EFESUS

EFESUS

¹ Aya Paulus, manwawan Yesus Kristus kuker marisen ro Allah, mufaḇe kawasa ḇesren ro Efesus, kawasa ḇekyar faro Yesus Kristus! ² Saswar-fakamaman ma aski ḇerama ro Allah, Kma koḇedi ma ro Manseren Yesus Kristus ryoyus mko. ³ Sanandik faro Allah, Kma ro Manseren koḇedi Yesus Kristus, ḇeḇuk kwar maḇeko ro Kristus, ḇaḇeḇok rur ḇeḇor kam ro boiyaswa. ⁴ Snar kuker Yesus Allah kyinfir ko kwar rofyor supswan ine ḇyeḇefrur ḇaimya, insa kosren ma kofarorew ḇa ro ḇarpon ḇyedi. ⁵ Kuker Allah saswar ḇyedi fyasna ḇepon ko kwar ro randakya ro Yesus Kristus fa koḇeromawa ḇe i imnisbos marisen ḇyedi, ⁶ insa koḇuk sanandik mufaḇe Allah saswar-fakamaman baba ḇyedi, ḇyukma ḇeko ro Yesus, Rumkun ḇyedi iswarbos ani. ⁷ Snar ro Yesus kosma fasaspar snar rik ḇyedi, isoine ḇaḇepayasyos ro sasar, imnis nana saswar-fakamaman ḇyena, ⁸ fakamaman ḇyena, ḇyuk fawawi ma kakara, nabor syadi maḇeko. ⁹ Snar fyasna kwar kankunes marisen ḇyedi maḇeko, imnis aw ḇyedi, isoine aw dun namuk kwar ro randakya kuker Yesus ¹⁰ imnis fasasos faro fafisuya ryama roi ḇeḇor kam neoser ro Kristus ma ḇyeḇru faro nakam, iḇye ro boiyaswa iḇye kako ro supswan ine. ¹¹ Yakofen "ro Kristus", snar ro Allah kosma rarwas ro ḇaḇeasas ḇyedi -- koine ro awarya ḇyuk fa kosma rarwas ani imnisbos kuker Allah kakara ḇyedi, ifrur roi ḇeḇor kam imnis marisen ḇyedi -- ¹² insa koine ro randakya bekyar faro Kristus, kosandik faro Allah, baba ḇyedi. ¹³ Ma ro Allah mko kako -- snar mkomnaf kwar wos napnapesya, isoine Ankankinem Ḇeḇye ḇeḇuk koreri faro mko -- ro Allah mko kako, rofyor mkokyarya, Allah ḇyuk aḇyair mboi nya mko, isoine Rur Ḇesren ḇyedi ḇyeasas kwar faro mko ani. ¹⁴ Ma Rur Ḇesren ani isaramper ko insa kosma rosai Allah ḇyeasas kwar faro kawasa ḇyesi, isoine ḇaḇefaspar ḇefrur fa Allah nya ko, insa kosandik Allah baba ḇyedi. ¹⁵ Snar yamnaf kwar mkokyar faro Manseren Yesus ma mkoswar snonkaku ḇesrensya, ¹⁶ inja yamnaiḇa yakofen kasumasa ḇemko. Ma indo yaswarepen mko ma yanadiwarek mko ḇesya kwar, ¹⁷ ma yor ḇe Allah Manseren koḇedi Yesus Kristus, Kma ḇepyum ani, ḇyuk Rur fawawi nanem ḇyedi fa fyasna i faro mko isof mkomambir kaku i. ¹⁸ Insa kakara ḇero snembri neḇeseḇen fanasnai, insa mkofawi sanemura ro rosai nari mkosma ro fararyor ḇyedi: isoine payamyum ḇeḇor ḇyena fyasos mufaḇekawasa ḇesrensya, ¹⁹ ma Allah papoik ḇyedi iba faro ḇekyar koya, imnis raris mankundi papoik ḇyedi, ²⁰ ḇyuki ifrur rofafisu ḇyawes Kristus rofandu ḇemarsya ma ḇyeifa kyain ro ḇar raku ḇyedi ro boiyaswa, ²¹ kankain Kristus ikaki syadibur ro ḇeḇuk sasoser ḇeborsya kam, ḇesma papoiksya kam, ḇeḇeḇrusya kam, ma manseirya kaker ḇeḇesnonsnon ro supswan ine mondaḇa ma supswan nari ḇeramaya. ²² Ma roi ḇeḇor kam Allah ryir na kwar ro Kristus weḇam ḇyedi ma ḇyeifa ḇyeḇru ro jemaat ro roi ḇeḇor nakam kwar. ²³ Jemaat ani Kristus baken ḇyedirya, iḇeḇefa namnis, snar mankundi ḇefrur roi ḇeḇor kam fanamnisya.

