1 Korɛntɩ zannɔ

Ci lɛɛkarɛ hɔ kʊ Pol a ba

KORƐNTƖ ZANNƆ

ma

Ci lɛɛkarɛ hɔ kʊ Pol a ba Korɛntɩ zannɔ ma bɩ

gasʊʊrɛ

Pol ɩ ci bɩ ba, ciro si a ŋ ba Korɛntɩ zannɔ wɔɔ ma, gɛɛ, ŋ lɛ da naa m, bɩ, hɩɩyɔɔ nɩ gʊaasɩbabaa daa ci b’ʊ, hɩɩyɔɔ vantɔɔ wɔɔ, a brɔɔ mim dɩnda, bɩ brɔɔ nyaam. Ci bɩ ba a ʊ Korɛntɩ kristagʊɔɔ wɔɔ ma. Pol mɩŋŋa ɩ lemim nyɩnta pa da b’ʊ an brɔɔ sokʊma bɩ cɩnta.

Korɛntɩ nyɩnta kʊ gʊta biisi, an nɩ zamaa m gʊta, busoo kʊ m dɔmɩm bɩ do ʊ sɔ. Korɛntɩ zannɔ wɔɔ nyɩnta ŋn’ɩ zum hɔdɩndarɛ do haay ʊ, kan yaadarɛ do haay kɩ, mɩsɩrbaa bʊnyaabənno m sɔ.

Ci bɩ ba a ʊ, bala kristagʊɔɔ wɔɔ nyɩnta, ŋn’ɩ nyaa bam kan kʊ kɩ, ŋn’a gʊngʊm. A hɩ a ʊ, k’a ŋ zɛ kʊ ra, k’a mɩsɩrbaa kʊ ŋ n’a bam Woso nɔ n yɩ ŋ la bɩ dɩnda ŋ nɩ sɔ. Ci bɩ nɔ ʊ bɩ, a yɩ m bɔm zaa ʊ kan mimbʊnyaabarɛ mim kɩ, an n’a hɩnkarɛ ŋ nɩ, a ʊ, ŋ nɩ ma Woso zaa bɩ ra. A ɩ harcɩntarɛ mim hɩm sɔ kan wosobaawɔnnɔ mannɩ hɔbɩrɛrɔ mim kɩ kan Sɛnt-Ɛspri ganwʊrɛrɔ mim kɩ, kristagʊɔɔ mɩmbɔʊrɛ mim kɩ, a muno ŋʊarɛ mim bɩ ka lɛɛ gʊta ci bɩ nɔ ʊ.

Pol ɩ yaa dam Korɛntɩ kristagʊɔɔ m

¹Mɔɔ mɩŋŋa Pol, Woso ɩ mɔɔ bir a hɔɔnhɔ nɔ ʊ kʊ m yɩ Krista Yeezuu zibəəzaa, mɔɔ m kan wɔɔ danyɩ Sɔstɛn kɩ m nɩ ci bɩ bam. ²A ba wɔɔ nawʊm Woso gʊɔɔ sokʊma k’a nɩ Korɛntɩ ʊ bɩ ma, gʊɔɔ kʊ Woso ŋ bɔ ʊ a hɔ Krista Yeezuu zɛkʊra nɔ ʊ rɔ wɔɔ, an ŋ bir kʊ ŋ nɩ mɩsɩrbaa mɩŋŋa ba rɔ wɔɔ, kan gʊɔɔ kʊ ŋ nɩ lɛɛ haay ʊ, ŋnɩ yaa dam wɔɔ Zuuba Yeezuu Krista m nɔ wɔɔ kɩ, Yeezuu mɩŋŋa m brɔɔ Zuuba, a m wɔɔ Zuuba sɔ. ³A yɛ wɔɔ nawʊm kʊ wɔɔ Zɩ Woso, kan wɔɔ Zuuba Yeezuu Krista kɩ m barka kan laafɩɩ kɩ ka awɔɔ ʊ.

⁴Mɔɔ ɩ yaa dam Woso m barka dɔmɩm haay awɔɔ tɔ ma, barka k’a ka awɔɔ ʊ Krista Yeezuu nɔ ʊ bɩ minto. ⁵Bala, a tɔ ma bɩ, awɔɔ Woso ganwʊrɛrɔ do haay yɩ, an lɛ da bɩ, awɔɔ ɩ lemim, kan hɔdɔrɛ kɩ ganwʊrɛrɔ m. ⁶A n ta ʊ sɔ bɩ, Krista kasɛtɩ bɩ paŋŋa yɩ awɔɔ zi, ⁷bɩ n a ka *Sɛnt-Ɛspri ganwʊrɛ sɩ n jɩra awɔɔ ma y, awɔɔ k’a nɩ dɔm wɔɔ Zuuba Yeezuu Krista hɩnkarɛ dɔmɩm ma rɔ wɔɔ. ⁸A mɩŋŋa n nɩ paŋŋa karɛ awɔɔ ʊ k’an ta an dɔmɩnnɔ nyarɛ ku, k’an bɩr yɩrɛ ɩ ʊ, hinni kʊ wɔɔ Zuuba Yeezuu Krista n nɩ zɛŋ ʊ bɩ, kʊ hɔsɩ minsi bɩ nyɩnta awɔɔ gʊr zi y. ⁹Woso k’a awɔɔ bir, k’awɔɔ m zɛkʊra yɩ kan a Nyɩ Yeezuu Krista kʊ wɔɔ Zuuba m bɩ kɩ bɩ, taalɛrazaa m.

Gʊngʊrɛ k’a nɩ Korɛntɩ kristagʊɔɔ sokʊma nɔ ʊ

¹⁰M danyɩnɔ, a yɛ mɔɔ nawʊrɛ awɔɔ han, wɔɔ Zuuba Yeezuu Krista tɔ ma, k’a kʊ ma, a b’a ka gʊngʊrɛ n nyɩnta awɔɔ bire ʊ y, k’a zɛ kʊ ra a bɩr hɔɔn deem m, kan hɔɔndarɛ deem kɩ m. ¹¹Bala, m danyɩnɔ, Kolowe gʊɔɔ a dɩnda mɔɔ m, ŋ ʊ, awɔɔ bɩr kʊ marɛ y. ¹²Hɔ kʊ mɔɔ ʊ kʊ m a hɩ bɩ ba n nɩ: Awɔɔ gʊaa biyəə y’a hɩrɛ a ʊ: «Pol gʊaa n mɔɔ m, naa zaa a ʊ, Apolɔs gʊaa n mɔɔ m, naa ʊ, Sefas gʊaa n mɔɔ m. Naa a ya, a ʊ, Krista gʊaa n mɔɔ m.» ¹³Krista a gʊngʊ ra? Pol n y’a wɔ gɔdarkʊra ma awɔɔ minto ra? Pol tɔ minto m n nɩ batɛm ka awɔɔ ʊ ra? ¹⁴Mɔɔ ɩ yaa dam Woso m barka, bala mɔɔ n batɛm ka awɔɔ gɔsɩ ʊ, kʊ Krispus kan Gayus kɩ bɛɛ y. ¹⁵Ncɩnaaʊ bɩ, awɔɔ gɔsɩ b’a dam ma an a hɩ a ʊ, mɔɔ batɛm ka a ʊ, m tɔ ra y. ¹⁶Mɔɔ batɛm ka Stefanas har gʊɔɔ ʊ sɔ, kʊ naa bɛɛ y, mɔɔ n batɛm ka gʊaa vanta ʊ m a dɔ y. ¹⁷Bala, Krista n mɔɔ nyɔɔ kʊ m bɩ batɛm ka y, mɔɔ nyɔɔ a ʊ kʊ m bɩ lemim nyɩnta pa da. Mɔɔ n yo mindɔrɛ ma m n’a pa bɩ darɛ y. A ba mɔɔ ʊ maam kʊ Krista gɔdarkʊra bɩ bɩ bɔ vam y.

Mindɔrɛ kan hɔɔzaabaa kɩ

¹⁸Gʊɔɔ kʊ ŋ nɩ nyaanɩm nɔ wɔɔ ɩ dɩgam lemim kʊ wɔɔ n’a pa dam, ʊ n’a hɩm, ʊ ʊ, Krista ga gɔdarkʊra ma bɩ ma hɔɔzaabaa lemim. Bɩ, kʊ wɔɔ kʊ wɔɔ bʊmbɔrɛ yɩ rɔ wɔɔ nɩ, Woso paŋŋa m gɔdarkʊra lemim bɩ m. ¹⁹Bala, n y’a gʊrsɩra ba Wosoci ʊ, n ʊ: «Mɔɔ mindɔrɛzannɔ mindɔrɛ zaar bam, m hɔɔntaʊrɛzannɔ hɔɔn zaar ba.» ²⁰Mindɔrɛzaa ɩ ka? Lɛrɔ karɩnsaamba ɩ ka? Her durnya naa do meerbaawaasɩzaa ɩ ka? Woso a ka durnya mindɔrɛ n a ba hɔɔzaabaa mim. ²¹Bala, Woso hɔɔn bɔ ʊ a mɩŋŋa mindɔrɛ nɔ ʊ, kʊ durnya b’a da ma an a dɔ durnya mindɔrɛ nɩ y, bɩ, k’a gʊɔɔ kʊ ŋ nɩ sɩra kam nɔ wɔɔ bʊmbɔ hɔɔzaabaa lemim padarɛ bɩ m. ²²Zɩɩfʊrɔ wɔɔ, a ka brɔɔ n nawʊm hoserlo ma, grɛkkɩrɔ wɔɔ n’a kam mindɔrɛ ma, ²³bɩ wɔɔ, Krista kʊ n y’a wɔ gɔdarkʊra ma bɩ wɔɔ n’a pa dam, zɩɩfʊrɔ ɩ dɩgam naa ma nyannɩ, do vantɔɔ gʊɔɔ nɩ dɩgam ma hɔɔzaabaa. ²⁴Bɩ, kʊ gʊɔɔ kʊ Woso ŋ bir lɔ wɔɔ nɩ, kʊ zɩɩfʊrɔ m, gɛɛ grɛkkɩrɔ nɩ, Krista kʊ wɔɔ n’a pa dam b’ɩ yɩrɛ ɩ ʊ, Woso paŋŋa m, bɩ Woso mindɔrɛ m sɔ. ²⁵Bala, hɔ k’a bɔ kʊ ʊ, ɩ ʊ, Woso hɔɔzaabaa m bɩ, hɔ bɩ do hɔɔntaʊrɛ lɛ da gʊɔɔ mindɔrɛ m, sɔ bɩ, hɔ k’a bɔ kʊ ʊ, ɩ ʊ, Woso paŋŋawar m bɩ, a paŋŋa lɛ da gʊɔɔ paŋŋa m.

²⁶M danyɩnɔ, k’a dɩga a mɩŋŋɔɔ ma mɩŋŋa k’a dɔ a ʊ, awɔɔ kʊ Woso a bir lɔ wɔɔ, awɔɔ barla, gʊɔɔ ba ʊ gʊta ŋnɩ mindɔrɛzannɔ durnya mɩm ʊ y, ŋnɩ paŋŋazannɔ sɔ y, ŋnɩ har wɩsɩ gʊɔɔ y. ²⁷Bɩ, hɔ kʊ hɔɔzaabaa m durnya ʊ bɩ, Woso bɩ sa, k’a nyannɩ da mindɔrɛzannɔ ma, hɔ kʊ paŋŋawar m durnya nɔ ʊ bɩ, Woso bɩ sa, k’a nyannɩ da hɔ k’a nɩ paŋŋa m bɩ ma. ²⁸Hɔ k’a bɩ zore an yaarsɩ durnya ʊ bɩ, hɔ k’a nyɔɔdʊ ba ʊ bɩ, Woso hɔ bɩ do sa, k’a nyaam hɔ kʊ gʊɔɔ nɩ dɩgam ma hɔ bɩ m, ²⁹kʊ gɔsɩ b’a da ma an a mɩŋŋa busu Woso lɛɛ y. ³⁰Woso mɩŋŋa tɔ ma m, awɔɔ m zɛkʊra yɩ kan Krista Yeezuu kɩ, a mɩŋŋa y’a ba wɔɔ mindɔrɛ k’a a to Woso zi, a ɩ wɔɔ ba tɩrga Woso mɩm ʊ, an n’a kam wɔɔ nɩ mɩsɩrbaa bam Woso tɔ ma, an nɩ wɔɔ bʊmbɔm mimbʊnyaa nɔ ʊ. ³¹Kʊ hɔ kʊ n y’a gʊrsɩra ba Wosoci b’ʊ bɩ n kʊ yɩ, n ʊ: «Gʊaa k’a ʊ, k’a lɛ bɔ a mɩŋŋa ʊ, a b’a lɛ bɔ a mɩŋŋa ʊ y, an a lɛ bɔ hɔ kʊ Zuuba a ba b’ʊ.

Lemim kʊ Pol a pa da Korɛntɩ ʊ

¹M danyɩnɔ, bʊr kʊ mɔɔ ʊ awɔɔ zi bɩ, mɔɔ n bʊr lɛmindɔrɛ m gɛɛ mindɔrɛ m kʊ m bɩ Woso kasɛtɩ bɩ ka awɔɔ ʊ y. ²Bala, mɔɔ hɔɔn bɔ ʊ, kʊ m bɩ hɔsɩ mim dɩnda awɔɔ zi b’ʊ, kʊ Yeezuu Krista mim bɛɛ y, an lɛ da bɩ a wɔ kʊ n y’a ʊ gɔdarkʊra ma bɩ mim m. ³Ncɩnaaʊ nɩ, mɔɔ n nyɩnta awɔɔ bire ʊ, paŋŋawar nɔ ʊ, dabɔʊ nɔ ʊ, kan mɛhinkəre kɩ. ⁴Mɔɔ meerbaa kan mɔɔ pa bɩ darɛ kɩ n nyɩnta lɛmindɔrɛ meerbaa nɔ ʊ y, bɩ nyɩnta ʊ Sɛnt-Ɛspri paŋŋa zibəə hɩnkarɛ nɔ ʊ. ⁵Nyɩnta a ʊ ncɩnaaʊ k’awɔɔ sɩrakarɛ bɩ bɩ yo gʊɔɔ mindɔrɛ ma y, bɩ k’an yo Woso paŋŋa ma.

Woso mindɔrɛ

⁶A n bɔkarɛ, mindɔrɛ paan… wɔɔ n’a dɩndam kristagʊɔɔ kʊ ŋ sɩrakarɛ yaa ka rɔ wɔɔ m. Mindɔrɛ naa do n a to durnya naa do nɔ ʊ, b’a n a to durnya paŋŋazannɔ kʊ ŋ nɩ b’a zaar bam nɔ wɔɔ zi y. ⁷Woso mindɔrɛ wɔɔ n’a dɩndam, hɔ k’a n dɔ biisi m, n n a nyaakʊm da, Woso mɩŋŋa ɩ nyɩnta an a cɩnta, bɩ ma bɩ durnya ba ʊ y, kʊ wɔɔ n bɩ nyɩnta a lɛbɔʊrɛ nɔ ʊ. ⁸Durnya naa do paŋŋazannɔ gɔsɩ n nyɩnta an a dɔ y, bala, k’a dɔ ŋ y’a ʊ, ŋ bɩ Zuuba k’a a so lɛbɔʊrɛ ʊ bɩ wɔm gɔdarkʊra ma y. ⁹Bɩ, amba n y’a gʊrsɩra ba Wosoci ʊ, n ʊ: «Hɔ kʊ gʊaa mɩm n a yɩ cɩna y, a tʊr n a ma cɩna y, hɔ kʊ gʊaa n a hɔɔn da ma cɩna y, hɔ bɩ do haay Woso a cɩnta gʊɔɔ kʊ ŋ n’a ŋʊam nɔ wɔɔ m.» ¹⁰Denter m, wɔɔ, Woso hɔ bɩ do hɩnka wɔɔ m Sɛnt-Ɛspri nɔ ʊ. Bala, Sɛnt-Ɛspri ɩ hɔ haay taa zɛm, baa hɔ kʊ Woso a nyaakʊm da paan… haay, a y’a taa zɛm sɔ. ¹¹Nka m nɩ gʊɔɔ barla, an gʊɔɔ mim dɔ? K’a maam, hɔɔn k’a nɩ kan kɩ bɩ m. Maam sɔ bɩ, hɔ k’a nɩ Woso gʊr zi bɩ, gɔsɩ b’a dam ma an a dɔ kʊ Woso Ɛspri bɛɛ y. ¹²Kʊ wɔɔ nɩ, wɔɔ n durnya ɛspri yɩ y, bɩ, Woso Ɛspri wɔɔ yɩ, kʊ wɔɔ n’ʊ da ma ʊ Woso barka ganwʊrɛrɔ wɔɔ dɔ. ¹³Bɩ, kʊ wɔɔ yɩ ŋ mim dɩndam, wɔɔ bɩr a dɩndam gʊaa mindɔrɛ nɩ y, bɩ, a dɩnda wɔɔ nawʊm Sɛnt-Ɛspri mindɔrɛ m, ʊ nɩ Woso hɔɔ jɩ dɩndam, Sɛnt-Ɛspri hɔdɩndarɛ m. ¹⁴Gʊaa k’a nɩ mɛsim hɔɔn m bala bɩ, a bɩr yɛm hɔ k’a a to Woso Ɛspri zi bɩ ma y. Hɔɔzaabaa m kan kɩ, a b’a dam ma an a jɩ ma y, bala, Woso Ɛspri n’a dam ma an a ka gʊaa n a dɔ. ¹⁵Bɩ gʊaa k’a nɩ Woso Ɛspri m bɩ, a ɩ hɔ haay dʊdɔ kam bɩ gɔsɩ b’a dʊdɔ karɛ y. ¹⁶Bala, n y’a da Wosoci ʊ, n ʊ: «Nka ɩ Woso hɔɔndarɛ dɔ, k’a hɔ dɩnda nɩ?» A n bɔkarɛ, wɔɔ, Krista hɔɔndarɛ wɔɔ n ta m.

