1 Tesaloniki zannɔ

Ci lɛɛkarɛ hɔ kʊ Pol a ba

TESALONIKI ZANNƆ

ma

Ci lɛɛkarɛ hɔ kʊ Pol a ba Tesaloniki zannɔ ma bɩ

gasʊʊrɛ

Pol ɩ ci bɩ ba. Ci naa do m lɛɛkarɛ ci Pol n a ba kristagʊɔɔ ma, an nɩ gʊaasɩbabaa daa ci bɩ nɔ ʊ. A ba a ʊ, kristagʊɔɔ kʊ ŋ nɩ kʊ kʊ n n’a hɩm ma Tesaloniki ʊ rɔ wɔɔ ma. Kʊ bɩ do Masedʊanɩ kʊ an ta ʊ.

Ci bɩ ba a ʊ, k’a Tesaloniki sɩrakarɛzannɔ wɔɔ paŋŋa da ra, bala, a ɩ Woso lemim pa da ŋ nɩ, an yɩ ma pakra k’a n’a hʊr jɩnnɔ kʊ ŋ nyɩnta b’ʊ rɔ wɔɔ tɔ ma. (Zibəəzannɔ Ci 17.1-10)

Ci bɩ nɔ ʊ, a y’a heer nyɔɔm Tesaloniki sɩrakarɛzannɔ wɔɔ minto, bala, ŋ yɩ dɔm Yeezuu zɛrɛ hɩɩya hɔ bɩ ma. Ŋ y’a hɔɔn darɛ a gʊɔɔ kʊ ŋ gɩnga rɔ wɔɔ mim ma, a yɩrɛ ŋ ma lʊnlɔ gɛ. Pol ɩ kristagʊɔɔ mɩmbɔʊrɛ bɩ mim tɔ darɛ ŋ nɔ ʊ, kʊ ŋ b’a heer zar y.

Pol ɩ yaa dam Tesaloniki kristagʊɔɔ m

¹Mɔɔ mɩŋŋa Pol, kan Silas kɩ Timote kɩ, wɔɔ nɩ ci naa do barɛ awɔɔ ma. Awɔɔ k’a m Tesaloniki kristagʊɔɔ wɔɔ, Zɩ Woso kan Zuuba Yeezuu Krista kɩ n’a so awɔɔ ʊ rɔ wɔɔ, a yɛ wɔɔ nawʊm kʊ Woso m barka, kan laafɩɩ kɩ ka awɔɔ ʊ.

Tesaloniki gʊɔɔ sɩra ka Woso ʊ kasɛtɩ

²Wɔɔ yaa darɛ nɔ ʊ haay, wɔɔ ɩ yaa dam awɔɔ tɔ ma, ʊ nɩ Woso barka dam dɔmɩm haay awɔɔ minto. ³Wɔɔ y’awɔɔ sɩrakarɛ zibəə tɔ darɛ ʊ nɔ ʊ tee… wɔɔ Zɩ Woso lɛɛ, kan ŋʊarɛ k’awɔɔ n ta m bɩ tʊntɔʊrɛ zibəə kɩ, kan taaheerlɛ k’awɔɔ n ta m kɔɔkɔɔ wɔɔ Zuuba Yeezuu Krista nɔ ʊ bɩ kɩ. ⁴Ʊ danyɩnɔ, wɔɔ dɔ wɔɔ ʊ Woso awɔɔ ŋʊa, an awɔɔ bɔ ʊ k’a a so awɔɔ ʊ. ⁵Bala, kʊ wɔɔ bɩ lemim nyɩnta pa da awɔɔ m bɩ, a n yɩ lɛ meerbaa m bala y, yɩ a ʊ, kan *Sɛnt-Ɛspri paŋŋa kɩ wɔɔ n’a kasɛtɩ m ʊ heer ʊ, ʊ ʊ sɩra lemim m. Awɔɔ mɩsɩrbaa kʊ wɔɔ ba awɔɔ bire ʊ awɔɔ daahan minto bɩ dɔ. ⁶Awɔɔ wɔɔ hɔbaa sa, wɔɔ kan Zuuba kɩ, bala, awɔɔ nyɩnta fɩryɩrɛ gʊta nɔ ʊ, a a gu a Woso lemim bɩ si heernyɔɔ kʊ Sɛnt-Ɛspri n’a kam bɩ nɔ ʊ. ⁷Ncɩnaaʊ nɩ, Masedʊan kan Akayii kɩ sɩrakarɛzannɔ wɔɔ haay n a ba awɔɔ hɔbaa dɩndarɛ zannɔ. ⁸Bala, Zuuba lemim b’a to awɔɔ zi an ta Masedʊan kan Akayii kɩ kʊrɔ ʊ, bɩ, kʊrɔ wɔɔ duro bɛɛ m bala y, sɩra k’awɔɔ ka Woso ʊ bɩ mim ta lɛɛ haay ʊ, an nɩ yɩrɛ ɩ ʊ, pakra bɛɛ m dɔ kʊ wɔɔ n’ʊ ya ʊ a dɩnda ŋ nɩ y. ⁹Bala, ta kʊ wɔɔ ʊ awɔɔ zi awɔɔ m wɔɔ si mɩŋŋa bɩ, gʊaa haay ɩ bɩ mim dɩndam, a bɔ k’awɔɔ ʊ *wosobaawɔnnɔ yaadarɛ ʊ, a a bɔ a taam k’a zu Woso k’a m mɩsɩr a m sɩra b’ʊ bɩ, n yɩ bɩ mim dɩndam sɔ. ¹⁰A n nɩ dɔrɛ a Nyɩ Yeezuu kʊ Woso mɩŋŋa a mɩm bɔ ʊ gəəno bire ʊ, an n’a tom brama k’a bʊr bɩ ma, an nɩ wɔɔ yɔm Woso nɔmaa k’a nɩ zɛm bɩ wɔ ʊ.

