FARFYAR RO MANWAWANSYA

FARFYAR RO MANWAWANSYA

¹ Ne, Teofilus, ro syap ḇepon ayedi yafas kwar ro Yesus, roi ḇeḇor I frur ma fyarkor na, ² isof ro ras ḇyeḇekanow ya. Fafisu ḇyeḇekanow ḇaim ḇyuk sasoser kwar kuker papoik Rur Ḇesren faro manwawan kyimfir kwar ansi. ³ Faro manwawan ansi Yesus fyasna mankundi ro fyor marindi ḇekur i nasyof kwar, ma kuker aḇyair nabor ḇyuk fasasnai mboi i kenem. Snar ro ras samfur rifiak, fyasnai mankundi ḇe rarwan ono ma dawawos faro si ro Ḇaḇesasoser Allah ya. ⁴ Ro ras oso fafisu dananus si, danunyoḇ si insa sibur awer Yerusalem, ḇoi skain ro dia fa siwaf Mami asas ḇyedi, raris i kofen kwar: "Imnis raris mkomnaf kwar ro aya. ⁵ Snar Yohanes ḇyuk masi sren kuker war, ḇape mkokada fyoroḇa nari mkosma masi sren kuker Rur Ḇesren." ⁶ Inja kawasa ḇeryur ro dia sifuken: "Manseren, wamarisenke ro fafisu ine, bawes Ḇaḇesasoser faro kawasa Israel?" ⁷ Yesus kyarem: "Fandunba fa mkofawi fafisu Mami mankundi ḇyuk kwar raris papoik ḇyedi. ⁸ Mboi nari mkosma papoik, rofyor Rur Ḇesren dadofes ḇemko, ma nari mkoḇesaksi ḇe aya ro Yerusalem ma sup Yudea ḇesiper, Samaria isof supswan pember ya." ⁹ Yesus dawos rarirya posa, ḇyeḇekanowḇo sesaksi kam, ma mandifna nakawef i bur mamam sena. ¹⁰ Rofyor smam asuser ḇe nanki, fafisu ḇyeḇekanow ani, kniko snon risuru ḇesansun sansun ḇepyoper suyores fanam si, ¹¹ ma sukofen faro si: "Ne, snon Galilea, snaro mkores ma mkomam ḇenanki? Yesus ine, ḇyeḇekanow benanki ḇebur mko, nari kyaḇer wer kuker nyan ḇeraris mkomambo ḇyeḇekanow ḇe boiyaswa." ¹² Ma manwawan ansi skaḇer ro urk sapḇe urk Zaitun ḇe Yerusalem, swaf ya imnis mararan ro ras Ari ro Yerusalem. ¹³ Fyor sra kwar ro mnu ya, sekḇe sim ḇero bo, moḇ seryar roya. Manwawan ansi isoine Petrus ma Yohanes, Yakobus ma Andreas, Filipus ma Tomas, Bartolomeus ma Matius, Yakobus Alfeus mandaḇendi, Simon snon Zelot ma Yudas Yakobus mandaḇendi. ¹⁴ Sikam sesne oser ro nadi kayam, kuker bin ono ma Maria Yesus snari ma Yesus ḇedar ḇyesi. ¹⁵ Ro ras anna Petrus dores fandu naek ḇeryur ansi, barbor sedi indokada utin oser samfur risuru, ma ikofen: ¹⁶ "Ne, naek ayena mko, imnis fas-fas ro Refo, Daud ikofen kwar kuker famfnoḇek Rur Ḇesren ro roi ḇekur Yudas, ḇefarkin snonkaku ḇefor Yesus ansi. ¹⁷ Snar randak ya Yudas daksun kako ro dandonek koḇedi ma daksmai rarwas ro fararur ine." ¹⁸ Yudas ani kyoḇes kwar saprop mnuk oso kuker ḇaḇyak ro ḇarḇor ḇyena, ma isapi fa doḇer bosi, isof sneri imef ma snewar ḇyesi skakyai. ¹⁹ Roi ḇeḇesya ine kawasa kam ḇekain ro Yerusalem sifawiyi, isof saprop ani sap i ro wos sedi "Hakal-Dama", isoine "Saprop Rik". ²⁰ "Snar fas-fas oso isya ro syap Mazmur: ’Iḇyesyadi aḇdares kankain ḇyedi ḇyeursḇa, ma iḇyesyadi ono skain awer ro moḇ ani;’ ma: ’Iḇyesyadi oso ḇeso syadwer i ro nasan ḇyedi.’ ²¹ Inja nari oso i fnoḇek ko isoine oso ro kawasa ḇerama ḇesoko ḇesya kwar ro fafisu Manseren Yesus i sya ro fandu ko, ²² isoine randak ro fafisu Yohanes ḇyuk masi sren isof ro Yesus ḇyeḇekanow ḇeboiyaswa bur ko, insa dakḇe saksi fnoḇek ko ro Yesus aḇiḇer ḇyedi." ²³ Inja sfasnai snon risuru isoine: Yusuf sapḇe Barsabas roḇa Yustus ma Matias. ²⁴ Sikam senadiḇo soḇo: "O Manseren, au ḇefawi snonkaku sya kam sisnesna, fasnaikada ro fandu snonkaku ansuine, ²⁵ insa dakuf farmyan nasan ḇaḇemanwawan Yudas ibur ani, ḇesapi kwar faro moḇ ḇemnis kuker frur ḇyedi." ²⁶ Raimnai skinsor snon ansui ma syor ro Matias ma rarirya i fnoḇek barbor ro manwawan samfur seser oser ansi.

¹ Ro ras Sababu Rur Ḇesren, snonkaku ḇekyar sya si ryur kam ro moḇ oso. ² Kniko rakrok oso dado ro nanki imnis wam doḇer ma kyain nosen rum, skain ro ya; ³ ma smam sak-sak ono namnis ramar, nasber ma nkain ro siḇrusna. ⁴ Ma sifo kuker Rur Ḇesren, mboi sirandak sawos ro wos-wos ḇeso, raris moḇ Rur ya ḇyuk fa sawos raya. ⁵ Rofyor ya snon Yahudi ḇekyar ono si sya ro Yerusalem ro er nakam ro supswan pember. ⁶ Fafisu rakrok ani dado ya, kawasa ḇeḇor ansi spanjuḇer. Ma sikmom snar oso-oso ro si imnaf manwawan ansi sawos ro wos sena. ⁷ Sikam sikandor ḇo sefesfyas ma sifuken: "Inja rariso snar ḇeyawawos sine kam snon Galilea inke? ⁸ Rariso indiri kokam komnaf sawawos ro wos koḇena oser-oser, isoine wos kawos ro mnu marin koḇena: ⁹ koine snon Partia, Media, Elam, ḇekain ro Mesopotamia, Yudea ma Kapadokia, Pontus ma Asia, Frigia ma Pamfilia, ¹⁰ Masir ma sup-sup Libia ḇefanam Kirene, snonkaku ḇerama ker Roma, ¹¹ iḇye snon Yahudi ma ḇeyakso kako agama Yahudi, snon Kreta ma snon Arab, komnaf siwawos ro wos koḇena oser-oser ro fararur ḇeba Allah ifrurna." ¹² Sikam sefesfyas ma sikmom ḇo sikofen yae faro si: "Rosaisoine?" ¹³ Ḇape snonkaku ḇeso ono skoryae ḇo soḇo: "Simser." ¹⁴ Inja Petrus iyori fnoḇek manwawan samfur seser oser ansi ma kuker mkaren ḇeba ikofen besi: "Ne, kawasa Yahudi ma mkokam ḇekain ro mnu Yerusalem, mkofawi ma mkokara wos ayena ne. ¹⁵ Snonkaku ansine simser raris moḇ mkokara raya ḇa, snar insape arwo babo oras siw, ¹⁶ ḇape raris Allah ikofen kwar kuker sḇayo Nabi Yoel: ¹⁷ Roi ḇeḇor nane ro ras ḇepupes nari ndama imnis Allah wos ḇyena nari yawan Rur Yedi faro kawasa kam; ma nari Rur ya fyarkor romawa-inai mkoḇesi fa sawos roi ono, ma snonkbor-inkbor mkoḇesi nari smam mamam ono, ma kawasa mansar mkoḇesi nari smafu mafu ono. ¹⁸ Ma manfamyan ayesi kako snon ma bin nari yawan Rur Yedi faro si ro ras-ras anna ma nari sawos roi ono. ¹⁹ Ma nari yafrur aḇyair-aḇyair kanandor ro nanki yaswa ma fasasnai kanandor ro supswan ine: isoine rik ma for kamayow ma paw. ²⁰ Ma ori nari syadwer fa pyampanbos ma paikya irik ḇepon ro ras Manseren ifyafer ya, ras payamyum ḇeba ani. ²¹ Ma mansei ḇefararyor kuker snonsnon Manseren nari isma aski. ²² Ne, kawasa Israel, mkorower wos nane: Roi yakofen kuker ya isoine, Yesus ro Nazaret, snonkaku Allah kyimfir kwar ma fyasnai faro mko kuker samambraḇ ma aḇyair-aḇyair kanandor Allah ifrurna kuker Yesus ro fandu mko raris mkofawi. ²³ Iso Allah ḇyuk, imnis marisen ḇyedi, ma mkopai i kwar ḇo mkomun i kuker ḇramin ro er-er ḇeḇarḇor. ²⁴ Ḇape Allah ḇyawes i ma fyaspar i bur marindi marmar ya, snar papok marmar ya ipok fa kyarwarek i ḇa. ²⁵ Snar Daud ikofen ro i doḇo: ’Yamam ḇesya kwar faro Manseren, snar dores fanam aya isof yapok yamarmer ḇa. ²⁶ Eḇedari sneri marisen syadi ma rur yedi sandik Manseren, ma kraf yedi kenem kuker aski, ²⁷ snar rwir aya faro munaiḇui ḇa, ma mam monda Manfamyan ḇesren bedi i pokem ḇa. ²⁸ Wakofen ḇadir faro aya nyan kankenem ya; yamarisen syadi ro ḇarpon bedi snar au sya fanam aya.’ ²⁹ Naek ma srar, ryani yakofen ḇayirbos faro mko ro Daud, er koḇedi kpusedi. Imar kwar ma seraki ma rus ḇyedi, isya kaker ro fanduko isof ras ine. ³⁰ Ḇape ikada nabi dirya ma ifawi, Allah ḇyeasas ḇe i kwar kuker soar, nari isiḇer oso ro Daud kpu ḇyesi fa ḇye wairek. ³¹ Eḇedari myam rarpon kwar ma ikofen ro Wairek aḇiḇer ḇyedi, rofyor ikofen, nari yamam monda au ro munaiḇui ḇa, ma kraf bedi ipokem ḇa. ³² Yesus ine kada iso Allah ḇyawes ya, ma ro aḇiḇer ḇyedi nkoine kam nko ḇesaksi. ³³ Ma Allah ikanow i kwar ro ḇar raku ḇyedi ma isma Rur Ḇesren ḇyeasas ani, i sabui fa iso mkomam ma mkorower ine. ³⁴ Snar Daud kada, dekḇe boiyaswa ḇa, mboi mankundi ikofen: Manseren ikofen kwar faro Manseren yedi: ³⁵ Kwain ro ḇar raku yedi, isof yafrur mbroḇ besi fa seararef ro wemssu. ³⁶ Inja er Israel syakam ipyum syadi si fawibos, isoine Allah isiḇer Yesus kwar, mkopai ro aprop ani, fa ḇye Manseren ma Kristus." ³⁷ Rofyor simnaf rarirya sisnesna nkarsosen, isof sifuken faro Petrus ma manwawan ḇeso ansi: "O naek nkoḇesi mko, rosaiso nari nkofrur ya?" ³⁸ Inja Petrus kyarem faro si: "Mkombror ma iḇye kada mkor fa mkosma masi sren kuker snonsnon Yesus Kristus ḇeḇuk ampun ro sasar mkobena, ma nari mkosma Rur Ḇesren. ³⁹ Snar mkoiso ḇeḇeknam asas ani ma faro romawa mkoḇesi ma faro kawasa ḇeḇinkwan kaker sya, isoine dandonek nari ḇesma fararyor ro Manseren Allah koḇedi." ⁴⁰ Ma kuker wos ḇeso nabor wer Petrus ḇyesaksibos beri, ma imsorḇo danun si ma ikofen: "Mko faspar mankun mko bur syos ḇeḇarḇor sine." ⁴¹ Kawasa ḇekyar Petrus wos ḇyena sor fa sisma masi sren ma ro ras ani dandonek ḇefnoḇek sya indokada syaran rikior. ⁴² Sikam si souser manwawan ansi farkarkor sena kuker ḇaḇeoser. Ma sikam siraryur ḇesyakwar fa spanasnis mamami ma senadi. ⁴³ Kawasa ansi simkak kam, snar manwawan ansi sifrur aḇyair kanandor nabor. ⁴⁴ Ma kawasa ḇekyar kwar syakada sḇeoser ma nana sena snakam na, ⁴⁵ ma ro fandu si, ono sisya sḇoḇ ḇesya kwar nana sena ma sirarwasna faro kawasa ansi imnis ananjar sena oser-oser. ⁴⁶ Kuker ḇaḇeuser ma kuker sne oser siryur ro ras-ras kam ro Rum Allah. Spanasnis mamami ro rum sena oser-oser ro rum ḇe rum ma sanan kam kuker raryaḇ ma kuker sne ḇenapes, ⁴⁷ mboi sisandik Allah. Ma kawasa kam simarisen si. Ma ras-ras nakam Manseren ḇyuk kawasa sibor fa sifnoḇek kuker snonkaku ḇesma aski.

