Zakkɩ

Ci kʊ

ZAKKƖ

a ba

Ci kʊ Zakkɩ a ba bɩ

gasʊʊrɛ

Zakkɩ bɩ, Yeezuu danzaa m, n y’a gɩngarɛ n ʊ, a ɩ ci bɩ ba. A bɩr a lɛ bɔrɛ a mɩŋŋa ʊ danyɩbaa naa do k’an ta m kan Yeezuu kɩ bɩ nɔ ʊ y. Zakkɩ nyɩnta gʊaa wɩsɩ, a ɩ nyɩnta Zerizalɛm kristagʊɔɔ wɔɔ lɛɛzaa.

Ci bɩ ba a ʊ, wosogʊɔɔ kʊ ŋ nɩ lɛɛ haay ʊ rɔ wɔɔ ma, bɩ ci bɩ nɔ ʊ a y’a hɩrɛ a ʊ, a ba a ʊ, Israyɛl do bueerehɩɩyɔɔ wɔɔ ma. Kristagʊɔɔ sokʊma bɩ makra a ba brɔɔ ma. Ci bɩ ba a ʊ, k’a minno y’a hʊnhɔ dɩnda kristagʊɔɔ wɔɔ m, an nɩ sore ŋ la, k’a ŋ dʊndɔ kʊ ŋ n’a mɩsɩrbaa bɩ ba k’an a ga kʊ ʊ kan sɩrakarɛ bɩ kɩ. Bala, kʊ sɩrakarɛ n zu kʊ ʊ kan zibəəro kɩ, hɔ vam m.

Minno wɔɔ ba n nɩ: fɩryɩrɛ kan tʊntɔʊrɛ kɩ, mindɔrɛ kan yaadarɛ kɩ, hɔntazannɔ kan ŋʊazannɔ kɩ, makrarɔ kan lɛtaamarɔ bʊnyaarɔ kɩ, Woso lemim kan a zuure kɩ.

Zakkɩ ɩ yaa dam Woso dogʊɔɔ m jilli

¹Mɔɔ mɩŋŋa Zakkɩ, Woso kan Zuuba Yeezuu Krista kɩ zibəənyɩ m mɔɔ m. Yaa mɔɔ n’a dam Woso dogʊɔɔ kʊ ŋ y’a kərgu lɛɛ haay ra durnya nɔ ʊ rɔ wɔɔ m.

Fɩryɩrɛ kan mindɔrɛ kɩ mim

²M danyɩnɔ, k’awɔɔ ɩ fɩr do haay yɩm k’a a heer nyɔɔ, ³bala, awɔɔ dɔ a ʊ, fɩryɩrɛ bɩ nɔ ʊ, k’awɔɔ jɩm kɔɔkɔɔ sɩrakarɛ nɔ ʊ, awɔɔ bʊraama yɩm. ⁴Bɩ, pakra m, k’awɔɔ bʊraama bɩ n a hɩnka fasɩ, k’awɔɔ n yɩ mɩŋŋa fasɩ, hɔsɩ bɩ jɩra a ma y.

⁵Bɩ, kʊ gʊaa y’awɔɔ barla mindɔrɛ n jɩra ma, k’an a yɛ Woso han, a y’a kaŋ ʊ, bala, Woso ɩ hɔ kam gʊaa haay ʊ an lɛ da a zaa n’a yɛm bɩ ra, b’a bɩr meer bam ma y. ⁶A n ta ʊ bɩ, pakra m, k’a zaa n a yɛ sɩrakarɛ nɔ ʊ, a bɩ sɩnsɩm ka y. Bala, gʊaa k’a nɩ sɩnsɩm kam bɩ bɔ kʊ ʊ, kan higʊta kurə kɩ, hɩnhɛr n’a yəŋŋəm jɩsa kan bɩsɩ kɩ. ⁷Gʊaa naa do lɔɔ n a ga m an a gɩnga a ʊ, a hɔ yɩm Zuuba zi y. ⁸Bala, hɔɔn hɩɩya-hɩɩya zaa m, a heer n sɩra ka kan hɔsɩ barɛ kɩ y.

Ŋʊazaa kan hɔntazaa kɩ mim

⁹Kristagʊaa k’an ŋʊazaa bɩ n a heer nyɔɔ, bala, Woso a busu. ¹⁰Kʊ kristagʊaa kʊ hɔntazaa m bɩ, n a heer nyɔɔ sɔ, bala, Woso a ka an zer. Sɩra nɔ ʊ, hɔntazaa cenim amba burvu tɩr sur bɩ m. ¹¹Bala, kʊ woso haan, b’a gu kan paŋŋa kɩ an na bur bɩ ma, bur bɩ n ga, a vu bɩ n sur, a gʊɛrɛ k’an ta ʊ bɩ n nyaam. Yɩ a nawʊrɛ ncɩnaaʊ, hɔntazaa n cem zɔɔ-zɔɔ a zibəəro dɔmɩm ʊ.

