Galasii zannɔ

Ci kʊ Pol a ba

GALASII ZANNƆ

ma

Ci kʊ Pol a ba Galasii zannɔ ma bɩ

gasʊʊrɛ

Pol ɩ ci bɩ ba. A ba a ʊ Galasii kʊrɔ wɔɔ kristagʊɔɔ ma.

Ci bɩ ba a ʊ, bala, zɩɩfʊrɔ kʊ ŋ y’a ba kristagʊɔɔ gɔsɩnnɔ ɩ ta ŋ zi ŋn’aa hɔ dɩnda ŋ nɩ, an bɔkarɛ ŋ hɔdɩndarɛ bɩ bɩr zum kʊ ʊ kan lemim nyɩnta bɩ kɩ y. Ŋ ʊ, pakra m kʊ gʊɔɔ n gasʊ baŋŋʊ ʊ, kʊ n bɛɛ ŋ bɩ bʊmbɔrɛ yɩrɛ y.

A m naa, Pol n ci ba k’a hɩnka ŋnɩ a ʊ, Krista k’a ga bɩ, a hɔ haay kʊ lɛrɔ wɔɔ a cɩnta bɩ ba an a nya, an wɔɔ yɔ Moyiisi lɛrɔ wɔɔ lɔmbaa nɔ ʊ, wɔɔ n’ʊ so ʊ mɩŋŋɔɔ ʊ Sɛnt-Ɛspri paŋŋa kan a lɛ sire kɩ tɔ ma.

Pol ɩ yaa dam Galasii kristagʊɔɔ m

¹Mɔɔ mɩŋŋa Pol nɩ ci naa do bam, kristazibəəzaa m mɔɔ m, gʊɔɔ bɛɛ mɔɔ bɔ ʊ y, bɩ gʊaa bɛɛ mɔɔ nyɔɔ sɔ y, Yeezuu Krista mɩŋŋa, kan Zɩ Woso k’a a mɩm bɔ ʊ gəəno bire ʊ bɩ k’ɩ mɔɔ bɔ ʊ. ²Mɔɔ kan danyɩnɔ kʊ ŋ nɩ naa ʊ haay rɔ wɔɔ kɩ, wɔɔ ɩ yaa darɛ awɔɔ m, awɔɔ kʊ kristagʊɔɔ sokʊmarɔ n’awɔɔ m, an nɩ Galasii kʊrɔ ʊ rɔ wɔɔ.

³A yɛ mɔɔ nawʊm wɔɔ Zɩ Woso han, kan Zuuba Yeezuu Krista kɩ han, kʊ ŋ nɩ barka kan laafɩɩ kɩ ka awɔɔ ʊ. ⁴Yeezuu mɩŋŋa ɩ yɛ an ga, k’a wɔɔ bʊmbɔ ʊ mimbʊnyaarɔ nɔ ʊ, k’a a da ma a wɔɔ yɔ durnya bʊnyaa naa do wɔ ʊ, amba wɔɔ Zɩ Woso lɛ n taa bɩ m. ⁵Woso tɔ n lɛbɔʊrɛ yɩ dɔmɩm haay. Amina.

Lemim nyɩnta vanta ba ʊ y

⁶A bɔ k’awɔɔ nawʊm Woso k’a awɔɔ bir k’awɔɔ n yɩ a gʊɔɔ Krista barka minto b’ʊ, a ta k’a zu lemim nyɩnta vanta ʊ bɩ, a a ka mɔɔ n zɛ kədə. ⁷A bɩr yɩrɛ ɩ ʊ lemim nyɩnta vanta n ta ʊ wa, a ɩ yɩrɛ ɩ ʊ, gʊɔɔ n’awɔɔ warm kʊ ma, ŋn’a kam ma k’a Krista lemim nyɩnta bɩ zaar ba. ⁸Bɩ, kʊ gʊaa lemim nyɩnta vanta dɩnda awɔɔ m, an a hɔ kan lemim kʊ wɔɔ pa da awɔɔ m bɩ kɩ, baa kʊ wɔɔ m, baa kʊ malɛɛka y’a to arzana ʊ an bɩ naa ba, kʊ Woso nɔmaa n a kərgu a zaa ra. ⁹Mɔɔ lɛɛ ka m a hɩ, bɩ mɔɔ yɩ m yarɛ m so ra, kʊ gʊaa lemim nyɩnta vanta pa da awɔɔ m, bɩ lemim k’awɔɔ si hɔɔ bɩ bɛɛ, kʊ Woso nɔmaa n a kərgu a zaa ra. ¹⁰Ncɩnaaʊ naa, m ka mɔɔ nawʊm ma kʊ gʊɔɔ nɔ n yɩ kan m kɩ ra? Gɛɛ, kʊ Woso nɔ n yɩ kan m kɩ ra? A ŋʊa mɔɔ nawʊm kʊ gʊɔɔ n m ŋʊa ra? Ayy…, kʊ m ka mɔɔ nawʊm ma kʊ gʊɔɔ nɔ n yɩ m la, mɔɔ bɩ nyɩntam Krista zibəənyɩ dɔ y.

Krista ɩ lemim nyɩnta bɩ da Pol wɔ ʊ

¹¹M danyɩnɔ, k’a dɔ a ʊ, lemim nyɩnta kʊ mɔɔ pa da awɔɔ m bɩ n a to gʊɔɔ zi y. ¹²Bala, a ma bɛɛ mɔɔ ʊ gʊɔɔ zi y, bɩ gʊɔɔ bɛɛ y’a dɩnda mɔɔ n sɔ y, Yeezuu Krista mɩŋŋa y’a hɩnka mɔɔ m, mɔɔ n a dɔ.

