1 Timote

Ci lɛɛkarɛ hɔ kʊ Pol a ba

TIMOTE

ma

Ci lɛɛkarɛ hɔ kʊ Pol a ba Timote ma bɩ

gasʊʊrɛ

Pol ɩ ci bɩ ba. A ba a ʊ Timote ma. Bɩ ma bɩ, b’ɩ Efɛɛzɩ ʊ. Timote bɩ, a zɩ bɩ grɛkkɩ m, a da bɩ m zɩɩfʊ, an a ba sɩrakarɛzaa. (Zibəəzannɔ ci 16.1-3) Pol karɩndanyɩ m Timote m, bɩ m zibəəro ka ʊ gʊta Tesaloniki ʊ kan Korɛntɩ kɩ ʊ. (1 Timote 1.3)

Ci bɩ ba a ʊ, bala kristagʊɔɔ wɔɔ barla, gʊɔɔ gɔsɩnnɔ ɩ hɔdɩndarɛ bʊnyaarɔ dɩndam. Nyɩnta Pol ʊ lɔnnɔcɛ ʊ, an ci bɩ ba k’a sɩrakarɛzannɔ wɔɔ kan wosogʊɔɔlɛɛzannɔ wɔɔ kɩ dʊndɔ.

A y’a hɩm nɩ a ʊ, an hɔdɩndarɛ k’an tɩrga nyasʊ kɔɔkɔɔ, an bɩr Woso zi bam lemim nyɩnta padarɛ nɔ ʊ. K’an zɛ kʊ ra n nɩ yaa da dɩnda gʊɔɔ wɔɔ m, an gʊɔɔ tɩrgɔɔ bɔ ʊ, an ŋ ka wosogʊɔɔ wɔɔ lɛɛ.

Pol ɩ yaa dam Timote m

¹Mɔɔ mɩŋŋa Pol nɩ ci naa do barɛ. Woso kʊ wɔɔ bʊmbɔrɛzaa m bɩ kan Krista Yeezuu k’an wɔɔ taaheerlɛ bɩ k’ɩ zaa ka, mɔɔ nɩ m ba Krista Yeezuu zibəəzaa. ²Ci bɩ ba mɔɔ nawʊrɛ ɩbɩɩ ma, Timote, mɔɔ nyɩ paan… sɩrakarɛ nɔ ʊ, a yɛ mɔɔ nawʊrɛ kʊ Zɩ Woso kan wɔɔ Zuuba Krista Yeezuu kɩ n barka, kan cicirzɛrɛ kɩ, kan laafɩɩ kɩ ka ɩ ʊ.

Dʊndɔrɛ zambʊ karɩnsaambɔɔ wɔɔ tɔ ma

³Amba mɔɔ yɛ ɩ han, m hʊrlɛ ma, kʊ m ta Masedʊan ʊ bɩ, gɔɔta ɩ nyɩnta Efɛɛzɩ ʊ, k’ɩ gʊɔɔ kʊ ŋ nɩ ŋʊaar hɔ dɩndam nɔ wɔɔ da jɩm ʊ. ⁴A hɩ ŋ nɩ sɔ kʊ ŋ nɩ biisi minno kan yaabɔɔ tɔrɔ gaandarɛrɔ sʊʊra jintoo wɔɔ kɩ to. Minno wɔɔ duro, bɩsɩkarɛ ŋn’ɩ zɛm nɩ bala, ŋ bɩr a dam Woso hɔɔnhɔ barɛ kʊ wɔɔ n’a dɔm sɩrakarɛ nɔ ʊ bɩ han y. ⁵Meerbaa naa do ba ɩbɩɩ nawʊm kan ŋ kɩ, kʊ ŋ n’a da ma, ŋnɩ heer hu yɩ, kʊ ŋʊarɛ n nyɩnta ŋ heer ʊ, kʊ ŋ nɩ hɔɔndarɛ mɩŋŋa yɩ, ŋnɩ sɩra ka paan…. ⁶Gʊɔɔ gɔsɩnnɔ a gʊ zaa kʊ wɔɔ hɩnka naa ma, ŋnɩ nyaam, meerbaa yaarsɩrɔ nɔ ʊ. ⁷Ŋ ʊ, Woso lɛrɔ hɔdonno n a mɩ, an bɔkarɛ hɔ kʊ ŋ mɩŋŋɔɔ n’a hɩm, ŋn’ɩ som la kan paŋŋa kɩ bɩ, ŋn’a jɩ dɔ y.

⁸Wɔɔ dɔ wɔɔ ʊ Moyiisi lɛrɔ wɔɔ mɩŋŋa, k’a ɩ yɩrɛ ɩ ʊ, gʊaa ɩ zuŋ ʊ amba a a ga m bɩ m. ⁹Ʊ a tɔ da ʊ nɔ ʊ, ʊ ʊ, n nɩ lɛrɔ wɔɔ ka gʊɔɔ tɩrgɔɔ tɔ ma y, a ka n y’a ʊ bayɛrɛzannɔ tɔ ma, kan bɩsɩkənno kɩ, gʊɔɔ bʊnyaarɔ kɩ, mimbʊnyaabənno kɩ, kan gʊɔɔ kʊ ŋ bɩr Woso daŋ ʊ rɔ wɔɔ kɩ, kan gʊɔɔ kʊ ŋ nɩ Woso hɔ gore bɔŋ ʊ rɔ wɔɔ kɩ, gʊɔɔ kʊ ŋ n’a zɩrɔ kan a dɔɔ kɩ meeyaa bɔŋ ʊ rɔ wɔɔ kɩ kan gərzenno kɩ, ¹⁰jaandənno kɩ, kan gʊɔɔ yaarɔ wʊta kan kʊ kɩ zannɔ kɩ, kan gʊɔɔ kʊna ŋnɩ ŋ hɛɛ zannɔ kɩ, ŋʊaarzannɔ kɩ, kan ŋʊaarkasɛtɩzannɔ kɩ. Lɛ bɩ ka n y’a ʊ sɔ mim haay k’a nɩ hɔdɩndarɛ mɩŋŋa bɩ zarm tɔ ma. ¹¹Hɔdɩndarɛ naa do a ga kʊ ʊ kan lemim nyɩnta kʊ Woso a da mɔɔ wɔ ʊ bɩ kɩ. Lemim bɩ do nɩ Woso k’a a so heernyɔɔ ʊ bɩ lɛbɔʊrɛ hɩnkarɛ.