Hɔ k’a nɩ zɛm makra m

¹²Mimbirenyɩntazaa m gʊaa k’a nɩ jɩnɩm kɔɔkɔɔ makra nɔ ʊ bɩ m. Bala, k’a wɔ makra b’ʊ an bɔ ʊ, a mɩsɩrbaa k’a nyarɛ ba ʊ bɩ yɩm, ganwʊrɛ kʊ Woso a ler bɔ k’a ka gʊɔɔ kʊ ŋ n’a ŋʊam nɔ wɔɔ ʊ bɩ n bɩ. ¹³Kʊ gʊaa ɩ makra lɛɛ, a b’a hɩ, a ʊ: «Woso nɩ mɔɔ makra barɛ y.» Bala, mimbʊnyaa b’a dam ma an Woso makra ba y, bɩ Woso mɩŋŋa bɩr gɔsɩ makra bam k’an mimbʊnyaa ba y. ¹⁴Bɩ, gʊaa lɛtaama bʊnyaa ɩ tɩr a zaa gaa an wɔ ʊ an a da makra ʊ, k’an mimbʊnyaa ba. ¹⁵Kʊ lɛtaama bʊnyaa bɩ paŋŋa yɩ a zaa zi, b’a a ka a zaa n mimbʊnyaa ba. Kʊ mimbʊnyaa bɩ ba an nya, b’a zaa ga.

¹⁶M danyɩnɔ ŋʊarɛ nɔ ʊ, a b’a nyʊnnyɔɔ y. ¹⁷Hɔ mɩŋŋa haay kʊ wɔɔ n’a yɩm, ganwʊrɛ k’an mɩŋŋa fasɩ haay, a to a nawʊm Woso zi, brama, a ɩ lɛɛgurehɔɔ kʊ ŋ nɩ brama rɔ wɔɔ da. A mɩŋŋa bɩr a lʊrm fɩɩgaa y, bɩ monsigə ba zi y. ¹⁸A mɩŋŋa ɩ hɔɔn bɔ ʊ a zim, an mɩsɩrbaa ka wɔɔ ʊ a lemim k’an sɩra bɩ m. A ba a ʊ ncɩnaaʊ kʊ wɔɔ n yɩ lɛɛkarɛzannɔ hɔɔ daarɔ k’a nɩ ŋ dam nɔ wɔɔ barla.

Ʊ zi ba hɔ kʊ wɔɔ n’a mam bɩ m

¹⁹M danyɩnɔ ŋʊarɛrɔ, k’a tɔ da a nɔ ʊ, a ʊ, gʊaa biyəə a ga m an bɩr a tʊr kam mɩŋŋa, b’a bɩ nyagɩra ba k’a meer ba, a bɩ nyagɩra ba sɔ k’a nɔmaa ba y. ²⁰Bala, nɔmaa kʊ gʊaa n’a bam bɩ bɛɛ n’a kam an hɔ k’an tɩrga Woso mɩm ʊ bɩ ba y. ²¹Naa tɔ ma bɩ, k’a hɔ k’an bʊnyaa a heer ʊ haay to, a a gʊ mimbʊnyaa haay ma.

²²A bɩ ŋʊaar ba a mɩŋŋɔɔ m a ʊ, a y’a tʊr kam Woso lemim bɩ ma y, k’a sa a zi bam paan…. ²³Bala, gʊaa k’a n’a tʊr kam lemim bɩ ma b’a bɩr zi bam nɩ bɩ, bɔ a ʊ kʊ ʊ, kan gʊaa k’a nɩ dɩgarɛ a meer ma jɛtɩga ʊ kɩ, ²⁴dɩga k’a ʊ a ma an a hʊr bɩ, a meer bɩ k’an lʊnlɔ bɩ, an bɩ tɔ bɔ a nɔ ʊ lɛɛm. ²⁵Bɩ, gʊaa k’a nɩ Woso lɛ bɩ k’an mɩŋŋa fasɩ bɩ karɩnda bam k’a zu ʊ bɩ, a kʊsɩ a nawʊm ma taalɛra nɔ ʊ, a bɩr a tʊr kam ma bala k’a b’a tɔ bɔ a nɔ ʊ y, bɩ, zi an n’a bam nɩ, Woso bɩ zaa bɩ barka daŋ ʊ, a zibəə haay nɔ ʊ.