¹ Ro ras oso fanam oras nadi, isoine oras kior fafisu ori ikren, Petrus ma Yohanes suyek ḇe Rum Allah. ² Ro dia snon oso isya ḇyemanis rofyor snari daḇen i isof sunfarma i kuker waryar. Ras-ras kam snon ani sriri fanam kedwai ḇeba ro Rum Allah, ḇenirḇe kedwai Ḇepyum, insa dor farsarser faro snonkaku ḇesun ro Rum Allah sya. ³ Rofyor snon ani myam, Petrus ma Yohanes suḇe susun ro Rum Allah, inja dor farsarser ro su. ⁴ Sumam bosi ma Petrus ikofen, ḇo doḇo: "Mambe nurori." ⁵ Inja snon ani iknower su kuker kakyar nari isma roi oso ro su. ⁶ Ḇape Petrus ikofen, ḇo doḇo: "Sarak ma brawen yana onoḇa, ḇape rosai yasma ya, yaḇuki faro au: Kuker snonsnon Yesus Kristus, snon Nazaret ani, wambran!" ⁷ Raimnai ikin snon ani ḇrasi ḇar rakuya ma iyeri fa dores. Rofyor aniḇeri fasfisew ro wemin ḇyesu nsambraḇ. ⁸ Snon ani dores, ma doper ma imbran mura-muma ma iso su randum ro Rum Allah, imbran dapoper ma isandik Allah. ⁹ Kawasa ansi kam smam imbranḇo isandik Allah, ¹⁰ raimnai kawasa ansi smamḇaḇir iso ḇekainḇo ḇefararyor farsarser ro kedwai Ḇepyum ro Rum Allah, isof sikam sikandor ma sikmom rosai ḇeḇesya kukeri. ¹¹ Snar snon ani iso wanan Petrus ma Yohanes su, inja kawasa ḇeḇor ḇekandor ansi srama spanjuḇer sko ro rumbrawer snirḇe Salomo. ¹² Petrus myam kawasa ḇeḇor ansi ḇo ikofen: "Ne, kawasa Israel, snaro mko kandor kuker roi ḇeḇesyanine ma rosai mko knower inko imnis inkoiso ḇefrur snonkaku ine fa imbran snar samambraḇ roḇa souser inko ḇena nerer? ¹³ Allah Abraham, Ishak ma Yakub, Allah kpu koḇesi ḇyuk payamyum faro Manfamyan Ḇyedi kwar, isoine Yesus mkoḇoḇ ma mkopampum ro ḇarpon Pilatus, rofyor Pilatus kyara fa doḇo fyaspar i. ¹⁴ Ḇape mkopampum kwar, Ḇesren ma Ḇenapes ya, ma mkomarisen snon mamun oso ḇe sasuref ḇemko. ¹⁵ Rarirya Ḇye Manfarkin kankenem ya, mkomun i kwar, ḇape Allah ḇyawes i ro munaiḇui; ma roi ḇeḇesya nane inkoiso ḇeḇesaksi. ¹⁶ Ma snar kakyar faro snonsnon Yesus, rarirya snonsnon ani iso ḇeḇuk sambraḇ kwar faro snonkaku mkomam ma mkofawi ine; ma kakyar ani ḇeḇuk pararei kwar faro snon ine, ro ḇarpon mkoḇena kam. ¹⁷ Ne, naek ma srar mko, yafaw mkofrur rarirya snar fawawi ḇa mkoḇena, imnisbos kaku manfarkin mkoḇesi. ¹⁸ Ḇape kuker nyan ine Allah ifrur mnis rosai ikofen kwar ro ḇepon kuker sḇayo nabi-nabi Ḇyesi, isoine Wairek iwan ani nari isma marindi. ¹⁹ Inja mko mbror kada ma mkokaḇer insa sasar mkoḇena neḇepyos. ²⁰ Insa Manseren ḇyuk fafisu marisen ma iwan Yesus Kristus, ḇyuk ḇemko ro randak ya. ²¹ Kristus ani kyain ro boiyas isof fafisu roi ḇeḇor nakam namnis raris moḇ Allah ikofen kwar kuker sḇayo nabi-nabi ḇesren ḇyesi ro awar madero. ²² Imboi Moses ikofen kwar, ḇodoḇo: ’Manseren Allah nari ḇyawes faro mko nabi oso ro fandu naek mkoḇesi imnis i wan aya: Mko mnaf i ro roi ḇeḇor nari ikofen faro mko. ²³ Ma nari ro fafisu iyama mansei ḇemnaf pyum nabi ani ḇa ikada nari ḇyeḇemun ro fandu er koḇesi. ²⁴ Ma nabi sibor ḇekofen kwar randak ro Semuel ma ḇepon roi, sawos kwar ro fafisu ine.’ ²⁵ Mkokada mko ḇeknam wos nane ma mkosma rarwas ro asas Manseren Allah ḇyuk kwar faro up koḇesi, rofyor ikofen faro Abraham: Kuker kpu besi er kam ro supswan nari sisma ḇok. ²⁶ Ma faro mko kada eḇedari Allah ḇyawes Manfamyan Ḇyedi ma iwan i faro mko insa ḇyeḇok mko ma fyarkin mko oser-oser fa imbror ro sasar ḇarbor ḇeḇor ḇyena."

¹ Rofyor Petrus ma Yohanes su yawawos kaker kuker kawasa ḇebor ansi, mananir ḇewaren Rum Allah kuker kawasa Saduki srama fasaw faro su. ² Snon ansi simsorbos kaku snar sufarkor kawasa ḇebor ansi ma suḇaryas, Yesus ḇyeknam ro aḇiḇer fandu snonkaku ḇemar sya. ³ Inja sfor su ma ssun suḇe bui snar roḇ kwar, inja siwaf meserdi. ⁴ Ḇape rofandu snonkaku ḇemnaf farkarkor ansi sibor sikyar, isof dandonek sedi indokada sesnon syaran ririm. ⁵ Ro meserdi manfarkin-manfarkin Yahudi ma ḇebarara-ḇebarara kuker ḇefawinananem Refo Yahudi sfananjur ro Yerusalem ⁶ kuker Imam Ḇeba Hanas ma Kayafas, Yohanes ma Aleksander ma snonkaku ḇeso kam ḇesun ro keret Imam Ḇeba. ⁷ Rarirya ssun Petrus ma Yohanes ḇe ḇarpon kankain ani ma sirandak sifuken su, ḇo soḇo: "Kuker papok rosai roḇaido kuker snonsnon mansei mufrur rarirya?" ⁸ Inja Petrus kyarem, kuker papok Rur Ḇesren: "Ne, manfarkin-manfarkin er ma ḇebarara-ḇebarara, ⁹ rofyor knikine mko kukeḇ nu snar fararur pyum faro snonkaku ḇeduf oso ma mkoḇo nu kofen ḇadir kuker papok rosai snon anine isma pararei, ¹⁰ inja mko kam ma er Israel ḇesiper mkofawi kwar, isoine kuker snonsnon Yesus Kristus, snon Nazaret, mkopai kwar ani, ḇape Allah ḇyawes i kwar ro fandu snonkaku ḇemar sya -- ma kuker papoik Yesus ani snon ine dores kuker pararei ro ḇarpon mkoḇedi. ¹¹ Yesus ani irya karui ḇefawi ḇeḇawes rum sya sisawen ya -- isoine mankun mko, -- ḇape i ḇeḇe karui dopir ya. ¹² Ma koreri isya ro snonkaku oso ḇeseḇa demir kuker Yesus, snar ro supswan ḇesiper ine snonsnon oso ḇeso isya ḇa ḇesma kwar papoik ro Allah fa ḇeḇuk koreriya maḇeko." ¹³ Rofyor fananjur ani smam Petrus ma Yohanes ḇri suḇena ma sifawi, sukada snonkaku waworek befarkorḇa, inja sikam sikandor; ma smamḇaḇir su imnis snonkaku ḇeso Yesus. ¹⁴ Ḇape rofyor smam snon ḇeprei ani dores kuker su, inja sawos royo ḇa fa siksampum su. ¹⁵ Ma rofyor siwan sufa susasyarbur fananjur ani, insape skara, ma soḇo: ¹⁶ "Nyan rosai nari kun faro snonkaku sine? Snar kawasa kam ro Yerusalem ḇesiper, sifawi kam kwar, sufrur aḇyair kanandor oso kwar ro fababa ma kopok kofamyun iba. ¹⁷ Ḇape insa roi ḇeḇesya ine imbran awer ro fandu kawasa ḇebor ansi, ipyum syadi kodwarek si, insa sawos kaker awer ro snonsnon ani faro manseirya kaker." ¹⁸ Rofyor siwan kwar fa susun wer, ssoser faro su insa sawawos roḇa sfarkor kaker awer snonsnon Yesus. ¹⁹ Ḇape Petrus ma Yohanes sukarem faro si: "Mankun mkokara, rosai ḇenapes ro ḇarpon Allah: koso mkoke roḇa koso syadi faro Allah. ²⁰ Snar nari inkomnai ḇaḇeri fa inkawawos ro roi inko mam ma inko mnaf kwar." ²¹ Ḇape sḇaḇekwef manwawan ansi syadi wer, fama ḇarpur ya srir si snar kankain ani sisma nyano ḇa fa ssḇuk samamyai faro su, snar simkak kawasa ḇebor ansi, ḇeḇuk sanandik faro Allah snori snar roi ḇeḇesya kwar ani. ²² Snar snon ḇeprei kuker aḇyair kanandor ani umur ḇyedi isyadi kwar ro wampasi wambarek samfur rifiak. ²³ Rofyor sfaspar su kwar Petrus ma Yohanes sura faro min suḇesi; ma sufarfyar ro roi ḇebor mananir imam-imamsya ma ḇebarara Yahudisya sikofen faro su anna. ²⁴ Fafisu min suḇesi simnaf wos anna, sikam sinadi faro Allah, soḇo: "O Manseren, au ḇefrur nanki, supswan ma roi ḇebor kam ḇero ina. ²⁵ Ma kuker famfnoḇek Rur Ḇesren ro manfyan bedi Daud, kma inkoḇedi, wakofen kwar: Snaro er-er sya sembrus, snaro keret-keret ro er-er sya skakara ro roi ḇeḇefromo? ²⁶ Wairek-wairek supswan sfasasos ma ḇebarara sya sfananjur fa sisampum Manseren ma Kristus. ²⁷ Snar kaku ḇeri Herodes ma Pontius Pilatus kuker er-er ma keret-keret ro er Israel siraryur kwar ro mnu ine fa sisampum Yesus, Manfyan Ḇesren bedi rwem kwar, ²⁸ fa ifrur roi ḇebor kam fasnai kwar ro randak ya kuker papoik ma marisen bedi. ²⁹ Ma fafisu ine, o Manseren, mamkada rariso sfamfaḇri kuker inko inja buk faro manfyan besi ḇri fa inkoḇuk ḇaryas wos bedi. ³⁰ Wasu bramsu fa buk pararei faro snonkaku, ma wafrur aḇyair-aḇyair ma fasasnai kanandor kuker snonsnon Yesus, Manfyan Ḇesren bedi." ³¹ Ma ro fafisu sisya senadi, moḇ siryur ro ani imararer ma sikam sifo kuker Rur Ḇesren, ma sbaryas wos Allah kuker ḇri. ³² Rarirya raryur snonkaku ḇekyar kwar, sikam sesne oser ma serur oser, ma oso ikofen ḇa, nana ḇyena faro mankundi, ḇape roi ḇebor anna faro sikam. ³³ Ma kuker papoik ḇeba manwawan ansi ssḇuk kesaksian ro aḇiḇer Manseren Yesus, ma sikam sikenem ro saswar ma fakamaman Allah. ³⁴ Rarirya oso ro si dananjar ḇa; snar sikam ḇena saprop roḇa rum, sḇoḇ nana sena ma maeja ro roi sḇoḇ anna ssun na ³⁵ ma srir na ro ḇarpon manwawan ansi siwesna; raimnai sirwas na faro snonkaku ansi oser-oser imnis fandun ḇyena. ³⁶ Rarirya kako kuker Yusuf manwawan sya sap kako iḇe Barnabas, isoine romawa sneprei, snon Lewi ḇeraker Siprus. ³⁷ Ḇyoḇ yaf ḇyedi, ma pipi sya dunsi faro manwawan ansi.

¹ Snon oso ḇeso snori Ananias. I kuker swari snori Safira suḇoḇ saprop mnuk oso. ² Kuker fawawi ro swari Safira sukram maeja saprop ani ḇarya ma ḇaryakada Ananias duni fa ryiri ro ḇarpon manwawan ansi siwesna. ³ Ḇape Petrus ikofen, ḇo doḇo: "Ananias, rosai ḇeḇewari ibiris ḇyewayam snembri, isof wafrowes Rur Ḇesren ya ma wakram maeja ro yaf boḇ ani ḇarya? ⁴ Rofyor boḇ saprop ani ḇaim, saprop beirya, ma rofyor boḇi kwar, maeja ya kako isya ro ḇramsi? Snaro kwara ro snembri fa wafrur roi ḇeradine? Wafrowes snonkaku ḇa, ḇoi wafrowes Allah." ⁵ Rofyor Ananias imnaf wos ani isapi ma imarbos beri. Inja kawasa kam ḇemnaf roi ḇeḇesya anine simkak fafayaḇa. ⁶ Ma romawa babo ono srama; spankun ḇemar ani, ma ssuni ro waryar randi, fa sikriri. ⁷ Indokada oras rikior nawas wer, Ananias swari syun ḇoi ifawi roi ḇeḇesya kwar ya ḇa. ⁸ Petrus ikofen faroi, ḇo doḇo: "Wakofen kaku faro aya, maeja ḇero saprop muḇoḇ ani irya kamke?" Bin ani kyarem, ḇo doḇo: "Kaku rarirya." ⁹ Petrus ikofen: "Snaro muḇe oser fa mufrowes bir Manseren Rur Ḇyedi? Mame, snonkaku insandi ḇekrir swambri sya, si ḇeyores ro ḇarpon kedwa ya ma nari sakun au kako ro waryar ḇeḇondi." ¹⁰ Rofyor ani beri bin ani isapi ro ḇarpon Petrus wemin ḇyesu ya ma imarbos beri. Rofyor ani snonkbor ansi ssun, sisma bin ani imar kwar, inja ssuni ro waryar ya randi ma sikriri fanam swari. ¹¹ Inja jemaat ani ḇesiper ma kawasa ḇemnaf roi ḇeḇesya ine simkak fafaya ḇa. ¹² Ma manwawan ansi sifrur aḇyair nabor ma fasasnai kanandor ro fandu kawasa ḇeḇor ansi. Kawasa ḇekyarsya kam siryur ḇesya kwar ro rumbrawer Salomo kuker ḇaḇeoser. ¹³ Snonkaku ḇeso sya simku ḇa fa seoser kuker si. Rariryano kawasa ḇeḇor ansi kam semaf si. ¹⁴ Ma faḇaḇye muma snonkaku ḇefnoḇek fa ḇekyar Manseren sibor kaku iḇye snon ma bin, ¹⁵ rarirya ssun ḇeduf ono ḇeḇondi, ḇenyan ḇeba, ma srir si fa sḇarek ro kamboi ro yar sena, insa Petrus rofyor imbrainuk, nin ḇyedi dunuk ro si. ¹⁶ Ma snonkaku ḇeḇor ḇeraker mnu-mnu fanam Yerusalem kako semaraniḇo srama ssun ḇeduf sesi ma snonkaku rurḇemaḇak iswoḇer sya. Ma sikam ḇyuk pararei faro si. ¹⁷ Ḇarpurya Imam Ḇeba kuker ḇeso isya, isoine snonkaku ro rarwas Saduki sirandak fa smunwarek si, snar sisnesna namsor kaku ḇeri, ¹⁸ inja sfor manwawan ansi fa sismai ro bui ro mnu ya. ¹⁹ Ḇape rofyor roḇ kwar Manseren malaikat ḇyesi oso syeḇen kedwai ḇeḇor ro bui ma dunsi ḇeḇondi ma ikofen: ²⁰ "Mkora, mkores ro Rum Allah ma mko ḇaryas wos ḇekenem ya faro kawasa ḇeḇor ansi." ²¹ Seuser anun ani, ma fyor arwo babo sra ssun ro Rum Allah ma sirandak ssḇuk farkarkor ro dia. Rofyor ani Imam Ḇeba ma ḇeso isya siwan Kankain Karkara Agama fa siryur, isoine ḇebarara kankain er Israel sya kam, posa siwan fa ssun manwawan ansi ro bui. ²² Ḇape rofyor snonkaku siwan ansi sra ro bui, fama sisrow manwawan ansi ro dia ḇa. Inja skaḇer fa sikofen ḇayir, ²³ ḇo soḇo: "Inkora ḇoi bui isisen pyum kaku ma manwadwaren sya kam sisya ro moḇ sena ro ḇarpon kedwaya, ḇape rofyor inkoseḇen kwar, inkosrow snonkaku osero ḇa ro bui." ²⁴ Rofyor mananir ḇewaren Rum Allah ma mananir imam-imamsya simnaf wos anna, seḇirḇar ma sifuken inja rosai ḇeḇesya kwar kuker manwawan ansi. ²⁵ Ḇape snon oso ryama faro si ma ikofen: "Mkomame, snonkaku mkoḇefa ḇesun ro bui, sisya ro Rum Allah ma ssḇuk farkarkor faro kawasa ḇeḇor." ²⁶ Inja mananir ḇewaren Rum Allah kuker min ḇyesi sra ssun manwawan ansi, ḇape kuker aḇaḇen, snar simkak nari kawasa ḇeḇor ansi ssosi kuker karui. ²⁷ Ssun manwawan ansi ḇeḇarpon Kankain Karkara Agama. Imam Ḇeba ifuken si, ²⁸ doḇo: "Inkodwarek pakrek mko kwar insa mkoḇuk farkarkor kaker awer. Ḇape mko ḇaryas farkarkor mkoḇena, ro Yerusalem ḇesiper, ma mkomarisen mkorir Snon ani rik ḇyedi fa nek inko." ²⁹ Ḇape Petrus ma manwawan ḇeso ansi skarem, soḇo: "Inkoso syadi faro Allah ro inkoso snonkaku. ³⁰ Up koḇesi Allah sedi ḇyaus Yesus kwar, mkomun i ma mkopai ro aprop. ³¹ I kada isma saḇsiḇer ro Allah mankundi ḇar raku ḇyedi fa ḇyemanfarkin ḇeḇeknam koreri, insa Israel simbror ma sisma ampun ro sasar sena. ³² Ma inkoine inkoḇe saksi ro roi ḇeḇor annane, inko ma Rur Ḇesren, Allah ḇyuk faro kawasa sya kam ḇeḇeuser Yesus." ³³ Simnaf wos anna sisnesna nfafardun ma skara fa siḇe smun manwawan ansi. ³⁴ Ḇape snon Farisi oso ro fandu kankain ani snon ḇefawinananem Refo Yahudi snori Gamaliel, kawasa sibor semafi, iyori ma dor, insa siwan snonkaku ansi fa sisasyar resari. ³⁵ Raimnai ikofen faro kankain ani: "Ne, kawasa Israel, mkokara naḇye resari, rosai mkomarisen mkofrur faro snonkaku sine. ³⁶ Snar ro ḇepon Teudas ikḇawes kwar ma dow mankundi ḇesnon ḇeba, ma snonkaku ḇesoi sya indokada utin rifiak; ḇape smun i ma ḇesoi sya kam sibur ḇesisye ma roi ḇeḇesya ani imnai. ³⁷ Posa kwar roi, ro fafisu fasfas epen ḇarbor snonkaku sya, Yudas snon Galilea oso ikḇawes. Dun kawasa sibor kaku fa siso i ro mbrus ḇyedi, ḇape ikako imar, ma ḇesoi sya kam siḇesisye. ³⁸ Eḇedari yakofen faro mko: Mkopok mkofrur roi oso ḇaḇeri faro snonkaku ansine. Mkorir si, snar rofyor roi sifrur ine ḇyeknam ro snonkaku nari ipromes, ³⁹ ḇape rofyor ḇyeknam ro Allah nari mkopok mkodwarek snonkaku sine ḇa; snar imbude mkosampum Allah." ⁴⁰ Rarirya siso farkarkor ani. Ma sor manwawan ansi fa siprer si ma sidwarek si insa ssḇuk farkarkor kaker awer kuker snonsnon Yesus. Raimnai siwan si fa sibur. ⁴¹ Manwawan ansi sibur kankain ani kuker raryaḇ ḇeba, snar skara kwar sikako sakḇe kandera ma san anonef snar snonsnon Yesus. ⁴² Rarirya ras-ras kam ssḇuk farkarkor pdef ro Rum Allah ma ro kawasa rum sena ma sḇaryas Ankankinem Ḇeḇye ḇekur Wairek.

