ROMA

ROMA

¹ Naek srar ayesi, Allah iswar ma dorkwar fa ḇeḇe kawasa ḇyesi ro Roma. Allah kyinfir aya ma ikanow ḇardi aya kwar fa yaḇaryas Ankankinem Ḇeḇye ḇyedi. ² Ankankinem Ḇeḇye ani, Allah ḇyeasasi kwar ro awar ḇeponya faro nabi-nabi ḇyesi, ma sfasepeni kwar ro Refo. ³ Ankankinem Ḇeḇye ḇekur Allah Rumkun ḇyedi, isoine Manseren koḇedi Yesus Kristus, mboi roḇaḇe snonkaku ḇyedi, ḇyeḇarpur ro Daud, ⁴ ḇape roḇaḇe Manseren ḇyedi fyasna ḇadir i Allah Rumkun ḇyediri. Ine ḇyeḇefasna ḇadir kuker papoik ḇesyadadi, aḇiḇer ḇyedi rofandu marmarya. ⁵ Kuker i kako, Allah ḇyuk saswar ma fakamamanḇe aya fa yaḇe manwawan, insa yakfin snonkaku ro er-er -- syakam fa sesyowi Kristus, ma sikyar faro snonsnon ḇyedi. ⁶ Wos ḇekur er-ersyakam ma naek ayesi mkokako ro Roma isoine; naek srar mkoḇe ḇeyor kwar fa mkoḇe kawasa faro Yesus Kristus. ⁷ Iso eḇedari yafas faro naek srar ayesimko, iḇyekada Allah kma koḇeja ma Manseren Yesus Kristus ḇyeḇok ma ḇyuk aski mufaḇe naek srar mkokam. ⁸ Ḇepon kaku, kuker snonsnon ro Yesus Kristus, yakofen kasumasa faro Allah snar naek srar mkokaem, snar sup swan ine ḇesiper simnaf kwar, mboi mkokyar kaku faro Yesus Kristus. ⁹ Mboi Allah yuffarmyan kuker sne ḇesiper ro ḇaḇe ḇararyas Ankankinem Ḇeḇyeya, kuker Rumkun ḇyedi, iso ḇeḇesaksi maro aya, mboi rofyor yabe yanadi ido, yaswarepen mko besyakwar; ¹⁰ yabenadi kuker kaku ḇeri faro Allah insa ḇyuk fa yasma fafisu fa yarakaki mko. ¹¹ Yamarisen yasrow naek ma srar mko, insama yarwas fakamaman yasma ro Allah Rur ḇyeja fa syambraḇ ser mko. ¹² Kakara yedi isoine, snar kokam kokyar faro Yesus Kristus, inja ibye kosonemyaeko. ¹³ Naek srar mko, yamarisen insama mkofawi, mboi nabor kaku kwar yamarisen fa yarakaki naek srar mko, ḇape roi ḇedwarek aya naisya ḇesya kwar. Yamarisen insa rofandu naek ma srar mko kako mkofararur insa fararur ayeja ḇyebon, raris moḇ fararur ayeja ḇyebon rofandu er-er ḇeḇe Yahudiḇasya ro moḇ ḇese. ¹⁴ Snar yasma wawan faro er ḇesesyakam, ḇesma farkarkor kwar ma ḇesma farkarkor ḇaim, iḇye ḇefawisya ma ḇefawi ḇaimsya. ¹⁵ I eḇedar fa yamarisen kaku yaḇaryas Ankankinem Ḇeḇye faro naek ma srar ḇekain ro Roma mkoya kako. ¹⁶ Yakyar kaku faro Ankankinem Ḇeḇyeya, snar ikada Allah papoik ḇyedirya snar ḇyuk koreri faro snonkaku ḇekyarsya, ḇepon kaku faro kawasa Yahudisya ma er ḇesesya kako. ¹⁷ Snar kuker Ankankinem Ḇeḇye ani, Allah fyasna rariso nyan ḇaḇeoser snonkaku kuker Allah iḇye kaḇer wer; isoine kakyar faro Allah, ro randakya isof papupesya. Imnis fas-fas ro Refo, "Snonkaku ḇekyar faro Allah isof ḇaḇeoser ḇyedi kuker Allah iḇye kaḇer wer, snonkaku ani nari ikenem!" ¹⁸ Ro boiyaswa Allah fyasna masasor ḇyeja faro sasar ma ḇarḇor snonkakusya sena, snar sasar ma ḇarḇor annakam nadwarek snonkakusya fa sifawi farkarkor ḇenapes Allah ḇyenaḇa. ¹⁹ Snar rosai snonkakusya sifawiḇa ḇekur Allah sḇaḇirna ro sisnesna ma kakara sena, snar Allah mankundi fyasna nakwar. ²⁰ Rofyor Allah ifrur supswan ine, Allah rari ḇyena komam ro komkasna ḇana, isoine ḇaḇe Manseren ḇyena ma papoik ḇekain fyoro-fyoro ḇyena, snonkakusya sifawina kwar ro roi ḇeḇor Allah ifrur kwarna. Inja snonkakusya sisma sanoyo ḇaḇeri fa sbuki ḇyesano wareksi. ²¹ Snonkakusya sifawi Allah ḇesyaḇoi, snonkaku ansi sesyowi Allahḇa ma sikofen kasumasa faroiḇa. Imboi snonkakusya skara roi famfnom munda; snar sisnesna npanpan kwar. ²² Skara ḇo soḇo sifawi nananem, fama smamkir royoḇaḇeri. ²³ Sisyom faro Allah ḇekenem fyoroya ḇaḇoi, sisyom faro amfyanir ḇesnai farari roi nari ḇemarna; isoine snonkaku, mansya, ma aiwan ḇeḇe wemin rifiaksya ma aiwan ḇeyanawersya. ²⁴ Eḇedari Allah myam monda siḇo ḇyuk fa sifrur raris marisen sena fa sifrur roi ḇeyarwarem rofandusi. ²⁵ Allah ḇekakuya, sfadweri kuker roi ḇekakuḇa. Isoine roi sifrur ro ḇramin naiso sisyom farona. Mboi ḇefrursiya iso sisyom ma sḇansuba rofyoro-fyoro faroyakada! Amin. ²⁶ Snar snonkaku ansya sifrur rariryanja eḇedari Allah myam mondasiḇo siso mankunsi rmomen ḇefrur mamyai sena. Bin sesya kako sfarḇuk kuker snonsya werḇa; imnis rari ḇaḇekawin ro snonkakuḇa ḇoi, sfarḇuk kuker bin ḇesesya. ²⁷ Snonsya kako sakḇerarirya; sfarḇuk kuker binsyaḇa ḇoi, sfarḇuk kuker snon ḇesesya, isof snon ansi sifrur roi ḇefrur anonef faro snonsya, isof mankunsi sikamar fararur ḇeḇyeḇa sena. ²⁸ Ma snar snonkakusya sḇaḇir fa skarem Allah ḇa, inja Allah ḇyuksi faro kakara ḇeyun fras farosi, isof sifrur roi ḇeḇarḇor na: ²⁹ Sisnesna nafo kuker ḇarḇor ḇeḇor kam ḇenapesḇa ma roi ḇekakuḇa, isoine sasewar nana, arwarem, masasor, sifo kuker swaruser mamun, rakrakrok ma ankarkar. ³⁰ Simarisen sifrur fanor snonkaku ḇese; simewer sḇeuser sinan, semararesi, sifawi rariḇa, ma sayin faro Allah, ma simarisen semandaw. Simarisen sḇesewar fawawinanem ḇebabo fa sḇukifrur roi ḇeḇarḇor, ³¹ simewer skara snonkaku ḇesesyandi, sisaswarḇa ma sisoasuserḇa. ³² Mboi sifawi kaku Allah sasoser ḇyena isoine mansei ḇefrur rariryaido nari isma samamyai marmari. Rariryano sifrur roi ḇeḇyeḇa anna ḇesyakwar kako, ma ssḇuk kaku faro snonkaku ḇefrur rariryasya.

¹ Inja snonkaku awne, woḇo buk samamyai faro snonkakuyo ḇese? Ḇape mankundaw ḇardi wakfis ro sasaryaḇa. Snar rofyor buk samamyai faro snonkaku ḇese anya, rarirya buk samamyai ḇardi kako, faro mankundaw snar aw kako wakfrur rarirya. ² Ḇape kofawi mboi rofyor Allah ḇyuk samamyai faro snonkaku ḇefrur rariryansya wos ḇyena nanapes. ³ Inja snonkakuyo buk samamyai faro snonkaku ḇese ḇesasarsya, ḇape awḇardi wakfrur sasar kako, inja kwara ḇo woḇo, nari wakfisbur Allah samamyai ḇyukya? ⁴ Oroḇaido woḇo mamkyof Allah saswar ma kaḇaḇaḇ ḇyenake? Mkokam nari mkofawi mboi Allah saswar kaḇaḇ fyasna faro mko kwarya, doḇo insama mkombror ro sasar mkoḇena. ⁵ Ḇape mkoḇrumna npakrek ma mkomewer mkosadwer kenem ḇeḇarḇor mkoḇenandi. Inja mankunmkoiso ḇefanfon samamyai mkoḇena fa nmarḇak syadi wer, rofyor masasor ma samamyai ḇenapes ro Allah ḇyeḇefasnai ro ras ḇepupesya. ⁶ Snar Allah nari myunsu faro snonkaku oser-oser raris fararur ḇyena. ⁷ Kankenem ḇekain fyoroya ro Allah ḇyuk faro mansei ḇeḇeuser ma ḇeḇenaḇye, sisma syowi ma sanandik ḇekain fyoro-fyoro. ⁸ Snonkaku ḇewasen mankunsi ma ḇemewer ḇeḇeyuser Allah ma ḇefrur ḇarḇorsya, Allah imsor fafaya siḇa. ⁹ Mansei ḇemarisen ḇefrur roi ḇeḇarḇorsya, nari sḇekandera; ḇepon faro kawasa Yahudisya ma er ḇesesya kako. ¹⁰ Ḇape faro snonkaku ḇemarisen ḇefrur roi ḇeḇyesya, nari sisma sanandik ma ḇaḇesyowi ma aski ro Allah; ḇepon kaku faro kawasa Yahudisya, ma faro er besesya kako. ¹¹ Snar Allah ifrur faro snonkakusyakam fa namnis. ¹² Inja snonkaku ro er-er ḇese ḇeyakfawi sasoser agama Yahudiḇasya sasar sena nari sisma samamyai ro ḇandibur sasoser anna. Ḇape Yahudisya sḇesasar snar sifawi sasoser anna; rarirya sasoser anna naiso nari sḇukisof sina. ¹³ Snar snonkaku ḇemnaf sasoser Refo Yahudi ansya siso Allah ḇyuk napnapes farosyaba, mboi snonkaku ḇeḇeyuser sasoser Refo Yahudi siso Allah ḇyuk napnapes farosya. ¹⁴ Snonkaku er ḇese ḇefawi sasoser agama Yahudiḇa. Ḇape rofyor mankunsi simarisen sifrur rosai sasoser anna nakofen, rariryaido mankunsi sisnesna naiso ḇeḇesasoser farosi. ¹⁵ Snar kuker rari sena, nfasna ḇadir mboi rosai sasoser anna nakofen, neḇefas ro sisnesna. Ma sneuser sena kako nfasna sasoser anna, snar fyornoido nbuk sasar faro mankunsi, ma fyornoido nbuk kaku faro mankunsi. ¹⁶ Rarirya roi nari ḇerarirya ro ras sikofen ani. Ro ras ani-imnis Ankankinem Ḇeḇye yaḇaryas-kuker Yesus Kristus Allah nari ḇyuk samamyai faro roi ḇeborkam ḇeyokef ro sne ma kakara snonkaku. ¹⁷ Ḇape, rariso kuker naek srar mko ro baboine? Naek srar mkokarem mankunmkoḇe snonkaku Yahudi ma mkokaf ro sasoser agama Yahudi, ma mkomarares kuker ḇaḇesasoser anna kuker Allah, ¹⁸ naek srar mkosma fasasna ro sasoser anna, isof naek srar mkofawi Allah marisen ḇyena ma mkofawi rosai ḇeḇyeya. ¹⁹ Naek srar mkofawi kaku mboi mkoḇe manfarkin faro snonkaku ḇeprafsya ma mkoḇe isna faro snonkaku ḇekain ro pampansya. ²⁰ Naek srar mkofarkor snonkaku ḇefawi royoḇasya, ma mkoḇe guru faro romawasya. Naek srar mkofawi kaku, mboi ro sasoser Refo Yahudi anna, mkosma fawawi ma farkarkor ḇenapesya. ²¹ Naek srar, mkoḇuk farkarkor faro snonkaku ḇesesya; inja, snaro naek srar mkofarkor mankunmkoḇa? Naek srar mkofarkor snonkaku besesya insa skaraw awer, ḇape mankun mkoido mkokarawke? ²² Naek farkor snonkaku ḇesesya fa sifrur farbuk awer, ḇape mankundaw ido wafrur farbukke? Naek wayin faro karwarsya, ḇape mankundaw ido fasyar papus ḇero rum karwarsya sena fa nwanake? ²³ Naek waryaḇ snar nwa Allah sasoser ḇyena Musa ḇyuk kwarna, ḇape mankundaw ido wonef Allah ma wamewer waso sasoser ḇyenake? ²⁴ Ro Refo sfas radine, "Snar mko snonkaku Yahudi Allah snonsnon ḇyedi ḇyeḇeyonef rofandu er-er ḇesenakam." ²⁵ Rofyor naek srar mkoḇeyuser sasoser ro agama Yahudina ido, sofakfuk mkoḇani ḇyefandun kako. Ḇape rofyor naek srar mkoḇeyuser ḇaḇesasoser aniḇaido, sofakfuk mkoḇena nefromo munda. ²⁶ Rofyor snonkaku ḇeḇe Yahudiḇa oso sisofukiḇa, mboi ḇyeuser sasoser agama Yahudi anna ido, nari Allah kyoriḇe snonkaku ḇesofukḇake? ²⁷ Rarirya, snonkaku ḇeyaksofukḇasya nari ssḇuk samamyai faro kawasa Yahudi ḇesma sasoser ma ḇesofuksya, snar sikada sisma sasoser agamaḇa ma sisofukḇa, fama siso naḇye sasoser agama anna. ²⁸ Snar snonkaku Yahudi kakusya, snonsnon Yahudi mundaḇa; ma snonkaku ḇesma sofakfuk ro baken mundaba. ²⁹ Ḇape snonkaku Yahudi ḇekakusya siso ḇesma sofakfuk sne ro Allah Rur ḇyeja ma ḇesma fasapepen munda ro syap snonkaku senaḇa. Snonkaku ḇerarirya ansya sisma sanandik ro snonkaku ḇesesyaḇa, mboi sisma sanandik ro Allah.

