Ci kʊ Pol a ba
RƆM ZANNƆ
ma
Ci kʊ Pol a ba Rɔm zannɔ ma bɩ
gasʊʊrɛ
Pol ɩ ci bɩ ba. A ba a ʊ, Rɔm kristagʊɔɔ wɔɔ ma. Zɩɩfʊrɔ nyɩnta brɔɔ barla sɔ. A a gɩnga gallɛm gʊta k’a ta ŋ zi Rɔm ʊ b’ʊ, k’a n a da ma cɩna bɩ, an bɩ, an ci bɩ ba ŋ ma, an bʊmbɔrɛ bɩ zaa mim dɩnda ŋ nɩ, an a hɩnka a ʊ, gʊɔɔ haay kʊrɔ ma Woso lɛɛ, zɩɩfʊrɔ kan do vantɔɔ gʊɔɔ kɩ. Bɩ, kʊ ŋ sɩra ka Yeezuu Krista ʊ, Woso yɩ ŋ bam tɩrga a mɩm ʊ, b’a n zu kʊ ʊ kan ŋ zibəə kɩ y.
A a hɩnka ci bɩ nɔ ʊ sɔ, a ʊ, Krista bɩ, wɔɔ yɔ a nawʊm mimbʊnyaa lɔmbaa nɔ ʊ, kʊ wɔɔ n ʊ da ma, ʊ mɩsɩrbaa k’a Woso nɔ yɩ bɩ ba Sɛnt-Ɛspri paŋŋa nɔ ʊ. Hɔ kʊ ci b’ʊ k’a hɩnka an lɛ da bɩ, a ɩ yɩrɛ ɩ ʊ sɩrakarɛ bala n’a kam gʊɔɔ n bʊmbɔrɛ yɩ, Krista zibəə k’a ba gɔdarkʊra ma bɩ tɔ ma.
A gɩnga kʊ Woso n ta m zɩɩfʊrɔ tɔ ma bɩ mim hɩ, an a hɩnka sɔ a ʊ, kɛɛrɛ naa zɛkʊra ɩ zɩɩfʊrɔ kan do vantɔɔ gʊɔɔ kɩ bire ʊ Krista tɔ ma. Bɩ, ŋʊarɛ y’a ga m an nyɩnta ʊ kristagʊɔɔ haay bire ʊ, kʊ kʊmarɛ n bɩr ta ʊ. A n lɛ da bɩ, ʊ bɩ gʊɔɔ kʊ ŋ paŋŋa ba ʊ sɩrakarɛ nɔ ʊ hɔɔ niŋŋoo nɔ ʊ rɔ wɔɔ gore bɔ ʊ y, bɩ gʊɔɔ kʊ ŋ paŋŋa ba ʊ rɔ wɔɔ n a ga m sɔ ŋnɩ gʊɔɔ kʊ ŋ bɩr a hɔɔn dam hɔdeem ma kan ŋ kɩ rɔ wɔɔ dʊdɔ ka y.
1Pol ɩ yaa dam Rɔm kristagʊɔɔ m
1Mɔɔ mɩŋŋa, Pol, Krista Yeezuu zibəənyɩ m mɔɔ m, mɔɔ ɩ ci naa do ba awɔɔ ma. Woso mɔɔ bir kʊ m m ba a zibəəzaa, a mɔɔ bɔ ʊ m hɔ, k’a mɔɔ nyɔɔ kʊ m aa lemim nyɩnta bɩ pa da.
2Lemim nyɩnta bɩ do Woso nyɩnta an a ler bɔ tee… Wosoci nɔ ʊ, a lɛsinnɩsorazannɔ lɛ m bɩ. 3Lemim nyɩnta bɩ do bɩ, a Nyɩ Yeezuu Krista, wɔɔ Zuuba bɩ mim an n’a dɩndam. K’a mɛsim nɔ ʊ nɩ, Davɩd do gʊaa m. 4Bɩ, kʊ *Sɛnt-Ɛspri zibəə nɩ, Woso a mɩm bɔ ʊ gəəno bire ʊ, hɔ bɩ do n a hɩnka a ʊ, Woso Nyɩ m an nɩ paŋŋa m. 5Yeezuu Krista minto m mɔɔ n barka yɩ, m m ba a zibəəzaa, kʊ m a ka kʊ do haay gʊɔɔ m sɩra ka ʊ, ŋnɩ zu ʊ. 6Awɔɔ ɩ gʊɔɔ wɔɔ duro barla, bala, Yeezuu Krista y’awɔɔ bir k’a so awɔɔ ʊ.
7Awɔɔ haay kʊ sɩrakarɛzannɔ n’awɔɔ m, an nɩ Rɔm ʊ, Woso awɔɔ ŋʊa, an awɔɔ bir k’a nyɩnta a gʊɔɔ barla. A yɛ mɔɔ nawʊm kʊ wɔɔ Zɩ Woso, kan Zuuba Yeezuu Krista kɩ m barka kan laafɩɩ kɩ ka awɔɔ ʊ.
Pol lɛ taa k’a ta Rɔm ʊ
8A n lɛɛ ka bɩ, mɔɔ ɩ yaa dam Woso kʊ mɔɔ n’a zi bam bɩ m barka, Yeezuu Krista nɔ ʊ, awɔɔ haay minto, bala, durnya nɔ ʊ jilli n y’awɔɔ sɩrakarɛ mim dɩndam. 9Woso zi mɔɔ n’a barɛ kan m heer kɩ haay, a Nyɩ bɩ lemim nyɩnta bɩ padarɛ nɔ ʊ, a m mɔɔ kasɛtɩzaa, a a dɔ a ʊ, mɔɔ dɔmɩm haay yaadarɛ nɔ ʊ, mɔɔ y’awɔɔ tɔ darɛ m nɔ ʊ, 10m n’a yɛm han, k’a hɔɔnhɔ m, kʊ m kɔ, m zaa yɩ, m bʊr awɔɔ zi. 11Mɔɔ lɛ taa paan… kʊ m awɔɔ yɩ, kʊ m Sɛnt-Ɛspri ganwʊrɛrɔ jir kan awɔɔ kɩ, k’awɔɔ paŋŋa n a da ra gʊta, 12gɛɛ, k’ʊ kʊ paŋŋa da ra, awɔɔ kan mɔɔ kɩ, sɩrakarɛ deem kʊ wɔɔ n ta m bɩ nɔ ʊ. 13M danyɩnɔ, mɔɔ lɛ taa k’awɔɔ n a dɔ a ʊ, mɔɔ gɩnga gallɛm hɔka kʊ m bʊr awɔɔ zi, bɩ, an ta an her ku naa, mɔɔ n m da ma y. A ŋʊa mɔɔ ʊ kʊ m bɩ lee ku awɔɔ zi b’ʊ, kʊ m zibəə n nyɩ da, amba a a da kʊrɔ vantɔɔ ʊ bɩ m. 14Hɔɔngʊrɛzannɔ kan bahɔɔngʊrɛzannɔ kɩ mim pakra ba mɔɔ ma, mindonno kan bamindonno kɩ mim pakra ba mɔɔ ma sɔ. 15Naa y’a ka mɔɔ lɛ n taa paan… kʊ m lemim nyɩnta pa da awɔɔ m sɔ, awɔɔ k’a nɩ Rɔm ʊ rɔ wɔɔ m.
Paŋŋa kʊ lemim nyɩnta bɩ n ta m
16Nyannɩ bɩr mɔɔ zɛm lemim nyɩnta bɩ tɔ ma y, bala, Woso paŋŋa m, an nɩ gʊaa haay k’a sɩra ka bʊmbɔm. Zɩɩfʊrɔ a lɛɛ ka ŋ ma, an bɔkarɛ an lee ku do vantɔɔ wɔɔ zi. 17Wɔɔ y’a yɩm sɔ denter, lemim nyɩnta bɩ nɔ ʊ Woso tɩrgabaa n’a hɩnkaŋ ʊ, Woso ɩ gʊaa k’a sɩra ka bɩ bam tɩrga, sɩra k’a a ka Woso ʊ bɩ minto bala, amba n y’a gʊrsɩra ba Wosoci nɔ ʊ, n ʊ: ‹Gʊaa k’an tɩrga sɩrakarɛ tɔ ma bɩ mɩsɩrbaa bam.›
Gʊɔɔ kʊrɔmarɔ
18Woso a to brama an a heerbusu hɩnka, kʊ gʊɔɔ bɩr a daŋ ʊ, mimbʊnyaarɔ ŋn’ɩ ŋ bam, ŋ bʊnyaabaa n a ka, sɩra bɩr dɔm dɔ sɔ y. 19Denter m, hɔ k’a n’a karɛ ŋnɩ Woso dɔ n a nyaakʊm da y, Woso a hɩnka kʊ ŋ n’a dɔ mɩŋŋa. 20Paŋŋa kʊ Woso n ta m b’a jirə ba ʊ bɩ, kan Woso mɩŋŋa taʊrɛ kɩ bɩ, gɔsɩ bɩr ŋ yɩrɛ y, bɩ durnya darɛ tɛkka ma, gʊaa a da ma an ŋ yɩ hɔɔ kʊ Woso ŋ da rɔ wɔɔ nɔ ʊ, naa minto bɩ, gʊɔɔ bɩ gumə yɩm fɩɩga y. 21Ŋ Woso dɔ, bɩ ŋ bɩr Woso daŋ ʊ, ŋn’a barka darɛ amba Woso a ga m bɩ nɩ y. Naa n a ka, ŋ hɔɔndarɛ n’a ba daŋŋada, ŋ n kʊrɔ hɔɔn ma, ŋn’ɩ monsigə ʊ. 22Ŋ y’a hɩrɛ a ma mindɔrɛzannɔ, an bɔkarɛ taajɛmzannɔ m, 23a ga kʊ ŋ y’a ʊ m, kʊ ŋ nɩ Woso k’a nɩ lɛbɔʊrɛ m, an nɩ mɩsɩrbaa m tee… bɩ da ʊ bɩ, bɩ to ŋ y’a ʊ ŋn’ɩ *wosobaawɔnnɔ kʊ ŋ bɔ kʊ ʊ kan gʊaa k’a nɩ ga m kɩ, bɛnnɔ kɩ, hɔɔgansiro kɩ, tara burə hɔɔ kʊ ŋ n’a gaatam nɔ kɩ daŋ ʊ.
24Naa minto m, Woso n ŋ to ŋn’ɩ dintim zibəəro kʊ ŋ lɛ n taa rɔ wɔɔ barɛ a hɔɔnhɔ ma, ŋn’a mɛ gore bɔŋ ʊ mim k’a nyannɩ n ta ʊ barɛ nɔ ʊ kan kʊ kɩ. 25Bala, ŋ Woso sɩra minno wɔɔ to ŋnɩ ŋʊaar sa, ŋn’ɩ yaa dam hɔɔ kʊ Woso ŋ da rɔ wɔɔ m, ŋn’ɩ zure ŋ ʊ, an bɔkarɛ Woso ŋ y’a ga m, ŋn’a da ʊ, a m hɔ haay darɛzaa. Woso n lɛbɔʊrɛ yɩ dɔmɩm haay! Amina! 26Naa minto m, Woso n ŋ to, kʊ ŋ nɩ bɩr a nyannɩ minno lɛtaamarɔ bam. Ŋ lannɔ wɔɔ bɩr a kam ma sɔ, k’a bɩr kan yar kɩ y, wʊta ŋ nawʊm lannɔ kan kʊ kɩ, an bɔkarɛ, naa barɛ n a ga nɩ y. 27Yaarɔ wɔɔ maam sɔ, ŋ bɩr a kam ma, k’a bɩr kan lʊ kɩ y, a ŋʊa ŋ nawʊm paan…, k’a bɩr wʊtam kan a muno yaarɔ kɩ. Yaarɔ kan yaarɔ kɩ nɩ nyannɩ zi bam kan kʊ kɩ, naa n a ka sɔ, ŋn’a nyaanlɛ zibəə fɩryɩrɛ k’a a ga m yɩrɛ a mɛ ʊ.
28Kʊ ŋ n a ŋʊa k’a Woso dɔ bɩ, Woso n ŋ to a hɔɔn daŋŋada bɩ nɔ ʊ, kʊ ŋ nɩ hɔ k’a n’a ga barɛ m bɩ ba. 29Zibəə k’a n a ga barɛ m do haay ba ŋ nawʊm, mimbʊnyaa do haay, gʊɔɔ lɛtaama bʊnyaa do haay, bʊnyaabaa do haay, jɩmbaa n ŋ heer han, gərzɛrɛ ba n nɩ, nyaabarɛ ba n nɩ, zambʊbarɛ ba n nɩ, zibəə daŋŋada haay, 30ŋn’ɩ tɔ bɔm, ŋn’ɩ gʊɔɔ tɔ zaar barɛ, ŋnɩ sɔ Woso m, ŋ bɩr gʊɔɔ daŋ ʊ y, ŋn’a mɩŋŋɔɔ busum, ŋn’a lɛ bɔrɛ a mɩŋŋɔɔ ʊ, ŋn’ɩ bɔm mimbʊnyaa daarɔ barɛ m, ŋ bɩr yɛm a zɩrɔ lɛ ma y, 31ŋ hɔɔn ba ʊ y, ŋ bɩr jɩnlɛ a lɛ ra y, gʊaa mim bɩr ŋ kɔrɛ y, gʊaa cicir bɩr ŋ zɛrɛ y. 32A n bɔkarɛ, ŋ y’a dɔ mɩŋŋa ŋ ʊ, Woso lɛ y’a hɩrɛ a ʊ, gʊaa k’a nɩ ziro nɔɔn duro barɛ a ga zɛ m. Kan naa kɩ haay ŋ gɔɔta ŋn’ɩ tam lɛɛ kan minno nɔɔn duro barɛ kɩ. A n a na ma bɩ, kʊ ŋ gʊaa yɩ sɔ, an nɩ minno nɔɔn duro barɛ, bɩ ŋ nɔ yɩ.
2Woso dʊdɔbarɛ
1Ncɩnaaʊ bɩ, nka n’ɩbɩɩ nɩ, ɩbɩɩ k’ɩ n’ɩ gʊɔɔ dʊdɔ yarlɛ? Ɩbɩɩ bɩ gumə yɩrɛ y, gʊɔɔ dʊdɔ k’ɩbɩɩ n’a yarm bɩ, ɩ mɩŋŋa dʊdɔ ɩ n’a yarm, bala, ɩbɩɩ yɩ ŋ dʊdɔ yarm, b’ɩbɩɩ ɩ zi kʊ ŋ n’a bam bɩ bam sɔ. 2Wɔɔ dɔ denter m, ʊ ʊ, gʊɔɔ kʊ ŋ nɩ minno nɔɔn duro bam nɔ wɔɔ, Woso yɩm dʊdɔ yarm sɩra m, amba ŋ zibəə bʊnyaa b’a ga m bɩ m. 3Ɩbɩɩ k’ɩ nɩ gʊɔɔ kʊ ŋ nɩ minno nɔɔn duro bam nɔ wɔɔ dʊdɔ yarm bɩ, b’ɩbɩɩ y’a barɛ, am ŋ hɔ bɩ m bɩ, ɩ hɔɔn ɩbɩɩ da ɩ ʊ, ɩ bɔm lɛm Woso dʊdɔyarlɛ bɩ nɔ ʊ ra? 4Gɛɛ, ɩbɩɩ bɩr dɩgam Woso ŋʊarɛ gʊta k’an ta m ɩbɩɩ minto, an nɩ bʊrlɛ a ma, k’a mɩŋŋa ba ɩbɩɩ m bɩ ma hɔsɩ ra? Ɩbɩɩ n a dɔ ɩ ʊ, a ba k’a nawʊrɛ ɩbɩɩ m mɩŋŋa bɩ, a hɩ a ʊ, k’ɩbɩɩ m toore yɩ, ɩ ɩ bɔ ɩ taam la? 5B’ɩbɩɩ da bɩr bɔŋ ʊ y, ɩ lɛ baa k’ɩ ɩ bɔ ɩ taam y, bɩ, a ba k’ɩbɩɩ n nawʊrɛ ncɩnaaʊ naa, hʊnhʊrlɛ gʊta ɩbɩɩ n’a bankarɛ ɩ minto, dɔmɩm kʊ Woso n n’a heerbusu hɩnkaŋ ʊ, an dʊdɔ ka kan sɩra kɩ bɩ nɔ ʊ. 6Hinni bɩ do ʊ bɩ, a gʊaa biyəə zibəə nyɔɔdʊ kaŋ ʊ, amba a a ga m bɩ m. 7Gʊɔɔ kʊ ŋ n’a tɔŋ ʊ, k’a mɩŋŋa ba tee…, ka Woso nɔ yɩ, ŋn’a kam Woso lɛbɔʊrɛ ma, kan a daʊrɛ kɩ ma, kan mɩsɩrbaa k’a bɩr a zaar bam kɩ ma rɔ wɔɔ, Woso mɩsɩrbaa k’a nyarɛ ba ʊ karɛ ŋ ʊ. 8Bɩ, kʊ gʊɔɔ kʊ ŋ nɩ bɩsɩ kam Woso ma, ŋ bɩr zum sɩra ʊ y, ŋn’a bʊnyaa bam nɔ wɔɔ nɩ, Woso y’a nɔmaa kan a heerbusu kɩ hɩnkarɛ ŋ nɩ. 9Kʊsɩ kan fɩr kɩ gʊɔɔ kʊ ŋ n’a bʊnyaa bam nɔ wɔɔ yɩm, zɩɩfʊrɔ n nɩ lɛɛ kam, do vantɔɔ wɔɔ n a nya ŋ ʊ. 10Bɩ, Woso lɛbɔʊrɛ, daʊrɛ, kan laafɩɩ kɩ kam gʊaa haay k’a n’a mɩŋŋa bam b’ʊ, zɩɩfʊrɔ n nɩ lɛɛ kam, do vantɔɔ wɔɔ n a nya ŋ ʊ. 11Bala, Woso bɩr gʊɔɔ jirə bɔrɛ y.