¹ Ro fafisu ani, kawasa Kristen ḇesun babo sya sibor syadi wer, isof ro fandu kawasa Yahudi ḇeyawosḇe Yunani sya surem kawasa Ibrani sya, snar rarwas faro kabom sesi sefandun siḇa ro afuf farmyan ḇero ras-ras. ² Snar roi ḇeḇesya nine manwawan samfur seser risuru ansi sor kawasa Kristen sya kam fa sfanjur ma sikofen: "Inko kara imnisḇa, snar inko myaren ḇa fa inkoḇaryas Allah wos ya, snar afuffarmyan meja ya. ³ Inja naek ma srar mko iḇye mko kinfir snon rifik ro fandu mko. Snonkaku kofawi kam kankenem ḇepyum ma ḇefo kuker Rur Ḇesren ma ḇefawinananem, insa ko kanow si fa suf fararur ine, ⁴ insa mankun inko inkomam ker nadi ma afuffarmyan wos ya." ⁵ Karkara ani jemaat ḇesiper simarisen i, inja skinfir Stefanus snon oso ḇefo kuker kakyar ma Rur Ḇesren, ma Filipus, Prokhorus, Nikanor, Timon, Permenas ma Nikolaus, snon oso ḇeso agama Yahudi ro Antiokhia. ⁶ Raimnai ssun si ḇeḇarpon manwawan ansi, ma manwawan ansi srir siḇrasna ro siḇrusna ma senadi. ⁷ Allah wos ḇyedi iryer syadi wer, ma dandonek kawasa Kristen ro Yerusalem sibor syadi wer, ma imam sya sibor sakkyar ma sakso kako. ⁸ Ma Stefanus, ḇefo kuker fakamaman ma papoik, ifrur fasasnai kanandor ma aḇyair-aḇyair ro fandu kawasa. ⁹ Ḇape naek ono sikḇawes ro fandu jemaat Yahudi, sap siḇe kina jemaat Libertini -- kina jemaat ansi ido snonkaku ro Kirene ma ro Aleksandria -- fnoḇek snon Yahudi ono ḇeraker Kilikia ma Asia. Snon ansi sfamfaḇri kuker Stefanus, ¹⁰ ḇape sipok sisampum Stefanus fawawinananem ḇyena ḇa ma Rur ḇedifi fa dawos ya ḇa. ¹¹ Inja sna wosi kuker snonkaku ono ma sikofen ḇo soḇo: "Inkomnaf kwar ikofen wos anonef faro Moses ma Allah." ¹² Kuker nyan ḇeradine sfarkor ninyan kawasa ḇeḇor ansi ma ḇebarara ma ḇefawinananem Refo Yahudi; fa soper Stefanus, sismeri ma ssuni ḇeḇarpon Kankain Karkara Agama. ¹³ Ma siwan saksi ankarkar ono fa sikofen: "Snon ine dawos ḇesya kwar wos anonef ḇekur moḇ ḇesren ine ma sasoser Refo Yahudi, ¹⁴ snar inkomnaf kwar ikofen, Yesus snon Nazaret ine, nari kyakok Rum Allah ine ma syadwer rari Moses ḇyefa ḇeḇewaris ḇeko." ¹⁵ Kawasa ḇeryur ro Kankain Karkara Agama ine siknower Stefanus, ma smam Stefanus ḇarpon ḇyedi isnai imnis ḇarpon malaikat oso.

¹ Imam Ḇeba ikofen: "Kaku rariryake?" ² Stefanus kyarem, ḇo doḇo: "Ne, naek ma sinan-sinan, mkomnaf naḇye! Allah ḇeḇye syadi fyasnai ḇayir mankundi kwar faro sinan up ḇepon koḇedi Abraham, rofyor isya kaker ro sup Mesopotamia, fafisu kyain faswef ḇaim ro Haran, ³ ma dawos faroi: Wasasyar bur mnu bedi ma naek srar besi ma rwaḇe mnu nari Yafasnai faro au. ⁴ Inja isasyar ro mnu kawasa Kasdim, ma ryama kyain faswef ro Haran. Ma rofyor kmari imar kwar, Allah iwan i fa ibur sup ani ḇesup ine, moḇ babo ine, mko kain ro ine; ⁵ ma ro dia Allah ḇyuk pusaka faroi ḇa, ma saprop mnuk ono roḇa, ḇape Allah ḇyeasas nari ḇyuk sup ani faroi ma kpu ma up ḇyesi, ḇape ro fafisu ani isma romawa ḇaim. ⁶ Ma Allah ikofen radine, nari kpu ḇyesi semandaman ro sup amber ma nari sewayam si ḇemanfyan ma sifrur kandera si ḇewampasi wambarek utin rifiak." ⁷ Ḇape Allah ikofen: "Nari er ḇeḇewayam ansi yaḇuk samamyai faro si, ma nari sisasyar kwar ro dia ma seari faro aya ro moḇ ine. ⁸ Raimnai Allah ḇyuk faroi asas sofuk; ma rarirya Abraham daḇen Ishak, ma ifrur sofakfuk ḇyedi ro ras ḇeḇewar ya; ma Ishak daḇen Yakub, ma Yakub daḇen kpu samfur seser risuru koḇan si. ⁹ Snar sne masasor, ro kpu koḇesi inja sḇoḇ Yusuf ḇesup Masir, ḇape Allah ryowusi, ¹⁰ ma fyaspari ro kandera ḇyena kam ma ḇyuk faroi saswar-fakamaman ma fawawi nanem ro fafisu dores ro ḇarpon Firaon, wairek Masir. Firaon isiḇer i fa ḇyefaker ro sup Masir ma rum wairek ḇesiper. ¹¹ Ma ro fafisu ani andoḇa myun sup Masir ḇesiper ma sup Kanaan, ma sekandera naba, isof kpu koḇesi sisma nanan ḇa. ¹² Ḇape rofyor Yakub imnaf, ro sup Masir gandum sisya inja iwan up koḇesi ḇe Masir. Ine kada rara ḇepon ya iri. ¹³ Ma ro rara ḇeḇesuru ya Yusuf fyasnai ḇadir mankundi faro naek ḇyesi, isof Firaon ifawi Yusuf er ma ḇarpur ḇyesi. ¹⁴ Ḇarpur ya Yusuf iwan fa sfaryan kmari Yakub ma naek ḇyesi kina senakam ḇarbor sedi sesamfur rifik seser ririm. ¹⁵ Rarirya Yakub fyaryan ḇesup Masir. Ro dia Yakub imar, i ma kpu koḇesi; ¹⁶ kor sesi ssunsi ḇe Sikhem ma sikramsi ro rus Abraham kyoḇes kwar kuker pipi sarak ono ro Hemor romawa ḇyesi ro Sikhem. ¹⁷ Ḇape asas Allah ḇyuk faro Abraham fyanam imnis kwar, ma er ani iryewen ma sibor ro sup Masir, ¹⁸ isof wairek babo oso ikḇawes ma ikif sasoser ro sup Masir, snon ani dakfawi Yusuf ḇa. ¹⁹ Wairek ani syewar nyan ankar ma sararer faro er koḇedi ma ifrur kandera kpu koḇesi, ma iwanbo sisawen romawa kasun sesi, insa er koḇedi ipromes. ²⁰ Ro fafisu ani Moses ḇyeḇeaḇen ma ipyum ro mamam Allah. Paik rikior ḇyeḇefaduru ro kmari rum ḇyedi. ²¹ Raimnai si sawen i, ḇape imboki Firaon duni ma iwan fa sfadurui imnis ḇinkundi romawa ḇyedirya. ²² Ma Moses ḇyeḇefarkor kuker fawawi ḇeḇor ro kawasa Masir, ma ipok ro wos ma fararur ḇyena. ²³ Fafisu byeumur wampasi wambarek samfur rifiak, iswaruser ro sneri fa ryakaki naek ḇyesi, isoine kawasa Israel. ²⁴ Rofyor ani myam snon Masir ya, iprer naek ḇyesi oso, inja ifnoḇek i ma myun snon Masir ani. ²⁵ Kyara doḇo naek ḇyesi nari sifawi, Allah ḇyuki fa fyaspar si, ḇape sikada sifawiḇa. ²⁶ Ro meserdi ryakaki si wer ma fyor ani, snon Israel risuru sumunsu, ma syewar fa ḇyedasisu doḇo: Naek mko! Mkofawiḇake mkoḇe manbekanaek? Snaro mkomun yae mko? ²⁷ Ḇape snon ḇefrur sasar faro min ḇyedi ani isampum Moses ma ikofen doḇo: ²⁸ Mansei ḇekanow au fa bemanfarkin ma mankara faro inko? Inja woḇo wakmun aya imnis mandoḇindi mun snon Masir ani? ²⁹ Moses imnaf wos ani, ifrar ibur ma ikenem imnis mandaman ro sup Midian. Ro diwa daḇen romawa snon risuru. ³⁰ Ma wampasi wambarek samfur rifiak nawas myam malaikat oso ro sup ḇeursḇa fanam bon Sinai rofor ḇesber ḇesasyar ro manuk. ³¹ Moses ikandor snar mamam ani, ma fafisu ryaḇe moḇ ani fa myam fanam, Manseren dawos faroi: ³² Aya ine Allah up besi, Allah Abraham, Isak ma Yakub, inja Moses ryadai ma imkuḇa beri rofyor myam roi ḇeḇesya ani. ³³ Manseren Allah ikofen faroi: Per roi ḇesower wemsi, snar moḇ, wores ro ani, saprop ḇesren dirya. ³⁴ Ya mamepen kwar kuker kaku ḇeri ḇaḇekandera ḇekur er ayesi ro sup Masir, ma yamnaf kwar fafafko sena, ma yado kwar insa yafaspar si; inja rwama, insa yawan au ḇesup Masir. ³⁵ Moses ine iso simewer kwar ani, ma sikofen: Mansei ḇekanow au ḇemanfarkin ma mankara? -- Moses ani iso Allah iwan fa ḇeḇemanfarkin ma ḇeyun aski kuker fafnoḇek malaikat, befasna mankundi kwar faroi ro manuk. ³⁶ Iso ḇeyunsi fa sisasyar kuker frur fasasnai kanandor ma aḇyair-aḇyair ro sup Masir, ro soren ḇerik ma sup ḇeursḇa, wampasi wambarek samfur rifiak. ³⁷ Moses anine kaker iso ḇekofen faro kawasa Israel: Nabi oso ḇemnis raris aya ine nari Allah ḇyausi faro mko ro fandu naek mkoḇesi. ³⁸ Moses anine iso ḇeyores fanandu jemaat ro sup ḇeḇeursḇa fandu malaikat ḇekofen faroi ro bon Sinai ma up koḇesi; ma iso ḇemnaf wos-wos ḇekenem, raimnai ḇeyakḇuk wos anna wer faro mko. ³⁹ Ḇape kpu koḇesi simewer siso useri, ḇoi spampumi. Ro sisnesna simarisen skaḇer ḇesup Masir. ⁴⁰ Inja sikofen faro Haruni: Wafrur amfyanir ono faro inko, ḇembran ro ḇarpon inkoḇedi, snar Moses ḇeyun inko fa inko sasyar bur sup Masir ani -- inko fawiḇa rosai ḇeḇesya kwar kukeri. ⁴¹ Ma rofyor ani sifrur sapi mkun oso ma sikun farsarser faro amfyanir ani ma simarisen kuker rosai sifrur ro mankunsi ani. ⁴² Inja Allah myambur si ḇo ryirsi fa seari faro roi ḇeḇor ḇero nanki imnis fasfas ḇero syap nabi-nabi: ’Inja rosai mko bukfarser faro aya ma aiwan rosai mko karuk ḇesamsom fafisu wampasi wambarek samfur rifiak ro sup ḇeḇeursḇa ani, ne, er Israel? ⁴³ Royo ḇaim, mboi mkoḇar aḇdares Molokh ma mak amfyanir Refan, amfyanir-amfyanir mko frur ani faro mko syom. Rarirya nari Yun mko ma Yasawen mko isof ro Babel ḇar iwara.’ ⁴⁴ Rum ḇeḇesaksi faro kpu koḇesi ro sup ḇeḇeursḇa, imnis Allah syoser kwar faro Moses insa ifrur raris rum myam kwar ya. ⁴⁵ Rum ani kpu koḇesi sisma i ma kuker farkankin ro Yosua suni ḇo ssun ro sup ine, isoine fafisu sup ine ḇyeḇeyun bur er-er ḇeso, Allah iyaw ro ḇarpon kpu koḇesi; rarirya isof fafisu Daud. ⁴⁶ Daud isma saswar ma fakamaman ro ḇarpon Allah ma dor insa Allah imarisen ido ifrur rum oso faro Allah Yakub kyain ro. ⁴⁷ Ḇape Salomo kada iso ḇeḇawes rum oso faro Allah. ⁴⁸ Ḇape Allah ḇekaki syadi ipok fa kyain ro rosai snonkaku sifrur kuker ḇramin ḇa, imnis rosai nabi sya sikofen: ⁴⁹ ’Nanki irya karapesa nasan ayedi, ma supswan irya araref ayedi. Rum rosai nari mko frur faro aya, rarirya Allah ikofen, moḇ rosai nari ḇeḇemananai faro aya? ⁵⁰ Mkofawi ḇake nanefakam ḇrawr ḇero ḇrassu?’ ⁵¹ Ne, snonkaku ḇukor ḇepakrek ma sne ḇesouser ḇa ma knaram ḇeproi, mko kada mkosampum Rur Ḇesren, imnis kpu mko ḇesi rarirya mko kako. ⁵² Mansei si ro nabi-nabi sya ḇeyaksma kandera ro kpu mkoḇesi ḇa? Mboi smun snonkaku ḇepon sya ḇeḇaryas raramuma ro snon ḇenapes, ro baboine mko famyun ma mkomun kwar ani. ⁵³ Mkosma kwar sasoser ro Refo Yahudi ma malaikat-malaikatsya ssḇukḇe mko ḇape mkoso naba." ⁵⁴ Rofyor Kankain Karkara Agama simnaf wos anna sisnesna nasam kaku ma sark fafais sinasna. ⁵⁵ Ḇape Stefanus ḇefo kuker Rur Ḇesren iwakwaker ḇe nanki ma myam payamyum Allah ma Yesus dores ro ḇar raku Ḇyedi. ⁵⁶ Inja ikofen: "Kaku ḇeri yamam nanki ḇyas ma Rumkun Snonkaku dores ro Allah ḇarpon Ḇyedi." ⁵⁷ Rarirya sar naba ma snos siknasna ḇo sopri ma sfori. ⁵⁸ Sismeri ḇe mnuya ḇandiri, ma ssoi kuker karui. Ma saksi-saksi sya srir syatu sena ro ḇarpon snonkbor ḇenir Saulus. ⁵⁹ Fafisu ssoi, Stefanus ḇyenadi, ḇo doḇo: "O Manseren Yesus, wun rur ayedi." ⁶⁰ Kyain wepur ma dor naba: "Manseren befa sḇar awer sasar ine!" Ikofen rarirya posa imar.

