12345678910111213141516171819202122232425262728
12345678910111213141516
123456789101112131415161718192021222324
123456789101112131415161718192021
12345678910111213141516171819202122232425262728
12345678910111213141516
12345678910111213141516
12345678910111213
123456
123456
1234
1234
12345
123
123456
1234
123
1
12345678910111213
12345
12345
123
12345
1
1
1
12345678910111213141516171819202122

LUKAS

1

1 Teofilus ḇesmai syowi, Snonkaku sibor sḇesewar kwar fa sfasasuser ḇaryas oso ro roi ḇeḇor ḇeḇesya kwar ro fanduko. 2 Imnis raris sḇaryas kwar maroko, ro randakya ro snonkaku ḇemam kuker mkamor ma ḇeyuffarmyan Wosya. 3 Eḇedari, yakukeḇ naḇye kaku roi ḇeḇesya anna kam kwar ro randak kakuya, rarirya yun karkara namuk fa yafrurna ḇesyap fa namnis faro au, 4 insa wafawi, roi ḇeḇor sḇukfarkor au na nkaku rarirya. 5 Ro awar Herodes, koranu fiak ro sup Yudea, imam oso isya snori Zakharia ro rarwas imam-imam Abia. Swari kako ḇyeknam ro kpu Harun, snori Elisabet. 6 Imbeswa suine sukenem nasren, ro Allah ḇarpon ḇyedi ma sukenem kuker ḇaḇeuser sasoser nakam raris Manseren moḇ ḇyukraya ma suḇeyuk royoḇa. 7 Ḇape sukada suna romawaḇa, snar Elisabet pyansnasem ma suḇe insar mansar kwar. 8 Rofyor oso, ro fafisu rarwas skofararurya syuḇer Zakharia ifrur fararur ḇaḇeimam ro Manseren ḇarpon ḇyedi. 9 Snar fafisu skinsor, imnis rari sedi, insa kinsorya fyasnai imam ḇefararur ya, iso sfasnai fa ḇesun ro Rum Ḇesrenya ma ḇekun mamboḇo ro dia. 10 Ro fafisu ani kawasa ḇeḇor ansi sfanjur ro ḇuḇes ma senadi. Rofyor anikada fyor kankun mamboḇo. 11 Zakharia myam Manseren malaikat ḇyesi oso dores ro ḇar raku rokef kankun mamboḇo. 12 Myam roi ḇeḇesya ani ikandor ma imkak. 13 Ḇape malaikat ani ikofen faroi: "Ne, Zakharia, wamkak awer, snar nadi ḇena nasmai kankarem kwar ma swambri, Elisabet, nari daḇen romawa snon oso faro au ma nari nwir iḇe Yohanes. 14 Nari wamarisen ma waryaḇ, rarirya kawasa ḇeḇor nari sakmarisen snar ḇaḇeḇeyaḇen ḇyedi. 15 Snar nari iba ro Manseren ḇarpon ḇyedi ma nari dinem anggur roḇa aninem ḇeparek ḇa ma nari ifo kuker Rur Ḇesrenya randak ro snari sneuser ḇyena; 16 nari ikfin kawasa Israel sibor fa skaḇer faro Manseren, Allah sedi, 17 Ma nari imbran ḇepon Manseren kuker Rur ma papoik Elia fa dun kaḇer sinansya sisnesna faro romawa sesi ma snonkaku ḇeḇarḇor sisnesna faro karkara snonkaku ḇenapes ma rarirya fyasos sasrai ḇepyum oso faro Manseren." 18 Raimnai Zakharia ikofen faro malaikat ani: "Rariso nari yafawi, roi ḇeḇor nane moḇ ndamumaraya? Snar yaḇe mansar kwar ma swayedi kako dakḇe insar kwar." 19 Malaikat ani kyarem faroi: "Aya ine Gabriel ḇeyuf farmyan Allah ma Allah iwan aya kwar insa yawawos kuker au ma yun ankankinem ḇeḇye ine faro au. 20 Kaku ḇeri snar wakyar wos ayenaḇa, nari ḇeawer ma wawosḇa isof ro ras rosai, roi ḇeḇor nane kam ndarirya." 21 Rofyor ani kawasa ḇeḇor ansi siwaf Zakharia. Sikam sikmom, snar ḇyeuryar ro Rum Ḇesrenya dori. 22 Ro fafisu isasyar, iwawos kuker siḇa ma sifawi, mboi isya myam mamam oso ro Rum Ḇesren ani. Raimnai ḇyoi ḇramin ḇyedi farosi, snar ḇyeawer. 23 Ro fafisu fararur ḇyedi imnai kwar, ibur ḇerum ḇyedi. 24 Raimnai fyoroḇa swari Elisabet, imoḇesḇa paik ririm ma iyokef ḇinkundi, ḇo ikofen: 25 "Inekada, fararur oso ro Manseren maḇeaya, ma knikine imarisen ipyos mamyai ayena ro ḇarpon snonkaku." 26 Ro paik ḇeḇewonemya, Allah iwan malaikat Gabriel ifa ryaḇe mnu oso ro sup Galilea snoriso Nazaret, 27 faro inkbor oso snoriso Maria; inkbor ani ssḇuki dapsasor snonkbor oso snoriso Yusuf, ro kina Daud; 28 Rofyor malaikat ani syunro Maria rum ḇyedi, ikofen: "Aroo faro au, inkbor ḇesma fakamaman; Manseren ryous au." 29 Maria imnaf wos ani, ikandor ma kyara ro sneri, wos samsom ani knam ḇyedi moḇ ryaya. 30 Malaikat ani ikofenwer faroi: "Ne, Maria, wamkak awer! Snar wasma saswar ma fakamaman ro Allah ḇarpon ḇyedi. 31 Kaku ḇeri, nari wamoḇesḇa, ma nari waḇen rumkun snon oso, ma nwiriḇe Yesus. 32 Nari romawa ani iba ma nari sapiḇe Rumkun Allah ḇekaki syadi. Ma Manseren Allah nari ḇyuk faroi, karapesa nasan Daud, kpu ḇyedi, 33 ma nari ḇye wairek faro Yakub kpu ḇyesi, isof fyoro-fyoro, ma nasan ḇyedi ipok imnaiḇa." 34 Maria ikofen faro malaikat ani, "Roi wakofen ine nari ryamuma rariso, snar ayaine yafakawin ḇaim?" 35 Malaikat ani kyarem: "Rur ḇesrenya nari isabu faro au, ma papoik Allah ḇekaki syadi nari kyadiren au, inja Rumkun waḇen ani sapiḇe Rumkun Allah ḇesren. 36 Ma kaku ḇeri Elisabet, napirman bani soḇo ḇepasnanasem ani ma ḇeḇeinsar kwar, ikako imoḇesḇa kuker romawa snon oso, ḇye paikri wonem kwar. 37 Snar Allah isma papoik ro roiḇeḇor nakam." 38 Maria ikofen: "Kaku ḇeri, ayaine Manseren infamyan ḇyedi; roi wakofen anna ndarirya mura." Raimnai malaikat ani ipromes buri. 39 Fafisu ono nasyonde kwar, Maria imbranḇeri ḇebon, ipdefḇe mnu oso ro sup Yehuda. 40 Fyor ryakwar ro mnu ani, syun ro Zakharia rum ḇyedi, ma ikofen aroo faro Elisabet. 41 Ma rofyor Elisabet imnaf Maria aroo ḇyena, romawa dores ani dapoper ro sneyuser ḇyena, ma Elisabet ifo kuker Rur Ḇesren. 42 Rarirya ibras naba: "Au ḇesmai ḇokro fandu binsyakam, ma sneuser bedi ismai ḇok kako. 43 Manseiso ayaine, isof Manseren yedi snari ryakaki aya? 44 Snar kaku ḇeri, rofyor yamnaf aroo bena, romawa ḇekain ro sneuser yedi iryaḇ ma dapoper. 45 Ma aski faroi, snar rosai sikofen faroi ro Manseren snonsnon ḇyedi, ikyar nari ndarirya." 46 Raimnai Maria ikofen: "Ruryedi isandik Allah, 47 ma sneri iryaḇ snar Allah, knam korer ayedi, 48 snar myamepen kwar, ranrun snero manfamyan ḇyedi. Kaku ḇeri, randakro knikine er-er syakam nari sap ayaḇe bin ḇeḇe aski, 49 Snar Allah Ḇepoik syadi, ifrur kwar fararur ḇebasyadi faro aya, ma snonsnon ḇyediso besren. 50 Ma ḇaḇe naḇye ḇyedi kyonro syosḇe syos, faro snonkaku ḇemkak ḇeyararyofi. 51 Fyasnai papoik kuker ḇraurḇyena, ma dun ḇesisye snonkaku sneḇeḇemararessya; 52 Pyandun snonkaku ḇepoksyafa sisaburo karapesa nasan sena, ma ikanow snonkaku ḇerun snesya; 53 Ḇyuk faro snonkaku ḇebisersya, roi ḇeborkam, kuker farsbawer, ma iwan snonkaku ḇenanasyafa sibur beidi. 54 Ifnoḇek Israel, manfamyan ḇyedi, snar iswarepen ḇaḇenaḇye ḇyena, 55 imnis ḇyeasas kwar faro up koḇesi, faro Abraham ma syos-syos ḇepur ḇyesi isof fyoro-fyoro." 56 Ma Maria ryows Elisabet indokada paik rikior, raimnai ibur wer ḇerum ḇyedi. 57 Ḇarpurya Elisabet rasḇyena namnis inja daḇen romawa snon oso. 58 Rofyor snonkaku ḇero mnu ḇyedi ma naek srar ḇyesi simnaf, Manseren fyasnai ḇaḇenaḇye ḇyedi ḇeḇa kaku faroi, sikam simarisen kuker i. 59 Ma ras ḇeḇewarya srama fa sifrur sofakfuk faro romawa ani ma simarisen sniriḇe Zakharia imnis kmari snonsnon ḇyedi, 60 ḇape snari ikofen: "Roḇa, mkonir iḇe Yohanes." 61 Sikofen faroi: "Oso ro fandu naek besi daknir rarirya ḇa." 62 Raimnai spankai kmari fa sifuken snonsnon rosai imarisen ḇyuk faro romawa ḇyedi. 63 Dor karu fas oso, raimnai fyas: "Snonsnon ḇyedi isoine Yohanes." Ma sikam sikandor. 64 Ma ro fafisu ani beri sḇari ḇyas ma ramar ḇyedi pyer wer, ma iwawos ḇo isandik Allah. 65 Rarirya snonkaku ḇekain yar-yar i sya simkak kam, ma roi ḇeḇesya anna kam nefarfyar pampyam ro bran Yudea ḇesiper. 66 Ma snonkakusya kam, ḇemnaf nasya skara na ma sikofen: "Nari rosai ḇeḇesya kuker romawa ine?" Snar Manseren ryous i. 67 Ma Zakharia, romawa ani kmari, Rur ḇesrenya kyanosni ma ḇyardi ḇo doḇo: 68 "Sanandik faro Manseren, Allah Israel, snar ryakaki er ḇyesi, ma dun fasaspar farosi. 69 Ḇyuk aḇyair papoik oso kwar, ḇeḇuk koreri maḇeko, ro manfamyan ḇyedi Daud, kpu ḇyesi; 70 -- raris moḇ ikofenkwar ro awar madero, kuker sḇayoi nabi-nabi ḇesren ḇyesi -- 71 insa fyaspar kobur mbroḇ koḇesi ma roḇramin snonkakukam ḇeyayin konsya, 72 fa fyasnai ḇaḇe naḇye ḇyena faro Up koḇesi ma swarapepen faro asas ḇesren ḇyena, 73 isoine soar ikofen kwar faro Abraham, kpu ḇepon koḇedi mboi ḇyuk fakamaman maḇeko, 74 insa kosma fasasparbur mbroḇ koḇesi ma kuker kakyar, koḇenadi faroi kuker makakakḇa, 75 kuker saranden ma napnapes ro ḇarpon ḇyedi ro kankenem koḇena ḇesiper. 76 Ma au, romawayedi, nari sap auḇe nabi Allah, Ḇekaki Syadi; snar auso nari ḇepon Manserenfa ḇefasos nyan faroi, 77 insa ḇyuk fawawi faro kawasa ḇyesi mboi nari sismai korer ḇekakuya, rofyor Allah ipyos nyaki sasar sena kwar, 78 snar ḇaḇenaḇye ma saswar ro Allah koḇedi, ma kuker nyan rosai ḇyuki ryakakiko, imnis ori ḇeyekro arwo, 79 fa isnai kawasa ḇekainro pampan, ma kadaun marmarsya, fa ikfin kowesna faro nyan ḇeḇeaski." 80 Ma romawa ani isur ma iba ma rur ḇyedi syambraḇ. Ma ikenem ro sup ḇeursḇa isof ro ras fyasnai mankundi faro er Israel.

2

1 Rofyor ani Kaisar Agustus ḇyuk sasoser oso, ḇewan fa sfasepen snonkakusya kam ro supswan ine. 2 Ine fas-fas sifrur randak kaku ro fafisu Kirenius ḇye gubernur ro mnu Siria. 3 Rarirya kawasa ansi kam sraḇe mnu marin sena oser-oser fa sfasepen si. 4 Rarirya kako Yusuf isasyar ro mnu Nazaret ro sup Galilea ḇesup Yudea, mnu Daud ḇenirḇe Betlehem, -- snar ḇyeknam ro keret ma up Daud -- 5 insa ḇyeḇefasepen kuker Maria, bin sḇukapsasori ma ḇemoḇesḇa ro fafisu ani. 6 Ro fafisu sura kwar ro diwa Maria ras ḇyena namnis fa kyain, 7 ma daḇen romawa snon oso, roma rak ḇyedi, posa ḇyeḇepankun kuker kruḇen kinak ma ḇyeifa ḇyarek ro sayer dombasya sananroya, snar skosma moḇo ḇa ro rum seryar roya. 8 Ro supya fyor ani manfarandows ono sisya skain siwaren rofanfan sesi ro maper ro roḇ ani. 9 Knikoḇama Manseren malaikat ḇyesi oso fyanamsi ma Manseren sasnai ḇyedi isnaiyar si isof simkak kaku. 10 Raimnai malaikat ani ikofen farosi: "Mkomkak awer, snar kaku ḇeri yaḇaryas faro mko marisen ḇeba faro ersyakam: 11 Ras ine Knam koreri ḇyeḇeaḇen kwar faro mko, isoine Kristus, Manseren, ro mnu Daud. 12 Ma aḇyairya isoine faro mko: Nari mkosrow wombrek oso ḇyeḇepankun kuker kruḇen kinak ma ḇyarek ro sayer rofanfansya sanan roya." 13 Ma knikoḇama smam fnoḇek malaikat ani, malaikat kankramo ro Boiyas sisandik Allahḇo soḇo: 14 "Sanandik faro Allah ro Boiyaswa, ro moḇ ḇekaki syadi! Ma askiro supswan, faro snonkaku ḇefrur sneprei Allahsya." 15 Malaikat ansi sibur kwar ma skaḇerḇe boiyas, ḇefarandows ansi sikofen yae farosi: "Mkorama koraḇe Betlehemfa komam rosai ḇeḇesya kwar ro diwa, imnis raris rosai Manseren ikofen maroko." 16 Rarirya srafasau kaku, ma sisrow Maria ma Yusuf ma wombrek ani ḇyarekro moḇ rofamfansya sanan roya. 17 Ma rofafisu smami, ma sikofen ḇadir rosai simnafkwarfa ḇekur wombrek ani. 18 Ma snonkaku ḇemnaf ansikam sikandor snar roiḇeḇor manfarandows ansi sikofen farosi anna. 19 Ḇape Maria ikram wos annaro sneri ma kyara asuserna. 20 Rarirya manfarandows ansi sibur kaḇer, ma sisandik Allah snar roi ḇeborkam simnaf ma smam anna, nakam namnis raris rosai sikofen kwar farosi. 21 Ma rofafisu wombrek ani ḇye rasri war kwar, sifrur sofakuk ḇyedi, ma sniriḇe Yesus, imnis snonsnon malaikatya ikofen kwar, rofyor snari fyadoresi ḇaim. 22 Ma fafisu fasasrenya imnis kwar, raris sasoser Refo Yahudi Moses ḇyena, suniḇe Yerusalemfa ssḇuki faro Manseren, 23 raris fas-fas ro Manseren sasoser ḇyena: "Romawa rakḇeḇe snonsyakam, nari sfasrensi faro Allah," 24 ma ssḇuk farsarser kako, imnis wos Manseren ikofenro asas ḇyedi, isoine waimon mandu oser roḇaido manjawa manduoser. 25 Ro mnu Yerusalem, snon oso isya snori Simeon. I snonkaku ḇekyar faro Allah ma ḇenapes, ma ḇewaf Ḇeḇuk sneprei faro Israelsya. 26 Rur Ḇesrenya isyaroi, ma isma fasasnaikwar ro Rur Ḇesrenya, mboi nari imarḇa rao isof dakmam Wairek, isoine i ḇesma ramrem kwar ro Manseren. 27 Rur Ḇesrenya ḇyedifer i fa ryaḇe Allah Rum ḇyedi. Ro fafisu Yesus, Romawa ani, sinan ḇyesuya susun kuker i fa sifrur asuser faroi ro roi sikofen kwar ro sasoser Refo Yahudi, 28 dun Romawa ani ma fyoraḇen i ḇo isandik Allah, ḇo doḇo: 29 "Knikine, Manseren, iḇye manfamyan bedi imar mura kuker aski imnis raris wos bedi, 30 snar yamam kwar koreri ḇeramuma ro Au, 31 koreri fasos kwar faro ersya kam, 32 isoine isnai ḇesnaiser faro er ḇese ma payamyum faro er besi, Israel." 33 Ma snari kuker kmari sukandor kaku snar roi ḇeḇor kam ikofen fa ḇekur i. 34 Raimnai Simeon ḇyeḇok sko ma ikofen faro Maria, Romawa ani snari: "Kaku ḇeri Romawa ine ḇyebefasnai fa nari pyampum roḇa ḇyawes kawasa sibor ro Israel ma ḇyeaḇyair ḇefnai rakrakrok -- 35 ma nari fafardunya imnis sumber esar ḇekukkir snembri, --insa fyasnai ḇair kawasa ḇeḇor karkara sena." 36 Ro moḇ ani Hana isya kako, nabi bin oso Fanuel ḇindaḇendi ro keret Asyer. Ḇyeinsar kwar. Fyakawin kwar ma ikenem kuker swari ḇewampasi wambarek rifik, 37 ma ro fafisuya ḇyekabom ma ikenem wampasi wambarek samfur riwar seser rifiak. Ma syun ḇesya kwar ro Allah Rum ḇyedi, roḇ meser ikyar faro Allah ma ḇyenadi ḇo fyarfor. 38 Ma rofyor ani kako ryama ro dia ma ikofen kasumasa faro Allah ma dawawos ro Romawa ani faro snonkaku ḇeḇor ḇewaf ḇaḇefaspar faro Yerusalem. 39 Rarirya seasuser roi ḇeḇor kam ḇekur Manseren sasoser ḇyena posa kwar sisiḇerḇe mnu sedi, isoine Nazaret ro Galilea. 40 Romawa ani isur fasaw ma syambraḇ, ifo kuker fawawi nananem ma saswar fakamaman Allah naisya roi. 41 Ro wampasi wambarek nakam Yesus sinan ḇyesu suraḇe Yerusalem ro ras munara Paskah. 42 Fafisu Yesus ḇyewampasi wambarek samfur seser risuru skoraḇe Yerusalem imnis raris rari sedi ro ras munara ani. 43 Posa kwar ro ras-ras munara ani, fafisu sibur, Yesus kada kyain ro Yerusalem ḇoi sinan ḇyesuya sufawiḇa. 44 Snar sukara ḇo suyoḇo iso maran ḇepon na, inja skombran ras ḇesiper oser, insape susewar i ro fandu naek ma min suḇesi. 45 Snar susma iḇa, inja sukaḇerḇe Yerusalem fa susewar pdef i. 46 Ro ras ḇeḇekiorya insape susrow i ro Allah Rum ḇyedi; isya kyain fandu guru-guru agama Yahudi ḇeḇuk farkarkorsya fa dakrower si ma ḇyuk fakfuken faro si. 47 Ma snonkaku ḇeḇor ḇemnaf i sya kam sikandor kaku snar fawawi ḇyena ma kankarem ḇyukna kam. 48 Ma rofyor sinan ḇyesuya sumam i, sukandor raimnai snari ikofen faroi, ḇo doḇo: "Romawa yedi, snaro wafrur rarirya faro nu? Aya ma kmami nusewar Aw kuker sne ḇekarsosen." 49 Kyarem faro su: "Snaro musewar Aya? Mufawiḇake, ayaisya ro Mami Rum ḇyedi dori?" 50 Ḇape sufawiḇa rosaiso ikofen faro su. 51 Raimnai ibur fnoḇek su ḇe Nazaret; ma iso user fadaduru suḇena. Snari kada ikram roi ḇeḇor anna kam ro sne ḇyedi. 52 Ma Yesus imakma iba fasaw ma ifawi nanemkaku, inja Allah ma snonkaku sya siswar I.

3

1 Ro wampasi wambarek samfur seser ri rim ro Kaisar Tiberius ḇaḇesasoser ḇyedi, fafisu Pontius Pilatus ḇye gubernur ro sup Yudea, ma Herodes ḇyekoranu fiak ro sup Galilea, ma naek ḇyedi Filipus, ḇyekoranu fiak ro sup Iturea ma Trakhonitis, ma Lisanias ḇyekoranu fiak ro sup Abilene, 2 ro fafisu Hanas ma Kayafas suḇe Imam Ḇeba, Allah ikofen faro Yohanes, Zakharia mandaḇendi ro sup ḇeursba. 3 Inja Yohanes ryama ro supya mnuk Yordan ḇesiper ma ḇyaryas, ḇo doḇo: "Mkombror ma mkor masi sren ma nari Allah ipyos nyaki sasar mkoḇena kam, 4 Imnis fas-fas ro syap nabi Yesaya ḇardi ḇyena: Mkaren snonkaku oso isya ḇekaru ro sup ḇeḇeursḇa: Mkofasos nyan faro Manseren, mkofrur nyan ḇeaḇyoḇer faro i. 5 Dwas nakam nari neḇekupoi rarirya bon ma urkna nari neḇekar pyom, ḇekaparawer na neḇesye aḇyoḇer, ḇeḇe row-row na neḇekar pyom, 6 ma kawasa kam nari smam koreri ḇeramuma ro Manseren." 7 Raimnai ikofen faro kawasa ḇeḇor ḇerama faroi fa ḇesma masi sren, ḇo doḇo: "Ne, ikak beknampu kpu ḇyena mko! Mansei ḇekofen faro mko fa mko frarbur masasor nari ḇeramuma ya? 8 Inja mko ḇuk bon-bon ḇemnis kuker marandor. Ma mkopok mkokara ḇaḇeri ro mkosnemna: Abraham kma nkoḇe dirya! Snar yakofen faro mko: Allah ipok kaku fa ifrur karui nane fa neromawa faro Abraham! 9 Mkanya fyasos kwar ro aya fuarya ma ai knam ḇemarem bon ḇepyun ba, nari ḇyeḇeroḇen ma ḇyeḇekun ro for." 10 Snonkaku ḇeḇor ansi sifuken faroi: "Rofyor rariryanido, rosaiso nari nkofrurya?" 11 Kyarem farosi: "Mansei ḇena sansun risuru, irwas faro ḇeyaknaḇaya, ma mansei ḇena roḇean, dakfur rarirya kako." 12 Ḇeyor som ono kako, srama sorfa saksma masi sren ma sifuken faroi: "Guruyo, rosai nari nkofrurya?" 13 Yohanes kyarem: "Mkor syadi awer ro rosai sḇe asaskwar faro mko." 14 Ma sordade-sordadesya sifuken kako faroi: "Ma nkonido rosai nari nkakfrurya?" Yohanes kyarem farosi: "Mkofasyar ma mkoḇewayam awer snonkaku, mboi mkokenem mnis monda kuker ḇaḇyak mkoḇena." 15 Ḇape snar kawasa ḇeḇor ansi sifawi kuker kakyar, ma skara ḇo soḇo imbude Yohanes irya Wairek siwaf anike, 16 ḇape Yohanes kyarem faro kawasa ḇeḇor ansi kam: "Ayakada yaḇuk masasisren faro mko kuker war monda, ḇape ḇepoik syadiro aya, nari ryama, ma yasyusḇafa yaper kaḇrai ḇefes roi ḇesowerḇyesi. Ikada nari ḇyuk masi sren faro mko, kuker Rur Ḇesren ma for. 17 Badeiḇerasya isyakwar ro ḇramin ḇyesuyafa ḇyuk ifrur sren sayar aḇrui ḇyesi ma iryur aḇrui ḇyesiro kron ḇyedi, ma pissya kada seḇekunro for ḇembrerḇa." 18 Kuker wos anun ḇese, Yohanes ḇyaryas Ankankinem Ḇeḇyeya faro kawasa ḇeḇor ansi. 19 Ḇape snar isonek Herodes ḇeḇe koranu fiak ro sup Galilea, snar fyakawin kuker Naek ḇyedi Herodias, ma snar ḇarḇor ḇese ifrur kakona, 20 koranu fiak ani ifrur syadi wer ro ḇarḇor ḇyena, kuker nyan ḇyuk samamyai faro Yohanes ro bui. 21 Ro fafisu kawasa ḇeḇor ansi sisma masi sren kwar ma ro fafisu Yesus kako isma masi sren ma Ḇyenadi, rofyor ani nanki ḇyas 22 ma Rur Ḇesrenya dado imnis manjawa faro i. Ma mkaren oso ryok ro nanki: "Aukada Romawa Yaswar kaku, Yaḇeḇare faro Au." 23 Fafisu Yesus irandak ifararurya indokada ḇyewampasi wambarek samfur rikior ma kawasa skarai ikada romawa ro Yusuf, ma kpuḇyesi siso sine: Eli, 24 Matat, Lewi, Malkhi, Yanai, Yusuf, 25 Matitya, Amos, Nahum, Hesli, Nagai, 26 Maat, Matitya, Simei, Yosekh, Yoda, 27 Yohanan, Resa, Zerubabel, Sealtiel, Neri, 28 Malkhi, Adi, Kosam, Elmadam, Er, 29 Yesua, Eliezer, Yorim, Matat, Lewi, 30 Simeon, Yehuda, Yusuf, Yonam, Elyakim, 31 Melea, Mina, Matata, Natan, Daud, 32 Isai, Obed, Boas, Salmon, Nahason, 33 Aminadap, Admin, Arni, Hesron, Peres, Yahuda, 34 Yakub, Isak, Abraham, Terah, Nahor, 35 Serug, Rehu, Peleg, Eber, Salmon, 36 Kenan, Arpaksad, Sem, Nuh, Lamekh, 37 Metusalah, Henokh, Yeret, Mahalaleel, Kenan, 38 Enos, Zet, Adam, Allah.