¹³Nyɩnta kʊ mɔɔ ʊ hɔ niŋŋə biisi, m nɩ zum zɩɩfʊrɔ wosozaa ʊ bɩ, awɔɔ mim ma. Awɔɔ dɔ a ʊ, dɔmɩm bɩ do ʊ bɩ, mɔɔ fɩr ka Woso gʊɔɔ sokʊma bɩ ma gʊta maam-maam, kʊ m a zaar ba. ¹⁴Zu kʊ mɔɔ nawʊm zɩɩfʊrɔ wosozaa b’ʊ bɩ, mɔɔ cem m muno zɩɩfʊrɔ wɔɔ han zaa bɩ zuure nɔ ʊ gʊta, m nɩ m yoŋ ʊ gʊta m lɛ da ŋ la, m yaabɔɔ yɩnnɩbayɩrɔ wɔɔ zuure nɔ ʊ. ¹⁵Bɩ Woso lɛɛ ka an mɔɔ bɔ ʊ a barka bɩ tɔ ma kʊ m a zi ba, bɩ ma bɩ, mɔɔ n yɩ cɩna y. Ncɩnaaʊ nɩ, an mɔɔ bir zibəə bɩ tɔ ma. ¹⁶Bɩ k’a b’a ŋʊa kʊ mɔɔ n’a Nyɩ bɩ dɔ kʊ m a pa da do vantɔɔ gʊɔɔ m bɩ, mɔɔ n m ka ma kʊ m gʊaa lar ma y, ¹⁷mɔɔ n ta Zerizalɛm ʊ sɔ gʊɔɔ kʊ ŋ lɛɛ ka mɔɔ m ŋn’a ba kristazibəəzannɔ rɔ wɔɔ zi y, m hʊr mɔɔ ʊ lɛɛm m ta Araabɩrɔ kʊ ʊ, m m to b’ʊ, m bʊr Damas kʊ ʊ. ¹⁸Bɩ jɛ ʊ dɔɔraa kaakʊ kur bɩ, mɔɔ n ta Zerizalɛm ʊ, kʊ m aa Sefas1.18 Sefas: Pɩyɛɛr tɔ vanta m. K’a dɩga Zaan 1.42 bɩncɛ ʊ. dɔ, mɔɔ gɔɔta b’ʊ kan kɩ dɔmɩm bueeresoor. ¹⁹Mɔɔ n zibəəzaa vanta yɩ kʊ *Zakkɩ bɛɛ y, Zuuba danzaa bɩ. ²⁰Hɔ kʊ mɔɔ n’a hɩrɛ awɔɔ m ci b’ʊ naa, Woso n mɔɔ kasɛtɩzaa, ŋʊaar bɛɛ mɔɔ n’a barɛ y. ²¹M hʊr kʊ mɔɔ ʊ Zerizalɛm ʊ bɩ jɛ ʊ, ta mɔɔ ʊ Siiri kʊrɔ ʊ, kan Silisii kʊrɔ ʊ kɩ. ²²Bɩ, Zidee kʊrɔ wɔɔ kristagʊɔɔ sokʊmarɔ wɔɔ n mɔɔ yɩ deem y. ²³A ma ŋ y’a ʊ bala, n n’a dɩndarɛ, n ʊ: «Gʊaa k’a nɩ fɩr kam wɔɔ ma biisi bɩ, a ɩ Krista zaa k’a nyɩnta an n’a zaar bam bɩ pa dam kɛɛrɛ.» ²⁴Naa do n a ka, ŋn’a lɛ bɔm Woso ʊ mɔɔ minto.

Pol kan kristazibəəzannɔ vantɔɔ kɩ kʊ zɛʊrɛ

¹Dɔɔraa bueeresi cenle jɛ ʊ, mɔɔ m bɔ, m m ya, m ta Zerizalɛm ʊ kan Barnabas kɩ, mɔɔ Tiitɩ gaa m ta m kan m kɩ sɔ. ²Woso y’a hɩ mɔɔ m hɔhɩnkarɛ nɔ ʊ, a ʊ, mɔɔ n ta, bɩ minto m mɔɔ n ta. Kʊ wɔɔ yaa lee ku bɩ, mɔɔ lemim nyɩnta kʊ mɔɔ n’a pa dam do vantɔɔ barla bɩ sa, m a dɩnda ŋ nɩ. Mɔɔ sokʊma ba kan lɛɛzannɔ wɔɔ kɩ a minto m a dɩnda ŋ nɩ sɔ, kʊ zi kʊ mɔɔ ba kan zi kʊ mɔɔ n’a bam bɩ kɩ bɩ bɔ vam y. ³Baa mɔɔ zukuuzaa Tiitɩ kʊ grɛkkɩ gʊaa m bɩ, ŋ n a ka ma k’a paŋŋa ba ma k’an gasʊ baŋŋʊ ʊ y. ⁴A n bɔkarɛ gʊɔɔ a da wɔɔ zi ŋn’a hɩrɛ a ma kristagʊɔɔ bɩ ŋʊaarzannɔ m, brɔɔ a nyasʊ kɔɔkɔɔ kʊ Tiitɩ n gasʊ baŋŋʊ ʊ. A da ŋ y’a ʊ wɔɔ zi k’a soamɩŋŋaʊ kʊ Krista Yeezuu a ka wɔɔ ʊ bɩ sɩnsɩɩ, a ŋʊa ŋ y’a ʊ k’a a ya, a wɔɔ da lɔmbaa ma. ⁵Wɔɔ n yɛ ŋ ma y, wɔɔ n’ʊ ka ma k’ʊ kʊ ma kan ŋ kɩ baa poore tɔkkɛ y, a ba wɔɔ ʊ ncɩnaaʊ, kʊ sɩra k’a nɩ lemim nyɩnta bɩ nɔ ʊ bɩ m bɩr a bɩncɛ ʊ. ⁶Kʊ lɛɛzannɔ wɔɔ m, ŋ lɛɛzaabaa mim n pakra ba mɔɔ ma y, bala, Woso bɩr gʊɔɔ jirə bɔrɛ y. Ncɩnaaʊ nɩ, lɛɛzannɔ wɔɔ n mɔɔ da hɔsɩ vanta barɛ ma lemim nyɩnta bɩ pa darɛ nɔ ʊ y. ⁷Bɩ, ŋ yɛ ŋn’a dɔ ŋ ʊ, Woso mɔɔ da ʊ kʊ m lemim nyɩnta pa da do vantɔɔ gʊɔɔ m, amba Woso Pɩyɛɛr da ʊ k’an a pa da zɩɩfʊrɔ m bɩ m. ⁸Bala, Woso k’a Pɩyɛɛr bɔ ʊ, an a nyɔɔ zɩɩfʊrɔ ma bɩ, Woso bɩ do ɩ mɔɔ bɔ ʊ sɔ, an mɔɔ nyɔɔ do vantɔɔ gʊɔɔ zi. ⁹Kristagʊɔɔ wɔɔ nyɩnta ŋn’ɩ dɩgam Zakkɩ kan Sefas kɩ Zaan kɩ ma a lɛɛzannɔ, brɔɔ yɛ ŋn’a dɔ ŋ ʊ Woso a barka ka mɔɔ ʊ, kʊ mɔɔ n zi bɩ ba denter. A m naa, ŋnɩ mɔɔ wɔ nyasʊ, k’a hɩnka a ʊ, kʊmarɛ ɩ wɔɔ bire ʊ, kʊ wɔɔ m ta do vantɔɔ wɔɔ zi, kʊ ŋ bɔɔm n ta zɩɩfʊrɔ wɔɔ zi. ¹⁰Bɩ, hɔ kʊ ŋ y’a cɩnta bɩ, ŋ ʊ, ʊ ʊ da ŋʊazannɔ han, bɩ kʊ hɔ bɩ do nɩ, mɔɔ ba denter.