¹ Rarirya ido, fainda rosai koḇe snonkaku Yahudiya ma fandun rosai koḇeuser ḇaḇe sofakfukya? ² Mboi fandun ḇyena nabor kaku! Ḇeponya, snar Allah ikyar wos ḇyeja faro kawasa Yahudisya. ³ Ḇape rariso rofyor ono rofandu snonkaku Yahudi sḇeyuk sasoser Allah ḇyena? Snar rarirya ido nari sidwarek Allah saswar ḇyedike? ⁴ Kaku ḇeri rariryaḇa! Snar Allah inapes ḇesya kwar faro snonkaku ḇeyankarkarsya. Imnis sfas kwar ro Refo radine: "Rofyor wawawos ido, wawos roi ḇenapes, irya ḇefainda rofafisu semankara aw." ⁵ Ḇape rofyor Allah nanapes ḇyedi fyasnai snar kofrur roi ḇeḇarḇor ido rosai nari kokofenya? Snar Allah inapesḇa rofyor ḇyuk samamyai faro ko? [Yawos imnis snonkakusya moḇ sawos raya.] ⁶ Oroḇaḇeri! Snar rofyor Allah inapesḇa ido, rariso nari ḇyemankara supswan ine? ⁷ Ḇape snar fararur ḇenapesḇana nfasna, ḇaḇenapnapes Allah ḇyair syadi wer isof isma sanandik; snaro snonkaku ḇeḇarḇorsya sḇemankara siḇe snonkaku ḇesasar? ⁸ Ma rosai eḇedari kokofen awer ḇo koḇo: "Iḇye syadi kofrur ḇarḇor insa kosma ḇaḇyeya?" Mboi snonkaku ono sisya sonef aya ḇo soḇo ayaiso bekofen kwar rarirya. Snonkaku berariryasya Allah byuk samamyai farosikada. ⁹ Inja Yahudi koya kankain koḇena inaḇye syadi wer ro er-er ḇesesyake? Oroḇaḇeri! Yakofen kwar ḇo yoḇo, iḇye snon Yahudi ma snonkaku ro er-er ḇese, sikam sifrur sasar kwar. ¹⁰ Imnis fasfas ḇero Refo, "Snonkaku oseroḇaḇeri fa inapes. ¹¹ Snonkaku oseroḇaḇeri fa myamkir ma snonkaku oseroḇaḇeri fa isyom Allah. ¹² Snar snonkakusyakam sḇinkwanbur Allah; isof sikam sibor kwar. Snonkakuyo ifrur roi ḇenapesḇa; mboi snonkakuyoḇaḇeri! ¹³ Aroren sena namnis ureren ḇeḇas. Ankar ma sararer nadaf ro ramar sena, ma sḇardip sena nkup anonef, imnis sayaryur ikak ḇeyarek. ¹⁴ Sḇadon sena nafo kuker fras ma rarmomen. ¹⁵ Simbran samberen kaku rofyor siḇe smamun kuker snonkaku. ¹⁶ Farmambriwer ma ḇaḇekandera, sḇuḇer na ro moḇnakam. ¹⁷ Simkasna napraf faro nyan ḇaḇeaskiya; ¹⁸ ma sesyowi faro Allahḇa." ¹⁹ Insape kofawi roi ḇeḇor sfas kwar ro sasoser agama Yahudi anna, irya faro snonkaku ḇekenem ro sasoser anna. Irya snonkaku osero fa dun sanowarekiḇa, ma Allah ḇyuk samamyai faro supswan ine ḇesiper. ²⁰ Snar snonkaku oseroḇaḇeri fa iḇye kaḇer faro Allah, snar snonkaku ansya sifrur roi ḇeḇor ḇero sasoser agama anna. Ḇape sasoser anna nfasna munda snonkakusya sasar sena farosi. ²¹ Ḇape baboine Allah fyasna kwar nyan rosai ḇefrur fa snonkakusya siḇye kaḇer kuker Allah; ma nyan ḇeḇesya ani nari iwawik sasoser agama Yahudi annaḇa. Nyan ani kosma ro Musa syap ḇyena ma nabi-nabisya syap senaba, ²² isoine Allah ḇyuk fa snonkakusya siḇye kaḇer kukeri, rofyor snonkakusya sikyar faro Yesus Kristus; Allah ifrur rarirya faro snonkakusyakam ḇekyar faro Yesus; snar rarwaso isyaḇa: ²³ snonkakusya sḇesasar kwar ma sḇinkwanbur Allah ḇeḇuk koreri ḇesia. ²⁴ Inja Allah saswar ḇyeja munda snonkakusya ḇaḇe oser sedi kuker Allah iḇye kaḇer; nyan ḇyedi isoine: Snonkakusya sisma ḇaḇemkei snar Yesus Kristus. ²⁵ Allah ḇyuk Yesus Kristus fa ḇye farsarser, insa kuker marmar ḇyeja, snonkakusya sisma ḇaḇemkei ro sasar sena, rofyor sikyar faro Yesus Kristus. Snar rofafisu ḇesyof kwar Allah ikḇaḇ snonkakusya ro sasar sena, isof ḇyuk samamyai farosiḇa. Allah ifrur rarirya fa fyasna napnapes ḇyedi. ²⁶ Ḇape baboine imewer sasar anna, insa fyasna napnapes ḇyedi. Kuker nyan ine, fyasna napnapes ḇyedi; ma snonkaku oser-oser ḇekyar faro Yesus, siso ḇeḇye kaḇer kuker Allah. ²⁷ Inja sanoyo isya faro snonkaku koyaba kwar fa koḇuki imarares. Snaro rarirya? Snar kofruruser roi ḇeḇor sfas ro sasoser agama Yahudinake? Roḇa! Mboi snar kakyar koḇena. ²⁸ Snar knam kakuya ryadine: Snonkaku Allah fyasna fa ḇesma ḇaḇemkei ro sasar sena, sisma ḇaḇemkei ani, snar sifrur rosai sfas ro sasoser agama Yahudinaḇa, mboi snar kakyar sena. ²⁹ Oroḇaido Allah ḇye Allah faro Yahudisya sererke? Inja dakḇe Allah faro er-er ḇesesyaḇake? Mboi, er ḇesesya Allah sedirya kako! ³⁰ Inja Allah oserbaken ido, iso ḇeḇuk ḇaḇye kaḇer faro Yahudisya faro Allah snar kakyar sena; ma iso ḇeḇuk ḇaḇye kaḇer faro Allah ro er ḇesesya snar kakyar sena kako. ³¹ Rariryaido kosawen sasoser agama Yahudina snar kokyar faro Yesus Kristuske? Oroḇaḇeri! Mboi kuker kakyar koḇena, koḇeyuser naḇye syadi sasoser anna.

¹ Rariryaido, rosai nari kokofen fa ḇekur Abraham, up ro er koḇejanya? Rosai isma ro fawawi ḇyeja? ² Rofyor Abraham fararur ḇeḇye ḇyena nai ḇeḇewar fa Allah nyai imnis snonkaku ḇefrur sneprei Allah ido, isma knam fa fyakḇuni. Ḇape fyakḇuni ro ḇarpon Allah ḇyediḇa. ³ Fasfas ro Refoya ryok radine: "Abraham ikyar faro Allah, ma snar kakyar ḇyedi, Allah nyai imnis snonkaku ḇefrur sneprei Allah." ⁴ Snonkaku ḇefararursya, sisma sasuref; ma sasuref ḇyedi isma munda ḇesamsomḇa, snar iso ḇenaiya. ⁵ Ḇape snonkaku ono sisya sifararur ro mankunsiḇa; mboi sikyar faro Allah ḇefasna snonkaku ḇesasar sisma ḇaḇemkei ro sasar. Snar kakyar sena, Allah nyasi imnis snonkaku ḇefrur sneprei Allah. ⁶ Daud dakkara rarirya kako; iso eḇedari ikofen; aski faro snonkaku Allah nyasya imnis snonkaku ḇefrur sneprei Allah, rarirya Allah kyara fararur senaḇa. Daud ikofen kako radine ḇo doḇo: ⁷ "Aski faro snonkaku Allah ipyos sasar sena, ma sasar sena Allah ikrirna! ⁸ Aski faro snonkaku Allah kyor sasar senaḇasya!" ⁹ Inja wos aski ani kyur faro snonkaku ḇeḇeuser sofakfuksya serer mundake? Roḇaido faro snonkaku ḇeyakḇeuser sofakfukḇasya kakoke? Nkokofen ḇepon kwar, mboi Allah nya Abrahami, imnis snonkaku ḇefrur sneprei Allah, snar Abraham ikyar faro Allah. ¹⁰ Inja, fafisu rosai Allah fyasna roi ḇeḇesya ani? Rofyor Abraham ḇyeḇesofukyake, oroḇaido ḇyeḇesofuk ḇaimyake? Mboi rofyor ḇyeḇesofuk ḇaimya. ¹¹ Ḇyeḇesofuk ro ḇarpurya, ma sofakfuk ḇyeja imnis aḇyair munda mboi Allah nyai kwar imnis raris snonkaku ḇefrur sneprei Allah, snar kakyar ḇyeja faro Allah. Allah nyai rofyor ḇyeuser sofakfukya ḇaimya. Ma nari Abraham ḇye kma ro ḇar rurya faro snonkakusyakam ḇekyar faro Allah, ma snar Abraham Allah nyaiḇe snonkaku befrur sneprei Allah, ma sikada sakso ḇaḇe sofakfukyaḇa. ¹² Abraham ḇye kma ro ḇar rurya faro snonkaku ḇeḇeuser sofakfukya kako. Abraham kako kma ro ḇar rurya farosi, snar seuser ḇaḇe sofakfukya mondaḇa, ḇape snar sikako sikenem kuker kakyar faro Allah, imnis raris Abraham ro fafisu dakḇeuser ḇaḇe sofakfukya ḇaimya. ¹³ Allah ḇyardi kwar faro Abraham ma kpu ḇyesi nari Abraham nya supswan ine. Allah ḇyardi rarirya maroḇa snar Abraham ḇyeuser agama Yahudi naḇa, ḇape snar ikyar faro Allah, isof Allah nyai imnis snonkaku ḇefrur sneprei Allah. ¹⁴ Snar rofyor snonkaku ḇeḇeuser agama Yahudi siso ḇesma rosai Allah ḇyeasas kwar ido, kakyar faro Allah ḇyefandun ḇaḇeri, ma Allah asas ḇyena kako nefromo monda. ¹⁵ Snar sasoser Yahudina nor samamyai Allah. Ḇape sasoser anna naisyaḇa kada, nari sasarno naisyaḇa kako. ¹⁶ Inja asas Allah ḇyena neknam ro kakyar snonkaku sena faro Allah, imnis raris Abraham ikyar Allah, snar Abraham ḇye kma faro kokam ro ḇar rurya; mnuk ine kyain faro snonkaku ḇeḇeuser agama Yahudi semirḇa, mboi kyain kako faro snonkaku ḇekyar Allah raris mob Abraham ikyar Allah raya. ¹⁷ Snar Allah ikofen radine faro Abraham, "Yakimfir aw kwar fa bekma faro er-er ḇeḇor kam." Rarirya Allah ḇyuk asas ani faro Abraham. Ma Abraham ikyar faroi, snar irya Allah ḇeḇuk kankenem faro snonkaku ḇemarsya. Ikada Allah ḇefrur roi ḇeḇesya ḇaimna fa naisya kuker wos monda. ¹⁸ Inja Abraham myam roi ono ro kakyar ḇyejaḇa, ḇape ikyar ḇesya kwar, isof isma asas fa ḇyekma faro er ḇeḇor nakam. Imnis sfas kwar ro Refo, "Up besi nari sibor kaku." ¹⁹ Rofyor ani Abraham ifawi, mboi nari isma kpu ono werḇa kwar, snar ḇyemansar kaku kwar, ma kankenem ḇyedi fyanamḇe wampasi wambarek utin oser kwar, isyadi wer swari Sara pyansnasem. Rariryano Abraham kakyar ḇyedi iko ḇesya kwar. ²⁰ Kakyar ḇyedi iko ḇesya kwar ma kyormararu asas Allah ḇyejaḇa isof syambraḇ syadi wer ro kakyarya ma isandik Allah ḇesya kwar. ²¹ Ikyar kaku nari Allah ifrurmnis rosai ḇyeasas kwarna. ²² Iso eḇedari Allah nya Abraham, imnis snonkaku ḇefrur sneprei Allah. ²³ Wos "Allah nyai imnis snonkaku ḇefrur sneprei Allah" ḇyeḇefas fa kyur Abraham dererḇa, ²⁴ ḇape faro kokako. Allah nari dakna ko imnis snonkaku ḇefrur sneprei Allah, snar kokyar faro Allah ḇeḇuk aḇiḇer faro Yesus Manseren koḇedi ro marmarya. ²⁵ Yesus anine ssḇuki kwar insa smuni snar sasar koḇena, raimnai Allah ḇyawes i wer insa Allah ḇyuk napnapes maḇeko.

