YAKOBUS

YAKOBUS

¹ Ro aya, Yakobus, Allah ma Manseren Yesus Kristus manfamyan suḇedi yafarem aroo faro keret samfur seser risuru ḇekakek ro supswan ine. ² Naek srar ayesi, rofyor mkosapi ro fafrowes ḇeḇor, mkokarana imnis aski oso, ³ snar mkofawi, mboi manasnasen ḇekur kakyar mkoḇena nbuk ḇaḇenamu faro mko. ⁴ Ma ḇaḇenamu ani ḇyuk bon ḇemku, insa mkomnis ma mkosiper ma mkananjar awer roi ono kako kada. ⁵ Ḇape rofyor rofandu mko ono sisya smamkarkir mnis ḇa ido, sor mamkarkir ani ro Allah kada, ḇeḇuk faro snonkaku kam kuker sanemura ma ḇeyor kaḇerna ḇa,-- inja roi anna nari neḇeḇuk faroi. ⁶ Inja dorna kuker kakyar, ma ḇyeḇirḇar awer, snar ḇeḇeḇirḇar simnis kuker ḇak ro soren, wamya dun mura-muma. ⁷ Snonkaku ḇerarirya kyara awer nari isma roi oso ro Manseren. ⁸ Snar snonkaku ḇeḇesnemandu nari iknon ro kenem ḇyedi ḇa. ⁹ Kawasa Kristen ḇesaḇarar siryaḇ kada rofyor Allah ikanow si. ¹⁰ Ma kawasa Kristen ḇeḇekayan siryaḇ kako kada, rofyor Allah ryun si. Snar snonkaku ḇeḇekayan nari sipromes imnis aḇris pampen. ¹¹ Snar ori dek kuker samsam ḇeyosuk ma ḇefrur maryoi aḇris ansi, isof pampen sesi skapaf ma sananai ḇepyum sena ndo. Rarirya kako kuker ḇeḇekayansya; rofandu ḇaḇesewar ḇeḇor sena nari napromes. ¹² Aski faro snonkaku ḇedworen ro fafrowesna, ma dores nako kwar ro manasnasen ido, nari isma wower kankenem Allah ḇyeasas faro mansei ḇeswar Allah. ¹³ Rofyor snonkaku oso isma fafrowes ido ikofen awer: "Fafrowes ine ryama ro Allah!" Snar ḇarḇorya ipok ifrowes Allah ḇa, ma Allah mankundi ifrowespan manseirya ḇa kako. ¹⁴ Ḇape snonkaku oser-oser isma fafrowespan snar mankundi rmomen baken ḇyena, nasmeri ma nadenemi. ¹⁵ Ma ḇaḇermomen baken ani ḇyebon kwar daḇen sasar; ma rofyor sasar imku kwar, daḇen marmari. ¹⁶ Naek srar yaswar kaku, mkoḇor awer! ¹⁷ Roi ḇeḇye ma ḇemnis kosmana ndamaker boiyaswa, Allah ḇyena fanado, i ḇefrur isnai ḇeḇor kam ro nanki. ¹⁸ Kuker marisen ḇyedi i frur ko kwar kuker wos ḇenapes ḇyedi, insa kosma moḇ ḇepon fakoḇe romawa rak rofandu roi ḇekenem kam ifrurna. ¹⁹ Ne, naek srar yaswar kaku, mkoswarepen: Mko kam mkosamberen famkomnaf, ḇape mkowawos ma mkomasasor fasaw awer kako; ²⁰ snar masasor snonkaku nafrur roi ḇenapes ono ro Allah ḇarpon ḇyedi ḇa. ²¹ Inja mkosawen roi ḇemamasna kam ma ḇarḇor ḇeborna kam ma kuker randun sne mkona Allah wos ḇyedi kyer kwar ro mkosnemna, nari ḇeḇuk koreri faro rur mkoḇesi. ²² Ḇape mkuffarmyan wos ani ma mkorower monda awer; snar rarirya ḇaido mkoḇeankar mankun mko. ²³ Snar snon oso imnaf monda wosya ma ifrur ḇaido, imnis kuker snon oso ḇemam mankundi ro kansinai. ²⁴ Kniko fasaw myam mankundi, raimnai rya ma ḇyeprobos moḇ isnairaya. ²⁵ Ḇape mansei ḇekukeḇ sasoser ḇemnis anna isoine sasoser ḇeḇuk ḇaḇemkei faro snonkaku, ma ḇyenamu faḇyeuserna, inja ryower monda ma fyananderna ḇa, ḇape ifrur kakuḇerina, nari isma aski ro fararur ḇyena. ²⁶ Rofyor snon oso kyara mankundiḇe ḇeḇeari nasrawen, ḇape fyarmku ramar ḇyedi ḇa, ḇyeankar mankundi, ma ḇaḇeari ḇyena nefromo. ²⁷ Ḇaḇeari ḇekaku ma ḇefarorewḇa ro Allah, Kma koḇedi ḇarpon ḇyedi, isoine ryakaki awak param ma kabomsya ro ananjar sena, ma ḇyesasor mankundi insa supswan ine ifrur mamas aweri.

