Ci hɩɩya hɔ kʊ
PƖYƐƐR
a ba
Ci hɩɩya hɔ kʊ Pɩyɛɛr a ba bɩ
gasʊʊrɛ
Pɩyɛɛr ɩ ci bɩ ba, bɩ gʊɔɔ niŋŋoo y’a hɩrɛ ŋ ʊ, a karɩndanyɩ m, ci naa do ba n y’a ʊ, gʊaasɩbabaa daa ciro wɔɔ haay jɛ ʊ, bɩ, a n lɛɛ ka hɩnkarɛ ci bɩ nɩ y. Ci bɩ ba n y’a ʊ, kristagʊɔɔ kʊ ŋ y’a kərgu lɛɛ haay ra rɔ wɔɔ ma.
Ci bɩ ba n y’a ʊ, k’a ŋʊaarhɔdɩndarɛzannɔ wɔɔ hɔdɩndarɛ da jim ʊ, bala, brɔɔ ɩ hɔɔ kʊ ŋ n’a ga m ŋnɩ bɩr kristagʊɔɔ mɩsɩrbaa nɔ ʊ bɩ dɩndam sɔ. Kʊ ŋ lɛ n taa k’a mɩsɩrbaa ba mimbʊnyaa nɔ ʊ bɩ y’a ka ŋn’a dɩndam gʊɔɔ m kʊ ŋ n’a ba maam sɔ.
Pɩyɛɛr ʊ kristagʊɔɔ wɔɔ n a gʊ ŋ ma, ŋn’a ba mimbʊnyaa ma laatʊ. Kʊ ŋn’a gu gʊɔɔ kʊ ŋ nɩ yaa wʊm Woso lerbɔrɛ k’a ʊ Yeezuu y’a yarɛ an bʊr lɔ wɔɔ ma. Ci bɩ k’a a ba bɩ, bɩ ma bɩ, a gusi gʊta an a zɔ zɛ ma.
1Pɩyɛɛr ɩ yaa dam kristagʊɔɔ m
1Mɔɔ mɩŋŋa Simɔn Pɩyɛɛr, mɔɔ nɩ ci bɩ bam, Yeezuu Krista zibəənyɩ m mɔɔ m, a zibəəzaa m mɔɔ m sɔ. Ci bɩ ba mɔɔ nawʊm awɔɔ ma, awɔɔ k’a sɩrakarɛ n hɔdeem kan wɔɔ hɔ kɩ rɔ wɔɔ. Yeezuu Krista m wɔɔ Woso, a m wɔɔ Bʊmbɔrɛzaa sɔ, a tɩrgabaa y’a ka, awɔɔ n sɩra ka.
2A yɛ mɔɔ nawʊm k’awɔɔ n bɩr Woso dɔm, kan wɔɔ Zuuba Yeezuu kɩ, k’a a da ma a barka kan laafɩɩ kɩ yɩ gʊta.
Kristagʊaa mɩsɩrbaa zaa
3Woso zi ba a paŋŋa bɩ m, an a ka wɔɔ nɩ hɔ haay kʊ wɔɔ ʊ ga m ʊ a yɩ, k’ʊ ʊ da ma, ʊ mɩsɩrbaa ba a zuure nɔ ʊ mɩŋŋa bɩ m. A ka k’a ʊ wɔɔ n Krista dɔ bɩ nɔ ʊ. Bɩ mɩŋŋa ɩ wɔɔ bir a lɛbɔʊrɛ kan a paŋŋa kɩ m. 4Yɩ a ʊ, ncɩnaaʊ, an hɔɔ mɩŋŋɔɔ kʊ ŋ nɩ gʊtɔɔ Woso n ŋ ler bɔ rɔ wɔɔ ka wɔɔ ʊ, ŋ ka a ʊ, k’awɔɔ n a da ma a a yɔ lɛtaamarɔ bʊnyaarɔ kʊ ŋ nɩ durnya ʊ, ŋn’ɩ gʊɔɔ zaar bam nɔ wɔɔ m. K’a wɔ ʊ, a Woso mɩŋŋa mɩsɩrbaa ba. 5Naa tɔ ma bɩ, k’a a tɔ ʊ paan… a mɩsɩrbaa zore na a sɩrakarɛ bɩ ma, a Woso dɔrɛ na mɩsɩrbaa zore bɩ ma. 6A a tɔ ʊ gʊta, a a da a mɩŋŋa ma, k’a tʊntɔʊrɛ na daamɩŋŋama bɩ ma, k’a mɩsɩrbaa k’a Woso nɔ yɩ na tʊntɔʊrɛ bɩ ma, 7k’a a tɔ ʊ sɔ, a bakʊmmɩŋŋa na mɩsɩrbaa k’a Woso nɔ yɩ bɩ ma, k’a ŋʊarɛ na bakʊmmɩŋŋa bɩ ma. 8K’awɔɔ ɩ hɔɔ nɔɔn duro bam tee…, ŋ y’a karɛ awɔɔ n ziro ba gʊta a bɩr wɔɔ Zuuba Yeezuu Krista dɔm tee…. 9Bala, gʊaa kʊ hɔɔ nɔɔn duro ba zi bɩ, bʊʊ n a zaa m, an n’a wɔ dɩndam, a tɔ ba a nɔ ʊ dɔ, a ʊ, n y’a mimbʊnyaarɔ gʊngʊ a ma biisi y.