Hɔ kʊ Pol a ba Tesaloniki ʊ

¹Ʊ danyɩnɔ, awɔɔ dɔ a zim a ʊ, ta kʊ wɔɔ ʊ awɔɔ zi bɩ, a n bɔ vam y. ²Awɔɔ dɔ sɔ a ʊ, fɩr kʊ ŋ y’a ka wɔɔ ma, ŋnɩ wɔɔ sʊnsɔ wʊ Filipii ʊ bɩ wɔɔ ʊ hʊr ma lɛɛ m, ʊ bʊr awɔɔ zi. Bɩ Woso heerkoodəbaa ka wɔɔ ʊ, baa kʊ jɩnnɔ nyɩnta ʊ gʊta bɩ, wɔɔ ʊ da ma, ʊ lemim nyɩnta k’a a to zi bɩ pa da awɔɔ m. ³Nyʊnnyɔɔrɛ pa bɛɛ wɔɔ n’a darɛ y, gɩnga bʊnyaa bɛɛ wɔɔ n ta m sɔ ʊ nɩ pa bɩ darɛ y, wɔɔ bɩr ʊ kam ma sɔ k’ʊ ŋʊaar ba gʊɔɔ nɩ y. ⁴Bɩ, kʊ Woso wɔɔ ka lɛɛ an dɩga wɔɔ ma, an a dɔ a ʊ, wɔɔ ʊ ga m bɩ, an a lemim nyɩnta bɩ da wɔɔ wɔ ʊ. Naa y’a ka kʊ wɔɔ ɩ meer bam, wɔɔ bɩr ʊ kam ma kʊ gʊɔɔ nɔ n yɩ ʊ ra y, ʊ ka wɔɔ nawʊm ma kʊ Woso nɔ n yɩ ʊ ra, bala, a mɩŋŋa nɩ hɔ k’a nɩ wɔɔ heer ʊ yɩm. ⁵Awɔɔ dɔ mɩŋŋa a ʊ, wɔɔ n yɛ fɩɩgaa k’ʊ bra bɩmba gʊɔɔ nɩ y, wɔɔ n meer ba ʊ n’a gɩngam k’awɔɔ m hɔ ka wɔɔ ʊ y, naa woo… naa, Woso m wɔɔ kasɛtɩzaa. ⁶Wɔɔ n’ʊ ka ma fɩɩgaa kʊ gʊɔɔ m wɔɔ da ʊ y, wɔɔ n’ʊ ka ma awɔɔ zi, wɔɔ n’ʊ ka ma gʊɔɔ vantɔɔ zi sɔ y. ⁷A n bɔkarɛ, a ga k’a ʊ m kʊ wɔɔ m daʊrɛ kʊ Krista zibəəzannɔ a ga m, ŋn’a yɩ bɩ yɩ bɩ, wɔɔ n ʊ ka ma k’an yɩ ncɩnaaʊ awɔɔ gʊr zi y. Bɩ, nyɩntabaa wɔɔ ba awɔɔ m gʊta, amba nyɩnɔ da tɩr nyasʊrɛ a nyɩnɔ m nyɩnta bɩ m. ⁸Awɔɔ ŋʊa kʊ wɔɔ ʊ bɩ minto bɩ, wɔɔ n a ŋʊa k’an bɩr yɩrɛ ɩ ʊ, lemim nyɩnta bɩ wɔɔ ka awɔɔ ʊ a minto y, wɔɔ ŋʊa sɔ k’ʊ mɩsɩrbaa ka awɔɔ tɔ ma. Bala, wɔɔ awɔɔ ŋʊa maam-maam.