¹ Baboine kosma kankenem ḇeḇye kaḇer kuker Allah snar kakyar koḇena. Ma eḇedari kokenem ro aski kuker Allah snar Yesus Kristus Manseren koḇedi. ² Snar kokyar Yesus ḇyuk fa kosma Allah saswar ḇyedi, eḇedari kokenem isof baboine. Rarirya komarisen snar kokyar kaku nari koḇaḇir baba Allah ḇyuk maḇekonya. ³ Ma isyadi wer, kokako koryaḇ rofandu kandera koḇena snar kofawi nafrur fa kofarmku, ⁴ ma ḇaḇe farmku ani ḇyuk fa kodworen ro manasnasen; mnuk ine iso ḇeḇuk saneraroya. ⁵ Saneraro ḇeradineya nari ḇyefromo faro koba, snar kosnesna neḇeser kwar kuker Allah saswar ḇyena. Allah ifrur roi nanekam kuker fafnoḇek Rur ḇyedi, ḇyukmabeko kwar ani. ⁶ Rofyor kosambraḇ ḇa kwar, Kristus imarwarek ko, rofafisu ḇemnis, Allah ḇyardi kwarya; snar rorandakya koḇinkwan kakubur Allah. ⁷ Syamswen kaku faro snonkaku ḇemarisen ḇemar sadwer snonkaku ḇenapes oso, mboi faro snonkaku ḇeḇye ono sisya simarisen fa simar sadwer snon ani rofyor snon ani kyaku. ⁸ Ḇape Allah fyasna saswar ḇyedi maroko rofyor Yesus imar warek ko, rofyor koisya roi sasarya kaker! ⁹ Baboine kosma kankenem ḇeḇye kaḇer kuker Allah snar Kristus marmar ḇyedi, inja nari kosma fasparbur Allah masasor ḇyedi snar Yesus Kristus. ¹⁰ Ma rofafisu koḇembroḇ kuker Allah, kosma ḇaḇedasi kuker marmar ro Rumkun ḇyedi, isyadi wer baboine koḇye kaḇer kuker Allah kwar inja kokako nari kosma koreri snar kankenem Yesus Kristus. ¹¹ Ma isyadi wer ro roi ḇeḇesya ani, koryaḇ kako snar Allah ḇaḇye ḇyedi fyasna maḇeko ro Manseren koḇedi Yesus Kristus. Snar kuker Kristus, ro baboine kosma ḇaḇeoser koḇedi kuker Allah. ¹² Sasarya ssyunḇe supswan ine snar snonkaku oser, ma snar sasar ani, ifnai marmarya. Eḇedari marmarya iduḇ faro snonkakusyakam, snar snonkakusyakam sifrur sasar kwar. ¹³ Rofyor sasoser agama Yahudi neḇeḇuk ḇaim, sasarya isya kwar ro supswan ine. Ḇape sasar anna neḇeyawḇa, snar sasoser ono naisya fa neḇeḇeyuk ḇaim. ¹⁴ Rarirya, marmarya daḇen snonkakusyakam ro awar Adam isof ro Moses. Ḇape snonkaku ḇeyakḇeyuk roi Adam ḇyeyuknaḇasya kako marmarya deksi. Snar Adam ḇyefarari snonkaku nari ḇeramumaya. ¹⁵ Ḇape snonkaku ansuya sumamnisḇa; snar Allah saswar ḇyedi iba syadi wer ro Adam sasar ḇyena. Ḇaḇeyuk ro snonkaku oser ifnai fa snonkakusyakam simar. Ḇape saswar ma aski Allah ḇyena naba syadi wer snar snonkaku sne ḇeḇye oser, isoine Yesus Kristus, faro snonkakusyakam. ¹⁶ Fakamaman ma ḇaḇenaḇye Allah ḇyedi kako ibasyadi wer faro sasar snonkaku oser ani. Snar rofyor snonkaku oser ḇyeyuk ido, skara "iḇe ḇesasar". Ḇape rofyor snonkakusya sibor sifrur sasar kwar, saswar Allah ryama fyasna ḇadir, "sasaro isyaḇa kwar". ¹⁷ Snar ḇaḇeyuk ro snonkaku oser, marmar iduḇ ḇemoḇ nakam snar snonkaku oser ani. Rarirya kosma fararwe snar fararur ro snonkaku oser ḇese, isoine Yesus Kristus, faro snonkakusyakam. Nari Allah ḇyuk farsbawer monda fakamaman ḇyedi waworek farosi insa siḇye kaḇer wer faro Allah; ma nari sisma papoik ro supswan ine snar Yesus Kristus. ¹⁸ Inja, raris ḇaḇeyuk snonkaku oser ifnai fa snonkaku ḇeborsyakam sisma samamyai, rarirya kako fararur snonkaku oser ḇeḇeyuser Allah marisen ḇyena, ḇyedar fa snonkakusyakam sisma fasaspar ro sasar sena ma sisma kankenemya. ¹⁹ Ma raris snonkaku sibor sḇesasar snar snonkaku oser ḇaḇeyuk ḇyena, rarirya kako nari snonkaku sibor sikenem imnis Allah marisen ḇyedi, snar snonkaku oser ḇeḇeyuser Allah marisen ḇyena. ²⁰ Ḇeḇuk sasoser agama Yahudina isoine Allah mankundi. Ḇape rofyor snonkakusya sḇesewar fa sḇeuser sasoser anna, rofyor ani kako sḇeyuk syadi wer ro sasoser anna ma sḇesasar faro Allah. Rofyor snonkaku ansi sḇesasar syadi wer, Allah fyasna iswar syadisi wer. ²¹ Inja, imnis komar snar kofrur sasar, rarirya kako Allah ḇyuk nyan maḇeko insa koḇye kaḇer wer kuker Allah snar saswar ḇyeja ḇeko. Ma snar ḇaḇeoser koḇedi kuker Allah, iḇye kaḇer kwar ma ḇyuk kako kankenem fyoro-fyoroya maḇeko snar Manseren koḇedi Yesus Kristus.

¹ Rariryaido nari rosai koḇe kokofenya? Iḇye kofrur sasar ḇesya kwar, insa Allah iswar syadi koke? ² Roḇa kaku ḇeri! Sasarya nyako werḇa snar imar kwar ro kosnesna, inja kopok ḇaḇeri fa kofrur pdef sasar ro kankenem koḇena werḇa. ³ Mkofawi ḇake mboi rofyor kosma masasi ḇesrenya, fyasna ḇadir koḇeoser kwar kuker Yesus Kristus? Ine fyasna koḇeoser kuker Yesus ro marmar ḇyedi. ⁴ Kuker masasisren ani, sikrirko kuker Yesus ma komar fnoḇeki, insa raris Yesus diḇri rofandu ḇemarsya snar papoik ma ḇaḇye ro Kmari, rarirya kako nari kokenem ro kankenem ḇebaboya. ⁵ Rofyor koḇeoser kwar kuker Kristus snar komar fnoḇeki kwar, inja nari koḇeoser kuker i kako ro aḇiḇer ḇyedi. ⁶ Kokam kofawi mboi rari snonkaku ḇekwar koḇena namar kwar fnoḇek Kristus ro apropya, insa papoik rari ḇesasar koḇena neḇepyos; rarirya sasarya nyakoḇe women werḇa kwar. ⁷ Snar snon oso imar ido, snon ani isma ḇaḇemkei ro papoik sasarya. ⁸ Inja rofyor komar kwar fnoḇek Kristus ido, kokyar nari kokenem fnoḇeki ro kankenem ḇyedi. ⁹ Snar kofawi mboi Kristus diḇri kwar ro marmarya, inja nari imar werḇa; marmarya dufepen kankenem ḇyeja werḇa. ¹⁰ Kristus marmar ismaya, isma snar sasarya. Rarirya imar ḇeoser monda isof fyoro-fyoro. Ma kankenem ro baboineya, irya kankenem faro Allah. ¹¹ Naek srar mko kako mkokara mboi mkomar faro sasarya, ḇape mkokenem ro ḇaḇeoser ḇedworen kuker Allah snar Kristus Yesus. ¹² Inja mkoḇuk fa sasarya ḇyewayam kaker awer mko ro supswan ine, insa mkoso marisen ḇeḇarḇor ḇyena kaker awer. ¹³ Rarirya kako naek buk awer kina ro baken bedi faro papoik sasarya fa ifrur roi ḇeḇarḇor kaker awer. Mboi buk baken beja faro Allah, raris snonkaku ḇebur marmarya faro kankenemya. Naek buk baken bedi ḇesiper faro Allah, insa Allah nya aw fa ifrur marisen ḇyena. ¹⁴ Sasar anya ḇyewayam kaker awer naek aw, snar wakenem kaker ro sasoser agama Yahudi ḇakwar, mboi awsya kwar ro Allah saswar ḇyedi. ¹⁵ Inja rariso? Kofrur sasar murake snar koisya roi papoik sasoser agama Yahudi ḇakwar, mboi koisya roi Allah papoik fakamaman ḇyedi? Oroḇaḇeri! ¹⁶ Naek wafawiḇake mboi rofyor naek buk mankundaw faro snonkaku oso insa wafrur marisen ḇyena ido irya bewomen faro snonkaku ani, inja beuser marisen ḇyena ma bewomen faro sasar ḇeyunḇe marmarya, oroḇaido bemanfyan ḇesouser Allah, ma rarirya naek waḇye kaḇer kuker Allah. ¹⁷ Ḇape kasumasa faro Allah! Snar randakya naek bewomen faro sasari, ḇape baboine kuker sne ḇesiper naek beyuser farkarkor ḇenapes ssḇuk kwar faro aw na. ¹⁸ Naek beḇeḇemkei kwar ro sasar, ma baboine bemanfyan faro Allah marisen ḇyena. ¹⁹ Snar swaruser mkoḇena nsambraḇ ḇa, inja yaḇuk fasasna ro ḇaḇewomen ine, insa ipyan ḇemko fa mkofawi. Randakya mkoḇuk mankunmko fa mkoḇe women faro roi ḇemamas ma roi ḇeḇarḇor fa nafrur roi ḇeḇarḇor. Rarirya kako babine, iḇye naek srar mkoḇuk mankunmko ḇesiper raris manfyan faro Allah, insa ḇyukfrur ḇardi marisen ḇyena. ²⁰ Rofyor naek srar mkoḇe women faro sasarya, inja papoik ma marisen Allah isya faro mkoḇa. ²¹ Rofafisu ani, fainda rosai naek srar mkosma ro roi ḇeḇor baboine mkomai mkofrur na? Fararur anna nun mko faro marmar monda! ²² Ḇape baboine mkosma ḇaḇemkei ro sasarna kwar, ma mkoḇe manfyan faro Allah. Fainda mkoḇedi isoine, naek srar mkokenem ḇardi faro Allah ma roi ḇeḇesya ani dun kankenem ḇekaku ma ḇekain fyoro-fyoro. ²³ Snar marmar irya sasuref ro sasarya; ḇape kankenem ḇekain fyoro-fyoro fnoḇek Yesus Kristus Manseren koḇedi irya fakamaman Allah ḇyuk waworek monda maḇeko.

