IBRANI

IBRANI

¹ Ro awar ḇeponiwara Allah dawawos ḇerarwan ono mufaḇe kpu koḇesi kuker nabi ḇyesya ro nyan nabor, ḇape ro awar ḇepupes ine Allah dawawos maḇeko kwar kuker Rumkun ḇyedi ḇeḇemanfanduya. ² Allah ḇyeasas kwar mboi Rumkun ḇyedi i ḇena roi ḇeḇor kam. Snar Yesus Allah ifrur kwar sansoren ḇoka. ³ I ḇeḇeisnai ro Allah ḇaḇe baba ḇyedi; ma fanir ro Allah mankundi. Ikada fyaduru sansoren ḇoka ine kuker papoik ro wos ḇyedi. Ma fyasren snonkakusya ro sasar sena kwar, insape kyain ro karapesa sasoser fnoḇek Allah, ḇena papoik ḇekaki syadiya ro boiyaswa. ⁴ I sma kankain ḇekaki syadi ro malaikatsya, imnis raris Allah snonsnon ḇyuk faroi kako ipyum syadi ro snonsnon malaikatsya. ⁵ Snar Allah ikofen ḇaim radine faro malaikat oso: "Awkada Rumkun ayedi! ro ras ine yaḇe Kma faro aw?" ma Allah ikofen kako faro malaikat oso ḇaim, "Nari yaḇe Kma faroi, ma nari ḇyeromawaḇe aya?" ⁶ Ma rofyor Allah iwan Rumkun rak ḇyedima ḇesupswan ine, ikofen radine: "Allah malaikat ḇyesi kam sḇansuba faro i." ⁷ Faro malaikatsya, Allah ikofen radine: "Allah ifrur malaikat ḇyesi fasewamdoḇer, ma ḇeyuffarmyan besi fasimnis for ḇesber." ⁸ Ḇape Allah ikofen faro Rumkun ḇyedi: "Karapesa nasan bedi, o Allah, nari kyain fyoro-fyoro, ma ḇaḇesasoser bedikada sasoser ḇaḇenapnapes." ⁹ "Awkada wamarisen ḇaḇenapnapesya ma wayin ḇarḇorya, rarirya Allah, Allah bedi ryem aw kwar kuker mani imnis aḇyair marasrisen, isyadi ro min besi." ¹⁰ Allah ikofen wer: "Ro awar ḇeponiwara, aw o Allah, wafrur kwar sup ine, ma kuker ḇramin beja wafrur nanki. ¹¹ Ma nari nakam napromes, ma nari nakwar imnis mar wai, ḇape awma nari farweḇa. ¹² Nari waper sansoren ḇoka ine imnis mar ma nari wasadwerna, ḇape auma nari fadwerḇa, ma kankenem bedi kyain fyoro-fyoro." ¹³ Ma Allah ikofen ḇaim radine faro snon oso ro malaikat ḇyesi kako: "Kwain ro ḇar raku yedi, isof yafrur mbroḇ besi faskuk wepur ro ḇarpon bedi?" ¹⁴ Malaikat ansi kam isoine rur ḇeyuffarmyan Allah sirya, ma iwan si fasifnoḇek snonkaku nari ḇesma koreri?

¹ Snar rarirya kufepen nako ma kodworen ro rosai komnaf kwar, insa koki awer ro kiraya. ² Snar wos malaikatsya sikofen nari ndarirya faswef, ma ḇaḇeuk ono ma ḇaḇeuserḇa nari nasma munsu, ³ nari kokfis rariso rofyor kokara kuker awnosḇa knam ro koreri ani, randakya Manseren ikofen kwar ma kosma na ro snonkaku ḇerower kwarsya sfar pampyam maḇeko kuker nyan kokyar na, ⁴ Allah ifrur ḇaryas sena fanadworen kaku kuker aḇyair ma aḇyair kanandor ma fasasna ḇeḇor kuker papoik ḇyena ma Rur ḇyedi ḇyerarwas na imnis mankundi marisen ḇyedi. ⁵ Snar malaikatsya sisma papoik ro Allah ḇa fasḇuk sasoser ro supswan ḇebabo nari ḇeramaya, isoine sup koḇekawawos ine. ⁶ Ro Refo mnuk oso isya sfas radine: "O, Allah, snonkakusya mansesirya, isof wamarisen waswarepen si, oroḇaido rumkun snonkaku, isof ḇefandun si? ⁷ Rofafisu ḇeknampu rwun syadi i ro malaikatsya, ma buk ḇei kankain ḇepyum ma ḇaḇesyowi, ⁸ wafrur i faisma papoik ro roi ḇeborkam." Isoine roi oso kako ryobaḇ papoik snonkaku ḇa. Ḇape baboine komam ḇaim, snonkaku sisma papoik ro roi ḇeḇor anna. ⁹ Ḇape Yesus rofafisu kermkun ḇyeḇerun faryobaḇ malaikatsya, isoine Yesus komam, snar kandera marmar, ḇyeḇesiḇer kuker wower payamyum ma syowi, insa Allah saswar-fakamaman ḇyena ifawi marmari faro snonkakusya kam. ¹⁰ Snar imnis raris Allah rari ḇyedi -- ifrur ma fyaduru roi ḇeḇor kam, -- Allah dun snonkaku sibor faro babaya, ma ḇyeimnis Yesus, faḇyemanfarkin ḇesi faro koreri, kuker ḇaḇekandera ḇyedi. ¹¹ Snar Yesus fyasren ma sḇeḇefasren, sikam sḇeknam oser; eḇedari imai ḇa dap siḇe naek srar. ¹² Yesus ikofen faro Allah: "Nari yaḇaryas snombri faro naek srar ayesi, ma yasandik aw rofandu jemaat." ¹³ Yesus ikofen wer: "Nari yarir kakyar ayedi mufaḇe Allah." Ma Yesus ikofen wer: "Kaku ḇeri, aya isoine ma romawa Allah ḇyuk maḇe aya kwarsya." ¹⁴ Snar snonkaku dap ḇeromawa ansi, sikada kankenem snonkaku, nari ḇemar, inja Yesus mankundi imnis kuker si ma ikenem ro rari snonkaku imnis si. Ifrur rarirya insa marmar ḇyedi kyakok Ibiris, ḇesma papoik ro marmari, ¹⁵ ma kuker nyan ḇerarirya ḇyuk ḇaḇemakakei faro snonkaku ro kankenem sena ḇesiper sisya ro ḇaḇewomen snar simkak faro marmari. ¹⁶ Snar kaku ḇeri, malaikatsya si iswarsya ḇa, ḇape Abraham kpu ḇyesi iswar si. ¹⁷ Snar rarirya ro roi ḇeḇor kam imnisbos naek srar ḇyesi, insa ḇye Imam Ḇeba ḇena saswarya ma ḇeḇeuser faro Allah ma ḇyuk aski faro ersya kam ro sasar sena. ¹⁸ Kuker nyan ine mankundi isma kwar kandera ma fafrowes, insa ifnoḇek snonkaku ḇesma fafrowes sya.

