Tiitɩ

Ci kʊ Pol a ba

TIITƖ

ma

Ci kʊ Pol a ba Tiitɩ ma bɩ

gasʊʊrɛ

Pol ɩ ci bɩ ba. A ba a ʊ Tiitɩ ma, Tiitɩ zɩ bɩ grɛkkɩ m. Pol karɩndanyɩ m an zi ba kan Pol kɩ lemim nyɩnta padarɛ nɔ ʊ. (Galasii zannɔ 2.1-3) Nyɩnta Tiitɩ ʊ Krɛtɩ kʊ ʊ, an n’a dam sɩrakarɛzannɔ wɔɔ han, bɩ ma bɩ, Pol ɩ lɔnnɔcɛ ʊ, an a to b’ʊ an ci bɩ ba.

Ci bɩ k’a a ba bɩ, a hɩ a ʊ, k’a wosogʊɔɔlɛɛzannɔ mɩsɩrbaa k’an lʊnlɔ tɔ da Tiitɩ nɔ ʊ. K’a dʊndɔ ka sɩrakarɛzannɔ wɔɔ ʊ, an lɛ da bɩ, gʊɔɔgusinno wɔɔ kan lannɔ pooro wɔɔ kɩ, nyukumbonno wɔɔ kɩ, lɔnnɔ wɔɔ kɩ. K’a mɩsɩrbaa kʊ ŋ y’a ga m, ŋn’a ba an Woso nɔ yɩ bɩ tɔ da ŋ nɔ ʊ. Kʊ ŋ nɩ jɩm kɔɔkɔɔ a nɔ ʊ.

Pol ɩ yaa dam Tiitɩ m

¹Mɔɔ mɩŋŋa Pol, Woso zibəənyɩ m mɔɔ m, Yeezuu Krista zibəəzaa m mɔɔ m, kʊ m a ka kʊ gʊɔɔ kʊ Woso ŋ bɔ ʊ rɔ wɔɔ n sɩra ka, ŋnɩ sɩra dɔ, an a ga mɩsɩrbaa k’a Woso nɔ yɩ m, ²kʊ ŋ nɩ mɩsɩrbaa k’a nyarɛ ba ʊ bɩ ta a heer lɛ. Woso ɩ mɩsɩrbaa bɩ do ler bɔ wɔɔ m, bɩ ma bɩ, durnya ba ʊ y. Bɩ, Woso bɩr ŋʊaar barɛ y. ³Dɔmɩm kʊ Woso a cɩnta bɩ k’a b’a ku bɩ, a mɩsɩrbaa bɩ do hɩnka, lemim k’a ka kʊ gʊɔɔ n a pa da bɩ m. Woso mɩŋŋa, k’an wɔɔ bʊmbɔrɛzaa bɩ, a lɛ ka mɔɔ ʊ, an lemim bɩ do da mɔɔ wɔ ʊ, kʊ m a pa da. ⁴Tiitɩ, ci bɩ ba mɔɔ nawʊrɛ ɩbɩɩ ma, mɔɔ nyɩ paan… n’ɩbɩɩ m, sɩrakarɛ deem kʊ wɔɔ m ta m bɩ nɔ ʊ. A yɛ mɔɔ nawʊm kʊ wɔɔ Zɩ Woso kan wɔɔ bʊmbɔrɛzaa Krista Yeezuu kɩ n barka, kan laafɩɩ kɩ ka ɩ ʊ.

