Kolɔɔsɩ zannɔ

Ci kʊ Pol a ba

KOLƆƆSƖ ZANNƆ

ma

Ci kʊ Pol a ba Kolɔɔsɩ zannɔ ma bɩ

gasʊʊrɛ

Pol ɩ ci bɩ ba. A ba a ʊ Efɛɛzɩ zannɔ ci bɩ barɛ dɔmɩm ʊ. Kolɔɔsɩ kʊ bɩ, Pol mɩŋŋa n ta b’ʊ y, a zibəəkɔɔn deem k’a tɔ m Epafras kʊ m, b’ɩ lemim nyɩnta bɩ pa da ʊ sɔ.

Ci bɩ ba Pol ʊ, bɩ ma bɩ, a ɩ lɔnnɔcɛ ʊ Rɔm ʊ. Ci bɩ ba a ʊ, k’a Kolɔɔsɩ gʊɔɔ wɔɔ bɔ zaa ʊ ʊ, kʊ ŋ bɩ zu ŋʊaarhɔdɩndarɛ ʊ y, bala, gʊɔɔ ɩ ba hɩ ŋ nɩ, ŋ ʊ, pakra m kʊ ŋ nɩ fɩr ka a mɩŋŋɔɔ ma ziro ba, kan baŋŋʊgasʊrɛ kɩ, minno vantɔɔ kɩ. Bɩ y’a ka Pol n ci ba k’a hɩ ŋnɩ a ʊ, Yeezuu Krista bala nɩ gʊaa bʊmbɔm fasɩ.

Ci b’ɩ mɩsɩrbaa kʊ kristagʊɔɔ a ga m ŋn’a ba bɩ hɩnkam. Bɩ, Krista wɔɔ ʊ ga m ʊ yo ma, ʊ gɔɔta kan kɩ dɔmɩm haay, an nɩ wɔɔ yɔm lɔmbaa do haay wɔ ʊ.

Pol ɩ yaa dam Kolɔɔsɩ zannɔ m

¹Mɔɔ mɩŋŋa Pol, Woso ɩ mɔɔ bɔ ʊ kʊ m yɩ Krista Yeezuu zibəəzaa. Mɔɔ kan wɔɔ danyɩ Timote kɩ m nɩ ci bɩ barɛ awɔɔ ma. ²Awɔɔ, kʊ wosogʊɔɔ n’a mɩ, an nɩ Kolɔɔsɩ ʊ rɔ wɔɔ, wɔɔ danyɩnɔ n’awɔɔ m Krista nɔ ʊ, awɔɔ ɩ tarɛ a lɛ ra. A yɛ wɔɔ nawʊm kʊ wɔɔ Zɩ Woso n barka kan laafɩɩ kɩ ka awɔɔ ʊ.

Pol ɩ Woso barka dam Kolɔɔsɩ zannɔ tɔ ma

³Kʊ wɔɔ ɩ yaa dam Woso m awɔɔ tɔ ma, wɔɔ Zuuba Yeezuu Krista Zɩ bɩ, wɔɔ ɩ yaa dam nɩ barka dɔmɩm haay. ⁴Wɔɔ ma denter n n’awɔɔ sɩra ka Krista Yeezuu ʊ mim hɩm, kan ŋʊarɛ k’awɔɔ n ta m wosogʊɔɔ wɔɔ haay tɔ ma bɩ mim kɩ. ⁵Awɔɔ ɩ sɩrakarɛ m, a n nɩ ŋʊarɛ m, bala, Woso hɔ cɩnta awɔɔ m arzana ʊ, awɔɔ n a ta a heer lɛ. Bɩ lemim nyɩnta kʊ n y’a pa da awɔɔ m, a m sɩra lemim b’ɩ taaheerlɛ bɩ do ka awɔɔ ʊ. ⁶Lemim nyɩnta bɩ do ɩ tam durnya lɛɛ haay ʊ, an nɩ nyɩ dam, an n’a kərgum lɛɛ ra, amb’a a ba awɔɔ zi, Woso barka mim k’awɔɔ ma bɩ dɔmɩm ʊ saa…, a b’a dɔ a ʊ, barka paan… m bɩ. ⁷Wɔɔ zibəəkɔɔn Epafras naa do dɩnda awɔɔ m, wɔɔ gʊaasɩba m, Krista zibəənyɩ m, a m taalɛrazaa, zi bɩ ba a nawʊm kan awɔɔ kɩ wɔɔ bɩncɛ ʊ. ⁸A ɩ ŋʊarɛ kʊ *Sɛnt-Ɛspri a da awɔɔ heer ʊ bɩ mim hɩ wɔɔ m.

