Ci hɩɩya hɔ kʊ Pol a ba
KORƐNTƖ ZANNƆ
ma
Ci hɩɩya hɔ kʊ Pol a ba Korɛntɩ zannɔ ma bɩ
gasʊʊrɛ
Pol ci hɩɩya hɔ naa do nɔ ʊ bɩ, wɔɔ y’a yɩm, bakʊmarɛ ɩ nyɩnta ʊ Pol kan Korɛntɩ zannɔ wɔɔ kɩ bire ʊ.
Korɛntɩ kristagʊɔɔ gɔsɩnnɔ ɩ nyɩnta ŋn’a tɔ zarlɛ ŋ ʊ kristazibəəzaa bɛɛ y. A m naa Pol n ci bɩ ba k’a bɔ ŋ lɛɛ, k’a ka ma kʊ zɛkʊra n nyɩnta ʊ sɔ.
Ci bɩ nɔ ʊ, a y’a zibəə kan a fɩryɩrɛ kɩ mim dɩndam. A y’a hɩnkarɛ a ʊ, kristazibəəzaa n a mɩ paan… denter. A a ya, an kʊ ma kan Korɛntɩ zannɔ wɔɔ kɩ. A n ŋ dʊndɔ kʊ ŋ n’a tɔ ʊ, kan busoo zɩnzɛkʊra bɩ kɩ, k’a a da m Zidee kristagʊɔɔ han.
1Pol ɩ yaa dam Korɛntɩ gʊɔɔ m
1Mɔɔ mɩŋŋa Pol, Woso hɔɔnhɔ ma m, mɔɔ nɩ m ba Krista Yeezuu zibəəzaa, mɔɔ kan wɔɔ danyɩ Timote kɩ m nɩ ci bɩ bam, a ba wɔɔ nawʊm Woso gʊɔɔ sokʊma k’a nɩ Korɛntɩ ʊ bɩ ma. A ba wɔɔ nawʊm wosogʊɔɔ kʊ ŋ nɩ Akayii kʊrɔ vantɔɔ ʊ rɔ wɔɔ ma haay sɔ. 2A yɛ wɔɔ nawʊm wɔɔ Zɩ Woso, kan Zuuba Yeezuu Krista kɩ han, kʊ ŋ nɩ barka kan laafɩɩ kɩ ka a ʊ.
Woso nɩ wɔɔ heer wʊtam
ʊ fɩryɩrɛ nɔ ʊ
3Ʊ ʊ lɛ bɔ Woso ʊ, wɔɔ Zuuba Yeezuu Krista Zɩ bɩ, wɔɔ Zɩ m, an n’a mɩŋŋa bam gʊɔɔ m tee…, an nɩ ŋ heer wʊtam mim haay nɔ ʊ. 4A ɩ wɔɔ heer wʊtam wɔɔ fɩryɩrɛrɔ haay nɔ ʊ, kʊ wɔɔ n’ʊ da ma, ʊ gʊɔɔ kʊ ŋ nɩ fɩr do haay yɩm nɔ wɔɔ heer wʊta sɔ, heerwʊtarɛ kʊ wɔɔ yɩ a mɩŋŋa zi bɩ m. 5Denter m, kʊ wɔɔ nɩ fɩr yɩm gʊta amba Krista fɩr yɩ bɩ m bɩ, maam sɔ bɩ, Woso ɩ wɔɔ heer wʊtam gʊta Krista tɔ ma. 6Kʊ wɔɔ ɩ fɩr yɩm, fɩr bɩ yɩ wɔɔ nawʊm k’awɔɔ n heerwʊtarɛ yɩ, a bʊmbɔrɛ yɩ. Kʊ wɔɔ ɩ heerwʊtarɛ yɩrɛ, a yɩ wɔɔ nawʊm k’awɔɔ n a da ma a jɩm kɔɔkɔɔ fɩryɩrɛrɔ kʊ wɔɔ nɩ ŋ yɩm nɔ wɔɔ lɔɔrɔ nɔ ʊ. 7Naa tɔ ma m wɔɔ heer n kookoo awɔɔ mim bɩncɛ ʊ, bala, wɔɔ dɔ wɔɔ ʊ k’awɔɔ nɩ fɩryɩrɛrɔ kʊ wɔɔ nɩ ŋ yɩm nɔ wɔɔ yɩm bɩ, awɔɔ ɩ heerwʊtarɛ kʊ wɔɔ n ta m bɩ m sɔ.
8Wɔɔ lɛ taa k’awɔɔ n’a dɔ a ʊ, wɔɔ fɩr yɩ gʊta Azii kʊrɔ wɔɔ ʊ, wɔɔ fɩr yɩ maam-maam an cem wɔɔ paŋŋa han. Wɔɔ n a gɩnga, ʊ ʊ, ʊ lam fɩr naa do nɔ ʊ y. 9Ɩɩn… yɩ a ʊ ncɩnaaʊ karɛ, a gɩnga wɔɔ ʊ, ʊ ʊ, wɔɔ dʊdɔ n y’a yar k’a wɔɔ meeyaa bɔ ʊ. Yɩ a ʊ ncɩnaaʊ, wɔɔ n ʊ da ma dɔ, ʊ yo ʊ mɩŋŋɔɔ ma y, wɔɔ n yo Woso ma, bala, an nɩ gəəno mɩm bɔŋ ʊ. 10A wɔɔ yɔ karɛ fɩryɩrɛrɔ maam-maam kʊ ŋ y’a yo k’a wɔɔ meeyaa bɔ ʊ rɔ wɔɔ wɔ ʊ. Wɔɔ dɔ, ʊ ʊ, a ba n nɩ wɔɔ yɔm tee… ŋ wɔ ʊ. 11Awɔɔ y’a dam wɔɔ han sɔ, yaa k’awɔɔ n n’a dam wɔɔ tɔ ma bɩ minto. Yɩ an nawʊrɛ ncɩnaaʊ, wɔɔ n daahan yɩ Woso zi gʊta, gʊɔɔ cir kʊ ŋ yaa da wɔɔ tɔ ma bɩ minto. Naa n’a kam sɔ gʊɔɔ gʊta n yaa da m barka.
Pol gɩngarɔ
12Hɔ k’a nɩ wɔɔ heer bam nyɩnta kan ʊ mɩŋŋɔɔ kɩ bɩ, wɔɔ noom k’an fu an nɩ wɔɔ kasɛtɩ kam mɩŋŋa bɩ m. Bala, wɔɔ ʊ mɩsɩrbaa ba kan gʊaa haay kɩ, an lɛ da bɩ, kan awɔɔ kɩ sɩra nɔ ʊ, kan ʊ heer kɩ haay. Woso y’a da wɔɔ han, a barka bɩ tɔ ma m wɔɔ n wɔ ʊ, ʊ naa ba, wɔɔ mɩŋŋɔɔ mindɔrɛ bɛɛ y. 13Hɔ kʊ wɔɔ n’a gʊrsɩra barɛ awɔɔ ma biyəə bɩ, a ba wɔɔ nawʊm k’awɔɔ n wɔ ʊ, a karɩnda ba, a jɩ dɔ mɩŋŋa. Bɩ, mɔɔ y’a gɩngam, m ʊ, awɔɔ hɔ kʊ wɔɔ ʊ k’ʊ a hɩ naa jɩ mam mɩŋŋa fasɩ. 14Dɩɩtaa naa, awɔɔ y’a jɩ mam poore a ʊ, wɔɔ nɩ yɩm awɔɔ heernyɔɔ, b’awɔɔ yɩm wɔɔ heernyɔɔ sɔ wɔɔ Zuuba Yeezuu wusigəre hinni ʊ.
15Mɔɔ naa nyasʊ m heer ʊ kɔɔkɔɔ hɔɔ, m a cɩnta kʊ m lɛɛ ka m bɔ awɔɔ zi b’ʊ, m awɔɔ heernyɔɔ da ra gallɛm hɩɩya. 16Kʊ m m to awɔɔ zi b’ʊ m ta Masedʊan ʊ, kʊ m bɩ m to Masedʊan ʊ, m bʊr awɔɔ zi b’ʊ k’awɔɔ n b’a da m han kʊ m ta Zidee ʊ. 17A hɩ awɔɔ ʊ gɩnga naa do kʊ mɔɔ wʊ bɩ, dɔ mɔɔ ka ra? Gɛɛ a hɩ awɔɔ ʊ, m gɩngarɔ wɔɔ wʊ mɔɔ nawʊm amba durnya gʊɔɔ hɔ bɩ m na? M n’a hɩm m ʊ, ɩɩn… mɔɔ naa bam, m m ya m jɩm b’ʊ, m ʊ, ayy… mɔɔ bɩ naa barɛ y. 18Sɩrazaa m Woso m, a m mɔɔ kasɛtɩzaa, meer kʊ mɔɔ ba kan awɔɔ kɩ bɩ, a n nyɩnta hɔɔn hɩɩya-hɩɩya nɔ ʊ y. 19Bala, Yeezuu Krista kʊ Woso Nyɩ m bɩ lemim kʊ wɔɔ pa da awɔɔ m bɩ, mɔɔ kan Silas kɩ, Timote kɩ bɩ, lemim bɩ do n nyɩnta «Ɩɩn… kan Ayy… kɩ» nɔ ʊ y. Nyɩnta a ʊ, sɩra nɔ ʊ. 20Bala, Yeezuu mɩŋŋa tɔ ma m, Woso n nɩ hɔ k’a ler bɔ haay barɛ. Bɩ y’a ka wɔɔ nɩ «Amina» dam Yeezuu tɔ ma, ʊ n’ʊ lɛ bɔm Woso ʊ. 21Woso nɩ wɔɔ paŋŋa dam la, awɔɔ kan wɔɔ kɩ Krista zuure nɔ ʊ. A ɩ wɔɔ bɔ ʊ, ʊ hɔ, 22an a wɔjɩ da wɔɔ ʊ a Sɛnt-Ɛspri m, k’a hɩnka a ʊ, a zɛm bɩ hɔ k’a ler bɔ wɔɔ m haay ka wɔɔ ʊ.
23Woso mɔɔ n’a barɛ m kasɛtɩzaa, kʊ mɔɔ ga a jɩra mɔɔ m ŋʊaarbarɛ m. Kʊ mɔɔ n a ŋʊa kʊ m awɔɔ heer kɔ bɩ y’a ka, mɔɔ n m ya m bʊr awɔɔ zi Korɛntɩ ʊ y. 24Wɔɔ bɩr ʊ kam ma kʊ minno niŋŋoo dɩnda awɔɔ m k’awɔɔ n sɩra ka ŋ ʊ paŋŋa nɩ y. Awɔɔ ɩ jɩnɩm kɔɔkɔɔ sɩra ka Krista ʊ nɔ ʊ kara. Bɩ, ʊ da wɔɔ nawʊrɛ awɔɔ han k’awɔɔ n heernyɔɔ yɩ.
21Hɔ kʊ mɔɔ cɩnta m heer ʊ bɩ ba n nɩ: Mɔɔ bɩ n bɔrɛ m bʊr awɔɔ zi b’ʊ heerzar nɔ ʊ y. 2Kʊ mɔɔ awɔɔ heer zaar ba, nka nɩ heernyɔɔ kam mɔɔ ʊ, k’awɔɔ kʊ mɔɔ awɔɔ heer zaar ba rɔ wɔɔ bɛɛ nɩ? 3Naa tɔ ma m mɔɔ n lɛɛ ka m ci ba awɔɔ ma ncɩnaaʊ, kʊ mɔɔ n a ŋʊa kʊ m bʊr awɔɔ zi k’awɔɔ n mɔɔ da heerzar ma, an bɔkarɛ awɔɔ y’a ga m a mɔɔ heer nyɔɔ bɩ tɔ ma m. Bɩ, mɔɔ dɔ paan… m ʊ, awɔɔ haay, kʊ mɔɔ ɩ heernyɔɔ m, awɔɔ heernyɔɔ m sɔ. 4Ci bɩ do kʊ mɔɔ ba awɔɔ ma naa, a n yɩ mɔɔ ma naanaa y, a ba mɔɔ ʊ kan heerzar kɩ, m nyi ka. Mɔɔ n a ŋʊa kʊ m awɔɔ heer zar y, ci bɩ ba mɔɔ ʊ k’awɔɔ n a dɔ a ʊ, mɔɔ y’awɔɔ ŋʊam gʊta.
Pol y’a yɛm kʊ ŋ nɩ sugur ka kʊrɔmazaa b’ʊ
5K’awɔɔ gʊaa nyɩnta an bʊr heerzar nɩ, mɔɔ bɛɛ a m heer zar y, awɔɔ haay a a heer zar, gɛɛ awɔɔ gʊɔɔ gɔsɩnnɔ m. 6A da k’awɔɔ ʊ kʊ ʊ a hʊnhʊr bɩ, a a zaa bɔ. 7Naa tɔ ma bɩ, k’a sugur ka ʊ, a heer wʊta, k’a heer b’a zar an bɔɔlam ba y. 8Bɩ y’a ka mɔɔ n’a yɛrɛ awɔɔ han k’a a ŋʊarɛ hɩnka m. 9Bala, ci bɩ kʊ mɔɔ ba awɔɔ ma bɩ, m ka mɔɔ ʊ ma kʊ m dɩga a k’awɔɔ ɩ mim sim fasɩ-fasɩ gɛ. 10K’awɔɔ sugur ka gʊaa ʊ, mɔɔ ɩ sugur karɛ a zaa ʊ sɔ. Bɩ kʊ mɔɔ sugur ka gʊaa ʊ, k’a ɩ yɩrɛ ɩ ʊ a ga a ʊ m kʊ m sugur ka ʊ, a ba mɔɔ nawʊm awɔɔ tɔ ma, Krista mɩm m. 11A ba wɔɔ nawʊrɛ ncɩnaaʊ, k’ʊ bɩ zaa ka Sʊtaana ʊ, k’an wɔɔ ku y. Bala, gɩngarɔ k’an ta m nɔ wɔɔ, wɔɔ ŋ dɔ mɩŋŋa.