10Naa tɔ ma bɩ, m danyɩnɔ, Woso y’awɔɔ bɔ ʊ, k’a a tɔ ʊ, a gɔɔta a zuure nɔ ʊ kɔɔkɔɔ. K’awɔɔ ba ncɩnaaʊ, awɔɔ b’a dom fɩɩga y. 11Yɩ a nawʊrɛ ncɩnaaʊ, Woso n zaa ka awɔɔ ʊ fasɩ, awɔɔ n gasʊ wɔɔ Zuuba Yeezuu Krista kʊ wɔɔ Bʊmbɔrɛzaa m bɩ cirbəə kʊ k’a nyarɛ ba ʊ b’ʊ.
Ʊ nyasʊ hɔ kʊ n y’a dɩnda
wɔɔ m bɩ m
12Naa tɔ ma m, mɔɔ n’a ŋʊam kʊ m bɩr hɔɔ nɔɔn duro tɔ darɛ awɔɔ nɔ ʊ, baa k’awɔɔ ŋ dɔ kara, an nɩ zum sɩra naa do ʊ kɔɔkɔɔ bɩ kɩ. 13Bɩ, mɔɔ y’a gɩngam m ʊ, a a ga m kʊ m bɩr hɔɔ nɔɔn duro tɔ darɛ awɔɔ nɔ ʊ tee…, kʊ mɔɔ gɔɔta m m mɩsɩr naa dɔmɩm ʊ, k’awɔɔ b’a zu a ʊ y. 14Mɔɔ dɔ mɔɔ ʊ, mɔɔ hʊrlɛ a zɔ durnya naa ʊ, amba wɔɔ Zuuba Yeezuu Krista nyɩnta an a hɩ mɔɔ m bɩ m. 15Bɩ, mɔɔ yɩ m tɔŋ ʊ, k’an bɩr yɩrɛ ɩ ʊ, mɔɔ baʊrɛ jɛ ʊ, awɔɔ a da ma dɔmɩm haay nɔ ʊ a hɔdɩndarɛrɔ nɔɔn duro tɔ da a nɔ ʊ.
16Bala, yo bɛɛ wɔɔ ʊ ŋʊaar dɔrɛ noonno ma, ʊ wɔɔ Zuuba Yeezuu Krista k’a nɩ zɛm kan paŋŋa gʊta kɩ bɩ dɩnda awɔɔ nɩ y. A mɩŋŋa yɩ wɔɔ ʊ ʊ zim a lɛbɔʊrɛ gʊta nɔ ʊ. 17Wakatɩ kʊ Zɩ Woso daʊrɛ kan lɛbɔʊrɛ kɩ ka ʊ bɩ, wɔɔ nyɩnta b’ʊ. Woso mɩŋŋa nyɩnta a lɛbɔʊrɛ gʊta nɔ ʊ, an meer ba kan kɩ, a ʊ: «Mɔɔ Nyɩ m naa do, mɔɔ n’a ŋʊam gʊta.» 18Nyɩnta kʊ wɔɔ ʊ kan kɩ ci mɩŋŋa bɩ burə ʊ bɩ, wɔɔ leer naa do k’a a to brama bɩ ma ʊ zim.
