Ci hɩɩya hɔ kʊ Pol a ba
TESALONIKI ZANNƆ
ma
Ci hɩɩyaa hɔ kʊ Pol a ba Tesaloniki zannɔ ma bɩ
gasʊʊrɛ
Pol ɩ ci bɩ ba. Ci naa do ɩ lɛɛkarɛ ciro kʊ Pol ŋ ba rɔ wɔɔ barla. A ba a ʊ kristagʊɔɔ kʊ ŋ nɩ Tesaloniki ʊ rɔ wɔɔ ma.
Ci bɩ ba a ʊ, an a ya an nɩ Yeezuu zɛrɛ hɩɩya hɔ bɩ mim dɩndam, bala, mim naa do gɔɔta an nɩ Tesaloniki gʊɔɔ wɔɔ kɔm. Brɔɔ gɔsɩnnɔ ʊ, Yeezuu lee ku kara, nɔɔ ʊ a bɩ zi bam dɔ y, bala, Yeezuu wusigəre dɔmɩm a zɔ. Naa haay tɔ ma m an ci bɩ ba k’a ŋ bɔ zaa ʊ.
1Pol ɩ yaa dam Tesaloniki kristagʊɔɔ m
1Mɔɔ mɩŋŋa Pol, kan Silas kɩ Timote kɩ, wɔɔ nɩ ci naa do barɛ awɔɔ ma, awɔɔ k’a m Tesaloniki kristagʊɔɔ wɔɔ, wɔɔ Zɩ Woso kan Zuuba Yeezuu Krista kɩ n’a so awɔɔ ʊ rɔ wɔɔ. 2A yɛ wɔɔ nawʊm kʊ Zɩ Woso kan Zuuba Yeezuu Krista kɩ n barka kan laafɩɩ kɩ ka awɔɔ ʊ.
Barka yaadarɛ kan heeryore kɩ
3M danyɩnɔ, a a ga m, kʊ wɔɔ n yaa da Woso m barka, awɔɔ tɔ ma tee…. A ga a ʊ m, kʊ wɔɔ n a ba ncɩnaaʊ, bala awɔɔ sɩrakarɛ y’a dam la, awɔɔ kʊ ŋʊarɛ nɩ tam lɛɛ tee…. 4Naa minto m, kʊ wɔɔ y’awɔɔ mim dɩndam Woso gʊɔɔ sokʊmarɔ vantɔɔ lɛɛ, a dɩnda wɔɔ nawʊm ʊ n’ʊ mim kam brama, bala, gʊɔɔ sɔ awɔɔ m, ŋnɩ fɩr karɛ awɔɔ ma, awɔɔ nɩ yɛm naa haay ma, an n’a tʊntɔŋ ʊ a gɔɔta an nɩ sɩrakarɛ m.
5Naa woo… n’a hɩnkarɛ a ʊ, dʊdɔ kʊ Woso n nɩ zɛm b’a ka bɩ yɩm tɩrga, fɩryɩrɛrɔ nɔɔn duro k’awɔɔ nɩ yɛrɛ ŋ ma naa n n’a karɛ awɔɔ n’a ga Woso cirbəə gasʊrɛ m, Woso cirbəə bɩ do tɔ ma m awɔɔ nɩ fɩr yɩm. 6Sɩra m, hɔ k’an tɩrga bɩ Woso n n’a bam, a y’awɔɔ zɩm bɔm gʊɔɔ kʊ ŋ nɩ fɩr karɛ awɔɔ ma rɔ wɔɔ ma, an fɩryɩrɛ ka ŋ ʊ. 7Bɩ, awɔɔ k’a nɩ fɩr yɩm nɔ wɔɔ, a mɛnyɔɔ karɛ awɔɔ ʊ kan wɔɔ kɩ, naa ba a nawʊm hinni kʊ Zuuba Yeezuu n’a tom brama an zer kan a malɛɛkarɔ paŋŋazannɔ kɩ bɩ ma. 8Zer a nawʊm sɛwurə nɔ ʊ, k’a bɩ fɩr ka gʊɔɔ kʊ ŋ n Woso dɔ, bɩ ŋ bɩr yɛm wɔɔ Zuuba Yeezuu lemim nyɩnta bɩ ma rɔ wɔɔ ma. 9Fɩryɩrɛ kʊ ŋ n’a yɩm bɩ, zaarbarɛ k’a nyarɛ ba ʊ m, n nyɔɔ n nawʊm laatʊ Zuuba taʊrɛ kan a cirbəə paŋŋa kɩ ma. 10Zɛ k’a nawʊm dɔmɩm gʊta bɩ do hinni ʊ bɩ, naa n nɩ baŋ ʊ. Zɛ a nawʊm k’a bɩ nyɩnta lɛbɔʊrɛ m a gʊɔɔ wɔɔ zi, kʊ gʊɔɔ kʊ ŋ sɩra ka ʊ haay rɔ wɔɔ n a lɛ bɔ a ʊ. Awɔɔ nyɩntam gʊɔɔ wɔɔ duro barla, bala, awɔɔ sɩra ka lemim kʊ wɔɔ pa da awɔɔ m b’ʊ.