Pol hɔɔn ɩ kɔm Trowas kʊ ʊ
12Mɔɔ m hʊr m ta Trowas ʊ, kʊ m aa Krista lemim nyɩnta pa da, kʊ mɔɔ yaa lee ku bɩ, mɔɔ yaa dɩga a Zuuba zaa banka gʊta, kʊ m lemim bɩ pa da. 13Bɩ, heerkɔrɛ gʊta mɔɔ nyɩnta a nɔ ʊ, kʊ mɔɔ n wɔɔ danyɩ Tiitɩ yɩ bɩ tɔ ma. A m naa, mɔɔ n zaa yɛ Trowas gʊɔɔ wɔɔ han m m len so ŋ nɩ, m m hʊr, m ta Masedʊan ʊ.
Wɔɔ ɩ bʊrm hɔ woo… ra
Krista tɔ ma
14Krista a da a jɩnnɔ haay ma, an nɩ ŋ gɩngaatarɛ an nɩ yirbə sire ŋ nɩ. Woso tɔ n lɛbɔʊrɛ yɩ, k’a nɩ wɔɔ gaam Krista da ma naa do nɔ ʊ dɔmɩm haay, an n’a kam gʊɔɔ nɩ Krista dɔm lɛɛ haay ʊ bɩ minto. 15Bala, wɔɔ bɔ kʊ ʊ kan tidəər ji nyɩnta kɩ, Krista n’a kam Woso ʊ, gʊɔɔ kʊ ŋ nɩ bʊmbɔrɛ zaa ra rɔ wɔɔ, kan gʊɔɔ kʊ ŋ n’ɩ nyaanɩm nɔ wɔɔ k’ɩ dɩgam wɔɔ ma tidəər. 16Kʊ gʊɔɔ kʊ ŋ n’ɩ nyaanɩm nɔ wɔɔ nɩ, kan brɔɔ kɩ zɛ wɔɔ nɩ zɛm nɩ, ŋn’ɩ gɩngarɛ, gʊɔɔ kʊ ŋ nɩ bʊmbɔrɛ zaa ra rɔ wɔɔ, kan brɔɔ kɩ, mɩsɩrbaa wɔɔ nɩ zɛm nɩ, ŋn’ɩ mɩsɩrbaa yɩm sɔ. Bɩ, kʊ Woso bɛɛ m, nka ɩ wɔ ʊ, an nɩ zi naa do barɛ? 17Wɔɔ n bɔ kʊ ʊ kan gʊɔɔ kʊ ŋ Woso lemim bɩ sa, ŋn’ɩ ter bam nɩ rɔ wɔɔ kɩ y. Bɩ kʊ Woso mɩŋŋa ɩ wɔɔ nyɔɔ bɩ, a lemim bɩ pa wɔɔ n’a dam kan sɩra kɩ, a mɩm m, kʊ Krista zibəənyɩnɔ m wɔɔ m bɩ tɔ ma.
3Gʊaasɩbabaa daa bɩ lemim padənno mim
1Awɔɔ y’a hɩrɛ a ʊ, a hɩ wɔɔ ʊ k’ʊ ʊ ya, ʊ ʊ lɛ bɔ, ʊ mɩŋŋɔɔ ʊ ra? Wɔɔ bɩr ʊ kam ci ma kʊ a hɩnka gʊɔɔ m k’awɔɔ n a dɔ a ʊ kristazibəəzannɔ paan…rɔ m wɔɔ nɩ y. Wɔɔ bɩr a yɛrɛ awɔɔ han sɔ k’a ci ba a ka wɔɔ ʊ k’ʊ a hɩnka gʊɔɔ m, amba gʊɔɔ vantɔɔ n’a bam bɩ nɩ y. 2Wɔɔ ci bɩ n’awɔɔ m, awɔɔ m wɔɔ ci, n n a gʊrsɩra ba wɔɔ heerlɔ ʊ. Gʊaa haay n a dɔ an n’a karɩnda bam. 3Gʊaa woo… a dɔ a ʊ Krista ci k’a ba bɩ n’awɔɔ m, an a da wɔɔ wɔ ʊ k’ʊ a ka. Ci bɩ ba bɛɛ n y’a ʊ, gʊrsɩra ba hɔ nɩ y, a ba n y’a ʊ Woso k’an mɩsɩr bɩ Ɛspri m, n n a ba jaa wargarɔ ma sɔ y, a ba n y’a ʊ gʊɔɔ heerlɔ ma.
4Wɔɔ heer k’an kookoo bɩ y’a ka wɔɔ nɩ naa hɩm, Krista barka tɔ ma, Woso taa. 5Wɔɔ b’ʊ dam ma, ʊ a hɩ, ʊ ʊ, wɔɔ wɔŋ ʊ, ʊ zi naa do ba ʊ zim nɩ y. Woso n’a kam wɔɔ nɩ wɔrɛ a barɛ ʊ. 6A y’a ka wɔɔ n’ʊ da ma, ʊ ʊ ba Gʊaasɩbabaa daa bɩ zibəənyɩnɔ. Gʊaasɩbabaa naa do n a to lɛrɔ ci b’ʊ y, a to a ʊ, Sɛnt-Ɛspri zi. Bala, lɛrɔ ci b’ɩ zɛ a nawʊm zɛ m, Sɛnt-Ɛspri bɩ, mɩsɩrbaa bɩ n’a kam.
7Lɛrɔ wɔɔ gʊrsɩra n y’a ba deem-deem jaa wargarɔ ma, a gʊrsɩra bɩ barɛ dɔmɩm ʊ bɩ, Woso lɛbɔʊrɛ a hɩnka, Moyiisi meer nɩ yɔm kan paŋŋa kɩ. A yɔrɛ bɩ k’an maam-maam b’a ka Israyɛl gʊɔɔ wɔɔ bɩr a dam ma n n’a mɩm nyam Moyiisi rɛ y. A n bɔkarɛ pakra m, kʊ lɛbɔʊrɛ bɩ do n nya. K’a ɩ yɩrɛ ɩ ʊ, lɛrɔ wɔɔ zibəə bɩ, zɛ a nɩ zɛm nɩ, an bɔkarɛ a ɩ lɛbɔʊrɛ m ncɩnaaʊ, 8k’a maam, zibəə kʊ Sɛnt-Ɛspri n’a bam b’ɩ lɛbɔʊrɛ m gʊta an cem haay. 9Kʊ zibəə k’a nɩ gʊɔɔ dʊdɔ yarm bɩ nyɩnta lɛbɔʊrɛ m, k’a maam, zibəə k’a nɩ gʊɔɔ bam tɩrga Woso mɩm ʊ b’ɩ lɛbɔʊrɛ m an lɛ da. 10Wɔɔ ʊ da ma ʊ a hɩ, ʊ ʊ, lɛbɔʊrɛ k’a nyɩnta ʊ biisi bɩ b’a dam ma an a makra ba kan lɛbɔʊrɛ k’an ta ʊ her bɩ kɩ y, her hɔ bɩ lɛ da soyy…. 11Bala, k’a ɩ yɩrɛ ɩ ʊ, hɔ k’a nɩ cenim bɩ lɛbɔʊrɛ yɩ, k’a maam hɔ k’a nɩ gɔɔtam tee… bɩ lɛbɔʊrɛ yɩrɛ an lɛ da.
12Kʊ wɔɔ nɩ taaheerlɛ naa do m bɩ y’a ka, wɔɔ heer n kookoo. 13Wɔɔ n bɔ kʊ ʊ kan Moyiisi kɩ y, bɩ nyɩnta an nɩ pɛɛra karɛ a meer ma, kʊ Israyɛl gʊɔɔ wɔɔ bɩ dɩga Woso lɛbɔʊrɛ k’a n’a meer ma an nɩ nyam bɩ ma y. 14Israyɛl gʊɔɔ kʊ ŋ nyɩnta ʊ biisi rɔ wɔɔ n wɔ ʊ ŋnɩ hɔsɩ jɩ ma y. Israyɛl gʊɔɔ kʊ ŋ nɩ ta ʊ her sɔ nɔɔm maam sɔ, kʊ ŋ yɩ gʊaasɩbabaa gusire ciro wɔɔ karɩnda barɛ, ŋ bɩr ŋ jɩ marɛ y. Ɩ ʊ pɛɛra n y’a ka a meer ma, am Moyiisi hɔ bɩ m, pɛɛra bɩ n gaa ŋ meer la y. Bala, sɩra ka Krista ʊ bala n’a kam pɛɛra bɩ do n gaa gʊaa meer la, a zaa n hɔ k’an ta ʊ jɩ ma. 15Denter m, baa kan her kɩ, kʊ ŋ yɩ Moyiisi ciro wɔɔ karɩnda barɛ, ŋ bɩr a jɩ marɛ y, ɩ ʊ pɛɛra nɩ karɛ ŋ hɔɔn ra. 16Ba gʊaa a bɔ a ta a m, an sɩra ka Zuuba ʊ bɩ, dɔmɩm bɩ do ʊ pɛɛra bɩ tɩr gaa a zaa meer la. 17Bɩ, Zuuba kʊ n y’a hɩ ma bɩ, Sɛnt-Ɛspri m, bɩ lɛɛ kʊ Zuuba Ɛspri n ta ʊ bɩ, soamɩŋŋaʊ ɩ lɛɛ bɩ do ʊ. 18Bɩ, wɔɔ haay k’ʊ sɩra ka rɔ wɔɔ, pɛɛra n a ka wɔɔ meer la y, bɩ, Zuuba lɛbɔʊrɛ nɩ yɩm wɔɔ ma, a lɛbɔʊrɛ bɩ nɩ wɔɔ lʊrm kʊ bɔ kʊ ʊ kan kɩ. Ncɩnaaʊ m wɔɔ lɛbɔʊrɛ bɩ n’a dam la tee… zi kʊ Zuuba n’a bam bɩ n naa. A m Sɛnt-Ɛspri.
4Zi kʊ Woso n’a bam wɔɔ gʊr zi
1Woso a ba wɔɔ m mɩŋŋa, a zibəə naa do da wɔɔ wɔ ʊ, bɩ y’a ka wɔɔ bɩr ʊ heer zaar barɛ y. 2Wɔɔ bɩr yɛm kutim-kutim kan nyannɩ zibəəro wɔɔ kɩ ma y. Wɔɔ bɩr bra bɩmbam gʊɔɔ nɩ y, bɩ wɔɔ bɩr ŋʊaar warm Woso lemim bɩ ma sɔ y. Bɩ, sɩra wɔɔ n’a hɩm garga ra Woso mɩm m, kʊ gʊaa haay n a dɔ a heer ʊ a ʊ, sɩrazannɔ m wɔɔ m. 3K’a ɩ yɩrɛ ɩ ʊ, lemim nyɩnta kʊ wɔɔ n’a pa dam bɩ jɩ a nyaakʊm da kan gʊɔɔ niŋŋoo kɩ, k’a maam, gʊɔɔ wɔɔ duro, gʊɔɔ kʊ ŋ nɩ nyaanɩm nɔ wɔɔ m. 4Durnya naa do woso kʊ Sʊtaana m bɩ yɩ ŋ hɔɔn ta, kʊ ŋ bɩ lemim nyɩnta bɩ jɩ ma, ŋ nɩ sɩra ka ʊ y. Ŋ hɔɔn a ta kʊ ŋ bɩ wɔ ʊ sɔ, ŋ nɩ Krista lɛbɔʊrɛ k’a nɩ yɔm lemim nyɩnta bɩ nɔ ʊ bɩ yɩ y. 5K’a dɔ a ʊ, wɔɔ bɩr ʊ mɩŋŋɔɔ mim pa darɛ y, bɩ Zuuba Yeezuu Krista wɔɔ n’a pa darɛ. Bɩ kʊ wɔɔ nɩ, wɔɔ y’a hɩrɛ ʊ mɩŋŋɔɔ ma awɔɔ zibəənyɩnɔ Yeezuu tɔ ma. 6Bala, Woso k’a hɩ a ʊ, kʊ lɛɛgure n nyɩnta monsigə nɔ ʊ bɩ, Woso bɩ do y’a ka a mɩŋŋa lɛɛgure n gu wɔɔ heerlɔ ʊ, k’a ka kʊ wɔɔ n lɛbɔʊrɛ k’an ta m, an nɩ yɔm Krista meer ma bɩ yɩ. Bɩ, kʊ Woso lʊnlɔ Krista maam sɔ.
