MATIUS

MATIUS

¹ Yesus Kristus ḇyeḇarpur ro rumkun Daud, rumkun Abraham. ² Abraham daḇen Ishak, Ishak daḇen Yakub, Yakub daḇen Yehuda ma naek srar ḇyesi, ³ Yehuda daḇen Peres ma Zerah ro Tamar, Peres daḇen Hezron, Hezron daḇen Ram, ⁴ Ram daḇen Aminadab, Aminadab daḇen Nahason, Nahason daḇen Salmon, ⁵ Salmon daḇen Boas ro Rakhab, Boas daḇen Obed ro Rut, Obed daḇen Isai, ⁶ Isai daḇen raja Daud. Daud daḇen Salomo ro Uria swari, ⁷ Salomo daḇen Rehabeam, Rehabeam daḇen Abia, Abia daḇen Asa, ⁸ Asa daḇen Yosafat, Yosafat daḇen Yoram, Yoram daḇen Uzia, ⁹ Uzia daḇen Yotam, Yotam daḇen Akhas, Akhas daḇen Hiskia, ¹⁰ Hiskia daḇen Manasye, Manasye daḇen Amon, Amon daḇen Yosia, ¹¹ Yosia daḇen Yekhonya, ma naeksrar ḇyesi ro fafisu ḇaḇemanfyan ḇe Babel. ¹² Ḇarpur ro ḇaḇemanfyan ḇe Babel, Yekhonya daḇen Sealtiel, Sealtiel daḇen Zerubabel, ¹³ Zerubabel daḇen Abihud, Abihud daḇen Elyakim, Elyakim daḇen Azor, ¹⁴ Azor daḇen Zadok, Zadok daḇen Akhim, Akhim daḇen Eliud, ¹⁵ Eliud daḇen Eleazar, Eleazar daḇen Matan, Matan daḇen Yakub, ¹⁶ Yakub daḇen Yusuf Maria swari, ḇeaḇen Yesus sapḇe Kristus. ¹⁷ Inja sikam sesyos samfur seser rifiak ro Abraham isof Daud, syos samfur seser rifiak ro Daud isof ḇaḇemanfyan ḇe Babel, ma syos samfur seser rifiak ro ḇaḇemanfyan ḇe Babel isof ro Kristus. ¹⁸ Yesus Kristus ḇyeḇeaḇenya farfyar ḇyedi ryadine: Rofyor snaḇyedi Maria, ssḇuki dapsasor Yusuf, ro fafisu ani imoḇesḇa kuker Rur Ḇesren, rofyor sukenem ḇeimbeswa ḇaim. ¹⁹ Snar Yusuf Maria swari, snon ḇenapes dirya, inja imewer ifrur mamyai swari Maria ro fababa, mḇoi kyara fa imewer famyun i. ²⁰ Ḇape fafisu kyara fasis swaruser ani, Manseren malaikat ḇyesi oso ḇyair faroi ro mafu ḇo ikofen: “Yusuf romawa Daud wamkak awer fa wun Maria ḇeswa ḇedi, snar romawa doresya irya samambraḇ ro Rur Ḇesren. ²¹ Nari daḇen romawa snon oso ma nari nwir I ḇe Yesus, snar iso nari ḇeḇuk koreri faro er ḇyesi ro sasar sena.“ ²² Roi ḇeḇesya ine ndariryanya insa imnis Manseren wos Ikofen faro nabisya: ²³ "Mḇoi nari ḇinkbor oso imoḇesḇa, ma daḇen romawa snon oso ma nari snir I ḇe Imanuel" -- isoine: Allah ryous ko. ²⁴ Rofyor ḇyir ro anenef ḇyedi, Yusuf iso rosai Manseren malaikat ḇyedi syoser faroi kwar. Inja dun Maria ḇeswa ḇyedi, ²⁵ ḇape denefusi ḇa isof daḇen romawa snon ḇyedi ma nyiriḇe Yesus.

¹ Yesus ḇyeḇeaḇen kwar ro Betlehem ro sup Yudea ro awar Wairek Herodes, snon ḇefawinananem mak ono srama ker ḇar Wamurem ḇe Yerusalem ma sifuken: ² "Wairek Yahudi ḇeaḇen baboya Isyaro, moḇo? Nkomam kwar mak ḇyedi ro ḇar Wamurem ma nkorama fa nkaksyom I." ³ Fafisu wairek Herodes ma mnu Yerusalem ḇesiper simnaf rarirya sikandor kam. ⁴ Inja iryur mananir imam ma ḇefawinananem Refo Yahudisya ro er Yahudi, ma ifuken ro si, moḇ rosaiso nari Wairek ḇyeḇeaḇen roya. ⁵ Sikofen faro i ḇo soḇo: "Ro Betlehem sup Yudea snar raris nabisya sfas kwar bosoḇo: ⁶ ’Ma au Betlehem, wabaḇa syadi mnu-mnu ro sup Yehuda, ḇape nari manfarkin oso isasyar ro au, fa nari ḇyefarandows er Yesi Israel.’ " ⁷ Ramnai kuker fasasis Herodes dor snon ḇefawinananem mak ansi ma kuker aḇaḇen kaku ifuken kuker aunos faro si, fafisu rosai makya ḇyairya. ⁸ Raimnai iwansi ḇe Betlehem, doḇo: "Mkora, mkosewar pyum kaku insa mkofawi roi ḇekur Romawa ani ma rofyor mkosrow i kwar, mko ḇaryas fasau ma ḇeaya insa aya kako yara fa yaksyom I." ⁹ Simnaf wairek ani wos ḇyena kwar, sra beri. Indo mam kada, mak smam ro Wamurem ani pyon si isof imnai ro moḇ rosai Romawa ani, isya ro ya. ¹⁰ Fafisu smam mak ani, simarisen kaku. ¹¹ Ma ssun ro rum ani ma smam Romawa ani fnoḇek snari Maria, inja sḇansuba ma si syom I. Sikam sḇas kamon papus sena ma ssḇuk samsom farsarser faro I, isoine brawen, mamḇoḇo ma manispum. ¹² Snar snon ḇefawinananem mak ansi sismai ananun ro malaikat oso insa skaḇer awer faro Herodes, inja sibur ḇe mnu sena siso nyan ḇese. ¹³ Snon ḇefawinananem mak ansi sibur kwar, Manseren malaikat ḇyesi oso fyasnai faro Yusuf ro mafu ma doḇo: "Wakḇok wun Romawa anine kuker snari, mko frar ḇe Masir ma mkokain ro diwa isof Yakofen wer faro au, snar Herodes iḇesyewar Romawa ani fa myun I." ¹⁴ Inja Yusuf ikbok, ma dun Romawa ani kuker snari ro roḇ ani beri, ma sskobur ḇe Masir, ¹⁵ ma skokain ro diwa isof Herodes imar. Roi nane nesya insa Manseren wos Ikofen kuker sḇayo nabi: "Ro Masir Yor Romawa Yedi." ¹⁶ Fafisu Herodes ifawi, mḇoi snon ḇefawinananem mak ansi seankar i kwar, imsor kaku. Inja iwan fa smun romawa-romawa mkun ro Betlehem ma fanam Betlehem sya kam, isoine romawa ḇeḇewampasi wambarek risuru ḇesop imnis kuker rosai isma ma ifawi kwar ro snon ḇefawinananem mak ansi. ¹⁷ Rarirya wos Manseren Ikofen kuker sḇayo nabi Yermia isrow: ¹⁸ "Komnaf mkaren ro Rama, ḇarop ma kankanes ḇekum ḇarmor; Rakhel kyanes romawa ḇyesi ma imewer sawos sneprei indi, snar romawa ḇyesi sisyaḇa kwar." ¹⁹ Rofyor Herodes imar kwar, Manseren malaikat ḇyesi oso fyasnai mankundi ro mafu faro Yusuf ro Masir, doḇo: ²⁰ "Wakḇoke, wun romawa ani kuker snari ma mkokaḇer ḇe sup Israel, snar beaw fa ḇemun Romawa anisya simar kwar." ²¹ Inja Yusuf ikbok ma dun Romawa ani kuker snari ma skora ḇesup Israel. ²² Rofyor imnaf kwar mḇoi Arkhelaus ḇyewairek ro Yudea fa syadwer Herodes, kmari, inja imkak ryaḇe Betlehem. Snar sisma ananun ro mafu, inja Yusuf ryaḇe sup Galilea. ²³ Skora kwar ro diwa, Yusuf kyain ro mnu oso snori Nazaret. Roi nanekam ndarirya insa nasrow wos nabi-nabisya sikofen, nari sap Iḇe: "Snon Nazaret".

¹ Rofyor Yohanes Ḇeḇemasasi Sren ryama ro sup ḇeursḇa Yudea ma ḇyaryas: ² "Mkombror, snar Ḇaḇesasoser Boiyas fyanam kwar!" ³ Kaku beri iso Nabi Yesaya ikofen ḇaryar rofyor doḇo: "Mkaren snonkaku ḇekaru ro sup ḇerursḇa: ’Mkofasos nyan faro Manseren, mkofrur nyan ḇeaḇyoḇer faro I.’ " ⁴ Yohanes syun syatu ro onta bur, ma ḇeḇoḇek ḇyedi ro aiwan kif, ma roḇean ḇyena kampam ma umbersup. ⁵ Kawasa ḇekain ro Yerusalem, ma Yudea ḇesiper ma ro war Yordan ḇesiper srakam faro i. ⁶ Raimnai skarem sasar sena ma Yohanes ḇyuk masi sren faro si ro war Yordan. ⁷ Ḇape rofyor myam kawasa Farisi ma Saduki sya siḇor sakrama ma sakor masi sren, inja ikofen faro si ḇodoḇo: "Ne ikak ḇeknampu kpu ḇyena mko. Mansei ḇekofen faro mko, insa mkofrarḇur masasor nari ḇerama? ⁸ Inja mkoḇuk bon ḇemnis kuker marandor ḇekaku. ⁹ Ma mkokara awer ro mkosnemna mkoḇo: Nkoine kma nkoḇedi Abraham! Yakofen faro mko: Allah ipok kaku fa ifrur romawa faro Abraham ro karui nane! ¹⁰ Mkanya fyasos kwar ro ai fuarya, ma ai knam ḇeḇuk bon ḇepyumba, nari neḇeroḇen ma sikun na ro for. ¹¹ Yaḇuk masi sren faro mko kuker war imnis aḇyair marandor, ḇape ḇera papur aya Ikada Ipoksyadi ro aya ma yasyusḇa fa yaper roi ḇesower wemin ḇyesi. Ikada nari ḇyuk masi sren kuker Rur Ḇesren ma kuker for. ¹² Badei ḇeras isya kwar ro Ḇramin ḇyesuya. Nari Ifrur sren sayar aḇrui ḇyedi, ma iryur aḇrui ḇyesi ro kron, ḇoi pissya nari ikunsi ro for ḇepok ḇembrerḇa." ¹³ Yesus ryama ker Galilea ḇe Yordan faro Yohanes insa Isma masi sren ro i. ¹⁴ Ḇape Yohanes kyurpum ḇe I, ḇodoḇo: "Aya iso ḇesmai masi sren ro Aukada, ḇesyaḇo Woḇo rwama faro aya?" ¹⁵ Inja Yesus kyarem, ma Ikofen faro i: "Iḇye roi ḇeḇesya nane ndarirya mura, insa kuḇeimnis Allah marisen ḇyena kam." Inja Yohanes isouser I. ¹⁶ Isma masi sren kwar, Yesus Isasyar fasau bur warya ma ro fafisu ani beri nanki ḇyas ma Myam Rur Allah imnis manjawa dado faro I, ¹⁷ ma simnaf mkaren ro boiyas ḇekofen: "Inekada Romawa Yaswar kaku, faro I Ya ḇeḇare."

¹ Raimnai Rurya dun Yesus ḇe sup ḇerursḇa insa Isma fafrowes ro Ibiris. ² Ma ḇyefarfor ras ma roḇ samfur rifiak kwar, papupesya Yesus Ibiser. ³ Raimnai ḇefararwrowesya ryama ma ikofen faro I: "Kaku Au Rumkun Allah, buk sasoser insa karu nane nemamami." ⁴ Ḇape Yesus kyarem: "Fas-fasya isya: ’Snonkaku sikenem snar mamamiya dererḇa ḇape ro wos oser-oser ḇesasyar ro Allah sḇari.’ " ⁵ Ḇarpur Ibiris dun Iḇe Mnu Ḇasrenya ma ryir I ro Rum Allah bunemya, ⁶ raimnai ikofen faro I: "Kaku Au Rumkun Allah, wasawen mankundau snar fas-fasya isya: ’Ḇekur Au Allah syoser malaikat-malaikatsya ma nari skansin fa siser Au kuker siḇrasna insa wemin besu susbui awer ro karui.’ " ⁷ Yesus Ikofen faro i: "Fas-fas oso isya kako: ’Wafrowes awer Manseren Allah bedi!’ " ⁸ Raimnai Ibiris dun I wer ḇe bon ḇekaki kaku ma fyasnai faro I ḇaḇesasoser ḇeḇor kam ro supswan ine kuker payamyum ḇyena, ⁹ ma ikofen faro I: "Nanekam nari jaḇukna faro Au, rofyor Ban suba ḇo wasyom aya." ¹⁰ Inja Yesus Ikofen faro i: "Ibiris, wabur Aya! Snar fas-fas isya: Mḇoi wasyom faro Manseren, Allah bedi, ma derer faro I monda ḇenadi!" ¹¹ Raimnai Ibiris ibur I, mamkada, ma malaikat-malaikat srama fa suf farmyan Yesus. ¹² Ḇape rofyor Yesus Imnaf, mḇoi sfor Yohanes ikwar I syof bur ḇe Galilea. ¹³ Ibur Nazaret ma kyain ro Kapernaum, ro danosen andirya, ro supya fyor Zebulon ma Naftali, ¹⁴ insa ḇyeimnis wos Manseren Ikofen kuker sḇayo Nabi Yesaya: ¹⁵ "Sup Zebulon ma Naftali, nyan ḇeso munda, ḇe sup war Yordan ḇarya, isoine Galilea, sup er-er ḇese, -- ¹⁶ er ḇekain ro pampan, smam kwar Isnai ḇeba ma faro ḇekain ro sup kadarin marmar, Isnaiya dek kwar faro si." ¹⁷ Ro fafisu ani Yesus ḇyaryas: "Mkombror, snar Ḇaḇesasoser Boiyas fyanam kwar!" ¹⁸ Ma rofyor Yesus Isya imbran sye danosen Galilea, myam manbekanayek risuru, isoine Simon sap kako ḇe Petrus ma ḇedar ḇyedi, Andreas. Suisya ssunap pam ro danosen, snar su mandaswan in. ¹⁹ Yesus Ikofen faro su: "Murama, muso Aya, insa Yana muḇe mandaswan snonkaku." ²⁰ Inja fafisuya beri subur pam suḇena ma suso I. ²¹ Ma rofyor Yesus Ibur moḇ ani kwar, myam manbekanaek risuru wer, isoine Yakobus Zebedeus mandaḇendi kuker ḇedar ḇyedi Yohanes, sufnoḇek kma suḇedi, Zebedeus, skoisya skoyanem pam ḇe waiya. Yesus dor su, ²² fafisuya beri subur waiya kuker kma suḇedi, ma suso I. ²³ Yesus Imbran yar sup Galilea ḇesiper; ma ḇyuk farkarkor ro rum nadi sena ma ḇyaryas Ankankinem Ḇeḇye ro Ḇaḇesasoser Allah ma ḇyuk pararei faro snonkaku ḇeduf ma ḇeḇeroro sibor ro fandu er ine. ²⁴ Inja ḇyesno-sno ro sup Siria ḇesiper ma ssun faro I snonkaku ḇeduf ḇepyumba sya kam, ḇeduf dafduf ḇeḇor kam ma ḇeḇeroro, rur ḇemaḇaksya sower si, ma ḇeduf mandai ma ḇepapipen, ma Yesus ḇyuk pararei faro si. ²⁵ Ma kawasa sibor kaku semarani ma siso I. Sramuma ker Galilea ma Dekapolis, ro Yerusalem, ro Yudea ma Yordan ḇarya.

¹ Fafisu Yesus myam kawasa ḇeḇor ansi, dek ro urek oso ma kyain kwar, manfamyan ḇyesi siryur faro I. ² Raimnai Yesus irandak dawos ma fyarkor si ḇo Ikofen: ³ "Aski faro snonkaku rur ḇesaḇarar sya ro Allah ḇarpon ḇyedi, snar siḇena Ḇaḇesasoser Boiyas. ⁴ Aski isya faro snonkaku ḇeḇarop sya, snar nari sisma sneprei. ⁵ Aski isya faro snonkaku sne ḇesḇunek sya, snar siso nari ḇena supswan ine, ḇeromowi imnis Allah ankankinem ḇyedi. ⁶ Aski isya faro snonkaku ḇebiser ma ḇembrow snar napnapes ya, snar nari sisyopen. ⁷ Aski isya faro snonkaku ḇesaswar sya, snar nari sisma fakamaman. ⁸ Aski isya faro snonkaku sne ḇesren sya, snar nari smam Allah. ⁹ Aski isya faro snonkaku ḇeyun aski, snar nari sap siḇe romawa-romawa Allah. ¹⁰ Aski isya faro snonkaku ḇeḇekandera snar napnapes, snar sikada nari sisma Ḇaḇesasoser Boiyas. ¹¹ Aski isya faro mko, rofyor skoryae mko ma sifrur kandera mko ma sonef mko kuker wos ḇeḇor ḇeḇyeḇa snar Aya. ¹² Mkoryaḇ ma mkomarisen, snar ḇaḇyak mkoḇena naba ro boiyas, snar rarirya kako sifrur kandera kwar faro nabi-nabi ḇepon mko sya." ¹³ "Mko ine karumasen supswan. Rofyor karumasen ani ḇyuar, kuker rosaiso nari kofrur fa myasmasen wer? Ḇyuk fainda werḇa rarirya ḇyeḇesawen ma snonkakusya saref apapen i. ¹⁴ Mko ine isnai supswan. Mnu ḇekain ro Urek bori ipok fyanarḇa. ¹⁵ Oso wer snonkaku spam paramrom raimnai sikawefi kuker fyomba, mḇoi skafi ro adadu, isof ḇyeisnai snonkaku sya kaim ro rum ya. ¹⁶ Rarirya isnai ḇedi isak ma isnaiyar snonkaku sya insa smam fararur ḇepyum ḇena ma sisandik Kmami ro boiyaswa." ¹⁷ "Mkokara awer, Yarama ine fa Yaḇerer sasoser Refo Yahudi roḇaido syap nabi-nabi. Yarama fa Yaḇerer naba, mḇoi insa Yaḇeimnisna. ¹⁸ Inja Yakofen faro mko: Kaku beri rofyor nanki ma supswan ine ssupromes ḇaim, sasoser Refo Yahudi, mir roḇa pun oso nari ryoḇa beri isof nakam namnis. ¹⁹ Rarirya mansei ḇeḇerer roi oso ro sasoser Refo Yahudi ḇebaḇa syadi, ma fyarkor i kuker nyan ḇemnisḇa faro snonkaku ḇese, ima nari kyain ro moḇ ḇekakiḇa syadi ro Ḇaḇesasoser Boiyaswa; ḇape mansei ḇeḇeuser ma ḇefarkor mnis sasoser Refo Yahudi, ikada nari kyain ro moḇ ḇekaki syadi ro Ḇaḇesasoser Boiyaswa. ²⁰ Inja Yakofen faro mko: Rofyor kankenem ḇaḇeagama mkoḇena nanapes syadiḇa ro kankenem ḇaḇeagama ḇefawinananem Refo Yahudi ma snon Farisi syaḇa, kaku ḇeri nari mkaksun ro Ḇaḇesasoser Boiyaswaḇa. ²¹ Mkomnaf kwar wos Allah Ikofen faro kpu koḇesi: Mko mamun awer; mansei ḇemamun nari seifa ismai. ²² Ḇape Yakofen faro mko: Snonkaku mansei ḇemsorya faro naek ḇyedi nari seifa ismai; mansei ḇekofen faro naek ḇyedi: Ne, korwar! nari ssuni ḇeḇarpon Kankain Karkara Agama ma mansei ḇekofen: Famyun Allah! nari sisawen i ro for ḇembrerḇa. ²³ Inja rofyor, wun farsarser ḇena ḇe rokef farsarser fa bukfarser, ḇape kwara smai naek ḇedi imsor au, ²⁴ rwir farsarser ḇena ro ḇarpon rokef farsarserya ma rwa bedasi ḇepon kuker naek bedi resari, raimnai insape kwaḇer ma buk farsarser ḇena. ²⁵ Fasau fa bedasi kuker mbroḇ bedi rofyor ausya kaker kuker i ro nyanya faduri, imbude mbroḇ bedi ḇyuk au faro mankaraya ma mankara dakḇuk au wer faro ḇefnoḇek i sya fa wasmai ro buindi. ²⁶ Yakofen faro mko: Kaku ḇeri nari wasasyar ro diwaḇa, rofyor bak namuk nyaki ḇenaḇa. ²⁷ Mkomnaf kwar wos berok radine: Mkofrur farbuk awer. ²⁸ Ḇape Yakofen faro mko: Mansei myam bin oso ma irmomen i ro sneri, ifrur farbuk kuker i kwar ro sneri dori. ²⁹ Inja rofyor mkamsu ḇar rakuya ḇyeninyan au, weri ḇo wasawen i, snar ipyum syadi faro au rofyor kina oso ro ḇaken bedi ryo, ro ḇaken bedi ḇesiper ḇyeḇesawen ro for ḇembrerḇa. ³⁰ Rofyor ḇramsu ḇar rakuya ḇyeninyan au, kwaruk i ma wasawen i, snar ipyum syadi faro au kina oso ro ḇaken bedi ryo ro ḇaken bedi ḇesiper ḇyeḇesawen ro for ḇembrerḇa. ³¹ Wosya ḇyeḇekofen kwar kako: Mansei ḇefaspar swari nari ḇyuk syap faspar faro i. ³² Ḇape Yakofen faro mko: Mansei ḇefaspar swari snar farbukḇa, i ḇefrur fa swari i frur farbuk; ma mansei ḇefakawin kuker bin fyaspar ani, ikako dakfrur farbuk. ³³ Mko mnaf kako kwar wos sikofen faro kpu koḇesi: Swowar ankar awer, mḇoi wufepen sowar bedi ro ḇarpon Manseren. ³⁴ Ḇape Yakofen faro mko: Mkopok mko sowar ḇa beri, iḇye kuker nanki, snar nanki irya Allah karapesa nasan ḇyedi, ³⁵ iḇye kako kuker supswan, snar supswan Allah araref ḇyedi rya, roḇa kuker Yerusalem, snar Yerusalem irya mnu Wairek Ḇeba, ³⁶ swowar awer kako kuker ḇru ḇedi, snar wapokḇa fa wafrur snonburyam oser fa ipyoper roḇa pyaisem. ³⁷ Rofyor mḇoi, iḇye mkokofen: mḇoi, rofyor roḇa, iḇye mkokofen: roḇa. Rosai ḇesyadi ro ine ḇyeknam ro ḇeḇarḇor ya. ³⁸ Mkomnaf kwar kako wos: Mkamor syadwer mkamor ma nakor syadwer nakor. ³⁹ Ḇape Yakofen faro mko: Mkomunsu awer snonkaku ḇefrur ḇarḇor faro mko, mḇoi manseiryawer ḇyaser fofer raku bedi, buk kako faro i fofer rasar bedi. ⁴⁰ Ma faro snonkaku ḇemarisen ḇeḇuksof au snar irmomen sansun bedi, buk kako syatubedi. ⁴¹ Ma manseirya wer ḇeḇedafdifer au fa wambran fnoḇek i kawanwan mil oser, wambran fnoḇek i kawanwan mil risuru. ⁴² Buk faro snonkaku ḇeyor ari faro au, ma snonkaku ḇeyor ari rosai ro au wamewer awer. ⁴³ Mkomnaf kako kwar wos: Mkoswar min mkoḇesi ma mkain mbroḇ mkoḇesi. ⁴⁴ Ḇape Yakofen faro mko: Mkoswar mbroḇ mkoḇesi ma mkoḇenadi wark ḇeḇewayam mko sya. ⁴⁵ Snar kuker rarirya mkoḇe romawa-romawa faro Kma mkoḇedi ro boiyaswa, ḇeḇuk ori faro snonkaku ḇarḇor ma ḇeḇye sya ma ḇyuk mekemya dado faro snonkaku ḇenapes ma ḇenapesḇa. ⁴⁶ Rofyor mko swar faro ḇeswar mko sya, rosai wasma ḇeḇaḇyak ya? Mkofawiḇake ḇeyor balasten sya kako sakfrur rarirya? ⁴⁷ Ma rofyor mkoḇuk aroo munda faro naek mkoḇesi monda, rosai ḇesyadi ro fararur snonkaku ḇesesi sena? Mkofawiḇake snonkaku ḇefawi Allahḇa sya sakfrur rarirya? ⁴⁸ Inja mkonapes imnis raris Kma mkoḇedi ro boiyaswa moḇ inapes rai."