Yeezuu barka darɛ a mɩŋŋabaa

tɔ ma

¹²Mɔɔ ɩ yaa dam wɔɔ Zuuba Krista Yeezuu m barka, k’a paŋŋa ka mɔɔ ʊ kʊ m a zi ba bɩ minto. Mɔɔ ɩ yaa dam nɩ barka k’a gɩnga a ʊ, mɔɔ n ga a zibəə bɩ m an mɔɔ da ʊ bɩ minto. ¹³A n bɔkarɛ biisi bɩ, mɔɔ nyɩnta n meerbaa bʊnyaa ba ma, m fɩr ka a gʊɔɔ ma, m a sʊnsɔ wʊ. Bɩ, a mɔɔ cicir zɛ, bala, badɔ ɩ mɔɔ da naa haay barɛ ma, kʊ mɔɔ n sɩra ka bɩ tɔ ma. ¹⁴Wɔɔ Zuuba bɩ barka ka mɔɔ ʊ gʊta, an a ka mɔɔ n sɩra ka, m nɩ ŋʊarɛ m Krista Yeezuu nɔ ʊ. ¹⁵Meerbaa kʊ mɔɔ ʊ kʊ ma ba naa, sɩra m, gʊaa haay a ga m, an a si mɩŋŋa: «Krista Yeezuu bʊr durnya ʊ, k’a bɩ mimbʊnyaabənno bʊmbɔ.» Bɩ, mɔɔ mimbʊnyaa barɛ ɩ lɛ da. ¹⁶Bɩ, Woso mɔɔ cicir zɛ, k’an bɩr yɩrɛ ɩ ʊ, Krista Yeezuu a bʊraama gʊta hɩnka mɔɔ gʊr zi mɔɔ kʊ mɔɔ m mimbʊnyaabər gʊta k’a lɛ da bɩ, kʊ mɔɔ m yɩ makra gʊɔɔ kʊ ŋ nɩ zɛm bɩ sɩra ka ŋnɩ mɩsɩrbaa k’a nyarɛ ba ʊ yɩ rɔ wɔɔ tɔ ma.

¹⁷Bɩ, kʊ gʊɔɔ n a a lɛ bɔ Woso ʊ,

ŋn’a da ʊ dɔmɩm haay,

an cir an nɩ cirbəə m dɔmɩm haay,

an nɩ mɩsɩrbaa m tee…,

gʊaa bɩr a mɩŋŋa yɩrɛ y,

a deem m Woso. Amina.

Pol ʊ Timote n a yo ʊ

¹⁸M nyɩ Timote, ɩ b’ɩ dʊndɔ mɔɔ nawʊm, amba wosolɛsinnɩsora ganwʊrɛ meerbaa zannɔ nyɩnta ŋ n’ɩbɩɩ mim hɩ bɩ m, hɔ kʊ ŋ y’a hɩ bɩ tɔ da ɩ nɔ ʊ, ɩ sa ɩ zoobarɛ mɩŋŋa bɩ bam. ¹⁹Zoo bɩ ba sɩrakarɛ m, kan hɔɔndarɛ mɩŋŋa kɩ m. Hɔɔndarɛ mɩŋŋa bɩ do, gʊɔɔ gɔsɩnnɔ a to, a tore bɩ n a ka ŋ sɩrakarɛ n a zar. ²⁰Yimene kan Alɛsandɩr k’ɩ gʊɔɔ wɔɔ duro barla, mɔɔ wɔ daa ŋ ma Sʊtaana wɔ ʊ, kʊ ŋ nɩ hɔɔn ka, kʊ ŋ b’a ya ŋnɩ Woso sʊnsɔ wʊ y.

Dʊndɔrɛ kʊ gʊɔɔ n yaa da Woso m

¹Hɔ kʊ mɔɔ lɛɛ ka m n’a yɛm bɩ, a yɛ mɔɔ nawʊrɛ, kʊ gʊɔɔ n yaa da Woso m gʊɔɔ haay tɔ ma, a ŋ mim haay da Woso wɔ ʊ, a yaa da m barka ŋ tɔ ma. ²K’a yaa da cinno wɔɔ tɔ ma, kan lɛɛzannɔ haay kɩ tɔ ma sɔ, k’ʊ nyɩnta laafɩɩ nɔ ʊ, ʊ bɩr zum Woso ʊ zenyy…, mɩsɩrbaa zore nɔ ʊ kan daʊrɛ kɩ. ³Naa m mɩŋŋa, an Woso kʊ wɔɔ bʊmbɔrɛzaa m bɩ nɔ yɩ, ⁴a lɛ taa kʊ gʊɔɔ haay n bʊmbɔrɛ yɩ, kʊ ŋ n’a da ma, ŋnɩ sɩra dɔ.

