1 Zaan

Ci lɛɛkarɛ hɔ kʊ

ZAAN

a ba

Zaan ciro wɔɔ

gasʊʊrɛ

Lɛɛkarɛ kristagʊɔɔ wɔɔ y’a hɩrɛ, ŋ ʊ: ciro kaakʊrɔ nɔɔn duro, Yeezuu Krista karɩndanyɩ deem k’a tɔ m Zaan yɩ ŋ gʊrsɩra ba, a bɩr a mɩŋŋa tɔ hɩm ciro wɔɔ ʊ y, a hɩ a nawʊrɛ a mɩŋŋa ma Gʊaagʊsire ciro wɔɔ nɔ ʊ. Ciro wɔɔ ba a ʊ, a gusimbaa dɔmɩm ʊ. Ɩ ʊ, Efɛɛzɩ Zaan nyɩnta ʊ an ciro wɔɔ ba ʊ.

Ci lɛɛkarɛ hɔ kʊ Zaan a ba bɩ

gasʊʊrɛ

Zaan bɩ, lɛɛkarɛ ci bɩ ba a ʊ, kristagʊɔɔ ma. A lɛ n taa k’a ŋ paŋŋa da ra kʊ ŋ nɩ mɩsɩrbaa ba Woso kan Krista kɩ zɛkʊra nɔ ʊ, kʊ mɩsɩrbaa bɩ do n nyɩnta kʊ ŋʊarɛ zibəə nɔ ʊ. Kʊ ŋ nɩ dundo a zi sɔ kan ŋʊaar hɔdɩndarɛrɔ kɩ, bala, gʊɔɔ ɩ nyɩnta ŋn’ɩ ŋʊaar hɔ dɩndam lɛɛ haay ʊ. Mim k’a n’a hɩrɛ an lɛ da b’ɩ yɩrɛ ɩ ʊ, lemim nyɩnta bɩ sɩra k’a n’a hɩm bɩ bɩr a nʊkʊrɛ y, b’a kʊ yɩm haay.

Kasɛtɩzaa paan… mindində

¹Hɔ k’a nyɩnta ʊ a sɩŋŋɩda ʊ, wɔɔ n a ma, wɔɔ n a yɩ, ʊ mɩm m. Wɔɔ n dɩga a sɩɩ…, ʊ ʊ wɔ da ma, an nɩ mɩsɩrbaa Lemim dɩndam bɩ, ²bala, mɩsɩrbaa bɩ do a hɩnka wɔɔ n a yɩ, ʊ n’a kasɛtɩ karɛ, ʊ nɩ mɩsɩrbaa k’a nyarɛ ba ʊ bɩ mim hɩrɛ awɔɔ m. A ɩ nyɩnta Zɩ zi, an b’a hɩnka wɔɔ m. ³Hɔ kʊ wɔɔ yɩ, ʊ a ma sɔ bɩ, wɔɔ y’a pa darɛ awɔɔ m sɔ, k’awɔɔ n a da ma, a a zɛ kʊ ra kan wɔɔ kɩ. Bɩ wɔɔ ʊ zɛ kʊ ra kan Zɩ kɩ kan a Nyɩ Yeezuu Krista kɩ. ⁴Naa wɔɔ n’a gʊrsɩra barɛ awɔɔ ma, kʊ wɔɔ heernyɔɔ bɩ n yɩ gʊta.

