GALATIA

GALATIA

¹ Ro Paulus, manwawan oso, mboi snar ro snonkakuḇa, ma ro snonkaku osoḇa kako, mboi ro Yesus Kristus ma Allah, Kmaya, ḇeḇawes i kwar rofandu ḇemarsya, ² ma aya kuker naek ḇerowus ayasya kam, faro jemaat-jemaat ro Galatia: ³ Saswar-fakamaman ma aski ḇeramaker Allah, Kma koḇedi, ḇerama ro Yesus Kristus. ⁴ Ḇeḇuk mankundi kwar ḇefarsarser snar sasar koḇena, insa fyasparko ro ḇarḇor supswan ine imnis Allah ma Kma koḇedi marisen ḇyedi. ⁵ Sanandik mufaḇe Allah rawo isof fyoro-fyoro! Amin. ⁶ Yakandor, snar mkowai dokor fasaw bur Allah, ro saswar-fakamaman Yesus ḇeyor mko kwar, ma mkoso ankankinem ḇeḇye oso ḇese, ⁷ Ankankinem Ḇeḇye ḇekakuḇa. Snar snonkaku ono sisya sfarkor ninyan mko ma skara fasoḇo siwararye Ankankinem Ḇeḇye ro Kristus. ⁸ Ḇape iḇye nko roḇaido malaikat oso ro boiyaswa ḇeḇaryas Ankankinem Ḇeḇye oso ḇese bur Ankankakinem Ḇeḇye nkoḇaryas faro mko, nari ḇyeḇefras kada. ⁹ Imnis nkokofen ḇepon kwar, baboine yakofen ḇeoser wer: rofyor snonkaku sisya sḇaryas Ankankinem Ḇeḇye oso ḇese bur, rosai mkosma kwar, nari ḇyeḇefras kada. ¹⁰ Inja knikine rariso: yasewar snonkaku marisen sena roḇaido yasewar Allah marisen ḇyenake? Yasewar fayun snonkaku sisnesna insa simarisen aya kaker? Rofyor yamarisen yasewar fayun snonkaku sisnesna insa simarisen maro aya, rarirya ido ayaine Kristus manfamyan ḇyedi sayaḇa. ¹¹ Rarirya yaḇuk farkarkor faro naek ayesi mko, mboi Ankankinem Ḇeḇye yaḇukfarkor ani Ankankinem Ḇeḇye ro snonkaku riryaḇa. ¹² Snar yasma i ro snonkakuḇa, ma snonkakusi ḇefarkor i maḇe ayasyaḇa, mboi yasma i kuker fasasna ro Yesus Kristus. ¹³ Snar mkomnaf ḇepon kwar kankenem ayedi ro agama Yahudi: Yafrur kandera Allah jemaat ḇyena kuker pakakrek kaku ma yasewar fayakakok na. ¹⁴ Ma rofyor ayaisya ro agama Yahudi ayaiso ḇero ḇarpon syadi ro min ḇeḇor ayesi ḇemnis kuker aya rofandu er ayedi, imnis snonkaku ḇemyaren ḇefaduru rari up ayesi. ¹⁵ Ḇape rofafisu Allah, ḇekimfir aya randak ro yaḇe ḇeyaḇen ḇaimya ma dor aya kuker saswar-fakamaman ḇyedi, ¹⁶ imarisen fyasna Rumkun ḇyedi maḇe aya, insa yaḇaryas i rofandu er-er ḇese ḇeḇe Yahudiḇa, rarirya fafisu oso ḇaḇeri fayor kakara ro snonkaku; ¹⁷ ma yara ḇe Yerusalemḇa kako fayasrow naek ḇeḇe manwawan ḇepon kwar ro aya, ḇape yara ḇesup Arab raimnai yakaḇer wer ḇe Damsyik. ¹⁸ Raimnai, wampasi wambarek rikior posa, yara ḇe Yerusalem fa yarakaki Kefas, ma yeḇeryar ro rum ḇyedi ḇeras samfur seser ririm. ¹⁹ Ḇape yamam manwawan ḇese ansi oso ḇaḇeri, derer Manseren Yesus naek ḇyedi Yakobus. ²⁰ Ro Allah ḇarpon ḇyedi yakofenbos: roi yafas faro mko nane nkaku rarirya, yasrerḇa. ²¹ Ḇarpurya yara ḇesupya fyor Siria ma Kilikia. ²² Ḇape jemaat-jemaat ro Yudea smamḇaḇir aya ḇaim. ²³ Sikada srower monda, iso ḇeponiwara ḇefrur kandera si, knikine ḇyaryas kakyar saiso, imarisen kyakok ani. ²⁴ Ma sisandik Allah snar aya.