7Bɩ, wɔɔ, a hɔ gʊta naa do ka wɔɔ ʊ, k’ʊ a hɩnka gʊɔɔ m, an bɔkarɛ, wɔɔ bɔ kʊ ʊ kan gedre tɔkkɛ kɩ, ʊ nɩ hɔ gʊta naa do m ʊ gʊr zi. Ncɩnaaʊ m kʊ gʊaa woo… n a dɔ a ʊ, paŋŋa gʊta naa do n a to wɔɔ zi y, a to a ʊ Woso zi. 8Wɔɔ ɩ fɩr do haay yɩm, bɩ bɩ n a da wɔɔ ma y, wɔɔ hɔɔn ɩ kɔm minno gʊtɔɔ ma, bɩ wɔɔ hɔɔn n a zar y. 9Gʊɔɔ ɩ fɩr kam wɔɔ ma gʊta, bɩ Woso n a bɔ wɔɔ ʊ y. Ŋ yɩ wɔɔ nam tara ma, bɩ ŋ bɩr wɔŋ ʊ ŋnɩ wɔɔ zaar barɛ y. 10Dɔmɩm haay, wɔɔ ɩ zɛ m ʊ mɩm la, ɩ ʊ ga wɔɔ nawʊrɛ am Yeezuu hɔ bɩ m, ncɩnaaʊ m, kʊ Yeezuu mɩsɩrbaa bɩ n a hɩnka wɔɔ gʊr zi. 11Wɔɔ gɔɔta ʊ m mɩsɩr, bɩ dɔmɩm haay n y’a kam ma k’a wɔɔ meeyaa bɔ ʊ Yeezuu tɔ ma, bɩ wɔɔ dɔ ʊ ʊ, wɔɔ zɛm bɩ gɩnga. Bɩ kan naa kɩ haay, Krista mɩsɩrbaa y’a hɩnkam wɔɔ gʊr zi. 12Ncɩnaaʊ nɩ, wɔɔ nɩ zɛ lɛ ʊ dɔmɩm haay, bɩ n a ka awɔɔ nɩ mɩsɩrbaa bam.
13N y’a gʊrsɩra ba Wosoci b’ʊ, n ʊ: «Sɩra mɔɔ ka, bɩ y’a ka mɔɔ n meer ba.» Sɩrakarɛ deem-deem naa do wɔɔ n ta m sɔ, bɩ y’a ka wɔɔ nɩ meer bam. 14Wɔɔ dɔ denter m, ʊ ʊ, Woso Zuuba Yeezuu mɩm bɔ ʊ gəəno bire ʊ, a wɔɔ mɩm bɔŋ ʊ sɔ kan kɩ. A n a ka wɔɔ kan awɔɔ kɩ, ʊ nyɩnta kan kɩ lɛɛ deem ʊ. 15Hɔɔ nɔɔn duro haay ba wɔɔ nawʊm awɔɔ daahan tɔ ma, kʊ gʊɔɔ cir n Woso barka bɩ nyɔɔdʊ yɩ sɔ, maam bɩ, gʊɔɔ cir gʊta Woso barka darɛ, ŋn’a lɛ bɔ ʊ.
Ʊ dɩga booti hinni hɔɔ wɔɔ ma
16Naa tɔ ma m, wɔɔ bɩr ʊ heer zaar barɛ y. Bala, wɔɔ dɔ ʊ ʊ, kʊ wɔɔ mɛ bɩ paŋŋa y’a bɔŋ ʊ poore-poore k’a bɩ nya, wɔɔ nyi bɩ paŋŋa y’a dam la dɔmɩm haay. 17Bala, fɩryɩrɛrɔ kʊ wɔɔ nɩ ŋ yɩm dɩɩtaa naa, ŋ zɛm bɩ nya, wɔɔ n lɛbɔʊrɛ gʊta yɩ, ŋ tɔ ma. Lɛbɔʊrɛ bɩ do gʊta maam-maam, a nyarɛ ba ʊ sɔ y. Kʊ wɔɔ dɩga lɛbɔʊrɛ bɩ do ma, wɔɔ dɔ ʊ ʊ hɔsɩ bɛɛ m fɩryɩrɛrɔ nɔɔn duro nɩ y. 18Hɔ kʊ gʊaa n’a yɩrɛ a mɩm m bɩ bɛɛ wɔɔ n’ʊ kam ma y, hɔ kʊ gʊaa bɩr a yɩrɛ a mɩm m bɩ wɔɔ n’ʊ kam ma. Bala, hɔ k’a nɩ yɩm mɩm m bɩ, cenlezaa m, bɩ hɔ k’a bɩr yɩm mɩm m bɩ, a nyarɛ ba ʊ y.
51Wɔɔ mɛ naa do bɔ kʊ ʊ kan pɛɛracɛ kɩ. Wɔɔ dɔ ʊ ʊ, k’a b’a zaar ba, Woso mɛ vanta kam wɔɔ ʊ arzana ʊ. Mɛ bɩ do garɛ ba ʊ y, gʊaa wɔzibəə bɛɛ m bɩ y. 2Bɩ dɩɩtaa naa, wɔɔ ɩ pɛn wʊm, ɩ ʊ, mɔr wɔɔ busu, bala, a ŋʊa wɔɔ nawʊm paan… k’an bɩr yɩrɛ ɩ ʊ, wɔɔ y’ʊ mɛ daa b’ʊ, mɛ kʊ Woso n b’a kam wɔɔ ʊ arzana ʊ bɩ. 3Bala, kʊ wɔɔ mɛ bɩ do sa, wɔɔ bɩ nyɩntam dɩgɩ fɩɩga y. 4Kʊ wɔɔ gɔɔta ʊ n’ʊ mɛ naa do ʊ naa, wɔɔ ɩ pɛn wʊm, ɩ ʊ mɔr wɔɔ busu, bɩ, a ŋʊa bɛɛ wɔɔ nawʊm k’ʊ mɛ naa do to wa, wɔɔ lɛ n taa k’ʊ mɛ daa bɩ ka a gusire naa ra, kʊ mɛ k’a garɛ ba ʊ bɩ n nyaam mɛ k’a nɩ gam bɩ m. 5Woso mɩŋŋa ɩ wɔɔ banka k’a bɩ naa woo… ka wɔɔ ʊ. A Sɛnt-Ɛspri ka wɔɔ ʊ, k’a hɩnka a ʊ, a zɛm bɩ hɔ k’a ler bɔ wɔɔ m naa ba.
6Ncɩnaaʊ nɩ, wɔɔ heer n kookoo dɔmɩm haay, bɩ wɔɔ dɔ ʊ ʊ, kʊ wɔɔ gɔɔta, ʊ n’ʊ mɛ naa do ʊ, wɔɔ n’ʊ mɛ daa bɩ yɩ cɩna bɩ, wɔɔ ba Zuuba har ʊ b’ʊ cɩna sɔ y. 7Bala, ʊ mɩsɩrbaa bɩ ba wɔɔ nawʊm sɩrakarɛ nɔ ʊ, hɔ kʊ mɩnyaa n a yɩm bɩ bɛɛ wɔɔ nɩ yom ma y. 8Sɩra m, wɔɔ heer kookoo, kʊ wɔɔ ʊ bɔ ʊ mɛ naa do ʊ, ʊ ta ʊ nɩ kan Zuuba kɩ, a jɩra wɔɔ m. 9Naa tɔ ma bɩ, kʊ wɔɔ y’ʊ mɛ naa do ʊ, gɛɛ kʊ wɔɔ ʊ bɔ ʊ, a bɩ mim y, ʊ ka wɔɔ nawʊm ma k’ʊ mɩsɩrbaa barɛ n a nɔ yɩ. 10Bala, pakra m kʊ wɔɔ haay n bɩ jɩm Krista dʊdɔkarɛ duu bɩ taa, kʊ gʊaa biyəə n zi k’a nyɩnta an a ba a mɩsɩrbaa nɔ ʊ tara burə ʊ naa ʊ bɩ nyɔɔdʊ yɩ, k’a mɩŋŋa ɩ ba ɩ nyɔɔdʊ yɩ, k’a bʊnyaa nɩ a maam sɔ.
Krista nɩ wɔɔ zɛm kʊ ra
kan Woso kɩ
11Naa tɔ ma m, kʊ wɔɔ Zuuba nyi ba m dɔ bɩ, wɔɔ n’ʊ kam ma kʊ gʊɔɔ n sɩra ka wɔɔ meerbaa ʊ, bɩ Woso wɔɔ dɔ mɩŋŋa, mɔɔ y’a gɩngam sɔ m ʊ, awɔɔ mɔɔ dɔ sɔ mɩŋŋa a heerlɔ ʊ 12A b’a hɩ a ʊ, a ŋʊa wɔɔ nawʊm k’ʊ ʊ lɛ bɔ ʊ mɩŋŋa ʊ ko y. Ʊ ka wɔɔ nawʊm ma, k’awɔɔ n a heer nyɔɔ wɔɔ tɔ ma, k’a a da ma a mim yɩ a nyɩ bɔ gʊɔɔ kʊ ŋ n’a lɛ bɔrɛ a mɩŋŋɔɔ ʊ gʊɔɔ mɩm m bala rɔ wɔɔ nʊ, hɔ zore ba ŋ heer ʊ y, ŋ leer ba b’ʊ y. 13Kʊ hɔɔzannɔ m wɔɔ nɩ, Woso tɔ ma m, bɩ kʊ hɔɔntaʊrɛzannɔ m wɔɔ nɩ, awɔɔ daahan tɔ ma m. 14Krista ŋʊarɛ y’a so wɔɔ ʊ. Kʊ wɔɔ ʊ hɔɔn da, ʊ ʊ, gʊaa deem kʊ Krista m ga gʊaa haay bɩncɛ ʊ, bɩ wɔɔ dɔ, ʊ ʊ, k’a maam, gʊɔɔ wɔɔ woo… gɩnga sɔ. 15Bɩ ga a ʊ denter gʊaa haay bɩncɛ ʊ, kʊ gʊɔɔ k’a ŋ bɩncɛ sa rɔ wɔɔ b’a mɩsɩrbaa ba a mɩŋŋɔɔ tɔ ma dɔ y, kʊ ŋ n’a mɩsɩrbaa bɩ ba a tɔ ma, a ɩ ga an a mɩm bɔ ʊ ŋ bɩncɛ ʊ.
16Ncɩnaaʊ bɩ, wɔɔ bɩr dɩgam gɔsɩ ma gʊɔɔ dɩgarɛ m bala y, biisi bɩ, wɔɔ dɩga Krista ma ncɩnaaʊ, bɩ kɛɛrɛ naa, wɔɔ bɩr dɩgam ma maam y. 17Bɩ, kʊ gʊaa a ba kristagʊaa, a ba a zaa mɩsɩrbaa bɩ n nawʊm mɩsɩrbaa daa. A mɩsɩrbaa k’a n’a bam biisi bɩ cem, hɔ woo… a ba daa. 18Naa haay naa, a to a ʊ Woso zi, a ɩ wɔɔ zɛ kʊ ra kan a kɩ Krista tɔ ma, an a ya, an gʊɔɔ zɛkʊra zibəə bɩ da wɔɔ wɔ ʊ. 19Hɔ k’an ta ʊ bɩ, Woso mɩŋŋa ɩ nyɩnta an zu kʊ ʊ kan Krista kɩ an nɩ gʊɔɔ haay zɛm kʊ ra kan a mɩŋŋa kɩ. A bɩr ŋ mimbʊnyaarɔ karɛ ŋ la y, a y’a ya an gʊɔɔ zɛkʊra lemim bɩ da wɔɔ wɔ ʊ kʊ wɔɔ n a pa da.
20Ncɩnaaʊ bɩ, Krista ɩ wɔɔ bɔ ʊ, kʊ wɔɔ n meer ba a bɩncɛ ʊ, Woso mɩŋŋa ɩ zu kʊ ʊ kan wɔɔ meerbaa kɩ, an nɩ gʊɔɔ birm kʊ ŋ nɩ b’a zɛ kʊ ra kan a kɩ. Ʊ wɔ wɔɔ n’a zɩnzɛrɛ awɔɔ m Krista tɔ ma, k’a to kʊ Woso n awɔɔ zɛ kʊ ra kan a mɩŋŋa kɩ. 21Krista mɩŋŋa n mimbʊnyaa ba fɩɩga y, Woso n a ka an a ba ɩ ʊ mimbʊnyaa n a mɩŋŋa m wɔɔ tɔ ma, a ba a ʊ ncɩnaaʊ, kʊ wɔɔ n yɩ tɩrga Woso mɩm ʊ, Krista tɔ ma.
61Kʊ zi wɔɔ n’a bam kan Woso kɩ bɩ, wɔɔ y’a yɛrɛ awɔɔ han, ʊ ʊ, a b’a to Woso barka k’a yɩ bɩ n ta vam y. 2Bala, Woso a hɩ, a ʊ:
Dɔmɩm kʊ mɔɔ nɩ barka kam bɩ, mɔɔ ɩbɩɩ yaadarɛ si,
hinni k’ɩbɩɩ nɩ bʊmbɔrɛ ŋʊaŋ ʊ bɩ, mɔɔ bʊr m bɩ m da ɩ han.
Dɔmɩm kʊ Woso n’a barka kam bɩ n naa. Dɔmɩm k’a n’a bʊmbɔrɛ kam bɩ n naa sɔ.
