Efɛɛzɩ zannɔ

Ci kʊ Pol a ba

EFƐƐZƖ ZANNƆ

ma

Ci kʊ Pol a ba Efɛɛzɩ zannɔ ma bɩ

gasʊʊrɛ

Pol ɩ ci bɩ ba. A ba a ʊ Kolɔɔsɩ zannɔ ci bɩ barɛ dɔmɩm ʊ. Bɩ ma bɩ, a ɩ lɔnnɔcɛ ʊ Rɔm ʊ. A ba a ʊ, kristagʊɔɔ sokʊmarɔ ma Efɛɛzɩ ʊ kan a bɔlɛɛmarɔ kɩ ʊ.

Hɔɔ kʊ lemim nyɩnta bɩ n’a hɩnkam wɔɔ m Krista bʊmbɔrɛ k’a bʊrm bɩ zibəə nɔ ʊ b’a n’a dɩndam ci b’ʊ. A n a hɩnkarɛ a ʊ, gʊɔɔ kʊ ŋ nɩ Krista zuure nɔ ʊ rɔ wɔɔ, ŋ bʊmbɔrɛ yɩ, ŋnɩ mɩsɩrbaa paan… m, bala ŋ y’a zɛ kʊ ra kan Woso kɩ. A y’a hɩnkam ci bɩ nɔ ʊ sɔ a ʊ, kristagʊɔɔ haay deem, a n a ga m gʊngʊrɛ n nyɩnta ʊ ŋ gaa ma y. Bala, Krista mɛ n a gʊɔɔ wɔɔ m haay. Zɩɩfʊrɔ kan do vantɔɔ gʊɔɔ kɩ.

A y’a hɩnkarɛ a ʊ, a a ga m kʊ lemim nyɩnta hɔdɩndarɛ bɩ n nyɩnta kristagʊɔɔ mɩsɩrbaa nɔ ʊ. A a dɩnda ci bɩ nɔ ʊ, a ʊ, zoobarɛ kʊ kristagʊɔɔ n ta m bɩ, a ba bɛɛ ŋ nawʊm kan gʊɔɔ kɩ y, a ba ŋ nawʊm kan zinəro kɩ Sʊtaana kɩ.

Pol ɩ yaa dam Efɛɛzɩ zannɔ m

¹Mɔɔ mɩŋŋa Pol nɩ ci bɩ barɛ awɔɔ ma. Woso ɩ mɔɔ bɔ ʊ kʊ m yɩ Krista Yeezuu zibəəzaa. Ci bɩ ba mɔɔ nawʊrɛ awɔɔ ma, awɔɔ kʊ wosogʊɔɔ n’a mɩ, [an nɩ Efɛɛzɩ ʊ,] an nɩ yɛm Krista Yeezuu ma, an nɩ zɛkʊra m kan kɩ rɔ wɔɔ. ²A yɛ mɔɔ nawʊm kʊ wɔɔ Zɩ Woso kan Zuuba Yeezuu Krista kɩ n barka kan laafɩɩ kɩ ka awɔɔ ʊ.

Barka kʊ Woso a ka wɔɔ ʊ

Krista nɔ ʊ

³Ʊ Woso barka da, a m Zuuba Yeezuu Krista Zɩ.

A *Sɛnt-Ɛspri barka do haay ka wɔɔ ʊ arzana ʊ, Krista zɛkʊra nɔ ʊ.

⁴Woso lɛɛ ka an wɔɔ bɔ ʊ

Krista zɛkʊra nɔ ʊ,

bɩ ma bɩ, a n durnya da y,

wɔɔ bɔ a ʊ maam k’ʊ yɩ a gʊɔɔ,

kʊ minsi bɩ nyɩnta wɔɔ gʊr zi a mɩm ʊ y.

⁵K’a nɩ wɔɔ ŋʊam bɩ minto bɩ,

a a cɩnta hɔɔ tee…

kʊ wɔɔ n b’ʊ ba a nyɩnɔ

Yeezuu Krista tɔ ma,

naa a lɛ n taa a ŋʊarɛ bɩ tɔ ma.

⁶Ʊ ʊ lɛ bɔ Woso ʊ,

a barka k’an ta lɛbɔʊrɛ m bɩ tɔ ma,

a ka an nawʊm wɔɔ ʊ vam,

kʊ wɔɔ nɩ zɛkʊra m kan a Nyɩ ŋʊarɛzaa bɩ kɩ bɩ tɔ ma.

⁷Bala, Krista ma bɩ tɔ ma bɩ,

Woso wɔɔ bʊmbɔ,

an wɔɔ mimbʊnyaarɔ sugur ka wɔɔ ʊ.

A barka bɩ gʊtabaa tɔ ma m.

⁸A barka bɩ k’a ka wɔɔ ʊ gʊta bɩ minto bɩ,

a a ka wɔɔ nɩ mindɔrɛ m kan hɔɔn kɩ m.

⁹A a ka wɔɔ n a hɔɔnhɔ k’a nyaakʊm da bɩ dɔ,

hɔ k’a cɩnta biisi tee… k’a ba Krista nɔ ʊ bɩ m.

¹⁰Hɔ kʊ Woso a cɩnta k’a ba a nyambʊr dɔmɩm k’a bɔ ʊ bɩ ma bɩ,

a ɩ yɩrɛ ɩ ʊ, hɔ k’a nɩ brama haay kan hɔ k’a nɩ tara burə ʊ haay kɩ bɩ,

an n’a som kʊ ma kʊ Krista deem taan… n yɩ ŋ soʊrezaa.

¹¹Hɔ woo… ba Woso n nawʊm a hɔɔnhɔ ma,

bɩ y’a ka an lɛɛ ka an wɔɔ bɔ ʊ,

amba a lɛ n taa bɩ m,

kʊ wɔɔ n yɩ a gʊɔɔ.

Kʊ wɔɔ nɩ zɛkʊra m kan Yeezuu Krista kɩ bɩ tɔ ma m.

Ncɩnaaʊ nɩ, an wɔɔ hɔjirle ka wɔɔ ʊ.

¹²Naa ba a ʊ, kʊ gʊɔɔ n a lɛ bɔ a gʊtabaa ʊ wɔɔ tɔ ma,

wɔɔ kʊ wɔɔ lɛɛ ka ʊ Krista ta ʊ heer lɛ rɔ wɔɔ.

¹³A do n naa sɔ kan awɔɔ kɩ.

Krista nɔ ʊ, awɔɔ sɩra lemim bɩ ma, lemim nyɩnta k’a n’awɔɔ bʊmbɔm bɩ m.

