1 Pɩyɛɛr

Ci lɛɛkarɛ hɔ kʊ

PƖYƐƐR

a ba

Ci lɛɛkarɛ hɔ kʊ Pɩyɛɛr a ba bɩ

gasʊʊrɛ

Yeezuu karɩndanyɩ Pɩyɛɛr ɩ ci bɩ ba. Ci bɩ ba a ʊ kristagʊɔɔ sokʊmarɔ kʊ ŋ nyɩnta Azii minɛɛr kʊrɔ ʊ rɔ wɔɔ ma. Zɩɩfʊrɔ nyɩnta kristagʊɔɔ wɔɔ duro barla, bɩ, gʊɔɔ kʊ ŋ gɔɔta rɔ wɔɔ, doro vantɔɔ gʊɔɔ m.

Ci bɩ ba a ʊ, kristagʊɔɔ kʊ ŋ nɩ fɩr yɩm a sɩrakarɛ tɔ ma, ŋ heer n’a zarm nɔ wɔɔ minto. Kʊ ŋ nɩ jɩm kɔɔkɔɔ, ŋnɩ gɔɔta ŋnɩ hɔ k’a Woso nɔ yɩ bɩ ba mim haay nɔ ʊ. Kʊ ŋ nɩ lɛbɔʊrɛ kʊ Woso n nɩ zɛm b’a ka ŋ ʊ bɩ nyasʊ a heer ʊ kɔɔkɔɔ.

N Pɩyɛɛr zɛ gɔdarkʊra ma a sɩrakarɛ tɔ ma, Rɔm zannɔ kʊ ŋ wuti ŋn’ɩ fɩr kam kristagʊɔɔ ma bɩ dɔmɩm ʊ. Pol nyɩnta kristagʊɔɔ fɩryɩrɛ bɩ do nɔ ʊ sɔ.

Pɩyɛɛr ɩ yaa dam kristagʊɔɔ m

¹Mɔɔ mɩŋŋa Pɩyɛɛr nɩ ci bɩ bam, Yeezuu Krista zibəəzaa m mɔɔ m. A ba mɔɔ nawʊm awɔɔ kʊ Woso a bɔ ʊ k’a yɩ a gʊɔɔ a hɩsɩga da, a m saanɔɔ Pɔn kʊ ʊ kan Galasii kʊ kɩ ʊ, Kapadɔs kʊ kɩ ʊ, Azii kan Bitinii kʊrɔ kɩ ʊ rɔ wɔɔ ma. ²Zɩ Woso y’awɔɔ bɔ ʊ, amba a lɛɛ ka an a cɩnta a hɔɔnhɔ nɔ ʊ k’a ba bɩ tɔ ma, a y’a so awɔɔ ʊ, a Ɛspri k’a a ka awɔɔ ʊ bɩ tɔ ma, k’awɔɔ n yɛ Yeezuu Krista ma, k’a ma bɩ n’awɔɔ hu bɔ. A yɛ mɔɔ nawʊm, kʊ Woso n a barka, kan a laafɩɩ kɩ ka awɔɔ ʊ gʊta.

Woso barka darɛ bʊmbɔrɛ bɩ tɔ ma

³Ʊ ʊ lɛ bɔ Woso ʊ, wɔɔ Zuuba Yeezuu Krista Zɩ bɩ, bala, a cicirzɛrɛ gʊta bɩ nɔ ʊ, a a ka wɔɔ n yɩrɛdaa yɩ, k’ʊ taaheerlɛ paan… yɩ, Yeezuu Krista k’a a mɩm bɔ ʊ gəəno bire ʊ bɩ tɔ ma. ⁴A ba a ʊ maam kʊ wɔɔ n hɔjirle k’a b’a dam ma an vɔn gɛɛ an dintim ka, gɛɛ a paŋŋa n a bɔ ʊ yɩ, hɔjirle bɩ do Woso a cɩnta awɔɔ m arzana ʊ. ⁵Awɔɔ kʊ Woso paŋŋa nɩ dɔrɛ a ma sɩrakarɛ tɔ ma, k’awɔɔ n bɩ bʊmbɔrɛ k’an b’a hɩnkam lɛɛm jɛ dɔmɩm ʊ bɩ yɩ.

⁶Bɩ tɔ ma m, awɔɔ n’a heer nyɔɔm gʊta, baa kʊ pakra m k’awɔɔ n fɩr yɩ dɩɩtaa, makrarɔ y’a hʊnhɔ kʊ ŋ n’awɔɔ heer zarm dɔmɩm poorero nɔɔn duro nɔ ʊ. ⁷Fɩr bɩ yɩrɛ bɩ, awɔɔ sɩrakarɛ makra an n’a bam, kʊ sɩrakarɛ paan… m gɛ. Awɔɔ sɩrakarɛ bɩ mɩŋŋabaa lɛ da sarma m, hɔcenlezaa m bɩ, an bɔkarɛ n tɩr a makra ba sɛ ʊ, k’a mɩŋŋabaa dɔ. Ncɩnaaʊ bɩ, awɔɔ sɩrakarɛ bɩ makra jɛ ʊ, awɔɔ lɛbɔʊrɛ kan cirbəə kɩ, daʊrɛ kɩ yɩm dɔmɩm kʊ Yeezuu Krista n b’a hɩnkaŋ ʊ b’ʊ. ⁸Awɔɔ ɩ Yeezuu Krista mɩŋŋa ŋʊam b’awɔɔ n a yɩ a mɩm nɩ y, awɔɔ sɩra ka ʊ, b’awɔɔ n a yɩ cɩna y. Naa tɔ ma m, awɔɔ n’a heer nyɔɔm heernyɔɔ gandaa ʊ m, gɔsɩ b’a dam ma an heernyɔɔ gʊta bɩ do dɔ an a hɩ y. ⁹K’awɔɔ nɩ zɛm b’a nyiro wɔɔ bʊmbɔrɛ yɩ bɩ, bɩ y’a ka Woso ʊ awɔɔ n sɩra ka.