Pol kan Pɩyɛɛr kɩ mim Antɩyɔs kʊ ʊ

¹¹Bɩ, Sefas k’a bɩ bʊr Antɩyɔs ʊ bɩ, mɔɔ ba kan kɩ gʊaa haay lɛɛ, k’a kʊrɔ ma bɩ tɔ ma. ¹²Bala nyɩnta a ʊ, an nɩ hɔ bɩm kan do vantɔɔ gʊɔɔ kɩ, bɩ ma bɩ, Zakkɩ gʊɔɔ nyɔɔ bɩ ŋnɩ lee ku cɩna y. Kʊ ŋ bɩ lee ku bɩ, an a da a ra, an a gʊ ŋ ma an jɩm a hɔ, nyi k’a n’a bam zɩɩfʊrɔ kʊ ŋ ʊ, do vantɔɔ gʊɔɔ m gasʊ baŋŋʊ ʊ rɔ wɔɔ m bɩ minto. ¹³Zɩɩfʊrɔ kʊ kristagʊɔɔ m ŋnɩ nyɩnta b’ʊ kan kɩ rɔ wɔɔ n a hɔbaa sa sɔ, naa n a ka Barnabas mɩŋŋa n gasʊ ŋ hɔɔn hɩɩya-hɩɩya zibəə b’ʊ. ¹⁴Kʊ mɔɔ ŋ yɩ ŋ bɩr zum sɩra k’a nɩ lemim nyɩnta b’ʊ tɩrga bɩ, mɔɔ hɩ Sefas m gʊaa haay lɛɛ mɔɔ ʊ: «Ɩbɩɩ k’ɩ n zɩɩfʊ bɩ, k’ɩbɩɩ n’ɩ mɩsɩrbaa bam am do vantɔɔ gʊɔɔ hɔ bɩ m bɩ, ɩ bɩr a bam am zɩɩfʊrɔ hɔ m bɩ, a a ba lɔ ɩbɩɩ n’a ŋʊam k’ɩ paŋŋa ba do vantɔɔ gʊɔɔ wɔɔ ma kʊ ŋ n’a mɩsɩrbaa ba am zɩɩfʊrɔ hɔ nɩ?»

¹⁵Zɩɩfʊrɔ m wɔɔ m, wɔɔ zɩrɔ ɩ nyɩnta maam, do vantɔɔ gʊɔɔ kʊ ŋ nɩ Woso lɛrɔ dɔ rɔ bɛɛ n wɔɔ nɩ y. ¹⁶Bɩ, wɔɔ dɔ ʊ ʊ, gʊaa b’a dam ma an yɩ tɩrga Woso mɩm ʊ Moyiisi lɛrɔ zibəəro barɛ minto y, sɩra ka Yeezuu Krista ʊ nɩ gʊaa bam tɩrga bala. Sɩra wɔɔ ka Krista Yeezuu ʊ sɔ kʊ Woso n’ʊ ba tɩrga a tɔ ma, bɩ lɛrɔ zibəəro tɔ ma bɛɛ y, bala, n bɩ gɔsɩ bam tɩrga lɛrɔ zuure tɔ ma y. ¹⁷Wɔɔ, ʊ ka wɔɔ nawʊm ma kʊ n n’ʊ ba tɩrga Krista tɔ ma, an bɔkarɛ an nɩ yɩrɛ ɩ ʊ, ʊ ba wɔɔ ʊ mimbʊnyaabənno sɔ am do vantɔɔ gʊɔɔ m. K’a maam Krista bɩ mimbʊnyaa zi an n’a bam na? Ayy… fɩɩga! ¹⁸Bala, kʊ mɔɔ lɛrɔ wɔɔ zuure to k’a b’a dam ma an gʊaa ba tɩrga Woso mɩm ʊ bɩ minto, kʊ mɔɔ n ya m m bɔ kʊ m zu ʊ, mɔɔ nɩ m bam lɛrɔbɩsɩkamazaa kɛɛrɛ. ¹⁹Bɩ kʊ mɔɔ mɩŋŋa m, lɛrɔ wɔɔ minto bɩ, mɔɔ bɩr m mɩsɩrbaa bam lɛrɔ wɔɔ tɔ ma dɔ y, kʊ m m da ma m m mɩsɩrbaa bɩ ba Woso tɔ ma. Kʊ n Krista wɔ gɔdarkʊra ma bɩ, mɔɔ ga kan kɩ. ²⁰Mɩsɩrbaa kʊ mɔɔ n ta m naa, mɔɔ bɛɛ m ta nɩ y, Krista n a mɩsɩrbaa bam mɔɔ ʊ. Mɩsɩrbaa kʊ mɔɔ n’a bam her-her naa, a ba mɔɔ nawʊm sɩra ka Krista ʊ nɔ ʊ, a m Woso Nyɩ, an mɔɔ ŋʊa an yɛ an ga mɔɔ tɔ ma. ²¹Mɔɔ bɩr Woso barka bɩ bam hɔ nɩbɩr y, bala, k’a ɩ yɩrɛ ɩ ʊ, lɛrɔ wɔɔ tɔ ma gʊaa a da ma an yɩ tɩrga Woso mɩm ʊ, k’a maam, Krista bɩ ga a ʊ vam.

Zaa kʊ Woso a sa k’a gʊaa bʊmbɔ

¹Aba! Galasii zannɔ, hɔɔnwarzannɔ. Nka ɩ wɔ ʊ an awɔɔ hɔɔn wusigə ncɩnaaʊ? A n bɔkarɛ n y’a hɩnka awɔɔ m mɩŋŋa, a dɔ a ʊ, Yeezuu Krista ga gɔdarkʊra ma. ²Kʊ m laaka da a han wa: Lɛrɔ wɔɔ zuure minto y’a ka Woso n a Ɛspri bɩ ka awɔɔ ʊ ra, gɛɛ zu k’awɔɔ ʊ sɩrakarɛ lemim b’ʊ bɩ minto nɩ? ³Bɔ yarmabaa m naa? Woso zuure bɩ sɩŋŋɩda sa awɔɔ ʊ Woso Ɛspri paŋŋa m, a bɔkarɛ an n’a ŋʊam kɛɛrɛ k’a nyambʊr a mɛsim paŋŋa m na? ⁴Ziro kʊ Woso ŋ ba awɔɔ mɩsɩrbaa nɔ ʊ rɔ wɔɔ, bɔ ŋ y’a ʊ vam kan awɔɔ kɩ ra? Mɔɔ y’a gɩngam mɔɔ ʊ, ŋ bɩ vam kan awɔɔ kɩ sɩɩn! ⁵Kʊ Woso y’a Ɛspri karɛ awɔɔ ʊ, an nɩ hoserlo barɛ awɔɔ bire ʊ, naa ba an nawʊm lɛrɔ wɔɔ k’awɔɔ nɩ zure ŋ ʊ bɩ tɔ ma ra? Gɛɛ zu k’awɔɔ ʊ sɩrakarɛ lemim b’ʊ bɩ tɔ ma nɩ?