¹ Naek srar ayesi mko! Mkokam mkofawi sasoserya kwar. Inja mkofawi papoik ro sasoserya isya faro snonkaku oso, rofyor snonkaku ani isya ikenem kaker? ² Imnis bin oso isma yaḇyaḇek kuker sasoser faro swari rofyor swari isya ikenem kaker. Rofyor swari imar kwar bin ani imkeibur sasoser ḇefesepeni faro swa ḇyani. ³ Rofyor bin ani ikenem kuker snon oso ḇese rofyor swa ḇyedi isya ikenem kaker, bin ani skoriḇe ḇefrur farbuk. Ḇape rofyor swari imar, raris sasoseryanido, bin ani imkei kwar. Ma rofyor fyakawin kuker snon oso ḇese werido, skoriḇe ḇefrur farbukḇa. ⁴ Rarirya kuker mko, naek srar ayesi. Faro sasoser agama Yahudi naek srar mkomar kwar, snar mkoḇe oser kwar kuker Kristus baken ḇyedi snar marmar ḇyedi, ma nya mko kwar. Ḇyeḇeḇawes ro marmarya insa koḇe fainda faro Allah ro kankenem koḇena. ⁵ Snar ro randakya, kokenem imnis rari snonkaku. Rofyor ani rmomen ḇesasar, naiso ḇeyek ro kosnesna snar sasoser agamaya iso ḇeyufepenko. I ḇeḇewar fa kofrur roi ḇeyun faro marmarya. ⁶ Ḇape baboine koḇe ḇefesepen kuker sasoser agama Yahudi anna werḇa. Komarbur papoik ro sasoser randakya ḇeyaḇek ko kwar. Inja koḇe manfyan faro rari ḇekwarnaḇa kwar, imnis sasoser ḇeser fasfasna. Inja baboine koḇe manfyan koso rari babo Allah Rur ḇyedi fyasna maḇe konya. ⁷ Rarirya ido, rosai koḇe kokofenya? Sasoser Refo Yahudi nbarḇorke? Roḇa kaku! Ḇape sasoser anna naiso ḇefarkor aya ro sasarya. Yafawiḇaḇeri rosaiso rmomenya, rofyor sasoser Refo Yahudi anna nakofen pyan iḇa, "Warmomen awer." ⁸ Imnis raris sasoser Refo Yahudi anna, sasarya isma nyan fa ḇyawes marisen famfnom ḇeyek ro sneri; snar rofyor sasoser anna naisyaḇa, sasarya kako nari imar. ⁹ Ro randakya, yakenem kuker sasoser agamayaḇa. Ḇape rofyor sasoser agamaya isya kwar sasarya kako isya ḇeri ¹⁰ ma yamar. Inja sasoser agama ro randakya kokara nari ḇeḇuk kankenem, ḇesyaḇo nbuk marmar maḇe aya. ¹¹ Snar sasoser agama anna, sasarya kako isma nyan fa ifrowes aya ma myun aya. ¹² Sasoser agama anna neknam ro Allah, ma sasoser anna ndama ro Allah, inja nanapes ma naḇye. ¹³ Inja, rarirya ido roi ḇeḇye anna nun marmar maḇe ayake? Oroḇaḇeri! Mboi sasarya iso ḇeyun marmarya. Kuker roi ḇeḇye anna, sasarya dun marmar maḇe aya, insa rari ḇesasarna nfasna bos kaku. Kuker sasoser Allah ḇyena sasarya ḇarḇor ḇyena nasna bos kaku. ¹⁴ Kofawi sasoser agama Yahudi anna neknam ro Allah Rur ḇyedi, ḇape aya inekada snonkaku ḇesamḇraḇ ḇa. Yaḇe ḇeḇoḇ kwar fa yaḇe women faro sasarya. ¹⁵ Snar aya ḇardi yafawi roi yafrurnaḇa. Snar roi yamarisen na yafrur naḇa, ḇape rosai yayin na, naiso yafrur na. ¹⁶ Inja, rofyor yafrur rosai ḇefasasye marisen ayena ido, irya yakarem mboi sasoser agama Yahudi nanapes. ¹⁷ Rarirya ayai ḇefrur nayaḇa ḇoi, papoik sasar ḇero baken ayejaya. ¹⁸ Yafawi kaku, mboi roi ḇeḇye oso isya roi baken ayejaḇa; isoine ro rari ḇaḇesnonkaku ayedi. Snar yamarisen fa yafrur roi ḇeḇye, ḇape yasambraḇ fa yafrur naḇa. ¹⁹ Roi ḇeḇye yamarisen fa yafrurna yafrur naḇa; mboi roi ḇeḇarḇor yamewer naiso yafrur na. ²⁰ Inja rofyor yafrur roi yamewer naido, irya fyasna ḇadir ayaiso ḇefrur nanyaḇa ḇoi, papoik sasar ḇero baken ayejaya. ²¹ Inja, yun kakara ro mankundaya ḇo yoḇo, sasoser ine iso ḇefasnaya; isoine rofyor yamarisen yafrur roi ḇeḇyeido, roi ḇeḇarḇor naiso ḇeyek ro aya na. ²² Sneri kada imarisen faro Allah sasoser ḇyena, ²³ ḇape yafawi kaku ro baken ayeja sasoser oso ḇese isya ḇeyufepen aya -- isoine sasoser ḇesampum kuker sasoser raris kakara fawawi ayena. Iso ebedari sasoser sasarya iyabek aya. ²⁴ - ²⁵ Inja, yakenem radine: Yasouser Allah sasoser ḇyena kuker fawawi ayena, ḇape kuker rari ḇaḇesnonkaku ayeja, yakenem faro sasarya. Aya ine snonkaku ḇeroë! Mansei nari ḇemarisen ḇefaspar ayabur baken ine ḇeyun aya faro marmarya? Kasumasa faro Allah! Snar imarisen fyaspar aya kuker Yesus Kristus.

¹ Baboine samamyai isya werḇa faro snonkaku ḇekenem ro ḇaḇeoser kuker Yesus Kristus. ² Snar sasoser ro Allah Rur ḇyedi, ḇyuk fa kokenem ro ḇaḇeoser kuker Yesus Kristus ḇefaspar aya kwarbur sasoser sasar ḇeyun faro sasarya. ³ Rosai sasoser agamaya ifrurḇa, snar snonkaku koya kosambraḇ ḇa Allah ifrurna kwar. Allah ifrur kafyo papoik sasarya ro rari snonkakuya, isof iwan Rumkun ḇyedi fa ryama kuker ḇaḇesnonkaku ḇesasar, insa ipyos sasar na. ⁴ Allah ifrur rarirya insa marisen ḇyedi ḇefasna ro sasoser agama Yahudi koḇena fa nambran ro kenem koḇena raris kankenem ro Allah Rur ḇyedi ma koso awer kankenem ro ḇaḇesnonkakuya. ⁵ Snonkaku ḇekenem imnis rari snonkaku, siwasen monda roi simarisen ro rari snonkaku. Ḇape snonkaku ḇekenem kuker Allah Rur ḇyedi, siwasen monda rosai Allah Rur ḇyedi imarisen. ⁶ Naek srar rofyor kakara koḇena papoik rari snonkakuya nyana, nari ḇarpurya dunḇe marmar. Ḇape rofyor kakara koḇena papoik Allah Rur ḇyedi nyana, nari ḇarpurya isoine kankenem ma ḇaḇeaski kuker Allah. ⁷ Mansei papoik rari snonkakuya nyaya, snonkaku ani ḇyemḇroḇ Allah; snar snonkaku ani kyunem faro Allah sasoser ḇyena ḇa; ma imewer kyunem faro Allah sasoser ḇyena. ⁸ Snonkaku ḇekenem imnis rari snonkaku sifrur sneprei Allah ḇa. ⁹ Ḇape naek ma srar mkokada mkokenem imnis rari snonkaku senaḇa. Naek srar mkokenem imnis Allah Rur ḇyedi rofyor, kaku ḇeri Allah Rur ḇyedi ifararur ro mko. Mansei ḇesma Kristus Rur ḇyediḇa, snonkaku ani Kristus dakna iḇa. ¹⁰ Ḇape rofyor Kristus ikenem ro naek srar kankenem mkoḇena, nari baken mkoḇena namar snar sasarna, ḇape Allah Rur ḇyedi ḇyuk kankenem faro mko, snar ḇaḇeoser mkoḇedi kuker Allah iḇye kwar. ¹¹ Inja Allah Rur ḇyedi ḇeḇawes Kristus ro marmar, isya roi naek srar kankenem mkoḇena, iso ḇeḇuk aḇiḇer faro Kristus ro marmarya, inja nari ḇyuk kankenem faro baken mkoḇena ro marmarya. Ifruri rarirya kuker Rur ḇyedi ḇekenem ro naek srar mkoya. ¹² Naek ma srar ayesimko, koine snonkaku ḇeḇenyaki, ḇape koḇenyaki faro rari snonkakuyaḇa; inja fandun fa kokenem imnis marisen ḇyenaḇa. ¹³ Snar rofyor naek srar mkokenem imnis rari snonkakuya nari naek srar mkomar; ḇape rofyor kuker papoik ro Allah Rur ḇyedi, naek srar mkomun ḇesya kwar fararur ḇesasar mkoḇena, irya nari naek srar mkokenem. ¹⁴ Snonkaku ḇesma farkankin ro Allah Rur ḇyeja, sikam Allah romawa ḇyesirya. ¹⁵ Snar Allah Rur ḇyedi ḇyuk faro mko fa mkoḇe manfyanḇa, isof mkokenem kuker makakakḇa kwar. Snar Allah Rur ḇyedi ifrur fa mkoḇe rumkun faro Allah. Ma kuker papoik ro Allah Rur ḇyedi kor Allah ḇe "Kma, o Mami." ¹⁶ Allah Rur ḇyedi fnoḇek rur koḇesi skarem mboi koine Allah romawa ḇyesi. ¹⁷ Inja, rofyor koine koḇe romawa Allah, kokako koḇe romawa pusaka faro Allah nari ḇeyaksma ḇok fyasos kwar faro romawa ḇyesya. Nari kowarpu Yesus ma kosma rosai fyasos kwar faroiya; snar rofyor koḇe kandera fnoḇek Yesus kwar, inja kokako nari kosma payamyum fnoḇek Yesus kako. ¹⁸ Kandera ḇeḇor kosma ro baboine na, raris fawawi ayedi, namnis kuker payamyum nari ḇefasna maḇe konyaḇa. ¹⁹ Farsyos sansoren ḇesiper siryaḇ ma siwaf fafisu Allah iḇe fyasna payamyumya faro romawa ḇyesi. ²⁰ Snar farsyos sansorenya ḇyeḇemam monda ḇo ḇyerere snar mankundi marisen ḇyediḇa, ḇape snar Allah iso ḇemam monda ḇo ryariryaya. Rariryano ḇape ḇareya isya isoine, ²¹ snar rofafisu oso farsyos sansoren nari isma faspar ro papoik ḇemuni fa ḇyemomprafya ma nari isma ḇaḇemkei fnoḇek Allah romawa ḇyesi ro baba siḇe sismaya. ²² Kofawi, ḇape isof ro fafisu ine farsyos sansoren ḇye kandera imnis bin oso ḇyekandera ro fafisu iḇe daḇen wombrek ḇyedi. ²³ Ma farsyos sansoren derer fyafayafḇa, mboi kokako kakfafayaf ro kosnesna. Kosma Allah Rur ḇyedi kwar imnis raris roi ḇyuk ḇepon maḇeko, ḇape koisne kowaf kaker Allah ḇyuk fasaspar faro baken koḇena ḇesiper ma nya koḇe romawa ḇyesi. ²⁴ Snar kuker ḇaḇeḇare, kosma koreri. Ḇape roi koḇe ḇareya komami kwar nari koḇeḇareiḇa kwar. Snar mansei ḇeḇe ḇare faro rosai myam kwar? ²⁵ Ḇape koḇe ḇare faro rosai komam ḇaimya, nari kowaf kuker kaḇaḇaḇ. ²⁶ Rarirya kako Allah Rur ḇyedi ryama isaramper ko rofyor kosambraḇ ḇa. Snar kofawi moḇ koḇenadi rayaḇa; Rur ani mankundi inadi warek ko faro Allah, kuker marisen ḇefnakḇa isof indokada dapnaḇa. ²⁷ Ḇape Allah ḇefawi snonkaku sisnesna, ifawi Rurya marisen ḇyedi; Snar Rur ani dor ro Allah faro Allah kawasa ḇyesi, ma fararyor ḇyena namnis kuker Allah marisen ḇyedi. ²⁸ Kofawi Allah ifrur roi ḇeborkam isof ro nbuk roi ḇeḇye faro snonkaku ḇeswarisya ma ḇesma fararyor ro i raris auw ḇyena. ²⁹ Snonkaku Allah kyinfir kwar, Allah kyinfirsi ro randakya fa simnis kuker Rumkun ḇyedi, isoine Yesus Kristus. Rarirya Rumkun ani ḇye romawa rak rofandu naek srar. ³⁰ Rarirya kako Allah dorsi ma kyinfirsi ro ḇepon kwar; ma snonkaku ḇesma fararyor ansi ḇyuk fa siḇye kaḇer kuker Allah. Ma snonkaku ḇyuk fa ḇeḇye kaḇer wer kuker Allah, sisma rarwas ro Allah mankundi kankenem ḇyedi. ³¹ Rosai koḇe kokofen werya ro baboine ro roi ḇeḇor annakamya? Rofyor Allah iwaira ko, mansei nari ḇesampum koya? ³² Mankundi Rumkun ḇyedi iswariḇa, mboi ḇyuki faro fandun koḇenakam; insape nari ḇyuk roi ḇesena maḇe koḇake? ³³ Mansei nari ḇefasasye Allah kawasa kyinfir kwar koya, rofyor Allah mankundi fyasna mboi kosasarḇa? ³⁴ Inja snonkaku ono sisya simarisen ssḇuk sasar ḇekoke? Yesus Kristus iso nari ḇeḇriwarek konya! Iso ḇemar kwarya, oroḇaido iso Allah ḇyawes kaḇer wer rofandu marmarya ma isya ro Allah ro moḇ papoikya. ³⁵ Mansei nari ḇedwarek Kristus saswar ḇyuk maḇe konya? Kandera naiso ḇedwareknake, roḇaido mandakyake, roḇaido basbiseryake, roḇaido saḇararyake, roḇaido raroyake, roḇaido marmarya kakoke? ³⁶ Ro Refoya fasfasya ryok radine, "Ras nakam nkokenem ro raro marmari snar auw. Sifrur inkoḇe domba siḇe skarukya." ³⁷ Roba! Mboi ro roi ḇeḇor anna nekam, kosma fainda ḇemnis snar Yesus Kristus ḇeswar koya. ³⁸ Snar yakyar kaku ro sup-swan ine ḇesiper, iḇye marmari ma kankenemya kako; iḇye malaikat ma iḇye ḇesma papoiksya kako; iḇye ro baboine, iḇye ro fafisu nari ḇeramumaya kako, oroḇaido samambraḇ ḇesena; ³⁹ iḇye roi ḇero nanki, roi ḇero sup ine dori nakako, oroḇaido roi ḇese wer, nakam nadwarek Allah saswar ḇyuk mabekonyaḇa, imnis fyasna kwar ro Yesus Kristus Manseren koḇedi.