¹ "Mkoswarepen, mkofrur awer fandun agama mkoḇena ro ḇarpon snonkaku insa smam na, snar rofyor mkofrur rarirya, nari mkosma ḇaḇyak ḇa ro Kma mkoḇedi ro Boiyaswa. ² Inja rofyor buk farsarser, mkonuk maon ḇeḇaryas awer na, raris kawasa ḇeḇarḇor sya sifrur ro rum-rum nadi ma ro rumbins swaf, insa sisma sanandik ro snonkaku. Yakofen faro mko: Kaku ḇeri ḇaḇyak sedi sisma ikwar. ³ Mḇoi woḇo buk farsarser ido, ḇramsi ḇar rasar ya ipok ifawi awer rosai ḇramsi ḇar raku ya ifrur ya. ⁴ Iḇye farsarser ḇena buk na kuker yakyokef, insa Kmami ḇemam roi ḇeyokef na nari myunsu na faro au." ⁵ "Ma rofyor mkoḇenadi, mkoḇenadi awer imnis snonkaku ḇemarares sya. Simarisen soresḇo sḇenadi ro rum nadi sena donna ma sampak farsam, insa kawasa smam si. Yakofen faro mko: Kaku ḇeri sisma ḇaḇyak sedi kwar. ⁶ Ḇape rofyor waḇe ḇenadi, swun randum ro sim bedi, ma kwen kedwai ya ma ḇenadi faro Kmami ro moḇ ḇeyokef. Ma Kma bedi bemam roi ḇeyokef na nari myunsu na faro au. ⁷ Oso wer rofyor mkoḇenadi mko kaḇkaḇer awer imnis raris snonkaku ḇefawi Allahḇa sya. Skara ḇo soḇo nadi ḇekwan na, nari naser kankarem. ⁸ Inja mkomnis awer si, snar Kma mkoḇedi Ifawi roi ḇeḇor mkoḇe fandun na, ro fafisu mkor na ḇaim faro I. ⁹ Inja mkoḇenadi radine: Kma nkobedi ro boiyaswa, Nkofasren Snomḇri kada, ¹⁰ Ḇaḇesasoser Bedi ryama kada, Marisen bedi ryarirya kada Ro supswan ine imnis ro boiyaswa. ¹¹ Buk maro nko ro ras ine roḇean namnis maro nko ¹² ma Wapyos nyaki sasar nkoḇena, imnis nkakpyos nyaki sasar snonkaku ḇeḇesasar maro nko sya; ¹³ ma Wun nkoḇe fafrowes na awer, mḇoi faspar nko bur Ibirisya. [Snar Au ḇena Ḇaḇesasoser ya ma papaik ya ma payamyum ya isof fyoro-fyoro. Amin.] ¹⁴ Snar rofyor mkopyos snonkaku sasar sena, Kma mkoḇedi ro boiyaswa Dakpyos sasar mkoḇena kako. ¹⁵ Ḇape rofyor mkopyos sasar snonkaku ḇa, Kma mkoḇedi kako Ipok dakpyos sasar mkoḇena ḇa." ¹⁶ "Ma rofyor mkofarfor, mkomam saneso awer imnis snonkaku ḇeḇarḇor. Smam saneso, insa snonkaku smam si skara sisya ro ḇaḇefarfor. Yakofen faro mko: Kaku ḇeri sisma ḇaḇyak sedi kwar. ¹⁷ Ḇape rofyor waḇe befarfor, rwem ḇrumbri ma bansren mkamsi, ¹⁸ insa snonkaku sya smam awer ausya ro ḇaḇefarfor, mḇoi derer Kma bedi ro moḇ beyokef. Mḇoi Kma ḇedi ḇemam roi ḇeyokef nari myunsu na faro au." ¹⁹ "Mkosewar awer papus ro supswan ine; snar ro supswan ine nari snus ma praf nari nenafanamkok ma ḇekarau-rau sya simkok ma skarauna. ²⁰ Ḇape mkosewar faro mko papus ḇero boiyaswa; snar ro boiyaswa snus ma praf nenafanamkokḇa ma ḇekarau-rau sya sipok skakok na ma skarauna ḇa. ²¹ Snar ro moḇ papus ḇena naisya roya, ro dia snembri isya kako. ²² Mkamor ḇyepadamara faro ḇaken ya. Rofyor mkamsu suḇye, ḇaken ḇedi ḇesiper isnai; ²³ rofyor mkamsu suḇarḇor, beken ḇedi ḇesiper pyampan. Inja rofyor isnai ḇero au pyampan, nari pampan ya pyampan bos beri. ²⁴ Snonkaku oser ipok duf farmyan tuan risuruḇa. Snar rofyor rarirya, nari dayin oso ma iswar suminya, roḇa ido ḇyeuser faro oso ḇoi suminya ḇyefandun i ḇa. Mkopok mkoḇe manfyan faro Allah ma faro papus ba." ²⁵ "Yakofen faro mko: Mkomkakwarek awer kankenem mkoḇena, nari rosai mkan roḇa mkinem, ma mkomkakwarek awer ḇaken mkoḇena kako, rosai nari mkofmar na. Mkofawiḇake kankenem ya isyadi ro roḇean ma ḇaken ya isyadi ro famamar? ²⁶ Mkomam faro man sya ro farsyos, ḇeyakḇuḇer morḇa ma ḇeyakufḇa ma ḇeyakryur roḇean ro sayarḇa, ḇesyaḇo Kma mkoḇedi ro boiyaswa ḇyuk roḇean ḇemnis faro si. Inja mkofawiḇake mko kada mkosyadi bur ro man sya? ²⁷ Mansei ro fandu mko snar imkakwarek kankenem ḇyedi inja pyam rof oser monda ro nyan kankenem ḇyedi? ²⁸ Ma snaro mkomkakwarek roi ḇefmar? Mkomamepen mampyoper pampen ro maper, ḇesur ḇoi ḇefararur ḇa ma ḇefawi ḇeroren ḇa, ²⁹ ḇape Yakofen faro mko: Salomo kuker payamyum ḇyena kako, ḇape daksansuni kuker sansun ḇepyum inis pampen sya osoḇa. ³⁰ Inja raris Allah fyamankor aḇris ro maper, ḇeḇesya ro ras ine ma meser sisawen si ro for, inja Allah ipokḇake fa fyamankor mko syadi wer, ne, mko snonkaku ḇekyar mnis ḇa? ³¹ Inja mkomkakwarek awer ma mkoḇo: Rosaiso nari nkan ya? Rosaiso nari nkinem ya? Rosaiso nari nkofmar ya? ³² Roi nanefa kam er-er ḇeyakfawi Allah ḇa sya siso ḇesewar na. Ḇape Kma mkoḇedi ro boiyaswa Ifawi, mḇoi mkoḇe fandun nakam. ³³ Inja mkosewar bepon Ḇaḇesasoser Allah ma napnapes ḇyedi, nari nakaem neḇeḇuk fnoḇek faro mko. ³⁴ Inja mkomkakwarek awer meserdi, snar meserdi nya ananjar ḇardi. Ananjar ro ras-ras imnis faro ras ani."

¹ "Mkoḇe ḇaḇemankara awer snonkaku, insa sakḇe mankara awer mko. ² Snar kuker ḇaḇemankara mkobuki ḇyemankara, nari ssḇuki ḇyemankara mko kako ma warnkyara mkobuki ḇyewarnkyara, nari ssḇuki ḇyewarnkyara mko kako. ³ Snaro mam faro ai muḇen ro naek bedi mka ḇyedi, ḇoi ai mnuk ḇeba ro mka ḇedi wafawi i ḇa? ⁴ Rariso wakofen faro naek bedi: Iḇye yer ai muḇen ḇero mka bedi, ḇoi ai mnuk ḇeba ḇero mka bedi baḇir i ḇa. ⁵ Ne, snonkaku ḇeḇarḇor, wasasyar ḇepon ari ai mnuk ḇeba ro mka ḇedi, insape nari mka ḇedi myam fa buki ryer ai muḇen ani ro naek bedi mka ḇyedi." ⁶ "Mkoḇuk awer roi ḇesren faro make sya ma mkosawen awer inkin mor faro randib sya, insa saref apepen awer i, raimnai i warye fa kyar sawek mko." ⁷ "Mkore, nari sḇuk faro mko; mkosewar, ma nari mkosma; mkonuk, nari kedwa ya ḇyeḇeseḇen faro mko. ⁸ Snar snonkaku mansei ḇeyor, isma ma snonkaku mansei ḇesewar, isrow ma snonkaku mansei ḇenuk faro i kedwa ya ḇyeḇeseḇen. ⁹ Isyake snon oso ro mko ḇyuk karui faro romawa ḇyedi, rofyor dor ifen, ¹⁰ roḇaido ḇyuk ikak rofyor dor in? ¹¹ Inja rofyor ḇeḇarḇor mko ya, mkofawi mkoḇuk roi ḇeḇye faro romawa mkoḇesi, isyadi wer kuker Kma mkoḇedi ro boiyaswa! Nari ḇyuk roi ḇeḇye faro ḇeyor faro I sya." ¹² "Roi ḇeḇor mkomarisen insa snonkaku sifrur faro mko, rarirya mkakfrur faro si kako. Irya sasoser ḇeyufur Refo Yahudi ma syap nabi sya. ¹³ Mkosun ro kedwai ḇefyos ya, snar kedwai ḇeḇam ma nyan ḇemgkeiya dun faro for ḇembrerḇa, ma kawasa sibor ssun ro i; ¹⁴ snar kedwai ḇefyos ma nyan ḇemkei ḇa ḇeyun faro kankenem ya, kawasa ḇesma i sya sibor ḇaḇeri." ¹⁵ "Mkoḇesasor mko ro nabi-nabi sararer, ḇerama faro mko ḇefrur farari domba, ḇape kaku ḇeri sikada randip arḇur ḇermomen. ¹⁶ Nari mkomam bir si ro bon sena. Rariso snonkaku srokem awai bon ro aser borekke roḇa imyui bon ro manḇines borek? ¹⁷ Rarirya ai knam ḇeḇye na nbuk bon ḇeḇye, mḇoi ai knam ḇeḇyeḇa na nbuk bon ḇeḇyeḇa. ¹⁸ Rarisyaḇa ai knam ḇeḇye ipok imarem bon ḇeḇyeḇa maroḇa, ma ai knam ḇeḇyeḇa ipok imarem bon ḇeḇye ono ḇa. ¹⁹ Inja ai knam ḇemarem bon ḇeḇyeḇa, nari sroḇen na ma sisawen na ro for ya dori. ²⁰ Inja nari mkomambir si ro bon sena. ²¹ Nari mkoḇo snonkaku ḇeyor Ayaḇe: Manseren, Manseren! siso nari ḇesun ro Ḇaḇesasoser Boiyaswa, roḇa kaku, mḇoi ḇeḇeuser Kma Yedi marisen ḇyena ro boiyaswa sikada. ²² Ro ras ḇepupes ya snonkaku sibor kaku sor Aya, ḇo soḇo: Manseren, Manseren, mḇoi nkoiso ḇeḇardi snonsnon Bedi, ma ḇeyaw Ibiris kuker snonsnon Bedi ma ḇefrur aḇyair kanandor kuker snonsnon Bedi kako? ²³ Rofyor ani nari yawos isnai faro si ma Yakofen: Yamam ḇaḇir mko ḇaḇeri! Mko bur Aya, mko kaem ḇefrur ḇarḇor!" ²⁴ "Manseisi ḇemnaf wos Ayenane ma ḇeḇeuserna sya, simnis kuker snonkaku ḇefawi nananem ḇefrur rum ḇyedi ro saprop ḇepnas. ²⁵ Ḇarpur mekem ya imyun ma daf ya myun, ma wam ya ifnak rum ani, ḇape rum ani kyarḇaken ḇa snar ḇyeḇeḇawes ro saprop ḇepnas. ²⁶ Ḇape mansei si simnaf wos Ayenane ma ḇeḇeuserna ḇa sya, simnis kuker snonkaku ḇefawi nananem ḇa, ḇefrur rum byedi ro karyen. ²⁷ Ḇarpur mekem ya imyun ma daf ya ryama, ma wam ya ipok ḇo ifnak rum ani, isof rum ani kyarḇaken ma imkokbos beri." ²⁸ Ma Yesus dawos rarirya posa kwar, kawasa ḇeḇor ḇemnaf farkarkor ḇyena sikam sikandor, ²⁹ snar fyarkor si imnis snonkaku ḇena papoik, mḇoi imnis kuker ḇefawinananem Refo Yahudisya ḇa.

¹ Yesus isabu kwar ro urek ya, snonkaku sibor semarani ḇo siso I. ² Ro fafisu ani snon ḇeduf pado oso ryama kyunem ma ḇyansuba faro Yesus, ro ḇarpon ḇyedi ma ikofen: "Tuan, rofyor Tuan wamarisen, Tuan wapok fasren aya." ³ Inja Yesus pyan ro snon ani ḇo Ikofen: "Yamarisen fa waprei." Ro fafisuya beri snon ani isren ro dafduf pado ani. ⁴ Raimnai Yesus ikofen faro i: "Waswarepen, wakofen ḇadir awer pararei bedine faro snonkaku oso, ḇoi rwafa fasnai mankundaw faro imam ma buk farsarser, raris Moses ḇyuk sasoser kwar faro si." ⁵ Fafisu Yesus syun ro Kapernaum mananir sarar oso ryama faro I mo ikofen, ḇo doḇo: ⁶ "Tuan, manfyan ayedi ḇyarek ro rum ma iduf dafduf papipen ma iduf fafaya ḇa." ⁷ Yesus ikofen faro i: "Woḇo Yarafa Yaḇuk pararei faroike?" ⁸ Ḇape mananir sarar ani kyarem faro Yesus, ḇo doḇo: "Tuan, yasyusḇa fa yor Au ḇe rum ayedi, mḇoi Wakofen wos oser monda, nari manfyan ayedi iprei. ⁹ Snar mankundaya yaso sasoser ro mananir ayedi, ma ro baḇ ayedi sordade sisya. Rofyor yakofen faro sordade yesi oso: Rwa!, nari rya, ma faro oso wer: Rwama!, nari ryama, roḇa wer faro manfamyan yesi oso: Wafrur roi ine!, nari ifrur roi ani." ¹⁰ Rofyor Yesus imnaf kwar rarirya, I kandor ma Ikofen faro kawasa ḇeso Insya: "Yakofen faro mko, kaku ḇeri kakyar ḇeba ḇera dine Yasma ḇaim ro fandu snonkaku oser ro fandu kawasa Israel si. ¹¹ Yakofen faro mko: Kawasa sibor nari srama ker Wamurem ma Wamḇarek fa skain sanan kam kuker Abraham, Ishak ma Yakub ro Ḇaḇesasoser Boiyaswa, ¹² ḇoi romawa-romawa Ḇaḇesasoser ansi kada nari sisawen si ro moḇ ḇepapan-ḇepampan bos kaku, ro moḇ ḇeser kankanes ma arkfafais nakor." ¹³ Raimnai Yesus ikofen faro mananir sarar ani: "Waburmura ma nari wasma raris kakyar bedi." Ma ro fafisu ani beri manfyan ḇyani i prei. ¹⁴ Skorama ro Petrus rum ḇyedi, Yesus myam Petrus imbanyori ḇyarek snar ḇyis. ¹⁵ Yesus duf bin ani ḇrasi, ma bis ani iburi beri. Ikḇok beri ma duf farmyan I. ¹⁶ Ro mandira ya ssun faro Yesus snonkaku ḇeḇor rur ḇemaḇak siswoḇer sya ma kuker wos oser monda Yesus iyaw rur-rur ansi ma ḇyuk pararei faro snonkaku ḇeduf si. ¹⁷ Roi ḇeḇesya nane ndarirya insa Nabi Yesaya wos ikofen fa ḇekur moḇ ine ya imnis, doḇo: "Iso ḇeḇar papokḇa koḇena ma ḇekamar dafduf koḇena." ¹⁸ Ro fafisu Yesus myam kawasa ḇeḇor sores yaryar I, Iwan fa manfamyan ḇyesi skaḇor ḇe danosen ya ḇar iwara. ¹⁹ Raimnai snon ḇefawinananem Refo Yahudi oso ryama ma ikofen faro Yesus, ḇo doḇo: "Guru, yamarisen yaso Au, ḇe moḇ sai rwayoḇ na." ²⁰ Yesus ikofen faro i: "Randip arḇur ya isma niw ma man sya sisma narem, ḇape Rumkun Snonkaku daksma moḇ fa Denef ro ḇa." ²¹ Snonkaku oso ḇese, isoine oso ro manfamyan ḇyesi, ikofen faro Yesus, ḇo doḇo: "Manseren, buk fa yara resari fa yakrir mami." ²² Ḇape Yesus ikofen faro i: "Waso Aya ma snonkaku ḇemar sya iḇye sikrir snonkaku ḇemar sesi." ²³ Raimnai Yesus dek ro wai ya ma manfamyan ḇyesi siso I. ²⁴ Kniko monda wam doḇer ḇeba myun ro danosen ani, isof bak na nbaser wai ani, ḇape Yesus denef. ²⁵ Inja manfamyan ḇyesi oso ryama ḇyan I, ḇo doḇo: "Manseren, wafnoḇek, koine koro." ²⁶ Ikofen faro si: "Snaro mkomkak, mkokyar mankunba?" Raimnai Yesus iyori, ma Imsor wam ma bak anna, ma danosen ani iḇrin bos beri. ²⁷ Ma snonkaku ansi sikandor, ḇo sikofen: "Snon rosaisoine, indiriso wam ma ḇakna neuser sasoser ḇyedi?" ²⁸ Sko fyafer kwar ro ḇarya, isoine ro sup ya fyor kawasa Gadara, snonkaku biris iswoḇer suya surama ker rusna, fa su srow Yesus. Suḇarḇor bos beri, isof snonkaku ono sipok sunuk nyan ani ḇa. ²⁹ Ma snon ansui suyar naba, suyoḇo: "Rosai waḇe wafrur ḇe nko, ne, Rumkun Allah? Inja rwama kwar ya isoineke fa buk kandera faro nko ḇepon ro fafisu ya ḇaim?" ³⁰ Mḇoi ḇyinkwan knikrosi randip naiḇeba ono simbran sanan. ³¹ Inja Ibiris ansi sor faro Yesus, soḇo: "Rofyor wayaw nko, iḇye wawan nko fa nkosun ro randip nai siwa." ³² Yesus ikofen faro si: "Mkora!" Inja sisasyar ma ssun ro randip nai ansi. Rarirya randip nai ḇesiper ansi soper kam ro fofen ya ḇe danose ya dori ma simsar kam. ³³ Inja ḇewaren randip ansi sifrar ḇe mnu ya ma sfawar roi ḇeḇor nakam ro snonkaku Ibiris iswoḇer ansu ya. ³⁴ Inja kawasa ro mnu ansya kam sisasyar fa sra sisrow Yesus, ma sisrow Yesus kwar, sikam sordafdifer I insa Ibur sup sedi.

¹ Inja Yesus dek kwar ro wai ya posa skokaḇor. Fyoroḇa skofyafer ro mnu marin ḇyedi. ² Ma kawasa ssun faro I snon ḇepapipen oso ḇeḇarek ro kamḇoi anenef ḇyedi. Rofyor Yesus myam kakyar sena Ikofen faro snon ḇepapipen ani: "Wakyare, ne, romawa Yedi nyaki sasar bena neḇepyos kwar." ³ Snon ḇefawinananem Refo Yahudi ono simnaf rarirya sikofen ro sisnesna, soḇo: "Idonef Allah." ⁴ Ḇape Yesus Ifawi swaruser sena inja Ikofen: "Snaro mkokara roi-roi ḇeḇyeḇa ro mkosnemna? ⁵ Rosai ḇepyan ya, Yakofen: Sasar bena neḇepyos kwar, roḇaido Yakofen: Wakḇok ma wambran? ⁶ Ḇape insa mkofawi, ro supswan ine Rumkun Snonkaku ipok ipyos sasar" -- raimnai Ikofen faro snon ḇepapipen ani; --"Wakḇok, wakanow kamḇoi anenef bedi ma wabur ḇe rum bedi!" ⁷ Ma snon ani iyori fa ibur. ⁸ Ma kawasa ḇeḇor ḇemam roi ḇeḇesya ani simkak ma sisandik Allah ḇeḇuk kwar papoik ḇerarirya faro snonkaku. ⁹ Rofyor Yesus ibur kwar ro dia, Myam snon oso snori Matius kyain ro rum ḇeyor som, inja Ikofen faro i: "Waso Aya." Ma Matius iyori ma iso I. ¹⁰ Ḇarpur ya rofyor Yesus danan ro Matius rum ḇyedi, ḇeyor som sibor srama ma snonkaku ḇesasar ono sanan kam kuker Yesus ma manfamyan Ḇyesi. ¹¹ Rofyor snon Farisi smam rarirya sikofen faro manfamyan Ḇyesi, soḇo: "Snaro Guru mkoḇedi danan kuker ḇeyor som ma snon sasar?" ¹² Yesus imnaf rarirya Ikofen: "Snonkaku ḇeprei sefandun ḇena monsyaḇa, ḇoi snonkaku ḇeduf sya siso ḇeḇefandun ḇena mon." ¹³ Inja mkora, ma mkokara wos ine kankunesḇyedi isoine: "Roi Yaḇefandun ya isoine sne ḇesaswar ḇoi farsarser ḇa, snar Yarama fa yor ḇenapes sya ḇa, ḇoi Yor kawasa ḇesasar." ¹⁴ Ḇarpur ya manfamyan Yohanes ḇyesi srama faro Yesus ma sifuken, soḇo: "Rariso indiri nko kuker Farisi sya nkoḇe farfor, mḇoi manfamyan besi sakfarfor ḇa?" ¹⁵ Yesus kyarem farosi: "Inja manfakawin ya bati ḇyesi semarindiro fafisu manfakawin ya isya kyainus si? Ḇape fafisu isyama nari ssun manfakawin ya bur si ma ro fafisu ani insape nari sakḇe farfor. ¹⁶ Snonkaku osoḇa beri syokop sansun ḇekwar kuker marker ḇebabo, snar nari marker ḇebabo ani ismeruk sansun ani, ma makmuk ya iba syadi wer. ¹⁷ Rarirya kako somunaḇebabo seḇeser ro kibonḇeḇerereḇa snar rofyor rarirya ido nari kibon ḇeḇerere ani imef ma swan ansi sisbawer ma kibon ani kako ḇyemommom. Inja somuna ḇebabo sya seḇeser ro kibon ḇebabo kako, ma rarirya sukam suḇe ḇefaduru." ¹⁸ Fafisu Yesus dawawos rarirya faro si, mananir rum nadi, oso, ryama faro Yesus ma ḇyan suba faro I, ḇo doḇo: "Inaikir ayedi insandi imar, ḇape yor fa rwama insa rwir ḇramsi roi, nari ikenem wer." ¹⁹ Inja Yesus iyor i fnoḇek manfamyan Ḇyesi ma siso snon ani. ²⁰ Rofyor ani bin ḇeduf dafduf rik ḇewampasi wambarek samfur seser risuru ryama fyanam Yesus ro ḇarpur Ḇyedi ma pyan ro Yesus syatu Ḇyedi pusyom na. ²¹ Snar kyara ro sneri: "Mḇoi yapan monda ro syatu Ḇyenano nari yaprei." ²² Ḇape Yesus isiḇer fa myam i ma Ikofen: "Wamku ser snembri, ne inai Yedi, kakyar bedi ḇyuk pararei faro au kwar." Inja ro fafisu ani beri bin ani iprei bos. ²³ Rofyor Yesus rya kwar ro mananir rum nadi ani rum ḇyedi ma myam siwuf sonker ma kawasa ḇeḇor ansi sembrus, ²⁴ ikofen faro si: "Mko sasyar bur, snar inai ine imarḇa, ḇoi denef. Ḇape simbrif I." ²⁵ Rofyor kawasa ansi seḇeyaw kwar, Yesus syun ma duf inaikir ani ḇrasi, rofyor ani inaikir ani ikbok beri. ²⁶ Rarirya roi ḇeḇesya ani ḇyesno yar-yar sup ya fyor ani. ²⁷ Rofyor Yesus imbran pdef mararan Ḇyedi ro diwa, snon ḇepraf risuru suyom I ma suyor ḇo suyoḇo: "Waswar nu, ne, Romawa Daud." ²⁸ Ro fafisu Yesus syun ro rum oso, snon ḇepraf ansu ya sura faro I ma Yesus ikofen faro su: "Mukyar, nari Yapok yafrur raris fararyor muḇena?" Sukarem, suyoḇo: "O Manseren, nukyare." ²⁹ Raimnai Yesus pyan ro mkamor suḇesi ma Ikofen: "Musma raris moḇ mukyar rai." Fyorya beri mkamor suḇesi sḇas. ³⁰ Ma Yesus danun pakrek faro su, ma ikofen: "Muswarepen naḇye insa snonkaku osero ifawi awer roine." ³¹ Ḇape rofyor susasyar ya beri suḇaryasi ro supya fyor ani ḇesiper. ³² Rofyor snon ḇepraf ansuya susasyar, kawasa ssun faro Yesus awer oso biris ya iswoḇer i. ³³ Ma rofyor Ibiris ya ḇyeḇeyaw, awer ani dawawos beri. Kawasa ḇeḇor ansi sikandor soḇo: "Roi ḇera dine komam baim ro Israel." ³⁴ Ḇape Farisi sya soḇo: "Kuker papoik ro mananir Ibiris Iyau Ibiris ya." ³⁵ Rarirya Yesus Imbran yar ḇe mnu nakam; Ḇyuk farkarkor ro rum nadi ma ḇyaryas Ankankinem Ḇeḇye ro Ḇaḇesasoser Boiyaswa ma iyaw dafduf ma papipen nakaem. ³⁶ Myam kawasa ḇeḇor ansi, Yesus sneri dek kuker sawarwar faro si, snar simor ma ssoninyan imnis domba ḇena manfarandowsḇa. ³⁷ Inja Ikofen faro manfamyan Ḇyesi: "Fafisu afufya imnis kwar, ḇoi yaf ya ibabo ḇeyinek sya sibor ḇa. ³⁸ Inja mkor faro tuan ḇena afuf ya, insa fyarem ḇeyinek sya sibor faro afuf ani."