⁹Bɩ y’a ka, hinni kʊ wɔɔ naa ma ʊ bɩ tɛkka ma, wɔɔ ɩ yaa darɛ awɔɔ tɔ ma dɔmɩm haay. A yɛ wɔɔ nawʊm Woso han, k’an a ka k’awɔɔ n a hɔɔnhɔ dɔ mɩŋŋa, a bɩr Sɛnt-Ɛspri mindɔrɛ m kan a hɔdɔrɛ kɩ m. ¹⁰Maam bɩ, awɔɔ y’a dam ma, a mɩsɩrbaa k’a Zuuba nɔ yɩ bɩ ba, a hɔɔnhɔ barɛ nɔ ʊ. Naa n’a kam awɔɔ n zi mɩŋŋa do haay ba, a ta lɛɛ Woso dɔrɛ nɔ ʊ. ¹¹Wɔɔ y’a yɛm han sɔ k’an awɔɔ paŋŋa da ra, a mɩŋŋa paŋŋa k’a cem hɔ haay han bɩ m. K’awɔɔ n a da ma a bɩr a tʊntɔŋ ʊ, a bʊr a ma hɔ haay nɔ ʊ. ¹²K’a Zɩ Woso barka da kan heernyɔɔ kɩ, a ɩ zaa ka k’awɔɔ n hɔjirle yɩ kan a gʊɔɔ wɔɔ kɩ lɛɛgure nɔ ʊ. ¹³A wɔɔ yɔ monsigə paŋŋa wɔ ʊ, an ta wɔɔ m a Nyɩ k’a n’a ŋʊam bɩ cirbəə nɔ ʊ. ¹⁴A Nyɩ bɩ tɔ ma m, Woso wɔɔ bʊmbɔ, an wɔɔ mimbʊnyaarɔ sugur ka wɔɔ ʊ.

Yeezuu zɛ wɔɔ zɛ kʊ ra kan Woso kɩ

¹⁵Gɔsɩ bɩr Woso yɩrɛ y,

bɩ kʊ gʊaa Yeezuu yɩ,

k’a lʊnlɔ Woso maam.

A m lɛɛkarɛzaa an nɩ hɔ haay

kʊ Woso a da bɩ burə ʊ.

¹⁶Bala, zu Woso ʊ kʊ ʊ kan kɩ

an hɔ haay da,

brama ʊ kan tara burə ʊ kɩ,

hɔɔ kʊ ŋ nɩ yɩm mɩm ʊ

kan hɔɔ kʊ ŋ bɩr yɩm kɩ,

cirbəəro, kan lɛɛsoʊrezannɔ kɩ,

lɛɛzannɔ kɩ, paŋŋazannɔ kɩ.

Zu Woso ʊ kʊ ʊ kan kɩ

an hɔ haay da,

an a ka ʊ, an a so ʊ.

¹⁷A ɩ lɛɛ ka an ta ʊ,

hɔ haay lɛɛ,

a tɔ ma m hɔ haay n gɔɔta an a bɩncɛ ʊ.

¹⁸A mɩŋŋa n a gʊɔɔ wɔɔ sokʊma bɩ minzaa.

A m lɛɛkarɛzaa,

a ɩ lɛɛ ka an a mɩm bɔ ʊ gəəno bire ʊ,

k’a gɔɔta a bɩr hɔ haay lɛɛ,

hɔ haay nɔ ʊ.

¹⁹Bala, Woso mɩŋŋa y’a ŋʊa

k’an yɩ an a mɩŋŋa m jilli.

²⁰Woso a cɩnta,

k’a hɔ haay zɛ kʊ ra kan a kɩ

a Nyɩ bɩ tɔ ma,

hɔɔ kʊ ŋ nɩ brama kan tara burə ʊ kɩ,

ga k’a ʊ gɔdarkʊra ma bɩ tɔ ma.