Ʊ ta Woso lɛɛgure nɔ ʊ

⁵Lemim kʊ wɔɔ ma zi, ʊ n’a pa darɛ awɔɔ m bɩ ba n nɩ. Woso bɩ, lɛɛgure m. Monsigə ba zi fɩɩgaa y. ⁶Kʊ wɔɔ hɩ, wɔɔ ʊ: «Wɔɔ ʊ zɛ kʊ ra kan kɩ», ʊ bɔkarɛ, ʊ nɩ tam monsigə ʊ, ŋʊaar wɔɔ n’a barɛ, bɩ wɔɔ bɩr sɩra barɛ y. ⁷Bɩ, kʊ wɔɔ ɩ tam lɛɛgure ʊ, amba a mɩŋŋa nɩ lɛɛgure nɔ ʊ bɩ nɩ, wɔɔ ʊ zɛ kʊ ra kan ʊ muno kɩ, b’a Nyɩ Yeezuu bɩ ma bɩ nɩ wɔɔ hubɔm wɔɔ mimbʊnyaarɔ haay nɔ ʊ. ⁸Bɩ kʊ wɔɔ ʊ: «Mimbʊnyaa ba wɔɔ ma y», bra wɔɔ n’a barɛ ʊ mɩŋŋɔɔ m, sɩra bɩ wɔɔ nɔ ʊ y. ⁹Kʊ wɔɔ ʊ mimbʊnyaarɔ bɔ ʊ lɛ ma Woso taa, a wɔɔ mimbʊnyaarɔ sugur kam wɔɔ ʊ, an tɩrgabaawar haay gʊ wɔɔ ma, bala, sɩrazaa m b’a tɩrga sɔ. ¹⁰Kʊ wɔɔ hɩ, wɔɔ ʊ: «Mimbʊnyaabənno bɛɛ m wɔɔ nɩ», a ba wɔɔ ʊ ŋʊaarzaa, b’a meerbaa ba wɔɔ nɔ ʊ y.

¹M nyɩnzɛɛnnyɩnɔ, naa gʊrsɩra ba mɔɔ ʊ awɔɔ minto, k’a bɩ mimbʊnyaa ba y. Bɩ, kʊ gʊaa mimbʊnyaa ba, wɔɔ mimbankarɛzaa ta ʊ Zɩ taa, Yeezuu Krista k’an tɩrga bɩ m. ²Bala, a mɩŋŋa ɩ nyɩnta mannɩhɔ wɔɔ mimbʊnyaarɔ minto. Bɩ wɔɔ hɔɔ wɔɔ minto bɛɛ m bala y, durnyazannɔ haay hɔɔ minto m sɔ.

K’a zu muno ŋʊarɛ lɛ b’ʊ

³Kʊ wɔɔ zu a lɛrɔ wɔɔ ʊ, wɔɔ dɔ wɔɔ ʊ, wɔɔ Woso dɔ. ⁴Gʊaa k’a hɩ, a ʊ: «Mɔɔ dɔ», b’a bɩr zure a lɛrɔ wɔɔ ʊ, ŋʊaarzaa m, sɩra b’a nɔ ʊ y. ⁵Bɩ kʊ gʊaa a meerbaa bɩ si, kan sɩra kɩ, a zaa Woso ŋʊa paan…. Bɩ minto bɩ, wɔɔ dɔ wɔɔ ʊ, ʊ ɩ kan kɩ. ⁶Kʊ gʊaa a ʊ, a ɩ gɔɔtam kan kɩ, pakra m k’a mɩŋŋa m zu zaa kʊ Yeezuu a sa b’ʊ.

⁷M gʊaasɩbɔɔ, lɛ daa bɛɛ mɔɔ n’a gʊrsɩra barɛ awɔɔ ma y, lɛ gusire m, awɔɔ n ta m a sɩŋŋɩda ʊ. Lɛ gusire naa do, meerbaa k’awɔɔ ma bɩ m. ⁸Bɩ kan bɩ kɩ, lɛ daa mɔɔ n’a gʊrsɩra barɛ awɔɔ ma. Bɩ naa sɩra, kan Krista kɩ, kan awɔɔ kɩ sɔ. Bala, monsigə ɩ cenim, lɛɛgure denter paan… b’ɩ yɔm kaka. ⁹Gʊaa k’a ʊ, a ɩ lɛɛgure nɔ ʊ, an bɔkarɛ, an sɔ a danyɩ m bɩ, a gɔɔta, an nɩ monsigə ʊ tee…. ¹⁰Gʊaa k’a danyɩ ŋʊa b’ɩ lɛɛgure ʊ, bɩ hɔsɩ ba zi an b’a dam ma, an a ka an a gəm zɛ y. ¹¹Bɩ gʊaa k’a sɔ a danyɩ m bɩ, monsigə nɔ an ta ʊ. A n nɩ tam monsigə ʊ, b’a n a dɔ kʊ ta an nawʊm ka y. Bala, monsigə b’a mɩm ta.