¹ Yesus dor manfamyan samfur seser risuru Ḇyesi fa siryur ma ḇyuk papoik faro si insa ssḇuki yaw rodur ḇeḇarḇor ma dafduf kam ma raryarḇa nakam. ² Wawan samfur seser risuru ansi sisnosna naiso nane: Ḇeponya Simon sniri kako ḇe Petrus ma ḇedar ḇyedi Andreas, ma Yakobus Zebedeus mandaḇendi, ma ḇedar ḇyedi Yohanes, ³ Filipus ma Bartolomeus, Tomas ma Matius ḇeyor som, Yakobus Alfeus mandaḇendi, ma Tadeus, ⁴ Simon snon Zelot ma Yudas Iskariot ḇeḇoḇ Yesus. ⁵ Wawan samfur seser risuru ansi Yesus iwansi kuker ananun faro si: "Mkoso awer nyan ḇeraḇe er ḇese ma mkosun awer ro mnu-mnu Samaria, ⁶ ḇoi mkora faro domba-domba ḇeḇor ro fandu er Israel. ⁷ Mkora ma mkoḇaryas: Ḇaḇesasoser Boiyaswa fyanam kwar. ⁸ Mkoḇuk pararei faro snonkaku ḇedufsi; mko ḇawes ḇemarsi; mkofasren ḇeduf padosi; ma mkoyaw Ibiris ya. Papoik nane mkosma waworekna monda kwar, inja mkakḇuk waworek kako. ⁹ Mkun awer brawen, roḇa sarak roḇa kansai roiḇeḇoḇek mkoḇena. ¹⁰ Mkun awer roi ḇeḇaryam ro maran mkoḇena, mkun syadi awer sansun risuru, roḇesower roḇa ankyon, snar snonkaku ḇefararur oso nari isma ḇaḇyak. ¹¹ Rofyor mkosun ro mnu-mnu ḇeba ma kasun, mkosewar ro dia snonkaku ḇefrur pyum fa mkokainus si rao isof ro mkombran wer. ¹² Rofyor mkosun ro rum ono, mkokofen aroo faro si. ¹³ Rofyor ḇena rum ya ḇyenaḇye, aroo mkoḇena nkain faro si, ḇape roroḇaido aroo ani kyaḇer faro mko. ¹⁴ Ma rofyor snon oso ḇyenaḇye mkoḇa, ma imnaf wos mkoḇenaḇa, mkosasyar ma mkobur rum roḇa mnu ma mkokokef fafen ḇero mkowemna. ¹⁵ Yakofen faro mko: Kaku ḇeri ro ras mankara ya sup Sodom ma Gomora kandera sedi nari myanan syadi kandera ḇekur mnu ine." ¹⁶ "Mkomame, Yawan mko imnis domba ro fandu randip arḇur, inja mkofawi kaku imnis ikak ma mkonapes imnis man jawa. ¹⁷ Ma mkepen mko ro snonkaku sya kam; snar nari ono sḇoḇ mko faro kankain karkara agama ma siprer mko ro rum nadi sena. ¹⁸ Ma snar Aya nari ssun mko ḇe ḇarpon ḇena papok ma wairek-wairek imnis fasasnai faro si ma faro snonkaku ḇefawi Allah ḇa sya kako. ¹⁹ Rofyor sḇoḇ mko, mkararyof awer rariso ma rosai nari mkawos ḇesyan na, snar nakam nari Yaḇukna ḇe mko ro fafisu ya beri. ²⁰ Snar nari mkoiso ḇeyawos mko ya ḇa, ḇoi Kma mko ḇedi Rur Ḇyedi; iso nari ḇeyawos pyan ro mkosḇam na. ²¹ Ono nari sḇoḇ naek sesi fa smun si, rarirya kako sinan oso faro romawa ḇyesi. Ma romawa sya srakrakrok sinan sesi ma nari smun si. ²² Ma nari Yafnai fa kawasa kam sayinmko ma sisurem mko ḇape faro mansei ḇemku isof papupes ya nari sisma aski. ²³ Rofyor sewayam mko ro mnu ine, mko frar ḇe mnu ḇese; snar Yakofen faro mko: Kaku ḇeri rofyor mkora faro mnu-mnu Israel nakam ḇaim, Rumkun Snonkaku ryama kwar. ²⁴ Romawa farkor oso isyadi ro guru ḇyedi ḇa, rarirya kako manfyan oso isyadi tuan ḇyedi ḇa. ²⁵ Inja, rofyor romawa farkor ani imnis raris guru ḇyedi, ma manfyan ani imnis raris tuan ḇyedi, kuker rarirya imnis kwar faro si. Rofyor tuan ḇena rum ya snir i ḇe Beelzebul, rosai wer kuker kina ḇero rum ya. ²⁶ Inja mkomkak awer si, snar roi oso isisen ma iyokef ḇa snar nakam nfababa ma kofawi na kam kwar. ²⁷ Rosai Yakofen faro mko ro panpan, mkawos na roisnai; ma rosai sfararumro knaram mkoḇena mkoḇaryas na ro rum bunem iyaswa. ²⁸ Ma mkomkak awer faro mansei ḇemun ḇaken ya, ḇape ḇepok fa ḇemun rur ya ḇa; mkomkak syadi faro ḇepok ḇemun iḇye rur ya ma ḇaken ya ro for ḇembrerḇa ya. ²⁹ Mkofawi ḇake manesu risuru sḇoḇ su kuker maeja ropia oser? Rariryano osero ro man mkun ansi ipok imar famfnomḇa rofyor Mami ro Boiyaswa Imarisenḇa. ³⁰ Ma mko kako snonburyam mkoḇena naser karkor epen. ³¹ Inja mkomkak awer snar mkoḇe maeja syadi ro manesu ḇeḇor. ³² Snonkaku oser-oser ḇekarem Aya ro ḇarpon snonkaku, Aya kako nari Yakkarem i ro ḇarpon Mami ro boiyaswa. ³³ Mḇoi mansei ḇefamyun Aya ro ḇarpon snonkaku, Aya kako nari Yakfamyun i ro ḇarpon Mami ro boiyaswa." ³⁴ "Mkokara awer ḇo mkoḇo, Yarama fa Yun aski faro supswan ine; Yarama fa Yun askiḇa, mḇoi Yun sumber. ³⁵ Snar Yarama fa Yararwas romawa sya bur sikmas si, inai sya bur sisnas si, Imbikin sya bur imbanyo sesi, ³⁶ ma kina ro rum oso nari sembroḇ yaesi. ³⁷ Mansei ḇeswar snari ma kmari syadi ro Aya, ikada isyusḇa faro Aya; ma mansei ḇeswar romawa ma inai ḇyesi isyadi ro Aya, ikako daksyusḇa faro Aya. ³⁸ Mansei ḇeḇar aprop ḇyedi ḇo ḇeso Ayaḇa, isyusḇa faro Aya. ³⁹ Mansei ḇefaduru kankenem ḇyedi nari kankenem ani ryo bur i, ma mansei kankenem ḇyedi ryo bur i snar Aya nari isma i wer. ⁴⁰ Mansei ḇena mko irya daknai Aya, ma mansei ḇena Aya irirya daknai Mami ḇewan Ayanya. ⁴¹ Mansei ḇena nabi oso snar i nabi nari isma ḇaḇyak nabi, ma mansei ḇena snon ḇenapes oso nari isma ḇaḇyak snon ḇenapes. ⁴² Ma mansei ḇeḇuk war ḇepnunek sek oser monda faro awak param oso, snar i ḇeso Aya, rarirya Yakofen faro mko: Kaku ḇeri ḇaḇyak ḇyedi ipok ryo bur iba."

¹ Yesus danun faro manfamyan samfur seser risuru Ḇyesi kwar raimnai ibur moḇ ani fa ḇyuk farkarkor ma ḇyaryas Ankankinem Beḇye ro mnu-mnu sena. ² Ro bui Yohanes imnaf fararur Kristus ifrurna, ³ inja iwan manfamyan ḇyesi fa sifuken faro I, ḇo soḇo: "Auso nari ḇeramayake, roḇa nari nkowaf snono ḇese?" ⁴ Yesus kyarem faro si: "Mkora, ma mkokofen faro Yohanes rosai mkomnaf ma mkomam na: ⁵ snonkaku ḇepraf sya smam, manis sya simbran, ḇeduf pado sya seḇefasren, ḇepro sya simnaf, ḇemar sya siḇer si, ma faro snonkaku ḇesaḇarar sya ankankinem ḇeḇye ya ḇyeḇeḇaryas faro si. ⁶ Ma aski isya faro snonkaku ḇefafayaf Ayaḇa sya." ⁷ Yohanes manfamyan ḇyesi sibur kwar, Yesus irandak dawawos faro kawasa ḇeḇor ansi ro Yohanes: "Fainda rosai mkora ḇe sup ḇeḇeursḇa? Fa mkomam amboḇer wam ya iyowmura-muma? Roḇa rosaiso mkora kuker ya? ⁸ Fa mkomam snonkaku ḇefmar sansun ḇepyum? Snonkaku ḇefmar sansun ḇepyum moḇ sedi isya ro rum wairek-wairek. ⁹ Inja fainda rosai mkora kuker ya? Mkomam nabike? Kaku, ma Yakofen faro mko, mḇoi isyadi ro nabi. ¹⁰ Snar fas-fas isya kyur i: Mame, Yawan wawan Ayedi fa pyon au, ikada nari fyasos nyan Bedi ro ḇarpon Bedi. ¹¹ Yakofen faro mko: Kaku ḇeri rofandu snonkaku bin sya saḇen si oso ḇanim ikḇawes fa iba syadi Yohanes Ḇemasi, ḇape ḇebaḇa syadi ro Ḇaḇesasoser Boiyaswa ikada iba syadi Yohanes. ¹² Rofyor Yohanes Ḇemasi ikḇawes isof knikine, Ḇaḇesasoser Boiyaswa ḇyeḇesrewma snonkaku ḇesrew isya ssewar fa siḇriwark i. ¹³ Snar nabisya kam ma Refo Yahudi sḇardi isof Yohanes ikḇawes ¹⁴ ma -- rofyor mkomarisen mkonai -- ikada Elia nari ḇeramumanya irya. ¹⁵ Mansei ḇeḇeknaram iḇye imnaf! ¹⁶ Kuker rosai Yaḇuki kyarai syos baboine? Sikada simnisbos romawa fnak ḇekain ro pasar ma ḇeyor faro min sesi: ¹⁷ Nkowuf sonker faro mko, ḇape mkomas ḇa, Nkokanes kankanes-saneso, ḇape mkomandakḇa. ¹⁸ Snar Yohanes ryama, ima dananḇa, madinemba, ma sikofen: Rurḇemaḇak siswoḇer i. ¹⁹ Ḇarpur wer Rumkun Snonkaku ya ryama, Ikada danan ma dinem, ma sikofen: Mkomame, I snonkaku ḇeyandafdaferma ḇeyinemuk, bati ro snon ḇeyor som ma snonkaku ḇesasar. Ḇape Allah fawawi Ḇyena nfasna napnapes ro fararur ḇyena." ²⁰ Raimnai Yesus ryakrok mnu-mnu ḇembror ḇa, snar ro moḇ anna Yesus ifrur aḇyair kanandor nabor kaku, ḇo ikofen: ²¹ "Ne, Korazim nari rwo! Ne, Betsaida nari rwo! Snar rofyor ro Tirus ma Sidon aḇyair-aḇyair kanandor ḇeḇesya kwar ro fandu mko, nakḇesya ro diwa sikada simbror fyoro kwar ma smandak. ²² Ḇape Yakofen faro mko: Ro ras mankara ya, mnu Tirus ma Sidon nari kandera-suna nmanan syadi ro kandera mkoḇena. ²³ Ma au ne, Kapernaum, inja nari beḇekanow isof ro nankike? Roḇa, nari beḇesabu isofro munaibui! Snar rofyor aḇyair kanandor ro fandu mko nakrarirya ro Sodom kada, nari mnu ani isya kyain kaker isof ras ine. ²⁴ Ḇape Yakofen faro mko: Ro ras mankaraya, Sodom sya kandera sena nari nmanan syadi ro kandera mkoḇena." ²⁵ Ro fafisu ani Yesus isandik ma ikofen: "Yakofen kasumasa faro Au, Mami, Manseren nanki ma supswan, snar nakam wayokef na bur snonkaku ḇefawi nananem, ḇape ḇasna faro snonkaku waworek. ²⁶ O Mami, snar raririrya marisen Bedi. ²⁷ Nakam neḇeḇuk kwar faro Aya ro Kma Yedi ma snonkaku oso ḇa myam ḇaḇir Romawa ya derer Kma ya, ma snonkaku oso ḇa myam ḇaḇir Kma ya derer Romawa ya ma snonkaku Romawa ya imarisen fyasnai faro si. ²⁸ Mkoramuma faro Aya, mkokam ḇemor ma ḇembrus ma ḇeḇekandera, nari Yaḇuk mananai faro mko. ²⁹ Mkoḇar kamnam Ayedi ma mkofarkor ro Aya, snar Aya yamyaren asuser ma sneri ikaki ḇa ma rur mkoḇesi nari sisma kananon. ³⁰ Snar kamnam Ayedi ifrur marisen ma kamnam Ayedi myanan."

¹ Ro fafisu ani, ro ras Mananai Yahudi, Yesus imbranuk yaf gandum ono. Snar manfamyan Ḇyesi sibiser inja sinek gandum yorem ono ma san si. ² Farisi ono smam rarirya, sikofen faro I: "Mamkada, manfamyan Ḇyesi sifrur roi kopok kofrur ḇa ro ras Mananai Yahudi." ³ Ḇape Yesus kyarem faro si: "Mkowasya ḇaimke rosai Daud, ifrur ro fafisu i ma ḇeso isya sibiser, ⁴ rariso syun ro Rum Allah ma rariso sikam san mamami fasasos, ono ḇese sipok san ḇa, iḇye Daud ma ḇeso isya, derer monda faro imam-imamsya? ⁵ Roḇaido mkowasya ḇake ro Refo Yahudi, ro ras-ras Mananai Yahudi imam-imamsya seyuk sasoser ras Mananai Yahudi ro Rum Allah dori, ḇape skor si ḇeḇesasarḇa? ⁶ Yakofen faro mko: dine oso isya iba syadi ro Rum Allah. ⁷ Rofyor mkofawi kankunes ro wos ine: Yamarisen sawarwar ya ḇoi farsarser ḇa, rarirya nari mkoḇuk samamyaiḇa faro snonkaku ḇesasar ḇa sya. ⁸ Snar Rumkun Snonkaku ya Ikada Manseren faro ras Mananai Yahudi ya." ⁹ Rofyor sskobur ro dia, Yesus syun ro rum nadi sedi. ¹⁰ Ro dia snon ḇramin ḇar ḇemar oso isya. Sifuken faro Yesus: "Ipyumke koḇuk pararei faro snonkaku sya ro ras Mananai Yahudi?" Knam karkara sedi insa ssḇuk sasar faro I. ¹¹ Ḇape Yesus ikofen faro si: "Rofyor oso ro mko isma domba oso ma isapi ro der ro ras mananai Yahudi, nari isasyar i bur derya ḇake? ¹² Mkokaraḇake snonkaku sya semaedya syadi ro domba ani? Rarirya kako kofrur roi ḇeḇye ro ras Mananai Yahudi." ¹³ Raimnai Yesus ikofen faro snon ani: "Fos ḇramsi!" Ma fyos ḇrasi, ma ḇrasi iprei beri. ¹⁴ Raimnai Farisi ansi sisasyar fa sna awi insa smun Yesus. ¹⁵ (15a) Ḇape Yesus ifawi knam aw sedi inja ibur moḇ ani. (15b) Kawasa sibor siso Yesus ma ḇyuk pararei faro ḇeduf sya kam. ¹⁶ Danun pakrek faro si, insa sikofen ḇayir awer mansei irya, ¹⁷ insa wos Yesaya ikofen kwar ya imnis, ḇo doḇo: ¹⁸ "Mkomam, ine Manfamyan Ayedi yakinfir kwar, ma Yaswar I, snar kuker I rur Yedi imarisen. Nari Yaḇuk rur Yedi faro I, ma nari iso ḇekofen ḇair sasoser faro er-er sya. ¹⁹ Ima nari dakfaḇaḇri ḇa ma sḇari fyarbaba ḇa ma kawasa sakrower mkaren Ḇyedi ḇa ro sampakri ḇo. ²⁰ Ajumek ḇekorew ma ḇesawayom nari pyankar iba, ma marom ḇepawya nari Fyasye i ḇa, isof Ifrur fa sasoser ya ḇyefainda. ²¹ Ma er-er sya nari sikyar faro I." ²² Ḇarpurya sun faro Yesus snon oso rur ḇemaḇak ya iswoḇeri. Snon ani ipraf ma ḇyeawer, ma Yesus ḇyuk pararei faro i, isof awer ani dawos ma myam wer. ²³ Ma kawasa ḇeḇor ansi sikandor, ma sikofen: "Inenido Romawa Daudke?" ²⁴ Ḇape rofyor kawasa Farisi ansi simnaf rarirya, sikofen, ḇo soḇo: "Kuker Beelzebul, mananir rur ḇemaḇak, Iyaw rur ḇemaḇak sya." ²⁵ Ḇape Yesus Ifawi swaruser sena inja Ikofen faro si, ḇo doḇo: "Ḇaḇesasoser oso ḇeyunḇesisye nari ryo ma mnu oso roḇa kina ro rum ḇeyunḇesisye ipok kyain kawan ḇa. ²⁶ Rarirya kako rofyor Ibiris iyaw Ibiris, ikako irarwas ma ḇyembroḇ mankundi; rariso nari ḇaḇesasoser ḇyedi kyain nako? ²⁷ Rarirya rofyor Yayaw rur ḇemaḇak kuker papoik ro Beelzebul, kuker papoik rosai kpu mkoḇe sya ssḇuki dakyaw i? Inja siso nari ḇeḇemankara ḇemko. ²⁸ Ḇape rofyor Yayaw rur ḇemaḇak kuker papoik Allah Rur Ḇyedi, inja kaku ḇeri Ḇaḇesasoser Allah ryama kwar faro mko. ²⁹ Roḇaido rariso snonkaku ḇemarisen ḇesun ma ḇefasar papus ro snon ḇesambraḇ oso, rofyor sfes ḇepon snon ani ḇaim? Sfes ḇepon i kwar insape sfasyar rum ani. ³⁰ Mansei ḇefnoḇek Ayaḇa ikada isampum Aya ma mansei ḇeryur fnoḇek Ayaḇa, ikada fyasasye. ³¹ Inja Yakofen faro mko: Sasar ḇeḇor kam ma anonef ro snonkaku nari nasma ḇaḇepayasyos, ḇape anonef faro Rur Ḇesren ikada isma ḇaḇepayasyos ḇaḇeri. ³² Rofyor snonkakuya isampum Rumkun Snonkaku, ikada isma payasyos, ḇape rofyor isampum Rur Ḇesren ikada isma payasyos ḇaḇeri ro supswan ine payasyos oḇa, ma ro ras ḇepupes ya kako payasyosḇa. ³³ Rofyor mkokofen ai knam oso ipyum rarirya bon ḇyena kako napyum; rarirya kako ai knam oso mkoḇo ipyumba, rarirya kako bon ḇyena nakpyum ba. Snar ai ani bon ḇyena naiso koḇuki ifawi i na. ³⁴ Ne, ikakḇeknampu mkun ḇyesi, rariso mkofawi mkawos roi ḇeḇye, ḇape mankun mko mkoḇarḇor? Snar roi mkap kuker sḇadon irya nek ro sne. ³⁵ Snonkaku ḇepyum sawos roi ḇepyum ro fayar ḇepyum, ma snonkaku ḇeḇyeḇa sikada sawos roi ḇeḇarḇor ro fayar ḇeḇarḇor. ³⁶ Ḇape Yakofen faro mko: wos famfnom snonkaku sya sawos na nari skarem na ro ras mankara ya. ³⁷ Kuker wos anna nari ssḇuk kaku faro au, ma kuker wos anna kako nari ssḇuk samamyai faro au." ³⁸ Ro fafisu ani ḇefawi nananem Refo Yahudi kuker Farisi ono sikofen faro Yesus, ḇo soḇo: "Guru nkomarisen nkomam aḇyair oso ro Au." ³⁹ Ḇape kyarem faro si: "Syos ḇeḇarḇor ma ḇefrur farḇuk ine soḇo sor aḇyair oso ro Aya. Ḇape sikada nari sisma aḇyair osoḇa derer aḇyair Nabi Yunus. ⁴⁰ Snar raris Yunus kyain ro in ḇeba sasop ya dori ḇeras rikior ma roḇ rikior, rarirya kako Rumkun Snonkaku nari kyain ro mun aiḇui ḇeras rikior roḇ rikior. ⁴¹ Ro fafisu mankara ya, kawasa Niniwe nari sikḇwawes ma sifnoḇek syos ine ma ssḇuk samamyai faro si. Snar kawasa Niniwe sikada simbror rofyor simnaf Yunus ḇaryas ḇyena ma kaku ḇeri ro dine mkakmam snon oso isya iba syadi wer ro Yunus! ⁴² Ro fafisu mankara ya wairek bin ro ḇar Wambrau ani nari diḇri fnoḇek syos ine ma nari dakḇuk samamyai kako. Snar wairek bin ine ryama ker supswan pember fa dakmnaf Salomo fawinananem ḇyena, ma kaku ḇeri mkakmam snon oso isya ro dine isyadi wer ro Salomo!" ⁴³ "Ro fafisu rur ḇemaḇak ya isasyar bur snonkaku, ikada imbran iḇor farma ro sup-sup manuren syewar moḇ mananai. Ḇape ismaḇa. ⁴⁴ Inja ikofen: Nari yarerḇe rum yabur ani. Ma rya kwar ro rum ani myam ma rum ani ḇyebei, sisasapu sren i ma sfasos pyum i. ⁴⁵ Rarirya isasyar ma dor rur ḇemaḇak rifik ḇesawo syadi wer ro i ma ssun fa sikenem ro dia. Ma ro papupes ya snonkaku ani iḇyeḇa syadi wer ro ḇepon ya. Rarirya kako kuker syos ḇeḇarḇor ine." ⁴⁶ Fafisu Yesus isya dawawos kuker kawasa ḇeḇor ansi, mkakmam snari ma naek Ḇyesi sores ro ḇandi ma sesewar fa sisrow ma sawawos kukeri. ⁴⁷ Rarirya snonkaku oso ikofen faro I: "Mame, snami ma naek ḇesi sisya ro ḇandi ma ssewar fa sisrow Au." ⁴⁸ Ḇape Yesus kyarem faro snonkaku ḇekofen wos ani faro Inya: "Manseiso sna Yedi? Ma manseiso naek Ayesi?" ⁴⁹ Raimnai Ikofen, ma fyos ḇraminya ḇo fyasnai faro manfamyan Ḇyesi: "Sine sna Yedi ma naek Ayesi. ⁵⁰ Snar mansei ryawer ḇefrur Mami marisen Ḇyena ro boiyaswa, ikada naek ma srar Ayedi ma sna Ayedi."

