Jeremaya

JEREMAYA

gbouŋ

Ki jiin Jeremaya gbouŋ na po

Jeremaya din tee manntɔɔe, ki bia tee Yennu sɔkinii, ki piak Yennu maan, ki li gar bina piinnawa, ki teen niib nba be Juda naan yent ni. U din yɔɔ beerib nan bi-i kii nyik bi yanbɔntoona, Yennu saa dat bi tuba. U din be Jerusalem-e yoo nba ki Babilonn kunkɔnkɔnna kɔn ki nyann doo maŋ na. Jeremaya bia din dɔŋ pak nan Yennu tan saa teen u sennii u niib dudukit ni, ki bia sɔbir bi para ni.

¹Gbouŋ na maan tee linba ki Jeremaya din pake. Jeremaya din tee manntɔɔ Hilkia bijae. Hilkia tee mannteeb nba nyii Anatof nba be Benjaminn yent ni na yenɔe. ²Josaya naan bina piik nan ŋantaa nie, ki Yennu pak nan Jeremaya. Josaya din tee Amonn bijae, ki tee Juda kpanbar. ³Yennu bia din ŋamm pak nan Jeremaya, yoo nba ki Josaya bija Jehoyakim tee kpanbar na. Li poor po ki Yennu pak nan Jeremaya fuunu bonchiann, ki tan tuu Josaya bija Sedekaya naan bina piik nan yenn ni. Li binn ŋmaarii ŋanŋmu ni, ki bi soor Jerusalem teeb ki saan namm digbangann.

Biaŋinba ki Yennu yiin Jeremaya

⁴Yennu din pak nan min Jeremaya a, ⁵“N din gannaewa ki tan tura manfoor, ki bi din tan maara na ki sɔɔ ki n nyinnawa, maa fii tee n sɔkinii, nisaarii boor.”

⁶Ki n jiin a, “Yabint Yennu, n ki mi maan paku, n daa tee bonbunne.”

⁷Ŋaan ki Yennu yetin a, “Daa piak nan a waabi, ŋaan saant niib nba ki n tuuma na boor, ki saa pakib linba kur ki n saa wanna maa fan pakib. ⁸A daa tiimm jaŋmaanii, kimaan n sii be nana ki guua. Min Yabint Yennu-e pak na.”

⁹Ŋanne ki Yennu tant nuu ki sii n mɔgbana, ŋaan yetin a, “Gbiintir, n teena maan nba ki a saa pake na. ¹⁰Dinna n teena yiikooe digbana nan kpanbara paak, a fan ŋabir, ki bia daa sikin tiŋ ni, ki biir, ki bia ber ŋaan fat, ki maa, ki bia bur.”

Ki jiin yirintii ŋanlee po

¹¹Ki Yennu boin a, “Jeremaya, a la bia?”

Ki n jiin a, “N la tiik nba ki bi yi liabtiik na yiinue.”

¹²Ki Yennu jiin a, “A mɔk mɔnii, n guue1.12 Bi maan ni, “guu” nan “liabtiik” mɔbona naane. maa n la nan n maan na teen mɔnii.”

¹³Ŋanne ki Yennu ŋamm pak nanin a, “A la bia ki pukini?”

Ki n jiin a, “N la bobir be gaŋ po, ki daan, ki yaa lin mɔɔn nna na.”

¹⁴Ki u yetin a, “Biiru saa daa gaŋ po ki sik binba kur be tiŋ na ni paak, ¹⁵kimaan n yi binba be gaŋ po na kur a bin baar. Bi kpanbara saa maa bi naan binbinta Jerusalem tammɔi ni, ki lint li joonjot, ki bia lint Juda dolia. ¹⁶N saa dat n niib tuba, kimaan bi tun biira; bi yêtima, ŋaan mann maruŋ ki teen yenbis, ki bia maa pata ki jiantir. ¹⁷Jeremaya, teent siir. A saan wannib linba kur ki n paka. A daa tiimm jaŋmaanii mɔtana, nna-i kaa, n saa te ki fan tinib jaŋmaanii bonchiann, yoo nba ki a be namm na. ^18-19Jeremaya, gbiintir, sɔɔ kur nba be tiŋ na ni, li Juda kpanbara, nan li saakab, nan li mannteeb, nan li niib kur saa kɔn nana. Ŋaan dinna n teena paŋ nba ki a saa set ki tookibe, ki a sii tee nan dopaarir nae, ki tee nan kut-tootir na, ki bia tee nan kutmɔnt joonn na. Bi kan nyanna, kimaan n sii be nana, ki guua. Min Yennu-e pak na.”

Biaŋinba ki Yennu loon Israel teeb

¹Ki Yennu yetin

²a man mɔɔnt maan na ki tur sɔɔ kur nba be Jerusalem a,

“N tian yaa din waan fanu biaŋinba,

yoo nba ki i din tee nipaauŋ na,

yoo nba ki i din sint jii i mɔŋ ki turin na.

I din wei n poor ki gar kunkoouk paak,

tiŋ nba ki bi ki ban bur siar na ni.

³Israel teeb, i din tee n kuukɔɔ niibe,

i din tee n kasii faare.

N din te ki biak bonchiann baar wunba kur paani daŋ.

Min Yennu-e pak na.”

Ki jiin Israel teeb yeejamm biit po

⁴Gbiintir Yennu maan, yimm Jakɔb yaaboona nba tee Israel teeb na. ⁵Yennu yet a:

“Bilante ki i yeejamm din baar nann n paaki?

Bee din te ki bi lek bi numm ki nyikimi?

Bi din jiant yenbise, yenbis nba kaa nyɔɔti,

ki li te ki bi mɔŋ mun ji kaa nyɔɔti.

⁶Bi din ki gbiin n po, ŋaan mine din nyinnib Ijipt,

ki somm namm kunkoouk paak,

siaminba tee tinkokirik nan tanbiiuŋ nan bootit,

ki tee tinkooŋ nan daŋ tiŋ nba ki sɔɔ ki kaar leŋ,

ki sɔɔ bia ki somm leŋ na,

⁷ki n baar namm tiŋ nba mɔk koorin ni,

a bin tan di li jaauŋ nan bonŋana manu,

ŋaan ki bi biir n tiŋ, ki kɔɔn tiŋ nba ki n turib maŋ jakint.

⁸Mannteeb na ki boi a, ‘Yennu be lia?’

N tiɔŋ mannteeb ki bannin.

Doo diara kɔn nanime, ki n sɔkiniinba piak tingbann

nba tee Baal na sann ni, ki jiantir yenbis.

⁹Li paak, min Yennu saa ŋamm pak n maan ki jiin n niib po.

N saa baar nan maan ki jiin bi yaaboona po.

¹⁰Saant yonbaa po, ki baar kunkonn doo nba foo nyun ni,

ki bi yi Saiprus na, ki tun sɔɔ yondo po, Kedar tiŋ ni.

I saa la nan linba na booru daa ki ban tun kaawa,

¹¹digbansiar ki ban lebit u yenbis,

nan baa lek ki tee yenmɔnii nawa.

Ŋaan n niib nyik min Yennu nba tee baakir daanɔ nae,

ŋaan waa yennii nba kan fit tun siar ki sommib na.

¹²Li paak, ki n yet sanpaak a wun ŋak nan yanputuk

nan bakitnauŋ nan yaarlituk,

¹³kimaan n niib tun biit booru munlee-e;

bi ŋmant bi poor ki tur min nba teen nyunŋanin na,

ŋaan gbiir gbiit nba tee bonyiant, ki nyun kan fit be leŋ.

Biaŋinba ki Israel teeb toonbiit saa baar nan tubdatu

¹⁴“Israel digbann ki tee yommik kaa,

bi din ki marɔ yommisin ni kaa. Bee teen ki u datai waa beerɔ?

¹⁵Bi gaan jat u paak nan yanbɔra nae,

bi kpant u tiŋ kunkoouko, ki u doi teen langbent ki dɔɔ yann.

¹⁶Nn, Memfis nan Tapanes jab yeer u yukpabuko.

¹⁷Israel digbann, fine baar nan linba na a mɔŋ paak.

A yêt min a Yomdaanɔ Yennu-e,

yoo nba ki n tɔk nana sɔnu maŋ ni na.

¹⁸A dukii li-i tee ki a saan Ijipt ki saa nyuu

Nail mɔkir ni nyun, a saa la sommlannpoe?

A dukii li-i tee ki a saan Asiria ki saa nyuu

Yufrates mɔkir ni nyun, a saa la sommlannpoe?

¹⁹A tiɔŋ toonbiite saa dat a tubir;

faa nyikin na, ŋanne saa biira.

A saa bann laa ton ki bi biaŋinba nan fan nyik

min a Yomdaanɔ Yennu, ki ji ki waa n sɔnii na.

Min Yabint Yennu-e pak na.”

Israel teeb nba yêt Yenjiantu biaŋinba

²⁰Ki Yabint Yennu yeen a,

“Israel digbann, sian yooewa ki a din yêt n yiikoo,

a yêt fan sak n mɔbe, ŋaan jiantir pɔtuk yennii na,

kunkonn nba dokii kur paak nan timaatik kur nyakir.

²¹N burae, ki a tee nan daan tiik nba ŋan,

ki nyii bin nba ŋan ni na,

ŋaan gotir faa ji tan tee biaŋinba na.

A ji tee daan tiik nba loon lɔɔnbiite.

²²Fi-i lekii jii cheeb nba paar ki wur,

ŋaan n bia sii laat a jakint.

²³A saa teen nlee ki yet nan a ki biir a mɔŋi,

ki bia ki jiant tingbann nba tee Baal na?

Gotir faa tun biit biaŋinba baauk na ni. Gotir faa tun linba.

A tee nan muuk ni laagumii nba ki u poor sooru yoo-i baar,

ki u lin tiin yann,

²⁴ki tiin do kunkoouk nae.

U poor sooru yoo-i baar, ŋmee saa fit gɔɔrɔ?

Laagumjak nba loonɔ ji ki bakiti,

kimaan u be-e yoo nba kur ki laagumjak tee wun lomɔ.

²⁵Israel digbann, a daa chat a taa,

koo ki koot a kunkɔr nan boorganii yenbis weiu.

Ŋaan a tuu yet a, ‘Aaii, n kan ŋmat poor.

N loon boorganii yenbis nae ki sii waab.’ ”

Biaŋinba ki Israel teeb jaŋ nan tubdatu

²⁶Ki Yennu yet a, “Baa tuu tan soor nanyukɔ, ki wun di fei biaŋinba na, nnae ki yimm Israel niib kur tan saa di fei. I kpanbara nan saakab, nan mannteeb nan n sɔkiniinba na saa di fei. ²⁷Yimm nba yaa tiike tee i baa, ki tann tee i naa na, i kur tan saa di feiwa. Linba na saa tun, kimaan yaa nyikin ŋaan yaat na paak. Li-i tee ki i be daamii ni yoo nba, i tuu yime a man baar ki tinni.

²⁸“Yennii nba ki i maa ki tur i mɔŋ na be lia? Li-i tee ki i be daamii ni, yin te bin nyinni, li-i tee ki bi saa fit. Juda teeb, i yennii yab nan yaa mɔk doi biaŋinba nae. ²⁹Bee tee i daamii? Bee ki i yêtimi? ³⁰N dat i tuba, ŋaan li ki ŋamm siari. I ki sak man ŋmakiti. I tee nan yanbɔr waatik nae, ki kpii n sɔkiniinba kur. ³¹Israel teeb, gbiintir linba ki n piak na. N tee nan kunkoouk nae ki turini-i? N bɔne ki tee nan ninbɔŋ tiŋ na-a? Bee ki i piak a i sii tuun yaa loon linbae, ki kan ban jen n boori? ³²Poopaaŋ tammit u salinbaŋ po-o, koo pooyookir tammit u chiann liant po-o? Ŋaan yimm n niib tamm n po ki li wei ki gar yoowa. ³³I setik mi yɔɔs sooru. Poochonchonn saa fit tumii i boora. ³⁴I tiat mɔnn nan talas damm nan nikaat sɔme, li ki tee fat-teeb sɔn kaa.

“Ŋaan linba na kura, ³⁵ki i yeen a, ‘Ti ki tun biir. Yennu ji ki dont wutoor ti paak.’ Ŋaan min Yennu saa dat i tuba, kimaan i nɔi nan i ki tun biiti. ³⁶I teen i mɔŋ dafur nan yaa jii i mɔŋ ki tur digbangana yennii nawa. Ijipt saa dinni fei nan Asiria nba din dinni fei nae. ³⁷I saa ŋmant i poor ki tur Ijipt, ki i yura n kpiak nan fei. Min Yennu yêt binba ki i teen i dindann bi ni nawa, ki i kan la nyɔsiat bi boori.”

Biaŋinba ki Israel teeb yêt Yennu weiu

¹Ki Yennu yet a, “Jɔɔ-i yêt u ŋaapoo, ki poo na yaat saan kun jaganɔ, u sɔrkperɔ na ji daa gaarɔ. Linba na saa biir tiŋ nae fas. Ki fin Israel digbann mɔk yɔɔsnba bonchiann, ŋaan bia loon fan jen n boor. ²Gotir kunkona paak. Li ki mɔk siaminba ki a ki tun nan bonchonchonn na. A kar sɔnjokpinii ki guu a yɔɔsnba, nan Arab jɔɔ nba tuu kar sɔnjokpiŋ ki guu sɔngata kunkoouk paak, a wun fat bi bona na. A biir tiŋ na nan a bonchonchonsin nawa. ³Ŋanne teen ki n gɔɔr saak, ki bia nyar nyuntona. A kpan gorii nan bonchonchonn nae, ki ki tiin fei.

⁴“Ki mɔtana ki a piakin, a mine tee a baa, ki loona yoo nba ki a bo tee bik nawa, ⁵a n wutoor kii do yoo kuri, n kii dia-a punpunn yoo kuri. Israel digbann, faa pak linbae na, ŋaan tun biit nba kur ki a fit.”

See ki Israel nan Juda teeb lebit bi binbeŋ

⁶Yoo nba ki Josaya din tee kpanbar na, ki Yennu pakin a, “A la linba ki Israel digbann nba tee nan poochonchonn na tuma-a? U ŋmant u poore ki turin, ki tun nan bonchonchonn na kunkonfoouk kur paak, nan timaatik kur nyakir. ⁷N dukin nan wuu tun linba na kur gbenn, u saa jen n boora, ŋaan u ki jeni, ki u niipoo Juda nba tee nan bonchonchonn na la li kura. ⁸Juda bia la nan n yêt Israel digbann ki ber nyinnɔ, kimaan u ŋmant u poor ki turin, ki kpant bonchonchonn, ŋaan Juda nba tee Israel niipoo chonchoonn na ki tin jaŋmaanii, ki mun bia teen bonchonchonne, ⁹ki ki tiin siara fei. U biir tiŋ nae nan waa jiantir tana nan tiinii ki li tee bonchonchonsin na. ¹⁰Linba na kur poor po, ki Israel niipoo chonchonn nba tee Juda na, kpann nan u jent n boore, ŋaan u nunii ki mɔnii. Min Yennu-e pak na.”

¹¹Ki Yennu pakin nan Israel nba lek ŋmant poor ki turɔ na, ŋaan u benu ŋan ki gar Juda benu. ¹²Yennu pakin a n saan pak Israel a, “Fin Israel, bonchonchonn na, jenin n boor. N mɔk ninbatinu, ki kan donn wutoori. N kan ban donn wutoor a paak yaayoo siiyoo. ¹³Fin n sak nan a mɔk biit, ki sak nan a yêt a Yomdaanɔ Yennu mɔba. Fiitir a biit nan timaatik kur nyakir a jii a lomm ki tur boorganii yenniiwa, ki ki sak n mɔbi. Min Yennu-e pak na.

¹⁴“Yimm nba ki waa min Yennu na, jenin man, i tee n niibe. N saa nyinni yenɔ yenɔ doo kur ni, ki nyinni banlee-lee yeeja ŋaak kur ni, ki jen nani Sayɔnn kunkonn paak. ¹⁵N saa turi doo diateeb nba saak n mɔb, ki bi saa dia-i nan yanfoon nan bannu. ¹⁶Ki yi-i pɔt yoo nba tiŋ na ni, niib ji kan pak n mɔlor lakir na po. Bi ji kan dukin li po, koo ki tiar li po. Li poŋ ji kii kpaa talas nan bii mɔkiri, ki boi bin teen leeri. ¹⁷Li yoo-i baar, bi sii yi Jerusalem, ‘Yennu naan binbintire,’ ki digbana kur saa lakin leŋ ki jiantin. Bi ji kii tuun linba ki bi tubkangbatin nan bi yanbɔndudukit wantib na. ¹⁸Yimm Israel teeb saa lakin nan Juda teeb, ki saa nyi yommisin ni, gaŋ po tiŋ na ni, ki jen tiŋ nba ki n tur i yeejamm, a lii yɔɔ kii tee i yent na ni.”

Ki jiin Yennu niib patjiantii po

¹⁹Ki Yennu yet a, “Israel digbann,

n loon man gaara nan n bija nae,

ki tura durinya na ni tiŋ nba ŋan bonchiann.

N loon fan yiinin baae, ki ji daa ŋmantir poor ki teenin.

²⁰Ŋaan a tee nan poo chonchonn nae, a ki waan.

Min Yennu-e pak na.”

²¹Fuur fu kunkona paak.

Israel teebe mɔ ki fabin, kimaan bi tuu be yanbɔnbinbeŋe,

ki tamm bi Yomdaanɔ Yennu po.

²²Jenin man, yimm nba ŋmant i poor ki tur Yennu na;

u saa turi laafia ki yii tee niŋamm.

Ki i yeen a, “Nn, ti jent Yennu boore, kimaan ŋɔɔe tee ti Yennu. ²³Ti ki la sommir ti kunkona paak tingbana jiantii ni. Timm Israel teeb sommir nyi ti Yomdaanɔ Yennu kuukɔɔ boore. ²⁴Ŋaan tingbann Baal nba tee fei tingbann na jiantue te ki ti kɔŋ bonkobit, nan bonjai nan bonpoi, nan linba kur ki ti yeejamm din tun ki bak li paak, yaayoo niwa na. ²⁵Li tee tin dɔɔr ti fei nie, ki ti fei maŋ n piinit. Timm nan ti yeejamm yɔɔ tuun ki biir ti Yomdaanɔ Yennu-e. Ti ki ban sak u sennii.”

Ki jiin biit tumu nyiku po

¹Ki Yennu yet a, “Israel teeb, li-i tee ki i loon jenui-e, yii jent na. N ki loon pata na maan. Yi-i nyinnir, ŋaan waan fanu, ²li sii took nan yii poor n sann ni. Ki digbana kur saa boi a n teen piisin bi paak, ki bin dontin.”

³Ki Yennu pak tur Juda nan Jerusalem teeb a, “Kon i tinii nba ki koo na, i daa buur i bonboorii kunkonii ni. ⁴Ii dia yimm nan min Yennu mɔsonn na man, ki jii i mɔŋ ki turin, yimm Juda nan Jerusalem teeb. Yi-i kii teen nna, n wutoor sii di nan muu nae, kimaan biit nba ki i tun na paak. Li sii die, ki sɔɔ kaa ki saa kpeen muu maŋi.”

Ki jiin Juda po

⁵Pebin naatunn tiŋ na kur po,

ki hoot nan kunkɔsaakar ki lin nyi fanu.

Pakin Juda nan Jerusalem teeb ki bin chiar saan doi nba paar ni.

⁶Want sɔnu nba saa Sayɔnn. Chiat ki tinn i mɔŋ. I daa taantir.

Yennu baat nan biak nan biiru bonchianne, ki li nyi gaŋ po.

⁷Yanbɔr nba tuu nyi u bɔr ni ki baat biaŋinba na,

nnae ki digbana biirtɔɔ na nyii ki baat.

U baat a wun biir Juda-e.

Juda doi saa biar langbente, ki sɔɔ kan kɔɔ leŋi.

⁸Li paak, lian bɔtoot liant man, kii mɔ kii fabin,

kimaan Yennu wutochiɔŋ na ki nyik Juda.

⁹Ki Yennu yet a, “Li daar ni, kpanbara nan saakab saa kɔŋ bi parcheenn. Mannteeb saa jek, ki lin yaar lit sɔkiniinba.”

¹⁰Ki n yet a, “Yabint Yennu, a kpann Jerusalem teeb nae fas. A yet a parmaasir sii be, ŋaan banjiake dii bi turii ni na.”

¹¹Yoo baat, ki Jerusalem teeb saa gbat nan wontouŋ da ki nyii kunkoouk paak, ki baat bi paak. Li kii tee wonŋauŋ nba jikit fouŋ kɔɔ kaa; ¹²Yennu nba tur mɔb ki wouŋ nba baat na sii mɔk paŋ ki gar nna. Yennu tiɔŋ yeen a u saa dat u niib tuba.

Ki jiin Juda teeb datai po

¹³Gotir, datai nae baat ki yat nan sanpagbant na, ki bi tɔb torit tee nan sajaperinn na, ki bi taanii kakii ki gar baakawa. Ti ki mɔk dindann. Ti boonta. ¹⁴Jerusalem, wuut biit nba be a par ni na, ki lian fit la tinnu. A sii dukii yanbɔndudukit ki lin wei nlee?

¹⁵Toomiinba nyii Dann doo ni, nan Efraim kunkona paak, ki mɔɔntir lababiiuk. ¹⁶Bi baar a bin kpaan digbanae, ki bia pak Jerusalem nan datai nyii digbanbanfɔkir ki baat. Datai na saa hoot ki tur Juda doi, ¹⁷ki saa ŋaa loon Jerusalem nan jab nba tuu guu tiŋ na, kimaan u niib na yêt Yennu mɔba. Yennu-e pak na.

¹⁸Juda, fine baar nan linba na a mɔŋ paak, kimaan faa be biaŋinba, nan faa tun linba na paak. A biite baar nan biak na, li ŋmuu ki saar a wuba.

Jeremaya yanyêtuk ki jiin u niib po

¹⁹Tont be. N kan fit gubin gaar tont na.

N wub! N wub ton bonchiann. N kan fit ŋmini.

N gbia naatuna nan tɔb hootii.

²⁰Biak yenn tuu gare, ki leer waa.

Tiŋ na kur tee langbente.

Ti ŋei na biira, ki li mɔpina na pat pat.

²¹N saa la tɔb ninmɔnn nan naatuna mɔnii ki lin wei nlee?

²²Yennu yet a, “N niib na tee bonliiniie.

Bi ki mimi. Bi tee nan wajata nae ki ki mɔk bannu.

Bi mi toonbiit tumue fanu, ŋaan gbar toonŋana tumu.”

Jeremaya yirintu ki jiin biiru po

²³N got tingbouŋ na ki sɔɔ li tee tinkokirik nba fukiie,

ki n got sanpaak ki sɔɔ yentu kaa.

²⁴Ki n got jɔjaana ki sɔɔ ki bi jekir, ki kunkona labin.

²⁵N la nan niib kaa, ki nɔɔnii mun bia yukir ki yaata.

²⁶Tinkpiasir na kpant tanbiiuŋo, ki li doi na tee langbent,

kimaan Yennu wutoor doo bonchiann.

²⁷Yennu poŋ pak nan tingbouŋ na kur saa kpant tanbiiuŋo, ŋaan u kan biirir fasi.

²⁸Tingbouŋ na saa bui kpemɔnii, ki sanpaak saa bɔnn.

Yennu-e pak na, ki kan lebit u dudukiti,

u soor sooruwa, ki kan ŋmat poori.

²⁹Taanjakira nan tɔrbantɔɔra na fuur

saa te ki sɔɔ kur n chiar.

Siab saa chiar ki kɔɔ fɔɔr, ki siab saa do jɔɔt paak.

Doi kur saa biar yann, ki sɔɔ ji kan ban kar bi ni.

³⁰Jerusalem, a boonta. Bee ki a lia taŋanti?

Bee ki a lia salinbana ki ban chɔrɔ?

A faŋit a mɔŋ yanne. A yɔɔsnba yêtawa, ki loon bin kpia.

³¹N gbat mɔŋ, ki li tee nan poo nba tuu yaa wun mar na,

ki gbat wuyikiŋ ki li naan nan poo nba tuu yaa wun mar

u sapaanmar na.

Jerusalem mɔ ki loon wamaasin wun foont,

ki tantir u nuu ki yeen a, “N boonta. Bi baate a bin kpin.”

Ki jiin Jerusalem biit po

¹Jerusalem teeb, tinin ki lin i sɔnjot kur ni.

Gotir lint. Lamin i numm. Lomin doi ni,

ki laan i saa la nirɔ nba ki u toona ŋan ki u loon Yennu-u?

Yi-i saa fit lau, Yennu saa nyik chab Jerusalem-a.

²Baa lek yeen a, “Nan Yennu nba be na,”

ŋaan bi poor faak mɔporae.

³Yennu, a ninbina ki gorii ki loon mamɔmm kaa-a?

A faabe, ŋaan ki li ki toŋib.

A butibe, ŋaan ki bi yêt ŋmakitir.

Bi chee bi parae, ki li wakii gar tann, ki yêt bin nyik bi toonbiit.

⁴Ki n dukin a, “Niib na tee tariie ki kaa yan,

kimaan bi ki mi Yennu sɔnii, koo waa loon bii tuun linba.

⁵Li paak, n saa saan bi tɔɔndamm boore ki pak namm,

kimaan ŋamme mi Yennu sɔnii,

ki mi waa loon bii tuun linba.”

Ŋaan bi kur yêt Yennu yiikoowa, ki bia yêt bin sak u mɔba.

⁶Li paak, yanbɔr saa nyi fɔɔr ni ki lekib,

ki kinkatir saa nyi kunkoouk paak ki biirib,

ki naamuuk sii dɔɔ kpia bi doo ki guub,

ki saa pat wunba nyii nanyer,

kimaan bi mɔyêtuk na yab bonchiann,

ki yoo kur bi ki waa Yennu sɔnii.

⁷Ki Yennu boi a, “Bee ki n saa nyik chabini?

I waas yêtima, ki poor yennii nba ki tee yenmɔnii sana ni.

N turib linba kur ki bi loon,

ŋaan ki bi chomm, ki ŋamii saa bonchonchona ŋei ni.

⁸Bi tee nan taanjai nba dii gboo,

ki ji mɔk niɔŋ nan poo nae, ki sɔɔ kur nian u lɔɔ ŋaapoo.

⁹N kan dat bi tuba linba na paaki-i?

Koo ki daa dont wutoor nibooru nba na paaki-i?

¹⁰Saant bi daan tiinii kpaant ni ki biirib,

ŋaan i daa biirib chainchain.

Ii chɔɔ yiinii maŋ, kimaan bi ki tee min Yennu yab kaa.

¹¹Israel teeb nan Juda teeb maŋ ki waan nan waama.

Min Yennu-e pak na.”

Biaŋinba ki Yennu yêt Israel teeb

¹²Bi faar faake ki paan Yennu, ki yet a, “U kan teent siari. Siara biak kan baar ti paaki. Ti kan ban la kuun, koo komi. ¹³Yennu sɔkiniinba na tee wouŋo, ki Yennu maan na kaa bi ni. Li paak, ŋaant linba ki bi piak na n ŋmat bi mɔŋ paak.” ¹⁴Tɔn, Yomdaanɔ Yabint Yennu nba yet linbae na a, “Kimaan niib na nba pak linba na, n saa te ki n maan na-ii tee nan muu nae a mɔb ni, ki niib na-ii tee daat nba ki li sii di.”

¹⁵Yennu yet a, “Israel teeb, n baat nan digbanbanfɔkir jabe a bin kɔn nani, ki tee yaayoo ni digbann nba mɔk gbankur, ki i ki gbia koo ki bant li niib maan paak. ¹⁶Bi jatiat saa fit kpi niib bonchiann, ki bi kur tee kunkɔnkɔncheena. ¹⁷Bi saa di i jeet kur, ki kpi i bonjai nan bonpoi kur, ki ŋman i pei nan nei kur. Bi saa biir i tilontii kur. Bi saa jii banjiake ki biir i doi nba paar ki i maa li paak na kur.”

¹⁸Yennu yet a, “Daa maŋ ni, n kan biiri fas fasi. ¹⁹Li-i tee ki niib na boi a, ‘Bee ki ti Yomdaanɔ Yennu tun linba na ki turiti?’ fan yetib a, ‘Baa yêtin ŋaan jiantir boorganii yennii bi tiɔŋ tiŋ ni na paak, mɔtana bi sii tee yommii ki tur nigamm, tiŋ nba ki tee bi yar na ni.’ ”

Biaŋinba ki Yennu yakii nan u niib

²⁰Yennu din yet a, “A mɔɔnt linba na ki tur Jakɔb yaaboona, ki pakir Juda tiŋ ni ²¹ki yet a: Gbiintir na man, yimm nba kaa yan, ki mɔk ninbina ŋaan ki ki laat, ki mɔk tuba ŋaan ki ki gbia na, ²²n tee Yennu-e. I kan tinin jaŋmaanii-i? I bo kii baantir kaa n boori-i? Mine nan tanbiiuŋ ki li kɔr mɔkgbeŋir, ki tee kɔru nba ki li kan ban yakir li paak yaayoo siiyoo. Nyunpana sii labin ki mɔk fuut, ŋaan kan fit do li paak. ²³Ŋaan niib na mɔk tubkangbatin nan mɔyêtuk, ki ŋmat gaar gann po. ²⁴Bi ki yeen bi mɔŋ a, ‘Ŋaant ki tii tiin ti Yomdaanɔ Yennu, wunba teen naalɔuŋ, nan sakosaak li saka yoo, ki teent jaauŋ saama na.’ ²⁵I toonbiite boon linba na. I biite te ki i kɔŋ linba na.

²⁶“Nibiit be n niib na ni ki tuu dɔɔ guu, nan nirɔ nba tuu pii laauŋ a wun soor nɔɔŋ na, ki bia naan nan binba tuu pii barit a bin soor jab na. ²⁷Bi ŋei gbee nan kpinkpanniie, nan nɔɔnii nba tuu gbee ŋmangɔuŋ na. Bi mɔkite, ki la paŋ, ²⁸ki di gboot, ki gbeŋit. Bi toonbiit ki mɔk paak; bi ki sommit kpeebii ki bi laat mɔnii bi buut ni, bi ki taant tatimm ki bi gaan bi mɔnii.

²⁹“Ŋaan min Yennu saa dat bi tuba linba na paaka. N saa pab bi toonbiit na paaka. ³⁰Bontonn nba mɔk gbananjekint tun tiŋ na paaka. ³¹Yennu sɔkiniinba na fa faak kɔɔe; ki mannteeb na tuun nan sɔkiniinba nba wannib biaŋinba na, ki n niib ki mɔk siar ki saa paki. Ŋaan li joontu yoo-i baar, bi tan saa teen nlee?”

Biaŋinba ki datai ŋaa loon Jerusalem

¹Benjaminn teeb, chiat man, ki la tinnu. Ii chiar nyi Jerusalem man. Pebin naatunn na Tekoa doo ni, ki joo muu nba tee nyinn, Bef Hakerem doo ni. Biak nan biiru saa nyi gaŋ po ki baari. ²Sayɔnn doo fan, ŋaan li saa biira. ³Kpanbara saa baar leŋ nan bi kunkɔnkɔnna. Bi saa chaan bi lanbont ki lint doo na, ki sɔɔ kur saa kar waa loon sian.

⁴Bi saa yet a, “Teent siir ki lek Jerusalem. Teent siir, ti saa lekir yonsuuk niŋe.” Ŋaan li poor po bi saa yet a, “Yoo gara, yonnu baawa, ki nyiɔk poŋ piin bɔnnuwa. ⁵Ti saa lekib nyiɔko, ki biir doo maŋ joonjot.”

⁶Yabint Yennu-e tur kpanbara na yaak a bin chɔɔ tiinii ki teen tɔb dindena ki ŋaa loon Jerusalem. U yet a, “N saa dat doo na tubir, kimaan li gbee nan nɔɔntonte. ⁷Bunbunn nyun nba yɔɔ bunii biaŋinba na, nnae ki Jerusalem biit tee. N gbia kpikpiruk nan biiru doo na ni, ki laat yiarii nan danii leŋ. ⁸Jerusalem teeb, ŋaant ki daamii na-ii tee kpaanii ki turi, nna-i kaa, n saa nyɔr nyikiiwa; n saa kpint i doo na ki teenir kunkoouk, siaminba ki sɔɔ kan kari.”

Ki jiin Israel teeb mɔyêtuk po

⁹Ki Yabint Yennu pakin a, “Israel tiŋ saa biar yann nan baa tuu pɔɔr daan tilɔɔna daan tiinii paak ki bin biar yann biaŋinba nae. Li paak, see ki a tinn sɔɔ kur nba ki a saa fit, yoo nba daa be na.”

¹⁰Ki n jiin a, “Ŋmee saa gbiint ki turin, li-i tee ki n pak namm ki kpaanibi? Bi tee tubkangbatae, ki yêt bin gbiint a maan; bi laa linba ki a wannin a n pakib nae. ¹¹Yennu, a wutoor nba doo bi paak biaŋinba, n wutoor mun doo nnae bi paak, ki n ji kan fit diari.”

Ŋanne ki Yennu yetin a, “Kpaat n wutoor na ki mɔɔn waas paak, sɔnjot ni, nan naasimm tintaanu ni. Bi saa soor jab nan bi ŋaapoob ki yaat namm, ki bia saa yaat nan nikpera mɔŋ. ¹²Nigamme saa gaar bi ŋei nan bi kpaant nan bi poob. N saa dat tiŋ na ni niib tubawa. ¹³Nijaana nan tarii kur loon bin tɔkin sɔnbiite ki la likirii, ki n sɔkiniinba nan mannteeb ŋmaab niib na. ¹⁴Bi tee nan n niib danii na tee sankpanpui nae, ki yeen a, ‘Li kur ŋan,’ ŋaan ki li ki ŋani. ¹⁵Bi marinbiit na te ki fei sooriba-a? Aaii, siara fei ki sooribi, bi poŋ ki mi fei kaawa. Li paak, bi saa baa nan leeb nba baa nae. Mi-i dat bi tuba yoo nba, li sii tee bi joontue na; min Yennu-e pak na.”

Biaŋinba ki Israel teeb yêt Yennu sɔnu

¹⁶Ki Yennu yet u niib a, “Setir sɔnpaata ni man kii gorii. Ii boi sɔnkperii po ki la sɔnchinchibir nba be sian. Tɔkint sɔnu maŋ man, ki i saa la parmaasir.”

Ŋaan ki bi jiin a, “Aaii, ti kan tɔkini.” ¹⁷Ŋanne ki Yennu nyinn guuteeb a bii gbiin naatunn kpaanii. Ŋaan ki bi yet a, “Aaii, ti kan gbiinti.”

¹⁸Ki Yennu yet a, “Gbiintir man, boorganu na, ki bann linba saa tun ki tur n niib. ¹⁹Tingbouŋ, gbiintir. N baat nan boontue niib na paak, ki li sii tee bi biit tubdatu, kimaan bi yêt n tumiiue, ki bia ki gaar n maan. ²⁰N baka kaa bonnunubit nba ki bi nyi nann Sieba ki teenin na po, koo bonnunubit nba ki bi nyi nann digbanbanfɔka na. N kan gaar bi piinii koo ki n par mei bi maruŋ paaki. ²¹Li paak, n saa te ki niib maŋ n gbiat baa. Bibaanba nan bi bonjai saa kpo, ki yɔɔsnba nan bi kɔɔnanleeb mun bia saa kpo.”

Ki jiin Jerusalem leku po

²²Ki Yennu yet a, “Niib nyi gaŋ po digbann, ki baat. Digbanpaarir nba fɔk bonchiann na tee tɔb siire. ²³Bi jii bi tɔrbana nan takoobiiwa, ki tee tondamm nba ki tiin ninbaauko. Bi fuut tee nan mɔkgbeŋir nyun fuut nae, yoo nba ki bi jak taanii. Bi teen siire a bin faa Jerusalem tɔb.”

²⁴Ki Jerusalem teeb na jiin a, “Ti gbat maan maŋa, ki ti nii ji sɔɔne. Yanyêtuk nan gbananyekitir nyannite, nan poo nba tuu kar matdaaŋ paak na. ²⁵Ti kan nyi doo kpiŋ, koo ki somm sɔnii ni, kimaan ti datai be nan jatiate, ki ninmɔnn be siar kur po.”