Pol zibəə
3Wɔɔ lɛ baa k’ʊ hɔsɩ ba k’an yɩ gʊaa ma bʊnyaa y, bala, wɔɔ lɛ baa kʊ gɔsɩ n wɔɔ zibəə bɩ sʊnsɔ wʊ y. 4A n ta ʊ bɩ, hɔ haay kʊ wɔɔ n’a bam bɩ, a ba wɔɔ nawʊm ʊ n’a hɩnkam ʊ ʊ, Woso zibəənyɩnɔ m wɔɔ m. Bɩ tɔ ma bɩ,
wɔɔ ɩ jɩnɩm kɔɔkɔɔ fɩr do y’a hʊnhɔ nɔ ʊ,
mim kʊsɩrɔ kʊ ŋ n’ɩ wɔɔ yɩm nɔ ʊ, cicir nɔ ʊ, dabɔʊ nɔ ʊ.
5Gʊɔɔ wɔɔ zɛ madɩr m gʊta,
ŋnɩ wɔɔ du,
ŋn’a zɛ kʊ ra ŋnɩ zee da wɔɔ ma,
wɔɔ nyɩnta kɔrɛrɔ nɔ ʊ,
hinceem bɩr bam wɔɔ nɩ y,
hɔbɩrɛ bɩr bɩm wɔɔ nɩ y.
6Wɔɔ ɩ heer fu zi bam,
Woso hɔdɔrɛ zi wɔɔ n’a bam,
ʊ nɩ bʊraama zi bam.
Ʊ nɩ mɩŋŋabaa bam,
ʊ nɩ tam Sɛnt-Ɛspri paŋŋa m,
ʊ nɩ ŋʊarɛ zi bam noom fu m.
7Ʊ nɩ sɩra lemim hɩm,
ʊ nɩ tam Woso paŋŋa nɔ ʊ,
ʊ nɩ tɩrgabaa yar mɔrlɔ sam ʊ nɩ yar barɛ ŋ nɩ,
k’ʊ jɩm kɔɔkɔɔ.
8Gʊɔɔ gɔsɩnnɔ ɩ wɔɔ daŋ ʊ,
niŋŋoo nɩ wɔɔ bɔŋ ʊ,
nɔɔrɔ y’a lɛ bɔm wɔɔ ʊ,
nɔɔm nɩ wɔɔ sʊnsɔ wʊm.
N yɩ dɩgam wɔɔ ma ŋʊaarbənno,
an bɔkarɛ sɩrazannɔ m wɔɔ m.
9Gʊɔɔ ɩ dɩgam wɔɔ ma,
ɩ ʊ, gɔsɩ n wɔɔ dɔ y,
an bɔkarɛ gʊɔɔ wɔɔ dɔ.
N y’a gɩngarɛ n ʊ,
gɩnga wɔɔ nawʊm,
bɩ wɔɔ gɔɔta ʊ m mɩsɩr,
n yɩ fɩr kam wɔɔ ma gʊta,
bɩ wɔɔ n gɩnga y.
10N yɩ wɔɔ heer zaar barɛ,
bɩ wɔɔ gɔɔta ʊ nɩ heernyɔɔ m,
n yɩ dɩgam wɔɔ ma ŋʊazannɔ,
an bɔkarɛ wɔɔ y’a kam gʊɔɔ n’a bam hɔzannɔ,
n yɩ dɩgam wɔɔ ma ɩ ʊ,
hɔsɩ ba wɔɔ ʊ y,
an bɔkarɛ wɔɔ nɩ hɔ haay m.
11Awɔɔ Korɛntɩ zannɔ, wɔɔ ʊ heer gʊ ʊ meer ba kan awɔɔ kɩ fasɩ, ʊ ʊ ŋʊarɛ hɩnka awɔɔ m. 12Wɔɔ awɔɔ si ʊ heer ʊ, awɔɔ n wɔɔ si a heer ʊ y. 13Awɔɔ ba mɔɔ ʊ m nyɩnɔ, m nɩ meer bɩ bam kan awɔɔ kɩ, k’a a heer gʊ wɔɔ m, a wɔɔ ŋʊa sɔ, amba wɔɔ n’awɔɔ ŋʊam bɩ m.
Lɛɛgure kan monsigə kɩ b’a dam ma ŋ n a zɛ kʊ ra y
14A bɩ yɛ a a zɛ kʊ ra kan basɩrakənno kɩ y. A n a ga m, awɔɔ n a ba deem kan ŋ kɩ y. Hɔ tɩrga y’a dam ma an a zɛ kʊ ra kan hɔ bʊnyaa kɩ ra? Lɛɛgure y’a dam ma an a war kʊ ma kan monsigə kɩ ra? A n a ga nɩ y. 15Krista y’a dam ma an kʊ ma kan Sʊtaana kɩ ra? Gɛɛ sɩrakarɛzaa y’a dam ma an a ba deem kan basɩrakarɛzaa kɩ ra? 16Wosocɛ b’a dam ma an kʊ ma kan *wosobaawɔnnɔ kɩ y. Bɩ, wɔɔ m Woso k’an mɩsɩr bɩ cɛ, amba a mɩŋŋa a hɩ bɩ m, a a hɩ, a ʊ:
Mɔɔ mɩsɩrbaa barɛ ŋ bire ʊ,
m bɩr kan ŋ kɩ,
mɔɔ nɩ yɩrɛ ŋ Woso,
ŋnɩ yɩ mɔɔ gʊɔɔ.»
17Naa tɔ ma bɩ, Zuuba a ya, a ʊ:
K’a bɔ gʊɔɔ bʊnyaarɔ wɔɔ bire ʊ, a a gʊ a hɔ.
A b’a wɔ da dintim hɔ ma y,
maam bɩ, mɔɔ y’awɔɔ sire m zi.
18Mɔɔ yɩrɛ awɔɔ zɩ,
awɔɔ n yɩ mɔɔ nyɩnɔ yaarɔ kan mɔɔ nyɩmbɔnnɔ kɩ,
Zuuba k’a paŋŋa jirə ba ʊ y’a hɩ.
71M danyɩnɔ, k’a a yo Woso n lerbɔrɛrɔ nɔɔn duro bɔ wɔɔ m bɩ, ʊ mim haay k’a nɩ dintim kam wɔɔ mɛ kan wɔɔ nyi kɩ ma gʊ ʊ ma, ʊ ʊ tɔ ʊ gʊta k’ʊ bɩr mɩŋŋa fasɩ Woso lɛsire nɔ ʊ.
Pol heernyɔɔ
2K’a yɛ a wɔɔ ŋʊa, wɔɔ n a bʊnyaa ba gɔsɩ nɩ y, wɔɔ n gɔsɩ mim zaar ba y, wɔɔ n ʊ da gʊaa bir y. 3Mɔɔ bɩr meer barɛ ncɩnaaʊ kʊ m awɔɔ dʊdɔ yar y, amba mɔɔ hɩ dɩɩtaa bɩ, wɔɔ y’awɔɔ ŋʊam gʊta, hɔsɩ b’a dam ma an wɔɔ gʊ awɔɔ ma y, baa zɛ, baa mɩsɩrbaa. 4Mɔɔ sɩra ka awɔɔ ʊ gʊta, mɔɔ heer ɩ nyɔɔm awɔɔ tɔ ma gʊta. Wɔɔ fɩryɩrɛrɔ haay nɔ ʊ, mɔɔ ɩ heer koodə m gʊta, m nɩ m heer nyɔɔm paan….
5Bala, lee kʊ wɔɔ ku Masedʊan ʊ bɩ, wɔɔ n hoonsire yɩ baa poore tɔkkɛ y. Jɩsa kan bɩsɩ kɩ a n yɩ wɔɔ ma naanaa y, gʊɔɔ ɩ nyaa bam kan wɔɔ kɩ, wɔɔ nɩ dabɔʊ m ʊ heer ʊ sɔ. 6Bɩ Woso nɩ gʊɔɔ kʊ ŋ hɔɔn kaanm a mɩŋŋa m nɔ wɔɔ paŋŋa dam la, a a ka Tiitɩ n bʊr, naa n wɔɔ paŋŋa da ra. 7Bɩ, naa bɛɛ n a deem y, hɔ kʊ Tiitɩ a hɩ wɔɔ m bɩ wɔɔ paŋŋa da ra sɔ, a a hɩ a ʊ, a heer koodə yɩ awɔɔ tɔ ma. A a hɩ sɔ a ʊ, awɔɔ lɛ taa paan… k’a a ya, a mɔɔ yɩ, bala, awɔɔ heer a zaar ba kan mim k’awɔɔ ba bɩ kɩ, an n’a ŋʊam paan… k’a a da mɔɔ han gʊɔɔ kʊ ŋ n’ɩ mɔɔ tɔ zarm nɔ wɔɔ lɛɛ. Naa tɔ ma m sɔ mɔɔ heer n nyɩnta gʊta maam-maam kɛɛrɛ.
8Baa kʊ ci kʊ mɔɔ ba awɔɔ ma biisi b’awɔɔ heer zaar ba, dɩɩtaa naa mɔɔ bɩr kʊrkʊr darɛ a tɔ ma y. K’a nyɩnta an awɔɔ heer zaar ba dɔmɩm poore nɔ ʊ bɩ, a a da ma mɔɔ n kʊrkʊr da. 9Bɩ dɩɩtaa naa, m heer mɔɔ n’a nyɔɔm, kʊ mɔɔ awɔɔ heer zaar ba bɩ tɔ ma bɛɛ y. Kʊ heerzar b’a ka awɔɔ n a bɔ a taam bɩ tɔ ma m. Woso awɔɔ heerzar bɩ sa, an a ba awɔɔ m mɩŋŋa, naa tɔ ma bɩ, wɔɔ n a bʊnyaa ba y. 10Bala, heerzar k’a a to Woso zi bɩ zɛ a nawʊm heerlʊrlɛ m, an nɩ bʊmbɔrɛ kam, kʊrkʊrdarɛ ba a nɔ ʊ y. Bɩ, durnya naa do heerzar bɩ, zɛ bɩ n nawʊm zɛ m. 11K’a dɩga a, heerzar k’a a to Woso zi b’a ka, awɔɔ n a ka ma ŋʊɩɩ… k’a mim bɩ banka, a a ka awɔɔ n sugur yɛ,
awɔɔ nɔ n ma ʊ kan a mɩŋŋɔɔ kɩ,
awɔɔ n nyi ba hɔ kʊ mim bɩ n’a bam bɩ m,
a a ka sɔ awɔɔ n n’a ŋʊam k’a a ya, a mɔɔ yɩ zɔɔ,
a n’a kam ma k’a a da mɔɔ han paan…,
a a ka sɔ awɔɔ n yɛ k’a gʊaa k’a mim bɩ ba bɩ hʊnhʊr.
A n ta ʊ bɩ, awɔɔ hɔ woo… ba k’a hɩnka a ʊ, awɔɔ ba mim bɩ nɔ ʊ y. 12Mɔɔ n ci bɩ ba awɔɔ ma gʊaa k’a mim bʊnyaa bɩ ba bɩ tɔ ma y, gɛɛ gʊaa kʊ n mim bɩ ba m bɩ tɔ ma y. A ba mɔɔ ʊ k’awɔɔ n a da ma a dɔ Woso mɩm ʊ a ʊ, a wɔɔ ŋʊa paan…. 13Naa tɔ ma m hɔ k’awɔɔ ba bɩ n wɔɔ heer ba kookoo.
Heer koodə bɛɛ wɔɔ yɩ bala y, wɔɔ heernyɔɔ yɩ sɔ gʊta. Tiitɩ k’a b’a hɩ wɔɔ m a ʊ, awɔɔ a paŋŋa da ra, a ka a heernyɔɔ yɩ bɩ tɔ ma m sɔ. 14Mɔɔ lɛɛ ka hɔɔ, m m lɛ bɔ awɔɔ ʊ a mɩm m, b’awɔɔ ka an a dɔ denter a ʊ, hɔ kʊ mɔɔ hɩ bɩ sɩra m. Amba wɔɔ nɩ sɩra hɩm tee… bɩ, ʊ lɛ kʊ wɔɔ bɔ awɔɔ ʊ Tiitɩ zi bɩ yɩ sɩra sɔ amba wɔɔ hɩ bɩ m. 15Bʊr k’a ʊ, awɔɔ zi b’ʊ, awɔɔ n a si mɩŋŋa kan nyibəə kɩ daʊrɛ kɩ, a yɛ a lɛ ma bɩ, a y’a tɔ darɛ a nɔ ʊ, an n’awɔɔ ŋʊam gʊta an cem biisi han. 16Mɔɔ heer ɩ nyɔɔm gʊta, kʊ mɔɔ dɔ mɔɔ ʊ, mɔɔ m da ma m yo awɔɔ ma hɔ haay nɔ ʊ bɩ tɔ ma.
