HABAKUK
gbouŋ
Ki jiin Habakuk gbouŋ na po
Habakuk din boi Yennu linba paak ki u te nitont nba tee Babilonn teeb na dat Israel teeb nba ki ton nan ŋamm na tuba. Yennu din jiin a u tan saa dat Babilonn teeb tuba li poorpoe. Gbouŋ maŋ joontu ni, Habakuk yet nan u lek-ii kɔŋ bont kur, ŋaan u sii kpamm ki mɔk parpeenn, kimaan Yennu-e tee u tinntɔɔ.
11Mɔmaan nba nae ki Yennu fiit ki tur u sɔkinii Habakuk.
Biaŋinba ki Habakuk pak jiin ŋmabir po
2Yennu, n saa yiina ki loon sommir ki lin wei nleewa, ki a gbat ki tinnit kunkɔnbiir na ni? 3Bee ki a te ki n laat wahalboorik na? A saa teen nlee ki gorii toonbiboorik na tuumii? Biiru nan kpikpiruk lintima, ki kunkɔna nan gooruk goor lokir kur po. 4Sennu na ki paari, ki ki mɔk nyɔɔt, ki barmɔnbuut kaa. Ki toonbiit damm laat nyannu niŋamm paak, ki barmɔnii buut ji ki bu.
Biaŋinba ki Yennu pak nan u niib
5Ŋanne Yennu pak nan u niib a, “Ii gorii digbana nba kookii na man, li saa bakitiie nan yaa saa la linba. N yaa man tun siare, ki li-i tee ki i tan gbat li po yoo nba, i kan teen yada. 6N yaa man tur Babilonn teeb nba tee nitont nan jatdamm na yiikooe. Bi saa lin durinya na ni, ki kɔn nyann tinlia. 7Bi sii dont bi mɔŋ, ki tuun baa loon biaŋinba, ki jeent niib, ki bi tiin jaŋmaanii.
8“Ki bi taanii sii tiin nantaar ki gar naamuut, ki ton gar kinkata nba ki kon mɔkib, ki bi jab jakit taanii maŋ ki nyi digbanbanfɔka, ki baat, ki taanii na taawoka luk tiŋ. Ki bi laan tiŋ na paak, nan baakir nba tuu siik a wun soor nant na.
9“Ki bi kunkɔnkɔnna na baat nan jatuk a bin kɔn nyann. Baa baar yoo nba, ki jaŋmaanii soor sɔɔ kur bonchiann, ki yommii nba ki bi soorib na yab, ki tee nan mɔktanbiinii na. 10Ki bi sarikit kpanbara, ki laa toontunna saakab, ki poont tankpeka ki dent doo na joona, a bin nyannib, ki pansiak kaa ki saa fit gɔɔrib. 11Bi da nan wouŋ nae, ki saa gar. Bi paŋe tee bi yenbik.”
Biaŋinba ki Habakuk ŋamm pak u daamii ki tur Yennu
12Yennu, fine tee Yomdaanɔ, durinya na nba piina. Fine tee n Yomdaanɔ, ki tee kasii mɔkmɔk nan mɔkmɔk. Yennu nba tee n Yomdaanɔ ki bia tee n guutɔɔ, fine gann Babilonn teeb, ki turib paŋ, a bin dat ti tuba. 13Nlee ki a sii fit be nan kpinkpannii damm nba tee toonbiit damm na? A ninbina na mantik teen kasii nan lii gorii toonbiita, ki a bia kii fit laat niib ki bi tuun toonbiiti. Bee teen ki a ŋmin soon nna, ŋaan ki bi biir niib nba mantik be popeensin binbeŋ ki garib na?
14Nlee ki a sii dia nisaarii nan bi tee janii, koo bi tee bonbubɔkit nba ki mɔk tɔɔndaanɔ na? 15Babilonn teeb na gaant janpeenii ki so niib nan bi tee janii nae. Bi daarib nan laant, ki hoot nan kpinkpammuk, baa soorib na paak. 16Bi bia jiantir bi janlaant na, ki mann maruŋ ki teemm, kimaan bi janlaant na teemm bonŋana.
17Bi sii tun dia bi jukbanjai nae ki kpi niib yoo kur, ki ninbatinu kaa-a?