⁶K’a a yo Abraham n sɩra ka Woso ʊ, Woso n dɩga ma tɩrga a mɩm ʊ bɩ, ⁷k’a maam, k’a dɔ mɩŋŋa a ʊ, sɩrakənno wɔɔ n Abraham nyɩnɔ. ⁸A n ta ʊ sɔ bɩ, Wosoci bɩ lɛɛ ka an a hɩ hɔɔ a ʊ, Woso do vantɔɔ gʊɔɔ wɔɔ bam tɩrga a mɩm ʊ ŋ sɩrakarɛ tɔ ma, bɩ minto m Woso n lemim nyɩnta naa do hɩ Abraham m, a ʊ: ‹Tara burə gʊɔɔ do haay barka yɩrɛ ɩbɩɩ tɔ ma.› ⁹Ncɩnaaʊ nɩ, gʊɔɔ kʊ sɩrakənno m nɔ wɔɔ nɩ barka yɩm kan sɩrakarɛzaa Abraham kɩ. ¹⁰Bɩ gʊɔɔ kʊ ŋ nɩ yom lɛrɔ wɔɔ ma rɔ wɔɔ, lerbɔrɛ kʊsɩ ɩ kan ŋ kɩ, bala, n y’a gʊrsɩra ba Wosoci b’ʊ, n ʊ: ‹Gʊaa k’a bɩr hɔ haay kʊ n y’a da lɛrɔ wɔɔ ci bɩ nɔ ʊ bɩ bam tee… bɩ, lerbɔrɛ kʊsɩ ɩ kan kɩ.› ¹¹Sɩra nɔ ʊ, gɔsɩ b’a dam ma an yɩ tɩrga Woso mɩm ʊ, lɛrɔ wɔɔ zuure tɔ ma y, bala, n y’a gʊrsɩra ba, n ʊ: ‹Gʊaa k’an tɩrga Woso mɩm ʊ sɩrakarɛ tɔ ma bɩ, a mɩsɩrbaa bam.› ¹²Lɛrɔ wɔɔ zaa bɩ y’a hɔ kan sɩrakarɛ zaa bɩ kɩ, bala, n ʊ: ‹Gʊaa k’a nɩ zum lɛrɔ wɔɔ ʊ haay bɩ nɩ mɩsɩrbaa yɩm.› ¹³Krista a mɩŋŋa ka n a zɛ wɔɔ tɔ ma, a ba a ʊ maam k’a wɔɔ bʊmbɔ lɛrɔ wɔɔ lerbɔrɛ kʊsɩ nɔ ʊ, a mɩŋŋa ɩ sompi wɔɔ bɩncɛ ʊ an lerbɔrɛ kʊsɩ bɩ yɩ, bala, Wosoci bɩ nɔ ʊ, n ʊ: ‹Lerbɔrɛ kʊsɩ ɩ kan gʊaa kʊ n y’a zeŋŋə gɔ ma bɩ kɩ.› ¹⁴Nyɩnta ʊ ncɩnaaʊ, kʊ do vantɔɔ gʊɔɔ wɔɔ m barka kʊ Abraham a yɩ bɩ yɩ Krista Yeezuu nɔ ʊ, k’an bɩr yɩrɛ ɩ ʊ, wɔɔ *Sɛnt-Ɛspri kʊ Woso a ler bɔ bɩ yɩ sɩrakarɛ tɔ ma.

Woso lerbɔrɛ kan lɛrɔ wɔɔ kɩ mim

¹⁵M danyɩnɔ, ʊ makra sa gʊɔɔ minkəm zibəə nɔ ʊ, kʊ gʊaa a hɔɔnhɔ da ci ʊ an a cɩnta, amba a a ga m bɩ nɩ, kʊ n a ba a zɛ kur, gɔsɩ bɩr hɔ k’a hɩ bɩ zaar barɛ, b’a bɩr hɔ nam ma sɔ y. ¹⁶A do m bɩ sɔ, lerbɔrɛrɔ wɔɔ bɔ Woso ʊ Abraham m kan a nyɩ bɩ kɩ m. N n a hɩ, n ʊ: «A nyɩnɔ y,» ɩ ʊ a hɩ n y’a ʊ nyɩnɔ hɔka ma y, ayy…, nyɩ bɩ deem, bɩ nyɩ bɩ, Krista m, bɩ n ʊ, k’a hɩ ma. ¹⁷Hɔ kʊ mɔɔ ʊ kʊ m a hɩ bɩ ba n nɩ: Woso lɛɛ ka an a hɔɔnhɔ hɩ an a cɩnta, dɔɔraa zorsi bukərku kur bɩ, n nɩ bɔkarɛ n nɩ bɔ lɛrɔ wɔɔ m, ncɩnaaʊ naa, lɛrɔ wɔɔ b’a dam ma ŋnɩ hɔ kʊ Woso lɛɛ ka an a hɩ bɩ zaar ba, ŋnɩ ler kʊ Woso a bɔ bɩ zaar ba sɔ wa. ¹⁸Bala, kʊ lɛrɔ wɔɔ zuure tɔ ma m gʊaa nɩ hɔjirle yɩm Woso zi, k’a maam Woso lerbɔrɛ tɔ ma bɛɛ dɔ y. A n bɔkarɛ ler kʊ Woso a bɔ bɩ y’a ka Woso n a barka ka Abraham ʊ.

¹⁹Kʊ ncɩnaaʊ m lɛrɔ wɔɔ zibəə n bɔ m kɛɛrɛ? Lɛrɔ wɔɔ ka Woso ʊ kʊ ŋ nɩ bɩr wɔɔ mimbʊnyaarɔ hɩnkam wɔɔ m, kʊ nyɩ kʊ Woso ler bɩ bɔ a tɔ ma bɩ n tolle ba an yɩ. Malɛɛkarɔ ɩ bʊr lɛrɔ wɔɔ m, gʊaa deem ɩ nyɩnta malɛɛkarɔ wɔɔ kan zɩɩfʊrɔ wɔɔ kɩ bire ʊ. ²⁰Lɛrɔ wɔɔ karɛ bɩncɛ ʊ, a yɩ pakra kʊ gʊaa n nyɩnta ʊ ŋ karɛ ma, bɩ ler bɩ bɔrɛ bɩncɛ ʊ, Woso mɩŋŋa mim m bɩ a deem.

²¹Naa k’a hɩ a ʊ, lɔ? Lɛrɔ wɔɔ bɩsɩ ŋn’a kam Woso lerbɔrɛrɔ wɔɔ ma ra? Ayy…, a bɛɛ m naa y. Bala, kʊ yɩ an nawʊrɛ ɩ ʊ, lɛ niŋŋə n ta ʊ, gʊɔɔ n’a dam ma ŋnɩ mɩsɩrbaa yɩ a tɔ ma, k’a maam lɛ bɩ do n’a kam gʊɔɔ n yɩ tɩrga Woso mɩm ʊ sɔ. ²²Bɩ, Wosoci b’a hɩ a ʊ, mimbʊnyaa paŋŋa y’a so durnya gʊɔɔ ʊ jilli. Maam bɩ, gʊɔɔ kʊ ŋ sɩra ka rɔ wɔɔ hɔ kʊ Woso a ler bɔ bɩ yɩ, sɩra kʊ ŋ y’a ka Yeezuu Krista ʊ bɩ tɔ ma.

