Job

JOB

labaar

Ki jiin Job gbouŋ na po

Gbouŋ na beerit jasɔɔ poe, ki bi yiu Job. U din tee mɔkitɔɔe ki bia tee Yentinnɔ. Sintaanii din tan lek Job ki biir u mɔkint, ki bia kpii u waas, ki bia turɔ baatuk, ŋaan ki Job bia waa Yennu fanu; ki li joontu, Yennu tan teen piisin Job paak, ki li gar sinsinn yar na.

Sintaanii nba bikin Job biaŋinba

¹Jasɔɔe din be, ki bi yiu Job, ki u kɔɔ Us tiŋ ni, ki jiantir Yennu ki waau fanu, ki tee niŋanɔ, ki dia u mɔŋ fanu, ki ki tuun biit. ²U din mɔk bonjai banlore nan bonpoi bantaa. ³U bia din mɔk pei tusaa ŋanlore, nan laagumiinba tusaa ŋantaa, nan nei tusir, nan bonii kobii ŋanŋmu. U bia din mɔk toontunna ki bi yab bonchiann. U din mantik tee jakpaatir nba be yondo po yent na nie.

⁴Job bonjai na din tuu tee jaamme yenɔ yenɔ, ki yi bi niipoob bantaa na, ki bi lakin di. ⁵Ki jaamm kur sanyafannuk, Job din tuu dɔŋ fiire, ki mann maruŋ u waas na kur paak, a lin ŋammib. U din tuu tun linba na, kimaan u tuu dukin nan bi yenɔ tan saa mann tun biit, ki sukii Yennu ŋaan kan bann nan u sukiiɔ.

⁶Daar nba din tan baar nan malakanba1.6 Bi maan ni, bi sɔb “Yennu waas.” n baar Yennu boor, ki Sintaanii tɔk namm ki baar. ⁷Ki Yennu boiɔ a, “A bo be lee?”

Ki Sintaanii jiin a, “N bo somme ki lin gɔrin tingbouŋ na kur po.”

⁸Ki Yennu boiɔ a, “A la n toontunnɔ Job nba tee biaŋinbawa-a? Sɔɔ ki be tingbouŋ na paak ki waan fanu, ki bia tee niŋanɔ nan ŋɔɔ na. U jiantirin, ki dia u mɔŋ fanu, ki ki tuun biiti.”

⁹Ki Sintaanii jiin a, “Li-i tee ki Job ki laat siar a boor, u saa fit jiantawa-a? ¹⁰A tun guue, ŋɔɔ nan u ŋaateeb nan linba kur ki u mɔk, ki tee piisin linba kur ki u tuun paak, fine bia turɔ bonkobit bonchiann ki bi gbee tiŋ na kur po. ¹¹Ŋaan mɔtana, li-i tee ki a nyinn bona nba kur ki u mɔk na, u saa sat mɔtonte a paak.”

¹²Ki Yennu yet Sintaanii a, “Tɔn, linba kur ki u mɔk na, li be a nuu ni, ŋaan a daa biir u gbananti.” Ŋanne ki Sintaanii yaat.

Biaŋinba ki Job kɔŋ u waas nan u mɔkint kur

¹³Dasiar ki Job waas di jaamm, bi yɔɔrkper ŋaak, ¹⁴ki toomii tin ki baar Job boor, ki yetɔ a, “Ti bo dia naajaie ki ko kpaab, ki ti bonii na ŋman mɔɔt, muuk nba kpiat na ni, ¹⁵ki Saba teeb tan lekit, ki fat bi kur, ki kpii a toontunna na kur, see min kɔɔe biar ki chiar paak, ki baar maa min beta.”

¹⁶U yeen ki saa gbent na, ki sɔɔ toontunlɔɔ baara, ki yet a, “Saak sik pei nan pekpaarii na paaka, ki kpii bi kura, ki min kɔɔe biar ki baar maa min beta.”

¹⁷U yeen ki saa gbent na, ki sɔɔ toontunlɔɔ baara, ki yet a, “Kaldii fat-teeb tee koonn muntaa, ki baar lekit, ki yaat nan laagumiinba nawa, ki bia kpii a toontunna na kurawa, see min kɔɔe biar ki chiar paak, ki baar maa min beta.”

¹⁸U yeen ki saa gbent na, ki sɔɔ toontunlɔɔ baara, ki yet a, “A waas na bo di jaamme a bijakper ŋaak, ¹⁹ki wonpaaruk nyii tiŋ nba ki siar ki pia na po, ki daa ŋaak na, ki kpii bi kur, min kɔɔe biar, ki chiar baar maa min beta.”

²⁰Tɔn, ki Job ji fiir set ki pat u liant nan parbiir, ki koor u yut, ki baa fabin tiŋ ni, ²¹ki yet a, “Bi din marin yanne, n bia tan saa kpo yanne. Yennu-e din turin, ki mɔtana u jii yaat nann na. Yennu sann n la dontir.”

²²Linba kur lek din baar Job na, ŋaan u din ki nyiir Yennu ki tun yanbɔmmi.

Biaŋinba ki Sintaanii ŋamm bikin Job

¹Daar nba din tan baar nan malakanba2.1 Bi maan ni, bi sɔb “Yennu waas.” na n ŋamm baar Yennu boor na, ki Sintaanii tɔk namm ki baar. ²Ki Yennu boiɔ a, “A bo be lee?”

Ki Sintaanii jiin a, “N bo somme ki lin gɔrin tingbouŋ na kur po.”

³Ki Yennu yetɔ a, “A la n toontunnɔ Job nba tee biaŋinbawa-a? Sɔɔ ki be tingbouŋ na paak, ki waan fanu ki bia tee niŋanɔ nan ŋɔɔ na. U jiantirin, ki dia u mɔŋ fanu, ki ki tuun biiti. A wei tukilin a man te ki a lekɔ, ki li ki mɔk paak nan waama, ŋaan u lek tee wunba waan fanue nan waa tuu waan na.”

⁴Ki Sintaanii jiin a, “Nisaarik saa nyik bont kur u manfoor paaka. ⁵Li paak, li-i tee ki a toŋ u gbanant, u saa sat mɔtonte a paak.”

⁶Ŋanne ki Yennu yet Sintaanii a, “Tɔn, u gbanant be a nuu ni, ŋaan li ki tee ki a kpiu kaa.”

⁷Ŋanne ki Sintaanii seet Yennu boor, ki saan te mɔra soor Job gbanant kur po. ⁸Ki Job fiir saan kar tanpenn paak, ki jii sipachabir ki chat u mɔra na. ⁹Ki u ŋaapoo yetɔ a, “A lek bia daa waa Yennu nan faa tuu waau na-a? Bee ki a kan sukir Yennu ki kpo?”

¹⁰Ki Job jiin a, “A piak baryanae na. Li-i tee ki Yennu turit bonŋansiar, ti tuu gaarire fanu, ki nlee ki ti sii piak biirɔ, li-i tee ki u te daamii baariti.” Daamii nba na kur ni lek, ŋaan Job ki yet siar ki biir Yennu.

Ki jiin Job naasinyɔɔsnba baaru po

¹¹Job naasinyɔɔsnba bantaa na din tee Elifas, ki u nyii Temann doo ni, nan Bildad, ki u nyii Sua tiŋ ni, nan Sofar, ki u nyii Naama tiŋ ni. Baa gbat nan Job yiar na, ki bi lor a bin saan ki maan u par. ¹²Baa daa be banfɔkira na, ki bi la Job ŋaan ki ki bannɔ. Baa tan bannɔ yoo nba, ki bi piin ki mɔ fabin, ki pat bi liant nan parbiir, ki yat tant sanpaapo nan bi yura paak, ¹³ki ji tan kar u boor tiŋ ni datunmuna ŋanlore nan li nyiɔk kur, ŋaan ki ki fit yet mɔbonn ki turɔ, kimaan baa la waa di fara biaŋinba na.

Biaŋinba ki Job jii u daamii ki tur Yennu

Job mɔmaan

¹Li poor po ki Job yaat u mɔb, ki sat mɔtont ki jiin daar nba ki bi din marɔ na po. ²U din yet a:

³Yennu, a te mɔtont-ii be daar nba ki bi din marin na paak, ki te mɔtont-ii be nyiɔk nba ki bi din soor n poor na paak. ⁴Yennu, lebitir li daar ki teenir bunbɔnn, ki ji daa ban tian daar maŋ po, ki ji daa ban te yentu yentir li paaki. ⁵A teen li daar ki lii tee bunbɔncheenn, ki dɔkinir nan sanpagbouŋ, ki lin piin yonnu, ⁶ki nyinn nyiɔk maŋ li binn ni, ki ji daa te ki bi ban kaaniri. ⁷A teenir nyɔyann ki li daa be parpeenn ni. ⁸A te jabaabuura n sat mɔtont daar maŋ paak, ŋamme mi nyun ni bonsusoouk nba ki bi yiu Lefiatann na dianu. ⁹Soot sanyafaar ŋmaajar na ki u daa yentir; ki daa te ki li nyiɔk mɔk dindann nan sanyiɔk yentu. ¹⁰A te mɔtont-ii be nyiɔk maŋ paak, nan waa te ki bi marin u ni, ki te daamii nan parbiir dɔkit n paak na.

¹¹N sunman ki n din bo kpo n naa poor niwa, koo ki n din kpo baa marin yoo nba na. ¹²Bee teen ki n naa din dian u taapaaki? Bee teen ki u din mɔɔntin u biimi? ¹³Li-i tee ki n din bo kpoie, n ji bo foie mɔtana man, ¹⁴ki ji bo sii gɔɔnt nan kpanbara nan doodiara nba din ŋamm maa yaayoo ni naan ŋei na. ¹⁵Ki n ji bo sii gɔɔnt nan tɔɔndamm nba tuu gbeen bi ŋei nan salimmɔna nan salimpeena na, ¹⁶koo ki gɔɔnt nan bik nba ki bi tuu marɔ kpeent na. ¹⁷Kaat niŋewa ki nitont na tuu nyik bi toonbiit, ki jab nba tun bak na tuu tan la foon. ¹⁸Leŋe ki dansarkɔɔra gbaa laat parmaasir, ki foi nan tintantii nan mukir sennii. ¹⁹Ki sɔɔ kur be nni, binba tee nijaana nan tarii, ki daaba kur be bi yamani leŋ.

²⁰Bee ki a te niib be ninbaatiri? Bee ki a teen niib nba be parbiir ni na yentu? ²¹Bi guu kuume, ŋaan ki li ki baatib. Bi mantik loon kaauko ki gar mɔkint kur. ²²Bi ki mɔk parpeenni, see bi tan kpo ki bi piib. ²³Yennu-e bɔrin bi tɔɔnn po binbeŋ, ki ŋaan ki bi be mabir ni, lokir kur po. ²⁴Maa sii di jeet na, ki n be mɔnii paak, ki kan fit nyik kukura. ²⁵Ki linba kur ki n tiinir jaŋmaanii, li jijekit n tan teen barmɔnii, ²⁶ki n ki laat parmaasir, ki bia ki laat foon, ki n daamii ki mɔk gbennu.

Sinsinn labafaant

(4.1–14.22)

Elifas mɔmaan

¹Ki Elifas, wunba nyii Temann doo ni na jiin a: ²Job, li-i tee ki n pak, a saa donn wutoora-a? N ji kan fit ŋmini. ³A tumii niib bonchiann, ki bia tur binba ki bi nii baŋ na paŋ. ⁴Nirɔ-i jat baantir kimaan waa bak ki baŋ na, ŋaan a mɔmaame tuu kpaŋɔ ki wun set fanu. ⁵Ŋaan mɔtana li baar a paaka nan fii be daamii ni, ki a mantik baŋ nan fin gaarira. ⁶A tuu jiantir Yennu, ki a binbeŋ ki mɔk bisiati. Li paak, a chee par kii mɔk dindann. ⁷Dukint mɔtana ki jiin poor, ki laan li mi biir niŋanɔ-ɔ. ⁸N ban la niib tuun toonbiit nan bi ko kpaant na, ki buur tonu nan bonboorii na, ki tan jaan tont nan biit. ⁹Yennu saa donn wutoor ki biirib nan wonpaaruk nae. ¹⁰Tondamm na sii duun ki beet nan yanbɔra nae, ŋaan Yennu saa te ki bin ŋmin ki saa kɔnn bi nyana. ¹¹Bi sii tee nan yanbɔra nba be ki ki mɔk siar nan bin di nae, ki bi saa kpo, ki bi waas kur saa yat.

¹²Bi turin bunbɔri maan, ki li gbatu paar. ¹³N gɔɔn gɔchiɔŋ, ŋaan ki damiit daamiin. ¹⁴Ki jaŋmaanii nan jijekit kɔɔn, ki n gbanant kur jekir. ¹⁵Ki seek4.15 Bi maan ni, seek nan wouŋ tee mɔbon-yenne. gar n numpo, ki wajeerii fiir n paak. ¹⁶Ki n la siar see n boor, ki n got sirrr, ŋaan ki bann laa tee linba. Tɔn, ki li ŋmin soon, ki n tan gbat kunkɔr yet a, ¹⁷“Sɔɔ kaa ki sii fit be fanu Yennu tɔɔnn, koo ki yeen u naamii daanɔ boori. ¹⁸Yennu ki teen yada nan u Yendɔuŋ ni toontunna na, u laat u malakanba na toonkpeta gbaa. ¹⁹A dukin nan u saa teen yada nan nisaarik nba tee nɔɔnn, bont nba tee tant, ki saa mat nan wobmaann nawa-a? ²⁰Nisaarik sii fit mɔk manfoor sanyiɔk ni, ki daajoouk tan baat na ki u kpowa, ŋaan bo ki mi li po. ²¹Ki waa mɔk linba kur, bin jii yaat nann. U tuu kpoe, ki daa ki mɔk yanfoon.”

¹Job, yiint, ki laan sɔɔ saa toona-a? Malaka sɔɔ be ki a saa jiant u paaki-i? ²Li tee jatiie ki a te dudukit nan wutoor n tan kpia. Li ki tee linba ki nirɔ nba mɔk subinii saa tun. ³N la jatit nba gorii nan bi be fanu na, ŋaan mɔtont sat bi ŋei paaka. ⁴Ki bi waas kan ban la fat-n-mɔŋ, ki sɔɔ kaa ki saa fit set ki pak bi paak, buut boori. ⁵Kommae saa di jatit jeburkara, nan jeet nba lek bur kunkonii niwa, ki binba nunii mɔn nan bin la mɔkint na sii fumm bi mɔkint paak. ⁶Bonbiir ki nyi tant ni, koo daamii ki nyi tiŋ ni. ⁷Barmɔnii, nisaarike te ki daamii baat u mɔŋ paak, nan musankɔɔna nba tuu put ki nyii muu ni ki do sanpaapo biaŋinba na.

⁸Li-i tee ki n bo tee fin, n bo saa jiant Yennu paake, ki jii n daamii ki turɔ. ⁹Ti kan fit bann toonjaana nba ki u tuun na, ki u bakitnauŋ toona na ki mɔk kann. ¹⁰U te saak baa tiŋ na paak, ki bia maant kpaant nyun. ¹¹Barmɔnii, Yennu dont sikin-n-mɔŋ damm, ki bia teen binba mɔ fabin na parpeenn. ^12-13Ŋɔɔe ŋmat kpinkpannii damm lora, ki te barit nba ki subindamm pii na ŋmat sob, ki te baa tuun linba kur, ki bi ki laat nyannu. ¹⁴Ki yonsuuk ni gbaa, ki bi be bunbɔnn ki barin. ¹⁵Ŋaan Yennu-e tint nandamm ki nyintib kuun ni; ki tint talas damm, ki sɔɔ ki diimm. ¹⁶Ŋɔɔe teen nandamm na dindann, ŋaan te tondamm na ŋmin soon.

¹⁷Parpeenn be daanɔ nba ki Yennu ŋmakitirɔ na paak. A daa biir a par, li-i tee ki u yakii nana. ¹⁸Yennu-e bobint nar nba ki u fet, ki wuu tura daŋ, ŋaan u nuue bia saa tura laafia. ¹⁹Yoo kur u saa tinna ki nyinna daŋ ni. ²⁰Yoo nba ki kon tan baar, u saa dia-a ki a la manfoor, kii guua tɔb ni, ki a nyi kuun ni. ²¹Yennu saa fat ki nyinna, yoo nba ki bi piak ki biira; u bia saa tinna, yoo nba biiru baara. ²²Ki a sii laa, tɔb nan kon yoo, ki a kii tiin muuk ni bonkobit jaŋmaanii. ²³Ki tana sii kaa tiŋ nba ki a ko na ni, ki muuk ni bonkobit na ji kan ban lekani. ²⁴Ki a ji sii be a ŋaak ni nan parmaasir, yoo nba ki a got a pei, a saa lab ki bi mɔk laafia. ²⁵Ki a sii mɔk waas bonchiann, ki bi yab nan tanbiinii na. ²⁶Ki a saa wei bonchiann, ki a gbanant sii mɔk paŋ ki tan tuu yoo nba ki a saa kpo. ²⁷Job, ti tumii linba na ki li weiewa, ki tan bannir. Li tee barmɔniie, li paak, gaatir.

Job mɔmaan

¹Ki Job jiin a: ²Li-i tee ki n daamii nan n parbiir kpiasu bo mɔk bikinuie, ³li kpiasu bo sii yab ki gar mɔkgbeŋir ni tanbiiniiwa. Li paak, a daa te ki n mɔbongbeŋa na n yaar litani. ⁴Yabint Yennu yekin peenii, ki li lɔbii na saat n gbanant kur powa. Yennu-e bir biiru na chinchuuntuk a lin biirin.