Awɔɔ n sɩra ka Krista ʊ,

a m bɩ Woso n Sɛnt-Ɛspri k’a ler bɔ bɩ ka awɔɔ ʊ.

¹⁴Sɛnt-Ɛspri bɩ ka a ʊ wɔɔ ʊ,

k’a hɩnka a ʊ, a hɔ haay, k’a ler bɔ bɩ kam wɔɔ ʊ,

wɔɔ hɔɔ wɔɔ duro yɩm, dɔmɩm kʊ wɔɔ n bɩ bɔlɛm yɩŋ ʊ fasɩ b’ʊ.

Naa tɔ ma bɩ, ʊ ʊ lɛ bɔ Woso gʊtabaa ʊ.

Pol yaadarɛ

¹⁵Naa tɔ ma m, kʊ mɔɔ sɩra k’awɔɔ ka Zuuba Yeezuu ʊ bɩ mim ma bɩ, m a ma sɔ, n ʊ, awɔɔ ɩ wosogʊɔɔ wɔɔ haay ŋʊam bɩ, ¹⁶kʊ mɔɔ ɩ yaa dam Woso m awɔɔ tɔ ma, bɩ mɔɔ n’a barka dam awɔɔ minto dɔmɩm haay. ¹⁷A yɛ mɔɔ nawʊm wɔɔ Zuuba Yeezuu Krista Woso bɩ han, wɔɔ Zɩ k’a nɩ lɛbɔʊrɛ m gʊta bɩ, k’an mindɔrɛ ka awɔɔ ʊ, k’awɔɔ n a da ma a bɩr Woso dɔm, k’a b’a dɔ paan…. ¹⁸A yɛ mɔɔ nawʊm han sɔ, k’a n’awɔɔ hɔɔn gu a lɛɛgure bɩ m, k’awɔɔ n a da ma a taaheerlɛ k’awɔɔ bir ma bɩ dɔ, k’awɔɔ n a da ma a hɔnyɩ k’an a lɛbɔʊrɛ nɔ ʊ bɩ dɔ sɔ, hɔjirle hɔnyɩ k’awɔɔ nɩ zɛm b’a yɩ kan a gʊɔɔ wɔɔ kɩ bɩ m. ¹⁹A yɛ mɔɔ nawʊm sɔ, k’a n a ka k’awɔɔ n a paŋŋa gʊta k’a zi bam wɔɔ tɔ ma bɩ dɔ, wɔɔ kʊ sɩrakarɛzannɔ m wɔɔ m nɔ wɔɔ. K’awɔɔ n a paŋŋa bɩ gʊtabaa k’a cem haay dɔ. ²⁰Paŋŋa bɩ do Woso zi ba m an a hɩnka, Yeezuu Krista mɩm k’a a bɔ ʊ bɩ dɔmɩm ʊ, an a ka an nyɩnta a bɩsɩ ra arzana ʊ. ²¹A n a ka Yeezuu nɩ paŋŋazannɔ do haay burə ʊ, lɛɛzannɔ do haay, lɛɛsoʊrezannɔ haay, cirbəə do haay kɩ burə ʊ. A a ka an nɩ hɔ k’an ta ʊ her durnya naa ʊ gɛɛ booti m haay burə ʊ. ²²A a ka Krista n a so hɔ haay ʊ. A a ka an nɩ hɔ haay burə ʊ, an a ka an a ba a gʊɔɔ wɔɔ sokʊma minzaa. ²³Kristagʊɔɔ sokʊma bɩ m Krista mɛ. A mɩŋŋa n’a mɩsɩrbaa barɛ a gʊr zi jilli, Woso mɩŋŋa n’ɩ mɩsɩrbaa bam Krista mɩŋŋa gʊr zi jilli sɔ.

Woso wɔɔ mɩm bɔ ʊ Krista nɔ ʊ

¹Biisi bɩ, gəəno n’awɔɔ m, awɔɔ kʊrɔmarɔ kan a mimbʊnyaarɔ wɔɔ kɩ tɔ ma. ²A mɩsɩrbaa bɩ ba awɔɔ nawʊm am durnya gʊɔɔ hɔ bɩ m. A n nɩ zum paŋŋazannɔ kʊ ŋ nɩ warkʊ nɔ ʊ rɔ wɔɔ cir b’ʊ. Cir bɩ do bɩ, zinəro cir k’a nɩ zi bam kan gʊɔɔ kʊ ŋ nɩ bɩsɩ kam Woso ma kɩ bɩ m. ³Wɔɔ haay, wɔɔ nyɩnta ŋ barla sɔ, ʊ nɩ hɔɔ bʊnyaarɔ kʊ wɔɔ mɛsim lɛ n taa rɔ wɔɔ bam. Ʊ nɩ zure ʊ mɛsim lɛtaamarɔ bʊnyaarɔ wɔɔ ʊ, kan ʊ hɔɔndarɛrɔ bʊnyaarɔ wɔɔ kɩ ʊ. Kʊ wɔɔ n maam bɩ, gʊɔɔ kʊ Woso nɔmaa n n’a kərgure ŋ la rɔ wɔɔ m wɔɔ m, amba gʊɔɔ mɩsɩrɔ wɔɔ m.

⁴Bɩ, Woso cicirzɛrɛ bɩ gʊta maam-maam, k’a nɩ wɔɔ ŋʊam gʊta bɩ tɔ ma. ⁵Bɩ y’a ka, gɩnga kʊ wɔɔ ʊ, ʊ mimbʊnyaarɔ tɔ ma bɩ, a mɩsɩrbaa ka wɔɔ ʊ Krista zɛkʊra tɔ ma. Denter m, Woso barka bɩ tɔ ma m, awɔɔ n bʊmbɔrɛ yɩ. ⁶Kʊ wɔɔ ʊ zɛ kʊ ra kan Krista Yeezuu kɩ bɩ, Woso wɔɔ mɩm bɔ ʊ kan kɩ, an wɔɔ nyɩnta kan kɩ arzana ʊ, ʊ nɩ cirbəə bɩm kan kɩ. ⁷A ba a ʊ wɔɔ m mɩŋŋa ncɩnaaʊ Krista Yeezuu nɔ ʊ, k’a barka gʊtabaa hɩnka gʊɔɔ m, wakatɩ haay k’a nɩ zɛm nɔ ʊ. ⁸Bala, Woso barka bɩ tɔ ma m, awɔɔ n bʊmbɔrɛ yɩ sɩrakarɛ nɔ ʊ. Awɔɔ mɩŋŋɔɔ minto bɛɛ y’a ka awɔɔ n bʊmbɔrɛ yɩ y, Woso ganwʊrɛ m an a ka awɔɔ ʊ vam. ⁹Awɔɔ zibəəro tɔ ma bɛɛ y, ncɩnaaʊ bɩ, gɔsɩ b’a dam ma an a lɛ bɔ a mɩŋŋa ʊ y. ¹⁰Bala, Woso ɩ wɔɔ da, wɔɔ da a ʊ, Krista Yeezuu zɛkʊra nɔ ʊ, kʊ wɔɔ n’ʊ mɩsɩrbaa ba zibəəro mɩŋŋɔɔ barɛ nɔ ʊ gʊta, Woso mɩŋŋa ɩ lɛɛ ka an zibəəro wɔɔ duro banka kʊ wɔɔ n bɩ ŋ ba.

