Filipii zannɔ

Ci kʊ Pol a ba

FILIPII ZANNƆ

ma

Ci kʊ Pol a ba Filipii zannɔ ma bɩ

gasʊʊrɛ

Pol ɩ ci bɩ ba. Kristazibəəzannɔ ci b’ʊ bɩ, Filipii kʊ bɩ Pol lɛɛ ka ʊ an lemim nyɩnta bɩ pa da ʊ Masedʊan kʊrɔ wɔɔ barla, hɔhɩnkarɛ kʊ Woso a hɩnka m bɩ jɛ ʊ. (Zibəəzannɔ Ci 16.6-40) Nyɩnta a ʊ lɔnnɔcɛ ʊ Rɔm ʊ an ci bɩ ba.

Ci bɩ ba a ʊ, k’a Filipii kristagʊɔɔ wɔɔ barka da, bala, ŋ y’a da han busoo m, bɩ ma bɩ, a ɩ kɔrɛ nɔ ʊ. Ci bɩ ba a ʊ sɔ, k’a ŋ heer yo kʊ ŋ nɩ jɩm kɔɔkɔɔ Krista nɔ ʊ, bala ŋʊaarhɔdɩndarɛrɔ nyɩnta ʊ gʊta dɔmɩm bɩ do ʊ, ŋn’a ŋʊam k’a gasʊ Filipii kristagʊɔɔ sokʊma bɩ nɔ ʊ. A ɩ heernyɔɔ mim dɩndam ci bɩ nɔ ʊ, kan kʊmarɛ mim kɩ, mɩŋŋazerle mim kɩ.

A y’a hɩnkarɛ ŋ nɩ, a ʊ, kristagʊaa a ga m, an a ka ma k’a bɔ kʊ ʊ kan Krista mɩŋŋa kɩ a mɩsɩrbaa nɔ ʊ, bɩ nyɔɔdʊ n ta ʊ an cem. (Filipii zannɔ 3)

Pol ɩ yaa dam

Filipii kʊ kristagʊɔɔ m

¹Mɔɔ mɩŋŋa Pol kan Timote kɩ bɩ, Krista Yeezuu zibəənyɩnɔ m wɔɔ m, ci bɩ ba wɔɔ nawʊm wosogʊɔɔ kʊ ŋ nɩ Krista Yeezuu nɔ ʊ, ŋnɩ Filipii kʊ ʊ rɔ wɔɔ ma, kan a lɛɛzannɔ wɔɔ kɩ kan a daahanzannɔ kɩ ma. ²A yɛ wɔɔ nawʊm kʊ wɔɔ Zɩ Woso kan Zuuba Yeezuu Krista kɩ n barka kan laafɩɩ kɩ ka a ʊ.

Pol yaadarɛ

³Kʊ mɔɔ tɩr m hɔɔn da awɔɔ ma, bɩ mɔɔ yaa da Woso m barka awɔɔ tɔ ma. ⁴Kʊ mɔɔ ɩ yaa darɛ awɔɔ tɔ ma, a da mɔɔ n nawʊm kan heernyɔɔ kɩ. ⁵Bala, awɔɔ jɩm mɔɔ m paan… lemim nyɩnta bɩ padarɛ nɔ ʊ hallɩ a sɩŋŋɩda ʊ an ta an her ku. ⁶Mɔɔ dɔ fasɩ m ʊ: zi mɩŋŋa kʊ Woso a sɩŋŋɩda ba awɔɔ gʊr zi bɩ, a tam lɛɛ an tolle ba an zibəə bɩ do nyambʊr Krista Yeezuu wusigəre hinni ʊ. ⁷A a ga m kʊ mɔɔ nɩ m hɔɔn da awɔɔ haay ma ncɩnaaʊ, kʊ mɔɔ n’awɔɔ ŋʊam gʊta bɩ minto. Bala, kʊ mɔɔ nɩ lɔnnɔcɛ ʊ naa ʊ naa, gɛɛ kʊ mɔɔ nɩ lemim nyɩnta pa dam m n’a hɩnkam sɔ m ʊ, sɩra m bɩ, awɔɔ a na mɔɔ ma barka kʊ Woso a ka mɔɔ ʊ ncɩnaaʊ bɩ nɔ ʊ. ⁸Denter m, Woso m mɔɔ kasɛtɩzaa, a a dɔ a ʊ, mɔɔ y’awɔɔ gʊaa haay ŋʊam paan… Krista Yeezuu ŋʊarɛ nɔ ʊ.