⁵Boŋ-i ŋman mɔɔt, li tuu manɔe, ki naab-i ŋman sinkpinkoont, u tuu ŋmine. ⁶Ŋmee saa fit di jesisabuk nba ki yaarin kaa leŋi? Manlante be jenpeenn ni? ⁷N ki mɔk niɔŋ nan li jebooru, ki mi-i dii linba na kur, n par paak tuu pukire.

⁸Bee Yennu kan turin linba ki n boi li po na? Bee teen ki u kan jiin n miaru? ⁹N sunman wun bo kpimi. ¹⁰Li-i tee ki n bo bann nan u saa tun nna, n bo sii yuuk ki mobite nan kpinkpammuk, n bo kan boi n gbananyekitir nba tee biaŋinba. N mi nan Yennu tee kasiie. N ki ban yêt u sennii. ¹¹Panboorbee ki n mɔki, ki li saa te ki n be n manfoor ni? Bee paake ki n sii be manfoor ni, yoo nba ki dindann kaa na? ¹²Yennu jii tanne ki namimi-i? N gbanant tee kutmɔnte-e? ¹³Pansiar ki be ki n saa fit tinn n mɔŋ, siar boor ki be ki n saa saan boi sommir po.

¹⁴Mi-i be daamii na booru nie, ki n loon yɔnanmɔnii, laa lek tee ki n yêt Yennu koo ki n ki yêtɔ. ¹⁵Ŋaan yimm nba tee n yɔɔsnba na tee kpinkpannii damm, nan bunii nba tuu koon biaŋinba, yoo nba ki saak ki baa nae. ¹⁶Ki sakaana nan nyuntana kɔr bunii na, ¹⁷ŋaan yonnu-i nyikint, lin bot, ki bunii na n biar dɔɔ yann, ki koon. ¹⁸Ki niib bonchiann kpaan nyun ki bot, ki lin lintir kunkoouk paak ki tan kpo. ¹⁹Ki niib bonchiann nyii Sieba nan Tema doi ni ki kpaanir, ²⁰ki bi dindann na kpo bunkoonii na boor. ²¹I tee nan bunii maŋ nae n boor. I la linba baarima, ki ŋmat jir poor nan jaŋmaanii. ²²N ban boi-i maa i turin piinii, koo i tur sɔɔ fobit piinii n paaki, ²³koo i tinnin ki n nyi dataak, koo tondaanɔ nuu ni-i?

²⁴Tɔn, ii tumiin, ki wannin n biit nba tee linba, ki n sii tee soon nna, ki gbiint turi. ²⁵Barmɔnpakue lebitir dudukit, ŋaan i yeen baryanae na, ²⁶ki dukii nan n ki piak siari, ŋaan wouŋo da; ki bee teen ki i jiint n mɔbona nba kaa dindann na? ²⁷I tan saa tɔ naatɔɔte ki fit gaar kpeebii, ki kpar i yɔnanmɔnii ki mɔkit. ²⁸Gotir n numpo, n kan faar faaki. ²⁹I mantik dukin fɔkit bonchiann; nyikin ki daa fa faak ki paami. I daa biirimi; n mɔk mɔnii, ³⁰ŋaan ki i dukii nan n faa faake. I dukii nan n kan fit bɔkit bonŋann nan bonbiiri.

¹Nisaarik binbeŋ tee nan ninmɔnn kunkɔnkɔnna toona nae, ki tee nan paŋ toonn na, ²ki bia tee nan daabir nba lin loon maasu boor na, ki tee nan toontunnɔ nba tuu guu a wun gaar paauk biaŋinba na. ³Ki ŋmaarik n tuu ŋmaarik, li ki mɔk linba paak te ki n be, ki nyiɔk n tuu nyiɔk, ki li teenin parbiir. ⁴Li-i tee ki n dɔɔr man gɔɔn yoo nba, sanyiɔk ki yentir yian, ki n labin nyiɔk na kur, ki guu lin yent. ⁵N gbanant gbee nan nanwubaae, ki pɔr narwaka, ki mɔt nyi nara na ni. ⁶Ki daa na saa ŋaan ki n ki mɔk dindann, ki saa yian yian nan pek pek na.

⁷Yennu, tiat nan n manfoor tenn waaminnae, ki n parpeenn poŋ gbenna. ⁸Bi laatin mɔtana, ŋaan ji kan ban lami. Li-i tee ki bi kpaanin, n sii kaa. ^9-10Ki ti tee nan sanpagbouŋ nba tuu penn ki yant nae, ki nisaarik tuu kpo ki ji ki jenti, ki niib nba kur tuu miu na n ji tamm u po. ¹¹Li paak, n kan fit ki ŋmini. N wutoor doo ki li tonin, see ki n pak.

¹²Bee ki a guumi? A dukii nan n tee nyun ni bonsusoouko-o? ¹³N dɔɔ tiŋ ni ki koor a man foi, ki loon fatu, a lin nyinnin gbananyekitir ni. ¹⁴Ŋaan fine jeentin nan damiit; ki te ki n laat yirintu, ki bia damii damibiit. ¹⁵Fi-i chek n turu, li chee nan n gbanant-ii be parbibooru na ni. ¹⁶N bak nan mii be n manfoor na niwa, n ji ki loon mii mɔk manfoori. Nyikimin. N binbeŋ ki mɔk nyɔsiati.

¹⁷Bia paake ki nisaarik kpaa talas ki tura ni? Bia paake ki a baka be waa tuun linba po? ¹⁸A fiitirɔ sanyiɔk ni kur, ki bia bikintɔ yoo kur. ¹⁹A kan paat a numm n paak, ki man fit nak mɔsanti-i? ²⁰Mi-i tun yanbɔmmi, n tun bee ki biir fin dansarguurɔ? Bee ki a jiin ki teenin jabenni? N tee jikire ki be a paaki-i? ²¹A kan ban nyik n yanbɔmm ki chabimi-i? A kan tinin ninbaauk, maa tun kpet na paaki-i? Li kan wei ki n sii be kaauk ni ki tan sii kaa, yoo nba ki a kpaanin.

Bildad mɔmaan

¹Tɔn, ki Bildad, wunba tee Sua booru ni nirɔ na, jiin a: ²A saa pak li mɔbonbooru ki lin wei nlee? A mɔbona tee nan wouŋ nba da ki gaar nae. ³Yennu ki lebitir barmɔnii, u ki gbaar nan wun tun linba ŋani. ⁴A waas na sii tun yanbɔmme ki biir Yennu; li paake ki u dat bi tuba laa jaŋib biaŋinba. ⁵Ŋaan ŋmantir ki barin Yabint Yennu. ⁶Li-i tee ki a mantik tee niŋanɔ ki tee kasii, ŋann Yennu saa baar ki somma, ki bia fiin a ŋaak, ki li tee a paatii. ⁷Ki mɔkint nba kur ki a kɔŋ na kii tee siar, li kan yekin nan linba ki Yennu saa ŋamm ki tura na.

⁸Boin ti yeejamm nba din gar na, ki laan bi baanba din tumii bee, ⁹kimaan bi marit wonne, ki ti ki mi siari, ki daa nba ki ti mɔk tingbouŋ na paak tee nan yunyuŋ nae. ¹⁰A ŋaan ki yaayoo ni yandamm na n wanna; a gbiint baa saa yeta linba a:

¹¹“Gartuut kan fit set siaminba ki nyun kaa. A kan ban lar siaminba ki bakir kaa. ¹²Ki li-i tee nyun na tan fɔɔri, ŋanne tuu sint koor, ki ki kpaat jaŋ nan bin chɔɔr ki tun nann toonn. ¹³Niib nba ki mi Yennu tee nan gartuut na nae; baa ki mi Yennu na, bi ki mɔk dindanni. ¹⁴Bi dindann tee na poruk ŋmiiuk nae. ¹⁵Li-i tee ki bi deen poruk ŋmiiuk paak, li saa fit diaba-a? Li-i tee ki bi bib soor gunguŋ, li saa fit sommib ki bin seta-a?”

¹⁶Toonbiit damm kpaatire nan mɔɔt nba ki yonnu nyi li paak na, ki bia tee nan mɔɔt nba tuu lat kpaab kur po na. ¹⁷Ki bi jiina tuu lor lint tana, ki soor tann kur kenken, ¹⁸ŋaan fi-i jikii ŋabirir, sɔɔ ji kan ban bann nan li bo see leŋi. ¹⁹Nn, kpinkpammuk nba kur ki toonbiit damm mɔke na, nigamme ji tuu baar ki gaar bi setu.

²⁰Ŋaan Yennu kan ban nyik binba waau fanu na, koo ki tur toonbiit damm na sommiri. ²¹U saa te ki a la laat, ki bia hoot, ²²ŋaan te fei n di damm nba ki loon a maan na, ki tondamm na ŋei saa boont.

Job mɔmaan

¹Ki Job jiin a: ²N mi nan linba na tee barmɔniie, ŋaan nisaarik saa teen nlee kii be fanu Yennu tɔɔnni? ³Nlee ki nirɔ saa fit nɔi nanɔ mɔniɔku? U saa fit boi buboit tusir, ki sɔɔ kan fit jiin li siar. ⁴Yennu mantik sub, ki bia mɔk paŋ; ki nisaarik kan fit tookɔ. ⁵Ki u chari jɔjaana ŋaan ki ki beerib, ki biirib nan u wutoor. ⁶Yennu-e te ki tiŋ jekin, ki ŋakin jaantarii nba dia tingbouŋ na. ⁷U saa fit gɔɔr yonnu ki u kan do, ki bia gɔɔr ŋmaabira ki bi kan yent nyiɔk. ⁸Sɔɔ ki somm Yennu ki u lat sanpagbanti, koo ki sommɔ ki u ŋmaat nyun ni bonsusoouk paaki. ⁹Ŋɔɔe nan ŋmaabira ki jɔnn sanpaapo, ki nan ŋmaabira nba ki bi yib Wouŋ nan Bɔk na, ki bia nan ŋmaalore, nan naanyuŋmaarik, nan ŋmaabira nba be niidiitu po na. ¹⁰Ti kan fit bann toonjaana nba ki u tuun na paak, ki u bakitnauŋ toona ki mɔk terik.

¹¹Yennu-i gaar n boor, ŋaan n kan fit lau. ¹²U jikit waa loon linbae, ki sɔɔ kan fit gɔɔrɔ, ki bia ki fit boiɔ a, “A tuun bee na?” ¹³Yennu wutoor-i doo, li ki maakit, ki biir u datai nba sommit nyun ni bonsusoouk Rahab ki u ki saak u mɔb. ¹⁴Li paak, n saa la mɔbona lee, ki tur Yennu gatu? ¹⁵N ki tuun biiti, ŋaan maa saa tun linba tee ki man miar Yennu, wunba tee n buut daanɔ na, ninbatinu poe. ¹⁶Li-i tee ki u te ki n pak n maan lek, ŋaan n kan teen yada nan u saa gbiint ki turimi. ¹⁷U tuun wonpaaruk, ki li fibitin, ki teenin daŋ, ŋaan ki li ki mɔk paak nan waama.

¹⁸U kan te man foi, ki gbeen n binbeŋ nan tont. ¹⁹N saa fit mab ŋɔɔ Yennu-u? N jiiu ki saan nanɔ buut boori-i? Sɔɔ saa fit te ki wun saana-a? ²⁰N ki biir siari, ki tee nimɔnɔ, ŋaan n mɔbona nyi ki tee nan n biir nae, ki linba kur ki n pak, ki li biirin. ^21-22N ki biir siari. N baka kaa linba tuunin na; ki n manfoor benu ni ki man turin. Li ki daamii; taa biir koo taa ki biiri, Yennu saa boontita. ²³Niŋanɔ-i kpir kpo, Yennu tuu laae. ²⁴Yennu-e jii durinya na ki tur toonbiit damm. Ŋɔɔe te ki barbuura na jɔɔn. Ki li-i kii tee Yennu-i kaa teeni, ŋmee teeni?

²⁵N daa na baate yian yian, ki li yenn kɔɔ gbaa ki ŋani. ²⁶N manfoor tiine yian yian nan burgbetir nba mantik tiin na, ki saa yian yian nan baakir nba tuu laan a wun soor weŋ na. ^27-28Ki mi-i laa mɔmiin, ki koor a man tamm n gbanantont na po yoo nba, n daamii na kur tuu jen ki jeentime. N mi nan Yennu-e bu n buut ki biirin. ²⁹Waa poŋ bu ki biirima na, bia paake ki li sii daamiimi? ³⁰Cheeb kaa ki saa fit wuur n yanbɔmmi. ³¹Yennu-e lun bootuk nba mɔk jakint ni, ki n liant gbaa tiinin fei. ³²Yennu-i bonii tee nisaarik, n bo saa turɔ gatuwa; ki ti bo saa jii leeb ki saan buut boor, ki saa pak ti kɔnn po. ³³Ŋaan sɔɔ kaa ki saa set ti sinsuuk ni; sɔɔ kaa ki saa bu min nan Yennu maami. ³⁴Yennu, nyikin ki daa daar n tubiri. Nyintin yanputuk ni. ³⁵N ki tiin jaŋmaanii. N yaa man pake, kimaan n mi n mɔŋ par ni.

¹N bak nan n manfoor benuwa. Gbiintir n parbiir maan na. ²Yennu, a daa biirimi. Betirin n bonkpetir nba tee linba. ³Li mana nan fin te ki n di fara-a? A saa biir a tiɔŋ nba nan linbawa, ki laa mɔmiin toonbiit damm lora paaki-i? ⁴A laat bona nan nisaarik na-a? ⁵A manfoor jin nan ti yara nae-e? ⁶Tɔn, ki bee paake ki a waa fiitir n yanbɔmm kura, ki waa beerin biit nba kur ki n tun ni? ⁷A mi nan n ki biir, ki sɔɔ kan fit fatin a nuu ni.

⁸A jii a niie ki namin, ki nii maŋe bia biirin mɔtana na. ⁹Tiat nan a jii nɔɔnne ki namin; ki a ji yaa a nannime ki man ŋmat kpant tanbiinii-i? ¹⁰Fine tur n baa paŋ ki u marin, fine te ki n kpaat n naa poor ni. ¹¹Fine nan n gbanant, ki kɔɔn kpaba nan jiina, ki jii gbananbɔŋ nan nanbɔna ki dɔkin kpaba na paak. ¹²Fine turin manfoor nan lomm nba kaa gbennu, ki a gotu nae dian, ki n mɔk manfoor. ¹³Ki n ji mi mɔtana nan a bɔr lorin a fan turin daŋe. ¹⁴Ki a diitirin, a fan laan n saa tun kpeti, ki lin te ki a yêt ki kan nyik chabin. ¹⁵Mi-i tun ki kpet yoo nba, biak be n paak, ŋaan mi-i tun linba ŋan yoo nba, n kan la paku. N be ninbaatire, ki fei piinima. ¹⁶Li-i tee ki n lek la nyannu, a tuu waa beerin nan yanbɔr nba tuu waa nant a wun soor nae. A tuu tun bakitnauŋ toonae a lin turin daŋ. ¹⁷A yɔɔ mɔk siara damme ki bi biirin, ki a wutoor do n paak ki pukii, ki a lorin lorpaana nba saa lekin.

¹⁸Yennu, bee paake ki a te ki bi marimi? N din bo saa fit kpo, ki sɔɔ daa ki lami. ¹⁹Mi-i din bo nyii poor ni ki saan kaauk ni yiama, li bo sii ŋan ki gar maa be na. ²⁰N manfoor ki per gbennu-u? Nyikimin. Ŋaant ki n di manu, n manfoor nba biar na ni. ²¹N yaatire yian, ki ji kan ban jeni. N saa tiŋ nba tee bunbɔncheenn na nie, ²²ki tee tiŋ nba gbee nan bunbɔnn nan dindankɔŋir nan ŋmatir, ki yentu na gbaa tee bunbɔnn.

Sofar mɔmaan

¹Tɔn, ki Sofar wunba tee Naama booru ni nirɔ na jiin a: ²Mɔbona na kur sii fit nyi, ki jiinu daa jiinta-a? Machiɔŋ kan fit tur nirɔ mɔnii. ³Job, a dukii ti kan fit tura gatue-e? A baryana na saa fit te ki ti ŋmina-a? ⁴A want a mɔŋ nan faa piak linba kur tee barmɔniie, ki want a mɔŋ nan a tee popeenn daanɔ Yennu boor. ⁵N sunman ki Yennu n bo tura gatu. ⁶U saa beta nan bonbɔrkara bonchiann be yanfoon ni; ki bonyena be ki mantik sumii ki gar nisaarik bannuwa. Yennu-e daar a tubir ki li ki jaŋ waa bo saa dat a tubir biaŋinba.

⁷A saa fit bann Yennu yaarlituk toona nan u yabint nan yiikoo nba teewa-a? ⁸Sanpagbouŋ na, Yennu mi li paak, ki li fɔk kaa terik nan nirɔ n baar. Yennu mi kpeentiŋ, ŋaan fin ŋarin ki mi. ⁹Yennu yabint yarin ki gar tingbouŋ na, ki bia yarin ki gar mɔkgbeŋir. ¹⁰Li-i tee Yennu soora, ki saan nana a wun bu a buuti, ŋmee be ki saa fit gɔɔrɔ? ¹¹Yennu mi niib nba ki mɔk nyɔɔt; u laat bi toonbiit kur. ¹²Bɔŋ nba kan fit mar nirɔ biaŋinba na, nnae mun ki jatuk kan fit subiri.