²⁶Ki Yennu yet u niib a, “Ii lia bɔtoot liant man, kii birin tanpent ni. Ii mɔ nan parbiir man, nan i bija yemmir nba saa kpo ki yin mɔ kpemɔnii biaŋinba na, kimaan wunba yaa wun baar ki biiri na set saa lekiwa. ²⁷Jeremaya, bikint n niib nan faa saa bikin kut na, ki la baa naan linba. ²⁸Bi kur tee mɔyêtuk damm nba tee tubkangbatae, ki wakii nan kutmɔnt koo kutbin na. Bi kur tee nibiite ki lin jaan sanjaauŋ. ²⁹Saauk muu na di saamewa, ŋaan ki kutbiit na ki nann ki boti. Li ki mɔk nyɔɔt nan mii yɔɔ kii ŋamii n niibi, kimaan nitont na ki nyii bi sinsuuk ni. ³⁰Bi sii yib kaa nyɔɔte, kimaan min Yennu yêtiba.”

Ki jiin Jeremaya mɔmaan po

^1-3Ki Yennu tun min Jeremaya u jiantu ŋasaakak nba ki Juda teeb kɔɔ a bin jiantɔ na tammɔb boor. U yetin a man set leŋ ki mɔɔnt linba ki ŋɔɔ Israel teeb Yabint Yennu loon wun pak turib na a, “Lebitir i binbeŋ nan i toona, ki n saa nyiki ki yii be nna. ⁴Niib nba beeri a i tinna, kimaan Yenjiantu ŋasaakak be i boor na, i daa tee li maan yada.

⁵“Lebitir i binbeŋ ki nyik bonbiir nba ki i tuun na. Ii tuun linba ŋan kii teen i leeb. ⁶I daa ŋmaab saamm nan kpeebii nan pakɔi. I daa kpi niib kaat tiŋ na ni. I daa jiantir pata, kimaan ŋanne saa biiri. ⁷Li-i tee ki i lebit, n saa chabi ki yii be tiŋ nba ki n jii tur i yeejamm ki li yɔɔ tee bi faar na ni.

⁸“Gotirii, i teen yada faak mɔmaan nie. ⁹I jaan, ki kpi niib, ki chomm, ki poor faak mɔpora, ki mann maruŋ ki teen tingbann Baal, ki jiantir tingbanlia. ¹⁰I tuun linba ki n ki loon nae, ŋaan tuu baar ki see n boor, n jiantu ŋasaakak ni ki yeen a, ‘Ti be ti yamanie.’ ¹¹I dukii nan n jiantu ŋasaakak na tee fat-teeb gungurboore-e? N la yaa tuun linbawa. ¹²Ii saa Siilo man, sinsinn boor nba ki n gann ki bi sii jiantirin na, ki saa got maa tumir biaŋinba, kimaan Israel teeb nba tee n niib na biit paak. ¹³I tun biit na kurewa, ki n piak nani yoo nan yoo, ŋaan ki i yêt gbiintu. N yiini, ki i ki tooni. ¹⁴Li paak, maa tun linba ki tur Siilo na, n saa tun nnae ki tur n jiantu ŋasaakak nba ki i teenir yada nan li saa sommi na. Maa biir Siilo doo biaŋinba na, nnae ki n saa biir siaminba ki n tur i yeejamm nan yimm na. ¹⁵N saa ber nyinni n boor ni nan maa ber i nikpiimm Israel teeb nae. Min Yennu-e pak na.”

Ki jiin niib na mɔyêtuk po

¹⁶Ki Yennu yet a, “Jeremaya, daa mein niib na paaki. A daa mɔ, koo ki mein bi paaki. A daa barimin, kimaan n kan gbiint ki tura. ¹⁷A ki la baa tuun linba Juda doi ni nan Jerusalem sɔnii ni na-a? ¹⁸Waas yi daate, ki jab jokit muu, ki poob miin yon a bin lo lilaat ki tur yenpook nba ki bi yi Sanpaapo Poobat na. Bi mɔ daan ki teen yenlia a lin gbatin. ¹⁹Ŋaan li setik gbia mine-e? Aaii, li gbia ŋamme, ki tee fei ki turib. ²⁰Li paak, ki min Yabint Yennu saa mɔɔn n wutochiɔŋ na nna. N saa mɔɔnir nisaarii nan bonkobit nan tiinii nan jeet paak. N wutoor na sii tee nan muu nae, ki sɔɔ kan fit kpeeniri.

²¹“N niib, marunyena be, ki i tuu joo li kur maruŋ binbintir paak, ki marunlia mun be ki i tuu dir. Ŋaan linba ki min Yennu piak tee nnae, i poŋ tuu di li kur. ²²N din ki tur i yeejamm sennsau ki jiin mujoonu maruŋ, koo siara maruŋ po, yoo nba ki n din nyinnib Ijipt tiŋ ni na. ²³Ŋaan n din pakib nan bin sak n mɔb, ki n sii tee bi Yennu, ki bi mun tee n niib. N din betib a bii be nan maa wannib na, ki bona sii saa fanu ki teemm. ²⁴Ŋaan bi din ki sak n mɔb, koo ki gbiint linba ki n pakib na. Bi din tun linba ki bi mɔyêtuk nan tubkangbatin wannibe; ki baa bo sii ŋan na, ki bi biir saa naagbaak. ²⁵Laa jii daar nba ki i yeejamm din nyii Ijipt nawa ki tan tuu dinna, n yɔɔ tuun n toontunna nba tee n sɔkiniinba nae i boor. ²⁶Ŋaan sɔɔ ki gbiint, koo ki kɔɔn u baka li ni. I ŋamm teen tubkangbata nan mɔyêtuk damm ki gar i yeejamma.

²⁷“Li paak, Jeremaya, a saa pak maan na kur ki tur n niiba, ŋaan bi kan gbiint ki turani. A saa yiimm, ŋaan bi kan tooni. ²⁸A saa pakib nan bi digbann na ki sak min nba tee bi Yomdaanɔ Yennu na mɔbi, koo ki tumii yan bi tubdatu ni. Mamɔmm kpowa. Sɔɔ poŋ ji ki piak li po.

Ki jiin biit po

²⁹“Jerusalem teeb, ii mɔ man, koot i yut ki lu.

Ii yiin kuun yanii kunkona paak man,

kimaan min Yennu wutoor doo, ki n yêt n niiba.

³⁰“Juda teeb tun bonbiira. Bi jii bi tingbana nba ki n wutoor do li paak nae, ki bir n jiantu ŋasaakak ni. ³¹Bi maa maruŋ binbintir nba ki bi yir Tofef nae, Hinom baauk ni, a bii dia bi bonjai nan bi bonpoi kii mann mujoonu marint leŋ. N ki wannib a bin tun linba na. N poŋ ki dukin nna. ³²Li paak, yoo baat ki bi ji kan yiinir Tofef koo Hinom baauku, ŋaan bi sii yir nikpinu baauko. Bi sii pii niib leŋe, nan yiar nba tan sii kaa nan piinu. ³³Nisaarii gbanankpeena tan sii tee jeete ki tur nɔɔnii nan muuk ni bonkobit, ki sɔɔ sii kaa ki yɔɔbi. ³⁴Tiŋ na tan sii dɔɔ yanne. N saa boon parmaasir fuut, nan poochiann jaamm parpeenn fuut, Juda doi ni nan Jerusalem sɔnjot niwa.

¹“Li yoo na, bi saa nyinn Juda kpanbara nan li saakab nan mannteeb nan Yennu sɔkiniinba nan nileeb nba din be Jerusalem na kpaba bi kaat ni. ²Bi kan taanir ki pii kaa, ŋaan li sii dɔɔe nan mɔɔt na. Li sii dɔɔ yeenin ni, yonnu nan ŋmaarik nan ŋmaabira nba ki niib na din loomm, ki tuunib, ki faa namm labaar, ki bia jiantirib na boor. ³Ki biit damm digbann na niib nba tinn, ki be siaminba ki n yatib na saa dukin nan bi-i kpoi sɔ bi-i fo. Min Yabint Yennu-e pak na.”

Ki jiin biit nan tubdatu po

⁴Ki Yennu pakin a n yet u niib a, “Nirɔ-i baa, u ki fi-i? Nirɔ-i tut sɔnu, u ki ŋmat poori-i? ⁵N niib, ki bee ki i yaat n boor ki ji ki jenti? I dia i patae, ki yêt yin jen n boor. ⁶N gbiinte fanu, ŋaan i ki pak mamɔmmi. Nan i yenɔkɔɔwa ki mɔ kɔɔ u biit paaki, ki i sɔɔ ki boi a, ‘N biir bee?’ Sɔɔ kur tun waa loon linbae, nan taamm nba tuu tiin ki saa tɔb biaŋinba na. ⁷Barŋmaauŋ gbaa mi yoo nba jaŋ nan u ŋmatu, ki pinpara nan silaantoont nan naakpaapeenii mi yoo nba tee bin yaat ki lee doo, ŋaan yimm n niib ki mi sennii nba ni ki n diai. ⁸Ki i saa teen nlee ki pak nan i sub, ki bia mi n sennii? Gotir, faak wannteeb na kpint n sennii nawa. ⁹I subindamm na dii fei-e ki li ŋmatib ki bi sik baruk ni. Bi yêt n maame, ki mɔtana bi mɔk subinlannpoe? ¹⁰Li paak, n saa jii bi kpaant na ki tur nigamme ki bii yen, ki jii bi poob na ki tur jagamm. Tarii nan nijaana kur loon bin tɔkin sɔnbiite ki la likirii. Mannteeb nan n sɔkiniinba gbaa ŋmaab niib nae. ¹¹Bi tee nan n niib danii na tee sankpanpui nae ki yeen a, ‘Li kur ŋan,’ ŋaan ki li ki ŋani. ¹²N niib, i marinbiit na te ki fei sooriwa-a? Aaii. Fei ki soori nan waama. I poŋ ki mi fei kaawa. Li paak, i saa baa nan leeb nba baa nae. Mi-i dat i tuba yoo nba, li sii tee i joontue na; min Yennu-e pak na.

¹³“N loon man taan n niib nan kpaarɔ nba tuu taan u jeet nae, ŋaan bi tee nan daan tiik nba kaa lɔɔna nae, ki tee nan kinkaŋ nba kaa kinkana, ki li tituut poŋ jɔɔka na. Ŋanne ki n chab nigamm a bin yent tiŋ na.”

¹⁴Ki Yennu niib boi a, “Bee ki ti bia daa kari? Baat man ki tin chiar saan digbanpaara ni, ki saa kpo leŋ. Ti Yomdaanɔ Yennu-e chabit nan kuun, u turit lɔbiie a ti nyu, kimaan ti tun biirɔwa. ¹⁵Ti daan parmaasire nan laafia, ŋaan ti ki lari; mukisuko baar. ¹⁶Ti datai poŋ ji be Dann doo niŋe, ki ti gbia bi taanii wuyikinii. Tiŋ na kur tuu jekire, yoo nba ki bi taanii mɔ. Ti datai baar a bin biir ti tiŋ, nan linba be leŋ kur, nan ti doo, nan li niib.”

¹⁷Ki Yennu yet a, “Ii chek man, n tuun wai-e i boor, waatont nba ki i kan fit diŋib, ki bi saa junti.”

Biaŋinba ki Jeremaya par biir u niib paak

¹⁸N parbiir na kaa gbennu, n par ni yiare.

¹⁹Gbiintir. N gbia n niib wuyikinii tiŋ na munn po a,

“Yennu ji kaa Sayɔnne-e? Sayɔnn kpanbar na ji kaa leŋe-e?”

Ki Yennu nba tee bi kpanbar na jiin a,

“Bee ki i jiantir i pata,

ki gbaa jiantir boorganii yennii nba kaa nyɔɔt na,

ki donn n wutoori?”

²⁰Ki niib na yikin a,

“Sakoouk gara, ki jaauŋ bia gara, ŋaan ti ki tinni.”

²¹N niib nba la biiru na paak teen ki n par biir.

N mɔ kpemɔniie, n ki mɔk parmaasir nan waama.

²²Tebuk kaa Gilead yent ni-i? Tebira kaa leŋe-e?

Ki bee teen ki n niib ki la laafia?

¹N sunman ki n yur bo tee bunbunne,

ki n ninbina tee ninnyuut nyuntonn,

ki man bo bui n niib nba ki bi kpiib na paak,

yonnu nan nyiɔk.

²N sunman ki n bo mɔk binbeboore muuk ni,

ki bo nyi n niib ni.

Bi ki tee niŋamm kaa, bi ki waa Yennu,

³Bi teen siir nan faake yoo kur,

bi nyik mamɔmme ŋaan dia doo na nan faak.

Ki Yennu yet a, “N niib tuu nyi toonbiyenn ni,

ki lɔɔr toonbileer nie, ki ki sak nan n tee bi Yennu.”

⁴Sɔɔ kur-ii chek u lɔɔ paak, sɔɔ daa tee u ninja yada,

kimaan ninja kur tee faak daanɔe,

ki sɔɔ kur gbii u yɔɔk paak.

^5-6Sɔɔ kur turin u yɔɔke, ki sɔɔ ki piak mamɔmm,

kimaan bi tumii bi jerima faake,

ki kan nyik toonbiit tumu.

Bi-i nyii kpikpiruk yenn ni, bi tuu kɔɔ leer nie,

ki fayeŋ-i gar, leer n wei.

Yennu yeen a u niib yêtɔe.

⁷Linba na paak ki Yabint Yennu yet a,

“N saa pur n niib nan kut nae ki bikimm.

N niib tun biita, n ji saa tun namm lannpoe?

⁸Bi jerima tee nan peenlɔbit nae, ki bi fa faak yoo kur.

Sɔɔ kur piak naasinyɔɔsire u lɔɔ boor,

ŋaan pii baruk ki guuntɔ.

⁹N kan dat bi tuba linba na paaki-i?

Koo ki daa dont wutoor nibooru nba na paaki-i?

Min Yennu-e pak na.”

¹⁰Ki n yet a, “N saa fabin kunkona paaka,

ki mɔ mɔmaatuk paak, kimaan bi koora,

ki sɔɔ ji ki gaar bi ni, sɔɔ ji ki gbia nei mɔnii,

ki nɔɔnii nan muuk ni bonkobit chiar yaat.”

¹¹Ki Yennu yet a, “N saa te Jerusalem n kpant langbent,

kii tee mɔbɔi binbeboor,

ki Juda doi bia saa kpant langbent,

ki tee siaminba ki sɔɔ kan fit kar.”

¹²Ki n boi a, “Yennu, bee ki tiŋ na biir, ki bia koor nan kunkoouk na, ki sɔɔ ki gaar leŋi? Ŋmee sub fanu ki saa bann linba na paaki? A wann ŋmee li paak, ki u mun saa wann leebi?”

¹³Ki Yennu jiin a, “N biir tiŋ na, kimaan n niib nyɔr nyik tumiiu nba ki n turib nae. Bi ki sak n mɔb, ki bia ki tun linba ki n wannib na. ¹⁴Ŋaan bi teen tubkangbatae, ki jiantir tingbann Baal, nan bi baanba nba din wannib biaŋinba na. ¹⁵Li paak, gbiintir linba ki min Yabint Yennu nba tee Israel teeb Yennu yaa man tun. N saa tur n niib jeet nba ton ki bin di, ki bia turib lɔbii ki bin nyu. ¹⁶N saa yat kɔɔnib digbana nba ki bi yeejamm nan bi mɔŋ ki ban gbat li po, ki te ki kunkɔnkɔnna n tookib nan maa tan saa boontib.”

Biaŋinba ki Jerusalem teeb boi sommir po

¹⁷Ki Yabint Yennu yet a, “Dukint linba tuun na po.

Yiint kpemɔnii damm,

nan poob nba yiin kuun yanii na ki bin baar.”

¹⁸Ki niib na yet a,

“Pakimm ki bin kakit ki yin kuun yanii turit,

nan ti ninbina nba tan saa gbee nan ninnyuut,

ki ti ningbant n matik nan mɔnii.”

¹⁹Gbiintir mɔnii fuur Sayɔnn doo ni man a,

“Ti boonta. Ti dii feiwa.

Li tee tin nyi tiŋ na nie, kimaan bi bit ti ŋeiwa.”

²⁰Ki n yet a, “Yimm poob n gbiint ki tur Yennu;

ki i baka-ii be u maan ni.

Ii tumii i bonpoi kpemɔnii, ki wann i yɔɔsnba kuun yanii yinu.

²¹Kuun tɔkin ti takorbonae, ki kɔɔ ti diit ni,

ki bia baar ti kpanbara ŋei ni, ki kpi waas sɔnjot ni,

ki kpi naasimm dai ni.

²²Gbanankpeena dɔɔe siar kur po,

nan mɔbaa nba tuu dɔɔ kpaant ni na,

koo karwantpat-teeb nba tuu chɔɔ karwanta ki bir,

ki sɔɔ ki tikirir na. Yennu nba yetin a n pak linbae na.”

²³Ki Yennu yet a,

“Subindamm daa faa kpinkpant bi subinii paak,

ki paŋ damm mun bia daa faa kpinkpant bi paŋ paak,

ki mɔkita mun bia daa faa kpinkpant bi mɔkint paaki.

²⁴Li-i tee ki sɔɔ loon wun faa kpinkpant,

wun faa nan u min, ki bia bant n maan paak,

kimaan n lomm yɔɔ be-e, ki n tuun linba ŋan ki bia took.

Ŋanne mei n par. Min Yennu-e pak na.”

^25-26Ki Yennu yet a, “Yoo baat ki n saa dat Ijipt teeb, nan Juda teeb, nan Edom teeb, nan Amonn teeb, nan Moab teeb, nan kunkoouk teeb nba pɔɔn bi yut9.25 Bi din pɔɔn bi yut ki baakit bi tingbanne. na tuba. Niib na kur pot bi punawa, ŋaan bi ki dia mɔlor nba ki punpotu tee li nyinn na. Niib na nan Israel teeb na kur, sɔɔ ki dia n mɔlor na.”

Ki jiin patmannu nan barmɔnii jiantu po

¹Israel teeb, gbiintir maan nba ki Yennu yaa wun pak turi na.

²U yet a, “I daa waa digbanlia taatɔk,

i daa te ki bonsaana nba ki i laat sanpaapo na daamii-i,

halii nan laa lek kɔɔnt digbanlia jaŋmaanii nawa.

³Niib maŋ jiantu tee yanne.

Tiike ki bi tuu chɔɔ ki lu fɔɔr ni,

ki tikpeera n jii bi pai ki kpeerir,

⁴ki ŋammir nan salimpeena nan salimmɔna,

ki bin jii kpai ki kpaa sennir, a li daa baa.

⁵Li pata tee nan baa tuu nan bont nba ki senn kpaab ni

ki li beer bondidiit nae,

bi kan fit pak, bi bia kan fit somm, niib-ii jikitib.

I daa tiinib jaŋmaanii: Bi kan fit paani daŋi,

bi bia kan fit sommini.”

⁶Yennu, sɔɔ kaa ki tee nan fin na, a tee Yenjaanne,

ki a sann yab, ki bia mɔk paŋ.

⁷Ŋmee kan tur fin nba tee digbana kur kpanbar na baakiri?

A jaŋ nan niib n tura baakira.

Subindamm ni nan kpanbara ni, sɔɔ ki be ki tee nan fin na.

⁸Bi kura tee jatit nan bonliiniie.

Bi saa tumii bee, baa jii tiinii ki nan pata nba na boori?

⁹Bi nyii nan salimpeena Speenn tiŋ nie,

ki nyii nan salimmɔna Ufas tiŋ ni,

ki saauk damm tan taan bi pata maŋ ki pɔrir.

Linba na kur tee bonninnant damm toonae.

Bi lannib taŋant nba ki taluura luue.

¹⁰Ŋaan fin Yennu-e tee barmɔnii Yennu,

ki tee Yennu nba fo na, ki bia tee kpanbar yaayoo siiyoo.

A wutoor-i doo yoo nba, durinya tuu jekire;

digbana kan fit dia a wutoor.

¹¹(Yimme tee yin pakib nan Yennu saa biir pata nawa. Pata maŋ kaa nan sanpaak nan tingbouŋ na. Bi ji sii kaa siar po, tingbouŋ na ni.)

Dontir yaŋ ki teen Yennu

¹²Yennu jii u yiikooe ki nan tingbouŋ na,

ki jii u subinii ki nan durinya na, ki tant sanpaak.

¹³U tur mɔbe, ki nyun nba be sanpagbouŋ liik po na fu.

Ŋɔɔe te ki sanpagbant nyi siar kur po ki lakii.

Ŋɔɔe te ki sanyikintii nyikintir, ki wonpaaruk nyi u boore ki da.

¹⁴Nisaarii laat linba na, ŋaan kaa yan, ki tee jatit.

Binba naan pata na dii feie,

kimaan pata nba ki bi naan na tee yanne, ki kaa manfoori.

¹⁵Bi ki mɔk nyɔɔt, ki tee bin yisimme.

Yennu-i baar bi paak nan wutoor yoo nba, u saa biiriba.

¹⁶Israel teeb Yennu na ki tee nan pata maŋ na kaa,

ŋɔɔe nan bona kur, ki gann Israel teeb a bii tee u tiɔŋ niib;

u sanne tee Yabint Yennu.

Ki jiin biiru nba baat po

¹⁷Jerusalem teeb, bi looniwa. Tikit i faar man. ¹⁸Yennu yaa wun ber nyinni tiŋ na nie. U saa buti, ki nan i yenɔkɔɔwa tan kan tenni. Yennu-e pak na.

¹⁹Ki Jerusalem teeb yikin a,

“Ti la daŋ bonchiann, ki ti fiat maŋ kan buuri,

ki ti bo dukii a li tee linba ki ti saa fit gubin gaare.

²⁰Ti ŋei kpant langbenta.

Ki ŋmiit nba tuu diar na cheera.

Ti waas kur yaata,

ki sɔɔ ji kaa ki saa ŋamm maa ti ŋei maŋi,

sɔɔ kaa ki saa lor ti mɔŋmii na.”

²¹Ki n jiin a, “Ti tɔɔndamm na tee jatite,

bi ki boi Yennu ŋmakitir po.

Ŋanne teen ki bi gbar, ki ti niib yat.

²²Gbiintir, maan baara,

ŋmatir be digbann nba be gaŋ po na ni bonchiann.

Li jab saa te ki Juda doi n kpant langbent,

ki mɔbɔie sii be leŋ.”

²³Yennu, n mi nan sɔɔ kaa ki dia u binbeŋ joontu yiikoo u nuu ni,

sɔɔ ki yen u mɔŋ manfoori.

²⁴Yennu, ŋmakitirit, ŋaan a daa mantik ton nanti,

koo ki dat ti tuba yoo nba ki a wutoor doo;

fi-i tun nna, ti saa boonte.

²⁵Ŋaant ki a wutoor-ii be digbana nba ki jiantira na,

nan niib nba yêta na paak.

Bi kpii timm nba tee a niib nae, ki biirit fas,

ki teen ti doi langbent.

Ki jiin Jeremaya nan mɔlor na po

¹Ki Yennu pakin a, ²“Gbiintir mɔlor na mɔmaan. Pakin Juda teeb nan Jerusalem teeb ³nan min Israel teeb Yomdaanɔ Yennu poor mɔpor biiuk ki teen wunba kur ki sak mɔlor na mɔmaan. ⁴Li mɔlore ki n din lor nan bi yeejamm, yoo nba ki n din nyinnib Ijipt tiŋ ni, siaminba din tee nan muu nba kaa kpeenu ki turib na. N pakib nan bin sak n mɔb ki tun linba kur ki n wannib. N pakib nan bi-i sak n mɔb, mine sii tee bi Yennu, ki bi tee n niib; ⁵ki n saa dia mɔsonn nba ki n senn ki tur bi yeejamm, nan n saa turib tiŋ nba kpai ki mɔk mɔkint, ki bi ji be leŋ mɔtana na.”

Ki n jiin a, “Yennu, lii tee nna.”

⁶Ŋanne ki Yennu pakin a, “Saant Juda doi ni, nan Jerusalem sɔnjot ni. A mɔɔnt n maan leŋ, ki pak niib na ki bin gbiint mɔlor na mɔmaan ki sakir. ⁷Maa din nyinn bi yeejamm Ijipt tiŋ ni, n din kpaanib nan bin sak n mɔb. N bia tukin kpaanib nnae nan dinna. ⁸Ŋaan bi ki gbiint koo ki saki. Sɔɔ kur tukin ki tee tubkangbatire nan biit daanɔ, nan baa din tee na. N sennib nan bii dia mɔlor na, ŋaan bi yêta. Ŋanne ki n dat bi tuba nan mɔlor na nba wann na.”

⁹Ki Yennu bia pakin a, “Juda teeb nan Jerusalem teeb lorin lorbiite ki jiin n po. ¹⁰Bi ŋmat bi yeejamm toonbiit niwa; bi yeejamm maŋ din yêt linba ki n wannib na tumue, ŋaan jiantir yenlia. Israel teeb nan Juda teeb biir mɔlor nba ki n lor nan bi yeejamm nawa. ¹¹Li paak, min Yennu kpaanib nan n saa baar nan biiru bi paak, ki bi kan fit nyi leŋi. Ki bi-i yiinin ki loon sommir, n kan gbiint ki turibi. ¹²Ki Juda teeb nan Jerusalem teeb saa saan tingbana nba ki bi mann maruŋ ki teemm na boor, ki boi sommir po. Ŋaan li tingbana kan fit sommib, yoo nba ki biiru na baari. ¹³Juda niib tingbana yab nan bi doi nba yab nae, ki Jerusalem niib maa maruŋ binbinta ki li kann yab nan bi doo ni sɔnii kann nba yab na, ki mann maruŋ ki teen bi tingbanbiiuk Baal. ¹⁴Jeremaya, daa mein koo ki barimin niib na paaki. Bi-i be daamii ni yoo nba, ki yiinin ki loon sommir, n kan gbiint turibi.”

¹⁵Ki Yennu bia yet a, “Niib nba ki n loomm na tuun biite. Bi mɔk yiikolannpoe ki sii be n ŋasaakak na ni? Bi dukii bi-i senn mɔsona, ki mann bonkobit maruŋ, li saa fit gɔɔr biaka-a? Linba na saa maŋ bi parawa? ¹⁶N tuu yib kpan tiinii nba mɔk faate, ki gbee nan lɔɔnŋana, ŋaan fuut nba tee nan satianii na niŋe ki n saa joo li tituut muu, ki gbat li yiinii.

¹⁷“Min Yabint Yennu-e bur Israel nan Juda, ŋaan mɔtana n dia biake ki kpaanib. Ŋamme baar nan linba na bi mɔŋ paak, kimaan baa tun biit na. Bi donn n wutoore nan baa mann maruŋ ki tur tingbann Baal na.”

Lorbiiuk nba jiin Jeremaya manfoor po

¹⁸Ki Yennu pakin ki jiin lorbiit nba ki n datai lorin ki jiin n po na. ¹⁹Ki n tee nan pegann nba ki bi saa nanɔ a bin kɔtɔ na, ŋaan ki n ki mi nan n paake ki bi lorin lorbiiuk na ki yeen a, “Ŋaant ki ti chɔɔ tiik na nan u lɔɔna ki lu. Ŋaant tin kpiu, ki sɔɔ ji daa mi tian u po.”

²⁰Ŋanne ki n miar Yennu a, “Yabint Yennu, a tee barmɔnpakirɔe, ki bikii niib yan nan bi binbeŋ. N jii n maan ki teen a nuu nie. Li paak, ŋaant ki man la a wutoor niib na paak.”

²¹Anatof teeb loon bin kpime, ki pakin nan bi saa kpin, li-i tee ki n tukin ki mɔɔntir Yennu maan na. ²²Ŋanne ki Yabint Yennu yet a, “N saa dat bi tubira. Bi naasimm saa kpo tɔb nie, ki bi waas n kpo kon. ²³N senn yooe ki saa baar nan biak Anatof niib paak. Li yoo-i baar, nan bi yenɔkɔɔwa kan tinni.”

Ki jiin Jeremaya buboit po

¹Yennu, min nan fin-i yaa ti bu, fine sii mɔk mɔnii.

Ŋaan n saa boia buboit ki jiin barmɔnii maan powa.

Bee teen ki yanbɔndamm mɔkitiri?

Bee ki ŋmabir damm paakiti?

²A buribe, ki bi baa jiina, ki kpaatir, ki loon lɔɔna.

Yoo kur bi piak fanue ki jiint a po, ŋaan bi baka kaa a po.

³Ŋaan Yennu, a min, ki laat maa tuun linba

nan maa loona biaŋinba.

Berin niib na, ki bin tut saan nan pei na ki bin kpib.

Ii guub nan yoo nba tan saa jaŋ nan bin kpib.

⁴Li saa wei nlee ki ti tiŋ bia daa tee tinkooŋ,

ki siar kur boor mɔɔt n koori?

Bonkobit nan nɔɔnii kpenne, kimaan ti niib toonbiit paak,

niib nba yeen a, “Yennu ki laat linba ki ti tuun na.”

⁵Yennu yet a, “Jeremaya, li-i tee ki a bak

nan fan poo nantaar poot nan niibi,

a saa teen nlee ki poo nan taanii?

Li-i tee ki a kan fit set paanu ni,

a saa teen nlee ki set Jɔɔdann mɔkir fɔɔr ni?

⁶A tiɔŋ ninjamm nba nyii a ŋaak ni na kɔɔtawa,

ki taan nileeb po ki wora.

Baa lek piak nan mɔmant na, ŋaan a daa teeb yada.”

Ki jiin Yennu yanyêtuk po

⁷Ki Yennu yet a, “N nyɔr nyik Israel teeba,

n yêt n nigannkab nawa.

N jii niib nba ki n loomm na, ki kubin bi datai nuu niwa.

⁸N nigannkab na kɔn nanime.

Bi gaan jate n paak nan yanbɔr be fɔɔr ni na, ki n yan yêtib.

⁹N nigannkab na tee nan nɔɔŋ nba ki kanbiat worɔ

lokir kur po nae.

Yiint muuk ni bonkobit ki bin baar tan di jaamm.

¹⁰Digbangana yent damm bonchiann biir n daan tiinii kpaaba,

bi ŋmaa n kpaant ki biirir,

ki kpint n tinŋaŋ na ki teenir kunkoouk.

¹¹Bi teenir kankoonne ki li dɔɔ yann n boor ni.

Tiŋ na kur kpant kunkoouko ŋaan ki sɔɔ ki fiin li po.

¹²Jab saan tiŋ na kur poe a bin fat bona.

N tun tɔbo a lin biir tiŋ na kur, ki sɔɔ kii be u yamani.

¹³N niib buur diie, ŋaan jaan mɔɔt.

Bi tun nan bi paŋ, ŋaan bi ki la siari.

N wutochiɔŋo te ki bi jeet ŋakit.”

Ki jiin Yennu mɔsonn po

¹⁴Ki Yennu yet a, “N mɔk siar ki saa pak tur Israel teeb kɔɔnanleeb nba biir tiŋ nba ki n tur n niib Israel teeb maŋ na. N saa nyinn nibiit maŋ bi tinii ni, nan baa tuu ŋabir bonbuburit nae, ki fat Juda teeb bi nii ni. ¹⁵Ŋaan mi-i yaat namm, li poor po, n saa tinib ninbaauk. N saa jen nan nibooru kur bi tiɔŋ tiŋ ni, nan bi tiɔŋ digbann ni. ¹⁶Li-i tee ki bi saa gaar n niib jiantu nan bi par kur, ki por a, ‘Nan Yennu nba be na,’ nan baa din tumii n niib a bii poor tingbann Baal sann ni biaŋinba na, bi saa pukin n niib po, ki sii mɔkitir. ¹⁷Ŋaan li-i tee ki digbansiar kan sak n mɔb, ŋann ŋarin n saa ŋabirɔe ki biirɔ fas fas. Min Yennu-e pak na.”

Ki jiin chabŋann kurtajinn po

¹Ki Yennu yetin a n saan ki daa chabŋann kurtajinn ki yoo, a ŋaan n daa sikintir nyun ni. ²Ki n daa ki yoo. ³Ki Yennu ŋamm pak nanin, ki yet a, ⁴“Saant Yufrates mɔkir boor ki saa bɔr kurtajinn na fɔru ni, tana ni.” ⁵Ki n saan bɔrir, Yufrates mɔkir boor.

⁶Li din weiwa, ki Yennu tan pakin a n ŋmat Yufrates mɔkir boor ki saa jii kurtajinn na. ⁷Ki n ŋmat saan. Maa baar leŋ ki lar, ki sɔɔ ki li biira, ki ji ki ŋani.

⁸Ki Yennu ŋamm pak nanin a, ⁹“Nnae ki n saa biir Juda parbifaant na, nan Jerusalem parbifaachiɔŋ na. ¹⁰Ŋamm biit damm na yêt bin sak n mɔbe. Bi yɔɔ tee tubkangbata nan biit damme, ki jiantir tingbana. Li paak, bi tan sii tee nan kurtajinn na nba kaa nyɔɔt nae. ¹¹Kurtajinn nba tuu jaŋ siak ni ki dia biaŋinba na, n bo loon Juda nan Israel niib kur-ii dian nnae chinchin. N tun nnae, a bii tee n niib ki baar nan baakir nan dontir ki turin, ŋaan ki bi yêt n mɔb.”

Ki jiin dasɔɔr po

¹²Ki Israel teeb Yomdaanɔ Yennu pakin a, “Jeremaya, pakin Israel niib nan dasɔɔr kur tee lin gbee nan tilɔɔna daame. Bi saa jiin a bi mi nan dasɔɔr kur tee lin gbee nan daame. ¹³Li poor po, fan pakib nan min Yennu loon man gboon tiŋ na ni nirɔ kur daame nan baa tan saa yib, li kpanbara nba tee Defid yaaboona na, nan mannteeb, nan n sɔkiniinba, nan Jerusalem niib kur. ¹⁴Li poor po, n saa butib nan soa nba tuu lia leer na, saakab nan waas kur yomm. Ninbaauk koo ninkpabauŋ kan fit te man nyik bi kpinu.”

Biaŋinba ki Jeremaya yakii ki jiin dont-n-mɔŋ po

¹⁵Israel teeb, Yennu paka, ii sikin i mɔŋ ki gbiint u maan.

¹⁶Ii baakit i Yomdaanɔ Yennu

yoo nba ki u daa ki baar nan bunbɔnn

nba saa te yin gbiat kunkona ni na,

ki sɔɔ ki u daa ki kpint yentu nba ki i daan na,

ki teenir bunbɔnchiɔŋu.

¹⁷Li-i tee ki i kan gbiint, n saa bɔr buiwa,

kimaan i yuwannu paak.

N saa bui bonchiann, ki n ninnyuut tan sii puube,

kimaan baa yaat nan Yennu niib ki teemm yommii na paak.

¹⁸Ki Yennu pakin a, “Pakin kpanbar na nan u naa, ki bin fiir bi naangbant paak ki sik tiŋ ni, kimaan bi naan fokirii nba fan bonchiann na yit baawa. ¹⁹Doi nba be Juda diitu po na, bi ŋaa loonira, ki sɔɔ ji kan fit nakin bi boor. Bi soor Juda niib kur, ki saan namm yommisimewa.”

²⁰Jerusalem, gotir. A dataie nyii gaŋ po ki siik na. Niib nba ki bi teenib a nuu ni na be lia? A niib nba ki a dont a mɔŋ bi paak na be lia? ²¹A saa pak a bee, li-i tee ki niib nba ki a dukii a bi tee a yɔɔsnba na tan kɔn nyanna, ki dia-ani? Li sii yiara nan poo nba tuu yaa wun mar nae. ²²Li-i tee ki a boi linba paak ki na kur tun ki tura, ki bi muka ki liat a tiati, li tee a toonbiit nba yabit paak nii nae. ²³Nibɔŋ saa fit lebit u gbananta-a? koo naamuuk saa fit boon u pɔriuwa-a? Li-i tee ki bi saa fit tun nna, ŋann ŋarin, fin nba ki tuun siar ki pukin toonbiit po na bo saa fit tumii ŋant tumuwa. ²⁴Yennu saa yata nan mɔɔt nba ki wonfufuk tuu pebirir nae. ²⁵U yet nan a joontu sii tee nnae. Waa lor wun teena biaŋinbae na, kimaan a tamm u poe, ki waa tingbana. ²⁶Yennu tiɔŋo saa liat a tiat ki senna yann, ki a di fei. ²⁷U la-a ki a tuun linba tee u kɔɔr. U la-a ki a jiantir tingbana, kunkona paak nan kpaant ni, nan jɔɔ nba tuu mɔk niɔŋ nan u lɔɔ ŋaapoo, koo nan taanjak nba tuu ŋakit tannaaŋ paak nae. Jerusalem teeb, i boonta. I saa ban teen kasiiwa-a?