¹ Ro ras ani Yesus isasyar ro rum ani ma rya kyain ro danosen andir ya. ² Kawasa sibor semarani ḇo srama spanjuḇer I, inja dek ro wai oso ma kyon roi, mḇoi kawasa ḇeḇor ansi kam sores ro ḇande. ³ Ma dawos roi nabor farosi kuker sarḇer. Doḇo: "Snon ḇekekef mor oso isasyar fa kyekef mor. ⁴ Ro fafisu kyekef ya, mor ono nasapi ro nyan andir, ma mansya srama san na rao naḇro. ⁵ Mor ono nasapi ro moḇ ḇeḇekarui, ḇeḇesaprop mankunba inja nasur fasaw, ⁶ ḇape rofyor ori dek kwar, nmaryoi ma nmas snar nerares ḇa. ⁷ Mor ono wer nasapi ro manuk borek; ma manuk anna naduḇ epenna isof nmas ma namar. ⁸ Ma ono nasapi ro saprop ḇepyum raimnai nasur ma namarem: ono ḇeutin, ono ḇesamfur ri wonem, ono wer ḇesamfur rikior. ⁹ Mansei ḇeḇeknaram ido iḇye kada imnaf!" ¹⁰ Ma manfamyan ḇyesi srama sifuken faro i, ḇo soḇo: "Snaro wawos faro si kuker sarḇer?" ¹¹ Yesus kyarem: "Faro mko kada mkosma fakamaman fa mkofawi kankunes Ḇaḇesasoser ro boiyaswa, ḇape sikada roḇa. ¹² Snar mansei ḇena, nari ssḇuk faroi wer isof nya farsbawer; ḇape mansei ḇeyakna ḇa, rosai wer isya faroi nari neḇeyun bur i. ¹³ Eḇedari yawos faro si kuker sarḇer; snar smam ḇape imnis smam ba ma srower ḇape imnis srower ḇa, ma sifawi ḇa. ¹⁴ Inja Yesaya ḇardadi ḇyedi imnis fa kyur si: Nari mkomnaf kuker knaram mkoḇesi, ḇesyaḇo mkokara ḇa, nari mkomam keker mka mkoḇesi, ḇesyaḇo mkofawi ḇa. ¹⁵ Snar er ine sisnesna napup kwar, ma siknasna nadiw, ma simkasna nasef; insa smam awer kuker simkasna ma simnaf awer kuker siknasna ma sifawi awer kuker sisnesna, isof skaḇer ma yaḇuk pararei faro si. ¹⁶ Ḇape aski faro mko snar mka mkoḇesi smam ma knaram mkoḇesi simnaf. ¹⁷ Snar yakofen faro mko: Kaku ḇeri nabi ma snonkaku ḇenapes sya sibor simarisen sakmam ma sakmnaf, roi mkomam ma mko mnaf nane, ḇape sakmam ma sakmnaf na ḇa. ¹⁸ Inja mkomnaf naḇye, sarḇer snon ḇekekef mor ani. ¹⁹ Faro snonkaku oser-oser ḇemnaf wos ḇekur Ḇaḇesasoser Boiyaswa, ḇape sifawi na ḇa, snar ḇeḇarḇor ya ryama ma dun mor ḇekekef anna ro sisnesna; irya mor ḇekekef ro nyan andir. ²⁰ Mor ḇekekef ro saprop ḇeḇekaruina irya snonkaku ḇemnaf wos ya ma fasaw ḇeyun na kuker raryaḇ. ²¹ Ḇape nerares ḇa inja nasur fasaw knik monda. Rofyor kanderama ḇaḇewayam ono ndama nkuri snar wos ani, snon ani isapi fasaw kaku. ²² Mor ḇesapi ro fandu manuk borek irya snonkaku ḇemnaf wos ani, raimnai araryof ananjar awar kirai ine ma sne ḇero nana nepen epen wos anna isof namarem ba. ²³ Mor ḇesapi ro saprop ḇepyum irya snonkaku ḇemnaf wos ani ma ḇefawi, rarirya nebon, ono ḇeutin, ono ḇesamfur riwonem, ono wer ḇesamfur rikior." ²⁴ Yesus ḇyuk sarḇer oso ḇese wer faro si, doḇo: "Ḇaḇesasoser Boiyaswa imnis raris snonkaku ḇekekef mor ḇepyum ro yaf ḇyedi. ²⁵ Ḇape rofyor kawasa syakam senef, mbroḇ ḇyedi ryama ma dakkekef ampyampumber mor ro fandu gandum ansi, raimnai ibur. ²⁶ Ro fafisu gandum ansi sisur ma simarem randak ya, ampyampumber ansi kako saksur. ²⁷ Inja tuan ḇena yaf ya manfamyan ḇyesi srama faro i ma sikofen, ḇo soḇo: Tuan, rariso mor ḇepyum siso kwekef ro yaf bedi, ḇesyaḇo ampyampumber sine srama kero? ²⁸ Tuan ani kyarem: Mbroḇ koḇediso ḇefrur rarirya. Raimnai manfamyan ansi sikofen faro i: Inja tuan wamarisen ido nkora nkopas ampyampumber ansi? ²⁹ Ḇape ikofen: Roḇa, snar imbude mkopas sasar gandum sya rofyor mkopas ampyampumber ansi. ³⁰ Inja sisur kam mura isof fafisu afuf ya. Ro fafisu ani nari yakofen faro ḇeyuf ansi: Mkoryur ḇepon ampyampumber ansi ma mkororbos si fa sebosbos ma seḇekun; ḇarpur ya mkoryur gandum sya ma mkosun si ro sayar ayedi." ³¹ Yesus ḇyuk sarḇer oso ḇese wer faro si, doḇo: "Ḇaḇesasoser Boiyaswa imnis raris sasawi mor, sun ma skekef ro yaf sena. ³² Kaku mor aniso ḇebaḇa syadi ro mor ḇese sya kam, ḇape rofyor isur kwar, sasawi ani iba syadi rofaran ḇese sya kam, ma isyadi wer ḇyeai knam, isof man ro farsyos sya srama smunnarem ro snaw-snaw ḇyena." ³³ Ma fyar-fyar sarḇer ine kako faro si: "Ḇaḇesasoser Boiyaswa imnis raris mur bin oso dun fa ḇyukḇaren terigu amek rikior ma ifrur fa napisen kam." ³⁴ Nakam Yesus ḇyuk na faro kawasa ḇeḇor ansi kuker sarḇer, ³⁵ insa nabi ya wos ḇyedi imnis isoine: "Yamarisen yaḇas sḇari fa yawos sarḇer, Yamarisen yawos ro roi ḇero kankunes ro randak supswan ine ḇyeḇefrur ya." ³⁶ Raimnai Yesus ibur kawasa ḇeḇor ansi. Manfamyan ḇyesi srama ma sikofen faro i, ḇo soḇo: "Wakofen fasnai faro nko ro sarḇer ampyampumber ro fandu gandum ansi." ³⁷ Ma kyarem faro si, ḇo doḇo: "Snonkaku ḇekekef mor ḇepyumya ido irya Romawa Snonkaku; ³⁸ yaf ya irya supswan. Mor ḇepyum sya irya romawa-romawa Ḇaḇesasoser ma ampyampumber sya irya romawa-romawa ḇeḇarḇor. ³⁹ Mbroḇ ḇekekef ampyampumber sya irya Ibiris. Fafisu afuf ya irya ras papupes ma ḇeyuf ansi irya malaikat. ⁴⁰ Ma raris ampyampumber sya siryur si ma sikun si ro for rarirya kako ro ras ḇepupes ya. ⁴¹ Rumkun snonkaku nari iwan malaikat ḇyesi ma nari siryur roi ḇeḇor ḇeḇeninyan ma snonkaku kam ḇefrur ḇarḇor ro Ḇaḇesasoser ḇyedi. ⁴² Sikam nari sisawen si ro for; rodia nari sisma kankanes ma arkfafais nakor. ⁴³ Rofyor ani kawasa ḇenapes sya nari sisnai imnis ori ro Ḇaḇesasoser Kma sedi. Mansei ḇeḇeknaram, iḇye imnaf!" ⁴⁴ "Ḇaḇesasoser Boiyaswa imnis papus beyokef ro yaf ya, ma snonkaku oso isma na, raimnai iyokef na wer. Snar raryaḇ ḇyedi rya ḇyoḇ pres papus ḇyena fa ḇyukkoḇes yaf ani. ⁴⁵ Rarirya kako kuker Ḇaḇesasoser Boiyaswa imnis snon ḇesewar inkin mkamor ḇepyum. ⁴⁶ Rofyor isrow kwar inkin mkamor ḇeḇemaeja kaku, rya ma ḇyoḇ pres papus ḇyena fa ḇyukkoḇes inkin mkamor ani." ⁴⁷ "Rarirya kako Ḇaḇesasoser Boiyaswa imnis pam paspos ḇenap ro soren, ma in syoso-syoso sḇar ro pam ani. ⁴⁸ Pam ani ifo kwar spawi ḇebonde ma skimfir in ḇepyum sya ma siser si ro aiḇar ḇoi in ḇepyumba sya sisawen si. ⁴⁹ Rarirya kako ro fafisu ras ḇepupes ya: Malaikat-malaikat sya nari srama fa sirarwas snonkaku ḇeḇarḇor sya bur snonkaku ḇenapes sya, ⁵⁰ raimnai sisawen snonkaku ḇeḇarḇor sya ro for ḇembrerḇa; ro diwa nari skanes ma sark fafais nakor. ⁵¹ Mkofawi roi ḇeḇor nanekam kwarke?" Skarem: "Mḇoi, nkofawi kwar." ⁵² Raimnai Yesus ikofen faro si: "Inja ḇefawi nananem Refo Yahudisya oser-oser isma farkarkor ḇekur Ḇaḇesasoser Boiyaswa imnis tuan oso ḇesasyar papus ḇebabo ma ḇekwar nakam ro kron ḇyedi." ⁵³ Yesus fyar-fyar sarḇer anna posa kwar, ibur moḇ ani. ⁵⁴ Ryama kwar ro mnu ḇyedi, fyarkor kawasa ro dia ro rum nadi sedi. Sikandor kam ma sikofen: "Ro moḇ rosai isma fawawi ma samambraḇ ḇyuki ifrur aḇyair kanandor nane? ⁵⁵ Ko kam kofawi irya rumawa ro snon ḇefawi nananem ḇefrur rum? Kofawi kako snari snori Maria ma naek ḇyesiso: Yakobus, Yusuf, Simon ma Yudas? ⁵⁶ Ma srar ḇyesi kako sisya skainfadu ko? Inja moḇ rosaiso isma roi ḇeḇor nanefa ro ya?" ⁵⁷ Ma sikam sfafayaf ḇo siyaw i. Inja Yesus ikofen faro si: "Nabi oso semafi ro moḇ-moḇ ḇese, mḇoi demir ro mnu mankundi ḇyedi ma rum ḇyedi kada sefandun i ḇa." ⁵⁸ Ma snar kakyarḇa sena, Yesus dakfrur aḇyair kanandor nabor ro dia ḇa.

¹ Ro fafisu ani Yesus ḇyesno faro Herodes, koranofiak ro supya mnuk ani, dakmnaf i. ² Rarirya ikofen faro ḇefararur ḇyesi: "Irya Yohanes Ḇemasi; diḇri kwar ro fandu ḇemar sya eḇedari samambraḇ anna nafararur roi." ³ Snar Herodes iwan kwar fa sfor Yohanes, ḇo sewanka i ma ssun i ro bui, snar dun ḇedar ḇyedi Filipus swari, Herodias fa fyakawin i. ⁴ Snar Yohanes isonk Herodes, ḇo doḇo: "Wapok wun Herodiasḇa, snar rarirya beyuk sasoser agama!" ⁵ Herodes ḇyenamu myun Yohanes ḇape imkak kawasa ḇeḇor ansi, snar skarai nabi rirya. ⁶ Ḇape ro ras munara swarapepen Herodes ḇyeḇeyaben ya, Herodias inai ḇyedi ifyer ro ḇarpon sedi ma ifrur raryaḇ Herodes sneri, ⁷ isof Herodes ḇyeasas kuker syasi nari ḇyuk faroi rosai ryawer imarisen dor ro i. ⁸ Snar inai ani snari fyarkor ninyan i kwar inja ikofen: "Buk faro aya Yohanes Ḇemasi ḇruri ro sayer oso." ⁹ Inja wairek sneri fyafardun, ḇape snar sna ḇyedi ma dakam ḇyesi, eḇedari ḇyuk sasoser fa ssḇuk Yohanes ḇruri faro i. ¹⁰ Inja iwan fa speremuk Yohanes ḇruri ro bui, ¹¹ raimnai siseri ro sayer oso, ma ssḇuki faro inai ani ma duni faro snari. ¹² Raimnai Yohanes Ḇemasi manfamyan ḇyesi srama ssun aipyokem ani fa sikrir i. Ḇarpur ya sra faro Yesus fa sikofen ḇadir faro i. ¹³ Yesus imnaf Yohanes imar kwar imarisen kyaḇer bur moḇ ani ma dek wai oso ḇemoḇ ḇeḇeursḇa. Ḇape kawasa ḇeḇor ansi simnaf inja sisasyar ro mnu sena siso nyan ḇeraḇande fa siyomuser i. ¹⁴ Fafisu Yesus ryande, myam kawasa ḇeḇor ansi ma iswar si, ḇo ḇyuk pararei faro ḇeduf si. ¹⁵ Fanam mandira, manfamyan ḇyesi srama faroi ma sikofen, ḇo soḇo: "Moḇ ine ḇyeuserḇa ma fyanam roḇ kwar. Inja wawan kawasa ḇeḇor ansine fa sra insa skoḇes roḇean ro mnu-mnu na." ¹⁶ Ḇape Yesus ikofen faro si: "Sipok sibur awer, mkoiso nari ḇefan si." ¹⁷ Skarem faro i, ḇo soḇo: "Inkosma monda ro dine mamami ririm ma in risuru." ¹⁸ Yesus ikofen: "Mkun na muma maro aya." ¹⁹ Raimnai iwan kawasa ḇeḇor ansi fa skain ro aḇris sya. Rofyor dun mamami ririm ma in risuru kwar, iwakwaker ḇe nanki ma ikofen kasumasa ma ḇyeḇokna posa pyanasnis na ma ḇyuk na faro manfamyan ḇyesi, raimnai manfamyan ḇyesi sirwas na faro kawasa ḇeḇor ansi. ²⁰ Ma sikam sanan isof sarḇor. Sanan posa kwar siryur mamami ker-ker ḇedawer na ma siserna ro noken samfur seser risuru nafo. ²¹ Kawasa ḇeyanan ansi kam indokada sesyaran ririm, ḇoi bin ma romawasya seḇeyakkor ḇa. ²² Raimnai Yesus ḇyuk sasoser fasau faro manfamyan ḇyesi fa sek ro wai ma spon i ḇe ḇariwarḇar, ro fafisuya kako iwan kawasa ḇeḇor ansi fa sibur. ²³ Ma iwan kawasa ansi fa sibur kwar, Yesus dek ro urek ani raryas demir ḇyenadi. Ro fafisu roḇ kwar, derer ro dia. ²⁴ Ro fafisu ani manfamyan ḇyesi skaḇor kwar bur sup ya isof ro danosen ya faduri, ma wai ani ikren-ikḇar ro bak na, snar sko sor wam ya. ²⁵ Ro fafisu kyamadui meser (indokada oras) kior Yesus ryama faro si imbran ro warya bori. ²⁶ Ro fafisu manfamyan ḇyesi smam imbran ro war ya bori, sikandor, simkak ḇo sfararar ma soḇo: "Faknik ri rya!" ²⁷ Ḇape Yesus ikofen fasaw faro si: "Mkoknon! Ayai ri, mkomkak awer!" ²⁸ Inja Petrus dor faroi: "Manseren, aurya ido, wakofen ḇo yambran ro warya bori mufaḇe au." ²⁹ Yesus ikofen: "Rwamuma!" Inja Petrus dado bur wai ya ma imbran ro war ya bori fa isrow Yesus. ³⁰ Ḇape rofyor ḇyabir wam ya ipok, imkak ma iswarḇaḇ imbrur inja dar-dor: "Manseren, wafnoḇek aya!" ³¹ Yesus isawar fa iser i ma ikofen: "Ne, snonkaku ḇekyar mnis ḇa, snaro beḇirḇar?" ³² Raimnai suyek ro wai ya ma wam ya kako iḇrin. ³³ Ma snonkaku ḇero wai ani sḇansuba faroi, soḇo: "Kaku ḇeri Rumkun Allah risoau." ³⁴ Rofyor skofyafer kwar skorande ro Genesaret. ³⁵ Rofyor kawasa ro mnu ani smamḇaḇir Yesus, sikofen ḇayir i ro sup ani ḇesiper. Inja ssun ḇeduf sesi kam faro Yesus. ³⁶ Sor faro i insa span monda ro syatu pusyom ḇyena. Ma snonkaku ḇepan roi isya siprei kam.

¹ Ḇarpur ya Farisi ono kuker ḇefawi nananem Refo Yahudi ḇeraker Yerusalem srama faro Yesus ma sikofen: ² "Snaro manfamyan ḇesi sḇeyuk rari ro kpu koḇesi? Snaro sḇan siḇrasna ḇa ro fafisu sanan?" ³ Ḇape Yesus kyarem faro si: "Snaro mko kako mkakḇeyuk Allah sasoser ḇyena ḇekur kako rari kpu mkoḇesi? ⁴ Snar Allah ikofen: Besyowi snami ma kmami; ma oso wer: Mansei ḇefras snari roḇa kmari ikada ismai samamyai marmar. ⁵ Ḇape mko kada mkoḇo: Mansei ḇekofen faro snari ma kmari: Rosai yasma na fa yaḇuk ḇesyowi mu, yaḇukna nfarser kwar faro Allah, ⁶ snonkaku ani ikada ḇyesyowi snari ma kmari ḇa. Rarirya Allah wos ḇyena mkoḇeuser naba snar rari mankun mkoḇena. ⁷ Ne, snonkaku ḇemarares Kaku ḇeri ro Nabi Yesaya ḇardadi ḇyedi ḇekur mko: ⁸ Er ine som Aya kuker sḇardip monda, Mḇoi sisnesna kada nbinkwan bur Aya. ⁹ Fromo monda kakyar ma nadi sena faro Aya, snar farkarkor ssḇuk farkor na sasoser snonkaku monda." ¹⁰ Raimnai Yesus dor snonkaku ḇeḇor ansi ma ikofen faro si: ¹¹ "Mkomnaf ma mkokara pyum: Roi ḇesun ro sḇadon naiso ḇeḇemamas snonkaku sya ḇa, mḇoi roi ḇesasyar ro sḇadon naiso ḇeḇemamas snonkaku." ¹² Ma manfamyan ḇyesi sra ma sifuken faro i: "Wafawi kwarke wos wakofen na nekarui ḇekarkar faro Farisi ansi?" ¹³ Yesus kyarem faro si: "Rokaker Kma yedi ro boiyas kyerḇa na, nari neḇepas kuker rares ḇyena kam. ¹⁴ Mkomam monda si. Si snonkaku ḇepraf ḇekfin ḇepraf sya. Rofyor snon ḇepraf oso ikfin min ḇepraf oso, nari susapi ro der." ¹⁵ Raimnai Petrus ikofen faro Yesus: "Wakofen ḇayir sarḇer ine faro nko." ¹⁶ Yesus kyarem: "Mko kako mkakfawi ḇayim sarḇer ani? ¹⁷ Mkofawiḇake roi ḇeḇor ḇesun ro sḇadon nsun pdef ḇesnewar raimnai sisawen na ro akyek? ¹⁸ Ḇape rosai ḇesasyar ro sḇadon neknam ro sne ma naiso ḇefrur mamas snonkaku. ¹⁹ Snar ro sne iso ḇekara swaruser ḇeḇyeḇa, mamun, farḇakbuk rmomen, karaw, soar ankar ma anonef. ²⁰ Naiso ḇefrur mamas snonkaku. Ḇape kanan kuker ḇramin ḇeḇan ḇa, ikada ḇyemamas snonkaku ḇa." ²¹ Raimnai Yesus kyaḇerbur ro dia ḇe sup Tirus ma Sidon. ²² Bin Kanaan oso ro sup ani ryama ma dor: "Waswar aya, o Manseren, Romawa Daud, snar inai yedi rur ḇemaḇak ya iswoḇer i isof ḇyenyawa ḇa." ²³ Ḇape Yesus kyarem wos oso faro i ḇa. Raimnai manfamyan ḇyesi srama ma sor faro Yesus, ḇo soḇo: "Wawan i fa ibur, snar iyawuser koḇo dor ḇesya kwari." ²⁴ Yesus kyarem: "Yasma wawan monda faro domba-domba ḇeḇor ro fandu er Israel." ²⁵ Ḇape bin ani fyanam Yesus ma ḇyansuba faro i ma ikofen: "Manseren wafnoḇek aya." ²⁶ Ḇape Yesus kyarem: "Kopok kun roḇean ḇefasos faro romawa sya ma neḇesawen faro make sya ḇa." ²⁷ Bin ani ikofen, ḇo doḇo: "Kaku ḇaboi Manseren, ḇape makei ya dakan kako roḇean mom-mom ḇesapi ro meja tuan ḇyedi." ²⁸ Inja Yesus kyarem ma ikofen faro i: "Ne, awino, kakyar bedi iba, rarirya roi wor ani wasmai raris moḇ wamarisen rai." Ma ro fafisu ani beri inai ḇyedi iprei. ²⁹ Fafisu sskobur supya fyor ani kwar, Yesus imbran sye danosen Galilea ma dek ro urek oso ma kyain ro dia. ³⁰ Fyoroḇa kawasa sibor semarani ḇo srama ḇe I ma ssun snonkaku ḇepapipen, manis, ḇepraf, awer ma ḇese sibor wer, ma srir si ro ḇarpon Yesus ma ḇyuk pararei faro sikam. ³¹ Rarirya kawasa ḇeḇor ansi sikandor snar smam awer sya sawawos, manis sya siprei, ḇepapipen sya simbran, ḇepraf sya smam, ma rarirya si sandik Allah Israel. ³² Raimnai Yesus dor manfamyan ḇyesi ma ikofen: "Sneri iswar kuf kawasa ḇeḇor ansine. Ras rikior kwar siso aya ma nanano kyur siḇa. Yamewer yawan si fa sibur kuker basbiser, nari simsoi ro nyan ya bori." ³³ Manfamyan ḇyesi sikofen faro i, ḇo soḇo: "Rariso moḇ ḇeḇeursḇa ine kosma roḇeyan fa koḇukfan snonkaku ḇeḇor ansine?" ³⁴ Yesus ikofen faro si: "Mkosma roḇeyan ri ḇeso?" Skarem, ḇo soḇo: "Mamami rifik ma in kasun ono sisya kako." ³⁵ Raimnai Yesus iwan kawasa ḇeḇor ansi fa skain ro saprop ya bori. ³⁶ Raimnai dun mamami rifik anna kuker in ansi, ikofen kasumasa, raimnai pyanasnis na ma ḇyuk na faro manfamyan ḇyesi, fa manfamyan ḇyesi sakḇuk na faro snonkaku ḇeḇor ansi. ³⁷ Ma sikam sanan isof sarḇor. Ḇarpur ya siryur mamami ker-ker ḇedawer na, sismai noken rifik nafo. ³⁸ Snonkaku ḇeyanan ansi kam sesyaran rifiak, bin ma romawa sya seḇeyakkor ḇa. ³⁹ Raimnai Yesus iwan snonkaku ḇeḇor ansi fa sibur. Ikada dek ro wai ma skopaw ḇesup Magadan.