¹ (1a) Paulus kako dakmarisen fa Stefanus smuni. (1b) Ro fafisu ani randak ro kandera ḇeba ḇekur jemaat ro Yerusalem. Sikam sibur sfamok sup Yudea ḇesiper ma Samaria, demir manwawan ansi si ḇekainepen. ² Kawasa ḇekyar sya skanes Stefanus ma sikriri. ³ Ḇape Saulus syewar nyan fa fyasasye jemaat ani inja syun-syaye rum ḇe rum ma ismer snon ma bin ḇeḇandi ma ḇyesi fa ssun ro bui. ⁴ Kawasa Kristen ḇebur famok ansi simbran ro sup ḇesiper ma sḇaryas Ankankinem Ḇeḇye. ⁵ Ma Filipus ryaḇe mnu oso ro Samaria ma ḇyaryas Wairek faro snonkaku ḇero dia. ⁶ Rofyor kawasa ḇeḇor ansi simnaf Filipus ḇaryas ḇyena ma smam fasasnai kanandor ma aḇyair-aḇyair ifrurna, sikam sesne oser simarisen rosai ḇyaryasna. ⁷ Snar kawasa ḇeḇor rur ḇemaḇak siwoḇer sya, rur ḇemaḇak ansi si sasyarḇo siyiw naba, ma snonkaku sibor ḇepapipen ma ḇeḇemanis ono ifrursi fa siprei. ⁸ Rarirya raryaḇ ḇeba kaku ro mnu ani. ⁹ Snon oso snori Simon fyoro kwar nya mon ro mnu ani ma ifrur kanandor kawasa Samaria, ma dow mankundi ḇe snon ḇeba. ¹⁰ Snonkaku sya kam kasun ḇeba sisoi ma sikofen: "Snon ine isma papoik ro Allah, sorḇe Papoik Ḇeba." ¹¹ Ma sikam sisoi snar fyoro kwar ifrur fa sikandor kuker fararur mon ḇyesi. ¹² Ḇape baboine sikyar faro Filipus ḇeḇaryas Ankankinem Ḇeḇye ro Ḇaḇesasoser Allah ma snonsnon Yesus Kristus, ma sor fa sisma masi sren, iḇye snon ma bin. ¹³ Simon mankundi kako dakkyar, ma rofyor isma masi sren kwar, iso wanan Filipus, ma ikandor rofyor myam aḇyair-aḇyair ma fasasnai kanandor ḇeba ḇeḇesya na. ¹⁴ Rofyor manwawan ḇero Yerusalem simnaf, sup Samaria kawasa ansi sisma wos Allah kwar, inja siwan Petrus ma Yohanes suraḇe Samaria. ¹⁵ Sura kwar ro dia manwawan ansu suḇenadi, insa kawasa Samaria saksma Rur Ḇesren. ¹⁶ Snar Rur Ḇesren ya dado faro snon oso ḇaim ro fandu si, snar sisma masi sren monda kuker snonsnon Manseren Yesus. ¹⁷ Raimnai susawar dofensi, posa sisma Rur Ḇesren. ¹⁸ Rofyor Simon myam Rur Ḇesren ya dado faro kawasa ansi snar manwawan ansu ya susawar dofen si, inja ḇyuk pipi ono faro su, ma ikofen: ¹⁹ "Muḇuk ḇe aya kako papoik ani, insa rofyor yaksawar dofen snonkaku ono, sikako saksma Rur Ḇesren." ²⁰ Ḇape Petrus ikofen faroi: "Mboi pipi besi nari sro kuker au, snar woḇoda, fakamaman Allah kwoḇes i kuker pipi. ²¹ Wasma rarwas osoḇa ro mnuk ine, snar snembri inapes ḇa ro ḇarpon Allah. ²² Iḇyekada wambror ro ḇarḇor benane ma benadi faro Manseren, insa ḇyuk ampon ro swaruser ḇero snembri; ²³ snar yamam snembri ḇyepus kwar ma syarmar ma ḇarḇor ḇena newayam au." ²⁴ Simon kyarem: "Iḇyekada mkonadi kuker aya faro Manseren, insa roi ḇeḇor mko kofen kwar nane nkur awer aya." ²⁵ Suḇe saksi ma suḇaryas Manseren wos ḇyedi kwar sukaḇer ḇe Yerusalem ma ro mararan suḇedi suḇaryas Ankankinem Ḇeḇye ro mnu-mnu nabor ro sup Samaria. ²⁶ Ḇarpur ya malaikat Manseren ḇyesi oso ikofen faro Filipus, doḇo: "Wayor au ma rwaḇe ḇar wambraw waso nyan ḇesabu ro Yerusalem ḇe Gasa." Nyan ani ḇyeusḇa. Inja Filipus rya. ²⁷ Snon Etiopia oso, wairek Kandake, wairek bin ro sup Etiopia faker ḇyedi, ḇebarara mananir ḇemamwark wairek ani nana ḇyena, ryaker sup Etiopia ḇe Yerusalem fa daksun ari. ²⁸ Snon ani ro mararan barbur ḇyedi kyain ro kereta ḇyedi ma ḇyewasya syap Nabi Yesaya. ²⁹ Ma Rur ya ikofen faro Filipus: "Rwamura fanam kereta ya!" ³⁰ Filipus rya fasaw ma imnaf faker ani ḇyewasya syap Nabi Yesaya. Filipus doḇo: "Tuan wafawi roi wawasya nake?" ³¹ Kyarem: "Yafawi rariso rofyor oso fyarkin aya ḇa?" Raimnai dor Filipus fa dek ma kyainusi. ³² Mnuk ḇyewasya ani ryok radine: "Raris domba oso suni ḇemoḇ skarakruk ro ya; ma imnis domba mkun ḇeḇeawer ro ḇarpon snon ḇekapnik bur ḇyesi, rarirya ipok ḇyas sḇari ḇa. ³³ Ro ḇaḇemanfyan ḇyena kandera ya deki; manseiso nari ḇefarfyar ḇarpur ḇyedi? Snar nyawa ḇyedi sunibur supswan." ³⁴ Inja faker ani ifuken Filipus: "Yafuken au manseiso nabiya ikofen ḇesyan ya? Ikofen mankundike roḇa snon oso ḇeso?" ³⁵ Inja Filipus dawos randak kuker mnuk ani ma ḇyaryas Ankankinem Ḇeḇye ro Yesus faroi. ³⁶ Skombran pdef mararan skoḇedi isof ro moḇ ḇeḇewar oso. Raimnai faker ani ikofen: "Mamkada war ya iso iya; rosai ḇedwarek aya fa yasma masi sren?" [ ³⁷ Filipus kyarem: "Rofyor tuan wakyar kuker snembri ḇesiper, ido." Faker ani kyarem: "Mboi yakyar, Yesus Kristus Rumkun Allah."] ³⁸ Inja snon Etiopia ani iwan fa kereta ani imnai, ma sudoḇe war ya ma Filipus ḇyuk masi sren faroi. ³⁹ Rofyor susasyar bur war ya kwar Rur Manseren dun Filipus ma faker ani myami werḇa. Imbran pdef mararan ḇyedi kuker raryaḇ. ⁴⁰ Ḇape Filipus kada isya ro Asdod. Imbranuk sup aniḇo ḇyaryas Ankankinem Ḇeḇye ro mnu nakam isof ryama ro Kaisarea.

¹ Fafisu ani Saulus dosam ḇyedi isber ma daw fa iḇemyun Manseren kawasa ḇyesi. Rya faro Imam Ḇeba, ² ma dor syap kuasa roi fa dun faro majelis Yahudi ro Damsyik, insa, rofyor isrow snon ma bin ḇeso Manseren Nyan ḇyedi, fyor si ma dunsi ḇe Yerusalem. ³ Ro mararan ḇyedi ḇe Damsyik, fafisu fyanam mnu ani kwar kniko sananai oso syoker nanki ma isnai yari. ⁴ Isapi ma imnaf mkaren oso ikofen faroi: "Saulus, Saulus, snaro bewayam aya?" ⁵ Saulus kyarem: "Manseiso au, Manseren?" Inja Ikofen: "Aya ine Yesus, bewayam ya. ⁶ Indo wakḇok ma rwaḇe mnu ya, ro diwa nari sikofen faro au, rosai nari wafrur ya." ⁷ Kawasa ḇesoi ro mararan ani sikmom, snar simnaf mkaren ani, ḇape smam snonkaku oso ḇa. ⁸ Saulus ikḇok ma dores, raimnai ḇyas mkasu, ḇape myam royoḇa; inja sikfin i fa syun ro Damsyik. ⁹ Ras rikior dafafare ma dananba dinemba. ¹⁰ Ro Damsyik Manseren kawasa Kristen ḇyesi oso isya snori Ananias. Manseren ikofen faroi ro mamam oso: "Ananias!" Kyarem: "Ayaisine Manseren!" ¹¹ Manseren ikofen: "Rwama rwaḇe nyan ḇenir Nyan Ḇeyaḇyoḇer, ma swewar ro Yudas rum ḇyedi snon oso ḇeraker Tarsus benir Saulus isya fafisu ine ḇyenadi, ¹² ma ro mamam oso myam, snonkaku ḇenir Ananias syun randum isawar dofeni, insa myam wer." ¹³ Ananias kyarem: "Manseren ro snonkaku sibor yamnaf kwar ro snon ani ifrur ḇarḇor nabor kwar faro snonkaku ḇesren besi ro Yerusalem. ¹⁴ Ma ryama ro dine kuker papoik ḇeba ro mananir imam, insa fyor snonkaku syakam ḇeyap snombri." ¹⁵ Ḇape Manseren ikofen faroi: "Rwamura snar snon ani dera yakimfir kwar faro aya fa ḇyaryas snonsnon Yedi faro er ḇeso kako ma faro wairek-wairek ma kawasa Israel. ¹⁶ Mankundaya nari yafasna faroi, kandera nabor nari nkuri snar snonsnon ayedi." ¹⁷ Inja Ananias rya ma syun ro rum ani. Isawar dofen Saulus ma ikofen: "Saulus, naek yedi, Manseren Yesus, ḇefasnai mankundi faro au ro nyan wambrar ro ani, iwan aya kwar faro au insa mam wer ma wafo kuker Rur Ḇesren." ¹⁸ Ma ro fafisuya beri, arpar ro mkassu noḇes isof myam wer. Ikḇok ma isma masi sren. ¹⁹ (19a) Ma rofyor danan kwar syamḇraḇ wer. (19b) Saulus kyain ras ono kuker kawasa Kristen ro Damsyik. ²⁰ Fafisu ani beri ḇyaryas Yesus ro rum nadi, ma ikofen Yesus irya Rumkun Allah. ²¹ Kawasa Kristen ḇeḇor ḇemnafi sya sikmom ma sikofen: "Inja snonkaku ineke, iso ḇemarisen ḇemun mansei-mansei ḇeyap snonsnon Yesus ro Yerusalem? Ma ryama kuker swaruser ani kako insa fyor ma dunsi ḇeḇarpon mananir imam-imam?" ²² Ḇape Saulus fararur ḇyedi iba syadi wer isof kawasa Yahudi ro Damsyik sikmom, snar fyasnaibos, Yesus i Wairek. ²³ Ḇarpur ro ras ono kawasa Yahudi ssewar nyan oso insa smun Saulus. ²⁴ Ḇape nyan ḇeḇyeḇa ani Saulus ifawiyi. Ras-roḇ kawasa Yahudi siwaren wark kedwai nakam ro mnu ani insa smuni. ²⁵ Rarirya ro roḇ oso kawasa Kristen ḇyesi ono suni fa sikyui ro aram oso ro ayar mamun mnuya ḇandiri. ²⁶ Saulus rofyor ryama kwar ro Yerusalem syewar fa isnefer kawasa Kristen sya ḇape simkak i kam, ma sikyarḇa beri, ikako daksun kwar ḇe Kristen. ²⁷ Ḇape Barnabas ikada duni faro manwawan sya ma fyar faro si, rariso Saulus myam Manseren ro nyan ya faduri ma moḇsaiso Manseren dakawawos faroi ma rariso ḇri ḇyedi fa ḇyuk farkarkor ro Damsyik ro snonsnon Yesus. ²⁸ Ma Saulus ryowus si ro Yerusalem, ma kuker ḇri ḇyuk farkarkor ro snonsnon Manseren. ²⁹ Ikako dawawos ma fyaḇaḇri kuker kawasa Yahudi ḇeyawos ḇe Yunani, ḇape ssewar nyan insa smuni. ³⁰ Ḇape rofyor naek Kristen ro jemaat sifawi awine kwar inja ssun Saulus be Kaisarea ma siwani fa iburḇe Tarsus. ³¹ Fyoro kaku jemaat ro Yudea ḇesiper, Galilea ma Samaria skain kuker aski. Jemaat ani sḇawsi ma sikenem kuker araryof faro Manseren. Dandonek sedi sibor syadi wer kuker fafnoḇek ro Rur Ḇesren ya. ³² Rofyor ani Petrus imbran yar fa ryakaki ḇe moḇna kam. Ro mararan ani dakrama kako faro kawasa ḇesren ro Lida. ³³ Ro dia isrow snon oso snori Eneas, ḇeduf papipen ma ḇeḇarek ro kamboi ḇyedi ḇewampasi wambarek riwar kwar. ³⁴ Petrus ikofen faroi: "Eneas, Yesus Kristus ḇyuk pararei faro au; wakḇok ma fasos kamboi bedi!" Fafisu ani beri snon ani ikḇok. ³⁵ Kawasa kam ḇero Lida ma Saron smami, inja skaḇer faro Manseren. ³⁶ Ro Yope bin Kristen oso snori Tabita -- ro wos Yunani Dorkas. Bin ine nabor kaku ḇyesyowi ma ḇyuk farsarser. ³⁷ Ḇape ro fafisu ani iduf rao isof imar. Ma rofyor si masi i posa, suni fa ḇyarek ro sim ḇero bo. ³⁸ Lida fyanam Yope. Rofyor kawasa Kristen simnaf Petrus isya ro Lida, siwan naek risuru faroi kuker fararyor: "Rwama fasaw ḇe inko." ³⁹ Inja Petrus fyasos fa iso si. Sra kwar ro Yope, ssun pdefi ḇesim ḇero bo ma kabom sya kam srama sores fanam i ma skanesḇo sfasnai faroi sansun ma rofmar, Dorkas isip faro si ro fafisu isya iḇye ya. ⁴⁰ Ḇape Petrus iwan fa sisasyar kam, posa kyain wepur ma ḇyenadi. Raimnai myam ḇemar ani ma ikofen: "Tabita, wakḇok kada!" Inja Tabita ḇyas mkasu ma fyor myam Petrus, ikḇok fa kyain. ⁴¹ Petrus ikin ḇrasu ma ifnoḇek i fa dores. Raimnai dor kawasa ḇesren ansi fnoḇek kabom sya ma fyasnai faro si, bin ani ikenem. ⁴² Roi ḇeḇesya anine imbran yar Yope ḇesiper ma kawasa sibor kaku sikyar faro Manseren. ⁴³ Ḇarpur ro roi ḇeḇesya ani Petrus kyain ras ono ro Yope ro rum snon ḇenir Simon, ḇeyak aiwan kif.