Hɔ kʊ Sɛnt-Ɛspri a ba Krista tɔ ma biisi

¹⁰Wosolɛsinnɩsorazannɔ kʊ ŋ nyɩnta biisi ŋnɩ so Woso lɛ ra, ŋnɩ barka kʊ Woso ʊ k’a ka awɔɔ ʊ bɩ mim hɩ bɩ, ŋ bʊmbɔrɛ k’awɔɔ n nɩ zɛm b’a yɩ bɩ daasɩ ŋn’a a ka. ¹¹A ka ŋ y’a ʊ ma, k’a minno kʊ Krista Ɛspri b’a hɩnka ŋ nɩ bɩ kʊyɩrɛ dɔmɩm kan ŋ zaarɔ kɩ dɔ, bala, Ɛspri bɩ do k’a nyɩnta kan ŋ kɩ bɩ lɛɛ ka an fɩryɩrɛrɔ kʊ Krista n’a yɩm bɩ mim hɩ, kan lɛbɔʊrɛ k’a n’a yɩm, fɩr bɩ yɩrɛ jɛ ʊ bɩ kɩ. ¹²Bɩ, Woso a hɩnka a lɛsinnɩsorazannɔ wɔɔ duro m, a ʊ, lemim k’a ka kʊ ŋ nɩ so ra bɩ, a n a ka ŋ bɔɔm tɔ ma y, awɔɔ hɔ m. Lemim nyɩnta bɩ do padənno wɔɔ a hɩ awɔɔ m, bɩ, a pa ŋ y’a da awɔɔ m *Sɛnt-Ɛspri paŋŋa kʊ Woso a ka ŋ ʊ bɩ m. Malɛɛkarɔ mɩŋŋɔɔ n lɛ taa k’a lemim bɩ do dɔ gʊta.

Mɩsɩrbaa zore barɛ mim

¹³Naa tɔ ma bɩ, k’a a banka, k’a ta lɛɛ kan zibəə kɩ, a b’a zu a ʊ y, k’a barka kʊ Woso n’a karɛ awɔɔ ʊ Yeezuu Krista hɩnkarɛ ma bɩ ta a heer lɛ kɔɔkɔɔ. ¹⁴Amba nyɩnɔ nɩ yɛrɛ a zɩrɔ ma bɩ, k’a yɛ Woso ma, a b’a ya a zu lɛtaamarɔ bʊnyaarɔ k’awɔɔ n ta ŋ nɩ biisi badɔ nɔ ʊ rɔ wɔɔ ʊ y. ¹⁵Bɩ, amba Woso k’awɔɔ bir bɩ n mɩŋŋa bɩ, awɔɔ sɔ k’a bɩr mɩsɩrbaa mɩŋŋa bam a tarɛ haay nɔ ʊ. ¹⁶Bala, Woso a hɩ a ci b’ʊ, a ʊ: «K’a yɩ mɩŋŋa, bala, mɔɔ mɩŋŋa.»

¹⁷Woso k’a nɩ gʊɔɔ dʊdɔ kam b’a bɩr ŋ jirə bɔm bɩ, awɔɔ nɩ yaa dam nɩ a ʊ, a Zɩ m, gʊaa biyəə dʊdɔ an n’a kam amba a zaa zibəə a ga m bɩ m. Bɩ tɔ ma bɩ, k’a mɩsɩrbaa k’a gɔɔta awɔɔ m, awɔɔ n’a bam tara burə ʊ bɩ ba, Woso mɩŋŋa daʊrɛ kan a nyibəə kɩ nɔ ʊ. ¹⁸Awɔɔ dɔ a ʊ, mɩsɩrbaa k’a nyɔɔdʊ ba ʊ, awɔɔ zɩrɔ n a to awɔɔ m bɩ, Woso awɔɔ yɔ b’ʊ. Bɩ, hɔ k’a n’a zaar bam, gɛɛ wanzurfu gɛɛ sarma bɛɛ a a sa, an awɔɔ yɔ nɩ y. ¹⁹Awɔɔ yɔ a ʊ, Krista ma kʊ n b’a dam ma n a lɛ hɩ bɩ m, bɔ b’ʊ kʊ ʊ kan sinnyɛɛm k’a m mɩŋŋa, hɔ bʊnyaa sɩ ba ma bɩ kɩ. ²⁰Woso lɛɛ ka an a bɔ ʊ, bɩ ma bɩ, durnya ba ʊ y. Kɛɛrɛ naa, a a hɩnka jɛ dɔmɩnnɔ ʊ, awɔɔ daahan tɔ ma. ²¹A tɔ ma m, awɔɔ n sɩra ka Woso ʊ, bɩ y’a mɩm bɔ ʊ gəəno bire ʊ, an lɛbɔʊrɛ ka ʊ, yɩ a ʊ ncɩnaaʊ, k’awɔɔ sɩrakarɛ kan awɔɔ taaheerlɛ kɩ n yo Woso ma.