²¹B’awɔɔ, awɔɔ nyɩnta biisi a m laatʊ Woso ma, zibəə bʊnyaarɔ k’awɔɔ n’a hɔɔn darɛ ŋ ma, a nɩ ŋ bam nɔ wɔɔ a ka, awɔɔ n a ba a jɩnnɔ. ²²Kɛɛrɛ naa, Woso awɔɔ zɛ kʊ ra kan a kɩ a Nyɩ bɩ k’a ga mɛsim nɔ ʊ bɩ tɔ ma. A ba a ʊ maam, k’awɔɔ n bɩ jɩm a lɛɛ, k’awɔɔ n bɩr mɩŋŋabaa nɔ ʊ, kʊ minsi bɩ nyɩnta awɔɔ gʊr zi y. Kʊ gɔsɩ bɩ mim yɩ k’a hɩ awɔɔ ma y. ²³Bɩ, a y’awɔɔ ma k’awɔɔ n gɔɔta a bɩr sɩra kam, a jɩm kɔɔkɔɔ, a b’a to kʊ hɔsɩ n awɔɔ gʊ taaheerlɛ kʊ lemim nyɩnta k’awɔɔ ma b’a ka awɔɔ ʊ bɩ ma y. N lemim nyɩnta bɩ do pa da gʊaa haay m durnya nɔ ʊ, bɩ mɔɔ mɩŋŋa Pol, m ba mɔɔ ʊ a zibəənyɩ.

Zi kʊ Pol n’a bam

²⁴Kɛɛrɛ naa, mɔɔ yɩ m heer nyɔɔm fɩr kʊ mɔɔ n’a yɩm k’awɔɔ n daahan yɩ a nɔ ʊ bɩ tɔ ma. Bɩ, mɔɔ gɔɔta m nɩ Krista fɩryɩrɛ bɩ yɩrɛ m mɛ ʊ, a mɛ bɩ tɔ ma, naa k’a hɩ a ʊ, a gʊɔɔ wɔɔ so kʊ ma. ²⁵Zibəə kʊ Woso a da mɔɔ wɔ ʊ kʊ m a ba k’awɔɔ n daahan yɩ bɩ tɔ ma m, mɔɔ nɩ m ba kristagʊɔɔ sokʊma bɩ zibəənyɩ, kʊ m Woso lemim bɩ pa da jilli, gʊaa haay m. ²⁶Lemim bɩ do bɩ, hɔ kʊ Woso a nyaakʊm da biisi tee… bɩ m. Bɩ kɛɛrɛ naa, Woso a hɩnka a gʊɔɔ wɔɔ m. ²⁷A ŋʊa a ʊ, k’a gʊɔɔ wɔɔ m hɔ k’a a nyaakʊm da, am gʊta, a gore n ta ʊ, k’a ka do vantɔɔ haay ʊ bɩ dɔ. Hɔ bɩ do ba n nɩ: Krista y’awɔɔ heer ʊ, k’a maam, awɔɔ ɩ taaheerlɛ m, a ʊ, a nyɩntam Woso lɛbɔʊrɛ nɔ ʊ. ²⁸Ncɩnaaʊ nɩ, wɔɔ nɩ Krista pa dam gʊaa haay m. Ʊ nɩ gʊaa biyəə bɔ n zaa ʊ, ʊ nɩ hɔ dɩndam gʊaa biyəə m, mindɔrɛ haay nɔ ʊ. K’a ka kʊ gʊaa biyəə n yɩ amba Woso lɛ n taa bɩ m Krista zɛkʊra nɔ ʊ. ²⁹Naa mɔɔ nɩ m kam ma, bɩ y’a ka mɔɔ nɩ zi bam, m nɩ zoo bam Krista paŋŋa k’a nɩ kan mɔɔ kɩ, an nɩ zi bam mɔɔ mɩsɩrbaa ʊ bɩ m.

¹Mɔɔ lɛ taa k’awɔɔ n zoo kɔɔda kʊ mɔɔ n’a barɛ awɔɔ tɔ ma, kan Lawodisee zannɔ kɩ tɔ ma, kan gʊɔɔ cir kʊ ŋ n mɔɔ yɩ a mɩm m fɩɩgaa rɔ wɔɔ kɩ tɔ ma bɩ dɔ. ²Zoo bɩ ba mɔɔ nawʊm, kʊ ŋ nɩ heer koodə yɩ, kʊ ŋ lɛ n bɩr deem ŋʊarɛ nɔ ʊ, kʊ ŋ nɩ sɩra dɔ fasɩ, ŋnɩ heer koodə yɩ a nɔ ʊ. Maam bɩ, ŋ hɔ kʊ Woso a nyaakʊm da biisi bɩ dɔm. Hɔ bɩ do bɩ, Krista m. ³A mɩŋŋa n ta mindɔrɛ hɔnyɩ haay woo… kan hɔdɔrɛ haay woo… kɩ m.