⁵Bala, Woso deem n ta ʊ,

gʊaa deem taan… nɩ gʊɔɔ zɛm kʊ ra kan Woso kɩ,

Krista Yeezuu m.

⁶A ɩ yɛ an a mɩŋŋa ka zɛ ma,

kʊ gʊɔɔ haay n bʊmbɔrɛ yɩ.

Dɔmɩm kʊ Woso a cɩnta bɩ k’a b’a ku an naa ba bɩ, a yɩ kasɛtɩ, an a hɩnkarɛ a ʊ, Woso lɛ taa k’a gʊaa haay bʊmbɔ. ⁷Naa mɩŋŋa tɔ ma m Woso n mɔɔ bɔ ʊ kʊ m yɩ a lemim padər, an mɔɔ ba kristazibəəzaa, sɩra mɔɔ n’a hɩm, mɔɔ bɩr ŋʊaar barɛ y, mɔɔ cɩnta a ʊ, kʊ m sɩrakarɛ kan sɩra kɩ dɩnda do vantɔɔ gʊɔɔ wɔɔ m.

⁸Naa minto bɩ, mɔɔ lɛ taa kʊ gʊɔɔ yaarɔ wɔɔ n yaa da Woso m, lɛɛ haay ʊ, ŋn’a wɔrɔ busu brama kʊ mimbʊnyaa bɩ nyɩnta ŋ gʊr zi y, ŋ bɩ nɔmaa kan nyaa kɩ to a heer ʊ ŋnɩ yaa bɩ da y.

Lannɔ mim

⁹Kʊ lannɔ wɔɔ nɩ, mɔɔ lɛ taa, kʊ ŋ nɩ huu k’a ga kʊ ʊ ba du a ma, ŋnɩ bɩr sappɩ, mɩŋŋahɩnkarɛ ba ŋ zi y, ŋ b’a ka mim kʊsɩrɛ waasɩ ma, gɛɛ sarma nyɛɛnnɔ ma y, gɛɛ busoo gʊta huu ma, gɛɛ mɩŋŋabankarɛ waasɩ ma y. ¹⁰Bɩ, kʊ ŋ n’a ka zi mɩŋŋa barɛ ma, bala, lannɔ kʊ ŋ ʊ, a ɩ zum Woso ʊ rɔ wɔɔ, a ga a wʊm kʊ ŋ n’a ba ncɩnaaʊ. ¹¹Hɔdɩndarɛ wakatɩ ʊ, lannɔ wɔɔ a ga m, ŋnɩ zɛ sɩɩ…, ŋnɩ yɛ hɔ haay ma. ¹²Mɔɔ bɩ yɛm kʊ lannɔ n hɔ dɩnda gʊɔɔ yaarɔ m, ŋn’a so ŋ ʊ y, a a ga m, ŋnɩ zɛ sɩɩ…. ¹³Bala, Adam Woso lɛɛ ka an a da, Ɛɛvɩ n bɔkarɛ an a nya ʊ. ¹⁴Adam bɛɛ Sʊtaana bra ba nɩ y, Ɛɛvɩ a bra ba m, an yɛ, an bɩsɩ ka Woso lɛ ma. ¹⁵Bɩ, k’a yɛ nyɩdazaambaa ma an a tʊntɔ ʊ sɩrakarɛ nɔ ʊ, kan ŋʊarɛ kɩ, mɩŋŋabaa kɩ, mɩŋŋazerle kɩ, a bʊmbɔrɛ yɩm.

Kristagʊɔɔ lɛɛzannɔ mim

¹Sɩra m, meerbaa kʊ mɔɔ ʊ kʊ m a ba naa m, kʊ gʊaa lɛ taa k’a ka wosogʊɔɔ lɛɛ, zibəə mɩŋŋa a ʊ k’a ba. ²Bɩ, kristagʊɔɔ lɛɛzaa a ga m, an bɩr gʊaa kʊ n bɩ mim yɩrɛ n a hɩ ma y, a lʊ m bɩr deem, an bɩr gʊaa k’a a da a mɩŋŋa ma zaa, hɔɔndamimmazaa, nyasʊ a mɩŋŋa m zaa, an bɩr saanɔɔ sim mɩŋŋa a har ʊ, an n’a dam ma an hɔ dɩnda gʊɔɔ m. ³A bɩ yɩ bɛɛmirezaa waasɩ y, a bɩ yɩ wɔkaarɛzaa nyaa bɩncɛ ʊ y, bɩ k’an yɩ kʊmarɛzaa, laafɩɩkamazaa, a bɩ yɩ busooŋʊarɛzaa y. ⁴K’an dɩga a har mim ma mɩŋŋa, an a da a nyɩnɔ ma, ŋnɩ bɩr zuŋ ʊ, ŋnɩ bɩr a daŋ ʊ hɔ haay nɔ ʊ. ⁵Bala, kʊ gʊaa n a da ma an nyasʊ a har mim m mɩŋŋa, a y’a bam lɔ k’a a da ma, a nyasʊ Woso gʊɔɔ sokʊma nɩ? ⁶Kʊ gʊaa k’a yɩ kristagʊɔɔ lɛɛzaa, a n a ga m, an yɩ sɩrakarɛzaa daa y, kʊ m bɛɛ m, a y’a mɩŋŋa busum, an dʊdɔyarlɛ kʊ Sʊtaana a yɩ bɩ yɩ. ⁷A a ga m sɔ, k’a kasɛtɩ m bɩr mɩŋŋa gʊɔɔ kʊ ŋ bɩr zum Krista ʊ rɔ wɔɔ zi, kʊ n b’a da ma, n a gore bɔ ʊ y, k’a b’a da Sʊtaana baŋŋa ʊ y.