12Gʊɔɔ kʊ ŋ nɩ mimbʊnyaa bam, ŋ n Moyiisi lɛrɔ wɔɔ dɔ rɔ wɔɔ, ŋ gɩngam sɔ, bɩ Moyiisi lɛrɔ bɛɛ n nɩ nyɩntarɛ ŋ dʊdɔ karɛ zaa y, bɩ gʊɔɔ kʊ ŋ lɛrɔ wɔɔ dɔ, ŋn’a gu ŋn’ɩ mimbʊnyaa bam nɔ wɔɔ, lɛrɔ wɔɔ n nɩ nyɩntarɛ ŋ dʊdɔ karɛ zaa. 13Bala, gʊɔɔ kʊ ŋ n’a tʊr kam lɛrɔ wɔɔ ma bala rɔ wɔɔ bɛɛ m tɩrga Woso mɩm ʊ y, gʊɔɔ kʊ ŋ nɩ zure ŋ ʊ rɔ wɔɔ m. 14A a da ma, gʊɔɔ kʊ zɩɩfʊrɔ bɛɛ nɩ ŋ mɩ y, ŋ n Moyiisi lɛrɔ wɔɔ dɔ rɔ wɔɔ, nɔɔ m hɔ kʊ lɛrɔ wɔɔ n’a hɩm bɩ ba, bɩ ŋ n a dɔ y. A ba kʊ ŋ nawʊrɛ ncɩnaaʊ bɩ ŋ n lɛrɔ wɔɔ dɔ bɩ, naa y’a hɩnkarɛ a ʊ, ŋ lɛ cɩnta a mɩŋŋɔɔ m. 15Ncɩnaaʊ bɩ, ŋ y’a hɩnkarɛ ŋ ʊ, hɔ kʊ lɛrɔ wɔɔ lɛ n taa bɩ, n y’a gʊrsɩra ba a heer ʊ, ŋ heer ɩ kasɛtɩ kam, kan ba ŋ mɩŋŋɔɔ tɩr a dɔ ŋ ʊ, a mɩŋŋa ba gɛɛ a bʊnyaa ba bɩ kɩ. 16Nyɩnta a nawʊrɛ ncɩnaaʊ dʊdɔkarɛ hinni ʊ, amba lemim nyɩnta kʊ mɔɔ n’a pa dam bɩ n’a hɩm bɩ m, Woso zaa kam Krista Yeezuu ʊ k’an hɔ haay k’a nyaakʊm da gʊɔɔ heer ʊ bɩ dʊdɔ ka.
Zɩɩfʊrɔ kan Moyiisi lɛrɔ kɩ
17Ɩbɩɩ k’ɩ n’a hɩrɛ ɩ ma zɩɩfʊ, ɩ nɩ yom lɛrɔ wɔɔ ma, ɩ n’ɩ lɛ bɔrɛ ɩ mɩŋŋa ʊ, ɩ ʊ, ɩ Woso dɔ, 18ɩbɩɩ k’ɩ hɔɔnhɔ dɔ, lɛrɔ wɔɔ tɔ ma bɩ, ɩbɩɩ hɔ k’a ga barɛ m bɩ dɔ ɩ bɔ kʊ la m. 19Ɩbɩɩ y’ɩ hɔɔn darɛ ɩ ʊ, zaa hɩnka bʊʊrɔ m zaa n’ɩbɩɩ m, ɩ nɩ lɛɛ gum monsigəzannɔ m, 20ɩ ʊ, bahɔdonno dʊndɔrɛzaa n’ɩ mɩ, gʊɔɔ poorero karɩnsaamba, a gɩnga ɩbɩɩ nawʊm ɩ ʊ, ɩbɩɩ hɔ dɔ, ɩ sɩra dɔ mɩŋŋa lɛrɔ wɔɔ minto. 21A lɔ ɩbɩɩ nɩ hɔ dɩndam gʊɔɔ m, ɩ bɩr a dɩndarɛ ɩ mɩŋŋa nɩ? Ɩbɩɩ y’a hɩm gʊɔɔ m, ŋ bɩ koor ba y, ɩ bɔkarɛ ɩ nɩ koor barɛ. 22Ɩbɩɩ y’a hɩrɛ ŋ bɩ jaan da y, ɩ bɔkarɛ ɩ n’a darɛ, ɩbɩɩ sɔ *wosobaawɔnnɔ daʊrɛ m, ɩ bɔkarɛ ɩ nɩ gasʊrɛ ŋ daʊrɛ cɛrɔ ʊ, ɩ nɩ ŋ bɔm.2.22 k’ɩ ɩ kam busoo ma.23Ɩbɩɩ y’ɩ heer nyɔɔm lɛrɔ wɔɔ k’ɩbɩɩ ŋ dɔ bɩ tɔ ma, b’ɩbɩɩ ɩ Woso gore bɔŋ ʊ, k’ɩbɩɩ nɩ bɩsɩ kam lɛrɔ wɔɔ ma bɩ tɔ ma. 24Amba n y’a gʊrsɩra ba Wosoci nɔ ʊ bɩ, n ʊ: ‹Awɔɔ zɩɩfʊrɔ, awɔɔ y’a kam, do vantɔɔ wɔɔ nɩ Woso sʊnsɔ wʊm.›
25K’ɩbɩɩ ɩ zum lɛrɔ wɔɔ ʊ, gasʊ k’ɩbɩɩ ʊ baŋŋʊ ʊ bɩ jɩ ta ʊ, bɩ k’ɩbɩɩ y’ɩ gum lɛrɔ wɔɔ zuure ma, baa k’ɩbɩɩ gasʊ baŋŋʊ ʊ, a bɔ kʊ ʊ, ɩ ʊ, ɩbɩɩ n gasʊ baŋŋʊ ʊ y. 26Bɩ, kʊ gʊaa k’a n gasʊ baŋŋʊ ʊ ɩ hɔ kʊ lɛrɔ wɔɔ n’a hɩm bɩ barɛ, Woso bɩ dɩgarɛ a zaa ma ɩ ʊ, gasʊ a ʊ baŋŋʊ ʊ ra? 27Bɩ, gʊaa k’a nɩ zum lɛrɔ wɔɔ ʊ b’a n gasʊ baŋŋʊ ʊ bɩ, a y’ɩbɩɩ dam nyannɩ ʊ, bala, ɩbɩɩ gasʊ baŋŋʊ ʊ, ɩ nɩ lɛrɔ wɔɔ m, bɩ, ɩbɩɩ bɩr zure ŋ ʊ y. 28Zɩɩfʊ paan… bɩ, gʊaa k’a m zɩɩfʊ gʊɔɔ mɩm ʊ bɩ bɛɛ y, mɛsim gasʊ baŋŋʊ ʊ bɛɛ m baŋŋʊgasʊrɛ paan… y. 29Bɩ, zɩɩfʊ paan… bɩ, heer an ta ʊ, baŋŋʊgasʊrɛ paan… bɩ, heer hɔ bɩ m. A to a nawʊm *Sɛnt-Ɛspri zi, a bɩr a tom Moyiisi lɛrɔ wɔɔ nɔ ʊ y. Zɩɩfʊ bɩ do lɛbɔʊrɛ bɩr a tom gʊɔɔ zi y, a to a nawʊm Woso zi.
31Ncɩnaaʊ naa, k’ɩ zɩɩfʊ, bɔ ɩ n’a yɩrɛ a nɔ ʊ, baŋŋʊgasʊrɛ nyɔɔdʊ m bɔ nɩ? 2A nyɔɔdʊ ta ʊ gʊta denter. Bala, a lɛɛkarɛ hɔ bɩ, zɩɩfʊrɔ wɔɔ Woso a lemim da ŋ wɔ ʊ. 3K’ʊ a hɩ, ʊ ʊ lɔ? Ŋ gʊɔɔ gɔsɩnnɔ kʊ ŋ n sɩra ba minto b’a da ma, an a ka Woso bɩ gɔɔtarɛ a sɩrabarɛ nɔ ʊ ra? 4Fɩɩga! Baa, kʊ gʊaa haay ŋʊaarzaa, Woso gɔɔta an nɩ sɩra m, amba n y’a gʊrsɩra ba Wosoci ʊ, n ʊ:
Kʊ n n’ɩ dɔ tɩrga ɩ meerbaa nɔ ʊ, bɩ k’ɩ bʊr ɩ jɩnnɔ ra dʊdɔkarɛ nɔ ʊ.
5Bɩ, kʊ wɔɔ batɩrgabaa ɩ Woso tɩrgabaa hɩnkarɛ, bɔ wɔɔ k’ʊ a hɩ? K’ʊ a hɩ, ʊ ʊ, Woso gumə ba ʊ kan wɔɔ hʊnhʊrlɛ kɩ a nɔmaa nɔ ʊ ra? Meer naa do kʊ wɔɔ ba naa, gʊɔɔ hɔɔndarɛ meerbaa m. 6A bɩ ncɩnaaʊ y, kʊ n bɛɛ m, Woso y’a bam lɔ k’a durnya dʊdɔ ka? 7Gɛɛ, gʊaa a da ma, an a hɩ a ʊ, kʊ mɔɔ ŋʊaarbarɛ y’a kam Woso sɩra n’a hɩnkam paan… a lɛbɔʊrɛ minto, bɔ m kɛɛrɛ, an mɔɔ ba mimbʊnyaazaa, an nɩ mɔɔ dʊdɔ karɛ? 8A lɔ wɔɔ bɩr mimbʊnyaa barɛ, k’a mɩŋŋa m nyɩnta ʊ? Gʊɔɔ gɔsɩnnɔ ɩ wɔɔ tɔ bʊnyaa hɩm, ŋn’a hɩrɛ ŋ ʊ, naa wɔɔ n’a dɩndam gʊɔɔ m. Kʊ Woso bɩ gʊɔɔ wɔɔ duro dʊdɔ yar, a gumə ta ʊ.
Woso mɩm ʊ gʊaa haay
mimbʊnyaa ba
9Ʊ a nyambʊr ʊ a hɩ, ʊ ʊ lɔ? Wɔɔ zɩɩfʊrɔ, lɛ wɔɔ da gʊɔɔ vantɔɔ wɔɔ m na? Fɩɩga! Wɔɔ lɛɛ ka ʊ a hɩnka, ʊ ʊ, gʊaa haay, kʊ zɩɩfʊ m, gɛɛ zɩɩfʊ bɛɛ, ŋ yɩ mimbʊnyaa lɔmbaa nɔ ʊ. 10Amba n y’a gʊrsɩra ba Wosoci ʊ bɩ m, n ʊ:
Gʊaa tɩrga ba ʊ y,
baa deem taan… tɔkkɛ,
11Woso mindor ba ʊ y,
baa deem taan… ba ʊ,
an n’a kam Woso ma y.
12Ŋ haay, ŋ y’a nyʊnnyɔɔ,
ŋ haay jilli, a bʊnyaa ŋn’a bam.
Ŋ barla bɩ, a mɩŋŋabarɛzaa ba ʊ y, baa deem taan… tɔkkɛ.
13Ŋ lɛ meerbaa ɩ gʊɔɔ zaar bam.
Bra ŋn’a bɩmbam gʊɔɔ m,
a lɛ meerbaa m,
ŋ nɛɛm ɩ busum am cɩrka sɛ m.
14Ler kʊsɩ bɔrɛ yɩ ŋ lɛ han, kan meerbaa k’a nɩ busum gʊɔɔ ma kɩ.
15Ŋ kaarɛ kan gərzɛrɛ kɩ.
16Kʊ ŋ bɔ lɛɛ bɩ do ʊ,
lɛɛ zaarbarɛ kan kʊsɩ kɩ
ŋn’a tore a jɛ ʊ.
17Ŋ n laafɩɩ zaa dɔ y.
18Ŋ mɩm ʊ bɩ, Woso daʊrɛ jɩ ba ʊ y.
19A n bɔkarɛ, wɔɔ dɔ, ʊ ʊ, hɔ haay kʊ lɛrɔ wɔɔ n’a hɩm bɩ, a hɩ a nawʊm gʊɔɔ kʊ lɛrɔ wɔɔ a so ŋ ʊ rɔ wɔɔ m. Kʊ gɔsɩ b’a da ma, an gumə ka a mɩŋŋa ʊ y, kʊ durnya haay m kʊrɔ gumə ma Woso taa. 20Bɩ y’a ka, ‹gɔsɩ b’a bam tɩrga Woso mɩm ʊ›, lɛrɔ wɔɔ zi k’a ŋ ba minto y, lɛrɔ wɔɔ, gʊaa mimbʊnyaa ŋn’a hɩnkam nɩ bala.
Sɩrakarɛ nɩ gʊaa bam tɩrga
Woso mɩm ʊ
21Kɛɛrɛ naa, Woso hɔ k’a a ba, an wɔɔ ba tɩrga, bɩ lɛrɔ wɔɔ mim b’a nɔ ʊ bɩ hɩnka, amba lɛrɔ wɔɔ kan wosolɛsinnɩsorazannɔ wɔɔ kɩ ciro nyɩnta ŋn’a hɩ bɩ m. 22Woso ɩ gʊɔɔ bam tɩrga, kʊ ŋ sɩra ka Yeezuu Krista ʊ minto, a ba a nawʊrɛ ncɩnaaʊ, gʊɔɔ haay kʊ ŋ sɩra ka Krista ʊ rɔ wɔɔ m, bala, ŋ hɔdeem, a bɩr ŋ jirə bɔrɛ y. 23Ŋ haay mimbʊnyaa ba, ŋ y’a do Woso lɛbɔʊrɛ gasʊʊrɛ ma. 24Bɩ, Woso ŋ ba tɩrga nɩbɩr, a cicirzɛrɛ nɔ ʊ, Krista Yeezuu k’a nɩ ŋ bʊmbɔm mimbʊnyaa nɔ ʊ bɩ tɔ ma. 25A mɩŋŋa Woso a bɔ ʊ, k’an ga gʊɔɔ kʊ ŋ nɩ sɩra kaŋ ʊ rɔ wɔɔ mimbʊnyaarɔ sugur yɩrɛ minto, k’a tɩrgabaa hɩnka, bala, a nyɩnta an bʊr a ma biisi, a n gʊɔɔ hʊnhʊr ŋ mimbʊnyaarɔ tɔ ma y. 26Bɩ her naa, Woso ɩ zaa k’a n’a sam, an nɩ gʊɔɔ bam tɩrga bɩ hɩnkam, bala, a lɛ taa k’a gʊɔɔ kʊ ŋ sɩra ka Yeezuu ʊ rɔ wɔɔ ba tɩrga, k’a gɔɔta a tɩrgabaa nɔ ʊ sɔ. 27Lɛ bɔ a mɩŋŋa ʊ zaa ta ʊ dɔ ra? Fɩɩga! Bɔ minto? Bala, a n ta ʊ kɛɛrɛ bɩ, lɛrɔ wɔɔ zuure bɛɛ y, sɩrakarɛ m. 28Sɩra m, wɔɔ dɔ ʊ ʊ, sɩrakarɛ tɔ ma m, n nɩ gʊaa bam tɩrga, bɩ lɛrɔ wɔɔ zuure tɔ ma bɛɛ y. 29Gɛɛ, Woso bɩ, zɩɩfʊrɔ Woso m bala ra? Do vantɔɔ wɔɔ Woso bɛɛ sɔ ra? Ɩɩn…, do vantɔɔ wɔɔ Woso m sɔ. 30Bala, Woso deem taan… n ta ʊ, an nɩ zɩɩfʊrɔ bam tɩrga ŋ sɩrakarɛ tɔ ma, an nɩ do vantɔɔ bam tɩrga sɔ, ŋ sɩrakarɛ tɔ ma. 31Wɔɔ sɩrakarɛ bɩ, lɛrɔ wɔɔ ba a nawʊm hɔ k’a jɩ ba ʊ ra? A bɛɛ m bɩ y, lɛrɔ wɔɔ gore an n’a daŋ ʊ paan….
4Abraham sɩrakarɛ mim
1Kɛɛrɛ naa, bɔ mim wɔɔ n’a hɩm ʊ yaaba Abraham bɩncɛ ʊ? Bɔ hɔ a a yɩ a zi nɩ? 2K’a ɩ yɩrɛ ɩ ʊ, Abraham ba n y’a ʊ tɩrga, a zibəə tɔ ma, a a da ma an a lɛ bɔ a mɩŋŋa ʊ, b’a bɩ ncɩnaaʊ y, a b’a dam ma an a lɛ bɔ a mɩŋŋa ʊ Woso taa y. 3Bala, Wosoci bɩ y’a hɩrɛ, a ʊ: ‹Abraham sɩra ka Woso ʊ, am naa Woso n a ba tɩrga, a sɩrakarɛ tɔ ma.› 4Kʊ gʊaa zi ba, a yawʊra n n’a bam, yawʊra bɩ do, ganwʊrɛ bɛɛ y, hɔ k’a zaa b’a ga m bɩ m bɩ. 5Bɩ gʊaa k’a n hɔsɩ zi ba y, an sɩra ka Woso k’a nɩ mimbʊnyaabər bam tɩrga b’ʊ bɩ, Woso ɩ dɩgam bɩ zaa ma tɩrga, a sɩrakarɛ minto. 6Davɩd ɩ gʊaa kʊ Woso dɩga a tɩrga b’a zibəə tɔ ma bɛɛ b’ɩ heernyɩnta mim hɩm sɔ, a ʊ:
7Mimbirenyɩntazannɔ m gʊɔɔ kʊ Woso ŋ kʊrɔmarɔ sugur ka ŋ ʊ, an ŋ mimbʊnyaarɔ gʊngʊ ŋ ma rɔ wɔɔ m.
8Mimbirenyɩntazaa m gʊaa kʊ Woso bɩr a mimbʊnyaa darɛ a heer ʊ bɩ m.
9Mimbirenyɩnta naa do zɩɩfʊrɔ wɔɔ hɔ m a minto ra, gɛɛ do vantɔɔ wɔɔ a da ma ŋn’a yɩ sɔ ra? Wɔɔ y’a hɩrɛ, ʊ ʊ: ‹Abraham sɩra ka Woso ʊ, Woso n a ba tɩrga, a sɩrakarɛ minto.› 10Ba naa a ʊ brɔ dɔmɩm ʊ? Gasʊ k’a b’a ʊ baŋŋʊ ʊ bɩ m gɛɛ, gɛɛ a lɛɛ ka a baŋŋʊgasʊrɛ bɩ nɩ? Gasʊ k’a b’a ʊ baŋŋʊ ʊ bɩ dɔmɩm bɛɛ y, a lɛɛ ka, bɩ ma bɩ, a n gasʊ baŋŋʊ ʊ y. 11Dɔmɩm kʊ Abraham n gasʊ baŋŋʊ ʊ bɩ, Woso a ba tɩrga, bɩ jɛ nɩ, Woso n bɔkarɛ, an a da ʊ, k’an gasʊ baŋŋʊ ʊ. Kʊ bɩ m nyɩnta makra, an a hɩnka a ʊ, Woso Abraham ba tɩrga, a sɩrakarɛ tɔ ma. Ncɩnaaʊ nɩ, Abraham n a ba gʊɔɔ kʊ ŋ nɩ sɩra kam Woso ʊ haay yaaba, baa kʊ ŋ n gasʊ baŋŋʊ ʊ y. Kʊ Woso n brɔɔ ba tɩrga sɔ, ŋ sɩrakarɛ minto. 12Gʊɔɔ kʊ ŋ gasʊ baŋŋʊ ʊ rɔ wɔɔ yaaba m sɔ, bɩ gʊɔɔ kʊ ŋ gasʊ baŋŋʊ ʊ ŋnɩ sɩra ka Woso ʊ rɔ wɔɔ m, amba Abraham sɩra ka Woso ʊ, bɩ ma bɩ a n gasʊ baŋŋʊ ʊ bɩ m.