⁹Hɔ kʊ mɔɔ n’a yɛm Woso han awɔɔ tɔ ma bɩ ba n nɩ: A yɛ mɔɔ nawʊm k’awɔɔ ŋʊarɛ n bɩr a dam la tee…, k’awɔɔ m bɩr hɔdɔrɛ m, k’a a da ma a bɩr mim jɩ marɛ m. ¹⁰K’a a da ma sɔ, a hɔ k’an mɩŋŋa dɔ a bɔ kʊ zi a ba. Maam bɩ, awɔɔ yɩm mɩŋŋa fasɩ, minsi bɩ nyɩntarɛ awɔɔ ma hinni kʊ Krista n nɩ zɛŋ ʊ b’ʊ y. ¹¹Yeezuu Krista tɔ ma, tɩrgabaa zibəəro y’awɔɔ mɩsɩrbaa hanm, an yɩ Woso lɛbɔʊrɛ kan a daʊrɛ kɩ.

Pol dure n a nya lemim nyɩnta bɩ padarɛ ʊ y

¹²M danyɩnɔ, mɔɔ lɛ taa k’awɔɔ n a dɔ a ʊ, mim niŋŋə k’a mɔɔ yɩ bɩ, a da a ʊ lemim nyɩnta bɩ ta lɛɛ han denter m. ¹³Bala, mim bɩ do tɔ ma bɩ, Rɔm cir dɔmazannɔ wɔɔ kan gʊɔɔ haay kɩ sɔ a dɔ ŋ ʊ, mɔɔ du n y’a ʊ Krista tɔ ma. ¹⁴Bɩ wɔɔ danyɩnɔ wɔɔ paŋŋa a da ra Zuuba zuure nɔ ʊ, mɔɔ dure bɩ tɔ ma, a a ka ŋ heer n kookoo gʊta, ŋn’ɩ Woso lemim bɩ pa dam bɩ nyibəə ba ŋ nɩ y.

¹⁵Sɩra m, gʊɔɔ gɔsɩnnɔ ɩ Krista lemim nyɩnta bɩ pa dam jɩmbaa kan bakʊmarɛ kɩ nɔ ʊ. Bɩ, gɔsɩnnɔ y’a pa dam noom hu m. ¹⁶A pa bɩ da brɔɔ n nawʊm ŋʊarɛ nɔ ʊ, ŋ y’a dɔ ŋ ʊ, kʊ mɔɔ nɩ lɔnnɔcɛ ʊ naa, lemim nyɩnta bɩ pa darɛ tɔ ma m. ¹⁷Bɩ, ŋnɩ gɔɔta rɔ wɔɔ, pa bɩ da brɔɔ n nawʊm noom kundə m, jɩmbaa nɔ ʊ, ŋn’a gɩngarɛ ŋ ʊ, a mɔɔ fɩryɩrɛ bɩ gore daŋ ʊ ncɩnaaʊ lɔnnɔcɛ ʊ b’ʊ.

¹⁸Baa kʊ ŋ yɩ pa bɩ dam noom m gɛɛ sɩra nɩ, mɔɔ bɩr kɔm sɩ ma y, bala, Krista lemim bɩ n’a pa dam. Naa tɔ ma bɩ, mɔɔ yɩ m heer nyɔɔrɛ, bɩ mɔɔ gɔɔtam m m heer nyɔɔ. ¹⁹Bala, mɔɔ dɔ mɔɔ ʊ, naa woo… zɛm bɩ yɩ mɔɔ bʊmbɔrɛ, awɔɔ yaadarɛ kan Yeezuu Krista Ɛspri daahan kɩ tɔ ma. ²⁰Bala, hɔ kʊ mɔɔ nɩ dɔm ma, m a ta m heer lɛ kan m paŋŋa kɩ haay bɩ, mɔɔ lɛ baa kʊ hɔsɩ nyannɩ n bɩ m nyasʊ y, mɔɔ gɔɔta m heerkoodəbaa m. Bɩ, kɛɛrɛ sɔ naa, amba dɔmɩm haay m bɩ, kʊ Krista n lɛbɔʊrɛ gʊta yɩ m mɛ ʊ, m mɩsɩrbaa nɔ ʊ, gɛɛ m zɛ nɔ ʊ. ²¹Bala, kan mɔɔ kɩ, Krista m mɔɔ mɩsɩrbaa, zɛ b’ɩ yɩrɛ ɩ ʊ, hɔnyɩ m. ²²Bɩ kʊ mɔɔ gɔɔta tara burə ʊ kʊ m mɩsɩrbaa ba, a y’a kam m zi ba gʊɔɔ daahan tɔ ma. Naa minto bɩ, mɔɔ n a dɔ kʊ kara mɔɔ n’a bɔŋ ʊ y. ²³Hɔ hɩɩya naa nɩ mɔɔ gaarɛ: Mɔɔ lɛ taa kʊ m m hʊr, m ta m bɩr kan Krista kɩ. Bɩ n mɩŋŋa mɔɔ ma an lɛ da paan…. ²⁴Bɩ kʊ mɔɔ gɔɔta tara burə ʊ naa ʊ sɔ, a yɩrɛ awɔɔ daahan gʊta. ²⁵Naa tɔ ma bɩ, mɔɔ dɔ paan…, mɔɔ dɔ mɔɔ ʊ, mɔɔ gɔɔtam mɩsɩr, m bɩr kan awɔɔ haay kɩ k’awɔɔ n ta lɛɛ, a bɩr heernyɔɔ m sɩrakarɛ nɔ ʊ. ²⁶Ncɩnaaʊ bɩ, kʊ mɔɔ m bɔ m bʊr awɔɔ zi, awɔɔ y’a heer nyɔɔm a a lɛ bɔ Krista Yeezuu ʊ gʊta, mɔɔ tɔ ma.

