FASASNA FARO YOHANES

¹ Syap ine kyur rosai Allah ikofen ḇadir faro Yesus Kristus insa fyasna na faro Allah manfamyan ḇyesi rosai nari ḇerama fasaw na. Kristus iwan malaekat ḇyedi faro manfamyan ḇyedi. Yohanes, insa ikofen ḇadir roi anna faroi. ² Yohanes fyarfyar roi myam anna kam; ma ḇaḇesaksi ḇyedi ḇekur Allah wos ḇyena ḇyuk faro Yesus Kristus. ³ Fainda faro snonkaku ḇewasya ma ḇerower ḇaryas ḇardadi syap ine roi ikofen ḇadir na ma isouser rosai sfas roi na. Snar fyoroḇa wer nari nakam ndama. ⁴ Naek srar ḇekain ro jemaat rifik ro supya mnuk Asia! Aya, Yohanes, yakyar naek srar mkosma ro Allah, ḇaḇye ma aski --isoine i sya, ma i sya kwar, ma nari ryama -- ma rur rifik sisya ro ḇarpon karapesa ḇaḇesasoser ḇyedi kako, ⁵ ma ro Yesus Kristus, Saksi ḇeḇeuser. I sḇawes kaḇer ḇepon ro marmar ma ikada isma papoik ḇesyadi ro wairek-wairek ro sup ine. Yesus iswar ko, ma kuker marmar ḇyedi fyaspar ko ro sasar koḇena kuker rikḇyena -- ⁶ ḇarpurya ifrur ko fakoḇe er oser, koḇe imam-imam ḇeyuffarmyan Allah, Kma ḇyedi. Yesus Kristus iba syadi ma ḇena papoik isof fyoro-fyoro. Amin! ⁷ Mkomam, ryama kuker mandep! Kawasa kam nari smam i, ḇewan i kuker bomsya kako. Ersya kam ro supna nari skanes snar i. O, Amin. ⁸ "Aya kada ḇeponyama ḇepupesya, Manseren Allah ikofen, isya, isya kwar, ma nari ryama, Ḇesma Papoik syadiya." ⁹ Aya Yohanes, naek mkoḇedi bemnis kuker mko ḇeḇekandera imnis manfamyan oser-oser ḇeso Kristus. Kofarmku ro kandera imnis kawasa ḇyesi. Sisawen aya ro myos Patmos snar yaḇaryas Allah wos ḇyedi, Yesus ḇyuk na. ¹⁰ Ro Manseren ras ḇyedi, Allah Rur ḇyedi ḇyepoik aya, inja yarower mkaren ḇeba oso -- imnis kḇur ḇerok -- dawos ro dokor ayedi. ¹¹ Mkaren ani ikofen, "Fas rosai mam na, ma farem syap ine faro jemaat rifik nane: Efesus, Smirna, Pergamus, Tiatira, Sardis, Filadelfia ma Laodikia." ¹² Yaknenef ḇedokor fayamam mansei ḇewawos faro aya. Ma yamam padamara ḇeḇewemin rifik ḇeḇemarom sifrur naro brawen. ¹³ Rofandu padamara wemin anna yamam snon oso dores imnis snonkaku. Syansun syatu ḇekwan isof ro wemin ḇyesi. Ro andersi isron sarei brawen. ¹⁴ Snonburyam ḇyena napyoper imnis manwarefbur, payapyoper mankum. Mka ḇyesi sisak imnis for; ¹⁵ wemin ḇyesi sinyar imnis kansai sikun ro for. Mkaren ḇyedi imnis sriḇwar ḇesobir ḇerok maum. ¹⁶ Dufepen kum rifik ro ḇramin ḇyedi ḇar rakuya, ma sumber ḇesar raḇanḇar isya ro sḇadon ḇyedi. Ḇarpon ḇyedi isna imnis ori ro orkok pandaf. ¹⁷ Rofyor yamam i, yakain wepur ro ḇarpon ḇyedi imnis snonkaku ḇemar kwar. Ḇape ryir ḇramin raku ḇyedi ro aya ma ikofen, "Wamkak awer! Aya kada ḇeponya ma ḇepupesya. ¹⁸ Aya kada ḇekenem! Yamar kwar, ḇape mam kada, yakenem isof fyoro-fyoro. Yasma papoik syadi ro marmarya ma mun aiḇui. ¹⁹ Rarirya, fas rosai mam na, isoine rosai naisya ro baboine, ma rosai nari ḇerama na. ²⁰ Inekada kankunes ro kum rifik mam ro ḇramin ḇar raku yedi, ma ro padamara ḇeḇewemin rifik ro brawen anna. Kum rifik ansi isoine malaikatsya ro jemaat rifik, ma padamara ḇeḇewemin rifik anna isoine jemaat rifik anna."

¹ "Faro malaikat jemaat ro Efesus, fas radine: Inekada ananun ro i ḇeyufepen kum rifik ro ḇramin ḇar raku ḇyedi, ma ḇembran rofandu padamara brawen ḇeḇewemin rifik anna. ² Yafawi roi mkofrurna: mko fararur sambraḇ ma mkosnemna nadworen kaku. Yafawi mkomewer mkoso ḇeḇarḇorsya. Ma snonkaku ḇekarem mankun si ḇemanwawan ḇape roḇa, iḇye mkomnasen si, insa mkofawi wawan sisyaḇa, mboi sankarkar. ³ Ma mkoknon mboi mkoḇekandera snar aya, ma mkofawi mkomor ḇa. ⁴ Ḇape yasampum mko: Snar saswar ḇepon mkobani maro aya isyaḇa kwar. ⁵ Rarirya mkoswarepen mkosapi ḇinkwan kaku! Mkombror ro sasar mkoḇena, ma mkofrur rosai mkofrur ro ḇepon kwar ani. Rarirya ḇaido, nari yarama ma yapas padamara wemin mkoḇanibur moḇ ḇyedi. ⁶ Ḇape roi ḇeḇye oso isya ro mko isoine: Mkayin fararur ro ḇeso Nikolaus sya, aya kako yayin si. ⁷ Mansei ḇeḇeknaram ido ryower ma kyara rosai Allah Rur ḇyedi ikofen faro jemaat-jemaat! Mansei ḇeḇefainda, nari yaḇuk fadan bon ro ai knam kankenem ḇesur ro Allah yaf ḇyedi." ⁸ "Faro malaikat jemaat ro Smirna, fas radine: Inekada ananun ro i ḇeponya ma ḇepupesya -- ḇemar kwar ma ḇekḇok kaḇer. ⁹ Yafawi kandera mkoḇena; yafawi mkosaḇarar -- ḇape mkoḇekayan kaku ḇeri! Yafawi anonef ro kawasa ḇekarem mankun siḇe Yahudi, ḇape rarirya ḇa; sikada Ibiris kawasa ḇyesiri! ¹⁰ Mkomkak awer kandera nari fyoro ḇa mkosma na. Mkoswarepen, Ibiris nari ḇyeono ro mko fassun ro bui faifrowes sas mko. Nari mkosma kandera ras samfur. Iḇyesyadi mkofarmku nako faro aya isof mkomar, nari yaḇuk faro mko wower ḇekakuya. ¹¹ Mansei ḇeḇeknaram ido ryower ma kyara rosai Allah Rur ḇyedi ikofen faro jemaat-jemaat! Mansei ḇeḇefainda, nari ismaḇaḇeri kandera marmar ḇeḇesuruya." ¹² "Faro malaikat jemaat ro Pergamus, fas radine: Inekada ananun ro i ḇeyuf sumber ḇesar raḇanḇar. ¹³ Yafawi moḇ mkokain rona. Mkokain ro moḇ karapesa ḇaḇesasoser Ibirisya. Mkofarmku nako faro aya. Rofafisu Antipas, saksi ḇeḇeuser ayedi, ḇyeḇemun rofandu mko, ro ayar mamun. Ibirisya kyain roya, rofyor ani kako mkofamyun kakyar mkoḇena ḇa faro aya. ¹⁴ Ma rariryano roi ono naisya yamarisen naba ro mko: Rofandu mko ono sisya siso farkarkor rosai Bileam ḇyukna. Bileam ḇyuk farkarkor faro Balak insa ḇyeninyan kawasa Israel, fasifrur sasar; ḇyeḇuk si fasan roḇean ḇefarser kwar faro amfyanir ma sifrur farbuk. ¹⁵ Rarirya kako rofandu mko snonkaku ono sisya siso farkarkor ro ḇeso Nikolaus. ¹⁶ Snar rarirya mkombror ro sasar mkoḇena! Mkofrur rarirya ḇaido, kniko nari yarama faro mko wer ma yaḇe embroḇ snonkaku ansi kuker sumber ḇero sḇadon ayedi. ¹⁷ Mansei ḇeḇeknaram ido ryower ma kyara rosai Allah Rur ḇyedi ikofen faro jemaat-jemaat! Mansei ḇeḇefainda, nari yaḇuk fadan mamami (manna) ḇeyokef, ma nari oser-oser isma ro aya karui ḇepyoper oser. Ro karui ani sfas snonsnon babo oso, manseirya wer kako ifawi ḇa, mboi snonkaku ḇesma iya derer." ¹⁸ "Faro malaikat jemaat ro Tiatira, fas radine: Inekada ananun ro Allah Rumkun ḇyedi, mka ḇyesi sisak imnis for, ma wemin ḇyesu sumnis kansai ḇenyar sikun ro for. ¹⁹ Yafawi roi ḇeḇor mkofrur na -- yafawi mkosaswar, mkosouser, mkofararur, ma mkofarmku ro kandera. Yafawi baboine mkofararur nabor syadi ro ḇeponiwara. ²⁰ Ḇape yasampum mko: Snar mkoḇuk mkosnemna faro Izebel kwar, bin ḇekarem ḇinkundiḇe Allah wawan ḇyedi. Manfamyan ayesi sibor kwar isrer si ma fyarkor si fasifrur farḇuk ma san roḇean sḇukfarser kwar faro amfyanirsya. ²¹ Yaḇuk fafisu kwar faro si fasimbror ro sasar sena, ḇape simarisen simnai ḇa rofararur farḇuk. ²² Mkoswarepen! Nari yapyasbos i isof iduf ro kamboi ḇyedi. Rodia i kuker snonkaku ḇefrur farḇuk fnoḇek isya nari sisma kandera ḇeba. Nakam nari yafrurna ro baboine -- mboi rofyor simnai ro sifrur roi ḇeḇarḇor fnoḇek kuker iḇa. ²³ Ma ḇeso isya nari yamun si kako insa jemaat sifawi kam aya kada yafawi snonkakusya swaruser sena. Nari yamunsu faro mko kam imnis oser-oser fararur ḇyedi. ²⁴ Ḇape eḇesesya ro Tiatira ḇeyakso farkarkor ḇeḇarḇor ani ḇa, ma ḇefarkor fawawi Ibiris ani ḇa. Yakofen nari yaḇuk kamnam ḇemarḇak faro mko ḇa. ²⁵ Ḇape isof rofyor nari yaramumaya, iḇyesyadi mkoso faswef rosai mkosma kwar. ²⁶ - ²⁷ Mansei ḇeḇefainda, ma ḇefararur pdef isof ro papupesya ḇefrur rosai yamarisen, nari yaḇuk papoik faroi imnis yasma ro Kma yedi. Nari sisma papoik ro aya fasḇuk sasoser faro er-er kuker ankyon mankarmomen, ma ḇyuki ryaḇdiwer er-er ansi isof semommom imnis uren saprop. ²⁸ Nari sisma kum mesri ro aya. ²⁹ Mansei ḇeḇeknaram ido ryower ma kyara rosai Allah Rur ḇyedi ikofen faro jemaat-jemaat!"