¹ Ro Kaisarea snon oso isya snori Kornelius, mambri sarar sor ḇe sarar Italia. ² I kuker kina ro rum ḇyedi sikyar ma sararyof faro Allah ma ḇyuk farsarser nabor faro er Yahudi ma ḇyenadi ḇesya kwar faro Allah. ³ Indokada fanam oras kior mandira, myambos Manseren malaikat ḇyesi oso ryama syun ro rum ḇyedi ma ikofen: "Kornelius!" ⁴ Myambos malaikat ani kuker makakak ma ikofen: "Rariso ine o Manseren?" Malaikat ani kyarem: "Nadi ma farsarser ḇena kam nek kwar faro Allah ḇarpon ḇyedi ma Allah iswarepen au. ⁵ Inja knikine, wawan snonkaku onoḇe Yope fa ssun snon ḇenir Simon sapi kakoḇe Petrus. ⁶ Isya ro rum Simon snon ḇeyak aiwan kif, ḇekain ro swan andir." ⁷ Malaikat ḇeyawos faroi ani i buri kwar, raimnai dor snon risuru ro manfamyan ḇyesi fnoḇek sordade ḇekyar oso ro snonkaku ḇefnoḇek i ḇesya kwar si. ⁸ Rofyor ikofen ḇayir roi ḇeḇor anna kam faro si posa iwan siḇe Yope. ⁹ Meserdi rofyor snon rikior ansi sisya kaker ro mararan ma sfanam mnu Yope kwar, indokada fanam oras samfur seser risuru arkok, Petrus dekḇe rum ya bori fa ḇyenadi. ¹⁰ Petrus iḇe danan snar ibiser, ḇape insape sfasos roḇean na, fafisu ani papoik Allah iswoḇer i. ¹¹ Myam nanki ḇyas ma roi oso imnis kruḇen ḇeba ḇyedopir rifiak ma sikyui isof ro saprop ya. ¹² Ro dori iser aiwan syoso-syoso kam ḇeḇewemin rifiak, ḇeanawer ma mansya. ¹³ Imnaf mkaren oso ikofen: "Ne, Petrus wayor au, kwaruksi ma wansi!" ¹⁴ Ḇape Petrus kyarem: "Roḇa, o Manseren rariryaḇa snar aya yakan ḇaim roi ḇefor ma ḇemamas." ¹⁵ Mkaren ani ryokḇe eḇesuru ya faroi: "Rosai Allah fyasren, wapok fa befor naba." ¹⁶ Roi ḇeḇesya ani ryamaḇe rarwan rikior posa kruḇen ani ḇyeḇeyer fasau ḇe nanki. ¹⁷ Petrus kyara ro sneri, fasasnai rosai ḇero mamam myam kwar ine. Fafisu ani Kornelius snonkaku iwan ansi sisya ro kedwai ya ḇarpondi ma sifuken Petrus rum ḇyedi. ¹⁸ Skor snon oso fa skofuken, imbude Simon sapḇe Petrus isya ro rum ani. ¹⁹ Fyor ani Petrus kyara kaker ro mamam ani, ma Rur ya ikofen faroi: "Snon risuru suisya susewar au. ²⁰ Wayor au wado ma waso si, beḇirḇar awer, snar ayaiso ḇewan si muma." ²¹ Inja Petrus dado rarḇaḇ ikofen faro si: "Ayaiso mkossewar ya; rosaiso ḇeḇedari mkoramuma ya?" ²² Skarem faro i: "Kornelius snon mambri sne ḇenapes ma ḇeyararyof Allah ro fandu er Yahudisya kam si fawiyi, isma kwar fasasnai ro Allah ma mam malaikat ḇesren oso ḇekofen faroi insa dor au ḇe rum ḇyedi fa imnaf rosai nari wakofen faroi." ²³ Ma Petrus ikofen fa skenef ro dia. Mesrdi ikḇok fa iso si fnoḇek naek ono ro Yope. ²⁴ Ro arwori skorama ro Kaisarea. Kornelius isya iwafsi ma dor naek ma bati ḇyesi fa siryur kwar. ²⁵ Rofyor Petrus syun, Kornelius rya isrow i ma ḇyan suba ro ḇarpon ḇyedi. ²⁶ Ḇape Petrus idwarki doḇo: "Wores, aya ine snonkaku monda." ²⁷ Ma dawawos kukeri, ḇo syun ma isrow kawasa sibor sisya siryur. ²⁸ Ikofen faro si: "Mkofawi kam kwar, rari Yahudi ḇyuk ḇaḇeri fa snon Yahudi oso ikenem fawas snonkaku ḇeḇe Yahudi ḇa, roḇa syun ro rum sena. Ḇape Allah fyasnai kwar faro aya insa yapok yakofen awer snonkaku osoḇe ḇemamas. ²⁹ Snar rarirya yaḇerer fararyor mkoḇena ḇa mboi yara muma beri. Insape yamarisen yafawi rosai ḇeḇedari mkor aya." ³⁰ Kornelius kyarem: "Ras rifiak ḇesyof kwar indokada fanam oras kior ro fafisu ḇeradine, yaḇenadi ro rum ayedi." ³¹ Kniko snonkaku oso dores ro ḇarpon ayedi, ma sansun ḇyena nasnaper ma ikofen: "Kornelius nadi ḇena Allah imnaf na kwar ma farsarser ḇena kam Allah iswarepen na ro ḇarpon ḇyedi. ³² Inja wawan snon onoḇe Yope fa ssun Simon sap kakoḇe Petrus; isya ro Simon snon ḇeyak aiwan kif rum ḇyedi, ḇekain ro swan andir. ³³ Eḇedari yawan fasaw snon ono faro au, ma kuker sne ḇeryaḇ rwama kwar ine. Knikine inko ryur kam kwar ro ḇarpon Allah ro dine, insa inko mnaf rosai Allah ḇyeasas faro au." ³⁴ Raimnai Petrus irandak dawawos doḇo: "Kaku ḇeri yafawi kwar, Allah myam rarwas snonkaku ḇa. ³⁵ Snonkaku oser-oser ro er rosairya kaker, ḇeyararyof ma ḇeḇesyowi Allah kuker napnapes imarisen si. ³⁶ Wos ani iso Allah iwan fa sḇaryas faro er Israel isoine wos ḇeḇaryas aski ro Yesus Kristus i Manseren faro kawasa kam. ³⁷ Mkofawi roi ḇeḇor ḇeḇesya kwar ro sup Yudea ḇesiper randak ro Galilea posa ro masasisren Yohanes ḇyaryas, isoine Yesus ro Nazaret. ³⁸ Rariso Allah ryemi kuker Rur Ḇesren ma papoik, iso, ḇembran yar-yar ma ḇefrur pyum ma ḇeḇuk pararei faro snonkaku kam rur ibiris iswoḇer si, snar Allah ifnoḇeki. ³⁹ Ma inkoine saksi-saksi ro roi ḇeḇor ifrur kwar ro Yudea ma Yerusalem kako; ḇape smuni ma skafi ro aprop. ⁴⁰ Yesus ani Allah ḇyawesi kwar ro ras ḇeḇekior ya, ma Allah imarisen insa fyasnai ḇayir mankundi, ⁴¹ faro kawasa er sya kam ḇa, ḇoi faro saksi-saksi, Allah fyasnai kwar ro ḇepon, isoine faro inko ḇeyan ma ḇeyinem kuker i, rofyor diḇri ro munaiḇui. ⁴² Ma isiḇer inko kwar fa inko ḇaryas faro er-er sya kam, ma inkoḇe saksi, iso Allah kyur fasnai fa ḇaḇemankara faro snonkaku ḇekenem ma ḇemar sya." ⁴³ Iso nabisya kam sḇardi kwar isoine mansei ḇekyar faroi nari ismai ampon ro sasar kuker snonsnon ḇyedi. ⁴⁴ Fafisu Petrus dawos rarirya, Rur Ḇesren ya dado faro snonkaku kam ḇemnaf ḇaryas ani. ⁴⁵ Ma kawasa ḇekyar kwar ro rarwas ḇesofuk ḇeso Petrus, sikandor, snar smam, mboi fakamaman Rur Ḇesren ḇyeḇesbawer faro er-er ḇeso kako, ⁴⁶ snar simnaf kawasa ansi sawawos ro wos Rur ya ma sisandik Allah. Inja Petrus ikofen: ⁴⁷ "Inja nari snonkaku sidwarekke masi sren kuker war, faro snonkaku sine, snar sikada sisma Rur Ḇesren kwar imnis ko?" ⁴⁸ Raimnai iwan fa sismai masi sren kuker snonsnon Yesus Kristus. Posa kwar sor ro Petrus insa kyainus si ras ono wer.

¹ Manwawan ansi ma naek srar ro sup Yudea simnaf, er-er ḇese sya saksma kako Allah wos ya. ² Fafisu Petrus ryama kwar ro Yerusalem, kawasa ro rari sofakfuk sfamfaḇri swaruser kukeri. ³ Sikofen, ḇo soḇo: "Au ine swun kwar ro rum snonkaku ḇesofuk ḇaim, ma wanan fnoḇek si." ⁴ Ḇape Petrus fyar asuser farosi roi ḇeḇesya anna kam, doḇo: ⁵ "Aya isya yaḇenadi ro mnu Yope, kniko rur yedi kyanosen kuker samambraḇ Allah ma yamam mamam oso: roi oso kyaf imnis kruḇen ḇeḇam ḇyeḇefes ro dopir rifiak, ikyu ro nanki isof ro ḇarpon ayedi. ⁶ Yaknower i ma yamam ro dori aiwan syoso-syoso ḇeḇewemin rifiak ma ḇerafdi ma ḇeyanawer ma man sya. ⁷ Raimnai yamnaf mkaren ḇekofen ḇeaya: Ne, Petrus, wakḇok ma kwawuk si ḇo wansi! ⁸ Ḇape yakofen: Roḇa Manseren, rariryaḇa, snar roi ḇefor ma ḇemamas naksun ro sbari ḇaim. ⁹ Ḇape ro rarwan ḇeḇesuru ya mkaren ḇeraker nanki ani ikofen wer faro aya: Rosai Manseren fyasren kwar, wapok befornaḇa! ¹⁰ Mamam ani imbran rarwan rikior, insape ḇyeḇeyer kaḇer ḇe nanki. ¹¹ Ro fafisu ya kako snon rikior skores ro ḇarpon rum, inkenef roya; siwan si ker Kaisarea yoḇ aya. ¹² Ma rurya ikofen faro aya: Rwa wasosi ḇo beḇirḇar awer! Ma naek riwonem skoine skoso aya. Nkosun ro snon ani rum ḇyedi, ¹³ ma fyawar faro inko, rariso myam malaikat oso, dores ro rum ḇyedi ma ikofen faroi: Wawan snon ono ḇe Yope fa ssun Simon sniri kako ḇe Petrus. ¹⁴ Iso nari ḇeyun ḇaryas faro mko, nari ḇeḇuk aski faro au ma faro kina ḇero rum bedi ḇesiper. ¹⁵ Ma ro fafisu yarandak yawawos, Rur Ḇesren ya dado faro si, imnis raris dado ḇepon kwar faro ko. ¹⁶ Inja yaswarepen Manseren ikofen kwar: ’Yohanes ḇyuk masasi kuker war, ḇape mko nari mkokada mkosma masi sren kuker Rur Ḇesren.’ ¹⁷ Inja rofyor Allah ḇyuk kwar saswar ḇyedi farosi raris ḇyuk faro ko ro fafisu korandak ko kyar Yesus Kristus, raris si nari yamrer Allah marisen ḇyedi?" ¹⁸ Ro fafisu simnaf roi ḇeḇesya anna kam, inja sikam siknon, ma sisandik Allah, soḇo: "Inja faro er-er ḇese kako Allah ḇyuk farosi marandor ḇefarkin si faro kankenem ya." ¹⁹ Ro fafisu ya naek srar sibor skakek snar marindi ḇekur si rofyor sḇuk samamyai marmar faro Stefanus kwar. Sibur skakek isof ro Fenisia, Siprus ma Antiokhia; fama sḇaryas Ankankinem Ḇeḇye ya monda faro snonkaku Yahudisya serer. ²⁰ Mboi ro fandusi snonkaku Siprus ma Kirene ono ḇerama ro Antiokhia ma ḇewawos kako faro snonkaku Yunani ma ḇeḇaryas Ankankinem Ḇeḇye, isoine Yesus irya Manseren. ²¹ Ma Manseren ifnoḇek si inja snonkaku sibor kaku sikyar ma skaḇer faro Manseren. ²² Rarirya sḇesno faro jemaat Yerusalem, inja jemaat ani siwan Barnabas ḇe Antiokhia. ²³ Rofyor Barnabas ryama kwar ma myam saswar ma fakamaman Allah, imarisen naba kaku. Ḇyuk swarepen farosi insa skain nadworen faro Manseren, ²⁴ snar Barnabas snonkaku ḇepyum, ḇefo kuker Rur Ḇesren ma ḇekyar. Dun snonkaku sibor faro Manseren. ²⁵ Raimnai Barnabas ryaḇe Tarsus fa syewar Saulus; ma isrowi kwar, duni ḇe Antiokhia. ²⁶ Sukain kuker jemaat ani ḇewampasi wambarek oser, ma suḇuk farkarkor faro kawasa sibor. Ro Antiokhia manfamyan ansi sap randak siḇe Kristen. ²⁷ Rofyor ani nabi ono srama ker Yerusalem ḇe Antiokhia. ²⁸ Snonkaku oso ro si ḇenir Agabus iyori ma kuker papoik Rur Ḇesren ikofen, nari andoḇa ḇebayo myun supswan ḇesiper. Roi ḇeḇesya ani myun kako ro fafisu Klaudius. ²⁹ Inja kawasa Kristen ansi sawfa siryur fafnoḇek ono raris oser-oser mankundi samambraḇ ḇyedi ma sfarem na faro naek srar ḇekain ro Yudea si. ³⁰ Inja sifrur rarirya kako ma sfarem nafa Barnabas ma Saulus suyun na faro penatua-penatua sya.