11Bɩ y’a ka, wɔɔ nɩ yaa dam Woso m awɔɔ tɔ ma tee…, k’an a ka k’awɔɔ n a ga mɩsɩrbaa k’a mɩŋŋa awɔɔ bir k’awɔɔ m b’a ba bɩ m. K’an a ka, a paŋŋa bɩ minto bɩ, k’awɔɔ n a da ma, a hɔ mɩŋŋa haay k’awɔɔ lɛ n taa k’a ba bɩ ba, kʊ zi k’awɔɔ n’a bam sɩra k’awɔɔ ka bɩ tɔ ma bɩ m nyɩ da. 12Naa n’a kam wɔɔ Zuuba Yeezuu n lɛbɔʊrɛ yɩ awɔɔ gʊr zi, awɔɔ m lɛbɔʊrɛ yɩ a gʊr zi, wɔɔ Woso kan Zuuba Yeezuu Krista kɩ barka tɔ ma.
2Hɔ k’a nɩ nyɩntaŋ ʊ Yeezuu n bɔkarɛ an bʊr
1M danyɩnɔ, kʊ wɔɔ Zuuba Yeezuu Krista zɛrɛ hinni bɩ nɩ, kan ba wɔɔ n’ʊ som kʊ ma kan kɩ bɩ mim nɩ, hɔ kʊ wɔɔ ʊ k’ʊ a yɛ awɔɔ han bɩ ba n nɩ: 2A a da ma, n ʊ, wosolɛsinnɩsora ganwʊrɛ meerbaa niŋŋə, gɛɛ Woso lemim padarɛ niŋŋə, gɛɛ ci niŋŋə y’a to wɔɔ zi an n’a hɩrɛ a ʊ, Zuuba zɛrɛ hinni bɩ lee ku, a b’a hɔɔn war kʊ ma a nyi ba naanaa, naa do tɔ ma y. 3A b’a to kʊ gɔsɩ n bra bɩmba a m fɩɩga y. Bala, pakra m kʊ gʊɔɔ cir gʊta m wuti ŋnɩ bɩsɩ ka Woso ma, kʊ gʊaa bʊnyaa kʊ Woso n n’a dam sɛhar ʊ bɩ n a hɩnka, bɩ jɛ ʊ, Zuuba dɔmɩm bɩ n n’a kuŋ ʊ. 4Gʊaa bʊnyaa bɩ do bɩ yɛm, gʊɔɔ n yaa da hɔsɩ m dɔ y, baa Woso mɩŋŋa, a y’a mɩŋŋa cɩntam hɔ haay burə ʊ, baa Woso burə ʊ. A gasʊm Wosocɛ gʊta mɩŋŋa ʊ, an aa nyɩnta an a hɩ a ʊ, Woso n’a mɩ.
