Fabinii

FABINII

Ki jiin Fabinii gbouŋ na po

Gbouŋ na piak Jerusalem biiru fabinii poe. Ti ki mantik mi daanɔ nba sɔb gbouŋ na, ŋaan niib bonchiann yaa Jeremaya-e sɔbir. Baatusir ni, bi yi gbouŋ maŋe Lamenteesins.

Ki jiin Jerusalem ninbaatir po

¹Jerusalem doo nba tuu gbee nan niib na ji dɔɔ yanne.

Durinya na niib din baakitɔ,

ki mɔtana ki u ji tee nan pakɔɔk na;

u tuu tee digbanjaanne ki gar digbanlia, ŋaan ji biir ki butin.

²U tuu bui nyɔtunmunn, ki ninnyuut lɔ siik u kpianii ni,

ki u yɔkperii na kur, sɔɔ ki biar ki saa maan u pari.

Ki u tɔknanleeb na kur gbii u paak, ki ji tee u datai.

³Juda teeb na tee yommii nba ki mɔk sommire,

ki bi ber nyinnib bi ŋei ni.

Ki bi ji kɔɔ siab tinii ni,

ki ki mɔk siaminba ki bi saa yet a li tee bi yari.

Ki bi datai na lintib, ki bi ki mɔk sɔnu nba saa chiar paaki.

⁴Ki bi sɔɔ ji ki baat Yenjiantu ŋasaakak na ni,

ki jiantir Yennu, kasii daa na ni.

Ki sapaamm nba tuu yiin leŋ na di fara,

ki mannteeb na mun kurii ki duun.

Ki doo na tammɔi be yann,

ki Sayɔnn doo be nan gbananyekitir.

⁵Ki u datai na nyannɔ, ki diau nan yiikoo.

Yennu-e te ki u di biak na, u toonbichiɔŋ paak.

Bi soor u waas ki yaat namma.

⁶Jerusalem fant na ji kaa.

U tɔɔndamm na tee nan piarii nba kon tuu baŋib nae,

ki tee nan binba tuu chiar paak kpamm,

ki bi paŋ n gbenn na.

⁷Jerusalem tian u mɔkint nba ki u din mɔk

yaayoo ni na po,

ŋaan mɔtana ki u ji tee langbent kɔɔ.

Ki waa kɔɔ u datai ni yoo nba, sɔɔ kaa ki saa sommɔ;

ki binba nyannɔ na laau, u baak paak.

⁸U baakir gbenne, ki u be payann, ki dii fei.

U kuriie ki bɔrii u numpo, ki fei mɔkɔ.

Ŋɔɔ Jerusalem kɔɔn u mɔŋ jakint nan toonbilankanta.

⁹U jakint toona na nyɔɔn paanu nie,

ŋaan ki u baka kaa nan biiru nba saa baarɔ na po.

U baak na yab, ki sɔɔ kaa ki saa fit maan u par.

U datai na nyannɔwa, ki u bui fabin ki tur Yennu

a wun tinɔ ninbaauk.

¹⁰Ki datai na fat u mɔkint kur.

Ki u la ki bi kɔɔ Yenjiantu ŋasaakak na ni tiɔŋ,

siaminba ki Yennu ki saak binba ki waau kɔɔ na.

¹¹U niib na tuu kuriie, yoo nba ki bi kpaan jeet a bin di.

Bi dia bi mɔkint na ki kpentir jeete, a lin foorib.

Ki doo na yikin a, “Yennu, gotirin,

ki la maa be ninbaatir ni biaŋinba.”

¹²Ki u yikin ki teen sɔngar teeb na kur a, “Gotirin man.

Sɔɔ daa ki ban la gbanantont nan n yar na na,

ki li tee gbanantont nba ki Yennu teenin,

yoo nba ki u wutoor doo.

¹³“Yennu te muu nyii sanpaapo,

ki tee muu nba di n gbananbin ni.

U piin baruko, ki tan soorin ki sikinin tiŋ ni,

ki nyikin, ki n ji be nan gbanantont yoo kur.

¹⁴“U diit ki la n toonbiit kur,

ki taan bobinir ki jɔnnir n turu ni, ki li kpiasu baŋin.

Yennu jiin ki kubin n datai nuu ni,

ki n ji ki mɔk paŋ nba saa tookib.