²³Dɔmɩm kʊ sɩrakarɛ zaa bɩ n bʊr cɩna bɩ, Moyiisi lɛrɔ wɔɔ ɩ wɔɔ ba a lɔnnɔ ŋn’ɩ dɔm wɔɔ ma, kʊ Woso n tolle ba an sɩrakarɛ zaa bɩ hɩnka. ²⁴Ncɩnaaʊ bɩ, lɛrɔ wɔɔ, dɔ ŋ y’a ʊ wɔɔ ma, kʊ Krista n tolle ba an bʊr, kʊ Woso n wɔɔ ba tɩrga a mɩm ʊ sɩrakarɛ tɔ ma. ²⁵Bɩ, kɛɛrɛ naa, sɩra ka Krista ʊ dɔmɩm m, lɛrɔ wɔɔ kʊ ŋ nyɩnta ŋn’ɩ dɔm wɔɔ ma bɩ, ŋ bɛɛ y’a so wɔɔ ʊ dɔ y. ²⁶Bala, awɔɔ woo… naa, Woso nyɩnɔ n’awɔɔ m, sɩra k’awɔɔ ka Krista Yeezuu ʊ bɩ tɔ ma. ²⁷Denter m, awɔɔ haay k’a batɛm si Krista nɔ ʊ bɩ, a mɩsɩrbaa n n’awɔɔ mɩsɩrbaa ʊ jilli. ²⁸Naa tɔ ma kɛɛrɛ bɩ, kʊ zɩɩfʊ n’ɩ mɩ, gɛɛ do vanta gʊaa n’ɩ mɩ, minsi bɛɛ n bɩ y, kʊ lɔ n’ɩ mɩ, gɛɛ soamɩŋŋaʊzaa n’ɩ mɩ, minsi bɛɛ n bɩ sɔ y, kʊ yar n’ɩ mɩ, gɛɛ lʊ n’ɩ mɩ minsi bɛɛ sɔ y. Bala, awɔɔ woo… naa, awɔɔ a ba deem Krista Yeezuu nɔ ʊ. ²⁹Kʊ Krista y’a so awɔɔ ʊ bɩ, k’a maam Abraham nyɩnɔ n’awɔɔ m, awɔɔ nɩ hɔjirle kʊ Woso a ler bɔ bɩ yɩm.

Lɛrɔ wɔɔ bɛɛ y’a so wɔɔ ʊ dɔ y

¹Hɔ kʊ mɔɔ ʊ kʊ m a hɩ bɩ ba n nɩ: Nyɩ k’a nɩ zɛm b’a so a zɩ hɔnyɩ ʊ bɩ, a nyɩbaa dɔmɩm ʊ, bɔ a ʊ kʊ ʊ kan lɔ kɩ, an bɔkarɛ a y’a so hɔnyɩ b’ʊ jilli. ²A nyɩbaa dɔmɩm ʊ, gʊɔɔ nɩ nyasʊm nɩ, ŋnɩ dɩgarɛ a mim woo… ma, kʊ dɔmɩm k’a zɩ b’a cɩnta k’an a so a hɔnyɩ b’ʊ bɩ n tolle ba an a ku. ³A do m bɩ sɔ kan wɔɔ kɩ, dɔmɩm kʊ wɔɔ n Krista dɔ cɩna bɩ, bɔ wɔɔ ʊ kʊ ʊ kan nyɩnɔ kɩ, dɔmɩm bɩ do ʊ bɩ, durnya paŋŋazannɔ kʊ gʊaa bɩr ŋ yɩm nɔ wɔɔ y’a so wɔɔ ʊ, ŋnɩ wɔɔ ba lɔnnɔ. ⁴Bɩ, dɔmɩm kʊ Woso a cɩnta bɩ k’a b’a ku bɩ, a a Nyɩ bɩ nyɔɔ, lʊ y’a yɩ. Yɩ a ʊ, dɔmɩm kʊ Israyɛl gʊɔɔ wɔɔ nɩ lɛrɔ wɔɔ zuure nɔ ʊ bɩ ma. ⁵K’a a da ma a gʊɔɔ kʊ lɔnnɔ m lɛrɔ wɔɔ minto rɔ wɔɔ yɔ, kʊ Woso n wɔɔ ba a nyɩnɔ. ⁶Kʊ Woso nyɩnɔ m wɔɔ m bɩ y’a ka, an a Nyɩ bɩ Ɛspri bɩ zer wɔɔ heerlɔ ʊ, wɔɔ n’ʊ dam ma Ɛspri bɩ tɔ ma, ʊ nɩ Woso birm, ʊ ʊ: «Ʊ Zɩ.» ⁷Ncɩnaaʊ bɩ, lɔnnɔ bɛɛ n’awɔɔ m dɔ y, Woso nyɩnɔ n’awɔɔ m, bɩ k’a nyɩnɔ n’awɔɔ m bɩ, awɔɔ n nɩ zɛm b’a so a hɔjirle b’ʊ, Woso n nɩ naa barɛ.

Pol hɔɔn ɩ kɔm Galasii zannɔ minto

⁸Nyɩnta k’awɔɔ ʊ biisi awɔɔ n Woso dɔ bɩ, zu awɔɔ nawʊm hɔɔ kʊ n n’a hɩrɛ ŋ ma wosoro, a a ba ŋ lɔnnɔ, bɩ hɔɔ wɔɔ duro, Woso bɛɛ nɩ ŋ mɩ y. ⁹Bɩ, kɛɛrɛ naa, awɔɔ Woso dɔ, an lɛ da bɩ, Woso awɔɔ dɔ, b’a a ba lɔ kɛɛrɛ, a a ya, a a bɔ k’a zu durnya paŋŋazannɔ kʊ gʊaa bɩr ŋ yɩm nɔ wɔɔ ʊ, k’a a ya, a a ba ŋ lɔnnɔ? Bɩ hɔɔ nɩbɩɩrɔ nɩ ŋ mɩ, ŋ ba paŋŋa nɩ y. ¹⁰Awɔɔ ɩ dɩgam dɔmɩnnɔ niŋŋoo ma dɔmɩm wɩsɩrɔ a yaadarɛ nɔ ʊ, an n’a bam maam sɔ kan monno niŋŋoo kɩ, hɔɔ niŋŋoo dɔmɩm kɩ, dɔɔraarɔ kɩ. ¹¹Awɔɔ mim naa ɩ mɔɔ da bɔŋ ʊ, ɩ b’a ka zi mɔɔ ba awɔɔ minto vam wa?

¹²M danyɩnɔ, a yɛ mɔɔ n nawʊrɛ awɔɔ han gʊta, amba mɔɔ m ba awɔɔ gʊaa deem bɩ, k’a mɔɔ hɔbaa sa sɔ. A zar bɛɛ awɔɔ ʊ mɔɔ ma y. ¹³Awɔɔ dɔ mɩŋŋa a ʊ, mɔɔ yaaba zɛrɛ sabaabʊ y’a ka mɔɔ n lemim nyɩnta pa da awɔɔ m, m lɛɛkarɛ zɛrɛ ma awɔɔ zi b’ʊ. ¹⁴K’awɔɔ bɩ to a kɔ mɔɔ yaaba bɩ tɔ ma bɩ, awɔɔ n mɔɔ bɔ ʊ y, b’awɔɔ n a si mɔɔ lɛɛ y. Bɩ mɔɔ si awɔɔ ʊ mɩŋŋa ɩ ʊ, Woso malɛɛka deem awɔɔ si, ɩ ʊ, Krista Yeezuu mɩŋŋa awɔɔ si. ¹⁵Heernyɔɔ k’awɔɔ n ta m biisi b’ɩ ka? Mɔɔ dɔ mɩŋŋa m ʊ, k’awɔɔ n’a dam ma, awɔɔ y’a mɩnyaarɔ waaŋ ʊ a ŋ ka mɔɔ ʊ dɔmɩm bɩ do ʊ. ¹⁶Bɩ kɛɛrɛ naa, m ba mɔɔ ʊ awɔɔ jɩm sɩra kʊ mɔɔ n’a hɩrɛ awɔɔ m bɩ minto ra?