Woso lemim padənno zibəə

¹M danyɩnɔ, kʊ mɔɔ nɩ, mɔɔ n wɔ ʊ m meer ba kan awɔɔ kɩ amba n tɩr a ba kan gʊɔɔ kʊ ŋ nɩ Woso Ɛspri m nɔ wɔɔ kɩ nɩ y, bɩ meer bɩ ba mɔɔ ʊ kan awɔɔ kɩ amba gʊɔɔ kʊ ŋ gɔɔta ŋn’ɩ durnya mɩsɩrbaa bam nɔ wɔɔ m, bala, awɔɔ gɔɔta a m banfinnirɔ Krista sɩrakarɛ nɔ ʊ. ²Nyonhi mɔɔ ka awɔɔ ʊ, hɔbɩrɛ gorezaa bɛɛ y, bala, awɔɔ b’a dam ma cɩna a hɔbɩrɛ gorezaa bɩ y. Baa kan dɩɩtaa dɔmɩm kɩ, awɔɔ b’a dam ma a hɔbɩrɛ gorezaa bɩ y. ³Bala, awɔɔ gɔɔta an nɩ durnya mɩsɩrbaa bam. Jɩmbaa kan nyaa kɩ y’awɔɔ bire ʊ, naa bɩr a hɩnkarɛ a ʊ, awɔɔ gɔɔta an nɩ durnya mɩsɩrbaa bam, an nɩ tam am gʊaa k’an Woso dɔ m naa? ⁴K’awɔɔ gʊaa deem tɩr a hɩ, a ʊ: «Pol gʊaa m mɔɔ m», gʊaa vanta ʊ: «Apolɔs y’a so mɔɔ ʊ», naa k’awɔɔ n’a bam naa, gʊaa k’an Woso dɔ zibəə bɛɛ awɔɔ n’a bam naa? ⁵Nka m Apolɔs nɩ? Nka m Pol nɩ? Zibəənyɩnɔ m, Woso nɩ ŋ nyɔɔ awɔɔ ma, k’awɔɔ n sɩra ka Krista ʊ, n gʊaa biyəə a zi ba amba Zuuba a da ʊ bɩ m. ⁶Apolɔs kan mɔɔ kɩ, bɔ wɔɔ ʊ kʊ ʊ kan danwunno kɩ. Mɔɔ ɩ Woso lemim bɩ duu, Apolɔs n hi da ra, Woso y’a ka an ma. ⁷Ncɩnaaʊ bɩ, hɔsɩ bɛɛ m gʊaa k’a n’a duum bɩ nɩ y, hɔsɩ bɛɛ m gʊaa k’a nɩ hi dam la bɩ m sɔ y, Woso k’a ka hɔ bɩ nɩ mam b’ɩ lɛ da haay. ⁸Gʊaa k’a n’a duum kan gʊaa k’a nɩ hi dam la bɩ kɩ, ŋ hɔdeem, bɩ, gʊaa biyəə y’a yawʊra yɩm an a ga kʊ ʊ kan a mɩŋŋa zibəə kɩ. ⁹Bala, zi wɔɔ n’a bam kan kʊ kɩ Woso zibəə bɩ nɔ ʊ, b’awɔɔ m hɔsɩra kʊ Woso n’a wʊm.

Awɔɔ m cɛ kʊ Woso n n’a dɔ m. ¹⁰Amba cɛdɔrɛzaa mɩŋŋa m bɩ, mɔɔ cɛ bɩ jɩr cɩnta an a ga kʊ ʊ kan ganwʊrɛ kʊ Woso a ka mɔɔ ʊ bɩ kɩ, gʊaa vanta m bɔkarɛ an n’a dɔm lɛ. Bɩ, kʊ gʊaa biyəə n dundo a zi kan zaa k’a sa an nɩ cɛ bɩ dɔm nɩ m bɩ kɩ. ¹¹Kʊ cɛ bɩ jɩr bɩ nɩ, gʊaa b’a dam ma, an cɛjɩr vanta da fɩɩga y, cɛjɩr k’an ta ʊ hɔɔ tee… bɩ nɩ gɔɔtarɛ a bɩncɛ ʊ, cɛjɩr bɩ do, Yeezuu Krista m. ¹²Bɩ, kʊ gʊaa cɛ dɔ cɛjɩr bɩ rɛ sarma mɔr m, gɛɛ wanzurfu m, gɛɛ jaa tɔzannɔ m, gɛɛ gɔ m, gɛɛ bur m, gɛɛ haaʊ m, ¹³Woso y’a zaa zibəə makra barɛ an dɩga a dʊdɔkarɛ hinni ʊ. Woso gʊaa biyəə zibəə makra bam sɛ m, sɛ nɩ gʊaa biyəə zibəə k’an lʊnlɔ hɩnkarɛ, bɩ gʊaa biyəə n n’a zibəə mɩŋŋabaa gɛɛ a bʊnyaabaa dɔm ma. ¹⁴Gʊaa kʊ sɛ bɩ b’a zibəə bɩm bɩ, bɩ zaa y’a zibəə ganwʊrɛ yɩm. ¹⁵Bɩ gʊaa kʊ sɛ bɩ n’a zibəə bɩm bɩ, a b’a zibəə ganwʊrɛ yɩrɛ y, a mɩŋŋa bʊmbɔrɛ yɩm, bɩ, bɔ a nawʊm kʊ ʊ, ɩ ʊ, bɔ a ʊ sɛ nɔ ʊ.

¹⁶Awɔɔ n a dɔ a ʊ, Wosocɛ n’awɔɔ m, Woso Ɛspri bɩ nɩ kan a kɩ ra? ¹⁷Kʊ gʊaa Wosocɛ bɩ zaar ba, Woso bɩ zaa zaar bam sɔ. Bala, Wosocɛ bɩ Woso hɔ m, bɩ cɛ bɩ do bɩ n’awɔɔ m.

¹⁸Gɔsɩ bɩ bra ba a mɩŋŋa nɩ y. K’awɔɔ gʊaa deem ʊ, a hɔɔn ka amba durnya naa do hɔ bɩ nɩ, k’a n’a ba hɔɔzaa k’an bɔkarɛ an hɔɔn ka. ¹⁹Bala, durnya naa do mindɔrɛ bɩ, hɔɔzaabaa m Woso mɩm ʊ. Amba n y’a gʊrsɩra ba Wosoci b’ʊ sɔ, n ʊ: «Woso ɩ mindɔrɛzannɔ kum hɔɔnkarɛ zi kʊ ŋ n’a bam bɩ nɔ ʊ.» ²⁰N y’a ya, n n a gʊrsɩra ba sɔ, n ʊ: «Zuuba mindɔrɛzannɔ hɔɔndarɛrɔ dɔ. A a dɔ a ʊ, ŋ nyɔɔdʊ ba ʊ y.» ²¹Ncɩnaaʊ bɩ, gɔsɩ b’a lɛ bɔ a mɩŋŋa ʊ, gʊɔɔ tɔ ma y, bala, awɔɔ hɔ m hɔ haay m. ²²Kʊ Pol m, gɛɛ Apolɔs m, gɛɛ Sefas m, awɔɔ hɔɔ m, kʊ durnya m gɛɛ mɩsɩrbaa m, gɛɛ zɛ m, kʊ her-her dɔmɩm naa m, gɛɛ bootirɔ dɔmɩnnɔ m, woo… naa awɔɔ hɔ m. ²³Bɩ, k’awɔɔ nɩ, Krista y’a so awɔɔ ʊ, Woso n a so Krista ʊ.

Kristazibəəzannɔ mim

¹A a ga m, kʊ gʊɔɔ n a dɔ ŋ ʊ, mɔɔ kan Apolɔs kɩ bɩ, Krista zibəənyɩnɔ m wɔɔ m, Woso n a minno k’a ŋ nyaakʊm da biisi bɩ da wɔɔ wɔ ʊ, kʊ wɔɔ n ŋ dɩnda gʊɔɔ m. ²Kʊ n hɔ da gʊaa wɔ ʊ k’a n dɩga a mim ma, hɔ kʊ n’a kam ma k’a zaa bɩ n a ba kɛɛrɛ bɩ, sɩrabarɛ m. ³Bɩ kʊ mɔɔ nɩ, hɔsɩ bɛɛ m kan mɔɔ kɩ k’awɔɔ mɔɔ dʊdɔ yar, gɛɛ gʊɔɔ vantɔɔ mɔɔ dʊdɔ yar y. Mɔɔ bɩr m mɩŋŋa dʊdɔ yarlɛ m zim sɔ y. ⁴Sɩra m, mɔɔ n kʊrɔma yɩ m heer ʊ an nɩ mɔɔ kɔrɛ y, bɩ naa bɛɛ n’a hɩnkarɛ a ʊ, mim ba mɔɔ ma wa. Gʊaa k’a nɩ mɔɔ dʊdɔ kam bɩ, Zuuba m. ⁵Bɩ minto bɩ, a bɩ lɛɛ ka a gɔsɩ dʊdɔ ka y, k’a to kʊ Zuuba n a bɔ an bʊr, k’a b’a bɔ an bʊr, a hɔ gaam hɔ k’a nyaakʊm da monsigə ʊ ra, an bɔ hɔ haay kʊ gʊɔɔ n ta ŋ nɩ a nɔ ʊ rɔ wɔɔ m garga ra. Maam bɩ, Woso y’a lɛ bɔm gʊaa biyəə ʊ, amba a a ga m bɩ m.

Korɛntɩ zannɔ mɩŋŋabusure mim

⁶M danyɩnɔ, awɔɔ daahan tɔ ma m, mɔɔ n naa dɩnda, m makra sa Apolɔs kan mɔɔ kɩ ma, k’awɔɔ n wɔɔ hɔbaa sa, a b’a mɩŋŋɔɔ busu a cem hɔ kʊ n y’a gʊrsɩra ba Wosoci b’ʊ bɩ han y. Awɔɔ gɔsɩ bɩ yo gʊaa vanta ma k’a a mɩŋŋa busu, a gʊaa vanta gore bɔ ʊ y. ⁷Bala, gʊaa ra, nka y’a ka ɩbɩɩ m lɛ da ɩ muno nɩ? Bɔ ɩbɩɩ yɩ ɩ zim k’a ka bɛɛ n y’a ʊ ɩbɩɩ ʊ? Bɩ k’a ka n y’a ʊ ɩbɩɩ ʊ, bɔ m, ɩ n’ɩ mɩŋŋa busurɛ ɩ ʊ, a yɩ ɩ ʊ ɩ zim nɩ? ⁸Ʊn’hʊʊn…, awɔɔ ɩ hɔ haay m kaka an bʊrbɔ, hɔnyɩzannɔ n’awɔɔ m, awɔɔ a ba cinno, bɩ cinno bɛɛ m wɔɔ nɩ y. A ŋʊa mɔɔ nawʊm k’awɔɔ n’a ba cinno paan…rɔ, kʊ wɔɔ m nyɩnta cinno sɔ kan awɔɔ kɩ. ⁹Mɔɔ hɔɔndarɛ nɔ ʊ, wɔɔ kʊ wɔɔ m kristazibəəzannɔ wɔɔ, Woso bɩ, wɔɔ da ʊ gʊaa haay jɛ ʊ, gʊɔɔ nɩ dɩgam wɔɔ ma. Bɔ wɔɔ ʊ kʊ ʊ kan gʊɔɔ kʊ n yɩ ŋ dʊdɔ yar n nɩ tarɛ ŋ nɩ k’a yaa ŋ zɩnzɛ rɔ kɩ. Ɩ ʊ wɔɔ nyɔɔ n y’a ʊ saa, am hɔɔnɩbɩɩrɔ hɔ bɩ m durnya haay mɩm ʊ, malɛɛkarɔ nɩ dɩgam wɔɔ ma, gʊɔɔ nɩ dɩgam wɔɔ ma sɔ. ¹⁰Hɔɔzannɔ n wɔɔ m, Krista kʊ wɔɔ n’a pa dam bɩ minto. B’awɔɔ, mindɔrɛzannɔ n’awɔɔ m k’awɔɔ a zɛ kʊ ra kan Krista kɩ bɩ tɔ ma. Paŋŋawarzannɔ n wɔɔ m, awɔɔ m paŋŋazannɔ, n y’awɔɔ gore daŋ ʊ, bɩ n yɩ wɔɔ gore bɔŋ ʊ. ¹¹A n ta an wakatɩ naa do ku naa, wɔɔ gɔɔta ʊ nɩ fɩr yɩm, nɔ m kan mɩsɩ kɩ m, huu jɩra wɔɔ ma, gʊɔɔ ɩ fɩr kam wɔɔ ma, wɔɔ ba ʊ mɩŋŋɔɔ har nɩ y, lɛɛ wɔɔ n’a sam tee…. ¹²Zi wɔɔ n’a bam kɔɔkɔɔ k’ʊ lɛɛmaa hɔ yɩ, ʊ a bɩ. Kʊ gʊɔɔ wɔɔ sʊnsɔ wʊ, bɩ wɔɔ ŋ barka da ʊ. Kʊ gʊɔɔ ɩ fɩr kam wɔɔ ma, bɩ wɔɔ yɛ fɩryɩrɛ bɩ ma. ¹³Kʊ gʊɔɔ y’a bʊnyaa hɩm wɔɔ ma, bɩ wɔɔ meerbaa nyɩnta ba kan ŋ kɩ. Kan a her kɩ naa, n gɔɔta n nɩ dɩgam wɔɔ ma ɩ ʊ, durnya gumə m wɔɔ m, ɩ ʊ, durnya dintim m wɔɔ m.

Lɛ kʊ Pol n ta m

¹⁴Mɔɔ n hɔ kʊ mɔɔ gʊrsɩra ba naa ʊ naa ba, kʊ m awɔɔ da nyannɩ ʊ y. A ba mɔɔ ʊ, kʊ m awɔɔ bɔ zaa ʊ, bala, mɔɔ nyɩnɔ n’awɔɔ m, m n’awɔɔ ŋʊam. ¹⁵Baa k’awɔɔ karɩnsaambɔɔ yɩ tisi-tisi Krista nɔ ʊ, awɔɔ zɩ bɩ hɔka y, a deem. Mɔɔ n’awɔɔ zɩ, bala, mɔɔ ɩ lɛɛ ka m lemim nyɩnta bɩ pa da awɔɔ m, awɔɔ n sɩra ka Yeezuu Krista ʊ. ¹⁶Naa minto bɩ, awɔɔ dʊndɔ mɔɔ nawʊm, k’a mɔɔ hɔbaa sa. ¹⁷Mɔɔ lɛ taa k’awɔɔ n mɔɔ hɔbaa sa, bɩ minto m, mɔɔ n Timote nyɔɔ awɔɔ ma, k’an bɩ mɩsɩrbaa kʊ mɔɔ n’a bam Krista zuure nɔ ʊ bɩ zaarɔ tɔ da awɔɔ nɔ ʊ, amba mɔɔ n’a dɩndam lɛɛ haay ʊ, kristagʊɔɔ sokʊmarɔ haay m bɩ m. K’a dɔ a ʊ, Timote bɩ mɔɔ nyɩ m am awɔɔ hɔ bɩ m sɔ, mɔɔ n’a ŋʊam, an a kʊsɩ mɔɔ ma. ¹⁸Awɔɔ gʊɔɔ gɔsɩnnɔ a mɩŋŋɔɔ busu, ŋn’a gɩngarɛ ŋ ʊ, mɔɔ bɩ zɛm bɩ bʊr awɔɔ zi b’ʊ y. ¹⁹Bɩ, kʊ Zuuba yɛ, mɔɔ zɛrɛ awɔɔ zi b’ʊ zɔɔ, bɩ mɩŋŋabusurezannɔ wɔɔ meerbaarɔ bɛɛ mɔɔ nɩ m kam ma kʊ m a ma y, bɩ, m ka mɔɔ nawʊm ma kʊ m a dɔ kʊ ŋ yɩ paŋŋa m gɛ. ²⁰Bala, Woso cirbəə bɩ, meerbaarɔ mim bɛɛ y, zi paŋŋazaa k’a n’a bam bɩ mim m. ²¹N kara awɔɔ lɛ n taa? Awɔɔ lɛ n taa kʊ mɔɔ n bʊr a zi bara m m wɔ ʊ kʊ m nyaa ba kan a kɩ gɛɛ, kʊ m bʊr a zi ŋʊarɛ m kan nyɩntabaa kɩ nɩ?

Jaandarɛ mim

¹Mɔɔ ma n n’a dɩndam lɛɛ kar ʊ, n ʊ, gʊaa ɩ jaan da awɔɔ barla, bɩ gʊɔɔ kʊ kristagʊɔɔ bɛɛ m nɔ wɔɔ bɩ yɛrɛ ŋn’ɩ jaandarɛ naa do lɔɔ da y, k’an bʊnyaa maam-maam bɩ tɔ ma. A dɩnda n nawʊrɛ, n ʊ, awɔɔ gʊaa deem nɩ kan a zɩ lʊ kɩ. ²A ga a wʊm k’awɔɔ heer n a zar, a nyi ka mimbʊnyaa k’an awɔɔ bire ʊ bɩ minto, a gʊaa k’a naa ba bɩ bɔ a zi, an bɔkarɛ, awɔɔ bɩ to an n’a mɩŋŋɔɔ busum. ³Mɔɔ ba b’ʊ kan awɔɔ kɩ y, bɩ mɔɔ heer ɩ kan awɔɔ kɩ, ncɩnaaʊ bɩ, mɔɔ gʊaa k’a mim naa do ba bɩ dʊdɔ yar, ɩ ʊ b’ʊ mɔɔ n ta ʊ kan awɔɔ kɩ. ⁴K’awɔɔ b’a so kʊ ma k’a mim naa do dɩnda, mɔɔ heer nyɩntam kan awɔɔ kɩ, wakatɩ bɩ do ʊ bɩ, k’a gʊaa bɩ do dʊdɔ yar Zuuba Yeezuu tɔ kan a paŋŋa kɩ m. ⁵K’a gʊaa bɩ do da Sʊtaana wɔ ʊ, k’a mɛsim n a zaar ba, k’a nyi bɩ n a da ma an bʊmbɔrɛ yɩ hinni kʊ Zuuba n nɩ zɛŋ ʊ b’ʊ.

⁶Awɔɔ n a ga m hɔɔ, a a mɩŋŋɔɔ busu y. N ʊ: «Nyʊnyɔɔ poore tɔkkɛ ɩ nyisi derm haay.» Awɔɔ n bɔɔr naa do dɔ ra? ⁷Naa tɔ ma bɩ, k’a mimbʊnyaa haay k’ɩ ʊ nyʊnyɔɔ gusire m bɩ bɔ a bire ʊ, k’a a da ma, a yɩ mɩŋŋa-mɩŋŋa ɩ ʊ, nyisi daa kʊ n n nyʊnyɔɔ da ma bɩ m. Bala, sɩra nɔ ʊ, Woso awɔɔ hu bɔ, Yeezuu Krista zɛ bɩ tɔ ma. Yeezuu Krista bɔ kʊ ʊ kan sinnyɛɛm kʊ n tɩr a zɛ mannɩ pakkɩ cibsa ma bɩ kɩ. ⁸Ʊ ʊ pakkɩ cibsa bɩ bɩ, bɩ, ʊ b’a bɩ bur kʊ nyʊnyɔɔ gusire n ta ma bɩ nɩ y. Nyʊnyɔɔ gusire bɩ do bɔ kʊ ʊ, ɩ ʊ, mimbʊnyaabarɛ m kan mɩsɩrbaa bʊnyaa barɛ kɩ. Bɩ, ʊ ʊ cibsa bɩ bɩ bur kʊ n n nyʊnyɔɔ da ma m, naa k’a hɩ a ʊ, heer hu nɔ ʊ, sɩra nɔ ʊ.

⁹Ci kʊ mɔɔ nyɩnta m a ba awɔɔ ma bɩ nɔ ʊ bɩ, mɔɔ hɩ awɔɔ m mɔɔ ʊ, a b’a zɛ kʊ ra kan jaandər kɩ y. ¹⁰Durnyazannɔ kʊ jaandənno m, mɩnyɔɔzannɔ m, ŋnɩ konno, ŋn’ɩ yaa dam *wosobaawɔnnɔ m nɔ wɔɔ, brɔɔ bɛɛ mɔɔ ʊ a b’a zɛ kʊ ra kan ŋ kɩ y. Kʊ gʊaa ʊ, a b’a lɛ dam nawɔnnɔ ʊ, pakra m k’an bɔ durnya ʊ, kʊ n bɛɛ m a wer ta ʊ. ¹¹Ayy… durnyazannɔ wɔɔ bɛɛ mɔɔ hɩ ŋ ma y, bɩ gʊaa k’a ʊ danyɩ n a mɩ Krista zuure nɔ ʊ, an bɔkarɛ, jaandər m, gɛɛ mɩnyɔɔzaa, gɛɛ an nɩ yaa dam wosobaawɔnnɔ m, gɛɛ tɔzarlɛzaa, gɛɛ bɛɛmirewaasɩzaa, gɛɛ hɔyɔrɛzaa bɩ. Bɩ zaa mɔɔ hɩ ma, baa kʊ hɔbɩrɛ m, a b’a zɛ kʊ ra kan kɩ y. ¹²Mɔɔ bɛɛ n nɩ gʊɔɔ kʊ kristagʊɔɔ bɛɛ nɩ ŋ mɩ rɔ wɔɔ dʊdɔ yarlɛ y. B’awɔɔ a ga m, a gʊɔɔ kʊ ŋ n’awɔɔ sokʊma nɔ ʊ rɔ wɔɔ dʊdɔ yar. ¹³Kʊ durnyazannɔ wɔɔ nɩ, Woso n nɩ brɔɔ dʊdɔ yarm. K’a hɔ kʊ Wosoci b’a hɩ bɩ ba, a a hɩ, a ʊ: «K’a la gʊaa k’a n’a bʊnyaa bam bɩ ra a bɔ a barla.»