¹ Ḇarpur ya snon Farisi ma Saduki ono srama simarisen sifuken sye Yesus. Sor insa Yesus fyasnai faro si aḇyair oso ro boiyaswa. ² Ḇape Yesus kyarem faro si: "Ro mandira snar rep na narik, inja mkoḇo: Ras ya nari iḇrin, ³ ma ro arwo babo snar rep na narik ma nkadum, inja mkoḇo nari rasya ipyum ba. Sananai nanki mkofawi mkomambir na ḇape aḇyair awar mkofawi na ḇa. ⁴ Syos ḇeḇarḇor ma ḇeso mnisḇa sine senamu sor aḇyair oso. Ḇape faro si nari koḇuk aḇyair oso ḇa derer aḇyair Nabi Yunus." Raimnai Yesus ibur si. ⁵ Rofyor Yesus manfamyan ḇyesi skaḇoruk danosen, sfanander sun mamami. ⁶ Yesus ikofen faro si: "Mkepen ma mkoḇesasor mko ro mur Farisi ma Saduki." ⁷ Ma skara ro mankunsi ma sikofenyae faro si: "Ikofen rarirya snar kun mamami ḇa." ⁸ Ma ro fafisu Yesus ifawi rosai ḇefnai fa sawosyae si, inja ikofen: "Snaro mkawawos ro mkun mamami ḇa? ⁹ Ne, snonkaku ḇekyar mnis ḇa! Mkofawi ḇaimke? Mkoswarepen ḇake mamami ririm faro snonkaku syaran ririm ma mkoryur bedawer na noken ri ḇeso? ¹⁰ Roḇaido mamami rifik faro snon syaran rifiak ma bedawer na mkoryur na ro inoken ri ḇeso? ¹¹ Rariso mkofawiḇa ḇo mkoḇo yawos ro mamami, mamami naiso yakofen na ḇa. Yakofen faro mko: Mkoḇesasor ma mkepen mko ro mur kawasa Farisi ma Saduki." ¹² Ro fafisu ya insape sifawi Yesus dawos insa sepen si ro mur mamami ḇa, ḇoi ro farkarkor snon Farisi ma Saduki. ¹³ Yesus ryama kwar ro Kaisarea Filipi, ifuken faro manfamyan ḇyesi: "Kawasa sya soḇo, manseiso Rumkun Snonkaku ya?" ¹⁴ Skarem, ḇo soḇo: "Ono sikofen: Yohanes Ḇemasi, ono wer sikofen: Elia ma ono kako sikofen: Yermia roḇaido oso ro fandu nabisya." ¹⁵ Raimnai Yesus ifuken faro si: "Ḇape mko kada rosai mkakkofen, manseiso aya?" ¹⁶ Inja Simon Petrus kyarem, ḇo doḇo: "Au kada Wairek Rumkun Allah ḇekenem!" ¹⁷ Yesus ikofen faro i: "Aski faro au Simon Yunus mandaḇen ḇyedi snar snonkaku riso ḇekofen ḇadir faro au ya ḇa, ḇoi Kma yedi ro boiyaswa. ¹⁸ Ma aya kako yakofen faro au: Au irya Petrus ma ro karui orḇom ine nari yaḇawes jemaat ayedi ma mun aibui ipok i ḇa. ¹⁹ Faro au nari yaḇuk asyopder ḇaḇesasoser Boiyaswa. Rosai fes ro supswan ine nari neḇefes ro boiyas ma rosai per ro supswan ine nari neḇeper ro boiyaswa." ²⁰ Raimnai Yesus myunwark manfamyan ḇyesi insa sikofen ḇayir awer faro manseirya wer mḇoi irya Wairek. ²¹ Rofyor ani Yesus ikofen ḇayir randak faro manfamyan ḇyesi nari ryaḇe Yerusalem ma ro diwa isma kandera nabor ro ḇeḇarara, mananir imam ma ḇefawi nananem Refo Yahudisya, isof smun i ḇape nari ḇyeḇeḇawes ro ras ḇeḇekior ya. ²² Ḇape Petrus pyaw Yesus fa isoi ma isonek i, ḇo doḇo: "Manseren, Allah myam monda awer roi ḇera dine! Roi ḇeḇesya ani ipok kyur awer au." ²³ Inja Yesus iknenef ma ikofen faro Petrus: "Biris wabur. Au karui ḇekarkar aya, snar kwara karkara Allah ḇyena ḇa, ḇoi karkara snonkaku." ²⁴ Raimnai Yesus ikofen faro manfamyan ḇyesi: "Mansei ḇemarisen ḇeso aya, fyamyun mankundi, ḇoi ḇyar aprop ḇyedi ma iso aya. ²⁵ Snar mansei ḇeḇekuker kankenem ḇyedi, ikada nari kankenem ḇyedi ryo bur i; ḇape mansei kankenem ḇyedi ryobur i snar aya, ikada nari ismai kankenem ḇyedi. ²⁶ Fandun rosai snonkaku oso isma supswan ine ḇesiper ḇape kankenem ḇyedi ryobur i? Inja rosai nari koḇuki syadweri ya? ²⁷ Snar Rumkun Snonkaku nari ryama kuker payamyum Kmari ma malaikat-malaikat ḇyesi siyaker i; rofyor ani nari myunsu faro snonkaku oser-oser raris rosai ifrur kwar. ²⁸ Yakofen faro mko: Kaku ḇeri ro fandu snonkaku ḇeryur sine ono nari simar ḇa isof sakmam Rumkun Snonkaku ryama raris wairek ro Ḇaḇesasoser ḇyedi."

¹ Ras riwonem nande Yesus dun Petrus, Yakobus ma naek ḇyedi Yohanes, skofnoḇek I ḇo skek bon ḇekaki oso. Ro bon ani bori skerer ḇaken. ² Fafisu ya Yesus fyadwer mankundi ro ḇarpon skoḇena; Ḇarpon ḇyedi isnai imnis ori ma sansun ḇyena napioper karḇas imnis isnai. ³ Skomam wer Moses ma Elia suyawawos kuker I. ⁴ Petrus ikofen faro Yesus, ḇo doḇo: "Manseren, aski ḇefnakḇa nkoisya ro moḇ ine. Inja wamarisen kada, yafrur aḇdares rikior ro dine, oso faro Au, oso faro Moses ma oso wer faro Elia." ⁵ Ma rofyor Yesus dawawos kaker, kuker arḇeḇer mandif ḇesna oso isabu fa iswoḇer sko ma ro mandif ani skomnaf mkaren oso ikofen: "Ine Rumkun yaswar kakurirya, faro I sneri imarisen, iḇye mkomnaf I." ⁶ Manfamyan ḇyesi simnaf rarirya simkak kaku ḇo skain wepur ma sḇansuba. ⁷ Raimnai Yesus ryama pyan ro sko ḇo ikofen: "Mkoyor mko, mkomkak awer!" ⁸ Ma ro fafisu sko kanow skoḇrusna, skomam snonkaku oso ḇa ḇoi Yesus derer. ⁹ Ro fafisu skado ro bon ani, Yesus danun faro sko: "Mkofarfyar awer mamam ani faro snonkaku osoḇa beri rofyor Rumkun Snonkaku ḇyeḇeḇawes ḇaim ro fandu ḇemar sya." ¹⁰ Raimnai manfamyan ḇyesi sifuken faro i, ḇo soḇo: "Rarirya ido snaro ḇefawi nananem Refo Yahudi soḇo, nari Elia ryama resari?" ¹¹ Yesus kyarem: "Kaku nari Elia ryama fa fyasos roi ḇeḇor nakam ¹² ma yakofen faro mko: Elia ryama kwar, fama snonkaku sya smambir iba, ma sifrur faro i raris marisen sena. Rarirya kako Rumkun Snonkaku nari isma kandera ro si." ¹³ Ro fafisu ani manfamyan ansi sifawi Yesus dawawos ro Yohanes Ḇemasi. ¹⁴ Fafisu Yesus ma manfamyan ḇyesi skaḇer faro kawasa ḇeḇor ansi, snon oso ryama faro Yesus ma ḇyansuba ḇo doḇo: ¹⁵ "Manseren, waswar romawa yedi. Iduf mandai ma ḇyekandera kaku. Fafisu ono isapi ro for ono wer isapi ro war. ¹⁶ Yuni kwar faro manfamyan ḇesi, ḇape sipok sifruri fa iprei ḇa." ¹⁷ Inja Yesus ikofen: "Ne, mko syos ḇekyar ḇa ma ḇeḇarḇor, fafisu rosai kaker nari yakain fandu mko? Fafisu rosai kaker nari yakḇaḇ asuser mko? Mkun romawa ani muma!" ¹⁸ Yesus ḇyewef rur ḇemaḇak ani, isof isasyar buri ma romawa ani iprei beri. ¹⁹ Ḇarpur ya ro fafisu Yesus derer manfamyan ḇyesi srama sifuken faro i: "Snaro rur ḇemaḇak ani nkopok nkoyawi ḇa?" ²⁰ Ikofen faro si: "Snar mkokyar mnis ḇa. Yakofen faro mko: Kaku ḇeri rofyor mkosmai kakyar ḇeba ḇemnis sasawi mor monda nari mkokofen faro Urek ine: Wakren bur moḇ ine ḇe diwara, --ma urek ani nari ikren, ma roi oso ipok ḇyerer au ḇa. [ ²¹ Dafduf mandai ine ḇyeḇeyaw monda kuker nadi ma farfor.]" ²² Rofyor Yesus ma manfamyan ḇyesi sisya kam ro Galilea, ikofen faro si: "Rumkun Snonkaku ya nari sḇoḇi faro snonkaku sya ²³ ma nari smun i ḇape ro ras ḇeḇekior nari ḇyeḇeḇawes." Rofyor manfamyan ansi simnaf rarirya sisnesna nfafardun fafaya ḇa. ²⁴ Ro fafisu Yesus ma manfamyan ḇyesi srama ro mnu Kapernaum ḇeyor som faro Rum Allah sya srama faro Petrus ma sikofen: "Rariso guru bedi nari ḇyak som dirham risuru ansuyake roḇa?" ²⁵ Kyarem faro si ḇo doḇo: "Mḇoi nari ḇyake." Ma rofyor Petrus syun ro rum ya, Yesus ifuken ḇepon i: "Simon wakkarai rariso? Faro manseisi wairek-wairek supswan ine ssun som? Faro kawasa ḇyesike roḇaido ro snon mandaman sya?" ²⁶ Petrus kyarem ḇo doḇo: "Ro mandaman sya!" Inja Yesus ikofen faro i: "Rarirya kawasa ḇyesi ma roḇa. ²⁷ Ḇape insa koḇe karui ḇekarkar faro si awer, rwa swarera ro danosen. Ma in pos ḇepon ya wai sḇari, nari wasma pipi dirham rifiak ro i. Wun si ma buk faro si fabuk ḇakwarek aya ma au kako."

¹ Rofyor ani manfamyan ansi srama faro Yesus ma sifuken: "Manseiso ḇeba syadi ro Ḇaḇesasoser Boiyaswa?" ² Inja Yesus dor romawa kasun oso fa dores fandu si raimnai ikofen: ³ "Yakofen faro mko, kaku ḇeri rofyor mkombror ma mkomnis kuker romawa kasun ineḇa ido, nari mkopok mkosun ro Ḇaḇesasoser Boiyaswa ḇa. ⁴ Mḇoi mansei ḇerun sneri fa imnis romawa kasun ine, iso ḇeba syadi ro Ḇaḇesasoser Boiyaswa. ⁵ Mansei ḇefaduru romawa kasun ḇeradine snar snonsnon Ayedi, ikada fyaduru Aya." ⁶ "Ḇape mansei ḇeḇeninyan oser ḇaken ro romawa kasun ḇekyar faro Aya sine, iḇye wer sfes karui yas-yas oso ro sasukor ḇyedi ma simsawer i ro soren. ⁷ Supswan ryokada kuker ḇaḇeninyan ḇeḇor ḇyena: Mḇoi ḇaḇeninyan ya isya, ḇape snonkaku ḇeḇeninyan ya ryokada. ⁸ Rarirya rofyor ḇramin roḇa wemin besi oso ḇyeninyan au, kwaruk i ma wasawen i, snar ipyum syadi faro au fa swun ro kankenem ya kuker ḇaramuk roḇa bemanis ro wasararir kuker ḇramin besuya ma wemin besuya ḇo si sawen au ro for ḇemḇrerḇa. ⁹ Na rofyor mka besu ya oso ḇyeninyan au, weri ma wasawen i, snar ipyum syadi faro au fa swun ro kankenem ya kuker mka oser ro bemka risuru ḇo sisawen au ro for ḇembrerḇa. ¹⁰ Mkoswarepen, ro karkara mkoḇena mkorun awer oso ro romawa kasun sine. Snar yakofen faro mko: Malaikat sesi sisya ro boiyaswa ḇemam Mami ḇarpon ḇyedi ḇesyakwar ro boiyaswa. [ ¹¹ Snar Rumkun Snonkaku ryama fa ḇyuk aski faro snonkaku ḇeḇor sya.]" ¹² "Rariso karkara ḇedi? Rofyor snonkaku oso ismai domba utin oser, ma oso ro si iḇor, rariso nari ryirḇake samfur risiw seser risiw ansi ro ḇonya ḇo rya syewar ḇeḇor ani? ¹³ Ma yakofen faro mko: Kaku ḇeri rofyor ismai, raryaḇ ḇyedi iba syadi snar oser ani, ro samfur risiw seser risiw ḇeḇorḇa ansi. ¹⁴ Rarirya kako Kma mkoḇedi ro boiyas imarisenḇa fa oser ro romawa sine iḇor." ¹⁵ "Rofyor naek bedi ifrur sasar, wasoneki ro fafisu muyerer. Rofyor imnaf anun bena rarirya wasma kaḇer naek bani wer. ¹⁶ Rofyor imnaf auḇa, wun snonkaku oser roḇa suru wer, insa farkarkor ro snonkaku risuru roḇa kior ḇeḇesaksi ro wawos ani ḇyeḇeyawos namuk kwar. ¹⁷ Rofyor fyandun siḇa, mkun wawos anna faro jemaat. Ma rofyor imewer imnaf jemaat kako, ikada komam i imnis snonkaku ḇefawi Allah ḇa roḇaido imnis snon ḇeyor som. ¹⁸ Yakofen faro mko: Kaku ḇeri rosai mkofes ro supswan ine nari neḇefes ro boiyas ma rosai mkoper ro supswan ine nari neḇeper ro boiyas. ¹⁹ Ma yakofen wer faro mko: Rofyor snonkaku risuru ro fandu mko ro supswan ine suḇe sne oser fa suyor rosairya kaker, fararyor suḇedi Kma yedi ro boiyaswa nari ḇyuki faro su. ²⁰ Snar ro moḇsai snonkaku risuru roḇa kior siryur kuker Snori, ro moḇ ani Aya isya ro fandu si." ²¹ Ḇarpurya Petrus ryama ikofen faro Yesus: "Manseren, nari yaḇuk ampun ḇefis faro naek yedi ḇefrur sasar maro aya? Isof ḇefikke?" ²² Yesus ikofen faroi: "Roḇa! Yakofen faro au: Isof ḇe fikḇa, mḇoi isof samfur rifik ḇe fik. ²³ Snar Ḇaḇesasoser Boiyaswa imnis raris wairek oso ḇemarisen ḇefrur karkor kuker manfamyan ḇyesi. ²⁴ Rofyor irandak kwar kuker karkor ani, ssun faroi snon oso ḇeḇenyaki talenta syaran samfur. ²⁵ Ḇape snon ani ipok fa ḇyak nyaki ḇyenaḇa, inja wairek ani ḇyuk sasoser insa sḇoḇi kuker kina ḇyena ma nana ḇeḇor ḇyena kam fa sḇukḇak nyaki ḇyena. ²⁶ Ḇape manfamyan ani ḇyansuba ma syom wairek ani ḇo ikofen: Wakḇaḇ aya resari, nyaki ḇeḇor ayena kam nari yaḇak pres na. ²⁷ Inja saswar ya dek ro wairek ani sneri faro manfamyan ani, isof ipyos nyaki ḇyena ma ḇyemkei i. ²⁸ Ḇape rofyor manfamyan ani isasyar, isrow manfamyan ḇese wer ḇeḇenyaki faroi dinar utin oser. Iserepen i ma damkoser min ḇyani sasukor ḇyedi, ḇo ikofen: Bak nyaki bena! ²⁹ Ma min ḇyani ḇyansuba ḇo dor faroi: Wakḇaḇ aya resari, nyaki ayena nari yaḇak nakam. ³⁰ Ḇape fyandunḇa ḇoi ḇyemin ḇyani fa ismai ro bui isof ḇyakpres nyaki ḇyena. ³¹ Min ḇese ḇyesi smam rarirya sisnesna nfafardun ma sra sikofen ḇayir roi ḇeḇor ḇeḇesya anna faro tuan sani. ³² Wairek ani iwan fa sor snon ani ma ikofen faroi: Ne, manfamyan ḇeḇarḇor, nyaki bena kam yapyosna kwar snar wor kwar ro aya. ³³ Snaro au kako wakswar min bediḇa imnis moḇ yaswar au raya? ³⁴ Inja tuan ḇyani imsori ma ḇyuki faro ḇewaren ḇui, isof ḇyak pres nyaki ḇyena. ³⁵ Inja Kma yedi ro boiyaswa nari dakfrur rarirya kako faro mko, rofyor mkono oser-oser ḇyuk ampunḇa faro naek ḇyedi kuker sne ḇesiper."

¹ Yesus ḇyuk farkarkor posa kwar, ibur ro Galilea ma syuḇer ro Yudea ro war Yordan ḇarya. ² Kawasa sibor semarani ḇo siso i ma ḇyuk pararei faro si rodia. ³ Snon Farisi ono srama faro Yesus fa sifrowes sas i. Sifuken: "Iḇyeke snon oso fyaspar swari kuker knam famfnom monda?" ⁴ Yesus kyarem: "Mkowasya ḇake, ḇefrur snonkaku sya ro randak ya ifrur snon ma bin? ⁵ Ma ikofen: Rarirya snonya nari ibur snari ma kmari ma ḇyeoser kuker swari, isof sukam suḇe ḇaken oser. ⁶ Rarirya suḇe suru werḇa ḇoi suḇe oser. Inja, rosai Allah ḇyefa ḇeḇeoser kwar, snonkaku sipok sfaspar i ḇa." ⁷ Sikofen faroi: "Rarirya ido, snaro Moses ḇyuk sasoser fa ssḇuk syap faspar rofyor snon oso fyaspar swari?" ⁸ Yesus ikofen faro si: "Snar mkosnemna npakrek eḇedari Moses ḇyuk fa mkofaspar swa mkoḇesi, ḇape ro randak ya raririrya ḇa. ⁹ Ḇape yakofen faro mko: Mansei ḇefaspar swari, mḇoi swari ifrur farḇakbuk ḇa, raimnai ḇyuk bin oso ḇese, ikada ifrur farḇuk." ¹⁰ Manfamyan ḇyesi sikofen faro i: "Rofyor ḇaḇeoser fakawinya ryarirya ido, ipyum syadi fakawino awer." ¹¹ Rarirya ikofen faro si: "Kawasa sipok sifawi kam wos ineḇa, derer faro snonkaku ḇesma fakamaman sya. ¹² Snon ono sisya sipok sfakawin ḇa snar spansnasem rofyor sisnassi saḇen si ḇayim, ma snon ono sḇeḇekar, ma snon ono wer mankunsi sifrur rarirya snar Ḇaḇesasoser Boiyaswa. Mansei ḇepok ḇefawi ido ikada ifawi." ¹³ Raimnai snonkaku ansi ssun faro Yesus roma kapira ono, insa isawardofen si ma ḇyenadi kuker si; ḇape manfamyan ḇyesi simsor snonkaku ansi. ¹⁴ Ḇape Yesus ikofen: "Mkorir romawa kapira ansi, srama faro aya ḇo mkodwarek awer si; snar snonkaku ḇemnis sisya siso ḇena Ḇaḇesasoserro Boiyaswa." ¹⁵ Raimnai isawardofen si posa ḇarpur ya ibur moḇ ani. ¹⁶ Snon oso ryama faro Yesus ma ikofen: "Guru, fararur syowi rosaiso nari yafrur insa yaksmai kankenem ḇemnaiḇa ya?" ¹⁷ Yesus kyarem: "Snaro wafuken Aya ro mnuk rosai ḇeḇye ya? Derer oser monda ḇeḇye ya. Ḇape rofyor wamarisen waksun ro kankenemya ido beuser Allah sasoser ḇyena kam." ¹⁸ Snon ani ikofen faro I: "Sasoser rosai ḇeḇesyani?" Yesus ikofen: "Mamun awer, wafrur farḇuk awer, kwaraw awer, ḇesaksi ankarkar awer, ¹⁹ ḇesyowi snami ma kmami ma waswar min besi ḇese imnis waswar mankundaw." ²⁰ Snonkḇor ani ikofen faro i: "Nakam yaḇeuser na kwar, rosai ḇemnisḇa kaker ya?" ²¹ Yesus ikofen faro i: "Rofyor wamarisen wafrur imnis ido, rwamura, ḇoḇ nana ḇeḇor bena ma bukna faro snonkaku ḇesaḇarar sya, rarirya nari wasmai nana ro boiyas, ḇarpurya rwamuma ma waso Aya." ²² Fafisu snonkbor ani imnaf wos anna, ibur kuker sne ḇefafardun, snar nana ḇyena nabor. ²³ Yesus kofen faro manfamyan ḇyesi: "Yakofen faro mko; kaku ḇeri syamswen kaku faro snon ḇenana oso fa daksun ro Ḇaḇesasoser ro Boiyaswa. ²⁴ Yakofen wer faro mko, ipyan syadi onta oso syun ro wairusmkir ya ro snon ḇenana oso syun ro Ḇaḇesasoser Allah." ²⁵ Ro fafisu manfamyan sya simnaf rarirya, sikḇiresma sikofen: "Rofyor raririrya ido nari mansei ḇesma koreri ya?" ²⁶ Yesus myam si ma ikofen: "Faro snonkaku roi nane ndariryaḇa, ḇape faro Allah roi ḇeḇor kam ndarirya." ²⁷ Raimnai Petrus kyarem ma ikofen faro Yesus: "Inko ine inkobur kam roi ḇeḇor inkoḇena kwar ma inkoso Au; inja ḇaḇyak rosaiso nari inko isma ya?" ²⁸ Yesus ikofen faro si: "Yakofen faro mko, kaku ḇeri rofyor awar babo ro fafisu Rumkun Snonkaku ya dek ro karapesa nasanḇyedi, mko ine, ḇeso Aya kwar, nari mkokain kako ro karapesa samfur seser risuru fa mkakḇe mankara keret samfur seser risuru ro er Israel. ²⁹ Ma mansesi ḇebur kwar rum sena, roḇa naek ma srar sesi, roḇa sna ma kma sesi, roḇa romawa sesi, roḇa yaf sena snar Aya, snon ani nari isma kaḇer utin ḇeutin ma nari isma kankenem ḇemnaiḇa ya. ³⁰ Ḇape kawasa ḇeḇor ḇepon sya nari spupes, ma ḇepupes sya nari spon."

¹ "Snar Ḇaḇesasoser ro Boiyaswa imnis tuan ḇena rum oso isasyar ro arwo prim kaku fa syewar snonkaku ono fa sifararur ro yaf anggur ḇyedi. ² Rofyor nyawosi kuker snonkaku ansi kwar ro ḇaḇyak sedi dinar oser ro ras oser, posa iwan siḇe yaf anggur ḇyedi. ³ Indokada oras siw arwo isasyar wer ma isrow snonkaku ono sarores monda ro pasar. ⁴ Ikofen faro si: Mkora mkakfararur kako ro yaf anggur ayedi, ma nari yaḇak pyum mko. Ma sikako sakra. ⁵ Indokada oras samfur seser risuru ma oras kior mandira ya kako isasyar ma syewar ḇefararur ono wer. ⁶ Indokada oras rim mandira isasyar wer ma isrow snonkaku ono wer, inja ikofen faro si: Snaro mkarores monda ro dine ro ras ḇesiper ine? ⁷ Sikofen faroi: Snar snonkaku ono ssḇuk fararur faro nko ḇa. Ikofen faro si: Mkora kako ḇe yaf anggur ayedi. ⁸ Fafisu mandira kwar tuan ani ikofen faro manwadwaren yaf ya: Wor ḇefararur ansi ma baksi, bak ḇepon ḇesun papupes sya isof ḇesun ḇepon sya. ⁹ Inja ḇefararur ro indokada oras rim sya srama ḇyaksi ma oser-oser isma dinar oser. ¹⁰ Ḇarpur ya ḇefararur ḇepon ansi sakrama, skara soḇo nari sismai syadi, ḇape sikako oser-oser ismai dinar oser kako. ¹¹ Fafisu sisma ḇaḇyak sedi, sikada surem faro tuan ani, ¹² soḇo: Ḇesun papupes sine sifararur oras oser monda ḇesyaḇo baksi imnis kuker inko, ḇefararur marḇak ras ḇesiper ma ḇerires dares pnas ro ori. ¹³ Ḇape tuan ani kyarem faro oso ro si, ḇo _doḇo: Naek, yafrur sasar faro au ḇa. Rariso kuna wosi kwar kuker ḇaḇyak dinar oser ro ras oser? ¹⁴ Wun rarwas ḇedi ḇo wabur; yamarisen yaḇuk faro ḇesun papupes ani imnis kuker yaḇuk faro au. ¹⁵ Ipyumḇake yafrur marisen ro sneri kuker nana yena? Roḇaido wamsor, snar yafrur pyum? ¹⁶ Rarirya kako snonkaku ḇepupes sya nari spon ma ḇepon sya nari spur." ¹⁷ Fafisu Yesus ryaḇe Yerusalem, dor ḇardi manfamyan samfur seser risuru ḇyesi ma ikofen faro si ro nyanya faduri: ¹⁸ "Knikine kora ḇe Yerusalem ma Rumkun Snonkaku nari sḇoḇi faro mananir imam-imam ma ḇefawi nananem Refo Yahudisya, ma nari ssḇuk samamyai marmar faro i. ¹⁹ Ma nari ssḇuki faro er-er ḇefawi Allah ḇa sya, insa sonef i, siprer i ma spai i ro aprop, ma ro ras ḇeḇekior ya nari ḇyeḇeḇawes." ²⁰ Raimnai Zebedeus mandaḇen ḇyesu fnoḇek sna suḇedi skora faro Yesus, ma sna suḇedi ḇyan suba ro ḇarpon ḇyedi fa dor roi oso ro i. ²¹ Yesus ikofen: "Rosai wamarisen ya?" Kyarem, ḇo _doḇo: "Buk sasoser, insa romawa ayesuine sukain ro Ḇaḇesasoser bedi, sumindi ro ḇar raku ma sumin ya ro ḇar rasar ḇedi." ²² Ḇape Yesus kyarem, ḇo ikofen: "Mkofawi ḇa rosaiso mkor ya. Mḇoi nari mkakinem sek aninem yinem ya?" Sukofen faro Yesus: "Mḇoi rarirya." ²³ Yesus ikofen faro si: "Sek aninem yedi, mḇoi nari mkakinem i, ḇape kankain ro ḇar raku ma ḇar rasar ayedi, yapok fa yaḇuki ḇa. Ine nari ḇyeḇeḇuk faro snonkaku mansesi Kma yedi fyasos kwar sya." ²⁴ Manfamyan samfur ḇese ansi simnaf rarirya simsor faro mambekanaek ansu ya. ²⁵ Ḇape Yesus dor si ma ikofen: "Mkofawi ḇaḇesasoser er-er sya, ssḇuk sasoser faro kawasa kuker ḇramin mankarmomen ma ḇeḇarara-ḇeḇarara sya sewayam si kuker pakakrek. ²⁶ Rariryaḇa fandu mko. Mansei ḇemarisen ḇeba ro fandu mko, iḇye duf farmyan mko, ²⁷ ma mansei ḇemarisen ḇeḇemananir fandu mko, iḇye ḇye manfamyan ḇe mko; ²⁸ imnis raris Rumkon Snonkaku ryama insa suf farmyan i ḇa, mḇoi insa duf farmyan ma insa ḇyuk kankenem ḇyedi fa ḇyukḇak namuk kawasa ḇeḇor." ²⁹ Ro fafisu Yesus kuker manfamyan ḇyesi sisasyar ro mnu Yerikho, kawasa sibor semarani ḇo siso i. ³⁰ Snon ḇepraf risuru suisya sukain ro nyan andir ya, ma sumnaf, Yesus imbranuk, inja suyor ḇo suyoḇo: "Manseren, Rumkun Daud, waswar nu!" ³¹ Ḇape kawasa ḇeḇor ansi sewef su insa suḇefasis. Ḇesyaḇo insape ssubras syadi wer, suyoḇo: "Manseren, romawa Daud, waswar nu!" ³² Inja Yesus dores kan ma dor su. Ikofen: "Rosaiso mumarisen insa yafrur faro mu?" ³³ Sukarem, ḇo suyoḇo: "Manseren, numarisen insa numam wer." ³⁴ Rarirya saswar ya dek ro Yesus sneri, inja pyan ro sumkasna ma ro fafisu ya kako sumam beri ma suso I.

