MARKUS

MARKUS

¹ Ine kada Ankankinem Ḇeḇye randak kaku ḇekur Yesus Kristus Rumkun Allah. ² Imnis fas-fas ḇero surat Nabi Yesaya, Manseren ikofen ḇo doḇe: "Mame, nari Yawan manfamyan Ayedi ’fa pyon Au, iso nari ḇefasos nyan ḇe Au; ³ mkarem snonkaku oso isya ḇye ruran ro sup ḇeursḇa: Fasos nyan ḇemkei ma ḇeaḇyoḇer faro Manseren." ⁴ Rarirya Yohanes Ḇemasi rya ḇe sup ḇeursḇa fa ḇyaryas: "Mkombror ḇo mkosma masi sren insama Allah ipyos sasar mkoḇena." ⁵ Inja kawasa ḇero sup Yudea ḇesiper ma ḇero Yerusalemsya kam srama ro i, ma skaram sasar sena ma sisma masasisren ro war Yordan. ⁶ Yohanes syatu ḇyena ro onta bur, ḇeḇoḇek ḇyedi ro aiwan kif ma anan ḇyena kampam ma umber sup. ⁷ Wos ikofen na ndok ra dine: "Ro ḇarpur ayedi ḇepok syadi aya nari isyama, yakunem fa yaper kaḇrai roḇesower-wesisya monda, yasyus ḇa. ⁸ Aya ma yamasi mko kuker war monda ḇape i, nari imasi mko kuker RurḆesren." ⁹ Ro fafisu ya Yesus ryaker Nazaret ro sup Galilea, ma Yohanes ḇyuk masasisren faro I ro war Yordan. ¹⁰ Rofyor isasyar bur war ya, Myam nanki ḇyas, ma Rurḇesren ya isaḇu ro i imnis manjawa. ¹¹ Ma mkarem oso ryok ro nanki mumfes, ḇo doḇe: "Au kada Rumkun saswar ayedi, faro Au yamarisen." ¹² Fyor o ḇa Rur ya fyarkin Yesus ḇe sup ḇeursḇa. ¹³ Ḇyarek ras samfur rifiak ro sup ḇeursḇa anya, ma biris ifrowes i. Ikenem ro fandu aiwan ḇeḇarḇor sya ma malaikatsya suf farmyan i. ¹⁴ Sfor Yohanes raimnai Yesus rya ḇe Galilea ma Ḇyaryas Ankankinem Ḇeḇye ro Allah, ¹⁵ Doḇe: "Fafisu ya imnis kwar; Ḇaḇesasoser Allah fyanam kwar. Mkombror ma mkokyar faro Ankankinem Ḇeḇye ya." ¹⁶ Rofyor Yesus imbran ro yendisare ḇero danosen Galilea, myam Simon ma naekri Andreas. Suisya ssunap pam ro danosen ani snar mandaswan suirya. ¹⁷ Yesus ikofen faro su ḇo doḇe: "Ne, murama muso aya, ma nari Yana mu ḇe mandaswan snonkaku." ¹⁸ Inja fyor ya beri subur pam suḇedi ma suso i. ¹⁹ Ma ro marandan ḇyani fyoro ḇa wer Yesus myam Yakobus, Sebedeus mandaḇendi, ma naekri Yohanes, suyanem pam ya ro wai ya dori. ²⁰ Yesus dor su beri ḇo subur sinan kma suḇe Sebedeus kuker snon ḇeyan ḇaḇyak ḇyesi, ma suso i. ²¹ Skosun ro Kapernaum; ras Mananai Yahudi ya syeḇen mura, Yesus Syun beri ro rum Ari ya dori ma Ḇyuk farkarkor faro kawasa sya. ²² Kawasa sikandor rofyor simnaf farkarkor Ḇyena snar fyarkor si imnis snonkaku ḇena papoik; ḇo imnis kuker snon ḇefawi nananem Refo Yahudisya ḇa. ²³ Ro fafisu ani snon rur-ḇemaḇak sisawoḇer oso isya ro rum Ari ya dori. Snon ani dar naba ḇo doḇe: ²⁴ "Rosai waḇe wafrur kuker inko, Yesus snon Nazaret? Waḇe rwama fa mun inko kwar ya isoine ke? Yafawi au kwar: Ḇesaranden ḇeramuma ker Allah." ²⁵ Ḇape Yesus Ḇye wef i ḇo doḇe: "Be fasis, wasasyar buri!" ²⁶ Rur-ḇemaḇak anya kyiker farma snon ani, posa dar naba ḇo isasyar buri. ²⁷ Kawasa ansya kame sikandor kaku, isof sifuken yae ro mankun si ḇo soḇe: "Rosaisoine? Farkarkor ḇebabo ke? Dawawos kuker papoik, ma rur-ḇemaḇak syano dawos epen si, ma siso user wos Ḇyena." ²⁸ Fyorya abar ḇyedi ifrar yar sup Galilea ḇesiper. ²⁹ Sisasyar ro rum Ari anya, Yesus kuker Yakobus ma Yohanes skora ḇe Simon ma Andreas rum suḇedi. ³⁰ Simon imbanyori ḇyis ḇo ḇyarek. Skokofen ḇadir beri dafduf ani faro Yesus. ³¹ Inja Yesus rya myam bin ani, i kin ḇrasi ma Ḇyausi. fyor ya beri ḇasḇis anya ibur i. Ma posa bin anine duf farmyan sko. ³² Ro mandira ya, rofyor ori syun kwar, sun snonkaku ḇeduf ma snonkaku rur-ḇemaḇak sisawoḇer sya kam faro Yesus. ³³ Inja kawasa ḇero mnuḇeba anya sya kame, siryur ro rum ya rawendi. ³⁴ Yesus ḇyuk pararei faro snonkaku ḇesma dafduf ḇeḇor ansi, ma rur-ḇemaḇak sya iyaw sibor kaku; imewer ḇyuk fa rur-ḇemaḇak ansya sawosri, snar sifawi I kwar. ³⁵ Ḇyarḇir meser ro arwo prim ya, Yesus ikḇok ma isasyar ḇe moḇ ḇeḇeursḇa oso ma ḇye nadi ro diwa. ³⁶ Ḇape Simon kuker min ḇyesi siyaw user I. ³⁷ Rofyor sisrowi, sikofen ḇei ḇo soḇe: "Kawasa sya kame, ssewar au!" ³⁸ Inja Kyarem faro si ḇo doḇe: "Mkorama, kora ḇe moḇ ḇese, ḇe mnu-mnu ḇeba ḇefanam nane, insa Yakḇaryas Ankankinem Ḇeḇye ine kako ro diwa, snar si ḇeḇewar Yarama ya!" ³⁹ Ma Yesus rya ḇe sup Galilea ḇesiper, ma ḇyaryas Ankankinem Ḇeḇye anya ro rum Ari sena, ma iyaw rur-ḇemaḇak sya. ⁴⁰ Snon ḇeduf pado oso ryama faro Yesus i, ḇyan suba ro ḇarpon Ḇyedi ma dor fafnoḇek ro I ḇo doḇe: "Sye, Wamarisen ido Buk pararei ḇe aya!" ⁴¹ Yesus sneri iswar kufi, inja isawar ra pyan ro snon anya ma ikofen faro i ḇo doḇe: "Yamarisen. Waprei ro dafduf bedi!" ⁴² Rofyor ya beri dafduf pado anya isyof buri, ma iprei. ⁴³ Yesus iwan ifa ibur, ḇo danun pakrek faroi ḇo doḇe: ⁴⁴ "Waswarepen, wapok fa baḇdas awer parare bedine faro manseirya kaker, imboi rwa fasna mankundau faro imamsya, ma buk farsarser ḇekar parare ḇedi, imnis sasoser Musa ḇyani insa ḇye fasasnai-kaku faro si." ⁴⁵ Ḇape snon anya ibur ma ḇyaḇdas parare ḇyanya ḇe moḇ-moḇ na kam, isof Yesus ipok fa syun fababa wer ro mnu ḇeba ani ḇa. Ḇyarek ro moḇ ḇeḇeursḇa na, ḇape kawasa siswek i ḇesya kwar beraker moḇ nakam.

¹ Ras ri ḇeso nawase, Yesus Kyaḇer wer ḇe Kapernaum, ma abar nakofen ḇadir isya ro rum. ² Mura kawasa sya srama spanjuḇer rao moḇ anna nafyos, ma kedwaya ḇarpondi kako. Rofyor ḇyaryas wos ya faro kawasa ansi, ³ snonkaku ono sisya sun snon ḇeapaper oso faro i; ma snon rifiak skoḇar i kuker waryar oso. ⁴ Ḇape sisma nya no ḇa fa suni faro Yesus, snar donek ya iba, mura skek kukeri ma skoḇas rum ya bori imnis kaku murḇaḇ ro moḇ Yesus Kyon ro ya, posa skokyui ro ḇarpon Ḇyedi. ⁵ Rofyor myam kakyar skoḇena, ikofen faro snon ḇeapaper anya ḇo Doḇe: "Ne rumkun Yedi, wasma payasyos ro sasar ḇena kwar!" ⁶ Ḇape ro moḇ anya snon ḇefawi nananem Refo Yahudisya ono sisya kako, inja skara fasis ro sisnes na ḇo soḇe: ⁷ "Rosai ḇefnai fa snonkaku ine dawos rarirya? Donef Allah. Mansei nari ḇepok fa ḇeḇuk ampun ro sasar, nkofawi monda Allah mankundi.?" ⁸ Ḇape Yesus myamkir swaruser ma karkara sena, inja ikofen faro si ḇo doḇe: "Mkokara ro mkosnemna rarirya, snaro? ⁹ Rosai ḇepyan syadi ya, Yakofen ḇe snon ḇeapaper ine ḇo yoḇe: Wasma payasyos ro sasar ḇena kwar roḇa i do: wakḇoke, wakanow yar ḇena ma wambran. ¹⁰ Ḇape insama mkofawi ro supswan ine Rumkun Snonkakuya ipok ipyos sasarna." Ma ikofen kaku faro snon ḇeapaper anya ḇo doḇe: ¹¹ "Yakofen kaku faro au, wakḇoke, wakanow yar ḇena ḇo wabur ḇe rum bedi!" ¹² Ma snon ḇeapaper anya ikḇoke, ikanow yar ḇyena ma isasyar ro fandu kawasa ansya, isof sikandor kam ma sisandik Allah ḇo soḇe: "Roi ḇera dine, nkomam ono ḇaim!" ¹³ Raimnai Yesus rya wer ḇe danosen andir ya, ma kawasa sya kam sra yoḇ i inja fyarkor si. ¹⁴ Posa, rofyor imbran uk ro moḇ anya, myam Lewi Alfius mandaḇendi kyain ro rum ḇeyor som ya, inja ikofen ḇe i ḇo doḇe: "Waso Aya!" Mura Lewi dores ma isoi. ¹⁵ Raimnai rofyor Yesus inanus Lewi rorum ḇyedi, snon ḇeyor som ma snonkaku ḇesasar sibor saknan warpu i kuker manfamyan ḇyesi, snar kawasa ḇeso i sya sibor kaku. ¹⁶ Rofyor snon ḇefawi nananem Refo Yahudi ro ḇar Farisi sya smam Yesus inan fnoḇek snon ḇeyor som ma snonkaku ḇesasarsya inja sifuken faro manfamyan ḇyesi ḇo soḇo: "Snaro Yesus danan us ḇeyor som ma kawasa ḇesasarsya?" ¹⁷ Yesus imnaf wos anya ma ikofen yoḇ si ḇo doḇe: "Snonkaku ḇepre syama sefandun dokter ḇa, imboi ḇeduf sya kada. Yarama ine, yaḇe yor snonkaku ḇenapes ḇa, imboi kawasa ḇesasar!" ¹⁸ Ro fafisu oso, rofyor Yohanes manfamyan ḇyesi ma kawasa Farisi sfarfor, snonkaku ono srama ro Yesus ma sifuken ḇo soḇe: "Snaro Yohanes manfamyan ḇyesya ma snon Farisi manfamyan sesya sfarfor ḇoi, manfamyan ḇesya sakfarfor ḇa?" ¹⁹ Yesus Kyarem ḇe si ḇo doḇe: "Jadi fa manfakawin ya bati ḇyesya sfarfor rofyor isya kuker si? Rofyor manfakawin anya isya kaker ro fandu si, nari sipok fa sfarfor ḇa. ²⁰ Ḇape nari fafisu ya isyama manfakawin anya ssun i bur si, ma rofyor anya insape sakfarfor. ²¹ Snonkakuyo ḇyuk kruḇen ker ḇebabo yo syokop marwai yo ḇaim, snar rarirya ido nari kruḇen ker ḇebabo ya syawek fanuk marwai ani, imuk naba syadi wer. ²² Rarirya kako, snonkaku yo nari isar swan ḇebabo yo ro kibon ḇeḇerereyo ḇa, snar rarirya ido, swan ansya nari sisai pef kibon ḇeḇerere ani, ma swan kuker kibon sudawer kame. Inja swan ḇeḇabo ya, ipyum syadi ḇyeḇeser ro kibon ḇebabo kako!" ²³ Ro ras Mananai Yahudi oso Yesus ma manfamyan Ḇyesya simbran uk ro yaf gandum oso, ma ro fyor simbran anya manfamyan ansya spanuk gandum yorem ono. ²⁴ Inja snon Farisi sya sikofen faro i ḇo soḇe: "Mam kada! Snaro manfamyan ḇesya sifrur roi kopok fa kofrur ḇaḇeri ro ras Mananai Yahudi?" ²⁵ Yesus Kyarem faro si ḇo doḇe: "Mkowasya roi Daud ifrurna ḇaim ke? Rofyor i ma ḇeso i sya sananjar ma sibiser, ²⁶ rariya syun ro rum Allah, rofyor Abyatar ḇye imam ḇeba ya, dan mamami farsarser-snonkaku ḇese sakan ḇa derer imainsya kada ma ḇyuk kako faro ḇeso isya." ²⁷ Ma Yesus ikofen ḇe si ḇo doḇe: "Ras Mananai Yahudi ḇyeḇefrur faro snonkaku sya, ḇoi snonkaku sya seḇefrur faro ras Mananai Yahudi yaba, ²⁸ inja Rumkun Snonkaku Ya kako Ḇye Manseren faro ras Mananai Yahudi ya."