Ki jiin yonkoonbiiuk po

¹Ki Yennu pak turin ki jiin yonkoonin po a,

²“Juda mɔ kpemɔniie, kimaan u doi kpenne,

ki u niib dɔɔ tiŋ ni nan yanyêtuk,

ki Jerusalem mɔ ki loon sommir.

³Mɔkita na tun bi daabae nyun po,

ki bi saan bunbuna boor,

ŋaan bi ki la nyun, ki ŋmat jen nan sɔkoona.

Bi yan ŋmate, ki bi ŋaa tama, ki bɔri bi numpo.

⁴Tiŋ koore, kimaan saak ki baa, ki kpaara para biir,

ki bi bɔrii bi numpo.

⁵Kɔnaaŋ nyɔr nyik u bike muuk ni, kimaan mɔɔt kaa.

⁶Bɔnii see kunkona paake, ki foi ŋabitir nan mɔbɔi na,

ki bi ninbina diŋ, kimaan bi ki laat jeeti.

⁷N niib bui ki fabin turin a,

‘Yennu, ti para ni beerit nan ti biira,

ŋaan a sommit nan faa senn mɔsonn na.

Ti nyika ki li wei bonchiann, ti tun biirawa.

⁸Israel teeb yada kur gaa a paake, fine nyinnit biak ni.

Bee ki a tee nan saamɔ na ti tiŋ ni?

Bee ki a tee nan sinsommtɔɔ nba tuu dɔɔr nyɔyemmir na?

⁹Bee ki a tee nan jɔɔ nba ki bi kpirɔ na?

Bee ki a tee nan kunkɔnkɔnnɔ nba kaa yiikoo

ki saa tinn nirɔ na?

Yennu, a setik be nant, ti tee a niibe. Daa nyikititi.’ ”

¹⁰Ki Yennu pak ki jiin niib na po a, “Bi lon n boor ni yaatu bonchiann, ki bia ki fit dia bi mɔŋi. Li paak, n par ki mei bi paaki. N saa tiar biit nba ki bi tun na, ki dat bi tubawa.”

¹¹Ki Yennu pakin a, “Daa piakin nan man somm niib na. ¹²Bi-i lekii lor mɔi, ŋaan n kan gbiint bi mɔnii nba jiin sommir po na, ki bi-i lekii mann mujoonu piinii, nan jeet piinii maruŋ ki turin, ŋaan n par kan maŋ bi paak. N saa kpib tɔbii nan kon nan yiarii nie.”

¹³Ŋanne ki n yet a, “Yabint Yennu, a mi nan a sɔkiniinba na yeen niib na nan tɔb koo kon sii kaa, a kimaan a sat mɔb nan parmaasir sii be ti tiŋ paak.”

¹⁴Ŋaan ki Yennu jiin a, “Sɔkiniinba na fae n sann ni; n ki tumm, koo ki turib mɔb, koo ki pakib siari. Baa laat linba ki piak na ki nyii n boor kaa, bi buntaa na tee bon-yana nba ki bi dukine. ¹⁵Min Yennu-e beera maa saa tun linba ki tur sɔkiniinba nba ki n ki tumm, ŋaan ki bi piak n sann ni, ki yeen a tɔb nan kon kan baar tiŋ na paak na. N saa kpib tɔb nan kon nie. ¹⁶Binba ki bi pak maan na ki turib na mun bia saa kpo li sɔnu nie. Ki bi saa lu bi gbanant Jerusalem sɔnjot ni, ki sɔɔ sii kaa ki saa piibi. Linba na saa tun ki tur bi kur nan bi poob nan bi bonjai nan bi bonpoi. N saa te ki bin pa bi toonbiit paaka.”

¹⁷Ki Yennu wannin a n pak tur niib na ki jiin n parbiir po ki yet a,

“N ninnyuut-ii luun yonnu nan nyiɔk.

N kan nyik mɔnii, kimaan n niib la daŋ bonchiann ki li gbatiba.

¹⁸Mi-i kɔɔ muuk, n tuu la jab nba ki bi kpiib tɔb ni na gbanante,

ki mi-i saan doi ni, man la ki niib kpenn kon.

Yennu sɔkiniinba nan mannteeb na tuun toona,

ŋaan bi ki mi baa tuun linba.”

Ki jiin niib na baruŋ po

¹⁹Yennu, a set yêt Juda-e fabi-i? A ki loon Sayɔnn niibe-e?

Bee ki a turit daŋ nba yab ki ti kan la laafia?

Ti loon parmaasire, ŋaan bonŋansiar ki tuuni,

ki ti loon laafia, ŋaan ki woribuk baar.

²⁰Yennu, ti tun biirawa.

Ti fiit ti tiɔŋ biit nan ti yeejamm biita.

²¹Tiat a mɔsonn na po, ki daa yêenti.

A daa baat nan fei Jerusalem nba ki a naangbouŋ be na paaki.

A daa porii mɔlor nba ki a lor nant na.

²²Tingbana na sɔɔ kaa ki saa fit tur saaki.

Sanpaak mɔŋ kan fit te saak n baa.

Ti teen ti dindann fin ti Yomdaanɔ Yennu nie,

kimaan fine tuun linba na kura.

Ki jiin Juda niib boontu po

¹Ki Yennu pak turin a, “Li-i lekii bo tee Moses nan Samuel see nna ki bo fabin nanin, ŋaan n bo kan tin niib na ninbaauku. A te ki bin seet nna. ²Li-i tee ki bi boia baa saa yaat saan sian, fan pakib a min Yennu yet a:

Yiariie saa kpi siab; bi sinsaanboore na.

Ki siab mun saa kpo tɔb nie; bi sinsaanboore na.

Ki siab mun, kome saa kpib; bi sinsaanboore na.

Ki siab mun tee bin sooribe ki yaat namm ki teemm yommii,

bi sinsaanboore na mun.

³Min Yennu-e lor nan bontona ŋanna n tun ki turib. Bi saa kpib tɔbii ni, ki bɔi saa pat bi gbanant, ki nɔɔnii saa dir, ki muuk ni bonkobit saa ŋman linba biar na. ⁴N saa te ki niib kur yan n put bi paak, kimaan Hesekia bija Manase nba tun linba Jerusalem, yoo nba ki u din tee Juda kpanbar na.”

⁵Ki Yennu yet a,

“Ŋmee saa tin yimm Jerusalem teeb ninbaauku?

Ŋmee ki li saa daamii-ɔ i paaki? Ŋmee saa set ki boi i po?

⁶Yimm niib na yêtima, ki ŋmant i poor ki turin,

ŋanne ki n tant n nuu ki faa mati,

kimaan n soor n mɔŋ ki tan baka.

⁷Tiŋ na doo kur ni, n lui nan mɔɔt nae ki tur wouŋ.

N biir yimm n niibe ki kpii i waas,

kimaan yaa ki nyik i yanbɔntoona na paak.

⁸Pakɔi yab i tiŋ ni ki gar mɔkgbeŋir paak tanbiiniiwa.

N kpii i naasimm bi paant nie, ki dinn bi naanba biak.

N lekib nan biake nan biiru.

⁹Poo nba ki u waas banlore kpo na fibe, ki gbaa nan foon.

Yentu nba ki u tuu be leŋ na kpant bunbɔnna,

u dii fei-e, ki li yiarɔ.

N saa te ki i datai n kpi yimm nba daa biar fo na.

Min Yennu-e pak na.”

Ki jiin Jeremaya bunburimii po

¹⁰N tee jɔɔ nba be nan parbiire. Bee ki n naa din marimi? Li tee man kɔn ki bia nɔi nan sɔɔ kure, tiŋ na ni. N ki kpent likirii sɔɔ boor, ki sɔɔ mun bia ki kpent likirii n boori, ŋaan sɔɔ kur porintirin mɔporae. ¹¹Yennu, li-i tee ki n ki tun a toonn fanu, koo li-i tee ki n ki set n datai taar ni ki fabin nana, yoo nba ki bi bo be biak nan wahala ni na, fan ŋaan ki bi mɔpora maŋ n mann mɔnii. ¹²Sɔɔ kaa ki saa fit kɔnn kut, mantik kut nba nyii gaŋ po ki bi ŋmat kutmɔnt li ni na.

¹³Ki Yennu pakin a, “N saa tun datai ki bin jii n niib gor nan bi mɔkint, ki lin dat bi tuba, kimaan bi biit nba ki bi tun tiŋ na kur po na paak. ¹⁴N saa te ki bin teen daaba ki tur bi datai, tiŋ nba ki bi ki mi na ni, kimaan n wutoor di nan muu nae, ki kaa kpeenu.”

¹⁵Ŋanne ki n pak a, “Yennu, a mɔk bannu. Tiat n po ki sommin. Datir binba tun bonbiir ki turin na tuba. Daa mantik mɔk sukuru namm, ki bi saa la yaak ki kpin. Tiat nan a paake ki bi sukiin. ¹⁶A pak nanime, ki n gbiint mɔbonn kur. Yabint Yennu nba tee yiikoo daanɔ, n tee a yɔɔe, a mɔmaame gbeen n par nan kpinkpammuk nan parpeenn. ¹⁷N ki be nan nileeb ki laa, ki n par mei. N sak a mɔbe, ki be n kɔɔ, ki n wutoor doo bi biit paak. ¹⁸Bee ki n sii yɔɔ di biaki? Bee ki n daŋ ki mɔk tebuku? Bee ki li kan buuri? A lor fan dinnin fei nan kpenu nba tuu fɔɔr tuntonn biaŋinba nae-e?”

¹⁹Ki Yennu jiin a, “Li-i tee ki a jen, n saa gaarae, ki a ŋamm teen n toontunnɔ. Li-i tee ki a nyik baryana, ŋaan mɔɔnt n maan nba kpaa talas, a saa ŋamm teen n sɔkiniie. Niib nae saa jen a boor, ki li ji kii tee fan saan bi boor kaa. ²⁰N saa teena nan kutmɔnt maar nba mɔk paŋ nae bi boor. Bi saa kɔn nana, ŋaan kan nyanna. N sii be nana, ki saa guura, ki dia-a fanu. ²¹N saa nyinna nɔɔnbiit nan kpikpiruk damm nuu ni. Min Yennu-e pak na.”

Linba ki Yennu loon Jeremaya-ii tuun

¹Yennu din ŋamm pak nan min Jeremaya a, ²“Daa kɔɔnt poo ki maar waas nna na. ³N saa wanna linba saa tun ki tur waas nba ki bi marib nna na, nan bi damm. ⁴Yiarbiiuko saa kpib, ki sɔɔ kan mɔ bi kpemɔnii, koo ki piibi. Bi gbanant sii poo nan mɔba nae tiŋ ni. Bi saa kpib tɔbii nie, koo bin kpo kon, ki bi gbanant sii tee jeet ki tur nɔɔnii nan muuk ni bonkobit.

⁵“Ii mi ki a kɔɔ ŋaak nba ni ki kuun kpo ki bi fabin. A daa fabin sɔɔ paak. N kan teen piisin n niib paak ki turib parmaasir, koo ki timm ninbaauk, koo kii mɔk lomm nammi. ⁶Mɔkita nan nandamm na kur saa kpo tiŋ na niŋe, ŋaan sɔɔ kan piib, koo ki mɔ bi kpemɔnii, koo ki ŋmaar u mɔŋ, koo ki koor u yut a wun wann u parbiiri. ⁷Sɔɔ kan di koo ki nyu nan daanɔ nba ki u nikpiimɔ kpo, a wun maan u pari. Sɔɔ kan joi u lɔɔ, li-i lekii tee wunba ki u baa koo ki u naa kpo.

⁸“A daa kɔɔ ŋaak nba ki niib di jaamm, a daa kaar namm ki di ki nyu. ⁹Gbiintir linba ki min Yabint Daanɔ Israel teeb Yennu yaa man pak. N saa te kpinkpammuk, nan parmaasir, nan poochianu jaamm parpeenn fuut na n ŋmin. Niib nba be nna sii be bi manfoor ni ki la linba na n tun.

¹⁰“Fi-i pakib linba na kur, bi saa boia linba paak ki n lor man dinnib biak na. Bi saa boia, a bi biir bee, koo bi tun bonbilanne ki tur bi Yomdaanɔ Yennu. ¹¹A pakib nan Yennu yet a, ‘I yeejamm din nyikime, ŋaan jiantir yenbis. Bi din nyɔr nyikime, ki ki sak n wannu. ¹²I mɔŋ tun bonbilankant nba gar i yeejamm yar paaka. I kur na tee tubkangbata nba tee biit damme, ki ki saak n mɔb. ¹³Li paak, n saa ber nyinni tiŋ na ni, ki kɔɔni tiŋ nba ki yimm koo i yeejamm ki ban mi li ni. Leŋe ki i saa jiant tingbana, yonnu nan nyiɔk, ki n kan tini ninbaauk.’ ”

Biaŋinba ki bi saa nyi digbana ki jen

¹⁴Ki Yennu yet a, “Yoo baate ki niib tan kan por n sann ni, a mine tee Yennu nba fo, ki nyinn Israel teeb Ijipt tiŋ ni na. ¹⁵Ŋaan bi sii poor n sann ni, a Yennu nba fo, ki nyinn Israel teeb gaŋ po tiŋ na ni, ki nyinnib digbanlia nba ki n din yat kɔɔmm na ni. N saa jen namm bi tiɔŋ digbann ni, tiŋ nba ki n tur bi yeejamm na ni. Min Yennu-e pak na.”

Ki jiin tubdatu nba baat na po

¹⁶Ki Yennu yet a, “N yi jansoora bonchianne, maa bin baar ki tan soor niib na. Li poor po ki n saa tun yiin waarib bonchiann, ki bin baar tan lomm jɔɔt ni, nan kunkona paak, nan tanfiat ni. ¹⁷N laat linba kur ki bi tuun, siar ki bɔrmi, ki bi biit ki mir bot n tɔɔnn po. ¹⁸N saa te bin pa bi biit, nan bi tonu toona paak taar munlee-e, kimaan bi biir n tiŋ nan bi pata nba ki manfoor kaa bi ni, nan nirɔ nba tuu kpo ki manfoor kaa u gbanant ni nae, ki gbeen n tiŋ na nan tingbana.”

Ki jiin Jeremaya Yenmiaru po

¹⁹Yennu, fine guun ki teenin paŋ, a sommitin daamii yoo. Digbana saa nyi tingbouŋ na kpinii po ki baar a boor, ki yet a, “Ti yeejamm din ki mɔk siar ki pukin faak yennii, bi din ki mɔk siar ki pukin pata nba kaa nyɔɔt po. ²⁰Nisaarik saa fit nan u mɔŋ yenniiwa-a? Aaii. Wu-u tun nna, bi ki tee yenmɔnii kaa.”

²¹Ki Yennu jiin a, “Li paak, n saa te nisaarii n bann n yiikoo nan n paŋ yomm kɔɔe, ki bann nan mine tee Yennu.”

Ki jiin Juda niib biit nan bi tubdatu po

¹Yennu yet a, “Yimm Juda teeb, bi jii kut makmɔɔnue ki sɔb i biit, ki jii tanchincheenn ki sɔbir i para ni, nan i maruŋ binbinta lɔtii ni. ²I niib jiantir tingbana, maruŋ binbinta boae, ki bia jiantir chicherpook Asera ninnant na, timaatik kur nyakir, nan kunkonn kur paak, ³nan jɔɔt nba be tiŋ na ni paak. N saa te ki i datai n jii i mɔkint nan i faar kur ki yaat nann, kimaan biit nba ki i tun i tiŋ na kur po na paak. ⁴Li tee yin nyi tiŋ nba ki n turi na nie, ki n saa te yii tee daaba ki tur i datai, tiŋ nba ki i ki mi na ni, kimaan n wutoor di nan muu nae, ki kan ban kpeeni.”

Ki jiin mɔmaan booru booru po

⁵Ki Yennu yet a,

“N saa biir daansɔɔ nba ŋmant u poor ki turin,

ŋaan maa nirɔ paak, ki u yada be nisaarik paŋ ni na.

⁶Li nibooru tee nan tituuk nba pia kunkoouk paak,

siaminba ki siar ki kpaatir nae.

Bonŋansiar ki baat li nibooru boori.

⁷“Ŋaan n saa teen piisin wunba jii u dindann

ki teen n ni na paake.

⁸Li daanɔ tee nan tiik nba pia kpengbiɔŋ,

ki tantir u jiina sikint nyun ni nae.

Li tiik ki tiin jaŋmaanii, yoo nba ki tiŋ kooti,

kimaan u faat mei-e.

Saak-i kii baa, ŋaan li ki tonɔ; u loon lɔɔnae yoo kur.

⁹“Ŋmee saa fit bann nisaarik par ni?

Li mɔk kpinkpannii ki gar bont kur,

ki li baatuk na yabit gar nan lin la tebuwa.

¹⁰Min Yennu-e gorii nirɔ par ni, ki bikii nirɔ yan.

N pa nirɔ kur nan u binbeŋ nba tee biaŋinbae,

nan waa tuun linba.”

¹¹Daanɔ nba ŋmab likirii ki mɔkit

tee nan korik nba wakin jena nba ki u ki ŋaa nae.

U manfoor benu ni, see ki u mɔkint na tan boont,

ki li joontu ni, u tan sii tee jatuko.

¹²Ti Yenjiantu ŋasaakak na tee nan naangbant

nba mɔk baakir nae,

ki tɔɔ kunkonfoouk paak pinpiik niwa.

¹³Yennu, fine tee Israel teeb dindann,

binba yêta na kur saa di feiwa.

Bi saa bot nan baa tuu sɔb sana tanbiinii ni nae,

kimaan bi yêt fin Yennu

nba tee bunbunn nba teen nyunŋanin nawa.

Ki jiin Yennu sommir po

¹⁴Yennu, tebimin, ki n saa la laafia fanu; tintin, ki n sii be n yamani fanu. N dontir fine.

¹⁵Niib na piak ki teenin a, “Yennu nba daan kɔɔntit jaŋmaanii nba na be lia? Ŋaant wun tun li bona mɔtana.”

¹⁶Ŋaan Yennu, n ki yet maa a baar nan biak bi paak, n ki ban sun ki daamii n baaribi. Yennu, a mi linba na, a mi maa pak linba. ¹⁷A daa te ki n tiin jaŋmaanii, kimaan daamii-i baar, n tuu gur a boore. ¹⁸Yennu, baat nan fei binba mukisin na paak, ŋaan te ki n daa di fei. Gbeentib nan jaŋmaanchiɔŋ, ŋaan daa te ki n tiin jaŋmaanii. Baat nan biak bi paak, ki but butib.

Ki jiin foon daar na po

¹⁹Ki Yennu yetin a, “Jeremaya, saant ki saa mɔɔnt n maan, Niib Tammɔb na ni, siaminba ki Juda kpanbara kɔɔ ki bia nyi na. Li poor po, fan saan tammɔlia nba be Jerusalem na boa. ²⁰A pak kpanbara na, nan Juda niib kur, nan binba be Jerusalem ki kɔɔ tammɔi na kur, ki bin gbiint maa piak linba. ²¹A pakib nan li-i tee ki bi loon bi manfoa, bi daa jikin jiksiar foon daar na ni, bi daa jikin siar ki kɔɔ Jerusalem tammɔi ni, ²²koo ki jii siar bi ŋei ni ki nyi nann foon daari. Bi daa tuun toonn foon daar na, li tee bin diar ki li-i tee kasiie, nan maa senn bi yeejamm biaŋinba na. ²³Bi yeejamm din ki gbiint ki turin, ki bi baka bia din kaa n po. Bi din teen tubkangbatae, ki ki sak n mɔb, koo ki tumii siar n boori.

²⁴“A pak niib na nan li kpaa talas ki bin sak n sennu na kur. Bi daa jikin jikir ki gaar doo na tammɔi ni foon daar. Li tee bin dia foon daar nae, ki lii tee kasii, ki daa tuun siar li daar ni. ²⁵Ŋanne ki bi kpanbara nan saakab tuu saa kɔɔ Jerusalem tammɔi na, kii mɔk naan yiikoo nba ki Defid din mɔk na. Ki ŋamm nan Juda teeb nan Jerusalem teeb saa jak taantorit nan taanii, ki Jerusalem doo sii yɔɔ gbee nan niib. ²⁶Niib saa nyi Juda doi ni, nan Jerusalem digbanbis nba kook na ni, ki saa nyi Benjaminn yent ni, nan kunkonbis ni, nan kunkona paak, nan Juda yent diitu po, ki baar. Bi saa baar nan mujoonu piinii, nan marint, nan jeet piinii, nan bonnunubit, nan niipoturu piinii, n jiantu ŋasaakak ni. ²⁷Ŋaan li kpaa talas bin sak n mɔb, ki dia foon daar na, ki lii tee kasii daar. Bi daa jikin jiksiar ki gaar Jerusalem tammɔi na ni li daar, kimaan bi-i tun nna, n saa joo Jerusalem tammɔi na muuwa, ki muu saa di Jerusalem kpanbara ŋei, ki sɔɔ kaa ki saa kpeen muu maŋi.”

Biaŋinba ki Jeremaya saan yɔkmaarɔ ŋaak

¹Ki Yennu pak min Jeremaya a, ²“Saant yɔkmaarɔ na ŋaak, ki n saa tura n maan leŋ.” ³Ki n saan ki saa la ki yɔkmaarɔ na maa yɔk. ⁴Li-i tee ki bobsiar ki ŋan, u tuu yeere ki ŋamm maa.

⁵Ŋanne ki Yennu pakin a, ⁶“N ki mɔk yaak ki saa teen yimm Israel teeb nan yɔkmaarɔ na nba tee u yɔk biaŋinba na-a? I be n nuu nie nan yɔk nba be yɔkmaarɔ nuu ni na. ⁷Yoo nba ki n yet nan n saa ŋabir ki yeer, koo ki biir digbann nba, koo naan yent nba, ⁸ŋaan ki li digbann ŋmat jen n boor ki nyik biit tumu, n ji kan tun linba ki n bo yaa n tun na. ⁹Li mun bia tee nnae, li-i tee ki n yet nan n saa bur, koo ki maa digbann, koo naan yent nba, ¹⁰ŋaan ki li digbann yêt n mɔb ki tuun biit, n ji kan tun linba ki n bo yaa n tun na. ¹¹Tɔn, pakin Juda teeb nan Jerusalem teeb nan n lorin lorbiite ki jiint bi po, ki tee siir ki saa dat bi tuba. Pakimm ki bin nyik bi yanbɔnbinbeŋ na, ki lebit bi benu nan bi marima. ¹²Ŋaan bi saa jiin a, ‘Aaii. Bee ki ti saa lebit ti binbeŋi? Ti sii yɔɔ tee tubkangbata nan biit damm, taa loon biaŋinbae.’ ”

Biaŋinba ki niib na yêt Yennu

¹³Ki Yennu yet a,

“Boin digbann kur ki laan linba na booru ban tumewa.

Israel teeb tun bonbilankanta.”

¹⁴Lebanonn jɔfɔkit ban nak marin baanuwa-a?

Li jɔɔt ni kpenii na ban fɔɔra-a?

¹⁵Ŋaan n niib tamm n powa,

ki jokit bonnunubit ki teen tingbana.

Bi gbiatire sɔnu nba tee bin tɔkin na ni,

bi ji ki waa sɔnkperii na, ŋaan tɔkii sɔnbukii.

¹⁶Bi tunn tiŋ na ki teenir woribuk boore,

a bii yɔɔ kii yisimir yoo kur.

Wunba kur gar leŋ, u gbanu saa jek,

kimaan waa saa la linba na paak.

Li saa bakitib, ki bi saa pak bi yura.

¹⁷N saa yat n niib bi datai tɔɔnn,

nan wonfufuk nba tuu yat tant na.

N saa ŋmant n poor ki turib,

ki biiru-i baarib yoo nba, n kan sommibi.

Lorbiiuk nba jiin Jeremaya po

¹⁸Ŋanne ki niib na yet a, “Ŋaant man ki tin tun siar ki jiin Jeremaya po. Mannteeb sii yɔɔ be-e ki teenit tumiiu, ki subindamm yɔɔ be ki teenit kpaanii, ki Yennu sɔkiniinba yɔɔ be ki mɔɔntir Yennu maan. Ŋaant ki tin paanɔ maan, ki bia nyik waa piak linba na gbiintu.”

¹⁹Ŋanne ki n miar Yennu a, “Yennu, gbatir linba ki n piak na, ki gbiint linba ki n datai piak ki jiin n po na. ²⁰Biite tee ŋamm nyɔɔti-i? Ŋaan bi gbiir bootuko a man baa leŋ. Tiat biaŋinba ki n baar a boor ki pak sommib, nan a daa diab nan wutoori. ²¹Yennu, ŋaant bi waas n kpo kon, ŋaant ki bin kpo tɔbii ni, ŋaant ki bi poob n kɔŋ bi sɔrib nan bi waas, ŋaant yiarii n kpi jab na, ki naasimm na n kpo tɔbii ni. ²²Tumin biirteeb ki bin biir bi ŋei, yoo nba ki bi ki mi li po, ki bin bui nan jaŋmaanii. Bi gbiir bootuko a man baa leŋ, ki pii baruk a lin soorin. ²³Ŋaan fin Yennu mi bi lorbiit nba ki bi lorin a bin kpin na po. A daa chabin bi yanbɔmm, koo ki nyikin bi biit na. A te ki bi datai n nyannib, ki bin di biak, a wutoor ni.”

Ki jiin buuk nba yeer po

¹Ki Yennu pakin a n saan daa buuk, ki bia pakin a n nyinn niib na saakasiab, nan mannteeb nba tee nikpera na siab, ²ki saan gar nyi Sipiar Tammɔb na ni, ki saan Hinom baauk na ni. Leŋe ki n saa mɔɔnt maan nba ki u saa turin na. ³U bia pakin a n yet a, “Juda kpanbara nan Jerusalem teeb, gbiintir linba ki min Yabint Daanɔ nba tee Israel teeb Yennu loon man pak turi. N yaa man baar nan biake nna, ki wunba kur gbat li po, li saa jek u gbanu. ⁴N yaa man tun nae, kimaan niib na nyɔr nyikime, ki kɔɔn nna jakint nan baa mann maruŋ nna ki teen tingbana nba ki ŋamm koo bi yeejamm, koo Juda kpanbara din ki mi siar jiin bi po na. Bi gbeen nna nan nikaat sɔme, ⁵ki maa maruŋ binbinta ki tur tingbann Baal, a bii jokit bi waas muu, ki lii tee maruŋ. N ki ban wannib nan bin tun nna, li poŋ ki ban baar n yan ni kaawa. ⁶Li paak, yoo baat ki bi tan kii yi nna Tofef koo Hinom baauku, ŋaan bi tan sii yir Nikpinu baauko. ⁷Nna nae ki n saa ŋmat Juda teeb nan Jerusalem teeb lora kur. N saa te ki bi datai n la nyannu bi paak, ki kpib tɔbii ni. N saa jii bi gbanant ki tur nɔɔnii nan muuk ni bonkobit, ki li tee bi jeet. ⁸N saa baar nan biak nba bi bonchiann doo na paak, ki wunba kur gaar, u gbanu saa jek, ki lin yaar litɔ. ⁹Datai saa ŋaa loon ki yiab a bin kpi li niib na. Tɔb na sii bi bonchiann, ki binba be doo na nɔɔk ni saa ŋman bi leeb, ki bia ŋman bi tiɔŋ waas.”

¹⁰Ki Yennu pakin a man yeer buuk na, jab nba wei n poor po na numm ni, ¹¹ŋaan yetib nan Yabint Yennu yet a, “N saa biir niib na nan doo na, ki lii tee nan yɔk buuk nba ki n yeer, ki li kan fit jiin taan ki mubin nae. Bi sii pii niib Tofef-e, nan yiar nba tan sii kaa nan piinu. ¹²N senn mɔsonn nan n saa teen doo na nan li niib nan maa teen Tofef biaŋinba nae. ¹³Jerusalem ŋei, nan Juda kpanbara ŋei, nan ŋei nba ki bi jokit bonnunubit li yura paak19.13 Bi ŋei yura paak, bi din tuu sere. ki teen ŋmaabira, ki mɔ daan, ki li tee piinii ki teen yenbis na, sii tee jakint nan Tofef nae.”

¹⁴Li poor po ki n nyii Tofef, siaminba ki Yennu tumin a man mɔɔnt u maan na, ki saan set Yenjiantu ŋasaakak dindouŋ ni, ŋaan pak niib na kur, ¹⁵nan Yabint Daanɔ nba tee Israel teeb Yennu na yet a, “N yaa man baar nan tubdatu nba ki n yet nae doo na paak, nan doi nba kpia kur paak, kimaan i tee tubkangbatae ki ki saak gbiintir linba ki n piaki.”

Ki jiin Jeremaya nan manntɔɔ Pasur kɔnn po

¹Ki manntɔɔ Pasur, wunba tee Imer bija, ki din tee Yenjiantu ŋasaakak yudaanɔ na nba gbat ki n mɔɔntir maan na, ²ki u te bi soorin ki boon, ki baanin bant, ki birin kpian Yenjiantu ŋasaakak na, Benjaminn tammɔb nba be paapo na boor. ³Laa fant sanyiɔk ki Pasur te ki bi baatin yoo nba ki n pak turɔ a, “Yennu ki pur a sann Pasur kaa. Sann nba ki u tura tee, ‘Jaŋmaanchiɔŋ siar kur po.’ ⁴Yennu tiɔŋ yet a, ‘N yaa man teena jaŋmaanchiɔŋo ki tur a mɔŋ nan a yɔɔsnba, ki a saa la bi datai dia jukii ki kpib. N saa jii Juda niib kur ki teemm Babilonn kpanbar nuu ni, ki u saa yaat nan siab ki saan namm u tiŋ ni, ki bii tee daaba, ŋaan kpi leeb na. ⁵N bia saa te ki bi datai n fat bi mɔkint kur doo na ni, ki yent i gor nan i faar kur, ki kpab nan Juda kpanbara gor kur, ki saan nann Babilonn, ⁶ŋaan bi saa soor fin Pasur nan a ŋaateeb kur ki saan nani Babilonn. I saa kpo leŋe ki bin pii-i, ki kpab nan i yɔɔsnba nba ki i faar faak bonchiann ki turib na.’ ”

Biaŋinba ki Jeremaya jii u daamii ki tur Yennu

⁷Yennu, a kpannime, ki n set be kpinkpannii ni.

A mɔk paŋ ki garin, ki nyannin.

Sɔɔ kur piak maame ki jiint n po, ki bi laan yontunmuna.

⁸Yoo nba kur ki n pak,

li tee man yikin sanpaapoe ki hoot a, “Woribuk! Biiru!”

Yennu, n be tiŋ nie ki tee yann yoo kur,

kimaan maa mɔɔntir a maan na paak.

⁹Ŋaan li-i tee ki n yet a,

“See ki n nyik Yennu ki ji kan ban pak u sann ni,”

li yoo a maan na tuu tee nan muu nae ki di n par ni.

N tuu yabire maa mii diar n par ni,

ŋaan n ki fit diari.

¹⁰N gbat sɔɔ kur lɔkin ki yeen a, “Jaŋmaanchiɔŋ li munn po.

Ŋaant tin pootɔ ki tur doo yiikoo damm.”

N yɔnanmɔnii gbaa guu man baae.

Bi yeen a, “Li ki gar ti saa fit kparɔ ki nyannɔwa,

ki soorɔ ki teenɔ bonbiir.”

¹¹Ŋaan fin Yennu-e see n poor nan paŋ nan yabint,

ki binba waan na saa baa.

Bi saa di fei yaayoo siiyoo, kimaan bi kan nyanni.

Bi fei maŋ sii kaa tammu.

¹²Ŋaan fin Yabint Yennu ŋarin bikii niib fanue,

ki mi linba be bi para ni, nan bi dudukit ni.

Li paak, ŋaant man la ki a pa bonbiir ki jiin n datai,

kimaan n jii n binbeŋ ki teen a nuu nie.

¹³Yinin yaŋ ki tur Yennu. Dontir Yennu.

U nyinn binba di biak na biit damm na nuu niwa.

¹⁴Porin daar nba ki bi din marin na mɔb.

Tammit daar nba ki n naa din marin na po.

¹⁵Porin daanɔ nba din maan n baa par na mɔb,

wunba din baar ki kumiiɔ a, “Li tee bonjake, a mɔk bija na.”

¹⁶Ŋaant ki wuu tee nan doi nba ki Yennu biirir,

ki li ki mɔkɔ ninbaauk na.

Ŋaant wun gbat tont mɔnii sanyiɔk ni, nan tɔb fuur yonsuuk ni,

¹⁷kimaan waa din ki kpiin yoo nba ki n be poor ni na.

N naa poor nie din bo sii tee n kaauk.

¹⁸Bi din marin bia poe?

A mii be daamii nan ninbaatir ni,

ki n manfoor n tan joont nan fei-i?

Baa saa nyann Jerusalem biaŋinba

¹Ki Juda kpanbar Sedekaya tun Malkia bija Pasur, nan manntɔɔ Sefania wunba tee Maaseya bija na n boor nan baruŋ a, ²“Dimin sukuru ki pak nan Yennu ki turit, kimaan Babilonn kpanbar Nebukanesar nan u jab yaa bin lek doo nae. Li ki gar Yennu n tun u bakitnauŋ toona na yenn ki turit, ki mia Nebukanesar ki wun ŋmat chiari.”

³Ŋanne ki Yennu pak nanin ki n bet jab nba ki bi tumm n boor na ⁴a bin pak Sedekaya, nan Israel Yomdaanɔ Yennu yet a, “Sedekaya, n yaa man nyann a jab nba kɔn nan Babilonn kpanbar nan u jab nae. N saa taan a jab na jatiat ki poonir doo na sinsuuk ni. ⁵N saa kɔn nana nan n paŋ nan wutoor kur. ⁶N saa kpi sɔɔ kur nba be doo na ni. Yiarbiiuk saa kpi nisaarii nan bonkobit kur. ⁷Ŋaan fin nan a saakab nan a niib nba saa nyi tɔb nan kon nan yiarii ni na, n saa te ki Nebukanesar nan u jab nba loon bin kpi-i na n soori. Nebukanesar saa kpi-i. U kan nyik i sɔɔ, koo ki tinɔ ninbaauk, koo ki mɔk ninkpabauŋ nanɔ. Min Yennu-e pak na.”

⁸Ki Yennu pakin a man wann niib na a, “Gbiintir man. Min Yennu teeni gannue, ki jiin sɔnu nba saa manfoor ni, nan sɔnu nba saa kuun ni po. ⁹Wunba kur biar doo na ni, bi saa kpiu tɔb ni, koo kon koo yiarii saa kpiu, ŋaan wunba nyii nanyer ki jii u mɔŋ ki tur Babilonn teeb nba lekin doo na, bi kan kpiu, u saa tinn u manfoora. ¹⁰N lorin nan man biir doo nae ki daa nyikitiri-i. N saa jiir ki tur Babilonn kpanbar ki wun joor muu. Min Yennu-e pak na.”