Sɩrakarɛ nɩ Woso lerbɔrɛ yɩm
13Woso k’a durnya soʊre ler bɔ Abraham m kan a yaŋŋɔɔ wɔɔ kɩ m bɩ, lɛrɔ zuure minto bɛɛ y, k’a Abraham ba tɩrga, a sɩrakarɛ tɔ ma bɩ m. 14Kʊ hɔ kʊ Woso a ler bɔ bɩ yɩ n nawʊm lɛrɔ zuure tɔ ma, sɩrakarɛ jɩ ba ʊ dɔ y, lerbɔrɛ bɩ nyɔɔdʊ ba ʊ sɔ y. 15Bala, lɛrɔ wɔɔ ɩ zɛm Woso nɔmaa m, bɩ, k’a ɩ yɩrɛ ɩ ʊ, lɛrɔ ba ʊ y, lɛrɔ bɩsɩkama ba ʊ sɔ y.
16Naa y’a ka sɩrakarɛ n nɩ hɔ kʊ Woso a ler bɔ bɩ yɩm, k’an yɩ Woso ganwʊrɛ k’a n’a kam, kʊ lerbɔrɛ bɩ n nyɩnta Abraham yaŋŋɔɔ haay hɔ. Yaŋŋɔɔ kʊ ŋ nɩ lɛrɔ wɔɔ m nɔ wɔɔ bɛɛ m a deem nɩ y, yaŋŋɔɔ kʊ ŋ sɩra ka am Abraham hɔ bɩ m nɔ wɔɔ m sɔ, ʊ woo…, ʊ zɩ m Abraham m. 17Denter m, n y’a gʊrsɩra ba Wosoci ʊ, n ʊ: ‹Ɩbɩɩ cɩnta mɔɔ ʊ, k’ɩ yɩ doro gʊta zɩ.› Wɔɔ zɩ m Abraham m, Woso k’a sɩra ka ʊ bɩ taa. Woso k’a nɩ gəəno mɩm bɔŋ ʊ, an n’a kam hɔ k’a ba ʊ nɩ nyɩntaŋ ʊ m. 18Abraham sɩra ka an a ta a heer lɛ a ʊ, a hɔ kʊ Woso a ler bɔ bɩ yɩm, baa kʊ hɔsɩ ba ʊ, an nɩ yom ma k’a a dɔ a ʊ, a hɔ kʊ Woso a ler bɔ bɩ yɩm bɩ, a a gu an sɩra ka, an b’a ba doro gʊta yaaba, amba Woso a hɩ m, a ʊ: ‹Ɩbɩɩ yaŋŋɔɔ zɛm bɩ yɩ gʊta› bɩ m. 19Abraham dɔɔraa k’a bɩ ta an zɔrɔ ku, Saara n gusi sɔ ŋ b’a dam ma ŋnɩ nyɩ yɩ dɔ bɩ, Abraham sɩrakarɛ paŋŋa gɔɔta a n a bɔrɛ y. 20A n sɩnsɩm ka Woso lerbɔrɛ bɩ ma y, bɩ, sɩrakarɛ bɩ paŋŋa ka ʊ, an a lɛ bɔ Woso ʊ. 21A n a nyasʊ a heer ʊ kɔɔkɔɔ a ʊ, kʊ Woso hɔ ler bɔ, a ɩ paŋŋa m sɔ, k’a ka k’an kʊ yɩ. 22Naa minto m, Woso n Abraham ba tɩrga, a sɩrakarɛ tɔ ma. 23Kʊ n y’a gʊrsɩra ba Wosoci ʊ, n ʊ: ‹Woso Abraham ba tɩrga› bɩ, Abraham y’a deem tɔ ma bɛɛ y. 24Wɔɔ tɔ ma n sɔ, bala, n wɔɔ bam tɩrga, wɔɔ kʊ wɔɔ nɩ sɩra kam, Woso k’a wɔɔ Zuuba Yeezuu mɩm bɔ ʊ b’ʊ. 25Woso a ka n n’a zɛ gər wɔɔ mimbʊnyaarɔ tɔ ma, an a mɩm bɔ ʊ, k’a wɔɔ ba tɩrga.
5Woso wɔɔ zɛ kʊ ra kan a mɩŋŋa kɩ Yeezuu tɔ ma
1Woso wɔɔ ba tɩrga, wɔɔ sɩrakarɛ minto, wɔɔ n laafɩɩ yɩ kan Woso kɩ, wɔɔ Zuuba Yeezuu Krista tɔ ma. 2Yeezuu Krista minto m, wɔɔ n b’ʊ dam ma, ʊ Woso cicirzɛrɛ yɩ sɩrakarɛ nɔ ʊ, cicirzɛrɛ bɩ do wɔɔ jɩm ʊ kɔɔkɔɔ, bɩ wɔɔ y’ʊ heer nyɔɔm, kʊ wɔɔ nɩ taaheerlɛ m, ʊ ʊ, ʊ zɛm bɩ nyɩnta Woso lɛbɔʊrɛ nɔ ʊ bɩ tɔ ma. 3A n lɛ da bɩ, wɔɔ y’ʊ heer nyɔɔrɛ ʊ fɩryɩrɛ nɔ ʊ, bala, wɔɔ dɔ, ʊ ʊ, fɩryɩrɛ n nɩ zɛm tʊntɔʊrɛ m, 4tʊntɔʊrɛ n nɩ zɛm mim dama m, mim dama n nɩ zɛm taaheerlɛ m. 5Taaheerlɛ naa do bɩ wɔɔ dam nyannɩ ʊ y, bala, Woso a ŋʊarɛ k’an ta m wɔɔ minto bɩ da wɔɔ heer ʊ an a han, Sɛnt-Ɛspri k’a ka wɔɔ ʊ bɩ m.
6Sɩra m, dɔmɩm kʊ Woso a cɩnta bɩ k’a ku bɩ, wɔɔ n nɩ paŋŋawar nɔ ʊ, ʊ b’ʊ dam ma, ʊ ʊ yɔ bɩ, Krista ga wɔɔ mimbʊnyaazannɔ wɔɔ tɔ ma. 7A wer ta ʊ, kʊ gʊaa n yɛ, an ga gʊaa tɩrga tɔ ma. A a da ma gʊaa n yɛ, an ga gʊaa mɩŋŋa tɔ ma barɛ m. 8Hɔ kʊ Woso a ba k’a wɔɔ ŋʊa k’a nawʊm bɩ hɩnka bɩ ba n nɩ: Wɔɔ nyɩnta mimbʊnyaabənno, Krista n a gu an ga wɔɔ tɔ ma. 9Woso k’awɔɔ ba tɩrga, Krista k’a ga wɔɔ tɔ ma bɩ minto bɩ, an lɛ da haay bɩ, a wɔɔ bɔ lɛ m Woso heerbusu nɔ ʊ. 10Bala, nyɩnta kʊ wɔɔ ʊ Woso jɩnnɔ bɩ, a zu kʊ ʊ kan a Nyɩ bɩ garɛ kɩ, an wɔɔ zɛ kʊ ra kan a kɩ. K’a wɔɔ zɛ kʊ ra kan a kɩ kɛɛrɛ bɩ, an lɛ da bɩ, a wɔɔ bʊmbɔm sɔ a Nyɩ bɩ mɩsɩrbaa m. 11Naa bɛɛ n’a deem nɩ y, wɔɔ y’ʊ heer nyɔɔm sɔ Woso nɔ ʊ, wɔɔ Zuuba Yeezuu Krista tɔ ma, a ɩ wɔɔ zɛ kʊ ra kan Woso kɩ.
Adam kan Krista kɩ
12Gʊaa deem taan… y’a ka mimbʊnyaa n gasʊ durnya ʊ, Adam m. Mimbʊnyaa bɩ do m bʊr zɛ m. Yɩ a ʊ, ncɩnaaʊ, zɛ n a kərgu gʊɔɔ haay ra, bala, ŋ haay mimbʊnyaa ba. 13Mimbʊnyaa lɛɛ ka an nɩ durnya ʊ, Woso n bɔkarɛ an lɛrɔ wɔɔ ka Moyiisi ʊ, bɩ, dɔmɩm kʊ lɛrɔ wɔɔ ba ʊ bɩ, Woso bɩr gʊɔɔ mimbʊnyaa taar karɛ ŋ la y. 14Kan bɩ kɩ, an a sa Adam dɔmɩm bɩ ma, an ta Moyiisi dɔmɩm ra bɩ, zɛ a so gʊɔɔ ʊ, baa gʊɔɔ kʊ ŋ n Adam mimbʊnyaa bɩ lɔɔ ba rɔ wɔɔ, zɛ brɔɔ zɛ sɔ. Adam nyɩnta Krista k’a a ga m, an bʊr bɩ bɔkʊʊrɛzaa.
15Bɩ, Woso ganwʊrɛ k’a n’a kam vam bɩ n bɔ kʊ ʊ kan Adam kʊrɔma bɩ kɩ y. Sɩra m, gʊaa deem kʊrɔma ɩ bʊr gʊaa cir zɛ m, bɩ Woso ganwʊrɛ bɩ gʊtabaa lɛ da, Woso ganwʊrɛ bɩ do ka gʊɔɔ ʊ, gʊaa deem taan… tɔ ma, Yeezuu Krista m, bɩ tɔ ma m, Woso n barka ka gʊaa cir ʊ gʊta. 16Hɔ kʊ Woso ganwʊrɛ bɩ n nɩ zɛm nɩ bɩ bɩ hɔdeem kan hɔ kʊ gʊaa deem kʊrɔma n nɩ zɛm nɩ bɩ kɩ y. Bala, Adam deem taan… kʊrɔma kʊ Woso a dʊdɔ yar b’a ka, gʊaa haay nɩ mimbʊnyaa kɔrɛ nɔ ʊ. A n bɔkarɛ, mimbʊnyaarɔ kʊ ŋ yɩ ŋ ba gʊta bɩ kur bɩ, Woso ganwʊrɛ bɩ ŋ ba tɩrga. 17A yɩ sɩra, gʊaa deem mimbʊnyaa y’a ka, zɛ n a so gʊaa haay ʊ gʊaa deem bɩ tɔ ma, bɩ Yeezuu Krista deem tɔ ma, gʊɔɔ ɩ hɔ yɩm Woso zi gʊta, a y’a ganwʊrɛ gʊta bɩ karɛ ŋ ʊ nɩbɩr, an nɩ ŋ bam tɩrga. Krista tɔ ma, ŋ mɩsɩrbaa barɛ, ŋnɩ cirbəə bɩ.
18K’a yɩ ncɩnaaʊ, gʊaa deem kʊrɔma k’a a ka, gʊaa haay nɩ mimbʊnyaa kɔrɛ nɔ ʊ bɩ, maam sɔ bɩ, gʊaa deem tɩrgabaa zibəə gʊaa haay bʊmbɔ an ŋ ba tɩrga, kʊ ŋ nɩ mɩsɩrbaa ba. 19Gʊaa deem bɩsɩkarɛ k’a ka gʊɔɔ haay n a ba mimbʊnyaabənno Woso mɩm ʊ bɩ, maam sɔ bɩ, gʊaa deem k’a yɛ Woso hɔɔnhɔ ma b’a ka, gʊɔɔ gʊta n a ba tɩrga Woso mɩm ʊ. 20A n bɔkarɛ, bʊr kʊ lɛ b’ʊ bɩ, a a ka mimbʊnyaa n a ba gʊta, bɩ, lɛɛ kʊ mimbʊnyaa pasɩ ʊ bɩ, Woso barka nyɩnta ʊ gʊta an lɛ da. 21Ncɩnaaʊ bɩ, amba mimbʊnyaa a so gʊɔɔ ʊ zɛ tɔ ma bɩ, maam sɔ bɩ, Woso barka y’a som gʊɔɔ ʊ tɩrgabaa tɔ ma, k’a ka, kʊ wɔɔ n mɩsɩrbaa k’a nyarɛ ba ʊ yɩ wɔɔ Zuuba Yeezuu Krista tɔ ma.
6Woso ɩ wɔɔ yɔm mimbʊnyaa lɔmbaa nɔ ʊ a cicirzɛrɛ tɔ ma
1Bɔ wɔɔ k’ʊ a hɩ kɛɛrɛ? Ʊ gɔɔta ʊ bɩr mimbʊnyaa bam, kʊ Woso cicirzɛrɛ n a da ra gɛ? 2Ayy…, fɩɩga! Kʊ mimbʊnyaa mim bɩncɛ nɩ, gəəno m wɔɔ m, wɔɔ y’a bam lɔ kɛɛrɛ k’ʊ mɩsɩrbaa ba mimbʊnyaa nɔ ʊ? 3Awɔɔ n a dɔ a ʊ, batɛm kʊ wɔɔ si bɩ, ʊ ba wɔɔ ʊ deem kan Krista Yeezuu kɩ a garɛ bɩ nɔ ʊ ra? 4Batɛm bɩ sire nɔ ʊ bɩ, wɔɔ bir n y’a ʊ kan kɩ a zɛ bɩ nɔ ʊ, k’an bɩr yɩrɛ ɩ ʊ, kʊ Krista a mɩm bɔ ʊ gəəno bire ʊ Zɩ paŋŋa m bɩ, maam sɔ bɩ, kʊ wɔɔ n mɩsɩrbaa daa ba.
5Bala, ʊ ba kʊ wɔɔ ʊ deem kan kɩ a zɛ nɔ ʊ bɩ, wɔɔ y’ʊ bam deem kan kɩ sɔ a mɩmbɔʊrɛ nɔ ʊ. 6Ʊ a dɔ mɩŋŋa, ʊ ʊ, mɩsɩrbaa kʊ wɔɔ n ta m biisi bɩ, n y’a wɔ gɔdarkʊra ma kan Krista kɩ. Kʊ mimbʊnyaa k’a nɩ wɔɔ ʊ bɩ paŋŋa n a da, k’ʊ bɩ nyɩnta mimbʊnyaa lɔnnɔ dɔ y. 7Denter m, gʊaa k’a ga bɩ, mimbʊnyaa paŋŋa ba zi dɔ y. 8Bala, kʊ wɔɔ ga kan Krista kɩ bɩ, wɔɔ sɩra ka, ʊ ʊ, ʊ mɩsɩrbaa bam kan kɩ sɔ. 9Bala, Krista k’a a mɩm bɔ ʊ gəəno bire ʊ bɩ, a bɩ gam dɔ y, zɛ paŋŋa ba zi dɔ y. 10Krista ga gallɛm deem, an a gʊ kʊ ma kan mimbʊnyaa kɩ, dɔmɩm haay minto. Dɩɩtaa naa, a mɩsɩr, bɩ mɩsɩrbaa bɩ ba a nawʊm Woso tɔ ma. 11Awɔɔ sɔ, k’a dɔ a ʊ, awɔɔ gɩnga, a a gʊ kʊ ma kan mimbʊnyaa kɩ, bɩ awɔɔ ɩ mɩsɩrbaa bam kɛɛrɛ Woso tɔ ma, Yeezuu Krista zɛkʊra nɔ ʊ.
12A b’a ya, a ka kʊ mimbʊnyaa n a so a mɛ k’a nɩ zɛm bɩ ga b’ʊ y, a yaa a ka awɔɔ n zu a mɛsim lɛtaamarɔ ʊ. 13A b’a mɛ vəŋŋəro sa, a ŋ ka mimbʊnyaa ʊ, k’an ŋ sa an ŋ ba a zibəə mɔr y. Awɔɔ n’a bam bɩ, k’a mɩŋŋɔɔ sa a ka Woso ʊ, a mɩm awɔɔ bɔ ʊ gəəno bire ʊ, k’a mɛ vəŋŋəro wɔɔ sa, a ŋ ba zi mɩŋŋa barɛ mɔr. 14Mimbʊnyaa bɛɛ y’a so awɔɔ ʊ dɔ y, bala, awɔɔ ba lɛ nɔ ʊ y, Woso barka nɔ awɔɔ n ta ʊ.
Woso zibəənyɩnɔ m wɔɔ m
15Naa jɩ m bɔ nɩ? Kʊ lɛ bɛɛ y’a so wɔɔ ʊ dɔ, bɩ Woso barka wɔɔ n’a nɔ ʊ bɩ, wɔɔ y’a nam bɩ lɛ m, k’ʊ mimbʊnyaa ba ra? Ayy…, fɩɩga! 16Awɔɔ n a dɔ a ʊ, k’awɔɔ a mɩŋŋa sa, a ka gʊaa ʊ k’a zu a hɔɔnhɔ ʊ, gʊaa k’awɔɔ nɩ zure a hɔɔnhɔ ʊ bɩ lɔnnɔ n’awɔɔ m na? A ɩ yɩrɛ ɩ ʊ, kʊ mimbʊnyaa lɔnnɔ n’awɔɔ nɩ, bɩ mimbʊnyaa a ka awɔɔ n gɩnga, gɛɛ kʊ Woso hɔɔnhɔ awɔɔ nɩ zuŋ ʊ, bɩ Woso mɩsɩrbaa k’an tɩrga ka awɔɔ ʊ. 17Bɩ, ʊ Woso barka da. Nyɩnta k’awɔɔ ʊ biisi mimbʊnyaa lɔnnɔ rɔ wɔɔ, awɔɔ bɩ zu hɔdɩndarɛ kʊ ŋ y’a dɩnda awɔɔ m b’ʊ kan a heer kɩ haay. 18Awɔɔ yɔ kʊ n y’a ʊ mimbʊnyaa wɔ ʊ bɩ, awɔɔ a ba tɩrgabaa lɔnnɔ. 19Makrarɔ yaargarɛrɔ mɔɔ ŋ sa meerbaa bɩ nɔ ʊ, k’awɔɔ n hɔ kʊ mɔɔ n’a hɩm bɩ jɩ ma, bala, awɔɔ bɩr a dam ma, an nɩ minno wɔɔ jɩ marɛ y. Amba awɔɔ nyɩnta biisi, a a mɩŋŋɔɔ ba dintim kan zibʊnyaa do haay kɩ zibəə lɔnnɔ, a a ba Woso bɩsɩkamazannɔ bɩ, kɛɛrɛ naa, k’a mɩŋŋɔɔ ba tɩrgabaa zibəə lɔnnɔ, k’a mɩsɩrbaa mɩŋŋa ba Woso mɩm m.