¹ Ḇarpur ro wampasi wambarek samfur seser rifiak besyof kwar, aya kuker Barnabas nura ḇe Yerusalem wer ma yun Titus kako. ² Yara snar fasasna oso. Ma yafar farosi Ankankinem Ḇeḇye yaḇaryas faro er-er ḇese ḇeḇe Yahudiḇa -- yawawos ḇardi kuker ḇefawisya serer, -- insa fararur yafrur ḇepon ma yafrur wer na nefromoḇa. ³ Rariryano Titus, ḇewarpu aya ani, ikada snon Yunani rirya, ḇape ḇyeḇedif faifrur sofakfuk ḇyediḇa. ⁴ Mboi kaku naek ḇesararer ono sisya ssun fasis fa sidafdif, isoine ḇesun fasis faḇedwarek ḇaḇemkei koḇedi kosma ro Yesus Kristus, insa kuker nyan ine sewayam ko wer. ⁵ Ḇape fafisu oso ḇaḇeri fa komarisen kosusu ma kokunem farosi insa Ankankinem Ḇeḇye ḇekakuya kyain faswef faro mko. ⁶ Ma faro si kokara ḇefawi ansi rariso kankain ḇepon sena, faro aya nefandunḇa, snar Allah myam ḇaḇekaryerḇa -- ḇefawi ansi rariso wer kako, nari sedafdifer aya kuker roi oso ḇeseḇa. ⁷ Ḇape rarirya roḇarya, fafisu smam kwar mboi faro aya ssḇuk kakyar kwar ro ḇaḇeḇaryas Ankankinem Ḇeḇye faro kawasa ḇesma ḇaḇesofakfuk ḇasya, imnis raris Petrus faro ḇesma ḇaḇesofakfuksya ⁸ -- snar Allah ḇeḇuk kwar samambraḇ mufaḇe Petrus fa ḇyemanwawan faro snonkaku ḇesma sofakfuksya, Allah ani kako ḇyuk kwar samambraḇ maḇe aya faro snonkaku ḇeyaksma sofakfuk ḇaimsya. ⁹ Ma smam saswar-fakamaman ḇeḇuk kwar maḇe aya, inja Yakobus, Kefas ma Yohanes, smam imnis ḇeḇe manfarkin jemaat, sedasi kuker aya ma Barnabas imnis aḇyair ḇaḇeoser, insa nkora mura ḇe snonkaku ḇesma sofakfuk ḇaimsya ma sikada sra faro snonkaku ḇesma sofakfuk kwarsya; ¹⁰ mboi nkoswarepen kaku snonkaku ḇesaḇararsya ma iso yamarisen yaḇesewar kaku ḇeri fayafrurya. ¹¹ Rofafisu Kefas ryama ḇe Antiokhia, kuker fababa yasampumi snar ikada syasar. ¹² Snar snonkaku ono ro ḇar Yakobus srama ḇaim, Petrus danan kuker naek ḇeyaksma sofakfuk ḇaimsya, ḇape srama kwar, isusu ma ḇyinkwanbur si snar imkak kawasa ḇesma sofakfuk kwarsya. ¹³ Ma kawasa Yahudi ḇesesya sifrur ankar kako kuker i, isof Barnabas dakso ankarkar sena kako. ¹⁴ Ḇape rofyor yamam, mboi kankenem sena namnis kuker Ankankinem Ḇeḇye ḇekakuyaḇa, yakofen bos kaku mufaḇe Kefas ro ḇarpon sena kam: "Rofyor aw, snon Yahudi oso, wakenem imnis korwar ma wakenem imnis Yahudiḇa, rariso nari wadafdif naek ḇeyakso sofakfuk ḇasya fasikenem