¹ Ḇeponiwara mkomar snar ḇaḇeyuk ma sasar mkoḇena. ² Mkokenem ro sasar na, snar mko nyan supswan ine, ma mkoḇeyuser ḇesma papoik ḇaḇesasoser ro sansoren, isoine rur ḇeḇarḇor baboine ḇefararur rofandu snonkaku ḇeḇarḇorsya. ³ Kaku ḇeri roḇeponiwara ko kako sakkor ko rofandu si, rofyor kokenem ro kakara ma marisen baken ḇeḇarḇor koḇena. Rofafisu ani kosma masasor ro Allah kako, imnis snonkaku ḇese ansi. ⁴ Ḇape Allah ḇyuk maḇe ko fakamaman snar ifo kuker saswar ḇeba. ⁵ Koine snonkaku ḇemar kwar snar sasar koḇena -- ḇape ifrur fa kokenem kaḇer fnoḇek Kristus, snar saswar-fakamaman Allah mkosma koreri -- ⁶ snar koḇeoser kuker Yesus Kristus, Allah ḇyawes kaḇer ko ma ḇyuk moḇ ḇeko fnoḇek Yesus Kristus ro boiyaswa, ⁷ insa rofafisu nari ḇeramaya, fyasna saswar-fakamaman ḇyedi imnis raris ḇaḇye ḇyedi maḇeko ro Yesus Kristus. ⁸ Snar saswar-fakamaman mkosma koreri snar kakyar; ima bon ro sasewar bediḇa, mboi Allah i ḇeḇukiya, ⁹ ine bon ro fararur bediḇa: insa snonkaku ono simarares awer mankunsi. ¹⁰ Snar Allah iso ḇefrur konya, koḇe ḇefrur ro Yesus Kristus insa kofrur fararur ḇeḇye, Allah fyasos ḇepon maḇeko kwarya. ¹¹ Rarirya mkoswarepen, mboi fafisu iwara -- mkoḇe snonkaku Yahudiḇa ḇesma aḇyair ro baken, imnis snir ḇesnonkaku ḇesma sofakfuk ḇa ro kawasa Yahudi ḇenir mankunsi "ḇesofakfuk", isoine sofakfuk ro baken kuker fararur snonkaku, -- ¹² mboi rofafisu ani mkoḇeoser kuker Kristusḇa, mkaksun ḇekawasa Israel ḇa ma mkaksma rarwasḇa ro asas sikofen na, kuker saneraroḇa ma kuker Allah ro supswan ineḇa. ¹³ Ḇape baboine mkoḇeoser kuker Yesus Kristus, ḇeponiwara mko "ḇinkwan", ḇape mko "fanam" kwar snar Kristus rik ḇyedi. ¹⁴ Snar ikada aski ma raryaḇ koḇedirya, ifrur fakawasa Yahudi ma kawasa Yahudiḇa sḇeoser kwar ma kyakok ayar ḇerwas, isoine ḇaḇembroḇ, ¹⁵ snar marmar ḇyedi; imnis snonkaku ipyos kwar sasoser Refo Yahudi ma sasoser ḇeborna ma ifrur er ansuya fasuḇe er oser snonkaku babo ḇeḇeoser kuker Kristus, ma rarirya ifrur askiya, ¹⁶ ma ifrur fa er ansuya suḇedasi kuker Allah fa suḇebaken oser, kuker aprop ipyos ḇaḇembroḇ ro su. ¹⁷ Ryama ma ḇyaryas kwar aski faro "ḇeḇinkwan" mkoya ma aski faro "ḇefanamsya", ¹⁸ snar kuker Kristus kokam -- iḇye kawasa Yahudi iḇye kawasa ḇeḇe Yahudiḇa -- kosma Rur oser fakofanam Kmari. ¹⁹ Rarirya mkoḇe amber ma mandamanḇa, mboi mkoḇe min kina oser ro snonkaku ḇesren ma kina-kina ro Allah, ²⁰ sḇawes robo araref manwawan ma nabisya, kuker Yesus Kristus ḇeḇe karui dopir. ²¹ I ḇepam ḇaḇawes rum ani ḇesiper fa ḇyerum ḇepyum faro Allah ḇesrenya, ro Manseren. ²² Kuker Kristus mko kako mkomnis dera-dera insa mkoḇe ḇeḇawes fa mko kako mkoḇe Rum Rur faro Allah.

