Yaŋ

YAŊ

Ki jiin Yaŋ gbouŋ na po

Gbouŋ na ni mɔk yanii nba ki a sii fit yiin, koo ki piak ki mei Yennu. Yanii maŋ bonchiann, Defid-e din yin. Yaŋ gbouŋ na bɔkit paabu munŋmue: Gbouŋ yenn, nan gbouŋ ŋanlee, nan gbouŋ ŋantaa, nan gbouŋ ŋanna, nan gbouŋ ŋanŋmu. Baatusir ni, bi yi gbouŋ maŋe Saams.

GBOUŊ YENN

(Yanii 1 -- 41)

Barmɔnii parmaasir

¹Daansiab nba ki gaan biit damm maan

ki bia ki tokii bi binbeŋ,

koo ki ki tɔkii nan binba yaa Yennu kaa na,

parmaasir tee bi yare.

²Bi parmaasir nyi baa saak Yennu sennu na niŋe,

kimaan bi dukii sennu maŋ poe yoo kur.

³Li nibooru tee nan tiik nba see kpengbiɔŋ nae,

kimaan u lomm yoo-i baar, u tuu lone,

u tituut bia ki siiri.

Bi toona kur saa fanue.

⁴Ŋaan li ki tee nna kaa biit damm boori.

Biit damm ŋarin tee nan fouŋ nae,

ki wouŋ tuu da ki piar yaatir.

⁵Yennu tan saa biir biit damm,

ki ŋamm nan Yennu niib kan lakin taan benu.

⁶Yennu-e ŋmakitir niŋamm na ki nyintib bonbiir ni,

ŋaan nibiit na ŋarin kpan tɔk bi biiru sɔnue.

Ki jiin kpanbar nba ki Yennu gannɔ na po

¹Bee ki niib lorin mɔyêtuk lora?

²Bee ki niib lorin lora nba kaa nyɔɔti?

Ki bi kpanbara nan bi yudamm lorin lorbiit

ki jiin Yennu nan daanɔ nba ki u gannɔ na po,

³ki yeen a, “Ŋaant tin nyinn ti mɔŋ bi nuu ni.

Ti nyinn ti mɔŋ bi yent ni.”

⁴Yennu kar u naan binbintir paak yendɔuŋ ni,

ŋaan laab nan bi lorkpeena maŋ.

⁵U dia wutoore ki teemm kpaanii,

ki jii parbiir ki jek bi gbanu.

⁶U yet a, “N kasii kunkonn Sayɔnn paake2.6 Sayɔnn din tee Jerusalem bɔkire. ki n dinn n kpanbar.”

⁷Ŋanne ki kpanbar na yet a, “N saa mɔɔnt linba ki Yennu pake.

U pakin a, ‘Fine tee n bija, ki dinnae ki n teen a baa.

⁸Boimin ki man tura digbana na kur,

tingbouŋ na kur sii tee a yare.

⁹A saa jii kutgbianue ki yeerib,

ki but butib nan boba na.’ ”

¹⁰Gbiintir man, yimm kpanbara,

jiin linba na ki tumii yan man,

yimm tingbouŋ na kpanbara:

¹¹Ii jiantir Yennu nan jaŋmaanii,

¹²ki gbaan jiantɔ nan gbananjekiruk.

Nna-i kaa, u wutoor saa doe yiama ki yin kpo.

Parmaasir be daansiab nba baat Yennu boor

a wun nyinnib ninbɔŋ ni na paak.

Sanyiɔk ni Yenmiaru ki jiin sommir po

¹Yennu, n mɔk datai bonchiann,

binba kɔn nanin yab halii.

²Bi piak n po ki yeen a, “Yennu kan sommɔ.”

³Ŋaan Yennu, fine tee n sommtɔɔ, ninbɔŋ kur ni,

fine teenin nyannu nan parcheenn.

⁴N yi Yennu-e ki loon sommir,

ki u be u kasii kunkonn paak, ŋaan teenin gatu.

⁵N tuu dɔɔ nyiɔk ki gɔɔnt, ŋaan ki Yennu guume.

⁶N ki jee n datai tusaa tusaa nba kook lintin na.

⁷Yennu, baat. Tintin, n Yomdaanɔ. Dint n datai na biak,

ki te ki bi daa mɔk paŋ nba saa paanin daŋi.

⁸Nyannu nyi Yennu boor nie.

Wun teen piisin u niib paak.

Daajoouk Yenmiaru ki jiin sommir po

¹Yennu, fin nba tee n fat-tɔɔ,

turimin gatu yoo nba ki n fabin tura.

Maa bo be daamii ni, fine bo sommin.

Ii tee burchimɔ n boor mɔtana, ki gbiint n miaru.

²Yimm niib na, taar munŋaae ki i sii dintin fei?

Taar munŋaae ki i sii loon linba kaa nyɔɔti,

ki bia waa linba ki tee barmɔnii?

³Bant nan Yennu gann niŋamm nae ki teemm u yab.

U gbiintir n fabinii, yoo nba ki n yiinɔ.

⁴Ii jekir nan yanputuk ki nyik toonbiit man.

Ii tuu kii dɔɔ i dɔɔnii paak soon nna,

yin dukin linba na fanuwa.

⁵Mant maruŋ nba took ki tur Yennu,

ŋaan teenɔ yada.

⁶Niib bonchiann fabin ki yeen a,

“Yennu, teent piisin ti paak.

Ii mɔk ninbatinu nan timm.”

⁷Ŋaan faa turin parpeenn nba na chee bi dii

nan bi tilɔɔna daan nba saa turib linba.

⁸Mi-i dɔɔr, n tuu gɔɔn n yamanie,

kimaan fin Yennu kɔɔe guun ki dian fanu.

Yenmiaru nba saa gɔɔr bonbiir

¹Gbiintir n mɔmaan ki gbat n duna,

²gbiintir n mɔnii ki sommin,

fin nba tee n Yennu nan n kpanbar.

N meia, Yennu.

³Fine gbia n kunkɔr sanyiɔk ni,

ki yondoor ki n tuu fabin nana, ŋaan ji guu a gatu.

⁴A tee Yennu nba ki loon biite.

A ki saak biit a boor ni.

⁵A poŋ ki loon fan la dont-n-mɔŋ damm.

A ki loon binba tee nɔɔntont damm na maami.

⁶A tuu biir faak damm nae,

ki bia yisin kpikpiruk nan kpinkpannii damm.

⁷Ŋaan a yaa lonchiɔŋ paak ki n fit baat a boor.

N fit jiantira, a kasii ŋasaakak ni,

ki bia gbaant a tɔɔnn ki teena baakir.

⁸Yennu, n datai yab bonchiann.

Sommitin ki man tun a loomm.

Ŋammit a sɔnu fanu ki man tɔkin.

⁹N datai nba piak linba kur ki tee barmɔnii.

Ŋamm kpan loon bin biire.

Bi mɔmaan kur mariie,

ŋaan ki bi para gbee nan faak nan kpinkpannii.

¹⁰Yennu, datir bi tuba ki biirib.

Ŋaant ki bi tiɔŋ lorbiit na n biirib.

Berimm a boor ni, kimaan bi toonbiit kaa bannu,

nan bi mɔyêtuk nba ki bi mɔk ki jiin a po na paak.

¹¹Ŋaan binba kur teena yada na be nan parpeenn,

ki saa fit yin parpeenn yanii.

Ii guu daansiab nba loona na,

kimaan a paake ki bi mɔk parpeenn.

¹²Yennu, a teen daansiab nba saak a mɔb nae piisin,

ki a lomm tee nan naagbankɔŋir na ki nyintib daŋ ni.

Yenmiaru nba jiin sommir po

¹Yennu, daa jikit wutoor ki yakii nanimi.

Daa jikit wutoor ki daar n tubiri.

²Yennu, ii mɔk ninbatinu n paak, kimaan n ki mɔk paŋi.

Turimin paŋ, kimaan n bak bonchiann,

³ki n binbeŋ kur gbee nan daamii.

A saa taantir n sommir po nlee?

⁴Yennu, baat ki tan tinnin,

jiin a ninbatinu na ki nyinnin kuun ni.

⁵Sɔɔ ki tian a po kpeentiŋi,

Ŋmee saa jianta kpeentiŋi?

⁶N bak nan parbiira,

nyiɔk kur, n dindɔɔnu tuu pɔɔk ninnyuut nie.

N ninnyuut tuu borik n yukpakitire.

⁷N ninbina mɔr piina, ki n ji ki nyɔɔni,

kimaan n datai nba te ki n mɔ na paak.

⁸Seetir n boor ni man, yimm biit damm na,

kimaan Yennu gbia n mɔŋ.

⁹U gbiin n bubuuk ki jiin sommir po,

ki saa gat n miaruwa.

¹⁰Fei saa di n datai, ki bi mɔi n toŋ bonchiann,

kimaan Yennu nba saa nyannib na paak.

Bi saa ŋmat nan feie.

Yenmiaru nba jiin fatu po

¹N Yomdaanɔ Yennu, n baar a boor a fii nyintin bonbiir nie;

a nyinnin binba waa beerin na nuu ni.

²Nna-i kaa, bi saa bibin nan yanbɔr nae,

ki saan nanin siaminba ki sɔɔ kaa ki saa gaarin,

leŋewa ki bi saa pat n gbanant yɔni yɔni.

^3-4N Yomdaanɔ Yennu, li-i tee ki n tun ki biir sɔɔ,

li-i tee ki n nyii n yɔsiak poor,

koo ki n ki mɔk ninbatinu nan daansɔɔ nba biirin,

li-i tee ki n tun linba na yenn,

⁵fan ŋaan ki n datai maŋ n wein ki soorin;

ŋaant bin nyannin ki kpin, ki n gbanant-ii dɔɔ

ki daa mɔk manfoori.

⁶Yennu, fiit nan wutoor,

setir a taajaa paak, ki took n datai bi wutoor ni,

ki sommin, kimaan a tee wunba waa barmɔnii sɔnue.

⁷Tikit niib na kur a boor ni, kii diab.

⁸Yennu, fine tee nisaarii kur barbuurɔ,

a bu ki sommin; a mi nan n ki mɔk biiti.

⁹A tee popeenn Yennu-e,

ki bu ti para ni nan ti dudukit ni buut.

Potir nɔɔntont damm binbeŋ na,

ŋaan tur niŋamm na nyɔɔt.

¹⁰Yennu-e nyintin ninbɔŋ ni,

u tint daansiab nba saak u mɔb.

¹¹Yennu tee popeenn barbuurɔe; u tuu biir nibiit nae.

¹²Bi-i kii lebit bi binbeŋ, Yennu saa ŋat u jukbanjiak nae.

U daar u tɔrbanne ki tee siir.

¹³U jikit u jatiat nba kpi kuun nae;

u yekit u peenii nba mɔk muu nae.

¹⁴Gotir nibiit na nba dukii biit po,

bi lorin kpikpiruko ki dukii kpinkpannii.

¹⁵Ŋaan baa pii barit nba na, bi mɔŋe bia siik leŋ.

¹⁶Bi tubdatu nyi bi tiɔŋ toonbiit nie;

bi danii nyi bi tiɔŋ kpikpiruk nie.

¹⁷N teen Yennu niipoouk, u ŋamm paak.

N yiin yaŋ ki dont Yennu, wunba tee Yabint Daanɔ na.

Ki jiin Yennu nan nisaarik po

¹Yennu, fin nba tee ti Yomdaanɔ na,

tingbouŋ na munn laat a yabint nba tee biaŋinba.

A dontir do ki baat sanpagbant.

²Ki waas nan sanpantii yiinir yaŋ.

A biir a dataiwa, ki tuu ber binba biira na,

ki bin nyik a biiru.

³Maa tuu got sanpaak nba ki a nan na, nan ŋmaarik,

nan ŋmaabira nba ki a teemm bi binbeboor na,

⁴nisaarik tee bee ki a baka be u po,

nisaarik mun ki a gbiin u po?

⁵A din te ki u pɔ waan malakanba boor,

ki bia te ki u la dontir nan paku.

⁶Fine gannɔ a wuu gorii tingbouŋ na ni bonfoa

nba ki a nan kur, ki teenɔ bonnaŋir kur yudaanɔ.

⁷Ŋanne tee nei nan pei nan muuk ni bonkobit

⁸nan nɔɔnii nan janii nan nyun ni bonfoa kur.

⁹Yennu, fin nba tee ti Yomdaanɔ na,

tingbouŋ na munn laat a yabint nba tee biaŋinba.

Ki jiin niipoturu po

¹Yennu, n saa donta nan n par kur.

N saa pak wann bakitnauŋ toona nba kur ki a tun.

²N Yabint Yennu, n sii yiin nan parpeenne kimaan a paak,

n sii yiine ki dontira.

³Fi-i lekit, n datai tuu ŋmat poore; bi tuu baa tiŋ nie ki kpo.

⁴A ŋan ki bia waa mɔnii a buut ni, ki bu fanu ki taa n po.

⁵A biir yanbɔndamm nan nɔɔntont damm nawa.

Sɔɔ kan mi tiar bi po.

⁶Ti datai boonte fas fas.

A biir bi digbana, ki ti tamm bi powa.

⁷Ŋaan Yennu-e tee kpanbar yoo kur,

u maa u naan binbintir a wuu bu buut.

⁸U dia tingbouŋ na nan popeenne,

ki bu niib buut nan li sɔnu.

⁹Yennu-e tee binba di biak na sindandiiuk.

U boore tee gungurboor ninmɔnn yoo.

¹⁰Yennu, binba mia na saa teena yadawa,

a ki yêen wunba baar a boori.

¹¹Yinin dontir yaŋ ki dont Yennu,

wunba tee kpanbar ki be Sayɔnn digbanjaann ni na,

pakin wann sɔɔ kur waa tun linba.

¹²Yennu tian daansiab nba be fara niŋ na po,

u ki tammit bi mɔnii po, u daar binba dintib biak na tuba.

¹³Yennu, ii mɔk ninbatinu nanin,

gotir n datai nba kɔɔnin biak nba ni na.

Yennu, nyintin kuun ni,

¹⁴ki man fit set a niib boor Jerusalem,

ki wannib linba paak ki n dontira na.

N sii kpamme, kimaan a tinnima.

¹⁵Binba ki jiantira na gbiir bootite, ki bia ŋmat baa leŋ;

bi tiɔŋ baruko soorib.

¹⁶Yennu kasii buut niŋe ki u fiit u mɔŋ ki wann.

Ŋaan biit damm na tuu baa bi tiɔŋ toona nie.

¹⁷Biit damm nan binba ki mi Yennu na ŋarin,

kuume tee bi joontu.

¹⁸Yennu kan tamm talas damm po,

ki nandamm dindann mun kan teen yanni.

¹⁹Baat, Yennu, daa te ki nisaarii nyanti.

Baat nan binba ki mia na a boor ki tan bu bi buut.

²⁰Ŋaant ki bin tin jaŋmaanii.

Ŋaant ki bin bann nan bi tee niibe ki tan saa kpowa.

Yenmiaru nba jiin fatu po

¹Yennu, bee ki a fɔk nant nna?

Bee ki a tuu bɔr a mɔŋ yoo nba ki ti be mabir ni?

²Biit damm na mɔk yuwannue ki dint tatimm biak;

sootib bi barit nba ki bi bar na ni.

³Biit daanɔ want u mɔŋe, u yanbɔnlor na ni;

bonlonbiiuk daanɔ poor Yennu mɔporae ki yêenɔ.

⁴Biit daanɔ baka kaa Yennu po.

U yuwannu ni, u dukii nan Yennu ki kpaa talasi.

⁵Biit daanɔ bona kur saa fanue.

U ki bant Yennu buut nba tee biaŋinba;

U laa u dataie.

⁶U tuu pak ki tur u mɔŋ a,

“N kan mi ki baa, n kan mi kɔɔ mabir ni.”

⁷U mɔmaan tee mɔtont nan faak nan jaŋmaankɔɔntuk kɔɔe.

U kakii nan naŋ nan biit maan paku halii. ⁸U tuu bɔr digbanbis nie

ki guu a wun kpi niib nba ki mɔk biit na.

U tuu chakin binba ki mɔk sommteeb nae.

⁹U tuu dɔɔ u bɔr niŋ nan yanbɔr nae.

U dɔɔe ki guu tatimm na, ki u baruk tuu tan soorib,

ki wun jiib ki yaat namm.

¹⁰Niib nba kaa sommteeb na, u faabe bir tiŋ ni;

u jii u panjatuk nae ki nyann talas damm na.

¹¹Biit damm yeen a, “Yennu baka kaa,

u mun u ninbinawa, u kan mi lati.”

¹²Yennu, datir biit damm na tuba.

Tiat tatimm na po.

¹³Li saa teen nlee ki biit daanɔ n yisin Yennu,

ki pak tur u mɔŋ a, “U kan dat n tubiri.”

¹⁴Ŋaan a laat, a chakin mabir nan biak kure,

ki teen siir nan fan somm.

Talas daanɔ jikit u mɔŋ ki teenae.

A yɔɔ sommit fara damme.

¹⁵A biir biit damm nan nɔɔntont damm paŋ na,

datir bi tuba, baa tun biit na paak,

halii nan baa tan saa nyik biit tumu.

¹⁶Yennu-e sii tun tee kpanbar,

binba jiantir tingbana na saa bot u tiŋ ni.

¹⁷Yennu, a saa gbiint binba sikint bi mɔŋ na miaruwa.

A saa turib parcheenna.

¹⁸A saa gbiint kpeebii nan binba be mabir ni na mɔniiwa.

A saa bu ki sommiba, ki nisaarii nba baat nan kpikpiruk na

ji kan baar nan kpikpiruku.

Dindann nba be Yennu ni

¹N maa Yennu paake, ki u nyintin mukir ni.

I tee jatite ki piak teenin a, “Yukit nan nɔɔŋ na ki do jɔjaana,

²kimaan biit damm jii bi tɔrbana ki be bunbɔnn ni

ki tekin peenii a bin yek niŋamm na.

³Li-i tee ki bonsiar kur biir, niŋanɔ saa tee nlee?”

⁴Yennu be u kasii jiantu ŋasaakak ni.

U naangbouŋ be yendɔuŋ ni, ki u gorii niib siar kur po,

ki mi linba kur ki niib tuun.

⁵U bikii niŋamm nan biitdamm kure.

U ki loon tubkangbata damm na.

⁶U sikint mupeenu nan sarwuuta nitont paak.

U daar bi tuba nan wartouŋ nba koot bona nae.

⁷Yennu tee kasiie ki loon toonŋana.

Binba tuun toonŋana sii tun be Yennu tɔɔnne.

Yenmiaru nba jiin sommir po

¹Yennu, sommitit. Niŋanɔ nan yenɔkɔɔwa ki biari,

a ji kan la nimɔnɔ kɔtaa.

²Bi kur fa faie ki teen bi leeb, bi dia mɔmante ki kparin bi leeb.

³Yennu, a te bin ŋmin bi fai mɔi maŋ.

Mubint bi dont-n-mɔŋ mɔi nba yeen a,

⁴“Ti tuu jii ti mɔbonae ki la linba ki ti loon.

Ti sii piak ti yanbɔɔte, ŋaan sɔɔ kaa ki saa te ki tin ŋmini.”

⁵Ŋaan Yennu yeen a, “N saa baar mɔtana,

kimaan talas damm di biake,

ki binba be mabir ni na kurii nan gbananyekitir.

N saa turib yandɔɔnn binbeŋ nba ki bi tuu daan nawa.”

⁶Yennu mɔsonae ŋan ki tin teenir yada,

kimaan li tee nan lik-kut nba ki bi purir saauk muu ni

taar munlore nae.

^7-8Nitont be siar kur po, sɔɔ kur dont linba tee bonbiire.

Yennu, ii diat fanu, ki nyinnit li nibooru nuu ni.

Yenmiaru nba jiin sommir po

¹Yennu, a saa tamm n po ki lin wei nlee?

Yoo kur amii?

Taar munŋaae ki a saa lek a numm ŋaan nyikimi?

²N sii be mabir ni ki lin wei nlee?

Parbiir saa gbee n par ni yonnu nan nyiɔk ki lin wei nlee?

N datai saa nyannin ki lin wei nlee?

³N Yomdaanɔ Yennu, gotirin ki turin gatu.

Turimin paŋ ki daa te ki n kpenni.

⁴Daa te ki n datai yeen a, “Ti nyannɔwa.”

Daa te ki bi kpamm n baak paaki.

⁵N gaa a lomm nba tun ki be na paake.

N sii kpamme, kimaan a saa nyinnin biit niwa.

⁶N saa yin yaŋ ki tura, kimaan a ŋan ki turin.

Ki jiin nisaarii nɔɔntont po

(Yaŋ 53)

¹Jatit dukii bi para ni a, “Yennu kaa.”

Bi kur tee niyoonae ki tun bonbilankanta,

sɔɔ kaa ki tuun linba tooki.

²Yennu be sanpaapo ŋaan gorii nisaarii

a wun laan siab be ki sub ki bia jiantirɔ.

³Ŋaan bi kur tun ki kpeta; bi kur tee nibiite, jinjan-youŋ.

Sɔɔ kaa ki tuun linba ŋan, nan yenɔkɔɔwa.

⁴Yennu boi a, “Bi ki mi-ii?”

Toonbiit damm maŋ ki mi-ii?

Bi di n niib nan nirɔ nba tuu di jeet na,

ki bia ki meimi.

⁵Ŋaan bi yan saa puta;

kimaan Yennu be nan binba saak u mɔb na.

⁶Toonbiit damm na kut labin sikin-n-mɔŋ daanɔ lorae,

ŋaan Yennu-e tee u fat-tɔɔ.

⁷N mei Yennu-e a nyannu n nyi Sayɔnn

ki baar u niib Israel teeb paak.

Yoo nba ki Yennu saa te ki Israel teeb na n mɔkit na,

bi tan sii mɔk parpeenn bonchiann.

Ki jiin Yennu nba loon linba po

¹Yennu, ŋmee saa fit kɔɔ a jiantu ŋasaakak ni?

Ŋmee saa fit jianta, a kasii kunkonn Sayɔnn na paaki?

²See nirɔ nba saak fin Yennu mɔb,

ki bia yɔɔ tuun linba took,

wunba mɔbona tee barmɔnii, ki faak kaa leŋ;

³Wunba ki gbii tiŋ u leeb paak.

U ki tuun biit ki teen u leebi, u bia ki gbiin biya.

⁴U yisin binba ki Yennu yêemm nae;

ŋaan baakit binba saak Yennu mɔb na.

Wuu senn mɔsonn, u tuu tume, li pann-i lekii jan biaŋinba.

⁵Wuu kpent bont ki tur nirɔ, u ki boi nyɔɔt po.

U ki saak ki bi nyar u mɔb ki u piak ki biir wunba mɔk mɔnii.

Wunba tuun linba na kur, u sii yɔɔ be fanue.

Ki jiin pardɔɔnn Yenmiaru po

¹Yennu, nyintin ninbɔŋ ni;

n dindann be a nie ki jiin sommir po.

²N yet Yennu a, “Fine tee n Yomdaanɔ,

bonŋana nba kur ki n mɔk, li nyii a boore.”

³Yennu niib nba teenɔ yada na, ŋamme be fanu.

N parmaasir kur tee mii be bi boore.

⁴Binba tiin ki saa tingbana boor na baat nan mabire bi mɔŋ paak.

N kan pukin bi maruŋ ni, n kan jiant bi tingbana maŋi.

⁵Yennu, n mɔk fin kuukɔɔe, fine teenin maa loon linba kur.

N tɔɔnn po benu kur be a nuu nie.

⁶A piinii nba ki a pin kur mɔk bakitnauŋ; a piinii kur ŋane.

⁷N dont Yennu, kimaan u ŋmakitirin.

Ki nyiɔk n dudukit teenin kpaanii.

⁸Yoo kur n tian Yennu benu po;

u naakin, ki siar kaa ki saa daamimi.

⁹Li paak, n mɔk parpeenn ki teenɔ niipoouk,

n mi nan n see chinchin,

¹⁰kimaan fine nyintin kuun paŋ ni;

a kan te ki a kasii nirɔ gbanant n bat,

koo wun nyint kpeentiŋi.

¹¹A saa wannin sɔnu nba saa manfoor niŋa.

A benu teenin kpinkpammuk bonchiann,

ki baat nan parmann n boor yoo kur.

Ki jiin niŋanɔ Yenmiaru po

¹Yennu, gbiintir maa fabin fabinii nba ki jiin buut

nba ŋan po na.

Gbatir mɔnii nba ki n mɔ ki loon sommir na.

Gbiintir n miarmɔnu na.

²A saa bu ki sommima, kimaan a mi linba took.

³A mi n dudukit, faa baar n boor nyiɔk,

a bikinin fanue ki ki la yanbɔndudukit n ni.

⁴N ki piak biit nan leeb nba piak biaŋinba na.

N sak a maame ki yêt min wei kpikpiruk sɔnii.

⁵N yɔɔ tɔk a sɔnue; n ki mi kpat nyii kpiŋi.

⁶Yennu, n meia, kimaan a teenin gatu,

li paak, gbiintir n mɔbona.

⁷Wantin a bakitnauŋ lomm na ki tinnin.

Li-i tee ki n be a boor, n nyii n datai nuu niwa.

⁸Ii guun nan faa saa guur a tiɔŋ ninbinn biaŋinba na.

Jiimin ki gurin a boouk ni,

⁹ki nitont na daa fit teen siari.

Databiit na kaan lintima.

¹⁰Bi ki tiin ninbaauku, ŋaan piak ki dont bi mɔŋ.

¹¹Bi ŋaa lintima, mi-i ŋmant siar kur po, bi bee,

ki loon yaak bin dat sikinin.

¹²Bi tee nan yanbɔra nae ki guun;

ki loon bin chat-chatin.

¹³Yennu, baat, tookit n datai ki nyannib.

Jiin a jukbanjiak ki fatin tondamm nuu ni.

¹⁴Nyintin binba mɔk linba kur ki bi loon na nuu ni.

Datir bi tuba nan biak nba ki a bir guumm na.

A ŋaan ki lii yaba ki baar bi waas nan bi yaaboona.

¹⁵Ŋaan n saa la fin Yennu-wa, kimaan n ki tun biit nan waama;

ki mi-i gɔɔn tan yerik, a benu tuu turin kpinkpammuk bonchiann.

Yaŋ nba jiin nyannu po

¹Yennu, n loona bonchiann, fine tee wunba kɔn n paak.

²Yennu-e tee n guutɔɔ, ŋɔɔ tee n digbanpaarir,

ki mi-i be u boor, n be n yamaniŋe.

U guun nan naagbankɔŋir nae,

ki kɔn n paak, ki dian fanu.

³N tuu yiin Yennu-e ki wun tinnin ki nyinnin n datai nuu ni.

Pakin Yennu man.

⁴Kuun daŋ kaane ki lintin,

ki biiru yuuk ki gaar n paak nan nyunpana na.

⁵Kuun daŋ kaane ki lintin; ki kaauk pii u baruk ki guun.

⁶Maa be mabir ni, n yiin Yennu-e.

N yiin Yennu ki loon sommir,

ki u be u ŋasaakak ni, ŋaan gbat n kunkɔr,

ki gbiint n mɔŋ nba ki n mɔ ki loon sommir na.

⁷Ŋanne ki tingbouŋ damm ki nik, ki jɔjaana fiaka bekint ki jekir;

kimaan Yennu wutoor doowa.

⁸Ki munyuut nyii u manbonii ni,

ki mupeenu nan musankɔɔna nyii u mɔb ni.

⁹Ŋanne ki u pat sanpagbouŋ ki nyii sik;

ki sanpagbounbɔŋ be u taa po.

¹⁰Ki u kar u bonfoa nba mɔk kpinkpant18.10 Bi maan ni, bi yib “cherubim.” Bi nyii Yennu boore. paak ki bi yukir,

ki wouŋ saa nanɔ.

¹¹U jii bunbɔnne ki dɔkin u mɔŋ,

ki sanpagboun-gbakisir nba gbee nan nyun na

kaan lint u munn po.

¹²Ki sakaana nan mukpana nyii sanyikintii ni,

u tɔɔnn po, ki baar tan bɔkit sanpagbouŋ na ki gar.

¹³Ŋanne Yennu tian; ki sɔɔ kur gbat Yabint daanɔ Yennu kunkɔr;

¹⁴ki u yek u peenii ki yat u datai.

U jii sanyikintiie ki weib, ki bi chiar.

¹⁵Yennu, yoo nba ki a gaar jat a datai paak,

ki yakii namm nan wutoor na,

ŋanne ki mɔkgbeŋir tiŋ po ji dɔɔ yann, ki tingbouŋ fiakir nyɔɔnt.

¹⁶Yennu tant nuu ki li nyii sanpaapo ki sik ki tan soorin,

ki dat nyinnin nyun nba sumii ni.

¹⁷Ki u fatin, ki n nyii n datai nba mɔk paŋ na nuu ni,

ki bia fatin ki n nyii binba namin,

ki bia tee binba mɔk paŋ ki garin na nuu ni.

¹⁸Maa be daamii ni yoo nba, ki bi worin,

ŋaan ki Yennu tinnin.

¹⁹Ki u sommin, ki n nyii ninbɔŋ ni,

ki tinnin, kimaan u par mei n paak.

²⁰Yennu pa paatii ki teenin, kimaan n tuun linba tooke,

u tee piisin n paak, kimaan n ki mɔk biiti.

²¹N mɔk mɔsaku nan Yennu sennu na;

N ki yêt n Yomdaanɔ Yennu.

²²N sak wei u sennii na kurawa;

N ki mɔk mɔyêtuk nan u sennii na.

²³U mi nan n ki mɔk biiti,

ki bia mi nan n soor n mɔŋ ki ki tun kpeti.

²⁴Ki u pa paatii ki teenin,

kimaan n tuun linba tooke, ki u bia mi nan n ki tun biiti.

²⁵Yennu, a tuun toonŋanae ki teen damm nba ŋan na,

a mantik ŋanne ki tur binba ŋan.

²⁶A mantik want a yeenu ki teen binba yeen,

ŋaan tee tondamm dataak.

²⁷A tuu tinn damm nba sikin bi mɔŋe,

ŋaan sikint damm nba donn bi mɔŋ.

²⁸Yennu, fine teenin yentu,

fine boon bunbɔnn nba bo be n boor na.

²⁹Fine turin paŋ, ki n fit lek n datai,

ki bia turin yiikoo ki n fit nyann bi jatuk.

³⁰Yennu, a toona mantik ŋan halii.

A mɔbona mantik waa leer.

A tee nan naagbankɔŋir nae ki tur sɔɔ kur nba loon a sommir.

³¹Yennu kuukɔɔe tee ti Yomdaanɔ

Yennu kuukɔɔe tee ti sommtɔɔ.

³²Ŋɔɔe tee Yennu nba teenin paŋ,

ki ŋamii n sɔnjot ki li yeen.

³³U te ki n tiin fanu nan piarɔ na,

u guun fanu, jɔjaana paak,

³⁴ki tumiin ki n teen siir nan tɔb,

ki te ki n saa fit tɔ tɔrbanpaarir.

³⁵Yennu, fine guun, ki tinnin,

a baka nba be n po na paake ki n tee nijaann,

ki a yiikoo na dian, ki n tinn.

³⁶Fine bɔrin, ki bi ki fit soorin, ki n bia ki baa tiŋ ni,

³⁷ki n tuu wei ber n datai ki soorib,

ki n ki nyikitib nan maa tuu tan biirib,

³⁸ki n tuu faa birib tiŋ ni, ki bin gbar fiiru,

ki n nyannib, ki bi dɔɔ n tɔɔnn.

³⁹Fine turin paŋ tɔb ni, ki te ki n nyann n datai na;

⁴⁰ki a te ki n datai na chiar ki nyikin

ki n biir binba namin na.

⁴¹Ki bi yikin ki loon sommir, ŋaan sɔɔ kaa ki saa fatib;

ki bi yi Yennu, ŋaan ki u ki teemm gatu.

⁴²Ki n biirib, ki bi naan nan tanbiinii nba ki wouŋ

tuu pebir yaat nann na.

Ki n ŋmaatib nan tant nba tuu dɔɔ sɔnjot ni na.

⁴³Ki a fatin ki n nyii mɔyêtdamm nuu ni,

ki teenin digbana na diarɔɔ;

niib nba ki n tuu ki mib na, ŋamme ji tee n jiamm.

⁴⁴Ki boorganu-i gbat n kunkɔr yoo nba, ki bi mɔk mɔsaku,

ki gbaant n tɔɔnn,

⁴⁵ki bi gbanant baŋit, ki bi nyi bi digbanpaara ni, ki jekir.

⁴⁶Yennu fo; pakin n sommtɔɔ.

A mɔɔnt Yennu nba tinnin na yabint nba tee.

⁴⁷U te ki n nyant n datai, u baŋit digbana nba ki n diab na,

⁴⁸ki fiarin, ki n nyi n datai ni.

Yennu, fine te ki n fit nyant n datai,

ki fiarin ki n nyi nikpiirit nuu ni.

⁴⁹Li paak, ki n dontir a sann, digbana niib sinsuuk ni.

N saa yin yaŋ ki dont fine.

⁵⁰Yennu-e teen min kpanbar Defid nyannjaann,

ki jikit u lomm nba kaa paak na,

ki teen min nba ki u gannin na,

nan n yaaboona, ki saa tuu yoo nba kaa paak.

Ki jiin Yennu baakir po

¹Sanpaak want Yennu baakir nba tee biaŋinbae;

ki sanpagbant mɔɔntir u nii nba ŋamm linba.

²Daar kur mɔɔntir ki teen daar nba waae,

nyiɔk n tuu nyiɔk want Yennu bannu nba tee-e.

³Ki mɔmaan ki piak, ki kunkɔsiar bia ki yeen,

⁴ŋaan ki mɔmaan nyi ki saa durinya kur po,

ki sɔɔ kur gbia tingbouŋ na kur po.

Yennu ŋamm binbeboor sanpagbouŋ ni ki tur yonnu;

⁵ki u nyi sanyiɔk ni,

ki naan nan pooyookir sɔrɔ nba mɔk parpeenn na,

ki bia tee nan nantatinnɔ nba teen siir a wun tin na,

⁶ki nyi sanpaapo chian yeŋ po, ki tuu puur ki saan leer po.

Siar kaa ki saa fit bɔr nyi li yekitu ni.

Ki jiin Yennu sennu na po

⁷Yennu sennu ŋan, ki teen panpaaŋ.

Yennu wannue tee barmɔnii,

ki teen damm nba pɔt yan na subinii.

⁸Yennu senniie tee barmɔnii,

ki binba sakir mɔk parpeenn.

Yennu wannu ŋan, ki teen nirɔ bannu.

⁹Li ŋan ki tin baak Yennu,

ki lii tee nna mɔkmɔk nan mɔkmɔk.

Yennu sennii ŋan ki took yoo kur,

¹⁰ki mɔk niɔŋ ki gar salima,

ki man chee siat nba tuu be sagbent ni na.

¹¹Ki min nba tee a daabir na, ki li teenin bannu.

Ki n mɔk mɔsaku ki laat nyɔɔt li paak.

¹²Sɔɔ kaa ki saa fit bann u biit.

Yennu, nyikin chab n biit nba ki n ki mi li po.

¹³Dɔkint min a daabir, ki min nyi garuk yanbɔmm ni.

A daa te ki n yanbɔmm diinin, ki n sii fit be fanu,

ki nyi yanbɔntoona ni.

¹⁴Yennu, ŋaant ki n mɔmaan nan n dudukit-ii man a po.

Fine tee n sindandiiuk nan n tinntɔɔ.

Yenmiaru nba jiin nyannu po

¹Yennu n gat a miaru, yoo nba ki a be daamii ni.

Ŋɔɔ nba tee Jakɔb Yennu na-ii guua,

²ki tura sommir, ki lin nyi u ŋasaakak ni,

Sayɔnn kunkonn na paak.

³Wun gaar a maruŋ kur nan a mujoonu piinii kur,

⁴ki tura faa loon linba kur,

ki ŋmakit a bont kur, ki fan la nyannu,

⁵ki ti tan saa yikin nan parpeenn, yoo nba ki a la nyannu na,

ki ti saa donn ti farimii ki dont Yennu.

Yennu n gat a miaru kur.

⁶Mɔtana, n ji bann nan Yennu tint u niganntɔɔ,

ki teenɔ gatu, ki tee ki u niganntɔɔ na laat nyannu.

⁷Nisiab teen yada nan bi taantorite,

ki leeb mun teen yada nan bi taanii,

ŋaan timm ŋarin teen yada nan ti Yomdaanɔ Yennu sanne.

⁸Li nibooru sii gbiatire, ki baa,

ŋaan ki timm n fiir, ki see kenken.

⁹Yennu, turin a kpanbar nyannu.

Gbiintir, ki turit gatu yoo nba ki ti yiina.

Yenmiaru nba jiin dontir po

¹Yennu, kpanbar kpamme, kimaan a turɔ paŋa.

U kpamme, kimaan a te ki u la nyannuwa,

²A turɔ u par nba loon linbawa, ki gaar u miaru.

³A gaarɔ, ki turɔ piisin nba yab,

ki yirin salima fokirik u yur paaka.

⁴U boi manfoor po, ki a turɔ manfoor nba kaa gbennu.

⁵U baakir yab, kimaan faa turɔ sommir ki u nyann na paak.

Ki a turɔ yugontir nan sann.

⁶Barmɔnii, a set turɔ piisin nba kaa gbennuwa,

ki a benu te ki u mɔk parpeenn.

⁷Kpanbar jikit u yada ki tee yabint daanɔ Yennu niŋe,

kimaan Yennu lomm paak, ki siar kan ban dammɔ.

⁸Ki u tuu saa nyann u datai kur,

ki nyann wunba kur ki loon u maan.

⁹Ki u tan saa lekit bi boor ki dib,

ki boontib nan muyeruk nba saa di siar na.

Yennu saa donn u wutoor bi paak, ki di boontib.

¹⁰Ki kpanbar na saa kpi bi maaru kur,

ki boontib tingbouŋ na paak.

¹¹Bi lorin bonbiir u paak, a bin biirɔ, ŋaan bi kan tɔɔrii.

¹²Kpanbar na saa yekit u peeniie ki bin ŋmat chiar.

¹³Yennu, ti piak dontira, kimaan a panchiɔŋ paak.

Ti saa yin yaŋ, ki dont a sann.

Tont mɔnii nan dontir yaŋ

¹Yennu, Yennu, bee ki a nyikimi?

Ki n mɔ fabin ki loon a sommir, ki a ki turin sommiri.

²Yennu, n bui yonnu ni nan nyiɔk kur, ki ki foi,

ŋaan ki a ki turin gatu,

³ŋaan fine kar a naangbouŋ paak ki tee kasii,

ki Israel teeb dontira.

⁴Ti yeejamm din teen fine yada.

Bi din teena yada, ki a tinnib.

⁵Bi din yi a sann, ki laat tinnu,

ki teena yada ki ki kɔŋit a sommir.

⁶N ji ki tee nisaarik kaa, n tee nanwubire,

ki niib piak ki butimin, ki bia sarikitin.