¹ "Faro malaikat jemaat ro Sardis, fas radine: Inekada ananun ro i ḇena Allah Rur rifik ḇyesi ma kum rifik ansi. Yafawi rosai mkofrurna. Soḇeda mkokenem ḇape mkomar kwar! ² Inja, mkokḇok, ma mkosambraḇser rosai isya kaker faro mko ḇepon ro nakam namar ḇaimya. Snar yasma mboi rosai mkofrurna, oso imnis ḇaim ro Allah ḇarpon ḇyedi. ³ Inja, mkoswarepen kaḇer wer rosai sfarkor ḇepon kwar faro mko ma rosai mkomnaf kwar. Mkofrurna ma mkombror ro sasar mkoḇena. Rofyor mkombror ḇa, nari yarama faro mko imnis raris ḇekaraw; ma nari mkofawi ḇa fafisu yaramaya. ⁴ Ma rofandu mko ro Sardis snonkaku ono sisya siwaren sansun sena insa nasren faswef. Sima nari simbran fnoḇek aya kuker ssun sansun ḇepyoper, snar sikada sisyus. ⁵ Mansei ḇeḇefainda, nari ssḇuk fasyun sansun ḇepyoper. Snonsnon sena nari yapyosna ḇa ro syap kawasa ḇekenem. Ma roḇarpon Kma yedi ma malaikat ḇyesya nari yakarem si ḇekawasa ayesi. ⁶ Mansei ḇeḇeknaram ido ryower ma kyara rosai Allah Rur ḇyedi ikofen faro jemaat-jemaat!" ⁷ "Faro malaikat jemaat ro Filadelfia, fas radine: Inekada ananun roi Ḇesren, Ḇenapes. Ikada dufepen asyopder Daud ḇyedi; rofyor syeḇen, oso fakyeni ḇa, ma rofyor kyeni, oso fasyeḇeni ḇa kako. ⁸ Yafawi rosai mkofrurna. Yafawi mkosambraḇ mankun ḇa; mkoso farkarkor ayena kwar ma mkoḇeuser faro aya. Yaseḇen kedwai oso faro mko kwar, oso fakyeni ḇa kako. ⁹ Mkoswarepen ine: Mansei ḇeḇekawasa Ibiris ani, ḇeḇeankarkar ḇekarem mankundiḇe Yahudi, mboi sima roḇa. Nari yafrur fasrama sḇansuba ro ḇarpon mkoḇena. Ma nari sifawi mboi yaswar mko. ¹⁰ Snar mkoso sasoser ayena kwar ma mkofarmku kwar, aya kako nari yafadiren mko rofafisu kandera nari ḇemun supswan ḇesiper ine. Roi ḇeradine nari ndama nefarawrowes faro kawasa kam ro supna. ¹¹ Nari yarama fasaw! Mkowaren naḇye rosai mkona kwar, insa oso fadun awer wower ḇeḇefainda mkoḇedi ḇa. ¹² Mansei ḇeḇefainda, nari yafrur faimnis adir ro Allah yedi rum ḇesren ḇyedi, ma nari isasyar ro moḇ ani wer ḇa. Snonsnon Allah yedi, ma snonsnon mnu Allah yedi -- isoine Yerusalem babo nari ḇesabu roboiyaswa, ro Allah yedi -- nari yafas i ro snonkaku ani mankundi. Snonsnon babo yedi kako nari yafas i ro mankundi. ¹³ Mansei ḇeḇeknaram ido ryower ma kyara rosai Allah Rur ḇyedi ikofen faro jemaat-jemaat!" ¹⁴ "Faro malaikat jemaat ro Laodikia, fas radine: Inekada ananun ro i ḇenirḇe Amin (Yesus) saksi ḇeḇeuser ma ḇenapes, knam ḇedafdif roi ḇeḇor kam Allah ifrurna. ¹⁵ Yafawi rosai mkofrurna; Yafawi mkoprim ba ma mkosam ba kako. Iḇyekada mkoprim roḇa mkosam! ¹⁶ Ḇape mkofarmandin; mkosam ba ma mkoprim ba kako. Rarirya nari yaḇayorem mko. ¹⁷ Rofyor mkokofen, ’Nko ḇekayan ma nana nko ḇena namnis; nkananjar royo ḇa.’ Ḇape mkofawi ḇa mkosaḇarar ma mkofrur saneso mankun mko! Mkosaḇarar, mkoḇaḇer, ma mkoparyaref. ¹⁸ Inja yanun faro mko insa mkokoḇes brawen ro aya, isoine brawen ḇekaku, insa mkoḇekayan. Mkokoḇes ro aya sansun ḇepyoper kako famkosansunwarek baken ḇeḇaḇer mkoḇena ḇefrur mamyai. Ma mkokoḇes aryawin kako fasḇuki isfu mka mkoḇesi insa mkomam. ¹⁹ Snonkaku yaswarsya si yasonek ma yaprersya. Inja mkomarisen ido mkombror ro sasar mkoḇena. ²⁰ Mkomam! Yores ro kedwaya ḇarpondi ma yanuk. Rofyor oso ryower mkaren yedi, ma syeḇen kedwai, nari yasun fayasrowi; nari yanan fnoḇek i ma dakanan fnoḇek aya. ²¹ Mansei ḇeḇefainda, nari yaḇuk fakyain ro karapesa ḇaḇesasoser ayedi fnoḇek aya. Snar mankun daya kako yaḇefainda kwar ma baboine yakain fnoḇek Kma yedi ro karapesa ḇaḇesasoser ḇyedi. ²² Mansei ḇeḇeknaram ido ryower ma kyara rosai Allah Rur ḇyedi ikofen faro jemaat-jemaat!"

¹ Posa kwar yasma mamam oso wer. Yamam kedwai oso ro boiyaswa ḇyeḇeseḇen. Ḇarpurya yarower wer mkaren randakya ḇewawos kwar maro aya imnis rakrok kḇur. Mkaren ani ikofen, "Rwama wekmumyas. Nari yafasna faro aw rosai nari ḇeramana." ² Fasaw kaku yasma papoik ro Allah Rur ḇyedi. Ma yamam ro boiyaswa karapesa ḇaḇesasoser oso, ma snon oso kyain ro karapesa ḇaḇesasoser ani. ³ Snon ani ḇarpon ḇyedi isna imnis permata baiduri pandan (karui ḇekakur sananai ḇyedi ryumek) ma permata delima (karui ḇekakur sananai ḇyedi irik). Saseḇi oso isnai ḇezamrud (karui ḇekakur kaku, sananai ḇyedi ryumek), ḇeparek yar karapesa ḇaḇesasoser ani. ⁴ Karapesa ḇaḇesasoser samfur risuru seser rifiak ḇese nkainyar karapesa ḇaḇesasoser ani. Rodia manfarkin samfur risuru seser rifiak skain rona ssansun sansun ḇepyoper ma sisaswo wower brawen. ⁵ Karapesa ḇaḇesasoser ani isasyar arḇeḇer ma karadu ḇerok ḇeruru. Ma roḇarpon karapesa ḇaḇesasoser ani paramrom rifik naisya nasnai; nakada Allah Rur rifik ḇyenairya. ⁶ Ro ḇarpon karapesa ḇaḇesasoser ani kosma roi oso komam imnis soren fanin, isren imnis kristal, (fanin sanana ḇyedi isren). Ma roi ḇekenem rifiak nores snefer yar karapesa ḇaḇesasoser ani, ro ḇarpon, ma dokorya nafo kuker mka ro kum. ⁷ Roi ḇekenem ḇepon ani komam imnis singa, (aiwan ḇeyan ḇepek). Ḇeḇesuruya, imnis sapi snon. Ḇeḇekiorya ḇarpon ḇyedi imnis snonkaku. Ḇeḇefiakya, komam imnis mankankan ḇeroḇ. ⁸ Roi ḇekenem rifiak ansi, oser-oser ḇyeprer riwonem, ḇandiri ma dori nafo kuker mka ro kum, nkain yari. Roḇ meser roi ḇekenem ansi sidisen ḇesyakwar, "Sren, sren, Manseren isren, Allah ḇepik syadi; isya, isya kwar, ma nari ḇeramumaya." ⁹ Roi ḇekenem rifiak ansi sidisen, dow sanandik, jow ma kasumasa faro i ḇekain ro karapesa ḇaḇesasoser ani, isoine i ḇekenem isof fyoro-fyoro. Ma rofyor roi ḇekenem ansi sidisen, ¹⁰ ma manfarkin samfur risuru seser rifiak ansi skain wepur ro ḇarpon ḇekain ro karapesa ḇaḇesasoser ani, raimnai sḇan suba faro i ḇekenem isof fyoro-fyoro ani. Ḇarpurya srir wower sena ro ḇarpon karapesa ḇaḇesasoser ani ma sikofen, ¹¹ "O, Manseren, o, Allah nkobedi! Aw monda kada wasyus fawasma sanandik, syowi ma papik. Snar aw ḇefrur roi ḇeḇor kam, ma snar marisen ḇedi kako roi ḇeḇor anna neḇefrur kwar ma nakenem."

¹ Ma ḇarpurya yamam ḇekain ro karapesa ḇaḇesasoser ani, ro ḇramin ḇyeja syap oso isya, syap ḇeniw. Syap ani ifo kuker fasfas ro ḇanḇar. Syap ḇeniw ani ḇyeḇekakop kuker kakop rifik. ² Raimnai yamam malaikat ḇesambraḇ oso, kyaru naba, "Mansei ḇesyus faḇeḇas kakop ma syap ḇeniw ine?" ³ Ḇape snon oso ḇa iḇye ro boiyaswa, ma sup ine, roḇa ro sup ine baḇdi osoḇa faḇyas syap ani, ma myam rodori. ⁴ Inja yakanes rawo yamarpapyoi, snar snon oso isya ḇa kako isyus faḇyas syap ani, ma myam rodori. ⁵ Raimnai snon oso ro manfamyan ansi ikofen maro aya, "Kwanes awer! Mame! Singa (aiwan ḇeyan ḇepek) ro er Yehuda, ḇeḇeḇarpur ro Daud ḇeba ani, ḇyefainda kwar. I ḇesyus faḇeḇas kakop rifik ma syap ḇeniw ani." ⁶ Ma yamam Rumkun Domba oso dores rofandu karapesa ḇaḇesasoser ani, ma roi ḇekenem rifik kuker manfarkin-manfarkin ansi sores yar i. Rumkun Domba ani imnis raris ḇyeḇekauk kwar. Ḇyeknapur rifik ma mka rifik: isoine Rur rifik ro Allah, iwan kwar ḇesupna ḇesiper. ⁷ Ḇarpurya Rumkun Domba ani rya dun syap ḇeniw ani ro ḇramin ḇar raku ḇekain ro karapesa ḇaḇesasoser ani. ⁸ Ro fafisu Rumkun Domba ani dun syap ḇeniw ani, roi ḇekenem rifiak ma manfarkin samfur risuru seser rifiak ansi skain wepur ro ḇarpon ḇyedi. Manfarkin ansi oser-oser duf sonker ma sek brawen ḇeser mamboḇo, isoine Allah kawasa ḇyesi nadi sena. ⁹ Ma sidisen mkaren dow ḇaḇo oso: "Aw kada wasyus fawun syap ani, ma bas kakop ḇyena. Snar beḇemun kwar, ma kuker marmar ḇedi, snonkaku ro keret kam, wos, kawasa ma er bak namuk si kwar faro Allah. ¹⁰ Wafrur si fase er oser seimam-imam, insa suffarmyan Allah koḇedi, ma ssḇuk sasoser imnis wairek ro supna." ¹¹ Ḇarpurya yamam wer ma yarower mkaren malaikat sibor sesyaran-syaran ma syaran samfur-risamfur! Sores yar karapesa ḇaḇesasoser ma roi ḇekenem rifiak ma manfarkin ansya. ¹² Sidisen kuker mkaren ḇeba, "Rumkun Domba skawuk kwar ani, isyus faisma papoik, ḇaḇekayan, ḇaḇefawawi ma ḇaḇesamambraḇ; i syus fasesyowi i, isma baba ma sisandik i!" ¹³ Ma yarower roi ḇekenem ro nanki, ro supna, ro supna baḇna, ro sorenya dori -- roi ḇekenem ḇeḇor kam ro farsyos sansoren ine -- nadisen, "I ḇekain ro karapesa ḇaḇesasoser, ma Rumkun Domba ani, ikada isma sanandik ma syowi ma baba ma ḇaḇepapoik isof fyoro-fyoro!" ¹⁴ Ma roi ḇekenem rifiak ansi skarem: "Amin!" Ma manfarkin ansi kako skain wepur ma sḇan suba.