¹³Job, ŋaant ki a par-ii be nan Yennu, ki fii meiɔ. ¹⁴Nyint toonbiit nan bonkpeta nba be a ŋaak ni, ¹⁵ki ŋamm took durinya na fanu nan parcheenn, ¹⁶ki a tan saa tamm a daamii powa, ki li saa gar nan nyunmɔnn nba tuu gar, ki bin tamm li po na. ¹⁷A binbeŋ ni sii yeen ki gar yonnu nba tuu nyikintir yonsuuk ni nawa, ki a binbeŋ nba be bunbɔnn ni na tan saa yent nan sanyafaar nae, ¹⁸ki a tan sii be weriku ni, ki gbee nan dindann; ki Yennu saa guura ki tura foon. ¹⁹Ki a tan kii tiin a datai jaŋmaanii; ki niib bonchiann tan saa boia sommir po. ²⁰Ŋaan tondamm na tan saa got lint ki kɔŋ bi dindann, ki bi saa la nan sɔnu kaa ki bi saa paak, ki dindanyemmir nba ki bi mɔk na tee kuume saa baarib.

Job mɔmaan

¹Ki Job jiin a: ²Nn, yimme piak ki teen niib. Li-i tee ki i kpo, yanfoon mun saa kpoe. ³Ŋaan n mɔk yan nan yaa mɔk nae. I ki cheemi. Sɔɔ kur mi linba kur ki i yet na. ⁴Ki n yɔɔsnba gbaa laan mɔtana. Bi laame, ŋaan ki n be fanu, ki ki mɔk bisiati; yosau din be ki Yennu gat n miaru. ⁵Yaa ki mɔk daamii nae, ki i laan, ki liat nirɔ nba yaa wun baa na. ⁶Ŋaan nanyukii nan binba ki mi Yennu na be parmaasir nie, ki bi yennii tee panii nba ki bi mɔk na.

⁷Nɔɔnii nan bonkobit gbaa, ŋaan bi mɔk linba ki bi saa fit wanna. ⁸Boin bonfoa nba be tingbouŋ na paak, nan nyun ni bonfoa na, ki bin tura yanfoon. ⁹Bi kura mi nan Yennu jii u yiikooe ki namm. ¹⁰Yennu-e ŋmakitir u naamii manfoa; ki nisaarik kur manfoor be ŋɔɔ Yennu yiikoo ni. ¹¹A lamm nba bant jeet manu biaŋinba na, nnae ki a tuba gbia maan.

^12-13Nikpera mɔk yanfoon, ŋaan Yennu-e mɔk yanfoon nan paŋ. Nikpera sub, ŋaan Yennu sub ki mɔk paŋ ki tuun u toona. ¹⁴Li-i tee ki Yennu bet yoo nba, ŋmee be ki saa fit ŋamm maa? ki ŋmee bia saa fit fat daanɔ nba ki Yennu kɔɔnɔ dansariki? ¹⁵Yennu-i soor saak yoo nba, yonkoonin tuu baare, ki wuu taŋi ŋaa saak yoo nba, nyunmɔnn n pubir. ¹⁶Yennu paar, ki nyant yoo kur; ki binba ki bi kpannib na, nan kpinkpannii damm kur be u paŋ nie. ¹⁷U nyint doo diara yanfoon, ki bia te tɔɔndamm na tuun nan jatit na. ¹⁸U liatir kpanbara, ki teeb yommii. ¹⁹U sikint mannteeb nan niib nba be paŋ ni. ²⁰Ki kpaanteeb nba ki niib teemm yada na, ki u loont bi mɔi, ki nyint nikpera na yanfoon. ²¹Ki binba be paŋ ni na, ki u dintib fei, ki bia gɔi doo diara yiikoo, ²²ki te yentu saa bunbɔnn nba naan kpeentiŋ na ni. ²³U teen digbana paŋ nan yabint, ŋaan u tuu tan te ki bin nyannibe ki bia biirib, ²⁴ki te digbana tɔɔndamm na kpantir jatit, ki te li ŋmatib, ki bi lin lintir ²⁵ki turin bunbɔnn ni, ki lian nan dayibira na.

^1-2Yaa piak linba kur, n ban gbata, n bann li kur paaka. N sub nan yaa sub nae. I ki cheemi. ³Min nan Yennu-e mɔk maan, li ki tee min nan yimm kaa; n loon man jii n maame ki pak nanɔ. ⁴I dɔkint yaa ki mi linba nae nan fai; i tee nan tebira nba kan fit teb sɔɔ nae. ⁵Ii ŋmin ki daa yeen siar, ki sɔɔe n tan dukin nan i mɔk yan.

⁶Gbiintir mii piak n maan yoo nba. ⁷Bee ki i fa faaki? I dukii nan i faak na saa somm Yennuwa-a? ⁸I koor a yin pak sommɔe-e? I yaa yin pak ki sommɔ buut boore-e? ⁹Li-i tee ki Yennu goti sirrr, u saa la bonŋansiar i niwa-a? I dukii a i saa fit kpann Yennu nan yaa kpann nisaarii biaŋinba nae-e? ¹⁰I lukitin lek bɔre, ŋaan u saa yakii naniwa, ¹¹ki u paŋ nae saa kɔɔni jijeet. ¹²I barjokit na ki mɔk nyɔɔt nan tanpent nae; ki i mɔniat na ki mɔk paŋ nan kpiaruk na. ¹³Ŋminin man, ŋaan turin yiar ki man pak, ki laan li joontu nba lek sii tee biaŋinba.

¹⁴N teen siir nan man chibin n saaŋmaŋa. ¹⁵N dindann kur bota, Yennu-i jikii kpiin, bee saa teeni? N saa pak n maan ki turɔe. ¹⁶Li pasiar n parcheenn nae tan saa tinnin, kimaan nibiiuk kaa ki saa fit set Yennu tɔɔnni. ¹⁷Li paak, gbiintir ki la n maan na paak. ¹⁸N teen siir nan man pak n mɔmaama, kimaan n mi nan n mɔk mɔnii.

¹⁹Yennu, a baat a fan pak ki biirime-e? Li-i tee ki a tun nna, n teen siir nan mii ŋmin, ŋaan kpo. ²⁰Ŋaant man boi bona ŋanlee po, ki a sak nanin, ki n ji kii koor a mii bɔriiani: ²¹nyikin ki daa daar n tubir, ki bia daa te ki jaŋmaanii kpimi.

²²Yennu, pakin sinsinn, ki man tur gatu, koo ki a ŋaan man pak, ŋaan ki a turin gatu. ²³N yanbɔmm tee bee? N tun bee ki biirani? N biit tee bee ki a bu nanimi?

²⁴Bee paake ki a tiin bɔrimi? Bee paake ki a ŋmaŋitin nan n tee dataak na? ²⁵A koor a fan jeenime-e? N tee nan tutuuk nae, ki a lekin kinkak-koonne.

²⁶Bee ki a biirin toonbilankant tumu paaki, halii nan toonbiit nba ki n din tun bisin niŋa na? ²⁷Ki a baan jarit n taa ni, ki gorii taaŋmaatir nba kur ki n ŋmaan, ki fiitir n taaŋmant. ²⁸Ki li paak, ki n but but nan dadutinn na, ki bia tee nan tintɔɔk tɔɔ liatgbakituk na.

¹Nisaarik daa tee waaminnae ki gbee nan daamii. ²Ti kpaatire, ki suur yian yian nan tipuuk na. Ti boore nan yunyuŋ nba boor biaŋinba na. ³Yennu, a saa gotin koo ki sennin ki bu n buuta-a? ⁴Bonŋansiar ki fit nyi linba ki yeen ni. ⁵Yennu daan senn nisaarik manfoor ki jaŋ u ŋmaarii kann nba tee-e, ki u kan fit yakir. ⁶Lekin a numm ŋaan nyikɔ; ŋaant ki wuu be u binbenpaarir ni, li-i tee ki u saa fit.

⁷Bi-i chɔɔ tiik ki lu, ŋaan dindann be u paak, u tuu jen u manfoor nie ki kpaatir. ⁸U jiina-i lekii kpet biaŋinba, ki u nyakir na kpo tiŋ ni, ⁹wuu laat nyun, u tan saa binte nan tipaaŋ na. ¹⁰Ŋaan nisaarik tuu kpoe, ki u joontu kure na; ki wuu kpo, u ji be lee?

¹¹Kpenii nba jit ki ki puub biaŋinba, ki mɔka koor na, ¹²nnae mun ki niib kpenn, ki ji ki fi. Bi kan ban fiir durinya na ni, bi kan ban yerik bi gɔɔn ni.

¹³N sunman ki a bɔrin kpeentiŋe, ki ŋaan ki mii bɔr leŋ ki saa tuu yoo nba ki a wutoor saa maak, ki a ji senn yoo, ki tan tiar n po. ¹⁴Nirɔ-i kpo, u saa fit jen u manfoor niwa-a? Ŋaan min saa guur ki la yoo nba ŋane, ki guur nan daamii yoo na nba tan saa gbenn. ¹⁵Ki a ji kii yiinin, man toon, ki a sii mɔk parpeenn nanin, min nba tee a naamii na. ¹⁶Ki a sii gorii taaŋmaatir nba kur ki n ŋmaan, ŋaan a kan kan n toonbiiti; ¹⁷ki a saa nyik chabin, ki tamm n biit po, ki saa piin biit nba kur ki n tun.

¹⁸Yoo baate ki jɔjaana tan saa bet baa, ki tanpiit n chat. ¹⁹Nyun saa lukir tana, ki sajakpera saa baa ki piar tiŋ; nnae ki a biir nisaarik dindann, u manfoor po. ²⁰Ki a tuu nyann nirɔ, ki yaatɔ ki u ji ki be, ki u numm tuu gbitik kuun ni. ²¹Ki u waas tuu tan la baakir, ŋaan ki u ki bant, koo u waas na-i dii fei, ki bi ki kumiiɔ. ²²U tuu kpan bant u mɔŋ gbanantont nan u ninbadudukit na kɔɔe.

¹Ki Elifas nba nyii Temann doo ni na jiin a: ²Mayana, Job, mayana. ³Yandaansɔɔ ki be ki saa pak nan faa yeen biaŋinba na, koo ki pak somm u mɔŋ nan mɔbon-yana nba na. ⁴Li-i tee ki a bo fit, sɔɔ kaa ki bo saa tin Yennu jaŋmaanii; sɔɔ kaa ki bo saa miar Yennu. ⁵Faa yeen linba na, ŋanne want faa tee nibiiuk biaŋinba; a koore a fan dɔkin a mɔŋ nan yan mɔbona. ⁶Li ki kpaa talas ki man pak biirani; mɔbona nba kur ki a pak na, li poŋ biirawa.

⁷A dukii nan fine tee sinsinn nirɔ nba ki bi mari-i? Yennu nba din nan jɔjaana na, a din be-e? ⁸A din gbia lora nba ki Yennu lorimi-i? Yanfoon tee a kuukɔɔ yare-e? ⁹Siar kaa ki a mir, ŋaan ki ti ki miri. ¹⁰Ti tumii yanfoon yupeent boore, ki bi tee niib nba ki bi marib a baa liik.

¹¹Yennu teena parmaasire, ki bee teen ki a yêeniri? Ti piak u paak nan sikin-n-mɔŋ mɔbonae, ¹²ki a mantik donn wutoor ki goriit nan ninŋmitik. ¹³A donn wutoor nan Yennu-e ki piak biirɔ.

¹⁴Nisaarik sii mantik tee popeenn daanɔwa-a? Sɔɔ sii fit be fanu nan Yennuwa-a? ¹⁵Yennu ki teen u malaka nba na yada gbaa. Bi mɔŋ ki be kasii u tɔɔnn ni. ¹⁶Ki nisaarik nyu toonbiit nan li tee nyun na. Nn, nisaarik tee ŋmabir daanɔe, nisaarik ki mɔk nyɔɔti.

¹⁷Job, ji gbiintir maa mi linba. ¹⁸Yandamm wannin barmɔnii maame, ki li tee baa tumii linba bi yeejamm boor, ki bi ki nyik woonin ni maan ki li bɔri. ¹⁹Ki boorganu din kaa bi tiŋ ni, ki sɔɔ ki be, ki saa turimm ki bin fɔkit nan Yennu.

²⁰Nibiiuk nba diin leeb sii be wahala nie, u manfoor ni kur. ²¹Jaŋmaansooruk fuut tan sii mɔ u tuba ni, ki fat-teeb tan saa lekɔ yoo nba ki u dukii nan u be u yamani na. ²²Ki u ki mɔk dindann nan wun nyi bunbɔnn ni, kimaan jukbanjiak guue siar po, ki saa kpiu. ²³Ki juut guu, a bin di u gbanant. U mi nan u manfoor be daŋ nie; ²⁴ki biiru tee nan kpanbar jaann na, ki guu a lin lekɔ.

²⁵Biiru nba na boorike baat daanɔ nba sakin nan Yabint daanɔ Yennu, ki piak biirɔ. ^26-27Ki daanɔ maŋ mɔk garuk nan mɔyêtuk; ki teen tub-kpaasuk, ki dia u naagbankɔŋir, ki took a wun kɔn nan Yennu.

²⁸Ŋɔɔe tee jɔɔ nba kɔn nyann doi, ki fat ŋei nba ki li damm chiar ki nyik na, ŋaan tɔbe tan saa biir doi nan ŋei maŋ. ²⁹U kan biar ki mɔkit, ki lin wei; ki linba ki u mɔk na kan yukiri, ki u yunyuŋ gbaa saa bota. ³⁰Ki u kan fit nyi bunbɔnn ni. Ki u sii tee nan tiik nba ki muu tuu di u yiini, ki wouŋ n pebir li puuk ki yaat nann nae. ³¹Li-i tee ki u mantik jatik ki teen toonbiit tumu yada, ŋann toonbiite sii tee u paauk, ³²ki u yoo n tan fit baari, u saa koore, nan yiinu nba tuu koor biaŋinba na, ki ji kan ban binti. ³³U sii tee nan tiik nba lɔɔna tuu suur bonkaa nae, ki bia sii tee nan kpan tiik nba tuu suur li puuk biaŋinba na. ³⁴Binba ki mi Yennu na tan kii mɔk yaaboona, ki muue tan saa di ki biir ŋei nba ki bi ŋmab ki maa na. ³⁵Ŋamme tee damm nba lorin toonbiit, ki bia tuun toonbiit maŋ, ki bi para yɔɔ gbee nan kpinkpannii na.

Job mɔmaan

¹Ki Job jiin a: ²N ban gbat mɔbona nba na booruwa, ki chekinii nba ki i teenin na tee gbanantonte. ³I kpan yaa yii piake yoo kuri-i? I sii loon mɔbonjoontkara yoo kuri-i? ⁴Li-i bonni tee ki i be n binbeŋ na booru ni, ki n mun be i binbeŋ na ni, n bo saa fit yet yaa piak linba na kurawa. N bo sii gumii n yure nan subinii, ki pak nani mɔbona bonchiann. ⁵N bo saa chekini nan kpaanii, ki bo sii ŋammit piak, a lin maan i para.

⁶Ŋaan mi-i yet siari, li ki sommitin; ki li-i tee ki n ŋmini, li ki maakit n gbanantonti. ⁷Yennu, a te ki n chɔka, ki bia te ki bi kpii n ŋaateeb. ⁸A soorima ki tee n dataak. N tee gbouŋ nan kpaba kuukɔɔe, ki niib jiir ki li tee n toonbiit nyinn.

⁹Ki Yennu jii wutoor ki pat patin, ki goriin nan naŋ. ¹⁰Ki niib yisimin ki see lintirin, ki pebitin tanpakii. ¹¹Yennu-e jiin ki kubinin nibiit nuu ni. ¹²N din be parmaasir ni, ŋaan ki Yennu soor n turu ni, ki but butin ki nannin. U jii mine ki n tee jabenn, ¹³ki yekitin peenii ki li nyi lokir kur po, ki tee peenii nba kɔɔ saatin ki teenin daŋ. Linba na lek, ŋaan u ki mɔk ninbatinu nanin. ¹⁴U teenin daŋ yoo nan yoo, ki lekinin nan kunkɔnkɔnnɔ na. ¹⁵Ki n mɔ fabin ki lia liant nba tee bɔtoot liant, ki kɔŋ dindann, ki kar tanbiinii ni, ¹⁶ki bui, ki n ninbina tan mɔnn, ki faant, ¹⁷ŋaan ki n ki tun jat-toonsiari, ki n Yenmiaru tee barmɔnii.

¹⁸Tingbouŋ, a daa bɔrii wahala nba baarimi. A daa te yiinii nba ki n yi, ki li tee barmɔnii po na kpakint yanni. ¹⁹Sɔɔ be Yendɔuŋ ni ki saa set n paak, ki pak turin. ²⁰N yɔɔsnba laame, ki n nunii nyi ninnyuut, a Yennu n la. ²¹N loon sɔɔ n set n paak ki barin Yennu, nan nirɔ nba tuu barin u yɔɔk paak biaŋinba na. ²²N bina na saae, ki n ji tɔk sɔnu nba saa, ŋaan ki ki jent na.