¹⁵“Yennu laa n kunkɔnkɔnwakita nba ki n mɔk nae;

u te ki kunkɔnkɔnna baar kpii n naasinpaauŋ nawa.

U mat n niib na ki li tee nan daan tilɔɔna

nba ki bi ŋmaan ki nyint nyun nae.

¹⁶“Li paake teen ki n ninbina luun ninnyuut yoo kur.

Sɔɔ kaa ki saa fit maan n pari.

Sɔɔ kaa ki saa fit chee n par.

N datai nyannima; n niib na ji ki biar nan siari.

¹⁷“N tantir n nii, ŋaan sɔɔ kaa ki saa sommin.

Yennu te ki datai nyii lokir kur po ki lekin,

ki ŋmaŋitin nan n tee bon-yanne na.

¹⁸“Ŋaan Yennu-e mɔk mɔnii, kimaan n yêt u mɔba.

Gbiintir man, niib nba be lokir kur po,

gotir gbanantont nba ki n be li ni.

Bi soor n naasinpaauŋ nan sapaamm

ki teemm yommii ki yaat namm.

¹⁹“Ki n tun yiin n yɔɔsnba, ŋaan ki bi yêt ki ki sommin.

Ki mannteeb nan tɔɔndamm kpenn doo na sɔnjot ni,

ki loon jeet a bin di ki foor bi mɔŋ.

²⁰“Yennu, gotir n par nba be daamii ni ki tonin biaŋinba.

N par biir bonchiann, n toonbiit paak.

Nikpinu be sɔnjot ni, ki kuun be diit ni gbaa.

²¹“Gbiintir n kukura, sɔɔ ki be ki saa maan n pari.

N datai na kpamme, kimaan faa te biiru baarin na paak.

A tun linba ki a sat mɔb na,

ki te n datai na n di biak nan maa dii biaŋinba na.

²²“A pak biirib bi tonu na paak;

a dat bi tuba nan faa dat n tubir n toonbiit paak biaŋinba na.

N kurii nan ninbaatire, ki gbee nan parbiir.”

Ki jiin Jerusalem teeb tubdatu na po

¹Yennu din donn wutoor ki te bunbɔnn piin Sayɔnn.

U te ki Sayɔnn mɔkint bonchiann biir,

ki nyɔr nyik u ŋasaakak na,

daar nba ki u be wutoor ni na.

²Yennu biir Juda digbanbis kur, ki ninbatinu kaa;

ki bit joonpaara nba guu doi na,

ki te digbann na nan li diara dii fei.

³U be wutoor ni, ki biir Israel teeb paŋ buri buri.

U yêt wun sommit yoo nba ki ti datai baar na,

ki fiir ti paak nan muu na, ki boont bona kur.

⁴U tɔ u peenii na ti paak, ki li tee nan u tee ti dataake na,

ki kpii binba kur ki ti numm gboob

ki bi tuu maant ti para na.

Jerusalem na nie ki ti bann u wutoor nba do ti paak biaŋinba.

⁵Yennu biir Israel teeb nan u tee bi dataake na,

ki te bi joonpaara nan nijaana ŋei kpant langbent,

ki te parbiir nba kaa gbennu baar Juda teeb paak,

⁶ki yeer ŋasaakak nba ki ti jiantirɔ li ni na buri buri,

ki gɔɔr kasii daa nan foon daa na,

ki kpanbar nan mannteeb na kur la u wutoor

nba doo bi paak biaŋinba.

⁷Yennu yêt u maruŋ binbintir na,

ki bia biir u kasii ŋasaakak nawa,

ki te dataak na yeer joona na,

ki bi yikin a bi la nyannu,

siaminba ki ti tuu jiantir Yennu ki mɔk parpeenn na.

⁸Yennu-e lor nan Sayɔnn joona na n baa;

u bikin li yarimu ki sak nan li saa biir fas fas,

ki li difoot nan joona na kur ji biar tee langbent.

⁹Ki li gana na pii tangbiina ni,

ki ganchaata na jint buri buri.

Ki leŋ kpanbar nan li nijaana na ji tee yommii digbangann ni.

Bi ji ki want Yennu sennii na,

ki sɔkiniinba na ji ki laat yirintu ki li nyi Yennu boori.

¹⁰Ki Jerusalem nikpera na kar tiŋ ni ki ŋmin soon nna,

ki puk tanbiinii bi yura paak, ki bia lia bɔtoliant,

ki sapaanbis na tibint bi yura nan fei.