¹ Indokada ro fafisu ani Wairek Herodes ryak kuker frur ḇepakrek faro snonkaku ono ro jemaat. ² Iwan fa smun Yakobus, Yohanes ḇeba ḇyedi, kuker sumber. ³ Fafisu myam, mamun ani ifrur raryaḇ snonkaku Yahudi si sisnesna, inja ifrur pdef nyan ani ma iwan fa sfor Petrus. Fafisu ani ras ḇeba munara Mamami Ḇepisenba. ⁴ Petrus ḇyeḇefor kwar, Herodes iwan fa suni ro bui ma sordade syos rifiak siwaren i, syos oser sordade rifiak. Doḇo insa, munara Paskah isyof kwar duni ḇeḇarpon snonkaku ḇeḇor. ⁵ Rarirya Petrus ismai ro bui. Ḇape kuker sneḇesiper jemaat ani sinadi kuker i faro Allah. ⁶ Ro fafisu Herodes imarisen duni ḇeḇarpon snonkaku ḇeḇor ansi ro meserdi ḇayim, ro roḇ ani kako Petrus denef ro fandu sordade risuru, sfes i kuker wanka risuru. Sordade ḇeso sya sisya siwaren ro kedwa ya ḇarpondi. ⁷ Kniko malaikat Allah ḇyesi oso dores fanam Petrus ma sasnai ḇyedi iyar sim ani. Malaikat ani ḇyan Petrus, ma ikofen: "Wakḇok fasaw!" Rarirya wanka ansi soḇes ro Petrus ḇrasi. ⁸ Raimnai malaikat ani ikofen faroi: "Fes sifer bedi ma swower roḇesower besi!" Petrus ifrur rarirya. Raimnai malaikat ani ikofen faroi: "Swansun syatu ḇena ma waso aya!" ⁹ Raimnai iso malaikat ani ḇo susasyar ḇape ifawiḇa, rosai malaikat ani ifrur faroi nkaku rarirya, snar kyara doḇoda myam mamam oso. ¹⁰ Fafisu sumbranuk manwadwaren ḇepon si ma moḇ wadwaren ḇeḇesuru, sura ro ḇarpon kedwai ḇeba mankarmomen ḇewaiḇe mnu. Kedwai ani ḇyas ro mankundi faro su. Surandi kwar, sumbran isof ro nyan ḇaḇar ya, ma kniko malaikat ani iburi. ¹¹ Rofyor Petrus ḇyaḇir mankundi kwar, ma ikofen: "Insape yafawi kaku Manseren iwan kwar malaikat ḇyedi fa fyaspar aya ro Herodes ḇrasi ma snonkaku Yahudisya karkara sena." ¹² Ma kyara knik fasaw kwar, ryaḇe Maria, Yohanes snari rum ḇyedi, Yohanes ine sapi kako ḇe Markus. Ro dia kawasa sibor siryur ma senadi. ¹³ Ma rofyor nyuk kedwai ḇebaya, imfamyan ḇenirḇe Rode ryama imnafpan mansei ḇenuk ya. ¹⁴ Ryower bir beri Petrus mkaren ḇyedi, ḇape snar raryaḇ ḇyedi inja syeḇen kedwai ḇeba aniḇa ḇoi syun randum fasau fa ikofen bayir, Petrus isya ro ḇarpon kedwai ḇebaya. ¹⁵ Sikofen faro bin ani: "Swawo!" Ḇape fyaḇri ḇo doḇo, kaku ḇeri rarirya. Ma sikofen: "Rur ḇyediri." ¹⁶ Ḇape Petrus nyuk yayayu ḇesya kwar isof fafisu seḇen kedwai ya ma smami, skarsosen. ¹⁷ Inja Petrus pyankai epen si insa sefasis, raimnai fyawar rariso Manseren fyarkini fa isasyar ro bui. Ikofen: "Mko kofen ḇayir roi ḇeḇesya nane faro Yakobus ma naek srar koḇansi." Raimnai isasyar ma ryaḇe moḇ ḇeso. ¹⁸ Meserdi sordade ansi searubiru. Sifuken yaesi rosai ḇeḇesya kwar kuker Petrus. ¹⁹ Herodes iwan fa ssewar Petrus, ḇape sismai iba. Inja Herodes iwan fa skukeḇ sordade ansi ma smun si fa simar. Raimnai fyaryan ro Yudea ḇe Kaisarea ma kyain ro dia. ²⁰ Herodes imsor fafayaḇa faro snonkaku Tirus ma Sidon. Inja sesne oser ḇo sra faro Herodes. Sisma nyan oso fa seḇaḇyuk Blastus, wairek faker ḇyesi oso, fa ifnoḇek si, insa sor aski, snar mnu sedi sisma roḇean ro supya mnuk wairek ḇyedi. ²¹ Ma ro ras sap kwar ya, Herodes syansun sansun ḇaḇesasoser ḇyena, ma kyain ro karapesa nasan ya ḇo dawos faro si. ²² Ma kawasa ḇyesi ssibras: "Ine Allah mkaren ḇyedi ma mkaren snonkaku ḇa!" ²³ Ma ro fafisu aniḇeri malaikat oso ḇyaserbosi snar ḇyesyowi Allah ḇa. Inja karom sya sani isof imar. ²⁴ Manseren wosya iryer ma snonkaku sibor simnafi. ²⁵ Barnabas ma Saulus sukaḇer ro Yerusalem rofyor sufrur posa fararur afuffarmyan suḇedi. Suyun Yohanes, sap kakobe Markus.

¹ Ro fafisu ani ro jemaat Antiokhia nabi ma guru ono sisya, isoine: Barnabas ma Simeon sapi kako ḇe Niger, ma Lukius snon Kirene, ma Menahem romawa fan sfan fnoḇek Wairek Herodes, ma Saulus. ² Ro ras oso rofyor seari faro Manseren ma sfarfor, Rur Ḇesren ya ikofen: "Mkoḇuk ḇardi Barnabas ma Saulus faro aya, insa sufrur fararur yaḇuk kwar faro su." ³ Inja sfarfor ma senadi, ma sisawar dofen su kwar, siwan su fa sura. ⁴ Snar Rur Ḇesren ya iwan su, Barnabas ma Saulus surandak ro Seleukia, ma ro dia suyayun ḇe Siprus. ⁵ Sko fyafer ro Salamis suḇaryas Allah wos ḇyedi ro rum ari snonkaku Yahudi sya sena. Ma Yohanes iso su fa ifnoḇek su. ⁶ Skombran yar myos ani kasiper isof skora ro Pafos. Ro dia sko srow snon Yahudi oso snori Baryesus. I snon ḇena mon ma nabi sararer. ⁷ Gubernur ro myos ani min ḇyedirya, Gubernur ani snori Sergius Paulus, snonkaku ḇefawi nanem. Gubernur ani dor Barnabas ma Saulus, snar imarisen dakmnaf Allah wos ḇyena. ⁸ Ḇape Elimas -- rarirya snonsnon ro wos Yunani, -- snon ḇena mon ani, idwarek su ma syewar fa pyambar Gubernur ani kakyar ḇyedi. ⁹ Ḇape Saulus, sapi kako ḇe Paulus, ḇefo kuker Rur Ḇesren, iknoweri, ma ikofen: ¹⁰ "Ne, romawa Ibiris, ḇefo kuker ankar sararer ma ḇarḇor, au mbroḇ ro napnapes, nari wamnai ḇake pambar Manseren Nyan ḇenapes ḇyena? ¹¹ Knikine, mam, Manseren ḇrasi myun au, ma wapraf, ras ono wapok mam oriḇa." Ma ro fafisuya beri snonkaku ani ḇyaḇir afyo ma pampan ya ikawefi, ma pyanfafyai syewar snonkaku ḇekfin i. ¹² Gubernur ani myam roi ḇeḇesya ani, ikyar; ma ikandor kaku farkarkor Manseren ḇyena. ¹³ Raimnai Paulus ma min ḇyesi sibur Pafos ma sayun ḇe Perga ro Pamfilia; ḇape Yohanes ibur si ma kyaḇer ḇe Yerusalem. ¹⁴ Ro Perga skombran pdef mararanya ma skorama ro Antiokhia ro Pisidia. Ro ras Mananai Yahudi skoraḇe rum ari, ma skokain ro dia. ¹⁵ Siwasya sasoser Refo Yahudi ma syap nabi-nabi posa kwar, mananir-mananir ro rum ari ansi siwan fa sifuken su: "Naek mko, rofyor wos anun ḇeḇawes ma ḇeḇuk sneprei faro er sine naisya, iḇye mkawos na farosi!" ¹⁶ Inja Paulus iyori. Ma ryasepen si, ḇo doḇo: "Ne, snonkaku Israel ma mko ḇeyararyof faro Allah, mko mnafkada! ¹⁷ Allah er Israel ani kyinfir kwar up koḇesi ma ifrur er ani fa idonek, fafisu skain ro Masir imnis mandaman. Kuker sambraḇ ma papoik Allah dunsi kwar fa sisasyar bur mnu ani. ¹⁸ Wampasi wambarek samfur rifiak i kḇaḇ si ro rari sena ro sup ḇeursḇa. ¹⁹ Ma rofyor Allah myun er rifik ro sup Kanaan kwar, i rarwas sup ani faro si fa snaḇe pusaka, ²⁰ indokada wampasi wambarek utin rifiak samfur ririm. Posa kwar ḇyuk faro si hakim-hakim isof ro awar Nabi Semuel. ²¹ Ḇarpur ya sor wairek oso inja Allah ḇyuk farosi Saul Kis mandaḇendi ro keret Benyamin, ḇe wampasi wambarek samfur rifiak. ²² Saul ḇyeḇesawen kwar, Allah ikanow Daud ḇe wairek faro si. Faro Daud Allah fyasnai kwar: Yasma kwar Daud Isai mandaḇendi, snon oso ḇefrur sneprei ma ḇefrur marisen ḇeḇor ayena. ²³ Ma ro up ḇyesi, imnis raris moḇ ḇyeasas kwar. Allah ḇyawes kwar Ḇeḇuk koreri faro snonkaku Israel, isoine Yesus. ²⁴ Fafisu siwaf rarama ḇyedi Yohanes ḇyaryas kwar faro er Israel ḇesiper insa simbror ma sor masi sren. ²⁵ Ma ro fafisu Yohanes fanam ifrur posa fararur ḇyedi ikofen: Ro karkara mkoḇena mkoḇo Yesus iso aya, ḇape ikada nari pyur aya. Faro yaper roi ḇesower ḇyesi monda yasyus ḇa. ²⁶ Ne, naek srar yesi, iḇye Abraham kpu ḇyesi, ma ḇeyararyof Allah, ḇaryas koreri ani sḇaryas i kwar faro ko. ²⁷ Snar kawasa ḇekain ro Yerusalem ma manfarkin-manfarkin sesi skarem Yesus ḇa. Inja ssḇuk samamyai faro i, fa sifrur mnis nabi-nabi sya wos sena si wasya ro ras-ras Mananai Yahudi. ²⁸ Ma sisma roi osoḇa fa snaḇe knam samamyai marmari, ḇesyaḇo sor kwar faro Pilatus insa smuni. ²⁹ Ma rofyor sifrur mnis kwar roi ḇeḇor sfasḇair ro i, raimnai sisabu i ro aprop, ma sikriri. ³⁰ Ḇape Allah ḇyawesi ro fandu ḇemar sya. ³¹ Ma fyor ono fyasnai mankundi faro ḇesoi, ro Galilea ḇe Yerusalem sya. Siso baboine ḇeḇesaksi i faro er ine. ³² Ma knikine inko ḇaryas ankankinem ḇeḇye ine faro mko, isoine asas ssḇuk kwar faro up koḇesi, ³³ Allah ḇye imnis kwar faro ko, kpu sesi, kuker ḇaḇawes Yesus, imnis fas-fas ro mazmur ḇeḇesuru: Rumkun yedi au! Yaḇen au kwar ro ras ine. ³⁴ Allah ḇyawes i kwar fandu ḇemar sya ma ipok ḇyuki faro munaiḇui wer ḇa. Roi ḇeḇesya ine Manseren fyasnai ro wos ine: Aya nari yafrur mnis faro mko asas-asas ḇesren nari mko kyar na, yaḇuk na kwar faro Daud. ³⁵ Eḇedari ikofen ro mazmur ḇeso: Nari wapok mam mundaḇa snonkaku Ḇesren bedi ro mun aiḇui. ³⁶ Snar Daud ifrur Allah marisen ḇyena ro awar ḇyedi, raimnai imar ma sikriri fanam kpu ḇyesi, ma ikada ssḇuki faro munaiḇui. ³⁷ Ḇape Yesus Allah ḇyawes ya, i kada rarirya ḇa. ³⁸ Inja mkofawi, ne naek srar, snar Iso ḇeḇedar sḇaryas faro mko nyan ḇaḇeampun ro sasar. ³⁹ Ma i ḇeḇedar snonkaku ḇekyar sya sisma faspar ro sasar ḇeḇor sena, mboi mkopok mkosma naba, kuker Moses sasoser ḇyena. ⁴⁰ Inja, mkepen mko, insa mkosma awer rosai sikofen kwar ro syap nabi-nabi: ⁴¹ Mko swarepen, ne ḇenankoryae mko, mko karsosen ma mkomar, snar yafrur fararur oso ro awar mkoḇedi, Fararur oso nari mkokyari ḇa, rofyor sḇaryasi faro mko." ⁴² Ro fafisu Paulus ma Barnabas susasyar, sor ro su insa suwawos ro mnuk ani wer ro ras Mananai Yahudi iyama. ⁴³ Seari posa kwar, snonkaku Yahudi sibor ma ḇeyakso agama Yahudi ḇeyararyof faro Allah, siso Paulus ma Barnabas; manwawan ansu suḇuk farkarkor ma suyanun si insa skain nako ro Allah saswar ma fakamaman ḇyena. ⁴⁴ Ro ras Mananai Yahudi ḇepur ani indokada mnu ani ḇesiper srama fa simnaf Allah wos ḇyena. ⁴⁵ Ḇape, rofyor snonkaku Yahudi smam snonkaku ḇeḇor ansi, sifo kuker masasor ma sawos anonef, ma sisampum rosai Paulus ikofen na. ⁴⁶ Ḇape Paulus ma Barnabas sumku ḇo sukofen: "Kaku ḇaḇoi mkoiso nari ḇesma ḇepon ḇaryas ro Allah wos ḇyedi, ḇape mko pampumi ma mkokara mkoḇe mkosyusḇa fa mkosma kankenem ḇemanaiḇa ya. Eḇedari inko kaḇer faro er-er ḇeso. ⁴⁷ Snar ineiso sasoser faro inko: Ya fasnai au kwar insa beisnai faro er-er ḇeyakfawi Allah ḇa sya, insa wun aski isof ro supswan pember." ⁴⁸ Snonkaku ḇeyakfawi Allahḇa sya kam simnaf rarirya siryaḇ ḇo sisandik wos Allah; ma snonkaku sya kam Allah fyasnai fa ḇesma kankenem ḇemnaiḇa sya, sikyar. ⁴⁹ Raimnai Manseren wos ya ḇyeḇeḇaryas ro sup ya fyor ani ḇesiper. ⁵⁰ Snonkaku Yahudi sya sfarkor ninyan bin-bin ḇeḇesnonsnon ma ḇeyararyof Allah, ma ḇebarara-ḇebarara ro mnu ani, fa sifrur kandera faro Paulus ma Barnabas ma siyaw subur supya fyor ani. ⁵¹ Inja Paulus ma Barnabas sukokef fafen ḇero suwesna imnis swarapepen faro snonkaku ansi, raimnai suraḇe Ikonium. ⁵² Ma kawasa Kristen ḇero Antiokhia si ryaḇ ma sifo kuker Rur Ḇesren.