4

1 Yesus, ḇefo kuker Rur Ḇesren, kyaḇer ro war Yordan, raimnai Rur Ḇesrenya duniḇe sup ḇeḇeursḇa. 2 Kyain ro dia ras samfur rifiak ma Ibirisya ifrowes i. Fyor kyain ro dia dan royoḇa ma posa ro ras samfur rifiak ibiser. 3 Inja Ibiris ikofen faroi: "Kaku au Rumkun Allah, ido wawan fa karui nane nemamami." 4 Yesus kyarem faroi: "Fas-fas isya: Snonkaku sikenem kuker mamamiya dererḇa." 5 Ḇarpurya Ibiris dun Yesus ḇemoḇ ḇekaki oso ma kniko monda fyasnai faro i ḇaḇesasoser-ḇaḇesasoser kam ro supswan ine. 6 Ibiris ikofen faro i: "Papoik ḇeḇor nakam kuker payamyum ḇyena nari yaḇuk na faro Au, snar nakam neḇeḇuk kwar maro aya ma yakḇuk na faro manseirya wer yamarisen sya. 7 Inja rofyor bansuba ḇeaya, nakam nari nwana." 8 Ḇape Yesus ikofen faroi: "Fas-fas isya ryok: Aukada bansuba faro Manseren, Allah bedi, ma Demir monda iso wanadi faroi!" 9 Ḇarpurya wer dun Yesusbe Yerusalem ma ryir i ro Allah Rum ḇyedi bunemya, ma ikofen faro i: "Kaku au Rumkun Allah ido, wasawen mankundaw, 10 snar fas-fas isya: Ḇekur au, ikada nari ḇyuk sasoser faro malaikat-malaikat ḇyesi fa skansin 11 ma siser Au insa wemsi kyarkar awer ro karui." 12 Yesus kyarem ma ikofen: "Wos isya: Wafrowes Manseren, Allah bedi awer!" 13 Ibiris fafrowes ḇyena posa kwar isusu bur i ma iwaf fafisu ḇepyum faroi. 14 Kuker papoik Rurya Yesus kyaḇerḇe Galilea. Ma ḇyesno ro sup ani ḇesiper. 15 Ro fafisu ani ḇyuk farkarkor ro rum nadi ro dia ma snonkakusya kam sisandik i. 16 Ryama ro Nazaret moḇ sfaduru ma ibaroya, ma imnis rari ḇyedi ro ras Mananai Yahudi syun ḇerum nadi, raimnai iyori fa ḇyewasya Refo. 17 Ssḇuk faroi syap nabi Yesaya ma rofyor ḇyasi kwar, isma mnuk, ro moḇ sfas ḇo soḇo: 18 "Rur Manseren isya ryows aya, snar ikada ryem aya kwar, insa yaḇaryas Ankankinem Ḇeḇye faro snonkaku ḇesaḇarar; ma iwan aya kwar 19 fa yaḇaryas ḇaḇemkei faro snonkaku ḇeḇemanfyansya, ma mamam faro ḇeprafsya, ma ḇaḇemkei faro snonkaku sewayamsya insa yaḇaryas wampasi wambarek Manseren ḇaḇenaḇye ḇyena ḇerama kwar." 20 Raimnai isisen syap ani, ḇyuk kaḇeri faro ḇefararur, raimnai kyain; ma snonkaku sya kam ro rum nadi ani smamjoḇ i. 21 Raimnai irandak ḇyuk farkarkor faro si, ḇo ikofen: "Ro ras ine mnuk mkomnaf ine imnis." 22 Ma snonkaku ansi kam ssḇuk kaku roi ma sikandor snar wos ḇepyum dawosna, inja sikofen: "Inenido Yusuf romawa ḇyaniryake?" 23 Inja ikofen faro si: "Mboi nari mkokofen wos sarḇer ine maro aya: Ne, snon ḇena mon, buk pararei faro mankundaw. Wafrur kako ro dine, ro mankundaw mnu bedi, roi ḇeḇor nkomnaf wafrur kwar ro Kapernaum!" 24 Ma ikofen wer: "Yakofen faro mko, kaku ḇeri nabi oso sesyowi i ro mnu ḇyedi ḇa. 25 Ma yakofen faro mko, ma wos Ayenane nkaku: Ro fafisu Elia kosmai bin kabom sibor ro Israel rofyor nanki isisen ḇewampasi wambarek rikior ma paik ri wonem ma rofyor andoḇa ḇeba myun sup ani ḇesiper. 26 Ḇape Elia ḇyeḇewan faro oso ro siḇa, mboi faro kabom oso ro Sarfat, ro sup Sidon. 27 Ma ro awar Nabi Elisa ḇeduf pado sibor ro Israel ma oso ro si isma fasasren ḇaḇeri, mboi Naaman derer ro sup Siria." 28 Simnaf kam rarirya kawasa kam ḇero rum nadi ani simsorbos kaku. 29 Siyorsi, raimnai sfori ḇo suni ḇemnuya ḇondiri ḇebon moḇ mnuya kyain roya, insa sisawen i ro fofen ani. 30 Ḇape Yesus imbran uk ro fadu sedi ma ibur si. 31 Posa kwar Yesus ryaḇe Kapernaum, mnu oso ro Galilea, fa ḇyuk farkarkor ro dia ro ras-ras Mananai Yahudi. 32 Simnaf farkarkor ḇyena sikandor kaku, snar wos ḇyena nafo kuker papoik. 33 Ro rum nadi ani snon rur ḇemaḇaksyower oso ma snon ani dar naba: 34 "Ne, au Yesus snon Nazaret, rosai wafrur kuker inko? Rwama insa mun inko? Yafawi manseiso aw: au Saranden ro Allah." 35 Ḇape Yesus ḇyewefi, ḇo ikofen: "Befasis, wasasyarburi!" Ma rur ḇemaḇak ani ipyasbos snon ani ro fandu kawasa ḇeḇor ansi, raimnai isasyarbur snon ani ma ifrur dafdufi ḇaḇeri. 36 Ma snonkakusya kam sikandor, ma sikofen yae faro si, ḇo soḇo: "Rosaisoine? Snar ifo kuker baba ma papoikya ma ḇyuk sasoser faro rur-rur ḇemaḇaksya fa sisasyar." 37 Ma snonsnon ḇyedi ḇyesno ḇemoḇ nakam ro supya fyor ani. 38 Posa isasyarbur rum nadi ani ma ryaḇe Simon rum ḇyedi. Ro fafisu ani Simon imbanyori isam fafayaḇa ma sor faro Yesus insa ifnoḇek i. 39 Rarirya dores fanam bin ani, raimnai iyaw sam-sam ani, ma dafduf ani iburi. Bin ani ikḇok ḇeri ma duffarmyan si. 40 Ro fafisu ori isyun, kawasa ansi sun ḇeduf sesi faro Yesus, ḇeduf dafduf ḇeḇor kam. Ma isawardofen si ma ḇyuk pararei faro si. 41 Ro snonkaku sibor kako rur ḇemaḇaksya sisasyarbur si ma sfararar, ḇo soḇo: "Rumkun Allah risaw." Raimnai idwarek pakrek si ma imewerbos kaku sawawosri, snar sifawi ikada Wairek dirya. 42 Fafisu isnai kwar, Yesus imbran fa ryaḇe moḇ ḇeḇeusḇa oso. Ḇape kawasa ḇeḇor ansi ssewar I, ma sisrow I ma soḇo skarwarek i insa ibur awer si. 43 Ḇape ikofen faro si: "Ro mnu-mnu ḇese kako yamarisen yaḇaryas Ankankinem Ḇeḇye ro Ḇaḇesasoser Allah snar i ḇeḇedari yaḇeḇewan muma." 44 Ma ḇyaryas Ankankinem Ḇeḇyeya ro rum nadina ro sup Yudea.

5

1 Ro fafisu oso Yesus dores ro danosen andir Genesaret, ma kawasa sibor spanjuḇer i fa simnaf Allah wos ḇyena. 2 Myam wai risuru ro danosen andir ani. Mandaswan sya sido kwar fa sḇan pam sena. 3 Dek ro wai oso isoine Simon wai ḇyedi, ma iwan fa sri wai ani ḇeḇanda knik ḇyinkwan bur danosen andirya. Raimnai kyain ro waya ma ḇyuk farkarkor faro kawasa ḇeḇor ansi. 4 Ḇyuk farkarkor posa kwar, ikofen faro Simon: "Mkoḇores ḇemoḇ ḇedok ma mkonap pam mkoḇena fa mkoḇukmun in." 5 Simon kyarem, doḇo: "Guru, roḇ ḇesiper nkoraswan kwar ḇape nkosmai inoḇa ḇeri, ḇape snar wawanja, nari yanap pamya mura." 6 Ma fyor skonap pamya posa, skomun in nai ḇebayo isof pam skoḇena namuk. 7 Inja skorar min skoḇesi ro wai ḇese ani insa srama sakfnoḇek sko. Ma srama sakfnoḇekḇo inkoser in ro wai ansuya rao fanam sumsar. 8 Ro fafisu Simon myam roi ḇeḇesya ani kyainwepur ma ḇyansuba ro Yesus ḇarpon ḇyedi, ḇo ikofen: "Manseren, wasusubur aya, snar ayaine snonkaku ḇesasar." 9 Snar i ma snonkaku ḇefnoḇek sya sikandor snar in ḇeḇor skofor ansi; 10 rarirya kako Yakobus ma Yohanes Zebedeus mandaḇen ḇyansui ḇefnoḇek Simon. Yesus ikofen faro Simon: "Wamkak awer, randak ro knikine nari bemandaswan snonkaku." 11 Ma skosu wai skoḇena kwar, sskobur roi ḇeborna kam fa skoso Yesus. 12 Ro fafisu oso Yesus isya ro mnu oso. Ro dia snon oso iduf dafduf pado. Ro fafisu myam Yesus, kyainwepur ḇo syom, ḇo doḇo: "Tuan, wamarisen kada nari fasren aya." 13 Inja Yesus isawar ma pyan ro snon ani, ma ikofen: "Yamarisen insa wasren." Ro fafisu aniḇeri dafduf pado ani iburi beri. 14 Yesus idwarek snon ani insa ḇyaryas awer pararei ḇyani faro manseiryawer ma ikofen: "Rwa, fasnai mankundaw faro imam ma buk farsarser ro pararei bedi, farsarser ḇeraris Moses syoser kwar ḇefasasnai faro si." 15 Ḇape Yesus ḇyeḇeḇaryas ma ḇyesno ḇinkwan ma kawasa sibor semarani ma srayoḇ i, insa simnaf farkarkor ḇyena ma sisma pararei ro dafduf sena. 16 Ḇape Yesus isusu ḇemoḇ ḇeḇeusḇa fa ḇyenadi. 17 Ro ras oso fafisu Yesus ḇyuk farkarkor, snon Farisi ma ḇefawinananem Refo Yahudi ono skain sakrower i. Srama ker mnu-mnu nakam ro Galilea ma Yudea ma ro Yerusalem. Manseren papoik ḇyedi ifnoḇek i, isof ḇyuk pararei faro ḇeduf si. 18 Kniko snonkaku ono sḇar snon ḇepapipen oso kuker waryar ḇyedi; ma sḇesewar fa ssun kuker i insa srir i ro ḇarpon Yesus. 19 Snar sisma nyan osoḇa fa sun kuker i snar kawasa sya sibor mankenem ro dia, inja skek kuker i ḇerumya bori, ma skoḇas osna, ma skokyu snon ani kuker waryar ḇyedi rofandu kawasa ansi imnis bos ro Yesus ḇarpon ḇyedi. 20 Ro fafisu Yesus myam kakyar sena, ikofen: "Ne, naeko, sasar bena neḇeampun kwar." 21 Ḇape ḇefawinananem Refo Yahudi ma snon Farisi skara ḇo soḇo: "Snonkaku mansei ḇeyonef Allah ine? Mansei nari ḇebuk ampun ro sasar imbude Allah derer?" 22 Ḇape Yesus ifawi swaruser sena, inja ikofen faro si: "Rosai mkokara ro mkosnemna? 23 Rosai ḇepyan syadiya, yakofen: Sasar bena neḇeampun kwar, roḇaido yakofen: Wakḇok, ma wambran? 24 Ḇape insa mkofawi, ro supswan ine Rumkun Snonkaku isma papoik fa ḇyuk ampun ro sasarna" -- raimnai ikofen faro snon ḇepapipen ani --: "Yakofen faro au, wakḇok, wakanow waryar bedi ma waburḇe rum bedi!" 25 Ma ro fafisu ani beri ikḇok, ro ḇarpon sedi, raimnai ikanow waryar ḇyedi ma iburḇe rum byedi ḇo sisandik Allah. 26 Snonkaku ḇeḇor ansi sikandor, ma sisandik Allah, ma simkak kaku, ma sikofen: "Ras ine nkomam kwar roi ḇefrur kanandor ḇeba." 27 Ḇarpurya, ro fafisu Yesus isasyar, myam snon ḇeyor som oso, snori Lewi, isya kyain ro rum ḇeyor som. Yesus ikofen faroi: "Waso Aya!" 28 Rarirya Lewi iyori beri fa ibur roi ḇeḇor nakam, ma iso Yesus. 29 Ma Lewi ifrur munara ḇeba faro Yesus ro rum ḇyedi ma ḇeyor som sibor ma snonkaku ḇese sakanan fnoḇek i. 30 Snon Farisi ma ḇefawinananem Refo Yahudi surem Yesus manfamyan ḇyesi, ḇo soḇo: "Snaro mkanan fnoḇek snonkaku ḇeyor som ma kawasa sasar?" 31 Rarirya Yesus kyarem faro si ma ikofen: "Snonkaku ḇeprei sya sefandun ḇena monsya ḇa, mboi ḇedof sya kada; 32 Yaramuma insa yor snonkaku ḇenapes sya ḇa, mboi snonkaku ḇesasar, insa simbror." 33 Snon Farisi ansi sikofen faro Yesus wer, ḇo soḇo: "Manfamyan Yohanes ḇyesi nabor sfarfor ma sḇenadi, rarirya kako manfamyan Farisi sya sesi, ḇape manfamyan besi kada sanan ma sinem." 34 Yesus kyarem faro si: "Inja snon manfakawin ya ḇati ḇyesi nari kowansi fa sfarfor, rofyor manfakawin ani isya kaker fnoḇek si? 35 Mboi fafisuya nari ryama, rofyor manfakawinya ḇyeḇeyun bur si, ro fafisu ani kada insape sakḇe farfor." 36 Ikofen kako wos peper oso faro si: "Snonkaku osoḇa nari pyansawek kruḇen ker ro sansun ḇebabo fa ḇyuki syokop sansun wai oso. Rofyor rarirya ido, sansun ḇebabo ani nari imuk, rosai wer kuker kruḇen ḇesokop sun ro sansun ḇebabo ani nari imnisḇa kuker sansun ḇekwar ani. 37 Rarirya kako snonkaku osoḇa fa nari iser swan ḇebabo ro kibonḇeḇerere, snar rofyor rarirya ido, swan ḇeḇabo ansi nari sisaipef kibon ḇeḇerere ani ma swan sya sisbawer ma kibon ani kako imbriwer. 38 Inja swan ḇebabo sya ipyum syadi seḇeser ro kibon ḇebabo kako. 39 Ma snonkaku osoḇa ḇeyinem sawawek swan ḇekwar kwar nari imarisen ḇa fa dinem swan ḇebabo, snar nari ikofen: Swan ḇekwarya kada ipyumkaku."

6

1 Ro ras Mananai Yahudi oso, fafisu Yesus imbran ro yaf fasibu oso, manfamyan ḇyesi sinek fasibu yorem ono siswir diwer si kuker siḇrasna ma san si. 2 Ḇape snon Farisi ono sikofen: "Snaro mkofrur roi kopok kofrurḇa ro ras Mananai Yahudi?" 3 Rarirya Yesus kyarem faro si: "Mkowasya ḇake ro rosai Daud ifrur, ro fafisu i ma ḇesoisya sibiser, 4 eḇedari syun ro Rum Allah ma dun mamami farsarser, fa dan ma ḇyuk kako faro ḇesoisya, mamami rosai snonkaku ḇese sipok sakanḇa derer monda imam-imamsya?" 5 Yesus ikofen wer faro si: "Rumkun Snonkaku irya Manseren faro ras Mananai Yahudi." 6 Ro ras Mananai Yahudi ḇese wer, Yesus syunḇe Rum nadi, fa ḇyuk farkarkor. Ro dia snon ḇramin ḇar raku ḇemar oso isya. 7 Ḇefawinananem Refo Yahudi ma snon Farisi sḇair Yesus, fa smampan imbude Yesus ḇyuk pararei faro snon ani ro ras Mananai Yahudi, insa sisma knam fa ssḇuk sasar faroi. 8 Ḇape ifawi swaruser sena, inja ikofen faro snon ḇramin ḇar ḇemar ani: "Wayor au ma wores ro faduine!" Inja snon ani iyori fa dores. 9 Raimnai Yesus ikofen faro si: "Yafuken faro mko: Rosaiso sefakofrur ro ras Mananai Yahudi, kofrur roi ḇeḇyeke roḇaido kofrur ḇarḇor, kofnoḇek nyawa snonkaku roḇaido komun si?" 10 Raimnai myam yar-yar sikam, ma ikofen faro snon ḇeduf ani: "Fos ḇramin bedi!" Snon ani ifrur rarirya ma ḇramin ḇyedi iprei beri. 11 Inja masasor sena nasber, inja sawos yae faro si, rosaiso nari sifrur faro Yesus. 12 Ro fafisu ani Yesus ryaḇe urek fa ḇyenadi ma ro roḇ ḇesiper ani ḇyenadi faro Allah. 13 Fafisu meser kwar, ma dor manfamyan ḇyesi fa srama faroi ma kyinfir ro fandu si snon samfur seser risuru, siso dapḇe manwawan: 14 Snonsnon sena naiso nane, Simon nyiriḇe Petrus, ma Andreas Simon ḇedar ḇyedi, Yakobus ma Yohanes, Filipus ma Bartolomeus, 15 Matius ma Tomas, Yakobus Alfeus mandaḇendi, ma Simon sapḇe snon Zelot, 16 Yudas Yakobus mandaḇendi, ma Yudas Iskariot iso ḇarpurya ḇeḇoḇ Yesus. 17 Raimnai isabu kuker si ma simnai ro moḇ ḇepyom oso: ro dia manfamyan ḇyesi sibor kaku siryur ma snonkaku ḇese kako ḇerama ker Yudea ḇesiper ma ro Yerusalem ma ḇerama ker supya mnuk swanandir Tirus ma Sidon. 18 Srama insa simnaf farkarkor ḇyena ma insa ḇyuk pararei ro dafduf sena; ma kako rur ḇemaḇak siswoḇer sya. 19 Ma kawasa ḇeḇor ansi kam sesewar fa span roi, snar papoik ḇesasyar roi ma kawasa ansi kam ḇyuk pararei faro si. 20 Raimnai Yesus myam faro manfamyan ḇyesi ma ikofen: "Askifaro, ne, ḇesaḇararmkoya, snar mkokada nari mko na Ḇaḇesasoser Allah, 21 Aski faro, ne, knikine ḇeḇisermkoya, snar mkokada nari mkosyopen. Aski faro, ne, ḇekanes mkoya, snar mkokada nari mkombrif. 22 Aski faro, mko rofyor snonkaku sya sayin mko ma simewer mko, skoryae mko ma rofyor spampum snonsnon mkoḇena imnis roi ḇeḇarḇor oso, snar Rumkun Snonkaku. 23 Mkoryaḇ ma mko marisen ro fafisu ani, snar kaku ḇeri, ḇaḇyak mkoḇedi iba ro boiyas; snar kpu sesi sifrur rarirya kako faro nabi sya. 24 Ḇape nari mkoroë, ne, ḇenana mkoya, snar ro nana mkoḇena mkosma kwar sneprei mkoḇena. 25 Nari mkoroë, snonkaku ḇeyarbor ro knikine mkoya, snar nari mkobiser. Nari mkoroë, snonkaku knike ḇembrif mkoya, snar nari mkoḇe kandera ma mko kanes. 26 Nari mkoroë, rofyor snonkaku sya sisandik mko; snar kpu mkoḇesi sifrur rarirya kako kwar faro nabi sararer sya." 27 "Ḇape faro mko, ḇemnaf aya, Yakofen: Mkoswar mbroḇ mkoḇesi, mkofrur pyum faro snonkaku ḇeyain mko sya; 28 mkor ḇok faro snonkaku befras mko; mkonadi warek snonkaku ḇeyonef mko. 29 Mansei ḇeḇaser fofer besya oso, buk fofer besi ḇarya wer, ma mansei ḇeyun syatu bedi, buk sansun baken bedi fa dun iwer kako. 30 Buk faro snonkaku mansei ḇeor faro au; ma wor siḇer awer faro snonkaku ḇeyun roi nwana. 31 Ma raris wamarisen insa snonkaku sifrur faro au, wakfrur rarirya kako faro si. 32 Ma rofyor mkoswar snonkaku ḇeswar mko, rosai fainda faro au? Snar snonkaku ḇesasar sya kako sakswar faro snonkaku ḇeswar si sya. 33 Snar rofyor mkofrur pyum faro snonkaku ḇefrur pyum faro mko sya, rosai fainda faro mko? Snonkaku ḇesasar sya kako sakfrur rarirya. 34 Ma rofyor mkor resari roi oso faro snonkaku oso, snar mkokyar nari mkosma kaḇer roi oso roi, fainda rosai faro au? Snonkaku ḇesasar sya kako sakḇuk resari faro snonkaku ḇesasar sya, insa sisma munsu nabor namnis. 35 Ḇape mko kada, mkoswar mbroḇ mkoḇesi ma mkofrur pyum faro si ma mkoḇuk resari ma mkokyar awer nari mkosma munsu, rarirya ḇaḇyak mkoḇedi nari iba ma nari mkoḇeromawa Allah Ḇekaki Syadi, snar ikada ipyum faro snonkaku ḇekofen kasumasa ḇa ma snonkaku ḇeḇarḇor sya. 36 Iḇyekada mkoḇesnemura, imnis raris Kma mkoḇedi kako ḇyesnemura." 37 "Mkoḇe mankara awer, rarirya mko kako nari sakḇemankara mkoḇa. Ma mkoḇuk samamyai awer, rarirya mko kako nari sakḇuk samamyai faro mkoḇa; mkoḇuk ampun rarirya mko kako nari sḇeampun mko. 38 Mkoḇuk kada nari smunsu faro mko: warnkyara ḇeḇye oso, skukira ifyos, ma sisas i isof isbawer ma ḇesbawer anna nari sisbawer na ro farandan bedi. Snar warnkyara mkoḇuki kyaraya, nari ssḇuki kyara mko kako." 39 Yesus ikofen wos peper oso wer faro si: "Rariso snon ḇepraf oso ikfin snon ḇepraf ḇeseya? Mkofawiḇake nari sukam susapi ro der? 40 Romawa farkor oso nari isyadi ro guru ḇyediḇa, ḇape rofyor fyarkor posa kwar ro farkarkor ḇyena nari imnis guru ḇyedi. 41 Snaro mam faro papoi ḇero naek bedi mkamor ḇyesuya, ḇoi ai fyor ḇeba ḇeḇeayuḇ ro mkamor besuya wafawiḇake? 42 Rariso nari wakofen faro naek bedi: Naeko iḇye yapyos papoi ḇero mkamor besuya, mboi ai baken ḇeba ḇeḇeayuḇ ro mkamor besuya kada mam i ḇake? Ne, snonkaku ḇeankarkar, wasasyar ḇepon ai baken ḇeba ḇeḇeayuḇ ro mkamor besuya resari insape mam pyum fa wapyos papoi-papoi anna ro naek bedi mkamor ḇyesu ya." 43 "Snar ai knam ḇeḇye oso nari imarem bon ḇeḇyeḇayo ḇa, ma rarirya kako ai knam ḇeḇyeḇa oso nari imarem bon ḇepyumo ḇa. 44 Snar ai knam oser-oser ḇyeḇemambir ro bon ḇyena. Snar korokem ara bonḇa ro aikus borek ma anggur bon ro kaḇrai borekḇa. 45 Snonkaku ḇeḇye ifrur roi ḇeḇye ro sne karambram ḇeḇye ḇyedi ma snonkaku ḇeḇarḇor ifrur roi ḇeḇarḇor ro sne karamḇram ḇeḇarḇor ḇyedi. Snar roi ikofen na nakḇairo sne ḇyedi." 46 "Snaro mkor aya: Manseren, Manseren, mboi mkofrur roi yakofen naḇa? 47 Mansesi ḇerama faro aya ma ḇemnaf wos ayena ḇo ḇefruruser na -- nari yafasnai faro i kuker mansei yaḇuki imnisya, -- 48 imnis raris snon oso ḇeḇawes rum: Snon ani ḇyai woni ḇekaki ma ryir araref ḇyedi ro karuna bo. Ro fafisu faḇruḇ ma dafya myun rum ani, rum ani imararerḇa, snar rum ani sifrur i fa idworen. 49 Ḇape mansei ḇemnaf wos ayena, mboi ḇefrur userna ḇa, imnis raris snon oso ḇefrur rumro saprop ḇeḇeararef ḇa. Rofyor dafya myun i, rum ani fasaw kaku kyarḇaken ma imkokbos beri."