¹ Rarirya aya ine, Paulus, manfamyan Yesus Kristus, ḇesmai snar fandun mkoḇena, ne kawasa ḇefawi Allahḇa ² -- ma mkomnaf kwar rariso fararur saswar-fakamaman Allah, sikyar mabe aya faro mko, ³ isoine kuker nyan mamam sfasna maḇe aya kankunes, imnis fas-fas ḇeknampu yafas iyasne. ⁴ Fyor mkowasya i, nari mkofawi kakara ayedi ro Kristus kankunes ḇyedi, ⁵ rofyor syos ḇeponiwara kankunes ani ḇyeḇeḇaryas ḇa faro romawa-romawa snonkaku, ḇape ro baboine Allah Rur ḇyedi fyasna i faro manwawansya ma nabi ḇesren ḇyesya, ⁶ isoine snonkaku ḇeḇe Yahudiḇa, ḇape snar Ankankinem Ḇeḇye, sisma kako ḇaḇeromowi ma sḇekina ro baken ma siwarpu ro amar ssḇuk ro Yesus Kristus ani. ⁷ Ro Ankankinem Ḇeḇye ani yuffarmyan kwar raris Allah saswar-fakamaman ḇyukma ḇeaya, imnisbos kaku fararur papoik ḇyedi. ⁸ Aya kada, yaḇyeḇa syadi rofandu kawasa kam ḇesrensya, ḇape ssḇuk saswar-fakamaman ine, insa yaḇaryas mufaḇe kawasa ḇeḇe Yahudiḇa nana Kristus ḇyena nari ḇeḇroḇa, ⁹ ma insa yaḇaryas rosai ḇeḇeknam ro fararur kankunes ro wampasi wambarek utin-utin ono ḇeyokef ro Allah, ḇeau roi nakam, ¹⁰ baboine insa jemaatna nbaryas Allah fawawi ḇeḇor ḇyena faro ḇeḇuk sasoser, ma ḇesma papoik ro boiyaswa, ¹¹ imnisbos kuker Allah marisen ḇyena ḇekain fyoro, ifrur kwar kuker Yesus Kristus, Manseren koḇedi. ¹² Kokyar faro Kristus ma koḇeoser kuker i nari komsik ma kosma nyan ḇesun mufaḇe Allah, kuker kakyar koḇena faro i. ¹³ Rarirya yor faro mko, insa mkomkak warek awer aya ro kandera ayedi snar mko, snar kandera ayedi kada idaw ḇaḇye ḇemko. ¹⁴ Rarirya yakain wepur yaḇansubainaḇe Mami ḇarpon ḇyedi, ¹⁵ faro i kina kam ro boiyaswa ma ro supswan ine sna snonsnon ḇyedi. ¹⁶ Yaḇenadi insa Allah ḇeḇye syadi imarisen ḇyuk samambraḇ ma makaku faro mkosnemna kuker Rur ḇyedi, ¹⁷ insa Kristus kyain ro mkosnemna snar kakyar mkoḇena, ma mkoḇe rares ma mkoḇe knam ro saswar. ¹⁸ Yanadi, insa mko ma snonkaku ḇesrensya kam mkofawi, saswar Kristus ḇyedi aḇaḇamya, kawanwanya, kakakiya ma swafya, ¹⁹ insa mkofawi kaku saswar Kristus ani isyadi fawawi ḇeḇor kam. Yanadi, insa mkofo kuker Allah ḇaḇeimnis ḇyena. ²⁰ Kuker Allah papoik ḇyedi ḇefararur sambraḇ ro ko, Allah ifrur rosai kam nasyadi ro rosai konadi ma korna roḇa kokarana, ²¹ Allah imarisen akak-awob ro jemaat sisandik Allah kada ro Yesus Kristus isof fyoro-fyoro. Amin.

