JOEL
gbouŋ
Ki jiin Joel gbouŋ na po
Yennu sɔkinii Joel yoo na, naasuut din yɔɔ baate, ki ŋman bona kur ki biir tiŋ na. Joel din kpaan Israel teeb na nan naasuut na tee Yennu tubdatue, bi yanbɔntoona paak, ki bia yaa naasuut na see kunkɔnkɔnna bonchiann nba tan saa baar ki kɔn nyannib na taar nie, bi-i kii nyik bi yanbɔmm ŋaan jiant Yennu kuukɔɔ. Joel bia din betib Seyeeŋ na nba tan saa baar Yennu niib kur paak biaŋinba.
11Yennu mɔmaame na, ki u teen Joel, wunba tee Petuel bija na.
Ki jiin naasuut baaru po
2Yimm nba tee nikpera na, gbiintir man;
wunba kur kɔɔ Juda tiŋ ni, gbiintir.
Linba na booru ban tuma, laa tee i yoo,
koo i yeejamm yoowa-a?
3Want i waas li po man, ki bi mun saa wann bi waas,
ki bi mun tan saa wann maaru nba waa.
4Naasuut bonchiann saa baa bonbuburit paak.
Naasuut nba liit ki nyik linba, binba wei tuu ŋmamire.
5Fiit kii mɔ, yimm dayibira na;
ii bui, yimm danyuura na.
Lɔɔna nba ki bi ŋaa daan na biira.
6Naasuut nba tee nan kunkɔnkɔnna nba yab bonchiann na
lek ti doowa;
bi mɔk paŋ ki yab kaa kann;
ki bi nyana porin nan yanbɔr yar na.
7Bi biir daan tilontiiwa, ki ŋman ti tilontlia.
Bi ŋman kokir li wakawa, ki tan nyik li yiinii ki li peen.
8Yimm niib na, ii bui man,
nan sapaamɔ nba tuu bui fabin,
jɔɔ nba ki u yaa wun kunɔ kuun biaŋinba na.
9Jeet nan daan kaa ki bi saa tur Yennu, u ŋasaakak ni;
ki mannteeb na bui fabin,
kimaan Yenpiinii kaa ki teen Yennu.
10Ki kpaant dɔɔ yann, ki tiŋ bui fabin,
kimaan jeet na biira, ki daan tiinii na koor,
ki kpan tiinii na suur.
11Ii mɔk parbiir man, yimm kpaara;
ii bui fabin, yimm nba gorii tilontii kpaant,
kimaan boroboro dii nan mukirii
nan bonbuburit nba be i kpaant ni biira.
12Li daan tiinii nan kinkanii na suura,
li tilontii kur suur ki kpowa, ki niib na parpeenn gbenn.
13Ii lia bɔtoliant kii mɔ man,
yimm nba tee mannteeb ki tuun maruŋ binbintir boor na.
Saant Yenjiantu Ŋasaakak ni, ki bui fabin nyɔtunmunn.
Jeet nan daan kaa ki i saa tur Yennu.
14Turin mɔb ki bin lor mɔi, yiint ki taan niib na.
Taant saakab na nan Juda teeb na kur
ki bin baar i Yomdaanɔ Yennu ŋasaakak na ni,
ki fabin turɔ.
15Yennu daar na pera, ki tee daar nba
ki Yabint daanɔ maŋ saa baar nan biiru.
Daar maŋ sii tee bonbilankante.
16Ti goriie, ki ti jeet biir,
ŋaan ki ti kan fit teen siari.
Parpeenn kaa Yenjiantu Ŋasaakak na ni.
17Ki bonboorii kpenn tinkooŋ ni.
Ki jeet kaa ki ti saa bekiri.
Ki boa be koont ki yeer yeer.
18Ki nei mɔ lin nan parbiir,
ki peburuŋ mun bia di wahala,
kimaan mɔɔt kaa ki bi saa ŋman.
19Ki n fabin tur fin Yennu,
kimaan bonkobit kpinkpaar boa nan tiinii kur koora,
ki tee nan muue diir na.