¹¹Ki n ninbina ji bak nan mɔnii; ki n kpak nyann.

N ji bake nan ninbaatir, kimaan n niib nba kpo na paak.

Ki waas nan sanpantii kpenn doo na sɔnjot ni.

¹²Ki kon nan nyunnyukuru sob,

ki bi fabin ki teen bi naanba,

ki baa sɔnjot ni nan bi turib danii na,

ki ji kpenn bi naanba nii ni.

¹³Jerusalem, n mantik loona, n saa pak a bee?

Nlee ki n saa maan a pari?

Sɔɔ daa ki ban dii biak nan linba na na.

A biiru na yab, ki tee nan mɔkgbeŋir nba yab biaŋinba nae.

Ki siara dindann ji ki be.

¹⁴A sɔkiniinba na ji ki mɔk siar ki saa beta,

see bin faar faak kuukɔɔ.

Bi mɔmaan na kpannae, bi ki pak fiit a toonbiit na.

Bi te ki a ki mi nan li kpaa talas nan fin lebit a binbeŋi.

¹⁵Ki niib nba gaar fin Jerusalem boor na yisima.

Bi pakin yura, ki laa a biiru na paak, ki yeen a,

“Digbanŋann nae na-a?

Doo nba ki tingbouŋ na tuu dontir u mɔŋ li paak nae na-a?”

¹⁶A datai na kur sarikita, ki goriia jia-a nan naŋ,

ki mian bi mɔi ki yeen a,

“Ti biirira, daar nba nae ki ti tuu guu.”

¹⁷Yennu poŋ tun waa lor a wun tun linbawa.

U biirite, ki ninbatinu kaa,

nan waa din wannit sianyoo biaŋinba na.

U te ki ti datai na la nyannu, ki te bi kpamm ti biiru na paak.

¹⁸Jerusalem, a te ki a joona na n fabin ki tur Yennu.

A te ki a ninnyuut-ii puub nan mɔkir na, yonnu nan nyiɔk.

Ii mɔ nan ninbaatir, ki tan baŋ.

¹⁹A tuu fiir nyiɔk kur kii fabin kii teen Yennu.

A loot a par, ki barimɔ ki wuu mɔk ninbatinu

a waas nba kpenn kon sɔnjot ni lokir kur po na paak.

²⁰Yennu, gotirii. Bee ki a mantik daar ti tuba nna?

Poob ŋman bi waas nba ki bi loomm na nante.

Ki bi kpi mannteeb nan a sɔkiniinba na, a ŋasaakak na ni.

²¹Nipaauŋ nan nikpera kur dɔɔ sɔnjot ni ki kpowa,

ki datai jukbanjai na kpii naasimm nan sapaamm;

ki a kpiib, ki ki mɔk ninbatinu namm,

daar nba ki a wutoor doo na ni.

²²A yiin n datai ki bi lintin,

ki tee nan baa tuu yiin jaamm dinu na,

ki sɔɔ kaa ki saa fit chiar paak, a wutoor daar na ni.

Bi kpii n waas nba ki n wubirib ki loomm nawa.

Ki jiin tubdatu nan lebitu nan dindann po

¹N tee daanɔ nba mi Yennu tubdatu nba tee biaŋinbae.

²U ber sikinin bunbɔncheenn nie,

³ki yɔɔ faan niikura, ki ninbaauk kaa,

⁴ki tan te ki n gbanant tee fiat fiat, ki bia kɔnn n kpaba.

⁵U kɔɔnin dansarik nba tee ninbaatir nan parbiir nie,

⁶ki mabin ki n be bunbɔncheenn nba naan kuun na ni.

⁷Ki u baanin jarit, ki n tee yommik,

ki ki mɔk dindann nan n tan saa paaki.

⁸Ki n yikin sanpaapo ki loon sommir,

ŋaan ki Yennu yêt wun gbiint.

⁹Ki n somm lian, ki tana joona gɔin siaminba kur ki n tɔkin.

¹⁰Ki u guun nan naamuuk nba tuu guu biaŋinba na,

ki chibin nan yanbɔr nba tuu chib biaŋinba na.

¹¹Ki u wei ber nyinnin sɔnjouk na ni,

ki patin buri buri, ki nyikin.

¹²Ki u dat u tɔrbann na,

ki n tee jabenn nba ki u saa tɔ peenii.