¹ Rosai nari yaḇe yakofen ine kyaku snar Kristus i ḇena ayanya. Yaḇe ankarḇa. Allah Rur ḇyedi ḇefarkin sne ayeja, ḇyuk kakyar ḇeaya kako mboi wos yakofen nane nkaku. ² Sneri fyafardun ma yaḇe kandera, ³ snar naek srar ayesi ḇeḇe er oser kuker ayasya. Mankundaya ḇardi yamarisen Allah ifras aya snar si, ma yaḇe ḇefasparbur Kristus. ⁴ Sikada kawasa ḇesma kankinfir kwar, ma Allah nyasi ḇeromawa ḇyesi, ma fyasna papoik ḇyedi farosi. Iso ḇefrur asas kuker si ma ḇyuk farosi sasoser agama. Allah ikofen farosi moḇ rosai nari sḇeari raya ma sisma kako ḇaḇeasas ḇyena kwar. ⁵ Siso ḇeḇeknam ro up koḇesi. Ma Kristus ro ḇaḇe snonkaku ḇyeknam ro er sedi. Ikada ikaki syadibur ḇesesyakam. Sanandik faro Allah rofyoro isof fyoro! Amin. ⁶ Yakara ma yakofenḇa ḇo yoḇo Allah asas ḇyena nari ndarirya werḇa; ḇape kawasa Israel Allah kyinfir sikamba. ⁷ Abraham kpu ḇyesi seromawa Allah kamba. Snar Allah ikofen faro Abraham: "Ishak kpu ḇyesya semir siso sorḇe kpu besi." ⁸ Irya Abraham kpu ḇyesi siso sorḇe Rumkun Allah, isoine kpu ḇyesi saḇen kwar kuker Allah asas ḇyedi; mboi kpu ḇyesikamba. ⁹ Snar Allah asas ḇyedi ryadine: "Rofafisu sfasnaikwarya, nari yakaḇer, ma Sara nari daḇen romawa snon oso." ¹⁰ Ma ine kako: Ribka daḇen wombrek risuru ro kma oser, isoine Ishak, up koḇedi. ¹¹ Rofyor wombrek ansuya suḇe ḇeyaḇen ḇaim, Allah fyasna kankimfir ḇyeja ḇepon kwar. Allah kankinfir ḇyedi ḇyeknam ro fararur snonkaku senaḇa, mboi ḇyeknam ro Allah mankundi fararyor ḇyedi. Snar rofafisu ani Ribka romawa ḇyansuya sufrur roi ḇeḇye oso ḇaim ma roi ḇeḇarḇor oso ḇaim. ¹² Allah ikofen kwar faro Ribka, "Ḇebaya nari duffarmyan faro ḇedarya." ¹³ Sfas kwar ro Refo mboi Allah ikofen radine, "Yaswar Yakub, ḇape yayin Esau." ¹⁴ Rarirya rosai koḇe kokofenya? Inja Allah inapesḇake? Mboi kaku ḇeri, Allah inapes! ¹⁵ Snar Allah ikofen faro Moses, "Yamarisen yafasna fakamaman faro mansei yaḇe yafasna fakamaman faroya, ma yamarisen yafasna saswar faro mansei yaḇe yafasna saswarya farosya." ¹⁶ Inja, rosai Allah dawos namuk kwar neknam ro marisen snonkakusya senaḇa roḇa ḇaḇesewar snonkakuḇa, mboi neknam ro Allah ḇaḇesyowi ḇyeja monda faro snonkaku kyinfirsya. ¹⁷ Snar sfas ro Refo radine, "Allah ikofen faro Wairek Masir, ’Yakanouw aw fa bewairek faro kakara ine monda, isoine insa kuker aw, yafasna papoik ayedi ma yafrur snonsnon ayedi fa ḇyesno-sno ro sup-swan ḇesiper.’ " ¹⁸ Inja Allah iswar faro snonkaku oser-oser, rofyor Allah imarisen rarirya. Ma Allah ḇyuk fa snonkakusya siḇrusna npakrek, rofyor Allah imarisen rarirya kako. ¹⁹ Inja, nari naek srar mkokofen ḇeaya, "Rofyor rarirya, snaro Allah imarisen kaker fa ḇyuk safsof faro snonkaku? Mboi snonkaku mansei nari ḇedwarek Allah marisen ḇyena?" ²⁰ Ḇape naek srar! Naek srar mkokada snonkaku monda. Inja naek srar mkomsik fa mkokarem faro Allah ḇa! Rariso nari uren sapropya ikofen faro ḇefruriya ḇo doḇo, "Snaro wafrur aya fa yaradine?" ²¹ Mkofawiḇake snonkaku ḇefrur uren saprop ani ifrur saprop ḇerik ḇyena, raris mankundi marisen ḇyedi? Ro saprop ḇerik anna, snonkaku ani imarisen ifrur uren saprop risuru ḇemnis, uren saprop oso faro fandun ḇepyum ma ḇeseya faro fandun famfnom. ²² Rarirya kako kuker rosai Allah ifrurna. Imarisen fyasna masasor ḇyedi ma fyasna papoik ḇyedi. Ḇape ikḇaḇ faro mansei iḇe ḇyuk samamyai farosya snar sifrur fa imsor kaku. ²³ Allah kako imarisen fyasna maḇeko kamayai nabor kaku faro snonkaku iswar koya. Snar koḇe ḇefasos kwar fa kosma ḇaḇe askiya. ²⁴ Koiso ḇesma fararyor kwar, mboi faro er Yahudi semirḇa, ḇape faro er ḇesesya kako. ²⁵ Snar ro syap nabi Hosea Allah ikofen: "Snonkaku yanaḇasya, nari yorsiḇe ’Kawasa ayesi’. Er yaswarḇasya, nari yorsiḇe ’er saswar ayesi’. ²⁶ Ma ro moḇsai sikofen faro snonkakusya, ’Mkokada kawasa ayesi mkoḇa,’ rodia snonkaku ansi nari sorsiḇe Allah romawa ḇyesi ḇekenem." ²⁷ Nabi Yesaya ikofenbos faro er Israel, "Kaku ḇeri er Israel sibor simnis karyen ro swan, ḇape kermkun monda nari ḇesma koreri. ²⁸ Snar nari fasaw Manseren ḇyuk samamyai faro supswan ine ḇesiper." ²⁹ Yesaya ikofen radine kako, "Rofyor Allah Ḇepoik syadi ḇyuk kpu maḇe koḇakada, nari kokam komnis raris Sodom ma Gomora kwar." ³⁰ Inja, rarirya: Er-er ḇese ḇeyakḇe Yahudiḇa sḇesewar awer insama ḇaḇeoser sedi kuker Allah iḇye kaḇer wer. Ḇape snar sikyar Allah, inja Allah ifrur fa ḇaḇeoser sedi kukeri iḇyekaḇer wer. ³¹ Mboi, kawasa Yahudi sḇesewar ḇesya kwar, insa sḇeuser sasoserna insa ḇaḇeoser sedi kuker Allah iḇye kaḇer wer. Ḇape ḇaḇesewar sedi ḇyuk bon farosiḇa. ³² Rosai ḇefnai fa ḇaḇesewar sedi ḇyebon farosiḇa? Snar sifrur roi ḇerarirya kuker kakyar faro Allahḇa, mboi sikyar monda ḇaḇesewar ro mankunsi. Inja skarkar ma sisapi ro "Karui Karkarya." ³³ Karui ani sfasi ro Refo radine, "Mkoswarepen wos ine: Ro Sion yarir kwar karui oso nari ḇefrur fa snonkakusyakam skarkar; isoine karui ḇeba oso nari ḇefrur fa snonkaku sisapi. Ḇape snonkaku ḇekyar faroisya nari sfafkoḇa."

¹ Naek srar! Yaswarkuf kaku insa er ayesi sḇesi fa sisma koreri. Ma kaku ḇeri yaḇenadi faro Allah, snar si. ² Yakofen kaku mboi sikada simyaren kaku sḇeyuser Allah. Ḇape mayaryaren sena neknam ro swaruser ḇeramaker Allahḇa. ³ Smamkarkirḇa rariso Allah ifrur fa ḇaḇeoser snonkaku sedi kuker Allah iḇyekaḇer wer. Ma snar simarisen sifrur raris mankunsi marisen sena, rarirya simewer skunem faro Allah fasasna ḇyena. ⁴ Sasoser agama Yesus ifrurmnis nakwar. Inja snonkaku mansei ḇekyar faro Kristus, ḇaḇeoser ḇyedi kuker Allah iḇye kaḇer wer. ⁵ Moses fyas mboi snonkaku ḇeḇye kaḇer kuker Allah snar sasoser agama nari sikenem snar sḇeuser sasoser anna. ⁶ Ḇape faro snonkaku ḇeḇye kaḇer kuker Allah, ḇyeknam ro kakyar sena faro Allah. Refoya ikofen radine, "Wakofen awer ro snembri, ’Mansei nari ḇeyekḇe boiyaswaya?’ (isoine ḇeyun Kristus fa isabuya,) ⁷ oroḇaido ’Mansei nari ḇesabu ḇemun aiḇuiya?’ (isoine ḇekanow Kristus fa dekbur marmarya.)" ⁸ Kakara ani ryadine, "Ḇararyas ro Allah fyanam kaku faro naek srar; isya roi naek srar sḇadon mkoḇena, ma isya roi naek srar sne mkoḇena." Inja wos nkoḇaryas, wos ḇekur kakyarya. ⁹ Snar rofyor naek srar mkokarem kuker sḇadon mkoḇena, mboi, "Yesus Manserendirya," ma naek srar mkokyar ro mkosnemna, mboi Allah ḇyawes Yesus ro marmarya kwar, irya naek srar nari mkosma koreri. ¹⁰ Snar kuker sneya, snonkaku sikyar Allah, isof Allah nyasiḇe snonkaku ḇeḇye kaḇer kuker Allah. Ma snonkaku skarem kuker sisḇasna isof sisma koreri. ¹¹ Ro Refoya sfas radine, "Snonkaku ḇekyar nari simaiḇa." ¹² Ine ryarirya faro snonkakukam snar rarwas oso isyaḇa fandu kawasa Yahudi ma kawasa er ḇesesyaḇa. Allah oser ani irya Manseren faro kawasakam. Ḇyuk ḇok ḇeḇor syadi faro snonkakukam ḇeyor fafnoḇek faroisya. ¹³ Ro Refo sfas kwar radine, "Snonkakukam ḇeyor Manseren snonsnon ḇyedi, nari sisma koreri." ¹⁴ Ḇape rariso snonkaku sor Manseren, rofyor sikyar ḇaim? Ma rariso siḇe sikyar faro Manseren, rofyor simnaf Allah ḇaim? Rarirya kako rariso nari simnaf Manseren, rofyor ono sḇaryas faro siḇaim? ¹⁵ Ma rariso snonkakusya ssun ḇaryas ani, rofyoe sḇeḇewan ḇaim? Ro Refo sfas radine, "Ḇaḇye ḇefnakḇa faro snonkaku ḇerama ḇeyun Ankankinem Ḇeḇye ro Allah!" ¹⁶ Ḇape snonkakukam sna Ankankinem Ḇeḇye aniḇa. Snar Yesaya ikofen, "Manseren, mansei nari ḇekyar ḇaryas inkoḇenanya?" ¹⁷ I eḇedar snonkaku sikyar snar simnaf ḇararyas ma ḇaryas ani simnafi snar snonkaku ono sisya sḇaryas ro Kristus. ¹⁸ Ḇape yaḇe yafuken: Inja kaku simnaf ḇaryas ani ḇaimke? Yafawi kaku simnafi kwar! Snar sfas ro Refo radine, "Mkaren sena neruran ro supswan ḇesiper, ma wos sena nda kwar isof supna pember." ¹⁹ Yaḇe yafuken wer: Inja kawasa Israel sifawi ḇaimke? Iḇye syadi fakfuken ine isma kankarem ḇepon ro Moses. Moses ikofen, "Allah ikofen radine, ’Nari yafrur fa mkofafayaf faro er ono yanaḇasya, ma nari yafrur fa mkomsor faro er ono ḇefawi royoḇasya.’ " ²⁰ Yesaya iḇri syadi wer. Ikofen ḇo doḇo, "Allah ikofen radine, ’Snonkaku ḇesewar ayaḇa, sisrow aya kwar; ma yafasna mankundaya farosi ḇefuken ayaḇasya!’ " ²¹ Ḇape faro er Israel Yesaya ikofen ḇo doḇo, "Allah ikofen radine, ’Ras nakam yasu ḇramin ayesuya faro er oso ḇesampum aya ma ḇeḇesyowi ayaḇa.’ "