⁹Ʊ danyɩnɔ, ziro kʊ wɔɔ ŋ ba, ʊ kɔrɛ yɩ bɩ, ŋ tɔ y’awɔɔ nɔ ʊ, wɔɔ zi ba sinuu ʊ kan gunuu ʊ kɩ, k’awɔɔ gɔsɩ bɩ kɔ wɔɔ hɔbɩrɛ mim tɔ ma y, a ba wɔɔ ʊ ncɩnaaʊ, ʊ Woso lemim nyɩnta bɩ pa da awɔɔ m. ¹⁰Awɔɔ wɔɔ kasɛtɩ bɩ kan Woso kɩ sɔ, a dɔ a ʊ, nyɩnta kʊ wɔɔ ʊ kan awɔɔ kɩ bɩ, awɔɔ k’a m sɩrakarɛzannɔ wɔɔ, mɩsɩrbaa kʊ wɔɔ ba awɔɔ zi bɩ, nyɩnta a ʊ mɩŋŋabaa kan tɩrgabaa kɩ nɔ ʊ, mim n nyɩnta wɔɔ gʊr zi y. ¹¹Awɔɔ a ya a dɔ sɔ a ʊ, wɔɔ nyasʊ awɔɔ gʊaa biyəə m, amba nyɩnɔ zɩ tɩr nyasʊ ŋ nɩ bɩ m: ¹²Ʊ a dʊndɔ, ʊ awɔɔ heer yo, ʊ a hɩ awɔɔ m karɛ, paan… ʊ ʊ, a mɩsɩrbaa k’a Woso nɔ yɩ bɩ ba, a y’awɔɔ bir k’awɔɔ n nyɩnta kan a kɩ a cirbəə kan a lɛbɔʊrɛ kɩ nɔ ʊ.

¹³Wɔɔ ɩ yaa dam Woso m barka sɔ dɔmɩm haay, bala, Woso lemim kʊ wɔɔ pa da awɔɔ m bɩ, awɔɔ si a dɔ a ʊ, Woso lemim m, gʊaa lemim bɛɛ y, bɩ Woso lemim m denter paan…, an n’a zi bam awɔɔ gʊɔɔ k’a sɩra ka rɔ wɔɔ heer ʊ. ¹⁴Ʊ danyɩnɔ, mim kʊ Woso gʊɔɔ sokʊmarɔ kʊ ŋ nɩ Krista Yeezuu nɔ ʊ, Zidee kʊrɔ wɔɔ ʊ rɔ wɔɔ a yɩ bɩ, awɔɔ yɩ sɔ. Bala, awɔɔ danyɩnɔ fɩr ka awɔɔ ma sɔ, amba brɔɔ danyɩnɔ kʊ ŋ nɩ zɩɩfʊrɔ fɩr ka ŋ ma rɔ wɔɔ m. ¹⁵Zɩɩfʊrɔ wɔɔ duro ɩ Zuuba Yeezuu zɛ gər, ŋ yɩ wosolɛsinnɩsorazannɔ wɔɔ zɩnzɛ, ŋ yɩ fɩr ka wɔɔ ma sɔ. Woso heer bɩ nyɩnta kan ŋ kɩ y, gʊɔɔ haay jɩnnɔ n ŋ mɩ. ¹⁶Ŋ y’a tam wɔɔ m toore, kʊ wɔɔ bɩ lemim nyɩnta pa da do vantɔɔ gʊɔɔ m kʊ ŋ n bʊmbɔrɛ yɩ y, a ba kʊ ŋ nawʊrɛ ncɩnaaʊ naa, a mimbʊnyaa ŋn’a dam la tee… bɩ naa haay jɛ ʊ, Woso a nɔmaa kərgu ŋ la.