¹ Posa kwar yamam Rumkun Domba ani ḇyas kakop ḇeponya rofandu kakop rifik anna. Ma yarower roi ḇekenem rifiak ansi oso ikofen, "Rwama!" Mkaren ḇyedi ryok imnis rakrok karadu. ² Raimnai yamam, kuda ḇepyoper oso ḇeyekroiya duf saren oser, ma ssḇuk faroi wower oser. Ma rya imnis snon oser ḇesma fainda faḇefaḇri ḇaḇefaindaya. ³ Ma ḇarpurya Rumkun Domba ani ḇyas kakop ḇeḇesuruya, ma yarower roi ḇekenem ḇeḇesuruya ikofen, "Rwama!" ⁴ Inja kuda ḇese oser isasyar wer. Kuda ani irik ma dafuk. Ḇeyekiya ssḇuk papoik fadun askibur supna ḇesiper, insa snonkaku smunyae si. Ma ssḇuk faroi sumber ḇeba oser. ⁵ Raimnai Rumkun Domba ani ḇyas kakop ḇeḇekiorya. Ma yarower roi ḇekenem ḇeḇekiorya ikofen, "Rwama!" Yamam, kuda ḇepaisem oser. Ḇeyekiya duf warnkyara risuru ro ḇraminya. ⁶ Ma yarower imnis mkaren rofandu roi ḇekenem rifiak ansi ḇekofen, "Sasuref ras oser fasibu amek oser, ḇyepipi sarak dinar oser; ma sasuref ras oser katera amek rikior, ḇyepipi sarak dinar oser. Ḇape mkokaruk awer zaitun knam ma anggur knam anna." ⁷ Raimnai Rumkun Domba ani ḇyas kakop ḇeḇefiakya. Ma yarower roi ḇekenem ḇeḇefiakya ikofen, "Rwama!" ⁸ Wakmam kada kuda oser sanana ḇyedi ryumek-nyanyar. Ḇeyekiya snonsnon ḇyedi Marmari. Ma mun aiḇui duserfaku ro dokor ḇyedi. Ssḇuk faro si mun ḇeḇefiak ro supna faro papoik sedi, insa smamun kuker ḇaḇe embroḇ, kuker fafisu basbiser, kuker dafduf ma kuker aiwan ḇeḇarḇor. ⁹ Raimnai Rumkun Domba ani ḇyas kakop ḇeḇerimya. Ma yamam ro rokef farsarserya baḇdi rur snonkaku smun faḇemar kwar ansya, snar sḇaryas Allah wos ḇyedi kuker ḇaḇesaksi sena. ¹⁰ Ma sfararar kuker mkaren ḇeba, "O, Manseren Ḇepoik syadi, ḇesren ma ḇenapes! Fafisu rosai wer insape kwukeḇ kankain supna ma ḇuk samamyai faro si snar smun inko kwar?" ¹¹ Ḇarpurya ssḇuk faro si oser-oser syatu ḇepyoper oser. Ma siwan si fasimnaisu fafisu knik wer, isof dandonek sedi imnis min sesi ḇeyuffarmyan ma naek srar sesi nari sḇeḇemun imnis si kako. ¹² Raimnai yamam Rumkun Domba ani ḇyas kakop ḇeḇewonemya. Ma rim ḇeba ḇeyun nyawa myun. Ori pyaisem imnis sanampuru, ma paikya fyanandik imnis rik. ¹³ Maksya sfarbrubru ro nanki ḇesupna imnis imyui bon ḇekamur ḇerwu ro knamya rofafisu wam doḇerya kyiker. ¹⁴ Ma nanki ipromes imnis syap ḇeniw, bon ma aimandoi (myos) nakam neḇekanowbur moḇ nena. ¹⁵ Ma waireksya ro supna, ḇebararasya, mambrisya, kawasa ḇeḇekayan ma kawasa ḇesma papoik, ma kawasa ḇesesya, fnoḇek manfyan ma snonkaku ḇemkei, sikam siyokef ro aḇyaḇ ma ro bon karuina swaf-swafna. ¹⁶ Ma sfararar faro bon ma karui anna, "Mkomsiserepen inko! Mkoyokef inko ro mamam ḇyedi ḇekain ro karapesa ḇaḇesasoser, snar masasor ro Rumkun Domba ani! ¹⁷ Snar ras ḇeba ḇeyun nyawa ryama kwar, baboine sfasna masasor sena ma snonkaku oso ḇa kako fyarmku ro ḇarpon sena!"

¹ Ḇarpurya, yamam malaikat rifiak sores ro dopir rifiak ro supna. Ma sidwarek wam rifiak ro supna insa wamo iso awer roḇande, roḇa rosoren, roḇa ro ai knamna. ² Raimnai yamam malaikat oso ḇese isasyar ro ḇar ori dek. Dun Allah kakop ḇekenem ḇyedi. Ma kuker mkaren ḇeba malaikat ani dor malaikat rifiak ḇesma Allah papoik ḇyedi faḇemkok ḇande ma soren. ³ Malaikat ani ikofen, "Mkomkok ḇepon awer ḇandeya, roḇa sorenya, roḇa ai knam na, rofyor koḇuk kakop aḇyair ro Allah koḇedi faro manfamyan ḇyesya andar sena ḇaim." ⁴ Raimnai ikofen ḇadir maro aya, snonkaku ssḇuk kakop aḇyair Allah ro andar sena, dandonek seja syaran utin oser samfur rifiak seser rifiak. Snonkaku sine sunsi ro er Israel keret samfur seser risuru; ⁵ ro keret oser-oser syaran samfur oser seser risuru. Isoine ro keret ma er: Yehuda, Ruben, Gad, ⁶ Asyer, Naftali, Manasye, ⁷ Simeon, Lewi, Isakhar, ⁸ Zebulon, Yusuf ma Benyamin. ⁹ Ḇarpurya yamam, snonkaku sibor syadi wer -- isof snon oso nari kyor dandonek sejaḇa! Sikada snonkaku ro ersya kam, keret, kawasa ma wosna. Ssansun syatu ḇepyoper ma suf srai ram, snonkaku ḇeḇor ansi sores roḇarpon karapesa ḇaḇesasoser ma roḇarpon Rumkun Domba ani. ¹⁰ Raimnai skaru kuker mkaren ḇeba, "Korer koḇeja ryama ro Allah koḇedi, ḇekain ro karapesa ḇaḇesasoser ḇyedi, ma ro Rumkun Domba ani!" ¹¹ Malaikatsya kam sores yar karapesa ḇaḇesasoser ma manfarkinsya kuker roi ḇekenem rifiak ansi. Malaikat ansi skain wepur roḇarpon karapesa ḇaḇesasoser ma sḇansuba faro Allah. ¹² Skaru kam, "Amin! Allah koḇeja ikada Allah ḇesma sanandik, baba ma ḇefawinananem. Ko kofen kasumasa nabor kaku faro Allah ma ḇaḇesyowi. I Allah ḇepoik ma ḇesambraḇ isof fyoro-fyoro! Amin." ¹³ Ma snon oso ro manfarkin ansi ifuken aya, "Snonkaku ḇesun syatu ḇepyoper sine, mansesirya ma sramakero?" ¹⁴ Yakarem, "Yafawi ḇa, tuan. Tuan mankundaw wafawi." Inja ikofen maro aya, "Sinekada snonkaku ḇesma koreri kwar, posa ro sisasyarbur kandera ḇeba. Spap syatu sena kwar ma sifrurna fanapyoper kuker Rumkun Domba ani rik ḇyena. ¹⁵ Rarirya sores ro ḇarpon karapesa ḇaḇesasoser Allah, ma ssesyowi faro Allah roḇ meser ro Allah rum ḇesren ḇyedi. Ma i ḇekain ro karapesa ḇaḇesasoser ani nari iso si fafyadiren si. ¹⁶ Nari sibiser ma simbrow wer ḇa; samsam ori nari myun si wer ḇa, ¹⁷ snar Rumkun Domba ḇekain rofandu karapesa ḇaḇesasoser ani nari ḇyemanfarandows faro si. Nari fyarkin si ḇewar baken ḇeḇuk kankenem. Ma nari Allah ipyos mkaru senabur simkasna."

¹ Rofafisu Rumkun Domba ani ḇyas kakop ḇeḇefikya, boiyaswa ḇyeusḇa isof indokada oras muno. ² Raimnai yamam malaikat rifik sores ro Allah ḇarpon ḇyedi, ma ssḇuk kḇur rifik faro si. ³ Malaikat oso ḇese, dun ben brawen ḇeser farsarser ḇekun, ḇo ryama dores ro ḇarpon meja farsarser. Ssḇuk faroi kwar ben brawen ḇeser mamboḇo nabor kaku insa ḇyuk nfarser fnoḇek Allah kawasa ḇyesi nadi sena kam ro rokef brawen farsarser ani ro ḇarpon karapesa ḇaḇesasoserya. ⁴ Mamboḇo paw ma Allah kawasa ḇyesi nadi sena, nek ro malaikat ḇeyores ani ḇramin ḇyedi ro ḇarpon Allah. ⁵ Ḇarpurya malaikat ani dun ben brawen ḇeser farsarser ḇekun ani ma iseri kuker for ro rokef farsarser, posa isawen na ḇesupna. Ma karadu nḇeruru ma arḇeḇer ma rim. ⁶ Posa kwar, malaikat rifik ḇeyuf kḇur rifik ansi sfasos fasiḇe siwuf. ⁷ Malaikat ḇeponya iwuf kḇur ḇyedi, ma mekem karui ma for irḇaren rik nasapi ḇesupna. Ma mun rikior ro supna nananem ranaḇro; rarirya kako mun rikior ro ai knam ma aḇrisna. ⁸ Raimnai malaikat ḇeḇesuruya iwuf kḇur ḇyedi, ma roi oso imnis bon ḇeba isber, ḇyeḇesawen ḇesoren. Ma mun rikior ro soren fyarwe ḇerik, ⁹ ma mun rikior ro roi ḇekenem ḇeḇor ro soren simar; rarirya kako mun rikior ro jawasina namsawer. ¹⁰ Raimnai malaikat ḇeḇekiorya iwuf kḇur ḇyedi, ma kum ḇeba oso, isber imnis paramrom, isapi ro nanki, ma myun munrikior ro warna ma war sunna. ¹¹ (Kum ani snonsnon ḇyedi "Apsintus" = "Sarmar".) Ma mun rikior ro warna nsarmar, ma snonkaku sibor simar snar sinem war ḇesarmar anna. ¹² Raimnai malaikat ḇeḇefiakya iwuf kḇur ḇyedi. Ma mun rikior ro ori, mun rikior ro paiki, ma mun rikior ro kumsya seḇeprer isof mun rikior ro sambraḇ sena napromes. Ma mun rikior ro meserya pyampan ma rarirya kako mun rikior ro roḇya. ¹³ Raimnai yamam, ma yarower mankankan oso iroḇ ro sansoren ḇoka ḇo kyaru, "Raro! Raro! Rarokada faro snonkaku kam ro supna, nari rofafisu mkorower malaikat rikior ḇese ansko skowuf kḇur skoḇesi!"

¹ Raimnai malaikat ḇeḇerimya iwuf kḇur ḇyedi, ma yamam kum oso isapi ro nanki ḇesupna. Ssḇuk faro kum ani asyopder mun aiḇui. ² Ma kum ani syeḇen mun aiḇui; ma paw nasasyar roi imnis paw ro apen ḇeba. Ori ma sansoren ḇoka pyampan, snar paw ro mun aiḇui. ³ Raimnai kampam sisasyar ro paw ani sisabu ḇesupna. Ssḇuk papoik faro kampam ansi imnis raris ssḇuk faro manora (aiwan ḇeyarek sayaryur). ⁴ Sidwarek si fasan awer aḇris roḇa ai knam, roḇa rokaker ḇesena. Mboi smun monda snonkaku ḇesma kakop aḇyair ro Allah ḇa ro andar sena. ⁵ Kampam ansi sidwarek si insa smun awer snonkaku ansi, mboi sifrur kandera monda si paik ririm. Sayaryur ani imnis kandera manora, ḇeyarek, rofyor darek snonkaku. ⁶ Paik ririm ani, snonkaku ssḇesasewar insa simar, ḇape nari simar ḇa; simarisen simar mura, ḇape marmarya ḇyinkwanbur si. ⁷ Kampam ansi komam simnis kuda-kuda ḇefasos faḇeḇe embroḇ. Ro ḇrusena roi oso komam imnis wower brawen. Ḇarpon sena namnis snonkaku. ⁸ Snonburyam sena namnis snonburyam bine, ma nakor sena namnis singa nakor. (Aiwan ḇeyan ḇepek.) ⁹ Sisosefwarek sianderna kuker adai sansun mankarmomen. Prer sena ndok imnis rakrok dandonek kuda kareta ḇeḇeḇeyoper ḇe embroḇ. ¹⁰ Sḇepurai ma sarek sayaryur imnis manora. Ma ropurai sena sisma samambraḇ fasifrur kandera snonkaku isof paik ririm. ¹¹ Sisma wairek ḇesasoser si, wairek ani isoine malaikat ḇekarem ro munaiḇui. Snonsnon ḇyedi ro wos Ibrani Abadon; ma ro wos Yunani Apolion (isoine "Ḇefrur makakok"). ¹² Raro ḇeponya isyonde kwar. Posa kwar nari raro risuru surama wer. ¹³ Ḇarpurya malaikat ḇeḇewonemya iwuf kḇur ḇyedi. Ma yarower mkaren oso ryok ro dopir rifiak ro rokef farsarser brawen ro Allah ḇarpon ḇyedi. ¹⁴ Mkaren ani ikofen faro malaikat ḇeḇewonem ani, "Per malaikat rifiak siyaḇek fanam war Efratsya!" ¹⁵ Raimnai sper malaikat ansya, snar sfasos si kwar faḇe oras, ras, paik, ma wampasi wambarek anna fasmun mun rikior ro kawasa kam. ¹⁶ Sikofen maro aya mboi dandonek sarar ḇeyek kudasya sesyaran-risyaran utin risuru. ¹⁷ Ma ro mamam, yamam kuda ansi ma ḇeyeksisya ssun sansun mankarmomen ḇefanandik ḇesak, ḇerumek imnis batu nilam, (karui ḇemnis for ḇerumek) ma nnanyar ḇebelerang (roi ḇesak ḇesam kaku ḇenanyar). Kudasya siḇrusna namnis singa (aiwan ḇeyan ḇepek) siḇrusna, ma ro sisḇasna nasasyar for, paw, ma belerang. ¹⁸ For, paw, ma belerang ḇesasyar ro kuda ansi sisḇasna nmun kawasa mun rikior kuker kandera rikior anna. ¹⁹ Samambraḇ kudasya neknam ro sisḇasna ma purai sena kako. Purai sena nbe ikak ḇru. Kuker purai sena, kuda ansi ssḇuk kandera faro snonkaku. ²⁰ Ḇape kawasa ḇese ḇemar ḇa ro kandera anna kako, simbror ḇa ro roi mankunsi sifrurna. Simnai ḇa ro sisyom Ibiris, ma amfyanir brawen, sarak, kansai, karui ma ai, ḇemamḇa, roḇa ḇerower ma ḇembran ḇa. ²¹ Ma simbror ḇa ro smamun, sifrur fawawi rawan, sifrur farḇuk ma skaraw.