¹³Ki u yek u peenii na, ki li kɔɔ n gbanant ni.

¹⁴Ki niib laan daar kur, ki n tee nilaakir bi boor.

¹⁵U te ki n di farbiiuk, ki li tee nan jeet nan nyun na.

¹⁶Ki u duur n numm nan tiŋ, ki kɔnn n nyana tana paak.

¹⁷Ki n tamm laafia nan parmaasir nan parpeenn nba tee biaŋinba.

¹⁸Ki n ji ki mɔk yoo saan ki sii be n manfoor ni;

n dindann nba ki n mɔk nan Yennu na ji kaa.

¹⁹Mi-i dukin n gbananyekitir po nan maa ki mɔk binbeboor na,

li tee lɔbii nba tone.

²⁰Ki n yɔɔ dukii li po, ki be ninbachiɔŋ ni, ki butin.

²¹Ŋaan n dindann lek tuu jen yoo nba ki n tiar bonyennkɔɔ na poe:

²²Yennu ninbatinu na yɔɔ be-e, ki u lomm kaa gbennu.

²³Yennu lomm paane sanyiɔk kur, ki u ŋant na yab bonchiann.

²⁴Yennu kuukɔɔe ki n mɔk, li paak, u nie ki n mɔk dindann.

²⁵Yennu ŋan ki tur wunba kur teenɔ yada.

²⁶Li paak li ŋan ki tin guur nan sukuru, ki wun tinnit.

²⁷Li mantik ŋan ki tin tumii sukuru na booru, bisin niewa.

²⁸Li-i tee ki ti di wahala, li ŋan ki tin kar soon nna nan sukuru.

²⁹Li ŋan ki tin gbaan nan mɔsaku,

kimaan li ki gar dindann tan sii be.

³⁰Bi-i lekii boot, ki bia sukiit, li ŋan ki tin gaar li kur.

³¹Yennu mɔk ninbatinu, ki kan nyikit fas fasi.

³²U saa fit te ki parbiir n baarit,

ŋaan u lomm nba ki u be nant na tee barmɔniie, ki mɔk paŋ.

³³Li ki manɔ, li-i tee ki ti be parbiir nan gbanantont ni.

³⁴Yennu mi yoo nba ki ti sei be mukir ni.

³⁵Yennu mi yoo nba ki bi fiarit mɔnii nba ki u turit na ni.

³⁶Yoo nba ki barmɔnii ki piak buut boor na, ŋaan u mi li po.

³⁷Yennu loomm kuukɔɔe tuun yoo kur.

³⁸Bonŋann nan bonbiir kur tuun nan waa senn biaŋinba nae.

³⁹Bee paake ki ti sii mɔk bunburimii,

li-i tee ki ti la tubdatu ti toonbiit paaki?

⁴⁰Ŋaant ki tin fiit ti binbeŋ, ki jen Yennu boor.

⁴¹Ŋaant tin loot ti para, ki miar Yennu nba be yendɔuŋ ni na.

⁴²“Yennu, ti tun yanbɔmm ki biirawa, ki a ki nyik chabiti.

⁴³“A wei berite, ki kpiit, ki wutoor dɔɔk a ninbatinu na paak.

⁴⁴A wutoor na tee nan sanpagbouŋ nae,

ki mantik kpakii, ki ti miaru kan fit gar baara ni.

⁴⁵A lute nan ti tee bonjakina na, boorganu ni,

⁴⁶ki ti datai na kur sukiit ki bia laat,

⁴⁷ki ti kpan be baak nan biiru ni,

ki be ninbɔŋ nan jaŋmaansooruk ni.

⁴⁸Ki ninnyuut nyi n ninbina ni ki puub nan kpenu na,

kimaan n niib biiru na paak.

⁴⁹“N ninnyuut na sii yɔɔ puube,

⁵⁰ki tan tun yoo nba ki Yennu saa got sikin ki lat.

⁵¹N tuu la parbiire,

li-i tee ki n laat linba baar doo na poob paak.

⁵²“Ki n datai nba namin kaat na soorin

nan baruk nba tuu soor nɔɔŋ biaŋinba na.

⁵³Ki n fo, ŋaan ki bi lun bootuk ni, ki biin tann li mɔb paak.

⁵⁴Ki nyun na yaa lin piinin, ki n ji mi nan kuun nakinima.

⁵⁵“Yennu, ki n be bootuk na tiŋ po ki yikin teena.