¹N manfoor gbennu nakina, ki n ji ki fit foi, siar ki tenn ki tee n yari, see kaauk kɔɔe tee n yar. ²Ki n laat sɔɔ kur sarikitin bonchiann. ³Yennu, n piak barmɔniie, ki a gaar n maan maŋ. Sɔɔ kaa ki saa fit pak sommin nan maa yeen linba na. ⁴A dɔkin bi yame, ki bi ki banntii. A daa te ki bi nyantimi. ⁵Barŋara ni yet a nirɔ kɔi u lɔɔ ki gaar likirii, ki u waas tan dii fara li paak. ⁶Ki niib ji dia barŋar maŋ mɔtana ki piak biirin, ki baat ki sat mɔsant n numpo; ⁷N parbiir na ŋman jɔɔnima, ki n kpinkpant nan taa koor ki tee nan mɔɔnii na. ⁸Binba yaa bi tee niŋamm na, li jekibe, ki bi kur piak ki biirin, ki yeen a n ki tee yentinnɔ kaa. ⁹Binba dukii a bi be fanu na kpan set dukii nan bi mɔk mɔniie. ¹⁰Li-i tee ki bi kur baar set n tɔɔnn, ŋaan n kan la nan bi yenɔkɔɔwa mɔk yami.

¹¹N daa gara, ki n lora biir; ki n dindann yaat. ¹²Ŋaan ki n yɔɔsnba yeen a nyiɔk tee yonsupeeŋ nie, ki yaa yentu naake, ŋaan ki n mi nan n biar bunbɔnn niwa. ¹³Ki dindann nba ki n mɔk na tee kpeentiŋe, ki tee siaminba ki n saa dɔɔr gɔɔn, ki li tee bunbɔnn ni. ¹⁴Ki n saa yiin kaauk na n baa, ki nanwuba nba mɔɔn na, ki n saa yiimm n naa nan n niipoob. ¹⁵Dindann ji be lee ki n sii daani? Ŋmee lari? ¹⁶Dindann tan kan tɔk nanin, yoo nba ki n siik kpeentiŋ na.

Bildad mɔmaan

¹Ki Bildad, wunba tee Sua booru ni nirɔ na jiin a: ²Job, i booru kii fit ŋmini-i? Li-i tee ki a nyik ki gbiini, ti bo saa fit pak nanawa. ³Bee teen ki a dukii nan ti mantik jatik nan bonkobit nae? ⁴A dont wutoor ki mantik daamii a mɔŋe. Tingbouŋ na saa fit dɔɔr yann, a wutoor donu paaka-a? Yennu saa chat jɔjaana na, a lin maŋawa-a?

⁵Nibiiuk muu na saa kpeena, ki li muyeruk ji kan ban di. ⁶Ki fitir nba be u ŋaak ni na sii tee bunbɔnne. ⁷U taakaabii tuu be fanue, ŋaan mɔtana u ji gbiatire, ki u mɔŋ kpaanii na te ki u baa tiŋ ni. ⁸U somm ki kɔɔ laauŋ ni, ki li fir u taa. ⁹Ki baruk soor u taagbina ki diau. ¹⁰Bi pii baruk u sɔnu nie, ki baruk na dɔɔ tiŋ ni ki be bɔr ni, ¹¹ki jaŋmaanii guu lintɔ, ki waa u taaŋmaatir kur ni.

¹²U tuu mɔke, ŋaan mɔtana u ji be kome; ki biiru see ki guu-u sɔnu ni. ¹³Ki nar yoona yat u gbanant kur po, ki te ki u kpinkpant nan taa pɔɔk, ¹⁴ki nyinnɔ ŋaak nba ki u be u yamani na ni, ki daarɔ a wun took kpanbar nba tee kuun na. ¹⁵Ki muu nan sarwuuta saa di u ŋaak, ki lin kpant tanpent. ¹⁶Ki u ji saa biar ki tee nan tiik nba tuu koor nan jiinawa na. ¹⁷Ki u sann saa bot durinya na ni, ki sɔɔ ji kan ban tiar u po. ¹⁸Ki bi saa ber nyinnɔ footib tiŋ ni, ki bia ber nyinnɔ yentu ni, ki kɔɔnɔ bunbɔnn ni. ¹⁹Ki u kii mɔk yaaboona, koo tennini. ²⁰Laa nyii yondo po ki saan tuu yonbaa po, binba kur saa gbat u biiru na po, waat saa kɔɔb ki bin jekir nan jaŋmaanii. ²¹Linba nae tee toonbiit damm biiru, binba yaa baka kaa nan Yennu na.

Job mɔmaan

¹Ki Job jiin a: ²Bee ki i mantik biir n par nan maami? ³I sukiin yoo nan yoo, ki ki tiin fei nan yaa sukiin biaŋinba na. ⁴Mi-i lekii tun kpetiie, li biiri nlee? ⁵I dukii nan i cheeme, ki jikit n daamii na ki sent, ki li tee n toonbiit paaki. ⁶I ki laat nan Yennu-e tuun linba na-a? U pii baruko, a lin soorin. ⁷Ki n pak u biiru na paak, ŋaan sɔɔ ki gbiint turimi; sɔɔ ki gbat mɔnii nba ki n mɔ loon barmɔnii na. ⁸Yennu gɔɔr n sɔnuwa, ki n ji kan fit saan; u bɔr n sɔnu ki li be bunbɔnn ni. ⁹U jii n mɔkint kur ki yaat nann na, ki biir n sann. ¹⁰Ki u boon lokir kur po, ki ŋabir n dindann kur, ki nyikin a man koor ki kpo. ¹¹Yennu donn wutoor nanin ki li saa yakira, ki dian nan n tee u dataake nan barmɔnii na. ¹²U tuun kunkɔnkɔnna ki bi lekinin, ki gbii bunbunii ki lintir n ŋaak, ki guutin a bin lekin.

¹³Yennu te ki n ninjamm yêtima; ki n tee saamɔ ki tur binba bo mima na; ¹⁴ki n nikpiimm nan n yɔɔsnba na seet n boor. ¹⁵Binba ki n bo gaamm saauŋ n ŋaak ni na tamm n powa; ki poob nba tee n ŋaatoontunna na ji dian nan n tee saamɔ, koo boorganue na. ¹⁶Ki mi-i yiin n toontunnɔ, u ki toon, mi-i lekii barimɔ maa wun sommin gbaa. ¹⁷N nubiru paak n ŋaapoowa, ki n mɔŋ ninjamm ki fit nakiimi. ¹⁸Ki waas yisimin ki laan, yoo nba ki bi lan. ¹⁹Ki n yɔnanmɔnii goriin ninkpianii; ki binba ki n mantik lomm na yêtin; ²⁰ki n gbananbɔŋ laak n kpaba paak; ki li tenn waan nan n manfoor n bo gbenn.

²¹Yimme tee n yɔɔsnba. Tinimin ninbaauk. Yennu nuue faa birin. ²²Bee ki i waa mukisin nan Yennu nba mukisin biaŋinba na. Yaa turin parbiir biaŋinba na, li ki jaŋi-i?

²³N sunman ki sɔɔ n bo tiar n mɔbona nae, ki sɔbir gbouŋ ni, ²⁴koo ki bo jii sirik ki jab n mɔbona na tann paak, ki lin te lii be mɔkmɔk nan mɔkmɔk. ²⁵N mi nan n Tinntɔɔ be, ki tan saa baar tingbouŋ na ni li joontu, ki sommin. ²⁶Yiaru-i lekii biir n gbananbɔŋ na, ŋaan n sii be n gbanant nie ki la Yennu. ²⁷N saa lau nan n mɔŋ ninbina, ki u ji kii tee saamɔ.

Ki n kɔŋ pardɔɔnn, kimaan yaa yet a, ²⁸“Nlee ki ti saa teenɔ tonti-i?” Ki i kpaan yaa saa jii linba ki nyiirin ki lekin. ²⁹Mɔtana i ji tin jukbanjiak na jaŋmaanii, kimaan yanbɔmm paak ki Yennu saa donn wutoor, ki jii u jukbanjiak na ki dat niib tuba, ki li saa te yin bann nan sɔɔ be ki tee buut daanɔ.

Sofar mɔmaan

¹Ki Sofar, wunba tee Naama booru ni nirɔ na jiin a: ²Job, a ŋmat n yame, ŋaan n mɔk sukuru ki saa tura gatu. ³Faa yet linba na tee sukite, ŋaan n mi maa saa jiina biaŋinba.

⁴Barmɔnii, a mi nan laa nyii yaayoo ni, yoo nba ki Yennu din nan nisaarik tiŋ na paak ki tan tuu mɔtana, ⁵nibiiuk ki ban mɔk parpeenn ki li yukii. ⁶Ki u dont-n-mɔŋ saa fit kpaat ki tuut sanpaak, ki u yur siit sanpagbant, ⁷ŋaan u tan saa bote nan tanbiinii na, ki binba tuu miuwa na ji sii birise nan waa saan siaminba. ⁸U saa bote nan damiit na, koo nan faa tuu la yirintu biaŋinba nyiɔk na, ki sɔɔ ji kan ban lau. ⁹Ki u saa yaat siaminba ki u tuu kɔɔ na, ki bot. ¹⁰Ki u waas tan saa jiin waa fat linba nandamm boor na. ¹¹U gbanant tuu paane, ki mɔk paŋ, ŋaan li kan yukiri ki li saa kpant tanbiinii.

^12-13Toonbiit tumu mantik man ki turɔ, ki u tent siar u mɔb ni, a li manu n maŋɔ. ¹⁴Ŋaan jeet na tuu toŋe u poor ni, ki toŋ ki tee nan lɔbii nba tee biaŋinba. ¹⁵Nibiiuk tuu tan wukit mɔkint nba ki u jan nae; Yennu-e tuu tan nyinnir, wuu lekii nakir u poor ni. ¹⁶Nibiiuk nba nak linba tee nan lɔbii nae, li kpiue nan waatouŋ nba junt ki kpi biaŋinba na. ¹⁷U kii be u manfoor ni ki tan la kpan nba sii puub nan mɔka na, koo ki la naabiin nan siat puub nan kpenii na. ¹⁸U tan saa jii waa tun la linba kure ki tur; ki tan kii mɔk yaak nba saa di u mɔkint na, ¹⁹kimaan u tuu diin nandamm nae, ki bi be fara ni, ki bia fiar ŋei nba ki leeb maa na. ²⁰Ki siar ki kpeent u nianchiɔŋ na. ²¹Wuu dii yoo nba, siar ki tenti. Mɔtana, u mɔkint gbennue na. ²²U mɔkint na nba yab biaŋinba na, ŋaan ninbaatir saa baarɔ ki biirɔ. ²³Ŋaant ki wuu di linba kur ki u loon. Yennu saa donn wutobiir ki dat u tubir. ²⁴Yoo nba ki u koor a wun chiar nyi kutbin jukbanjiak ni na, kutmɔnt tɔrbanne saa yekɔ ki birɔ. ²⁵Ki peenii na daat saa ŋmuu saar u gbanant, ki li mɔporimii nba ŋmuu siaminba na, sɔn sii nyi leŋ, ki u yan saa put, ki jaŋmaanii n soorɔ. ²⁶Ki linba kur ki u mɔk na saa biir; muu nba ki nirɔ ki joo na saa di ŋɔɔ nan u ŋaateeb kur. ²⁷Sanpaake fiitir jɔɔ na toonbiit, ki tingbouŋ na di siara ki biirɔ. ²⁸Ki u mɔkint na kur saa biir, yoo nba ki Yennu wutoor saa do na.

²⁹Linba nae tee nibiit nyɔɔt, ki tee joontu nba ki Yennu sennib.

Job mɔmaan

¹Ki Job jiin a: ²Gbiintir maa yeen linba na, li tee pardɔɔnn maan nba ki n boi-i li poe. ³Ii turin yaak ki man pak, ki mi-i pak gbenn yoo nba, yi-i looni, i saa fit mia i mɔi.

⁴N ki kɔn nan nisaarii kaa, n mi linba paake ki n ki mɔk sukuru. ⁵Gotirin man. Nna ki jaŋ nan yii goriin jia-a nan jaŋmaanii-i? ⁶Mi-i taŋi dukin linba teenin na yoo nba, jaŋmaanii nan jijekit tuu soorime.

⁷Bee teen ki Yennu te toonbiit damm be bi manfoa ni, ki tuu tan kpet, ki bia mɔkitiri? ⁸Bi mɔk waas nan yaaboona, ki be bi manfoa ni ki laatib ki bi kpaatir. ⁹Yennu ki te bonbiir baat bi ŋei paaki, bi ki ban be ki jaŋmaanii mɔkibi. ¹⁰Nn, bi bonkobit kur pɔte, ki maar bonbis, ŋaan ki ki laat daamii. ¹¹Toonbiit damm na waas lin ki jerime nan pebis na, ¹²ki bia waa kɔnn nan naagbai mɔnii waak. ¹³Toonbiit damm be bi manfoa ni nan parmaasire, ki tuu tan kpo soon nna, ki daamii kaa.

¹⁴Toonbiit damm na beer Yennu a wun nyikib. Bi ki loon bin bann Yennu sɔnii. ¹⁵Bi dukii nan li ki kpaa talas nan bin wei Yennu, koo li ki mɔk nyɔɔt nan bin miarɔ. ¹⁶Bi yeen nan bi tiɔŋ paŋ paake ki bi mɔkitir, ŋaan bi mɔŋ dudukit nba ki bi dukii na, n kan saki.

¹⁷Taar munŋaae ki Yennu donn wutoor, ki te biiru nan bunbɔnn baar toonbiit damm paak a wun dat bi tuba? ¹⁸Taar munŋaae ki u pebirib nan wonpaaruk nba tuu yat mɔpont, koo nan biaŋinba ki wonpaaruk tuu pebir tanbiinii ki yaat nann na?

¹⁹Ki i yeen nan Yennu daar bik tubir, u baa toonbiit paake. Aaii. Ŋaant Yennu n dat toonbiit damm na tiɔŋ tuba. Ŋaant ki wun tun nna ki lin wann nan li tee bi tiɔŋ toonbiit paake. ²⁰Ŋaant ki toonbiit damm na n gaar bi mɔŋ tubdatu; ŋaant ki bin la Yabint Yennu wutoor tonu. ²¹Li-i tee ki nirɔ manfoor gbenn yoo nba, u baka tuu mantik be u waas po nan bi mɔk parpeenni-i? ²²Nisaarik saa fit tur Yennu nba dia yent damm nba tee yiikoo damm na kpaaniiwa-a?

^23-24Nisiab tuu be ki mɔk laafia ki saa tuu daar nba ki bi saa kpo na; ki bi tuu kpo nan parpeenn, ki kpenn dafur, ki be gbananŋant ni. ²⁵Nisiab mun tuu be ki parpeenn kaa nan waama; bi tuu be bi manfoa ni, ki tan kpo nan parbiire. ²⁶Ŋaan bi kur lek tuu tan kpo ki bin piibe, ki nanwuba n kɔɔ bi kur.

²⁷N mi dudukbiit nba ki i mɔk ki jiin n po na. ²⁸Ki i boi a, “Nijaann nba na ŋaak be lee mɔtana? jɔɔ nba tuu tuun toonbiit na.” ²⁹I tuu ki piak nan bonsunsommiti-i? I mi labaar nba ki bi tuu piaki-i? ³⁰Daar nba ki Yennu wutoor tuu do ki wun dat niib tuba na, toonbiit daanɔe tuu tan foon. ³¹Sɔɔ kaa ki saa fit pak biir toonbiit daanɔ, koo ki pa jiinɔ waa tun linba kur. ³²Yoo nba ki bi tuu jiiu saa nanɔ kaat ni, ki saa birɔ kaauk ni na, niibe tuu guu u kaauk na. ³³Niib tusaae tuu be u kupiinu ni, ki tant tuu tan paan u paak soon nna.

³⁴Ki yimm, ki i koor a yin maan n par nan baryana. Gatu nba ki i teenin na kur tee faake.

Labafaant taar muntaa

(22.1–27.23)

Elifas mɔmaan

¹Ki Elifas nba nyii Temann doo ni na jiin a: ²Nisɔɔ be-e, halii nan binba mantik tee subindamm nawa, bi sɔɔ be ki mɔk nyɔɔt Yennu boori-i? ³A toonŋana mɔk nyɔɔt Yennu boori, koo faa be niŋantin binbeŋ na mɔk sommir ki teenɔ-ɔ? ⁴Li ki tee faa mantik waa Yennu na paak kaa, ki u yakii nana, ki bu a buuti. ⁵Aaii, faa mantik biir na paake; li tee toonbiit nba kur ki a tun na paake. ⁶Faa saa te ki a ninja n pa likirii ki jiina na, ki a ji gaar u liant ŋaan nyikɔ yann, ki u ki mɔk waa saa lia linba. ⁷A yêt, ki ki tur binba bak na nyun, ki bia yêt ki ki dinn binba ki kon mɔkib na. ⁸Ki a jii yiikoo nan paŋ ki fat tiŋ na kur. ⁹Li ki tee a yêt fan somm pakɔi kuukɔɔ kaa, ŋaan a bia fat kpeebii bona ki ŋmaŋitib. ¹⁰Ŋanne teen ki bootit linta, ki a ji gbee nan jaŋmaanii. ¹¹Ki li mantik bɔn, ki a kan fit la, ki nyunmɔnn piina.