⁴Naa hɩ mɔɔ nawʊm, kʊ gɔsɩ bɩ bra bɩmba awɔɔ m meerbaa nyɩntɔɔ nɩ y. ⁵Sɩra m, mɔɔ ba b’ʊ kan awɔɔ kɩ y, bɩ mɔɔ heer ɩ kan awɔɔ kɩ, m nɩ m heer nyɔɔm k’awɔɔ nɩ jɩnɩm kan kʊ kɩ kɔɔkɔɔ a sɩra ka Krista ʊ nɔ ʊ bɩ tɔ ma.

Ʊ gɔɔta sɩrakarɛ hɔdɩndarɛ nɔ ʊ

⁶Ncɩnaaʊ bɩ, k’awɔɔ Krista Yeezuu si k’an yɩ a Zuuba bɩ, k’a bɩr tam lɛɛ tee… kan kɩ a zɛkʊra nɔ ʊ. ⁷K’a jɩm kɔɔkɔɔ a yaa ka a nɔ ʊ, a a mɩsɩrbaa bɩ dɔ ra am cɛ hɔ bɩ m. A nyasʊ a sɩrakarɛ bɩ m kɔɔkɔɔ, amba n y’a dɩnda awɔɔ n bɩ m, a bɩr yaa dam Woso m barka kan a heer kɩ haay.

⁸K’a a dundo a zi, kʊ gɔsɩ bɩ bra bɩmba a m, gʊɔɔ hɔdɔrɛ yaarsɩ nɩ y. Gʊɔɔ minkəm hɔdɔrɛ m, durnya paŋŋazannɔ kʊ ŋ bɩr yɩm nɔ wɔɔ hɔ m, a n a to Krista zi y. ⁹Bala, Woso k’an lʊnlɔ haay bɩ, Krista maam sɔ a mɛsim nɔ ʊ. ¹⁰K’awɔɔ a zɛ kʊ ra kan kɩ bɩ, awɔɔ ɩ hɔ haay m, a mɩŋŋa nɩ lɛɛzannɔ kan paŋŋazannɔ kʊ ŋ bɩr yɩm mɩm m nɔ wɔɔ burə ʊ.

¹¹K’awɔɔ a zɛ kʊ ra kan kɩ bɩ, n y’awɔɔ gasʊ baŋŋʊ ʊ, bɩ gʊɔɔ baŋŋʊgasʊrɛ bɩ bɛɛ y, Krista y’awɔɔ gasʊ baŋŋʊ bɩ do ʊ, awɔɔ yɔ k’a ʊ mɛsim k’an awɔɔ dam mimbʊnyaa barɛ ma bɩ wɔ ʊ bɩ m. ¹²Batɛm kʊ n y’a ka awɔɔ ʊ bɩ, awɔɔ bir n y’a ʊ kan Krista kɩ, awɔɔ n a mɩm bɔ ʊ kan kɩ sɔ, k’awɔɔ sɩra ka Woso paŋŋa k’a mɩm bɔ ʊ gəəno bire ʊ bɩ tɔ ma m. ¹³Biisi bɩ, gəəno n’awɔɔ m a mimbʊnyaarɔ wɔɔ tɔ ma, k’awɔɔ ba zɩɩfʊrɔ do barla bɩ tɔ ma sɔ.

Bɩ, kɛɛrɛ naa, Woso awɔɔ mɩm bɔ ʊ kan Krista kɩ,

an wɔɔ mimbʊnyaarɔ haay sugur ka wɔɔ ʊ.

¹⁴Biisi bɩ, wɔɔ ɩ kʊrɔma nɔ ʊ, kʊ wɔɔ n zu Woso lɛrɔ wɔɔ ʊ bɩ tɔ ma,

bɩ Krista bɩ, a mim k’a nɩ wɔɔ yɩm wɔɔ kʊrɔmarɔ wɔɔ tɔ ma bɩ ciro wɔɔ zaar ba,

a wɔ a ʊ gɔdarkʊra ma.