Daahanzannɔ mim

⁸Daahanzannɔ wɔɔ a ga m sɔ, ŋnɩ yɩ mɩsɩrbaa zore zannɔ, sɩrazannɔ, ŋ bɩ yɩ bɛɛmirezannɔ waasɩ y, ŋ bɩ yɩ zambʊ hɔkamazannɔ y. ⁹Ŋ y’a ga m, ŋnɩ jɩm kɔɔkɔɔ sɩra kʊ sɩrakarɛ a hɩnka bɩ nɔ ʊ, hɔɔndarɛ mɩŋŋa m. ¹⁰K’a lɛɛ ka a ŋ ka lɛɛ, a dɩga ŋ ma, kʊ mim ba ŋ gʊr zi, k’a bɔkarɛ a ŋ da daahanbaa zibəə b’ʊ. ¹¹Daahanzannɔ kʊ lannɔ m nɔ wɔɔ a ga m sɔ, ŋnɩ bɩr mɩsɩrbaa mɩŋŋa m, ŋ bɩ yɩ meerbaa bʊnyaa ba gʊɔɔ ma zannɔ y, ŋn’a da a mɩŋŋɔɔ ma, ŋnɩ yɩ jɩnalɛrazannɔ hɔ haay nɔ ʊ. ¹²Daahanzaa biyəə lʊ a ga m an bɩr deem, an a da a nyɩnɔ ma mɩŋŋa, an dɩga a har mim ma mɩŋŋa. ¹³Bala, gʊɔɔ kʊ ŋ nɩ daahanbaa zi bam mɩŋŋa rɔ wɔɔ, ŋ gore daʊrɛ yɩrɛ ŋnɩ heerkoodəbaa gʊta yɩ sɩra ka Krista Yeezuu ʊ zɛkʊra nɔ ʊ.

¹⁴Mɔɔ y’a gɩngam kʊ m bʊr ɩbɩɩ zi zɔɔ, bɩ naa haay gʊrsɩra mɔɔ ba ɩbɩɩ ma, k’an bɩr yɩrɛ ɩ ʊ, ¹⁵kʊ mɔɔ bʊr m bɩr zɛm zɔɔ, k’ɩbɩɩ m mɩsɩrbaa k’a a ga m, an bɩr bam Woso gʊɔɔ gʊr zi bɩ dɔ. Wosogʊɔɔ wɔɔ duro, kristagʊɔɔ sokʊma bɩ m, Woso k’an mɩsɩr bɩ y’a so ʊ, sokʊma bɩ do n ta hɔdɩndarɛ k’a m sɩra bɩ m, an n’a kam gʊɔɔ n’a dɔrɛ. ¹⁶Wɔɔ sɩrakarɛ hɔ gʊta k’a nyaakʊm da Woso n a hɩnka bɩ, gɔsɩ b’a dam ma an bɩsɩ ka ma y.

A a hɩnka mɛsim nɔ ʊ,

Sɛnt-Ɛspri n a hɩnka gʊaa tɩrga,

malɛɛkarɔ m dɩga a.

N n’a mim pa da do vantɔɔ zi.

Gʊɔɔ sɩra ka ʊ durnya nɔ ʊ jilli.

Woso n a busu an a nyɩnta lɛbɔʊrɛ nɔ ʊ arzana ʊ.

Ŋʊaar hɔdɩndarɛrɔ kʊ ŋ nɩ nyɩntaŋ ʊ dɔmɩnnɔ jɛzannɔ ʊ

¹Sɛnt-Ɛspri a hɩ paan… a ʊ, jɛ dɔmɩnnɔ ʊ, gʊɔɔ gɔsɩnnɔ sɩrakarɛ tore, ŋnɩ yɛ brabagʊɔɔ m zinəro ma, kan hɔdɩndarɛrɔ kʊ zinəro wɔɔ n ta ŋ nɩ, gʊɔɔ nɩ ŋ dɩndam nɔ wɔɔ kɩ ma. ²Gʊɔɔ kʊ ŋ n’a hɔ bam ɩ ʊ, gʊɔɔ mɩŋŋɔɔ n ŋ mɩ, ŋn’ɩ ŋʊaar bam nɔ wɔɔ n’a karɛ ŋn’a nyʊnnyɔɔ, gʊɔɔ wɔɔ duro heer ga, amba sɛ tɩr na hɔ ma bɩ m, nyannɩ ba ŋ nɩ fɩɩga y. ³Ŋ y’a hɩrɛ ŋ ʊ, gʊɔɔ bɩ lʊ ka cɛ ʊ dɔ y, bɩ lannɔ bɩ cɛ ka sɔ y, ŋ hɔbɩrɛrɔ niŋŋoo bɩrɛ cizɛm, an bɔkarɛ Woso ɩ hɔɔ wɔɔ duro da sɩrakarɛzannɔ tɔ ma, bala, brɔɔ sɩra dɔ, kʊ ŋ nɩ barka yaa da Woso nɩ, ŋn’a dɔ ŋnɩ ŋ bɩ. ⁴Bala, hɔ haay kʊ Woso a da bɩ mɩŋŋa, kʊ gʊɔɔ ɩ yaa dam Woso m barka ŋn’a dɔ ŋn’a sarɛ, ʊ n’ʊ ga m, ʊ dɩga deem taan… ma hɔ bʊnyaa y. ⁵Bala, Woso lemim bɩ kan wɔɔ yaadarɛ kɩ y’a hu bɔm.