¹²Yennu ki be Yendɔuŋ ni kaawa-a? Ki ŋmaabira na be sanpaapo, ŋaan ki u gorii sikint bi paaki. ¹³Ŋaan ki i bia lek boi a, “Yennu mi bee? U buu sanpagbant nie, ki tan saa teen nlee ki bu ti buuti?” ¹⁴I dukii a sanpagbant na dɔkinɔe, ki u lin somm sanpaapo ki ki laati.

¹⁵A loon fan somm sɔnjot nba ki toonbiit damm yɔɔ tɔkii nae-e? ¹⁶Nyunmɔnn diibe yiama, ŋaan ki bi yoo daa ki baari. ¹⁷Ŋamme tee niib nba yêt Yennu, ŋaan dukii nan u kan fit teenib siar na. ¹⁸Yennu nae lek te ki bi mɔkitir. N ji ki fit bann toonbiit damm na dudukit nba tee. ¹⁹Niŋamm na kpamme, ki binba ki tuun biit na laa, yoo nba ki bi la toonbiit damm na laat tubdatu. ²⁰Barmɔnii, Yennu biir ti datai nae, ki muu dii biir bi mɔkint a.

²¹Li paak, Job, maŋit nan Yennu, ki nyik, ki daa nyiirɔ nan u tee a dataake na; li-i tee ki a tun nna, ŋann u saa teen piisin a paaka. ²²A gaar u wannu nba ki u teen; ki teen u maan na a par ni. ²³Nn, a sikin a mɔŋ ki jen Yennu boor, ki nyinn toonbiit nba kur tuun a ŋaak ni. ²⁴Lubin a salima na, ki lu a salima nba ŋan na kpenkoouŋ na tanbiinii ni. ²⁵Ŋaant ki Yabint Yennu-ii tee a salimmɔna nan salimpeena, kii kpek kii guua. ²⁶Ki a sii yɔɔ tee Yennu yada, ki bia bann nan ŋɔɔe tee a parmaasir nyakir. ²⁷Yoo nba ki a miarɔ, u saa tura gatu, ki a mun sii dia mɔsonn nba ki a lor nanɔ. ²⁸Ki a saa nyann linba kur ki a tuun, ki yentu sii yentir a sɔnu ni. ²⁹Yennu-e sikint karinbaandaanɔ, ŋaan tint sikin-n-mɔŋ daanɔ. ³⁰U saa fat nyinna, li-i tee ki a ki tun kpet, ŋaan tuun linba ŋan.

Job mɔmaan

¹Ki Job jiin a: ²N bia lek daa yêene, ki jikit n daamii ki beer Yennu. N kan fit nyik ki daa kurii. ³N sunman ki n bo mi maa saa lomɔ siaminba, kii mi maa saa tɔkin sian ki saan u boor. ⁴N bo saa jii n daamiie ki turɔ, ki nɔi mɔniɔk kur a lin sommin. ⁵N loon man bann linba ki u saa yete, nan waa saa turin gatu biaŋinba. ⁶Yennu saa jii u paŋ na kur ki kɔn nanima-a? Aaii, u saa gbiint ki turime, li-i tee ki n pak. ⁷N tee niŋanɔe, n saa fit pak nan Yennu-wa; ki u saa ŋaan yann nan n ki mɔk biiti.

⁸N lon Yennu yondo po, ŋaan ki u kaa leŋ, ki bia lomɔ yonbaa po, ki ki lau. ⁹Yennu be u toona ni niigaŋ po nan niidiitu po, ŋaan ki n bia lek ki lau. ¹⁰Ŋaan Yennu mi taaŋmaatir nba kur ki n ŋmaa. Li-i tee ki u bikinin, u saa la nan n yeene. ¹¹N waa sɔnu nba ki u gann na nan barmɔnii, ki ki turin siar po.

¹²N yɔɔ tuun linba ki Yennu senn nae. N tuun waa loon biaŋinbae; n ki tuun n mɔŋ nba loon biaŋinba kaa.

¹³Yennu ki ban lebitir. Sɔɔ kaa ki saa fit kɔn nanɔ, koo ki gɔɔr waa loon wun tun linba. ¹⁴U saa gbeen waa lor a wun tun linba ki turima; lor maŋ tee u lora nba ki u mɔk na yenne; ¹⁵li paak teen mi-i dukin linba na kur po, ki n jekir ki tiinɔ jaŋmaanii. ¹⁶Yabint Yennu te ki n parcheenn bot, ki li kɔɔnin jijeet. ¹⁷Ŋaan bunbɔnn na kan fit te ki n ŋmini, bunbɔncheenn nba dɔɔk n numpo na.

¹Bee teen Yennu ki senn buut daar nan li yoo ki tur binba waau na, ki bia bu buut ki turib bi mɔnii?

²Ki niib chari tiŋ terii tana, a bin gaar tinii ki pukin; ki jaan pei ki pukiib bi mɔŋ pei po. ³Bi ŋmaab bonii nba tee kpeebii yara, ki bia gaan pakɔi naakookii ki sent pana nba ki pakɔi dii na paak. ⁴Bi fiar nandamm ki miinib bi mɔnii, ki mukis talasdamm ki bi tiin bɔrii.

⁵Li paak ki nandamm na ji kpaan jeet kunkoouk paak nan bɔnii na, ki siar boor ji kaa ki bi saa lon jeet ki tur bi waasi. ⁶Ki li kpaab talas nan bii jaan jeet, siab kpaant ni, ki bia pɔ lɔɔna, toonbiit damm kpaant ni. ⁷Ki bi dɔɔ gɔɔnt nyiɔk yann, ki ki mɔk baa pin linba; bi ki mɔk siar ki pin waati. ⁸Ki saak nba baa jɔɔt ni na matikitib, ki bi tikii tanfiat ni a bin gur.

⁹Ki toonbiit damm na jikit waas nba ki bi baanba kaa na, ki teeb yommii, ki gaan nandamm waas ki sent pana nba ki ŋamm nandamm dii na paak. ¹⁰Ki nandamm na nyi yann, ki ki mɔk liant nba ki bi saa lia, ki jaan jeet, ŋaan lin kon, ¹¹ki to kpai ki war kpan, ki ŋmakii daan tilɔɔna ki tee daan, ŋaan ki nyunyukiru mɔkib. ¹²Ki doo na ni, binba la danii nan binba kpenn na mɔ fabin sanpaapowa, ŋaan Yennu ki gbiin bi miaru.

¹³Nisiab yêt yentu nawa; bi ki bann li paaki, ki bia ki waa laa saa siaminba po. ¹⁴Ki nikpiiruk tuu fiir sanyafaar ki saan kpi nandamm, ki nyiɔk ki u tee nanyukɔ. ¹⁵Joonbaaruk tuu guu daajobɔnbiir n baare, ki wun dɔkin u numpo, a sɔɔ ji daa bantɔ. ¹⁶Nanyukii kɔɔ ŋei ni nyiɔko, ŋaan bɔrii bi mɔŋ yonnu ni, bi ki loon yentu. ¹⁷Bi tiin yonnu ni yentu na jaŋmaaniie, ŋaan bunbɔnn ki mɔkib jaŋmaanii.

((Sofar mɔmaan))24.17 Sofar sann kaa bi sɔbu ni; ŋaan ti mi nan u mɔmaame na.

¹⁸Ki Sofar jiin a: Nyunmɔnn tuu tan di toonbiit daanɔe, ki tiŋ nba tee u yar na, Yennu mɔtont be li paak; ki u ji kan ban saan ki tun u kpaab na ni. ¹⁹Biaŋinba waruk nan yonkoonin tuu koor marin na, nnae mun ki yanbɔndaanɔ tuu tan bot tiŋ na ni. ²⁰Ki u naa gbaa ji ki tian u po, ki nanwuba tuu mɔɔu, ki biirɔ nan tibaauŋ na. ²¹Li tuu baar nna, kimaan waa tuu ŋmaŋit pakɔi na, ki bia ki mɔk ninbatinu nan kanmata na paak. ²²Yennu tuu jii u paŋe ki biir nijaana; Yennu tuu tume, ki toonbiit daanɔ n kpo. ²³Yennu saa fit te ki u be u yamani, ŋaan ki u ninbina paa u paak yoo kur. ²⁴Toonbiit daanɔ mɔkituk ki wei, ŋaan u tuu tan koore nan mɔɔt na, ki bia koor nan kinkakir nba ki bi tuu chɔɔ na. ²⁵Sɔɔ be ki saa fit nɔi nan linba na ki tee nna-a? Sɔɔ be ki saa fit pak nan n mɔmaan na ki tee barmɔnii-i?

Bildad mɔmaan

¹Ki Bildad, wunba tee Sua booru ni nirɔ na jiin a: ²Yennu-e mɔk yiikoo, li ŋan ki ti kur n tinɔ jaŋmaanii; u te ki parmaasir be yendɔuŋ ni. ³Sɔɔ be ki saa fit kan malakanba, binba tuun u boor nawa-a? Siar boor be ki yabint Yennu yentu na ki yentir leŋi-i? ⁴Sɔɔ sii fit be fanu koo ki yeen Yennu boora-a? ⁵Ŋmaarik yentu koo ŋmaabira yentu gbaa, li ki yeen Yennu boori, ⁶ŋma ji boi nisaariki, wunba tee nanwubir ki tee bonmumɔɔk na? Nisaarik nyɔɔt tee bee Yennu boori?

Job mɔmaan

¹Ki Job jiin a: ²A mantik mɔk sommir nlee ki teen min janandaanɔ nan butimɔɔ na? ³Nlee ki a mantik teen kpaanŋanii ki biitir a bannu ki teen min jatuk na? ⁴A dukii nan ŋmee saa fit gbiint a mɔmaan na kuri? Ŋmee somma, ki a fit pak nna?

((Bildad mɔmaan))26.4 Bildad sann kaa bi sɔbu ni; ŋaan ti mi nan u mɔmaame na.

⁵Ki Bildad jiin a: Kpeemm sei nba be nyun ni, tinpɔɔr ni na jekire. ⁶Kpeen tiŋ na loot yaae Yennu boor; ki siar ki dɔɔkir u boori. ⁷Yennu-e tant sanpaak nba be niigaŋ po na, ki jɔnn tingbouŋ na, ki siar ki diari. ⁸Yennu-e gbeent sanpagbouŋ na nan nyun, ki diar, ki li kpiasu na ki te li puti. ⁹Ŋɔɔe lat sanpagbouŋ, ki li dɔɔk ŋmaarik. ¹⁰Ŋɔɔe te ki sanpaak nan mɔkgbeŋir chet leer, ki bia bɔkit yentu ki nyinnir bunbɔnn ni. ¹¹Wuu taŋi ŋak jaantarii nba dia sanpaak na yoo nba, ki bi damm ki jekir nan jaŋmaanii. ¹²U paŋe ki u jii ki nyann mɔkgbeŋir, ki bia jii u bannue ki biir mɔkgbeŋir ni bonsusoouk nba ki bi yiu Rahab na. ¹³U foome te ki sanpaak yeen. U nuue kpii bonsusoouk nba tiin a wun paak na. ¹⁴Ŋaan linba na kur tee u paŋ na waame, ŋanne tee lɔkinii nba ki ti gbat. Ŋmee saa fit bann Yennu nba mantik mɔk paŋ biaŋinba?

Job mɔmaan

¹Ki Job jiin a: ²N por Yabint Yennu nba fo na, wunba ki sak ki turin mɔnii, ki te ki n binbeŋ toŋ na sann ni, ³Yennu nba daa turin manfoor ki n be na, ⁴n kan ban jii n mɔb ki pak bonbiir, ki n jerin bia kan ban faar faaki. ⁵N kan yet a linba ki i piak na tee barmɔnii. N sii kpan see nan n ki biir siare, ki saa tuu n kuun daar. ⁶N sii yɔɔ yeene nan n mɔk mɔnii, kimaan n dudukit beerin daa kur nan n ki biir siari.

⁷Binba kur tee n datai ki kɔn nanin na, bin la tubdatu nan toonbiit damm na. ⁸Dindann boor bee ki toonbiit damm mɔki, yoo nba ki Yennu tan saa boi bi manfoor po na? ⁹Yennu saa gbat bi mɔnii, yoo nba ki daamii baariba-a? ¹⁰Bi bo sii loon parpeenn nba ki u teemm nae, ki meiɔ yoo kur.

¹¹Ŋaant ki man wanna Yennu paŋ yabint nba tee biaŋinba, ki bia kat wanna Yabint Yennu nba lor biaŋinba. ¹²Ŋaan i poŋ la linba kur ki u tuma, ki bee teen ki i piak baryana na?

((Sofar mɔmaan))27.12 Sofar sann kaa bi sɔbu ni; ŋaan ti mi nan u mɔmaame na.

¹³Ki Sofar jiin a: Yabint Yennu nba daar tondamm nan toonbiit damm tuba biaŋinbae na. ¹⁴Bi saa fit mar waas bonchiann, ŋaan bi tan saa kpi bi kur tɔbii nie, koo bi waas tan kii di gboot. ¹⁵Ki binba saa tenn na, yiariie saa kpib, ki bi pakɔi tan kan mɔ fabin bi kuun po gbaa. ¹⁶Toonbiit damm na tan sii mɔk likirii nba ki bi kan fit kan, ki bia sii mɔk liant bonchiann, ¹⁷ŋaan niŋanɔe tan saa liar, ki niburchimɔ n yent u likirii maŋ. ¹⁸Toonbiit damm na maa ŋei, ki li tee nan nanaat gbandiat nae, koo ki tee nan sukir nba ki kpaguurɔ be li ni na. ¹⁹Toonbiit damm maŋ tan saa dɔɔr gɔɔn ki bi mɔkint na be-e, bi-i taŋi fiir yoo nba, bin ji got kɔŋ bi mɔkint maŋ. ²⁰Jaŋmaanii tan saa kpirib nan nyunmɔnn nba tuu sik biaŋinba nae, ki wouŋ n pebirib nyiɔk ki yaat namm. ²¹Yondo po wouŋ nae saa pebir ki nyinnib bi ŋei ni; ²²ki li saa da gar bi paak, ki kan tinib ninbaauk, ki bi lek sii koor a bin chiar paak. ²³Baa sii tiin na, wouŋ na fuur sii waa beerib, ki jeentib nan biiru paŋ.

Ki jiin yanfoon dontir po

¹Kut bootit be ki tee siaminba ki bi gbii salimpeena. Boa be ki tee siaminba ki bi ŋammi salimmɔna. ²Niib gbii tiŋ ki nyint kut li ni, ki naan tana ki nyint kutmɔnt li ni. ³Niib gbii boot sunsunt, ki baat tinpɔɔr ni, ki kpaan kut nba be bunbɔncheenn ni, ⁴ki li fɔk nan niib nba kɔɔ siaminba, koo ki fɔk nan siaminba ki nisaarik saa baar. Ki niib gbii kut boot-tintant, ki saa tuun leŋ bi kuukɔɔ, ki tɔb ŋmiit ki siik bootit na ni. ⁵Tiŋ nba ki jeet nyi li ni na, li tiŋe bia di muu tinpɔɔr niwa. ⁶Ki tiŋ na tana mɔk tanbinyinyira nba daauk paar, ki li tanbiinii mɔk salima, ⁷ki kanbiɔk kaa ki laat sɔnu nba saa kut bootit na ni. Ki juuk bia kaa ki ban yukir ki gar li paak. ⁸Yanbɔr koo bonkob-susoleeuk taar ki ban ŋmaa sɔnii nba ki sɔɔ kaa leŋ maŋ.

⁹Nisaarii gbii tana nba paar paake, ki gbii jɔɔt nyaka ni. ¹⁰Baa gbii ki faa sɔnii tana ni na, ki bi laat tanbinyinyira nba daauk paar. ¹¹Bi gbii ki baat kpen yur po, ki nyint linba be bɔr ni paanu. ¹²Ŋaan lia nie ki a saa la yanfoomi? Lia nie ki ti saa tumii ki banni?

¹³Ti kan la yanfoon nisaarii boori. Sɔɔ ki mi li ŋant nan barmɔnii. ¹⁴Ki mɔkgbeŋa nan mɔka nba sumii yeen a, a kan la yanfoon bi ni. ¹⁵A kan fit jii salimpeena koo salimmɔna ki daa yanfoomi. ¹⁶Ki salima nba ŋan nan tanbinyinyira nba daauk paar, ŋaan li nyɔɔt kan fit yekin nan yanfoomi. ¹⁷Li mɔk nyɔɔt ki gar salima, ki bia mɔk nyɔɔt ki gar salima seŋ, koo seŋ leer nba daauk paar. ¹⁸Yanfoon nyɔɔt yab gar tanbinyinyira nba kur be ki li daauk paara. ¹⁹Ki tanbinyinyira nba daauk paar nan salinŋana na, ŋaan li nyɔɔt kan fit yekin nan yanfoon nyɔɔti.

²⁰Yanfoon nyi lia nie jikii? Lia nie ki ti saa tumii ki banni? ²¹Bonfosiar kaa ki saa fit lari; nɔɔn nba lek yuuk sanpaapo na, ŋaan u kan fit lar. ²²Ki kuun nan biiru yeen a bi gbia bi yaae ki jiin yanfoon po.

²³Yennu kuukɔɔe mi li sɔnu, ki mi siaminba ki u saa lon yanfoon, ²⁴kimaan u laat tingbouŋ na kpinii, ki laat linba kur be sanpagbouŋ na lɔŋ ni. ²⁵Yoo nba ki Yennu din tur wouŋ yiikoo, ki bia bikin mɔkgbeŋir yabint nba tee biaŋinba na; ²⁶yoo nba ki Yennu din senn sennu ki tur saak, nan satianii nba sii tɔkii siaminba na; ²⁷li yooe ki u din got yanfoon, ki bikin li kpaiu, ki sak nan li ŋan.