¹ Ḇarpur Yesus syun wer ḇe rum nadi. Ro diya snon ḇramin ḇar ḇemar oso daksun. ² Snon Farisi ono sisya ssḇair, imbude Yesus ḇyuk pararei faro snon anya ro ras Mananai Yahudi yandi, insama rarirya ido ssḇuk sasar ḇe Yesus. ³ Yesus ikofen faro snon ḇramin ḇar ḇemar anya ḇo doḇe: "Rwama wores ro fa-du!" ⁴ Raimnai ikofen faro si ḇo doḇe: "Ne, rosai ssḇuk fa kofrur ro ras Mananai Yahudi yani, ḇaḇe naḇye ya ke, frur fanor i, kofanaḇak kankenem snonkaku ke komun si?" Ḇape ssḇe fasis monda. ⁵ Yesus Fyafayaf snar ḇaḇe marares sena ma kuker masasor myam yar si ḇo Ikofen faro snon ḇramin ḇar ḇemar anya ḇo doḇe: "Fos ḇramsi!" Ma snon anya fyos ḇrasi ma iprei. ⁶ Ro diya snon Farisi nansya si sasyar ma se sne oser kuker snon Herodiani sya fa soḇe ssmun Yesus. ⁷ Ḇarpur Yesus kuker manfamyan ḇyesi sisusu bur ḇe danosen ya, ma kawasa Galilea siḇor sisoi. ⁸ Siya sibor kako sra ker Yudea, Yerusalem, Idumea, war Yordan ḇar iwara, Tirus ma Sidon, srama faroi, snar simnaf Yesus fararur ḇyena. ⁹ Yesus iwan manfamyan ḇyesya fa ssfasos wai ya faroi snar imkak donek ya sifyosepen indi. ¹⁰ Snar snonkaku ḇeduf ifrur fa ḇeprei sibore, ro diya ḇeḇeroro ro dafduf sibor sra yoḇ i ma sifyos apepeni imfa siḇe sspan roi. ¹¹ Rofyor rur ḇemaḇak sya smam i, sisapi ma sḇansuba faroi ro ḇarpon ḇyedi ma sar naba: "Au ine Rumkun Allah." ¹² Ḇape Yesus ḇyewef si snar imewer kaku ssḇaryas indi. ¹³ Imnai ro diya Yesus dek ro urek oso. Dor snon imarisen sya ma srama yoḇi. ¹⁴ Kyinfir snon samfur seser risuru fa sifnoḇek i, insa nya si ḇe manfamyan fa ssḇaryas Ankankinem Ḇeḇye ya, ¹⁵ ma ḇyuk papoik faro si fa ssḇukyau rur ḇemaḇak sya. ¹⁶ Snon samfur seser risuru isiḇer ansya sisosine: Simon, nyir i kako ḇe Petrus, ¹⁷ Yakobus Zebedeus mandaḇendi ma Yohanes Yakobus ḇedardi, snon suine nyir su ḇe Boanerges isoine romawa karadu, ¹⁸ ḇefnoḇek kako sya sisosine Andreas, Pilipus, Bartolomeus, Matius, Tomas, Yakobus Alfeus mandaḇendi, Tadeus, Simon snon Selot, ¹⁹ ma Yudas Iskariot, na ḇeḇoḇ Yesus. ²⁰ Ḇarpur wer Yesus syun ro rum oso. Kawasa sibor kaku ssfanjur wer isof skoḇe skonano jadi ḇa. ²¹ Fyor ya Yesus naek ḇyesya simnaf moḇ ine, ssrama ssiḇe ssun i, snar soḇe swar user ḇyena namnis ḇa kwar. ²² Rofyor ya kako ḇefawi nananem Refo Yahudi ḇera ker Yerusalemsya sikofen ḇo soḇe: "Rodur Ḇeelzeḇul syouri, ma: ’Kuker snopor mananir rur ḇemaḇak iyau rur ḇemaḇak sya.’ " ²³ Ro diya Yesus dor si ma fyarkor si kuker wos sarḇer, ḇo doḇe: "Rariso ro kakara mkoḇena ibiris iyau ibirisya? ²⁴ Ḇaḇesasoser oso fyarmafmef ido na isonem ḇa, ²⁵ ma sim oso kina byena sun besisya, sim ani ipok isonemba kako. ²⁶ Rarirya kako rur ḇemaḇak ya, ḇye mbroḇ mankundi isof irarwas ido na ipok fa isonem ḇa, imnis ra fafisu ḇyeja iḇro kwar. ²⁷ Rarirya snon oso ipok syun fa fyasyar snon ḇesambraḇ oso arasa ḇyena ro rum ḇyedi ḇa rofyor snon ḇesambraḇ ani ḇyeḇefes ḇaim. Rofyor snon ḇesambraḇ ani siyaḇeki kwar in sape arasa ḇyena sfasyarna. ²⁸ Yakofen wos ḇekaku faro mko: Sasar ma anonef ḇeḇor romawa snonkaku sya sena kam nari nasma ampun. ²⁹ Ḇape oso doḇe donef Rur-ḇesren ya ido, ima na isma ampun ḇa fyoro-fyoro, mboi syasar snar ifrur sasar ḇekain fyoro-fyoro." ³⁰ Yesus ikofen rarirya snar soḇe rur ḇemaḇak ya syouri. ³¹ Yesus snari ma naek ḇyesya sra yoḇi. Sores ro ḇandi ḇo siwan ono ḇese fa sor Yesusi. ³² Kawasa ḇeḇor ḇekain yar-yar Yesus sya sikofen faroi ḇo soḇe: "Ne, mam kada snami ma naek Bansi ḇeyores ro ḇandi siwa, ssewar fa siḇe sisrow Au." ³³ Yesus kyarem faro si ḇo doḇe: "Mansei Yana ḇe sna ma naek?" ³⁴ Myam yoḇ kawasa ḇekain yar-yar i ansya raimnai ikofen faro si ḇo doḇe: "Sine sna ma naek srar Ayesi rya. ³⁵ Mansei ḇeḇeuser Allah marisen ḇyena, sirya naek snon ma srar bin ma sna Ayesi rya."

¹ Rofyor oso Yesus ḇyuk farkarkor wer ro danosen andir ya. Ma kawasa donek ḇefnak ḇa siryur yar i, inja dek ro wai ḇepyar na iya fa kyain ro wai anya ḇoi kawasa ansya ssna ro ḇonde ro danosen andir ya. ² Ma ḇyuk farkarkor faro si roi nabor kuker sarḇer. Ro farkarkor ḇyena ikofen faro si ḇo Doḇe: ³ "Ne mkorower! Snon ḇekekef mor oso isasyar fa kyekef mor. ⁴ Rofyor daḇuḇer mor ono sisapi ro nyan andir, ma man sya san si ra siḇro. ⁵ Mor ono sisapi ro moḇ ḇeḇe karui, ḇeḇe saprop ḇekpor ḇa, inja mor anna nasur fasau snar saprop ya isrepek. ⁶ Fama rofyor oridek ma isam nakam nnmaryoi snar ne rares ḇa. ⁷ Mor ono wer sisapi ro moḇ ḇeḇe kaḇraiborek, ma kaḇraiborek anna naduḇ epen si isof simar, inja ssḇuk bon ḇa. ⁸ Mor ono kada sisapi ro saprop ḇepyum ma sisur pyum kaku ḇo simarem, bon nna ono ne samfur rikior ono ne samfur riwonem ma ono wer ne utin oser." ⁹ Ma ikofen ḇo doḇe: "Mansei ḇeḇe kna fa imnaf ido imnaf naḇye!" ¹⁰ Fafisu Yesus derer ro mankundi, ḇeso i sya ma manfamyan snon samfur seser risuru ḇyansya sifuken i ro sarḇer ani. ¹¹ Kyarem faro si ḇo doḇe: "Kankunes Ḇaḇesasoser Allah ḇyeḇeḇair kwar faro mko, ḇape faro snonkaku ḇese roi ḇeḇor anna neḇefarkor ḇe si kuker sarḇer, ¹² insa: Se mka fa smam ḇape skara na ḇa, se kna fa simnaf ḇape sifawi kankunes ḇyeja ḇa, imbude simbror ḇo sisma ampun di." ¹³ Raimnai ikofen faro si ḇo doḇe: "Inja mkofawi sarḇer ine kankunes ḇyeja ḇake? Rarirya ido nari mkofawi sarḇer ḇese na kankunes nena rariso? ¹⁴ Ḇekekef mor anya kyekef wos ya. ¹⁵ Snonkaku ro nyan andir ro moḇ wos ya ḇyeḇekekef ro nanya, isoine ḇemnaf wos ya, raimnai biris ya ryama pyoser wos insandi simnaf anna bur si. ¹⁶ Rarirya kako mor ḇeḇeḇekekef ro moḇ ḇeḇe karui isoine, snonkaku ḇemnaf ma ḇeryaḇ fasau wos anna fa sna na. ¹⁷ Fama wos anya ḇye rares ḇa inja kyain kawan ḇa. Rofyor kandera ma marindi nkur si snar siso wos refo ya inja sisusu beri. ¹⁸ Ma mor ḇese ḇesapi ro mbron kaḇrai borek, isoine ḇemnaf wos ya, ¹⁹ raimnai makakak faro supswan ma faraurowes nana ma raryaḇ faro roi ḇese nsun ma nposer wos anya isof ḇye bon ḇa. ²⁰ Ḇarpur kaku mor ḇesapi ro saprop ḇepyum, isoine snonkaku ḇemnaf ma ḇekram wos anya isof wos anya ḇye bon, ono ne bon samfur rikior, ono ne bon samfur riwonem ma ono wer ne bon utin oser." ²¹ Ma Yesus ikofen faro si ḇo doḇe: "Snonkaku spam padamara fa srir i ro bade ya baḇdi ḇa roḇaido kamboi anenef ro ya baḇdi ḇa, ḇoi sriri ro kadadu ḇyedi. ²² Snar roi oso ipok iyokef ḇa ḇoi na kam nnbair ro sananai ya, ma roi oso ḇye ḇefamyun ḇa snar na kaem nnfababa. ²³ Mansei ḇeḇe kna fa imnaf ido imnaf naḇye!" ²⁴ Raimnai ikofen wer ḇo doḇe: "Mkokara roi mkomnaf na! Warnkyara mkoḇukkara naek mkoḇesi nari ssḇuki dakkara au kako ma nari isyadi wer faro au. ²⁵ Snar mansei ḇesma roi ono ido nari ssḇuk faroi wer, imboi mansei ḇesma roi ono ḇa, rosai wer isma na nari ssun na buri." ²⁶ Raimnai Yesus doḇe: "Ḇaḇesasoser Allah moḇ ryaya isoine: imnis raris snon beḇuḇer mor ro saprop, ²⁷ posa roḇ-meser denef ma ikḇok, imboi mor ḇyuḇer ansya sikpireu, sisur ma sikaki, ḇeker anya fyaun warek si ḇa. ²⁸ Sup ro saprop ya do i so ḇeḇuk bon, randak ya ne yof, ne yorem, ḇarpur ne bon posa nakraf. ²⁹ Rofyor bon anna nnmas kwar snon ḇeker anya kyaruk na snar fafisu afuf ya imnis kwar." ³⁰ Yesus ikofen wer ḇo doḇe: "Kuker rosai koḇuk karkara mura ro Ḇaḇesasoser Allah ya, oroḇaido kuker wos sarḇer rosai koḇuki ikofen fasnai ya? ³¹ Ḇaḇesasoser anya imnis raris sasawi mor ssḇuḇer ro saprop ya ḇo. Sasawi mor ya iso ḇebaḇa syadi mor rokaker ḇese kam ḇero sup ya bori. ³² Ḇape rofyor ssḇuḇeri isur ma iba syadi rofaran ḇese na kam ma ḇye snau ḇeba, isof man ḇero farsyos sya ssmun narem ro kadaun ḇyena." ³³ Kuker wos sarḇer ḇeḇor ḇera dine Yesus fyarkor wos ya faro si imnis raris fawawi sena, ³⁴ rarirya Yesus fyarkor kawasa ansya kuker sarḇer monda, ḇape faro manfamyan ḇyesi kada fyasna ḇair kankunes ro sarḇer anna kame. ³⁵ Ro ras anya mun mandira ya Yesus ikofen ḇe si ḇo doḇe: "Mkorama kokaḇor ḇe ḇar iwara." ³⁶ Skobur kawasa ḇeḇor ansya ḇo skokaḇor ma wai ḇese kako nakso Yesus. ³⁷ Fyoro ḇa wam doḇer ma bak na nek ro waiya ra fanam imsar. ³⁸ Fafisu ya Yesus denef ḇo fyak noraya ro waiya urndi. Ma manfamyan ḇyansya ssḇani ḇo sikofen ḇo soḇe: "Mankorari yo, au ma ḇefandun ko ḇa ḇo na koro!" ³⁹ Yesus ikḇok ma myunwarek wam ya ma ikofen faro danosen ya: "Wamnai! Wa-brin!" Ma wam anya imnai beri ḇo danosen anya iḇrin dam. ⁴⁰ Raimnai ikofen faro si ḇo doḇe: "Snaro mko mkak mankenem rarirya?" ⁴¹ Simkak kaku ḇo sawos yae ro mankun si: "Inja snon saisoine, isof wam ma danosen ya kako nakso wos ḇyena?"

¹ Ma skofyafer ro danosen ya ḇar iwara ro sup kawasa Gerasa sya sedi. ² Yesus dado bur waiya rande beri, snon rur ḇemaḇak sisower oso rya ker kubir na muma fa isrou Yesus. ³ Snon anya ikenem ro kubir anna snar snonkaku yo syambraḇ fa iyaḇek i ḇa, snar siyaḇek i kwar kuker wanka, ⁴ apyaur fama pyauk ma imerdawdiwer na, isof snonkaku yo syambraḇ fa fyadurui ḇa. ⁵ Ras roḇ imbran ḇyediwai ro kubir ma urek na ḇo ḇoi fyararar ma ikoḇ mankundi kuker karui. ⁶ Yesus ḇyinkwan kaker ḇesya ḇo myam raroi, inja ifrar fa isroui ma ḇyan suba faro Yesus, ⁷ ma dar naba ḇo doḇe: "Nyaki rosai ḇekur au ma aya, ne Yesus Manfun Allah ḇekaki syadi? Kuker snonsnon Allah Wafrur susa awer aya!" ⁸ Snar rofyor Yesus ikofen kwar faro i ḇo doḇe: "Ne, au rur ḇemaḇak, wasasyar bur snon ine!" ⁹ Raimnai ifuken snon ani: "Snombri so?" Kyarem ḇo doḇe: "Snonsnon ayeja isoine syaran-syaran snar inkobore." ¹⁰ Snon rur ḇemaḇak sya ssour anya dor samsom insa Yesus iyaw awer rur ḇemaḇak ansya bur sup ani. ¹¹ Ro diya randip nai yo simbran ssewar nanan ro urek fuwar oso, ¹² inja rur ḇemaḇak ansya ssor faro Yesus ḇo soḇe: "Wawan inko fa inkosun ro randip siwa!" ¹³ Yesus ḇyuk raris fararyor seja ma rur ḇemaḇak ansya sisasyar bur snon anya fa ssun ro randip ansi. Randip nai anya soper ro fofen ya ma simsar kam ro danosen ya ma simar: barbor seja fanam syaran risuru. ¹⁴ Raimnai ḇewaren warek randip ansya sifrar ḇe mnu ḇeḇa ma mnu-mnu mawa fa sḇaryas inja kawasa ansi sisasyar fa sakmam rosai ḇeḇe jadi kwar ya. ¹⁵ Srama faro Yesus ma smam snon rur ḇemaḇak sya ssour anya kyain, syansun i ma iknon dam, ḇape simkak. ¹⁶ Snonkaku ḇemam roi ḇeḇe jadi anna sfarfyar faro ḇerama babo ansya rosai ḇeḇe jadi kuker snon rur ḇemaḇak sya ssower anya ma randip ansi. ¹⁷ Simnaf rarirya sor faro Yesus insa ibur sup sedi. ¹⁸ Rofyor Yesus dek wer ro waiya snon insanja rur ḇemaḇak ssour anya dor faro Yesus insa imarisen ido iso I. ¹⁹ Yesus iso marisen ḇyedi ḇaḇoi ikofen faro i ḇo doḇe: "Wabur ḇe rum bedi ma kawasa ḇero mnu bedi ma ḇaryas faro si roi ḇeḇor Manseren Allah ifrur kwar faro au ma rariso Allah fyasna saswar ḇyedi faro au." ²⁰ Snon anya ibur ma fyawar ro sup Dekapolis roi ḇeḇor Yesus ifrur kwar faro i ma si kam sikandor. ²¹ Yesus skokaḇer ker Gerasa skofyafer ro Kapernaum wer kawasa sibor srama sisrou i. Isya kaker ro danosen andir ya. ²² Mananir rum nadi oso ryama, snonsnon ḇyedi isoine Yairus. Fyor myam Yesus, ḇyan suba ro ḇarpon ḇyedi, ²³ ma dor faro i ḇo doḇe: "Inai iyeja iduf marḇak ma fyanam imar, rwama kada insa pan ro i fa iprei ma ikenem wer." ²⁴ Inja Yesus iso snon ani. Kawasa donek ḇefnak ḇa sakso i, ma sifyos epen Yesus. ²⁵ Ro fandu kawasa ansya bin oso isya iduf dafduf rik taun samfur seser risuru kwar, ²⁶ rarwan nabor kwar ifrauk dokter sibor fa ssḇuk aryawin ro dafduf ḇyedi isof nana ḇyena naḇro fama iprei ḇa ḇoi dafduf anya iba syadi wer ro randak ya. ²⁷ Imnaf abar kwar ro naek ḇyesi ro Yesus fararur ḇyena inja ro fandu kawasa ḇeḇor ansya ryama fyanam Yesus kruri ma pyan ro sansun syatu Yesus ḇyena, ²⁸ snar kyara ḇo doḇe: "Rofyor yapan monda ro sansun ḇyena nari yaprei." ²⁹ Fafisu ya beri dafduf ḇyeja imnai ma ḇyaḇir baken ḇyeja iprei kwar. ³⁰ Ro fafisu ya beri Yesus ḇyaḇir samambraḇ ono nasasyar bur i, inja isiḇer fa myam sewar ro fandu kawasa ansya ma ifuken: "Mansei ḇepan ro sansun syatu ayena?" ³¹ Manfamyan ḇyesya sikofen ḇo soḇe: "Mam kawasa ḇeḇor sine sifyos apepen au ḇesya ḇo: wafuken mansei ḇepan ro aya?" ³² Ḇape Yesus myam yar-yar fa fyawi manseiso ḇepan ro i nya. ³³ Bin anya imkak snar ifawi rosai ḇeḇe jadi kwar ro i, inja ḇyan suba ro Yesus ḇarpon ḇyedi ma kuker napnapes ikofen ḇadir faro Yesus. ³⁴ Yesus ikofen faro bin anya ḇo doḇe: "Ne, inai Yedi, kakyar beja ḇyuk aski faro au. Wabur kuker aski ma waprei ro dafduf bedi!" ³⁵ Rofyor Yesus dawawos kaker, snonkaku ono kina mananir rum nadi anya ḇyansya srama sikofen ḇadir ḇo soḇe: "Inai banya imar kwar inja wafrur susa awer mankorari I." ³⁶ Ḇape Yesus ḇyefandun wos sena ḇa ḇoi ikofen faro mananir rum Ari anya ḇo doḇe: "Wamkak awer, wakyar monda!" ³⁷ Raimnai Yesus damrer ono siso indi, ḇoi derer kuker Petrus, Yakobus ma Yohanes Yakobus ḇedari ḇyedi. ³⁸ Skorama ro mananir rum nadi anya rum ḇyedi ma Yesus myam kawasa sya sembrus, skanes kuker mkarem ḇeba. ³⁹ Yesus syun ro rum anya ma ikofen faro kawasa ansya ḇo doḇe: "Snaro mkoḇe mbrus ma mkokanes? Inai ine imar ḇa ḇoi denef!" ⁴⁰ Ḇape simbrif i. Ma iyaw kawasa ansya raimnai dun inai anya snari ma kmari ma suiso ḇeso i randum ro sim inai anya ḇyedi. ⁴¹ Ma Yesus kyin inai anya ḇrasi ḇo ikofen ḇo doḇe: "Talita kum," isoine: "Ne inai aune, yakofen faro au, wakḇoke!" ⁴² Fyor ya beri inai anya ikḇok fa dores ma imbrane, snar ḇye umur taun samfur seser risuru kwar. Kawasa ḇero diya nansya kam sikandor fafaya ḇa. ⁴³ Yesus danun pakrek kaku faro si insa oso ifawi awer roi nane ma iwan fa sfan inai ani.