imnis snonkaku Yahudi?" ¹⁵ Koḇe ḇeyaḇen imnis snon Yahudi ma komnis snon ḇesasar ro er-er ḇesesyaḇa. ¹⁶ Mkofawi, mboi snonkaku osero ḇaḇeri sbuk napnapes faroi snar ḇyeuser sasoser Refo Yahudiya, ḇape snar kakyar faro Yesus Kristus monda. Eḇedari nko kako nkokyar faro Yesus Kristus kwar, insa nkosma ḇaḇenapnapesya snar kakyar faro Kristus. Mboi snar ḇaḇeuser sasoser Refo Yahudiyaḇa. ¹⁷ Ḇape rofyor mankun nko ḇardi, nkoḇesewar insa ssḇuk ḇaḇenapnapesya maḇe nko ro Kristus, rofyor ani nkofawi nko snonkaku ḇesasar, rarirya ido roi ḇeradine fyasna inja Kristus duffarmyan sasar na ke? Oroḇaḇeri. ¹⁸ Ḇape aya ine yafasna mankundaya imnis snon ḇeḇeyuk sasoser Refo Yahudi, rofyor yaḇawes kaḇer rosai yakakok kwar na. ¹⁹ Ḇape yamar kwar faro sasoser agama anna -- inja sasoser anna naiso ḇemun aya -- insa yakenem kuker Allah. Spai epen aya ro aprop kuker Kristus kwar; ²⁰ rariryano yakenem, ḇape yakenem ro mankundaya ḇa, mboi Kristus ikenem fnoḇek aya. Ma kankenem ayedi yakenem kuker baken ro baboine, irya kankenem ro kakyarya faro Allah Rumkun ḇyedi ḇeswar aya kwar ma ḇyuk mankundi ḇefarsarser maro aya. ²¹ Nari yapampum saswar-fakamaman Allah ḇyena ḇa. Snar rofyor ḇaḇenapnapes isya ro sasoser Refo Yahudi ido, nari Kristus ḇaḇemarmar ḇyedi ḇyefromo monda.

¹ Sye, kawasa Galatia mkoyano, ḇemamkarkirḇa, mansei ḇeyawninyan mko kwar? Yesus Kristus ḇyeḇepaiepen kwar ro aprop ani ḇyeḇefasna kwar faro mko ḇake? ² Inja roi yamarisen yafawi ro mko isoine: Mkosma Rurya kwarke snar mkoḇeuser sasoser Refo Yahudi roḇaido snar kakyar faro ḇaḇeḇaryas Ankankinem Ḇeḇyeya? ³ Snaro mkomamkarkir ḇaḇeri rarirya? Mkorandak kwar kuker Rurya, raimnai ro ḇarpurya mkomarisen mkosma i kuker papoik ro mankun mko? ⁴ Roi mkosma kwar anna kam nefromoke? Nari nefromoḇa! ⁵ Inja knikine rariso, Allah ḇeḇuk fa mkofo kuker Rurya ma ḇefrur aḇyair kanandor rofandu mko, ifrur rarirya snar mkoḇeuser sasoser Refo Yahudiya roḇaido snar kakyar faro ḇaḇeḇaryas Ankankinem Ḇeḇyeya? ⁶ Rarirya kako kakyar Abraham ḇyedi faro Allah, eḇedari Allah kyor roi ani ḇenapnapesya faro i. ⁷ Inja mkomam, snonkaku ḇekenem kuker kakyarsya sikada Abraham romawa ḇyesirya. ⁸ Ma Refo ifawi ḇepon kwar, Allah ḇyuk napnapesya faro snonkaku ḇeḇe Yahudiḇasya snar kakyar, Ankankinem Ḇeḇye ine