¹ Fafisu Yesus ma manfamyan ḇyesi sfanam kwar Yerusalem ma srama ro Betfage ro urek Zaitun, Yesus iwan snon risuru ro manfamyan ḇyesi kuker anun: ² "Muraḇe mnu ḇero ḇarpon muḇedi, ma ro diwa nari musrow keledai bin oso ḇyeḇefes ma mkun ḇyedi isya ro risḇyedi. Muper keledai ani ma muyuni muma faro Aya. ³ Ma rofyor snonkaku ono sifuken mu, mokofen faro si: Manseren ḇyefanduni. Nari isiḇer i fasaw wer." ⁴ Roi ḇeḇesya ine ryarirya insa ḇardi nabiya ḇyaryas ani imnis: ⁵ "Mkokofen faro imfun Sion: Mamkada, Wairek bedi ryama faro au, Ikada fyafir ma ḇyeaḇaḇen ma dek ro keledai oso, keledai kuḇ babo." ⁶ Inja manfamyan ansuya sura ma sufrur raris moḇ rosai Yesus ḇyuk kwar faro su. ⁷ Suyun keledai bin ani fnoḇek mkun ḇyedi, ma sḇor keledai ani dokor ḇyedi kuker sansun sena ma Yesus dek fa kyain roi. ⁸ Kawasa ḇeḇor sḇor sansun sena ro sampakya, ma ḇesesya wer skaruk airam ono fa skekna ro sampak ya kako. ⁹ Ma kawasa ḇeḇor ḇesoi sya ḇembran ro ḇarpon ma ḇarpur Yesus ssibras, soḇo: "Aski faro Rumkun Daud, I ḇesma ḇok ḇerama kuker Manseren snori, aski ro moḇ ḇekaki syadi!" ¹⁰ Rofyor syun ro Yerusalem, mnu ḇeba ani imbrus ma kawasa ansi sikofen, ḇo soḇo: "Snonkaku saisoine?" ¹¹ Ma kawasa ḇeḇor ansi skarem: "Ine nabi Yesus ro Nazaret ro sup Galilea." ¹² Raimnai Yesus syun ro Allah Rum ḇyedi ma iyaw snonkaku kam ḇefarḇaḇyan ro Allah Rum ḇyedi rawndi sya. Pyamḇar meja-meja sḇuksadwer pipi na ma bangku-bangku ro snonkaku ḇeḇoḇ manjawa sya. ¹³ Raimnai Yesus ikofen faro si: "Fas-fas isya: Rum Ayedi nari snir iḇe rum-nadi. Ḇape mkokada mkofrur iḇe nas snonkaku ḇemamun." ¹⁴ Rarirya ḇepraf sya ma manis sya srama faroi ro Allah Rum ḇyedi ma ḇyuk pararei faro si. ¹⁵ Ḇape rofyor mananir imam-imam ma ḇefawi nananem Refo Yahudi smam aḇyair kanandor ifrur na ma romawa-romawa ḇebras ro Allah Rum ḇyedi sya: "Aski faro Rumkun Daud!" ¹⁶ Sisnesna namsor, ma sikofen faroi: "Wamnaf romawa sine roi sikofen na?" Yesus ikofen faro si: "Yamnaf; mkowasya ḇaimke: Ro sḇadon romawa makḇoi ma romawa ḇeyinem sus fasos kwar sanandik?" ¹⁷ Raimnai ibur si ma isasyar ro mnu ya fa ryaḇe Betania ma denef ro dia. ¹⁸ Ro arwori ro maran kyaḇer wer ḇe Yerusalem, Yesus ibiser. ¹⁹ Fanam nyanya Yesus myam ara knam oso inja imbran yoḇi fa syewar bon roi, ḇape ismai royo ḇa derer fyabairam monda. Inja Yesus ikofen faro ai knam ani: "Wapok wamarem wer ḇa isof fyoro-fyoro!" Ma ro fafisu ani beri ara knam ani myas. ²⁰ Manfamyan ḇyesi smam roi ḇeḇesya ani sikandor, ma sikofen: "Rariso isof ara knam ani myas fasaw beri?" ²¹ Yesus kyarem faro si: "Yakofen faro mko, kaku ḇeri rofyor mkokyar ma mkoḇe ḇirḇarḇa, nari mkofrur roi ḇeraris yafrur faro ara knam ani, dererḇa ḇoi rofyor mkokofen faro bon ine: Wakḇaken ma rwop randa wamsawer ro soren! nari ndarirya. ²² Ma rosairya wer mkor ro nadi kuker kakyar, nari mkosmai na." ²³ Raimnai Yesus syun ḇe Allah Rum ḇyedi, ma fafisu fyarkor ro dia, mananir imam-imam kuker ḇeḇarara-ḇeḇarara er Yahudi srama faroi, ma sifuken: "Kuker papoik rosaiso bukfrur roi ḇera dine na? Ma manseiso ḇeḇuk papoik ani faro Au?" ²⁴ Yesus kyarem faro si: "Aya kako nari yaḇuk fakfuken oso faro mko ma rofyor mkokarem i faro Aya, nari Aya kako yakkofen faro mko kuker papoik rosaiso yaḇuki ifrur roi annane kam ya. ²⁵ Ḇakḇuk masi sren Yohanes ryama kero? Ryaker boiyaswake roḇa ryaker snonkakuke?" Sawos yae faro si, ma sikofen: "Rofyor kokofen: Ryamaker boiyaswa, nari ikofen faro ko: Rarirya ido, snaro mkokyar faro i ḇa? ²⁶ Ḇape rofyor kokofen, ḇo koḇo: Ryamaker snonkaku, komkak kawasa ḇeḇor ansi, snar sikam skara Yohanes ani nabi rirya." ²⁷ Raimnai skarem faro Yesus: "Inko fawiḇa." Inja Yesus ikofen faro si: "Rarirya ido, Aya kako yakkofen faro mkoḇa kuker papoik rosaiso yaḇuki ifrur roi annane kam ya." ²⁸ "Ḇape mko kara rariso: Snon oso ḇena romawa risuru. Rya faro romawa rak ya ma ikofen: Romawa jedi ras ine rwa wafararur ro yaf anggur. ²⁹ Romawa ani kyarem: Mḇoi, mami. Ḇape rya ḇa. ³⁰ Inja sinan ani ryawer faro romawa ḇeḇesuru ya ma ikofen rarirya kako. Ma romawa ani kyarem bo doḇe! Yamewer. Ḇape ḇarpurya fyafko ma rya. ³¹ Mansei ro fandu romawa ansu ya ḇeḇeuser kmari marisen ḇyedi?" Skarem, ḇo soḇo: "Romawa ḇeḇesuru ya." Yesus ikofen faro si: "Yakofen faro mko, kaku ḇeri ḇeyor som ma bin ḇefrur farḇuk nari spon mko fa ssun ro Allah Ḇaḇesasoser ḇyedi. ³² Snar Yohanes ryama fa fyasnai nyan ḇenapes faro mko, ḇape mko kyar i ḇa. Ḇape ḇeyor som ma bin-bin ḇefrur farḇakḇuk sikada sikyar faroi. Ḇape mkomam i ḇesyaḇo mkofafko ḇa ma mkokyar faro i ḇa kako." ³³ "Mkomnaf sarḇer oso ḇese wer. Snon ḇena saprop oso dom yaf anggur raimnai kyeri ḇo dar werek i. Raimnai ḇyai der moḇ ḇekafos anggur ma ḇyawes kaderen ḇekaki fa sḇukwaren yaf ani. Raimnai ḇyeasas yaf ani faro ḇeḇuk sasureffa sifararur ro yaf ani ḇoi ryaḇe sup ḇese. ³⁴ Fafisu afufanggur ya fyanam, iwan manfamyan ḇyesi faro ḇefararur ro yaf ani fa ssun rarwas ḇyedi ro anggur bon anna. ³⁵ Ḇape ḇefararur ro yaf ani sfor manfamyan ḇyesi: siprer sia, smun sia ma sso sia kuker karui. ³⁶ Ḇarpur ya tuan ani iwan manfamyan ono ḇese wer, sibor syadi ro ḇepon ansi, ḇape si kako sifrur si raris min sesi. ³⁷ Ḇarpurya iwan romawa ḇyedi faro si, ḇo ikofen: Roma ḇyedi nari sararyof i. ³⁸ Ḇape rofyor ḇefararur ro yaf ansi smam rumkun ḇyani, sawos yae faro si: Roma ine iso nari ḇeḇewaris yaf ine, mkorama komun i, insa kona waris ḇyedi. ³⁹ Inja sfori ma sisawen i ḇe yaf ya ḇandiri posa smun i. ⁴⁰ Rofyor tuan ḇena yaf ani ryama, rosaiso nari ifrur faro ḇefararur ro yaf ani?" ⁴¹ Sikofen faro i: "Nari myun snonkaku ḇeḇarḇor ansi ma yaf anggur ani nari ḇyuki faro ḇeḇuk sasuref ono ḇese, sikada nari ssḇuk bon ro yaf ani faroi ro fafisu afuf ya." ⁴² Yesus ikofen faro si: "Mkowasya ḇaimke fas-fas ro Refo: Ḇefawi nananem ḇaḇawes rum, karui sisawen ya iso ḇeḇe karui dopir: roi ḇeḇesya ine ryama ro Manseren mun ḇyedi, roi ḇefrur kanandor ro ḇarpon komkasna. ⁴³ Rarirya yakofen faro mko, nari Allah Ḇaḇesasoser ḇyedi ḇye ḇeyun bur mko ma nari ḇye ḇeḇuk faro er oso ḇeḇuk bon faro Ḇaḇesasoser ani. [ ⁴⁴ Mansesi ḇesapi ro karui ani, nari sekis-kis ma mansesi karui ani ḇyarek epen sya nari semnuk-mnuk.]" ⁴⁵ Fafisu mananir imam-imam ma snon Farisi ansi simnaf sarḇer Yesus ḇyani, sifawi siso Yesus syarḇer si. ⁴⁶ Inja ssewar nyan insa sfori, ḇape simkak kawasa ḇeḇor ansi, snar kawasa ḇeḇor ansi karkara sena I nabi rirya.

¹ Raimnai Yesus dawos wer kuker sarḇer faro si: ² "Ḇaḇesasoser ro Boiyaswa imnis raris wairek oso, ḇefrur munara fakawawin faro rumkun ḇyedi. ³ Iwan manfamyan ḇyesi fa sra sor snonkaku dor kwar fa ḇeso munara fakawawin ani, ḇape simewer sramari. ⁴ Iwan manfamyan ono ḇese wer, kuker ananun: Mko kofen faro snonkaku yor ansi: Kaku ḇeri, roḇean ayena yafasos na kwar, sapi snoman ma rofanfan yesi seḇekaruk kwar; nakam neḇefasos kwar, inja mkorama ḇemunara fakawawin ine. ⁵ Ḇape snonkaku dor ansi sefandun iba; ono sraḇe yaf sena, ono sraḇe sasewar sena, ⁶ ma ono wer sfor manfamyan ansi, sḇewayam ma smun si. ⁷ Rarirya wairek ani imsor, ma iwan sarar ḇyesi fa sra smun ḇemamun ansi ma sikun mnu sedi. ⁸ Posa kwar ikofen faro manfamyan ḇyesi: Munara fakawawin ya ḇyeḇefasos kwar, ḇape snonkaku yor ansi sisyusḇa. ⁹ Inja mkora wer ḇenyan farsam nakam ma mkor snonkaku mkosrow ro diwa sya, mkun si faro munara fakawawin ine. ¹⁰ Rarirya manfyan ansi sra siryur snonkaku kam sisrow ro nyan diḇo, snonkaku ḇeḇarḇor ma snonkaku ḇepyum, isof sim munara fakawawin ani ifo kuker dakam ansi. ¹¹ Fafisu wairek ani syun fa isrow dakam ansi, myam snon oso daksansun sansun munara ḇa, ¹² inja ikofen faroi: Ne, naek, snaro swun ro dine ḇoi waksansun sansun munara ḇa? ¹³ Ḇape snon ani ḇyefasis monda. Inja wairek ani ikofen faro manfamyan ḇyesi: Mkofes wemin ma ḇramin ḇyesya ma mkosawen snon ani ḇemoḇ ḇepampan syadi, ro diwa kankanes ma arkfafais nakor naisya. ¹⁴ Snar sibor seḇeyor, ḇape skinfir sya sibor ḇa." ¹⁵ Ḇarpurya snon farisi ono sra sna awi fa ssewar nyan rariso sifrowes Yesus kuker fakfuken oso. ¹⁶ Siwan manfamyan sesi fnoḇek snon Herodian ono fa sifuken I: "Guru, inkofawi, Au snonkaku ḇenapes ma kuker napnapes ḇuk farkarkor ro Allah nyan ḇyena ma Au wamkak ḇa faro mansei rya wer, snar au swewar snonsnon ḇa. ¹⁷ Wakofen faro nko karkara bedi: Inja koḇak som faro Kaisarke roḇa?" ¹⁸ Ḇape Yesus ifawi sne ḇeḇarḇor sena inja, ikofen: "Snaro mkofrowes Aya, ne snonkaku ḇeḇarḇor? ¹⁹ Mkofasnai faro Aya pipi faro som ani." Inja ssun faroi dinar oser. ²⁰ Ma ifuken faro si: "Kakop ma fas-fas mansei ḇyedi sine?" ²¹ Skarem, ḇo soḇo: "Kakop ma fas-fas Kaisar." Raimnai Yesus ikofen faro si: "Mkoḇuk faro Kaisar rosai Kaisar dor ro mko ma mkoḇuk faro Allah rosai Allah dor ro mko." ²² Simnaf rarirya sikandor ma sisusu bur Yesus ma sibur beri. ²³ Ro ras ani Saduki ono sra faro Yesus, ḇena karkara, aḇiḇer ya isya ḇa. ²⁴ Sifuken faro I: "Guru, Moses ikofen, rofyor snon oso imar bur swari ḇoi suna romawaḇa, ḇedar ḇyedi ḇyuk bin ani insa ssuyaḇen romawa oso sadwer naek ḇyedi ḇemar ani. ²⁵ Rarirya ro fandu inko mambekanaek rifik sisya. Ḇepon ya fyakawin, ḇape nya romawa osoḇa ḇo imar. Inja naek ḇyedi fyakawin bin ani insa ssuyaḇen sadwer naek ḇyedi ḇemar ani. ²⁶ Rarirya kako ḇeḇesuru ma ḇeḇekior ya isof ḇeḇefik ya. ²⁷ Ḇarpur ya sikam simar, ma bin ani kako dakmar. ²⁸ Inja mansei ro fandu mambekanaek rifik ansi nari befakawin bin ani ro fafisu aḇiḇer ya? Snar sikam sfakawin kuker bin ani kwar." ²⁹ Yesus kyarem faro si: "Mkosasar bos, snar mkofawi Refo ḇa, ma rarirya kako Allah papoik ḇyena! ³⁰ Snar ro fafisu aḇiḇer ya snonkaku sfakawin ḇa, ḇoi sikenem imnis malaikat ro boiyaswa. ³¹ Ḇape ro mnuk aḇiḇer fandu ḇemar si mkowasya ḇake rosai Allah ikofen, radine: ³² Aya ine Allah Abraham, Allah Ishak ma Allah Yakub? Snar I Allah faro snonkaku ḇemar sya ḇa, ḇoi I Allah faro snonkaku ḇekenem sya." ³³ Kawasa ḇeḇor ḇemnaf ansi sikandor farkarkor ḇyena. ³⁴ Fafisu snon Farisi sya simnaf, Yesus isisen wark snon Saduki sya sisḇasna, inja siryur ³⁵ ma oso ro si, isoine snon ḇefawi nananem Refo Yahudi, ifuken sas Yesus: ³⁶ "Ne, Guru, sasoser rosaiso ḇeba syadi ro sasoser Refo Yahudi?" ³⁷ Yesus kyarem faroi: "Waswar Manseren, Allah ḇedi, kuker snembri ḇesiper ma kuker rur bedi ḇesiper ma kuker karkara ḇena ḇesiper. ³⁸ Ine sasoser ḇepon ma ḇeba syadi. ³⁹ Ma sasoser ḇeḇesuru ḇemnis kuker sasoser ḇepon ani iso ine: Waswar min besi imnis waswar mankundaw. ⁴⁰ Sasoser ansuine suiso ḇeḇeknam sasoser nakam ro Refo Yahudi ma syap nabi-nabi." ⁴¹ Fafisu snon Farisi ono sisya siryur, Yesus ifuken faro si, doḇo: ⁴² "Rariso karkara mkoḇena ro Wairek? Mansei rumkun ḇyedi rya?" Sikofen faro I: "Daud rumkun ḇyedi rya." ⁴³ Yesus ikofen faro si: "Rofyor rarirya ido, snaro Daud ikofen kuker sḇayoi Rur ya ma dap iḇe Manseren ḇyedi, ro fafisu ikofen: ⁴⁴ Manseren ikofen kwar faro Manseren yedi: kwainkada ro ḇar raku Yedi, isof Yarir mbroḇ besi fa waref epen si. ⁴⁵ Inja rofyor Daud dapiḇe Manseren ḇyedi, rariso dapi ḇe rumkun ḇyedi wer?" ⁴⁶ Snonkaku osoḇa kyarem faro I, ma randak ro ras ani snonkaku osoḇa beri ḇemku fa ḇefakfuken roi ono faro I.

¹ Ma Yesus ikofen faro kawasa ḇeḇor ma faro manfamyan ḇyesya, doḇo: ² "Ḇefawinananem Refo Yahudi ma snon Farisi skain kwar ro karapesa Moses. ³ Inja mkoso ma mkoḇeuser roi ḇeḇor sfarkor faro mko, ḇoi mkoso awer fararur sena, snar sfarkor na ḇape sifrur naba. ⁴ Sfes kamnam ḇemarḇak, raimnai srir na ro kawasa sya erdai sena, ḇape mankunsi ḇardi sakḇyunekro naba. ⁵ Fararur sifrur nakam, simarisen monda insa snonkaku smam na; imnis raris kaḇrai nadi ḇeḇam ma syatu sena pusyom ḇekwan na; ⁶ simarisen skain ro moḇ ḇekaki ro munara ma ro ḇarpon rum nadi; ⁷ simarisen sisma syom ro pasar ma simarisen sor siḇe Rabi. ⁸ Ḇape mko kada, sap awer mkoḇe Rabi; snar mkosma Rabi oser monda ma mko kam mkoḇe mambekanaek. ⁹ Ma mkap awer mansei ryakaker ḇe kma ro supswan ine, snar Kma oser monda faro mko, isoine Allah ro boiyaswa. ¹⁰ Sap awer mko kako ḇemanfarkin, snar Manfarkin oser monda faro mko, isoine Wairek. ¹¹ Mansei ḇeba syadi ro fandu mko, iḇye wer duf farmyan mko. ¹² Ma mansei ḇekanow mankundi, nari ḇyeḇepandun ma mansei ḇerun mankundi, nari ḇyeḇekanow. ¹³ Mkoroë, ne, ḇefawi nananem Refo Yahudi ma kawasa Farisi, ne, kawasa ḇeḇarḇor mko, snar mkosisen kedwai Ḇaḇesasoser Boiyaswa ro ḇarpon snonkaku. Snar mankun mko mkosun ḇa ma mko dadwarek ḇeḇesewar fa ḇesun sya. [ ¹⁴ Mkoroë, ne, ḇefawi nananem Refo Yahudi ma kawasa Farisi, ne, kawasa ḇeḇarḇor mko, snar mkoren kabom-kabom sya rum sena ma mkosisen wark mamam snonkaku kuker nadi ḇekwan mkoḇena. Inja nari mkosmai samamyai ḇemarḇak syadi.] ¹⁵ Mkoroë, ne, ḇefawi nananem Refo Yahudi ma kawasa Farisi, ne, kawasa ḇeḇarḇor mko, snar mkokaḇor soren ma mko mbranuk sup, fa mkun snonkaku oser monda insa daksun ro agama mkoḇedi ma syun kwar, mkofrur iḇe romawa for ḇemḇrerḇa, ḇeḇarḇor syadi ḇe suru ro mankun mko. ¹⁶ Mkoroë, ne, manfarkin ḇepraf, ḇekofen: Soar imnis raris Rum Ari Ḇesren, soar ani dau roi oso ḇa; ḇape soar imnis raris brawen ro Rum Ari Ḇesren, soar ani iyaḇek. ¹⁷ Ne, mko snonkaku ḇefawi royoḇa ma snonkaku ḇepraf, rosaiso ḇeḇefandun syadi, brawen roḇa Rum Ari Ḇesren ḇefasren brawen ansi? ¹⁸ Soar imnis raris rokef farsarser, soar ani daw roi oso ḇa; ḇape soar imnis raris farsarser ḇero rokef ya, soar ani iyaḇek. ¹⁹ Ne, mko snonkaku ḇepraf, rosai ḇeḇefandun syadi, farsarser roḇa rokef farsarser ḇefasren farsarser anna? ²⁰ Inja mansei ḇesowar imnis raris rokef farsarser syowar imnis raris rokef farsarser ma kako imnis raris roi ḇeḇor kam ḇerir ro bori na. ²¹ Ma mansei ḇesowar imnis raris Rum Ari Ḇesren, syowar imnis raris Rum Ari Ḇesren ma kako imnis raris I, ḇekain ro rum ani. ²² Ma mansei ḇesowar imnis raris Boiyaswa, syowar imnis raris karapesa Allah ma kako imnis raris I, ḇekain ro karapesa ani. ²³ Mkoroë, ne, ḇefawi nananem Refo Yahudi ma kawasa Farisi, ne, kawasa ḇeḇarḇor mko, snar rarwas ḇar ḇeḇesamfur ro marisan, ampui ma konsop mkoḇak na, ḇape roi ḇeḇefandun syadi ro sasoser Refo Yahudi mkamdwerna, isoine: napnapes ma sawarwar ma ḇaḇeuser. Inja kofrur oser ma kopok kamdwer ḇese na ḇa. ²⁴ Ne, mko manfarkin ḇepraf, papanursya mkoryan sibur aninem mkoḇena, ḇape onta ḇero aninem na mkoren si. ²⁵ Mkoroë, ne, ḇefawi nananem Refo Yahudi ma kawasa Farisi, ne, kawasa ḇeḇarḇor mko, snar skaninem ma ben ḇeyanan mkoḇan sren ḇandisi, ḇape donsi kada sifo kuker fasyar ma rmomen. ²⁶ Ne, snon farisi ḇepraf, mkoḇan sren ḇepon sek aninem ya dori resari, rarirya nari ḇandiri kako daksren. ²⁷ Mkoroë, ne, ḇefawi nananem Refo Yahudi ma kawasa Farisi, ne, kawasa ḇeḇarḇor mko, snar mkomnis raris russauf kuker kamara ḇepyoper, ipyumra ḇandiri ro mamam, ḇape ro dori ifo kuker ḇemar kor ma buramek. ²⁸ Rarirya kako mko, ro mamam snonkaku ro ḇandi mkonapes, ḇape ro mkodom na nafo kuker ḇarḇor ma sasar. ²⁹ Mkoroë, ne, ḇefawinananem Refo Yahudi ma kawasa Farisi, ne, kawasa ḇeḇarḇor mko, snar mkoḇawes aḇerpapor ro nabi-nabi ma mkofamankor kakop rusro snonkaku ḇesren sya ma mkokofen: ³⁰ Rofyor nko kenem ro awar kpu nkoḇesi kada nari nkakso si ḇa ro mamun smun nabi sya. ³¹ Ḇape rarirya ido mankun mko ḇardi mkoḇe saksi, mḇoi mkoḇe kpu ro ḇemun nabi ansi. ³² Inja, mkofamfon sasar ro kpu mkoḇesi! ³³ Ne, mko ikak, ne, ikak ḇeknampu kpu ḇyesi! Rariso nari mkoper mankun mko ro samamyai for ḇembrer ḇa? ³⁴ Inja, mkomam, Aya yawan faro mko nabi-nabi, ma snon ḇefawinananem ma ḇefawi nananem Refo Yahudi: ono ro si nari mkomun si ma mkopai si ro aprop, ono wer nari mko prer si ro rum-rum ari mkoḇena ma mkoḇewayam si ro mnu ḇe mnu. ³⁵ Insa mko kamar rik ḇesbawer ro snonkaku ḇesasar ḇa, randak ro Habel snon ḇenapes ani, isof ro Zakharia Berekhya mandaḇendi, mkomun ro fandu moḇ ḇesren ma rokef farsarser. ³⁶ Yakofen faro mko: Kaku ḇeri roi ḇeḇor nane kam nari syosbabo ine siso ḇeḇar na!" ³⁷ "Yerusalem, Yerusalem, au ḇemun nabi-nabi ma ḇeso si kuker karui snonkaku siwan yoḇ au sya! Rarwan nabor kwar yaswar kuf fa yafanjur romawa besi, imnis mankoko sinan ḇeryur mkun sesi ro prer ḇyesi baḇsi, ḇape mko mewer. ³⁸ Mkomam rum mkoḇanine nari ḇyeḇebur ma ḇyeusḇa. ³⁹ Ma Yakofen faro mko: Randak ro knikine nari mkomam Aya wer ḇa, isof mko kofen: Sanandik faro I ḇerama kuker Snonsnon Manseren!"