8Busoo zɩnzɛkʊra Zerizalɛm kristagʊɔɔ tɔ ma
1Ʊ danyɩnɔ, wɔɔ lɛ taa k’awɔɔ n barka kʊ Woso a ka Masedʊan kristagʊɔɔ sokʊmarɔ wɔɔ ʊ bɩ mim dɔ. 2Kristagʊɔɔ wɔɔ yɛ fɩr ma gʊta, kʊsɩ do y’a hʊnhɔ nɔ ʊ. Bɩ, ŋ nyɩnta heernyɔɔ gʊta m, bɩ n a ka ŋnɩ yɛ ŋnɩ hɔ k’an ta m ka gʊta maam-maam kan a heer kɩ haay busoo zɩnzɛkʊra bɩ nɔ ʊ, an bɔkarɛ ŋ mɩŋŋɔɔ ɩ ŋʊazaabaa nɔ ʊ gʊta. 3Mɔɔ ŋ kasɛtɩ bɩ, hɔ kʊ ŋ nɩ ta m bɩ ŋ y’a ka, a ka ŋ y’a ʊ sɔ an lɛ da a paŋŋa ra a zim. 4A yɛ ŋ y’a ʊ wɔɔ han ŋʊɩɩ… k’a a hɔ na busoo zɩnzɛkʊra bɩ ma a a da m wosogʊɔɔ wɔɔ han. 5Hɔ kʊ wɔɔ n a gɩnga bɩ ŋ y’a ba, lɛɛ ŋ y’a ka ŋn’a mɩŋŋɔɔ ka Zuuba ʊ, ŋnɩ bɔkarɛ ŋnɩ yɛ ŋnɩ hɔ kʊ wɔɔ n’a hɩm bɩ bam, Woso hɔɔnhɔ nɔ ʊ.
6Ncɩnaaʊ nɩ, wɔɔ n ma Tiitɩ ma, k’an a bɔ an bʊr awɔɔ zi b’ʊ an bɩ daahan zibəə k’a sɩŋŋɩda sa kan awɔɔ kɩ, busoo zɩnzɛkʊra bɩ nɔ ʊ bɩ ba an a nyambʊr. 7K’a a yo hɔntazannɔ n’awɔɔ m, sɩrakarɛ nɔ ʊ, Woso lemim padarɛ nɔ ʊ, Woso hɔdɔrɛ nɔ ʊ, awɔɔ n’a yoŋ ʊ kan a heer kɩ haay a n nɩ wɔɔ ŋʊam sɔ bɩ, k’a a yo ʊ sɔ paan… busoo zɩnzɛkʊra bɩ mim nɔ ʊ. 8Mɔɔ n naa hɩ, ɩ ʊ, lɛ mɔɔ n’a karɛ awɔɔ ʊ y. Kʊ mɔɔ gʊɔɔ vantɔɔ tʊntɔʊrɛ mim hɩ bɩ, a hɩ mɔɔ ʊ k’awɔɔ n a hɩnka a ʊ, ŋʊarɛ k’awɔɔ n ta m bɩ paan… denter. 9Awɔɔ wɔɔ Zuuba Yeezuu Krista barka k’a n’a kam wɔɔ ʊ bɩ dɔ. Hɔntazaa n a mɩŋŋa m, an bɔkarɛ a yɛ an a mɩŋŋa ba ŋʊazaa awɔɔ tɔ ma, k’awɔɔ n a ba hɔntazannɔ a mɩŋŋa ŋʊazaabaa tɔ ma.
10Naa kʊ mɔɔ n’a hɩm naa, m hɔɔndarɛ mɔɔ n’a hɩm. A gɩnga mɔɔ ʊ a mɩŋŋa k’awɔɔ n gɔɔta a ta lɛɛ kan zibəə k’awɔɔ sɩŋŋɩda sa zu ʊ bɩ kɩ. Awɔɔ ɩ yɩ lɛɛkarɛzannɔ, a busoo zɩnzɛkʊra bɩ ka, awɔɔ ɩ lɛ sa a bɔ a lɛ m sɔ. 11Kɛɛrɛ naa, k’a ta lɛɛ kan a heer kɩ haay, amba awɔɔ sɩŋŋɩda sa bɩ m, a zi bɩ ba a nyambʊr, k’a busoo zɩnzɛkʊra bɩ ka a paŋŋa tɛkka ma. 12Bala, kʊ gʊaa hɔ ka Woso ʊ a zim, Woso ɩ hɔ bɩ do sim, dɩga a nawʊm hɔ k’a zaa bɩ n ta m bɩ ma, a bɩr dɩgam hɔ k’a ba m bɩ ma y. 13Mɔɔ bɩr m kam ma kʊ m awɔɔ da ŋʊazaabaa ma, kʊ gʊɔɔ gɔsɩnnɔ n hɔ yɩ wa, a ŋʊa mɔɔ nawʊm kʊ gakʊʊbarɛ n nyɩnta ʊ. 14Dɩɩtaa naa, awɔɔ ɩ hɔ m gʊta, bɩ minto bɩ, awɔɔ a da ma, a a da gʊɔɔ kʊ hɔ jɩra ŋ ma rɔ wɔɔ han. Ncɩnaaʊ bɩ, kʊ hɔ bʊr an bɩ jɩra awɔɔ ma sɔ, gʊɔɔ k’awɔɔ a da ŋ han rɔ wɔɔ nɩ hɔ nɩ, ŋ y’a darɛ awɔɔ han sɔ. Maam bɩ gakʊʊbarɛ nyɩntaŋ ʊ. 15Amba n y’a gʊrsɩra ba Wosoci b’ʊ bɩ m bɩ:
Gʊaa k’a hɔ gʊr gʊta bɩ,
a ba m an cem a bɩncɛ han y,
gʊaa k’a gʊr poore bɩ,
hɔ n jɩra bɩ zaa ma sɔ y.
Tiitɩ ɩ tam Korɛntɩ ʊ
kan gʊaa hɩɩya kɩ
16Wɔɔ ɩ yaa dam Woso m barka, kʊ Tiitɩ lɛ n taa gʊta k’a a da awɔɔ han amba wɔɔ lɛ n taa sɔ bɩ tɔ ma, Woso ɩ naa da a heer ʊ. 17A yɛ kʊ wɔɔ ʊ han k’an ta awɔɔ zi b’ʊ bɩ, a yɛ, an lɛ da bɩ, a yɛ kan a heer kɩ haay, an hɔɔn bɔ ʊ a zim k’a ta awɔɔ zi b’ʊ. 18Wɔɔ danyɩ vanta wɔɔ n’a nyɔɔm kan kɩ, kristagʊɔɔ sokʊmarɔ wɔɔ haay y’a lɛ bɔŋ ʊ, k’a nɩ lemim nyɩnta pa dam mɩŋŋa bɩ tɔ ma. 19A n lɛ da bɩ, kristagʊɔɔ sokʊmarɔ wɔɔ y’a bɔ ʊ, k’an wɔɔ da zaa ʊ, zɩnzɛkʊra zibəə naa do kʊ wɔɔ n’a bam Woso lɛbɔʊrɛ tɔ ma bɩ nɔ ʊ, zi naa do ba wɔɔ nawʊm sɔ k’ʊ a hɩnka, ʊ ʊ, ʊ lɛ taa k’ʊ ʊ da gʊɔɔ han.
20Busoo kʊ n y’a da wɔɔ wɔ ʊ naa gʊta maam-maam, bɩ tɔ ma bɩ, wɔɔ ɩ dundore ʊ zi, kʊ gɔsɩ b’a hɩ a ʊ, wɔɔ n nyasʊm mɩŋŋa y. 21Wɔɔ lɛ taa k’ʊ hɔ k’an mɩŋŋa ba Woso mɩm ʊ, wɔɔ lɛ taa k’ʊ a ba sɔ gʊɔɔ mɩm ʊ.
22Wɔɔ gʊaa vanta nyɔɔm sɔ kan ŋ kɩ, wɔɔ tɩr a ka lɛɛ ʊ dɩga a, bɩ, wɔɔ yɩ gʊaa m, an nɩ Woso zibəə bɩ ŋʊam. Dɩɩtaa sɔ naa, a y’a tɔŋ ʊ paan…, bala a sɩra ka awɔɔ ʊ gʊta. 23Kʊ Tiitɩ nɩ, mɔɔ zukuu m, mɔɔ zibəəkɔɔn m sɔ awɔɔ zi b’ʊ, kʊ wɔɔ danyɩnɔ wɔɔ nɩ, kristagʊɔɔ sokʊmarɔ wɔɔ yɩ ŋ bɔ ʊ, ŋ zibəə bɩ y’a lɛ bɔm Krista ʊ. 24Naa tɔ ma bɩ, k’a ŋʊarɛ hɩnka ŋ nɩ paan…, kʊ kristagʊɔɔ sokʊmarɔ wɔɔ n a dɔ ŋ ʊ, ʊ lɛ kʊ wɔɔ n’a bɔrɛ awɔɔ ŋʊarɛ gʊtabaa ʊ bɩ, sɩra m.
9Busoo zɩnzɛkʊra bɩ bankarɛ
1Pakra bɛɛ m kʊ mɔɔ nɩ m ya m ci ba awɔɔ ma, kʊ m daahan kʊ wɔɔ ʊ k’ʊ a ka Zidee gʊɔɔ wɔɔ ʊ bɩ mim hɩ y. 2A ŋʊa k’awɔɔ nawʊm paan… k’a a da ŋ han bɩ, mɔɔ dɔ, bɩ y’a ka mɔɔ nɩ m lɛ bɔ awɔɔ ʊ Masedʊan gʊɔɔ wɔɔ lɛɛ, m a hɩ ŋ nɩ, m ʊ: «Akayii kʊ wosogʊɔɔ wɔɔ a banka zu ʊ kara, k’a a da Zidee kʊ wosogʊɔɔ wɔɔ han.» Naa kʊ mɔɔ hɩ ŋ nɩ bɩ, a a ka ŋ gʊɔɔ gʊta nɩ lɛtaama m, k’a a da Zidee gʊɔɔ wɔɔ han sɔ. 3Bɩ wɔɔ danyɩnɔ kʊ mɔɔ ŋ nyɔɔ awɔɔ ma rɔ nɔɔm, ŋ nyɔɔ mɔɔ ʊ k’awɔɔ n busoo k’awɔɔ lɛ n taa k’a ka bɩ zɛ kʊ ra, amba mɔɔ hɩ gʊɔɔ gɔsɩnnɔ m mɔɔ ʊ, awɔɔ a banka a nya bɩ m. K’awɔɔ ba ncɩnaaʊ kʊ wɔɔ bɩ lee ku, gʊaa woo… y’a dɔrɛ a ʊ, hɔ kʊ mɔɔ hɩ awɔɔ mim bɩncɛ ʊ bɩ, sɩra m. 4Bɩ kʊ wɔɔ bɩ lee ku awɔɔ zi b’ʊ kan Masedʊan gʊɔɔ wɔɔ kɩ, ʊ bɩ dɩga a awɔɔ n a banka a nya y, nyannɩ gʊta wɔɔ nyasʊm, bala, wɔɔ sɩra ka awɔɔ ʊ b’a n yɩ maam y. Bɩ, nyannɩ y’awɔɔ nyasʊm sɔ gʊta an lɛ da. 5Naa tɔ ma m mɔɔ n a gɩnga mɔɔ ʊ, a a ga m kʊ m a yɛ wɔɔ danyɩnɔ wɔɔ han kʊ ŋ nɩ lɛɛ ka mɔɔ m awɔɔ zi b’ʊ. K’awɔɔ n busoo k’awɔɔ ʊ k’a ka kan a heer kɩ haay bɩ zɩnzɛ kʊ ra a nya. Awɔɔ busoo bɩ do ler bɔ kara. Ncɩnaaʊ bɩ mɔɔ zɛm bɩ dɩga a awɔɔ busoo bɩ zɩnzɛ kʊ ra a nya, naa y’a hɩnkam sɔ a ʊ, a ka awɔɔ nawʊm kan a heer kɩ haay, awɔɔ bɩr a kam pakra nɩ y.
6K’a mim naa do tɔ da a nɔ ʊ:
Gʊaa k’a hɔ duu poore bɩ,
hɔ poore an n’a yɩm sɔ,
gʊaa k’a duu gʊta bɩ,
hɔ gʊta an n’a yɩm sɔ.
7Naa tɔ ma bɩ, a a ga m kʊ gʊaa biyəə n hɔ k’a gɩnga k’a ka bɩ ka, a b’a ka pakra nɩ, gɛɛ paŋŋa n y’a ba a ma tɔ ma y. Bala, gʊaa k’a nɩ hɔ kam kan heernyɩnta kɩ bɩ, Woso ɩ bɩ zaa ŋʊam. 8Bɩ, Woso a da ma an hɔ mɩŋŋa do y’a hʊnhɔ ka awɔɔ ʊ gʊta, kʊ hɔsɩ bɩ jɩra awɔɔ ma y, bɩ kʊ hɔ n bɩr ta awɔɔ ʊ gʊta, k’a zi mɩŋŋɔɔ do haay ba m. 9Yɩ a nawʊrɛ ncɩnaaʊ, amba n y’a gʊrsɩra ba Wosoci b’ʊ bɩ m, n ʊ:
A ɩ hɔ kam ŋʊazannɔ ʊ gʊta,
a ba k’a nawʊm gʊɔɔ m mɩŋŋa
bɩ nyarɛ ba ʊ y.