ḇyeḇeḇaryas ḇepon faro Abraham kwar: "Snar aw nari er-ersya kam ro sup ine sḇeḇeḇok." ⁹ Inja ḇekenem kuker kakyarsya sikada sisma ḇaḇeḇok fnoḇek kuker Abraham snon ḇekyar ani. ¹⁰ Snonkaku ḇekyar ma ḇeswarmura ro kankenem sena neknam ro ḇaḇekoreri -- snaro sḇeḇefras? Snar sfas kwar radine: "Fafras faḇe snonkaku ḇeḇeuser ma ḇefrur roi ḇeḇor ḇefas kwar ro syap sasoser Refo Yahudiḇasya." ¹¹ Ma ḇaḇenapnapesya isya faro snonkaku osoḇa ro Allah barpon ḇyedi snar ifrur sasoser Refo Yahudi isna kwar, snar: "Snonkaku ḇenapes nari sikenem kuker kakyarya." ¹² Ḇape sasoser Refo Yahudi ḇyeknam ro kakyaryaḇa, mboi mansei ḇefrur na, nari sikenem snar na. ¹³ Kristus ḇyak namuk ko kwar ro fafras sasoser Refo Yahudi kuker nyan ḇyuk mankundi fa isma fras snar ko, snar sfas kwar radine: "Fafras faro snonkaku ḇekaf ro ai apropya!" ¹⁴ Yesus Kristus ifrur rarirya kwar, insa kuker i Abraham ḇaḇeḇok ḇyedi rya faro er-er ḇese, isof kuker kakyar kosma Rur ḇeḇeasas kwar ani. ¹⁵ Naek srar, iḇye yun fasasna oso ro kankenem ras-ras. Asas oso ḇeser kankarem namuk kwar ro snonkaku, osoḇaḇeri faḇyereri roḇa pyami. ¹⁶ Faro Abraham ma ḇeḇekpu roi Allah ikofen asas ḇeḇor anna kam. Sikofenḇa "faro kpu-kpu ḇyesi" imnis raris kawasa ḇeḇor, ḇape faro snonkaku oser monda: "ma faro kpu besi," isoine Kristus. ¹⁷ Swaruser ayedi isoine: Allah asas ḇyena ro randakya neḇekarem namuk kwar, inja sasoser Refo Yahudi nari damrer naba, snar insape nasasyar babo ro wampasi wambarek utin rifiak samfur rikior ro ḇarpurya, isof samambraḇ asas ani ipromes. ¹⁸ Snar, rofyor rosai Allah ḇyuk na neknam ro sasoser Refo Yahudi, mboi neknam ro asasḇa; ḇape snar Allah asas ḇyena ḇyuk saswar-fakamaman ḇyena faro Abraham kwar. ¹⁹ Rarirya ido fandun rosai kuker sasoser Refo Yahudiya? Sasoser anna nafnoḇek snar ḇaḇeyuk -- sasoser anna nambran isof fafisu kpu ro asas ani ryama -- ma malaikat-malaikatsya ssḇuki faro manfandu oso. ²⁰ Manfandu dun wos ro snonkaku oser mondaḇa, mboi Allah ikada ḇyeoser. ²¹ Rariryaido, sasoser Refo Yahudi nasampum kuker Allah asas ḇyenake? Roḇaḇeri. Snar sasoser Refo Yahudi ḇyeḇeḇuk imnis roi oso ḇeḇuk kankenem, rariryaido napnapesya ḇyeknam ro sasoser Refo Yahudiya. ²² Ḇape sfas ro Refo radine mboi roi ḇeḇor kam naisya ro ḇaḇepapoik sasarya, insa kuker