¹ Ḇarpur Yesus kuker manfamyan ḇyesya ssraḇe mnu marin ḇyedi. ² Ro ras Mananai Yahudi, Yesus ḇyuk farkarkor ro rum Ari ḇero Nazaret ma kawasa Jemaat ḇeba anya sikandor snar simnaf farkarkor ḇyena, inja sikofen ḇo soḇe: "Moḇ saiso isma roi ḇeradine ro ya? Fawawi sanaiso ssḇuk faroi? Isof ifrur aḇyair ḇefrur kanandor ḇera dine kuker ḇramin ḇye suine? ³ Ko kam kofawi i ḇe sukan ai, Maria romawa ḇyedi, naek ḇyesi so Yakobus, Yoses, Yudas ma Simon? Ma kofawi kako srar ḇyesya sisya ro fadu ko?" Ro diya snar siwarki i mura siyaw i. ⁴ Inja Yesus ikofen faro si ḇo doḇe: "Nabi oso se mafi ro moḇ na kam, ḇoi ro mnu ḇyedi ma fandu kawasa ḇyesi ma rum ḇyedi, sefandun mankuni ḇa." ⁵ Yesus Imewer ifrur aḇyair kanandor oso ro diya ri, imboi ḇyuk pararei faro ḇeduf ri ḇeso monda kuker pyan ro si. ⁶ (6a) Yesus Kyara si ma ikandor snar kakyar ḇa sena. (6b) Raimnai Yesus Imbran yar mnu ḇe mnu fa ḇyuk farkarkor. ⁷ Yesus dor manfamyan samfur seser risuru ansya ma iwan si fa se suru-suru. Ḇyuk samambraḇ faro si fa ssḇuki yau rur ḇemaḇak sya, ⁸ ma danun faro si insa ssun awer roino ro marandan sedi, ankyon na manda, mboi ssun awer mamami, ssun awer roi ḇeḇaryam, ssun awer kako pipi ma ḇeḇoḇek sena. ⁹ Mkowemna kada mkosower na mboi mkun sansun risuru ḇa. ¹⁰ Yesus dawos pdef faro si ḇo doḇe: "Mkorafa ro moḇ oso ra simarisen fa mkosun ro rum oso ido mkokain ro dia isof mkosasyar bur wer ro moḇ ani. ¹¹ Imboi ro moḇ oso simarisen mko ḇa ma simewer srower mko ido ro moḇ anya mkokokef fafen ḇero mkowemna fa ne aḇyair faro si." ¹² Inja sra ma ssḇaḇdas faro kawasa sya fa simbror, ¹³ ma siyaw rur ḇemaḇak sibor ma ssrem ḇeduf sibor kuker mani ma ssḇuk pararei faro si. ¹⁴ Wairek Herodes i kako dakmnaf Yesus snar Ḇye snonsnon ma kawasa sikofen ḇo soḇe: "Yohanes Ḇemasi diḇri ro fandu ḇemar sya ḇefnai samambraḇ-samambraḇ na nafararur roi." ¹⁵ Ono soḇe: "Elia i ri!" Ḇese sya wer soḇe: "Nabi sya oso irya ke imnis raris nabi ro ḇepon iwara." ¹⁶ Rofyor Herodes imnaf rarirya ikofen ḇo doḇe: "Roḇa, Yohanes yaperem uk sasukor anya irya, i so ḇeyiḇer wer i." ¹⁷ Snar kaku Herodes i ḇewan fa sfor Yohanes fa se wanka i ḇo ismai ro bui snar dun Herodias ḇedar ḇyeja Filipus swar i, fa fyakawini. ¹⁸ Snar fafisu oso Yohanes fyarkor Herodes ḇo doḇe: "Swasar snar wun ḇedar beja swa ḇyedi!" ¹⁹ Knam ḇeḇedar fa Herodias imsor famyun Yohanes ro sneri ḇo syewar nyan fa iḇe myun i fama jadi ḇa, ²⁰ snar Herodes ḇyemaf Yohanes i snar ifawi Yohanes snonkaku ḇenapes ma ḇesren inja fyadiren i. Ḇape rofyor imnaf sap Yohanes sneri ḇyefisfyas, rarirya no imarisen imnaf i. ²¹ Herodias insape isma fafisu ḇepyum ya rofyor Herodes ifrur munara ya warek ras ḇyeja faro ḇebarara ḇyesi, mambri sya ma snonkaku ḇeḇe snonsnon ro sup Galilea sya. ²² Ro munara anya Herodias inai dojaru ḇyedi Salome ryarpon ifyer ro ḇebarara ansya ḇarpon sedi. Wairek ikofen faro inai anya ḇo doḇe: "Wor rosai wamarisen ya ro aya imba na yaḇuk na ḇe au!" ²³ Ma ḇye syasi faro inai ḇyanya ḇo doḇe: "Rosai waḇe wor kaker ro aya, nari yaḇuk i faro au, ḇaḇesasoser ayeja ḇar ya iryano yaḇuk i kako!" ²⁴ Inja inai anya rya ifuken snari ḇo doḇe: "Rosai nari yor ḇesyani?" Snari doḇe: "Wor Yohanes Ḇemasi ḇruri!" ²⁵ Rarirya fasau kaku inai anya rya faro wairek ma dor ḇo doḇe: "Yamarisen insa ro knikine beri buk Yohanes Ḇemasi ḇruri ro ben oso ḇe aya!" ²⁶ Fafisu anya wairek sneri ḇye susa namsin ḇa, ḇape snar syasi ḇyedi, ma snar ḇebarara sya fyadwer fararyor anya ḇa. ²⁷ Wairek iwan fasau snon-mamun ya ḇe bui, kuker sasoser insa rya pyerem uk Yohanes ḇruri. Snon anya rya pyerem uk Yohanes ḇruri ro bui. ²⁸ Snon anya dun Yohanes ḇruri ro ben ya ma ḇyuk i faro inai ani, ma inai anya dakun i faro snar i. ²⁹ Rofyor Yohanes manfamyan ḇyesya simnaf marmar ḇyeja srama ssun baken ḇyeja fa serak i ro kubir. ³⁰ Fyoro ḇa manfamyan Yesus ḇyansya sisiḇer ma siryur kuker Yesus wer ma sfarfyar faro i roi ḇeḇor sifrur ma sfarkor na. ³¹ Inja ikofen faro si ḇo doḇe: "Mkorama kosewar moḇ ḇeḇeursḇa insa kemir ma komnaisu ko resari!" Snar snonkaku ḇeramuma ma ḇeramura sibor kaku isof skosma fafisu ḇa kako fa skonan. ³² Inja skek wai ya ḇo skora ḇe moḇ ḇeḇeursḇa oso. ³³ Ḇape ro fyor skek wai ya kawasa sibor smam sko, ma sifawi moḇ skora yoḇ ya. Inja simbran ro nyan bera ḇande ya ma fasaw monda kawasa ḇera ker mnu ḇeba sibor spon sko raro moḇ skoḇe skora yoḇ ani. ³⁴ Ro fyor Yesus isabu ro wai ya munde, myam kawasa dandonek ḇefnak ḇa ansya inja iswar si, ḇyuk simnis domba ḇena manfakwak ḇa. Inja fyarkor si ro roi nabor. ³⁵ Snar fanam roḇ kwar manfamyan ḇyansya sra faro i ma sifuken ḇo soḇe: "Moḇ ine ḇyeursḇa ma fanam roḇ kwar. ³⁶ Inja wawan si fa sibur insa sskoḇes roḇeyan ḇesi ro mnu-mnu ḇefanam-nam nane." ³⁷ Ḇape Kyarem faro si ḇo doḇe: "Mkoiso nari ḇeḇuk nanan faro si!" Sikofen faro i ḇo soḇe: "Donek ḇeḇa ḇera dine koḇoḇ dinar utin risuru wer kako fa kofan si nari imnis ḇa kako." ³⁸ Ḇape ikofen faro si ḇo doḇe: "Mamami rifisi mkun ya? Indo mkomam pan!" Rofyor smam kwar sikofen ḇo soḇe: "Mamami ririm ma in risuru." ³⁹ Rarirya Yesus iwan fa kawasa ansya skain fa se uk-ukem ro aḇris sya bonsi. ⁴⁰ Ma uk-ukem anna ono ne utin oser ono wer ne samfur ririm. ⁴¹ Ma Yesus dun mamami ririm ma in risuru kwar, iwakwaker ḇe nanki ma isawar dofen roḇean anna posa, pyanasnis na ma ḇyuk na faro manfamyan ḇyansi, insa sirarwas na faro kawasa ansya kam; rarirya kako in risuru ansui. ⁴² Kawasa ansya sanan kam isof sarbor. ⁴³ Raimnai siryur roḇeyan ḇedawer na ma sisma inawen samfur seser risuru nafo, in sya ḇeso. ⁴⁴ Kawasa snon ḇeyan mamami ro ras anya sya si kam se syaran ririm. ⁴⁵ Posa kwar Yesus iwan fasaw manfamyan Ḇyesya fa sek ro wai ḇo spon i ḇe danosen ya ḇar iwara ḇe Betsaida, ma iwan kawasa ḇeḇor ansya fa sibur. ⁴⁶ Rofyor sibur ḇesisye kwar, Yesus dek urek ya fa ḇye nadi. ⁴⁷ Roḇ kwar wa anya isya ro danosen ya faduri, ḇoi Yesus demir ro ḇande. ⁴⁸ Rofyor ya myam doḇer ya myun manfamyan ḇyansi, simbrar ḇe moḇo ḇa snar wam ya iso ro wai rawer, ma indokada oras kior, imbran ro war ya bori fa rya warek si. ⁴⁹ Snar imbran ro war ya bori, soḇeda faknik riri, inja simkak ḇo sar naba kam. ⁵⁰ Snar smam kami eḇedari sikandor. Ḇape Yesus ikofen faro si ḇo doḇe: "Mkoknon! Ayairya, mkomkak awer!" ⁵¹ Rarirya dek ro wai ya fa isrow si ma wam anya iḇrin bos beri. Sisnesna ne fesfyas ma sikmom. ⁵² Snar nanan mamami ḇefrur kanandor anya isya ḇye karkara kaker faro si ma siwarki ro sisnesna. ⁵³ Skofyafer kwar Yesus ma manfamyan Ḇyesya skorande skopyar ro Genesaret. ⁵⁴ Fafisu ya skado bur wai ya, kawasa ansya smam bir Yesus I. ⁵⁵ Inja sifrar sikofen ḇair faro kawasa sya kam ro sup ani, ma sun ḇeduf sesya ro waryar faro Yesus ro moḇ simnaf Yesus isya ryo ya. ⁵⁶ Moḇ rya yoḇ na kam ḇe mnu-mnu ma mnuḇeba-mnuḇeba kawasa srir ḇeduf sesya ro nyan andir ma sor samsom faroi, insa imarisen fa span monda ro syatu Ḇyeja pusyom na. Ma kawasa kam ḇepan roi siprei.