¹ Ro Ikonium kako manwawan ansuya susun ro Yahudi sya rum ari sedi, ma suḇuk farkarkor faro snonkaku kuker sne ḇesiper, isof snonkaku Yahudi ma Yunani sibor sikyar. ² Ḇape kawasa Yahudi ḇepampum ḇaryas suḇena sya, sawos snesam kawasa ḇeyakfawi Allah ḇa sya isof simsor faro naek ansuya. ³ Paulus ma Barnabas sukain ras ono ro dia. Suḇuk farkarkor kuker makaku, snar sukyar faro Manseren. Ma Manseren ḇyuk sambraḇ ro ḇaryas saswar ma fakamaman Ḇyena ma ḇyuk faro su papoik fa sufrur aḇyair-aḇyair ma aḇyair kanandor. ⁴ Ḇape kawasa ḇeḇor ro mnu ani sirwas ḇesuru: ono siwaira kawasa Yahudi sya, ono wer siwaira manwawan ansu. ⁵ Inja kawasa ḇeyakfawi Allah ḇa sya kuker kawasa Yahudi sifnoḇek manfarkin-manfarkin sesi kam sirandak sifrur kandera manwawan ansu ma soḇo ssosu kuker karui. ⁶ Rofyor manwawan ansu sufawi auw sedi kwar, inja sufrar ḇe mnu-mnu ro Likaonia, isoine Listera ma Derbe ro sup ya fyor ani. ⁷ Ro dia suḇaryas Ankankinem Ḇeḇye. ⁸ Ro Listra snon oso isya kyain faswef, snar wesi ipokḇa ma pyapipen ro fafisu snari daḇeni ipok imbranḇa. ⁹ Kyain imnaf ro fafisu Paulus dawawos. Ma Paulus iknoweri ma myam, kakyar ḇyedi, inja ifruri fa iprei. ¹⁰ Rarirya Paulus dawos kuker mkaren ḇeba: "Wores afuf ro wemssu!" Ma snon ani iyori fa dores, ma imbran mura muma. ¹¹ Rofyor kawasa ḇeḇor ansi smam rosai Paulus ifrur ani, sikam ssibras ḇo sawos ro wos Likaonia: "Karwar-karwar ansi sado kwar ro fandu ko kuker sower snonkaku." ¹² Barnabas sori ḇe Zeus ma Paulus sori ḇe Hermes, snar i ḇeyawawos ya. ¹³ Inja karwar Zeus, ḇena rum karwar ro mnuya ḇandiri, imam ḇyedi ryama ḇo dun sapi snoman ma pampen-pampen bos ono ḇe kedwai ḇeba ro mnu kuker kawasa ḇeḇor fa ssḇuk farsarser samsom faro manwawan ansu. ¹⁴ Barnabas ma Paulus sumnaf rarirya susap sansun suḇena, ma suyoper ro fandu kawasa ḇeḇor ansi ma suyiw ḇo sukofen: ¹⁵ "Ne, kawasa mkoine kam, snaro mkofrur rarirya? Inko ine snonkaku monda raris mko. Inko isya ro dine fa inko ḇaryas Ankankinem Ḇeḇye faro mko, insa mkosawen fararur fromo ine, ma mkokaḇer faro Allah ḇekenem, ḇefrur kwar nanki ma supswan, soren ma roi ḇeḇor ḇero ina kam. ¹⁶ Ro awar ḇesyof Allah myam monda er-er kam ḇo siso nyan mankunsi sena, ¹⁷ rariryano i mewerḇa fa fyasnai mankundi kuker frur pyum nabor, isoine ḇyuk mekem ro nanki ma wampasi wambarek ḇeḇuksur pyum rokaker ḇe mko. Ḇyuk sneprei faro mko kuker nanan ma raryaḇ." ¹⁸ Manwawan ansu suyawos rarirya, fa sudwarek kawasa ḇeḇor ansi ḇape saser suba mboi indokada ssḇuk samsom farsarser faro su. ¹⁹ Ḇape kawasa Yahudi ḇerama ker Antiokhia ma Ikonium sembuk kawasa ḇeḇor ansi fa siso si. Raimnai sso Paulus kuker karui ma sismeri ḇe mnuya ḇandiri, snar skara ḇo soḇo imar kwar. ²⁰ Ḇape rofyor kawasa Kristen ansi sores yari-yari, inja ikḇawes ma syun ḇe mnuya. Meserdi i kuker Barnabas sura kam ḇe Derbe. ²¹ Paulus ma Barnabas suḇaryas Ankankinem Ḇeḇye ro mnu ani ma susma kawasa Kristen sibor. Raimnai sukaḇer ḇe Listra, Ikonium ma Antiokhia. ²² Ro mnu-mnu anna suḇuk samambraḇ faro kawasa Kristen sisnesna ma suyanun si insa sidworen ro kakyar sena, ma sukofen, kosun ro Ḇaḇesasoser Allah nari kosmai kandera nabor. ²³ Ro jemaat oser-oser manwawan ansuya sukanow penatua-penatua faro jemaat ani ma sunadi ma sefarfor posa suḇuk penatua-penatua ansi faro Manseren, ḇeḇeknam ro kakyar sena. ²⁴ Skombran kasiper sup Pisidia ma skosaye ro Pamfilia. ²⁵ Ro dia suḇaryas wos ya ro Perga, raimnai suraḇe Atalia, ro swan andir. ²⁶ Ro dia suyayun wer ḇe Antiokhia; ro sup Syam; ro moḇ anine iso randak ya ssḇuk su faro saswar ma fakamaman Allah insa surandak fararur, sufrur kwar ya. ²⁷ Sura kwar ro dia suyor fa jemaat ani siryur, posa sufarfyar faro si roi ḇeḇor kam Allah ifrur kwar kuker ḇramin suḇena, ma Allah ḇyas kedwai ya faro er-er ḇeso sya faro kakyar. ²⁸ Ro dia sukain fyoro kaku kuker kawasa Kristen ansi.

¹ Snonkaku ono sraker Yudea ḇe Antiokhia ma ssḇuk farkarkor faro naek srar ḇero dia: "Rofyor mko ḇeḇesofuk ḇaim imnis, rari Moses ḇyefa ḇeḇepusaka, nari mkopok ḇa fa mkosma koreri." ² Ḇape Paulus ma Barnabas susampum karkara sena. Ḇarpurya sfasnai, Paulus ma Barnabas kuker snonkaku ono ḇeso wer ro jemaat ani insa sraḇe Yerusalem faro manwawan-manwawan ma penatua-penatua sya fa sawawos ro mnuk ani. ³ Jemaat ani siyaker si isof ro mnu ya ḇandiri, raimnai simbrainuk Fenisia ma Samaria, ma ro moḇ anna sfarfyar ro marandor kawasa ḇeyakfawi Allah ḇa sya. Farfyar anna nafrur raryaḇ naek ansi sisnesna. ⁴ Skora kwar ro Yerusalem jemaat ma manwawan sya kuker penatua-penatua, sisrow si ma sfarfyar faro si ro roi ḇeḇor kam Allah ifrur kuker si. ⁵ Ḇape snonkaku ono ro rarwas Farisi, ḇekyar kwar sya, srama ma sikofen: "Snonkaku ro er ḇeso ḇekyar kwar sya nari seḇesofuk ma seuser Moses sasoser ḇyena." ⁶ Inja manwawan ansi ma penatua-penatua skankain fa sawawos ro mnuk ine. ⁷ Skara fyoro kwar ro mnuk ani, ḇarpur ya Petrus iyori ma ikofen faro si: "Ne, naek ma srar mko, mkofawi, ro randakya Allah kyinfir aya ro fandu mko, insa kuker sḇadon yedi er-er ḇeso sakmnaf ḇaryas ankankinem ḇeḇye ma sikyar. ⁸ Ma Allah, ḇefawi snonkaku sisnesna, fyasnai marisen ḇyedi kwar insa daknasi snar byuk Rur Ḇesren ya kako faro si imnis ḇyuk faro ko, ⁹ ma ipok ifrur rarwas osoḇa ro fandu ko kuker si, rofyor fyasren sisnesna kwar snar kakyar sena. ¹⁰ Rariryaido, snaro mko marisen mko frowsbir Allah kuker mkorir ro erdai kawasa Kristen ansi kamnam oso, kpu koḇesi sipok sḇarḇa, isof baboine kokako? ¹¹ Rarirya, ko kyar, saswar-fakamaman Manseren Yesus Kristus nari kosma koreri imnis si kako." ¹² Inja er ansi kam sefasis, ḇo simnaf Paulus ma Barnabas sufarfyar aḇyair ma fasasnai kanandor nakam Allah ifrur kwar kuker su fandu er-er ḇeso sya. ¹³ Paulus ma Barnabas sumnai ro wawos suḇena kwar, Yakobus ikofen: "Ne, naek ma srar, mkomnaf aya: ¹⁴ "Simon fyarfyar kwar, ro randak ya Allah fyasnai fakamaman ḇyedi faro er-er ḇese, isoine kuker kankinfir er oso ro fandu si faro snonsnon ḇyedi. ¹⁵ Mnuk ani imnis kuker fasfas ro nabi-nabi sya wos sena: ¹⁶ ’Ḇarpur nari yakaḇer ma yaḇawes wer aḇdares Daud ḇekarḇaken kwar, ma bemkokna nari yaḇawesna wer ma nari yaḇefa nadworen, ¹⁷ Insa kawasa ḇeso sya kam ssewar Manseren ma er-er kam ḇefawi Allah ḇa sya, yorsi ḇekawasa yesi rarirya Manseren ḇefrur nakam wos ḇyedi,’ ¹⁸ ma neḇefawi ḇepon kwar ro awar madero." ¹⁹ Inja yakara, imnis ḇa fa kofrur kandera faro er-er ḇeso ḇekaḇer faro Allah. ²⁰ Mboi kofas syap farosi, insa sḇinkwan bur roḇean sḇukfarser kwar faro amfyanir sya fa ḇearwarem, ma farbuk, ma aiwan ḇemaruk ma rik. ²¹ Snar ro awar ḇepon iwara Moses sasoser ḇyena sḇaryasna ro mnu oser-oser, ma isof baboine sasoser anna siwasyana ro ras-ras Mananai Yahudi ro rum-rum nadi." ²² Inja manwawan ansi ma penatua-penatua kuker jemaat ḇesiper ansi sawos namuk fa skinfir ro fandusi snon ono fa nari siwan siḇe Antiokhia fnoḇek Paulus ma Barnabas, isoine Yudas sap i kakoḇe Barsabas ma Silas. Snonkaku ansuine semaf su ro fandu naek ma srar ansi. ²³ Ssḇuk syap oso farosi ḇerok radine: "Aski ro manwawan-manwawan ma penatua-penatua, ro naek srar mkoḇesi faro naek srar ro Antiokhia, Siria ma Kilikia ḇeḇeknam ro er-er ḇeso. ²⁴ Inko mnaf kwar, naek ono ro fandu inko, ḇesmai ankinem ro inkoḇa, mboi ḇerafa ḇefrur ḇirḇar mkosnemna kuker farkarkor sena. ²⁵ Eḇedari kuker sne ḇesiper inkawos namuk kwar fa inko kinfir ma inkowan snonkaku ono faro mko fnoḇek Barnabas ma Paulus inko swar ansu, ²⁶ isoine snonkaku risuru ḇeḇuk nyawa kwar snar snonsnon Manseren koḇedi Yesus Kristus. ²⁷ Inja inkowan Yudas ma Silas, insa suwos asuser anun ḇefas ro syap ine faro mko kako. ²⁸ Snar Rur Ḇesren ya imarisen ma inko kako inko marisen, insa korir awer faro mko kamnam ḇeḇor ro roi ḇeḇefandun nane: ²⁹ inja iḇye mko ḇinkwan bur roḇean ḇefarsarser faro karwar, ma rik, aiwan ḇemaruk ma farbuk. Rofyor mko sasor mko ro roi ḇeḇesya nane, mkoso pyum kwar. Irya kwar, aski ḇemko." ³⁰ Siser siḇrasna kwar, Yudas ma Silas sumbran ḇe Antiokhia. Ro diwa sor jemaat ḇesiper fa siryur, raimnai skoḇuk syap ani farosi. ³¹ Sewasya syap ani kwar, jemaat simarisen kaku snar rakrok ya ḇyuk sneprei. ³² Yudas ma Silas, nabi suirya kako, inja fyoro kaku suḇuk swarepen faro naek srar ansya ma susonem sisnesna. ³³ Ma sukain fyoro knik ro dia, raimnai naek srar ansi srir su kuker aski fa sukaḇer faro ḇewan susya. [ ³⁴ Ḇape Silas kada imarisen kyain ro dia.] ³⁵ Paulus ma Barnabas sukain fyoro knik ro Antiokhia. Sufnoḇek kawasa ḇeso sibor, suḇuk farkarkor ma suḇaryas Manseren wosya. ³⁶ Ḇape ḇarpur ya ro fafisu ono Paulus ikofen faro Barnabas: "Iḇye ko kaḇer faro naek srar koḇesi ro mnu-mnu, moḇ ko ḇaryas Manseren wos ḇyena, insa komam rariso kankenem sena." ³⁷ Barnabas imarisen dun kako Yohanes sap iḇe Markus; ³⁸ ḇape Paulus ikofen bos, ipyumba fa kun snonkaku ḇebur ko kwar ro Pamfilia ma ḇemewer ḇefararur fnoḇek ko. ³⁹ Mnuk ani ḇyeknam famfaḇri ḇefnakḇa isof suḇe sisye ma Barnabas dun Markus kako fa isoi ḇo suyayun ḇe Siprus. ⁴⁰ Ḇape Paulus kyifir Silas, ma naek srar ansi srir sko faro saswar ma fakamaman Manseren. ⁴¹ Ma skombran yar Siria ma Kilikia ḇo suḇuk sambraḇ faro jemaat-jemaat ro dia.