Ʊ nyasʊ Woso lemim bɩ m
19Ncɩnaaʊ bɩ, wɔɔ sɩra ka gʊta, ʊ ʊ, lemim kʊ wosolɛsinnɩsorazannɔ wɔɔ a hɩ bɩ, sɩra m. A a ga m, k’awɔɔ n lemim bɩ si mɩŋŋa, bala, fɩtɩrɛ m, an nɩ yɔm monsigə ʊ, k’a gɔɔta a lemim bɩ si kʊ lɛɛgure dɔmɩm n a ku, kʊ Krista k’a bɔ kʊ ʊ kan dɔgta monyaa kɩ bɩ n bʊr, an lɛɛ gu awɔɔ heerlɔ wɔɔ ʊ. 20A n cem haay bɩ, k’a dɔ a ʊ, gɔsɩ b’a dam ma an wosolɛsinnɩsorameerbaarɔ kʊ ŋ nɩ Wosoci b’ʊ rɔ wɔɔ jɩ dɩnda a zim nɩ y. 21Bala, gʊaa bɛɛ hɔɔn bɔ ʊ a zim, k’a wosolɛsinnɩsora meer ba y, fɩɩga. Bɩ, *Sɛnt-Ɛspri y’a ka gʊɔɔ n wɔ ʊ, ŋnɩ Woso lɛ si, ŋnɩ so ra.
2Ʊ dundo ʊ zi kan ŋʊaar hɔdɩndarɛzannɔ wɔɔ kɩ
1Biisi bɩ, ŋʊaarlɛsinnɩsorazannɔ nyɩnta ʊ zɩɩfʊrɔ dogʊɔɔ wɔɔ barla. Kɛɛrɛ sɔ naa, ŋʊaarhɔdɩndarɛzannɔ nyɩntarɛ awɔɔ barla. Ŋ gasʊm hɔdɩndarɛrɔ bʊnyaarɔ m awɔɔ bire ʊ lɔɔ…, ŋnɩ bɩsɩ ka Zuuba k’a ŋ bʊmbɔ bɩ ma. Naa ŋn’a bam hʊnhʊrlɛ n bɩ daata zɛ ŋ la, an ŋ zar. 2Gʊɔɔ gʊta zure ŋ jɛ ʊ, ŋ jaandarɛ bɩ nɔ ʊ, ŋn’a kam gʊɔɔ n sɩra zaa bɩ sʊnsɔ wʊ. 3Busoo lɛtaama gʊta y’a sore ŋ ʊ, bɩ n a ka, ŋnɩ bra ba awɔɔ m meerbaarɔ nyɩntɔɔ m, k’a hɔ yɩ awɔɔ gʊr zi. Bɩ, Woso lɛɛ ka an a cɩnta tee… k’a ŋ dʊdɔ yar, ŋ zaarbarɛ ɩ zɛm k’a bɩ ŋ ku.
4Makrarɔ ba n nɩ: Woso n malɛɛkarɔ kʊ ŋ kʊrɔ ma rɔ wɔɔ to y, ŋ nyɔɔ a ʊ, an ŋ da sɛhar ʊ, ŋnɩ baŋŋarɔ n’a ma monsigə ʊ, ŋnɩ dɔm dʊdɔyarlɛ hinni ma. 5Woso n durnya k’a nyɩnta ʊ biisi bɩ to y, a a ka hi gʊta n bʊr an bɩ gʊɔɔ wɔɔ zaar ba, nyɩnta brɔɔ ʊ gʊɔɔ bʊnyaarɔ. Bɩ, Woso Nowee bʊmbɔ, kan gʊɔɔ vantɔɔ kɩ saanhɩna. Bɩ nyɩnta an nɩ zi mɩŋŋa barɛ pa dam.