7

1 Rofyor Yesus dawawosra posa kwar ro ḇarpon snonkaku ḇeḇor ansi, ryasyun ro Kapernaum. 2 Rodia, snon mambri Roma oso ro Kapernaum manfyan ḇyesi oso iduf marḇak ma fanam imar kwar isof iswari kaku. 3 Rofyor mambri ani imnaf Yesus, iwan ḇebarara Yahudi onofa sor Yesus, insa ryama ḇyuk pararei faro manfyan ḇyani. 4 Rofyor sisrow Yesus kwar, sor famfnoḇek ro Yesus ma sikofen: "Wafnoḇek snon ine, 5 snar ikada iswar er koḇesi ma iso ḇeḇawes rum ari nkoḇedi." 6 Inja Yesus isosi ma srakam. Fafisu sfanam mambri ani rum ḇyedi, iwan bati ḇyesi onofa sikofen faro Yesus: "Tuan, bekandera awer snar aya ine yasyusḇa fa swun ro rum ayedi; 7 knam ine eḇedarfa mankundaya yaramufa ḇe auḇa. Ḇape wakofen monda wos oser, nari manfyan ayani iprei. 8 Snar ayaine ḇardi yaro baḇ, ma robaḇ ayedi kako sordade sisya. Rofyor yakofen faro sordade oso: Rwa, ma nari rya, ma faro oso wer: Rwama ma nari ryama, oroḇa ido faro manfyan ayedi: Wafrur roi ine ma nari ifruri." 9 Rofyor Yesus imnaf wos ani, ikandori, ma iknenef faro snonkaku ḇeḇor ḇesoisya, ma ikofen: "Yakofen faro mko, rofandu kawasa Israel syakam, yasma kakyar ḇebayo rya dine ḇaim!" 10 Ma rofyor snonkaku iwan ansi skaḇer ḇe rum, sisma manfyan ani iprei kwar. 11 Ḇarpurya Yesus ryaḇe mnu oso ḇenirḇe Nain. Manfamyan ḇyesi sifnoḇek i, ma snonkaku ḇeḇor ono semarani bo saksoi. 12 Rofyor fyanam kedwai ḇeba ro mnu ani, sḇar snonkaku ḇemar oso ḇo sisasyar ro mnuya, romawa snon, kabom oso romawa ḇyedi ma kawasa sibor ro mnu ani sakfnoḇek kabom ani. 13 Ma rofyor Manseren Yesus myam kabom ani, saswarya dek ro sne ḇyedi, ma ikofen faroi: "Kwanes awer!" 14 Raimnai fyanam waryar ani ma pyan roi, inja ḇeḇar waryar ansi sores, ma Yesus ikofen: "Ne, snonkbor yakofen faro aw, wiḇer aw!" 15 Ma snonkbor ani ikḇok ma kyain ma irandak dawawos, ma Yesus ḇyuki faro snari. 16 Snonkaku ansikam simkak ma sisandik Allah, ma sikofen: "Nabi ḇeba oso syaye rofandu koḇedi," ma "Allah ryakaki kawasa ḇyesi." 17 Rarirya Yesus ḇyeabar yar sup Yudea ḇesiper ma supya mnuk ani kam. 18 Rofyor Yohanes imnaf roi ḇeḇor anna kam ro manfamyan ḇyesi, 19 inja dor rofandusi snon risuru fa sufuken Manseren: "Inja aw nari ḇeramayake, roḇa nari nkowaf snonkakuyo ḇeseke?" 20 Rofyor manfamyan ansuya sura faro Yesus kwar, sukofen: "Yohanes Ḇemasi iwan numa nufuken au: Inja aw nari ḇeramayake, roḇa nari nkowaf snonkakuyo ḇeseke?" 21 Rofyor ani Yesus ḇyuk pararei faro snonkaku sibor ro dafduf ma kandera sena kam ma iyaw rurḇemaḇak, ma ḇyuk mamam faro ḇepraf sya. 22 Ma Yesus kyarem faro su: "Mura ma mukofen faro Yohanes rosai mumam ma mumnaf: Snonkaku ḇepraf smam, snonkaku ḇepapipen simbran, snon ḇeduf pado seḇefasren, snon ḇepro simnaf, snon ḇemar sḇeḇeḇawes, ma snon ḇesaḇarar sisma Ankankinem Ḇeḇye. 23 Ma aski faro snonkaku ḇefafayaf ma ḇepampum ayaḇa." 24 Yohanes wawan ḇyansuya sura kwar, Yesus irandak dawawos faro kawasa ḇeḇor ansi ro Yohanes: "Rosai ḇeḇewar mkora ḇe sup ḇeursḇa? Mkomam doker wamya iso ḇo ḇewai mura muma? 25 Roḇaido fandun rosai mkoraya? Mkomam snonkaku ḇesansun sansun ḇepyumke? Snonkaku ḇesansun sansun ḇepyum ma ḇekenem manminsya, moḇ sena naisya ro rum wairek. 26 Inja fandun rosai mkoraya? Mkomam nabike? Kuker kaku, yakofen faro mko, mboi isyadi ro nabi. 27 Snar sfas ḇadiri kwar: Mam, yawan wawan ayedi fa pyon au, nari fyasos nyan bedi ro ḇarpon bedi. 28 Yakofen faro mko: Rofandu snonkaku saḇensya, oso iba syadi Yohanes ḇa, mboi ḇebaḇa ro Ḇaḇesasoser Allah iso ḇeba syadi roi." 29 Kawasa ḇeḇor ḇemnaf wos ḇyena, ma ḇeyor som, ssḇuk kaku ro ḇaḇenapnapes Allah, snar Yohanes ḇyuk masi sren farosi kwar. 30 Ḇape snon Farisi ma ḇefawinananem Refo Yahudi spampum Allah kakara ḇyena faro si, snar simewer Yohanes ḇyuk masi sren faro si. 31 Yesus ikofen: "Kuker rosai nari yaḇuk karai syos ine ma kuker rosai yaḇuk imnis si? 32 Snar simnis romawa ḇekain ro buḇes ma ḇeyor yae: Nkowuf sonker faro mko, ḇape mkomas ḇa, nkodisen dow-ḇarop, ḇape mkokanes ḇa. 33 Snar Yohanes Ḇemasi ryama ma dan mamami ḇa ma dinem anggur ḇa, ma mkokofen: Rur ḇemaḇak isawoḇi. 34 Ḇarpurya Rumkun Snonkaku ryama, danan ma dinem, mkokofen ḇo mkoḇo: Mkomam, ima snon oso ḇenambri ma ḇefarandinem, bati ro ḇeyor som ma snonkaku ḇesasar. 35 Ḇape fawawi Allah ya snonkaku ḇesouser ssḇuk kaku roi." 36 Snon Farisi oso dor Yesus fa ryama dakanan ro rum ḇyedi. Yesus ryama ro rum Farisi ani, ma kyain danan. 37 Ro mnu ani bin oso isya sifawi kami ḇe bin ḇesasar. Rofyor bin ani imnaf Yesus isya danan ro rum Farisi ani, ryama ma dun parana sabarom ḇeser mani spum. 38 Rofyor dores ro Yesus dokor ḇyedi fanam wemin ḇyesuya ma kyanes, ma ḇyan Yesus wemin ḇyesuya kuker mkaru ḇyena ma ipyos na kuker snonburyam ḇyena, raimnai isyum Yesus wemin ḇyesuya ma ryemi kuker mani spum ani. 39 Rofyor snon Farisi ḇepos Yesus ani myam roi ḇeḇesya ani, ikofen ro sne ḇyedi: "Nabi riso ine kada nari ifawi, mansei ma bin sai ḇepan roi; nari ifawi bin ine bin ḇesasar rirya." 40 Inja Yesus ikofen faroi: "Simon, yamarisen yakofen roi oso faro aw." Simon kyarem: "Guru, wakofen mura." 41 "Snon risuru suḇenyaki pipi ro snon ḇeḇuk pipi oso. Snon ḇeponya ḇyenyaki dinar utin ririm, suminya samfur ririm. 42 Snar supok suḇak naḇa, inja ipyos nyaki suḇan na. Mansei rofandu su, nari ḇeswar syadi i?" 43 Simon kyarem: "Yakara snon sipyos nyaki ḇeḇor ḇyenanya." Yesus ikofen faroi: "Kaku ro kakara bedi." 44 Ma isiḇer faro bin ani ḇo ikofen faro Simon: "Mam bin ine? Yasun ro rum bedi, ḇesyaḇo buk waro ḇyan wemin ayesuya ḇa, ḇape imasi wemin ayesu kuker mkaru ma ipyos wemin ayesuya kuker snonburyam ḇyena. 45 Wasyum ayaḇa, ḇape rofyor yasun isyum wemin ayesuya ḇesya kwar. 46 Rwem bukor ayedi kuker maniḇa, ḇape ikada ryem wemin ayesuya kuker mani spum. 47 Inja yakofen faro au: Sasar ḇeḇor ḇyena neḇepyos kwar, snar ifrur kwar saswar nabor kaku. Ḇape snonkaku ḇesma payasyos kermkun, ifrur saswar kermkun monda kako." 48 Raimnai ikofen faro bin ani: "Sasar bena neḇepyos kwar." 49 Ma ḇekain ḇeyananus Yesus ansya, skara ro sisnesna: "Manseiso ine, isof ipyos sasar na?" 50 Ḇape Yesus ikofen faro bin ani: "Kayar bedi ḇyuk koreri faro au kwar, wabur kuker aski!"

8

1 Posa kwar fyoroba Yesus imbran yar ro mnu ḇe mnu ma ḇyaryas Ankankinem Ḇeḇya ro Ḇaḇesasoser Allah. Ma manfamyan samfur seser risuru sifnoḇek i, 2 ma bin ono kako ḇyuk pararei ro rur ḇeḇarḇor ma dafduf ḇeḇor, isoine Maria sap ḇe Magdalena, ḇesma ḇaḇemkei kwar ro rur ḇeḇarḇor rifik, 3 Yohana Khuza swari ḇefararur ro rum Herodes, Susana ma bin ḇeḇor ḇese. Bin-bin sine suf farmyan maran ani kuker nana sena. 4 Fafisu kawasa ḇeḇor semarani ḇo srama, isoine kawasa ro mnu ḇe mnu ḇerama ḇeḇeoser kuker Yesus, ikofen sarḇer oso: 5 "Snon ḇekekef mor oso isasyar fa kyekef rokaker ḇyena. Rofyor kyekef, rokaker anna ono nasapi ro nyan andir, inja snonkaku saref apepen na mansya ro farsyos san na rao isof naḇro. 6 Ono nasapi ro saprop ḇeḇe karui, nasur kwar ḇape nmas snar nasma warḇa. 7 Ono wer nasapi ro manuk borek, ma manuk borek anna nasur fnoḇek nparek na isof nmas. 8 Ma ono nasapi ro saprop ḇeḇye, ma nasur kwar namarem ḇe rarwan utin oser." Iwawos rarirya kwar Yesus ikofen: "Mansei ḇena knaram fa ḇerower, iḇye kada ryower!" 9 Manfamyan ḇyesi sifuken faroi, sarḇer ani ikofen rosai. 10 Inja kyarem: "Faro mko kada mkosma fakamaman fa mkofawi kankunes ro Ḇaḇesasoser Allah, ḇape faro snonkaku ḇese roi ḇeḇesya ani ḇyeḇeḇuk kuker sarḇer, insa smam ḇoi seknaḇa ma srower ḇoi sifawi naḇa. 11 Kankunes sarḇer ani isoine: Rokaker anna irya Allah wos ḇyena. 12 Ḇesapi ro nyan andir anna isoine snonkaku ḇemnaf wos anna kwar; ḇarpurya Ibirisya ryama ma dun wos anna bur sisnesna, insa sikyar awer ma sisma koreriḇa. 13 Ḇesapi ro saprop ḇeḇe karui isoine snonkaku, ḇemnaf wos anna, sisma na kuker raryaḇ, ḇape wos anna nerares ḇa, sikyar knik monda ma rofafisu faraurowes sisusubur kakyar sena. 14 Ḇesapi ro manuk borek isoine snonkaku ḇemnaf wos anna, ma nasur pdef ḇape ḇaḇeḇirḇar ma ḇaḇekayan ma kankenem ḇaḇe marares, nepen na isof nbuk bon ḇembrai ḇa. 15 Ḇesapi ro saprop ḇeḇye isoine snonkaku, ḇemnaf wos anna kwar, ḇekram na ro sne kuker ḇaḇye ma nasasyar bon ro ḇaḇefarmkuya." 16 "Snonkakuyo pyam padamara posa ikawefi kuker fyomba roḇa ryiri ro kamboyo baḇdi, imboi ryiri ro adadu, insa snonkaku kam ḇesun ro rumya smam sanana ḇyedi. 17 Snar roi oso nari iyokef ḇa nari sfasna na, ma sḇekankunes roi osoḇa nari sifawina ma sfababa na. 18 Inja, mkokara nyan manafnaf mkoḇena. Snar mansei ḇesma, faroi nari ssḇuk, ḇape mansei ḇesmaḇa, nari sunburi rosai kyara nasya faroi." 19 Yesus snari ma naek ḇyesi srama faroi, ḇape sisrowi ḇa snar kawasasya sibor. 20 Snonkaku sikofen ḇadir faroi: "Snami ma naek bansi sisya ro ḇandi ma simarisen sisrow au." 21 Ḇape kyarem faro si: "Awini ma naek ayesya siso, ḇemnaf Allah wos ḇyena ma ḇefrur na." 22 Ro ras oso Yesus dek ro wai fnoḇek manfamyan ḇyesi, ma ikofen farosi: "Mkorama kokaḇorḇe danosenya ḇariwara." Rarirya skokaḇor. 23 Ma rofyor skayun kaker, Yesus ḇyarek ma denef. Kniko ḇama wamdoḇer iso ro danosen ani, isof ḇakna nekro wai ma fyanam imsar. 24 Inja manfamyan ḇyesi srama sḇani ma sikofen ḇo soḇo: "Guru, Guru, koroë!" Inja ikḇok, raimnai ifyow wam ma ḇak anna. Rofyor aniḇeri wam ma ḇak namnai ma danosen ani iḇrin. 25 Raimnai ikofen farosi: "Kakyar mkoḇena naisya ro?" Rarirya simkak ma sikandor, ma sikofen yae farosi: "Manseso snonkaku ine, isof ḇyuk sasoser faro wam ma sorenya ma nasouseri?" 26 Raimnai Yesus ma manfamyan ḇyesi sko fyafer ro sup kawasa Gerasa ḇekar ḇe sup Galilea ḇariwara. 27 Rofyor Yesus dado rande kwar, snon oso ro mnu ani ryama isrow Yesus; snon ani rur ḇemaḇaksya sisawoḇi ma fyoro kwar syansuni ḇa ma ikenem ro rum ba, mboi ikenem ro rusna monda. 28 Rofyor myam Yesus, fyararar ma kyain wepur ḇyansuba ro ḇarpon ḇyedi ma ikofen kuker mkaren ḇeba: "Rosai wafrur kuker aya, ne, Yesus Rumkun Allah Ḇekaki Syadi? Yor ro au, insa wafrur kandera awer aya." 29 Ikofen rarirya snar Yesus ḇyuk sasoser fa rur ḇemaḇak ansi sisasyar bur snon ani. Snar fyor ono ido rur ḇemaḇak ansi sisasmeri, isof sewanka i ma seapyaur i, ḇape imerakuk roi ḇeḇor sikfesi na rur ansi suni ḇe moḇ-moḇ ḇeḇeusḇa. 30 Ma Yesus ikofen faroi: "Snonsnon beja iso?" Kyarem ḇo doḇo: "Legion," (snonkaku syaran) snar rur ḇemaḇak sya sibor sisawoḇi. 31 Raimnai rur ḇemaḇak ansi sor faro Yesus, insa ḇyuk sasoser awer fa ssun ro der marmari. 32 Ro dia randip nai ḇeḇor ono ssewar sanan ro urek bam, ma rur ḇemaḇak ansi sor faro Yesus, insa imarisen fa ssun ro randip ansi. Inja Yesus ḇyuk raris fararyor sedi. 33 Rarirya rur ḇemaḇak ansi sisasyar bur snon ani ma ssun ro randip ansi. Randip nai ansi soper ro fofen andirya ma ssun ro danosen ma simar kam. 34 Ḇewaren randip ansi smam roi ḇeḇesya anna kwar, sifrar ḇe mnuya ma sfar faro mnu-mnu nakam roi ḇeḇesya ani ro dia. 35 Ma kawasa-kawasa sya sisasyar fa smam rosai ḇeḇesya ani. Rofyor srama faro Yesus ma sisrow snon rur ḇemaḇak sya sibur ani kyain fanam Yesus wemin ḇyesuya; ma syansuni kwar ma iknon dam. Ma kawasa ansi simkak. 36 Snonkaku ḇemam kwar roi ḇeḇesya ani mankunsi sikofen ḇadir farosi, rariso snonkaku rur ḇemaḇaksya sisawoḇ ani isma faspar kwar. 37 Raimnai kawasa ḇekain ro sup Gerasa sor faro Yesus, insa ibursi, snar simkak mankenem. Inja Yesus dek ro waiya, ma skayun kaḇer. 38 Ma snon rur ḇemaḇaksya sibur ani dor faro Yesus insa imarisen ido isoi. Ḇape Yesus iwani fa rya, doḇo: 39 "Wabur ḇe rum bedi ma farfyar roi ḇeḇor kam Allah ifrur faro au kwar." Snon ani rya iyar mnu ani ḇesiper ma ikofen ḇadir roi ḇeborkam Yesus ifrur faro mankundi na. 40 Rofyor Yesus kyaḇer, kawasa sibor srafa sisrowi snar sikam siwafi. 41 Inja snon oso snonsnon ḇyedi Yairus ryama. Ikada mananir ro rum-ari. Kyain wepur ma ḇyansuba ro ḇarpon Yesus wemin ḇyesuya ma dor faroi, insa Yesus ryaḇe rum ḇyedi, 42 snar inai binjos ḇyedi ḇeḇe wampasi wambarek samfur seser risuruya, fyanam imar. Ro marandan ḇe Yairus rum ḇyedi kawasa sibor sifyosepen Yesus. 43 Bin oso iduf dafduf rik ḇe wampasi wambarek samfur seser risuru kwar ma mansei ryawer kako ḇyuk pararei faroiḇa. 44 Imbran fa fyanam Yesus ro dokor ḇyedi ma duf Yesus syatu ḇyedi pusyom na, ma rofyor ani kako dafduf rik ani imnai beri. 45 Raimnai Yesus ikofen: "Mansei ḇepan ro aya?" Ma snar oso kyaremba, Petrus ikofen ḇo doḇo: "Guru, kawasa ḇeḇor spanjuḇer ma sifyos apepen au." 46 Ḇape Yesus ikofen: "Snon oso isya pyan ro aya, snar yaḇaḇir papoik isya isasyar ro baken yedi." 47 Rofyor bin ani myam, mboi fararur ḇyedi ḇyeḇefawi, inja ryadai ḇo ryama, kyain wepur ḇo ḇyansuba ro Yesus ḇarpon ḇyedi ma fyarfyar faro kawasa ḇeḇor rosai ḇefnai fa pyan ro Yesus ma rofafisu ani iprei beri. 48 Inja Yesus ikofen faro bin ani: "Ne, inai yedi, kakyar bedi ḇyuk aski faro aw kwar, wabur kuker aski!" 49 Rofyor Yesus iwawos kaker, snon oso ro kina mananir rum ari ani ryama ikofen ḇo doḇo: "Romawa bani imar kwar, inja wafrur kandera awer Gurui." 50 Ḇape Yesus imnaf rarirya ikofen faro Yairus: "Wamkak awer, wakyar monda, snar romawa ḇani nari ikenem." 51 Rofyor sra ro Yairus rum ḇyedi, Yesus ḇyuk fa Petrus, Yohanes ma Yakobus ma inai ani snari fnoḇek kmari skosun skoso Yesus ma snon oso ḇaḇeri dakso. 52 Snonkaku ḇeḇor ansi skanes inai ani. Ḇape Yesus ikofen: "Mkokanes awer; imarḇa, ḇape denef." 53 Simbrif Yesus, snar sifawi romawa ani imar kwar. 54 Raimnai Yesus duf romawa ani ḇramin ḇyedi ma dorḇo ikofen: "Ne, romawa wakḇok." 55 Ma romawa ani rur ḇyedi kyaḇer ma rofafisu ani kako ikḇok ma dores. Raimnai Yesus iwan fa sfan romawa ani. 56 Ma romawa ani sinan ḇyansu sukandor, ḇape Yesus myunwareksi insa sikofen ḇadir awer faro manseryawer kako rosai ḇerarirya ani.

