KOLOSE

KOLOSE

¹ Ro Paulus, Yesus Kristus manwawan ḇyedi, snar Allah marisen ḇyedi, ma Timotius naek koḇedi, ² faro naek srar Allah kawasa ḇyesi ḇekyar faro Kristus ro Kolose. Saswar-fakamaman ma aski ro Allah, Kma koḇedi, ryowus mko kada. ³ Rofafisu nkoḇenadiwarek mko, nkokofen kasumasa ḇesya kwar faro Allah, Kma ro Manseren koḇedi Yesus Kristus, ⁴ snar nkomnaf kwar kakyar mkoḇena faro Yesus Kristus ma ro saswar mkoḇena faro Allah kawasa ḇyesi, ⁵ snar kakyar, ḇefasos kwar faḇemko ro boiyaswa. Ro kakyar ani mkorower ḇepon kwar ro wos ḇaḇenapnapesya, isoine Ankankinem Ḇeḇye, ⁶ mkosma kwar. Ankankinem Ḇeḇye ani imarem ma iryer supswan ḇesiper, rarirya kako rofandu mko rofafisu mkorower i ma mkomam baḇir Allah saswar-fakamaman ḇekaku ḇyena. ⁷ Mkofawi nakam kwar ro Epafras, min nkoswar ro afuffarmyan, ḇeḇemanfamyan ḇeḇeuser Kristus snar nko. ⁸ I ḇekofen kako saswar mkoḇedi ḇyeknam ro Rurya. ⁹ Eḇedari rofyor nkomnafya, nkomnai ḇa nkonadiwarek mko. Ma nkor, insa mkona fawawi nakam ma kakara rurya, faro mkofawi mnis Manseren marisen ḇyena, ¹⁰ isof kankenem mkoḇena naḇye ro Manseren ḇarpon ḇyedi ma imarisen na ro roi ḇeḇor nakam, ma mkoḇuk bon ro fararur ḇeḇor ḇeḇyena ma mkosur ro fawawi ḇekaku ro Allah, ¹¹ ma mkosambraḇ kuker samambraḇ ḇeḇor kam kuker Allah papoik ḇyedi kada insa mkoḇar roi ḇeḇor kam kuker farmku ma kbaḇ, ¹² ma mkokofen kasumasa kuker raryaḇ faro Kmaya, iso ḇefrur famkona rarwas ro rosai ssḇuk faro Allah kawasa ḇyesi kam ro ḇaḇesasoser isnaya. ¹³ Fyaspar kobur papoik pampanya ma dun koḇe papoik Ḇaḇesasoser Rumkun saswar ḇyedi; ¹⁴ kuker Rumkun ḇyedi kosma faspar, isoine sasar koḇena neḇepyos kwar. ¹⁵ Kristus ikada fanir ro Allah kopok komamba, i rumkun rak, i ḇepon ro roi ḇeḇor ḇefrur kwarna. ¹⁶ Snar kuker i, Allah ifrur kwar roi ḇeḇor kam, ro boiyaswa ma ro supnane, roi komamna ma roi komambana, iḇye karapesa ḇaḇesasoser, ḇaḇesasoser kako, iḇye ḇesasosersya, iḇye kako ḇesma papoiksya; roi ḇeḇor kam neḇefrur snar Kristus ma faro Kristus. ¹⁷ Kristus isya ḇepon kaku kwar ro roi ḇeḇor nakam ma roi ḇeḇor anna kam naisya snar Kristus. ¹⁸ I ḇeḇeḇru ro bakenya, isoine jemaat. I rumkun rak, ḇyeḇeḇawes ḇepon rofandu snonkaku ḇemarsya, isof i ḇeḇefandun syadi ro roi ḇeḇor kam. ¹⁹ Allah mankundi imarisen insa roi ḇeḇor anna kam ḇemnis ro Allah, kosma nakam ro Rumkun ḇyedi, ²⁰ snar Rumkun