¹ Naek srar ayesi, imnis snonkaku ḇekyar faro Yesus Kristus, Manseren koḇedi ḇepoksyadi, kakyar ani mkofrur i kuker mkomam karyer awer. ² Snar, rofyor snon oso syun ro fananjur mkoḇedi kuker iwur kawin brawen ma syansun sansun ḇepyum ma snon ḇesaḇarar oso kako ryama daksun kuker sansun ḇepyum ba, ³ ma nari mkoḇesyowi snonkaku ḇesansun-sansun ḇepyum ani ma mkokofen faroi: "Tuan kwain ro moḇ ḇeḇye ine!" -- mboi faro snonkaku ḇesaḇarar ani mkokofen: "Wores rodiwa!" roḇa: "Kwain rosop fanam wemin ayesi!" ⁴ Mkofawiḇake mkofrur kwar ḇaḇemambaḇir ro mkosnemna ma mkofrur imnis mankara kuker kakara ḇeḇarḇor? ⁵ Mkomnaf naḇye, ne naek srar yaswar kaku! Mkofawiḇake Allah kyinfir snonkaku supswan ine skaraḇe ḇesaḇarar fasekayan ro kakyar ma sepusaka ro ḇaḇesasoser Allah ḇyeasas kwar faro mansei ḇeswarisya? ⁶ Ḇape mkokoryae snonkaku ḇesabararsya kwar. Mkofawiḇake snonkaku ḇeḇekayan siso ḇeḇewayam mko ma ḇesmer mko ḇekankain karkara ḇenapes? ⁷ Mkofawiḇake siso ḇeyonef snonsnon ḇesma syowi syadi, eḇedari Allah nya mko? ⁸ Ḇape, rofyor mkofruruser sasoser ḇepon sfas ro Refo: "Waswar snonkaku min besi imnis waswar mankundaw." ⁹ Ḇape, mkomam karyer ido, mkofrur sasar, ma mkoḇeyuk Allah sasoser ḇyena. ¹⁰ Snar mansei ḇeḇeuser sasoser ḇeḇor anna kam, ḇape ḇyeuser mnuk osoḇa rona, ḇyesasar farona kam. ¹¹ Snar ḇekofen ḇo ḇeyoḇo: "Wafrur farbuk awer," Ikofen kako: "Mamun awer." Inja mkofrur farbuk ḇa ḇape mkomamun, rarirya mkoḇeyuk sasoserna kako. ¹² Mkawos ma mkofrur imnis snonkaku nari ḇesun ro ḇaḇemankara kuker sasoser ḇeḇuk makakei faro snonkaku. ¹³ Snar ḇaḇemankara ḇena saswari isyaḇa nari ryarirya faro ḇesaswar ḇasya. Ḇape saswari nari ḇyuk fainda faro mankaraya. ¹⁴ Fainda rosai, naek srar ayesi, rofyor oso ikofen, ikada nya kakyarya, ḇape fyasna ro rari fararur ḇyena ḇa? Nari kakyar berarirya ḇyuk koreri faroike? ¹⁵ Rofyor naek oso roḇa srar oso isma sansun ḇa ma dananjar roḇean ro ras-ras, ¹⁶ ma snonkaku oso rofandu mko ikofen: "Parperoo, swabusum maramuk ma wanan rao warbor!" -- ḇape ḇyuk rosai ḇeḇefandun faroiḇa, fainda rosai ro wos anna? ¹⁷ Rarirya kako kuker kakyarya: Kakyarya ifnoḇek farararur ḇa, kakyar ani imar. ¹⁸ Ḇape nari snonkaku ono sisya sikofen: "Faro aw kakyarya isya ma faro aya fararurya isya," nari yakarem faroi: "Fasna maro aya kakyar bedi fnoḇek fararur ḇa, ma nari yafasna faro aw kakyar ayedi kuker fararurna." ¹⁹ Wakyare, snar Allah oser monda isya. Ḇape rodursya kako sikyar rarirya ma sradai. ²⁰ Ne, snonkaku ḇefawiroyoḇa, wamarisen fakwarem ro knikine, mboi kakyar kuker fararur ḇa irya kakyar ḇeḇefainda ḇa? ²¹ Mkofawiḇake Abraham kma koḇedi, ssḇuk napnapes faroi snar fararur ḇyena, rofyor ḇyuk romawa ḇyedi Ishak ḇefarsarser, ro rokef farsarserya? ²² Mkomam, mboi kakyarya fyasna ifararur kayam kuker fararurya rarirya kakyar