Wɔɔ ʊ ba deem Krista zɛ bɩ tɔ ma

¹¹Naa tɔ ma bɩ, k’a tɔ da a nɔ ʊ, a ʊ: awɔɔ, kʊ zɩɩfʊrɔ bɛɛ n’awɔɔ m nɔ wɔɔ, biisi bɩ, awɔɔ zɩɩfʊrɔ wɔɔ n’a hɩrɛ a ma ŋ ʊ, awɔɔ n gasʊ baŋŋʊ ʊ y. Ŋ n’a hɩrɛ a mɩŋŋɔɔ ma ŋ ʊ, a gasʊ baŋŋʊ ʊ, kʊ ŋ nɩ makra n a mɛ ma bɩ tɔ ma. ¹²Dɔmɩm kʊ ŋ nɩ naa hɩrɛ awɔɔ ma bɩ, awɔɔ laatʊ Krista ma, awɔɔ ba gʊɔɔ kʊ Woso ŋ bɔ ʊ rɔ wɔɔ barla y, nyɩnta awɔɔ ʊ saanɔɔ. Gʊaasɩbabaarɔ kʊ Woso ŋ da a gʊɔɔ wɔɔ ma, an ler bɔ ŋnɩ bɩ, awɔɔ n nyɩnta ŋ nɔ ʊ y. Nyɩnta k’awɔɔ ʊ a n’a mɩsɩrbaa bɩ bam durnya nɔ ʊ bɩ, awɔɔ ba taaheerlɛ nɩ, b’awɔɔ n Woso dɔ sɔ y. ¹³Kɛɛrɛ naa, awɔɔ k’a nyɩnta laatʊ Woso ma bɩ, Krista Yeezuu zɛkʊra bɩ nɔ ʊ, awɔɔ a zɔ Woso ma, Krista ma bɩ tɔ ma. ¹⁴Bala, Krista mɩŋŋa ɩ bʊr laafɩɩ m an ba ka wɔɔ ʊ, a zɩɩfʊrɔ kan do vantɔɔ gʊɔɔ kɩ zɛ kʊ ra an ŋ ba do deem. K’a yɛ an ga gɔdarkʊra ma bɩ tɔ ma bɩ, a sɔkʊm k’a nɩ ŋ bire ʊ am pəŋŋə hɔ bɩ m, an nɩ ŋ gʊngʊm kʊ ma bɩ zaar ba. ¹⁵A zɩɩfʊrɔ lɛrɔ wɔɔ, kan ŋ damarɔ kɩ, ŋ sʊfɔrɔ kɩ ci zɛ, k’a ka kʊ do hɩɩyɔɔ nɔɔm n a ba do deem taan… a mɩŋŋa zɛkʊra nɔ ʊ. A ba a ʊ ncɩnaaʊ, an ŋ zɛ kʊ ra laafɩɩ nɔ ʊ. ¹⁶Krista sɔkʊm zaar ba, ga k’a ʊ gɔdarkʊra ma bɩ dɔmɩm ʊ. A zɛ bɩ tɔ ma bɩ, a do hɩɩyɔɔ wɔɔ zɛ kʊ ra, an ŋ ba mɛ deem, an ŋ zɛ kʊ ra kan Woso kɩ. ¹⁷Ncɩnaaʊ nɩ, Krista n bʊr an laafɩɩ pa da awɔɔ m, awɔɔ kʊ zɩɩfʊrɔ bɛɛ n’a mɩ, an laatʊ Woso ma biisi rɔ wɔɔ. Bʊr a ʊ sɔ k’a laafɩɩ bɩ pa da zɩɩfʊrɔ m, brɔɔ kʊ ŋ nɩ jɩnjɛɛm Woso ma rɔ wɔɔ. ¹⁸Krista mɩŋŋa barka tɔ ma m, zɩɩfʊrɔ kan do vantɔɔ gʊɔɔ kɩ, wɔɔ n’ʊ dam ma, ʊ ʊ zɔ Woso ma Sɛnt-Ɛspri deem nɔ ʊ.

¹⁹Bɩ y’a ka awɔɔ kʊ zɩɩfʊrɔ bɛɛ n’awɔɔ m nɔ wɔɔ, saanɔɔ bɛɛ n’awɔɔ m dɔ, bɩ lɛɛ laatʊrɛ gʊɔɔ bɛɛ n’awɔɔ m sɔ y. Awɔɔ ɩ wosogʊɔɔ wɔɔ barla, Woso hargʊɔɔ n’a mɩ. ²⁰Awɔɔ sɔ, awɔɔ bɔ kʊ ʊ kan cɛ kʊ n n’a dɔm kɩ, n n’a dɔm cɛjɩr kʊ kristazibəəzannɔ wɔɔ kan wosolɛsinnɩsorazannɔ wɔɔ kɩ n a cɩnta bɩ ra, cɛ bɩ jɩr jaa wɩsɩ bɩ m Yeezuu Krista mɩŋŋa m. ²¹A mɩŋŋa n’a kam cɛ bɩ jaarɔ wɔɔ nɩ kʊ nyasʊm kɔɔkɔɔ, cɛ bɩ nɩ derm tee… an bɩ zɛm b’a ba Wosocɛ, Zuuba zɛkʊra nɔ ʊ. ²²Zɛkʊra k’awɔɔ n ta m kan Yeezuu Krista kɩ b’a ka, cɛ kʊ n n’a dɔm bɩ, awɔɔ n sɔ, k’a b’a ba cɛ kʊ Woso n a nɔ ʊ a Sɛnt-Ɛspri m.