Biaŋinba ki Yennu saa dat Juda naan ŋaateeb tuba

^11-12Ki Yennu pakin a n jii maan na, ki wann Juda naan ŋaateeb nba tee Defid yaaboona na. U yet a, “Gbiintir linba ki min Yennu piak na. Ŋaant ki ŋant-i tuun daar kur. Fatir wunba ki bi ŋmaabɔɔ na, ki nyinnɔ wunba ŋmaabɔɔ na nuu ni. Yi-i kii tuun nna, i biit nba ki i tuun na saa donn n wutoor, ki li sii di nan muu nba di ki kaa kpeenu nae. ¹³Yimm Jerusalem teeb kar kunkonn paake, ki doo gar baat kur, nan tanpiiuk nba doo gar paanu kur na. Ŋaan n saa kɔn naniwa. I yeen a sɔɔ kaa ki saa leki, koo ki biir i joonfoot na ki kɔɔ i doo ni. ¹⁴Ŋaan n saa dat i tuba, yaa tun linba na paaka. N saa joo i naan ŋei na muu, ki li saa di kpab linba kur lintir. Min Yennu-e pak na.”

Jeremaya mɔɔntii ki jiin Juda naan ŋaateeb po

^1-2Yennu din pakin a n saan Juda kpanbar nba tee Defid yaaboonn na ŋaak, ki pak kpanbar na, nan u saakab, nan Jerusalem teeb, a bin gbiint linba ki ŋɔɔ Yennu yet a, ³“Min Yennu senti nan yii tuun linba ŋan ki bia took. Ii nyinn wunba ki bi ŋmaabɔɔ na wunba ŋmaabɔɔ na nuu ni. I daa dia digbangann teeb diabiiki, ki bia daa dia kpeebii nan pakɔi diabiik. I bia daa kpi nikaati. ⁴Yi-i setiki tuun nan maa senni na, ŋann Defid yaaboonae sii yɔɔ tee kpanbara, ki ŋamm nan bi saakab nan bi niib sii yɔɔ be taantorit nan taanii paak, ki kɔɔ naan tammɔi na ni. ⁵Ŋaan li-i tee ki i ki sak n sennu, n por turi nan naan ŋaak na saa teen langbenna. Min Yennu-e pak na.

⁶“N boor ni, Juda naan ŋaak na fan nan Gilead tiŋ koo Lebanonn jɔjaana nae, ŋaan n saa teenir tin-yann nba ki sɔɔ kan kar leŋe. ⁷N tun jabe maa bin baar ki biirir. Bi kur saa baar nan bi pajara, ki chɔɔ li kpekii dachaatŋana na, ki lu muu ni.

⁸“Li poor po, digbangann teeb bonchiann sii gaar ki boi bi leeb, a bee teen ki min Yennu tun bonbooru na ki tur digbanjaann na. ⁹Ki bi saa jiin a kimaan yaa nyɔr nyik yimm nan min Yennu mɔlor, ŋaan jiantir yenbis na paak.”

Jeremaya mɔɔntii nba jiin Joahas po

¹⁰Yimm Juda teeb, i daa mɔ kpanbar Josaya paaki;

i daa mɔ u kpemɔnii, ŋaan ii bui saama u bija Joahas paak,

kimaan bi jiiu yaat nanɔ, ki u kan ban jen.

U kan ban ji la tiŋ nba ki bi din marɔ leŋ na.

¹¹Ki Yennu pak linba na ki jiin Josaya bija Joahas, wunba gaar u baa naan ki tee Juda kpanbar na po a, “U yaat nna nawa ki kan ban jen. ¹²U saa kpo tiŋ nba ki bi saan nanɔ na nie, ki kan ban ji la tiŋ na.”

Jeremaya mɔɔntii nba jiin Jehoyakim po

¹³Biiru be wunba jii fobit ki maa u ŋaak,

ki jii ŋmabir ki yarikir na paak;

wunba te ki u doo ni niib tuun toonn yann,

ki u ki pab na paak.

¹⁴Daanɔ nba yet a, “N saa maa ŋajaanne ki tur n mɔŋ,

ki maa ditɔɔtii nba tee dijaana na,” biiru be u paak.

Nnae ki u tuu kɔɔn u ŋaak takorbona

ki jii kpek taabii ki faŋir ki pentir bonmɔŋ.

¹⁵Li-i tee ki a jii kpek taabii ki maa ŋaak

ki li fan gar leeb ŋei, li saa fit teena kpanbarmɔnɔwa-a?

A baae la manfoor manu.

U din ŋane ki tee nimɔnɔ, ki do linba kur ki u tuun ni.

¹⁶U din bu tatimm buut fanu, ki bont kur saan fanu ki turɔ.

Yentinu nba want biaŋinbae na.

¹⁷Ŋaan fin kpan laat a ninfɔkin lommo.

A kpi nikaat, ki dia tonu ki dint a niib biak.

Yennu-e pak na.

¹⁸Ki Yennu pak jiin Josaya bija Jehoyakim nba tee Juda kpanbar na po a,

“Sɔɔ kan bui u kpemɔnii, koo ki yet a,

‘Li bi, n yɔɔk, li bi.’

Sɔɔ kan mɔ u paak, koo ki bui yet a,

‘N yomdaanɔ, n kpanbar.’

¹⁹U kuun sii tee nan boŋ kuun nae,

ki bi saa jiiu ki nyi lu Jerusalem nanyer po.”

Jeremaya mɔmaan nba jiin Jerusalem joontu po

²⁰Yimm Jerusalem teeb, saant Lebanonn tiŋ ni ki saa hoot.

Ii saa Basann tiŋ ni ki saa bui.

Ii be Moab kunkonfɔkit paak, ŋaan kii hoot,

kimaan bi nyann i jab kura.

²¹Yennu pak nani yoo nba ki i mɔkitir nae,

ŋaan ki i yêt gbiintu.

I tuun nnae i manfoor kur ni, i ki ban sak Yennu mɔbi.

²²Wouŋo saa pebir i tɔɔndamm ki yaat namm,

ki bin soor i jab ki yaat namm,

ki bii tee tɔb dansarkɔɔra.

Ki i doo n di fei ki la yukpiasir,

kimaan biit nba ki i tun na paak.

²³I be i yamanie,

i ŋei nba ki bi nyii nan kpekii Lebanonn ki maa na ni,

ŋaan tont-i baari yoo nba, i sii mɔk ninbaauk bonchiann,

ki tont maŋ sii tee nan poo nba tuu mɔ matyiaru nae.

Biaŋinba ki Yennu saa dat Jehoyachinn tubir

²⁴Ki Yennu pak Juda kpanbar Jehoyachinn, wunba tee Jehoyakim bija na a, “Nan maa tee Yennu nba fo na, fi-i lekii bo tee dɔuk baŋ n niidiitu ni, ŋaan n bo saa pitae, ²⁵ki tur niib nba ki a tiimm jaŋmaanii, niib nba loon bin kpiia na. N saa jiia ki tur Babilonn kpanbar Nebukanesar-e nan u jab. ²⁶N saa mia fin nan a naa ki yin saan digbangann. I saa saan digbangann nba ki bi ki mar i sɔɔ leŋe, ki i banlee kur saa kpo leŋ. ²⁷I sii mɔk niɔŋ nan yin la tiŋ na, ŋaan i kan ban jeni.”

²⁸Ki n yet a, “Kpanbar Jehoyachinn tee nan bobiyiɔŋ nba ki bi tuu lu, ki sɔɔ ki loonir nae-e? Ŋanne teen ki bi soor ŋɔɔ nan u waas kur ki saan namm yommisin ni, digbangann nba ki bi ki mi na-a?”

²⁹Juda tiŋ, mine tee Yennu. Gbiintir linba ki n piak na:

³⁰“Jɔɔ na saa kɔŋ u waasa,

ki sii tee daanɔ nba kan ban nyann.

U kii mɔk yaaboona nba saa dia Juda tiŋ

ki tee binba set kpanbar Defid taaboouk ni.

Min Yennu-e pak na.”

Ki jiin dindann po

¹Yennu buut sii bi bonchiann ki tur doo diara nba biir u niib ki yatib na. ²Linba ki Israel teeb Yomdaanɔ Yennu pake na, ki jiin doo diara nba bo tee bii gorii u niib na po a, “I ki gorii n niibi. I yatibe ki ber nyinnib. Mɔtana n saa dat i tuba, biit nba ki i tun na paak. ³N saa taan n niib nba biar na, ki nyi namm digbana nba ki n din yatib na ni, ki jen namm bi dantiŋ ni. Bi saa pɔt pukin, ki sii yab bonchiann. ⁴N saa gann doo diara ki bii goriib. N niib ji kii tiin jaŋmaanii koo ki jee, ki n ji kan dat bi tuba. Min Yennu-e pak na.”

⁵Ki Yennu yet a, “Yoo baate ki n saa gann Defid yaaboonn nba tee kasii, ki dinnɔ naan. Kpanbar maŋ sii dia niib nan subiniie, ki tuun linba ŋan ki bia took, tiŋ na kur po. ⁶Wu-u dii naan yoo nba, Juda niib sii be bi yamanie, ki Israel teeb be nan parmaasir. U sann sii tee, ‘Yennu-e tee ti binben-yeeŋ.’ ”

⁷Ki Yennu yet a, “Yoo baate ki niib tan kan por n sann ni, a Yennu nba fo ki nyinn Israel teeb Ijipt tiŋ ni na, ⁸ŋaan bi tan saa por n sann ni, a Yennu nba fo ki nyinn Israel teeb gaŋ po tiŋ na ni, nan digbana kur nba be ki n din yatib ki kɔɔmm na ni. Ki bi sii be bi dantiŋ ni.”

Jeremaya mɔɔntii ki jiin Yennu sɔkiniinba po

⁹N par biire, ki n gbanu jek.

N tee nan jɔɔ nba yib daan nae,

nan wunba nyuu daan ki li yabitɔ na,

kimaan Yennu nan u kasii mɔmaan na paak.

¹⁰Tiŋ na gbee nan niib nba ki waa Yennu-e,

ki be yanbɔmm binbeŋ, ki biir bi yiikoo.

Yennu mɔtonte te tiŋ na mɔ kpemɔnii, ki mɔɔt koot.

¹¹Yennu yet a,

“N sɔkiniinba nan mannteeb na tee binba ki waa min Yennu-e.

N lab ki bi tuun toonbiit, jiantu ŋasaakak tiɔŋ ni.

¹²Sɔnii nba ki bi tɔkii na sii ŋarii ki tee bunbɔnn,

ki n saa te bin ŋat baa.

N saa baar nan biak bi paak; bi tubdatu yoo baara.

Min Yennu-e pak na.

¹³N la Samaria sɔkiniinba toonbiita.

Bi piak tingbann Baal sann nie ki turin n niib.

¹⁴Ŋaan n bia la ki n sɔkiniinba nba be Jerusalem tuun bonbilankant.

Bi chomm ki bia fa faak, ki sommit niib ki bi tuun biit,

ki li te sɔɔ ki nyik biit tumu.

N boor ni, bi kur bi nan Sodom nan Gomora teeb nae.

¹⁵“Li paak, min Yabint Yennu nba piak linbae na, ki jiin n sɔkiniinba nba be Jerusalem po a:

N saa turib jetont ki bin di, ki turib lɔbii ki bin nyu,

kimaan ŋamme te ki tonu gbee tiŋ na kur po.”

¹⁶Ki Yabint Yennu pak tur Jerusalem teeb a, “I daa gbiin linba ki n sɔkiniinba mɔɔntir; bi kɔɔnti faak dindanne. Bi wanti linba ki bi dukine, ŋaan li ki tee linba ki n wannib kaa, ¹⁷ki yeen niib nba yêt bin gbiint linba ki n pak na, a bont kur saa saan fanu ki turiba; ki bi piak sɔɔ kur nba tee tubkangbatir, a biiru kan baarɔ.”

¹⁸Ki n yet a, “Sɔkiniinba na sɔɔ ki mi Yennu bunbɔri dudukit. Bi sɔɔ ki ban gbat, koo ki bann u maan paak, koo ki gbiint, ki jii u yan kɔɔn linba ki ŋɔɔ Yennu piak na ni. ¹⁹U wutoor na tee wonpaaruko, wonpaaruk nba saa da biit damm paak. ²⁰Wouŋ maŋ kan nyik danu nan yoo nba ki u tan saa gbenn linba kur ki u lor wun tun na. Yoo baat, ki u niib tan saa bann linba na paak fanu.”

²¹Ki Yennu yet a, “N ki tun sɔkiniinba na, ŋaan ki bi chiar saan, ki n bia ki turib mɔmaan, ŋaan ki bi piak n sann ni. ²²Bi-i bonni mi n bunbɔri dudukit, bi bo saa mɔɔnt n maan ki tur n niib ki te bin nyik bi toonbiit binbeŋ na, nan bi nɔɔntont toona nba ki bi tuun nawa.

²³“N tee Yennu nba be siar kur poe, li ki tee n be yennkɔɔ boor kaa. ²⁴Sɔɔ kan fit bɔr siar boor ki n kan lau. I ki mi nan n be siar kur boore sanpaapo nan tiŋ na ni-i? ²⁵N mi sɔkiniinba nba fa faak n sann ni, ki yeen a n teenib n maan bi damiit ni na nba piak linba. ²⁶Nlee yooe ki bi saa nyik n niib turimu nan bi faak nba ki bi dukii na? ²⁷Bi dukii nan damiit nba ki bi mɔɔntir maŋe saa te ki n niib n tamm n po, nan bi yeejamm nba din tamm n po biaŋinba, ŋaan jiant tingbann Baal na. ²⁸Sɔkinii nba damii damiit, wun pak nan li set tee damiite, ŋaan sɔkinii nba mun gbat n maan, wun pak nan li mamɔmm sɔnu ni. Fouŋ ŋant tee bee ki saa yek nan dii? ²⁹N maan na tee nan muu nae, ki bia tee nan jaar na, ki yakitir tana. ³⁰N kɔn nan sɔkiniinba nba jikit bi leeb maan ki mɔɔntir a li tee n maan na. ³¹N bia kɔn nan sɔkiniinba nba piak ki mɔɔntir bi tiɔŋ maan ŋaan yaa li nyii n boore na. ³²Gbiintir linba ki min Yennu piak. N kɔn nan sɔkiniinba nba mɔɔntir bi mɔŋ damiit nba gbee nan faak na. Bi mɔɔntir bi damiit maŋe ki kɔɔnt n niib muuk nan bi faak nan bi parbifaant na. N ki tumm, koo ki pakib a bin saani. Bi ki mɔk siara sommir ki teen n niibi. Min Yennu-e pak na.”

Ki jiin Yennu maan po

³³Ki Yennu pakin a, “Jeremaya, li-i tee ki n niib na yenɔ, koo sɔkinii, koo manntɔɔ boia a, ‘Yennu maan yaa bia?’ fan jiinɔ a, ‘A tee jikire ki tur Yennu, ki u saa nyikawa.’23.33 Bi maan ni, “jikir” paake tee “maan.”³⁴Li-i tee n niib na yenɔ, koo sɔkinii, koo manntɔɔ taa sann na a, ‘Yennu jikir,’ n saa dat ŋɔɔ nan u ŋaateeb tuba. ³⁵Ŋaan sɔɔ kur n tuu boi u yɔɔsnba nan u nikpiimm a, ‘Gatlanne ki Yennu turi? Yennu yaa bia?’ ³⁶Bi daa ban yeen mɔbonn nba tee Yennu jikir na, kimaan li-i tee ki sɔɔ yet nna, n saa te ki n maan na-ii tee jikir ki turɔ. Niib na ŋmat min Yennu nba fo ki tee bi Yabint Yennu na maama. ³⁷Jeremaya, boi n sɔkiniinba na a, ‘Yennu turi gatlanne? Yennu yaa bia?’ ³⁸Ki bii yêt n mɔb ki pak mɔbonn nba tee Yennu jikir na, fan betib ³⁹nan n saa tɔkirib ki lub banfɔkirewa, ŋamm nan doo nba ki n tur ŋamm nan bi yeejamm na. ⁴⁰N saa baar nan fei nba kaa gbennu bi paak, nan yukpiasir nba ki bi kan mi tamm li po.”

Ki jiin kinkana nba be kpanchibit ŋanlee ni po

¹Ki Yennu wannin kpanchibit ŋanlee, ki li see nan kinkana, Yenjiantu ŋasaakak na tɔɔnn po. (Linba na din tun Babilonn kpanbar Nebukanesar nba din soor Jehoyakim bija Jehoyachinn, wunba tee Juda kpanbar na, ki nyii nanɔ Jerusalem, ki saan nanɔ Babilonn, ki kpab nan Juda tɔɔndamm nan tikpeera nan toontun-yandamm na poor poe.) ²Sinsinn kpanchibuk na din gbee nan kinkana nba ŋan, ki tee linba dɔŋ mɔnne, ŋaan chibleeuk na din be nan kinkana nba tee bonbiite ki poŋ kan fit di. ³Ŋanne ki Yennu boin a, “Jeremaya, a la bia?”

Ki n jiin a, “N la kinkanae. Bonŋana na ŋan bonchiann, ki bonbiit na mun bi bonchiann ki kan fit di.”

⁴Ki Yennu pak turin a, ⁵“Min nba tee Israel teeb Yomdaanɔ Yennu na gaar nan niib nba ki bi din jiib saan namm Babilonn na tee nan kinkana nba ŋan nae, ki n saa diab nan ŋant. ⁶N sii guub ki tan jen namm tiŋ na ni. N saa te ki bin doe; n kan te bin baa kaa. N saa buribe; n kan ŋabirib kaa. ⁷N saa turib niɔŋ nba ki bi sii loon bin bann nan mine tee Yennu, ki bi sii tee n niib, ki n mun sii tee bi Yennu, kimaan bi saa jen n boor nan bi para kur.

⁸“Ŋaan Juda kpanbar Sedekaya nan u tɔɔndamm nba lintɔ na, nan Jerusalem niib kura nba kar tiŋ na ni, koo ki saan Ijipt na ŋarin, min Yennu saa dia bi kur nan kinkana nba biir gar nan dinu nae. ⁹N saa baar nan biak nba paar bonchiann bi paak, ki jaŋmaanii saa soor tingbouŋ na niib kur. Niib saa laab, ki jiib teen jinjeruk, ki sarikitib, ki jii bi sann ki teen mɔpor siaminba kur ki n yatib ki saan namm. ¹⁰N saa baar nan tɔb nan kon nan yiarii bi paak, ki tan tuu yoo nba ki bi kur saa kpo gbenn, tiŋ nba ki n din tur ŋamm nan bi yeejamm na ni.”

Ki jiin gaŋ po datai baaru po

¹Josaya bija Jehoyakim naan bina ŋanna nie ki Yennu maan baar n boor, ki jiin Juda niib kur po. Nebukanesar nba din dii Babilonn naan binn nbae na. ²Ki n pak tur Juda nan Jerusalem teeb kur a, ³“Amonn bija Josaya nba dii naan, li bina piik nan ŋantaa ni, ki tan tuu bina piinlee nan ŋantaa nba na, Yennu yɔɔ piak nanime, ki n wanti waa yaa linba. Ŋaan i ki gbiinti. ⁴I yêt yin gbiint koo ki jii i yan kɔɔn leŋe, ki Yennu yɔɔ tuun u toontunna nba tee u sɔkiniinba na. ⁵Bi paki nan yin nyik i yanbɔnbinbeŋ nba ki i be, nan toonbiit nba ki i tuun na, ki fit kii be tiŋ nba ki Yennu tur yimm nan i yeejamm, ki li tee i faar na ni. ⁶Bi pakii nan i daa jiantir koo ki waa yenbis, ki bia daa jiantir pata nba ki i maa na, ki dont Yennu wutoori. Yi-i bonni sak Yennu mɔb, u bo kan dat i tuba. ⁷Ŋaan Yennu tiɔŋo pak nan i yêt yin gbiint ki turɔe, ki donn u wutoor nan i pata na, ki baar nan tubdatu i mɔŋ paak.

⁸“Kimaan yaa kan gbiint ki turɔ na, ŋɔɔ Yabint Yennu yet a, ⁹‘N saa tun yiin gaŋ po niib na kur, nan n toontunnɔ Nebukanesar, wunba tee Babilonn kpanbar na. N saa baar namm, ki bin kɔn nan Juda nan li niib, nan digbana nba kur kpiar. N saa biir digbann na, nan digbana nba kpiar kur, ki teenir langbent yaayoo siiyoo, ki leŋ sii tee jaŋmaansooruk boor. Min Yennu-e pak na. ¹⁰N saa te ki bi kpinkpammuk nan parpeenn fuut na n ŋmin, ki kpab nan bi poochiann jaamm parpeenn fuut na. Kpan ji sii kaa bi fita ni, ki jeet bia sii kaa. ¹¹Tiŋ na kur ji sii tee langbente ki mɔk jaŋmaansooruk, ki tinii nba kpia na sii tuun ki teen Babilonn kpanbar bina piinlore. ¹²Li poor po, n saa dat Babilonn kpanbar nan u niib tuba, bi biit paak. N saa biir digbann maŋ, ki li sii yɔɔ tee langbent. ¹³N saa dat Babilonn teeb tuba nan biak nba ki n jeen digbana nan n saa jii dat bi tuba na. Biak maŋ poe ki n din pak tur Jeremaya. Ŋanne tee biak nba kur sɔb gbouŋ na ni. ¹⁴N saa pa jiin Babilonn teeb linba ki bi tun na paak, ki bi sii tee yommii ki tur digbana bonchiann nan kpanbarjaana.’ ”

Yennu nba saa dat digbana tuba biaŋinba

¹⁵Ki Israel teeb Yomdaanɔ Yennu pakin a, “Daŋmaŋe na, ki li gbee nan n wutoor. Jiin ki saan nann digbana nba kur ki n tuuma na niib boor, ki te bin nyu ŋmaŋ maŋ ni. ¹⁶Bi-i nyuu yoo nba, bi sii tiŋite ki waat, kimaan tɔb nba ki n baat nann bi paak na.”

¹⁷Ki n gaar daŋmaŋ na Yennu nuu ni, ki tur digbana nba kur ki Yennu tumin bi boor na, ki te ki bi nyuu. ¹⁸Ki n te Jerusalem nan Juda doi kur, nan li kpanbara nan tɔɔndamm na nyuu daŋmaŋ maŋ ni, a doi na n kpant langbent nba mɔk jaŋmaansooruk, ki niib-ii dia bi sann kii poor mɔpora, nan laa tee mɔtana.

^19-26Binba din pukin ki saa nyu daŋmaŋ na nie na:

Ijipt kpanbar nan u saakab nan u tɔɔndamm,

nan Ijipt teeb kur, nan boorganii nba be leŋ,

nan Us tiŋ ni kpanbara kur,

nan kpanbara nba be doi nba be Filistia tiŋ ni, ki tee Askelonn

nan Gasa nan Ekronn nan Asdod nba tenn waan na,

nan Edom nan Moab nan Amonn niib kur,

nan Taya nan Sidonn kpanbara kur,

nan Sinsuuk ni mɔkgbeŋir tinii na kpanbara kur,

nan Dedann nan Tema nan Bus doi,

nan niib nba yɔɔ pɔɔn bi yut na kur,

nan Arabia kpanbara kur,

nan kunkoouk paak booru na kpanbara kur,

nan Simri nan Elam nan Media kpanbara kur,

nan gaŋ po kpanbara na kur, binba be banfɔka,

nan binba naak kur din saa nyu yenɔ yenɔ.

Digbann kur nba be tingbouŋ na paak saa nyure; ki li joontik, Babilonn kpanbar n nyur.

²⁷Ŋanne ki Yennu pakin a, “Pakin niib na nan min Yabint Daanɔ nba tee Israel teeb Yennu na teemm sennu nan bin nyur nan baa tan saa yib ki sii, ki baa tiŋ ni ki gbar fiiru, kimaan tɔb nba ki n baat nann bi paak na. ²⁸Li-i tee ki bi yêt bin gaar daŋmaŋ na a nuu ni ki nyu, fan betib nan Yabint Yennu yet a see ki bi nyuu ŋmaŋ na ni. ²⁹N saa piin biiru na n tiɔŋ doo nie. Bi dukii a bi kan la tubdatu amii? Aaii, bi saa la tubdatuwa, kimaan n yaa man baar nan tɔbo nisaarik kur paak, tingbouŋ na ni. Min Yabint Daanɔ Yennu-e pak na.

³⁰“Li kpaa talase ki fin Jeremaya n mɔɔnt linba kur ki n paka. Li tee fan pak niib nae a,

‘Yennu sii be sanpaapo ŋaan gaar jat, ki tian sanpagbouŋ ni.

U saa gaar jat, u niib paak,

ki hoot nan nirɔ nba tuu ŋmaan mat daan tilɔɔna

ki hoot biaŋinba na.

Tingbouŋ na ni, sɔɔ kur saa gbat u kunkɔr,

³¹ki li fuut saa nik tingbouŋ na fiakir.

Yennu mɔk maan nan digbana.

U saa bu sɔɔ kur buut ki kpi biit damm na.

Yennu-e pak na.’ ”

³²Yabint Daanɔ Yennu yet a biiru tuu saa baar digban-yenn paak, ki tɔɔt digbanleer paake. Biirchiɔŋ be banfɔkir ki baat, ki tee nan wonpaaruk na. ³³Li daar maŋ ni, niib nba ki Yennu kpiib na gbanant saa yat dɔɔe tingbouŋ na kur po. Sɔɔ kan mɔ bi kpemɔnii, sɔɔ bia kan jiib ki saan pii. Bi sii pooe tiŋ na paak nan mɔba na.

³⁴Ii mɔ man, yimm tɔɔndamm, yimm nba tee n niib ŋmakit-teeb na, ii mɔ sanpaapo man, ii mɔ man, kii birintir tanbiinii ni. Yoo baar nan bin kpi-iwa, bi saa kɔti nan pejai nae. ³⁵Sɔnsau kaa ki i saa chiar paaki. ^36-37Ii mɔ kii yikin sanpaapo nan parbiir, kimaan Yennu donn wutoor ki biir i digbann, ki teen i parmaasir tiŋ na langbenta. ³⁸Yennu nyɔr nyik u niibe nan yanbɔr nba tuu nyɔr nyik u tanfiiɔk na. Tɔb wahala nan Yennu wutochiɔŋ na kpint tingbouŋ na ki teenir kunkoouko.

Biaŋinba ki bi bu Jeremaya buut

¹Yoo nba ki Josaya bija Jehoyakim din dii Juda naan na, li din ki weie ²ki Yennu pakin a, “Saant ki set jiantu ŋasaakak na dindouŋ ni, ki mɔɔnt linba kur ki n wanna maa a mɔɔnt tur binba nyii Juda doi ni, ki baar a bin jiant leŋ na. A daa te ki siar biati. ³Li ki gar niib na n gbiint ki nyik bi toonbiit na tumu. Li-i tee ki bi nyik bi toonbiit, n saa lebit n dudukit nba ki n yaa n baar nan biiru bi paak, kimaan bi biit paak na.”

⁴Ki Yennu pakin a n yet niib na a, “Min Yennu pak nan li kpaa talas yin sak n mɔb, ki wei wannu nba ki n turi na, ⁵ki bia gbiint n toontunna nba tee sɔkiniinba ki n yɔɔ tuunib i boor na mɔmaan. I ki ban sak linba ki bi piak na. ⁶Li-i tee ki i yɔɔ yêen bi maan maŋ, ŋann ŋarin n saa teen jiantu ŋasaakak na nan maa din teen Siilo doo biaŋinba nae, ki tingbouŋ na niib kur saa jii doo na sann ki teen mɔpor.”

⁷Mannteeb nan Yennu sɔkiniinba nan niib na kur gbat ki n piak linba na Yenjiantu ŋasaakak ni. ⁸Ki maa pak linba ki Yennu wannin na ki gbenn yoo nba, ki niib na soorin, ŋaan hoot a, “Li tee tin kpiae linba na paak. ⁹Bee ki a pak Yennu sann ni a jiantu ŋasaakak na saa teen nan Siilo doo na, a ki doo na saa biir, ki sɔɔ kan kar leŋi?” Ki niib na tikir lintin.

¹⁰Ki Juda tɔɔndamm nba gbat linba tun na, ki bi nyii kpanbar ŋaak, ki kakit saan Yenjiantu ŋasaakak na boor, ki saan kar siaminba ki bi yi Tammɔpaann na. ¹¹Ŋanne ki mannteeb nan Yennu sɔkiniinba na pak tɔɔndamm nan niib na a, “Jɔɔ na tee bin kpiu-e, kimaan u pak biir ti doowa. I mɔŋ tuba gbat waa pak linbawa.”

¹²Ki n yet a, “Yennu-e tumin a man pak linba kur ki i gbat ki n pak jiin Yenjiantu ŋasaakak nan doo na po na. ¹³Li kpaa talas yin lebit i binbeŋ nan linba ki i tuun, ki sak i Yomdaanɔ Yennu mɔb. Yi-i tun nna, u saa lebit u dudukit ki jiin biiru nba ki u yet a u saa baar nann na powa. ¹⁴Min ŋarin be i nii nie. Tumin linba ki i dukin nan li ŋan ki bia took. ¹⁵Ŋaan li kpaa talas ki yii mi linba na: Li-i tee ki i kpiin, yimm nan doo na niib kur sii be nikaar kpinu biit ni, kimaan Yennu-e tumin a man turi kpaanii na.”

¹⁶Ki tɔɔndamm nan niib na pak mannteeb nan Yennu sɔkiniinba na a, “Jɔɔ na pak nant ti Yomdaanɔ Yennu sann nie, sɔɔ daa kpiu.”

¹⁷Li poor po ki saakab na siab fiir set ki yet niib nba tikir leŋ na a, ¹⁸“Yoo nba ki Hesekia din tee Juda kpanbar na, ki Yennu sɔkinii Maika nba nyii Moresef na pak niib na kur linba ki Yabint Yennu pak na a,

‘Bi saa ko Sayɔnn nan baa tuu ko tammɔnn nae,

ki Jerusalem sii tee langbent,

ki Yenjiantu ŋasaakak kunkonn na saa kpant fɔɔr.’

¹⁹Kpanbar Hesekia nan Juda niib na din ki kpii Maika. Hesekia din baak Yennu-e ki kot a wun la u sommir, ki Yennu lebit u dudukit ki jiin biak nba ki u bo yet a u saa baar nann bi paak na po. Ti yaa tin baar nan biak nba kaa paake ti mɔŋ paak na.”

²⁰(Jasɔɔ din be ki u sann tee Yuria. U din tee Semaya bijae ki nyii Kiriaf Jearim. U mun din pak Yennu sann ni ki biir doo nan digbann na, nan Jeremaya nba pak na. ²¹Ki kpanbar Jehoyakim nan u jab nan u saakab nba gbat linba ki Yuria pak na, ki kpanbar na ji din loon wun kpiu. Yuria din gbat li po, ki chiar saan bɔr Ijipt, kimaan u din tiin nan bi saa kpiu. ²²Kpanbar Jehoyakim din tun El-natann, wunba tee Akbor bija na, nan jaleeb Ijipt tiŋ ni, a bin kpaan Yuria. ²³Bi din soor Yuria ki jen nanɔ kpanbar Jehoyakim boor, ki u te ki bi kpiiu, ki jii u gbanant ki lu niyana kaat ni.)

²⁴Ŋaan Safann bija Ahikam nba din taa n po na, bi din ki soorin tur niib na ki bi kpiimi.

Biaŋinba ki Jeremaya lia naayɔkit

¹Josaya bija Sedekaya nba dii Juda naan, li din ki wei kaawa ki Yennu pakin ²nan man jii gbann ŋmipiann nan daat ki ŋamm yɔkit ki lia turu ni. ³Yennu din pakin nan n tur Edom nan Moab nan Amonn nan Taya nan Sidonn kpanbara mɔb, ki lin nyi bi taatara nba baar Jerusalem a bin la Sedekaya na boor. ⁴Yabint Daanɔ nba tee Israel teeb Yennu na pakin a n wannib, ki bin yet bi kpanbara a Yennu yet a: ⁵“N yiikochiɔŋ nan n paŋ nie ki n nan durinya nan nisaarii nan bonkobit nba kur be tingbouŋ na paak, ki tuu jiib tur wunba ki n loon. ⁶Mine jii digbana na kur ki teen n toontunnɔ nuu ni, wunba tee Babilonn kpanbar Nebukanesar, ki te ki muuk ni bonkobit gbaa jiantirɔ. ⁷U sii dia digbana kur, ki bi sii tuun ki teen u bija nan u yaaboonn nan yoo nba ki u tiɔŋ digbann tan saa baa. Li yooe ki u digbann saa tun ki tur digbanjaana nan kpanbarjaana.

⁸“Ŋaan li-i tee digbann nba koo doo nba yêt u weiu, n saa jii tɔb nan kon nan yiariie ki dat li tubir, ki tan tuu yoo nba ki n saa te ki Nebukanesar n biirir tarrr. ⁹I daa gbiin i sɔkiniinba koo binba yeen a bi saa fit bann linba tan saa tun na po, laa lek tee damiit ni, koo kpeemm lanu ni, koo nyɔku. Bi kur piaki nan i daa jiantir kpanbar Nebukanesar. ¹⁰Bi kpannie, ki saa te siab n jii-i, ki yaat saan nani digbann nba fɔk nan i digbana bonchiann. N saa ber nyinniwa, ki bi saa biiri. ¹¹Ŋaan digbann nba sak Babilonn kpanbar mɔb ki waau, n saa te ki li niib-ii be bi tiŋ ni kii ko. Min Yennu-e pak na.”

¹²N pak ŋanne ki tur Juda kpanbar Sedekaya a, “Jiin a mɔŋ ki tur Babilonia kpanbar. A jiant ŋɔɔ nan u niib, ki la manfoor. ¹³Bee ki fin nan a niib saa kpo tɔb ni nan kon nan yiarii ni? Yennu yet a linba saa tume na ki tur digbann nba ki jii u mɔŋ ki tur Babilonn kpanbari. ¹⁴I daa gbiin sɔkiniinba nba piaki nan i daa jikit i mɔŋ ki teen Babilonn kpanbar na maami, bi kpannie. ¹⁵Yennu mɔŋ yet a u ki tummi, a ŋaan bi fae u sann ni ki teeni. Li paak, ki u saa ber nyinni ki bin kpi-i, yimm nan sɔkiniinba nba fa faak na.”

¹⁶Ki n pak mannteeb nan niib na a Yennu yet a, “I daa gbiin sɔkiniinba nba piak nan Yenjiantu ŋasaakak ni gor na, bi saa nyi nann Babilonn ki jen nann mɔtana na. Bi fae ki teeni. ¹⁷I daa gbiin bi maami. Jiin i mɔŋ ki tur Babilonn kpanbar, ki i saa la manfoor. Bee ki doo na saa kpant langbenti? ¹⁸Bi-i tee barmɔnii sɔkiniinba ki set dia n maan, ŋaant ki bin barin min Yabint Yennu ki n daa te ki gor nba biar jiantu ŋasaakak ni, nan naan ŋaak ni na, ki bi jikitir saa Babilonn-i.”

^19-20(Yoo nba ki kpanbar Nebukanesar din jii Juda kpanbar Jehoyachinn, wunba tee Jehoyakim bija na, nan Juda nan Jerusalem tɔɔndamm, ki saan namm Babilonia na, u din nyik toota na nan kutmɔnt nyunbuuk nan torit nan Yenjiantu ŋasaakak ni bonjaanlia.)

²¹“Gbiintir linba ki min Yabint Daanɔ nba tee Israel teeb Yennu na piak ki jiin gor nba biar jiantu ŋasaakak ni, nan linba be naan ŋaak nba be Jerusalem na po: ²²Bi saa jiir ki saan nann Babilonia, ki li sii be leŋe nan maa tan saa ŋmant n dudukit li paak yoo nba, ki jen nann ki teenir nna na. Min Yennu-e pak na.”

Ki jiin Jeremaya nan Yennu sɔkinii Hanania po

¹Li binn ni, Sedekaya naan bina ŋanna, ŋmaarii ŋanŋmu ni, ki Asur bija Hanania nba tee Yennu sɔkinii ki nyii Gibeonn na din pak turin, Yenjiantu ŋasaakak na ni. Mannteeb nan niib na numm ni ki u betin ²nan Yabint Daanɔ nba tee Israel teeb Yennu na yet a, “N biir Babilonia kpanbar paŋ nawa. ³Bina ŋanlee sinsuuk ni, n saa jen nan jiantu ŋasaakak ni gor nba ki Babilonn kpanbar Nebukanesar jii ki saan nann Babilonn na nna. ⁴N bia saa jen nan Juda kpanbar Jehoyachinn, wunba tee Jehoyakim bija na, ki kpab nan Juda niib kur nba saan be daabisin ni Babilonn na. Barmɔnii, n saa biir Babilonia kpanbar yiikoo nawa. Min Yennu-e pak na.”