2Biaŋinba ki Yennu gat tur Habakuk
1N saa do n ditɔɔtii na paake ki saa guur, ki laan linba ki Yennu saa wannin a man pak, nan gatu nba ki u saa turin ki jiin n buboit na po.
2Ki Yennu gat turin linba na a, “Sɔbin bonpatlai paak, linba ki n saa fiit ki wanna na, ki bin tuu fit karin yian. 3A ŋaan ki lii be sɔbinii ni, kimaan yoo daa ki jaŋ nan lin tun nna, ŋaan yoo baate yian yian, ki maa saa wanna linba na, li set saa tun nan barmɔniiwa. Li sii tee nan li taantire na, ŋaan guutir, li tan saa baara, li kan yukir nan baaru. 4Mɔmaan maŋe na: ‘Binba tee biit damm, bi kii mɔk manfoor, ŋaan binba tee popeendamm, bi sii mɔk manfoore, kimaan baa waa Yennu na paak.’ ”
Ki jiin biit damm biiru po
5Mɔkint tee kpinkpanniie, ki ninfɔkdamm mɔk dont-n-mɔŋ, ki bia ki foi. Kuun nba ki gboot biaŋinba na, nnae ki siar ki jaŋitib. Li paake teen ki bi-i kɔn nyann digban-yenn, ki bi lɔ leer, a lii tee bi yara. 6Ki niib nba ki bi kɔn nyannib na saa pak biir binba nyannib na, ki sukiib, ki yet a, “I jii linba ki tee i yara, ŋaan li biiriwa. I saa jii yoo nlee ki mukis i pandiira ki bin pa-i, ki yin mɔkiti?”
7Yimm nba nyann i leeb na tan sii bant na, ki sɔɔ kii kɔɔ pana niwa, ki li saa mukisi ki yin pa ki pukin nyɔɔt. Datai tan saa baar ki kɔɔni jaŋmaanii. Bi saa fat i bona. 8I din fat digbana bonchiann niib mɔkint, ŋaan binba din tenn ki mɔk manfoa na, ŋamme saa fat i mɔkint mɔtana, kimaan yaa din kpii niib nba na, nan yaa din biir niib nba be durinya na ni, nan li doi na paak.
9I boonta. I te ki i ŋaateeb mɔkit nan linba ki i jii kpikpiruk ki fat, ki bia yabii a yin ŋamm i ŋei ki li daa biir, ki i bia daa kɔɔ ninbɔŋ ni na. 10Ŋaan i lorbiit na baar nan fei-e, ki tur i ŋaateeb. Yaa biir digbana bonchiann na, i baar nan biirue i mɔŋ paak. 11I ŋaadikpina tana na yikine, ki biiri, ki yɔkaa na mun bia mɔ li bannu.
12I boonta. I jii toonbiit nan nikpinu mɔkinte ki maa doo na. 13Digbana nba ki i kɔn nyannib na niib bak nan toon-yana tumu, ki baa maa linba kur dii muuwa. Yabint Yennu-e tun linba na. 14Ŋaan tingbouŋ na tan saa gbee nan Yennu baakir bannu, nan biaŋinba ki nyun tuu gbee mɔkgbeŋa nae.
15I boonta. I donn wutoore, ki butin ki bia dinn i leeb na fei; ki te ki bi lian nan bi nyuu yib na. 16Li paak, i mɔŋ tan saa di fei-e, li kii tee baakir kaa. I mɔŋ tan saa nyu ki lian nnae. Yennu-e saa te ki i nyu i mɔŋ nyubitik nba tee tubdatu, ki i baakir na saa tunn ki tee fei. 17I chɔɔ Lebanonn tijara nawa, ki siab mun saa chɔɔi mɔtana. I kpii leŋ bonkobita, mɔtana, bonkobite ji sii jeenti. Linba na tan saa teen, kimaan niib nba ki i kpiib na paak, nan kpikpiruk nba ki i baar nann durinya na niib paak, ki biir bi doi na.
18Tingbann nyɔɔt tee bee? Tingbann tee linba ki nirɔ ŋammire, li ki beera siar see faak kuukɔɔ. Nyɔlante ki u teen wunba namɔ na, ki u maa u paaki. Tingbann kan fit pak maan gbaa. 19I boonta. I piak nan daauk a, “Fiit kar,” ki bia yeen nan tankɔrit a, “Fiit set.” Tingbann saa fit fiit siar ki turiwa-a? Li-i lekii pɔr salimpeena nan salimmɔna, ŋaan manfoor kaa li ni.