9

1 Inja Yesus dor manfamyan samfur seser risuru ḇyesi, raimnai ḇyuk samambraḇ ma papoik farosifa insa sipoik syadi rur ḇemaḇak ma ssḇuk pararei ro dafduf na. 2 Ma iwansifa sḇaryas Ḇaḇesasoser Allah ma ssḇuk pararei faro snonkaku, 3 ikofen farosi: "Mkun awer roi ono ro mararan, mkun awer ankyon roḇa roi ḇeḇaryam, mamami roḇa pipi, roḇa sansun risuru. 4 Ma rofyor mkosun ro rum oso kwar, mkoḇeryar rodia isof mkosasyar ma mkombran pdef mararan mkoḇedi rodia. 5 Ma rofyor snonkaku simewer mko ido, mkosasyar ro mnu sedi ma mkokokef oref ḇero mnu ani bur mkowemna insa neswarapepen farosi." 6 Raimnai sra simbran yar mnu nakam ḇo sḇaryas Ankankinem Ḇeḇye ma ssḇuk pararei faro snonkaku ḇeduf ro moḇ nakam. 7 Herodes, wairek ro sup Galilea, imnaf roi ḇeḇor ḇeḇesya anna ḇyaḇir ḇyefesfyas, snar snonkaku ono sikofen, mboi Yohanes diḇri rofandu ḇemarsya kwar. 8 Ono sikofen wer, mboi Elia kyaḇer kwar, ma ono kako sikofen, mboi snon oso ro nabi-nabi ḇepon ansi ikḇawes kwar. 9 Ḇape Herodes ikofen ḇo doḇo: "Yohanes yaperemuk ḇukor ḇyedi kwar. Mboi manseiso ine, ḇyesno ifrur roi ḇeḇesya rarirya?" Raimnai ḇyesewar insa daksruw Yesus. 10 Rofyor wawan ansi skaḇer sfarfyar faro Yesus rosai sifrur kwar na. Raimnai Yesus dunsi ma sraḇe mnu oso ḇenirḇe Betsaida, isof semir monda fnoḇek Yesus. 11 Ḇape kawasa ḇeḇor sifawi i, inja siso i. Ismasi ma dawawos farosi ro Ḇaḇesasoser Allah ma ḇyuk pararei faro kawasa ḇeḇefandun pararesya. 12 Fafisu mandiraya manfamyan samfur seser risuru ḇyansi srama faroi ma sikofen ḇo soḇo: "Wawan kawasa ḇeḇor ansifa sibur, insa sraḇe mnu-mnu ḇefanam nane fa ssewar moḇ seryar ro ma roḇean, snar koisya ro moḇ ḇeḇeusḇa." 13 Ḇape Yesus ikofen farosi: "Mkoiso nari ḇefansi!" Ḇape skarem ḇo soḇo: "Nkosma syadiḇa ro mamami ririm ma in risuru, ḇesyanja nkora nkokoḇes roḇean faro kawasa ḇeḇor sinekada." 14 Snar indokada snon syaran ririm sisya ro diwa. Raimnai ikofen faro manfamyan ḇyesi: "Mkowansi fa skain ḇewuk-wukem, wukem oser indokada snon samfur ririm." 15 Manfamyan ansi sifrur rarirya ma siwan kawasa ḇeḇor ansifa skain. 16 Ma Yesus dun mamami ririm ma in risuru ansuya kwar, iwakwaker ḇe nanki, ma ikofen kasumasa faro Allah, raimnai pyapef mamami ma in ansuya ma ḇyukna faro manfamyan ḇyesi insa sakḇerarwasna faro kawasa ḇeḇor ansi. 17 Ma sikam san isof sarbor. Ḇarpurya siryur mamami ker-ker ḇedawerna barborya inoken samfur seser risuru. 18 Ro rarwan oso rofyor Yesus demir ḇo ḇyenadi, manfamyan ḇyesi sra sfanami. Raimnai ifukensi: "Kawasa ḇeborsya soḇo, manseiso aya ine?" 19 Skarem ḇo soḇo: "Yohanes Ḇemasi, ono ḇese kako soḇo: Elia, ono ḇese wer soḇo, snon oso ro nabi-nabi ḇepon ansi ikḇawes kwar." 20 Yesus ifuken farosi: "Mboi mko ido mkokara manseiso aya?" Petrus kyarem ḇo doḇo: "Wairek ḇerama ro Allah." 21 Raimnai Yesus idwarek kaku, insa sikofen ḇair awer roi ḇeḇesya ani faro manseirya kako. 22 Ma Yesus ikofen: "Rumkun Snonkakuya nari ḇyekandera nabor ma ḇebarara-ḇebarara, mananir imam-imam ma ḇefawinananem Refo Yahudi, nari spampumi ma smuni ma ḇyeḇeḇawes ro ras ḇeḇekiorya." 23 Ikofen faro sikam: "Snonkaku oser-oser ḇemarisen ḇeso aya, ikada nari fyamyun mankundi, ma ḇyar aprop ḇyedi ro ras-ras ma iso aya. 24 Snar mansei ḇemarisen ḇeḇriwarek kankenem ḇyedi, nari kankenem ḇyedi ryoburi; ḇape mansei kankenem ḇyedi ryoburi snar aya, ikada nari isma kankenem ḇyedi. 25 Fainda rosai snon oso nya siper supswan ine, ma myun roḇa ḇyefromo mankundi ḇardi? 26 Snar mansei ḇemai aya ma wos ayena, Rumkun Snonkakuya kako nari imai snon ani, rofyor ifyafer kuker papoik ḇyedi ma papoik Kmaya ma papoik malaikat-malaikat ḇesren sya. 27 Yakofen faro mko: Kaku ḇeri rofandu snonkaku ḇerama mkoine nari ono simar ḇaim isof sakmam Ḇaḇesasoser Allah." 28 Indokada ras riwar ro farkarkor anna kwar, Yesus dun Petrus, Yohanes ma Yakobus, raimnai skek raryas ro bonya insa skoḇenadi. 29 Rofyor Yesus ḇyenadi, ḇarpon ḇyedi syadwer ma sansun ḇyena napyoper karḇas. 30 Ma kniko monda snon risuru suyawawos kuker Yesus, isoine Moses ma Elia. 31 Sufasna mankunsu ro sananai ro boiyaswa ma suyawawos kuker Yesus ro marmar ḇyedi nari fyoroḇa wer ḇyeimnis na ro Yerusalem. 32 Rofafisu ani Petrus ma min ḇyesi senef ma rofyor skokḇok ma skomam Yesus sanana ḇyedi: ma snon risuru suyores kuker Yesus. 33 Ma rofyor snonkaku ansu suḇe subur Yesus, Petrus ikofen faro Yesus: "Guru, aski bos kaku koisya ro moḇ ine. Iḇye kada nkofrur aḇdares rikior, oso faro au, oso faro Moses ma oso faro Elia." Ḇape Petrus ifawi roi ikofen naḇa. 34 Rofafisu ikofen rarirya, mandep oso ryama ikawef sko. Ma rofyor skosun ro mandep ani, skomkak kaku. 35 Ḇarpurya skomnaf mkaren ḇerok ro mandep ani ḇekofen: "Inekada Rumkun ayedi yakinfir kwar, mkomnaf i." 36 Rofyor mkaren ani imnai kwar, skomam Yesus demir dores. Ma manfamyan ansi sḇekankunes roi ḇeḇor smam anna, ma sfarfyar na faro manseiryawer ḇaḇeri ro fafisu ani. 37 Ro mesrdi skodoro bon ani, snonkaku ḇeḇor semarani ḇo srama sisrow Yesus. 38 Snon oso ro kawasa ḇeḇor ansi dor, ma ikofen ḇo doḇo: "Guru, wafnoḇek wakmam romawa ayedi, snar ikada romawa mandos ayedirya. 39 Rofafisu rur ḇemaḇakya iswoḇeri, rurḇemaḇak ani ifruri fa fyararar ma ryadaudower isof sḇadon ḇyedi kyaḇaḇus. Rurḇemaḇak ani ḇyewayami pdef ma imewer isasyar burindi. 40 Ma yor kwar faro manfamyan bansi insa siyaw rurḇemaḇak ani, ḇape sipokḇa." 41 Inja Yesus ikofen: "Ne, mko syos ḇekyarḇa ma ḇeḇor, fafisu rosai nari yakainso mko ma yakḇaḇ mko? Wun romawa banya muma!" 42 Rofyor romawa ani fyanam Yesus, rurḇemaḇak ani ipyasi ro saprop ma kyakikeri. Ḇape Yesus ḇyewef rurḇemaḇak ani ma ḇyuk pararei faro romawa ani, ma kyaḇeri faro kmari. 43 (43a) Kawasa ḇeḇor ansi sikandor snar smam Allah papoik ḇyedi iba kaku. (43b) Fafisu kawasa ansikam sikandor kaker snar roi ḇeḇor ifrur anna, Yesus ikofen faro manfamyan ḇyesi: 44 "Mkomnaf ma mkokara naḇye wos ayenane: Rumkun Snonkaku nari sḇoḇi faro papoik snonkaku." 45 Ḇape sifawi wos aniḇa, snar kankunes ḇyedi iyokef bursi, isof sifawi ḇa. Ma simkak sifuken kankunes ḇyedi faroi. 46 Rofandu Yesus manfamyan ḇyesi sfamfaḇri mansei rosi nari ḇeba syadiya. 47 Ḇape Yesus ifawi kakara sena. Eḇedari dun romawa kasun oso ma iwanfa dores ro risḇyedi, 48 ma ikofen farosi: "Mansei ḇefaduru romawa ine snar snonsnon ayedi, ikada fyaduru aya; ma mansei ḇefaduru aya, ikada fyaduru ḇewan ayanya. Snar ḇebaḇa syadi rofandu mkokam, iso ḇeba syadiya." 49 Yohanes ikofen: "Guru, nkomam snon oso iyau rurḇemaḇak kuker snonsnon bedi, inja nkodwarek snon ani, ima dakso koḇa." 50 Yesus ikofen faroi: "Mkodwarek aweri, snar mansei ḇesampum mkoḇa, ikada isyaro mun mkoḇedi." 51 Fafisu fyanam kwar fa Yesus ḇyeḇekano ḇe boiyaswa, kyara namuk fa ryaḇe Yerusalem. 52 Inja iwan wawan onofa sponi. Sra ssun ro mnu oso ro Samaria insa sfasos roi ḇeḇor ḇeḇefandun faro Yesus. 53 Ḇape kawasa ro mnu ani simewer Yesus, snar marandan ḇyedi ryaḇe Yerusalem. 54 Rofyor manfamyan ḇyansuya, isoine Yakobus ma Yohanes, sufawi roi ḇeḇesya ani, sukofen: "Manseren, wamarisen ido, nkor foro isabu ro nankifes myun kawasa sine?" 55 Ḇape isiḇer ma isoneksi. 56 Raimnai sraḇe mnu ḇesena. 57 Fafisu Yesus ma manfamyan ḇyesi simbran pdef marandan sedi, snon oso ikofen faro Yesus: "Nari yaso au, ḇemoḇ rosai waḇe rwayoḇna." 58 Yesus ikofen faroi: "Nafsup sisma der ma man sisma narem, ḇape Rumkun Snonkaku isma moḇofa ḇyarek roḇa." 59 Raimnai Yesus ikofen faro snon oso ḇese: "Waso aya!" Ḇape snon ani ikofen: "Wamarisen ido yarafa yakrir kamami resari." 60 Ḇape Yesus kyarem faroi: "Iḇye snonkaku ḇemar sikrir snonkaku ḇemar sesi; ḇape au, rwa ḇaryas Ḇaḇesasoser Allah ro moḇ-moḇ nakam." 61 Ma snon oso ḇese dakkofen wer: "Yamarisen yaso au, Manseren, ḇape wamarisen ido yara yakofen aroo faro kina ayesi ḇepon resari." 62 Ḇape Yesus ikofen faro snon ani: "Snonkaku ḇerandak ḇeḇebajak kwar, raimnai myamḇe dokor, isyusḇa fa ḇyekina ro Allah kawasa ḇyesi."

10

1 Raimnai Yesus kyinfir manfamyan samfur rifik wer, ma iwansi fasḇe suru-suru ḇo sponi ḇe mnu ma moḇ iḇe ryayoḇ na. 2 Ikofen farosi: "Yafna nadufen kwar, ḇape ḇefararursya siborḇa. Eḇedari nkor faro amber ḇena yafya, insa fyarem ḇefararur ono fa srabar roḇean anna. 3 Mkora, yawan mko imnis domba mkun ro fandu naf supsya. 4 Mkun awer kamon roḇa roi ḇeḇaryam, roḇa roi ḇesower wemin, ma mkoḇe aroo awer faro manseiryawer, rofyor mkoisya kaker ro mararanya. 5 Ma mkosun ro rum oso, mkofen ḇepon farosi: Aski faro mko ro rum ine. 6 Ma rum ani ono sisya sefandun faro aroo mkoḇena, nari askiya kyainso si. Ḇape ono sḇefandun aroo mkoḇenaḇa ido, nasiḇer faro mko. 7 Mkokain ro rum oso ido, mkonan ma mkinem rosai sḇukna, snar mansei ḇefararurya, nari isma sasuref; inja mkobur awer rum ani ḇe rum-rum ḇese. 8 Ma rofyor mkosun ro mnu oso rawo simarisen mko ido, mkan rosai sfasos faro mko. 9 Ma mkoḇuk pararei faro snonkaku ḇeduf ro mnu ani, ma mkokofen farosi: Ḇaḇesasoser Allah fyanam kwar faro mko! 10 Ḇape rofyor mkosun ro mnu ani ma simarisen mko ro mnu aniḇa ido, mkoraḇe sampak ḇero mnu ani ma mkor farma: 11 Rarirya kako oref ro mnu ani ḇekrof ro mkowemna, mkokokefna ro ḇarpon mkoḇedi, insa mkofawi roi ine: Ḇaḇesasoser Allah fyanam kwar. 12 Ḇape yakofen faro mko, nari ro ras mankaraya, Sodom myanan syadi ro kamnam mnu ani." 13 "Au Khorazim, rwoë! Au Betsaida, rwoë! Snar kanandor mkomam nane neḇefasna ro Tirus ma Sidon rarirya kada, nari smandak ma simbror fyoro kwar. 14 Rarirya rofyor ras mankaraya, kamnam Tirus ma Sidon nari nasrawen syadi kamnam mkoḇena. 15 Ma au Kapernaum, woḇo nari be ḇekanow raryas ro nankike? Oroḇa! mboi nari skekef au ḇemun aiḇui. 16 Mansei ḇemnaf mko ido, ikada imnaf aya. Ma mansei ḇesampum mko ido, imnis isampum aya, ma mansei ḇesampum aya ido, imnis raris isampum ḇewan ayanya." 17 Ḇarpurya manfamyan samfur rifik ansi skaḇer kuker raryaḇ ma sikofen: "Manseren, rur ḇemaḇaksya kako skunem faro nko, snar snonsnon bedi." 18 Raimnai Yesus ikofen: "Yamam Ibiris isapi imnis arḇeḇer ro nanki. 19 Kaku ḇeri yaḇuk kwar faro mko papoik, insa mkaref epen ikakya ma manora ḇeyarek, ma papoik fa mkobuki pyankar samambraḇ ro mbroḇ mkoḇesya, isof nari royo myun mkoḇa beri. 20 Rarirya ido, mkoryaḇ awer snar rur ḇemaḇak ansi skunem faro mko, mboi mkoryaḇ snar snonsnon mkoḇena neḇefas epen ro syap ḇero boiyaswaya." 21 Rofyor ani kako Yesus iryaḇ rodo Rur Ḇesrenya ma ikofen: "Yakofen kasumasa faro au Mami, Manseren nanki ma supswan, snar wayokef roi nanebur snonkaku ḇefawi ma beswaruser nananem sya, ḇape fasna na faro snon ḇefawi royo ḇaimsya. Mami, roi ḇeradine naiso ḇefrur fa wamarisen na. 22 Nakam Mami ḇyuk na kwar faro aya. Snon oseroḇa beri fa ifawi manseiso Rumkunya, demir monda Kmaya. Ma manseiso ḇemambir Kmaya, demir monda Rumkunya. Ma faro snonkaku mansei Rumkunya imarisen fyasna Kmaya farosya." 23 Raimnai Yesus iknenef faro manfamyan ḇyesi serer ḇardi ma ikofen: "Aski faro mkamor ḇemam rosai mkomam nane. 24 Snar yakofen faro mko: Nabi ma wairek sibor simarisen fa sakmam ma sakmnaf roi mkomam ma mkomnaf nane, ḇape sakmnaf naḇa." 25 Rofafisu oso snon ḇefawinananem Refo Yahudi oso iyori fa ikofen faro Yesus ḇo doḇo: "Guru, rosai nari yafrur insa yaksma kankenem ḇemna ḇaya?" 26 Yesus kyarem faroi: "Rosai sfas ro Refo sasoser Yahudi? Rosai wawasya ro dia?" 27 Snon ani kyarem: "Waswar Manseren Allah bedi kuker snembri ḇesiper ma kuker rur bedi ḇesiper ma samambraḇ ma kakara bena kam ḇesiper ma waswar min besi imnis waswar mankundaw." Yesus ikofen faroi: 28 "Kankarem bedi kyaku, wafrur rarirya ido, nari wasma kankenemya." 29 Ḇape snon ani iḇe ḇyuk kaku ḇe mankundi, inja ikofen faro Yesus: "Rarirya ido min ayesya siso?" 30 Yesus kyarem: "Snon oso isya dado ro Yerusalem ḇe Yerikho: Ro nyanya bori, isapi ro manfasyar ono siḇrasna ma sfasyar pres roi ḇeḇor ḇyena, nererḇa ḇoi smuni kako isof iḇe imar, raimnai siburi. 31 Rofafisu ani, imam oso imbranuk ro nyan ani; myam snon ani, ḇape iburi. 32 Rarirya kuker snon Lewi oso dakbur aryari ro moḇ ani, rofyor myam snon ani. 33 Raimnai snon Samaria oso dakmbranuk ro moḇ ani; rofafisu myam snon ani, saswarya dek ro sne ḇyedi. 34 Inja isnefer snon ani ma isbawer mani ma anggur ro par ḇyena ma pyarek apepen na. Posa dun snon ani ma ryiri ro keledai mankundi ḇyedi, ma duni ḇe rum seryar roya ma fyadurui. 35 Meser ḇyuk dinar risuru faro ḇena rum seryar ro ani ḇo doḇo: ’Fadurui ma mamwarek naḇye i. Kwoḇes rawo nasyadi ro pipi sine ido nari yafadwer si, rofyor yarer wermaya.’ " 36 Rariso kakara bedi, rofandu snon rikior anskoine manseiso snon sfasyar ani dorḇe min ḇyedi? 37 Snon ani kyarem: "Snon ḇefasna saswar faroi." Yesus ikofen faroi: "Wabur ma wafrur rarirya kako." 38 Fafisu Yesus ma manfamyan ḇyesi ro marandan sedi, ssuḇer ro mnu oso. Bin ḇenirḇe Marta dorfa Yesus syun ro rum ḇyedi. 39 Bin ani ḇeknik ḇyedi snonsnon ḇyedi Maria. Maria kyain fanam Yesus wemin ḇyesuya ma imnaf naḇye farkarkor ḇyena. 40 Mboi Marta syombirek kaku kuker afuffarmyanya. Inja fyanam Yesus ma ikofen: "Manseren, ḇefandun ḇake, mboi ḇeknik ayedi myam monda ayaḇo yemir yuffarmyanya? Wawan ima ifnoḇek aya." 41 Ḇape Manseren ikofen faroi: "Marta, Marta, wamkak warek ma wafrur kandera ḇinkundaw kuker roi nabor, 42 ḇape oser monda iso ḇeḇefandunya: Maria kyinfir kwar rarwas ḇeḇye syadi, isoine roi oso ipok duni buriḇa."

11

1 Rofyor Yesus isya ḇyenadi ro moḇ oso. Fafisu ḇyenadi raimnai, manfamyan ḇyesi oso ikofen faroi: "Manseren, farkor nko ro ḇaḇenadi, imnis raris Yohanes fyarkor manfamyan ḇyesi." 2 Yesus kyarem faro si: "Rofyor mkobenadi ido, mkokofen radine: Mami, nko fasren snonsnon bedi kada; Ḇaḇesasoser bedi ryama kada. 3 Buk maḇe inko fandun ḇeḇor ḇemnis ro ras-ras 4 ma wapyos sasar nkoḇena, snar nko kako nko ḇuk maf faro snonkaku ḇefrur sasar maro nko; ma wun nkoḇe fafrowes na awer." 5 Raimnai ikofen faro si: "Rofyor snon oso rofandu mko ryaḇe bati ḇyedi rum ḇyedi ro romfawru ma ikofen faroi: Naeko, yorfa bukma ḇeaya mamami rikior, 6 snar bati ayesi oso ro marandan ḇyedi ḇyeryar ro rum ayedi, ḇape yasma roḇeyan kernofa yafasos faroi ḇa; 7 yakara ḇoi ḇero rumya nari kyarem faroi: Wakyaren awer aya, kedwaya kyanken kwar ma aya kuker romawa ayesi nkenef kwar; inja nari yakḇok ma yaḇuk roi wor anna faro naek auḇa. 8 Yakofen faro mko: Snar bati ḇyedirya inja imewer kaku ikḇok fa ḇyuk faroi roi dor ani, ḇape snar ifawi imaiḇa ḇo dor yayayu ḇesya kwar eḇedari ikḇok ma ḇyuk faroi roi ḇye fandun ani. 9 Eḇedari yakofen faro mko: Mkore, nari neḇeḇuk faro mko; mko sewar, snar nari mkosma; mkonuk snar nari kedwaya syeḇen fabe mko. 10 Snar mansei ḇeyorya, nari ssḇuk faroi ma mansei ḇesewarya, nari isma ma mansei ḇenuk kedwaya, nari kedwaya syeḇen faroi. 11 Kma mansei rofandu mko, rofyor romawa ḇyedi dor in roi ḇesyaḇo, ḇyuk ikak faro romawa ḇyedi fa fyadwer inya? 12 Roḇaido, rofyor dor man pnor, nari ḇyuk faroi manora ḇeyarek sayaryurya? 13 Inja rofyor ḇeḇarḇor mkoya mkofawi mkoḇuk roi ḇeḇye faro romawa mkoḇesi, rosai wer kuker Kma mkoḇedi ro boiyaswa! Nari ḇyuk Rur Ḇesrenya faro mansei ḇeyor faroiya." 14 Ro rarwan oso Yesus iyaw rurḇemak ḇefrur awer ro snon oso. Rofyor rurḇemaḇak ani isasyarbur snon awer ani, dawawos wer. Inja snonkaku ḇeḇor ansi sikandor. 15 Ḇape rofandu si ono sikofen: "Iyaw rurḇemaḇaksya kuker papoik ro Beelzebul, mananir ro Ibirisya." 16 Ono kako sor aḇyair oso ro boiyaswa faro Yesus, fa sifrowespan i. 17 Ḇape Yesus ifawi swaruser sena inja ikofen: "Ḇaḇesasoser ḇefarmafmef nari imkok, ma kina ḇefarmafmef, nari imkok. 18 Rofyor Ibirisya kako irarwas ma isampum mankundi, rariso ḇaḇesasoser ḇyedi nari dores nadworen? Snar mkoḇo, yayaw Ibirisya kuker papoik ro Beelzebul. 19 Inja rofyor yayaw Ibirisya kuker papoik Beelzebul, kuker papoik rosaiso ḇesoi mkonsya ssḇuki iyawiya? Snar rarirya siso nari ḇeḇemankara faro mko. 20 Ḇape rofyor yayaw Ibirisya kuker papoik Allah, inja kaku ḇeri Ḇaḇesasoser Allah ryama faro mko kwar. 21 Rofyor snonkaku ḇesambraḇ oso fyasos fa ḇyuk ḇri warek rum ḇyedi, inja roi ḇeḇor ḇyena kam neḇekadiren. 22 Ḇape rofyor snon ḇesambraḇ syadi snon ani, oso ryama doper ma ifrur kafyoi kwar, nari snon ani dun romamun ḇyena buri kwar insape irarwas fasyar ḇyena. 23 Mansei ḇefnoḇek ayaḇa, isampum aya ma mansei ḇeryur fnoḇek ayaḇa, snonkaku ani fyasasye." 24 "Rofyor rur ḇemaḇakya isasyarbur snonkaku oso, ikada imbran ḇyediwai ro moḇ ḇeḇemarires fa syewar mananai, ḇape snar isma moḇoḇa, inja ikofen: Nari yakaḇer ḇerum yabur kwar ani. 25 Inja ryama isma rum ani ḇye ḇeyariref sren ma ḇye ḇefasos naḇye kaku. 26 Inja isasyar ma ḇyeḇuk rurḇemaḇak rifik ḇese ḇesawo syadi wer roi, ma ssun fa sikenem ro dia. Rarirya ro ḇarpurya snon ani kankenem ḇyedi iḇyeḇa syadi wer ro kankenem ḇepon ḇyani." 27 Fafisu Yesus dawawos kaker, bin oso rofandu kawasa ḇeḇor ansi dor ma ikofen faroi: "Aski faro bin ḇeyores au ma ḇesus au." 28 Ḇape Yesus ikofen: "Ḇeḇe askiya siso ḇemnaf Allah wos ḇyena ma ḇeḇeuserna." 29 Fafisu kawasa ḇeḇor ansi spanjuḇer Yesus, inja ikofen: "Syos ine syos ḇeḇarḇor. Simarisen aḇyair oso, ḇape faro si nari yaḇuk aḇyair osoḇa derer aḇyair nabi Yunus. 30 Snar imnis Yunus ḇeḇe aḇyair faro kawasa Niniwe, rarirya kako Rumkun Snonkaku nari ḇyeaḇyair faro syos babo ine. 31 Rofyor ḇaḇemankaraya, wairek ḇeraker ḇar wambraw ani nari ikḇawes fnoḇek syos ine ma nari ḇyuk samamyai faro si. Snar wairek ani ryamaker sup pember insa dakrower mamkarkir Salomo, mboi kaku ḇeri oso isya ro dine isyadi ro Salomo. 32 Rofyor ḇaḇemankaraya, kawasa Niniwesya nari siḇersi fnoḇek syos ine ma nari ssḇuk samamyai farosi. Snar kawasa Niniwesya simbror rofyor simnaf Yunus ḇaryas ḇyena, mboi kaku ḇeri oso isya ro dine isyadi ro Yunus!" 33 "Snonkaku oso ḇaḇeri ḇepam paramrom raimnai ryiri ro rumbaḇ roḇaido ikawefi kuker badei, mboi ryiri ro adaduya, insa snonkaku ḇesun syakam, smam sananai ḇyedi. 34 Mkamor besuya suḇe paramrom faro baken ḇesiper bedi. Rofyor mkamor besuya suḇye, baken ḇesiper bedi isnai, ḇape rofyor mkamor besuya suyas baken bedi pyampan. 35 Eḇedari mamepen naḇye insa sasnai ḇero auya pyampan awer. 36 Rofyor baken ḇesiper bedi isnai ma moḇo pyampan ḇa, nari baken ḇesiper bedi isnai imnis raris paramromya ḇyeisna au kuker sananai ḇyedi." 37 Fafisu Yesus ḇyuk farkarkor raposa, snon Farisi oso dor fa dakanan ro rum ḇyedi. Inja syun ro rum ani ma kyain danan. 38 Snon Farisi ani myam rarirya ikandor snar Yesus danan ḇoi ḇyan ḇramin ḇyesuya baim. 39 Inja Yesus ikofen faroi: "Snon Farisi mkoya mko fasren sek aninem ma bensya ḇandisi, mboi mkosnemna nafo kuker fasyar ma ḇarḇor. 40 Ne, snonkaku ḇefawi royoḇa, mkofawi ḇake ḇefrur ḇar ḇandiya, iḇefrur kako ḇar ḇeradoya? 41 Ḇape roḇean sek aninem ma bensya siser na buknaḇe farsarser ido kaku ḇeri ḇese nakam nari nasren faro au. 42 Ḇape nari mkoroë, ne snon Farisi, snar mkoḇak ḇar ḇeḇesamfurya ro konsop, kandefun ma rofaran ḇese na kam, ḇape mko fandun Allah napnapes ma saswar ḇyediḇa. Mkofrur oser ḇoi ḇesena neḇemamkyof awer. 43 Farisi mkoyane, mkoroë, snar mko marisen mko kon ro ḇarpon kaku ro rum ari ma mko marisen mko sma syom ro buḇes. 44 Mkoroë, snar mkomnis rus ḇeḇe aḇyairḇa; snonkaku simbran ro bo na ḇoi, sifawi naḇa." 45 Rofandu ḇefawinananem Refo Yahudi ansi oso kyarem ma ikofen faro Yesus: "Guru, wakofen radianya, kworyae inko kako." 46 Ḇape kyarem: "Ne, snon ḇefawinananem Refo Yahudi, mko kako mkoroë, snar mkorir kamnam ḇemarḇak faro snonkaku ḇesambraḇ fa ḇeḇar naḇasya, ḇape mankun mko kada mko ḇyunek ro kamnam ani kuker ḇrampin osero ḇaḇeri. 47 Mkoroë, snar nabi-nabi mkoḇawes rus ro ansya, kpu mkoḇesi aipyokem smun sirya. 48 Kuker fararur ḇerarirya, mkoḇuk kaku, ro fararur ḇeḇyeḇa up mkoḇesi sifrur kwar na, snar smun nabi-nabi ansi kwar ma mkoḇawes rus sena. 49 Eḇedari mamkarkir Allahya ikofen: Nari yawan faro si nabi-nabi ma manwawan ayesi ma ono ro nabi-nabi ma manwawan ansi nari sḇeḇemun ma sewayam si. 50 Inja ro supswan ine ḇyeḇefrurya rik ḇesbawer ro nabi-nabi ansya kam nari nek ro syos ine mko. 51 Randak ro Habil rik ḇyena isof ro Zakharia rik ḇyena smun kwar ro farswaf rokef farsarser ma Allah Rum ḇyedi. Mboi, yakofen faro mko: Sikam nari sḇuksi sisof syos ine mko. 52 Mkoroë, ne ḇefawinananem Refo Yahudi, snar mkun kwar asyopder ro fawawiya, ma mankun mko kada mkaksunḇa ma snonkaku ḇeḇesewar fa ḇesunsya mkodwarek si." 53 Ma rofyor Yesus ibur moḇ ani, ḇefawinananem Refo Yahudi ma Farisisya sḇair pdef ma sifuken ḇesya kwar kuker roi nabor. 54 Kuker nyan berarirya sḇesewar insa sisma wos ḇesasar oso roi ḇeḇe knam fa sḇukfori.