¹ Inja, naek srar Allah kawasa ḇesren ḇyesi, ḇesma rarwas ma fararyor ro boiyaswa, mkomam faro Manwawan ma Imam Ḇeba kokarem ani, isoine Yesus, ² Yesus iso ḇeḇeuser Allah ḇekinfir i kwar, imnis Moses kako ḇeponya ḇeḇeuser ḇefrur mnis rum ḇesiper ḇyedi. ³ Yesus isma ḇaḇesyowi ḇeba syadi ro Moses, imnis snon ḇefawinananem ḇaḇawes rum ḇyesyowi syadi i ro rum sḇawesya. ⁴ Snar snon oso ḇefawinananem ḇaḇawes rum ḇape snon ḇefawinananem ḇaḇawes roi ḇeborkam isoine Allah. ⁵ Moses ikada ḇyeuser Allah rum ḇyedi ḇesiper imnis manfamyan ḇaḇesaksi roi kam Allah fyasna faroi nari ḇerama na. ⁶ Ḇape Kristus ikada ḇyeuser imnis Rumkun nari ḇeḇeḇru ro Allah rum ḇyedi; ma Allah rum ḇyedi isoine koine, rofyor koisya ro papupesya kuf nako ro kakyar ma saneraro ro rosai komsik kukerya. ⁷ Snar rarirya, imnis raris Allah Rur ḇyedi ikofen: "Ro ras ine, rofyor Allah mkaren ḇyedi, ⁸ mkosnemna npakrek awer imnis kpu mkoḇesi spakrek, rofafisu sisma fafrowes ro sup ḇeursba. ⁹ Rodiwa kpu mkoḇesi smam fararur ayena kwar, ro wampasi wambarek samfur rifiak, ḇape sifrowes sas aya kuker nyan simnasen aya. ¹⁰ Rarirya yamsor si, ma yakofen: ’Sikada indo sankarkar, ma ssmambaḇir nyan ayena ḇa.’ ¹¹ Isof yamsorḇo yafores: ’Nari saksun ro moḇ mananai ayedi ḇa.’ " ¹² Naek srar, mkepen mko, insa rofandu mko snon oso iḇarḇor awer ma ikyarḇa awer ma isusubur Allah ḇekenemya. ¹³ Inja rasras mkofarkor yae mko, rofafisu sapḇe "Ras Ine," imnis ono rofandu mko sisnesna npakrek, snar ankarkar sararer ro sasarya. ¹⁴ Snar kosma kwar rarwas ro Kristus, inja kuf nadworen ro kakyar ḇepon koḇena isof ras ḇepupesya. ¹⁵ Ine kada sfasi ro Refo: "Ro ras ine rofyor mkorower Allah mkaren ḇyedi, mkosnemna npakrek awer, imnis kpu mkoḇesi spakrek rofafisu sisampum Allah." ¹⁶ Inja, snonkaku mansesiso ḇerower Allah mkaren ḇyedi raimnai ḇesampum i? Sikada kawasa kam Moses dun faḇesasyarbur sup Masir inke? ¹⁷ Manseren Allah imsor ro wampasi wambarek samfur rifiak? Faro si ḇefrur sasar ma ḇesapi ḇemar ro sup ḇeursḇa? ¹⁸ Mansesiso Allah fyoreswas nari ḇeyaksun ḇa romoḇ mananai ḇyedi? Mansesiso Allah ikofen wersya? Sikada snonkaku besampum Allah inke? ¹⁹ Rarirya komam kada, mboi sima saksun ḇa snar ḇaḇekakyar ḇa sena.

¹ Inja, iḇye kepen ko, insa oso isya rofandu mko skara iḇe ḇesusu awer, snar Allah asas ḇyedi nari kosun ro ḇaḇemananai ḇyedi isya kaker. ² Snar Ankankinem Ḇeḇye sḇaryas ani ssḇuki kwar maroko imnis raris faro si, ḇaryas ani ḇyefainda faro siḇa, snar rofafisu simnafya, sna na kuker kakyar ḇa. ³ Mboi ḇekyar koya kada, nari kosun ḇemoḇ mananaiya raris wos ḇyedi: "Yamsor ma yaforeswas: Mboi sikada nari saksun ḇemoḇ mananai yedi ḇaḇeri!" Allah ikofen rarirya, ḇape fararur ḇyedi imnai kwar ro randak supswan ine ḇyeḇefrur kwarya. ⁴ Snar ro ras ḇeḇefikya sfas kwar ro Refo radine: "Ro ras ḇeḇefikya Allah imnai ro fararur ḇeḇor ḇyena." ⁵ Ma ro mnuk ani sfas radine wer: "Nari saksun ḇemoḇ mananai ayedi ḇaḇeri." ⁶ Inja ḇemnaf ḇepon ḇaryas ro Ankankinem Ḇeḇye ani, ssḇuk moḇ mananai ḇesi ḇa, snar sikyar ḇari. ⁷ Ḇape Allah fyasna ḇepon kwar ras oso, sapḇe "Ras Ine," rofafisu ikofenbadir fyoro ḇepon kwar faro Daud imnis sikofen ro diasne radine: "Ro ras ine, rofafisu mkorower mkaren ḇyedi ido, mkoḇe mkosnemna fanpakrek awer!" ⁸ Snar imnis raris Yosua dun snonkaku ansi fasun kwar ḇemoḇ mananai ani, nari Allah dawawos ro ḇarpurya ro ras ḇese nari ḇeramuma werya ḇa. ⁹ Inja ras mananai oso isya ḇyeḇefasos, faro Allah kawasa ḇyesi, imnis Allah imnai ro ras ḇeḇefikya. ¹⁰ Snar mansei ḇesun ḇemoḇ mananai Allah ḇyuk faro i kwar, nari imnai kwar ro fararur ḇeḇor ḇyena imnis raris Allah imnai ro fararur ḇyena. ¹¹ Inja mkorama koḇesasewar kaku ḇeri fakosun ḇemoḇ manai ani ro Allah. Imbude komindi oso isapiri imnis si roḇepon, snar sikyar faro Allah ḇa. ¹² Snar Allah wos ḇyena wos ḇekenem ma ḇepok isar syadi ro sumber ḇesar raḇandiḇar. Wos ani kyuk randum ḇyerwas rur ma kankenem, faswisew ma korkor kuker sorem na; isof ifrur fakakara ma swaruser ro kosnesna nbaḇer kam. ¹³ Ma roi ḇekenem oso kako iyokef ḇa ro Allah ḇarpon ḇyedi, snar roi ḇeḇor kam nbas ma nbaḇer ro Allah ḇarpon ḇyedi. Ma nari kokarem faro i. ¹⁴ Baboine kona Imam Ḇeba kaku ḇesun isof ro ḇarpon Allah ḇyedi, isoine, Yesus Kristus, Allah Rumkun ḇyedi, inja kuf nako ro kakyar koḇedi kada. ¹⁵ Imam Ḇeba koḇedi, imam ḇemam monda ko ro raryar ḇa koḇena, snar mankundi kako isma kwar faraurowes sas ḇeḇor kwar imnis ko, mboi dakfrur sasar ḇa. ¹⁶ Rarirya komkak ḇa kora faro Allah ḇeḇuk sasoser kuker snemura. Nari Allah iswar ko ma ḇyeḇok ko ma kosma fafnoḇek, rofafisu koḇefandunya.

¹ Snar imam ḇeba oser-oser, skinfir rofandu snonkaku, sikanow faḇeḇeḇru ḇeyuffarmyan Allah, fararur ḇyedi isoine ḇyuk farsarser faro Allah ro rosai ssḇuk fasna ḇesom snar sasar sena. ² Imam ḇeba ani mankundi syambraḇ ḇa ro roi nabor, rarirya ikḇaḇ snonkaku ḇefawi royoḇa ma ḇembran sasarsya, ³ mankundi syambraḇ ḇa kako, inja ḇyuk farsarser som snar sasar kawasa sena monda ḇa, ḇape faro mankundi kako. ⁴ Ma snonkaku osoḇa kako dun ḇaḇesyowi ani faro mankundi ḇardi, ḇape Allah dori faro nasan ani imnis raris Harun. ⁵ Kristus kako rarirya, ikanow mankundi ḇa faḇye Imam Ḇeba, Allah, mankundi ḇekanow i, Allah ikofen faro i: "Awkada Rumkun ayedi! Ro ras ine yaḇe Kma faro aw." ⁶ Allah ikofen kako ro mnuk oso ḇese: "Awkada nari be Imam ro fyoro-fyoro, imnis raris rarwas imam Melkisedek." ⁷ Rofyor Yesus ikenem imnis snonkaku, ḇyenadi kwar ma dor kuker kankanes faro Allah, ḇepok ḇefaspar i bur marmari, ma snar kyunem faro Allah inja Allah imnaf i. ⁸ Yesus ikada Rumkun Allah, ḇape isouser rosai isma kandera kukerya kwar, ⁹ ma isma payamyum ḇyedi kwar, ḇyeknam ro koreri ḇekain fyoro faro snonkaku ḇesouser i sya, ¹⁰ ma Allah fyasna i fabye Imam Ḇeba ro rarwas imnis imam Melkisedek. ¹¹ Ro Yesus ḇaḇenasan ḇyedi imnis Imam Ḇeba, roi nabor nkoḇenkoḇaryas faro mko, ḇape nsamswen faneḇekofen snar nari mkofawi fasaw na ḇa. ¹² Fafisu mkoḇedi imnis kwar fa mkoḇe guru, ḇape mkofandun kaku snonkaku ono ḇese fasḇuk farkarkor ḇemko ro Allah fasasna ḇyena moḇ neknam raya ma nari mkosma roḇean ḇepnas ḇa mboi mkinem sus monda. ¹³ Snar mansei ḇeḇefandun ḇeyinem sus kaker, ḇyewombrek kaker, ifawi ḇaim roi ḇekaku ma roi ḇesasar na. ¹⁴ Roḇean ḇepnas kada faro ḇebasya, snar sima sifawi smambir kwar roi ḇeḇye ma roi ḇeḇarḇor.