6Woso Sodɔm kʊ kan Gomɔɔr kʊ kɩ dʊdɔ yar an a ka sɛ n bɩ ŋ zar. A ba a ʊ maam, k’a hɔ k’a nɩ gʊɔɔ bʊnyaarɔ yɩm bɩ hɩnka. 7A Lɔttɩ yɔ, nyɩnta b’ʊ gʊaa tɩrga, an nɩ gʊɔɔ kʊ ŋ nɩ mɩsɩrbaa bʊnyaa bam a zamaana nɔ ʊ rɔ wɔɔ bire ʊ, a heer n’a zarm. 8Bala, k’a mɩŋŋa n tɩrga, an nɩ ŋ kʊ b’ʊ bɩ, a yɩ ŋ zibəə bʊnyaarɔ wɔɔ yɩm, an nɩ ŋ mim mam, naa n a ka k’an tɩrga bɩ, a heer nɩ kɔm, gʊɔɔ wɔɔ zibəə bʊnyaarɔ wɔɔ tɔ ma. 9Ncɩnaaʊ bɩ, wɔɔ y’a yɩm minno nɔɔn duro haay nɔ ʊ, ʊ ʊ, zaa kʊ Zuuba n’a sam, an n’a gʊɔɔ bʊmbɔm bɩ, a a dɔ. K’a y’a bam lɔ sɔ an gʊɔɔ bʊnyaarɔ wɔɔ to, k’a bɩ ŋ dʊdɔ ka dʊdɔyarlɛ hinni ʊ, a fɩr ka ŋ ma, a a dɔ sɔ. 10A fɩr kam gʊɔɔ kʊ ŋ nɩ zure a lɛtaamarɔ bʊnyaarɔ wɔɔ ʊ rɔ wɔɔ ma, an lɛ da. Brɔɔ bɩr yɛm Woso ma y. Ŋʊaarhɔdɩndarɛzannɔ kʊ mɔɔ ŋ mim hɩ awɔɔ m nɔ wɔɔ, ŋ heer ka, mɩŋŋabusurezannɔ m sɔ, ŋ leer ba malɛɛkarɔ ʊ y, brɔɔ sʊnsɔ ŋ n’a wʊm a hɔɔnhɔ ma.
11Baa malɛɛkarɔ mɩŋŋɔɔ kʊ ŋ lɛ da ŋʊaarhɔdɩndarɛzannɔ wɔɔ m a paŋŋa kan a lɛbɔʊrɛ kɩ nɔ ʊ bɩ, ŋ bɩr malɛɛkarɔ vantɔɔ wɔɔ dʊdɔ yarlɛ y, bɩ ŋ bɩr ŋ sʊnsɔ wʊm Zuuba lɛɛ y. 12Bɩ gʊɔɔ nɔɔn duro bɔ kʊ ʊ kan poohɔɔ kɩ, ŋ hɔɔn ba ʊ y, ta ŋ nawʊ ʊ, kʊ n nɩ bɩ ŋ gʊr baŋŋarɔ ʊ, n nɩ ŋ zɩnzɛ. Hɔ kʊ ŋ n a dɔ bɩ n n’a sʊnsɔ wʊm. N zɛm bɩ ŋ zɩnzɛ am poohɔɔ hɔ bɩ m. 13Kʊ ŋ y’a ka gʊɔɔ ŋ fɩr yɩ bɩ, fɩryɩrɛ n nɩ nyɩntarɛ ŋ yawʊra sɔ. A lɛtaamarɔ bʊnyaarɔ wɔɔ ŋʊa ŋ tɩr a ʊ, ŋnɩ ŋ ba sinsebir ma. A so k’awɔɔ ʊ tɩr a ʊ kʊ ma, k’a kʊ ŋʊarɛ hɔbɩrɛ bɩ bɩ, nyɩnta kʊ ŋ tɩr a ʊ kan awɔɔ kɩ ŋnɩ bɩr a heer nyɔɔm a ŋʊaar zibəə nɔ ʊ bɩ, ŋ taʊrɛ awɔɔ bire ʊ b’ɩ nyannɩ darɛ awɔɔ ma. 14Ŋ ba zibəə m kʊ dɩga lannɔ ma, k’a mim bʊnyaa ba kan ŋ kɩ bɛɛ y. Ŋ bɩr kɔm kan mimbʊnyaa barɛ kɩ y, ŋn’a kam sɔ gʊɔɔ kʊ ŋ paŋŋa ba ʊ Woso zaa bɩ ra rɔ wɔɔ, ŋn’a dam mimbʊnyaa ʊ kan ŋ kɩ. Busoo yɩrɛ lɛtaama y’a so ŋ heer ʊ jilli. Woso lerbɔrɛ kʊsɩ ɩ kan ŋ kɩ. 15Ŋ zaa tɩrga bɩ to, ŋn’a nyʊnnyɔɔ. Bozɔɔr nyɩ Balam2.15 K’a dɩga Hɩnkarɛ Ci 2.14 bɩncɛ ʊ. zaa bɩ ŋ y’a sa, bɩ yɛ an a bʊnyaa ba k’a busoo yɩ. 16Bɩ, Woso həən si ma a kʊrɔma bɩ tɔ ma. Bra bɩr meer barɛ y, bɩ, hinni bɩ do ʊ bɩ, bra meer ba kan kɩ am gʊaa hɔ bɩ m. Yɩ a ʊ, ncɩnaaʊ bra bɩ n wosolɛsinnɩsorazaa bɩ hɔɔzaabaa zibəə bɩ da jɩm ʊ.