20Nyɩnta k’awɔɔ ʊ mimbʊnyaa lɔnnɔ rɔ wɔɔ, tɩrgabaa zibəə mim n nyɩnta awɔɔ ma y. 21Bɔ awɔɔ yɩ, zibəəro wɔɔ duro nɔ ʊ? Ŋ nyannɩ ta awɔɔ m her, bala, ŋ nyambʊrlɛ bɩ, zɛ m. 22Bɩ kɛɛrɛ naa, n y’awɔɔ yɔ mimbʊnyaa wɔ ʊ, a a ba Woso lɔnnɔ, hɔ k’awɔɔ n’a yɩrɛ a nɔ ʊ bɩ, mɩsɩrbaa k’a Woso nɔ yɩ m, a nyambʊrlɛ bɩ, mɩsɩrbaa k’a nyarɛ ba ʊ bɩ yɩrɛ m. 23Bala, mimbʊnyaa yawʊra bɩ, zɛ m, bɩ ganwʊrɛ kʊ Woso n’a kam nɩbɩr bɩ, mɩsɩrbaa k’a nyarɛ ba ʊ bɩ m, wɔɔ Zuuba Yeezuu Krista zɛkʊra nɔ ʊ.
7Moyiisi lɛrɔ bɛɛ y’a so kristagʊaa ʊ y
1M danyɩnɔ, awɔɔ hɔ kʊ mɔɔ n n’a ŋʊam kʊ m a hɩ awɔɔ m naa dɔ mɩŋŋa, bala, awɔɔ lɛrɔ dɔ. Ba gʊaa gɔɔta an mɩsɩr bɩ lɛ tɩr a so ʊ. K’a zaa bɩ ga, lɛ n a so ʊ dɔ y. 2Ʊ makra sa: lɛrɔ wɔɔ nɔ ʊ, n y’a cɩnta kʊ lʊ b’a gʊ a zim ma k’a zim bɩ bɛɛ bɩ ga y, bɩ k’a zim bɩ ga, lɛ k’a so lʊ b’ʊ k’an gɔɔta an bɩr kan a zim bɩ kɩ a mɩsɩrbaa dɔmɩm ʊ bɩ n a ya, an a so lʊ b’ʊ dɔ y. 3Bɩ, kʊ lʊ bɩ gʊaa vanta sa a zim bɩ nɩ meeyaa m, lʊ bɩ bir n nawʊm jaandər. Bɩ k’a zim bɩ bɩ ga, lɛ bɩ n a ya, an a so ʊ dɔ y, a a da ma an gʊaa vanta sa, bɩ n b’a dam ma n a hɩ ma jaandər y. 4M danyɩnɔ, a maam sɔ, lɛrɔ wɔɔ y’a so awɔɔ ʊ biisi. Kɛɛrɛ naa, a zɛ awɔɔ ʊ kʊ ra kan Krista k’a ga wɔɔ tɔ ma bɩ kɩ, lɛ n a ya, an a so awɔɔ ʊ dɔ y, awɔɔ gɩnga sɔ. Gʊaa vanta y’a so awɔɔ ʊ kɛɛrɛ, gʊaa k’a mɩm bɔ ʊ gəəno bire ʊ bɩ m, kʊ wɔɔ n’ʊ da ma ʊ zibəəro mɩŋŋɔɔ ba Woso tɔ ma. 5Bala, nyɩnta kʊ wɔɔ ʊ biisi, ʊ nɩ mɩsɩrbaa bam mɛsim lɛtaamarɔ nɔ ʊ bɩ, lɛrɔ wɔɔ minto bɩ, lɛtaamarɔ bʊnyaarɔ nyɩnta ŋn’ɩ wɔɔ mɛ jilli bɩ dam zi bʊnyaarɔ barɛ ʊ, ŋn’ɩ tam wɔɔ m zɛ bɩncɛ ʊ. 6Biisi bɩ, lɛrɔ wɔɔ, wɔɔ ba n y’a ʊ a lɔnnɔ, ŋn’a so wɔɔ ʊ, kɛɛrɛ naa, lɛrɔ wɔɔ bɩncɛ ʊ, gɩnga wɔɔ ʊ, Woso wɔɔ bɔ ŋ wɔ ʊ. Kɛɛrɛ naa, wɔɔ ʊ da ma, ʊ Woso zi ba zaa daa nɔ ʊ, Sɛnt-Ɛspri zaa m, lɛrɔ zaa gusire k’a nɩ Moyiisi ci ʊ bɩ bɛɛ dɔ y.
Lɛrɔ wɔɔ bɩr gʊaa yɔm
mimbʊnyaa wɔ ʊ y
7Naa jɩ m bɔ nɩ? Mimbʊnyaa m, lɛrɔ wɔɔ m na? Ayy…, fɩɩga! Bɩ, kʊ lɛrɔ wɔɔ bɛɛ m, mɔɔ b’a dɔm kʊ bɔ m mimbʊnyaa y. Bala, mɔɔ bɩ gʊaa hɔ lɛtaamarɔ dɔrɛ, kʊ lɛrɔ wɔɔ bɛɛ y’a cɩnta, ŋ ʊ: ‹Ɩ b’a ka ɩ lɛ m bɩr gʊaa hɔ zi y.› 8A m naa, mimbʊnyaa n a na lɛrɔ kʊ ŋ y’a cɩnta rɔ wɔɔ ma, an zaa yɩ mɔɔ gʊr zi, an mɔɔ lɛ ka gʊaa hɔ lɛtaama do haay zi. Bala, kʊ lɛrɔ wɔɔ ba ʊ, mimbʊnyaa bɩ, hɔ gər m. 9Biisi bɩ, lɛrɔ wɔɔ kʊ ŋ ba ʊ bɩ, mɔɔ mɩsɩr. Bɩ, lɛrɔ kʊ ŋ bɩ bʊr bɩ, mimbʊnyaa n a mɩm bɔ ʊ, mɔɔ m ga. 10Ncɩnaaʊ bɩ, mɔɔ mɩŋŋa mim bɩ nɔ ʊ bɩ, lɛrɔ kʊ ŋ nɩ mɩsɩrbaa ler bɔm mɔɔ m, brɔɔ a ka mɔɔ n ga. 11Bala, a na mimbʊnyaa b’ʊ lɛrɔ wɔɔ lɛ m, an bra ba mɔɔ m, an a ka, lɛrɔ wɔɔ n mɔɔ zɛ gər.
12Bɩ kʊ lɛrɔ wɔɔ a to ŋ y’a ʊ Woso zi, lɛ biyəə mɩŋŋa, a tɩrga, hɔ mɩŋŋa m. 13Bɩ, hɔ k’an mɩŋŋa bɩ y’a ka mɔɔ n ga ra? Ayy…, fɩɩga! Mimbʊnyaa ɩ mɔɔ zɛ, hɔ mɩŋŋa a a sa, an mɔɔ zɛ m gər. Yɩ a ʊ, ncɩnaaʊ, kʊ mimbʊnyaa bʊnyaabaa n a hɩnka. Lɛrɔ wɔɔ y’a ka, mimbʊnyaa bʊnyaabaa gʊtabaa n a hɩnka paan….
Mimbʊnyaa k’a a so gʊaa ʊ mim
14Wɔɔ dɔ, ʊ ʊ, lɛrɔ wɔɔ a to ŋ y’a ʊ Woso zi. Bɩ kʊ mɔɔ nɩ, gʊaa m mɔɔ m bala, mimbʊnyaa n mɔɔ si, an mɔɔ ba a lɔ. 15Mɔɔ bɩr m zi kʊ mɔɔ n’a bam jɩ dɔrɛ y, hɔ kʊ mɔɔ lɛ n taa kʊ m a ba bɩ, mɔɔ bɩr bɩ barɛ y, hɔ kʊ mɔɔ lɛ baa kʊ m a ba bɩ, mɔɔ n’a bam. 16Bɩ, k’a nɩ yɩrɛ ɩ ʊ, hɔ kʊ mɔɔ lɛ baa bɩ, bɩ mɔɔ n’a bam bɩ, mɔɔ yɛ kɛɛrɛ m ʊ, lɛrɔ wɔɔ mɩŋŋa. 17A ɩ yɩrɛ ɩ ʊ, hɔ bʊnyaa kʊ mɔɔ n’a bam bɩ, mɔɔ bɛɛ n’a barɛ y, mimbʊnyaa k’a nɩ mɔɔ nɔ ʊ bɩ n’a bam. 18Bala, mɔɔ dɔ mɔɔ ʊ, mɔɔ gʊr zi, (b’ʊ k’a hɩ a ʊ: mɔɔ mɛsim nɔ ʊ bɩ) hɔ mɩŋŋa ba ʊ y. Mɔɔ ɩ zi mɩŋŋa barɛ lɛtaama m, bɩ mɔɔ ba a barɛ paŋŋa nɩ y. 19Mɔɔ bɩr zi mɩŋŋa kʊ mɔɔ n’a ŋʊam bɩ barɛ y, zi bʊnyaa kʊ mɔɔ bɩr a ŋʊam bɩ mɔɔ n’a bam. 20Kʊ hɔ kʊ mɔɔ lɛ baa bɩ mɔɔ n’a bam bɩ, mɔɔ mɩŋŋa bɛɛ n’a barɛ y, mimbʊnyaa k’a nɩ mɔɔ ʊ bɩ m.
21Mɔɔ tɩr a yɩm, kʊ mɔɔ ʊ, kʊ m zu lɛrɔ wɔɔ ʊ, mɔɔ ba a paŋŋa nɩ y. Zi bʊnyaa barɛ paŋŋa mɔɔ m ta m bala. 22A ɩ yɩrɛ ʊ, mɔɔ heer nɔ ʊ, mɔɔ Woso lɛrɔ wɔɔ ŋʊa, 23bɩ, mɔɔ ɩ lɛ vanta yɩrɛ an nɩ zi bam mɔɔ mɩsɩrbaa nɔ ʊ, an nɩ zoo bam kan lɛrɔ niŋŋoo kʊ mɔɔ hɔɔn nɩ kan ŋ kɩ rɔ wɔɔ kɩ. Lɛ vanta bɩ do k’a nɩ mɔɔ ʊ bɩ n’a kam, mɔɔ nɩ m bam mimbʊnyaa paŋŋa k’a nɩ mɔɔ ʊ bɩ lɔ. 24Cicirzaa m mɔɔ m! Nka nɩ mɔɔ yɔm mɛ k’a nɩ tam mɔɔ m zɛ bɩncɛ ʊ bɩ wɔ ʊ? 25Woso m, Yeezuu Krista wɔɔ Zuuba bɩ tɔ ma, Woso m lɛbɔʊrɛ yɩ!
Naa haay tɔ ma, a ɩ yɩrɛ ɩ ʊ, kʊ mɔɔ mɩŋŋa nɩ, mɔɔ hɔɔn mɔɔ ba Woso lɛrɔ wɔɔ lɔ, mɔɔ mɛsim n bɔkarɛ an mɔɔ ba mimbʊnyaa lɔ.
8Yeezuu Krista minto bɩ, Sɛnt-Ɛspri y’a so kristagʊɔɔ ʊ
1Kɛɛrɛ naa, Woso b’a yarɛ an gʊɔɔ kʊ ŋ nɩ Krista Yeezuu nɔ ʊ rɔ wɔɔ dʊdɔ yar y. 2Bala, Yeezuu Krista nɔ ʊ, lɛ kʊ *Sɛnt-Ɛspri a sa k’a mɩsɩrbaa ka mɔɔ ʊ bɩ, a mɔɔ bʊmbɔ lɛ k’a nɩ mimbʊnyaa m k’a nyɩnta k’a mɔɔ gaa a ta mɔɔ m zɛ nɔ ʊ bɩ wɔ ʊ. 3Hɔ kʊ Moyiisi lɛrɔ wɔɔ n a da ma ŋn’a ba, gʊɔɔ kʊ ŋ n’a da ma ŋnɩ zu ʊ bɩ minto bɩ, Woso hɔ bɩ do ba. Woso k’a a Nyɩ bɩ nyɔɔ mɛsim nɔ ʊ, an bʊr mimbʊnyaabənno mɛsim m k’a bɩ ŋ yɔ mimbʊnyaa wɔ ʊ bɩ, a mimbʊnyaa dʊdɔ yar. 4Naa do ba Woso ʊ, kʊ tɩrgabaa kʊ lɛrɔ wɔɔ a cɩnta bɩ n kʊ yɩ, wɔɔ gʊr zi. Wɔɔ k’ʊ bɩr mɩsɩrbaa bam dɔ mɛsim nɔ ʊ bɩ, Sɛnt-Ɛspri paŋŋa nɔ ʊ m. 5Bala, gʊɔɔ kʊ ŋ nɩ mɛsim mɩsɩrbaa bam nɔ wɔɔ, hɔ kʊ mɩsɩrbaa bɩ do lɛ n taa ŋn’a kam ma, bɩ gʊɔɔ kʊ ŋ nɩ mɩsɩrbaa bam Sɛnt-Ɛspri paŋŋa mɩsɩrbaa nɔ ʊ rɔ wɔɔ, hɔ kʊ Sɛnt-Ɛspri lɛ n taa bɩ ŋn’a kam ma. 6Mɛsim hɔɔnhɔrɔ kama bɩ, ta a nawʊm gʊaa m zɛ bɩncɛ ʊ, bɩ, Sɛnt-Ɛspri hɔɔnhɔ kama bɩ, ta a nawʊm gʊaa m mɩsɩrbaa kan laafɩɩ kɩ bɩncɛ ʊ. 7Bala, Woso jɩnnɔ m mɛsim hɔɔnhɔrɔ wɔɔ m, bala, mɛsim bɩr zum Woso lɛ ʊ y, a b’a dam ma sɔ an zu ʊ y. 8Maam sɔ bɩ, gʊɔɔ kʊ ŋ nɩ yɛm mɛsim hɔɔnhɔ ma rɔ wɔɔ, b’a dam ma, ŋnɩ Woso nɔ yɩ y.
9K’awɔɔ nɩ, mɛsim bɛɛ y’a so awɔɔ ʊ y, Sɛnt-Ɛspri y’a so awɔɔ ʊ, bala, Woso Ɛspri b’ɩ y’awɔɔ nɔ ʊ. Kʊ gʊaa ba Krista Ɛspri bɩ nɩ, Krista gʊaa bɛɛ n’a zaa nɩ y. 10Bɩ, Krista y’awɔɔ nɔ ʊ, sɩra m, awɔɔ mɛ bɩ zɛm bɩ ga mimbʊnyaa tɔ ma. Bɩ, kʊ n y’awɔɔ ba tɩrga minto bɩ, Sɛnt-Ɛspri mɩsɩrbaa y’awɔɔ nɔ ʊ. 11Kʊ Woso k’a Yeezuu mɩm bɔ ʊ gəəno bire ʊ bɩ Ɛspri y’awɔɔ nɔ ʊ, Woso bɩ do, k’a Yeezuu Krista mɩm bɔ ʊ gəəno bire ʊ bɩ zum kʊ ʊ kan a Ɛspri bɩ kɩ, an mɩsɩrbaa ka awɔɔ mɛ k’a nɩ zɛm bɩ ga b’ʊ.
12Ncɩnaaʊ bɩ, m danyɩnɔ, pakra bɛɛ m, kʊ wɔɔ n zu mɛsim hɔɔnhɔ b’ʊ dɔ y, Sɛnt-Ɛspri n’a ŋʊam bɩ wɔɔ ʊ ga m, ʊ a ba. 13Bala, k’awɔɔ y’a mɩsɩrbaa bam a mɛsim hɔɔnhɔ nɔ ʊ, awɔɔ gɩngarɛ, bɩ k’awɔɔ a mɛsim hɔɔnhɔ zibəəro wɔɔ da jɩm ʊ Sɛnt-Ɛspri paŋŋa nɔ ʊ, awɔɔ mɩsɩrbaa bam. 14Bala, gʊɔɔ haay kʊ Woso Ɛspri n nɩ karɛ ŋ lɛɛ rɔ wɔɔ, brɔɔ m Woso nyɩnɔ. 15Ɛspri kʊ Woso a ka awɔɔ ʊ bɩ bɩr awɔɔ bam lɔnnɔ, k’awɔɔ n a ya a bɩr nyibəə nɔ ʊ y, Ɛspri bɩ do, awɔɔ ba a nawʊm Woso nyɩnɔ, an n’a kam wɔɔ nɩ Woso birm, ʊ ʊ: ‹Aba›, a jɩ k’a hɩ a ʊ: ‹Baaba›. 16Ɛspri bɩ do n n’a kam wɔɔ n n’a dɔrɛ ʊ heer ʊ mɩŋŋa, ʊ ʊ, Woso nyɩnɔ m wɔɔ m. 17Kʊ Woso nyɩnɔ m wɔɔ m bɩ, wɔɔ n nɩ zɛm b’ʊ so hɔnta k’a cɩnta wɔɔ m b’ʊ, wɔɔ zɛm b’ʊ so ʊ kan Krista kɩ, bala, kʊ wɔɔ fɩr yɩ kan kɩ, wɔɔ nyɩntam kan kɩ a lɛbɔʊrɛ nɔ ʊ sɔ.
Woso lɛ taa kʊ wɔɔ m bɩ nyɩnta a lɛbɔʊrɛ nɔ ʊ
18Mɔɔ y’a gɩngam mɔɔ ʊ, fɩr k’ʊ n’a yɩm her naa b’a dam ma fɩɩgaa, an a makra ba kan lɛbɔʊrɛ kʊ Woso n nɩ zɛm b’a hɩnka wɔɔ m bɩ kɩ y. 19Ncɩnaaʊ nɩ, durnya nɩ dɔm Woso nyɩnɔ hɩnkarɛ dɔmɩm ma, kan a heer kɩ haay. 20Durnya bɩ haay a ba hɔ vam, a bɛɛ y’a ŋʊa maam nɩ y, Woso k’a a da vambaa ma bɩ minto m, bɩ durnya gɔɔta an n’a gɩngam k’a bɩ bɔ vambaa bɩ nɔ ʊ. 21Bala, Woso durnya bɩ yɔm vambaa lɔmbaa bɩ wɔ ʊ sɔ k’an zɛkʊra yɩ kan Woso nyɩnɔ wɔɔ soamɩŋŋaʊ kɩ, kan ŋ lɛbɔʊrɛ bɩ kɩ sɔ. 22A n bɔkarɛ wɔɔ dɔ, ʊ ʊ, durnya bɩ jilli ɩ fɩr yɩm, an nɩ kɔrɛ nɔ ʊ dɩɩtaa, amba lʊ k’a nɩ nyoosi bam bɩ m. 23Durnya bɩ bɛɛ n’a deem nɩ y, wɔɔ ɩ fɩr yɩm ʊ heer ʊ, dɔ kʊ wɔɔ nawʊm dɔmɩm kʊ Woso n nɩ zɛm bɩ wɔɔ ba a nyɩnɔ paan…rɔ, an wɔɔ mɛ bʊmbɔ bɩ ma. Woso Sɛnt-Ɛspri ka wɔɔ ʊ lɛɛkarɛ ganwʊrɛ, k’ʊ bɔkarɛ ʊ bɩ ganwʊrɛrɔ kʊ ŋ gɔɔta rɔ wɔɔ yɩ. 24Bala, wɔɔ bʊmbɔrɛ yɩ, bɩ gɩnga nɔ ʊ m. Kʊ gʊaa ɩ hɔ k’a n’a gɩngam k’a b’a yɩ bɩ yɩrɛ a mɩm m, gɩnga bɛɛ m bɩ dɔ y, nka n’a yarɛ an hɔ k’a n’a yɩrɛ a mɩm m gɩnga? 25Bɩ, kʊ wɔɔ ɩ hɔ kʊ wɔɔ bɩr a yɩrɛ ʊ mɩm m bɩ gɩngarɛ, dɔ wɔɔ nawʊm ma kan bʊraama kɩ.
