FILIPI

FILIPI

¹ Syap ro Paulus ma Timotius, Yesus Kristus manfamyan ḇyesi, faro Allah kawasa ḇyesi kam ro Yesus Kristus ro Filipi, kuker manfarkin ma ḇeyuffarmyan (syamas) jemaat. ² Saswar-fakamaman ma aski-marisen ro Allah, Kma koḇedi, ma ro Manseren Yesus Kristus ryous mko kada. ³ Rofyor yaswarepen mko rofafisu ono yakofen kasumasa faro Allah yedi. ⁴ Ma rofyor yanadiwarek mko kam, yaḇenadi ḇesya kwar kuker sneḇemarisen. ⁵ Yakofen kasumasa faro Allah yedi snar ḇaḇeoser mkoḇedi ro ḇararyas Ankankinem Ḇeḇye ro ras randakya isof baboine. ⁶ Inja yakyar kuker sne ḇesiper, insa Allah, ḇerandak fararur ḇeḇye ine rofandu mko, nari ifnoḇek pdefi isof ro papupesya ro ras Yesus Kristus kyaḇer muma werya. ⁷ Mboi yakara rarirya kwar ro mko kam, snar yaswarepen mko ro sneri, snar mko kam mkosma rarwas ro saswar-fakamaman Allah ḇyuk ḇeaya, iḇye rofyor yasmai ro bui, iḇye kako rofyor yaḇesanowarek Ankankinem Ḇeḇyeya. ⁸ Snar Allah ḇyesaksi ḇeaya ro roi yakofen na kaku ḇeri yaswar mko kuker saswarkuf ro Yesus Kristus mankundi. ⁹ Ma yanadi radine, iḇyekada saswar mkoḇena nafo ro fawawi ḇenapes ma kakara ḇeḇor kam, ¹⁰ isof mkokinfir roi ḇeḇye kam, insa mkosren ma mkofarorewḇa famkowaf Kristus ras ḇyedi, ¹¹ ḇefo kuker bon napnapes Yesus Kristus ifrur kwar faro payamyum ma sanandik Allah. ¹² Yamarisen, insa naek srar mkofawi, mboi roi ḇeradine kuker aya nane, nai ḇeḇewar fa Ankankinem Ḇeḇye iryer, ¹³ isof ḇekon ro istana (rum) Gubernur ma snonkaku ḇese ḇero diansya kam sakfawi yasmai ro bui snar Kristus. ¹⁴ Ma samamyai yedi eḇedari naek srar ḇena kakyar oser sibor sikyar syadi faro Manseren ma simsik ḇo siwawos ro Allah wos ḇyedi kuker makakak ḇa. ¹⁵ Snonkaku ono sisya sḇaryas Kristus snar masasor ma rakrakrok, ḇape ono kako sḇaryasi kuker kakara ḇeḇye. ¹⁶ Snonkaku sine kada sḇaryas Kristus kuker saswar, snar sifawi, mboi aya isya rodine fayaḇesanowarek Ankankinem Ḇeḇyeya, ¹⁷ ḇape ḇesesya snar ḇaḇefandun mankunsi sena ma kuker kakara ḇenapesḇa, skara ḇo soḇo kuker rarirya sifrur samamyai yedi famyarḇak ro bui. ¹⁸ Ḇape rariryano royoḇa, snar rariso wer kako, Kristus ḇyeḇeḇaryas, kuker kakara ḇesasar roḇaido kakara ḇeḇye. Roi ḇeradine yamarisen na. Ma nari yamarisen faswef, ¹⁹ snar yafawi, mboi ro roi ḇeḇor nane kam ḇarpurya isoine yasma aski snar nadi