Zibəə kʊ Pol Tiitɩ da a barɛ ʊ

Krɛtɩ kʊ ʊ

⁵Ɩbɩɩ to mɔɔ ʊ Krɛtɩ kʊ ʊ b’ʊ, k’ɩ gɔɔta ɩ hɔ k’a n bankarɛ yɩ cɩna bɩ banka, k’ɩ gʊɔɔ nyʊkɔ ʊ, ɩ ŋ ba kristagʊɔɔ lɛɛzannɔ Krɛtɩ kʊnɔ rɔ wɔɔ biyəə nɔ ʊ, amba hɔ kʊ mɔɔ hɩ ɩbɩɩ m bɩ m. ⁶K’ɩ ʊ k’ɩ lɛɛzaa bɔ ʊ, a a ga m, an yɩ gʊaa kʊ n bɩ mim yɩrɛ n a hɩ ma y, a lʊ m bɩr deem, a nyɩnɔ m sɩrakarɛzannɔ, ŋ bɩr mɩsɩrbaa bʊnyaa barɛ y, balɛsire zannɔ bɛɛ nɩ ŋ mɩ sɔ y. ⁷Bala, kristagʊɔɔ lɛɛzaa bɩ, wosogʊɔɔ nyasʊnzaa m, bɩ minto bɩ, a a ga m, k’an bɩr gʊaa kʊ n bɩ mim yɩrɛ n a hɩ ma y, a n a ga m, an yɩ mɩŋŋabusurezaa, nɔmaazaa, gɛɛ bɛɛmirezaa waasɩ y, a n a ga m, an yɩ wɔkaarɛzaa nyaa bɩncɛ ʊ, gɛɛ zambʊ hɔ kamazaa y. ⁸A a ga m, an bɩr saanɔɔ sim a har ʊ mɩŋŋa, an bɩr zi mɩŋŋabarɛ ŋʊarɛ, an bɩr hɔɔndamimmazaa, an bɩr gʊaa tɩrga, gʊaa k’a nɩ mɩsɩrbaa k’a Woso nɔ yɩ bam, bʊraamazaa. ⁹A a ga m, k’an jɩm kɔɔkɔɔ Woso lemim paan… kʊ ŋ y’a dɩndam bɩ nɔ ʊ. Ncɩnaaʊ bɩ, a y’a dam ma, an gʊɔɔ dʊndɔ sɩra hɔdɩndarɛ bɩ nɔ ʊ, an bɩsɩkənno da jɩm ʊ.

Ŋʊaarhɔdɩndarɛzannɔ mim

¹⁰Gʊɔɔ wɔɔ nyʊkɔ ʊ amba wɔɔ hɩ bɩ m, bala, gʊɔɔ ta ʊ gʊta, an lɛ da bɩ, zɩɩfʊrɔ kʊ ŋ gasʊ baŋŋʊ ʊ rɔ wɔɔ barla, ŋ bɩr yɛm k’a zu sɩra ʊ y. Ŋ nɩ bra bɩmbam gʊɔɔ m meerbaa yaarsɩrɔ m. ¹¹A ka kʊ ŋ n’a meerbaarɔ wɔɔ barɛ to, bala, ŋ yɩ hadrɔ gɔsɩnnɔ gʊɔɔ zaar bam, ŋn’ɩ hɔ k’a n a ga m dɩndam gʊɔɔ m k’a hɔ yɩ, zambʊ hɔ yɩrɛ m. ¹²Krɛtɩ zannɔ wɔɔ mɩŋŋɔɔ gʊaa deem, kʊ ŋ nɩ dɩgam ma a lɛsinnɩsorazaa nyɩnta an a hɩ, a ʊ:

«Krɛtɩ zannɔ wɔɔ,

ŋʊaarzannɔ m tee…,

poohɔɔ nɩ ŋ mɩ,

yakʊzannɔ nɩ ŋ mɩ,

ŋ n hɔ vanta dɔ

kʊ hɔbɩrɛ bɛɛ y.»

¹³Hɔ kʊ gʊaa b’a hɩ naa, sɩra m, naa minto bɩ, həən si ŋ ma paan…, kʊ ŋ sɩrakarɛ n yɩ mɩŋŋa. ¹⁴Kʊ ŋ nɩ zɩɩfʊrɔ hɔdɩndarɛ k’ɩ ʊ noondarɛ m bɩ to, ŋ bɩ zu lɛrɔ kʊ gʊɔɔ kʊ ŋ sɩra to rɔ wɔɔ a cɩnta rɔ wɔɔ ʊ y. ¹⁵Kʊ gʊaa heer hu ta ʊ, hɔ haay hu ta ʊ sɔ kan kɩ. Bɩ kʊ gʊɔɔ kʊ dintinzannɔ m, ŋ bɩr sɩra kam nɔ wɔɔ nɩ, dintim m hɔ haay m kan ŋ kɩ. Bala, ŋ hɔɔndarɛrɔ bʊnyaa, kʊ ŋ y’a bʊnyaa bam sɔ, nyannɩ ba ŋ nɩ y. ¹⁶Ŋ y’a hɩrɛ ŋ ʊ, a Woso dɔ, bɩ ŋ zibəə bʊnyaarɔ wɔɔ y’a hɩnkarɛ ŋ ʊ, ŋ n Woso dɔ y. Hɔɔ bʊnyaarɔ nɩ ŋ mɩ Woso mɩm ʊ, bayɛrɛzannɔ m, ŋ b’a dam zi mɩŋŋa sɩ barɛ ma y.