20Ki muuk ni bonkobit na gbaa mɔ ki teen fin Yennu,
kimaan kpenii na fɔɔra.
2Naasuut na tee kpaaniie ki jiin Yennu daar po
1Pebin naatunn na.
Ŋaant ki lin mɔ, Yennu kasii kunkonn Sayɔnn na paak.
A te ki niib nba kur be Juda tiŋ ni n jekir,
kimaan Yennu daar na baate.
2Li daar tan sii tee bunbɔnne, ki tee bunbɔnchiɔŋ,
ki tee sanpagbounbouŋ, ki yentu kaa,
ki naasuut nba yab ki tee nan kunkɔnkɔnna na
saa lat piin kunkona na kur po.
Ki li booru daa ki ban teeni, ki bia ji kan ban teeni.
3Ki bi dii bonbuburit na nan muu nba tuu di biaŋinba na.
Ki bi tɔɔnn po, bonbuburit na ŋan nan Edenn kpaab na,
ŋaan baa gar sian tee tanbiinsaarik, ki siar ki biar leŋi.
4Ki bi naan taanii, ki tiin nan tɔb taanii na.
5Baa lin mobit kunkona na yura paak na,
ki bi mɔ nan tɔb taantorit na;
ki put nan mɔkoonii be muu ni na,
ki be chunchuuntuk nan kunkɔnkɔnna bonchiann
nba teen siir nan tɔb na.
6Baa nakin yoo nba, ki jaŋmaanii soor sɔɔ kur,
ki sɔɔ kur numpo penn.
7Ki bi lek nan kunkɔnkɔnna na,
ki do joona nan kunkɔnkɔnna na.
Ki bi kur somm sinsonn, ki ki borii,
8koo ki tɔkii lɔɔ yiar ni, ki daan joona ki gaar kɔɔ,
ki siar kaa ki saa gɔɔribi.
9Ki bi tɔ a bin kɔɔ doo na ni, ki chiar doo joona,
ki kɔɔ ki bia doo ŋei na paak,
ki kɔɔ takorii ni nan nanyukii na.
10Baa baar yoo nba, ki tiŋ jek,
ki sanpagbouŋ waa gbar gbar,
ki yonnu nan ŋmaarik bɔnn, ki ŋmaabira ji ki nyiiri.
11Ki Yennu kunkɔr tantir u kunkɔnkɔnna na paak,
ki kunkɔnkɔnna nba sak u mɔb na yab bonchiann ki bia paar.
Li tan sii bi bonchiann Yennu daar na ni.
Lamme tan saa nyi li ni?
Ki jiin binbeŋ lebitu po
12Ki Yennu yet a, “Mɔtana gbaa,
lebitir i binbeŋ nan barmɔnii, ki baar n boor,
ki lor mɔi ki bui fabin.
13Ii ŋaan ki i parbiir n wann i lebitu,
i liant patu kuukɔɔ kan jaŋi.”
Jenin man i Yomdaanɔ Yennu boor.
U mɔk burchint ki gbee nan ninbatinu;
u mɔk sukuru ki dia u mɔsona,
ki teen siir nan wun nyikchab yoo kur, ki kan dat i tuba.
14Li pasiar i Yomdaanɔ Yennu saa lebit u dudukita,
ki teen piisin i paak, ki te ki i jeet n nan bonchiann,
ki yin fit turɔ jeet nan daan piinii.
15Pebin naatunn na Sayɔnn kunkonn paak,
ki yiin niib na ki taamm, ki te bin lor mɔi.
16Taant niib na bɔyennkɔɔ boor;
ki te bin teen siir nan jiantii.
Baat nan nikpera, ki taan waas nan sanpantii,
nan binba kɔɔn poopaanii
nan bi poob na gbaa n nyik bi diit ŋaan baar.
17Mannteeb nba tuun Yennu toona ki be maruŋ binbintir
nan ŋasaakak tammɔb sinsuuk ni na n bui ki miar Yennu a,
“Yennu, ii mɔk ninbatinu nan a niib.
