Aisaya

AISAYA

gbouŋ

Ki jiin Aisaya gbouŋ na po

Aisaya din tee Yennu sɔkiniie, ki piak Yennu mɔmaan ki teen niib nba be Juda naan yent ni, yoo nba ki kpanbara banna din dia Juda ki gaan leeb na. Gbouŋ na bia beerit biaŋinba ki Israel nan Juda teeb datai din kɔn nyannibe. Aisaya nba din be u manfoor ni yoo nba na, Yennu sɔkiniinba leeb din be, ki tee Amos nan Hosea nan Maika. Aisaya din dɔŋ pak Yennu Niganntɔɔ na biak dinu nan u kuun po, ki bia yet a sanpaapo paann nan tingbounpaann tan sii be.

¹Gbouŋ na maan jiin Juda nan Jerusalem poe, linba ki Yennu fiit tur Amos bija Aisaya, yoo nba ki Yusia nan Jotam nan Ahas nan Hesekia din tee Juda kpanbara ki wei leeb paak na.

Biaŋinba ki Yennu yakii nan u niib

²Ki Yennu yet a, “Tingbouŋ nan sanpaak, gbiintir linba ki n piak na. Waas nba ki n wubirib na yêt n mɔba. ³Nei mi bi daanɔ, ki bonii mi siaminba ki bi daanɔ dintib. Linba na gar n niib Israel teeb nba mi linbawa. Bi ki bant maan paaki.”

⁴Yimm biit damm na, yimm niilabindiira nba tee yanbɔndamm na, i boonta. I biite tut lui. I yêt Yennu nba tee yimm Israel teeb kasii daanɔ nae, ki ŋmant i poor turɔ. ⁵Bee ki i tukin tee mɔyêtuk dammi? I loon yin la tubdatu bonchianne-e? Israel teeb, i yura poŋ gbee nan fiate, ki i para nan i yan ji kaa laafia. ⁶Laa nyii i yur paak ki saa tuu i taa po, i gbanu siar boor kaa ki mɔk laafia. I gbanant gbee nan fetimae nan nara nan fiat. I fiat maŋ ki wuur, ki tana bia ki boob li paaki. Bi ki teen nyɔku i fiat maŋ ni.

⁷Bi biir i digbann, ki joo i doi muuwa. I goriie ki boorganu niib yent i tiŋ, ki bont kur teen yann. ⁸Jerusalem kuukɔɔe biar, ki bi bia lekira. Li tee nan lanbouŋ nba be daan tiinii kpaab ni, koo kpinfaat kpaab ni, ki ki mɔk gaartɔɔ nae. ⁹Yabint Yennu-i bonni kii foor siab, Jerusalem bo saa biire nan Sodom nan Gomora doi na.

¹⁰Jerusalem, a diateeb nan a niib tee nan Sodom nan Gomora diateeb nan li niib nae. Gbiintir linba ki Yennu piaki na. Gbiintir linba ki u wanti na. ¹¹U yeen a, “I dukin a n loon marint nba ki i teenin yoo kur na-a? N miat pei nba ki i mann mujoonu marint ki teenin yoo kur nawa, ki bia miat i bonkob-ŋana nba ki i teenin nawa. N bak nan naajai nan pei nan buunii sɔma. ¹²Ŋmee beti nan i tuu baar nan linba na kur ki turin yoo nba ki i baat a yin jiantin na? Ŋmee wanni a yii lin kii chibit n ŋasaakak ni? ¹³Li ki mɔk nyɔɔt nan yin baar nan i piinii. N miat i bonnunubit nba ki i jokit nawa. N ji ki loon i ŋmaapaaŋ jaamm nan i foondaa nan i jiantu tintaanii; kimaan i yanbɔmm na biiriwa. ¹⁴N ki loon i ŋmaapaaŋ jaamm nan i dagaŋa jaamm na, bi tee jika nba ki n bak nan li jiinue.

¹⁵“Li-i tee ki i donn i nii ki mein, n kan fiint i po, i-i lekii miar biaŋinba, ŋaan n kan gbiint, kimaan i nii gbee nan sɔme. ¹⁶Wuut i mɔŋ man, kii yeen. Nyikin toonbiit nba ki n laat ki i tuun na. Barmɔnii, ii nyik toonbiit tumu, ¹⁷ŋaan tumii toonŋana tumu. Ii tuun ŋant, ki somm binba be mukisuk ni, ki tur kpeebii bi mɔnii, ki bia kɔn pakɔi paak.”

¹⁸Yennu ŋamm yet a, “Ŋaant ki tin ŋamm maan maŋ. I toonbiit bɔnniwa, ŋaan n saa wuuri ki yin penn nan ŋmaarik na. I biit nba lek te ki i bɔn bonchiann na, ŋaan n saa wuuri ki yin penn nan pegbonpeeŋ na. ¹⁹Li-i tee ki i saa sak n mɔb, i saa di jeet nba saa pia tiŋ na paak. ²⁰Ŋaan i-i yêtin, i saa kpoe. Min Yennu-e pak na.”

Ki jiin biit digbann na po

²¹Digbann nba tuu tee digbanŋann nae ji tuun toonbiit na. Sianyoo li din gbee nan niŋamme, ŋaan mɔtana nikpiirite ji be leŋ. ²²Jerusalem, sianyoo a din tee nan salimpeena nae, ŋaan mɔtana a ji ki mɔk nyɔɔti; a din tee nan tilɔɔna daŋanin nae, ŋaan a ji tee nyume. ²³A tɔɔndamm tee kpikpiruk damme nan nanyukii yɔɔsnba; yoo kur bi gaan piiniie nan mɔnyat. Bi ki taant kpeebii po barbuboor, ki bia ki gbiintir ki sommit pakɔi, yoo nba ki bi baar nan maan.

²⁴Li paak, mɔtana, gbiintir linba ki Israel teeb Yabint Yennu nba mɔk paŋ na yeen a, “N saa jiin yimm nba tee n datai na pana, ki i ji kan turin daamii. ²⁵N saa jiin bonbiir i paak. N saa ŋammi nan baa tuu pur kut ki ŋammir biaŋinba nae, ki saa nyinn i biit na kur. ²⁶N saa turi diateeb nan kpaanteeb, ki bii tee nan binba din dia-i sinsinn na. Ki Jerusalem sann ji sii tee Kasii Digbann nba waan fanu.”

²⁷Yennu nba tee kasii na paak, u saa tinn Jerusalem, nan wunba kur be leŋ ki nyik toonbiit tumu. ²⁸Ŋaan u saa biir wunba kur tuun toonbiit ki yêen u mɔb, ki saa kpi wunba kur yêtɔ.

²⁹Ki i tan saa mɔ kɔɔ nan yaa mi jiant tiinii, ki bia mi fukin tingbana kpaant ni, ki jiantirib na. ³⁰I saa suur nan kpinkpauŋ nba tuu yaa wun kpo ki suur nae, ki tee nan kpabik nba ki nyun kaa leŋ na. ³¹Paŋ damm na toonbiit saa biirib nan baa tuu kpeer muu ki lu kauk paak ki lin di nae, ki sɔɔ kaa ki saa gɔɔr biiru maŋ.

Ki jiin parmaasir nba kaa gbennu po

(Maika 4.1-3)

¹Maan nae ki Yennu tur Amos bija Aisaya, ki jiin Juda nan Jerusalem po:

²Daa baate ki kunkonn nba ki Yenjiantu ŋasaakak tɔɔ li paak na

tan sii fɔk gar kunkona kur, ki be sanpaapo ki gar jɔjaana kur.

Digbana bonchiann saa tut baar leŋ.

³Ki bi niib sii yeen a, “Ŋaant ki tin do Yennu kunkonn paak,

ki saan Israel teeb Yenjiantu ŋaak na ni.

U saa wannit waa loon tin tun linba;

ti saa somm sɔnii nba ki u gann ni,

kimaan Yennu wannu nyi Jerusalem-e;

u be Sayɔnn-e ki piak nan u niib.”

⁴U saa ŋamm barii nba be digbanjaana sinsuuk ni na.

Bi saa jii bi takoobii ki kur sɔkit, ki jii bi kpana ki kur gɔtit.

Digbana ji kan ban saan tɔbu, bi kan ban teen tɔb siiri.

⁵Tɔn, Jakɔb yaaboona, ŋaant ki tii somm yentu nba ki Yennu turit na ni.

Ki jiin tubdatu po

⁶Yennu, a nyɔr nyik a niib nba tee Jakɔb yaaboonawa. Tiŋ na gbee nan nyɔkii toona nba nyii yondo po nan Filistia yent nie. Niib na waa binba ki waa Yennu na kaare. ⁷Bi tiŋ na gbee nan salimpeena nan salimmɔnae, ki bi mɔkint na kaa paaki. Bi tiŋ na gbee nan taaniie, ki bi taantorit kaa paak. ⁸Bi tiŋ na gbee nan yenbise, ki bi jiantir linba ki bi jii bi tiɔŋ nii ki nan na.

⁹Sɔɔ kur yur saa sik tiŋ ni, ki u saa di fei. Yennu, a daa nyikin chabitibi.

¹⁰Bi saa gur tanfiat nba be jɔɔt ni, koo ki gbiir bootii tiŋ ni, a bin bɔr Yennu wutoor nba baat na, ki bɔr nyi u paŋ nan u yiikoo ni. ¹¹Yoo baat ki nisaarik parbifaant saa gbenn, ki nisaarik garuk n biir. Tɔn, Yennu kɔɔe ji saa la baakir. ¹²Daar maŋ ni, Yabint Yennu saa sikin wunba kur dont u mɔŋ, nan binba tee garit damm. Yennu kɔɔe tan saa la dontir, daar maŋ ni. ¹³U saa tut lu Lebanonn kpek-foot nan kpinkpant nba be Basann tiŋ ni. ¹⁴U saa boor naa jɔfɔkit nan kunkona na. ¹⁵Ŋafoouk nan joonjouk kur saa biir. ¹⁶U saa te ŋaringbeŋa nba kur tee ŋarinŋana na n kpii. ^17-18Nisaarik dont-n-mɔŋ saa gbenn, ki nisaarik garuk n biir. Yenbis kur saa bote fas. Yennu kɔɔe saa la dontir, daar maŋ ni.

¹⁹Nisaarii saa gur tanfiat nba be jɔɔt ni, koo ki gbiir bootii tiŋ ni, a bin bɔr nyi Yennu wutoor ni, nan u paŋ, nan u yiikoo nba baat bi paak na, yoo nba ki u saa baar a wun nik tingbouŋ na. ²⁰Li daar-i baar, bi saa lu bi salimpeena nan bi salimmɔna pata nba ki bi ŋamm nae, ki nyɔr nyikir nan naasɔɔrii nan nanjɔnt. ²¹Yennu-i baar a wun nik tingbouŋ na, nisaarii saa gur bootit nan tanfiat nba be jɔɔt nie, a bin bɔr nyi Yennu wutoor, nan u paŋ, nan u yiikoo nba baat bi paak na ni.

²²A daa tee a dindann nisaarik ni. Nisaarik jan nan bee?

Ki jiin Jerusalem ŋmatir po

¹Tɔn, ti Yomdaanɔ Yabint Yennu yaa wun nyinn bont kur nan nisaarik kur nba ki niib gaa bi paak nae, Jerusalem doo ni, nan Juda tiŋ ni. U yaa wun nyik bi jeet nan bi nyun turue, ²nan bi pandamm, nan bi kunkɔnkɔnna, nan bi barbuura, nan u sɔkiniinba, nan bi ninnyɔɔn damm, nan bi tɔɔndamm, ³nan bi kunkɔnkɔnna saakab, nan bi saakaleeb, nan bi kpaanteeb, nan binba kur dia nyɔkii ki ŋmakitir bona na. ⁴Yennu saa te ki bonjabise-ii diab. ⁵Sɔɔ kur sii ton nan u lɔɔ. Naasimm kan chɔrin bi saakab, ki niyana kan baakit tɔɔndamm.

⁶Yoo baat ki naakuuk ni niib tan saa gann bi ni yenɔ ki yetɔ a, “Fine mɔk bonliakar, a teen ti tɔɔndaanɔ, daamii yoo na.”

⁷Ki u saa jiin a, “Aaii, min kaa. N kan fit sommi. N ki mɔk jeet koo lianti. I daa teen i tɔɔndaanɔ.”

⁸Barmɔnii, Jerusalem be biiru ni. Juda tiŋ boontire. Linba kur ki bi piak ki bia tuun na tee biite ki tur Yennu. Bi sukii Yennu tiɔŋo yeenin ni. ⁹Bi ningorsime saa pak biirib. Bi tuun biit paanu nie, nan Sodom teeb nba din tun na. Bi boonta. Ŋamme lon bi tiɔŋ biiru.

¹⁰Niŋamm para sii peene, ki bona saa fanu ki turib. Bi saa di linba ki bi tun na nyɔɔte nan parmaasir. ¹¹Ŋaan yanbɔndamm boonta; baa tun linba ki tur bi leeb na, nnae mun ki bi saa tun ki turib.

¹²Lik-kpent teeb mukis n niib, ki bi pana damm ŋmaabib.

N niib, i tɔɔndamm kɔɔnti muuko, ki te ki i ki mi yaa saa ŋmant siaminba po.

Biaŋinba ki Yennu saa buu u niib buut

¹³Yennu teen siir a wun pak u maan; u teen siir a wun bu u niib buut. ¹⁴Yennu tan saa bu binba tee u niib tɔɔndamm nan saakab na buut. Waa tan saa bu bi buut ki biirib biaŋinbae na: “I fat daan tiinii kpaant, ki i ŋei gbee nan linba ki i fat tarii boor na. ¹⁵Yaa biir n niib, ki bia ŋmaŋit tarii na, li ki ŋani. Min i Yomdaanɔ Yabint Yennu-e pak na.”

Kpaanii nba saa Jerusalem poob boor na po

¹⁶Yennu yet a, “Gotir Jerusalem poob nba dont bi mɔŋ biaŋinba. Bi somm ki bi miana teek sanpaapo, ki gorii chonchon-ningorsin yoo kur, ki ŋmaan taabatjinii, ki banii nba be bi taakpakira ni damm. ¹⁷Ŋaan n saa dat bi tubawa. N saa koor bi yut ki nyikib yupaanii.”

¹⁸Daar baate ki Yennu saa jii linba ki Jerusalem poob want bi mɔŋ li paak na, ki yaat nann, ŋaan nyikib. Bona maŋe tee banii nba be bi taakpakira ni, nan bonŋana nba be bi yura paak, nan laanii nba be bi turii ni, ¹⁹nan bi tutuuta, nan bi niibanii, nan bi saarii, ²⁰nan bi yudaakat, nan bi saba nba ki bi piir bi nii ni, ki bia yokit bi sai ni na, ²¹nan banii nba ki bi piir bi niibira ni, ki bia tuu bi miana ni na, ²²nan bi liatfoŋana, nan baant, nan liatsunsont, nan bi bɔɔrii, ²³nan bi liatwotii, nan gungunŋant ninfianii, nan bobii, nan saarfɔkit nba ki bi yir yura paak na.

²⁴Bi ji kii sɔ tulaarii, bi tuu sii nubir pɔie; bi kii boob gbanŋana, ŋaan bi sii boob ŋmipianae; bi kii mɔk yuŋanti, bi sii tee yupaaniie; bi kii gbab chinchenŋana, bi sii gbab kparchante; bi fant na saa kpant feie.

²⁵Doo na ni jab nba mɔk panii na, ŋaan bi saa kpib tɔb niŋe. ²⁶Doo na tammɔi saa mɔ ki fabin, ki doo na mɔŋ sii tee nan poo nba ki bi gbabitɔ, ki kaanɔ yann tiŋ ni nae.

¹Li yoo-i baar, poob banlore tan saa bib soor jayenɔ kɔɔ ki pakɔ a, “Ti sii dint ti mɔŋ, ki bia gbabint ti mɔŋ, ŋaan fan di sukuru ki chabit yaak ki tin yet nan fine tee ti sɔrɔ, ki tin fit nyi pookpaka fei ni.”

Ki jiin Jerusalem ŋammu po

²Yoo baat ki Yennu saa te ki bonpipiat nan tiik nba kur be tiŋ na paak n kpaat ki faŋ. Israel teeb nba kur tinn na saa la parpeenn nan parbifaant, jeet nba pia tiŋ ni na paak. ³Wunba kur biar Jerusalem, ki Yennu gannɔ ki u foor na, bi sii yiu kasiie. ⁴Yennu saa jii u yiikoo ki dat niib maŋ tuba ki ŋammib, ki wuur Jerusalem biit nan sɔn nba ki bi nyinn leŋ na. ⁵Ki Sayɔnn kunkonn paak nan niib nba tikir leŋ na, Yennu saa te sanpagbouŋ-ii baak bi paak yonnu ni, ki tun munyuuk nan muyeruk nyiɔk. Yennu baakir saa dɔkin doo na kur ki guurir. ⁶Li saa bakin doo na ki lin nyi yonnu tonu ni, ki teenir parmaasir boor, ki lin nyi saak nan wouŋ biiru ni.

Yaŋ nba jiin daan tiinii kpaab po

¹Gbiintir ki man yin yaŋ na ki tura.

Yaŋ maŋ jiin n yɔɔk nan u daan tiinii kpaab poe.

N yɔɔk mɔk daan tiinii kpaab, kunkonn nba kpai paak.

²Ŋanne ki u yɔbin kpaab na, ki bia gbab tana,

ki bur daan tiinii nba ŋan bonchiann,

ki maa difoouk a wuu guu tiinii na,

ki gbiir bootuk a wuu tootir tilɔɔna na nyun,

ki ji guu, a lɔɔna na n mɔnn,

ŋaan ki lɔɔna na kur tee bonmiita.

³Ŋanne ki n yɔɔk na yet a, “Yimm niib nba be Jerusalem nan Juda na, ii bu min nan n daan tiinii kpaab na buut. ⁴Siar biar ki n ki tun kpaab na niŋi-i? Bee teen ki li yêt lɔɔnŋana nba ki n bo daan na lonuwa, ŋaan lon lɔɔnmiita?

⁵“Maa saa tun linba ki tur n kpaab maŋ tee nnae: n saa bet gungouŋ nba lintir nae faba, ki yeer joonjouk nba guur na, ki te muuk ni bonkobit n kɔɔ ki ŋmamir, ki ŋmaatir. ⁶N saa te ki mɔɔte n pia leŋ. N kan ŋamm tiinii maŋ ki bia kan ko li muuku. N saa nyik ki jagotuk nan kunkoniie n pia ki loonir. N poŋ kan te ki saak n baa leŋ.”

⁷Israel teebe tee Yabint Yennu daan tiinii kpaab;

Juda teebe tee daan tiinii nba ki u bur.

U daan a bin tun linba ŋane, ŋaan ki bi kpi niib.

U daan a bin tun linba tooke,

ŋaan binba ki bi mukisib na mɔ ki loon sommir.

Ki jiin biit nba ki nisaarii tuun na po

⁸I boonta. I daa ŋei nan kpaant ki pukii linba ki i mɔk na po. Li kan yukir kaawa ki yiar sii kaa nan niib n kar, ki i kuukɔɔe sii be tiŋ na paak. ⁹N gbat ki Yabint Yennu yeen a, “Ŋagbeŋa nba fan bonchiann na, ŋaan li kan yukir kaawa, ki li sii see langbenkoont. ¹⁰Daan tiinii nba see kpaant piik ni na, ŋaan li daan tan sii tee lena ŋanŋmue. Diboorii bɔrik-gbina kobik tan saa nan dibin bɔrik-gbina piike.”

¹¹I boonta. I tuu fiir sanyapob ni ki jak daanyunu, ki jii daajomuna ki be dayibint ni. ¹²I di jaamm nan biat nan nayakaa nan naagbai nan daan, ŋaan i ki bant Yennu nba tuun linba. ¹³Li paak, bi saa teeni yommiie ki saan nani digbangann ni. Kome saa kpi i tɔɔndamm, ki nyunnyukuru n kpi nileeb na. ¹⁴Kpeentiŋ ŋakit bi paakewa ki guub, ki yaat mɔb saama. Li saa faar Jerusalem nijaana, ki kpab nan nileeb nba nyu daan yib ki mɔk fuut na, ki nakib.

¹⁵Fei saa soor sɔɔ kur, ki binba dont bi mɔŋ na kur saa sik tiŋ ni. ¹⁶Ŋaan Yabint Yennu want u paŋ ki tuun linba ŋan, ki bia want u kasii binbeŋ, ki bu u niib buut. ¹⁷Doo na langbent ni pebis saa ŋman mɔɔt, ki bupanii saa ŋman mɔmaata.

¹⁸I boonta. I ki fit fat i mɔŋ ki nyii biit ni. ¹⁹I yeen a, “Ŋaant ki Yennu n kakit ki tun linba ki u yet nan u saa tun na, ki tin lar. Ŋaant ki Israel kasii Yennu n tun u lora na, ŋaant ki tin la u dudukit.”

²⁰I boonta. I yi bonbiire bonŋann, ŋaan yi bonŋann bonbiir. I jii bunbɔnne ki teen yentu, ŋaan jii yentu ki teen bunbɔnn. I jii linba tone ki li marii, ŋaan jii linba marii ki teen linba ton.

²¹I boonta. I dukii nan i sube, ki mɔk yan.

²²I boonta. I tee nijaanae dalenn ni, ki mɔk para ki ki tiin siar daan ŋmatu yoo. ²³Ŋaan mɔnyat paak ki i te biit damm saa yann, ŋaan gɔi mɔndamm na ki bi ki laat mɔnii. ²⁴Li paak, kinkaka nan mɔkoont nba tuu di muu biaŋinba na, i jiina mun saa bat, ki i puuk n koor nnae, ki wouŋ n pebirir, kimaan i yêt linba ki Yabint Yennu nba tee Israel teeb kasii Yennu tumii nawa. ²⁵Yennu wutoor doo u niib paak, ki u tant u nuu a wun dat bi tuba. Kunkona nba fɔk na saa damm, ki binba kpo na gbanant saa biar dɔɔ sɔnii ni nan mɔɔt na. Ŋaan Yennu wutoor lek kan maaki, ki u nuu sii tian a lin dat niib tuba.

²⁶Yennu tur nyinne a wun yiin digbann nba be banfɔkir, ki foon yiin binba be banfɔka na a bin baar, ki bi baat yian yiama. ²⁷Bi sɔɔ ki bakii, bi sɔɔ ki jarin siar. Bi ki tiŋit koo ki gɔɔnti. Bi sɔɔ gbann ki worik, ki bi taasaŋmiit ki cheer. ²⁸Bi peenii porime, ki bi tɔrbana teen siir nan tɔnu. Bi taanii taawoka wakii nan tann nae, ki bi taantorit fiia lintir nan sajaperinn na. ²⁹Jab na gaan jat nan yanbɔra nba tuu kpi bonkobuk ki jii u nant ki kɔɔ nann muuk siaminba ki sɔɔ kan lab ki fat nae.

³⁰Li daar-i baar, bi saa gaar jat Israel paak nan kunkɔsaakar nan mɔkgbeŋir fuur nae. Gotir tingbouŋ na. Bunbɔnn nan parbiir be li kur po. Bunbɔnn nak yentu nawa.

Biaŋinba ki Yennu yiin Aisaya

¹Binn nba ki kpanbar Yusia din kpo na ni, ki n la Yennu, ki u kar u binbintir paak sanpaapo nan dontir, ki u baauŋ yit gbee jiantu ŋasaakak na kur po. ²Ki bonfoa nba nyirii nan muu na see lintɔ, ki bonfoor kur mɔk kpinkpant ŋanloob-loob. Ki bonfoor kur jii kpinkpant ŋanlee ki dɔkin u numpo, ki jii kpinkpant ŋanlee ki dɔkin u gbanant, ŋaan dia kpinkpant ŋanlee nba biar na ki yuuk. ³Ki bi yeen bi leeb a:

“Kasii, kasii, kasii. Yabint Yennu tee kasiie.

U baakir gbee durinyawa.”

⁴Ki bi kunkɔra na fuur te ki Yenjiantu ŋasaakak na fiakir ŋak, ki munyuut gbee ŋasaakak maŋ.

⁵Ki n yet a, “N poŋ ji ki mɔk dindann. N boonta, kimaan maan nba kur nyii n mɔb ni tee biite, ki n be niib nba yaa maan kur tee biit na boor. Ŋaan ki n tiɔŋ ninbinne la kpanbar, wunba tee Yabint Yennu na.”

⁶Ki bonfoa na yenɔ yukir baar n boor, ki dia musankɔɔnn nba ki u jii maruŋ binbintir paak nan babuk na, ⁷ki jii musankɔɔnn na ki suu n mɔgbana, ŋaan yet a, “Linba na sii a mɔgbanawa, ki mɔtana a biit piina, a yanbɔmm la nyikin chaba.”

⁸Ki n gbat Yennu yet a, “N saa tun ŋmee? Ŋmee sii tee ti toomii?”

Ki n jiin a, “N saa saana. Tummin.”

⁹Ki u betin a n saan ki pak maan na ki tur niib na a, “Yi-i lekii gbiint biaŋinba, ŋaan i kan bann li paak. Yi-i lekii got biaŋinba, ŋaan i kan bann linba tuun.” ¹⁰Ŋanne ki u yetin a, “Linin niib na yan, ki kpaa bi tuba, ki jɔɔn bi nunii, ki bi daa laat, koo ki gbia koo ki bant maan paaki. Nna-i kaa, bi saa jen n boore ki la laafia.”

¹¹Ki n boi a, “Yennu, li sii tee nna ki wei nlee?”

Ki u jiin a, “Ki tan tuu yoo nba ki doi na sii tee langbent ki biar yann, ki tan tuu yoo nba ki sɔɔ sii kaa ŋei maŋ ni, nan yoo nba ki tiŋ na mɔŋ sii tee tinfukiryann. ¹²N saa saan nan niib na banfɔkir, ŋaan nyik tiŋ na yann. ¹³Li-i tee ki niib piik ni yenɔ biar tiŋ na ni, n saa biirɔwa; u sii tee nan baa tuu chɔɔ kpinkpauŋ, ŋaan ki u dagbir n biar ki fiik tiŋ ni nae.”

Dagbir na see Yennu niib pinpiin-paann seenu nie.

Ki jiin maan nba saa kpanbar Ahas boor na po

¹Yoo nba ki kpanbar Ahas, wunba tee Jotam bija, ŋaan tee Yusia yaaboonn na, din dia Juda teeb na, tɔb din baar. Ki Siria kpanbar Resinn nan Remalia bija Peka, wunba tee Israel kpanbar na, din saan lek Jerusalem, ŋaan ki fit nyanniri.

²Ki mɔmaan nba baar Juda kpanbar a Siria jab poŋ be Israel yent ni na, ki ŋɔɔ nan u niib yan put, ki bi jekir nan wouŋ nba tuu da tiinii ni na.

³Ki Yennu pak Aisaya a, “Jiin a bija Sear Jasub ki saan la kpanbar Ahas. A saa lau sɔnu ni, siaminba ki bi luu chinchena na, bunu nba jikit nyun ki nyi nann paapo nyundɔɔnn ni na joontik boor. ⁴A pakɔ ki wuu chek, kii tee soon nna, ki daa tiin jaŋmaanii, koo ki li daamiiɔ. Siria bat Resinn nan u jab, nan bat Peka wutoa ki mɔk jaŋmaanii, ki tee nan munyuut nba tuu wubir kinkaka ŋanlee ni biaŋinba na. ⁵Siria teeb nan Israel teeb nan li bat na lor bonbiira. ⁶Bi loon bin wor Juda-e ki jeen niib na ki bin taan bi po, ki bin fit dinn Tabeel bija naan.

⁷“Ŋaan min Yennu yet nan linba na kan mi tumi. ⁸Bee? Kimaan Siria ki mɔk paŋ ki gar Damaskus nba tee li digbangbeŋir na, ki Damaskus mun ki mɔk paŋ ki gar bat Resinn. Israel ŋarin, bina piinloob nan ŋanŋmu sinsuuk ni na, li saa mantik biir gar nan lii tee digbann ki seewa. ⁹Israel ki mɔk paŋ ki gar Samaria nba tee li digbangbeŋir na, ki Samaria ki mɔk paŋ ki gar bat Peka.

“I yada-i kii paar, i kan fit gubin.”

Ki jiin Imanuel po

¹⁰Ki Yennu ŋamm tur Ahas maleer a, ¹¹“Boin a Yomdaanɔ Yennu ki wun tura nyinn. Li saa fit nyi kpeentiŋ koo sanpaapo.”

¹²Ki Ahas jiin a, “N kan boi nyinn po. N yêt man bikin Yennu-e.”

¹³Li yoo na ki Aisaya jiin a, “Kpanbar Defid yaaboona, gbiintir man. Li ki ŋan ki a te ki nisaarii n di sukuru ki miat. A saa bia te ki Yennu n di sukuru ki miata-a? ¹⁴Tɔn, Yennu mɔŋe saa tura nyinn: Sapaamunn7.14 Bi maan ni, li sii fit tee sapaamunn koo poopaaŋ. tan saa soor poor ki mar bonjak, ki purɔ Imanuel.7.14 Imanuel paake tee “Yennu be nant.”¹⁵Yoo nba ki u tan saa subir ki ji dukii linba ki u saa tun na, niib tan sii nyu naabiime ki di siat. ¹⁶Li yoo tan sii baat na, ki sɔɔ kpanbara banlee nba jeenta na tiŋ dɔɔr yanna.

¹⁷“Yennu yaa wun baar nan daamiie fin nan a niib nan naan ŋaak kur paak, li daamii sii ton ki gar daamii nba mi baar, laa nyii yoo nba ki Israel tingbouŋ din bɔkit u mɔŋ Juda tingbouŋ ni nawa. U yaa wun baar nan Asiria kpanbare.

¹⁸“Li yoo-i baar, Yennu saa foone ki li tee nyinn ki yiin Ijipt teeb, ki bin nyi banfɔka Nail kpenii kur po, ki baar ki tee nan kpajui na, ki Asiria teeb n nyi bi tiŋ ni ki baar, ki tee nan sai na. ¹⁹Bi sii miribe jɔlɔnt ni, nan tanfiat nba be jɔɔt ni, ki bi tan saa piin kunkonii nan bonkobit kpinkpaar boor kur po.

²⁰“Li yoo-i baar, Yennu saa te yukoortɔɔe n nyi Yufrates mɔk-pootir po. Ŋɔɔe tee Asiria kpanbar, ki u saa koor i tianii nan i yut nan i gbanant paak kobit kur.

²¹“Li yoo-i baar, ki kpaarɔ lek mɔk naasar yenɔkɔɔ nan buunii banlee gbaa, ²²ŋaan u tan saa la biin bonchiann ki lin jaŋɔ. Barmɔnii, binba tan saa tenn waan tiŋ na paak sii mɔk naabiin ki nyu, ki bia mɔk siat ki di.

²³“Li yoo-i baar, daan tiinii kpaant nba ŋan ki mɔk tiinii tusir tusir, ki li daauk tee likbina tusir tusire, ŋaan kunkonii nan jagotuko tan saa pia loonir. ²⁴Niib tan sii dia peenii nan tɔrbana ki gɔrin leŋe. Barmɔnii, tiŋ na kur tan saa gbee nan kunkonii nan jagotuko. ²⁵Kunkona nba paak ki bi tuu buur jeet na, ŋaan kunkonii kɔɔe tan saa pia, ki sɔɔ kan ŋmaa leŋ. Li sii tee siaminba ki nei nan pei ŋmame.”

Aisaya bijae tee nyinn ki tur niib na

¹Ki Yennu pakin a, “Jiin bonsɔbkar nba yarin ki sɔb nammigbeŋa li paak a: ‘Lekin Yian. Kakitir Fat.’ ²N saa yiin nichinchiba banlee nba tee Jeberekia bija Sekaria, nan manntɔɔ Yuria, ki bii tee n siara damm.”

³Li poor po, ki n ŋaapoo soor poor. Waa mar ti bija maŋ yoo nba, ki Yennu yetin a, “Purimɔ ‘Lekin Yian, Kakitir Fat.’ ⁴Bik na nba tan saa kpaat ki fit yet ‘Naa’ nan ‘Baa’ yoo nba na, ki sɔɔ ki Asiria kpanbar jii Damaskus mɔkint nan Samaria bont kur, ki yaat nann na.”

Ki jiin Asiria kpanbar baaru po

⁵Yennu ŋamm pak turin. ⁶U yet a, “Kimaan niib na nba yêt nyun nba nyii Siiloa kpenbik ni soon nna, ŋaan mɔk parpeenn bat Resinn nan bat Peka paak na, ⁷min Yennu saa baar nan Asiria kpanbar nan u jab kur ki bin wor Juda. Bi saa tia ki lek nan Yufrates mɔkir nba tuu gbee nan li mɔkgbiant biaŋinba nae. ⁸Bi saa lia Juda nan nyunmɔnn nae, ki do porik ki piin bont kur.”

Yennu be nant. U kpinkpanfɔkit nae guu tiŋ na.