10Woso nɩ hɔ kam hɔduurezaa ʊ an n’a duum, an nɩ hɔbɩrɛ kaŋ ʊ an n’a bɩm. Woso bɩ do nɩ hɔ karɛ awɔɔ ʊ gʊta amba awɔɔ lɛ n taa bɩ m, an a ka an pasɩ yɔɔgʊ, k’awɔɔ n wɔ ʊ a ba gʊɔɔ m mɩŋŋa gʊta. 11A y’a kam awɔɔ n hɔ yɩ gʊta dɔmɩm haay, k’awɔɔ n bɩr a bam gʊɔɔ m mɩŋŋa tee…. K’a yɩ ncɩnaaʊ, gʊɔɔ cir gʊta y’a lɛ bɔm Woso ʊ, awɔɔ ganwʊrɛrɔ wɔɔ kʊ wɔɔ n’a karɛ ŋ ʊ tɔ ma. 12Bala, busoo zɩnzɛkʊra bɩ zibəə bɩ, a da bɛɛ a nawʊm wosogʊɔɔ wɔɔ han bala y, a ka a nawʊm sɔ gʊɔɔ nɩ Woso barka dam gʊta maam-maam. 13Zi naa do barɛ n’awɔɔ taalɛra zaa bɩ zuure nɔ ʊ bɩ hɩnkam. A a hɩnka a ʊ, awɔɔ sɩra ka Krista lemim nyɩnta b’ʊ denter, an nɩ yɛm ma karɛ. Gʊɔɔ gʊta y’a lɛ bɔm Woso ʊ naa tɔ ma, ŋ y’a lɛ bɔŋ ʊ sɔ k’awɔɔ n’a barɛ ŋ nɩ mɩŋŋa, an n’a hɔnyɩ jirm kan ŋ kɩ kan gʊaa haay kɩ bɩ tɔ ma. 14Ŋ yaa darɛ awɔɔ tɔ ma, ŋ n’awɔɔ ŋʊa gʊta, kʊ Woso a barka ka awɔɔ ʊ gʊta ncɩnaaʊ bɩ minto. 15Bɩ kʊ Woso tɔ n lɛbɔʊrɛ yɩ, a ganwʊrɛ gʊta k’a lɔɔ ba ʊ bɩ tɔ ma.
10Pol y’a darɛ a nyaa ma
1Awɔɔ y’a hɩm mɔɔ mɩŋŋa Pol ma, a ʊ, kʊ mɔɔ y’awɔɔ bire ʊ, nyibəəzaa m mɔɔ m, bɩ kʊ mɔɔ laatʊ bɩ mɔɔ nɩ m darɛ m nyaa ma kan awɔɔ kɩ. Bɩ, a yɛ mɔɔ nawʊrɛ awɔɔ han Krista bʊgʊ-bʊgʊdabaa m kan a ŋʊarɛ kɩ m, m ʊ: 2A b’a ka kʊ mɔɔ bɩ lee ku awɔɔ bire ʊ, kʊ m m da m nyaa ma wa! Bala, gʊɔɔ kʊ ŋ n’a gɩngarɛ ŋ ʊ, ʊ zi woo… ba wɔɔ nawʊm gʊaa hɔɔndarɛ m bala rɔ wɔɔ, mɔɔ dɔ mɔɔ ʊ mɔɔ m da ma, m m da m nyaa ma kan ŋ kɩ. 3Sɩra m, wɔɔ mɛ kʊ wɔɔ n ta m ʊ n’ʊ mɩsɩrbaa bam nɩ naa, mɛsim m. Bɩ wɔɔ bɩr Woso zuure zoo bɩ bam gʊaa hɔɔndarɛ nɩ y. 4Yar mɔdrɔ kʊ wɔɔ n ta m, ʊ nɩ yar bɩ barɛ ŋ nɩ rɔ wɔɔ, durnya gʊɔɔ n ta ŋ nɩ rɔ wɔɔ bɛɛ y. Wɔɔ hɔɔ wɔɔ, Woso yar mɔdrɔ paŋŋazannɔ m ŋn’a dam ma ŋnɩ bʊr jɩnnɔ gʊtɔ-gʊtɔɔ ra. Wɔɔ ɩ hɔɔndarɛrɔ daŋŋadɔɔ zaar bam. 5Wɔɔ ɩ hɔɔ kʊ gʊɔɔ ŋ sa mɩŋŋabusure nɔ ʊ ŋn’a ta m Woso dɔrɛ m toore rɔ wɔɔ zaar bam, wɔɔ ɩ hɔɔndarɛ haay dam jɩm ʊ, ʊ n’a karɛ a zannɔ nɩ yɛm Krista ma. 6Bɩ, k’awɔɔ hɩnka a ʊ, awɔɔ ɩ yɛm hɔ kʊ wɔɔ n’a hɩm haay ma fasɩ, k’a dɔ a ʊ, wɔɔ ʊ banka ʊ a nya k’ʊ gʊɔɔ haay kʊ ŋ bɩr yɛm nɔ wɔɔ hʊnhʊr.
7Gɛɛ dɩga awɔɔ nawʊm hɔ kʊ gʊɔɔ n’a yɩrɛ a mɩm m bɩ ma bala ra? Ncɩnaaʊ bɩ, kʊ gʊaa ʊ Krista hɔ n a mɩ fasɩ, k’an a hɔɔn da an a dɔ sɔ a ʊ, Krista y’a so wɔɔ ʊ, amba a a so a zaa ʊ bɩ m. 8Baa kʊ mɔɔ m lɛ bɔ m mɩŋŋa ʊ gʊta, lɛ kʊ Krista a ka mɔɔ ʊ bɩ tɔ ma bɩ, a nyannɩ ba mɔɔ nɩ y. Bɩ, lɛ kʊ mɔɔ m ta m naa, a ka Woso ʊ mɔɔ ʊ, k’awɔɔ n wɔ ʊ a ta lɛɛ, a sokʊma bɩ nɔ ʊ, awɔɔ zaarbarɛ tɔ ma bɛɛ y. 9Mɔɔ lɛ baa k’awɔɔ n a gɩnga a ʊ, m ka mɔɔ nawʊm ma kʊ m awɔɔ da bɔ ʊ m ciro wɔɔ meerbaarɔ nɩ y. 10Bala, n y’a hɩrɛ, n ʊ: «Mɔɔ ciro wɔɔ meerbaarɔ kʊsɩ, nyaa meerbaarɔ m sɔ, bɩ kʊ mɔɔ bʊr m nɩ kan awɔɔ kɩ, paŋŋawarzaa n mɔɔ m, bɩ mɔɔ n meerbaa dɔ sɔ y.» 11Bɩ gʊaa k’a nɩ naa hɩm bɩ, mɔɔ ʊ, kʊ m a hɩ m, m ʊ: Hɔ kʊ wɔɔ n’a gʊrsɩra barɛ ʊ ciro wɔɔ ʊ kʊ wɔɔ ba awɔɔ bire ʊ bɩ tɔ ma bɩ, kan hɔ kʊ wɔɔ n’a bam kʊ wɔɔ ɩ kan awɔɔ kɩ bɩ, ŋ hɔdeem, ŋ jirə ba ʊ y.
12Sɩra m, wɔɔ b’ʊ dam ma ʊ ʊ ga kʊ ʊ gɛɛ ʊ ʊ makra ba gʊɔɔ kʊ ŋ n’a hɔɔn darɛ ŋ ʊ, a lɛ da gʊɔɔ m nɔ wɔɔ ma y. Hɔɔnwarzannɔ m brɔɔ m. Bɩ y’a ka ŋn’ɩ dɩgarɛ a mɩŋŋɔɔ ma k’a a makra ba kan gʊɔɔ kɩ, ŋn’a makra barɛ a mɩŋŋɔɔ ma. 13Bɩ kʊ wɔɔ nɩ, wɔɔ bɩ yɛrɛ ʊ ʊ lɛ bɔ ʊ mɩŋŋɔɔ ʊ, an cem jirə kʊ Woso a ka bɩ han y, wɔɔ y’ʊ lɛ bɔrɛ ʊ mɩŋŋɔɔ ʊ zibəə kʊ Woso a ka wɔɔ ʊ k’ʊ a ba bɩ tɛkka ma, a ka k’a ʊ wɔɔ n’ʊ da ma ʊ lee ku awɔɔ zi bɩ nɔ ʊ. 14Bala, ta kʊ wɔɔ ʊ awɔɔ zi b’ʊ bɩ, cem bɛɛ wɔɔ ʊ ʊ jirə han y. Wɔɔ ɩ lɛɛ ka, ʊ bɩ Krista lemim nyɩnta pa da awɔɔ m. 15Wɔɔ bɩr ʊ lɛ bɔrɛ ʊ mɩŋŋɔɔ ʊ gʊɔɔ vantɔɔ zibəə tɔ ma y. Bɩ, wɔɔ ta ʊ heer lɛ k’awɔɔ sɩrakarɛ n a da ra, kʊ wɔɔ zibəə n paŋŋa yɩ gʊta awɔɔ barla sɔ, zibəə kʊ Woso wɔɔ da ʊ bɩ m naa, wɔɔ bɩ bɔrɛ a jirə la nɩ y. 16Wɔɔ wɔŋ ʊ ncɩnaaʊ ʊ lemim nyɩnta bɩ pa da kʊrɔ kʊ ŋ nɩ laatʊ awɔɔ kʊ bɩ ma rɔ wɔɔ ʊ, bɩ wɔɔ b’ʊ lɛ bɔrɛ ʊ mɩŋŋɔɔ ʊ zi kʊ gʊɔɔ vantɔɔ a ba tɔ ma y, zi kʊ Woso a ka brɔɔ ʊ kʊ ŋ n’a ba bɩ n bɩ.
17Wosoci b’a hɩ, a ʊ: «Gʊaa k’a ʊ k’a a lɛ bɔ a mɩŋŋa ʊ, a b’a lɛ bɔ a mɩŋŋa ʊ y, an a lɛ bɔ hɔ kʊ Zuuba a ba b’ʊ.» 18Bala, gʊaa k’a n’a lɛ bɔrɛ a mɩŋŋa ʊ a zim bɩ bɛɛ Woso nɔ nɩ yɩm ma y. Gʊaa kʊ Woso mɩŋŋa n’a lɛ bɔŋ ʊ bɩ m.
11Pol ɩ ŋʊaarzibəəzannɔ mim hɩm
1Kɛɛrɛ naa, mɔɔ hɔɔzaabaa meer bam kan awɔɔ kɩ, k’a yɛ ma. Ɩɩn… a yɛ mɔɔ nawʊrɛ awɔɔ han k’a yɛ mɔɔ hɔɔzaabaa meerbaa bɩ ma. 2Awɔɔ ŋʊa kʊ mɔɔ nawʊm bɩ, jɩmbaa n ta mɔɔ m, a to a ʊ Woso zi. Bala, awɔɔ banka mɔɔ ʊ amba nyɩmbʊɛɛrɛ k’a n yar dɔ bɩ m, kʊ m a ka Krista ʊ, k’a n yɩ awɔɔ zim. 3Bɩ, mɔɔ da nɩ bɔŋ ʊ, mɔɔ ʊ, a a da ma gʊɔɔ n bra ba awɔɔ m ŋʊaarlɔ m awɔɔ n a bɔ Krista zuure ʊ paan…, amba mɩm bɩ bra ba Ɛɛvɩ m ŋʊaarlɔ meerbaa m bɩ m. 4Meer bɩ ba mɔɔ nawʊrɛ ncɩnaaʊ, bala, kʊ gʊaa bʊr an nɩ Yeezuu Krista vanta mim hɩrɛ, an nɩ meer bɩ bam ɛspri kʊ Sɛnt-Ɛspri bɛɛ m bɩ nɩ, an nɩ lemim vanta pa darɛ awɔɔ m, bɩ lemim nyɩnta k’awɔɔ zu ʊ biisi bɩ bɛɛ y, awɔɔ tɩr a gu a yɛ ma.
5Gʊɔɔ k’awɔɔ n’a hɔɔn darɛ ŋ ma a ʊ, zibəəzannɔ kʊ ŋ lɛ da rɔ nɩ ŋ mɩ rɔ wɔɔ, mɔɔ y’a gɩngam m ʊ ŋ n lɛ da mɔɔ nɩ y. 6A a da ma mɔɔ bɩ wɔŋ ʊ, m meer ba wɩsɩ am ŋ hɔ bɩ nɩ y, bɩ kʊ Woso hɔdɔrɛ mim nɩ, ŋ bɩ jɩra mɔɔ nɩ y. Mɔɔ m hɔdɔrɛ bɩ hɩnka hɔ haay nɔ ʊ, mim haay nɔ ʊ.