12

1 Rofafisu ani snonkaku syaran-syaran spanjuḇer kwar, isof sifyosapepen. Rarirya Yesus ikofen ḇepon faro manfamyan ḇyesi: "Mkoḇesasor mko ro ragi isoine ḇaḇeankarkar ro kawasa Farisisya. 2 Rosai ḇesisenya nari ḇyeḇeḇas ma rosai ḇeyokef nari ḇyeḇefawi. 3 Inja rosai mkokofen ro pampan nari neḇemnaf ro isnaya, ma rosai mkofarararum ro simna nari neḇefadwaren." 4 Ne, batiyena mko, mkokmkak awer faro ḇemun bakenya, ḇape ḇepok ḇefrur royo ro ḇarpurya werḇa. 5 Iḇye yafasna faro mko mansei nari mkomkakya. Mkomkak faro Allah, ḇemun raposa, ḇena papoik fa ḇesawen rofor ḇembrerḇaya. Mkokyare, iso mkomkak faroya! 6 Manesu ririm seḇeḇoḇ kuker maeja pipi risuru. Rariryano Allah ḇyefanander osero ḇaḇeri, 7 rarirya kako snonburyam ro ḇukor bedi neḇekor kwar. Eḇedari mkomkak awer, snar mkoḇe maeja syadi ro manesusya. 8 Mkoswarepen naḇye: Mansei ḇekarem aya roḇarpon snonkaku, Rumkun Snonkakuya nari dakkaremi roḇarpon Allah malaikat ḇyesi kako. 9 Ḇape mansei ḇefamyun aya roḇarpon snonkaku, nari Rumkun Snonkaku dakfamyuni roḇarpon Allah malaikat ḇyesi kako. 10 Rofyor snonkakuyo isampum Rumkun Snonkakuya, nari isma payasyosro sasar; ḇape mansei ḇeyonef Rur Ḇesrenya, nari isma payasyos ro sasar ḇyenaḇaḇeri. 11 Rofyor sun mko faro kankain karkara jemaat roḇa faro ḇesasoser ma ḇena papoiksya, mkomkak awer rosai nari mkokofen fa mkoḇesano warek mko. 12 Snar rofafisu ani beri Rur Ḇesren fyarkor mko ro rosai nari mkawosna. 13 Snon oso ro snonkaku ḇeḇor ansi ikofen faro Yesus, ḇo doḇo: "Guru, wakofen faro naek ayedi insa irwas pusaka mami imarbur na fa namamnis." 14 Ḇape Yesus ikofen faroi: "Naeko, mansei ḇekanow aya fa yaḇe mankara roḇa manfandu faromu?" 15 Ikofen wer farosi: "Mkowaren ma mkosasor mko ro mnuk rmomenya, snar snonkaku oso nana ḇyena nabor rariso wer kankenem ḇyedi ḇyeknam ro nana ḇyenaḇa." 16 Posa kwar ikofen farosi sarḇer oso: "Snon ḇenana oso isya saprop ḇyena nbuk an ḇeḇor kaku. 17 Inja kyara ro sneḇyedi, ḇo doḇo: ’Rosai nari yafrurya, snar yasma moḇ fa yabuki ikram an ḇeḇor ayenaneḇa.’ 18 Raimnai kyara romankundi, ḇo doḇo: ’Iḇye yafrur radine; nari yakakok sayar ayena ma yaḇawes ḇeba syadi wer fa yaḇuki ikram an ma roi ḇeḇor ayena.’ 19 Raimnai nari yakofen faro rur ayedi: ’Rur yedi au, roi ḇeḇor nakam namawes kwar ma nari naḇroḇa ḇewampasi wambarek nabor; wamnaisu au, wan winem ma wamarisen!’ 20 Ḇape Allah ikofen faroi: Ne, snonkaku ḇefawi royoḇa, ro roḇ ineḇeri rur bedi nari ḇyeḇeyun bur aw, ma rosai fasos kwar na, mansei nkain faroya? 21 Rarirya kuker snonkaku ḇeryur nana faro mankundi, mboi syewar fa dakna nana ro Allah mamam byenaba." 22 Yesus ikofen faro manfamyan ḇyesi: "Eḇedari yakofen faro mko, ’Mkoḇeḇirḇar awer snar kankenem mkoḇena, rosai nari mkanya, ma ro baken mkoḇena, rosai nari mkofmarya.’ 23 Snar kankenemya ḇyemaeja syadi ro roḇean ma bakenya ḇyemaeja syadi ro famamarya. 24 Mkomamepen ro manwawa ḇeyakkakerḇa ma ḇerabarḇa ma sakna kron roḇa sayarḇa, rariryano Allah fyansi kuker roḇean. Rosai wer kuker mko snonkaku ḇesyadibur man ansi! 25 Mansei rofandu mko snar ḇirḇar ḇyena, inja pyam pinkyur oser ro kankenem ḇyedi? 26 Inja, rofyor mkosambraḇ fa mkofrur roi kasun osoḇa, rosai ḇeḇewar mkoḇeḇirḇar ro roi ḇeḇor ḇese? 27 Mkomamepen ro mampyoper ḇefawi ḇerorenḇa ma ḇeyanyanemḇa, ḇape yakofen faro mko: Wairek Salomo kuker kamayai ḇeḇor ḇyenakam, ḇape syansun sansun ḇepyum rariso wer namnis kuker payamyum pampen mampyoper aniḇa. 28 Inja, aḇris ḇesur ro ras ine raimnai meser sisawen ro forya Allah fyamankorsi, rosai wer kuker mko snonkaku ḇekyar mnisḇa! 29 Inja, mkowos awer rosai nari mkan roḇa rosai nari mkinem, ma mkoḇeḇirḇar awer. 30 Snar nanekam er-er ro supswan ine ḇeyakfawi Allah ḇasya siso ḇesewar na. Ḇape kma mkoḇedi ifawi fandun mkoḇenakam. 31 Ḇape mkosewar ḇaḇesasoser ḇyedi resari insape nari ḇyukna faro mko kako. 32 Ne, naek ḇeborḇa mko, mkomkak awer! Snar Kma mkoḇedi imarisen ḇyuk faro mko ḇaḇesasoser ani. 33 Mkobob nana mkoḇenakam fa mkobuk farsarser! Mko sip faro mko mansrip ḇedauḇa, isoine nana oso ro boiyaswa nari ḇeḇroba, ma ḇekarawsya nari skarawḇa ma as sya nari san naḇa. 34 Snar romoḇ nana bena naisya, rodia kako snebedi isya." 35 "Iḇyekada mkofasos mkoḇoḇek sifer mkoḇena ḇesya kwar ma paramrom mkoḇena kako nasnai ḇesya kwar. 36 Ma iḇyekada mkomnis snonkaku ḇewaf tuan sedi ḇeburker ḇaḇefakawawin, insa ryama nyuk kedwaya fasaw kedwaya ḇyeḇeseḇen faroi. 37 Aski faro manfamyan ḇewaren isof tuan ḇyedi ryama. Yakofen faro mko: Kaku ḇeri nari ḇyoḇek sifer ḇyedi ma nari dor si fa skain sanan ma mankundi ryama duffarmyansi. 38 Ma rofyor ryama ro roḇya faduri roḇa ikamadui meser ma isrow sifrur rarirya aski farosi. 39 Ḇape insa mkofawi: Rofyor tuan ḇena rumya ifawi oras rosai ḇekarawya ryama nari myam monda rum ḇyediḇo skakokiḇa. 40 Iḇye mkokako mkepen mkokada ma mkofasos snar Rumkun Snonkakuya nari ryama rofafisu mkofawiḇa." 41 Petrus ikofen ḇo doḇo: "Manseren inkoiso swarḇer ḇaryar inkoyake roḇaḇo wakofen faro snonkakusya kamke?" 42 Manseren kyarem: "Inja, manfamyan mansei ḇeḇeaunos ma ḇefawinananem nari tuan ḇyedi ikanowi fa ḇyemananir faro manfamyan ḇyesikam fa ḇeḇuk roḇean farosi ro fafisuya? 43 Aski faro manfamyan ani rofyor tuan ḇyedi ryama ma isrow isya ro fararur ḇyena. 44 Yakofen faro mko: Kaku ḇeri nari tuan ḇyedi ikanowi fa myamwarek nana ḇyenakam. 45 Ḇape rofyor manfamyan ani iḇarḇor ma ikofen: Tuan ayedi nari isamberen mumaḇa, inja iprer manfamyan snon ma bin, ma dan dinem isof imser. 46 Ḇape manfamyan ani tuan ḇyedi nari ryama ro ras manfamyan ani ifawiḇa ma nari myuni ma ifrur faroi imnis raris snonkaku ḇeḇeawnosḇasya. 47 Mboi manfamyan ḇefawi tuan ḇyedi marisen ḇyedi ḇape ḇefasosḇa roḇa ḇeḇeuser tuan ḇyedi marisen ḇyediḇa, nari isma aprer nabor. 48 Ḇape mansei ḇefawi marisen tuan ḇyediḇa ma ifrur roi ḇesasar ḇefnai ayos, nari isma ayos ḇemanan. Snonkaku mansei, ssḇuk nabor faroya nari sor nabor syadi roi, ma faro mansei sikyar nabor faroya, nari sor nabor syadi wer roi." 49 "Yarama insa yaso for ḇe supswan ine ma yakyar kako for ani isak kwar! 50 Nari yasma kandera ḇefnakḇa ma sne yedi ḇyefesfyas, rofyor roi ḇeḇesya ani ryama ḇaim! 51 Mkokara ḇo mkoḇo, mboi yarama yun aski faro supswan ine? Roḇa, yakofen kaku ḇeri faro mko yun askiḇa mboi famfaḇri. 52 Snar randak ro ras ine famfaḇri naisya fandu snonkaku ririm ro rum oso, kyor skosampum kuker suru ma suru susampum kuker kior. 53 Kmaya isampum romawaya ma romawaya isampum sinan ḇyedi, snaya isampum inai ḇyedi, ma inai isampum snari, imbanyoya isampum imbikin ḇyedi ma imbikin ḇyedi isampum imbanyoya." 54 Yesus ikofen faro kawasa ḇeḇor ansi wer: "Rofyor mkomam mandepna nker ro ḇar wambarek ido mkokofen, ḇo mkoḇo: Nari mekemya imyun ma imyun rarirya. 55 Ma rofyor wambrawya iso, mkokofen ḇo mkoḇo: Rasya nari isam, ma isam kaku rarirya. 56 Ne, snonkaku ḇeḇarḇor, rosai mkomam ro supswan ine ma nankiya mkofawi mkokara ḇaḇir na, rosai eḇedari mkokara ḇaḇir awar ineba? 57 Ma snaro mko kako mkawos namuk ro mankun mko ro rosai ḇenapes naḇa? 58 Snar, rofyor mko kuker mbroḇ mko ḇesi mkora ḇeḇarpon ḇesasosersya ḇaim mkoḇesewar fa mkoḇedasi kuker si rofafisu mkoisya ro nyandibo, insa dun awer aw ḇeḇarpon mankaraya ma mankaraya dakḇuk aw faro ḇefnoḇeki ma ḇefnoḇekisya sisawen au ro bui. 59 Yakofen faro mko: Mkopok mkosasyar ro diwaḇa, isof mkoḇak pres njaki mkoḇena resari."

13

1 Rofyor snonkaku ono sfar faro Yesus ro snon Galilea, Pilatus myunsya rik sena fyawawas na kuker rik farsarser ssḇuki fyarser na. 2 Yesus kyarem farosi: "Inja mkoḇo snon Galilea ḇemar sine sasar sena naba syadi snonkaku Galilea ḇesesya kamke, snar sisma roi ḇeradine na? 3 Roḇa! yakofen faro mko. Ḇape rofyor mkombrorḇa, nari mkokam mkoro kuker nyan ḇerarirya. 4 Roḇaido mkoḇo snonkaku samfur seser riwar kaderen syosya imbriwer fa myunbos ro Siloam ansi, sasar sena naba syadi ro sasar snonkaku ḇena mnu ro Yerusalem? 5 Yakofen faro mko. Roḇa! Ḇape rofyor mkombrorḇa, mkokam nari mkoro kuker nyan berarirya." 6 Raimnai Yesus ikofen sarḇer ine: "Snonkaku oso nya ara knam oser ro yaf anggur ḇyedi, ma rya syewar bon ro ara knam ani, ḇape isma bono ḇaḇeri. 7 Inja ikofen faro ḇefararur ro yaf anggur ani: Wampasi wambarek rikior kwar yarama yasewar bon ro ara knam ine ḇape yasma bonoḇa. Iḇye rwoḇen ara knam ani! Isur farfyos monda sapropya! 8 Snon ani kyarem: Tuan, yor fa kyain ro wampasi wambarek ine wer ari, nari yasofer saprop ro fuarya ma yarir fafen roi, 9 imbude wampasi wambarek iyama imaremri; mboi roḇaido, insape ḇyeḇeroḇen!" 10 Rofyor Yesus ḇyuk farkarkor ro rum ari oso ro ras Mananai Yahudi. 11 Rodia bin oso isya rur ḇemaḇakya iswoḇeri ḇewampasi wambarek samfur seser riwar kwar isof iduf rao dokor ḇyedi iyar ḇo dores aḇyoḇer werḇa. 12 Fafisu Yesus myam bin ani, dori ma ikofen: "Ne awine waprei ro dafduf ḇedi." 13 Raimnai pyan ro bin ani ḇukor ḇyedi ma fafisu ani beri bin ani dores aḇyobber, ma isandik Allah. 14 Ḇape mananir rum ari imsor snar Yesus ḇyuk pararei faro snonkaku ḇeduf ro ras Mananai Yahudi, ma ikofen faro snonkaku ḇeḇor ansi ḇo doḇo: "Ras riwonem naisya faro kofararur. Inja mkorama mkosewar pararei ro ras anna oso, mboi ro ras arina awer." 15 Ḇape Yesus kyarem faroi ma ikofen: "Ne, snonkaku ḇeḇarḇor mkofawiḇake rofandu mko ono sisasyar sapi ma keledai sesi ro padwar sena ro ras Mananai Yahudi ma sunsi ḇemoḇ saninem war roya? 16 Mboi bin ine ibirisya pyarari ḇewampasi wambarek samfur seser riwar kwar ine, Abraham kpu ḇyedirya inja koperi ro ras Mananai Yahudi ḇake?" 17 Ma fyor ikofen rarirya, mbroḇ ḇyesikam simai ma kawasa ḇeḇor ansi simarisen snar smam roi ḇeba ifrur nane. 18 Raimnai Yesus ikofen: "Rosai yaḇuki syarḇer Allah Ḇaḇesasoser ḇyedi ma kuker rosai nari yaḇuki imnisya? 19 Imnis sesawi mor snon oso dun ma ḇyuḇer ro yaf ḇyedi; mor ani isur ma ḇyebaken ma man ro farsyos sifrur narem ro snaw ḇyena." 20 Ma ikofen wer: "Kuker rosai yaḇuki syarḇer Allah Ḇaḇesasoser ḇyedi? 21 Imnis mur bin oso dun fa ḇyuki irḇaren kuker terigu amek rikior isof namnir kam." 22 Rofyor oso Yesus imbran ḇe Yerusalem, dunuk ro mnu ḇe mnu ḇo ḇyuk farkarkor. 23 Ma snonkaku oso ikofen faroi: "Manseren, snonkaku ḇesma korerisya sibor ḇake?" 24 Yesus kyarem faro kawasa ansi: "Mkobesewar fa mkosun ro kedwai ḇefyosya! Snar yakofen faro mko: Snonkaku sibor sesewar fa siḇe ssun fama sismaḇa. 25 Rofyor tuan ḇena rumya ikḇok ma kyen kedwaiya nari mkores ro ḇondi ma mkonuk kedwaiya ḇo mko kofen: Tuan, sweḇen kedwaiya maḇe inko! Ma nari kyarem ma ikofen faro mko: Yafawi moḇ mkoramuma royaḇa. 26 Ma nari mko kofen: Nkoiso ḇeyan ma ḇeyinem kwar ro ḇarpon ḇedi ma aw ḇeḇuk farkarkor kwar ro nyan-nyan ro mnu nkoḇedi. 27 Ḇape nari ikofen faro mko: Yafawi moḇ rosai mkoramuma royaḇa, mkobur ḇarpon ayedi mko snonkaku ḇeḇarḇor! 28 Rodiwa nari mkosma kankanes ma arkfafais nakor, rofyor nari mkomam Abraham ma Isak ma Yakub ma nabisyakam ro Allah Ḇaḇesasoser ḇyedi, ḇape mko ḇardi sisawen mko bebandi. 29 Ma nari snonkaku srama ker Wamurem, Wambarek, Wambrur ma Wambraw ma nari skain sanan ro Allah Ḇaḇesasoser ḇyedi. 30 Ma kaku ḇeri snonkaku ḇepursya nari spon, ma snonkaku ḇeponsya nari spur." 31 Rofyor ani snon farisi ono sramura faro Yesus ma sikofen ḇo soḇo: "Snar Herodes iḇe myun aw inja rwa wabur moḇ ine." 32 Yesus kyarem: "Mkora mko kofen faro makei sup ani: Yayaw setan, ma yaḇuk pararei faro snonkaku ro ras ine ma meser, ma ro ras ḇeḇekior nari yamnai ro fararur ayena. 33 Ḇape ras ine ma meser yawer yambran pdef mararan ayedi, snar nabi oso nari ḇyeḇemun ro Yerusalem ḇandiriḇa. 34 Yerusalem, Yerusalem aw ḇemun nabi-nabisya ma manwawan Allah iwansya swosi kuker karui! Rarwan ono yaswarkuf fa yaryur romawa mkoḇesi, imnis mankoko sinan ḇeryur mkun ḇyesi ro prer ḇyedi baḇsi, ḇape mkomewer. 35 Kaku ḇeri rum bedi nari ḇyeḇebur ma ḇyeursḇa. Ḇape yakofen faro mko: Nari mkomam aya werḇa isof rofafisu mkokofen: Bok faroi ḇerama kuker snonsnon Manseren!"

14

1 Ro ras Mananai Yahudi oso, Yesus rya fa dakanan ro rum manfarkin kawasa Farisi oso rodia. Inja snonkaku ḇerama rodiasyakam smamepen kaku Yesus. 2 Kniko snon ḇeduf dafduf ḇefo oso ryama dores ro ḇarpon ḇyedi. 3 Riamnai Yesus ikofen faro snon ḇefawinananem Refo Yahudi ma snon Farisi ansi: "Ro ras Mananai Yahudi, fandun fa koḇuk pararei faro snonkaku ḇedufsyake, roḇa?" 4 Sikam sefasis. Raimnai iserepen snon ḇeduf ani ḇramin ḇyedi, ma ḇyuk pararei faroi ma iwani fa ibur. 5 Posa ikofen farosi: "Mansei rofandu mko, ḇena romawa, roḇa sapiyo fa isapi ro war ḇeyer oso ro ras Mananai Yahudi, ma nari isasyari ḇaḇeri ro ras ani?" 6 Ḇape snonkaku osero isampum ḇaḇeri. 7 Snar Yesus myam snonkaku dakam ansi skinfir moḇ ḇepyum syadi, inja ikofen wos sarḇer ine farosi: 8 "Rofyor snonkaku oso pyos mko fa mkan munara fakawawin, mkokain awer ro mob ḇekaki, snar imbude snon ani dor snonkaku ḇeba syadi onori, 9 nari snon ḇeyor mko ani ryama ikofen faro mko: Mkoḇuk moḇ ine faro snon iwa. Nari kuker mamyai, mkora mkokain ro moḇ ḇekakiḇa syadi. 10 Ḇape rofyor sor mko, mkora mkokain ro ḇarpur kaku. Insa tuan ḇena rumya ryamaido ikofen faro mko: Bati, yor kuker syowi, insa rwamura kwain ro ḇarpon kaku iwa. Rariryaido, nari wasma ḇaḇesyowi ro ḇarpon snonkaku ḇeḇor sor ansi. 11 Snar mansei ḇeyow mankundi ido, nari ḇyeḇerun, ma mansei ḇerun mankundi ido, nari ḇyeḇekanow fa ikaki." 12 Ma Yesus ikofen faro snon ḇeposi ani kako: "Rofyor wafrur munara ro isnake roḇke, pos awer bati ḇesi roḇa naek srar besi roḇa kina ḇesi roḇa min ḇefanam aw ma ḇenanasya, snar nari smunsu na faro aw, rofyor sakor aw wer. 13 Ḇape rofyor wafrur munara ido, pos snonkaku ḇesaḇarar, ma ḇeḇeroro, ḇepapipen ma snonkaku ḇeprafsya. 14 Nari wasma aski, snar snonkaku ansya sisma roi ono fa sḇukḇak frurpyum benaḇa. Snar nari wasma sasuref, ro ras aḇiḇer snonkaku ḇenapessya." 15 Simnaf Yesus wos ḇyena, snonkaku oso rofandu ḇenan ansya ikofen faro Yesus: "Aski faro mansei ḇeyananso Allah, rofyor Ḇaḇesasoser ḇyedi ryamaya." 16 Ḇape Yesus ikofen faro snon ani: "Snonkaku oso isya ifrur munara ḇeba, ma pyos snonkaku sibor kaku. 17 Rofyor anan munara ani siḇe sraki, iwan manfamyan ḇyesi fa sikofen ḇadir faro snonkaku pyos ansi: ’Mkoramuma, snar roi ḇeḇor nakam nfasos kwar.’ 18 Ḇape sikam sun sano wareksi. Ḇeponya ikofen: ’Yor maf snar insape yakoḇes babo saprop mnuk oso, ma yaḇe yara fa yamami.’ 19 Suminya dakkofen: ’Yor maf snar insape yakoḇes sapi mandu ririm ma skarsi kwar, inja yaḇe yara yamnasenpan si.’ 20 Minya wer kako ikofen: ’Yor maf, snar insape yafakawin baḇo inja nari yarafa ḇa.’ 21 Inja manfamyan ani kyaḇer ma ḇyuk nakam faro tuan ḇyani. Rarirya tuan ḇena rumya imsor ma ikofen: ’Mkora fasaw ḇe sampak ma rumbines swaf na ma mkun snonkaku ḇesaḇarar ma ḇeḇeroro ma ḇeprafsya, ma snonkaku ḇepapipensya. 22 Posa manfamyan ansi sikofen ḇadir faroi: Tuan, rosai swoser kwar ani, nkofruri kwar. Ḇape rariryano moḇ naisya kaker. 23 Raimnai tuan ani ikofen faro manfamyan ḇyesi: Mkoramura ḇe sampak ma nyan dayuk, ma mkoḇedifer snonkaku ḇero diansya fa saksun, snar yamarisen rum ayedi ifo. 24 Snar yakofen faro mko: Osoḇaḇeri rofandu snonkaku yapos kwar ansi, nari sakkain ro munara ayedi.’ " 25 Rofyor ani kawasa sibor semarani ma siso Yesus ro marandan ḇyedi. Yesus isiḇer ma ikofen farosi: 26 "Snonkaku oso iḇe iso aya ido, dayin kmari, snari, swari ma romawa ḇyesi, naek ma srar ḇyesi, ma kenem ḇyedi kako, insape nari ḇyemanfamyan maro aya. 27 Mansei ḇeḇar aprop ḇyedi ḇo iso ayaḇa, nari ḇyemanfamyan maro ayaḇa. 28 Snar rofandu mko oso iḇe ifrur kaderen ḇeḇesyos ido, nari dawof fasasos kumpan ḇefrur ḇaḇawes ani fa namniske, namnisḇaim? 29 Snar ryir ararefya raimnai ifrur fararur ani fa iḇroḇa ido snonkaku ḇemam fararur ani, nari skoryayei, 30 ma sikofen: Snonkaku ani ryak ḇaḇawes ani raimnai, syambraḇ fa ifrur posa iḇa. 31 Roḇa, wairek oso nya sordade syaran samfur ma iḇe ḇyembroḇ wairek ḇese ḇena sordade syaran samfur risuru ido, nari kyain fa kyara ḇepon resari ro samambraḇ ḇyedi, rofyor myamun kuker mbroḇ ḇyedi ḇaim? 32 Inja ifawi syambraḇ ḇarya, iwan wawan ono fa sor dasi, rofyor mbroḇ ḇyedi ḇyinkwan kaker. 33 Rarirya kako kuker snonkaku oser-oser rofandu mko, ḇemewer ḇerir roi ḇeḇor ḇyenandi, nari ḇye manfyan maro ayaḇa. 34 Karumasenya iḇye, ḇape karumasen ani ḇyuar ido, nari rosai koḇukfruri fa myasmasen werya? 35 Nari sefanduni faro yaf werḇa, ma snai ḇe pupuk werḇa, mboi sisawen waworek monda si. Mkoḇe knaram ido mkorower!"