¹ Raimnai yamam malaikat ḇesambraḇ oso ḇese isabu ro boiyaswa. Mandep nasawoḇi, ma saseḇi pyarek ḇru ḇyedi. Ḇarpon ḇyedi isnaper imnis ori, ma wemin ḇyesi simnis adir for. ² Ro ḇraminsya syap kasun beniw ḇeḇaspyan oso isya. Wemin ḇar rakuya daref ro soren, ma ḇar rasarya daref ro ḇande. ³ Raimnai kyaru naba kaku imnis singa ḇeawur. Malaikat ani kyaru posa kwar, karadu rifik ndok ḇeruru. ⁴ Rarirya karadu rifik anna ndok, yamarisen yafasepen na, ḇape yamnaf mkaren oso ro boiyaswa ikofen, "Fasepen awer rosai karadu rifik anna nakofen na; ma kankunes ḇyena!" ⁵ Raimnai yamam malaikat beyaref ro soren ma ro ḇande ani ikanow ḇramin ḇar raku ḇyedi ḇenanki. ⁶ Ma syowar kuker Allah ḇekenem fyoroya snonsnon ḇyedi, ḇefrur nanki, supna, soren, ma roi ḇeḇor kam ḇero ina. Malaikat ani ikofen, "Fafisuya nari ḇyeḇesusu wer ḇa! ⁷ Ḇape rofafisu malaikat ḇeḇefikya iwuf kḇur ḇyedi, ma nari Allah ifrur aw kankunes ḇyedi, imnis ikofen ḇadir kwar faro manfamyan ḇyesi, isoine nabisya." ⁸ Ḇarpurya mkaren ḇewawos kuker aya kwar ro boiyaswa ani, dawawos maro aya wer. Ikofen, "Rwa wun syap ḇeniw ḇeḇaspyan ro ḇramin malaikat ḇeyaref ro soren ma ḇande ani." ⁹ Inja yara faro malaikat ani ma yor insa ḇyuk syap kasun ḇeniwpyan ani maḇe aya. Ikofen, "Wuni ma wani. Ma ro snembri dori nari syarmar, ḇape ro sḇa bedi myarnden imnis umber." ¹⁰ Inja yun syap kasun ḇeniwpyan ani ro ḇramin ḇyedi ma yani. Ro sḇa yedi ḇyaḇir imnis umber, ḇape yoreni kwar, sneri syarmar. ¹¹ Ḇarpurya ssḇuk sasoser maḇe aya, "Baryas ḇeoser wer ro Allah wos ḇyedi faro ersya, kawasa, wosna ma waireksya kam."

¹ Raimnai ssḇuk maro aya ai fyor oser imnis ankyon warnkyara, raimnai ssḇuk sasoser, "Rwa kwara Allah Rum ḇyedi ma rokef farsarserya. Kwor dandonek snonkaku ḇeḇenadi ro dorisya. ² Ḇape buḇes ḇero Allah Rum ḇyedi ḇandiriya, ima kwara aweri, snar mun ani ḇyeḇeḇuk kwar faro ḇefawi Allah ḇasya. Sikada nari sarefapepen mnu ḇesren ani isof paik samfur rifiak seser risuru. ³ Ma nari yawan saksi yesuya susun sansun mandak, ma nari suḇaryas Allah wos ḇyedi isof ras syaran oser utin risuru samfur riwonem." ⁴ Saksi ansuya kada zaitun knam risuru ma padamara wemin risuru kosma ro Allah ḇarpon ḇyedi ḇefrur nanki, farsyos sansoren. ⁵ Rofyor snonkaku sifrowes sas fasifrur roi ḇeḇyeḇa oso faro su, nari for isasyar ro susḇasna ma ikun mbroḇ suḇesi. Kuker nyan ḇerarirya, snonkaku kam ḇemarisen ḇefrur dafduf faro su nari sḇeḇemun. ⁶ Susma papoik fasusisenwarek nanki insa mekemya isabu awer rofyor suḇaryas Allah wos ḇyedi. Susma papoik faro war sun na kako, insa sufadwer war anna fanarik. Ma susma papoik kako fasuprer supna kuker kandera syoso kam, rofafisu rosai sumarisenya. ⁷ Ma rofyor suḇaryas kwar ḇaḇesaksi suḇena posa, aiwan ḇesasyar ro munaiḇui nari ḇye embroḇ su ma myun su. ⁸ Ma aipyokem ansu srir su ro nyanmor mnu ḇeba, ro moḇ Manseren suḇedi spai i roya. Snonsnon ḇeḇaryar mnu ḇeba ani isoine Sodom roḇa Masir. ⁹ Kawasa ro er kam, keret, wosna ma kawasa nari smam aipyokem ansu isof ras rikior munya, ma simarisen fa aipyokem ansu suḇeḇepim ḇa. ¹⁰ Kankain supna nari siryaḇ snar marmar ro saksi ansuya. Nari sifrur munara ma sfaremyae pankun, snar nabi ansuya sufrur kandera nabor faro kawasa kam ro supna kwar. ¹¹ Posa ro ras kior munya, Allah Rur ḇekenem ḇyedi syun wer ro nabi ansuya. Inja suyor su fasuyores, isof kawasa kam smam su simkak kaku. ¹² Ḇarpurya nabi ansuya surower mkaren ḇeba dor su ro boiyaswa, "Murama, muyek mumyas ro dine!" Inja suyek ḇeboiyaswa, ro ḇarpon mamam mbroḇ suḇesi, kuker mandep oso isawoḇ su. ¹³ Rofafisu ani rim ḇebayo myun. Ma ḇar ḇeḇesamfur ro mnu ani imsiser, ma snonkaku syaran rifik simar ro rim ani. Kawasa ḇese simkak kaku, ma sisandik Allah ro boiyaswa baba ḇyedi. ¹⁴ Raro ḇeḇesuruya isyonde kwar. Ḇape mkomam kada. Raro ḇeḇekiorya kniko nari ryama wer. ¹⁵ Raimnai malaikat ḇeḇefikya iwuf kḇur ḇyedi, ma ro boiyaswa korower mkaren ḇeba kaku ḇekofen, "Papoik ḇaḇesasoser supswan baboine isya ro Manseren koḇedi ḇramin ḇyedi ma Wairek Ḇeḇuk koreri sḇeasas kwarya. Nari ḇyuk sasoser isof fyoro-fyoro!" ¹⁶ Ma manfarkin samfur risuru seser rifiak ḇekain ro karapesa ḇaḇesasoser sena ro Allah ḇarpon ḇyedi, skain wepur ma sḇansuba faro Allah. ¹⁷ Sikofen, "Manseren, Allah bepoik syadi, isya, ma isya kwar! Nko kofen kasumasa mufa ḇeaw, snar kwain ro papoik ḇeba bedi kwar, ma warandak ḇesasoser kwar! ¹⁸ Kawasa ḇefawi Allah ḇa, sirmomen snar fafisuya imnis kwar fa fasna masasor bedi, ma fafisuya imnis kwar fabuk samamyai faro snonkaku ḇemarsya. Fafisuya isoine fabuk sasuref faro manfamyan ḇesi nabisya, ma faro kawasa ḇesi kam, isoine snonkaku kam ḇekyar faro aw, ḇeba ma kasun kako. Fafisuya isoine fawafrur farmambriwer si ḇefrur farmambriwer supna!" ¹⁹ Raimnai Allah Rum ḇyedi ro boiyaswa ḇyeḇeseḇen, ma yamam burua asas ḇyedi ro rumya dori. Raimnai arḇeḇer nasamar apepen ma rakrok karadu ndok ḇeruru ma rimya myun ma mekem karui.

¹ Raimnai ḇaḇemamam ḇeba ḇesnai kanandor oso isya ro nanki. Isoine bin oso syansun ori imnis sansun ḇyedi, ḇo dores ro paikya bori. Ro ḇru ḇyedi kosma wower oso ḇyekum samfur seser risuru. ² Bin ani imoḇesḇa, ma snar fafisu ḇyedi imnis kwar faiḇe daḇen, inja iduf ma fyararar. ³ Raimnai ḇaḇemamam ḇesnai kanandor oso isya wer ro nanki. Isoine korḇen ḇeba ḇerik oso isya ḇyebru rifik ma ḇyeknapur samfur. Ḇru oser-oser isaswo wower oser. ⁴ Kuker purai ḇyedi ḇyuki dawerepen maksya ḇar ḇeḇekior ro nanki ma syosi ḇesupna. Korḇen ani dores fanam bin ḇeḇeḇeyaḇen ani, insa doren romawa ḇyedi rofyor daḇen i kwar. ⁵ Bin ani daḇen romawa snon oso nari ḇeḇesasoser er kam kuker ankyon mankarmomen. Ḇape romawa ani ḇyeḇeposerbur bin ani, ma ḇyeḇeyun faro Allah ro ḇarpon karapesa ḇaḇesasoser ḇyedi. ⁶ Ma bin ani ifrar ḇesup ḇeursḇa, moḇ Allah fyasos kwar faroi. Ro moḇ ani nari ḇyeḇefaduru ras syaran oser utin risuru samfur riwonem. ⁷ Raimnai ḇaḇe embroḇ isya ro boiyaswa. Mikhael kuker malaikat ḇyesi se embroḇ korḇen ani. Ma korḇen ani kuker malaikat ḇyesi sifnoḇek i ḇo sisampum Mikhael. ⁸ Ḇape korḇen ani ḇyeḇefrur kafyo. I ma malaikat ḇyesi ssḇuk wer faskain ro boiyaswa ḇa. ⁹ Korḇen ḇeba ani ḇyeḇesawen ḇeḇondi! Ikada ikak sinan ani ḇenirḇe Ibiris, roḇa Setan (manfamyan Ibiris) ḇeḇeankarkar supswan ḇesiper. Ḇyeḇesawen fnoḇek malaikat ḇyesi ḇesupna. ¹⁰ Raimnai yarower mkaren ḇeba oso ro boiyaswa ikofen, "Baboine Allah fafisu ḇyedi ḇyuk koreri faro kawasa ḇyesi! Baboine Allah fyasna kwar papoik ḇyedi imnis Wairek! Baboine Wairek Ḇeḇuk koreri sḇeasas kwar ani kako fyasna ḇaḇepapoik ḇyedi kwar! Snar ḇeḇoḇ naek srar koḇesi ro Allah ḇarpon ḇyedi roḇ meser, ḇyeḇesasyarbur boiyaswa kwar. ¹¹ Naek srar koḇesi sifrur kafyo i kwar kuker Rumkun Domba rik ḇyena, ma kuker wos ḇenapes ro Allah sifkai ḇairya. Inja ssḇuk kankenem sena isof simar. ¹² Rarirya ḇekain ro boiyaswa mkoya kam mkoryaḇ kada! Ḇape faro supna ma soren nari mkoroë. Snar Ibiris isabu faro mko kwar kuker masasor ḇeba kaku, snar ifawi fafisu ḇyedi fyanam kwar!" ¹³ Rofafisu korḇen ani ḇyaḇir mboi sisawen i ḇesupna kwar, inja iyom bin ḇeḇeḇeyaḇen romawa snon ani. ¹⁴ Ḇape ssḇuk faro bin ani kwar mankankan prer ḇeba risuru, insa iroḇ ḇemoḇ ḇyedi ro sup ḇeursḇa, ro moḇ nari sfaduru i wampasi wambarek rikior munya, ḇyinkwanbur korḇen ani. ¹⁵ Ma korḇen ani kyup war nabor ḇemoḇ bin ani, insa bin ani iki. ¹⁶ Ḇape supna nafnoḇek bin ani; supna nbas nasḇasna ma noren war ḇesasyar ro korḇen ani sḇadonya na. ¹⁷ Korḇen ani imsor kaku bin ani, isof rya ḇye embroḇ romawa ḇese ro bin ani, isoine snonkaku kam ḇeḇeuser faro Allah sasoser ḇyena, ma ḇeḇeuser faro Allah wos ḇenapes ḇyena, Yesus fyasna kwarna. ¹⁸ Raimnai korḇen ani dores ro swan andir.

