Yankpaŋii

YANKPAŊII

Ki jiin Yankpaŋii gbouŋ na po

Gbouŋ na tee yaniie ki jɔɔ nan poo yin ki want baa loon leeb biaŋinba. Siab yaa jɔɔ nan poo na see Yennu nan u niib taar nie, ki leeb yaa li see Yiisa nan u weira taar nie. Baatusir ni, bi yi gbouŋ maŋe Sɔŋs.

¹Solomonn yaŋ nba na mantik man ki gar yanii kura.

Sinsinn yaŋ

Poo lomm yaŋ

²Mɔɔtir n tankpinn,1.2 Bi binbeŋ ni, bi din tee nna ki want lomm. kimaan a lomm man ki gar daama.

³A nubiru man ki tee nan bonnunubit nae;

ki a sann tee nan bi kpaar bonnunubit ki mɔɔn na.

Li ki tee birisuk kaa nan sapaamm na loona.

⁴Jiin min, ki tin chiar yaat;

ki a sii tee n kpanbar, ki jii kɔɔ nanin a diiuk ni,

ki ti saa taan ki mɔk parpeenn, ki nyu gboo ki lon leeb.

Li ki tee birisuk kaa nan sapaamm kur loona.

⁵Jerusalem poob, n bɔne, ŋaan mɔk fant,

n bɔnu tee nan Kedar niib lanbont

nba be kunkoouk paak biaŋinba nae,

ŋaan fan nan jinjɔnii nba be kpanbar Solomonn ŋaak ni na.

⁶Daa goriin yanni, kimaan yonnue bɔnn n gbanant na.

N naa waas wutoa bo doo n paake,

ki bi te ki n tuun bi tilontii kpaant ni toona.

N ji ki mɔk yaak nan man ŋamm n mɔŋi.

⁷N yɔɔk, betirin siaminba ki a saa saan nan a pei ki bin ŋman.

Lia nie ki bi saa saan ki foi yonsukenken ni?

Bee paake ki n sii lin loona pekpaarlei ni?

Jɔɔ lomm yaŋ

⁸Fin sapaan-ŋanchintiliŋ na,

a ki mi maa kpaar pei siaminba-a?

Ii saa kii waa pei na taaboot;

a lon siaminba ki a saa kpaar a buunii,

ki lii kpia pekpaarii lanbont na.

⁹N yɔɔk, a te jab niana nan tannaaŋ nba tuu te

Faaro taanjalona nba daar taantorit na nianɔ biaŋinba nae.

¹⁰A yut nba sɔɔn a kpianii ni,

ki sik a turu ni na fan nan tuliat nba ŋan nae.

¹¹Ti saa jii salimmɔna ki ŋmat nan salimpeena

ki ŋamm laamm ki tura.

Poo lomm yaŋ

¹²Kpanbar kar u kok-foouk paake,

ki n tulaarii na nubiru man ki yent leŋ.

¹³N yɔɔk na dɔɔ n biaa paake,

ki nubir nan bonnunubit nba ki bi yi mir na.

¹⁴N yɔɔk na tee nan tipuut nba be daan tiinii kpaant

nba be Engedi biaŋinba nae.

Jɔɔ lomm yaŋ

¹⁵N yɔɔk, a mantik fan bonchiann,

a ninbina na mantik nyirii ki mɔk lomm.

Poo lomm yaŋ

¹⁶N yɔɔk, a mantik ŋan bonchiann; a mantik maant n par.

Mɔmaata nae sii tee ti dɔɔnu,

¹⁷ki ti sii be kpekii nan naasei nyaka ni, ki li tee ti ŋaak.

¹N tee nan tipuuk nba be Saronn tiŋ ni nae,

ki bia tee nan tipuuk nba be baauk ni na.

Jɔɔ lomm yaŋ

²Tipuuk nba fan ki gar kunkonii biaŋinba na,

nnae ki n yɔɔk fan ki gar pooleeb.

Poo lomm yaŋ

³Tilontii nba ŋan ki gar tilei biaŋinba na,

nnae ki n yɔɔk fan ki gar jaleeb.