mkoḇena ma fafnoḇek ro Yesus Kristus Rur ḇyedi. ²⁰ Snar roi yaḇe ḇare ma yakyar kakuya isoine mboi ro roi ḇeḇor anna kam nari yamai ḇa, mboi raris fafisu nakam, rarirya baboine, Kristus isma syom snar aya, ro kankenem yedi, iḇye ro marmar yedi kako. ²¹ Snar kankenemya maḇe aya Kristus irya ma marmarya fainda rirya. ²² Ḇape rofyor nari yakenem ro supswan ine, irya fyasna ḇeaya yafararur fayaḇuk bon. Inja rosai nari yakimfirya, yafawi ḇa. ²³ Ḇar risuru suḇedifer aya: yamarisen yara yakain fnoḇek Kristus -- ikada iḇye syadi kaku; ²⁴ ḇape fandun syadi yakain ro supswan ine snar mko. ²⁵ Ma ro kakyar ine yafawi: nari yakain ma nari yarowus mko kam wer, insa mkosamberen syadi ma nkoryaḇ snar kakyarya, ²⁶ isof masasik mkoḇena ro Yesus Kristus nasyadi wer snar aya, rofyor yakaḇer faro mko. ²⁷ Iḇye syadi mkokenem namnis kuker Kristus Ankankinem Ḇeḇye ḇyedi insa rofyor yaramufa yamam, mboi rofyor yarafa ḇaido yamnaf, mboi mkores nako ro rur oser, ma mkoḇe sne oser ro fararur faro kakyar ḇerama ro ḇaryas Ankankinem Ḇeḇye, ²⁸ kuker makakak kermkuno ḇaḇeri faro mbroḇ mkoḇesi. Faro sikam irya aḇyair raroya, ḇape faro mko aḇyair ro askiya, ḇerama ro Allah. ²⁹ Snar faro mko mkosma fakamaman snar kakyar faro Kristus monda ḇa, mboi mkoḇekandera kukeri kako, ³⁰ ḇaḇesewar mkoḇedi imnis kuker rosai mkomam ro aya, ma baboine rosai mkomnaf ro aya.

¹ Inja ro Kristus ananun naisya, sneprei ma saswar, ḇaḇeoser ro Rurya isya, saswarya ma snesoya isya, ² insa mkofrur mnis raryaḇ yedi isoine: iḇye mkona sne-kakara oser, mkona saswar oser, rur oser, kakara oser, ³ mboi mkosewar ḇaḇefandun mankun mkoḇena ḇardi awer roḇa sanandik ḇeḇefromo awer. Inja iḇye kuker randun sne mkomam min mkoḇesi sikaki syadi ro mankun mko; ⁴ ma mkono oser-oser syewar fandun mankundi ḇyena awer, ḇape fandun snonkaku ḇesesya kako. ⁵ Iḇye ro kankenem kayam mkona, swaruser ma ḇaḇir raris kosma ro Yesus Kristus kako, ⁶ I kada imnis kuker Allah, ḇape kyara ḇaḇaḇeoser ḇyedi ḇemnis kuker Allah, nari iḇriwarek naḇa. ⁷ Mboi ryir nakam kwar ma ḇyeimnis mankundi raris manfyan oso. Imnis raris snonkaku, ma ikenem imnis snonkaku. ⁸ Ryun mankundi, ma ikenem kuker aunos faro Allah isof imar -- isoine spai ro aprop faimar. ⁹ Eḇedari Allah ikanowi fa ikaki syadi, ma ḇyuk faroi snonsnon ḇeba syadi ro