17Ŋʊaarhɔdɩndarɛzannɔ nɔɔm bɔ kʊ ʊ, kan hiyəə gəəro kɩ. Ŋ bɔ kʊ ʊ sɔ kan warkʊ kʊ hɩnhɛr gʊta nɩ cenim nɩ kɩ, Woso lɛɛ banka ŋ nɩ monsigə gʊta ʊ, kʊ ŋ nɩ bɩ gɔɔta ʊ. 18A lɛ ŋn’a bɔrɛ a mɩŋŋɔɔ ʊ meerbaa vanvannɔ m, ŋn’ɩ ŋʊaar bam gʊɔɔ kʊ ŋ bɔ nyaanlɛzannɔ bire ʊ lɛɛm nɔ wɔɔ m. Naa ba ŋ nawʊm a jaandarɛ lɛtaamarɔ bʊnyaarɔ wɔɔ m, kʊ brɔɔ n jaan da sɔ. 19Soamɩŋŋaʊ ler ŋn’a bɔm gʊɔɔ wɔɔ duro m, an bɔkarɛ mimbʊnyaa lɔnnɔ nɩ ŋ mɩŋŋɔɔ m. Bala, kʊ hɔ a so ɩ ʊ, hɔ bɩ do lɔ n’ɩ mɩ. 20Gʊɔɔ kʊ ŋ wɔɔ Zuuba Yeezuu Krista, kʊ wɔɔ Bʊmbɔrɛzaa m bɩ dɔ rɔ wɔɔ, ŋ bɔlɛm yɩ durnya zibəə bʊnyaarɔ kʊ ŋ nɩ dintim kam gʊaa ma rɔ wɔɔ wɔ ʊ. Bɩ, kʊ ŋ y’a ya, ŋnɩ gasʊ minno wɔɔ duro barɛ ʊ, hɔɔ wɔɔ duro barɛ n’a so ŋ ʊ, a yɩrɛ ŋ ma bʊnyaa gʊta, an lɛ da biisi m. 21Kʊ jɩra ŋ y’a ʊ zaa k’an tɩrga bɩ dɔrɛ ra, k’a jɩra hɔɔ. Bɩ, ŋ y’a ku ŋn’a dɔ, ŋnɩ bɔkarɛ ŋn’a bɔ Woso lɛrɔ kʊ ŋ y’a dɩnda ŋ nɩ rɔ wɔɔ ʊ. 22Mim niŋŋə k’a ŋ yɩ naa y’a hɩnkarɛ a ʊ, hɔ kʊ bɔɔr naa do a hɩ naa, sɩra m, a a hɩ, a ʊ: «Ji b’a bɔ, an aa hɔ k’a bɔ a rɛ bɩ bɩ.» A a y’a an a hɩ sɔ, a ʊ: «Kurkur kʊ n y’a sʊrgɔ lɛɛm-lɛɛm b’a ya an ta, an n’a birmim bɩtɛ ʊ.»