⁷Binba kur laatin, ki bi sarikitin, ki sukiin, ki laan,

⁸ki yeen a, “U teen Yennu yadae, ŋaant Yennu maŋ n tinnɔ;

Yennu maŋ-i loonɔ, bee ki u kan sommɔ?”

⁹Fine din te ki n naa marin soona,

ki te ki n teena yada, n sanpantin niŋa.

¹⁰N maa a paake daar nba ki n naa marin nawa,

ki a tee n Yennu nba guun yoo kur.

¹¹A daa fɔkitir nanin;

wahala baara, ki sɔɔ kaa ki saa sommin.

¹²Datai bonchiann lintima, ki tee nan naajai na,

ki naan nan naaja-nyiatii nba nyii Basann tiŋ ni na.

¹³Ki bi yaatir bi mɔi a bin patin,

ki li naan nan yanbɔr nba tuu yaat u mɔb na.

¹⁴N paŋ gbenne, ki tee nan baa tuu kpaar nyun

ki lin yat tiŋ ni na, ki n kpaba tukit ki nyii dukina ni,

ki n wub tee nan kpan nba tuu nann na,

¹⁵ki n kunkɔr koor nan tankoont na,

ki n lamm tab dindak ni, ki a nyikin tant ni nan n kpoe na.

¹⁶Ki nibiit lintin ki tee nan bɔjote taan ki lintin na,

ki lont lont n niipant nan taapant.

¹⁷Ki n kpaba kur nyɔɔn, ki n datai goriin ki kpamm;

¹⁸ki bi tɔ naatɔɔt ki biit n liant.

¹⁹Yennu, a daa fɔk nanin, baat yian ki tan fatin.

²⁰A fatin ki man nyi kuun ni; a nyinnin bɔi na ni.

²¹A fatin yanbɔra na ni.

N paŋ gbenna, ki a nyinnin naaja-nyiatii na ni.

²²Ki n saa wann n niib faa tun ŋamm nba ki turin,

ki saa dont a sann bi tintaanu ni.

²³Yimm nba tiin Yennu jaŋmaanii, ii dont u sann.

Binba tee Jakɔb maaru kur, ii baakit u sann;

yimm nba tee Israel teeb, ii jiantɔ.

²⁴U ki yêen talas damm nba be mukir ni,

u ki nyɔr nyikib bi wahala ni;

u ki lekin u numm bi paak, ŋaan gbiintir ki teemm,

yoo nba ki bi fabin ki turɔ.

²⁵Nibur tintaanu niŋe ki n saa pak a sann

linba ki a tun turin na paak,

ki jii n piinii nba ki n senn mɔsonn na,

ki mann maruŋ niib nba jiantira na tɔɔnn.

²⁶Ki talas damm saa di ki gboo bi yamani,

ki binba baar Yennu boor saa pak u sann.

Bin mɔkit nan yoo nba kaa gbennu.

²⁷Digbana kur saa tiar Yennu po.

Durinya munn saa ŋmant u paak, ki booru kur saa jiantɔ.

²⁸Yennu-e tee kpanbar, ki dia digbana kur.

²⁹Karinbaandamm kur saa gbaan u tɔɔnn;

nisaarii kur tan saa gbaan u tɔɔnn, ki jiantɔ.

³⁰Maar paanu nba tan saa fiir saa jiantɔ,

ki bi tan saa pak tur maar paanu nba saa fiir na

ki jiin Yennu po.

³¹Bi tan saa yet niib nba ki bi saa marib na a,

“Yennu tinn u niiba.”

Yennu-e tee ti gotitɔɔ

¹Yennu-e tee n gotitɔŋanɔ, n laat linba kur ki n loon.

²U te ki n dɔɔ siaminba mɔk jeet, ki ŋmakitirin,

ki n saa siaminba nyun be.

³U ŋammit teenin paŋ.

U sanŋann paak, ki u ŋmakitirin sɔnjouk nba ŋan ni.

⁴Yennu, mi-i lekii somm baauk nba ki kuun yinyuŋ be na ni,

n ki tiin jaŋmaanii, kimaan a be nanin

ki dia a dammir ki teenin parcheenn,

⁵ki sent n jeet, siaminba ki n datai laatin.

A gaarin saauŋ, ki n nyubitik gbee ki mɔ.

⁶N mi nan a ŋamm nan lomm sii yɔɔ be n boor,

ki n sii be a ŋaak ni, n manfoor kur ni.

Ki jiin kpanbarjaann na po

¹Durinya na nan linba kur be li ni tee Yennu yare.

Li tingbouŋ nan wunba kur be li ni tee Yennu yare.

²Ki u nan tingbouŋ ki paan mɔkgbeŋa paak,

ki teen li fiakir ki li be nyun tiŋ po.

³Ŋmee mɔk yaak nba saa fit do Yennu kunkonn paaki?

Ŋmee saa fit kɔɔ u kasii ŋasaakak ni?

⁴See binba toona ŋan, ki bi tee popeenn damm,

ki tee binba ki jiantir yenbis, ki bia ki sent faak mɔsona.

⁵Yennu saa teen piisin bi paak, ki tinnib.

Yennu saa wann nan bi kaa biiti.

⁶Li niboorue tee binba jiantir Yennu,

wunba ki Jakɔb mun din jiantir na.

⁷Lootir gana. Lootir yaayoo ni gana na,

ki kpanbarjaann na n kɔɔ.

⁸Ŋmee tee kpanbarjaann maŋi?

Ŋɔɔe tee Yennu, ki mɔk paŋ ki kɔn ki nyant tɔbii,

ki tee Yabint daanɔ.

⁹Lootir gana. Lootir yaayoo ni gana na,

ki kpanbarjaann na n kɔɔ.

¹⁰Ŋmee tee kpanbarjaann maŋi?

Ŋɔɔe tee Yabint daanɔ Yennu,

ki tee kpanbarjaann maŋ.

Yenmiaru nba saa guur nirɔ

¹Yennu, n jikit n par ki meia.

²A nie ki n teen yada. Fatirin, ki nyinnin fei ni.

A daa te ki n datai laat paŋ ki gaarimi.

³Sɔɔ ki be ki sii mɔk dindann a paak ki tan di fei.

Binba tee mɔyêtuk damm na, ŋamme saa di fei.

⁴Yennu, wantin a sɔnii, fiitir ki wannin.

⁵Wantin ki mii be a barmɔnii sɔnii ni,

kimaan fine tee Yennu, ki tee n tinntɔɔ,

ki n dindann be a ni daa kur.

⁶Yennu, tiat a ninbatinu nan a lonjaann na po,

linba ki a din tur yaayoo niwa na.

⁷Nyikin chab yanbɔmm nan toonkpeta nba ki n tun

naasint niŋa na,

Yennu, a lomm nan a ŋant paak, a tiar n po.

⁸Kimaan Yennu nba be fanu, ki u toona ŋan na paak,

ki u want yanbɔndamm sɔnŋanu nba ki bi saa tɔkin,

⁹ki dia binba sikin bi mɔŋ, ki wantib u sɔnu.

¹⁰Yennu dia u barmɔnii binbeŋ nan lomme,

ki ŋmakitir damm nba waa u mɔlor ki saak u sennu.

¹¹Yennu, nyikin chab n yanbɔmm nba yab na,

kimaan a ŋant paak.

¹²Niib nba tiin Yennu,

ŋamme saa tumii ki bann u sɔnii nba ki bi saa tɔkin,

¹³ki bi saa mɔkit bi manfoor ni,

ki bi maaru tan saa di bi tiŋ faar.

¹⁴Yennu yɔɔsnbae tee damm nba mɔk mɔsaku nanɔ,

ki u gbeent u mɔlor namm.

¹⁵N gorii Yennu-e n sommir po yoo kur,

ki u nyintin daŋ ni.

¹⁶Yennu, ŋmantir n paak ki tinin ninbaauk,

kimaan n tee n kɔɔe ki di biak.

¹⁷Nyintin parbiir ni,

ki bia sommin ki min nyi daamii ni.

¹⁸Gotir n ninbaatir nan daamii nba tee,

ki nyik chab n yanbɔmm.

¹⁹Gotir n datai nba yab biaŋinba;

gotir baa namin biaŋinba.

²⁰Ii guun, ki tinnin, ki daa te ki bi nyantin ki n di fei,

kimaan n baar a boor maa a sommime.

²¹N toonŋana nan n barmɔnii binbeŋ n tinnin,

kimaan n dindann kur be a paake.

²²Yennu, tint a niib Israel teeb,

ki bin nyi bi daamii kur ni.

Ki jiin niŋanɔ Yenmiaru po

¹Yennu, a bu n buut ki turin mɔnii,

kimaan n tuun linba ŋan, ki teena yada,

ki ki biris nana.

²Yennu, fiitir n par ki bikinin,

katir n binbeŋ nan n dudukit,

³kimaan a lomm yɔɔ be n tɔɔnn po,

ki a ŋant yɔɔ ŋmakitirin.

⁴N ki tɔkii nan niyana,

koo ki mɔk lor siar nan kpinkpannii damm.

⁵N ki loon toonbiit damm maan,

n bia ki kaar nan nitont.

⁶Yennu, n wuur n nii ki li want nan n ki mɔk biiti,

ki somm lintir a binbintir na ki jiantira,

⁷ki yiin yanii ki dontir a sann,

ki want a bakitnauŋ toona kur.

⁸Yennu, n loon ŋaak nba ki a be na;

ki li tee siaminba ki a baakir be na.

⁹A daa biirin ki kpab nan yanbɔndammi.

Daa teen nan faa tee nikpiirit biaŋinba na.

¹⁰Bi tee niib nba tuun toonbiite yoo kur,

ki tee damm nba gaan fobit piinii yoo kur.

¹¹Min ŋarin tuun linba ŋan. Tinin ninbaauk, ki tinnin.

¹²N nyii ninbɔŋ kura niwa;

ki Yennu niib tintaanu niŋe ki n saa dont u sann.

Dontir Yenmiaru

¹Yennu-e tee n yentu ki bia tee n tinntɔɔ;

n kan tin sɔɔ jaŋmaanii.

Yennu-e guun ki nyintin bonbiir kur ni;

n kii mɔk jaŋmaanii.

²N datai-i pikinin a bin kpin yoo nba

bi sii gbiatire ki baa tiŋ ni.

³Li-i lekii tee ki nibur set ki lintin, n yan kii puti.

N datai-i lekii pikinin, n kii tiin jaŋmaanii;

Yennu-e ki n teenɔ yada.

⁴N boi Yennu bonyenn kɔɔ poe, bonyenn kɔɔe ki n loon:

N loon mii be Yennu ŋasaakake n manfoor ni kur,

kii bari Yennu ŋant nba tee, ŋaan boi u sommir po.

⁵Ki n wahala yoo ki u tuu saa dɔkin n paak.

U tuu saa bɔrin fanu, u ŋasaakak ni,

ki donnin jɔfoouk paak.

⁶Ki n saa nyann n datai nba lintin na;

ki u ŋasaakak niŋe ki n saa yikin nan kpinkpammuk,

ki mann maruŋ, ki yin yaŋ ki dont Yennu.

⁷Yennu, gbiintir ki turin, yoo nba ki n yiina.

Tinimin ninbaauk ki turin gatu.

⁸Yoo nba ki a yet a, “Baat ki tan jiantin” na,

ki n jiin a, “Yennu, n baate.”

⁹A daa bɔrii a numm nanimi,

a daa dont wutoor nanin, koo ki beer min a daabiri.

N tinntɔɔ Yennu, fine tun ki tee n sommtɔɔ,

a daa yêenin ki nyikinimi.

¹⁰N baa nan n naa saa fit ki yêtin,

ŋaan Yennu saa gaarima.

¹¹Yennu, wantin faa loon man tun linba tura,

ki ŋmakitin ki man tɔkin sɔnŋanu,

kimaan n mɔk datai bonchiann.

¹²A daa ŋaanin ki te ki n datai tuun linba ki bi loon ki teenimi,

kimaan faak siara damm fiir ki biirin, ki nyint mabiit.

¹³N mi nan n sii be n manfoor ni,

ki la Yennu bonŋana nba be tiŋ na paak.

¹⁴Teent Yennu yada, cheen a par, kii wakii.

Teent Yennu yada.

Yenmiaru nba jiin sommir po

¹Yennu, fine tee n sommtɔɔ, ki n yia.

A daa nyar a tuba nanimi.

Li-i tee ki a ŋmin ki ki turin gatu,

n sii tee nan binba sik kpeentiŋ nae.

²Gbiintir ki turin, yoo nba ki n fabin ki loon sommir,

yoo nba ki n donn n nii ki jiin a kasii ŋasaakak po.

³A daa biirin ki kpab nan nɔɔnbiit damm nba tee

toonbiit dammi, binba piak kunkɔmana ki teen leeb,

ŋaan mɔk nɔɔn ŋmiant na.

⁴Datir bi tuba toonbiit nba ki bi tun,

nan yanbɔntoona nba ki bi tun na paak.

Datir bi tuba ki pab biit nba ki bi nii tun paak,

ki jiin turib linba kpaab.

⁵Bi ki diitir ki bant linba ki Yennu tun nan linba ki u nami,

li paak ki u saa dat bi tuba, ki boontib, ki bi ji sii kaa.

⁶Dontir tee Yennu yare,

kimaan u gbat n fabinii ki tinin ninbaauka.

⁷Yennu-e tee n guutɔɔ ki kɔn n paak.

N teenɔ yada, ki u sommitin, ki n mɔk parpeenn,

ki saa yin kpinkpammuk yaŋ, ki turɔ niipoouk.

⁸Yennu-e guu u niib,

ki kɔn u niganntɔɔ paak, ki teenɔ tinnu.

⁹Yennu, tint a niib, ki teen piisin bi paak,

kii kpaarib nan yoo nba kaa paak.

Ki jiin Yennu kunkɔr nba nyii wonpaaruk ni po

¹Pakin Yennu man, yendɔuŋ ni naamii,

pakin Yennu, u baakir nan u paŋ paak.

²Pakin Yennu, u baakir sann paak.

Gbaant man tiŋ ni ki jiant Kasii Daanɔ,

wuu taŋi lekit yoo nba.

³Yennu kunkɔr toon mɔkgbeŋa paak;

ki tee baakir Yennu tintantii.

Yennu tintantii be mɔkgbeŋa paak.

⁴Yennu kunkɔr mɔk paŋ bonchiann.

Yennu kunkɔr mɔk yabint baakir.

⁵Yennu kunkɔr yakitir kpekii.

Yennu kunkɔr yakitir Lebanonn kpekii buri buri,

⁶ki te Lebanonn jɔjaana mobit nan naabis na,

ki bia te Hermonn kunkonn yuk nan naajagann na.

⁷Yennu kunkɔr tantir, ki saak nyikintir.

⁸Yennu kunkɔr te ki kunkoouk damm.

Yennu kunkɔr damm Kades kunkoouk.

⁹Yennu kunkɔr kɔnii naajii,

ki suur tutuut nba be tiinii maŋ paak,

ŋaan ki binba be Yennu ŋasaakak ni na yikin a,

“Baakir tee Yennu yare.”

¹⁰Yennu mɔk yiikoo mɔkgbeŋa na paak.

Yennu-e tee kpanbar mɔkmɔk nan mɔkmɔk.

¹¹Yennu jikit paŋ ki teen u niib;

Yennu tee piisin u niib paak, ki teemm parmaasir.

Ki jiin niipoturu Yenmiaru po

¹Yennu, n piak a sann, kimaan a fatima,

a ki te ki n datai laami.

²Yennu, n yikin ki loon sommir, ki a turin laafia.

³Yennu, a nyinnin kaauk niwa.

N bo paa sɔnue ki siik tinpɔɔr ni, ki a tinn n manfoor.

⁴Binba kur waa Yennu fanu, yinin yaŋ ki dontɔ,

Tiat man linba ki Kasii Daanɔ tun na, ki turɔ niipoouk.

⁵U wutoor ki wei nan maaku,

ŋaan ki u ŋant wei ki saa dian manfoor terik.

Bubuuk sii be nyiɔko, ŋaan ki kpinkpammuk be sanyiɔk ni.

⁶Yoo nba ki n gbanant maak na, ki n yet n mɔŋ a,

“N kan ban gbarii.”

⁷Yennu, a bo ŋan ki turin,

ki bo guun kenken nan jɔtankpaauk na,

ŋaan yoo nba ki a bɔr a numm nanin, ki jaŋmaanii soorin.

⁸Yennu, n yiin fine, n barimae ki a sommin.

⁹“Mi-i kpo, nyɔlante ki a saa la?

N kaauk ni siku nyɔɔt sii tee bee?

Kpeemm fit piak ki dontir a sanni-i?

Bi saa fit mɔɔnt a barmɔnii ŋant nba teewa-a?

¹⁰Yennu, gbiintir, ki tinin ninbaauk. Yennu, sommitin.”

¹¹A lebit n parbiire ki li tee parpeenn sawaak,

ki nyinn n parbiir, ŋaan turin parpeenn,

¹²ki n ji saa yin yaŋe ki pak a sann, n kii ŋmini.

Yennu, fine tee n Yomdaanɔ,

n saa tura niipoouko nan yoo nba kaa paak.

Yenmiaru nba jiin yada teenu po

¹Yennu, n baar a boor ki loon sommire,

a daa te ki sɔɔ nyantin.

Nyintin, kimaan a tee kasii daanɔe. N meia, fatirin.

²Gbatir ki turin. Sommitin mɔtana.

Ii tee n guutɔɔ ki fatin, kii leekin ki tinnin.

³Fine tee n sommtɔɔ nan n tinntɔɔ,

ki a sii dian ki ŋmakitirin, a sanŋann paak.

⁴A nyinnin baruk nba ki bi pii ki guunin na ni,

kimaan fine tee n sommtɔɔ.

⁵N jikit n seek ki kubint a nuu ni,

Yennu, barmɔnii Yennu, a tinnin.

⁶A ki loon binba jiantir tingbana na.

Fine ki n teena yada.

⁷N sii mɔk parpeenn, ki kpamm,

kimaan a mɔk lomm yoo kur,

ki laat ki bia mi n daamii nba tee.

⁸A ki te ki n datai nyannimi,

ki te ki n la woruku ki saa fit saan maa loon siaminba.

⁹Yennu, tinimin ninbaauk, kimaan n be wahala nie.

N ninbina bak nan mɔniiwa, ki n mun bia chɔka;

¹⁰ninbaatir chɔkima, ki mɔnii jiŋ n manfoor,

ki n daamii kur te ki n bak, ki n kpaba baŋ.

¹¹Ki n datai kur, mantik n leeb na, dian diabiike.

Binba min fanu, ki bi tiinin jaŋmaanii,

bi-i lan sɔnu ni, bin chiar.

¹²Ki sɔɔ kur tamm n po, nan n kpoe na;

ki n ji tee nan baa tuu jii bont nba biir ki lu na.

¹³Ki n gbia ki n datai burin ki biirin lokir kur po,

ki kɔɔntin jaŋmaanii, ki lorin lora n paak, a bin kpin.

¹⁴Yennu, fine ki n teena yada,

ki yet a, “Fine tee n Yomdaanɔ.”

¹⁵N sii yɔɔ be a nuu ni, ki a fatin n datai boor,

ki bia fatin binba waan a bin biirin na boor.

¹⁶Ŋaant ki a ŋant-ii be min, a toontunnɔ paak.

A jii a lomm nba be yoo kur na ki tinnin.

¹⁷Yennu, a daa te ki n di fei,

kimaan n fabin ki turawa.

Ŋaant ki nɔɔnbiit damm n di fei,

ki sik dɔɔr soon nna kaauk ni.

¹⁸A te ki bi fai mɔi na n kpakin,

binba tee fai damm nan biir teeb,

ki piak biir niŋamm na kur.

¹⁹A ŋant yab bonchiann ki a jii guun binba baakita.

Sɔɔ kur mi faa ŋan biaŋinba, ki a guu binba teena yada,

²⁰ki nyintib bi datai lora ni, ki bɔriib a boor ni,

ki bi nyi bi datai sukit ni.

²¹Pakin Yennu, kimaan u tun u lomm nba kaa paak nae

ki turin, yoo nba ki n datai bo lekin ki n be bi sinsuuk ni na.

²²Jaŋmaanii bo soorime, ki n yet a,

“Yennu-e berin, ki n fɔkit nanɔ.”

Ŋaan ki u gbat n fabinii, yoo nba ki n yiin ki loon sommir na.

²³Ii loon Yennu man, yimm nba tee u niib na.

Yennu maŋe guu niŋamm,

ŋaan daar karinbaandamm tuba nan laa kpaab biaŋinba na.

²⁴Ii wakii man, ki chee i para,

yimm nba mɔk dindann nan Yennu na.

Ki jiin yanbɔmm katu nan nyikinchab po

¹Damm nba ki Yennu nyik chab bi yanbɔmm,

ki bia piin bi biit na, parpeenn tee bi yare.

²Daanɔ nba ki Yennu ki pak biirɔ nan u tun biir,

ki bia ki mɔk kpinkpannii na, parpeenn tee u yare.

³Yoo nba ki n bo ki kat n yanbɔmm ki wann na,

n gbanant bo baŋ ki chɔke,

kimaan mɔnii nba ki n mɔ daa kur na paak.

⁴Yennu, a daar n tubir yonnu ni nan nyiɔk kur,

ki n paŋ gbenn nan piar yonnu nba tuu koor tiŋ biaŋinba na.

⁵Ki n ji kat n yanbɔmm ki wanna, n ki bɔr n toonbiiti.

N dukin ki kat n yanbɔmme ki tur fin Yennu, ki a nyik chabin.

⁶Li paak, wunba be fanu nana,

wun miara, yoo nba ki u be mukir ni;

wahala maŋ-i lekii pir nan nyunpana na

ŋaan li kan teenɔ siar.

⁷Fine tee n gungurboor, ki a saa nyinnin wahala ni.

N saa yin yaŋ nan kunkɔpaarir, a tinnu na paak,

kimaan fine guun.

⁸Ki Yennu yet a, “N saa wanna faa sii be biaŋinba,

ki sii kpaana ki goriia.

⁹A daa jatikit nan taamm koo boŋ nba ki mɔk yan,

ki bi ŋmakitirɔ nan taanbobit nan taangarikawa,

ki u fit saak mɔb na.”

¹⁰Nɔɔnbiit damm saa di fara,

ŋaan binba teen Yennu yada na,

u sii guub nan u lomm nba be yoo kur na.

¹¹Yimm nba tee niŋamm na, yii mɔk parpeenn kii kpamm,

kimaan Yennu nba tun linba ki turi na paak.

Yimm nba saak u mɔb na, ii yikin nan parpeenn.

Ki jiin dontir yaŋ po

¹Ii yin yaŋ nan parpeenn ki tur Yennu,

yimm nba tee niŋamm na.

Li ŋan ki niŋamm na n jiantɔ.

²Ii faa kɔnn ki tur Yennu niipoouk.

Ii yin yaŋ ki faa biɔk ki turɔ.

³Ii yin yanpaaŋ ki turɔ,

ki faa kɔnn fanu ŋaan yikin nan parpeenn.

⁴Yennu mɔmaan took ki bia tee barmɔnii;

ki toona nba kur ki u tuun na be fanu.

⁵Yennu loon kasii toona nan toonŋana,

ki u lomm nba yɔɔ be na gbee tingbouŋ.

⁶Yennu yet mɔmaame ki nan sanpaapo,

ki bia yet mɔbonn ki li nan yonnu

nan ŋmaarik nan ŋmaabira,

⁷ki u taan mɔkgbeŋa kur bɔyenn kɔɔ boor,

ki taan mɔkgbeŋa nba sumii maŋ, ki li dɔɔ yomm.

⁸Ŋaant ki tingbouŋ na bont kur n jiant Yennu.

Ŋaant tingbouŋ na niib kur n baakit Yennu.

⁹U din pake, ki tingbouŋ na nan,

ki u yet mɔmaan, ki bont kur lekit ki set.

¹⁰Yennu-e ŋmat tingbouŋ na niib dudukit,

ki te niib na ki fit tuun bi lora,

¹¹ŋaan Yennu lora see-e kenken yoo kur,

ki waa loon biaŋinba tuun yoo n tuu yoo.

¹²Parpeenn be digbann nba ki Yennu tee bi Yomdaanɔ na paak.

Parpeenn be niib nba ki u gannib ki bi tee u yab na paak.

¹³Yennu be yendɔuŋ ni ki tibin got ki la nisaarik kur.

¹⁴U be u naan gbant paak,

ki gorii wunba kur be tingbouŋ na ni.

¹⁵Ŋɔɔe nan sɔɔ kur yan, ki mi baa tuun linba kur.

¹⁶Kpanbar sɔɔ kaa ki saa fit kɔn ki nyann tɔb

kimaan waa mɔk kunkɔnkɔnna bonchiann na paaki;

koo kunkɔnkɔnnɔ sɔɔ kaa ki saa kɔn nyann

kimaan waa mɔk paŋ na paaki;

¹⁷Tɔb taamm ki tee dindann ki jiin nyannu po,

u paŋ kan tinni.

¹⁸Yennu gorii binba saak u mɔbe,

ki bia gorii binba mɔk dindann nan u lomm

nba ki u teen yoo kur na.

¹⁹Ki u nyintib kuun ni,

ki teemm manfoor kon sakir ni.

²⁰Ti dindann maa Yennu paake,

ŋɔɔe tee ti guutɔɔ nan ti sommtɔɔ.

²¹U nie ki ti mɔk parpeenn,

kimaan ti teen yada u kasii sann na nie.

²²Yennu, ŋaant ki a lomm nba yɔɔ be na-ii be nant

nan taa maa ti dindann a paak biaŋinba na.

Dontir nba jiin Yennu ŋamm po

¹N sii tun teen Yennu niipoouko,

n kan ban nyik u dontiri.

²N saa pak u sanne, kimaan waa tun linba ki turin na.

Ŋaant ki binba kur ki li diimm na n gbiint kii mɔk parpeenn.

³Taantin ki tin pak Yabint Yennu.

Ŋaant ki tin lakin dont u sann.

⁴N miar Yennu, ki u gat ki turin,

ki fat nyinnin jaŋmaanii kur ni.

⁵Ki binba kur ki li diimm na kpaa numm ki goriiɔ,

ki li maŋib; bi kan ban di fei.

⁶Ki fara damm fabin ki turɔ,

ki u turib gatu ki nyinnib bi wahala kur ni.

⁷Yennu malaka guu damm nba baakit ŋɔɔ Yennu,

ki u nyintib ninbɔŋ ni.

⁸Bikint ki la Yennu nba ŋan biaŋinba.

Piisin be daanɔ nba kur gur u mɔŋ Yennu boor paak.

⁹Ii baakit Yennu, yimm nba tee u niib,

kimaan binba saak Yennu maan ki kɔŋit siar.

¹⁰Yanbɔra saa fit kɔŋ jeet, ki kon n soorib,

ŋaan binba saak Yennu maan ki kɔŋit bonŋana.

¹¹Ii saana, n yɔɔsnba, ki tan gbiint,

ki n saa wanni ki yin baak Yennu.

¹²I ŋmee loon ki wun la manfoor manu?

I loon manfofoouk nan parpeenn-ii?

¹³Ŋann ii nyik mabiit paku, ki bia daa fa faak.

¹⁴Nyikin toonbiit, ŋaan kii tuun toonŋana.

Lomin parmaasir nan i yan kur.

¹⁵Yennu ninbina gorii niŋamm nae,

ki u tuba bia gbiin bi fabinii.

¹⁶Yennu kɔn nan binba tuun toonbiit,

ki bi-i kpo, bi sann tuu bote.

¹⁷Niŋamm na tuu fabine ki tur Yennu,

ki wun gbat ki nyintib bi daamii ni.

¹⁸Yennu naak damm nba ki bi para biir,

ki sommit binba ki mɔk dindann nan waama na.

¹⁹Niŋanɔ mɔk daamii bonchiann,

ŋaan Yennu-e nyintɔ daamii maŋ kur ni.

²⁰Yennu-e guu u kpaba, ki nan yennkɔɔwa ki jintiri.

²¹Toonbiite saa kpi nɔɔnbiit damm;

ki binba ki loon niŋamm na saa la tubdatu.

²²Yennu saa tinn u niib;

ki binba baat u boor ki gurin na saa la tinnu.

Yenmiaru nba jiin sommir po

¹Yennu, yêtir damm nba yêenin na,

ki bia kɔn nan damm nba kɔn nanin na.

²Jiin a naagbankɔŋir ki baar fatin.

³Wokitir a kpann nan pajar ki took binba waan na.

Satir mɔb nan a saa tinnima.

⁴Ŋaant ki binba koor a bin nyinn n manfoor na, bin gbar ki di fei.

Ŋaant ki binba lorin n paak bonbiir na, lin ŋmatib ki bin ŋmat.

⁵Yennu malaka n wei berib nan fouŋ nba ki wouŋ tuu pebir na.

⁶Ŋaant ki bi sɔnu-ii bɔn, kii biaki ŋarii,

ki te ki Yennu malaka n faab ki birib tiŋ ni.

⁷Bi pii barit ki guuntin, ki li ki mɔk paaki;

ki bia gbiir bootsunsuŋ a bin soorin.

⁸Bi tan sii bant na ki biiru tunn bi paaka,

ki barit nba ki bi pii na, lin soorib,

ŋaant ki bin baa bootuk na ni, ki lin biirib.

⁹N par ji sii mei nan Yennu,

ki n sii mɔk parpeenn, waa tinnin na paak,

¹⁰ki n saa yet Yennu nan n par kur a,

“Yennu, sɔɔ ki be ki tee nan fin na,

ki a nyint butimm, paŋ damm nuu ni,

ki bia nyint fara damm nan nandamm

binba ŋmaabib na nuu ni.”

¹¹Toonbiit damm di siara ki biirin,

ki boin buboit nba ki n ki mi li po;

¹²ki bi pa biit ki jiintin ŋamm paak,

ki te ki n ki mɔk dindann.

¹³Ŋaan baa bo yiar yoo nba, n bo lia parbiir liante

ki sikin n mɔŋ ki lor mɔb,

ki tibin n yur tiŋ ni ŋaan mei Yennu

¹⁴nan maa bo saa miar ki tur n yɔɔk koo n naa bik biaŋinba na,

ki n lin mɔ fabin nan nirɔ nba tuu mɔ fabin

u naa paak biaŋinba na.

¹⁵Ŋaan daamii nba tan baarin yoo nba,

ki bi kur mɔk parpeenn, ki taan leeb ki lintin,

ki sarikitin, ki saamm boon, ki faan yoo kur,

¹⁶ki nyiitir bi nyana nan naŋ

nan niib nba sii sarikit wabik biaŋinba na.

¹⁷Yennu, a saa tamm n po ki lin wei nlee?

Fatir n manfoor ki nyinnin bi biiru na ni.

Fatir n manfoor ki nyinnin yanbɔra na ni.

¹⁸N saa tura niipoouk a nibur tintaanu ni,

bi kura sinsuuk niŋe ki n saa tura dontir.

¹⁹A daa te ki n datai kpamm n biiru paaki.

Bi tee fai damme.

A daa te binba namin ki li kaa paak na laa n parbiir paaki.

²⁰Bi ki piak parmaasir maami,

ŋaan piak ki fa fai ki biir binba be soon nna, tiŋ na ni na,

²¹ki piak ki biirin nan kunkɔpaara a,

“Ti la faa tun linbawa.”

²²Yennu, a la linba nawa, li paak, a daa ŋmini.

Yennu, a daa fɔkitir nanimi.

²³Yennu, fiit a mɔŋ ki kɔn turin. Yennu, fiit ki pak turin.

²⁴Yennu, a be fanu,

li paak, want nan n ki mɔk biiti, ki daa te ki n datai laami.

²⁵A daa te ki bi yeen ki teen bi leeb a,

“Ti nyannɔwa. Taa loon biaŋinbae na.”

²⁶Ŋaant ki binba kpamm n wahala ni na,

bin nyannib ki lin ŋmatib.

Ŋaant ki binba want bi mɔŋ na, bin di fei ki kɔŋ baakir.

²⁷Ŋaant binba loon ki min nyi wahala ni na,

bii yikin nan parpeenn, ki tuu ŋamm yet a,

“Yennu-e yen dontir, ki u par mei nan u daabir n la nyannu.”

²⁸N sii mɔɔntir a kasii binbeŋ po,

kii dontir a sann daar kur ni.

Ki jiin nisaarik nɔɔnbiit po

¹Yanbɔmm piak nan nɔɔnbiit daanɔ u par niŋewa;

U yêt Yennu, ki ki tiinɔ jaŋmaanii,

²kimaan u dont u mɔŋe,

ki dukii nan Yennu kan bann u yanbɔmm ki biirɔ.

³Ki u mɔmaan tee nɔɔnbiit, ki gbee nan kpinkpannii,

ki u ki fit tuun siar ki li tee subinii ki bia ŋani.

⁴Wuu be u dɔɔnu ni gbaa, u lorin bonbiire.

U ki tuun siar ki li ŋani, u bia ki yêen linba ki ŋani.

Ki jiin Yennu ŋant po

⁵Yennu, a lomm nba be yoo kur na saa tuut sanpaake,

ki a ŋant yat sanpagbant ni,

⁶ki a kasii binbeŋ na fɔk nan jɔjaana na,

ki a barmɔnii buut sumii nan mɔkgbeŋa na,

ki a dia nisaarii nan bonkobit a nuu ni.

⁷Yennu, a lomm nba kaa gbennu na ŋan,

li nigbeŋa nan nibutimii kur gurin a kpinkpant maasue.

⁸Jeet nba ki a turit na, ŋanne ki ti di ti yamani.

Ki a te ki ti nyu a mɔkir nba tee ŋant na ni nyun.

⁹A niŋe ki manfoor kur nyi.

Ki a yentu nie ki ti laat yeenin.

¹⁰A ŋamm kii loon binba mia,

ki bia tun ŋamm ki tur binba be kasii.

¹¹A daa te ki karinbaandamm lekinimi,

koo ki nɔɔnbiit damm na te ki n tiini.

¹²Gotir toonbiit damm nba baa dɔɔ,

ki dɔɔ ki kan fit fiiri.

Ki jiin nibiit nan niŋamm joontu po

¹A daa te ki li daamiia nɔɔnbiit damm toona paaki.

A daa te ki li mɔka funfunn binba tuun toonbiit na paaki.

²Bi tan saa boonte nan mɔɔt nba tuu koor na,

ki bia kpo nan mɔmaata nba tuu tan koor na.

³Teent Yennu yada kii tuun linba ŋan,

ki li saa te ki a be tiŋ na paak nan laafia.

⁴Lomin parpeenn Yennu boor,

ki u saa tura a par nba loon linba.

⁵Jiin a mɔŋ ki tur Yennu.

Teent Yennu yada, ki u saa somma.

⁶U saa te ki a kasii binbeŋ na n nyirik nan sanyayondoor na,

ki te ki a barmɔnii binbeŋ-ii yeen nan yonsupeeuŋ ni na.

⁷Teent sukuru ki guur Yennu ki wun tun.

A daa te ki li daamiia binba tuun toonbiit,

ki mɔkitir na paaki.

⁸A daa te ki li daamiia ki a dont wutoor ki gbit a kpak,

ŋanne baat nan toonbiit.

⁹Yennu saa boon toonbiit damm nawa,

ŋaan binba mɔk dindann ki guu Yennu nae tan saa yent tiŋ na.

¹⁰Li kan yann kaawa ki nɔɔnbiit damm na ji tan sii kaa.

Ki i tan saa lon bi boor ŋaan kan la.

¹¹Binba sikin bi mɔŋe tan saa yent tiŋ na.

Ki li mɔkint nan parmaasir sii tee bi yar.

¹²Nɔɔnbiit damm lorin bi lora, a bin biir niŋamm nae,

ki namm ki ŋman nyana.

¹³Yennu laa nɔɔnbiit damm nae,

kimaan u mi nan bi boontu daar per na.

¹⁴Nɔɔnbiit damm saatir bi jukbanjai

ki bia daar bi tɔrbana,

a bin kpi talas damm nan nandamm biak ni,

ki bia kpi binba tuun toonŋana na,

¹⁵ŋaan bi tiɔŋ jukbanjai maŋe saa kpib,

ki bi tɔrbana n bia kɔnn.

¹⁶Niŋanɔ mɔkint-i waar,

ŋaan li chee nɔɔnbiit damm kur mɔkint nba yab.

¹⁷Kimaan Yennu saa nyinn nɔɔnbiit damm paŋa,

ŋaan somm binba tuun toonŋana.

¹⁸Yennu saa guur binba saak u maan,

ki te tiŋ na-ii tee bi yar mɔkmɔk nan mɔkmɔk.

¹⁹Ki bi kan di fara, biak yoo,

ki kon yoo, bi sii laat jeet ki li jaŋitib.

²⁰Ŋaan nɔɔnbiit damm na ŋarin saa kpoe,

ki Yennu datai na saa bote nan tipuuk na.

Bi saa yate nan munyuuk na.

²¹Nɔɔnbiit daanɔ kpentir, ŋaan ki ki pa jiint,

niŋanɔ ŋarin teen nan u par kure.

²²Damm nba ki Yennu teen piisin bi paak na,

ŋamme saa yent tiŋ na,

ŋaan binba ki u sat mɔtont bi paak na, u saa ber nyinniba.

²³Li-i tee ki Yennu par peen wunba paak,

u ŋmakitirɔ sɔniie.

²⁴Ki li-i tee ki u baa, u kan kpakin tiŋ ni,

kimaan Yennu saa sommɔ ki wun fiir.

²⁵N tee nikpere ki wei bonchiann,

ŋaan n ki ban la niŋanɔ nba Yennu nyikɔ yann,

koo ki te ki u waas mei jeeti.

²⁶U tuu piine, ki bia kpentir ki teen u leeb yoo kur,

ki u waas tee piisin ki turɔ.

²⁷Nyikin toonbiit ŋaan kii tuun toonŋana,

ki fin nan a waas saa wei tiŋ na ni,

²⁸kimaan Yennu loon linba ŋan,

li paak, ki u ki nyikin niib nba tuun u loomm na yanni,

ki guub yoo kur, ŋaan beer nɔɔnbiit damm maaru ki nyintib.

²⁹Niŋamm nae saa yent tiŋ na,

ki kar li ni mɔkmɔk nan mɔkmɔk.

³⁰Mɔbonŋana nyi niŋanɔ boor ki tee subinii maame,

ki u lamm piak linba took,

³¹ki u dia Yennu sennu u par ni, ki ki nyikin.

³²Nɔɔnbiit daanɔ guu niŋanɔe,

ki koor a wun nyinn u manfoor.

³³Ŋaan Yennu kan nyikib bi datai nuu ni,

koo bii saan namm buut ni, bi kan pak biiribi.

³⁴Guut Yennu yoo, kii dia u sennu,

ki u saa donna ki a yent tiŋ na,

ki a tan saa la nɔɔnbiit damm biiru yoo.

³⁵N ban la nɔɔnbiit daanɔ nba ton bonchiann,

ki bia laat yiikoo nan kpek nba tuu la sinsetboor

ki mɔk yiikoo biaŋinba na.

³⁶Ki li poor po ki n tan gar ki ji ki la u leŋi,

ki n lommɔ, ŋaan ki ki lau.