26Maam sɔ bɩ, Sɛnt-Ɛspri ɩ zɛm sɔ, an n’a dam wɔɔ han, ʊ paŋŋawar nɔ ʊ. Bala, kʊ wɔɔ n yaadarɛ dɔ an a ga kʊ ʊ ba bɩ, Sɛnt-Ɛspri mɩŋŋa ɩ yaa dam wɔɔ tɔ ma, hoonsibɔɔrɛ kʊ gʊaa b’a dam ma an a jɩ hɩ nɔ ʊ. 27Bɩ, Woso k’a hɔ k’a nɩ gʊaa heer ʊ dɔ bɩ, a hɔ kʊ Sɛnt-Ɛspri lɛ n taa bɩ dɔ. Bala, yaa kʊ Sɛnt-Ɛspri n’a dam wosogʊɔɔ wɔɔ tɔ ma bɩ, a da a nawʊm amba Woso n lɛ n taa bɩ m.
28Wɔɔ dɔ sɔ, ʊ ʊ, Woso n n’a kam mim haay woo… nɩ kʊ zɛŋ ʊ, ŋn’ɩ yɩm mɩŋŋa gʊɔɔ haay kʊ ŋ nɩ Woso ŋʊam nɔ wɔɔ ma, gʊɔɔ k’a ŋ bir amba a a cɩnta bɩ m. 29Bala, gʊɔɔ kʊ Woso lɛɛ ka, an ŋ bɔ ʊ rɔ wɔɔ, a a cɩnta sɔ kʊ ŋ nɩ bɩ bɔ kʊ ʊ kan a Nyɩ bɩ kɩ, k’a Nyɩ bɩ m yɩ Nyɩ jɩtaarɛ danyɩnɔ cir bireyaa ʊ. 30Gʊɔɔ kʊ Woso lɛɛ ka an ŋ bɔ ʊ rɔ wɔɔ, a ŋ bir sɔ, ŋ bir k’a ʊ bɩ, a ŋ ba tɩrga, k’a ŋ ba tɩrga bɩ, a ŋ tɔ busu a lɛbɔʊrɛ nɔ ʊ sɔ.
Woso ŋʊarɛ gʊtabaa
31Bɔ wɔɔ n’ʊ yarɛ ʊ a hɩ? Kʊ Woso ɩ kan wɔɔ kɩ, nka m nɩ bʊrm wɔɔ ra? 32Woso n a mɩŋŋa Nyɩnnɩ bɩ bɔ lɛ m y, a a ka ŋn’a zɛ wɔɔ haay tɔ ma. K’a a yo an yɛ naa do ma bɩ, a hɔ haay kam wɔɔ ʊ kan a Nyɩ bɩ kɩ. 33Nka m nɩ mim kam gʊɔɔ kʊ Woso ŋ bɔ ʊ rɔ wɔɔ ra? Gɔsɩ, bala, Woso nɩ ŋ bam tɩrga. 34Nka m nɩ ŋ dʊdɔ yarlɛ? Gɔsɩ, bala, Yeezuu Krista ɩ ga, an lɛ da bɩ, a a mɩm bɔ ʊ, an nɩ nyɩntam Woso bɩsɩ ʊ, an nɩ yaa dam wɔɔ tɔ ma. 35Nka m nɩ wɔɔ gʊm ŋʊarɛ kʊ Krista n ta m wɔɔ minto bɩ ma? Fɩryɩrɛ m gɛɛ heerzɛkʊma nɩ, gʊɔɔ kʊ ŋ nɩ cicir kam wɔɔ ma rɔ m gɛɛ nɔ nɩ, ta dɩgɩbaa m gɛɛ mim kʊsɩ nɩ, gɛɛ zɛ nɩ? 36Amba n y’a gʊrsɩra ba Wosoci ʊ bɩ m, n ʊ:
Ɩbɩɩ tɔ ma m, n nɩ wɔɔ zɩnzɛm wakatɩ haay nɔ ʊ,
n yɩ dɩgam wɔɔ ma, am seero kʊ ŋ nɩ tam k’a yaa n ŋ zɩnzɛ rɔ wɔɔ hɔ bɩ m.
37Bɩ, naa haay nɔ ʊ, damazannɔ paan…rɔ m wɔɔ m, a zaa k’a wɔɔ ŋʊa bɩ tɔ ma. 38Bala, mɔɔ dɔ kan heerkoodəbaa kɩ, m ʊ: zɛ, gɛɛ mɩsɩrbaa, malɛɛkarɔ gɛɛ paŋŋasoʊrezannɔ kʊ ŋ nɩ ta ʊ, hɔ k’an ta ʊ her, gɛɛ an nɩ zɛm booti m, paŋŋazannɔ haay, 39mim ʊ paŋŋazannɔ, gɛɛ paŋŋazannɔ kʊ ŋ nɩ tara ʊ, gɛɛ hɔ kʊ Woso a da haay, sɩ b’a dam ma an wɔɔ gʊ ŋʊarɛ kʊ Woso n ta m, wɔɔ tɔ ma, wɔɔ Zuuba Yeezuu Krista zɛkʊra bɩ nɔ ʊ bɩ ma y.
9Woso ɩ Israyɛl gʊɔɔ wɔɔ bɔ ʊ
1Sɩra mɔɔ n’a hɩm, Krista zɛkʊra nɔ ʊ, mɔɔ bɩr ŋʊaar barɛ y, Sɛnt-Ɛspri a zɛ kʊ ra kan mɔɔ heer kɩ, ŋnɩ mɔɔ sɩra bɩ hɩrɛ kasɛtɩ karɛ. 2Mɔɔ ɩ heerzaarbarɛ gʊta m, m heer nɩ busum dɔmɩm haay. 3Mɔɔ y’a ŋʊam k’an bɩr yɩrɛ ɩ ʊ, Woso kaanm mɔɔ m, m bɩr laatʊ Krista ma, m danyɩnɔ, m zɩrɔ wɔɔ, mɔɔ do gʊɔɔ wɔɔ tɔ ma, k’a ɩ yɩrɛ, ɩ ʊ, naa yɩm ŋ bʊmbɔrɛ. 4Ŋ mɩŋŋɔɔ m Israyɛl zannɔ, Woso n ŋ bɔ ʊ k’a ŋ ba a nyɩnɔ, an a lɛbɔʊrɛ ka ŋ ʊ kan a gʊaasɩbabaa zaarɔ kɩ, a lɛrɔ kɩ, a Woso daʊrɛ zaa kɩ, lerbɔrɛrɔ kɩ. 5Ŋ yaabɔɔ m Abraham m, Izakkɩ kan Zakɔɔb kɩ m. Kʊ yɩrɛ nɔ ʊ nɩ, Krista bɩ, ŋ do gʊaa m. Krista mɩŋŋa nɩ hɔ haay burə ʊ. A m Woso, a tɔ m lɛbɔʊrɛ yɩ dɔmɩm haay nɔ ʊ. Amina!9.5 N y’a da ma, n n’a wusigə sɔ, n ʊ: «Kʊ Woso tɔ n lɛbɔʊrɛ yɩ dɔmɩm haay nɔ ʊ! Amina!».
6A bɩr yɩrɛ ɩ ʊ, jɩra Woso ʊ ler k’a bɔ bɩ ra wa, bɩ, Israyɛl yaŋŋɔɔ wɔɔ haay bɛɛ m Israyɛl do gʊɔɔ paan…rɔ y, 7Abraham yaŋŋɔɔ haay bɛɛ n a nyɩnɔ paan…rɔ y, bala, Woso a hɩ Abraham m, a ʊ: ‹Izakkɩ n n’ɩ nyɩnɔ kʊ mɔɔ ŋ ler bɔ ɩbɩɩ m nɔ wɔɔ yɩrɛ.› 8Naa k’a hɩ, a ʊ: nyɩnɔ kʊ gʊaa nɩ ŋ yɩrɛ, am gʊaa haay hɔ bɩ m bɩ, brɔɔ bɛɛ m Woso nyɩnɔ y, bɩ nyɩnɔ kʊ n yɩ ŋ ler bɔ rɔ wɔɔ, brɔɔ n nɩ dɩgarɛ ŋ ma yaŋŋɔɔ paan…rɔ. 9Ler kʊ Woso a bɔ bɩ ba n nɩ: ‹Kʊ dɔmɩm kʊ mɔɔ cɩnta b’a ku, mɔɔ yɩ m yarɛ m bʊr, Saara m nyɩyar yɩ.›
10Naa bɛɛ n a deem nɩ y, cirgərenyɩnɔ kʊ Rebeka ŋ yɩ rɔ wɔɔ zɩ deem, wɔɔ yaaba Izakkɩ m. 11A n bɔkarɛ, Woso y’a mɩŋŋa zaa m, an n’a gʊaa bɔŋ ʊ a hɔɔnhɔ ma, a bɩr dɩgam zi kʊ gʊɔɔ a ba bɩ ma y, dɩga a nawʊm a mɩŋŋa lɛtaama ma, an nɩ gʊɔɔ birm. Woso k’a lɛ n taa kʊ zaa naa do n gɔɔta an bɩr ta ʊ bɩ, an a to nyɩnɔ wɔɔ m yɩ y. Maam bɩ, ŋ n a da ma ŋnɩ hɔ mɩŋŋa, gɛɛ hɔ bʊnyaa ba y. 12A n lɛɛ ka nyɩnɔ wɔɔ yɩrɛ ma bɩ, a a hɩ Rebeka m, a ʊ: ‹Nyɩnɔ wɔɔ poore bɩ n n’a som jɩtaarɛ b’ʊ.› 13Amba n y’a gʊrsɩra ba Wosoci ʊ, n ʊ: ‹Mɔɔ Zakɔɔb ŋʊa, m Eso bɔ m jɛ m› bɩ m.
14Bɔ wɔɔ kʊ a hɩ? Kʊ a hɩ, ʊ ʊ, Woso bɩr a zi bam tɩrga ra? Ayy…, fɩɩga! 15Bala, Woso a hɩ Moyiisi m, a ʊ: ‹Gʊaa kʊ mɔɔ lɛ n taa bɩ, mɔɔ nɩ m ŋʊarɛ zi bam kan kɩ, gʊaa kʊ mɔɔ lɛ n taa bɩ, mɔɔ n’a cicir zɛ m.› 16Woso mɩŋŋabaa bɩ bɩr zum kʊ ʊ kan gʊaa hɔɔnhɔ kɩ y, b’a ba a zibəə ma sɔ y. Woso deem an ta ma, kʊ nka a lɛ n taa b’a bɩ zaa cicir zɛ. 17Naa minto m Wosoci bɩ n’a hɩ Eziptɩ cir m, a ʊ: ‹Mɔɔ y’ɩbɩɩ cɩnta cir kʊ m m paŋŋa bɩ hɩnka, bɩsɩ k’ɩ n’a kam mɔɔ ma bɩ nɔ ʊ, kʊ mɔɔ tɔ m bɔ durnya lɛɛ haay ʊ.› 18Ncɩnaaʊ bɩ, kʊ nka Woso lɛ n taa, b’a cicir zɛ, kʊ nka a lɛ n taa sɔ, b’a ka sɔ a zaa n a ba bɩsɩkər heerkarɛ nɔ ʊ.
Woso ɩ gʊɔɔ bɔŋ ʊ a hɔɔnhɔ ma
19Gʊaa a da ma an a hɩ, a ʊ: «K’a ɩ yɩrɛ ncɩnaaʊ, bɔ m Woso n a ya, an nɩ həən sim gʊɔɔ ma? Bala, nka n’a dam ma an bɩsɩ ka a hɔɔnhɔ ma?» 20Bɩ, ɩbɩɩ k’ɩ m gʊaa, bɔ zaa n’ɩbɩɩ m k’ɩ bɩsɩ ka kan Woso kɩ? Taanm y’a hɩm a dɔrɛ zaa bɩ m, a ʊ: «Bɔ m, ɩbɩɩ m mɔɔ dɔ ncɩnaaʊ gɛ?» 21Mɔrdor y’a so ji k’a nɩ zi bam nɩ b’ʊ, a a da ma, an ji deem-deem bɩ yɔɔ an mɔr dɔ m cibsa tɔ ma, an mɔr dɔ m sɔ, dɔmɩm haay zibəə tɔ ma.
22Woso a ŋʊa k’a a nɔmaa hɩnka, a a ŋʊa sɔ kʊ n n’a paŋŋa dɔ, an bɔkarɛ, gʊɔɔ kʊ ŋ y’a ga dʊdɔyarlɛ m Woso nɔ k’a ma ʊ kan ŋ kɩ bɩ minto rɔ wɔɔ, Woso a gu an bʊr a mɩŋŋa ma, an ŋ dʊdɔ yar y. 23K’a lɛbɔʊrɛ gʊtabaa hɩnka gʊɔɔ k’a nɩ ŋ cicir zɛm nɔ wɔɔ m. Lɛɛ a ka an brɔɔ banka k’a lɛbɔʊrɛ ka ŋ ʊ. 24Bɩ, gʊɔɔ wɔɔ duro m wɔɔ m, a n wɔɔ bir zɩɩfʊrɔ barla bala y, wɔɔ bir a ʊ sɔ doro vantɔɔ gʊɔɔ barla. 25Naa Woso a hɩ wosolɛsinnɩsorazaa Ozee ci ʊ bɩ, a a hɩ, a ʊ:
Do kʊ mɔɔ do bɛɛ m bɩ,
mɔɔ y’a hɩm ma, m do,
do kʊ mɔɔ bɩr a ŋʊam biisi bɩ, mɔɔ y’a hɩm ma, m ŋʊarɛ do.
26Lɛɛ kʊ n y’a hɩm nɩ hɔɔ, n ʊ: ‹Mɔɔ do bɛɛ n’awɔɔ m bɩ,›
lɛɛ bɩ do n ŋ birŋ ʊ, n ʊ: ‹Woso k’an mɩsɩr bɩ nyɩnɔ.›
27Ezayii Israyɛl do bɩ mim hɩ sɔ, a ʊ: ‹Baa kʊ Israyɛl gʊɔɔ wɔɔ pasɩ, an higʊta lɛ ra nyɩntaayaa m bɩ, gʊɔɔ kʊ ŋ nɩ bʊmbɔrɛ yɩrɛ ŋ barla rɔ wɔɔ, bɩ yɩm gʊta y. 28Bala, Zuuba hɔ k’a nyɩnta an a hɩ haay bɩ bam tara burə ʊ zɔɔ-zɔɔ.›
29Amba Ezayii a ya, an a hɩ, a ʊ:
Kʊ hɔ haay Zuuba bɩ bɛɛ yaŋŋɔɔ to wɔɔ m poore y,
bɔ wɔɔ nawʊm kʊ ʊ kan Sodɔm kʊ kɩ,
ʊ ʊ ba am Gomɔɔr kʊ hɔ bɩ m.9.29 K’a dɩga Sɩŋŋɩda Ci 19 bɩncɛ ʊ.
Sɩra ka Yeezuu Krista ʊ n nɩ gʊaa bam tɩrga
30Naa jɩ m bɔ nɩ? Do vantɔɔ gʊɔɔ wɔɔ kʊ ŋ n nyɩnta ŋ n’a ka tɩrgabaa ma rɔ wɔɔ, ŋ tɩrgabaa yɩ, tɩrgabaa k’a a to sɩrakarɛ nɔ ʊ m. 31A n bɔkarɛ, Israyɛl gʊɔɔ kʊ ŋ n’a kam lɛro kʊ ŋ nɩ tɩrgabaa karɛ ŋ ʊ rɔ wɔɔ ma bɩ, ŋ n a da ma, ŋ n zu lɛrɔ wɔɔ duro ʊ y. 32Bɔ minto nɩ? A ɩ yɩrɛ ɩ ʊ, Israyɛl n a ka ma k’a yɩ mɩŋŋa Woso mɩm ʊ sɩrakarɛ nɔ ʊ y, a ka a ʊ ma, k’a yɩ mɩŋŋa zibəəro mɩŋŋɔɔ barɛ nɔ ʊ. Ncɩnaaʊ nɩ, ŋn’a gəm zɛ, gənzɛrɛ jaa bɩ ma, 33amba n y’a gʊrsɩra ba Wosoci ʊ bɩ m, n ʊ:
K’a dɩga a, mɔɔ ɩ gənzɛrɛ jaa cɩntam *Siyɔn ʊ,
jaa m, an nɩ gʊaa dom.
Bɩ kʊ gʊaa sɩra ka ʊ, a bɩ nyannɩ bɩrɛ y.
10Zɩɩfʊrɔ kan do vantɔɔ gʊɔɔ kɩ Zuuba deem
1M danyɩnɔ, hɔ kʊ mɔɔ lɛ n taa, m n’a yɛm Woso han bɩ, a yɛ mɔɔ nawʊm kʊ zɩɩfʊrɔ wɔɔ n bʊmbɔrɛ yɩ. 2Bala, mɔɔ m da ma, m a hɩ, m ʊ, ŋ y’a tʊntɔŋ ʊ Woso kama nɔ ʊ, bɩ hɔdɔrɛ ɩ jɩra tʊntɔʊrɛ bɩ do nɔ ʊ. 3Kʊ ŋ n Woso k’a nɩ gʊaa bam tɩrga bɩ zaa jɩ dɔ bɩ, a mɩŋŋɔɔ m tɩrgabaa zaa ŋ y’a cɩnta, naa do a ka ŋ n zu zaa kʊ Woso nɩ gʊaa bam tɩrga b’ʊ y. 4Bala, Krista hɔ kʊ Moyiisi lɛrɔ wɔɔ a cɩnta bɩ ba haay an a nya, kɛɛrɛ naa, gʊaa haay k’a sɩra ka Yeezuu Krista ʊ bɩ, Woso ɩ bɩ zaa bam tɩrga.