¹ Ma yamam aiwan oso isasyar ro sorenya dori. Ḇyeknapur samfur ma ḇyeḇru rifik. Knapur oser-oser isya wower oser, ma ro ḇru oser-oser sfas snonsnon anonef faro Allah. ² Aiwan yamam ani isna imnis harimau, (aiwan ḇeyan ḇepek) ma weminsya simnis beruang (aiwan ḇeḇarḇor) wemin, ma snonipoiya imnis singa (aiwan ḇeyan ḇepek) snonipoi. Ma korḇen ani ḇyuk samambraḇ ḇyena faroi, ma karapesa ḇaḇesasoser ḇyedi, ma papoik ḇeba ḇyedi. ³ Oso ro ḇru rifik ro aiwan ani komam imnis ḇyepar ḇeba kwar, ḇape par ani iprei wer. Supna kam sḇaḇir i, sikandor ma siso aiwan ani. ⁴ Ma sikam sḇansubaina faro korḇen ani snar ḇyuk papoik ḇyedi faro aiwan ani! Ma sḇansubaina faro aiwan ani kako. Sikofen, "Oso imnis kuker aiwan ani ḇa! Oso nari ḇye embroḇ ma isampum i ḇa!" ⁵ Aiwan ani imarisen faikofen roi ḇeḇor ḇefrur marares ma ḇeyonef Allah. Sḇeifa ḇyesasoser paik samfur rifiak seser risuru monda. ⁶ Raimnai irandak donef Allah ma snonsnon ḇyedi. Rarirya kako Allah moḇ kankain ḇyedi, ma kankain ro boiyaswa donef si kam. ⁷ Simarisen faḇye embroḇ Allah kawasa ḇyesi ma ifrur kafyo si. Ma ssḇuk papoik faro i robo keret, kawasa, wos, ma ersya. ⁸ Kawasa kam ḇekenem ro supna, nari sḇansuba faro aiwan ani, derer kawasa sfasepen snonsnon kwar, ro syap snonkaku ḇekenem, ḇepon ro supswan ḇyeḇefrur ḇaimya, isoine kawasa ro Rumkun Domba skauk kwar ani ḇyesi. ⁹ Mansei ḇeḇeknaram ido imnaf naḇye ḇaryas ine kada: ¹⁰ "Mansei ḇefasna fasemanfyan nari ḇyemanfyan. Ma mansei ḇefasna fasḇeḇemun kuker sumber nari smuni kuker sumber. I eḇedari Allah kawasa ḇyesi nari sfarmku ma sesyowi i." ¹¹ Ma yamam aiwan oser ḇese isasyar ro supna don na. Ḇyeknapur risuru imnis knapur ro rumkun domba. Mkarenya imnis mkaren korḇen. ¹² Nya ḇaḇepapoik ḇeba ro aiwan ḇepon ani ro ḇarpon mka ḇyedi. Supna ḇesiper ma ḇekain ro borisya, ḇyedusu si fasḇansuba faro aiwan ḇepon ani, ḇena par ḇeba ḇeprei wer ani. ¹³ Aiwan ḇeḇesuru ine ifrur aḇyair kanandor ḇeba. Ifrur for ḇesabu ro nanki ḇesupna ro ḇarpon kawasa kam. ¹⁴ Kawasa kam ḇekenem ro supna isrer si kuker fararur kanandor ro ḇarpon aiwan ḇepon ani. Ma iwan sikam fasifrur amfyanir oso fa sḇukḇesyowi aiwan skorpar kuker sumber, ḇape ikenem faswef. ¹⁵ Aiwan ḇeḇesuru ine ssḇuk faḇyuk kankenem faro amfyanir ani, isof amfyanir ani dawawos ma myun kawasa kam ḇemewer ḇeḇan suba faroisya. ¹⁶ Kawasa kam, ḇeba ma kasun, ḇeḇekayan ma ḇesaḇarar, manfamyan roḇa ḇemkei, aiwan ani ḇyedafdifer si fasisma aḇyair ro ḇramin ḇar raku sena roḇa ro andar sena. ¹⁷ Ma osoḇa fakyoḇes roḇa ḇyoḇ roi oso, rofyor nya aḇyair ani ḇa, isoine snonsnon aiwan ani mankundi, roḇa nomor ḇefasna snonsnon ḇyedi. ¹⁸ Rodine fandun kaku mamkarkir. Snonkaku ḇefawi nanem sikada sawof kankunes ro nomor aiwan ani, snar nomor anna kada snonsnon ro snonkaku oso, nomor anna naiso nane utin riwonem samfur riwonem seser riwonem.

¹ Ma yaknower wer, ma wakmam: Rumkun Domba dores ro urek Sion, ma ḇefnoḇekisya snonkaku syaran utin oser samfur rifiak seser rifiak sfas snonsnon ḇyedi ro andar sena ma snonsnon Kma ḇyedi. ² Raimnai yarower mkaren oso ro nanki syobir imnis rakrok sriḇ ḇeba ma ryok ḇeruru imnis karadu ḇeba. Mkaren ani ḇyeḇerower imnis mkaren sonker ro ḇefnak sonker sesya. ³ Ro ḇarpon karapesa ḇaḇesasoser, ma roi ḇekenem rifiak kuker manfarkinsya siyar karapesa ḇaḇesasoser ani, ma dandonek snonkakusya syaran utin oser samfur rifiak seser rifiak ansi sidisen dow ḇebabo oso. Dow ani osoḇa fafyarkor i kako, derer monda snonkaku syaran utin oser samfur rifiak seser rifiak ansi. Sikada snonkaku sḇakwarek faḇemkei ro supna kwar. ⁴ Sikada snonkaku ḇewaren saranden ḇaken sena snar sifrur ḇaḇeoser kuker bin ḇa. Sikada sisren imnis dojaru babo. Siso Rumkun Domba ani ḇemoḇ rosai iḇeryayoḇ na. Rofandu kawasa kam, sikada snonkaku sḇakwarek faḇemkei kwar imnis farsarser ḇepon faro Allah ma Rumkun Dombaya. ⁵ Sakḇe ankarkar ḇaim; ma sfarorewḇa. ⁶ Ma yamam malaikat oso ḇese iroḇ ro farsyos nanki. Malaikat ani dun ḇaryas ro Ankankinem Ḇeḇye ḇekain fyoroya ma ḇyaryas faro snonkaku ro sup ine; isoine faro er oser-oser, keret, wos, ma kawasa. ⁷ Malaikat ani kyaru kuker mkaren ḇeba, "Mkomkak faro Allah, ma mkosandik baba ḇyedi! Snar fafisuya imnis kwar fa Allah ḇyemankara snonkaku. Mkoḇansuba faroi ḇefrur nanki, supna, soren ma war ssun na kam!" ⁸ Malaikat ḇeḇesuruya iyomuser malaikat ḇeponya ma kyaru, "Isapi kwar! Mnu ḇeba Babel isapi kwar! Ifrur er nakam fasimser kwar kuker war anggur isoine anggur rmomen farḇuk ḇyena!" ⁹ Malaikat ḇeḇekior oso iyomuser malaikat risuru ansu, ma kyaru kuker mkaren ḇeba, "Snonkaku ḇeḇansuba faro aiwan ma amfyanir ḇyedi, ma ḇena aḇyair aiwan ani ro andar roḇa ḇraminya, ¹⁰ snonkaku ani nari dinem Allah anggur ḇyedi, isoine anggur masasor ḇyedi iwek kwar ro sek aninem ḇyedi, fyosen roi kermkuno ḇa. Kawasa ansi kam nari sifrur kandera si ro forya dori ma belerang (roi ḇesak ḇenanyar ḇesam kaku) ro ḇarpon malaikat ḇesrensya ma ro ḇarpon Rumkun Domba ani. ¹¹ For ḇepaw ḇefrur kandera kawasa ansi nari ipaw pdef isof fyoro-fyoro. Roḇ meser simnaḇa sisma kandera, isoine ḇeḇansuba faro aiwan ani ma amfyanir ḇyedi, kawasa kam ḇena aḇyair snonsnon aiwan ani." ¹² Rarirya Allah kawasa ḇyesi ḇeḇesyowi Allah sasoser ḇyena skain nako ro kakyar faro Yesus. ¹³ Raimnai yarower mkaren oso ryamaker boiyaswa ḇekofen, "Fasepen nane: Ḇaḇeaski faro kawasa randak ro baboine ḇemar rofafisu suffarmyan Manseren!" Allah Rur ḇyedi kyarem, "Kaku! Nari simnaisu ro sifararur, snar bon ro afuffarmyan sena nafnoḇek si." ¹⁴ Ḇarpurya yamam, mandep ḇepyoper oso. Ro mandepya bori snon oso kyain, isna imnis snonkaku. Ro ḇru ḇyedi wower brawen oso isya, ma ro ḇramin ḇyedi sabit (sumber oso imnis paik ḇesrew babo) ḇesar oso isya. ¹⁵ Ḇarpurya malaikat oso ḇese isasyar ro Allah Rum ḇyedi. Ma kyaru kuker mkaren ḇeba, faro ḇekain ro mandepya bori ani, "Wawai sabit bedi fabuki kyawuk, snar fafisu ekdofenya imnis kwar; supna nadufen kwar faneḇeyekdofen!" ¹⁶ Inja bekain ro mandepya bori ani iwai sabit ḇyedi ḇesupna, ma supna neḇeyekdofen kako. ¹⁷ Ḇarpurya yamam malaikat oso ḇese wer isasyar ro Allah Rum ḇyedi ro boiyaswa. I kako duf sabit ḇesar oso. ¹⁸ Posa kwar, malaikat oso ḇese, ḇesma papoik for, isasyar ro rokef farsarser. Kuker mkaren ḇeba kyaru faro malaikat ḇeyuf sabit ḇesar ani, "Wawai sabit bedi ma kwawuk anggur bon ro anggur knam ro supna, snar bonna nambrai kwar!" ¹⁹ Ma malaikat ani iwai sabit ḇyedi ḇesupna ma kyawuk anggur bon ro knamna, posa ryirna ro moḇ ḇekafos anggur masasor Allah. ²⁰ Anggur bon anna neḇekafos ro mnuya ḇandiri, ma ro moḇ ḇekafos ani rik nadaf imnis kirai isof kilometer utin rikior, ma kakakiya fyanam meter risuru.

¹ Ma yamam aḇyair ḇese ḇeba fafayaḇa oso ro nanki, nyaiso: Malaikat rifik sisya kuker kandera rifik ḇepupes. Inekada rarwan ḇepupes Allah isbawer masasor ḇyedi. ² Raimnai yamam roi oso ḇesna imnis soren fanin, fyasfosen kuker for. Yamam kako kawasa ḇeḇefainda kwar ro aiwan ma amfyanir ḇyedi, ma sefainda ro snonsnon kawasa ḇesma nomor aḇyairya. Kawasa ḇeḇefainda kwar ansi sores ro soren fanin andir ani ma suf sonker Allah ḇyuk faro sina. ³ Ma sidisen Moses, Allah manfamyan ḇyedi _dow ḇyedi, ma Rumkun Domba dow ḇyedi. Rakrok ḇyedi radine, "Manseren, Allah ḇepoik syadi, fararur bena naba ma nafnai kanandor! Wairek ro er nakam, nyan bena nanapes ma nkaku! ⁴ Manseren, mansei nari ḇemkak aw ḇa? Mansei nari ḇemewer ḇeḇaryas baba bedi? Werer monda wasren. Er nakam nari srama sḇansuba faro aw snar nyan bena nanapes kawasa kam smamna kwar." ⁵ Ma posa kwar ro roinane kam, yamam Allah Rum ḇyedi ro boiyaswa ḇyeḇeseḇen, ma rum kruḇen moḇ Allah kyain roya isya ro dori. ⁶ Ma malaikat rifik kuker kandera rifik anna sisasyar ro Allah Rum ḇyedi. Sansun sena ro kruḇen ḇepyoper ma ḇesnaper. Ma siandersna neḇeḇoḇek kuker ḇeḇoḇek brawen. ⁷ Ḇarpurya roi ḇekenem rifiak ansi oso ḇyuk faro malaikat rifik ansi sek brawen rifik ḇefo kuker Allah masasor ḇyedi, --Allah ḇekenem isof fyoro-fyoroya. ⁸ Ma Allah Rum ḇyedi ifo kuker paw ro baba ma papoik ḇyedi. Ma rofyor malaikat rifik ḇeyun kandera rifik anna namnai ḇaim, snonkaku osoḇa nari syun ro Allah Rum ḇyedi.