15

1 Ro ras oso, snon ḇeyor som ma snonkaku ḇesasar sibor kaku sra fa sakmnaf Yesus. 2 Inja snon Farisi ma snon ḇefawinananem Refo Yahudi sikofen: "Inja snonkaku ḇesasarsya nyasi ma danan fnoḇeksi." 3 Rarirya Yesus ikofen sarḇer ine farosi: 4 "Mansei rofandu mko, ḇesma domba utin oser, ma oso rofandu domba ansi iḇor ido, rosai nari ifrurya? Nari ryir domba samfur risiw seser risiw ansi ro sup ḇeḇeursḇa, ma rya fa syewar domba ḇeḇor ani isof isrowi? 5 Ma rofyor isrowi kwar, dowi ma ikamari kuker raryaḇ; 6 ma rofyor rya ro rum kwar, dor maniḇoḇ ḇyesi ma snonkaku ḇefanami sya, ma ikofen farosi, ’Mko marisen fnoḇek aya, snar domba ḇeḇor ayedi yasrowi kwar!’ 7 Yakofen faro mko: Rarirya kako nari raryaḇ syadi ro boiyaswa, snar snonkaku ḇesasar oser imbror, isyadi wer ro raryaḇ snar snonkaku samfur risiw seser risiw ḇenapes, ḇeḇefandun marandor ḇa." 8 "Roḇa bin mansei ḇena kumpan sarak samfur, ma rofyor oso ryo, rosai nari ifrurya? Nari pyam padamara ma syewar kuker aunos isof isrowi. 9 Ma rofyor isrowi kwar, dor bati ḇyesi ma snonkaku ḇefanam rum ḇyedi ma ikofen farosi, ’Mkomarisen fnoḇek aya, snar kumpan ḇero ayani yasmai kwar.’ 10 Yakofen faro mko: Rarirya kako nari raryaḇ isyadi fandu Allah malaikat ḇyesi, snar snonkaku ḇesasar oso imbror." 11 Yesus ikofen wer: "Snon oso nya romawa risuru. 12 Ḇedarya ikofen faro kmari: ’Mami, bukma ḇe aya rarwas ro nana koḇena ayena maḇe aya.’ Inja kmari irarwas nana anna rofandu sko. 13 Ḇarpurya ro ras riḇeso romawa ḇedar ani ḇyoḇ rarwas ḇyan nakam, raimnai ryaḇe sup ḇeḇinkwan. Rodiwa ḇyoḇ farfnak nana ḇyena kuker kankenem ḇeḇe fromo monda. 14 Rofyor nana ḇyena naḇro kwar, basbiser ḇebaya myun mnu ani ma ikako syaḇarar. 15 Inja rya fa ifararur faro tuan oso ro mnu ani. Snon ani iwani ḇe yaf ḇyedi fa iwaren randip ḇyesi. 16 Ma imarisen iser snewar ḇyedi kuker roḇean randip anna, ḇape snonkaku osero ḇaḇeri fa ḇyuk roi oso faroi. 17 Insape iwasen ma ifawi kankenem ḇyedi, ma ikofen: ’Snonkaku ḇefararur faro kamami san kamayai, ḇape aya rodine, yaḇe yamar kuker basbiser. 18 Nari yayor aya ma yabur ḇe kamami ma yakofen faroi: Mami, yaḇesasar faro Allah ma faro mami, 19 inja wor awer aya ḇe romawa bedi mboi wafrur aya imnis snonkaku ḇeyan sasuref faro mami.’ 20 Rarirya iyori ma ibur faro kmari. Fafisu ḇyinkwan kaker, kmari myam ḇeponi kwar ma saswarya dek ro sne ḇyedi. Inja kmari ifrar ma dawer epeni ma isyumi. 21 Ḇape romawa ani ikofen faro kmari: Mami yaḇesasar faro Allah ma faro mami. Inja yasyus fa wor aya ḇe romawa bediḇa. 22 Ḇape kmari ikofen faro manfamyan ḇyesi: ’Mkun fasaw syatu ḇepyum kakuyo ma mkoḇe fa syansun ma mkopanai kawin oso ro ḇrampin ḇyedi, ma mkoḇuk roi ḇesower ro wemin ḇyesuya. 23 Ma mkun sapi kuḇ ḇeḇebaken ani, ma mkomuni raimnai mkorama kan komarisen. 24 Snar romawa ayedi imar ḇape ikenem kaḇer, iḇor kwar ḇape kosmai wer.’ Rarirya sirandak marisen ani kuker raryaḇ. 25 Ḇape romawa rakya isya ro yaf, ma rofyor ibur fa fyanam rumya, imnaf rakrok sonker, doya mas-mas ma fayaryer anna. 26 Inja dor manfyan oso ma ifuken faroi: ’Rosai eḇesya ro rumya?’ 27 Manfyan ani ikofen: ’Ḇedar bani kyaḇer kwar ma kmami myun sapi kuḇ ḇeḇebaken ani, snar isma kaḇer romawa ḇyedi kuker ḇaḇye.’ 28 Rarirya romawa rak ani imsor ma imewer daksunri. Inja kmari isasyar fa dakawos sneprei. 29 Ḇape kyarem faro kmari ma ikofen: Wampasi wambarek nabor kaku, yuffarmyan mami, ma yaḇeyuk sasoser bena oso ḇaim, ḇape wakḇuk nek-nek mkun oso fa yaḇuki dakmarisen kuker maniḇoḇ ayesiḇa. 30 Insape romawa ḇefnak mami nana bena faro bin ḇesasar ine ryama, kwaruk sapi kuḇ ḇeḇebaken ani faroi. 31 Ḇape kmari ikofen faroi: Romawa yedi, awma ras nakam awsya kuker aya ḇesya kwar, ma roi ḇeḇor ayena, roi ḇeḇor ḇenairya. 32 Iḇyekada rwama komarisen ma koryaḇ, snar ḇedar bani imar kwar ḇape ikenem kaber, ibor kwar fama kosma kaḇeri wer."

16

1 Yesus ikofen kako faro manfamyan ḇyesi: "Snon ḇenana oso isya nya snon ḇekram kumpan oso. Snon ḇenana ani imnaf manwarwaren ḇyani ḇyoḇ afafer nana ḇyena. 2 Inja dor manwarwaren ani ma ifuken: Kaku ro roi yamnaf ro aw na? Buk kankarem ḇenapes ro fararur bedi, snar nari wafararur ro fararur ani werḇa. 3 Manwarwaren ani kyara fasis ḇo doḇo: Rosai nari yafrurya? Tuan ayedi ḇyuk fa yamnai ro fararur manwarwarenya. Fama nari yaḇekir fa yuf adafyaḇa, ma yafararyor yan nari yamai. 4 Yafawi rosai nari yafrurya, insa rofyor yamnai ro fararur manwarwarenya, yasma snonkaku ono fa yaḇeryarus ro rum sena. 5 Raimnai dor snonkaku ḇeḇe nyaki kwar faro tuan ḇyedi, oser ḇe oser, ma ikofen faro ḇeponya: Nyaki ḇena faro tuan ayedi ḇeso irya." 6 Snon ani kyarem ḇo doḇo: "Mani fyom utin oser. Raimnai ikofen faro snon ani: Syap nyaki bedi isoine, kwain ma wafrur syap nyaki oso ḇese, ro knikine beri: Fas fyom samfur ririm. 7 Posa ikofen faro ḇeḇesuruya: Awkako, wasma nyaki riḇeso? Snon ani kyarem: Gandum kadu utin oser. Ikofen faro snon ani: Syap nyaki ḇedi isoine, wafrur syap nyaki oso ḇese; fas ḇayir kadu samfur riwar. 8 Inja tuan ani isandik manwarwaren ḇeḇye ba ani, snar ḇyerarirya kuker kakara ḇeḇye. Snar romawa supswan senaḇye faro min sesi, ro romawa isnasya. 9 Ma yakofen faro mko: Mkoseref ḇaḇebati kuker arasai ḇeḇyeḇa na, insa rofyor arasai anna nafnoḇek mkoḇa kwar ido, mkoiso ḇesma mob ro rum ḇekain fyoroya." 10 "Mansei ḇenapes ro roi kasun na, nari inapes kako ro roi ḇeba na. Mboi mansei ḇenapesḇa ro roi kasun na, nari inapesḇa kako ro roi ḇeba na. 11 Inja, mkonapes faro arasai ḇeḇyeḇa na, mansei nari ḇekyar mko ro nana ḇekakuna? 12 Ma mkonapes faro snon ono ḇese nana senaḇa, mansei nari ḇeḇuk nana mkoḇena faro mko? 13 Manfamyan oso duffarmyan faro tuan risuruḇa. Snar rofyor rarirya ido, nari dayin oso ma iswar ḇeseya, roḇa nari ḇyeuser faro oso ma fyandun ḇeseyaḇa. Mko fararur faro Allah ma faro arasai awer." 14 Farisisya simnaf wos anna kam ma simbrifi snar sikada sewomen faro pipiya. 15 Raimnai Yesus ikofen farosi: "Mkoḇuk kaku ro mankun mko, ro ḇarpon snonkaku, ḇape Allah ifawi sne mkoḇena. Snar roi snonkaku semanmin na, Allah dayin na. 16 Sasoser ro Refo Yahudi ma syap nabi-nabi sena nambran isof fafisu Yohanes; ma rofyor ani Ankankinem Ḇeḇye Allah Ḇaḇesasoser ḇyedi ḇyeḇeḇaryas, ma snonkaku oser-oser sfamfaḇri fa siḇe saksun roi. 17 Snar nanki ma sup na nari napromes, ḇape kakop oso ro Refo Yahudi nari ryoḇa. 18 Snonkaku oso fyaspar swari, raimnai fyakawin oso ḇese, ifrur farbuk; ma mansei bebekawin bin ani ifrur farbuk kako." 19 "Snon ḇenana oso syansun mararesi kuker syatu ḇeyafuk kaku ma ras nakam ikenem kuker kamayai. 20 Ma snon ḇesaḇarar oso isya snonsnon ḇyedi Lazarus; baken ḇyedi ifo kuker armaker, ma ḇyarek ro kedwai snon ḇenana ani ḇyedi, 21 ma imarisen iser snewar ḇyedi kuker roḇean mir-mir ḇesapi ro meja snon ḇenana ani. Isyadi wer naf ḇyesi srama sreḇ par ma armaker ḇyesi. 22 Fyoroḇa snon ḇesaḇarar ani ipsur, ma malaikatsya suni ma sriri ro Abraham wesop ḇyesuya. 23 Snon ḇenana anya kako dakpsur, ma seraki ma rofafisu isma kandera ro mun aibui myam ḇinkwan raryas ro Abraham ifran Lazarus. 24 Inja kyaru muryas ma ikofen: ’Mami Abraham, waswar aya; wawan Lazarus, syowen ḇrampin ḇyesi ro war kenoma ipnunek ramar yedine, snar yaḇekandera mankenem ro for ine saksak ḇyedi.’ 25 Ḇape Abraham ikofen: ’Rumkun yedi, waswarepen, awma wasma ḇaḇye bena kwar rofyor wakenemya. Mboi Lazarus isma kandera ḇefnakḇa. Baboine isma sneprei ma waksma kandera ḇefnakḇa. 26 Oso wer ido, rofandu inko ma aw, ḇron ḇeba oso isya pyandwas ko, inja mansei ḇero dine ryaḇe ḇar iyafaḇa, ma mansei ḇero dia, dunuk mumaḇa.’ 27 Ḇape snon ḇenana ani ikofen: ’Rarirya ido yor faro aw, mami, insa wawan Lazarus ḇe rum kamam ḇyedi, 28 snar yana ḇedar ririm, insa ḇyuk swarepen kaku farosi, insa ssun awer beri ḇe moḇ ḇeḇekandera ine.’ 29 Ḇape Abraham ikofen: ’Syap Moses ma syap nabi-nabisya sisma na kwar. Iḇye simnaf ḇaḇesaksi anna.’ 30 Ḇape snon ḇenana ani kyarem: ’Roḇa, mami Abraham, snar oso rofandu ḇemarsya kyaḇer farosi, nari simbror.’ 31 Abraham ikofen faroi: ’Rofyor simnaf Moses ma nabi-nabisya wos senaḇa, nari simnaf snonkaku ḇemar ma beyiber rofandu ḇemarsya wos senaba kako.’ "

17

1 Yesus ikofen faro manfamyan ḇyesi: "Farkarkor ninyan naisya, ḇape kandera faro snonkaku ḇefrur rariryasya. 2 Iḇye syadi snonkaku ḇerariryasya kofes karui ḇeyas-yas ro sisasusna, ma komsawer si ro soren, imbude sfarkor ninyan ono rofandu snonkaku ḇepokḇa sinendi. 3 Mkosasor mankun mko! Rofyor naek bedi ḇyesasar, wasoneki ma rofyor imbror kwar, buk maf faroi. 4 Mboi rofyor ḇyesasar ḇe rarwan rifik ro ras oser faro aw ma rarwan rifik kyaḇer faro aw ma ikofen: Yambror kwar, rarirya buk ampun faroi." 5 Inja wawan ansi sikofen faro Manseren: "Manseren, buk sambraḇ maḇe nko ro kakyarya!" 6 Manseren kyarem: "Rofyor mkona kakyar iba imnis sesawi mor, nari mkokofen faro ara knam ine: Kwapas ma wasur ro soren, ma nari byeyuser sasoser mkoḇena." 7 "Mansei rofandu mko, ḇena manfamyan oso fa kyaker, roḇa ḇyemanfarandows rofanfan, nari ikofen faroi, rofyor manfamyan ḇyani ibur ker yaf ḇyedi: Rwama fasaw fa wanan! 8 Nari roḇa! Imboi nari ikofen faro manfamyan ani: Fes sifer ḇedi ma wuf faryan aya, isof yanan ma yinem ḇepon resari. Posa kwar insape wakanan ma wakinem. 9 Nari ikofen kasumasake faro manfyan ani snar ḇyeyuser roi ḇeḇor ḇyuk fa ifrur kwar anna? 10 Rarirya kako mko. Rofyor mkofrur roi ḇeḇor sefa mkofrur anna kam kwar, iḇye mkokofen: Nko ine manfyan ḇeḇe faindaba; ma nkofrur monda rosai nari nkofrur na." 11 Ro Yesus mararan ḇyedi ḇe Yerusalem, imbrasye yawek ḇeyawas Samaria ma Galilea. 12 Fafisu syun ro mnu oso, snon pado samfur srama sisrowi. Sores ḇinkwan 13 ma siyiw: "Yesus, Guru, waswar inko!" 14 Rofyor Yesus myamsi, ma ikofen: "Mkora mkofasna mko faro imam." Ma fafisu sisya kaker ro nyanya faduri, smam sisren ro dafduf sena. 15 Inja oso rofandusi myam iprei kwar, kyaḇer ma isandik Allah kuker mkaren ḇeba, 16 raimnai kyain wepur ro ḇarpon Yesus ma ikofen kasumasa faroi. Snon ani snon Samaria rirya. 17 Ḇarpurya Yesus ikofen: "Insaja snon samfur iso ḇesma parareya? Moḇ rosai snon risiw sisya roya? 18 Snaro snon mandaman ine monda kyaḇer ikofen kasumasa faro Allah?" 19 Raimnai Yesus ikofen faro snon ani: "Wores ma wabur. Snar kakyar bedi ḇyuk aski faro aw kwar." 20 Farisi ono sifuken faro Yesus, fafisu rosai Allah Ḇaḇesasoser ḇyedi nari ryamaya, Yesus kyarem, ma ikofen: "Allah Ḇaḇesasoser ḇyedi ryama kuker aḇyair ro snonkakuḇa, 21 isof snonkaku sikofen, ’Mkorama mkomam, isoine!’ roḇa, ’isya rodiwa!’ Snar kaku ḇeri Allah Ḇaḇesasoser ḇyedi isya rofandu mko." 22 Posa kwar Yesus ikofen faro manfamyan ḇyesi: "Nari fafisuya ryama, mkomarisen mkomam ras oso rofandu ras Rumkun Snonkakuya ḇyena, ḇape nari mkomam iba. 23 Ma nari snonkakusya sikofen faro mko: ’Mkomam, isya rodiwa!’ roḇa, ’Mkomam, isya rodine!’ Ḇape mkoramura awer, ma mkoso awer. 24 Snar imnis raris arḇeḇer, isamar ro madepya pember ine ḇe mandepya pember iwara, rarirya kuker ras raramuma ro Rumkun Snonkakuya ḇyedi. 25 Ḇape nari isma kandera nabor ḇepon resari ma nari syos ine simeweri. 26 Ro ras imnis raris roi ḇeḇesya ro awar ḇepon ro Nuh, rarirya kuker roi ḇeḇesya ro ras Rumkun Snonkakuya. 27 Nari sanan ma sinem, sfakawin ma siwafwofer, isof ras Nuh syun ro jawasiya, raimnai faḇruḇya ryama myunsi rao siḇro. 28 Rarirya kako kuker roi ḇeḇesya ro awar Lot: sanan ma sinem, sḇaḇoḇ ma skaḇkoḇes, skaker ma sḇaḇawes. 29 Ḇape ro ras Lot isasyarbur Sodom, mekem for ma mekem karui for ḇesabu ker nankiya myun presi. 30 Rarirya kako kuker roi ḇeḇesya ro ras Rumkun Snonkakuya fyasna mankundia. 31 Ro ras ani mansei isya ro rumya bori, ma roi ḇeḇor ḇyena naisya ro rumya dori, dado fa dun naba. Rarirya kuker snonkaku ḇekaker ro yaf, kyaḇer faro rum ḇyediḇa. 32 Mkoswarepen Lot swari! 33 Mansei ḇeḇesewar ḇemyof kenem ḇyedi, nari kenem ḇyedi ryoburi. Mboi mansei kenem ḇyedi ryoburi, ikada nari isma aski. 34 Yakofen faro mko: Ro roḇ ani snon risuru suyenef kam ro kamboi anenef oser, nari sun oser ma sibur suminya. 35 Bin risuru suisya suso pokem, nari sun oser ma sibur suminya." [ 36 Ma rofyor snon risuru suisya ro yaf, nari sun oser ma sibur suminya.] 37 Manfamyan ansi sifuken faro Yesus: "Moḇ rosai nari ndarirya, Manseren?" Yesus kyarem farosi: "Ro moḇ rosai aipyokem sisya, rodiwa manwawasya spanjuḇer kako."

18

1 Posa kwar, Yesus ḇyuk sarḇer oso fa ḇyefarkarkor faro manfamyan ḇyesi, insa simyaren senadi ḇesya kwar ma sfafayaf awer. 2 Yesus ikofen: "Ro mnu oso, Mankara oso imkak Allah ḇa, ma ipok ḇyefandun snonkaku syaḇa. 3 Ma ro mnu ani, bin kabom oso isya ryama ḇesya kwar faro mankara ani ma ikofen: Wafnoḇek aya fa wasrow kuker mbroḇ ayedi. 4 Fafisu riḇeso kwar mankara ani imewer. Ḇape rofafisu oso, ikofen ro sne ḇyedi: Aya ine yamkak Allah ḇa ma yaḇesyowi snonkaku ḇesesyaḇa. 5 Ḇape bin kabom ine ḇyeyayayu aya ḇesya kwar, inja iḇye kada yaḇuk kaku roi, insa ryamuma kaker awer, snar ifrur marmor aya mankenem." 6 Posa Manseren ikofen: "Mkokara rosai mankara ḇeḇarḇor ani ikofenya! 7 Nari Allah ḇyuk nanapes faro snonkaku kyinfir kwarsya, ma ḇeyori, ro roḇ meser syaḇake? Ma nari ḇyeuryar fafisu naḇo ifnoḇeksi ḇake? 8 Yakofen faro mko: Nari isamberen fa ḇyuk kaku farosi. Ḇape, rofyor Rumkun Snonkakuya ryama ido, nari isma kakyaro ro supswan ine kakerke?" 9 Yesus fyawar kako sarḇer ḇekur snonkaku ḇerun min sesya ma soḇo semir sinapes, Yesus ikofen sarḇer ine: 10 "Snonkaku risuru suraḇe Allah Rum ḇyedi fa suḇenadi; snon ansuya oso snon Farisi rirya, ma suminya snon ḇeyor som rirya. 11 Snon farisi ani dores ma ḇyenadi ro sne ḇyedi radine: O, Allah, yakofen kasumasa faro au, snar yamnis kuker snonkaku ḇese siyafa ḇa, snonkaku ḇefasyarḇa, ḇeḇarḇor ḇa, ḇefrur farbuk ḇa ma yamnis snonkaku ḇeyor som ine ḇa; 12 Yafyorḇe suru ro ari swaf oser, ma yaḇuk rarwas ḇar ḇeḇe samfur ro roi ḇeḇor ayena kam. 13 Ḇape snon ḇeyor som ani dores ḇinkwan ma kyankunem, posa pyanepen ander ḇyedi ma ikofen: O, Allah, waswar snonkaku ḇesasar aya ine. 14 Yakofen faro mko: Snon anine iburḇe rum ḇyedi kuker napnapes isma ro Allah, ḇape snon Farisi anyama roḇa. Snar mansei ḇeyow mankundi ido, nari ḇyeḇerun ma mansei ḇerun mankundi ido, nari ḇyeḇekanow." 15 Sinan ono sun romawa kapirare sesya faro Yesus, insa ḇyeḇoksi. Ḇape manfamyan ḇyesi smam mura ido, sisonek snonkaku ansi. 16 Fama Yesus dorsi ma ikofen: "Mkorir romawa ansi insa srama ḇe aya, mkodwarek awersi, snar snonkaku ḇera dinesya siso ḇena Allah Ḇaḇesasoser ḇyedisya. 17 Yakofen faro mko: Kuker kaku ḇeri mansei ḇeseref Allah Ḇaḇesasoser ḇyedi imnis romawa kapirareḇa ido, nari ipok fa daksun roiḇa." 18 Snon manfarkin oso ifuken faro Yesus, ḇo doḇo: "Guru ḇeḇye, rosai nari yafrur insa yaksma kankenem fyoro-fyoroya?" 19 Yesus kyarem: "Rosai ḇeḇewar wor ayaḇe ḇeḇyeya? Snonkako osero fa iḇye ḇaḇeri, demir monda Allah. 20 Wafawi Allah sasoser ḇyena kam kwar: ’Wafrur farbuk awer, wasararer awer, mamun awer, besyowi snami ma kmam su.’ " 21 Snon ani ikofen: "Nane kam yaḇeuser na kwar, rofyor yababoya isof ras ine." 22 Yesus imnaf rarirya ikofen faroi: "Ḇape roi oser isya kaker fa nari wafrurya: boḇ pres nana benakada ma warwas na faro ḇesaḇararsya, rarirya nari wakna nana ḇero boiyaswa, posa rwama waso aya." 23 Rofyor snon ani imnaf wos ani, iwarai snar snon ḇenana rirya. 24 Raimnai Yesus myami ma ikofen: "Syamswen fafayaḇa, faro snon ḇenanasya saksun ro Allah Ḇaḇesasoser ḇyedi. 25 Snar ipyan syadi faro onta oso syun ro mbraifun mkir ḇebaḇa, ro snon ḇenana ḇesewar fa ḇesun ro Allah Ḇaḇesasoser ḇyedi." 26 Ma ḇemnaf ansi sikofen: "Rarirya ido, mansei nari ḇesma koreriya?" 27 Yesus ikofen: "Rosai snonkaku sipok ḇaḇeri fa sifrur na, Allah kada ifrur na." 28 Petrus ikofen: "Nkoine nkobur roi ḇeḇor inkoḇena kam ma nkoso au." 29 Ḇape Yesus ikofen farosi: "Kaku ḇeri, yakofen faro mko, snonkaku mansei ḇebur rum ḇyedi, swari, roḇa naek srar ḇyesi, sinan ḇyesi roḇa romawa ḇyesi, snar Allah Ḇaḇesasoser ḇyedi, 30 nari isma kaḇer sasuref pararyur, rofafisu ine beri kako ma ro awar ḇeramumaya nari isma kankenem fyoroya." 31 Yesus dor manfamyan samfur seser risuru ḇyesya, ma ikofen farosi: "Insape koraḇe Yerusalem ma roi ḇeḇor nabisya sfas fa ḇekur Rumkun Snonkaku ani nari namnis. 32 Snar nari sḇoḇi faro er-er ḇeyakfawi Allah ḇa, ma skoryaye i, sonef i ma saninef i, 33 ma siprer i ma smun i, ma ro ras ḇeḇe kiorya nari diḇeri wer." 34 Ḇape roi ikofen anna, sifawi osero ḇaḇeri, snar kankunes ro wos anna nayokef farosi ma sifawi roi kyara ḇesyan naḇa. 35 Rofyor Yesus fyanam fa syuḇer ro Yerikho, snon ḇepraf oso kyain ro sampak andirya ma fyararyor. 36 Rofyor snon ani imnaf kawasa ḇeḇor ansi sunuk, inja ifuken: "Rosai sifrurya?" 37 Snonkaku sikofen faroi: "Yesus snon Nazaret ani ḇeyunukya." 38 Inja dor: "Yesus, Rumkun Daud, waswar aya!" 39 Inja ḇembran ro ḇarponsya sewefi, insa ḇyefasis. Ḇape dor naba syadi wer: "Rumkun Daud, waswar aya!" 40 Inja Yesus imnai ma iwan fa sun snon ani faroi. Ma rofafisu fyanam faroi kwar, Yesus ifuken i: 41 "Rosai wamarisen insa yafrur faro aw?" Snon ani kyarem: "Manseren, yamarisen kaku yamam wer!" 42 Raimnai Yesus ikofen faroi: "Rarirya ido mame, snar kakyar bedi ḇyuk aski faro aw kwar!" 43 Ma rofafisu ani beri myame, inja iso Yesus ḇo isandik Allah. Kawasa ḇemam roi ḇeḇesya ani kako sisandik Allah.