Danyɩnɔ dʊdɔ ba kan kʊ kɩ mim

¹A a ba lɔ, k’awɔɔ gʊaa deem ɩ mim m kan a mim kɩ, ta a tɩr a ʊ durnya dʊdɔkənno zi kʊ ŋ nɩ dʊdɔ bɩ ba, a lɔ a bɩr mim bɩ dam wosogʊɔɔ wɔɔ wɔ ʊ, kʊ ŋ n’a dɩnda? ²Awɔɔ n a dɔ a ʊ, wosogʊɔɔ wɔɔ n nɩ zɛm bɩ durnya dʊdɔ ka ra? Bɩ, k’awɔɔ n nɩ zɛm bɩ durnya dʊdɔ ka, bɔ m awɔɔ bɩr a dam ma an nɩ minno poorero nɔɔm dɩndarɛ? ³Awɔɔ n a dɔ a ʊ, wɔɔ zɛm bɩ malɛɛkarɔ dʊdɔ ka ra? Bɩ, bɔ m kɛɛrɛ wɔɔ bɩ her mɩsɩrbaa naa minno dʊdɔ karɛ? ⁴Kan naa kɩ haay, kʊ minno nɔɔn duro b’a da ʊ, b’awɔɔ gʊɔɔ kʊ kristagʊɔɔ bɩr dɩgarɛ ŋ ma hɔsɩ a sokʊma nɔ ʊ rɔ wɔɔ sa a ŋ ba a dʊdɔkənno. ⁵Naa do nyannɩ ba awɔɔ m na? Awɔɔ k’a m danyɩnɔ Krista nɔ ʊ rɔ wɔɔ, a ɩ yɩrɛ ɩ ʊ, awɔɔ gʊaa deem taan… ba ʊ, mindɔrɛzaa, k’a mim banka awɔɔ barla ra? ⁶A n a ga m, kʊ danyɩnɔ n ta kʊ m dʊdɔkənno taa y, an lɛ da bɩ, a bɩ zore kʊ ŋ nɩ ta kʊ m basɩrakənno taa y. ⁷Sɩra nɔ ʊ, awɔɔ kʊrɔ ma maam-maam, ta k’awɔɔ nawʊm kʊ m dʊdɔkənno taa bɩ minto. Kʊ hɔ k’a bɩ tɩrga n y’a ba awɔɔ m, awɔɔ nɩ fɩr yɩrɛ, a jɩra ta b’ʊ bɩ m. Kʊ hɔ n n’a yɔrɛ awɔɔ m, awɔɔ n yɛ ma, k’a jɩra sɔ. ⁸Bɩ, awɔɔ bɩr yɛm hɔɔ nɔɔn duro ma y, awɔɔ mɩŋŋɔɔ nɩ hɔ k’a bɩ tɩrga bam, an nɩ koor bam, bɩ, naa ba awɔɔ nawʊrɛ a danyɩnɔ m. ⁹Awɔɔ dɔ mɩŋŋa a ʊ, gʊɔɔ kʊ ŋ n’a bʊnyaa bam nɔ wɔɔ bɩncɛ bɩ nyɩntam Woso cirbəə b’ʊ ra? A bɩ bra bɩmba a mɩŋŋɔɔ nɩ y. K’a dɔ a ʊ, jaandənno, kan wosobaawɔnnɔ yaadənno kɩ, muno lannɔbənno, muno zinobənno, yaarɔ wʊta kan kʊ kɩ zannɔ, ¹⁰konno, mɩnyɔɔzannɔ, bɛɛmirewaasɩzannɔ, gʊɔɔ tɔzarlɛzannɔ, hɔyonno, ŋ bɩncɛ bɩ nyɩntam Woso cirbəə b’ʊ y. ¹¹Awɔɔ gʊɔɔ gɔsɩnnɔ nyɩnta ŋn’ɩ hɔɔ nɔɔn duro bam biisi. Bɩ, Woso awɔɔ hu bɔ, an mimbʊnyaarɔ nɔɔn duro gʊ awɔɔ ma, an awɔɔ bɔ ʊ a hɔ, k’a a so awɔɔ ʊ, a awɔɔ ba tɩrga a mɩm ʊ, Zuuba Yeezuu Krista tɔ ma, Sɛnt-Ɛspri paŋŋa nɔ ʊ.

Hɔ kʊ sɩrakarɛzannɔ n a ga m,

ŋn’a ba y

¹²Gʊaa a da ma an a hɩ, a ʊ: «Zaa ta ʊ kʊ mɔɔ n hɔ haay woo… ba.» Sɩra m, bɩ, hɔ haay bɛɛ n mɩŋŋa gʊaa n’a bam wa. Mɔɔ m da ma, m a hɩ, m ʊ: «Zaa ta ʊ kʊ m hɔ haay ba.» Bɩ, mɔɔ b’a tom hɔ niŋŋə n mɔɔ ba a lɔ y. ¹³Gʊaa bɩ do a da ma an a hɩ sɔ, a ʊ: «Hɔbɩrɛ da n y’a ʊ gʊaa nɔ tɔ ma, n nɩ gʊaa nɔ da hɔbɩrɛ tɔ ma sɔ. Bɩ, Woso zɛm bɩ hɔbɩrɛ kan gʊaa nɔ bɩ kɩ zaar ba.» Sɩra m, bɩ, n nɩ wɔɔ mɛ bɩ da jaandarɛ minto y, wɔɔ mɛ bɩ, ta an a wʊ ʊ Zuuba hɔ, Zuuba n ta ʊ wɔɔ mɛ bɩ daahan minto. ¹⁴Bɩ, Woso k’a Zuuba Yeezuu mɩm bɔ ʊ bɩ, a wɔɔ mɩm bɔŋ ʊ sɔ a paŋŋa bɩ m. ¹⁵Awɔɔ n a dɔ a ʊ, awɔɔ mɛrɔ wɔɔ Krista mɛ vəŋŋəro m na? Mɔɔ yɛrɛ m Krista mɛ vəŋŋə sa m a ba lʊmɩŋŋahɛɛrɛzaa mɛ vəŋŋə ra? Ayy…, fɩɩga! ¹⁶Awɔɔ n a dɔ a ʊ, kʊ gʊaa a zɛ kʊ ra kan lʊmɩŋŋahɛɛrɛzaa kɩ, a zaa bɩ kan lʊ bɩ kɩ a ba n y’a ʊ deem na? Bala, Wosoci a hɩ a ʊ: «Ŋ hɩɩya haay a ba gʊaa deem.» ¹⁷Bɩ, gʊaa k’a a zɛ kʊ ra kan Zuuba kɩ bɩ, a a ba ɛspri deem kan kɩ. ¹⁸Naa minto bɩ, k’a a si jaandarɛ lɛɛ. Mimbʊnyaarɔ vantɔɔ kʊ gʊaa nɩ ŋ bam nɔ wɔɔ n a so a mɛ ʊ jilli y. Bɩ, jaandarɛzaa bɩ, mimbʊnyaa an n’a barɛ a mɛ bɩ m. ¹⁹Gɛɛ, awɔɔ n a dɔ a ʊ, awɔɔ mɛ bɩ Sɛnt-Ɛspri cɛ m, Woso n a ka awɔɔ ʊ, an n’awɔɔ heer ʊ ra? Bɩ minto bɩ, awɔɔ bɛɛ y’a so a mɩŋŋɔɔ ʊ dɔ ra? Woso y’a so awɔɔ ʊ. ²⁰Bala, Woso hɔ bɔ gʊta an awɔɔ bʊmbɔ m. Bɩ minto bɩ, k’a hɔ k’a n’a lɛ bɔm Woso ʊ bɩ ba a mɛ bɩ m.

Lʊsarɛ mim laakadarɛrɔ nyɩbɔʊrɛ

¹Kɛɛrɛ naa, kʊ m minno k’awɔɔ mɔɔ lɩnlar ma ci ʊ rɔ wɔɔ nyɩ bɔ ʊ. Awɔɔ ʊ: «A mɩŋŋa kʊ gʊaa b’a zɔ lʊ ma y.» ²Bɩ, kʊ jaandarɛ n a ga m bɩ, gʊaa biyəə a ga m an bɩr a mɩŋŋa lʊ m, lʊ biyəə n bɩr a mɩŋŋa zim m. ³Bɩ, gʊaa yar b’a ga m an hɔ k’a lʊ b’a ga m bɩ ba a lʊ bɩ m, lʊ bɩ maam sɔ, a a ga m an hɔ k’a zim b’a ga m bɩ ba a zim bɩ m. ⁴Bala, lʊ bɩ bɛɛ y’a so a mɩŋŋa mɛ b’ʊ y, a zim bɩ y’a so ʊ. Gʊaa bɩ bɛɛ y’a so a mɩŋŋa mɛ b’ʊ sɔ y, a lʊ bɩ y’a so ʊ. ⁵A b’a gu kʊ ma y, k’a maam kʊ awɔɔ ma, k’a zɛkʊra da jɩm ʊ dɔmɩm poore nɔ ʊ, k’a a da ma a toore yɩ a yaa da gʊta, bɩ, a b’a to dɔmɩm k’awɔɔ a zɛkʊra da jɩm ʊ bɩ n maasɩrɛ ba y. K’a a ya, a a bɔ a bɩr kan kʊ kɩ, kʊ m bɛɛ m awɔɔ bɩ zɛm b’a da ma a bʊr a ma y, bɩ Sʊtaana yom bɩ ma an awɔɔ makra ba k’awɔɔ n a do mimbʊnyaa nɔ ʊ. ⁶Hɔ kʊ mɔɔ hɩ naa, lɛ bɛɛ mɔɔ n’a karɛ awɔɔ ʊ y, a ɩ yɩrɛ ɩ ʊ, awɔɔ a da ma, a naa ba. ⁷Kʊ mɔɔ hɔɔnhɔ m, kʊ gʊaa haay do m mɔɔ m, bɩ, Woso gan wʊ gʊaa biyəə ma a hʊnhɔ, a a ka gʊaa niŋŋə nɩ lʊ m, an a ka gʊaa vanta n’a dam ma, an mɩsɩrbaa ba bazabaa nɔ ʊ.

⁸Naa y’a ka mɔɔ ʊ kʊ m a hɩ gʊɔɔ kʊ ŋ lannɔ gɩnga rɔ wɔɔ m, kan zonno wɔɔ kɩ m, m ʊ, ŋnɩ gɔɔta a deem maam amba mɔɔ m. ⁹Bɩ, kʊ ŋ b’a dam ma ŋnɩ bʊr a mɩŋŋɔɔ ma, kʊ yaarɔ wɔɔ n lannɔ ka cɛ ʊ, kʊ zonno wɔɔ n zino sa. Kʊ ŋ y’a ba ncɩnaaʊ a jɩra, kʊ lʊ gɛɛ zim yɩrɛ lɛtaama n a so ŋ ʊ, an bɩr bɩrɛ am sɛ hɔ bɩ m.

¹⁰Lɛ kʊ mɔɔ ʊ kʊ m a cɩnta lannɔzannɔ wɔɔ m kan zinzannɔ wɔɔ kɩ m bɩ ba n nɩ: «Lʊ b’a gʊ a zim ma y.» Mɔɔ mɩŋŋa bɛɛ lɛ bɩ cɩnta y, Zuuba m. ¹¹Kʊ lʊ a gʊ a zim ma, a b’a ya an zim sa y, k’a lɛ taa zim ma k’an a bɔ an aa kʊ ma kan a zim bɩ kɩ, an nyɩnta kan kɩ. Lʊ zim n a ga m sɔ an la a lʊ ra y.

¹²Kʊ gʊɔɔ kʊ ŋ gɔɔta rɔ wɔɔ nɩ, mɔɔ nɩ meer bam kan ŋ kɩ, Zuuba bɛɛ y, hɔ kʊ mɔɔ ʊ kʊ m a hɩ ŋ nɩ bɩ ba n nɩ: «Kʊ kristagʊaa ta lʊ m, bɩ sɩrakarɛzaa bɛɛ m lʊ bɩ nɩ, lʊ bɩ m bɔkarɛ an yɛ k’a nyɩnta kan kɩ, a bɩ la lʊ bɩ ra y.» ¹³A n ta ʊ sɔ bɩ, kʊ lʊ kʊ kristagʊaa m zim ta ʊ, bɩ sɩrakarɛzaa bɛɛ y, an bɔkarɛ an yɛ k’a nyɩnta kan lʊ bɩ kɩ, lʊ bɩ b’a bɔ ʊ y. ¹⁴Bala, zim kʊ sɩrakarɛzaa bɛɛ b’a ba Woso hɔ a lʊ bɩ tɔ ma, lʊ kʊ sɩrakarɛzaa bɛɛ b’a ba Woso hɔ sɔ a zim bɩ tɔ ma. Kʊ ncɩnaaʊ bɛɛ, bɔ an nawʊm kʊ ʊ, ɩ ʊ, ŋ nyɩnɔ wɔɔ, dintim nyɩnɔ m Woso mɩm ʊ, an bɔkarɛ ŋ y’a ba wosogʊɔɔ. ¹⁵Kʊ basɩrakarɛzaa bɩ lɛ taa k’a gʊ a mim bɩ ma, k’an a gʊ ma. Zim kʊ kristagʊaa m bɩ, gɛɛ lʊ kʊ kristagʊaa m bɩ, a so a mɩŋŋa ʊ mim naa do nɔ ʊ. A n bɔkarɛ, Woso k’a awɔɔ bir bɩ, awɔɔ bir a ʊ, k’awɔɔ n mɩsɩrbaa ba laafɩɩ nɔ ʊ. ¹⁶Bala, lʊ, ɩbɩɩ k’ɩ m kristagʊaa bɩ, a a da ma ɩbɩɩ n a ka ɩ zim bɩ n bʊmbɔrɛ yɩ, b’ɩbɩɩ y’a dɔm na? Gʊaa yar bɩ, ɩbɩɩ k’ɩ m kristagʊaa bɩ, a a da ma, ɩbɩɩ n a ka ɩ lʊ bɩ n bʊmbɔrɛ yɩ, b’ɩbɩɩ y’a dɔm sɔ ra?

Gʊaa biyəə n jɩm hɔ kʊ Woso

a ka ʊ bɩ nɔ ʊ

¹⁷Mɔɔ ʊ kʊ m hɔ vanta naa do hɩ awɔɔ m sɔ, hɔ naa do mɔɔ n’a dɩndam kristagʊɔɔ sokʊmarɔ m lɛɛ haay ʊ, a ɩ yɩrɛ ɩ ʊ, gʊaa biyəə a ga m an mɩsɩrbaa niŋŋə kʊ Woso a ka ʊ dɔmɩm k’a a bir ma kan bɩ zu a ʊ bɩ ba. ¹⁸Kʊ Woso gʊaa bir, bɩ ma bɩ a zaa gasʊ baŋŋʊ ʊ, a b’a baŋŋʊgasʊrɛ bɩ nyaakʊm da y. Kʊ gʊaa vanta Woso a bir, bɩ ma bɩ, a zaa n gasʊ baŋŋʊ ʊ, a b’a ka ma k’a gasʊ baŋŋʊ ʊ y. ¹⁹Kʊ gʊaa gasʊ baŋŋʊ ʊ, gɛɛ k’a n gasʊ baŋŋʊ ʊ, hɔsɩ bɛɛ n bɩ y. Woso lɛrɔ wɔɔ zuure n hɔ. ²⁰Gʊaa biyəə n gɔɔta mɩsɩrbaa kʊ Woso a ka ʊ, a birle dɔmɩm ʊ bɩ m. ²¹Kʊ nyɩnta ɩ ʊ lɔ, dɔmɩm kʊ Woso ɩ bir ʊ bɩ ma, ɩ bɩ ɩ hɔɔn kɔ a tɔ ma y, bɩ kʊ zaa ta ʊ k’ɩ ɩ da ma ɩ bɔ lɔmbaa bɩ nɔ ʊ, k’ɩ zaa bɩ do sa. ²²Bala, lɔ kʊ Woso a bir k’an bɩ zu Zuuba ʊ bɩ, a ba b’ʊ soamɩŋŋaʊzaa Zuuba nɔ ʊ. Bɩ, soamɩŋŋaʊzaa kʊ Woso a bir sɔ bɩ, a ba b’ʊ Krista lɔ. ²³Woso hɔ bɔ gʊta an awɔɔ bʊmbɔ m, a b’a ya a yɛ, a a ba gʊɔɔ lɔnnɔ y. ²⁴M danyɩnɔ, amba mɔɔ lɛɛ ka m a hɩ bɩ, gʊaa biyəə a ga m, an gɔɔta an bɩr mɩsɩrbaa kʊ Woso a ka ʊ dɔmɩm k’a a bir ʊ bɩ bam Woso mɩm ʊ.

Bazanɔ kan nyɩmbɔnnɔ kɩ mim

²⁵Kʊ bazanɔ wɔɔ mim nɩ, hɔ kʊ mɔɔ ʊ kʊ m a hɩ naa, Zuuba bɛɛ y’a cɩnta a ʊ, mɔɔ n a hɩ y, m hɔɔndarɛ mɔɔ ʊ kʊ m a hɩ, bɩ Zuuba barka ma bɩ, gʊaa kʊ n n’a dam ma, n n a mim si sɩra bɩ m mɔɔ m. ²⁶Mɔɔ yɩ m hɔɔn dam mɔɔ ʊ, her-her dɔmɩm naa kɔrɛ minto bɩ, a mɩŋŋa kʊ baza n gɔɔta maam. ²⁷K’ɩ ɩ jaan m sɔ, ɩbɩɩ ka ma k’ɩ ɩ bɔ ʊ y, k’ɩ ba jaan m, ɩbɩɩ ka ma k’ɩ jaan zɛ y. ²⁸Bɩ, k’ɩ ɩ jaan bɩ sa, mimbʊnyaa bɛɛ ɩ ba y, kʊ nyɩmbʊɛɛrɛ a jaan sa sɔ, an mimbʊnyaa ba sɔ y. Bɩ, kʊ m a hɩ a m, gʊɔɔ kʊ ŋ lannɔ ka cɛ ʊ, kan nyɩmbɔnnɔ kʊ ŋ zino sa rɔ wɔɔ, ŋ fɩr yɩrɛ a mɩsɩrbaa nɔ ʊ gʊta, mɔɔ lɛ baa k’awɔɔ n fɩr bɩ do yɩ y, bɩ minto m mɔɔ nɩ meerbaa naa do bam.