³⁷Dukint niŋanɔ po, daanɔ nba be kasii binbeŋ;

parmaasir daanɔ mɔk yaaboona.

³⁸Yanbɔndamm kur saa boonta, ki bi maaru bia saa boonta.

³⁹Yennu-e tint niŋamm, ki guub yoo nba ki bi be fara ni.

⁴⁰Ki u sommitib, ki fiarib; u fiarib nɔɔnbiit damm boor,

ki tint bi manfoa, kimaan bi baat ki gurin u niŋe.

Ki jiin talasdaanɔ Yenmiaru po

¹Yennu, a daa daar n tubir nan wutoori,

²kimaan a peenii na ŋmuu ki saarima,

ki a nuu faa ki birin.

³Ki a wutoor paak, ki laafia ji kaa n gbanant ni,

ki n kpaba ji ki mɔk paŋ, kimaan n yanbɔmm paak.

⁴Ki n biit kpiakin nan jikir nba tuu kpiak nan jiinu

biaŋinba na.

⁵N jatii paak ki n nara lukir ki pɔɔk.

⁶Bi dinnin ki n faab tiŋ ni, ki mɔ fabin daa kur.

⁷Ki n gbanant di muu nan yuyeeuk, ki n ki mɔk laafia.

⁸Ki n baŋ, ki ki mɔk paŋ nan waama,

ki n par biir, ki n fabin nan tont.

⁹Yennu, a mi maa loon linba, ki a gbiin n fabinii.

¹⁰N parpaak toe, ki n paŋ gbent;

ki n ninbina jii ki nyirii.

¹¹Ki n yɔɔsnba nan n tɔknanleeb tiinin,

nan n ŋaateeba ki nakiin, kimaan n nara na paak.

¹²Binba loon ki bin nyinn n manfoor na pii barite ki guuntin,

ki binba loon bin paanin daŋ na lorin daa kur a bin biirin.

¹³N tee nan tuukpaar nae ki ki gbia maan,

ki bia tee nan muuk nba kan fit pak maan na.

¹⁴Ki n kpant nirɔ nba kan fit pak jiin

kimaan waa ki gbia na paak.

¹⁵Yennu, n teena yada ki guu a gatu,

fin, n Yomdaanɔ Yennu-e saa turin gatu.

¹⁶N meia ki yet a, “A daa te ki n datai laan, laa biirin na paaki,

koo ki bi dont bi mɔŋ maa baa na paaki.”

¹⁷N ji yaa man baae ki be nan tont yoo kur.

¹⁸Ki n pak ki kat n yanbɔmm, ki n biit maŋ daamiin.

¹⁹N datai mɔk laafia ki bia mɔk panii.

Ki n datai yaba ki namin, ki li ki mɔk paaki.

²⁰Ki binba jikit biit ki pa n ŋamm paak na piak ki biirin,

kimaan maa koor a man tun linba ŋan na paak.

²¹Yennu, a daa ŋaanin; Yennu, daa fɔkitir n boor.

²²Yennu, n tinntɔɔ, baat yian ki tan sommin.

Ki jiin wunba be wahala ni yanbɔmm fiitu po

¹N yet a, “N saa soor n mɔŋ nan toona nba ki n tuune,

ki bia soor n jerinn nan mabiit paku.

N kan yet mɔbonsiar, yoo nba ki nɔɔnbiit damm kpiami.”

²Ki n ŋmin soon nna, ki ki yet siari,

ki lek ki pak nan bonŋanna, ŋaan ki n fara na ŋamii pukii.

³Ki n par biir, ki mi-i dukin li po, parbiir n ŋamm pukin.

Ki n ki fit nyik buboiti a,

⁴“Yennu, n manfoor saa wei nlee? N saa kpo nlee yooe?

Ŋaant ki mii mi n manfoor nba saa wei biaŋinba.”

⁵A te ki n manfoor jiŋa.

N manfoor fɔkint ki tee siar a boor,

nisaarik manfoor tee waaminnae.

⁶Nisaarik tee nan yinyuŋ nae,

waa tuun linba kur tee yanne.

U kpaan mɔkint, ŋaan ki mi wunba tan saa yent.

⁷Yennu, n ji sii loon bee? N mɔk dindann a ni.

⁸Sommitin, ki min nyi yanbɔmm ni;

A daa te ki n tee jatit nilaakiri.

⁹N ŋmine, n kan yet mɔbonsiari,

kimaan fine te ki n di fara na.

¹⁰A ji daa daar n tubiri;

N yaa man kpoe nan niikura nba ki a faan na.

¹¹A tubdatu nba ki a daar nisaarik tubir

u yanbɔmm paak na tee kpaaniie,

ki a biir linba ki u loon nan dundura na.

Mamɔmm, nisaarik tee nan wamaasin nae.

¹²Yennu, gbiintir n miaru ki bia gbiint n fabinii;

mi-i mɔ, fan baar ki tan sommin.

N be a boor ki tee nan saamɔ nae,

ki tee nan n yeejamm nba din tuu tee na; n kan wei.

¹³Nyikimin ki n sii mɔk parpeenn nan maa tan saa yaat

ki ji sii kaa.

Dontir yaŋ

¹Ki n guur Yennu sommir po soon nna,

ki u gbiint ki gbat n mɔnii,

²ki dat nyinnin daŋ bootuk ni, ki bia nyinnin bakir nba sumii ni,

ki tɔɔnin tanpiiuk paak, ki te ki n set siaminba ŋan;

³ki u wannin ki n yin yanpaaŋ, dontir yaŋ nba teen ŋɔɔ Yennu.

Niib bonchiann saa la nna ki lii tee kpaanii,

ki bi saa teen Yennu yada.

⁴Damm nba teen Yennu yada, ki tee binba ki jiantir pata,

koo ki ki pukin tingbann jiantdamm po na, parpeenn tee bi yare.

⁵Ti Yomdaanɔ Yennu, a tun bona bonchiann ki turit;

sɔɔ ki be ki tee nan fin na. A lor lorŋana bonchiann ki jiin ti po.

N kan fit kan li kur, li yab bonchiann.

⁶A ki loon maruŋ nan piinii,

a ki boi bonkobit mujoonu maruŋ po,

koo maruŋ nba saa nyinn biit po,

ŋaan a turin tubae a man gbiint a mɔmaan.

⁷Ki n toon ki yet a, “Mine na. N baara.

A kpaanii nba ki a teenin na be sennu gbouŋ ni.

⁸Yennu, n loon man tun a loomm,

ki a sennu be n par ni.”

⁹Yennu, a niib kur tintaanu niŋe,

ki n pak a barŋanii nba jiin faa tinnit na po.

A mi nan n kan fit nyik li paku.

¹⁰N ki woon a tinnu maan na n par ni.

N tun piak a barmɔnii binbeŋ nan a sommir poe.

N ki ŋmin nan mɔmaan na paku, a niib kur tintaanu ni,

ki piak a lomm nan barmɔnii nba tee biaŋinba.

¹¹Yennu, n mi nan a kan nyik a ninbatinu nanimi,

ŋaant ki a lomm nan barmɔnii-ii guun yoo kur.

Yenmiaru nba jiin sommir po

(Yaŋ 70)

¹²Fara bonchiann lintima, li yab ki kaa kann.

N yanbɔmm kɔɔnin fara niwa, ki n ji ki laat,

li yab ki gar yut nba be n yur paaka,

li te ki n ji ki mɔk parcheenn.

¹³Yennu, tintin, baat yian ki tan sommin.

¹⁴Ŋaant niib nba kur kpaanin a bin kpin na,

bin di fei ki lin bia ŋmatib;

ŋaant binba mɔk parpeenn n baak po na, bin ŋmat ki di fei.

¹⁵Ŋaant ki binba kur laan na, lin bakitib bi baak ni.

¹⁶Ŋaant ki binba kur baat a boor-ii mɔk parpeenn kii kpamm.

Ŋaant ki binba kur mɔk niipoturu a tinnu paak-ii tun kii yeen a,

“Yennu tee Yenjaanne.”

¹⁷Yennu, n tee nibutiŋe ki tee tarik, ŋaan a ki tamm n po.

Fine tee n tinntɔɔ ki tee n Yennu.

Baat yian ki tan sommin.

Ki jiin baatɔɔ Yenmiaru po

¹Wunba baka be fara damm po na, parpeenn tee u yare.

Yennu saa sommɔ yoo nba ki u be daamuk ni.

²Yennu sii guu-u ki u mɔk manfoor,

u saa te ki u be tiŋ na ni, ki mɔk parpeenn,

u kan ŋaau yann ki te ki u datai diau.

³Yennu saa sommɔ yoo nba ki u be baatdiiuk ni,

ki saa turɔ laafia.

⁴N yet a, “Yennu, n tun ki biirawa, ŋaan tinimin ninbaauk,

ki turin laafia.”

⁵N datai yeen linba ki ŋane ki teenin.

Bi loon man kpoe ki bin tamm n po.

⁶Binba baat ki foontin na tee fai damme,

ki tabintin barbiit, ki tuu nyi nann ki piak sɔɔ kur.

⁷Binba ki loon na lɔkine ki teen leeb,

ki biirin ki bikii bonbiir nba saa baarin biaŋinba.

⁸Ki bi kur yeen a, “Baatbiiuk soorɔwa;

u kan ban paaki.”

⁹N yɔmɔŋ gbaa, wunba ki n teenɔ yada,

ki min nan ŋɔɔ tun ki tuun saaŋmaŋ ni na nyii n poora.

¹⁰Yennu, tinimin ninbaauk ki turin laafia,

ki n saa pa jiin n datai.

¹¹N mi nan a mɔk parpeenn nanin,

ki n datai kan fit nyannimi.

¹²A saa sommima, kimaan n tuun linba ŋan,

ki a saa te ki mii be a boor yoo kur.

¹³Pakin ki dont Israel teeb Yomdaanɔ Yennu man.

Pakin ki dontɔ mɔtana nan yoo nba kaa paak.

Mamɔmm, lii tee nna.

GBOUŊ ŊANLEE

(Yanii 42 -- 72)

Ki jiin wunba be digbangann Yenmiaru po

¹Yennu, n lin kpaana nan n par kur

nan piarɔ nba tuu lin kpaan nyunmaasin biaŋinba nae.

²Fin Yennu nba fo na, n niana.

Nlee yooe ki n sii be a tɔɔnn ki jiantirani?

³Yonnu ni nan nyiɔk kur ki n mɔ ki ninnyuut tee n jeet.

Ki n datai yɔɔ ki boin a, “A Yennu na be lia?”

⁴Mi-i tiar linba gar, n yan tuu yêt bonchiann,

ŋanne tee maa tuu lakin saan nan nibur Yennu ŋasaakak ni na.

Ki n tuu ŋmakitir nibur maŋ, ki bi somm nan parpeenn,

ki yiin yanii ki dontir Yennu nan kunkɔpaara.

⁵Bee ki n be parbiir ni? Bee ki daamii be n ni?

N saa teen n dindann Yennu nie, ki saa ŋamm dontɔ,

Ŋɔɔe tee n tinntɔɔ nan n Yennu.

⁶N be parbiir nie, li paak,

mi-i dukin Jɔɔdann mɔkir po, n tuu tiar a poe,

mi-i dukin Hermonn kunkonn po, n tuu tiar a poe,

mi-i bia kii dukin Misar kunkonn po, man tiar a po.

⁷Sutik yi sutik nan fuur, ki pir n paak nan nyunmɔnn na,

ki tee nan nyunpana nba tuu lakitir na, ki pir piinin.

⁸Yennu want u lomm yonnu ni,

ki n fit yiin yaŋ nyiɔk ki teenɔ,

ki miar ŋɔɔ Yennu nba teenin manfoor na.

⁹N yet Yennu, wunba tee n guutɔɔ na a,

“Bee ki a tamm n po? Bee ki n sii lin di fara,

ki n datai dia ki ŋmaŋitimi?”

¹⁰Ki bi chɔɔn n kpaba nan sukit, ki boin daa kur a,

“A Yennu na be lia?”

¹¹Bee ki n be parbiir ni? Bee ki daamii be n ni?

N saa teen n dindann Yennu nie, ki saa ŋamm dontɔ,

ŋɔɔe tee n tinntɔɔ nan n Yennu.

Ki jiin wunba be digbangann Yenmiaru po

¹Yennu, want nan n ki mɔk biiti,

ki bu nyinnin binba ki jiantira na ni,

a fatin ki min nyi fai damm nan nibiit na ni.

²Fine tee n sommtɔɔ; bee ki a nyikimi?

Bee ki n sii lin di fara, ki n datai dia ki ŋmaŋitimi?

³A tun a yentu nan a barmɔnii ki lin ŋmakitin,

ki jiin ki jen nanin Sayɔnn, a kasii kunkonn na boor,

nan a binbeboor nba ki a be na.

⁴Yennu, n saa saan a maruŋ binbintir boore,

fine tee n parpeenn nyakir,

ki n saa faa kɔnn ki yin yaŋ ki donta.

Yennu, fine tee n Yennu.

⁵Bee ki n be parbiir ni? Bee ki daamii be n ni?

N saa teen n dindann Yennu nie, ki saa ŋamm dontɔ.

Ŋɔɔe tee n tinntɔɔ nan n Yennu.

Yenmiaru nba saa gɔɔr bonbiir

¹Yennu, ti gbat nan ti tubawa,

ti yeejamm betit faa din tun linba ki turib sianyoo nawa.

²A din ber nyinn binba ki jiantira na bi tiŋ ni,

ki dat bi tuba,

ŋaan kaan a niib leŋ, ki te ki bi mɔkit.

³Li din ki tee a niib na jatiat paak kaa

ki bi kɔn ki nyann tiŋ na,

bi din ki nyann nan bi mɔŋ paŋ kaa,

li din tee a yiikoo nan a paŋ nie,

nan a mɔŋ benu paak, ki li wann nan a loomm.

⁴Fine tee n kpanbar, ki bia tee n Yennu,

ki teen timm Israel teeb nyannu.

⁵Fine turit a paŋ ki ti nyann ti datai.

⁶N dindann ki be n tɔrbann ni kaa,

n jatiat kan fit te ki man nyann,

⁷ŋaan fine te ki ti nyann ti datai,

ki te binba ki loon ti maan na dii fei.

⁸Ti sii tun dontir a sanne daar kur,

kii bia kii teena niipoouk nan yoo nba kaa paak.

⁹Ki mɔtana a ji nyikita, ki te ki ti datai nyannit,

a ji ki somm nan ti kunkɔnkɔnna na,

¹⁰ki te ki ti chiar ŋaan nyik ti datai, ki bi jii ti mɔkint.

¹¹Ki a te ki bi kpiit nan pei na,

ki te ki ti yat kɔɔ digbangana.

¹²Ki a kɔi a niib daabauŋ,

ki li tee nan bi nyɔɔt ki yab na.

¹³Ki boorganu la faa teent biaŋinba,

ki bi ji sarikitit ki bia laat.

¹⁴Ki a te ki ti kpant nilaaka digbana kur ni,

ki bi sarikitit.

¹⁵N tun be fei nie, ki fei piinin murirr.

¹⁶Ki n gbia binba namin, nan n datai nba yisimin

ki bia sukiin na.

¹⁷Ti lek ki tamm a po,

ki bia ki biir mɔlor nba ki a lor nant na,

ŋaan ki linba na kur teenit.

¹⁸Ti ki nyik a weiu,

ti bia ki mɔk mɔyêtuk nan a sennii,

¹⁹ŋaan ki a nyikit yann bonkob-susoot ni,

ki ŋaat bunbɔncheenn ni.

²⁰Li-i bonni tee ki ti nyik ki ki jiantir fin Yennu,

ŋaan jiantir tingbana,

²¹a set bo saa banne, kimaan a mi ti dudukit.

²²Ŋaan a paake ki bi kpit yoo kur,

ki ti tee nan peeuk nba ki bi tuu tee siir a bin kpiu na.

²³Yennu, fiit, bee ki a gɔɔnti?

Kakitir a mɔŋ, ki daa yêent kɔtaa-a.

²⁴Bee ki a lek a numm nanti?

A daa tammit ti fara nan ti daamii po.

²⁵Ti baa ki but tiŋ niwa,

ki bi nyannit ki ti dɔɔ tanbiinii ni.

²⁶Fiit ki tan sommit, ki tinnit,

kimaan a lomm nba ki gbent na paak.

Kpanbar pookɔɔnt yaŋ

¹Mɔbonŋanae gbee n yur, ki n yin yaŋ na ki tur kpanbar,

ki li tee nan sɔbtɔŋanɔ sɔbinii na.

Ki n lamm teen siir nan lin yin.

²Fine tee jafaŋ ki gar jab kur,

ki Yennu teen piisin a paak,

ki a mɔb farik nan maan paku.

³Kpanbar jaann, fine mɔk baakir, ki a yur goon.

⁴Ii be taamm paak kii saa ki saa nyann,

ki guur barmɔnii nan sikin-n-mɔŋ nan kasii binbeŋ.

Ŋaant ki a nuu-ii tuun toonjaana.

⁵A tɔrbann peenii porin,

ŋaant ki lin yek saar a datai parbiia,

digbana niib n baa a taa po.

⁶Naangbouŋ nba ki Yennu tura na saa wei

mɔkmɔk nan mɔkmɔk.

Ki a saa dia a niib nan barmɔnii.

⁷A loon toonŋana, ŋaan ki loon toonbiit,

li paak ki Yennu ganna, ki tura parpeenn,

ki li gar kpanbarlia nba be.

⁸Ki tulaarii nba tee mir nan alos na be a liant paak,

ki yan-yinna yiin yanii ŋaak nba ki bi ŋammir nan loobnyana na ni, ki a mɔk parpeenn.

⁹Kpanbara bonpoi pukin pooburchimm nba be a ŋaak ni na po.

Ki pooyookir na see a naangbouŋ diitu po, ki lia salima liant.

¹⁰Kpanbar pooyookir, gbiintir maa yaa man beta linba:

Tammit a niib po nan a baa ŋaaniib po.

¹¹A fante saa te kpanbar na loona,

turimɔ baakir, kimaan ŋɔɔe tee a chanbaa.

¹²Taya doo ni niib saa baar nan piinii ki tura,

ki mɔkita sii koor a bin maŋ nana.

¹³Kpanbar pooyookir be ŋaak nie,

ki fan bonchiann ki lia salima liant.

¹⁴Ki u saa lia baauŋ nba mɔk gungunbooru kur na,

ki somm saan kpanbar boor,

ki u poochiann sapaan-yɔɔsnba sii be u poor po ki chiantɔ,

ki bi kur saa baar kpanbar boor.

¹⁵Ki bi saa somm nan parpeenn nan parmaasir,

ki saa kɔɔ kpanbar ŋaak.

¹⁶Ki fin nba tee kpanbar na, a saa mar bonjai bonchiann,

ki bi saa set a yeejamm seenu ni kii tee kpanbara,

ki a saa teemm yudamm tiŋ na kur po.

¹⁷N yaŋ saa te ki niib-ii tian a sann yoo kur.

Ki sɔɔ kur saa dont a sann yoo nan yoo.

Yennu be nant

¹Yennu-e tee ti paŋ daanɔ nan ti guutɔɔ,

ki teen siir nan wun sommit daamii ni, yoo kur.

²Li-i lekii tee ki tiŋ damm,

ki jɔjaana baa mɔkgbeŋa nba sumii ni,

³li-i lekii tee mɔkgbeŋa na damm, ki mɔk fuur,

ki li jek kunkona, ŋaan ti kii tiin jaŋmaanii.

⁴Mɔkisiar be ki teen yabint daanɔ Yennu doo nba tee

u kasii binbeboor na parpeenn.

⁵Yennu be doo maŋ ni, ki li kan biiri;

u tuu saa baar ki sommir sanyafaar.

⁶Yennu kunkɔr tant, ki tingbouŋ nann,

ki jaŋmaanii soor niib na, ki digbana baa.

⁷Yabint daanɔ Yennu be nant,

wunba tee Jakɔb Yennu na, ŋɔɔe tee ti gungurboor.

⁸Baat ki tan got Yennu toona.

Gotir yaarlituk toona nba ki u tun tiŋ na paak.

⁹U te tɔbii gbent tingbouŋ na kur po,

ki kɔnii tɔrbana, ki jintir kpana,

ki bia jokit naagbankɔŋa muu,

¹⁰ki yet a, “Nyikin kɔnn man,

ki bann nan mine tee Yennu,

ki saa la dontir digbana kur ni,

ki bia saa la dontir tingbouŋ kur po.”

¹¹Yabint daanɔ Yennu be nant,

wunba tee Jakɔb Yennu na, ŋɔɔe tee ti gungurboor.

Yennu-e tee kpanbarjaann

¹Digbana niib kur n poi niipoouk nan parpeenn,

kii bia kii dont Yennu nan kunkɔpaara.

²Ŋaant ki tin chɔrin yabint daanɔ Yennu nba gar sɔɔ kur na,

ŋɔɔe tee kpanbar jaann nba dia tingbouŋ munn.

³U te ki ti nyann niib na, ki te ki ti dia digbana,

⁴ki gann tiŋ nba ki ti kɔɔ na ki turit,

ki li tee Israel teeb nba ki u loomm na japaat tiŋ.

⁵Yennu do u naangbant paak.

Waa do na ki niib tantir ki peeb naatuna nan parpeenn.

⁶Yinin yaŋ ki dont Yennu, yinin ki dont ti kpanbar maŋ,

yinin donta yanii,

⁷kimaan ŋɔɔ Yennu-e tee tingbouŋ na kur kpanbar,

yinin yaŋ ki dontɔ.

⁸Yennu kar u kasii naangbant paak ki dia digbana kur.

⁹Digbana diateeb kur taan be nan niib nba tee

Abraham Yennu niib na,

kimaan kpanbara nba be tingbouŋ na paak tee Yennu yabe.

U ŋan nan dontir.

Ki jiin Yennu digbanjaann Sayɔnn po

¹Yennu tee yabint daanɔe,

ki ŋan tin dontɔ, u doo nba be u kasii kunkonn paak na ni.

²Sayɔnn tee Yennu kunkonne, li fɔk ki bia ŋan;

kpanbar jaann nba tee Yennu na,

u dooe tee durinya kur parpeenn boor.

³Yennu be doo maŋ ni, ki wann nan yamani benu be u boor.

⁴Ki kpanbara taan leeb ki baar

a bin kɔn nan Sayɔnn kunkonn doo na.

⁵Baa la doo maŋ, ki li yaar litib, ki jaŋmaanii soorib, ki bi chiar,

⁶ki ji jekir nan poo nba tuu mɔ matyiaru na,

⁷ki lian nan wonpaaruk nba tuu tut ŋaringbeŋa

ki li lian biaŋinba na.

⁸Ti gbat ki bia la linba ki yabint daanɔ Yennu tun

doo maŋ niwa.

U sii guu doo maŋ, ki li be li yamani,

nan yoo nba kaa paak.

⁹Yennu, a ŋasaakak niŋe,

ki ti dukii a lomm nba kaa gbennu na po,

¹⁰ki niib kur dontir a sann durinya kur po,

ki a dia a doo nan barmɔnii.

¹¹Ŋaant ki Sayɔnn niib-ii mɔk parpeenn,

ŋaant ki parpeenn-ii be Juda doo ni,

kimaan a buut ŋan.

¹²Yennu niib, ii somm lint Sayɔnn, ki kan li difoot.

¹³Gotir li joona, ki fiitir li maarpaara fanu,

ki tan fit wann maarpaanu nba waa na a,

¹⁴“Yennu na tee ti Yennu-e mɔkmɔk nan mɔkmɔk,

ki sii tee ti ŋmakit-tɔɔ nan durinya gbennu.”

Fi-i teen mɔkint yada, li tee jatiie

¹Sɔɔ kur n gbat na man,

gbiintir, niib nba kur be tingbouŋ na paak,

²li nijaana nan tarii, li mɔkita nan nandamm kur.

³N dudukit be paanu ni, ki n saa pak yanfoon maan.

⁴Ki n saa ŋmat got barjokit ni,

ki faa biɔk ki yin yaŋ ki wann li paak.

⁵Li-i tee ki n datai lintin ki n be ninbɔŋ ni,

n ki tiin jaŋmaanii.

⁶Bi tee binba teen bi mɔkint yada,

ki bia dont bi mɔŋ, bi likirii paake.

⁷Nisaarik kan fit tinn u mɔŋ,

u kan fit pa Yennu, u daauk nba tee biaŋinba,

ki li tee u manfoor paaki,

⁸kimaan nisaarik manfoor paak pann yab bonchiann.

U lekii pa linba, ŋaan li kan jaŋ

⁹nan u ji daa kpenn ki siik kaauk ni.

¹⁰Sɔɔ kur saa la nan yandamm kpenn,

ki jatit kpenn, ki bonliinii bia kpenn.

Bi kur tuu nyik bi mɔkinte ki tur siab.

¹¹Bi kaat saa teen bi ŋei nan yoo nba kaa paak,

ki bi sii be leŋ yoo n tuu yoo,

ŋaan bo mɔk bi yur paak tiniie.

¹²Nisaarik mɔkint kan fit nyinnɔ kuun ni,

u bia lek saa kpoe nan bonkobuk nba kpenn na.

¹³Gotir linba tuun ki teen damm nba teen bi mɔŋ yada,

nan bi leeb nba saak baa piak linba na.

¹⁴Bi saa kpoe nan pei nba kpenn na,

ki kuun sii tee bi kpaartɔɔ.

Binba be kasii na saa nyannib,

ki bi gbanant saa bat yian kpeentiŋ, siaminba fɔk nan bi ŋei.

¹⁵Ŋaan Yennu saa fatin kuun nuu ni,

ki saa jiin, ki mii be u boor.

¹⁶Li-i te ki a la ki nirɔ mɔkitir,

koo u mɔkint maŋ yabitiri, a daa te ki li daamiia.

¹⁷U tan kan fit jii ki saan nann yoo nba ki u kpenni,

u mɔkint na tan kan weiɔ ki saan kaauk ni.

¹⁸Nirɔ numm-i lekii gboo waa mɔk linba,

ki niib kpakitirɔ, u mɔkint na paaki,

¹⁹u lek tan saa kpoe ki wei u yeejamm,

ki kan ban la yentu.

²⁰Nisaarik-i mɔk mɔkint ŋaan ki mɔk bannu,

u bia lek saa kpoe nan bonkobuk nba kpenn na.

Ki jiin barmɔnii Yenjiantu po

¹Yabint daanɔ nba tee Yennu na piak.

U yi tingbouŋ na kur,

laa nyii yondo po ki saa tuu yonbaa po.

²Yabint Yennu yentu nyi Sayɔnn doo nba fan na ni.

³Ti Yennu baate, ŋaan u kan baar soon nna,

muu sii die ki be u tɔɔnn, ki wonpaaruk da ki lintirɔ.

⁴Ki u saa yiin sanpaak nan tiŋ ki bin di siara,

ki la waa saa bu u niib buut biaŋinba.

⁵U yet a, “Taant niib nba ŋamm bi mɔŋ na ki turin,

binba mann maruŋ ki senn mɔsonn nanin.”

⁶Sanpagbant mɔɔntir nan Yennu-e tee Kasii Daanɔ,

ki saa bu buut.

⁷“N niib, gbiintir, ki man pak.

N niib Israel teeb, n saa di siara ki biiri.

Mine tee Yennu, ki tee i Yennu.

⁸N ki yakii nani i maruŋ paak,

koo i mujoonu piinii nba be n tɔɔnn po na paak kaa.

⁹N ki loon naajai nba be i naagɔtit ni,

koo buunii nba be i buloi ni na,

¹⁰kimaan bonkobit nba kur be muuk ni na tee n yabe,

nan nei nba kur be kunkona tusaa paak na.

¹¹Nɔɔnii nba kur be tee n yabe,

ki bonfoa nba kur be muuk ni na tee n yabe.

¹²“Kom-i bonni mɔkin, n bo kan betini,

kimaan durinya nan linba kur be li ni tee n yare.

¹³N ŋman naajai nantii? Koo n nyu buunii sɔmii?

¹⁴Ii ŋaan ki i niipoturu-ii tee i maruŋ ki teen min Yennu,

ki bia tuu tur min Yabint Daanɔ linba kur ki i senn mɔsonn.

¹⁵Ii tuu yiin min Yennu yoo nba ki i la daamii,

ki n saa fati, ki i sii baakitin.”

¹⁶Yennu yeen nɔɔnbiit damm a:

“I la yaak lee ki sii piak n sennu po?

Bee ki i sii piak n mɔlor po?

¹⁷I ki sak nan min ŋmakiti, ki yêt n sennu.

¹⁸Nanyukii nba kur ki i lab, ki i sob yɔɔs,

ki pukin i mɔŋ bonchonchona ni.

¹⁹“I teen siir nan mabiit pakue, ki i mɔi farik nan faak,

²⁰ki teen siir nan yin pak ki biir i tiɔŋ ninjamm,

ki paab maan.

²¹I tun linba na kurawa, ŋaan n ki yet siari,

ki i ji dukin nan n mun tee nan yimm nae.

Mɔtana, n saa yakii naniwa, ki kat wanni, i numm ni.

²²“Gbiintir linba na man, yimm nba yêtin na,

nna-i kaa, n saa boontiwa, ki sɔɔ kii be ki saa tinniini.

²³Niipoturue tee maruŋ nba baakitin,

ki n set saa tinn binba kur saak n mɔb.”

Yenmiaru nba jiin nyikin chab po

¹Yennu, tinimin ninbaauk,

kimaan a lomm nba yɔɔ be na paak.

A wuur n yanbɔmm nan biit kur,

kimaan a ninbatinchiɔŋ na paak.

²Wuutin fanu, ki man nyi yanbɔmm nan biit kur ni.

³N bann nan n be yanbɔmm nan biit nie yoo kur.

⁴N tun ki biirawa, n biir fin kuukɔɔe,

ki tun linba ki a yaa li tee bonbiir na ki tura.

Li paak, a mɔk mɔnii nan fan bu n buut.

N kan nyiira, li-i tee ki a biirin.

⁵N din tee yanbɔndaanɔe yoo nba ki bi marin na,

ki bia tee biit daanɔ yoo nba ki bi din soor n poor nawa.

⁶A kpaan mamɔmm nan barmɔniie nisaarik ni.

Kɔɔnt a bannu n dudukit ni.

⁷Nyint n yanbɔmm ki mii yeen,

a wuurin ki mii peen nan sakaana na.

⁸Ŋaant ki man gbat parpeenn nan parmaasir fuur,

faa lek kɔnn n kpabawa na, ŋaan n bia sii mɔk parpeenn.

⁹Bɔrin a numm ki daa laat n yanbɔmmi,

ŋaan wuur n biit kur.

¹⁰Yennu, ŋammit n par ki lii ŋan,

ki pant n seek nan binbenŋaŋ.

¹¹A daa beer ki nyintin a boor,

koo ki nyinn a Seyeeŋ na n ni.

¹²A ŋamm turin a tinnu kpinkpammuk na,

ki te ki mii loon a mɔsaku.

¹³Ki n saa wann yanbɔndamm a sennii,

ki bi saa jen a boor.

¹⁴Yennu, nyikin n manfoor ki tinnin,

ki n saa jii parpeenn ki mɔɔnt a kasii binbeŋ.

¹⁵Yennu, lootir n mɔb, ki man pak dont a sann.

¹⁶A ki loon maruŋ, nna-i kaa, n bo saa jiie ki tura.

A baka bia kaa mujoonu piinii ni.

¹⁷Yennu, n maruŋ tee sikin-n-mɔŋ binbeŋe.

Ki a kan yêt daanɔ nba sikin u mɔŋ ki lebit u pari.

¹⁸Yennu, tinin Sayɔnn doo ninbaauk ki sommir,

ŋammit maa Jerusalem joona.

¹⁹Ki li saa te ki a mɔk parpeenn nan maruŋ nba ŋan,

nan mujoonu piinii,

ki bi sii kpi naajai ki mann maruŋ, a binbintir na paak.

Yennu buut nan u ninbatinu

¹Bee ki a dont a mɔŋ nan toonbiiti, fin nijaann na?

Yennu lomm be-e mɔkmɔk nan mɔkmɔk.52.1 Koo “Bee ki a dont a mɔŋ daa kur ki saa di fei Yennu boori?”

²A lorin a fan biir leeb, ki a mɔb di nan bilepaann na,

ki a fa fai,

³ki loon bonbiir ki gar bonŋann, ki loon faak ki gar barmɔnii,

⁴ki loon faak nba saa pak ki biir a leeb, faak daanɔ na.

⁵Barmɔnii, Yennu saa biirae fas fas;

u saa soorae ki dat nyinna a ŋaak ni;

u saa nyinna nisaarii tiŋ na ni,

⁶ki niŋamm saa la linba na ki tin jaŋmaanii,

ki bi saa laa laat ki yet a,

⁷“Gotir, jɔɔ nba nae ki jii u mɔŋ tur Yennu,

ŋaan maa u mɔkint paak, ki dukii nan nɔɔnbiite saa sommɔ.”

⁸Min ŋarin tee nan kpan tiik nae, ki see Yennu ŋasaakak ni.

N yada yɔɔ be u lomm nba be mɔkmɔk nan mɔkmɔk na nie.

⁹Yennu, n sii tun ki teena niipoouko,

faa tun linba ki turin na paak,

a sann nie ki n mɔk dindann, kimaan a sann ŋan,

ki n saa dont a sann maŋ, a niib tɔɔnn.

Ki jiin nisaarii nɔɔntont po

(Yaŋ 14)

¹Jatit dukii bi para ni a, “Yennu kaa.”

Sɔɔ kur tee niyoonne, ki tun bonbilankanta,

sɔɔ kaa ki tuun linba tooki.

²Yennu be sanpaapo ŋaan gorii nisaarii,

a wun laan siab be ki sub, ki bia jiantirɔ-ɔ?

³ŋaan bi kur ŋmante ki tuun toonbiit,

ki bi sɔɔ kaa ki tuun linba ŋan, nan yenɔkɔɔwa gbaa.

⁴Yennu boi a, “Bi ki mi-i?

Toonbiit damm maŋ ki mi siari-i?

Bi di n niib nan nirɔ nba tuu di jeet nae,

ki bia ki meimi.”

⁵Jaŋmaanii bia saa ŋamm soorib ki gar baa tuu mi biaŋinba.

Yennu saa kpi u niib datai ki yat bi kpaba.

Yennu yêtibe, ki saa te ki Israel teeb na n nyannib.

⁶N mei Yennu-e a nyannu n nyi Sayɔnn

ki baar u niib Israel teeb paak.

Yoo nba ki Yennu saa te ki Israel teeb na n mɔkit na,

bi tan sii mɔk parpeenn bonchiann.

Yenmiaru nba jiin datai gɔɔru po

¹Yennu, jiin a paŋ ki tinnin, jiin a paŋ na ki ŋaan yann.

²Yennu, gbatir n miaru, ki gbiint n mɔmaan.

³Karinbaandamm fiir n paaka, ki nitont koor a bin kpin;

ŋamme tee binba baka kaa nan fin Yennu na.

⁴Ŋaan barmɔnii, Yennu-e tee n sommtɔɔ.

Ti Yomdaanɔe tee n fat-tɔɔ.

⁵Yennu n te ki n datai na toonbiit n ŋmat kii tee bi tubdatu.

U saa boontib, kimaan u kasii binbeŋ na paak.

⁶Yennu, n saa mann parpeenn maruŋo ki tura.

N saa pak ki dont a sann, kimaan a ŋan.

⁷A nyinnin n daamii kura niwa, ki n la ki n datai baa.

Jɔɔ nba ki u naasinyɔɔk fukit u paak na Yenmiaru

¹Yennu, gbiintir n miaru;

a daa lekin a numm n fabinii na paaki.

²Gbiintir, ki turin gatu; n dudukit bak nan daamiiwa.

³Ki jaŋmaanii mɔkin nan n datai nba jeentin na.

Ki nɔɔnbiit damm goriin ninŋmiɔŋ,

ki baat nan daamii ki teenin, ki dont wutoor nanin ki namin.

⁴Ki n yan put ki ŋmat, ki n nubir kuun;

⁵ki jaŋmaanii te ki n jekir nan yanputuk,

⁶ki n ji sunman ki n mɔk kpinkpant nan ŋmann na

ki bo yukir ki saan banfɔkir ki saa foi.

⁷N bo saa yukire ki saan banfɔkir,

ki saa ŋamm n binbeboor muuk ni.

⁸N bo saa kakite ki faa lanbouŋ

ki nyi wonpaaruk nba baat na ni.

⁹Yennu, ŋmatir nɔɔnbiit damm na pinpakit,

kimaan n laat kunkɔna nan kpikpiruk doo ni.

¹⁰Ki yonnu nan nyiɔk kur ki bi lin doo na ni,

ki tuun toonbiit, ki bia sukii niib ki daamiib.

¹¹Ki biiru be siar kur po doo na ni,

ki li sɔnii gbee nan fat-teeb nan fai damm.

¹²Li-i bonni tee dataakie sukiin, n bo sii ŋmine,

li-i bonni tee ki n dataakie want u mɔŋe,

n bo saa bɔr n mɔŋe ki u kan lami,

¹³ŋaan li tee fine, nisaarik nan min na,

ki tee n lɔɔ, n yɔnanmɔŋ.

¹⁴Ki min nan fin tuu lakin mɔk pinpakit nan leeb

ki lakint ki jiantir Yennu, u ŋasaakak ni.

¹⁵Ŋaant ki n datai n kpo yian,

ŋaant ki bin piib foot kaat ni,

kimaan toonbiit gɔrin ŋaan dɔɔ bi boore.

¹⁶Ki n yiin n Yomdaanɔ Yennu ki boi sommir po,

ki u saa tinnin.

¹⁷Li daajoouk, nan sanyiɔk, nan yonsuuk ni kur,

ki n bui fabin ki teenɔ, ki u gbia n kunkɔr.

¹⁸Maa tookit tɔb nba na, u saa te man jen nan laafia,

datai bonchiann nba lek kɔn nanin na.

¹⁹Yennu nba bo tee kpanbar pinpiik niwa na

saa gbat n miaru ki nyannib turin,

kimaan bi yêt bin lebit bi binbeŋa, ki bia ki tiin Yennu.

²⁰N yɔkperik lek u yɔɔsnba,

ki biir mɔlor nba ki u lor namm na.

²¹Ki u mɔb ban ki gar kpan,

ŋaan ki naŋ gbee u para;

ki u mɔmaan ŋarii ki gar kpan,

ŋaan porii yian nan jukbanjai na.

²²Jiin a daamii kur ki tur Yennu, ki u sii guua;

u kan ban te ki binba be fanu na n baa.

²³Yennu, fine saa sikin nikpiirit nan fai damm na bi kaat ni;

a kan te ki bii be ki baar bi manfoor bonjinni.

Min ŋarin, fine ki n teena yada.

Yenmiaru nba jiin yada teenu po

¹Yennu, tinimin ninbaauk, kimaan niib mukisime.

N datai diinime yoo kur.

²Ki n sanbiirteeb mukisin daa kur, ki niib bonchiann kɔn nanin.

³Yabint daanɔ Yennu, mi-i tiin jaŋmaanii yoo nba,

fine ki n saa teen yada.

⁴N teen Yennu-e yada ki ki mɔk jaŋmaanii,

ki dontir u sann, kimaan u mɔsonn na paak.