ani kako Allah ifrur roi ḇeḇor kam kuker ḇaḇeaski faro mankundi, iḇye roi ḇeḇor kam ro supnane, ma roi ḇeḇor kam ro boiyaswa kako, Allah ifrurna snar marmar Rumkun ḇyedi ro apropya. ²¹ Randakya mkokenem ḇinkwanbur Allah, ma mkoḇe mbroḇ i kuker rari ma kakara ḇeḇarḇor mkoḇena; ²² ḇape ro baboine, kuker marmar ro Rumkun ḇyedi, Allah ifrur ḇaḇeoser mkoḇedi, iḇye kaḇer wer kuker mankundi. Kuker nyan ine dun mko faro Allah imnis snonkaku ḇesren, mkokaku ma mkofarorew ḇa. ²³ Inja nari mkodworen ro kakyarya, mkores faswef ma mkomarmer ḇa, ma mkorir awer kakyar faro Ankankinem Ḇeḇyeya, mkomnaf kwarya ma ḇyeḇeḇaryas kwar ro supswan ine, ma aya ine, Paulus, ḇeyuffarmyan faro i kwar. ²⁴ Baboine yaryaḇ snar yaḇekandera kuker mko, snar kuker kandera yena, yafasos rosai ḇemnis ḇa ro kandera Kristus ḇyena, ro baken ḇyedi, isoine jemaat. ²⁵ Aya ine yaḇemanfyan faro jemaat ani imnis raris fararur Allah ikyar kwar maro aya fayaḇaryas pdef wos ḇyedi faro mko, ²⁶ isoine ḇaryas ḇeyokef ma ḇeḇekankunes wampasi wambarek utin-utin roḇepon iwara faro snonkakusya kam, ḇape baboine ḇyeḇekofenḇadir faro kawasa ḇyesi. ²⁷ Allah imarisen ikofenḇadir faro si, ro ḇaḇye ma baba ro kankunes ani rofandu er-er ḇese, isoine: Kristus isya rofandu mko, isoine nari mkosma rarwas ro Allah baba ḇyedi! ²⁸ Iso nkoḇaryasya, rofyor nkoḇuk farkarkor ma nkanun snonkaku oser-oser ro fawawi ḇeḇor kam, insa sfarkin snonkaku oser-oser faro ḇaḇeimnis snar Kristus. ²⁹ Eḇedari yaḇesewar kaku kuker samambraḇ ḇeḇor kam imnis Kristus papoik ḇyedi ḇefararur sambraḇ ro aya.

¹ Snar yamarisen insa mkofawi, fararur ḇemarḇak yafrur faro mko, ma faro si ro Laodikia ma faro mko kam, ḇemambaḇir aya ḇaimsya, ² insa sisnesna naprei ma sḇeoser ro saswari, isof sisma nana ḇeḇor kam ḇekur ḇaḇesnekin ro kakara, inja smambaḇir Allah kankunes ḇyedi isoine Kristus, sna nana ḇaḇemamkarkir ḇeḇor kam ma fawawi anna neḇeyokef ro Kristus. ³ Snar nana fawawinanem ḇeḇor kam ma fawawi neknam ro Kristus. ⁴ Roi ḇeḇor nane kam yakofena, insa ono sḇeankar mko maroḇa kuker wos ḇerok marndanden. ⁵ Snar rariso wer kako imburo baken yedi isya rofandu mkoḇa, ḇape rur yedi isya fnoḇek mko ma yamam kuker raryaḇ kankenem aunos ma kakyar ḇedworen mkoḇena snar Kristus. ⁶ Mkona Yesus Kristus, Manseren koḇedi kwar. Inja nari mkokenem faswef kuker i. ⁷ Ma mkoḇerares ro i ma mko ḇeḇeḇawes