TITUS

TITUS

¹ Ro Paulus, Allah manfamyan ḇyedi ma Yesus Kristus manwawan ḇyedi faḇefaduru Allah snonkaku kyinfir kwarsya kakyar sena ma fawawi ro napnapesya ḇeḇair ro ḇaḇeari koḇena, ² ma ḇyeknam ro saneraro ḇekaku ḇekain fyoro rofyor awarya ḇaim Allah ḇyeasas i kwar ma Allah ipok isrer ḇa, ³ ma rofyor Allah imarisen, fyasna kwar ro wos ḇyedi ro ḇaryas Ankankinem Ḇeḇye ikyar kwar maro aya imnis Allah sasoser ḇyedi, Ḇeḇuk korerima ḇeko. ⁴ Faro Titus, romawa karyer yedi ro kakyar koḇena kam: Allah Kmaya ma Yesus Kristus, saswar-fakamaman ma aski-ḇaḇye ḇyedi ryous aw kada. ⁵ Yaḇur aw kwar ro Kreta kuker swaruser ine, insa wafrur rosai ḇeḇefandun ma insa wakanaw penetua-penetua ro mnuna imnis raris moḇ yanun kwar faro aw, ⁶ isoine snonkaku ḇefarorewḇa, ḇena swa oser monda, kina ḇyena sikenem kuker kakyar faro Kristus ma sisma safsof awer ro kankenem ḇeḇyeḇa mboi sikenem kuker aunos. ⁷ Snar ḇefararur ro Allah rum ḇyedi snonkaku ḇefarorewḇa, ḇemarares ḇa, ḇemasasor ḇa, ḇemasaser ḇa, mkaba pipiḇa, ⁸ mboi ḇemarisen ḇeḇuk moḇ ḇeḇeryar, ḇemarisen roi ḇeḇye, ḇefawi nanem, ḇenapes, ḇekenem nasren, ḇemkuser mankundi ⁹ ma ḇeserepen wos ḇenapes ḇemnis kuker farkarkor ḇeḇye, insa ifawi ḇyuk farkarkor faro snonkaku ro knam farkarkor anna ma ḇyenamu faḇyuk snekin faro ḇesampumisya. ¹⁰ Snar snonkaku sibor kwar sikenem kuker aunos ḇa, isyadi rofandu snonkaku ḇeso sasoser sofakfukya. Kuker wos ḇeḇefromo ma sfarkor ninyan snonkaku. ¹¹ Snonkaku ḇerariryasya sḇadon sena neḇesisen kada, snar sfarkor ninyan kina sibor kuker farkarkor ḇemnis ḇa fasisma fainda ḇefrur mamyai. ¹² Nabi oso ro siḇardi, ḇekain ro Kreta ikofen kako: "Kretasya indo sankarkar, sḇeaiwan ḇeḇarḇor, ḇeyanburamek ma ḇemanon." ¹³ Nabi ani wos ḇyedi kyaku. Inja wasonek pakrek kaku si insa sikyar faro Allah kuker nyan ḇenapes, ¹⁴ ma sikyar kaker awer farfyar kakais Yahudi ma sasoser-sasoser snonkaku ḇesasyarbur ḇaḇenapnapesya. ¹⁵ Faro ḇesrensya roi ḇeḇor nakam nasren; ḇape faro ḇearwaremsya ma ḇekyar ḇasya osoḇaḇeri faisren, snar kakara ma swaruser sena nmamas. ¹⁶ Skarem soḇo sifawi Allah, ḇape ro fararur sena sfamyun Allah. Sikada snonkaku befrur roi ḇemnis oso ḇaḇeri.