²⁹M danyɩnɔ, kʊ m a hɩ a m denter, dɔmɩm n gɔɔta wɔɔ m gʊta y. Bɩ tɔ ma bɩ, an a sa naa ma, gʊɔɔ kʊ ŋ nɩ lannɔ m nɔ wɔɔ n a mɩsɩrbaa ba ɩ ʊ, ŋ ba lannɔ nɩ y. ³⁰Gʊɔɔ kʊ ŋ nɩ nyi kam nɔ wɔɔ, ɩ ʊ, ŋ heer n a zar y. Gʊɔɔ kʊ ŋ n’a heer nyɔɔm nɔ wɔɔ, ɩ ʊ, ŋ heer n nyɔɔ y. Gʊɔɔ kʊ ŋ nɩ hɔ sim nɔ wɔɔ, ɩ ʊ, ŋ ba hɔsɩ nɩ y. ³¹Gʊɔɔ kʊ ŋ nɩ durnya naa hɔ yɩm nɔ wɔɔ, ɩ ʊ, ŋ bɩr a yɩrɛ y. Bala, durnya naa do k’a nɩ yɩm naa, cem an nawʊm naa. ³²Mɔɔ lɛ baa k’awɔɔ hɔɔn n bɩr kɔrɛ y. Gʊaa k’a n lʊ sa bɩ, a hɔɔn an n’a dam Zuuba hɔɔnhɔrɔ ma, an n’a kam ma kʊ Zuuba nɔ n yɩ a ra. ³³Bɩ gʊaa k’a lʊ n ta ʊ bɩ, a hɔɔn nɩ kɔm durnya minno ma, a ka a nawʊm ma k’a laarɛ nɔ n yɩ a ra, ³⁴a hɔɔn m hɩɩya-hɩɩya. Maam sɔ bɩ, lʊ k’a ba zim nɩ y, kan nyɩmbʊɛɛrɛ k’a n zim sa kɩ, a hɔɔn ŋn’a dam Zuuba hɔɔnhɔrɔ ma. Ŋ n’a kam ma kʊ Woso n a so a ʊ jilli, a mɛ, kan a nyi kɩ nɔ ʊ. Bɩ lʊ k’a zim n ta ʊ bɩ, a hɔɔn an n’a dam durnya minno ma, a ka a nawʊm ma k’a zim nɔ n yɩ a ra. ³⁵Naa hɩ mɔɔ nawʊrɛ awɔɔ mɩŋŋɔɔ daahan minto. M ka bɛɛ mɔɔ nawʊm ma kʊ m awɔɔ hɔɔn kɔ y. A ŋʊa mɔɔ nawʊm k’awɔɔ m hɔ k’an mɩŋŋa an lɛ da bɩ ba, k’a hɔɔn bɩ nyɩnta hɩɩya-hɩɩya y, k’a kʊsɩ Zuuba ma bala.

³⁶Kʊ gʊaa jaan ta ʊ, a hɔɔn nɩ gasʊŋ ʊ gʊta, b’a bɩr a da ra a mɩŋŋa ma y, an a hɔɔn da a ʊ, a yaa a zɔ ma an yɩ mim, a a da ma, an a jaan bɩ sa. K’a naa ba, a n mimbʊnyaa ba y, kʊ ŋ nɩ kʊ sa. ³⁷Bɩ gʊaa k’a a hɔɔn da, an hɔɔn bɔ ʊ a zim, bɩ pakra bɛɛ m kan kɩ, an a da a mɩŋŋa lɛtaama ma, an a cɩnta a heer ʊ a zim, a ʊ, a bɩ lʊ sarɛ y, a a ba mɩŋŋa. ³⁸Ncɩnaaʊ bɩ, gʊaa k’a nyɩmbʊɛɛrɛ sa bɩ, a a ba mɩŋŋa, bɩ gʊaa k’a n a sa bɩ, a a ba mɩŋŋa an lɛ da.

³⁹Kʊ lʊ zim ta ʊ, gɔɔta a nawʊm an bɩr gʊaa bɩ do lʊ tee…, gʊaa bɩ mɩsɩrbaa tɛkka ma. Bɩ, k’a zim bɩ bɩ ga, a a so a mɩŋŋa ʊ kɛɛrɛ, a a da ma, an bɔ an gʊaa vanta sa, bɩ kristagʊaa an n’a sam bala. ⁴⁰Bɩ, mɔɔ hɔɔndarɛ nɔ ʊ, k’a gɔɔta a n a ya an zim sa, a heer nyɔɔrɛ an lɛ da, mɔɔ sɩra ka mɔɔ ʊ, Woso Ɛspri ɩ kan mɔɔ kɩ sɔ, bɩ minto bɩ, k’a mɔɔ meerbaa bɩ si.

Mannɩrɔ sim sʊrɛ wosobaawɔnnɔ cɛ ʊ

¹Ʊ wosobaawɔnnɔ mannɩrɔ sinno wɔɔ mim dɩnda kɛɛrɛ. Awɔɔ y’a hɩrɛ, a ʊ: «Ʊ haay ʊ ta hɔdɔrɛ m.» Denter m, bɩ hɔdɔrɛ ɩ gʊaa dam mɩŋŋabusure ma. A n bɔkarɛ ŋʊarɛ y’a kam gʊɔɔ sɩrakarɛ n’a dam la. ²Kʊ gʊaa y’a hɔɔn darɛ a ʊ, a hɔ dɔ, k’an a dɔ a ʊ, a n hɔ dɔ amba a a ga m bɩ nɩ y. ³Bɩ, kʊ gʊaa Woso ŋʊa, Woso bɩ zaa dɔ a gʊaa.

⁴Kɛɛrɛ naa, wɔɔ ʊ ga m ʊ wosobaawɔnnɔ mannɩrɔ wɔɔ sim sʊ gɛɛ? Wɔɔ dɔ ʊ ʊ, wosobaawɔm deem taan… ba ʊ an mɩsɩr durnya ʊ y, bɩ Woso vanta ba ʊ, kʊ Woso k’an ta ʊ deem bɩ bɛɛ y. ⁵Bala, baa kʊ gʊɔɔ ɩ hɔɔ niŋŋoo kʊ ŋ nɩ brama gɛɛ tara ʊ birm wosoro, ŋnɩ ŋ ba denter sɔ wosoro kan zuubɔɔ kɩ, ⁶a bɩ ncɩnaaʊ wɔɔ zi y, wɔɔ n a dɔ bɩ, Woso deem taan…, Zɩ bɩ m, a to hɔ haay ʊ a mɩŋŋa zi, wɔɔ n ta ʊ a tɔ ma. Bɩ Zuuba bɩ deem sɔ, Yeezuu Krista m, a mɩŋŋa tɔ ma m hɔ haay woo… n ta ʊ, a tɔ ma m sɔ wɔɔ n ta ʊ.

⁷Bɩ, kristagʊɔɔ haay bɛɛ naa dɔ y. Gɔsɩnnɔ kʊ ŋ mim ka wosobaawɔnnɔ mannɩrɔ sinno wɔɔ m bɩ, ŋ gɔɔta ŋn’ɩ ŋ sʊm, ŋn’a hɔɔn darɛ ŋ ʊ, mannɩrɔ wɔɔ ka n nawʊm wosoro paan…rɔ ʊ. Naa minto bɩ, kʊ ŋ sɩrakarɛ paŋŋa ba ʊ bɩ, ŋ y’a hɔɔn darɛ ŋ ʊ, a kʊrɔ ma Woso mɩm ʊ, mannɩrɔ wɔɔ sinno wɔɔ sʊrɛ tɔ ma. ⁸Wɔɔ dɔ, ʊ ʊ, hɔbɩrɛ bɛɛ nɩ wɔɔ zɔm Woso ma y, kʊ wɔɔ n a bɩ, a b’a dam ma an wɔɔ ba laatʊ Woso ma y, kʊ wɔɔ bɩ sɔ a bɛɛ n n’a dam ma an wɔɔ zɔ Woso ma sɔ y. ⁹Bɩ, k’a dundo a zi, awɔɔ ɩ soamɩŋŋaʊ m k’a a hɔɔnhɔ bɩ, b’a ba ka k’awɔɔ soamɩŋŋaʊ bɩ n a ka kʊ gʊɔɔ kʊ ŋ ba paŋŋa m cɩna Woso zuure bɩ nɔ ʊ rɔ wɔɔ n a do mimbʊnyaa nɔ ʊ y. ¹⁰Bala, ɩbɩɩ k’ɩ hɔ dɔ bɩ, kʊ gʊaa kʊ paŋŋawarzaa m Woso zuure nɔ ʊ b’ɩbɩɩ yɩ ɩ nɩ nyɩntam wosobaawɔm cɛ ʊ, ɩ n’a mannɩ sim sʊrɛ, naa y’a dam han denter la? A bɩ mannɩrɔ wɔɔ sim sʊm, bɩ n a heer kɔ ra? ¹¹Yɩ a nawʊrɛ ncɩnaaʊ, ɩbɩɩ k’ɩ hɔ dɔ bɩ minto, paŋŋawarzaa n a dom Woso ma, b’ɩbɩɩ danyɩ m, Krista mɩŋŋa n ga a tɔ ma. ¹²K’awɔɔ ɩ naa bam, a bʊnyaa awɔɔ n’a barɛ a danyɩnɔ paŋŋawarzannɔ wɔɔ m, an nɩ ŋ heer warm kʊ ma, bɩ mimbʊnyaa naa do ba awɔɔ nawʊm Krista m sɔ. ¹³Naa minto bɩ, kʊ mɔɔ dɔ mɔɔ ʊ, mɔɔ danyɩ y’a dom mimbʊnyaa nɔ ʊ, hɔ kʊ mɔɔ n’a bɩm tɔ ma, k’a maam mɔɔ bɩ n yarɛ m sim sʊ fɩɩga y, kʊ m danyɩ b’a do y.

Pol y’a mɩsɩrbaa kan a zibəə kɩ mim dɩndam

¹Mɔɔ n m so m mɩŋŋa ʊ ra? Kristazibəəzaa bɛɛ m mɔɔ m na? Mɔɔ n wɔɔ Zuuba Yeezuu yɩ m mɩm m na? Zi kʊ mɔɔ ba Zuuba nɔ ʊ, bɩ bɛɛ n’awɔɔ m na? ²Kan gʊɔɔ gɔsɩnnɔ kɩ, kʊ kristazibəəzaa bɛɛ m mɔɔ nɩ, kan awɔɔ kɩ, kristazibəəzaa m mɔɔ m. Bala, hɔ k’a n’a hɩnkam, a ʊ, kristazibəəzaa m mɔɔ m bɩ, awɔɔ m, Zuuba nɔ ʊ.

³Hɔ kʊ mɔɔ n’a hɩrɛ m nɩ m gumə dɩndam, gʊɔɔ kʊ ŋ nɩ mim kam mɔɔ ra rɔ wɔɔ lɛɛ bɩ ba n nɩ: ⁴Mɔɔ n m ga m, kʊ gʊɔɔ m hɔbɩrɛ kan hɔmire kɩ ka m ʊ, m zibəə bɩ tɔ ma ra? ⁵Mɔɔ n m ga m, m lʊ sɩrakər sa k’an bɩr kan mɔɔ kɩ, m zaakʊrɛrɔ wɔɔ nɔ ʊ, amba kristazibəəzannɔ wɔɔ, Zuuba dannɔ wɔɔ kan Pɩyɛɛr kɩ n’a bam bɩ m na? ⁶Gɛɛ, mɔɔ kan Barnabas kɩ, wɔɔ y’ʊ ga m ʊ minto kʊ zi ba, ʊ ʊ mɩŋŋɔɔ tʊr m na? ⁷Awɔɔ ma cɩna, n ʊ, sʊrdaa tɩr a mɩŋŋa tʊr a zim k’a bɩr sʊrdaabaa bam na? Gɛɛ kʊ gʊaa dɩvɛn gɔ sɔɔn a ba zaa m k’a dɩvɛn gɔ bɩ nyɩ bɩ ra? Gɛɛ hɔbɩsɩrɔ dundor b’a lɛ m k’a hɔbɩsɩrɔ k’a nɩ dɔrɛ ŋ ma rɔ wɔɔ nyonhi mi ra? ⁸A b’a hɔɔn da a ʊ, yo mɔɔ nawʊm hɔ kʊ gʊɔɔ n’a bam tee… bɩ makrarɔ ma y. Bala, Moyiisi lɛrɔ wɔɔ ɩ hɔ kʊ mɔɔ n’a hɩm naa hɩm sɔ. ⁹Bala, n y’a da lɛrɔ wɔɔ duro ʊ, n ʊ: «Ɩ bɩ hɔ du der k’a nɩ hɔyaa zɔm bɩ lɛ ma y.» A hɩ awɔɔ ʊ, Woso bɩ kɔ a nawʊm dono ma, ¹⁰gɛɛ meer naa do ba a ʊ wɔɔ tɔ ma ra? Sɩra m, wɔɔ minto m n nɩ hɔ naa do gʊrsɩra ba. Bala, a a ga m, kʊ gʊaa k’a nɩ dam wʊm bɩ kan gʊaa k’a nɩ hɔyaa zɔm bɩ kɩ n bɩr a gɩngarɛ ŋ ʊ, a y’a hɔ yɩm hɔyaa bɩ jirle nɔ ʊ sɔ. ¹¹Amba danwur nɩ hɔyaa duum bɩ, wɔɔ lemim nyɩnta duu awɔɔ m. Amba gʊaa k’a nɩ hɔyaa zɔm bɩ, an n’a hɔjirle yɩm bɩ, a hɩ awɔɔ ʊ kʊ wɔɔ ɩ durnya hɔnyɩ yɩrɛ awɔɔ zi, a bʊnyaa ra? ¹²K’awɔɔ ɩ nyasʊm gʊɔɔ vantɔɔ m, k’a a ga m bɩ minto bɩ, wɔɔ bɛɛ awɔɔ nɩ nyasʊm wɔɔ m an lɛ da ra?

Bɩ, kʊ kristazibəəzannɔ wɔɔ m bɩ, hɔ kʊ wɔɔ ʊ ga m bɩ m bɩ. Bɩ wɔɔ n’ʊ ka ma k’awɔɔ m naa ba wɔɔ nɩ y. Yɛ wɔɔ ʊ kɔrɛ do haay ma, kʊ hɔsɩ b’a ta Krista lemim nyɩnta bɩ padarɛ m toore y. ¹³Awɔɔ dɔ, a ʊ, gʊɔɔ kʊ ŋ nɩ Wosocɛ gʊta bɩ zi bam nɔ wɔɔ, hɔ kʊ gʊɔɔ nɩ zɛm nɩ Wosocɛ ʊ b’ʊ bɩ nɩ ŋ hɔbɩrɛ. Gʊɔɔ kʊ ŋ nɩ Wosocɛ mannɩrɔ zi bam nɔ wɔɔ, mannɩhɔɔ wɔɔ nɩ ŋ hɔbɩrɛ. ¹⁴Maam sɔ bɩ, Zuuba lɛ ka kʊ n nɩ nyasʊ gʊɔɔ kʊ ŋ nɩ lemim nyɩnta pa dam nɔ wɔɔ m.

¹⁵Bɩ, mɔɔ nɩ m ka ma kʊ gʊɔɔ n a ba m m ncɩnaaʊ y. Mɔɔ n ci naa do ba kʊ ŋ nɩ hɔ ka m ʊ y. Kʊ mɔɔ ga, a jɩra mɔɔ m kʊ mɔɔ n hɔ yɛ, m zi kʊ mɔɔ n’a bam naa minto. Gɔsɩ bɩ mɔɔ mɩŋŋa lɛbɔʊrɛ naa do yɔm mɔɔ nɩ y. ¹⁶Bala, kʊ mɔɔ m, lemim nyɩnta bɩ pa darɛ bɩ, lɛbɔ a mɩŋŋa ʊ hɔ bɛɛ y. Pakra m kʊ mɔɔ n a pa da, bɩ, kʊ mɔɔ n a pa da, kʊ kʊsɩ n m yɩ. ¹⁷Kʊ mɔɔ ɩ hɔɔn bɔ ʊ m zim, kʊ m zi naa do ba, mɔɔ ba n tɩr m mɩm dam kʊ Woso m ganwʊ m ma. Bɩ, kʊ mɔɔ da n y’a ʊ bɩ, zi kʊ n mɔɔ da ʊ bɩ mɔɔ n’a bam, mɔɔ bɩr dɔm hɔsɩ ma y. ¹⁸Bɔ mɔɔ n’a yɩrɛ a nɔ ʊ kɛɛrɛ? Lemim nyɩnta bɩ kʊ mɔɔ n n’a pa dam vam bɩ m mɔɔ hɔ. Mɔɔ bɩr m kam ma kʊ nɩ lemim nyɩnta bɩ padarɛ hɔ kʊ mɔɔ m ga m ka m ʊ y.

M tɔ mɔɔ nawʊŋ ʊ

kʊ gʊɔɔ n bʊmbɔrɛ yɩ

¹⁹Soamɩŋŋaʊzaa m mɔɔ m, gɔsɩ lɔ bɛɛ m mɔɔ nɩ y. Bɩ, mɔɔ m mɩŋŋa ba gʊaa haay lɔ, kʊ m m da ma m a ka, kʊ gʊɔɔ gʊta n bʊmbɔrɛ yɩ sɩra ka Krista ʊ nɔ ʊ. ²⁰Kʊ mɔɔ ta m nɩ zi bam zɩɩfʊrɔ barla, bɩ mɔɔ zɩɩfʊrɔ mɩsɩrbaa sa, kʊ m a ka kʊ ŋ nɩ sɩra ka Krista ʊ. Baa kʊ mɔɔ bɩr zum Moyiisi lɛrɔ ʊ bɩ, m mɩsɩrbaa bɩ ba mɔɔ nawʊm ɩ ʊ, zu mɔɔ nawʊrɛ ŋ ʊ. Kʊ mɔɔ ɩ zi bam gʊɔɔ kʊ ŋ nɩ zure ŋ ʊ rɔ wɔɔ bireyaa ʊ, a ba mɔɔ nawʊm maam, kʊ m m da ma m bʊr ŋ nɩ Krista sɩrakarɛ nɔ ʊ. ²¹Kʊ mɔɔ ɩ gʊɔɔ kʊ ŋ n Moyiisi lɛrɔ wɔɔ dɔ rɔ wɔɔ barla, bɩ mɔɔ m ba am ŋ hɔ bɩ m, mɔɔ bɩr zum Moyiisi lɛrɔ wɔɔ ʊ y, kʊ m a ka kʊ ŋ nɩ sɩra ka Krista ʊ. A bɩr yɩrɛ ɩ ʊ, mɔɔ ɩ bɩr zum Woso lɛrɔ wɔɔ ʊ y, mɔɔ ɩ zure ŋ ʊ, bala, mɔɔ ɩ zum Krista lɛ ʊ. ²²Kʊ mɔɔ ɩ gʊɔɔ kʊ paŋŋawarzannɔ m sɩrakarɛ nɔ ʊ rɔ wɔɔ barla, bɩ mɔɔ m ba am ŋ hɔ bɩ m, ɩ ʊ, paŋŋawarzaa m mɔɔ m, kʊ m a ka kʊ ŋ nɩ sɩra ka Krista ʊ. Ncɩnaaʊ bɩ, kʊ ŋkɔɔ m, bɩ mɔɔ m ba am ŋ hɔ bɩ m, kʊ m a ka, baa kʊ bɔ m, kʊ ŋ gɔsɩnnɔ n bʊmbɔrɛ yɩ. ²³Naa woo… naa ba mɔɔ nawʊm lemim nyɩnta bɩ minto, kʊ m m hɔ yɩ sɔ.