¹²A gʊrsɩra mɔɔ n’a barɛ awɔɔ ma, m nyɩnɔ ŋʊarɛrɔ, bala, awɔɔ a mimbʊnyaarɔ sugur yɩ, Yeezuu Krista tɔ minto. ¹³Zɩrɔ, a gʊrsɩra mɔɔ n’a barɛ awɔɔ ma, bala, awɔɔ Gʊaa k’a nyɩnta ʊ a sɩŋŋɩda ʊ bɩ dɔ. A gʊrsɩra mɔɔ n’a barɛ awɔɔ ma gʊɔɔ pooro, bala, awɔɔ bʊr *Bʊnyaabarɛzaa ra. ¹⁴A gʊrsɩra mɔɔ ba awɔɔ ma, m nyɩnɔ ŋʊarɛrɔ, bala, awɔɔ Zɩ dɔ. A gʊrsɩra mɔɔ ba awɔɔ ma, zɩrɔ, bala, awɔɔ Gʊaa k’a nyɩnta ʊ a sɩŋŋɩda ʊ bɩ dɔ. A gʊrsɩra mɔɔ ba awɔɔ ma, gʊɔɔ pooro, bala, awɔɔ paŋŋa ta ʊ, bɩ Woso lemim gɔɔta awɔɔ ʊ, a bʊr *Bʊnyaabarɛzaa ra.

¹⁵A bɩ durnya ŋʊa, kan hɔ k’a n’a nɔ ʊ bɩ kɩ y. Kʊ gʊaa durnya ŋʊa, Zɩ ŋʊarɛ b’a nɔ ʊ y. ¹⁶Bala, hɔ haay k’a nɩ durnya nɔ ʊ bɩ, mɛsim lɛtaama, mɩm lɛtaama bʊnyaa, mɩŋŋabusure arzaka nɔ ʊ, naa haay n a to Zɩ zi y. A to a ʊ durnya nɔ ʊ. ¹⁷Durnya ɩ cenim kan a lɛtaamarɔ kɩ. Bɩ, gʊaa k’a nɩ Woso hɔɔnhɔ bam bɩ gɔɔtam dɔmɩm k’a nyarɛ ba ʊ bɩ nɔ ʊ.

Krista jɩm

¹⁸M nyɩnɔ ŋʊarɛrɔ, dɔmɩm jɛzaa a ku. Awɔɔ ma, n n a pa da, n ʊ, Krista jɩm b’ɩ zɛm. A n a sɩŋŋɩda sa naa ma, Krista jɩnnɔ wɔɔ a hɩnka gʊta. Naa minto y’a ka, wɔɔ n’a dɔ wɔɔ ʊ, dɔmɩm jɛzaa a ku. ¹⁹A to ŋ y’a ʊ wɔɔ zi, bɩ ŋ n nyɩnta wɔɔ gʊɔɔ y. Kʊ nyɩnta ŋ y’a ʊ wɔɔ gʊɔɔ, ŋ gɔɔtam kan wɔɔ kɩ. Bɩ, pakra m, kʊ gʊaa haay n a dɔ paan… a ʊ, wɔɔ gʊɔɔ bɛɛ m gʊaa haay nɩ y. ²⁰K’awɔɔ nɩ, Krista bɩ *Sɛnt-Ɛspri ka awɔɔ ʊ, b’awɔɔ haay, awɔɔ sɩra dɔ kɛɛrɛ. ²¹Mɔɔ n a gʊrsɩra ba awɔɔ ma, mɔɔ ʊ, awɔɔ n sɩra dɔ y, awɔɔ dɔ. B’awɔɔ dɔ sɔ, a ʊ, ŋʊaar n a to sɩra nɔ ʊ y. ²²Nka m ŋʊaarzaa? Kʊ bɩ m gʊaa k’a nɩ bɩsɩ karɛ, a ʊ, Yeezuu bɩ Krista bɛɛ nɩ y. Krista jɩm bɩ, gʊaa k’a bɩsɩ ka Zɩ kan Nyɩ kɩ ma m. ²³Gʊaa niŋŋə haay k’a bɩsɩ ka Nyɩ bɩ ma, a ba kan Zɩ bɩ kɩ sɔ y. Gʊaa k’a a bɔ a lɛ ma, a ʊ, a Nyɩ bɩ dɔ bɩ, a ɩ kan Zɩ bɩ kɩ sɔ. ²⁴Bɩ k’awɔɔ nɩ, kʊ lemim niŋŋə k’awɔɔ ma a sɩŋŋɩda ma bɩ n gɔɔta awɔɔ heer ʊ. Kʊ lemim niŋŋə k’awɔɔ ma bɩ gɔɔta awɔɔ heer ʊ, awɔɔ gɔɔta sɔ, an nɩ Nyɩ kan Zɩ kɩ nɔ ʊ. ²⁵Lerbɔrɛ niŋŋə kʊ Zɩ a bɔ wɔɔ m bɩ m mɩsɩrbaa k’a nyarɛ ba ʊ bɩ m.