Sɩrakarɛ zoobarɛ

²⁷Bɩ, k’a mɩsɩrbaa ba amba Krista lemim nyɩnta bɩ n’a hɩm bɩ m. Maam bɩ kʊ mɔɔ wɔ ʊ m bʊr awɔɔ zi, gɛɛ kʊ mɔɔ n m da ma, mɔɔ y’awɔɔ mim mam, m a dɔ m ʊ, awɔɔ ɩ jɩnɩm kɔɔkɔɔ a lɛ n deem, an nɩ zoo bam heer deem m, kʊ sɩrakarɛ kʊ lemim nyɩnta bɩ n’a kam bɩ n ta lɛɛ. ²⁸A bɩ yɛ jɩnnɔ wɔɔ n nyibəə da a ma fɩɩga y. Bɩ n’a karɛ ŋn’a dɔ ŋ ʊ, a nyaam, b’awɔɔ ɩ bʊmbɔrɛ m. Bɩ naa do naa, a to a ʊ, Woso zi. ²⁹Bala, mimbirenyɩnta kʊ Woso a ka awɔɔ ʊ Krista nɔ ʊ bɩ, k’awɔɔ n sɩra ka ʊ bɛɛ n a deem y, bɩ k’awɔɔ n fɩr yɩ a tɔ ma sɔ. ³⁰Awɔɔ kan mɔɔ kɩ, zoo deem wɔɔ m tara ʊ n’a bam. Zoo deem bɩ do mɔɔ ba biisi awɔɔ mɩm la bɩ, bɩ, awɔɔ dɔ, a mɩŋŋa mɔɔ gɔɔta m m ta ra.

Ʊ Krista jɩ sa

¹Zɛkʊra k’awɔɔ n ta m kan Krista kɩ bɩ, a bɩr awɔɔ heerkoodəbaa dam la ra? Awɔɔ ŋʊa k’a nawʊm bɩ bɩr awɔɔ heer yom na? Awɔɔ n a zɛ kʊ ra *Sɛnt-Ɛspri nɔ ʊ ra? Awɔɔ ɩ kʊ ŋʊam an nɩ kʊ cicir zɛm, gɛɛ lɔ? ²Naa tɔ ma bɩ, k’a kʊ ma, a a lɛ ba deem, a bɩr ŋʊarɛ deem m, a bɩr hɔɔn deem m. Maam bɩ, mɔɔ heernyɔɔ yɩm fasɩ.

³A bɩ hɔsɩ ba jɩmbaa nɩ y, b’a bɩ hɔsɩ ba k’a mɩŋŋɔɔ hɩnka y, naa nyɔɔdʊ ba ʊ y. Bɩ, gʊaa biyəə n a mɩŋŋa zer a muno taa, a ʊ, ŋ lɛ da a m. ⁴A b’a ka a mɩŋŋɔɔ daahan ma bala y, k’a a ka a muno daahan ma sɔ. ⁵K’a bɩr hɔɔn kʊ Krista Yeezuu n ta m bɩ m kan kʊ kɩ.

⁶A mɩŋŋa kan Woso kɩ bɩ, ŋ deem,

bɩ, a n a ka ma wʊɩɩn… kan paŋŋa kɩ,

k’a gɔɔta a a ga kʊ ʊ kan Woso kɩ y.

⁷Bɩ, a yɛ an hɔ haay to,

an a ba zibəənyɩ,

a ba a ʊ gʊaa, am gʊaa woo… hɔ bɩ m.

A n yɩ amba gʊɔɔ n nɩ yɩm bɩ m.

⁸A a mɩŋŋa ba poore, an yɛ Woso ma,

an tolle ba an yɛ an ga,

b’a zɛ bɩ, zɛ bʊnyaa m,

ga a ʊ, gɔdarkʊra ma.