⁵Ki mannteeb nan niib nba kur see Yenjiantu ŋasaakak ni na boor, ki n pak tur Hanania a, ⁶“Li ŋan bonchiann. N sunman ki Yennu tun nnawa. N sun ki a masɔkinkar maŋ teen mɔniiwa, ki wun jii jiantu ŋasaakak ni gor na kur, nan niib nba kur ki bi soorib daaba Babilonia na ki jen namm. ⁷Ŋaan gbiintir linba ki n piak ki teen fin nan niib na. ⁸Sɔkiniinba nba din pak sianyoowa, ki min nan fin daa kaa na, din bunt nan tɔbii nan kon nan yiarii saa baar digbana bonchiann paak, nan kpanbarjaana paak. ⁹Ŋaan sɔkinii nba bunt buntir bonŋann, bi saa sak nan u set tee barmɔnii sɔkinii nba ki Yennu tumɔ, yoo nba ki u mɔɔntii na tun ki gbeene.”

¹⁰Ŋanne ki Hanania liat yɔkit na n turu ni ki biirir, ¹¹ŋaan pak niib na kur numm ni a, “Yennu yet a biaŋinba ki u saa biir yɔkit nba ki kpanbar Nebukanesar yɔkin digbana kur turii nie na, ki u saa tumir bina ŋanlee sinsuuk ni.” Li poor po ki n yaat.

¹²Linba na poor poe ki Yennu pakin ¹³a man saan yet Hanania a, “Yennu yet nan a saa fit biir daat yɔkite, ŋaan u saa jii kut yɔkite ki senn li taar ni. ¹⁴Yabint Daanɔ nba tee Israel teeb Yennu na yet nan u saa jii kut yɔkite ki yɔkin digbana na kur paak, ki bi saa jiant Babilonn kpanbar Nebukanesar. Yennu yet nan u saa te ki muuk ni bonkobit gbaa n jiant kpanbar Nebukanesar.”

¹⁵Ki n pak linba na ki tur Hanania, ki bia pukin a, “Hanania, gbiintir. Yennu ki tumani, ŋaan ki a te niib na gaan faak na. ¹⁶Li paak, Yennu mɔŋ yet nan u yaa wun bakinae. Binn na tan sii gbent na ki a kpowa, kimaan faa pak niib na a bin yêt Yennu mɔb na paak.”

¹⁷Ki Hanania set kpo binn maŋ, ŋmaarii ŋanlore ni.

Ki jiin gbouŋ nba ki Jeremaya sɔb na po

¹Ki min Jeremaya sɔb gbouŋ ki tur mannteeb, nan Yennu sɔkiniinba, nan niib na tɔɔndamm, nan niib nba kur ki Nebukanesar jiib Jerusalem ki saan namm Babilonn ki teemm yommii na. ²Maa sɔb gbouŋ maŋ yoo nba na, ki sɔɔ kpanbar Jehoyachinn, nan u naa, nan kpanbar ŋaasaakab, nan Juda tiŋ tɔɔndamm, nan Jerusalem tɔɔndamm, nan tikpeet damm, nan yandantoontunna kur, ki bi soorib saan namm Babilonia-wa. ³Ki n jii gbouŋ na ki tur Safann bija Elasa, nan Hilkia bija Gemaria, wunba ki Juda kpanbar Sedekaya din tuumɔ Babilonn kpanbar Nebukanesar boor na. N din sɔb a:

⁴“Yabint Daanɔ nba tee Israel teeb Yennu na piak ki teen niib nba kur ki u chab ki Nebukanesar soorib Jerusalem ki saan namm Babilonn ki teenib yommii na a: ⁵‘Maan ŋei man ki kɔɔ. Baan kpaant man kii di linba ki i buur leŋ na. ⁶Ii kɔɔnt poob kii maar waas, ki ŋaan i waas mun n kɔɔn poob kii maar. Li kpaa talas yii pɔte ki daa waabit kaa. ⁷Ii tuun linba saa somm doi nba ki n te ki i saan leŋ ki teen yommii na. Ii mein kii teen doi maŋ man, kimaan li-i tee ki doi maŋ mɔk, i mun sii mɔke. ⁸Min Yabint Daanɔ nba tee Israel teeb Yomdaanɔ Yennu na kpaanii nan i daa te ki sɔkiniinba nba be i boor na kpanni, koo binba yaa bi saa fit bunt buntaa, ki jiin linba tan saa tun po na kpannini. I daa gbiin bi damiit maŋ po. ⁹Bi fa faake n sann ni ki teeni. N ki tummi. Min Yabint Yennu-e pak na.’

¹⁰“Ki Yennu yet a, ‘Li-i tee ki Babilonia bina piinlore na gar, n saa wanni n baka nba be i po biaŋinba. N saa dia n mɔsonn nba ki n senn nan n saa jen nani na. ¹¹Min kuukɔɔe mi i paak lora nba ki n mɔk, lora nba saa turi mɔkint ki li ki tee biak kaa, lora nba saa baar nan linba ki i daan tɔɔnn po na. ¹²Ki i saa yiinin. I saa baar ki miarin, ki n saa turi gatu. ¹³I saa lomin, ki lan, kimaan i saa lomin nan i yan kure. ¹⁴Nn, n yeen nan i saa lan ki n jiin kaani i tiŋ ni. N saa nyi nani tiŋ kur ni nan siaminba kur ki n daan yat saan nani na, ki jen nani tiŋ nba ni ki n daan nyinni ki saan nani yommisin ni na. Min Yennu-e pak na.’

¹⁵“I piak nan Yennu turi u sɔkiniinba Babilonia tiŋ niwa. ¹⁶Gbiintir linba ki Yennu piak ki teen wunba dia digbann nba ki Defid din dia na, nan niib nba be doo maŋ ni na, ŋamme tee i nikpiimm nba ki bi din ki kpabib nani ki teen yommii na. ¹⁷Yabint Yennu yet a, ‘N baat nan tɔbo nan kon nan yiarii bi paak, ki saa teemm nan kinkann nba tuu bat ki gar nan dinu na. ¹⁸N saa weib nan tɔbo nan kon nan yiarii, ki digbana kur saa jek nan linba ki bi la. Mi-i lub siaminba kur, leŋ niib yan saa put, ki bi gbanii n jek, kimaan linba tun turib na paak. Niib saa laab, ki jii bi sann ki poor mɔpora. ¹⁹Linba na saa tun ki turib, kimaan bi ki sak mɔmaan nba ki n teen n toontunna nba tee sɔkiniinba, ki bi teemm yoo kur na. Bi yêt gbiintue. ²⁰Yimm nba kur ki n saan nani yommisin ni Babilonia na, ii gbiint linba ki min Yennu piak na.’

²¹“Yabint Daanɔ nba tee Israel teeb Yennu na pak ki jiin Kolaya bija Ahab nan Maaseya bija Sedekaya, ŋamm nba jikit u sann ki fa faak teeni na powa, a u saa jiib ki teen Babilonia kpanbar Nebukanesar nuu ni, ki wun kpib i numm ni. ²²Li-i tee ki niib nba ki bi din teemm yommii ki nyii namm Jerusalem ki saan namm Babilonia na loon bin por nirɔ mɔpor, bi tuu saa yet a, ‘Yennu n teena nan Babilonia kpanbar nba din joo Sedekaya nan Ahab muu foot biaŋinba na.’ ²³Bi joontu sii tee nnae, kimaan bi tun bonbilankanta, bi tun bonchonchonn toona ki bia faar faak Yennu sann niwa. Yennu din ki loon bin tun linba na, u mi baa tun linba, ki tee siarae li po. Yennu-e pak na.”

Ki jiin gbouŋ nba ki Semaya sɔb na po

^24-25Yabint Daanɔ nba tee Israel teeb Yennu na turin maan, a n tur Semaya nba nyii Nehelam, ki sɔb gbouŋ u tiɔŋ sann ni, ki tur Jerusalem teeb kur, nan manntɔɔ Sefania nba tee Maaseya bija na, nan mannteleeb kur na. Gbouŋ maŋ ni, u din sɔb ki yet Sefania a:

²⁶“Yennu teena manntɔɔ ki senna Jehoyada taar ni, ki mɔtana fine ji tee Yenjiantu ŋasaakak na ni yudaanɔ. Li tee a toonne ki fan te bin soor waatɔ nba kur pur u mɔŋ Yennu sɔkinii, ki baanɔ jaruk, ki jii kut kantu ki lann u turu ni. ²⁷Bee ki a ki tun nna ki tur Jeremaya nba nyii Anatof ki piak nan u tee Yennu sɔkinii ki teen niib na? ²⁸Li tee bin gɔɔrɔe, kimaan u pak niib nba be Babilonia na nan bi sii tee yommii ki be leŋ ki lin weiwa; a bin maa ŋei, ki kar, ki baa kpaant, kii di linba ki bi ko na.”

²⁹Ki Sefania karin gbouŋ na ki wannin; ³⁰ki li poor po ki Yennu yetin a ^31-32n jiin maan nba jiin Semaya po na, ki tur yommii nba kur be Babilonia na a, “Min Yennu saa dat Semaya nan u yaaboona kur tuba. N ki tumɔ, ŋaan ki u pak turi ki li tee nan u tee sɔkiniie na, ki te ki i gaar faak ki teenir yada. U sii kaa yaaboona i sinsuuk ni. U kii be u manfoor ni ki la bonŋana nba ki n saa tun ki tur n niib na, kimaan waa pakib nan bin yêt n mɔb na paak. Min Yennu-e pak na.”

Ki jiin Yennu mɔsonn po

¹Ki Israel teeb Yomdaanɔ Yennu na ²pakin a, “Sɔbin linba kur ki n paka na ki teen gbouŋ ni, ³kimaan yoo baate ki n tan saa ŋamm n niib nba tee Israel teeb nan Juda teeb na. N saa jen namm tiŋ nba ki n din tur bi yeejamm na ni, ki bi saa yentir. Min Yennu-e pak na.”

⁴Ki Yennu pak tur Juda teeb nan Israel teeb a:

⁵“N gbat yanputuk fuur,

ki li ki tee parmaasir wuyikinii kaa,

ŋaan tee jaŋmaanii wuyikiniie.

⁶Ŋminin ŋaan dukin. Jɔɔ saa fit mar bika-a?

Bee ki n laat jɔɔ kur ki u nii be u poor paak

nan poo nba tuu yaa wun mar na?

Bee ki sɔɔ kur penn nna?

⁷Dabiir baat, ki daar kaa ki saa yek nan li daari.

Li tee yoo nba bie ki tur n niib, ŋaan n saa tinniba.”

⁸Yabint Yennu yet a, “Li daar-i baar, n saa kɔnn yɔkit nba yɔɔk bi turii ni na, ki bia pit jarit na, ki bi ji kii tee digbangann teeb na yommii. ⁹Ki bi sii jiantir min nba tee bi Yomdaanɔ Yennu na nan Defid yaaboonn nba ki n saa gann ki dinnɔ naan nae.

¹⁰N niib, i daa tiin jaŋmaanii. Israel teeb, i yan daa puti.

N saa nyinni digbanbanfɔkir na niwa,

tiŋ nba ni ki i tee yommii na.

I saa jen kpen, ki sii be i yamani.

I sii be fanu, ki sɔɔ kan kɔɔni jaŋmaanii.

¹¹N saa baar i boor ki tan tinni.

N saa biir digbana nba ki n yati ki saan nani na,

ŋaan n kan biir yimmi.

N saa dat i tubawa, ŋaan n saa dat i tuba nan lomme.

Min Yennu-e pak na.”

¹²Ki Yennu pak u niib a,

“I fiat na kan buuri, ki i danii na kaa tinteb-po.

¹³Sɔɔ kaa ki saa gotini, i nara na kaa tebuku,

dindann kaa nan i saa la laafia.

¹⁴I yɔɔsnba kur tamm i powa, bi ji ki fiin i po.

N leki nan n tee dataak nae.

I tubdatu na paar, kimaan i biit na yab bonchiann,

i nɔɔntont na paak niiwa.

¹⁵I ji daa piak i danii na po, kimaan li kaa tebuku.

N dat i tuba nna, kimaan i biit yab bonchiann,

ki i nɔɔntont na paak niiwa.

¹⁶Ŋaan mɔtana n saa biir binba kur biiri na,

ki bi saa soor i datai kur ki teemm yommii.

Binba dinti biak na kur mun saa di biak,

ki binba fiar i bona na, siab mun saa fat bi yara.

¹⁷N saa te ki yin la laafia, ki te ki i fiat na n buur,

nan i datai na nba lek yeen a,

‘Sayɔnn tee digban-yanne, ki sɔɔ ki fiin u po’ na.

Min Yennu-e pak na.”

¹⁸Ki Yennu yet a, “N saa jiin kaan n niib bi tiŋ ni,

ki sii mɔk ninbatinu ŋaak kur paak,

ki bi saa ŋamm maa Jerusalem nan li naan ŋaak.

¹⁹Niib nba be leŋ na saa yin dontir yaŋ,

ki hoot nan kpinkpammuk.

N piisin saa te ki bin pɔt, ki bia turib baakir.

²⁰N saa pant digbann na yiikoo nba ki bi din tuu mɔk na,

ki ŋamm sennir fanu, ki dat binba dintib biak na tuba.

^21-22Bi diarɔɔ saa nyi bi tiɔŋ digbann nie,

ki bi yudaanɔ n nyi bi tiɔŋ niib ni.

U saa baar n boor yoo nba ki n yiinɔe.

Ŋmee sii mɔk par ki baar ŋaan ki n ki yiinɔ.

Bi sii tee n niibe, ki n tee bi Yennu.

Min Yennu-e pak na.”

^23-24Yennu wutoor tee wonpaaruko, wonpaaruk nba saa da biit damm paak. Wouŋ maŋ kan nyik danu nan yoo nba ki u tan saa gbenn linba kur ki u lor wun tun na. Yoo baat, ki u niib tan saa bann linba na paak fanu.

Ki jiin Israel teeb kunu po

¹Ki Yennu yet a, “Yoo baat, ki n tan sii tee Israel booru kur Yennu, ki bi mun tee n niib. ²N wann n ninbatinu ki tur niib nba nyii kuun ni kunkoouk paak na. Yoo nba ki Israel teeb ŋakitir ki loon foon na, ³ki n nyii banfɔkira ki baar bi boor. Israel teeb, n yɔɔ loonie, ki tukin wanti n lomm nba kaa gbennu na. ⁴N bia saa fiiniwa. I saa ŋamm jii i naayaka ki waa waak nan parpeenn, ⁵ki bia saa ŋamm bur daan tiinii Samaria kunkona paak, ki binba bur tiinii maŋ saa di li lɔɔna. ⁶Barmɔnii, yoo baat ki guuteeb tan sii be Efraim kunkona paak, ŋaan yiin leeb ki yet a, ‘Ŋaant ti do Sayɔnn man, ti Yomdaanɔ Yennu boor.’ ”

⁷Ki Yennu yet a, “Yinin yanii nan parpeenn

ki tur Israel nba tee digbana kur digbanjaann na.

Yinin i dontir yaŋ a, ‘Yennu tinn u niiba,

u fat binba kur biar nawa.’

⁸N saa nyi namm gaŋ po ki baar namm,

ki bia nyi namm tingbouŋ na kpinii kur po

ki baar namm.

Jɔɔnii nan dianii saa weib ki baar,

ki podamm nan binba yaa bin mar kur saa baar.

Bi saa jen ki tee digbanjaanne.

⁹N niib sii jent ki mɔe,

ki mein yoo nba ki n kpent namm na.

N saa saan namm kpenii nba mɔk nyun boor,

ki tɔkin namm sɔnu nba kaa boota, ki bi kan gbiat.

N tee nan baa nae ki tur Israel teeb,

ki Efraim boorue tee n bijakper.”

¹⁰Ki Yennu yet a, “Digbana, gbiintir ki turin,

ki mɔɔnt n maan banfɔka mɔkgbiant.

N yat n niiba, ŋaan n saa tikiribe kii guub,

nan pekpaarik nba tuu guu u pei na.

¹¹N nyinn Israel teebe ki tinnib digbanpaarir nuu ni.

¹²Bi saa baar ki yin nan kpinkpammuk Sayɔnn kunkonn paak,

ki bi para sii mei n piinii paak,

ŋanne tee jeet nan tilɔɔna daan nan kpan nan bonkobit.

Bi sii tee nan kpabik nba ki bi maantir nyun fanu nae,

bi sii mɔk linba kur ki bi loon.

¹³Ki sapaamm saa waa waak ki mɔk parpeenn,

ki naasimm nan jakpera sii kpamm.

N saa maan bi para,

ki saa kpint bi mɔnii na ki teen kpinkpammuk,

ki kpint bi parbiir ki teen parmaasir.

¹⁴N saa gboon mannteeb nan jeet nba ŋan,

ki tur n niib, bi bonloŋa kur.

Min Yennu-e pak na.”

Ki jiin Yennu ninkpabauŋ po

¹⁵Ki Yennu yet a, “Fuur fu Rama doo ni,

fuur nba tee kpemɔnii nan fabinii,

ki Rachel mɔ u waas paak,

ki bi barimɔ ki tan goo,

kimaan u waas kaa.

¹⁶Nyikin mɔnii ŋaan fiar a ninnyuut na.

Linba kur ki a tun ki tur a waas na kan biar yann,

ki kaa nyɔɔti. Bi saa nyi datai tiŋ ni ki jena.

¹⁷Dindann be a tɔɔnn po; a waas na saa kpenna.

Min Yennu-e pak na.

¹⁸“N gbia ki Israel teeb piak nan parbiir a,

‘Yennu, ti tuu tee nan bonkobyiɔk nae,

ŋaan a tumiit mɔsakuwa.

Jenin nant, ti teen siir nan tin jen a boora,

fin nba tee ti Yomdaanɔ Yennu na.

¹⁹Ti bo yêtae, ŋaan mɔtana ti loon tin jene.

Faa dat ti tuba na, ti yura ji sɔɔne nan parbiir.

Ti din dii fei-e ki la yukpiasir,

kimaan ti din tun biit ti bisin niwa.’

²⁰“Israel digbann, fine tee n bijaloŋir,

bik nba ki n lomm mantik be u ni.

Yoo nba kur ki n taa a sann,

n tuu dukin a po nan lomme.

N yan tuu nyi saan a boore.

N sii mɔk ninbatinu nana.

²¹Teent nyina ki dɔk sɔnu na.

A ŋamm la sɔnu nba ki a tɔkin ki yaat na.

Jenin man, yimm Israel teeb,

jenin doi nba ki i din nyii na ni man.

²²I saa taantir nlee, yimm yadkanpɔɔna damm na?

N nan bonpaann nba be li kɔɔe,

ki li be li kɔɔ nan poo nba tuu tekir jɔɔ na.”

Ki jiin Yennu niib nyɔɔt baaru po

²³Ki Yabint Daanɔ nba tee Israel teeb Yennu na yet a, “Mi-i jiin niib na bi tiŋ ni yoo nba, bi saa ŋamm pak Juda tiŋ ni nan li doi ni a,

‘Yennu n teen piisin Jerusalem kasii kunkonn paak,

kasii boor nba ki u be na.’

²⁴Niib sii be Juda tiŋ nan li doi kur ni, ki kpaara sii be, ki pekpaarii be nan bi pei. ²⁵N saa maan binba bak na gbanu, ki bia gboon wunba ki kon baŋɔ. ²⁶Ki nisaarii saa yet a, ‘N gɔɔn ki tan yerik, ki sɔɔ ki n mɔk paŋ.’

²⁷“Min Yennu piak nan yoo baat ki n saa gbeen Israel nan Juda tinii nan niib nan bonkobit. ²⁸Ki maa la yaak nba ki ŋabir, ki daa bir, ki ber, ki biir, ki bet na, nnae ki n saa bia la yaak ki burib ki bia maa donnib. ²⁹Li yoo-i baar, nisaarii ji kan yet a,

‘Bibaanba mɔɔ gbiirkaa, ŋaan ki li mii bi waas nyana.’

³⁰Ŋaan wunba mɔɔ gbiirkaa, u nyanae sii mii, ki sɔɔ kur saa kpo u tiɔŋ biit paak.”

³¹Ki Yennu yet a, “Yoo baate, ki n tan saa lor mɔlorpaann nan Israel teeb nan Juda teeb. ³²Li tan kii tee nan mɔlor nba ki n din lor nan bi yeejamm, yoo nba ki n kub bi nii ki nyinnib Ijipt tiŋ ni na kaa. N lek din tee nan bi sɔrɔ nae, ŋaan ki bi ki dia mɔlor na. ³³Mɔlorpaann nba ki n saa lor nan Israel teeb na sii tee nnae: n ji saa teen n sennii maŋ bi dudukit nie, ki sɔbir bi para ni. Mine sii tee bi Yennu, ki bi tee n niib. ³⁴Bi sɔɔ ki tee wun ji tumii u lɔɔ koo u ninja ki yaa, ‘Bant Yennu,’ kimaan bi kur tan sii min, laa nyii tarik ki saa tuu paarɔ. N saa nyik chab bi biit, ki kan ban tiar bi yanbɔntoona po. Min Yennu-e pak na.”

³⁵Yennu-e tur yonnu ki li teent yentu daar ni,

ki turit ŋmaarik nan ŋmaabira ki li teen yentu nyiɔk.

Ŋɔɔe tuu kut mɔkir ki te ki li fu, u sanne Yabint Yennu.

³⁶U senn mɔsonn a durinya ŋaak bona nba be li seenu ni

ki yukii biaŋinba na, nnae ki Israel sii tee digbann ki yukir.

³⁷Li-i tee ki bi saa fit bikin sanpaak, ki ŋmaa tingbouŋ na,

li yooe ki Yennu mun saa yêt u niib Israel teeb,

kimaan linba ki bi tun na paak.

Yennu-e pak na.

³⁸Ki Yennu yet a, “Yoo baate ki bi saa ŋamm maa Jerusalem, ki li tee n doo, laa nyii Hananel difoouk na boor, ki saan tuu Gungɔnt boor Tammɔb na. ³⁹Ki kpaar na saa nyi yonbaa po maŋ ki saan baar Gareb kunkonn paak, ki gɔnt baar Goa. ⁴⁰Baauk na kur, baa pii kuun sian, ki bi lubin bonchiat na, nan kpaant nba be Kidronn nyuntonn boor na kur, ki saan tuu Taamm Tammɔb nba be yondo po na, li kur sii tee kasiie ki turin. Bi ji kan ban yeer doo na koo ki biiriri.”

Ki jiin Jeremaya tiŋ daanu po

¹Juda kpanbar Sedekaya naan bina piik nie ki Yennu pak nanin. Babilonia kpanbar Nebukanesar mun yaa naan bina piik nan ŋanniin nie na. ²Li yoo na ki Babilonia kpanbar jab lek Jerusalem, ki sɔɔ ki bi soorin ki loonin kpanbar ŋaak dindouŋ niwa. ³Kpanbar Sedekaya-e din loonin leŋ, ki nyiirin a n mɔɔntir nan Yennu yet a, “N saa te ki Babilonia kpanbar n nyann doo nae, ⁴ki kpanbar Sedekaya kan fit chiar paaki. Bi saa soorɔ ki tur Babilonia kpanbar, ki u saa lau nan u ninbinn, ki pak nanɔ. ⁵Bi saa soor Sedekaya ki saan nanɔ Babilonia, ki u sii be leŋ nan maa tan saa dat u tubir. Wuu lekii kɔn nan Babilonn teeb na, ŋaan u kan nyanni. Min Yennu-e pak na.”

⁶Yennu pakin ⁷nan n baa naa bik Salum bija Hanamel saa baar n boor ki pakin a man daa u tiŋ nba be Anatof, ki li be Benjaminn yent ni na, kimaan mine mantik kpiin nanɔ ki mɔk yaak nba saa daa tiŋ na, ki li tee n yar. ⁸Nan Yennu nba kpan pak biaŋinba na, ki Hanamel baar n boor, dindouŋ maŋ ni, ki tan yetin a n daa tiŋ na. Ki n bann nan Yennu set pak nanima. ⁹Ki n daa tiŋ na Hanamel boor, ki bikin u likirii turɔ. Li daauk din tee salinkuna piik nan ŋanlore-e. ¹⁰Ki n sɔb n sann ki te niib dii siara, ki n loon gbouŋ na. N din bikin likirii na churu paake. ¹¹Li poor po, ki n jii gbant ŋanlee nba tee tiŋ na daanu gbant na; gbouŋ nba loon ki tiŋ na daanu sennii be li ni na, nan gbouŋ nba ki loon na, ¹²ki tur Baruk, wunba tee Neria bija ki tee Maseya yaaboonn na. N din jii gbant maŋ ki turɔ Hanamel numm nie, nan siara damm nba sɔb bi sana tiŋ na daanu gbouŋ paak na, nan jab nba kar dindouŋ ni na numm ni. ¹³Bi kura numm nie ki n pak Baruk a, ¹⁴“Yabint Daanɔ nba tee Israel teeb Yennu wanna nan a jii gbant na, linba loon na nan linba ki loon na, ki kpeenir yɔkbobir ni, ki lii be li ni ki wei. ¹⁵Yabint Daanɔ nba tee Israel teeb Yennu na yet a bi saa ŋamm daa ŋei nan tinii nan daan tiinii kpaant, tiŋ na ni.”

Ki jiin Jeremaya Yenmiaru po

¹⁶Maa tur Baruk tiŋ daanu gbant na, ki n miar Yennu a, ¹⁷“Yabint Yennu, a jii a paŋ nan a yabinte ki nan tiŋ nan sanpaak. Siar kaa ki paar turani. ¹⁸A wann a lomm nba kaa paak na ki tur niib tusaa, ŋaan a mun bia daar niib tuba, bi damm biit paak. A tee Yenjaann nba mɔk yiikooe, ki tee Yabint Yennu. ¹⁹A lorin yan lora ki tuun toonjaana, ki laat linba kur ki niib tuun, ki pab ki li jaŋit nan bi toona. ²⁰Yoo nba din gar na, a din tun bakitnauŋ nan yaarlituk toona Ijipt tiŋ ni, ki bia tukin ki tuunir nan dinna, Israel tiŋ ni nan digbanlia nba kur be, ki li te bi banna siar kur po. ²¹Li nyii yaarlituk nan bakitnauŋ toona nba jeen ti datai na nie ki a jii a yiikoo nan paŋ, ki nyinn a niib Israel teeb, Ijipt tiŋ ni. ²²A turib tiŋ nba ŋan ki kpai na, nan faa din senn bi yeejamm mɔsonn nae. ²³Ŋaan baa kɔɔ tiŋ na ni ki yentir yoo nba, bi ji ki sak a mɔb koo ki wei a sennii. Bi ki tun linba ki a wannib a bin tun na. Ŋanne ki a baar nan biiru na bi paak.

²⁴“Babilonia teeb bir leku tanpootae, ki lint doo na, a bin nyannir, ki poŋ lekira. Tɔb nan kon nan yiaru saa te ki doo na n baa bi nuu ni. Linba ki a pak na teen mɔniiwa, ²⁵ŋaan fin Yabint Yennu-e wannin nan n daa tiŋ na, siara damm numm ni, ŋaan ki Babilonia teeb lek yaa bin nyann doo nae.”

²⁶Ki Yennu pakin a, ²⁷“Mine tee Yennu nba tee nisaarii kur Yomdaanɔ, siar kaa ki paar n boori. ²⁸N saa jii doo na ki tur Babilonia kpanbar Nebukanesar nan u jab, ki bi saa nyannir, ²⁹ki joor muu. Bi saa joo li kur muu, ki kpab nan ŋei nba ki bi jokin bonnunubit li ni ki tur tingbann Baal ki donn n wutoor na. Bi jokin bonnunubit maŋ ŋei na yur paake,32.29 Bi ŋei yura paak, bi din tuu sere. ki bia mɔ daan piinii ki teen yenbis. ³⁰Laa nyii Israel teeb nan Juda teeb pinpiik niwa, bi kpan dont n wutoore bonchiann nan linba ki bi tuun na. ³¹Doo na teeb donn n wutoor ki biir n par, li piinu niewa. N lor man biirire, ³²kimaan Jerusalem nan Juda teeb, nan bi kpanbara nan bi tɔɔndamm, nan mannteeb nan sɔkiniinba biit paak. ³³Bi ŋmant bi poore ki turin, ki maa lek tumiib yoo kur na, ŋaan bi ki loon bin gbiint ki banni. ³⁴Bi poŋ maa bi tingbanbiit nae, jiantu ŋasaakak nba tee bii jiantirin na ni, ki biirir. ³⁵Bi maa tingbann Baal maruŋ binbintae, Hinom Baauk ni, a bii mann bi bonjai nan bonpoi kii teen tingbann nba tee Molek na. N ki wannib nan bin tun linba na, li poŋ ki kɔɔ n yan ni nan bin tun nna ki kɔɔn Juda teeb bonbilankant ni.”

Ki jiin dindann mɔsonn po

³⁶Yennu nba tee Israel teeb Yomdaanɔ na pakin a, “Jeremaya, niib na yeen a tɔb nan kon nan yiarii saa te ki doo na n baa Babilonia kpanbar nuu niwa. Gbiintir linba ki n mɔk ki saa pak pukin. ³⁷N saa tikir niib maŋ ki nyi namm digbana nba ni ki n wutoor din doo ki n par biir, ki n yatib ki saan namm na, ki jen namm nna, ki te bii be bi yamani. ³⁸Ki bi sii tee n niib, ki n tee bi Yennu. ³⁹N saa turib dudukjar yenn kɔɔe bi manfoor ni, ki ŋanne tee bii teenin baakir yoo kur, ki lii ŋan ki tur ŋamm nan bi yaaboona. ⁴⁰N saa lor mɔlor namm, ki li mɔlor sii yɔɔ be. N sii yɔɔ tuun ŋamm ki teemm ki saa te ki bi tiinin nan bi yan kur, ki lin te bi daa ŋmantir bi poor ki teenin. ⁴¹Li sii manin nan mii tuun toonŋana kii teemm, ki n saa kaanib fanu, tiŋ na ni.

⁴²“Biaŋinba ki n baar nan biak niib na paak na, nnae ki n bia saa turib bonŋana nba kur ki n senn mɔsonn nan n saa turib na. ⁴³Niib na piak nan tiŋ na sii tee nan kunkoouk nba ki nisaarik koo bonkobuk kaa nae, ki li sii be Babilonia teeb nuu ni, ŋaan niib tan saa daa kpaant tiŋ na ni. ⁴⁴Niib saa daar, ki sɔb bi sana li gbant ni, ki loon ki siara damm n set. Linba na saa tun Benjaminn yent ni, nan doi nba lint Jerusalem na ni, nan Juda yent doi ni, nan kunkona tiŋ na doi ni, nan kunkonbis doi ni, nan Juda yent diitu po doi ni. N saa jiin kaan niib na bi tiɔŋ tiŋ niwa. Min Yennu-e pak na.”

Ki jiin dindann mɔsonleer po

¹Yoo nba ki n loo dindouŋ ni na, ki Yennu maan ŋamm baar n boor. ²Yennu nba nan tingbouŋ na ki sennir li seenu ni na pak turin. Wunba sann tee Yennu na pak nanin a, ³“Yiintin, ki n saa toon; n saa paka bakitnauŋ nan yaarlituk bona nba ki a ki mi siar jiin li po. ⁴Min Israel teeb Yomdaanɔ Yennu piak a Jerusalem ŋei nan Juda naan ŋaak na, bi saa yeerir, kimaan baa loonir ki lekir na paak. ⁵Siab saa kɔn nan Babilonia jab, ki Babilonia jab na saa gbeen ŋei na nan niib nba ki n saa jii n wutochiɔŋ ki kpib na gbanankpeena. N lek n numm doo na paaka, kimaan biit nba ki li niib tun na paak. ⁶Ŋaan n saa teb doo na nan li niiba, ki turib laafia. N saa wannib parmaasir nan binbenŋaŋ. ⁷N saa te Juda nan Israel teeb n mɔkit, ki ŋamm maab, nan baa din tee na. ⁸N saa ŋammib, ki nyinnib bi biit nba ki bi din biirin na ni, ki saa nyik chab bi biit nan bi mɔyêtuk na. ⁹Jerusalem sii tee kpinkpammuk nan baakir nan yugontir boore ki turin, ki durinya ŋaak na digbann kur yan saa put, bi-i gbat bonŋana nba ki n tun ki tur Jerusalem teeb, nan maa baar nan nyɔɔt nba ki tur doo maŋ na po.”

¹⁰Ki Yennu yet a, “Niib yeen a nna tee nan kunkoouk nae, ki niib koo bonkobit kaa leŋ. Bi mɔk mɔnii: Juda doi nan Jerusalem sɔnii dɔɔ koonte, niib koo bonkobit kaa leŋi, ŋaan nna na, i saa ŋamm gbat ¹¹fuut nba tee parmaasir nan parpeenn yar, ki poochianu jaamm kpinkpammuk fuur sii fu. I sii gbia niib yiin yanii, yoo nba ki bi baat nan niipoturu piinii a bin turin jiantu ŋasaakak ni na, ki bi sii yiin a,

‘Turin Yabint Yennu niipoouk,

kimaan u ŋan, ki u lomm kaa gbennu.’

N saa te ki tiŋ na n mɔkit nan laa din tee na. Min Yennu-e pak na.”

¹²Yabint Yennu yet a, “Tiŋ nba naan kunkoouk, ki niib nan bonkobit kaa leŋ na, ŋaan mɔmaatuk tan sii be, ki pekpaarii saa baar nan bi pei leŋ. ¹³Ki doi nba be kunkona digbann na ni, nan li kunkonbis ni, nan Juda yent diitu po, nan Benjaminn yent ni, nan doi nba lint Jerusalem na ni, nan Juda yent doi nie ki pekpaarii tan saa ŋamm kan bi pei. Min Yennu-e pak na.”

¹⁴Yennu yet a, “Yoo baat, ki n saa gbeen mɔsonn nba ki n senn ki tur Israel nan Juda teeb na. ¹⁵Li yoo, n saa gann Defid yaaboonn nba tee popeendaanɔe ki dinnɔ naan. Kpanbar maŋ sii tuun linba ŋan ki bia tooke, tiŋ na kur po. ¹⁶Ki Juda nan Jerusalem niib saa foor ki be bi yamani. Doo na sann sii tee ‘Yennu-e tee ti binben-yeeŋ.’ ¹⁷Min Yennu senn mɔsonn nan Defid yaaboonn sii yɔɔ be ki di Israel naan, ¹⁸ki mannteeb sii yɔɔ be ki nyi Liifai booru ni, ki tuun n toona, ki mann mujoonu maruŋ, nan jeet piinii maruŋ, nan marunlia.”

¹⁹Yennu pak turin a, ²⁰“N lor mɔlore ki tur yonnu ni nan nyiɔk a bin tuu baar bi binbaar yoo, ki li mɔlor kan ban loti. ²¹Nnae ki n bia lor mɔlor nan n toontunnɔ Defid a u sii yɔɔ mɔk yaaboonn nba saa di naan, ki bia lor mɔlor nan mannteeb nba nyii Liifai booru ni, a bi sii yɔɔ tuun n toona; ki li mɔlora kan ban ki loti. ²²N saa pukin n toontunnɔ Defid yaaboona kann, ki bia pukin mannteeb nba nyii Liifai booru ni na kann, ki bi kanu sii paar nan ŋmaabira kanu nba paar na, koo mɔktant kanu nba paar nae.”

²³Yennu pak turin a, ²⁴“A la biaŋinba ki niib piak nan n yêt Israel nan Juda booru munlee nba ki n gann nawa-a? Ki li paak bi ji ki gorii gboot n niib, ki bia ki dukii bi po nan bi tee digbanni. ²⁵Ŋaan min Yennu mɔk mɔlor ki tur yonnu ni nan nyiɔk, ki bia senn sennii nba dia tingbouŋ nan sanpaak. ²⁶Maa tun bona na biaŋinba na, nnae ki n saa dia n mɔlor nan Jakɔb yaaboona nan n toontunnɔ Defid. N saa gann Defid yaaboona na yenɔe ki wuu dia Abraham nan Aisak nan Jakɔb yaaboona. N sii mɔk ninbatinu nan n niib, ki te bin mɔkit.”