snonsnon besena kam. ¹⁰ Ma faro ḇaḇesyowi Yesus, roi ḇeḇor kam ḇekenem ro boiyaswa, ma ro supnane baḇna, nari nbansuba faroi. ¹¹ Sikam nari skarem Yesus Kristus ikada Manseren, ma rarirya Allah Kmaya isma syom. ¹² Naek srar yaswar kaku mkoine, indo mkoḇeuser; inja mko fararur faswef ro sasewar koreri mkoḇena kuker makakak ma araryof, imnis raris rofyor aya isya rofandu mko, mboi isyadi baboine rofafisu aya isya rofandu mko ḇa kako, ¹³ snar Allah iso ḇefararur ro mko iḇye marisen ma ro fararur kako imnis marisen ḇyedi. ¹⁴ Mkofrur roi ḇeḇor kam kuker sasurem ma famfaḇri awer, ¹⁵ ma mkofrur sasar awer, imnis Allah romawa ḇesren ḇyesi rofandu snonkaku ḇeḇarḇor ma ḇesasar ma ḇeḇor sine, isof mkosna rofandusi imnis maksya ro supswan ine, ¹⁶ ma mkoserepen ro wos ḇekenemya, insa ro ras Kristus ḇyedi yamsik aya, mboi yafaḇri waworek ḇa ma yaḇekandera fromo ḇa. ¹⁷ Ḇape rik ayena neḇesbawer ḇefasarser kako snar kakyar mkoḇena, yamarisen naba ma yaryaḇ naba kaku kuker mko. ¹⁸ Ma rarirya kako nari mkoryaḇ kaku ma mkoryaḇ kuker aya. ¹⁹ Ḇape ro Manseren Yesus yakyar nari yawan Timotius faro mko, insa yasma sneprei kako rofyor yamnaf rariso kankenem mkoḇena. ²⁰ Snar snonkaku oso isya ro dine ḇa, ḇena sne ma kakara oser kukeri ma ḇekara kaku ḇeri ḇaḇefandun mkoḇena; ²¹ snar sikam ssewar ḇaḇefandun mankunsi sena, mboi ḇaḇefandun ro Yesus Kristus ḇa. ²² Mboi mkofawi ḇaḇeuser ḇyena neḇemnasen kwar ma ifnoḇek aya kwar ro afuffarmyan ro Ankankinem Ḇeḇyeya imnis romawa oso ifnoḇek kmari. ²³ Iso nari yakyar yawan fasaw mufaḇemko, rofyor wawos ḇekur aya nane nasnai kwar maḇeaya. ²⁴ Ḇape yakyar faro Manseren, nari mankundaya kako yarakaki fasaw faro mko. ²⁵ Rofafisu ine yakara iḇye yawan Epafroditus faro mko, isoine naek ayedi ma min ḇefararur kayam, mkowan faḇeyuffarmyan aya ro ḇaḇefandun yena. ²⁶ Snar iswarkuf mko kam ma imkakwarek mko snar mkomnaf dafduf ḇyedi kwar. ²⁷ Kaku iduf rawo fanam imar, ḇape Allah iswari, ma derer monda ḇa, mboi aya kako, insa yaḇekandera mankenem awer. ²⁸ Eḇedari yawan fasaw i, insa rofyor mkomam i, mkoryaḇ wer ma sneri iknon. ²⁹ Inja mkosrow i kuker marisen ḇeba ma mkoḇesyowi snonkaku ḇerariryasya. ³⁰ Snar kuker fararur Kristus ḇyena indokada imar ma ḇyuk rur ḇyedi fa ifrur mnis rosai ḇemisḇa ro afuffarmyan mkoḇena maro aya.