Pol lɛ taa k’a a ya, a Tesaloniki zannɔ yɩ

¹⁷Bɩ, m danyɩnɔ, kʊ wɔɔ nɩ, wɔɔ ʊ ba awɔɔ ma laatʊ, a maasɩrɛ ba poore. Ʊ n ʊ ya, ʊ n nɩ kʊ yɩrɛ y. Bɩ wɔɔ heer gɔɔta an nɩ kan awɔɔ kɩ, wɔɔ ŋʊa paan… k’ʊ ʊ ya, ʊ awɔɔ yɩ, naa tɔ ma bɩ, wɔɔ ʊ tʊntɔ ʊ gʊta k’ʊ ʊ da ma, ʊ awɔɔ yɩ. ¹⁸Ncɩnaaʊ nɩ, wɔɔ n a ŋʊa k’ʊ ʊ wusigə ʊ ta awɔɔ zi. Mɔɔ mɩŋŋa Pol, mɔɔ m tɔ ʊ gallɛm hɔka kʊ m ta awɔɔ zi, bɩ Sʊtaana wɔɔ zaa tii, wɔɔ n’ʊ da ma y. ¹⁹Sɩra nɔ ʊ, awɔɔ sɔ, awɔɔ n’a kam wɔɔ nɩ taaheerlɛ m, awɔɔ tɔ ma m wɔɔ nɩ zɛm bɩ heernyɔɔ yɩ, ʊ ʊ da ma ʊ lɛbɔʊrɛ yɩ wɔɔ Zuuba Yeezuu taa, a zɛrɛ hinni ʊ. ²⁰Denter m, awɔɔ m wɔɔ lɛbɔʊrɛ kan wɔɔ heernyɔɔ kɩ.

Timote ta Tesaloniki ʊ Pol kan a zukuuro kɩ tɔ ra

¹Yɩ a ʊ ncɩnaaʊ, kʊ wɔɔ n’a ŋʊam kʊ awɔɔ yɩ, bɩ wɔɔ bɩr ʊ dam ma bɩ, wɔɔ n kɔ ʊ lɛ sa, ʊ ʊ k’ʊ gɔɔta ʊ minto Atɛnnɩ ʊ. ²A m bɩ, wɔɔ n’ʊ danyɩ Timote nyɔɔ, wɔɔ zibəəkɔɔn m an nɩ Woso zi bam Krista lemim nyɩnta bɩ padarɛ nɔ ʊ. A nyɔɔ wɔɔ ʊ awɔɔ ma k’an awɔɔ paŋŋa da ra, an awɔɔ heer yo a sɩrakarɛ nɔ ʊ, ³k’an bɩr yɩrɛ ɩ ʊ, awɔɔ gɔsɩ b’a bɔ a jɛ m fɩr k’awɔɔ n’a yɩm naa minto y. Bala, awɔɔ dɔ a ʊ, Woso zaa bɩ nɔ ʊ, pakra m kʊ wɔɔ n fɩr yɩ. ⁴Nyɩnta kʊ wɔɔ ʊ awɔɔ zi b’ʊ bɩ, wɔɔ ser ka ʊ a hɩ awɔɔ m, ʊ ʊ, pakra m kʊ wɔɔ n fɩr yɩ, b’awɔɔ dɔ, a ʊ, hɔ kʊ wɔɔ hɩ b’ɩ ba bɩ. ⁵Naa tɔ ma m, kʊ mɔɔ n m da ma dɔ, m bʊr m ma kʊ m awɔɔ mim dɔ bɩ, mɔɔ n Timote nyɔɔ, k’an awɔɔ sɩrakarɛ mim dɔ, k’an b’a hɩ m m. Bala, mɔɔ da bɔ ʊ, mɔɔ ʊ, ɩ b’a ka Sʊtaana n awɔɔ makra ba, awɔɔ m sɩrakarɛ to, zi kʊ wɔɔ ba awɔɔ zi bɩ n bɔ vam y.