K’a mɩsɩrbaa ba ŋʊarɛ nɔ ʊ

²²Yɛ k’awɔɔ ʊ sɩra ma b’a ka, awɔɔ nyiro wɔɔ hu n bɔ, k’a a da ma, a kʊ ŋʊa paan… danyɩbaa nɔ ʊ. K’a kʊ ŋʊa gʊta noom hu m. ²³Bala, yɩrɛdaa awɔɔ yɩ, b’a n a to gʊaa zi y, gʊaa ɩ gam, bɩ Woso y’awɔɔ yɩ, a garɛ ba ʊ y. A lemim k’an mɩsɩr a cenle ba ʊ b’a sa an awɔɔ yɩ m. ²⁴Amba Wosoci n’a hɩm bɩ m bɩ:

Gʊɔɔ haay bɔ kʊ ʊ kan bur kɩ,

lɛbɔʊrɛ kʊ ŋ nɩ tam haay bɩ

bɔ kʊ ʊ kan burvu kɩ,

kʊ bur bɩ ga, b’a vu bɩ sur.

²⁵Bɩ Zuuba lemim b’ɩ gɔɔtam

dɔmɩm haay.

Bɩ, lemim bɩ do bɩ, lemim nyɩnta kʊ n y’a pa da awɔɔ m bɩ m.

¹K’a bʊnyaabaa do haay to kan ŋʊaar do haay kɩ, noombakʊma kɩ, a bɩ jɩm ba y, b’a b’a bʊnyaa hɩ gɔsɩ ma y. ²Amba nyɩnɔ poorero nɩ nyonhi ŋʊam bɩ, k’a Woso lemim k’an mɩŋŋa bɩ ŋʊa tee… k’a a da ma a ma Woso zaa bɩ nɔ ʊ, a bʊmbɔrɛ yɩ. ³Bala, Wosoci bɩ y’a hɩm denter, a ʊ:

Awɔɔ b’a dɔ a ʊ, Zuuba mɩŋŋa.

Woso gʊɔɔ m wɔɔ m

⁴K’a zɔ Zuuba ma, jaa mɩsɩr m, gʊɔɔ n kaanm m, bɩ, Woso dɩga a jaa tɔzaa m, an a bɔ ʊ. ⁵K’a a zɔ ma, bala, awɔɔ bɔ kʊ ʊ kan jaa mɩsɩɩrɔ kɩ sɔ, kʊ Woso n awɔɔ sa an awɔɔ ba Sɛnt-Ɛspri cɛ. Awɔɔ yɩrɛ a mannɩbənno kʊ ŋ y’a mɩŋŋa ka ʊ, k’a mannɩrɔ kʊ ŋ y’a to Sɛnt-Ɛspri zi rɔ wɔɔ ba a ŋ ka Woso ʊ, a yɩ ŋ ŋʊam Yeezuu Krista tɔ ma.

⁶Bala, Wosoci bɩ nɔ ʊ, n ʊ:

K’a dɩga a, mɔɔ ɩ jaa paŋŋazaa cɩntam *Siyɔn ʊ,

mɔɔ y’a bɔ ʊ, jaa tɔzaa m gʊta,

gʊaa k’a sɩra ka ʊ bɩ, a bɩ nyannɩ bɩrɛ y.

⁷Awɔɔ k’a sɩra ka ʊ rɔ wɔɔ,

jaa naa do tɔ ma awɔɔ ɩ lɛbɔʊrɛ m,

bɩ kʊ bɩsɩkənno wɔɔ nɩ, Wosoci b’a hɩ, a ʊ:

Jaa kʊ cɛdonno wɔɔ kaanm m bɩ y’a ba cɛ bɩ jɩrjaa paŋŋazaa.

⁸Wosoci b’a y’a an a hɩ sɔ, a ʊ:

Jaa bɩ do a ba gʊɔɔ gənzɛrɛ jaa, ŋ dore jaa.

Kʊ ŋ n sɩra ka Woso lemim b’ʊ bɩ y’a ka ŋn’a gəm zɛm ma, Woso lɛɛ ka an a cɩnta k’an yɩ ncɩnaaʊ.

⁹B’awɔɔ, gʊɔɔ kʊ Woso ŋ bɔ ʊ rɔ wɔɔ n’awɔɔ m, cir m Woso m, a mannɩbənno n’awɔɔ m, gʊɔɔ kʊ Woso a so ŋ ʊ rɔ wɔɔ n’awɔɔ m, Woso mɩŋŋa y’awɔɔ ba a hɔ, k’awɔɔ n a zibəəro gʊtɔɔ wɔɔ pa da, a y’awɔɔ bir an bɔ awɔɔ m monsigə ʊ, an bʊr awɔɔ m a lɛɛgure k’an mɩŋŋa gʊta b’ʊ. ¹⁰Biisi bɩ, Woso bɩ gʊɔɔ bɛɛ n’awɔɔ nɩ y, bɩ kɛɛrɛ naa, a gʊɔɔ n’awɔɔ m. Biisi bɩ, Woso n a cicirzɛrɛ hɩnka awɔɔ nɩ y, bɩ kɛɛrɛ naa, a awɔɔ cicir zɛ.