¹ Raimnai yarower mkaren ḇeba oso ḇeraker Allah Rum ḇyedi dori ikofen faro malaikat rifik ansi, "Mkora mkosbawer sek masasor rifik ro Allah murḇaḇ ḇesupna!" ² Malaikat ḇeponya rya isbawer sek ḇeponya ḇesupna. Ma kawasa ḇesma aḇyair ro aiwan ani ma ḇeḇansuba faro amfyanir ḇyedi, sisma makisyo ḇefrur sayaryur kaku si. ³ Posa kwar malaikat ḇeḇesuruya isbawer sek ḇyedi ḇesoren. Ma soren ani fyarwe imnis smoi ro ḇemarsya, isof roi ḇekenem ro soren ani simar kam. ⁴ Posa kwar malaikat ḇeḇekiorya isbawer sek ḇyedi ḇewarna ma war sun nakam, isof warna kam nfarwe ḇerik. ⁵ Ma yarower malaikat ḇesma papoik ro warya ikofen, "Samamyai bukya inapes, o, Ḇesren syadi, Allah isya ro baboine ma Allah isya ro ḇeponya kwar. ⁶ Snar sisbawer Allah kawasa ḇyesi rik sena ma nabisya rik sena; inja baboine wafrur fasinem rik. Rarirya kada namnis faro si!" ⁷ Raimnai yarower mkaren oso ro rokef farsarser ikofen, "Manseren, Allah Ḇepoik syadi, ḇekaku ma kakara bena nanapes!" ⁸ Ma insape malaikat ḇeḇefikya isbawer sek ḇyedi ḇeori, ma ori kako ssḇuk faikun snonkaku kuker samsam ḇyedi. ⁹ Snonkaku sinanem snar samsam ḇyedi, isof sifras Allah snonsnon ḇyedi, ḇepoik ro kandera anna. Rariryano, simewer simbror ro sasar sena ma simewer sisandik Allah ḇaḇebaba ḇyedi. ¹⁰ Raimnai malaikat ḇeḇerimya isbawer sek ḇyedi ro karapesa aiwan ani ḇyedi. Isof ḇaḇesasoser aiwan ani ḇesiper pyampan, ma snonkaku sarekuk sḇardip sena snar siduf. ¹¹ Ma sifras Allah ro boiyaswa snar sayaryur ro makisyo sesi. Ḇape simbror ḇa kaker ro fararur ḇeḇarḇor sena. ¹² Raimnai malaikat ḇeḇewonemya isbawer sek ḇyedi ḇewar ḇeba Efrat. Ma war ani isyor faḇye nyan isof waireksya ḇeraker ḇar ori dek simbran roi. ¹³ Ma yamam rur ḇeḇarḇor rikior imnis mankyaw. Mankyaw ansi oser-oser isasyar ro korḇen ani sḇadon ḇyedi, ro sḇadon aiwan, ma nabi sararersya sbadon sena. ¹⁴ Sikada setansya (manfamyan ro Ibiris) rur ḇyesi ḇefrur roi ḇefrur kanandor. Rur rikior ansi sra faro waireksya kam ro supswan ḇesiper ma fyanjur si insa se embroḇ ro Ras ḇebaya, isoine ro Allah Ras ḇyedi Ḇepoik syadiya. ¹⁵ "Mkakmam! Yarama imnis ḇekaraw! Aski faro snonkaku ḇewaren faswef ma ḇefasos sansun ḇyena, isof ḇyaḇer ḇo imbran ma imai ro ḇarpon kawasa ḇa!" ¹⁶ Ma raimnai rur ḇeḇarḇor ansi siryur wairek ansya ro moḇ oso, ro wos Ibrani sniriḇe Harmagedon, (snonsnon ḇeḇaryar moḇ ḇaḇe embroḇ). ¹⁷ Raimnai malaikat ḇeḇefikya isbawer sek ḇyedi ḇefarsyos sansoren ḇoka. Ma mkaren oso ryok naba ro karapesa ḇaḇesasoser ro Allah Rum ḇyedi, ḇekofen, "Posa kwar!" ¹⁸ Raimnai arḇeḇer nasak, ma karadu ndok ḇeruru ma rim ḇeba myun. Rim ḇeba ḇeradine myun ḇaim rofyor snonkaku seḇefrurya. Inekada rim ḇeba syadi. ¹⁹ Mnu ḇeba ani imbriwer ḇemun rikior, ma mnu nakam ro supswan ḇesiper nemom-mom: Raimnai Allah iswarepen Babel ḇeba ani. Ma Allah ḇyefadinem anggur ro sek anggur Allah ḇyedi --isoine anggur masasor ḇyedi. ²⁰ Aimandoi ḇeḇor ma bon nakam kako napromes. ²¹ Ma mekem karui ḇemarḇak kilogram samfur ririm, nasapi ro nanki fanmun kawasa. Ma kawasa sifras Allah snar kandera mekem karui ḇeba anna.

¹ Raimnai snon oso ro malaikat rifik ḇeyuf sek rifik anna ryama ikofen maro aya, "Rwama, insa yafasna faro aw rariso ḇefrur farḇuk ḇesyakwar ani nari isma samamyai, isoine mnu ḇeba ani sḇawes fanam warna. ² Waireksya ro supna sifrur farḇuk kuker i, ma ḇekain ro supna simser snar sinem anggur farḇuk ḇyena." ³ Ma Allah Rur ḇyedi ḇyepoik aya, ma malaikat ani dun aya ḇesup ḇeursḇa. Rodiwa yamam bin oso kyain ro aiwan ḇerik ḇesak oso bori, ifo kuker fasfas snonsnon ḇeyonef Allah. Aiwan ani ḇyeḇru rifik ma ḇyeknapur samfur. ⁴ Bin ani syansun sansun ḇerik ḇeyafuk, ma sfamankor i kuker karamas brawen, permatasya (karui ḇekakur) ma mustika. Dufepen sek brawen oso ḇefo kuker roi ḇefrur ayin ma ḇemamas, bon ro farḇuk ḇyena. ⁵ Ro andar ḇyedi sfas snonsnon oso ḇesma kankunes. Snonsnon ani isoine "Babel Ḇeba, sna ro ḇefrur farḇuk sawawek ma snonkaku ḇeyarwarem ro supswan ine." ⁶ Ma yamam bin ani imser kuker rik ro Allah kawasa ḇyesi ma rik ro kawasa smunsya snar sisouser faro Yesus Kristus. Rofyor yamam bin ani, yakandor kaku. ⁷ Raimnai malaikat ani ikofen maro aya, "Snaro wakandor rarirya? Iḇye syadi yakofen ḇadir kankunes ro bin ani ḇyedi faro aw ma kankunes ro aiwan dek ani, isoine aiwan ḇeḇeḇru rifik ma knapur samfur. ⁸ Aiwan ani ikenem ḇepon kwar, ḇape baboine ikenem wer ḇa. Nari fyoroḇa isasyar wer ro munaiḇui ma nari rya faro ḇaḇeraroya. Snonkaku ḇekenem ro supna, snonsnon sena neḇefas ḇa [rofyor supswan ḇyeḇefrur ḇaimya] ro syap snonkaku ḇekenem, nari snonkaku ansi sikandor rofyor smam aiwan ani. Snar aiwan ani ikenem ro ḇepon kwar. Baboine ikenem wer ḇa, ḇape nari isasyar kaḇer wer. ⁹ Inja fandun kaku mamam karkir ma fawi nanem. Ḇru rifik nakada urek rifik; isoine urek moḇ bin ani kyain roya. Ma ḇru rifik anna kada wairek rifik kako; ¹⁰ rim ro si sisapi kwar, oser isya ḇyesasoser kaker, ma oso wer ryama ḇaim. Rofyor nari ryamaya, nari ḇyesasoser knik monda. ¹¹ Ma aiwan ḇekenem ro ḇepon kwar, ḇape baboine ḇekenem wer ḇa, ikada wairek ḇeḇewar. Ikada oso ro wairek rifik ansi kako, ḇape ḇaboine ḇeraḇe ḇaḇeraroya. ¹² Knapur samfur mam anna kada wairek samfur ḇeḇesasoser ḇaim. Ḇape nari ssḇuk papoik faro si fasakḇe sasoser kam imnis wairek fnoḇek aiwan ani ḇeoras oser. ¹³ Wairek samfur ansine sna wos oser; sikam ssḇuk sambraḇ ma papoik sena kam faro aiwan ani. ¹⁴ Nari se embroḇ sisampum Rumkun Domba ani. Ḇape Rumkun Domba kuker ḇeso ma ḇeḇeuser isya sḇeḇeyor kwar ma sḇeḇekinfir insa skafyo wairek ansi, snar ikada Tuan ro tuansya kam, ma Wairek ro waireksya kam." ¹⁵ Malaikat ani ikofen kako, "War mam ani, moḇ bin ḇefrur farḇuk ani kyain roya, ikada er, kawasa, ma wosna kam. ¹⁶ Knapur samfur mam anna ma aiwan ani nari dayin ḇefrur farḇuk ani. Nari sfasyar nana ḇeḇor ḇyena, ma seifa ḇyaḇer. Nari san kraf ḇyedi ma sikuni kuker for. ¹⁷ Snar Allah ifrur sisnesna fasifrur Allah aw ḇyena. Allah ḇyefaseoser fasḇuk ḇaḇepapoik faro aiwan ani, insa aiwan ani ḇyesasoser isof Allah roi ikofen na ndarirya. ¹⁸ Bin mam ani kada mnu ḇeba, ḇeḇesasoser waireksya ro supna."

¹ Raimnai yamam malaikat oso ḇese isabu ro boiyaswa. Isma papoik ḇeba, ma sananai ḇyedi ifrur supswan ḇesiper faisnai. ² Ma kuker mkaren ḇeba, kyaru, "Bin ani isapi kwar! Babel Ḇeba isapi kwar! Baboine ḇyemoḇ faro setansya ma rur ḇemabak. Rodori man ḇeḇor kam ḇeyarwarem syososyoso ma snonkakusya sayin sikenem roi. ³ Er ḇeḇor kam sinem anggur rmomen farḇuk ḇyena. Waireksya ro supswan sifrur farḇuk kukeri, ma ḇefaḇaḇyan ro supswan sekayan snar syambraḇser rmomen-nafsu ḇyedi ḇa." ⁴ Raimnai yarower mkaren ḇese ro boiyaswa ḇekofen, "Kawasa yesi, mkosasyar! Mkosasyar buri! Mkoso awer sasar ḇyena, ma mkakḇar awer samamyai ḇyedi! ⁵ Snar sasar ḇyena nkamnamnam isof ro nanki, ma Allah iswarepen ḇarḇor ḇeḇor ḇyena. ⁶ Mkomunsu faroi imnis ifrur faro mko kwar; mkomunsu syadi faroi ro roi ḇeḇor kam ifrur kwarna. Mkoser sek ḇyedi kuker aninem ḇepakrek syadi ro anininem sfasos faro mko kwar. ⁷ Mkoḇuk faroi kandera ma marindi nabor namnis baba ḇyedi ma marisen ssḇuk faro mankundi ḇardi. Snar ikofen sawawek faro mankundi, ’Aya ine wairek bin ḇesasoser! Yaḇe kabom ḇa; ma nari yasma marindi ḇa!’ ⁸ Snar rarirya, nari ro ras oser monda isma kandera -- dafduf, snefafardun, ma basbiser. Ma nari sikuni kuker for, snar Manseren Allah ḇekukeḇ iya nya papoik ḇeba." ⁹ Waireksya ro supna ḇeso fararur farḇakḇuk ma rmomen bin ani nari skanes mnu ani rofafisu smam for ḇekuniya paw ḇyena nek. ¹⁰ Nari sores ḇinkwan snar simkak saksma kandera ḇyedi. Sikofen, "Syee, raro ḇefnakḇa mnu ḇesma snonsnon ine -- mnu Babel ḇesambraḇ ḇesyaḇo! Ro ras oser monda samamyai bedi myun marmar aw!" ¹¹ Ḇefaḇaḇyan ro supna skanes kako ma smandak snar bin ani, snar snonkaku oso ḇaḇeri nari ḇekoḇes roi ḇefarḇyan sena. ¹² Osoḇa nari kyoḇes brawen, sarak, mutiara (mustika), ma permata (roi ḇesnai fafirek ḇesisye) sesi; kain lenan (kruḇen ḇepyoper) kako, kain ungu (kruḇen ḇefuk), sutera, ma kain merah padam (kruḇen ḇerik ḇeyafuk); ai ḇeḇor kam kosma famfnomḇa, roi ḇeḇor ro gading (kakyom) ma roi ḇekakur, ro kansai, mankarmomen ma pualam (karui afer ḇepakrek ḇenyaser); ¹³ ai kif ḇemarnden, kefikefi, setagi (roi oso sikuni paw ḇyena nadiref), mur, ma mamboḇo; anggur ma mani, tepung ma fasibu; sapi ma domba, kuda ma kereta, manfamyan ma kankenem snonkaku kako. ¹⁴ Ḇefarḇaḇyan sya sikofen faro bin ani, "Roi ḇeḇor wamarisen nwa na naisyaḇa kwar, ma marares ḇeḇor kam ma roi ḇepyum bena ndo kwar. Nari wasrowna wer ḇa!" ¹⁵ Ḇefarḇaḇyan ro mnu ani isof sḇekayan nari sores ḇinkwan, snar simkak kandera ḇekuriya. Nari skanes ma smandak, ¹⁶ ma sikofen, "Syee, raro ḇefnakḇa ro mnu ḇeḇesnonsnon ine! Indo syun pakaian lenan (sansun ḇepyoper), kain ungu (kruḇen ḇefuk) ma kain merah menyala (kruḇen ḇerik ḇesak); indo ifo kuker karamas brawen, permata (roi ḇesnai fafirek ḇesisye) ma mutiara (mustika)! ¹⁷ Ḇape ro oras oser monda, kayan ḇyena kam ndoburi kwar!" Nakhoda (manfarasya) kam, ḇesosya, ma ḇefararur ro jawarana, ma mandaswan ro sorensya kam sores ḇinkwan ¹⁸ ma sar rofafisu smam for ḇekun mnu ani paw ḇyena nekya. Ma sikofen, "Mnu oso imnis mnu ḇeba ineḇa!" ¹⁹ Inja skokef fafen ro ḇru sena ḇeaḇyair mandak, ma sarḇo skanes, "Syee, mnu ḇeba ine raro ḇyedi ifnakḇa! Kayan ḇyena nafrur fasnonkaku kam ḇena jawarasya ro soren sḇekayan! Ḇape ro oras oser monda, roi ḇeḇor anna ndoburi!" ²⁰ Ne, boiyaswa, mkoryaḇ naba snar mnu ani fyarmambriwer! Ne, Allah kawasa ḇyesi, manwawan, ma nabisya, mkoryaḇ naba! Snar Allah ḇyuk samamyai ḇei imnis myunsu rosai ifrur faro mko kwar! ²¹ Raimnai malaikat ḇesambraḇ oso ikanow karui oso -- iba imnis karui ḇeyisdiwer -- ma syoi ḇesoren ma ikofen, "Radine mnu Babel ḇeḇesnonsnon ani nari ḇyeḇeso isof sisrowi werḇa. ²² Ma mkaren ḇefnak sonker, ḇedasdisen, ma ḇewuf sonker, ma ḇewuf kḇur, nari neḇerower wer ḇa ro aw! Ma snon ḇefawinananem oso ro manwarwor nari isrowi wer ḇa rodiya, ma rakrok ro roi ḇeyisdiwer nari ḇyeḇerower wer ḇa. ²³ Snonkaku nari smam padamara ḇena nasnai wer ḇa; ma nari srower munara marisen fakawawin rodia wer ḇa. Ḇefaḇaḇyan besi snonkaku ḇefawi syadi ro supna, ma kuker fawawi rawan bena beankar ersya ro supna!" ²⁴ Babel isma samamyai snar ro mnu ani sisma kwar nabisya rik sena, kawasa Allah ḇyesi rik sena -- ma kawasa ḇeḇor rik sena smun ro supna.