⁵⁶Yoo nba ki n tan barima, maa fan gbiint n mɔnii na, ki a gbat,

⁵⁷ki gat turin, ki yetin a n daa tiin jaŋmaanii.

⁵⁸“Yennu, ki a tan baar ki fatin, ki tinn n manfoor.

⁵⁹A kɔn n paak, ki mi baa tun bonkpeta nba ki biirin.

⁶⁰A mi n datai na nba namin, nan baa lorin n paak biaŋinba.

⁶¹“Yennu, a gbat baa sukiima; a mi bi lora kur.

⁶²Ki bi piak n paak daa kur ki lorin bi lora.

⁶³Ki bi tuu piin sanyiɔk ni ki laan, ki tan tuu nyiɔk.

⁶⁴“Yennu, a dat bi tuba baa tun linba na paak.

⁶⁵A sat mɔtont bi paak, ki ŋaan bin kɔŋ bi dindann.

⁶⁶A wei berib nan wutoor, ki boontib tingbouŋ na paak.”

Ki jiin Jerusalem biiru poor po

¹Ti salinnyinyira na ji biire;

ki Yenjiantu ŋasaakak na tana yat ki dɔɔ sɔnjot ni.

²Sayɔnn naasimm na tuu mɔk nyɔɔt nan salima nae ki turit,

ki mɔtana ki bi ji diab nan yɔkboba na.

³Naamunaaŋ gbaa, u tuu mɔɔnt u bonbis,

ŋaan ki n niib na ŋarin tee nan naamiɔŋ na

ki ton nan bi bonbis.

⁴Ki bi te bi sanpantii kpenn kon nan nyunnyukuru;

ki bi waas na mei jeet, ŋaan ki sɔɔ ki teemm.

⁵Ki niib nba tuu di jeŋant na ji kpenn kon sɔnjot ni;

binba tuu be bi yamani na ji ŋakitir

ki kpaan jebura tanpena paak.

⁶Ki n niib na la tubdatu,

ki li gar Sodom teeb nba din la biiru nba nyii Yennu boor yiama na.

⁷Tɔɔndamm na din yeen, ki ki mɔk jakint nan wunn na,

ki bia peen ki gar naabiin,

ki bi gbanant mɔk laafia nan fant nan paŋ bonchiann,

⁸ŋaan mɔtana ki bi ji dɔɔ sɔnjot ni ki kpo,

ki bi numpo wob bɔnn, ki bi gbanant koor ki tee nan dakoonn na,

ki tab bi kpaba paak, ki sɔɔ kan fit bannibi.

⁹Binba din kpo tɔb ni na yar din sɔ

ki gar binba din ki laat jeet ki fɔi,

ki tan kpenn kon li poor po na.

¹⁰Biiru nba din baar n niib paak na mɔk jaŋmaansooruk,

ki bi naanba tan tat ŋaa bi waas ki ŋman.

¹¹Yennu wutoor mantik doo Sayɔnn doo paake,

ki u joor muu ki li dii boont.

¹²Nirɔ din ki be siar boor, koo li boorganu doi diara na gbaa,

ki teen yada nan datai saa fit kɔɔ Jerusalem tammɔkɔɔka na ni.

¹³Ŋaan li din tan tume,

kimaan Yennu sɔkiniinba nan mannteeb na din tun yanbɔmm,

ki kpii binba ki tun toonbiit nawa.

¹⁴Ki doo na tɔɔndamm lin yirib sɔnjot ni,

nan bi tee jɔɔniie na, ki mantik gbar sɔn,

ki sɔɔ kaa ki saa fit siibi.

¹⁵Ki niib na tantir a, “Seetir man. I biir i mɔŋa; i daa siitit.”

Ki bi ji lin yirib, ki nyi digban-yenn ni ki saa leer po,

ŋaan sɔɔ ki gaamm saauŋu.

¹⁶Yennu ji ki fiin bi po, ŋɔɔe yatib u tiɔŋ,

ki u baka ji kaa mannteeb nan tɔɔndamm na po.

¹⁷Ki ti guu sommir nba saa baar tee-e, ŋaan ki li tan ki baari,

ki bia guu sommir nba saa nyi digbann nba kan fit sommit na boor.

¹⁸Ki datai na goriit, ki ti lek ji kan fit somm sɔnjot ni.

Ki ti daa gbenn, ki ti yoo nakin ki biiru baar ti paak.