¹ (1a) Papupesya naek srar mkoryaḇ snar Manseren. (1b) Yafas radine faro mko snar nmarḇak maro aya ḇa mboi nbuk aski faro mko. ² Mkosasor mko ro nafsya, mkosasor mko ro snonkaku ḇeḇarḇorsya, mkosasor mko ro sofakfuk ḇesasarna, ³ snar koine snonkaku ḇesma sofakfuk ḇekaku, ḇeḇeari kuker Allah Rur ḇyedi, ma ḇemsik kuker Yesus Kristus mboi kosma kakyar faro rari snonkaku ḇa. ⁴ Kaku ḇeri aya kako yasma knam faro yakyar rari snonkaku sena. Rofyor snonkaku ono ḇese sisya skara soḇo sikyar faro rari snonkaku sena, ayama yasyadi wer: ⁵ yasma sofakfuk ro ras ḇeḇewar, ro er Israel, ro keret Benyamin, snon Ibrani kaku, ro ḇaḇeuser sasoser Refo Yahudi aya ine snon Farisi, ⁶ ro fararur yaḇewayam jemaat, ro ḇaḇenapnapes ma sasouser sasoser Refo Yahudi yafarorewḇa. ⁷ Ḇape rosai ḇeḇefandun ḇeaya, baboine nefainda ḇa snar Kristus. ⁸ Rarirya roi ḇeḇor kam yakara naḇe roi ḇeḇefromo, snar mambir faro Yesus Kristus Manseren ayedi, naḇye syadi ro roi nakam. Snar i eḇedari yasawen ḇesena kam ma yakara naḇe mamas, insa yasma Kristus, ⁹ ma aya isya kuker Kristus mboi kuker ḇaḇenapnapes ayena ḇa snar yaḇeuser sasoser Refo Yahudi, mboi kuker napnapes snar kakyar faro Kristus, isoine napnapes Allah ḇyuk snar kakyarya. ¹⁰ Ma Yamarisen insa yamambaḇir Kristus ma papoik ro ḇaḇeaḇiḇer ḇyedi ma ḇaḇeoser ro ḇaḇekandera ḇyena, ro moḇ yaḇeoser kuker Kristus ro ḇaḇemarmar ḇyedi, ¹¹ insa ro papupesya yasma ḇaḇeaḇiḇer rofandu ḇemarsya. ¹² Inja imnis raris yasma moḇ ine kwar roḇa yamnis kwar, mboi yayawna, isof yaforna, snar aya kako Yesus Kristus fyor aya ro marandan ḇeraḇe Damsyik. ¹³ Naek srar, yakara ḇa ro mankundaya, mboi yaforna kwar, ¹⁴ ḇape moḇ yafararur raiso ine: yafanander rosai ḇero ḇarpur ayedi kwar ma yamamker monda faro rosai ḇero ḇarpon ayedi, ma yafrar faro yasma sasuref, isoine fararyor ro boiyaswa ro Allah snar Yesus Kristus. ¹⁵ Inja mkorama, ḇemnis kwar koya, kokara rarirya. Ma rofyor mkona kakara ḇese ro roi oso, roi ḇerarirya ani nari Allah fyasnai faro mko. ¹⁶ Ma rosairya monda kosma kwar, kombran rarirya monda. ¹⁷ Naek srar, mkoso kankenem ayedi ma mkomam warek si, imnis kankenem mkomam ro nko. ¹⁸ Snar, raris yakofen ḇerarwan ono faro mko kwar, ma yafasḇair wer ro baboine kuker kankanes, snar kawasa sibor sikenem imnis sembroḇ Kristus aprop ḇyedi. ¹⁹ Ḇarpurya nari sisma raro, snar Manseren sedi iso marisen baken sena, simsik si kuker roi ḇefrur mamyai, siswaruserker monda roi ḇero supswan ine. ²⁰ Snar koine koḇe kina ro boiyaswa, ma rodia kako kowaf Manseren koḇedi Yesus Kristus ḇeḇuk koreri ḇeko, ²¹ ma nari ḇesadwer baken ḇepyumba koḇenane, fanamnis kuker baken ḇepyum ḇyedi, imnis papoik ḇyedi ḇefrur kafyo roi ḇeḇor kam faro mankundi.