²⁶Kʊ gʊaa ʊ, zu a nawʊm Woso ʊ b’a bɩr bʊrlɛ a nɛɛm ma kan meerbaarɔ bʊnyaarɔ kɩ, bra an n’a barɛ a mɩŋŋa m, wosozuure bɛɛ m bɩ y. ²⁷Wosozuure k’an mɩŋŋa, dintim ba ma Zɩ Woso mɩm ʊ bɩ ba n nɩ: Ʊ nyasʊ sʊnnɔ m, kan zonno kʊ ŋ nɩ fɩr yɩm nɔ kɩ m, ʊ dundo ʊ zi kʊ durnya hɔɔ bʊnyaarɔ b’ʊ da mimbʊnyaa barɛ ma y.

Ʊ bɩ gʊɔɔ jirə bɔ y

¹M danyɩnɔ, wɔɔ Zuuba Yeezuu Krista n nɩ lɛbɔʊrɛ m gʊta, awɔɔ n sɩra ka ʊ. Naa tɔ ma bɩ, a n a ga m k’awɔɔ n gʊɔɔ jirə bɔ y. ²Ʊ makra sa, a a da ma, gʊɔɔ hɩɩyɔɔ n bɩ gasʊ awɔɔ sokʊma nɔ ʊ, deem n huu mɩŋŋa du a ma an sarma tolleŋŋarɔ dɩnda a nyʊkʊnnɔ ma, deem n bɩr ŋʊazaa an huu yaarsɩrɔ du a ma. ³K’awɔɔ gʊaa k’a huu wɩsɩrɔ du a ma bɩ nyaasɩ ka mɩŋŋa, a bɔkarɛ a hɩ m a ʊ: «Ɩbɩɩ, bʊr ɩ nyɩnta bɩncɛ mɩŋŋa naa do ʊ», a bɔkarɛ a hɩ ŋʊazaa bɩ m, a ʊ: «Ɩbɩɩ, jɩm brama» gɛɛ, a hɩ m, a ʊ: «Bʊr ɩ nyɩnta tara ʊ naa ʊ, mɔɔ gam taa». ⁴K’awɔɔ ba ncɩnaaʊ, jirə bɛɛ awɔɔ bɔ a barla ra? Bɩ, naa k’awɔɔ n’a bam naa, a ba bɛɛ awɔɔ ʊ dʊdɔkənno hɔɔndarɛ bʊnyaarɔ m na?

⁵M danyɩnɔ ŋʊarɛ nɔ ʊ, k’a tʊr ka mɩŋŋa! Woso gʊɔɔ kʊ ŋʊazannɔ m durnya naa do ʊ rɔ wɔɔ bɔ ʊ, kʊ ŋ nɩ hɔnta paan… kʊ sɩrakarɛ m bɩ yɩ, kʊ ŋ nɩ Woso cirbəə bɩ yɩ, Woso ɩ cirbəə bɩ do ler bɔ gʊɔɔ kʊ ŋ n’a ŋʊam nɔ wɔɔ m. ⁶B’awɔɔ, awɔɔ ɩ ŋʊazannɔ gore bɔŋ ʊ. A n bɔkarɛ, hɔntazannɔ wɔɔ nɩ fɩr karɛ awɔɔ ma, ŋn’ɩ tarɛ awɔɔ m dʊdɔkənno taa. ⁷Ŋ mɩŋŋɔɔ nɩ tɔ mɩŋŋa kʊ Woso a ka awɔɔ ma bɩ sʊnsɔ wʊm.