Yeezuu Krista zibəənyɩ mɩŋŋa mim

⁶Naa dɩnda sɩrakarɛzannɔ wɔɔ m, k’ɩbɩɩ ba ncɩnaaʊ, ɩbɩɩ yɩm Krista Yeezuu zibəənyɩ k’an mɩŋŋa, bɩ n’a hɩnkam sɔ a ʊ, ɩbɩɩ y’ɩ tʊrm sɩrakarɛ lemim bɩ m, kan sɩra hɔdɩndarɛ k’ɩ nɩ yɛm ma mɩŋŋa bɩ kɩ. ⁷Ɩ bɩ yɛ biisi minno yaarsɩrɔ wɔɔ dɩndarɛ ma y, ŋ bɩr a dam gʊaa han sɩrakarɛ nɔ ʊ y. Ɩ bɩr ɩ tʊntɔŋ ʊ kan mɩsɩrbaa k’a Woso nɔ yɩ bɩ barɛ kɩ. ⁸Bala, kʊ gʊaa y’a mɛ paŋŋa dam la tʊntɔʊrɛ nɔ ʊ, daahan m, b’a gʊaa bankarɛ bɩ gʊta y, an bɔkarɛ, kʊ gʊaa ɩ mɩsɩrbaa k’a Woso nɔ yɩ bɩ barɛ, a y’a dam gʊaa han hɔ haay nɔ ʊ. Woso ler bɔ, k’a zaa m mɩsɩrbaa paan… yɩ tara burə ʊ naa ʊ, kan booti hinni ʊ kɩ. ⁹Meerbaa naa do, sɩra m, gʊaa haay n’a ga m, an a si mɩŋŋa. ¹⁰Naa minto m, wɔɔ nɩ yɛm kɔrɛ ma, ʊ n’ʊ yoŋ ʊ, bala, Woso k’a m mɩsɩr bɩ wɔɔ ta ʊ heer lɛ. A m gʊaa haay bʊmbɔrɛzaa, bɩ gʊɔɔ kʊ ŋ sɩra ka rɔ wɔɔ an nɩ ŋ bʊmbɔm. ¹¹Naa, ɩbɩɩ ɩ ga m, ɩ hɩ paan…, ɩ dɩnda gʊɔɔ m.

¹²Ɩ b’a ka gɔsɩ n ɩ gore bɔ ʊ, k’ɩ m gʊaa poo bɩ tɔ ma y. Bɩ, a ka k’ɩ yɩ makra mɩŋŋa sɩrakarɛzannɔ wɔɔ mɩm ʊ, ɩ meerbaa nɔ ʊ, ɩ tarɛ nɔ ʊ, ɩ ŋʊarɛ nɔ ʊ, ɩ sɩrakarɛ nɔ ʊ, ɩ mɩsɩrbaa k’an mɩŋŋa Woso mɩm ʊ barɛ nɔ ʊ. ¹³Ɩ bɩr ɩ tɔŋ ʊ, kan Woso lemim bɩ karɩnda barɛ kɩ, gʊɔɔ sokʊma nɔ ʊ. Ɩ tɔ ʊ kan gʊɔɔ dʊndɔrɛ kɩ, kan hɔ dɩnda gʊɔɔ m kɩ, k’an ta an mɔɔ bʊrlɛ ku. ¹⁴Ɩ bɩ ganwʊrɛ kʊ Woso a ka ɩ ʊ, k’ɩ zi bam bɩ to y. A ka k’a ʊ ɩbɩɩ ʊ bɩ, nyɩnta ʊ kan wosolɛsinnɩsora ganwʊrɛ meerbaa zannɔ kɩ, kristagʊɔɔ lɛɛzannɔ kʊ ŋ y’a wɔ ka ɩbɩɩ ra kɩ sɔ. ¹⁵Naa ɩbɩɩ ga m, ɩ nyasʊ kɔɔkɔɔ ɩ heer ʊ, ɩ ɩ tʊntɔ ʊ kan a zibəə kɩ, gʊaa woo… n a dɔ ŋ ʊ ɩ y’ɩ yoŋ ʊ, ɩ nɩ tam lɛɛ. ¹⁶Dundo ɩ mɩŋŋa zi, ɩ dundo hɔ k’ɩ n’a dɩndam gʊɔɔ m bɩ zi, ɩ bɩr ɩ tɔŋ ʊ kan naa haay kɩ, k’ɩbɩɩ ba ncɩnaaʊ, ɩbɩɩ y’ɩ mɩŋŋa yɔm, ɩ gʊɔɔ kʊ ŋ n’a tʊr karɛ ɩ ma rɔ wɔɔ yɔ sɔ.

Dʊndɔ zaarɔ sɩrakarɛzannɔ wɔɔ

tɔ ma

¹Ɩ bɩ həən si gʊaa gusire ma kan paŋŋa kɩ y, bɩ, dɩga ma ɩ zɩ, ɩ dʊndɔ. Nyukumbonno wɔɔ dʊndɔ danyɩbaa nɔ ʊ. ²Ɩ lannɔ gusinno wɔɔ dʊndɔ, ɩ ʊ, ɩ dɔɔ m, lannɔ pooro wɔɔ dʊndɔ kan heer hu kɩ, ɩ ʊ, ɩ danlʊrɔ m.