N loon ki mii kaar u maasu, ki u lɔɔna na-ii man n mɔb ni.

⁴U jiin ki baar nanin u jeet dindiboor,

ki chaan lomm fariŋ n yur paak.

⁵A jii tilɔɔnkoona ki lin turin paŋ,

ki bia turin tilɔɔnmɔna ki lin turin paŋ.

A niɔŋ te ki n baŋa.

⁶N yur kpaak n yɔɔk niigaŋe, ki u niidiitu barimin.

⁷Jerusalem poob, satir mɔb nanin.

Ii sat mɔb, piarɔ nan kɔɔk nba tiin bonchiann na sann ni

nan i kan te lomm n baar, ŋaan ki li yoo daa ki baari.

Yaŋ nba pukin munlee

Poo lomm yaŋ

⁸N gbat n yɔɔk kunkɔr.

U baat ki tiin jɔɔt ni, ki tiin kunkona paak, ki baat n boor.

⁹N yɔɔk tee nan kɔɔk koo pajak nba tee biaŋinba nae,

ki see kpia joonn ki got gaan takoru ni, ki gorii diiuk na ni.

¹⁰Ki n yɔɔk maŋ ji piak nanin.

Jɔɔ lomm yaŋ

N yɔɔk, ii saana.

N yɔɔk, baat ki tin tɔk saan.

¹¹Siɔk gara, saak nyik baanuwa;

¹²tipuuk yite tiŋ na ni.

Yoo nba na tee yanii yooe, ki ti gbia lanjerii mɔnii kpaant ni.

¹³Kinkana piin mɔnnuwa; ki wouŋ yent nan tipuuk nubiru.

N yɔɔk, ii saana. N yɔɔk, baat ki tin tɔk saan.

¹⁴A tee nan ŋmandajuuk nba bɔrii tanfiat ni biaŋinba nae.

Ŋaant ki man la a ningorsin nba ŋan na,

ki bia te ki n gbat a kunkɔr nba man na.

¹⁵Soot lunlona na ki turit, lunlona nba waar,

ki tee binba biir ti kpaant ni tilontii nba yinn puuk na.

Poo lomm yaŋ

¹⁶Mine yen n yɔɔk, ki u mun yenin.

N yɔɔk kpaar u pei titubira na ni.

¹⁷Ki li-i taŋi yentir ki bunbɔnn na n bot,

n yɔɔk, chiat ki jen n boor yian nan kɔɔk

koo pajak nba tuu tiin jɔgbaak paak biaŋinba na.

¹Ki n dɔɔ gado paak nyɔtunmunn,

ki kpaan daanɔ nba ki n par lakib u paak;

ki lin lommɔ ŋaan ki lau.

²N ji saa fiire ki lin doo ni, ki got li sɔnjot ni nan dai ni.

N saa kpaan daanɔ nba ki n par lakib u paak nae.

Ŋanne ki n lin kpaanɔ, ŋaan ki ki lau.

³Ki nyiɔk guuteeb tan lan, yoo nba ki bi lin gɔnt doo na na.

Ki n boib a, “I la n yɔɔk-ii?”

⁴Maa gar guuteeb na yoo nba, ki n ji la n yɔɔk.

Ki n kubɔ, ki ji kan ŋaan ki wun yaat,

see ki n tan jiiu ki saan nanɔ n naa ŋaak,

ki kɔɔ nanɔ diiuk nba ki bi din marin na ni.

⁵Jerusalem poob, satir mɔb nanin,

ii sat mɔb nan piarɔ koo kɔɔk nba tiin bonchiann na sann ni

nan i kan te lomm n baar, ŋaan ki li yoo daa ki baari.

Yaŋ nba pukin muntaa

Poo lomm yaŋ

⁶Wunba nyii kunkoouk po ki tee nan munyutootir,

ki puk tulaarii nan bonnunubit nba tee mir,

ki tee tulaarii nba kur ki kpinkpenta kɔi na tee ŋmee?

⁷Solomonn-e baat, ki kar u naan kok paak, ki bi jiiu,

ki Israel teeb kunkɔnkɔnjaana piinloob be u boor.