⁹Naa k’a a ba bɩ minto bɩ,

Woso a gore da ʊ, an cem haay,

an tɔ k’a nɩ tɔrɔ haay woo… burə ʊ bɩ ka ma.

¹⁰A ba a ʊ maam kʊ Yeezuu tɔ ma bɩ,

kʊ kunkonno haay kʊ ŋ nɩ brama kan tara burə ʊ kɩ,

tara noom kɩ ʊ, n kukurə zɛ.

¹¹Kʊ nɛɛm haay n a bɔ a lɛ ma a ʊ, Yeezuu Krista m Zuuba,

bɩ nɩ yɩm Zɩ Woso lɛbɔʊrɛ.

¹²M ŋʊarɛ gʊɔɔ, nyɩnta kʊ mɔɔ ʊ kan awɔɔ kɩ bɩ, awɔɔ ɩ yɛm Woso ma tee…. Bɩ, dɩɩtaa naa, mɔɔ ba kan awɔɔ kɩ b’ʊ y. Ncɩnaaʊ bɩ, k’a banka a yɛ ma gʊta. K’a bʊmbɔrɛ kʊ Woso a ka awɔɔ ʊ bɩ zi ba, nyi ba Woso m, kan mɛhinkə kɩ nɔ ʊ. ¹³Bala, Woso mɩŋŋa nɩ zi barɛ awɔɔ ʊ, an n’a kam awɔɔ nɩ lɛtaama m kan paŋŋa kɩ m, k’a hɔ k’a ga kʊ ʊ kan a hɔɔnhɔ kɩ bɩ ba.

¹⁴Kʊ zibəə kara n ta ʊ, k’a ba, a bɩ kukur ba, b’a bɩ bɩsɩ ka a barɛ nɔ ʊ y. ¹⁵Maam bɩ, awɔɔ yɩm noonhuzannɔ, gɔsɩ bɩ hɔsɩ yɩrɛ an a hɩ awɔɔ ma y. Awɔɔ yɩm Woso nyɩnɔ kʊ mim daŋŋada sɩ ba ŋ ma y, a n nɩ durnya naa do gʊɔɔ kʊ ŋ vɔn, ŋnɩ zibʊnyaabənno nɔɔm bire ʊ. Awɔɔ a ga m, a yɔ ŋ bire ʊ am fɩtɩrɛrɔ m. ¹⁶Bala, awɔɔ n ta mɩsɩrbaa lemim bɩ m, an n’a pa darɛ ŋ nɩ. K’awɔɔ ba ncɩnaaʊ, bɩ n n’a kam awɔɔ n yɩ mɔɔ lɛbɔʊrɛ, hinni kʊ Krista n nɩ zɛŋ ʊ b’ʊ. Bala, bɩ n n’a hɩnkarɛ a ʊ, mɔɔ zibəə bɩ, kan mɔɔ kɔrɛ bɩ kɩ n yɩ vam y.

¹⁷Awɔɔ sɩrakarɛ bɩ bɔ kʊ ʊ, ɩ ʊ, mannɩ awɔɔ n’a kam Woso ʊ. A a da ma, n nɩ mɔɔ zɛ gər, bɩ k’a yɩ maam m meeyaa bɩ mɔɔ na awɔɔ sɩrakarɛ mannɩ bɩ ma. Bɩ, a yɩm mɔɔ ma heernyɔɔ, bɩ mɔɔ yɩ m heer nyɔɔm kan awɔɔ kɩ. ¹⁸A maam sɔ kan awɔɔ kɩ, k’a heer nyɔɔ, a heernyɔɔ ba kan mɔɔ kɩ.

Pol ʊ, k’a Timote kan Epafrodit kɩ nyɔɔ

¹⁹Kan Zuuba Yeezuu daahan kɩ, mɔɔ y’a gɩngam kʊ m Timote nyɔɔ awɔɔ zi zɔɔ. Maam bɩ, k’a b’a bɔ an bʊr, mɔɔ y’awɔɔ mim mam sɔ m heer koodə yɩ. ²⁰Gɔsɩ vanta ba naa ʊ, an n’a hɔɔn dam, an nɩ kɔrɛ awɔɔ mim ma kan mɔɔ kɩ y. ²¹Ŋ woo… naa, a ka ŋ nawʊrɛ a mɩŋŋɔɔ daahan ma, ŋ bɩr a kam Yeezuu Krista hɔɔnhɔ ma y. ²²Bɩ, kʊ Timote nɩ, awɔɔ sɩra bɩ, awɔɔ dɔ a ʊ, a nyɩnta kan mɔɔ kɩ amba nyɩ tɩr kan a zɩ kɩ bɩ m, ʊ lemim nyɩnta bɩ zi ba. ²³Ncɩnaaʊ bɩ, kʊ mɔɔ m mim bɩ zaa yɩ, a mɩŋŋa mɔɔ n’a nyɔɔrɛ awɔɔ ma zɔɔ-zɔɔ. ²⁴Mɔɔ sɩra ka Zuuba nɔ ʊ, m a dɔ m ʊ, mɔɔ zɛm sɔ awɔɔ zi b’ʊ zɔɔ.