A daa te digbanlia sarikitit, ki bia laat,
ki yeen a, ‘I Yennu na be lia?’ ”
Biaŋinba ki Yennu te tiŋ kpiak
18Yennu baka be tiŋ na paak,
ki u mɔk ninbatinu nan u niib,
19ki turib gatu a, “Mɔtana, n ji yaa man turi jeete
nan tilɔɔna daan nan olif tiinii kpan, ki te yin gboo,
ki digbanlia na ji kan sarikini.
20N saa nyinn naasuut nba tee nan kunkɔnkɔnna
ki nyii niigaŋ po nae,
ki ber bi siab ki bin saan kunkoouk po,
ki ber binba tee sɔnliita na ki sikinib Mɔk-kpeenn ni,
ki ber binba joont na ki sikinib
Sinsuuk ni mɔkgbeŋir na ni.
Ki bi gbanankpeena saa nubir.
N saa biirib, kimaan baa tun linba ki turi na paak.
21“Sarwaat, i daa tiin jaŋmaanii,
ŋaan ii mɔk parpeenn kii kpamm,
kimaan linba Yennu tun ki turi na paak.
22Bonkobit, i daa tiin jaŋmaanii,
kimaan bonkobit kpinkpaar boa biikite,
ki tiinii loon lɔɔna,
ki kinkana nan daan tilɔɔna yab bonchiann.
23“Sayɔnn teeb, ii mɔk parpeenn man;
ii kpamm man linba ki i Yomdaanɔ Yennu tun
ki turi na paak.
U te kpafusaak baa ki li jaŋiti, ki te saak baa sabouŋ,
ki bia baa sakoouk nan waa tuu baa biaŋinba na.
24Jarii kur saa gbee nan jeete,
ki bui saa gbee nan tilɔɔna daan nan olif tiinii kpan.
25Ki i bona nba din biir
bina nba niŋ ki naasuburuŋ din ŋman i bonbuburit na,
n saa jiinir ki turi. Mine din tun naasuut maŋ i boor.
26Mɔtana, i ji sii mɔk jeet bonchiann ki di gboot,
ki i saa pak dont min i Yomdaanɔ Yennu sann,
wunba tun bakitnauŋ toona ki turi na.
Ki yimm, n niib, ji kan ban di fei.
27Ki yimm Israel teeb saa bann nan n be nani.
Ki min Yennu-e tee i Yomdaanɔ, ki sɔɔ ji ki be.
Ki yimm, n niib, ji kan ban di fei.
Ki jiin Yennu daar na po
28“Ki li poor po, n tan saa sikin n Seek, sɔɔ kur paak,
ki i bonjai nan i bonpoi tan sii sɔkint n maan,
ki i jakpera mun tan sii damii damiit,
ki i naasimm tan sii laat yirintu.
29Ki daa maŋ ni, n tan saa sikin n Seek na
n daaba paak, li jab nan poob kur.
30“Ki daa maŋ ni, n tan saa tun bakitnauŋ toona
sanpaapo nan tingbouŋ na ni;
ki sɔn nan muu nan munyuuk tan sii be.
31Yonnu tan saa kpint ki bɔnn,
ki ŋmaarik mun saa kpint ki mɔnn nan sɔn na;
li tan saa teen nnaewa ki min Yennu dajaann
nba tee biiru daar na n fit baar.
32Ŋaan binba kur tan boin sommir po saa la tinnu.
Niib nba be Jerusalem, bi siab saa la fatu,
ki binba ki n gannib na sii mɔk manfoor
nan min Yennu nba yet biaŋinba.”
3Ki jiin tingbouŋ na ŋaateeb buut po
1Yennu ŋamm yet a, “Daa maŋ ni, n tan saa ŋamm jiin
Juda nan Jerusalem teeb mɔkinta.
2N tan saa taan tingbouŋ na ŋaateeb kur
ki baar namm Buut Baauk ni.
Leŋe ki n saa bu bi buut
nan baa tun linba kur ki tur n niib.