⁸Ki bi kur dia jukbanjai, ki mi kɔnn fanu.

Ki sɔɔ kur dia u jukbanjiak,

ki teen siir ki guu kpikpiruk nba tan saa mann baar nyiɔk.

⁹Kpanbar Solomonn din jii daŋant nba nyii Lebanonn-e,

ki ŋamm naan kok na.

¹⁰U din jii salimpeenae ki pɔr li dasenta,

ki pɔr li musura po nan salimmɔna,

ki jii chab mɔnwuwur nba ki Jerusalem poob nyar nan burchint na,

ki paan u kok na paak.

¹¹Sayɔnn poob, baat ki tan barii kpanbar Solomonn.

U yir naan fokirik nba ki u naa din yirimɔ, u pookɔɔnt daar nae,

ki li tee u parpeenn nan kpinkpammuk daar na.

Jɔɔ lomm yaŋ

¹N yɔɔk, a mantik fan bonchiann.

A ninbina nba ki saarik dɔɔk na nyirii nan lomm,

ki a yut na lian ki tee nan buunii nba tuu yab

ki nyi Gilead kunkonn paak ki siik biaŋinba na.

²A nyana peen nan baa tuu koor pei ki wurib biaŋinba na,

ki nan nyan-yenn na ki fokiti, ki li kur tɔɔ leer paak.

³A mɔgbana mɔne nan kpinkpamɔnn na.

Fi-i piak yoo nba, ki li mɔk fant.

A tankpina nba ki saarik dɔɔk nan nyiriie.

⁴A turu tee nan Defid difoouk nba ki bi maar ki li fan nae,

ki mɔk tuliat nba tee nan naagbankɔŋa tusire jɔɔn

ki lint li kur po na.

⁵A biaa na tee nan piarii banlee di tutubira ni na.

⁶N sii be bonnunubit nba ki bi yir mir na kunkonn paake,

ki li-i taŋi yentir ki bunbɔnn na n bot.

⁷N yɔɔk, a fan bonchiann, ki a siar po ki gbeen.

⁸N pooyookir, a lakin tɔk nanin, ki tin nyi Lebanonn kunkona ni,

a tɔk nyi nanin Lebanonn.

A nyi Amana kunkonn paak ki sik baar,

ki bia nyi Senir kunkonn nan Hermonn kunkonn paak,

ki li tee siaminba ki yanbɔra nan naamuut be na.

⁹N pooloŋir, n pooyookir, a ninbina nan tuliat

nba ki a lia na yent n dudukita.

¹⁰N pooloŋir, n pooyookir, a lomm na manin,

a lomm na ŋan gar daama,

a tulaarii na nubiru man ki gar bonnunubit nba bewa.

¹¹N yɔɔk, siat manu na be a mɔgbana paak;

a lamm na tee naabiin nan siate n boor.

A liant na nubir nan bonnunubit kur nba be Lebanonn nae.

¹²N pooloŋir, n pooyookir, a tee nan kpaab nba bɔr nae,

ki tee nan kpaab nba ki bi maa joonn ki lintir,

ki tee nan nyuntonn nba tee niyenɔkɔɔ yar na.

¹³Leŋe ki bonbuburit bintir,

ki kpaatir nan tilontii nba loon lɔɔnŋana,

nan bonnunubit nba kur be.

¹⁴Ki kadaak nan jangbadui nyɔr leŋ,

nan kamantos tiinii nan kinkakimana nan poru

nan bonnunubit booru kur nba be nyɔr leŋ,

ki bonnunubit nba tee mir nan alos

nan bonnunubit kur nba nubiru man be leŋ.

¹⁵Ki nyuntona maant kpaab na,

ki bunii nyun nyi Lebanonn kunkona ni

ki puub nan paŋ ki kɔɔ kpaab na ni.

Poo lomm yaŋ

¹⁶Niigaŋ po wouŋ, fiit.

Niidiitu po wouŋ, damin n kpaab paak,

ki te wamaasin n da nan nubiru nba man.