¹ Snar rarirya mkorama komnai ro koḇuk farkarkor araref ḇepon ro ḇaḇe Kristen, ma iḇyekada kombrar ro farkarkor ḇemnis, isoine snonkaku simnai ro sifrur roi ḇeḇefromo, mboi sikyar faro Allah, ² isoine farkarkor ḇeḇeararef ro masi sren, kanow ḇramin ro snonkaku siḇrus na, kaḇakḇok ro ḇemarsya ma ḇaḇesamamyai ḇekain fyoroya. ³ Roi nanekam, Allah imarisen ido, nari kofrur na. (Inja kokara awer roi kofrur ma kokyar na naiso ḇefnai koreri maḇeko naba, mboi snar Yesus iso ḇefnai fakosma koreriya.) ⁴ Snar sisya ḇepon kwar ro Allah isna ḇyedi, ma san kwar ḇaḇeḇok ḇeḇye ro boiyaswa, ma sisma rarwas ro Rur Ḇesrenya, ⁵ ma san Allah wos ḇeḇye ḇyena ma fakamaman awar nari ḇeramaya, ⁶ ḇape sfamyun wer, rariso nari kokfin kaḇer si fasimbror ro sasar sena, snar mankunsi spaiepen Allah Rumkun ḇyedi wer ma sfafirek i ro fababa. ⁷ Snar saprop ḇesosef nanek ḇemyun roi, ḇyuk mamarem rokaker ḇeḇefainda faro snonkaku ḇefrurisya, sisma Allah ḇaḇeḇok ḇyena. ⁸ Ḇape rofyor saprop ani ḇyuksur rokaker ḇemarem ḇemanuk, ma kaḇrai borek, saprop ani ḇyefainda ḇa ma nari Allah ifrasi, ma ḇarpurya ḇyeḇekun. ⁹ Ḇape naek srar yaswar kaku, nkokofen wos ḇeḇuk kandera nemirḇa, mboi yafawi kaku ḇeri rariso nari mkokfisbur na, snar mkona roi ḇeba syadi ro kandera anna, isoine koreri. ¹⁰ Snar Allah inapes, isof nari fyanander ḇa fararur mkoḇena faro i ro fafnoḇek mkoḇena mkofrur faro kawasa ḇese ḇeḇe Kristensya, mkofnoḇek isof ro baboine kako. ¹¹ Nkomarisen insa mko oser-oser fyasna kaku ḇeri roi ikyarya isoine koreri isof isma i ro ḇarpurya, ¹² ma mkomyaren ḇa awer, ḇape nkomarisen mkoso si snar kakyar ma kaḇaḇaḇ sisma rarwas ro Allah ḇaḇeasas ḇyedi mkowaf ani. ¹³ Snar rofafisu Allah ḇyuk asas ḇyedi faro Abraham, Allah ḇyuk mankundi fyores warek, snar oso ikaki syadiḇa ro i, ¹⁴ doḇe: "Kaku ḇeri nari yaḇeḇok aw ma yafrur fawaryewen." ¹⁵ Abraham iwaf kuker kaḇaḇaḇ ma rarirya isma rosai sḇeasas faroi. ¹⁶ Snar snonkaku indo sfafores kuker snonkaku mansei ḇekaki syadi, isma samambraḇ ro fafores ani, ma isma fafnoḇek. ¹⁷ Allah imarisen kawasa ḇesma asas ḇyedi ani, insa sikyar kaku, eḇedari ḇyuk mankundi fyores, ¹⁸ insa fasasna risuru ansuya susadwer ḇa, isoine asas ma fafores, Allah fyes mankundi kuker fafores ani, Allah isrer ḇa, inja ḇesewar fafnoḇek koya, idif ko fakufnako kakyar ḇero ḇarpon koḇena. ¹⁹ Kakyar ani kada yor ḇesambraḇ moḇ kufepen ko ma kankenem koḇena naknon, snar ḇyeḇemsawer isof ro sorenya ropukya, knamya isya ro sim ḇesren ro Allah rum ḇyedi ro boiyaswa. ²⁰ Yesus syun fapyon ko kwar, rofafisu iso rarwas Melkisedek, ḇye Imam Ḇeba isof fyoro-fyoro.

¹ Melkisedek ine Allah Ḇekaki Syadi imam ḇyedirya ḇye wairek ro Salem; fafisu Abraham ḇyeembroḇ waireksya ma kyafyo si, Melkisedek ryama isrow i ma ḇyeḇoki. ² Abraham ḇyuk faro Melkisedek rarwas ḇar ḇeḇesamfur ro rosai dun ro embroḇ ani. (Snonsnon Melkisedek ḇeponya "Wairek Ḇenapes"; wairek ro Salem, "Wairek Aski".) ³ Melkisedek ine sikofen ḇadir snariḇa, kmariḇa ma ḇarpur ḇyediḇa, sikofen ḇadir ras saḇeniya ma ras imarya ḇa. Imnis raris Allah Rumkun ḇyedi, ḇyeimam isof fyoro-fyoro. ⁴ Komam Melkisedek ine iba syadi isof Abraham kpu koḇedi, ḇyuk rarwas ḇar ḇeḇesamfur faroi ro rosai ḇeḇye syadi dun ro embroḇ. ⁵ Lewi kpu ḇyesi sisma nasan imam, imnis sasoser Refo Yahudi, insa sor rarwas ḇar ḇeḇesamfur ro er Israel, isoine ro naek sesi, snar sikako seknam ro Abraham. ⁶ Melkisedek ḇyekpu ro siḇa, ḇape isma rarwas ḇar ḇeḇesamfur ro Abraham ma ḇyeḇoki, snar Allah ḇyuk asas faroi. ⁷ Rarirya sisampumḇa ḇeba syadiya ḇyuk ḇok faro ḇebaḇaya. ⁸ Imamsya ḇesma ḇaḇyak rarwas ḇar ḇeḇesamfur ani sikada snonkaku monda nari ḇemar, ḇape Refoya doḇo: Melkisedek ḇesma ḇar rarwas ḇeḇesamfur ani ikada snonkaku ḇekenem. ⁹ Inja kofawi Lewi mankundi ḇyeknam kako ro Abraham isma ḇaḇyak ḇar rarwas ḇeḇesamfur ro kawasa Israel -- ḇyak kako faro Melkisedek ḇar rarwas ḇeḇesamfur ani ro Abraham. ¹⁰ Fafisu Melkisedek isrow Abraham, Lewi ḇyeḇeaḇen ḇaim, ḇape ḇyeknam ro Abraham. ¹¹ Rofafisu imam Lewisya ssḇuk sasoser agama Yahudi faro kawasa Israel. Snar imam Lewisya sifrur mnisḇa ro roi sifrurna, inja fandun kaku imam ḇese, ro rarwas imam Melkisedek, mboi rarwas imam Harun werḇa. ¹² Snar rofyor nasan imam ḇyeḇefadwer rarirya, nari sasoser Refo Yahudi ani ḇyeḇefadwer kako. ¹³ Manseren koḇani iso sikofen rodineya, ikada ḇye Manseren faro er ḇese, ma er ḇyedi kada snon oso ifrur fararur imnis imam ḇaim. ¹⁴ Snonkaku sikam sifawi Manseren koḇedi ḇyeknam ro er Yehuda; ma Moses dap er aniḇa rofyor iwawos ro imamsya. ¹⁵ Roi siwos ine isnai syadi wer, kuker imam oso ḇese dores imnis Melkisedek. ¹⁶ Sikanow i faḇyeimam, snar ḇarpur ḇyediḇa, ḇape snar papoik ro kankenem ḇyedi ma nari imar ḇa. ¹⁷ Snar ro Refo sikofen: "Nari au beimam fyoro-fyoro, imnis nasan imam rarwas Melkisedek." ¹⁸ Inja, baboine sasoser ḇekwar sisusu na, snar samambraḇ ḇa nbefainda ḇa, ¹⁹ -- snar kaser sasoser Refo Yahudiya nari ḇyuk koreri ḇaḇeri -- inja baboine ssḇuk ḇeko kakyar ḇeḇye syadi oso; rarirya kofanam Allah. ²⁰ Ma roi ḇeradine ndarirya kuker fafores ḇa. Rofafisu imam ḇesesya sikanow si faseimam, Allah iso kuker fafores ḇa. ²¹ Ḇape Yesus ḇyeḇekanow faḇyeimam, syun ro fafores, rofafisu Allah ikofen faroi: "Manseren fyores kwar, ma nari syadwer marisen ḇyedi ḇa: ’Au kada beimam fyoro-fyoro,’ " ²² rarirya kako Yesus ḇyefafnoḇek oso ro asas ḇeḇye syadi. ²³ Ma imam-imam ḇeḇor ḇese ansi, snar oseroser imar isof sifararur pdef ro nasan sedi ḇa. ²⁴ Yesus kada ikenem fyoro-fyoro, inja nasan imam ḇyedi ssḇuki faro snonkaku ḇese ḇa. ²⁵ Rarirya Yesus ḇyuk aski fyoro-fyoro faro kawasa ḇerama faro Allah snar i. Yesus ifrur rarirya snar ikenem fyoro-fyoro fadun fararyor kawasa sena faro Allah. ²⁶ Yesus ikada Imam Ḇeba kofandun kaku. Ima isren, kosma ḇaḇesasar oso ro iḇa roḇaido sasar rosai wer kako. Skinfir i kwarbur snonkaku ḇesasarsya, ma ḇyeḇekanow ḇemoḇ ḇekaki syadi kam ro nanki. ²⁷ Ima imnis imam-imam ḇeba ḇesesya ḇa, insa rasras ssḇuk farsarser som snar mankunsi sasar sena ḇepon, posa insape kawasa sasar sena, Yesus ḇyuk farsarser som ḇerarwan oser monda rofyor ḇyuk mankundi ḇefarsarser somya. ²⁸ Sasoser Refo Yahudi ikanow snonkaku ḇemnis ḇa fasḇe Imam Ḇeba, ḇape ḇarpur ro sasoser Refo Yahudi, Allah ifrur asas kuker soar, ikanow faḇeḇe Imam Ḇeba, isoine Rumkun ḇemnis kwar isof fyoro-fyoro.