¹ Raimnai Yesus isasyar ro Allah Rum ḇyedi, ma rya. Manfamyan ḇyesi srama ma sfasnai payamyum ro Allah Rum ḇyedi. ² Ikofen faro si: "Mkomam roi ḇeḇor anna kam? Yakofen faro mko, kaku ḇeri nari karui oso ro dine ḇyeḇemam monda ḇa ḇo ḇyarek ro oso bori; nakam nari neḇekakok." ³ Fafisu Yesus kyain ro urek Zaitun bori, manfamyan ḇyesi srafaroi insa sawawos ro mankunsi kuker I. Sikofen, ḇo soḇo: "Wakofen maro nko, fafisu rosaiso roi anna ne nari ndamuma ya ma aḇyair rosaiso ḇefasnai raramuma bedi ma aḇyair ḇefasna papupes supswan ya?" ⁴ Yesus kyarem faro si: "Mkepen mko insa snonkaku ono sfarkor ninyan awer mko! ⁵ Snar snonkaku sibor srama sap snori ma sikofen: Aya ine Wairek, ma nari sfarkor ninyan kawasa sibor. ⁶ Nari mkomnaf rakrok mbroḇ ma ḇaryas embroḇ. Rariryano mkepen mko, ma mkokarsosen awer; snar roi nane kam nari ndarirya resari, ḇape papupes ya ryama ḇaim. ⁷ Snar er nari sikḇawes sisampum er ḇese, ma ḇaḇesasoser sisampum ḇaḇesasoser ḇese na. Nari basbiser isya ma rim ḇeba nmun ro moḇ nabor. ⁸ Ḇape nakam insape kandera ḇemun randak ḇeyunḇe awar babo ya. ⁹ Rofyor ani nari ssḇuk mko fa sewayam ma smun mko ma nari er ḇeḇor kam sayin mko snar snonsnon Ayedi, ¹⁰ ma snonkaku sibor nari siwarki ma sḇoḇ yae si ma sayin yae si. ¹¹ Nabi sararer sibor nari sikḇawes fa sfarkor ninyan kawasa sibor. ¹² Ma snar sasar na, naba syadadi inja saswari ro snonkaku sibor ndoë. ¹³ Ḇape mansei ḇemku epen isof ḇarpur ya kada nari isma aski. ¹⁴ Ma Ankankinem Ḇeḇye ro Ḇaḇesasoser ine nari ḇye ḇeḇaryas ro supswan ḇesiper fa ḇyesaksi faro er sya kam, raimnai insape awar papupes ya." ¹⁵ "Inja rofyor mkomam ḇarḇor ḇeḇyeḇa ndo moḇ ḇesren, raris Nabi Daniel ikofen kwar -- ḇeḇewasya mkokara pyum -- ¹⁶ rarirya kawasa ro sup Yudea iḇye syadi sifrar sibur ḇe bon na. ¹⁷ Snonkaku ḇeyun wam ro kaderen ro rum ya bori ido awer fa dun roi oso ro rum ḇyedi, ¹⁸ ma snonkaku ḇero yaf kyaḇer awer fa dun sansun ḇyena. ¹⁹ Ara faḇye faro bin-bin ḇemoḇesḇa ma ḇesus romawa ro fafisu ani. ²⁰ Mkoḇe nadi, insa rofyor mkofrar mkobur ya isrow awer fafisu prim ya ma isrow awer ro ras Mananai Yahudi ya. ²¹ Snar ro fafisu ani nari wayam ḇefnak ḇa nmun, roi ḇeradine nmun ḇaim ro awar madero isof babo ine ma nari napok nmun wer ḇa. ²² Ma rofyor ya Allah ḇyuk fafisu ya fa iknampuḇa kada, nari roi ḇekenem nakam oso isma askiḇa; ḇape snar snonkaku Allah kyimfir sya, eḇedari fafisu ani ḇyei fa iknampuri. ²³ Rofyor ani snonkaku ono sikofen faro mko: Mkomame, Wairek isya ro dine, roḇaido Wairek isya ro diwa, mkokyar awer si. ²⁴ Snar Wairek-Wairek sararer ma nabi-nabi sararer nari sikḇawes ma nari sifrur aḇyair ḇeba syadi ma aḇyair kanandor, isof sfarkor ninyan snonkaku Allah kyinfir kwar sya kako. ²⁵ Mkoswarepen naḇye, Yakofen na ḇepon kwar faro mko. ²⁶ Inja, rofyor ono sikofen faro mko: Mkomame, Isya ro sup ḇeursḇa, mkoramura awer; roḇaido: Mkomame, Isya ro sim ya dori, mkokyar awer. ²⁷ Snar imnis raris samar ḇearḇeḇer ro ḇar wamurem ḇe ḇar wambarek, rarirya kuker raramuma ro Rumkun Snonkaku. ²⁸ Ro moḇ rosai ḇepsursya sisya, ro dia mankankan spanjuḇer." ²⁹ "Fafisu wayam ani isyof fasaw bur, ori nari pyampan ma paik ya isnaiḇa ma mak sya nari sfarsapi ro nanki ma papoik-papoik ro nanki nari namarmer. ³⁰ Rofyor ani nari aḇyair Rumkun Snonkaku fyasnai ro nanki ma kawasa kam ro supswan ine nari skanes ma nari smam Rumkun Snonkaku ryama ro mandif ro nanki kuker papoik ma payamyum ḇyena. ³¹ Ma nari Iwan malaikat-malaikat ḇyesi fa sisasyar ma siwuf sonker berok naba kaku ma nari siryur snonkaku Allah kyimfir kwar sya ro supswan ḇesiper. ³² Mkun farkarkor ro sarḇer ara knam: Rofyor snau-snau ḇyena nakpirew ma nkakyei randak, mkofawi fyor ryas ya fyanam kwar. ³³ Rarirya kako rofyor mkomam roi ḇeḇor nane kam, mkofawi beri, mḇoi fafisu ḇyedi fyanam kaku kwar, ro kedwai ya ḇarpondi. ³⁴ Yakofen faro mko: Kaku ḇeri syos ine, nari ryo ḇaim, roi ḇeḇor nane ndarirya resari. ³⁵ Nanki ma supswan ine nari ndo, ḇape wos Ayedi kada nari ryoḇa. ³⁶ Ḇape ras ma fafisu ani snonkaku oso ipok ifawiḇa beri, ma malaikat-malaikat ro boiyaswa kako roḇa, ma Rumkun ya kako roḇa, derer Mami mankundi." ³⁷ "Snar imnis raris roi ḇeḇesya ro awar Nuh, rarirya kako nari roi ḇeḇesya anna ndarirya kako ro raramuma ro Rumkun Snonkaku ya. ³⁸ Snar imnis raris kawasa ro awar faḇruḇ ya ḇaim, sanan ma sinem, sekawin ma sfakawin si, isof ro ras Nuh syun ro wai ya, ³⁹ ma sifawi royoḇa beri ḇepon ro faḇruḇ ya ryama myun sikam, rarirya kako nari roi ḇerarirya ndama ro fafisu rarama Rumkun Snonkaku ya. ⁴⁰ Rofyor ani snonkaku risuru suisya ro yaf, nari oso ḇyeḇeyun ma sumin ya ḇyeḇebur; ⁴¹ rofyor bin risuru suso fas, sumindi ḇyeḇeyun ma sumindi ḇyeḇebur. ⁴² Inja iḇye mkepen mko, snar mkofawiḇa ras rosai Manseren mkoḇedi ryama ya. ⁴³ Ḇape mkofawi mnuk ine: Ro fafisu tuan ḇena rum ya ifawi ḇepon fafisu rosai ḇekaraw sya srama ro roḇ ya, nari iwaren ma ipok myam monda rum ḇyedi ḇo sfasyari ḇa. ⁴⁴ Rarirya mko kako mkofasos, snar Rumkun Snonkaku ryama ro fafisu mkokaraḇa." ⁴⁵ "Manfamyan mansei ḇeḇesyowi ma ḇefawi nananem, ikada tuan ḇyedi ikanow i fa myamwarek snonkaku ḇyesi ma ḇyuk nanan faro si ro fafisu ya? ⁴⁶ Aski faro manfamyan, rofyor tuan ḇyedi isrow isya ifararur ro fararur ḇyedi ro fafisu tuan ḇyedi ryama. ⁴⁷ Yakofen faro mko: Kaku ḇeri nari tuan ḇyedi ikanow i fa myamwarek roi ḇeḇor ḇyena kam. ⁴⁸ Ḇape rofyor manfamyan ani iḇarḇor ma ikofen ro sneri: ⁴⁹ Tuan ayedi nari ryakaki muma ḇa, inja irandak iprer manfamyan ḇese sya, ma dan dinem kuker ḇemasaser sya, ⁵⁰ rarirya tuan ḇyani nari ryama ro fafisu kyara ḇaḇeri, ma ifawi ḇa, ⁵¹ ma nari myun i ma ifrur faroi imnis snonkaku ḇeḇarḇor. Ro diwa kada nari ismai kankanes ma arkfafais nakor."

¹ "Rofyor ani Ḇaḇesasoser Boiyaswa imnis inkbor samfur, ḇeyun parambrom sena ma sra sisrow manfakawinya. ² Rim ro fandu si sifawi royoḇa mḇoi rim ḇese sya sifawi nananem. ³ Inkbor ḇefawi royoḇa ssun parambrom sena, ḇape ssun mani ḇa, ⁴ mḇoi inkbor ririm ḇefawinananem ansi ssun parambrom sena ma mani kako ro botol sena. ⁵ Ḇape snon manfakawin ani ryama fasauḇa isof enef ya myun si inja senef kam. ⁶ Rofyor romfawru simnaf mkaren ḇeyor: Manfakawin ryama! Mkosrow i! ⁷ Inkbor ansi sikbok kam ma sfasasos parambrom sena. ⁸ Inkbor ḇefawi royoḇa ansi sikofen faro inkbor ḇefawinananem ansi: Mkoḇuk mani mkoḇena ono ḇeinko, snar parambrom nkoḇena fanam nambrer. ⁹ Ḇape inkbor ḇefawinananem ansi sikofen: Roḇa, nari namnis faro nkoḇa ma faro mkoḇa kako. Ipyum syadi mkora faro ḇeḇoḇ mani ma mkokoḇes ro diwa. ¹⁰ Ḇape rofyor sramura fa skoḇes mani ya, manfakawin ani ryama ma ḇefasos kwar ansi siyaker i ma ssun kuker i ro sim munara fakawin ani, posa kedwai ya ḇyeḇesisen. ¹¹ Ḇarpur ya inkbor ḇese ansi srama ma sikofen: Tuano, tuano, bas kedwai ya ma ḇe inko! ¹² Ḇape kyarem: Yakofen faro mko, kaku ḇeri yamam ḇaḇir mkoḇa. ¹³ Rarirya, mkowaren, snar mkofawiḇa ras ma fafisu ya." ¹⁴ "Snar Ḇaḇesasoser Boiyaswa imnis raris snon ḇemarisen ḇesasyar ḇe mnu ḇese, inja dor manfamyan ḇyesi ma ḇyuk nana ḇyena faro si, kuker kakyar insa sifararur kuker na. ¹⁵ Rarirya ḇyuk faro oso talenta ririm, faro oso wer suru ma faro oso wer ḇyuk oser, sisma raris samambraḇ sena, raimnai rya. ¹⁶ Manfamyan ḇena talenta ririm ani rya fasau. Ifararur kuker pipi ansi ma isma syadi talenta ririm wer. ¹⁷ Manfamyan ḇesma talenta risuru ani kako dakfararur rarirya ma isma syadi talenta risuru wer. ¹⁸ Ḇape manfamyan ḇena talenta oser ani kada rya ma ḇyai saprop ya ma derak tuan ḇyedi pipi ḇyani. ¹⁹ Fyoro kwar manfamyan ansi tuan sedi iburma ma ifrur karkor kuker manfamyan ḇyansi. ²⁰ Manfamyan ḇena talenta ririm ani ryama ma dun syadi talenta ririm, ma ikofen ḇo doḇo: Tuan, talenta ririm iso wakyar ḇe aya; mame yasma syadi talenta ririm wer. ²¹ Inja tuan ḇyani ikofen faroi: Fararur bedi ipyum kaku, ne, manfamyan ḇeḇye ma ḇeḇesyowi yedi; fasnai kwar ḇesyowi roi kasun, nari yaḇuk fa mamwarek roi ḇeba. Swun ma wakun aski ro tuan bedi. ²² Raimnai manfamyan ḇesma talenta risuru ani dakrama, ma ikofen: Tuan, talenta risuru suiso wakyarma ḇe aya; mame yasma syadi talenta risuru wer. ²³ Inja tuan ḇyani ikofen faroi: Fararur bedi ipyum kaku, ne, manfamyan ḇeḇye ma ḇeḇesyowi yedi; fasnai kwar ḇesyowi roi kasun, nari yaḇuk fa mamwarek roi ḇeba. Swun ma wakun aski ro tuan bedi. ²⁴ Insape manfamyan ḇena talenta oser ani dakrama ma ikofen, ḇo doḇo: Tuan, yafawi au snonkaku ḇeḇarḇor ḇeyuf ro moḇ kwekef ro ḇa ma ḇesrai ro moḇ rosai kwer ro ḇa. ²⁵ Rarirya yamkak ḇo yara yerak talenta ḇani ro saprop ya dori: Talenta bani isoine! Tuan wuni! ²⁶ Inja tuan ani kyarem: Ne, au, manfamyan ḇeḇarḇor ma ḇemyarenḇa, wafawi, yuf ro moḇ yakekef roḇa ma yasrai ro moḇ rosai yaker ro ḇa? ²⁷ Rarirya ipyum syadi pipi yesi buksi faro snonkaku ḇefarḇaḇyan sya, insa yasiḇer ido yun pipi yesi kuker pampen ḇyesi. ²⁸ Rarirya mkun talenta ani buri ma mkobuki faro ḇesma samfur ani. ²⁹ Snar snonkaku mansei ḇena ya nari ssḇuk faroi wer fa nya nabor syadi wer. Ḇape mansei ḇenaḇa, nari rosai nya na nari neḇeyun bur i. ³⁰ Ma manfamyan ḇeḇefainda ḇa ani mkosawen i ḇe ḇondi, ḇe moḇ ḇepampan syadi. Ro diwa nari ismai kankanes ma arkfafais nakor." ³¹ "Rofyor Rumkun Snonkaku ryama kuker payamyum Ḇyedi ma malaikatsya kam siyaker I, ma nari kyain ro karapasa nasan Ḇyadi. ³² Raimnai er sya kam nari seḇefanjur ro ḇarpon Ḇyedi ma nari kyinfir si oser ḇe oser, raris ḇefarandosya kyinfir domba sya bur kambing sya, ³³ ma nari domba sya ḇyesi fa snara ḇar raku ḇyedi ma kambing sya snara ḇar rasar ḇyedi. ³⁴ Ma nari ikofen faro ḇenara ḇar raku ḇyedi: Mkorama, ne, besma ḇok ro Kma Yedi, mkakna Ḇaḇesasoser ḇefasos kwar faro mko ro fafisu supswan ine ḇyeḇefrur ya. ³⁵ Snar rofyor yabiser mkofan Aya; rofyor yambrow mkoḇe war fa yinem; rofyor yaḇe snon dakam mkoḇe moḇ fa yaḇeryar ro; ³⁶ rofyor yaḇaḇer mkoḇuk ḇe Aya mar fa yafmar; rofyor yaduf, mkofaduru Aya; rofyor yasma ro bui, mkora kaki Aya. ³⁷ Rarirya snonkaku ḇenapes ansi nari skarem faro I, ḇo sikofen: Manseren, fyor rosaiso nkomam wabiser ma nkofan Au, roḇa wambrow ma nkoḇuk war fa winem? ³⁸ Fyor rosaiso nkomam Au ḇe snon dakam, ma nkoḇuk moḇ ryar faro Au, roḇa baḇer ḇo nkoḇuk mar faro Au? ³⁹ Fyor saiso nkomam waduf roḇa wasmai ro bui ma nkora kaki Au? ⁴⁰ Ma Wairek ani nari kyarem faro si: Yakofen faro mko, kaku ḇeri roi ḇeḇor kam mkofrur faro oser ro fandu naek Ayesi ḇeḇenyawa ḇa sine, irya mkofrur kwar maḇe Aya. ⁴¹ Ma nari ikofen kako faro ḇeyores ro ḇar rasar Ḇyedi: Ne, mkobur ḇarpon Ayedi, ne, snonkaku ḇesma fras, mkosun ro for ḇembrer ḇa ḇefasos kwar faro Ibiris kuker malaikat-malaikat ḇyesi. ⁴² Snar fyor Yabiser, mkofan Aya ḇa; fyor Yambrow mkoḇuk war fa Yinemba; ⁴³ fyor yaḇe snon dakam, mkoḇuk moḇ fa Yaḇe ryar ro ḇa; rofyor Yaḇaḇer, mkoḇuk mar faro Aya ḇa; rofyor Yaduf ma Yasmai ro bui, mkora kaki Aya ḇa. ⁴⁴ Ma nari sikaem skarem faro I, ma sikofen: Manseren, fyor saiso nkomam wabiser, roḇa wambrow, roḇa besnon dakam, roḇa baḇer roḇa waduf, roḇa wer wasmai ro bui ḇape nkuf farmyan Au ḇa? ⁴⁵ Ma nari kyarem faro si: Yakofen faro mko, kaku ḇeri roi ḇeḇor rosai mkofrur ḇa faro naek Ayesi ḇeḇenyawa ḇa sine, rarirya kako mkakfrur na faro Aya ḇa. ⁴⁶ Ma snonkaku sine nari ssun ḇe moḇ wayam ḇekain fyoro, ḇape snonkaku ḇenapes sya ssun ro kankenem ḇemnaiḇa ya."