¹⁷Gʊɔɔ kʊ ŋ nɩ ŋʊaar hɔ dɩndam nɔ wɔɔ, tʊntɔʊrɛ kʊ ŋ nɩ ta m kan awɔɔ kɩ naa, tʊntɔʊrɛ paan… bɛɛ y, a ka ŋ nawʊm ma k’a awɔɔ gʊ mɔɔ ma, k’awɔɔ n a tɔ ʊ kan a kɩ. ¹⁸A mɩŋŋa kʊ gʊɔɔ n bɩr ta tʊntɔʊrɛ m hɔ mɩŋŋa tɔ ma, b’a ga a ʊ m kʊ tʊntɔʊrɛ bɩ do n bɩr tam lɛɛ tee…, baa kʊ mɔɔ ɩ kan awɔɔ kɩ, gɛɛ kʊ mɔɔ ba kan awɔɔ kɩ b’ʊ y. ¹⁹Mɔɔ nyɩnɔ n’awɔɔ m, mɔɔ m ya m nɩ fɩr yɩm paan… m heer ʊ awɔɔ tɔ ma, m nɩ nyoosi bam am lʊ jɩsɩzaa hɔ bɩ m, kʊ m a ka k’awɔɔ n Krista mɩsɩrbaa yɩ paan…. ²⁰A ŋʊa mɔɔ nawʊm paan… kʊ m bɩr awɔɔ bire ʊ b’ʊ dɩɩtaa, kʊ m m meerbaa bɩ lʊr m a ba, bala, mɔɔ n a dɔ kʊ mɔɔ meer bɩ bam kan awɔɔ kɩ lʊnlɔ y.

Gʊaasɩbabaa hɩɩyɔɔ wɔɔ gʊɔɔ mim

²¹Awɔɔ k’a n’a ŋʊam kʊ lɛrɔ wɔɔ n a so a ʊ rɔ wɔɔ, k’a hɩ m m wa. Awɔɔ n hɔ kʊ lɛrɔ wɔɔ a hɩ bɩ ma ra? ²²N y’a gʊrsɩra ba Wosoci b’ʊ, n ʊ, Abraham nyɩnɔ yɩ hɩɩya, deem yɩ a ʊ kan Agaar kɩ, lɔ m bɩ, an deem yɩ kan Saara kɩ soamɩŋŋaʊzaa m bɩ. ²³Bɩ lʊ kʊ lɔ m bɩ nyɩ bɩ, yɩ b’ʊ amba gʊaa haay nɩ yɩm bɩ m, an bɔkarɛ, nyɩ kʊ soamɩŋŋaʊzaa b’a yɩ bɩ, Woso ɩ lɛɛ ka an a yɩrɛ ler bɔ. ²⁴Mim naa do naa, hɔ a ʊ k’a dɩnda wɔɔ m, a ba n nɩ: Lannɔ hɩɩyɔɔ wɔɔ, gʊaasɩbabaa hɩɩyɔɔ kʊ Woso ŋ da rɔ wɔɔ makra nɩ ŋ mɩ. Lɛɛkarɛ gʊaasɩbabaa makra m Agaar m. Gʊaasɩbabaa kʊ Woso a da Sinayii ci burə ʊ bɩ m, gʊɔɔ kʊ gʊaasɩbabaa bɩ do a so ŋ ʊ rɔ wɔɔ, lɔnnɔ nɩ ŋ mɩ. ²⁵Bala, Agaar bɩ, bɔ a ʊ kʊ ʊ, ɩ ʊ, Sinayii ci bɩ m, Araabɩrɔ kʊ ci bɩ do n ta ʊ, a bɔ kʊ ʊ sɔ ɩ ʊ, Zerizalɛm kʊnɔ k’an ta ʊ her-her naa m, bala, a ɩ lɔmbaa nɔ ʊ kan a gʊɔɔ wɔɔ kɩ sɔ. ²⁶Bɩ arzana Zerizalɛm bɩ, soamɩŋŋaʊzaa m bɩ, wɔɔ kʊnɔ bɩ m bɩ, bɔ a ʊ kʊ ʊ, ɩ ʊ, wɔɔ da m. ²⁷Bala, n y’a gʊrsɩra ba Wosoci ʊ, n ʊ:

Ɩbɩɩ k’ɩ n cɩna bɩ, ɩ heer nyɔɔ,

bala, ɩbɩɩ bɩr nyɩnɔ yɩm biisi y,

heernyɔɔ zee da,

ɩbɩɩ k’ɩ n nyoosibarɛ fɩr yɩ biisi bɩ,

bala, lʊ kʊ n kaanm m bɩ nyɩnɔ yɩm gʊta,

an lɛ da lʊ k’a zim n ta ʊ bɩ nyɩnɔ ra.

²⁸B’awɔɔ, m danyɩnɔ, amba Izakkɩ m bɩ, ler kʊ Woso a bɔ bɩ nyɩnɔ n’awɔɔ m. ²⁹Biisi bɩ, amba nyɩ k’a yɩ am gʊaa haay hɔ bɩ m bɩ nɩ fɩr kam nyɩ kʊ Woso Ɛspri a ka an yɩ bɩ ma bɩ, her sɔ naa, a maam sɔ. ³⁰Bɩ, bɔ n y’a hɩ Wosoci b’ʊ? N ʊ: ‹La lʊ kʊ lɔ m bɩ ra kan a nyɩ bɩ kɩ, bala, a n a ga m kʊ lɔ bɩ nyɩ bɩ n hɔjirle yɩ kan soamɩŋŋaʊzaa bɩ nyɩ bɩ kɩ y.› ³¹Ncɩnaaʊ bɩ, m danyɩnɔ, lɔ bɩ nyɩnɔ bɛɛ m wɔɔ nɩ y, lʊ kʊ soamɩŋŋaʊzaa n bɩ nyɩnɔ m wɔɔ m.

A b’a ya, a a ba lɛrɔ wɔɔ lɔnnɔ y

¹Krista bɩ, wɔɔ yɔ a ʊ, kʊ wɔɔ n’ʊ so ʊ mɩŋŋɔɔ ʊ paan…. Naa tɔ ma bɩ, k’a jɩm kɔɔkɔɔ, a b’a ya a to gɔsɩ n’a ba hɔ niŋŋə lɔnnɔ y.