²⁸Ki Yennu yet nisaarik a, “A tin min Yennu jaŋmaanii, ŋanne tee yanfoon; ki bia nyik toonbiit tumu, ŋanne tee bannu.”

Job majoontik ki jiin u binbeŋ po

Job mɔmaan

¹Ki Job piin ki ŋamii piak a: ²N sunman ki n binbeŋ na bo saa ŋmat ki tee nan Yennu nba din guun biaŋinba nae. ³Yennu din yɔɔ be nanin, ki teenin yentu, yoo nba ki n somm bunbɔnn ni na. ⁴Li din tee sakir nba ni ki n mɔkitire, ki Yennu yɔɔkit nanin, ki tee piisin n ŋaak paak, ⁵ki Yabint Yennu be nanin li yoo, ki n waas kur be n boor ki lintin. ⁶Ki nei nan buunii teenin biin bonchiann, ki n kpan tiinii pia nan tana niŋa. ⁷Yoo nba kur ki doo na saakab lakin, ki n saa maa n kar bi sinsuuk ni; ⁸naasinpaauŋ na tuu fiir chate yoo nba ki bi lan, ki jakpera na n fiir set, ki li want nan bi chɔrimin. ⁹Niib na tɔɔndamm tuu ŋmin fuute; ¹⁰binba tee nijaana na mɔŋ tuu ŋmine.

¹¹Ki binba kur lan, koo ki gbat n labaari, bi tuu piak linba ŋane ki jiin maa tun linba po. ¹²Nandamm na-i mɔ yoo nba, n tuu sommibe, ki bia sommit kpeebii nba ki mɔk sommteeb. ¹³Ki jab nba mantik be ninbaatir ni na piakin, ki n sommit pakɔi ki bi laat fat-n-mɔŋ. ¹⁴Ki n be popeenn binbeŋ kur, ¹⁵ki tee jɔɔnii ninbinn, ki bia tee wɔbii taa. ¹⁶N daan tee nan kpeebii baa nae, ki nyint saamm daamii ni, ¹⁷ki biir nitont yiikoo, ki fiar binba ki bi diimm na ki nyintib bi nuu ni, ¹⁸ki yɔɔ dukii nan man wei n manfoor ni, ki tan kpo n ŋaak ni nan pardɔɔnn. ¹⁹N daan tuu tee nan tiik nba jiina be nyun ni nae, ki bia tee nan tiik nba yiinii mei nan marin na. ²⁰Ki sɔɔ kur piak ki dontirin, ki n mɔk paŋ yoo kur. ²¹Ki mi-i taŋi kpaan kpaanii yoo nba, niib tuu ŋmine, ŋaan gbiint linba ki n piak na fanu. ²²Ki mi-i pak gbenni, ki bi ki mɔk siar ki pukii li paaki. ²³Ki n mɔbona na maant bi para nan biaŋinba ki kpaara tuu la saak kpafuur yoo, ki bi para mei na. ²⁴Ki n tuu laa mɔmiin, yoo nba ki bi kɔɔ birisuk ni, ki n maanunyeeŋ na chekintib. ²⁵Ki n be bi tɔɔnn ki teemm ŋmakita, ki gar bi tɔɔnn nan kpanbar nba tuu gar u kunkɔnkɔnna tɔɔnn biaŋinba na, ki maant bi para yoo nba ki bi be parbiir ni.

¹Ŋaan mɔtana, jab nba ki n kperib na laame. Bi baanba mantik tuu ki mɔk nyɔɔt, li paake ki n tuu kan te bin somm n bɔi ki bin kpakir pei. ²Bi tuu tee jakpera nba mantik baŋ, ki kan fit tun toonsiar ki turime. ³Bi mantik tuu tee nandamme, ki kon waab, ki bi ŋman jiin koona nyiɔk, muuk ni, kunkoouk paak. ⁴Bi tuu ŋab tutubirae ki ŋman kunkoouk paak, mantik gbetnaatunn jiina nba ki man na. ⁵Ki sɔɔ kur beerib nan hootii, ki li tee nan bi hoot nanyukiie na. ⁶Ki bi ji kɔɔ tanfiat ni, bootii nba ki bi gbiir jɔɔt loka ni na. ⁷Ki bi be muuk na ni, ki beet nan bonkobit na, ki taan leeb tiiuk na ni, ⁸ki tee nan niib nba ki mɔk yan ki kaa nyɔɔt na, ki bi ber nyinnib tiŋ na ni.

⁹Mɔtana ki bi ji baat ki laan, ki n ki tee siar, ŋaan tee nilaakir bi boor, ¹⁰ki bi sarikitin, ki dukii nan bi mantik ŋan ki garime, ki lek baat ki siin mɔsant n numpo. ¹¹Kimaan Yennu nba te ki n baŋ ki ki mɔk paŋ na, ki bi ŋmat n paak nan wutobiir. ¹²Ki niib maŋ lekin nan paŋ, ki te ki n ŋmat poor, ki bi koor a bin kpin, ¹³ki gɔɔr maa saa bot siaminba po, ŋaan koor a bin biirin; ki sɔɔ kaa ki saa gɔɔrib. ¹⁴Ki bi lekin loka kur po, ki baat ki tan do n yur paaka; ¹⁵ki jaŋmaanii soorin; ki n baakir bot nan wamaasin na, ki n mɔkint gar nan sanpagbouŋ na.

¹⁶Mɔtana, n ji yaa man kpoe na, ki weriku kaa n daamii po, ¹⁷ki n kpaba chɔɔn nyiɔk kur, ki n gbanant nba junt nan tont na ki maakit. ¹⁸Ki Yennu soorin, liatir turu ni, ki ŋmakir n liant ki li tor tor. ¹⁹Ki u lun bakir ni, ki n ji tee nan tant na.

²⁰Yennu, mi-i yiina, ŋaan a ki gat jiintin; ki mi-i bia kii miara yoo nba, a ki fiin n po. ²¹Ki a ŋmaŋitin nan daamii; ki diinin nan a paŋ kur. ²²A te wouŋ pebirin, ki te wonpaaruk na lianin. ²³N mi nan a jikitin ki saa nanin kuun boore, siaminba tee sɔɔ kur kunkunboor na. ²⁴Bee ki a lekin jabutiŋi? ki u tee daanɔ nba kan fit tun siar, see wun miar ninbatinu po. ²⁵N tuu ki mɔ sommit niib nba be daamii ni, ki bia mɔk ninbatinu nan talas dammi-i? ²⁶N daan parpeenn nan yentu poe, ŋaan ki parbiir nan bunbɔnn ji baatin. ²⁷Ki daamii nan gbananyekitir mantik gbatin, ki daar n tuu daar, ki n be daamii ni. ²⁸Ki n be bunbɔncheenn ni, ki ki laat yonnu yentu; ki see niwor ni, ki mei sommir po. ²⁹Ki n piak nan parbiir kunkɔr, ki li mɔnii tee nan mɔbɔk, koo naamiɔŋ nba mɔ biaŋinba na. ³⁰Ki n gbanant bɔnn, ki di muu nan gbanantouŋ. ³¹Siaminba ki n tuu gbia jinjeruk nan kpinkpammuk na, mɔtana n ji gbia fabinii nan mɔniie leŋ.

¹Ki n por kat nan n kan ban got sapaamɔ ki n niɔŋ n kɔɔu.

²Yabint Yennu yaa wun tun bee ki turiti? U yaa wun pa ki jiin nisaarik nlee, u toona paaki? ³Yennu te ki parbiir nan biiru baat damm nba tuun toonbiit nae. ⁴Yennu mi linba kur ki n tuun, u laat taaŋmaatir nba kur ki n ŋmaan.

⁵N por nan n ki ban tun bonbiiri, n bia ki ban bikin maa n kpann n leebi. ⁶Ŋaant Yennu n bikinin, bonbikinkar nba ŋan paak, ki u saa la nan n ki tun bonkpetiri. ⁷Ki mi-i tun ki kpetiie, koo ki te toonbiit soorin, koo ki n nii tarin jakintie, ⁸ŋann ki a ŋaan ki n jeet n biir, koo ki a ŋaan siab n di jeet nba ki n bur na.

⁹Li-i tee ki n niɔŋ ban kɔɔ n lɔɔ ŋaapoo ni, ki n bɔr guu-u u diiuk tammɔb ni, ¹⁰ŋann ki a ŋaan ki n ŋaapoo n kpant sɔɔ yɔɔ, kii biaki dɔɔ jalɔɔ gado paak. ¹¹Kuume sii tee tubdatu, li toonbibooru paak. ¹²Li toonbibooru tee muu nba di ki boontire, ki li saa di linba kur ki n mɔk.

¹³Li-i tee ki n toontunna na yenɔ baar nan bunburimii n boor, n tuu gbiinte ki diau fanu. ¹⁴Li-i tee ki n ki tun nna, nlee ki n saa fit baar Yennu boori? Yennu-i taŋi baar yoo nba a wun bu n buuti, n saa yet a bee? ¹⁵Yennu nba turin manfoor na, li Yennu-e bia tur n toontunna manfoor.

¹⁶N ki ban yêt ki ki somm nandammi, n bia ki ban te ki pakɔi be parbiir ni, ¹⁷koo ki te kpeebii lin kon, ŋaan ki min di. ¹⁸Laa nyii n bisin niŋa, n tuu diabe fanu.

¹⁹Ki yoo nba ki n la sɔɔ be talas ni, ki namii, ki kan fit daa lianti, ²⁰n tuu turɔ liant nba ki bi luur nan pekobit nba nyii n pelook nie, ki wun ji pakin nan u par kur.

²¹Ki li-i tee ki n ban ŋmab kpeebik, ŋaan mi nan n tan saa di u mɔnii buut boori, ²²ŋann n kpinkpant n kɔnn, ki tukit nyi n bɔpiat ni. ²³N kan ban tun li toonbiit booru, kimaan n tiin Yennu tubdatu jaŋmaanii.

²⁴Ki li-i tee ki n tuu maa salima paak, koo ki yet salima maŋ a, “Fine tee n fat-tɔɔ,” ²⁵koo ki piak dont n mɔŋ, n mɔkint na paaki, ²⁶koo ki ban jiant yonnu, u yentu na paaki, koo ki jiant ŋmaarik u ŋant na paaki, ²⁷a lin te ki n par n chɔrimm, koo ki turib baakiri, ²⁸ŋann yanbɔnboorik na tubdatu-ii tee kuun; kimaan maa yêt Yabint Yennu weiu na paak.

²⁹Li ki ban manin yoo nba ki n datai be daamii ni, koo ki li manin yoo nba ki biiru baaribi. ³⁰N ki ban miar Yennu a bin kpo-o. ³¹Ki jab nba kur tuun n boor na mi nan n tun gaan saamme. ³²N tun gaan sɔngatae n ŋaak ni, ki ki saak bi dɔɔ sɔnjot ni.

³³Jasiab koor a bin bɔr bi yanbɔmme, ŋaan min ki ban dɔkin n yari. ³⁴Min ki tiin jaŋmaanii nan niib nba saa yet linba. N tuu ki ŋmin, koo ki loo diloor kimaan bi sukit paaki.

³⁵Sɔɔ kan gbiint maa yeen linba na-a? N pora nan mɔbona nba kur ki n yeen na tee barmɔniie. Ŋaant Yabint Yennu n gat turin.

Li-i tee linba kur ki n biirtɔɔ saa pak ki biirin na bo sɔb siar paak, ki n bo saa lar, ³⁶n bo saa barir n bɔpiɔk paak nan parbifaant, ki bo yirir n yur paak nan fokirik nae. ³⁷N saa yet Yennu-e linba kur ki n tun, ki gonn n yur sanpaapo kii be u tɔɔnn.

³⁸Li-i tee ki n jan tiŋ nba ki n ko naie, koo ki fat bondaanɔ boori, ³⁹li-i tee ki n dii jeet nba bur li ni naie, ŋaan te kpaara nba bur na kpenn komi, ⁴⁰ŋann a te mɔtont nan kunkonii n pia leŋ, ki daa tee jeet kaa.

Job mɔmaan kure na.

Elihu mɔmaan

(32.1–37.24)

¹Jab bantaa na ji din ki pak siar ki tur Job, kimaan Job din mi u mɔŋ fanu nan u tee popeendaanɔe. ²Ŋaan ki jasɔɔ see ki bɔɔkib, ki bi yiu Elihu, ki u wutoor doo; ki u ki fit soor u mɔŋ, kimaan Job din piak ki ŋamii u mɔŋ, ŋaan nyiirii Yennu-e. (Elihu din tee Barakel bijae, ki tee Bus yaaboonn, ki nyii Ram naakuuk ni.) ³U wutoor bia din doo Job yɔɔsnba bantaa na paaka. Bi din ki la sɔnu nba ki bi saa paan ki gat Job-i; ŋanne ki li naan nan Yennu tun ki bote na. ⁴Elihu-e din tee bik leŋ maŋ, li paak ki u din guur ki sɔɔ kur tan pak gbenna. ⁵Yoo nba ki u la nan jab bantaa na ki fit tur Job gatu na, ki u wutoor doo, ⁶ki u piin ki piak.

Elihu mɔmaan

N tee bike, ŋaan ki i tee saakab, li paak ki n bo tiin jaŋmaanii nan man beti maa dukii linba. ⁷Ki n yet n mɔŋ nan n saa te ki yin pak gbooe, yimm nba tee jakpera na n biit i yan nan leeb. ⁸Ŋaan Yabint Yennu Seeke teen niib yanfoon, ⁹li ki tee kpetuk kaa teen niib subinii, koo bi kpetuk na n sommib ki bin ban linba ŋani. ¹⁰Li paak, n loon ki yin gbiint ki turin. Ii ŋaan man beti linba ki n dukii.

¹¹N bo gbiine nan sukuru ŋaan ki i piak, ki n guui ki i kpaan mɔbonŋana. ¹²Ki n tee soon nna ki gbiin, ki la ki i gbar, ki ki fit wann nan Job nba yet linba na, u faare. ¹³Nlee ki i piak nan i la yanfoon boora? Yennu-e tee wunba saa gat ki tur Job, kimaan yimm gbara. ¹⁴Job bo piak ki teen yimme, u bo ki piak ki teen min kaa, ŋaan n bo kan jiin nan yaa gat biaŋinba na.

¹⁵Job, bi kɔŋ maama, bi ki mɔk jiinu nba ki bi saa turani. ¹⁶Baa lek ŋmina na, ŋaan mi-i kpaŋi guu-u? Bi see-e leŋ, ki ji ki mɔk maan nba ki bi saa paki. ¹⁷Aaii, mɔtana, n ji saa turi n mɔŋ jiinue, ki beti maa dukii linba. ¹⁸N kan fit guur nan yoo nba ki n tan saa pakii. N kan fit dia n mɔbona. ¹⁹Li-i tee ki n tan ki la yiar nan man paki, n saa pute nan kunkɔɔr nba ki bi tuu gbeenir dapaanin na. ²⁰N kan fit guuri, li tee man pake. ²¹N kan fit taan i sɔɔ po mɔniɔk na ni. N ki yaa man pak ki maan i sɔɔ pari. ²²N ki mi baa piak mɔmant biaŋinba. Yennu saa dat n tubira, li-i tee ki n tun nna.

¹Job, mɔtana, gbiintir linba ki n yaa man beta na fanu. ²N teen siir nan man yet linba kur be n dudukit niwa. ³N maan kur yeene, ki n piak barmɔnii. ⁴Yennu Seeke namin, ki turin manfoor.

⁵A turin gatu, li-i tee ki a saa fit. Teent siir ki nɔi nanin. ⁶Min nan fin tee yomme Yennu boor. Ti kura na, Yennu jii nɔɔnne ki nant. ⁷Li paak, li ki ŋan ki fii tiinin jaŋmaanii. N kii diinani.

⁸Maa gbat linba ki a pake na a: ⁹“N ki tun biiri. N ki tun siar ki biiri. N ki tun kpeti, n nyii biit niwa, ¹⁰ŋaan ki Yennu la nyiiruk nba ki u jii lekin, ki ŋmaŋitin nan n tee u dataake na. ¹¹Ki u bobin jarit n taa ni; ki gorii taaŋmaatir nba kur ki n chat.”

¹²Ŋaan Job, n yaa man yeta nan a biira. Yennu yab ki gar nisaarik kur. ¹³Bee teen ki a nyiir Yennu nan linba paak teen ki u ki gat nisaarik miaru? ¹⁴Yennu lek yɔɔ piak, ŋaan sɔɔ ki gbiin maan nba ki u piak na. ¹⁵Nyiɔk nba ki niib tuu gɔɔnt na, Yennu piak damiit nan yirintu nie. ¹⁶U tuu te ki bin gbiint waa piak linbae, ki bi tuu tin jaŋmaanii nan kpaanii nba ki u teemm na. ¹⁷Yennu piak a lin te bin nyik toonbiit tumue, ki bia gɔɔrib, ki bi daa mɔk dont-n-mɔŋ. ¹⁸U kan te ki bin la biiru. U saa tinnib ki bin nyi kuun ni. ¹⁹Yennu teen nirɔ yiaru, ki yekitir u gbanant nan tont, a lin ŋmakitɔ u binbeŋ ni. ²⁰Baatɔɔ mɔb ni ki man, ki u jekpaŋit gbaa tuu tone. ²¹U gbanant tuu fɔɔre, ki u ki naan nirɔ, ki a fit laat u kpaba kur; ²²ki li kan wei nan wun saan kpeentiŋ.