5Nyɩnta kʊ mɔɔ ʊ kan awɔɔ kɩ bɩ, mɔɔ naa mim dɩnda awɔɔ m, a tɔ ba awɔɔ nɔ ʊ ra? 6Dɩɩtaa naa, hɔ n’a tam gʊaa bʊnyaa bɩ m toore, k’a b’a da ma, an a hɩnka k’a dɔmɩm bɛɛ y’a ku y, awɔɔ hɔ bɩ do dɔ. 7Denter m, gʊaa bʊnyaa bɩ paŋŋa a nyaakʊm da an nɩ zi bam kara, bɩ pakra m kʊ gʊaa k’a n’a tam gʊaa bʊnyaa bɩ m toore bɩ n’a gaa toore. 8Bɩ jɛ ʊ, gʊaa bʊnyaa bɩ y’a hɩnkam kɛɛrɛ, bɩ Zuuba Yeezuu y’a zɛm gər a lɛ hoonsire m, an a hɔɔnsɩ a hɩnkarɛ leegure paŋŋa gʊtabaa m. 9Gʊaa bʊnyaa bɩ, a hɩnka a nawʊm kan Sʊtaana paŋŋa kɩ, a zi paŋŋazannɔ do haay bam, an makrarɔ ba kan hoserlo kɩ, k’a gʊɔɔ nyʊnnyɔɔ. 10A yom zi bʊnyaa do haay ma, an gʊɔɔ kʊ ŋ nɩ nyaanɩm nɔ wɔɔ nyʊnnyɔɔ, brɔɔ nyaanɩm, bala, sɩra k’a n’a dam ma an ŋ bʊmbɔ bɩ, ŋ n a ŋʊa, bɩ, ŋ n yɛ ma y. 11Bɩ y’a ka, Woso n a ka nyʊnnyɔɔrɛ paŋŋa nɩ zi bam kan ŋ kɩ, kʊ ŋ nɩ sɩra ka ŋʊaar ʊ. 12Yɩ a nawʊrɛ ncɩnaaʊ, Woso m bɩ zɛm bɩ gʊɔɔ kʊ ŋ n yɛ sɩra ma y, bɩ zibʊnyaa barɛ ŋn’a ŋʊam nɔ wɔɔ dʊdɔ yar.
Ʊ jɩm kɔɔkɔɔ sɩrakarɛ nɔ ʊ
13M danyɩnɔ, wɔɔ ʊ ga m, ʊ yaa da Woso m barka awɔɔ tɔ ma tee…, awɔɔ kʊ Zuuba n’a ŋʊam nɔ wɔɔ. Bala, Woso awɔɔ bɔ ʊ, bɩ ma bɩ, durnya ba ʊ cɩna y. *Sɛnt-Ɛspri zibəə tɔ ma, kan yɛ k’awɔɔ ʊ sɩra ma bɩ kɩ minto, k’awɔɔ n bʊmbɔrɛ yɩ, a yɩ Woso soʊre hɔɔ. 14Bʊmbɔrɛ bɩ tɔ ma m, an zu kʊ ʊ kan lemim nyɩnta kʊ wɔɔ pa da awɔɔ m bɩ kɩ, an awɔɔ bir, k’awɔɔ m bɩ nyɩnta wɔɔ Zuuba Yeezuu Krista lɛbɔʊrɛ nɔ ʊ. 15Naa tɔ ma bɩ, danyɩnɔ, k’a jɩm kɔɔkɔɔ, a hɔ haay kʊ wɔɔ dɩnda awɔɔ m meerbaa nɔ ʊ gɛɛ ci ʊ bɩ nyasʊ mɩŋŋa.
16Wɔɔ Zuuba Yeezuu Krista mɩŋŋa, kan wɔɔ Zɩ Woso kɩ wɔɔ ŋʊa, ŋnɩ heerwʊtarɛ k’a nyarɛ ba ʊ, kan taaheerlɛ mɩŋŋa kɩ ka wɔɔ ʊ. 17A yɛ wɔɔ nawʊrɛ ŋ han, kʊ ŋ n’a ka kʊ heerwʊtarɛ n’awɔɔ heer han, kʊ ŋ nɩ paŋŋa ka awɔɔ ʊ k’a bɩr hɔ k’an mɩŋŋa haay bam tee…, zibəə kan meerbaa kɩ nɔ ʊ.
3Yaadarɛ mim
1M danyɩnɔ, hɔ k’a gɔɔta wɔɔ n’a hɩrɛ awɔɔ m bɩ ba n nɩ, k’a yaa da wɔɔ tɔ ma, kʊ Zuuba lemim n gɔɔta an bɩr tam lɛɛ tee…, k’an daʊrɛ yɩ amba a nyɩnta ʊ awɔɔ zi b’ʊ bɩ m. 2K’a yaa da wɔɔ tɔ ma sɔ, kʊ Woso n wɔɔ yɔ gʊɔɔ bʊnyaarɔ kʊ ŋ nɩ kʊsɩ rɔ wɔ ʊ, bala, gʊɔɔ haay bɛɛ nɩ sɩra karɛ y. 3Bɩ, jɩnalɛrazaa m Zuuba m, a y’awɔɔ paŋŋa dam la, an dɔ awɔɔ ma kan a bʊnyaabarɛzaa bɩ kɩ. 4K’awɔɔ mim bɩncɛ nɩ, Zuuba a ka wɔɔ heer n kookoo ʊ a dɔ, ʊ ʊ, awɔɔ ɩ hɔ kʊ wɔɔ n’a hɩrɛ awɔɔ m bam b’awɔɔ gɔɔtarɛ a ta lɛɛ kan a barɛ kɩ. 5Bɩ, kʊ Zuuba n a ka k’awɔɔ n Woso ŋʊa kan a heer kɩ, k’a a da ma sɔ, a bɩr tam lɛɛ tee…, baa kʊ bɔ m, amba Krista a ba bɩ m.