ani imnis. ²³ Rarirya mnuk ro Refo ḇekofen: "Abraham ikyar faro Allah, ma Allah kyori ḇeḇenapes." Eḇedari Abraham sapiḇe: "Allah bati ḇyedi." ²⁴ Inja mkomam, mboi snonkakusya sisma napnapesya snar fararur sena ma snar kakyar monda ḇa. ²⁵ Mkofawiḇake Rakhab, bin befrur farbuk ani kako, isma napnapes snar fararur ḇyena, rofyor iyokef manpaf Israel ro rum ḇyedi, raimnai fyaspar si ro nyan oso ḇese? ²⁶ Snar imnis baken ḇena rur ḇa irya kakyar ḇemar rirya, rarirya kako kakyar fnoḇek fararur ḇa irya kakyar ḇemar rirya kako.

¹ Naek srar ayesi, rofandu mko sibor simarisen seguru awer; snar kofawi, mboi ḇaḇeguruya nari kosma mankara imnis warnkyara ḇemarḇak syadi. ² Snar kokam kosasar ro roi nabor; mansei ḇesasar ḇa kuker wos ḇyena, ikada snonkaku ḇenapes, ma nari fyara baken ḇesiper ḇyedi kako. ³ Korir pisan ro kudaya sḇadon ḇyedi, insa iso marisen koḇena, kuker nyan ḇerarirya kako koḇuki fyara baken ḇesiper ḇyedi. ⁴ Ma komam monda faro jawarana, naba rariso wer ma wamdoḇerna nmunna rariso, ḇape neḇefara kuker remis kasun imnis manfaraya marisen ḇyedi. ⁵ Rarirya ramarya kako, ḇyekina ḇeba ḇa ro baken, ḇesyaḇo imararesi kuker roi ḇebana. Mkomam for ḇeba ḇa kako wer, ḇape ikun supna mnuk ḇesiper. ⁶ Ramarya imnis for kako. Ro baken koḇeja ramar ani ḇyeknam ro ḇarḇor fakyakek ḇarḇorya ro baken ḇesiper koḇedi. Kuker for ḇeḇeknam ro for ḇembrerḇa, for ani ikun kankenem ḇesiper koḇedi. ⁷ Aiwan ḇeḇor ḇekafdirsya kam, isoine: mansya, aiwan ḇeyanawer, ma insya snonkakusya sḇesi fasfafir kwar. ⁸ Ḇape snonkaku oso ḇaḇeri ipok faḇye ramarya fafyafir; ramar ani roi oso ḇeyan ḇepek, ma kopok i ḇa, ma ifo kuker inamer ḇeḇuk marmar. ⁹ Kuker ramarya kosandik Manseren. Kma koḇedi; ma kuker ramarya kofras snonkaku Allah fyanir faḇemnis mankundi, ¹⁰ ro sḇadon oser ani isasyar ḇaḇok ma fafras. Inja naek srar ayesi roi ḇeradine ndarirya awer. ¹¹ Isyake war ḇeprim ma war ḇesarmar susasyar ro war sun oser? ¹² Naek srar ayesi, isyake imyui knam imarem ḇeawai bon ma isyake ur knam imarem ḇesrai bon? Rarirya kako sun ḇemasmasen nari ḇyuk war ḇeprim ba. ¹³ Mansei rofandu mko ḇefawinanem ma ḇena fawawi? Kuker kankenem ḇeḇye fyasna fararur ḇyena ro mamamkarkir ma ḇaḇekaḇaḇaḇ kada. ¹⁴ Rofyor mkokram masasor ma mkofandun mankun mko, mkomarares mankun mko awer ma mkankarkar ḇo mkosampum awer ḇaḇenapnapesya! ¹⁵ Inja irya ido fawawi nanem ḇerama ro boiyaswa ḇa, mboi ro supswan, ro snonkaku nafsu-rmomen sena, ro rudur ḇemaḇak. ¹⁶ Inja ro moḇ kokram masasor ma kofandun mankun ko rodia isya anunḇesisye ma fararur ḇeḇor ḇeḇarḇorna naisya. ¹⁷ Ḇape fawawinanem ḇerama ro boiyaswa ikada kyaku, ma ḇyuk aski, fyafir, iso asuser, ifo kuker saswar ma ḇyuk bon ḇeḇye, iwaira mun osoḇa ma dankarkar ḇa. ¹⁸ Ḇape ḇaḇenapnapesya irya bon ro askiya ma snonkaku beswar askiya siso benaisya.