Zonno mim

³Zonno kʊ ŋ gɔsɩ ba ʊ rɔ wɔɔ, nyasʊ ŋ nɩ kan daʊrɛ kɩ. ⁴Zoro k’a nyɩnɔ n ta ʊ gɛɛ a yaŋŋɔɔ, nyɩnɔ wɔɔ, gɛɛ yaŋŋɔɔ wɔɔ y’a ga m, ŋn’a yɩrɛzannɔ nyasʊm dɩnda. Naa ŋ y’a ga m, ŋn’a ba, a Woso zuure bɩ nɔ ʊ. Kʊ ŋ yɩrɛzannɔ wɔɔ nyasʊ ŋ nɩ bɩ, ŋnɩ nyasʊ ŋ nɩ sɔ. Woso n’a ŋʊam bɩ m naa. ⁵Kʊ zoro k’an zoro paan… an gɔɔta a deem bɩ nɩ, yo b’ʊ Woso ma, an nɩ yaa dam tee… sinuu ʊ kan gunuu ʊ kɩ, an nɩ daahan yɛm Woso han. ⁶Bɩ, kʊ zoro k’a n’a kam mɛsim lɛtaamarɔ ma bɩ nɩ, a mɩsɩr mɩnyaa dɩgarɛ nɔ ʊ, bɩ, sɩra nɔ ʊ, gər m Woso mɩm ʊ. ⁷Ŋ bɔ zaa ʊ meerbaarɔ nɔɔn duro m, kʊ gɔsɩ bɩ mim yɩ ŋ gʊr zi k’a dɩnda y. ⁸Kʊ gʊaa bɩr nyasʊrɛ a hargʊɔɔ nɩ, an lɛ da bɩ, a jɛɛrzannɔ nɩ y, a zaa sɩrakarɛ bɔ a jɛ m, a bʊnyaabaa lɛ da basɩrakarɛzaa m.

⁹K’ɩ ʊ k’ɩ zoro tɔ da zombaa daahan ci b’ʊ, a a ga m, kʊ zoro bɩ do dɔɔraa m busɔrdɩ ku, bɩ nyɩnta a ʊ, gʊaa deem taan… lʊ sɔ. ¹⁰A a ga m sɔ, gʊɔɔ n a zibəəro mɩŋŋɔɔ barɛ kasɛtɩ ka, ŋn’a dɔ ŋ ʊ, a a nyɩnɔ tʊr mɩŋŋa, a saanɔɔ si mɩŋŋa a har ʊ, an wosogʊɔɔ gannɔ sʊrgɔ,5.10 Kʊ gʊɔɔ ta zɩɩfʊrɔ har ʊ, naa ŋ tɩr a ba ŋ nɩ. an a da cicirzannɔ han, an zi mɩŋŋa do haay ba.

¹¹Kʊ zonno pooro wɔɔ nɩ, ɩ bɩ ŋ tɔ da ci b’ʊ y, bala, kʊ gʊaayar sʊra bʊr an ta ŋ nɩ, bɩ ŋ y’a gʊ Krista zuure ma, ŋn’a ŋʊam k’a a ya a zim sa. ¹²A ba kʊ ŋ nawʊrɛ ncɩnaaʊ bɩ, n yɩ ŋ dʊdɔ yarlɛ, bala, ŋ n jɩm a lɛ ra lɛɛkarɛ ler kʊ ŋ y’a bɔ Krista m bɩ nɔ ʊ y. ¹³A n ta ʊ sɔ bɩ, mim ŋ y’a ka nyɩnta vam m, ŋn’ɩ gʊɔɔ harlɛrɔ sam, an lɛ da bɩ, a lɛ n’a zum gʊɔɔ minno ʊ, ŋ bɩr dundore a zi y, hɔ k’a n’a ga hɩrɛ m bɩ, bɩ ŋn’a hɩm. ¹⁴Naa tɔ ma bɩ, mɔɔ lɛ taa kʊ zonno pooro wɔɔ n’a ya ŋnɩ cɛ ka, ŋnɩ nyɩnɔ yɩ, ŋnɩ dɩga a jɛɛr mim ma mɩŋŋa, kʊ ŋ bɩ zaa ka wɔɔ jɩnnɔ wɔɔ ʊ, ŋn’a da ma, ŋn’a bʊnyaa hɩ wɔɔ ma y. ¹⁵Bala, zonno pooro wɔɔ gɔsɩnnɔ a bɔ zaa tɩrga b’ʊ kara, ŋn’ɩ zum Sʊtaana ʊ. ¹⁶Kʊ lʊ sɩrakarɛzaa ɩ zonno m a har gʊɔɔ barla, k’an nyasʊ ŋ nɩ, a b’a to kʊ kristagʊɔɔ sokʊma n kɔ ŋ tɔ ma y, k’an a da ma, an a da zonno kʊ ŋ gʊɔɔ ba ʊ rɔ wɔɔ han.

Kristagʊɔɔ lɛɛzannɔ mim

¹⁷Gʊɔɔ kʊ kristagʊɔɔ lɛɛzannɔ m ŋn’a zi bam mɩŋŋa rɔ wɔɔ, ŋ y’a ga daʊrɛ m gallɛm hɩɩya, an lɛ da bɩ, niŋŋoo kʊ ŋ nɩ kɔm kan Woso lemim padarɛ zibəə kɩ, hɔdɩnda gʊɔɔ m zibəə kɩ rɔ wɔɔ. ¹⁸Bala, Wosoci b’a hɩ a ʊ:

Ɩ bɩ hɔ du der k’a n’ɩ yɩr zɔm bɩ lɛ ma y.5.18 Dono ɩ tɩr zɩɩfʊrɔ wɔɔ hɔyaa zɔ, gɔ gaatarɛ m a jɛ ʊ.

A a ya, an a hɩ sɔ, a ʊ:

Zibəəzaa a ga m,

an a zibəə nyɔɔdʊ yɩ.