Kristagʊɔɔ mɩsɩrbaa mim

¹¹M danyɩnɔ ŋʊarɛ nɔ ʊ, k’a dɔ a ʊ, cenlezannɔ n’awɔɔ m tara burə ʊ naa ʊ, saanɔɔ n’awɔɔ m, bɩ tɔ ma bɩ, k’a gʊ lɛtaamarɔ bʊnyaarɔ wɔɔ ma, a ka ŋ nawʊm ma k’a awɔɔ zaar ba. ¹²K’awɔɔ nɩ gʊɔɔ kʊ kristagʊɔɔ bɛɛ nɩ ŋ mɩ bire ʊ bɩ, k’a mɩsɩrbaa k’an zore ba, k’an bɩr yɩrɛ ɩ ʊ, kʊ ŋ y’awɔɔ tɔ zaar barɛ, ŋn’a hɩrɛ ŋ ʊ, gʊɔɔ bʊnyaarɔ n’awɔɔ nɩ, kʊ ŋ n’awɔɔ zibəəro mɩŋŋɔɔ wɔɔ yɩ, maam bɩ, ŋ y’a lɛ bɔm Woso ʊ, hinni k’a n’a hɩnkarɛ ŋ nɩ b’ʊ.

¹³K’a yɛ lɛɛzannɔ kʊ ŋ nɩ durnya ʊ naa ʊ haay rɔ wɔɔ ma Zuuba tɔ ma. Kʊ cir nɩ, k’a yɛ ma k’a m cir bɩ tɔ ma. ¹⁴Kʊ gʊɔɔ kʊ cir n cɩncɩnta kʊ ŋ n a so lɛɛrɔ ʊ wɔɔ nɩ, k’a yɛ ŋ ma sɔ, ŋ cɩncɩnta a ʊ, kʊ ŋ nɩ gʊɔɔ kʊ ŋ n’a bʊnyaa bam nɔ wɔɔ hʊnhʊr, ŋn’a lɛ bɔ gʊɔɔ kʊ ŋ n’a mɩŋŋa bam nɔ wɔɔ ʊ. ¹⁵Bala, Woso lɛ taa k’awɔɔ n bɩr a mɩŋŋa bam, kʊ gʊɔɔ kʊ ŋ hɔɔn ba ʊ, ŋ n hɔsɩ dɔ rɔ wɔɔ b’a da ma ŋnɩ hɔsɩ hɩ y. ¹⁶K’awɔɔ a so a mɩŋŋɔɔ ʊ bɩ, k’a mɩsɩrbaa ba, b’a bɩ yo soamɩŋŋaʊ bɩ do ma, k’a bʊnyaa ba y. Bɩ k’a mɩsɩrbaa bɩ ba, kʊ Woso zibəənyɩnɔ n’awɔɔ m bɩ tɔ ma. ¹⁷K’a gʊɔɔ haay da ʊ, k’a danyɩnɔ Krista nɔ ʊ rɔ wɔɔ ŋʊa, k’a nyi ba Woso m, k’a cir da ʊ sɔ.

Ʊ Krista hɔbaa sa

¹⁸Awɔɔ kʊ zibəənyɩnɔ n’a mɩ rɔ wɔɔ, k’a yɛ a soʊrezannɔ wɔɔ ma daʊrɛ gʊta nɔ ʊ, k’a ba ncɩnaaʊ kan bɔɔ n nyɩnta kan awɔɔ kɩ, ŋn’a mɩŋŋa barɛ awɔɔ m nɔ wɔɔ kɩ. K’a ba ncɩnaaʊ sɔ, kan bɔɔ n kʊsɩ rɔ wɔɔ kɩ. ¹⁹Bala, kʊ gʊaa ɩ yɛm fɩr ma Woso tɔ ma, bɩ kʊrɔ bɛɛ a ʊ ma an nɩ fɩr bɩ do yɩrɛ, Woso nɔ ɩ yɩm bɩ zaa ra. ²⁰Bɩ, k’awɔɔ bʊnyaa ba, ŋnɩ fɩr karɛ awɔɔ ma, nka n’a lɛ bɔrɛ awɔɔ ʊ naa tɔ ma? Bɩ, k’awɔɔ mɩŋŋa ba, n nɩ bɔkarɛ n nɩ fɩr karɛ awɔɔ ma, awɔɔ nɩ yɛm ma bʊraama nɔ ʊ, Woso nɔ ɩ yɩrɛ awɔɔ ra naa nɔ ʊ. ²¹A n bɔkarɛ Woso bɩ, awɔɔ bir a ʊ, naa tɔ ma. Bala, Krista fɩr yɩ awɔɔ tɔ ma, an n’a ŋʊam k’awɔɔ n a hɔbaa sa.

²²A mɩŋŋa n mimbʊnyaa sɩ ba y,

a n ŋʊaar ba fɩɩga y,

²³n y’a sʊnsɔ wʊ,

b’a n a sompi gʊaa n’ʊ y,

gʊɔɔ fɩr ka ma,

b’a n nyaa ba kan ŋ kɩ y,

a mɩŋŋa to a ʊ, Woso wɔ ʊ,

bɩ n nɩ dʊdɔ kam tɩrga.

²⁴A mɩŋŋa ɩ yɛ an wɔɔ mimbʊnyaarɔ wɔɔ sa

an fɩr yɩ ŋ nɩ, an ga gɔdarkʊra ma, k’an bɩr yɩrɛ ɩ ʊ,

gəəno n wɔɔ m wɔɔ mimbʊnyaarɔ wɔɔ lɛɛ,

k’ʊ mɩsɩrbaa ba tɩrgabaa nɔ ʊ.