¹ Mamunmun ma rakrakrok rofandu mko ndama kero? Mkofawiḇake ndama ro rmomen-nafsu ḇefamfaḇriyae ro baken mkoḇena? ² Mkormomen roi oso, ḇape mkosma i ḇa, inja mkomamun; mkokram masasor, ḇape marisen mkoḇena mkosmana ḇa, inja mkorakrakrok ma mko mamunmun. Mkosma roi oso ḇa snar mkoḇenadi ḇa. ³ Roḇa mkoḇenadi kako, ḇape mkosma roi oso ḇa, snar mkonadi sasar, snar roi mkorna faro marisen mankun mko ḇardi. ⁴ Ne mko, snonkaku ḇefarmku ḇa! Mkofawiḇake, ḇaḇebati kuker supswan ine, mko ḇeembroḇ kuker Allah? ⁵ Mko kara awer, mboi Refoya ḇyeknam ba faikofen: "Rur Allah ḇyukma ḇeko marisen ḇyedi syambraḇ kaku!" ⁶ Ḇape saswar-fakamaman, Allah ḇyukma ḇeko, syambraḇ syadi ro marisen rur koḇesi. Rarirya ikofen: "Allah isampum ḇemarares, ḇape iswar ḇerun sisnesna." ⁷ Eḇedari mkokunem faro Allah, ma kosampum Ibiris, rarirya nari ifrarbur mko! ⁸ Mkofanam faro Allah, ma nari Allah fyanam faro mko. Wafrur sren ḇramsi, ne snonkaku ḇesasar! ma wafrur sren snembri, ne mko ḇeḇesnemandu! ⁹ Mkofawi ḇaḇekandera mkoḇenaḇae, mkoḇarop ma mkokanes; marafrif mkoḇena neḇesadwer kuker kankanes ma raryaḇ mkoḇena kuker barop. ¹⁰ Mkorun mko ro Manseren ḇarpon ḇyedi, ma nari ikanow mko. ¹¹ Naek srar ayesi, mkonefyae awer mko! Mansei ḇeyonef naek ḇyedi roḇa ḇyemankara i, kyoryae Allah sasoser ḇyena; ma rofyor bemankara Allah sasoser ḇyena, rarirya ido waser sasoser anna ḇa mboi bemankarana. ¹² Oser monda i Ḇeḇuk sasoser ma Ḇeḇemankara. Isoine Allah ḇepok ḇeḇuk koreri ma ḇeḇuk raro. Ḇape aw ido, isof wamarisen bemankara faro min besi? ¹³ Inja knikine, ne ḇekofen mkoya: "Ras Ine roḇa meser nkora ḇemnu oso, ma rodiwa nari nkokain wampasi wambarek oser ma nko farḇaḇyan ma nkosma fainda," ¹⁴ rofyor ani nari mkofawi roi ḇekur mko ro meserdiya ḇa. Mankun mko kako mkofawi ḇa. Kankenem mkoḇena namnis raris kamayow ḇeḇair knik monda raimnai ipromes. ¹⁵ Iḇye mkokofen radine: "Manseren imarisen ido, nari nkokenem ma nkofrur ine roḇa iwa." ¹⁶ Ḇape knikine mkomarares ma mkofakḇun mko, ma marares ḇeḇor ḇerarirya nsasar. ¹⁷ Inja snonkaku oso ifawi rariso nari ifrur ḇaḇye, ḇape ifrurna ḇa, ikada, ḇyesasar.