²⁴Awɔɔ dɔ a ʊ, kʊ gʊɔɔ ɩ bra sim brasire zaŋŋa ʊ, ŋ haay ɩ bra bɩ sim, bɩ deem taan… nɩ bra bɩ sire ganwʊrɛ yɩm. Bɩ tɔ ma bɩ, k’a bra bɩ si mɩŋŋa k’a a ganwʊrɛ yɩ. ²⁵Brasinno haay y’a mɛ tʊntɔm gʊta, k’a a da ma a yɩ lɛɛkarɛzaa, a ganwʊrɛ yɩ. Bɩ, ŋ ganwʊrɛ bɩ, hɔ m an n’a zarm. Bɩ, kʊ wɔɔ nɩ, kʊ wɔɔ ʊ tʊntɔ ʊ, wɔɔ ganwʊrɛ bɩ nyɩntam hɔ k’a bɩr a zaar barɛ y. ²⁶Bɩ minto bɩ, mɔɔ ɩ bra bɩ sim, bɩ mɔɔ bɩr a sim yaarsɩ y. Mɔɔ bɔ kʊ ʊ, kan zoobər kɩ, bɩ mɔɔ bɩr zoo bɩ bam kan lɛɛ tu kɩ y. ²⁷Bɩ, m mɛ bɩ mɔɔ n’a tʊntɔm, m n’a dam bar ʊ kɔɔkɔɔ, bala, mɔɔ lɛ baa kʊ m lemim nyɩnta pa da gʊɔɔ nɩ, kʊ Woso n bɔkarɛ an bɩ mɔɔ bɔ a jɛ m, m bɔ vam nɩ y.

A bɩ wosobaawɔnnɔ da ʊ y

¹M danyɩnɔ, mɔɔ lɛ taa k’awɔɔ n mim k’a wɔɔ zɩɩfʊrɔ, wɔɔ yaabɔɔ yɩ, dɔmɩm kʊ ŋ nyɩnta ʊ poo ʊ ŋn’ɩ zum Moyiisi ʊ bɩ tɔ da a nɔ ʊ. Awɔɔ dɔ a ʊ, Woso a ka warkʊ n dɔ ŋ ma jilli, ŋ bra higʊta ma sɔ, ²a bɔ kʊ ʊ ɩ ʊ, ŋ haay batɛm si warkʊ bɩ kan higʊta bɩ kɩ ʊ, k’a zu Moyiisi ʊ. ³Ŋ haay hɔbɩrɛ k’a a to Woso zi bɩ bɩ. ⁴Ŋ nɩ hi k’a a to Woso zi sɔ bɩ mi, bala, ci deem ɩ nyɩnta ʊ, ci bɩ do hi ŋ y’a mi. Ci bɩ, Woso y’a ka ŋ ʊ, an nɩ zure ŋ jɛ ʊ. Bɩ, ci bɩ do bɩ, Krista m. ⁵Baa kan naa kɩ haay, ŋ gʊɔɔ nyɩnta ʊ gʊta Woso nɔ n yɩ ŋ la y, bala, ŋ gɩnga, n ŋ bir poo b’ʊ. ⁶Ba minno nɔɔn duro ʊ, k’a hɔɔn dɩnda wɔɔ m, kʊ wɔɔ bɩ nyɩnta hɔɔ bʊnyaarɔ lɛtaama nɩ, amba ŋ nyɩntam bɩ nɩ y. ⁷A bɩ yɩ wosobaawɔnnɔ daʊrɛzannɔ amba ŋ gʊɔɔ gɔsɩnnɔ nɩ y, bala, n y’a gʊrsɩra ba Wosoci ʊ, n ʊ: «Gʊɔɔ wɔɔ nyɩnta k’a hɔ bɩ, k’a hɔ mi, ŋnɩ bɩ wuti k’a sar ba.» ⁸Amba ŋ gʊɔɔ gɔsɩnnɔ jaan da bɩ, ʊ bɩ jaan da y. Bala, jaan bɩ darɛ a ka, ŋ gʊɔɔ bam tisi-tisi buhɩra a yaa n kaakʊ n gɩnga hindeem taan… nɔ ʊ. ⁹Amba ŋ gʊɔɔ gɔsɩnnɔ Zuuba makra ba bɩ, ʊ bɩ Zuuba makra ba y. Bala, naa kʊ ŋ y’a ba b’a ka mɩnnɔ m sakʊ dɩnda ŋ ʊ, ŋnɩ gɩnga. ¹⁰Amba ŋ gʊɔɔ gɔsɩnnɔ kukur ba bɩ, ʊ bɩ kukur ba y. Bala, naa kʊ ŋ y’a ba bɩ, Woso malɛɛka k’a nɩ gʊɔɔ zɩnzɛ m bɩ, bʊr an bɩ ŋ zɩnzɛ. ¹¹Minno nɔɔn duro wɔɔ yaabɔɔ wɔɔ yɩ, k’an nyɩnta makra, bɩ y’a ka n ŋ da ci ʊ, kʊ wɔɔ m hɔɔn yɩ ʊ ŋ tɔ ma, wɔɔ kʊ wɔɔ n’ʊ mɩsɩrbaa bam jɛ dɔmɩnnɔ ʊ rɔ wɔɔ.

¹²Naa minto bɩ, gʊaa k’a n’a hɔɔn darɛ a ʊ, a b’a barɛ am ŋ hɔ bɩ m bɩ, k’an dundo a zi k’a b’a do y. ¹³Makrarɔ kʊ ŋ nɩ gʊɔɔ yɩm nɔ wɔɔ y’awɔɔ yɩ bɩ, bɩ taalɛrazaa m Woso m, a b’a tore awɔɔ n makra yɩ k’an cem awɔɔ paŋŋa han y. Kʊ makra awɔɔ yɩ, a y’a karɛ awɔɔ m bɔ ʊ, k’a a da ma a bʊr la.

A b’a zɛ kʊ ra kan zinəro kɩ y

¹⁴M danyɩnɔ, naa minto bɩ, k’a ba wosobaawɔnnɔ daʊrɛ ma laatʊ. ¹⁵Mɔɔ dɔ mɔɔ ʊ, hɔɔntaʊrɛzannɔ n’awɔɔ m, bɩ tɔ ma m mɔɔ nɩ meer bam kan awɔɔ kɩ, k’a a hɔɔn da hɔ kʊ mɔɔ hɩ bɩ ma a dɩga a. ¹⁶Ba wɔɔ tɩr ʊ so kʊ ma kʊ Zuuba tɔdaanɔʊ hɔbɩrɛ bɩ bɩ bɩ, wɔɔ tɩr barka hɔmire bɩ barka da ʊ, ʊ a dɔ ʊ a mi, barka hɔmire bɩ kʊ wɔɔ n’a mim bɩ, wɔɔ ɩ zɛkʊra yɩm kan Krista kɩ a ma bɩ tɔ ma. Kʊ wɔɔ bur bɩ jinjir ʊ a bɩ, wɔɔ ɩ zɛkʊra yɩm sɔ kan Krista kɩ a mɛ bɩ tɔ ma. ¹⁷Kʊ bur bɩ n deem bɩ, wɔɔ haay, mɛ deem zannɔ wɔɔ m sɔ, bala, bur deem bɩ wɔɔ ʊ da kʊ ʊ haay ʊ n’a bɩm. ¹⁸K’a dɩga Israyɛl gʊɔɔ wɔɔ ma, ŋ tɩr hɔɔ zɩnzɛ k’a mannɩ ba ŋ nɩ Woso ma, gʊɔɔ kʊ ŋ nɩ mannɩrɔ wɔɔ duro sim sʊm nɔ wɔɔ, a zɛ ŋ nawʊm kʊ ra kan Woso kɩ. ¹⁹Bɩ, mɔɔ meerbaa bɩ jɩ n bɔ nɩ? A hɩ mɔɔ ʊ, hɔsɩ m wosobaawɔm kan a mannɩ sim kɩ n na? ²⁰Ayy…! Mɔɔ ʊ kʊ m a hɩ m ʊ, basɩrakənno wɔɔ, mannɩrɔ wɔɔ ba ŋ nawʊm zinəro ma, a ka bɛɛ ŋ nawʊm Woso ʊ y. Mɔɔ lɛ baa k’awɔɔ n’a zɛ kʊ ra kan zinəro kɩ y. ²¹A n a ga m, k’awɔɔ n Zuuba hɔmire mi, k’a a ya, a zinəro hɔ mi y. A n a ga m sɔ, k’awɔɔ n Zuuba hɔbɩrɛ bɩ, k’a a ya, a zinəro hɔ bɩ y. ²²Gɛɛ, a ŋʊa wɔɔ nawʊm k’ʊ Zuuba da nɔmaa ma ra? A hɩ awɔɔ ʊ wɔɔ paŋŋa lɛ da m na?

Wosobaawɔnnɔ mannɩ sim

²³Gʊɔɔ gɔsɩnnɔ y’a hɩrɛ ŋ ʊ: «Zaa ta ʊ, k’ʊ hɔ haay ba.» Denter m, bɩ hɔ haay bɛɛ n’a dam wɔɔ han wa. Kʊ ŋ bɩ to ŋn’a hɩrɛ ŋ ʊ: «Zaa ta ʊ, k’ʊ hɔ haay ba», kʊ ŋ n’a dɔ ŋ ʊ, hɔ haay bɛɛ n’a kam wɔɔ n ta lɛɛ Woso zuure nɔ ʊ wa. ²⁴Kʊ gʊaa biyəə n bɩr a kam hɔ k’a n’a dam a mim han bɩ ma, a b’a ka a mɩŋŋa daahan ma y. ²⁵Awɔɔ a da ma a hɔ haay k’a nɩ daasɩ ʊ si a bɩ, b’a bɩ laaka da a mim ma y, k’a b’a heer kɔ y. ²⁶Bala, Zuuba y’a so tara burə ʊ kan hɔ haay k’a n a nɔ ʊ kɩ ʊ. ²⁷Kʊ basɩrakakristaʊzaa awɔɔ bir a har ʊ k’a bɩ hɔ bɩ, k’awɔɔ yɛ a birle ma k’a ta, k’a yaa lee ku, kʊ bɔ n y’a ka a ʊ, k’a bɩ bala, a bɩ laaka da ma y, a yaa n’a heer kɔ. ²⁸Bɩ kʊ gʊaa a hɩ a m, a ʊ: «Sim naa do mannɩ sim m», a ba sʊ y, gʊaa k’a naa hɩ awɔɔ m bɩ minto, kʊ heer kɔrɛ bɩ yɩ ʊ y. ²⁹Bɩ, awɔɔ heer kɔrɛ bɛɛ mɔɔ n’a hɩm ma y, gʊaa k’a sim bɩ mim hɩ awɔɔ m bɩ heer mɔɔ n’a hɩm ma. Bala, a n a ga m, kʊ gʊaa vanta heer m mɔɔ dʊdɔ yar y. ³⁰Kʊ mɔɔ ɩ Woso barka darɛ m nɩ hɔ niŋŋə bɩrɛ, bɔ m gʊaa vanta nɩ mɔɔ tɔ zarlɛ an bɔkarɛ mɔɔ Woso barka da, m n’a bɩrɛ?

³¹Ncɩnaaʊ bɩ, kʊ hɔ awɔɔ n’a bɩrɛ, gɛɛ hɔ awɔɔ n’a mire, baa kʊ bɔ awɔɔ n’a barɛ, k’a hɔ haay ba Woso lɛbɔʊrɛ minto. ³²A b’a ka, k’awɔɔ tɔ ma kʊ gʊɔɔ n a do mimbʊnyaa nɔ ʊ y. Kʊ zɩɩfʊ m, gɛɛ grɛkkɩ m, gɛɛ kristagʊɔɔ kʊ Woso y’a so ŋ ʊ rɔ wɔɔ m, a b’a ka kʊ gɔsɩ n a do y. ³³Ncɩnaaʊ nɩ, mɔɔ mɩŋŋa nɩ m yoŋ ʊ, kʊ m yɩ mɩŋŋa gʊaa haay ma, hɔ haay nɔ ʊ. A ba kʊ mɔɔ nawʊrɛ ncɩnaaʊ bɩ, mɔɔ bɩr m kam m mɩŋŋa daahan ma y. M ka mɔɔ nawʊm ma kʊ gʊɔɔ cir gʊta n daahan yɩ, kʊ ŋ nɩ bʊmbɔrɛ yɩ.

¹Amba mɔɔ nɩ Krista hɔbaa dɩndam bɩ, k’a mɔɔ hɔbaa sa sɔ.

Woso gʊɔɔ mɩŋŋazerle

²Mɔɔ yɩ m lɛ bɔrɛ awɔɔ ʊ, bala, awɔɔ ɩ mɔɔ tɔ darɛ a nɔ ʊ hɔ haay nɔ ʊ, an nɩ zum mɔɔ hɔdɩndarɛrɔ haay ʊ, amba mɔɔ dɩnda awɔɔ m bɩ m. ³Bɩ, mɔɔ lɛ taa k’awɔɔ n mim naa do dɔ: Yeezuu Krista m gʊaa yar haay lɛɛzaa, gʊaa yar m lʊ lɛɛzaa, Woso m Krista lɛɛzaa. ⁴Gʊaa yar haay k’a hɔ ku a mim ma, k’a yaa da, gɛɛ an nɩ Woso lɛ sim k’a so ra bɩ, a lɛɛzaa kʊ Krista m bɩ an n’a bɔŋ ʊ. ⁵Bɩ, lʊ niŋŋə k’a n hɔ ka a mim la, an bɔkarɛ a ʊ k’a yaa da, gɛɛ Woso lɛ an n’a sim k’a so ra bɩ, a lɛɛzaa an n’a gore bɔŋ ʊ, bala, bɔ a ʊ kʊ ʊ, ɩ ʊ, a mim a a bɔ. ⁶Kʊ lʊ lɛ baa k’a hɔ ka a mim la, k’a n’a minkə zɩnzɛra. Bɩ k’a ɩ yɩrɛ ɩ ʊ, nyannɩ m kʊ lʊ n a minkə zɩnzɛra gɛɛ an a mim bɔ, k’a maam, k’an hɔ ka a mim la. ⁷Gʊaa yar bɩ n a ga m an hɔ ka a mim la y. Bala, Woso bɔkʊʊrɛzaa m, a m Woso lɛbɔʊrɛ sɔ, bɩ gʊaa yar lɛbɔʊrɛ m lʊ m. ⁸Bala, gʊaa yar n a to lʊ mɛ ʊ y, lʊ n y’a bɔ gʊaa yar mɛ ʊ. ⁹Bɩ, Woso n gʊaa yar da lʊ tɔ ma y, lʊ a a da gʊaa yar tɔ ma. ¹⁰Naa minto nɩ, lʊ n a ga m, an hɔ ka a mim la k’a hɩnka a ʊ, a zim n’a lɛɛzaa, malɛɛkarɔ tɔ ma.

¹¹Kan naa kɩ haay, gʊaa b’a dam ma an a hɩ a ʊ, lʊ zibəə ba gʊaa yar ma y, b’a b’a dam ma sɔ an a hɩ a ʊ, gʊaa yar zibəə ba lʊ ma, Zuuba mɩm ʊ y. ¹²Bala, k’a nɩ yɩrɛ ɩ ʊ, lʊ bɔ n y’a ʊ gʊaa mɛ ʊ bɩ, lʊ nɩ gʊaa yɩm. Bɩ naa haay a to a ʊ Woso zi. ¹³K’a hɔɔn da ma a zim a dɩga a, a a ga m kʊ lʊ n yaa da Woso m b’a n hɔ ka a mim la ra? ¹⁴Awɔɔ n a dɔ a ʊ, nyannɩ m kʊ gʊaa yar minkə n bɩr jintə ra? Gʊaa woo… naa dɔ. ¹⁵A n bɔkarɛ kʊ lʊ minkə jintə bɩ n a lɛbɔʊrɛ, bala, minkə jintə bɩ ka n y’a ʊ lʊ ʊ, k’a mim bɩ gɔɔta vam y. ¹⁶Kʊ gʊaa a ʊ, k’a bɩsɩ ka hɔdɩndarɛ naa do ma, k’an a dɔ a ʊ, wɔɔ kan kristagʊɔɔ sokʊmarɔ wɔɔ kɩ, wɔɔ n minkə hɔ vanta m kʊ yɩnnɩbayɩ naa do bɛɛ y.

Zuuba tɔdaanɔʊ hɔbɩrɛ mim

¹⁷Hɔ k’a gɔɔta mɔɔ ʊ kʊ m a hɩ bɩ, mɔɔ bɩ m lɛ bɔrɛ awɔɔ ʊ y. Bala, k’awɔɔ tɩr a so kʊ ma k’a yaa da Woso m, hɔ k’awɔɔ n’a bam sokʊmarɔ wɔɔ nɔ ʊ bɩ bɩr a darɛ awɔɔ han y, awɔɔ bɔ a nawʊrɛ a jɛ m. ¹⁸Mim lɛɛkarɛ hɔ bɩ, n y’a hɩ mɔɔ m, n ʊ, k’awɔɔ a so kʊ ma, b’awɔɔ a gʊngʊ a hʊnhɔ. Mɔɔ y’a gɩngam mɔɔ ʊ, a a da ma an yɩ sɩra. ¹⁹Denter sɔ, k’awɔɔ a gʊngʊ a hʊnhɔ, bɩ n n’a kam n nɩ gʊɔɔ kʊ taalɛrazannɔ m nɔ wɔɔ dɔ. ²⁰Bɩ, k’awɔɔ a so kʊ ma, Zuuba hɔbɩrɛ bɩ bɩrɛ tɔ ma bɛɛ y. ²¹Bala, sokʊma bɩ wakatɩ ʊ, gʊaa biyəə nɩ larɛ a mɩŋŋa hɔbɩrɛ ra, maam bɩ, nɔ ɩ gʊɔɔ gɔsɩnnɔ zɛrɛ, gʊɔɔ gɔsɩnnɔ n bɔkarɛ ŋn’ɩ bɛɛ mire an nɩ ŋ zɛm. ²²Awɔɔ har ba ʊ, awɔɔ nɩ hɔ bɩŋ ʊ, a nɩ hɔ miŋ ʊ ra? Gɛɛ a hɩ awɔɔ ʊ, k’a Krista gʊɔɔ wɔɔ gore bɔ ʊ, k’a a ya a nyannɩ da gʊɔɔ kʊ ŋ ba hɔsɩ m nɔ wɔɔ ma ra? Bɔ mɔɔ n’a hɩrɛ awɔɔ nɩ, mɔɔ yɩ m lɛ bɔrɛ awɔɔ ʊ ra? Fɩɩgaa! Mɔɔ bɩ m lɛ bɔrɛ awɔɔ ʊ naa nɔ ʊ y.