⁸N y’a da Wosoci b’ʊ, n ʊ: «Ɩ ɩ mim ŋʊa amba ɩ mɩŋŋa m», Woso cirbəə bɩ mɩsɩrbaa zaa n naa do. K’awɔɔ ɩ zuŋ ʊ, awɔɔ y’a bam mɩŋŋa. ⁹Bɩ, k’awɔɔ ɩ gʊɔɔ jirə bɔrɛ, mimbʊnyaa awɔɔ n’a bam bɩ, b’awɔɔ ɩ kʊrɔma nɔ ʊ, bala awɔɔ n zu Woso lɛ b’ʊ y. ¹⁰Bala, kʊ gʊaa ɩ zum lɛrɔ wɔɔ ʊ haay, k’a bɩ bɔ deem la m, bɔ a ʊ ŋ haay la m. ¹¹Bala, Woso y’a hɩ, a ʊ: «Ɩ bɩ jaan da y,» a a ya an a hɩ sɔ, a ʊ: «Ɩ bɩ gʊaa meeyaa bɔ ʊ y.» Bɩ kʊ gʊaa n jaan da y, an bɔkarɛ an gər zɛ, bɩsɩ a a ka lɛrɔ wɔɔ ma. ¹²Kʊ meer awɔɔ n’a bam, kʊ zi awɔɔ n’a bam, k’a dɔ a ʊ, lɛ k’a nɩ soamɩŋŋaʊ kam bɩ, Woso n nɩ zɛm b’a sa an awɔɔ dʊdɔ ka m. ¹³Bala, gʊaa k’a n a mim cicir zɛ bɩ, Woso b’a cicir zɛm dʊdɔkarɛ nɔ ʊ y, bɩ kʊ gʊaa y’a muno cicir zɛm, a bɩ nyi bam dʊdɔkarɛ nɩ y.

Sɩrakarɛ paan… mim

¹⁴M danyɩnɔ, kʊ gʊaa ʊ, a sɩra ka Woso ʊ, an bɔkarɛ a bɩr sɩrakarɛ zibəəro sɩ barɛ y, sɩrakarɛ k’a ʊ, a ta m bɩ y’a dam ma an a bʊmbɔ ra? ¹⁵A a da ma kristagʊaa n ta ʊ yar gɛɛ lʊ, ŋ b’a huuro m k’a du a ma, bɩ ŋ ba hɔsɩ m k’a bɩ y. ¹⁶K’awɔɔ gʊaa deem a hɩ ŋ nɩ, a ʊ: «K’a doo laafɩɩ, a huu du a ma, k’a hɔ bɩ mɩŋŋa.» B’awɔɔ n hɔ k’a jɩra ŋ ma bɩ ka ŋ ʊ y, meerbaa naa do nyɔɔdʊ ta ʊ ra? ¹⁷Ncɩnaaʊ sɔ bɩ, sɩrakarɛ k’a bɩr zi bam bɩ, hɔgər m fasɩ.

¹⁸A a da ma gʊaa n a hɩ, a ʊ, ɩbɩɩ ɩ sɩrakarɛ m, mɔɔ nɩ zibəəro m. Mɔɔ y’a hɩrɛ a zaa m, m ʊ, ɩ sɩrakarɛ bɩ hɩnka m m, zibəəbarɛ war nɔ ʊ, kʊ m m zibəəro wɔɔ barɛ hɩnka a ɩ m, k’ɩ dɔ ɩ ʊ, mɔɔ ɩ sɩrakarɛ m. ¹⁹Ɩbɩɩ sɩra ka ɩ ʊ, Woso deem taan… n ta ʊ, ɩ y’a bam mɩŋŋa, bɩ, zinəro naa dɔ sɔ, ŋn’ɩ nyi bam. ²⁰Yarma ra, a dɔ ɩ ʊ, sɩrakarɛ k’a bɩr zi bam bɩ vam. ²¹Wɔɔ yaaba Abraham bɩ, a zibəəro tɔ ma bɛɛ y’a ka Woso n a ba tɩrga ra, k’a yɛ k’a mannɩ ba a nyɩ Izakkɩ m bɩ bɛɛ ra? ²²Ɩbɩɩ dɔ kɛɛrɛ ɩ ʊ, Abraham sɩrakarɛ bɩ, zu a ʊ kʊ ʊ kan a zibəəro kɩ, a zibəəro wɔɔ y’a ka a sɩrakarɛ bɩ n yɩ paan…. ²³Ncɩnaaʊ m, hɔ kʊ Wosoci b’a hɩ bɩ n kʊ yɩ, a a hɩ, a ʊ: «Abraham sɩra ka Woso ʊ, am naa, Woso n dɩga a gʊaa tɩrga.» Woso n a bir a gʊaasɩba sɔ. ²⁴Awɔɔ dɔ kɛɛrɛ a ʊ, Woso bɩ, gʊaa ba a nawʊm tɩrga a zibəəro tɔ ma, a sɩrakarɛ y’a deem tɔ ma bɛɛ y.

²⁵Yɩ a ʊ ncɩnaaʊ sɔ kan lʊmɩŋŋahɛɛrɛzaa Rahab kɩ, a zibəəro y’a ka Woso n tɩrgabaa ka ʊ, Israyɛl dundolɛɛzizannɔ k’a ŋ si a har ʊ, an zaa vanta hɩnka ŋ nɩ ŋn’a sa ŋn’a hʊr bɩ tɔ ma m. ²⁶Denter m, amba gʊaa nyi nɩ bɔrɛ a mɛ ʊ, a zaa nɩ gam bɩ, sɩrakarɛ k’a n zu kʊ ʊ kan zibəəro kɩ bɩ, hɔ gər m sɔ.