²Mɔɔ mɩŋŋa Pol, mɔɔ ʊ kʊ m a hɩ a m, m ʊ, k’awɔɔ ʊ kʊ n a gasʊ baŋŋʊ ʊ, hɔ kʊ Krista a ba awɔɔ tɔ ma bɩ nyɔɔdʊ bɩ nyɩntaŋ ʊ dɔ y. ³Kʊ m m ya m so ra paan…, kʊ gʊaa a bɔ an gasʊ baŋŋʊ ʊ, k’an a dɔ a ʊ, pakra m k’an zu lɛrɔ wɔɔ ʊ haay. ⁴Awɔɔ k’a n’a kam ma k’a yɩ tɩrga Woso mɩm ʊ, lɛrɔ wɔɔ zuure tɔ ma bɩ, awɔɔ a gʊ Krista ma, a do awɔɔ ʊ Woso barka bɩ ma sɔ. ⁵Kʊ wɔɔ nɩ, a ta wɔɔ ʊ ʊ heer lɛ kʊ Woso n’ʊ ba tɩrga a mɩm ʊ sɩrakarɛ tɔ ma. Wɔɔ n’a mɩm dam Sɛnt-Ɛspri paŋŋa m bɩ n naa. ⁶Bala, kʊ wɔɔ ʊ zɛ kʊ ra kan Krista Yeezuu kɩ, kʊ wɔɔ gasʊ baŋŋʊ ʊ, gɛɛ kʊ wɔɔ n gasʊ baŋŋʊ ʊ, hɔsɩ bɛɛ m bɩ y, hɔ k’a a ga m bɩ, sɩrakarɛ m, an nɩ zi bam ŋʊarɛ nɔ ʊ.

⁷Biisi bɩ, awɔɔ ɩ tam lɛɛ mɩŋŋa Woso zaa bɩ ra, nka y’a ta awɔɔ m toore k’awɔɔ bɩ zu sɩra ʊ dɔ? ⁸Woso k’awɔɔ bir bɩ bɛɛ nɩ naa barɛ awɔɔ nɩ y. ⁹Bɔɔr deem y’a hɩrɛ a ʊ: «Nyʊnyɔɔ poore ɩ nyisi derm haay.» ¹⁰Kʊ mɔɔ nɩ, mɔɔ heer kookoo Zuuba tɔ ma awɔɔ mim bɩ bɩncɛ ʊ. Mɔɔ dɔ mɔɔ ʊ, awɔɔ hɔɔndarɛ yɩm deem kan mɔɔ hɔɔndarɛ bɩ kɩ. Bɩ, gʊaa k’a n’awɔɔ warm kʊ ma bɩ, Woso bɩ zaa hʊnhʊrm, baa kʊ nka m.

¹¹M danyɩnɔ, kʊ mɔɔ nɩ, mɔɔ bɩr baŋŋʊgasʊrɛ mim pa dam dɔ y, k’a pa mɔɔ n’a dam, gʊɔɔ bɩ fɩr kam mɔɔ ma dɔ y, bɩ ŋ bɩ kaanm Krista gɔdarkʊra zɛ bɩ m sɔ y. ¹²Gʊɔɔ kʊ ŋ n’awɔɔ warm kʊ ma rɔ wɔɔ, kʊ mɔɔ hɔɔnhɔ m, kʊ ŋ lɛ taa kʊ ŋ nɩ ta ŋn’aa mɩŋŋɔɔ bɔ am hɔbɩsɩ hɔ bɩ m, a pakra ba ŋ ma.

Mɛsim mɩsɩrbaa kan Sɛnt-Ɛspri mɩsɩrbaa kɩ

¹³M danyɩnɔ, k’awɔɔ nɩ, awɔɔ bir Woso ʊ k’awɔɔ n a so a mɩŋŋɔɔ ʊ, b’a bɩ yo soamɩŋŋaʊ bɩ do ma k’a mɛsim lɛtaamarɔ zi ba y. Bɩ k’a yɩ kʊ zibəənyɩnɔ ŋʊarɛ nɔ ʊ. ¹⁴Bala, lemim k’a so lɛrɔ wɔɔ ʊ haay bɩ ba n nɩ: «Ɩ mim ŋʊa amba ɩ ɩ mɩŋŋa ŋʊa bɩ m.» ¹⁵Bɩ k’awɔɔ y’a hɔ barɛ ɩ ʊ poohɔɔ n’a mɩ, an nɩ sɔ dɩndam kʊ ʊ, an nɩ kʊ kɩnkaansʊrɛ, k’a dundo a zi, kʊ n bɛɛ a kʊ nyam.

¹⁶Hɔ kʊ mɔɔ n’a hɩrɛ awɔɔ m bɩ ba n nɩ: K’a to kʊ Sɛnt-Ɛspri n ka a lɛɛ a mɩsɩrbaa nɔ ʊ, maam bɩ, awɔɔ b’a mɛsim lɛtaamarɔ barɛ y. ¹⁷Hɔ kʊ mɛsim lɛtaamarɔ n’a ŋʊam bɩ bɩr yɛm Sɛnt-Ɛspri ma y, Sɛnt-Ɛspri n’a ŋʊam sɔ bɩ bɩr yɛm mɛsim lɛtaamarɔ wɔɔ ma sɔ y, jɩnnɔ nɩ ŋ mɩ kan kʊ kɩ, maam bɩ awɔɔ b’a dam ma a a mɩŋŋɔɔ hɔɔnhɔ ba y. ¹⁸Bɩ, kʊ Sɛnt-Ɛspri ɩ karɛ awɔɔ lɛɛ a mɩsɩrbaa nɔ ʊ, k’a dɔ a ʊ, lɛrɔ wɔɔ bɛɛ y’a so awɔɔ ʊ dɔ y.

¹⁹Mɛsim zibəəro ɩ yɩm garga ra, ŋ ba n nɩ: Jaandarɛ m, lannɔ kan yaarɔ barɛ kɩ m, dintim zibəə haay m, ²⁰yaa da *wosobaawɔnnɔ m, nyɩsɩrɔ bɩrɛ m, sɔkʊm m, bakʊmarɛ m, jɩmbaa m, kan nɔmaa kɩ, ka a mɩŋŋa daahan ma m, gʊngʊrɛ m, bazɛkʊra m, ²¹kan mɩm bɩr gʊɔɔ hɔ ma kɩ, bɛɛmire waasɩ kɩ, kan hɔ bɩ maam-maam kɩ, kan zibəəro kʊ ŋ bɔ kʊ ʊ kan nawɔnnɔ kɩ. Kʊ m m ya m so ra, amba mɔɔ lɛɛ ka m awɔɔ bɔ zaa ʊ bɩ m, gʊɔɔ kʊ ŋ nɩ hɔɔ nɔɔn duro bam nɔ wɔɔ, ŋ bɩ gasʊm Woso cirbəə b’ʊ y.