3Zuuba Yeezuu y’a yarɛ an bʊr
1M gʊaasɩbɔɔ, mɔɔ ci hɩɩyazaa m naa, mɔɔ n’a barɛ awɔɔ ma. Ciro hɩɩyɔɔ nɔɔm haay nɔ ʊ bɩ, m ya mɔɔ ʊ, m nɩ som hɔɔ k’awɔɔ ŋ dɔ hɔɔ rɔ wɔɔ ra, kʊ ŋ tɔ n bɩr awɔɔ nɔ ʊ, k’a bɩr a hɔɔn darɛ ŋ ma, amba a a ga m bɩ m. 2Mɔɔ lɛ taa k’awɔɔ n meerbaarɔ kʊ wosolɛsinnɩsorazannɔ nyɩnta ŋn’a ba biisi rɔ wɔɔ tɔ da a nɔ ʊ. K’a wɔɔ Zuuba Yeezuu Krista, kʊ wɔɔ Bʊmbɔrɛzaa m bɩ lɛ bɩ tɔ da a nɔ ʊ. A zibəəzannɔ wɔɔ a ŋ da ʊ, ŋn’a dɩnda awɔɔ m. 3K’a ser ka a dɔ a ʊ, jɛ dɔmɩnnɔ ʊ, gʊɔɔ nyɩntaŋ ʊ, ŋnɩ bɩr a mɩsɩrbaa bam a lɛtaamarɔ bʊnyaarɔ tɔ ma bala. 4Ŋ yaa wʊrɛ awɔɔ ma, ŋnɩ bɩr a hɩrɛ, ŋ ʊ: «Yeezuu a hɩ a ʊ, a zɛm, gɛɛ lɔ? Bɩ bɔ m, an bʊr? Bala, wɔɔ zɩrɔ gɩnga laatʊ, bɩ durnya bɩ gɔɔta an n’a bɩncɛ ʊ, amba a nyɩnta ʊ a darɛ dɔmɩm ʊ bɩ m.» 5Meerbaa naa do kʊ gʊɔɔ wɔɔ n’a bam naa, a tɔ ŋn’a bɔrɛ a nɔ ʊ, ŋ ʊ, biisi-biisi bɩ, Woso nyɩnta an meer ba, an a ka, brama kan tara kɩ n nyɩnta ʊ. Tara bɩ banka a ʊ hi m, zu a ʊ kʊ ʊ kan hi kɩ tara bɩ n ta ʊ. 6Bɩ, durnya k’a nyɩnta ʊ biisi bɩ, hi a a zaar ba m sɔ. 7Bɩ, Woso lemim deem-deem bɩ do a hɩ sɔ, a ʊ, kʊ sɛ n bɩ brama kan tara kʊ ŋ nɩ ta ʊ her lɔ nɔɔm zaar ba. Ŋ to Woso ʊ, k’a bɩ ŋ zaar ba hinni k’a nɩ gʊɔɔ kʊ ŋ bɩr yɛm ma rɔ wɔɔ dʊdɔ yarm, an ŋ zaar ba b’ʊ.
8Bɩ, m gʊaasɩbɔɔ, hɔ deem n ta ʊ, a n a ga m k’awɔɔ n a tɔ bɔ a nɔ ʊ y. A ɩ yɩrɛ ɩ ʊ: Zuuba mɩm ʊ, dɔmɩm deem bɔ kʊ ʊ ɩ ʊ, dɔɔraa tisi m, dɔɔraa tisi n bɔ kʊ ʊ ɩ ʊ, dɔmɩm deem m. 9Gʊɔɔ y’a hɔɔn darɛ ŋ ʊ, Zuuba bɩr hɔ k’a ler bɔ bɩ bam zɔɔ y. A bɩ ncɩnaaʊ y. A ɩ yɩrɛ ɩ ʊ, bʊr a nawʊrɛ a ma kan awɔɔ kɩ, k’a lɛ baa, k’awɔɔ gɔsɩ n nyaam bɩ tɔ ma. A ŋʊa a nawʊm kʊ gʊaa haay n a bɔ a taa m, an sugur yɛ. 10A n bɔkarɛ, hinni kʊ Zuuba n nɩ zɛŋ ʊ bɩ, yɩ a nawʊrɛ am koor hɔ bɩ m. Hinni bɩ do ʊ bɩ, brama nyaanɩm bʊrga guta maam-maam nɔ ʊ, sɛ n hɔɔ kʊ ŋ nɩ brama haay bɩ. Tara burə kan hɔɔ kʊ ŋ n’a nɔ ʊ haay kɩ mim bɔm garga ra.