¹ Eḇedari, naek srar yaswar kaku ma yaḇeḇare-ḇeswar, raryaḇ ayedi ma wower ayedi, mkores nako kako snar Manseren, ne, naek srar yaswar kaku! ² Yanun mu Euodia ma Sintike, insa muna sne-kakara oser snar Manseren. ³ Mboi, yor kaku faro mko kako, Sunsugos, min ḇeḇeasuser ayedi: mkofnoḇek si. Snar sifnoḇek aya kwar ro ḇaḇeḇaryas Ankankinem Ḇeḇyeya, fnoḇek kuker Klemens ma min ḇese yesi ḇesma fararur oser, ḇena snonsnon ḇefasepen ro syap kankenemya. ⁴ Mkoryaḇ ḇesya kwar snar Manseren! Yakofen ḇeoser wer: mkoryaḇ mura! ⁵ Iḇye syadi sneḇefafir mkoḇena snonkakusya kam sifawina. Manseren fyanam kwar! ⁶ Iḇye mkoraryof rosairya wer kako, mboi mkofasna roi ḇeḇor kam marisen mkoḇena faro Allah ro nadi ma fararyor kuker kafkofen kasumasa. ⁷ Saswar-ḇaḇye ro Allah, ḇesyadi ro kakara, nari nfaduru sne ma kakara mkoḇena snar Yesus Kristus. ⁸ Inja papupesya, naek srar, ḇekaku mkoya kam, ḇesma snonsnon mkoya kam, ḇenapes mkoya kam, ḇesren mkoya kam, ḇefafir mkoya kam, ḇewos pyum mkoya kam, ḇeḇenaḇye mkoya kam ma nari ḇesma sanandik, mkokara roi ḇeḇor anna kam. ⁹ Ma rosai mkofarkor kwar, ma rosai mkosma kwar, ma rosai mkomnaf kwar, ma rosai mkomam kwar ro aya, mkofrurna. Mboi Allah ḇeḇeknam saswar-ḇaḇenaḇye nari ryowus mko. ¹⁰ Yaryab fafayaḇa snar Manseren, mboi ḇarpurya kakara mkoḇena ma ḇaḇaḇir mkoḇena mkoswar aya wer. Mboi swarapepen mkoḇena naisya, ḇape mkosma fafisu ḇa. ¹¹ Yakofen rarirya snar yananjar ḇa, snar mankundaya yafrur mnis fandun yena ro fafisu nakam. ¹² Yafawi rosaiso ḇaḇebakyafya ma yafawi rosaiso andidoya. Ro roi ḇeḇor kam ma rosairya wer nekankunes wer maro aya ḇa; iḇye rofafisu yasyopen, iḇye rofafisu yabiser, iḇye rofafisu andido, iḇye rofafisu bakyaf kako. ¹³ Ro roi ḇeḇor nakam yaḇarna snar Kristus ḇeḇuk samambraḇ maḇe aya. ¹⁴ Rarirya fararur mkoḇena naḇye kako, snar mkun rarwas kwar ro kandera yena. ¹⁵ Mankun mkofawi kako, ne, kawasa Filipi; rofafisu yarandak yaḇaryas Ankankinem Ḇeḇyeya, rofyor yabur Makedonia, jemaat oso isya ḇa ifrur karkor kuker aya ro nyaki yena mboi mkerer. ¹⁶ Snar ro Tesalonika kako rarwan risuru mkofarem kwar fafnoḇek mkoḇena maro aya. ¹⁷ Mboi farsarser anna naiso yakor syadina ḇa, mboi bon ḇyena, ḇefrur fainda mkoḇena naba syadi. ¹⁸ Baboine yasma kwar rosai ḇeḇefandun ro mko, mboi isyadi wer ro roi ḇeḇor anna. Ayaisya ro andido, snar yasma kwar farem mkoḇena ro Epafroditus, farsarser ḇediref oso, samsom oso ḇefrur marisen ma Allah imarisen na. ¹⁹ Allah yedi nari myunsu fandun mkoḇena kam imnis raris nana ma papoik ḇyedi ro Yesus Kristus. ²⁰ Sanandik faro Allah ma Kma koḇedi isof fyoro-fyoro! Amin! ²¹ Mko kofen aroo ayena faro Allah kawasa ḇyesi ḇeḇeoser kuker Yesus Kristus. Aroo faro mko ro naek srar ḇewarpu aya rodinesya. ²² Allah kawasa ḇyesi kam rodine, isyadi wer snonkaku ro istana (rum) Kaisar, sfarem aroo faro naek srar. ²³ Saswar-ḇaḇye ro Manseren Yesus Kristus ryowus rur mkoḇesi! Ro nu, Paulus ma Timotius