kakyar faro Yesus Kristus asas ani ḇyeḇeḇuk faro bekyarsya. ²³ Rofyor kakyar ani ryama ḇaim sasoser Refo Yahudi iwaren warek ko, ma pyadwar ko isof kakyar ani ḇyeḇefasna. ²⁴ Rarirya sasoser Refo Yahudi ikfin ko isof Kristus ryama, insa ḇyuk napnapesya maḇe ko snar kakyar koḇena. ²⁵ Baboine kakyar ani ryama kwar, inja koisyaḇa kwar ro manwadwaren ḇefarkin ani. ²⁶ Snar mkokam mkoḇe romawa faro Allah snar kakyar faro Yesus Kristus. ²⁷ Snar mkokam, mkoḇe ḇemasi kuker snonsnon Kristus, inja mkona Kristus kwar. ²⁸ Rarisya rarwas oso isyaḇa rofandu snonkaku Yahudi roḇaido snonkaku Yunani, manfyanoḇa roḇaido snonkaku ḇemkei, snon ma bin isyaḇa kwar, snar mko kam mko ḇeoser kuker Yesus Kristus. ²⁹ Rofyor Kristus nya mko, mko kako mko ḇeup ro Abraham ma nari mkosma kako Allah asas ḇyena.

¹ Swaruser ayedi isoine: rofyor snon ḇena waris oso ḇyesnonkuf ḇaim, imnisbos kaku manfyan oso, ḇape i ḇena waris ḇeḇor anna; ² ḇape isya ro manwadwaren ḇefaduru i isof fafisu kmari ikofen faroiya imnis kwar. ³ Rarirya ko kako: rofyor koḇesnonkuf ḇaim, koḇemanfyan faro rodur ḇero supswan ine. ⁴ Ḇape fafisuya imnis kwar, Allah iwan Rumkun ḇyedi, ma bin oso daḇen i ma kyunem faro sasoser Refo Yahudi. ⁵ Ḇyeḇewan faḇyak namuk kawasa kam ḇekunem faro sasoser Refo Yahudisya, insa nya ko ḇeromawa ḇyesi. ⁶ Ma snar nya mko ḇeromawa ḇyesi, inja Allah iwan Rumkun ḇyedi Rur ḇyedi fasyun ro kosnesna, ma kyaru: "o Mami, o Mami yedi!" ⁷ Inja mkoḇemanfyan wer ḇa kwar, mboi mko ḇeromawa; rofyor mko ḇeromawa, nari mko kako mkasma Allah waris ḇyena kam. ⁸ Ro ḇeponiwara, rofyor mkomamḇaḇir Allah ḇa, mko ḇemanfyan faro papoik-papoik imnis allah, ḇape Allah ḇekaku naisya ḇaḇeri. ⁹ Ḇape baboine mkofawi Allah kwar, roḇaido Allah ifawi mko kwar, inja rariso mko kaḇer wer faro rodur-rodur ro supswan ḇesambraḇ ḇa ma ḇesaḇarar ma mkomarisen mkorandak mko ḇemanfyan faro na wer? ¹⁰ Kuker aunos mkofaduru ras ono, paik ono, fafisu ono faswef ma wampasi wambarek ono. ¹¹ Yamames warek imbude kandera yena faro mko nefromo mondari. ¹² Naek srar yor faro mko, insa mkomnis raris aya, snar aya kako yamnis raris mko kwar. Mko frur roi ḇeḇyeḇa oso ḇaim maro aya. ¹³ Mkofawi, mboi ro randakya yaḇaryas Ankankinem Ḇeḇyeya faro mko kwar isoine snar baken ayedi iduf. ¹⁴ Kaku ḇeri