5Moyiisi tɩrgabaa k’a n’a tom lɛrɔ nɔ ʊ bɩ mim hɩ, a ʊ: ‹Gʊaa k’a nɩ zum lɛrɔ wɔɔ haay ʊ bɩ mɩsɩrbaa bam lɛrɔ wɔɔ tɔ ma.› 6Tɩrgabaa kʊ sɩrakarɛ n’a kam bɩ mim ba n nɩ: ‹Ɩ b’a hɩ ɩ heer ʊ, ɩ ʊ, nka n nɩ tam brama?› Naa do naa, a hɩ ɩbɩɩ ʊ, k’ɩ ʊ, nka n nɩ tam brama an a ka Krista m zer? 7Ɩ b’a hɩ sɔ, ɩ ʊ, ‹nka n nɩ zerm tara noom ʊ?› Ncɩnaaʊ naa, a hɩ ɩbɩɩ ʊ, k’ɩ ʊ, nka n nɩ zerm an a ka Krista m bɔ gəəno bire ʊ? 8Lemim nyɩnta bɩ y’a hɩrɛ a ʊ lɔ kɛɛrɛ? A y’a hɩrɛ, a ʊ: ‹Lemim bɩ y’ɩ jɩr ʊ, ɩbɩɩ lɛ kan ɩ heer kɩ an ta ʊ.› A n bɔkarɛ, sɩrakarɛ lemim bɩ do wɔɔ n n’a pa dam naa. 9K’ɩbɩɩ bɔ ɩ lɛ ma gʊaa haay lɛɛ, ɩ ʊ, Yeezuu Krista m Zuuba, k’ɩbɩɩ sɩra ka ɩ heer ʊ, ɩ ʊ, Woso a mɩm bɔ ʊ gəəno bire ʊ, ɩbɩɩ bʊmbɔrɛ yɩrɛ. 10Bala, kʊ gʊaa sɩra ka a heer ʊ, bɩ Woso a ba tɩrga. Kʊ gʊaa a sɩrakarɛ bɔ a lɛ ma gʊaa haay lɛɛ, bɩ Woso a zaa bʊmbɔ. 11Bala, Wosoci a hɩ, a ʊ: ‹Kʊ gʊaa sɩra ka ʊ, a bɩ nyannɩ bɩrɛ y.› 12Naa minto bɩ, zɩɩfʊ kan do vanta gʊaa kɩ b’a hʊnhɔ y, ŋ haay Zuuba deem, an nɩ hɔ mɩŋŋa bam gʊɔɔ haay kʊ ŋ nɩ yaa dam nɩ rɔ wɔɔ m. 13Bala,
gʊaa biyəə k’a nɩ Zuuba tɔ birm bɩ, a bʊmbɔrɛ yɩm.
14Bɩ, ŋ y’a bam lɔ ŋn’a bir, kʊ ŋ n sɩra ka ʊ? Ŋ y’a bam lɔ ŋnɩ sɩra ka ʊ, kʊ ŋ n a mim ma? Ŋ y’a bam lɔ ŋn’a mim ma, kʊ gʊaa n a pa da ŋ nɩ? 15Bɩ, gʊaa y’a bam lɔ k’a mim pa da, kʊ n n’a nyɔɔ? Amba n y’a gʊrsɩra ba Wosoci ʊ, n ʊ: ‹Gʊɔɔ kʊ ŋ nɩ zɛm k’a bɩ lemim nyɩnta bɩ pa da rɔ wɔɔ leekure ɩ heernyɩnta kam.› 16Bɩ, gʊɔɔ wɔɔ haay bɛɛ lemim nyɩnta bɩ si y. Amba wosolɛsinnɩsorazaa Ezayii a hɩ, a ʊ: ‹Zuuba, nka ɩ sɩra ka lemim kʊ wɔɔ pa da b’ʊ?› 17Naa minto bɩ, bɔ sɩrakarɛ n nawʊm lemim kʊ gʊaa n’a tʊr kam ma bɩ nɔ ʊ, bɩ lemim bɩ do k’a n’a mam bɩ, Krista lemim m.
18Bɩ, mɔɔ laaka dam kɛɛrɛ wa, Israyɛl do bɩ n lemim bɩ ma ra? Ŋ y’a ma sɩɩn! Bala, n y’a da Wosoci ʊ, n ʊ: ‹Ŋ leer lee ku tara burə haay ra, ŋ meerbaarɔ m ta durnya lɛzojɩ ʊ.› 19Mɔɔ yɩ m yarɛ m laaka da sɔ, Israyɛl do bɩ, an lemim bɩ jɩ ma ra? A lɛɛkarɛ hɔ, Moyiisi a hɩ, a ʊ: ‹Mɔɔ y’a karɛ awɔɔ m jɩm ba do kʊ mɔɔ do paan… bɛɛ m bɩ minto, mɔɔ y’a karɛ awɔɔ nɔ n ma ʊ, do k’a hɔɔn ba ʊ tɔ ma.› 20Ezayii n a ya, an a hɩ, a ʊ: ‹Gʊɔɔ kʊ ŋ bɩr a kam mɔɔ ma rɔ wɔɔ ɩ mɔɔ yɩ, mɔɔ m hɩnka gʊɔɔ kʊ ŋ n hɔsɩ yɛ mɔɔ han rɔ wɔɔ m.› 21Kʊ Israyɛl mim nɩ, Woso a hɩ, a ʊ: ‹Dɔmɩm haay, mɔɔ m wɔ nyɔɔ do k’a bɩr yɛrɛ y, an nɩ bɩsɩ kam bɩ zi.›
11Woso n a bɔ Israyɛl do b’ʊ y
1Kʊ m m ya, m laaka da wa, Woso bɩ a bɔ a ʊ, a do b’ʊ ra? Ayy…, fɩɩga, mɔɔ n a gɩnga y! Bala, Israyɛl gʊaa m mɔɔ mɩŋŋa m, Abraham yaŋŋa m mɔɔ m, m to mɔɔ ʊ Bɛnzamɛn do bɩ barla. 2‹Woso n a bɔ a do k’a lɛɛ ka an a bɔ ʊ b’ʊ y.› Awɔɔ hɔ kʊ Wosoci bɩ n’a hɩm *Elii k’a bʊr an bɩ Israyɛl mimbʊnyaarɔ k’a ŋ ba rɔ wɔɔ dɩnda Woso m bɩ dɔ. 3A a hɩ, a ʊ: ‹Zuuba, ŋ y’ɩbɩɩ lɛsinnɩsorazannɔ wɔɔ zɩnzɛ, ŋn’ɩbɩɩ mannɩjaarɔ wɔɔ wurgə, mɔɔ ɩ gɔɔta m deem, ŋn’a kam ma k’a mɔɔ mee bɔ ʊ.› 4Bɩ, bɔ Woso a hɩ nɩ? A a hɩ, a ʊ: ‹Mɔɔ m gʊɔɔ bɔ ʊ tisi saanhɩna, m hɔ, ŋ n kukurə zɛ, ŋ n yaa da *wosobaawɔm Baal nɩ y.› 5Ncɩnaaʊ bɩ, her dɔmɩm naa nɔ ʊ sɔ naa, gʊɔɔ ta ʊ poore, Woso n ŋ bɔ ʊ a hɔɔn n’a ŋʊa tɔ ma. 6Ŋ bɔ a ʊ, a hɔɔn n’a ŋʊa tɔ ma, ŋ zibəəro tɔ ma bɛɛ y, kʊ m bɛɛ m, Woso hɔɔn bɔʊrɛ bɩ bɩ yɩm hɔɔn bɔʊrɛ paan… y.
7Kʊ a hɩ, ʊ ʊ lɔ? Hɔ kʊ Israyɛl n’a kam ma bɩ, an a yɩ y, bɩ gʊɔɔ kʊ Woso ŋ bɔ ʊ rɔ wɔɔ a yɩ. Gʊɔɔ kʊ ŋ gɔɔta rɔ wɔɔ heer karɛ ba, k’a bɩ hɔsɩ jɩ ma y. 8Amba n y’a gʊrsɩra ba Wosoci ʊ, n ʊ: ‹Woso a ka ŋ hɔɔn n a ta, ŋ mɩm n ta ʊ, bɩ ŋ bɩr lɛɛ yɩrɛ y, ŋ tʊr n ta ʊ, bɩ ŋ bɩr mim marɛ y, an ta an her dɔmɩm ku.›
9Davɩd a hɩ sɔ, a ʊ: ‹Kʊ ŋ hɔbɩrɛ n nyɩnta ŋ ma am baŋŋa k’a nɩ hɔ sam bɩ m, am zaŋŋa hɔ bɩ m, kʊ ŋ n’a dundo, ŋnɩ hʊnhʊrlɛ yɩ a n’a gakʊ ʊ kan ŋ zibəəro kɩ. 10Kʊ monsigə n ka ŋ mɩm la, kʊ ŋ bɩ lɛɛ yɩ dɔ y, kʊ ŋ nɩ bɩr kuntəm tee….›11.10 a m lɔ k’a kuntə, an mɔr busu an n’a yɔrɛ a taa bɩ hɔ bɩ m.
11Mɔɔ m ya, m nɩ laaka dam, zɩɩfʊrɔ wɔɔ kʊ ŋ y’a gəm zɛ naa, a do ŋ y’a ʊ fɩɩga ra? Ayy…, fɩɩga, mɔɔ n a gɩnga y! Bɩ, ŋ kʊrɔma bɩ minto bɩ, do vantɔɔ gʊɔɔ bʊmbɔrɛ yɩ, kʊ bɩ n a ka kʊ zɩɩfʊrɔ wɔɔ m jɩm ba ŋ ma. 12A n bɔkarɛ, k’a ɩ yɩrɛ ɩ ʊ, ŋ kʊrɔma a ka durnya m hɔnta yɩ, kʊ ŋ terma b’a ka do vantɔɔ gʊɔɔ wɔɔ m hɔnta yɩ, kʊ ŋ bɩ bʊmbɔrɛ yɩ, bɩ bɛɛ nɩ zɛm hɔ m an lɛ da ra?
Do vantɔɔ gʊɔɔ wɔɔ bʊmbɔrɛ
13Kɛɛrɛ bɩ, do vantɔɔ gʊɔɔ, mɔɔ y’a hɩrɛ awɔɔ m, m ʊ: kristazibəəzaa m mɔɔ m, an mɔɔ nyɔɔ do vantɔɔ wɔɔ tɔ ma. Maam bɩ, mɔɔ yɩ m zibəə bɩ tɔ busure. 14A gɩnga mɔɔ nawʊm maam, kʊ m do gʊɔɔ wɔɔ m jɩm ba, k’an bɩr yɩrɛ ɩ ʊ, gɔsɩnnɔ bʊmbɔrɛ yɩ. 15Ŋ bɔ kʊ Woso ʊ a rɛ b’a ka durnya n a zɛ kʊ ra kan Woso kɩ, k’a a ya, an ŋ gaa, bɔ n nɩ nyɩntaŋ ʊ? Nyɩnta a nawʊm mɩsɩrbaa, gʊɔɔ kʊ ŋ gɩnga rɔ wɔɔ tɔ ma.
16K’a ɩ yɩrɛ ɩ ʊ, Woso hɔ m lɛbiisi bur bɩ nɩ, bur bɩ haay Woso hɔ m sɔ. Kʊ Woso hɔ m gɔ bɩ nyim nɩ, Woso y’a so gɔ bɩ vəŋŋəro haay ʊ sɔ. 17Israyɛl gʊɔɔ wɔɔ bɔ kʊ ʊ kan gɔ kʊ n n’a bankam mɩŋŋa kɩ, n n’a vəŋŋəro gɔsɩnnɔ zɩnzɛ ra. Kʊ zɩɩfʊ bɛɛ n’ɩbɩɩ m bɩ, bɔ ɩbɩɩ ʊ kʊ rɛ kan pooyaa gɔ vəŋŋə kʊ n y’a sa, n n’a naasʊ gɔ mɩŋŋa bɩ vəŋŋəro wɔɔ bɩncɛ ma kɩ. Maam bɩ, gɔ kʊ n y’a banka bɩ nyinno wɔɔ y’ɩbɩɩ tʊrm sɔ. 18Naa minto bɩ, ɩbɩɩ n’ɩ ga m, ɩ gɔ bɩ vəŋŋəro gɔsɩnnɔ kʊ n yɩ ŋ zɩnzɛ ra rɔ wɔɔ gore bɔ ʊ y. Ɩbɩɩ y’a bam lɔ k’ɩ lɛ bɔ ɩ mɩŋŋa ʊ? Ɩbɩɩ bɛɛ m ta gɔ bɩ nyinno wɔɔ nɩ y, gɔ bɩ nyinno wɔɔ m ta ɩbɩɩ m.
19A a da ma, ɩbɩɩ n a hɩ mɔɔ m, ɩ ʊ: «Bɩ, gɔ bɩ vəŋŋəro zɩnzɛ n y’a ʊ ra, kʊ mɔɔ n ŋ bɩncɛ sa wa.» 20Sɩra m, n zɩnzɛ n y’a ʊ ra kʊ n y’a do sɩrakarɛ ma bɩ tɔ ma, ɩbɩɩ n ŋ bɩncɛ sa, ɩ sɩrakarɛ minto. Bɩ, dundo ɩ zi, ɩ bɩ ɩ mɩŋŋa busu y, nyi ba. 21Bala, zɩɩfʊrɔ wɔɔ m gɔ bɩ vəŋŋəro paan…rɔ, bɩ Woso n ŋ to gɔ bɩ ma y, a a da ma an a ba ɩbɩɩ m maam sɔ, a b’ɩbɩɩ tore y. 22Dɩga Woso ŋʊarɛ kan a nyaa kɩ zaa ma. A nyaa ta ʊ kan gʊɔɔ kʊ ŋ sɩrakarɛ to rɔ wɔɔ kɩ, an bɔkarɛ an mɩŋŋa kan ɩbɩɩ kɩ. Bɩ, pakra m k’ɩbɩɩ m gɔɔta a ŋʊarɛ bɩ nɔ ʊ, kʊ m bɛɛ m, n y’ɩbɩɩ zɛm la, am vəŋŋəro wɔɔ hɔ bɩ m. 23Kʊ zɩɩfʊrɔ wɔɔ a bɩsɩkarɛ bɩ to, n y’a yarɛ, n nɩ ŋ cɩnta a bɩncɛ gusire b’ʊ. Bala, Woso a da ma, an a ya an ŋ cɩnta lɛɛ kʊ ŋ nyɩnta ʊ hɔɔ b’ʊ. 24Ɩbɩɩ kʊ zɩɩfʊ bɛɛ n’ɩbɩɩ m bɩ, bɔ ɩbɩɩ ʊ kʊ ʊ kan pooyaa gɔ vəŋŋə kʊ n y’a zɛ ra n n’a naasʊ har gɔ kʊ n n’a bankam bɩ kɩ ma, an bɔkarɛ a n a ga m y. Zɩɩfʊrɔ wɔɔ, har gɔ bɩ vəŋŋəro m, a naanaa an cem kʊ n n’a ya, n nɩ ŋ naasʊ gɔ kʊ ŋ nɩ kan kɩ hɔɔ bɩ ma.
Israyɛl do bʊmbɔrɛ
25M danyɩnɔ, mɔɔ lɛ baa kʊ mim k’a nyaakʊm da naa n nyɩnta awɔɔ ma yirgu y, k’awɔɔ bɩ dɩga a mɩŋŋɔɔ ma mindɔrɛzannɔ y. A ɩ yɩrɛ ɩ ʊ, Israyɛl gʊɔɔ gɔsɩnnɔ y’a ba heerkarɛzannɔ, bɩ nyɩnta a nawʊrɛ ncɩnaaʊ, kʊ do vantɔɔ gʊɔɔ wɔɔ haay kʊ ŋ nɩ bʊmbɔrɛ yɩm nɔ wɔɔ m tolle ba ŋnɩ bʊmbɔrɛ yɩ. 26Ncɩnaaʊ bɩ, Israyɛl gʊɔɔ wɔɔ haay ŋ zɛm bɩ bʊmbɔrɛ yɩ, amba n y’a gʊrsɩra ba Wosoci ʊ, n ʊ:
Bʊmbɔrɛzaa bɩ y’a tom Siyɔn ʊ,
a Zakɔɔb yaŋŋɔɔ wɔɔ mimbʊnyaarɔ gʊngʊrɛ ŋ ma,
27gʊaasɩbabaa kʊ mɔɔ n’a darɛ ŋ ma bɩ n naa.
Dɔmɩm kʊ mɔɔ nɩ zɛm bɩ ŋ mimbʊnyaarɔ gʊngʊ ŋ ma bɩ m.
28Kʊ gʊaa k’a dɩga Israyɛl gʊɔɔ wɔɔ kʊ ŋ y’a gu lemim nyɩnta bɩ ma bɩ ma, a a da ma an a hɩ a ʊ, Woso jɩnnɔ nɩ ŋ mɩ, bɩ, awɔɔ daahan m bɩ, bɩ kʊ Woso gʊaa bɔʊrɛ bɩ nɔ nɩ, Woso ŋ ŋʊa ŋ yaabɔɔ wɔɔ tɔ ma. 29Bala, Woso bɩr hɔ k’a a ka bɩ sire y, a bɩr a hɔɔn lʊrm sɔ gʊɔɔ k’a ŋ bir lɔ wɔɔ mim bɩncɛ ʊ y. 30Biisi bɩ, awɔɔ nyɩnta bɩsɩ ka Woso ma zannɔ, bɩ her naa, Woso awɔɔ cicir zɛ, kʊ zɩɩfʊrɔ bɩsɩ ka ma bɩ tɔ ma. 31Her sɔ naa, brɔɔ bɩsɩ ka Woso ma, k’an bɩr yɩrɛ ɩ ʊ, awɔɔ cicir kʊ n y’a zɛ bɩ jɛ ʊ, kʊ n nɩ ŋ cicir zɛ sɔ. 32Bala, Woso a ka gʊɔɔ haay nɩ bɩsɩkarɛ nɔ ʊ, k’a ŋ haay cicir zɛ.
Woso gʊtabaa
33Woso hɔnta, a mindɔrɛ kan a hɔdɔrɛ kɩ nɔyaa ta ʊ gʊta maam-maam! Gɔsɩ b’a dam ma, an hɔ k’a a cɩnta nɔ dɔ y, gɔsɩ b’a dam ma, an a zaarɔ jɩ dɔ y. 34Wosoci y’a hɩrɛ, a ʊ:
Nka ɩ Zuuba hɔɔndarɛ dɔ? Gɛɛ, nka ɩ nyɩnta a dʊndɔrɛzaa?
35Gɛɛ, nka ɩ lɛɛ ka an hɔ ka ʊ, k’an a zɩm ka a zaa ʊ?
36Bala, hɔ haay bɩ, a to a ʊ a zi, an ta ʊ a paŋŋa tɔ ma, an ta ʊ a mɩŋŋa tɔ ma. Woso m lɛbɔʊrɛ yɩ dɔmɩm haay! Amina!
