Ci hɩɩya hɔ kʊ Pol a ba
TIMOTE
ma
Ci hɩɩya hɔ kʊ Pol a ba Timote ma bɩ
gasʊʊrɛ
Pol ɩ ci bɩ ba. A ba a ʊ, Timote ma. Bɩ ma bɩ, a a zɔ a garɛ kan a zibəə nyarɛ kɩ ma. Lɔnnɔcɛ a nyɩnta ʊ an ci bɩ ba, a yɩ ma kɔɔkɔɔ gʊta.
Ci bɩ ba a ʊ, k’a Timote heer yo, fɩryɩrɛrɔ kʊ bɩ nɩ ŋ yɩm tɔ ma. K’an dundo a zi sɔ kan gʊɔɔ kʊ ŋ nɩ bɩsɩ nɩbɩr kam lɔ wɔɔ kɩ. K’an a tɔ ʊ kan Wosoci bɩ hɔ dɩndarɛ kɩ con. A y’a zɛ mim dɩndam ci b’ʊ, a ʊ, a zoo ba a a da ma.
1Pol ɩ yaa dam Timote m
1Mɔɔ mɩŋŋa Pol ɩ ci naa do ba, Woso ɩ mɔɔ bɔ ʊ, kʊ mɔɔ n yɩ Krista Yeezuu zibəəzaa, kʊ m mɩsɩrbaa kʊ Woso a ler bɔ, wɔɔ n’a yɩm Krista Yeezuu nɔ ʊ bɩ pa da. 2Ci bɩ ba mɔɔ nawʊrɛ ɩbɩɩ ma, Timote, mɔɔ nyɩ n’ɩbɩɩ m, m n’ɩ ŋʊam, a yɛ mɔɔ nawʊrɛ kʊ Zɩ Woso, kan wɔɔ Zuuba Krista Yeezuu kɩ n barka, kan cicirzɛrɛ kɩ, kan laafɩɩ kɩ ka ɩ ʊ.
Pol ɩ Timote paŋŋa dam la
3Mɔɔ ɩ yaa dam Woso m barka, a zi mɔɔ n’a bam kan noom hu kɩ, amba mɔɔ yaabɔɔ zu ʊ bɩ m. Sinuu ʊ kan gunuu ʊ kɩ mɔɔ yaadarɛ nɔ ʊ haay, mɔɔ ɩ yaa darɛ ɩbɩɩ tɔ ma, m n’a barka darɛ. 4Nyi k’ɩbɩɩ ka bɩ tɔ ɩ mɔɔ nɔ ʊ, mɔɔ n’a ŋʊam paan… kʊ m m ya, m ɩ yɩ, kʊ m heer n nyɔɔ gʊta. 5Sɩra k’ɩbɩɩ ka denter bɩ, a tɔ ɩ mɔɔ nɔ ʊ, ɩbɩɩ yaabalʊ Loyis ɩ nyɩnta sɩrakarɛ bɩ do m, ɩ da Enis nyɩntam sɔ. Bɩ, mɔɔ dɔ mɔɔ ʊ, ɩbɩɩ ta sɩrakarɛ bɩ do m sɔ.
6Naa minto m, mɔɔ nɩ m ya, m n’a hɩrɛ ɩbɩɩ m, m ʊ, ganwʊrɛ kʊ Woso a ka ɩ ʊ k’ɩ zi ba m, mɔɔ nɩ m wɔ ka ɩbɩɩ ra ɩbɩɩ n a yɩ bɩ, zi ba m. 7Bala, Ɛspri kʊ Woso a ka wɔɔ ʊ bɩ bɩr wɔɔ dam nyibəə ma y, bɩ, paŋŋa kan ŋʊarɛ kɩ, daamɩŋŋama kɩ an n’a kam wɔɔ ʊ.