rariryano baken ayedi ḇyefafrowes faro mkono, mkayin ayaḇa mboi mkosrow aya kwar, imnis mkosrow Allah malaikat ḇyesi oso, isyadi wer imnis mkosrow Yesus Kristus mankundi. ¹⁵ Fyor ani aski ḇeba faro mko! Ma baboine, ḇaḇeaski mkoḇani ryoiyo? Snar yaḇesaksi ḇemko, mboi rofyor ani mkomarisen mker mka mkoḇesi maḇe aya kwar. ¹⁶ Inja baboine mkokara aya ḇembroḇ mkoḇedi, snar yafasna napnapesya faro mko? ¹⁷ Sikada sfaḇri sesewar insa ssun mko, ḇape kuker sne ḇenapesḇa sena, snar simarisen ssun mko fa mkoso si kuker kaku ḇeri. ¹⁸ Mboi iḇye rofyor snonkaku sesewar fasun snonkaku ḇese faro roi ḇeḇye, mboi sifrur rarirya rofafisu nakam, imbude rofafisu aya isya rofandu mko mondari. ¹⁹ Ne, romawa yesi, snar mko yaḇekandera dafduf yaḇeyaḇen wer, isof rari Kristus ḇyair ro mko. ²⁰ Yaswarkuf kaku aya isya rofandu mko rofyor ine fa yawawos kuker mko kuker mkaren ḇese, snar yafawi werba yafrur rosai mufabemko. ²¹ Mkokofen maḇe aya, ne, mko kam ḇemarisen ḇeso sasoser Refo Yahudi, mkomnaf ḇaimke sasoser Refo Yahudiya? ²² Ro dia isya sfas, Abraham nya romawa risuru, oso ro infyan bin ḇyedi ma oso ro bin ḇemkeya? ²³ Ḇape romawa ro infyan bin ani ḇyeḇeaḇen imnis marisen snonkaku ma romawa ro bin ḇemkei ani ḇyeḇeaḇen snar Allah asas ḇyedi. ²⁴ Inekada wospeper. Snar bin risuru ansuya supeperyar ḇaḇeasas risuru ro Allah: Oso ḇyeknam ro bon Sinai (isoine Hagar) -- (Hagar daḇen romawa ḇyesi simnis manfyan.) ²⁵ Hagar imnis bon Sinai ro sup Arab -- ma imnis kuker Yerusalem ro baboine, snar ikenem ro ḇaḇeinfyan kuker romawa ḇyesi. ²⁶ Ḇape Yerusalem ro boiyaswa ikada bin ḇemkeiya ma ikada sna kobedirya. ²⁷ Snar sfas kwar radine: "Mkoryaḇ naba ḇae, ne, bin ḇepansnasem ḇefawi ḇeaḇen ḇaim! Mkoryaḇ ma mkobras, ne aw ḇefawi ḇaḇekandera ḇaim dafduf aḇaḇenya! Snar bin swa ḇyedi iburya nari daḇen romawa sibor syadi ro bin ḇeḇeswaya." ²⁸ Inja naek srar, mkokada romawa sḇeasas imnis Ishak. ²⁹ Ḇape imnis ḇeponiwara, saḇen kuker marisen snonkaku, ḇyewayam faro saḇen kuker marisen Rurya, rarirya baboine kako. ³⁰ Ḇape rosai sfas ro Refoya? Ro Refo sfas radine: "Mkoyaw infyan ani kuker romawa ḇyedi, snar romawa ro infyan ani nari daksma warisḇa fnoḇek kuker romawa ro bin ḇemkei ani." ³¹ Inja, naek srar, koine romawa ro infyan aniḇa, mboi romawa ro bin ḇemkeiya.