Zibəə kʊ Woso Pol da ʊ

¹Naa tɔ ma m mɔɔ nɩ yaa darɛ awɔɔ tɔ ma. Mɔɔ mɩŋŋa Pol, awɔɔ kʊ do vantɔɔ gʊɔɔ n’a mɩ rɔ wɔɔ, mɔɔ du n y’a ʊ Krista tɔ ma awɔɔ daahan minto. ²Zibəə kʊ Woso mɔɔ da ʊ a barka tɔ ma, kʊ mɔɔ n a ba m m da awɔɔ han k’a hɔɔnhɔ n kʊ yɩ awɔɔ gʊr zi bɩ, awɔɔ zibəə bɩ do mim ma mɩŋŋa. ³Gɩnga kʊ Woso n ta m an a nyaakʊm da bɩ, a a hɩnka mɔɔ m kʊ mɔɔ n a dɔ. A mim mɔɔ dɩnda awɔɔ m ci bɩ nɔ ʊ poore m cem bɩ. ⁴K’awɔɔ ci kʊ mɔɔ ba awɔɔ ma naa karɩnda ba, awɔɔ y’a dɔrɛ a ʊ, mɔɔ Krista mim k’a nyaakʊm da bɩ dɔ mɩŋŋa. ⁵Biisi bɩ, Woso n Krista mim k’a nyaakʊm da bɩ hɩnka gɔsɩ nɩ y, bɩ kɛɛrɛ naa, Woso mim bɩ do hɩnka a zibəəzannɔ m, kan a lɛsinnɩsorazannɔ wɔɔ kɩ m Sɛnt-Ɛspri m. ⁶Krista mim k’a nyaakʊm da Woso n a hɩnka bɩ ba n nɩ: A ɩ yɩrɛ ɩ ʊ, do vantɔɔ gʊɔɔ kʊ ŋ y’a zɛ kʊ ra kan Krista kɩ lemim nyɩnta bɩ tɔ ma bɩ, brɔɔ hɔjirle kʊ Woso a cɩnta zɩɩfʊrɔ wɔɔ m bɩ yɩm sɔ kan ŋ kɩ. Ŋ y’a ba hɔdeem kan zɩɩfʊrɔ wɔɔ kɩ, ler kʊ Woso a bɔ Krista nɔ ʊ bɩ, ŋ woo… hɔ m.

⁷Woso barka bɩ tɔ ma m, mɔɔ n ganwʊrɛ yɩ, m m ba lemim nyɩnta bɩ zibəənyɩ, Woso y’a paŋŋa zi ba an yɩ mɔɔ ma ncɩnaaʊ. ⁸Mɔɔ m wosogʊɔɔ wɔɔ poorero wɔɔ poore, baa kan naa kɩ haay, Woso gan wʊ mɔɔ ma. Kʊ mɔɔ m hɔɔ mɩŋŋɔɔ kʊ ŋ nɩ Krista nɔ ʊ, bɩ ŋ tɛkka ba ʊ rɔ wɔɔ pa da do vantɔɔ gʊɔɔ wɔɔ m. ⁹Kʊ m a ka, kʊ gʊɔɔ m hɔ kʊ Woso a nyaakʊm da biisi bɩ kʊ yɩrɛ zaa dɔ. Woso mɩŋŋa ɩ hɔ haay da, a ɩ hɔ naa do nyaakʊm da sɔ biisi tee…. ¹⁰Woso bɩ, naa do ba a ʊ, kʊ paŋŋazannɔ kan paŋŋasoʊrezannɔ haay kʊ ŋ nɩ brama rɔ wɔɔ kɩ n Woso mindɔrɛ k’a zaa n hɔka bɩ dɔ kɛɛrɛ kristagʊɔɔ sokʊma bɩ tɔ ma. ¹¹Naa ba Woso ʊ, bala, a a cɩnta hɔɔ laatʊ, bɩ ma bɩ durnya ba ʊ y, k’a hɔɔnhɔ naa do ba wɔɔ Zuuba Yeezuu Krista nɔ ʊ. ¹²Kʊ wɔɔ ʊ zɛ kʊ ra kan Krista kɩ ʊ sɩra ka ʊ bɩ, wɔɔ ɩ lɛ m k’ʊ zɔ Woso ma kan heerkoodəbaa kɩ. ¹³Naa tɔ ma bɩ, a yɛ mɔɔ nawʊrɛ awɔɔ han k’a b’a heer zar kʊ mɔɔ nɩ fɩryɩrɛ nɔ ʊ awɔɔ minto bɩ tɔ ma y. Mɔɔ fɩr bɩ yɩrɛ bɩ, a ka a nawʊm awɔɔ m lɛbɔʊrɛ yɩ.

Krista ŋʊarɛ dɔrɛ

¹⁴Naa tɔ ma m, mɔɔ nɩ kukurə zɛm Zɩ Woso taa. ¹⁵A mɩŋŋa har haay a to zi brama kan tara burə ʊ kɩ. ¹⁶A yɛ mɔɔ nawʊm han, a lɛbɔʊrɛ gʊtabaa tɔ ma bɩ, k’a n’awɔɔ paŋŋa da ra Sɛnt-Ɛspri m, k’a a da ma a bɩr paŋŋa m a heer nɔ ʊ. ¹⁷K’an a ka sɔ, kʊ Krista n nyɩnta awɔɔ heer ʊ sɩrakarɛ nɔ ʊ. A yɛ mɔɔ nawʊm sɔ, k’awɔɔ m məsi da a jɩm kɔɔkɔɔ kʊ ŋʊarɛ nɔ ʊ. ¹⁸Maam bɩ, awɔɔ wɔŋ ʊ kan wosogʊɔɔ wɔɔ kɩ haay, a Krista ŋʊarɛ gʊtabaa kan a jintəbaa kɩ, a hɛ kɩ, kan a nɔyaa kɩ jɩ dɔ. ¹⁹A yɛ mɔɔ nawʊm k’awɔɔ n a ŋʊarɛ bɩ dɔ, baa kʊ gɔsɩ b’a dam ma an a dɔ haay bɩ kɩ bɩ, k’awɔɔ n a dɔ, kʊ Woso mɩsɩrbaa jilli n’awɔɔ heer han.

²⁰Woso mɩŋŋa a da ma an hɔ woo… ba, an lɛ da hɔ haay kʊ wɔɔ n’a yɛm, gɛɛ ʊ n’ʊ hɔɔn dam ma bɩ ra, naa ba a nawʊm kan paŋŋa k’a nɩ zi bam wɔɔ gʊr zi bɩ kɩ m. ²¹Bɩ k’a tɔ m lɛbɔʊrɛ yɩ, kristagʊɔɔ sokʊma bɩ gʊr zi, Krista Yeezuu tɔ ma, wakatɩ haay nɔ ʊ, dɔmɩm haay. Amina!