⁹Yimm digbana na, lakint nan jaŋmaanii man. Gbiintir man, yimm nba be banfɔka tingbouŋ na kur po. Nn, teent siir nan kɔnn, ŋaan kii mɔk jaŋmaanii. ¹⁰Ii lorin lora, ŋaan li kan ban teen fanu. Ii piak yaa loon biaŋinba. Ŋaan li kur tee yanne, kimaan Yennu be nant.

Biaŋinba ki Yennu kpaan u sɔkinii

¹¹Yennu jii u paŋ nba yab nae ki kpaanin, a n daa waa sɔnu nba ki niib na tɔk na. U yet a, ¹²“Daa waa niib na lorbiit, ki bia daa tiin bona nba ki bi tiin na. ¹³Tiat nan min Yabint Yennu tee kasiie. Mine tee daanɔ nba ki a sii tiin. ¹⁴N kasii binbeŋ nba mɔk jaŋmaanii na paak te ki n tee nan tann nba ki bi gbiatir baa na. N tee nan baruk nae ki saa soor Juda nan Israel tingbant, nan Jerusalem doo niib. ¹⁵Niib bonchiann saa gbiat, ki baa but but. Baruko saa soorib.”

Kpayakit nba yaa ti daa piak nan kpeemm

¹⁶Yimm nba tee n taatara na, ii guu kii dia maan nba ki Yennu turin na. ¹⁷Yennu bɔr u mɔŋe u niib boor, ŋaan ki n teenɔ yada, ki jii n dindann ki maa u paak.

¹⁸N be nan waas nba ki Yennu turin na. Yabint Yennu nba naangbouŋ be Sayɔnn kunkonn paak nae tunt, ki ti tee nan maan nba fo, Israel teeb boor.

¹⁹Ŋaan niib saa yeti a yin boi ninnyɔɔn damm nan jabaabuura, binba burin ki lɔkin na, a bin fiit maan ki turi. Bi saa yet a, “Li tee niib n tuu boi kpinkpaarii nan kpeemme, binba fo na paak.”

²⁰Ii yetib a, “Gbiintir linba ki Yennu wanti na. I daa gbiin ninnyɔɔn damm yari. Linba ki bi wanti na kan sommini.”

Ki jiin daamii yoo po

²¹Niib na saa lin yirib muuk ni, ki sii kaa dindann, ki kon sii mɔkib. Baa sii be kon nan wutoor ni na, bi saa mɔ Yennu nan bi kpanbar mɔtont. Bi saa gokit got sanpaapo, ²²koo ki nut bi ninbina tiŋ ni, ŋaan bi kan la siar, see daamii nan bunbɔnn kɔɔ, bunbɔncheenn nan jaŋmaanii nba ki bi kɔɔ na ni.

¹Sɔnsau sii kaa ki bi saa tɔkin ki nyi daamii yoo na ni.

Ki jiin wunba tan saa di naan po

Sebulunn nan Naftali booru tiŋ din ban dii feiwa, ŋaan yoo baat ki yent maŋ saa la baakir, laa nyii sinsuuk ni mɔkgbeŋir na ki saa yondo po, ki saa tuu Jɔɔdann mɔk-pootir tiŋ, ki bia gar Galilii yent, siaminba ki boorganu kar na.

²Niib nba tuu somm bunbɔnn ni na ji la yentchiɔŋa.

Bi tuu be bunbɔnn tiŋ na nie, ŋaan mɔtana yeeuŋ yent bi paaka.

³Yennu, a turib kpinkpamjaanna, ki te ki bi mɔk parpeenn.

Bi kpamm faa tun linba na paake,

nan niib nba tuu jaan bi jeet ki kpamm,

koo ki chentir mɔkint nba ki bi fat ki kpamm biaŋinba na,

⁴kimaan a kɔnn bi yɔkit nba tuu yɔɔk bi paak nawa,

ki bia jint gbann nba tuu boob bi sai ni na.

A nyann digbann nba tuu diin ki ŋmaŋit a niib nawa,

nan faa din nyann Midiann jab sianyoo biaŋinba na.

⁵Jab nba lek na taasaat, nan bi tiat nba ki sɔn tarin na kur,

muue saa di.

⁶Bi mar bik ki turita. Bi turit bonjaka.

Ŋɔɔe sii tee ti diatɔɔ. Bi sii yiu, “Bakitnauŋ ŋmakit-tɔɔ,”

nan “Yabint Yennu,” nan “Baa nba yɔɔ be,”

nan “Parmaasir kpanbar.”

⁷U naan yiikoo sii kpaatire yoo kur;

u naan sii yɔɔ be parmaasir nie,

ki u saa gaar kpanbar Defid naan yent ki dia,

ki u yiikoo sii gaa linba took nan barmɔnii paak,

laa nyi mɔtana nan yoo nba waa mɔkmɔk nan mɔkmɔk.

Yabint Yennu-e lor wun tun linba na.

Biaŋinba ki Yennu saa dat Israel teeb tuba

⁸Yennu sat mɔb nan u saa bu Israel teeb nba tee Jakɔb yaaboona na buut. ⁹Israel teeb kur nba be Samaria doo ni saa bann nan ŋɔɔ Yennu-e tun linba na. Mɔtana bi mɔk garuko, ki want bi mɔŋ, ki yeen a, ¹⁰“Tant ŋaak na baawa, ŋaan ti saa ŋamm maar nan tanae. Bi kɔnn kɔnn sinsabik yɔkaa nawa, ŋaan ti saa jii kpek yɔkaae ki ŋamm yɔk.”

¹¹Yennu donn bi datai wutoae ki bi lekib. ¹²Siria teeb nba be yondo po, nan Filistia teeb nba be yonbaa po na yaat mɔi-e, ki nak Israel teeb. Linba na lek, ŋaan Yennu wutoor ki maaki, u nuu bia tiane a wun dat bi tuba.

¹³Israel teeb ki nyik bi toonbiiti; Yabint Yennu nba lek dat bi tuba na, ŋaan bi ki jen u boori. ¹⁴Dayenn kɔɔe ki u saa dat Israel teeb kur nan bi tɔɔndamm tuba; u saa pot yur nan joor kur. ¹⁵Nikpera nan nijaana nae tee yur, ki faak sɔkiniinba na mun tee joor. ¹⁶Binba din dia niib na diab tuntunae, ki ŋmatib fas. ¹⁷Li paak, Yennu kan chab ki bi naasimm na nan yenɔkɔɔwa n paaki, ki bia kan tin bi pakɔi koo bi kpeebii na ninbaauk, kimaan niib na kur tee binba ki waa Yennu-e, ki tee nɔɔnŋmiant damm, ki bi maan kur tee biit. Linba na lek, ŋaan Yennu wutoor kan maaki, u nuu bia sii tiane a wun dat bi tuba.

¹⁸Niib na biit di nan muu nba tuu di jagotuk nan kunkonii nae. Li di nan muu nba tuu di fɔɔr, ki munyuuk do nae. ¹⁹Yabint Yennu wutoor nba doo na paak, ki u tubdatu na di nan muu na tiŋ na kur po, ki kpi niib maŋ, sɔɔ kur gbaa a wun tinn u mɔŋe. ²⁰Tiŋ na siar kur po niib bibit jeet nba kur ki bi laate, ŋaan bi kon na kan ban gbenn. Bi poŋ ŋman bi tiɔŋ waase. ²¹Manase booru nan Efraim booru wor bi leebe, ki bia taan leeb ki wor Juda. Linba na lek, ŋaan Yennu wutoor ki maaki, u nuu bia tiane a wun dat bi tuba.

¹I boonta. I sent sennbiit ki mukis n niib. ²I tuun nnae ki gɔi tarii, ki bi ki laat bi mɔnii, ki bia ki laat ŋant. I tuun nnae ki fiar pakɔi nan kpeebii faar. ³I tan saa teen nlee, yoo nba ki Yennu daar i tuba na? I tan saa teen nlee, yoo nba ki u saa jii digbanbanfɔkir niib ki bin baar nan daamii i paak na? I tan saa chiar saan lia nie ki la sommiri? I tan saa bɔr i mɔkint lia nie? ⁴Bi tan saa kpi-i tɔbii nie, koo ki soori ki teeni yommii, ŋaan Yennu wutoor lek bia kan maaki, u nuu bia sii tiane a wun dat i tuba.

Ki jiin Asiria kpanbar po

⁵Yennu yet a, “N jii Asiria kpanbare ki teen lanbann maa n dat binba ki n wutoor doo bi paak na tuba. ⁶N tun Asiria kpanbare maa wun saan dat niib nba ki waa min Yennu na tuba, ŋamme donn n wutoor. N tumɔe maa wun saan fat ki jan, ki bia ŋmaat niib na nan bi tee sɔnjouk ni tante na.”

⁷Ŋaan Asiria kpanbar na mun mɔk u yur po lorbiitewa. U lorin a wun biir digbana bonchianne. ⁸U faa parbiire a, “N jab ŋmakit-tɔɔ kur tee kpanbare. ⁹N nyann Kalno nan Karkemis doi, nan Hamaf nan Arpad doiwa. N nyann Samaria nan Damaskus doiwa. ¹⁰N tant nuue maa n dat digbana nba jiantir tingbana na tuba, ki tingbana maŋ yab gar Jerusalem nan Samaria tingbanawa. ¹¹N biir Samaria nan li tingbana kurawa, ki bia saa tun nnae ki tur Jerusalem nan tingbana nba ki bi jiantir leŋ na.”

¹²Ŋaan Yennu yet a, “Mi-i gbenn linba ki n tuun Sayɔnn kunkonn paak nan Jerusalem na yoo nba, n saa dat Asiria kpanbar tubir nan waa want u mɔŋ ki faa kpinkpant na.”

¹³Asiria kpanbar want u mɔŋ ki yeen a, “Mine tun li kur na, n tiɔŋ. N mɔk paŋ, ki sub, ki mɔk yan. Mine chaat digbana terii, ki jii bi jeet nba ki bi bɔr kur. N chibit niib nba be leŋ na paake nan naajak na. ¹⁴Digbana nba be durinya na ni daan tee nan nɔɔntiɔk nae, ki n taan bi gor na yiama, nan jena na. Ki kpinkpounsiar ki damm ki saa yɔɔmi, ki mɔb ki yaat ki koon n paaki.”

¹⁵Ki Yennu yet a, “Piak saa fit yet a u chee wunba diau ki chɔɔn na-a? Kanpinta juk saa fit yet nan u chee wunba diau ki porii bona nawa-a? Gbajar kaa wokitir nirɔ, ŋaan nirɔe wokitir gbajar.”

¹⁶Yabint Yennu yaa wun baar nan yiarue binba di gboot mɔtana na paak, ki dat bi tuba. Muu nba ki kpeent sii be bi gbanant ni ki yɔɔ di. ¹⁷Yennu nba tee Israel yentu nae saa kpant muu. Israel teeb kasii Yennu na saa kpant muyeruk nba saa jii dayenn ki di bont kur, halii kunkonii nan jagotuk kur. ¹⁸Fɔɔr nba mun, nan kpaant nba kpai kur saa biir, nan yiarpaaruk nba tuu biir nirɔ biaŋinba na. ¹⁹Tiinii barik barik nnae tan saa tenn, ki bik gbaa saa fit kan tiinii maŋa.

Ki jiin niib waaminna jenu po

²⁰Yoo baat ki Israel teeb nba foor na ji kan gaan bi dindann digbann nba nyannib na paaki. Bi tan saa teen bi dindann Yennu nba tee Israel teeb kasii Yennu na nie. ²¹Israel teeb waaminnae tan saa jen bi Yabint Yennu boor. ²²Mɔtana nba ki Israel teeb yab ki tee nan mɔktanbiiuŋ na, ŋaan bi waaminnae tan saa jen. Biiru be sɔnu ki baat niib na paak, ki kpan saa jaŋibi. ²³Nn, Yabint Yennu nba tee Yomdaanɔ na saa baar nan biiru tiŋ na kur poe, nan biaŋinba ki u yet na.

Biaŋinba ki Yennu saa dat Asiria teeb tuba

²⁴Yabint Yennu nba tee Yomdaanɔ na yeen u niib nba kar Sayɔnn na a, “I daa tiin Asiria teeb na, baa lek dinti biak, nan Ijipt teeb nba din tuu dia-i biaŋinba na. ²⁵Li-i yann waan, n saa nyik i tubdatu, ki li poor po, man biir Asiria teeb maŋ. ²⁶Min Yabint Yennu saa jii lanbanne ki boob, nan maa boo Midiann teeb, Oreb tangbeŋir boor biaŋinba na. N saa dat Asiria teeb tuba, nan maa dat Ijipt teeb tuba biaŋinba nae. ²⁷Li yoo-i baar, n saa nyinni Asiria yiikoo ni, ki bi yɔkit na ji kii paa i bɔpiat paak ki teeni kpiasu.”

Ki jiin datai leku po

²⁸Jab nba tee datai na nyann Ai digbann-a. Bi gar Migronn-a. Bi nyik bi jeet Mikmas-e. ²⁹Bi gar lɔɔnu nawa, ki ji dɔɔ Geba-e nyiɔk. Niib nba be Rama doo ni na, jaŋmaanii jekibe, ki niib nba be kpanbar Sɔɔl doo nba tee Gibea na chiar. ³⁰Ii hoot man, yimm nba tee Galim teeb na. Gbiintir man, Laisa teeb. Jiint man, yimm Anatof teeb. ³¹Madmena nan Gebim teeb tiine a bin fat bi manfoa. ³²Dinna, datai na be Nob doo ni, bi be leŋe ki ŋakin bi nii Sayɔnn kunkonn po, Jerusalem doo na po.

³³Yabint Yennu saa biirib nan baa tuu chɔɔ tiik yiinu ki lu nae. Bi saa chɔɔ bi parbifaara nan bi yudamm na ki butib. ³⁴Yennu saa chɔɔ lub nan baa tuu chɔɔ fɔɔr sinsuuk ni tiinii nae, ki Lebanonn tiŋanii gbaa n baa.

Ki jiin parmaasir digbann na po

¹Defid naan ŋaateeb na tee nan tiik nba ki bi chɔɔ lu-u nae; yiinu nba tuu tuk tigbir paak biaŋinba na, nnae ki kpanbar paaŋ saa nyi Defid yaaboona na ni.

²Yennu Seeke saa turɔ yanfoon nan bannu nan minu

nba ki u sii dia u niib.

U sii mi Yennu loomm ki baakitɔ,

³ki sii mɔk parpeenn nan Yennu mɔsaku.

U kii gorii numpo koo ki gbia bi yaa kaa ki bu buuti.

⁴U saa bu tarii buut fanu, ki kɔn talas damm paak.

U tuu saa tur mɔbe ki bin dat niib tuba, ki nibiit na saa kpo.

⁵U saa dia u niib nan mamɔmm nan binbenŋaŋ.

⁶Kinkata nan pei tan saa lakin be nan parmaasir,

ki naamuut nan bupanii tan saa lakin dɔɔr.

Ki naabis nan yanbɔrbis tan saa lakin di, ki waas kpaarib.

⁷Ki nei nan naamuut tan saa lakin di,

ki bi waas lakint dɔɔ nan parmaasir.

Ki yanbɔra saa ŋman mɔɔt nan nei nba ŋman mɔɔt biaŋinba na.

⁸Bonbuna tan sii jerin waalabirii, ŋaan kan la daŋi.

⁹Siar sii kaa Yennu kasii kunkonn Sayɔnn paak ki tee daŋ,

koo biiti.

Tiŋ na tan saa gbee nan Yennu bannu,

nan mɔkgbeŋir nba gbee nan nyun nae.

Ki jiin binba be boorganu tinii ni jenu po

¹⁰Daar baate ki kpanbar paaŋ tan saa nyi kpanbar Defid naan naakuuk ni ki tee nyinn ki tur booru kur. Bi tan saa lakin u naan digbann na ni, ki turɔ baakir. ¹¹Li daar-i baar, Yennu saa ŋamm jii u paŋ na ki jen nan u niib nba biar Asiria nan Ijipt nan Patros nan Sudann nan Elam nan Babilonn nan Hamaf tinii ni, nan mɔkgbiant nan nyun ni kunkona paak na, bi doi ni. ¹²Yennu saa donn u nyinn fariŋ ki wann digbana nan u bia lakint Israel nan Juda niib nba yat nae, ki nyi namm durinya loka ŋanna kur po, ki jent namm. ¹³Israel tingbouŋ ji kan fumm nan Juda tingbouŋ, ki Juda teeb mun ji kii tee Israel teeb dataaki. ¹⁴Bi saa taan ki lek Filistia teeb nba be yonbaa po, ki fat niib nba kar yondo po na bona. Bi saa nyann Edom nan Moab teeb, ki Amonn teeb saa sak bi mɔb. ¹⁵Yennu saa te ki Sues mɔkgbeŋir n fɔɔr, ki bia baar nan wontouŋ ki lin fɔɔr Yufrates mɔkir, ki kpenbis ŋanlore-e saa tenn, ki sɔɔ kur saa fit somm poot. ¹⁶Sɔnjar saa nyi Asiria ki tur u niib nba tee Israel teeb ki tinn leŋ na, nan laa din tun biaŋinba ki tur bi yeejamm, yoo nba ki bi din nyii Ijipt na.

Niipoturu yaŋ

¹Yoo baat ki niib saa yin yaŋ a,

“N dontira, Yennu. A wutoor bo doo n paake,

ŋaan mɔtana a maan n para, ki a wutoor bia ji ki do.

²Yennu-e tee n tinntɔɔ, n saa teen ŋɔɔe yada,

ki kan tin jaŋmaanii.

Yennu-e teenin yiikoo nan paŋ, ŋɔɔe tee n tinntɔɔ.

³Nyunmaasin nba baat nan kpinkpammuk

kunkɔkoonn paak biaŋinba na,

nnae ki Yennu niib tuu kpamm, yoo nba ki Yennu tinnib.”

⁴Daar baate ki niib saa yin yaŋ na a, “Turin Yennu niipoouk.

Yiintɔ ki wun somma. Pakin digbana kur, waa tun linba.

Wantib u yiikoo nba jan.

⁵Yinin ki dont Yennu, kimaan waa tun toonjaana nba na paak.

Ŋaant durinya munn n gbat li labaar.

⁶Ŋaant ki wunba be Sayɔnn kur-ii hoot kii yiin,

kimaan ŋamm Israel teeb kasii Yennu mɔk yiikoo,

ki be u niib boor.”

Biaŋinba ki Yennu saa dat Babilonn doo tubir

¹Mɔmaan na jiin Babilonn doo poe, ki Amos bija Aisaya gaarir Yennu boor.

²Dont tɔb fariŋ, jɔkoonn yur paak, ki hoot ki tur jab na, ki donn a nuu, ki li-i tee nyinn ki turib, ki bin lek digbann nba mɔk karinbaanii na tammɔi. ³Yennu yiin u jab nba tee kasii ki mɔk para, ki bia mɔk parpeenn u nyannu paak na, a bin faa tɔb, ki dat binba ki u wutoor doo bi paak na tuba.

⁴Gbiintir fuur nba fu kunkona paak na, li tee nibur fuure, ki tee digbanchiɔŋ tikiru fuur. Yabint Yennu tee u jab tɔb siire. ⁵Bi nyii digbanbanfɔkae, durinya na kur po, ki baat. Yennu donn wutoore ki baat a wun biir tiŋ na kur.

⁶Ii kurii nan gbanantont. Yennu daar na pera, ki tee daar nba ki Yabint daanɔ maŋ saa baar nan biiru. ⁷Sɔɔ kur nii sii sɔɔn, ki sɔɔ kur saa kɔŋ dindann. ⁸Jaŋmaanii saa soor bi kur, ki gbanantont saa nyannib, nan poo nba tuu kar matdaaŋ paak ki li tonɔ na. Bi sii gorii leeb nan jaŋmaanninbinae, ki fei n kpib. ⁹Yennu daar baate ki tee u wutochiɔŋ nan yanyêtuk dabiiuk na. Tingbouŋ na saa kpant tinkokirik, ki u saa biir yanbɔndaanɔ kur. ¹⁰Ŋmaabir kur nan ŋmaawob kur kan yenti, yonnu-i doo ŋaan u sii bɔne, ki ŋmaarik kan yent.

¹¹Yennu yet a, “N saa baar nan biiru tingbouŋ na paak, ki dat yanbɔndamm kur tuba, bi biit paak. N saa sikin wunba kur want u mɔŋ, ki dat garuk damm nan tondamm na tuba. ¹²Binba saa foor na lanu sii paar nan salima lanu nba paar biaŋinba nae. ¹³N saa te ki sanpaak n jekir, ki tingbouŋ na n damm li fiakir ni, daar nba ki min Yabint Yennu saa wann n wutoor na.

¹⁴“Boorganu nba kar Babilonn saa chiar kun bi dantinii ni, ki yat nan piarii nba tuu tiin a bin bot waarib na, koo pei nba kaa pekpaarik na. ¹⁵Bi-i soor wunba kur, bi saa jii juke ki kpiu. ¹⁶Bi saa mat bi waas bi numm ni, ki fat bi faar, ki bia mia bi poob ki dɔɔ namm.”

¹⁷Yennu ŋamm yet a, “N fiint Mede teebe maa bin lek Babilonn. Bi baka kaa salimpeena po. Bi niɔŋ bia kaa salimmɔna ni. ¹⁸Bi saa jii bi tɔrbana nan peeniie ki kpi naasimm na. Bi kii mɔk ninbatinu nan sanpantii, ki kii mɔk ninkpabauŋ waas paak. ¹⁹Babilonia-e tee digbann nba mantik fan. U niib faa parbiir u paake, ŋaan min Yennu saa biir Babilonn13.19 Babilonn-e din tee Babilonia digbansaakar. nan maa tun Sodom nan Gomora biaŋinba nae. ²⁰Sɔɔ ji kan ban kar leŋ. Arab teeb bonsunsommsɔɔ kan ban chaan u lanbouŋ leŋ, ki pekpaarsɔɔ bia kan ban kpaar u pei leŋ. ²¹Li sii tee boor nba ki muuk ni bonkobit be-e, ki tee siaminba ki fiit tia bi tiat. Barŋmaant sii be leŋe, ki sina mobit langbent maŋ ni, ²²ki kinkata nan mɔbɔi fuut sii toon ŋatɔɔtii nan naan ŋei ni. Babilonn yoo baara. U daa poŋ ŋman gbenna.”

Ki jiin binba be boorganu tinii ni na jenu po

¹Yennu bia tan sii mɔk ninbatinu nan u niib Israel teeb, ki saa ŋamm gannib ki teemm u niib. U saa te bin ŋamm kɔɔ bi tiŋ ni, ki boorganu saa baar kɔɔ namm. ²Digbana bonchiann saa somm Israel teeb ki bin ŋmat bi tiŋ nba ki Yennu turib na ni, ki digbana maŋ sii tee yommii ki tuun teen Israel teeb. Binba din kɔn nyann Israel teeb na, ŋaan mɔtana Israel teeb saa kɔn nyannib, ki Israel teeb maŋ sii dia damm nba din dinnib biak na.

Biaŋinba ki Babilonia kpanbar be kpeentiŋ

³Yennu saa tur Israel teeb na foon, ki bin nyi bi gbananyekitir nan bi fara dinu nba ki bi miamm ki bi tuun ninmɔnn toonn na ni. ⁴Yennu-i tun linba na yoo nba, bi sii sarikit Babilonia kpanbar nae, ki yeen a:

“Kpanbar-touŋ na baawa. U kan ban mukis sɔɔ jikii. ⁵Yennu te ki kpanbar-tont na panii gbenna, ⁶binba tuu jii wutoor ki mukis niib, ki bia mukis digbana nba ki bi nyannib na. ⁷Mɔtana durinya kur ji be foon nan parmaasir nie, sɔɔ kur yiin parpeenn yaniie. ⁸Lebanonn nyankpanii nan li kpekii ji kpamme, kpanbar maŋ baak paak; sɔɔ ji kaa ki saa chɔɔbi, kimaan kpanbar na kaa.

⁹“Kpeentiŋ tee siire a wun gaar Babilonia kpanbar na saauŋ. Binba din mɔk yiikoo tiŋ na paak na narimii ji ŋmakintire. Kpanbara narimii ji fi bi naan binbinta paake. ¹⁰Bi kura ji yeenɔ a, ‘Mɔtana, a ji tee tarik nan timm nae. A ji tee ti yenɔe. ¹¹Bi tuu baakita nan bayaniie, ŋaan mɔtana fine ji be kpeentiŋ na. A ji dɔɔ dundura gado paake, ki pin nanwuba kuntir.’ ”

¹²Babilonia kpanbar, fin nba yeen nan sanyafaar ŋmaajar na, a nyii sanpaapo ki baawa. Sianyoo a bo nyann digbana, ŋaan mɔtana bi lua tiŋ niwa. ¹³A din dukii fan do sanpaapoe, ki saa maa a naan binbintir ŋmaabira paapo. A dukin nan a saa kar nan kpanbar nae, jɔjaann nba be gaŋ po, ki yenbis tikii na paak. ¹⁴A yet nan a saa do sanpagbant liik poe, kii tee nan Yabint daanɔ na, ¹⁵ŋaan bi sikinae tinpɔɔr ni, kpeentiŋa.

¹⁶Kpeemm saa gota nan yaarlituko. Bi saa boi a, “Jɔɔ nba din nik tingbouŋ ki te digbana jek nae na-a? ¹⁷Jɔɔ nba din biir doi ki te durinya kpant fɔɔr nae na-a? Jɔɔ nba din ki ŋaan u dansarii, ki bia ki te ki bi kun nae na-a?”

¹⁸Tingbouŋ na kpanbara kur dɔɔ bi kajaana ni, ¹⁹ŋaan fin ki mɔk kaauk, ki bi lu a gbanant a lin bat. Ki jab nba ki bi kpiib tɔb ni na gbanant piin a yar, ki bi kpab nann ki lu tana bootuk ni, ki ŋmaa li paak. ²⁰Kimaan faa teen a tiŋ langbent, ki kpii a tiɔŋ niib na, bi kan piia nan baa pii kpanbarleeb biaŋinba na. A ŋaanibiit na nan yenɔkɔɔwa kan biari. ²¹Ŋaant ki bin piin ki kpi niib. Bi saa kpi kpanbar na bonjaie, bi yeejamm biit paak. Bi sɔɔ kan ban dia tingbouŋ na, koo ki maa doi li ni.

Ki jiin Babilonn biiru po

²²Yabint Yennu yet a, “N saa lek Babilonn ki kpantir langbent. N kan tenn siar leŋi; waas sii kaa, sɔɔ kan foor. Min Yennu-e pak na. ²³N saa te ki Babilonn n borik, fiite sii be leŋ. N saa jii ŋaanue ki piar Babilonn, ki siar kan biari. Min Yabint Yennu-e pak na.”

Ki jiin Asiria teeb biiru po

²⁴Yabint Yennu por mɔpor a, “Linba ki n lor na saa tuma. Maa dukii maa n tun linba na saa tuma. ²⁵N saa biir Asiria teeb nba be n tiŋ ni na, ki mobit bi paak, n kunkona paak. N saa nyinn n niib Asiria teeb yɔkit nan jika nba ki bi jii na ni. ²⁶N lore na ki jiin durinya po: n nuu tian ki saa dat nigbouŋ na tuba.” ²⁷Yabint Yennu-e lor a wun tun linba na; u tant nuue a wun dat niib tuba, ki sɔɔ kaa ki saa fit gɔɔrɔ.

Ki jiin Filistia teeb biiru po

²⁸Mɔmaan nae din mɔɔnt binn nba ki Israel kpanbar Ahas din kpo na ni.

²⁹Filistia teeb, lanbann nba booi na kɔnna, ŋaan yaak ki chabi nan yii mɔk parpeenni. Waayouŋu kpo, waleeuk nba ton bonchianne tuu baar set u taar ni. Waauk jenn kaatir bonbiiuko. ³⁰Yennu sii tee u niib nba tee tarii na kpaartɔɔ, ki saa te bii be bi yamani. Ŋaan u saa tun kon naadaake, yimm Filistia teeb paak, li kan tenn i sɔɔ ki u mɔk manfoori.

³¹Yimm Filistia teeb doi na, ii duun kii mɔ sommir po. I kur yam-ii put. Tangbiruŋ nyii gaŋ po ki baat, ki tee kunkɔnkɔnna nba ki jaŋmaandaanɔ kaa bi ni.

³²Ti saa pak toomii nba nyii Filistia yent ni ki baar ti boor na bee? Ti saa pakib nan Yennu-e senn Sayɔnn, a u niib nba di fara na n la fatu leŋ.

Ki jiin Moab teeb biiru po

¹Mɔmaan na jiin Moab teeb poe.

Bi biir Ar nan Kir doi nyɔyemmire, ki Moab tiŋ kur ŋmin sirrr. ²Ki Dibonn teeb do kunkonn paak a bin fabin pookperii ni. Moab teeb fabin nan yanyêtuk, Nebo nan Medeba doi paak; ki koor bi yura nan tianii nan yanyêtuk. ³Niib nba be sɔnii ni lia parbiir liante, ki binba be doo ni nan ŋei ni mɔ ki fabin. ⁴Hesbonn nan Eleale teeb mɔe, ki bi mɔnii maŋ fɔkitir ki saa baat Jahas. Jab na mɔŋ gbanu jeke, ki bi ji ki mɔk kpaŋ-n-mɔŋ. ⁵N par biire, Moab teeb paak. Niib na chiar ki saan Soar doo nie, nan Eglaf Selisiya. Siab tɔkin sɔnu nba saa Luhif nae, ki mɔ ŋaan saa, ki siab tiin saa Horonaim ki mɔ sanpaapowa. ⁶Nimrim kpenbik fɔɔra, ki mɔɔt nba be leŋ na koor, ki siar kaa leŋ ki mei. ⁷Niib na pootir kpentiiuk baauk nae, ki loon bin chiar paak nan bi faar. ⁸Mɔŋ doe Moab kpaar kur po. Li gbia Eglaim nan Beer Elim doi ni. ⁹Ki sɔn te Dibonn doo ni mɔkir na mɔn, ŋaan Yennu lorin siar ki li bi ki gar nnawa, ki guu leŋ niib na. Barmɔnii, bi saa kpi niib nba biar Moab na kure, ki sɔn sii puub.

Ki jiin Moab teeb dindann kaarin po

¹Moab teeb nyii Sela doo ni, kunkoouk paak, ki saan Jerusalem, ki dia peeuk, ki li tee piinii a bin tur wunba dia doo na. ²Bi be Arnonn mɔkir boore, ki lin yana yana, nan baa tuu yukin nɔɔnii bi tiat ni ki bi lin biaŋinba na.

³Bi pak Juda teeb a, “Wantit taa saa tun linba. Dɔkint ti paak nan tiik nba tuu mɔk maasu yonsuuk ni biaŋinba na, ki ŋaan tin foi i maasu. Ti tee kunsɔntinnae. Ii bɔrit siaminba ki sɔɔ kan lati. ⁴Ŋaant ki tin kar a tiŋ ni. Fatirit binba loon bin biirit na nuu ni.”

(Mukisuk nan biiru saa gbenna, ki binba biir doo maŋ saa yaat, ⁵ki Defid yaaboona na yenɔ tan sii tee kpanbar, ki saa dia niib na nan binbenŋaŋ nan lomm. U sii kakii ŋant tumu paak, ki saa te ki barmɔnii piak.)

⁶Juda teeb yeen a, “Ti gbat Moab teeb nba want bi mɔŋ biaŋinbawa. Ti mi nan bi mɔk garuk nan parbifaant, ŋaan bi garuk na tee garyanne.”

⁷Moab teeb saa bui, kimaan biak nba ki bi saa di na paak. Bi kur saa mɔ, yoo nba ki bi tiar jeŋant nba ki bi tuu di, Kir Heres doo ni na. Bi dindann kur saa kpo. ⁸Kpaant nba kpia Hesbonn, nan daan tiinii nba be Sibma na biira. Kpaant maŋ daame ki doodiara tuu nyu yib. Sian yoo tiinii maŋ din lat ki saa baar Jaser doo, ki saan yondo po ki saa baar kunkoouk na paak, ki saan yakleer na yonbaa po, ki saa baar Mɔk-kpeenn na. ⁹Mɔtana n mɔ Sibma daan tiinii paak, nan maa mɔ Jaser paak biaŋinba nae. N ninnyuut lɔe, kimaan Hesbonn nan Eleale doi paak, jeet kaa ki saa maan bi para. ¹⁰Sɔɔ kaa ki mɔk parpeenn tinŋaŋ na ni mɔtana. Sɔɔ ki hoot koo ki yiin yaŋ kpaant na ni. Sɔɔ ki mat daan tilɔɔna leŋ, a wun teen daami, parpeenn hootii na gbenna. ¹¹N kurii nan parbeenne, Moab tiŋ paak, ki duun nan parbeenn, Kir Heres doo paak. ¹²Moab teeb bakint bi mɔŋe ki do bi kunkona paak pookperii ni, nan bi jiantu diit ni ki mei, ŋaan li kan sommibi.

¹³Mɔmaan nba ki Yennu tur sinsinn ki jiin Moab poe na. ¹⁴Ki Yennu ji yeen mɔtana a, “Binmuna ŋantaa ni, Moab mɔkint kur saa mir bot. Li nichiɔŋ na, ŋaan waaminnae tan saa tinn, ki bia tee nibutimii.”