¹⁵A lɛɛzannɔ kan paŋŋazannɔ kʊ gʊɔɔ bɩr ŋ yɩm nɔ wɔɔ paŋŋa da,

an nyannɩ da ŋ ma garga ra, kʊ gʊɔɔ n ŋ yɩ,

a bʊr ŋ la, an ŋ gɩngaata a jɛ ʊ, an yirbə si ŋ nɩ.

¹⁶Ncɩnaaʊ bɩ, a b’a to gɔsɩ n’awɔɔ dʊdɔ yar, hɔbɩrɛ, gɛɛ hɔmire, gɛɛ cibsarɔ bɩrɛ mim ma, gɛɛ mom daarɔ kan *sabaa dɔmɩnnɔ kɩ mim ma y. ¹⁷Hɔɔ nɔɔn duro haay bɩ, hɔɔ kʊ ŋ y’a ga m ŋnɩ bʊr lɔ wɔɔ ŋn’a hɩnkam, hɔɔ paan…rɔ bɛɛ nɩ ŋ mɩ y. Hɔ paan… bɩ, Krista m. ¹⁸A b’a to gɔsɩ n a ka a ter bʊmbɔrɛ bɩ ma y. Gʊɔɔ kʊ ŋ n’a mɛ dam kɔrɛ ma, ŋn’ɩ yaa dam malɛɛkarɔ m, ŋn’ɩ hɔhɩnkarɛrɔ mim dɩndam can rɔ wɔɔ m. Mɩŋŋabusurezannɔ nɩ ŋ mɩ vam, a hɔɔn ŋ n’a darɛ am gʊɔɔ hɔ bɩ m. ¹⁹Ŋ n gɔɔta n a kʊsɩ Krista ma y, an bɔkarɛ, bɩ m minzaa. Krista tɔ ma m, mɛ bɩ jilli nɩ tʊrlɛ yɩm, an n’a kam mɛ bɩ n deem, mɛ bɩ məsiro kan a kunəro kɩ tɔ ma, an nɩ mam amba Woso lɛ n taa bɩ m.

²⁰K’awɔɔ gɩnga kan Krista kɩ bɩ, durnya paŋŋazannɔ kʊ ŋ bɩr yɩm nɔ wɔɔ n a so awɔɔ ʊ dɔ y, bɔ m kɛɛrɛ awɔɔ n’a mɩsɩrbaa bam ɩ ʊ, durnya gʊɔɔ n’awɔɔ nɩ? Bɔ m awɔɔ nɩ yɛrɛ gʊɔɔ n’awɔɔ dam lɛrɔ zuure ʊ? ²¹N n’a hɩrɛ awɔɔ m, ŋ ʊ: Ɩ bɩ hɔ naa do sa y, ɩ bɩ naa da ɩ lɛ ma y, ɩ b’ɩ wɔ da naa do ma y. ²²Lɛrɔ nɔɔn duro haay gʊɔɔ hɔɔ m, hɔɔ kʊ gʊɔɔ nɩ zi barɛ ŋ nɩ, ŋnɩ nyam mim ŋn’a dɩndam. ²³Sɩra m, kʊ gʊaa dɩga lɛrɔ nɔɔn duro ma, b’a ʊ hɔɔntaʊrɛ hɔɔ m, bala, ŋ y’a hɩrɛ ŋ ʊ, gʊɔɔ n yaa da, ŋn’a mɩŋŋɔɔ zer, ŋnɩ fɩr ka a mɩŋŋɔɔ ma, an bɔkarɛ, nawɔnnɔ haay naa, ŋ bɩr a dam gʊaa han k’an bʊr a mɛsim lɛtaamarɔ ma y.

Ʊ ʊ ka arzana hɔɔ ma

¹K’awɔɔ a mɩm bɔ ʊ kan Krista kɩ gəəno bire ʊ bɩ, k’a ka hɔɔ kʊ mim ʊ hɔɔ m nɔ wɔɔ ma, lɛɛ kʊ Krista n ta ʊ Woso bɩsɩ ra ʊ bɩ hɔɔ wɔɔ. ²K’a bɩr a hɔɔn dam arzana hɔɔ ma, a b’a hɔɔn da durnya hɔɔ ma y. ³Bala, awɔɔ gɩnga, awɔɔ mɩsɩrbaa n’a nyaakʊm da Woso zi kan Krista kɩ. ⁴Kʊ Krista n’awɔɔ mɩsɩrbaa bɩ, k’a b’a hɩnka, a y’awɔɔ hɩnkam sɔ kan a kɩ, a nyɩnta a lɛbɔʊrɛ nɔ ʊ.