8Naa tɔ ma bɩ, ɩ bɩ nyannɩ zɛ wɔɔ Zuuba kasɛtɩ karɛ ma y, ɩ bɩ nyannɩ zɛ mɔɔ tɔ ma kʊ mɔɔ nɩ lɔnnɔcɛ ʊ a tɔ ma bɩ minto sɔ y. Bɩ, yo Woso paŋŋa ma, ɩ yɛ fɩr ma lemim nyɩnta bɩ tɔ ma am mɔɔ hɔ bɩ m. 9Woso mɩŋŋa ɩ wɔɔ yɔ, wɔɔ bir a ʊ, kʊ wɔɔ n yɩ a gʊɔɔ. A n naa ba, wɔɔ zibəəro mɩŋŋɔɔ tɔ ma y, a mɩŋŋa hɔɔnhɔ kan barka k’a n’a kam bɩ kɩ tɔ ma m. Barka bɩ do ka a ʊ wɔɔ ʊ, Krista Yeezuu nɔ ʊ, bɩ ma bɩ, durnya n a sɩŋŋɩda ba y. 10Bɩ kɛɛrɛ naa, wɔɔ bʊmbɔrɛzaa Krista Yeezuu k’a bʊr bɩ, barka bɩ do a hɩnka garga ra. Bala, a zɛ paŋŋa zaar ba, an mɩsɩrbaa k’a nyarɛ ba ʊ hɩnka lemim nyɩnta bɩ m.
11Lemim nyɩnta bɩ do padarɛ tɔ ma m, Woso n mɔɔ bɔ ʊ, kʊ m yɩ a padarɛzaa, kristazibəəzaa, a hɔdɩndarɛzaa. 12Bɩ tɔ ma m, mɔɔ nɩ fɩr naa yɩm, bɩ fɩr bɩ yɩrɛ nyannɩ ba mɔɔ nɩ y, bala, gʊaa kʊ mɔɔ sɩra ka ʊ bɩ, mɔɔ bɩ zaa dɔ mɩŋŋa, bɩ mɔɔ heer kookoo sɔ, m a dɔ m ʊ, a ɩ paŋŋa m k’a dɔ hɔ k’a a da mɔɔ wɔ ʊ bɩ ma, k’an ta an a zɛrɛ hinni ku. 13Yo sɩra meerbaarɔ kʊ mɔɔ ŋ ba kan ɩ kɩ rɔ wɔɔ ma, ɩ jɩm sɩrakarɛ kan ŋʊarɛ kʊ wɔɔ n ta ŋ nɩ Krista Yeezuu nɔ ʊ bɩ nɔ ʊ kɔɔkɔɔ. 14Dɔ hɔdɩndarɛ mɩŋŋa kʊ n y’a da ɩ wɔ ʊ bɩ ma, ɩ dɔ ma Sɛnt-Ɛspri paŋŋa k’a nɩ kan wɔɔ kɩ bɩ m.
Onezifɔɔr a da Pol han
15Ɩbɩɩ dɔ ɩ ʊ, kristagʊɔɔ kʊ ŋ nɩ Azii kʊ b’ʊ rɔ wɔɔ haay a bɔ mɔɔ ʊ, Fizɛl kan Hɛrmozɛnnɩ kɩ yɩ ŋ barla sɔ. 16A yɛ mɔɔ nawʊm kʊ Woso n’a cicirzɛrɛ kərgu Onezifɔɔr hargʊɔɔ ra, bala, a tɩr mɔɔ heer ba kookoo dɔmɩm niŋŋoo ʊ, nyannɩ n a nyasʊ mɔɔ dure bɩ tɔ ma y. 17Bala, bʊr k’a ʊ Rɔm ʊ naa ʊ bɩ, a a ka mɔɔ bɩncɛ ma paan…, an aa mɔɔ yɩ. 18A yɛ mɔɔ nawʊm kʊ Zuuba n a ka, k’an Woso ba mɩŋŋa yɩ, Zuuba mɩŋŋa zɛrɛ hinni ʊ. Ɩbɩɩ dɔ mɩŋŋa sɔ ɩ ʊ, nyɩnta kʊ mɔɔ ʊ Efɛɛzɩ ʊ bɩ, a a da mɔɔ han gʊta.
2Yeezuu Krista yarbər mɩŋŋa zibəə
1K’ɩbɩɩ nɩ, m nyɩ, ɩ paŋŋa da ra, barka kʊ wɔɔ n ta m Krista Yeezuu nɔ ʊ bɩ m. 2Mɔɔ hɔdɩndarɛ k’ɩbɩɩ ma gʊɔɔ cir lɛɛ bɩ, a dɩnda gʊɔɔ kʊ ŋ nɩ nyasʊm nɩ mɩŋŋa rɔ wɔɔ m, kʊ ŋ n’a da ma, ŋn’a dɩnda gʊɔɔ vantɔɔ m sɔ.