¹ Knam ro wos ḇeḇor nane isoine: kosma Imam Ḇeba ḇerarirya, ḇekain ro Allah Ḇeba syadi ḇar raku ro karapesa nasan ḇyedi ro boiyaswa, ² ma ḇeyuf fararur imnis Imam Ḇeba ro Moḇ Ḇesren Syadi, ro Rum kruḇen Ḇaḇeari ḇekaku, Manseren ifrurya ma snonkaku oso ifruri ḇa. ³ Imam ḇeba oseroser ḇyeḇekanow insa ḇyuk farsarser roḇa som faro Allah: Rarirya kako Imam Ḇeba koḇedi, nari isma roi ono fanya ḇefarsarser. ⁴ Imnis raris isya ro supswan inekada, nari ḇyeimam ḇa, snar imam sisya kwar fasḇuk farsarser som siso sasoser Refo Yahudi. ⁵ Fararur sifrur imnis imam ani ḇyefanir ma nin ro rosai isya ro boiyaswa, Allah ikofen ḇadir ḇepon faro Moses kwar rofafisu nari ḇyawes Rum kruḇen faseari roya. Allah ikofen radine faro Moses: "Waswarepen! Wafrur nakam imnis raris sfasna faro au ro bonya bori kwar." ⁶ Ḇape baboine Yesus isma nasan imam ḇeba syadi, ro fararur imam sifrur na. Snar asas ḇeyaḇek epen ḇyeḇefrur rofandu Allah kuker snonkaku, ikada imnis Manfandu ro ḇaḇeasas ḇeḇye syadi, snar roi ḇeradine neknam ro asas ḇekaki syadi. ⁷ Snar rofyor asas ḇeyaḇek ḇepon ani fyarorewḇa kada, nari faindaḇa fakofrur asas ḇeyaḇek ḇeḇesuruya. ⁸ Ḇape Allah isrow farorew ani ro kawasa ḇyesi, isof ikofen: "Mkoswarepen nari fafisu iyama, nari yafrur asas ḇebabo kuker kawasa yesi Israel, ma kawasa Yehuda. ⁹ Asas ani imnis kuker asas yafrur kwar kuker kpu sesiḇa rofafisu yakfin si fasisasyarbur sup Masir. Sḇeuser asas yafrur faro siyaḇa, rarirya yafandun siḇa. ¹⁰ Ḇape baboine, asas yafrur faro kawasa Israel ro rasras nari ḇerama, rarirya Manseren ikofen: Nari yaker sasoser ayena ro kakara sena, ma neḇefas ro sisnesna. Nari yaḇe Allah ḇesi, ma nari sḇekawasa ḇeaya. ¹¹ Ma osoḇa rofandu si fyandun ḇyuk farkarkor faro kina min ḇyesi, robaido ifkai faro naek byesi: ’Mkofawi Manseren kada!’ Snar sikam, ḇeba kasun, nari sifawi aya. ¹² Nari yapyos sasar sena, ma yafanander na." ¹³ Snar ifkaiḇair asas ḇebabo oso, Allah ifrur asas ḇepon ḇekwar ani faipromes fasaw.

¹ Asas ḇeyaḇekepen ḇepon isma sasoser ḇaḇeari, ma isma kako moḇ ḇaḇeari snonkaku sifrur na. ² Sifrur rum kruḇen oser ḇarpondi sniriḇe Moḇ Ḇesren. Rodia isya paramrom ma meja kuker mamami ssḇuki fyarsarser faro Allah. ³ Roḇarpur kruḇen ḇeḇesuru ḇepandwas sim ḇesren ma sim Ḇesren Syadiya. ⁴ Ro sim Ḇesren Syadi ani isya rokef ḇekun mamboḇo, sifruri ro brawen, ma isya kako Burua Asas soweri kam kuker brawen. Ro Burua ani dori isya sek brawen ḇeser mamami (manna), Harun ankyon ḇyedi ḇekpirew kwar, ma karufas risuru sḇukfasepen Allah sasoser samfur ḇyena. ⁵ Ro Burua ani sosef ḇyedi isya fanir malaikat risuru roi ḇekenem ḇeḇeprer ḇekakopḇair Allah isya. Prer ro fanir malaikat ansu skambreres robo moḇ snepek rik, ḇaḇepayasyos ro sasar. Ḇape fafisu ine nari kawos roi ḇeḇor anna kamba. ⁶ Rarirya srir roi ḇeḇor anna ro moḇ ḇesren ani. Ma rasras kam imamsya ssun ro rum kruḇen ani sim ḇero ḇarponya fasḇeari. ⁷ Ro sim ḇeḇesuru ro rum kruḇen ani imam ḇebaya derer i ḇesunya. Ifararur rodia ḇerarwan oser monda ro wampasi wambarek oser, ma ifararur rodia dun rik ḇyukfarser warek faro Allah snar mankundi sasar ḇyena ma snar kawasa ḇyesi sasar sena sifrur ḇo sḇaḇirḇana. ⁸ Kuker sasoser ine, Allah Rur ḇyedi ḇyuk farkarkor isnai ḇeko, rofyor sim ḇepon ro rum kruḇen ani ḇarpon ḇyedi isya kaker, nyan kosunyoḇ Moḇ Ḇesren Syadi ani nari syeḇen ḇaim. ⁹ Ine ḇyewos peper ro awar baboine. Isoine farsarser ma aiwan sikun ḇesom faro Allah, nari nafrur mnis ḇeḇuk farsarser ansi sisnesnaḇa. ¹⁰ Snar nakam nun monda marisen ḇeroḇean, aninem ma farsarser syoso-syoso, nama sasoser faro kankenem baken, nari ndarirya rawoo isof fafisu Allah ifrur ḇaḇebaboya. ¹¹ Ḇape Kristus ryama kwar, imnis Imam Ḇeba ro roi ḇeḇye ḇerama kwar: Rum kruḇen moḇ ḇaḇeari ifrur fararur ḇyeja roya imnis Imam Ḇeba ikada, Rum kruḇen ḇeba syadi ma ḇemnis syadi, snonkaku sifrur ḇa, --isoine ḇeḇeknam ro supswan ineḇa, -- ¹² Kristus syun ro Moḇ Ḇesren Syadi ani ḇerarawan oser ma imnis isof fyoro-fyoro. Rofafisu ani dun domba som ono rik senaḇa roḇaido lembu mkuno rik ḇyenaḇa faḇyukfarser, ḇape ḇyuk mankundi rik ḇyena, rarirya ḇyuk ḇaḇemkei ḇekain fyoro-fyoro ḇeko. ¹³ Snar rofyor domba snon oso rik ḇyena ma lembu snon oso rik ḇyena fnoḇek oref ro lembu mkun sikun ḇesom, snepekna faro ḇearwaremsya isof sisren ro baken monda, ¹⁴ ḇape Kristus rik ḇyena nasyadi ro Rur ḇekain fyoro, Kristus ḇyuk mankundi fyarserḇe Allah kwar raris som ḇefarorewḇa, rik ḇyena nfasren kosnesna ro fararur kankenem ḇekaku ḇaya insa koḇeari faro Allah ḇekenemya. ¹⁵ Snar rarirya, ro Kristus, Allah ifrur asas ḇeyabekepen babo oso insa ḇesma fararyor kwar ro Allah sisma ḇok ḇekain fyoro Allah ḇyeasas kwarya. Nakam ndarirya snar oso imar kwar, isoine Kristus ma marmar ḇyedi ḇyuk ḇaḇemkei faro snonkaku, sasar sifrur rofafisu asas ḇeyaḇekepen ḇepon ani isya kaker. ¹⁶ Rofafisu syap romowi isya, rodia sikofen ḇadir snonkaku ḇefrur romowi ani imar kwar. ¹⁷ Snar syap romowi ani kyaku ḇa, rofyor ḇefruriya isya ikenem. Syap ani kyaku rofyor ḇefruriya imar kwar. ¹⁸ Rarirya snaro asas