Ki jiin Siria teeb nan Israel teeb tubdatu po

¹Yennu yet a, “Damaskus ji kan ban teen doo, li sii tee langbente. ²Siria dolia sii yɔɔ dɔɔ yanne. Li sii tee pei nan nei jediboore, ki sɔɔ kan berib. ³Israel tiŋ sii kaa wunba saa kɔn li paak, ki Damaskus saa kɔŋ li yent-n-mɔŋ. Siria teeb nba tinn na sii be fei ni, nan Israel teeb na. Min Yabint Yennu-e pak na.”

⁴Yennu bia yet a, “Daar baate ki Israel yiikoo na saa gbenn, ki namu saa set u mɔkint taar ni. ⁵Israel sii tee nan kpaab nba ki bi jaan dii li ni nae, ki dɔɔ yann nan baa tuu jaan Refaim baauk ni dii na. ⁶Niib waaminnae saa foor, ki Israel sii tee nan kpai saaŋ nba ki bi tuu pɔɔr li saana kur, ŋaan ki ŋanlee koo ŋantaa n saa biar jɔɔn yur paak na, koo ki biar jɔɔn lɔuŋ ni na. Min Israel teeb Yomdaanɔ Yennu-e pak na.”

⁷Li daar-i baar, niib saa ŋmant bi Naamii Daanɔ paak ki loon sommir. Ŋɔɔe tee Israel teeb kasii Yennu na. ⁸Bi ji kan gaan bi mɔŋ maruŋ binbinta nba ki bi maa nan bi nii na paak, koo ki teen bi chicherpook Asera ninnauŋ, nan maruŋ binbinta nba ki bi jokit bonnunubit li paak na yada.

⁹Li daar-i baar, doi nba ki bi guur fanu na tan saa biar yann, ki tee langbent nan doi nba ki Hif teeb nan Amor teeb din nyik, yoo nba ki bi tin paak Israel teeb na.

¹⁰Israel teeb, i tamm Yennu nba nyinti ki guui nan tanpigbouŋ na powa, ŋaan i baa tingbana kpabise, a yin jiant boorganu yenbis, ¹¹ŋaan bi-i lekii pia ki yinn puuk sanyiɔk nba ki i burib na ni, ŋaan i kan jaammi. Daamii nan tonu nba kaa tebuk kɔɔe sii be.

Ki jiin datai tinii nyannu po

¹²Digbana nba paar be wutoor nie, ki gaan jat, ki li tee nan mɔkgbeŋir nyunpana nba tuu liat leer na. ¹³Niib na saa yian nan nyunpana nae, ŋaan ki Yennu kpaanib, ki bi ŋmat nan kunkonn paak tangbiruŋ na, nan sajaperinn nba tuu jii mɔpont na. ¹⁴Daajoouk, bi baat nan jaŋmaanchiɔŋo, ŋaan ki li tan yentir sanyiɔk na, ki bi kaa. Wunba kur fiar ti tiŋ faar, u joontu tan sii tee nnae.

Ki jiin Sudann teeb tubdatu po

¹Sudann mɔka liik po, tinsiak be, ki bi gbia kpinkpant fuur. ²Taatara nyi tiŋ maŋ nie ki tɔk Nail mɔkir nan warii burgbeta. Ŋmatir kun man, yimm tontii nba kakii na. Ŋmatir nan maan, i tiŋ nba ki mɔka bɔkitir na ni, i niib nba mɔk paŋ nan yiikoo ki fɔk ki tee gbananŋiŋara, ki durinya munn tiimm na boor.

³Gbiintir man, yimm nba kur be durinya ŋaak na. Ii gorii nyinn fariŋ nba ki bi saa donn sanpaapo, kunkona paak na. Gbiintir naatunn mɔnii. ⁴Yennu pakin a, “N sii be yendɔuŋ ni, ki got sikin soon nna tingbouŋ na paak, nan marin nba tuu baa waruk daar soon nna, jejaan-yoo na, koo nan yonnu nba tuu nyi biaŋinba yonsuuk ni na. ⁵Ki sɔɔ ki bi daa ki pɔɔr daan tiinii, yoo nba ki daan tipuuk tuu siir ki li lɔɔna mɔnt nae, ki datai saa biir Sudann teeb na yiama, nan baa tuu jii juk ki gbat daan tiyiinii biaŋinba na. ⁶Bi jab gbanant sii dɔɔ yanne, ki tur nɔɔnii nan muuk ni bonkobit. Nɔɔnii sii di bi gbanant maŋe tuntonn, ki bonkobit mun dir waat yoo.”

⁷Yoo baat, ki Yabint Yennu tan saa gaar piinii, ki lin nyi tiŋ nba ki mɔka bɔkitir na ni, niib nba mɔk paŋ nan yiikoo, ki fɔk ki tee gbananŋiŋara, ki durinya munn niib tiimm na. Bi saa baar Sayɔnn kunkonn paak, siaminba ki bi jiantir Yabint Yennu na.

Ki jiin Ijipt teeb tubdatu po

¹Mɔmaan na jiin Ijipt teeb poe.

Yennu baat Ijipt-e, ki jaak sanpagbouŋ paak ki saa yian yian. Ijipt tingbana jekire u boor, ki Ijipt teeb na kɔŋ bi parcheenn. ²Yennu yet a, “N saa kɔnn Ijipt teeb nan bi leeb, ki kɔnn nirɔ nan u ninja, ki kɔnn nirɔ nan u lɔɔ. Digbana nba kpia leer saa kɔn nan leeb, ki kpanbara nba kpia leeb saa kɔn yiikoo paak. ³N yaa n ŋmat Ijipt teeb lorae, ki biir bi dindann. Bi saa boi bi tingbana sommir po, ki bu jabaat, ki kɔɔ tingbanbis nan kpeemm boa ki loon ŋmakitu. ⁴N saa jii Ijipt teeb na, ki kubin kpanbar nba tee nɔɔntont daanɔ ki wuu diab. Min Yabint Yennu-e pak na.”

⁵Nyun saa waab Nail mɔkir ni, ki mɔkir maŋ sii fɔɔt waan waan ki saa gbenn. ⁶Ki mɔkir na bunbunii ni sii fɔɔt waan waan ki nubir. Ki kaar nan garii saa koor, ⁷ki bonbuburit nba kook Nail mɔkir na saa koor, ki wouŋ n pebirir. ⁸Ki wunba kur tee jansoorɔ Nail mɔkir na ni, ki laat u daar diisir, tan sii kurii ki bui, ki bi janpeenii nan janlaant saa teen yann. ⁹Binba luu chinchena na dindann saa bot; ¹⁰binba luu nan binba mi nii toona saa la biiru nan mukisuk.

¹¹Soann digbann tɔɔndamm tee jatite. Ki Ijipt subindamm teemm jat-kpaanii. Bi teen nlee ki yet kpanbar na a ŋamme gaar yaayoo ni subindamm nan kpanbara toona. ¹²Ijipt kpanbar, subindamm nba tee a ŋmakit-teeb na be lia? Bi saa fit wanna Yabint Yennu nba mɔk lora nba ki jiin Ijipt po-o? ¹³Soann nan Memfis doi tɔɔndamm tee jatite. Li din tee bin ŋmakit niib nae, ŋaan ki bi boomm. ¹⁴Yennu-e te ki bi tur kpaanbiit. Li paak ki Ijipt teeb toona kur tee bonkpeta, ki bi baantir nan dayibirɔ nba tuu ŋat baantir u siit ni na. ¹⁵Sɔɔ kaa Ijipt, laa tee tarik koo paarɔ, nijaann koo nibunbuur, ki saa fit somm Ijipt-i.

Biaŋinba ki Ijipt teeb saa jiant Yennu

¹⁶Yoo baat ki Ijipt teeb tan sii tee butimm nan poob na. Jaŋmaanii tan saa lub, yoo nba ki bi la nan Yabint Yennu tant nuu a wun dat bi tuba na. ¹⁷Ijipt teeb tan saa tin Juda teeb jaŋmaanii, yoo nba ki niib tiarib Yabint Yennu nba teen siir a wun biirib biaŋinba.

¹⁸Li yoo-i baar, Ijipt digbana ŋanŋmu ni niib tan sii piak Israel teeb danmaan, ki bia poor mɔpora Yabint Yennu sann ni. Doyenn sann tan sii tee “Biiru doo.”19.18 “Biiru doo,” koo “Yonnu doo.”

¹⁹Li yoo-i baar, maruŋ binbintir sii be Ijipt ki tee Yennu yar, ki tanchaakir be Ijipt kpaar paak ki bi tur Yennu, ²⁰ki li sii tee nyina ki want nan Yabint Yennu be Ijipt. Yoo nba ki niib na di biak ki yiin Yennu ki loon sommir, u saa tun sɔɔ ki wun baar sommib. ²¹Yennu saa fiit u mɔŋ ki wann Ijipt teeb, ki bi saa gaarɔ ki jiantɔ, ki turɔ maruŋ nan piinii. Bi saa senn mɔsonjaana ki turɔ, ki bia gbeen bi mɔsona maŋ. ²²Yennu saa dat Ijipt teeb tuba, ŋaan li poor po, wun turib laafia. Bi saa ŋmat u boor, ki u saa gbat bi miaru ki turib laafia.

²³Li yoo-i baar, sɔnjar sii be ki nyi Ijipt ki saa Asiria. Li digbana ŋanlee niib sii somm kɔɔ bi leeb doi ni, ki digbana ŋanlee maŋ niib saa lakin jiant Yabint Yennu. ²⁴Li yoo-i baar, Israel tan sii mɔk yiikoo nan Ijipt nan Asiria nae, ki digbana ŋantaa na sii tee piisin ki tur durinya kur. ²⁵Yabint Yennu saa teen piisin bi paak, ki yet a, “N saa teen piisin yimm n niib Ijipt teeb paak, nan yimm Asiria teeb nba tee n naami na paak, nan yimm Israel teeb nba ki n gann na paak.”

Ki jiin Yennu sɔkinii nba be gbananbir ki tee nyinn na po

¹Ki Asiria kpanbar Sargonn tur u kunkɔnkɔnna saakɔɔ mɔb ki u wor Filistia teeb doo Asdod. ²Ŋaan sɔɔ bina ŋantaa nba gar, Yennu din pak Amos bija Aisaya, a wun pit u taasaat, ki bia liat u parbiir liatir nba ki u lia na. Ki u sak, ki lin gbananbir, ki somm taayana. ³Baa nyann Asdod doo yoo nba, ki Yennu yet a, “N toontunnɔ Aisaya tuu lin gbananbire ki somm taayana bina ŋantaa. Linba na tee nyinne ki jiin linba saa tun ki tur Ijipt nan Sudann na po. ⁴Asiria kpanbar saa jii yommii nba ki u nyann digbana ŋanlee maŋ ni, ki yaat namm gbananbirae. Saakab nan waas kur saa somm gbananbirae, nan taayana, nan payana, ki li tee fei ki teen Ijipt. ⁵Binba jii bi dindann ki teen Sudann ni, ki faa parbiir Ijipt paak na yan saa yêt, ki bi dindann saa kpo. ⁶Li yoo-i baar, niib nba be Filistia mɔkgbianu na saa yet a, ‘Gotir linba tun ki tur niib nba ki ti tuu maa bi paak a bin nyinnit Asiria kpanbar nuu ni na. Ti saa ban tinna-a?’ ”

Yirintu nba jiin Babilonn baak po

¹Mɔmaan na jiin Babilonia poe. Sajaperinn nba tuu piar kunkoouk biaŋinba na, nnae ki biak saa nyi yanputuk tiŋ ni ki baar. ²Ki yirintu maŋ ni, ki n la bonbiir tun, ki tee fikitu nan biiru.

Elam kunkɔnkɔnna, lekin man. Media kunkɔnkɔnna, dɔɔt ki lint doi na. Yennu saa gɔɔr fara nba ki Babilonn te li baar nawa.

³Maa la linba, nan maa gbat linba yirintu maŋ ni kɔɔnin jaŋmaaniie, ki turin gbanantont, li tonu tee nan poo nba tuu yaa wun mar ki li tonɔ nae. ⁴N numpo fuune, ki jaŋmaanii jek n gbanu. N sunman ki daajoouk baara, ŋaan n ki laat siar ki pukin jaŋmaanchiɔŋ po.

⁵Yirintu maŋ ni, jaamm teen siira, bi lat kuntae, a saamm n kar li paak. Bi die ki nyu. Li yoo na ki mɔmaan baar a, “Kunkɔnkɔnna saakab, ŋammit i naagbankɔŋa.”

⁶Yennu pakin a, “Saant ki senn tammɔguurɔ, ki pakɔ ki wun tuu wann waa laat linba. ⁷Li-i tee ki u la jab jak taanii paak banlee-lee, ki siab jak bonii nan laagumiinba, wun diitib fanu.”

⁸Ki tammɔguurɔ na yiin a, “Chanbaa, n see nna guue yonnu nan nyiɔk.”

⁹Mɔtana, jabe jak taanii banlee-lee ki baat na. Ki tammɔguurɔ na yet a, “Babilonn baawa. Tingbana nba ki bi jiantir na kur biire, ki dɔɔ yarik yarik tiŋ ni.”

¹⁰N niib Israel teeb, bi boori nan dii nae, ŋaan mɔtana ki n mɔɔntir barŋanii nba ki n gbat Yabint Yennu nba tee Israel teeb Yennu na boor ki teeni.

Mɔmaan nba jiin Edom po

¹¹Mɔmaan na jiin Edom poe.

Sɔɔ be Edom ki yin a, “Tammɔguurɔ, nyiɔk na saa wei nlee nan yentu? A wannin laa saa yent yian biaŋinba.”

¹²Ki n jiin a, “Sanyiɔk yentire, ŋaan nyiɔk bia saa bɔnna. Fi-i loon fan ŋamm boi, fan jen ki tan boi.”

Mɔmaan nba jiin Arabia po

¹³Mɔmaan na jiin Arabia poe.

Yimm Dedann teeb, yimm nba chaant i lanbont Arabia tinkokirik ni na, ¹⁴turin binba ki nyunnyukuru mɔkib, ki bi baar i boor na nyun. Yimm niib nba be Tema tiŋ ni na, turin kunsɔntinna na jeet man. ¹⁵Niib tiin a bin nyi takoobii nba yaa lin kpib na nie, ki bia nyi tɔrbana nba teen siir a lin tɔ, nan tɔb ninbɔŋ kur ni.

¹⁶Ki Yennu pakin a, “Binyenn kɔɔ nie ki Kedar booru kur yiikoo tan saa gbenn. ¹⁷Tɔrbantɔɔra nba tee pardamm ki be Kedar na, ŋaan bi waaminnae tan saa tenn. Min nba tee Israel teeb Yomdaanɔ Yennu nae pak na.”

Mɔmaan nba jiin Jerusalem po

¹Mɔmaan na jiin Yirintu Baauk na poe.

Bee tuumi? Bee teen ki doo na niib kur be bi ŋei yura paak22.1 Bi ŋei yura paak, bi din tuu sere. ki kpammii? ²Doo na kur be fuut nie, ki gbee nan fuur nan kpinkpammuk.

I jab nba kpo tɔb na ni din ki kɔn kaa ki tan kpo. ³I tɔɔndamm kur din chiar ki bi saa soorib, ki sɔɔ bi daa ki tɔ nan peenyemmira. ⁴Tɔn, nyikimin ki man bui n niib nba kpo na paak. A daa koor a fan maan n pari. ⁵Mɔtanae tee yanputuk nan biiru nan ŋmatir yoo, Yirintu Baauk na ni, ki ti Yomdaanɔ Yabint Yennu-e te ki li baar ti paak. Bi yeer ti doo joonjot ki sikin tiŋ niwa, ki mɔnii yat kunkona na paak ki loon sommir.

⁶Ki kunkɔnkɔnna nyii Elam tiŋ ni, ki jak taanii, ki dia tɔrbana nan peenii, ki leeb nyii Kir tiŋ ni, ki bi naagbankɔŋa teen siira. ⁷Juda baat nba kpai na gbee nan taantorite; ki kunkɔnkɔnna nba jak taanii see Jerusalem tammɔi ni. ⁸Ki Juda tiŋ ji biar ki ki mɔk linba guu-u.

Laa tun nna yoo nba, ki i nyinn jatiat nba be li diiuk ni na. ^9-10I la Jerusalem joonjot na siaminba loon ŋammuwa. I got Jerusalem ŋei kura, ki bet yenn-nba a yin la tana ki ŋamm doo joonjot na. Ki yin lian bekir nyun, ¹¹i bir nyunbuure doo na nɔɔk ni, ki li dia nyun nba nyi nyunbukper ni ki puub siik na. Ŋaan i ki gbiint Yennu po, wunba lor linba na kur sian yoowa, ki bia tan te ki li tun na.

¹²I Yomdaanɔ Yabint Yennu bo yii-i a yin bui ki fabin, ki koor i yut, ki lia parbiir liant. ¹³Ki i nyik nnawa, ŋaan laa ki kpamm, ki kpii pei nan nei ki ŋman, ki nyu daan. I yet a, “Ŋaant man ki tii di kii nyu, kimaan ti won saa kpowa.”

¹⁴Yabint Yennu tiɔŋ pak ki turin a, “Bi yanbɔmm na kan ban la nyikinchab bi manfoor ni kur. Min Yomdaanɔ Yabint Yennu-e pak na.”

Kpaanii nba jiin Sebna po

¹⁵Ki ti Yomdaanɔ Yabint Yennu pakin a man saan Sebna boor, wunba tee kpanbar ŋaak toontunna saakɔɔ na, ki saa yetɔ a, ¹⁶“A dukii ki a tee ŋmee? A la yaak lee ki gbiir a tiɔŋ kaauk tanpiiuk ni? ¹⁷A lek tee nijaanne, ŋaan Yennu saa jiia ki lua siar po. ¹⁸U saa tɔkira nan bɔɔr nae, ki lua tiŋ nba yarin bonchiann ni. A saa kpo leŋe ki dɔɔ kpia a taantorit nba ki a tuu faa kpinkpant li paak na. A tee fekɔɔntuko ki tur a chanbaa ŋaateeb. ¹⁹Yennu saa nyinna a toonjaana ni, ki sikin a saakatuk na tiŋ ni.”

²⁰Yennu bia yet Sebna a, “Li-i tun nna yoo nba, n saa tun yiin n toontunnɔ Eliakim, wunba tee Hilkia bija na. ²¹N saa jii a toontunliatir ki lannɔ, ki jii a toontungbann ki bobinɔ, ki jii yiikoo nba ki a tuu mɔk na kur ki turɔ. U sii tee nan baa nae Jerusalem nan Juda teeb boor. ²²N saa turɔ yiikoo nan barmɔnii, ki u sii waa kpanbar nba tee Defid yaaboonn na paak. U sii mɔk yiikoo peenii, wuu loot linba, sɔɔ kaa ki saa kpar, u mun-i kpar linba, sɔɔ kaa ki saa looti. ²³N saa kpaaue chib nan kpaar na, u toona ni, ki baakir sii nyi u boor ki saa u niib peŋ.

²⁴“Ŋaan u nikpiimm nan binba gaa u paak sii tee jikire ki turɔ. Bi sii gaa u paak nan boba nan ŋmanii nba tuu jɔɔn dachaatir paak biaŋinba nae. ²⁵Li-i tun nna yoo nba, dachaatir nba din chaan fanu na saa worike ki baa, ki linba bo jɔɔn li paak na kur joontui na.” Yennu-e pak na.

Mɔmaan nba jiin Fonisia tiŋ po

¹Mɔmaan na jiin Taya doo23.1 Taya din be Fonisia tiŋ nie. poe.

Ii kurii nan yanyêtuk, yimm nba nyii ki be mɔkgbeŋir paak, ŋarint ni na. I doo Taya biira. Li ŋei nan siaminba ki ŋarint see na tee langbente. Yoo nba ki i ŋarint na nyii Saiprus tiŋ ni ki jent nae ki i gbat maan na. ²Ii fabin man, yimm Sidonn doo23.2 Sidonn din be Fonisia tiŋ nie. kpinkpenta. I din tun niib ki bi ³poot mɔkir, a bin daa ki bia kɔi dii nba ki bi koo Ijipt tiŋ ni na, ki bia kpentir kpinkpouŋ digbana kur ni.

⁴Sidonn doo, a dii feiwa. Mɔkgbeŋir nan mɔkjaann na sunsunt yêtawa, ki piak a, “N ki ban mar waasi. N ki ban wubir bonjai koo bonpoi.”

⁵Ijipt teeb gbanu saa jek ki bin ŋaa tama, yoo nba ki bi gbat nan Taya doo biira na.

⁶Ii kurii nan yanyêtuk man, yimm Fonisia teeb. Yabit ki chiar saan Speenn tiŋ ni. ⁷Linba na set tee parpeenn doo Taya nba ki bi maar sianyoowa na-a? Li set tee doo nba din te ki li nisiab saan poot mɔkgbeŋir a bin maa yentnba na-a? ⁸Ŋmee lor ki te linba na baar Taya paak, digbanjaann nba ki li kpinkpenta tee nijaana, ki durinya niib kur mantik teemm baakir na? ⁹Yabint Yennu-e lor linba na. U lor nna a wun boon bi parbifaant nba ki bi mɔk bi toona ni nae, ki dinn bi jab nba ki bi baakitib na fei.

¹⁰Ii saa ki i ko tiŋ na man, yimm niib nba be Speenn yent ni na. Sɔɔ kaa ki ji saa guurini. ¹¹Yennu tant u nuue mɔkgbeŋir paak ki nyann digbana. U tur yaak a bin biir Fonisia teeb kpinkpouŋ doi na. ¹²Sidonn doo, a parpeenn na gbenna, ki a niib ji di biak. Bi-i lekii chiar saan Saiprus ŋaan bi kii be bi yamani.

¹³(Li din ki tee Asiria teeb kaa, ŋaan Babilonn teebe din te ki muuk ni bonkobit kɔɔ yent Taya. Babilonn teeb din maa tɔb difɔkit, ki yeer Taya ŋagbeŋa, ki teen doo maŋ langbent.)

¹⁴Ii kurii nan yanyêtuk, yimm nyun ni toontunna nba be mɔkgbeŋir paak na. Digbann nba ki i tuu maa li paak na biira.

¹⁵Yoo baate, ki bi tan saa tamm Taya po bina piinlore, ki li tee kpanbar manfoor fɔkint. Li bina-i gar, Taya sii tee nan bonchonchonn nba ki bi yiinɔ yanii nae a,

¹⁶“Fin bonchonchonn nba ki bi tamm a powa na,

jiin a biɔk ki lin doo na ni.

Ii faa ki ŋamm yin a yanii na ki lin te jab n jen a boor.”

¹⁷Bina piinlore na-i gar, Yennu saa te ki Taya n ŋmat u kpinkponkperuk ni, ki kɔi u mɔŋ ki tur durinya ŋaak digbana kur. ¹⁸U likirii nba ki u la kpinkpouŋ na ni, u saa jiir ki tur Yennu. U kan bɔrir siar po kaa, ŋaan binba jiantir Yennu nae sii dia likirii maŋ, ki daa jeet nan tiat nba ki bi loon.

Biaŋinba ki Yennu saa dat tingbouŋ na tubir

¹Yennu saa biir tingbouŋ na ki nyikir yann. U saa kut ŋmat tingbouŋ na, ki yat li niib. ²Sɔɔ kur saa di li biak, li mannteeb nan niib na, nan daaba nan bi chanbaanba, nan binba daa, nan binba kɔi, nan binba kpentir teen, nan binba gaan, nan mɔkita nan nandamm. ³Tingbouŋ na saa dɔɔr yann ki tee langbent. Yennu-e pak na, ki li set saa tuma.

⁴Tiŋ na kur saa koor wakit; ki durinya kur saa chɔk, ki sanpaak nan tiŋ kur saa dut. ⁵Niib na biir tingbouŋ na, kimaan baa yêt Yennu sennu, ki bia biir mɔlor nba ki u lor a lii yɔɔ kii be na. ⁶Li paake ki Yennu por tingbouŋ na mɔb. Li niib di biak, biit nba ki bi tun na paake. Nichaŋ nnae biar be bi manfoor ni. ⁷Daan tiinii koore, ki daan ji namii. Wunba kur tuu mɔk parpeenn, ŋaan u ji be parbiir nie; ⁸ki bi biat nan gingana mɔnii nba man na ŋmin. ⁹Bi ji ki yiin parpeenn yanii ki nyu daami, sɔɔ ji ki laat li manu. ¹⁰Doo na ni bont kur ji be ŋmatir nie, ki niib be bi ŋei ni, ŋaan kpar gana bi mɔŋ paak, a bin tinn. ¹¹Ki niib mɔ sɔnjot ni, kimaan daan ji kaa. Parpeenn kpan mir bote tiŋ na paak yaayoo siiyoo. ¹²Doo na ji tee langbente, li gana biira. ¹³Linba nae saa tun ki tur digbann kur, durinya na ŋaak. Li sii tee nan yoo nba ki bi tuu jaan bona ki gbenn, ki sɔɔ ki bi lebir kpan tiinii kur, ki daan tilɔɔna nan yennkɔɔwa ki biar tiik paak nae.

¹⁴Binba tinn tan saa yin yaŋ nan parpeenn. Binba be yonbaa po na tan saa pak Yennu yabint nba tee, ¹⁵ki binba be yondo po na saa dont u sann. Niib nba kar kpia mɔkgbeŋir na saa dont Israel teeb Yomdaanɔ Yennu maŋ. ¹⁶Ti saa gbat yaŋ, ki bi yiin banfɔkir durinya kur po, ki dont Israel digbann nba ki mɔk biit na.

Ŋaan n yeen a, “N ki mɔk dindann. N boontiri na. Mɔlanfik damm tukin ki fukitir, ki bi lorbiit na kpaatir yoo kur. ¹⁷Sɔɔ kur n gbiint ki turin. Wahala nan bootit nan barit dɔɔ ki guui. ¹⁸Wunba lɔkit wahala na saa baa bootuk ni, ki wunba lɔkit bootuk na saa sik baruk ni, ki sajakper matuŋ saa baa, ki tingbouŋ na fiakir saa damm. ¹⁹Tingbouŋ na saa put bɔkit ki yaa. ²⁰Tingbouŋ maŋ saa niŋ nan dayibirɔ nae, ki saa laŋ nan wouŋ nba tuu laŋ lanbouŋ biaŋinba na. Durinya na biit kpiakire, ki saa te lin baa ki kan ban fiiri.

²¹“Yoo baate ki Yennu saa dat yiikoo damm nba be sanpaapo, nan tingbouŋ na diara tuba. ²²Yennu saa lakimm ki bin muk nan dansarkɔɔra nba tuu be bootuk ni nae. U saa kparib dansarik nie ki tan tuu bi tubdatu yoo. ²³Ŋmaarik nan yonnu saa di fei, kimaan Yabint Yennu-e sii tee kpanbar. U sii kar Jerusalem doo ni, Sayɔnn kunkonn paak, ki dia doo maŋ, ki niib na tɔɔndamm saa la u yentsaakar na.”

Dontir yaŋ

¹Yennu, fine tee n Yomdaanɔ,

n saa tura baakir ki dont a sann.

A tun yaarlituk toonawa;

a gbeen lora nba ki a din lor sianyoo nawa.

²A te ki doi kpant langbent, ki bia yeer li ŋapaara.

Ti datai nba din maa naan ŋei nba na bote yaayoo siiyoo.

³Digbanjaana niib saa tura baakir;

bi saa tina jaŋmaanii, nibiit doi ni.

⁴Talas damm nan tarii chiar ki baar a boor,

ki be bi yamani daamii yoo.

Fine turib gungurboor sajakper yoo,

ki bia turib maasu, wɔruk yoo.

Nɔɔnbiit damm tuu lek nan wonpaaruk nae,

⁵ki bia lek nan kunkoouk paak yonkoonin na,

ŋaan fin Yennu-e muu ti datai mɔi.

Fine te ki nɔɔnbiit damm ŋmin fuut

nan sanpagbouŋ nba tuu maan wɔruk daar biaŋinba na.

Ki jiin Yennu jaamm po

⁶Sayɔnn kunkonn na paake ki Yabint Yennu saa teen jaamm, ki tur durinya na ŋaak digbana kur, jaamm nba mɔk jeŋant nan daŋanin. ⁷Leŋe ki u saa pian biak sanpagbouŋ nba jɔɔn digbana kur yur paak na. ⁸Yabint Yennu saa biir kuun yaayoo siiyoo. U saa fiar sɔɔ kur ninnyuut, ki boon fei nba ki u niib yɔɔ di durinya na ni. Yennu tiɔŋo pak na.

⁹Li-i tun nna yoo nba, sɔɔ kur saa yet a, “Ŋɔɔe tee ti Yennu. Ti teen ti dindann u nie, ki u fatit. Ŋɔɔ-i tee ti Yomdaanɔ. Ti teen ti dindann u nie, ki mɔtana ti mɔk parpeenn nan kpinkpammuk, kimaan u tinnita.”

Ki jiin Moab teeb tubdatu po

¹⁰Yennu saa guur Sayɔnn kunkonn, ŋaan bi saa ŋmaat Moab niib tiŋ ni nan nei nba tuu ŋmaat kauk, ki lin teen koorin na. ¹¹Bi saa tant bi kpinkpant nan bi yaa bin duk nyun nae, ŋaan Yennu saa sikinib tiŋ ni, ki bi tatuŋ saa te bi nii n sɔnn. ¹²U saa biir Moab ŋapaara nan bi joonfɔkit na, ki sikinir tanbiinii ni.

Biaŋinba ki Yennu saa tur u niib nyannu

¹Daar baate ki niib maŋ tan saa yin yaŋ na Juda tiŋ ni a:

Ti doo mɔk paŋ. Yennu tiɔŋo guu li joona.

²Lootir doo na tammɔi ki ŋaan digbann nba ki mɔk biit na n kɔɔ,

digbann nba niib tuun linba took.

³Binba lora see fanu, kimaan bi dindann nba be a ni na,

fin Yennu-e teemm barmɔnii parmaasir.

⁴Teent i dindann Yennu ni yaayoo siiyoo, u sii guut yoo kur.

⁵U sikin binba tuu dont bi mɔŋ nawa,

ki biir digbanpaarir nba ki bi tuu be leŋ na,

ki yeer bi joona ki lur tiŋ ni.

⁶Binba tuu di biak na ji somm li paake mɔtana,

ki bi taapant ŋmaatir.

⁷Yennu, a tuu ŋamm sɔnu nba ki niŋamm tɔkii nae fanu,

sɔnu nba ki bi tɔkii naae mur-mur.

⁸Ti waa a loomme, ki teen ti dindann a ni.

A kuukɔɔe ki ti loon.

⁹N tuu dukii a poe nyiɔk nan n par kur.

Fi-i bu tingbouŋ na nan li niib kur buut,

bi kur saa bann ŋant paaka.

¹⁰Faa lek ŋan ki tur biit damm na,

ŋaan bi ki bann bin tun linba tooki.

Niŋamm tiŋ na ni gbaa, ŋaan bi tuun biite;

bi yêt bin sak a yiikoo nba teewa.

¹¹A datai ki mi nan a saa dat bi tuba.

Yennu, kɔɔntib fei ki ŋaan bin di biak.

Ŋaant bin di biak nba ki a teen li siir na.

Wantib faa loon a niib biaŋinba.

¹²Yennu, a sii teenit parmaasir;

linba kur ki ti tun, a paŋe te ki ti tun.

¹³Ti Yomdaanɔ Yennu, siabe tuu diat,

ŋaan fin kuukɔɔe tee ti Yomdaanɔ.

¹⁴Mɔtana bi kpowa, ki ji kan ban fiiri,

bi narimii kan ban fiir, kimaan a dat bi tubae ki biirib,

ki sɔɔ ki tian bi po.

¹⁵Yennu, fine te ki ti digbann yabitir,

ki tantir li yent siar kur po, ki linba na tura baakir.

¹⁶Yennu, a dat a niib tubae, ki bi daamii ni, ki bi miara.

¹⁷Fin Yennu-e te ki ti bui nan poo nba tuu yaa wun mar

ki li tonɔ biaŋinba na.

¹⁸Ti daan be tont nan daamii nie, ŋaan ti tan ki mar siar.

Ti ki la nyannu ki tur ti tiŋi; ti ki teen siari.

¹⁹Ti niib nba kpo na saa fiira.

Bi gbanant saa jen manfoor niwa.

Binba kur gɔɔnt bi kaat ni na saa fiir ki yin parpeenn yanii.

Marin nba tuu pant tingbouŋ na biaŋinba na,

nnae ki Yennu saa fiin binba kpo sianyoowa na.

Ki jiin buut nan ŋammir po

²⁰N niib, ii kun i ŋei ni man, ki saa kɔɔ, ŋaan loon gana. Ii bɔr i mɔŋ waan nan yoo nba ki Yennu par tan saa maak. ²¹Yennu nyii u binbeboor Yendɔuŋ ni ki baat, a wun dat tingbouŋ na niib tuba, bi biit paak. Baa bɔr ki kpii niib nba na kur maan saa nyi paanu, ki tiŋ ji kan bɔr niib nba ki bi kpiib maŋi.