Gʊaa nɛɛm zibəə mim

¹M danyɩnɔ, a b’a ka ma k’a yɩ hɔdɩndagʊɔɔnzannɔ woo… y. Awɔɔ dɔ a ʊ, wɔɔ kʊ ʊ nɩ hɔ dɩndam gʊɔɔ m nɔ wɔɔ, n wɔɔ dʊdɔ kam kʊsɩ an lɛ da. ²Bala, wɔɔ haay, wɔɔ ɩ kʊrɔm ma. Gʊaa k’a bɩr kʊrɔm ma a meerbaa nɔ ʊ bɩ, gʊaa tɩrga m fasɩ, a a da ma an bʊr a mɩŋŋa ma jilli. ³Kʊ wɔɔ tɩr sarbɩr da sisiro lɛ ʊ kʊ ŋ nɩ zu wɔɔ ʊ bɩ, wɔɔ y’ʊ so ŋ mɛ b’ʊ jilli sɔ ŋn’ɩ wɔɔ hɔɔnhɔ bam. ⁴K’a dɩga kɔɔlʊʊ gʊtɔɔ wɔɔ ma sɔ, kʊ ŋ bɩ to ŋnɩ gʊta maam-maam, hɩnhɛr gʊtɔɔ nɩ ŋ nyɔɔtam bɩ, ŋ hɔ poore n ta ʊ, an a ka ŋn’ɩ tam lɛɛ haay k’a brarɛzaa bɩ lɛ n taa b’ʊ. ⁵A maam sɔ kan gʊaa nɛɛm kɩ, vəŋŋə poore m gʊaa mɛ ʊ, an bɔkarɛ an n’a mɩŋŋa busum hɔɔ gʊtɔɔ barɛ mim nɔ ʊ. Awɔɔ dɔ a ʊ, sɛ poore a da ma, an poo gʊta bɩ.

⁶Gʊaa nɛɛm bɩ do m bɩ, sɛ m sɔ, an ta hɔ bʊnyaa haay m, wɔɔ mɛ b’an ta ʊ, an nɩ dintim kam wɔɔ mɩsɩrbaa ma jilli, an nɩ sɛ dam wɔɔ ma haay, sɛhar sɛ y’a so a mɩŋŋa ʊ. ⁷Gʊɔɔ a da ma, ŋn’ɩ hɔmɩsɩr haay tʊntɔrɛ, poohɔɔ kan bɛnnɔ kɩ, hɔɔmɩsɩɩrɔ kʊ ŋ n’a gaatam kan zɔnɔ kɩ, ŋ wɔ ŋ ʊ denter. ⁸Bɩ gɔsɩ b’a dam ma an nɛɛm tʊntɔ y. Hɔ bʊnyaa m, an nɩ lɛɛ sam, gʊɔɔ meeyaa bɔʊrɛ nyɩsɩ y’a han. ⁹Ʊ nɛɛm wɔɔ sa, ʊ n’ʊ lɛ bɔm Zuuba ʊ, ʊ Zɩ b’ʊ, ʊ n’a sam sɔ, ʊ nɩ lɛ kʊsɩ dam gʊɔɔ n’ʊ, an bɔkarɛ Woso yɩ ŋ da ŋnɩ bɔ a mɩŋŋa rɛ. ¹⁰M danyɩnɔ, a n a ga m kʊ wɔɔ lɛ deem-deem bɩ n bɩr ler mɩŋŋa bɔm, an bɩr a bʊnyaa bɔm sɔ y. ¹¹Hiyəə ba ʊ, an nɩ bɔm hi nyɩnta m kan hi kʊsɩ kɩ nɩ y. ¹²Sɔɔn b’a dam ma an tʊgɔ nyɩ da y, gɛɛ dɩvɛn gɔ n sɔɔn nyɩ da y. Yɛhiyəə b’a dam ma, an bɔ hi nyɩnta nɩ y.