⁶Bɩ kɛɛrɛ naa, Timote a to awɔɔ zi b’ʊ an bʊr, a lemim nyɩnta hɩ wɔɔ m, awɔɔ sɩrakarɛ kan awɔɔ ŋʊarɛ kɩ mim bɩncɛ ʊ, a a hɩ, a ʊ, wɔɔ tɔ gɔɔta an awɔɔ nɔ ʊ nyɩnta, bɩ amba wɔɔ lɛ n taa k’ʊ ʊ ya, ʊ awɔɔ yɩ bɩ, awɔɔ lɛ taa k’a a ya, awɔɔ yɩ sɔ. ⁷Ʊ danyɩnɔ, yɩ a ʊ ncɩnaaʊ awɔɔ sɩrakarɛ minto bɩ, wɔɔ n heerkoodəbaa yɩ, ʊ fɩryɩrɛ kan ʊ makrarɔ kɩ nɔ ʊ. ⁸Bala, wɔɔ ɩ heernyɔɔ m kɛɛrɛ ɩ ʊ, mɩsɩrbaa daa wɔɔ yɩ, k’awɔɔ nɩ jɩnɩm kɔɔkɔɔ Zuuba zuure nɔ ʊ bɩ minto. ⁹Awɔɔ tɔ ma, wɔɔ b’ʊ dam ma ʊ Woso barka da, ʊ a nya y, heernyɔɔ gʊta k’awɔɔ n’a kam wɔɔ ʊ a taa bɩ minto. ¹⁰Sinuu ʊ kan gunuu ʊ kɩ wɔɔ y’a yɛm han gʊta, k’an a ka k’ʊ ʊ da ma, ʊ awɔɔ yɩ k’ʊ hɔ k’a jɩra awɔɔ sɩrakarɛ ma bɩ na awɔɔ m ma.

¹¹Wɔɔ gɔɔta ʊ n’a yɛm wɔɔ Zɩ Woso mɩŋŋa kan wɔɔ Zuuba Yeezuu kɩ han, kʊ ŋ nɩ wɔɔ zaa banka k’ʊ ʊ da ma, ʊ bʊr awɔɔ zi. ¹²Wɔɔ y’a yɛm kʊ Zuuba n a ka k’awɔɔ ŋʊarɛ kan kʊ kɩ kan gʊɔɔ haay kɩ bɩ n a da ra an bɩr tam lɛɛ tee…, amba wɔɔ n’awɔɔ ŋʊam bɩ m. ¹³K’an a ba maam, an awɔɔ heer yo, k’awɔɔ m bɩr mɩŋŋa, mim ba awɔɔ gʊr zi wɔɔ Zɩ Woso taa y, hinni kʊ wɔɔ Zuuba Yeezuu n nɩ zɛŋ ʊ kan a gʊɔɔ kɩ haay bɩ tɔ ma.

Mɩsɩrbaa k’a Woso nɔ yɩ

¹M danyɩnɔ, hɔ k’a gɔɔta wɔɔ n’a hɩrɛ awɔɔ m, ʊ awɔɔ dʊndɔ m wɔɔ Zuuba Yeezuu tɔ ma bɩ ba n nɩ: Biisi bɩ, wɔɔ mɩsɩrbaa k’awɔɔ n’a bam an Woso nɔ yɩ bɩ dɩnda awɔɔ m, bɩ mɩsɩrbaa bɩ do awɔɔ n’a bam, bɩ k’a ta lɛɛ tee… kan mɩsɩrbaa bɩ do kɩ a da ra. ²Awɔɔ hɔ kʊ wɔɔ awɔɔ dʊndɔ m wɔɔ Zuuba Yeezuu tɔ ra bɩ dɔ. ³Hɔ kʊ Woso lɛ n taa bɩ ba n nɩ: A lɛ taa k’awɔɔ n mɩsɩrbaa k’an mɩŋŋa a mɩm ʊ ba, k’a a gʊ jaandarɛ do haay ma. ⁴Awɔɔ gʊaa biyəə a ga m, an a da a mɛsim ma dɔ, k’an a da ma, an mɩsɩrbaa mɩŋŋa ba kan daʊrɛ kɩ. ⁵K’a b’a mɩŋŋɔɔ to kʊ lɛtaamarɔ bʊnyaarɔ n a so awɔɔ ʊ, amba gʊɔɔ kʊ ŋ n Woso dɔ rɔ wɔɔ hɔ bɩ nɩ y. ⁶Mim naa do nɔ ʊ, a b’a ka gɔsɩ n kʊrɔma kan a danyɩ kɩ an zambʊ ba ma y, bala, Zuuba gʊɔɔ kʊ ŋ nɩ minno nɔɔn duro bam nɔ wɔɔ hʊnhʊrm, amba wɔɔ lɛɛ ka ʊ a hɩ awɔɔ m, ʊ ʊ ya, ʊ so ra paan… bɩ m. ⁷Sɩra nɔ ʊ, Woso n wɔɔ bir kʊ wɔɔ n mɩsɩrbaa ba lannɔ gɛɛ yaarɔ barɛ nɔ ʊ y, bɩ kʊ wɔɔ n mɩsɩrbaa ba mɩŋŋabaa nɔ ʊ. ⁸Naa minto bɩ, gʊaa k’a nɩ kaanɩm hɔdɩndarɛ naa do m bɩ, gʊaa bɛɛ a nɩ kaanɩm nɩ y, Woso k’a n’a *Sɛnt-Ɛspri karɛ awɔɔ ʊ b’a kaanm m.