¹Li daar, Yennu saa jii u takoobu nba mɔk paŋ ki bia kpi kuun nae, ki dat waagbeŋir nba tee ŋmaruŋo, ki bi yiu Lefiatann na tubir, ki kpi ŋɔɔ bonkob-susoouk nba be mɔkgbeŋir ni na.

²Li daar, Yennu saa pak jiin u kpaŋamm na po a, ³“N goriir fanu ki maantir nyun yoo kur. N guure yonnu nan nyiɔk, a sɔɔ daa paar daŋ. ⁴N wutoor ji ki do n kpaab maŋ paak. Li-i bonni tee ki kunkonii nan jagotuk be leŋ ki daamir, n bo saa joo kunkonii nan jagotuk maŋ muue faba. ⁵Li-i tee ki n niib na datai loon mii guub, bin maŋ nanin. Barmɔnii, ŋaant bin maŋ nanin.”

⁶Yoo nba baat na, Israel niib, Jakɔb yaaboona na, tan saa baa jiina nan tiik nae, ki yinn puuk ki yit. Lɔɔna nba ki bi saa lon na saa gbee tingbouŋ na.

⁷Yennu ki ban dat Israel teeb tuba nan waa daar bi datai tuba biaŋinba na. Bi bia ki mi kɔŋ bi jab, nan bi datai na. ⁸Yennu niib na tubdatu tee waa din saan namm digbangann ki bi saa tee yommii nae. U din jiib nan yondo po wonbiiuko, ki saan namm siar po. ⁹Israel teeb saa la nyikin chab, li-i tee ki bi nann bi tingbana maruŋ binbinta tana na ki li kpant yon, ki bi yenbis bonnunubit binbinta, nan chicherpook Asera ninnant na bia kaa.

¹⁰Digbanpaarir na ji tee langbente. Li dɔɔ yanne nan kunkoouk na. Li ji tee bonkob-kpaaŋe, siaminba ki bi sii di, ki bia foi. ¹¹Tiinii na yiinii koore ki kɔnn baa, ki poob tɔkii ki kuunt. Niib na nba ki bann siar na, Yennu nba tee bi nantɔɔ na kii mɔk ninmaanii, koo ki timm ninbaauku.

¹²Li daar, laa nyii Yufrates mɔkir ki saa tuu Ijipt teeb kpaar, Yennu saa tikir u niibe yenɔ yenɔ, nan nirɔ nba tuu boor dii ki lin nyi, ŋaan nyik fouŋ biaŋinba na.

¹³Li daar-i baar, bi saa pebir naatunne ki yiin Israel teeb nba tee yommii ki be Asiria nan Ijipt tinii ni na. Bi saa baar ki tan jiant Yennu, u kasii kunkonn nba be Jerusalem na paak.

Ki jiin gaŋ po yent na po

¹Israel tingbouŋ boonta. Li baakir na kpiate, nan tipuuk fokirii nba ki bi tɔɔndamm nba tee dayibira na yir na. Bi parbifaasaakab na sɔɔr tulaariie fanu, ŋaan ji biar dɔɔ ki yib kpowa. ²Yennu mɔk sɔɔ, ki u mɔk paŋ nan yiikoo, ki saa lekib. Daanɔ maŋ saa baar nan sakaana nae, koo sajakper matuŋ na, koo nyunmɔnpaarir na, ki yent tiŋ maŋ. ³Bi saa ŋmaat linba ki tɔɔndamm nba tee dayibira na mɔk parbifaant li paak na tiŋ ni. ⁴Tɔɔndan-parbifaara maŋ baakir nba kpiat na saa bot, nan sinsinn kinkana nba tuu mɔnn ki bin pɔɔr mɔɔ nae.

⁵Daar baat, ki Yabint Yennu sii tee nan jirima puuk fokirik na, ki tur u niib nba tinn na. ⁶U saa tur binba tee barbuura na mamɔmm yan, ki bia tur binba guu doo na tammɔi ki bi ki lekin na parcheenn.

Ki jiin Yennu sɔkiniinba nba tee dayibira na po

⁷Sɔkiniinba nan mannteeb na mɔŋ yib bonchiann, ki jat baantire. Bi nyuu daan booru booru bonchiann, ki ji be ŋmatir nie. Sɔkiniinba na yib halii, ki ji ki fit bant yirintu nba ki Yennu wantib na paak, ki mannteeb na mun yib halii, ki ji ki fit bu maan nba ki niib baat nann na. ⁸Teebula nba ki bi kar li boor na siit piinira, ki li siar boor ki biar ki yeeni.

⁹Bi burime ki jiin min Aisaya po, ki yeen a, “Jɔɔ maŋ dukii nan u tumii lamme? Ŋmee loon u maan maŋi? U maan maŋ ŋan nan bonbuna nba daa piint jedinu nae. ¹⁰U yiab a wun tumiit nammir nammire, nan guunu guunu, nan taakaabu taakaabu.”

¹¹Yi-i kan gbiint ki turimiie, Yennu saa jii niboorganii nba piak maganiie ki bin tumii-i yan. ¹²U loon wun turi foon nan parmaasir, ŋaan ki i yêt yin gbiint turɔ. ¹³Ŋanne teen ki Yennu yaa wun tumii-i nammir nammir, nan guunu guunu, nan taakaabu taakaabu. Ki i sii gbiatir baa taakaabu kur ni. I saa la daŋ, ki sik baruk ni, ki bi saa kɔɔni dansarii.

Ki jiin Sayɔnn lɔtik ni tann po

¹⁴Yimm garuk damm nba kar Jerusalem ki dia niib na, ii gbiint linba ki Yennu piak na. ¹⁵I faa kpinkpant a yimm nan kuun lor ki taan mɔba, ki yimm nan kpeentiŋ soor sooruwa. I mɔk dindann nan biak-i baar, ŋaan li saa lɔkit yimma, kimaan i tinnu dindann maa faak nan kpinkpannii paake. ¹⁶Li paak, Yabint Yennu nba piak linbae na a: “N fɔkint fiakir nba wakii ki mɔk paŋe Sayɔnn ni. Li lɔtik nie ki n sent tann nba mɔk paŋ, ki mɔbona na sɔb li paak a, ‘Yada nba paar mun bia mɔk sukurue.’ ¹⁷Mamɔnpakue tee fiakir na bikinu ŋmiiuk, ki ŋamm mun tee lɔtik ni nyundaauk.”

Sajakper saa wuur faak nba ki i tuu maa li paak na, ki nyunmɔnn saa di linba guui na. ¹⁸Mɔlor nba ki yimm nan kuun lor na saa biir, ki yimm nan kpeentiŋ mɔtaauk na saa taat. Biak-i baar yoo nba, li saa nyanni. ¹⁹Li sii faai yoo nan yoo, sanyiɔk kur. Li tee yin gubin gaarire yonnu nan nyiɔk. Barsaanii nba kur saa nyi Yennu boor saa baar nan jaŋmaanpaaniie. ²⁰I sii tee nan jɔɔ nba be barjouk ni nae, ki yiab a wun dɔɔr dɔɔnu nba jiŋɔ paak, ki bia yiab a wun pin u mɔŋ kuntir nba waabɔ na. ²¹Yennu saa kɔn nan waa din kɔn biaŋinba Perisim kunkonn boor, nan Gibeonn baauk ni, a wun tun linba ki u lor na; u toona sii tee nan bonsaann nae. U saa tont u toonn nawa, u yaarlituk toonn maŋ.

²²I daa laa kpaanii nba ki n teeni na. I-i tun nna, li sii paar nan yin tinn. N gbat Yabint Daanɔ Yennu lor nba jiin tiŋ na kur biiru powa.

Ki jiin Yennu yanfoon po

²³Gbiintir maa piak linba na man; kɔɔnt i yan linba ki n beeri na ni. ²⁴Kpaarɔ kaa ki sii kpan ko bɔyennkɔɔ boor yoo kur ŋaan ki buri. ²⁵Wuu ŋamm tiŋ na yoo nba, u tuu bur bonbuburit nae, li jummir nan nanjoi, ki bur karwanta nan dii chaabu chaabu, ki bur bonboolia, u kpaab na kpiŋ. ²⁶U mi waa saa tun u toona biaŋinba, kimaan Yennu wannɔ li bannuwa. ²⁷U ki jikit lanban-gbeŋir ki boo jummir koo nanjoi ki nyint li bimi, ŋaan u tuu jii lanbanbik nba ki li kpiasu jaŋe. ²⁸U ki boo karwanta ki li gaar ki yee li bin na, ŋaan u tuu jii toruko ki fuur fuur li paak ki bin na ki yee. ²⁹Yanfoon na kur nyii Yabint Yennu boore. Yennu nba lorin u lora nba kur tee subinii lorae, ki li laat nyannu.

Ki jiin Jerusalem joontu po

¹Yennu maruŋ binbintir nba tee Jerusalem tiɔŋ na boonta. Defid nba din kar digbann nba ni na boonta. Ŋaant ki binyenn kɔɔ koo ŋanlee n baar gar nan li diina nan li jaamm. ²Ki Yennu saa baar nan biak, digbann nba ki bi yir “Yennu maruŋ binbintir” na paak. Mɔnii nan fabinii sii be, ki doo na kur sii tee nan binbintir nba ki sɔn piin li munn po nae. ³Yennu saa wor doo maŋ ki ŋaa loon a wun yentir. ⁴Jerusalem sii tee nan nariŋ nba be tiŋ niwa ki gbaa a wun pak, ki u kunkɔr na n nyi tiŋ ni, ki naan nan linlɔkinii nba nyi tant ni nae.

⁵Jerusalem, boorganu nba kur wora na tan saa yaat nan wouŋ nba tuu pebir tanbiinii nae, ki bi jaŋmaansooruk jab na tan saa yukir nan musanjiant na. Yabint Yennu tan saa kpire, ⁶ki tinna nan jat satianii nan tinjekiruk, yoo nba ki sɔɔ ki daan na. U saa tun wonpaaruk nan muu nba yab bonchiann. ⁷Li yoo na, digbana jab nba tuu wor Yennu maruŋ binbintir doo na, bi jatiat nan bi tiat nan bi bont kur saa bot nan damiite na, koo nan nyiɔk yirintue na. ⁸Digbana nba kur taan leeb a bin lek Jerusalem na sii tee nan wunba ki kon tuu mɔkɔ bonchiann, ki u damii ki u di jeet, ŋaan wuu fiir yoo nba, wun la ki u be kon nae, koo wunba nyunnyukuru tuu mɔkɔ bonchiann, ki u damii ki u nyu nyun, ŋaan fiir ki sɔɔ ki u kunkɔr be koont nae.

Ki jiin kpaanii nba ki bi ki yiinir siar na po

⁹I-i tee bonliinii man. I-i tee jɔɔnii man. I daa nyu daan, ŋaan yib. I-i baantir man, ŋaan ki lemm daan. ¹⁰Yennu-e te ki i tiŋit ki loon yin gɔɔn gɔchiɔŋ. Sɔkiniinba nae bo sii tee niib na ninbinn, ŋaan Yennu-e dɔkin bi numpo. ¹¹Sɔkiniinba yirintu kur paak bɔre i boor; li sii tee nan gbouŋ nba ki bi loon li mɔb nae. Fi-i jiir ki saan nann wunba mi karuŋ boor, ki turɔ a wun karin ki wanna, u saa paka nan u kan fit, kimaan li mɔb loona. ¹²Fi-i jiir ki saan nann wunba kan fit karin boor, ki turɔ a wun karin ki tura, u saa paka nan u ki mi karuŋu.

¹³Yennu yet a, “Niib na want a bi jiantirin, ŋaan bi mɔbona na kaa gbinni, ki bi para fɔk nanin. Bi jiantu kpan tee bi kaar, nan bi danmarima kɔɔe, ki bi tumiir ki tian li yetu yoo kur. ¹⁴Li paak, n saa baar nan kpikpiruk daamii nyɔɔ nyɔɔ bi paak, ki put bi yan. Subindamm saa kpant jatit, ki bi subinii na saa teen yann.”

Dindann nba jiin yoo nba waa na po

¹⁵Binba yiab a bin bɔr Yennu bi lora na boonta. Bi tuun bi lorbiit na bunbɔnn nie, ki dukii sɔɔ kan lab, koo ki bann baa tuun linba. ¹⁶Bi tuu tunn bont kure. Yɔk nan yɔkmaarɔ, ŋmee kpaa talasi? Bonsiar kaa ki nirɔ saa jii u nuu ki nan, ki bont na n tan yet nirɔ maŋ a, “Fin kaa namimi,” koo ki yet nirɔ na a, “A ki mi a toonni.”

¹⁷Nan baa yeen na, li kan wei kaawa ki fɔɔr saa kpant kpaant, ŋaan ki kpaant n kpant fɔɔr.

¹⁸Li daar-i baar, tuukpaar saa gbat gbouŋ nba ki bi karin, ki jɔɔnii nba yɔɔ be bunbɔnn ni na, bi ninbina saa munt ki bin la. ¹⁹Tarii nan sikin-n-mɔŋ damm saa ŋamm la parpeenn nba ki Israel teeb kasii Yomdaanɔ Yennu na saa tur. ²⁰Li sii tee binba dint leeb biak ki bia ki gorii gboot Yennu na joontue. U saa biir biit daanɔ kur, ²¹ki bia biir binba fa fai ki biir leeb sana na, nan binba gɔi nibiit tubdatu na, nan binba fa fai ki te niŋamm ki laat bi mɔnii na.

²²Li paak, Israel teeb Yomdaanɔ Yennu, wunba din nyinn Abraham daamii ni na yeen a, “N niib, i ji kan mi di fei, ki i yura kan ban kpiak nan fei. ²³Yoo nba ki i la waas nba ki n saa turi na, i saa sak nan mine tee Israel teeb kasii Yennu. I saa baakin ki tinin. ²⁴Jatuk saa tumii yan kii bant maan paak, ki binba tuu mɔk bunburimii na-i la tumiiu, bi sii mɔk parpeenn.”

Ki jiin lorkpeeuŋ nba ki bi lor nan Ijipt na po

¹Yennu yet a, “Binba dia Juda tiŋ na boonta, kimaan bi yêt n mɔba. Bi waa lor nba ki n ki lore, ki taant mɔtaat nba ki tee n loomm, ki lakint bi biit ki birin. ²Bi tuu saan Ijipt ki loon sommir, ŋaan ki boin kpaanii po. Bi loon Ijipt-e n guurib, ŋanne teen ki bi teen bi dindann Ijipt kpanbar na ni, ³ŋaan kpanbar na kii mɔk paŋ nba saa sommib. Ijipt kpanbar guuru na saa joont nan biake. ⁴Bi taatara poŋ baar Ijipt teeb doi nba tee Soann nan Hanes nawa. ⁵Ŋaan Juda teeb saa mɔ kɔɔ nan baa jii bi dindann ki teen digbann nba kan fit sommib na ni, digbann nba dinnib fei, yoo nba ki bi loon sommir na.”

⁶Yennu mɔmaame na ki jiin bonkobit nba be diitu po kunkoouk paak na a: “Taatara somm ki gaar daŋ tiŋ ni, siaminba ki yanbɔra be, ki wai nba mɔk lɔbii nan waabiit nba yuuk be leŋ na. Bi tuu jinn bi bonii nan laagumiinba bona nba daauk paar, a bin tur digbann nba kan fit sommibi. ⁷Sommir nba kur ki Ijipt saa fit tur kaa nyɔɔti. Li paak, ki n pur Ijipt sanjɔɔk a, ‘Waauk nba kaa lɔbii.’ ”

Ki jiin mɔyêtuk niib na po

⁸Ki Yennu yetin a n sɔb niib na nba naan linba, ki teen gbouŋ ni, ki lin te niib maŋ binbenbiik na-ii yɔɔ kii dɔɔ gbouŋ ni. ⁹Yoo kur bi mɔk mɔyêtuko, ki mɔk faak, ki bia ki saak bin gbiint Yennu wannu. ¹⁰Bi tuu pak Yennu sɔkiniinba nae a bin ŋmin, ki tuu yet a, “I daa piakit linba ŋan po. Ii piakit taa loon tii gbia linba, ii piakit kpinkpannii nba man. ¹¹Bakint leŋ, ki daa loo ti sɔnu. Ti ki loon tin gbat siar ki jiin Israel teeb kasii Yennu na po.”

¹²Ŋaan Israel teeb kasii Yennu na nba pak linbae na a, “I yêt maa piaki linba nae, ŋaan waa kpikpiruk nan kpinkpannii maan. ¹³I mɔk biit. I tee nan joonfoouk nba mɔk yiann ki saa sik tiŋ ni nae; i saa baae yiama. ¹⁴I saa yeer nan yɔkbobir nae, ki but but, ki nan sipiaka kan tenn ki fit mɔɔr muu, koo ki finn nyun bunbunn ni.”

¹⁵Yabint Yennu nba tee Israel teeb kasii Yomdaanɔ na piak niib na a, “Jenin man soon nna, ki tan teenin yada, ŋanne ki i sii be fanu ki mɔk paŋ.” Ŋaan ki i yêt yin tun nna. ¹⁶I loon yin jak taanii nba kakiie, ki chiar bot i datai. I mɔk mɔnii. Nantaare tee linba ki i saa tun. I dukii nan i taanii mantik kakiie, ŋaan binba waai na kakii ki gariwa. ¹⁷I jab tusir-i la datai na jɔɔ yenɔkɔɔ, ŋaan i jab tusir maŋ saa chiare, ki jab banŋmu saa fit te ki i kur n chiar yaat. I jab na sɔɔ kan biar, see fariŋ na kɔɔe saa biar, ki be kunkonn yur paak. ¹⁸Ŋaan Yennu lek guue a wun tini ninbaauk. U teen siir a wun tini ninbaauk, kimaan u yɔɔ tuun linba tooke. Parpeenn be daansiab nba teen Yennu yada na paak.

Ki jiin Yennu piisin na po

¹⁹Yimm niib nba be Jerusalem na ji kan ban bui. Yennu mɔk ninkpabauŋ, ki yi-i fabin ki boiɔ sommir po, u saa turi gatuwa. ²⁰Yennu saa te ki yin kɔɔ daamii ni, ŋaan u mɔŋ sii be ki wanti, ki li ji kii kpaa talas nan yin lon u boor. ²¹Yi-i bot ki saan diitu po koo gaŋ po, i saa gbat u kunkɔr i poor po, ki li yeen a, “Sɔnue na. Ii waar.” ²²I saa jii i yenbis nba ki bi jii salimpeena ki taanir, nan linba ki bi jii salimmɔna ki pɔrir na, ki lur nan bonjakinn na, ŋaan pak sanpaapo a, “Botir n sɔnu ni.” ²³Yi-i bur bonbuburit, Yennu saa te ki saak n baa, ki lin kpaat ki nan bonchiann ki yin jaan, ki i bonkobit bia sii mɔk mɔɔt ki ŋman. ²⁴I naajai nan bonii nba ko tanmɔna na sii mɔk mɔŋant ki ŋman. ²⁵Daar nba ki bi saa nyann i datai doo, ki kpi li niib na, nyun sii puube ki nyi jɔjaana nan kunkona kur ni. ²⁶Ŋmaarik sii yeen nan yonnu nae, ki yonnu yentu saa ŋamm pukin taar munlore, ki li yeeuŋ sii tee nan daa ŋanlore nba saa taan ki yent dayenn kɔɔ ni na. Linba na kur tan saa tun, yoo nba ki Yennu saa lor u niib fiat nba ki u turib na a lin buur nae.

Ki jiin Asiria teeb tubdatu po

²⁷Yennu yiikoo nan u baakir be banfɔkir ki baat, ki niib laatir. Muu nan munyuuko want u wutoor nba tee. Wuu piak, u mɔbona na di nan muu nae. ²⁸U tuu gaan wouŋo u tɔɔnn po, nan nyungbeeuk nba tuu jii bont kur ki yaat nann na. Li tuu di digbanae ki biirir, ki boont li niib lorbiit na. ²⁹Ŋaan yimm nba tee Yennu niib na sii yiin yaniie, ki mɔk parpeenn nan yaa tuu tuun biaŋinba, ŋɔɔ Yennu jaamm daar nyiɔk na. I sii mɔk parpeenn nan damm nba tuu somm waa naagbai mɔnii, a bin kɔɔ Yennu nba tee Israel teeb fat-tɔɔ na jiantu ŋasaakak ni nae.

³⁰Yennu saa te ki sɔɔ kur n gbat u yiikoo kunkɔr, ki bann u wutoor paŋ nba tee. Muyeruk nan sanpagbouŋ lootu, nan sakaana, nan sajakpera sii be. ³¹Ki Asiria teeb na-i gbat Yennu kunkɔr ki bann u ninmɔnn tubdatu na, bi yan saa put. ³²Ki Yennu nba sii faab ki birin yoo nan yoo na, ki u niib mun sii faa gingana nan biat yoo maŋ kur. Yennu tiɔŋo saa kɔn nan Asiria teeb na. ³³Sian yooewa ki bi din ŋamm siaminba ki muchiɔŋ tan saa di Asiria kpanbar na. Leŋ maŋ sumii, ki yarin, ki daat bia gbee. Yennu-e saa foont muyeruk ki lin joor.

Biaŋinba ki Yennu saa guur Jerusalem

¹Binba saa Ijipt ki loon sommir na boonta. Bi maa Ijipt kpanbar kunkɔnkɔnna paŋ paake, li taanii nan taantorit nan li jab, ŋaan bi ki maa Israel teeb kasii Yabint Yennu na paaki, koo ki boiɔ sommir po. ²U mi waa tuun linba. U baat nan biake, u dia u lor na ki saa dat biit damm nan binba sommitib na kur tuba. ³Ijipt teeb maŋ ki tee yennii kaa, bi tee nisaariie. Bi taanii na tee tingbouŋ na ni bonfoae. Yennu-i wokit u nuu yoo nba, digbanpaarir Ijipt na saa but bute, ki Ijipt maŋ nba somm digbann nba na n baa. Bi banlee kur saa biire.

⁴Ki Yennu pakin a, “Pekpaarii-i lekii yikin ki hoot biaŋinba, ŋaan bi kan fit ber yanbɔr, bonkobuk nba ki u kpiiu na boori; nnae mun, ki siar kaa ki saa gɔɔr min Yabint daanɔ Yennu, ki n kan guur Sayɔnn kunkonni. ⁵Biaŋinba ki nɔɔŋ tuu baŋ u tiɔk paak a wun guur u waas na, nnae ki min Yabint Yennu saa guur Jerusalem ki kɔn li paak.”

⁶Yennu bia yet a, “Israel teeb, i tun biirima, ki yêt n wannu, ŋaan mɔtana, ii jen n boor man. ⁷Yoo baate ki i kur tan saa lu yenbis nba ki i jii salimpeena nan salimmɔna ki nan, ki li tee biit na. ⁸Bi tan saa biir Asiria teeb, tɔb nie, ŋaan li kii tee nisaarik paŋ kaa. Asiria teeb saa chiar tɔb ni, ki bi naasimm saa teen yommii. ⁹Jijeet saa te ki bi kpanbar n chiar, ki jaŋmaanchiɔŋ saa te ki u jab saakab n lu bi tɔb farimii.” Yennu nba ki bi jiantirɔ Jerusalem, ki u maruŋ muu yɔɔ di leŋ na, ŋɔɔe pak na.

Ki jiin kpanbar-chinchibir na po

¹Dasiar, kpanbar sɔɔ tan sii be ki dia doo na diachinchibir, ki doo tɔɔndamm sii be ki dia doo nan mamɔmm. ²Bi tan sii tee nan wondɔkitir, koo satekitir nae. Bi sii tee nan kpenii nae ki puub kunkoouk paak, ki bia tee nan tinperik paak tanjagbouŋ yunyuŋ na. ³Bi ninbina nan bi tuba sii yaae, ki gbiin niib daamii. ⁴Bi sii tee sukuru damme, ki tuun nan bannu, ki piak baa lor linba. ⁵Sɔɔ kan dukin nan jatuk tee nijaann, koo nitouŋ tee niŋanɔ. ⁶Jatuk piak jatmaame, ki dukii bonbiir nba ki u saa tun. Waa tuun linba, nan waa piak linba tee sukite ki teen Yennu, u ki ban tur binba ki kon mɔkib na jeet, koo ki tur binba nyunnyukuru mɔkib na nyumi. ⁷Jatuko tee nibiiuko ki tuun biit; u lorin a wun jii faake ki biir tatimm, ki gɔɔrib ki bi daa laat bi mɔnii. ⁸Ŋaan niŋanɔ ŋarin tuun linba tooke, ki see barmɔnii paak kenken.

Ki jiin tubdatu nan ŋammir po

⁹Yimm poob nba be i yamani, ki dudukdaauŋ ki waa-i na, gbiintir maa piak linba na. ¹⁰I gboo mɔtanawa, ŋaan binn po nna yoo, i para saa biir, kimaan daan tilɔɔna sii kaa ki i saa tɔkirii. ¹¹I tuu be i yamanie, ki dudukdaauŋ ki waai, ŋaan mɔtana, ii jekir nan jaŋmaanii man. Liatir i tiat, ŋaan jii kparchant ki lor i sai ni. ¹²Ii wɔb nii man nan yanputuk, kimaan tinkpiasir na nan daan tilontii na biira, ¹³ki kunkonii nan jagotuk ji pia n niib tiŋ ni. Ii mɔ ŋei nba kur ki niib din mɔk parpeenn li paak na, nan doo nba din gbee nan parpeenn na paak, ¹⁴kimaan kpanbar ŋaak na saa nyint, ki digbansaakar na saa biar yann. Ŋei nan joonjaana nba tuu guur na saa kpant langbent yaayoo siiyoo. Bɔniie sii lin leŋ, ki pei sii ŋman mɔɔt leŋ.

¹⁵Ŋaan Yennu bia tan saa turit u Seeka. Tinfukirik na tan saa kpiak, ki kpaant saa nan jeŋant, ¹⁶ki popeensin nan mamɔmm sii be tiŋ na kur po. ¹⁷Sɔɔ kur nba sii tuun ŋant na paak, parmaasir nan yent-n-mɔŋ sii yɔɔ be-e. ¹⁸Yennu niib saa nyi daamii ni, ki bi ŋei sii be fanu nan parmaasir. ¹⁹Sakaana-i lekii baa fɔɔr ni, ki doo na bit, ²⁰ŋaan sɔɔ kur sii mɔk parpeenn, kimaan nyun sii be ki maant bonbuburit, ki mɔɔt sii be, ki bonii nan bonkob-leet ŋman bi yamani, siar kur po.

Miaru nba jiin sommir po

¹Ti datai boonta. Bi fate ki bia fikit, ŋaan ki sɔɔ ki fatib koo ki fikitibi. Bi fatu nan bi fikitu yoo maŋ-i gbenn, niib mun saa fatib ki fikitiba.

²Yennu, ii mɔk ninbatinu nant. Ti teen ti dindann a nie. Ii guut daar kur, ki tinnit daamii yoo. ³Li-i tee ki a kɔn ti paak, tɔb fuur tuu te ki digbana n chiare. ⁴Niib numm tuu chiit bi tiat nae ki bin fatir yiama.

⁵Yennu tee Yenjaanne, ŋɔɔe dia bont kur. U saa gbeen Jerusalem nan mamɔmm nan ŋant, ⁶ki te digbann na be u yamani. Yoo kur, u guu u niibe, ki teenib yanfoon nan bannu. Linba mantik tee bi gor tee baa baakit Yennu nae.

⁷Jab nba mɔk para boi sommir po. Taatara nba yiab a bin baar nan parmaasir na mɔe sanpaapowa. ⁸Sɔnjara na gbee nan ninbɔŋe, ki sɔɔ ji ki tɔkiir. Lora nan mɔsona biira, ki bi ji ki teen sɔɔ baakiri. ⁹Tiŋ na dɔɔ yanne, ki sɔɔ kaa leŋ. Lebanonn fɔɔr na koora, ki Saronn baakpiasir na ji tee nan kunkoouk na, ki Basann tiŋ ni nan Kamel kunkonn paak tiinii siir.

Ki jiin Yennu kpayakit po

¹⁰Yennu pak digbana na a, “Mɔtana, see ki n tun siar ki wann n paŋ nba tee biaŋinba. ¹¹I lorin loryana, ki linba kur ki i tuun na ki mɔk nyɔɔt. N Seek tee nan muu nae ki saa di boonti. ¹²I saa di ki boonte faba, nan baa tuu joo kunkonii ki lin teen tanpent na. ¹³Ŋaant sɔɔ kur nba be banfɔkir, nan wunba naak n gbat linba ki n tun, ki bann n yiikoo nba tee.”

¹⁴Sayɔnn biit damm na jekire nan jaŋmaanii, ki yeen a, “Yennu tubdatu tee nan muu nba yɔɔ di nae. Ti sɔɔ saa fit nyi muu maŋ niwa-a?” ¹⁵Wunba piak ki bia tuun linba ŋane saa nyi muu maŋ ni. Daa jikit a yiikoo ki ŋmaab tatimm, ki bia daa gaan mɔnyat. Daa waa niib nba lorin a bin kpi kuun, koo ki tun toonbilia. ¹⁶Nnae ki a saa tinn ki be a yamani nan a be ŋapaaruk ni na. A sii mɔk jeet ki di, ki bia mɔk nyun ki nyu.

Ki jiin burchinbinbeŋ nba baat na po

¹⁷I bia tan saa la kpanbar nba mɔk fant na dia tiŋ nba tant saan lokir kur po. ¹⁸I jaŋmaan-kperii nba ki i tuu mɔk ki jiin boorganii lampo gaarteeb, nan chekit teeb po na, ji sii tee tiarime. ¹⁹I kan ban la boorganii garuk damm nba piak maan nba ki i ki gbia na. ²⁰Gotir Sayɔnn, doo nba ki ti tuu di Yenjiantu jaamm leŋ na. Gotir Jerusalem. Leŋ benu kii mɔk daamii. Li sii tee nan lanbouŋ nba yɔɔ be nae, linba dachaata ki chaatir, ki li ŋmiit ki cheen na. ²¹Bakitnauŋ Yennu sii be nant leŋ. Ti sii kɔɔ kpia mɔkjaana nan kpenjaanae, ŋaan ti datai ŋarint kan somm li paak. ^22-23Ŋarint maŋ bona kur tee yanne; li chinchena na kan fit tanti. Ti saa fat jab nba tee ti datai na mɔkint kure, ki li sii yab bonchiann, ki dianii gbaa saa gaar tora. Yennu tiɔŋo sii tee ti kpanbar; ŋɔɔe sii diat, ki guut. ²⁴Wunba kur be ti tiŋ na ni kan ban yet a u yiar, ki bi biit kur saa la nyikinchab.

Biaŋinba ki Yennu saa dat u datai tuba

¹Digbana niib kur, baat man. Tikit man ki gbiint. Ŋaant durinya kur, nan wunba kur be li ni n baar nna, ki tan gbiint. ²Yennu wutoor doo digbana kur, nan li jab kur paaka. U biirib ki kɔɔmm biiru niwa. ³Bi gbanant kan pii, ŋaan sii dɔɔe, ki bat nubir; ki kunkona sii mɔn nan sɔn, ⁴ki yonnu nan ŋmaarik nan ŋmaabira saa nann ki kpant tant. Sanpaak saa bot nan baa tuu pin dindɔɔnmɔŋe na, ki ŋmaabira saa baa nan sinsabik tituut koo kinkana nba tuu baa biaŋinba na.

⁵Yennu ŋamm u jukbanjiake yendɔuŋ niwa, ki mɔtana li saa chɔɔ Edom, tiŋ nba niib ki u biirib ki kɔɔmm biiru ni na. ⁶Bi sɔn nan bi kpapana saa piin jukbanjiak na, nan pei nan buunii nba ki bi tuu mannib maruŋ, ki bi sɔn nan kpapana n piin juk na. Yennu-e saa mann maruŋ na, Bosra doo ni; u saa te ki li tee nikpinu bonchianne, Edom tiŋ ni. ⁷Niib na sii baa nan mɔnaajai nan naajabira nae, ki tingbouŋ na sii mɔn nan sɔn, ki kpapana n dɔkinir. ⁸Yoo nba nae ki Yennu saa fat Sayɔnn doo, ki kɔn nan li datai.

⁹Edom mɔka saa kpant kpabouŋ, ki tiŋ na n kpant sarwuutir. Tiŋ na kur saa di muu nan kpabouŋ nae. ¹⁰Li sii die yonnu nan nyiɔk, ki munyuut sii yɔɔ do leŋ. Tiŋ na sii dɔɔ yann yaayoo siiyoo, ki sɔɔ ji kan ban gar leŋ. ¹¹Fiit nan kinkaate saa yent tiŋ maŋ. Yennu saa ŋamm teenir tinkokiryann, nan laa din tuu tee biaŋinba pinpiik ni na. ¹²Kpanbar tan sii kaa ki dia tiŋ na, ki tɔɔndamm na kur sii kaa. ¹³Kunkonii nan jagotuk saa pia naan ŋei kur, nan doi nba ki bi maa joonjot ki lint na ni, ki mɔbɔi nan fiite tan sii be leŋ. ¹⁴Muuk ni bonkobite sii lin leŋ, ki narinbiit yi bi leeb leŋ. Nyiɔk bonsusoouk saa baar leŋ, ki loon yiar wun foi. ¹⁵Fiit saa tia tiat, ki ŋaa jena, ki kaat bira, ki bia joomm leŋ. Juut saa tikir leŋ banlee-lee.