⁵Ncɩnaaʊ bɩ, k’a hɔ kʊ tara burə hɔ m an awɔɔ mɩsɩrbaa ʊ bɩ zɛ. Hɔɔ wɔɔ duro ba n nɩ: Jaandarɛ m, lannɔ gɛɛ yaarɔ barɛ m, lɛtaamarɔ bʊnyaarɔ kʊ ŋ n’a som gʊɔɔ ʊ m, mɛsim hɔɔnhɔ kama m, mɩnyɔɔ m, mɩnyɔɔ bɩ, *wosobaawɔnnɔ yaadarɛ do vanta m bɩ. ⁶Hɔɔ nɔɔn duro nɩ zɛm Woso nɔmaa m gʊɔɔ [kʊ ŋ bɩr yɛm Woso ma rɔ wɔɔ] zi. ⁷Naa awɔɔ n’a bam biisi a mɩsɩrbaa nɔ ʊ.

⁸Kɛɛrɛ naa, k’a a bɔ hɔɔ nɔɔn duro ʊ haay. A bɩ nɔmaa ba y, a b’a heer der y, a bɩ bʊnyaabaa ba y, a bɩ sʊnsɔ wʊ y, a bɩ dintim meerbaarɔ ba y. ⁹A bɩ ŋʊaar ba kʊ nɩ y, bala, awɔɔ a bɔ a mɩsɩrbaa gusire b’ʊ, kan a zibəəro bʊnyaarɔ wɔɔ kɩ ʊ. ¹⁰Mɩsɩrbaa daa awɔɔ n ta m kɛɛrɛ, mɩsɩrbaa bɩ do, a lʊr a nawʊm tee… an nɩ bɔm kʊ ʊ kan a darɛzaa bɩ kɩ. Yɩ a nawʊrɛ ncɩnaaʊ awɔɔ n Woso bɩ dɔ fasɩ. ¹¹Ncɩnaaʊ bɩ, jirəbɔrɛ ba ʊ dɔ, zɩɩfʊrɔ bire ʊ kan do vantɔɔ gʊɔɔ kɩ y, gʊɔɔ kʊ ŋ gasʊ baŋŋʊ ʊ kan gʊɔɔ kʊ ŋ n gasʊ baŋŋʊ ʊ kɩ bire ʊ y, jirebɔrɛ bahɔdonno kan pooyaa gʊɔɔ kɩ bire ʊ sɔ y, b’a ba lɔnnɔ kan soamɩŋŋaʊzannɔ kɩ bire ʊ y. Bala, Krista ɩ lɛ da haay, an nɩ gʊɔɔ k’a so ŋ ʊ rɔ wɔɔ haay heer ʊ.

¹²K’awɔɔ nɩ wosogʊɔɔ wɔɔ barla bɩ, Woso y’awɔɔ ŋʊa, an awɔɔ bɔ ʊ k’a a so awɔɔ ʊ. Bɩ tɔ ma bɩ, k’a bɩr kʊ ŋʊarɛ m, a bɩr mɩŋŋabaa bam kʊ m, a bɩr mɩŋŋazerle m, kan bʊgʊ-bʊgʊdabaa kɩ m, bʊraama kɩ m. ¹³K’a bɩr yɛm kʊ ma, bɩ kʊ gʊaa ɩ mim m kan a mim kɩ, k’a sugur ka kʊ ʊ. Amba Zuuba sugur ka awɔɔ ʊ bɩ, k’a ba maam sɔ. ¹⁴A n cem woo… bɩ, k’a bɩr ŋʊarɛ m, bala, ŋʊarɛ nɩ hɔ haay nam kʊ ʊ paan…. ¹⁵K’a ka kʊ heer laafɩɩ kʊ Krista n’a kam bɩ n a so awɔɔ heerlɔ wɔɔ ʊ. Awɔɔ bir Woso ʊ naa tɔ ma, k’awɔɔ n yɩ deem. K’a bɩr yaa dam Woso m barka. ¹⁶K’a Krista lemim bɩ da a heer ʊ jilli. K’a bɩr hɔ dɩndam kʊ m, a bɩr kʊ bɔm zaa ʊ, hɔɔntaʊrɛ m. K’a bɩr laa lɔm, laarɔ ciro wɔɔ nɔ ʊ, kan mim ma laarɔ wɔɔ kɩ, laa kʊ *Sɛnt-Ɛspri a da a heer ʊ haay kɩ. A laa bɩ lɔ ncɩnaaʊ, a Woso barka da kan a heer kɩ haay. ¹⁷Kʊ bɔ awɔɔ n’a bam, gɛɛ kʊ bɔ awɔɔ n’a hɩm, k’a ba Zuuba Yeezuu tɔ ma, a bɩr Woso barka dam a tɔ ma.