Ŋaant ki n yɔɔk n saan u kpaab ni ki saa di tilɔɔna nba man.

Jɔɔ lomm yaŋ

¹N pooloŋir, n pooyookir, n kɔɔ n kpaab niwa.

N pɔ n baarii nan bonnunubit nba tee mir nae;

n di siat nan sagbente; n nyu tilɔɔna daame nan naabiin.

Poob lomm yaŋ

N yɔɔsnba, ii di kii biaki nyu man nan yaa tan saa gboo.

Yaŋ nba pukin munna

Poo lomm yaŋ

²N dɔɔr gɔɔne, ki damii damiit,

ki li damiit ni ki n yɔɔk koon n tammɔb.

Jɔɔ lomm yaŋ

N yɔɔk, ŋaant man kɔɔ.

N pooloŋir, a tee nan ŋmann nae n boor.

Marin borik n yura, ki n yut borik nan sinsamiin.

Poo lomm yaŋ

³N dɔŋ yokita; bee paake ki n saa ŋamm yoo?

N wuur n taawa, bee paake ki n saa te ki lin ji jɔkin ni?

⁴N yɔɔk tun u nuu gann fɔnn niwa,

ki li maŋin nan waa nakinin na.

⁵Ki n bo teen siir nan man te ki wun kɔɔ.

Ki bonnunubit nba tee mir na pɔr n nii,

ki n niibira maan mir nyun, yoo nba ki n soor ganlootir na.

⁶Ki n loot gann na ki tur n yɔɔk, ŋaan sɔɔ ki u dɔŋ yaata.

Ki n lek loon man gbat u kunkɔr. Ki n lin lomɔ, ŋaan ki ki lau.

Ki n yiu, ŋaan ki ki gbat ki u toon.

⁷Ki nyiɔk guura na lin doo na ni ki tan lan, ki faan ki turin daŋ;

ki guura nba be doo na joonn boor na liat n gbakit foouk.

⁸Jerusalem poob, ii sat mɔb nanin nan li-i tee ki i la n yɔɔk na,

i saa betɔ nan u niɔŋ te ki n baŋa.

Poob lomm yaŋ

⁹Poo nba mantik fan ki gar poo kur na,

a yɔɔk na mɔk bɔkitu nan jaleeb nba be nawa-a?

Bia bonte be u ni, ki teen bakitnauŋ,

ki a loon ki tin sat mɔb nana ni?

Poo lomm yaŋ

¹⁰N yɔɔk na ŋan ki bia mɔk paŋ,

u be u kɔɔe, li-i tee ki a got niib tusaa piik ni.

¹¹U numpo tee nan kutmɔnt nae, ki ŋarii,

ki u yut ŋan ki bɔn nan naakpaabɔŋ na.

¹²Ki u ninbina fan nan ŋmana nba tuu be kpenu ni biaŋinba na,

ki tee nan ŋmana nba ki bi wurib naabiin, ki bi see kpia kpenu na.

¹³U kpianii na mɔk fant ki tee nan kpaab nba gbee nan kpinfaat

nan baarii na.

Ki u mɔgbana tee nan tipuuk nba ki bi gbar mir tulaar-nyun na.

¹⁴U nii na fan,

ki u pir banii nba ki bi tabin tanbinyinyira li paak na.

Ki u gbanant na tee nan loobnyana nba ŋarii biaŋinba na,

ki nyirii nan tanbinyinyira na.

¹⁵Ki u pana tee nan tann nba chaa, ki tee jaantarik,

ki bi sikinir salima toota ni na.

Ki u paŋ tee nan Lebanonn kunkona ni kpek-foot na.

¹⁶Ki u mɔgbana na mɔɔtu5.16 Bi binbeŋ ni, bi din tuu mɔɔtir mɔgbanae ki li want lomm. man; ki u gbanant kur po ŋan.

Jerusalem poob, n yɔɔk nba naan biaŋinbae na.

Poob lomm yaŋ

¹Poo nba mantik fan ki gar poob kur na, a yɔɔk na saan lee.