²⁵Bɩ mɔɔ y’a gɩngam kɛɛrɛ mɔɔ ʊ, pakra m kʊ m Epafrodit da zaa ra awɔɔ m, mɔɔ danyɩ m, mɔɔ zibəəkɔɔn m, mɔɔ zoobarɛkɔɔn m sɔ. Awɔɔ y’a nyɔɔ mɔɔ ma, k’an b’a da mɔɔ han. ²⁶A y’a ŋʊam paan… k’a a ya, a awɔɔ yɩ haay, a ma k’a ʊ, n ʊ, awɔɔ a yaaba bɩ ma bɩ, a heer a zar gʊta. ²⁷Denter m, a yaaba zɛ an a yo k’a ga, Woso a cicir zɛ, b’a deem bɛɛ Woso a cicir zɛ y, mɔɔ cicir a a zɛ sɔ, kʊ mɔɔ heerzarlɛ b’a da ra y. ²⁸Bɩ y’a ka mɔɔ n’a darɛ awɔɔ m zaa ra zɔɔ-zɔɔ k’awɔɔ n a yɩ, a heernyɔɔ ba, kʊ mɔɔ heerzar bɩ n’a bɔrɛ sɔ. ²⁹K’a bɩ lee ku, k’a si kan heernyɔɔ gʊta kɩ Zuuba nɔ ʊ. K’a gʊɔɔ ncɩnaaʊ rɔ wɔɔ da ʊ. ³⁰Bala, a a yo k’a ga Krista zibəə bɩ tɔ ma, a a meeyaa ka zɛ ma, k’a a da ma, a zi k’awɔɔ a ga m a ba mɔɔ m bɩ ba awɔɔ bɩncɛ ʊ.

Krista nɩ gʊaa bam tɩrga

¹Kɛɛrɛ naa, m danyɩnɔ, k’a a heer nyɔɔ, k’awɔɔ a zɛ kʊ ra kan Zuuba kɩ bɩ tɔ ma. Meerbaarɔ kʊ mɔɔ ŋ ba kan awɔɔ kɩ rɔ wɔɔ mɔɔ m ya m nɩ sore ŋ la, bɩ naa bɩr mɔɔ kɔrɛ y, bala, a y’a darɛ awɔɔ han. ²K’a dundo a zi kan gʊɔɔ kʊ ŋ n’a bʊnyaa bam nɔ wɔɔ kɩ, jino m, ŋʊaar baŋŋʊgasʊrɛ bɩ hɔdɩndarɛzannɔ m, k’a dundo a zi kan ŋ kɩ. ³Wɔɔ nɩ baŋŋʊgasʊrɛ paan… bɩ zi bam. Bala, zu wɔɔ nawʊm Woso ʊ Sɛnt-Ɛspri paŋŋa m. Krista Yeezuu n wɔɔ lɛbɔʊrɛ, wɔɔ bɩr yom zɩɩfʊrɔ yɩnnɩbayɩrɔ ma k’ʊ lɛ bɔ ʊ mɩŋŋɔɔ ʊ y.

⁴A n bɔkarɛ, mɔɔ m da ma m yo yɩnnɩbayɩrɔ wɔɔ duro ma sɔ. Kʊ gʊaa y’a gɩngarɛ a ʊ, a hɔ yɩm yɩnnɩbayɩrɔ wɔɔ zibəə nɔ ʊ, k’a maam mɔɔ ɩ lɛ da. ⁵Mɔɔ yɩrɛ dɔmɩm sinnyə hinni ʊ, m mɔɔ gasʊ ʊ baŋŋʊ ʊ. Israyɛl gʊaa paan… m mɔɔ m, Bɛnzamɛn do gʊaa m mɔɔ m, mɔɔ yaabɔɔ wɔɔ haay zɩɩfʊrɔ nɩ ŋ mɩ. Kʊ Moyiisi lɛrɔ wɔɔ zuure nɩ, nyɩnta mɔɔ ʊ farizɛn m nɩ zure ŋ ʊ paan…. ⁶Wɔɔ yɩnnɩbayɩrɔ wɔɔ kʊ mɔɔ ŋ ŋʊa gʊta bɩ, a a ka mɔɔ m fɩr ka kristagʊɔɔ sokʊma bɩ ma. Kʊ tɩrgabaa kʊ n n’a kam ma lɛrɔ nɔ ʊ bɩ nɩ, mɔɔ nyɩnta mɩŋŋa fasɩ, gɔsɩ n mim yɩ k’a hɩ mɔɔ ma y.