ḇeyaḇekepen ḇepon ani ḇyeḇekarem namuk kuker rikḇa. ¹⁹ Randakya Moses ikofen ḇadir kam sasoser Refo Yahudi faro er Israel ḇesiper; posa kwar Moses dun lembu mkun rik ḇyena ma domba snon rik ḇyena, irḇaren na kuker war, ḇarpurya nyepek na ro syap Allah ma er Israel ḇesiper kuker dombabur ḇeafuk ma hisop (ajumek ram), ²⁰ ma ikofen, ḇo doḇo: "Inekada rik ḇeḇeasas ḇeyabek epen Allah ifrur ḇemko." ²¹ Ḇarpurya Moses nyepek rik anna kako ro Rum kruḇen ḇaḇeari ma roi ḇeḇor ssḇuki isyom Allah na. ²² Rarirya siso sasoser Refo Yahudi, roi ḇeḇor kam neḇefasren kuker rik; inja sasar nasma payasyos rofyor rikya isbawer. ²³ Kuker nyan ḇeradine roi ḇeḇor ḇeḇekakop ro roi ḇeḇesya nane ro boiyaswa, neḇefasren. Ḇape roi ḇeḇor ro boiyaswa ḇardi nefandun som ḇeḇye syadi. ²⁴ Snar Moḇ Ḇesren Kristus syun roya moḇ snonkaku sifrur risyaḇa. Moḇ ani ḇyekakop monda ro Moḇ Ḇesren ḇekakuya. Kristus mankundi syun ro boiyaswa isrow Allah fadawawos fandun koḇena. ²⁵ Imam Ḇeba Yahudi wampasi wambarek nakam syun ro Moḇ Ḇesren Syadi ro Allah Rum ḇyedi dun rik ro aiwan oso. Ḇape Kristus syun faḇyuk mankundi fyarser kaḇer ḇesya kwar ḇa. ²⁶ Snar rarirya ido, randak supswan ine ḇyeḇefrurya, isma kandera ḇesya kwar. Ḇape kofawi baboine ro awar ḇepupes ine, ryama ḇerarwan oser monda faipyos sasar kuker ḇyuk mankundi ḇefarsarser. ²⁷ Allah ikofen kwar mboi snonkaku simar ḇerarwan oser munda, posa kwar Allah kyakara si. ²⁸ Rarirya kako Kristus ḇyefarsarser ḇerarwan oser monda imnis som ḇepyos sasar snonkaku sibor. Nari ryama wer ḇerarwan ḇeḇesuruya ḇyar sasar werḇa, mboi ḇyuk koreri faro snonkaku ḇewaf rarama ḇyedi.

¹ Ro sasoser Refo Yahudiya ḇyuk monda nin ro koreri nari ḇeramaya, ḇape nin ro koreri ḇardiḇa. Wampasi wambarek nakam samsom ssḇuk ḇefarsarser namnis ḇesyakwar monda. Inja rariso sasoser Refo Yahudi ma samsom ḇerarirya nbuk manasnis faro snonkaku ḇerama ḇesyom Allahsyake? ² Ma snonkaku ḇesyom Allah seḇefasren kaku kwar ro sasar, nari sḇaḇir sḇesasar wer ḇa, ma nari simnai ro ssḇuk som. ³ Ḇape samsom ro wampasi wambarek nakam nḇuk swarepen faro snonkaku sasar sena. ⁴ Snar lembu snon rik ḇyena ma domba snon rik ḇyena nari napyos sasar ḇa. ⁵ Rarirya rofafisu Kristus syun ḇesupswan ine, ikofen faro Allah: "Aw wamarisen ḇa som ma farsarser ḇape fasos kwar baken oso ḇeaya. ⁶ Wamarisen ḇa som aiwan ḇekun imnis farsarser oroḇaido samsom ssḇuk farser faḇepyos sasar. ⁷ Inja yakofen: ’Ayaisoine, o Allah! Yarama insa yafrur marisen bedi, imnis fasfas ḇekur aya ro syap ḇeniw ine.’ " ⁸ Randakya Kristus ikofen: "Wamarisen ḇa som ma farsarser; wamarisen ḇa som aiwan ḇekun imnis farsarser ma samsom ḇepyos sasar." Kristus ikofen rarirya, ḇape som ḇeḇor anna ssḇuk farser siso sasoser Refo Yahudi. ⁹ Ma ḇarpurya Kristus ikofen: "Aya isoine, o Allah! Yarama insa yafrur marisen bedi." Rarirya Allah ipyos som-som ḇekwar ḇeḇor anna kam, isadwer na kuker Kristus raris som ḇebabo. ¹⁰ Ma snar Allah marisen ḇyedi, Yesus Kristus fyasren ko kam ro sasar kuker som ro Yesus mankundi ḇyeḇefarser ḇerarwan oser monda isof fyoro-fyoro. ¹¹ Imam Yahudi oser-oser ifrur fararur ḇyedi ro ras oser-oser, ma fyarser kaḇer ḇesyakwar som ḇemnis nari ḇepyos sasar ḇa. ¹² Kristus ḇyuk farsarser som oser monda snar sasar, som ani kyain rawo isof fyoro-fyoro. Posa kwar Kristus kyain ro Allah ḇar raku ḇyedi ma ḇyuk sasoser fnoḇek Allah. ¹³ Ma baboine Kristus iwaf isof Allah ifrur mbroḇ ḇyesi faskafyo faroi. ¹⁴ Snar kuker som oser monda, Kristus ifrur snonkaku ḇesma ḇaḇefasren ro sasar, fasinapes isof fyoro-fyoro. ¹⁵ Ma roi ḇeḇesya ani Allah Rur ḇyedi ḇyuk ḇaḇesaksi ḇeko. Allah Rur ḇyedi ikofen: ¹⁶ " ’Ine kada asas nari yafrur faro si ro rasras nari ḇerama,’ Manseren ikofen, ’Nari yarir sasoser yena ro sisnesna, ma yaker na ro kakara sena.’ ¹⁷ ’Nari yafanander sasar ma ḇarḇor sena.’ " ¹⁸ Inja, sasar ma ḇarḇor anna neḇepyos kwar fandun fasḇuk som ḇaḇepayasyos sasar wer ḇa. ¹⁹ Inja naek srar, baboine kuker marmar Yesus ani ḇyuk makakei fakosun ro Moḇ Ḇesren Syadi ani, ²⁰ snar Yesus syeḇen kwar nyan babo oso ḇeko, isoine nyan ḇeḇuk kankenem. Nyan ani dunuk kruḇen eruk, isoine Yesus mankundi baken ḇyedi, ²¹ ma kona snon oso ḇeḇe Imam Ḇeba ḇeḇeḇru ro Allah Rum ḇyedi. ²² Inja, mkorama kofanam Allah kuker sne ḇenapes ma kakyar ḇekaku beri, snar kosnesna neḇeḇan sren ro ḇaḇaḇir sasar, ma ḇaken koḇena neḇeḇan sren kwar kuker war ḇesren. ²³ Mkorama kufnako ro rosai kokarem imnis raris kakyar koḇedi, snar kokyar Allah nari ḇyuk raris asas ḇyedi. ²⁴ Mkorama kokarayaye insa kodifyae ko, insa kofrur roi ḇeḇye ma kofasna saswarya. ²⁵ Koḇinkwanbur awer fananjur kayam ro ḇaḇeari koḇena, imnis snonkaku ono sifrur kwar, ḇape mkorama kanun yaeko, snar kofawi mboi fyoroḇa wer nari Manseren ryama. ²⁶ Snar rofyor Allah ḇaryas ḇyedi sikofen i kwar maḇeko, ḇape kofrur sasar ḇesyakwar, kuker famamyun nari som oso isyaḇa faipyos sasar koḇena. ²⁷ Ḇape isya faroko isoine kofanam Allah kakara ḇenapes ḇyedi ma for masasor Allah nari ḇekunpres snonkaku ḇesampum isya. ²⁸ Ro ḇeponiwara ḇesampum sasoser Moses