¹ Fyor oso snon Farisi ono ma ḇefawi nananem Refo Yahudi ono ḇera ker Yerusalem srama faro Yesus. ² Smam Yesus manfamyan ḇyesya ono sanan kuker ḇramin bemamas, isoine sḇan ssibras na ḇa. ³ Snar Yahudi Farisi ansya simnis Yahudi ḇesesya, sanan ḇa ro fyor sḇan ssibras na ḇaim, snar se user rari up sesi ro ḇepon. ⁴ Ma rofyor skaḇer ker pasar sipok sanan ḇa kako snar simasisren si ḇaim. Rari ḇeḇe waris ḇera dine nabor kaker, ḇeraris ḇan-ḇan sek, fyom, ma rosaser sifrur ro kansai. ⁵ Naiso ḇeḇe knam fa Farisi ma ḇefawi nananem Refo Yahudi sifuken Yesus ḇo soḇe: "Snaro manfamyan ḇesya sakḇe user kpu koḇesya rari sena ḇa, ḇoi sinan kuker ḇramin ḇemamas?" ⁶ Yesus Kyarem faro si ḇo doḇe: "Kaku ra moḇ Nabi Yesaya ḇyardi mko ra ya, snonkaku ḇarḇor ḇekenem kuker rari ḇekaku ḇa! Snar fas-fas oso ryok ḇo doḇe: Kawasa sine ssom aya kuker sḇardip monda, ḇape sisnesna nnḇinkwan bur aya. ⁷ Fainda oso ḇa sḇe ari faro aya, snar farkarkor sḇukna sasoser snonkaku nairi. ⁸ Allah sasoser ḇyena mkoḇe rer na, ḇoi mkuf rari snonkaku." ⁹ Yesus ikofen faro si wer ḇo doḇe: "Mkofawi nananem kaku isof mkosaun Allah sasoser Ḇyena insa mkofaduru rari mankun mkoḇena." ¹⁰ Snar Moses dakkofen kako ḇo doḇe: "Be maf kmami ma snami! Imboi: mansei ḇefras kmari roḇa snari kada na imar. ¹¹ Ḇape mkokofen ḇo mkoḇe: Rofyor oso ikofen faro kmari roḇa snari: rosai yana fa yaḇuki fyaduru mu, yaḇuk na nnfarser isoine samsom faro Allah, ¹² imboi mkorir si ḇaḇeri fa sifrur roi oso faro kma sesi roba sna sesi. ¹³ Rariya Allah wos ḇye mkofarkor ya mkoso i ḇa, snar mkoso syadi rari mkoḇena. Ma roi ḇerarirya kaker naiso mkofrur na." ¹⁴ Raimnai Yesus dor kawasa ansya ma ikofen faro si ḇo doḇe: "Mko kam mkomnaf faro aya, ma mkokram pyum wos Yakofen nane. ¹⁵ Rosai rya wer ḇero ḇondi, ma ḇesun ro snonkaku sya oso, napok nafrur mamas si ḇa, ḇoi roi ḇesasyar ro snonkaku sya naiso ḇefrur mamas na. [ ¹⁶ Mansei ḇeḇe knaram fa ḇyukrower iḇye ryower pyum!]" ¹⁷ Ro fyor Yesus syun ro rum oso fa ryir kawasa ḇeḇor ansya, manfamyan ḇyesya srama fa sifuken kankunes ḇero wos sarḇer ani. ¹⁸ Rarirya Yesus kyarem faro si ḇo doḇe: "Inja mko kako mkakfawi kankunes ḇyeja ḇa ke? Mkofawi roi ḇeḇor ḇero ḇandi fa ḇesun ro snonkaku sya napok nafrur mamas snonkaku sya ḇa. ¹⁹ Snar roi ḇesun anna nnsun ro kakara sena ḇa ḇoi nnsun ro sasop sena posa sisawen na ro akyek!" Rarirya Yesus fyasna roḇean nakam nasren. ²⁰ Ikofen wer ḇo doḇe: "Rosai ḇesasyar ro snonkaku sya na kada nafrur mamas si. ²¹ snar roi ḇero sne snonkaku nasasyar ro swaruser ḇarḇor, nafsu kraf, karau, mamun, ²² farḇakḇuk, rmomen, ḇarḇor, ankarkar, nafsu kraf, masasor anonef, kafkofen, marares, ḇaḇe dip. ²³ Roi ḇeḇyeḇa ḇera dine nek ro sne karkara ma naiso ḇefrur mamas snonkaku sya." ²⁴ Raimnai Yesus imbran ro dia ma ryaḇe sup Tirus. Rya ro Tirus syun ro rum oso ro mnu ifyafer ro ya kuker kankunes, insa kawasa sya sifawi awer raramuma Ḇyedi. ²⁵ Imboi bin oso inai ḇyeja rur ḇemaḇak ya isawoḇer i, imnaf Yesus ryama, mura ryama ḇyansuba ro wessu. ²⁶ Bin anya bin Yunani er Siria-Fenisia. Bin anya dor samsom faro Yesus insa Iyau rur ḇemaḇak ḇesawoḇer inai ḇyedi. ²⁷ Ma Yesus ikofen faro i ḇo doḇe: "Ipyum syadi romawa ḇena roḇean na sya sarbor resari, snar roḇean ḇefasos faro romawa sya kopok kosawen na faro naf sya ḇa." ²⁸ Ḇape bin anya kyarem faro Yesus ḇo doḇe: "Kaku ḇaḇoi Manseren, ḇape naf ḇero meja ya baḇdi sya kako sakan roḇean mom romawa sya san ḇo ḇesapi na." ²⁹ Inja Yesus ikofen faro bin anya ḇo doḇe: "Snar wos ḇena, rwamura beri, inari rur ḇemaḇak anya isasyar kwar bur inai bani." ³⁰ Bin anya ibur ḇe rum ḇyedi, ma isrow inai ḇyeja ḇyarek ro anenef ḇyedi ḇoi rur ḇemaḇak ya ibur i kwar. ³¹ Raimnai Yesus ibur sup Tirus imbran uk Sidon fa ryaḇe danosen Galilea, dun uk sup Dekapolis faduri. ³² Ro diya kawasa sya ssun snon ḇepro ma ḇewos kir ḇa faro Yesus ma sor faro Yesus insa Isawar dofen snon ani. ³³ Ma rofyor Yesus dun snon anya fa subur kawasa ḇeḇor ansya raimnai isu ḇrampinsi ro snon anya knaram ḇyeja ma daninef ro ḇrasi posa pyan ro ramar ḇyedi. ³⁴ Raimnai Yesus myam ḇe nanki ma imnai ḇe do ma ikofen faro snon anya ḇo doḇe: "Efata!" isoine: Base! ³⁵ Rofyor anya beri knasi ḇyas ma ramar ḇyeja kako imarmer ma dawos pyum. ³⁶ Yesus ikofen faro kawasa ḇero moḇ ya insa sfarfyar awer faro manseirya wer kako. Ḇape rofyor Yesus myun warek si insape sḇaryas syadi wer. ³⁷ Sikandor ma sikmom ma sikofen ḇo soḇe: "Ifrur roi ḇeḇor nakam napyum kaku, ḇepro sya srower, awer sya ḇyuk fa sawos wer."

¹ Rofyor anya kawasa sya sibor kaku sisya ro moḇ ani, ma snar sisma nanan ḇa inja Yesus dor manfamyan ḇyesya ma ikofen faro si ḇo doḇe: ² "Sneri iswar kuf kawasa ḇeḇor ansine. Ras rikior siso farma aya ḇape sisma nanan ḇa. ³ Ma rofyor Yawan fa sibur ḇe rum sena kuker basbiser ido nari ono sisapi snar ono sra ker moḇ ḇeḇinkwan." ⁴ Manfamyan ḇyesya skarem faro i ḇo soḇe: "Rariso ro moḇ ḇeḇeursḇa ine nari kofan si kuker mamami isof sarbor kam?" ⁵ Yesus ifuken faro si ḇo doḇe: "Mkosma mamami rifis?" Skarem ḇo soḇe: "Mamami rifik." ⁶ Raimnai iwan kawasa ansya fa skain kame. Posa dun mamami rifik anna ma ḇye nadi kuker na ra posa pyanasnis na ḇo ḇyuk na faro manfamyan ḇyesya fa ssḇuk ḇerwas kawasa ansi. ⁷ Sisma kako in ono ma ssḇuk si faro Yesus fa ḇye nadi kuker si ra posa sirarwas si faro kawasa ansi. ⁸ Ma san kam isof sarbor. Posa siryur mamami ḇedawer na sisma inoken rifik nafo. ⁹ Kawasa ansya kam fanam syaran rifiak. Insape Yesus iwan si fa sibur. ¹⁰ Yesus dek fasau ro wai kuker manfamyan ḇyansya fa skoraḇe sup Dalmanuta. ¹¹ Fafisu ya Farisi ono sra faro Yesus fa sifuken sye i. Mnuk ḇeḇe knam fakfuken sye ine faro Yesus, simarisen sor ro Yesus aḇyair oso ro nanki. ¹² Inja ro fafisu anya fiafayaf ro sneri ma ikofen ḇo doḇe: "Snaro syos ine mkor aḇyair? Yakofen wos ḇekaku faro mko, faro syos ine jadi fa mkosma aḇyairo ḇa." ¹³ Posa Ibur si; dek ḇe wai anya wer ma sskobur ḇe danosen ya ḇar iwara. ¹⁴ Ro fafisu anya Yesus manfamyan ḇyesya se pro ssun mamami faro nanan sena. Smam rosaser seja mamami oser baken monda ro wai ya. ¹⁵ Yesus ḇyuk swarapepen faro si ḇo doḇe: "Mkowaren ma mkepen mko roi yar roi ḇefrurpis kawasa Farisi ma roi ḇefrurpis Herodes." ¹⁶ Inja skara ma sikofen yae faro si ḇo soḇe: "Dawos rarirya snar koḇe pro kokoḇes mamami faro ko." ¹⁷ Rofyor Yesus ifawi rosai ḇeḇe knam sawos yae ro mankun si, ikofen faro si ḇo doḇe: "Snaro mkawos yae mko ro mnuk mamami ḇa? Inja mkofawi ḇaim kaker ke? Mkosnemna napakrek kaker? ¹⁸ Mkoḇe mkamor ḇape mkomam ḇa, mkoḇe knaram fama mko mnaf ḇa kaker? ¹⁹ Mkoswar epen fafisu yapanasnis mamami ririm faro snonkaku syaran ririm ya ḇake, mkoryur ḇedawer na inawen riḇeso skofo?" Skarem ḇo soḇe: "Inawen samfur seser risuru." ²⁰ "Ma rofyor mamami rifik faro snonkaku syaran rifiak, ḇedawer na mkoryur inawen rifis?" Skarem ḇo soḇe: "Inawen rifik." ²¹ Ma Yesus Ikofen faro si ḇo doḇe: "Inja mkofawi ḇaim kaker?" ²² Ḇarpur Yesus kuker manfamyan Ḇyesya skorama ro Betsaida. Ro Betsaida kawasasya ssun snon ḇepraf oso faro Yesus ma sor faro Yesus insa pyan ro i. ²³ Yesus ikfin snon ḇepraf anya ḇo duni ḇe mnuya ḇondi. Surandi kwar Yesus daninef ro snon anya mkasi posa ryir ḇrasi ro snon anya ḇo ikofen ḇo doḇe: "Inja mam roino kwar ke?" ²⁴ Snon anya myam ḇe ḇarpon ma ikofen ḇo doḇe: "Yamam snonkaku sya simbran farma, ḇape sisnai imnis aiknam bembran farma." ²⁵ Yesus ryir ḇrasi wer ro snon anya mkasi ma myam bos beri ma iprei isof myam ḇaḇir roi ḇeḇor na kam. ²⁶ Raimnai Yesus iwan i fa ibur ḇe rum ḇyedi ma ikofen ḇo doḇe: "Swun ḇe mnu ya awer!" ²⁷ Raimnai Yesus kuker manfamyan Ḇyesya skora wer ḇe mnu ḇefanam sup Kaisarea Filipi. Ro marandan anya Yesus ifuken manfamyan Ḇyesya ḇo doḇe: "Kawasa sya soḇe manseiso aya ine?" ²⁸ Skarem faroi ḇo soḇe: "Ono soḇe Yohanes Ḇemasi, ono wer soḇe: Elia, ono wer kako soḇe: oso ro fandu nabi-nabisya." ²⁹ Yesus ifuken wer faro si ḇo doḇe: "Imboi mko ido rosai mkakkofen ro aya?" Inja Petrus kyarem ḇo doḇe: "Au ido Wairek!" ³⁰ Raimnai Yesus myun warek si insa sikofen ḇair awer faro mansei rya wer. ³¹ Raimnai Yesus fyarkor randak faro si, nari Rumkun Snonkaku ya isma marindi nabor ro ḇebarara sya ma mananir Imam ḇefawi nananem Refo Yahudisya simeweri ma smuni, ḇape nari diḇri ro ras ḇeḇe kiorya. ³² Marindi nari ḇekur i na ikofen bos na. Inja Petrus ismer Yesus ḇe ḇondi ma imsor I. ³³ Raimnai Yesus iknenef fa myam yoḇ manfamyan Ḇyesya ma Imsor Petrus i ḇo doḇe: "Ne, Biris wabur aya, kwara roi Allah Kyara na ḇa ḇoi kwara karkara snonkaku." ³⁴ Raimnai Yesus dor kawasa ḇeḇor ansya ma manfamyan Ḇyesya ma ikofen faro si ḇo doḇe: "Snonkaku mansei ḇemarisen ḇeso aya iḇye kada ḇye pro mankundi ḇo ḇyar aprop ḇyedi ma duser aya. ³⁵ Snar mansei ḇeyoḇe ḇefaspar kankenem ḇyedi nari kankenem ḇyedi ryo buri; ḇoi mansei kankenem ḇyeja ryo bur i snar aya ma snar Ankankinem Ḇeḇye ya, nari isma kankenem ḇyedi. ³⁶ Fainda rosai snonkaku oso nya ḇesiper supswan ḇoi, kankenem ḇyeja ryo buri? ³⁷ Ma nari rosai isma fa ḇyuk farwe kankenem ḇyedi? ³⁸ Snar mansei ḇemai aya ma wos ayena ro fandu syos babo ḇesapurnak ma ḇesasar mko ine, Rumkun Snonkaku ya kako nari dakmai snas rofyor ifyafer kuker payamyum Kmari ḇyena ma malaikat ḇesren sya siyakeri muma ya."