Ʊ ʊ yo ʊ, ʊ bɩr deem

Krista zɛkʊra nɔ ʊ

¹Hɔ kʊ mɔɔ ʊ kʊ m a yɛ awɔɔ han kɛɛrɛ bɩ, ba n nɩ: awɔɔ dɔ a ʊ, mɔɔ du n y’a ʊ kʊ mɔɔ nɩ Krista zi bam bɩ tɔ ma. K’a mɩsɩrbaa ba amba Woso mɩŋŋa lɛ n taa, an awɔɔ bir ma bɩ m. ²K’a bɩr a mɩŋŋɔɔ zerm tee…, a bɩr bʊgʊ-bʊgʊ, a bɩr bʊraama m, k’a yɛ kʊ ma ŋʊarɛ nɔ ʊ. ³K’a a yo ʊ, a bɩr deem Sɛnt-Ɛspri zɛkʊra bɩ tɔ ma, laafɩɩ kan kʊ kɩ nɔ ʊ. ⁴Krista mɛ bɩ deem, Sɛnt-Ɛspri bɩ deem, taaheerlɛ hɔ kʊ Woso wɔɔ bir ma, k’ʊ b’a yɩ bɩ deem sɔ. ⁵Wɔɔ Zuuba bɩ deem, sɩrakarɛ bɩ deem, batɛm deem wɔɔ n’a sim, ⁶Woso deem, a m gʊaa haay Zɩ, a y’a so hɔ haay ʊ, an nɩ zi bam kan gʊaa haay kɩ, an nɩ gʊaa haay heer ʊ. ⁷Bɩ Woso barka ka wɔɔ gʊaa biyəə ʊ, Krista n a jir a hɔɔnhɔ ma. ⁸Naa do Wosoci b’a hɩ ma, a ʊ:

K’a der mim ʊ bɩ,

a lɔnnɔ gaa an ta ŋ nɩ,

an gan wʊ gʊɔɔ ma.

⁹N ʊ: ‹A der.› Naa jɩ n bɔ nɩ? Naa ʊ k’a hɩ, a ʊ, lɛɛ a ka an zer tara noom ʊ paan…. ¹⁰Gʊaa k’a zer bɩ, a mɩŋŋa ɩ der brama laatʊ, k’a nyɩnta hɔ haay nɔ ʊ, a ka kʊ ŋ nɩ yɩ mɩŋŋa fasɩ. ¹¹A ɩ gan wʊ gʊɔɔ ma. A a ka gɔsɩnnɔ n a ba a zibəəzannɔ, an a ka gɔsɩnnɔ m wosolɛsinnɩsorazannɔ. A n a ka nɔɔ m lemim nyɩnta padənno, an nɔɔrɔ ba a gʊɔɔ dundonno, hɔdɩndagʊɔɔnzannɔ m sɔ. ¹²A ba a ʊ ncɩnaaʊ, kʊ wosogʊɔɔ wɔɔ n a da ma ŋnɩ Woso zuure zibəə bɩ ba, kʊ Krista mɛ bɩ m ta lɛɛ sɩrakarɛ nɔ ʊ. ¹³Maam bɩ, wɔɔ tam lɛɛ haay. Ʊ sɩrakarɛ, kan Woso Nyɩ bɩ dɔrɛ kʊ wɔɔ n ta m bɩ kɩ n yɩ deem. Ʊ ma Woso zaa bɩ nɔ ʊ, ʊ bɩ bɔ kʊ ʊ kan Krista mɩŋŋa kɩ fasɩ. ¹⁴Ncɩnaaʊ bɩ, wɔɔ bɩ nyɩntam nyɩnɔ dɔ, ʊ ʊ mɩŋŋɔɔ to gʊɔɔ n bɩr ʊ yəŋŋəm jɩsa kan bɩsɩ kɩ a hɔdɩndarɛ haay nɩ y, ŋʊaarzannɔ m, bɩ ŋ bɩ wɔŋ ʊ dɔ ŋnɩ ŋʊaar ba wɔɔ m, wɔɔ n fɔ y. ¹⁵Bɩ, kʊ wɔɔ ɩ sɩra hɩm ŋʊarɛ nɔ ʊ, wɔɔ mam hɔ haay nɔ ʊ Woso zuure bɩ nɔ ʊ, ʊ tolle ba ʊ ʊ ba amba Krista m, a m minzaa. ¹⁶A mɩŋŋa tɔ ma m, mɛ bɩ vəŋŋəro wɔɔ jilli n kʊ nyasʊ ŋnɩ deem. Gʊaa mɛ kunəro n’a kam mɛ bɩ vəŋŋəro wɔɔ nɩ kʊ nyasʊm, mɛ bɩ n deem. Maam bɩ, kʊ mɛ bɩ vəŋŋə biyəə y’a zi bam, bɩ n’a kam mɛ bɩ n bɩr tam lɛɛ tee… an bɩr mam ŋʊarɛ nɔ ʊ.

Mɩsɩrbaa daa kʊ Krista a ka wɔɔ ʊ

¹⁷Hɔ kʊ mɔɔ n’a hɩrɛ awɔɔ m, m n’a yɛrɛ awɔɔ han Zuuba tɔ ma bɩ ba n nɩ: A b’a ya a mɩsɩrbaa bɩ ba am gʊɔɔ kʊ ŋ n Woso dɔ rɔ wɔɔ hɔ bɩ nɩ y, zu ŋ nawʊrɛ a hɔɔndarɛrɔ ʊ, ŋ bɩ hɔsɩ yɩm naa barɛ nɔ ʊ y. ¹⁸Monsigə y’a so ŋ hɔɔn ʊ, ŋ laatʊ mɩsɩrbaa kʊ Woso n’a kam bɩ ma. Bala, ŋ n hɔsɩ dɔ y, kʊ ŋ y’a heer ta bɩ tɔ ma. ¹⁹Nyannɩ bɩr ŋ zɛm fɩɩga y, a da ŋ y’a ʊ jaandarɛ lɛ ʊ, ŋnɩ dintim mɩsɩrbaa do haay bam, b’a nyannɩ ba ŋ nɩ y.