¹ Yaḇe yafuken: Inja Allah mankundi isawen kawasa ḇyesya kwarke? Roḇa kaku ḇeri! Snar aya ḇardi snon oso ro Israel, Abraham kpu ḇyesi, ma ro keret Benyamin. ² Roḇa! Allah isawen kawasa kyinfir kwar ro randakyansyaḇa. Naek srar mkofawi kwar rosai ḇefas ro Refo fa ḇekur Elia, rofyor ḇyuk safsof ro kawasa Israel faro Allah. Elia ikofen, ³ "Manseren, snonkakusya smun nabi-nabi bansi ma simkok rokef ḇekun farsarser faro awna. Yemir monda yakenem ma simarisen siḇe smun aya." ⁴ Rosai Allah kyarem faro Elia? Allah kyarem, "Yafaduru snon syaran rifik faro mankundaya kwar. Ma saksyom faro karwar Baal ḇaim." ⁵ Rarirya kako ro baboine: Allah kyinfir rarwas kasun oso kwar rofandu snonkakusya snar fakamaman ḇyedi. ⁶ Allah kyinfirsi ḇyeknam ro fakamaman ḇyedi mboi ḇyeknam ro fararur senaḇa. Snar rofyor Allah kankinfir ḇyedi ḇyeknam ro snonkakusya fararur sena, nari Allah fakamaman ḇyedi fakamaman ḇekaku risyaḇa. ⁷ Inja, rariso? Kawasa Israelsya sisma rosai ssewaryaḇa. Ḇesmasya isoine rarwas kasun monda Allah kyinfir kwarsya. Ḇesesyakam siḇrusna npakrek faro Allah fararyor ḇyedi. ⁸ Snar ro Refoya sfas radine, "Allah ifrur sne ma swaruser sena fa nedip; ma isof fafisu ine simkasna nmamba ma knaram sena namnafba." ⁹ Daud ikofen kako ḇo doḇo, "Iḇye munara sena nedenem faro mankunsi, ma neder, moḇ sisapi fa semompraf! ¹⁰ Iḇyekada mamam sena npampan insa smam awer; ma iḇyekada sikrusna nayar isof fyoro-fyoro." ¹¹ Yafuken wer: Fafisu kawasa Yahudi sisapiya, inja rarirya insa semomprafke? Roḇaḇeri! Ḇape snar sasar sena, mboi er ḇesesya sisma aski, isof Yahudisya sikram masasor faro er ḇesesya. ¹² Snar er Yahudi sḇesasar ma siso Allah marisen ḇyenaḇa, inja Allah ḇyeḇok er-er ḇesesya. Isyadi wer rofyor ḇaḇeoser kuker Yahudi iḇye kaḇer wer kuker Allah; nari Allah ḇaḇeḇok ḇyuk faro er-er ansi iba syadi wer! ¹³ Ḇape knikine iḇye yakofen faro naek srar ḇeyakḇe Yahudiḇasya! Fyoro kwar ine, yafararurḇe manwawan faro er-er ḇeyakḇe Yahudiḇasya, snar yaḇe manmin fafaya fararur ayediḇa. ¹⁴ Yakyar kaku nari yafrur masasor mankundaya er ayedi, insa kuker nyan ine ono rofandusi saksma koreri. ¹⁵ Snar Allah pyampumsi ro ḇandi, isof ro ḇaḇeoser rofandu supswan ine kuker Allah iḇye kaḇer wer; isyadi wer rofyor Allah nyasi! Mnuk ine imnis raris snonkaku ḇemar ma ḇekenem wer! ¹⁶ Rofyor mamami mnuk ḇeponya ḇyeḇeḇuk faro Allah kwar, rarirya mamami ḇesiperya ḇyeḇeḇuk kam faro Allah kako. Ma rofyor ai raresna Allah nyana, snaw-snaw ḇyena Allah nyana kako. ¹⁷ Snaw ono ro zaitun knam -- isoine kawasa Yahudi --sḇeḇekaruk kwar. Ma ro naur snaw skaruk anna, sḇeknof zaitun snaw ḇesurku, isoine naek srar ḇeyakḇe Yahudiḇasya. Naek srar mkoḇe ḇeknof ro dia insa mkakan roi ḇeḇor ḇeḇye ro kankenem Rur kawasa Yahudisya. ¹⁸ Inja naek srar mkomamkyof awer kawasa skaruk kwar imnis ai snau ansya. Naek srar mkoswarepen, snar ai snawsi mko monda. Ma snawya iḇeḇuk nanan faro raresnaḇa, mboi rares naiso ḇeḇuk nanan faro snawnanya. ¹⁹ Ḇape naek nari wakofen, "Mboi, ḇape snaw-snaw anna neḇekaruk insa yaḇe ḇeknof ro knamya!" ²⁰ Kaku ḇeri. Ḇape sisawensi snar sikyarḇa, mboi naek srar mkokada snamko snar kakyar mkoḇena. Inja naek srar mkomarares awer mko snar mnuk ine; iḇyekada naek srar mkomkak. ²¹ Snar rofyor Allah iswar kawasa Yahudisyaḇa ma isawensi imnis snaw ḇekaku ani, naek srar mko kyar awer nari iswar mko ma isawen mkoba. ²² Inja rodine komam Allah ḇaḇye ḇyedi ma Allah ḇaḇepakakrek ḇyedi. Fyasna pakakrek ḇyedi faro kawasa ḇesasar, ḇape iḇye faro naek srar mko -- rofyor naek srar mkokenem faswef ro ḇaḇye ḇyedi. Mboi roḇaido, naek srar mko kako nari sisawen mko. ²³ Ma faro kawasa Yahudi ansi, rofyor simnai ro kakyarḇa sena, nari seḇena kaḇer wer; snar Allah ipok fa nyakaḇersi wer. ²⁴ Naek srar ḇeyakḇe knam ro er Yahudiḇa mkomnis zaitun snaw ḇesurku. Inja, rofyor naek srar, mkosampum rari mkoḇena, nari mkoḇe ḇeknof ro zaitun knam ḇekakuya, rosai wer kuker kawasa Yahudi sḇukmnis kuker snaw ro zaitun knam ḇekakuya. Ikada ipyan syadi fa Allah dun kaḇersi faro zaitun knam sedi wer. ²⁵ Naek srar! Yakyar naek srar mkokara awer ḇo mkoḇo mkofawi roi ḇeborkam kwar. Snar Allah imarisen roi oso, ḇape snonkakusya sifawi i ḇaim. Ma yamarisen insa naek srar mkofawi i; isoine: Ono ro kawasa Yahudi siḇrusna npakrek, ḇape fararur ḇeradine nari nambran rao isof dandonek kawasa ḇeyakḇe Yahudiḇa ḇerama faro Allah simnis resari. ²⁶ Raimnai kawasa Yahudisya nari sisma koreri. Snar ro Refo sfas radine, "Wairek Manfaspar beyun koreriya nari ryama ro Sion; i nari ḇepyos ḇarḇor ḇeborkam ro Yakub kpu ḇyesi. ²⁷ Nari yafesepen si kuker asas ine rofyor yaḇe yapyos sasar sena." ²⁸ Snar kawasa Yahudi simewer sakna Ankankinem Ḇeḇye ro Allah, rarirya sembroḇ Allah; ma kuker nyan ḇeradine, ḇyuk fainda faro naek srar ḇeyakḇe Yahudiḇasya. Ḇape snar Allah kyinfirsi kwar, inja Allah iswar faswefsi snar up sesi. ²⁹ Snar rofyor Allah kyinfir snonkaku ma ḇyeḇoksi, Allah iyer kaḇer rosai ifrur kwar naḇa. ³⁰ Fyor iwara naek srar mkoḇesyowi Allahḇa. Ḇape baboine Allah fyasna mboi naek srar mkosma ḇaḇemkei ro sasar, snar kawasa Yahudi sesyowiḇa. ³¹ Rarirya kako faro kawasa Yahudi ansi. Fafisu ine sesyowi Allahḇa, insa naek srar sfasnaḇadir mkoḇe mkei ro sasar na. Ḇape nari si kako sfasnaḇadir si ḇesma ḇaḇemkei ro sasar na. ³² Snar Allah myam monda ḇo papoik ḇaḇeuserḇaya nya kawasa ḇeborkam, insa fyasna saswar ḇyedi farosi kam. ³³ Kaku ḇeri Allah arasa ḇyena naba! Kaku ḇeri fawawinananem ḇyena naba! Manseiso nari ḇekukeḇ rosai dawos namuk na? Manseiso nari befawi nyan byuk fararurya? ³⁴ Ro Refo sfas radine, "Manseiso ḇefawi Manseren swaruser ḇyena? Manseiso nari ḇeḇuk ananun faroi? ³⁵ Manseiso bebuk kwar roi oso faro Manseren isof iḇe dor munsu ro na?" ³⁶ Allah ḇefrur roi ḇeḇor nakam. Nakam neknam ro Allah ma Allah i ḇenananya. Sanandik faro Allah isof fyoro-fyoro! Amin.