²⁶Naa gʊrsɩra ba mɔɔ ʊ awɔɔ ma gʊɔɔ kʊ ŋ lɛ n taa k’awɔɔ nyʊnnyɔɔ rɔ wɔɔ minto. ²⁷K’awɔɔ nɩ, Sɛnt-Ɛspri k’awɔɔ si Krista bɩ zi bɩ, a gɔɔta awɔɔ heer ʊ. Pakra bɛɛ m kʊ n nɩ hɔ dɩnda a m dɔ y. Sɛnt-Ɛspri nɩ hɔ haay dɩndarɛ awɔɔ m. A hɔdɩndarɛ bɩ sɩra m, ŋʊaar bɛɛ y. K’a gɔɔta Krista nɔ ʊ, amba a hɔ dɩnda awɔɔ m bɩ m.

²⁸Ncɩnaaʊ bɩ, m nyɩnɔ ŋʊarɛrɔ, k’a gɔɔta Krista nɔ ʊ, k’a b’a hɩnka, k’ʊ heer n bɩr kookoo, kʊ wɔɔ bɩ nyannɩ yɩ a taa, ʊ ʊ ba ma laatʊ a zɛrɛ hinni ʊ y. ²⁹K’awɔɔ dɔ, a ʊ, Krista tɩrga bɩ, k’a dɔ sɔ a ʊ, gʊaa k’a nɩ tɩrgabaa zi barɛ, Woso nyɩ m paan….

Woso nyɩnɔ

¹K’a dɩga ŋʊarɛ gʊta kʊ Woso a ka wɔɔ ʊ, an nɩ wɔɔ birm a nyɩnɔ bɩ ma. Bɩ, sɩra m, Woso nyɩnɔ m wɔɔ m. Bɩ y’a ka, durnya b’a dam ma, an wɔɔ dɔ y. Bala, durnyazannɔ wɔɔ n Woso dɔ y. ²M gʊaasɩbɔɔ, naa ma kɛɛrɛ bɩ, Woso nyɩnɔ m wɔɔ m. Bɩ, nyɩnta kʊ wɔɔ n nɩ zɛm b’a ʊ hɔ niŋŋə bɩ, bɩ n a hɩnka cɩna y. Wɔɔ dɔ wɔɔ ʊ, k’a b’a hɩnka, wɔɔ zɛm bɩ bɔ kʊ ʊ kan kɩ. Bala, k’a lɔ, wɔɔ y’a yɩrɛ. ³Gʊaa niŋŋə k’an ta taaheerlɛ naa do m Krista nɔ ʊ bɩ, a ɩ dintim gʊrɛ a ma, k’a yɩ mɩŋŋa amba Yeezuu m mɩŋŋa bɩ m. ⁴Gʊaa niŋŋə haay k’a mimbʊnyaa ba, kaanm a nawʊm Woso lɛ m, bala, mimbʊnyaa bɩ, kaanm lɛ m m. ⁵Awɔɔ dɔ a ʊ, Yeezuu bʊr k’a bɩ mimbʊnyaarɔ gʊngʊ wɔɔ ma, bɩ mimbʊnyaa ba ma y. ⁶Gʊaa niŋŋə haay k’a gɔɔta kan kɩ, a bɩr mimbʊnyaa bam dʊntɔ y. Gʊaa niŋŋə haay k’a nɩ mimbʊnyaa bam, a n a yɩ, b’a n a dɔ sɔ y.

⁷M nyɩnɔ ŋʊarɛrɔ, k’a bɩ yɛ kʊ gɔsɩ n’awɔɔ nyʊnnyɔɔ y. Gʊaa k’a nɩ tɩrgabaa zi bam bɩ tɩrga, amba Yeezuu n tɩrga bɩ m. ⁸Gʊaa k’a nɩ mimbʊnyaa bam, Sʊtaana gʊaa m. Bala, mimbʊnyaabər m Sʊtaana m a sɩŋŋɩda ʊ. Bɩ minto y’a ka Woso Nyɩ bɩ n bʊr k’a bɩ Sʊtaana zibəəro zaar ba. ⁹Gʊaa niŋŋə haay kʊ Woso a yɩ bɩ bɩr mimbʊnyaa bam dʊntɔ y, a mɩsɩrbaa hɔdo bɩ y’a nɔ ʊ, a b’a dam ma, an mimbʊnyaa ba dʊntɔ y, bala Woso y’a yɩ. ¹⁰Naa minto y’a ka n nɩ Woso nyɩnɔ dɔ, n nɩ ŋ bɔ kʊ zi kan Sʊtaana hɔɔ kɩ. Gʊaa k’a bɩr tɩrgabaa zi barɛ y, b’a bɩr a danyɩ ŋʊam sɔ y, Woso gʊaa bɛɛ y.