¹ Baboine komkei, snar Kristus ḇyuk makakei maḇe ko kwar! Inja mkufnako ro ḇaḇemkei mkoḇedi ma mkomarisen fasrir awer kamnam ḇaḇemanfyan ani wer. ² Kaku ḇeri, aya, Paulus, yakofen faro mko: rofyor mkor famkosma sofakfuk ido, Kristus ḇyefainda faro mkoḇa. ³ Yakofen wer faro snonkaku mansei ḇeyor faḇesma sofakfuk, insa sifrur sasoser ḇeḇor kam ḇero Refo Yahudi na. ⁴ Ḇaḇeoser mkoḇedi kuker Kristus imuk, rofyor mkokyar ḇaḇenapnapes sasoser Refo Yahudiya; nari mkokenem ro ḇandibur saswar-fakamaman Allahya. ⁵ Snar fafnoḇek Rurya, ma snar kakyarya faro Kristus, kowaf ḇaḇenapnapes, koswarmura roya. ⁶ Snar kuker Kristus, ḇaḇesofakfuk ro baken, nefandunḇa, mboi fararur kakyarya kuker saswar monda. ⁷ Ro ḇeponiwara mkofaḇri naḇye kwar. Baboine mansei ḇedwarek mko wer, isof mkoso napnapesya wer ḇa? ⁸ Dafdif faro mkoso si wer ndama ro Allah ḇeyor mko kwar aniḇa. ⁹ Mur kermkun ifrur faterigu amek oser ipisen. ¹⁰ Snar koḇeoser kuker Manseren, inja yakyar mkosma swaruser ḇesebur swaruser ineḇa. Ḇape manseirya wer kako ḇefrur ḇirḇar mko nari isma samamyaiya, ro Allah. ¹¹ Ma aya ine wer, naek srar, rofafisu yaḇaryas kaker sofakfuk ani, ḇyefandun, snaro sewayam aya kaker? Rarirya ido, aprop ani ḇyekarui karkar werḇa. ¹² Iḇyesyadi ḇefrur ḇirḇar mko ansi skar mankunsi monda! ¹³ Naek srar, mkoḇe ḇeyor kwar famkomkei. Ḇape mkona ḇaḇemkei ani imnis fafisu fa mkoḇuki ifrur marisen kankenem ḇesasar awer, mboi iḇye mkuffarmyan yae mko kuker saswar. ¹⁴ Snar sasoser Refo Yahudi nakam neknam ro wos oser ine, isoine: "Waswar min ḇesi snonkaku ḇese imnis waswar mankundaw!" ¹⁵ Ḇape rofyor mkarek yae ma mkoren yae mko ido, mko swarepen naḇye, insa mkofarmambri yae awer. ¹⁶ Kakara yedi radine: mkokenem kuker Rurya kada, nari mkoso kankenem rmomen krafya ḇa. ¹⁷ Snar rmomen krafya fyamfaḇri kuker rmomen Rurya ma rmomen Rurya fyamfaḇri kuker rmomen krafya -- snar sukam sufamfaḇriyae -- isof ro rarwan ono mkofrur rosai mkomarisen naba. ¹⁸ Ḇape rofyor Rurya ikfin, mko nari mkokenem ro sasoser Refo Yahudiya ḇa. ¹⁹ Fararur krafya isna kwar, isoine: farbuk, mamas, rmomen, ²⁰ ḇaḇesyom amfyanir, mon, mbroḇ, fadḇan, masasor ro sne, msor, fandun mankun, rakrakrok, rur-makakok, ²¹ ayin, masaser, munara marares, ma ḇese na. Nane kam yaḇuk swarepen faro mko -- imnis yaḇuk swarepen ro ḇepon kwar -- mboi mansei ḇefrur roi ḇerarirya, nari isma rarwas ro Allah Ḇaḇesasoser ḇyedi ḇa. ²² Ḇape rofyor Rurya ikfin ido bon ḇyena isoine: saswar, raryaḇ, aski, ḇaḇekaḇaḇaḇ, ḇaḇenaḇye, ḇaḇeuser, ḇaḇesyowi, ²³ ḇaḇerandun sne, ḇaḇefarmku mankun. Roi ḇeradine sasoser oso isyaḇa faisampum na. ²⁴ Yesus Kristus nya manseirya kwar ido, nari myun kraf kuker nafsu ḇeḇor ma rmomen ḇyena kam. ²⁵ Rofyor kokenem kuker Rurya, iḇye wer Rur ani ikfin kankenem koḇena kako, ²⁶ inja komararesḇa, kosampumyae ḇa ma kayinyae awer ko.