ḇyuknasya nari sisma payasyos ro sasar senaḇa mboi sisma samamyai ma marmar, rofyor saksi risuru roḇa kior sesaksi snonkaku ani ḇyesasar kaku ḇeri. ²⁹ Rariso samamyai ḇemarḇak ssḇuk faro snonkaku ḇekoryae Allah Rumkun ḇyedi, snonkaku ḇekofen rik asas ḇefasreni darwarem, ma snonkaku ḇekoryae saswar-fakamaman Rurya? ³⁰ Snar kofawi mansei ḇekofen ḇo ḇeyoḇo: "Nari ayaiso ḇemunsuya. Ma kakuḇaḇoi nari mankundayaiso ḇemunsu na." Ma ikofen wer ḇo doḇo: "Nari Manseren ḇyemankara faro kawasa ḇyesi." ³¹ Ḇayesi ḇeyonef ansi nari simkak namsinḇaḇeri, rofyor sisapi ro Allah ḇekenemya ḇramin ḇyesuya. ³² Mkoswarepen fafisu ḇesyof. Rofyor ani mkosma kandera ḇemaḇak, ḇape snar mkosma Allah isna ḇyedi kwar inja mkofaḇri ma mkosusuḇa, ³³ fafisu ono skoryae naek srar ma sifrur iḇyeḇa ro fababa. Fafisu ono kako mkun ḇar fnoḇek ḇesma kandera ansya. ³⁴ Fafisu ono mkun kwar ḇar ro kandera samamyai snonkaku ma fafisu ono papus mkoḇena sfasyar na, mkosma roi ḇeḇesya nane kuker marisen monda, snar mkofawi nari mkona arasai ḇeḇye syadi ḇekain fyoro-fyoroya. ³⁵ Rarirya mkorir awer kakyar mkoḇena, snar sasuref ḇeba isya iwaf. ³⁶ Mkofandun kaku kaḇaḇaḇi insa mkofrur Allah marisen ḇyedi, ma rarirya nari mkosma rosai Allah ḇyeasas kwar faro mko. ³⁷ Snar sfas ro Refo radine, "Knikmkun monda wer, sfasna faḇerama ani, nari ryama; ma nari isusu rarama ḇyediḇa. ³⁸ Ḇape snonkaku yesi ḇenapes nari ikenem; snar kakyar ḇyedi faro aya, ḇape rofyor fandusi ono sisusu, nari yamarisen siḇa." ³⁹ Ḇape nkoine nkoḇeoser kuker ḇaḇeoserya ma ḇeḇorḇa, mboi nkoine kawasa ḇekyar faro Allah ma ḇesma kankenem.

¹ Ḇaḇe kakyar ḇyeknam ro roi ḇeḇor kokyar ma bon ro roi ḇeḇor komam ḇaim na. ² Snar kakyarya, sikofen ḇadir kwar kuker ḇaḇesaksi faro kpu koḇesi ro awar madero. ³ Snar kakyarya, kofawi mboi sansoren ḇoka ḇyeḇefrur kuker rosai Allah ikofen, isof rosai komam na ndarirya ro rosai komam ḇaim na. ⁴ Snar kakyarya, Habel ḇyuk farsarser kwar faro Allah kuker samsom ḇeḇye syadi ro samsom Kain ḇyena. Snar kakyar ḇyedi Allah nya Habel imnis snonkaku ḇenapes, snar Allah imarisen farsarser ḇyena. Habel imar kwar, ḇape snar kakyar ḇyedi, isya iwawos wer. ⁵ Snar kakyarya, Henokh imarḇa, mboi ḇyeḇekanow ma ḇyeḇeyun faro Allah. Snonkaku oso isrow iḇa kako, snar Allah i kanowi kwar. Sfas ro Refo mboi rofyor Henokh ḇyeḇekanow ḇaim, isma ḇaḇesaksi, ifrur marisen Allah ḇyedi kwar. ⁶ Kakyar isyaḇa, snonkaku osoḇa kako ifrur Allah marisen ḇyedi. Snar snonkaku ḇerama faro Allah, ikyar Allah isya, ma Allah myunsu faro ḇesewar kaku isya. ⁷ Snar kakyarya, Nuh isma swarapepen Allah ḇyuk faroi roi nari ḇerama ro ḇarpurya, ḇyeḇemam ḇaim ma snar Nuh ḇyesyowi Allah isof ifrur wai oso faḇyuk ḇeaski faro kina ḇyena; papupesya ssḇuk samamyai faro supswan, ḇape rofyor ani Allah fyasnai Nuh mankundi ḇeḇenapes snar kakyar ḇyedi. ⁸ Snar kakyarya, Abraham ḇyesyowi Allah rofafisu Allah dori ma iwani farya ḇemnu Allah ḇyeasas faroi, raimnai Abraham rya ḇoi ifawi moḇ iḇe ryayoḇya ḇa. ⁹ Kuker kakyar faro Allah, Abraham kyain ro mnu Allah ḇyeasas faroi ani imnis mandaman. Abraham kyain rodia ro rum kruḇen kuker Ishak ma Yakub, ḇeyaksma asas ani kako ro Allah. ¹⁰ Snar Abraham ikyar nari iḇe kyain ro mnu Allah dawya ma ḇyawes kuker araref ḇesambraḇ. ¹¹ Snar kakyarya, Abraham ma Sara suyaḇen romawa kpu, rofyor Abraham ḇyemansar kaku kwar ma Sara ḇinkundi pyansnasem. Abraham ikyar nari Allah ifrur namnis asas ḇyedi. ¹² Fafisu ani Abraham syambraḇ ḇa fanya romawa, ḇape romankundi daḇen kpu up sibor, dandonek sedi kokor napok siba-- simnis dandonek maksya ro nanki ma karyen mor ro swan andirya. ¹³ Sikam snonkaku ḇekyar faswef, isof rofafisu simar, ḇape sakmam ḇaim rosai Allah ḇyeasas kwar, sikada smam mura rona monda ḇoi srar na kuker kakyar ro sisnesna, ma rarirya sfasna, sikada mandaman ma snon dakam ro supswan ine. ¹⁴ Snonkaku ḇekofen rarirya sfasnaibos mboi simarisen ssewar mnu kaku sedi. ¹⁵ Ḇape mnu seknam ro ma sibur kwar ani skaraya ḇa. Snar rarirya ido sisma fafisu kwar faskaḇer ḇemnu ani wer. ¹⁶ Ḇape baboine simarisen mnu oso ḇeḇye syadi, isoine mnu ro boiyaswa. Rarirya Allah imai ḇa sap iḇe Allah sedi, snar Allah fyasos mnu oso faro si kwar. ¹⁷ - ¹⁸ Snar kakyar kako, fafisu Allah imnasenpan Abraham, Abraham ḇyuk Ishak, romawa ḇyedi faḇyefarsarser som. Romawa Allah ḇyeasas ani ḇyuki faro Abraham kwar; ma romawa ani Allah ikofen kwar, "Ro Ishak inekada nari wasma kpu-up yaḇeasas faro aw." Rariryano Abraham imarisen ḇyuk romawa oser ḇyani kako. ¹⁹ Snar Abraham kyara Allah ipok ḇyuk kaḇer kankenem faro Ishak ro marmar ḇyedi -- inja kokofen raris Abraham isma kaḇer Ishak kwar ro marmar. ²⁰ Snar kakyar, Ishak ḇyeasas ḇok-ḇok faro Yakub ma Esau ro ḇarpuriyama. ²¹ Snar kakyar, rofafisu Yakub imar ḇaim -- ikasandem ro ankyon ḇyedi ḇo ḇyansuba faro Allah -- Yakub ḇyuk ḇok ḇyena faro Yusuf romawa ḇyesuya. ²² Snar kakyar, Yusuf -- rofafisu fanam imar -- iwawos ro kawasa Israel nari sisasyarbur sup Masir. Raimnai kwar Yusuf ḇyuk ananun insa sfaduru rombronbyesya. ²³ Snar kakyar, Moses sinan ḇyesuya