²⁰B’awɔɔ, mɩsɩrbaa naa do bɛɛ Krista a dɩnda awɔɔ nɩ y. ²¹A mɩŋŋa mim n y’a dɩnda awɔɔ m bɩ, kʊ kristagʊɔɔ n’awɔɔ m bɩ, n nɩ sɩra k’a nɩ Yeezuu nɔ ʊ bɩ dɩnda awɔɔ m. ²²Naa minto bɩ, awɔɔ a ga m, a a biisi mɩsɩrbaa bɩ to, a a bɔ a mɛsim k’a lɛtaamarɔ bʊnyaarɔ nɩ bra bɩmbarɛ awɔɔ m k’awɔɔ zaar ba b’ʊ. ²³K’a lʊrlɛ yɩ a heer kan a hɔɔn kɩ ʊ. ²⁴K’a mɩsɩrbaa daa kʊ Woso a ka awɔɔ ʊ bɩ ba. Woso ɩ mɩsɩrbaa bɩ do da an bɔ a mɩŋŋa rɛ, bɩ y’a ka mɩsɩrbaa bɩ do n tɩrga, an Woso nɔ yɩ, an sɩra sɔ.

²⁵Naa tɔ ma bɩ, a b’a ya, a ŋʊaar ba y. Gʊaa biyəə n sɩra hɩ a mim m, bala mɛ deem vəŋŋoo n wɔɔ m. ²⁶K’awɔɔ nɔ ma ʊ, a b’a ka a mimbʊnyaa ba y. A b’a nɔmaa bɩ to a nɔ ʊ gum n da nɩ y. ²⁷A bɩ zaa ka Sʊtaana ʊ, an bʊr a ra y. ²⁸Gʊaa k’a nɩ koor bam biisi bɩ, an a wɔ bɔ koorbaa b’ʊ k’an zi ba an a lɛɛmaa hɔ yɩ, maam bɩ, a y’a dam ma an hɔ yɩ, an n’a dam gʊaa k’a lɛ n taa daahan ma han. ²⁹Meerbaa bʊnyaa sɩ n a ga m an bɔ awɔɔ lɛ ʊ y, k’a meerbaa k’a n’a dam gʊɔɔ han, ŋnɩ ta lɛɛ sɩrakarɛ nɔ ʊ bɩ ba. K’a meerbaa mɩŋŋa ba, k’an a da gʊɔɔ kʊ ŋ n’a tʊr karɛ awɔɔ ma rɔ wɔɔ han. ³⁰A b’a ka a Sɛnt-Ɛspri heer zɛ ma y, Woso bɩ, a ka a ʊ awɔɔ ʊ, k’a a jɩ da wɔɔ ʊ, bɩ n’a hɩnkarɛ a ʊ, Woso y’a so awɔɔ ʊ, an n’a hɩnkam sɔ a ʊ, dɔmɩm ɩ zɛm Woso n bɩ wɔɔ yɔm fasɩ-fasɩ. ³¹A b’a to mim n bɩr a heer ʊ kan gʊaa kɩ y, a bɩ yɩ heerbusuzannɔ y, a bɩ nɔmaa ba y. A bɩ yɩ hany-hany zannɔ y, a bɩ sʊnsɔ wʊ y, k’a zi bʊnyaabarɛ do haay to. ³²Bɩ, k’a bɩr mɩŋŋa kan kʊ kɩ, a bɩr kʊ ŋʊam gʊta, a bɩr sugur kam kʊ ʊ, amba Woso sugur ka awɔɔ ʊ Krista nɔ ʊ bɩ m.

K’a mɩsɩrbaa ba leegure nɔ ʊ

¹K’a Woso hɔbaa dɩnda, bala, a nyɩnɔ n’awɔɔ m, an n’awɔɔ ŋʊam. ²K’a mɩsɩrbaa ba ŋʊarɛ nɔ ʊ amba Krista m. A ɩ wɔɔ ŋʊa, an a meeyaa ka wɔɔ tɔ ma, a mɩŋŋa a ka amba n tɩr hɔ zɛ n a ka Woso ʊ, an Woso nɔ yɩ bɩ m.

³Wosogʊɔɔ n’awɔɔ m, bɩ tɔ ma bɩ, an a ga m kʊ jaandarɛ mim, dintim do haay mim, lɛ n bɩr gʊaa hɔ zi mim n nyɩnta awɔɔ bire ʊ y, a bɩ sʊʊra ba ŋ ma sɔ fɩɩga y. ⁴A n a ga m sɔ, kʊ meerbaarɔ yaarsɩrɔ n bɔ a lɛ ʊ y, hɔɔnwar kan dɔkarɛrɔ meerbaarɔ kɩ y. A ga a ʊ m k’awɔɔ n bɩr barka yaa dam Woso m. ⁵K’a dɔ mɩŋŋa a ʊ, jaandənno, lannɔ gɛɛ yaarɔbənno, mɩnyɔɔzaa. Mɩnyɔɔzaa bɩ, wosobaawɔm yaadər m, bala, a hɔnyɩ ŋʊa an lɛ da Woso ra. Nawɔnnɔ haay, ŋ gɔsɩ bɩ gasʊm Krista kan Woso kɩ cirbəə b’ʊ fɩɩga y.

⁶A n a ga m kʊ gʊaa n bra bɩmba awɔɔ m meerbaa vanvannɔ nɩ y. Naa woo… tɔ ma m, Woso nɔmaa n’a kərgum gʊɔɔ kʊ ŋ bɩr yɛm ma rɔ wɔɔ ra. ⁷Ncɩnaaʊ bɩ, a b’a zɛ kʊ ra kan ŋ kɩ y. ⁸Biisi bɩ, awɔɔ ɩ monsigə ʊ, bɩ kɛɛrɛ naa, awɔɔ ɩ leegure nɔ ʊ, k’awɔɔ a zɛ kʊ ra kan Zuuba kɩ bɩ tɔ ma. Ncɩnaaʊ naa, kʊ leegure gʊɔɔ n’awɔɔ m bɩ, k’a leegure mɩsɩrbaa ba. ⁹Bala, hɔ kʊ leegure nɩ zɛm nɩ bɩ, bamɩŋŋa m, kan tɩrgabaa zibəə kɩ, kan sɩra kɩ. ¹⁰K’a a yo ʊ, a hɔ kʊ Zuuba lɛ n taa bɩ dɔ, a bɔ kʊ zi. ¹¹A bɩ monsigə zibəəro wɔɔ ba sɔ y, ŋ nyɔɔdʊ ba ʊ y, k’a ŋ bʊnyaabaa bɩ hɩ garga ra. ¹²Hɔ kʊ gʊɔɔ wɔɔ duro n’a bam sɛɛrɛ bɩ, a hɩrɛ mɩŋŋa nyannɩ ta ʊ. ¹³Bɩ, hɔ haay k’ʊ n nɩ bɔrɛ a mim n garga ra bɩ, hɔ bɩ do ɩ yɩm fasɩ, ʊ n’a mim dɔm. ¹⁴Bala, hɔ haay k’a nɩ bɔm garga ra bɩ, a ba a nawʊm leegure. Bɩ y’a ka n a hɩ, n ʊ:

Ɩbɩɩ k’ɩ nɩ hinceem bam bɩ,

gu hinceem ma, wuti gəəno gaa ʊ,

kʊ Krista n lɛɛ gu ɩ m.