12Mɩsɩrbaa k’a Woso nɔ yɩ
1M danyɩnɔ, k’a yo Woso n a ŋʊarɛ zi ba kan awɔɔ kɩ ncɩnaaʊ bɩ, a yɛ mɔɔ nawʊrɛ awɔɔ han k’a mɩŋŋɔɔ ka Woso ʊ, amba mannɩ k’an mɩsɩr, Woso n a so ʊ, an mɩŋŋa ma bɩ m. Daʊrɛ naa do nɩ Woso nɔ yɩm. 2A bɩ zu her durnya naa mɩsɩrbaa zaarɔ ʊ y, bɩ k’a yɛ a zu Woso zaarɔ ʊ, k’awɔɔ hɔɔndarɛ n a lʊr jilli, an awɔɔ banka. Maam bɩ, awɔɔ Woso hɔnhɔ, hɔ k’an mɩŋŋa, an a nɔ yɩ, an mɩŋŋa paan… bɩ dɔrɛ.
3Woso barka bɩ tɔ ma, mɔɔ m da ma m a hɩ awɔɔ gʊaa biyəə m, m ʊ: a b’a mɩŋŋɔɔ m busu a heer ʊ y. Bɩ, gʊaa biyəə n dɩga a mɩŋŋa ma, amba Woso sɩrakarɛ hɔ jir a n’a hɔ ka ʊ bɩ m. B’a b’a ka an bra ba a mɩŋŋa m y. 4Gʊaa mɛ vəŋŋə bɩ deem nɩ y, ŋ gʊta, ŋn’a hʊnhɔ sɔ, wɔɔ mɛ vəŋŋəro bɩr zi deem barɛ y. 5Ncɩnaaʊ sɔ bɩ, wɔɔ kʊ wɔɔ m gʊta bɩ, mɛ deem m wɔɔ m Krista zɛkʊra bɩ nɔ ʊ, ʊ nɩ zɛkʊra m kan kʊ kɩ, gʊaa biyəə kan a bɩncɛ kɩ. 6Gʊaa biyəə nɩ ganwʊrɛ do m a hʊnhɔ, an a ga kʊ ʊ kan barka kʊ Woso a ka ʊ bɩ kɩ m. Kʊ wosolɛsinnɩsora ganwʊrɛ nɩ, k’a zaa m bɩr zi bam nɩ, k’an a ga kʊ ʊ kan sɩrakarɛ kɩ. 7Kʊ gʊaa vanta ɩ daahan ganwʊrɛ nɩ, k’an bɩr a daahan zi bam, k’a vanta ɩ hɔdɩndarɛ ganwʊrɛ nɩ, k’an a hɔdɩndarɛ zi ba. 8Kʊ gʊaa vanta ɩ dʊndɔrɛ ganwʊrɛ nɩ, k’an a zi ba. Gʊaa k’a nɩ hɔ kam, k’an a ka kan a heer kɩ haay. Kʊ lɛɛzannɔ n a zi ba mɩŋŋa-mɩŋŋa, kʊ gʊaa cicirzɛrɛzaa n a cicirzɛrɛ zi ba kan heernyɩnta kɩ.
9K’a kʊ ŋʊa sɩra m. K’a sɔ hɔ bʊnyaa m, a zi mɩŋŋa barɛ nyasʊ kɔɔkɔɔ. 10K’a bɩr a kam kʊ ŋʊarɛ ma kan a heer kɩ haay, amba danyɩnɔ nɩ kʊ ŋʊam bɩ m. K’a bɩr lɛ zɛm kʊ daʊrɛ ma. 11K’a yakʊ to, a Zuuba zi ba kaarɛ-kaarɛ. 12K’a heernyɔɔ ba taaheerlɛ nɔ ʊ, a bʊr a ma cicir nɔ ʊ, k’a a yo ʊ yaadarɛ nɔ ʊ. 13K’a da wosogʊɔɔ kʊ hɔ jɩra ŋ ma rɔ wɔɔ han, k’a bɩ kɔ saanɔɔ sire ma y.
14Gʊɔɔ kʊ ŋ nɩ cicir karɛ awɔɔ ma rɔ wɔɔ, k’a yɛ Woso han k’an hɔ mɩŋŋa ba ŋ nɩ. K’a lɛ nyɩnta da gʊɔɔ nʊ, a b’a bʊnyaa da ŋ nʊ y. 15K’a heer nyɔɔ kan gʊɔɔ kʊ ŋ n’a heernyɔɔm nɔ wɔɔ kɩ, k’a nyi ka kan gʊɔɔ kʊ ŋ nɩ nyi kam nɔ wɔɔ kɩ. 16K’a kʊ ma mɩŋŋa, a b’a mɩŋŋɔɔ busu y. ‹A b’a gu zibəə poore barɛ ma y, a bɩ dɩga a mɩŋŋɔɔ ma mindonno y.›
17A bɩ zi bʊnyaa ba a sompi gʊaa nʊ y. ‹K’a a ka ma k’a mɩŋŋa ba gʊɔɔ haay mɩm ʊ.› 18K’a ɩ yɩrɛ ɩ ʊ, awɔɔ an ta a ma, k’a a yo ʊ k’a bɩr laafɩɩ m kan gʊɔɔ haay kɩ. 19M danyɩnɔ ŋʊarɛrɔ, a b’a zɩm bɔ a zim nɩ y, bɩ k’a to kʊ Woso n a nɔmaa zi ba, bala, n y’a gʊrsɩra ba Wosoci ʊ, n ʊ: ‹Mɔɔ m Zuuba, mɔɔ nɩ zɩm bɔm, mɔɔ n nɩ gʊaa biyəə hɔ k’a a ga m kaŋ ʊ.› 20N y’a ya n a gʊrsɩra ba, n ʊ: ‹Bɩ kʊ nɔ y’ɩ jɩm zɛrɛ, k’ɩ hɔbɩrɛ ka ʊ k’an a bɩ. Kʊ mɩsɩ y’a zɛm, k’ɩ hi ka ʊ k’an a mi. Bala, a ba k’ɩbɩɩ nawʊm maam bɩ, sɛkɩna ɩbɩɩ n’a karɛ a mim la bɩ.› 21Ɩ b’a to mimbʊnyaa m bʊr ɩ ra y, b’a mɩŋŋa ba k’ɩ bʊr a bʊnyaa ra.
13Krista gʊaa a ga m, an yɛ kʊ jɩtannɔ lɛ ma
1Gʊaa haay a ga m, an zu lɛɛzannɔ kʊ ŋ nɩ dɩgam kʊ bɩ ma rɔ wɔɔ lɛ ʊ. Bala, lɛɛzaa ba ʊ, k’a a to bɛɛ ʊ Woso zi y. Kʊrɔ lɛɛzannɔ kʊ ŋ nɩ ta ʊ haay rɔ nɔɔm, Woso yɩ ŋ cɩncɩnta. 2Ncɩnaaʊ bɩ, kʊ gʊaa bɩsɩ ka lɛɛzannɔ ma, bɩsɩ a ka lɛ kʊ Woso a cɩnta bɩ ma. Gʊɔɔ kʊ ŋ nɩ bɩsɩ karɛ ŋ ma rɔ wɔɔ dʊdɔyarlɛ yɩrɛ. 3Bala, gʊɔɔ kʊ ŋ n’a mɩŋŋa bam nɔ wɔɔ b’a dam ma, ŋnɩ nyi ba lɛɛzannɔ nɩ y, bɩ, a bʊnyaabənno wɔɔ nyi barɛ ŋ nɩ. K’ɩ lɛ baa k’ɩ nyi ba lɛɛzannɔ m, k’ɩ zi mɩŋŋa ba, ŋ y’a lɛ bɔrɛ ɩ ʊ, 4bala, Woso zi ŋ n’a bam, k’a ka k’ɩbɩɩ n a mɩŋŋa ba. Bɩ k’ɩbɩɩ y’a bʊnyaa barɛ, k’ɩ nyi ba ŋ nɩ. Bala, paŋŋa kʊ ŋ nɩ ta m k’a gʊaa hʊnhʊr bɩ, a bɩ vam nɩ y. Woso zi ŋ n’a bam, k’a Woso nɔmaa hɩnka a bʊnyaabarɛzaa m. 5Bɩ minto nɩ, gʊaa n a ga m, an zu kʊ lɛɛzannɔ wɔɔ lɛ ʊ. Kʊ Woso nɔmaa n b’a yɩ minto bɛɛ n’a deem nɩ y. Kʊ heer kɔrɛ bɩ nyɩnta ʊ sɔ y.
6Naa tɔ ma m sɔ, awɔɔ n nɩ yawʊrlɔ kam, bala, a sirezannɔ wɔɔ, Woso yɩ ŋ da ʊ kʊ ŋ n’a ba mɩŋŋa. 7K’a gʊaa biyəə hɔ k’awɔɔ m ta m ka ʊ. Kʊ yawʊr m, k’a ka a zaa ʊ. Kʊ hɔhɛɛrɛ gɛɛ a sire yawʊr m, k’a ka sɔ. Kʊ gʊaa k’awɔɔ a ga m a lɛ si bɩ nɩ, k’a lɛ si. A n a ga m awɔɔ n a da ʊ bɩ, k’a da ʊ.
Kʊ ŋʊarɛ mim
8Awɔɔ, a b’a ka kʊ gʊaa zɩm m bɩr ta awɔɔ ra y, kʊ bɩ m kʊ ŋʊarɛ m. Gʊaa k’a mim ŋʊa bɩ, a zaa hɔ kʊ lɛrɔ wɔɔ a cɩnta bɩ ba haay. 9Bala, lɛrɔ kʊ ŋ n’a hɩrɛ ŋ ʊ: ‹Ɩ bɩ jaan da y, ɩ bɩ gər zɛ y, ɩ bɩ koor ba y, ɩ b’a ka ɩ lɛ m bɩr gʊaa hɔ zi y.› Nawɔnnɔ haay kan lɛrɔ kʊ ŋ gɔɔta rɔ wɔɔ kɩ haay, a zɛ ŋ yaa ʊ kʊ ra lɛ naa do nɔ ʊ: ‹Ɩ mim ŋʊa amba ɩ ɩ mɩŋŋa ŋʊa bɩ m.› 10Gʊaa k’a n’a mim ŋʊam bɩ, a bɩr hɔsɩ bʊnyaa bam nɩ y. Bɩ y’a ka, kʊ gʊaa ɩ ŋʊarɛ m, a zu lɛrɔ wɔɔ ʊ haay.
11K’awɔɔ dɔmɩm kʊ wɔɔ m ta ʊ naa mim dɔ bɩ, wakatɩ m, an a ga m k’awɔɔ n gu hinceem ma. Her naa, bʊmbɔrɛ bɩ jɩnjɛɛm wɔɔ ma, an lɛ da dɔmɩm kʊ wɔɔ sɩŋŋɩda sa ʊ, ʊ sɩra ka ʊ bɩ ma. 12Gum da gʊta, dɔmɩrɛ a zɔ, bɩ minto bɩ, ʊ monsigə zibəəro to, ʊ lɛɛgure yarmɔr da ʊ ma. 13Ʊ ta sɩra nɔ ʊ, amba a a ga m n nɩ ta sinsebir ʊ bɩ m. Ʊ b’ʊ zɛ kʊ ra k’ʊ hɔ bɩ maam-maam y, k’ʊ hɔ mi maam-maam sɔ y. Ʊ bɩ jaan da y, ʊ bɩ mɛsim zi daŋŋadɔɔ ba y, ʊ bɩ nyaa ba kan kʊ kɩ y, ʊ bɩ jɩmbaa da kʊ ma y. 14K’a mɩsɩrbaa daa kʊ Zuuba Yeezuu Krista mɩsɩrbaa m bɩ ba, a b’a ya, a a hɔɔn da a mɩŋŋɔɔ m mɛsim mɩsɩrbaa gusire bɩ ma, k’a lɛtaamarɔ ba y.
14Ʊ bɩ kʊ dʊdɔ ka Woso zaa bɩ ra y
1K’a gʊaa kʊ paŋŋawarzaa m sɩrakarɛ nɔ ʊ bɩ si, b’a ba hɔɔndarɛrɔ mim dɩnda bʊnyaa y. 2Makra ba n nɩ, gʊaa deem y’a gɩngarɛ a ʊ, a a da ma a hɔ haay bɩ, deem n bɔkarɛ, a sɩrakarɛ paŋŋawar minto bɩ, dʊlɛɛrɔ an ŋ bɩrɛ. 3Gʊaa k’a nɩ hɔ haay bɩm bɩ n a ga m, an gʊaa k’a bɩr a bɩm bɩ gore bɔ ʊ y, bɩ gʊaa k’a bɩr a bɩm bɩ, a bɩ gʊaa k’a n’a bɩm bɩ dʊdɔ ka y, bala, Woso a zaa si a zi. 4Nka n’ɩbɩɩ m, k’ɩ gʊaa vanta zibəənyɩ dʊdɔ ka? K’a jɩm kɔɔkɔɔ, gɛɛ k’a do, a zuuba bɩ mim m bɩ. B’a jɩnɩm kɔɔkɔɔ sɔ, bala, Zuuba ɩ paŋŋa m k’a ka k’an jɩm.
5Makra vanta ba n nɩ sɔ: Gʊaa niŋŋə zi, dɔmɩnnɔ wɔɔ lɛ da kʊ m, a vanta zi, dɔmɩnnɔ wɔɔ hɔdeem. A a ga m kʊ gʊaa biyəə n hɔ k’an ta m a heer ʊ bɩ dɔ mɩŋŋa. 6Gʊaa k’a nɩ dɩgarɛ a ʊ, dɔmɩnnɔ wɔɔ lɛ da kʊ m bɩ, a ba a nawʊm Zuuba tɔ ma, gʊaa k’a nɩ hɔ haay bɩm bɩ, Zuuba tɔ ma m sɔ, bala, a ɩ Woso barka darɛ. Gʊaa k’a bɩr hɔ haay bɩm bɩ, Zuuba tɔ ma m sɔ, an nɩ Woso barka darɛ. 7Bala, wɔɔ gʊaa deem ba ʊ, an nɩ mɩsɩrbaa bam a mɩŋŋa minto y, bɩ gʊaa ba ʊ sɔ, an nɩ gam a mɩŋŋa minto sɔ y. 8Bala, kʊ wɔɔ mɩsɩr, Zuuba tɔ ma m wɔɔ nɩ mɩsɩrbaa bam, kʊ wɔɔ gɩnga, gɩnga wɔɔ ʊ Zuuba tɔ ma sɔ. Kʊ wɔɔ mɩsɩr gɛɛ kʊ wɔɔ gɩnga, Zuuba ɩ gɔɔta an a so wɔɔ ʊ. 9Bala, a hɩ Krista ʊ k’a nyɩnta gəəno kan mɩsɩɩrɔ kɩ Zuuba, bɩ minto m an ga an a ya an a mɩm bɔ ʊ. 10B’ɩbɩɩ, bɔ m ɩ n’ɩ danyɩ dʊdɔ karɛ? B’ɩbɩɩ, bɔ minto m sɔ, ɩ n n’ɩ danyɩ gore bɔŋ ʊ? Wɔɔ haay naa, Woso wɔɔ birm a dʊdɔkarɛ duu bɩ taa, k’a bɩ wɔɔ dʊdɔ ka. 11Bala, n y’a gʊrsɩra ba Wosoci ʊ, n ʊ:
Amba mɔɔ mɩŋŋa Zuuba m mɩsɩr denter naa m, mɔɔ y’a hɩ m ʊ:
Gʊaa haay kukurə zɛrɛ m taa, gʊaa biyəə yaa darɛ, an a leer busu an a hɩ, a ʊ, mɔɔ m Woso.
12Maam bɩ, wɔɔ gʊaa biyəə y’a mɩŋŋa mim nyɩ bɔŋ ʊ Woso taa.
Ʊ ʊ ka a mɩŋŋa ma, ʊ danyɩ minto
13Ʊ b’ʊ ya, ʊ kʊ dʊdɔ yar y. Bɩ, k’a ka ma k’a bɩ hɔsɩ ba fɩɩga k’an a ka, k’a danyɩ n a do, gɛɛ an mimbʊnyaa ba y. 14Zuuba Yeezuu zɛkʊra nɔ ʊ, mɔɔ dɔ mɩŋŋa m heer ʊ, m ʊ, hɔsɩ ba ʊ an dintim nɩ y. Bɩ, kʊ gʊaa a hɔɔn da, a ʊ, hɔ naa do dintim m, a ba a nawʊm dintim a mɩŋŋa ma. 15K’ɩbɩɩ ka ɩ danyɩ heer n a zar hɔbɩrɛ tɔkkɛ k’ɩbɩɩ n’a bɩm tɔ ma, ɩbɩɩ bɩr tam ŋʊarɛ nɔ ʊ dɔ y. Ɩ b’a ka kʊ gʊaa kʊ Krista ga a tɔ ma bɩ m nyaam ɩ hɔ k’ɩ n’a bɩm bɩ tɔ ma y. 16A b’a ka hɔ k’an mɩŋŋa awɔɔ ma bɩ m bʊr tɔ bɔrɛ m awɔɔ jɛ ʊ y. 17Bala, Woso cirbəə bɩ, hɔbɩrɛ kan hɔmire kɩ mim bɛɛ y, tɩrgabaa kan laafɩɩ kɩ, heernyɩnta kʊ Sɛnt-Ɛspri n’a kam bɩ kɩ mim m. 18Gʊaa k’a nɩ Krista zi barɛ ncɩnaaʊ bɩ, Woso nɔ ɩ yɩm la, gʊɔɔ n’a ŋʊam sɔ.
19Naa tɔ ma bɩ, ʊ ʊ ka hɔ k’a nɩ zɛm laafɩɩ m kan wɔɔ haay sɩrakarɛ talɛɛ kɩ bɩ ma. 20Ɩ bɩ Woso zibəə zar hɔbɩrɛ tɔ ma y. Hɔ haay mɩŋŋa, sɩra m, bɩ, kʊ gʊaa hɔ niŋŋə k’a nɩ zɛm gʊaa vanta dore m bɩ bɩ, a bʊnyaa. 21Hɔ k’an mɩŋŋa bɩ ba n nɩ: Kʊ sim sʊrɛ, gɛɛ bɛɛ mire, gɛɛ hɔ vanta barɛ y’a karɛ ɩbɩɩ danyɩ n’a do, ɩ b’a ba y. 22Ɩ sɩrakarɛ k’ɩ n ta m hɔ bɩ do minto bɩ to ɩ zi, Woso lɛɛ. Heernyɩntazaa m gʊaa k’a n’a ŋʊam k’a mim ba b’a heer bɩr a dʊdɔ yarm bɩ m. 23Bɩ, gʊaa k’a nɩ hɔ bɩm an bɔkarɛ a heer nɩ sɩnsɩm kam hɔ bɩ do ma bɩ, Woso a dʊdɔ yar, bala, a zibəə bɩ n a to heer sɩrakarɛ nɔ ʊ y. A n bɔkarɛ hɔ haay k’a n a to heer sɩrakarɛ nɔ ʊ bɩ, mimbʊnyaa m.