²³Li pasiar Yennu malakanba, binba tee tusaa tusaa na yenɔ nba tian niib bi toona po nae saa baar ki tan sommɔ. ²⁴Ki malaka na sii mɔk ninbatinu ki yet a, “Ŋaamɔ, li ki tee wun saan kpeentiŋi. Paatii nba saa pa ki ŋaaue na.” ²⁵Ki u gbanant saa ŋamm pant ki mɔk paŋ, ²⁶ki wuu miar Yennu yoo nba, Yennu saa gat turɔ, ki u saa jiantɔ nan kpinkpammuk, ki Yennu saa ŋamm ŋmant bont kur fanu ki turɔ. ²⁷Ki u saa yet niwor ni a, “N tun yanbɔmma. N ki tun linba ŋani, ŋaan ki Yennu tinnin. ²⁸U fat nyinnin, ki n ki saan kpeentiŋi, ki daa mɔk manfoor.”

²⁹Yennu yɔɔ tuun linba nae yoo kur, ³⁰ki tint nisaarik manfoor, ki teenɔ parmaasir u manfoor benu ni.

³¹Job, ji gbiintir mɔtana linba ki n yaa n beta; ŋminin ki ŋaan man pak. ³²Ŋaan li-i tee ki a mɔk siar ki saa yeti, ŋaant man gbatir, ki n sii mɔk parpeenn ki sak nan a mɔk mɔnii. ³³Ŋaan li-i kii tee nna, fan ŋmin, ki gbiint ki turin, ki n saa wanna faa saa la yan biaŋinba.

¹Ki Elihu ŋamm yet a: ²Yimm subindamm, gbiintir n mɔmaan; yimm nba tumii na, ii gbiint man. ³I mi jemant yoo nba ki i lemmir, ŋaan i ki fit bant yan maan, yoo nba ki i gbatiri. ⁴Li ji tenn timme n bann linba ŋan. ⁵Job yeen nan u ki mɔk biiti, a ŋaan ki Yennu yêt nan wun turɔ mɔnii. ⁶Ki Job boi a, “Nlee ki n sii fa faak nan n mɔk biiti? N mantik la daŋ bonchiann, ŋaan li ki tee n biit paak kaa.”

⁷I ban la sɔɔ ki u tee nan Job na-a? U ki ban chɔrin Yennu. ⁸U biir u yoo nan toonbiit damme, ki lin nan yanbɔndamm. ⁹U yeen nan li ki ban mɔk nyɔsiat nan nirɔ-i koor a wun tun Yennu loommi.

¹⁰Gbiintirin man, yimm nba tee bannteeb na. Yabint Yennu saa fit tun bonbiira-a? ¹¹U pa niib paatii, ki li nyi toona nba ki bi tume, ki diab nan laa kpaab biaŋinba. ¹²Yabint Yennu ki tuun toonbiiti. U ki ban tun linba ki ŋan ki tur sɔɔ. ¹³Yennu gaan u yiikoo sɔɔ boore-e? Sɔɔe guun Yennu durinya na-a? ¹⁴Li-i tee u loriie, ki u te ki foon jiti, ¹⁵nisaarii kur saa lakin kpoe, ki ji ŋmat tant ni.

¹⁶Li-i tee ki a mɔk bannu, fan gbat linba na, ki gbiint linba ki n yeen na. ¹⁷A piak ki biir kasii Yennu nae-e? A dukii nan u ki loon barmɔniie-e? ¹⁸Yennu piak ki biir kpanbara nan doo diara, yoo nba ki bi ki mɔk nyɔɔt, ki tee tondamm. ¹⁹U ki taant doo diara po, koo ki sommit mɔkita ki gar nandamm, kimaan ŋɔɔe teen sɔɔ kur manfoor. ²⁰Nisaarik saa fit kpir ki kpo nyiɔk. Yennu-e tuu faa nisaarii ki birib, ki bi kpenn; u tuu kpi nijaann, ki li ki paari. ²¹U laat taaŋmaatir nba kur ki nirɔ ŋmaan. ²²Bunbɔnn siar ki be ki bɔn ki yanbɔndaanɔ saa fit bɔr Yennu li ni. ²³Li ki kpaa talas nan Yennu n senn yoo nba ki nisaarii tan saa saan ki wun bu namm. ²⁴Li ki kpaau talas nan wun fiita ki fit nyinn tɔɔndamm, ŋaan senn siab bi seenu ni. ²⁵U tuu beribe, ki biirib nyiɔk, kimaan u mi baa tuun toona nba. ²⁶U daar yanbɔndamm tuba, siaminba ki sɔɔ kur saa fit lae, ²⁷kimaan bi nyik ki ki waau, ki bia yêt u sennii weiuwa. ²⁸Bi mukis nandamm, ki bi fabin ki teen Yennu, ki u gbia bi fabinii nba loon sommir na.

²⁹Yennu-i kii lor wun tun siar faba, ŋaan sɔɔ kaa ki saa pak ki biirɔ. Li-i tee ki u lek u numm, nisaarii saa biar yanne. ³⁰Siar sii kaa ki digbana niib saa fit tumii, ki lin gɔɔr tondamm, ki bi daa diab ki ŋmaŋitibi.

³¹Job, a pak kat a biit ki tur Yennu, ki sat mɔb nan a ji kan ŋamm tun ki biira-a? ³²A boi Yennu ki u wanna a biita-a? ki a sak nan a saa nyik toonbiit tumuwa-a? ³³Faa yêt toona nba ki Yennu tuun na, nlee ki a dukii nan u saa tun faa loon linba? Li tee fine n dukin, n yar kaa; betirit mɔtana faa dukin linba.

³⁴Yandaanɔ kur set saa sak nanime, ki subirtɔɔ nba kur gbat n maan na saa yet a ³⁵Job piak waa ki mi linbae; ki waa piak linba kur, yan kaa leŋi. ³⁶Dukint linba kur ki Job yeen na fanu; a saa la nan u pinpakit na tee nan toonbiit daanɔ pinpakit nae. ³⁷U pukii mɔyêtuko u toonbiit na po, ti tɔɔnne ki u piak sarikit Yennu.

¹Ki Elihu ŋamm yet a: ²Job, li ki ŋan ki fin yet nan a ki tun ki biir Yennu, ³koo ki boi Yennu nan, “N toonbiit daamiia nlee? Maa ki tun biit na, n nyɔɔt tee lanne?” ⁴N loon ki man gat fin nan a yɔɔsnba nae mun.

⁵Gotir sanpaapo, a saa la nan sanpagbant na fɔk nanawa. ⁶Li-i tee ki a tun bonbiir, li kan teen Yennu siar. A lekii tun ki kpet taar munŋaawa, ŋaan li kan daamii Yennu. ⁷Faa tee popeenn daanɔ na, li sommit Yennu-u? Yennu ki loon siar a boori. ⁸A yaa toonbiit paake ki a lɔɔ di fara, ki toonŋana nba ki a tuun na, ki li sommitɔ.

⁹Li-i tee ki niib be mabir ni, bi tuu duune, ki fabin ki loon sɔɔ n sommib. ¹⁰Ŋaan bi ki baat Yennu boor, wunba tee bi naamii daanɔ, ki teemm dindann yoo nba ki bi be werebuk ni na. ¹¹Bi ki baat Yennu boor, wunba teent subinii na, ki te ki ti mɔk yan ki gar bonkobuk, koo nɔɔŋ nba be kur. ¹²Bi tun buie ki loon sommir, ŋaan ki Yennu ki teemm gatu, kimaan bi mɔk garuk, ki tee toonbiit damm. ¹³Li ki mɔk nyɔɔt nan bii mɔ mɔnii; Yabint Yennu ki laatib, koo ki gbia bi miaru.

¹⁴Job, a yet nan a kan fit la Yennu, ŋaan dimin sukuru, a maan be u boor. ¹⁵A dukii nan Yennu ki daar niib tuba, ki bia ki fiin toonbiit po. ¹⁶Li ki mɔk nyɔɔt nan fii tun kii piak; li tee barmɔniie nan a ki mi faa piak linba.

¹Ki Elihu ŋamm yet a: ²Job, dimin sukuru waan, ki gbiint linba ki n yaa man pak Yennu taar ni na. ³N bannu yab, n yaa man jii maa mi linbae ki wann nan Yennu nba tee n naamii daanɔ na tuun linba ŋan. ⁴Maa beera linba na, siar kaa ki tee faaki. Faa laat min nba a tɔɔnn po na tee yandaanɔe nan barmɔnii.

⁵Yennu mantik mɔk paŋ halii, u ki yisin sɔɔ; siar kaa ki u ki bant li paak. ⁶U ki te ki toonbiit damm be mɔkmɔki, ŋaan u tuun linba ŋane ki teen nandamm. ⁷U guu binba tee popeenn damm; u teemm yaak, ki bi dia niib nan kpanbara nba dia na, ki bia te niib teemm chɔruŋ mɔkmɔk nan mɔkmɔk. ⁸Ŋaan li-i tee ki niib be baana ni, ki di fara, baa tun linba paaki, ⁹Yennu-e wantib bi toonbiit nan bi garit. ¹⁰U te ki bi gbiin u kpaanii, ki nyikin toonbiit tumu. ¹¹Li-i tee ki bi mɔk mɔsaku nan Yennu, ki waau, bi sii be bi manfoor ni nan parmaasir, ki mɔkitir. ¹²Ŋaan li-i kii tee nna, bi tan saa kpoe yann ki saan kpeentiŋ.

¹³Binba ki mi Yennu na, bi wutoa yɔɔ doe, ki bi-i lekii la tubdatu gbaa, ŋaan bi ki mei Yennu sommir po. ¹⁴Bi kpenne, ŋaan daa paan, kimaan feie te ki bi kpet yiama. ¹⁵Ŋaan Yennu subint niib nan farae, ki dia wahala ki lootir bi tuba.

¹⁶Yennu-e nyinna daamii ni, ki te ki a la fat-n-mɔŋ a yamani; ki dokin jeet a dindiboor. ¹⁷Ŋaan mɔtana a la tubdatu nan laa jaŋa biaŋinbae. ¹⁸Ii mi ki daa te fobit piinii kpannani, koo ki mɔkint n ŋmanta ki a tan boti. ¹⁹Li tan kii mɔk nyɔɔt nan fii mɔ kii loon sommir; ki a paŋ na kur ji kan somma li yoo. ²⁰A daa sun ki nyiɔk n baari, ki tee yoo nba ki digbana niib tan saa kpo na. ²¹Ii mi ki a tan saa mann tun toonbiit. Yennu tura wahala na, a lin gɔɔr ki nyinna toonbiit tumu nie.

²²A tiar Yennu paŋ nba yab biaŋinba. Ŋɔɔe tee wanntɔɔ nba chee sɔɔ kur. ²³Sɔɔ kaa ki saa yet Yennu waa saa tun linba, koo ki pak biirɔ nan u tun bonbiiri. ²⁴U yɔɔ laat dontire nan toona nba ki u tuun, li ŋan ki a mun pak dontɔ. ²⁵Sɔɔ kur la waa tun linbawa; ki ti sii fit be banfɔkira ŋaan lar. ²⁶Ti kan fit mantik bann u yabint nba jaŋ biaŋinba, koo ki bann u bina kann nba tee biaŋinba.

²⁷Yennu-e fɔɔn nyun tiŋ ni, ki te ki li kpantir saak. ²⁸U te saak nyi sanpagbant ni ki baa, ki teen nisaarii. ²⁹Sɔɔ ki mi sanpagbant na nba chari biaŋinba, koo biaŋinba ki satianii na nyi sanpagbant na ni, siaminba ki Yennu be na. ³⁰U te sanyikintii yentir sanpagbouŋ na kur po, ŋaan ki nyun tiŋ po tee bunbɔnn. ³¹Yennu nba teen niib jeet biaŋinbae na, ki teen jeet ki li yab ki kaa bannu. ³²U tuu kub sanyikintii na u nuu nie, ki tuu tan te lin yek jabenn na. ³³Satianii na tuu mɔɔnt wouŋ baaru poe, ki bonkobit gbaa mi u baaru po.

¹Wouŋ na tuu te ki n yan n put bonchiann. ²I kura n gbiint Yennu kunkɔr, ki bia gbiint satianii nba nyi u mɔb ni na. ³Yennu te sanyikintii na purin sanpagbouŋ ni, ki nyi tingbouŋ na bɔkyenn po, ki saa tuut leer po. ⁴Ki bi tuu gbat u kunkɔr na tintantii, ki li tee u yabint satianii na fuur, ki li sanyikintii yentir yoo kur. ⁵Ki Yennu piak, ki yaarlituk nan bakitnauŋ toona tuun, ki ti kan fit bann li paak. ⁶U te sakaana baa tingbouŋ na paak, ki bia te saajakpera baa. ⁷U te ki niib toona pɔr, ki wantib ŋɔɔ Yennu nba saa fit tun linba. ⁸Ki muuk ni bonkobit na saa bi dindɔɔboa. ⁹Ki wouŋ na da ki nyi niidiitu po, ki waat da nyi niigaŋ po. ¹⁰Yennu foome maakit nyun na, ki te ki li kpantir nyuntana. ¹¹Ki sanyikintii yentir ki nyi sanpagbant ni, ¹²ki chari nan Yennu nba loon biaŋinba. Ki bi tuun Yennu nba senn biaŋinba, durinya na kur po. ¹³Yennu-e te saak baa ki maant tingbouŋ; li pasiar u saa te saake n baa, ki dat niib tuba, koo ki lin wannib u lomm nba tee biaŋinba. ¹⁴Job, teent soon waan, ŋaan gbiint. Dukint bakitnauŋ toona nba ki Yennu tuun. ¹⁵A mi Yennu nba senn biaŋinba ki te sanyikintii yentir ki nyi sanpagbant ni-i? ¹⁶A mi sanpagbant nba jɔɔn biaŋinba sanpaapo-o? Li tee Yennu bannchiɔŋ yaarlituk toona nba tee-e. ¹⁷Naauko tuu gbata, yoo nba ki niidiitu po wouŋ tuu da gar tiŋ na paak na. ¹⁸A saa fit somm Yennu ki wun lat sanpaak na, ki ŋammir ki lii wakii nan kut nawa-a? ¹⁹A wannit taa saa yet Yennu linba; ti yan na liira, ki ti ki mɔk taa saa yet linba. ²⁰N kan boi man pak nan Yennu. Bee paake ki n saa turɔ yaak ki wun biirimi?

²¹Ki mɔtana yonnu yentu nba be sanpaapo na nyɔkite, ki mantik yeen ki ti kan fit gotiri; ki wouŋ na da ki yat sanpagbouŋ na. ²²Ki yabint Yennu nyi niigaŋ po nan u yentu nba ŋan, ki baat nan u yentsaakar, ki li mɔk jaŋmaanii. ²³Yennu yiikoo mantik yab, ki ti kan fit baar nakinɔ; u tee popeenn daanɔ ki tuun linba ŋan ki teen niib. ²⁴Li paak ki niib kur baakitɔ, u baka kaa binba dukii nan bi tee yandamm na po.

Biaŋinba ki Yennu tur Job gatu

Yennu mɔmaan

¹Yennu kunkɔr nyii wouŋ ni ki pak tur Job, ki yet a:

²A tee ŋmee ki biris n yanfoon po, ki ki mi siar, ŋaan piak mɔbon-yana na? ³Mɔtana, teent siir na jɔɔ na, ki jiin n buboit nba ki n yaa n boia na. ⁴A din be yoo nba ki n nan durinya na-a? Li-i tee ki a mi fanu, fan betin. ⁵Ŋma poe senn li yabint nba sii tee biaŋinba? Ŋmee jii ŋmiiuk ki bikin li fɔkinti? A mi buboit na jiinu kuri-i? ⁶Bee tee jaantarii ki dia tingbouŋ na? Ŋmee fɔkin durinya na fiakiri? ⁷Li daar sanyafaare ki ŋmaabira lakin ki yin yaŋ, ki malakanba yikin nan kpinkpammuk. ⁸Ŋmee gɔɔr mɔkgbeŋa na nyun, yoo nba ki li put nyii tinpɔɔr ni na? ⁹Mine din dɔkin mɔkgbeŋa na nan sanpagbant ki pɔbinir, ki li be bunbɔnn ni. ¹⁰Mine dɔk ki bir mɔkgbeŋir kpaar, ki kpar li tammɔkɔɔka, ¹¹ki yetir a, “A tuu saan ki dian nna, ŋaan daa gaar, ki a nyunpana na n tuu dian nna na.” ¹²Job, faa be a manfoor niwa, a tan ban yet dasiar ki li yenti-i? ¹³A tan ban yet sanyiɔk ki li yent tingbouŋ na paak, ki nyinn toonbiit damm bi bɔra niwa-a? ¹⁴Ki yonnu yentir tingbouŋ na paak nan li kunkona nan baat na ni, ki li nyɔɔn fanu nan liatir paak nyarimu na, ki bia nyɔɔn fanu nan yɔk paak bɔɔni na. ¹⁵Daar yentu mantik yeen ki tur toonbiit damm, ki li gɔib, ki bi ji ki fit tuun toonbiiti.