¹ Snar rarirya yaḇuk swarapepen faro mko, aya, snon sḇefa ḇesma samamyai snar Manseren, insa kankenem mkoḇena namnis snonkaku sor kwar imnis raris fararyor ani. ² Inja mkorun mkosnemna ḇesya kwar, mkosnemna nasḇunek ma mkokaḇaḇaḇ. Mkofasnai saswar mkoḇena ro mkofnoḇekyae mko. ³ Ma mkoḇesewar famkofaduru ḇaḇeoser Rurya insa fyesepen mko kuker aski: ⁴ baken oser ma Rur oser, imnis raris moḇ sor mko kwar raya faro saneraro oser ro fararyor mko smaya, ⁵ Manseren oser, kakyar oser, masisren oser, ⁶ Allah oser ma Kma ro roi nakam, Allah robo roi nakam ma ifnoḇek roi nakam ma nya papoik nakam. ⁷ Faro oser-oser ro ko ssḇuk kwar saswar-fakamaman siso warnkyara Kristus ḇyukya. ⁸ Rarirya mnuk ro Refo doḇo: "Rofafisu dek ḇemoḇ ḇekaki, dun women sibor; i ḇebuk roi ḇeḇor ḇeḇye faro snonkaku." ⁹ Rarirya "dek kwar" isoine, ido kwar kako ḇesupswan mun ḇerabaḇ syadiya? ¹⁰ I ḇedo kwar, i kako dek ḇinkwan ḇemoḇ ḇekaki syadi kwar ro nanki kam, insa ifrur mnis roi ḇeḇor kam. ¹¹ Ma i ḇeḇuk kwar iḇye manwawan, iḇye kako nabi-nabi, iḇye manbaryas Ankankinem Ḇeḇye, iḇye kako manfarandous ma ḇeḇuk farkarkorsya, ¹² insa sfasos snonkaku ḇesren faro fararur afuffarmyan, faro ḇaḇawes Kristus baken ḇyedi, ¹³ isof kokam kosma kwar ḇaḇeoser ro kakyarya ma fawawi ḇekaku ro Allah Rumkun ḇyedi, ma komnis snonkuf ḇepduk, ma faḇaḇye muma ḇesur imnis Kristus, ¹⁴ inja komnis romawa kasun werḇa, ro farkarkor wam syoso-syoso ḇefrur ḇirḇar ro farfnak fromo ro snonkaku ḇefawi ankarkar ḇeḇuk farkarkor ninyan, ¹⁵ ḇape kuf nako farkarkor ḇenapes ma saswar, ro roi ḇeḇor kam insa nasur faro i, isoine Kristus, ḇeḇeḇruya. ¹⁶ Ro i baken ḇesiper ani, -- ḇyeḇesyos ma ḇyeḇeyaḇek ḇeoser imnis afuffarmyan baken ḇesiper ro kina oser-oser, --ḇesma sasur ḇyedi ma ḇeḇawes mankundi ro saswarya. ¹⁷ Rarirya kuker snonsnon Manseren, yakofenbos faro mko: Mkokenem kaker awer imnis snonkaku ḇefawi Allah ḇa kuker kakara ḇeḇefromo ¹⁸ ma kakara ḇepampan ḇyena sikenem ḇinkwanbur ḇaḇeoser kuker Allah, snar fawawiḇa ma pakakrek ro sisnesna. ¹⁹ Ḇaḇaḇir sena napup, isof siso rmomen ḇeḇor kam, ma sifrur farbuk raris marisen sena kuker mamyaiḇa. ²⁰ Ḇape mko kada mkoḇese kaku ḇeri. Mko kada mkofarkor kwar ma mkofawi Kristus. ²¹ Snar mkomnaf i kwar ma mkosma farkarkor