3Yɛ fɩryɩrɛ ma am mɔɔ hɔ bɩ m, hɔ kʊ Krista Yeezuu yarbər mɩŋŋa a ga m, an a ba bɩ m naa. 4Kʊ yarbər ta yar ma, k’a lɛ taa kʊ yarbənno cir bɩ nɔ n yɩ a ra, a bɩr a kam gʊɔɔ kʊ ŋ gɔɔta har ʊ rɔ wɔɔ mɩsɩrbaa barɛ ma y. 5A dɔ sɔ ɩ ʊ, kʊ n brasire ganwʊrɛ cɩnta, kʊ gʊaa n zu bra bɩ sire zaa ʊ, n bɩ ganwʊrɛ bɩ kaŋ ʊ y. 6Danwur k’a kɔ dam lɛ ra bɩ n nɩ lɛɛ kam an aa dam bɩ wʊrɛ hɔ yɩ. 7Ɩ hɔɔn da hɔ kʊ mɔɔ n’a hɩm naa ma k’ɩ jɩ ma, bala, Zuuba hɔɔn karɛ ɩ ʊ, k’ɩ ɩ da ma, ɩ jɩ ma haay.
8Yeezuu Krista tɔ da ɩ nɔ ʊ,
Davɩd do gʊaa m,
a a mɩm bɔ ʊ gəəno bire ʊ,
amba lemim nyɩnta
kʊ mɔɔ n’a pa dam bɩ
n’a hɩm bɩ m.
9Lemim nyɩnta bɩ do tɔ ma m, mɔɔ nɩ fɩr yɩm, n nɩ mɔɔ du, ɩ ʊ, zibʊnyaabarɛzaa m mɔɔ m. Bɩ, kʊ lemim nyɩnta bɩ nɩ, n a du y. 10Bɩ y’a ka mɔɔ nɩ yɛm fɩr do haay ma, gʊɔɔ kʊ Woso ŋ bɔ ʊ rɔ wɔɔ minto, kʊ brɔɔ n a da ma sɔ, ŋnɩ bʊmbɔrɛ kʊ Krista Yeezuu n’a kam bɩ yɩ, kʊ ŋ nɩ gasʊ lɛbɔʊrɛ k’a nyarɛ ba ʊ b’ʊ. 11Meerbaa kʊ mɔɔ ʊ kʊ m a ba naa, sɩra m an a ga sire m:
Kʊ wɔɔ ga kan Yeezuu Krista kɩ,
wɔɔ mɩsɩrbaa bam kan kɩ sɔ.
12Kʊ wɔɔ jɩm kɔɔkɔɔ kan kɩ,
wɔɔ cirbəə bɩm kan kɩ sɔ,
kʊ wɔɔ bɩsɩ ka ma,
a bɩsɩ kam wɔɔ ma sɔ.
13Kʊ wɔɔ n jɩm ʊ lɛ ra kan kɩ,
a mɩŋŋa ɩ jɩnɩm a lɛ ra tee…,
bala, a b’a dam ma, an bɩsɩ ka a mɩŋŋa ma y.