Biaŋinba ki Jeremaya kpaan Sedekaya

¹Ki Yennu pak nan min Jeremaya, yoo nba ki Babilonia kpanbar Nebukanesar nan u jab, nan jab nba din tee u sommteeb ki nyii digbana kur po, nan booru kur nba tee u jiamm na din lek Jerusalem nan li digbanbis na. ²Israel teeb Yomdaanɔ Yennu na pakin a man saan pak Juda kpanbar Sedekaya a, “Min Yennu saa jii doo na ki kubin Babilonia kpanbar nuu ni, ki u saa joor muu. ³A kan chiar boti; bi saa soora ki kubin u nuu ni. A saa lau nan a ninbinn, ki saa pak nanɔ, li poor po ki a saa saan Babilonia. ⁴Sedekaya, gbiintir linba ki n piak ki jiint a po na. Bi kan kpia tɔb niŋi. ⁵A saa kpo nan gbananmaasue. Baa din tuu joo bonnunubit yoo nba ki bi pii a yeejamm nba din dɔŋ dii naama ki a tan dii na, nnae ki bi saa joo bonnunubit ki tura. Bi sii mɔ a kpemɔnii ki yeen a, ‘Ti kpanbar kpowa.’ Min Yennu-e pak na.”

⁶Ki n jii maan na ki tur kpanbar Sedekaya, Jerusalem doo ni, ⁷yoo nba ki Babilonn kpanbar jab din lek doo na. Jab na bia din lek Lakis nan Aseka, ki li tee Juda yent ni digbanpaara nba biar.

Ki jiin daaba dianu po

⁸Kpanbar Sedekaya nan Jerusalem teeb din lor mɔlor nan bin chab ⁹bi leeb Israel teeb nba tee daaba na ki bii be bi yamani, jab nan poob kur, ki sɔɔ ji daa dia u lɔɔ Israel nirɔ ki u tee daabiri. ¹⁰Niib na kur nan bi saakab din sak nan bin ŋaa bi daaba na, ki bia ji daa ban jikitib ki tee daaba. Ki bi set din ŋaab, ¹¹ŋaan tan lebit bi dudukit li poor po ki ŋmat soorib, ki mia teemm daaba biak.

^12-13Ŋanne ki Israel teeb Yomdaanɔ Yennu na pakin a n pak niib na a, “N lor mɔlor nan i yeejamm, yoo nba ki n din nyinnib Ijipt, ki fatib daabisin ni na. N din pakib nan ¹⁴bina ŋanlore ni kur, bin tuu ŋaa Israel daabir nba kur tun turib bina ŋanloob nba gar, ŋaan i yeejamm baka kaa n po, ki bi ki gbiint linba ki n pak na. ¹⁵Daa ŋanŋaa nba gar na ni, i daan lebit i dudukit ki tun linba mei n par. I kura daan sak nan yin ŋaa Israel teleeb na, ki i daan lor mɔlor n boor ni, jiantu ŋasaakak ni, siaminba ki i jiantirin na. ¹⁶Ŋaan i bia ŋamm lebit i dudukite, ki ki turin baakir. I kur ŋmat jii daaba nba ki i daan ŋaab nan baa loon biaŋinba nae, ki mia jiimm daabisin ni. ¹⁷Li paak, min Yennu piaki nan i yêt n mɔba; i ki tur Israel teleeb bi yaaki. Tɔn, n saa turi yaak, ki li sii tee yaak nba ki i saa kpo tɔb ni, nan yiarii ni, nan kon ni. N saa te ki digbann kur tingbouŋ na ni yan n put nan linba ki n saa tun turi na. ^18-19Juda nan Jerusalem saakab, ki kpab nan kpanbar ŋaasaakab, nan mannteeb, nan tɔɔndamm kur lor mɔlor nanin ki somm naajak nba ki bi chɔɔ bɔkitɔ na bɔka ŋanlee maŋ sinsuuk ni. Ŋaan bi biir mɔlor nae, ki ki dia li mɔbona. Li paak, n saa teen niib na nan baa din teen naajak maŋ nae. ²⁰N saa jiib kubin bi datai nba loon bin kpib na, ki nɔɔnii nan muuk ni bonkobit saa di bi gbanant. ²¹N bia saa jii Juda kpanbar Sedekaya nan u saakab ki kubin binba loon bin kpib na. N saa jiib ki kubin Babilonia jab nba nyik i leku na. ²²N saa tur mɔb, ki bi saa jen doo na ni. Bi saa lekir ki nyannir, ki joor muu. N saa teen Juda doi nan kunkoouk nba ki sɔɔ ki kɔɔ leŋ nae. Min Yennu-e pak na.”

Ki jiin Jeremaya nan Rekab niib po

¹Yoo nba ki Josaya bija Jehoyakim din tee Juda kpanbar na, ki Yennu pak turin a, ²“Saant Rekab naakuuk ni, ki saa pak namm, ki jiib baar namm jiantu ŋasaakak na diit na yenn ni, ki turib daan.” ³Ki n jii Rekab naakuuk na niib kur: ŋamme tee Jasania (Jeremaya lɔɔ bija, ki Jeremaya lɔɔ maŋ mun din tee Habasinia bija) nan u ninjamm, nan u bonjai kur, ⁴ki baar namm Yenjiantu ŋasaakak na ni, ki jiib kɔɔ namm Igdalia bija Hanann nba tee Yennu sɔkinii na poorpoweiteeb diiuk ni. Diiuk na din be Salum bija Maaseya diiuk yur paake, ki kpia nan saakaleeb diit. Salum din tee saakajaanne, Yenjiantu ŋasaakak na ni. ⁵Ki n gbeen nyunnyuŋmanii nan saaŋmanii nan daan ki senn Rekab niib na, ŋaan yetib a, “Gaat daan man.”

⁶Ŋaan ki bi jiin a, “Ti ki nyu daan. Ti yeeja Jonadab nba tee Rekab bija na din pakit a timm koo ti yaaboona daa nyu daan. ⁷U bia pakit nan ti daa maa ŋei koo ki baa kpaanti; ki bia daa buur daan tiinii, koo ki daar. U wannit nan tii be lanbont nie yoo kur, ki lin te ki tii be tiŋ nba ni ki ti tee nan saamm na. ⁸Ti sak sennu nba kur ki ti yeeja Jonadab turita. Ti mɔŋ ki nyu daan, ki ti bonjai nan ti bonpoi nan ti poob mun bia ki nyu. ^9-10Ti ki maa ŋei ki kɔɔ, ti be lanbont nie; ki ti bia ki mɔk daan tiinii, koo kpaant, koo bonbuburiti. Ti sak linba ki ti yeeja Jonadab sennit na fanuwa. ¹¹Ŋaan yoo nba ki kpanbar Nebukanesar lek tiŋ nae, ki ti dukin nan tin baar Jerusalem ki nyi Babilonia jab nan Asiria jab nuu ni. Ŋanne teen ki ti kar Jerusalem na.”

^12-13Ki Yabint Daanɔ nba tee Israel teeb Yennu na pakin a man saan pak Juda nan Jerusalem niib a, “Min Yennu boi-i ki laan bee teen ki i yêt yin gbiint n maan, ki ki sak n sennii. ¹⁴Jonadab yaaboona sak u sennu nba yaa bi daa nyu daan na, ki nan dinna bi sɔɔ ki nyu daan, ŋaan ki n yɔɔ piak nani, ki i ki sak n mɔb. ¹⁵N yɔɔ tuun n toontunna nba tee n sɔkiniinba nae i boor, ki bi piaki nan yin nyik i toonbiit, ŋaan kii tuun fanu. Bi kpaani nan ii nyik yenbis jiantu, ki fit kii be tiŋ nba ki n tur yimm nan i yeejamm na ni. Ŋaan i ki gbiint turin, koo ki teen i baka n ni. ¹⁶Jonadab yaaboona sak sennu nba ki u senniba, ŋaan yimm ŋarin ki sak n mɔbi. ¹⁷Li paak, min Yabint Daanɔ nba tee Israel teeb Yennu na saa baar nan biiru nba kur ki n senn na, yimm Juda nan Jerusalem teeb paak. N saa tun linba na, kimaan i ki gbiint yoo nba ki n pak nani na, ki bia ki toon yoo nba ki n yiini na.”

¹⁸Ki n pak Rekab niib na a Yabint Daanɔ nba tee Israel teeb Yennu na yet a, “I sak sennu nba ki i yeeja Jonadab turi nawa, i wei u sennu na kura, ki tun linba kur ki u wanniwa. ¹⁹Li paak, min Yabint Daanɔ nba tee Israel teeb Yennu na sent mɔsonn nan Rekab bija Jonadab sii yɔɔ mɔk yaaboonne, ki u tuun ki teenin.”

Biaŋinba ki Baruk karin gbouŋ Yenjiantu ŋasaakak ni

¹Josaya bija Jehoyakim nba dii Juda naan, li bina ŋanna nie ki Yennu pak turin a, ²“Jiin gbouŋ ki sɔb linba kur ki n paka ki jiin Israel tiŋ nan Juda tiŋ nan digbana kur po na ki teen leŋ. Sɔbin linba kur ki n paka, laa nyii yoo nba ki n sint pak nana, ki sɔɔ Josaya daa tee kpanbar nawa ki tan tuu mɔtana. ³Li-i tee ki Juda niib gbat biiru nba kur ki n yaa man baar nann bi paak na, li ki gar bin nyik toonbiit tumu, ki n bo saa nyik chab bi toonbiit nan bi yanbɔmma.”

⁴Ŋanne ki n yiin Neria bija Baruk ki wannɔ linba kur ki Yennu pakin. Ki Baruk sɔbir ki teen gbouŋ ni. ⁵Ki n tur Baruk mɔbona nba na a: “Bi ki chabin nan man kɔɔ Yenjiantu ŋasaakak ni. ⁶Li paak, n loon fan tan saan leŋ, yoo nba ki niib na lor mɔi-e. Li tee fan saan karin gbouŋ na nan kunkɔsaakare, ki bin gbat linba kur ki Yennu pak turin, ki n mun wanna. A tun linba na siaminba ki sɔɔ kur saa fit gbat a kunkɔr, ki kpab nan Juda teeb nba nyii bi doi ni ki baar na. ⁷Li ki gar bin miar Yennu ŋaan nyik bi toonbiiti, kimaan Yennu wutoor doo niib na paak bonchiann.” ⁸Ki Baruk karin Yennu maan na, Yenjiantu ŋasaakak ni, nan maa kpan wannɔ biaŋinba na.

⁹Ki Jehoyakim nba dii Juda naan, li bina ŋanŋmu, ŋmaarii ŋanyia nie, ki niib na lor mɔi, a Yennu par n maak bi paak. Binba din be Jerusalem, nan binba kur din nyii Juda doi ni ki baar na kur din lor mɔie. ¹⁰Niib na kur din gbiine, ki Baruk karin linba kur ki n wannɔ na. U din tun linba na Yenjiantu ŋasaakak nie, Safann bija Gemaria nba tee gbansɔbirɔ na diiuk ni. U diiuk na din be ŋasaakak dindouŋ na paapoe, ki kpia Tammɔpaann na.

Biaŋinba ki bi karin gbouŋ na ki tur saakab

¹¹Mikaya, wunba tee Gemaria bija, ŋaan tee Safann yaaboonn na din gbat ki Baruk karin Yennu mɔmaan na. ¹²Ki u din saan kpanbar ŋaak, ki saa kɔɔ kpanbar gbansɔbirɔ na diiuk ni, ki saakab na kur be leŋ. Gbansɔbirɔ Elisama nan Semaya bija Delaya, nan Akbor bija El-natann, nan Safann bija Gemaria, nan Hanania bija Sedekaya, nan saakaleeb na kur din be leŋ. ¹³Ki Mikaya pakib linba kur ki u gbat Baruk karin ki tur niib na. ¹⁴Ki saakab na tun Jehudi (u din tee Netania bijae, ki tee Selemia yaaboonn ŋaan tee Kusi yaaboonlee) a wun saan yet Baruk ki wun baar nan gbouŋ nba ki u karin ki tur niib na. Ki Baruk baar nan gbouŋ na ki turib. ¹⁵Ki bi pakɔ a, “Karin kok paak ki karin gbouŋ maŋ ki turit.” Ki Baruk karin. ¹⁶Waa karin gbenn yoo nba, ki bi ŋmat jiant leeb paak nan jijekit, ki yet Baruk a, “See ki ti wann kpanbar linba na.” ¹⁷Bi din yetɔ a, “Wantit faa teen biaŋinba ki tan sɔb na. Jeremaya-e wannani-i?”

¹⁸Ki Baruk jiin a, “Jeremaya-e wannin li mɔbona kur, ki n jii bonsɔbkar ki sɔbir gbouŋ na ni.”

¹⁹Ki bi yetɔ a, “Li tee fin nan Jeremaya n saan ki saa bɔre. I daa te ki sɔɔ bant yaa be siaminba.”

Biaŋinba ki kpanbar joo gbouŋ na muu

²⁰Saakab na din bir gbouŋ na gbansɔbirɔ Elisama diiuk nie, ŋaan saan kpanbar naakuuk ni, ki saa wann kpanbar li maan kur. ²¹Ki kpanbar tun Jehudi a wun jii gbouŋ na. Ki u jii gbouŋ na Elisama diiuk ni, ki karin wann kpanbar nan u saakab nba see u boor. ²²Li din tee waat yooe, ki kpanbar na kar u waat naakuuk ni ki kpia muu. ²³Ki yoo nba Jehudi karin bɔka ŋantaa koo ŋanna, kpanbar na tuu jii jukbike ki ŋmaar li biaŋ, ki lu muu ni. U din tee nnae nan waa saa joo gbouŋ na kur muu. ²⁴Ŋaan kpanbar na nan u saakab nba kur gbat maan na, bi sɔɔ yan din ki put, koo ki bi tun siar ki li saa wann nan bi para biiri. ²⁵El-natann nan Delaya nan Gemaria lek din barin kpanbar na nan u daa jokit gbouŋ na, ŋaan ki u ki gbiint turibi. ²⁶Li poor po ki u yet u ŋaasaakɔɔ Jerameel, nan Asriel bija Seraya, nan Abdeel bija Selemia, a bin soor min nan n gbounsɔbirɔ Baruk. Ŋaan sɔɔ ki Yennu bɔrita.

Biaŋinba ki Jeremaya sɔb gbounleeuk

²⁷Ki kpanbar Jehoyakim nba joo gbouŋ nba ki n wann Baruk ki u sɔb na poor poe, ki Yennu pakin ²⁸a n ŋamm jii gbounleeuk ki sɔb linba kur bo be sinsinn gbouŋ ni na, ki teen leŋ. ²⁹Yennu din pakin a n yet kpanbar na a, “A joo gbouŋ nawa, ki bia boi Jeremaya a bee ki u sɔb a Babilonia kpanbar saa baar ki tan biir tiŋ na, ki kpi li niib nan bonkobit kuri. ³⁰Li paak min Yennu piak fin kpanbar Jehoyakim a a yaaboonsɔɔ kan ban dia Defid naan yent na. Bi saa lu a gbanant siaminba ki yonnu sii nyi li paak daar nɔɔk ni, ki marin mun baa li paak nyiɔk. ³¹N saa dat fin nan a yaaboona nan a saakab tuba, kimaan biit nba ki i kur tun na paak. Fin nan Jerusalem nan Juda teeb kura ki gbiint n kpaanii na, ki n saa baar nan biak nba ki n wann na i paak.”

³²Ŋanne ki n jii gbounleeuk ki tur n gbansɔbirɔ Baruk, ki u sɔb linba kur ki n wannɔ, ki li bo be sinsinn gbouŋ ni na, nan mɔbonlia nba naan nna.

Biaŋinba ki Sedekaya loon Jeremaya n miar Yennu

¹Babilonia kpanbar Nebukanesar din dinn Josaya bija Sedekaya-e Juda naan, ki u set Jehoyakim bija Jehoyachinn taar ni. ²Ŋaan Sedekaya nan u saakab nan niib na din ki gaar maan nba ki Yennu pakin na.

³Ki kpanbar Sedekaya tun Jehukal, wunba tee Selemia bija na, nan Maaseya bija Sefania nba tee manntɔɔ na, a bin baar yetin ki man miar ti Yomdaanɔ Yennu ti digbann na paak. ⁴Li yoo na ki n daa ki kɔɔ dansariki, ki lin n yamani. ⁵Babilonia jab din faa Jerusalem tɔbo, ŋaan baa gbat nan Ijipt jab poot Ijipt kpaara na, ki bi ŋmat.

⁶Ki Israel teeb Yomdaanɔ Yennu yetin nan n pak Sedekaya a, ⁷“Ijipt jab baat a bin tan somma, ŋaan bi saa ŋmat kuna, ⁸ki Babilonia jab na saa jen ki tan lek doo na, ki nyannir, ki joor muu. ⁹Min Yennu kpaani nan i daa kpann i mɔŋ ki dukii nan Babilonia jab na kan jeni; bi saa jenna. ¹⁰Li-i lekii tee ki i nyann Babilonia jab kur, ki binba ki i paamm danii na kɔɔ biar ki dɔɔ bi lanbont ni, ŋaan bi saa fit fiir joo doo na kur muuwa.”

Biaŋinba ki Jeremaya kɔɔ dansarik

¹¹Babilonia jab na din nyii Jerusalem ki ŋmat, kimaan Ijipt jab na din baate a bin somm Jerusalem teeb. ¹²Ki n nyii Jerusalem maa n saan Benjaminn yent ni, ki saa gaar ti ŋaak faar tor. ¹³Ŋaan maa baar Benjaminn Tammɔb yoo nba, ki jab nba be leŋ na saakɔɔ, ki u sann tee Irija, ki u baa sann tee Selemia ki u yeeja sann tee Hanania na gɔɔrin, ki yet a, “A tiin saa Babilonia jab boore na.”

¹⁴Ki n jiin a, “Li ki tee nna kaa. N ki tiin kaa.” Ŋaan Irija din ki gbiint turimi. U din soorime ki saan nanin saakab boor. ¹⁵Bi wutoor din doo n paak, ki bi tur mɔb a bin boon, ki kparin gann Jonatann nba tee gbansɔbirɔ na ŋaak ni. Bi din jii u ŋaak maŋe ki teen dansarik. ¹⁶Bi din sikinin dansarik nba be tiŋ nie, ki li wei bonchiann.

¹⁷Li poor po ki kpanbar Sedekaya tan tun a bin yiinin, ki n baar u ŋaak ni, ki u bakin ki boin a, “Labasiar be ki nyii Yennu boori-i?”

Ki n jiin a, “Labaar be. Bi tan saa soora ki kubin Babilonia kpanbar.” ¹⁸Li poor po ki n boiɔ a, “N tun bonbilanne ki tura, koo ki tur a saakab koo niib na, ki a kɔɔnin dansariki? ¹⁹Sɔkiniinba nba paka nan Babilonia kpanbar kan leka, koo ki lek a digbann na be lia? ²⁰Chanbaa, n mei-a ki a gbiint ki turin, ki tun linba ki n saa wanna. Chanbaa, a daa jiintin dansarik ni, Jonatann ŋaaki. Fi-i tun nna, n saa kpo leŋa.”

²¹Ki kpanbar Sedekaya te ki bi kparin u ŋaadindouŋ ni. N din be leŋe, ki bi nyi nan boroboro kunn, baa pur sian na, ki teenin daar kur, nan doo na ni jeet nba tan gbenn.

Biaŋinba ki bi sikin Jeremaya bunbunkoonn ni

¹Ki Matann bija Sefatia, nan Pasur bija Gedalia, nan Selemia bija Jehukal, nan Malkia bija Pasur gbat nan n piak niib na ²a Yennu yet a, “Wunba biar doo na ni saa kpo tɔb ni, koo nan kon, koo nan yiaru. Ŋaan wunba nyii ki jii u mɔŋ tur Babilonn jab, bi kan kpiu, u saa tinn u manfoora.” ³N bia din beerib nan Yennu yet a, “N saa jii doo na ki teen Babilonia jab nuu ni, ki bi saa nyannir.”

⁴Ki saakab na din saan kpanbar boor ki saa yetɔ a, “Li tee bin kpi jɔɔ nae, waa piak biaŋinba na te ki jaŋmaanii kɔɔ doo na ni jab nae, ki u bia tuun nnae ki teen sɔɔ kur nba be doo na ni. U ki yaa wun somm niib na kaa. U biiribe.”

⁵Ki kpanbar Sedekaya jiin a, “Tɔn, tumin yaa loon biaŋinba ki turɔ. N kan fit gɔɔrini.” ⁶Ki bi soorin, ki pirimin ŋmiit, ki sikinin kpanbar ŋaasaakɔɔ Malkia bunbunn ni, ki li be kpanbar ŋaadindouŋ ni. Nyun din kaa bunbunn na ni, see bakir kɔɔ, ki n sik fer leŋ.

⁷Ki Ebed-melek, wunba tee Itiopia jatɔɔkir, ki tee kpanbar ŋaatoontunnɔ na, gbat nan bi sikinin bunbunn ni. Li yoo ki kpanbar na bu maan, Benjaminn Tammɔb ni. ⁸Ki Ebed-melek saan leŋ ki yet kpanbar na a, ⁹“Chanbaa, jab na nba tun linba na tee biite. Bi sikin Jeremaya bunbunn nie, ki kon saa kpiu, kimaan jeet ji kaa doo na ni.” ¹⁰Ki kpanbar na wann Ebed-melek a wun jii jab bantaa, ki ŋɔɔ nan ŋamm n baar donnin bunbunn na ni, ki n daa kpenni. ¹¹Ki Ebed-melek nan jab bantaa na saan kpanbar ŋaadiiuk nba ki bi birin bona li ni na, ki jii kparchant ki sikin nan ŋmiit turin, ¹²ki pakin a n kɔɔn kparchant na n boot ni, ki ŋmiit na daa teenin daŋ. Ki n tun nna, ¹³ki bi dat nyinnin bunbunn na ni. Li poor po ki bi ji din te ki n be kpanbar na ŋaadindouŋ ni.

Biaŋinba Sedekaya boi Jeremaya kpaanii po

¹⁴Sianyoo biak ki kpanbar Sedekaya te ki bi baar nanin Yenjiantu ŋasaakak na tammɔb nba pukin ŋantaa na ni, ki u yet a, “N loon ki n boia siare ki fan wannin li barmɔnii kur.”

¹⁵Ki n jiin a, “Mi-i paka barmɔnii, a saa kpime, ki mi-i bia tura kpaanii, a kan gbiinti.”

¹⁶Ki kpanbar Sedekaya senn mɔsonn na ki turin woonin ni a, “N por nan Yennu nba fo ki teenit manfoor na nan n kan kpi-a, koo ki jiia kubin binba loon bin kpi-a na.”

¹⁷Ŋanne ki n pak Sedekaya a Yabint Daanɔ nba tee Israel teeb Yennu na yet a, “Li-i tee ki a jii a mɔŋ ki chab Babilonn kpanbar saakab na, a manfoor saa tinna, ki doo na kan di muu. Fin nan a ŋaak kur saa tinna. ¹⁸Ŋaan li-i tee ki a ki jii a mɔŋ ki chabib, Yennu saa jii doo na ki kubin Babilonn jab, ki bi saa joor muu, ki a kan fit nyi bi nuu ni.”

¹⁹Ŋaan ki kpanbar na jiin a, “N tiin n tiŋ ni niib nba jii bi mɔŋ ki tur Babilonia jab nae. Babilonia teeb na tan saa mann soorin ki turib, ki bin dinnin biak.”

²⁰Ki n yet a, “Bi kan soora ki turibi. N barimae nan fan sak Yennu mɔb, ki a manfoor saa tinn, ki bont kur saa saan fanu ki tura. ²¹Ŋaan Yennu wannin damiit ni linba saa tun, li-i tee ki a yêt fan jii a mɔŋ ki chabib. ²²Damiit maŋ ni, n la ki poob nba biar Juda naan ŋaak ni na, ki siab saa namm ki teen Babilonia kpanbar saakab na. Gbiintir linba ki poob na piak ŋaan saa a:

‘Kpanbar na yɔnanmɔmm nae turimɔ.

Ŋamme diau tuntuna. Ki u taa nba ji fer bakir ni na,

ki u yɔɔsnba yaat ŋaan nyikɔ.’ ”

²³Ki n bia yet a, “Bi saa soor a poob nan waas ki saan turib Babilonia jab na, ki fin mɔŋ kan fit nyi bi nuu ni. Babilonia kpanbar saa soora, ki bi saa joo doo na kur.”

²⁴Ki Sedekaya jiin a, “A daa te ki sɔɔ gbia siar ki jiin ti labafaant na po, ki a manfoor mun bia kii be daŋ ni. ²⁵Li-i tee ki saakab na gbat nan min nan fin faa labaar, bi saa baare ki boia taa pak linba. Bi saa senn mɔsonn nan bi kan kpia, li-i tee ki a wannib taa pak linba kur. ²⁶A pakib nan a bo barimime a n daa jiinta dansarik ni, ki a tan saa kpo leŋ.” ²⁷Ŋanne ki saakab na kur baar ki boin, ki n wannib linba ki kpanbar kpan pakin a n wannib na. Bi ji din ki mɔk siar ki saa teeni, kimaan sɔɔ din ki gbat ti labafaant maŋi. ²⁸Ki bi din nyikin naan ŋaak na dindouŋ ni nan daar nba ki bi tan nyann Jerusalem.

Ki jiin Jerusalem baak po

¹Sedekaya nba dii Juda naan, li bina ŋanyia, ŋmaarii piik nie, ki Babilonn kpanbar Nebukanesar baar nan u jab kur ki lek Jerusalem. ²Ki ŋmaarii ŋanna daa ŋanyia daar nba tee Sedekaya naan bina piik nan yenn ni na, ki bi yeer doo na joonjouk na.

³(Baa din nyann Jerusalem yoo nba na, Babilonia kpanbar saakayudamm na din baar kar bi kaanii ni, Sinsuuk ni Tammɔb na boor. Ŋamme tee Nergal Sareser, nan Samgar Nebo, nan Sasekim, nan Nergal Sareser lɔɔ.)

⁴Ki kpanbar Sedekaya nan u jab na nba la linba tuun na, ki bi chiar nyiɔk, ki nyii doo na ni. Bi din nyii tɔkin naan kpaab na poe, ki gar tammɔb nba ki joonjot tur nann na po, ki chiar saa Jɔɔdann mɔkir baauk po. ⁵Ŋaan Babilonia jab na din weib ki soor Sedekaya, Jeriko paanu ni. Bi din jiiu ki saan tur kpanbar Nebukanesar, yoo nba ki u be Ribla doo ni, Hamaf yent ni na. Leŋe ki Nebukanesar bu u buut ki wann u tubdatu nba tee. ⁶Ribla maŋe ki Nebukanesar kpii Sedekaya bonjai, ŋɔɔ Sedekaya ninbinn ni, ki bia kpii Juda saakab kur. ⁷Li poor po, ki u kpakir Sedekaya maŋ ninbina, ŋaan te ki bi baanɔ jarit, a bin saan nanɔ Babilonia. ⁸Ki sɔɔ ki Babilonia jab na joo naan ŋaak nan niib na ŋei muu, ki bia bet Jerusalem joonjota. ⁹Li joontik ni, ki kunkɔnkɔnna ŋmakit-tɔɔ Nebusaradann jii niib nba biar doo na ni, ki kpab nan binba jii bi mɔŋ ki turɔ na, ki saan namm Babilonia, ki teemm daaba. ¹⁰U din nyik talas damm nba kaa faar nae Juda tiŋ ni, ki turib daan tiinii kpaant nan tinii.

Ki jiin Jeremaya ŋaanu po

¹¹Ŋaan kpanbar Nebukanesar din tur Nebusaradann nba tee kunkɔnkɔnna ŋmakit-tɔɔ na mɔb a wun tur sennu na a, ¹²“Saant man ki lon Jeremaya ki diau fanu. I daa paau daŋ, ŋaan i tun linba ki u loon ki turɔ.” ¹³Ki Nebusaradann nan saakayudamm nba tee Nebusasbann nan Nergal Sareser nan Babilonia kpanbar saakaleeb na ¹⁴din jiin naan ŋaak dindouŋ na ni ki nyii nanin. Bi din jiin ki guun Gedalia, wunba tee Ahikam bija, ŋaan tee Safann yaaboonn nae, a wun te ki man baar ŋaak fanu. Ki n din be niib na boor.

Ki jiin Ebed-melek dindann po

¹⁵Yoo nba ki n din daa be dansarik ni, naan ŋaak dindouŋ ni na, ki Yennu pakin ¹⁶nan n pak Ebed-melek, wunba nyii Itiopia na, a Yabint Daanɔ nba tee Israel teeb Yennu na yet a, “Nan maa yet a n saa baar nan biiru doo na paak na, nnae ki n saa tun, ki li kii tee ŋammu kaa, ki i sii be ki la linba na tuun. ¹⁷Ŋaan min Yennu-e sii guua, ki bi kan soora ki tur jab nba ki a tiimm na. ¹⁸N sii dia-a fanu, ki bi kan kpiani. Ki n saa tinn a manfoor, kimaan faa teenin yada na. Min Yennu-e pak na.”

Biaŋinba ki Jeremaya nan Gedalia lakin be

¹Babilonia kunkɔnkɔnna ŋmakit-tɔɔ Nebusaradann nba din ŋaa min Jeremaya Rama na poor poe, ki Yennu pak nanin. Bi din jiin nan jaruko ki saan nanin leŋ, ki kpab nan Jerusalem nan Juda nileeb nba ki bi soorib ki saan namm Babilonia na.

²Ki kunkɔnkɔnna ŋmakit-tɔɔ na yiinin, ki nyii nanin kpiŋ, ki yet a, “A Yomdaanɔ Yennu-e senn tiŋ na biiru, ³ki mɔtana u tun linba ki u yet a u saa tun nawa. Linba na kur tun, kimaan a niib tun biir Yennu ki ki sak u mɔb. ⁴N saa baat jaruk na a nii ni ki ŋaa-a yann. Li-i tee ki a loon fan wein ki saan Babilonia, a saa fit tun nna, ki n sii goriia. Ŋaan li-i tee ki a ki loon saanu, faa daa saa. Tiŋ na kur be a nuu ni, ki a saa fit saan faa loon siaminba po.”

⁵Maa din ki jiin siar na, ki Nebusaradann yetin a, “Ŋmatir Gedalia, wunba tee Ahikam bija ki tee Safann yaaboonn na boor, ŋɔɔ nba ki Babilonia kpanbar teenɔ Juda doi diarɔɔ na. A saa fit ki be u boor kii be nan niib na, koo a saa fit saan siaminba kur ki a loon.” Ki u turin piinii nan jeet, a man saan nann, ki chabin ki n saan. ⁶Ki n saan be nan Gedalia, Mispa doo ni, ki be nan niib nba din biar tiŋ maŋ ni na.

Ki jiin Juda tiŋ diarɔɔ Gedalia po

(2 Kpanbara 25.22-24)

⁷Ki Juda jab na siab nan bi saakab na siab din daa ki jii bi mɔŋ ki chab Babilonia jab na. Ki bi din gbat nan Babilonn kpanbar jii Gedalia ki teenɔ tiŋ na diarɔɔ, ki jii binba ki bi ki saan namm Babilonn na ki teen u nuu ni. Ŋamme tee tiŋ na ni talas damm. ⁸Ki Natania bija Ismael, nan Karea bija Johanann, nan Tanhumef bija Seraya, nan Efai nba nyii Netofa na bonjai, nan Jesania nba nyii Maaka na, saan nan bi jab Gedalia boor, Mispa. ⁹Gedalia din pakib a, “N teeni n mɔmaan nan i daa te ki siara jaŋmaanii mɔki nan yin jii i mɔŋ ki chab Babilonn teebi. Karin tiŋ na ni ki jiant Babilonn kpanbar, ki bona saa saan fanu ki turi. ¹⁰N mɔŋ sii be Mispa na ki tee i taatar, yoo nba ki Babilonia teeb baar nna, ŋaan i saa fit taan daan nan tilɔɔna nan olif tiinii kpan ki bekir, ŋaan kii be doi nba ki i kar na ni.” ¹¹Li yoo na ki Israel teeb nba kur be Moab, nan Amonn, nan Edom, nan digbanlia ni na gbat nan Babilonn kpanbar chab Israel tesiab a bii be Juda, ki Gedalia-ii tee bi diarɔɔ. ¹²Ki bi nyik boa nba bi tuu yat be na, ŋaan ŋmat Juda tiŋ ni. Bi din baar Gedalia boor, Mispa, ki tikir daan nan tilɔɔna bonchiann leŋ.

Ki jiin Gedalia kpinu po

(2 Kpanbara 25.25-26)

¹³Linba na poor poe, ki Johanann nan kunkɔnkɔnna saakab nba ki jii bi mɔŋ chab Babilonn jab na, baar Gedalia boor, Mispa, ¹⁴ki tan yetɔ a, “A ki mi nan Amonn kpanbar Baalis tun Ismael a wun kpiani-i?” Ŋaan Gedalia din ki teen maan na yada. ¹⁵Ki Johanann bakin pakɔ a, “Ŋaant min saan kpi Ismael, ki sɔɔ kan bann wunba tun nna. Bee ki u saa kpiani? Li saa te ki Juu teeb nba be a boor na n chiar yate, ki lin baar nan biak Israel teeb nba biar Juda na paak.”

¹⁶Ŋaan Gedalia din jiin a, “Daa tuun nna. Linba ki a piak jiin Ismael po na ki tee barmɔnii kaa.”

¹Ki binn maŋ ŋmaarii ŋanlore ni, ki Ismael nba tee Netania bija, ŋaan tee Elisama yaaboonn, ki nyii naan ŋaak, ki bia tee kpanbar saakab na yenɔ na, saan Mispa nan jab piik a wun la Gedalia. Yoo nba ki bi kur lakin kar ki di jeet na, ²ki Ismael nan u jab piik na nɔɔt bi jukii ki kpii Gedalia. ³Ismael bia din kpii Israel teeb nba be nan Gedalia na kur, nan Babilonia jab nba taan be leŋ na.

⁴Laa din yent ki niib tan bant nan bi kpii Gedalia na, ⁵ki jab piinniin nyii Sekem nan Siilo nan Samaria ki baar. Bi din koor bi tianiie ki pat bi tiat ki ŋmaar ŋmaar bi mɔŋ. Bi din dia jeete nan bonnunubit a bin tur Yenpiinii, Yenjiantu ŋasaakak ni. ⁶Ki Ismael nyii Mispa ki tookitib ŋaan mɔ. Waa baar bi boor yoo nba ki u yet a, “N barimie, baat ki tan got Gedalia.” ⁷Baa kɔɔ doo na ni yoo nba, ki Ismael nan u jab na kpiib, ki jii bi gbanant ki lu bunbunn ni.

⁸Ŋaan jab piik din be bi tɔku na ni, ki yet Ismael a, “Ti barimae ki a daa kpit. Ti mɔk dii nan kpan nan siat, ki li bɔr siar po.” Ki u nyikib. ⁹Bunbunn nba ni ki Ismael din lu jab nba ki u kpiib nae din tee linba yab, ki kpanbar Asa din gbiir yoo nba ki Israel kpanbar Baasa din lekɔ na. Ismael din gbeen bunbunn na nan niib gbanante. ¹⁰U din soor kpanbar bonpoi nan Mispa niib kur, ŋamme tee binba ki kunkɔnkɔnna saakɔɔ din jiib ki teen Gedalia nuu ni na. Ismael din soorib ki tɔkin namm, Amonn yent poe.

¹¹Ki Johanann nan kunkɔnkɔnna saakab nba lakin be nanɔ na gbat bonbiir nba ki Ismael tun na, ¹²ki bi jii bi jab ki ber dinn u paak, ki saa soorɔ nyunchiɔŋ nba be Gibeonn na boor. ¹³Yoo nba ki Ismael yommii na la Johanann ki u tɔk nan kunkɔnkɔnna saakab na, ki bi par maŋ, ¹⁴ki bi chiar baar jab na boor. ¹⁵Ŋaan Ismael nan u jab na banniin din chiar Johanann boor, ki kɔɔ Amonn tiŋ ni.