Nisaarik saa fit teenin bee?

⁵Daa kur ki n datai labii n maan,

ki yɔɔ dukii baa saa teen biaŋinba ki biirin.

⁶Ki bi taant leeb ki bɔriin,

ki gorii n sommir ni, nan baa saa teen biaŋinba ki kpin.

⁷Yennu, bi biit na paak, a dat bi tuba,

ki nyann niib maŋ nan wutoor.

⁸A mi n fabinii nba tee biaŋinba,

ki la n ninnyuut kann nba tee biaŋinba,

ki sɔb teen a gbouŋ ni.

⁹Daar nba ki n saa boia sommir po na, n datai saa baae.

Ŋanne ki n saa bann nan fin Yennu taa n po.

¹⁰Yennu, a mɔsonn paake ki n dontira.

¹¹Yennu, fine ki n teen yada, n kii tiin jaŋmaanii.

Nisaarik saa fit teenin bee?

¹²Yennu, n saa tura mɔsonn nba ki n sat nae.

N saa tura niipoouko,

¹³kimaan a nyinnin kuun niwa, ki guun, ki n ki gbiatir,

ki n saa somm nan fin Yennu, kii be a manfoor yentu ni.

Yenmiaru nba jiin sommir po

¹Tinimin ninbaauk, Yennu, tinimin ninbaauk,

kimaan a niŋe ki n seek gur.

A kpinkpant maasue ki n laat fatu,

daamii nba tuu baarin nan laa tuu tan gar.

²N fabin ki tur Yabint Yennu,

Yennu nba teenin linba kur ki n loon.

³U saa toon Yendɔuŋ ni ki tinnin, ki nyann n datai.

Yennu saa turin u lomm nan u barmɔnii.

⁴N datai lintima, ki naan nan yanbɔra nba so niib na,

ki bi nyana tee nan kpana nan tɔrbann peenii na,

ki bi jerima di nan jukbanjai na.

⁵Yennu, want a yabint sanpagbant ni,

ki ŋaan a baakir-ii be tingbouŋ na kur po.

⁶N datai lu laauŋo a bin soorin, ki n be nan parbiir,

ki bi gbii bootuk, sɔnu nba ki n tɔkii na ni,

ŋaan ki bi mɔŋ tan baa li ni.

⁷Yennu, n be nan parcheenne; n saa yin yaŋ ki donta.

⁸N seek, fiit ki faa kɔnn nan bonmumɔɔt.

N saa fiir sanyafaare ki faa.

⁹Yennu, n saa pak a sann, digbana kur ni.

N saa yin yaŋ ki tura, niib kur boor,

¹⁰kimaan a lomm yab ki saa tuu sanpaak,

ki a kasii binbeŋ bia tuu sanpagbant.

¹¹Yennu, want a yabint, sanpagbant ni,

ki ŋaan a baakir-ii be tingbouŋ na kur po.

Yenmiaru nba saa te Yennu n dat nɔɔnbiit damm tuba

¹Yimm nba tee yudamm na, i bu buut fanu-u?

I bu buut nan barmɔnii ki teen sɔɔ kuri-i?

²Aaii, i dukii toonbiit nba ki i saa tun na kɔɔe,

ki tuun ki biir leeb tiŋ na paak.

³Toonbiit damm fiir bi bisin niŋewa,

ki fa fai nan bi manfoor gbennu.

⁴Ki bi mɔi gbee nan lɔbiie, nan waalabirii yar na,

ki kpaa bi tuba nan waajiant nba kpaa bi tuba biaŋinba na,

⁵ki ji kan gbat daanɔ nba maŋit wai para na yeriki,

daanɔ maŋ-i lekii sub biaŋinba.

⁶Yennu, a faa kɔnn nibiit maŋ nyana.

⁷Ŋaant ki bin bot nan nyun nba tuu fɔɔr na;

bi-i dat bi tɔrbana yoo nba, fan ŋaan ki bi peenii na n gbitik.

⁸Bi-i saa, bii tee nan jayeruk nba tuu saa ki mian na,

kii bia kii tee nan sanpantik nba ki bi tuu marɔ kpeent

ki u ki la yentu na.

⁹Bi tuu tan bant na, ki sɔɔ ki bi chɔɔb nan mɔɔt nawa;

Yennu saa pebirib ki yaat namm nan u wutoor,

baa lek be bi manfoor ni gbaa.

¹⁰Kasii damm sii mɔk parpeenn,

li-i tee ki bi la yanbɔndamm be tubdatu ni,

li yooe ki bi saa somm toonbiit damm sɔn ni.

¹¹Ki niib ji saa yet a, “Barmɔniie, kasii damm gaan bi paatii;

barmɔnii, Yennu nba bu tingbouŋ na buut na set be.”

Yenmiaru nba jiin fat-n-mɔŋ po

¹Yennu, nyintin n datai nuu ni.

Gɔɔt datai nba fiir n paak na.

²Nyintin toonbiit damm boor, ki tinnin nikpiirit nuu ni.

³Gotir baa dɔɔ ki guu biaŋinba, a bin kpin.

Toonbiit damm tikii a bin biirin.

Li ki tee a n tun yanbɔmm koo ki biir siar kaa.

⁴N ki tun ki biir siari, ŋaan ki bi tee siir a bin lekin.

Fiit ki sommin. Gotir n ninbaatir.

⁵Yabint daanɔ Yennu, wunba tee Israel teeb Yennu,

fiit ki dat binba ki jiantira na tuba;

a daa tiin toonbiit damm ninbaauk.

⁶Bi tuu tan ŋmat ki jen daajoouk, ki kɔɔ doo ni,

ki ŋmuut nan bɔi nae ki lin.

⁷Gbiintir sukit nan mabiit nba nyi bi mɔi ni.

Ki bi jerima tee nan jukbanjai na ki nyi bi mɔi ni,

ki bi dukii nan sɔɔ ki gbia baa yeen linba na.

⁸Yennu, fin ŋarin laabe, ki sarikit binba ki jiantira maŋ.

⁹Yennu, n mɔk parcheenn a paŋ niŋe; fine tee n gungurboor.

¹⁰Yennu loonin ki saa baar n boor,

ki te ki man nyann n datai.

¹¹Yennu, a daa kpibi.

Li-i tee ki a kpiib, n niib saa tamm bi tubdatu na poe.

A yatib nan a paŋ ki bii lin, ki fan nyannib,

fin Yennu nba tee ti guutɔɔ.

¹²Yanbɔmm be bi para ni, ki bi mɔmaan kur tee biit.

Ŋaant ki bi moindib, kimaan bi sat mɔtont ki bia fa fai.

¹³A boontib nan a wutoor, ki boontib fas fas,

ki sɔɔ kur n bann tingbouŋ na kur po

nan fin Yennu-e dia Israel teeb,

ki a paŋ bia yat be tingbouŋ na kur po.

¹⁴N datai tuu tan jen daajoouk ki kɔɔ doo ni,

ki ŋmuut nan bɔi nae ki lin

¹⁵nan bɔi nba tuu lin ki kpaan jeet biaŋinba na,

ki mɔ, li-i tee ki bi ki dii jaŋi.

¹⁶N saa yin yaŋ ki jiin a paŋ po,

sanyiɔk ni kur, n saa yin yaŋ sanpaapo

ki jiin a lomm nba kaa gbennu na po,

kimaan fine tee n gungurboor,

ki tee n bunbɔr boor yoo nba ki n be daamii ni.

¹⁷N saa yin yaŋ ki dont a sann; n paŋ nyi a boore.

Yennu-e tee n gungurboor, ki tee Yennu nba loonin.

Yenmiaru nba jiin fatu po

¹Yennu, a yêtita, ki te ki ti baa.

A donn wutoor ti paaka; mɔtana, jiantir ki tinnit.

²A te ki tiŋ na jeke, ki a lootir yaan.

Li paak, a teb li fiat, kimaan li bɔkit dɔɔe jiak jiak.

³A te ki a niib dii fara bonchiann

ki te ki ti ŋmaan gbeŋit nan ti yib daan na.

⁴Ki binba baakita na, ki a teemm kpaanii,

a bin tan nyi biiru ni.

⁵A tinnit nan a paŋ, ki turit gatu,

ki lin te binba ki a lomm na n la woruku.

⁶Yennu be u kasii boor ki yet a,

“N saa jii nyannu ki bɔkit Sekem doo,

ki biit Sukof baauk ki tur n niib.

⁷Gilead yent tee n yare,

ki Manase yent bia tee n yar.

Efraim yent tee n kut fokirike,

ki Juda yent tee n naan dammir.

⁸N saa jii Moab teebe ki bii tee tatilaauk nba

ki n sii sokii bona li ni,

ki sii birin n taasaat Edom yent ni,

ki li sii tee nyinn nan mine yen yent maŋ,

ki hoot man nyann Filistia teeb na paak.”

⁹Ŋmee saa jiin ki saan nanin digbanpaarir na ni?

Ŋmee saa jiin ki saan nanin Edom yent ni?

¹⁰Yennu, a set yêtite-e?

A ji kii be nan ti kunkɔnkɔnna na-a?

¹¹Turint sommir ki tin nyann ti datai,

kimaan nisaarik sommir tee yann na.

¹²Yennu-i be nant, ti saa nyanna;

u saa nyann ti datai ki turita.

Yenmiaru nba saa gɔɔr bonbiir

¹Yennu, gbatir n fabinii, ki bia gbiint n miaru.

²N be parbiir nie, ki bia fɔk nan ŋaak ki yia.

Jiimin ki saan gurin siaminba ŋan ni,

³kimaan fine tee n sommtɔɔ,

ki tee joonpaarir nba leek n datai.

⁴Ŋaant ki mii be a kasii boor nan n manfoor gbennu;

ŋaant ki mii gur a kpinkpant maasu.

⁵Yennu, a gbat mɔsona nba ki n sat nawa,

ki turin bona nba ki a teen niib nba baakita na.

⁶Pukint kpanbar na manfoor bina bonchiann;

ŋaant ki u naan-ii be mɔkmɔk nan mɔkmɔk.

⁷Yennu, ŋaant ki wuu tee kpanbar kii be a tɔɔnn

nan yoo nba kaa gbennu.

Guutɔ nan a kasii binbeŋ nan a lomm nba kaa gbennu na.

⁸Ki n sii tun yiin yanii ki dontir a sann,

ki bia sii yɔɔ teena piinii nba

ki n senn mɔsonn li po na daa kur.

Yennu-e guut

¹N tee soonnae ki guu maa Yennu n tinnin,

u niŋe ki n tinnu saa nyi.

²U kuukɔɔe guun, ki bia saa tinnin,

ŋɔɔe tee n sommtɔɔ, ki n kan ban baa.

³I saa lek jɔɔ ki lin wei nlee?

I kur na saa taan ki nyiauwa-a?

U kaa paŋ nan joonkpeeuŋ nae.

⁴Yimme loon yin sikin u jirima,

ki fa fai ki li mani, ki piak nyint piisin mɔmaan,

ŋaan ki i para ni, ki i sat mɔtont ki teenɔ.

⁵N maa Yennu kuukɔɔ paake, u niŋe ki n mɔk dindann.

⁶U kuukɔɔe guun, ki bia saa tinnin,

ŋɔɔe tee n sommitɔɔ, ki n kan ban baa.

⁷N tinnu nan baakir saa nyi Yennu boore,

ŋɔɔe tee n guutɔɔ nba ŋan, ki tee n gungurboor.

⁸N niib, teent Yennu yada yoo kur,

ki betɔ i daamii kur, kimaan ŋɔɔe tee ti sindandiiuk.

⁹Nisaarik tee nan wamaasin nae,

li nijaana nan tarii kur kaa nyɔɔti.

Fi-i jiib ki paan bikir paak, bi ki mɔk kpiasu,

ki fukii nan wamaasin na.

¹⁰A daa tee yada a fatuk ni,

a bia daa mɔk japaat nanyuk bona paaki.

A mɔkint-i lekii pukin biaŋinba, ŋaan a daa maa li paaki.

¹¹N gbat ki Yennu yet nan taar munŋaa nawa,

a paŋ tee u yare,

¹²ki u lomm kaa gbennu.

Barmɔnii, u saa pa sɔɔ kura u paauk

nan u toona nba tee biaŋinbae.

Ki jiin waa loon Yennu biaŋinba po

¹Yennu, fine tee n Yennu. N loon fine.

Nan tinkooŋ nan tinsaatik nba tuu loon nyun na,

nnae ki n gbanant nan n seek kur kpenn a paak.

²Ŋaant ki mii laata a kasii binbeboor,

kii bia kii laat a yabint nan baakir nba tee biaŋinba.

³A lomm nba mɔk nyɔɔt ki gar manfoor na,

li paak ki n saa dont a sann.

⁴N manfoor ni kur, n saa dont a sanne.

N saa donn n nii ki miara.

⁵N seek saa di jeŋant ki gboo,

ki n mɔb saa yin parmaasir yanii ki dont a sann.

⁶Ki mi-i dɔɔ n dɔɔnu paak, n sii tian a po;

nyɔtunmunn n sii dukii a po,

⁷kimaan a tun tee n sommtɔɔe;

ki n sii be a kpinkpant maasu ki yin parpeenn yaŋ.

⁸N taab nana, ki a nuu dian ki tinnin.

⁹Binba koor a bin kpin na saa sik kpeentiŋ.

¹⁰Bi saa kpib tɔbii ni, ki kinkata saa ŋman bi gbanant.

¹¹Yennu nba saa tur kpanbar nyannu na, u sii kpamme.

Binba sent mɔsona Yennu sann ni na saa dontɔ;

ki binba fa faak na saa pɔbin bi mɔi kii ŋmin.

Yenmiaru nba saa gɔɔr bonbiir

¹Yennu, gbatir n miaru, n be daamii niŋe.

Gɔɔt n datai ki bi daa nyint n manfoor.

²Guutin, ki min nyi nɔɔnbiit damm lora ni

nan toonbiit damm tintaanu ni.

³Bi ŋat bi jerima, ki li di nan jukbanjai nae,

ki bia nyint bi mɔbonbiit, ki li tɔ nan tɔrbanpeenii na,

⁴ki kakii ki mɔɔntir bi faak maan nba tee fei

ki dia sanbiiuk ki biir niŋamm,

⁵ki korin leeb nan lorbiit,

ki bikii baa saa pii bi barit siaminba,

ŋaan yaa, “Ŋmee saa lati?”

⁶ki lorin lorbiit, ki yaa, “Ti lor ki soor linba ŋane na.”

Barmɔnii, nisaarik par nan u dudukit tee linba sumiie.

⁷Yennu saa yekib u peenii, ki li saa turib danii yiama.

⁸Yennu saa biirib, kimaan bi mɔbonbiit na paak,

ki binba kur saa lab saa pak bi yura,

⁹ki jaŋmaanii saa soor nisaarik kur,

ki bi saa mɔɔnt Yennu toona nba tee,

ki bia dukin waa tun toona nba.

¹⁰Ki niŋamm kur sii kpamm

nan toonŋana nba ki Yennu tun.

Bi saa la gungurboor u nie,

ki binba kur para yeen saa dont u sann.

Ki jiin dontir nan niipoturu po

¹Yennu, li ŋan ki tin dont a sann Sayɔnn doo ni.

Fine ki ti saa jii ti mɔsona ki tura,

²kimaan fine gat miaru,

ki niib nba be lokir kur po saa baar a boor.

³Taa bo be yanbɔmm ni na, ki a bo nyik chab ti biit.

⁴Damm nba ki a gannib na, parpeenn tee bi yare;

ŋamme tee binba ki a baar namm a bii be a kasii boor na,

ki ti saa gboo nan bonŋana nba be a ŋaak ni na,

ki tee piisin nba be a kasii ŋasaakak ni na.

⁵Yennu nba tee ti tinntɔɔ, a teent gatu,

a bakitnauŋ toonŋana ni,

Niib nba be durinya kur po,

nan binba be mɔkgbeŋa pootir, banfɔkira na,

bi kur maa a paake.

⁶Fine bir jɔjaana nan a paŋ,

ki wann a yabint paŋ nba tee biaŋinba.

⁷Mɔka nyunpana nba fi biaŋinba, ŋaan fine te ki li baŋit,

ki fit so nyunpana fuur;

ki niib-i tɔɔ jat paak, fine fit sikint bi wutoa.

⁸Durinya niib kur mɔk jaŋmaanii,

toongbeŋa nba ki a tun na paak,

ki toona nba ki a tun na te parpeenn fuur be

tingbouŋ na kur po.

⁹A baka be tiŋ na paak, ki te saak baa,

ki bia te ki li mɔk koorin, ki kpai.

Ki a gbeen bi kpennii nyun, ki te ki tiŋ na naan jeet.

Faa tun biaŋinbae na:

¹⁰a te saak baa yoo kur kpaant ni,

ki nyun borikit tiŋ na;

a te samimmiiuk baa ki maant tiŋ, ki te bonbuburit kur pia.

¹¹Ki a te jeet naan binn kur ni,

ki tii saan siaminba kur, ki jeet be li kura po.

¹²Ki bonkobit kpinkpaar boor gbee nan bonkobit,

ki kunkona na gbee nan parpeenn,

¹³ki bonkob-kpaaŋ na gbee nan pei,

ki baat na mun gbee nan jeet;

ki bona kur kpamm ki yiin yanii nan parpeenn.

Ki jiin dontir nan niipoturu yaŋ po

¹Tingbouŋ na niib kur n pak Yennu,

ki yikin nan kpinkpammuk,

²ki yin yaŋ ki baakit u sann,

ki turɔ dontir nan baakir,

³ki yet Yennu a, “Toona nba ki a tuun na teen bakitnauŋ.

A paŋ yab bonchiann,

ki li te ki a datai gbaa a tɔɔnn nan jaŋmaanii.

⁴Sɔɔ kur nba be tingbouŋ na ni jiantira.

Bi yiin yanii ki dontira. Bi yiin yanii ki dontir a sann.”

⁵Saana man ki tan got linba ki Yennu tun.

U tuun bakitnauŋ toona, nisaarik yaa paak.

⁶U te ki mɔkgbeŋir kpant tinkooŋ,

ki ti yeejamm somm tiŋ maŋ ni ki poot.

Ŋanne ki ti ji kpamm waa tun nna maŋ.

⁷Yennu-e dia durinya nan u paŋ,

ki u ninbina gorii digbana kura,

Mɔyêtdamm daa fi ki tookitɔ.

⁸Digbana niib kur n pak Yennu man;

Ii ŋaan ki niib n gbat i dontir fuur.

⁹U te ki ti mɔk manfoor, ki guut, ki ti ki baa.

¹⁰Yennu, fine bikint na;

a bikint nan saauk daanɔ nba tuu pur kut biaŋinba nae.

¹¹A te ki ti sik baruk ni, ki bia nyakin jik-kpiasir ti poor po,

¹²ki te ki ti datai diint,

ki ti somm ki gar muu nan nyunmɔna ni;

mɔtana, a ji baar nant siaminba ki manu bewa.

¹³N saa baar nan mujoonu piinii a ŋaak ni.

N saa tura linba ki n senn mɔsonn nan n saa tura na.

¹⁴Maa bo be daamii ni ki sat mɔb

nan n saa tura piinii nba na, see ki n tura.

¹⁵N saa baar nan pei ki lin joo muu a maruŋ binbintir na paak.

N saa baar nan naajai nan buunii ki mann maruŋ,

ki li munyuuk saa do sanpagbouŋ ni.

¹⁶Yimm nba kur tiin Yennu jaŋmaanii na,

baat man ki tan gbiint, ki n saa beti waa tun linba ki turin.

¹⁷N bui fabin sommir po, ki dontirɔ nan yanii.

¹⁸Li-i bonni tee ki n ki fiit n yanbɔmm,

Yennu bo kan gbiint ki turimi.

¹⁹Ŋaan barmɔnii, Yennu gbat ki turima, ki gbiint n miaruwa.

²⁰Paku tee Yennu yare, kimaan u ki yêt n miaru;

u bia ki yêt wun turin u lommi.

Niipoturu yaŋ

¹Yennu, a tinit ninbaauk, ki teen piisin ti paak,

ki gotit nan burchint,

²ki lin te durinya teeb kur n bann a yanbɔɔt,

ki bia te digbana teeb kur n la a tinnu.

³Yennu, ŋaant niib n donta, ki bia te niib kur n paka.

⁴Ŋaant ki digbana teeb-ii mɔk parpeenn

ki yin yanii nan kpinkpammuk,

kimaan a bu niib buut nan barmɔnii,

ki bia ŋmakitir digbana kur tingbouŋ na paak.

⁵Yennu, ŋaant niib kur n donta, ki bia te niib kur n paka,

⁶ki li saa te tiŋ na n nan jeet.

Yennu, fin nba tee ti Yennu na, teen piisin ti paaka.

⁷Yennu saa teen piisin ti paak,

ki tingbouŋ na niib kur saa baakɔ.

Dontir nan niipoturu yaŋ

¹Yennu, fiit ki te ki a datai n yat,

ŋaant ki a datai n chiar ki yaat a boor.

²A pebirib ki yatib nan wouŋ nba tuu pebir munyuut

ki yatir biaŋinba na,

ki te biit damm na n bot fin Yennu boor,

nan kpan nba tuu kpian muu ki nann biaŋinba na.

³Niŋamm na ŋarin-ii mɔk parpeenn,

kii kpamm Yennu tɔɔnn.

Bii mɔk parpeenn kii yikin nan kpinkpammuk.

⁴Yinin yanii ki tur Yennu, yinin ki dont u sann,

yinin ki dont daanɔ nba jaak sanpagbouŋ paak;

ki u sann tee Yennu na. Ii mɔk parpeenn u tɔɔnn.

⁵Yennu nba be u kasii ŋasaakak ni na,

u baka be kpeebii nan pakɔi po, ki u goriib.

⁶U teen binba ki mɔk kunkɔɔ boor na ŋei, ki bi kɔɔ,

ki nyint dansarkɔɔra, ki bi be nan parpeenn,

ŋaan binba tee mɔyêtdamm na sii kɔɔ tiŋ nba saat nie.

⁷Yennu, yoo nba ki a din ŋmakit a niib

ki somm gar namm kunkoouk paak na,

⁸tingbouŋ din jeke, ki sanpagbouŋ loot, ki saak baa,

kimaan fin Yennu nba yen Sainai jɔɔr na din baate,

fin nba tee Israel teeb Yennu na.

⁹Yennu, a din te saak baa bonchiann,

ki ŋamm pant tiŋ nba bo saat na.

¹⁰Ki a niib jii tiŋ maŋ ki teen bi doo.

Yennu, a ŋant paak, ki a teen talas damm linba ki bi loon.

¹¹Yennu tur u sennu, ki poob bonchiann mɔɔnt maan maŋ a,

¹²“Kpanbara nan bi kunkɔnkɔnna chiar yaat.”

Ki poob nba be ŋei ni na biit mɔkint nba ki bi chiar

ŋaan nyik na,

¹³ki li tee ŋmana ki bi nan ki jii salimpeena ki taanir,

ki jii salimmɔna ki teen bi kpinkpant paak na.

Bee ki i siab biar be pei sinsuuk ni tɔb daari?

¹⁴Yoo nba ki Yabint Yennu din yat kpanbara

tiŋ na paak na,

li din tee nan sakaana nba baa Salmonn kunkonn paak nae.

¹⁵Basann jɔɔt tee jɔjaanae ki tee porik porik.

¹⁶Bee ki jɔjaana nba porin na fumm nan kunkonn nba

ki Yennu gann ki sii be leŋ nan yoo nba kaa paak na?

¹⁷Yennu saa jii taantorit tusbamm,

ki nyi Sainai jɔɔr paak, ki kɔɔ u kasii binbeboor.

¹⁸U saa jii binba ki u nyann ki soorib na,

ki do namm sanpaapo, ki saa gaar piinii niib boor,

niib nba tee mɔyêtdamm na gbaa, u saa gaar bi piiniiwa.

Yabint Yennu, a sii be leŋe.

¹⁹Pakin Yennu, wunba jikin ti jik-kpiata daar n tuu daar na;

u tee Yennu nba saa tinnite.

²⁰Ti Yennu-e tee Yennu nba saa tinnit,

ŋɔɔe tee Yennu, ki tee ti Yomdaanɔ ki nyintit kuun ni.

²¹Barmɔnii, Yennu saa yeer u datai yura,

ŋamme tee binba yɔɔ be bi yanbɔmm sɔnu ni na.

²²Yennu yet a,

“N saa nyinn i datai Basann ki jen namm,

ki bia nyinnib mɔkgbeŋa ni ki jen namm,

²³ki te yin somm bi sɔn ni,

ki bia te ki i bɔi n lenii bi sɔn, baa loon biaŋinba.”

²⁴Yennu, niib kur la a nyannu sommira.

N la a nichiɔŋ na somm saa

fin Yennu nba tee n kpanbar na kasii ŋaak ni,

²⁵ki yanyinna be tɔɔnn po,

ki binba peeb bonpipebit joont poor,

ki sapaamm nba jeen naayaka foo sinsuuk ni.

²⁶“Pakin Yennu man, u nibur sinsuuk ni;

pakin Yennu man, yimm nba kur tee Jakɔb yaaboona.”

²⁷Benjaminn boorue saa liit, ŋamme ki yab;

ki Juda saakab nan bi booru saa wei bi poor,

ki Sebulunn nan Naftali saakab saa wei paan.

²⁸Yennu, want a paŋ nan a yiikoo,

a yiikoo nba ki a tuu dia ki sommitit na,

²⁹A jiantu ŋasaakak nba be Jerusalem na paak,

ki kpanbara saa baar nan piinii ki tura.

³⁰A yakii nan Ijipt nba naan nan bonkob-gbeŋir

nba be kinkauk niŋ na,

ki bia yakii nan digbana nba naan nan naajai

nba ŋmat nan naabis na,

ki te ki bi kur n sikin bi mɔŋ ki jii bi likirii ki tura;

ki yat niib nba mɔk niɔŋ ki loon tɔbii faanu na.

³¹Taatara nba see digbanlia taa ni na saa nyi Ijipt

ki baar Yennu boor,

ki Itiopia teeb saa donn bi nii ki miar Yennu.

³²Yinin yaŋ ki tur Yennu, durinya teeb,

yinin ki dont Yennu maŋ,

³³ki tur ŋɔɔ nba jaak yaayoo ni sanpagbouŋ paak na.

Gbiintir u satian-paarii.

³⁴Ii mɔɔnt Yennu yiikoo,

wunba yaa yabint paŋ be Israel teeb paak na,

ki u yiikoo be sanpagbant ni na.

³⁵Yennu baakir yab, ki u be u kasii binbeboor.

Ŋɔɔ Israel teeb Yennu teen u niib paŋ nan yiikoo.

Pakin Yennu man.

Ki jiin fabinii nba loon sommir po

¹Yennu, a tinnin, kimaan nyun na dian n yiake.

²N fer kpii bakir niŋe, ki n taa ki siit tiŋi.

N baar nyunsunsuŋ niŋa, ki nyunpana yaa lin piinin.

³N bake nan maa yikin ki loon sommir,

ki n kunkɔr ji ton, ki n ninbina mɔnn ki n kpaan fin Yennu.

⁴Binba namin ki li ki mɔk paak na yab

ki gar n yur paak yuta;

niib bonchiann tee n datai ki namin, ki li ki mɔk paaki,

ki tee binba loon ki bin biirin,

ki mianin a man jiin maa ki jan linba.

⁵Yennu, n yanbɔmm ki bɔr a boori,

ki a mi maa jatik biaŋinba.

⁶N Yomdaanɔ Yabint Yennu, a daa te ki n baat nan fei

ki teen binba teena yada na.

Israel teeb Yennu, a daa te ki n dint binba jiantira na fei,

⁷kimaan a yaa sann paak, ki bi sukiin ki dintin fei.

⁸Ki n tee nan saamɔ na, n ninjamm boor,

ki bia tee nan boorganu na, n ŋaateeb boor.

⁹Maa loon a ŋaak biaŋinba na, n par di muue,

ki sukit nba bo sii tee a yar na, ki li baa n paak.

¹⁰Ki n sikin n mɔŋ ki lor mɔb, ki niib sukiin;

¹¹ki n lia kuun fabinii liant, ki bi laan.

¹²Ki bi piak n paak sɔnjot ni, ki dayibira yinin yanii.

¹³N Yomdaanɔ Yennu, min ŋarin saa miarawa.

A turin gatu yoo nba ki a loon;

gatir ki turin kimaan a lomm paak,

nan faa gbeent a mɔsonn ki tint niib na paak.

¹⁴A tinnin ki n daa kpii bakir na ni,

ki tinnin ki min nyi n datai na ni,

ki bia nyinnin nyunsunsuŋ na ni.

¹⁵A daa te ki nyunpana na piintin,

koo ki te ki n di nyun, sunsuŋ na ni,

koo ki n fer kpii kaauk na ni.

¹⁶Yennu, jiin a lomm nba ki gbent na ki turin gatu;

jiin a ninbatinchiɔŋ na ki ŋmant n paak.

¹⁷A daa lekin a numm min a toontunnɔ paak;

n be wahalbiiuk niŋe, a turin gatu mɔtana.

¹⁸Baat n boor ki tan tinnin, ki nyinnin n datai nuu ni.

¹⁹A mi baa sukiin biaŋinba, ki mi maa di fei,

ki bi butimin biaŋinba; a laat n datai kur.

²⁰Sukit biir n pare, ki te ki n biar yann.

Ki n kpaan wunba saa maan n par, ŋaan n ki la sɔɔ;

ki kpaan wunba saa korimin, ki bia ki la sɔɔ.

²¹Ki kon nba mɔkin yoo nba, ki bi turin lɔbii,

ki nyunnyukuru soorin, ki bi turin damiituk.

²²A te ki bi diina jaamm n kpant barit,

ki te bi maruŋ jaamm na n baanib.

²³A te ki bin jɔɔn, ki te bi sai ni-ii tun kii yiar.

²⁴A donn wutoor bi paak, ki te a wutobiiuk na n boontib,

²⁵ki ŋaan bi kaaŋ na n biar yann,

ki daa te sɔɔ kɔɔ bi binbeboor na jikii,

²⁶Bi dint binba ki a dat bi tuba nae biak,

ki bia piak niib nba ki a turib danii na wahala po.

²⁷Sɔbin bi yanbɔmm kur ki bir;

a daa te ki bi laat tor a tinnu na ni.

²⁸A piin bi sana manfoor gbouŋ na ni;

a daa te ki bi sana pukii a niib na ni.

²⁹N be nan gbanantont nan ninbaatire;

Yennu, ŋaant ki a tinnu na-ii guun.

³⁰N saa yin yaŋe ki dont Yennu sann,

ki bia mɔɔnt u yabint ki turɔ niipoouk.

³¹Linba na saa maŋ Yennu ki chee mi-i turɔ naab

ki li tee piinii,

ki bia chee mi-i jii naajak nan yina ki mann maruŋ.

³²Talasdamm na-i la nna, bi sii mɔk parpeenne;

ki binba jiantir Yennu na mɔk kpaŋ-n-mɔŋ.

³³Yennu-e gbiintir talas damm miaru,

ki ki tammit u niib nba be dansarii ni na po.

³⁴Sanpaak nan tingbouŋ nan mɔkgbeŋa,

nan bonfoa nba kur be li ni, pak Yennu man,

³⁵kimaan u saa tinn Jerusalem-a,

ki bia ŋamm maa Juda dolia,

ki u niib saa kɔɔ kar leŋ ki yent tiŋ na;

³⁶ki u toontunna na yaaboona saa yent tiŋ na,

ki niib nba loonɔ, ŋamme saa kɔɔ leŋ.

Yenmiaru nba jiin sommir po

¹Yennu, gbiintir ki tinnin;

N Yomdaanɔ, baat yian ki tan sommin.

²A te ki damm nba koor a bin kpin na,

bin baa, ki ŋmat bi mɔŋ.

Ŋaant damm nba mɔk parpeenn n biak dinu po na,

bin ŋmat ki di fei.

³A te damm nba laan ki sarikitin na,

lin bakitib bi baak ni.

⁴Ŋaan niib nba kur baat a boor na,

bii mɔk parpeenn kii kpamm.

Ŋaant ki binba kur mɔk niipoturu a tinnu paak na-ii yeen a,

“Yennu-e tee yabint daanɔ.”

⁵Yennu, n namii ki talas waan, li paak baat n boor yian,

fine tee n tinntɔɔ,

Yennu, baat ki tan sommin; a daa te ki li wei.

Nikper Yenmiaru

¹Yennu, n baar a boor ki loon fatue. A daa te ki n di fei.

²Kimaan faa tee popeendaanɔ na, a sommin ki bia fatin.

Gbiintirin ki tinnin.

³Ii tee n gungurboor, kii tee siaminba ki n sii yɔɔ be.

Yetir a kunkɔr ki lin tinnin,

kimaan fine tee n gungurboor nan n guutɔɔ.

⁴Yennu, a fatin nɔɔnbiit damm nuu ni,

ki bia nyinnin nitont nan toonbiit damm paŋ ni.

⁵Yabint Yennu, a nie ki n mɔk dindann,

ki teena yada, laa nyii n bisin niŋa.

⁶Laa nyii n maaru niŋa, n maa a paake,

fine nyinnin n naa poor ni.

N sii tun piak a sanne.

⁷N manfoor tee nyinne ki tur niib bonchiann,

kimaan a guun fanu.

⁸N sii dontira daa kur, ki mɔɔntir a yabint.

⁹A daa yêenin mɔtana ki yaa n kpeta;

a bia daa nyikinin ki yaa n gbanant baŋa,

¹⁰kimaan n datai loon bin kpime,

bi piak ki lorin a bin biirime,

¹¹ki yeen a, “Yennu nyikɔwa,

ŋaant ki tin weiɔ ki soorɔ,

kimaan sɔɔ ji kaa ki saa fatɔ.”

¹²Yennu, a daa fɔkitir nanimi.

Yennu, baat yian ki tan sommin.

¹³A te ki n datai n kpakin nan fei;

ki binba loon bin biirin na n di fei ki boont.

¹⁴Min ŋarin, n sii tun mɔk dindann nana,

ki piak a sann yoo n tuu yoo.

¹⁵N saa pak a popeensin nba tee,

ki bia pak a tinnu po daar kur,

li lek yab gar n bannu nba teewa.

¹⁶N saa tɔkin n Yomdaanɔ Yennu paŋ nie,

ki mɔɔnt u ŋant, u yar kɔɔe ki n saa mɔɔnt.

¹⁷Yennu, maa din tee bika, ki a tumiin a mɔmaan,

n bia daa tian ki piak a bakitnauŋ toona po.

¹⁸Yennu, mɔtana n ji kpet, ki n yut penna, a daa nyikinimi.

Ii be nanin, ki mii mɔɔntir a paŋ nan a yiikoo,

kii teen maaru nba waa kur.

¹⁹Yennu, a popeensin saa tuu sanpagbante.

Fine tee daanɔ nba tun toonjaana,

ki sɔɔ ki be ki tee nan fin na.

²⁰A lek te daamii nan wahala baa n paak,

ŋaan a saa ŋammin ki te min la laafiawa;

a kan te ki man sik kaauk ni.

²¹A saa te ki man teen nijaann ki gar maa bo teewa,

ki a bia saa ŋamm ki maan n para.

²²Yennu, n saa faa kɔnn ki donta,

kimaan a popeensin paak.

N saa yin yaŋ ki donta nan bonfifaat,

fin nba tee Israel teeb Kasii Daanɔ.

²³N saa yikin nan parpeenn,

yoo nba ki n yiin ki dontira na, kimaan a tinnima.

²⁴N saa pak a popeensin po daa kur,

kimaan niib nba koor a bin turin daŋ na,

n nyannib, ki bi dii feiwa.

Yenmiaru nba jiin kpanbar po

¹Yennu, a wann kpanbar ki wuu bu nan a popeensin na;

turimɔ a tiɔŋ barmɔnii,

²ki lin te wun fit dia a niib nan barmɔnii,

ki bia dia talas damm na nan popeensin.

³A te tiŋ na n tur niib na mɔkint,

ki niib na-ii be leŋ kii tee popeendamm.

⁴Ki kpanbar na sii bu tarii buut nan barmɔnii,

kii sommit talas damm,

ŋaan kii sikint binba dint tarii biak na.

⁵A te a niib na-ii yɔɔ kii jiantira nan yonnu nba yɔɔ do na,

kii biaki jiantira nan ŋmaarik nba yɔɔ do na,

ki saa tuu yoo nba kaa gbennu.

⁶A te kpanbar na-ii tee nan saak nba tuu baa kpaant ni na,

kii biaki tee nan samimmiiuk nba tuu baa tiŋ paak na.

⁷A te ki popeensin n yabit u manfoor yoo,

ki bia te mɔkint-ii yɔɔ kii be

nan ŋmaarik nba yɔɔ be biaŋinba na.

⁸Ki u tingbouŋ yent saa lat ki nyi mɔkgbeŋir

ki saa tuu mɔkgbeŋleer;

ki nyi Yufrates mɔkir ki saa tuu tingbouŋ kur po.

⁹Ki niib nba be kunkoouk paak na saa gbaan u tɔɔnn,

ki u datai saa baa fabin tiŋ ni.

¹⁰Ki Speenn kpanbara nan binba kɔɔ tinii nba be

mɔkgbeŋa sinsuuk ni na saa jiantɔ;

ki Sieba nan Seba kpanbara saa baar nan piinii;

¹¹ki kpanbara kur saa gbaan u tɔɔnn,

ki digbana kur saa jiantɔ.

¹²Ki u saa somm talas damm nba miarɔ

nan nandamm nba ki niib yêtib na.

¹³Ki u sii mɔk ninbatinu nan talas damm,

nan nandamm, ki bia saa tinn tarii manfoa.

¹⁴Ki u saa fat damm nba ki bi ŋmaŋib ki bia diimm,

kimaan bi manfoor mɔk nyɔɔt ki turɔ.

¹⁵Kpanbar na manfoor n wei;

ki Sieba salima-ii tee u yar;

ki niib-ii mei Yennu u paak yoo kur,

ki Yennu piisim-ii be u paak yoo kur,

¹⁶ki jeet-ii be tiŋ na ni, ki kunkona n gbee nan bonbuburit,

ki lon lɔɔna nan Lebanonn yar na, ki li doi n gbee nan niib,

ki lii tee nan mɔɔt nba tuu pia tiŋ paak na;

¹⁷ki daa te bi tammit kpanbar na sann po;

ki te ki u sann n wei nan yonnu na;

ki digbana kur n boi Yennu ki wun teen piisin bi paak

nan waa teen kpanbar na paak biaŋinba na.

¹⁸Dontir-ii be timm Israel teeb Yomdaanɔ Yennu na paak,

Ŋɔɔ kɔɔe tuun bakitnauŋ toona.

¹⁹Ii dont u baakir sann, nan yoo nba kaa gbennu.

Tingbouŋ na kur n gbee nan u baakir.

Mamɔmm nan mamɔmm.

²⁰Linba nae joont ki tee Jese bija Defid Yenmiaru.

GBOUŊ ŊANTAA

(Yanii 73 -- 89)

Yennu barmɔnii gatu

¹Yennu set ŋan ki tur Israel teeb,

u ŋan ki tur binba para yeen na.