suyokef i ḇepaik rikior rofyor Moses ḇyeḇeyaḇenya. Sumam romawa snon ani ipyum kaku, ma sumkak ḇa fasusampum wairek sasoser ḇyena. ²⁴ Snar kakyar, Moses iba kwar imewer sap i ḇeromawa ro imboki wairek Masir. ²⁵ Imarisen syadi ḇyekandera kuker Allah kawasa ḇyesi rofafisu kermkun ikenem ro marisen kankenem ḇesasar. ²⁶ Moses ḇyaḇir maeja ḇesyadiya isma anonef kuker Wairek Ḇeḇuk koreri Allah ḇyeasas ani ro isma arasai ḇeḇor ro mnu Masir; snar Moses ikyar sasuref ro ras ḇarpurya. ²⁷ Snar kakyar, Moses ibur Masir kwar ma imkak ḇa wairek masasor ḇyedi. Moses imbran pdef ḇemoḇ ryayoḇya imnis raris myam kwar, Allah komam ḇaim ani. ²⁸ Snar kakyar, Moses ifrur munara Paskah ma isasyar sasoser fakawasa Israel snepek rik ro rum sena ro kedwa na insa Malaikat Marmari myun awer romawa rak sesi. ²⁹ Snar kakyar, kawasa Israel ssunuk Soren Ḇerik, raris simbran ro saprop ḇesyor, ma rofyor kawasa Masir sakunuksas kako ḇape soren ani doren si. ³⁰ Snar kakyar, kawasa Israel simbran yaryar ayar karui Yerikho ras rifik, ma ayar karui ani imbroḇen. ³¹ Snar kakyar kako, Rakhab, bin ḇefrur farbuk ani sakmun iḇa fnoḇek kawasa ḇeḇeankarkar, snar fyaduru manpaf ro Israelsya. ³² O, yaḇe yawos pdef ḇape fafisu yena nabor ḇa, rofyor yamarisen yafarfyar ro Gideon, Barak, Simson, Yefta, Daud, Semuel ma nabisya. ³³ Snar kakyarya, sḇefainda ro embroḇ kuker ḇaḇesasosersya. Sifrur rosai ḇenapes, isof sisma rosai Allah ḇyeasas faro si. Spanoser singasya sisḇasna, ³⁴ sfasye for ḇeba. Sikfis kwar ro sumber ḇemamun. Sambraḇ ro raryarḇa sena; sambraḇ syadi ro embroḇ isof sifrur kafyo sararsya ro er mandaman. ³⁵ Snar kakyar, bin-binsya sisma kaḇer kawasa ḇemar kwar sesi. Ḇape ono simarisen sisma kandera isof simar, simewer sisma mkei, snar simarisen sisma kaḇer kankenem ḇeḇye syadiya. ³⁶ Kawasa ono kako sḇeḇekoryae, siprersi, sewanka si ma sesifa ssun ro bui. ³⁷ Ssosi kuker karui isof simar, sisyoḇuksi, smunsi kuker sumber. Sinarbur kuker famamar ro domba kif roḇa kambing kif; ssabarar ma sifrur kandera si. ³⁸ Supswan ine isyusḇa farosi. Sinarbur ro supḇeursḇa ma ro bon na, skain ro abyaḇ na ma ner ro saprop. ³⁹ Fainda ḇeba kaku faro snonkaku sine snar kakyar sena! Ḇape sisma ḇaim rosai Allah ḇyeasas faro si. ⁴⁰ Snar Allah fyasos kwar faro ko roi ḇemnis syadi; koisya ḇa ido nari sisma manasnisya ḇa.

¹ Snar kona saksisya sibor ḇesiryaryar ko raris mandepna, eḇedari mkoramuma kosawen roi ḇemarḇakna ma sasar ḇekrof roko ma mkorama kofarmku koso famfaḇri sḇukma ḇeko. ² Mkorama komam monda faro Yesus, snar i ḇefnoḇek ko faro ḇaḇekakyarya faro i ro randakya isof papupesya! Ḇyefandun ḇa imar ro apropya imnis roi oso ḇefrur mamyai. Iswarepen monda marisen nari ḇyaḇir ro ḇarpurya. Baboine ḇyuk sasoser fnoḇek Allah ro ḇar raku karapesa nasanya. ³ Mko karasas rariso Yesus kandera ḇyedi ro ḇarpon snonkaku ḇesasar ḇesampum i. Rarirya mkosambraḇ ma kakyar mkoḇena namuk awer. ⁴ Snar mkofaḇri mkosampum sasar, isof ro mkosasyar rik ḇaim. ⁵ Ma mkosampum awer Allah ananun ḇyena faro mko imnis kma oso dawawos kuker romawa ḇyesi! Allah ikofen, "Ne, rumkun yedi, kwara nabye rofyor Manseren fyarkor aw, ma kakyar mkoḇena namuk awer rofyor imsor mko. ⁶ Snar Manseren fyarkor snonkaku saneraro ḇyesi, ma iprer snonkaku kyarem imnis romawa ḇyesi." ⁷ Rofyor mkosma aprer ro Allah imnis raris farkarkor ro kma oso. Snar rariso romawa oso isma aprer ro kmari ḇa? ⁸ Rofyor mkoso aprer ḇyena ḇa imnis romawa fyarkor, mkoḇeromawa kaku ḇa, mboi mkoḇeromawa daḇyor. ⁹ Kosma kma ro supswan ine. Kosma farkarkor ro kma ani, ma nari koḇesyowi i. Rarirya kako faro kma rur koḇedi ro boiyaswa, kokenem syadi faroi insa kosma kankenem. ¹⁰ Sinan koḇesi ro supswan ine ssḇuk farkarkor rofyor ḇeknampu monda, ro rosai skara ḇeḇye. Ḇape Allah fyarkor ko faro ḇaḇye mankun koḇena, insa kosren fnoḇek i. ¹¹ Rofyor sfarkor ko, aprer anna nbuk marisen ro kosnesna ḇa. Ḇape ro ḇarpurya, sfarkor kwar koya, koso kankenem Allah imarisen na, isof nbuk bon ḇeḇaḇir aski maro ko. ¹² Snar rarirya swambraḇser ḇramin ḇemor bedi ma wepur ḇeradadai bedi. ¹³ Wambran ro nyan ḇepyom insa wemin ḇeryarḇa bedi ryosdis awer mboi iprei. ¹⁴ Besewar wakenem kuker aski faro kawasa kam, ma faḇri fawakenem nasren kuker Manseren, snar kuker nyan ine ḇa snonkaku osoḇa nari myam Manseren. ¹⁵ Mkowaren insa snon oso ḇaḇeri isasyarbur awer Allah saswar-fakamaman ḇyedi, insa ono simnis awer rokaker ḇemamur rofandu naek srar isof nḇuk rakrakrok ma makakok snonkaku ḇeḇor kuker mamur ḇyedi. ¹⁶ Mkowaren insa mkokenem ro farḇuk awer roḇaido mkofandunḇa rosai ḇesren, imnis raris Esau, ḇyoḇ nasan romawa rawer ḇyedi kuker roḇean ben oser monda. ¹⁷ Snar mkofawi mboi ro ḇarpurya Esau imarisen isma ḇok ani ro kmari, ḇape ḇyeḇepampum. Esau dor kuker kankanes, ḇape isma fafisu osoḇa fa fyadwer sasar ḇyena. ¹⁸ Snar mkaksrow roi oso ḇaim imnis er Israel fyoriwara sisrow kwar. Sisrow bon span roya, isoine Bon Sinai kuker for ḇesber ḇyena; sisrow ḇaḇepampan, fnureḇ ma wam doḇer, ¹⁹ sisrow kḇur ḇerok, ma mkaren ḇerok nababos. Rofafisu kawasa