Mindɔrɛ k’a a to Woso zi

¹³Gʊaa y’awɔɔ barla an mim dɔ ra? K’an a hɩnka mɩsɩrbaa tɩrga nɔ ʊ, bʊraama zibəə nɔ ʊ. ¹⁴Bɩ, kʊ jɩmbaa kan heer kʊsɩ kɩ, lɛɛzaabaa kama kɩ y’awɔɔ heer han, a b’a lɛ bɔ a mɩŋŋɔɔ ʊ y, b’a bɩ sɩra gore bɔ ʊ a ŋʊaarlɔ nɩ y. ¹⁵Bala, mindɔrɛ naa do n a to Woso zi y, durnya hɔ m, a to a ʊ gʊɔɔ zi, bɔ a ʊ Sʊtaana zi. ¹⁶Sɩra nɔ ʊ, lɛɛ kʊ jɩmbaa n ta ʊ, gʊɔɔ n’a hɔɔn darɛ a mɩŋŋɔɔ ma con bɩ, lɛɛ bɩ do ʊ bɩ, hɔ haay woo… yɩm bʊrga, ziro bʊnyaarɔ n nyɩnta ʊ sɔ. ¹⁷Bɩ, mindɔrɛ k’a a to Woso zi bɩ y’a hɔ, a mɩŋŋa, laafɩɩ kama m, a bʊgʊ-bʊgʊ, kʊmarɛ kama m, cicirzɛrɛ m gʊta, zi mɩŋŋa barɛ m gʊta, jɩmbaa b’a nɔ ʊ, bɩ zambʊ b’a nɔ ʊ sɔ y. ¹⁸Gʊɔɔ kʊ ŋ n’a kam ma kʊ laafɩɩ n bɩr ta ʊ rɔ wɔɔ, tɩrgabaa mɩsɩrbaa bɩ ba ŋ nawʊm laafɩɩ kama nɔ ʊ, a nyɔɔdʊ bɩ, tɩrgabaa mɩsɩrbaa ŋn’a yɩm.

Ʊ bɩ durnya hɔ ŋʊa y

¹A a ba lɔ awɔɔ bɩr kʊ marɛ, an nɩ nyaa bam kan kʊ kɩ tee…? K’awɔɔ lɛtaamarɔ bʊnyaarɔ nɩ zoo bam awɔɔ heerlɔ wɔɔ ʊ bɩ tɔ ma m. ²Awɔɔ lɛ taa hɔɔ niŋŋoo ma, b’awɔɔ bɩr ŋ yɩrɛ y, bɩ tɔ ma bɩ, awɔɔ y’a kam ma k’a gər zɛ, awɔɔ ɩ jɩm bam bɩ hɔsɩ bɩr kʊyɩrɛ awɔɔ nɩ y, bɩ n a ka awɔɔ nɩ zoo bam an nɩ nyaa bam kan kʊ kɩ. Awɔɔ bɩr hɔsɩ yɛm Woso han y, bɩ y’a ka awɔɔ ba hɔ k’awɔɔ lɛ n taa bɩ nɩ y. ³Awɔɔ y’a yɛm b’awɔɔ bɩr a yɩrɛ y, k’awɔɔ bɩr a yɛm han mɩŋŋa bɩ tɔ ma, bala, a yɛ awɔɔ nawʊm k’a sa, a a hɔɔnhɔ ba m. ⁴Taalɛrazannɔ bɛɛ n’awɔɔ nɩ y! Awɔɔ n a dɔ a ʊ, k’ɩ ɩ durnya jɛ ʊ, Woso jɩm n’ɩ mɩ ra? Gʊaa k’a lɛ n taa durnya ma bɩ, a ba a nawʊm Woso jɩm. ⁵A hɔɔn awɔɔ n’a darɛ a ʊ, hɔ kʊ Wosoci b’a hɩ bɩ vam m na? A a hɩ a ʊ, Woso ɩ jɩm bam k’a a Ɛspri ka wɔɔ ʊ, an nɩ kan wɔɔ kɩ bɩ tɔ ma. ⁶Bɩ, a y’a barka kam wɔɔ ʊ gʊta, bɩ tɔ ma m Wosoci bɩ n a hɩ a ʊ, Woso y’a gum mɩŋŋabusurezannɔ ma, b’a ɩ barka kam mɩŋŋazerlezannɔ ʊ. ⁷Naa tɔ ma bɩ, k’a mɩŋŋɔɔ zer a yɛ Woso ma. K’a a gu Sʊtaana ma, a y’a sire an a gʊ awɔɔ ma laatʊ. ⁸K’a zɔ Woso ma, a y’a zɔrɛ awɔɔ ma sɔ. Awɔɔ k’an kʊrɔmazannɔ, k’a zi bʊnyaa barɛ to! K’a heer hu bɔ hɔɔn hɩɩya-hɩɩya zannɔ ra! ⁹K’a heer zaar ba a kʊrɔmarɔ wɔɔ tɔ ma! K’a zɛ heerzar ba a nyi ka! K’a yaawʊrɛ to a nyi ka, k’a a heernyɔɔ bɩ to, a a heer zar! ¹⁰K’a a mɩŋŋɔɔ zer Zuuba taa, k’an awɔɔ busu.