²Min ŋarin, li bo kaa waan ki n ji bo kii mɔk dindann u ni,

n yada bo baa gbenn na,

³kimaan n bo fumm nan dont-n-mɔŋ damm,

yoo nba ki n la nan nɔɔnbiit damm mɔkitir na.

⁴Bi gbanant ki yekitir, ki bi wakii ki mɔk laafia.

⁵Bi ki di fara nan nileeb na,

bi bia ki laat daamii nan nileeb na.

⁶Li paak ki bi jii garuk ki tuun ki li tee tuliat,

ki jii kpikpiruk ki pin ki li tee nan chinchenn na;

⁷ki bi para nyint bonbiir,

ki bi yan dukii toonbiit tumu ki ki bakitii.

⁸Ki bi laa leeb ki piak mabiit ki teemm,

ki mɔk karinbaanii, ki lorin a bin biir leeb,

⁹ki piak bonbiir ki jiint Yennu nba be yendɔuŋ ni na po,

ki dia garuk ki want tingbouŋ na niib baa sii tuun biaŋinba,

¹⁰ki li te Yennu niib ŋmant ki teemm yada

nan linba kur ki bi yeen.

¹¹Bi yeen a, “Yennu kan banni;

wunba tee Yabint Daanɔ na kan banni.”

¹²Nɔɔnbiit damm nba tee biaŋinbae na;

bi mɔk mɔkint bonchiann ki bia laat ki li pukiib.

¹³Maa soor n mɔŋ ki ki tuun toonbiit na, li tee yanne-e?

¹⁴Yennu, a te ki n bakit daa kur,

ki sanyiɔk ni kur ki a daar n tubir.

¹⁵Li-i bonni tee ki n yet mabooru na,

n bo saa jurin a niibe.

¹⁶Maa yabir ki dukin daamii na po, li paakime tee-e

¹⁷nan maa tan kɔɔ a ŋasaakak na ni,

ki n ji bann linba tan saa baar nɔɔnbiit damm paak.

¹⁸A tan saa sennib siaminba ŋarii, ki bin baa yot.

¹⁹Li kpan biiribe ki bi ji siik ki saa woribuk ni.

²⁰Bi tee nan damiit nba tuu bot sanyiɔk ni nae;

Yennu, fi-i fiir, bi tuu bote.

²¹Yoo nba ki n par bo biir na, n dudukit bo daamiimi,

²²n bo jatike nan peeuk na, ki ki bant a maan paaki,

²³ŋaan n lek be nanae yoo kur, ki a soor n niidiitu ki dian.

²⁴Ki a dian nan kpaanii, ki li joontik, a tan saa gaarin nan baakir.

²⁵N ji mɔk bee yendɔuŋ ni, li-i kii tee fini kaa?

Ki tingbouŋ na paak, n kii loon siar ki pukin a po.

²⁶N gbanant nan n yan saa baŋ,

ŋaan Yennu-e saa turin paŋ, ŋɔɔ kɔɔe ki n sii loon.

²⁷Niib nba nyik Yennu na saa kpakin yanne,

u saa biir binba ki be fanu nanɔ nawa.

²⁸Min ŋarin, li ŋan bonchiann nan maa naak Yennu na,

n jii Yabint daanɔ Yennu ki u teen n gungurboor.

N saa pak wann u toona kur.

Yenmiaru nba jiin Israel teeb po

¹Yennu, bee ki a nyikit nna?

A wutoor saa do a niib paak mɔkmɔk nan mɔkmɔk-aa?

²Ii tian niib nba ki a bo gannib sianyoowa na po,

ki bi tee binba ki a bo nyinnib daabisin ni,

ki teemm a tiɔŋ niib na.

Ii tian Sayɔnn kunkonn nba ki a bo kɔɔ li ni na po.

³A somm tangbiina nba dɔɔ na paak;

ti datai biir linba kur be a ŋasaakak niwa.

⁴A datai yikin ki kpamm a ŋasaakak ni,

ki chaan bi farimii leŋ, ki li want nyannu nyinn.

⁵Ki bi tee nan niib nba tuu dia pai ki chɔɔn tiinii na,

⁶ki dia pajara ki chɔɔn taabii dikpina,

⁷ki joo a ŋasaakak na muu,

ki biir a niib nba jiantira siaminba na,

⁸ki yet bi para ni a bi saa biirite fas fas,

ki joo kasii boor kur muu, tingbouŋ na ni.

⁹Ki ti ki la ti kasii bona, ki a sɔkiniinba sɔɔ ki biar,

ki ti sɔɔ mun ki mi laa sii tee nna ki wei biaŋinba.

¹⁰Yennu, ti datai saa sarika ki lin wei nlee?

Datai na saa biir a sann mɔkmɔk nan mɔkmɔk-ee?

¹¹Bee ki a yêt fan sommiti?

Bee ki a lor a nii poor po? Lotir a nii ki biirib turit.

¹²Yennu, fine tee ti kpanbar pinpiik niwa,

ki tinnit nan taar munŋaa nawa tiŋ na ni,

¹³ki jii a panchiɔŋ ki te mɔkgbeŋir bɔkit,

ki faa yeer bonsusoot nba be nyun ni na yura.

¹⁴Fine din faa but bonsusoouk nba ki bi yiu

Lefiatann na yura,

ki jii u gbanant ki dinn bonkobit nba be muuk ni na.

¹⁵Fine din loot nyuntona nan mɔktona,

fine bia din te ki kpengbeŋa fɔɔr.

¹⁶Fine din nan yonnu nan nyiɔk,

ki senn yonnu nan ŋmaarik, ki bi be bi binbeboa.

¹⁷Fine din bɔkit tiŋ na terii, ki te ki piar nan siɔk be.

¹⁸Yennu, tiat nan a datai sarikitae,

bi teen jatite ki biir a sann.

¹⁹A daa ŋaan a niib ki teen bi databiit na,

a bia daa tammit a niib nba la daamii na po.

²⁰Tiat mɔlor nba ki a lor nant na po,

kimaan toonbiit yat gbee tingbouŋ na lɔtii kur powa.

²¹A daa te ki niib nba ki bi diimm na di fei,

a te nandamm nan talas damm n dont a sann.

²²Yennu, fiit a tiɔŋ ki somm a niib,

tiat nibiit nba sarikita biaŋinba daar kur na.

²³A daa tammit a datai nba donn wutoa ki tian tintianii na,

nan fuut nba ki a datai fu yoo kur na po.

Yennu-e tee buut daanɔ

¹Yennu, ti teena niipoouk,

ti teena niipoouk, kimaan a naak nant.

Ti piak a yabint nba tee biaŋinba,

ki bia want a bakitnauŋ toona nba ki a tuun.

²Yennu yet a, “N senn buut yooe,

ki saa bu nan barmɔnii.

³Tiŋ na, nan li niib kur-i taŋi jek yoo nba,

ŋaan mine sii diab, ki bi kan damm.

⁴N beer nɔɔnbiit damm na, maa bin nyik tonu,

⁵ki bia daa dont bi mɔŋ, ki mɔk yuwannu.”

⁶Sɔɔ kaa ki saa nyi yondo po koo yonbaa po

koo niidiitu po koo niigaŋ po ki fit donn nisaariki;

⁷Yennu kɔɔe tee buut daanɔ,

u bu ki teen yenɔ kaat, ki bia bu ki teen lɔɔ mɔnii.

⁸Yennu dia nyubitike,

ki li gbee nan daamii nba tee u wutoor,

ki u kpaan mɔ, ki tingbouŋ na nɔɔnbiit damm nyu;

bi nyuu li kur ki gbenn.

⁹Min ŋarin kan nyik nan man pak ki dont Yennu,

wunba ki Jakɔb din jiantir na,

n bia saa yin yanii ki dontɔ.

¹⁰U saa pot nɔɔnbiit damm paŋ,

ŋaan pukin kasii damm yar.

Yennu-e tee nyannu daanɔ

¹Yennu sann nyɔɔnt Juda yent ni,

ki u sann la baakir Israel tingbouŋ ni,

²ki u ŋaak be Jerusalem,

ki u binbeboor tee Sayɔnn kunkonn paak.

³Leŋe ki u kɔnn datai na peenii,

ki kɔnn bi naagbankɔŋa nan jukbanjai,

barmɔnii, u bia kɔnn bi jatiat kurawa.

⁴Yennu, a gbee nan yentue, ki a yabint ŋan,

ki a nyii kunkona tiŋ nba ki a nyann a datai na ni.

⁵Ki bi jii kunkɔnkɔnna maŋ nba mɔk linba kur,

ki bi ji biar gɔɔnt kuun gɔɔn,

ki bi paŋ nan bi bannu kur teen yann.

⁶Fin Yennu nba ki Jakɔb din jiantir na,

yoo nba ki a yakii namm na,

ki bi taanii nan taanjakira baa ki kpo kpo.

⁷Yennu, fin kuukɔɔe ki ti sii tiina jaŋmaanii;

li-i tee ki a wutoor doo, sɔɔ kan fit set a tɔɔnni.

^8-9Yennu, a mɔɔnt a buut yendɔuŋ niŋa,

yoo nba ki a fiir a fan bu ki somm binba ki bi diimm

tiŋ na paak na,

ki jaŋmaanii kɔɔ tingbouŋ na, ki u ŋmin soon.

¹⁰Barmɔnii, a wutoor-i baa a datai paak,

niib tuu tura dontire,

ki niib nba nyii tɔb na ni saa tiar ki teen jaamm.

¹¹Turin i Yomdaanɔ Yennu linba ki i senn mɔsonn

a i saa turɔ na. Ii baar nan i piinii ki turɔ.

Digbana nba kur kpiai na n baar nan bi piinii

ki tur Yennu nba ki nisaarik tiinɔ na.

¹²U te ki doo diara sikint bi mɔŋ,

ki te tingbouŋ na kpanbara tiinɔ jaŋmaanii.

Pardɔɔnn nba be daamii yoo

¹N yikin nan kunkɔpaarir ki tur Yennu.

N yikin nan kunkɔpaarir, ki u gbiint turin.

²N wahala yoo, n mei Yennu,

ki dont n nii nyɔtunmunn ki meiɔ,

ŋaan ki ki laat pardɔɔnni.

³Mi-i dukin Yennu po yoo nba, n tuu kuriie.

Mi-i dukin Yennu po, n gbanu tuu chɔke.

⁴U te ki n ningbouŋ ki mun, ki li daamiin, ki n ki fit piak.

⁵N dukii daa nba gar, ki bia tian bina nba gar sianyoowa.

⁶N tiar yanii nba ki n tuu yiin na nyiɔk,

ki dukin ki boi n mɔŋ a,

⁷“Yennu saa nyikit fas fas, ki ji kii mɔk ninbatinu nantii?

⁸U lomm nba kaa gbennu na ji bote-e?

U mɔsonn na saa nyikite yoo kurii?

⁹Yennu tamm u ninbatinu na poe-e?

Wutoor yent u ninbatinu na boore-e?”

¹⁰Ki n ji yet a, “Linba daamiin bonchiann tee nnae:

Yennu ji ki dia u panchiɔŋ na ki sommititi.”

¹¹Yennu, n saa tiar a toonjaana na po.

N bia saa tiar a bakitnauŋ toona nba ki a tun

sianyoowa na.

¹²N sii tian linba kur ki a din tun,

ki bia dukin a toonjaana na po.

¹³Yennu, a sɔnii tee kasii;

yensau ki be, ki yab nan fin Yennu na.

¹⁴Fin Yennu fit tuun bakitnauŋ toona,

ki fiitir a yiikoo ki teen a niib,

¹⁵ki tint a niib nba tee Jakɔb nan Joosef maaru na

nan a paŋ.

¹⁶Yennu, yoo nba ki nyun din la-a na,

jaŋmaanii din soorɔwa,

ki mɔkgbeŋa nba sumii na, ki li jekir.

¹⁷Ki saak nyii sanpagbant ni ki baa,

ki satianii tant, ki sanyikintii yent lokir kur po.

¹⁸Satianii na jek tiŋ, ki sanyikintii na yent durinya

kur po, ki tingbouŋ jek, ki damm.

¹⁹Ki a somm gaar nyunpana ni,

ki tɔkin poot mɔkgbeŋir, ŋaan sɔɔ ki laat a taaboota.

²⁰Ki a ŋmakit a niib nan pekpaarik nba tuu ŋmakit u pei na,

ki teemm Moses nan Aarɔnn nii ni.

Ki jiin Yennu nan u niib po

¹N niib, gbiintir n wannu maŋ,

kii tee soon nna ki gbat maa yaa man beti linba.

²N saa pakii barjokite,

ki fiit bunbɔr bona nba bo be sianyoowa na,

³linba ki ti gbat ki bia mi, linba ki ti baanba din betit na.

⁴Ti kan bɔr ti waas maan maŋi,

ti bia saa wann maaru nba waa ki jiin bakitnauŋ toona

nba ki Yennu tun, nan u paŋ na po.

⁵Ki u tur Jakɔb maaru nba tee Israel teeb na sennu,

ki bia turib wannu,

ki kpaan ti yeejamm a bin wann bi waas sennu maŋ,

⁶a lin te maaru nba waa n tumii, ki mun wann bi waas.

⁷Ki bi-i tun nna, li saa te bin teen Yennu yada,

ki kan tamm toona nba ki u tun na po,

ŋaan sii mɔk mɔsaku nan u sennu.

⁸Bi kii tee nan bi yeejamm nba din tee tubkangbata

nan mɔyêtdamm na kaa;

ŋamm yaa yada din ki gbee nan Yennu,

ki bi bia din ki waa Yennu fanu.

⁹Efraim jab lek din bar loa nan tɔrbana,

ŋaan bi din tan chiar tɔb daara.

¹⁰Bi din ki dia bi mɔlor nan Yennu,

ki yêt bin gaar u sennu na.

¹¹Bi din tamm waa tun linba ki turib nawa,

li bakitnauŋ toona nba ki u din tun ki bi la na.

¹²Bi yeejamm din goriie ki Yennu tun bakitnauŋ

toona maŋ, Soann paanu nba be Ijipt tiŋ ni na.

¹³Yennu din bɔkit mɔkgbeŋir ki te ki bi somm gar li ni,

ki te nyunpana set nan joona na.

¹⁴U din liin sanpagbouŋo, ki li ŋmakitirib yonnu ni,

ki u bia ŋmakitirib nyiɔk nan muu yentu.

¹⁵U din yee tangbeŋa, kunkoouk na paak,

ki teemm nyun, ki li yab nan mɔka ni nyun na.

¹⁶U din te ki nyun nyi tanpiiuk ni ki puub nan mɔkir na.

¹⁷Bi bia lek din tuun yanbɔmm ki biir Yennu,

ki mɔk mɔyêtuk nan Yabint Yennu, kunkoouk na paak.

¹⁸Bi lek din miewa ŋaan bikin Yennu,

ki boi jeet nba ki bi nian po.

¹⁹Bi din pak ki biir Yennu ki yet a,

“Yennu saa fit turit jeet kunkoouk na paaka-a?

²⁰Li tee mɔniie nan u faa tanpiiuk, ki nyun nyii

ki puub bonchiann, ŋaan u saa fit turit jeeta-a?

U saa fit tur u niib nanta-a?”

²¹Li paak, ki Yennu wutoor ji doo yoo nba ki u gbat

bi pinpakit maŋ, ki din lekib nan muu.

U wutoor din doo Israel teeb na paak bonchiann,

²²kimaan bi din ki teenɔ yada,

ki bia ki mɔk yada nan u saa fit tinnibi.

²³U lek din pak nan sanpagbouŋ,

ki te ki li takorbona loot,

²⁴ki te jeet nyii sanpagbant ni ki sik,

ki tee mana ki bi dii.

²⁵Yennu din turib linba kur ki bi loon,

ki bi dii malakanba jeet.

²⁶U din te ki wouŋ daa ki nyii yondo po,

ki bia jii u paŋ ki te ki wouŋ nyii niigaŋ po ki daa,

²⁷ki nyinn pinpara, ki bi yab nan tanbiinii na, ki tur u niib.

²⁸Pinpara na din baa kaaŋ na sinsuuk ni,

nan lanbont78.28 Bi din dia bonkobit gbante ki faa bi lanbont. na kur po.

²⁹Niib na din ŋman ki tan gboo,

kimaan u din turib baa nian linbawa.

³⁰Bi bia lek din ki fit nyinn bi niɔŋ,

ŋaan bia daa ŋman,

³¹li yooe ki Yennu wutoor doo bi paak;

ki u kpii bi nipaarit, binba tee Israel naasinchinchiba na.

³²Linba na kur, ŋaan niib na bia lek din tuun yanbɔmm.

Yennu bakitnauŋ toona nba ki u tuun na kur lek,

bi din ki teenɔ yada.

³³Li paak ki u din jiŋ bi daa ki li tee nan foon na,

ki bia jii biak ki jiŋ bi manfoa.

³⁴Yoo nba kur ki u kpii bi siabi,

leeb nba biar na tuu mɔ kɔɔbiae,

ki lebit bi binbeŋ ki miar ŋɔɔ Yennu nan ninbinmɔnii.

³⁵Bi tuu tiar nan Yennu-e tee bi guutɔɔ,

ki tee Yabint daanɔ nba baar ki sommitib.

³⁶Ŋaan bi mɔbona kur din tee faie;

bi din ki piak siar ki li tee barmɔnii.

³⁷Bi para din ki yeen nanɔ,

bi din ki dia bi mɔlor fanu nanɔ.

³⁸Ŋaan Yennu lek bia din mɔk ninbatinu nan u niib na,

ki nyik chab bi yanbɔmm, ki din ki biiribi.

Yoo n tuu yoo u din tuu gɔɔr u wutoore, ki ki fiint u jati.

³⁹U din mi nan bi tee nisaariie,

ki tee nan wamaasin nba tuu gar ki ji ki jent na.

⁴⁰Bi din tuu baar nan kpikpiruko ki biirɔ yoo kur

kunkoouk na paak, ki teenɔ parbiir, muuk na ni.

⁴¹Bi din bikii Yennu-e yoo kur,

ki dont Israel teeb Kasii Daanɔ maŋ wutoor.

⁴²Bi din tamm u yabint paŋ

nan daar nba ki u din fatib bi datai boor nae,

⁴³ki din tun u bakitnauŋ nan yaarlituk toona,

Soann paanu nba be Ijipt tiŋ ni na.

⁴⁴U din te ki mɔka nyun kpant sɔn,

ki Ijipt teeb kɔŋ nyun nan nyunu.

⁴⁵U din te kpajui baa bi ni, ki daamiib,

ki te pɔnta yabit ki biir bi tiŋ.

⁴⁶U din tun naasuut, ki bi baar ŋman bi bonbuburit,

ki bia biir bi kpaant kur.

⁴⁷U din tun sakaana, ki li biir bi tilontii,

ki te sakaana baa bi kinkanii paak, ki li kpo.

⁴⁸U din te sakaana nan sanyikintii kpii bi bonkobit.

⁴⁹U din kpaar u wutoor ki paan bi paak,

ki li tee kuun malakae baar bi paak,

ki bi be parbiir ni.

⁵⁰U din ki gɔɔr u wutoor koo ki tinn bi manfoa,

ŋaan kpiib nan yiarbiit.

⁵¹U din kpii Ijipt nirɔ kur bija sinsinn.

⁵²U din gare ki u niib na waa nan pekpaarik nba tuu gar

ki u pei waa na, ki ŋmakitirib kunkoouk na paak.

⁵³U din ŋmakitirib nan laafia, ki bi ki mɔk jaŋmaanii,

ŋaan ki u te ki mɔkgbeŋir mubin bi datai na paak,

⁵⁴ki din diab ki baar namm u kasii tiŋ kpaar boor,

ki li tee kunkona tiŋ nba ki u kɔn ki nyann na ni.

⁵⁵U din ber niib nba kɔɔ leŋ na ki nyinnib,

yoo nba ki u nigannkab Israel teeb baat na,

ki biit tiŋ na ki tur bi booru kur,

ki kɔɔmm niib nba din kɔɔ leŋ na ŋei ni.

⁵⁶Ŋaan Israel teeb na lek din mɔk mɔyêtuk

ki biir Yabint Yennu, ki bia bikiiɔ, ki ki saak u sennu na.

⁵⁷Bi din tee mɔyêtdamme, ki ki mɔk mɔsaku,

nan bi baanba nba din ki mɔk na.

Bi din tee nan tɔrbanŋmarima nae.

⁵⁸Bi din dont Yennu wutoor nan bi tingbanjiant boa,

ki gbit u kpak nan bi pata.

⁵⁹Yennu din donn wutoor nan waa la nna na,

li paak, ki u yêt u niib fas fas.

⁶⁰U din yaan u kasii boor nba be Siilo na,

ki li tee u lanbouŋ nba ki u tuu kɔɔ nant na,

⁶¹ki din te ki ti datai fat mɔlor lakir nba tee nyinn

ki want u paŋ nan baakir na.

⁶²U din donn wutoor nan u tiɔŋ niib,

ki te ki bi datai kpiib.

⁶³Bi din kpii naasimm tɔbii ni,

ki sapaamm kɔŋ jab nan bin kumm.

⁶⁴Bi mannteeb din kpo tɔbii ni,

ki bi datai na ki saak ki pakɔi na fabinii.

⁶⁵Li joontik, ki Yennu fiir ki tee nan u bo gɔɔnte na,

ki tee nan nipaaruk nba tuu nyu daan ki ŋamm la paŋ na,

⁶⁶ki ber u datai ki nyinnib, ki bi dii fei nba kaa paak.

⁶⁷U din yêt Joosef maaru; u din ki gann Efraim booru,

⁶⁸ŋaan gann Juda booru

nan Sayɔnn kunkonn nba ki u mantik loon na.

⁶⁹Leŋe ki u maa u ŋasaakak,

ki li fɔk nan sanpaak na,

ki te ki li yoo be nan tingbouŋ nba yoo be na.

⁷⁰U din gann Defid, ki u tee u toontunnɔ,

ki u nyinnɔ bonkob-look ni,

⁷¹waa sii kpaar pei na, ki u jiiu ki teenɔ kpanbar,

ki u sii gorii u niib Israel teeb, binba tee ŋɔɔ Yennu faar na.

⁷²Ki Defid jii u par kur ki diab nan barmɔnii,

ki soorib fanu, ki ŋmakitirib.

Yenmiaru nba jiin Israel teeb po

¹Yennu, binba ki waa-a na lek a tiŋa.

Bi biir a kasii ŋasaakak nawa ki but Jerusalem.

²Bi jii a niib gbanant ki tur juut nan muuk ni bonkobit,

a bin di.

³Bi kpii a niib ki bi sɔn puub nan nyun na.

Sɔn puube nan nyun na Jerusalem kur po,

ki sɔɔ ki be ki saa pii niib na gbanant.

⁴Digbana nba kpiat na sukiite ki bia laat, ki sarikitit.

⁵Yennu, a wutoor saa do ti paak ki lin wei nlee?

A wutoor sii tun ki dite nan muu na-a?

⁶Ŋmantir a wutoor ki paan digbana nba ki jiantira na paak,

niib nba ki meia na.

⁷Bi kpii a niib, ki boont a tingbouŋa.

⁸A daa daar ti tuba, ti yeejamm yanbɔmm paaki,

a tint ninbaauk mɔtana, ti ji ki mɔk dindanni.

⁹Yennu, a sommit, ki tinnit.

A fatit ki nyik chab ti yanbɔmm, kimaan a mɔŋ sanŋann paak.

¹⁰Bee teen ki boorganu na boit a, “I Yennu na be lee?”

Yennu, ŋaant ki tin la nan ti ninbina,

ki a dat binba kpii a niib na tuba.

¹¹Gbiintir dansarkɔɔra na fabinii,

ki jii a paŋ ki fat binba ki bi pak biirib ki loon bin kpib na.

¹²Yennu, digbanlia nba sukii ki biira na,

jiint pab taar munlore bi biit paak.

¹³Ki timm nba tee a niib, ki tee a pelook ni pei na

sii teena niipoouk nan yoo nba kaa paak,

ki bia sii dontira yoo kur.

Yenmiaru nba jiin Israel teeb fiinu po

¹Yennu, fin nba din ŋmakitir Israel teeb

nan pekpaarik nba tuu ŋmakitir pei biaŋinba na,

gbiintir ki turit.

Fin nba kar a naangbouŋ paak,

bonninnant banlee nba mɔk kpinkpant na80.1 Bi maan ni, bi yib “cherubime”, ki bi naan bonkobit, ŋaan mɔk kpinkpant. paapo,

²fiitir a mɔŋ ki wann Efraim booru nan Benjaminn booru

nan Manase booru, ki jii a paŋ ki baar tinnit.

³Yennu, ŋaant ki tin jen a boor,

a tinit ninbaauk ki tin la tinnu.

⁴Yabint daanɔ Yennu, a saa donn wutoor

ki lin wei nlee, ki tan fit gbat a niib miaru?

⁵A te ki ti di ninbaauk,

ki turit ninnyuut nan nyubitgbeŋir ki ti nyuu.

⁶A te ki ti datai kɔn nant, a bin fat ti tinii ki sukiit.

⁷Yabint Yennu, a tinit ninbaauk

ki ŋaan ki tin jen a boor ki la tinnu.

⁸A nyii nan tiik nyakir Ijipt tiŋ nie, ki ber digbanlia,

ki nyinnib, ŋaan bur nyakir maŋ bi tiŋ ni.

⁹A din poŋ ŋamm yiare leŋ ki burir, ki te ki li kpaat,

ki li jiina mii sik, ki lat ki gbenn tiŋ na kur po.

¹⁰Tiik na maasu din bakin kunkona nawa,

ki li yiinii bia piin kpek-kpera na.

¹¹Li yiinii din lat baar Sinsuuk ni mɔkgbeŋir na boora,

ki bia tant ki saa tuu Yufrates mɔkira.

¹²Bee ki a yeer joona nba maa ki lintiri?

Mɔtana, wunba kur gaar saa fit jan li lɔɔna.

¹³Mɔdoorii biirire, ki muuk ni bonkobit bia di ŋanne.

¹⁴Yabint Yennu, jenin ti boor.

Tibint yendɔuŋ ni, ki got sikin ti paak;

baat ki tan tinn a niib.

¹⁵Baat ki tan tinn tilontik nba ki a burɔ,

ki u tee tipaaŋ, ki a te ki u kpaat nan paŋ na.

¹⁶Ti datai chɔɔr ki bir tiŋ ni, ki joor muuwa;

gotirib nan wutoor ki biirib.

¹⁷Guut ki tinn niib nba ki a gannib,

ki bi tee digbann nba ki a te ki bi paar na.

¹⁸Ki ti ji kan ban lek ti numm nanani.

A te ki tii mɔk manfoor, kii yi a sann kii dontira.

¹⁹Yabint daanɔ Yennu, a tinit ninbaauk,

ki ŋaan ki tin jen a boor, ki la tinnu.

Yenjiantu jaamm yaŋ

¹Yinin yaŋ sanpaapowa nan kpinkpammuk

ki tur ti guutɔɔ Yennu.

Yinin dontir yaŋ ki tur ŋɔɔ Yennu nba ki Jakɔb din jiantir na.

²Piint bonmumɔɔt faanu kii ŋakin siiyak,

ki pinn kunkɔmana nba be kɔnn nan biɔk paak na.

³Pebin jaamm na naatunn, yoo nba ki ŋmaarik paan,

nan yoo nba ki u tee ŋmaamunn na.

⁴Linba nae tee Israel teeb sennu,

ki tee wannu nba nyii Yennu nba ki Jakɔb81.4 Jakɔb sanleere tee Israel. din jiantir na boor,

⁵ki u sennir ki li tee Israel teeb sennu

yoo nba ki u din lek Ijipt tiŋ na.

N din gbat magamm nba ki n ki mi,

⁶ki li yet a, “N paat jika nba paa i bɔpiat paak nawa.

N te ki i bir i jika kurawa.

⁷I yiinin yoo nba ki i be wahala ni, ki n tinni,

ki n be wonpaaruk ni, ŋaan gat ki turi,

ki bikini Meriba nyun boor.

⁸Gbiintir man, n niib, ki n turi kpaanii.

Israel teeb, n bo sunman yin gbiint ki turime.

⁹I daa ban jiantir yensau.

¹⁰Mine tee i Yomdaanɔ Yennu,

mine din nyinni Ijipt tiŋ ni;

yaatir i mɔb man, ki n dinni.

¹¹“Ŋaan n niib na kan gbiint ki turimi.

Israel teeb na kan sikin bi mɔŋ ki turin.

¹²Li paak ki n te ki bi be tuukpaatuk benu,

ki tuun bi mɔŋ nba loon bii be biaŋinba.

¹³N niib-i bonni saa gbiint ki turin,

Israel teeb maŋ-i bonni saa wei n wannu,

¹⁴n bo saa kɔne yian ki nyann bi datai,

ki biir bi datai maŋ kur.

¹⁵Ki binba ki loonin na, jaŋmaanii saa soorib,

ki bin gbaan n tɔɔnn,

ki bi tubdatu sii be yaayoo nan yaayoo.

¹⁶Ŋaan n saa dinni jeet nba ŋan,

ki bia gbooni nan siat nba saa nyi tanfiiɔk ni.”

Yennu-e tee kpanbarjaann

¹Yennu kar u naangbouŋ paak,

ki barbuura bonchiann be u tɔɔnn,

ki u bu bi buut ki yaa,

²“I daa nyikin barmɔnii bunu,

I daa bu ki teen tondamm na mɔnii.

³Bumin barmɔnii buut ki somm nandamm nan kpeebii,

pakin barmɔnii ki somm talas damm nan binba ki li diimm na.

⁴Fatirib ki nyinnib biit damm nuu ni.

⁵“Bi ki mi siari, bi bia ki bant siar paaki,

ki tee ŋmabir damm,

ki barmɔnii paku bot durinya na teeb boor.

⁶Ki min Yennu yet a, ‘I tee barbuurae, i kur tee Yennu waase,’

⁷ŋaan i kur tan saa kpoe nan nileeb na,

ki bia kpo nan doo guuteleeb na.”

⁸Yennu, setir ki bu tingbouŋ na buut,

kimaan digbana na kur tee a yare.

Yenmiaru ki jiin Israel teeb datai nyannu po

¹Yennu, a daa ŋmini, a daa ŋmin ki taantir.

²Gotir, a datai nba yêen ki ki saak a mɔb.

³Bi bɔrii ki lorin lora a bin biir a niib;

bi lorin a bin biir binba ki a guub na,

⁴ki yeen leeb a, “Ii saana man ki tin boont digbann na,

ti daa te ki Israel sann ji puuri.”

⁵Ki bi kur taan dudukyent ki lor a bin biira.

⁶Ki Edom teeb, nan Ismael teeb, nan Moab teeb,

nan Hagar booru ni niib,

⁷nan Gebal teeb, nan Amonn teeb, nan Amalek teeb,

nan Filistia teeb, nan Taya doo ni niib taan a bin kɔn nana.

⁸Ki Asiria teeb mun taan Amonn teeb

nan Moab teeb nba tee Lot yaaboona na po.

⁹Teentib nan faa din tun biaŋinba ki tur Midiann teeb,

nan faa bia din tun biaŋinba ki tur Sisera nan Jabinn,

Kisonn mɔkir ni na,

¹⁰binba ki ti din biirib Endor doo ni,

ki bi gbanant dɔɔ ki tan bat na.

¹¹Teent bi nijaana nan faa din tun biaŋinba

ki tur bat Oreb nan bat Seeb na,

ki nyann bi tɔɔndamm kur nan faa din tun biaŋinba

ki tur bat Seba nan bat Salmuna na.

¹²Ŋamme din yet a, “Ŋaant ki tin fat Yennu tiŋ na ki yent.”

¹³Yennu, ŋaant ki bii tee nan tangbiruŋ na,

kii biaki tee nan fouŋ nba ki wouŋ tuu pebir na.

^14-15Wein ki berib nan wonpaaruk,

ki da wonpaaruk ki fibitib,

ki kɔɔmm jaŋmaanii nan muu nba tuu di muuk na,

koo nan muu nba tuu di ki lenn kunkona na.

¹⁶Yennu, dintib fei, ki lin te niib kur n lon a boor.

¹⁷A te ki bii di fei yoo kur, kii tiin jaŋmaanii.

Ŋaant bin kpo nan fei.

¹⁸Ŋaant ki bin bann nan fine tee Yennu,

ki tee yabint daanɔ, tingbouŋ na kur po.

Parpeenn nba be Yenjiantu ni

¹Yabint daanɔ Yennu, a ŋasaakak mantik ŋan bonchiann.

²N mantik loon ki mii be leŋ,

n seek kur loon ki mii be Yennu ŋasaakak nie,

kii yiin parmaasir yanii nan n par kur

kii teen Yennu nba fo na.

³Yabint daanɔ nba tee n kpanbar nan n Yennu,

jablankpiitii gbaa, ŋaan bi mɔk bi ŋei,

ki tabilantianii mun bia luu bi tiat ki kaatir bi waas li ni,

ki li kpia a maruŋ binbintir.

⁴Parpeenn be binba kɔɔ a ŋaak ni na paak,

bi sii tun yiin yaniie ki dontira.

⁵Binba ki bi paŋ nyi a boor na, parpeenn tee bi yare,

ki tee binba jii bi para ki teen siir nan bin saan

Sayɔnn kunkonn boor na.

⁶Baa somm ki gar Baka baakoouŋ na ni na,

ki bi te leŋ teen nyuntona.

Siɔk-i baar, ki saak baa, nyunboa tuu dɔɔre,

⁷ki bi saa ki ŋammit laat paŋ tee-e

nan baa tan saa baar Yennu boor, Sayɔnn kunkonn na paak.

⁸Yabint daanɔ Yennu, gbatir n miaru,

Fin nba ki Jakɔb din jiantir na, gbiintirin.

⁹Yennu, kpanbar nba ki a gannɔ na, teent piisin u paak.

¹⁰Mi-i dɔɔr daar yennkɔɔ a ŋasaakak ni,

li chee nan man dɔɔr siar po daa tusir.

Mi-i see Yennu ŋasaakak boor ki guu tammɔb,

li chee nan man kɔɔ nibiiuk ŋaak.

¹¹Kimaan Yennu-e tee ti guutɔɔ nan ti kpanbar,

ki tee piisin ti paak, ki ti laat burchint nan baakir,

ki binba tuun linba ŋan, u ki miimm bonŋana.

¹²Yabint Yennu, parpeenn be damm nba teena yada paak.

Yenmiaru nba saa somm Israel teeb

¹Yennu, a mɔk ninbatinu nan a tiŋ.

A te ki Israel teeb bia ŋamm mɔkita.

²A nyikchab a niib bi yanbɔmma,

ki bia piin bi biit kurawa.

³A nyik ki ji ki dont wutoor nammi,

ki soor a parbeenn na.

⁴Yennu, fine tee ti tinntɔɔ,

jenin nant, ki nyik, ki daa dont wutoor nanti.

⁵A saa donn wutoor ti paak ki li ki mɔk yoo-o?

A kan ban nyik a wutoor maŋi-i?

⁶A ŋammit, ki tii paar,

ki timm nba tee a niib na n dont a sann.

⁷Yennu, want a lomm nba be yoo kur na,

ki bia sommit, ki tinnit.

⁸N saa gbiint linba ki ti Yomdaanɔ Yennu yete;

li-i tee ki ti ki ŋmat ti jat binbeŋ ni,

u senn mɔsonn a u saa tur timm u niib parmaasira.

⁹Barmɔnii, u teen siir nan wun tinn binba baakitɔ,

ki u baakir saa kpakin ti tiŋ ni.

¹⁰Lomm nan barmɔnpakue che leeb,

ki kasii binbeŋ nan parmaasir barin leeb.

¹¹Binbenŋaŋ saa nyi tingbouŋ na nie,

ki popeensin n nyi yendɔuŋ ni.

¹²Yennu saa turit linba ŋan,

ki te ki ti tiŋ n kpiak ki nan jeet.

¹³Popeensime tuu lii Yennu tɔɔnn, ki ŋammit sɔnu ki teenɔ.

Yenmiaru nba jiin sommir po

¹Yennu, gbiintir ki turin gatu,

kimaan n tee tatimɔɔe, ki namii.

²Ii guu n manfoor, kimaan n jii n mɔŋ ki turawa.

Fine tee n Yennu, ki a tinn a daabir nba teena yada na.

³Yennu, a tinin ninbaauk, kimaan n meia yoo kur.

⁴Yennu, a te ki a daabir-ii mɔk parpeenn,

kimaan n jikit n miaru ki teen fine.

⁵Yennu, a mɔk nyikinchab, ki ŋan turit,

ki a lomm gbee nan wunba kur miara.

⁶Yennu, gbiintir n miaru,

ki gbiint n fabinii nba loon sommir.

⁷N wahala yooe ki n saa yiina, kimaan a saa turin gatuwa.

⁸Yennu, yensau kaa ki tee nan fin na,

sɔɔ daa ki ban tun siar ki li tee nan a yar na.

⁹Yennu, digbana nba kur ki a nan na tan saa baar

ki gbaan a tɔɔnn, ki jianta; bi tan saa tur a sann baakir.

¹⁰A tee yabintdaanɔe, ki tuun bakitnauŋ toona, fin kɔɔe tee Yennu.

¹¹Yennu, a wannin a sɔnii, ki n saa somm nan barmɔnii.

A wannin ki n jianta nan n par kur, kii tiin a sann jaŋmaanii.

¹²N Yomdaanɔ Yennu, n saa jianta nan n par kure.

N sii baakit a sann nan yoo nba kaa gbennu.

¹³A mɔk lomm bonchiann nanin, ki tinnin,

ki n ki sik kaauk ni.

¹⁴Yennu, karinbaandamm fiir a bin biirin,

ki tee nikpiirit nba taan leeb a bin kpin;

bi tee niib nba baka kaa a poe.

¹⁵Ŋaan fin n Yomdaanɔ, fine tee ninbatinu nan lomm Yennu,

ki mɔk sukuru nan barmɔnii nan burchint.

¹⁶Jiantir n paak, ki tinin ninbaauk, a chekinin, ki tinin,

kimaan n jiantira nan n naa nba din jiantira biaŋinba nae.

¹⁷Yennu, turimin a ŋamm siara, ki n datai n la, ki di fei,

kimaan fin Yennu-e sommin ki maan n par.

Dontir nba jiin Jerusalem po

¹Yennu maa u doo Jerusalem kasii kunkona paak.

²U loon Jerusalem maŋ ki gar Israel teeb nba kɔɔ siaminba kur.

³Yennu doo, gbiintir bonŋana nba ki bi piak ki jiint a po na.

⁴“Yoo nba ki n tan saa sɔb digbana nba saak n mɔb na,

n tan saa pukin Ijipt nan Babilonn.

Mi-i taŋi sɔb Jerusalem teeb sana, n saa pukin Filistia

nan Taya nan Itiopia teeb sana.”

⁵Ki bi tan saa pak Sayɔnn po ki yet nan digbana kur nyii u nie,

ki Yabint Daanɔ saa te ki u mɔk paŋ.

⁶Yennu tan saa sɔb niib sana ki pukin Jerusalem teeb po.