¹⁹Kʊ gʊaa a hɩ a ʊ, lɛɛzaa mim ba, kʊ gʊaa hɩɩya gɛɛ kaakʊ n a hɩ ŋ ʊ, a mim bɩ do ba denter y, ɩ bɩ mim bɩ do si sɩra y. ²⁰Gʊɔɔ kʊ ŋ nɩ mimbʊnyaa bam nɔ wɔɔ, həən si ŋ ma gʊɔɔ woo… lɛɛ, kʊ gʊɔɔ kʊ ŋ gɔɔta rɔ wɔɔ m nyi ba, ŋnɩ dundo a zi.

²¹A yɛ mɔɔ nawʊrɛ ɩbɩɩ han, Woso kan Krista Yeezuu kɩ, Woso malɛɛkarɔ wɔɔ kɩ lɛɛ, k’ɩ zu hɔ kʊ mɔɔ hɩ ɩbɩɩ m haay naa ʊ, ɩ bɩ jirə bɔ k’ɩ zɛ gʊaa m gumə ma y, gɛɛ k’ɩ gumə ka ʊ y. ²²Ɩ b’ɩ wɔ ka gɔsɩ mim la nyagɩra m, k’an zi ba wosogʊɔɔ wɔɔ barla y, ɩ bɩ gasʊ gʊaa mimbʊnyaa ʊ y. Dundo ɩ mɩŋŋa zi, k’a bʊnyaa b’a nɔ ɩ ma y.

²³Ɩ bɩ gɔɔta ɩ bɩr hi mire a minto bala y, dɩvɛn mi poore, ɩ nɔ k’a tɩr busum an tɩr ɩ dam kɔrɛ ma bɩ tɔ ma.

²⁴Gʊɔɔ niŋŋoo mimbʊnyaarɔ ɩ yɩm garga ra, bɩ n ŋ dʊdɔ ka cɩna y, gɔsɩnnɔ hɔɔ bɩr dɔm zɔɔ y, ŋ mimbʊnyaarɔ wɔɔ dɔ n tɩr a ʊ jɛ ʊ. ²⁵Zibəəro mɩŋŋɔɔ barɛ do m bɩ sɔ, gʊɔɔ gɔsɩnnɔ hɔɔ tɩr yɩm garga ra, nɔɔ zibəə bɩr yɩm garga ra lɛɛm nɩ y, bɩ ŋ zɛm bɩ bɔ garga ra.

Lɔnnɔ kan a soʊrezannɔ kɩ

¹Gʊɔɔ haay kʊ ŋ nɩ lɔmbaa kɔrɛ nɔ ʊ rɔ wɔɔ a ga m, ŋn’a dɔ ŋ ʊ, a soʊrezannɔ wɔɔ a ga daʊrɛ m. Kʊ gʊɔɔ bɩ Woso tɔ zar y, kʊ ŋ bɩ wɔɔ hɔdɩndarɛ bɩ tɔ zar sɔ y. ²Lɔnnɔ kʊ ŋ soʊrezannɔ wɔɔ sɩrakarɛ zannɔ m nɔ wɔɔ, ŋ b’a hɩ ŋ ʊ, a hɔdeem kan ŋ kɩ Krista danyɩbaa nɔ ʊ, ŋnɩ ŋ gore bɔ ʊ y. A ga a ʊ m, ŋnɩ ŋ zi ba mɩŋŋa-mɩŋŋa denter an lɛ da, kʊ sɩrakarɛzannɔ m, ŋ bɔɔ m ŋnɩ ŋ ŋʊam, ŋn’ɩ ŋ zi bam bɩ tɔ ma.

Ŋʊaar hɔdɩndarɛzannɔ kan hɔnyɩ denter kɩ mim

Hɔ k’ɩbɩɩ ga m, ɩ dɩnda gʊɔɔ m, ɩ ŋ dʊndɔ m bɩ n naa. ³Kʊ gʊaa ɩ hɔ vanta dɩndam, a bɩr yɛm wɔɔ Zuuba Yeezuu Krista sɩra meerbaarɔ wɔɔ ma y, b’a bɩr yɛm hɔdɩndarɛ k’a ga kʊ ʊ ba kan mɩsɩrbaa k’a Woso nɔ yɩ bɩ kɩ ma sɔ, ⁴gʊaa bɩ do bɩ, mɩŋŋabusurezaa m. A n hɔsɩ dɔ y, bɩsɩkarɛ waasɩ yaaba n ta m, an n’a kam ma k’a nyaa ba meerbaanyɩrɔ tɔ ma. Naa nɩ zɛm lɛtaama bʊnyaa m kan kʊmarɛwar kɩ, kʊ tɔ zarlɛ kɩ, hɔɔn da kʊ ma bʊnyaa kɩ m. ⁵A ɩ gʊɔɔ kʊ ŋ hɔɔn m daŋŋada rɔ wɔɔ dam bɩsɩkarɛ jintoo ma, bala, ŋ n sɩra dɔ y, ŋn’a gɩngarɛ ŋ ʊ, sɩrakawosoʊ bɩ, hɔnyɩ yɩrɛ zaa m.