ro i ma mkoḇeuser napnapes ro Yesus, ²² isoine mkosawen kankenem ḇekwar ro ḇepon, rmomenya kyakok kwar kuker ankarkar, ²³ insama mkosnemna ma kakara ḇeḇor mkoḇena nbabo kam, ²⁴ inja mkokenem babo, imnis raris Allah ifrur kwar ma marisen ḇyedi isoine kankenem ḇenapes, ma ḇesren. ²⁵ Rarirya mkosawen ankarkar ma mkokofen roi ḇekakuyae faro mko, snar kokam koḇekina ro Kristus baken ḇyedi. ²⁶ Rofyor mkomsor, mkomsor isof ori isyun epen awer, rarirya ido mkoḇesasar, ²⁷ inja mkoḇuk fafisu faro Ibirisya awer. ²⁸ Snonkaku ḇekarawraw, kyaraw wer awer, iḇye syadi ifararur sambraḇ kaku ro fararur ḇeḇye kuker ḇra ḇyesuya, isof isma roi ono faḇyerwas na faro snonkaku ḇesma mnisḇasya. ²⁹ Wawos ḇemamas nasasyar awer ro mkosḇamna, mkawos kuker wos ḇeḇefandun ḇeḇawes, insa ḇemnafsya, sisma saswar-fakamaman. ³⁰ Mkofrur snefafardun Allah Rur Ḇesren ḇyedi awer, snar Rur ani ryem mko kwar famkowaf ras Koreriya. ³¹ Mkosawen swaruser ḇeḇor ḇesarmar ro mkosnemna, dosam masasor, rakrakrok ma famfaras, rarirya kako ḇarḇor ḇeḇor ḇero mkosnemna kam. ³² Mboi mkosnemna nfafir faro min mkoḇesi, mko swaryae mko, ma mkoḇuk ampunyae faro mko, imnis raris Allah ḇyuk ampun ḇemko ro Kristus.

¹ Rarirya mkoso asuser Allah, imnis romawa iswar kaku ² ma mkokenem ro saswar, imnis Yesus Kristus iswar mko ma ḇyuk mankundi fa ḇyefarsarser samsom ḇediref faro Allah. ³ Ḇape farbuk ma roi ḇemamas roḇa fararur famfnom neḇekofen awer rofandu mko, imnis kankenem ro snonkaku ḇesrensya. ⁴ Rarirya kako wos ḇemamas, ḇeḇebei roḇa fararur famfnom -- snar roi ḇeradine nasyusḇa -- iḇye syadi wakofen kasumasa faro Allah. ⁵ Mkoswarepen naḇye: snonkaku ḇefrur farbuk, ḇefrur mamas roḇaido snonkaku ḇefrur famfnom, isoine ḇesyom faro amfyanir, osoḇaḇeri fanari isma rarwas ro Kristus ma Allah Ḇaḇesasoser suḇedi. ⁶ Mkoḇor awer kuker wos ḇeḇebeidi ro snonkaku, snar roi ḇerarirya nbuk masasor faro Allah ro kawasa ḇeḇeuser i ḇasya. ⁷ Mkoḇebati awer kuker si. ⁸ Ḇepon iwara mkoro pampan, ḇape baboine mkoroi Manseren isnai ḇyedi. Inja mkokenem imnis romawa ro isnaiya, ⁹ bon ro isnaiya isoine kankenem ḇeḇye ma fararur ḇenapes ma ḇekaku faro Allah, ¹⁰ ma mkoḇesewar fa mkomamḇaḇir rosai ḇefrur sneprei faro Allah. ¹¹ Mkoso ma mkun awer rarwas ro fararur ḇepampan