A mɩŋŋa sampɔɔrlɔ wɔɔ tɔ ma m, awɔɔ n laafɩɩ yɩ.

²⁵Bala, biisi bɩ, awɔɔ nyaam am seero hɔ bɩ m, bɩ kɛɛrɛ naa, awɔɔ a bɔ a bʊr a dundor bɩ zi, an nɩ dɔrɛ awɔɔ ma sɔ.

Gʊaa kan a lʊ kɩ mɩsɩrbaa mim

¹Lannɔ wɔɔ, awɔɔ sɔ, k’a zu a zino wɔɔ lɛ ʊ, maam bɩ, kʊ gɔsɩnnɔ ta ʊ, ŋ bɩr sɩra kam Woso lemim b’ʊ, kʊ ŋ lannɔ wɔɔ zibəə n a ka, kʊ ŋ nɩ sɩra ka Woso ʊ, baa kʊ ŋ n meer ba y. ²Ŋ y’awɔɔ mɩsɩrbaa k’an mɩŋŋa, an nɩ zure ŋ lɛ ʊ bɩ yɩm. ³A b’a ka ma k’a a mɛ gʊɛrɛ da ma, mintɔɔnrɛ m, gɛɛ sarma nyɛɛnnɔ nɩ, gɛɛ garbarɛ waasɩ nɩ y. ⁴Bɩ k’a ka k’a gʊɛrɛ bɩ n bɩr a heer ʊ, bʊgʊ-bʊgʊdabaa kan bʊraama kɩ gʊɛrɛ bɩ, bɩ nyarɛ ɩ ba ʊ y, a nyɔɔdʊ ta ʊ sɔ Woso mɩm ʊ gʊta. ⁵Lannɔ kʊ ŋ nyɩnta biisi ŋn’ɩ zum Woso ʊ rɔ wɔɔ, gʊɛrɛbaa naa do ŋnɩ ta m, ŋn’ɩ zure a zino lɛ ʊ. ⁶Nyɩnta Saara ʊ ncɩnaaʊ, an nɩ yɛm Abraham lɛ ma, an n’a birm a zuuba, k’awɔɔ y’a mɩŋŋa bam, awɔɔ bɩr a tom hɔsɩ nɩ nyibəə darɛ a ma, awɔɔ nyɩntarɛ a nyɩnɔ.

⁷Awɔɔ k’an zino wɔɔ, k’a mɩsɩrbaa mɩŋŋa ba kan a lannɔ wɔɔ kɩ, a dɔ a ʊ, ŋ paŋŋa n awɔɔ hɔ ku y, k’a daʊrɛ zi ba kan ŋ kɩ, bala, ŋ mɩsɩrbaa denter bɩ hɔjirle yɩm sɔ kan awɔɔ kɩ, Woso barka bɩ nɔ ʊ. K’a ŋ da ʊ, kʊ hɔsɩ b’a ta a yaadarɛ nɩ y.

Ʊ bɩr hɔɔn deem m

⁸Meer naa do ba mɔɔ nawʊm kan awɔɔ haay kɩ kɛɛrɛ: K’a ka, k’a hɔɔn n bɩr deem, a bɩr kʊ cicir zɛm, a bɩr kʊ ŋʊam danyɩbaa nɔ ʊ, a bɩr a mɩŋŋa bam kʊ m, a bɩr mɩŋŋazerle m. ⁹A b’a bʊnyaa sompi gʊaa nʊ y, kʊ gʊaa awɔɔ sʊnsɔ wʊ, a b’a sʊnsɔ wʊ sɔ y. Bɩ, k’a barka da ʊ, bala, awɔɔ bir Woso ʊ, k’awɔɔ n mɩsɩrbaa ba ncɩnaaʊ, k’awɔɔ n a barka hɔjirle yɩ. ¹⁰Wosoci b’a hɩ, a ʊ:

Kʊ gʊaa lɛ taa mɩsɩrbaa ma,

k’a taʊrɛ n yɩ a ma mɩŋŋa,

a zaa a ga m,

an meerbaa bʊnyaa barɛ to,

kan ŋʊaarbarɛ kɩ.

¹¹K’a zaa n a bɔ a bʊnyaa barɛ ʊ,

an a mɩŋŋa ba,

an bɩr a kam ma tee…

kʊ laafɩɩ n bɩr gʊɔɔ bire ʊ.

¹²Bala, Zuuba mɩm ɩ gʊɔɔ tɩrgɔɔ wɔɔ ra, an n’a tʊr karɛ ŋ yaadarɛ ma,

bɩ, a bɩr yɛm gʊɔɔ kʊ ŋ n’a bʊnyaa bam nɔ wɔɔ ma y.