¹ Ikofen wer faro si ḇo doḇe: "Yakofen wos ḇekaku faro mko, ro fandu snonkaku ḇeryur sine ono nari simar ḇa isof sakmam Ḇaḇesasoser Allah ḇerama kuker papok kwar." ² Ras riwonem nawas ido Yesus dun Petrus, Yakobus ma Yohanes sko ḇo skek bon ḇekaki oso. Ro moḇ anya skerer monda. Rofyor anya Yesus Fyadwer mankundi ro ḇarpon mamam skoḇena, ³ ma syatu Ḇyena napioper bos ma nasnaper. Bepapap sansun ro supswan ine oso fa nari pyap saranden rarirya ḇa. ⁴ Skomam wer Elia ma Moses suyawawos kuker Yesus. ⁵ Petrus ikofen faro Yesus ḇo doḇe: "Raḇi, marisen ḇefnak ḇa koro moḇ ine. Iḇye kada nkofrur aḇdares rikior, oso ḇe au, oso ḇe Elia ma oso ḇe Moses." ⁶ Ikofen rarirya, snar ikmom rosaiso iḇe ikofenya, snar skomkak mankenem. ⁷ Fyor anya mandep oso ryama isawoḇ sko ma mkarem oso ryok ro mandep anya ḇo doḇe: "Ine ma Manfun saswar ayedirya, mkomnaf I." ⁸ Fyoro ḇa skomam snonkaku ono sisya sifnoḇek sko ḇa ḇoi Yesus derer. ⁹ Rofyor skado bur bon ani, Yesus ḇyeasas insa skofar awer faro snonkaku oso ro roi ḇeḇor skomam anna isof Rumkun Snonkaku diḇri ro kubir ro fandu ḇemar sya resari. ¹⁰ Skoswarepen asas ani ma skofuken yae sko ro rosai Yesus ikofen ḇe "aḇiḇer ro fandu ḇemar sya." ¹¹ Inja skofuken Yesus ḇo skoḇe: "Snaro snon ḇefawi nananem Refo Yahudi sikofen ḇo soḇe, nari Nabi Elia pyonma resari?" ¹² Yesus Kyarem ḇo doḇe: "Imboi Elia nari pyonma fa ḇye user roi ḇeḇor na kam resari. Imboi rariso kuker rakrok fasfas ḇekur Rumkun Snonkaku ḇeyoḇe: Nari Yesus isma marindi nabor ma sonefi? ¹³ Ḇape Yakofen ḇe mko: kaku Elia pyon ma kwar, ḇoi snonkaku sya sifrur marisen sena faro i raris moḇ nabisya ssfas kwar fa ḇekuri." ¹⁴ Ro fafisu Yesus, Petrus, Yakobus ma Yohanes skokaḇer faro manfamyan ḇese ansi, skomam kawasasya sibor siyaryar manfamyan ansya ma snon ḇefawi nananem Refo Yahudi ono sisya sfamfaḇri roi oso kuker si. ¹⁵ Fyor kawasa ansya smam Yesus, sikandor ma srama sisrow I. ¹⁶ Ma Yesus ifuken si ḇo doḇe: "Rosai mkawos faro si?" ¹⁷ Snon oso ro fandu kawasa ansya ikofen faroi ḇo doḇe: "Mankor ari ye, yun romawa yedine faro au, snar rur ḇemaḇak ya isawoḇeri. ¹⁸ Ma rofyor rur anya isawoḇeri ipyas i ro saprop ya bori ma sbari kyaḇaḇus, darek fafais nasi ma ipadadorem. Yor kwar faro manfamyan Besya, fa siyau rur anya fama sipok ḇa." ¹⁹ Ma Yesus ikofen faro manfamyan Ḇyesya ḇo doḇe: "Ne syos ḇekyar ḇa mko ine, fafisu rosai nari yarous kaker mko? Fafisu rosai kaker yakbab mko? Mkun romawa anya muma!" ²⁰ Ma ssun romawa anya faro Yesus. Rofyor rur ḇemaḇak anya myam Yesus, isasas romawani, ipyas i ro saprop ya bori ma isuwayafer ḇo ḇyai kaḇaḇus. ²¹ Raimnai Yesus Ifuken faro romawa anya kmari ḇo doḇe: "Inja iduf fyoro kwar ke?" Romawani kmari kyarem ḇo doḇe: "Ro fyor ibaḇa ya. ²² Indo rur ḇemaḇak ya ismeri fa ikuni ro for, isaweni ro war fa iḇe myuni. Inja au ma Wapok fa Wafrur roi ḇeḇorna kam, yor fa wafnoḇeki ma Waswar inko." ²³ Yesus Kyarem faro i ḇo doḇe: "Inja woḇe: na wapok ido? Faro snonkaku ḇekyar sya roi ḇeḇor na kam nari ndarirya." ²⁴ Romawa ani kmari dar naba ḇo doḇe: "Yakyare. Wafnoḇek snonkaku ḇekyar ḇa aya ine!" ²⁵ Rofyor Yesus myam kawasa sya sibor siryur yoḇ sko, iyau rur ḇemaḇak ani: "Ne, au rur ḇemaḇak ḇefrur fa snonkaku sya seawer ma siproi, Yayau au wasasyar bur romawa ine, wapok wawer wer fa swun ro i ḇa!" ²⁶ Ma rur ḇemaḇak anya isasyar ma dar naba ḇo kyakiker romawa ani namsin ḇaḇeri. Romawa ani isnai imnis ḇemar, inja kawasa sya sibor soḇe: "Imar kwar." ²⁷ Ḇape Yesus kyin romawa anya ḇrasi ma ikḇok ro mankundi. ²⁸ Rofyor Yesus syun ro rum oso, ma derer kuker manfamyan Ḇyesi, sifuken i ḇo soḇe: "Rosai ḇeḇe wari nkopok nkoyau rur ḇemaḇak anya ḇa ya?" ²⁹ Yesus kyarem faro si ḇo doḇe: "Rur ḇeḇesneya koyaui kuker nyan ḇese ḇa, ḇoi kuker nadi monda." ³⁰ Yesus ma manfamyan Ḇyesya simbran ro dia ma ssunuk Galilea ma imewer oso ifawi marandan skoḇedine; ³¹ snar imarisen fyarkor manfamyan Ḇyesya ma ikofen faro si ḇo doḇe: "Rumkun Snonkaku nari sḇoḇi faro snonkaku sya fa smun i ma ro ras rikior nawas nari diḇri." ³² Sikmom roi Yesus ikofen ya, fama simkak sifuken faroi. ³³ Yesus ma manfamyan Ḇyesya skorama wer ro Kapernaum. Ro fyor syun kwar ro rum oso, ifuken faro manfamyan Ḇyesya: "Rosaiso insandi mkofamfabri ro nyan ya?" ³⁴ Ḇape sefasis snar insandi ro marandan seja sfamfabri mansei ḇeba syadi ro si. ³⁵ Inja Yesus kyain ma dor manfamyan samfur seser risuru ḇyansya ma ikofen faro si ḇo doḇe: "Mko no doḇe fyabri fa iso ḇepon ya, iḇye syadi iso ḇepur kaku ya fa duf farmyan ḇese sya kam." ³⁶ Raimnai Yesus dun romawa kasun oso fa dores fandu si, posa fyorepen romawa anya ma ikofen ḇo doḇe: ³⁷ "Mansei ḇefaduru romawa ḇera dine snar snonsnon ayedi, i kada dakfaduru aya. Ma mansei ḇefaduru aya ido, ayaiso fyaduru ya ḇa ḇoi bewan ayanya iso fyaduru ya." ³⁸ Yohanes ikofen faro Yesus I ḇo doḇe: "Mankorari ye, nkomam snon oso ḇeyakso ko ḇa ḇape iyaw rur ḇemaḇak kuker snonsnon ḇedi, inja nkomun warek i snar dakso ko ḇa." ³⁹ Ḇape Yesus ikofen faro si ḇo doḇe: "Mkomun warek awer i! Snar snonkaku oso ḇefrur aḇyair kanandor kuker snonsnon ayedi, ipok donef aya ro fafisu ya ḇa. ⁴⁰ Mansei ḇesampum ko ḇa ikada ifnoḇek ko. ⁴¹ Yakofen wos ḇekaku faro mko, mansei ḇeḇuk war aninem sek oser faro mko snar mkuser faku Kristus i nari isma ḇaḇyak." ⁴² "Mansei ḇefarkor ninyan oso ro fandu romawa kasun ḇekyar aya sine, ipyum syadi sfes karui ḇeba ro sasuri ḇo simsaweri ro soren. ⁴³ Ma ḇramin ḇe suiya oso daw ninyan au ido kwaruki, snar iḇye wer swun ro kankenem ya kuker ḇaramuk, imbude sisawen au rofor ḇembrer ḇa kuker ḇramin ḇesiper. [ ⁴⁴ Ro moḇ anya karom sya simar ḇa ma for anya ipok imbrer ḇa.] ⁴⁵ Ma rofyor wemin besu suyau ninyan au kwaruk su, snar iḇye wer swun ro kankenem ya kuker wemuk, ipyum syadi ro sisawen au rofor ḇembrer ḇa kuker wemin besu; [ ⁴⁶ rofor anya karom sya sinanem ḇa ma for anya ipok imbrer ḇa.] ⁴⁷ Ma rofyor mkamsu suyau ninyan au, wer oso, snar iḇye swun ro Ḇaḇesasoser Allah kuker mka oser ipyum syadi sisawen au ro for ḇembrer ḇa kuker mkamsu. ⁴⁸ Ro moḇ anya karom sya simar ḇa ma for anya ipok imbrer ḇa. ⁴⁹ Snar snonkaku oser-oser nari sḇuḇrei kuker karumasen for. ⁵⁰ Fainda ro karumasen ipyum kaku ḇape rofyor ḇyuar, kuker rosai mkofruri fa miasen wer? Iḇye syadi mkomasmasen ma mkokenem kuker aski fandu min mkoḇesi."

¹ Ro dia Yesus skora ḇe sup Yudea ma war Yordan ḇar iwara ma ro dia kako kawasa sibor srama spanjuḇer I, ma raris fararur Ḇyedi Yesus fyarkor si wer. ² Snon Farisi ono sra faro Yesus fa sifrowes bir i ḇo soḇe: "Jadi fa snon oso fyaspar bur swari ke?" ³ Inja Yesus kyarem faro si ḇo doḇe: "Rariso kuker Moses sasoser ḇyena faro mko?" ⁴ Skarem ḇo soḇe: "Moses ḇyuk kwar fa ḇyeḇefaspar kuker syap ḇepampum." ⁵ Inja Yesus ikofen faro si ḇo doḇe: "Imboi snar sne ḇepakrek mkoḇena ḇeḇewar Moses fyas sasoser ḇera dine. ⁶ Snar ro awar supswan Allah ifrur snonkaku snon ma bin, ⁷ inja snon oso nari ibur kmari ma snari su ma ḇye oser kuker swari, ⁸ isof suḇe kraf oser. Rarirya suḇe baken risuru wer ḇa ḇoi suḇe oser. ⁹ Inja rosai Allah fyesepen kwar, snonkaku sya sipok sfaspar awer." ¹⁰ Ro fafisu skorandum ro rum oso manfamyan ḇyensya sifuken Yesus ro yar ine. ¹¹ Ma Yesus ikofen ḇe si ḇo doḇe: "Mansei ḇefaspar swar i, raimnai dun bin ḇese, irya ifrur far-ḇaḇuk faro swa ḇepon byedi. ¹² Rarirya kako bin oso fyaspar swari ma fyakawin snon ḇese, i kako ifrur farḇuk." ¹³ Ma kawasa sya ssun romawa kapira ono faro Yesus insa ḇye barakas si, ḇape manfamyan ḇyesya sisonek kawasa ansi. ¹⁴ Rofyor Yesus myam rarirya, imsor ma ikofen faro si ḇo doḇe: "Mkorir romawa ansya fa sra yoḇ aya, imboi mkomunwarek awer si, snar snonkaku ḇera dine sya siso ḇenai Ḇaḇesasoser Allah. ¹⁵ Yakofen kaku ḇe mko: Mansei ro mko imarisen daknai Ḇaḇesasoser Allah ḇape dakmnis romawa kapira ḇa na daksun ro i ḇa." ¹⁶ Raimnai fyoraḇen romawa kasun ansya ma pyan rosi ḇo ḇye barakas si. ¹⁷ Rofyor Yesus imbran pdef ro marandan ḇyedi, snon oso ifrar yoḇi ma ḇyan suba ro ḇarpon ḇyedi ma ifukeni ḇo doḇe: "Mankorari ḇeḇye, na rosai yafrur fa yaksma kankenem ḇemnai ḇa ya?" ¹⁸ Yesus kyarem faroi ḇo doḇe: "Snaro wor ayaḇe ḇeḇye? Oso ro fandu snonkaku iḇye syadi Allah ḇa, Allah demir. ¹⁹ Wafawi Allah sasoser ḇeḇor ḇyena kwar: Nari mamun awer, nari wafrur farḇakḇuk awer, nari kwarau awer, nari be saksi ankarkar awer, nari wayaḇyoḇer snonkaku nana sena awer, ma ḇe maf kmami ma snami su!" ²⁰ Ma snon anya ikofen faro Yesus ḇo doḇe: "Mankorari yo, roi wakofen nane kam yaḇe user na rofyor yaba ḇa ya." ²¹ Ḇape Yesus myam yoḇi ma sneri iswari mura ikofen faroi ḇo doḇe: "Imboi roi oser wer iso ḇemnis ḇaim ro au; wabur mura, boḇ kayan ḇena, bukna faro kawasa ḇesaḇarar sya, snar nari wasma kayan ro nanki, raimnai rwama waso aya." ²² Imnaf wos anna fyafayaf ḇo ibur kuker sne ḇefafardun snar kayan ḇyena nabor kaku. ²³ Raimnai Yesus myam manfamyan ḇye ḇeyores yar i ma ikofen faro si ḇo doḇe: "Syamswen kaku faro snon ḇenana sya saksun ro Ḇaḇesasoser Allah." ²⁴ Manfamyan ḇyesya sikmom rofyor simnaf wos ḇyena. Ma Yesus Ikofen wer ḇo doḇe: "Romawa yena mko, kosun ro Ḇaḇesasoser Allah ya syamswen fafaya ḇa. ²⁵ Onta oso syun ro wairus mkir ya ipyan ro snon benana oso daksun ro Ḇaḇesasoser Allah." ²⁶ Sikmom syadadi wer ma sawos yae ro mankun si ḇo soḇe: "Rarirya ido nari mansei ḇesma koreri ya?" ²⁷ Yesus myam yoḇ si ḇo doḇe: "Faro snonkaku roi ḇera dine ndarirya ḇa, ḇape rarirya ḇa faro Allah. Snar roi nane ndarirya faro Allah." ²⁸ Ḇarpur wer Petrus ikofen faro Yesus i ḇo doḇe: "Nkoine nkobur pres nana nkoḇena snar nkoso Au!" ²⁹ Yesus kyarem ḇo doḇe: "Yakofen kaku faro au, snonkaku oser-oser ḇebur rum ḇyedi, naek srar, sna roḇa ido kma, kina ḇyena roḇa ido yaf ḇyena snar aya ma Ankankinem Ḇeḇye ya, ³⁰ snonkaku anya ro fafisu ine kako nari isma sadwer syadi ḇe utin, rum, naek srar, sna, kina ma yaf marindi ḇemun fnoḇek na, ma ro ras ḇarpur iyama isma kenem ḇemnai ḇa ya. ³¹ Imboi kawasa ḇeḇor ḇepon ansya nari spur ḇoi ḇepur ansya nari sakpon wer." ³² Yesus kuker manfamyan Ḇyesya sisya ro marandan ḇera ḇe Yerusalem ma Yesus pyon si. Manfamyan ansya se fesfyas ma kawasa ḇeso skonsya simkak. Yesus dor manfamyan samfur seser risuru Ḇyansya ma Ikofen fababa rosai nari ḇekur i ḇo doḇe: ³³ "Insape kora ḇe Yerusalem ma Rumkun Snonkaku nari ssḇuki faro mananir imam-imam ma snon ḇefawi nananem Refo Yahudi ma nari se ukum i fa imar. Ma nari ssḇuki faro er-er ḇeyakfawi Allah ḇa sya, ³⁴ ma nari iser anonef, aninef, ayos ma smun, ḇape ro ras ḇeḇekior ya nari diḇri ro kubir." ³⁵ Sebedeus mandaḇen ḇyesu Yakobus ma Yohanes susnefer Yesus ma sukofen faro i ḇo suyoḇe: "Mankorari yo, nukyar insama Kwarem fararyor nuḇedine!" ³⁶ Yesus ifuken ḇo doḇe: "Rosaiso muyoḇe Yafrur faro mu?" ³⁷ Inja sukofen ḇo suyoḇe: "Wamarisen kada nari ras kokain ro payamyum Bedi numindi nyaro ḇar raku Bedi ma numindi wer nyaro ḇar rasar Bedi." ³⁸ Ḇape Yesus ikofen faro su ḇo doḇe: "Mufawi ro muyor ya ḇa. Jadi fa muyakinem ro sek aninem Yaḇe Yinem ma muyakmasi masasi Yaḇe Yamasi ya ke?" ³⁹ Sukarem ḇo suyoḇe: "Numarisen." Yesus ikofen faro su ḇo doḇe: "Imboi na muyakinem ro sek aninem Yaḇe Yinem ya ma nari muyakmasi masasi Yaḇe Yamasi ya. ⁴⁰ Ḇoi mnuk kankain ro ḇar raku ma ḇar rasar yeja, mankun daya Yapok fa Yaḇuk i ḇa. Mnuk anya nari ḇyeḇe ḇuk faro snonkaku mansei Allah fyasos kwar sya." ⁴¹ Manfamyan samfur ḇese ansya simnaf rarirya simsor Yakobus ma Yohanes su. ⁴² Ḇape Yesus dor si ma ikofen ḇo doḇe: "Mkofawi, mansei sap ḇe ḇeḇe prenta er-er ḇeḇor sya, siso ḇeḇe prenta kawasa sesya kuker ḇramin mankarmomen, ma ḇebarara sesya prenta sena nambran kuker pakakrek faro kawasa sesi. ⁴³ Mkoma rarirya ḇa. Mansei ḇemarisen ḇeba ro fandu mko ido i kada nari ḇye manfyan ḇe mko, ⁴⁴ mansei ḇemarisen ḇeba syadi kaku ro fandu mko ido i kada ḇye manfyan ḇe mko kam. ⁴⁵ Snar Rumkun Snonkaku kako ryama insa suf farmyan i ḇa, ḇoi insa duf farmyan ma ḇyuk nyawa ḇyedi fa ḇyak namuk snonkaku ḇeḇor sya kam." ⁴⁶ Yesus kuker manfamyan ḇyesya srama ro Yeriko. Ma ro fafisu Yesus isasyar kuker manfamyan ḇyesya ro Yeriko, fnoḇek kawasa ḇeḇor kaku, snon ḇesaḇarar ma ḇepraf isoine Timeus mandaḇen ḇye ḇenir ḇe Bartimeus kyain ro nyan andir ya. ⁴⁷ Rofyor imnaf Yesus snon Nazaret anya irya, dor naba ḇo doḇe: "Yesus Daud mandaḇen ḇyedi au, waswar aya!" ⁴⁸ Kawasa sibor se wef i insa ḇye fasis, ḇape dor naba syadi wer ḇo doḇe: "Daud mandaḇen ḇyedi au waswar aya!" ⁴⁹ Ma Yesus imnai ḇo ikofen faro si ḇo doḇe: "Mkori ma!" Sor snon ḇepraf anya ma sikofen faroi ḇo soḇe: "Wepen snembri, ma wayor au, snar Yesus dor au." ⁵⁰ Inja doḇes syatu ḇyeja ma iyori beri fa rya isrow Yesus. ⁵¹ Yesus Ifuken i ḇo doḇe: "Rosai wamarisen fa insa yafrur faro au?" Snon ḇepraf anya kyarem ḇo doḇe: "Rabuni, yor fa insa yakmam e!" ⁵² Inja Yesus ikofen faro i ḇo doḇe: "Rwa mura, kakyar beja ḇyuk aski faro au!" Ro fafisu ya kako myam beri, ma iso Yesus ro marandan Ḇyedi.