¹⁵Naa tɔ ma bɩ, k’a dundo mɩsɩrbaa k’awɔɔ n’a bam bɩ zi mɩŋŋa. A b’a mɩsɩrbaa bɩ ba hɔɔnwar nɔ ʊ y, bɩ k’a mɩsɩrbaa bɩ ba hɔɔntaʊrɛ nɔ ʊ. ¹⁶Bʊnyaabaa y’a so her dɔmɩnnɔ nɔɔ ʊ gʊta, bɩ tɔ ma bɩ, k’a a yo ʊ, a bɩr hɔ k’a ga barɛ m bɩ bam wakatɩ haay nɔ ʊ. ¹⁷A bɩ yɩ hɔɔnwarzannɔ a mɩsɩrbaa barɛ nɔ ʊ y, bɩ k’a a ka ma a hɔ kʊ Zuuba lɛ n taa k’awɔɔ n a ba bɩ dɔ.

¹⁸A bɩ dɩvɛn mi an a mɩm durgə y. Awɔɔ mɩsɩrbaa an n’a zaar bam. Bɩ, k’a to kʊ Sɛnt-Ɛspri n a a han. ¹⁹K’a kʊ paŋŋa da ra Woso lɛbɔʊrɛ laarɔ m: K’a laa lɔ laarɔ ciro wɔɔ ʊ, kan mim ma laarɔ wɔɔ kɩ, kan laa haay kʊ Sɛnt-Ɛspri a da a heer ʊ kɩ. K’a laarɔ wɔɔ lɔ a Zuuba da ʊ kan a heer kɩ haay. ²⁰Wakatɩ haay kan mim haay kɩ nɔ ʊ, k’a Zɩ Woso barka da, wɔɔ Zuuba Yeezuu Krista tɔ ma. ²¹K’a yɛ kʊ ma, k’awɔɔ nɩ Krista daŋ ʊ bɩ tɔ ma.

Lʊ kan a zim kɩ mim

²²Lannɔ wɔɔ, k’a yɛ a zino wɔɔ ma, amba awɔɔ nɩ yɛm Zuuba ma bɩ m. ²³Bala, lʊ minzaa n’a zim m, amba Krista n’a gʊɔɔ wɔɔ sokʊma bɩ minzaa bɩ m, Krista mɩŋŋa mɛ n’a gʊɔɔ wɔɔ sokʊma bɩ m, an a mɛ bɩ bʊmbɔrɛzaa. ²⁴Bɩ, amba kristagʊɔɔ wɔɔ sokʊma bɩ nɩ yɛm Krista mɩŋŋa ma bɩ, lannɔ wɔɔ k’a yɛ a zino wɔɔ ma sɔ hɔ haay nɔ ʊ.

²⁵Yaarɔ wɔɔ, k’a lannɔ wɔɔ ŋʊa, amba Krista a gʊɔɔ sokʊma bɩ ŋʊa an yɛ an a mɩŋŋa ka zɛ ma a tɔ ma bɩ m. ²⁶A a ba ʊ ncɩnaaʊ, k’a ka k’a gʊɔɔ wɔɔ sokʊma n yɩ mɩŋŋa fasɩ Woso mɩm ʊ. A gʊɔɔ wɔɔ sokʊma hu a bɔ hi m kan a lemim kɩ m. ²⁷A ŋʊa a ʊ, k’a gʊɔɔ sokʊma bɩ n bɩ jɩm a lɛɛ lɛbɔʊrɛ nɔ ʊ, hubɔrɛ nɔ ʊ, mɩŋŋabaa fasɩ nɔ ʊ, kʊ kʊrɔma sɩ, gɛɛ hɔ bʊnyaa sɩ bɩ yɩ ʊ a gʊr zi y, k’an bɩr Woso soʊhɔ fasɩ, minsi bɩ yɩ ʊ a gʊr zi y. ²⁸Yaarɔ wɔɔ a ga m sɔ, n n’a lannɔ wɔɔ ŋʊa ncɩnaaʊ, amba ŋn’a mɛ ŋʊam bɩ m. Gʊaa k’a n’a lʊ ŋʊam bɩ, a mɩŋŋa a n’a ŋʊam. ²⁹Gʊaa ba ʊ an nɩ sɔrɛ a mɩŋŋa mɛ nɩ y, nyasʊ a nawʊm nɩ, an n’a tʊrm, amba Krista n n’a barɛ a gʊɔɔ sokʊma bɩ m bɩ m. ³⁰K’a mɛ bɩ vəŋŋəro n wɔɔ m bɩ tɔ ma m, an nɩ nyasʊm wɔɔ m maam. ³¹N y’a da Wosoci ʊ, n ʊ: ‹Naa tɔ ma m, gʊaa n n’a gʊrɛ a zɩ kan a da kɩ ma, an a na a lʊ ma, ŋ gʊaa hɩɩya haay n a ba gʊaa deem.› ³²Mim naa do nɔyaa ta ʊ gʊta, mɔɔ ʊ kʊ m a hɩ m ʊ, Krista kan a gʊɔɔ sokʊma bɩ kɩ mim n y’a hɩ. ³³Bɩ, a hɩ n nawʊrɛ awɔɔ ma sɔ, gʊaayar biyəə n a lʊ ŋʊa amba a a mɩŋŋa ŋʊa bɩ m, kʊ lʊ biyəə n a zim da ʊ sɔ.

Nyɩnɔ kan a zɩrɔ kɩ mim

¹Nyɩnɔ wɔɔ k’a a zɩrɔ wɔɔ lɛ si, amba Zuuba lɛ n taa bɩ m, a ga a ʊ m. ²Lɛɛkarɛ lɛ kʊ Woso ler bɔ an a na ma bɩ ba n nɩ: ‹Ɩ zɩ kan ɩ da kɩ da ʊ. ³Maam bɩ, ɩ mɩsɩrbaa nyɩnta yɩm, ɩ meeyaa jintə yɩm tara burə ʊ.›

⁴Awɔɔ k’a m nyɩnɔ wɔɔ zɩrɔ wɔɔ, a bɩ nyɩnɔ wɔɔ da nɔmaa ma y, bɩ k’a ŋ tʊr, a ŋ bɔ zaa ʊ, dʊndɔrɔ kʊ ŋ y’a to Zuuba zi m.