¹⁶Gotir Yennu gbouŋ ni siaminba sɔb jiin bonfoa po na, ki karin laa yaa linba. Bonfoa na nan yenɔkɔɔwa kan boti, bonfoor kur sii mɔk u benanlɔɔe. Yennu-e wann a lii tee nna, u mɔŋe saa taamm boyennkɔɔ ni. ¹⁷Yennu-e saa chent tiŋ na, ki tur bonfoor kur u tor. Bi sii be leŋ yaayoo siiyoo, ki tiŋ maŋ sii yɔɔ tee bi yar.

Ki jiin kasii sɔnjouk po

¹Kunkoouk saa kpamm, ki puuk saa yit kunkoouk na paak.

²Kunkoouk na saa yin yaŋ ki hoot nan parpeenn;

li saa faŋ nan Lebanonn kunkona nae,

ki bia sii kpai nan Kamel nan Saronn sarwaat na.

Sɔɔ kur saa la Yennu fant, ki la u yabint nan u yiikoo.

³Turin niib nba nii baŋ,

nan binba duna baantir nan bakint na paŋ.

⁴Pakin wunba kur ki mɔk tama a,

“Ii mɔk paŋ ki daa tiin jaŋmaanii,

Yennu baate a wun tinna, u baate a wun dat a datai tuba.”

⁵Jɔɔnii saa nyɔɔnt, ki tuukpaa sii gbia,

⁶ki dianii sii yuuk ki mobit, ki waa waak,

ki binba ki fit piak na saa hoot nan parpeenn.

Nyun nan kpenii saa pubir kunkoouk paak;

⁷ki tanbiintonii saa kpant mɔkir,

ki tinkooŋ saa gbee nan nyuntona.

Mɔbɔi nba tuu be sian na saa pia kaar nan gartuut.

⁸Sɔnjar sii be leŋ ki li sann tee, “Kasii Sɔnu.”

Biit daanɔ kan ban tɔkin sɔnu maŋi,

ki jatit kan turin binba tɔk sɔnu maŋi.

⁹Yanbɔra sii kaa leŋ, bonkob-biiuk kan tɔkin sɔnu maŋ.

Binba ki Yennu tinnib nae saa tɔkin sɔnu maŋ ki kun.

¹⁰Bi saa baar Jerusalem nan kpinkpammuko,

ki yiin ki hoot nan parpeenn.

Bi sii yɔɔ be parpeenn nie,

ki nyi parbiir nan yanyêtuk ni yaayoo siiyoo.

Biaŋinba ki Asiria kunkɔnkɔnna loon bin lek Jerusalem

(2 Kpanbara 18.13-27; 2 Barkperii 32.1-19)

¹Hesekia nba din dii Juda naan, li bina piik nan ŋanna nie, ki Asiria kpanbar Senakerib lek Juda digbanpaara ki nyannib. ²U din wann u kunkɔnkɔnna saakɔɔ a wun nyi Lakis ki saan Jerusalem nan jab bonchiann ki saa te kpanbar Hesekia n jii u mɔŋ ki chabɔ. Yudaanɔ na din tɔkin sɔnu nba ki bi luu chinchena nae, bunu nba ki nyun nyi paapo nyundɔɔnn, ki tɔkii siik na. ³Hesekia saakab bantaa din nyii ki chetɔ. Ŋamme tee kpanbar ŋaasaakab Hilkia bija Eliakim, nan Sebna, wunba tee kpanbar ŋaak gbansɔbirɔ, nan Asaf bija Joa, wunba sɔbin naan maan na. ⁴Asiria yudaanɔ na din yetib a u kpanbar na loon wun bann linba tun ki tur kpanbar Hesekia parcheenne. ⁵U din yet a, “I dukii nan maan saa fit set jatuk yan nan paŋ taar niwa? I dukii ŋmee saa sommi ki yin yêt Asiria kpanbar mɔbi? ⁶I daan Ijipt-e n sommi, ŋaan li sii tee nan nirɔ nba saa jii mɔɔnu ki teen u patu nae. Li saa jinte ki ŋmuu u nuu. Ijipt kpanbar tee nnae ki tur wunba kur jii u mɔŋ ki gaan u paak.”

⁷Ki Asiria yudaanɔ na ŋamm pak a, “Koo i saa pakin nan i gaa i Yomdaanɔ Yennu paake-e? Yennu poochianfei nan binbintae ki Hesekia din bet, yoo nba ki u din pak Juda nan Jerusalem teeb a bii jiantir maruŋ binbint-yennkɔɔ paak na. ⁸N saa sak lor nani kpanbar sann ni. N saa turi taanii tusaa ŋanlee, li-i tee ki i saa la jab nba ki bi kann baar nna, ki saa jakib. ⁹I poŋ kan fit yek nan Asiria jab saakabarik kaawa, ŋaan ki i loon Ijipt teeb n turi taantorit nan taanjakira. ¹⁰I dukii nan maa lek i tiŋ ki biirir na, li ki tee Yennu sommir kaa-a? Yennu tiɔŋo pakin a man lekir ki biirir.”

¹¹Ki Eliakim nan Sebna nan Joa pak saakɔɔ na a, “Pakin Aram booru maan ni ki turit. Ti gbia li maan. Daa piak nant Hiibru booru maami;36.11 Hiibru din tee Israel teeb maame. niib nba kur be joonjouk na paak gbiine.”

¹²Ki saakɔɔ maŋ jiin a, “I dukii a yimm nan i kpanbar kuukɔɔ paake te ki n kpanbar na tumin a man tan pak linba na-a? Aaii. N bia piak ki teen binba kar joonjouk na paake, bi tan saa di bi tiɔŋ bint ki bia nyu bi nyarin, nan yaa tan saa di i bint ki bia nyu i nyarin biaŋinba nae.”

¹³Li poor po ki saakɔɔ na fiir set ŋaan pak Hiibru maan ni nan kunkɔsaakar a, “Gbiintir linba ki Asiria kpanbar piaki na. ¹⁴U kpaani nan i daa te ki kpanbar Hesekia kpanni. Hesekia kan fit tinni. ¹⁵I daa te ki u kparimi ki yin nɔɔb i mɔŋ ki gaan Yennu paaki. I daa dukii nan Yennu saa tinni, ŋaan ber timm Asiria kunkɔnkɔnna ki ti kan kɔn nyann i doo na. ¹⁶I daa gbiin Hesekia maami. Asiria kpanbar na piaki a yin nyi doo na ni, ki jii i mɔŋ ki turɔ. U bo saa chab i kur ki yii di i tiinii lɔɔna, kii nyu i bunbuna ni nyun, ¹⁷ki tan tuu yoo nba ki ti kpanbar maŋ saa kaani tiŋ nba tee nan i yar na ni, siaminba ki daan tiinii be, ki i sii laat tilɔɔna daan, ki dii be ki i tee boroboro. ¹⁸I daa te ki Hesekia kpanni ki i dukii nan Yennu saa tinni. Digbansiar tingbann mi tinn li doo niib ki bi nyii Asiria kpanbar nuu niwa-a? ¹⁹Hamaf nan Arpad tingbana na be lia mɔtana? Ki Sefarfaim tingbana na be lia? Tingbansiar ban tinn Samariawa-a? ²⁰Digbana nba na tingbana ban tinn bi doo niib ki nyinnib ti kpanbar na nuu ni-i? Ki bee teen ki i dukii nan Yennu saa fit tinn Jerusalem-i?”

²¹Niib na din ŋmine, nan Hesekia nba wannib biaŋinba na; bi din ki pak nan mɔbonna. ²²Li poorpo ki Eliakim nan Sebna nan Joa pat bi liant nan parbiir, ŋaan saan ki saa wann Hesekia linba kur ki Asiria saakɔɔ na pak.

Biaŋinba ki kpanbar na boi Aisaya kpaanii po

(2 Kpanbara 19.1-7)

¹Kpanbar Hesekia nba gbat maan na yoo nba, ki u pat u liant nan parbiir, ki lia bɔtoot liant,37.1 Bɔtoot liante want nan bi mɔk parbiir. ki saan kɔɔ Yenjiantu ŋasaakak ni, ²ki tun Eliakim, wunba tee kpanbar ŋaasaakɔɔ na, nan Sebna, wunba tee gbansɔbirɔ, nan mannteeb saakab, a bin saan Amos bija Aisaya, wunba tee Yennu sɔkinii na boor. Bi mun bia din lia bɔtoot liante. ³Waa din turib mɔb nba a bin yet Aisaya-e na a: “Dinna tee biak daare; bi dat ti tuba ki ti dii feiwa. Ti tee nan poo nba tuu yaa wun mar, ŋaan ki paŋ kaa nan matuk nae. ⁴Asiria kpanbar tun u kunkɔnkɔnna saakawakitire, ki u baar sukii Yennu nba fo na. A Yomdaanɔ Yennu n gbat sukit na, ki dat binba sukii na tuba. Li paak, a miar Yennu ti niib nba daa tenn na paak.”

⁵Aisaya nba gbat kpanbar Hesekia mɔb yoo nba, ⁶ki u tur gatu na a, “Yennu beera nan a daa te ki Asiria teeb na jeenta, nan baa yeen a Yennu kan fit tinni na. ⁷Ŋɔɔ Yennu saa te ki Asiria kpanbar na n gbat biyaa maan, ki li saa te wun ŋmat kun u tiɔŋ tiŋ ni, ki Yennu n te bin kpiu leŋ.”

Ki jiin jeenu munlee na po

(2 Kpanbara 19.8-19)

⁸Asiria saakawakitir na din gbat nan u kpanbar na nyii Lakis-a, ki kɔn nan digbann nba kpia nan Lakis, ki bi yir Libna nae, ki u saan leŋ a wun pak nanɔ. ⁹Mɔmaan din baar Asiria teeb na nan Sudann bat Tirhaka gar Ijipt kunkɔnkɔnna tɔɔnn, ki baat a bin worib. Asiria kpanbar na nba gbat nna maŋ, ki u tur Juda kpanbar Hesekia gbouŋ ¹⁰a wun yetɔ a, “Yennu nba ki a teenɔ yada na paka nan a kan kɔɔ n nuu ni, ŋaan a daa te ki linba na kpanna ni. ¹¹A gbia linba kur ki Asiria kpanbar tuu tuun ki teen digbana nba kur ki u dukin a wun biirir. A dukin nan a saa fit mir bota-a? ¹²N yeejamm din biir Gosann nan Harann nan Resef doi, ki kpii Bef Edenn niib nba din be Telasar na, ki bi tingbana din ki fit tinnib. ¹³Digbana nba tee Hamaf nan Arpad nan Sefarfaim nan Hena nan Ifa na kpanbara be lia?”

¹⁴Ki kpanbar Hesekia gaar gbouŋ na toomiinba na boor, ki karin. Li poor po ki u saan Yenjiantu ŋasaakak ni, ki saa paan gbouŋ maŋ Yennu tɔɔnn, ¹⁵ŋaan miar Yennu a, ¹⁶“Yabint Yomdaanɔ, timm Israel teeb Yennu nba kar a naan binbintir paak, bona nba mɔk kpinkpant na37.16 Bi maan ni, bi yib “cherubime”, ki bi naan bonkobit, ŋaan mɔk kpinkpant. paapo, fin kɔɔe tee Yennu, ki dia durinya na naan gbant kur. Fine nan tingbouŋ nan sanpaak. ¹⁷Yennu, gotir linba tuun ki teent na. Gbiintir linba ki kpanbar Senakerib piak ki sukii fin Yennu nba fo na. ¹⁸Yennu, ti kura mi nan Asiria kpanbara maŋ biir digbana bonchiann, ki yaan li tinii, ¹⁹ki joo bi tingbana muu. Tingbana maŋ ki tee Yennu kaa, bi tee bonninnant nba tee tikpeet nan tanae, ki nisaarii teen nan bi nii. ²⁰Ti Yomdaanɔ Yennu, nyintit Asiria teeb na nuu ni, ki te tingbouŋ na digbana kur niib n bann nan fin kɔɔe tee Yennu.”

Ki jiin kpanbar Senakerib baak po

(2 Kpanbara 19.20-37)

²¹Ki Aisaya nakin ki pak kpanbar Hesekia nan u miaru jiinue na, ²²a Yennu yet a, “Jerusalem doo laa fin Senakerib-e, ki sarikita. ²³A dukii a tuu sukii ŋmee ki fiakitɔ na? A ki tur min Israel teeb kasii Yennu baakiri. ²⁴A tun toomii a bii dont bi mɔŋ n boor nan fin nan a taantorit kɔn nyann Lebanonn jɔjaana nawa. A want a mɔŋ nan a chɔɔ leŋ kpek-foot, nan leŋ naasei nba ŋan, ki kɔɔ baar tiiuk na sinsuuk niwa. ²⁵A want a mɔŋ nan a gbiir bunbuna digbangana ni, ki nyuu li nyun, ki a jab ŋmaa ki tɔŋ Nail mɔkir ki fɔɔrir.

²⁶“A ki ban gbat nan n lor linba na sianyooewa-a? Ki mɔtana ki n ji tun. Mine tura yiikoo ki a tunn digbanjaana ki poonir tangbiinkpeka. ²⁷Binba din kɔɔ leŋ na din kaa paŋ. Bi din tiin jaŋmaaniie ki dii fei. Bi din tee nan sarwaauk ni mɔɔt nae, koo mɔɔt nba pia mɔpinn paak, ki wɔruk baar koorib na.

²⁸“Ŋaan n mi a binbeŋ kur, faa tuun linba nan faa saa sian. N mi faa donn wutoor n paak biaŋinba. ²⁹N gbat labaar ki jiin a wutoor nan a parbifaant na powa, ki mɔtana n saa tuun janpeenu a miar ni, ki kɔɔn garika a mɔb ni, ki tɔkin nana sɔnu nba ki a tɔkin baar na, ki jiina.”

³⁰Ki Aisaya pak kpanbar Hesekia a, “Linba saa tun na nyinne na: Binn na nan binn nba waa na ni, i sii di muuk ni bonpipiate, ŋaan binn nba ji saa wei ŋantaa na ni, i saa bur dii ki jaanir, ki bur tiinii ki di li lɔɔna. ³¹Binba tinn ki be Juda sii mɔkitir nan tiik nba ki u jiina tuu sik tinpɔɔr ni, ki u loon lɔɔna biaŋinba nae. ³²Niib sii be Jerusalem nan Sayɔnn kunkonn paak ki tee binba tinn, kimaan Yabint Yennu-e lor a linba na n tun.

³³“Yennu nba ŋamm pak linba ki jiin Asiria kpanbar na poe na: ‘U kan kɔɔ Jerusalem, koo ki tɔr peenu. Jab nba lia tɔb liant na kan nakin doo maŋi, koo ki maa tɔb dindena ki lintiri. ³⁴Sɔnu nba ki bi bo tɔkin baar na, bi saa ŋmat tɔkin li sɔnue ki kun, ki poŋ kan kɔɔ doo maŋ ni kaawa. Min Yennu-e pak na. ³⁵N saa kɔn doo maŋ paak ki guurir, kimaan n tiɔŋ baakir, nan mɔsonn nba ki n senn ki tur n toontunnɔ Defid na paak.’ ”

³⁶Ŋanne ki Yennu malaka saan Asiria teeb kaaŋ ni, ki saa kpii jab tusaa kobik nan piinniin nan ŋanŋmu. Laa yent sanyiɔk ki bi dɔɔ ki kpowa. ³⁷Ki Asiria kpanbar Senakerib ŋmat kun Ninefe. ³⁸Dasiar ki u tan jiantir u tingbann Nisrok jiantu diiuk ni, ki u bonjai banlee nba tee Adra-melek nan Sareser jii bi takoobii ki kpiiu, ŋaan chiar saan Ararat tiŋ ni. Ki u bonjaleek, wunba sann tee Esar-hadonn na, gaar u naan.

Ki jiin kpanbar Hesekia baatuk nan u paaku po

(2 Kpanbara 20.1-11; 2 Barkperii 32.24-26)

¹Yoo na ni ki kpanbar Hesekia dɔɔ nan baatuk ki per kuuma. Ki Amos bija Aisaya nba tee Yennu sɔkinii na yetɔ a, “Yennu piaka, a li tee fan ŋmakit bont kur fanue, kimaan a kan paaki. Teent siir nan kuun.”

²Ki Hesekia ŋmant u numm ki tor dikpinn, ŋaan miar Yennu a, ³“Yennu, tiat nan n weia fanu nan baakir, ki yoo kur ki n yiab a n tun linba ki a loon man tun.” Li yoo na ki u piin ki mɔ nan parbiir.

⁴Ki Yennu wann Aisaya ⁵a wun ŋmat Hesekia boor ki saa pakɔ a, “Min Yennu nba tee a yeeja Defid Yomdaanɔ na gbat a miaru nawa, ki bia la a ninnyuut nawa. N saa te ki a manfoor n pukin bina piik nan ŋanŋmu. ⁶N saa tinn fin nan Jerusalem digbann na Asiria kpanbar nuu ni, ki n bia saa tukin kii guu digbann maŋ.”

²¹Ki Aisaya yet Hesekia a bin jii kinkana ki ŋann ki pɔr u mɔra na, ki u saa la laafia. ²²Ki kpanbar Hesekia boi a, “Nyinlanne want nan n tan saa fit saan Yenjiantu ŋasaakak ni?”

⁷Ki Aisaya jiin a, “Yennu saa tura nyinn ki lin wann nan u sii dia u mɔsonn. ⁸Taaŋmaata nba ki kpanbar Ahas din maa na, Yennu saa te ki li taaŋmaata yunyuŋ n ŋmat poor, taar piik.” Ki taaŋmaata na yunyuŋ ŋmat poor taar piik.

⁹Hesekia nba la laafia yoo nba ki u sɔb dontir yaŋ na a:

¹⁰N bo dukin nan manfoor sinsuuk nie ki n saa kpeentiŋ,

ki n manfoor saa pot jinjiŋe.

¹¹N dukin nan n kan ban la Yennu koo nisaarik tingbouŋ na ni.

¹²N manfoor bo pote ki gbenn, nan baa tuu chaat lanbouŋ na,

nan baa saa pot chinchenn nba ki bi daa luu na.

Ki n dukin nan Yennu gbent n manfoore na.

¹³Tont te ki n bui nyɔtunmunn, ki li naan yanbɔre kɔnii n kpaba,

ki n dukin nan Yennu gbent n manfoore na.

¹⁴Ki n kunkɔr waab ki baŋ, ki n mɔ nan ŋmann na.

Ki n ninbina bak nan sanpaapo gotu.

Yennu, nyintin daamii na kur ni.

¹⁵N saa pak a bee? Yennu-e tun linba na.

N par biire, ki n kan fit gɔɔn.

¹⁶Yennu, n sii tee a yɔɔe, a kuukɔɔ yɔɔ.

Turmin laafia, ki te mii fo.

¹⁷N tont na saa kpant manue.

A nyinn n manfoor ninbɔŋ kur niwa.

A nyikin chab n biit kura.

¹⁸Sɔɔ kaa kpeentiŋ ki saa fit donta.

Kpeemm kan fit teen yada a mamɔmm ni.

¹⁹Binba fo nae dontira, nan maa dontira mɔtana na.

Bibaanba piak bi waas, a mamɔmm po.

²⁰Yennu, a turin laafiawa.

Ti saa faa kɔna ki donta,

ki yin donta, a jiantu ŋasaakak ni, ti manfoor ni kur.

Ki jiin toomiinba nba nyii Babilonn na po

(2 Kpanbara 20.12-19)

¹Li sakir ni, ki Babilonn kpanbar Merodak Baladann, wunba tee Baladann bija na, gbat nan Hesekia tuu yiar ŋaan la laafiawa, ki u tun toomiinba ki turɔ gbouŋ nan piinii. ²Hesekia din gaar toomiinba na saauŋ, ŋaan wannib u mɔkint nba tee salimpeena nan salimmɔna nan bonnunubit nan tulaarii, nan u jatiat. Siar din ki biar u bonbibekit diiuk ni, koo u yent na siar boor ki u ki wannibi. ³Ki Yennu sɔkinii Aisaya saan kpanbar Hesekia na boor ki boiɔ a, “Jab na nyii lee? Bi pak bee ki turani?”

Hesekia din jiin a, “Bi nyii Babilonia-e, banfɔkira.”

⁴Ki Aisaya boiɔ a, “Bi la bee a naan ŋaak na ni?”

Ki Hesekia jiin a, “Bi la bona kurawa. Siar ki tenn bonbibekit diiuk na ni, ki n ki wannibi.”

⁵Ki Aisaya yet kpanbar na a, “Yabint Yennu piak ⁶nan yoo baat ki linba be a ŋaak na ni, linba ki a yeejamm din bɔr nan dinna, Babilonn teeb tan saa jiir ki kun nann. Siar tan kan tenn. ⁷Bi tan saa jii a tiɔŋ yaaboona na siab, ki yaat saan namm Babilonn, ki teenib jatɔɔka, Babilonn kpanbar ŋaak.”

⁸Hesekia din bann maan maŋ paak, nan parmaasir nan manue sii be, yoo nba ki u be u manfoor ni na. Ŋanne ki u jiin a, “Maan nba ki Yennu paka, ki a wannin na ŋan.”

Ki jiin dindann mɔmaan po

¹Ki Yennu yet a, “Maant n niib para, maant n niib para.

²Turin Jerusalem teeb na parcheenn.

Pakimm nan bi dii fara ki li yukir jaŋa,

ki mɔtana bi biit la nyikinchaba.

N dat bi tuba bi biit kur paaka.”

³Sɔɔ hoot ki yeen a, “Ŋammit sɔnu muuk ni, ki tur Yennu,

ŋammit sɔnu kunkoouk paak, ki turɔ.

⁴Gbeent baauk kur, ki yeer jɔɔr kur ki naa.

Kunkona saa boor naa,

ki digbann nba tee bongbetima na saa naa, ki ŋarik.

⁵Ŋanne ki Yennu yiikoo saa dɔkit, ki nisaarii kur saa lar.

Yennu tiɔŋo tur mɔsonn na.”

⁶Kunkɔr hoot a, “Mɔɔntir mɔmaan.”

Ki n boi a, “Mɔmaan boorbee ki n saa mɔɔnti?”

Ki kunkɔr na jiin a, “A mɔɔnt nan nisaarii kur tee nan mɔɔt nae.

Bi ki yukii nan puuk nba ki yukii nae.

⁷Mɔɔt tuu jɔɔke, ki puuk n koor,

yoo nba ki Yennu tun wouŋ ki li da gar li paak.

Nisaarii ki yukii nan mɔɔt nba ki yukii nae.

⁸Barmɔnii, mɔɔt tuu jɔɔke ki puuk n koor,

ŋaan Yennu maan ŋarin yɔɔ be-e.”

⁹Jerusalem teeb, ii do jɔfoouk paak ki saa mɔɔnt barŋanii na.

Sayɔnn teeb, yiint nan kunkɔsaakar, ki mɔɔnt barŋanii na.

Pakin, ki daa tiin jaŋmaanii. Betir Juda doi na, a bi Yennu baat.

¹⁰Yabint Yennu baat a wun dia durinya na nan yiikoo.

U baat ki dia niib nba ki u tinnib na.

¹¹U saa got u pei na, nan u tee pekpaarik nae,

ki taan pebis na ki diab u nii ni;

u saa somm nan penaant na, nan sukuru.

Ki jiin Israel teeb Yennu nba kaa lɔɔ na po

¹²Sɔɔ saa fit jii mɔkgbeŋir ki bikin u niipant niwa-a?

koo sɔɔ saa fit jii u nii ki bikin sanpaaka-a?

Sɔɔ saa fit jii tingbouŋ na tant kur ki bikin ŋmanbaŋ niwa-a?

koo sɔɔ saa fit jii jɔjaana nan kunkona

ki bikin churu paaka-a?

¹³Sɔɔ saa fit wann Yennu waa sii tuun biaŋinbawa-a?

koo ŋmee saa fit tumii Yennu, koo ki turɔ kpaanii?

¹⁴Yennu tuu boi ŋmeewa ki fit bann bont paak,

koo ki bann bona nba sii tuun biaŋinba?

¹⁵Yennu boor, digbana tee yanne,

li tee nan nyun nba tuu too kpek nae.

Kunkona nba see mɔkgbeŋa ni na fukii nan tangbiruŋ nae.

¹⁶Bonkobit nba kur be Lebanonn fɔɔr ni na maruŋ

kan jaŋ Yennu, ki li tiinii na kur kan jaŋ li muu.

¹⁷Digbana na ki tee siar u boori.

¹⁸Ti saa bikin Yennu nan ŋmee? A saa bikinɔ nlee?

¹⁹U ki tee nan yenbik nba ki toontunna maa na kaa,

u ki tee nan yenbik nba ki saauk damm jii salimmɔna ki pɔr,

ki sennir salimpeenboota ni na kaa.

²⁰Jɔɔ nba kan fit la salimpeena koo salimmɔna

tuu gann tiik nba ki dute,

ki kpaan tikpeerɔ nba mi tikpeet fanu,

ki wun kpeer bonninnauŋ nba kan fit baa.

²¹I ki mi-i? Bi din ki paki yaayoo ni-i?

I ki gbat durinya na nba din piin biaŋinba-a?

²²Wunba kar u naan gbant paak nae din nan durinya na.

U be tingbouŋ nan sanpaak liik poewa,

ki nisaarii nba be tingbouŋ na ni waar ki tee nan lannyanii na.

Ŋɔɔe jɔnn sanpagbouŋ na nan jinjɔŋ na,

ki li naan diiuk nba ki nirɔ sii be li ni.

²³Ŋɔɔe sikint doo diara nba mɔk yiikoo ki teeb yann.

²⁴Bi tee nan bont nba tuu pia ki daa ki baa jiina nae.

Yennu-i te ki wouŋ da yoo nba, bi tuu koore,

ki wei wouŋ nan mɔɔt na.

²⁵Ti saa bikin kasii Yennu na nan ŋmee?

Sɔɔ be ki tee nan ŋɔɔ na-a?

²⁶Gotir sanpaak. Ŋmee nan ŋmaabira nba ki a laat na?

Li tee wunba gar bi tɔɔnn nan nirɔ nba saa gar nibur tɔɔnn nae.

U mi ŋmaabira maŋ kann nba tee, ki yi ŋmaabir kur nan u sann.

U yiikoo yab bonchiann, ki nan ŋmaabir yennkɔɔwa ki boori.

²⁷Israel teeb, bee ki i burin a Yennu ki mi i daamii,

koo u baka kaa nan yaa ki laat mɔnii na po?

²⁸I ki mi-i? I ki gbati-i?

Yennu tee Yomdaanɔ nba yɔɔ be-e yaayoo siiyoo;

ŋɔɔe nan durinya na kur.

U ki bakit koo ki miatiri. Sɔɔ ki bant u dudukit paak.

²⁹Ŋɔɔe teen binba bak ki chɔk na paŋ.

³⁰Binba paan na gbaa baŋit, ki naasimm bakit,

³¹ŋaan binba teen bi dindann Yennu ni ki loon sommir na,

ŋɔɔ Yennu-e saa ŋamm pant bi paŋ.

Bi sii mɔk paŋ nan baakaa nae, ki do sanpaapo.

Bi saa tin, ŋaan kan bakii, ki sii somm, ki ki baŋit.

Ki jiin Yennu mɔsonn nan Israel teeb po

¹Yennu yet a, “Yimm digbanbanfɔka damm na,

ii ŋmin man, ki gbiint turin.

Ii teen siir ki saan nan i maan, barbuut boor,

ki i saa la yaak ki pak.

Ŋaant ki ti lakin taan ki la wunba mɔk mɔnii.

²“Ŋmee din nyii nan nyannu daanɔ na yondo po,

ki turɔ nyannu siaminba kur ki u saani?

Ŋmee din te ki u nyann kpanbara nan digbana?

U takoobu na chɔɔ butib nan bi tee tangbiruŋ nae,

ki u peenii yatib nan wouŋ nba tuu yat mɔɔt na.

³U waa beeribe u yamani,

ki kakii ki u taa ki baat tiŋ fanu.

⁴Ŋmee din te linba na tumi?

Ŋmee te ki bona tuun, laa tuun biaŋinba na?

Min Yennu din be pinpiik ni, ki min Yennu bia sii be li joontu.

⁵“Digbanbanfɔka niib la maa tun linbawa;

bi jekire ki jat baantir nan jaŋmaanii.

Bi kur taan leebe ki baar.

⁶Nuu toontunna na sommit bi leeb ki teemm parcheenn.

⁷Kanpinta tuu yet saauk daanɔe a, ‘A yabira.’

Ki wunba ŋamii patir na teen wunba kpaan patir maŋ kpaŋ-n-mɔŋ.

Bi tuu yet a, ‘Li tukinu na ŋan,’ ki ji jii kpai ki kpaa patir na.

⁸“Ŋaan yimm Israel teebe tee n toontunna,

ki tee niib nba ki n gann, kii tee n yɔɔk Abraham yaaboona.

⁹N din nyii nani durinya na kpinii poe,

ki yiini banfɔkawa ki i baar.

Ki n yeti a, ‘Yimme tee n toontunna.’

N din ki yêti kaa, ŋaan n din gannie.

¹⁰I daa tiin jaŋmaanii. N be nani.

Mine tee i Yennu. I daa te ki siar kɔɔnti jaŋmaanii.

N saa turi paŋ ki sommi. N saa guuri, ki tinni.

¹¹“Binba donn wutoor i paak na

saa bann baak fei nba tee biaŋinba.

Binba kɔn nani na saa kpo,

¹²ki bot tingbouŋ na ni.

¹³Mine tee i Yomdaanɔ Yennu; n teeni paŋ ki beeri a,

‘Daa tiin jaŋmaanii, n saa sommiwa.’ ”

¹⁴Ki Yennu bia yet a, “Yimm Israel teeb nba lek ki yab

ki bia ki mɔk paŋ na, ŋaan i daa tiin jaŋmaanii,

n saa sommiwa.

Min nba tee yimm Israel teeb kasii Yennu nae tee i tinntɔɔ.

¹⁵N saa teeni nan diboolanbana nae,

ki i sii paan ki bia porin, ki i saa boor jɔɔt ki bet,

ki kunkona saa boor ki kpant tanbiinii.

¹⁶I saa faa donnib sanpaapo, ki wouŋ n pebirib ki yaat,

ki wonpaaruk saa yatib.

Ki i ji sii mɔk parpeenn, kimaan mine tee i Yennu;

ki i saa dont min nba tee yimm Israel teeb kasii Yennu na sann.

¹⁷“N niib nba tee tarii na kunkɔra-i koor,

ki bi loon nyun yoo nba, min Yennu saa gat bi miaru.

Min Israel teeb Yennu na kan ban nyɔr nyikibi.

¹⁸N saa te ki mɔka puub kunkonkoona paak,

ki nyuntona nyi baat ni.

N saa kpint kunkoot ki teenir nyundɔɔna,

ki kpint tinkooŋ ki teenir nyuntona.

¹⁹N saa te kpekii nan kpinkpant nan kpan tiinii

nan tulaarii tiinii n pia kunkoouk paak.

Tiinii saa pia kunkoouk paak,

li foi nan naagbasukirii nan kɔɔnsaant.

²⁰Niib saa la nna, ki bann nan min Yennu-e tumir.

Bi saa bann nan Israel teeb kasii Yennu-e te ki li tun.”

Ki jiin Yenmɔnu nan tingbana po

²¹Yennu nba tee Israel teeb kpanbar na piak a:

“Yimm digbana tingbana na, baat nan i maan man.

Baat nan i mɔna-chinchibir nba ki i mɔk.

²²Baat nna man, ki bunt linba saa tun,

ki li-i tun yoo nba, tin bann.

Want barbuut na ni, linba din tun yaayoo ni, ki bia yetit li paak.

²³Betirit linba saa tun tɔɔnn po, ki tin bann nan i tee yenniie.

Tumin toonŋansiar, koo baat nan biak.

Ii te ki jaŋmaanii nan yaar lituk n soorit.

²⁴Yimm nan i toona kur tee yanne,

binba jiantiri na nubir pɔie n boor.

²⁵“N gann jasɔɔ, ki u be yondo po.

N saa baar nanɔ ki wun tan piin gaŋ po ki lek.

U ŋmaat doo diara nan tanmaatit nae,

ki bia tee nan yɔkmaarɔ nba tuu ŋmaat yɔk tant biaŋinba na.

²⁶I ŋmee bunt nan linba na saa tumii,

ki tin fit yet nan u mɔk mɔnii?

I sɔɔ ki pak mɔbonn ki jiin li po. Sɔɔ ki gbat ki i pak siari.

²⁷Min Yennu-e tee sinsinn daanɔ nba yet Sayɔnn teeb maan maŋ.

N tun toomii Jerusalem maa wun pak a,

‘A niib kpent. Bi kpent bi doo ni.’

²⁸Maa got tingbana na, bi sɔɔ ki mɔk siar ki saa pak,

nan bi yenɔkɔɔwa ki fit jiin buboit nba ki n boi na.

²⁹Tingbana na kur ki mɔk nyɔɔti, bi kan fit teen siari;

tingbana na tee butimme, bi kaa pansiaki.”