¹⁹Ki ti datai na tiin kakii

ki gar baakir nba tuu tiantir sanpaapo biaŋinba nawa,

ki wei berit, ki tɔkii ti sɔnbuka, jɔɔt ni,

ki bɔr kunkoouk paak a bin soorit.

²⁰Ki bi soor wunba ki ti manfoor dindann gaa u paak na,

ŋɔɔe tee kpanbar nba ki Yennu gann,

ki tee daanɔ nba ki ti teenɔ yada nan u saa guurit

ki tin nyi binba saa lekit na nuu ni.

²¹Ii laa man, yimm Edom teeb nan Us teeb.

Ii mɔk parpeenn man, nan yaa daa mɔk yaak na.

Biiru mun bia baatie, ki i mun bia tan sii daŋit ki be payana,

ki di fei.

²²Yennu dat Sayɔnn teeb tubawa,

u kan te ki ti ji tee yommii boorganu tiŋ ni;

ŋaan yimm Edom teeb, Yennu saa dat i tubawa;

u saa fiit i toonbiit na ki nyinnir paanu.

Miaru ki jiin ninbatinu po

¹Yennu, ii tian linba teenit na po. Gotirit, ki la ti fei.

²Ti mɔkint na be boorganu nuu nie;

ki boorganu niib ji kɔɔ ti ŋei ni.

³Datai na kpii ti baanbawa, ki ti naanba ji tee pakɔi mɔtana.

⁴See ki ti pa nyun nba ki ti nyu na paak;

see ki ti daa daat nba ki ti sii jokit muu.

⁵Ki bi diat nan paŋ nan ti tee bonii koo laagumiinba na;

ki ti tan bak, ŋaan ki bi ki sak ti foi.

⁶Ki ti ji ti mɔŋ tur Ijipt teeb nan Asiria teeb,

a lin te ki tii laat jeet, kii mɔk manfoor.

⁷Ti yeejamme din tun biir, ŋaan bi ji kaa mɔtana,

ki timme ji di wahala, biit nba ki bi tun na paak.

⁸Ki niib diat, ŋaan niib maŋ ki chee yommii,

ki sɔɔ kaa ki saa fatit ki tin nyi bi nuu ni.

⁹Nikpiirit line doo na kur po.

Ti tuu chibin ti saaŋmaniie, yoo nba ki ti kpaan jeet.

¹⁰Kon te ki ti gbanant toŋ,

ki tee nan boroboro diiuk nba tuu toŋ biaŋinba na.

¹¹Bi fat ti poob ki dɔɔ namm, Sayɔnn kunkonn tiɔŋ paake;

ki Juda digbanbis kur ni, ki bi mukis ti bonpoi, ki dɔɔ namm,

¹²ki soor ti tɔɔndamm ki jɔnnib, ki ki teen nikpera na chɔruŋu,

¹³ki mukis ti naasimm na, ki bi naan dii,

ki li tee nan bi tee daabae na,

ki bonjabis na lin jikin dakpiata nba gar bi paŋ terik.

¹⁴Ki nikpera na ji ki kaar doo na tammɔkɔɔka boori;

ki nipaauŋ na mun bia ji ki yiin yanii ki faa bonfifaati.

¹⁵Parpeenn nyii ti binbeŋ niwa,

ki parbiir gaar ti sawaanu yiar.

¹⁶Taa tuu mɔk parbifaant linba paak na, li siar ji ki biari.

Ti tun yanbɔmma, ki mɔtana ti ji be biiru nie.

¹⁷Ti para biir bonchiann,

ki ninnyuut piin ti ninbina, ki ti ki fit laat,

¹⁸kimaan Sayɔnn kunkonn5.18 Sayɔnn kunkonn tee siaminba ki Yenjiantu ŋasaakak be nae. dɔɔ yanne,

ki sɔɔ kaa li ni, ki mɔbɔi ji lin li langbent ni.

¹⁹Yennu, fine tee kpanbar nba sii yɔɔ be,

ki sii diat nan durinya na gbennu.

²⁰Bee teen ki a nyikit ki li wei nna? A saa ban tiar ti po jika-a?

²¹Yennu, a te ki tin jen a boor. A te ki tin jen.

A ŋamm fiin ti sann nba din be yaayoo niwa na,

²²koo a kpan yêtite nan yoo nba kaa gbennu-u?

A wutoor kpan yɔɔ be-e?