Muno ŋʊarɛ

¹¹Kʊ sɩra m, lemim niŋŋə k’awɔɔ ma a sɩŋŋɩda ma bɩ n naa: Ʊ kʊ ŋʊa. ¹²A b’a ba am Kayɛn hɔ bɩ nɩ y, kʊ *Bʊnyaabarɛzaa gʊaa m bɩ, a a danyɩ zɛ gər. Bɩ, bɔ minto an a zɛ? K’a zibəəro wɔɔ nyɩnta bʊnyaa, a danyɩ bɩ zibəəro wɔɔ n nyɩnta tɩrga bɩ m. ¹³Kʊ durnya sɔ awɔɔ m, m danyɩnɔ, a bɩ zɛ kədə y. ¹⁴Wɔɔ dɔ wɔɔ ʊ, bɔ wɔɔ ʊ zɛ nɔ ʊ, ʊ bʊr mɩsɩrbaa nɔ ʊ, kʊ wɔɔ ʊ danyɩnɔ ŋʊa bɩ minto. Gʊaa k’a bɩr a danyɩ ŋʊam bɩ gɔɔta zɛ nɔ ʊ. ¹⁵Gʊaa niŋŋə haay k’a sɔ a danyɩ m bɩ, gərzer m. B’awɔɔ dɔ a ʊ, gərzer deem taan… ba mɩsɩrbaa k’a nyarɛ ba ʊ bɩ nɩ a zi y. ¹⁶Hɔ k’a a ka wɔɔ n ŋʊarɛ k’an hɔ niŋŋə bɩ dɔ ba n nɩ: Yeezuu a mɩsɩrbaa ka wɔɔ minto. A a ga m sɔ, wɔɔ n ʊ mɩsɩrbaa ka, ʊ danyɩnɔ minto. ¹⁷Kʊ gʊaa ɩ durnya naa do arzakarɔ m, an a danyɩ yɩ cicir nɔ ʊ, b’a n a da han y, Woso ŋʊarɛ bɩ y’a bam lɔ k’a bɩr a zaa ʊ?

¹⁸M nyɩnɔ ŋʊarɛrɔ, ʊ bɩ ŋʊarɛ ba lɛmindɔ m kan meerbaa kɩ nɔ ʊ y. Ʊ kʊ ŋʊa, zibəə barɛ kan sɩra kɩ nɔ ʊ. ¹⁹Naa minto, wɔɔ y’a dɔrɛ ʊ ʊ, ʊ ɩ sɩra nɔ ʊ, bɩ wɔɔ heerkoodəbaa yɩm zi. ²⁰Bala, kʊ wɔɔ heer ɩ mim kam wɔɔ ra, Woso gʊtabaa lɛ da wɔɔ heer la, a hɔ haay dɔ. ²¹M gʊaasɩbɔɔ, kʊ wɔɔ heer bɩr mim kam wɔɔ ra, wɔɔ heer koodə Woso zi. ²²Kʊ wɔɔ hɔ yɛ han, wɔɔ y’a yɩrɛ, bala, wɔɔ a lɛrɔ wɔɔ si, ʊ nɩ hɔ k’a nɔ yɩ bɩ barɛ. ²³Ba a lɛ n na: K’ʊ sɩra ka a Nyɩ Yeezuu Krista bɩ tɔ ʊ, k’ʊ kʊ ŋʊa amba a lɛ ka wɔɔ ʊ bɩ m. ²⁴Gʊaa k’a n’a lɛrɔ wɔɔ sire, a ɩ kan Woso kɩ, Woso nɩ kan kɩ sɔ. Wɔɔ dɔ wɔɔ ʊ, a ɩ kan wɔɔ kɩ, Sɛnt-Ɛspri k’a ka wɔɔ ʊ bɩ minto.