¹ Ḇape aw Titus, baryas farkarkor ḇenapes raris Allah farkarkor ḇyena. ² Snonkaku ḇeḇesinansya simkuser si, sesyowi, sifawinanem, kakyar sena nanapes, sisaswar ma senamu. ³ Rarirya kako ḇinsarsya, sikenem imnis snonkaku ḇesren, skoraryae ḇa, seḇinfyan faro swan ḇa, ḇape sifawi ssḇuk farkarkor ro roi ḇeḇyena ⁴ ma rarirya sfarkor inai babosya fasiswar swasesi ma romawasesi, ⁵ sikenem kuker fawawinanem ma saranden, simyaren sfaduru kina sena, sfafir ma saser faro swasesi, insa Allah wos ḇyedi snonkakusya sonef aweri. ⁶ Rarirya kako romawa babosya; wanunsi insa simkusersi ro roi ḇeḇor kam ⁷ ma mankundaw benyan ḇefasna kankenem ḇeḇye. Inja buk farkarkor kuker aunos ma kaku ḇeri, ⁸ wawos bena nanapes ma ḇaryas bena nfarorewḇa isof ḇesampum awsya simai, snar roi ḇeḇyeḇa ono naisyaḇa fasikofen ro ko. ⁹ Manfamyansya sesyowi manseren sesi ro roi ḇeḇor kam ma sisampum awer si, ¹⁰ ma skaraw awer, ḇape sikenem naḇye kuker awnos, insa rarirya snonkakusya sisandik Allah farkarkor ḇeḇor ḇyena kam, Ḇeḇuk korerima ḇeko. ¹¹ Snar Allah saswar-fakamaman ḇyena ḇeḇuk koreri faro snonkakusya kam nasnai kwar. ¹² Allah saswar ḇyedi fyarkor ko insa kobur ḇarḇorna ma rmomen supswan ine ma insa kokenem kuker fawawinanem, nanapes ma ḇaḇeari faro Allah ro supswan ine. ¹³ Ma kowaf Ras ḇepupes sanemura ro ani, ḇefo kuker aski; ro Ras ḇepupes ani nari supswan smam Yesus Kristus baba ḇyedi, isoine Allah Ḇebasyadi ma Wairek Ḇeḇuk korerima ḇeko. ¹⁴ Ḇeḇuk mankundi kwar maḇeko insa ḇyuk ḇaḇemkei ḇeko ro ḇarḇor nakam ma fyasren kawasa ono faro mankundi, ḇemyaren ḇefrur roi ḇeḇye. ¹⁵ Baryas roi ḇeḇor anna kam, ma buk ananun ma buk snekin snonkaku kuker papoik wasmana. Ma snonkaku ono smamkyof awer aw.

¹ Buk swarepen faro si insa siso ḇaḇesasoserya ma snonkaku ḇesma papoik, sisouser ma sfasos fasifrur fararur ḇeḇye. ² Sonefyae awer si, srakrok awer, iḇye sikenem kuker fafir faro snonkakusya kam. ³ Snar ḇeponiwara ko kako kokenem ro fawawi royoḇa: koḇeuser ḇa, koḇor, koḇemanfyan faro nafsu ḇeḇor ma rmomen, kokonem ro ḇarḇor ma kram masasor, kayinyae ko. ⁴ Ḇape Allah, Ḇeḇuk korerima ḇeko fyasna saswar ḇyedi kwar ma ḇaḇye ḇyedi faro ko, ⁵ rofyor ani ḇyuk korerima ḇeko, snar fararur ḇeḇye koḇena ḇa, ḇape snar ḇaḇenaḇye ḇyedi ro masi sren ḇeyaḇen kaḇer ko snar fararur ro Allah Rur ḇyedi, ⁶ Allah Rur ḇyedi ḇyukma ḇeko ro Yesus Kristus, Ḇeḇuk korerima ḇeko, ⁷ insa komnis snonkaku ḇenapes snar saswar-fakamaman ḇyedi, ko kako kosma kankenem ḇekain fyoro, imnis raris sanemura koḇena. ⁸ Wos ine kyaku ma yamarisen insa kuker snekin swambrabser i, insa ḇekyar kwar faro Allahsya sesewar kaku ḇeri fasifrur roi ḇeḇye ma ḇeḇefainda faro kawasa kam. ⁹ Ḇape binkwanbur famfaḇri ma ḇefawiroyoḇa, ma wawos ḇekur up, kankenem ḇemnisḇa ma rakrakrok ḇekur sasoser Refo Yahudi, snar nakam nefainda ḇa ma nefromo monda. ¹⁰ Snonkaku ḇeḇuk farkarkor ninyan oso wasonek i ḇerarwan oser roba suru, posa wakenem awer kuker i. ¹¹ Wafawi kwar ḇerariryasya siḇarḇor ma sasar sena nbuk samamyai faro mankunsi. ¹² Yawan Artemas roba Tikhikus faro aw, ḇesewar fawasrow aya ro Nikopolis, snar yakara namuk kwar fayakain ro dia rofafisu primya. ¹³ Wafnoḇek naḇye kaku Zenas, ḇefawinanem Refo Yahudi ani, ma Apolos, ro mararan suḇedi, insa suyananjar royo awer. ¹⁴ Ma snonkaku koḇesi farkor si kako insa sifrur roi ḇeḇye faro fandun sena, insa kankenem sena nefromo awer. ¹⁵ Naek srar ḇewarpu aya rodine nkofarem aroo faro aw. Ma wakofen aroo nkoḇena faro min koḇesi ḇekyar fnoḇek ko faro Kristus. Manseren ḇyeḇok naek srar mko kam kada. Ro aya, Paulus