⁷Ki bi waa waak ki yiin yanii a, “Ti piisin kur nyi Jerusalem-e.”

Yenmiaru nba jiin sommir po

¹N Yomdaanɔ Yennu, fine tee n tinntɔɔ,

n mɔ fabin ki teena yonnu nan nyiɔk kur.

²Gbatir n miaru, gbiintir n fabinii ki sommin.

³Parbiir bonchiann baarima, ki n ji naak nan kuun.

⁴N ji tee nan nileeb nba tuu yaa bin kpo nae,

ki n paŋ kur gbenn.

⁵Ki n nyint kpeemm boor,

ki ji tee nan binba ki bi tuu kpib ki bi dɔɔ kaat ni,

ki tee binba ki a ji ki tian bi po na,

binba ki a ji kan sommibi.

⁶Ki a jiin ki lun kasunsuŋ ni,

ki li tee siaminba tee bunbɔncheenn ki bia sumii chib.

⁷A wutoor paa n paak ki kpai, ki n dɔɔ nyunpana lɔŋ ni.

⁸A te ki n yɔnanmɔnii nyikin, ki te ki n nubir bi boor,

ki n be diloor, ki ji kan fit chiar.

⁹N ninbina diŋ nan wahalawa.

Yennu, n yia daa kur, ki dont n nii ki meia.

¹⁰A tuun bakitnauŋ toona ki teen kpeemmi-i?

Kpeemm fit fi ki dontirani-i?

¹¹A lomm nba kaa gbennu na, bi piak li po kaat ni-i?

koo ki piak a binbenŋaŋ, biiru boori-i?

¹²Bi laat a yaarlituk toona bunbɔnn niŋi-i?

koo ki laat a toonŋana tiŋ nba ni ki bi tamm a po na ni-i?

¹³Yennu, n yi fine, maa a sommin; n meia sanyiɔk kur.

¹⁴Yennu, bee ki a yêtimi? Bee ki a lek a numm nanimi?

¹⁵Maa fiir ki tee bika, n di wahala ki per man kpowa;

a tubdatu jikir na chɔkima,

¹⁶ki a wutobiiuk na butima,

ki a jaŋmaansooruk leku na biirin.

¹⁷Daar n tuu daar, li tuu lintime nan nyunmɔnn na,

ki set loonin lokir kur po.

¹⁸A te ki n yɔnanmɔnii nyikin,

ki bunbɔncheenn kɔɔe ji tee n yɔnanmɔŋ.

Israel teeb daamii yoo yaŋ

¹Yennu, n sii tun yiin yaniie

ki jiin a lomm nba kaa gbennu na po.

N saa jii mɔbe ki mɔɔnt a barmɔnii binbeŋ po,

maaru n tuu maaru kur ni.

²N saa wann nan a lomm see-e kenken yoo kur,

ki bia wann nan a barmɔnii binbeŋ be-e fanu

nan sanpagbouŋ na.

³A din yet a, “N senn n mɔlor nan nirɔ nba ki n ganne.

N senn mɔsonn nan n toontunnɔ Defid-e a,

⁴‘A maaru ni nirɔe sii tun tee kpanbar.

N saa te ki a naangbouŋ-ii mɔk paŋ, maaru n tuu maaru kur ni.’ ”

⁵Yennu, sanpagbant yiin yanii ki dont a bakitnauŋ toona,

ki kasii damm yiin a barmɔnii binbeŋ po.

⁶Yennu, sɔɔ ki be yendɔuŋ ni ki tee nan fin na;

malakanba nba be yendɔuŋ ni, bi sɔɔ ki tee a lɔɔ.

⁷Kasii damm sinsuuk nie ki yentinu be bonchiann,

a mɔk baakir ki gar binba linta na kur.

⁸N Yomdaanɔ Yennu, sɔɔ ki be ki tee nan fin na.

Yennu, fine tee yabint daanɔ, ki mɔk barmɔnii binbeŋ bona kur ni.

⁹Ki a ŋmakitir mɔkgbeŋa,

ki yoo nba ki li nyunpana fiiri, ki a tuu te lin diŋ.

¹⁰A din faa but bonsusoouk Rahab ki kpiiu;

ki jii a panchiɔŋ ki nyann a datai.

¹¹Sanpaak nan tingbouŋ na kur tee a yare.

Fine nan durinya nan linba kur be li ni.

¹²Fine nan li niidiitu nan niigaŋ po kur.

Tabor kunkonn nan Hermonn kunkonn kur yiin parpeenn yanii

ki dontir fine.

¹³A kpinkpouŋ be nan yiikooe, ki a nuu mɔk paŋ,

ki a diitu nuu be sanpaapo.

¹⁴Kasii nan barmɔnii binbeŋe tee a naangbouŋ fiakir,

ki lomm nan barmɔnii binbeŋ be a tɔɔnn po.

¹⁵Yennu, niib nba tumii ki sii jiantira nan yanii,

parpeenn tee bi yare; ŋamme tee binba somm a yentu ni na.

¹⁶Bi kpamm a sann nie daa kur, ki dontira, a toonŋana paak,

¹⁷ki ti baakir nan paŋ nyi a boor, ki a lomm niŋe te ki ti nyann.

¹⁸Yennu-e gann ti guutɔɔ,

fin nba tee timm Israel teeb kasii Yennu na,

fine turit ti kpanbar.

Yennu mɔlor nan Defid

¹⁹Sianyoo ki a din pak yirintu ni ki tur a barmɔnii toontunnɔ,

ki yet a, “N somm kunkɔnkɔnnɔ nan paŋa,

n jii naangbouŋ ki tur daanɔ nba ki n gannɔ niib na niŋa.

²⁰Mine jii n toontunnɔ Defid

ki mɔɔn kasii kpan u yur paak ki teenɔ kpanbar.

²¹N paŋ sii yɔɔ be nanɔ; barmɔnii, n yiikoo saa te ki u wakii.

²²U datai kan ban nyannɔ; nitonsɔɔ kan ban nyannɔ.

²³N saa faa but u datai, ki bia kpi wunba kur namɔ.

²⁴N sii loonɔ ki be fanu nanɔ, ki te ki u laat nyannu yoo kur.

²⁵N saa yarik u naangbouŋ,

laa nyii Sinsuuk ni Mɔkgbeŋir ki saan tuu Yufrates mɔkir.

²⁶Ki u saa betin a, ‘Fine tee n baa nan n Yennu,

ki bia tee n guutɔɔ nan tinntɔɔ.’

²⁷Ki n saa jiiu ki teenɔ n bijakper,

ki u sii tee wunba gar kpanbar kur;

²⁸ki n sii tun dia n mɔsonn nanɔ,

ki n mɔlor sii yɔɔ be nanɔ nan yoo nba kaa gbennu.

²⁹N saa ŋamm senn u naan ki lii be mɔkmɔk nan mɔkmɔk,

ki u yaaboonne sii tun tee kpanbar.

³⁰“Ŋaan li-i tee ki u yaaboona na ki mɔk mɔsaku nan n sennu,

ki bia ki waa n wannu na,

³¹li-i tee ki bi ki saak n kpaanii, ki bia ki dia n sennu na,

³²ŋann n saa dat bi tubae, kimaan bi yanbɔmm paak.

N saa te ki bin di fara bi biit paak,

³³ŋaan n kan nyik n lomm nan Defid-i,

koo ki kan dia n mɔlor nanɔ.

³⁴N kan biir n mɔlor nanɔ,

koo ki nyinn mɔlor nba ki n lor nanɔ na ni siari.

³⁵“N por nan n kasii sann nae ki kat,

nan n kan ban faar faak ki tur Defid-i.

³⁶U sii tun mɔk yaaboonae,

ki mine sii gorii u naangbouŋ nan yoo nba kaa gbennu,

³⁷ki li sii yɔɔ be nan ŋmaarik nba yɔɔ be sanpagbouŋ ni

biaŋinba na.”

Fabinii ki jiin baa nyann kpanbar na po

³⁸Mɔtana, a donn wutoor nan a kpanbar ganntɔɔ nawa,

ki yêtɔ, ki ji tabitɔ taar.

³⁹A biir mɔlor nba ki a lor nan a toontunnɔ nawa,

ki lu u naan fokirik jakint ni,

⁴⁰ki yeer u doo joona, ki biir u ŋapaara ki li teen yann.

⁴¹Ki binba kur gar leŋ jaan u bona, ki u leeb ji laau.

⁴²Ki a te ki u datai nyannɔ, ki te bi kur mɔk parpeenn.

⁴³A te ki u kunkɔntiat teen yann, ki te ki bi nyannɔ tɔb ni.

⁴⁴A tiit u naan dammira, ki faa yeer u naan kok ki bir tiŋ ni,

⁴⁵ki te ki u kpet yian, ŋaan ki u yoo daa ki baari,

ki te ki u dii fei.

Yenmiaru nba jiin fatu po

⁴⁶Yennu, a saa bɔr a mɔŋe ki saa tuu yoo nba kaa gbennu-u?

A wutoor saa di nan muu na ki lin wei nlee?

⁴⁷A tiar n manfoor nba jiŋ biaŋinba.

A tiar nan fine nant, ki ti tee nisaarii.

⁴⁸Ŋmee sii yɔɔ be u manfoor ni, ki kan ban kpo?

Nisaarik saa teen nlee, ki kan sik kaauk ni?

⁴⁹N Yomdaanɔ, a lomm nba din be na, li siara be lia?

Mɔsonn nba ki a din lor nan Defid na be lia?

⁵⁰A daa tammit baa sukii min, a toontunnɔ biaŋinba,

nan maa bia gaar tingbouŋ na mɔtont kur biaŋinba.

⁵¹Yennu, a dataie sukii a kpanbar ganntɔɔ na.

Siaminba kur ki u saa, ki bi waa sukiiɔ.

⁵²Pakin Yennu man ki saa tuu yoo nba kaa gbennu.

Lii tee nna.

GBOUŊ ŊANNA

(Yanii 90 -- 106)

Ki jiin Yennu nan nisaarik po

¹N Yomdaanɔ, fine tun tee ti binbeboor.

²Faa daa din ki nan kunkona nan durinya na,

ŋaan sɔɔ ki a poŋ din tee Yennu nba kaa gbennue,

ki bia sii tun tee Yennu yaayoo siiyoo.

³A te ki nisaarik ŋmat waa bo be sian,

ki lebitirɔ ki u kpantir tant.

⁴Bina tusir tee nan daar yennkɔɔ nae a boor,

li tee nan wonn nba tuu gar nae, koo ki jin nan nyiɔk na.

⁵A jikitit ki yaatir nant nan nyunmɔnn nba tuu pubir nae.

Ti manfoor jin nan damiit nae,

ki tee nan sanyiɔk ni mɔmaatuk na.

⁶Li lek tuu fiir sanyiɔk ni ki paane, ki yit puuk,

ŋaan daajoouk po lin koor ki suur.

⁷A wutoor di ki boontirite, ki a parbiir na jek ti gbanu.

⁸A bir ti yanbɔmm a tɔɔnn po,

ki bir ti bunbɔr yanbɔmm yeenin ni, siaminba ki a sii laatir.

⁹A wutoor chɔɔ jiŋ ti manfoawa,

ki ti bina tuu bot yiama nan kukura na.

¹⁰Ti manfoor tee bina piinlore-e,

koo li-i tee ki ti mɔk paŋ, tin baar bina piinniin,

ŋaan li kur na teent bakint nan ninbaatire;

ti manfoor tuu gbenne yian, ki ti ji ki be.

¹¹Ŋmee mi a wutoor paŋ nba tee?

Ŋmee mi a wutoor nba saa baar nan jaŋmaansooruk nba?

¹²A wannit ti manfoor nba tenn ki jin biaŋinba,

ki tin la yan kii sub.

¹³A wutoor saa do ki wei nlee?

Yennu, tinin timm a daaba ninbaauk.

¹⁴Kɔɔntit a lomm nba kaa gbennu na ni sanyiɔk kur,

ki li saa te ki ti mɔk parpeenn kii yiin yanii nan ti manfoor terik.

¹⁵Ŋaant ki tii mɔk parpeenn ki lin wei

nan faa bo turit parbiir ki li wei biaŋinba na.

¹⁶Ŋaant timm a daaba na n la a toonjaana,

ki ti yaaboona n la a baakir yabint.

¹⁷Ti Yomdaanɔ Yennu, ŋaant ki a piisim-ii be nant,

ki te ki tin nyann linba kur ki ti tuun ni.

Yennu-e tee ti guutɔɔ

¹Wunba baar Yennu boor ki loon fatu;

wunba biar Yabint Yennu maasu,

²ŋɔɔe saa fit yet a, “Yennu, fine tee n guutɔɔ nan n fat-tɔɔ.

Fine te n Yennu; ki n teena yada.”

³U saa nyinna woonin ni ninbɔŋ nan yiarkanbant kur ni.

⁴U saa jii u kpinkpante ki bakina, ki sii guua ki a be fanu,

ki u barmɔnii saa guura ki bia kɔn tura.

⁵A daa tiin nyiɔk ninbɔŋi, koo binba saa pikina yonnu ni,

⁶koo yiarkanbant nba baat nyiɔk, koo yiarbiit nba kpi yonnu ni.

⁷Tusir saa kpo ki dɔɔ linta,

ki tusaa piik n kpo ki linta, ŋaan a kan la daŋi.

⁸A ninbinn saa la biit damm nba laat tubdatu biaŋinba.

⁹A jii Yennu-e ki teenɔ wunba kɔn a paak,

ŋɔɔe tee Yabint daanɔ, ki tee a guutɔɔ;

¹⁰li paak, ninmɔnn kan baara,

ninmɔnn kan nakin a ŋaaki.

¹¹Yennu saa jii u malakanba ki bin guua,

kii goriia siaminba kur ki a saa.

¹²Bi sii dia-a nan bi niie, ki a taar kan gbiat tann gbaa.

¹³A saa ŋmaat yanbɔra nan wai, yanbɔrtont nan waalabirii.

¹⁴Yennu yet a, “N saa tinn binba mɔk lomm nanin na,

ki guur binba min ki n tee bi Yennu na.

¹⁵Bi-i yiinin, n saa turib gatu; bi-i kɔɔ daamii ni,

n sii be namm, ki nyinnib, ki te bin la baakir.

¹⁶N saa turib manfofoouk, ki tinnib.”

Dontir yaŋ

¹Yennu, li ŋan ki tin tura niipoouk bonchiann.

Yabint Yennu, li ŋan ki tin yin yaŋ ki tura baakir,

²ki mɔɔnt a lomm nba kaa gbennu na, sanyiɔk kur;

nan a mamɔmm na, nyiɔk kur,

³ki jii bonmumɔɔt nan naagbai ki yin yanii ki donta.

⁴Yennu, a paŋ toona teenin parpeenne;

faa tun linba nae te ki n yiin kpinkpammuk yanii.

⁵Yennu, a toona tee toonjaanae.

A dudukit sumii bonchiann.

⁶Jatuk kan fit bann linba na,

yankaarin daanɔ kan fit bann linba na paaki.

⁷Biit damm lek sii kpaatir nan mɔɔt nae;

binba tuun toonbiit na lek sii mɔkitire,

ŋaan fin Yennu tan saa biiribe fas,

⁸kimaan fin Yennu-e tee yiikoo daanɔ yaayoo siiyoo.

⁹Ti mi nan a datai kur saa kpowa,

ki a saa nyann biit damm na kura.

¹⁰A te ki n mɔk paŋ nan mɔnaab nae,

a tee parpeenn piisime n paak.

¹¹N la ki a nyann n dataiwa,

n gbat biit damm mɔniiwa.

¹²Niŋamm saa yit nan kaatii nae,

bi sii kpaatir nan Lebanonn kpekii nae.

¹³Bi tee nan tiinii nba ki bi burib Yennu ŋasaakak ni nae,

ki bi kpaatir ki yit Yenjiantu ŋasaakak ni,

¹⁴ki tuu kpeta, ŋaan bia loon lɔɔna,

ki bi faat mei yoo kur, ki bi mɔk paŋ.

¹⁵Ŋanne want nan Yennu ŋan,

n guutɔɔ maŋ ki mɔk siara biit u ni.

Yennu-e tee kpanbar

¹Yennu-e tee kpanbar, u gbee nan yabinte nan paŋ,

u senn tingbouŋ na fanue, ki li kan ban nyat.

²Yennu, a naan binbintir na maa fanue pinpiik niwa,

a din be ki sɔɔ durinya daa kaa.

³Yennu, mɔksunsunt dont bi kunkɔrae sanpaapo;

bi dont bi kunkɔrae ki tantir.

⁴Yennu-e tee kpanbar sanpaapo,

ki mɔk yiikoo ki gar mɔkgbeŋa jat,

ki mɔk paŋ ki gar mɔkgbeŋa nyunpana.

⁵Yennu, a sennii yɔɔ be-e;

ki a jiantu ŋasaakak na tee barmɔnii kasii boor yaayoo siiyoo.

Yennu-e tee sɔɔ kur barbuurɔ

¹N Yomdaanɔ, fine tee Yennu nba daar niib tuba,

fiitir a wutoor ki wann.

²Fine tee nisaarii kur barbuurɔ,

fiit ki tur biit damm na, baa jaŋ nan linba.

³Biit damm na parmaasir saa wei nlee?

Yennu, li saa wei nlee?

⁴Biit damm na parbifaanu saa wei nlee?

ki bi faa parbia ki jiint bi toonbiit po.

⁵Yennu, bi dint a niib biake;

bi mukis binba tee a yab nae.

⁶Bi kpi pakɔi nan kpeebiie,

ki kpi saamm nba kɔɔ ti tiŋ ni na.

⁷Bi yeen a, “Yennu ki laatit;

Israel teeb Yennu maŋ ki mi linba ki ti tuun na.”

⁸N niib na, bee ki i mantik tee bonliinii nna?

I tan saa subir nlee yooe?

⁹Yennu-e nan ti tuba, u ki gbia-a?

Ŋɔɔe nan ti ninbina, u ki laati-i?

¹⁰Digbana kur be u nuu nie, u kan dat bi tuba-a?

Ŋɔɔe tee nisaarik kur wanntɔɔ, u kɔŋit bannu-u?

¹¹Yennu mi baa dukii linba kur;

u mi bi yankaarin dudukit nba tee.

¹²Yennu, parpeenn be daanɔ nba ki a tumiiɔ na paak,

wunba ki a wantɔ a sennu na.

¹³A tuu turɔ foome ki nyinnɔ biak ni,

halii nan daar nba ki bi saa gbiir bootuk

ki biit damm n baa li ni na.

¹⁴Yennu kan nyik u niibi;

u kan nyik damm nba tee u yab na.

¹⁵Barmɔnii saa ŋamm kii be buut damm boor,

ki binba tee kasii na kur saa gaarir.

¹⁶Ŋmee set n poor ki took biit damm na?

Ŋmee gaar n paak ki took toonbiit damm na?

¹⁷Li-i bonni kii tee ki Yennu sommin,

n bo saa saan kpeentiŋe yiama.

¹⁸Ki n yet a, “N yaa man baae na,”

ŋaan ki fin Yennu lonchiɔŋ na fiinin ki sennin.

¹⁹Yoo nba ki n gbee nan dudukit ki li daamiin,

a tuu chee n pare, ki turin parmaasir.

²⁰A ki loon barbuura nba di fobit piinii na maami,

binba tuun linba ki sennu yaa bi daa tuun,

²¹binba lorin lorbiit niŋamm paak,

ki te ki bi kpi binba kaa biit na.

²²Ŋaan Yennu-e kɔn n paak, ŋɔɔe guun.

²³U saa dat bi tuba bi biit paak,

ki biirib bi yanbɔmm paak.

Ti Yomdaanɔ Yennu saa biiriba.

Dontir yaŋ

¹Baat man ki tin yin dont Yennu.

Ŋaant tin yin parmaasir yaŋ ki tur Yennu, ŋɔɔe guut.

²Ŋaant ti baar u boor nan niipoturu,

ki yin kpinkpammuk nan dontir yanii,

³kimaan ti Yomdaanɔ tee Yabint Yennu-e,

yabint kpanbar nba gar yenbis kur.

⁴Ŋɔɔe dia tingbouŋ na kur ki ŋmakitir,

laa nyii tinpɔɔr ni ki saa tuu jɔfɔkit yura paak.

⁵Mɔkgbeŋa nan tingbouŋ na tee u yare,

ki u diar, kimaan ŋɔɔe nann.

⁶Baat man ki tin gbaan ki jiantɔ;

ŋaant ki ti gbaan Yennu nba turit manfoor na tɔɔnn,

⁷kimaan ŋɔɔe tee ti Yennu, ki ti tee niib nba ki u goriit,

niib nba ki u teent linba ki ti loon.

Dinna nba na, ii gbiint waa piak linba a:

⁸“I daa nyar i tuba nan i yeejamm nba din nyar bi tuba,

Meriba nyuntonn boor,

daar nba ki bi din be Masa95.8 Masa tee Meriba nyuntonn maŋ sanleere. nyuntonn boor, kunkoouk paak na.

⁹Leŋe ki bi din bikin min Yennu,

ŋaan bi lek din la maa tun linba ki turiba.

¹⁰N wutoor din doo bi paak bina piinna,

ki n yet a, ‘Niib na mantik teen tubkangbata damma,

bi yêt bin sak n sennue.’

¹¹N wutoor din dooe, ki n por mɔporjaann a,

‘I kan ban kɔɔ tiŋ nba ki n bo yaa man turi foon na ni.’ ”

Yennu-e tee kpanbarjaann

(1 Barkperii 16.23-33)

¹Yinin yanpaanii ki tur Yennu.

Durinya munn n yin ki tur Yennu.

²Yinin ki tur Yennu ki dontɔ.

Daar kur, ii mɔɔntir waa tinnit na barŋaniie.

³Ii mɔɔntir u baakir kii teen digbana kur,

kii mɔntir u yabint toona kii teen nisaarii kur.

⁴Yennu tee Yenjaanne ki ŋan nan tii dontirɔ bonchiann,

ki turɔ baakir, ki lin gar kpanbar kur.

⁵Digbanlia yenbis na kur tee yanne,

ŋaan Yabint Yennu-e nan sanpaak.

⁶Dontir nan yabinte lintɔ,

paŋ nan fante gbee u jiantu ŋasaakak na ni.

⁷Tingbouŋ na niib kur n dont Yennu,

bin dont u baakir nan u yabint na.

⁸Ii dont Yennu sann nba tee baakir sann na,

ki baar nan piinii u jiantu ŋasaakak ni.

⁹Yoo nba ki kasii daanɔ Yennu dɔkit,

yin baa gbaan u tɔɔnn;

tingbouŋ na munn n jekir u tɔɔnn.

¹⁰Pakin ki tur digbana kur a, “Yennu-e tee kpanbar.

Tingbouŋ na see-e kenken ki kan ban nyat;

u saa jii mamɔmme ki bu niib buut.”

¹¹Tiŋ nan sanpaak, ii mɔk parpeenn man.

Mɔkgbeŋir nan linba be li niŋ kura, ii kpamm man.

¹²Tinii nan linba be leŋ kura, ii mɔk parpeenn man.

Fɔɔr ni tiinii kur-ii kpamm man,

¹³yoo nba ki Yennu saa baar a wun dia tingbouŋ na.

U saa dia durinya na niib nan mamɔmm nan ŋante.

Yennu-e tee kpanbarjaann

¹Yennu-e tee kpanbar.

Tingbouŋ, ii mɔk parpeenn.

Yimm tinii nba foo mɔkgbeŋa ni na, ii kpamm man.

²Sanpagbant nan bunbɔnne lintɔ;

u dia niib nan binbenŋaŋe nan mamɔmm.

³Muu gaar u tɔɔnne ki di u datai nba ŋaa lintɔ na.

⁴U sanyikintii tuu yent durinya nae,

ki tingbouŋ na n la ki jekir.

⁵Jɔfɔkit tuu nanne nan kpan na,

Yennu nba tee tingbouŋ na kur Yomdaanɔ na tɔɔnn.

⁶Sanpaak mɔɔntir Yennu ŋante,

ki nisaarii kur laat waa mɔk yiikoo biaŋinba.

⁷Patmanntɔɔ kur tuu di feie;

yenbis kur n gbaan ki jiant Yennu.

⁸Yennu, Sayɔnn niib mɔk parpeenne,

ki Juda teeb kpamm, kimaan a buut paak.

⁹Yabint Yennu, fine tee tingbouŋ na kur diatɔɔ;

a tee Yenjaanne ki gar yenbis kur.

¹⁰Yennu loon niib nba ki tuun biit nae;

ŋɔɔe guu u niib manfoor;

ŋɔɔe nyintib biit damm paŋ ni.

¹¹Yentu tuu yent kasii damm paake;

ki parmaasir baat niŋamm paak.

¹²Yimm niŋamm kur-ii mɔk parpeenn man,

kimaan linba Yennu tun na paak.

Tiat linba ki kasii daanɔ Yennu tun na, ki turɔ niipoouk.

Yennu-e dia durinya na kur

¹Yinin yanpaanii ki tur Yennu,

kimaan u tun bakitnauŋ toonawa.

U jii u tiɔŋ yiikoo nan kasii paŋe ki nyann nyannu na.

²Yennu-e mɔɔnt waa nyann biaŋinba,

ŋɔɔe fiit u tinnu yiikoo na ki wann niib.

³U dia u mɔsonn nba ki u din senn ki tur Israel teeb na,

nan u mamɔmm nan u lonchiɔŋ nba ki u turib.

Nisaarii nba be siar kur po la Yennu nyannu nawa.

⁴Tingbouŋ na kur n yin nan parpeenn ki tur Yennu;

jiin yanii nan kpinkpammuk hootii ki dontɔ.

⁵Yinin dontir yanii ki tur Yennu.

Faan kɔnn ki yin yaŋ ki turɔ.

⁶Pebin naatuna nan yina,

ki hoot nan kpinkpammuk ki tur Yennu;

ŋɔɔe tee ti kpanbar.

⁷Mɔkgbeŋir nan linba be leŋ kur, ii fu man;

tingbouŋ nan linba be leŋ kur, ii yiin man.

⁸Mɔka, ii poi niipoot man;

yimm kunkona, ii taan kii yiin parmaasir yanii, Yennu tɔɔnn;

⁹kimaan u baate a wun bu niib buut.

U saa dia durinya na nan mamɔmm nan ŋante.

Yennu-e tee kpanbarjaann

¹Yennu-e tee kpanbar; ŋaant nisaarii gbanant n jek.

U kar bonninnant paak, ŋaant tingbouŋ na n damm.

²Yennu-e tee Yabint daanɔ, Sayɔnn kunkonn paak;

ŋɔɔe tee digbana kur kpanbarjaann.

³Sɔɔ kur saa dont u sanjaann na.

U tee kasii daanɔe.

⁴Kpanbar-saakar, a loon linba tee mamɔmme;

a baar nan mamɔmme Israel teeb boor;

a baar nan kasiie nan ŋant.

⁵Ii dont ti Yomdaanɔ Yennu man;

ii jiantɔ, u naangbouŋ boor.

U tee kasii daanɔe.

⁶Moses nan Aarɔnn din tee u mannteebe,

Samuel-e din miarɔ,

bi din fabin tur Yennu, ki u turib gatu.

⁷U din be sanpagbouŋ niŋewa ŋaan piak namm;

ki bi sak u wannu nan u sennii nba ki u turib na.

⁸Ti Yomdaanɔ Yennu, a tur a niib gatu,

ki wannib nan a tee Yennu nba nyikinchabit niibe

nan faa lek daar bi tuba bi yanbɔmm paak nawa.

⁹Ii dont ti Yomdaanɔ Yennu man, ki jiantɔ, u kasii kunkonn na paak,

kimaan ti Yomdaanɔ Yennu tee kasiie.

Dontir yaŋ

¹Durinya niib kur n yin yaŋ ki tur Yennu.

²Ii jiant Yennu nan kpinkpammuk man,

kii yiin parpeenn yanii ki baar u boor.

³Ii bann nan Yennu-e tee barmɔnii Yennu.

Ŋɔɔe nant, ki ti tee u niib.

Ti tee u niibe, u tiɔŋ niib.

⁴Kɔɔn Yennu ŋasaakak ni nan niipoturu,

ki kɔɔ li dindonjouk ni nan dontir.

Turimɔ niipoouk kii dontirɔ.

⁵Yennu ŋan, ki u lomm kaa gbennu,

ki u barmɔnii binbeŋ be yaayoo nan yaayoo.

Kpanbar mɔsonn

¹Yennu, n yaŋ jiin a lomm nan a barmɔnii binbeŋ poe,

ki n yiin ki teena.

²Biit kaa n toona ni. A saa baar n boor nlee yooe?

N sii be kasii binbeŋe, n ŋaak ni,

³n kan sak kii be binbenbiiki.

N ki loon binba ki saak Yennu mɔb na benu;

n ki mɔk siara kpiir nammi.

⁴N kan teen faak daanɔ,

ki bia kan lor lorsiar nan toonbiit tunna.

⁵Wunba bɔr ki pak biir u lɔɔ,

daanɔ maŋe ki n saa biirɔ,

wunba kur got u lɔɔ ninŋmiaŋ ki mɔk garuk,

n kii be nan li daanɔ.

⁶N saa gann binba saak Yennu mɔb nae,

ki te ki bii kɔɔ n ŋaak ni.

Niŋamm na kɔɔe ki n saa sak bii tuunin.

⁷Kpinkpannii damm kan kɔɔ n ŋaak ni;

daanɔ nba fa faak kan set n boor.

⁸Daar n tuu daar,

n saa biir biit damm nba be tiŋ na nie;

n saa nyinn biit damm kur Yennu doo na niwa.

Naasimɔ fabinii ki jiin u daamii po

¹Yennu, gbiintir n fabinii,

ki gbat n mɔnii nba jiin sommir po.

²Mi-i be daamii ni, a daa lekin a numm ŋaan nyikitimi.

Gbiintir, ki turin gatu yiama, yoo nba ki n yiina.

³N manfoor yate yian yian nan munyuut na,

ki n gbanant di nan muu na.

⁴Bi faa birin nan mɔkoont nae, ki n ji ki loon jeet.

⁵Maa kurii sanpaapowa na, ki n ji waab,

ki tee gbouŋ nan kpaba.

⁶N tee nan kunkoouk paak fiiuk nae,

ki bia tee nan langbent ni fiiuk na.

⁷N dɔɔ ki ki gɔɔnti;

n tee nan nɔɔn-yemmir nae, ki lin jak mɔpina paak.

⁸N datai sukiime daar kur,

ki binba laan na dia n sann ki poor mɔporbiit.

^9-10A wutoor nan a parbeenn paak,

ki n mɔɔ tanpent ki li tee n jeet,

ki n ninnyuut tuu ŋmat nan n bonnyukar;

ki a tɔkirin ki lun.

¹¹N manfoor tee nan daajoouk yinyuŋ nae;

ki n tee nan mɔkoont na.

¹²Ŋaan fin Yennu-e yɔɔ tee kpanbar,

ki maarpaanu kur sii yɔɔ tian a po.

¹³A saa fiir ki tin Sayɔnn doo ninbaauk,

kimaan yoo baar nan fan tinir ninbaauka;

yoo nba nae jaŋ.

¹⁴Laa lek biir na, ŋaan timm a toontunna loonir,

laa lek tee langbent na, ŋaan ti tiinir ninbaauk.

¹⁵Nisaarii saa tin Yennu,

tingbouŋ na kpanbara kur saa tin u paŋ na jaŋmaanii.

¹⁶Yoo nba ki Yennu saa ŋamm maa Sayɔnn na

u saa fiit u yabint ki wann.

¹⁷U saa gbat u niib nba ki u yêtib na, ki gbiint bi fabinii.

¹⁸Sɔbin linba ki Yennu tun na,

ki guun maarpaanu nba waa na,

ki niib nba ki bi daa ki marib na n tan dontɔ.

¹⁹Yennu be u kasii boor sanpaapoewa ŋaan got sikin,

u be sanpaapoe ŋaan diit tingbouŋ na.

²⁰U gbat dansarkɔɔra kukura,

ki nyinn binba ki bi bu biirib ki yaa bin kpib na yann.

²¹Ki li paak bi saa dont u sann, Sayɔnn kunkonn na paak,

ki u saa la dontir Jerusalem,

²²yoo nba ki digbana niib nan yent nba ni niib

saa taan leeb ki jiantɔ na.

²³Yennu-e teenin nichɔkuŋ

yoo nba ki n daa tee nipaaŋ na;

u jiŋ n manfoore.

²⁴Li paak ki n yet a, “Yennu, a daa jikitin

ki saa nanin mɔtana, maa daa ki kpet na.”

Yennu, a yɔɔ be-e.

²⁵Sian yooewa ki a din nan tingbouŋ na,

ki jii a tiɔŋ nii ki nan sanpaak.

²⁶Bi tan saa bota, ŋaan fin sii yɔɔ be-e;

bi tan saa kpiar nan kparchant nae.

A saa lub nan kparchant nae ki bin bot.

²⁷Ŋaan fin ŋarin tee yomme yoo kur, ki a manfoor kaa gbennu.

²⁸Ti waas sii be bi yamanie,

ki a fatu nie ki ti yaaboona sii be fanu.

Ki jiin Yennu lomm po

¹N seek, pakin Yennu.

N gbanu kur, pakin Yennu kasii sann.

²N seek, pakin Yennu, ki daa tammit u ŋamm po.

³U tuu nyik chab n biit kure ki te n yiarii kur n gbenn.

⁴Ŋɔɔe nyintin kuun ni, ki mɔk lomm nan ninbatinu n paak.

⁵U gbeen n binbeŋ nan bonŋanae,

li paak ki n tee nipaaŋ ki bia mɔk paŋ

nan baakir nba mɔk paŋ biaŋinba na.

⁶Yennu-e bu ki sommit binba be mukir ni na, ki teemm mɔnii.

⁷U din fiit u lorae ki tur Moses,

ki te ki Israel teeb la u paŋ toona.

⁸Yennu mɔk ninbatinu nan lomm,

u wutoor ki do yian, ki u bia gbee nan lonchiɔŋ.

⁹U ki yakii nan niib yoo kuri,

u bia ki yɔɔ be nan wutoori.

¹⁰U ki daar ti tuba ki li baat laa jaŋit biaŋinba

koo ki pa ti biit nan ti yanbɔmm paatii nba tee biaŋinba na.

¹¹Sanpaak nan tiŋ nba fɔk nan leer biaŋinba na,

nnae ki u lomm mun yab ki tur binba baakitɔ na.

¹²Yondo po nan yonbaa po nba fɔk nan leer biaŋinba na,

nnae mun Yennu tuu jii ti biit ki fɔkit nann ti boor.

¹³Baa nba mɔk ninbatinu ki tur u waas biaŋinba na,

nnae mun ki Yennu mɔk ninbatinu ki tur damm nba baakitɔ.

¹⁴U mi waa jii linba ki nant, u mi nan ti tee tante.

¹⁵Timm ŋarin, ti manfoor tee nan mɔɔt nba tuu pia nae,

ti tuu kpaat ki yite, ki tee nan tipuuk na,

¹⁶ŋaan wouŋu da yoo nba, lin pebirir, ki sɔɔ ji kan lari.

¹⁷Ŋaan binba teen Yennu baakir na,

Yennu lomm yɔɔ be namme;

ki u lomm be maarpaanu nba baat yoo kur paak,

¹⁸binba dia u mɔlor, ki bia saak u sennu fanu na.

¹⁹Yennu bir u naangbouŋ yendɔuŋ nie;

ŋɔɔe tee niib kura kpanbar.

²⁰Yimm malakanba nba mɔk paŋ nan yabint na,

ii dont Yennu man,

yimm nba saak u sennii ki bia gbiin u maan na.

²¹Yimm sanpaapo pandamm kura n dont Yennu,

yimm u toontunna nba tuun u loomm na.

²²Yimm nba tee u naamii kur, ki be u naan ni kur,

ii dont Yennu man.

N seek, pakin Yennu.

Ki jiin naamii daanɔ dontir po

¹N seek, pakin Yennu.

N Yomdaanɔ Yennu, a yab bonchiann.

²A gbee nan yabinte nan baakir,

ki gbab yentu, ki li linta nan chinchenn na.

A tant sanpagbouŋ nan nyungbouŋ nae,

³ki senn a doo, nyun nba be sanpaapo na paak.

A jii sanpagbante ki teen a taantorit,

ki jak wouŋ kpinkpant paak.

⁴A jii wouŋo ki teen a toomiinba,

ki tuu yent sanyikintii, ki li tee a toontunna.

⁵Fine senn tingbouŋ na li fiakir paak,

ki li set fanu ki kan ban chat,

⁶ki jii mɔkgbeŋa ki bakin li paak nan liant na,

ki nyun dɔkin jɔjaana na.

⁷Yoo nba ki a yakii nan nyun na, ki li chiar;

laa gbat a satianii fuur yoo nba, ki li chiar yaat,

⁸ki pubir gar jɔjaana yura paak ki sik baat ni,

ki saan faa ŋamm sian ki turir na.

⁹Ki a kɔr kɔru nba ki li kan ban yakir,

a lin guurir, ki li ji daa piint tingbouŋ na.

¹⁰Fine te ki nyun nyi nyuntona ni ki puub siik baat ni,

ki mɔka puub ki gaar kunkona sinsuuk ni.

¹¹Ŋanne teen muuk ni bonkobit kur nyun,

leŋe ki bɔnii kpeent bi nyunnyukuru.

¹²Nɔɔnii tia bi tiat leŋ tiinii na paake ki mɔ.

¹³Fine te saak nyi sanpaapo ki baa ki maant kunkona,

ki tingbouŋ na gbee nan a piisin.

¹⁴Fine te mɔɔt pia, ki bonkobit ŋman,

ki jeet naan, ki nisaarii di, ki buur bi bonbuburit,

¹⁵ki ŋaa tilɔɔna daan, ki li teemm parpeenn,

ki tee kpan, ki li teemm parcheenn,

nan jeet, ki li teemm paŋ.

¹⁶Lebanonn kpekii na laat saak bonchiann;

tiinii maŋ tee Yennu tiɔŋ tiinii nba ki u bure.

¹⁷Leŋe ki nɔɔnii tia bi tiat, ki janbɔɔnlot tia tiinii maŋ paak;

¹⁸ki piarii be jɔjaana na paak, ki sina kɔɔ tanfiat na ni.

¹⁹Fine nan ŋmaarik a wuu dakin ŋmaarii kann,

ki yonnu mi u binbaayoo.

²⁰Fine nan nyiɔk,

ki li-i bɔnn, muuk ni bonfoa n nyi ki somm.

²¹Yanbɔrpaanii na tuu kpaan bi jeet ŋaan gaan jate,

ki kpaan jeet nba ki Yennu saa turib.

²²Yonnu-i taŋi do yoo nba, bin ŋmat bi dɔɔnii ni.

²³Li yoo na ki nisaarii n nyi ki tun bi toona

ki saa tuu daajoouk.

²⁴Yennu, a nan bona bonchiann.

A nan li kur nan subinchiɔŋo;

tingbouŋ na gbee nan a naamiie.

²⁵A nan mɔkgbeŋir, ki li yarin ki bia fɔk,

ki bonfoa nba be leŋ kaa kann,

bongbeŋa nan bonbis kur be leŋ.