¹ Naek srar! Allah ḇaḇye ḇyedi ibakaku maḇeko. Eḇedari yor kaku ḇeri insa naek srar mkoḇuk mankunmkoḇe farsarser ḇekenem oso ḇardi faro Allah ḇefrur sneprei Allah kada. Ikada ḇaḇeari ḇekakuya. ² Mkoso awer nyan famfnom ro supswan ine. Naek buk mankundaw fa Allah ifrur fa babo wer, insa beḇesadwer. Rarirya naek wafawi Allah marisen ḇyena -- isoine rosai ḇeḇye ma ḇefrur sneprei Allah ma ḇemnis. ³ Allah ḇyuk fakamaman ḇyedi kwar maḇe aya. Eḇedari yanun naek srar mkokam: Mkoḇaḇir mankunmko mkokaki syadi awer ro roi ḇekakuna. Iḇye syadi naek kwara ma rwun mankundaw; oser-oser kyara mankundi, imnis raris Allah kakyar ḇyuk faroiya. ⁴ Baken koḇena nna kina nabor. Kina oser-oser fararur ḇyedi isya ḇardi. ⁵ Rarirya kuker ko kako, kobor rariso wer, ḇape koḇe baken oser snar koḇe oser kuker Kristus. Ma koḇe oser kuker ḇesesya, raris kina ro baken oser. ⁶ Ko oser-oser nya fakamaman ḇesisye. Fakamaman anna Allah ḇyuk na maḇeko raris saswar ḇyedi. Rarirya kona fakamaman anna. Snonkaku ḇena fakamaman fa ḇeḇaryas Allah wos ḇyena, snonkaku ani ḇyardi ḇararyas ro Allah raris kakyar ismaya. ⁷ Snonkaku ḇena fakamaman fa ḇefnoḇek snonkaku ḇese, snonkaku ani ifnoḇek kaku ḇeri snonkaku ḇese kuker kaku. Snonkaku ḇena fakamaman fa ḇeḇuk farkarkor, iḇyekada ḇyuk farkarkor kuker kaku. ⁸ Snonkaku ḇena fakamaman fa ḇeḇuk wos raryaḇ faro snonkaku ḇese, kaku ḇeri snonkaku ani ḇyuk wos raryaḇ faro snonkaku ḇese. Snonkaku ḇena fakamaman fa ḇeḇuk faro snonkaku ḇese rosai nyana, snonkaku ani ifrur fararur ani kuker snemura kuker napnapes. Snonkaku ḇena fakamaman fa ḇyemanfarkin, kaku ḇeri snonkaku ani ḇyemanfarkin ḇekaku ma ḇemyaren kada. Snonkaku ḇena fakamaman fa ḇefasna saswar faro snonkaku ḇese, snonkaku ani ifrur fararur ani kuker marisen. ⁹ Mkosaswar kuker sne ḇenapes. Mkayin roi ḇeḇarḇor na, ma mkoserepen mko ro roi ḇeḇye. ¹⁰ Iḇye syadi naek srar mkoswar yae mko oser ḇe oser imnis manbekanaek ro kina oser, ma iḇyekada oser-oser iwarpon min ḇyedi ro ḇaḇearooya. ¹¹ Mkofararur kuker mayaryaren. Mkopapum awer. Mkofararur faro Manseren kuker raryaḇ ro Allah Rur ḇyedi. ¹² Naek srar mkokyar faro Manseren kuker raryaḇ, ma mkokḇaḇ ro ḇaḇekandera, ma mkofarmku ro nadiya. ¹³ Mkofnoḇek mnis ḇaḇefandun ro snonkaku ḇekyar faro Allah ma mkorepen si kuker sne ḇemarisen ro rum mkoḇena. ¹⁴ Mkor faro Allah insa ḇyeḇok snonkaku ḇeḇarḇor faro mkonsya. Mboi, mkor fa Allah ḇyeḇoksi, ma mkofras awersi. ¹⁵ Mkoryaḇ fnoḇek snonkaku ḇeryaḇsya, ma mkokanes fnoḇek snonkaku ḇekanes. ¹⁶ Mkokenem kuker ḇaḇeoser rofandu mko. Mkokara awer roi ḇekakibur fawawi mkoḇena, ḇape mkorun mankun mko faro roi ḇekur kankenem ras-ras. Mboi mkokara mkofawi syadi awer! ¹⁷ Rofyor ono sifrur sasar faro naek srar mkoido, mkomunsu awer na kuker ḇarḇor. Mboi mkofrur rosai snonkakusyakam skara ḇeḇyena. ¹⁸ Ro ḇar mkoḇedi, mkosewar fa mkokenem kuker aski faro snonkakusya kam. ¹⁹ Naek srar yesi! Mkomunsu awer swarapepen mkadu, snar Allah nari ḇeḇuk samamyaiya. Snar ro Refo sfas radine, "Ayaiso nari ḇemunsuya. Ayaiso nari ḇeḇuk samamyaiya, ine Manseren wos ḇyedi." ²⁰ Iḇyekada fan mbroḇ besi rofyor sibiser; ma buk aninem farosi, rofyor simbrow. Snar wafrur rarirya, irya wafrur mamyaisi. ²¹ Mkomam monda ḇo ḇarḇorya kyafyo awer mko, mboi iḇyekada naek srar mkokafyo ḇarḇorya kuker ḇaḇyeya.

¹ Snonkaku oser-oser nari ḇyeyuser faro ḇesasosersya, snar ḇesasoser oso isma papoik ro Allah. Ma ḇesasoser ro baboine, Allah i ḇeḇuk na. ² Eḇedari snonkaku ḇesampum ḇesasosersya, imnis isampum rosai Allah ḇyuk kwar na. Ma manseiso ḇefrur rarirya nari isma samamyai. ³ Snar snonkaku ḇefrur roi ḇeḇye simkak ḇesasosersyaḇa. Mboi snonkaku ḇefrur roi ḇeḇarḇor sikada simkak. Rofyor naek srar mkokara insa mkomkak awer ḇesasosersya, naek srar mkofrur roi ḇeḇye, rarirya nari naek srar mkosma sanandik. ⁴ Snar ḇesasoserya Allah manfamyan ḇyedirya ḇefararur faro naek srar mko fa mkosma ḇaḇye. Ḇape rofyor naek srar mkofrur ḇarḇorido nari mkomkak faroi, mboi isma papoik fa ḇyuk samamyai faro snonkaku waworek mondaḇa. Ikada Allah manfamyan ḇyedirya fa ḇyuk samamyai faro snonkaku ḇefrur ḇarḇorsya. ⁵ Eḇedari naek srar mkoḇeyuser faro ḇesasoserya -- snar mkomewer mkosma samamyai mondaḇa, ḇape snar kakara mkoḇena kako. ⁶ I ḇeḇeknam kako fa snaro naek srar mkoḇak som, snar ḇesasoser Allah manfamyan ḇyedirya insa ifrur ḇardi fararur ani. ⁷ Inja bak faro ḇesasoserya, rosai nari bak faroi. Bak som, rofyor sor som ro naek srar mko, ma mkomkak faro mansei fandun fa mkobak farosya; ma mkoḇesyowi faro mansei ḇesma syowisya. ⁸ Mkoḇenyaki awer roi oso faro manseirya kako, ḇape iḇyekada mkoswaryae mko. Snar snonkaku ḇeswar min snonkaku ḇese, ikada ifrur mnis Allah sasoser ḇyena, Moses ḇyuk kwar na. ⁹ Snar sasoser agama Yahudi, isoine: Wafrur farbuk awer; mamun awer; kwaraw awer; warmomen oso ḇese nana ḇyena awer; nakam nafnoḇek sasoser ḇese, nanekam ne sasoser oser monda, isoine, "Waswar min snonkaku ḇese, imnis waswar mankundaw." ¹⁰ Snonkaku ḇeswar faro snonkaku ḇesesya, nari sifrur ḇarḇor faro snonkaku ansiḇa. Inja snonkaku ḇeswar min sesya sikda sifrur mnis sasoser agamaya kwar. ¹¹ Roiḇese ro nanekam mkofawi mboi rofafisu ine, fafisu faro naek srar mko fa mkokḇok ro anenef. Snar fafisu faro kosma askiya fyanam syadiḇe ko kwar rofafisu randak kokyarya. ¹² Roḇya fyanam isyonde kwar; ma kniko monda meser. Inja, iḇye komnai ro fararur ḇepampan. Mboi kofasos mankunko kuker romamun isnaya. ¹³ Iḇye kofrur roi ḇeḇor ḇeḇeawnos, imnis raris roi kofrur ro isnaya; ma kofrur munara ḇeba syadi awer, isof komser. Roḇaido kofrur farbuk awer, roḇa rari ḇeḇeawnosḇa awer. Komamun awer, roḇa kardu masasor awer. ¹⁴ Iḇye Manseren Yesus Kristus i ḇefasna rosai naek srar mkoḇe mkofrur na. Ma mkoso awer rari snonkaku ḇesasar fa mkoso rmomen mkoḇena awer.

¹ Snonkaku kakyar ḇedworenḇasya mkonasi kuker ḇaḇye rofandu naek srar. Mkorakrakrok awer kukersi snar swaruser sena. ² Snonkaku ono skara sima san famfnom monda. Ḇape snonkaku ono ḇese kakyar sena nadworenḇa; inja skara sima san wei monda. ³ Snonkaku ḇeyan famfnom, skoryaye awer snonkaku ḇeyakan famfnomḇasya; ma snonkaku ḇeyan famfnomḇasya, skoryaye awer snonkaku ḇeyan famfnomsya, snar Allah nyasikam kwar. ⁴ Manseiso naek srar isof mkoḇe mkoḇemankara snonkaku ḇesesya manfamyan sesi? Manfamyan ani isapi roḇa dores afuf, ikada tuan ḇyedi nari ḇekara faroi. Ma manfamyan ani nari dores afuf, snar Manseren iso ḇepok ḇeḇawesi fa dores afufya. ⁵ Snonkaku ono skara ras ono nefandun syadi ro ras ḇesena, ḇape snonkaku ono ḇese wer skara rasras anna namniskam monda. Iḇye snonkaku oser-oser kyara raris mankundi kakara ḇyena. ⁶ Snonkaku ḇekara ras ono nbefandun syadi, snonkaku ansi skara rarirya faro sikḇesyowi Manseren. Snonkaku ḇeyan famfnom ansya, sifrur rarirya fa sikḇesyowi Manseren, ma sikofen kasumasa faro Allah snar roḇean anna. Rarirya kako faro snonkaku ḇeyan famfnomḇa ansi; snonkaku ansi kako sḇesyowi Manseren ma sikofen kasumasa faro Allah. ⁷ Snonkaku oso ḇaḇeri ro ko, ikenem faro mankundi; ma snonkaku oso ḇaḇeri ro ko ḇemar faro mankundi. ⁸ Rofyor kokenem, kokenem faro Manseren, ma rofyor komar, komar kako faro Manseren. Inja, kankenem roḇa marmarya, Manseren iso ḇenakonya. ⁹ Kristus imar kwar ma ikenem kaḇer wer. Eḇedari ḇye Manseren faro snonkaku ḇekenemsya ma faro snonkaku ḇemar kwarsya kako. ¹⁰ Inja, naek srar! Rosai eḇedari mkoḇuk sasar faro naek srar mkoḇesi ḇena kakyar oser? Ma rosai eḇedari naek srar mkorun naek srar mkoḇesi? Kokam nari kosma mankara ro ḇarpon Allah. ¹¹ Snar sfas ro Refo radine, "Manseren ikofen, kaku ḇeri, snonkaku oser-oser nari ḇyansuba ro ḇarpon ayedi; ma snonkaku oser-oser nari kyarem mboi Allah risaya." ¹² Inja kokam oser-oser nari kyarem fararur ḇeḇor ḇyena faro Allah. ¹³ Snar rarirya koḇuk sasaryaye awer. Mboi naek srar koḇesewar insa kofrur awer roi oso, ḇefrur fa naek ḇena kakyar oser isma fafrowes ma isapi ro sasar. ¹⁴ Snar yaḇeoser kuker Manseren Yesus, inja yakyar kaku roi osoḇaḇeri fa ifrur ayin; ḇape roi ani ifrur ayin faro snonkaku oser-oser rofyor kyara iḇe roi ḇefrur ayin. ¹⁵ Ḇape rofyor naek wan roi oso ḇefrur fa naek ḇena kakyar oser imsor, rarirya wakenem kuker saswar werḇa. Rofyor Yesus imar kwar snar snonkaku oso, mam monda ḇo imar awer snar roi wan na. ¹⁶ Inja mam monda awer roi ḇeḇye faro aw, ḇape snonkaku ḇese skara naḇe roi ḇeḇyeḇa. ¹⁷ Snar ro Allah ḇaḇesasoser ḇyedi, rosai snonkakusya san ma sinem, naiso ḇeḇefandun wer naḇa. Mboi roi ḇeḇefandun kakuya isoine, snonkakusya siso user Allah marisen ḇyedi, fa sisma aski ma marisen ḇeba Allah Rur ḇyedi ḇyuk farosi kwarya. ¹⁸ Snonkaku ḇeyuffarmyan Yesus rarirya, sifrur sneprei Allah, ma sisma syowi ro snonkaku ḇesesya. ¹⁹ Rarirya komarisen kokenem ro ḇaḇeoser ma kofarkoryaye ko. ²⁰ Ma snar roḇean, nafnai fa naek kwakok awer, rosai Allah ifrur kwar na. Roḇean nakam nasren fa neḇeyan; ḇape rosai wan fa ḇefnai snonkaku ḇese fa sisapi ro sasar, rarirya naek swasar. ²¹ Iḇye syadi wan awer manfnai roḇa winem awer anggur roḇa wafrur rosai wer, rofyor nafrur fa naek oso ḇena kakyar oser ḇyesasar. ²² Mboi rosai naek wakyarya, wafruri ro Allah ḇarpon ḇyedi monda faro mankundaw ḇardi. Snonkaku ḇeḇaḇir knam osoḇa fa ḇyesasar faro roi skara ḇekaku, snon ani isma aski. ²³ Ḇape snonkaku ḇekara ma ḇeḇe ḇirḇar ḇeyan roi oso, ḇape ḇarpurya dan roḇeyan ani, Allah ḇyuk sasar faroi; snar snon ani ifrur mnis kakyar ḇyedi faro Allahḇa. Ma rosairya wer ifrur kuker kakyarḇa, irya syasar.