Ʊ yɛ fɩryɩrɛ ma

¹³Bɩ, k’awɔɔ ɩ zi mɩŋŋa barɛ ŋʊarɛ, nka n n’a bʊnyaa barɛ awɔɔ nɩ? ¹⁴Baa k’awɔɔ fɩr yɩ zi mɩŋŋa barɛ tɔ ma, k’a dɔ a ʊ, mimbirenyɩnta m. A bɩ nyi ba gʊɔɔ nɩ y, b’a b’a heer kɔ y. ¹⁵Bɩ, k’a Krista da ʊ a heer nɔ ʊ, a m Zuuba. K’a banka mɩŋŋa, k’an bɩr yɩrɛ ɩ ʊ, kʊ gʊɔɔ awɔɔ lar taaheerlɛ k’awɔɔ n ta m bɩ mim ma, k’a a da ma a jɩ dɩnda ŋ nɩ mɩŋŋa. ¹⁶Bɩ, k’a jɩ dɩnda ŋ nɩ bʊgʊ-bʊgʊdabaa m, kan daʊrɛ kɩ m, a bɩr noom hu m. Maam bɩ, gʊɔɔ kʊ ŋ n’awɔɔ tɔ zarm, ŋn’a bʊnyaa hɩrɛ awɔɔ tarɛ ma Krista Zuure tɔ ma rɔ wɔɔ nyannɩ bɩrɛ. ¹⁷Bala, k’awɔɔ ɩ fɩr yɩm zi mɩŋŋa k’awɔɔ n’a bam tɔ ma, kʊ Woso hɔɔnhɔ m maam nɩ, naa jɩra fɩr yɩ a bʊnyaa barɛ tɔ ma m.

Krista zɛ bɩ nɩ wɔɔ bʊmbɔm

¹⁸Krista mɩŋŋa ga wɔɔ mimbʊnyaarɔ tɔ ma, ga a ʊ gallɛm deem taan…, a mɩŋŋa tɩrga, an bɔkarɛ an ga gʊɔɔ bʊnyaarɔ tɔ ma, a ba a ʊ maam, k’a wɔɔ gaa a bʊr wɔɔ m Woso zi, n y’a zɛ gər a mɛsim nɔ ʊ, Sɛnt-Ɛspri n a ya, an mɩsɩrbaa ka ʊ. ¹⁹Sɛnt-Ɛspri bɩ do a nyɩnta m biisi, an Woso lemim pa da m. Pa bɩ da a ʊ, bayɛrɛzannɔ kʊ ŋ nyɩnta ʊ, ŋnɩ gɩnga, ŋnɩ gəənokʊ ʊ, lɔnnɔcɛ ʊ rɔ wɔɔ m. ²⁰Bayɛrɛzannɔ wɔɔ duro dɔmɩm ʊ bɩ, Woso bʊr a ma, Nowee nɩ kɔɔlʊʊ bɩ bam. Gʊɔɔ kʊ ŋ bʊmbɔrɛ yɩ dɔmɩm bɩ do ʊ rɔ wɔɔ bɩ gʊta y, ŋ gʊaa sinnyə ŋnɩ bɔlɛm yɩ hi bɩ wakatɩ ʊ. ²¹Dɩɩtaa sɔ naa, bʊmbɔrɛ bɩ yɩ awɔɔ ʊ ncɩnaaʊ sɔ, batɛm kʊ wɔɔ n’a sim bɩ bɔkʊrɛ m minno wɔɔ duro m. Batɛm bɩ bɩr wɔɔ mɛ dintim sʊrgɔrɛ y, bɩ, a ka a nawʊm wɔɔ nɩ hɔɔn bɔŋ ʊ, k’ʊ zu Woso ʊ kan noom hu kɩ. Bʊmbɔrɛ bɩ yɩ wɔɔ nawʊrɛ ncɩnaaʊ, kʊ Yeezuu Krista a mɩm bɔ ʊ gəəno bire ʊ bɩ tɔ ma. ²²A a busu, an ta arzana ʊ, an nɩ nyɩntam Woso bɩsɩ ra, malɛɛkarɔ haay kan lɛɛsoʊzannɔ kɩ, paŋŋazannɔ kɩ haay nɩ zure a lɛ ʊ.

Ʊ ʊ gʊ mimbʊnyaa barɛ ma

¹Ncɩnaaʊ bɩ, kʊ Krista fɩr yɩ a mɛsim nɔ ʊ bɩ, awɔɔ sɔ, k’a naa da a heer ʊ a dɔ a ʊ, gʊaa k’a fɩr yɩ a mɛsim nɔ ʊ bɩ, a a gʊ mimbʊnyaa ma. ²A n a sa dɩɩtaa ma, k’a dɔmɩm k’a gɔɔta awɔɔ m k’a mɩsɩrbaa ba tara burə ʊ bɩ sa, a Woso hɔɔnhɔ ba m, a b’a sa a lɛtaamarɔ bʊnyaarɔ kʊ gʊɔɔ nɩ ŋ ŋʊam bɩ ba nɩ y. ³Nyɩnta k’awɔɔ ʊ biisi, a bawosodonno mɩsɩrbaa ba bɩ, a kɔ an bʊrbɔ kɛɛrɛ. Dɔmɩm bɩ do ʊ bɩ, ta awɔɔ nawʊm yɔka, a n nɩ lɛtaamarɔ bʊnyaarɔ m, a n nɩ bɛɛ mim waasɩ, a n nɩ hɔ bɩm waasɩ, a n nɩ hɔ mim waasɩ, a n nɩ yaa dam *wosobaawɔnnɔ m zibʊnyaabarɛ nɔ ʊ. ⁴Kɛɛrɛ naa, bawosodonno kʊ ŋ nɩ dɩgarɛ awɔɔ ma, awɔɔ bɩr a mɩŋŋɔɔ kam zibʊnyaarɔ nɔɔn duro barɛ ʊ kan a kɩ dɔ rɔ wɔɔ, ŋn’a dɔ kʊ bɔ an n’a hɩrɛ y, am naa, ŋn’awɔɔ sʊnsɔ wʊm. ⁵Bɩ, Woso zɛm bɩ ŋ da lɛ ʊ, ŋn’a zi bʊnyaarɔ wɔɔ mim nyɩ bɔ ʊ, Woso mɩŋŋa a banka an nya, k’a gʊɔɔ mɩsɩɩrɔ kan gəəno kɩ dʊdɔ ka. ⁶Naa y’a ka, n nɩ lemim nyɩnta bɩ pa da gʊɔɔ kʊ ŋ gɩnga rɔ wɔɔ m sɔ, n brɔɔ dʊdɔ ka, amba n nɩ gʊaa woo… dʊdɔ kam bɩ m, lemim bɩ pa n y’a da ŋ nɩ, kʊ ŋ nɩ mɩsɩrbaa ba Sɛnt-Ɛspri tɔ ma, amba Woso n mɩsɩr bɩ m.