¹ Ḇarpurya yarower roi oso imnis mkaren snonkaku ḇeḇor ḇerok ḇeruran ro boiyaswa ḇekaru, "Haleluya (Sanandik) faro Allah! Allah koḇedi ikada Allah ḇena aski ma koreri, ikada Allah ḇeba syadi ma ḇesma papoikya! ² Ḇaḇemankara ḇyedi inapes ma kyaku! Ḇyuk samamyai faro pelacur yang besar (ḇinfarḇuk ḇeba) ani kuker ḇaḇefarḇuk ḇyena. Allah ḇyuk samamyai kwar faro ḇinfarḇuk ani, ma myun Allah manfamyan ḇyesi." ³ Raimnai mkaren snonkaku ḇeḇor ansi skaru wer, "Haleluya (Sanandik) faro Allah! For ḇekun mnu ḇeba ani paw ḇyena nek ḇesya kwar ma namnai ḇa!" ⁴ Ma manfarkin samfur risuru seser rifiak ma roi ḇekenem rifiak ansi skain wepur ma sḇansuba faro Allah ḇekain ro karapesa ḇaḇesasoser ani. Sikofen, "Amin! Haleluya (Sanandik), faro Allah!" ⁵ Raimnai korower mkaren oso ryok ro karapesa ḇaḇesasoser ani ikofen, "Allah manfyan ḇyesi kam, ma kawasa kam -- ḇeba ma kasun -- ḇeḇansuba faro Allah, mkosandik Allah!" ⁶ Posa kwar yarower rakrok oso imnis mkaren fananjur kawasa ḇeḇor kaku; rakrok ḇyedi imnis ḇak ḇemef ḇemaum ma imnis karadu ḇerok ḇeruru. Yarower sikofen, "Sanandik faro Allah! Snar Manseren, Allah koḇedi Ḇepoik syadi ani baboine ḇyewairek. ⁷ Mkorama komarisen ma koryaḇ; mkorama kosandik baba ḇyedi! Snar ras fakawawin Rumkun Domba ryama kwar ma ḇinfakawin ḇyedi fyasos kwar faro wafwofer ḇyedi. ⁸ Sansun ḇepyoper ḇesnaper neḇeḇuk faroi kwar fasyansun." [Sansun ḇepyoper ani kada fararur ḇeḇye Allah kawasa ḇyesi sifrur kwar.] ⁹ Raimnai malaikat ani ikofen maro aya, "Fasepen roi nane: ’Aski faro snonkaku ḇesma fararyor ḇemunara fakawawin Rumkun Domba ani.’ " Ḇarpurya malaikat ani ikofen wer, "Wos inekada wos ḇekaku ro Allah." ¹⁰ Ma yakain wepur ro malaikat ani ḇarpon ḇyedi yamarisen yaḇansuba faroi, ḇape ikofen maro aya, "Bansuba awer! Bansuba faro aya awer, mboi bansuba faro Allah! Snar aya kako manfamyan imnis aw ma imnis naek srar besi ḇeyufepen wos ḇekaku ro Yesus ḇyaryasna!" Snar ḇekofen ḇadir faro nabisya ikada wos ḇekaku Yesus ḇyaryasna. ¹¹ Ḇarpurya yamam boiyaswa ḇyeḇeḇas, ma yakmam kuda ḇepyoper oser. Ḇeyekiya snonsnon ḇyedi Ḇesouser ma Ḇekaku. Inapes ro ḇyuk samamyai ro ḇaḇe embroḇ ifrurna. ¹² Mka ḇyesi simnis for ḇesak ma isaswo wower nabor ro ḇru ḇyedi. Sfas kwar ro baken ḇyedi snonsnon oso; ma mankundi derer monda ifawi snonsnon ani. ¹³ Syatu syansunya ḇyeḇesowen kwar ro rik. Ma sniriḇe "Allah wos ḇyedi." ¹⁴ Sarar ḇero boiyaswa ssansun sansun ḇepyoper ḇesren ma sek kuda ḇepyopersya ḇo sisoi. ¹⁵ Sumber ḇesar oso isya ro sḇadon ḇyedi ma kuker sumber ani nari ḇyukfrur kafyo ersya kam, ma nari ḇyesasoser si kuker ankyon mankarmomen. Ma nari ikafos anggur ro moḇ ḇeyisdiwer anggur masasor Allah ḇepoik syadiya. ¹⁶ Ro syatu ḇyedi ma wesop ḇyedi sfas snonsnon ine, "Wairek robo waireksya, ma Tuan robo tuansya." ¹⁷ Raimnai yamam malaikat oso dores ro orya bori. Ma kyaru kuker mkaren ḇeba faro mansya kam ḇeroḇ ro farsyos sansorenḇoka, "Mkorama mkofanjur mkoso munara ḇeba Allah ifrurya! ¹⁸ Mkorama mkan waireksya baken sena, mambrisya baken sena ma mambri ḇemarsya baken sena; mkorama mkan ḇeyek kudasya baken sena kuker kudasya baken sena ma snonkaku kam baken sena, ḇeba ma kasun, manfyan ma ḇemkei!" ¹⁹ Ḇarpurya yamam aiwan ani, ma waireksya ro supna kuker sarar embroḇ sesi, sfanjur fase embroḇ sisampum ḇeyek ro kuda ḇepyoper ansi, ma sarar embroḇ ḇyesi. ²⁰ Ma aiwan ani ḇyeḇefor fnoḇek nabi ḇekakuḇa ḇefrur kwar roi kanandor ro ḇarpon aiwan ani. [Kuker roi kanandor anna aiwan ani dankar snonkaku ḇena aḇyair aiwan ani, ma snonkaku ḇeḇansuba faro amfyanir aiwan ani.] Raimnai aiwan ani ma nabi ḇekakuḇasya sikenem ḇo sisawen si ro soren for ḇesber kuker belerang (roi ḇesak ḇenanyar ḇesam kaku). ²¹ Ma sarar embroḇ sesi sḇeḇemun kuker sumber ḇesasyar ro sḇadon ḇeyek kuda ḇepyoper ani. Ma mansya kako srama ma san aipyokem snonkaku ansi kuker masaḇsoḇ isof sarbor.

¹ Raimnai kwar yamam malaikat oso isabu ro boiyaswa. Dufepen asyopder munaiḇui -- ma wanka ḇeba oso. ² Raimnai fyorepen korḇen ani, ikak mansar ani, -- isoine Ibiris roḇa Setan, (manfamyan Ibiris) ani ma ḇyewankai isof wampasi wambarek syaran oser. ³ Ḇarpurya malaikat ani isawen korḇen ani ḇemunaiḇui, ma syopder der ani ma ryir kakop ḇesisen, insa korḇen ani ḇyeankarkar ersya wer ḇa, rofyor wampasi wambarek syaran oser iḇro ḇaim. Posa kwar nari speri faro fafisu ḇeknampu wer. ⁴ Ma yamam karapesa ḇaḇesasoser nabor, ma snonkaku ḇekain ro karapesa ḇaḇesasoser anna ssḇuk papoik farosi fasawos namuk samamyaiya. Yamam kako rur snonkaku skauk ḇru sena snar sḇesaksi Yesus, ma sḇaryas Allah wos ḇyedi. Snonkaku sinema sakḇansuba maroḇa faro aiwan, roḇa amfyanir ḇyedi kako. Si kako saksma aḇyair ḇaim ro aiwan ani ro andar roḇa ḇramin sena. Sikada sikenem kaḇer wer ma sḇesasoser imnis wairek fnoḇek Kristus rofafisu wampasi wambarek syaran oser. ⁵ Ine kada kaḇakḇok ḇepon ro snonkaku ḇemar si. [Ḇape snonkaku ḇese ḇemarsya sakḇok ḇaim rofafisu wampasi wambarek syaran oser ani.] ⁶ Aski faro snonkaku ḇesma ḇaḇeḇok ḇeso kaḇakḇok ḇepon ine. Marmar ḇeḇesuruya ipok siḇa. Nari sḇeimam faro Allah, ma sḇeimam faro Kristus; ma nari ssḇuk sasoser fnoḇek i ro wampasi wambarek syaran oser. ⁷ Ma wampasi wambarek syaran oser ani isyonde kwar, insape Ibiris ḇyeḇesasyar ro bui, ⁸ ma nari rya ḇyeankarkar ersya ḇekain ro supna ḇesiper, isoine Gog ma Magog (wairek Gog ro sup Magog). Ibiris iryur si fasḇe embroḇ, dandonek sedi iba kaku, imnis barbor karyen ro soren. ⁹ Ma sisasyar ḇesupswan ḇesiper, ma seruren kankain rum Allah kawasa ḇyesi ma mnu Allah iswar ani. Ḇape for isabu ro nanki ma ikun pres si. ¹⁰ Ḇarpurya Ibiris ḇeḇeankar si ani ḇyeḇeso ḇesoren for ma belerang (roi ḇesak ḇenanyar ḇesam kaku). Isoine moḇ sisawen ḇepon aiwan ma nabi ḇekakuḇa ansuya roya. Nari susma kandera ḇemnai ḇa roḇ meser isof fyoro-fyoro. ¹¹ Raimnai kwar yamam karapesa ḇaḇesasoser ḇepyoper ḇeba oso ma ḇekain ro iya. Nanki ma supna napromes ro ḇarpon ḇyedi, isof komamna wer ḇa. ¹² Ma yamam snonkaku ḇemarsya, ḇeba ma kasun, sores kam ro ḇarpon karapesa ḇaḇesasoser ani. Ma syapna neḇeḇas. Ḇarpurya syap oso ḇese ḇyeḇeḇas, isoine syap kankenemya. Ma rofafisu ani samamyai ssḇuk faro snonkaku ḇemarsya, imnis rosai sifrur kwar siso fasfasepen ro syap anna. ¹³ Raimnai sorenya ḇyefa ḇemar roisya sisasyar. Marmar ma munaiḇui daksasyar ḇemar roisya. Ma sikam sisma samamyai imnis kuker rosai sifrur kwar. ¹⁴ Ḇarpurya Marmari ma Munaiḇui sisawen suḇe soren for. [Soren for inekada marmar ḇeḇesuruya.] ¹⁵ Snonkaku sfasepen sisnosna ḇa ro syap kankenemya, sisawen si ro soren for ani.