⁶Denter m, sɩrakawosoʊ bɩ, hɔnyɩ gʊta m, k’a ɩ yɩrɛ ʊ, ɩ y’ɩ zergam hɔ k’ɩ m ta m bɩ rɛ. ⁷Bala, bʊr kʊ wɔɔ ʊ durnya ʊ bɩ, wɔɔ n bʊr hɔsɩ nɩ y, wɔɔ y’ʊ bɔm sɔ ʊ wɔ m vam. ⁸Naa tɔ ma bɩ, kʊ wɔɔ ɩ hɔbɩrɛ m kan huu kɩ m, naa a ga m, an wɔɔ bɔ. ⁹Bɩ, gʊɔɔ kʊ ŋ n’a kam ma k’a ba hɔnyɩzannɔ wɔɔ, a do ŋ nawʊm makra nɔ ʊ, ŋn’ɩ gasʊm lɛtaamarɔ nɩbɩɩrɔ kʊ ŋ nɩ bʊnyaa baŋŋa nɔ ʊ. Lɛtaamarɔ wɔɔ duro nɩ gʊɔɔ dam zaarbarɛ kan nyaanlɛ kɩ ma. ¹⁰Bala, mimbʊnyaarɔ do haay məsi m busoo ŋʊarɛ m. Gʊɔɔ gɔsɩnnɔ a nyʊnnyɔɔ ŋn’a ba sɩrakarɛ ma laatʊ, ŋn’ɩ fɩr do y’a hʊnhɔ yɩm a mɩsɩrbaa nɔ ʊ, busoo ŋʊarɛ kʊ ŋ gasʊ ʊ bɩ tɔ ma.

Dʊndɔ Timote minto

¹¹B’ɩbɩɩ, Woso gʊaa n’ɩ mɩ, ɩ ba laatʊ naa woo… ma, ɩ ɩ tɔ ʊ kan tɩrgabaa zibəə kɩ, mɩsɩrbaa k’a Woso nɔ yɩ kɩ, kan sɩrakarɛ kɩ, ŋʊarɛ kɩ, tʊntɔʊrɛ kɩ, nyɩntabaa kɩ. ¹²Zoo mɩŋŋa kʊ sɩrakarɛ zoo m bɩ ba, mɩsɩrbaa k’a nyarɛ ba ʊ bɩ nyasʊ kɔɔkɔɔ. Ɩbɩɩ bir Woso ʊ bɩ tɔ ma, ɩbɩɩ m nyɩnta ɩ yɛ ma, ɩ ɩ sɩrakarɛ bɔ ɩ lɛ ma mɩŋŋa gʊɔɔ cir lɛɛ. ¹³Kʊ m lɛ cɩnta ɩ m, Woso k’a nɩ mɩsɩrbaa kam hɔ haay ʊ bɩ taa, kan Krista Yeezuu kɩ taa, bɩ nyɩnta an a sɩrakarɛ kasɛtɩ ka mɩŋŋa Pɔns Pɩlatɩ taa. ¹⁴Lɛ kʊ mɔɔ n’a karɛ ɩbɩɩ ʊ bɩ ba n nɩ: Zu hɔ kʊ mɔɔ hɩ ɩbɩɩ m haay b’ʊ, ɩ nyasʊ m kʊ dintim b’a nɔ ma y, kʊ minsi bɩ nyɩnta ɩ gʊr zi sɔ y, kʊ wɔɔ Zuuba Yeezuu Krista n tolle ba an a bɔ an bʊr. ¹⁵A zɛm dɔmɩm kʊ Woso a cɩnta k’an b’ʊr ma b’ʊ,

Woso mɩŋŋa ɩ lɛ da haay,

a y’a so heernyɔɔ ʊ,

a m cinno haay Cir,

a m zuubarɔ haay Zuuba,

¹⁶a mɩŋŋa y’a deem taan… ɩ bɩr garɛ y,

lɛɛgure kʊ gɔsɩ b’a dam ma

an a zɔ ma nɔ an nɩ nyɩntaŋ ʊ,

gɔsɩ n a yɩ y,

bɩ gɔsɩ b’a dam ma an a yɩ y.

A y’a so lɛbɔʊrɛ ʊ

kan paŋŋa k’a nyarɛ ba ʊ kɩ!

Amina.

Dʊndɔ hɔnyɩzannɔ tɔ ma

¹⁷A hɩ gʊɔɔ kʊ ŋ nɩ hɔ m durnya naa do nɔ ʊ rɔ wɔɔ m, ɩ ʊ, ŋ b’a mɩŋŋɔɔ busu, bɩ ŋ bɩ yo hɔnyɩ ma y, bala hɔ cenlezaa m. Bɩ, kʊ ŋ nɩ yo Woso ma, a m nɩ hɔ woo… kam wɔɔ ʊ gʊta, kʊ wɔɔ m bɩr ta ŋ nɩ, ʊ ʊ heer nyɔɔ ŋ nɩ. ¹⁸A hɩ ŋ nɩ ɩ ʊ, ŋnɩ zi mɩŋŋa ba, ŋn’a ba zi mɩŋŋa barɛzannɔ gʊtɔɔ, ŋnɩ yɩ hɔkarɛzannɔ, ŋn’a da gʊɔɔ vantɔɔ han a hɔnyɩ bɩ m. ¹⁹Kʊ ŋ y’a barɛ ncɩnaaʊ, hɔnyɩ mɩŋŋa k’a b’a zarlɛ, ŋn’a cɩntarɛ a mɩŋŋɔɔ m booti hinni tɔ ma, k’a bɩ mɩsɩrbaa paan… yɩ.

Leersore

²⁰Timote ra, nyasʊ hɔ kʊ Woso a da ɩ wɔ ʊ bɩ m, ɩ b’ɩ lɛ zu meerbaarɔ yaarsɩrɔ kʊ bɩsɩkawosoma meerbaarɔ m nɔ wɔɔ ʊ y, kan bɩsɩkarɛ kʊ n n’a hɩm ma hɔdɔrɛ, bɩ ŋʊaar hɔdɔrɛ m b’ʊ y. ²¹Gʊɔɔ gɔsɩnnɔ sɩrakarɛ to ŋn’a nyʊnnyɔɔ, kʊ ŋ ʊ, a ta hɔdɔrɛ naa do m bɩ tɔ ma.

Bɩ, kʊ Woso barka n nyɩnta kan ɩ kɩ!