²⁶Ki ŋarint somm li paak,

ki nyun ni bonfogbeŋir nba ki a nan na lin leŋ.

²⁷Bi kura gaa a paake, a fan turib jeet yoo nba ki bi loon.

²⁸Ki a teemm jeet ki bi di, ki teemm jeŋant ki bi di gboot.

²⁹Li-i tee ki a lek a numm, jaŋmaanii tuu sooribe,

ki fi-i jii be foon,

bi tuu kpoe ki ŋmat sik tant nba ki bi bo nyii na ni.

³⁰Ŋaan fi-i turib foon, bi tuu teen bonfoae;

a teen tiŋ na bonfoa manfoor.

³¹Yennu yiikochiɔŋ-ii yɔɔ kii be.

Yennu-ii yɔɔ kii mɔk parpeenn linba kur ki u nan na paak.

³²Wuu got tingbouŋ, li jekire, wuu sii jɔjaana ki li nyi munyuut.

³³N sii yiin ki teen Yennu-e, n manfoor kur ni;

n manfoor fɔkint ni kur, n sii yiin dontir yaniie ki teen Yennu.

³⁴U par-ii mei n yaŋ maŋ paak,

kimaan n parpeenn nyi u boore.

³⁵Wun boon toonbiit damm na tingbouŋ na ni,

ki daa te nibiit na ji be.

N seek, pakin Yennu.

Pakin Yennu.

Yennu nan u niib

(1 Barkperii 16.8-22)

¹Turin Yennu niipoouk, ki mɔɔnt u yabint po;

ki pak nisaarii waa tun linba.

²Yinin dontir yaŋ ki tur Yennu,

ki pak wann waa tun bakitnauŋ toona nba.

³Ii mɔk parpeenn, kimaan taa tee u niib na paak,

ŋaant ki wunba kur jiantirɔ-ii kpamm.

⁴Saant Yennu boor ki boi sommir po, kii jiantirɔ yoo kur.

^5-6Yimm nba tee u toontunnɔ Abraham yaaboona na,

yimm nba tee Jakɔb nba ki u din gannɔ na yaaboona na,

ii tian yaarlituk toona nba ki Yennu tun na,

nan buut nba ki u bu na.

⁷Ti Yomdaanɔe tee Yennu,

u sennu na tee tingbouŋ na kur yare.

⁸U sii yɔɔ dia u mɔlor nae, ki u mɔsonn na sii yɔɔ be,

ki tur maarpaanu nba kur saa baar.

⁹U sii dia mɔlor nba ki u din lor nan Abraham na,

nan mɔsonn nba ki u din senn ki tur Aisak na.

¹⁰Yennu din lor mɔlore ki tur Jakɔb,

ki li tee mɔlor nba sii yɔɔ be.

¹¹U din yet a, “N saa tura Keenann tiŋ. Li sii tee a tiɔŋ faare.”

¹²Yennu niib din ki yabi, ki tee saamm Keenann tiŋ ni.

¹³Bi din yeeke ki lɔɔn digbana, ki nyi yent ni ki saan leer ni.

¹⁴Ŋaan Yennu din ki saak sɔɔ dintib biaki,

waa loon ki wuu guub na, ki u yakii nan kpanbara na a,

¹⁵“I daa paa n nigannkab na daŋi, i daa siit n sɔkiniinba na.”

¹⁶Yennu-e din te ki kon baa tiŋ na paak, ki biir bi jeet kur,

¹⁷ŋaan u din tun sɔɔe ki u gar bi tɔɔnn,

ŋɔɔe tee Joosef, wunba ki bi din kɔɔtɔ ki bi teenɔ daabir na.

¹⁸Bi din jii jaruko ki baan u taa, ki jii kut ki lor u turu ni,

¹⁹nan yoo nba ki u buntir na tan teen mɔnii.

Yennu mɔmaame din pak kat nan u mɔk mɔnii.

²⁰Li yoo na ki Ijipt kpanbar na ji ŋaau,

ki doo diatɔɔ maŋ nyikɔ,

²¹ki jiiu ki te ki u tee u toontunna saakɔɔ,

ki teenɔ tiŋ na kur ŋmakit-tɔɔ,

²²ki te ki u mɔk yiikoo nba gar kpanbar na ŋaasaakab kur,

nan yaak nba ki u saa fit kpaan kpanbar na tɔɔndamm.

²³Ŋanne ki Jakɔb saan Ijipt ki saa kar doo maŋ ni.

²⁴Yennu din jii matik bonchiann ki tur u nigannkab,

ki te ki bi mɔk paŋ ki gar bi datai,

²⁵ki te ki Ijipt teeb na ki loon u niib na, ki diab nan mɔleemii.

²⁶Ŋanne ki u tun u toontunna Moses nan Aarɔnn

ki bi tee binba ki u gannib.

²⁷Ki bi tun Yennu maŋ toonjaana nan bakitnauŋ toona

Ijipt tiŋ ni.

²⁸Yennu din te ki bunbɔnn baar Ijipt tiŋ ni,

ŋaan Ijipt teeb na din ki sak Yennu mɔbi.

²⁹U din te ki bi nyun kpant sɔn, ki bi janii kur kpo.

³⁰Bi doo din gbee nan pɔntae,

bi kpanbar ŋaak gbaa, pɔnta din gbee leŋa.

³¹Yennu din te ki kpajui nan naayinyoorii baar

ki gbee digbann na kur po.

³²U din nyik saake, ŋaan tun sakaana nan sanyikintii, tiŋ maŋ ni,

³³ki biir bi daan tiinii nan bi sinsabii, ki daa tiinii maŋ kur.

³⁴U din te ki naasuut baar, ki ki mɔk kann,

³⁵ki ŋman bonbuburit nba kur be tiŋ na paak,

ki bia ŋman bi jeet kur.

³⁶U din kpii Ijipt teeb ŋaak kur ni, bonjak nba tee bikperik.

³⁷Li poor po ki u nyinn Israel teeb na,

ki bi jii salimpeena nan salimmɔna,

bi kura din mɔk paŋ nan laafia.

³⁸Ijipt teeb na din tiimm jaŋmaaniie;

baa ji din tan nyii na, ki Ijipt teeb para ji maŋ bonchiann.

³⁹Yennu din te sanpagbouŋo jɔɔn u niib na yur paak,

ki teemm muu nyiɔk, ki wantib sɔnu.

⁴⁰Bi din boie, ki u turib pinpara,

u din turib jeet nba nyii yendɔuŋ nie, ki gboomm.

⁴¹U din loot tanne, ki nyun nyii leŋ,

ki pubir kunkoouk na paak nan mɔkir na.

⁴²U din tiar u kasii mɔsonn nba ki u din senn

ki tur u toontunnɔ Abraham na,

⁴³ki nyinn u nigannkab maŋ,

ki bi yiin yanii ki hoot nan parpeenn.

⁴⁴U din jii nisiab tiniie ki turib,

ki te ki bi gaar bi sarwaat,

⁴⁵a lin te ki u niib n sak u sennii,

ki bia dia u wannu na kur.

Pakin Yennu man.

Yennu ŋamm ki jiin u niib po

¹Pakin Yennu man.

Ii tur Yennu niipoouk, kimaan u ŋan,

ki u lomm kaa gbennu.

²Ŋmee saa fit wann toonjaana nba kur ki u tumi?

Ŋmee saa fit dontɔ ki lin jaŋi? Sɔɔ kaa.

³Parmaasir be daansiab nba saak u mɔb,

binba yɔɔ tuun linba ŋan na paak.

⁴Yennu, tiat n po yoo nba ki a sommit a niib na;

fi-i yaa a tinnib yoo nba, fan pukinin leŋ.

⁵Ŋaant ki man la ki a niib mɔkitir, ki biit namm bi parpeenn,

ki bia biit nan a niib maŋ parpeenn kpinkpammuk.

⁶Ti tun ki biir, nan ti yeejamm nba din tun biir nawa,

ti tee biit nan yanbɔndamme.

⁷Ti yeejamm nba din be Ijipt na

din ki bann Yennu bakitnauŋ toona paak;

bi din tamm bona bonchiann nba ki u tun

ki wannib u lomm nawa,

ki yêt Yabint Yennu mɔb, Mɔkmuŋ na boor,

⁸ŋaan u din tinnibe nan waa senn mɔsonn na,

a lin wann u panchiɔŋ.

⁹U din yet Mɔkmuŋ na, ki li fɔɔr;

ki u poon u niib tinkooŋ paak.

¹⁰U din nyinnib binba ki loomm na nuu nie,

ki fatib bi datai maŋ nuu ni.

¹¹Ki nyun dii bi datai na, nan bi yenɔkɔɔwa din ki biari.

¹²Ŋanne ki u niib teen u mɔsonn na yada,

ki yin yanii ki dontɔ.

¹³Li poorpo ki bi tamm waa tun linba na yiama,

ki ki guur u kpaanii ŋaan tuun bi toona.

¹⁴Bi din gbee nan nianbiiuko kunkoouk na paak

ki bikin ŋɔɔ Yennu.

¹⁵Li paak ki u turib baa loon linba maŋ,

ŋaan bia te ki yiarbiiuk baa bi paak.

¹⁶Bi din fumm nan Moses nan Aarɔnn

nba tee Yennu kasii toontunna nae, kunkoouk na paak.

¹⁷Ŋanne ki tingbouŋ bɔkit ki nak Datann nan Abiram

nan bi ŋaateeb;

¹⁸ki muu nyii sanpaapo ki baa bi poorpojɔɔmu paak,

ki dii biit damm maŋ.

¹⁹Bi din maa salima naabike, Sainai jɔɔr paak,

ki li tee tingbann ki bi jiantir.

²⁰Bi din nyik yabint Yennu jiantue

ŋaan jiantir bonkobuk nba ŋman mɔɔt ninnauŋ.

²¹Bi din tamm Yennu nba din jii u panchiɔŋ toona

ki nyinnib Ijipt na poe.

²²U tun bakitnauŋ toona bonchiann leŋ,

ki bia tun yaarlituk toona bonchiann Mɔkmuŋ na boor.

²³Yennu nba yet a u saa biir u niib na,

ki u niganntɔɔ Moses fiir set tokinɔ,

ki gɔɔr u wutoor na, ki li ji ki biirib.

²⁴Li poorpo, ki bi yêt tinŋaŋ na,

kimaan bi ki teen Yennu mɔsonn na yada.

²⁵Ki bi be bi lanbont ni ki burin,

ki yêt bin gbiint Yennu maan.

²⁶Ŋanne ki u turib ninmɔnn kpayakit

nan u saa te ki bi kur n kpo kunkoouk na paak,

²⁷ki yat bi yaaboona ki kɔɔmm binba ki mi Yennu na doi ni,

ki bin kpo digbangana ni.

²⁸Ki Yennu niib na taan Peor teeb,

ki bi jiantir tingbann nba ki bi yi Baal na, Peor doo ni,

ki dii jeet nba ki bi mann maruŋ ki tur tingbann

nba kaa manfoor maŋ.

²⁹Bi toonbiit din donn Yennu wutoore,

ki u te ki yiarbiiuk baa bi paak.

³⁰Ki Finehas set leŋ ki dat biitdamm na tuba,

ki yiarbiiuk na ji gbenn.

³¹Ki bi yɔɔ tian linba na po u sann ni,

ki bia sii yɔɔ tian li po, yoo nba baat kur.

³²Niib na din donn Yennu wutoor, Meriba nyuntona boor nie,

ki Moses kɔɔ daamii ni bi paak.

³³Bi din te ki Moses wutoor dooe ki saa gar,

ki u pak mɔbonkaat.

³⁴Bi din ki kpii binba ki waa Yennu na

nan ŋɔɔ Yennu nba wannib a bin kpib na.

³⁵Bi din kɔɔnt niib maŋ waase

ki gaar bi patmannu marima.

³⁶Yennu niib na din jiant yenbise, ki li baar nan bi biiru.

³⁷Bi din jikit bi bonjai nan bi bonpoie ki mann maruŋ

ki teen Keenann tingbana.

³⁸Bi din kpii waas nba kaa biit,

ki bi tiŋ na biir, kimaan waas na kpinu paak.

³⁹Bi ji din ki waa Yennu,

bi toonbiit na din te ki bi ji ki be kasii.

⁴⁰Li paak ki Yennu wutoor doo u niib na paak,

ki u yan yêtib.

⁴¹Ki u nyik ki chabib nan binba ki jiantir Yennu,

ki bi datai maŋ ji diab.

⁴²Bi datai din dintib biak, ki bi jiantirib.

⁴³Yennu din yɔɔ nyint u niib daamii nie,

ŋaan bi din gann mɔyêtuko ki sik kpii biit ni.

⁴⁴Baa bia fabin yoo nba,

ki Yennu gbat bi fabinii na ki gbiint bi daamii maŋ.

⁴⁵Bi paake ki u tiar u mɔlor na po, ki lebit u dudukit,

kimaan u lonchiɔŋ na paak.

⁴⁶U din te binba dintib biak na mɔ kɔɔ

nan baa dinnib biak na paak.

⁴⁷Ti Yomdaanɔ Yennu, tintit, ki nyinnit digbana na ni,

ki tii mɔk niipoturu ki dont a kasii sann.

⁴⁸Ii dont Yennu, wunba tee Israel teeb Yomdaanɔ na;

ii dontɔ mɔtana nan yoo nba waa kur.

Ŋaant sɔɔ kur n yet a, “Lii tee nna.”

Pakin Yennu man.

GBOUŊ ŊANŊMU

(Yanii 107 -- 150)

Dontir nba jiin Yennu ŋamm po

¹“Turin Yennu niipoouk,

kimaan u ŋan, ki u lomm kaa gbennu.”

²Ii yeen mɔbona na kii lei kii dont Yennu man,

yimm nba kur ki u tinni, ki nyinni i datai nuu ni,

³ki nyinni tingaŋ ni, li yondo po nan yonbaa po,

niigaŋ po nan niidiitu po, ki jen nani na.

⁴Siab din yirib kunkoouk na paake, ki sɔnu kaa,

ki bi ki mi baa saa tɔkin siaminba ki baar doo ki kɔɔ.

⁵Kon nan nyunnyukuru din soorib,

ki bi poŋ ji ki mɔk dindanni.

⁶Bi daamii maŋ nie ki bi yiin Yennu,

ki u nyinnib bi fara maŋ ni.

⁷U din tɔkin namm sɔnsunsonne,

ki saan namm doo nba ni ki bi sii be.

⁸Bin tur Yennu niipoouk, kimaan u lonchiɔŋ

nan u yaarlituk toona nba ki u tun ki turib na paak.

⁹Ŋɔɔe gboont binba ki nyunnyukuru mɔkib na,

ki bia gboont komma nan jeŋant.

¹⁰Siab din be bunbɔnn nba sumii nie,

ki tee dansarii, ki bant baab ki bi di fara,

¹¹kimaan bi din yêt Yabint Yennu sennue,

ki bia ki gaar u kpaanii.

¹²Bi din tun toonpaarae ki tan baŋ,

ki tuu baa tiŋ ni, ŋaan sɔɔ kaa ki saa sommib.

¹³Bi daamii maŋ nie ki bi yiin Yennu,

ki u nyinnib bi fara ni.

¹⁴Ŋɔɔe nyinnib bunbɔnchiɔŋ na ni,

ki cheer bi bant na ki yɔniir.

¹⁵Bin tur Yennu niipoouk, kimaan u lonchiɔŋ

nan u yaarlituk toona nba ki u tun ki turib na paak.

¹⁶Ŋɔɔe jintir kutmɔnt gana, ki bia jintir kutlaana.

¹⁷Siab din tee bonliiniie ki di fara

bi biit nan bi yanbɔmm paak.

¹⁸Bi din ki mɔk jeet niɔŋu, ki poŋ ji kɔr kuun tammɔb.

¹⁹Bi daamii maŋ nie ki bi yiin Yennu,

ki u nyinnib bi fara ni,

²⁰ki jii u mɔbona ki turib laafia, ki nyinnib kuun ni.

²¹Bin tur Yennu niipoouk, kimaan u lonchiɔŋ

nan u yaarlituk toona nba ki u tun ki turib na paak.

²²Bin jii maruŋ ki turɔ niipoouk nan yanii

nba tee parpeenn yanii, ki lin wann waa tun linba kur.

²³Siab din somm mɔkgbeŋa paake nan ŋarint,

ki kpaan bi daar diitir mɔkgbeŋa na ni.

²⁴Bi din la Yennu toona, u bakitnauŋ toona, nyun na paak.

²⁵U din pak maame, ki wonpaaruk piin ki da

ki fiin nyunpana na,

²⁶ki nyunpana na wokitir ŋaruŋ na, ki dont ki bia sikint.

Ninmɔnboorik na ni, niib na din ki mɔk dindann nan waama.

²⁷Bi din ŋat baantire, ki ŋmaan nɔrii nan dayibira na;

bi bannu na kur ji din ki mɔk nyɔɔti.

²⁸Bi daamii maŋ nie ki bi yiin Yennu,

ki u nyinnib bi fara ni.

²⁹U din te ki wonpaaruk na maak, ki nyunpana na dɔɔr.

³⁰Li din turib parpeenn, kimaan wonpaaruk na nba maak na,

ki u jiib ki donnib gbingbann nba ki bi loon paak.

³¹Bin tur Yennu niipoouk, kimaan u lonchiɔŋ

nan u yaarlituk toona nba ki u tun ki turib na paak.

³²Bin mɔɔnt nibur ni ki wann u yabint nba tee,

ki dont u sann, tɔɔndamm boor.

³³Yennu-e din te ki mɔka fɔɔr,

ki nyuntona jit, ki nyun ji ki nyi.

³⁴Ki u te ki koorin tiŋ kpant tinkokirik,

kimaan binba kɔɔ leŋ na toonbiit paak.

³⁵U din te ki kunkoot kpant nyundɔɔna,

ki tinkooŋ kpant jinjabii.

³⁶Ki u te komma kɔɔ leŋ, ki teenir doo ki be li ni,

³⁷ki buur bonbuburit nan tilontii, tiŋ na ni,

ki tuu tan jaan jeet bonchiann.

³⁸U din teen piisin u niib paak, ki bi mar waas bonchiann;

u din ki te ki bi bonkobit waabiti.

³⁹Yoo nba ki siab din nyann ŋɔɔ Yennu niib

ki diab nan tonu ki dintib fara, ki teemm butimm na,

⁴⁰u din sarik binba dintib fara na,

ki te ki bi yirik kunkoouk nba ki sɔnu kaa na paak,

⁴¹ŋaan nyinn talas damm na bi daamii na ni,

ki te ki bi pɔt nan bonkobit na.

⁴²Niŋamm laat na, ki mɔk parpeenn,

ŋaan ki biit damm na kur muu bi mɔi.

⁴³Binba mɔk subinii kur n dukin linba na po;

bin dukin Yennu lonchiɔŋ nba kaa gbennu na po.

Yenmiaru nba loon sommir ki jiin datai biiru po

(Yaŋ 57.7-11; 60.5-12)

¹Yennu, n mɔk dindann nba yab.

N saa yin yaŋ ki donta.

²N seek, fiit. N kɔnn nan n yerik, fiit man.

N saa fiir sanyafaare.

³Yennu, n saa tura niipoouk digbana sinsuuk ni.

N saa dont a sann nisaarii sinsuuk ni.

⁴A lomm nba kaa gbennu na do ki baat sanpaak;

ki a mamɔmm na siit sanpagbant.

⁵Yennu, want a yabint sanpagbant niŋ

nan a paŋ tingbouŋ na kur po.

⁶Jiin a paŋ na ki tinnit, ki gat n miaru na,

ki niib nba ki a loomm na n nyi bi daamii ni.

⁷Yennu be u kasii boor ŋaan yet a, “N saa jii yiikooe

ki bɔkit Sekem doo, ki bia chent Sukof baauk ki tur n niib.

⁸Gilead yent tee n yare, ki kpab nan Manase yent,

Efraim yent tee n kut fokirike,

ki Juda yent mun tee n naan dammir.

⁹Ŋaan n saa jii Moab yente ki teen n nyunnitŋmaŋ,

ki Edom yent sii tee n taasaat binbir boor,

ki lii tee nyinn ki want nan n yenir.

N saa hoot nan nyannu kunkɔre, Filistia teeb paak.”

¹⁰Yennu, ŋmee saa jiin ki saan nanin digbanpaarir na ni?

Ŋmee saa gar tɔɔnn ki saan nanin Edom-i?

¹¹A set kpan yêtime-e?

A kan tɔk nan ti kunkɔnkɔnna na-a?

¹²Sommitit, ki nyinnit ti datai nuu ni;

nisaarik sommir ki mɔk siara nyɔɔti.

¹³Yennu-i taa ti po, ti saa nyanna;

ŋɔɔe saa nyann ti datai.

Daanɔ nba be daamii ni fabinii

¹Yennu, n dontira; a daa ŋmini.

²Biit damm nan fai damm lekima. Bi fa faake ki paan,

³ki piak bonbiir ki jiint n po, ki lekinin ki li kaa gbinni.

⁴Bi biirime, ŋaan ki n lek loomm, ki miar fin Yennu bi paak.

⁵Bi jikit biite ki pa n ŋamm paak, ki jikit naŋ ki pan lomm paak.

⁶Gant barbuurɔ nba tee tondaanɔ ki wun bu n dataak buut,

ki ŋaan ki u datai na yenɔ n biirɔ.

⁷Bin bu u buut ki turɔ kaat, ki u Yenmiaru sii tee biit.

⁸Ŋaant ki u manfoor n gbenn yiama,

ki sɔɔ n gaar u toonn yiar na.

⁹Ŋaant ki u waas n teen kpeebii,

ki u ŋaapoo n teen pakɔɔk.

¹⁰Ŋaant ki u waas n teen miata nba ki mɔk ŋaaki,

ki bi-i kɔɔ langbent nba ni, nisiab n berib ki nyinnib.

¹¹Ŋaant ki u pandamm n jii u faar kur ki yaat,

ki saamm n jii mɔkint nba kur ki u tun la,

¹²ki daa te sɔɔ man nanɔ,

koo ki tin kpeebii nba ki u nyikib na ninbaauku.

¹³Ŋaant ki u yaaboona kur n kpo,

ki u sann n bot maarpaanu nba baat na ni.

¹⁴Yennu n tiar u yeejamm biit,

ki daa nyikin chabit u naa biiti.

¹⁵Yennu-ii yɔɔ kii tian bi biit po,

ŋaan ki niib daa tian bi po tiŋ na paak.

¹⁶Jɔɔ maŋ ki ban dukin wun tun ŋanti.

U kpii tarii nan nandamm nan talas damm.

¹⁷U porintir niib mɔi;

ŋaant u mɔpor n ŋmat u paak.

U ki tee piisin niib paaki;

sɔɔ mun daa tee piisin u paak.

¹⁸U poor mɔpora ki li tee nan liant nae;

ŋaant ki u mɔpora na n ŋmat kɔɔ saat

u gbanant ni nan nyun na,

ki mann kɔɔ u kpaba ni nan kpan na.

¹⁹Ŋaant ki lin pinɔ nan chinchenn na,

ki biaki tun kii boobɔ nan gbann na.

²⁰Yennu, datir n datai tuba biaŋinba na,

binba piak mabiit ki teenin na.

²¹Ŋaan fin Yabint Yennu,

a sommin nan faa senn mɔsonn biaŋinba na,

ki fatin, kimaan a lomm nba ŋan na paak.

²²N tee talas nan nandaanɔe, ki n par la daŋ ki li gbatin,

²³N saa bot nan yinyuŋ nba tuu bot daajoouk nae;

wouŋ saa pebirin nan naayinyoorik nae.

²⁴Kon te ki n duna baŋe,

ki n ji ki tee siar see gbouŋ nan kpaba kɔɔ.

²⁵Niib-i lan yoo nba, bi laame,

ki pakin bi yura, ki sarikitin.

²⁶N Yomdaanɔ Yennu, sommitin;

a tinnin, kimaan a lomm nba kaa gbennu na paak.

²⁷A te ki n datai n bann nan fine tee wunba tintin.

²⁸Bi-i porintin mɔi, ŋaan a saa teen piisime n paak.

Ŋaant ki man nyann binba biirin na,

ki min nba tee a daabir na n la parpeenn.

²⁹Ŋaant ki n datai n di fei, ki lia bi fei maŋ nan liatir na.

³⁰N saa tur Yennu niiposaakauko, ki dontɔ niburchiɔŋ boor,

³¹kimaan ŋɔɔe see tarik siak po,

ki nyintɔ binba yaa bin kpiu na nuu ni.

Ki jiin Yennu nan u kpanbargaŋir po

¹Yennu din yet n Yomdaanɔ a,

“Karin n niidiitu po mɔkmɔk nan maa tan saa jii a datai

ki teemm a taakpakita.”

²Yennu sii be Sayɔnn nie ki tant a naangbouŋ.

U yeen a, “Ii dia a datai.”

³Daar nba ki a saa kɔn nan a datai na, a niib saa somma.

A naasimm saa nyi ki baar a boor, kasii kunkona na paak

nan marin nba tuu baa sanyiɔk ni na.

⁴Yennu senn mɔsonjaanne, ki kan ban yakir mɔsonn maŋ paak.

U yet a, “A sii yɔɔ tee manntɔɔe, Melkisedek paabu ni.”

⁵Yennu see a diitu po;

u wutoor-i doo yoo nba, u saa nyann kpanbara.

⁶U saa bu digbana buut, ki te ki nikpeena lar tɔb ni;

u saa nyann kpanbara tingbouŋ na kur po.

⁷Kpanbar na saa nyu kpenu nba be sɔnjokpiŋ na ni,

ki la paŋ ki set ki nyann u datai.

Yaŋ nba jiin Yennu dontir po

¹Pakin Yennu man.

N saa jii n par kure ki tur Yennu niipoouk, nibur boor.

²Yennu toona mɔk bakitnauŋ bonchiann.

Binba kur para mei nan u toona maŋ loon bin bann li paake.

³U toona kur gbee nan baakir nan yiikooe;

ki u ŋamm kaa gbennu.

⁴Yennu ki te ki ti tammit u yaarlituk toona po;

u mɔk burchint nan ninbatinu.

⁵Ŋɔɔe teen binba baakitɔ na jeet; u ki tammit u mɔlor na po.

⁶U jii boorganu tiŋe ki tur u niib

a lin wann u niib maŋ u yiikoo nba yab biaŋinba.

⁷U ŋane toona nba kur ki u tuun ni, ki dia mamɔmm,

ki u sennii tee senn chinchiba.

⁸U sennii yɔɔ be-e,

kimaan u din tur sennii maŋ mamɔmm nan kasii niŋe.

⁹Ŋɔɔe fat u niib ki ŋaab yann,

ki lor namm mɔlor nba sii be yaayoo siiyoo.

U tee kasii nan yabint daanɔe.

¹⁰Yentinue tee yanfoon pinpiik,

ki binba kur waa u sennii na mɔk bannu.

Dontir-ii tee u yar yoo kur.

Ki jiin niŋanɔ parpeenn po

¹Pakin Yennu man.

Parpeenn be daanɔ nba baakit Yennu paak,

wunba kpamm nan Yennu sennii dianu.

²Niŋanɔ waas sii mɔk yiikooe tiŋ na ni;

ki piisin be u yaaboona paak.

³U ŋaateeb sii tee gordamme ki mɔk mɔkint,

ki mɔkitir yoo kur.

⁴Yentu tuu yent bunbɔnn nie ki tur niŋamm,

nan binba tee ninbatinna, nan burchimm,

nan popeendamm na.

⁵Parpeenn be daanɔ nba nuu yaa

ki u kpentir bona ki teen niib,

ki bia dia barmɔnii ki tuun u toona na paak.

⁶Niŋanɔ kan ban baa, bi sii yɔɔ tian u poe.

⁷U ki tiin jaŋmaanii nan lababiiuk gbatu;

u yada mɔk paŋ, ki u dindann be Yennu boor.

⁸U ki be parbiir ni koo ki mɔk jaŋmaanii;

ki li joontu, u mi nan u saa nyann u dataiwa.

⁹U nuu yaa, ki u piin tarii piinii;

ki u burchint na kan ban gbenn,

ki u mɔk yiikoo ki laat chɔruŋ.

¹⁰Nibiit na tuu la nnae ki bi wutoor n do;

ki bi liatir nan naŋ ki saa kpo;

ki bi dindann kur n bot tarrr.

Dontir nba jiin Yennu ŋant po

¹Pakin Yennu man.

Yimm nba tee Yennu toontunna kur n pak dont u sann man.

²Ti pak dont u sann mɔtana nan yoo nba kur waa.

³Laa nyii yonput po ki saan tuu yonbaa po,

ii pak dont Yennu sann man.

⁴Yennu-e dia digbana kur, u baakir doo gar sanpaaka.

⁵Sɔɔ kaa ki tee nan ti Yomdaanɔ Yennu na,

u be Yendɔuŋ niewa,

⁶ŋaan tuu tibin ki la sanpaak nan tiŋ.

⁷U tuu fiin talas damm tanbiinii nie,

ki nyinn nandamm na bi ninbaatir ni,

⁸ki te ŋamm nan yudamm lakin be,

binba tee u niib yudamm na.

⁹U te ki pookanmatir mar waase,

ki be u ŋaak ni ki mɔk parpeenn.

Pakin Yennu man.

Yukitgar114.1 Yennu malaka din kpii Ijipt teeb bijakpera, ŋaan nyik Israel yab. (Nyinu 12.29) tiaru yaŋ

¹Israel teeb nba din nyii Ijipt yoo nba,

ŋamm Jakɔb yaaboona nba din nyii tingaŋ maŋ niŋ yoo nba na,

²ŋamm Juda yaaboona din teen Yennu kasii niibe;

Israel teeb maŋ din teen Yennu tiɔŋ niibe.

³Ki Mɔkmuŋ na jiant got ŋaan gbab,

ki Jɔɔdann mɔkir jit, ki ji ki puub.

⁴Ki jɔjaana mɔbit nan buunii na,

ki kunkona yuuk nan pebis na.

⁵Mɔkgbeŋir, bee teen ki a gbabi?

Ki fin Jɔɔdann mɔkir muni, bee teen ki a jit ki ji ki puubi?

⁶Yimm jɔjaana na, bee teen ki i mɔbit nan buunii na?

Ki yimm kunkona mun, bee teen ki i yuuk nan pebis na?

⁷Tingbouŋ, ii jekir nan jaŋmaanii,

kimaan Yennu baaru paak,

ŋɔɔ Yennu nba ki Jakɔb din jiantir na.

⁸Ŋɔɔe kpintir tanpiit ki tee nyunbua,

ki kpintir jɔkunkona ki tee nyuntona.

Ki jiin Yen-yemmir nba tee barmɔnii Yennu na po

¹Yennu, fin kuukɔɔe, ki baakir saa baar a boor,

ŋaan li kan baar ti boor kaa,

kimaan a lomm nba kaa gbennu nan a barmɔnii na paak.

²Bee ki digbana sii boit a, “I Yennu na be lee?”

³Ti Yennu be yendɔuŋ ni; u tuun linba kur ki u loone.

⁴Digbana na yenbis na ŋarin,

bi jii salimmɔna nan salimpeenae ki namm,

niibe jii bi nii ki namm.

⁵Bi yenbis maŋ mɔk mɔi, ŋaan kan fit pak,

ki bia mɔk ninbina, ŋaan ki laati.

⁶Bi mɔk tuba, ŋaan kan fit gbat,

ki mɔk miana, ŋaan kan fit gbat nubiru.

⁷Bi mɔk nii, ŋaan kan fit soor siar,

ki bia mɔk taa, ŋaan kan fit sommi,

bi ki mɔk manfoori.

⁸Binba maa yenbis maŋ nan binba teen yenbis maŋ yada,

bi mɔŋ sii tee nan yenbis maŋ nae.

⁹Yimm Israel teeb, ii teen Yennu yada,

ŋɔɔe sommiti ki guui.

¹⁰Yimm Yennu mannteeb, ii teen Yennu yada,

ŋɔɔe sommiti ki guui.

¹¹Yimm nba kur jiantir Yennu na, ii teenɔ yada man,

ŋɔɔe sommiti ki guui.

¹²Yennu tian ti po ki saa teen piisin ti paak;

u saa teen piisin Israel teeb kur,

nan ŋɔɔ Yennu mannteeb kur paak.

¹³U saa teen piisin binba kur baakitɔ na paak,

li paarib nan tarii kur paak yomm.

¹⁴Yennu n turi waas, yimm nan i yaaboona.

¹⁵Yennu nba nan sanpaak nan tiŋ na n teen piisin i paak.

¹⁶Sanpaak tee Yennu kuukɔɔ yare,

ŋaan u jii tingbouŋo ki tur nisaarik.

¹⁷Kpeemm kan fit pak dont Yennu;

wunba sik kpeentiŋ kan fit pak dont Yennu,

¹⁸ŋaan timm nba fo nae saa tur Yennu niipoouk

mɔtana nan yoo nba kur waa.

Pakin Yennu man.

Wunba ki Yennu nyinnɔ kuun ni na Yenpaku

¹N loon Yennu, kimaan u gbia n fabinii,

u gbiintir n miaru.

²Yoo kur mi-i yiin, u tuu gbiint ki turime.

³Kuun bo lintime, ki kaauk ni tonu baarin,

ki jaŋmaanii nan dudukit kɔɔn.

⁴Ŋanne ki n yiin Yennu ki yet a,

“Yennu, n barimae ki a tinnin.”

⁵Yennu tee ninbatinnɔe ki bia ŋan.

Ti Yennu tee ninkpabauŋ Yennu-e.

⁶Yennu-e guu binba kaa guuteeb na;

maa bo be daŋ ni, u tinnime.

⁷N par, ii ji kii foi, kimaan Yennu ŋan turin.

⁸Yennu nyinnin kuun ni,

ki fiar n ninnyuut, ki bia te ki bi ki nyannimi.

⁹Li paak ki n somm Yennu tɔɔnn, footib boor ni.

¹⁰N mɔk yadae yoo kur, halii yoo nba ki n lek yet a,

“N poŋ kpo gbenna.”

¹¹Halii yoo nba ki jaŋmaanii soorin ki n yet a,

“Sɔɔ kaa ki jaŋ nan bin teenɔ yada.”

¹²N saa tur Yennu bee

u ŋamm nba kur ki u tun ki turin na paaki?

¹³N saa baar nan daame ki tan pi Yennu piinii,

ki turɔ niipoouk, waa tinnin na paak.

¹⁴U niburchiɔŋ na sinsuuk nie ki n saa turɔ

maa senn mɔsonn nan n saa turɔ linba na.

¹⁵Yennu nirɔ yenɔkɔɔ-i kpo, li tuu yiar Yennu bonchiann.

¹⁶Yennu, n tee a toontunnɔe;

n tuun a toonn nan n naa nba din tuun biaŋinba nae.

Fine nyinnin kuun ni.

¹⁷N saa tura niipoouk maruŋo ki jii n miaru ki tura.

^18-19A niib sinsuuk ni, a kasii ŋasaakak ni, Jerusalem-e,

ki n saa tura linba ki n senn mɔsonn nan n saa tura na.

Pakin Yennu man.

Ki jiin Yennu dontir po

¹Digbana kur n pak dont Yennu.

Nisaarii kur n pak dont Yennu.

²U lomm yab bonchiann ti paak,

ki u popeensin kaa gbennu.

Pakin Yennu man.

Ki jiin datai nyannu niipoturu po

¹Turin Yennu niipoouk, kimaan u ŋan,

ki u lomm kaa gbennu.

²Ŋaant ki Israel teeb n yet a, “U lomm kaa gbennu.”

³Ŋaant ki Yennu mannteeb n yet a, “U lomm kaa gbennu.”

⁴Ŋaant ki binba jiantirɔ kur n yet a, “U lomm kaa gbennu.”

⁵N daamii nie ki n yiin Yennu,

ki u turin gatu, ki nyinnin daamii maŋ ni.

⁶Yennu be nanin, n ki jee siar; nirɔ saa fit teenin bee?

⁷Yennu-e sommitin, ki n nyant n datai.

⁸Li ŋan fin teen Yennu yada, ki chee fii maa nisaarik paak.

⁹Li ŋan fin teen Yennu yada, ki chee fii maa tɔɔndamm paak.

¹⁰Datai bonchianne ki lintin,

ŋaan ki n jii Yennu paŋ ki biirib.

¹¹Bi daan ŋaa lintime li munn po;

ŋaan ki n jii Yennu paŋ ki biir bi kur.

¹²Bi daan waame gbangban nan sai na,

ŋaan ki n jii Yennu paŋ ki kpiib,

ki bi boont nan muu nba tuu di naamɔɔr na.

¹³Bi daan worin nan ninmɔnne a bin nyannin,

ŋaan ki Yennu sommin.

¹⁴Yennu turin yiikoo nan paŋ; ŋɔɔe tinnin.

¹⁵Gbiintir parpeenn hootii nba nyi Yennu niib binbeboor

ki jiin nyannu po na a: “Yennu yabint yiikooe te ki li tun.

¹⁶U yiikooe turit nyannu, u jii u panchiɔŋo ki kɔn tɔb ni.”

¹⁷N kan kpo, n sii foe ki mɔɔntir linba Yennu tun.

¹⁸U dat n tubir bonchiann, ŋaan u ki te ki n kpo.

¹⁹Lootir Yenjiantu ŋasaakak tammɔi na ki turin,

n saa kɔɔ li ni ki tur Yennu niipoouk.

²⁰Yennu tammɔbe na, kasii damm kɔɔe saa kɔɔ leŋ.

²¹Yennu, n saa pak donta, kimaan a gbia n fabinii,

kimaan a turin nyannuwa.

²²Tann nba ki tanmaara yêtir na,

ŋanne tan tee lɔtik ni tanŋann.

²³Yennu-e teen nna, ki li teent bakitnauŋ.

²⁴Daar nba nae tee Yennu daar.

Ŋaant ki tii mɔk parpeenn kii kpamm man.

²⁵A tinnit, Yennu, a tinnit. Yennu, turint nyannu.

²⁶Piisin be wunba baat Yennu sann ni na paak.

Ti be Yennu ŋasaakak nie ki tee piisin i paak.

²⁷Yennu-e tee ti Yomdaanɔ, u tun ŋane ki turit.

Ii dia faat i nii ni, ki piin jaamm na,

kii somm kii lintir maruŋ binbintir na.

²⁸Fine tee n Yennu, ki n teena niipoouk.

Fine tee n Yennu, ki n saa mɔɔnt a yabint.

²⁹Turin Yennu niipoouk, kimaan u ŋan,

ki u lomm kaa gbennu.

Ki jiin Yennu sennu po

¹Parpeenn tee daansiab nba kaa biit na yare,

binba dia Yennu sennu na.

²Parpeenn be binba waa u sennu na paak,

binba saak u mɔb nan bi para kur.

³Bi ki tuun biiti, bi waa Yennu mɔbe yoo kur.

⁴Yennu, fine turit a sennii,

ki bia wannit nan ti sakir nan barmɔnii.

⁵N sunman ki n bo dia a sennu maŋe ki waar fanu.

⁶Mi-i jii n yan ki kɔɔn a sennii na kur ni, n kan di fei.

⁷Maa bant a kasii sennu na, n saa jianta nan par nba yeene.