Ki jiin Yennu toontunnɔ na po

¹Yennu bia yet a, “N toontunnɔe na, ŋɔɔe ki n kɔɔnɔ paŋ.

Ŋɔɔe ki n gannɔ, ki n par mei u paak.

N jii n Seeke ki teen u ni,

ki u saa baar nan buut nba took digbana kur paak.

²U kan hoot, koo ki donn kunkɔr sanpaapo,

koo ki pak nan kunkɔsaakar sɔnii ni.

³U tan kan kɔnn lanbankɔɔnn ki tonti,

ki bia tan kan kpeen fitir nba ki di fanu.

U saa baar nan mamɔmm nba yɔɔ be-e sɔɔ kur paak.

⁴U kan ŋaa tama, koo dindanni;

u saa baar nan mamɔmme durinya paak.

Digbanbanfɔka damm kpan guu u tumiiue.”

⁵Yennu-e nan sanpaak ki jɔnnir,

ki ŋamm tingbouŋ na nan linba kur be li ni,

ki tur li niib kur manfoor nan foon.

Ki mɔtana, Yomdaanɔ Yennu maŋe yet u toontunnɔ a,

⁶“Min Yennu-e yiina ki tura yiikoo

maa fan te ki mamɔmm-i be tingbouŋ na paak.

Li saa nyi a nie, ki n saa lor mɔlor nan nisaarii;

li saa nyi a nie, ki n saa baar nan yentu, digbana kur paak.

⁷A saa munt jɔɔnii ninbina,

ki nyinn binba be bunbɔnn, dansarii ni na ki lub.

⁸“Min kuukɔɔe tee a Yomdaanɔ Yennu.

Yensɔɔ ji kaa ki saa chent nanin n baakiri.

N kan te ki pata n chent nanin n dontir na.

⁹Maa din yet linba na teen mɔniiwa.

Mɔtana, n saa paki bonsaanaewa, ki lin tan lian tun.”

Yaŋ nba jiin dontir po

¹⁰Yinin yanpaaŋ ki tur Yennu, durinya kur n yin dontɔ.

Yimm nba be ŋarint ni, nyun paak na, ii dontɔ,

bonfoa nba kur be nyun ni, ii dontɔ.

Digbanbanfɔka nan niib nba kur be leŋ, ii yiin man.

¹¹Kunkoouk nan li doi n dont Yennu,

ŋaant ki Kedar teeb n dontɔ.

Ŋaant binba be Sela doo ni na-ii hoot nan parpeenn

kunkona yura paak.

¹²Ŋaant binba be digbanbanfɔka na n tur Yennu dontir

nan baakir.

¹³Yennu tuu nyi ki kɔn, nan u tee kunkɔnkɔnnɔ nae,

u teen siire, ki u nunii mɔn tɔb paak.

U tuu yikin kɔnn wuyikiniie, ki hoot tɔb hootii,

ki tan nyann u datai.

Ki jiin Yennu mɔsonn po

¹⁴Ki Yennu yet a, “N ŋmin ki li wei bonchiann,

ki ki tur n niib gatu.

Ŋaan mɔtana, yoo baar nan man tun n toonn na;

n yikin nan poo nba tuu yaa wun mar nae.

¹⁵N saa biir kunkona nan jɔɔt, ki te mɔɔt nan tiinii kur n koor.

N saa kpint mɔka ki teenir kunkoot, ki te nyundɔɔna kur n fɔɔr.

¹⁶“N saa tɔkin nan n jɔɔnii na, sɔnu nba ki bi ki ban tɔkine.

N saa kpint bi bunbɔnn na ki teenir yentu,

ki naa digbangbetima na ki turib.

N mɔsonae na, ki n saa dia mɔsona maŋa.

¹⁷Binba kur teen pata yada, ki yi bonninnant bi yennii na

saa sik tiŋ ni ki di fei.”

Biaŋinba ki Israel teeb gbar bin tumii yan

¹⁸Ki Yennu yet a, “Yimm tuukpaa na, gbiintir man,

yimm jɔɔnii na, gotir fanu man.

¹⁹Sɔɔ tee jɔɔŋ ki gar n toontunnɔ-ɔ?

koo ki tee tuukpaar ki gar wunba ki n tumɔ na-a?

²⁰Israel teeb, i la bona bonchiann, ŋaan i ki jiir ki tun toonni.

I mɔk tuba ki gbia, ŋaan i kpan gbat bee?”

²¹Yennu tee Yomdaanɔ nba ki u nunii mɔn nan wun tinn niibe,

ŋanne ki u donn u sennii nan u wannu na sanpaapo,

ki loon u niib n turir baakir.

²²Ŋaan u niib na datai fatiba ki loonib dansarik ni,

ki bi nyint leŋ.

Bi jamme ki fat bi bona, ki sɔɔ kaa ki saa sommibi.

²³I sɔɔ saa gbiint linba na-a?

Laa nyii mɔtana ki saa, i sii gbiintir fanu-u?

²⁴Ŋmee jii Israel teeb ki tur fat-teeb na?

Li tee Yennu nba ki ti tuun biirɔ na tiɔŋo.

Ti ki be nan waa loon tii be na,

koo ki sak tumiiu nba ki u turit na.

²⁵Ŋanne te ki u wutoor gbatit, ki ti di tɔb wahala.

U wutoor di Israel kur po nan muu nae,

ŋaan ti din ki bann linba tuun ki tumii siar li ni.

Ki jiin Yennu tinnu mɔsonn po

¹Israel teeb, Yennu nba nami na yeen a,

“I daa tiin jaŋmaanii, n saa tinniwa.

N yi i sanae, kimaan i tee n yabe.

²Yi-i sik nyun sunsuŋ ni, ŋaan n sii be nani.

I daamii kan nyanni. Yi-i kɔɔ muu ni, ŋaan li kan di-i;

ki bonpaarir nba baarii, ŋaan li kan teeni siari.

³Kimaan mine tee i Yomdaanɔ Yennu,

Israel teeb kasii Yennu, wunba tinti na.

N saa jii Ijipt nan Sudann nan Seba-e,

ki lin teen i tinnu paatii.

⁴N saa jii digbanmunne ki lin teen i tinnu paatii,

kimaan i ŋan ki turin, ki n looni ki te niib teeni baakir.

⁵I daa tiin jaŋmaanii. N be nani.

“N saa jii i niib yondo po nan yonbaa po, ki kpen namm.

⁶N saa pak gaŋ po ki wun te bin kun,

ki bia pak diitu po ki u daa gɔibi.

Ŋaant ki n niib n nyi banfɔka, durinya na munn po, ki ŋmat kun.

⁷Bi tee n tiɔŋ niibe, ki n namm a bii baakitin.”

Biaŋinba ki Israel teeb na tee Yennu siara damm

⁸Ki Yennu yet a, “Tikit n niib barbuut boor.

Bi mɔk ninbina, ŋaan bi tee jɔɔniie.

Bi mɔk tuba, ŋaan bi tee tuukpaae.

⁹Tikit niib na, ki bin baar buut boor.

Bi yenlanɔe saa fit bunt linba tan saa tumii?

Bi ŋmee din bunt linba tan tuun mɔtana na?

Ŋaant ki yennii maŋ n baar nan bi siara damm

ki wann nan bi mɔk mɔnii, ki wann bi mɔnii bi mɔbona ni.

¹⁰“Israel teeb, yimme tee n siara damm;

n gann yimme maa yii tee n toontunna,

ki fit bannin, ki teenin yada,

ki bia bann nan mine tee Yen-yemmir.

Yennu ji kaa ki pukin n po;

yensau din kaa kawa, ki yensau bia kan ban kii be.

¹¹“Min kuukɔɔe tee Yennu, min kɔɔe saa fit tinni.

¹²Mine bunt linba saa tun, ki bia baar a man sommi.

Yenganu ki ban tun linba na, yimme tee n siara damm.

¹³Mine tee Yennu, ki bia sii yɔɔ tee.

Sɔɔ kaa ki saa fit nyi n yiikoo ni,

sɔɔ bia kaa ki saa fit lebit maa tuun linba.”

Ki jiin Israel teeb tinnu po

¹⁴Israel teeb kasii Yennu, wunba tinti na yeen a,

“N saa tun kunkɔnkɔnnae Babilonn ki tinni,

n saa biir doo maŋ tammɔi,

ki li niib hootii na saa kpant mɔŋ.

¹⁵Mine tee Yennu nba tee i kasii Yomdaanɔ.

Mine nan yimm Israel teeb, ki bia tee i kpanbar.”

¹⁶Sianyoo Yennu din teen sɔnjouk ki gaan mɔkgbeŋir ni,

ki faa sɔnu ki gaan nyunpubirkan ni,

¹⁷ki biir kunkɔnkɔnna bonchiann,

ki bi tee jab nba mɔk taantorit nan taanii.

Ki bi sik, ki kan ban do,

ki bot nan fitir muu nba tuu kpeen na.

¹⁸Ŋaan ki Yennu yet a,

“I daa maa linba tun ki gar sian yoowa,

koo ki gaa li paaki.

¹⁹Ii gorii bonpaann nba ki n yaa man tun na.

Li poŋ tuume, ki i saa fit lar mɔtana.

N saa faa sɔnu ki gaan kunkoouk paak,

ki turi kpenii nba mɔk nyun leŋ.

²⁰Muuk ni bonkobit gbaa saa baakin;

mɔbɔi nan naamiant saa dontin,

yoo nba ki n te mɔka puub kunkoouk paak

a lin tur n nigannkab nyun na.

²¹N nan ŋamme ki bi tee n tiɔŋ niib, ki bi saa yin ki dontin.”

Ki jiin Israel teeb biit tumu po

²²Ki Yennu yet a, “Ŋaan yimm Israel teeb din miatime,

ki ki jiantirin.

²³I ki baar nan i mujoonu maruŋ pei ki turimi,

i ki turin baakir nan i maruŋu.

N din ki turi jikir kaa nan maa boi-i maruŋ po na,

koo n ki bakinti kaa nan maa boi-i bonnunubit po na.

²⁴I ki daa bonnunubit ki turin,

i bia ki maan n par nan i bonkobit kpapana,

ŋaan jinnin i biit jik-kpiata,

ki te ki n bak nan biit nba ki i tun na.

²⁵Ŋaan mine bia tee Yennu nba nyikin i biit ki chabiti;

n tuun linba na, kimaan maa tee wunba na paake.

N kan biiri, i biit paaki.

²⁶“Ŋaant ki tin saan buut boor, baat nan i maan man.

Pakin i maan, ki wann nan i mɔk mɔnii.

²⁷I yeeja sinsinn din tun biite, ki i tɔɔndamm tun ki biirin,

²⁸ki i doo diara biir n kasii boor.

Ŋanne ki n baar nan biiru yimm Israel teeb paak,

ki te ki bi sukii yimm n tiɔŋ niib.”

Yennu kuukɔɔe tee ti Yomdaanɔ

¹Yennu yet a, “Gbiintir man, yimm Israel teeb nba tee

Jakɔb yaaboona, ki tee n toontunna nba ki n gann.

²Mine tee Yennu nba nami, ki sommiti i maaru niwa.

I daa tiin jaŋmaanii, i tee n toontunnae,

ki tee niib nba ki n gann ki looni.

³N saa tur tiŋ nba ki nyunkon be na nyun,

ki te kpenii puub tinkooŋ ni.

N saa mɔɔn n Seek i waas paak,

ki bia mɔɔn n piisin i yaaboona paak.

⁴Bi saa yit nan mɔɔt nba ki bi maanir nyun fanu nae,

ki lat nan kpentiiuk na.

⁵“Niib sii yeen leeb yenɔ yenɔ a, ‘N tee Yennu yɔɔe.’

Bi saa baar ki tan pukin Israel teeb po.

Sɔɔ kur saa sɔb Yennu sann u nuu paak,

ki sii yi u mɔŋ Yennu niib na yenɔ.”

⁶Yabint Yennu nba dia Israel teeb, ki bia guub na piak a,

“Mine tee pinpiik nan joontu, ki tee Yen-yemmir,

yensau ji kaa ki pukin n po.

⁷Sɔɔ be ki saa fit tun linba ki n tun na-a?

Ŋmee din saa fit wann linba saa tun,

laa nyii piinu niwa ki tan tuu gbennu?

⁸N niib, i daa tiin jaŋmaanii.

I mi nan laa nyii yaayoo niwa ki tan tuu mɔtana,

n buntir linba saa tume, ki i tee n siara damm.

Yensau ji be pukini-i?

Yensau be ki mɔk yiikoo, ŋaan ki n ki mi gbat u po-o?”

Biaŋinba ki patmannu tee jatii

⁹Binba kur maa pata na kaa nyɔɔti, ki bi pata nba ki bi dontib sanpaapo bonchiann maŋ kaa nyɔɔt. Binba jiantir pata maŋ tee jɔɔniie, ki bia ki mi siar, ki tan saa di feiwa. ¹⁰Li ki ŋan sɔɔ n jii kut ki nan siar ki jiantir, a li tee Yennu. ¹¹Wunba kur jiantirir saa di feiwa. Binba naan pata na tee nisaariie, bi ki tee siar. Ŋaant ki bin baar ki bin bu bi buut. Bi tan saa jekir ki di fei.

¹²Saauk daanɔ tuu jii kute ki pur muu ni, ki jii jaar ki boor kut na nan paŋ, nan laa tan saa teen waa loon linba. Waa tuu tuun na, kon nan nyunnyukuru tuu soorɔe, ki wun bia bak.

¹³Kanpinta tuu bikin taabue, ki jii bonsɔbkar ki nan linba ki u loon, ki kpeerir ki li ji naan nirɔ, ki tee nifaŋ, ki wun sennir u ŋaak ni. ¹⁴U saa fit chɔɔ kpek ki kpeer, koo tijakper, koo kɔɔnsaauŋ fɔɔr ni, koo u saa fit bur tisiak, ki guu a saak n baa ki lin kpaat. ¹⁵Nisaarik tuu jii tiik chianue, ki li tee daat ki u jokit muu, ki jii chianu nba tenn na ki nan patir. Tiik bɔkyenne ki nirɔ tuu jii ki teen daat ki nanii, ki bia teen jeet, ki jii bɔkleer na ki teen patir, ki jiantir. ¹⁶U tuu jii tiik na dayente, ki joo muu ki pur nant, ki ŋman tan gboo. U tuu nanii muu nae ki yet a, “Li ton ki man bonchiann. Muu na man bonchiann.” ¹⁷Daat nba tenn na, wun jii ki nan patir, ki gbaa jiantir. U tuu mei patir maŋe, ki yeen a, “Fine tee n yennu, a tinnin.”

¹⁸Li nibooru liisin paak ki bi ki fit bant baa tuun linba. Bi mun bi nuniie, ki nyar bi tuba, ki jiin barmɔnii po. ¹⁹Wunba naan pata na ki mɔk yan nba ki u saa yet a, “Daat maŋ yenn nbae ki n joo muu na. N pur boroboro nan nant li muu nie, ki ŋman, ŋaan tont daat nba tenn na ki nan patir, mɔtana n ji jiantir daat maŋe.”

²⁰Nirɔ-i di tanpent, li sɔ. U jatdudukit na turimɔ, ki li paak niiwa ki sɔɔ ji kan fit sommɔ. U kan sak nan patir nba ki u dia u nuu ni na ki tee siar nan waama.

Yennu-e tee naamii daanɔ nan tinntɔɔ.

²¹Yennu yet a, “Israel teeb, ii tian linba na man,

ii tian nan i tee n toontunnae.

Mine nami a yii tee n toontunna, ki n kan ban tamm i po.

²²N wuur i biit ki li yaat

nan sanpagbouŋ nba tuu gar biaŋinba nae.

Jennin n boor man; mine tee wunba tinti.”

²³Sanpaak, ii hoot nan kpinkpammuk. Tingbouŋ, ii hoot.

Kunkona nan fɔɔr ni tiik kur n hoot nan kpinkpammuk.

Yennu tinn u niib Israel teebe, ki li wann u yiikoo nba tee.

²⁴“Mine tee Yennu, ki tee i tinntɔɔ.

Mine tee wunba nami. Mine tee Yennu nba nan bont kur.

Min kɔɔe din jɔnn sanpaak.

Maa din naan tingbouŋ na yoo nba, sɔɔ ki sommin.

²⁵N nyint ninnyɔɔn damm nae paanu,

ki ŋmat binba cheŋ ŋmaabira na buntaa.

N tuu tunn yandamm bannu nae,

ki wann nan bi subinii na tee jatiie.

²⁶Ŋaan n toontunnɔ-i bunt buntir,

koo mi-i tun toomii a wun wann n lora,

n tuu te ki buntir na, nan n lora na n teen mɔniie.

N pak Jerusalem, a niib tan saa ŋamm kar leŋ,

ki pak Juda doi, a niib tan saa ŋamm maab.

Bi saa ŋamm ki fiin doi maŋ langbent.

²⁷N din yet mɔbonne, ki mɔkgbeŋir fɔɔr.

²⁸Ki n pak kpanbar Sairus a, ‘Fine saa dia n niib ki turin;

ki a saa tun linba ki n loon.

A saa tur mɔb ki bin ŋamm maa Jerusalem

ki bir jiantu ŋasaakak na fiakir.’ ”

Biaŋinba ki Yennu gann Sairus

¹Yennu gann Sairus-e ki teenɔ kpanbar.

U gann ŋɔɔe a wun kɔn nyann digbana,

ki tumɔ a wun liat kpanbara.

Yennu saa loot doi na tammɔi ki turɔ.

Yennu pak ki tur kpanbar Sairus a,

²“N mɔŋe saa ŋamm sɔnu ki tura,

ki naa jɔɔt nan kunkona.

N saa yeer bi kutgana na, ki biir bi kutlaana na.

³N saa nyinn mɔkint bɔra ni ki tura,

ki a bann nan mine tee Yennu

ki bia bann nan min Israel teeb Yennu-e put a sann ki yiina.

⁴N ganna maa a somm n toontunna Israel teebe,

ŋamme tee niib nba ki n gann.

Faa lek ki min na, ŋaan n te ki a la baakir bonchiann.

⁵“Mine tee Yennu, ki yensau ji kaa ki pukin n po.

Faa lek ki min na, ŋaan n saa tura paŋ nba ki a loon.

⁶N tuun linba na, a nisaarik kur nba be durinya na ni n bann

nan mine tee Yennu, ki yensau ji kaa ki pukin n po.

⁷Mine nan yentu nan bunbɔnn kura;

mine baat nan piisin nan biiru kur.

Min Yennu-e tuun linba na kur.

⁸N saa te ki nyannu n nyi sanpaapo ki baa nan saak nae,

ki tingbouŋ saa teen siir ki gaarir,

ki yent-n-mɔŋ nan barmɔnpaku sii be.

Min Yennu-e saa te linba na n tun.”

Ki jiin naamii nan barkperii Yennu na po

⁹Bobir nba tee nan bobilia na

saa fit nɔi nan wunba maau nawa-a?

Yɔk saa fit boi yɔkmaarɔ linba ki u tuuna-a?

Bobir saa fit yet a wunba maau na ki mi toonna-a?

¹⁰Sɔɔ saa fit yet u damm a, “Bee ki i marin nna?”

¹¹Yennu nba tee Israel teeb kasii Yomdaanɔ,

ki tee wunba ŋmakitir tɔɔnn po binbeŋ na yeen a,

“A kaa yaak ki saa boin siar ki jiin n waas po,

koo ki wannin linba ki n saa tumii.

¹²Mine nan tingbouŋ na, ki nan nisaarii a bii be leŋ.

N jii n yiikooe ki jɔnn sanpaak,

mine ŋmakitir yonnu nan ŋmaarik nan ŋmaabira.

¹³Mine fiin Sairus maa wun tun gbeen n loomm,

ki lin ŋmant bona.

N saa sont sɔnu nba kur ki u tɔkii,

u saa ŋamm maa n digbann Jerusalem,

ki nyinn n niib nba be dansarii ni na, ki ŋaab.

Sɔɔ ki jiiu, koo ki kɔɔu nan likirii, a wun tun linba na.”

Yabint daanɔ Yennu-e pak na.

¹⁴Ki Yennu yet Israel teeb a,

“Ijipt nan Sudann mɔkint sii tee i yare,

ki Seba jafɔkit na sii tee i yommii,

ki waa i poor po, ki jarit diab.

Bi saa gbaan i tɔɔnn ki pak kat a,

‘Yennu be nani, u kɔɔe tee Yennu,

¹⁵Israel teeb Yennu nba tint u niib nae

tee Yennu nba woont u mɔŋ.

¹⁶Binba maa pata na kur saa di feiwa,

bi kur yura saa tibina.

¹⁷Ŋaan Yennu-e tint Israel teeb,

ki bi nyannu na sii yɔɔ be,

ki niib maŋ kan ban di fei.’ ”

¹⁸Yennu-e nan sanpaak, ŋɔɔe tee Yenmɔnu.

Ŋɔɔe nan tingbouŋ na, ki li see fanu, ki bia saa wei.

U ki namir ki li dɔɔ yann kaa,

ŋaan u te ki li tee boor nba ki niib sii be-e.

Ŋɔɔe yet a, “Mine tee Yennu, ki yenlɔɔ ji kaa ki pukini.

¹⁹N ki bɔr pak kaa, koo n ki bɔr n lora.

N ki yet a Israel teeb n lomin yann boori.

N tee Yennu-e ki piak barmɔnii, ki fiitir linba took ki want.”

Ki jiin Yennu nba yen durinya na po

²⁰Ki Yennu yet a, “Lakint man, yimm digbana teeb,

yimm nba nyii digbana biiru ni na, baat buut man.

Niib nba somm nan bi pata nba tee daat,

ki mei pata nba kan fit tinnib na,

niib maŋ ki mi siar nan waama.

²¹Baat nan i maan buut boor,

ŋaant i sommteeb na n pak nan bi leeb.

Yaayoo ni, ŋmee din bunt linba tan saa tumi?

Li din ki tee min Yomdaanɔ Yennu nba tint niib na kaa-a?

Yensau ji kaa.

²²“Durinya kur niib, baat n boor man ki la tinnu.

Min kɔɔe tee Yennu nba be.

²³N mɔsonn tee barmɔniie, ki kan lebiti.

N senn mɔsonne ki turib nan n kpan tee maa tee wunbae,

a nisaarik kur saa baar ki gbaan n boor

ki por senn nan u sii waan.

²⁴“Bi saa yet a nyannu nan paŋ nyi n kɔɔ boore,

ŋaan binba ki loon n maan na saa di fei.

²⁵Min Yennu saa tinn Israel teeb nan bi yaaboona kur,

ki bin turin dontir.

¹“Babilonn yennii na joontue na.

Bi din jiantir Bel nan Nebo,

ŋaan mɔtana, boniie jii yennii maŋ,

ki bi tee jika ki teen bonkobit nba baka na.

²Pata na kan fit tinn bi mɔŋ. Bi nyannibe ki jiib yaat.

Babilonn yennii na joontue na.

³“Jakɔb yaaboona, gbiintir turin man,

yimm n niib nba tenn na kur. Mine dia-i bisin niŋa.

⁴Mine tee i Yennu, ki sii dia-i nan yaa tan saa kpet,

ki i yut n penn.

Mine nami ki sii gorii-i. N saa turi sommir ki tinni.”

⁵Ki min Yennu yet a, “I saa bikinin nan ŋmee?

Sɔɔ be ki tee nan min na-a?

⁶Niib tuu sat bi likbɔɔrii ki nyinn salimmɔna,

ki bikii salimpeena churu paak.

Bi tuu jii saauk daanɔe, wun nan patir,

ki bi gbaa ki jiantirir.

⁷Bi tuu wokitire ki buk ki saan sennir,

ki li see, ki kan fit chat baa sennir siaminba na.

Nirɔ-i miar siar, li kan fit jiin, koo ki tinnɔ biiru ni.

⁸“Yimm yanbɔndamm, ii tian linba na man.

Ii dukin maa tun linba.

⁹Ii tiar linba din tun sian yoowa na.

Ii sak nan min kuukɔɔe tee Yennu,

ki sɔɔ ji kaa ki tee nan min na.

¹⁰Pinpiik ni, n din yet linba tan saa tumewa,

ki wann linba tan saa teen,

ki yet nan n lora kan ban gbar tumu;

n saa tun linba kur ki n dukin nan man tuma.

¹¹N yi jasɔɔe, maa wun nyii yondo po ki baar.

U saa baar nan kanbiɔk nba tuu sik nae, ki n lor na n gbee.

Mine pak na, ki li lek saa tuma.

¹²“Gbiintir turin man, yimm tubkangbata nba dukii

nan nyannu boor fɔkewa na.

¹³N chari nan nyannu daar nae, ki nakint, li ki fɔk nan waama.

N nyannu na kan wei nan baaru.

N saa tinn Jerusalem-e, ki Israel teeb n la baakir leŋ.”

Ki jiin Babilonn doo buut po

¹Yennu din yet a, “Babilonn, fiit a naan gbant paak,

ki sik tiŋ ni, ki kar tanbiinii ni.

Sianyoo, a din tee nan sapaanmunn nae,

ki tee nan doo nba ki bi ki nyannir na,

ŋaan a ji ki ban be a yamani, mɔtana a tee yommike.

²Ŋmantir naar na. Nant yon. Yitir a saarik na.

Liatir a liatŋana na. Torin a mɔkuuru na ki poot kpenii.

³Nisaarii saa la-a yann ni.

Bi saa la ki bi sikina tiŋ ni, ki dinna fei.

N saa pa pann, ki sɔɔ kaa ki saa gɔɔrin.”

⁴Israel teeb kasii Yennu-e nyinnit.

U sanne tee Yabint Daanɔ Yennu.

⁵Yennu bia din yet Babilonn a, “Ii kar bunbɔnn ni kii ŋmin.

Bi ji kan yiina digbana poobati.

⁶N wutoor din doo n niib paake,

ki n diab nan bi ji ki tee n yab na,

ki jiib teen a yiikoo ni, ki a ki timm ninbaauk.

Ki nikpera na gbaa, ki a diab nan ninmɔnn.

⁷A dukin nan a sii yɔɔ tee poobate,

ki ki jii bona na ki teen a par ni,

koo ki dukii laa tan saa gbenn biaŋinba.

⁸“Fin nba loon manu na, gbiintir linba na.

A dukii nan a be a yamanie, ki be fanu.

A dukii nan a tee nijaann nan Yennu nae,

ki sɔɔ kaa ki tee nan fin na.

A dukin nan a kan ban teen pakɔɔk, koo ki kɔŋ a waasi.

⁹Ŋaan dayenn kɔɔ ni, yoo waaminnae,

ki bona ŋanlee na kur saa kpab tun.

Nan a nyɔku nba ki a tee na kur,

ŋaan a saa kɔŋ a sɔrɔ nan a waasa.

¹⁰“A din teen a mɔŋ yadae, a toonbiit ni,

ki dukin nan sɔɔ kan la-a.

A yan nan a bannu nae kɔɔna muuk, ki a yet a mɔŋ a,

‘Mine tee Yennu, ki sɔɔ ji kaa ki tee nan min na.’

¹¹Ninbɔŋ saa baara, ki a nyɔkii na nan yenna kan fit gɔɔrir.

Biiru saa kpir baar a paak, ki tee biiru nba ki a ki ban dukin li po.

¹²Ii dia a nyɔkii tingbangbirii na kur.

A bisin niwa, a tuu dia ŋanne ki tuun.

Li pasiar, li sii mɔk sommir ki tura, koo ki jeen a datai.

¹³Faa lek la kpaanii nba na kur, ŋaan a ki mɔk yiikoo.

Ŋaant ki a ninnyɔdamm na n nyi paanu ki tinna.

Binba chakin ŋmaabira ki tuu bikin ki bɔkit sanpaak,

ki wanta ŋmaarik kur ni linba saa tun.

¹⁴“Bi tee nan kakjina nae, ki muu saa dib.

Bi poŋ kan fit tinn bi mɔŋ kaawa.

Muyeruk na sii ton ki paakiba,

ki kii tee mumintik ki bi saa nanii.

¹⁵Ninnyɔdamm nba ki a gaan kpaanii bi boor bisin niwa na,

bi kur saa yaat ŋaan nyika, ki sɔɔ kan biar ki tinna.”

Yennu-e tee Yomdaanɔ nba yen tɔɔnn po benu

¹Israel teeb, gbiintir na man, yimm nba tee Juda yaaboona na.

I poor Yennu sann nie, ki want nan i waa Israel teeb Yennu na,

ŋaan i ki fiin mɔbona nba ki i piak na po,

²ŋaan bia faa parbia ki yeen a i tee kasii doo na niibe,

ki gaa Israel teeb Yennu nba sann tee Yabint daanɔ Yennu na paak.

³Yennu piak Israel teeb a,

“Sianyoo n din pak linba tan saa tunewa,

ki tan te ki li tun nan barmɔnii.

⁴N mi nan i tan sii tee tubkangbatae

ki sii wakii nan kut na, ki bia kaa naatuu nan kutmɔnt na.

⁵N din bann i binbeŋ sianyooewa, ki pak bona na powa,

ki li tan tun maa n gɔɔri ki i daa yeen a

i pata nan i bonninnante te ki li tumi.

⁶“Linba ki n din bunt na kur tuma;

li tee yin sake nan n buntaa na kur tee barmɔniie.

Mɔtana, n saa wanni bonsaana nba saa baar,

bona nba ki n ki ban fiit.

⁷Mɔtanae ki n te ki li tuun,

linba na booru din ki mi tun kaawa.

Li-i mi tun, i bo saa yet a i mi li kura po.

⁸N mi nan n kan ban teeni yada,

kimaan i yɔɔ tee kangaarnbae,

ŋanne teen ki i ki mi gbat linba na po faba,

ki li maan nan waama ki kɔɔ i tuba ni.

⁹“N dia n wutoore ki diisir, n diare ki kan biiri,

a lin te niib n dont n sann.

¹⁰N jii wahalae ki bikinii, nan baa tuu ŋamm kut

saauk muu ni biaŋinba na. Ŋaan n la ki i ki mɔk nyɔɔti.

¹¹Maa tun linba kur, n tuun n mɔŋ paake.

N kan te ki n sann n kɔŋ baakir,

koo ki te sɔɔ n chent nanin baakir nba tee n yar,

ki bia sii yɔɔ tee na.”

Ki jiin Sairus nba ki Yennu gannɔ na po

¹²Yennu din yet a, “Gbiintir man,

yimm Israel teeb nba ki n yiini na.

Mine tee Yennu, ki tee piinu nan joontu, ki tee Yen-yemmir.

¹³N niie din nan tingbouŋ na fiakir ki jɔnn sanpaak.

Mi-i yiin tiŋ nan sanpaak, bi tuu baare yian,

ki jii bi mɔŋ ki turin.

¹⁴“I kur n tikir ki gbiint.

Patsiar din kan fit bunt nan jɔɔ nba ki n gannɔ na

saa lek Babilonn-i; u saa tun linba ki n loon wun tume.

¹⁵Mine yiinɔ; mine saan nanɔ ki saa turɔ nyannu.

¹⁶“Nakint n boor, ki gbat maa piak linba.

Pinpiik niwa, n din piak paanu nie,

ki tuu te ki n mɔbona na n mann mɔnii.”

(Mɔtana, Yabint Yennu-e turin u Seek ki tumin.)

Yennu lor nba jiin u niib po

¹⁷Israel teeb kasii Yennu nba tinti na yet a,

“Mine tee i Yomdaanɔ Yennu, ki loon man tumii-i,

ki lii ŋan turi, ki wanni sɔnu nba ki i sii tɔkii.

¹⁸“Yi-i bonni sak n sennii,

piisin bo sii puub ki teeni nan mɔkir nba ki fɔɔt nae,

nyannu bo saa baari nan nyunpana nba tuu baar gbingbann nae.

¹⁹I yaaboona bo sii yab nan tanbiinii nae,

ki n bo kan te ki biiru n baaribi.”

²⁰Ii nyi Babilonn kii saa i yamani;

Ii hoot nan parpeenn ki jiin barŋanii maŋ po,

ki ŋaan sɔɔ kur n gbat siar kur boor a,

“Yennu tinn u toontunna Israel teeba.”

²¹Yennu nba din jii u niib ki gar namm wɔruk tinkorik paak na,

ŋaan nyunnyukuru din ki soorib.

U din te ki nyun nyii tanpiiuk ni, ki bi nyu;

u din bɔkit tann nae, ki nyun nyii.

²²Yennu yeen a, “Biit damm ki be parmaasir ni.”

Israel teebe tee yentu ki tur digbana

¹Yimm digbanbanfɔka damm, gbiintir man,

yimm nba be banfɔka na.

Bi din tan maarin na, ki sɔɔ Yennu gannin

ki teenin u toontunnɔwa.

²U te ki n mɔbona man nan banjiak nae.

U dia u tiɔŋ nuue ki guun.

U teenin nan peenu nae, ki n porin ki teen siir nan yeku.

³U yetin a, “Israel, a tee n toontunnɔe;

li saa nyi a nie ki niib n dontin.”

⁴Ki n jiin a, “N tun toonn-a, ŋaan dindann kaa.

N nyinn n paŋa ŋaan ki la siara nyɔɔt.”