⁹M danyɩnɔ Krista nɔ ʊ, kʊ kʊ ŋʊarɛ mim bɩncɛ nɩ, pakra bɛɛ m kan awɔɔ kɩ kʊ mɔɔ n ci ba awɔɔ ma, m a mim dɩnda awɔɔ nɩ y. Bala, Woso mɩŋŋa hɔ dɩnda awɔɔ m k’awɔɔ m bɩr kʊ ŋʊam. ¹⁰Bɩ, amba n ŋʊarɛ mim dɩnda awɔɔ m bɩ, awɔɔ ɩ danyɩnɔ haay kʊ ŋ nɩ Masedʊan kʊ b’ʊ jilli rɔ wɔɔ ŋʊarɛ. Bɩ, kʊ a yɛ awɔɔ han k’a ta lɛɛ tee… kan ŋ ŋʊarɛ kɩ a da ra. ¹¹K’a a yo ʊ kʊ laafɩɩ n nyɩnta awɔɔ kan gʊɔɔ kɩ bire ʊ, gʊaa biyəə n a zerga a mɩŋŋa mim lɛ, an zi ba an a mɩsɩrbaa ba m, amba wɔɔ lɛɛ ka, ʊ a hɩ awɔɔ m bɩ m. ¹²K’awɔɔ ba ncɩnaaʊ gʊɔɔ kʊ kristagʊɔɔ bɛɛ nɩ ŋ mɩ rɔ wɔɔ y’awɔɔ gore daŋ ʊ, awɔɔ bɩ gɔsɩ mɩm kam sɔ y.

Hɔ k’a nɩ nyɩntaŋ ʊ Yeezuu zɛrɛ hinni ʊ

¹³M danyɩnɔ, kʊ gʊɔɔ kʊ ŋ gɩnga rɔ wɔɔ mim bɩncɛ nɩ, wɔɔ lɛ baa k’awɔɔ n gɔɔta badɔ nɔ ʊ, a bɩr heerzarlɛ m amba gʊɔɔ kʊ ŋ ba taaheerlɛ m nɔ wɔɔ nɩ y. ¹⁴Kʊ wɔɔ sɩra ka, ʊ ʊ Yeezuu ga an a mɩm bɔ ʊ bɩ, maam sɔ bɩ, gʊɔɔ kʊ ŋ sɩra ka Yeezuu ʊ ŋnɩ bɔkarɛ ŋnɩ gɩnga rɔ wɔɔ, Woso brɔɔ mɩm bɔŋ ʊ ŋnɩ mɩsɩrbaa ba kan Yeezuu kɩ.