²³Hɔ kʊ mɔɔ nyɩnta m a dɩnda awɔɔ m bɩ, a ma mɔɔ ʊ Zuuba Yeezuu zi: Gum niŋŋə kʊ n’a bam k’a Zuuba nyasʊ a ka kʊ n a zɛ bɩ, gunuu ʊ bɩ do ʊ, a mɩŋŋa bur sa, ²⁴an barka da Woso m, an bɔkarɛ an a zɩnzɛ an a jinjir, an a hɩ a ʊ: «Naa do naa, mɔɔ mɛ m, mɔɔ n a ka awɔɔ tɔ ma, k’a tɩr naa ba, a mɔɔ tɔ da a nɔ ʊ.» ²⁵Hɔbɩrɛ bɩ jɛ ʊ bɩ, a a ba maam sɔ hɔmire bɩ m, an a hɩ a ʊ: «Hɔmire naa do gʊaasɩbabaa daa k’an ta ʊ kɛɛrɛ mɔɔ ma minto bɩ m. K’awɔɔ bʊr an nɩ hɔmire bɩ mim, k’a tɩr a ba, a mɔɔ tɔ da a nɔ ʊ.» ²⁶Bala, wakatɩ haay, k’awɔɔ nɩ Zuuba tɔdaanɔʊ bur bɩ bɩŋ ʊ, an nɩ tɔdaanɔʊ hɔmire bɩ mim bɩ, Zuuba mɩŋŋa zɛ awɔɔ n’a pa darɛ, k’an tolle ba an bʊr.

²⁷Bɩ y’a ka gʊaa k’a nɩ Zuuba tɔdaanɔʊ hɔbɩrɛ bɩ bɩm, gɛɛ an n’a hɔmire bɩ mim, an Zuuba bɔ ʊ bɩ, mim ɩ kan kɩ, bala, a n dɩga Zuuba mɛ bɩ kan a ma bɩ kɩ ma, hɔsɩ y. ²⁸Gʊaa biyəə a ga m, an a mɩŋŋa lar an dɩga a k’a jɩ dɔ mɩŋŋa gɛ, k’an a dɔ an bur bɩ bɩ, an hɔmire bɩ mi. ²⁹Bala, kʊ gʊaa bur bɩ bɩ, an hɔmire bɩ mi, b’a n a hɔɔn da mɩŋŋa an a dɔ a ʊ, Zuuba mɛ nɩ, a bɩ k’a ʊ, an a mi bɩ, a mɩŋŋa dʊdɔ yarlɛ a ka ma bɩ. ³⁰Naa tɔ ma m, awɔɔ barla gʊɔɔ n ta ʊ gʊta, ŋ bɩ laafɩɩ y, gɔsɩnnɔ n a ba yir, nɔɔn n gɩnga. ³¹Kʊ wɔɔ y’ʊ mɩŋŋɔɔ m heer daasɩrɛ ʊ zim, Woso bɩ wɔɔ dʊdɔ karɛ y. ³²Bɩ kʊ Woso wɔɔ dʊdɔ ka, a hɩ a ʊ, k’awɔɔ bɔ zaa ʊ, kʊ wɔɔ bɩ nyɩnta durnya gʊɔɔ k’a nɩ zɛm bɩ ŋ dʊdɔ yar, an ŋ da kɔrɛ ʊ rɔ wɔɔ barla dʊdɔkarɛ hinni ʊ y.

³³Ncɩnaaʊ bɩ, m danyɩnɔ, k’awɔɔ a so kʊ ma k’a Zuuba tɔdaanɔʊ hɔbɩrɛ bɩ bɩ, k’a dɔ kʊ ma. ³⁴Kʊ nɔ ɩ gʊaa zɛm, k’an lɛɛ ka an hɔ bɩ a har ʊ, k’a b’a so kʊ ma, a a ka a mɩŋŋɔɔ dʊdɔyarlɛ ma y.

Kʊ minno kʊ ŋ gɔɔta rɔ wɔɔ nɩ, kʊ mɔɔ bɩ bʊr, mɔɔ brɔɔ bɔm kʊ zi.

Sɛnt-Ɛspri ganwʊrɛrɔ mim

¹M danyɩnɔ, kʊ *Sɛnt-Ɛspri ganwʊrɛrɔ wɔɔ mim bɩncɛ nɩ, mɔɔ lɛ taa k’awɔɔ n hɔ k’an ta a nɔ ʊ bɩ dɔ mɩŋŋa. ²Awɔɔ dɔ a ʊ, nyɩnta k’awɔɔ ʊ basɩrakənno biisi bɩ, wosobaawɔnnɔ daʊrɛ y’a so awɔɔ ʊ, awɔɔ n a da ma an n’a bɔrɛ ŋ ʊ y. ³Naa minto bɩ, mɔɔ lɛ taa k’awɔɔ n a dɔ mɩŋŋa, a ʊ, kʊ Woso Ɛspri a so gʊaa ʊ, a zaa nɩ meer bam, a zaa b’a dam ma an a hɩ, a ʊ: «Lerbɔrɛ kʊsɩ ɩ kan Yeezuu kɩ y.» Bɩ gɔsɩ b’a dam ma sɔ an a hɩ, a ʊ: «Zuuba m Yeezuu m,» kʊ Sɛnt-Ɛspri bɛɛ y’a ka y.

⁴Sɛnt-Ɛspri ganwʊrɛrɔ wɔɔ y’a hʊnhɔ, bɩ Ɛspri deem-deem bɩ nɩ ŋ karɛ. ⁵Zibəəro y’a hʊnhɔ n ta ʊ Zuuba nɩ gʊɔɔ darɛ ŋ barɛ ʊ, bɩ Zuuba deem-deem bɩ zibəə m. ⁶Zibəəro zaarɔ y’a hʊnhɔ ta ʊ, bɩ Woso deem-deem bɩ n’a kam gʊɔɔ n’a dam zibəəro wɔɔ duro barɛ ma. ⁷Sɛnt-Ɛspri ɩ zi bam kan gʊaa biyəə kɩ ganwʊrɛrɔ y’a hʊnhɔ m, bɩ naa ba an nawʊm k’a a da gʊɔɔ haay han. ⁸Sɛnt-Ɛspri ɩ mindɔrɛ meerbaa ganwʊrɛ kam gʊaa deem ʊ. A n hɔdɔrɛ meerbaa ganwʊrɛ ka gʊaa vanta ʊ. ⁹Sɛnt-Ɛspri deem-deem bɩ do ɩ sɩrakarɛ ganwʊrɛ kam gʊaa ʊ, a ɩ waarɛ ganwʊrɛrɔ kam gʊaa vanta ʊ sɔ. ¹⁰A ɩ hoserlo barɛ ganwʊrɛ kam gʊaa vanta ʊ, an nɩ Wosolɛsinnɩsora meerbaa ganwʊrɛ kam gʊaa vanta ʊ sɔ. A ɩ ɛsprirɔ dɔ n a bɔ kʊ zi ganwʊrɛ kam gʊaa vanta ʊ, an nɩ leminno y’a hʊnhɔ hɩrɛ kam gʊaa vanta ʊ, a ɩ leminno wɔɔ duro wusigəre ganwʊrɛ kam gʊaa vanta ʊ sɔ. ¹¹Bɩ, naa woo… naa, Sɛnt-Ɛspri deem-deem bɩ zibəə m, an nɩ ganwʊrɛrɔ wɔɔ jinjirm gʊaa biyəə m, a hɔɔnhɔ ma.

Kristagʊɔɔ wɔɔ y’a hʊnhɔ,

bɩ, ŋ deem

¹²Wɔɔ dɔ wɔɔ ʊ gʊaa mɛ deem, an bɔkarɛ a vəŋŋəro m hɔka, bɩ, gʊaa mɛ vəŋŋəro k’a bɩ to an hɔka naa, mɛ deem m bala, Krista maam sɔ. ¹³Bala, wɔɔ haay woo… naa, Zuuba batɛm ka wɔɔ ʊ Sɛnt-Ɛspri deem-deem bɩ nɔ ʊ, k’ʊ yɩ mɛ deem zannɔ, kʊ zɩɩfʊ m wɔɔ m, gɛɛ do vantɔɔ m wɔɔ m, kʊ lɔnnɔ wɔɔ m, gɛɛ soamɩŋŋaʊzannɔ m wɔɔ m, ʊ ʊ ba deem, Sɛnt-Ɛspri deem-deem bɩ n y’a ka wɔɔ ʊ, an wɔɔ han an bra wɔɔ ra.

¹⁴Gʊaa mɛ vəŋŋə bɩ deem y, ŋ hɔka. ¹⁵Kʊ gʊaa gam a hɩ, a ʊ: «Kʊ wɔ bɛɛ m mɔɔ m bɩ, mɔɔ ba mɛ bɩ barla y,» naa do a da ma an a ka, a bɩ nyɩntam mɛ bɩ barla dɔ ra? ¹⁶Kʊ gʊaa tʊr a hɩ a ʊ: «Kʊ mɩnyaa bɛɛ m mɔɔ m bɩ, mɔɔ ba mɛ bɩ barla y,» naa a da ma an a ka a bɩ nyɩntam mɛ bɩ vəŋŋə dɔ ra? ¹⁷K’a ɩ yɩrɛ ɩ ʊ, gʊaa mɛ bɩ jilli, mɩnyaa nɩ, gʊaa tʊr nyɩntam lɛɛ ka ra ʊ? Kʊ gʊaa mɛ bɩ jilli, tʊr nɩ, gʊaa meeyaa nyɩntam lɛɛ ka ra ʊ? ¹⁸Bɩ sɩra nɔ ʊ, Woso gʊaa mɛ vəŋŋəro haay cɩncɩnta a bɩncɛ ʊ, a hɔɔnhɔ ma. ¹⁹Kʊ gʊaa mɛ vəŋŋəro wɔɔ jilli, vəŋŋə deem nɩ, mɛ bɩ nyɩntam ka? ²⁰Ncɩnaaʊ bɩ, gʊaa mɛ vəŋŋəro wɔɔ hɔka bɩ mɛ deem m.

²¹Gʊaa mɩnyaa b’a dam ma an a hɩ a wɔ m a ʊ: «Ɩbɩɩ zibəə ba mɔɔ ma y.» Gʊaa mim b’a dam ma an a hɩ a gannɔ m sɔ a ʊ: «Awɔɔ zibəə ba mɔɔ ma y.» ²²A n lɛ da bɩ, gʊaa mɛ vəŋŋəro k’ɩ ʊ, ŋ nyɔɔdʊ ba ʊ fɩɩgaa rɔ wɔɔ, brɔɔ zibəə n ta ʊ gʊta karɛ. ²³Wɔɔ mɛ vəŋŋəro kʊ wɔɔ nɩ dɩgarɛ ŋ ma ɩ ʊ, ŋ bɩ wɩsɩ rɔ wɔɔ, brɔɔ wɔɔ nɩ nyasʊrɛ ŋ nɩ gʊta, niŋŋoo k’ɩ ʊ nyannɩ bɩncɛrɔ m nɔ wɔɔ, brɔɔ wɔɔ nɩ nyasʊrɛ ŋ nɩ paan…. ²⁴Wɔɔ mɛ vəŋŋəro kʊ ŋ nɩ ta daʊrɛ m nɔ wɔɔ bɩr a kam nyasʊrɛ bɩ do ma y. Woso k’a gʊaa vəŋŋəro da bɩ, a zi bɩ ba a ʊ, kʊ vəŋŋəro kʊ ŋ ba daʊrɛ m nɔ wɔɔ n daʊrɛ yɩ gʊta. ²⁵A ba a ʊ maam, kʊ gʊngʊrɛ bɩ nyɩnta mɛ b’ʊ y, bɩ kʊ vəŋŋəro wɔɔ n bɩr nyasʊm kʊ m. ²⁶Kʊ mɛ vəŋŋə deem ɩ fɩr yɩm, vəŋŋəro mɩsɩrɔ wɔɔ haay ɩ fɩr yɩm kan kɩ. Kʊ vəŋŋə deem daʊrɛ yɩ, vəŋŋəro mɩsɩrɔ wɔɔ haay y’a heer nyɔɔm kan kɩ sɔ.

²⁷A n bɔkarɛ, Krista mɛ n’awɔɔ m, a mɛ bɩ vəŋŋə n’awɔɔ gʊaa biyəə m, gʊaa biyəə kan a bɩncɛ kɩ. ²⁸Ncɩnaaʊ nɩ, Woso n gʊɔɔ bɔ ʊ an zibəə ka ŋ ʊ, kristagʊɔɔ wɔɔ barla. Lɛɛkarɛ ma bɩ, kristazibəəzannɔ a ŋ cɩnta. A hɩɩya hɔ ma bɩ, wosolɛsinnɩsorazannɔ a ŋ cɩnta. A kaakʊ hɔ bɩ, hɔdɩndagʊɔɔnzannɔ a ŋ cɩnta. Bɩ jɛ ʊ, gʊɔɔ kʊ ŋ nɩ hoserlo barɛ ganwʊrɛ m nɔ wɔɔ m, kan yaabarɔ waarɛ ganwʊrɛrɔ zannɔ kɩ, kan daahanzannɔ kɩ, kan lɛɛzannɔ kɩ, kan gʊɔɔ kʊ ŋ nɩ leminno y’a hʊnhɔ hɩm zannɔ kɩ. ²⁹K’awɔɔ dɩga a naa, awɔɔ n a dɔ a ʊ, ŋ woo… bɛɛ m kristazibəəzannɔ ra? Ŋ woo… bɛɛ m wosolɛsinnɩsorazannɔ sɔ y. Ŋ woo… bɛɛ m hɔdɩndagʊɔɔnzannɔ y. Ŋ woo… bɛɛ nɩ hoserlo barɛ y. ³⁰Ŋ woo… bɛɛ nɩ yaabarɔ waarɛ ganwʊrɛrɔ nɩ y. Ŋ woo… bɛɛ nɩ leminno y’a hʊnhɔ hɩrɛ y. Ŋ woo… bɛɛ nɩ leminno wɔɔ wusigəre y. ³¹K’a ka ganwʊrɛrɔ kʊ ŋ nɩ mɩŋŋa an lɛ da rɔ wɔɔ ma, kan a heer kɩ haay.

Bɩ, kʊ m zaa k’an mɩŋŋa an cem haay bɩ hɩnka a m kɛɛrɛ.

Ŋʊarɛ k’a a ga m an nyɩnta ʊ kristagʊɔɔ barla

¹Baa kʊ mɔɔ ɩ leminno haay hɩm,

gʊɔɔ hɔ kan malɛɛkarɔ hɔ kɩ,

kʊ mɔɔ ba ŋʊarɛ m, hɔsɩ bɛɛ m mɔɔ nɩ y.

Bɔ mɔɔ ʊ kʊ ʊ kan lɔmbɩr k’a nyi nɩ bɔm kɩ,

gɛɛ bɔ mɔɔ ʊ kʊ ʊ, kan sɩsaka k’a nyi nɩ bɔm kɩ.

²A a da ma mɔɔ m wosolɛsinnɩsora meerbaa ganwʊrɛ yɩ,

m bɩr hɔdɔrɛ m haay, m hɔ k’a a nyaakʊm da haay dɔ,

a a da ma mɔɔ m bɩr sɩrakarɛ m haay,

m m dam ma m n’a kam ciro n’a gaarɛ a bɩncɛrɔ ʊ,

lɛ meerbaa tɔkkɛ ma,

kʊ mɔɔ ba ŋʊarɛ m hɔsɩ bɛɛ m mɔɔ nɩ y.

³Kʊ mɔɔ bɩ to m m hɔnyɩ haay jir cicirzannɔ m,

m m da ma sɔ m yɛ fɩr ma, n m da sɛ rɛ,

kʊ mɔɔ ba ŋʊarɛ m, naa woo… naa, vam m.

⁴Kʊ gʊaa ɩ ŋʊarɛ m, a ɩ bʊrlɛ a ma,

a ɩ hɔ mɩŋŋa bam gʊɔɔ m,

a bɩr jɩm barɛ y,

a bɩr a lɛ bɔrɛ a mɩŋŋa ʊ y,

a bɩr a mɩŋŋa busure y.

⁵Kʊ gʊaa ɩ ŋʊarɛ m, a bɩr zi daŋŋada barɛ y,

a bɩr a karɛ a mɩŋŋa daahan ma y,

a nɔ bɩr maŋ ʊ zɔɔ-zɔɔ y,

a bɩr mim cɩntarɛ a heer ʊ kan gʊaa kɩ y,

⁶kʊ gʊaa ɩ ŋʊarɛ m,

a bɩr a heer nyɔɔm zibʊnyaa barɛ ma y,

a heer a n’a nyɔɔm sɩra ma.

⁷Kʊ gʊaa ɩ ŋʊarɛ m,

a ɩ sugur bam hɔ haay nɔ ʊ,

a ɩ sɩra kam dɔmɩm haay,

a ɩ taaheerlɛ m tee…,

a ɩ yɛm kɔrɛ do haay ma.

⁸Ŋʊarɛ nyarɛ ba ʊ y.

Wosolɛsinnɩsora meerbaarɔ ganwʊrɛ nyarɛ,

leminno y’a hʊnhɔ rɔ wɔɔ hɩrɛ nyarɛ,

hɔdɔrɛ nyam sɔ.

⁹Bala, wɔɔ n hɔ haay dɔ y,

wosolɛsinnɩsora zibəə kʊ wɔɔ n’a bam sɔ bɩ,

wɔɔ bɩr a barɛ an n’a gam kʊ ʊ haay y.

¹⁰Bɩ, kʊ hɔ k’an mɩŋŋa paan… bɩ bɩ bʊr,

hɔ k’a jirə n ta ʊ bɩ nyarɛ.

¹¹Nyɩnta kʊ mɔɔ ʊ nyɩ bɩ, nyɩnzɛɛmbaa meer mɔɔ n’a barɛ, m nɩ m hɔɔn darɛ am nyɩ hɔ bɩ m, m nɩ nyɩbaa hɔɔn m.

Bɩ kʊ mɔɔ bɩ m ba gʊaa burgu bɩ, mɔɔ nyɩbaa zibəəro wɔɔ to.

¹²Her-her naa, bɔ a ʊ kʊ ʊ, ɩ ʊ, dɩga wɔɔ nawʊm jɛtɩga ʊ,

hɔ kʊ wɔɔ nɩ dɩgam ma bɩ bɩr yɩm fasɩ y,

bɩ dɔmɩm ɩ zɛm wɔɔ m b’a yɩm garga ra haay.

Her-her naa, mɔɔ hɔdɔrɛ jirə ta ʊ, bɩ hinni bɩ do ʊ, mɔɔ hɔ haay dɔm, amba Woso mɔɔ dɔ mɩŋŋa bɩ m.

¹³Kɛɛrɛ naa, hɔɔ kaakʊrɔ nɔɔn duro n ta ʊ, bɩ ŋ nyarɛ ba ʊ y:

Sɩrakarɛ m, bɩ taaheerlɛ m kan ŋʊarɛ kɩ,

bɩ ŋʊarɛ ɩ lɛ da ŋ nɩ haay.

Sɛnt-Ɛspri ganwʊrɛrɔ wɔɔ zibəə zaa

¹K’a a ka kʊ ŋʊarɛ ma paan…, a a ka *Sɛnt-Ɛspri ganwʊrɛrɔ wɔɔ ma sɔ kan a heer kɩ haay, an lɛ da bɩ, k’a a ka wosolɛsinnɩsora meerbaa ganwʊrɛ bɩ ma. ²Bala, gʊaa k’a nɩ lemim y’a hʊnhɔ hɩm bɩ, a hɩ bɛɛ a nawʊm kan gʊɔɔ kɩ y, meer bɩ ba a nawʊm kan Woso kɩ. Gɔsɩ bɩr hɔ k’a n’a hɩm bɩ jɩ marɛ y, hɔɔ kʊ n y’a nyaakʊm da, an nɩ ŋ hɩm Sɛnt-Ɛspri paŋŋa m. ³Bɩ gʊaa k’a nɩ Woso lɛ sire an nɩ som la bɩ, meer bɩ ba a nawʊm kan gʊɔɔ kɩ, an nɩ ŋ paŋŋa dam la, an nɩ ŋ heer yom, an nɩ ŋ heer wʊtam. ⁴Gʊaa k’a nɩ lemim y’a hʊnhɔ hɩm bɩ, a mɩŋŋa paŋŋa an n’a dam la, bɩ gʊaa k’a nɩ Woso lɛ sire an nɩ som la bɩ, sokʊmagʊɔɔ wɔɔ an nɩ ŋ paŋŋa dam la.

