Nahum

NAHUM

gbouŋ

Ki jiin Nahum gbouŋ na po

Nahum din pak Asiria digbansaakar Ninefe biiru po, ki yet nan li tee Yennu tubdatue, kimaan baa ton ki bia tuun toonbiit na paak. Jona nba din pak Yennu maan ki tur Ninefe teeb yoo nba na, ki sɔkinii Nahum daa kaa. Jona yoo maŋe ki Ninefe teeb na din nyik biit tumu, ki ki la tubdatu. Ŋaan li poorpo ki bi tan ŋmat toonbiit binbeŋ ni, ki Yennu boontib.

¹Mɔmaan na jiin Ninefe poe, ki tee yirintu nba ki Nahum wunba nyii Elkos doo ni na la.

Ki jiin Yennu wutoor nba do Ninefe po

²Ti Yomdaanɔ Yennu tee funfunn daanɔe,

binba yêen u mɔb, u daar bi tuba,

u wutoor nie ki u pa jiintib.

³Yennu ki dont wutoor yian yiami, ŋaan u mɔk yiikoo,

u kan ban te wunba tun biit n nyi tubdatu ni.

Yennu-i somm siaminba, wouŋo fukitir;

sanpagbante tee tangbiruŋ ki u taapant gbit.

⁴U yeen mɔkgbeŋir ki li fɔɔt, ki te mɔka fɔɔt,

ki te Basann tiŋ koot, ki te Kamel kunkonn mɔɔt koot,

ki bia te Lebanonn tiŋ ni tipuuk suur.

⁵Ki jɔfɔkit jekir Yennu tɔɔnn,

ki kunkona tuu nann u numm ni.

Yennu-i lekit yoo nba, tiŋ tuu jekire;

ki durinya na nan li niib kur jekir nan jaŋmaanii.

⁶U wutoor-i doo yoo nba, ŋmee saa tinni?

Ŋmee saa fit nyi u wutochiɔŋ na ni?

U tuu mɔɔn u wutoor nba di nan mupeenu nae,

ki tanpiit yakitir, ki kpantir tant u tɔɔnn.

⁷Yennu ŋan, u guu u niib daamii-i baar yoo nba,

ki u baka be damm nba baar u boor ni po.

⁸U tuu biir u dataie yiama

nan nyunmɔnn nba tuu pubir sik biaŋinba na;

ki binba yêen u mɔb, ki u te bi kpenn.

⁹A lorin bee a lin biir Yennu?

U saa biirawa, sɔɔ ki yêen u mɔb ki pukii taar munlee.

¹⁰Yimm dayibira na, n saa boonti

nan baa tuu ŋmat kunkonii nan kinkak-koona

ki lin di muu biaŋinba nae.

¹¹Ninefe, a nie ki jasɔɔ nyii ki gbee nan dudukbiit, ŋɔɔe lorin a lin biir Yennu. ¹²Linba ki Yennu yeen u niib Israel teebe na, “Asiria teeb nba lek mɔk panii, ki bia yab biaŋinba na, ŋaan n saa biirib ki bin kpo. N niib, mine te ki i dii fara, ŋaan n kan te ki lin ji baarini. ¹³N saa gɔɔr Asiria yiikoo nba dia-i na, ki bia cheer jarit nba baani na.”

¹⁴Linba nae ki Yennu senn ki jiin Asiria teeb po: “Bi kii mɔk yaaboona nba ki bi sana sii gaa bi paaki. N saa biir pata nba be bi yenbis jiant diit ni na. N ŋamii kaate ki guunt Asiria teeb. Bi ki ŋan nan bii be bi manfoa ni.”

¹⁵Gotirii, toomiie nyii kunkona paak ki baat nan labamann na. U paa sɔnue, a wun mɔɔnt nyannu na po. Juda teeb, ii di jaamm kii kpamm man, ki tur Yennu linba ki i senn nan i saa turɔ na. Ki nibiit na ji kan ban lek i tiŋi. N biirib ki gbenna.

Ki jiin Ninefe baak po

¹Ninefe teeb, bi saa lekiwa.

Yiikoo nba yaa lin buti na baara.

Ii teen siir ki kɔn i mɔŋ paak,

kii guu sɔnjouk na, ki teen siir nan tɔb.

²(Yennu yaa wun ŋamm fiin Israel teeb sanne, nan laa din tee biaŋinbawa ki bi datai tan biirir na.)

³Kunkɔnkɔnna nba tee datai na dia naagbankɔŋ mɔnte,

ki bia lia liatmɔnt, ki tee siir a bin lek.

Ki bi taantorit nyirii nan muu na, ki bi taanii chibit.

⁴Ki taantorit na kakii sɔnjot kur po,

ki tiin lin doo na niib tintikir boor, ki saa tunii,

ki tɔ nan muyeruk na, ki kakii nan sanyikintii na.

⁵Ki bi yiin kunkɔnkɔnna saakab na ki taamm;

ki bi ŋmaan jarib, ki tut saa tɔɔnn po.

Ki binba saa lek na kakit saan joonn na boor,

ki saa senn naagbankɔŋgbeŋir nba saa guur dajingbeŋir

nba ki bi saa tut joonn maŋ ki lu.

⁶Mɔkir boor tammɔi na loot yaae,

ki naan ŋaak na gbee nan jaŋmaansooruk.