7Kʊ mɔɔ bɩ Woso lemim nyɩnta pa da awɔɔ m bɩ, a pa bɩ da mɔɔ ʊ awɔɔ m vam, mɔɔ n hɔsɩ si awɔɔ han y. M mɩŋŋa mɔɔ zer, kʊ m awɔɔ gore da ʊ. A hɩ awɔɔ ʊ, a ba kʊ mɔɔ ʊ ncɩnaaʊ naa, kʊrɔ mɔɔ ʊ ma ra? 8Nyɩnta kʊ mɔɔ ʊ awɔɔ zi b’ʊ bɩ, kristagʊɔɔ sokʊmarɔ vantɔɔ ɩ mɔɔ yawʊra ba, mɔɔ brɔɔ wɔ nya, kʊ m m da awɔɔ han. 9M da kʊ mɔɔ nawʊrɛ awɔɔ han b’ʊ bɩ, kʊ busoo mim ta mɔɔ ma, mɔɔ bɩr awɔɔ kɔm k’a hɔsɩ kaŋ ʊ y. Wɔɔ danyɩnɔ kʊ ŋ nɩ Masedʊan ʊ rɔ wɔɔ bʊr, ŋnɩ hɔ kʊ mɔɔ lɛ n taa haay bɩ ka mɔɔ ʊ. Mɔɔ n yɛ fɩɩgaa k’awɔɔ n kɔ mɔɔ mim ma y, naa mɔɔ nɩ gɔɔtarɛ m bɩr a bam. 10Naa m mɔɔ goredaʊrɛ, sɩra mɔɔ n’a hɩm Krista k’a nɩ mɔɔ ʊ bɩ tɔ m, mɔɔ b’awɔɔ busoo sire y, m lɛ mɔɔ n’a bɔrɛ m mɩŋŋa ʊ naa tɔ ma, bɩ gɔsɩ b’a dam ma Akayii kʊrɔ wɔɔ ʊ jilli an a ta mɔɔ m toore naa nɔ ʊ y. 11Bɔ m mɔɔ n naa hɩ? Mɔɔ bɩr awɔɔ ŋʊam gɛ? Ayy…, Woso a dɔ a ʊ mɔɔ y’awɔɔ ŋʊam.
12Hɔ kʊ mɔɔ n’a bam naa, mɔɔ gɔɔtarɛ m bɩr a barɛ ncɩnaaʊ can, kʊ m a ka kʊ gʊɔɔ kʊ ŋ lɛ n taa k’a a lɛ bɔ a mɩŋŋɔɔ ʊ, a ʊ, a ɩ zi bam, am wɔɔ hɔ bɩ m nɔ wɔɔ n a da jɩm ʊ, kʊ ŋ b’a da ma ŋnɩ naa hɩ y. 13Gʊɔɔ nɔɔn duro, zibəəzannɔ paan…rɔ bɛɛ nɩ ŋ mɩ y, ŋʊaar ŋn’a bam gʊɔɔ m a zibəə bɩ nɔ ʊ, ŋn’a hɔ barɛ ɩ ʊ, Krista zibəəzannɔ m. 14Bɩ naa do naa, zɛkədə mim b’a nɔ ʊ y, bala, Sʊtaana mɩŋŋa a da ma an a mɩŋŋa ba ɩ ʊ, lɛɛgure malɛɛka m. 15K’a yo Sʊtaana mɩŋŋa wɔ ʊ an naa ba bɩ, k’a maam wɔɔ b’a hɩm ʊ ʊ, a zibəənyɩnɔ wɔɔ b’a mɩŋŋɔɔ barɛ ɩ ʊ zibəətɩrgazannɔ n a mɩ wa. Bɩ, ŋ nyambʊrlɛ bɩ, bɔ a nawʊm kʊ ʊ kan ŋ zibəə bɩ kɩ, a yɩrɛ ŋ ma bʊnyaa.
Pol fɩryɩrɛrɔ mim
16Kʊ m m ya, m so ra, awɔɔ gɔsɩ bɩ dɩga mɔɔ ma ɩ ʊ, hɔɔzaa n mɔɔ nɩ y. Gɛɛ k’awɔɔ ʊ hɔɔzaa n mɔɔ nɩ, k’a maam k’a yɛ mɔɔ ma amba awɔɔ nɩ yɛm hɔɔzannɔ ma bɩ m, kʊ m wɔ ʊ m m lɛ bɔ m mɩŋŋa ʊ poore. 17Hɔ kʊ mɔɔ ʊ kʊ m a ba naa, Zuuba hɔɔnhɔ bɛɛ m kʊ mɔɔ n a ba ncɩnaaʊ y. Kʊ mɔɔ ʊ kʊ m m lɛ bɔ m mɩŋŋa ʊ naa, hɔɔzaabaa zibəə m. 18K’a a yo gʊɔɔ gʊta n’a lɛ bɔrɛ a mɩŋŋɔɔ ʊ durnya minno ma bɩ, mɔɔ yɩ m lɛ bɔrɛ m mɩŋŋa ʊ sɔ. 19Awɔɔ kʊ mindɔrɛzannɔ n’a mɩ rɔ wɔɔ, awɔɔ ɩ yɛm hɔɔzannɔ ma naanaa. 20Awɔɔ ɩ yɛm gʊɔɔ n’a sore awɔɔ ʊ am lɔnnɔ hɔ bɩ m, ŋn’ɩ hɔ yɔrɛ a m, ŋn’ɩ ŋʊaar barɛ a m, ŋn’awɔɔ gore bɔŋ ʊ, ŋn’awɔɔ sʊnsɔ wʊm. 21Nyannɩ ɩ mɔɔ zɛm, bala, wɔɔ n wɔ ʊ, ʊ naa ba awɔɔ nɩ y.
Bɩ kɛɛrɛ naa, mɔɔ meer bɩ barɛ am hɔɔzaa hɔ bɩ m, gʊɔɔ kʊ ŋ n’a lɛ bɔrɛ a mɩŋŋɔɔ ʊ hɔɔ niŋŋoo m nɔ wɔɔ, mɔɔ yɩ m lɛ bɔrɛ m mɩŋŋa ʊ hɔɔ wɔɔ duro m sɔ. 22Gʊɔɔ wɔɔ duro ʊ ebree gʊɔɔ n’a mɩ, bɩ, ebree gʊaa n mɔɔ m sɔ. Ŋ ʊ, Israyɛl gʊɔɔ n’a mɩ, mɔɔ maam sɔ. Ŋ ʊ, Abraham yaŋŋɔɔ n’a mɩ, bɩ mɔɔ maam sɔ. 23Ŋ ʊ, Krista zibəənyɩnɔ n’a mɩ, ʊnhʊʊn…, mɔɔ hɔɔzaabaa meer bam fasɩ kɛɛrɛ,
Krista zibəənyɩ m mɔɔ m an lɛ da ŋ la.
Mɔɔ zi ba an lɛ da ŋ hɔ ra.
N mɔɔ du lɔnnɔcɛ ʊ an lɛ da ŋ la,
n mɔɔ zɛ mawʊr m an lɛ da ŋ la sɔ,
mɔɔ m mee ka zɛ ma gallɛm hɔka.
24Zɩɩfʊrɔ lɛɛzannɔ mɔɔ nyasʊ gallɛm soor ŋnɩ mɔɔ zɛ mawʊr m, mɔɔ zɛ n tɩr a ʊ mawʊr bɩ m gallɛm bukərku a yaa n nɛɛhʊ. 25Rɔm gʊɔɔ mɔɔ nyasʊ gallɛm kaakʊ ŋ nɩ mɔɔ zɛ bannɔ m,
hindeem ʊ gʊɔɔ mɔɔ bɩmba jaarɔ m k’a mɔɔ meeyaa bɔ ʊ.
Mɔɔ m yo kʊ m ga kɔɔlʊʊ nyoobarɛ nɔ ʊ gallɛm kaakʊ,
hindeem ʊ mɔɔ gɔɔta higʊta ʊ dɔmɩm deem,
dɔ n mɩ n nɩ mɔɔ bɔ lɛm.
26Mɔɔ zaakʊ gʊta,
mɔɔ zaakʊrɛrɔ wɔɔ nɔ ʊ,
pɛrgʊrɔ kʊ ŋ tɩr yar lɔ wɔɔ a yo k’a mɔɔ bɩ,
dazaamazannɔ a yo k’a mɔɔ zɛ sɔ,
mɔɔ dogʊɔɔ a ŋʊa k’a mɔɔ meeyaa bɔ ʊ sɔ.
Doro vantɔɔ gʊɔɔ a yo k’a mɔɔ zɛ gər sɔ.
Minno a yo k’a mɔɔ yɩ kʊnɔrɔ ʊ, kan poohɔɔnrɔ kɩ ʊ, higʊtɔɔ burə ʊ sɔ,
ŋʊaar kristagʊɔɔ barla sɔ.
27Mɔɔ zi kʊsɩrɔ ba, m makra kʊsɩrɔ yɩ, hinceem tɩr jɩra mɔɔ ma, nɔ n tɩr mɔɔ zɛ kan mɩsɩ kɩ, m tɩr m lɛ kʊsɩ pakra m, nyɛɛm mɔɔ zɛ, huu jɩra mɔɔ ma sɔ. 28Mɔɔ bɩ m kɔrɛ m minno vantɔɔ hɩ y, dɔmɩm biyəə mɔɔ heer ɩ kɔm kristagʊɔɔ sokʊmarɔ wɔɔ mim tɔ ma. 29Kʊ paŋŋawarzaa m gʊaa nɩ, b’ɩ ʊ, mɔɔ m. Kʊ gʊaa a do mimbʊnyaa nɔ ʊ b’a busu mɔɔ ma gʊta, ɩ ʊ mɔɔ m.
30Kʊ mɔɔ ʊ kʊ m m lɛ bɔ m mɩŋŋa ʊ, m lɛ mɔɔ n n’a bɔrɛ m paŋŋawar minno ʊ. 31Woso, wɔɔ Zuuba Yeezuu Zɩ bɩ, a a dɔ a ʊ, ŋʊaar bɛɛ mɔɔ n’a barɛ y. Bɩ, k’a tɔ n lɛbɔʊrɛ yɩ dɔmɩm haay. 32Nyɩnta kʊ mɔɔ ʊ Damas kʊ ʊ bɩ, kʊ bɩ dɩgamazaa kʊ cir Aretas a so ʊ b’a ka yarbənno n jɩm kʊ bɩ lɛrɔ ma, k’a mɔɔ ku a mɔɔ nyasʊ. 33Bɩ, gʊɔɔ mɔɔ da kasɩ ʊ, n n’a ka mɔɔ n bɔ kʊ bɩ pəŋŋə bɩ tokoro deem m, yɩ a ʊ ncɩnaaʊ kʊ bɩ dɩgamazaa bɩ n mɔɔ ku an mɔɔ nyasʊ y.
12Hɔ kʊ Woso a hɩnka Pol m
1Mɔɔ gɔɔtarɛ m m lɛ bɔ m mɩŋŋa ʊ ra? Mɔɔ dɔ mɔɔ ʊ a nyɔɔdʊ ba ʊ y, bɩ kɛɛrɛ naa, mɔɔ hɔɔ kʊ Zuuba ŋ hɩnka mɔɔ m nɩnnarɛ nɔ ʊ rɔ wɔɔ mim hɩm. 2Mɔɔ kristagʊaa dɔ, Woso n a busu an ta m a zi arzana ʊ, a busure dɔɔraa bueeresi hɔ m naa. Mɔɔ n a dɔ kʊ ta a ʊ arzana ʊ paan…, gɛɛ hɔhɩnkarɛ a a yɩ y, Woso ɩ naa dɔ. 3Denter m, mɔɔ dɔ mɔɔ ʊ, Woso a busu an ta m arzana ʊ, a a da ma hɔhɩnkarɛ a a yɩ, a a da ma Woso a busu paan… an ta m arzana ʊ b’ʊ, Woso ɩ naa dɔ mɔɔ n a dɔ y. 4Arzana ʊ b’ʊ bɩ, a meerbaarɔ niŋŋoo ma, gʊaa n a ga m an so ŋ la y, bɩ, zaa ba ʊ, gʊaa n ŋ mim hɩrɛ y. 5M lɛ mɔɔ n’a bɔrɛ m mɩŋŋa ʊ, gʊaa ncɩnaaʊ bɩ tɔ ma, bɩ mɔɔ bɩ m lɛ bɔrɛ m mɩŋŋa ʊ y. Kʊ mɔɔ ʊ kʊ m m lɛ bɔ m mɩŋŋa ʊ, m paŋŋawar minno mɔɔ nɩ ŋ hɩm. 6K’a hɩ mɔɔ ʊ kʊ m m lɛ bɔ m mɩŋŋa ʊ, mɔɔ bɩ yɩm hɔɔzaa y, bala, mɔɔ sɩra hɩm. Bɩ, mɔɔ lɛ baa kʊ m m lɛ bɔ m mɩŋŋa ʊ y, bala, mɔɔ lɛ baa kʊ gʊaa n a hɔɔn da mɔɔ ma an lɛ da m bɩncɛ ra, zi kʊ mɔɔ ba an n’a yɩm nɔ ʊ, gɛɛ meer kʊ mɔɔ n’a bam an n’a mam nɔ ʊ y.
7Hɔɔ gʊtɔɔ nɔɔn duro kʊ Woso ŋ hɩnka mɔɔ m b’a da ma an a ka mɩŋŋabusure n a so mɔɔ ʊ. Naa tɔ ma m Woso n yaaba da mɔɔ zi an nɩ mɔɔ kɔm, kʊ mɔɔ bɩ m mɩŋŋa busu y. Yaaba bɩ, bɔ a ʊ kʊ ʊ ɩ ʊ, Sʊtaana zibəəzaa deem zibəə m, an nɩ mɔɔ zɛm, kʊ mɔɔ bɩ m mɩŋŋa busu y. 8Mɔɔ yaa da Woso m gallɛm kaakʊ k’an mɔɔ yɔ fɩryɩrɛ naa do wɔ ʊ. 9A n a nyɩ bɔ mɔɔ n’ʊ, a ʊ: «Mɔɔ barka b’ɩbɩɩ bɔ, bala, k’ɩbɩɩ ɩ paŋŋawar nɔ ʊ, bɩ mɔɔ barka b’a zi ba fasɩ.» Naa tɔ ma bɩ, mɔɔ yɩ m heer nyɔɔm m m lɛ bɔ m mɩŋŋa ʊ, m paŋŋawarlɔ tɔ ma, kʊ Krista paŋŋa bɩ n nyɩnta mɔɔ gʊr zi fasɩ.