¹⁶A ban saan nyuntona nba be mɔkgbeŋir tiŋ po na boori-i? A tan ban somm mɔknyun tiŋ po-o? ¹⁷Sɔɔ ban wanna tammɔkɔɔka nba loo kpeentiŋ nba tee bunbɔnn nawa-a? ¹⁸A fit bann durinya na yabint nba tee biaŋinbawa-a? A jiin turin gatu, li-i tee ki a mi.

¹⁹A mi yentu koo bunbɔnn nba nyi siaminba-a? ²⁰A saa fit wannib biaŋinba ki bi saa saan fɔkit koo ki bia jen namma-a? ²¹N mi nan a saa fita, kimaan a mantik kpet halii, ki din be yoo nba ki n nan durinya na!

²²A tan ban saan ki gɔn diit nba ki n bekii saak nan sakaana nawa-a? ²³N bekirire ki guun daamii yoo, nan kunkɔna nan tɔbii yoo. ²⁴A ban saan siaminba ki yonnu nyi nawa-a, koo ki saan siaminba ki yondo po wouŋ da ki nyi nawa-a?

²⁵Ŋmee gbiir bootuk nba ki saak tɔkii li ni ki baa na, ki bia ŋamm sɔnu nba ki satianii tɔkii na? ²⁶Ŋmee te saak baa siaminba nirɔ ki kɔɔ na? ²⁷Ŋmee maant tinkooŋ na nyumi, ki li te mɔɔt kpaatiri? ²⁸Saak koo marin mɔk baa-a? ²⁹Sakaana nan waat naa tee ŋmee? ³⁰Ŋmee te ki nyu wakii nan tana na, yoo nba ki waat baar bonchianni?

³¹A saa fit taan ŋmaalore ki lakin loribi, koo ki bobit linba dia ŋmaajari-i? ³²A saa fit kii ŋmakitir ŋmaajara sakir n tuu sakiri, kii biaki ŋmakitir bob-gbeŋa nan bob-bis na ki bii chari-i?38.32 Li tee ŋmaajara nba be gaŋ poe.³³A mi sennu nba dia sanpaaki-i? Ki a saa fit te sennu maŋ n dia tingbouŋ na-a?

³⁴A saa fit te saak n yin sanpagbant ni, ki tan baa-a? ³⁵Ki li-i tee ki a yet sanyikintii a wun nyikint, li kan baar a boor ki beta a, “Timme na.” ³⁶Ŋmee teen nɔɔnii nan korii yanfoomi?

³⁷Ŋmee mantik sub ki saa fit kan sanpagbanti, ki labirir ki bin te saak n baa? ³⁸Saak nae tuu te tant n matik.

³⁹A loon jeet ki teen yanbɔra ki bi di, koo ki fit dint yanbɔrbis na ki bi gbooti ⁴⁰yoo nba ki bi bɔr be bi tanfiat ni, koo ki dɔɔ bi dindɔɔboa ki guu-u? ⁴¹Ŋmee dint kinkaati, yoo nba ki bi lin ki kpaan jeeti, ki tee yoo nba ki bi bonbis mɔ nanin ki loon jeeti?

¹A mi pawann nba maar yoo nba-a? A ban diit ki la pabɔŋ matuku-u? ²A mi baa tuu soor poor ki lin wei biaŋinba bin tan mari-i? A mi yoo nba ki bi tuu tan maari-i? ³A mi yoo nba ki bi tuu tan dɔɔr, ki mar bonbik durinya na ni-i? ⁴Bi tuu be muuk nie, ki bi waas tuu kpaat ki mɔk paŋ, ki tan yaat, ki ji ki jent.

⁵Ŋmee te ki bɔnii na be muuk ni bi yamani-i? ⁶Mine turib kunkoouk na, a lii tee bi binbeboor, ki te bi be tinfukirik na ni. ⁷Ki bi kɔɔ ki fɔk nan doi, kimaan fuut paak; ki sɔɔ kaa ki saa fit soorib ki te bin tun toonni. ⁸Kunkona na paake tee bi linlin boor, ki bi sii di, ki tee siaminba ki bi sii kpaan mɔmaatit ki ŋman.

⁹Mɔnaajak saa fit ko kpaab ki turawa-a? U sii loon wun dɔɔr a naaloor ni nyɔyemmira-a? ¹⁰A saa fit dia bi yenɔ nan ŋmiiuk ki wun ko kpaaba-a? koo ki te wun dat naasɔk a kpaab niŋa-a? ¹¹A sii fit maa u pangarisuk paak ki dukii nan wun tun a toonpaara ki turawa-a? ¹²A dukii nan wun jaan a jeet ki bia tikir jeet na, a jarik paaka-a?

¹³Naamiɔŋ kpinkpant kakii ki yuuk yian yian, ŋaan u kan fit yukir nan janbɔɔnlot na. ¹⁴Naamiɔŋ tuu nyik u jenn tin-yann nie, ki te yonnu n nyikint li paak tanbiinii na ni, ki li tan buun. ¹⁵U ki mi nan taar saa liar, koo muuk ni bonkobuk saa mann yeerir. ¹⁶Ki u binbeŋ tee nan jena maŋ ki tee u yar na, ki u baka bia kaa nan u paŋ saa teen yanni. ¹⁷Mine din namɔ jatuk, ki ki turɔ yanfoomi. ¹⁸Ŋaan li-i tee ki u piin nantaar yoo nba, u laa taamm nan taanjakirɔ nba saa tin biaŋinbae. ¹⁹Job, fine din nan taanii ki bi mantik mɔk panii, ki turib taanganni-i? ²⁰Fine namm ki bi fit mɔbit nan naasuut na, ki bia te ki bi tuu foont foon ki jeent niib na-a? ²¹Ki bi tuu dia bi taawoka ki parii tiŋ, ki tiin nan bi panii kur ki saa tɔb. ²²Bi ki mi jaŋmaanii, ki jukbanjiak kaa ki saa te bin tunnii. ²³Ki jatiat nba ki bi taanjakira dia na sii damme ki mɔk fuut ki nyirii. ²⁴Naatuna-i taŋi peb yoo nba, bi tuu jekire ki kpamm ki loon bin saan. ²⁵Ki naatunn-i peb kur, bin foont ki jiin, ki bann tɔb nubiruwa ki tan fit nakinir, ki gbia kunkɔnkɔnna saakab nba hoot ki teen sennii nba. ²⁶Job, kanbiɔk tumii a boore ki fit yuuk, yoo nba ki u lat u kpinkpant ki tor niidiitu po na-a? ²⁷Baakir tuu guu wun gbat a mɔbewa, ki tan fit tia u tiɔk jɔjaana ni-i? ²⁸Bi tia bi tiat jɔɔt paake ki bia dɔɔ tanjagbent paak jɔɔt ni, ²⁹ki tuu be leŋ ŋaan gorii laat banfɔkira, ki guu siar n gar ki bin kpi ki di. ³⁰Juut tuu tikir ki lint gbanankpeenae, ŋaan ki jubis na ji nyu sɔn.

¹Ki Yennu ŋamm pak nan Job a: ²Fin nba pakir nan min Yabint Yennu na, a saa ŋmin amii a saa jiinin gatue-e?

Job mɔmaan

³Ki Job jiin a: ⁴Yennu, n pak jatiiwa; n saa jiin a bia? N ji kan bikin nan man yet siari. ⁵N poŋ dɔŋ pak, ki li gar maa bo saa pak linbawa.

Yennu mɔmaan

⁶Ki Yennu ŋamm pak nan Job, ki li nyii wonpaaruk ni ki yet a:

⁷Mɔtana, teent siir na jɔɔ na, ki gat n buboit na. ⁸A koor a fan wann nan n ki tuun linba ŋane, ki sennin biit ni, ŋaan senn a mɔŋ ŋant ni-i? ⁹A paar nan maa paar biaŋinba nae-e? A kunkɔr saa fit tant sanpaapo nan n yar nawa-a? ¹⁰Li-i tee nnaie, fan fiir set nan a baakir nan dont-n-mɔŋ, ki tur a mɔŋ yabint nan ŋant. ¹¹Gotir binba mɔk dont-n-mɔŋ na, ki kpaar a wutoor bi paak, ki sikinib. ¹²Nn, gotirib ki sikinib, ki biir toonbiit damm, baa see siaminba na, ¹³ki piin bi kura tiŋ ni, ki baanib kpeentiŋ, ¹⁴ki n sii tee sinsinn daanɔ nba saa pak donta, ki yet nan a nyann nyannu na a tiɔŋo.

¹⁵Gotir bonkob-gbeŋir nba tee yeenn na; mine namɔ, ki bia nama. U ŋman mɔɔte nan naab na. ¹⁶Paŋ ki namii u gbanant ni, ki yiikoo gbee u nanbɔna ni. ¹⁷U joor see sinsonne nan kpek na, ki u taa nanbɔna mɔk paŋ. ¹⁸U kpaba wakiie nan kutmɔnt na, ki u taa tee nan kut laana na.

¹⁹Ŋɔɔe mantik tee yaarlituk, n naamii na ni. Ki wunba namɔ na kɔɔe saa fit nyannɔ. ²⁰Ki mɔɔt nba saa dinnɔ na pia kunkona paak, ki tee siaminba ki muuk ni bonkobit jerin. ²¹U dɔɔ kunkonii nyakae, ki bɔrii kaar nba see bakir ni na. ²²Ki kunkonii nan warii nba see ki kpia kpenu na lintɔ ki teenɔ maasu. ²³U ki tiin nyunmɔnn jaŋmaanii; ki li-i tee Jɔɔdann mɔkir nyun na liatɔ yoo nba, ki u ŋmin soon nna. ²⁴Ŋmee saa fit jɔɔn u ninbina ŋaan soorɔ? Ŋmee saa fit soor ki fut u miana?

¹A saa fit soor nyun ni bonsusoouk nba ki bi yiu Lefiatann na nan janpeenu, koo ki bobin u mɔb ŋmiiuku-u? ²A saa fit gaan ŋmiiuk u miana ni, koo ki lɔk u yiak nan janpeenu-u? ³U saa barima, a fan nyikɔ ki wun saana-a? U saa barin ninbatinu powa-a? ⁴U saa lor nana, ki bia sat mɔb nan u sii tuuna nan yoo nba kaa gbennu-u? ⁵A saa fit diau nan nɔɔnbik na, ki u tuun linba sii maant a toontunna bonpoi na parawa-a? ⁶Jansoora saa senn u daauka-a? Ki kpinkpenta saa fit patɔ ki kɔiwa-a? ⁷A saa fit ŋmuu u gbouŋ na nan jansoorkpana, koo ki soor u yur nan kpanporuŋ-aa? ⁸Siimɔ yomkɔɔ, ki a ji kan ban bikin a fan siiu, ki a bia kan ban tamm u kɔnn po.

⁹Ki wunba kur la bonsusoouk maŋ, u yan tuu ŋmate ki wun baa tiŋ ni. ¹⁰Ki bonsusoouk na wutoor-i doo yoo nba, ki li mɔk jaŋmaanii, ki sɔɔ kaa ki saa bikin a wun set u tɔɔnn. ¹¹Ŋmee saa fit lekɔ ŋaan kan la daŋi? Sɔɔ kaa durinya ni ki saa fit tun nna.

¹²Ŋaant ki man beta ki jiin bonsusoouk na taa po, ki bikin waa gbeŋ, ki bia mɔk paŋ biaŋinba. ¹³Sɔɔ kaa ki saa fit pɔkit u poor po wakir, koo ki fut gbakituk nba ki u lia na. ¹⁴Ŋmee saa fit te wun yabit u yiaki, u yiak nba mɔk jaŋmaansooruk nyana na? ¹⁵Waka chaa chunchuuntuko u poor po, ki lakin taab nan leer, ŋaan wakii nan tann na. ¹⁶Ki yennkɔɔ kur tur nan leer fanu, ki wamaasin kan fit gar li sinsuuk ni; ¹⁷ki lakin taab nan leer kenken, ki siar kaa ki saa ban dat ki bɔkitiri. ¹⁸Ki wuu chitin yoo nba, muu tuu nyie, ki u ninbina nyirii nan sannyayonmɔnn na. ¹⁹Ki muyeruk nyi u mɔb ni, ki musanpɔɔrii tɔ nyi. ²⁰Ki munyuut kpan nyi u miana ni, ki tee nan mɔɔte di muu bobir lɔŋ ni na. ²¹Ki u foon te muu di, ki muyeruk lenii ki nyi u mɔb ni. ²²Ki u turu na mantik paar, ki wunba tookɔ, jaŋmaanii tuu soor li daanɔe. ²³Ki u gbanant kur mɔk paŋ, li wakiie ki see sinsonn nan kut na. ²⁴Ki u par wakii, ki u ki tiin jaŋmaanii, ki wakii nan naar na. ²⁵Ki wuu fiir yoo nba, binba mɔk panii na gbaa, ŋaan bi tuu tiin jaŋmaaniie, ki kan fit teen siari. ²⁶Ki jukbanjiak kaa ki saa fit turɔ daŋi, ki kpann, koo peenu, koo kpanchinchimmir kaa ki saa fit turɔ daŋi. ²⁷Ŋɔɔ ŋarin, kut fukii nan kinkakir nae u boor, ki kutmɔnt ban nan dakpeeuŋ na. ²⁸Ki peensau kaa ki saa te wun chiar; ki tana nba ki bi saa jaatɔ tee nan kinkak-lansɔnt na. ²⁹U yaa boor, gbajar tee nan kinkakjinn nae, ki jab-i yekitɔ kpana yoo nba, ki u laa. ³⁰Waka nba taab u poor paak na tee nan sipa chaba nae; ki li tuu gbii tinmaatik, ki tee nan diboolanbann na. ³¹U tuu gbit mɔkgbeŋir na, ki li tee nan nyume daan na, ki te li ŋmikin, ki tee nan kpame be bobir ni na. ³²Ki wuu saa, punposopeeuŋ nyirii u poor po, mɔkgbeŋir na paak. ³³Siar kaa tingbouŋ na ni, ki tee nan ŋɔɔ na; u tee bonfoor nba ki tiin jaŋmaaniie. ³⁴U gorii ki ki gboot bonkobuk nba tee garuk daanɔ gbaa. Ŋɔɔe tee muuk ni bonkobit kura bat.

¹Tɔn, ki Job jiin Yennu a:

Job mɔmaan

²Yennu, n mi nan fine mantik tee paŋ daanɔ, ki mi nan a saa fit tun bona kur nba ki a loon. ³Ki a boi a n tee ŋmee ki biris a yanfoon po, ŋaan ki ki mi siari? Barmɔnii, n bo piak linba ki n ki bant li paake. Li mantik teen bakitnauŋ nan mii mi li paaka. ⁴Ki fin Yennu yet a man ŋmin, ŋaan ki fin pak, ki bia yabir ki jiin a buboit. ⁵Yoo nba gar, n tuu mi linba ki leeb beerin ki jiin a poe, ŋaan mɔtana n ji la-a nan n mɔŋ ninbinawa. ⁶Li paak, n dii fei nan linba ki n yet nawa, ki mɔ kɔɔ, ki puk tanbiinii nan tanpent.

Majoontik

⁷Yennu nba pak nan Job ki gbenn na poor poe, ki u yet Elifas a, “N wutoor doo fin nan a yɔɔsnba banlee na paaka, kimaan i ki pak barmɔnii ki jiin n po, nan biaŋinba ki n toontunnɔ Job pak na. ⁸Li paak, jiin naajai banlore nan pejai banlore ki tur Job, ki lii tee maruŋ i mɔŋ paak. Job saa miar min Yennu i paak, ki n saa gat u miaru na, ki kan dat i tuba nan ki li bo jaŋ nan man dat i tubawa. I ki pak barmɔnii ki jiin n po nan Job nba pak biaŋinba na.”

⁹Ŋanne Elifas nan Bildad nan Sofar teen nan Yennu nba wannib biaŋinba na, ki Yennu ji gat Job miaru.

¹⁰Tɔn, Job nba miar Yennu, u yɔɔsnba bantaa na paak na poor poe, ki Yennu te ki u ŋamm mɔkit, ki li mɔkint yab gar waa din mɔk biaŋinba na taar munlee. ¹¹Ki Job ninjamm nan u niipoob nan u yɔkperii na kur baar a bin gɔnɔ, ki tan dii jaamm u ŋaak ni. Bi din wann bi ninbatinu, ki maan u par nan daamii nba kur ki Yennu teenɔ na. Ki sɔɔ kur turɔ likirii nan salima baŋ.

¹²Yennu din teen piisin Job binbeŋ joontu ni, ki li gar waa din teen piisin u pinpiik niwa. Ki Job ŋamm la pei tusaa piik nan ŋanna, nan laagumiinba tusaa ŋanloob, nan nei tusaa ŋanlee, nan bonii tusir. ¹³U din ŋamm mar bonjai banlore nan bonpoi bantaa, ¹⁴ki pur bonposaakak na sann Jemima, ki wunba pukin banlee na tee Kesia, ki bonbik po tee Kerenn Hapuk.42.14 Jemima paak tee “ŋmann,” ki Kesia paak tee “bonnunubit nba man,” ki Kerenn Hapuk paak tee “lakbik.”¹⁵Poo sɔɔ din ki be durinya na ni ki fan nan Job bonpoi na. Bi baa din biit faare ki turib nan biaŋinba ki u tur bi ninjamm na.

¹⁶Job bikinu na poor poe ki u din dii bina kobik nan piinna. U din la yaaboona nan yaaboonlee, ¹⁷ki ji tan kpet bonchiann ki kpo.