Gʊaa biyəə n zi ba ganwʊrɛ

k’an ta m bɩ m

⁷Hɔ haay nyarɛ a zɔ, maam bɩ, gʊaa biyəə n bʊr a ma, a b’a zu a ʊ y, k’a a da ma, a bɩr yaa dam. ⁸A n lɛ da haay bɩ, k’a bɩr kʊ ŋʊam paan…, bala, ŋʊarɛ ɩ hɔ kam mimbʊnyaa yɔɔgʊ ra.

⁹K’a saana ba kʊ m, b’a bɩ kukur ba y. ¹⁰Woso ganwʊrɛ y’a hʊnhɔ ka awɔɔ gʊaa biyəə ʊ, gʊaa biyəə n zi ba a ganwʊrɛ bɩ m, a mim daahan tɔ ma. K’a ba ncɩnaaʊ, amba zibəənyɩnɔ mɩŋŋɔɔ m, a nyasʊ Woso barka k’a nɩ zi hɔka bam bɩ m mɩŋŋa. ¹¹Kʊ gʊaa ɩ lemim padarɛ ganwʊrɛ nɩ, k’an Woso lemim pa da. Gʊaa k’a nɩ daahan zi bam bɩ, k’an a ba paŋŋa kʊ Woso a ka ʊ bɩ m. K’a ba ncɩnaaʊ, kʊ Woso n lɛbɔʊrɛ yɩ hɔ haay woo… nɔ ʊ, Yeezuu Krista tɔ ma. Woso mɩŋŋa y’a so lɛbɔʊrɛ ʊ, kan paŋŋa kɩ dɔmɩm haay, Amina.

Heernyɔɔ fɩryɩrɛ nɔ ʊ

¹²M gʊaasɩbɔɔ, a bɩ dɩga fɩr k’awɔɔ n’a yɩm a sɩrakarɛ tɔ ma naa ma, ɩ ʊ, mim daŋŋada nɩ, a zɛ kədə y. ¹³K’a a heer nyɔɔ, bala a na awɔɔ ʊ Krista ma a fɩryɩrɛ nɔ ʊ, maam bɩ, k’a lɛbɔʊrɛ b’a hɩnka, awɔɔ nyɩntam heernyɔɔ nɔ ʊ sɔ. ¹⁴Kʊ gʊɔɔ y’awɔɔ sʊnsɔ wʊm Krista tɔ ma, mimbirenyɩnta m kan awɔɔ kɩ, bala, Woso Ɛspri kʊ lɛbɔʊrɛ Ɛspri m b’ɩ kan awɔɔ kɩ. ¹⁵A b’a ka, awɔɔ gɔsɩ n fɩr yɩ, k’a gər zɛ, gɛɛ k’a kom ba, gɛɛ k’a zi bʊnyaa ba, gɛɛ k’a a lɛ zu gʊɔɔ minno ʊ tɔ ma y. ¹⁶Bɩ, k’awɔɔ gʊaa ɩ fɩr yɩm, kʊ kristagʊaa m bɩ tɔ ma, nyannɩ b’a zɛ y, k’an a lɛ bɔ Woso ʊ denter, kʊ n n’a birm kristagʊaa bɩ tɔ ma. ¹⁷Dɔmɩm kʊ Woso n nɩ dʊdɔ kam b’a ku, a sa a nawʊm a gʊɔɔ wɔɔ ma. Bɩ, k’a sa a nawʊm wɔɔ ma, gʊɔɔ kʊ ŋ n sɩra ka Woso lemim nyɩnta b’ʊ rɔ wɔɔ, kʊ dʊdɔ bɩ ŋ ku, a yɩrɛ ŋ ma lɔ? ¹⁸Wosoci b’a hɩ, a ʊ:

Gʊɔɔ tɩrgɔɔ bʊmbɔrɛ yɩm,

B’a wer nyɩntaŋ ʊ.

K’a maam, a nyɩntam gʊɔɔ bʊnyaarɔ kan mimbʊnyaabənno kɩ ma lʊnlɔ?

¹⁹Ncɩnaaʊ bɩ, gʊɔɔ kʊ ŋ nɩ fɩr yɩm Woso hɔɔnhɔ ma rɔ wɔɔ, ŋnɩ gɔɔta ŋn’a mɩŋŋɔɔ to a darɛzaa Woso wɔ ʊ, ŋnɩ bɩr a mɩŋŋa bam. Taalɛrazaa m Woso m.