⁵Mɔɔ lɛ taa k’awɔɔ haay n bɩr lemim y’a hʊnhɔ hɩm, bɩ mɔɔ n a ŋʊa an lɛ da bɩ, k’awɔɔ ɩ Woso lɛ sire an nɩ som la, bɩ m jɩra. Gʊaa k’a nɩ Woso lɛ sire an nɩ som la bɩ, a lɛ da gʊaa k’a nɩ lemim y’a hʊnhɔ hɩm bɩ m, k’a maam lemim bɩ wusigə a ʊ, sokʊmagʊɔɔ wɔɔ n a jɩ ma, an ŋ paŋŋa da ra. ⁶M danyɩnɔ, k’a hɔɔn da a dɩga a. Kʊ mɔɔ bʊr awɔɔ zi, m nɩ leminno y’a hʊnhɔ hɩrɛ, bɩ Woso n hɔ hɩnka mɔɔ m, mɔɔ n a jɩ dɩnda awɔɔ nɩ y, bɩ mɔɔ n awɔɔ hɔdɔrɛ da ra y, bɩ mɔɔ n Woso lɛ si m so ra y, bɩ mɔɔ n hɔ dɩnda awɔɔ nɩ y, ncɩnaaʊ bɩ leminno y’a hʊnhɔ kʊ mɔɔ n’a hɩm bɩ nyɔɔdʊ y’awɔɔ ma ka?

⁷A do m naa sɔ kan sarbarɛ mɔdrɔ kɩ. Kɔnnɩ gɛɛ hir, kʊ ŋ nyi bɩr bɔm mɩŋŋa, gʊaa y’a bam lɔ k’a a tʊr ka kɔnnɩ bɩ, gɛɛ hir bɩ ma? ⁸Kʊ n huure hɛ kʊ gʊɔɔ n bɔ ŋnɩ ta yar ma, kʊ huure bɩ nyi bɩr bɔm zore, gʊɔɔ y’a bam lɔ ŋn’a dɔ ŋ ʊ, a bir n nawʊm yarbarɛ ma, k’a banka a ta? ⁹A do m bɩ sɔ kan awɔɔ kɩ. K’awɔɔ lemim y’a hʊnhɔ hɩ, bɩ lemim bɩ do jɩ bɩr marɛ y, ŋ y’a bam lɔ k’a hɔ k’awɔɔ n’a hɩm bɩ dɔ? A bɔ kʊ ʊ, ɩ ʊ, meer awɔɔ n’a bam vam. ¹⁰Leminno ɩ durnya naa ʊ gʊta ŋn’a hʊnhɔ, bɩ ŋ woo… naa, ŋ jɩ ta ʊ. ¹¹Bɩ, kʊ mɔɔ bɩr lemim kʊ gʊaa n’a hɩm kan mɔɔ kɩ bɩ marɛ, a zaa ɩ dɩgam mɔɔ ma saana kan a kɩ, mɔɔ nɩ dɩgarɛ a zaa ma saana sɔ. ¹²Ncɩnaaʊ bɩ, k’awɔɔ nɩ Sɛnt-Ɛspri ganwʊrɛrɔ wɔɔ ŋʊam paan… bɩ, k’a ka ganwʊrɛrɔ kʊ ŋ n’a kam kristagʊɔɔ sokʊma bɩ n ta lɛɛ sɩrakarɛ nɔ ʊ rɔ wɔɔ ma, k’awɔɔ n ŋ yɩ gʊta.

¹³Bɩ y’a ka, gʊaa k’a nɩ lemim y’a hʊnhɔ hɩm b’a ga m, an a yɛ Woso han, kʊ Sɛnt-Ɛspri n leminno wɔɔ wusigəre ganwʊrɛ ka a ʊ sɔ. ¹⁴Kʊ mɔɔ ɩ yaa dam Woso m lemim vanta m, mɔɔ heer ɩ yaa bɩ darɛ nɔ ʊ, bɩ mɔɔ bɩr hɔ kʊ mɔɔ n’a hɩm bɩ jɩ marɛ y.

¹⁵Ncɩnaaʊ naa, bɔ mɔɔ n n’a barɛ? Mɔɔ yaa dam lemim y’a hʊnhɔ bɩ m, bɩ mɔɔ yaa dam lemim kʊ gʊɔɔ n’a mam bɩ m sɔ. Mɔɔ laa lɔm lemim y’a hʊnhɔ bɩ m, bɩ mɔɔ laa lɔm lemim kʊ gʊɔɔ n’a mam bɩ m sɔ. ¹⁶Bala, k’ɩbɩɩ ɩ yaa dam Woso m barka lemim y’a hʊnhɔ nɩ, gʊɔɔ kʊ ŋ nɩ nyɩntam sokʊmagʊɔɔ wɔɔ barla, bɩ ŋ n hɔsɩ dɔ naa nɔ ʊ rɔ wɔɔ y’a bam lɔ k’a hɩ a ʊ «Amina» ɩ barka yaa bɩ darɛ ma? Bala, ŋ bɩr hɔ k’ɩbɩɩ n’a hɩm bɩ jɩ marɛ y. ¹⁷A a da ma, ɩbɩɩ barka yaa bɩ darɛ bɩ m bɩr mɩŋŋa gʊta, b’a bɩr a dam gʊɔɔ vantɔɔ wɔɔ han sɩrakarɛ nɔ ʊ y, kʊ ŋ bɩr hɔ k’ɩbɩɩ n’a hɩm bɩ mam bɩ tɔ ma.

¹⁸Mɔɔ ɩ Woso barka dam, kʊ mɔɔ n nɩ leminno y’a hʊnhɔ hɩm gʊta, an cem awɔɔ haay han bɩ minto. ¹⁹Bɩ, kʊ mɔɔ ta m nɩ kristagʊɔɔ sokʊma barla, kʊ mɔɔ meerbaanyɩ ba soor gʊɔɔ n a ma an a da ŋ han, a jɩra kʊ mɔɔ n meer ba yɔɔgʊ lemim vanta m.

²⁰M danyɩnɔ, a bɩ tɩr a hɔɔn da am nyɩnzɛɛnnyɩnɔ hɔ bɩ nɩ y, k’a tɩr a hɔɔn da am gʊɔɔ burgurɔ hɔ bɩ m. Bɩ kʊ mimbʊnyaa bɩncɛ nɩ, k’a yɩ am nyɩnzɛɛnnyɩnɔ hɔ bɩ m. ²¹N y’a gʊrsɩra ba Wosoci bɩ nɔ ʊ, n ʊ:

Do k’a nɩ lemim vanta hɩm mɔɔ n’a sarɛ,

m meer ba kan Israyɛl do bɩ kɩ, saanɔɔ mɔɔ nɩ ŋ sarɛ,

m meer ba kan ŋ kɩ, baa kan naa kɩ haay ŋ b’a tʊr kam mɔɔ ma y.

²²Naa minto bɩ, leminno y’a hʊnhɔ hɩrɛ bɩ, makra a n’a hɩnkam basɩrakənno wɔɔ m, a bɩr hɔsɩ hɩnkam sɩrakənno wɔɔ nɩ y, bɩ, wosolɛsinnɩsora meerbaa ganwʊrɛ bɩ, makra a n’a hɩnkam sɩrakənno wɔɔ m, b’a bɩr hɔsɩ hɩnkam basɩrakənno wɔɔ nɩ y.

²³K’awɔɔ a so kʊ ma haay, a a da kʊ ʊ haay an nɩ lemim y’a hʊnhɔ hɩrɛ, kʊ gʊɔɔ kʊ ŋ nɩ hɔsɩ dɔ a nɔ ʊ rɔ wɔɔ gɛɛ basɩrakənno bɩ gasʊ awɔɔ zi, ŋ b’a hɩrɛ ŋ ʊ, hɔɔzannɔ n’awɔɔ m na? ²⁴Bɩ k’awɔɔ haay ɩ Woso lɛ sire an nɩ som la, kʊ basɩrakər, gɛɛ gʊaa k’a n hɔsɩ dɔ naa nɔ ʊ bɩ, gasʊ awɔɔ zi, a y’a dɔrɛ a heer ʊ a ʊ, a y’a bʊnyaa bam, hɔ k’a n’a mam bɩ y’a karɛ an a dɔ a ʊ, a kʊrɔ ma, gʊaa haay n’a dʊdɔ yarm. ²⁵Hɔ k’a n’a heer ʊ haay bɔm garga ra, bɩ n a ka an kukurə zɛ Woso taa, an Woso da ʊ, an kasɛtɩ ka, a ʊ, Woso y’awɔɔ bire ʊ, denter.

Hɔ haay a ga m an ba an a ga kʊ ʊ kristagʊɔɔ sokʊma nɔ ʊ

²⁶Bɔ y’a ga barɛ m kɛɛrɛ? K’awɔɔ tɩr a so kʊ ma, kʊ gʊaa ʊ k’a laa lɔ, gʊaa vanta k’a hɔ dɩnda, Woso n hɔ hɩnka gʊaa vanta m k’a n’a hɩ, kʊ gʊaa vanta ɩ lemim y’a hʊnhɔ hɩrɛ m sɔ, deem nɩ lemim bɩ wusigəre nɩ, naa woo… naa, a a ga m an ba sokʊmagʊɔɔ wɔɔ haay sɩrakarɛ talɛɛ tɔ ma. ²⁷K’awɔɔ tɩr meer ba lemim y’a hʊnhɔ nɩ, kʊ gʊaa hɩɩya gɛɛ kaakʊ bala n meer bɩ ba lemim y’a hʊnhɔ bɩ m, deem-deem, kʊ gʊaa deem n a si an bɩr a wusigəre. ²⁸Kʊ gʊaa ba ʊ an nɩ lemim y’a hʊnhɔ bɩ wusigəm sokʊma bɩ nɔ ʊ, kʊ lemim y’a hʊnhɔ hɩrɛ zannɔ wɔɔ n ze pi, ŋnɩ bɩr a hɩrɛ a heer ʊ, ŋnɩ bɩr meer bam kan Woso kɩ. ²⁹Kʊ wosolɛsinnɩsora meerbaa ganwʊrɛ bɩ nɩ, kʊ gʊaa hɩɩya gɛɛ kaakʊ m Woso lɛ bɩ si, ŋnɩ so ra. Kʊ gʊɔɔ kʊ ŋ gɔɔta rɔ wɔɔ n a tʊr ka ŋ meerbaarɔ wɔɔ ma mɩŋŋa, ŋnɩ dɩga a Woso meerbaarɔ m denter gɛ. ³⁰Kʊ Woso hɔ hɩnka gʊaa vanta m gʊɔɔ wɔɔ barla k’a n’a hɩ, kʊ gʊaa k’a lɛɛ ka an nɩ meer bam bɩ n ze pi, kʊ bɩ n a hɔ bɩ hɩ. ³¹Awɔɔ a da ma a Woso lɛ si a so ra haay, bɩ k’a bɩr a bam deem-deem, kʊ gʊaa haay m daahan yɩ a nɔ ʊ, ŋnɩ paŋŋa yɩ ŋnɩ ta lɛɛ. ³²Wosolɛsinnɩsorazannɔ wɔɔ a da ma, ŋn’a da a mɩŋŋɔɔ ma, ³³amba kristagʊɔɔ sokʊmarɔ haay n’a bam bɩ m. Bala, Woso lɛ baa warkʊma ma y, hɔ haay n ba laafɩɩ an a ga kʊ ʊ bɩ an n’a ŋʊam.

³⁴K’awɔɔ tɩr a so kʊ ma, kʊ lannɔ wɔɔ n ze pi, ŋ ba lɛ m k’a meer ba sokʊma nɔ ʊ y, ŋnɩ nyɩnta sɩɩ… ŋnɩ bɩr a tʊr kam amba Moyiisi lɛrɔ a hɩ bɩ m. ³⁵Kʊ ŋ lɛ taa k’a laaka da hɔ niŋŋə ma k’a jɩ dɔ, kʊ ŋ n’a to ŋn’aa laaka da a zino han har ʊ. A bɩ zore kʊ lʊ m meer ba sokʊma nɔ ʊ y.14.34-35 Ciro gusinno niŋŋoo nɔ ʊ, bɩncɛrɔ nɔɔn duro ɩ sapitɩr 14 bɩ nyarɛ ma.

³⁶A hɩ awɔɔ ʊ Woso lemim bɩ, a to a ʊ, awɔɔ zi ra? Gɛɛ, a gɩnga awɔɔ ʊ, awɔɔ n ta m a minto ra? ³⁷Kʊ gʊaa y’a gɩngarɛ a ʊ, wosolɛsinnɩsorazaa n a mɩ, gɛɛ a ɩ mɩsɩrbaa bam Sɛnt-Ɛspri paŋŋa nɔ ʊ, k’a n’a dɔ a ʊ, hɔ kʊ mɔɔ gʊrsɩra ba awɔɔ ma naa, Zuuba mɩŋŋa lɛ m. ³⁸Kʊ gʊaa a ʊ, a bɩ yɛm hɔ kʊ mɔɔ hɩ naa ma, k’a dɔ a ʊ, Woso n a zaa dɔ Sɛnt-Ɛspri paŋŋa mɩsɩrbaa barɛ zaa y.

³⁹Ncɩnaaʊ bɩ, m danyɩnɔ, k’a ka wosolɛsinnɩsora meerbaa ganwʊrɛ bɩ ma kan a heer kɩ haay, b’a b’a ta gʊɔɔ kʊ ŋ nɩ lemim y’a hʊnhɔ hɩm nɔ wɔɔ m toore y. ⁴⁰Bɩ k’a ka ma, kʊ hɔ haay woo… n ba an a ga kʊ ʊ, warkʊma bɩ yɩ ʊ y.

Krista mɩmbɔʊrɛ mim

¹M danyɩnɔ, lemim nyɩnta kʊ mɔɔ pa da awɔɔ m, awɔɔ n a si, a gɔɔta a sɩra ka ʊ kɔɔkɔɔ bɩ, mɔɔ n’a tɔ darɛ a nɔ ʊ. ²Lemim nyɩnta bɩ do n’awɔɔ bʊmbɔm, k’awɔɔ nyasʊm amba mɔɔ pa da awɔɔ m bɩ m. Bɩ k’awɔɔ n nyasʊm mɩŋŋa, sɩra k’awɔɔ ka bɩ bɔm vam. ³Lɛɛ mɔɔ ka m hɔ kʊ n y’a dɩnda mɔɔ m bɩ dɩnda awɔɔ m. A ɩ yɩrɛ ɩ ʊ, Krista ga wɔɔ mimbʊnyaarɔ tɔ ma, amba n y’a da Wosoci ʊ bɩ m. ⁴N y’a bir, an a mɩm bɔ ʊ a dɔmɩm kaakʊ hinni ʊ, amba Wosoci a hɩ bɩ m. ⁵A a hɩnka Sefas m, bɩ jɛ ʊ an a hɩnka bueerehɩɩyɔɔ k’a ŋ bɔ ʊ rɔ wɔɔ m. ⁶Dɔmɩm vanta ʊ, an a hɩnka wɔɔ danyɩnɔ kristagʊɔɔ bam zɔrsoor m lɛ deem, gʊɔɔ wɔɔ duro gɔsɩnnɔ gɩnga, gʊta gɔɔta ŋnɩ mɩsɩr. ⁷Naa jɛ ʊ, a a hɩnka Zakkɩ m, an b’a hɩnka kristazibəəzannɔ wɔɔ m haay.

⁸Nawɔnnɔ woo… jɛ ʊ, an b’a a hɩnka mɔɔ m sɔ, mɔɔ kʊ mɔɔ bɔ kʊ ʊ kan nyɩ k’a yɩ b’a dɔmɩm n a ku bɩ kɩ bɩ. ⁹Bala, mɔɔ m kristazibəəzannɔ wɔɔ haay poore, mɔɔ n m ga m, kʊ n nɩ m bir kristazibəəzaa y, bala, mɔɔ fɩr ka Woso gʊɔɔ sokʊma ma. ¹⁰Bɩ, m ba kʊ mɔɔ ʊ gʊaa niŋŋə her naa, Woso barka bɩ tɔ ma m, b’a barka bɩ n bɔ vam mɔɔ gʊr zi y. Bɩ mɔɔ zi ba, m lɛ da ŋ haay ra, bɩ mɔɔ mɩŋŋa bɛɛ y, Woso barka k’a nɩ kan mɔɔ kɩ bɩ m. ¹¹Bɩ, kʊ mɔɔ nɩ lemim nyɩnta bɩ pa darɛ, gɛɛ zibəəzannɔ vantɔɔ wɔɔ nɩ, bɩ bɛɛ pakra ba y. Lemim deem wɔɔ n’a pa dam, bɩ lemim bɩ do awɔɔ sɩra ka ʊ bɩ.

Gəəno mɩmbɔʊrɛ mim

¹²Wɔɔ y’a pa dam ʊ ʊ, Krista a mɩm bɔ ʊ gəəno bire ʊ, b’a a ba lɔ awɔɔ gʊɔɔ gɔsɩnnɔ n’a hɩrɛ ŋ ʊ, gəəno b’a mɩm bɔŋ ʊ? ¹³Kʊ gəəno mɩmbɔʊrɛ ba ʊ, k’a maam, Krista n a mɩm bɔ ʊ wa. ¹⁴Bɩ k’a ɩ yɩrɛ ɩ ʊ, Krista n a mɩm bɔ ʊ, wɔɔ pa bɩ darɛ jɩ ba ʊ wa. B’awɔɔ sɩra bɩ karɛ vam sɔ wa. ¹⁵Bɩ, kʊ ncɩnaaʊ m, ŋʊaar kasɛtɩ zannɔ m wɔɔ m Woso mim bɩ nɔ ʊ. Bala, wɔɔ hɩ ʊ ʊ, Woso Krista mɩm bɔ ʊ gəəno bire ʊ, bɩ kʊ gʊɔɔ bɩr a mɩm bɔŋ ʊ, k’a maam Woso n Krista mɩm bɔ ʊ y. ¹⁶Kʊ gəəno bɩr a mɩm bɔŋ ʊ, k’a maam Krista n a mɩm bɔ ʊ y. ¹⁷Bɩ kʊ Krista n a mɩm bɔ ʊ, sɩra awɔɔ ka nɩbɩr, awɔɔ gɔɔta an n’a mimbʊnyaarɔ nɔ ʊ tee…. ¹⁸Naa k’a hɩ sɔ a ʊ, gʊɔɔ kʊ ŋ sɩra ka Krista ʊ, ŋnɩ bɔkarɛ ŋnɩ gɩnga rɔ wɔɔ ɩ nyaanlɛ nɔ ʊ. ¹⁹K’a ɩ yɩrɛ ɩ ʊ, her mɩsɩrbaa naa daahan tɔ ma m bala wɔɔ n sɩra ka Krista ʊ, yaanda barɛ paan… zannɔ m wɔɔ m, an cem gʊɔɔ haay han.