Woso lemim dɩnda sɩra nɔ ʊ
14Meerbaarɔ kʊ mɔɔ ŋ ba nɔɔn m tɔ da gʊɔɔ wɔɔ nɔ ʊ haay, ɩ hɩ ŋ nɩ paan… Woso lɛɛ, ɩ ʊ, ŋn’a si nyaa kʊ n n’a bam meerbaarɔ tɔ ma lɛɛ. Bala, ŋ hɔsɩ ba ʊ y. Gʊɔɔ kʊ ŋ n’a tʊr karɛ ŋ ma rɔ wɔɔ an nɩ ŋ zaar bam. 15Ɩ tɔ ʊ k’ɩ yɩ gʊaa k’a a ga m kʊ Woso nɔ n yɩ ra, k’ɩ yɩ zibəəzaa k’a zibəə nyannɩ ba ʊ y, an nɩ sɩra lemim bɩ dɩndam mɩŋŋa-mɩŋŋa. 16Ɩ bɩ yɛ sʊʊra yaarsɩrɔ kʊ ŋ bɩr a dam gʊaa han sɩrakarɛ nɔ ʊ rɔ wɔɔ ma y. Gʊɔɔ kʊ ŋ nɩ ŋ bam nɔ wɔɔ gɔɔtam tee… ŋnɩ bɩr a bam laatʊ Woso ma. 17Ŋ meerbaarɔ wɔɔ bɔ kʊ ʊ kan nyim k’a nɩ gʊaa mɛ bɩm haay kɩ. Himene kan Filɛtɩ kɩ yɩ ŋ barla. 18Ŋ hɔ, ŋnɩ sɩra bɩ to, ŋn’a hɩrɛ ŋ ʊ, gəəno mɩmbɔʊrɛ bɩ cem kara, ŋn’a kam gʊɔɔ gʊta n’a bɔm sɩrakarɛ ʊ. 19Bɩ, kan naa kɩ haay Woso sɩra bɩ bɔ kʊ ʊ, kan cɛjɩr kɩ, an gɔɔta an n’a bɩncɛ ʊ, n nɩ gʊrsɩra ba cɛjɩr bɩ ma, n ʊ:
Zuuba a gʊɔɔ dɔ.
N n’a ya, n ʊ:
Gʊaa k’a ʊ Zuuba gʊaa n’a mɩ bɩ, k’an a gʊ mimbʊnyaa ma.
20Cɛ gʊta nɔ ʊ, mɔr y’a hʊnhɔ ta ʊ, n n’a ba sarma m kan wanzurfu kɩ m, n nɩ nɔɔrɔ ba gɔ m kan taa kɩ m. Lɛɛkarɛ mɔdrɔ wɔɔ dɔmɩm gʊta hinni ʊ n nɩ bɔrɛ ŋ nɩ, n nɩ zi barɛ ŋ nɩ, ŋnɩ gɔɔta rɔ wɔɔ, dɔmɩm biyəə, n yɩ zi yaarsɩrɔ barɛ ŋ nɩ. 21Ncɩnaaʊ bɩ, kʊ gʊaa a gʊ zi bʊnyaarɔ kʊ mɔɔ ŋ gaa da rɔ wɔɔ ma, an a hu bɔ, a bɔm mɔr gorezaa rɛ, mɔr k’an zore, an mɩŋŋa Zuuba ma, zi mɩŋŋa barɛ haay tɔ ma.
Zuuba zibəənyɩ mɩŋŋa
22Ɩ si nyukumbombaa lɛtaamarɔ lɛɛ, ɩ ɩ tɔ ʊ kan ɩ heer kɩ haay, ɩ bɩr ɩ kam tɩrgabaa zibəə ma, sɩrakarɛ ma, kan ŋʊarɛ kɩ, laafɩɩ kɩ ma, gʊɔɔ kʊ ŋ nɩ yaa dam Zuuba m kan heer hu kɩ rɔ wɔɔ zɛkʊra nɔ ʊ. 23Bɩ, ɩ bɩ yɛ, hɔɔnwar kan badɔ kɩ bɩsɩkarɛrɔ wɔɔ ma y, ɩbɩɩ dɔ ɩ ʊ, ŋ nyambʊrlɛ bɩ, nyaa m. 24A n bɔkarɛ, Zuuba zibəənyɩ n a ga m, an nyaa ba y, a ga a ʊ m, an bɩr mɩŋŋa kan gʊaa woo… kɩ, an a da hɔdɩnda gʊɔɔ m ma, an bɩr bʊraama m. 25A a ga m, k’an hɔ dɩnda gʊɔɔ kʊ ŋ nɩ bɩsɩ kam ma rɔ wɔɔ m, heer bʊgʊ-bʊgʊda m, bala, a a da ma, brɔɔ n a bɔ a taa m, ŋnɩ sɩra dɔ. 26Maam bɩ, ŋ hɔɔn zerm, ŋn’a yɔ Sʊtaana k’a ŋ gʊr a baŋŋarɔ ʊ, an ŋ ba a lɔnnɔ, kʊ ŋ n’a hɔɔnhɔ ba bɩ m.