Sɛnt-Ɛspri kan zinə k’a nɩ Krista jɩnnɔ ʊ bɩ kɩ

¹M gʊaasɩbɔɔ, a bɩ sɩra ka gʊɔɔ haay kʊ ŋ ʊ, a ɩ Sɛnt-Ɛspri m nɔ wɔɔ ʊ y. K’a ŋ ka a lɛɛ a dɩga ŋ ma, kʊ Sɛnt-Ɛspri ŋ nɩ ta m paan… gɛɛ hɔ vanta m gɛ. Bala, ŋʊaarlɛsinnɩsorazannɔ gʊta y’a kərgu durnya ra. ²Hɔ niŋŋə k’a n’a karɛ awɔɔ m Sɛnt-Ɛspri bɩ dɔ bɩ ba n nɩ: Gʊaa k’a bɔ a lɛ ma, a ʊ, Yeezuu Krista a ba gʊaa bɩ, a ɩ Sɛnt-Ɛspri m. ³Bɩ gʊaa haay k’a bɩr Yeezuu Krista kasɛtɩ karɛ ncɩnaaʊ bɩ, bɩ zaa b’a Sɛnt-Ɛspri nɩ y. Zinə k’a nɩ Krista jɩm nɔ ʊ bɩ m, awɔɔ n a ma, n n’a hɩrɛ n ʊ, a ɩ zɛm bɩ. B’a lee ku durnya nɔ ʊ kaka. ⁴Awɔɔ kʊ Woso nyɩnɔ n’awɔɔ m bɩ, m nyɩnɔ ŋʊarɛrɔ, awɔɔ paŋŋa bʊr ŋʊaarlɛsinnɩsorazannɔ wɔɔ duro ra. Bala, Sɛnt-Ɛspri k’a nɩ kan awɔɔ kɩ bɩ paŋŋa lɛ da zinə k’a nɩ kan durnyazannɔ kɩ bɩ ra. ⁵Durnyazannɔ n ŋ mɩ, ŋn’ɩ durnya mim dɩndam, durnya n’a tʊr karɛ ŋ ma. ⁶Wɔɔ, Woso gʊɔɔ m wɔɔ m. Gʊaa k’a Woso dɔ bɩ, a tʊr an n’a kam wɔɔ ma. Gʊaa kʊ Woso gʊaa bɛɛ bɩ bɩr a tʊr kam wɔɔ ma y. Bɩ, wɔɔ nɩ Sɛnt-Ɛspri k’an sɩra bɩ dɔm ma kan zinə k’a nɩ Krista jɩm nɔ ʊ, an nɩ ŋʊaar bam bɩ kɩ.

Ŋʊarɛ bɩ, a to a ʊ Woso zi

⁷M gʊaasɩbɔɔ, ʊ kʊ ŋʊa, bala, ŋʊarɛ bɩ, a to a ʊ Woso zi. Gʊaa niŋŋə haay k’a a mim ŋʊa Woso y’a yɩ, a Woso dɔ. ⁸Gʊaa k’a bɩr a mim ŋʊarɛ, a n Woso dɔ y, bala, Woso bɩ ŋʊarɛzaa m. ⁹Woso ŋʊarɛ k’a hɩnka wɔɔ bire ʊ bɩ ba n nɩ: Woso a Nyɩ deem nyɔɔ durnya ʊ, kʊ wɔɔ n mɩsɩrbaa ba a minto. ¹⁰Ba a ŋʊarɛ bɩ n na: Wɔɔ bɛɛ ɩ Woso ŋʊa y, a ɩ wɔɔ ŋʊa. A y’a Nyɩ nyɔɔ, k’an bɩ nyɩnta mannɩhɔ wɔɔ mimbʊnyaarɔ minto. ¹¹M gʊaasɩbɔɔ, kʊ Woso wɔɔ ŋʊa ncɩnaaʊ, wɔɔ sɔ, wɔɔ ʊ ga m, ʊ kʊ ŋʊa. ¹²Gɔsɩ n Woso yɩ cɩna y. Kʊ wɔɔ kʊ ŋʊa, Woso ɩ kan wɔɔ kɩ, b’a ŋʊarɛ b’ɩ kan wɔɔ kɩ paan….