¹⁵Hɔ kʊ wɔɔ kʊ a hɩ kɛɛrɛ naa, Zuuba ɩ nyɩnta an a dɩnda. A ɩ yɩrɛ ɩ ʊ, wɔɔ gʊɔɔ k’ʊ gɔɔta ʊ m mɩsɩr naa, Zuuba zɛrɛ hinni ʊ, wɔɔ bɩ lɛɛ kam gʊɔɔ kʊ ŋ gɩnga rɔ wɔɔ nɩ y. ¹⁶Bala, kʊ Woso bɩ zaa ka, malɛɛka jɩtaarɛ deem n a leer busu, n nɩ Woso huure bɩ hɛ, Zuuba Yeezuu Krista mɩŋŋa y’a tom arzana ʊ, an zer. Gʊɔɔ kʊ ŋ sɩra ka Krista ʊ ŋnɩ bɔkarɛ ŋnɩ gɩnga rɔ wɔɔ n lɛɛ ka ŋn’a mɩm bɔ ʊ. ¹⁷Bɩ jɛ ʊ kɛɛrɛ, wɔɔ kʊ wɔɔ gɔɔta ʊ m mɩsɩr hinni bɩ do ʊ bɩ, n wɔɔ nam kʊ ʊ kan ŋ kɩ n nɩ wɔɔ busu warkʊ nɔ ʊ, kʊ aa Zuuba zɛ ʊ brama, yɩ a nawʊrɛ ncɩnaaʊ wɔɔ n nyɩnta kan Zuuba kɩ dɔmɩm haay. ¹⁸K’a meerbaarɔ nɔɔn duro ba kan kʊ kɩ, a bɩr kʊ heer yom.

Ʊ b’ʊ zu ʊ y

¹Ʊ danyɩnɔ, pakra bɛɛ m kʊ n nɩ ci ba awɔɔ ma n nɩ dɔmɩm gɛɛ wakatɩ kʊ minno nɔɔn duro n nɩ baŋ ʊ bɩ mim dɩnda awɔɔ nɩ y. ²Bala, awɔɔ mɩŋŋɔɔ a dɔ a zim a ʊ, hinni kʊ Zuuba n nɩ zɛŋ ʊ bɩ, nyɩnta a nawʊm amba koor tɩr bʊr gunuu ʊ gʊaa n a wakatɩ dɔ bɩ m. ³Kʊ gʊɔɔ bʊr ŋn’a hɩrɛ ŋ ʊ: «Laafɩɩ dɔmɩm wɔɔ n ta ʊ kɛɛrɛ, minsi ba ʊ y.» Dɔmɩm bɩ do fɩryɩrɛ n nɩ daata zɛrɛ ŋ la amba nyoosibarɛ tɩr daata zɛ lʊ jɩsɩzaa ra bɩ m, ŋ gɔsɩ bɩ bɔm lɛ nɩ y. ⁴Bɩ k’awɔɔ nɩ, ʊ danyɩnɔ, monsigə bɛɛ awɔɔ n ta ʊ, kʊ dɔmɩm bɩ do n bɩ daata zɛ awɔɔ ra, amba koor tɩr daata zɛ gʊaa ra bɩ nɩ y. ⁵Bala, awɔɔ haay, lɛɛgure gʊɔɔ n’awɔɔ m, sinuu gʊɔɔ n’awɔɔ m. Gunuu gʊɔɔ bɛɛ m wɔɔ nɩ, bɩ monsigə gʊɔɔ bɛɛ m wɔɔ m sɔ y. ⁶Naa tɔ ma bɩ, ʊ bɩ hinceem ba am gʊɔɔ mɩsɩrɔ wɔɔ nɩ y, ʊ b’a to kʊ hɔsɩ n’ʊ zu ʊ y, ʊ ʊ da ʊ mɩŋŋɔɔ ma. ⁷Hinceem zannɔ wɔɔ a ba ŋ nawʊm gunuu ʊ, gunuu ʊ ŋnɩ bɛɛ miŋ ʊ sɔ an nɩ ŋ zɛm. ⁸Bɩ, wɔɔ kʊ sinuu gʊɔɔ m wɔɔ m nɔ wɔɔ, ʊ ʊ da ʊ mɩŋŋɔɔ ma, k’ʊ gɔɔta ʊ sɩra ka, ʊ bɩr ŋʊarɛ m, ɩ ʊ pɔyaa goŋŋo wɔɔ ka ʊ ma, ʊ bɩr bʊmbɔrɛ kʊ wɔɔ n nɩ zɛm ba yɩ bɩ taaheerlɛ m, ɩ ʊ, pɔyaa firgə wɔɔ ku ʊ mim ma. ⁹Bala, Woso n wɔɔ bɔ ʊ k’a bɩ fɩr ka wɔɔ ma a nɔmaa nɔ ʊ y, bɩ wɔɔ bɔ a ʊ, kʊ wɔɔ n bʊmbɔrɛ yɩ wɔɔ Zuuba Yeezuu Krista tɔ ma. ¹⁰Yeezuu Krista mɩŋŋa ɩ ga wɔɔ tɔ ma, k’an bɩr yɩrɛ ɩ ʊ, kʊ wɔɔ gɔɔta ʊ m mɩsɩr, gɛɛ gɩnga wɔɔ ʊ, kʊ wɔɔ m mɩsɩrbaa ba kan kɩ a zɛrɛ hinni ʊ. ¹¹Naa minto bɩ, k’a kʊ heer yo, a kʊ sɩrakarɛ da ra, amba awɔɔ n’a bam kara bɩ m.