¹ Rofyor Yesus kuker manfamyan Ḇyesya skofanam kwar ḇe mnu ḇeba Yerusalem, fanam mnu Betfage ma Betania ḇekain ro Urek Zaitun, Yesus Iwan manfamyan risuru rosi. ² Kuker ananun ḇo doḇe: "Mura ḇe mnu ḇero ḇarpon muḇedi. Rofyor musun ro dia, nari musrow keledai babo oso isya sfesepen i, snonkaku sek i ro ras o ḇaim. Muperi ḇo muyuni muma. ³ Ma rofyor ono sifuken faro mu ḇo soḇe: snaro mufrur rarirya, mukofen faro si ḇo muyoḇe: Manseren ḇye fanduni. Nari Kyaḇer fasaui muma wer." ⁴ Inja sura mura beri, ma susrow keledai babo oso sfesepen i ro kedwai ḇero barpon ya ḇandi ro nyan andirya inja superi beri. ⁵ Ma snonkaku ono sifuken su ḇo soḇe: "Ne, muper keledai ya faro?" ⁶ Inja sukarem raris moḇ Yesus ikofen faro su rai. Inja snonkaku ansya smam monda su. ⁷ Ma suyun keledai anya faro Yesus ma sḇor dokor ya kuker sansun sena, raimnai Yesus dek roi. ⁸ Kawasa ḇeḇor ansya sḇor sansun sena ro nyanya, ma ono wer skek ai ram ssun ro yaf na. ⁹ Snonkaku ḇembran ro ḇarpon ma ḇeyuser ro ḇarpursya ssibras ḇo soḇe: "Hosana! Yesus ḇerama ro snonsnon Manseren, isma barakas, ¹⁰ Ḇaḇesasoser beramayan isma barakas, Ḇaḇesasoser kma koḇedi Daud, Hosana ro moḇ ḇekaki syadi!" ¹¹ Sra kwar ro mnu ḇeba Yerusalem Yesus syun ro Rum Allah. Ro dia myam user na kam, ḇape snar fanam roḇ kwar Yesus kuker manfamyan samfur seser risuru Ḇyesya sisayar ḇe Betania. ¹² Meserdi Yesus ma manfamyan samfur seser risuru ḇyansya sskobur mnu Betania kwar, Yesus ibiser. ¹³ Skobinkwan kaker ḇo myam ara knam oso ḇye ram kwar. Inja imbran yoḇ i fa Myam pan ḇye bon ri. Ḇape rofyor isya ro fuar ya kwar myam fama ḇye bon ḇa ḇoi ḇye ram monda, snar mamarem ḇyedi sya ḇa. ¹⁴ Inja ifras ara knam anya ḇo doḇe: "Na isof fyoro-fyoro snonkaku oso dan bon ḇena wer ḇa!" Ma manfamyan Ḇyesya sakmnaf fras ani. ¹⁵ Raimnai Yesus ma manfamyan Ḇyesya skorama ro mnu ḇeba Yerusalem. Rofyor Yesus syun kwar ro Rum Allah, iḇyaḇer snonkaku ḇefarḇaḇyan sya bur buḇes Rum Allah. Meja ssḇuk sadadwer pipi ma banku ḇeḇaḇoḇ manjawa sya sena pyambar na, ¹⁶ ma ḇyuk ḇa beri fa snonkaku ḇeyun papus simbranuk ro buḇes Rum Allah. ¹⁷ Raimnai fyarkor si ḇo doḇe: "Mkofawi fas-fas ḇerok ḇo ḇeyoḇe: Rum ayedi na snir i ḇe rum Ari faro ersya kam? Ḇape mkoine mkofruri ḇe nas faro kawasa ḇeḇarḇor!" ¹⁸ Mananir imam-imamsya ma ḇefawi nananem Refo Yahudisya simnaf roi ḇeḇe jadi ani, mura ssewar nyan fa siḇe smun i, snar smam kawasa ḇeḇor ansya sikandor farkarkor Ḇyena. ¹⁹ Fanam roḇ mura Yesus ma manfamyan Ḇyesya skosasyar bur mnu beba ani. ²⁰ Ro arwo babo ya rofyor Yesus ma manfamyan Ḇyesya skombranuk wer ro moḇ ara knam ani, ssmam ara knam anya myas ro ḇidwom isof ro rares ḇyena. ²¹ Ro diya Petrus iswar epen roi ḇeḇe jadi kwar anya, inja ikofen faro Yesus ḇo doḇe: "Rabi ye, wakmam kada, ara knam wafras anya myas kwar." ²² Yesus kyarem faro si ḇo doḇe: "Mkokyar faro Allah! ²³ Yakofen faro mko: Oso ḇye kaku fa ikofen faro bon ine: Wakḇaken ma rwop randa wamsawer ro soren! Oso ḇe ḇirḇar ḇa ḇoi wakyar nako ido nari roi wakofen na nejadi rarirya. ²⁴ Inja Yakofen ḇe mko: Rosairya wer mkor ma mkonadi wark na, mkokyar imnis raris mkosma na kwar, ma nari Allah Ḇyuk na faro mko. ²⁵ Ma rofyor mkofasos fa mkoḇe nadi mkoswarepen insa mkoḇuk ampon faro snonkaku mkomsor sya ro mkosnemna resari, insa Kma mkoḇedi ro boiyaswa dakḇuk ampon faro mko ro sasar mkoḇena. [ ²⁶ Mboi mkoḇuk ampon ḇa ido, Kma mkoḇedi ro boiyaswa dakḇuk ampon ḇa kako ro sasar mkoḇena.]" ²⁷ Raimnai Yesus kuker manfamyan ḇyesya sra wer ma ro mnu ḇeba Yerusalem. Rofyor Yesus imbran ro Rum Allah ya buḇes ya, mananir imam-imamsya ma ḇefawi nananem Refo Yahudi ma snon ḇebarara sya, srama sifuken Yesus ḇo soḇe: ²⁸ "Kuker snopor rosai bukfrur roi ḇeḇor nane? Ma mansei ḇeḇuk snopor anya faro au, isof wafrur roi ḇeḇor nane?" ²⁹ Yesus kyarem faro si ḇo doḇe: "Na Yaḇuk fakfuken oser faro mko. Mkokarem ḇeponi ḇe aya insape na Yakofen ḇadir snopor saiso yakfrur roi nane kam ya faro mko. ³⁰ Masisren Yohanes ryamuma ro boiyaswa ke snonkaku? Indo mkokarem ḇe aya pan!" ³¹ Sawos yae ro mankun si ḇo soḇe: "Na kokofen ḇo koḇe masi sren Yohanes ryama ker boiyaswa, na ikofen ḇo doḇe: rarirya ido snaro mkokyari ḇa? ³² Ḇape rariso na kokofen ḇo koḇe: Ryama ro snonkaku!" Snar simkak kawasa ḇeḇor ansi, snar snonkaku sya kam siwasen ḇo soḇe Yohanes nabi rirya kaku inja simkaki. ³³ Mura skarem faro Yesus ḇo soḇe: "Nkofawi ḇa." Inja Yesus ikofen faro si ḇo doḇe: "Rarirya ido aya kako nari Yakkofen ḇair snopor saiso Yakfrur roi ḇeḇor nane faro mko ḇa."

¹ Raimnai Yesus dawawos faro si kuker wos sarḇer ḇo doḇe: "Snon oso dom yaf anggur ya, posa dar warek i. Raimnai ḇyai ner ssḇuk kafos anggur ya, ma ifrur kako kaderen moḇ ssḇukwaren warek yaf ya. Neḇe fasos kam kwar ido ḇye asas yaf anya faro snonkaku ḇesma sasuref fa ḇewaren warek ma ḇefararur ḇoi ryaḇe sup ḇese. ² Ma ro fafisu mamarem ya, iwan manfamyan ḇyesya oso faro ḇewaren ma ḇefararur ro yaf ani, insa dun rarwas ḇyeja ro si. ³ Ḇape sfor manfamyan anya ma siprer i, posa siyaw i fa ibur beidi. ⁴ Ḇarpur wer iwan manfamyan ḇyesya oso ḇese wer faro si. Manfamyan anya siprer kir ḇruri ma sonefi. ⁵ Ḇape iwan manfamyan ḇyesya oso ḇese wer, ma manfamyan anya smuni. Ma iwan snonkaku sibor syadi mura wer, ḇape siprer ono ma smun ono. ⁶ Snonkaku oser isya kaker, isoine Rumkun iswar kuf ya. Papupes ya iwani faro si, snar kyara ḇo doḇe: Romawa ayedine nari se maf i. ⁷ Ḇape snonkaku ḇewaren yaf ya ansya sikofen yae ḇe si ḇo soḇe: i ḇeḇe warisi, mkorama komuni, insa kona waris ḇyedi. ⁸ Rarirya sfori, ma smuni, ma sisaweni ro yaf ya ḇandi ri. ⁹ Inja nari rosai ḇena yafya ifrur faro si? Nari ryama myun snonkaku ḇewaren warek ma ḇye asas yaf anya faro kawasa ḇese. ¹⁰ Mkowasya mnuk ine ḇaim ke? Karui sukan ḇeḇawes rum sisawen ya iso ḇeḇe jadi karui dopir ro rum ya: ¹¹ Roi ḇera dine ne jadi ro ḇar Manseren ya Ḇyedi, fararur ḇefrur kanandor faro snonkaku ko." ¹² Rarirya esewar nyan fa sfor Yesus, snar sifawi, si Yesus Syarḇer yar sya. Ḇape simkak faro kawasa ḇeḇor ansya, inja sibur ḇesisyei. ¹³ Ḇarpur wer siwan snon Farisi ma Herodian ono faro Yesus kuker fakfuken wos peper oso. ¹⁴ Snonkaku ansi sra faro Yesus ma sifuken ḇo soḇe: "Mankor ari ye, nkofawi au snonkaku ḇenapes, ma wamkak mansei ḇa kaker, snar swewar snonsnon ḇa, ḇoi farkor napnapes Allah nyan Ḇyena. Jadi fa sḇak som faro kaisar ke roḇa? Inja nkakḇak ke roḇa?" ¹⁵ Ḇape Yesus ifawi ḇarḇor sena inja ikofen faro si ḇo doḇe: "Rosai ḇefnai fa mkoḇe mkofrowes ḇir aya? Mkun pipi dinar oso ma Yakmam!" ¹⁶ Inja ssḇuk pipi dinar ya faroi. Mura ifuken si ḇo doḇe: "Fanir ma fas-fas manseiso ine?" Skarem ḇo soḇe: "Fanir ma fas-fas kaisar." ¹⁷ Ro dia Yesus ikofen faro si ḇo doḇe: "Rarirya mkoḇak faro kaisar rosai mkoḇuk faro kaisar ma faro Allah rosai mkoḇuk faro Allah!" Fyor simnaf kankarem Ḇyedine sikandor fafaya ḇa. ¹⁸ Saduki ono sra faro Yesus fa sifuken i ro yar aḇiḇerya, snar sima sikyar aḇiḇerya ḇa. Sifuken Yesus I ḇo soḇe: ¹⁹ "Mankor ari ye, Moses fyas prenta ine faro inko: Rofyor snon oso imar bur swari ma suna romawaba, inja naek ḇyedi fyakawin i insa nya rumawa oso fa syadweri. ²⁰ Mambekanaek rifik. Ḇeponya fyakawin bin oso ma ssuna romawa ḇa ḇo imar bur i. ²¹ Ḇeḇe suru ya dakfakawin bin anya wer, ssuna romawa ḇa ḇoi dakmar. Rarirya kako kuker snon ḇeḇe kiorya. ²² Rarirya kuker snon rifik ansya sfakawin kam bin ani, ḇape nya romawa oso fa syadwer skomindi ḇa. Ḇarpur bin anya dakmar kako. ²³ Ro ras aḇiḇerya, mansei ro fandu mambekanaek ansya ḇeḇe swa faro bin ani? Snar skoḇuk kam bin anya kwar." ²⁴ Yesus kyarem faro si ḇo doḇe: "Mko ma mkoḇor bos beri, snar mkofawi wos ḇero refo ya ma papoik Allah ya ḇa. ²⁵ Snar rofyor snonkaku sya siḇer si ro fandu ḇemar sya, nari sfakawin wer ḇa, imboi sikenem imnis malaikat ro boiyaswa. ²⁶ Ma kako ro aḇiḇer ḇemar sya, mkowasya surat Moses ḇa ke, ḇekur farfyar aikus, rariso moḇ Allah dawos faro i ḇo doḇe: Aya ine Allah Abraham, Allah Isak ma Allah Yakup? ²⁷ Manseren Allah ima ḇye Allah faro snonkaku ḇemar sya ḇa, ḇoi Allah faro snonkaku ḇekenem. Mkoḇor bos beri!" ²⁸ Ma snon ḇefawi nananem Refo Yahudi oso, ḇeyakmnaf snon Saduki ḇefuken sye Yesus ma ḇefawi kako Yesus kyarem mnis kaku faro si, inja rya faro Yesus ma ifuken ḇo doḇe: "Sasoser saiso ḇeba syadadi ya?" ²⁹ Yesus Kyarem ḇo doḇe: "Sasoser ḇeba syadadi isoine: Ne, kawasa Israel mkomnaf Allah mkoḇedi, i Manseren Mankundi. ³⁰ Waswar Manseren Allah ḇedi kuker sne ḇesiper ma rur bedi ḇesiper ma karkara ḇena ḇesiper ma samambraḇ bena kam. ³¹ Ma sasoser ḇeḇe suru isoine: waswar snonkaku min besi imnis waswar mankundau. Sasoser ḇese oso iba syadi ro sasoser suine ḇa." ³² Raimnai snon ḇefawi nananem Refo Yahudi anya ikofen faro Yesus ḇo doḇe: "Imnis kaku ḇeri, Mankor ari, wos Bedi kyaku, Manseren Mankundi derer baken, oso ḇese ḇa ḇo derer Manseren Allah. ³³ Kaku ḇeri koswar Manseren kuker sne ḇesiper ma kuker fawawi ḇesiper ma kuker samambraḇ ḇesiper ma koswar snonkaku min koḇesi imnis koswar mankun ko, iba syadadi farsarser ḇekun faro Allah ma farsarser aiwan bekaruk." ³⁴ Yesus myam fawawi ḇero kankarem byana, inja ikofen faro i ḇo doḇe: "Au kada binkwan bur Ḇaḇesasoser Allah ḇa!" Ma oso ḇye kir fa ifakfuken roi ḇese faro Yesus ḇa. ³⁵ Ro fafisu oso rofyor Yesus Ḇyuk farkarkor ro Rum Allah, ikofen ḇo doḇe: "Rosai ḇeḇedari snon ḇefawi nananem Refo Yahudisya sikofen ḇo soḇe: Daud rumkun ḇyediso Wairek? ³⁶ Daud mankundi ikofen kuker sḇayo rur ḇesren: Manseren ikofen kwar faro Manseren yedi: Kwainkada ro ḇar raku Yedi, isof Yaḇe fa mbroḇ besya kam sḇar wemsu. ³⁷ Daud mankundi dap Yesus ḇe Manseren, snaro dap ḇe rumkun ḇyedi wer?" Ma kawasa ḇeḇor ansya simarisen simnaf Yesus. ³⁸ Ro farkarkor Yesus Ḇyena ikofen ḇo doḇe: "Mkoḇe sasor mko ḇur snon ḇefawi nananem Refo Yahudi, ḇemarisen ḇembran kuker syatu ḇekwan ma ḇemarisen ḇesma samsom ro pasar, ³⁹ ma ḇemarisen ḇekain ro ḇarpon kaku ro rum ari, ma moḇ ḇepyum ro munara na, ⁴⁰ ma ḇeyoren kabom sya rum sena, ma ḇemun warek mamam snonkaku kuker nadi ḇekwan sena. Si ma nari sisma samamyai ḇemarḇak syadi." ⁴¹ Ro ras oso Yesus kyain fanam burua farsarser ma myamepen kawasasya rariso ro rarir pipi sena ro burua ani. Ma myam snon kayan ono ssḇuk pipi sya sibor kaku. ⁴² Myam kako bin kabom ḇesaḇarar oso ryama dakrir remis risuru, isoine sen oser. ⁴³ Inja Yesus dor manfamyan Ḇyesya ma ikofen faro si ḇo doḇe: "Yakofen faro mko, bin kabom ḇesaḇarar ine ḇyuk sibor syadi ro kawasa ḇerir pipi ro burua farsarser ine. ⁴⁴ Snar si kam ssḇuk ro kayan sena, ḇape kabom ine ma ḇyuk ro ḇaḇe saḇarar ḇyedi, nana ma an ḇyena kam."