¹³Sɛnt-Ɛspri k’a a ka wɔɔ ʊ bɩ minto, wɔɔ dɔ wɔɔ ʊ, wɔɔ ɩ kan kɩ, an nɩ kan wɔɔ kɩ. ¹⁴Bɩ wɔɔ yɩ, wɔɔ n’a kasɛtɩ karɛ, wɔɔ ʊ, Woso a Nyɩ bɩ nyɔɔ k’an bɩ yɩ durnya bʊmbɔrɛzaa. ¹⁵Gʊaa niŋŋə haay k’a bɔ a lɛ ma, a ʊ, Yeezuu Krista bɩ Woso Nyɩ nɩ, Woso ɩ gɔɔtam kan kɩ, an nɩ kan Woso kɩ. ¹⁶Bɩ wɔɔ, wɔɔ Woso ŋʊarɛ k’an ta m wɔɔ minto bɩ dɔ, wɔɔ sɩra ka naa ʊ sɔ. Woso bɩ, ŋʊarɛzaa m. Gʊaa k’a gɔɔta ŋʊarɛ nɔ ʊ, a zaa ɩ gɔɔtam kan Woso kɩ, Woso nɩ gɔɔtam kan kɩ. ¹⁷Bɩ minto y’a ka, ŋʊarɛ nɩ wɔɔ nɔ ʊ paan…, wɔɔ n n’ʊ dam ma, ʊ heerkoodəbaa yɩ dʊdɔkarɛ hinni ʊ. Bala, Yeezuu k’an hɔ niŋŋə bɩ, wɔɔ maam sɔ durnya naa do nɔ ʊ. ¹⁸Dabɔʊ ba ŋʊarɛ nɔ ʊ y. Bɩ ŋʊarɛ paan… ɩ lam nyibəə ra. Bala, nyibəə ɩ kan booti fɩryɩrɛ kɩ. Bɩ, gʊaa k’a nɩ nyi barɛ, ŋʊarɛ paan… b’a nɔ ʊ y.

¹⁹Kʊ wɔɔ nɩ, wɔɔ ɩ kʊ ŋʊam, bala, Woso ɩ lɛɛ ka an wɔɔ ŋʊa. ²⁰Kʊ gʊaa a hɩ a ʊ: «Mɔɔ ɩ Woso ŋʊam», an bɔkarɛ, an sɔ a danyɩ m, ŋʊaarzaa m. Sɩra m, gʊaa k’a bɩr a danyɩ k’a n’a yɩm bɩ ŋʊarɛ, a b’a dam ma, an Woso k’a bɩr a yɩm bɩ ŋʊa y. ²¹Ba lɛ kʊ Krista a ka wɔɔ ʊ bɩ n na: Gʊaa k’a nɩ Woso ŋʊam, k’an a danyɩ ŋʊa sɔ.

Kasɛtɩ kʊ Woso a ka

¹Gʊaa niŋŋə haay k’a sɩra ka a ʊ, Yeezuu bɩ Krista m, Woso nyɩ m. Gʊaa niŋŋə haay k’a Zɩ ŋʊa, a a Nyɩ ŋʊa sɔ. ²Hɔ k’a n’a hɩnkarɛ a ʊ, wɔɔ Woso nyɩnɔ ŋʊa bɩ ba n nɩ: Kʊ wɔɔ Woso ŋʊa, ʊ nɩ zure a lɛrɔ ʊ. ³Ba wɔɔ ŋʊarɛ kan Woso kɩ bɩ n na: Kʊ wɔɔ n a lɛrɔ si. B’a lɛrɔ wɔɔ, mɔr gorezaa bɛɛ y. ⁴Bala, gʊaa haay kʊ Woso y’a yɩ bɩ bʊr durnya ra. Hɔ k’a bʊr durnya ra bɩ, wɔɔ sɩrakarɛ m. ⁵Nka ɩ bʊr durnya ra? Kʊ bɩ m, gʊaa k’a sɩra ka, a ʊ, Yeezuu bɩ, Woso Nyɩ m.