⁷A n bɔkarɛ, hɔɔ nɔɔn duro kʊ ŋ nyɔɔdʊ n ta mɔɔ ma biisi bɩ, mɔɔ ɩ dɩgarɛ ŋ ma dore hɔɔ kɛɛrɛ, Krista kʊ mɔɔ dɔ bɩ tɔ ma. ⁸Sɩra m, mɔɔ ɩ dɩgam hɔ haay woo… ma dore hɔ, mɔɔ Zuuba Krista Yeezuu dɔrɛ mɩŋŋabaa k’a lɛ da hɔ haay ra bɩ tɔ ma. A tɔ ma m mɔɔ m hɔ haay to, m nɩ dɩgam hɔɔ wɔɔ duro ma bʊtʊrɔ, kʊ Krista n yɩ mɔɔ hɔ haay. ⁹K’an a so mɔɔ ʊ jilli sɔ. Mɔɔ bɩr a gɩngam dɔ, mɔɔ ʊ, m tɩrga Woso mɩm ʊ lɛrɔ wɔɔ zuure tɔ ma y. Sɩra kʊ mɔɔ ka Krista ʊ b’ɩ mɔɔ ba tɩrga Woso mɩm ʊ. Tɩrgabaa kʊ Woso n’a kam sɩrakarɛ tɔ ma bɩ m. ¹⁰Hɔ kʊ mɔɔ nɩ m kam ma bɩ, m ka mɔɔ nawʊm ma kʊ m Krista mɩŋŋa dɔ, kʊ m a mɩmbɔʊrɛ bɩ paŋŋa dɔ. Kʊ m m na ma a fɩryɩrɛ nɔ ʊ, kʊ m bɔ kʊ ʊ kan kɩ a zɛ bɩ nɔ ʊ. ¹¹K’an bɩr yɩrɛ ɩ ʊ, mɔɔ bɩ m da ma sɔ, m bɩ m mɩm bɔ ʊ gəəno bire ʊ.

Ʊ bra si hɔ k’ʊ n’ʊ gɩngaan zi

bɩ tɔ ma

¹²Mɔɔ n a hɩ mɔɔ ʊ, mɔɔ hɔ kʊ mɔɔ nɩ m kam ma bɩ yɩ m wɔ ʊ wa. Gɛɛ, mɔɔ m ba mɩŋŋa fasɩ wa. Bɩ, m tɔ mɔɔ nawʊŋ ʊ, kʊ m brasire ganwʊrɛ bɩ ku m wɔ ʊ, bala, Krista-Yeezuu mɔɔ ku a wɔ ʊ. ¹³Ayy… m danyɩnɔ, mɔɔ bɩr a gɩngarɛ m ʊ, mɔɔ brasire ganwʊrɛ bɩ ku m wɔ ʊ y. Bɩ hɔ deem mɔɔ n’a bam, hɔ k’a ba an cem bɩ bɔ mɔɔ nawʊrɛ m nɔ ʊ, m nɩ m tɔŋ ʊ kʊ m hɔ k’a nɩ lɛɛ bɩ ku. ¹⁴M tɔ mɔɔ nawʊŋ ʊ, kʊ m hɔ kʊ ŋ y’a cɩnta wɔɔ m lɛɛ bɩ ku. Brasire ganwʊrɛ kʊ Woso wɔɔ bir ma Krista Yeezuu nɔ ʊ, k’a b’a ka wɔɔ ʊ arzana ʊ bɩ m.

¹⁵Wɔɔ gʊɔɔ k’ʊ yaa ka sɩrakarɛ nɔ ʊ rɔ wɔɔ, ʊ bɩr hɔɔndarɛ deem naa m. Bɩ, k’awɔɔ y’a hɔɔn darɛ a hɔ, mim naa do nɔ ʊ, Woso y’awɔɔ hɔɔn gum ma. ¹⁶Bɩ, hɔ k’an ta ʊ bɩ, ʊ gɔɔta ʊ bɩr tam lɛɛ kan kʊ kɩ, hɔ kʊ wɔɔ dɔ bɩ nɔ ʊ.