Wosozuurezannɔ mɩsɩrbaa

¹K’ɩbɩɩ nɩ, hɔɔ kʊ ŋ y’a ga kʊ ʊ kan hɔdɩndarɛ k’an sɩra bɩ kɩ dɩnda gʊɔɔ m. ²A hɩ gʊɔɔ gusinno wɔɔ m ɩ ʊ, ŋn’a da a mɩŋŋɔɔ ma, ŋnɩ bɩr daʊrɛ m, ŋnɩ bɩr a hɔɔn dam mim ma mɩŋŋa, ŋnɩ bɩr sɩrakarɛ m paan…, ŋnɩ bɩr ŋʊarɛ denter m, ŋnɩ bɩr a tʊntɔŋ ʊ tee…. ³A hɩ lannɔ gusinno wɔɔ m sɔ ɩ ʊ, ŋnɩ bɩr mɩsɩrbaa mɩŋŋa k’a Woso nɔ yɩ bam, ŋ bɩ yɩ gʊɔɔ tɔzarlɛzannɔ y, ŋ bɩ yɩ bɛɛmirewaasɩzannɔ y, ŋnɩ zi mɩŋŋa barɛ dɩnda gʊɔɔ m. ⁴Ŋ n’a ba ncɩnaaʊ, kʊ lannɔ pooro wɔɔ n hɔɔntaʊrɛ dɩnda a zino kan a nyɩnɔ kɩ ŋʊarɛ minto, ⁵kʊ ŋ nɩ bɩr hɔɔndamimmazannɔ, ŋnɩ bɩr mɩsɩrbaa zore barɛ, ŋnɩ bɩr nyasʊrɛ a jɛɛr m mɩŋŋa, ŋnɩ bɩr nyɩntabaa m, ŋnɩ bɩr yɛrɛ a zino lɛ ma, kʊ gɔsɩ bɩ Woso lemim bɩ sʊnsɔ wʊ y.

⁶Nyukumbonno wɔɔ dʊndɔ maam sɔ ɩ ʊ, ŋnɩ bɩr a hɔɔn dam mim ma mɩŋŋa hɔ haay nɔ ʊ. ⁷A ka k’ɩ mɩŋŋa n yɩ makra mɩŋŋa, zi mɩŋŋa barɛ nɔ ʊ, hɔ dɩnda gʊɔɔ m sɩra m kan ɩ heer kɩ haay, a ka k’ɩ hɔdɩndarɛ nɔ ʊ, kʊ n n’ɩ gore da ʊ. ⁸A ka k’ɩ meerbaa n bɩr mɩŋŋa, kʊ gʊaa bɩ hɔsɩ yɩ k’a hɩ ɩ ma y, kʊ wɔɔ jɩnnɔ wɔɔ b’a da ma, ŋnɩ hɔ bʊnyaa hɩ wɔɔ ma y, kʊ ŋ nɩ nyannɩ bɩ.

⁹Lɔnnɔ wɔɔ dʊndɔ ɩ ʊ, ŋnɩ yɛ a soʊrezannɔ wɔɔ ma hɔ haay nɔ ʊ, ŋ n’a ka ma k’a ŋ heer nyɔɔ, ŋ bɩ bɩsɩ ka ŋ ma y. ¹⁰Ŋ bɩ hɔsɩ kʊna y, ŋnɩ bɩr a mɩŋŋa bam tee…, kʊ ŋ n’a dɔ ŋ ʊ, a ɩ sɩra bam. Ncɩnaaʊ bɩ, Woso kʊ wɔɔ bʊmbɔrɛzaa m bɩ, hɔ kʊ n n’a dɩndam bɩ daʊrɛ yɩm hɔ haay nɔ ʊ.