⁶Yeezuu Krista ɩ bʊr durnya ʊ, an a hɩnka hi m kan ma kɩ. Hi bɛɛ m bala y, hi m kan ma kɩ. Bɩ, Sɛnt-Ɛspri n’a kasɛtɩ kam, bala, Sɛnt-Ɛspri m sɩra. ⁷Ŋ kaakʊ, ŋ n’a kasɛtɩ karɛ: ⁸Sɛnt-Ɛspri, hi kan ma kɩ. Bɩ ŋ kaakʊ rɔ wɔɔ kasɛtɩ deem ŋ n’a karɛ. ⁹Kʊ wɔɔ ɩ gʊɔɔ kasɛtɩ sire, Woso kasɛtɩ bɩ gʊtabaa lɛ da. Ba Woso kasɛtɩ bɩ n na: A kasɛtɩ ka a Nyɩ b’ʊ. ¹⁰Gʊaa k’a sɩra ka Woso Nyɩ b’ʊ, a ɩ kasɛtɩ naa do m a heer ʊ. Gʊaa k’a n sɩra ka Woso ʊ bɩ, Woso ba an nawʊm ŋʊaarzaa. K’a n sɩra ka kasɛtɩ kʊ Woso a ka a Nyɩ b’ʊ bɩ minto. ¹¹Ba kasɛtɩ bɩ n na: Woso mɩsɩrbaa k’a nyarɛ ba ʊ bɩ ka wɔɔ ʊ, bɩ mɩsɩrbaa bɩ do ɩ Nyɩ bɩ zi. ¹²Gʊaa k’a nɩ kan Nyɩ bɩ kɩ, a ɩ mɩsɩrbaa m. Gʊaa k’a ba kan Woso Nyɩ bɩ kɩ, a ba mɩsɩrbaa bɩ do nɩ y.

Mɩsɩrbaa k’a bɩr nyam bɩ dɔrɛ

¹³Naa haay gʊrsɩra ba mɔɔ ʊ awɔɔ ma, awɔɔ k’a nɩ sɩra kam Woso Nyɩ b’ʊ bɩ, k’awɔɔ n a dɔ a ʊ, a ɩ mɩsɩrbaa k’a nyarɛ ba ʊ bɩ m. ¹⁴Hɔ k’a nɩ wɔɔ heer bam kookoo Woso zi bɩ ba n nɩ: Kʊ wɔɔ hɔ niŋŋə yɛ han an zu a hɔɔnhɔ ʊ, a y’a tʊr kam wɔɔ ma. ¹⁵Bɩ kʊ wɔɔ dɔ, ʊ ʊ, kʊ bɔ wɔɔ yɛ han a y’a tʊr kam wɔɔ ma bɩ, wɔɔ dɔ wɔɔ ʊ, wɔɔ ɩ hɔ kʊ wɔɔ yɛ bɩ m.

¹⁶Kʊ gʊaa a danyɩ yɩ, an nɩ mimbʊnyaa barɛ, mimbʊnyaa bɩ do bɩr tam zɛ bɩncɛ ʊ, k’an yaa da. Woso mɩsɩrbaa kaŋ ʊ, kʊ mimbʊnyaa bɩ do bɩr tam zɛ bɩncɛ ʊ paan… y. Bala, mimbʊnyaa ta ʊ, an nɩ tam zɛ bɩncɛ ʊ. Mimbʊnyaa bɩ do minto bɛɛ mɔɔ ʊ, a yaa da y. ¹⁷Zibəə bʊnyaa haay bɩ, mimbʊnyaa m. Bɩ, mimbʊnyaa haay bɛɛ nɩ tam zɛ bɩncɛ ʊ y. ¹⁸Wɔɔ dɔ wɔɔ ʊ, gʊaa niŋŋə haay kʊ Woso a yɩ bɩ bɩr mimbʊnyaa bam dʊntɔ y. Bala, Woso Nyɩ b’ɩ dɔm ma, *Bʊnyaabarɛzaa bɩr heer bam ma y. ¹⁹Wɔɔ dɔ wɔɔ ʊ, Woso gʊɔɔ m wɔɔ m, bɩ durnya haay jilli ɩ *Bʊnyaabarɛzaa wɔ ʊ. ²⁰Bɩ wɔɔ dɔ sɔ wɔɔ ʊ, Woso Nyɩ bʊr, an bɩ wɔɔ hɔɔn gu, k’ʊ Woso paan… bɩ dɔ. Bɩ Woso paan… Nyɩ Yeezuu Krista nɔ wɔɔ n ta ʊ. A m Woso paan…, a m mɩsɩrbaa k’a nyarɛ ba ʊ bɩ. ²¹M nyɩnɔ ŋʊarɛrɔ, a b’a ka a *wosobaawɔnnɔ wɔɔ da ʊ y.