Dʊndɔrɛ kristagʊɔɔ lɛɛzannɔ tɔ ma

¹Lɛɛzannɔ kʊ ŋ nɩ kan awɔɔ kɩ rɔ wɔɔ, mɔɔ ʊ kʊ m ŋ dʊndɔ. Lɛɛzaa m mɔɔ m sɔ am ŋ hɔ bɩ m, bɩ Krista fɩryɩrɛrɔ wɔɔ kasɛtɩzaa m mɔɔ m sɔ, mɔɔ nyɩntam lɛbɔʊrɛ k’a n’a hɩnkam b’ʊ sɔ. Hɔ kʊ mɔɔ ʊ kʊ m a hɩ ŋ nɩ bɩ ba n nɩ: ²K’a nyasʊ bakʊ kʊ Woso a da awɔɔ wɔ ʊ bɩ m mɩŋŋa. A bɩ dɔ ma pakra nɩ y, k’a dɔ ma heernyɩnta m, amba Woso lɛ n taa bɩ m. A bɩ dɔ bakʊ bɩ ma sɔ, k’a busoo yɩ y, bɩ k’a dɔ ma kan a heer kɩ haay. ³A b’a so gʊɔɔ kʊ Woso ŋ da a wɔ ʊ rɔ wɔɔ ʊ paŋŋa nɩ y, bɩ k’a a tɔ ʊ k’a hɔbaarɔ n bɩr mɩŋŋa, kʊ gʊɔɔ n a da ma ŋnɩ ŋ sa. ⁴K’awɔɔ ba ncɩnaaʊ, kʊ dundonno jɩtaarɛ bɩ bɩ bʊr, a y’a kam awɔɔ n nyɩnta a lɛbɔʊrɛ k’a bɩr a zarm bɩ nɔ ʊ.

Dʊndɔrɛ kristagʊɔɔ wɔɔ tɔ ma

⁵Gʊɔɔ kʊ ŋ gɔɔta rɔ wɔɔ, k’a yɛ lɛɛzannɔ wɔɔ ma. Awɔɔ haay k’a bɩr mɩŋŋazerle m kan kʊ kɩ, bala, Wosoci b’a hɩ, a ʊ:

Woso bɩr yɛm mɩŋŋabusurezannɔ wɔɔ ma y,

b’a y’a barka bɩ kam mɩŋŋazerlezannɔ ʊ.

⁶K’a mɩŋŋɔɔ zer Woso taa, a paŋŋa ɩ lɛ da haay, maam bɩ, a y’awɔɔ gore daŋ ʊ a dɔmɩm ʊ. ⁷K’a minno kʊ ŋ n’awɔɔ kɔm nɔ wɔɔ haay da a wɔ ʊ, bala, a mɩŋŋa ɩ nyasʊrɛ awɔɔ m.

⁸A b’a zu a ʊ y, k’a dundo a zi. Sʊtaana awɔɔ jɩm b’ɩ kumkum lɛɛ ma am poozaa hɔ bɩ m, an nɩ baa dam, an n’a kam gʊaa ma k’a nyasʊ a bɩ. ⁹K’a a da a lɛ ʊ kɔɔkɔɔ, sɩrakarɛ nɔ ʊ, a dɔ a ʊ, awɔɔ fɩryɩrɛrɔ wɔɔ y’awɔɔ danyɩnɔ yɩm sɔ durnya b’ʊ jilli. ¹⁰Awɔɔ ɩ fɩr yɩm dɔmɩm poore nɔ ʊ, bɩ, Woso k’a a so barka do haay ʊ, an awɔɔ bir, k’awɔɔ n nyɩnta a lɛbɔʊrɛ k’a nyarɛ ba ʊ nɔ ʊ, Krista zuure nɔ ʊ bɩ y’awɔɔ bankam fasɩ, an awɔɔ paŋŋa da ra, an a ka awɔɔ n jɩm kɔɔkɔɔ, hɔsɩ b’a darɛ awɔɔ ma y. ¹¹A y’a so paŋŋa ʊ dɔmɩm haay. Amina.

Meerbaa nyambʊrlɛ kan leersore kɩ

¹²Wɔɔ danyɩ Silas mɔɔ da ʊ, an ci poore naa gʊrsɩra ba, kʊ m a nyɔɔ awɔɔ ma. Mɔɔ ɩ dɩgam ma sɩrabarɛzaa sɩrakarɛ bɩ nɔ ʊ. Ci bɩ ba mɔɔ ʊ awɔɔ ma, kʊ m awɔɔ heer yo, kʊ m a hɩ a m paan… m ʊ, Woso barka denter b’awɔɔ n a nɔ ʊ naa, k’a gɔɔta a nɔ ʊ kɔɔkɔɔ. ¹³Gʊɔɔ kʊ Woso ŋ ba a gʊɔɔ rɔ wɔɔ sokʊma k’a nɩ *Babɩlɔnnɩ ʊ naa ʊ b’ɩ yaa darɛ a m. Mɔɔ nyɩ Markɩ ɩ yaa darɛ awɔɔ m sɔ. ¹⁴K’a yaa da kʊ m mɩŋŋa-mɩŋŋa danyɩbaa nɔ ʊ.

Bɩ, kʊ Woso laafɩɩ n bɩr kan awɔɔ haay k’a nɩ Krista nɔ ʊ rɔ wɔɔ kɩ.