Kristagʊɔɔ mɩsɩrbaa kan kʊ kɩ

¹⁸Lannɔ wɔɔ, k’a yɛ a zino wɔɔ ma, amba a ga m Zuuba zuure nɔ ʊ bɩ m.

¹⁹Zino wɔɔ, k’a a lannɔ wɔɔ ŋʊa, a bɩ nyaa ba kan ŋ kɩ y.

²⁰Nyɩnɔ wɔɔ, k’a a zɩrɔ wɔɔ lɛ si hɔ haay nɔ ʊ, hɔ kʊ Zuuba n’a ŋʊarɛ awɔɔ gʊr zi bɩ n naa.

²¹Awɔɔ k’a m zɩrɔ wɔɔ, a b’a nyɩnɔ wɔɔ da nɔmaa ma y, ŋ heer y’a a zar.

²²Lɔnnɔ wɔɔ, k’a zu a soʊrezannɔ wɔɔ lɛ ʊ, hɔ haay nɔ ʊ. A bɩ ŋ zi ba dundo kʊ ŋ nawʊrɛ a zi tɔ ma, kʊ ŋ n’a lɛ bɔ a ʊ y. Bɩ, k’a ŋ zi ba kan a heer kɩ haay, k’awɔɔ nɩ Zuuba gore daŋ ʊ bɩ tɔ ma. ²³Kʊ bɔ zi awɔɔ n’a bam, k’a ba kan a heer kɩ haay, ɩ ʊ, Zuuba zi awɔɔ n’a bam, gʊɔɔ hɔ bɛɛ y. ²⁴Awɔɔ dɔ a ʊ, Zuuba nɩ ganwʊrɛ awɔɔ ma, awɔɔ hɔ k’a cɩnta a gʊɔɔ m arzana ʊ bɩ yɩm. Awɔɔ Minzaa bɩ n Krista m, a zi awɔɔ n’a bam. ²⁵Gʊaa k’a n’a bʊnyaa bam bɩ, Zuuba y’a zi bʊnyaa bɩ yawʊra bam nɩ, a bɩr gʊɔɔ jirə bɔrɛ y.

¹Awɔɔ, kʊ lɔnnɔ soʊrezannɔ n’awɔɔ n nɔ wɔɔ, k’a tɩrgabaa kan sɩra kɩ zi ba kan a lɔnnɔ wɔɔ kɩ, a dɔ a ʊ, awɔɔ mɩŋŋɔɔ sɔ, awɔɔ soʊrezaa ta ʊ, an nɩ arzana ʊ.

Dʊndɔrɔ kan meerbaa nyambʊrlɛ kɩ

²K’a bɩr yaa dam tee… a b’a zu a ʊ y, k’a bɩr Woso barka dam. ³K’a yaa da wɔɔ tɔ ma sɔ, kʊ Woso n a ka k’ʊ toore mɩŋŋa yɩ, ʊ a lemim bɩ pa da gʊɔɔ m. K’ʊ Krista mim k’a n dɔ biisi bɩ pa da, bɩ tɔ ma m mɔɔ nɩ lɔnnɔcɛ ʊ. ⁴Kʊ m a pa da kʊ n a jɩ ma paan…, amba mɔɔ m ga m, m a ba bɩ m.