⁷Ki bi soor kpanbar na ŋaapoo,

ki u toontunna nba tee poob na mɔ nan ŋmana na,

ki wɔb nii nan ninbaatir.

⁸Ki niib na kakit ki tin nyii Ninefe

nan mɔkir nba tuu pat ki nyun gaar biaŋinba na.

Ki kunkɔr tantir ki yeen a, “Setir man, setir man,”

ŋaan ki bi sɔɔ ki jianti.

⁹Fatir salimpeena na man, fatir salimmɔna na man.

Doo na gbee nan mɔkinte.

¹⁰Ninefe biira, sɔɔ ki biar li ni, siar ji kaa leŋ,

ki niib yan ŋmat nan jaŋmaanii,

ki bi duna jekir, ki paŋ ji ki be, ki bi numpo penn.

¹¹Doo nba din tee nan fɔru nba gbee nan yanbɔra na,

ki tee siaminba ki bi goon yanbɔrbis na,

ki bia tee siaminba ki yanbɔrjai nan yanbɔrnaanii sii lin,

ki bi bonbis be bi yamani na ji be lia?

¹²Ki yanbɔr na soor bonkobuk,

ki patɔ burii burii, ki tur bonnaaŋ nan u bonbis,

ki gbeen u fɔru na nan nanchiat.

¹³Yabint Yennu yet a, “N tee a dataake. N saa joo a taantorit muu, ki bi saa kpi a kunkɔnkɔnna na tɔb ni, ki n bia saa gaar linba kur ki a fat a leeb boor na, ki bi ji kan ban gbat a toomii na kunkɔra.”

¹Biiru be fai damm nba tee nikpiirit na doo paak,

doo nba gbee nan gor, ki bi tan saa gaarir,

ki bia fatir tɔbii ni.

²Gbiintir bulaar mɔnii man,

ki gbiint fiaa sommir mɔnii,

ki gbiint taanii nba mobit biaŋinba,

ki bia gbiint taantorit fuur.

³Ki taanjakira teen siir, ki jukbanjai pekin,

ki kpana tiantir, ki nikpeena dɔɔ pukii,

ki yab kaa kann, ki jab gbiatirib.

⁴Ninefe doo nba tee nan bonchonchonn na la tubdatuwa.

U fane, ŋaan gbee nan dudukbiit,

ki kpar digbana, ki teemm yommii.

⁵Yabint Yennu yet a, “Ninefe, n saa dat a tubir.

N saa yokita, ki te digbana n la-a, ki te bin la a fei kur.

⁶N saa yisima, ki tarima jakint,

ki niib saa gota, ki jaŋmaanii n soorib.

⁷Ki binba kur la-a, bi saa fɔɔ jir poor.

Bi saa yet a, ‘Ninefe ji biar tee langbente.

Ŋmee mɔk ninbatinu nanɔ?

Ŋmee sii loon ki wun maan u pari?’ ”

⁸Ninefe, a chee Ijipt digbangbeŋir Tebes-ii? U mun bia din mɔk mɔkir, ki li guu-u nan joonn na. Nail mɔkire din tee u bontekitir. ⁹Tebes dooe din dia Itiopia nan Ijipt, ki u yiikoo kaa terik; ki Libia tee u yɔɔk. ¹⁰Bi lek din tan soor Tebes teebe ki yaat saan namm digbangann, ki boo bi waas ki kpiib, ki baan bi tɔɔndamm na nan jarit ki yaat namm, ki biitib tur niib nba soorib na.

¹¹Ninefe, a mun saa nyu ki yiba. A mun sii koor a fan nyi a datai nii nie. ¹²A ŋajaana na kur tan sii tee nan kinkaŋ nba mɔk kinkanmɔna nae; fi-i nik tiinii na, li lɔɔna na tuu baa a mɔb nie. ¹³A kunkɔnkɔnna na tee nan poob nae, ki a digbann na see a datai tɔɔnn, ki siar ki guuri. Muu saa di biir kut laana nba puun a tammɔkɔɔka ni nawa. ¹⁴Luunt nyun ki guun a mɔŋ, ki teen siir nan a datai, ki pukin a joona paŋ. A taa tant, ki teen birik-ŋmant siir. ¹⁵Faa lek tun linba kur, ŋaan bi saa joo-a muu ki kpi-a, koo ki kpi-a tɔb niwa. A saa boont nan naasuut nba tuu kokii bonbuburit biaŋinba nae.

A pɔte nan naasuut na. ¹⁶Ki a kpinkpenta pukin ki tee nan ŋmaabira nba be sanpaapo biaŋinba na. Mɔtana ki bi ji kaa, nan naasuut nba tuu lat bi kpinkpant ki yukir yaat biaŋinba na. ¹⁷A saakab na tee nan naasuut nba tuu taab joona, damaatuk daar biaŋinba nae. Ŋaan yonnu-i taŋi nyii yoo nba, bin yukir yaat, ki sɔɔ ki bant baa saan siaminba.

¹⁸Asiria kpanbar, a yent saakab na kpowa, ki a nijaana na bia gɔɔn tɔra, ki a niib na yat kunkona na paak, ki sɔɔ kaa ki saa jiib ki jen namm bi ŋei ni. ¹⁹A danii na kaa tebuku, ki a fiat na kan ban buri. Niib nba kur gbat nan biiru baara, ki bi poi niipoot ki kpamm. Nirɔ din fit nyii a tonu nba kaa gbennu na niwa-a?