10Naa y’a ka Krista tɔ ma
mɔɔ nɩ m heer nyɔɔm,
kʊ mɔɔ ɩ paŋŋawarlɔ nɔ ʊ,
kʊ gʊɔɔ ɩ mɔɔ sʊnsɔ wʊrɛ,
kʊ minno a hʊnhɔ ɩ mɔɔ yɩrɛ,
kʊ gʊɔɔ ɩ fɩr kam mɔɔ ma,
kʊ minno ɩ mɔɔ heer kɔm sɔ.
Bala, kʊ mɔɔ ɩ paŋŋawar nɔ ʊ,
bɩ mɔɔ paŋŋa n ta ʊ.
Pol heer ɩ kɔm Korɛntɩ gʊɔɔ tɔ ma
11Mɔɔ ɩ meerbaa bɩ barɛ ɩ ʊ, hɔɔzaa m mɔɔ m, b’awɔɔ ɩ mɔɔ da ʊ paŋŋa m. Awɔɔ y’a ga m hɔɔ a mɔɔ nyaa ba. Bala, baa kʊ hɔsɩ bɛɛ m mɔɔ nɩ, gʊɔɔ k’awɔɔ nɩ dɩgarɛ ŋ ma zibəəzannɔ wɩsɩrɔ wɔɔ, ŋ n lɛ da mɔɔ m hɔsɩ nɔ ʊ y. 12Zibəəro kʊ ŋ n’a hɩnkarɛ ŋ ʊ, kristazibəəzaa m mɔɔ m nɔ wɔɔ, ziro wɔɔ duro ba mɔɔ ʊ gʊɔɔ bire ʊ kan bʊraama gʊta kɩ. Zibəəro wɔɔ duro, hoserlo do y’a hʊnhɔ m kan gɩngarɛ do y’a hʊnhɔ kɩ. 13Bɔ n ta ʊ mɔɔ n a ba kristagʊɔɔ sokʊmarɔ vantɔɔ wɔɔ m, mɔɔ n a ba awɔɔ nɩ? K’a maam kʊ mɔɔ n yɛ k’awɔɔ n dɩga mɔɔ mɩsɩrbaa mim ma bɩ m. K’a kʊrɔma naa do sugur ka m ʊ.
14Dɩɩtaa naa, mɔɔ m banka m a nya kʊ m bʊr awɔɔ zi b’ʊ, a gallɛm kaakʊ hɔ mɔɔ nɩ zɛm b’ʊ naa, bɩ kʊ mɔɔ bɩ bʊr, mɔɔ bɩ yɛm awɔɔ n dɩga mɔɔ mim ma y. Awɔɔ mɩŋŋɔɔ mɔɔ nɩ m karɛ a ma, awɔɔ busoo bɛɛ y. Bala, nyɩnɔ bɛɛ n’a kam busoo ma k’a nyasʊ a zɩrɔ nɩ y, zɩrɔ wɔɔ n’a kam ma ŋn’ɩ nyasʊrɛ a nyɩnɔ m. 15Kʊ mɔɔ nɩ, heernyɔɔ m kan mɔɔ kɩ, kʊ m hɔ kʊ mɔɔ n ta m haay sa kan m mɩŋŋa kɩ, m m da m awɔɔ han. Awɔɔ ŋʊa kʊ mɔɔ nawʊm gʊta ncɩnaaʊ naa y’a ka awɔɔ bɩr mɔɔ ŋʊam na?
16Awɔɔ yɛ a dɔ a ʊ, mɔɔ n yɛ k’awɔɔ n kɔ mɔɔ nyasʊm tɔ ma y. B’a da ma gʊaa n a hɩ a ʊ, hɔɔnkarɛ zi mɔɔ ba kʊ m awɔɔ ku m wɔ ʊ, ŋʊaarlɔ m. 17Mɔɔ ŋʊaar ba awɔɔ m kʊ m hɔ yɩ awɔɔ gʊr zi ra? Mɔɔ gʊɔɔ kʊ mɔɔ ŋ nyɔɔ awɔɔ zi rɔ wɔɔ gʊaa deem da ʊ k’an ŋʊaar ba awɔɔ m na? 18Mɔɔ yɛ Tiitɩ han an ta awɔɔ zi b’ʊ, kan wɔɔ danyɩ kʊ mɔɔ mim hɩ awɔɔ m biisi bɩ kɩ. Awɔɔ a da ma a hɩ a ʊ, Tiitɩ ŋʊaar ba awɔɔ m k’a hɔ yɩ ra? A mɩŋŋa kan mɔɔ kɩ, tar deem wɔɔ sa, ʊ ʊ mɩsɩrbaa bɩ ba m, kan ʊ zibəə kɩ.
19A hɔɔn k’awɔɔ n’a darɛ a ʊ, ʊ ka wɔɔ nawʊm ma kʊ gumə ka ʊ mɩŋŋɔɔ ʊ awɔɔ lɛɛ bɩ, a dɔmɩm laatʊ. Ayy…, ʊ meerbaa bɩ ba wɔɔ nawʊm Woso taa amba Krista n’a ŋʊam bɩ m, bɩ, ʊ gʊaasɩbɔɔ, naa haay hɩ wɔɔ nawʊrɛ awɔɔ m, k’awɔɔ n ta lɛɛ sɩrakarɛ nɔ ʊ. 20Mɔɔ da ɩ bɔŋ ʊ, m ʊ, ɩ b’a ka mɔɔ n bʊr awɔɔ zi b’ʊ m bɩ dɩga a hɔ kʊ mɔɔ n’a gɩngarɛ awɔɔ zi bɩ bɩ maam nɩ y, awɔɔ n a yɩ sɔ a ʊ, hɔ k’awɔɔ n’a gɩngam mɔɔ zi bɩ, a bɩ maam sɔ y. Mɔɔ da ɩ bɔŋ ʊ, m ʊ, ɩ b’a ka nyaa n bɩ nyɩnta ʊ, kan jɩmbaa kɩ, nɔmaa kɩ, mɩmbɔkʊma kɩ, kan sʊnsɔwʊrɛ kɩ, gʊɔɔtɔzarlɛ kɩ, kan mɩŋŋabusure kɩ, warkʊma kɩ y. 21Mɔɔ da ɩ bɔŋ ʊ sɔ, m ʊ, m ya kʊ mɔɔ ʊ m nɩ zɛrɛ awɔɔ zi b’ʊ naa, ɩ b’a ka Woso n mɔɔ da nyannɩ ʊ awɔɔ bire ʊ wa. M m ya m nyi ka gʊɔɔ gʊta kʊ ŋ mimbʊnyaa ba hɔɔ, ŋnɩ gɔɔta ŋn’a bɔ a taam a dintim zibəəro wɔɔ nɔ ʊ rɔ wɔɔ tɔ ma wa, a a da ma ŋnɩ gɔɔta ŋn’ɩ jaan dam, ŋn’a zibʊnyaarɔ wɔɔ bam.
13Dʊndɔrɛ nyambʊrlɛ
kan leersore kɩ
1Kʊ mɔɔ bɩ bʊr awɔɔ zi b’ʊ, a gallɛm kaakʊ hɔ m naa kɛɛrɛ. Amba Wosoci b’a hɩ, a ʊ: «Kʊ gʊaa ʊ, gʊaa vanta mim ba, pakra m kʊ mim bɩ kasɛtɩzannɔ n nyɩnta ʊ hɩɩya gɛɛ kaakʊ, kʊ mim bɩ n yɩ sɩra», kʊ mɔɔ bɩ lee ku, naa wɔɔ n’a bam. 2Kʊ m lɛɛ ka m a hɩ gʊɔɔ kʊ ŋ mimbʊnyaa ba hɔɔ rɔ wɔɔ m kan gʊɔɔ mɩsɩrɔ wɔɔ kɩ m, bʊr kʊ mɔɔ ʊ b’ʊ a hɩɩya hɔ ma bɩ, mɔɔ ŋ bɔ zaa ʊ, bɩ kɛɛrɛ naa, kʊ mɔɔ ba b’ʊ naa, mɔɔ y’a hɩrɛ m ʊ, kʊ mɔɔ m ya m bʊr awɔɔ zi b’ʊ, mɔɔ bɩ gɔsɩ tore y, mɔɔ hʊnhʊrlɛ karɛ ŋ haay ʊ. 3Awɔɔ lɛ taa k’a a dɔ a ʊ, Krista a meerbaa da mɔɔ lɛ ʊ mɔɔ n’a bam, gɛɛ lɔ? K’a maam awɔɔ y’a dɔrɛ. Paŋŋawarzaa bɛɛ m Krista m awɔɔ gʊr zi y. A y’a paŋŋa bɩ hɩnkarɛ awɔɔ bire ʊ. 4Sɩra m, a zɛ kʊ n y’a ʊ gɔdarkʊra ma bɩ, a nyɩnta paŋŋawar nɔ ʊ, bɩ, a y’a mɩsɩrbaa bam kɛɛrɛ Woso paŋŋa tɔ ma. Kʊ wɔɔ ʊ zɛ kʊ ra kan kɩ bɩ, wɔɔ ɩ paŋŋawar nɔ ʊ sɔ, bɩ, ʊ mɩsɩrbaa bɩ ba wɔɔ nawʊm kan kɩ, ʊ n’ʊ zi bɩ bam kan awɔɔ kɩ Woso paŋŋa m.
5K’a bɔ a dɩga a mɩŋŋɔɔ ma a zim, awɔɔ ɩ mɩsɩrbaa bam sɩrakarɛ nɔ ʊ gɛ. Awɔɔ dɔ a ʊ, Yeezuu Krista y’awɔɔ bire ʊ, gɛɛ lɔ? K’awɔɔ n a dɔ, k’a maam, k’awɔɔ bɩ wɔŋ ʊ a a sɩrakarɛ zibəəro hɩnka bɩ tɔ ma m. 6Bɩ, mɔɔ y’a gɩngam mɔɔ ʊ, awɔɔ dɔ a ʊ, wɔɔ bɩ jɩra m sɩrakarɛ zibəəro hɩnkarɛ ra wa. 7Yaa wɔɔ n’a dam Woso m, k’awɔɔ bɩ mimbʊnyaa ba y. Ʊ ka bɛɛ wɔɔ nawʊm ma, k’ʊ a hɩnka awɔɔ m, ʊ ʊ, ʊ gumə ta ʊ wa. Ʊ ka wɔɔ nawʊm ma k’awɔɔ n a mɩŋŋa ba, baa k’a ɩ yɩrɛ ɩ ʊ, wɔɔ bɩ gumə yɩm mim kʊ wɔɔ dɩnda naa nɔ ʊ y. 8Bala, wɔɔ ba paŋŋa m k’ʊ sɩra da jɩm ʊ y. Paŋŋa wɔɔ n ta m k’ʊ a ka, kʊ sɩra n ta lɛɛ. 9Kʊ wɔɔ ɩ paŋŋawar nɔ ʊ, awɔɔ nɩ paŋŋa m denter, wɔɔ y’ʊ heer nyɔɔm. Wɔɔ n’a yɛm Woso han bɩ n naa karɛ. A yɛ wɔɔ nawʊm k’an a ka k’awɔɔ n yɩ mɩŋŋa fasɩ. 10Naa tɔ ma m, kʊ mɔɔ gɔɔta m m laatʊ awɔɔ ma bɩ, mɔɔ nɩ naa haay gʊrsɩra barɛ awɔɔ ma. K’an bɩr yɩrɛ ɩ ʊ, kʊ mɔɔ bɩ lee ku awɔɔ bire ʊ, m bɩ m da m nyaa ma kan awɔɔ kɩ, lɛ kʊ Zuuba a ka mɔɔ ʊ bɩ nɩ y. Bala, lɛ kʊ Zuuba a ka mɔɔ ʊ bɩ, a ka a ʊ mɔɔ ʊ gʊɔɔ bankarɛ tɔ ma, a n a ka mɔɔ ʊ kʊ m ŋ zaar ba y.
11Kɛɛrɛ naa, m danyɩnɔ, m leer mɔɔ n’a sore awɔɔ m. K’a bɩr a heer nyɔɔm. A bɩr a tɔŋ ʊ k’a yɩ mɩŋŋa fasɩ. K’a bɩr kʊ heer yom. A bɩr kʊ marɛ. A bɩr a mɩsɩrbaa bam laafɩɩ kan kʊ kɩ nɔ ʊ. Maam bɩ, kʊ ŋʊarɛzaa kan laafɩɩzaa kɩ m Woso m bɩ, a nyɩntam kan awɔɔ kɩ.
12K’a yaa da kʊ m mɩŋŋa danyɩbaa nɔ ʊ. Wosogʊɔɔ kʊ ŋ nɩ naa ʊ haay rɔ wɔɔ ɩ yaa darɛ awɔɔ m.
13Bɩ kʊ Zuuba Yeezuu Krista barka, kan Woso ŋʊarɛ kɩ, Sɛnt-Ɛspri zɛkʊra kɩ n bɩr kan awɔɔ haay kɩ.