Israel ansi srower mkaren ani, sor insa mkaren ani dawawos kaker faro si awer. ²⁰ Snar ssambraḇ srower mkaren ani ḇa ro sasoser ḇyuk na. Snar mkaren ani ikofen, "Rofyor aiwanke roḇa manseirya wer kako, ḇefanam bon ine, nari ḇyeḇeso kuker karui isof imar." ²¹ Ma rosai kawasa Israel smam ani dun nyawa isof Moses ikofen, "Yamkak ma yaradai!" ²² Ḇape mkora kwar ḇe Bon Sion Allah mnu ḇekenem ḇyedi, isoine Yerusalem ro boiyaswa kuker malaikat syaran-syaran ḇyesi. ²³ Ma mkorower raryaḇ fananjur oso--fananjur Allah rumkun rak ḇyesi, snonsnon sena neḇefas epen ro boiyaswa. Mkorower Allah, Mankara ro snonkaku kam. Mkosrow snonkaku ḇeḇye rur sesi sifrur faḇemnis kwar. ²⁴ Ma mkosrow Yesus manfandu ḇeyun asas ḇebabo ḇeyaḇek epen ani; mkosrow rik ḇesepek ḇefaduru roi ḇeḇye syadiya ro fadaduru Habel rik ḇyedi. ²⁵ Rarirya mkepen mko imbude ḇeyawawos ani mkomewer mkorower indi. Rofyor simewer simnafi, ḇefkai ḇayir Allah wos ḇyedi ro sup ine, nari sikfisbur ḇa, isyadi wer koine ḇemnaf i ḇeyawawos ro boiyaswa ani! Rofyor komewer komnaf i, rariso nari kokfisbur i? ²⁶ Rofafisu ani mkaren ḇyedi imkiker sup ine. Ḇape baboine ḇyuk asas kwar, "Nari yamkiker ḇerarwan oser wer, sup ine derer monda ḇa mboi nanki kako." ²⁷ Wos "ḇerarwan oser wer" fyasna roi ḇeḇor kam sifrur faḇemkiker kwar anna, nari sena fanakrenbur insa ḇemkiker ḇa na nkain faswef. ²⁸ Inja kokofen kasumasa faro Allah, snar kosma kwar ro Allah ḇaḇesasoser oso nari ḇemarmer ḇa. Inja kokofen kasumasa ma koḇeari kuker kakyar faro Allah kuker syowi ma makakak, imnis raris Allah mankundi marisen ḇyedi. ²⁹ Snar Allah koḇedi imnis for ḇekun.

¹ Inja mkoswaryae mko imnis raris kawasa Kristen ḇeḇemanbekanaek. ² Mkofanander awer mkoḇuk moḇ ḇeḇeryar faro snonkaku, snar fararur ḇorarirya snonkaku ono kuker fawawi ḇa sedakam malaikat ono kwar. ³ Mkoswarepen snonkaku ḇesma samamyai ro bui, imnis mkoisya kuker si ro bui kako. Ma snonkaku sifrur mnis ḇa, mkoswarepen si imnis mko kako sakfrur mko rarirya. ⁴ Mko kam mkoḇesyowi fakawawinya, eḇedari imbeswasya sesyowiyae si. Snar ḇefrur farḇuk ma ḇefrur ḇarḇor nari Allah ḇyuk samamyai faro si. ⁵ Mkormomen pipi awer, mboi mkokenem imnis kuker rosai isya faro mko. Snar Allah ikofen kwar, "Nari yarir aw ḇa ma nari yabur aw ḇa." ⁶ Rarirya kuker kakyar kokofen: "Manseren ifnoḇek aya, inja nari yamkak ḇa. Snonkaku oso ḇaḇeri nari ifrur roi oso maḇe aya!" ⁷ Mkofanander awer manfarkin mkoḇesi, ḇefkai ḇair Allah wos ḇyedi faro mko kwar. Mkoswarepen kankenem ḇepupes sena ma mkokyar faro Allah ma mkofrur farari kakyar ma fararur sena. ⁸ Yesus Kristus fyarwe ḇa, ro ḇeponiwara, baboine, isof fyoro-fyoro. ⁹ Mkomam monda awer farkarkor syoso-syoso ḇeḇor ḇefarkor ninyan mko. Allah ḇaḇye ḇyedi ifrur mkosnemna fanamku, mboi sasoser ro roḇean ḇa. Snar kawasa ḇepon ansi sisouser sasoser anna ḇape sisma fainda oso ḇa. ¹⁰ Kona rokef farsarser oso fakobuk farsarser som faro Allah. Ma imamsya ḇeyuffarmyan ro rum kruḇen ḇaḇeariya nari san rosai isyaro rokef farsarser ani ḇaḇeri. ¹¹ Aiwan rik ssḇuk farsarser imnis som ḇepyos sasar, Imam ḇebaya dun iḇe Moḇ Ḇesren Syadiya ro rum kruḇen ani dori; ḇape aiwan kraf ani kada ḇyeḇerap ro rum kruḇen ani ḇandiri. ¹² Rarirya Yesus kako imar ro kedwai ḇeba ro mnuya ḇandiri faipyos kawasa ḇyesi sasar sena kuker rik mankundi ḇyedi. ¹³ Snar rarirya mkorama kora faro i ro rum kruḇen ani ḇandiri ma kosma anonef kuker i. ¹⁴ Snar ro sup ine moḇ ḇekain fyoro oso faro koḇa; inja kosewar mnu nari ḇeramumaya. ¹⁵ Rarirya kuker Yesus mkorama kosandik Allah ḇesya kwar; ine imnis som kasumasa koḇena faroi, isoine sanandik ro sḇadon koḇena faro snonsnon ḇyedi. ¹⁶ Mkofanander awer mkofrur roi ḇeḇye ma mkofnoḇekyae mko, snar Allah i marisen samsom ḇerarirya. ¹⁷ Mkoḇeuser manfarkin-manfarkin mkoḇesi, ma mkoḇesyowi faro sikada, snar siwaren ḇesya kwar rur mkoḇesi ma skarem faro Allah. Rofyor mkoḇeuser si, nari sifararur kuker marisen; rofyor rarirya ḇa, nari sifararur kuker fafafko, snar roi ḇerarirya nbuk fainda osoḇa faro mko. ¹⁸ Mkonadiwarek ḇesya kwar faro nko; snar nkokyar nkosnesna nasren, snar nkomarisen nkofrur roi ḇenapes ḇesya kwar. ¹⁹ Yor faro mkerer, mkonadiwarek aya, insa Allah dun kaḇer aya fasaw faro mko. ²⁰ Allah ḇyawes kwar Manseren koḇedi Yesus ro marmar. Snar marmar ḇyedi, baboine ḇye Manfarandous Ḇeba maro ko imnis domba-domba ḇyesi. Marmar ḇyedi kako ḇyuk kaku ro Allah asas ḇyedi ḇekain fyoroya. ²¹ Allah knam askiya fyasos mko kuker roi ḇeḇye kada, mkofandun famkofrur imnis marisen ḇyedi. Kuker Yesus Kristus manfandu Allah, ifrur maro ko rosai imarisenya. Sanandik fyoro-fyoro faro Kristus! Amin. ²² Yor ro mko, naek srar, insa mkokara wos ananun ayenane kuker kaḇaḇaḇ kada, snar syap ayedine ikwan mankenem ḇa. ²³ Mkofawi naek koḇani Timotius sisasyar i kwar ro bui. Rofyor ryama kwar ro moḇ ayedine, nari yuni rofyor yaḇe yarakaki mko. ²⁴ Mkokofen ḇadir aroo ayedi faro manfarkin mkoḇesi kam ma faro Allah kawasa ḇyesi kam. Naek srar ro Italia kako sfarem aroo faro mko kam. ²⁵ Manseren ḇyebok naek srar mko kam kada.