A betit sɔnu nba ki a yɔɔk na tɔkin,

ki lin te tin fit somma ki a kpaanɔ.

Poo lomm yaŋ

²N yɔɔk na saan u kpaab niŋa,

ki li tee siaminba ki tinunubit be na.

U kpaar u pei kpaab na nie, ki tikii puuk.

³Mine yen n yɔɔk, ki u mun yenin;

u kpaar u pei titubira na nie.

Yaŋ nba pukin munŋmu sp Jɔɔ lomm yaŋ

⁴N yɔɔk, a mantik fan nan Jerusalem nba fan biaŋinba nae;

ki bia fan nan Tirsa doo na, ki a fant na mantik teen yaarlituk.

⁵Fi-i goriin, a niɔŋ tuu kɔɔme ki dian.

A yut na liane ki tee nan buunii nba tuu yab,

ki nyi Gilead kunkona paak ki siik biaŋinba na.

⁶A nyana na peen, ki tee nan peburuŋ nba ki bi daa wurib nae;

ki nan nyan-yenn na ki fokiti, ki li kur tɔɔ leer paak.

⁷A tankpina nba ki saarik dɔɔk na nyiriie.

⁸Kpanbar-i lekii mɔk poosaakab piinloob nan poobis piinniin,

nan sapaamm nba kaa kanni,

⁹ŋaan fin kɔɔe ki n loon, ki a mantik ŋan ki tee nan ŋmann na.

Fine tee a naa bonpoyemmir, ki tee a naa bilonkak.

Ki poob kur goriia ki piaka;

ki poosaakab nan poobis yiin yanii ki kpakitira.

¹⁰Ŋmee na, ki tan nyirii nan sanyiɔk na?

U mantik fan, ki yeen, ki tee nan yonnu,

koo ŋmaarik nba tuu nyɔkit biaŋinba na.

¹¹N nyii tilontii boore ki sik maa n got tibis nba be baauk ni na,

ki bia got fapaant nba be daan tilontii paak na,

ki bia got tipuut nba be tilontlia paak na.

¹²Fine te ki a niɔŋ kɔɔn,

ki n jekir nan taantoruk ŋmakit-tɔɔ nba teen siir nan tɔb na.

Poob lomm yaŋ

¹³Waan waak, Sulam sapaamɔ,

ŋaant ki tii goriia, faa waa waak na.

Poo lomm yaŋ

Bee paake ki i loon mii waa waak niib sinsuuk ni, ki yii goriimi?

Jɔɔ lomm yaŋ

¹Sapaamɔ, a fant mantik paaka.

A taa na fan nan taasaat halii.

A pana fan nan tanbinyinyira nba ki gbanjabirɔ tuu jab

ki li fan biaŋinba nae.

²A wurik tee nan bobir nba yɔɔ gbee nan damanin na,

ki jekpekir be leŋ, ki tipuuk lintira.

³A biaa na naan nan pajaat nba nae,

ki bia naan nan kɔi banlee-e na.

⁴A turu na tee nan baa tuu jii loobnyana ki maa difoouk nae.

A ninbina na tee nan nyuntona nba be Hesbonn doo ni,

ki kpia digbangbeŋir maŋ tammɔkɔɔkir nae.

A miana na mɔk ninbarisin,

ki fan nan Lebanonn difoouk nba tor Damaskus po na.

⁵A yur goone nan Kamel kunkonn na.

A yupiankar nyiriie nan chinchennyinyir na,

ki li fant saa fit kɔɔn kpanbar niɔŋ.

⁶A mɔk fant, ki ŋan bonchiann, ki gbee nan lomm.

⁷Ki a gbanant ŋan ki tee nan kpinkparik na,

ki a biaa na fan nan kpinkpamɔna na.

⁸N saa do kpinkparike, ki pɔɔr li lɔɔna.

Min yaa boor, a biaa na tee nan daan tilɔɔnsɔkita nae,

ki a foon nubiru man nan saana na.

⁹Ki a mɔb tee nan damanin na.

Poo lomm yaŋ

A ji te ki daan na n saan n yɔɔk boor sinsonn,

kii gaar u mɔgbana nan nyana paak.