¹ Naek srar, rofyor mkosrow snon oso rofandu mko ifrur sasar, iḇye syadi ḇekenem kuker Allah Rur ḇyedi, mkokfin snon ani ḇenyan ḇenapes kuker rur kaḇaḇaḇ, ma mkoḇesasor mankun mko, insa mkaksapi awer ro farawrowesya kako. ² Mkofnoḇekyae mko ma mkoḇar kamnam mkoḇena! Rarirya mkoḇeimnis sasoser Kristus. ³ Snar rofyor snon oso kyara iso ḇesyadiya, mboi ḇyerarirya ḇaido, ikada ḇyeankar mankundi. ⁴ Iḇye syadi snonkaku oser-oser imnasen mankundi resari ro kankenem ḇyedi; insape imsik mankundi, mboi myam awer faro kankenem snonkaku ḇese. ⁵ Snar snonkaku oser kamnam ḇyena namnis faro i kwar. ⁶ Ma mansei ḇesma farkarkor ro Manseren wosya, nari ḇyerwas roi ismana faro snonkaku ḇeḇuk farkarkor faro iya. ⁷ Mkoḇor awer! Allah myam monda mankundi ḇo ḇyeḇekoryae ḇa. Snar rosai snonkakusya sker ma skekef na nari sinekna. ⁸ Snar mansei ḇeker ma ḇekekef imnis rari snonkaku, nari dinek marmarya ro rari ḇyedi. Ḇape rofyor kyer ma kyekef imnis farkankin ro Allah Rur ḇyedi, nari dinek kankenem ḇekaku ma ḇekain fyoro ro Allah Rur ḇyedi. ⁹ Inja komor awer ro kofrur roi ḇeḇye, snar rofyor fafisuya ryama, nari kinek bon na rofyor ani. ¹⁰ Rarirya, rofyor kosma fafisu ine, mkorama kofrur roi ḇeḇye faro snonkakusya kam, isyadi faro min koḇesi ḇesma kakyar oser. ¹¹ Mkomam, ro mnuk ine mankundayai ḇefas faro mko rodine, kuker fasfas ker ḇeba. ¹² Snonkaku ḇemarisen ḇeyow mankun kuker roi ḇero baken, sikada sesewar seyayu mko faro ḇaḇesofakfuk, kuker kakara, insa sisma awer kandera snar aprop Kristus. ¹³ Snar snonkaku ḇesma sofakfuksya kako, sfaduru sasoser Refo Yahudiya ḇa. Mboi simarisen, fa mkosma sofakfuk, insa simarares si snar mkoḇeyuser sasoser anna. ¹⁴ Ḇape ayama yamewerbos kaku yamarares aya, mboi kuker aprop Manseren koḇedi Yesus Kristus, snar kuker i supswan ine ḇyeḇepai maro aya, ma aya faro supswan ine. ¹⁵ Snar ḇaḇesofakfukke roḇake, nefainda ḇa. Ḇeḇefaindaya isoine snonkaku saḇen babosya. ¹⁶ Ma snonkaku kam, ḇeḇuk mankun faro kakara ine, aski ḇaḇenaḇye Allah isabu faro si ma faro Israel ḇyesi. ¹⁷ Inja snonkaku oso ifrur kandera ḇe aya awer, snar aḇyair-aḇyair Yesus nya aya naisya ro baken ayedi. ¹⁸ Saswar-fakamaman ro Manseren koḇedi Yesus Kristus ḇyeḇok mko! Amin. Ro aya, Paulus