Bi te ki Israel teeb na yat kɔɔ digbangana ni,
ki bia biit Israel tiŋ nba tee n yar na.
3Bi tɔ naatɔɔte a bin chent n niib nba ki bi soorib na,
ki kɔi bonjai nan bonpoi ki teemm daaba,
a bin gaar likirii ki pa jantona nan daan paak.
4“I yiab a yin tun bee ki turimi, yimm Taya teeb, nan Sidonn teeb, nan niib nba kur be Filistia teeb yent ni na? I koor a yin teen siare ki jiinimi-i? Li-i tee ki i yaa yin tun siar ki jiinimi, ŋann n saa kakit yiame, ki pa jiini. 5I jii n salimpeena nan salimmɔna, nan n mɔkint kur, ki yaat saan nann i tingbanŋei niŋa. 6I jii Juda nan Jerusalem teeb ki yaat fɔkit namm bi tiɔŋ tiŋe, ki saa kɔib ki tur Griis teeb. 7Mɔtana, n ji yaa n nyinnibe yaa kɔib siaminba na. N saa teeni nan yaa teemm biaŋinba nae. 8N saa te ki bin kɔi i bonjai nan i bonpoi ki tur Juda teeb, ki bi mun saa kɔib ki tur Sabea teeb nba kɔɔ banfɔka na. Min Yennu-e pak na.
9“Turin mɔɔntii na digbana kur ni a,
‘Teent siir nan tɔb man, yiint i kunkɔnkɔnna,
ki taan bi kur ki somm namm.
10Faan i kumɔi ki teen jukbanjai,
ki faa i jukii ki kpantir kpana,
ki te i nibutimii gbaa n kɔn.
11Yimm digbana kur nba kpia na,
kakitir ki baar man, ki taan leeb baauk na ni.’ ”
Yennu, tumin a kunkɔnkɔnna ki bin lekib.
12“A te digbana na niib n teen siir,
ki baar Buut Baauk na ni.
Leŋe ki min Yennu saa kar ki bu digbana kur buut.
13Bi mantik ton halii, chɔɔmm ki bir tiŋ ni
nan baa tuu chɔɔ jeet li jaanu yoo biaŋinba na.
A ŋmaab nan baa tuu ŋmaa daan tilɔɔna li ŋinŋaa boor,
ki daan n tan nyi ki gbee mɔ biaŋinba na.”
14Niib tusbam-bamme be Buut Baauk na ni.
Leŋe ki Yennu saa baar yiama ki bu buut.
15Ki yonnu nan ŋmaarik saa bɔnn,
ki ŋmaabira na ji kan yent.
Ki jiin piisin nba ki Yennu saa tur u niib po
16Yennu kunkɔr saa nyi Sayɔnn kunkonn paak;
ki u kunkɔr n tant ki nyi Jerusalem po;
ki tingbouŋ nan sanpaak n jek,
ŋaan Yennu saa kɔn u niib paaka.
17“Tɔn, Israel teeb, i ji saa bann
nan mine tee i Yomdaanɔ Yennu.
N kɔɔ Sayɔnn-e, n kasii kunkonn na paak.
Jerusalem sii tee kasii dooe;
ki boorganu ji kan ban kɔn ki nyanniri.
18Ki daa maŋ ni, kunkona saa gbee nan daan tiiniie,
ki bonkobit sii be kunkonn kur paak,
ki nyun sii be Juda kpenii kur ni bonchiann.
Ki kpenu saa pubir nyi Yennu ŋasaakak boor,
ki li nyun saa maan Kpekii Baauk na.
19“Ki Ijipt tiŋ saa kpant kunkoouk,
ki Edom tiŋ n kpant langben-yana,
kimaan baa lek Juda tiŋ,
ki kpii li niib nba ki mɔk biit na paak.
20-21N saa kɔn binba ki bi kpiib na paaka.
N kan nyik biirteeb na yanni,
ŋaan niib sii be Juda tiŋ nan Jerusalem doo ni
mɔkmɔk nan mɔkmɔk,
ki min Yennu sii be Sayɔnn kunkonn paake.”