ḇeḇefaindaḇa, iḇye syadi mkosampum fararur anna. ¹² Snar roi sifrur ro kankunes sikofen na ido nafrur mamyai kwar. ¹³ Ḇape roi ḇeḇor ḇero isnaiya na nfababa, snar isnaiya isnaiyar nakam kwar. ¹⁴ Rarirya sikofen kwar: "Mkokḇok, ne, ḇeyenef mko, ma mkiḇer mko rofandu ḇemarsya ma nari Kristus isnai mko." ¹⁵ Rarirya, mkokara naḇye kaku, mkokenem rariso, mkomnis awer snonkaku ḇefawi royoḇa, mboi mkokenem imnis snonkaku ḇemamkarkir, ¹⁶ mkofandun fafisuna kuker aunos, snar fafisu ine fafisu ḇeḇarḇor. ¹⁷ Snar rarirya mkofawi royoḇa awer, ḇape mkoḇesewar insa mkofawi Manseren marisen ḇyedi. ¹⁸ Ma mkinem awer anggur ḇefrur masaser mko, snar anggur ifrur rarmomen-nafsu, mboi mkoḇesewar insa mkofo kuker Rurya, ¹⁹ ma mkowawosyae faro min mkoḇesi kuker dow, dow sanandik. Mkodisen dow rurya mkobras faro Manseren kuker sneḇesiper. ²⁰ Ma mkomarisen syadi ro roi ḇeḇor kam ma mkokofen kasumasa ḇesyakwar faro Allah -- Kmaya, kuker snonsnon ro Manseren koḇedi Yesus Kristus, ²¹ ma mkorun mankun mko oser faro ḇeseya ma nari mkomkak Kristus. ²² Ne, bin, kwunem faro swambri imnis kwunem faro Manseren, ²³ snar swambri ḇyebru faro aw imnis raris Kristus ḇyebru ro jemaat. I kada ḇyuk aski faro jemaat ḇeḇebaken oser ro i. ²⁴ Snar jemaat kyunem faro Kristus, rarirya kako binya kyunem faro swari ro roi ḇeḇor kam. ²⁵ Ne, snon, waswar swambri imnis Kristus iswar jemaat kwar ma ḇyuk mankundi faḇyesom warek jemaat ani ²⁶ ma fyasren jemaat, fyasren kwar ani kuker war masisren ma Allah wos ḇyedi, ²⁷ insa ḇye jemaat ani fadores ro ḇarpon ḇyedi kuker baba fyarorewḇa, ikruremḇa roḇaido eḇesena, insa jemaat isren ma fyarorewḇa. ²⁸ Rarirya kako snonya iswar swari kada imnis raris baken mankundi ḇyedi: Mansei ḇeswar swari imnis raris iswar mankundi. ²⁹ Snar snonkaku oso dayin baken mankundi ḇyedi ḇaim, mboi fyaduru ma ḇyemanmin i imnis raris Kristus faro jemaat ḇyedi, ³⁰ snar koine kina ro Kristus baken ḇyedi. ³¹ Ro Refo sfas radine, "Rarirya nari snon oso ibur snari ma kmari ma ḇyeoser kuker swari, isof suḇe baken oser." ³² Kankunes ine ibabos, ḇape ro yakofen kukerya isoine ḇaḇeoser Kristus kuker jemaat ḇyena. ³³ Ḇape rariso wer kako snon mko oser-oser: iswar swari imnis iswar mankundi ma bin oser-oser iḇye kada ḇyesyowi swa ḇyedi.