¹⁰N yɔɔke yenin ki nianin.

¹¹N yɔɔk, baat, ki tin nyi doo kpiŋ,

ki saa dɔɔr digbanbis na ni nyiɔk na.

¹²Ti tan saa dɔŋ fiire ki got daan tilontii na,

ki laan bi piin kpaatuwa-a? ki got laan tipuuk na pɔbitiri-i?

ki bia laan tilontlia na mɔk puuku-u?

Leŋe ki n saa tura n lomm.

¹³Ki a saa gbat manfoor tiik na nubiru,

nan tilɔɔna nba kur nubiru man ki li kpia ti tammɔb na.

N yɔɔk, n bir bonmankpera nan bonmanpaana, ki guuna.

¹N sunman ki a bo tee n naa bik nba mɔɔr n naa biime,

ki mi-i cheta sɔnjouk ni, ki n saa fit mɔɔt a tankpinn,8.1 Bi binbeŋ ni, bi din tuu mɔɔtir leeb tankpinn nae ki li want lomm.

ki sɔɔ baka sii kaa li po.

²N saa jiia, ki saan nana n naa ŋaak,

ki li sii tee siaminba ki a saa tumiin lomm.

N saa tura damanin nba ki n jii tilɔɔna nyun ki ŋaa na ki a nyu.

³N yur kpaak a niigaŋ paake, ŋaan ki a niidiitu barimin.

⁴Jerusalem poob, satir mɔb nanin nan i kan te lomm n baar,

ŋaan ki li yoo daa ki baari.

Yaŋ nba pukin munloob

Poob lomm yaŋ

⁵Ŋma poe nyii kunkoouk po, ki lɔn u yɔɔk nii ki baat na?

Poo lomm yaŋ

N fiina, tilontik na nyakire, siaminba ki bi din mara na.

⁶A daa jikit a par ki teen sɔɔ, see min kuukɔɔ;

a daa lor sɔɔ see min kuukɔɔ.

Lomm mantik paar ki tee nan kuun nae;

ki niɔŋ mɔk paŋ ki tee nan kuun mɔŋ nba tee biaŋinba na.

Li tuu tan yit ki tee muyeruko,

ki di nan muu nba tuu yabit ki di biaŋinba na.

⁷Ki nyun ki fit kpeent, nyunmɔnn ki be ki saa fit kpeeniri.

Ŋaan li-i tee ki sɔɔ koor a wun daa lomm nan u mɔkinti,

li joontu tan sii tee feie ki u saa la.

Poo maŋ ninjamm yaŋ

⁸Ti waarɔ be, ki tee sapaanbik, ki u biaa daa waar.

Ti saa teenɔ nlee, li-i tee ki naasinbik baat ki daakɔ?

⁹Ti waarɔ na-i bonni tee dikpinn,

ti bo saa maa salimpeena difoouko u paak.

Ki u bonni biaki tee gann, ti bo saa chaan kpek taabiie ki kɔrɔ.

Poo lomm yaŋ

¹⁰N tee dikpinne, ki n biaa na tee li ditɔɔtii.

N yɔɔk mi nan mi-i be u boor, n tuu mɔk parmaasire.

Jɔɔ lomm yaŋ

¹¹Solomonn mɔk sarwaauk siaminba ki bi yi Baal Hamonn na ni.

Kpaara be leŋ maŋ, ki u jikit u sarwaauk na ki teemm,

ŋaan gaan salimpeenbina tusir tusir.

¹²Ki Solomonn tuu gaar salimpeenbina tusire,

ki kpaara na mun tuu biar nan salimpeenbina kobii ŋanlee-lee,

ki li tee bi tora; ki n baka kaa. N mɔk n tiɔŋ sarwaauko.

¹³N yɔɔk, a te man gbat a kunkɔr kpaab na ni;

n kɔɔnanleeb na guua, a fan pak.

Poo lomm yaŋ

¹⁴N yɔɔk, baat n boor; a tee nan kɔɔk

koo pajak nba tuu be kunkona nba ki bonnunubit be leŋ nae.