20Yennu be u kasii Ŋasaakak ni; ŋaant ki sɔɔ kur nba be tingbouŋ na paak-ii tee soon nna u tɔɔnn.
3Ki jiin Habakuk Yenmiaru po
1Linba nae tee Yennu sɔkinii Habakuk Yenmiaru:
2Yennu, n gbat linba ki a tun na powa,
ki n ji tiina jaŋmaaniie.
A bia ŋamm tun toonjaana nba ki a tuu tuun na booru
ki turit mɔtana.
Ii mɔk ninbatinu, li-i lekii tee yoo nba ki a donn wutoor.
3Yennu bia saa nyi Edom poe ki jen;
kasii Yennu na saa nyi Parann kunkona na poe ki baar.
U yentsaakar na piin sanpaaka,
ki tingbouŋ na gbee nan u dontir.
4U baat nan sanyikintii yentue;
ki yentu yentir ki nyi u nuu ni.
Leŋe ki u yiikoo na bɔr.
5U tuu te ki yiaru n liit ki be u tɔɔnn,
ki te kuun waa u poor.
6U-u taŋi set yoo nba, tingbouŋ na tuu damme,
u-u lekii got digbana, bi tuu jekire.
Ki jɔfɔkit nba tuu be mɔkmɔk nan mɔkmɔk ji bit.
Ki kunkona nba tuu yɔɔ be na ji baa tiŋ ni,
ki tee kunkona nba ki u tuu somm li paak yaayoo niwa na.
7Ki n la Kusann teeb na tiin jaŋmaanii,
ki Midiann teeb na mun jekir.
8Yennu, li mɔka nae te ki a wutoor doo-o?
Mɔkgbeŋir nae mantik donn a wutoori-i?
Fine jaak sanpagbant na paak,
ki wonpaaruk nba be sanpagbouŋ ni na tee a taantoruk,
yoo nba ki a tur a niib nyannu na.
9Ki a teen siir a fan jii a tɔdaauk,
ki bia teen siir a fan yek a peenii.
Ki a sanyikintii na tɔ ki loot tingbouŋ.
10Yoo nba ki jɔfɔkit na got ki la-a na, ki bi jekir,
ki nyun nyii sanpagbouŋ ni ki baa.
Ki nyun nba be tingbouŋ na lɔŋ ni na fu fuut,
ki li nyunpana kpaatir do.
11Ki a peenii nba saa yian yian ki nyirii,
nan a kpann nba nyirii na
te ŋmaarik nan yonnu tuu biar set.
12A tuu somm lint tingbouŋ na nan wutoore,
ki a be wutoor ni, ki ŋmaan digbana.
13Ki a nyii, a fan tinn a niib,
ki bia tinn a kpanbar ganntɔɔ na.
Fine faa toonbiit damm tɔɔndaanɔ na ki birɔ tiŋ ni,
ki bia boont u poorpoweiteeb na fas fas.
14A peenii na ŋmuu saar u kunkɔnkɔnna saakɔɔ nae,
baa tan baarit a bin yatit yoo nba.
Bi tee nan wonpaaruk nae,
ki ji kpamm nan binba tuu bɔrii ki diin nandamm na.
15Ki a te a taanii na chibit mɔkgbeŋir na paak,
ki nyunchiɔŋ na teen nyunpuuk.
16Ki n gbia linba na kura ki jekir,
ki n mɔgbana jekir nan jaŋmaanii,
ki n gbanant baŋ, ki n taa ji jekir.
N saa guur soon nnae, ki saa tuu yoo nba ki Yennu
tan saa dat binba lekint na tuba.
17Daan tiinii na-i lekii kii mɔk lɔɔna,
ki kpan tiinii na mun ki yinn puuku,
ki tilontlia na mun bia ki loon lɔɔna,
ki tiŋ na mun bia ki nan jeeti,
pei kur-i lekii kpo,
ki naaloor na dɔɔ koont,
18ŋaan n lek sii kpamme, ki mɔk parpeenn,
kimaan n Yomdaanɔ Yennu-e tee n tinntɔɔ.
19Yabint Yennu-e teenin paŋ.
Ŋɔɔe te ki n somm fanu
nan piarɔ nba tuu somm biaŋinba na,
ki u guun fanu jɔfɔkit paak.