⁸N saa sak wei a sennii nawa; a daa nyikitimi.

Ki jiin Yennu sennu na saku po

⁹Naasimɔ saa teen nlee ki u binbeŋ-ii yeeni?

See ki u sak gaar a sennii.

¹⁰N loon man weia nan n par kurewa,

ii guun ki n daa mɔk mɔyêtuk nan a sennii.

¹¹N dia a sennu nae n par ni

a lin te ki n daa tuun biit ki teena ni.

¹²Yennu, n dontira, wantin a sennii.

¹³N saa pak a sennii nba ki a turit na nan kunkɔsaakar.

¹⁴N par mei a sennii weiu paak ki gar mɔkinta.

¹⁵N tumii a senniie ki fiitir a wannu na.

¹⁶N par man a sennii na paak, n kan tamm li po.

Parpeenn nba be Yennu sennu ni

¹⁷Ii ŋan ki tur min nba tee a toontunnɔ na

ki mii mɔk manfoor ki sak a wannu.

¹⁸Lootir n ninbina ki man fit la bakitnauŋ wannu

nba be a sennu na ni.

¹⁹N tee saamɔe tingbouŋ na ni, a daa bɔriin a sennii.

²⁰N par nian mii mi a senniie yoo kur.

²¹A sikint binba dont bi mɔŋ nae,

ki mɔpora be daansiab nba ki dia a sennii na paak.

²²Nyintin bi sukit nan bi sariku ni,

kimaan n dia a sennii na.

²³Doo diara tuu chet ki lor lorbiite ki jiin n po,

ŋaan min sii tumii a senniie.

²⁴A wannue teenin parpeenn, ki teenin kpaanii.

Ki jiin Yennu sennu na dianu po

²⁵Bi nyannime ki n dɔɔ tant ni,

fiintin nan faa senn mɔsonn biaŋinba na.

²⁶N pak fiit n toona kure ki wanna, ki a turin gatu,

wantin a sɔnii.

²⁷Sommitin ki man bann a sennii na paak,

ki n sii dukii a bakitnauŋ wannu na po.

²⁸Parbiir gbee ki yentima,

kɔɔntin paŋ, nan faa senn mɔsonn biaŋinba na.

²⁹Ii guun ki n daa tuun biiti,

ki jii a ŋant ki wannin a sennu.

³⁰N loon mii tee mɔsakdaanɔe, n gaar a tumiiuwa.

³¹Yennu, n wei a senniiwa, a daa te ki n kɔɔ fei ni.

³²N saa sak a sennii nan n par kur,

kimaan a saa turin bannu bonchiann.

Yenmiaru ki jiin bannu po

³³Yennu, wantin a sennii na paak,

ki mii dia a sennii maŋ yoo saaka.

³⁴Wantin a sennu maŋ paak ki man diar,

n saa diar nan n par kure.

³⁵A te ki mii mɔk mɔsaku nan a sennii na,

kimaan bi niŋe ki n laat parpeenn.

³⁶Turimin niɔŋ nba ki n saa sak a sennii ki gar mɔkint.

³⁷Ii guun ki n daa fiin linba kaa nyɔɔt po,

ii ŋan ki turin nan faa senn mɔsonn biaŋinba na.

³⁸Ii dia mɔsonn nba ki a senn ki tur min a daabir na,

mɔsonn nba ki a senn tur binba saak a mɔb na.

³⁹Nyintin sukit nba ki n tiin na ni,

a wannue tee wannu nba ŋan.

⁴⁰N loon man sak a senniie,

turimin manfopaann, kimaan a tee kasii daanɔe.

Ki jiin Yennu sennu na yada teenu po

⁴¹Yennu, wantin faa loonin biaŋinba,

ki tinnin nan a mɔsonn nba tee biaŋinba na,

⁴²ki man fit pak jiin daansiab nba sukiin na,

kimaan n teen yada nan a mɔmaama.

⁴³Sommitin ki mii piak barmɔnii yoo kur,

kimaan n dindann be a sennii nie.

⁴⁴N sii yɔɔ saak a sennue yaayoo siiyoo.

⁴⁵N sii be n yamanie, kimaan n yiab ki dia a wannu.

⁴⁶N saa mɔɔnt a sennii ki tur kpanbara, ki kan tin fei.

⁴⁷N parpeenn nyi a sennii dianu nie,

kimaan n loon a sennii maŋ.

⁴⁸N lomm be a sennii ni, ki n teen a sennii maŋ baakir.

N sii dukii a sennii maŋ poe yoo kur.

Parcheenn nba be Yennu sennu na ni

⁴⁹Tiat a mɔsonn nba ki a senn ki tur min a daabir na;

li turin dindanne.

⁵⁰N daamii ni lek, ŋaan n laa parcheenna,

kimaan a mɔsonn nae turin manfoor.

⁵¹Karinbaandamm na laame,

ŋaan n ki chat nyik a sennu na.

⁵²Yennu, n tian a sennii nba bo be yaayoo niwa na,

ki li teenin parcheenn.

⁵³Mi-i la biitdamm na ki dia a sennu yoo nba,

li tuu donn n wutoore.

⁵⁴Manfojinjiŋ nba ki n mɔk tingbouŋ na ni na,

n yiin yaniie ki jiin a sennii na po.

⁵⁵Yennu, n tian a poe nyiɔk, ki dukii a sennu na po.

⁵⁶Mi-i dia a senniie, ki n par tuu peen.

Ki jiin Yennu sennu dianu po

⁵⁷Yennu, fine tee linba kur ki n loon,

n senn mɔsonn nan n saa dia a senniiwa.

⁵⁸N meia nan n par kur, a fii mɔk ninbatinu n paak

nan a mɔsonn nba tee biaŋinba na.

⁵⁹N fiit n binbeŋewa ki senn mɔsonn

nan n saa dia a wannu.

⁶⁰N kakite yian maa n sak a sennii.

⁶¹Biit damm na pii baruko a n sik leŋ,

ŋaan n kan tamm a sennu po.

⁶²Tansuuniie ki n tuu fiir ki dontira,

kimaan a kasii sennii na paak.

⁶³N yɔɔsnbae tee binba kur jiantira na,

binba kur saak a sennii.

⁶⁴Yennu, tingbouŋ na kur gbee nan a lomm

nba kaa gbennue; wantin a sennii.

Yennu sennu mɔk nyɔɔt

⁶⁵Yennu, a dia a mɔsonn nawa,

ki ŋan ki tur min a daabir.

⁶⁶Turimin yan nan bannu,

kimaan n teen yada nan a senniiwa.

⁶⁷N tuu tuun ki kpete, ki a daar n tubir,

ŋaan mɔtana n saak a mɔb.

⁶⁸A ŋan bonchiann, ki mɔk burchint, wantin a sennii.

⁶⁹Biitdamm na fa faake ki paantin,

ŋaan n saak a wannue nan n par kur.

⁷⁰Niib maŋ ki mɔk bannu,

ŋaan a sennue teenin parpeenn.

⁷¹N tubdatu na ŋammime,

kimaan li te ki n tumii a senniie.

⁷²Sennu nba ki a tur na mɔk nyɔɔt ki turin

ki gar tingbouŋ na ni likirii kura.

Barmɔnii nba be Yennu sennu na ni

⁷³Fine namin, ki bia dian fanu,

turimin bannu ki man fit tumii a sennu.

⁷⁴Binba baakita na-i lan, bi sii mɔk parpeenne,

kimaan n dindann be a mɔsonn nie.

⁷⁵Yennu, n mi nan a sennii tee kasiie,

ki a mɔk mɔnii nan faa dat n tubir na.

⁷⁶Ŋaant ki a lomm nba kaa gbennu na n turin pardɔɔnn

nan faa senn mɔsonn ki tur min nba tee a daabir na.

⁷⁷Tinimin ninbaauk ki mii mɔk manfoor,

kimaan n par mei a sennu na paak.

⁷⁸Ŋaant ki karinbaandamm na n di fei

nan baa fa faak ki biirin na,

min ŋarin sii dukii a wannu na poe yoo kur.

⁷⁹Ŋaant ki binba baakita na n baar n boor,

binba kur mi a sennii na.

⁸⁰Ŋaant ki n sak a sennii fanu ki daa di fei.

Yenmiaru nba jiin fat-n-mɔŋ po

⁸¹Yennu, li paakima, ki n ji guu fine maa a tinnin,

n teen n dindann a maan niŋe.

⁸²N guur a mɔsonn na po ki tan bake;

ki n boi a, “Nlee yooe ki a tan saa sommimi?”

⁸³N ki mɔk nyɔɔt nan dalenchiɔk nae,

ŋaan n lek ki tamm a sennii na po.

⁸⁴N saa guura ki lin wei nlee?

Nlee yooe ki a saa dat binba biirin na tuba?

⁸⁵Karinbaandamm nba ki dia a sennu na gbiir bootite

ki loon man baa leŋ.

⁸⁶A sennii kur ŋane;

niib dia faake ki biirin, sommitin.

⁸⁷Bi poŋ ŋman kpiima, ŋaan n ki yêt a sennii.

⁸⁸Tint n manfoor, kimaan a lomm nba kaa gbennu na paak,

ki man fit sak a sennu na.

Ki jiin Yennu sennu na yada teenu po

⁸⁹Yennu, a mɔmaan sii yɔɔ be-e, li yɔɔ be-e yendɔuŋ ni.

⁹⁰A binbenŋaŋ yɔɔ be-e maaru kur ni,

fine senn tingbouŋ na li seenu ni.

⁹¹A sennu na paake te ki bona kur biar be,

kimaan bi kur tee a daabae.

⁹²N parpeenn-i bonni kii nyi a sennu ni,

fara nba ki n di nae bo saa kpin.

⁹³N kan ban yêt a sennii,

kimaan a te ŋanne teenin manfoor.

⁹⁴N tee a yɔɔe, tintin; n koore maa mii saak a sennii.

⁹⁵Biitdamm na guue a bin kpin;

ŋaan min sii dukii a sennii na poe yoo kur.

⁹⁶N bann nan bont kur mɔk joontue,

ŋaan a sennii na ŋarin yɔɔ be-e.

Ki jiin waa loon Yennu sennu na po

⁹⁷N loon a sennu bonchiann. N dukii li poe daar kur.

⁹⁸A sennii be n boore yoo kur ki te ki n sub ki gar n datai.

⁹⁹N mɔk bannu ki gar n wannteeb kur,

kimaan maa dukii a sennii maŋ po yoo kur na paak.

¹⁰⁰N sub ki gar nikpera, kimaan maa saak a sennii na.

¹⁰¹N yêt toonbiit kure, kimaan maa loon man sak a maan na.

¹⁰²N ki yêt a sennii, kimaan a mɔŋe tee n wanntɔɔ.

¹⁰³A mɔmaan man bonchiann, li man ki gar siata.

¹⁰⁴A senniie teenin subinii, li paak ki n yêt toonbiit tumu.

Ki jiin yentu nba be Yennu sennu na ni po

¹⁰⁵A maan tee fitire ki wantin sɔnu, ki bia tee yentu, n sɔnu ni.

¹⁰⁶N saa dia n mɔsonjaann nba ki n senn

nan n saa dia a kasii sennu na.

¹⁰⁷Yennu, n biak paakima,

turimin manfoor nan faa senn mɔsonn biaŋinba na.

¹⁰⁸Yennu, gaat n niipoturu miaru na,

ŋaan wannin a sennii.

¹⁰⁹N teen siir nan min chibin n saaŋmaŋ yoo kur;

n ki tamm a sennu na po.

¹¹⁰Biit damm na pii baruko ki guunin,

ŋaan n ki yêt a kpaanii.

¹¹¹A sennii tee n mɔkint nba yɔɔ be-e,

ŋanne teenin parpeenn.

¹¹²N lor man dia a senniie

ki saa tuu daar nba ki n saa kpo.

Yennu sennue guut

¹¹³N ki loon binba ki waa-a fanu na,

min ŋarin loon a sennu.

¹¹⁴Fine tee n guutɔɔ nan n fat-tɔɔ;

n jii n dindann ki maa a mɔsonn paake.

¹¹⁵Yimm biit damm na, seetir n boor ni;

n saa sak Yennu senniie.

¹¹⁶Yennu, turimin paŋ nan faa senn mɔsonn biaŋinba na,

ki mii mɔk manfoor, ki daa te ki n di fei, n dindann ni.

¹¹⁷Ii dian ki mii be n yamani; ki n sii yɔɔ gbiin a sennii na.

¹¹⁸A yêen binba kur ki saak a sennii nae,

bi kpinkpannii lora na ki mɔk nyɔɔti.

¹¹⁹A dia biit damm na gbaka gbaka nan kparchant nae,

li paak, n loon a sennii.

¹²⁰A paake ki n tiin jaŋmaanii,

n gbee nan yanputuko kimaan a sennii na paak.

Ki jiin Yennu sennu na saku po

¹²¹N tun linba took ki bia ŋana,

a daa nyikitin nan n datai.

¹²²Sent mɔsonn nan a saa somm min a daabira;

a daa te ki biitdamm dintin biaki.

¹²³N guur bak a tinnu sommir na powa,

tinnu nba ki a senn mɔsonn li po na.

¹²⁴Ii dian nan a lomm nba kaa gbennu na

ki wannin a sennii.

¹²⁵N tee a daabire; turimin bannu, ki man bann a wannu.

¹²⁶Yennu, yoo baar nan fan tun siara,

kimaan niib yêen a sennu nae.

¹²⁷N loon a sennii ki gar salima,

n loon a sennii ki gar salinŋana.

¹²⁸Li paak ki n waa a wannu kur fanu,

n ki loon toonbiit tumu.

Ki jiin sennu dianu po

¹²⁹A wannu tee bakitnauŋo. N gaarir nan n par kure.

¹³⁰Niib-i bann a maan paak, li tuu turib yentue,

ki teen binba ki mi siar na yan.

¹³¹N ŋakitir a sennii na paake.

¹³²Ŋmantir n paak ki tinin ninbaauk

nan faa mɔk ninbatinu ki teen binba loona na.

¹³³Ii dian ki n daa baa nan faa senn mɔsonn na;

a daa te ki biit yentirimi.

¹³⁴Nyintin binba dintin biak na nuu ni, ki man fit sak a mɔb.

¹³⁵Ŋaan ki a benu-ii tee piisin n paak, ki wannin a sennii.

¹³⁶N ninnyuut puub nan mɔkir nae,

kimaan niib nba ki dia a sennu na paak.

Barmɔnii nba be Yennu sennu na ni

¹³⁷Yennu, a tee kasii daanɔe, ki a sennii ŋan.

¹³⁸Faa tur sennii nba kur ŋane, ki bia took fanu.

¹³⁹N par di muue nan wutoor,

kimaan n datai ki yiin a sennii na ki li tee siari.

¹⁴⁰A mɔsonn tee barmɔniie,

n loon a mɔsonn bonchiann.

¹⁴¹N ki tee siari, ki bi yisimin, ŋaan n ki yêen a sennii.

¹⁴²A popeensin sii yɔɔ be-e, ki a sennu na tee barmɔnii yoo kur.

¹⁴³N gbee nan daamiie nan parbiir,

ŋaan a senniie teenin parpeenn.

¹⁴⁴A sennii tee mamɔmme yoo kur;

turimin bannu ki mii yɔɔ kii mɔk manfoor.

Yenmiaru nba jiin fat-n-mɔŋ po

¹⁴⁵Yennu, n jii n par kur ki yia,

turimin gatu, ki n saa sak a sennii.

¹⁴⁶N yia; tintin, ki n saa dia a sennii.

¹⁴⁷Yonnu tuu tan do na ki sɔɔ ki n yiinawa,

ki loon sommir; n teen n dindann a mɔsonn nie.

¹⁴⁸N ki gɔɔnt nyiɔk a man fit kii dukii a sennii po yoo kur.

¹⁴⁹Yennu, gbiintirin, kimaan a lomm nba kaa gbennu

na paak, want a ninbatinu ki tinn n manfoor.

¹⁵⁰Nɔɔntont damm nba biirin na ki fɔk nanimi,

ŋamme tee damm nba ki dia a sennu na.

¹⁵¹Yennu, a ki fɔk nanimi

ki a sennii kur tee linba yɔɔ tee barmɔnii.

¹⁵²Yaayoo niewa ki n din tumii,

ki bann nan a sennii maŋ yɔɔ be-e.

Fabinii nba jiin sommir po

¹⁵³Gotir n daamii na ki fatin, kimaan n ki tamm a sennu.

¹⁵⁴Taantin ki nyinnin barii ni;

fatirin nan faa senn mɔsonn biaŋinba na.

¹⁵⁵Biitdamm na kan la tinnu,

kimaan bi ki sak a sennii na.

¹⁵⁶Yennu, a ninkpabauŋ yab bonchiann,

want a ninbatinu ki tinnin.

¹⁵⁷N datai nan binba mukisin yab bonchiann;

ŋaan n ki yêt a sennii saku.

¹⁵⁸Mi-i got biitdamm na, n tuu yaa man put nan wutoore,

kimaan bi ki dia a sennii na.

¹⁵⁹Yennu, gotir maa loon a wannu biaŋinba.

A lomm kaa lebitu, li paak, tintin.

¹⁶⁰A maan kur tee mamɔmme,

ki a kasii sennii na kur yɔɔ be.

Ki jiin Yennu sennu weiu fanu po

¹⁶¹Pandamm tuu lekime kaat,

ŋaan min teen a sennu nae baakir.

¹⁶²A mɔsona na turin parpeenn bonchiann,

ki li manin nan nirɔ nba tuu la mɔkint

ki li manɔ biaŋinba na.

¹⁶³Faak tone n boor, ki n ki loon li maan,

ŋaan mɔk lomm nan a sennu.

¹⁶⁴Daar nɔɔk ni, n teena niipoouk taar munlore-e,

kimaan a kasii sennii na paak.

¹⁶⁵Binba loon a sennu na be bi yamanie,

ki siar kaa ki saa te bin baa.

¹⁶⁶Yennu, n guu fine a fan tinnin, ki waa a sennu.

¹⁶⁷N saak a wannu, n loon a wannu maŋ nan n par kure.

¹⁶⁸N saak a sennii nan a wannu,

ki a laat linba kur ki n tuun.

Yenmiaru nba jiin sommir po

¹⁶⁹Yennu, ŋaant ki n mɔnii na n baar a boor.

Turimin bannu nan faa senn mɔsonn biaŋinba na.

¹⁷⁰Gbiintir n miaru, ki tinnin nan a mɔsonn nba tee na.

¹⁷¹N saa yin yaŋe ki donta, kimaan a wannin a sennuwa.

¹⁷²N saa yin yaŋe ki jiin a sennu po,

kimaan a sennu tee mamɔmme.

¹⁷³A teen siir yoo kur kii sommitin, kimaan n dia a sennii.

¹⁷⁴Yennu, n nian a tinnu sommir nae.

N parpeenn nyi a sennu nie.

¹⁷⁵Turimin manfoor ki man donta,

ŋaant ki a sennii na n sommin.

¹⁷⁶N lin yeeke nan pebotikauk na,

li paak, baat ki tan lon min nba tee a daabir na,

kimaan n ki yêt a sennii na weiu.

Yenmiaru nba jiin sommir po

¹Maa be daamii ni yoo nba, n yiin Yennu-e, ki u turin gatu.

²Yennu, nyintin faak damm nan kpinkpannii damm nuu ni.

³Faak damm na, Yennu saa teeni nlee?

U saa dat i tuba nlee?

⁴U saa jii kunkɔnkɔnna peenporimii nan musankɔɔnae

ki dat i tuba.

⁵Maa be i boor na, li ton nan maa sii be Mesek tiŋ ni nae,

koo nan Kedar120.5 Bi mi nan Mesek teeb nan Kedar teeb tee nitonte. teeb boor ni benu nae.

⁶N kɔɔ nan niib nba ki loon parmaasir ki li wei bonchiann.

⁷Mi-i piak parmaasir binbeŋ po, ŋamm tuu piak tɔb poe.

Yennu-e tee ti guutɔɔ

¹N got jɔjaana paak; n sommir saa nyi lee ki baari?

²N sommir saa nyi Yennu nba nan sanpaak

nan tiŋ na boore ki baar.

³U kan te fan baa; a guutɔɔ yɔɔ nyɔie, ki ki tiŋit.

⁴Israel teeb guutɔɔ ki tiŋit koo ki gɔɔnti.

⁵Yennu sii goriia; u be a boor ki sii guua.

⁶Yonpeeuŋ kan paana daŋ yonnu ni,

ki ŋmaarik mun kan paana daŋ nyiɔku.

⁷Yennu saa nyinna ninbɔŋ kura ni;

u saa dia-a nan laafia.

⁸U saa guura, a nyinu nan a kɔɔnu kur ni,

mɔtana nan yoo nba kur waa.

Dontir nba jiin Jerusalem po

¹Li bo maŋime yoo nba ki bi yetin a,

“Ŋaant ki tin saan Yenjiantu ŋasaakak ni.”

²Ki mɔtana ti ji be nna na,

ki see Jerusalem tammɔi nɔɔk ni na.

³Jerusalem tee doo nba ki bi ŋammir nan fant

nan binbenŋaŋe.

⁴Leŋe tee siaminba ki nibooru na baar,

booru nba tee Israel teeb na,

a bin tur Yennu niipoouk nan u sennu nba tee biaŋinba na.

⁵Leŋe ki Israel kpanbara kar a bin bu bi niib buut.

⁶Ii mei Yennu wun tur Jerusalem parmaasir a,

“Ŋaant ki binba loona na-ii mɔkitir.

⁷Ŋaant ki gbananmaasu-ii be a doo ni,

ki manu-ii be a naan ŋei ni.”

⁸N yɔɔsnba nan n nikpiimm paake te ki n yeen Jerusalem a,

“Parmaasir-ii be a paak.”

⁹Ti Yomdaanɔ Yennu ŋasaakak paake

ki n mei maa bona kur-ii ŋan ki tura.

Yenmiaru nba jiin ninbatinu po

¹Yennu, n gorii fine, n goriia yendɔuŋ ni,

siaminba ki a naangbouŋ be na.

²Ti Yomdaanɔ Yennu,

daabjak nba gaa u chanbaa paak biaŋinba,

ki daabpook mun gaa u naa paak biaŋinba na;

nnae ki ti mun maa a paak

nan faa tan saa tinit ninbaauk yoo nba.

³Ii mɔk ninbatinu ti paak; Yennu, ii mɔk ninbatinu ti paak;

ti mantik la diabiiuk bonchiann.

⁴Mɔkita na mantik sarikitit ki li wei bonchiann,

ki karinbaandamm mantik biirit.

Yennu-e tee u niib guutɔɔ

¹Yennu-i bonni kii taa ti po, li bo sii tee nlee?

Israel teeb, turin gatu.

²“Yennu-i bonni kii taa ti po, yoo nba ki ti datai worit na,

³bi bo saa nakit foote,

kimaan bi wutoa doo ti paak ki saa gara.

⁴Nyunmɔnne bo saa dit, ki nyun n bo piinit,

⁵nyunjiinii bo saa dite.”

⁶Ŋaant ki tin tur Yennu niipoouk,

ŋɔɔe te ki ti datai ki fit biiriti.

⁷Ti mir bot nan nɔɔŋ nba tuu yukir

ki nyi waarɔ baruk ni nae.

Baruk na jinte, ki li werikit.

⁸Ti sommir nyi Yennu boore,

ŋɔɔe nan sanpaak nan tiŋ.

Ki jiin Yennu niib yamani benu po

¹Damm nba teen Yennu yada,

li damm tee nan Sayɔnn kunkonn nba kan ban damm,

koo ki nyat nae.

²Kunkona nba kook ki lint Jerusalem biaŋinba na,

nnae ki Yennu lint u niib mɔtana nan yoo nba kur waa.

³Biit damm kii tun ki dia kasii dammi,

bi-i tun ki diabi, kasii damm na mun tan saa mann tun biita.

⁴Yennu, tumin bonŋann ki tur binba tee niŋamm na,

binba saak a sennii na.

⁵Yoo nba ki a daar biit damm tuba,

fan mun dat binba yêt a sɔnii na tuba.

Parmaasir-ii be Israel teeb paak.

Yaŋ nba jiin fatu po

¹Yennu nba din jen nant Jerusalem yoo nba na,

li din naan nan damiit nae.

²Ti din laa laat, ki bia yin parpeenn yanii bonchiann,

ki digbanlia niib na pak ki jiin ti po a,

“Yennu tun toonjaana bonchiann ki turib.”

³Barmɔnii, u set tun toonjaana bonchiann ki turit,

ki ti gbee nan parpeenn.

⁴Yennu, a ŋamm te ki tin mɔkit

nan saak nba tuu baa ki kɔɔn kpenu nyun na.

⁵Ŋaant ki binba buur bonboorii

ŋaan mɔ na n tan jaan jeet kii laa.

⁶Binba jii bonboorii a bin bur ŋaan mɔ na,

bi tan saa jaan jeet ki jent ŋaak ni, ki yiin parpeenn yaniie.

Dontir nba jiin Yennu ŋamm po

¹Yennu-i kii maa ŋaak, tanmaara na bakint tee yanne;

Yennu-i kii guur doo, niib nba guu na, bi guuru kaa nyɔɔt.

²Nirɔ-i nyi sanyafaar ki tuun toonn nan u paŋ kur,

ki jent kɔɔ daajobɔnbiir, a u poor n gboo paak, li kaa nyɔɔti,

kimaan Yennu-e piin binba ki u loomm na bonloŋa,

yoo nba ki bi dɔɔ gɔɔn ni.

³Waas tee piiniie ki Yennu teen, bi tee piisime nan barmɔnii.

⁴Jɔɔ-i mɔk bonjai u naasint ni,

li tee nan kunkɔnkɔnnɔ nba dia peenii u nuu ni nae.

⁵Jɔɔ nba mɔk peenii maŋ booru bonchiann,

parpeenn tee u yare, kimaan wuu took u datai, buut boor,

ŋaan bi kan ban nyannɔ.

Nyɔɔt nba be Yennu mɔsaku ni

¹Binba saak Yennu mɔb ki dia u sennu na,

piisin be bi paak.

²A toonne saa tura a bonloŋa.

A sii mɔk parpeenne ki mɔkitir.

³A ŋaapoo sii tee nan tilontik nba lɔɔn bonchiann nae a ŋaak ni,

ki a bonjai tee nan kpan tiinii na, ki lint faa di sian na.

⁴Daanɔ nba saak Yennu mɔb,

Yennu saa teen piisin li daanɔ paak nnae.

⁵Yennu n te ki piisin n nyi Sayɔnn kunkonn paak ki baar a paak.

A ninbinn n la Jerusalem ki li mɔkitir a manfoor ni kur.

⁶Ii be a manfoor ni ki tan la a yaaboona.

Parmaasir-ii be Israel teeb paak.

Yenmiaru nba jiin Israel teeb datai biiru po

¹Israel tiŋ, wantit a datai nba biira biaŋinba,

laa nyii a bisin niwa.

²“Laa nyii n bisin niwa, n datai yɔɔ dian diabiiuko,

ŋaan bi ki ban nyannimi.

³Bi chɔɔn n poor po ki teenin fiat,

ki li tee nan baa tuu ko tanmɔnn na.

⁴Ŋaan Yennu nba tee kasii daanɔ na nyinnin daabisin niwa.”

⁵Binba kur ki loon Sayɔnn maan, Yennu n nyannib ki berib.

⁶Ŋaant ki bii tee nan mɔɔt nba tuu pia ŋaak yur paak,

ki koor ŋaan daa ki kpaat na.

⁷Sɔɔ ki taant li mɔɔt, koo ki lorin li mɔkpanni.

⁸Wunba gar leŋ kur kan yet a, “Yennu n teen piisin i paak.

Ti jikit Yennu sanne ki tee piisin i paak.”

Yenmiaru nba jiin sommir po

¹Yennu, n be daanchiɔŋ nie ki yia.

²N Yomdaanɔ, gbiintir n mɔnii,

ki gbat n fabinii nba jiin sommir po na.

³Fi-i bonni sɔbin ti biitie, ŋmee ki a bo kan turɔ kaati?

⁴Ŋaan a nyikin chabit ti biite a tin tura baakir.

⁵N guu Yennu sommire nan n par kur,

ki bia teen u maan yada.

⁶N guu Yennu nan n par kur

ki gar guutɔɔ nba tuu guu sanyiɔk yentu na.

⁷Israel teeb, teent Yennu yada man,

kimaan u lomm yɔɔ be-e,

ki u bia teen siir yoo kur a wun tinni.

⁸U saa nyinn u niib Israel teeb bi yanbɔmm kur ni.

Yenmiaru nba jiin sikin-n-mɔŋ nan yada po

¹Yennu, n nyik n japaat, ki bia nyik n parbifaant nawa.

N baka kaa bargbeŋa ni, koo maan nba paar ki turimi.

²Mɔtana, n soor n mɔŋe, ki mɔk parmaasir.

N par dɔɔre soon nna

nan bik nba tuu paa u naa taa paak na.

³Israel teeb, teent i dindann Yennu ni man,

mɔtana nan yoo nba kur waa.

Dontir nba jiin jiantu ŋasaakak na po

¹Yennu, a daa tammit Defid

nan fara nba kur ki u dii na po.

²Yennu, tiat mɔsonn nba ki u din senn ki por mɔpor,

ki tur fin yabint daanɔ, Jakɔb Yennu na a:

³“N kan kun ŋaak ni, koo ki dɔɔr n dɔɔnu paaki;

⁴n kan foi koo ki gɔɔni,

⁵halii nan maa tan saa maa ŋaak ki tur Yennu,

ki li sii tee Yabint daanɔ, Jakɔb Yennu maŋ yar.”

⁶Betlehem doo nie ki ti gbat Yennu mɔlor lakir na po,

ki tan lar Jearim kpaab ni;

⁷ki ti yet a, “Ŋaant ki tin saan Yennu ŋasaakak ni;

ŋaant ti jiantɔ, u naangbouŋ boor.”

⁸Yennu, a tɔk nan mɔlor lakir nba tee a yiikoo nyinn na

ki baar a ŋasaakak ni, kii be leŋ yoo kur.

⁹Ŋaant ki a mannteeb-ii tuun linba took yoo kur;

ŋaant ki a niib-ii hoot nan kpinkpammuk.

¹⁰Yennu, a din senn mɔsonn ki tur a toontunnɔ Defid;

a daa yêen a kpanbar gannkar maŋ na.

¹¹A din senn mɔsonjaanne ki tur Defid,

mɔsonn nba ki a kan ban nyik a:

“N saa dinn a bonjai na yenɔ naan,

ki u tan saa set a seenu ni ki dia a niib yoo nba ki a kaa.

¹²Li-i tee ki a bonjai na dia mɔlor

nan sennii nba ki n turib na fanu,

bi waas saa tukin kii di naan na yoo kur.”

¹³Yennu-e gann Sayɔnn doo; u loon wun teenir u ŋaake,

¹⁴ki yet a: “Nna nae ki n sii yɔɔ be,

nna nae ki n loon mii kaar n naangbouŋ paak.

¹⁵N saa sat piisin Sayɔnn doo paak, ki turɔ linba kur ki u loon;

n saa gboon u nandamm nan jeet.

¹⁶N saa teen piisin u mannteeb paak

linba kur ki bi tuun ni, ki u niib sii yiin yanii ki hoot.

¹⁷Nna nae ki n saa dinn Defid yaaboona na yenɔ naan

ki teenɔ kpanbarjaann;

nna nae ki n saa te ki n kpanbargaŋir naan na-ii tun kii be.

¹⁸N saa dinn u datai fei,

ŋaan te ki u naangbouŋ na-ii mɔkitir kii kpaatir.”

Dontir nba jiin naataann lomm po

¹Yennu niib-i taan leeb ki be nan parmann,

li ŋan bonchiann ki mei par.

²Li tee nan kpanŋanin nba ki bi jii mɔɔn Aarɔnn yur paak,

ki li lɔɔ siik u tiaŋ paak ki siik u liatir turu ni nae.

³Li tee nan Hermonn kunkonn paak marin nba saa baa

Sayɔnn kunkona paak nae.

Leŋe ki Yennu senn mɔsonn, u piisin po,

ki li tee manfoor nba kaa gbennu.

Yiinii nba jiin Yennu dontir po

¹Baat man ki tin pak Yennu,

yimm nba kur tee u toontunna na,

yimm nba be u ŋasaakak ni nyiɔk ki tuun u toona na.

²Dont i nii sanpaapo man, Yenjiantu ŋasaakak na ni,

ki miar Yennu ki bia dontɔ.

³Yennu nba nan sanpaak nan tiŋ na n turi piisin,

ki lin nyi Sayɔnn.

Dontir yaŋ

¹Pakin Yennu man.

Yimm nba tee Yennu toontunna na,

²yimm nba see Yennu ŋasaakak ni,

ki li tee jiantu ŋasaakak na, ii dont u sann.

³Pakin Yennu man, kimaan u ŋan,

ii yin yanii ki pak u sann, kimaan u ŋan.

⁴U gann Jakɔb yaaboonae ki teemm u yab,

ki jii Israel teeb maŋ ki teemm u niib.

⁵N mi nan Yennu tee Yenjaanne,

u tee Yenjaann ki gar yennii kur.

⁶U tuun linba kur ki u loone,

li sanpaapo nan tingbouŋ na ni,

li mɔkgbeŋa nan li mɔkgbeŋa tiŋ po.

⁷Ŋɔɔe te ki sayuŋ nyi durinya kpiŋ po ki tikii,

ki te ki sanyikintii be sayuŋ ni, ki te wouŋ nyi u boor ki da.

⁸Ijipt tiŋ nie ki u din kpii nisaarii nan bonkobit bonjakperii

kur yomm.

⁹Leŋe ki u din tun bakitnauŋ toona,

ki dat Ijipt kpanbar nan u saakab tuba.

¹⁰U din biir digbana bonchiann,

ki kpii kpanbara nba mɔk yiikoo:

¹¹Amor teeb bat Sihonn, nan Basann teeb bat Og,

nan Keenann batnba kur.

¹²U din jii bi tinii ki tur u niib Israel teebe.

¹³Yennu, bi sii yɔɔ mɔɔntir a sanne, ki a tee Yennu,

ki maaru kur saa tiar a po.

¹⁴Yennu saa kɔn ki tur u niib,

u saa tin u toontunna maŋ ninbaauk.

¹⁵Digbana yenbis na ŋarin,

bi jii salimmɔna nan salimpeenae ki namm,

niibe jii bi nii ki namm.

¹⁶Bi yenbis maŋ mɔk mɔi ŋaan kan fit pak,

ki bia mɔk ninbina ŋaan ki laati.

¹⁷Bi mɔk tuba ŋaan kan fit gbat, bi poŋ ki foi kaawa.

¹⁸Binba maa yenbis maŋ nan binba teen yenbis maŋ yada,

bi mɔŋ sii tee nan yenbis maŋ nae.

¹⁹Israel teeb, pakin Yennu man;

yimm nba tee Yennu mannteeb na, pakin Yennu man,

²⁰yimm Liifai teeb, pakin Yennu man;

yimm nba kur jiantirɔ na, pakimɔ man.

²¹Pakin Yennu, Sayɔnn kunkonn paak,

pakin ŋɔɔ nba be Jerusalem na.

Pakin Yennu man.

Niipoturu yaŋ

¹Turin Yennu niipoouk man, kimaan u ŋan,

u lomm kaa gbennu.136.1-26 “U lomm kaa gbennu” din tee niib na jiinue.

²Turin Yennu nba gar yenbis kur na niipoouk,

u lomm kaa gbennu.

³Turin wunba tee yomdamm kur Yomdaanɔ na niipoouk,

u lomm kaa gbennu.

⁴U kɔɔe tuun bakitnauŋ toonjaana,

u lomm kaa gbennu.

⁵U jii u subiniie ki nan tingbouŋ na,

u lomm kaa gbennu.

⁶U senn tingbouŋ, ki li paa nyun paak,

u lomm kaa gbennu.

⁷Ŋɔɔe nan yonnu nan ŋmaarik,

u lomm kaa gbennu.

⁸Ki yonnu na sii dia daar;

u lomm kaa gbennu.

⁹Ki ŋmaarik nan ŋmaabira sii dia nyiɔk,

u lomm kaa gbennu.

¹⁰U din kpii Ijipt teeb bijakpera,

u lomm kaa gbennu.

¹¹U din nyinn Israel teeb Ijipt tiŋ ni,

u lomm kaa gbennu.

¹²U jii u nuu paŋ nan u kpinkpouŋ paŋe,

u lomm kaa gbennu;

¹³ki bɔkit Mɔkmuŋ na,

u lomm kaa gbennu,

¹⁴ki te ki Israel teeb tɔkin leŋ,

u lomm kaa gbennu,

¹⁵ŋaan te ki Ijipt kpanbar nan u jab dii nyun,

u lomm kaa gbennu.

¹⁶U din jii u niibe ki saan namm kunkoouk paak,

u lomm kaa gbennu.

¹⁷U din kpii kpanbara nba mɔk yiikoo,

u lomm kaa gbennu.

¹⁸U din kpii kpanbarjaana,

u lomm kaa gbennu:

¹⁹Amor teeb kpanbar Sihonn,

u lomm kaa gbennu,

²⁰nan Basann kpanbar Og,

u lomm kaa gbennu,

²¹Ki jii bi tinii ki tur u niib,

u lomm kaa gbennu.

²²U din jiir ki tur u niib Israel teebe,

u lomm kaa gbennu.

²³Baa din nyannit na, u din ki tamm ti po,

u lomm kaa gbennu.

²⁴Ŋɔɔe din nyinnit ti datai nuu ni,

u lomm kaa gbennu.

²⁵Ŋɔɔe teen bonfoor kur jeet,

u lomm kaa gbennu.

²⁶Turin Yennu nba be yendɔuŋ ni na niipoouk,

u lomm kaa gbennu.

Israel teeb yommisin ni fabinii

¹Babilonn mɔka boore ki ti kar tiŋ ni,

leŋe ki ti tiar Sayɔnn po, ki bui,

²ki lakin ti bonfifaat tiinii nba be leŋ na paak.

³Ki binba kɔn ki nyannit na betit a tii yiin yanii;

bi loon tii maŋit bi para, ki yetit a,

“Ii yiin yanii nba jiin Sayɔnn po.”

⁴Ti saa teen nlee ki yin yanii ki tur Yennu, boorganu tiŋ ni?

⁵Mi-i tamm Jerusalem po, n ji daa fit faa kɔnn.

⁶Mi-i kii tiar a po,

li-i tee ki n ki tiar nan fine tee n parpeenn nba gbeŋ,

n ji daa fit yiin yanii.

⁷Yennu, tiat Edom teeb nba din tun linba,

daar nba ki ti datai nyann Jerusalem na.

Tiat baa din yeen a, “Yeetir ki sikinir tiŋ ni.”

⁸Babilonn doo, bi saa biirawa.

Parpeenn sii be daansɔɔ nba pa-a

faa daan tun linba ki turit na paak,

⁹wunba saa jii a sanpantii ki jaatib tana paake.

Ki jiin niipoturu Yenmiaru po

¹Yennu, n teena niipoouk nan n par kur;

n yiin ki dontira malakanba kur boor.