¹ Ḇesma kakyar ḇesambraḇ koya faro Allah, nari kokḇaḇser sano-sano ro snonkaku kakyar ḇesambraḇ ḇasya. Ma kofrur marisen mankunko ḇardi awer. ² Inja kono oser-oser ifrur marisen naek srar koḇesi faro ḇaḇye sena, insa kakyar sena faro Allah nsambraḇ syadi wer. ³ Snar Kristus kako kyara raryaḇ faro mankundi ḇardiḇa. Ro Refoya sfas radine, "Anonef ḇeḇor ssḇuk faro mko nkur aya kwar." ⁴ Fas-fas ro Refoya kam insa nfarkor ko. Snar farkarkor kosma ro Refoya nafrur fa kodworen ma kosambraḇ isof kokyar faro Allah. ⁵ Iḇyekada Allah, ḇyuk ḇaḇekaḇaḇ ma sneprei faro snonkaku ḇefnoḇek naek srar mko, insa mkokenem kuker ḇaḇesne oser, ma mkoso nyan ro Yesus Kristus. ⁶ Kuker sne oser, mko kam mkosandik Allah Kma ro Manseren koḇedi Yesus Kristus. ⁷ Inja iḇye naek srar mkoḇesyowiyae mko kuker marisen, imnis raris Kristus kako dakna mko fa mkosandik Allah. ⁸ Inja mkoswarepen, mboi Kristus duffarmyan kawasa Yahudi kwar fa fyasna mboi nari Allah ifrurmnis asas-asas ḇyena faro up koḇesi. ⁹ Yesus ifrur faro er-er ḇese kako fa sisandik Allah, snar saswar ḇyedi farosi. Snar sfas ro Refo radine, "Snar rarirya nari yasandik au rofandu er-ersya, ma nari yadisen sandik snonsnon bedi." ¹⁰ Snar sfas radine wer, "Mkoryaḇ fnoḇek Allah kawasa kyinfirsya, ne, er-er kam!" ¹¹ Ma ine wer kako, "Mkosandik Allah, ne, er-er kam, iḇyekada snonkaku kam mkosandiki!" ¹² Ma Yesaya ikofen kako radine, "Ro Isai kpu ḇyesi nari snon oso isasyar ma nari ḇyuk sasoser faro er-er kam; ma er-er kam nari sikyar faroi." ¹³ Allah knam ro naek srar kakyar mkoḇena. Rarirya ifrur fa naek srar mkosma marisen ḇeba ma aski, snar mkokyar faroi, insa kuker Allah Rur papoik ḇyedi, naek srar mkokyar syadi wer faro Allah. ¹⁴ Naek srar ayesi! Yafawi mboi roi ḇeḇye nabor kaku naisya ro mko. Naek srar mko kako mkofawi nakam, ma mkoḇukna nfarkoryae mko. ¹⁵ Ḇape yamarisen yaḇuk swarepen ro roi ono faro mko kaker ro syap ine; snar Allah ḇyuk kwar maro aya fararur ine. ¹⁶ Allah ḇyuk kwar fa yaḇe manfamyan ro Yesus Kristus, ma iwan aya faro er-er ḇese ḇeḇe Yahudiḇasya, ma yafararur imnis imam, ḇeḇaryas Ankankinem Ḇeḇye ro Allah, insa kawasa ḇeḇe Yahudiḇasya simnis farsarser oso faro Allah ma Allah nyasi. Iḇyekada Allah Rur ḇyedi ifrur fa sḇefarsarser oso faro Allah. ¹⁷ Inja, snar yaḇe oser kwar kuker Yesus Kristus, inja yamsik kuker fararur ayedi faro Allah. ¹⁸ Yamsik ḇo yawos rarirya ro rosai Yesus ifrur kuker aya kwar fa yafararur faro kawasa ḇeḇe Yahudiḇasya, insa sḇeyuser Allah. Yafrur rarirya kuker wos ma fararur, ¹⁹ ma kuker aḇyair-aḇyair kanandor; nakam ndarirya snar papoik ro Allah Rur ḇyedi. Ankankinem Ḇeḇye ro Kristus yaḇaryas nakam faro snonkaku, randak ro Yerusalem isof ro Ilirikum. ²⁰ Marisen ayedi isoine yaḇaryas Ankankinem Ḇeḇye ro Allah ro moḇ kawasa sakmnaf Kristus ḇaim. Snar yamewer yaḇawes fararur ro snon ḇese araref senandi. ²¹ Snar sfas ro Refo radine, "Snonkaku beyaksma bararyas ro i ḇaim, nari smam; ma snonkaku beyakmnaf ḇaim, nari sifawi." ²² Yawḇe rarwan ono kwar fa yaḇe yarakaki naek srar mko, ḇape roi ono nadadwarek aya. ²³ Ḇape baboine fararur ayena ro supya mnuk ine, naḇro kwar. Wampasi wambarek ono, yamarisen yarakaki naek srar mko. ²⁴ Nari rofyor marandan ayedi yaraḇe sup Spanyol, yunuk ro mnu mkoḇedi, yakyar nari yasrow mko kuker marisen. Posa kwar yakyar nari mkofnoḇek aya ro marandan ayedi ḇe Spanyol. ²⁵ Ḇape baboine yamarisen yun famfnoḇek faro kawasa Allah ḇyesi ro Yerusalem. ²⁶ Snar jemaat-jemaat ro Makedonia ma Akhaya sawos namuk kwar fa siryur famfnoḇek faro naek srar kawasa ḇesaḇarar rofandu Allah kawasa ḇyesi ro Yerusalem. ²⁷ Siwos namuk kwar fa simarisen sifrur rarirya. Mboi snonkaku ansi nari sifnoḇek naek srar ḇesaḇarar ro Yerusalem ansi; snar kawasa Yahudisya eḇedari kawasa ḇeḇe Yahudiḇasya sisma ḇok ro Allah. Inja, kawasa ḇeḇe Yahudiḇasya kako nari sifnoḇek kawasa Yahudisya kuker arasa sena sisma ro supswan ine. ²⁸ Rofyor yafrur posa fararur ayedi kwar, isoine yun famfnoḇek siryur anna faro kawasa ro Yerusalem kwar, nari yara ḇe Spanyol yunuk ro mnu mkoḇedi. ²⁹ Rofyor yara fa kwar, nari yaḇedar ḇok nabor ro Kristus faro mko. ³⁰ Kuker Manseren koḇedi Yesus Kristus, ma kuker saswar ro Allah Rur ḇyedi ḇyuk na, yor kaku faro naek srar, insa mkakḇenadiwarek aya faro Allah. ³¹ Mkoḇenadi insa Allah fyaspar ayabur kawasa ḇekyarḇa ro Yudeasya, insa yun famfnoḇek ḇe Yerusalem faro Allah kawasa ḇyesi rodia insa sisma na kuker marisen. ³² Ma rofyor Allah imarisen, nari yaramufa yasrow mko kuker marisen. Ma nari yasma sneprei rofandu mko. ³³ Allah ḇeḇeknam askiya ifnoḇek mko kam! Amin.

¹ Yamarisen yakofen ḇadir srar koḇedi, Febe. Ifnoḇek jemaat ro Kengkrea. ² Mkonai imnis snonkaku oso rofandu Manseren kawasa ḇyesi. Mboi rarirya kawasa ḇekyar faro Allah snayae si. Mkofnoḇeki rofyor ḇyefandun famfnoḇek ro mko, snar i ḇardi ifnoḇek snonkaku sibor kwar ma aya kako. ³ Mkokofen ḇadir aroo ayena faro Priska ma Akwila, min ayesi ḇefararurkam faro Yesus Kristus. ⁴ Indokada simar sadwer aya, snar simarisen sfaspar aya. Yakofen kasumasa farosi -- ma yererḇa ḇoi, jemaat-jemaat er ḇese ḇeḇe Yahudiḇasya kako sikofen kasumasa faro su. ⁵ Mkokofen aroo ayena kako faro jemaat ḇefanjur ro rum subedi. Aroo faro Epenetus yaswar kaku. Iso bekyar randak faro Kristus ro sup Asia. ⁶ Aroo ayena kako faro Maria. Snar ifararur sambraḇ kaku faro mko kwar. ⁷ Mkokofen ḇadir aroo ayena kako faro Andronikus ma Yunias. Sukada su ḇekeret ma er oser kuker aya ma su yaksun bui kwar fnoḇek aya. Rofyor yakyar faro Kristus ḇaim, sukada sukyar ḇepon kwar. Manwawansya sifawikam su. ⁸ Aroo faro Ampliatus, yaswar kaku ani snar i kuker aya nuḇe oser kwar kuker Manseren. ⁹ Mkokofen jow ayena faro Urbanus, min koḇedi ḇefararur fnoḇek ko faro Kristus. Ma jow ayena kako faro Stakhis yaswar kaku ani. ¹⁰ Aroo faro Apeles. Snar ḇaḇeyuser ḇyena faro Kristus nbair kwar. Aroo kako faro Aristobulus kina ḇyesi, ¹¹ ma faro Herodion. I kuker aya nuna keret ma er oser. Aroo kako faro naek srar ḇena kakyar oser ro Narkisus kina ḇyesi. ¹² Aroo ayena kako faro Trifena ma Trifosa ḇefararur sambraḇ kaku ro afuffarmyan faro Manseren, ma faro Persis yaswar kaku ani. I kako ifararur sambraḇ faro Manseren kwar. ¹³ Aroo faro Rufus ma snari, imnis sna ayedirya kako. Rufus snonkaku Manseren kyinfir ma ḇesma sanandik rirya. ¹⁴ Mkokofen ḇadir aroo ayena faro Asinkritus, Flegon, Hermes, Patrobas, Hermas ma kawasa kam ḇesma kakyar oser fnoḇeksi. ¹⁵ Aroo faro Filologus ma Yulia; faro Nereus ma srar ḇyedi; faro Olimpas ma faro snonkaku ḇekyar fnoḇeksya kam. ¹⁶ Mkoḇe arooyae mko kuker saswar, imnis naek Kristus. Kristus Jemaat-jemaat ḇyenakam sikofen aroo sena faro naek srar. ¹⁷ Naek srar! Yor kaku ḇeri mkoḇesasor mko ro snonkaku ḇefarkor ninyan ma ḇefrowes mko ro kakyar mkoḇena faro Manseren. Roi ḇerarirya, nasampum farkarkor ssḇuk kwar faro mko. Mkoḇinkwanbur snonkaku ansi. ¹⁸ Snar snonkaku ḇefrur rarirya ansi sifararur faro Kristus Manseren koḇediḇa, mboi sifararur faro rmomen mankunsi sena monda. Kuker ḇaḇyuk ma wosman sḇeankar snonkaku ḇefawi royoḇasya. ¹⁹ Snonkaku sifawikam kwar, mboi mkomarisen faro farkarkor ro Ankankinem Ḇeḇye ro Allah. Ma yamarisen snar roi ḇerarirya faro mko. Yamarisen insa naek srar mkofawinanem ro roi ḇeḇye ma mkofawi royoḇa ro roi ḇeḇarḇor na. ²⁰ Allah ḇeḇuk aski faro snonkaku, nari ḇyuk papoik faro mko fa mkoḇuki dawef Ibirisya. Manseren koḇedi Yesus Kristus ḇyeḇok naek srar mko ḇesya kwarkada! ²¹ Min ayedi Timotius, ḇyuk aroo faro naek srar. Rarirya kako Lukius, Yason ma Sosipater, ḇeḇekeret ma er oser kuker aya. ²² Befas syap ine aya Tertius. Yakofen aroo faro naek srar mko. ²³ Gayus fyarem aroo faro naek srar. Yaḇeryar ro rum ḇyedi ma nkoḇeari ro rum ḇyedi kako. Erastus ḇeḇe ḇukor ro ḇaḇepipi ro mnuya, fyarem aroo faro naek srar. Rarirya kako naek kobedi Kwartus. [ ²⁴ Manseren koḇedi Yesus Kristus ḇyeḇok naek srar, mko ḇesya kwarkada. Amin!] ²⁵ Sanandik faro Allah! Ikada ipok ḇyuk samambraḇ ma kakyar faro naek srar imnis Ankankinem Ḇeḇye ro Allah yaḇaryas kwar ro Yesus Kristus. Yaḇaryas ḇararyas ani imnis rosai Allah fyasna kwar; isoine roi Allah daw kwar ro wampasi wambarek utin-utin snonkaku sifawiḇa. ²⁶ Ḇape baboine raris Allah sasoser ḇyedi, aw ani ḇyeḇefasna ma ḇyeḇeḇaryas faro er-er kam kuker fas-fas ro nabi-nabisya, insa sikam sikyar ma sisoyuser Allah. ²⁷ Ikada Allah oser monda befawinanem syadi. Iḇyekada mkobesyowi Allah, isof fyoro-fyoro ro Yesus Kristus! Amin. Ro aya, Paulus, manfamyan ro Yesus Kristus