¹ Inja knikine ḇeḇekayan mkoya, mkoḇarop ma mkokanes snar kandera nari ḇekur mko! ² Kayan mkoḇena nari ndo ma sansun mkoḇena nari opsya sanna kwar! ³ Sarak ma brawen mkoḇena napraf kwar, ma praf anna nesaksi faro mko ma nari nan mko imnis for. Mkofanjur kwar arasa ro rasras ḇefanam rofyor ras papupesya. ⁴ Kaku ḇeri fararar ḇeba neḇemnaf kwar, snar mkoḇak sasuref ro ḇefararur ro yaf mkoḇenasya ḇa, ma fararar anna, Manseren ḇefrur sansoren ḇoka ḇena ma ḇepoik nakam imnafna kwar. ⁵ Ro marares mkoḇena mkokenem mkan ma mkomarisen isof mkosyopen ro supswan ine, faro ras kawakwukya. ⁶ Mkoḇuk samamyai kwar, mboi mkomun snonkaku ḇenapes ḇepok ḇesampum mko ḇasya. ⁷ Rarirya, naek srar, mkokḇaḇ isof Manseren ryama! Kaku ḇeri manfrudo siwaf bon ḇeḇemaeja ro yaf sena ma sikḇaḇ isof awar mekemya isabu ma awar mekem ḇeḇuk kakyeiya. ⁸ Mko kako mkokḇaḇ ma mkofarmku, snar Manseren raramuma ḇyedi fyanam kwar! ⁹ Naek srar, mkosurem awer mko ma mkoḇuk safsofyae, insa Allah ḇyuk samamyai awer faro mko. Kaku ḇeri Mankaraya dores kwar ro kedwaya fyasos faryama. ¹⁰ Naek srar, mkoso nyan kandera ma ḇaḇekaḇaḇaḇ nabisya ḇewawos kwar kuker Manseren snonsnon ḇyedi. ¹¹ Kaku ḇeri nkap si ḇeḇeaski, isoine si ḇefarmku kwar; ma mkomnaf kwar ro Ayub farmku ḇyena ma mkofawi ro ḇarpurya rosai Manseren fyasos faro i kwar, snar Manseren saswar ḇyedi iba ma ifo kuker saneso. ¹² Ḇape ḇepon kakuya, naek srar, mko soar awer kuker boiyaswa, kako wer kuker supswan roḇa kuker roi ḇese. Inja, mboi ido mkokofen monda mboi ma roroḇa ido, mkokofen monda roroḇa, insa mkosma samamyai awer. ¹³ Rofyor snon oso rofandu mko dananjar ido ḇyenadi! Rofyor snon oso iryaḇ ido idisen! ¹⁴ Rofyor snon oso rofandu mko iduf ido dor penetua jemaat kada insa sinadiwarek i ma sipyosi kuker mani ro Manseren snonsnon ḇyedi. ¹⁵ Ma nadi ḇesasyar ro kakyar nari ḇyuk pararei faro ḇeduf ani ma Manseren nari ḇyawes i; ma ifrur sasar kwar, nari sasar ḇyena neḇepyos. ¹⁶ Eḇedari mko karemyae sasar mkoḇena kwar ido mko nadiwarekyae mko kada, insa mkoprei. Nadi ro snonkaku ḇenapes, rofyor senadi kuker snekin, nadi ani papoik ḇyedi iba kaku. ¹⁷ Elia snonkaku monda ḇemnis kuker ko, ma ḇyenadi kaku ḇeri kwar, insa mekemya imyun awer, ma mekemya imyun ro supya ḇa isof wampasi wambarek rikior ma paik riwonem. ¹⁸ Raimnai ḇyenadi wer ma nanki ḇyuk mekem ma supya kako ḇyuk bon ḇyena. ¹⁹ Naek srar ayesi, rofandu mko oso isasyarbur ḇaḇenapnapesya ido ma snon oso dun siḇer i, ²⁰ mkofawi, mboi mansei ḇeyun kaḇer snon ḇesasar ani ro nyan ḇeḇorya, nari ḇyuk koreri faro snon ani rur ḇyedi ro marmar ma ifrur fasasar ḇeḇor ḇyena neḇepyos ma neḇefanander. Ro aya, Yakobus