roi, ma kakyar mkoḇena nadworen syadi ro rosai sḇukfarkor mko, ma mkosnemna nafo kuker kasumasa. ⁸ Mkosasor mko insa rosai sḇukfarkor ninyan mko fasfarkin mko ro nyan sasar awer ma ḇekaku ḇana, snar siso farkarkor ninyan ma rodur ḇero supswan ine, fama ḇyeknam ro Kristus ḇa. ⁹ Snar roi ḇeḇor kam ro Allah naisya ro Kristus, isoine ro ḇaḇesnonkaku ḇyedi, ¹⁰ ma ssḇuk namnis ḇemko kwar ro Kristus, snar Kristus iso ḇeḇeḇru ro ḇesasosersya ma ḇesma papoiksya kam. ¹¹ Ro Kristus mkosma sofakfuk kwar, sofakfuk snonkaku sifrur ḇa, ḇape kuker Kristus sofakfuk ḇyedi, ḇeḇeknam ro ḇaḇemkei baken ḇesasar ine, ¹² snar kuker Kristus mko ḇeḇekrir ro masisren, ma kuker Kristus mko ḇeḇeḇawes kako snar kakyar mkoḇena faro Allah fararur papoik ḇyedi, ḇeḇawes Kristus rofandu ḇemarsya kwar. ¹³ Mko kako, ro randakya mkomar ro ḇar rurya snar sasar mkoḇena, ma snar mkosma sofakfuk ro ḇaken ḇa, ḇape ro baboine Allah ḇyuk kankenem faro mko fnoḇek Kristus. Allah ipyos sasar ḇeḇor mkoḇena kwar. ¹⁴ Snar kuker payasyos syap nyakiya, ro fasasna sasoser ḇeḇuksof ma ḇesampum ko. Ma ipyosna ḇo pyaepenna ro ai apropya: ¹⁵ Kristus pyampum ḇesasosersya ma ḇesma papoiksya kwar ma ifrur si ḇeḇaḇeuni ḇefababa ro ḇaḇefainda ḇyedi faro si. ¹⁶ Inja mkomam monda awer snonkaku oso ḇeḇuksof faro mko ro roi ḇefor, inja rosai mkan ma mkinem roḇaido ras munara, munara paik babo roḇa wer ras Mananai Yahudi: ¹⁷ Nane kam nenin monda ro roi nari ḇerama, mboi neknam ro Kristus. ¹⁸ Mkomam monda awer fainda mkoḇena ḇo neḇeposer ro snonkaku ḇefrur ḇeḇefawi ḇa ḇerun mankun ḇo ḇeḇenadi faro malaikatsya, ḇeḇesewar ro ḇaḇemamam kuker knam oso ḇa ḇekanow mankun ro kakara sena ro supswan ine. ¹⁹ Mboi iserepen nako ḇa faro Ḇeḇeḇru, ro moḇsai baken ḇesiper ḇyeḇefaduru ma ḇyeḇefesepen faḇyeoser kuker urek ma faswisew, ḇesma sarsur ḇerama ro Allahya. ²⁰ Rofyor mkomar fnoḇek Kristus kwar ma mkomkei ro rodur ro supswan ine, rosai eḇedari mkokafyo faro rari ḇeḇor, imnis raris mkoisya mkokenem kaker ro supswan ine: ²¹ Mkopan awer ine, mkorepen awer iwa, mkoḇyunek awer ine; ²² nakam nkur monda roi ḇeḇor kona ma nari ḇero snar naso monda sasoser ma farkarkor snonkaku. ²³ Kaku ḇeri, rari anna komamna nafo kuker fawawi nanem kuker ḇaḇeari sifrur ro mankunsi, imnis raris randun mankun, ḇaḇewayam mankun, nefainda oso ḇa mboi sifrur syopen kankenem sena ro supswan ine.