Ŋaan n saa teen Yennu-e yada ki wun sommin n toona ni;

u saa pan, n toona paaka.

⁵Bi din tan maarin na ki sɔɔ Yennu gannima,

u teenin u toontunnɔe a man jen nan u niib

nba tee Israel teeb ki yat na.

Yennu-e teenin baakir, n paŋ nyi u niŋe.

⁶Ki Yennu yetin a, “N toontunnɔ, n mɔk toonjaanne ki teena.

Li ki tee nan a saa ŋamm teen Israel teeb

nba ki n tinnib na kɔɔ kaa-ii yabii,

ŋaan n saa te ki a tee yentue ki tur digbanlia,

ki lin te tingbouŋ na niib kur n tinn.”

⁷Israel teeb kasii Yennu nba tee bi tinntɔɔ na,

yeen wunba ki digbana yisimɔ bonchiann, ki bia namɔ,

ŋaan ki u tee doo diara toontunnɔ na a,

“Kpanbara saa la ki bi ŋaa-a, ki bi saa fiir ki tura jirima,

ki tɔɔndamm mun bia saa lar, ki gbaan jianta.”

Linba na saa tun, kimaan Yennu gann u toontunnɔwa,

Israel teeb kasii Yennu na dia u mɔsona.

Ki jiin Jerusalem ŋammu po

⁸Yennu yet u niib a, “Yoo-i baar nan man tinni,

n saa sommi, ki saa gbat i mɔnii nba jiin sommir po na.

N saa guuri ki nyinni, ki i paak, n saa lor mɔlor nan nibooru kur.

N saa te ki yin ŋamm kar i tiŋ nba dɔɔ yann na ni.

⁹N saa yet dansarkɔɔra na a, ‘Ii saa i yamani man,’

ki bia yet binba be bunbɔnn ni a, ‘Baat yeeuŋ ni man.’

Bi sii tee nan pei nba ŋman kunkona paak nae;

¹⁰nyunnyukuru koo kon kan soorib.

Yonnu nan tinkorik wɔruk kan teenib siar,

kimaan wunba mɔk lomm namme saa gar bi tɔɔnn.

U saa saan namm nyuntona boa.

¹¹“N saa faa sɔnjar ki gaan kunkona paak,

ki ŋamm sɔnu ki n niib n tɔkin.

¹²N niib saa nyi banfɔka ki baar.

Bi saa nyi gaŋ po nan yondo po

nan Asuann nba be diitu po na.”

¹³Sanpaak, ii yiin yaŋ.

Tingbouŋ, ii hoot kii kpamm, ŋaant kunkona-ii yiin yanii.

Yennu saa maan u niib para,

u sii mɔk ninbatinu nan u niib nba di biak na.

¹⁴Ŋaan ki Jerusalem teeb yet a,

“Yennu nyɔr nyikita. U tamm ti powa.”

¹⁵Ki Yennu jiin a, “Poo saa tamm u bik powa-a?

U kii loon u bik nba ki u marɔ na-a?

Li-i lekii tee ki poo saa tamm u bik po,

ŋaan min kan tamm i po.

¹⁶Jerusalem, n kan ban tamm a po;

n sɔb a sann n niipant nie.

¹⁷“Binba saa ŋamm maa-a na baate mɔtana,

ki binba bo biira na saa yaat.

¹⁸Gotir lint ki la linba tuun na. A niib na lakinte ki kpent.

Barmɔnii nan maa tee Yennu nba fo na,

a sii mɔk parbifaant a niib paak,

nan pooyookir nba tuu mɔk parbifaant u salinbana paak nae.

¹⁹“A tingbouŋ din boonte ki teen yann.

Ŋaan mɔtana li saa waab nan binba jent na karuwa.

Ki binba teen a doi langbent na saa nyi ki fɔkit nana.

²⁰A niib nba ki bi din marib yommisin ni digbangann ni na

tan saa yet dasiar a, ‘Tiŋ na mantik waaba.

Ti loon yiar nba yabe ki tin kar.’

²¹Li yoo na, a saa yet a mɔŋ a,

‘Ŋmee mar waas na kur ki turimi?

N din kɔŋ n waas, ki ji din ki fit mar waasi.

Bi din ber ki nyinnin ki teenin yommik.

Ŋmee wubir waas na? N din biar n kɔɔe, ki waas na nyii lee?’ ”

²²Yabint Yennu yet u niib a,

“N saa tur digbana nyinn, ki bi saa kunn i waas.

²³Kpanbara sii tee nan bi baanba nae ki turi,

ki poobatnba tee nan bi naanba na.

Bi saa baa fabin i tɔɔnn, ki turi baakir,

ki sikin bi mɔŋ ki turi jirima,

ki i saa bann nan mine tee Yennu,

ki wunba guu n sommir kan di fei.”

²⁴Jɔɔ-i jii linba jat ni, a saa fit fata-a?

A saa fit fat kunkɔnkɔntondaanɔ dansariiwa-a?

²⁵Yennu yeen a, “Linba saa tume na.

Bi saa jii kunkɔnkɔntondaanɔ dansarii na ki yaat namm,

ki bia fat kunkɔnkɔntondaanɔ bona.

N saa kɔn nan wunba kur kɔn nani, ki saa tinn i waas.

²⁶N saa te ki binba dinti biak na n kpi bi leeb,

ki nikpinu nan wutoor saa yibib,

ki niib kur saa bann nan mine tee Yennu nba tinti ki nyinti yann.

Bi saa bann nan mine tee Israel teeb Yennu nba mɔk paŋ.”

¹Ki Yennu yet a, “I dukii a n ber nyinn n niib

nan jɔɔ nba tuu yêt u poo ki ber nyinnɔ nae?

Ki li-i tee nnaie, yêtu gbant be lia.

I dukii nan n kɔie, ki bi soori

nan jɔɔ nba tuu kɔi u waas ki bin teenib daaba na-a?

Aaii. Bi din teeni yommii, kimaan i toonbiit paake.

Bi din yaat nani, kimaan i marinbiit paak.

²“Bee ki n niib yêt bin gbiint,

yoo nba ki n baar bi boor maa n tinnib na?

Bee ki bi yêt gatu, yoo nba ki n yiinib na?

N ki mɔk paŋ nba saa tinnibe-e?

N saa fit yet maan ki mɔkgbeŋir n fɔɔr,

ki mɔka n kpant kunkoot, ki li janii na n kpo nyunkon.

³N saa fit te ki sanpaak n bɔnn, ki tee nan li mɔ kpemɔnii na.”

Ki jiin Yennu Toontunnɔ na mɔsaku po

⁴Yabint Yennu wannin maa saa pak linbawa,

ki n saa fit kɔɔn binba chɔk na paŋ.

Sanyiɔk kur, u te ki n numm mɔne

nan man gbiint linba ki u saa wannin.

⁵Yennu turin bannuwa, ki n ki yêt,

koo ki lek n numm ŋaan nyikɔ.

⁶N jii n bɔɔnne ki chab binba boon na.

N ki gɔɔrib, yoo nba ki bi sukiin, ki ŋabii n tiaŋ,

ki sat mɔsant n numm po na.

⁷Ŋaan bi sukit na kan teenin siar,

kimaan Yabint Yennu-e teenin sommir.

N tuu kpaŋ n mɔŋe ki gubin diar, n mi nan n kan di fei,

⁸kimaan Yennu be nanin, ki saa wann nan n ki mɔk biiti.

Sɔɔ mɔk par ki saa baar nan maan n paaki-i?

Wun ŋaan tin tɔk saan barbuut boor.

Wun baar nan u maan maŋ.

⁹Yabint Yennu tiɔŋo kɔn n paak,

ki ŋmee mun saa yet a n mɔk kaati?

Binba paantin maan na kur saa mir bote

nan tintɔɔk nba tuu tɔɔ tiɔk biaŋinba na.

¹⁰Yimm nba kur baakit Yennu,

ki bia saak u toontunnɔ mɔb na,

sɔnu nba ki i tɔk na-i lekii bɔn biaŋinba,

ŋaan i teen Yennu yada kii maa u paak.

¹¹Yimm nba kur lorin a yin biir leeb na,

i tiɔŋ lorbiit maŋe saa biiri.

Yennu tiɔŋo saa te linba na n tun, ki i tan saa kpo ninbakuun.

Ki jiin maan nba saa maan Jerusalem par na po

¹Ki Yennu yet a, “Gbiintir man, yimm nba loon tinnu na,

yimm nba baat n boor ki loon sommir na.

Dukint yaa din nyii tann nba ni na po,

ki dukin baa din gbiir ki nyinni tanpiiuk nba ni na po.

²Ii dukin i yeeja Abraham po, ki bia dukin i yaa Sara po.

Maa din yiin Abraham yoo nba na, u din ki mɔk biki,

ŋaan ki n teen piisin u paak, ki turɔ waas.

Ki n te ki u yaaboona yabit ki kaa kann.

³“N saa wann Jerusalem nan binba be langbent ni na,

n ninkpabauŋ.

U tiŋ nba lek tee tinkokirik na, ŋaan n saa teenir tinkpiasir,

nan kpaab nba ki n din teen Edenn ni na.

Parpeenn nan manu sii be leŋ,

ki dontir nan niipoturu yanii sii yiin leŋ ki teenin.

⁴“Gbiintir turin man, n niib, gbiintir linba ki n piak.

N teen digbana n tumiiu, n sennu na saa turib yentu.

⁵N saa baar yiame ki tinnib, n nyannu yoo na pera.

N mɔŋe sii dia digbana.

Digbanbanfɔka guu n baarue, ki guu nan dindann a man tinnib.

⁶Gotir sanpaak, ki got tingbouŋ.

Sanpaak saa bot nan munyuut nae;

ki tingbouŋ n kpet nan kparchant na,

ki li niib kur saa kpo nan kpajuut nba kpenn biaŋinba na.

Ŋaan maa baat nan tinnu nba na sii yɔɔ be-e.

N nyannu nae sii tee linba see.

⁷“Gbiintir turin man, yimm nba mi linba ŋan,

ki tee binba jii n tumiiu ki teen bi para ni.

I daa tiin jaŋmaanii, li-i tee ki niib yisimi ki sukii-i.

⁸Bi tan saa mir bote nan tintɔɔk nba tuu tɔɔ tiɔk biaŋinba na.

Ŋaan tinnu nba ki n baat nann na sii yɔɔ be-e,

ki n nyannu na be yoo kur.”

⁹Yennu, fiit ki sommit. Jiin a yiikoo na ki tinnit,

ki tun a yiikoo toonn nan faa din tun yaayoo ni biaŋinba na.

Fine din gbat Ijipt nba tuu naan mɔkir ni bonkob-paaruk na

burii burii.

¹⁰Fine bia din te ki mɔkgbeŋir fɔɔr,

ki faa sɔnu mɔkgbeŋir maŋ ni,

a binba ki a tinnib na n fit poot.

¹¹Faa tinn binba na saa baar Jerusalem nan parpeenne,

kii yiin kii hoot nan kpinkpammuk.

Bi sii yɔɔ mɔk parpeenne, ki saa nyi parbiir nan yanyêtuk ni.

¹²Ki Yennu yet a, “Mine kɔɔnta paŋ.

Bee ki a tiin nisaarik nba saa kpo na,

nisaarik nba ki yukii nan mɔɔt nba ki yukii na?

¹³A tamm Yennu nba nama na poe, wunba tant sanpaak,

ki bia nan tingbouŋ fiakir na poe-e?

Bee ki a yɔɔ be jaŋmaanii ni ki jiin binba mukisa nan wutoor,

nan binba teen siir a bin biira na po?

Bi wutoor na kan ban siia ni.

¹⁴Li kan wei ki bi saa ŋaa dansarkɔɔra na yann.

Ki bi manfoor saa fɔkit, ki bi sii di linba kur ki bi loon.

¹⁵“Mine tee i Yomdaanɔ Yennu, mine tuu gbit mɔkgbeŋir,

ki te li nyunpana fu fuut. N sanne tee Yabint Yennu.

¹⁶Mine jɔnn sanpaak, ki bia teen tingbouŋ fiakir,

ki yet Jerusalem teeb a, ‘I tee n niibe.

N turi n wannu, ki guuri nan n nuu.’ ”

Ki jiin Jerusalem biak gbennu po.

¹⁷Jerusalem, fiit gɔɔn ni, kutir fiir.

A nyuu tubdatu nyubitik nba ki Yennu wutoor doo ki u tura,

a fan nyu nawa. A nyuur, ki li sike, ki te ki a tukintir.

¹⁸Sɔɔ kaa ki saa ŋmakita.

I ni sɔɔ kaa ki saa soor a nuu ki ŋmakitani.

¹⁹Biak munlee baarawa, tɔb biir a tiŋa, ki a niib tun kon.

Sɔɔ kaa ki saa tina ninbaauk.

²⁰Sɔngɔnt boor kur, gbananchɔkinte tuu te ki a niib n baa,

bi tee nan waarɔ baruk nba tuu soor piarɔ nae.

Yennu wutoor paŋ na gbatiba.

²¹Yimm Jerusalem teeb nba di wahala na,

yimm nba tukintir nan i yib na,

²²i Yomdaanɔ Yennu kɔn i paak ki yeen a,

“N jikit nyubitik nba ki n bo be wutoor ni ki n turi nae,

ki yaatir nann. I ji kan ban nyu daan nba te ki i tukintir na.

²³N saa jiir ki tur binba dinti biak nae,

binba te ki i dɔɔ sɔnjot ni, ki bi ŋmaat i paak nan i tee tante na.”

Biaŋinba ki Yennu saa tinn Jerusalem

¹Jerusalem, a ŋamm kii mɔk paŋ kii paar.

Yennu kasii digbann, a lia baakir.

Binba ki mi Yennu ki bia ki yeen na ji kan ban kɔɔ a ni.

²Jerusalem, yokin a mɔŋ, ki yent a mɔŋ.

Fiit tiŋ ni ki kar a naan gbant paak.

Cheet bant nba ki bi baana na,

yimm Sayɔnn teeb nba be yommisin ni na.

³Ki Yabint Yennu yet u niib a, “Yaa din teen daaba, bi din ki pa likirii i paaki; li paak, siar kan pa kaawa ki bin ŋaai. ⁴Yaa din saan kar Ijipt ki tee boorganu na, i din saan i yanbɔɔte, ŋaan Asiria din tan jii-i nan ninmɔnne ki yaat nani, ki bia ki pa siar i paaki. ⁵Ki Babilonn tiŋ ni, li boorue bia tun na. I tee yommiie, bi ki pa siar i paaki. Binba dia-i na dont bi mɔŋe, ki faa kpinkpant ki ki gorii gbootin. ⁶Yoo baate ki i tan saa bann nan mine tee Yennu ki pak turi.”

⁷Li fan bonchiann nan ki a la toomii ki u nyii kunkona paak,

ki baat nan labamann, ki li tee parmaasir barŋanii.

U mɔɔntir nyannue ki piak Sayɔnn a, “A Yennu-e tee kpanbar.”

⁸Binba guu doo maŋ na lakin hoot parmaasir hootiie.

Bi fit laat nan bi tiɔŋ ninbina biaŋinba ki Yennu jent Sayɔnn.

⁹Yimm Jerusalem langbent, ii hoot parpeenn po man.

Yennu saa tinn u doo, ki maan u niib para.

¹⁰Yennu saa jii u kasii paŋ na ki tinn u niib,

ki durinya niib kur saa lar.

¹¹Yimm nba jii jiantu diiuk bona na, ii yabir ki nyi Babilonn.

I daa siit linba tee kɔɔr bont; ii teen i mɔŋ kasii, kii nyi.

¹²Yoo nba na, li ki tee i saa nyi kpirik kaa,

i kii koor a yin mir boti.

I Yomdaanɔ Yennu-e saa gar i tɔɔnn,

ki guuri li munn po.

Ki jiin toontunnɔ nba di biak na po

¹³Ki Yennu yet a, “N toontunnɔ saa la nyannu u toona niwa,

u saa la baakir bonchiann.

¹⁴Niib bonchiann nba din lau, bi gbanant din jeke;

bi din biir u gbanant bonchiann ki u ji ki naan nirɔ.

¹⁵Ŋaan mɔtana li saa yaar lit digbana bonchiann u paak,

ki li saa teen kpanbara bakitnauŋ, ki bin muu mɔi.

Baa ki ban la linba, ŋaan bi tan saa lar, ki bia bannir.”

¹Ki niib na jiin a,

“Ŋmee din saa sak linba ki ti tan piak mɔtana na.

Ŋmee din saa fit la Yennu yiikoo bont na ni?

²Li din tee Yennu lomme nan u toontunnɔ n kpaat

nan bonpipiɔk na, ki baa jiina tinkooŋ ni.

U din ki mɔk sanjaann koo fant nba saa te ki ti niɔŋ n kɔɔu.

Fant siar din kaa u paak. Siar din kaa ki saa te tin nakinɔ.

³Ti din yisimɔe ki yêtɔ, ki u gubin gaar biak nan tont,

sɔɔ din ki loon wun gotɔ.

Ki ti yêtɔ, ki li naan nan u ki tee siar na.

⁴“Ŋaan u din gubin gaar biak nba bo sii tee ti yare,

nan tont nba ki ti bo saa di.

Li kura na, ŋaan ki ti bia dukii nan u biak na tee tubdatue

ki nyii Yennu boor.

⁵Ŋaan ti biit paake ki bi paanu daŋ,

ki boou ti yanbɔmm paak.

Ti la laafia u biak nba ki u dii na paake.

Waa gaar tanpakii na paak, ki ti la laafia.

⁶Ti kur din tee nan pei nba tuu bot nae,

ki sɔɔ kur tɔk u sɔnu.

Ŋaan ki Yennu te ki ti tubdatu na baa u paak,

tubdatu nba bo kpaa ti kur na.

⁷“Bi din diau ninmɔnne,

ŋaan ki u gubin gaar nan sikin-n-mɔŋ;

u din ki pak nan mɔbonna,

ki tee nan pegann nba ki bi tuu yaa bin kɔtɔ na,

ki bia tee nan peeuk nba ki bi tuu yaa bin koor u kobit na,

u din ki pak nan mɔbonna.

⁸Bi din soorɔ ki bu u buut, ki saan nanɔ a bin kpiu,

ki sɔɔ baka kaa u po. Bi din kpiiu, ti niib biit paake.

⁹Bi din kpab ŋɔɔ nan biit damme ki sikin kaauk ni,

ki piiu nan mɔkita, ŋaan ki u lek ki ban biir siar,

koo ki faar faaki.”

¹⁰Ki Yennu yet a, “Li din tee n loomme nan wun di biak.

U kuun din tee maruŋo a lin baar nan nyikinchab biit paak;

ki linba na paak ki u saa la yaaboona.

U manfoor saa yukir, ki u niŋe ki n mɔlor saa gbee.

¹¹U biak dinu poor po ki u saa la parmaasir,

ki bann nan u ki dii biak yann kaa.

N toontunmɔnɔ nba ki n par mei u paak na

saa gaar nisaarii bonchiann tubdatu,

ki u paak n saa nyik chabib.

¹²Li paak, n saa turɔ binbeboor nba mɔk baakir,

ki li tee nijaana nan yiikoo damm sinsuuk ni.

U yanbɔɔte ki u chab u manfoor,

ki gaar yanbɔndamm bonchiann paak ki dii biak,

ki miar Yennu a wun nyik chabib.”

Yennu lomm nba jiin Israel teeb po

¹Jerusalem, a tee nan poo nba ki mar nae,

ŋaan mɔtana a saa fit yin yaŋ kii hoot nan kpinkpammuk.

Mɔtana a sii mɔk waas bonchiann

ki gar poo nba ki u sɔrɔ ki ban nyikɔ.

²Yarikit a ŋaak nba ki a be leŋ na,

tantir li ŋmiit ki pukin li dachaata paŋ.

³A saa tant a kpaar lokir kur po,

a niib saa gaar tiŋ nba ki digbangana niib kar leŋ na.

Doi nba dɔɔ koont na saa gbee nan niib.

⁴Daa tiin jaŋmaanii, a ji kan di fei, a kan sik tiŋi.

A saa tamm biit nba ki a din tee poopaaŋ ki tuun na,

ki bia tamm faa tuu be a kɔɔ nan pakɔɔk na.

⁵A nantɔɔ sii tee nan sɔrɔ nae ki tura.

U sanne tee Yabint Yennu.

Israel teeb kasii Yennu saa tinna,

ŋɔɔe tee durinya na munn diatɔɔ.

⁶Israel, a tee nan poopaaŋ nba ki u sɔrɔ tuu yaat ŋaan nyikɔ,

ki u yamin yêt nae, ŋaan Yennu yia a fan jen u boor,

ki yeen a:

⁷“Yoo waaminnae ki n nyika,

ŋaan n saa ŋamm gaara nan lonchiɔŋo.

⁸Yoo waaminnae ki n donn wutoor ki nyika,

ŋaan n saa wanna n lomm yaayoo siiyoo.”

Yennu nba tinta nae pak linba na.

⁹“Nowa yooewa ki n din senn mɔsonn

nan n ji kan biir tingbouŋ na nan nyumi.

Mɔtana n senn mɔsonn nan n ji kan ban donn wutoor a paak,

n kan ban ŋmakita nan biak, koo ki dat a tubiri.

¹⁰Jɔɔt nan kunkona-i lekii but but,

ŋaan n lomm nba be a ni na kan ban gbenn;

n sii yɔɔ dia mɔsonn nba ki n senn

nan n saa tura parmaasir nae.”

Yennu nba loona nae pak linba na.

Ki jiin Jerusalem paann na po

¹¹Ki Yennu yet a, “Jerusalem, fin doo nba di biak ki kaa sommtɔɔ,

ki sɔɔ kaa ki saa maan a par na,

n saa ŋamm maa a fiakir nan tanbinyinyira nba ki li daauk paare.

¹²N saa jii tana nba mɔn, ki li daauk paar na,

ki maa a ditɔɔtii, ki jii tana nba nyirii nan muu na,

ki maa a tammɔi, ki jii tanbinyinyirlia nba ki li daauk paar na

ki maa joonjouk nba saa linta.

¹³“N tiɔŋo saa tumii a niib, ki turib gor nan parmaasir.

¹⁴Mamɔmm nan binbenŋaŋ saa tura paŋ.

A saa nyi biak nan jaŋmaanii ni.

¹⁵Li-i tee ki sɔɔ leka, u tun nna ŋaan ki n nuu kaa leŋ.

Wunba kur kɔn nana, see ki u baa.

¹⁶“Mine nan saauk damm nba tuu joo muu ki pur kut

ki nan jatiat na,

ki bia nan jɔɔ nba tuu jii jatiat maŋ ki kpi kuun na.

¹⁷Ŋaan jatiɔk kaa ki saa fit paana daŋi,

ki a sii mɔk gatu ki tur binba kur piak biira na.

N saa kɔn n toontunna paak ki turib nyannu.”

Yennu-e pak na.

Ki jiin Yennu ninkpabauŋ po

¹Ki Yennu yet a, “Wunba kur nyunnyukuru mɔkɔ,

wun baar, nyun be nna.

Yimm nba kur kaa likirii, ii baar man ki daa jeet ki di.

Baat man ki daa tilɔɔna daan nan naabiin.

I kan pa siar li paak.

²Bee ki i biir likirii linba ki gboot paaki?

Bee ki i di i paauk ŋaan bia be komi?

Gbiintir turin man, ki tun maa wanni linba;

ki i saa di jeet nba man ki gar jeet kur ki lin maŋi.

³“N niib, gbiintir turin man, ki baar n boor.

Baat n boor, ki i saa la manfoor.

N saa lor mɔlor kangbennuk nani,

ki turi piisin nba ki n din senn mɔsonn ki tur Defid na.

⁴N teenɔ digbana tɔɔndaanɔe nan ŋmakit-tɔɔ,

ki u paake ki n wannib n paŋ.

⁵I tan saa yiin digbangana niib;

sianyoowa bi din ki mi-ini,

ŋaan mɔtana bi saa tine baar ki pukini.

Min i Yomdaanɔ Yennu nba tee yimm Israel teeb kasii Yennu na

saa te linba na kur n tun.

N saa te ki yin la baakir nan chɔruŋ.”

⁶Jenin Yennu boor, ki miarɔ yoo nba ki u naak na.

⁷Nitont n nyik binbeŋ nba ki bi be na,

ki bia lebit dudukit nba ki bi dukii na.

Ŋaant ki bin jen ti Yomdaanɔ Yennu boor.

U mɔk ninbatinu, ki nyik chabit yian yian.

⁸Yennu yet a, “N dudukit ki tee nan i yara na,

ki n sɔnii bia mɔk bɔkitu nan i yara.

⁹Sanpagbouŋ nba fɔk nan tiŋ biaŋinba na,

nnae mun ki n sɔnii nan dudukit ŋan ki gar i yar.

¹⁰“N mɔmaan tee nan saak nan sakaana

nba tuu nyi sanpagbant ni ki baa maant tiŋ nae.

Ŋanne tuu te ki bonbuburit kpaatir, ki bia te li naan,

ki bi jikit ki buur, ki bia tee jeet ki di.

¹¹Nnae mun ki mɔmaan nba ki n saa pak na sii tee,

ki linba ki n lor maa lin tun na kan gbar tumu.

Ki li saa tun linba kur ki n tumir a lin tun.

¹²“I tan saa nyi Babilonn nan kpinkpammuko;

ki nyi doo na ni nan parmaasir.

Jɔɔt nan kunkona na tan sii yiin yanii,

ki tiinii tan sii hoot nan kpinkpammuk.

¹³Tiŋanii tan saa pia siaminba ki jagotuk be mɔtana na,

ki tulaarii tiinii n pia kunkonii sinsetboa.

Linba na sii tee nyinn nba sii yɔɔ be-e, ki tee tiaru

ki jiin linba ki min Yennu tun na po.”

Ki jiin Yennu niib po

¹Ki Yennu yet u niib a, “Ii tuun linba ŋan ki bia took, kimaan li kan wei, ki n saa tinni. ²N saa teen piisin binba yɔɔ dia foon daar ki ki teer gbaka gbaka na paak. N saa teen piisin binba ki tuun bisiat na paak.”

³Boorganu nba tabin u mɔŋ nan Yennu niib na daa yeen a, “Yennu kan sak man taan u niib na ki jiantɔ.”

Jɔɔ nba ki bi tɔɔu daa dukii nan waa kan fit mar waas na, u kan ban pukin Yennu niib ni. ⁴Yennu piak li jabooru a, “Li-i tee ki a baakitin, ki dia foon daar na, ki bia tuun linba ŋan n po, ki dia n mɔlor fanu, ⁵ŋann bi sii yɔɔ tian a sann, n jiantu ŋasaakak ni, nan n niib boor, ki lin yukir gar faa bo sii mɔk bonjai nan bonpoi. Ki a sann kan ban piini.”

⁶Yennu piak teen boorganu nba ji pukin u niib po ki mɔk lomm nanɔ, ki jiantirɔ, ki dia foon daar na, ki bia dia u mɔlor na fanu a, ⁷“N saa baar nani Sayɔnn, n kasii kunkonn na boor, ki turi parpeenn, n miaru ŋaak na ni, ki ji gaar i maruŋ nba ki i mann n binbintir paak na. Bi sii yi n ŋaak na nibooru kur Yenmiaru ŋaake.”

⁸Yabint Yennu nba nyinn u niib Israel teeb yommisin ni, tingaŋ ni, ki kpen namm na, senn mɔsonn nan u saa baar nan nileeb ki pukin bi paak.

Ki jiin Israel teeb tɔɔndamm biit po

⁹Yennu pak digbangana niib na, a bin baar kii tee nan muuk ni bonkobit na, ki ŋman u niib. ¹⁰U yet a, “Tɔɔndamm nba bo tee bin kpaan n niib na tee jɔɔniie. Bi ki mi siar; bi tee nan bɔmui nba ki gbekin nae, bi kpan dɔɔ damii damiit kɔɔe. Bi lon gɔɔn halii. ¹¹Bi tee nan bɔi nba mɔk jawuuk, ki ki di gboot nae. Tɔɔndamm na kaa yami. Sɔɔ kur tuun waa loon biaŋinbae, ki loon u tiɔŋ ŋamm, ¹²ki yeen a, ‘Ŋaant ki ti la daan ki nyu taa saa fit biaŋinba, ki wonne sii man ki gar dinna.’ ”

Ki jiin Israel teeb patjiantu po

¹Niŋamm kpenn, ki sɔɔ ki bant li paak, koo ki fiin li po. Ŋaan bi-i kpo, biiru kan paanib daŋi. ²Binba tuun ŋant na mɔk parmaasir nan foon, bi kuun poor po.

³Yimm biit damm na, baat nna man, ki bin bu i buut. I ki chee jabaabuura nan pooweira nan bonchonchonna. ⁴I yisin ŋmee? Yimm fai damm na, i mun laa ŋmee? ⁵I jiantir tingbana, ki dɔɔ nan leeb i tingbantiinii na boor. I dia i waas ki mann maruŋ, tanfiat nba be kpengbiant na ni. ⁶I jikit leŋ tanŋarsa nae, ki tee pata ki jiantirib, ki jikit daan ki mɔ bi paak, ki bia baat nan jeet piinii ki teemm ki mannib. I dukii n par mei linba na paaki-i? ⁷I tuu do jɔfɔkit paake, ki mann maruŋ, ki bia dɔɔ nan leeb. ⁸I maa i patyana nae, i ŋei tammɔi ni. I yêtime, ki tuu liat i liant ŋaan doo i gado yarima paak nan i yɔɔsnba, binba ki i tuu pa ŋaan dɔɔ namm na. Leŋe ki i tuu kpeen i niɔŋ. ⁹I tuu sɔɔr tulaarii nan kpanunubite ki saa jiantir tingbann Molek.57.9 Molek din tee Amonn teeb tingbanne. I tuun toomiinba ki bi saa banfɔka, ki baat kpeentiŋ gbaa, ki kpaan tingbana a yin jiant. ¹⁰I bakint i mɔŋ ki lin kpaan tingbanlia, ŋaan ki ki laatib. I dukii nan i tingbanyana nae teeni paŋ, ki i ki baŋiti.

¹¹Ki Yennu yet a, “Tingbana na tee lanne, ki jeenti, ki te ki i fa fai, ki ji ki jiantirin nan waama? Maa tee soon nna ki li wei nae, ki i nyik ki ki baakitimi-i? ¹²Yaa tuun linba na, i dukii nan li ŋane, ŋaan n saa nyinn i binbeŋ na paanu, ki i tingbana na tan kan fit sommi. ¹³I-i taŋi fabin ki loon sommir yoo nba, yin te i tingbana maŋ n tinni. Sajaperinne tan saa jiib ki yaat namm, ŋaan damm nba teenin yada sii mɔk manfoor, tiŋ na ni, ki bia sii jiantirin, n jiantu ŋasaakak ni.”

Yennu mɔsonn nba jiin sommir nan laafia po

¹⁴Ki Yennu ŋamm yet a, “Ŋaant ki n niib n ŋmat jen n boor. Bakint bonjarkar kur bi sɔnu ni, faan sɔnu ki teenir siir.

¹⁵“Mine tee Yenjaann, ki bia tee kasii, ki yɔɔ be. N be sanpaapoe, siaminba tee kasii, ŋaan n bia be nan niib nba sikint bi mɔŋ ki nyik bi biit, a man maan bi para ki turib dindann. ¹⁶N tur n niib manfoor, ki kan tukin kii piak kii biirib, koo kii dont wutoor namm yoo kuri. ¹⁷N bo donn wutoor bi paak, kimaan bi biit nan bi jawuuk paak, ki n dat bi tuba ki nyɔr nyikib. Ŋaan ki bi tee tubkangbata, ki tukin saa bi tiɔŋ sɔnu.

¹⁸“N la baa tun biaŋinbawa, ŋaan n saa turib laafiawa. N saa gar bi tɔɔnn ki sommib, ki maan binba mɔ na para. ¹⁹N teen sɔɔ kur parmaasire, binba naak nan binba be banfɔka na kur. N saa tur n niib laafiawa. ²⁰Ŋaan biit daanɔ tee nan mɔkgbeŋir nba ki foi nae, ki li nyunpana ki nyikin fiiru, ki baat nan jakint nan bakir. ²¹Biit damm ki be parmaasir ni.” Yennu-e yet na.

Ki jiin barmɔnii mɔloru po

¹Ki Yennu yet a, “Ii hoot nan paŋ. Pakin n niib Israel teeb bi biit po. ²Bi jiantirin daa kur, ki yeen a bi loon bin bann n maame ki bia sak n sennii. Bi yaa bi loon man turib sennii nba ŋane, ki bia yaa bi-i jiantirin, li manib.”

³Niib na boi a, “Bee ki ti sii lorin mɔi, ŋaan ki Yennu ki fiin ti po? Bee ki ti sii be kon, ŋaan ki u ki gbiini?”

Yennu piakib a, “Li mamɔmm tee nnae, yoo nba ki i lor mɔi na, i tuu tuun i tiɔŋ loommo, ŋaan dint i toontunna biak. ⁴I mɔloru maŋ te ki i tee kpikpiruk damm ki kɔn, ki boo leeb. I dukii mɔlor booru na saa te ki man gbiint i miaruwa-a? ⁵I tuu lor mɔie ki dint i mɔŋ biak, ki tibint nan mɔɔt na, ki lat i bɔtoot liant nan tanpent ki dɔɔ li paak.58.5 Bi din tee nna a lin wann nan bi mɔk parbiire, bi biit paak. I yi ŋanne mɔloru-u? I dukii nna sii mei n para-a?