²⁰B’a bɩ ncɩnaaʊ y, Krista a mɩm bɔ ʊ gəəno bire ʊ paan…. Lɛɛ a ka an a mɩm bɔ ʊ, kʊ gʊɔɔ kʊ ŋ gɩnga rɔ wɔɔ n b’a mɩm bɔ ʊ sɔ. ²¹Bala, gʊaa deem y’a ka zɛ n bʊr durnya ʊ, gʊaa deem tɔ ma m sɔ, gəəno n’a mɩm bɔŋ ʊ. ²²Adam minto y’a ka gʊɔɔ n ta ʊ, bɩ y’a ka gʊɔɔ nɩ gɩngam sɔ. Bɩ gʊɔɔ kʊ ŋ y’a zɛ kʊ ra kan Krista kɩ rɔ wɔɔ haay y’a mɩm bɔŋ ʊ, Krista tɔ ma sɔ.

²³Bɩ, mɩmbɔʊrɛ bɩ bɩncɛ ʊ, yɩ a nawʊrɛ ncɩnaaʊ: Krista m lɛɛkarɛzaa, a lɛɛ ka an a mɩm bɔ ʊ gəəno bire ʊ. K’a b’a bɔ an bʊr kɛɛrɛ, gʊɔɔ k’a so ŋ ʊ rɔ wɔɔ y’a mɩm bɔŋ ʊ. ²⁴Naa jɛ ʊ, Yeezuu Krista zinəro wɔɔ kan a cinno kɩ paŋŋa zaar bam, a paŋŋazannɔ kʊ ŋ nɩ durnya ʊ haay paŋŋa zaar bam. K’a ŋ paŋŋa zaar ba, bɩ jɛ ʊ, durnya nyarɛ, an bɔkarɛ an cirbəə kʊ Woso a ka ʊ bɩ da Zɩ Woso wɔ ʊ. ²⁵Bala, a a ga m, k’an a so cirbəə ʊ, kʊ Woso n tolle ba, an a ka an bʊr a jɩnnɔ ra, an tʊntɔ ŋ la. ²⁶Jɩm k’a nɩ gɔɔtam jɛ ʊ, n n’a zaar bam bɩ n zɛ m. ²⁷Bala, n y’a da Wosoci ʊ, n ʊ: «Woso a ka hɔ woo… n’a gannɔ taa.»

Bɩ Wosoci bɩ k’a hɩ a ʊ, hɔ haay woo… y’a taa bɩ, a ba Woso mɩŋŋa burə ʊ wa, bala, Woso mɩŋŋa y’a ka an nɩ hɔ haay woo… burə ʊ. ²⁸Bɩ, kʊ Woso b’a ka Krista nɩ hɔ haay burə ʊ, Krista mɩŋŋa k’a m Woso Nyɩ bɩ y’a mɩŋŋa zerm Woso taa, bala a y’a ka an nɩ hɔ haay burə ʊ. Yɩ a nawʊrɛ ncɩnaaʊ, Woso mɩŋŋa m bɩ nyɩntam hɔ haay soʊrezaa, gʊɔɔ haay burə ʊ.

²⁹Kʊ gəəno mɩmbɔʊrɛ ba ʊ, bɔ gʊɔɔ kʊ ŋ nɩ batɛm sim gəəno tɔ ma rɔ wɔɔ n’a barɛ? Kʊ gəəno mɩmbɔʊrɛ ba ʊ denter, bɔ tɔ ma m ŋnɩ batɛm sire ŋ minto? ³⁰Bɩ bɔ m sɔ wɔɔ mɩŋŋɔɔ, wɔɔ nɩ yɛm wɔɔ zibəə bɩ nɩ wɔɔ dam mim kʊsɩ lɛ ʊ? ³¹Mɔɔ mɩŋŋa, dɔmɩm biyəə mɔɔ ɩ zɛ lɛ ʊ. M danyɩnɔ, naa hɩ mɔɔ nawʊrɛ awɔɔ m, kʊ mɔɔ heer nɩ nyɔɔrɛ awɔɔ minto Zuuba Krista nɔ ʊ bɩ tɔ ma. ³²Gʊɔɔ fɩr ka mɔɔ ma Efɛɛzɩ ʊ naa ʊ, ɩ ʊ poohɔɔ nɩ ŋ mɩ, mɔɔ m zoo ba kan ŋ kɩ kɔɔkɔɔ. Kʊ naa ba mɔɔ ʊ durnya naa do hɔ yɩrɛ tɔ ma, a nyɔɔdʊ m bɔ nɩ? Kʊ gəəno mɩmbɔʊrɛ ba ʊ, k’a maam k’a ba amba bɔɔr naa do a hɩ bɩ m: «Ʊ ʊ da hɔbɩrɛ bɩrɛ lɛ ʊ bala, k’ʊ bɩr bɛɛ mim bala, bala, booti m, ʊ gɩngam.»

³³A bɩ bra bɩmba a mɩŋŋɔɔ nɩ y. Bala, n ʊ: «Kʊ gʊaa ɩ kan zukuuro bʊnyaarɔ kɩ, a ba a nawʊm gʊaa bʊnyaa sɔ.» ³⁴K’a a bɔ hɔɔn daŋŋada k’awɔɔ n ta m b’ʊ, k’a mimbʊnyaabarɛ to fasɩ. Awɔɔ gʊɔɔ gɔsɩnnɔ n Woso dɔ cɩna y, awɔɔ nyannɩ n bɩ.

Gəəno wɔɔ y’a mɩm bɔŋ ʊ

mɛ vanta m

³⁵A a da ma gʊaa n laaka da a ʊ, gəəno y’a bam lɔ ŋn’a mɩm bɔ ʊ? Kʊ ŋ y’a mɩm bɔ ʊ, ŋ mɛ bɩ yɩm lʊnlɔ? ³⁶Hɔɔnwarzaa ra, hɔ k’ɩbɩɩ n’a duum bɩ, k’an ga a bɔm na? ³⁷Bɩ hɔ k’ɩbɩɩ n’a duum bɩ, kʊ yɩryaa m gɛɛ hɔ vanta m, hɔ bɩ yaa ɩbɩɩ n’a duum, a gɔ bɛɛ ɩbɩɩ n’a sɔɔn wa. ³⁸Ba ɩbɩɩ duu bɩ, bɩ Woso a ka an bɔ, a do n a hɔ kan hɔyaa do vantɔɔ kɩ, amba Woso mɩŋŋa lɛ n taa bɩ m, hɔyaa do biyəə y’a hɔ. ³⁹Hɔɔ mɩsɩɩrɔ haay kʊ ŋ nɩ ta ʊ rɔ nɔɔm, biyəə mɛ y’a hɔ. Gʊɔɔ mɛrɔ y’a hʊnhɔ, poo kan harhɔɔ kɩ, bɛnnɔ kɩ, zɔnɔ kɩ mɛrɔ y’a hʊnhɔ sɔ. ⁴⁰Hɔɔ kʊ ŋ nɩ brama rɔ wɔɔ kan hɔɔ kʊ ŋ nɩ tara burə ʊ rɔ wɔɔ kɩ y’a hʊnhɔ, ŋ gʊɛrɛ y’a hʊnhɔ sɔ. ⁴¹Wosogure lɛɛgure y’a hɔ, mom hɔ y’a hɔ, monyaarɔ lɛɛgure y’a hʊnhɔ sɔ, monyaarɔ mɩŋŋɔɔ lɛɛgure lɛ dɩnda kʊ m.

⁴²Yɩ a nawʊrɛ ncɩnaaʊ sɔ gəəno mɩmbɔʊrɛ ma. Kʊ n ta k’a yaa gər bir, a do m ba n tɩr hɔyaa duu bɩ m. Gər bɩ hɔ vɔnrɛzaa m, bɩ k’a b’a mɩm bɔ ʊ, a bɩ vɔnm dɔ y. ⁴³Gər ɩ yɩrɛ ɩ ʊ, hɔ nyɔɔdʊwarzaa m, paŋŋawarzaa m sɔ n n’a birm maam, an bɔkarɛ an n’a mɩm bɔŋ ʊ an nɩ lɛbɔʊrɛ m kan paŋŋa kɩ m gʊta. ⁴⁴Gər birle ɩ yɩrɛ ɩ ʊ, tara burə hɔ n n’a birm bala, an bɔkarɛ k’a b’a mɩm bɔ ʊ, a mɛ b’a ba arzana mɛ. K’ʊ n nɩ tara burə ʊ naa ʊ naa, kʊ mɛ ta ʊ, arzana ʊ, mɛ nyɩntaŋ ʊ sɔ. ⁴⁵Naa tɔ ma m, n y’a gʊrsɩra ba Wosoci b’ʊ, n ʊ: «Gʊaa lɛɛkarɛzaa Adam a ba gʊaa mɩsɩr. Bɩ Krista bɔ kʊ ʊ ɩ ʊ, Adam hɩyaazaa m, bɩ bʊr a ʊ, jɛ ʊ, b’a m Ɛspri k’a nɩ mɩsɩrbaa karɛ.» ⁴⁶Bɩ lɛɛkarɛ mɛ k’an ta ʊ bɩ, mɛ kʊ Woso Ɛspri a ka bɩ bɛɛ m bɩ, durnya hɔ m bɩ. Woso Ɛspri n’a kam bɩ, zɛ bɩ n nawʊm jɛ ʊ. ⁴⁷Gʊaa lɛɛkarɛzaa bɩ, durnya gʊaa m bɩ, a bɔ n y’a ʊ taa ʊ. Gʊaa hɩɩyazaa bɩ, a to b’ʊ arzana ʊ. ⁴⁸Gʊaa kʊ durnya gʊaa m bɩ, durnya gʊɔɔ wɔɔ bɔ bɩ rɛ, gʊaa kʊ arzana gʊaa m bɩ, arzana gʊɔɔ wɔɔ bɔ bɩ rɛ sɔ. ⁴⁹Dɩɩtaa naa, wɔɔ bɔ durnya gʊaa bɩ rɛ, Bɩ, dɔmɩm ɩ zɛm, wɔɔ n bɩ zɛm bɩ bɔ arzana gʊaa bɩ rɛ sɔ.

⁵⁰M danyɩnɔ, mɔɔ ʊ kʊ m a hɩ m ʊ, gʊaa b’a dam ma an gasʊ Woso cirbəə b’ʊ, a mɛsim nɩ y. Hɔ k’a nɩ vɔnm bɩ b’a dam ma an hɔ k’a bɩr vɔnm bɩ yɩ y.

⁵¹K’a dɩga a, kʊ m hɔ kʊ gɔsɩ n a dɔ hɩ a m. Ʊ woo… naa, ʊ bɩ gɩngam haay y, bɩ ʊ da ʊ nawʊm kʊ ʊ haay ʊ ʊ lʊr. ⁵²Ba naa do n nawʊm, huure jɛzaa bɩ hɛrɛ ma, ʊ lʊr ʊ n nawʊm lɛɛm-lɛɛm, am mɩm nɩfɩ zɛrɛ m. Bala, kʊ n bɩ huure bɩ hɛ, gʊɔɔ kʊ ŋ gɩnga rɔ wɔɔ y’a mɩm bɔŋ ʊ mɛ k’a bɩ vɔnm dɔ m, wɔɔ n’ʊ lʊr. ⁵³Bala, wɔɔ k’ʊ nɩ gɩngam, ʊ nɩ vɔnm naa, pakra m kʊ wɔɔ n mɛ k’a bɩ gam fɩɩga y, b’a bɩ vɔnm sɔ sa. ⁵⁴Kʊ wɔɔ mɛrɔ b’a lʊr ncɩnaaʊ, hɔ kʊ n y’a gʊrsɩra ba Wosoci b’ʊ bɩ kʊ yɩm, n ʊ:

Zɛ ba ʊ dɔ y, n bʊr zɛ ra.

⁵⁵Zɛ ra, ɩ dama bii?

Ɩ paŋŋa bii?

⁵⁶Zɛ paŋŋa bɩ m mimbʊnyaa m, mimbʊnyaa paŋŋa bɩ m Moyiisi lɛrɔ m. ⁵⁷Ʊ yaa da Woso m barka, an n’a kam wɔɔ nɩ bʊrm hɔ haay ra, wɔɔ Zuuba Yeezuu Krista tɔ ma.

⁵⁸Ncɩnaaʊ bɩ, m danyɩnɔ ŋʊarɛrɔ, k’a jɩm kɔɔkɔɔ, a b’a ka hɔsɩ n a da a ma y, k’a bɩr tam lɛɛ tee… Zuuba zibəə nɔ ʊ, bala, awɔɔ dɔ a ʊ, kɔ k’awɔɔ nawʊm Zuuba zuure nɔ ʊ bɩ, a bɩ zɛm bɩ bɔ vam nɩ y.

Busoo zɩnzɛkʊra n a ka Zerizalɛm kristagʊɔɔ ʊ

¹Kʊ busoo zɩnzɛkʊra n a ka kristagʊɔɔ ʊ bɩ bɩncɛ nɩ, k’a hɔ kʊ mɔɔ hɩ Galasii kʊrɔ wɔɔ kristagʊɔɔ sokʊmarɔ wɔɔ m bɩ ba sɔ. ²Hɔ k’awɔɔ n’a bam bɩ ba n nɩ: Hatʊ hinni biyəə ʊ, k’awɔɔ gʊaa biyəə n dɩga busoo k’an ta m ma an a bɔ ʊ an a cɩnta a hɔ, k’an bɩr yɩrɛ ɩ ʊ, kʊ mɔɔ bɩ lee ku, k’awɔɔ b’a ya a ka ma k’a busoo zɩnzɛ kʊ ra y. ³Kʊ mɔɔ bɩ lee ku, mɔɔ ci bam m a ka gʊɔɔ k’awɔɔ nɩ ŋ bɔŋ ʊ kʊ ŋ nɩ ta a ganwʊrɛrɔ wɔɔ m ŋn’aa ŋ ka Zerizalɛm kristagʊɔɔ wɔɔ ʊ rɔ wɔɔ ʊ, kʊ ŋ nɩ ta m kan busoo bɩ kɩ. ⁴K’a bʊr an nɩ yɩrɛ ɩ ʊ, a a ga m kʊ mɔɔ mɩŋŋa n ta, ŋ tam kan mɔɔ kɩ.

Pol ɩ zaakʊrɛrɔ gɩngam

⁵Ta mɔɔ nawʊm Masedʊan kʊ ʊ, m a dɔ m lee ku awɔɔ zi, bra mɔɔ nawʊm b’ʊ, m bʊr awɔɔ zi. ⁶A a da ma, mɔɔ n nyɩnta awɔɔ zi b’ʊ poore, gɛɛ m nyɩnta b’ʊ nyɛɛm dɔmɩm ʊ, k’awɔɔ n a da mɔɔ han, m zaa bɩ sarɛ ma, baa kʊ ta mɔɔ nawʊm ka. ⁷Naa do ma naa, mɔɔ lɛ baa kʊ m dɩga awɔɔ ma cenle ma y, mɔɔ lɛ taa kʊ m bɩ gɔɔta kan a kɩ poore, kʊ Zuuba yɛ. ⁸Bɩ, mɔɔ gɔɔtam Efɛɛzɩ kʊ ʊ naa ʊ, an ta an pantɩkɔtɩ cibsa dɔmɩm ku. ⁹Bala, Woso a ka mɔɔ nɩ m dam ma m zi ba naa ʊ gʊta, bɩ jɩnnɔ wɔɔ gʊta sɔ. ¹⁰Kʊ Timote bɩ lee ku awɔɔ zi b’ʊ, k’a nyasʊ m mɩŋŋa, k’a heer n nyɔɔ, bala, Zuuba zi an n’a bam sɔ am mɔɔ hɔ bɩ m. ¹¹Gɔsɩ b’a gore bɔ ʊ y. K’a a da han k’an a bɔ an bʊr mɔɔ zi laafɩɩ, bala, mɔɔ y’a mɩm dam, kan danyɩnɔ wɔɔ kɩ. ¹²Kʊ wɔɔ danyɩ Apolɔs nɩ, mɔɔ hɩ m gallɛm hɔka k’an bʊr awɔɔ zi kan ʊ danyɩnɔ wɔɔ kɩ, b’a lɛ baa fɩɩgaa k’a ta awɔɔ zi b’ʊ dɩɩtaa y, k’a bɩ toore yɩ, a zɛm.

Meerbaa nyambʊrlɛ kan leersore kɩ

¹³K’a dundo a zi, a jɩm kɔɔkɔɔ sɩrakarɛ nɔ ʊ, a bɩr heer koodə m, a bɩr paŋŋa m. ¹⁴K’a hɔ haay woo… ba ŋʊarɛ nɔ ʊ. ¹⁵M danyɩnɔ, awɔɔ dɔ a ʊ, Stefanas kan a hargʊɔɔ kɩ ɩ lɛɛ ka ŋn’a ba sɩrakənno Akayii kʊrɔ wɔɔ ʊ. Ŋ y’a tʊntɔ ʊ paan… ŋn’a da kristagʊɔɔ wɔɔ han Woso zibəə bɩ nɔ ʊ. Mɔɔ ʊ kʊ m a hɩ a m, ¹⁶k’a yɛ gʊɔɔ ncɩnaaʊ rɔ wɔɔ ma, kan gʊɔɔ kʊ ŋ nɩ zi bam, ŋn’ɩ kɔrɛ yɩm kan ŋ kɩ rɔ wɔɔ ma sɔ.

¹⁷Mɔɔ heer ɩ nyɔɔm gʊta, Stefanas k’a nɩ naa ʊ, kan Fɔrtɩnatus kɩ, Akayikus kɩ bɩ tɔ ma, kʊ ŋ nɩ naa ʊ bɩ, bɔ a ʊ kʊ ʊ ɩ ʊ, awɔɔ nɩ kan mɔɔ kɩ. ¹⁸Bala, ŋ minto bɩ, mɔɔ heer koodə yɩ, ŋ y’awɔɔ heer ba kookoo sɔ. Gʊɔɔ ncɩnaaʊ rɔ wɔɔ a ga daʊrɛ m paan…. ¹⁹Azii kʊrɔ wɔɔ kristagʊɔɔ sokʊmarɔ wɔɔ ɩ yaa darɛ awɔɔ m. Akilas kan Priska kɩ ɩ yaa darɛ awɔɔ m danyɩbaa Zuuba nɔ ʊ minto. Kristagʊɔɔ kʊ ŋ n’a som kʊ ma ŋ har ʊ rɔ wɔɔ ɩ yaa darɛ awɔɔ m sɔ. ²⁰Wɔɔ danyɩnɔ wɔɔ haay ɩ yaa darɛ awɔɔ m. K’a yaa da kʊ m mɩŋŋa-mɩŋŋa kan daʊrɛ kɩ. ²¹Mɔɔ mɩŋŋa Pol nɩ leersore naa do gʊrsɩra bam. ²²Kʊ gʊaa n Zuuba ŋʊa y, Woso lerbɔrɛ bʊnyaa ɩ kan a zaa kɩ. «Maranata» a jɩ k’a hɩ a ʊ, Zuuba n bʊr. ²³A yɛ mɔɔ nawʊm kʊ Zuuba n’awɔɔ barka da ʊ. ²⁴Mɔɔ y’awɔɔ woo… ŋʊam Yeezuu Krista nɔ ʊ.