¹⁶Ki Johanann nan kunkɔnkɔnna saakab nba ki u tɔk namm na din jii niib nba ki Ismael kpii Gedalia ŋaan soorib Mispa na. Ŋamme din tee kunkɔnkɔnna nan poob nan waas nan jatɔɔka. ^17-18Bi din tiin Babilonia jab na jaŋmaaniie, kimaan Ismael kpii Gedalia nba ki Babilonn kpanbar jiiu ki teen tiŋ na diarɔɔ nawa. Ki bi ji din saa Ijipt a bin nyi Babilonia jab na nuu ni. Baa saa na, ki bi saa biar Chimham, ki li kpia Betlehem.

Biaŋinba niib na loon Jeremaya n miar Yennu ki turib

¹Ki kunkɔnkɔnna saakab na kur, ki pukin Karea bija Johanann, nan Hosaya bija Asaria, din baar nan nibooru kur ki tan pakin a, ²“Yabit ki tun linba ki ti wanna. Miat ti Yomdaanɔ Yennu ki turit. Miat ki tur timm nba kur tinn na. Sianyoo ti din yab bonchiann, ŋaan mɔtana ti ji tenn waaminnae, nan faa la na. ³Miat nan ti Yomdaanɔ Yennu n wannit taa sii tɔkii biaŋinba, nan taa sii tuun linba.”

⁴Ki n jiin a, “Li ŋan. N saa miar ti Yomdaanɔ Yennu, nan yaa boin na, ki wuu jiin linba, n saa wanni, n kan bɔri siari.”

⁵Ŋanne ki bi yetin a, “Yennu-e saa teen ti barmɔnii siara daanɔ nan ti saa tun linba kur ki u wanna. ⁶Li-i mei ti para, koo li-i kii mei, ŋaan ti saa sak ti Yomdaanɔ Yennu nba ki ti yet a fan miarɔ na mɔba. Li-i tee ki ti sak u mɔb, bont kur saa saan fanu ki turita.”

Biaŋinba ki Yennu gat Jeremaya miaru

⁷Li dapiik daare ki Yennu pak nanin, ⁸ki n yiin Johanann nan kunkɔnkɔnna saakab nba be nanɔ na, nan niib na kur, ki lakimm, ⁹ki pakib a, “Israel teeb Yomdaanɔ Yennu, wunba ki i tumin u boor a n miarɔ na yet a, ¹⁰‘Li-i tee ki i loon yii be tiŋ na ni, n saa te ki yii doe, n kan te ki yii siik kaa, n saa buriie, n kan ŋabirii kaa. Maa baar nan biak nba i paak na biir n par bonchiann. ¹¹I ji daa tiin Babilonia kpanbar na jaŋmaanii. N be nani, ki saa nyinni u nuu ni. ¹²Maa tee ninbatinnɔ na paak, n saa te wun tini ninbaauk ki te yin ŋmat kun. Min Yennu-e pak na.’

^13-15“Ŋaan yimm nba biar Juda na, i daa yêen i Yomdaanɔ Yennu mɔb ki nyi tiŋ na ni. I daa yeen a, ‘Aaii, ti saa saan kar Ijipt-e, siaminba ki ti ji kan mi kɔɔ tɔb ni, koo ki gbat tɔb mɔɔntii, koo ki be komi.’ Li-i tee ki i pak linba na, ŋann ŋarin Yabint Daanɔ nba tee Israel teeb Yennu na yeen a, ‘Li-i tee ki i lor yin saan kar Ijipt, ¹⁶ŋann tɔb nba ki i tiinir jaŋmaanii na saa nyanniwa, ki kon nba ki i jee na saa soori, ki i saa kpo Ijipt-e. ¹⁷Binba kur loon bin saan kar Ijipt na, tɔb, koo kon, koo yiarue saa kpib. Bi sɔɔ kan tinn, bi sɔɔ bia kan nyi biak nba ki n saa baar nann bi paak na ni.’

¹⁸“Israel teeb Yomdaanɔ Yennu yeen a, ‘Biaŋinba ki n wutochiɔŋ kpaar mɔɔn Jerusalem teeb paak na, nnae ki n wutochiɔŋ maŋ saa mɔɔn i paak, li-i tee ki i saan Ijipt. Sɔɔ-i la linba ki n tun turi na, li sii mɔkɔ jaŋmaanii, ki niib sii dia-i diayoonn, ki dia i sann ki poor mɔi. I ji kan ban la nna na.’ ”

¹⁹Ki n ŋamm yet a, “Yennu pak yimm nba biar Juda na, a i daa saa Ijipt. Ki n kpaani mɔtana ²⁰nan i yaa yin tun kpetir nba yabe na. I te ki n miar ti Yomdaanɔ Yennu ki turi, ki i senn mɔsonn nan i saa tun linba kur ki u senniwa. ²¹Ki n wanni, ŋaan i ji yêen linba kur ki ti Yomdaanɔ Yennu tumin a man wanni nae. ²²Li paak, ii tian linba na man, i saa kpo tɔb nie, koo nan kon, koo nan yiaru, tiŋ nba ki i loon yin saan kar nani.”

Biaŋinba ki bi saan nan Jeremaya Ijipt

¹Ki n pak niib na linba kur ki bi Yomdaanɔ Yennu tumin a n pakib na. ²Ki Hosaya bija Asaria, nan Karea bija Johanann, nan jakangbata na kur pakin a, “A fae. Ti Yomdaanɔ Yennu ki tuma a fan pakit ki ti daa saa kaar Ijipt-i. ³Neria bija Baruk-o beta a fan pak linba na ki jiin ti po, a Babilonia teeb na n la nyannu ti paak, ki kpit, koo ki soorit ki saan nant Babilonia.” ⁴Ki Johanann nan kunkɔnkɔnna na saakab, nan niib na kur, sɔɔ din ki sak Yennu mɔb ki saa biar Juda tiŋ ni. ⁵Ki Johanann nan kunkɔnkɔnna saakab na kur din jii binba biar Juda tiŋ ni na, ki kpab nan niib nba yaat ki tan jen na kur, ki saan namm Ijipt, ⁶li jab nan poob nan waas nan kpanbara bonpoi. Bi din jii wunba kur ki kunkɔnkɔnna saakayudaanɔ Nebusaradann nyik ki guun Gedalia, ki kpab nan min nan Baruk. ⁷Bi din yêt Yennu mɔbe, ŋaan saan Ijipt, ki saa baar Tapanes doo ni.

⁸Ki Yennu pakin leŋ maŋ a, ⁹“Jiin tangbeŋa ki pii tiŋ ni, doo diarɔɔ ŋaak na tammɔkɔɔkir tɔɔnn po, ki ŋaan Israel niib na siab n la ki a tuun nna, ¹⁰ŋaan pakib nan min Yabint Daanɔ nba tee Israel teeb Yennu na yaa n baar nan n toontunnɔ kpanbar Nebukanesar nba nyii Babilonn nae nna, ki u saa teen u naan binbintir, tana nba ki a pii na paak, ki saa lat u naangbouŋ na li paak. ¹¹Nebukanesar saa baar ki kɔn nyann Ijipt. Binba tee bin yiar ki kpo na saa yiar ki kpo, ki binba tee bin soorib ki teemm yommii na, bi saa soorib ki teemm yommii, ki binba tee bin kpo tɔb ni na saa kpo tɔb ni. ¹²N saa joo Ijipt tingbandiit muu, ki te Babilonn kpanbar n joo bi tingbana maŋ muu, koo wun jii ki yaat nann. Pekpaarik nba tuu nyinn naalianbiabii u tiat ni biaŋinba na, nnae ki Babilonn kpanbar saa nyinn Ijipt tiŋ ni bona kur ki yaat nan nyannu. ¹³U saa biir jiantu tantoota nba be Heliopolis doo ni, Ijipt tiŋ ni na, ki saa joo Ijipt tingbana jiantu diit na.”

Ki jiin Israel teeb nba be Ijipt na po

¹Yennu din pak nanin ki jiin Israel teeb nba kur be Ijipt doi nba tee Migdol nan Tapanes nan Memfis, nan tiŋ na diitu po na. ²Yabint Daanɔ nba tee Israel teeb Yennu na yet a, “I mɔŋ la biiru nba ki n baar nann Jerusalem nan Juda dolia kur paaka. Bi bia lek daa tee langbente, ki sɔɔ ki kɔɔ leŋi, ³kimaan li niib tun biit ki donn n wutoora. Bi mann marint ki tur yenbis, ki bia waa tingbana nan pata nba ki ŋamm, koo yimm, koo i yeejamm ki ban jiant. ⁴Yoo kur n tuun n toontunna nba tee n sɔkiniinba nae, ki bi piaki nan i daa tuun bonbilankant na, kimaan n ki loon nna. ⁵Ŋaan i ki gbiinti. I ki nyik i toonbiit, koo yenbis jiantu. ⁶Ŋanne te ki n mɔɔn n wutochiɔŋ Jerusalem nan Juda dolia ni, ki joo doi maŋ muu. Doi na din kpant langbente, ki tee jaŋmaansooruk boor nan dinna.

⁷“Li paak, min nba tee Israel teeb Yabint Daanɔ Yennu na boi-i linba te ki i tun bonbiir na booru ki tur i mɔŋ. I loon yin baar nan biiru, jab nan poob nan waas nan sanpantii paake, ki lin te ki i niib na daa tent amii-i? ⁸Bee ki i jiantir pata, ki mann maruŋ ki teen yenbis, Ijipt tiŋ nba ki i baar a yii be na ni, ki dont n wutoori? I tuun linba na a yin biir i mɔŋe, ki lin te durinya na digbann kuri laai, ki jii i sann ki teen mɔpori-i? ⁹I tamm biit nba kur ki i yeejamm, nan Juda kpanbara nan bi poob, nan yimm nan i poob tun Juda doi ni, nan Jerusalem sɔnii ni nae-e? ¹⁰Ŋaan i ki sikin i mɔŋ nan dinna. I ki turin baakir, koo ki wei sennii nba kur ki n tur yimm nan i yeejamm na.

¹¹“Li paak, min nba tee Israel teeb Yabint Daanɔ Yennu na saa donn wutoor i paak, ki biir Juda tiŋ kur. ¹²Ŋaan Juda niib nba tenn ki loon bin saan kar Ijipt na, see ki n biir bi kur, li nijaana nan talas damm kur saa kpo Ijipt, laa tee tɔb ni, koo kon ni. Bi sii mɔk jaŋmaansooruk, ki niib sii laab, ki jii bi sann ki teen mɔpor. ¹³N saa dat binba be Ijipt na tuba nan tɔbii, nan kon, nan yiarii, nan maa dat Jerusalem teeb tuba biaŋinba na. ¹⁴Juda niib nba kur biar ki saan Ijipt a bin kar na kan tin paak koo ki tinni. Nan bi yenɔkɔɔwa kan ŋmat Juda tiŋ ni, siaminba ki bi loon bin ŋamm kar na. Bi waaminnae saa foor ki tan ŋmat.”

¹⁵Ki jab nba kur mi nan bi poob mann maruŋ ki tur tingbana na, nan poob nba kur bo see leŋ na, ki kpab nan Israel teeb nba be Ijipt diitu po na, ki bi yaba, ki pakin a, ¹⁶“Maan nba ki a piak teent Yennu sann ni na, ti kan gbiinti. ¹⁷Ti saa tun linba kur ki ti pak nan ti saa tume. Ti saa mann ti tingbann nba tee Sanpaapo Poobat nae, ki mɔɔn daan yenpiinii ki turɔ, nan timm nan ti yeejamm, nan ti kpanbar, nan ti tɔɔndamm nba tuu tuun, Juda doi ni nan Jerusalem sɔnii ni na. Li yoo ti din mɔk jeet bonchiann, ki mɔkit, ki siar ki daamiit. ¹⁸Ŋaan taa nyik Sanpaapo Poobat na mannu, ki ji ki mɔ daan piinii ki teenɔ na, ti ji ki mɔk siar, ki ti niib kpo tɔbii nan kon ni.”

¹⁹Ki poob na ŋamm pak a, “Taa din tee chinchaa ki li naan Sanpaapo Poobat na, ki mann maruŋ ki teenɔ, ki mɔ daan piinii ki teenɔ, ti sɔrib din sak nan linba ki ti tuun na ŋan.”

²⁰Ki n pak jab nan poob nba pak nna ki turin na a, ²¹“Maruŋ nba ki yimm, nan i yeejamm, nan i kpanbara, nan i tɔɔndamm, nan tiŋ na ni niib mann Juda doi ni, nan Jerusalem sɔnii ni na, i dukii a Yennu ki mi li po, koo u tamm li poe-e? ²²Dinna, i tiŋ tee langbente, ki sɔɔ ki kɔɔ leŋ. Li kpant jaŋmaansooruk boore, ki niib jii li sann ki teen mɔpor, kimaan Yennu ji din kan fit dia i nɔɔntont nan i yanbɔntoona na. ²³Mɔtana, biak na baar i paak, kimaan i mann maruŋ ki tur tingbana, ki tun biir Yennu nan yaa ki sak u sennii na.”

^24-25Ki n pak niib na kur, mantik poob na, linba ki Yabint Daanɔ nba tee Israel teeb Yennu na din piak ki teen Juda niib nba be Ijipt na a: “Yimm nan i poob kur senn mɔsonjaana ki tur Sanpaapo Poobat. I senn mɔsonn nan i sii mann maruŋ ki bia mɔ daan piinii ki teenɔ, ki dia i mɔsona maŋ. Tɔn, ii dia i mɔsona maŋ, kii tuun i mɔsonjaana maŋ. ²⁶Ŋaan gbiintir mɔsonjaann nba ki min Yennu senn n sanjaann ni, ki teen yimm Israel teeb nba be Ijipt na kur. N kan ban te ki yin jii n sann ki senn mɔsonn ki yet a, ‘N por Yabint Daanɔ Yennu nba fo na.’ ²⁷N saa te ki i kan mɔkit, ŋaan n saa biirie. I kur saa kpoe tɔb ni, koo yiarii ni, ki nan i yenɔkɔɔwa tan kan tenni. ²⁸Ŋaan i waaminnae tan saa nyi kuun ni, ki nyik Ijipt ki jen Juda tiŋ ni. Ki binba foor na saa bann wunba maan tee mɔnii, laa tee n maan koo bi maan. ²⁹Min Yennu saa turi nyinn nan n saa dat i tuba nna, ki maa pak nan n saa baar nan biiru i paak na saa teen mɔnii. ³⁰N saa jii Ijipt kpanbar Hofra ki kubin u datai nba loon bin kpiu na, nan maa din jii Juda kpanbar Sedekaya ki kubin Babilonn kpanbar Nebukanesar nba din tee u dataak ki loon wun kpiu na.”

Yennu mɔsonn nba jiin Baruk po

¹Ki Josaya bija Jehoyakim nba dii Juda naan, li bina ŋanna nie, ki Baruk sɔb linba ki n wannɔ na. Li poorpo ki n yetɔ ²nan Israel teeb Yomdaanɔ Yennu yet a, “Baruk, ³a piak a, ‘Biak be n paak. Yennu pukin parbiir n daamii niwa. Kukura chɔkime, ki n ki laat foomi.’

⁴“Ŋaan min Yennu saa bet linba ki n maa na, ki bia ŋabir linba ki n bur na. N saa tun linba na ki tur durinya kur. ⁵A loon fan kpaan manu ki tur a mɔŋi-i? Daa looniri. N baat nan biake nisaarii kur paak, ŋaan n saa tinn a manfoor, faa saan siaminba kur. Min Yennu-e pak na.”

Biaŋinba ki bi nyann Ijipt jab

¹Ki Yennu pak turin ki jiin digbana na po, ²ki piin Ijipt. Waa pak linbae na ki jiin Ijipt kpanbar Neko jab po, binba ki Babilonn kpanbar Nebukanesar din nyannib Karkemis doo ni, ki li kpia nan Yufrates mɔkir na. U din nyinnib Juda kpanbar Jehoyakim naan bina ŋanna nie. Yennu din yet a:

³“Ijipt jab saakab hoot a,

‘Teent siir nan i naagbankɔŋa man, ki saan tɔb.

⁴Baant i taanii ki jakib.

Setir chaabu ki yir i kut fokirii.

Ŋatir i kpana man. Lian i jatiat.’ ”

⁵Ki Yennu boi a, “N laat bee?

Bi ŋmat poor nan yanputuko.

Bi nyann bi jabe, ki jaŋmaanii yentib,

ki bi chiar nan bi paŋ kur, ki ki jiant poori.

⁶Binba chiar nan paŋ na, ŋaan bi kan paaki.

Jab na kan boti.

Gaŋ po ki kpian Yufrates mɔkire ki bi gbiatir baa.

⁷Ŋmee gbeet nan Nail mɔkir na,

nan mɔkir nba tuu gbee ki do mɔkgbiɔŋ na?

⁸Ijipt tiŋe naan Nail mɔkir na,

nan mɔkir nba tuu gbee ki do mɔkgbiɔŋ na.

Ijipt yet a, ‘N saa fiire ki dɔkin durinya,

ki biir doi nan niib nba be doi maŋ ni na.

⁹A te ki taanii na-ii saa, ki torit na-ii somm,

ki te ki jab na-ii saa:

jab nba nyii Sudann nan Libia ki dia naagbankɔŋa na,

nan tɔrbamiira nba nyii Lidia na.’ ”

¹⁰Yabint Daanɔ Yennu nba tee Yomdaanɔ na daare na.

Dinnae ki u saa pa jiin niib.

Dinnae ki u saa dat u datai tuba.

U banjiak saa ŋmamm nan laa tan saa gboo,

ki nyu bi sɔn nan li par nba tan saa maak.

Dinnae ki Yabint Daanɔ Yennu saa mann maruŋ

nba sii be gaŋ po tiŋ nba kpia nan Yufrates mɔkir na.

¹¹Ijipt teeb, ii saa Gilead tiŋ ni ki saa lon tebuk.

I tebuk na kur tee yanne; siar kaa ki saa turi laafia.

¹²Digbana gbat i fei dinu powa, sɔɔ kur gbat ki i mɔ.

Jayenɔ tuu gbiat u lɔɔe, ki bi banlee n kpab baa.

Ki jiin Nebukanesar baaru po

¹³Babilonn kpanbar Nebukanesar nba baar a wun lek Ijipt yoo nba, ki Yennu pak turin a,

¹⁴“A mɔɔnt maan maŋ Ijipt doi ni,

ŋanne tee Migdol nan Memfis nan Tapanes,

ki yet a, ‘Teent siir man ki kɔn fat i mɔŋ.

Yaa mɔk linba kur, bi saa biirir tɔb niwa.

¹⁵Bee ki i tingbanjaann nba tee Apis na baa?

Yennu-e faau lu.’

¹⁶I jab gbiate ki baa, ki yenɔ tuu pak u lɔɔ a,

‘Kakitir; ŋaant tin kun ti niib boor,

ki nyi ti datai takoobii ni.’

¹⁷“Ii pur Ijipt kpanbar sanpaann man,

ki lii tee, ‘Fuut daanɔ nba kɔŋ u yaak.’

¹⁸Min Yabint Yennu-e tee kpanbar.

Mine tee Yennu nba fo na.

Tabor kunkonn nba fɔk ki gar kunkonn kur,

ki Kamel kunkonn nba kpia mɔkgbeŋir ki fɔk biaŋinba na,

nnae ki wunba saa leka na paŋ sii tee.

¹⁹Yimm Ijipt teeb, ii teen siir man

ki bin soori ki saan nani digbangann.

Memfis saa kpant kunkoouk,

ki tee langbent nba ki sɔɔ kaa leŋi.

²⁰Ijipt tiŋ ŋan nan naasar ŋann nae,

ŋaan ki kabik nyii gaŋ po ki baar lekɔ.

²¹U jab nba ki u jɔɔmm na gbar nan naabis nae.

Bi ki set ki kɔni, bi kur ŋmat chiare.

Bi biiru daar baara, bi boontu yoo baara.

²²Ijipt jab tiine ki foi nan waauk nba tuu gaan jat na,

yoo nba ki datai na baat.

Bi saa lekib nan pajarae, nan jab nba tuu chɔɔ tiinii

²³ki biir fɔɔr na.

Bi jab na yab ki kaa kanni, bi yab chee naasuut.

²⁴Ijipt teeb dii feiwa. Gaŋ po teeb nyanniba.

Min Yennu-e pak na.”

²⁵Israel teeb Yabint Daanɔ Yennu yet a, “N saa dat Amonn nba tee Tebes tingbann na tubir, ki kpab nan Ijipt tingbana nan li kpanbara. N saa jii Ijipt kpanbare nan binba teenɔ yada na kur ²⁶ki kubin binba loon bin kpib na, ŋamme tee Babilonn kpanbar Nebukanesar nan u jab. Ŋaan li poor po, niib bia tan saa kɔɔ kar Ijipt, nan baa din kar biaŋinba na. Min Yennu-e pak na.”

Ki jiin Yennu tinnu po

²⁷“N niib, i daa tiin jaŋmaanii man.

Israel teeb, i daa te ki i yan puti.

N saa nyinni digbanbanfɔkir maŋ ni,

siaminba ki i tee yommii na.

I saa jen kpen ki sii be i yan ni;

i sii be fanu, ki sɔɔ kan te ki jaŋmaanii n soori.

²⁸N saa baar i boor ki tan tinni.

N saa biir digbana nba kur ki n yati ki i saan leŋ na,

ŋaan n kan biir i mɔŋi.

N saa dat i tubawa, ŋaan mi-i daar yoo nba,

n sii daar nan lommo. Min Yennu-e pak na.”

Yennu maan nba jiin Filistia tiŋ po

¹Ijipt kpanbar din tan lekin Gasa47.1 Gasa din tee Filistia doi na yenne. na, ki sɔɔ Yennu pak nanin ki jiin Filistia tiŋ powa a:

²“Gotir! Nyun do gaŋ po, ki saa pubir nan nyunmɔnn na.

Li saa piin tiŋ na nan linba kur be li paaka,

li doi nan niib nba be leŋ na. Niib saa mɔ boi sommir po.

Sɔɔ kur nba be durinya na ni saa bui bonchiann.

³Bi saa gbat taanii taawoka mɔnii, nan torit mɔnii,

nan fiia birintu fuur.

Baanba kan jiant bi waas po, bi nii sii sɔɔne.

⁴Yoo baar nan bin biir Filistia-wa,

ki pot sommir nba ki u tuu laat Taya nan Sidonn boor na.

Min Yennu-e saa biir Filistia teeb na;

ŋamme tee binba kur nyii Kret mɔkgbiɔŋ po na.

⁵Parbiir nba kaa paak baar Gasa teeb paaka,

ki Askelonn niib ŋmin.

Filistia niib nba biar na saa mɔ ki lin wei nlee?

⁶I yikin ki piak a,

‘Yennu takoobu, nlee yooe ki a saa nyik niib kɔtu?

Ŋmatir sik a toouk ni. Ii be leŋ kii foi.’

⁷Ŋaan li saa teen nlee ki foi?

kimaan n turir toonn a lin tuma.

Mine wannɔ nan wun lek Askelonn doo

nan niib nba be mɔkgbiɔŋ na.”

Ki jiin Moab tiŋ biiru po

¹Linba ki Yabint Yennu pak ki jiin Moab tiŋ poe na a:

“Ii mɔk ninbatinu nan Nebo teeb man. Bi doo biira.

Bi nyann Kiriataim-a, ki yeer li joonwakita na, ki li niib dii fei.

²Moab fant na bota.

Datai nyann Hesbonn-a, ki lorin a bin biir Moab teeb na.

Madmenn doo na ji sii ŋmine. Jab saa saan ki lekir.

³Horonaim niib mɔe a, ‘Woribuk. Biiru.’

⁴“Bi biir Moab-a, gbiintir waas nba mɔ.

⁵Gbiintir bi mɔnii fuur, sɔnu nba saa Luhif na ni,

nan parbiir mɔnii, Horonaim sɔnu ni.

⁶Bi yeen a, ‘Kakitir ki chiar tinn i mɔŋ.

Ii chiar nan kunkoouk paak bɔŋ na.’

⁷“Moab tiŋ, a teen yada a paŋ nan mɔkint nie,

ŋaan mɔtana bi saa nyannawa,

ki bi saa jii a tingbann Kemos nan u nijaana nan mannteeb,

ki saan namm digbangann.

⁸Dosau kaa ki saa nyi biiru na ni,

ki baauk nan paanu kur saa biir.

Min Yennu-e pak na.

⁹Fiint katanu ki chaan guun Moab tiŋ.

Li saa biir mɔtana;

li doi saa biar langbent, ki sɔɔ ji kan kɔɔ leŋi.”

¹⁰(A sat mɔtont wunba ki tuun Yennu toonn nan u yan kur na paak. A sat mɔtont wunba ki chɔɔn niib ki kpi na paak.)

Ki jiin Moab digbana biiru po

¹¹Ki Yennu yet a, “Moab teeb tun be bi yamanie, ki sɔɔ ki mi soorib saan namm digbanganni. Moab digbann tee nan daan nba ki bi tuu sennir a lin baa tint, ki ki laŋir, ki bia ki kpaan lebitir dalenlia ni nae. Li baauk ki biir, ki li manu bia ki gbenti.

¹²“Li paak, yoo baate ki n saa tun niib ki bin baar kpaar Moab teeb ki mɔɔn nan daan na. Dalena na saa biar koont, ki bi bia saa yeerir buri buri. ¹³Ki fei saa soor Moab teeb nan baa jiantir tingbann nba tee Kemos na, nan fei nba din soor Israel teeb, baa din teen bi dindann tingbann nba tee Betel ni na.

¹⁴“Moab jab, bee ki i want nan i tee paarib,

ki tee pardamm nba ki bi bikinii tɔb ni?

¹⁵Moab nan li doi kur biira;

bi kpii Moab naasinpaara na kura.

Min nba tee Kpanbar, ki tee Yabint Yennu-e pak na.

¹⁶Moab boontu nakina, ki u biiru baate mɔtana.

¹⁷“Yimm nba kpia digbann maŋ ki mi u sanjaann po na,

ii mɔ u kpemɔnii man. Ii yet a,

‘Li yiikoo dianu na biira, ki li dontir nan yabint na ji kaa.’

¹⁸Yimm nba be Dibonn na, ii nyi i baakir boor maŋ,

ki sik ki tan kar tanbiinii ni,

Moab biirtɔɔ na be nna, ki teen li ŋapaara na langbenta.

¹⁹Yimm nba be Aroer na, ii see sɔnkpiŋ kii guu,

ki boi binba tiin yaatir na, ki laan bee teeni.

²⁰Bi saa turi gatu a, ‘Moab tiŋ baawa.

Ii mɔ u paak man; u dii feiwa.

Ii kokin Arnonn mɔkir ki mɔɔnt nan bi biir Moab-a.’

²¹“Tubdatu baar doi nba be kunkonn yur paak nawa. Doi maŋe tee Holonn nan Jasa nan Mefaf ²²nan Dibonn nan Nebo nan Bef Diblataim ²³nan Kiriataim nan Bef-gamul nan Bef-meonn ²⁴nan Keriof nan Bosra. Tubdatu baar Moab doi nba fɔk nan linba naak kur paaka. ²⁵Bi biir Moab tiŋ paŋ nan u yiikoo nawa. Min Yennu-e pak na.”

Biaŋinba ki Yennu saa sikin Moab tiŋ

²⁶Yennu yet a, “A te ki Moab tiŋ na n yib daan, kimaan u yêt n mɔba. Moab saa dɔɔr birint u mɔŋ siit ni, ki niib saa laau. ²⁷Moab, a tian faa din yisin Israel niib biaŋinba-a? A din diab ki li naan nan bi tɔk nanyuk tɔkue ki bi soorib na.

²⁸“Yimm niib nba be Moab tiŋ ni na, ii nyi i doi ni ki saan kɔɔ tanfiat ni. Ii tee nan ŋmann nba tuu tia u tiɔk tanfiiɔk mɔb boor nae. ²⁹Moab want u mɔŋ bonchiann. N gbat biaŋinba ki Moab niib want bi mɔŋ, ki mɔk garuk, ki bia dont bi mɔŋ, nan baa dukii bi mɔŋ po biaŋinbawa. ³⁰Min Yennu mi bi garuk po. Baa want bi mɔŋ na, ŋaan li kur tee yanne; linba ki bi tuun na kan wei. ³¹Li paak, n saa bui wunba kur be Moab tiŋ ni paak, nan niib nba be Kir Heres doo ni na paak. ³²N saa bui Sibma doo niib paak, ki lin gar Jaser doo niib paaka. Sibma doo, a tee nan daan tiik nba ki li yiinii tant ki poot Mɔk-kpeenn ki saa baar Jaser nae. Ŋaan mɔtana, bi biir a sakoouk lɔɔna nan a daan lɔɔna nawa. ³³Parmaasir nan kpinkpammuk ji kaa Moab nba tee tinŋaŋ na ni. N te ki daan nyik tootu daŋaaboora, sɔɔ kaa ki sii tee daan ki hoot nan kpinkpammuku.

³⁴“Hesbonn nan Eleale teeb mɔe, ki bi mɔnii na saa gbia Jahas, Soar niib gbia, ki Horonaim teeb nan Eglaf Selisiya teeb bia gbia. Nimrim kpenu na gbaa fɔɔra. ³⁵N saa te ki Moab niib n nyik bi mujoonu maruŋ nba ki bi tee bi jiant boa nawa, nan maruŋ nba ki bi mann ki teen bi pata nan bi yenbis na. Min Yennu-e pak na.

³⁶“N mɔe Moab tiŋ paak, nan Kir Heres niib paak, nan sɔɔe peeb naagbaak ki yiin kuun yanii na, kimaan baa tuu mɔk linba kur ji kaa. ³⁷Bi kur koor bi yute, ki bia pɔɔ bi tianii. Bi ŋmaar ŋmaar bi niie, ki lia bɔtoot liant. ³⁸Moab ŋei paak48.38 Bi ŋei yura paak, bi din tuu sere. nan doo na kur po, siar kaa ki pukin kpemɔnii, kimaan n yeer Moab nan bobir nba ki sɔɔ ki loon nae. ³⁹Moab biira. Ii yikin man. Niib ji yisin Moab tiŋe. Li ji tee langbente, ki digbana nba kpiar na ji laar. Min Yennu-e pak na.”

Biaŋinba ki bi saa biir Moab tiŋ

⁴⁰Yennu yet a digbanne saa tabint Moab teeb nan baakir nba tuu lat u kpinkpant ki tabint biaŋinba na, ⁴¹ki bi saa nyann doi nan ŋapaara na. Li daar, jaŋmaanii saa soor Moab jab, nan poo nba tuu kar matdaaŋ paak, ki jaŋmaanii mɔkɔ nae. ⁴²Bi saa biir Moab, ki li ji kii tee digbanni, kimaan li niib yêt n mɔba. ⁴³Jaŋmaanchiɔŋ nan bootit nan barit dɔɔe ki guu Moab teeb. Yennu-e pak na. ⁴⁴Wunba yabir a wun nyi jaŋmaanchiɔŋ na ni saa baa bootuk ni, ki wunba tab doo bootuk ni saa sik baruk ni, kimaan Yennu-e te ki li tee Moab biiru yoo. ⁴⁵Kunsɔntinna nba tee tarii na yiabe a bin la gungurboor, Hesbonn doo nba ki kpanbar Sihonn din dia na ni, ŋaan li mun di muue. Muu dii kpanbar Sihonn ŋaak nan u tiŋ nan li mɔyêtuk damm na kurawa. ⁴⁶Tinin Moab teeb ninbaauk man. Bi boont ŋamm nba jiantir tingbann Kemos nawa, ki jii bi bonjai nan bi bonpoi ki saan namm digbanganna.

⁴⁷Ŋaan yoo nba waa na, Yennu saa ŋamm donn Moab teeb. Linba na kure ki Yennu yet a li saa tun ki tur Moab teeb.

Biaŋinba ki Yennu saa dat Amonn teeb tuba

¹Linba ki Yennu pak jiin Amonn teeb poe na a: “Israel jab na be lia? Sɔɔ kaa ki saa kɔn bi tiŋ paaki-i? Bee ki bi ŋaan ki niib nba jiantir tingbann Molek na yent Gaad tiŋ ki kari? ²Ŋaan yoo baat ki n saa te ki Amonn teeb digbansaakar Raba niib n gbat tɔb fuur, ki li saa biar langbent, ki li digbanbis na saa di muu. Ki Israel teeb saa ŋmat gaar bi tiŋ binba din fat na boor. ³Hesbonn teeb, ii mɔ man. Bi biir Ai-wa. Raba poob, ii mɔ kpemɔnii man. Ii lia bɔtoot liant kii mɔ man, ii tiin kii lin nan ŋmatir man. Bi saa jii i tingbann Molek ki saan nanɔ digbangann ni, ki kpab nan u mannteeb nan u nijaana. ⁴Bee ki yimm mɔyêtdamm na want i mɔŋi? I paŋ gbente. Bee ki i teen i yiikoo yada, ki yeen nan sɔɔ kan bikin a wun lekini? ⁵N saa nyi nan jaŋmaanchiɔŋ siar kur po, ki baar nann i paak. I kur saa chiar. Sɔɔ kur saa chiar u manfoor paak, ki sɔɔ sii kaa ki saa tikir i jab na jikii.

⁶“Ŋaan li poor po n saa te ki Amonn teeb na n mɔkit. Min Yennu-e pak na.”

Biaŋinba ki Yennu saa dat Edom teeb tuba

⁷Yabint Yennu nba pak linbae na ki jiin Edom teeb po a: “Edom teeb yanfoon na ji kaae-e? Bi ŋmakit-teeb na ji ki fit wantib linba ki bi sii tuuni-i? Bi subinii na kur mir bote-e? ⁸Dedann teeb, ŋmatir kii tiin man. Ii bɔr man. N yaa man biir Esɔɔ yaaboonae, kimaan yoo baar nan man dat bi tubawa. ⁹Jab-i pɔɔr daan tilɔɔna, bi tuu nyik yenn-nbae tiinii na paak, ki li-i tee fat-teeb baar nyiɔk, bi tuu jii linba ki bi loon na kɔɔe. ¹⁰Ŋaan min kpan fat Esɔɔ yaaboona mɔkint na kure, ki bakit bi bunbɔr boa, a bi ji daa fit bɔri. N biir Edom teeb na kura. Nan bi niyemmira ki biari. ¹¹Nyikin i kpeebii n boor man, ki n saa gotib. I pakɔi sii fit maa n paak.

¹²“Li-i tee ki binba ki kpaa talas nan bin la tubdatu ji tan la tubdatu, i dukin tubdatu kan baar i paaki-i? Tubdatu saa baar i paaka. ¹³N mɔŋ por nan doo nba tee Bosra saa teen jaŋmaansooruk boor ki sii tee kunkoouk. Niib sii yisin leŋ, ki saa jii li sann ki poor mɔpora. Digbanbis nba kpia leŋ na sii yɔɔ tee langbente. Min Yennu-e pak na.”

¹⁴N yet a, “Edom digbann, n gaar maan nba nyii Yennu boore. U tun toomu a wun bet digbana na ki bin lakin bi jab ki teen siir ki leki. ¹⁵Yennu yaa wun teena bonchɔkuŋo, ki sɔɔ kan tura baakiri. ¹⁶A yuwannu na kpannawa. Sɔɔ ki tiina nan faa dukii bi tiina na. A be tanfiat niŋe jɔfɔkit paaka, faa lek be sanpaapo nan baakir na, ŋaan Yennu saa sikina tiŋ niwa. Yennu-e pak na.”