⁶“Mɔlorbooru nba ki n loon tee nnae: Ii baat biak bant na, ki yɔkit mamɔmm kaarin yɔkit na, ki ŋaan binba di biak na n saan yann. ⁷Ii chentir i jeet nan komma na, ki loot i ŋei ki tur talas damm nba kaa ŋei na, ki jii i tiat ki tur binba ki mɔk lia na, ki daa yêen i nikpiimm sommiri.

⁸“Ŋanne ki n lomm saa yent i paak nan sanyiɔk ni yondoor na, ki i fiat saa buur yian. N sii be nani yoo kur ki tinni; n benu i boor saa guuri lokir kur po. ⁹Yi-i mein yoo nba, n saa turi gatu. Yi-i yiinin yoo nba, n saa toon.

“Li-i tee ki i nyik niib biak dinu, ki nyik mapipaat nan mɔbonbiit kur, ¹⁰ki teen komma jeet, ki gboont binba namii na, ŋann ŋarin bunbɔnn nba linti na saa kpant yonsuuk ni yeeuŋo. ¹¹Ki n saa gar i tɔɔnn yoo kur, ki gboonti nan bonŋana. N saa turi paŋ nan laafia. I sii tee nan kpaab nba ki nyun be leŋ bonchiann nae, ki tee nan nyuntonn nba ki fɔɔt na. ¹²I niib saa ŋamm maa langbent nba baa li bina munna na, bi saa ŋamm maar li fiaka paak. Bi sii mi-i ki i tee niib nba ŋamm maa li joona nan langbent na.”

Ki jiin foon daar na dianu nyɔɔt po

¹³Ki Yennu bia yet a, “Li-i tee ki i dia foon daar na kasii, ki ki waa i mɔŋ loomm li daar, ki loon n kasii daar maŋ ki turir baakir, ki ki saa sɔnu, ki bia ki tuun toonn, koo ki ki piak maan nba ki mɔk nyɔɔt, ¹⁴ŋann i saa la n weiu manu nba tee. N saa te ki durinya teeb kur n turi baakir, ki i saa di manu, tiŋ nba ki n tur i yeeja Jakɔb na ni. Min Yennu-e pak na.”

Ki jiin nisaarii biit po

¹I daa dukii nan Yennu paŋ pɔt nan wun tinni, koo u tuba kpaa nan wun gbat i yiinii nba jiin sommir po. ²I biit paake ki u ki gbat i yiinii na. I biite bɔkit yimm nan Yennu, yoo nba ki i loon yin jiantɔ na. ³I mɔk biit nan yaa fa fai ki mɔk kpikpiruk nan nikpinu na.

⁴I tuu saan buut, ŋaan ki ki mɔk mɔnii. I tuu loon yin jii faake ki di mɔnii. I tuu lor a yin paan leeb daŋe. ^5-6I lorbiit maŋ baat nan bonbiire, nan waalabirik jena nba kaatir waalabirii na. Li jenn-i yeer, waauko tuu nyi li ni. Ŋaan i lorbiit maŋ kan sommi, li ki mɔk nyɔɔti, li tee nan baa saa jii poruk tiɔk ki teen chinchenn nae. ⁷Yoo kur, i lorin linba bie ki kakii nan li tumu. I ki taantir nan nikaat kpinu. Yi-i saan sian, i tuu biir leŋe ki teenir langbent. ⁸Ki yi-i baar sian, sɔɔ kur tuu weribe. Linba ki i tuun kur tee biite. I tɔk sɔnŋmarimae, ki wunba tɔk li sɔnu kur ki be u yamani.

Biaŋinba ki niib na kat bi yanbɔmm

⁹Ki niib na yet a, “Mɔtana, ti bann linba teen ki Yennu ki tinnit ti datai nuu niwa. Ti daan yentue a tii somm leŋ, ŋaan ki li tee bunbɔnn kuukɔɔ; ¹⁰ki ti barin nan jɔɔnii na, ki gbiatir yonnu ni nan li tee nyiɔko na, ki naan nan ti be kpeentiŋ bunbɔnn ni na. ¹¹Ti be yanputuk nan mukir nie, ki daan a Yennu n nyinnit mukir nan biak ni, ŋaan siar ki tuumi.

¹²“Yennu, biit nba ki ti tun biira na yabita. Ti biit na wantit nan ti biira. Ki ti mi ti biit maŋ kur po fanu. ¹³Ti ki sak a mɔbi, ki bia yêtawa, ki bia ki sak tin weia. Ti dint leeb biake, ki bia lek ti nunii siar po ŋaan nyika. Ti dudukit tee biite, ki ti mɔbona tee faak. ¹⁴Barmɔnii yaat ti boore, ki linba took kan nakint. Ti yêt mamɔmme, ki bia ki teen niib bi mɔnii. ¹⁵Mamɔmm mantik waar, ki li te wunba nyik yanbɔntoona, ki bi dintɔ biak.”

Biaŋinba ki Yennu tee siir a wun tinn u niib

Yennu la linba nawa, ki u par biir nan niib nba ki laat bi mɔnii na paak. ¹⁶Li bakitɔe nan waa la ki sɔɔ kaa ki saa somm binba ki bi dintib biak na. Li paak, u saa jii u tiɔŋ yiikooe ki nyinnib, ki te bin nyann. ¹⁷U saa lia barmɔnii nan gbakinu nae, ki bia yir tinnu nan kut fokirik na. U sii gbee nan lonchiɔŋ nba ki u saa ŋamm bonae, ki dat niib tuba ki kɔn binba di fara na paak. ¹⁸U saa dat u datai tuba nan bi toona nba tee biaŋinba nae, nan binba be banfɔka na gbaa. ¹⁹Laa nyii yondo po ki saa tuu yonbaa po, sɔɔ kur sii tiinɔ, u panchiɔŋ na paak. U saa baar nan nyunmɔnn nae, ki tee nan wonpaaruk na.

²⁰Yennu yeen u niib a, “N saa baar Jerusalem ki kɔn i paak, ki tinn yimm nba kur nyik i toonbiit na. ²¹N lor mɔlore nani, ki turi n Seek nan n wannu, ki li sii tee i yar yoo kur; laa nyii mɔtana ki saa, li tee yin sak n mɔbe, ki bia tumii i waas nan i yaaboona ki bin sak n mɔb yoo kur.”

Ki jiin Jerusalem baakir nba baat na po

¹Jerusalem, fiit kii nyirii nan yonnu na;

Yabint Yennu yentchiɔŋ na yentire a paak.

²Bunbɔnne saa piin digbanlia,

ŋaan ki Yennu maŋ yentu na sii yeen a paak,

ki u yentchiɔŋ na sii be nana.

³Digbana saa baar a yentu na ni,

ki kpanbara saa baar a dapaann yentu na ni.

⁴Gotir lint a mɔŋ ki la linba tuun,

a niib lakinte a bin kpen.

Bi saa jii a bonpoi na nan bi tee waase na.

A bonjai saa nyi banfɔka ki kpen.

⁵A saa la linba na ki gbee nan kpinkpammuk.

Parpeenn saa jek a gbanu.

Bi tan saa baar nan digbana mɔkint ki tura.

Bi mɔkint saa nyi mɔkgbeŋir pootir ki baar a boor.

⁶Laagumiinba saa jii jika ki nyi Midiann nan Efa

ki baar a boor.

Bi saa nyi Sieba ki baar nan salima nan bonnunubit.

Niib saa pak barŋanii ki jiin linba Yennu tun na po.

⁷Ki bi saa baar nan Kedar nan Nebayof pei kur a boor,

ki li tee maruŋ, ki mannir binbintir paak, ki lin maŋ Yennu.

Ki Yennu saa faŋ u ŋasaakak na, ki lin gar laa tuu tee.

⁸Ŋarinlanae naan sanpagbant na,

ki tee nan ŋmana nba tuu ŋmat kun na?

⁹Li tee ŋarint nba nyii banfɔkae, ki kpent nan Yennu niib.

Bi dia salimpeena nan salimmɔna,

a bin tur Yennu sann baakir;

ŋɔɔe tee Israel teeb kasii Yennu

nba te ki digbana kur teen u niib baakir na.

¹⁰Yennu pak tur Jerusalem a,

“Boorganue saa ŋamm maa a joona,

ki bi kpanbara sii jiantira.

N bo be wutoor nie ki dat a tubir,

ŋaan mɔtana n saa tina ninbaauk, ki tura sommir.

¹¹A tammɔi sii yaae yonnu ni nan nyiɔk,

ki lin te digbana kpanbara n baar nan bi mɔkint ki tura.

¹²Ŋaan n saa biir digbana nba ki jiantira nae peb.

¹³“Ki bi saa baar nan daat nba tee foi nan naagbasukirii,

nan kɔɔnsaant nba tee Lebanonn fɔɔr ni tiŋanii na,

ki tan ŋamm maa fin Jerusalem, ki faŋ n jiantu ŋasaakak na,

ki bia faŋ n doo maŋ.

¹⁴Binba dinta biak na yaaboona tan saa baar

ki gbaan a tɔɔnn ki tura baakir,

ki binba yisima na kur tan saa gbaan ki jianta,

ki saa yiina a, ‘Yennu doo,’

ki bia sii yiia ‘Sayɔnn nba tee Israel teeb kasii Yennu doo.’

¹⁵“Bi ji kan yêta ki bia namani, a ji kan biar dɔɔ yanni.

N saa teena digbanjaann, ki bia faŋa.

Ki a sii tee siaminba ki kpinkpammuk yɔɔ be.

¹⁶Digbana niib nan kpanbara sii dinta

nan binaa nba tuu dint u bik nae,

ki a saa bann nan min Yennu-e tinna,

a min Israel teeb Yabint Yennu-e nyinna ki ŋaa-a.

¹⁷“N saa tura salimmɔnae, ŋaan nyik kutmɔnt,

ki tura salimpeena nan kutmɔnt, ŋaan nyik kut nan taabii,

ki tura kut, ŋaan nyik tana.

A diara ji kan mukisani.

N saa te ki bin dia-a nan ŋamm nan parmaasire.

¹⁸Sɔɔ ji kan gbat jat fuuri, ki biiru ji kan ban bukir a tiŋi.

N saa guura ki kɔn a paak nan joonjouk nae,

ki a saa dontin, kimaan maa tinna na paak.

¹⁹“Yonnu kaa ji sii tee a yentu, daar ni,

ki ŋmaarik mun kii tee a yentu, nyiɔku.

Min Yennu-e sii yɔɔ tee a yentu yaayoo siiyoo.

N baakir yentu na sii yeen a paak,

²⁰ki a parbiir na saa gbenn.

Min Yennu-e sii yɔɔ tee a yentu yaayoo siiyoo,

ki saa yukir gar yonnu nan ŋmaarik.

²¹A niib kur sii tuun linba ŋan,

ki saa yent tiŋ na yaayoo siiyoo.

Mine namm ki kaamm a man fiit n yabint ki wann sɔɔ kur.

²²A ŋabik nba tee sikin-n-mɔŋ ŋaak na saa la paŋ,

ki tee nan digbanjaann na.

Li yoo-i baar, n saa te ki linba na n tume yiama.

Mine tee Yennu.”

Ki jiin tinnu barŋanii po

¹Yabint Yennu Seek be n ni.

U gannin ki tumin a man mɔɔnt barŋanii ki tur tatimm,

ki maan binba para biir na,

ki mɔɔnt tur yommii ki bin la yent-n-mɔŋ,

ki mɔɔnt tur dansarkɔɔra ki bin la fat-n-mɔŋ.

²U tumin a man mɔɔnt a yoo na baar

nan Yennu n tinn u niiba, ki nyann bi datai.

U tumin a man maan binba mɔ na kur parae,

³ki tur binba mɔ Sayɔnn na parpeenn nan kpinkpammuk,

ki li kii tee parbiir kaa, a bin nyik parbiir,

ŋaan kii yiin dontir yanii.

Bi sii tee nan tiinii nba ki Yennu tiɔŋ burir nae,

ki bi kur sii tuun linba took.

Ki Yennu saa la dontir, waa tun linba paak.

⁴Bi saa ŋamm maa doi nba dɔɔr langbent ki li yukir na.

⁵N niib, boorganu saa jianti.

Bi sii gorii i bonkobit, ki sii ko i kpaant, ki ŋamii i daan tiinii,

⁶ki bi sii yi-i Yennu mannteeb, ki yi-i Yennu toontunna.

I saa di digbana na mɔkint,

ki sii mɔk parbifaant nan li tee i yare.

⁷I fei nan yukpiasir kur gbenna.

I sii be i tiɔŋ tiŋ ni, ki i mɔkint saa pukin,

ki i parpeenn sii be yoo kur.

⁸Ki Yennu yet a, “N loon ŋante,

ŋaan n ki loon mukisuk, nan toonbiit.

N saa pa n niib nan barmɔnii, ki lor mɔlor kangbennuk namm.

⁹Bi sii tee niyikae digbana niib boor.

Wunba lab saa bann nan bi tee niib nba ki n teen piisin bi paake.”

¹⁰Jerusalem kpamm linba ki Yennu tun na paake.

U tee nan pooyookir nba tuu lia tiat

ki teen siir nan chiann nae.

Yennu-e turɔ tinnu nan nyannu.

¹¹Bonboorii nba tuu pia ki kpaat biaŋinba na,

nnae ki Yabint Yennu saa tinn u niib,

ki digbana kur niib saa pak dontɔ.

¹N saa pake ki maan Jerusalem par.

N kii ŋmin see ki u tan tinn,

ki u nyannu yeen nan nyiɔk muu na.

²Jerusalem, digbana saa la a popeensin,

ki bi kpanbara kur saa la a yabint nba tee biaŋinba.

Bi saa pura sanpaanne, sann nba ki Yennu tiɔŋ pura na.

³A sii tee nan naan fokirik nba fan biaŋinba nae ki tur Yennu.

⁴Sɔɔ ji kan yiina, “Kaadɔuŋ,” koo ki yiin a tiŋ “Pooluukir.”

A sanpaanne sii tee “Yennu par mei u paak.”

Ki bi sii yi a tiŋ na, “Jakunŋant,”

kimaan Yennu par mei a paak,

ki u sii tee nan sɔrɔ na ki tur a tiŋ.

⁵Naasimɔ nba tuu ji sapaanmunn ki teenɔ u poo biaŋinba na,

nnae ki a naamiidaanɔ saa kɔɔna.

Naasimɔ par nba tuu mei u poo paak biaŋinba na,

nnae ki Yennu par sii mei a paak.

⁶Jerusalem, n kaan guuteebe a joonjouk na paak.

Yonnu nan nyiɔk kur bi ki tee saa ŋmini.

Li tee bii tian Yennu u mɔsona na poe, ki daa te ki u tammiti.

⁷Bi daa teenɔ yaak, see ki u tan fiin Jerusalem,

ki teenir doo nba ki durinya kur saa pak dont.

⁸Yennu senn mɔsonjaanne,

ki saa jii u yiikoo ki gbeen u mɔsonn maŋ a:

“I dii ji kii tee i datai jeeti, ki nigamm ji kan nyu i tilɔɔna daan.

⁹Ŋaan yimm nba bur ki bia jaan dii maŋ nae

saa di li jeet, ki pak dont Yennu.

Yimm nba ŋamm ki bia pɔɔr li lɔɔna nae

saa nyu li daan, n jiantu ŋasaakak dindouŋ ni.”

¹⁰Jerusalem teeb, nyimin doo na ni man,

ki faa sɔnu ki tur i niib nba jent na.

Faan sɔnjar ki gbab tana. Ii teen dɔk ki digbana na n bann

¹¹nan Yennu mɔɔntir teen tingbouŋ kure a,

“Pakin Jerusalem teeb a, ‘Yennu baat a wun tinni,

ki tɔk nan niib nba ki u tinnib na.’ ”

¹²I sann sii tee “Yennu kasii niib,”

nan “Niib nba ki Yennu tinnib.”

Jerusalem sann sii tee “Doo nba ki Yennu loon,”

nan “Doo nba ki Yennu ki yêtir.”

Ki jiin Yennu nyannu po

¹“Ŋmee nyii Bosra, doo nba be Edom tiŋ ni ki baat na? Ŋmee jia lia tamɔnt fanu ki somm nan paŋ nan yiikoo na?”

“Li tee Yennu nba mɔk paŋ ki tinnit nae baat a wun mɔɔnt u nyannu po.”

²“Bee ki u liant jia mɔn nan jɔɔ nba tuu ŋmaan mit daan tilɔɔna a wun teen daan na?”

³Ki Yennu jiin a, “N ŋmaa digbana na nan daan tilɔɔna nae, ki sɔɔ ki nyii sommin. N ŋmaab nan wutoor, ki bi sɔn nyii tat n liant. ⁴N dukin nan yoo baar nan man tinn n niiba, li bo tee yoo nba ki n saa dat bi datai tubae. ⁵Li bakitime, yoo nba ki n got ki la nan sɔɔ kaa ki saa sommin na. Ŋaan n wutoor na turin paŋe, ki n mɔŋ kɔn ki nyann. ⁶N wutoor nie ki n ŋmaa digbanmuna ki matib. N kpaar bi manfoor sɔme ki mɔɔn.”

Ki jiin Yennu ŋant po

⁷N saa pak Yennu lomm nba ki gbent na poe.

N dontirɔ nan waa tun linba kur ki turit.

U teen piisin bonchiann timm Israel teeb paak,

kimaan u ninkpabauŋ nan u lonchiɔŋ na paak.

⁸Yennu yet a, “Bi tee n niibe, bi kan kpannin.” Li paak ki u tinnib ⁹bi biak dinu kur ni. Li din ki tee malaka kaa, ŋaan Yennu tiɔŋo din tinn u niib. U lomm nan u ninkpabauŋ paak ki u nyinnib. Yoo nba gar, u yɔɔ goriib, ¹⁰ŋaan ki bi yêtɔ, ki te ki u kasii Seek na la parbiir. Ŋanne ki Yennu kpant bi dataak ki kɔn namm.

¹¹Tɔn, ki bi ji tiar Moses nba din be sianyoo na po, wunba din tee Yennu toontunnɔ na, ki boi a, “Yennu nba din tinn u niib tɔɔndamm mɔkgbeŋir ni na, ji be lia? Yennu nba din jii u kasii Seek ki tur Moses na ji be lia? ^12-13Yennu nba din jii u paŋ ki tun toonjaana ki li nyii Moses ni, ki u bɔkit mɔkgbeŋir nyun, ki tɔkin nan u niib li sunsuŋ ni, a wun la sangbeŋir nba sii yɔɔ be na, ji be lia?”

Yennu-e din gar bi tɔɔnn, ki bi somm nan taanii na, ŋaan ki ki gbiat. ¹⁴Baa tuu jii bonkobit ki saan namm tinkpiasir ni biaŋinba na, nnae ki Yennu tur u niib foon. U gar u niib tɔɔnne, ki u sann la baakir.

Miaru nba jiin sommir nan ninbatinu po

¹⁵Yennu, faa be sanpaapo ki tee kasii ki mɔk baakir na, a gotit. A baka nba tuu be ti ni bonchiann na be lia? A paŋ na be lia? A lomm nan a ninkpabauŋ na be lia? A daa nyɔrin nyikinti. ¹⁶Fine tee ti baa. Ti yeejamm, Abraham nan Jakɔb ki gaariti, ŋaan fin Yennu-e tee ti baa nba yɔɔ tintit. ¹⁷Bee ki a te ki ti nyii a sɔnu ni-i? Bee ki a kpaa ti tuba, ki te ki ti nyikaani? Jenin, kimaan binba jiantira, nan binba yɔɔ tee a yab na paak.

¹⁸Timm nba tee kasii niib na din kɔɔ kar a kasii doo na ni waame, ŋaan mɔtana ti datai ji biirira. ¹⁹A diat nan a ki ban teen ti kpanbar nae, ki tee nan ti ki ban teen a niib na.

¹Bee ki a kan pat sanpagbouŋ ki siki? Kunkona bo saa la-a, ki jaŋmaanii n jekib. ²Bi bo sii jekir nan nyun nba tuu yaak muu paak ki daan nae. Baat ki tan fiit a yiikoo ki wann a datai, ki te digbana n jekir a numm ni. ³Yosau din be ki a baar ki tun yanputuk toona nba ki ti bo ki daan; kunkona din la-a, ki jaŋmaanii jekibe. ⁴Sɔɔ ki ban la, koo ki gbat yensau po ki u tee nan fin na, ki tuun li toonbooru ki teen binba teen bi dindann u ni na. ⁵A tuu gaar binba para mei toonŋana tumu paake, binba tian faa loon bii be biaŋinba. A wutoor bo doo ti paake, ŋaan ki ti tukin ki tuun linba bi; nan faa lek be a wutochiɔŋ na kur ni, ŋaan ti tuun biite, laa nyii sianyoowa. ⁶Ti kur na tee biit damme, ti toonŋana kur gbaa tee jakinte yoo kur. Ti biit te ki ti tee nan tituut nba tuu koor ki wouŋ n pebirir nae. ⁷Sɔɔ ki baat a boor miaru ni, sɔɔ ki baat a boor ki loon sommiri. A bɔre, ki ti ki laata, ki nyɔr nyikit kimaan ti biit paak.

⁸Ŋaan fin Yennu-e tee ti baa. Ti tee nan yɔk nae, ki a mun tee nan yɔkmaarɔ na. Fine nant, ⁹li paak a daa mantik dont wutoor ti paak, koo ki dia ti biit yoo kuri. Ti tee a niibe, ii mɔk ninbatinu ti paak. ¹⁰A kasii doi na tee nan kunkoouk nae. Jerusalem tee langbenchiate, ¹¹ki ti jiantu ŋasaakak, kasii nan fant boor nba ki ti yeejamm din dontira na, dii muu ki biira. Taa tuu loon boa nba na kur ji tee langbente. ¹²Yennu, linba na kur, a par ki lakib li paaki-i? A kan tun siar ki sommit, ŋaan te ki ti di biak nba ki ti kan fit gubin na-a?

Ki jiin mɔyêtuk damm tubdatu po

¹Yennu yet a, “N bo teen siir maa n gbat n niib miarue, ŋaan ki bi ki miarin; n teen siir maa bin lame, ŋaan ki bi ki lomin. Digbann na ki miarin, ŋaan ki n bo teen siir maa n gatib a, ‘Mine na, n saa sommiwa.’ ²Yoo kur n teen siire maa n gaar n niib saauŋ, ŋaan ki bi jii tubkpaasuk, ki tɔkii bi yur po sɔnii, ki tuun linba ki ŋan. ³Yoo kur bi dont n wutoore, ki li ki mɔkib fei. Bi mann tingbana kpaant ni, ki jokit bonnunubit pata binbinta paak. ⁴Nyiɔk, bi tuu saan tanfiat nan kaat nie ki piak nan kpeemm. Bi ŋman doorii65.4 Doorik din tee kɔɔre ki turib. nan pata nant, ⁵ŋaan yeen leeb na a, ‘Seetir ti boor ni man, ti teen kasii ki paak nan yin siita.’ N ki loon li nibooru maan. N wutoor doo bi paak nan muu nba kaa kpeenu nae.

⁶“N poŋ soor maa saa dat bi tuba biaŋinbawa, ki bi tubdatu sɔb ki be. N kan nyik baa tun linba na, ŋaan n saa pab ⁷bi biit paak, nan bi yeejamm biit paaka. Bi joo bonnunubit tingbann mann boa nba be kunkona paak na, ki pak biit ki jiin n powa. Li paak, n saa dat bi tuba bi biit nba jaŋ biaŋinbae.”

⁸Yennu bia yet a, “Sɔɔ ki biir daan tilɔɔna nba ŋani. Bi tuu jiir ki ŋaa daame. N mun kan biir n niib kuri. N saa tinn binba jiantirin nae. ⁹N saa teen piisin Israel teeb nba nyii Juda booru ni na paak, ki bi yaaboona saa yent n tiŋ nba tee kunkona na. N nigannkab nba jiantirin nae sii be leŋ. ¹⁰Bi sii jiantirin, ki tuu saan nan bi pei nan nei Saronn paanu ni, yonbaa po, ki bin ŋman mɔɔt, ki bia saan yondo po, Daamii Baauk na ni.

¹¹“Ŋaan li kii tee nna kaa ki tur yimm nba yêtin, ki yêt n kasii kunkonn nba tee Sayɔnn, ŋaan jiantir Gaad nan Meni nba tee yumann nan yubɔnn pata na. ¹²I joontu sii tee yin kpo jat kuume, kimaan maa yiini, ki i ki toon, ki n pak, ki i ki gbiint na paak. I lor tee yin yêtime, ŋaan kii tuun biit. ¹³Ki n beeri nan binba jiantirin ki saak n mɔb na sii mɔk bonchiann ki di ki nyu, ŋaan yimm n sii be kon nan nyunnyukurue. Bi sii mɔk parpeenne, ŋaan ki yimm di fei. ¹⁴Bi sii yiin parpeenn yaniie, ŋaan ki i mɔ nan yanyêtuk. ¹⁵N nigannkab saa jii i sanne ki li tee mɔtont nyinn. Min Yabint Yennu-e saa kpi-i, ŋaan n saa tur binba saak n mɔb na sanpaanne. ¹⁶Tiŋ na ni, wunba kur loon piisin saa boi barmɔnii Yennu-e piisin po. Wunba senn mɔsonn saa por barmɔnii Yennu sann nie. Yaayoo ni daamii na saa gar, ki bin tamm li po.”

Ki jiin naamii nba paan po

¹⁷Yennu bia yet a, “N yaa n nan tingbounpaann nan sanpaapo paanne. Nisaarii saa tamm linba tun ki gar na poe fas. ¹⁸Ii mɔk parpeenn kii kpamm, linba ki n nan na paak yaayoo siiyoo. Jerusalem paann nba ki n naan na saa gbee nan kpinkpammuko, ki u niib sii mɔk parpeenn. ¹⁹N mɔŋ saa gbee nan parpeenne, kimaan Jerusalem nan li niib paak. Mɔŋ sii kaa leŋ, sɔɔ kii boi sommir po. ²⁰Waas ji kii kpenn bonbuna, ki nisaarik kur tuu sii be ki saa tuu u manfoor terik. Binba dian bina kobik na, bi sii yib nipaauŋo. Bi-i kpo ki ki baar nna, li sii tee nyinne nan n dat bi tubir. ^21-22Niib saa maa ŋei ki kɔɔ bi mɔŋ; li kii tee siab kaa saa kɔɔ. Bi saa bur daan tiinii ki nyu li daan; li kii tee siab kaa saa nyu-u. N niib manfoor sii wei nan tiinii nba wei biaŋinba nae. Bi saa di baa tun linba ki la li manu. ²³Toonn nba ki bi tun na sii mɔk nyɔɔt, ki bi waas kan kɔɔ ninbɔŋ ni. N saa teen piisin, ŋamm nan bi yaaboona paak, yoo nba kur baat. ²⁴Bi tuu tan sii mein ki gbent na, ki n turib gatuwa. ²⁵Kinkata nan pebis saa lakin di jeet, ki yanbɔra saa ŋman mɔɔt nan nei nba ŋman biaŋinba na, ki wai ji sii kaa lɔbii. Ki Sayɔnn nba tee n kasii kunkonn na, siar sii kaa li paak ki tee daŋ, koo bonbiiri.”

Biaŋinba ki Yennu saa bu digbana buut

¹Ki Yennu yet a, “Sanpaak tee n naangbouŋo, ki tingbouŋ na mun tee n taakpakitir. Ŋaboorbee ki i saa maa turimi? Binbebolanne ki n sii be leŋi? ²N tiɔŋo nan durinya na kur. N par mei nan binba sikint bi mɔŋ ki mɔ kɔɔ bi biit paak nae, ki tee binba tiinin ki saak n mɔb na.

³“Niib na tuun bi yanbɔɔte. Bi boor, li kaa bɔkitu, baa kpii bonkobuk koo nisaarik ki mann maruŋ, baa lek kpii peeuk koo bɔki, baa lek baar nan jeet piinii koo baa dia doorik sɔmi, baa lek joo bonnunubit koo baa mann patiri. Bi para mei jiantu nba tee bonbilankant na paake. ⁴Li paak, n saa baar nan biak bi paak, ki li tee bona nba ki bi kpan tiin na, kimaan maa yiin, sɔɔ ki toon, maa pak, sɔɔ ki gbiinti. Bi lor a bin yêt n mɔbe ŋaan kii tuun biit.”

⁵Gbiintir linba ki Yennu piak, yimm nba tiinɔ ki bia saak u mɔb na a: “Yaa saak n mɔb na paak, ki i nisiab nami, ki ki mɔk siara lor nani. Bi laai ki yeen a, ‘Ŋaant ki Yennu n wann u paŋ ki tinni, ki tin la kii kpamm,’ ŋaan bi mɔŋe saa di fei. ⁶Gbiintir man, fuut nba fu doo ni na, nan gbɔɔruk nba be jiantu ŋasaakak ni na, tee min Yennu nba daar n datai tuba nae.

⁷“N kasii doo tee nan poo nba tuu kpir mar bik, ŋaan ki ki mɔ matyiaru nae. ⁸Sɔɔ mi la koo ki gbat li bonbooru-u? Bi ban maa digbann dayennkɔɔ-ɔ? Sayɔnn digbann kan di fara ki lin wei kaawa nan li maanu. ⁹Daa dukii nan n niib matuk yoo saa baar, ŋaan ki n kan maribi.” Yennu-e pak na.

¹⁰Ii taan Jerusalem po kii kpamm,

kii mɔk parmaasir u paak, yimm nba kur loon doo na na.

Yimm nba kur tuu mɔ u paak na,

ii taan u po kii kpamm mɔtana man.

¹¹I saa di u mɔkint na mant,

nan bik nba tuu tuuk u naa biir ni biaŋinba nae.

¹²Ki Yennu ŋamm yet a, “N saa turi mɔkint nba sii yɔɔ be-e, ki digbana mɔkint sii baat i boor, nan mɔkir nba yɔɔ puub ki ki fɔɔt na. I sii tee nan bik nba ki u naa tuu mɔɔntɔ, ki diau u nii ni, ki goriiɔ nan lomm nae. ¹³N saa maan i para Jerusalem doo ni, nan binaa nba tuu maant u bik par biaŋinba na. ¹⁴Yi-i taŋi la ki linba na tuun yoo nba, i sii mɔk parpeenn, ki lin turi paŋ nan laafia. Ki i saa bann nan min Yennu sommit damm nba saak n mɔbe, ŋaan dia n datai na nan wutoor.”

¹⁵Yennu saa baar nan muue, ki baar nan sajaperinn na, ki dat binba ki u wutoor doo bi paak na tuba. ¹⁶U saa jii muu nan banjiake ki dat durinya na niib nba kur mɔk biit na tuba, ki kpi bi bonchiann.

¹⁷Ki Yennu yet a, “Binba ŋamii bi mɔŋ ki jiin pata jiantu po, ki lakin saa poochianfei ni, ki ŋman doorii nan lɔɔrii, ki bia di jeleet nba tee kɔɔr na, bi joontu baara. ¹⁸N mi bi dudukit nan bi marima. N baate a man taan digbana kur niib. Bi-i lakin yoo nba, bi saa la n yiikoo nba saa tun linba, ¹⁹ki bann nan mine daar bi tuba.

“Ŋaan n saa tinn bi siab ki saan namm digbana nan tinii nba fɔk, ki ki ban gbat n sanjaann na po, koo ki la n yabint nan n yiikoo na. Li digbanae tee Speenn nan Libia nan Lidia, siaminba ki li niib mi tɔrbantɔnu bonchiann na, ki bia saan namm Tubal nan Griis. Digbana na nie, ki bi saa mɔɔnt n yabint nba tee. ²⁰Bi saa nyi nan i tiŋ ni nileeb na kur digbana ki jen namm, ki bi sii tee piinii ki turin. Bi saa jakinib taanii nan bontaanii nan laagumiinba nan taantorit nan jika torite, ki jen namm Jerusalem, n kasii kunkonn paak, ki li sii tee nan Israel teeb nba tuu teen jeet piinii, bona nba yeen na ni, ki baar nann jiantu ŋasaakak ni biaŋinba na. ²¹N saa teen bi yemm nba mannteeb nan Liifai teeb.

²²“N yiikoo nba saa te ki tingbounpaann nan sanpaapopaann yɔɔ be biaŋinba na, nnae ki i yaaboona nan i sann sii yɔɔ be. ²³Ki ŋmaapaaŋ jaamm kur, nan foon daar kur, digbana kur niib saa baar Jerusalem na ki tan jiantin.” Yennu-e pak na. ²⁴“Bi-i nyii yoo nba, bi saa la binba yêt n mɔb na gbanankpeena dɔɔ dɔɔ. Ki nanwuba nba kɔɔb na kan ban kpo-o, ki muu nba dib na kan ban kpeeni. Ki li yiar ni sii pɔi bonchiann ki teen nisaarik kur.”