Dʊndɔrɛrɔ kan leersore kɩ

¹²M danyɩnɔ, gʊɔɔ kʊ ŋ nɩ Woso zi bam awɔɔ barla ŋnɩ karɛ awɔɔ lɛɛ, ŋn’awɔɔ bɔm zaa ʊ Zuuba zaa nɔ ʊ rɔ wɔɔ, a yɛ wɔɔ nawʊrɛ awɔɔ han k’a ŋ gore da ʊ. ¹³K’a ŋ da ʊ gʊta kan ŋʊarɛ kɩ, ŋ zibəə bɩ minto. Awɔɔ haay, k’a bɩr laafɩɩ kan kʊ kɩ.

¹⁴Ʊ danyɩnɔ, kʊ a yɛ a han, k’a həən si gʊɔɔ kʊ ŋ bɩr mɩsɩrbaa zore bam nɔ wɔɔ ma, k’a heerkoodəwarzannɔ heer yo, k’a a da paŋŋawarzannɔ han, k’a bɩr bʊraama m kan gʊaa haay kɩ. ¹⁵K’a dundo a zi kʊ gɔsɩ b’a bʊnyaa sompi gʊaa n’ʊ y, bɩ k’a bɩr a karɛ a mɩŋŋa barɛ ma tee…, awɔɔ kan kʊ kɩ, kan gʊɔɔ haay kɩ bire ʊ.

¹⁶K’a bɩr heernyɔɔ m dɔmɩm haay, ¹⁷k’a bɩr yaa dam tee…. ¹⁸Mim woo… nɔ ʊ, k’a Woso barka da, bala, naa Woso lɛ n taa awɔɔ gʊr zi Krista Yeezuu zuure bɩ nɔ ʊ.

¹⁹A b’a ta Sɛnt-Ɛspri zibəə m toore y, ²⁰a bɩ wosolɛsinnɩsora ganwʊrɛ meerbaarɔ gore bɔ ʊ y. ²¹Bɩ, mim haay nɔ ʊ, k’a a hɔɔn da ma, a dɩga hɔ k’an mɩŋŋa a nɔ ʊ bɩ ma, a nyasʊ hɔ bɩ do m. ²²K’a a gʊ mimbʊnyaa do haay ma laatʊ.

²³A yɛ wɔɔ nawʊm, kʊ wɔɔ Woso kʊ laafɩɩ karɛzaa m bɩ n’awɔɔ hu bɔ jilli, k’an dɔ awɔɔ hɔɔn ma, kan awɔɔ nyi kɩ a mɛ kɩ ma haay, kʊ minsi bɩ nyɩnta awɔɔ gʊr zi wɔɔ Zuuba Yeezuu Krista zɛrɛ hinni ʊ y. ²⁴Woso mɩŋŋa y’awɔɔ bir, jɩnalɛrazaa m, an nɩ hɔ kʊ wɔɔ yɛ naa barɛ.

²⁵Ʊ danyɩnɔ, k’a yaa da Woso m wɔɔ minto sɔ.

²⁶K’a yaa da danyɩnɔ wɔɔ haay m, amba a a ga m bɩ m.

²⁷Zuuba tɔ ma, a yɛ mɔɔ nawʊrɛ awɔɔ han paan…. K’a ci naa do karɩnda ba danyɩnɔ wɔɔ haay lɛɛ.

²⁸A yɛ mɔɔ nawʊm kʊ wɔɔ Zuuba Yeezuu Krista barka n bɩr kan awɔɔ kɩ.