3Jɛ dɔmɩnnɔ minno
1A dɔ mɩŋŋa ɩ ʊ, dɔmɩnnɔ jɛzannɔ ʊ, mɩsɩrbaa bɩ yɩm kɔɔkɔɔ. 2Bala, gʊɔɔ y’a kam a mɩŋŋɔɔ daahan ma bala, busoo ŋʊarɛ n’a so ŋ ʊ, nyɩnta ŋ nawʊm lɛ bɔ a mɩŋŋa ʊ zannɔ, mɩŋŋabusurezannɔ, Woso sʊnsɔwʊrɛzannɔ, bɩsɩ ka a zɩrɔ ma zannɔ, bajindɔrɛzannɔ, Woso hɔ gore bɔʊrɛzannɔ. 3Ŋ bɩ nyɩntam ŋʊarɛ m y, ŋ nyɩntam bacicirzɛrɛzannɔ, gʊɔɔtɔzarlɛzannɔ, badaamɩŋŋazannɔ, ŋ nyɩntam bʊnyaa gʊta, zi mɩŋŋa barɛ jɩnnɔ, 4bɩmbɩrkʊmazannɔ, badundoamɩŋŋazizannɔ, mɩŋŋabusure n’a so ŋ ʊ maam-maam, ŋ y’a mɛsim lɛtaamarɔ ŋʊarɛ an lɛ da Woso ŋʊarɛ m. 5Ŋ y’a hɔ barɛ ɩ ʊ, wosozuurezannɔ nɩ ŋ mɩ, bɩ ŋ zibəəro y’a hɩnkarɛ a ʊ, Woso paŋŋa bɩ n ŋ mɩsɩrbaa lʊr y. Ɩ gʊ gʊɔɔ ncɩnaaʊ rɔ wɔɔ ma. 6Ŋ gʊɔɔ gɔsɩnnɔ ɩ gasʊm gʊɔɔ hadrɔ ʊ sɩɩ…, ŋnɩ lannɔ hɔɔnwarzannɔ kum hɔɔnkarɛ m, lannɔ wɔɔ duro mimbʊnyaarɔ gʊta, ŋn’ɩ zum a mɛsim lɛtaamarɔ haay ʊ. 7Ŋ yɩ hɔ dɩndam tee…, bɩ ŋ bɩr a dam ma ŋn’ɩ sɩra dɔrɛ y. 8Amba Zanɛs kan Zambrɛs kɩ a da Moyiisi lɛ ʊ ŋ bɩr yɛm bɩ, gʊɔɔ nɔɔn duro sɔ, a da ŋ nawʊm sɩra lɛ ʊ ŋ bɩr yɛrɛ y. Hɔɔn nyaanlɛzannɔ m, ŋ n sɩra ka Woso ʊ denter y. 9Bɩ, ŋ b’a dam ma ŋnɩ ta lɛɛ y, bala, gʊaa woo… sʊrlɛ ŋ hɔɔnwar zibəə bɩ ra, amba n nyɩnta n nɩ sʊr Zanɛs kan Zambrɛs kɩ hɔ ra bɩ m.
10Bɩ, k’ɩbɩɩ nɩ, ɩbɩɩ zu mɔɔ hɔdɩndarɛ ʊ mɩŋŋa, ɩ mɔɔ mɩsɩrbaa barɛ dɔ, kan mɔɔ gɩngarɔ kɩ, m sɩrakarɛ kɩ, m bʊr m mɩŋŋa ma kɩ, m ŋʊarɛ kɩ, m tʊntɔʊrɛ kɩ. 11Ɩbɩɩ fɩr kʊ gʊɔɔ a ka mɔɔ ma, kan cicir kʊ mɔɔ yɩ Antɩyɔs kʊ ʊ, kan Ikoniyɔm kʊ ʊ kɩ, Listɩr kʊ ʊ kɩ bɩ dɔ. Mɔɔ fɩr do haay yɩ, bɩ Zuuba mɔɔ yɔ ŋ haay nɔ ʊ. 12Pakra m hɔɔ, kʊ gʊɔɔ haay kʊ ŋ lɛ n taa k’a zu Woso ʊ mɩŋŋa, Krista Yeezuu nɔ ʊ rɔ wɔɔ n fɩr yɩ gʊɔɔ wɔ ʊ. 13Bɩ, kʊ gʊɔɔ bʊnyaarɔ, bra bɩmba gʊɔɔ m zannɔ wɔɔ nɩ, ŋ gɔɔtarɛ ŋnɩ bɩr tam lɛɛ zi bʊnyaa barɛ nɔ ʊ, ŋnɩ bɩr bra bɩmbam gʊɔɔ m ŋnɩ bɩr tarɛ, ŋnɩ bɩr bra bɩmbarɛ a mɩŋŋɔɔ m sɔ.