¹ Eḇedari rofyor mko ḇeḇeḇawes fnoḇek Kristus, mkosewar roi ḇero boiyaswa, ro moḇ Kristus isya, kyain ro Allah ḇar raku ḇyedi. ² Mkoswarepen monda roi ḇekur boiyaswana, mboi mkoswaruser roi ḇero supswan inena awer. ³ Snar mkomar kwar ma kankenem mkoḇena nayokef kuker Kristus snar Allah. ⁴ Rofyor Kristus, ḇeḇeknam kankenem koḇena, nari fyasna mankundi kwar, mko kako nari mkakfasna mkofnoḇek i ro ḇaḇenasan ḇyedi. ⁵ Eḇedari mkomun marisen rosai ḇero baken mkoḇena ro supswan ine, isoine ḇaḇe farḇuk, ḇaḇearwarem, ḇaḇermomen, marisen ḇeḇarḇor, ma faḇri mankun kako, imnis kuker ḇaḇesamsyom faro karwar, ⁶ nakam nafrur fa Allah imsor [faro snonkaku ḇeso Allah ḇasya]. ⁷ Ma mko kako ro randakya mkakfrur roi ḇerarirya rofafisu mkokenem rona. ⁸ Ḇape baboine, mkosawen roi ḇerarirya kam, isoine masasor, dosam, ḇarḇor, kankonem ma wos ḇemamas ḇesasyar ro mkosḇamna. ⁹ Ma mko ḇeankaryae awer, snar mkobur snonkaku ḇekwar ani ma rari ḇyena kwar, ¹⁰ ma mkorer kwarbur snonkaku ḇekwar fnoḇek rari ḇeponiwara, ma mko ḇeḇefrur babo pdef ro ras ḇe ras farari fanir (Allah) ḇefrur mko kwar. ¹¹ Roi ḇeradine isya wer ḇa snonkaku Yunani, roḇa snonkaku Yahudi, snonkaku ḇesofakfuk ma snonkaku ḇesofakfuk ḇa, snonkaku Barbar roḇa snonkaku Skit, women roḇa ḇemkei, ḇape Kristus monda ḇyeknam ro roi ḇeḇor nakam. ¹² Eḇedari, mkomnis snonkaku Allah kyinfir ma fyasren ma iswar syadi, ma mkofasna ḇaḇesneso, snemura, ḇaḇerun sne, ḇaḇefafir ma ḇaḇekaḇaḇaḇ. ¹³ Mkokḇaḇyae mko ma mkoḇuk ampunyae rofyor snon oso ikram masasor faro min ḇyedi; imnis raris Manseren ipyos sasar mkoḇena kwar mko kako mkakfrur rarirya kada. ¹⁴ Ma ro roi ḇeḇor nane kam: mkona saswari, ḇekaḇrai ḇefesepen ḇaḇeoser ma ḇaḇemanasnisya. ¹⁵ Ma saswar-ḇaḇye Kristus ḇyedi ḇyepoik mkosnemna, snar i eḇedari mko ḇeḇeyor kwar famko ḇebaken oser. Inja mkokofen kasumasa. ¹⁶ Mboi Kristus wos ḇyena nakenem kuker nana ḇeḇor ḇyena kam rofandu mko, isof kuker fawawinanem ḇeḇor kam mkoḇuk farkarkor ma mkosonekyae mko ma mkodisen mazmur, ma sanandik ma dow rurya, ma mkokofen kasumasa ro mkosnemna faro Allah. ¹⁷ Ma roi ḇeḇor kam mkofrurna, mkofrurna kuker wawos ma fararur, mkofrur nakam kuker snonsnon Manseren Yesus, ma mkokofen kasumasa snar Kristus faro Allah, Kma koḇedi. ¹⁸ Ne, bin ḇena swa, wasouser swambri imnis faro Manseren. ¹⁹ Ne, snon ḇena swa, waswar swambri ma bewayam awer i. ²⁰ Ne, inai ma romawa mko, indo mkoḇeuser sna-kma mkoḇesi ro roi ḇeḇor kam, snar naiso ḇefrur marisen faro Manseren. ²¹ Ne, sna-kma mkoya, indo mkofrur sneduf awer faro inai ma romawa mkoḇesi, insa sisnesna nfafayaf awer. ²² Ne, manfamyan mkoya, mkoḇeuser kuker manseren mkoḇesi ro supswan ine ro roi ḇeḇor kam, mboi mkoḇeuser ro ḇarpon sena monda awer famkofrur sneprei si, mboi kuker sneḇenapes snar mkomkak faro Manseren. ²³ Ma rosairyawer mkofrurna, mkofrur kuker sne ḇeryaḇ imnis faro Manseren mboi faro snonkaku ḇa. ²⁴ Mkofawi, isoine ro Manseren nari mkosma rarwas sfasnaḇadir imnis sasuref. Kristus imnis tuan ma mko ḇemanfamyan ḇei. ²⁵ Mansei ḇefrur sasar, nari ḇyar sasar ḇyena, snar ro Manseren kakara ḇyedi snonkaku simnis kame.