19

1 Yesus syun ro mnu Yerikho ma imbran pdef fa dunuk mnu ani. 2 Rodia snon oso isya snonsnon ḇyedi Zakheus, mananir ḇeyor som, ma snon ḇenana rirya. 3 Ḇyesewar kaku insama dakmam snon sapḇe Yesus ani, ḇape snar snonkakusya sibor siyari isof ipok dakmamiḇa, snar ḇaken ḇyedi ikakiḇa. 4 Inja ifrar ḇepon bur snonkaku ḇeḇor ansi, raimnai dek ro ara knam oso insa dakmam Yesus, nari ḇeyunuk rodia. 5 Fafisu Yesus dunuk ro moḇ ani, myamḇe bo ma ikofen: "Zakheus, wasabu fasaw, snar ras ine yaḇeryar ro rum bedi." 6 Rarirya Zakheus isabu fasaw ma isrow Yesus kuker raryaḇ ḇefnakḇa. 7 Ḇape snonkaku ḇemam roi ḇeḇesya ani sikam sisuremi ma sikofen: "Ḇyeryar ro snonkaku ḇesasarsya rum sena." 8 Ḇape Zakheus iyori ma ikofen faro Manseren: "Manseren, rarwas ro nana ayena, nari yaḇuk na faro snonkaku ḇesaḇararsya ma rofyor yun syadi roi ono ro snonkaku onoido nari yakaḇer na ḇe rarwan rifiak." 9 Yesus ikofen faroi: "Ras ine askiya isya kwar faro rum ine, snar snon ine kako romawa Abraham ḇyedirya. 10 Snar Rumkun Snonkakuya ryama insa syewar ma ḇyuk koreri faro snonkaku ḇeborsya." 11 Yesus dawos pdef wos ḇyena faro ḇemnafi ro diansya, kuker wos sarḇer oso, snar fyanam kwar ḇe Yerusalem ma kawasa ansi skara ḇo soḇo nari Allah Ḇaḇesasoser ḇyedi ifyafer fasaw. 12 Inja ikofen: "Snonkaku ḇena mnu oso ryaḇe mnu ḇeḇinkwan insa sisiḇeri fa ḇye wairek ro diya, posa kyaḇer. 13 Inja dor manfamyan ḇyesi snon samfur, ma ḇyuk pipi brawen samfur farosi ma ikofen: ’Mkoḇuk pipi sine sfarḇaḇyan rawo isof yakaḇer.’ 14 Ḇape snonkaku er ḇyesi sayin i, inja siwan wawan ono fa siyawuseri ma sikofen: ’Nkomewer snonkaku ine ḇye wairek faro nko.’ 15 Inja sisiḇeri ḇe wairek raposa kyaḇer ma ḇye wairek, iwan fa sor manfyan ḇyesi, ḇesma pipi kwar ansi, insa sikofen ḇayir barbor ro pipi sisma ro farḇyan sedi oser-oser fa dakfawi. 16 Inja snon ḇeponya ikofen: ’Tuan, pipi brawen oser yasma ro aw kwar ani, ḇyuk barbor pipi brawen samfur.’ 17 Ikofen faro snon ani: ’Iḇye kaku ro fararur bedi, aw manfyan ḇeḇye; wanapes ro roi kasun, inja wasma nasan fa wuf sasoser ro mnu samfur.’ 18 Snon ḇeḇe suruya ryama ma ikofen: ’Tuan, pipi brawen yasma ro aw kwar ani, ssḇuk barbor pipi brawen ririm.’ 19 Ikofen faro snon ani: ’Ma aw kako, wuf nasan ro mnu ririm.’ 20 Ma manfyan ḇeḇe kiorya ryama ikofen: ’Tuan, pipi brawen banya isine, yakrami ro marḇunya. 21 Snar yamkak tuan aw, snar yafawi tuan snonkaku ḇepakrek; inja wun roi ḇeḇor wapok rwirḇa ma tuan wuf rosai kwerḇa.’ 22 Inja ikofen faro snon ani: ’Aw manfyan ḇeḇarḇor, nari yaḇe mankara aw, raris mankundaw wos ḇena. Wafawi kaku aya ine snon ḇepakrek, ma ḇeyun roi ḇeḇor yapok yarirḇa, ma ḇeyuf rosai yakerḇa. 23 Rarirya ido, rosai ḇeḇewari rwir pipi ayedi ro snonkaku ḇefarḇyan pipi insa yakaḇer ido, yun pampen ḇyediḇa kukerya?’ 24 Raimnai ikofen faro snonkaku ḇeyores ro diansya: ’Mkun pipi brawen oser ani buri ma mkoḇuki faro snon ḇena pipi brawen samfur ani.’ 25 Inja sikofen: ’Tuan, nya pipi brawen samfur kwar.’ 26 Ḇape kyarem: ’Yakofen faro mko: Snonkaku mansei ḇesma ido, faroi nari ssḇuk wer, ḇape mansei ḇesmaḇa ido, nari sun rosai ismana buri. 27 Mboi faro ḇemsor aya ma ḇemewer yaḇe waireksya, mkunsi muma ma mkomunsi ro ḇarpon ayedi.’ " 28 Yesus dawos raposa, pyonsi ro maran ḇyedi ḇe Yerusalem. 29 Fafisu fyanam ḇe Betfage ma Betania, ḇekain ro bon ḇenirḇe urek Zaitun, iwan manfamyan ḇyesi snon risuru. 30 Kuker ananun: "Muraḇe mnu ḇero ḇarpon muḇediwanya: ’Ma rofyor musun ro diwa, nari musrow keledai kuḇ babo oso sfesi, ma snonkakuyo deki ḇayim. Muper keledai ani ma muyuni muma.’ 31 Ma rofyor snonkaku oso ifuken faro mu rosai ḇeḇewari muperiya? Nari mukarem radine: ’Manseren ḇyefanduni.’ " 32 Inja manfamyan ansuya sura ma susrow roi ḇeḇor anna raris moḇ Yesus ikofen raya. 33 Fafisu super keledai ani, snonkaku ḇena keledai ani ifuken: "Rosai ḇeḇewari muper keledai iya kukerya?" 34 Sukarem: "Manseren ḇyefanduni." 35 Inja suyun keledai ani faro Yesus, raima sḇori kuker sansun sena ma sifnoḇek Yesus fa dek roi. 36 Ma fafisu Yesus dek ro keledai ani, sḇor sansun sena ro nyanya. 37 Fafisu fyanam Yerusalem, ro nyan ḇeyado ro urek Zaitun, manfamyan ḇyesi ma ḇeyakeri ansya kam simarisen ma sisandik Allah kuker mkaren ḇeba snar aḇyair kanandor smam kwar na. 38 Sibras ma sikofen: "Ḇaḇeḇok faroi ḇeramuma imnis Wairek kuker snonsnon Manseren, aski ro boiyaswa ma syom faro Allah ro moḇ ḇekaki syadi!" 39 Farisi ḇeyakso kuker snonkaku ḇeḇor ansya sikofen faro Yesus: "Guru, wasonek manfamyan besine." 40 Yesus kyarem: "Yakofen faro mko: Rofyor sefasis ido, nari karui nane nabras." 41 Ma fafisu fyanam kwar ma myam mnu ani, kyanesi, 42 ḇo doḇo: "Sye iḇye syadi ro ras ine kako wafawi rosai ḇeyun aski faro aw. Ḇape insape roi ḇeḇesya ani iyokef ro mkomkamna. 43 Snar rasya ryama ido, nari mbroḇ besi siyar warek aw kuker ayar mamun ma soper aw ma sfasyar aw, 44 ma nari simkok aw fnoḇek kawasa besi ma arsen bedi karui oso kyon ro karui oso boriḇa, snar wafawiḇa fafisu rosai Allah ryakaki awya." 45 Raimnai Yesus syun ḇe Allah Rum ḇyedi, ma iyaw kawasa ḇefarḇaḇyan ro diansya, 46 ma ikofen farosi: "Sfar kwar ḇo soḇo: Rum ayeja ma rum nadi rirya. Ḇape mkofruri raris narem ḇefasyar monda." 47 Ro ras nakam, ḇyuk farkarkor ro rum ariya dori. Inja mananir-mananir Imam ma ḇefawinananem Refo Yahudi ma snonkaku ḇeḇe snonsnon ro er Israelsya sḇesewar fa smuni 48 ḇape sifawiḇa, nyan rosai ssḇuki myuni, snar kawasasya kam siryaḇi, ma simarisen simnafi.

20

1 Ro ras oso Yesus ḇyuk farkarkor faro kawasa ḇeḇor ro Allah Rum byedi ma ḇyaryas Ankankinem Ḇeḇye, mananir imam-imam ma ḇefawinananem Refo Yahudi fnoḇek ḇebararasya srama, 2 ma sikofen faro Yesus: "Wakofen ḇadir papoik rosai buki ifrur roi ḇeḇor anna ma mansei ḇeḇuk papoik ani faro aw!" 3 Yesus kyarem farosi: "Aya kako nari yaḇuk fakfuken oso faro mko. Mkokofen maro aya: 4 Masasi Yohanes ḇyani, ryama ker boiyaswake ryamaker snonkaku?" 5 Inja skara ro mankunsi ma sikofen: Rofyor koḇe: Ryamuma ro boiyaswa, nari ikofen: Rosai ḇeḇewari mkokyarḇa? 6 Oroḇaido koḇe: Ryamaker snonkaku, nari kawasa sine sfarmun ko kuker karui, snar sifawi kaku, Yohanes nabi rirya. 7 Raimnai skarem, nkofawi moḇ masasi ani ryamuma royaḇa. 8 Yesus ikofen farosi: "Rarirya ido, aya kako yakofen faro mkoḇa kuker papoik rosai yaḇuki ifrur roi ḇeḇor annaya." 9 Raimnai Yesus ikofen sarḇer ine faro snonkaku ḇeḇor ansi: "Snon oso isya ḇyas yaf anggur oso; posa ḇyuk yaf ani faro snon ḇefararursya raimnai ryaḇe sup ḇese rofafisu fyoro kaku. 10 Ma rofafisu mamaremya ryama, iwan manfyan ḇyesi oso faro ḇefararur ansya, insa ssḇuk rarwas ro anggur bon anna faroi. Ḇape ḇefararur ansi siprer manfyan ani ma siwani fa ibur beidi. 11 Inja iwan manfyan oso ḇese wer, ḇape manfyan ani sipreri ma skoryayei, raimnai siwani fa ibur beidi kako. 12 Inja iwan manfyan ḇeḇe kiorya, ḇape smuni isof ḇyeparpar, posa sisaweni ro yafya ḇandiri. 13 Inja tuan ḇena yaf anggur anine ikofen: Rosai nari yafrurya? Nari yawan romawa yaswar ani; snar ikada nari sesyowi i. 14 Ḇape fafisu ḇefararur ro yaf ansi smam romawa ḇyani, sna wosi, ma sikofen: I ḇeḇeknam yaf anggur ine, mkorama komuni, insama yaf anggur ḇyedine konai. 15 Inja smuni ma sisawen i ḇe yaf anggur ani ḇandiri, insape rosai nari tuan ḇena yaf anggur ani ifrur faro siya? 16 Nari ryama ma myun pres si, ma ḇyuk yaf anggur ani faro ono ḇese." Simnaf raririrya inja sikofen: "Rarirya awer!" 17 Ḇape Yesus myamsi ma ikofen: "Rarirya ido, kankunes rosai ḇero mnuk ineya: Karui kamasan ḇeḇaḇawes ansi sisawen kwar, iso nari ḇeḇe karui kakyarya. 18 Mansei ḇesapi ro karui ani, nari ḇyekiskis, ma mansei karui ani kyamepenya ido, nari ḇyefafen." 19 Inja ḇefawinananem Refo Yahudi ma mananir imam sḇesewar fa sfor Yesus ro fafisu ani kako, snar sifawi, mboi siso ikofen ro sarḇer ani, ḇape simkak kawasa ḇeḇor ansi. 20 Ḇefawinananem Refo Yahudi ma mananir imam-imam sḇayir Yesus. Siwan manpan ono faro Yesus ma sifrur mankunsi ḇe snonkaku ḇenapes, insa sidenem i kuker fakfuken oso ma ssḇuki faro Gubernuri. 21 Snonkaku ansi sifuken: "Guru, nkofawi wos ma farkarkor ḇena kam nanapes, ma mamkaryerḇa, mboi buk farkarkor ḇenapes ro Allah nyan ḇyena. 22 Inja nari nkoḇak som faro Kaisarke, roḇa?" 23 Ḇape Yesus ifawi swaruser mandaw sena, inja ikofen farosi: 24 "Mkofasna dinar osoma ro aya: fanir ma fasfas mansei ḇeroiya?" Skarem: "Kaisar." 25 Raimnai Yesus kyarem farosi: "Rarirya ido mkoḇuk faro Kaisar rosai nari mkoḇuk faro Kaisar ma faro Allah rosai nari mkoḇuk faro Allah!" 26 Inja sipok fa sidenem iba snar sikandor kankarem ḇyena ro ḇarpon kawasa ansi, inja sefasis. 27 Snon Saduki ono sra fa sisrow Yesus, snar sima sikyar faro ḇaḇawesya ḇa. Inja sifuken faroi: 28 "Guru, Moses fyas sasoser ine maḇe inko, ḇo doḇo: Rofyor snon oso, imar ma isma romawaḇa ido, nari naek ḇyeja ḇyekawin swari insa ḇyuk romawayo faro naek ḇyani. 29 Manbekanaek rifik sisya. Ḇeponya ḇyekawin kuker bin oso raimnai imar ḇape isma romawaḇa. 30 Inja ḇeḇesuruya ḇyekawin bin ani, 31 ma ḇeḇekiorya rarirya pdef isof ḇeḇefikya, simar kam ma sna romawaḇa. 32 Ḇarpurya bin ani kako dakmar. 33 Rariso kuker bin ani, mansei rofandu snon ansi ḇeḇeswa faroi ro ras aḇiḇerya? Snar skoḇe fik skofakawin kam kukeri kwar." 34 Yesus kyarem farosi: "Snonkaku rofafisu ine ro supswan inesya sḇekawin ma sfakawin si, 35 ḇape faro snonkaku skara ḇesyus fa ḇesma rarwas ro supswan ḇese ani ma ro aḇiḇer fandu snonkaku ḇemarsya, sḇekawin ḇa ma sfakawin siḇa. 36 Snar nari simar werḇa; imboi simnis kuker malaikat-malaikat ma seromawa Allah, snar sḇeḇeḇawes kwar. 37 Ro mnuk snonkaku ḇemarsya siḇer si, Moses ikofen ḇadir kwar ro mnuk manuk borek, ro moḇ rosai sap Manseren ḇe Allah Abraham, Allah Ishak ma Allah Yakub. 38 Inja Allah ḇye Allah faro snonkaku bemarsya ḇa, ḇape ḇye Allah faro snonkaku ḇekenemsya, snar snonkaku syakam nari sikenem ro ḇarpon ḇyedi." 39 Simnaf rarirya snonkaku ḇefawinananem Refo Yahudi ono sikofen: "Guru, kankarem bedi imnis kaku." 40 Rarirya simku fa sifuken roi ono ro Yesus wer ḇa. 41 Ḇape Yesus ikofen farosi: "Rariso snonkakusya soḇo, Wairek ḇeḇuk koreri (Mesias) ikada Daud romawa ḇyedirya? 42 Snar Daud mankundi ikofen ro syap Mazmur ḇo doḇo: Manseren ikofen faro Manseren yedi; kwainkada ro ḇar raku yedi; 43 isof yaḇe mbroḇ besi fa seararef ro wemsu. 44 Inja Daud dapiḇe Manseren ḇyedi, rariso nari ḇye romawa faroi wer?" 45 Fafisu snonkaku ḇeḇor ansi simnaf Yesus ikofen faro manfamyan ḇyesi: 46 "Mkoḇe sasor mko ro ḇefawinananem Refo Yahudi ḇesansun syatu ḇekwan ḇo ḇemarisen ḇembran ḇeḇesewar syom ro buḇes (pasar) ḇemarisen ḇekain ro ḇarpon ro rum ari ma moḇ sisma syom ro munara, 47 ma ḇeyoren pekwam kabomsya rum sena, ḇepanwarek kawasa simkasna kuker nadi ḇekwan sena. Nari sisma samamyai ḇemarḇak syadi."

21

1 Rofafisu Yesus isya ro Allah Rum ḇyedi myam snonkaku ḇenanasya srir farsarser sena ro burua farsarserya. 2 Myam kako bin kabom ḇesaḇarar oso dakrir remis risuru ro burua farsaser ani dori. 3 Inja ikofen: "Yakofen faro mko, kaku ḇeri bin ḇesaḇarar ine ḇyuk farsarser sibor syadi ro kawasa ansine kam. 4 Snar sikam ssḇuk ro farsbawer sena, ḇape kabom ine syaḇarar rariso kako ḇyuk ro nana ḇyena kam, ḇeḇefandun ro kankenem ḇyedi." 5 Ro fafisu snonkaku ono sawawos ro roi ḇekur Allah Rum ḇyedi ma smander ḇaḇaus ḇeḇesya ani, ḇyeḇefrur kuker karui ḇepyum ma roi ḇeḇor ssḇuki fyarser faro Allah, inja Yesus ikofen farosi: 6 "Rosai mkomam ḇesya ro dia -- nari rasya isyama, karui oso ipok ḇyarek ro karuiyo boriḇa; nakam nari neḇekakok." 7 Ma manfamyan ḇyesi sifuken faroi, ḇo soḇo: "Guru, rofafisu saiso nari roi ḇeḇor nane nesyanya? Ma abyair saiso, ḇefasna rofafisu ndariryana?" 8 Yesus kyarem: "Mkofasos insa seankar mko awer. Snar snonkaku sibor nari srama sap snonsnon ayedi ma sikofen: Ayai rya, ma fafisuya fyanam kwar. Mkoso awersi. 9 Ma rofyor mkomnaf roi sawos ro mbroḇ ma mbriwer mko kandor awer. Snar nakam nari ndarirya ḇepon ḇape nfasna ras ḇepupesya nari ryama fasawya isya ḇaim." 10 Ikofen farosi: "Er oso nari ḇyembroḇ ma isampum er ḇese ma ḇaḇesasoser oso nari ḇyembroḇ ḇaḇesasoser ḇeseya, 11 ma rim ḇeba kaku nari myun ma ro moḇ nabor dafduf kapyowi ma basbiser isya, ma nari roi ḇefrur kanandor naisya kako ma aḇyair-aḇyair ḇeyun nyawa nari nfasna ro nanki. 12 Ḇape roi ḇeḇor nane naisya ḇaim nari sfor mko ma sewayammko; nari skukeḇ mko ro rum nadina ma mkosun ro bui, ma nari sun mkoḇe ḇarpon kankain wairek-wairek ma ḇesma papoik sya snar snonsnon ayedi. 13 Inja roi nane nefafisu faro mko fa mkoḇuk ḇaryas Ankankinem Ḇeḇye ro Allah. 14 Inja mkoswarepen naḇye ro mkosnemna insa mkokara ḇepon awer sano faro mko. 15 Snar mankundaya nari yaḇuk faro mko fawawi ro wos, isof mbroḇ mkoḇesi sipok sisampum mkoḇa. 16 Ma sinan mkoḇesi, ma naek, kina, ma bati mkoḇesi sḇoḇ mko isof ono rofandu mko nari seḇemun, 17 ma snonkakusya kam sayin mko snar snonsnon ayedi. 18 Ḇape snonburyam osero ro mkoḇrumna ipok nari ryoḇa. 19 Rofyor mkores nako, nari mkosma kankenem mkoḇena." 20 "Rofyor mkomam sordade-sordadesya saiwarek Yerusalem ido, irya mkofawi beri, makakok ḇyedi fyanam kwar. 21 Rofyor ani snonkaku ro Yudea sifrar sibur be bon, ma snonkaku ro Yerusalemsya kako iḇye sfaryane, ma snonkaku ro mnuya ḇandirisya ssun awer ḇe Yerusalem, 22 snar irya fafisu mamunsuya imnis kwar ro roi ḇeḇor kam sfas kwar ro Refo. 23 Ras ani ifrur kandera fafayaḇa faro bin ḇemoḇesḇa ma ḇesasus sya! Mnu ine nari isma kandera ḇeba kaku ma Manseren nari ḇyuk samamyai faro er ine, 24 ma nari seḇemun kuker sumber ma er ansi sunsi ḇe women faro er ḇeḇor kam ma er ḇefawi Allah ḇasya nari saref apepen Yerusalem, isof fafisu er ansi sedi imnis." 25 "Ma nari aḇyair-aḇyair ono naisya ro ori, paiki ma maksya, ma er-er ḇero supswan inesya kam nari simkak ma sikmom rakrok maum ma raryoi ro sorenya. 26 Snonkakusya nari skarsosen rawo siḇe simar, snar makakakya ro roi ḇeḇor ḇemun supswan ine, snar samambraḇ ro nanki nari namarmer. 27 Rofafisu ani snonkakusya smam Rumkun Snonkakuya nari ryama ro mandep kuker papoik ma payamyum ḇyena. 28 Rofyor roi nanekam ndarirya, mkokanaw mkoḇrumna, snar kniko monda mkosma koreri." 29 Raimnai Yesus ikofen sarḇer ine farosi: "Mkomam epen ara knam roḇa ai knam rosairyawer. 30 Rofyor mkomam ai knam anna nkakyei kwar, mkofawi ro mankun mko irya wampasi samsamya fyanam kwar. 31 Rarirya kako, rofyor mkomam roi ḇeḇor anna ndarirya ido, irya mkofawi Allah Ḇaḇesasoser ḇyedi fyanam kwar. 32 Yakofen faro mko: Kaku ḇeri syos ine nari simar kam baim rofyor roi ḇeḇesya nane ndarirya. 33 Nanki ma supswan ine nari napromes, ḇape wos ayena nkain nako isof fyoro-fyoro." 34 "Mkowaren mankun mko, insa mkosnemna nafo awer kuker swaruser munara ma masaser ma fandun-fandun ro kankenem mkoḇena, imbude Manseren ras ḇyedi ifyafer kanandor mko imnis denem oso. 35 Snar ras ani imnis denem ḇefor snonkaku ḇekain ro supswan ine. 36 Mkowaren ma mkoḇenadi ḇesya kwar, insa mkosma sambraḇ fa mkoḇukfaspar mko ro roi ḇeḇor ḇeḇesya anna, ma mkores nako ro ḇarpon Rumkun Snonkakuya." 37 Ro meser na Yesus ḇyuk farkarkor ro Allah Rum ḇyedi ma ro roḇ na isasyar fa denef ro urek Zaitun. 38 Ma arwo na snonkaku ḇeḇor ansya kam sraḇe Allah Rum ḇyedi fa simnaf Yesus farkarkor ḇyena.