¹ Raimnai yamam nanki ḇebabo ma supna ḇebabo. Snar nanki ḇepon ma supna ḇepon nasyonde, ma sorenya ipromes. ² Ma yamam mnu ḇesren ani, isoine Yerusalem ḇebabo, isabu ro boiyaswa ro Allah. Mnu ani ḇyeḇefasos kwar imnis ḇinfakawin oso sḇekaramasi faisrow swa ḇyedi. ³ Ma yarower mkaren ro karapesa ḇaḇesasoser ani kyaru naba, "Baboine Allah rum kruḇen ḇyedi isya rofandu snonkakusya! Nari ikenem kuker si, ma sḇekawasa ḇyesi. Nari Allah mankundi isya kuker si ma ḇye Allah faro si. ⁴ Nari ipyos mkarui nakambur mka sena, snar marmarya isyaḇa kwar; sne ḇefafardun, kankanes, roḇa dafduf naisyaḇa kako. Roi ḇeḇor ḇekwar napromes." ⁵ Ma ḇekain ro karapesa ḇaḇesasoser ani, ikofen, "Baboine yafrur nakam fanbabo!" Ikofen maro aya kako, "Fasepen nane, snar wos nane nkaku ma neḇekyare." ⁶ Raimnai ikofen, "Posa kwar! Aya kada ḇeponya ma papupesya; Ayaine Manseren ro Randakya isof ro Papupesya. Mansei ḇembrowsya nari yaḇefa sinem ro war sun ḇeḇuk kankenem; ma nari sḇak royoḇa. ⁷ Snonkaku ḇeḇefaindaya, nari isma roi anna kam ro aya. Nari yaḇe Allah faroi, ma nari ḇyeromawa maro aya. ⁸ Ḇape snonkaku ḇemakakak, ḇekyar ḇa, ḇefrur ayin, ḇemamun, ḇefrur farḇakḇuk, ḇena rawan, ḇeḇansuba faro amfyanir ma ḇeḇeankarkarsya kam, moḇ sedi isoine soren for ma belerang (roi ḇesak ḇenanyar ḇesam kaku), ikada marmar ḇeḇesuruya." ⁹ Ma malaikat oso rofandu malaikat rifik ḇeyuf sek anna ḇefo kuker kandera rifik ḇepupes ani ryama ikofen maro aya ḇo doḇo, "Rwama! Nari yafasna faro aw Ḇinfakawin, isoine Rumkun Domba ani swari." ¹⁰ Ma Allah Rur ḇyedi ḇyepoik aya, ma malaikat ani dun aya ḇebon ḇekaki oso bori. Fyasna maro aya Yerusalem, mnu ḇesren ani. Mnu ani isabu mufes ro boiyaswa, ro Allah, ¹¹ kuker kamayai ma Allah baba ḇyedi. Mnu ani idameser imnis karui permata (karui ḇesnai fafirek ḇesisye), imnis karui baiduri pandan (karui ḇerumek ḇesnai fafirek ḇesnaper), ḇesren imnis kristal (fanin ḇesren). ¹² Ayar karui ḇeyarwareki, ikaki ma iḇam, kuker kedwai ḇeba samfur seser risuru ma malaikat samfur seser risuru siwaren na. Ro kedwai ḇeba anna sfas snonsnon keret samfur seser risuru ro er Israel. ¹³ Kedwai ḇeba rikior nfasna ḇeḇar oser-oser. Roḇar wamurem kedwai rikior, roḇar wambraw kedwai rikior, roḇar wambrur kedwai rikior, ma roḇar wambarek kedwai rikior. ¹⁴ Mnu ani ayar karui ḇyedi sḇawesi robo araref karui samfur seser risuru. Ro karui araref anna sfas snonsnon manwawan samfur seser risuru ro Rumkun Domba ani. ¹⁵ Malaikat ḇeyawawos kuker aya ani nya ankyon warnkyara ro brawen, faḇyuk ḇewarnkyara mnu ani, kedwai ḇeba ḇyena ma ayar karui ḇyena. ¹⁶ Mnu ani ḇyedopir rifiak -- kawanwanya imnis kuker aḇaḇamya. Ma malaikat ani ḇyewarnkyara mnu ani kuker ankyon warnkyara ḇyedi; ma kawanwanya kilometer syaran risuru utin rifiak; aḇaḇam ma kakakiya imnis kawanwanya. ¹⁷ Rofafisu malaikat ani ḇyewarnkyara ayar karui ḇyena, kakaki ayar ani ḇyemeter samfur riwonem. Warnkyara malaikat ani ḇyukḇewarnkyaraya ikada warnkyara ro snonkaku. ¹⁸ Ayar karui ro mnu ani ḇyeḇefrur ro karui baiduri pandan (karui ḇerumek ḇesnaper) ma mnu ani ḇardi ro brawen ḇekaku, isren imnis fanin. ¹⁹ Araref karui ro mnu ani sḇekaramasi kuker karui permata (karui ḇesnai fafirek ḇesisye) nabor. Araref karui ḇepon sifruri ro karui baiduri pandan (karui ḇerumek ḇesnaper), ḇeḇesuruya ro karui nilam (karui ḇesnai fafirek ḇeramen), ḇeḇekiorya ro karui yakut (karui ḇesnai fafirek ḇerumek), ḇeḇefiakya ro karui zamrud (karui ḇesnai fafirek ḇerumek ḇeḇemaeja kaku), ²⁰ ḇeḇerimya ro karui baiduri sepah (karui ḇepyoper ma ḇesasyek ḇesnai rakrik), ḇeḇewonemya ro karui delima (karui ḇesnai fafirek ḇerik), ḇeḇefikya ro karui ratna cempaka (karui ḇesnai fafirek ḇenar ḇebrawen), ḇeḇewarya ro karui pirus (karui ḇesnai fafirek ḇerumek ḇeramen), ḇeḇesiwya ro karui topas (karui ḇenanyar ḇeḇemaeja), ḇeḇesamfurya ro karui krisopras (karui ḇesnai fafirek ḇerumek ḇesasyek), ḇeḇesamfur seser oserya ro karui lazuardi (karui ḇesnai fafirek ḇeramen), ma ḇeḇesamfur seser risuruya ro karui kecubung (karui ḇesnai fafirek ḇefuk). ²¹ Kedwai ḇeba samfur seser risuru ḇyena nasma mutiara (mustika) samfur seser risuru; kedwai oser-oser sifruri ro mustika oser. Nyan mor ro mnu ani sifruri ro brawen ḇekaku, imnis fanin ḇesnaper. ²² Yamam Allah Rum ḇyedi ro mnu ani ḇa, snar Allah mankundi ḇeḇe Rum Allah, Allah Ḇepoik syadi, ma Rumkun Domba ani. ²³ Mnu ani ḇyefandun ori sananai ḇyedi ḇa roḇa paikya snar Allah baba ḇyedi ḇyeisnai yari, ma Rumkun Domba ani kada padamara ḇyedi. ²⁴ Ma nari ersya ro supna simbran ro isna ḇyedi, ma nari waireksya kako ssun ḇaḇekayan sena ḇemnu ani. ²⁵ Kedwai ḇeba anna ro mnu ani nari neḇeseḇen ro ras ḇesiper; nari sken naba, snar roḇ isya rodiwa ḇa. ²⁶ Ḇaḇebaba ma ḇaḇekayan ro ersya nari ssun naḇe mnu ani. ²⁷ Ḇape snonkaku ḇefrur roi ḇeyarwarem, ma ḇeḇeankarkar ssḇuk fasaksun ḇa -- rosai ḇemamas, sun naḇaḇeri fansun ro dori. Mboi ḇesun ro mnu ani, derer snonkaku snonsnon sena neḇefas ro syap Rumkun Domba ani, isoine syap kankenemya.

¹ Malaikat ani fyasna maro aya kako, war ḇesnaper imnis kristal (fanin ḇesren); war kankenem rirya. War ani idaf ro Allah karapesa ḇaḇesasoser ḇyedi ma ro Rumkun Domba ani, ² ipdef ḇenyan morya faduri ro mnu ani. Ro war andir ani, ḇanḇarya ai knam kankenemna naisya, namarem ḇesamfur seser risuru ro wampasi wambarek oser, isoine paik oser namarem ḇeoser. Ram ḇyena ssḇuk nafrur ersya fasiprei. ³ Ro mnu ani kosma roi osoḇa kako ḇesma fras ro Allah. Allah karapesa ḇaḇesasoser ḇyedi ma Rumkun Domba ani nari naisya ro mnu ani. Allah manfamyan ḇyesi sḇeari faro Allah ⁴ ma nari smam ḇarpon ḇyedi. Allah snonsnon ḇyedi nari ḇyeḇefas ro andar sena. ⁵ Nari sfandun padamara roḇa ori sananai ḇyediḇa, -- snar roḇ isyaḇa kwar, mboi Manseren Allah mankundi nari isnai si. Ma nari sḇesasoser imnis wairek isof fyoro-fyoro. ⁶ Raimnai malaikat ani ikofen maro aya, "Wawos nane nkaku ma neḇekyar. Manseren Allah ḇeḇuk Rur ḇyedi faro nabisya, iwan malaikat ḇyedi kwar fafyasna faro manwawan ḇyesi rosai nari fyoroḇa ḇeramana." ⁷ "Waswarepen nane!" Yesus ikofen. "Fyoroḇa nari yarama wer. Fainda faro snonkaku ḇeswarepen wos ḇararyar ro syap inesya!" ⁸ Ma aya, Yohanes, ḇerower ma ḇemam roi nane kam kwar. Yarower ma yamam posa kwar, yakain wepur ro ḇarpon malaikat ḇefasna nakamya maro aya, ma yamarisen yaḇansuba faroi, ⁹ ḇape ikofen maro aya, "Bansuba awer! Bansuba maro aya awer! Bansuba faro Allah kada! Snar aya kako manfamyan imnis aw, ma imnis naek srar besi nabisya ma snonkaku kam ḇeswarepen farkarkor ro syap ine!" ¹⁰ Ma ikofen wer, "Bekankunes awer wos ḇararyar ro syap ine, snar fafisuya fyanam kwar fa roi nane kam nari ndarirya. ¹¹ Snonkaku ḇeḇarḇor, iḇye ifrur pdef ḇarḇor; snonkaku ḇemamas, iḇye ifrur mamas mankundi; snonkaku ḇeso Allah marisen ḇyedi iso pdef Allah marisen ḇyedi, ma snonkaku ḇekenem faro Allah, ikenem pdef faro Allah kada." ¹² "Waswarepen ine!" Yesus ikofen, "Fyoroḇa nari yarama wer ma yun sasuref fayakmunsu faro snonkaku oser-oser imnis rosai ifrur kwarya. ¹³ Ayai ḇeponya ma ḇepupesya; aya Manseren ro Randakya isof ro Papupesya." ¹⁴ Aski faro snonkaku ḇepap syatu ḇyedi isof isren. Sikada nari san bon ro ai knam kankenem ma simbran ma ssun ro mnu ani ro kedwai ḇebaya. ¹⁵ Ḇape snonkaku ḇefrur ayin, ḇena rawan, ḇefrur ker farḇakḇuk, ḇemamun, ḇeḇansuba faro karwar ma ḇeḇeankarkarsya, iḇye ro wos ma kuker fararur, sine kam moḇ seja isya ro mnuya ḇandiri. ¹⁶ "Aya, Yesus, yafarem malaikat ayedi faro mko kwar insa ḇyaryas roi nane faro fandun jemaatna. Aya ine yaḇe ḇarpur ro Daud; aya kum wamurem ḇesna ani." ¹⁷ Allah Rur ḇyedi ma Ḇinfakawin ikofen, "Rwama!" Mansei ḇerower i kako ikofen, "Rwama!" Mansei ḇembrow, ryama kada! Ma mansei ḇemarisen, dun war ḇeḇuk kankenem ani waworek monda! ¹⁸ Faro snonkaku oser-oser ḇerower wos ḇararyar ro syap ine, aya, Yohanes, ḇeḇuk swarepen ine: Snonkaku ḇepam syadi roi oso ro wos ḇararyar ine, samamyai snonkaku ani kako nari Allah pyam syadi faroi kanderana sfas ro syap ine. ¹⁹ Ma snonkaku ḇekaruk roi oso ro wos ḇararyar ine, mun ḇyedi sfas ro syap ine nari Allah kyaruki kako -- isoine mun ro ai knam kankenemya ma ro mnu ḇesren ani. ²⁰ I ḇeḇuk ḇaryas ḇeḇor nane kam i kofen, "Kaku, nari yarama fasaw!" Kaku! Rwamuma, o Manseren Yesus! ²¹ Saswar ma aski ro Manseren Yesus kyainus mko kam kada! Amin.