¹⁷M danyɩnɔ, awɔɔ haay k’a mɔɔ hɔbaa sa, k’a dɩga gʊɔɔ kʊ ŋ n’a mɩsɩrbaa bam am wɔɔ m nɔ wɔɔ ma, wɔɔ hɔbaa ŋ y’a sa. ¹⁸Gʊɔɔ gʊta, ŋn’a mɩsɩrbaa bam ɩ ʊ, Krista gɔdarkʊra bɩ jɩnnɔ m. Mɔɔ hɩ awɔɔ m hɔɔ gallɛm hɔka, m m ya m nɩ som la kɛɛrɛ kan nyikəre kɩ. ¹⁹Gʊɔɔ wɔɔ duro nyambʊrlɛ bɩ, nyaanlɛ m, ŋ nɔ nɩ ŋ woso, hɔ k’a nyannɩ n ta ʊ bɩ n ŋ lɛbɔʊrɛ, durnya naa do hɔ ŋn’a hɔɔn dam ma bala. ²⁰Bɩ kʊ wɔɔ nɩ, wɔɔ kʊ bɩ m arzana m. Wɔɔ bʊmbɔrɛzaa, Zuuba Yeezuu Krista kʊ wɔɔ nɩ dɔm ma bɩ, a to a nawʊm arzana ʊ b’ʊ an bʊr. ²¹K’a bɩ bʊr, a wɔɔ mɛrɔ kʊ ŋ nɩ paŋŋawar nɔ ʊ rɔ nɔɔm lʊrlɛ, an ŋ ba, an a mɩŋŋa lɛbɔʊrɛ mɛ bɩ m. Naa ba a nawʊm paŋŋa k’an ta m k’a a so hɔ haay ʊ bɩ m.

Dʊndɔrɛrɔ

¹Ncɩnaaʊ bɩ, m danyɩnɔ ŋʊarɛrɔ, k’a jɩm kɔɔkɔɔ Zuuba nɔ ʊ. Mɔɔ lɛ taa kʊ m m ya m awɔɔ yɩ, mɔɔ heer ɩ nyɔɔm awɔɔ tɔ ma, awɔɔ m mɔɔ zibəə bɩ nyɔɔdʊ.

²A yɛ mɔɔ nawʊm kan m heer kɩ haay Evodi kan Sɩntɩsɩ kɩ han, kʊ ŋ nɩ kʊ ma mɩŋŋa, Zuuba nɔ ʊ. ³Bɩ, ɩbɩɩ k’ɩ m mɔɔ zibəəkɔɔn paan… bɩ, ɩ da ŋ han, bala, ŋ y’a na mɔɔ ma ʊ zoo ba lemim nyɩnta bɩ pa darɛ nɔ ʊ. Lannɔ nɔɔn duro, kan Kleman kɩ, kan mɔɔ zibəəkɔɔnrɔ vantɔɔ wɔɔ kɩ y’a na mɔɔ ma ʊ zoo bɩ ba. Ŋ haay tɔrɔ ɩ mɩsɩrbaa ci b’ʊ.

⁴K’a bɩr a heer nyɔɔm Zuuba nɔ ʊ, dɔmɩm haay. Kʊ m m ya m so ra, k’a bɩr a heer nyɔɔm.

⁵K’a bɩr bʊgʊ-bʊgʊ kan gʊaa woo… kɩ. Zuuba wusigəre dɔmɩm a zɔ. ⁶A b’a heer kɔ hɔsɩ mim ma y, bɩ mim haay nɔ ʊ, k’a hɔ k’awɔɔ lɛ n taa ma bɩ yɛ Woso han, a a wɔ zɩnzɛ m, bɩ, k’a yaa dam barka sɔ. ⁷Maam bɩ, Woso y’a laafɩɩ k’a cem hɔ haay kʊ gʊaa n’a hɔɔn dam ma bɩ han bɩ karɛ awɔɔ ʊ. Bɩ laafɩɩ bɩ do dɔrɛ awɔɔ heerlɔ kan awɔɔ hɔɔndarɛrɔ kɩ ma Krista Yeezuu nɔ ʊ.

⁸M danyɩnɔ, hɔ k’a gɔɔta mɔɔ n’a hɩrɛ awɔɔ m bɩ ba n nɩ: K’a a tɔ ʊ a bɩr hɔ k’an sɩra, an ta daʊrɛ m, an tɩrga m. A a tɔ ʊ a bɩr hɔ k’an mɩŋŋa, an a ga ŋʊarɛ m, a goredaʊrɛ n ta ʊ, hɔ kʊ zorebaa m fasɩ, an a ga lɛbɔʊrɛ m bɩ m. ⁹Hɔ haay k’awɔɔ dɩnda mɔɔ zi, a si, a ma, gɛɛ a yɩ mɔɔ gʊr zi bɩ, k’a sa a zi ba m. K’awɔɔ ba maam, Woso k’a nɩ heer laafɩɩ kam wɔɔ ʊ bɩ bam bɩr kan awɔɔ kɩ.