¹ Snar rarirya, ne, romawa mko, indo mkosouser sasoser ro sna-kma mkoḇesi snar Manseren. ² Mkoḇesyowi sna-kma mkoḇesi -- ine kada sasoser ḇeḇefandun ro asas ine: ³ insa mkosma aski ma kankenem ḇekwan ro supswan ine. ⁴ Ma kma mkoya, mkomsor awer romawa mkoḇesi, mboi mkofarkor si kuker farkarkor ma ananun Manseren. ⁵ Ne, manfamyan mkoya, mkosouser tuan mkoḇesi kuker makakak ma radadai kuker sne ḇeḇye ro supswan ine, imnis raris mko souser faro Kristus, ⁶ ma mkoso user ro ḇarpon sena monda awer fa mkofrur sneprei sisnesna, ḇape mkomnis manfyan faro Kristus inja mkofrur Allah marisen ḇyena kuker sne ḇesiper, ⁷ ma ḇemarisen ḇefrur afuffarmyan ḇyedi imnis snonkaku ḇeyuffarmyan faro Manseren mboi faro snonkaku ḇa. ⁸ Mkofawi, mboi snonkaku oser-oser, iḇye manfamyan, iḇye kako ḇemkei, rofyor ifrur roi ḇeḇye oso, nari isma munsu ḇyedi ro Manseren. ⁹ Ma tuan-tuan mkofrur rarirya kako faro si ma mkosawen masasor. Mkoswarepen, mboi Manseren sedi ma Manseren mkoḇedi isya ro boiyaswa ma ikada snonkakusya simnis kam. ¹⁰ Ḇarpurya, mkosambraḇ kuker papoik ro Manseren. ¹¹ Mkuf Allah romamun ḇeḇor fyasos faḇyuk faro mkona, insa mkofarmku mkosampum Ibiris ankarkar ḇyena; ¹² snar kofaḇri fakosampum snonkaku ḇa, ḇape kosampum samambraḇ ḇeḇuk sasoser, ḇesma papoiksya, ḇeḇeḇru ro supswan ḇepampan ine, rur ḇeḇarḇor ro farsyos sansoren. ¹³ Snar rarirya mkun Allah romamun ḇeḇor fyasos na, insa mkosambraḇ mkoḇuk sampum ro ras ḇeḇarḇor ani ma mkores nako, famkokfrur mnis roi ḇeḇor kam kwar. ¹⁴ Inja mkores nako, mkoḇoḇek roi ḇeḇoḇek napnapesya ma mkosansun-sansun embroḇ napnapesya, ¹⁵ mkosower mkowemna kuker roi ḇesower wemin, ma mkoḇaryas Ankankinem Ḇeḇye ro askiya. ¹⁶ Rofafisu nakam mkun adai kakyar snar kuker adai ani nari mkofasye ikoi ḇesak nakam ro Ibirisya; ¹⁷ mkosaswo ḇaḇeaskiya imnis roi ḇesaswo ma Allah wos ḇyedi imnis sepada Rurya, ¹⁸ mkofrur nakam kuker nadi famkor fafnoḇek ro Allah. Mkonadi kada rofafisu nakam kuker Rurya ma mkomnai awer ro nadi ma fararyor faro snonkaku ḇeḇor ḇesrensya, ¹⁹ ma aya kako, insa yasma wawos ḇemnis, rofyor yaḇas sḇadon ayedi, yasma fakamaman ḇenapes, insa yaḇri yaḇaryas kankunes Ankankinem Ḇeḇye, ²⁰ yuffarmyan imnis manwawan sḇefa ḇesmai. Mkonadi kada insa kuker ḇri yaḇaryas i, imnis moḇ yawos rai. ²¹ Insa mkofawi rariso ro mankundaya ma rariso ro dine, nakam nari Tikhikus, naek koḇedi yaswar ani ma ḇefnoḇek aya ro afuffarmyan ro Manseren, nari ikofen ḇadir faro mko. ²² Kuker kakara ine yawan i faro mko insa ikofen ḇadir rariso kuker nko faro mko ma iwos sneprei mkosnemna. ²³ Aski ma saswar kuker kakyar ro Allah, Kmaya ma Manseren Yesus Kristus ryowus mko kam. ²⁴ Iḇye Allah ḇyeḇok naek srar mko kam kada, ḇeswar Manseren koḇedi Yesus Kristus kuker saswar ḇekain fyoro-fyoroya. Ro aya Paulus