15Ʊ zu Krista jɩ ʊ
1Wɔɔ kʊ wɔɔ paŋŋa m ta ʊ rɔ wɔɔ, ʊ b’ʊ ka ʊ hɔɔnhɔ lɛtaama barɛ ma y. Bɩ, k’ʊ ʊ da gʊɔɔ kʊ ŋ ba paŋŋa bɩ do m nɔ wɔɔ han a paŋŋawar bɩ nɔ ʊ. 2A a ga m kʊ gʊaa biyəə n a ka ma k’a yɩ mɩŋŋa a mim tɔ ma, a daahan kan a sɩrakarɛ kɩ dara minto. 3Bala, Krista n a ka hɔ k’a mɩŋŋa nɔ yɩ ma y, bɩ, n y’a gʊrsɩra ba Wosoci b’ʊ, n ʊ: ‹Ɩbɩɩ sʊnsɔrɔ kʊ gʊɔɔ n’a wʊm nɔ wɔɔ a ba mɔɔ sʊnsɔrɔ.› 4A n bɔkarɛ, hɔ kʊ n lɛɛ ka n n’a gʊrsɩra ba haay bɩ, a ba n y’a ʊ kʊ wɔɔ m hɔ dɔ, k’an bɩr yɩrɛ ɩ ʊ, bʊraama kan heerwʊtarɛ kʊ Wosoci bɩ n’a kam bɩ tɔ ma, wɔɔ ʊ da ma ʊ nyasʊ taaheerlɛ m. 5A yɛ mɔɔ nawʊm, kʊ Woso k’a a so bʊraama ʊ kan heerwʊtarɛ kɩ bɩ n a ka k’awɔɔ m bɩr hɔɔndarɛ deem m kan kʊ kɩ, amba Krista Yeezuu lɛ n taa bɩ m, 6k’a a da ma, a a lɛ bɔ wɔɔ Zuuba Yeezuu Zɩ kʊ Woso m b’ʊ, zɛkʊra deem nɔ ʊ, leer deem m.
7K’a bɩr kʊ sim mɩŋŋa, amba Krista awɔɔ si bɩ m, Woso lɛbɔʊrɛ tɔ ma. 8A hɩ mɔɔ nawʊrɛ awɔɔ m paan… Krista bɩ, a ba a ʊ zɩɩfʊrɔ zibəənyɩ, k’a a da ma a ka kʊ Woso lerbɔrɛrɔ ŋ yaabɔɔ m nɔ wɔɔ ŋ kʊ yɩ, k’a Woso sɩra hɩnka maam. 9Bʊr a ʊ sɔ, kʊ do vantɔɔ gʊɔɔ wɔɔ n a lɛ bɔ Woso ʊ, a mɩŋŋabaa tɔ ma, amba n y’a gʊrsɩra ba Wosoci ʊ, n ʊ:
Naa minto bɩ, mɔɔ yɩ m lɛ bɔrɛ ɩbɩɩ ʊ doro bire ʊ,
mɔɔ laa lɔm m ɩ tɔ da ʊ.
10Wosoci b’a ya, an a hɩ, a ʊ:
Doro vantɔɔ, k’a a heer nyɔɔ
kan Zuuba do bɩ kɩ.
11A n a ya, an a hɩ, a ʊ:
Doro haay, k’a a lɛ bɔ Zuuba ʊ.
Kʊrɔ haay gʊɔɔ, k’a lɛ bɔ ʊ sɔ.
12Ezayii ci a hɩ sɔ, a ʊ:
Yese yaŋŋa bɩ zɛm,
a wutire an ka doro lɛɛ,
doro wɔɔ n yo ma.
13A yɛ mɔɔ nawʊm, kʊ Woso k’a so taaheerlɛ ʊ bɩ n a ka, k’awɔɔ n’a mɩŋŋɔɔ ka ʊ, bɩ k’a n’a ka sɔ, kʊ heernyɔɔ kan laafɩɩ kɩ n’awɔɔ han gʊta, Sɛnt-Ɛspri paŋŋa tɔ ma.
Pol zibəə
14M danyɩnɔ, mɔɔ dɔ mɩŋŋa m ʊ, awɔɔ ɩ mɩŋŋabaa m gʊta, a hɔ k’a a ga dɔrɛ m haay dɔ, an n’a dam ma a kʊ dʊndɔ. 15A n bɔkarɛ, ci naa do nɔ ʊ naa, mɔɔ lɛɛ niŋŋoo gʊrsɩra ba kan heerkoodəbaa kɩ, k’an bɩr yɩrɛ ɩ ʊ, mɔɔ hɔɔ niŋŋoo tɔ da awɔɔ nɔ ʊ. A ba mɔɔ ʊ ncɩnaaʊ, barka niŋŋə kʊ Woso a ka mɔɔ ʊ bɩ minto. 16Woso a k’a mɔɔ n Krista Yeezuu zi ba, amba wosomannɩbər hɔ bɩ m. Bɩ zibəə bɩ do, lemim nyɩnta bɩ padarɛ m. Ncɩnaaʊ bɩ, kʊ mɔɔ ɩ do vantɔɔ gʊɔɔ ka ŋ ʊ mannɩ ganwʊrɛ, kʊ bɩ n Woso nɔ yɩ, kʊ Sɛnt-Ɛspri n zer la, k’an yɩ mɩŋŋa. 17Krista Yeezuu zɛkʊra bɩ nɔ ʊ, mɔɔ m da ma, m m heer nyɔɔ, Woso zi kʊ mɔɔ n’a bam bɩ tɔ ma. 18Kʊ mɔɔ kʊ m hɔ niŋŋə mim hɩ, hɔ kʊ Krista a ka mɔɔ n a ba kʊ do vantɔɔ gʊɔɔ wɔɔ m zu Woso ʊ bɩ m. Naa ba a ʊ, meerbaarɔ kan zibəəro kɩ nɔ ʊ, 19hoserlo kan makrarɔ paŋŋa kɩ, Sɛnt-Ɛspri paŋŋa kɩ nɔ ʊ. Yɩ a ʊ, ncɩnaaʊ, mɔɔ m lemim nyɩnta bɩ pa da lɛɛ haay ʊ mɩŋŋa, an a sa Zerizalɛm ma an ta Iliiri kʊrɔ ʊ. 20Bɩ, lɛɛrɔ kʊ n nɩ Krista mim ma ʊ cɩna rɔ wɔɔ, mɔɔ lemim nyɩnta bɩ pa da ŋ ʊ. A ba mɔɔ ʊ ncɩnaaʊ, kʊ mɔɔ n a ŋʊa kʊ m zi ba lɛɛ kʊ gʊaa lɛɛ ka an zibəə sɩŋŋɩda sa ʊ tɔ ma. 21Hɔ kʊ n y’a gʊrsɩra ba Wosoci b’ʊ bɩ mɔɔ ba, n ʊ:
Gʊɔɔ kʊ n n’a mim dɩnda ŋ nɩ rɔ wɔɔ y’a yɩm,
gʊɔɔ kʊ ŋ n hɔsɩ ma a mim nɔ ʊ rɔ wɔɔ y’a mim jɩ dɔrɛ.›
22Naa do ɩ tɩr a nya mɔɔ ʊ, mɔɔ bɩr m dam ma m nɩ zɛrɛ awɔɔ zi y. 23Bɩ, kɛɛrɛ naa, mɔɔ zibəə nya kʊrɔ wɔɔ duro ʊ.
Pol gɩngarɔ
A dɔɔraa laatʊ mɔɔ n n’a ŋʊam kʊ m bʊr awɔɔ zi. 24Kʊ mɔɔ bʊr m nɩ tam Ɛspanyɩ ʊ, mɔɔ bɔm b’ʊ. A ŋʊa mɔɔ nawʊm kʊ m bɩ dɩga awɔɔ ma. Kʊ mɔɔ bɩ zer awɔɔ ra, m nyɩnta kan awɔɔ kɩ m a ga m tɛkka m, k’awɔɔ m dɩga mɔɔ zaa bɩ sarɛ mim ma, kʊ m cem. 25Her-her naa, ta mɔɔ nawʊm Zerizalɛm ʊ, daahan m, wosogʊɔɔ kʊ ŋ nɩ b’ʊ rɔ wɔɔ tɔ ma. 26Bala, Masedʊan kʊ bɩ kan Akayii kʊ bɩ kɩ wosogʊɔɔ wɔɔ lɛ sa, k’a busoo zɩnzɛ kʊ ra, a ka Zerizalɛm wosogʊɔɔ ŋʊazannɔ wɔɔ ʊ. 27Ŋ mɩŋŋɔɔ ɩ lɛ bɩ sa a zim, bɩ sɩra nɔ ʊ, cicirzannɔ wɔɔ duro a ga hɔ naa do yɩrɛ m ŋ zi, bala, Krista gʊɔɔ kʊ zɩɩfʊrɔ n ŋ mɩ Zerizalɛm ʊ rɔ wɔɔ a Woso dɔrɛhɔ jir kan do vantɔɔ gʊɔɔ wɔɔ kɩ. Naa tɔ ma bɩ, do vantɔɔ gʊɔɔ kʊ Krista gʊɔɔ m nɔ wɔɔ a ga m ŋn’a da ŋ han kan hɔnta kʊ ŋ nɩ tam bɩ kɩ sɔ. 28Kʊ mɔɔ zi naa do ba m a nya, m zɩnzɛkʊra busoo bɩ ka ŋ ʊ, mɔɔ bɔrɛ awɔɔ zi, m cem m ta Ɛspanyɩ ʊ. 29Mɔɔ dɔ mɔɔ ʊ, kʊ mɔɔ bʊr m nɩ zɛrɛ awɔɔ zi, zɛ mɔɔ nawʊm kan Krista barka gʊta kɩ.
30M danyɩnɔ, a yɛ mɔɔ nawʊrɛ awɔɔ han, wɔɔ Zuuba Yeezuu Krista tɔ ma, kan ŋʊarɛ kʊ Sɛnt-Ɛspri n n’a kam bɩ kɩ minto, k’a yar ba kan mɔɔ kɩ a yaadarɛ nɔ ʊ. 31K’a yaa da, kʊ basɩrakarɛzannɔ kʊ ŋ nɩ Zidee ʊ rɔ wɔɔ b’a da mɔɔ ma y. Bɩ, kʊ wosogʊɔɔ kʊ ŋ nɩ Zerizalɛm ʊ rɔ wɔɔ m daahan kʊ mɔɔ n nɩ tam nɩ bɩ si mɩŋŋa. 32K’a n bɩr yɩrɛ ʊ, kʊ Woso yɛ sɔ, mɔɔ lee kure awɔɔ zi heernyɔɔ gʊta m, m hoon si awɔɔ bire ʊ. 33Kʊ Woso k’a nɩ laafɩɩ kam bɩ m bɩr kan awɔɔ haay kɩ. Amina!
16Leersore
1Wɔɔ danlʊ Febe k’a nɩ zi bam Sankre kristagʊɔɔ sokʊma bɩ nɔ ʊ bɩ, mɔɔ n’a hɩ m, a kasɛtɩ mɩŋŋa. 2K’a si a zi Zuuba tɔ ma, amba a a ga barɛ m wosogʊɔɔ kan kʊ kɩ bire ʊ bɩ m, k’a bʊr a lɛ n taa awɔɔ daahan ma, k’a a da han a mim haay nɔ ʊ. A mɩŋŋa a da gʊɔɔ han gʊta, a a da mɔɔ mɩŋŋa han sɔ.
3K’a yaa da Priska kan Akilas kɩ m, mɔɔ zibəəkɔɔnrɔ m Krista Yeezuu zibəə bɩ nɔ ʊ. 4Ŋ y’a mɩŋŋɔɔ mee ka zɛ ma, k’a mɔɔ bɔ lɛm. Mɔɔ yɩ m deem bɛɛ nɩ ŋ barka darɛ y, do vantɔɔ wɔɔ kristagʊɔɔ sokʊmarɔ wɔɔ haay yɩ ŋ barka dam sɔ. 5K’a yaa da sɩrakarɛzannɔ kʊ ŋ n’a som kʊ ma ŋ har ʊ rɔ wɔɔ m. K’a yaa da mɔɔ gʊaasɩba Epayinɛtɩ bɩ m, a ɩ lɛɛ ka an sɩra ka Krista ʊ Azii kʊrɔ wɔɔ ʊ. 6K’a yaa da Maarii k’a zi ba gʊta awɔɔ tɔ ma bɩ m. 7K’a yaa da Andronikus kan Zuniyas kɩ m, mɔɔ danyɩnɔ m, bɩ, n nyɩnta n nɩ ŋ du lɔnnɔcɛ ʊ kan mɔɔ kɩ. Kristazibəəzannɔ wɩsɩrɔ m, ŋ lɛɛ ka mɔɔ m ŋn’a ba kristagʊɔɔ.
8K’a yaa da Ampliyatus m, mɔɔ ŋʊarɛzaa m Zuuba zuure nɔ ʊ. 9K’a yaa da Urbɛn m, wɔɔ zibəəkɔɔn m Krista zibəə bɩ nɔ ʊ, kan mɔɔ ŋʊarɛzaa Sɩtakɩs kɩ m. 10K’a yaa da Apelɛs m, a a sɩra ka Krista ʊ hɩnka hɔ gʊta nɔ ʊ. K’a yaa da Aristobul hargʊɔɔ m. 11K’a yaa da Herodɩnyɔ m, mɔɔ danyɩ m. K’a yaa da Narsis hargʊɔɔ kʊ ŋ sɩra ka Zuuba ʊ rɔ wɔɔ m. 12K’a yaa da Trifɛn kan Trifozɩ kɩ m, Zuuba zi ŋn’a bam. K’a yaa da Pɛrzidɩ m mɩŋŋa, a zi ba gʊta Zuuba tɔ ma. 13K’a yaa da Rufus m, Zuuba zibəənyɩ wɩsɩ m. K’a yaa da a da bɩ m, mɔɔ da m sɔ. 14K’a yaa da Asɩnkritɩ m, Flegɔn m, Hermɛs m, Patrobas m, Hermas m, kan danyɩnɔ vantɔɔ kʊ ŋ nɩ kan ŋ kɩ rɔ wɔɔ m. 15K’a yaa da Filolɔg kan Zuli kɩ m, Neere kan a danlʊ kɩ m, Olɩmpas kan wosogʊɔɔ kʊ ŋ nɩ kan ŋ kɩ rɔ wɔɔ m haay.
16K’a yaa da kʊ m mɩŋŋa danyɩbaa nɔ ʊ, kan kʊ daʊrɛ kɩ, ŋʊarɛ kɩ. Krista sokʊmarɔ wɔɔ haay ɩ yaa darɛ awɔɔ m.
17M danyɩnɔ, a yɛ mɔɔ nawʊrɛ awɔɔ han k’a dundo a zi, kan gʊɔɔ kʊ ŋ nɩ gʊɔɔ gʊngʊ kʊ ma zi bam nɔ wɔɔ kɩ, ŋnɩ sɩrakarɛzannɔ nyʊnnyɔɔ m, bɩsɩ kʊ ŋ n’a kam hɔdɩndarɛ k’awɔɔ yɩ bɩ ma. K’a gʊ ŋ ma laatʊ. 18Bala, gʊɔɔ ncɩnaaʊ rɔ wɔɔ, Zuuba Krista zi bɛɛ ŋ n’a barɛ y, a mɩŋŋɔɔ nɔ zi ŋn’a bam. Bra ŋ n’a bam bahɔdonno m, meerbaarɔ nyɩntɔɔ kan a ŋʊaar mindɩndarɛrɔ kɩ nɔ ʊ. 19Gʊaa haay a dɔ, a ʊ, awɔɔ ɩ yɛm Zuuba ma. Mɔɔ heer nyɩnta kan awɔɔ kɩ naa tɔ ma, bɩ mɔɔ lɛ n taa k’awɔɔ m yɩ mindɔrɛzannɔ, zi mɩŋŋa barɛ nɔ ʊ. K’a yɩ gʊɔɔ kʊ mim bɩr zar darɛ ŋ ma zannɔ, mimbʊnyaa nɔ ʊ. 20Woso k’a a so laafɩɩ ʊ bɩ Sʊtaana hɔɔnsɩrɛ awɔɔ gannɔ taa dɩɩtaa.
Bɩ kʊ wɔɔ Zuuba Yeezuu barka m bɩr kan awɔɔ kɩ.
21Mɔɔ zibəəkɔɔn Timote ɩ yaa darɛ awɔɔ m, mɔɔ danyɩnɔ Lusiyus, Zasɔn, kan Sosipatɛɛr k’ɩ yaa darɛ awɔɔ m.
22Bɩ, mɔɔ mɩŋŋa Tɛɛrtiyus, kʊ Pol a da ci naa do barɛ ʊ bɩ, mɔɔ ɩ yaa darɛ awɔɔ m Zuuba k’a nɩ wɔɔ zɛm kʊ ra bɩ nɔ ʊ.
23Gayus k’a mɔɔ si a har ʊ, kristagʊɔɔ sokʊma bɩ haay n nɩ kʊ zɛŋ ʊ a har ʊ b’ɩ yaa darɛ awɔɔ m. Erastɩ, kʊ bɩ busoocɩntər bɩ, kan Kaartus kɩ ɩ yaa darɛ a m. [24A yɛ mɔɔ nawʊm, kʊ wɔɔ Zuuba Yeezuu Krista barka m nyɩnta kan awɔɔ haay kɩ. Amina!]
25Woso ɩ paŋŋa m k’awɔɔ sɩrakarɛ paŋŋa da ra, amba lemim nyɩnta kʊ mɔɔ n n’a pa dam bɩ n n’a hɩm bɩ m, Yeezuu Krista lemim kʊ mɔɔ n’a pa dam, Woso hɔ k’a nyaakʊm da gɔsɩ n a dɔ y, an a hɩnka wɔɔ m, ʊ a dɔ bɩ m. Hɔ bɩ do Woso nyɩnta an a nyaakʊm da biisi tee… bɩ, 26kɛɛrɛ naa, wosolɛsinnɩsorazannɔ ciro wɔɔ a hɩnka lɛɛgure nɔ ʊ gʊaa haay m, amba Woso k’a nyarɛ ba ʊ lɛ ka bɩ m, a lɛ ka kʊ n nɩ ta m doro haay zi kʊ ŋ n’a dɔ, ŋnɩ sɩra ka, ŋnɩ zu ʊ.
27Kʊ Woso y’a deem k’an ta mindɔrɛ m bɩ m lɛbɔʊrɛ yɩ, Yeezuu Krista tɔ ma, dɔmɩm haay! Amina!