Ʊ b’ʊ muno dʊdɔ ka y

¹¹M danyɩnɔ, a ba bʊnyaa hɩ kʊ ma y. Gʊaa k’an a bʊnyaa hɩrɛ a mim ma, gɛɛ an a dʊdɔ karɛ, a bʊnyaa an n’a hɩm Woso lɛ ma, an nɩ Woso lɛ bɩ dʊdɔ kam. Bɩ, k’ɩbɩɩ ɩ Woso lɛ bɩ dʊdɔ kam, ɩ ba ɩ ʊ, a dʊdɔkər, a zuurezaa bɛɛ n’ɩ mɩ dɔ y. ¹²A n bɔkarɛ, Woso y’a deem taan… nɩ lɛ bɩ kam, a y’a deem taan… m dʊdɔkər sɔ. A n n’a dam ma an gʊɔɔ bʊmbɔ, an n’a dam ma an ŋ zaar ba sɔ. Nka n’ɩbɩɩ m, ɩ n’ɩ mim dʊdɔ karɛ?

A bɩ yɩ mɩŋŋabusurezannɔ y

¹³K’a tʊr ka mɔɔ ma kɛɛrɛ, awɔɔ k’a n’a hɩrɛ a ʊ: «Her, gɛɛ booti m, wɔɔ tam kʊ na ʊ gɛɛ kʊ na ʊ, ʊ gɔɔta b’ʊ dɔɔraa deem, ʊ ter ba ʊ busoo yɩ,» ¹⁴awɔɔ n a dɔ k’awɔɔ mɩsɩrbaa bɩ yɩm lɔ booti nɩ y, bala, awɔɔ bɔ kʊ ʊ kan sɛbtur kɩ, k’a bɔ b’a nyaam lɛɛm. ¹⁵A ga awɔɔ ʊ m, a hɩ a ʊ: «Kʊ Zuuba yɛ, wɔɔ mɩsɩrbaa barɛ, ʊ na ba kan na kɩ.» ¹⁶A n bɔkarɛ a lɛ awɔɔ n’a bɔrɛ a mɩŋŋɔɔ ʊ a dɩndarɛ nɔ ʊ. Lɛbɔaʊ naa do lɔɔ bʊnyaa. ¹⁷Gʊaa k’a hɔ k’a ga barɛ m dɔ, b’a n a ba y, a zaa mimbʊnyaa ba.

A yɩm kɔɔkɔɔ hɔntazannɔ ma

¹Hɔntazannɔ wɔɔ, k’a tʊr ka mɔɔ ma, k’a nyi ka a baa da, bala, awɔɔ fɩr yɩm gʊta. ²Awɔɔ hɔnta bɩ, hɔ vəm m, bɛɛ y’awɔɔ huuro bɩm sɔ. ³Tankampiisi y’awɔɔ sarma kan awɔɔ busoo kɩ zaar bam, ŋ zaarbarɛ bɩ nɩ nyɩntam kasɛtɩ an awɔɔ bɩ, am sɛ hɔ bɩ m. Awɔɔ hɔnta gʊr a kuntə jɛ dɔmɩnnɔ nɔɔm nɔ ʊ. ⁴Awɔɔ n gʊɔɔ kʊ ŋ zi ba awɔɔ hɔsɩrarɔ ʊ rɔ wɔɔ yawʊra ba y, k’a a tʊr ka, ŋ yɩ zee dam, bɩ, ŋ zee bɩ darɛ lee ku Zuuba k’a paŋŋa jirə ba ʊ bɩ zi. ⁵Awɔɔ mɩsɩrbaa nyɩnta yɩ tara burə ʊ, a a hɔɔnhɔ yɩ, awɔɔ hɔ bɩ gʊta a mɛ ka am hɔbɩsɩrɔ m, bɩ awɔɔ zɩnzɛrɛ dɔmɩm y’a kum. ⁶Awɔɔ gʊaa tɩrga dʊdɔ yar, a meeyaa bɔ ʊ, a n wɔ ʊ an jɩm awɔɔ lɛɛ y.