¹⁷Yennu yet a, “Biiru nba saa baar Edom paak na sii bi bonchiann, ki wunba kur gar leŋ, u yan saa put, ki u gbanu n jek. ¹⁸Yennu nba din biir Sodom nan Gomora nan doi nba kpiar na biaŋinba na, nnae ki u saa tun ki tur Edom, ki sɔɔ ji kan ban kar leŋi. Min Yennu-e pak na. ¹⁹Biaŋinba ki yanbɔr tuu nyi fɔɔr nba bɔɔk Jɔɔdann mɔkir ki do mɔpaauŋ ni na, nnae ki n saa baar ki te Edom teeb n kpir chiar ki nyi bi tiŋ ni. Ki tɔɔndaanɔ nba ki n saa gann na sii dia tiŋ na. Bi saa jii ŋmee ki bikinɔ nanimi? Ŋmee mɔk par ki saa yek nanimi? Kpanbar lanɔe saa fit kɔn nanimi? ²⁰Li paak, gbiintir lor nba ki n mɔk ki jiin Edom teeb biiru po na, nan maa loon man tun linba ki tur Temann doo niib na. Nisiab saa soor bi waas gbaa ki yaat namm, ki li saa soor sɔɔ kur jaŋmaanii. ²¹Edom-i baa yoo nba, fuur saa fu bonchiann, ki tingbouŋ na kur saa jek, ki bi wuyikinii saa fɔkit baar Mɔkmuŋ na. ²²Datai na saa lek Bosra nan baakir nba tuu yit u kpinkpant ki siik nae. Li daar, jaŋmaanii saa soor Edom jab, nan poo nba tuu kar matdaaŋ paak ki jaŋmaanii mɔkɔ nae.”

Biaŋinba ki Yennu saa dat Damaskus teeb tuba

²³Linba ki Yennu pak jiin Damaskus poe na a: “Niib nba be Hamaf nan Arpad doi ni na, li daamiibe, ki bi para biir, kimaan bi gbat lababiiuka. Dudukit gbee bi para nan mɔknyun nae, ki bi ki fit foi. ²⁴Damaskus niib na chɔke, ki yanputuk te ki bi chiar. Bi be tont nan ninnyumɔɔŋ nie, nan poo nba tuu kar matdaaŋ paak na. ²⁵Digbanjaann nba tuu mɔk parpeenn na ji dɔɔ yanne. ²⁶Li daar, bi saa kpi u naasimm na sɔnii nie, ki u jab na kur saa boont. ²⁷N saa joo Damaskus joonjot na muu, ki bia joo kpanbar Ben-hadad ŋapaara na muu. Min Yabint Yennu-e pak na.”

Ki jiin tubdatu nba baat Kedar booru nan Hasor doo paak na po

²⁸Linba nae ki Yennu pak ki jiin Kedar booru, nan yentnba nba ki kpanbar Hasor dia na po. Ŋanne ki Babilonn kpanbar Nebukanesar din kɔn nyann na. “Lekin Kedar niib, ki biir yondo po booru maŋ. ²⁹Fatir bi lanbont nan bi bonkobit, nan bi lanbont tammɔdɔkita, nan linba be bi lanbont ni kur. Jiin bi laagumiinba, ŋaan pak niib na a, ‘Jaŋmaanchiɔŋo linti.’

³⁰“Hasor teeb, min Yennu kpaani nan yin chiar fɔkit ki saa bɔr. Babilonn kpanbar Nebukanesar lor wun biirie, ki waa pak linbae na, ³¹‘Baat man. Ti saa lek niib nba dukii nan bi be bi yamani ki be fanu nawa. Bi doi ki mɔk joona nan gana, li bia ki mɔk gankpata, ki tee domanyauŋ.’

³²“Jiin bi laagumiinba nan bi bonkob-leet. N saa yat binba pɔɔn bi yut na lokir kur po, ki saa nyi nan biak siar kur po ki baar nann bi paak. ³³Hasor saa teen kunkoouk yaayoo siiyoo, ki sii tee mɔbɔi binbeboor. Sɔɔ ji kan ban kar leŋ. Min Yennu-e pak na.”

Biaŋinba ki Yennu saa dat Elam digbann tubir

³⁴Sedekaya nba din dii Juda naan, li ki yuur kaawa ki Yabint Yennu pak nanin ki jiin Elam digbann po. ³⁵U din yet a, “N saa kpi tɔrbantɔɔra nba te ki Elam mɔk paŋ na kure. ³⁶N saa te ki wouŋ n nyi siar kur po ki da kɔɔ Elam, ki yat u niib lokir kur po, ki tan tuu yoo nba ki u niib nba tee kunsɔntinna saa saan tingbouŋ kur ni. ³⁷N saa te ki Elam niib-ii tiin bi datai nba loon bin kpib na. N wutoor nba kaa paak niŋe, ki n saa biir Elam teeb, ki te jab n kɔn namm ki saa tuu yoo nba ki n saa boontib. ³⁸N saa biir bi kpanbara nan bi tɔɔndamm, ŋaan senn n naan kok leŋ. ³⁹Ŋaan li poor po, n saa te ki Elam teeb na n mɔkit. Min Yennu-e pak na.”

Biaŋinba ki bi saa nyann Babilonn

¹Maan nba ki Yennu ture na ki jiin Babilonn doo nan li niib po a:

²“Pakin maan maŋ ki tur digbana. A mɔɔntir.

Turin nyinn ki mɔɔnt maan maŋ.

A daa te ki li tee bunbɔr maami. Babilonn baawa.

Bi biir u tingbann nba tee Marduk nawa.

Babilonn tingbana dii feiwa, u bonninnanbiit na yeera.

³“Digbann jab nyii gaŋ po ki baar a bin lek Babilonn, ki kpantir kunkoouk. Niib nan bonkobit saa chiar yaat, ki sɔɔ kan kar leŋi.”

Ki jiin Israel teeb jenu po

⁴Yennu yeen a, “Yoo maŋ-i baar, Juda nan Israel niib kur sii mɔ ki baat, ki loon min nba tee bi Yennu na. ⁵Bi saa boi Sayɔnn sɔnu po, ki tɔkin li po. Bi saa lor mɔlor kangbennuk nanin, ki kan ban biir mɔlor maŋ.

⁶“N niib tee nan pei nba ki bi kpaarik nyikib ki bi bot kunkona ni nae. Bi lin nan pei nba tuu nyi kunkon-yenn paak ki saan kunkonleer paak nae, ki poŋ tamm bi ŋaak nba be siama. ⁷Wunba lab kur tuu lekibe, ki bi datai yeen a, ‘Bi tun ki biir Yennu-e. Li paak, taa teemm linba na ki bi. Bi yeejamm din teen Yennu-e yada, ki bi mun bo sii waau nnae.’

⁸“Israel teeb, ii tiin kii nyi Babilonn man. Nyimin tiŋ maŋ ni. Ii tee sinsinn damm nba saa nyi. ⁹N saa fiin digbanpaara nba be gaŋ po ki te bin lek Babilonn. Bi saa set jatuk ki took digbann na ki nyannir. Bi tee waara nba mi waaruko, ki tɔ bi peenii ki li ki nɔrii baa bɔɔr siaminba. ¹⁰Bi saa jii Babilonn faar, ki binba jii maŋ saa jii linba kur ki bi loon. Min Yennu-e pak na.”

Ki jiin Babilonn baak po

¹¹Ki Yennu yet a, “Babilonn teeb, i fat n niib bona. I mɔk parpeenne ki kpamm, ki li naan naab nba tuu ŋmaan dii50.11 Bi booru ni, nei-e boo dii, ki pinii na, koo ki mɔ nan taamm na, ¹²ŋaan i tiɔŋ digbangbeŋir na saa sik tiŋ ni ki di fei. Babilonn-e tan sii tee digbana kur ni digbanbutiŋ. Li tan sii tee kunkokoouŋ nba kaa nyume. ¹³N wutoor paak, sɔɔ kan kar Babilonn, li sii tee langbente, ki wunba gar leŋ kur saa jek, ki li saa yaar litɔ.

¹⁴“Tɔrbantɔɔra, setir chunchuuntuk ki teen siir nan tɔb, ki ŋaa loon Babilonn maŋ. Ii tɔ Babilonn i peenii na kur, kimaan u tun biir min nba tee Yennu nawa. ¹⁵Ii yikin tɔb wuyikinii doo na kur po man. Mɔtana, Babilonn gaar butinna. Bi yeer u joonjot kur ki bet sikinir tiŋ niwa. N pa pann ki jiint Babilonn teebe na. Li paak, ii pa i pann ki jiimm, ki diab nan baa tuu dia leeb biaŋinba na. ¹⁶I daa te ki bi buur jeet tiŋ maŋ ni, koo ki jaan jeet. Saamɔ nba kur be leŋ, jaŋmaanii saa soorɔ nan jab nba lekin na, ki u saa ŋmat kun u doo ni.”

Ki jiin Israel teeb kpenu po

¹⁷Ki Yennu yet a, “Israel teeb na tee nan pei nba ki yanbɔr weib ki yatib nae. Sinsinn, Asiria kpanbare din lekib, li poor po ki Babilonn kpanbar Nebukanesar yeer bi kpaba. ¹⁸Linba na paak, min Yabint Daanɔ nba tee Israel teeb Yennu na saa dat kpanbar Nebukanesar nan u tiŋ na tubir, nan maa din dat Asiria kpanbar tubir biaŋinba na. ¹⁹N saa jiin Israel teeb bi tiŋ niwa. Bi saa di jeet nba pia Kamel kunkonn paak nan Basann yent ni na, ki saa di linba kur ki bi loon, jeet nba kur pia Efraim nan Gilead yent ni na. ²⁰Yoo maŋ-i baar, bisiat sii kaa Israel teeb na ni, ki yanbɔnsiar sii kaa Juda teeb ni, kimaan n saa nyik chab niib nba ki n tinn bi manfoa nawa. Min Yennu-e pak na.”

Biaŋinba ki Yennu saa dat Babilonn teeb tuba

²¹Ki Yennu yet a, “Lekin Merataim teeb nan Pekod teeb. Ii kpib ki biirib. Ii tun linba kur ki n wanni. Min Yennu-e pak na. ²²Tɔb fuur gbia tiŋ maŋ ni, ki biiru bonchiann be leŋ. ²³Babilonn jab toor durinya kure ki bit bit, ki mɔtana li jaar mun bia biira. Digbana kur jeke nan linba tun ki tur tiŋ na. ²⁴Babilonn, a kɔn nanima, ki baa baruk nba ki n pii guuna, ŋaan ki a ki mi na ni. ²⁵N loot siaminba ki n jatiat be nawa. Ki n wutoor nie ki n nyinn jatiat na, kimaan min Yabint Yennu nba tee Yomdaanɔ na mɔk toonn Babilonn ki yaa min tun. ²⁶Ii lekir li munn po ki loon siaminba ki li jeet dɔɔ na. Ii poon linba ki i jii na nan baa tuu poon jeet na. Ii biir tiŋ na, ki daa nyikin siari. ²⁷Ii kpi bi jab na kur. Ii kpib fas. Babilonn teeb boonta. Yoo baar nan bin gaar tubdatuwa.”

²⁸(Kunsɔntinna tiin nyi Babilonn ki baat Jerusalem, ki piak ti Yomdaanɔ Yennu nba pa Babilonn teeb biaŋinba, nan baa din tun linba ki tur u Ŋasaakak na.)

²⁹“Pakin tɔrbantɔɔra na ki bin lek Babilonn. A te ki wunba kur saa fit tɔ tɔrbann ki wun saan. Loont doo na ki daa te sɔɔ nyi. Ii pa linba ki bi tun, ki jiinib ki tumm nan baa teen leeb na, kimaan bi tun nan yuwannue ki tur min Israel teeb kasii Yennu. ³⁰Li paak, bi saa kpi bi naasimm doo na sɔnii ni, ki biir bi jab kur li daar. Min Yennu-e pak na.

³¹“Babilonn, a gbee nan yuwannue; li paak, min Yabint Yennu nba tee Yomdaanɔ na kɔn nanae. Yoo baar nan man dat a tubira. ³²A niib nba mɔk garuk na saa gbiat baa, ki sɔɔ kan sommib ki bin fiiri. N saa joo a doi muu, ki linba kur be ki kpia saa biir.”

³³Yabint Yennu yet a, “Israel teeb nan Juda teeb be mukir nie. Binba nyannib ki soorib na guube fanu, ki kan chabib ki bin yaati. ³⁴Ŋaan wunba saa fatib na mɔk paŋ. U sanne tee Yabint Yennu. Ŋɔɔ tiɔŋo saa gaar bi paak, ki baar nan parmaasir tingbouŋ na paak, ŋaan bia baar nan biak Babilonn teeb paak.”

³⁵Yennu yet a, “Babilonn tee kuume.

U niib nan u kpanbara nan u subindamm kur tee kuume.

³⁶Kuun be u faak sɔkiniinba na paak. Bi tee jatite.

Kuun be u jab paak. Bi mɔk jaŋmaanchiɔŋ.

³⁷Ii biir bi taanii nan taantorit na.

Kuun be jab nba ki bi jɔɔmm na paak.

Bi tee bonchɔkinte. Ii biir bi mɔkint na, ki fat.

³⁸Baat nan yonkoonin bi tiŋ paak, ki fɔɔr bi mɔka.

Babilonn tee tiŋ nba ki li tingbana mɔk jaŋmaansooruko,

ki li tingbanae kpann niib na.

³⁹“Li paak, Babilonn saa gbee nan narinbiit nan funfɔntit nan nɔɔnii nba ki ŋane. Niib ji kan ban kɔɔ leŋ, yoo nba baat kur ni. ⁴⁰Linba saa tun Babilonn na tee linba din tun Sodom nan Gomora, yoo nba ki n din biirir ki kpab nan doi nba kpiar nae. Sɔɔ ji kan ban kar leŋi. Min Yennu-e pak na.

⁴¹“Niib nyi gaŋ po digbann na ki baat,

digbanjaann nba be banfɔkir,

ki kpanbara bonchiann teen siir nan tɔb.

⁴²Bi jii bi tɔrbana nan bi takoobiiwa,

ki tee nitont nba ki tiin ninbaauko.

Bi fuur tee nan mɔkgbeŋir nyunpana fuur nae,

yoo nba ki bi jak bi taanii.

Bi teen siire a bin faa tɔb nan Babilonn.

⁴³Babilonn kpanbar gbat labaar nawa, ki u nii sɔɔne.

Yanputuk nyannɔwa,

ki li tonu tee nan poo nba kar matdaaŋ paak na.

⁴⁴“Biaŋinba ki yanbɔr tuu nyi fɔɔr nba bɔɔk Jɔɔdann mɔkir ki do mɔpaauŋ ni na, nnae ki min Yennu saa baar ki te Babilonn teeb n kpir chiar ki nyi bi doo ni. Ki tɔɔndaanɔ nba ki n gann na sii dia digbann na. Ŋmee ki bi saa yekinɔ nanimi? Ŋmee mɔk par ki saa yek nanimi? Kpanbar lanɔe saa fit kɔn nanimi? ⁴⁵Li paak, gbiintir man bonbiir nba ki n lor Babilonn doo paak, nan maa loon man tun linba ki tur li niib. Bi saa soor bi waas gbaa ki yaat namm, ki li saa soor sɔɔ kur jaŋmaanii. ⁴⁶Babilonn-i baa yoo nba, fuur saa fu bonchiann, ki tingbouŋ kur saa jek, ki niib wuyikinii saa gbat digbanlia ni.”

Ki jiin Babilonn tubdatleer po

¹Yennu yet a, “N baat nan wonbiiuko a man biir Babilonn tiŋ nan li niib. ²N saa tun boorganu ki bin baar biir Babilonn, nan wouŋ nba tuu pebir fouŋ ki yaat nann na. Biiru daar maŋ-i baar, bi saa lek lokir kur po, ki tiŋ na saa biar dɔɔ yann. ³I daa teen bi jab na yaak ki bi yeek bi peenii, koo ki lia bi jatiati. I daa nyikin bi naasimm na. Ii boont bi jab na kur. ⁴Bi saa la danii, ki kpo bi doi sɔnii ni. ⁵Min Yabint Yennu nba tee Yomdaanɔ na ki nyɔr nyik Israel teeb nan Juda teeb, nan baa lek tun ki biir min nba tee Israel teeb Kasii Yɔɔ na. ⁶Chiat ki nyi Babilonn man. Tinin, ki tinn i manfoor man. I daa te ki bi kpi-i Babilonn teeb biit paaki. N pa bi panne, ki daar bi tuba nan laa jaŋib na. ⁷Babilonn din tee nan salima daŋmaŋ nae, n nuu ni, ki n te ki durinya kur yib. Digbana din nyuu li daame ki waat. ⁸Babilonn baae ki boont. Ii mɔ li kpemɔnii man. Ii kpaan tebuk ki teen li fiat na, li pasiar li saa buura. ⁹Boorganu nba be leŋ na yet a, ‘Ti yabir a tin somm Babilonn, ŋaan sɔɔ yoo gara. Ŋaant ki tin nyik ŋaan ŋmat kun. Yennu jii u paŋ kure ki dat Babilonn tubir ki biirir chain chain.’ ”

¹⁰Yennu yet a, “N niib na hoot a, ‘Yennu wann nan timme mɔk mɔnii. Ŋaant ki tin saan pak niib nba be Jerusalem na, ti Yomdaanɔ Yennu nba tun linba.’ ”

¹¹Yennu fiin Media kpanbarawa, kimaan u loon wun biir Babilonn-e, waa saa teen biaŋinba ki pa u Ŋasaakak biiru paake na.

Lek teeb saakab na tur mɔb a, “Ŋatir i peenii man. Teent siir nan i naagbankɔŋa man. ¹²Turin nyinn ki bin lek Babilonn joonjot. Kɔɔnt guuteeb na para. Sent guuteeb na bi seenii ni. Laan jab muuk ni man.”

Yennu tun linba ki u yet a u saa tun ki tur Babilonn niib nawa. ¹³Tiŋ maŋ mɔk mɔka nan mɔkint bonchiann, ŋaan li yoo baara, ki li manfoor jiinn cheera. ¹⁴Yabint Yennu por nan u mɔŋ manfoore, nan u saa baar nan jab bonchiann, ki bin tan lek Babilonn, ki jab na sii yab nan naasuut na, ki hoot nan nyannu.

Ki jiin dontir yaŋ na po

¹⁵Yennu jii u yiikooe ki nan tingbouŋ na,

ki jii u subinii ki nan tingbouŋ na nan sanpaak.

¹⁶U sennue te ki nyun nba be sanpagbant paapo na fu,

ki nyi nan sanpagbant lokir kur po ki tikiir.

Ŋɔɔe te ki sanyikintii nyikintir saak ni,

ki te wouŋ nyi u boor ki da.

¹⁷Nisaarii laat linba na kure, ŋaan tee jatit nan bonliinii.

Binba naan pata na dii feie,

kimaan baa naan pata nba maŋ tee bonninnanti,

ki kaa manfoori.

¹⁸Bi kaa nyɔɔti, ki tee niib n yêtibe,

ki Yennu-i baar a wun bu bi buut yoo nba, u saa biirib.

¹⁹Jakɔb Yennu na ki tee nan ŋamm na kaa.

Ŋɔɔe tee wunba nan bont kur,

ki gann Israel teeb a bii tee u tiɔŋ niib.

U sanne tee Yabint Yennu.

Ki jiin Yennu jaar na po

²⁰Yennu yet a,

“Babilonn, a tee n jaare ki tee n tɔb jatiɔk.

N jiia ki yeer digbana nan tinii,

²¹ki biir taanii nan bi jakira,

ki biir taantorit nan li ŋmakit-teeb,

²²ki kpii jab nan poob, ki kpii saakab nan waas,

ki kpii bonjai nan bonpoi,

²³ki kpii pekpaarii nan bi pei,

ki kpii binba dia taanii ki ko tanmɔna nan bi taanii maŋ,

ki kpii kpanbara nan tɔɔndamm.”

Ki jiin Babilonn tubdatu po

²⁴Ki Yennu yet a, “I saa la ki n pa jiin Babilonn nan li niib, biit nba kur ki bi tun tur Jerusalem na paak. ²⁵Babilonn, a mɔk paŋ nan jɔjaann nae, ki biir durinya kur, ŋaan min Yennu-e tee a dataak. N saa soora ki ŋmata nan tant ki nyika tanpent ni. ²⁶Sɔɔ kan ban jii a langbent ni tana ki maa ŋaaki. A sii tee nan kunkoouk nae yoo kur. Min Yennu-e pak na.

²⁷“Turin nyinn nba ki bi saa lek. Pebin naatunn ki digbana n gbat. Teent niib na tɔb siir ki took Babilonn. Pakin digbana nba tee Ararat nan Mini nan Askenas ki bin lek. Nyint jasaakɔɔ ki wun gar bi tɔɔnn. Baat nan taanii na, ki bii yab nan naasuut na. ²⁸Teent niib na tɔb siir ki took Babilonn. Tumin ki boi Media kpanbara po, nan bi tɔɔndamm nan bi saakab po, nan digbana nba kur ki bi dia na jab po. ²⁹Tingbouŋ na jekire nan jaŋmaanii, kimaan Yennu tuun u lor nba ki u yaa wun kpant Babilonn kunkoouk nae, ki sɔɔ kan kar leŋi. ³⁰Babilonn jab nyik kɔnna, ŋaan ji be bi ŋapaara nie. Bi para kpoe, ki bi ji tee nan poob na. Bi yeer doo na tammɔiwa, ki joo ŋei na muu. ³¹Toomiinba ji tiine yenɔ yenɔ ki saa kumii Babilonn kpanbar na nan bi yeer u doo na lokir kur po ki kɔɔwa. ³²Datai fat punpootboor na, ki joo ŋapaara na muuwa. Babilonn jab na yan pute. ³³Li kan yukir ki datai na saa kpib ki ŋmaatib, nan baa tuu ŋmaat dii jarik paak na. Min Yabint Daanɔ nba tee Israel teeb Yennu nae pak na.”

³⁴Babilonn kpanbar pot pot Jerusalem ki nakɔwa.

U nyik doo na koonte nan sɔkoonn na,

ki nakir nan waakper nba tuu nak bonkobuk biaŋinba na.

U jii linba ki u loone ŋaan lu linba tenn na.

³⁵Ŋaant ki Sayɔnn niib n yet a,

“Biiru nba baarit na kur nyiiruk n baa Babilonn paak.”

Ŋaant ki Jerusalem niib n yet a,

“Biak nba kur ki ti dii na nyiiruk n baa Babilonn paak.”

Biaŋinba ki Yennu saa somm Israel teeb

³⁶Yennu pak Jerusalem teeb na a, “N saa gaar i paak ki te ki i datai n pa baa tun linba ki turi na paak. N saa te ki Babilonn kpen-yura n koor, ki mɔka na n fɔɔr. ³⁷Tiŋ maŋ saa kpant langbent, ki muuk ni bonkobit sii be leŋ. Leŋ sii tee jaŋmaansooruk boore, ki sɔɔ kan kar leŋ, ki wunba kur lar, jaŋmaanii saa soorɔ. ³⁸Babilonn teeb na kur fu nan yanbɔra nae, ki mɔ nan yanbɔrbis na. ³⁹Bi tee jawudamme-e? N saa teen jaamm ki turib, ki te bin nyu yib kii mɔk parpeenn. Bi saa gɔɔn ki kan ban yerikii. ⁴⁰N saa te bin kɔtib, nan baa tuu kɔt pei nan buunii nan pejai biaŋinba nae. Min Yennu-e pak na.”

Ki jiin Babilonn joontu po

⁴¹Ki Yennu pak jiin Babilonn po a, “Bi nyann doo nba ki durinya tuu dontirɔ nawa. Babilonn ji tee siaminba mɔk jaŋmaansooruko ki tur digbana. ⁴²Mɔkgbeŋir pubir ki doo Babilonn paak, ki nyunpana piinɔwa. ⁴³Doi na kpant jaŋmaansooruk boore, ki tee nan kunkoouk nba kaa nyun, ki niib ki kɔɔ leŋ, ki bia ki gaar leŋ na. ⁴⁴N saa dat Babilonn tingbann nba tee Bel na tubira, ki te wun jiin bona nba ki u jan na, ki digbana bia ji kan jiantɔ.

“Babilonn joonjot baawa. ⁴⁵Israel teeb, chiat ki nyi leŋ man. Chiat ki tinn i manfoor, n wutochiɔŋ na ni. ⁴⁶I daa ŋaan tama koo ki tiin jaŋmaanii, yaa gbia biyaa na paaki. Binn kur mɔk li biyaae, biyaa nba jiin tɔbii po, nan biyaa nba jiin kpanbara nan bi leeb kɔna po. ⁴⁷Yoo baate ki n saa dat Babilonn tingbana tuba. Digbann na kur saa di fei, ki bi saa kpi leŋ niib na kur. ⁴⁸Linba kur be tingbouŋ na paak nan sanpagbant ni saa hoot nan kpinkpammuk, yoo nba ki Babilonn saa kɔɔ jab nba nyii gaŋ po ki baar a bin biirir na nuu ni. ⁴⁹Babilonn teebe baar nan durinya kur po niib kuun, ki mɔtana Babilonn saa baa, kimaan u te ki Israel teeb bonchiann kpo. Min Yennu-e pak na.”

Ki jiin Israel teeb nba be Babilonn na po

⁵⁰Yennu piak teen u niib nba be Babilonn a, “I nyii kuun niwa. Ii saa man. I daa taantir. Yaa lek fɔk nan i doo na, ŋaan ii dukii min nba tee i Yennu na po, kii tian Jerusalem po. ⁵¹I yeen a, ‘Ti dii fei ki la yukpiasira, ti la nan ti ki mɔk sommtɔɔ nan yenɔkɔɔwa, kimaan boorganu gaar kasii boa nba be Yenjiantu Ŋasaakak ni nawa.’ ⁵²Li paak, n piak nan yoo baat ki n saa dat Babilonn tingbana na tuba, ki binba la danii na saa mɔ tiŋ na kur po. ⁵³Li-i lekii tee ki Babilonn bo saa fit do ki saa maa ŋacheenn sanpaapo, ŋaan n bia bo saa tun niib leŋ ki bin saan yeer ŋaak maŋa. Min Yennu-e pak na.”

Biaŋinba ki Yennu saa ŋamm biir Babilonn

⁵⁴Yennu yet a, “Gbiintir mɔnii nba be Babilonn,

kpemɔnii nba jiin tiŋ na biiru po.

⁵⁵N biir Babilonn-e ki saa te lin muu sirrr.

Jab tiin kɔɔ leŋ nan mɔkgbeŋir ni nyunpana nae,

ki lekin nan fuut nba yab.

⁵⁶Bi baar ki biir Babilonn-e, ki nyann li jab,

ki bia kɔnn bi tɔrbanawa.

N tee Yennu nba daar biit damm tubae,

ki saa tun Babilonn linba jaŋɔ.

⁵⁷N saa te ki li doo diara, nan li yandamm

nan li tɔɔndamm, nan li jab n yib.

Bi saa gɔɔn ki kan ban yerik.

Min kpanbarjaanne pak na. Mine tee Yabint Yennu.

⁵⁸Bi saa daa Babilonn joonpaarit ki sikin tiŋ ni,

ki joo li tammɔfɔkit na muu.

Digbann maŋ toona kur teen yanna, bi bakint na dii muuwa.

Min Yabint Yennu-e pak na.”

Ki jiin Jeremaya mɔmaan po

⁵⁹Kpanbar Sedekaya tiɔŋ ŋmakit-tɔɔ din tee Seraya-e, ki u tee Neria bija, ŋaan tee Maseya yaaboonn. Sedekaya nba dii Juda naan, li bina ŋanna nie ki ŋɔɔ nan Seraya tɔk saa Babilonn, ki n tur Seraya mɔmasiar nna. ⁶⁰N din sɔb biiru nba kur saa baar Babilonn-e, ki teen gbouŋ ni, nan linba kur pukin ki jiin Babilonn po. ⁶¹N din yet Seraya a, “Li-i tee ki a baar Babilonn, fan karin linba kur sɔb na ki tur niib na. ⁶²Li poor po fan miar Yennu a, ‘Yennu, a pak nan a saa biir doo nawa, ki bonfoor sii kaa leŋi, laa tee nirɔ koo bonkobuk, ki li sii tee nan kunkoouk nae yoo kur.’ ⁶³Seraya, li-i tee ki a karin gbouŋ na ki tur niib na ki gbenn, fan jiir ki lor nan tann ki lur Yufrates mɔkir ni, ⁶⁴ŋaan yet a, ‘Linba saa tun ki tur Babilonn-e na. Li saa kpii ki kan ban pukiti, kimaan biiru nba ki Yennu saa baar nann na paak.’ ”

Jeremaya mɔmaan na dian nnae.

Ki jiin Jerusalem baak po

(2 Kpanbara 24.18–25.7)

¹Sedekaya din mɔk bina piinlee nan yenne ki dii Juda naan, ki kar Jerusalem bina piik nan yenn. U naa sann din tee Hamutal, ki tee Jeremaya nba be Libna na bipoo. ²Kpanbar Sedekaya din tan tun biir Yennu, nan kpanbar Jehoyakim nba poŋ din tun na. ³Yennu wutoor din mantik doo Jerusalem nan Juda teeb paak bonchiann, ki u te ki bi mir bot u tɔɔnn.

Sedekaya din yêt Babilonn kpanbar Nebukanesar mɔbe, ⁴ki Nebukanesar baar nan u jab kur ki lek Jerusalem, Sedekaya naan bina ŋanyia ni, li ŋmaarii piik ni, li dapiik daar. Bi din teen kaaŋ doo na nanyer poe, ⁵ki maa tɔb taaŋmaata ki lint li joona, ki loon doo na halii nan kpanbar Sedekaya naan bina piik nan yenn ni. ⁶Ki binn maŋ ŋmaarii ŋanna daa ŋanyia daar, ki sɔɔ kon be bonchiann, ki niib ki mɔk jeet ki di, ⁷ki Nebukanesar jab na daa Jerusalem joonjot na. Babilonn jab nba lek din ŋaa loon doo na, ŋaan ki doo na jab nyii nyiɔk ki chiar bot. Bi din tɔkin kpanbar kpaab na poe, ki gar tammɔb nba ki joona ŋanlee che leer na ni, ki chiar tɔkin Jɔɔdann mɔkir baauk po. ⁸Ŋaan Babilonn jab na din wei ber kpanbar Sedekaya, ki saa soorɔ paanu nba kpia Jeriko na ni, ki u jab kur chiar ŋaan nyikɔ. ⁹Ki bi soor Sedekaya ki saan nanɔ kpanbar Nebukanesar boor, ki sɔɔ Nebukanesar be Ribla doo ni, ki li be Hamaf yent ni. Leŋe ki Nebukanesar bu u buut ki turɔ biit. ¹⁰Ribla tiŋ nie ki u din kpii Sedekaya bonjai, ŋɔɔ Sedekaya ninbinn ni, ki bia kpii Juda saakab na. ¹¹Li poor po ki u te ki bi kpakir Sedekaya ninbina, ŋaan baanɔ jarit ki saan nanɔ Babilonn. Sedekaya din nyint dansarik nie, Babilonn, nan waa tan kpo.

Ki jiin Yenjiantu Ŋasaakak na biiru po

(2 Kpanbara 25.8-17)

¹²Babilonn kpanbar Nebukanesar naan bina piik nan ŋanyia, li ŋmaarii ŋanŋmu dapiik daare, ki Nebusaradann, wunba tee kpanbar na ŋmakit-tɔɔ, ki bia tee jab saakɔɔ na, din kɔɔ Jerusalem. ¹³U din joo Yenjiantu Ŋasaakak na, nan naan ŋaak na, nan nijaana na kur ŋei muu, ¹⁴ki u jab na bet doo na joonjot kur. ¹⁵Ki Nebusaradann jii niib nba kur biar doo na ni, nan binba mi toona fanu, nan binba jii bi mɔŋ ki tur Babilonn jab na, ki saan namm Babilonn, ¹⁶ŋaan nyik tarii nba ki mɔk mɔkinsiat na Juda yent ni, ki te bi tuun kpaant ni.

¹⁷Babilonn teeb na din biir kutmɔnt toota, nan torit nba be Yenjiantu Ŋasaakak ni na, nan kutmɔnt buuk na, ki jii kutmɔnt maŋ ki saan nann Babilonn. ¹⁸Bi bia din jii sipiat nan tanpenŋmant nba ki bi tuu ŋamii maruŋ binbintir ki tee leŋ na, nan linba ki bi tuu dia ki ŋamii fita na, nan senii nba ki bi tuu dia ki tek maruŋ bonkobit sɔn na, nan senii nba ki bi tuu dia ki jokit bonnunubit na, nan kutmɔnt bonlia nba biar, ki bi tuu dia ki tuun nann Yenjiantu Ŋasaakak ni toona na. ¹⁹Bi din jii linba kur tee salimmɔna nan salimpeena bona, ki tee kutsɔnbis nan tatilaat nba ki bi dia ki jikit musankɔɔna, nan kutsenii nba ki bi tee maruŋ bonkobit sɔn, nan tanpenŋmant, nan fitsenta, nan kutsɔnt nba ki bi dia ki jokit bonnunubit, nan kutsɔnt nba ki bi dia warii daan Yenpiinii nae. ²⁰Kutmɔnt bona nba ki kpanbar Solomonn din teen ki tur Yenjiantu Ŋasaakak, ki li tee toota nan torit nan buwakituk, nan naajanaŋa piik nan banlee nba diar na, din kpai ki paak nan bikinuwa. ^21-22Ki toota ŋanlee na din jan, ki tootir kur fɔkint tee taabatii piinlee nan ŋanlore, ki li gbeŋu tee taabatii piik nan ŋanniin. Li din mɔk foorin li sinsuuk ni, ki kpakii nan niibifoouk fɔkint na, li kur yur paak din mɔk kutmɔnt bonpaatir, ki li fɔkint tee taabatii ŋanlore nan bonjinn, ki bi luu bonluluut ki faŋir nan kutmɔnt lɔɔna li kur po, ki bonluluut na bia tee kutmɔnt. ²³Kutmɔnt lɔɔna piinyia nan ŋanloobe din be li loka ni, ki kobik mun be li yur paak.

Biaŋinba ki bi jii Juda niib ki saan namm Babilonn

(2 Kpanbara 25.18-21, 27-30)

²⁴Ki Nebusaradann, wunba din tee Babilonn jab saakɔɔ na jii Seraya, wunba tee mannteeb yudaanɔ na, nan Sefania ki u paa ki tee mannteeb yudaanɔ, nan Yenjiantu Ŋasaakak ni saakab nba tee nijaana bantaa na, ki saan namm. ²⁵Doo na ni, u bia din jii jɔɔ nba tee Juda jab ŋmakit-tɔɔ, nan kpanbar na ŋmakit teeb banlore nba daa be doo na ni, nan jab ŋmakit-tɔɔ na sommtɔɔ nba gorii jab na gbant paak, nan nijaanlia piinloob, ki saan namm. ²⁶Nebusaradann din saan namm ki saa tur Babilonn kpanbar, ki sɔɔ ki u be Ribla doo ni, ²⁷ki li be Hamaf yent ni. Kpanbar na din te ki bi kpiib leŋ.

Nnae ki bi din soor Juda niib na ki saan namm yommisin ni, Babilonn. ²⁸Niib nba ki Nebukanesar din soorib ki saan namm yommisin ni na kanne na: u naan bina ŋanlore ni, u din soor niib tusaa ŋantaa nan piinlee nan bantaa ki saan namm u tiŋ ni. ²⁹Ki u naan bina piik nan ŋanniin ni, ki u soor niib kobii ŋanniin nan piintaa nan banlee, ki nyii namm Jerusalem, ki saan namm u tiŋ ni. ³⁰Ki u naan bina piinlee nan ŋantaa ni ki Nebusaradann soor niib kobii ŋanlore nan piinna nan banŋmu ki saan namm, ki bi kur taan tee niib tusaa ŋanna nan kobii ŋanloob.

³¹Binn nba ki Efil-merodak din dii Babilonn naan na, u din tun ŋant ki tur Juda kpanbar Jehoyachinn ki nyinnɔ dansarik ni. Linba na din tun, baa din soor Jehoyachinn ki kɔɔnɔ dansarik na, li bina piintaa nan ŋanlore ni, li ŋmaarii piik nan ŋanlee ni, dapiinlee nan ŋanŋmu daare. ³²Efil-merodak din diau fanu ki turɔ baakir ki gar u leeb nba ki ŋɔɔ nan ŋamm din lakin be Babilonn ni na. ³³Jehoyachinn din mɔk yaak ki liatir u dansarik liant na, ŋaan lia taŋant, ki bia fit lakin kaar nan kpanbar na ki di jeet, u manfoor ni kur. ³⁴Waa din be u manfoor ni, bi din tuu teenɔ u bonloŋae daar kur ni.