¹ Fyor Yesus isasyar bur Rum Allah, manfamyan Ḇyesya oso ikofen faro i ḇo doḇe: "Mankor ari ye, wakmam kada karui nane nadoser bos beri ma rum anna napduk fafaya ḇa!" ² Inja Yesus ikofen faro i ḇo doḇe: "Wakmam rum-rum ḇepduk nane? Na karui nane oso ḇyeḇe mam monda fa isyos ro oso bori ḇa, na kam nari skakok na." ³ Ro fafisu Yesus kyain ro urek Zaitun bori ḇo myam ḇe Rum Allah, Petrus, Yakobus, Yohanes ma Andreas skofuken fasis faro i ḇo skoḇe: ⁴ "Wakofen ḇair fafisu saiso roi ḇeḇor nane nari ne jadi ya faro inko, ma aḇyair saiso nari ḇefasna nakam ndama ro ras fawar ya." ⁵ Inja Yesus dawos faro si ḇo doḇe: "Mkepen mko insa snonkaku ono sfarkor ninyan awer mko! ⁶ Snar nari snonkaku sibor srama kuker snori ma soḇe: Aya ine Yesus, ma nari sfarkor ninyan snonkaku sibor. ⁷ Ma ro fyor mkorower ruran mbroḇ roḇa abar ro mbroḇ, mkokoḇer awer. Nakam nari ndarirya, ḇape ras fawar isya ḇaim. ⁸ Snar nari er nefamfaḇri kuker er ma ḇaḇesasoser na nefamfaḇri kuker ḇaḇesasoser. Nari rim ḇeba na nmun ro moḇ-moḇ ono ma nari basbiser ya myun. Nakam nfasna randak marindi kam ḇeyun ḇe awar babo. ⁹ Ḇape mko ine mkepen pyum mko! Snar nari ssḇuk mko faro fananjur agama ma nari siprer mko ro rum ari, ma ssun mko ḇe ḇarpon besma papok wairek sya snar aya, insa ne saksi faro si. ¹⁰ Ḇape Ankankinem Ḇeḇye ya kada nari ḇyeḇe ḇaryas faro er sya kam. ¹¹ Ma ro fyor ssun mko ma sḇoḇ mko, mkokarsosen awer rosai nari mkokofen na ḇape mkokofen rosai Rur-ḇesren ya ikofen faro mko ro fafisu anya kako, snar mkoi ḇeyawawos ya ḇa, ḇoi Rur-ḇesren ya. ¹² Naek oso nari ḇyoḇ naekri fa smuni ma rarirya kako kma oso kuker romawa ḇyedi, ma romawa sya nari srakrok kuker sinan sesi ma nari smun si. ¹³ Nari snonkaku sya kam sfafardun mko snar snonsnon ayedi. Ḇape mansei befarmku nako isof ro ras fawar ya i kada nari isma koreri." ¹⁴ "Rofyor mkomam fafardun ḇeyun raro ya dores ro moḇ napnapes ya iḇye kada ḇeḇe wasya mkoya mkokara naḇye --rarirya kawasa ro Yudea iḇye syadi sifrar sibur ḇe bon na. ¹⁵ Snonkaku ḇeyun wam ro rum ya bori iḇye isabu awer fa dun roi oso ro rum ḇyedi. ¹⁶ Mansei ḇero yaf ya na kyaḇer fa dun sansun ḇyena ḇa. ¹⁷ Susa marindi faro bin ḇemoḇes ḇa roḇaido ḇesasus sya ro fafisu ya. ¹⁸ Inja mkoḇe nadi insa susa marindi nakam na nanyanem awer rofyor pnunek ya myun. ¹⁹ Snar ro fafisu anya nari susa marindi myun, roi ḇera dine nmun ro ras no ḇaim ro randak Allah ifrur supswan ine isof babo ine ma nari ḇye jadi wer ḇa. ²⁰ Ma Manseren Ḇyuk fa fafisu ya iknampu ḇa kada, nari roi ḇekenem nakam oso isma aski ḇa; ḇape snar snonkaku kyinfir kwarsya Manseren Ḇyuk fafisu ḇeknampu. ²¹ Ro fafisu anya oso ikofen faro mko ḇo doḇe: Mam kada Wairek isya ro dine, roba ido: Mam kada Wairek isya ro diwa, mkokyar awer. ²² Snar Wairek ḇekaku ḇa ma nabi ḇekaku ḇa sya nari sikḇawes ma sifrur aḇyair ḇefrur kanandor kuker karkara ya isoine imba kada se ḇirḇar snonkaku Allah Kyinfir sya. ²³ Mkepen mko! Snar Yakofen ḇadir ḇepon roi nane kam faro mko kwar." ²⁴ "Ḇape rofyor anya ḇarpur ro susa marindi, ori nari pyampan ma paiki isnai ḇa ²⁵ ma mak sya kam nari skapaf bur nanki ma kuasa nanki na nari namarmer. ²⁶ Ro fafisu anya nari kawasasya smam Rumkun Snonkaku ryama ro mandep kuker kuasa ḇeḇor kam ma payamyum Ḇyedi. ²⁷ Ma ro fafisu anya kako nari iwan malaikat Ḇyesya fa sisasyar ma nari siryur snonkaku kankinfir Ḇyesi ro ḇar wambarek wamurem-wambraw ma wambrur ro dunya pember isof nanki pember. ²⁸ Mkun farkarkor ro sarḇer ara knam. Rofyor snau-snau na nakpirew ma nkakyei randak mkofawi fafisu ryas ya fyanam kwar. ²⁹ Rarirya kako rofyor mkomam roi ḇeḇor nane ne jadi mkofawi bos beri fafisu ḇyedi fyanam kaku kwar ro kedwa ya ḇarpondi. ³⁰ Yakofen faro mko: Syos ine nari isyof ḇaim ḇoi nari roi nane kam ne jadi kaku ḇeri. ³¹ Nanki ma supya nari nasyof ḇape wos ayeja nari kyon fyoro. ³² Ḇape ras anya roḇa ido fafisu anya snonkaku yo ifawi ḇa, malaikat ḇero boiyaswa sya sifawi ḇa ma Rumkun ya kako roḇa, Sinan Kma ya derer monda." ³³ "Mkosasor mko ma mkwaren! Snar mkofawi fafisu ya ryama nya ḇa. ³⁴ Moḇ ine imnis bos kaku snon ḇewadwa, ḇebur rum ḇyedi ma ḇeḇe asas manfamyan ḇyesya oser-oser kuker fararur ḇyeja ma ḇeyanun faro ḇewaren kedwaya insa iwaren. ³⁵ Rarirya mkowadwaren snar mkofawi fafisu rosai ḇena rum ya kyaberya ḇa, ifyafer ro mandira babo ke roḇa ido romfauru ke, roḇa ido ḇyarḇir meser muryas ke roḇa ido arwo babo, ³⁶ inja rofyor ryama kanandor mko isrou awer mkoisya mkenef. ³⁷ Rosai yakofen faro mko, yakofen na faro kawasa kam: Insa mkowaren!"

¹ Ras ḇeḇa munara Paskah ma ras ḇeḇa Mamami ḇeḇe roi ḇefrurpis ḇa, ras risuru kaker insape sifrur su. Mananir imam-imamsya ma snon ḇefawi nananem Refo Yahudisya sesewar insa sfor ma smun Yesus kuker nyan ankar, ² snar sikofen ḇo soḇe: "Ro fafisu munara awer, insa kawasa sya sifrur mbrus awer." ³ Ro fafisu Yesus isya ro Betania, ro rum Simon ḇeḇe pado ḇyedi ma sisya skain sanan, bin oso ryama faro Yesus dun paranai oso ḇese mani spum bekakur kaku. Ikob kar paranai anya kwar, isbawer mani anya ma ḇyukrem Yesus ḇruri. ⁴ Snonkaku ono simsor ma sikofen yae faro si ḇo soḇe: "Snar mani spum ine ḇyeḇe fnak fromo monda? ⁵ Snar mani ine sḇoḇi kada maeja ḇyedi dinar utin rikior isyadi ma pipi ansya koḇuk si faro kawasa ḇesaḇarar sya." Raimnai simsor bin ani. ⁶ Ḇape Yesus ikofen ḇo doḇe: "Mkomam mondai. Snaro mkosnuki? Ifrur fararur ḇepyum oso faro aya kwar. ⁷ Snar snonkaku ḇesaḇarar sisya faswef kuker mko ma mkofnoḇek si rofyor mkomarisen, ḇape aya ma nari Yabesya faswef kuker mko ḇa. ⁸ Ifrur roi jadi fa ifrur kwar. Baken ayeja ryemi kwar imnis fasasos faro kardir ayedi. ⁹ Yakofen faro mko: Kaku ḇeri moḇ rosai Ankankinem Ḇeḇye ya ssḇaḇdas i ro supswan ḇesiper, rosai ifrur ine nari sakapi kako fa ssḇukswarepen i." ¹⁰ Raimnai Yudas Iskariot oso ro fandu manfamyan samfur seser risuru ansi rya faro mananir imam-imamsya kuker kakara fa ḇyoḇ Yesus faro si. ¹¹ Simarisen namsin baḇeri rofyor simnafi inja se asas ḇei nai ssḇuk pipi faro i. Ḇarpur Yudas syawar fafisu ḇepyum oso fa ḇyoḇ Yesus. ¹² Ro ras randak ras ḇeba munara Mamami ḇepisen ḇa fafisu skaruk domba Paskah, Yesus manfamyan Ḇyesya sikofen faro i ḇo soḇe: "Moḇ sai Wawarisen nkora nkofasos meja sren Paskah ḇe au?" ¹³ Inja iwan manfamyan risuru ma danun faro su ḇo doḇe: "Mura ḇe mnu ḇeba iwa, ro diwa nari musrou snon ḇeyun war ro fyom Muso i. ¹⁴ Ma mukofen faro ḇena rum syun ro ya ḇo muyoḇe: Mankor ari danun: sim rosai fasos kwar faro aya insa Yan Paskah fnoḇek kuker manfamyan ayesi? ¹⁵ Ma snon anya nari fyasnai sim ḇeba oso ḇe mu ro ḇo ḇefasos kwar. Mufasos meja sren Paskah ḇe ko ro dia!" ¹⁶ Inja manfamyan ansuya sura ro mnu ḇeba ani, susrou rosai Yesus ikofen faro su anna. Ro diya sufasos Paskah ani. ¹⁷ Roḇ kwar ido Yesus ryama kuker manfamyan samfur seser risuru ḇyansi. ¹⁸ Ro fafisu skokon skonan Yesus ikofen ḇo doḇe: "Yakofen faro mko, kaku ḇeri ro fandu mko nari oso ḇyoḇ aya, isoine ḇeyanan kuker aya." ¹⁹ Inja se susa ma oser-oser ikofen faro Yesus ḇo doḇe: "Aya rya ke roḇa, sye Manseren?" ²⁰ Yesus ikofen ḇo doḇe: "Snon anya isoine oso ro fandu mko samfur seser risuru ine, iso besowen mamami ro ben oser kuker aya. ²¹ Rumkun Snonkaku nari rya imnis kuker fas-fas ḇekur i, ḇape susa ḇefnak ḇa faro snonkaku ḇeḇoḇ Rumkun Snonkaku ani. Ipyum syadi snon anya ḇyeḇeyaḇen awer kada." ²² Ro fafisu Yesus kuker manfamyan Ḇyesya skonan, Yesus dun mamami, ḇye barakas na raimnai pyanasnis na ma ḇyuk na faro si ḇo ikofen ḇo doḇe: "Mkun ma mkan, ine baken ayedirya." ²³ Raimnai dun sek aninem ya, ma ikofen kasumasa raimnai Ḇyuki faro si, ma si kam sinem ro sek aninem ani. ²⁴ Ma ikofen faro si ḇo doḇe: "Ine rik ayedi, rik ḇeḇe asas esbawer faro kawasa kam. ²⁵ Yakofen faro mko: Kaku ḇeri nari yinem wer ro anggur bon ḇa isof ro ras yinem wer ya, isoine ro anggur babo, ro Ḇaḇesasoser Allah." ²⁶ Raimnai skodisen dow sanandik ra posa, skora ḇe urek Zaitun. ²⁷ Ma Yesus ikofen faro si ḇo doḇe: "Mko kam nari mkoḇe ḇirḇar ro kakyar mkoḇena. Snar fas-fas oso isya ro refo: Nari yaprer manfarandous ya ma domba sya skakek. ²⁸ Ḇape nari yiber aya kwar ido, nari Yapon mko ḇe Galilea." ²⁹ Petrus ikofen faro Yesus ḇo doḇe: "Naek ansine ma nari se ḇirḇar ro rakyar sena ḇoi aya ma oroḇa." ³⁰ Inja Yesus ikofen faro i ḇo doḇe: "Yakofen faro au, kaku ḇeri ro roḇ ine beri nari mankoko sya sor ḇe suru baim, famyun epen aya ḇe kior kwar." ³¹ Ḇape Petrus fyaḇri syadi we ḇo doḇe: "Ne, nari yamar warpu au, yapok yafamyun au ḇa." Bese sya kako sakkofen rarirya. ³² Raimnai Yesus kuker manfamyan Ḇyesya skora ro moḇ ḇenir ḇe Getsemani. Yesus ikofen faro manfamyan Ḇyesya ḇo doḇe: "Mkokon ro dine, insa Yara Yaḇe nadi." ³³ Ma dun Petrus, Yakobus ma Yohanes fa skoso i. Fafisu anya Yesus imkak ra ryadadai, ³⁴ inja ikofen faro sko ḇo doḇe: "Sneri iswar fafaya ḇa, Yaḇaḇir imnis ra Yaḇe yamar. Mkokon ro dine ḇo mkowaren." ³⁵ Imbran ḇe barpon knik ḇyan suba ro saprop ya bori ma Ḇye nadi insa jadi kada fafisu eḇesyanya isyonde bur i. ³⁶ Ikofen b_o doḇe: "Sye Kamamo roi nakam naisya ro kwasa ḇedi, wun sek aninem ine bur Aya, ḇape jadi awer imnis marisen Ayedi imboi raris marisen ḇedi." ³⁷ Raimnai kyaḇer ma, isrou manfamyan rikior ansko ya skenef. Ma Ikofen faro Petrus i ḇo doḇe: "Ne Simon, wenef ke? Jadifa mkowaren oras oser ḇa ke? ³⁸ Mkowaren ma mkoḇe nadi, insa mkosapi awer ro fafrowes; rur iso user ḇape kraf ya ma ipok ḇa." ³⁹ Raimnai rya wer ma inadi nadi insandi anya wer. ⁴⁰ Ma rofyor kyaḇer wer isrou skenef wer snar skomkasna napok ḇa ma skofawi rosai skoḇe skokarem faro Yesus. ⁴¹ Ḇarpur kyaḇer ḇe ḇeḇekiorya ma ikofen faro sko ḇo doḇe: "Mkenef mura fa mkomnai su mko. Imnis kwar. Fafisuya ryama kwar, mkomam kada, sḇoḇ Rumkun Snonkaku ya faro snonkaku ḇesasar. ⁴² Mkokḇok e, mkorama kora. Ḇeḇoḇ aya nya fyanam kwar." ⁴³ Ro fafisu Yesus dawos kaker, Yudas ro fandu manfamyan samfur seser risuru Yesus ḇyansya, ryama kuker rak ḇeyun sumber ma karbere ḇesma wawan ro mananir imam-imamsya, ḇefawi nananem Refo Yahudisya, ma snon ḇebarara. ⁴⁴ Snon ḇeḇoḇ Yesus ḇyuk aḇyair faro si kwar, isoine: "Snon nari yasyum ya, irya, mkofori ma mkuni kuker ḇaḇye." ⁴⁵ Ma rofyor ryama kwar ro dia, pyon fa isrou Yesus ma ikofen ḇo doḇe: "Rabi", raimnai isyumi. ⁴⁶ Ro dia siserepen Yesus ma sfori. ⁴⁷ Snon oso ro fandu sko ro moḇ anya, pyas sumber ḇyeja ma pyerem Imam Ḇeba ya manfamyan ḇyeja knasi fa imuk. ⁴⁸ Yesus ikofen faro si ḇo doḇe: "Mkoḇe snon mamun ri aya ke, inja mkorama kuker sumber ma karbere fa mkofor aya? ⁴⁹ Rasras na kam aya sya ro fandu mko ma Yaḇuk farkarkor ro rum Ari, ḇesya ḇo mkofor Aya ḇa. Ḇape rarirya kwar insa namnis fas-fas ḇero refo ya." ⁵⁰ Ro dia manfamyan ansya sifrar siburi kam. ⁵¹ Ro fafisu ya snon kbor oso isya syabusuni kuker kruḇen ḇepioperya iso Yesus. Siḇe sfor i, ⁵² ḇape pyupes kruḇen anya ma ifrar ibur ḇaḇer. ⁵³ Ḇarpur wer ssun Yesus I ḇe ḇarpon Imam Ḇeba sya. Ma mananir imam-imamsya, snon ḇebarara sya ma ḇefawi nananem Refo Yahudisya sfanjur kam. ⁵⁴ Ma Petrus dakso Yesus ro ḇarpur kaku, isof dakrandum ro buḇes Imam Ḇeba ya ma kyon fandu ḇewaren sya ḇo dakdapen forya. ⁵⁵ Mananir imam-imamsya, isyadi wer Kankain Kakara Agama ansya sesewar saksi ro sasar Yesus, insa nari smuni fa imar, ḇape sisma sasar oso ro i ḇa. ⁵⁶ Snonkaku sya sibor sikofen saksi ankar ro Yesus, ḇape ḇaḇesaksi ro Yesus wos sena namnis ḇa snar nun ḇesisye. ⁵⁷ Inja snonkaku ri ḇeso sek saksi fa se karak Yesus, kuker saksi ankar ḇera dine: ⁵⁸ "Nkomnaf snon ine ikofen kwar ḇo doḇe: Nari Yakakok Rum Ḇesren snonkaku sya sifrur ine ma nari yaḇausi ro ras rikior wer, ḇyeḇe frur ro ḇramin snonkaku ḇa." ⁵⁹ Ro yar ine kako ḇeḇesaksi sya wos sena namnis ḇa kaker. ⁶⁰ Inja Imam Ḇeba ya dores ro fandu kankain anya ma ifuken Yesus ḇo doḇe: "Jadi fa kwarem roi oso ro saksi ḇeḇe karak Au sine ḇa ke?" ⁶¹ Ḇape ḇye fasis monda ma kyarem woso ḇa. Imam Ḇeba ya ifuken wer ḇo doḇe: "Wairek i so au ke, Rumkun Allah ḇesma sanandikya?" ⁶² Yesus kyarem ḇo doḇe: "Ayai rya ḇaḇoi, ma nari mkomam Rumkun Snonkaku kyain ro ḇar raku Allah ḇepoik syadi ma ḇerama ker mandep ro nanki." ⁶³ Mura Imam Ḇeḇa ani pyansawsawek mar ḇyena ma ikofen ḇo doḇe: "Fainda rosai kosewar saksi kaker ya? ⁶⁴ Mkorower donef Allah kwar. Inja mkokara rariso?" Rarirya sawos namuk kuker mkarem oser, insa se ukumi fa Imar. ⁶⁵ Randak ro dia beri ḇo snon ono saninefi, span warek mkasi skuki ma sikofen faroi ḇo soḇe: "Ne nabi, indo wakofen ḇaii pan!" Ma snon ḇewaren warek sya sakḇaseri kako. ⁶⁶ Ro fafisu anya Petrus isya ro sop ro buḇes. Ma Imam Ḇeḇa infyan ḇyesya ia ryama, ⁶⁷ ma rofyor infyan anya myam Petrus dakdapen for ya myam bos i, ma ikofen ḇo doḇe: "Au kako ḇeso sawawek Yesus, snon Nazaret ani." ⁶⁸ Ḇape fyamyunepen ḇo doḇe: "Aya ine yafawi ḇa, ma yaḇor fnom roi wakofeni." Raimnai ryaḇe rum ya ḇarpondi [ma mankoko sya sor]. ⁶⁹ Rofyor infyan anya myam Petrus wer ikofen faro snonkaku ḇero diansya ḇo doḇe: "Snon ine oso ro fandu si." ⁷⁰ Ḇape Petrus fyamyun epen wer. Fyoro ḇa wer kawasa ḇero diansya sikofen faro Petrus ḇo soḇe: "Kaku ḇeri au ine snon oso ro fandu si, snar snon Galilea ri sau!" ⁷¹ Fyor anya Petrus ifras ma fyores ḇo doḇe: "Yafawi snon mkokofen ine ḇa kaku!" ⁷² Ma rofyor ya mankoko sya sor ḇe suru. Insape Petrus iswar epen ro Yesus Ikofen kwar faroi ḇo doḇe: "Mankoko sya sor ḇe suru ḇaim, fyamyunepen aya ḇe kior kwar." Mura Petrus kyanes.