22

1 Ras ḇeba Mamami Ḇepisenḇa, snirḇe Paskah ani fyanam kwar. 2 Mananir-mananir imam ma ḇefawinananem Refo Yahudi ssewar nyan rosai sisma fa smun Yesus, snar simkak kawasa ḇeḇor ansi. 3 Ḇarpurya Ibirisya syun ro Yudas ḇenir kakoḇe Iskariot, snon oso ro Yesus manfamyan samfur seser risuru ḇyesi. 4 Raimnai Yudas ryafa isrow mananir-mananir imam ma mananir-mananir ḇewaren Allah Rum ḇyedi fa sna awi, rariso nari ḇyoḇ Yesus farosi. 5 Simarisen fafayaḇa ma sna sne oser fa ssḇuk pipi faroi. 6 Yudas imarisen inja syewar fafisu ḇeḇye fa ḇyoḇ Yesus farosi insa kawasa ḇeḇor ansi sifawi awer. 7 Ma ras ḇeba Mamami Ḇepisenḇa, (mamami ḇefawnai kuker murḇa) isoine ras rosai snonkakusya skaruk domba faro munara Paskahya. 8 Raimnai Yesus iwan Petrus ma Yohanes, ḇo ikofen: "Mura mufasos nanan Paskah faro ko." 9 Sufuken faroi: "Moḇ rosaiso wamarisen nkofasos roya?" 10 Kyarem, doḇo: "Rofyor musun ro mnuya nari musrow snonkaku ḇeyun war ro fyom oso musoi ḇerum syun roya, 11 ma mufuken faro ḇena rumya: Guru ifuken aw: sim rosaiso nari yan Paskah kuker manfamyan ayesi roya? 12 Raimnai snon ani nari fyasnai faro mu sim ḇeba oso ro syos ḇero bo ḇefasos kwar, inja mufasos roi ḇeḇor kam ro dia." 13 Inja sura kwar ma susma roi Yesus ikofen faro su anna kam. Raimnai sufasos Paskahya. 14 Fafisuya ryama kwar, ma Yesus danan kuker manwawan ḇyesi. 15 Ikofen farosi: "Yaswar kuf kaku yan Paskah fnoḇek mko, rofyor yasun ḇaim ro ḇaḇewayamya. 16 Snar yakofen faro mko: mko kyare, nari yakani werḇa isof fafisu Allah Ḇaḇesasoser ḇyedi ifyafer." 17 Ḇarpurya dun sek aninem ma ikofen kasumasa posa, ikofen: "Mkuni ma mkorarwas fandu mko. 18 Snar yakofen faro mko: randak ro knikine, nari yinem anggur werḇa isof Allah Ḇaḇesasoser ḇyedi ifyafer." 19 Raimnai dun mamami, ma ikofen kasumasa posa pyanasnis na ma ḇyukna farosi, ḇo ikofen: "Inekada kraf ayedi ḇyeḇeḇoḇ kwar faro mko; mkofrur radine fa mkoswarepen aya." 20 Rarirya kako ifrur kuker sek aninem ani rofyor sanan kwar; raimnai ikofen: "Sek aninem inekada asas babo ro rik ayena ḇesbawer kwar snar mko. 21 Ḇape mkomame, ḇramin ḇeḇoḇ ayanya isya kuker aya ro meja ine. 22 Snar Rumkun Snonkaku nari rya imnis raris asasya moḇ ryaya, mboi kandera ḇeba faro snonkaku ḇeḇoḇ ayanya." 23 Raimnai sifuken yaesi mansei rofandusi nari ḇefrur rarirya. 24 Yesus manfamyan ḇyesi sfamfaḇri, mansei ro si ḇeba syadiya. 25 Rarirya Yesus ikofen farosi: "Wairek-wairek ro ersya ssḇuk sasoser faro kawasa sesi ma ḇebarara-ḇebarara sya ssḇuk papoik sena nsoser si sapsi ḇemanfadiren. 26 Ḇape mkoma rariryaḇa, mboi ḇeba syadi ro mko ryun mankundi fa ibaḇa syadi ma manfarkinya imnis ḇeyuffarmyan. 27 Snar mansei ḇeba syadiya: ḇekain ḇeyananke, roḇaido ḇeyuffarmyanyake? Mboi ḇekain ḇeyananya? Ḇape ayaisya fandu mko imnis ḇeyuffarmyan. 28 Mkoiso ḇekain fnoḇek aya ḇesya kwar ro fafrowes ḇeḇor yasma kwar. 29 Ma yafasna Papoik Ḇaḇesasoser Allah faro mko, imnis Mami fyasna Papoik ani faro aya, 30 mboi nari mkanan ma mkinem ro meja oser kuker aya ro Ḇaḇesasoser ayedi, ma nari mko kain ro karapesa nasan fa mkokara keret samfur seser risuru ro er Israel. 31 Simon, Simon, mame, Ibirisya imarisen ryas mko imnis fasibu, 32 ḇape yaḇenadi kuker aw kwar, insa kakyar bedi isapi awer. Ma aw, rofyor mambir kwarido, swambraḇser naek besi." 33 Petrus kyarem: "Manseren, yafasos fa yasun bui ma yamar fnoḇek au!" 34 Ḇape Yesus ikofen: "Yakofen faro aw, Petrus, ras ine mankokosya sor ḇaim, famyun ayaḇe kior kwar." 35 Raimnai ikofen farosi: "Fafisu yawan mko ani, mkun mansripḇa, roi ḇeḇaryamḇa ma roiḇesower weminḇa, rofafisu ani mkananjar royoke?" 36 Skarem: "Nkananjar royoḇa." Yesus ikofen farosi: "Ḇape baboine mansei ḇesma mansripo duni, rarirya kako kuker ḇesma roi ḇeḇaryam; ma mansei ḇesma sumberḇa ḇyoḇ syatu ḇyedi fa ḇyuki kyoḇes sumber. 37 Snar yakofen faro mko, mboi mnuk ro Refo ine imnis fa kyur aya: Nari ḇyeḇekor fnoḇek snonkaku ḇeḇarḇorsya. Snar rosai ḇefas kwar fa ḇekur aya nabe namnis." 38 Sikofen: "Manseren, sumber risuru suisne." Kyarem: "Imnis kwar." 39 Raimnai isasyar ro Yerusalem ma ryaḇe urek Zaitun. Manfamyan ḇyesi sisoi kako. 40 Skora kwar ro moḇ ani ikofen farosi: "Mko ḇenadi insa mkosapi awer ro fafrowes." 41 Raimnai imbran swaf bursi, posa kyain wepur ma ḇyenadi, doḇo: 42 "O Mami, rofyor wamarisen ido, kandera ḇekur aya ine wuni bur aya, ḇape Mami waso marisen ayedi awer, mboi marisen bedi ryarirya mura." 43 Ma malaikat oso ro nanki fyasnai faro Yesus ma ḇyuk samambraḇ faroi. 44 Imkak mankenem inja ḇyenadi kuker sneri ḇesiper. Sayan ḇyena namnis rik paporem ma nadaf ḇesaprop. 45 Ḇyenadi posa kwar iyori ma kyaḇer faro manfamyan ḇyesi, ḇape isrow sisya senef snar siswar mankenem Yesus. 46 Ikofen farosi: "Mkenef snaro? Mkokḇoke ma mkoḇenadi, insa mkosapi awer ro fafrowesya." 47 Rofyor Yesus dawawos kaker rak oso ryama, ma manfamyan ḇyesi ḇenir ḇe Yudas, oso rofandu manfamyan samfur seser risuru ḇyansi pyon rak ani. Yudas isnefer Yesus fa isyumi. 48 Ma Yesus ikofen faroi: "Yudas, boḇ Rumkun Snonkakuya kuker syumke?" 49 Rofyor ḇeso Yesus insya, smam rosai nari ḇeḇesyanya ma sikofen: "Manseren, iḇye komunsi kuker sumberke?" 50 Ma oso rosi doper ma pyapekbas Imam Ḇeba manfyan ḇyesi oso knaram ḇar raku kuker sumber. 51 Ḇape Yesus ikofen: "Iḇye kwar mura." Raimnai duf snon ani knaram ḇyani ma pyom iwer. 52 Ma Yesus ikofen faro mananir-mananir imam ma mananir ḇewaren Allah Rum ḇyedi ma ḇebarara-ḇebarara Yahudi ḇerama ḇeforisya, doḇo: "Kakara mkoḇena aya ine yaḇarḇorke, indiriso mkorama kuker sumber ma karbere fa mkofor aya? 53 Mboi mkofawi ras-ras nakam ayaisya rofandu mkoḇena ro Allah Rum ḇyedi, mboi mkofor ayaḇa. Ḇape ine fafisu mkoḇeirya, ma ineido papoik ro pampanya." 54 Raimnai Yesus ḇyeḇefor ma suni ro moḇ ani ma siyakeri ḇe Imam Ḇebaya rum ḇyedi. Ma Petrus iyomuser ro ḇarpur. 55 Ro buḇes ro rum ani snonkaku sikaḇen for ma skain yar-yari. Petrus ikako kyain fandusi. 56 Infyan oso myam Petrus kyain fanam forya; iknoweri raimnai ikofen: "Snon ine kako dakfnoḇeki." 57 Ḇape Petrus fyamyun ḇo ikofen: "Roḇa, aya ine yafawi snon ani ḇa!" 58 Fyoro werḇa snonkaku oso ḇese myami ma ikofen: "Au kako oso rosi!" Ḇape Petrus ikofen: "Roḇa, ayama roḇa!" 59 Ma indokada oras ḇesiper oser posa, snon oso ḇese ikofenbos faroi: "Kaku ḇeri, snon ine kako dakfnoḇeki, snar ikako snon Galilea." 60 Ḇape Petrus ikofen: "Roḇa, aya ine yafawi roi wakofenya ḇa." Rofafisu ani kako, rofyor isya dawos kaker, mankoko rawersya sore. 61 Raimnai Yesus iknenef ma myam Petrus. Inja Petrus iswarepen snar Manseren ikofen faroi: "Rofyor mankoko rawersya sor ḇaim ro ras ine famyun epen aya ḇekior kwar." 62 Raimnai syaye randi ma kyanes fafayaḇa. 63 Ma snonkaku ḇefor Yesus ansi, skoryayei ma sipreri. 64 Sisisen warek mka ḇyesya ma sifuken: "Indo wakofen mansei ḇeprer awya?" 65 Ma wos anonef sikofen faroi nabor. 66 Ma rofyor meser kwar ḇebarara-ḇebarara er Yahudi ma mananir-mananir imamsya ma ḇefawinananem Refo Yahudi skara posa kwar, sun Yesus ḇeḇarpon mankukeḇ Agama sedi, 67 ma sikofen: "Rofyor aw Wairek, wakofen maro nko." Yesus kyarem: "Yakofen kako ḇe mko wero, nari mkokyarḇa; 68 ma rofyor yafuken roi oso faro mko, nari mkopok fa mkokaremi ḇa. 69 Randak ro knikine Rumkun Snonkaku kyain kwar ro ḇar raku Allah ḇepok syadiya." 70 Sikofen kam: "Rarirya ido, awne Rumkun Allahke?" Yesus kyarem: "Iso mankun mkokofenya, mboi aya ine Rumkun Allah." 71 Raimnai sikofen: "Fainda rosai kosewar ḇaḇesaksi wer? Koine komnaf kwar ro mankundi sḇadon ḇyedi."

23

1 Raimnai kina mankukeḇ ansi siyorsi fa sun Yesus ḇeḇarpon Pilatus. 2 Ro dia sirandak ssḇuk safsof, ḇo soḇo: "Isna kwar maro nko, mboi snon ine fyarkor ninyan er nkoḇesi fa siḇor, ma myun warek nkoḇak som faro Kaisar, ma mankundi ḇardi ikofen ḇo doḇo, mboi ikada Kristus isoine Wairek." 3 Pilatus ifuken faroi: "Aukada wairek kawasa Yahudike?" Yesus kyarem: "Iso mankundaw wakofenya." 4 Pilatus ikofen faro mananir-mananir imamsya ma kawasa ḇeḇor ansya kam: "Yasma sasar oso ḇaḇeri ro snonkaku ine." 5 Ḇape seyayu besya kwar, ḇo soḇo: "Fyarkor ninyan kawasa ḇeḇor kuker farkarkor ḇyena ro Yudea ḇesiper, ḇyerandak ro Galilea ma ryama kwar kako rodine." 6 Rofyor Pilatus ryower rarirya ifuken, inja snon ine snon Galilea riryake? 7 Ma rofafisu Pilatus ifawi, mboi Yesus snonkaku ḇero sup mnuk Herodes, fyaremi fa suni ḇeḇarpon Herodes, snar ro fafisu ani isya kako ro Yerusalem. 8 Rofyor Herodes myam Yesus, Herodes iryaḇ kaku. Snar fyoro kwar imarisen dakmam Yesus, snar fyoro kwar imnaf roi ono ro Yesus, ma ikyar nari Yesus ifrur aḇyair kanandor oso fa dakmam. 9 Ḇyuk fakfuken nabor faro Yesus, ḇape Yesus kyarem royoḇaḇeri. 10 Rofafisu mananir-mananir imam ḇeḇeḇukorsya ma ḇefawinananem Refo Yahudi srarpon ma ssḇuk safsof ḇemarḇak faroi. 11 Fafisu ani Herodes kuker sarar ḇyesi sefarfnak ma skoryayei, skosansuni kuker syatu nasan raimnai skofarem kaḇeri wer faro Pilatus. 12 Ma ro ras ani beri, Herodes ma Pilatus, ḇeḇembroḇ ansuya suḇe bati wer. 13 Raimnai Pilatus fyanjur mananir-mananir imamsya ma manfarkin-manfarkin fnoḇek kawasasya, 14 ma ikofen farosi: "Mkun snonkaku ine maro aya imnis snonkaku ḇefarkor ninyan kawasa. Mankun mkomam mboi yakukeḇi kwar, ma sasar rosai mkoḇuksof i na yasma ono roiḇa. 15 Ma Herodes ikako isma sasar oso roiḇa, inja fyarem kaḇeri maro nko. Kaku ḇeri ifrur sasar roḇa fa ḇemnis kuker samamyai marmari. 16 Inja nari yapreri raimnai yafaspari." [ 17 Snar ro ras munara Paskah, Pilatus fyaspar snonkaku besmai oso faro kawasasya.] 18 Ḇape sibras kam: "Ḇyeḇemun! Faspar Barabas maḇe nko!" 19 Barabas ine ḇyeḇesun ro bui snar skofrur mbriwer ḇeba ro mnu ḇebaya, ma snar myamun. 20 Pilatus ikofen wer kuker mkaren ḇeba farosi, snar imarisen fa fyaspar Yesus. 21 Ḇape sibras wer, ḇo soḇo: "Ḇyeḇepai ro aprop! Ḇyeḇepai ro aprop!" 22 Pilatus dawos wer ḇerarwan ḇeḇekiorya farosi: "Inja ḇarḇor rosai snonkaku ine ifrur kwarya? Yasma sasar oso roi ḇaḇeri, bemnis kuker samamyai marmari. Inja nari yapreri ma yafaspari." 23 Ḇape sibras naba ḇo sedafdifer ḇesya kwar insa ḇyeḇepai ro aprop ma papupesya sefainda. 24 Pilatus iwai rasi. Raimnai dawos namuk insa fararyor sedi ḇyeḇeḇuk farosi. 25 Ma fyaspar snonkaku ḇesun ro bui snar ḇefrur mbriwer mamun ani imnis raris fararyor sedi, mboi ḇyuk Yesus farosi fa sifrur faroi imnis marisen sedi. 26 Rofyor Yesus ḇyeḇeyun ani, siserepen snon oso ḇenirḇe Simon ḇeraker Kireni, ḇeḇe ḇesun ḇe Yerusalem, srir apropya ro erda ḇyesuya, fa ḇyari ḇo iso Yesus. 27 Kawasa sibor kaku siso Yesus; rofandu si binsya sibor skanesi. 28 Yesus iknenef farosi ma ikofen: "Bin-bin Yerusalem mkoyane, mkokanes awer aya, mboi mkokanes ḇinkun mko, ma romawa mkoḇesi! 29 Snar mkomame, nari fafisuya ryama ma sikofen: Aski faro bin ḇepansnasem sya ma ḇeyaḇen romawaḇa ma ḇeyaksasusḇa sya. 30 Ma snonkakusya nari sikofen faro bon na; kwamsiser epen inko! ma faro bon na: Kwupoi inko! 31 Snar rofyor sifrur rarirya faro ai ḇepek, rosai wer kuker ai ḇemas?" 32 Ma sun kako snon ḇese risuru wer, isoine snon ḇarḇor fa susma samamyai marmar fnoḇek Yesus. 33 Fafisu srakwar ro moḇ ḇenirḇe Ḇukorbei (Golgota), spai Yesus ro moḇ ani fnoḇek snon ḇarḇor risuru ansu, oso ro ḇar raku ḇyedi ma suminya ro ḇar rasar ḇyedi. 34 Yesus ikofen: "O, Mami, buk ampun farosi, snar sifawi rosai sifrur ineḇa." Ma skinsor fa sḇerarwas sansun ḇyena. 35 Kawasa ḇeḇor ansi sores rodia ma smam nakam. Manfarkin-manfarkin sya skoryayei, ḇo soḇo: "Snonkaku ḇesesya fyasparsi, mboi knikine komampan fyaspar mankundiri, rofyor i Wairek ḇekaku Allah kyinfir kwar." 36 Rarirya kako sordade-sordadesya skoryayei, ssḇuk anggur ḇemnir faroi 37 ma sikofen: "Yahudisya wairek sedi awido, faspar mankundaw!" 38 Sfas ro apropya pumya radine: "Ine Yahudisya wairek sedirya." 39 Snon ḇarḇor oso spai fnoḇek Yesus, dakonefi, doḇo: "Kristus iso awke? Rarirya ido faspar mankundaw ma nu kako!" 40 Ḇape suminya isonek i, ḇo doḇo: "Inja wamkak faro Allah ḇake, mboi kokam kosma samamyai marmari? 41 Kukada kusma samamyai snar sasar kufrur na, ḇape snon ine dakfrur sasarḇa." 42 Raimnai ikofen: "Yesus, nari waswarepen aya, rofyor wafyafer imnis wairek." 43 Yesus ikofen faroi, ḇo doḇo: "Yakofen kaku faro aw, kaku ḇeri ras ine nari awsya kuker aya ro Firdaus." 44 Fafisu ro ras ani indokada oras samfur seser risuru orkok pandaf, ma pampanya ikawef supya fyor ani ḇesiper isof oras kior mandira, 45 snar ori isnaiḇa. Ma kruḇen eruk Sim Ḇesren imsawekra ḇyesuru. 46 Ma Yesus dor naba: "O, Mami, ro ḇramsu yarir rur ayedi." Ma ikofen rarirya posa, insape imar. 47 Rofyor mambri sararya myam roi ḇeḇesya anna, isandik Allah, doḇo: "Kaku, snon ine irya snon ḇenapes!" 48 Ma posa kwar ro kawasa ḇeḇor ḇepanjuḇer rodia fa ḇeyakmami, smam rosai ḇeḇesya anna, sibur sfafko mankunsi. 49 Snonkakusya kam ḇefawi Yesus fanam sya, ma kako bin-bin ḇesoi ker Galilea, sores ḇinkwan ma smam roi ḇeḇesya anna kam. 50 Snon oso snonsnon ḇyedi Yusuf. Snon anine ḇyekina ro Kankain Karkara Ḇeba, kako snon ḇeḇye ma ḇenapes rirya. 51 Ḇyesne oserḇa kuker fararur Kankain Karkara sawos namukya. I snon Arimatea ro mnu Yahudi oso ma ikako dakwaf-waf Allah Ḇaḇesasoser ḇyedi. 52 Rya faro Pilatus ma dor Yesus baken ḇyedi. 53 Ma isabu baken ani kwar pyankuni kuker kruḇen mansek (lenan), raimnai ikriri ro ureren spaikir ro urek karui, ro moḇ sikrir ḇemar osoro ḇaim. 54 Ras ani ras jumaat, ras Mananai Yahudi fyanam kwar. 55 Ma bin-bin ḇeso Yesus ro Galilea mumansya, sakso kako fa sakmam ureren ani fa sifawi moḇ rosai Yesus baken ḇyedi sikriri roya. 56 (56a) Ma rofyor sibur kwar, sfasos kefi-kefi ma mani ḇespum. (56b) Ma ras Mananai Yahudi sikam simnai snar sasoser Refo Yahudi,

24

1 ḇape ro ras ari arwo prim kakuya bin ansi sun kefi-kefi sfasos kwar na ḇo sraḇe rus Yesus ḇyani. 2 Ma sisma karui ḇesisen rus ani ikris kwar, 3 ma ssun kwar ro ureren ani ḇape sisrow Yesus baken ḇyediḇa. 4 Fafisu sores sikmom snar roi ḇeḇesya ani, kniko beri snon risuru susansun-sansun ḇesnaper ma suyores fandusi. 5 Simkak kaku ma skankunem, ḇape snonkaku ansuya sukofen farosi, ḇo suyoḇo: "Snaro mkosewar ḇekenemya rofandu ḇemarsya? 6 Isya ro dineḇa, diḇri kwar. Mkoswarepen rosai ikofen faro mko, rofafisu isya kaker ro Galilea, 7 isoine Rumkun Snonkakuya nari sḇoḇi faro snonkaku ḇesasar ma spai ro aprop, ḇape nari diḇri ro ras ḇeḇekiorya." 8 Inja siswarepen Yesus wos ikofen ani. 9 Ma skaḇer kwar ro rus, sfar nakam faro manfamyan sanfur seser oser ansi ma faro naek ḇesesya kam. 10 Bin-bin ansi sisosine Maria, ḇerama ro Magdala, ma Yohana, ma Maria Yakobus snari. Ma bin-bin ḇese ono kako ḇeyaksosi, sḇaryas faro manwawan ansi. 11 Ḇape faro manwawan ansi soḇo bin ansi seḇindawsi ma sikyar wos senaḇa. 12 Rarirya inja Petrus iyori ma ifrar fasaw ḇerus ani. Fafisu kyankunem ma ikiki mundum, myam kruḇen ḇepankun monda. Raimnai ibur ma iwasen ro sne ḇyedi rosai ḇeḇesya kwarya. 13 Ro ras ani kako snon risuru ro Yesus manfamyan ḇyesi suraḇe mnu ḇenirḇe Emaus, swafya indokada mil rifik ro Yerusalem, 14 ma sufarfyar ro roi ḇeḇor ḇeḇesya kwar anna. 15 Fafisu suisya suyawawos ma sufuken yayesu, Yesus mankundi ryama isnefer su, ma imbran fnoḇek su. 16 Ḇape roi oso isya idwarek sumkasna, isof supok sumamḇaḇir iba. 17 Yesus ikofen farosu ḇo doḇo: "Rosai mumbran muyawosya?" Inja sumnai kuker sne ḇefafardun. 18 Oso ro su snonsnon ḇyedi Kleopas, kyarem faroi, doḇo: "Awne werer snonkaku amber ḇeramuma babo ḇe Yerusalemke, indiri wakfawi rosai ḇeḇesya rodia ro ras ḇepupes naneḇa?" 19 Ifuken su ḇo doḇo: "Rosai ḇeḇesyaya?" Sukarem: "Rosai ḇeḇesya kuker Yesus snon Nazaret. Ima nabi rirya, ḇepoik ro fararur ma wos ro Allah ḇarpon ḇyedi ma ro ḇarpon er nkoḇesi kam. 20 Ḇape mananir-mananir imam ma manfarkin-manfarkin nkoḇesi sḇoḇi fa smuni, isoine spai kwar ro aprop isof imar. 21 Mboi ro randakya nkokyar iso nari ḇerama fa ḇefaspar er Israel. Ḇape ras rikior nawas kwar, fafisuya roi ḇeḇesya nane ndarirya. 22 Mboi bin ono rofandu nko sifrur kanandor nko: Isnai karkir sraḇe rus ma sisrow Yesus baken ḇyediḇa. 23 Raimnai skaḇer ma sikofen ḇo soḇo, mboi smam kwar malaikat ono sikofen farosi, mboi ikenem. 24 Ma min nkoḇesi ono sra kwar ḇerus ani, ma sisma kaku raris wos binsya sikofen na, ḇape sakmami ḇa." 25 Raimnai Yesus ikofen faro su: "Ne, mko snonkaku ḇefawi royoḇa, rariso mkosnemna npakrek, isof mkokyar ḇaḇeri roi ḇeḇor kam nabisya sikofen kwar na! 26 Mboi Wairek nari ḇyekandera nabor resari insape syun ro payamyum ḇyedi?" 27 Raimnai ikofen fasna faro su rosai sfas kwar ro Refoya, randak ro syap Moses isof syap nabi-nabi syakam. 28 Skofanam mnu skorayoḇ ani ma iḇe imbran pdef mararan ḇyedi. 29 Ḇape suyembuki, ḇo suyoḇo: "Kwainus nu, snar mandira kwar ma ori fyanam syun." Inja kyainus su. 30 Rofyor kyain dananus su, dun mamami ma ikofen kasumasa, raimnai pyefi ma ḇyukna faro su. 31 Rofafisu ani sumkasna nbas ma sumam ḇaḇiri, ḇape ipromes bur su. 32 Sufuken yaye su: "Mboi kusnesna naryaḇ kaku rofafisu iwawos kuker ku ro nyanya faduri ma rofyor ikofen fasna Refoya maro ku?" 33 Inja suyor su ma sukaḇer beri ḇe Yerusalem. Ro diwa susrow manfamyan samfur seser oser ansi. Sisya siryur kam kuker minmin sesi. 34 Sikofen: "Kaku ḇeri Manseren diḇri kwar ma fyasna mankundi kwar faro Simon." 35 Raimnai snon ansuya kako suyakfarfyar rosai ḇeḇesya kuker su ro nyanya faduri ma rariso sumam ḇaḇiri rofyor pyef mamamiya. 36 Ma rofyor sawawos roi ḇeḇesya ani, knikoḇama Yesus dores rofandu sedi ma ikofen farosi: "Aski faro mko!" 37 Sikandor ma simkak snar siwarki, soḇo smam rodur oso. 38 Ḇape ikofen farosi: "Snaro mkomkak ma rosai eḇedari mkokormararu ro mkosnemna? 39 Mkomam ro ḇramin ayesuine ma wemin ayesuine: Mankundayairi; mkopan ro aya insa mkofawi, imnis mkomam ro aya ine, snar rodurya ḇyekraf ma korḇa." 40 Ikofen rarirya, ma fyasna ḇramin ḇyesuya ma wemin ḇyesuya farosi. 41 Ma fafisu sikyar ḇakaker snar raryaḇ ma kanandor sedi, ikofen farosi: "Roḇean ono naisyake?" 42 Inja ssḇuk faroi in ḇesorep ker oser. 43 Duni ma dani ḇo smam kam. 44 Ikofen farosi: "Ine wos ayedi, yakofen kwar faro mko rofafisu ayaisya fnoḇek mko, isoine mboi roi ḇekur aya na nari namnis kam raris fasfas syap Moses ma syap nabi-nabi ma syap mazmur." 45 Raimnai ḇyas swaruser sena, isof sifawi wos Refoya. 46 Ikofen farosi: "Fasfas isya radine: Wairek nari ḇyekandera ma nari diḇri fandu ḇemarsya ro ras ḇekiorya. 47 Ma kuker snonsnon ḇyedi ḇaryas ḇekur marmar ma ḇaḇepayasyos ro sasar nari sḇaryas na faro er-ersya kam, randak ro Yerusalem ine. 48 Mko ḇeḇesaksi roi ḇeḇor nane kam. 49 Ma nari yafarem faro mko rosai Mami ḇyeasas kwar faro aya. Ḇape nari mko kain waf ro mnu ine isof mkoḇe ḇefasos kuker papoik ro Allah." 50 Raimnai Yesus dunsi ḇe mnuya ḇandiri isof sfanam Betania, rodia ḇyeḇoksi. 51 Ma fafisu ḇyeḇoksi, ḇyeḇekanow ḇe boiyaswa ma ibursi. 52 Skankunem ma sḇansuba faroi, raimnai sibur ḇe Yerusalem kuker raryaḇ ḇeba kaku. 53 Sisya ḇesya kwar ro Allah Rum ḇyedi ma sisandiki.