Pol ɩ Filipii zannɔ barka darɛ

¹⁰Mɔɔ m heernyɔɔ gʊta Zuuba nɔ ʊ, k’awɔɔ a ya, a a da mɔɔ han bɩ tɔ ma. Mɔɔ dɔ mɔɔ ʊ, awɔɔ y’a hɔɔn dam mɔɔ ma hɔɔ, bɩ, daahan bɩ dɔmɩm b’ɩ n’a a zaa ka y. ¹¹Hɔ bɛɛ ɩ jɩra mɔɔ ʊ, mɔɔ nɩ meer bɩ barɛ ncɩnaaʊ y. Bala mɔɔ minkə m, m nɩ m zergam hɔ kʊ mɔɔ n ta m bɩ rɛ, k’a gʊta gɛɛ k’a poore, a bɩ mim kan mɔɔ kɩ y. ¹²Mɔɔ wɔ ʊ, m nɩ m mɩsɩrbaa bam ŋʊazaabaa nɔ ʊ, mɔɔ wɔ ʊ, m n’a bam sɔ hɔtaʊrɛ nɔ ʊ. Lɛɛ haay ʊ, wakatɩ haay nɔ ʊ, mɔɔ m da ma m mɩsɩrbaa ba, kʊ mɔɔ hɔ bɩ an m ka, gɛɛ kʊ nɔ ɩ mɔɔ zɛm, hɔtaʊrɛ nɔ ʊ, gɛɛ hɔjɩrarɛ nɔ ʊ. ¹³Mɔɔ m da ma, m naa haay ba, Krista k’a nɩ paŋŋa kam mɔɔ ʊ bɩ tɔ ma. ¹⁴Bɩ, a da k’awɔɔ ʊ mɔɔ han m kɔrɛ nɔ ʊ naa, awɔɔ ba mɩŋŋa.

¹⁵Filipii zannɔ, awɔɔ dɔ a ʊ, m hʊr kʊ mɔɔ ʊ Masedʊan kʊ ʊ, lemim nyɩnta bɩ pa darɛ sɩŋŋɩda dɔmɩm ʊ bɩ, awɔɔ y’a deem ɩ nyɩnta kristagʊɔɔ sokʊmarɔ wɔɔ barla, a a da mɔɔ han, hɔ ka kʊ ʊ bɩ nɔ ʊ. ¹⁶Baa kʊ mɔɔ nyɩnta Tesaloniki ʊ bɩ, awɔɔ daahan nyɔɔ mɔɔ ma gallɛm hɔka, hɔ k’a jɩra mɔɔ ma dɔmɩnnɔ ʊ. ¹⁷M ka bɛɛ mɔɔ nawʊm ma kʊ n nɩ bɩr hɔ karɛ m ʊ y. Bɩ, m ka mɔɔ nawʊm ma, k’awɔɔ n hɔ k’awɔɔ ba bɩ nyɔɔdʊ yɩ gʊta. ¹⁸Hɔ k’awɔɔ ka haay bɩ, mɔɔ yɩ, a bɔ hɔ kʊ mɔɔ lɛ n taa bɩ la m. Hɔ k’awɔɔ ka Epafroditɩ ʊ k’an b’a ka mɔɔ ʊ bɩ, mɔɔ yɩ, hɔsɩ n jɩra mɔɔ ma dɔ y. Ganwʊrɛrɔ k’awɔɔ ŋ ka mɔɔ ʊ bɩ, bɔ ŋ y’a a ʊ kʊ rɛ kan mannɩ k’a ji n nyɩnta Woso ma, an a ŋʊa an a si kɩ. ¹⁹Bɩ, mɔɔ Zɩ Woso hɔnyɩ gʊtabaa cem haay, a hɔ k’a jɩra awɔɔ ma haay karɛ awɔɔ ʊ gʊta, Krista Yeezuu tɔ ma. ²⁰Bɩ, kʊ wɔɔ Zɩ Woso n lɛbɔʊrɛ yɩ dɔmɩm haay. Amina.

Leersore

²¹K’a yaa da wosogʊɔɔ kʊ ŋ nɩ yɛm Krista Yeezuu ma rɔ wɔɔ m. Wɔɔ danyɩnɔ kʊ ŋ nɩ kan mɔɔ kɩ rɔ wɔɔ ɩ yaa darɛ a m. ²²Wosogʊɔɔ wɔɔ haay ɩ yaa darɛ a m, an lɛ da bɩ, Rɔm cir hargʊɔɔ wɔɔ ɩ yaa darɛ awɔɔ m.

²³Bɩ, kʊ Zuuba Yeezuu Krista barka n bɩr kan awɔɔ kɩ.