²²Bɩ nyɩ kʊ Sɛnt-Ɛspri n’a dam gʊaa mɩsɩrbaa ʊ bɩ ba n nɩ: ŋʊarɛ m, kan heernyɔɔ kɩ, laafɩɩ kɩ, bʊraama kɩ, mɩŋŋabaa kɩ, bamɩŋŋa kɩ, taalɛra kɩ, ²³kan bʊgʊ-bʊgʊdabaa kɩ, kan da a mɩŋŋa ma kɩ. Lɛrɔ wɔɔ bɩr nyaa bam hɔɔ nɔɔn duro ma y. ²⁴Gʊɔɔ kʊ Krista a so ŋ ʊ rɔ wɔɔ, ŋ y’a mɛsim lɛtaamarɔ wɔɔ kan a hɔɔnhɔrɔ kɩ wɔ gɔdarkʊra ma. ²⁵Sɛnt-Ɛspri ɩ mɩsɩrbaa ka wɔɔ ʊ, bɩ minto bɩ, a a ga m k’an ka wɔɔ lɛɛ, ʊ mɩsɩrbaa nɔ ʊ. ²⁶Ʊ b’ʊ mɩŋŋɔɔ busu y, ʊ bɩ kʊ da nɔmaa ma y, ʊ bɩ jɩm ba kʊ ma y.

Ʊ kɔ kʊ ma

¹M danyɩnɔ, k’awɔɔ gʊaa yɩ an nɩ mimbʊnyaa bam, awɔɔ kʊ Sɛnt-Ɛspri nɩ karɛ a lɛɛ rɔ wɔɔ, k’awɔɔ n dundo zi a bɔ zaa ʊ, bɩ kʊ m a hɩ awɔɔ gʊaa biyəə m, gʊaa biyəə n dundo a zi k’a bɩ gasʊ kʊrɔma bɩ do ʊ sɔ y. ²K’a bɩr kɔm kʊ ma, a bɩr a dam kʊ han, k’awɔɔ y’a barɛ ncɩnaaʊ, lɛ kʊ Krista a cɩnta b’awɔɔ nɩ zuŋ ʊ. ³Kʊ gʊaa y’a hɔɔn darɛ a ʊ, hɔsɩ n’ a mɩ, an bɔkarɛ hɔsɩ bɛɛ n’a zaa nɩ, bra an n’a barɛ a mɩŋŋa m. ⁴Bɩ kʊ gʊaa biyəə n a hɔɔn da a mɩŋŋa zibəə ma an dɩga a, kʊ lɛbɔʊrɛ y’a nɔ ʊ, k’a n’a heer nyɔɔ kan a mɩŋŋa kɩ, b’a ba gɩnga gʊaa ma k’a heer nyɔɔ y. ⁵Bala, gʊaa biyəə n’a mɩŋŋa mim nyɩ bɔŋ ʊ Woso taa.

⁶Gʊaa kʊ n nɩ Woso lemim dɩndam nɩ b’a ga m, an hɔ haay k’an ta m bɩ bɔ ʊ an a ka hɔdɩndarɛzaa b’ʊ.

⁷A bɩ bra bɩmba a mɩŋŋɔɔ nɩ y, Woso bɩ yɛm gʊaa n yaa wʊ a ma y, bala, hɔ kʊ gʊaa a duu b’a n’a dam. ⁸Kʊ gʊaa a mɩŋŋa lɛtaamarɔ bʊnyaarɔ zibəəro duu, hɔ k’a n’a dam bɩ n zɛ m. Bɩ gʊaa k’a nɩ Sɛnt-Ɛspri hɔɔnhɔ zibəəro duum bɩ, hɔ kʊ Sɛnt-Ɛspri n’a kam bɩ an n’a yɩm, mɩsɩrbaa k’a nyarɛ ba ʊ m. ⁹Ncɩnaaʊ bɩ, ʊ bɩ kɔ kan zi mɩŋŋa barɛ kɩ y, ʊ bɩr tam lɛɛ tee…, bala, kʊ wɔɔ n kɔ y, wɔɔ y’ʊ zibəə bɩ nyɔɔdʊ yɩm, a dɔmɩm ʊ. ¹⁰Naa tɔ ma bɩ, kʊ wɔɔ nɩ toore n naa, ʊ zi ba gʊaa haay daahan minto, an lɛ da bɩ, ʊ a mɩŋŋa ba ʊ danyɩnɔ sɩrakarɛzannɔ wɔɔ m.

Meerbaa nyambʊrlɛ kan leersore kɩ

¹¹Kɛɛrɛ naa, mɔɔ nɩ gʊrsɩra bɩ barɛ m zim, bɩ minto m gʊrsɩranyɩ bɩ n gʊta-gʊta. ¹²Gʊɔɔ kʊ ŋ n’a hɩrɛ awɔɔ m, ŋ ʊ, a gasʊ baŋŋʊ ʊ rɔ wɔɔ, a ka ŋ nawʊm ma kʊ gʊɔɔ n’a yɩ, mɛsim hɔɔnhɔ tɔ ma. Ŋ lɛ baa k’a fɩr yɩ Krista gɔdarkʊra bɩ pa darɛ tɔ ma y. ¹³Bala, gʊɔɔ kʊ ŋ nɩ gasʊm baŋŋʊ ʊ rɔ wɔɔ mɩŋŋɔɔ bɩr zum lɛrɔ wɔɔ ʊ y. Ŋ nɩ bɔkarɛ, ŋn’a ŋʊam k’awɔɔ n gasʊ baŋŋʊ ʊ, k’a a da ma a a lɛ bɔ a mɩŋŋɔɔ ʊ k’awɔɔ yɛ a gasʊ baŋŋʊ ʊ. ¹⁴Kʊ mɔɔ nɩ, mɔɔ lɛbɔʊrɛ ba ʊ kʊ wɔɔ Zuuba Yeezuu Krista gɔdarkʊra bɩ bɛɛ y. Kan mɔɔ kɩ durnya bɩ hɔgər m Krista gɔdarkʊra bɩ tɔ ma, kan durnya bɩ kɩ sɔ, gər m mɔɔ m Krista gɔdarkʊra bɩ tɔ ma sɔ. ¹⁵Bala, kʊ gʊaa gasʊ baŋŋʊ ʊ, gɛɛ k’a n gasʊ baŋŋʊ ʊ, hɔsɩ bɛɛ n bɩ y, an lɛ da bɩ, yɩrɛdaa kʊ Woso n’a kam bɩ m. ¹⁶Gʊɔɔ kʊ ŋ nɩ zum hɔ kʊ mɔɔ hɩ naa do ʊ rɔ wɔɔ, kan Woso gʊɔɔ wɔɔ haay kɩ, kʊ Woso n laafɩɩ kan cicirzɛrɛ kɩ ka ŋ ʊ.

¹⁷A n a sa naa ma, gɔsɩ b’a ya an mɔɔ da kɔrɛ ma y, bala, mɔɔ ɩ fɩryɩrɛ jɩrɔ m m mɛ ma, an n’a hɩnkarɛ a ʊ, Yeezuu y’a so mɔɔ ʊ.

¹⁸M danyɩnɔ, bɩ kʊ wɔɔ Zuuba Yeezuu Krista barka n bɩr kan awɔɔ kɩ. Amina.