Zibəə mim
6Ʊ danyɩnɔ, a yɛ wɔɔ nawʊrɛ awɔɔ han, wɔɔ Zuuba Yeezuu Krista tɔ ma, danyɩnɔ haay kʊ yakʊzannɔ m nɔ wɔɔ, k’a gʊ ŋ ma laatʊ, brɔɔ bɩr yɛm hɔ haay kʊ wɔɔ dɩnda awɔɔ m bɩ ma y. 7Awɔɔ mɩŋŋɔɔ, awɔɔ hɔ k’a n’a bam a wɔɔ hɔbaa dɩnda bɩ dɔ. Bala, nyɩnta kʊ wɔɔ ʊ kan awɔɔ kɩ bɩ, wɔɔ n nyɩnta yakʊzannɔ y. 8Wɔɔ n gɔsɩ hɔbɩrɛ bɩ vam y. Bɩ, zi wɔɔ ba ʊ kɔ, wɔɔ zi ba sinuu ʊ kan a gunuu ʊ kɩ, k’awɔɔ gɔsɩ bɩ kɔ wɔɔ hɔbɩrɛ mim tɔ ma y. 9Sɩra nɔ ʊ, wɔɔ ʊ ga m, ʊ daahan yɩ awɔɔ zi, bɩ, wɔɔ y’a ŋʊa ʊ zim k’ʊ lɛɛmaa hɔ bɩ, k’awɔɔ n zu wɔɔ hɔbaa ʊ. 10Bala, nyɩnta kʊ wɔɔ ʊ awɔɔ zi b’ʊ bɩ, wɔɔ hɩ awɔɔ m, wɔɔ ʊ: «Kʊ gʊaa ʊ, a lɛ baa zibəə ma, k’a bɩ hɔ bɩ sɔ y.» 11A n bɔkarɛ, wɔɔ y’a marɛ n n’a hɩrɛ n ʊ, awɔɔ gʊɔɔ gɔsɩnnɔ n ta ʊ, ŋn’ɩ yakʊ bam, ŋ bɩr zi barɛ y, a war ŋ nawʊm gʊɔɔ minno ma. 12Lɛ kʊ wɔɔ n’a cɩntam gʊɔɔ wɔɔ duro m, ʊ nɩ ŋ dʊndɔm wɔɔ Zuuba Yeezuu Krista tɔ ma bɩ ba n nɩ: K’a a da a mɩŋŋɔɔ zibəə lɛ ʊ zɛny…, a a lɛɛmaa hɔ bɩ.
13Ʊ danyɩnɔ, k’awɔɔ nɩ, a bɩ kɔ kan zi mɩŋŋa barɛ kɩ y. 14Kʊ gʊaa n zu hɔ kʊ wɔɔ dɩnda ci naa do nɔ ʊ b’ʊ, k’a zaa da lɛ ʊ, a b’a ya, a a zɛ kʊ ra kan kɩ y, kʊ nyannɩ n a nyasʊ. 15Bɩ, a b’a zaa ba a jɩm y, k’a dʊndɔ, amba n tɩr a danyɩ dʊndɔ bɩ m.
Leersore
16Bɩ, kʊ Zuuba mɩŋŋa k’a nɩ laafɩɩ kam bɩ n laafɩɩ ka awɔɔ ʊ dɔmɩm haay, hɔ haay m. Bɩ, kʊ Zuuba m bɩr kan awɔɔ haay kɩ.
17Mɔɔ mɩŋŋa Pol nɩ leersore yaa kʊ mɔɔ n’a darɛ awɔɔ m naa gʊrsɩra barɛ m zim, ciro haay kʊ mɔɔ tɩr ŋ nyɔɔ rɔ wɔɔ, m wɔjɩ mɔɔ tɩr a daŋ ʊ ncɩnaaʊ. Mɔɔ mɩŋŋa gʊrsɩra n naa.
18Bɩ kʊ wɔɔ Zuuba Yeezuu Krista barka n bɩr kan awɔɔ haay kɩ.