14K’ɩbɩɩ nɩ, jɩm hɔ k’ɩbɩɩ dɩnda ɩ sɩra ka ʊ paan… bɩ nɔ ʊ kɔɔkɔɔ. Bala, ɩbɩɩ gʊɔɔ kʊ ŋ y’a dɩnda ɩbɩɩ m nɔ wɔɔ sɩra bɩ. 15A n a sa ɩbɩɩ nyɩbaa ma, ɩbɩɩ Wosoci bɩ dɔ, a y’a dam ma an hɔɔn ka ɩbɩɩ ʊ, ɩbɩɩ m sɩra ka Krista Yeezuu ʊ, ɩ bʊmbɔrɛ yɩ. 16Hɔ kʊ n y’a da Wosoci bɩ nɔ ʊ haay bɩ, Woso Ɛspri y’a ka n n’a da ʊ, bɩ, ta an a wʊ ʊ gʊɔɔ hɔdɩndarɛ minto, k’a nyʊnnyɔɔrɛ da jɩm ʊ, k’a gʊaa bɔ zaa ʊ, k’a mɩsɩrbaa tɩrga barɛ dɩnda gʊaa m. 17Kʊ Woso gʊaa mɩsɩrbaa n bankarɛ yɩ mɩŋŋa, k’a n a da ma an zi mɩŋŋa do haay ba.
4Woso lemim pa darɛ
1A yɛ mɔɔ nawʊrɛ ɩbɩɩ han paan… Woso mɩm ʊ, kan Krista Yeezuu kɩ mɩm ʊ, bɩ zɛm bɩ gʊɔɔ mɩsɩɩrɔ kan gəəno kɩ dʊdɔ ka, a yɛ mɔɔ nawʊrɛ ɩbɩɩ han, hinni k’a nɩ zɛŋ ʊ k’a bɩ cirbəə bɩ bɩ tɔ ma sɔ, 2k’ɩ Woso lemim bɩ pa da, ɩ bɩr som la tee…. K’a so ra dɔmɩm naanaa, gɛɛ k’a kʊsɩ, k’ɩ gɔɔta ɩ bɩr som la, həən si gʊɔɔ ma, ɩ bɔ ŋ lɛɛ kʊ ŋ n’a mimbʊnyaa to, ŋ heer yo kʊ ŋ n’a mɩŋŋa ba, naa haay ba bʊraama gʊta nɔ ʊ, ɩ bɩr hɔ dɩndarɛ ŋ nɩ. 3Bala, dɔmɩm zɛm, gʊɔɔ wɔɔ bɩ yɛrɛ ŋn’a tʊr ka sɩra hɔdɩndarɛ bɩ ma y, bɩ zu ŋ nawʊrɛ a mɩŋŋɔɔ lɛtaamarɔ ʊ, ŋn’a ka a hɔɔnhɔ karɩnsaambɔɔ ma ŋn’a bɩr a ma yɔɔgʊ, brɔɔ n bɩr hɔ k’an nyɩnta ŋ ma dɩndarɛ ŋ nɩ. 4Ŋ bɩ yɛrɛ ŋn’a tʊr ka sɩra ma dɔ y, ŋʊaar minno ŋn’a tʊr karɛ ŋ ma. 5B’ɩbɩɩ, bʊr ɩ ma hɔ haay nɔ ʊ, yɛ fɩr ma, lemim nyɩnta padarɛzaa zi ba, zibəə kʊ Woso a ka ɩ ʊ bɩ ba mɩŋŋa.