¹¹Bala, Woso a barka hɩnka gʊaa haay bʊmbɔrɛ tɔ ma. ¹²Woso barka bɩ n’a ŋʊam bɩ, kʊ wɔɔ n’ʊ bɔ mɩsɩrbaa bʊnyaa haay ʊ, kan durnya naa do lɛtaamarɔ haay kɩ ʊ. K’ʊ ʊ da ma, ʊ her-her mɩsɩrbaa naa ba mɩŋŋanyasʊrɛ nɔ ʊ, kan tɩrgabaa kɩ, Woso hɔɔnhɔ mɩsɩrbaa kɩ nɔ ʊ. ¹³Ʊ bɩr ʊ mɩsɩrbaa barɛ ncɩnaaʊ, ʊ bɩr dɔm dɔmɩm nyɩnta kʊ wɔɔ ta ʊ heer lɛ, wɔɔ bʊmbɔrɛzaa Yeezuu Krista lɛbɔʊrɛ n n’a hɩnkaŋ ʊ bɩ ma, a m wɔɔ Woso a m gʊta. ¹⁴A a mɩŋŋa ka zɛ ma wɔɔ tɔ ma, k’a a da ma, a wɔɔ bʊmbɔ mimbʊnyaa haay nɔ ʊ, k’awɔɔ hu bɔ, awɔɔ ba a mɩŋŋa dogʊɔɔ, k’ʊ bɩr zibəəro mɩŋŋɔɔ barɛ ŋʊam tee….

¹⁵Naa haay dɩnda, ɩ gʊɔɔ wɔɔ heer yo, ɩ ŋ bɔzaa ʊ lɛ kʊ Woso a ka ɩbɩɩ ʊ bɩ m. Ɩ b’a to kʊ gɔsɩ n’ɩ gore bɔ ʊ y.

Sɩrakarɛzannɔ mɩsɩrbaa

¹A hɩ sɩrakarɛzannɔ wɔɔ m haay, ɩ ʊ, ŋnɩ yɛ kʊ lɛɛzannɔ haay ma, ŋnɩ ŋ lɛ si, ŋnɩ bɩr zibəəro mɩŋŋɔɔ do haay barɛ ŋʊarɛ. ²Ŋ bɩ gɔsɩ sʊnsɔ wʊ y, ŋ bɩ nyaa ba y, ŋnɩ bɩr mɩŋŋabaa bam, ŋnɩ bɩr nyɩnta kan gʊɔɔ haay kɩ. ³Bala, wɔɔ nyɩnta biisi sɔ, ʊ n nɩ hɔɔnwar zi bam, ʊ m bayɛrɛzannɔ, ʊ nyaam, mɛsim lɛtaamarɔ do haay kan a hɔɔnhɔrɔ kɩ n’a so wɔɔ ʊ, ʊ n nɩ bʊnyaabaa bam, ʊ n n’ʊ kam ma k’ʊ yɩ am gʊɔɔ vantɔɔ m, ʊ a ka gʊɔɔ m sɔ ʊ m, ʊ sɔ kʊ m. ⁴Bɩ, Woso wɔɔ bʊmbɔrɛzaa bɩ, k’a b’a mɩŋŋabaa kan a ŋʊarɛ k’an ta m gʊɔɔ haay tɔ ma bɩ hɩnka bɩ, ⁵a wɔɔ bʊmbɔ vam, a n wɔɔ bʊmbɔ zibəə tɩrga kʊ wɔɔ ba barɛ m tɔ ma y, wɔɔ bʊmbɔ a ʊ, k’awɔɔ cicir zɛ bɩ tɔ ma. Wɔɔ bʊmbɔ a ʊ, an wɔɔ mimbʊnyaarɔ sʊrgɔ, *Sɛnt-Ɛspri n yɩrɛ daa ka wɔɔ ʊ, an mɩsɩrbaa daa ka wɔɔ ʊ. ⁶Bala, Woso a ka Sɛnt-Ɛspri n zer wɔɔ ra gʊta wɔɔ bʊmbɔrɛzaa Yeezuu Krista tɔ ma. ⁷A ba a ʊ ncɩnaaʊ, k’awɔɔ ba tɩrga a mɩm ʊ, a barka tɔ ma, kʊ wɔɔ n yɩ mɩsɩrbaa k’a nyarɛ ba ʊ bɩ hɔjirlezannɔ, wɔɔ taaheerlɛ bɩ m bɩ sɔ.