¹ Ne, faro manseren mkoya, mkofrur mnis kuker napnapes faro manfamyan mkoḇesi ro sasuref sena; snar mkofawi mkona Manseren oso ro boiyaswa. ² Mkofarmku ro nadi ma mkepen mko ma mkokofen kasumasa. ³ Ma mkonadiwarek aya kako, insa Allah ḇyas kedwai faro ḇaḇeḇaryas nkoḇena, isof nkawawos kankunes ro Kristus, ḇefnai fayasmai ro buiya. ⁴ Rarirya nari yafasnai, ḇararyas ani imnis moḇ ryaya. ⁵ Inja mkokenem kuker fawawi faro snonkaku ḇekyar ḇasya, ma mkofnak awer fafisuna. ⁶ Iḇye mkawawos kuker saswar, ma wos anna mbuar awer, isof mkofawi, rariso nari mkokarem faro snonkaku oser-oser. ⁷ Tikhikus, naek koḇedi koswar kaku ani, manfamyan ḇeḇeuser ma min ḇeyuffarmyan faro Manseren nari ikofenḇayir faro mko, ro roi ḇeḇor kam ḇekur ayana. ⁸ Yawan i faro mko kuker kakara insa mkofawi roi ḇekur nko ma insa ḇyuk sneprei faro mko. ⁹ Yawan i warpu Onesimus, naek koswar kaku ani ma ḇeḇeuser, snon oso rofandu mko. Nari sukofenḇayir faro mko ro roi ḇeḇor kam ḇero dinena. ¹⁰ Ma Aristarkus fyarem aroo faro mko, min ḇesmai fnoḇek aya ro bui ma Barnabas fno ḇyedi Markus mkosma ankinem kwar ro i; mkosrow i rofyor ryafa kwar faro mko. ¹¹ Ma ro Yesus snirḇe Yustus. Snonkaku rikior skoine skerer skoi ḇesma sofakfuk skoi ḇeḇemin kuker aya ḇesma fararur oser ro Ḇaḇesasoser Allah; skoiso ḇeḇesneprei maro aya. ¹² Epafras fyarem aroo faro mko; i snon oso rofandu mko, Yesus Kristus manfamyan ḇyedi, ḇeḇenadi ḇesyakwar faro mko, insa mkores nako, imnis snonkuf ma ḇekyar kaku roi ḇeḇor kam Allah imarisen na. ¹³ Mankundaya yaḇesaksi mboi ifararur sambraḇ kaku kwar faro mko ma naek srar ro Laodikia ma Hierapolis. ¹⁴ Lukas dokter (ḇefawinanem aryawin faro ḇedufsya) koswar kaku ma Demas sufarem aroo faro mko. ¹⁵ Mko kofenḇayir aroo nkoḇena faro naek srar ro Laodikia; ma faro Nimfa ma jemaat ḇero rum ḇyedi. ¹⁶ Ma rofafisu syap ine ḇyeḇewasya rofandu mko kwar, mkosewar fainsa ḇyeḇewasya faro jemaat Laodikia kako ma syap faro Laodikia kako ḇyeḇewasya faro mko. ¹⁷ Ma mko kofenḇayir faro Arkhipus: Mamwarek naḇye, insa afuffarmyan wasma ro Manseren ani wafrur mnisna. ¹⁸ Aya, Paulus, yafarem aroo faro mko. Aroo ine mankundaya iso ḇefas iya. Nari mkoswarepen wanka yena. Saswar-fakamaman ryowus mko kada. Ro nu, Paulus ma Timotius