Pol zɛ a zɔ
6Bala, kʊ mɔɔ nɩ, wakatɩ a ku kʊ m yɛ zɛ ma. Mɔɔ zɛ bɩ bɔ kʊ ʊ kan mannɩ kɩ, mɔɔ hʊrlɛ wakatɩ a ku. 7Mɔɔ zoo mɩŋŋa ba, mɔɔ brasire a tɛkka ku, mɔɔ nyasʊ sɩrakarɛ m. 8Kɛɛrɛ naa, Woso dama ganwʊrɛ cɩnta mɔɔ m, ganwʊrɛ bɩ do bɩ, tɩrgabaa m, an b’a kam mɔɔ ʊ, dʊdɔkarɛ hinni ʊ b’ʊ. A mɩŋŋa m dʊdɔkarɛzaa tɩrga. Mɔɔ bɛɛ an n’a karɛ m ʊ m deem nɩ y, a y’a kam gʊɔɔ haay kʊ ŋ n’a ŋʊam k’an bʊr lɔ wɔɔ ʊ.
Pol lɛ taa kʊ Timote n bʊr a zi
9Ɩ tɔ ʊ, k’ɩ bʊr mɔɔ zi zɔɔ. 10Bala, Demas a bɔ mɔɔ ʊ, k’a nɩ her durnya naa ŋʊam bɩ tɔ ma. A a hʊr an ta Tesaloniki ʊ, Gresans ta Galasii ʊ, Tiitɩ ta Dalmasi ʊ. 11Likki y’a deem ɩ gɔɔta kan mɔɔ kɩ. K’ɩ bʊr ɩ n nɩ zɛm k’ɩ Markɩ gaa ɩ bʊr m, bala, a y’a dam mɔɔ han gʊta m zibəə bɩ nɔ ʊ. 12Mɔɔ Tisikkɩ nyɔɔ Efɛɛzɩ ʊ. 13K’ɩ zɛm, kɩ bɔ Trowas kʊ ʊ Karpus zi, ɩ nyɛɛm huu kʊ mɔɔ to b’ʊ bɩ sa ɩ bʊr m, ciro wɔɔ gʊr ɩ bʊr ŋ nɩ sɔ, an lɛ da bɩ, n nɩ ŋ ba hɔbɩsɩ ci m nɔ wɔɔ.
14Alɛsandɩr, saar bɩ, a zi bʊnyaa ba mɔɔ m gʊta, Zuuba y’a zibəə zɩm kaŋ ʊ. 15Dundo ɩ mɩŋŋa zi kan kɩ sɔ, bala, a bɩsɩ ka wɔɔ meerbaarɔ ma gʊta. 16Mɔɔ lɛɛkarɛ dʊdɔ bɩ karɛ ma bɩ, gɔsɩ n nyɩnta ʊ k’a a da mɔɔ han y, a bɔ ŋ y’a mɔɔ ʊ haay. A yɛ mɔɔ nawʊm Woso han, k’a b’a taar ka ŋ la y. 17Bɩ, Zuuba a da mɔɔ han an paŋŋa ka mɔɔ ʊ, yɩ a ʊ ncɩnaaʊ mɔɔ n zi kʊ n y’a ka mɔɔ ʊ lemim nyɩnta padarɛ nɔ ʊ bɩ ba haay, do vantɔɔ gʊɔɔ haay n a ma. Bɩ, Zuuba mɔɔ yɔ taatii bɩ lɛ ʊ! 18Zuuba gɔɔtarɛ an mɔɔ yɔ zi bʊnyaa haay wɔ ʊ, an dɔ mɔɔ ma, mɔɔ n gasʊ a cirbəə kʊ ʊ arzana ʊ. A tɔ n lɛbɔʊrɛ yɩ dɔmɩm haay! Amina.
Leersore
19Yaa da Priska kan Akilas kɩ m, yaa da Onezifɔɔr har gʊɔɔ m sɔ. 20Erastɩ gɔɔta Korɛntɩ kʊ ʊ. Trofim yaaba zɛ, mɔɔ n a to Milɛ kʊ ʊ. 21Ɩ tɔ ʊ ɩ bʊr, kʊ nyɛɛm dɔmɩm n bɔkarɛ an a ku. Ebulus kan Pudɛns kɩ, Linus kɩ, Klodɩya kan danyɩnɔ kʊ ŋ nɩ naa ʊ haay rɔ wɔɔ k’ɩ yaa darɛ ɩ m. 22Bɩ, kʊ Zuuba n bɩr kan ɩ kɩ. Woso barka n bɩr kan awɔɔ haay kɩ.