⁸Meerbaa kʊ mɔɔ ba naa, sɩra m, mɔɔ lɛ taa k’ɩbɩɩ m bɩr a hɩm paan…, ɩ bɩr som la, kʊ gʊɔɔ kʊ ŋ sɩra ka Woso ʊ rɔ wɔɔ n bɩr a tʊntɔŋ ʊ ŋnɩ bɩr lɛɛ, kan zibəəro mɩŋŋɔɔ barɛ kɩ tee…. Zi mɩŋŋa barɛ bɩ, hɔ mɩŋŋa m, a y’a dam gʊɔɔ han sɔ. ⁹Bɩ, ɩ bɩ yɛ bɩsɩkarɛ yaarsɩrɔ ma y, yaabɔɔ tɔrɔ gaandarɛrɔ sʊʊrarɔ ma y, Moyiisi lɛrɔ nyaabarɛ kan ŋ bakʊmarɛ rɔ wɔɔ kɩ y, ŋ nyɔɔdʊ ba ʊ, bɩ ŋ bɩr a dam gʊaa han sɔ y. ¹⁰Kʊ gʊaa ɩ gʊɔɔ gʊngʊ kʊ ma zi bam, k’ɩ həən si ma, k’a gɔɔta an nɩ tam lɛɛ, k’ɩ ɩ ya ɩ həən si ma, k’a a gu an nɩ tam lɛɛ k’ɩ bɔ ɩ zi. ¹¹Ɩbɩɩ dɔ ɩ ʊ, gʊɔɔ ncɩnaaʊ rɔ wɔɔ, ŋ zaa tɩrga bɩ to, ŋ mimbʊnyaarɔ wɔɔ nɩ ŋ nyaanlɛ hɩnkarɛ.

Leersore meerbaarɔ

¹²Mɔɔ Artemas gɛɛ Tisikkɩ nyɔɔrɛ ɩbɩɩ zi. K’a bɩ lee ku, k’ɩ tɔ ʊ ɩ bʊr Nikopolis ʊ mɔɔ zi. Bala, kʊ bɩ do mɔɔ hɔɔn bɔ ʊ, kʊ m nyɩnta ʊ nyɛɛm dɔmɩm ʊ.

¹³Ɩ tɔ ʊ, k’ɩ ɩ da lɛrɔ karɩnsaamba Zenas han, kan Apolɔs kɩ, kʊ hɔsɩ bɩ jɩra ŋ ma, ŋ zaakʊrɛ bɩ dɔmɩm ʊ y. ¹⁴Wɔɔ gʊɔɔ wɔɔ a ga m sɔ, ŋnɩ bɩr a kam ma k’a bɩr lɛɛ kan zibəəro mɩŋŋɔɔ barɛ dɩndarɛ kɩ, kʊ ŋ n’a da ma, ŋn’a da gʊɔɔ kʊ hɔ jɩra ŋ ma rɔ wɔɔ han. Ncɩnaaʊ bɩ, ŋ bɩ mɩsɩrbaa k’a nyɔɔdʊ ba ʊ barɛ y.

¹⁵Gʊɔɔ kʊ ŋ nɩ kan mɔɔ kɩ haay rɔ wɔɔ ɩ yaa darɛ ɩ m. Yaa da gʊɔɔ kʊ ŋ nɩ wɔɔ ŋʊam sɩrakarɛ nɔ ʊ rɔ wɔɔ m. Bɩ, Kʊ Woso barka n bɩr kan awɔɔ haay kɩ.