11K’a yo sɛ n nɩ zɛm bɩ hɔ haay bɩ bɩ, awɔɔ a ga m a mɩsɩrbaa k’awɔɔ a ga m, a ba bɩ dɔ. Awɔɔ a ga m, a a mɩsɩrbaa ba zorebaa nɔ ʊ, a bɩr hɔ k’a Woso nɔ yɩ bam hɔ haay nɔ ʊ. 12A bɩr dɔm Woso dɔmɩm bɩ ma, a bɩr a tʊntɔŋ ʊ gʊta, k’an bʊr zɔɔ. Hinni bɩ do ʊ, sɛ n nɩ brama zaar baŋ ʊ, hɔɔ kʊ ŋ nɩ brama rɔ wɔɔ haay n faan sɛwurəro wɔɔ sebtur nɔ ʊ. 13Bɩ, Woso brama kan tara daa kɩ ler bɔ, tɩrgabaa nyɩntam durnya daa bɩ do ʊ. Naa wɔɔ ta ʊ heer lɛ, ʊ nɩ dɔm ma.
Ʊ ʊ tɔ ʊ k’ʊ Woso hɔɔnhɔ ba
14Naa tɔ ma bɩ, m gʊaasɩbɔɔ, kʊ dɔ wɔɔ nawʊm dɔmɩm naa do ma bɩ, k’a a tɔ ʊ paan… a bɩr mɩŋŋa, kʊ minsi bɩ nyɩnta a ma Woso mɩm ʊ y, k’a bɩr laafɩɩ m kan kɩ. 15K’a dɩga wɔɔ Zuuba bʊraama bɩ ma, a dɔ a ʊ, toore an n’a karɛ awɔɔ ʊ, k’awɔɔ n a da ma a bʊmbɔrɛ yɩ. Wɔɔ danyɩ Pol kʊ wɔɔ n’a ŋʊam bɩ, a ci ba awɔɔ ma an a hɩ ncɩnaaʊ sɔ. Ci bɩ ba a ʊ, mindɔrɛ kʊ Woso a ka ʊ bɩ m. 16Ciro k’a ŋ ba haay, k’a hɔ naa do mim dɩnda bɩ, naa do an n’a hɩm tee…. Ciro k’a ŋ ba rɔ wɔɔ nɔ ʊ bɩ, lɛɛ niŋŋoo ta ʊ ŋ jɩ marɛ wer n ta ʊ. Gʊɔɔ kʊ ŋ nɩ hɔsɩ dɔ, bɩ ŋ bɩr jɩnɩm kɔɔkɔɔ rɔ wɔɔ tɩr ŋ jɩ bɩ lʊr, amba ŋ mɩŋŋɔɔ n’a bam Wosoci bɩ lɛɛ vantɔɔ m bɩ m. A ba kʊ ŋ nawʊrɛ ncɩnaaʊ naa, a mɩŋŋɔɔ ŋn’a zaar barɛ a zim.
17Bɩ, m gʊaasɩbɔɔ, k’awɔɔ m, mɔɔ lɛɛ ka, m hɔ k’a n ta ʊ hɩ awɔɔ m. Naa tɔ ma bɩ, k’a dundo a zi, kʊ gʊɔɔ bʊnyaarɔ nyʊnnyɔɔrɛ zibəəro b’a nyʊnnyɔɔ y, k’a b’a gaa jɩnjɩ k’a ŋ ta ʊ kɔɔkɔɔ naa ʊ y. 18Bɩ, k’a gɔɔta a bɩr tam lɛɛ wɔɔ Zuuba Yeezuu Krista kʊ wɔɔ Bʊmbɔrɛzaa m bɩ barka kan a dɔrɛ kɩ nɔ ʊ tee…. A tɔ n lɛbɔʊrɛ yɩ, dɩɩtaa kan dɔmɩm haay kɩ nɔ ʊ. Amina!