Ʊ bʊr ʊ ma, Zuuba zɛm

⁷M danyɩnɔ, ʊ bʊr ʊ ma, kʊ Zuuba n tolle ba an bʊr. K’a makra sa danwur ma, bʊr a nawʊrɛ a ma an nɩ dɔm mɔsa ma, k’a a tara zibəə hɔ yɩ, an nɩ dɔm lɛɛkarɛ labarɛrɔ, kan jɛ labarɛrɔ kɩ ma. ⁸Awɔɔ, k’a bʊr a ma sɔ, a bɩr heer koodə m, bala, Zuuba wusigəre dɔmɩm a zɔ.

⁹M danyɩnɔ, a bɩ kukur ba kʊ ma y, kʊ Woso b’a dʊdɔ ka y. K’a dɩga a, ba dʊdɔkər bɩ nɩ cɛlɛ ma na. ¹⁰M danyɩnɔ, wosolɛsinnɩsorazannɔ kʊ ŋ nyɩnta ŋnɩ meer ba Zuuba tɔ ra rɔ wɔɔ, ŋ fɩr yɩ, bɩ ŋ bʊr a ma fɩr bɩ nɔ ʊ. K’a ŋ hɔbaa sa. ¹¹K’a dɩga a, gʊɔɔ kʊ ŋ nɩ jɩnɩm kɔɔkɔɔ fɩryɩrɛ nɔ ʊ rɔ wɔɔ, wɔɔ y’a hɩm wɔɔ ʊ, ŋ mimbirenyɩnta. Awɔɔ Zɔɔb k’a jɩm kɔɔkɔɔ fɩr nɔ ʊ bɩ mim ma, awɔɔ hɔ kʊ Zuuba a ba m fɩr bɩ yɩrɛ jɛ ʊ bɩ dɔ sɔ, bala, Zuuba ɩ gʊɔɔ cicir zɛm gʊta, an n’a mɩŋŋa barɛ ŋ nɩ.

¹²M danyɩnɔ, an lɛ da bɩ, a b’a wer si y, a b’a wer si brama tɔ nɩ, b’a ba si tara tɔ nɩ y, a b’a wer si fɩɩga y. K’awɔɔ yɛ mim ma, k’a ʊ ɩɩn… bala. K’awɔɔ n yɛ, k’a ʊ ayy…. A bɩ hɔsɩ na ma y, kʊ Woso b’awɔɔ dʊdɔ ka y.

Yaadarɛ mim

¹³Kʊ gʊaa y’awɔɔ barla an nɩ fɩr yɩm k’an yaa da. Kʊ gʊaa nɩ heernyɔɔ m, k’an laa lɔ an a lɛ bɔ Woso ʊ. ¹⁴K’awɔɔ gʊaa deem bɩ laafɩɩ, k’an kristagʊɔɔ lɛɛzannɔ wɔɔ bir, kʊ ŋ nɩ nyɔɔ nɔ ma Zuuba tɔ ra, ŋnɩ yaa da a tɔ ma. ¹⁵Kʊ ŋ yaa bɩ da kan sɩrakarɛ kɩ, yaabazaa bɩ laafɩɩ yɩm, Zuuba y’a waam, k’a mimbʊnyaarɔ ba sɔ, Zuuba sugur kaŋ ʊ. ¹⁶Naa tɔ ma bɩ, k’a mimbʊnyaarɔ bɔ a lɛ ma, a hɩ kʊ m, k’a yaa da kʊ tɔ ma, kʊ Woso n a waa. Gʊaa tɩrga yaadarɛ ɩ zi bam kan paŋŋa gʊta kɩ. ¹⁷Awɔɔ dɔ a ʊ, *Elii nyɩnta gʊaa am wɔɔ m, a yaa da Woso m ŋʊɩɩ…, kʊ la bɩ ba y, denter sɔ, la a gʊsɩ dɔɔraa kaakʊ kan a kur kɩ. ¹⁸A n a ya an yaa da, kʊ la bɩ n ba, Woso n a ka la bɩ n ba, hɔbɩrɛ n nyɩnta ʊ tara burə ʊ.

Ʊ ʊ da kʊ han Woso zuure nɔ ʊ

¹⁹M danyɩnɔ, k’awɔɔ gʊaa deem nyaam, an Woso zaa k’an sɩra bɩ to, kʊ gʊaa a ka an a ya an bʊr zaa bɩ ra, ²⁰k’a dɔ a ʊ, gʊaa k’a ka mimbʊnyaabər n a bɔ a mimbʊnyaabarɛ zaa ʊ, k’a zu Woso ʊ bɩ, a zaa bɩ meeyaa a a bʊmbɔ, an a ka sɔ, baa k’a mimbʊnyaarɔ gʊta, Woso n ŋ sugur ka ʊ haay.