¹ Yesus imnai kwar kuker farkarkor ḇeḇor ḇyena, ikofen faro manfamyan ḇyesi: ² "Mkofawi, ras risuru wer nari semunara Paskah, ma nari Rumkun Snonkaku ḇyeḇeḇoḇ fa spai I ro Aprop." ³ Ma ro fafisu ani mananir imam-imam ma ḇeḇarara er Yahudi siryur ro Imam Ḇeba ḇenir Kayafas rum ḇyedi, ⁴ ma saw aw oso insa sfor Yesus kuker nyan ankar fa smun I. ⁵ Rarirya sikofen: "Roi ḇeḇesya ani ḇyeḇefrur awer ro fafisu munara, imbude mbrus isya ro fandu kawasa sya ri." ⁶ Fafisu Yesus isya ro Betania, ro Simon ḇeḇe pado rum ḇyedi, ⁷ bin oso ryama faro Yesus, dun botol ḇeser mani ḇespum ḇediref pyum kaku ma ḇekakur. Mani ani isbawer i ro Yesus ḇruri, ro fafisu kyain danan. ⁸ Manfamyan ansi smam rarirya sisonek Yesus ḇo sikofen: "Fainda rosai kofnak mani ine? ⁹ Snar mani ine kyakur inja koḇoḇ i kada ma pipi sya koḇuk si faro snonkaku ḇesaḇarar sya." ¹⁰ Ḇape Yesus ifawi swaruser sena inja ikofen: "Snaro mkosonek bin ine? Snar ikada ifrur fararur ḇepyum oso faro Aya. ¹¹ Snar snonkaku ḇesaḇarar sya sisya ḇesya kwar ro fandu mko, ḇape Aya kada nari yakain nus mko ḇesya kwarḇa. ¹² Snar isḇawer mani ani ro ḇaken Ayedi, ifrur fasasos oso faro ḇaḇe kardir Ayedi. ¹³ Yakofen faro mko: Kaku ḇeri ro moḇsai ryawer sḇaryas Ankankinem Ḇeḇye ya ro supswan ḇesiper, rosai ifrur ine nari sakfayai kako fa sikswarepen i." ¹⁴ Raimnai oso ro fandu manfamyan samfur seser risuru ansi, ḇenir Yudas Iskariot, rya faro mananir imam-imam. ¹⁵ Ma ikofen: "Rosai mkomarisen mkoḇuk faro aya, insa yaḇoḇi faro mko?" Sḇak faro i kumpan sarak samfur rikior. ¹⁶ Ma rofyor ani syewar fafisu ḇepyum insa ḇyuk Yesus faro si. ¹⁷ Ro ras ḇepon ro ras munara Mamami Ḇepisen Ḇa Yesus manfamyan ḇyesi srama faro I ma sikofen: "Inja moḇ rosaiso wamarisen insa inkofasos roḇeyan Paskah faro Au?" ¹⁸ Yesus kyarem: "Mkora ḇe mnu faro snon oso ma mkokofen faroi: Guru doḇo: fafisu Yedi fyanam kwar; inja ro rum bedi Yamarisen yafrur munara Paskah kuker manfamyan Ayesi." ¹⁹ Rarirya manfamyan ḇyesi sifararur imnis moḇ sai Yesus ḇyuk faro si ma sfasos Paskah ani. ²⁰ Ma roḇ kwar, Yesus kyain danan fnoḇek manfamyan samfur seser risuru ansi. ²¹ Ma fafisu sanan, Ikofen: "Yakofen faro mko, kaku ḇeri nari oso ro fandu mko nari ḇyoḇ Aya." ²² Ma kuker sne ḇefafardun oser-oser ikofen faro Yesus: "Aya ḇake, o Manseren?" ²³ Kyarem: "Ḇefnoḇek Aya ḇo ḇesowen mamami ro ben ine, iso nari ḇeḇoḇ Aya. ²⁴ Kaku ḇaboi Rumkun Snonkaku nari ibur rarirya imnis sfas kwar fa ḇekur I, ḇape raro faro mansei ḇeḇoḇ Rumkun Snonkaku ya. Ipyum syadi snon ani ḇyeḇeyaḇen awer." ²⁵ Yudas, ḇemarisen ḇeḇoḇ I kyarem, ḇo doḇo: "Aya iryake, o Rabi?" Yesus ikofen faroi: "Raris moḇ wakofen rai." ²⁶ Ma fafisu skain sanan, Yesus dun mamami, ikofen kasumasa posa, pyanasnis i raimnai ḇyukḇaboḇ manfamyan ḇyesi ḇo ikofen: "Mkun ma mkan na, inenido ḇaken Ayedi rya." ²⁷ Raimnai dun sek aninem, ikofen kasumasa posa ḇyuki faro si ma ikofen: "Mkinem kam ro sek aninem ine. ²⁸ Snar inenido rik Ayenai rya, rik ḇeḇeasas sisbawer faro kawasa sibor fa ḇeḇuk payasyos ro sasar. ²⁹ Ḇape Yakofen faro mko: Randak ro knikine nari yapok yinem wer ḇa ro bon anggur knam ine isof ro ras yinem i wer, isoine yinem babo fnoḇek mko ro Mami Ḇaḇesasoser ḇyedi." ³⁰ Sidisen dow sanandik posa kwar, Yesus ma manfamyan ḇyesi sra ḇe urek Zaitun. ³¹ Ma Yesus ikofen farosi: "Roḇ ine kakyar mkoḇena kam nari neḇirḇar snar Aya. Snar fas-fas ya isya: Nari Yamun ḇefarandosya ḇoi domba nai ansi nari sibur ḇesisye. ³² Ḇape rofyor yiḇer Aya kwar, nari yapon mko ḇe Galilea." ³³ Petrus kyarem faro I: "Min ayesine kakyar sena neḇirḇar faro Au rariryano, ḇape aya ma roḇa kaku." ³⁴ Yesus ikofen faroi: "Yakofen faro au, kaku ḇeri roḇ ine, mankoko sya sor ḇaim famyun Aya ḇe kior kwar." ³⁵ Petrus ikofen faro I: "Isof ro yamar fnoḇek Au, yapok yafamyun Au ḇa." Manfamyan ḇese ansi kam sakkofen rarirya kako. ³⁶ Ma Yesus manfamyan ḇyesi sraro moḇ oso ḇenir ḇe Getsemani. Raimnai ikofen faro manfamyan ḇyesi: "Mkokain ro dine, ḇoi Yara fasaw knik ḇediwara fa yanadi." ³⁷ Ma dun Petrus kuker Zebedeus mandaḇen ḇyesu fnoḇek I. Rarirya rofyor ani sneri fyafardun ma ryadadai, ³⁸ inja ikofen faro si: "Sneri fyafardun fafayaḇa, imnis yaḇe yamar kaḇor. Mkokain ro dine ma mkowaren fnoḇek Aya." ³⁹ Raimnai imbran pak ḇur sko, posa ḇyansuba ma ḇyenadi, ma Ikofen: "O Mami, rofyor wamarisen kada, iḇye wun sek aninem ine bur Aya, ḇape raris marisen Ayedi awer, ḇoi raris marisen bedi." ⁴⁰ Raimnai kyaḇer faro manfamyan ḇyesi ma isrow sisya senef. Inja ikofen faro Petrus: "Mkopok mkowaren ḇake kuker Aya ro oras oser? ⁴¹ Mkowaren ma mkoḇenadi, insa mkosapi awer ro fafrowes ya: rur ya kada imyaren user, ḇape kraf ya ma ipok ḇa." ⁴² Raimnai ryaḇe ḇe ḇesuru ya wer ma ḇyenadi, ikofen: "O Mami, rofyor sek aninem ine Wamarisen fa wuni bur Ayaḇa, ḇoi rofyor Wamarisen fa yinem inido, marisen ḇena ndarirya mura!" ⁴³ Ma rofyor kyaḇer wer, isrow skenef, snar enef ya myun sko mankenem. ⁴⁴ Rarirya myam monda sko ro moḇ ani ḇoi kyaḇer wer ma ḇyenadi ḇe rarwan ḇeḇekior ma ḇyenadi, nadi insanja wer. ⁴⁵ Raimnai kyaḇer wer faro manfamyan ḇyansi ma ikofen faro si: "Insape mkenef mura ma mkomnaisu mko. Mkomam fafisu ya ryama kwar, nari Rumkun Snonkaku ḇye ḇeḇoḇ faro snonkaku ḇesasar sya siḇrasna. ⁴⁶ Mkokḇok, mkorama kora. Ḇeḇoḇ Aya ani fyanam kwar." ⁴⁷ Rofyor Yesus isya dawawos kaker, Yudas oso ro manfamyan samfur seser risuru ansi, ryama fnoḇek kawasa dandonek ḇeba ḇeyun sumber ma karbere, rak mananir imam-imam ma ḇeḇarara Yahudi siwan sirya. ⁴⁸ Snonkaku ḇeḇoḇ Yesus ani ikofen ḇair aḇyair ine kwar faro si: "Snonkaku nari yasyum ya ido, Iria, inja mkofor I." ⁴⁹ Ma imbran fasaw fa isrow Yesus ma ikofen, ḇo doḇo: "Aroo Rabi," ma isyum I. ⁵⁰ Ḇape Yesus ikofen faroi: "Ne, bati, rosai rwama kuker ya?" Rarirya kawasa ansi srama siser Yesus ma sfor I. ⁵¹ Ḇape snon oso ro ḇeso Yesus pyas sumber ḇyedi ma pyerem manfamyan imam ḇeba ya knaram ḇyedi fa imuk. ⁵² Inja Yesus ikofen faroi: "Swower sumber ani, snar mansei ḇefnak kuker sumber nari ryo kuker sumber. ⁵³ Roḇaido kwarai, mḇoi yapok ḇake fa yor ro Mami, insa fyarem fasaw sarar malaikat isyadi ro samfur seser risuru fa sifnoḇek Aya? ⁵⁴ Rofyor rarirya ido, rariso nari ḇaḇemnis fas-fas ro Refo, berok ḇo ḇeyoḇo, mnuk ine nari ryarirya?" ⁵⁵ Rofyor ani Yesus ikofen faro kawasa ḇeḇor ansi: "Mkowarki Ayaḇe ḇeḇarḇorke, isof mkorama kuker fasasos sumber ma karbere fa mkofor Aya? Ḇape ras-ras Ayaisya yakain yafarkor ro Allah Rum ḇyedi, ma mkofor Aya ḇa. ⁵⁶ Ḇape nakam nari ndarirya insa fas-fas ro nabi-nabi namnis." Ro fafisu ani manfamyan ansi sifrar sibur I. ⁵⁷ Sfor Yesus kwar, ssun iḇe ḇarpon Imam Ḇeba Kayafas. Ro dia ḇefawinananem Refo Yahudi ma ḇeḇarara-ḇeḇarara sya sisya sfanjur kwar. ⁵⁸ Ma Petrus iyom ro ḇarpur isof ro buḇes Imam Ḇeba ya, ma rofyor syun randum kwar, kyain fandu ḇewaren sya insa dakmam papupes ro wawos anna. ⁵⁹ Mananir Imam-Imam, fnoḇek Kankain Karkara Agama ansi ssewar ḇaḇesaksi sararer faro Yesus, insa isma samamyai marmar, ⁶⁰ ḇape sismai onoḇa, ro saksi sararer ḇeḇor ansi. Ḇape ḇarpurya snon risuru, suyores ma sukofen, ḇo suyoḇo: ⁶¹ "Snon ine ikofen: Nari yakakok Allah Rum ḇyedi raimnai yaḇawes i wer ro ras rikior." ⁶² Raimnai Imam Ḇeba ya iyori ma ikofen faro I, ḇo doḇo: "Rariso kwarem wos oso ḇa faro saksi-saksi ḇeḇuksof Au sine?" ⁶³ Ḇape Yesus ḇyefasis monda. Raimnai Imam Ḇeba ani ikofen faro I, ḇo doḇo: "Kuker snonsnon Allah ḇekenem, wakofen faro nko, Auryake Wairek, Rumkun Allah iso Auke roḇa." ⁶⁴ Yesus kyarem: "Iso wakofen kwar ya. Ḇape yakofen faro Au, randak ro knikine nari mkomam Rumkun Snonkaku ya kyain ro ḇar raku Ḇepok syadi ma ryama ro mandif ro nanki." ⁶⁵ Inja Imam Ḇeba ya pyansawek mar ḇyena ma ikofen, ḇo doḇo: "Donef Allah. Fainda rosai kosewar saksi kaker? Knikine mkomnaf kam anonef ḇyena. ⁶⁶ Rariso karkara mkoḇena?" Skarem ḇo soḇo: "Ikada isma samamyai marmar!" ⁶⁷ Raimnai saninef ro mkasi ma skuki; ḇese sya siprer I, ⁶⁸ ma sikofen: "Indo insas wakofen faro nko, ne Wairek, manseiso ḇeprer Au ya?" ⁶⁹ Ro fafisu ani Petrus kyain ro buḇes ya ro ḇondi. Kniko infyan bin oso ryama faroi, ma ikofen: "Au kako wakso fnoḇek kuker Yesus, snon Galilea ani." ⁷⁰ Ḇape fyamyun ro ḇarpon snonkaku ansi kam, ḇo doḇo: "Yafawiḇa, rosai wakofen ya." ⁷¹ Ro fafisu ryaḇe kedwai ḇeba ya, infyan oso ḇese myami ma ikofen faro snonkaku ḇero dia sya: "Snon ine dakfnoḇek Yesus snon Nazaret ani." ⁷² Ma fyamyun wer ḇo fyores: "Yafawi snon aniḇa beri." ⁷³ Fyoroḇa ro fafisu ani, snonkaku ḇero dia sya sra faro Petrus ma sikofen: "Kaku ḇeri au oso ro fandu si, snar komnaf ro wos ḇedi." ⁷⁴ Inja Petrus ani ifras ma fyores: "Yamam ḇaḇir snon aniḇa." Ma ro fafisu ani mankoko sya sor randak. ⁷⁵ Rarirya Petrus iswarepen rosai Yesus ikofen faroi kwar: "Mankoko sya sor ḇaim, famyun epen Aya ḇe kyor kwar." Rarirya isasyar ḇe ḇondi ma kyanes kuker sne ḇefafardun.

¹ Fafisu isnai kwar, mananir imamsya ma ḇeḇarara-ḇeḇarara er Yahudi siryur ma sna wosi fa smun Yesus. ² Sai wanka ro ḇrasi, raimnai ssuni ma ssḇuki faro Pilatus, gubernur Roma ro mnu ani. ³ Rofyor Yudas, ḇeḇoḇ Yesus ani, myam, Ismai samamyai mar-mar kwar, fyafko. Inja kyaḇer pipi sarak samfur rikior ansi faro mananir imam-imam ma ḇeḇarara sya, ḇo ikofen doḇo: ⁴ "Aya ine yasasar kwar snar yaḇoḇ rik snonkaku ḇesasarḇa ine." Ḇape skarem faroi: "Inko fandunrosai? Kwara ro mankundaw!" ⁵ Rarirya syo pipi sarak ansi ḇe Rum Ḇesren ya dori, raimnai ibur moḇ ani fa rya fyes mankundi. ⁶ Mananir Imam-Imam ssun pipi sarak ansi ma sikofen: "Pipi ansi kopok kosun siḇa ro ḇurua farsarser, snar pipi rik sirya." ⁷ Sawos yae faro si posa ssḇuk pipi ansi skoḇes saprop sapḇe Saprop Ḇefawi ḇefrur uren saprop, fa sifrur ḇe rus faro dakam sya. ⁸ Iso eḇedari isof ras ine sor iḇe Saprop Rik. ⁹ Rarirya Nabi Yermia wos ikofen ya imnis: "Sna pipi sarak samfur rikior, isoine maeja sawos namuk kwar faro snon oser imnis karkara ro fandu er Yahudi, ¹⁰ ma ssḇuk pipi ansi faro ḇaḇyak ḇefawi ḇefrur uren saprop ani, saprop ḇyedi, raris Manseren danun faro aya." ¹¹ Raimnai ssun Yesus ḇeḇarpon gubernur Pilatus. Ma gubernur ani ifuken I: "Au ryake wairek kawasa Yahudi?" Yesus kyarem: "Iso mankundaw wakofen ya." ¹² Ḇape raris safsof mananir imam-imam ma ḇeḇarara-ḇeḇarara sya sḇuksof I, kyarem wos oso ḇaḇeri. ¹³ Inja Pilatus ikofen faro I: "Inja wamnafḇake safsof ḇeḇor saksi-saksi sine sawos faro Au?" ¹⁴ Ḇape kyarem royo ḇaḇeri, isof gubernur ani ikmom kaku. ¹⁵ Biasa ro ras-ras munara ḇeba gubernur fyaspar snonkaku besmai oso imnis kankinfir ro kawasa ḇeḇor ansi. ¹⁶ Ma rofyor ani snon ḇeḇarḇor kaku oso isya ismai ro bui snonsnon ḇyedi Barabas. ¹⁷ Snar sfanjur kwar ro dia, inja Pilatus ikofen faro si: "Mansei mkomarisen yafaspar faro mko, Barabas roba Yesus, sapḇe Kristus?" ¹⁸ Pilatus ifawi kwar, mḇoi ssun Yesus ma ssḇuki faroi snar sayin I. ¹⁹ Ro fafisu Pilatus kyain ro karapesa karkara ḇenapes ya, swari fyarem anun faroi: "Wafrur roi osoḇa beri faro snon ḇenapes ani, snar snon ine ifnaiḇo roḇandi yasma wayam ro mafu." ²⁰ Ḇape snar dafdif mananir imam-imam ma ḇeḇarara sya, kawasa ḇeḇor ansi simarisen kam insa sor fa Barabas ḇyeḇefaspar ma Yesus kada isma samamyai marmar. ²¹ Gubernur kyarem faro si ma ikofen: "Mansei ro fandu snon ansuine mkomarisen yafaspar faro mko?" Sikofen: "Barabas." ²² Pilatus ikofen wer faro si: "Rarirya ido rosaiso nari yafrur kuker Yesus, sapḇe Kristus ani?" Sikam ssibras: "Ikada ḇyeḇepai epen ro aprop!" ²³ Ikofen wer: "Ḇape sasar rosaiso ifrur kwar ya?" Ḇape ssibras naba syadi wer: "Ikada ḇyeḇepai ro aprop!" ²⁴ Fafisu Pilatus myam nyan ḇyena kam nefromo, isyadi wer siḇe sifrur mbrus inja dun war fa ḇyukḇan ḇramin ḇyesi ro ḇarpon kawasa ansi ma ikofen: "Aya, yaḇe sasarḇa faro rik snon ine; Irya mankun mkokarem!" ²⁵ Ma kawasa ansi kam skarem: "Mḇoi rik ḇyena nek inko ma romawa nkoḇesi!" ²⁶ Raimnai fyaspar Barabas faro si, ḇape Yesus kada siprer I raimnai ḇyeifa spai ro aprop. ²⁷ Ḇarpur ya gubernur sordade ḇyesi ssun Yesus ḇe rum karkara ḇenapes, raimnai sor sordade ḇese sya kam fa sfanjur ḇo sores yar Yesus. ²⁸ Sper sansun ḇyena ma ssansun I kuker syatu ḇefuk. ²⁹ Siyanem wower ro kaḇrai borek ma sriri ro Yesus ḇruri, raimnai ssḇuk amboḇer ḇaken oso fa dufepen ro ḇrasi ḇar raku ya. Posa ssḇansuba ro ḇarpon ḇyedi ma skoryae I, ḇo soḇo: "Aroo, ne Wairek kawasa Yahudi!" ³⁰ Saninef I ma ssun amboḇer ani fa ssḇuki dos ro ḇruri. ³¹ Sonef I raposa sper sansun syatu ḇefuk ani buri ma ssansuni wer kuker sansun ḇyena. Raimnai ssuni ḇo sisasyar bur mnu ya, fa spai I ro aprop. ³² Fafisu sisasyar bur mnu ya, sisrow snon Kirene oso snori Simon. Snon ani sedafdifer i fa ḇyar pyan Yesus aprop ḇyedi. ³³ Ma sra ro moḇ ḇenirḇe Golgota, isoine: Moḇ Ḇukor bei. ³⁴ Raimnai ssḇuk anggur ḇefmnai kuker pus fa dinem. Ryepen anggur ansi kwar, imewer dinem sindi. ³⁵ Spai I kwar posa serarwas sansun ḇyena kuker kinsor mansei ḇena nanya. ³⁶ Raimnai skain ma siwaren I ro dia. ³⁷ Ro ḇruri bori ro aprop pum ya sfas ḇair knam rosai ḇefnai fa isma samamyai ya: "Ine Yesus Wairek Yahudi." ³⁸ Spai fnoḇek I snon mamun risuru, oso ro ḇar raku ma oso ro ḇar rasar ḇyedi. ³⁹ Snonkaku ḇeyunuk ro dia sonef I ma skakiker siḇrusna ḇo sikokofen, ḇo soḇo: ⁴⁰ "Ne, Au ḇeyoḇo ḇekakok Allah Rum Ḇesren ḇyedi ma ḇeḇawes i wer ro ras rikior, faspar mankundaw rofyor Allah Rumkun ḇyediso Au, wado bur aprop ya!" ⁴¹ Rarirya kako mananir imam-imam sifnoḇek ḇefawinananem Refo Yahudi ma ḇeḇarara sya skoryae I ma sikofen, ḇo soḇo: ⁴² "Snonkaku ḇese fyaspar si, ḇape mankundi kada ipok fa fyaspar I ḇa! I kada Wairek Israel? Ipyum syadi wado bur aprop iyasi ma nari nkokyar Au. ⁴³ Ryir kakyar ḇyedi faro Allah: ipyum syadi Allah fyaspar I, rofyor Allah imarisen kuker I! Snar ikofen kwar: Aya ine Allah Rumkun ḇyedi." ⁴⁴ Rarirya snon mamun spai fnoḇek I suyakkoryae I kako. ⁴⁵ Randak ro oras samfur seser risuru orkok isof ro oras kior mandira, pampan ya ikawef sup ya fyor ani. ⁴⁶ Indokada oras kior ya Yesus dor kuker mkaren ḇeba: "Eli, Eli, lama sabakhtani?" Isoine: Allah Yedi, Allah Yedi, snaro Wabur Aya? ⁴⁷ Kawasa ḇeyores ro dia simnaf rarirya, sikofen: "Dor Elia." ⁴⁸ Ma snonkaku oso ro si ryama fasaw; dun bunek, fa syowen i ro anggur ḇemnir, raimnai kyuki ro amboḇer oso ḇo isui fa Yesus dinem. ⁴⁹ Ḇape snonkaku ḇese sya sikofen: "Mkoḇuk awer, insa komam pan imbude Elia ryama fa fyaspar Indi." ⁵⁰ Yesus dar naba wer raimnai ryir nyawa ḇyedi. ⁵¹ Ma mkomam, eruk kroben ro Rum Ḇesren ya imsap ra ḇyesuru ro ḇo isof ro sop ma ḇyerim ḇeba, ma urek karu na nakpef, ⁵² ma rus na nḇas, ḇo snonkaku ḇesren ḇemar kwar sya sibor siḇer si. ⁵³ Ḇarpur ro Yesus aḇiḇer ḇyedi, sikam sisasyar ro rus, ma ssun ro mnu ḇesren ya fa sfasnai mankunsi faro kawasa ḇeḇor. ⁵⁴ Mananir sarar ma sordade ḇyesi ḇewaren Yesus ansi simkak fafayaḇa ro fafisu smam rim ma roi ḇeḇesya anna, inja sikofen: "Kaku ḇeri, ine Allah Rumkun ḇyedi." ⁵⁵ Ma ro dia bin ono sibor sores ḇinkwan ḇo smam, isoine bin-bin ḇeso Yesus ker Galilea fa ḇeyuf farmyan I. ⁵⁶ Ro fandu si kosmai Maria Magdalena, ma Maria Yakobus ma Yusuf sna suḇedi, ma Zebedeus mandaḇen ḇyesi sna sedi. ⁵⁷ Mandira kwar snon ḇenana oso snori Yusuf ḇyeknam ro Arimatea, ikako dakḇe manfamyan faro Yesus kwar. ⁵⁸ Rya faro Pilatus ma dor Yesus ḇaken ḇyedi. Pilatus ḇyuk sasoser insa ssḇuki faroi. ⁵⁹ Inja Yusuf dun ḇaken ani, ma pyarek i kuker kruḇen ḇepyoper, ⁶⁰ raimnai ikrir I ro rus ḇebabo ḇyedi, pyaikir ro urk karui, ma ikris kwar karui ḇeba oso ḇe kedwai rus ani, raimnai ibur. ⁶¹ Ma Maria Magdalena kuker Maria ḇese ani sukain ro dia ro ḇarpon rus ani. ⁶² Meserdi, isoine ras fasasos ya isyonde, mananir imam-imam ma snon Farisi sikam srama ro ḇarpon Pilatus, ⁶³ ma sikofen: "Tuan, inko swarepen, snon ḇefarkor ninyan ani fafisu ikenem ya ikofen: Ras rikior nasyof kwar nari Yiḇer Aya. ⁶⁴ Inja buk sasoser insa siwaren rusya isof ras ḇeḇekior ya; imbude manfamyan ḇyesi kofawiḇa ḇo srama skaraw indi, raimnai sikofen faro kawasa sya, ḇo soḇo: Diḇri kwar ro fandu ḇemar sya, isof farkarkor ninyan ḇepur ya ipyum ḇa syadi ro ḇepon ya." ⁶⁵ Pilatus ikofen faro si: "Sine manwadwaren faro mko, mkora ma mkowaren rus ani pyum kaku." ⁶⁶ Rarirya srama kuker fafnoḇek ro manwadwaren ansi sematerai rus ani ma siwareni.

¹ Ras Mananai Yahudi isyonde kwar, ro arwo prim kaku ro ras ḇepon ro usbu ani, Maria Magdalena ma Maria ḇese ani sura sumam kaki rus ani. ² Kniko ḇama rim ḇebayo myun snar Manseren malaikat ḇyesi oso dado ker nanki ryama ḇe karui ani ma ikrisi ma kyain ro bori. ³ Ḇarpon ḇyedi isnaper ma sansun ḇyena napyoper imnis manwaref bur. ⁴ Ma manwadwaren ansi simkak ra sradadai simnis kaku snonkaku ḇepsur. ⁵ Ḇape malaikat ani ikofen faro bin ansu ya, ḇo doḇo: "Mumkak awer; snar yafawi musewar Yesus spai ro aprop ani. ⁶ Isya ro dineḇa, snar diḇri kwar, imnis raris moḇ ikofen kwar raya. Murama, mumam moḇ ḇyarek ro ine. ⁷ Ma mura fasaw fa muḇaryas faro manfamyan ḇyesi mḇoi diḇri kwar ro fandu ḇemar sya. Iswara pyon mko ḇe Galilea; ro diwa nari mkomam I. Kaku ḇeri yaḇaryas faro mko kwar." ⁸ Subur fasau rus ani, kuker makakak fnoḇek raryaḇ ḇeba ma sufrar fasau fa sukofen ḇayir faro manfamyan Yesus. ⁹ Kniko ḇama Yesus isrow su ma ikofen: "Aroo faro mu." Sufanam I ma sufor wemin ḇyesu ya ma suban suba faro I. ¹⁰ Rarirya Yesus ikofen faro su: "Mumkak awer. Mura mukofen faro naek Ayesi, insa sra ḇe Galilea, ma ro diwa nari smam Aya." ¹¹ Fafisu sui sya ro nyan ya faduri, manwadwaren ansi ono sra kwar ḇemnu ya ma sikofen ḇadir roi ḇeḇor ḇeḇesya anna kam faro mananir imam-imam. ¹² Ma sna wosi kuker ḇeḇarara-ḇeḇarara ansi kwar, sawos namuk fa ssḇuk pipi sibor faro sordade ansi ¹³ ḇo sikofen, ḇo soḇo: "Nari mkofen radine, manfamyan ḇyesi srama ro roḇ ya ma skaraw I ro fafisu nkenef ya. ¹⁴ Ma rofyor roi ḇeḇesya ine gubernur dakmnafi, nari nkawos kuker i, fa nkofadiren mko." ¹⁵ Sismai pipi ansi ma sifrur raris moḇ sisma ananun rai. Ma farfyar ine imbran ro fandu kawasa Yahudisya isof ras ine. ¹⁶ Ma manfamyan samfur seser oser ansi sraḇe Galilea, ḇe urek rosai Yesus fyasnai kwar faro si. ¹⁷ Fafisu smam I sḇansuba faro I, ḇape ono seḇirḇar. ¹⁸ Yesus isnefer si ma ikofen: "Papoik nakam ro boiyaswa ma supswan ine ne ḇeḇuk kwar maro Aya. ¹⁹ Inja mkora mura, mkofarkor er sya kam ḇe manfamyan Ayesi ma mkoḇuk masi sren faro si kuker snonsnon Kma ya ma Rumkun ya ma Rur Ḇesren ya, ²⁰ ma mkofarkor si fa sifrur roi ḇeḇor kam raris yaḇeasas kwar faro mko. Ma mkofawi, Aya ine nari yarous mko besya kwar isof awar ḇepupes."