Lɔnnɔ kan a zuubɔɔ kɩ mim

⁵Awɔɔ kʊ lɔnnɔ n a mɩ rɔ wɔɔ, k’a zu a soʊrezannɔ wɔɔ lɛ ʊ daʊrɛ gʊta m, kan a heer kɩ m haay, amba awɔɔ nɩ yɛm Krista ma bɩ m. ⁶A bɩ ŋ zi ba kʊ ŋ nɩ dundore awɔɔ zi bɩ tɔ ma y, ɩ ʊ a ka awɔɔ nawʊm ma kʊ gʊɔɔ nɔ n yɩ a ra y. Bɩ k’a ŋ zi bɩ ba, kʊ Zuuba zibəənyɩnɔ n’awɔɔ m a n nɩ zum Woso hɔɔnhɔ ʊ bɩ tɔ ma. ⁷K’a a zuubɔɔ wɔɔ zi ba kan a heer kɩ haay, ɩ ʊ, Zuuba zi awɔɔ n’a bam gʊɔɔ hɔ bɛɛ y. ⁸Awɔɔ dɔ a ʊ, zi mɩŋŋa kʊ gʊaa n’a bam haay, Zuuba y’a zibəə bɩ nyɔɔdʊ karɛ a zaa ʊ, baa k’a zaa bɩ lɔ m gɛɛ soamɩŋŋaʊzaa m.

⁹Awɔɔ kʊ lɔnnɔ soʊrezannɔ n’awɔɔ n nɔ wɔɔ, k’a ba maam sɔ a lɔnnɔ wɔɔ m, a bɩ nyaa ba kan ŋ kɩ y. Awɔɔ dɔ a ʊ, awɔɔ kan a lɔnnɔ wɔɔ kɩ bɩ, awɔɔ Zuuba bɩ deem an nɩ brama, b’a bɩr gʊɔɔ jirə bɔrɛ y.

Sʊtaana bʊrla zaa

¹⁰Meerbaa kʊ mɔɔ n’a nyambʊrm nɩ bɩ ba n nɩ: k’a a paŋŋa da ra Zuuba zɛkʊra nɔ ʊ, a paŋŋa gʊta bɩ nɔ ʊ. ¹¹K’a yarmɔdrɔ kʊ Woso nɩ ŋ karɛ a ʊ bɩ da a ma, k’a a da ma a jɩm kɔɔkɔɔ Sʊtaana hɔɔnkarɛrɔ zibəə bɩ lɛ ʊ. ¹²Gʊɔɔ bɛɛ wɔɔ nɩ yar bɩ bam kan ŋ kɩ y. A ba wɔɔ nawʊm kan zinəro kɩ, kan lɛɛzannɔ kʊ ŋ nɩ paŋŋa bam, ŋ n’a so lɛɛrɔ ʊ, ŋ n’a so durnya naa do kʊ monsigə n b’ʊ, ŋ nɩ brama rɔ wɔɔ kɩ. ¹³Naa tɔ ma bɩ, k’a Woso yar mɔdrɔ wɔɔ da a ma. K’a wɔ ʊ, a jɩm kɔɔkɔɔ dɔmɩm bʊnyaa hinni ʊ, a a da jɩm bɩ lɛ ʊ, a yar ba paan… a a da ma, k’a gɔɔta a jɩm a gam la.

¹⁴K’a a banka a jɩm kɔɔkɔɔ. K’a sɩra so a mɔr ʊ, am hɔsoaʊ hɔ bɩ m, k’a bɩr tɩrgabaa m, goŋŋo kʊ n n’a dure a ma n bɩ, k’a du a ma. ¹⁵Lemim nyɩnta bɩ nɩ laafɩɩ kam, k’a pa da kaarɛ-kaarɛ, kʊsɔ n bɩ awɔɔ n’a daŋ ʊ. ¹⁶K’a bɩr sɩrakarɛ m, goŋŋo kʊ n n’a tarɛ a m n bɩ sɔ, awɔɔ nɩ bʊnyaabarɛzaa bɩ karɔ kʊ sɛwurə n ta ŋ ma rɔ wɔɔ linlihim nɩ. ¹⁷Bʊmbɔrɛ kʊ Woso a ka awɔɔ ʊ bɩ, yarbarɛ firgə m, k’a ku a mim ma. K’a Woso lemim bɩ sa sɔ, yarbarɛ kargʊ m Sɛnt-Ɛspri n’a karɛ awɔɔ ʊ. ¹⁸K’a yaa da wakatɩ haay. K’a yaadarɛ do haay da Sɛnt-Ɛspri daahan nɔ ʊ. A bɩ kɔ kan yaa bɩ darɛ kɩ y, k’a bɩr tam lɛɛ tee…. K’a yaa da wosogʊɔɔ wɔɔ haay tɔ ma sɔ. ¹⁹K’a yaa da mɔɔ tɔ ma sɔ, kʊ Woso n a lemim da m lɛ ʊ, kʊ m a pa da kan heerkoodəbaa kɩ, kʊ m hɔ k’a nyaakʊm da lemim nyɩnta nɔ ʊ bɩ hɩ fasɩ-fasɩ. ²⁰Mɔɔ bɔ Woso ʊ kʊ m lemim nyɩnta bɩ pa da, baa kʊ mɔɔ nɩ lɔnnɔcɛ ʊ naa. Naa minto bɩ, k’a yaa da Woso m mɔɔ tɔ ma, kʊ m lemim nyɩnta bɩ pa da amba a a ga m bɩ m.

Leersore

²¹Tisikkɩ mɔɔ mim dɩndarɛ awɔɔ m, k’awɔɔ n hɔ kʊ mɔɔ n’a bam bɩ dɔ. Wɔɔ danyɩ m, ʊ n’a ŋʊam, an nɩ Zuuba zi bam mɩŋŋa. ²²A nyɔɔ mɔɔ nawʊrɛ awɔɔ ma tɔkkɛ, k’an bɩ mɔɔ mim dɩnda awɔɔ m, an awɔɔ heer yo.

²³Bɩ kʊ Zɩ Woso, kan Zuuba Yeezuu Krista kɩ m laafɩɩ kan ŋʊarɛ kɩ, kan sɩrakarɛ kɩ ka ʊ danyɩnɔ wɔɔ haay ʊ. ²⁴Gʊɔɔ kʊ ŋ nɩ wɔɔ Zuuba Yeezuu Krista ŋʊam, ŋʊarɛ k’a nyarɛ ba ʊ bɩ m nɔ wɔɔ, kʊ Woso n ŋ barka da ʊ.