¹ Arwo prim kaku mananir imam-imamsya fnoḇek sinan ḇeḇarara ma ḇefawi nananem Refo Yahudisya ma Kankain Karkara Agama sya sna wos oser kam kwar. Se wanka Yesus raimnai ssuni ma ssḇuki faro Pilatus. ² Pilatus ifuken Yesus ḇo doḇe: "Au ido wairek kawasa Yahudi ke?" Yesus kyarem ḇo doḇe: "Imnis wos bedi." ³ Ma mananir imam-imamsya se karak Yesus kuker roi nabor. ⁴ Pilatus ifuken wer faroi ḇo doḇe: "Kwarem ḇa? Wamnaf kada karak sena nabor kaku nkur au!" ⁵ Ḇape Yesus kyarem ḇa beri isof Pilatus ikandor. ⁶ Ro ras ḇeba na indo ssfaspar snonkaku ḇesmai sya oser raris fararyor kawasasya. ⁷ Ro fafisu anya snon oso snori Barabas ismai fnoḇek min ḇye ḇemamun ma ḇefrur mbrus. ⁸ Inja kawasa ḇeḇor ansya srama ma sor, insa sfaspar ḇesma oso imnis ḇepon kwar. ⁹ Pilatus kyarem ḇe si ma ifuken ḇo doḇe: "Mkomarisen fa yafaspar wairek kawasa Yahudi ine ke?" ¹⁰ Ifawi kwar mananir imam-imamsya sḇoḇ Yesus snar simsori. ¹¹ Ḇape mananir imam-imamsya sfarkor ninyan kawasa ḇeḇor ansya sor fa Barabas ḇyeḇe faspar faro si. ¹² Pilatus kyarem wer ma ifuken faro si ḇo doḇe: "Rarirya ido rosai mkomarisen yafrur faro snon mkor ḇe wairek Yahudi ine?" ¹³ Inja siyiw naba wer ḇo soḇe: "Ḇyeḇe pai ro aprop!" ¹⁴ Raimnai Pilatus ikofen faro si ḇo doḇe: "Ḇape sasar rosai ifrur kwar?" Ḇape ssibras naba syadi ḇo soḇe: "Ḇyeḇe pai ro aprop!" ¹⁵ Snar Pilatus iḇe ifrur sneprei kawasa ḇeḇor ansya sisnes na, inja fyaspar Barabas faro si. Ḇape Yesus sipreri, ma Pilatus ḇyuki fa spai i ro aprop. ¹⁶ Ḇarpur wer snonmamun sya ssun Yesus ḇe rum karkara ḇenapes, ma sor snonmamun ḇese sya kam fa sfanjur. ¹⁷ Ssansun i kuker syatu ḇefuk ma siyanem wower ḇeḇe borek ma srir i ro ḇruri. ¹⁸ Raimnai insape ssḇansuba faroi ḇo soḇe: "Jow suba, wairek kawasa Yahudi!" ¹⁹ Siprer ḇruri kuker doker fyor, ma saninefi ḇo sḇan suba ma ssomi. ²⁰ (20a) Sonefi raimnai sper ssansun syatu ḇefuk anya buri ma ssansuni wer kuker sansun Ḇyena. (20b) Ḇarpur kaku ssun Yesus randi spai i ro aprop ya. ²¹ Fafisu ya snon oso snori Simon, snon Kirene Alexander ma Rufus suyor ḇe kma ḇebur ker yaf imbran uk, ma sidif snon anya fa ḇyar Yesus aporop Ḇyedi. ²² Ssun Yesus ḇe moḇ ḇenir ḇe Golgota, isoine: Moḇ ḇukor ḇei. ²³ Raimnai ssḇuk anggur sfaunai kuker roi ḇefrurpis mamami faroi, ḇape imewer si. ²⁴ Posa spai i ro aprop ma sirarwas sansun Ḇyena kuker sisawen onde fa sifawi oser-oser rarwas ḇyedi. ²⁵ Ras anya oras siw arwo spai i ro aprop. ²⁶ Ma sfas ḇair knam eḇedar se ukum i ro aprop ya pum ya isoine: "Wairek kawasa Yahudi." ²⁷ Spai snonmamun risuru fnoḇek Yesus, oser ro ḇar raku Ḇyedi ma oser ro ḇar rasar Ḇyedi. [ ²⁸ Rarirya isrou bos rakrok refo isoine: "Nari skori ro fandu snonkaku ḇarḇor."] ²⁹ Snonkaku ḇeyunuk ro diwa sya sonefi ma skakiker siḇrusna ma sikofen ḇo soḇe: "Ye, au ḇeyoḇe ḇekakok rum ḇesren ma nari Bawesi wer ro ras rikior, ³⁰ faspar mankundau bur aprop ya ma Wasabu!" ³¹ Rarirya kako mananir imam-imamsya fnoḇek ḇefawi nananem Refo Yahudisya sonefi ro mankun si ḇo sikofen ḇo soḇe: "Fyaspar snonkaku ḇese sya, ḇape ipok fa Fyaspar mankundi ḇa! ³² Wairek, Wairek Israel iya iḇye kada isabu bur aprop insa nkomam ma nkokyar e." Ma snon risuru spai ro aprop fnoḇeki ansu ya suyakkofen kako. ³³ Ro oras samfur seser suru orkok, pampan ya ikawef sup ya mnuk ani, isof oras kior. ³⁴ Ma ro oras kior ya Yesus dor naba ḇo doḇe: "Eloi, Eloi lama sabakhtani?" isoine: Allah Yedi, Allah Yedi, snaro wabur Aya? ³⁵ Simnaf rarirya snon diḇeso ḇeyores ro moḇ anya sikofen ḇo soḇe: "Mkomam kada, dor Elia." ³⁶ Ma snon oso dun bunek ya ma syoweni ro anggur ḇemnir posa kyuki ro doker baken ya ma ḇye fa Yesus dinem ma ikofen ḇo doḇe: "Indo kowaf ma komampan Elia ryama isabu i." ³⁷ Raimnai Yesus dor kuker mkarem ḇeba ma ryir nyawa Ḇyedi. ³⁸ Ro fafisu ya eruk kruḇen ro rum ḇesren ya imsap ra ḇye suru ro ḇo isof ro sop. ³⁹ Fyor mananir snonmamun ḇeyores ro Yesus ḇarpondi myam marmar Yesus Ḇyeja riarirya, ikofen ḇo doḇe: "Kaku ḇeri snon ine Rumkun Allah!" ⁴⁰ Bin ono sisya sakmam ro swaf ḇeḇinkwan, ro fandu si Maria Magdalena, Maria snonkbor Yakobus i ma Yoses sna suḇedi, kuker Salome. ⁴¹ Si kam siso farma Yesus ma suf farmyani rofyor isya ro Galilea. Ma ro dia bin ḇerama kwar ro Yerusalem ḇembran so Yesus sibor kaku. ⁴² Ro fafisu anya fanam roḇ, ma ras anya ras fasasos isoine ras ḇeyuser mufa ro ras Mananai ya. ⁴³ Eḇedari Yusuf, snon Arimatea, snon ḇebarara ro Kankain Karkara Agama, ḇewaf kako Ḇaḇesasoser Allah, imku fa rya dor Yesus baken Ḇyeja ro Pilatus. ⁴⁴ Pilatus ikandor rofyor imnaf Yesus imar kwar. Inja dor mananir snonmamun ma ifuken faroi, kaku Yesus imar kwar ke? ⁴⁵ Rofyor imnaf wos mananir snonmamunya ḇyena kwar, insape ḇyuk fa Yusuf dun Yesus baken Ḇyedi. ⁴⁶ Inja Yusuf kyoḇes kruḇen bepioper ya raimnai, isabu Yesus baken Ḇyeja bur aprop ya, ma ryuren I kuker kruḇen ḇepioper ani. Posa bye kubiri ro ureren byai ro urek karui oso raimnai ikris karui oso fa isisen kubir ya kedwa i. ⁴⁷ Maria Magdalena ma Maria Yoses snari, sumamepen moḇ se kubir Yesus ro ya.

¹ Ras Mananai Yahudi isyonde kwar, Maria Magdalena ma Maria Yakobus snari, kuker Salome skokoḇes kefi-kefi insa skora ḇe kubir fa skoḇuk isfu Yesus. ² Ma arwo babo kaku ro ras Ari ani ori dek kwar ido skora ḇe kubir. ³ Skokofen yae faro sko ḇo skoḇe: "Mansei nari ḇekris karui ḇeba anya bur kubir ya?" ⁴ Ḇape fyor skofanam ido skomam karui ḇeba ani ikris kwar. ⁵ Inja skosun randum ro kubir ya dori ma skomam snonkbor oso syansun syatu ḇepioper ḇo kyain ro ḇar raku. Skokandor fafaya ḇaḇeri, ⁶ ḇape snonkbor anya ikofen faro sko ḇo doḇe: "Mkomkak awer! Mkosewar Yesus snon Nazaret, spai ro aprop anya. Diḇri kwar. Isya ro dine ḇa. Mkomam e! Mob srir i fa Ḇyarek ro ya isoine. ⁷ Inja mkora mkokofen faro manfamyan Ḇyesya ma faro Petrus: Pyon mko ḇe Galilea; ro diwa nari mkomami, imnis ikofen faro mko kwar." ⁸ Raimnai skosasyar ma skofrar bur kubir, snar radadai ma kanandor ya isawob sko. Skokofen roi oso ḇa faro mansei rya kaker, snar skomkak. ⁹ Rofyor Yesus diḇri ro arwo babo ras Ari anya, fyasna mankundi bepon faro Maria Magdalena. Bin ine Yesus iyaw rur ḇemaḇak rifik buri kwar. ¹⁰ Raimnai bin anya rya, ma ikofen ḇair faro ḇeso sawawek Yesus ansi snar ro fafisu anya sisya ro mandak ma skanes. ¹¹ Ḇape rofyor simnaf Yesus ikenem ma fyasnai i kwar faro bin ine sikyar ḇa. ¹² Raimnai Yesus fyasnai mankundi wer kuker sananai ḇese faro skomin risuru ro marandan besasyar bur mnu ḇeba ya. ¹³ Inja sukaḇer wer fa sukofen ḇair faro min ḇese suḇesi ḇape sikyar su ḇa kako. ¹⁴ Ḇarpur ya fyasna mankundi faro snon samfur seser oser ansya ro fafisu sanan, ma Ikofen ḇaḇe kakyar ḇa ma sne ḇepakrek sena faro si, snar sikyar faro snonkaku ḇemam i kwar ro ḇarpur aḇiḇer Ḇyeja ḇa. ¹⁵ Raimnai ikofen faro si ḇo doḇe: "Mkora ḇe supswan ḇesiper, mkoḇaryas Ankankinem Ḇeḇye ya faro roi ḇekenem sya kam. ¹⁶ Mansei ḇekyar ma ḇesma masi sren nari isma koreri, ḇape mansei ḇekyar ḇa nari ismai ukum. ¹⁷ Aḇyair nane nari nafnoḇek snonkaku ḇekyar sya: nari siyau rur ḇemaḇak sya kuker Snori, ma nari sawos ro wos-wos ḇeḇaḇo faro si, ¹⁸ ma nari suf ikak ma sinem roi ḇeyinem mamur ḇeyun ḇe marmar ya, ḇape nari simar ḇa; nari sirir ssibras na ro ḇeduf sya ma nari siprei." ¹⁹ Fyor Yesus dawos rarirya yoḇ si raimnai, diryor ḇe boiyaswa ma Kyain ro Allah ḇar raku Ḇyedi. ²⁰ Si kako sra sḇaryas Ankankinem Ḇeḇye ro moḇ na kam, ma Manseren ifararur fnoḇek si ma syoser wos ya kuker aḇyair ḇefnoḇek si.