⁵K’a dundo a mɩsɩrbaa barɛ zi gʊɔɔ kʊ kristagʊɔɔ bɛɛ n ŋ mɩ rɔ wɔɔ bire ʊ. K’a a tɔ ʊ kan hɔ k’a a ga barɛ m kɩ wakatɩ haay. ⁶K’a ka k’a meerbaa n bɩr mɩŋŋa, yɛ n bɩr ta ma. Kʊ laakarɔ gʊɔɔ n’a darɛ a han, k’a nyɩbɔʊrɛ dɔ a bɔ ŋ nʊ, amba a ga m bɩ m.

Leersore

⁷Kʊ mɔɔ mim bɩncɛ nɩ, wɔɔ danyɩ ŋʊarɛzaa Tisikkɩ zɛm b’a dɩnda awɔɔ m haay. Zuuba zi a n’a bam taalɛra m, mɔɔ zibəəkɔɔn m Zuuba zibəə bɩ nɔ ʊ. ⁸A nyɔɔ mɔɔ nawʊrɛ awɔɔ ma tɔkkɛ k’an bɩ wɔɔ mim dɩnda awɔɔ m, an awɔɔ heer yo. ⁹Wɔɔ danyɩ Onezim, awɔɔ gʊaa deem m, a zɛm kan Tisikkɩ kɩ sɔ. Taalɛrazaa m, wɔɔ n’a ŋʊam. Ŋ nɩ hɔ k’a nɩ naa ʊ haay dɩndarɛ awɔɔ m.

¹⁰Aristarkɩ k’a nɩ kan mɔɔ kɩ lɔnnɔcɛ ʊ naa ʊ b’ɩ yaa darɛ awɔɔ m. Barnabas danyɩ Markɩ b’ɩ yaa darɛ a m sɔ. Mɔɔ lɛɛ ka m a hɩ awɔɔ m m ʊ, k’a lee ku awɔɔ zi b’ʊ k’a si mɩŋŋa, k’a ba maam denter. ¹¹Yeezuu kʊ n so ra n n’a birm Zistus b’ɩ yaa darɛ a m. Gʊɔɔ kaakʊrɔ nɔɔm y’a minto n zɩɩfʊrɔ, ŋn’ɩ zi bam kan mɔɔ kɩ Woso cirbəə bɩ tɔ ma. Zɩɩfʊrɔ kʊ ŋ sɩra ka Yeezuu ʊ rɔ wɔɔ barla, ŋ yɩ mɔɔ heer wʊtam gʊta.

¹²Awɔɔ kʊrɔ gʊaa Epafras ɩ yaa darɛ a m. Krista Yeezuu zibəənyɩ m an nɩ zoo bam awɔɔ tɔ ma yaadarɛ nɔ ʊ. K’awɔɔ n jɩm kɔɔkɔɔ, a ma Woso zaa bɩ ra, K’a Woso hɔɔnhɔ haay dɔ a ba. ¹³Mɔɔ sɩra bɩ, m a dɔ m ʊ, a ɩ kɔm gʊta awɔɔ tɔ ma, kan Lawodisee zannɔ kɩ, Hierapolis zannɔ kɩ tɔ ma sɔ. ¹⁴Wɔɔ gʊaasɩba Likki k’a m lɔɔtɔr bɩ, kan Demas k’ɩ yaa darɛ a m.

¹⁵K’a yaa da wɔɔ danyɩnɔ kʊ ŋ nɩ Lawodisee ʊ rɔ wɔɔ m, kan Nɩnfa kɩ m, kan kristagʊɔɔ kʊ ŋ n’a som kʊ ma a har ʊ rɔ wɔɔ m. ¹⁶K’awɔɔ mɔɔ ci bɩ karɩnda ba, k’a ka Lawodisee kristagʊɔɔ sokʊma b’ʊ, kʊ ŋ n’a karɩnda ba sɔ. K’awɔɔ n ci k’a n’a tom Lawodisee ʊ bɩ karɩnda ba sɔ. ¹⁷K’a hɩ Arsip m a ʊ, an dundo a zi kan zibəə kʊ Zuuba a ka ʊ bɩ kɩ, an a tɔ ʊ an zi bɩ ba mɩŋŋa.

¹⁸Mɔɔ mɩŋŋa Pol nɩ leersore yaa bɩ darɛ gʊrsɩra nyambʊrlɛ m zim, a ba n nɩ: K’a tɔ da a nɔ ʊ, a dɔ a ʊ, lɔnnɔcɛ mɔɔ n ta ʊ.

Bɩ kʊ Woso barka n bɩr kan a kɩ.