¹ Paulus ryama kako be Derbe ma ḇe Listra. Ro dia snon Kristen oso isya snori Timotius; snari bin Yahudi ḇekyar kwar, ḇoi kmari kada snon Yunani. ² Timotius ine naek srar ḇero Listra ma Ikonium siwafi kam, ³ ma Paulus imarisen insa ifnoḇek i ro mararan ḇyedi. Paulus iwan fa sisofuk i snar kawasa Yahudi ro sup ani, snar sikam oser-oser ifawi kmari snon Yunani rirya. ⁴ Ro mararan yar mnu ḇe mnu Paulus ma Silas sukofen ḇadir mnuk rosai manwawan sya ma penatua-penatua ro Yerusalem sawos namuk kwar kuker ananun, insa jemaat-jemaat siso na. ⁵ Rarirya jemaat-jemaat sisma samambraḇ ro kakyar, ma fyoromuma kawasa ḇekyar sya sibor syadi wer. ⁶ Skombranuk sup Frigia ma sup Galatia, snar Rur Ḇesren ya idwarek sko ḇaryas Ankankinem Ḇeḇye ro Asia. ⁷ Ma skorama ro Misia ma sko karabir fa skosun ro supya mnuk Bitinia, ḇape Rur Yesus ḇyuk ḇa. ⁸ Skunuk Misia kwar, skoranda ro Troas. ⁹ Ro roḇya Paulus myam mamam oso; snon Makedonia oso dores ro dia ma dori, ḇo doḇo: "Kwaḇor muma insa wafnoḇek inko!" ¹⁰ Rofyor Paulus myam mamam ani kwar, inkosewar fasaw fafisu fa inko kaḇor ḇe Makedonia, snar ro mamam ani inkun karkara, irya Allah dor inko insa inko ḇaryas Ankankinem Ḇeḇye faro snonkaku sya ro diwa. ¹¹ Inja inkopaw ro Troas ma inkayun pdef ḇe Samotrake, ma meserdi inkorande ro Neapolis, ¹² ro dia inkora ḇe Filipi, mnu ḇepon ro supya mnuk Makedonia ine, mnu dakam faro kawasa Roma. Ro mnu ani inko kain ras ono. ¹³ Ro ras Mananai Yahudi inko sasyar ro kadwai ḇeba ro mnuya. Inko mbran sye war andir ma inko srow moḇ Yahudi sya senadi roya, ro karkara inkoḇena isya ro dia; inko kain kwar, inkawawos faro bin-bin ḇeryur ro dia. ¹⁴ Oso ro fandu bin ansi benirḇe Lidia dakmnaf kako. I bin oso ḇeḇoḇ kruḇen ḇefuk ro mnu Tiatira, ḇesyom faro Allah. Manseren ḇyas sneri, isof kyarkara roi Paulus dawos na. ¹⁵ Isma masi sren kuker kawasa ro rum ḇyedi ḇesiper kwar, dor inko, ḇo doḇo: "Rofyor mko kara, ayaḇe bin ḇekyar faro Manseren, mkorama mkoḇe ryar ro rum ayedi." Ḇyedifer inko isof inkoso i. ¹⁶ Ro fafisu oso rofyor inkora wer ḇe moḇ nadi ani, inko srow infyan oso ḇena rur ḇemamkarkir; kuker mamam karkir ḇyena tuan ḇyesi sisma nana nabor. ¹⁷ Iyom user Paulus ma inko ma dorḇo doḇo: "Snonkaku sine ido Allah ro Moḇ ḇekaki manfamyan ḇyesirya. Sḇaryas faro mko nyan aski." ¹⁸ Infyan ani ifrur rarirya ḇe ras ono. Ḇape rofyor Paulus fyafayaf kayaryaren ani, inja isiḇer ma ikofen faro rur ani: "Kuker snonsnon Yesus Kristus yawan au fa wasasyarbur bin ine." Ro fafisu ani beri rur ani isasyarbur i. ¹⁹ Rofyor tuan-tuan ḇena infyan ani smam, kakyar sena insa sisma nana nefromo, inja sfor Paulus ma Silas, ma sismer su ḇebarpon ḇeḇenasan ro pasar. ²⁰ Rofyor ssun su kwar ḇeḇarpon ḇebarara-ḇebarara ro mnu ani, ma sikofen: "Snonkaku sine sifrur aru biru mnu koḇanine, snar sikada snon Yahudi, ²¹ ma ssḇuk farkarkor ro rari, kawasa Roma koya kopok koso naba." ²² Rarirya kawasa ḇeḇor ansi sikḇawes ma sisampum su. Inja ḇebarara-ḇebarara ḇero mnu ani siwan fa spansawek sansun ḇero baken suḇena ma siprer su. ²³ Siprer suḇe rarwan ono kwar, raimnai sḇesu fa susun bui. Mananir ro bui isma sasoser ḇepakrek insa iwaren pyum su. ²⁴ Imnis sasoser ani mananir ro bui ḇyuk fa susun ro sim ḇero fadu ma sewanka suwesna kuker apyawur ḇedworen. ²⁵ Ḇape indokada romfawru Paulus ma Silas suḇenadi ma sudisen dow sanandik faro Allah ma snonkaku ḇeyaksmai ḇeso ansi simnaf user su. ²⁶ Fyoroḇa rim ḇeba oso myun, isof bui dopir-dopir ḇyena namarmer; ma rofyor ya kako kedwai ḇeḇor nakam nbase ma wanka sya saibur su. ²⁷ Rofyor mananir bui ḇyir ro anenef ḇyedi ma myam kedwai ḇeḇor anna nbas kam pyas sumber ḇyedi fa iḇe ḇyukmun mankundi, snar kyara, snonkaku ḇesmai ansi sifrar sibur kwar. ²⁸ Ḇape Paulus dor naba kaku, ḇo doḇo: "Mun mankundaw awer, snar inko isya kam ro dine!" ²⁹ Mananir bui iwan fa sun paramrom, raimnai ifrar fa syun kuker radadai ḇyansuba ro ḇarpon Paulus ma Silas. ³⁰ Dunsu ḇeḇondi, ma ikofen: "Tuan-tuan rosai nari yafrur, insa yasma aski?" ³¹ Sukarem: "Wakyar faro Manseren Yesus Kristus ma nari wasma koreri, au ma kawasa ro rum bedi ḇesiper." ³² Posa suḇaryas Manseren wosya faroi ma kawasa kam ro rum ḇyedi. ³³ Ro oras ani beri mananir bui dunsu fa ḇyan sren amborew suḇena. Ro fafisuya i kuker kawasa ḇyesi sor fa sismai masi sren. ³⁴ Posa dunsu ḇe rum ḇyedi ma ikankun fa suyan. Ma iryaḇ fafayaḇa snar i ma kawasa ro rum ḇyedi ḇesiper sikyar kwar faro Allah. ³⁵ Meser kwar ḇebarara ro mnuya siwan ḇefararur ro mnuya fa sra faro mananir bui kuker anun: "Wasasyar snonkaku ansuya!" ³⁶ Mananir bui dakkofen anun ani faro Paulus, ḇo doḇo: "Ḇebarara ro mnu siwan kwar fa mko sasyar; inja mko sasyar ro knikine ma mkora kuker ḇaḇye!" ³⁷ Ḇape Paulus ikofen faro snonkaku ansi: "Skara nanapes ḇayim siprer inko kwar, kawasa Roma, ro ḇarpon kawasa ḇeḇor, raimnai inkosun bui. Insape siḇe sisasyar famyun inko? Rariryaḇa! Ḇoi mankunsi srama siyaker nu fa nusasyar." ³⁸ Ḇefararur ro mnu ansi sikofen ḇadir wos anna faro ḇebarara-ḇebarara ro mnu ani. Rofyor simnaf Paulus ma Silas snon Roma suirya, inja simkak kaku. ³⁹ Srama ma sor maaf raimnai siyaker manwawan ansuya fa susasyar ma sor ro su insa subur mnu ani. ⁴⁰ Raimnai subur bui ma sura ḇe Lidia rum ḇyedi; ma su srow naek ansi kwar ro dia ma suḇuk sneprei faro si, posa manwawan ansuya subur.

¹ Paulus ma Silas suso nyan ḇeyunuk Amfipolis ma Apolonia isof sura ro Tesalonika. Ro dia rum ari Yahudi oso isya. ² Raris fararur ḇyedi Paulus syun ro rum ari ani. Ro ras Mananai Yahudi rikior iwawos kuker si ro mnuk oso ro Refo. ³ Ikofen asuser faro si ma kyur fasnai, nari Wairek isma marindi ma diḇri fandu ḇemar sya, raimnai ikofen: "Ine Wairek, isoine Yesus, yaḇaryas faro mko." ⁴ Ono ro si sikyar ma seoser kuker Paulus ma Silas ma kawasa Yunani sibor kako ḇeyararyof faro Allah ma bin-bin ḇefawi ono sibor kaku. ⁵ Ḇape kawasa Yahudi sya simsor ma sisma famfnoḇek ro snon ḇarḇor ono ro fandu ḇeḇekirḇa ro pasar, fa sifrur mbrus ma searubiru mnu ani. Soper Yason rum ḇyedi kuker swaruser fa ssun Paulus ma Silas ḇe ḇarpon fananjur kawasa ḇeḇor. ⁶ Ḇape rofyor sisma su ḇa, sismer Yason kuker naek ono ḇe ḇarpon ḇebarara ro mnuya, ḇo ssibras, ḇo soḇo: "Snonkaku ḇefrur aru biru ro supswan ḇesiper srama kwar kako rodine, ⁷ ma Yason dun si fa seryar ro rum ḇyedi. Sikam sisampum Kaisar sasoser ḇyena ma sikofen, wairek ḇeso oso isya, isoine Yesus." ⁸ Rofyor kawasa ḇeḇor ansi ma ḇebarara ro mnu simnaf wos anna kam, sikam sefesfyas. ⁹ Ḇape sisma ḇaḇyak kwar ro Yason ma naek srar ono ḇeso inja srir si. ¹⁰ Ḇape ro roḇya beri naek srar ḇero dia siwan fasaw Paulus ma Silas fa suraḇe Berea. Sura kwar ro dia suraḇe Yahudi sya rum ari sedi. ¹¹ Kawasa Yahudi ro mnu ani sisnesna nfafir syadi kawasa Yahudi ro Tesalonika, snar sikada simnaf wosya kuker sne ḇemarisen syadi ma ras-ras kam sewasya Refoya fa ssḇuk karkara farkarkor simnaf na nkaku rariryake roḇa. ¹² Sibor kaku ro fandu si sikyar; ma bin-bin ḇefawi ono sibor kaku ma snon Yunani ono kako. ¹³ Ḇape rofyor kawasa Yahudi ro Tesalonika sifawi, ro Berea kako Paulus ḇyaryas Allah wosya kwar, srama kako ro dia fa sfarkor ninyan ma searu biru snonkaku ḇeḇor ansi sisnesna. ¹⁴ Ḇape naek srar ansi siwan fasaw kaku Paulus fa ryaḇe swan andir, ḇoi Silas ma Timotius sukada sukain kaker ro Berea. ¹⁵ Kawasa ḇeyaker Paulus sya sisoi isof ro Atena, raimnai skaḇer kuker ankinem faro Silas ma Timotius, insa susamberen snari. ¹⁶ Fafisu Paulus iwaf su ro Atena, sneri fyafayaf kaku snar myam mnu ani ifo kuker amfyanir-amfyanir karwar. ¹⁷ Eḇedari i kuker kawasa Yahudi ma kawasa ḇeyararyof Allah sya skarkara ro rum ari, ma kuker snonkaku ras-ras kam isrow ro pasar sya. ¹⁸ Ma kuker ḇefawinananem swaruser ono kako ro rarwas Epikuros ma Stoa sfamfaḇri swaruser kuker i ma ono sikofen: "Inja rosaiso mandaw ine imarisen ikofen ine?" Ḇape ḇeso sya sikofen: "Imbude ḇaryas farkarkor ro karwar mandaman." Snar ḇaryas Ankankinem Ḇeḇye ro Yesus ma aḇiḇer ya. ¹⁹ Inja ssuni ḇe ḇarpon kankain Areopagus ma sikofen: "Inko marisen fa inkakfawi farkarkor babo rosaiso farkor ine? ²⁰ Snar roi wakofen faro inko nane nafrur kanandor. Inja inko marisen inko fawi, rosai ḇeḇesya nakam." ²¹ Kawasa Atena ma kawasa mandaman ḇekain ro dia sisma mnis fafisuḇa faro roi ono mboi simarisen sawawos ma simnaf ro roi ḇeḇor ḇebabo. ²² Paulus rya dores ro Areopagus ma ikofen: "Ne, kawasa Atena, yamam, ḇoi ro roi ḇeḇor kam mko myaren kaku mkoḇe ari faro karwar-karwar. ²³ Snar rofyor yambran mura-muma ro mnu mko ḇedi ma yamam roi mko sandik na, yasrow kako rokef farsarser oso kuker fas-fas: Faro Allah inko fawiḇa. Rosai mkofawiḇa ḇoi mko syom, iso yaḇaryas faro mko. ²⁴ Allah ḇefrur kwar supswan kuker roi ḇeḇor ḇeroina kam, i rya, Manseren ro nanki ma supswan, kyain ro rum karwar snonkaku sya sifrur kuker siḇrasna ḇa, ²⁵ ma kako suf farmyan kuker ḇramin snonkaku ḇa, imnis raris nyamnis roi onoḇa, snar iso ḇeḇuk kenem ma knaref ma roi ḇeḇor kam faro snonkaku sya. ²⁶ Ro snonkaku oser baken ifrur kwar er-er kam ma snonkaku fa skain ro supswan ḇesiper ma ryir kwar faro si wampasi wambarek ma yawek na ro kankain sena, ²⁷ insa ssewar i ma span ma sisrow i, mboi ḇyinkwan koḇa. ²⁸ Snar ro i kokenem, komararer, koisya, imnis raris moḇ manwarwor mko ḇesi sikofen kwar: Snar koine koḇekpu ro Allah kako. ²⁹ Snar koine koḇeknam ro kpu Allah, rarirya kopok kokara awer, isoine ḇaḇe Manseren imnis raris brawen roḇa sarak roḇa karui, fararur kamasan ma fawawi snonkaku. ³⁰ Inja Allah myam werḇa faro awar fawawiḇa, mboi baboine Allah ḇyaryas faro snonkaku sya, ro moḇ nakam fa simbror. ³¹ Snar fyasnai kwar ras oso, fafisu rosai kuker napnapes nari ḇyemankara supswan kuker snonkaku oser fyasnai kwar posa ḇyuk faro kawasa kam fasasnai oso kuker ḇyaws i bur ḇemar sya." ³² Rofyor simnaf aḇiḇer ro snonkaku ḇemar sya, ono skoryaye, ma ono ḇeso sikofen: "Fafisu ḇeso resari inko mnaf wawos wer ro mnuk ani." ³³ Raimnai Paulus ibur si. ³⁴ Ḇape snon ono seoser kukeri ma sikyar, ro fandusi Dionisius, oso ro kankain Areopagus ma bin oso snori Damaris, ma snonkaku ono kako si fnoḇek sko.

¹ Raimnai Paulus ibur Atena, ma ryaḇe Korintus. ² Ro Korintus isrow snon Yahudi oso snori Akwila, mnu ḇyedi Pontus. Insape ryama ker Italia kuker swari, Priskila, snar Kaisar Klaudius ḇyuk sasoser kwar, insa kawasa Yahudi kam sisasyar bur Roma. Paulus rya isrow su ro rum suḇedi. ³ Snar fararur skoḇena namnis inja ryowus su. Skofararur kayam, snar fararur skoḇena skofrur rum kruḇen. ⁴ Ma ro ras Mananai Yahudi Paulus dawawos ro rum ari ma ḇyesewar insa dun snonkaku Yahudi ma Yunani fa sikyar. ⁵ Rofyor Silas ma Timotius surama ker Makedonia Paulus kuker sne ḇesiper ḇyaryas wosya, ma ḇyuk kesaksian faro kawasa Yahudi, insa sifawi Yesus i Wairek. ⁶ Ḇape rofyor kawasa ansi si sampum ma sonefi, inja kyokef fafen ḇero sansun ḇyena ma ikofen faro si: "Iḇye rik mkoḇena nek ro mankun mko ḇrumna; yasren, yasasar ḇa. Randak ro knikine yara faro er-er ḇeso." ⁷ Inja isasyar ro dia, fa ryaḇe rum snon oso ḇenir Titus Yustus, ḇeḇeari faro Allah, ma rum ḇyedi fyanam kuker rum ari. ⁸ Ḇape Krispus, mananir rum ari ani, ikada ikyar faro Manseren kuker kawasa ḇero rum ḇyedi ḇesiper, ma kawasa Korintus ḇemnaf ḇaryas Paulus ḇyena, sibor sikyar ma sor fa sisma masi sren. ⁹ Ro roḇ oso Manseren ikofen faro Paulus ro mamam oso: "Wamkak awer! Ḇaryas pdef wosya ḇo befasis awer! ¹⁰ Snar yarowus au ma snonkaku oso nari pyan ma ḇyewayam auḇa, snar kawasa yesi sibor ro mnu ine." ¹¹ Inja Paulus kyain ro dia ḇe wampasi wambarek oser ma paik riwonem ma ḇyuk farkarkor ro Allah wos ya rofandu si. ¹² Ḇape rofyor Galio ḇye Gubernur kwar ro Akhaya, kawasa Yahudi sikḇawes kam fa sisampum Paulus, ma ssuni ḇe ḇarpon kankain karkara ḇenapes. ¹³ Sikofen: "Snon ine ḇyesewar fa dun kawasa kam ḇeḇeari faro Allah sisnesna ro nyan ḇeso ḇemnisḇa kuker sasoser Refo Yahudi." ¹⁴ Rofyor Paulus iḇe dakawawos, Galio ikofen faro kawasa Yahudi sya: "Ne, kawasa Yahudi mko, rofyor mko ḇuksof roi ḇesasar roḇa ḇarḇor oso, nari yaḇeaḇaḇen ma yamnaf mko, ¹⁵ ḇape roi ḇeḇesya ani irya snar masasor ḇekur wawos roḇa snonsnon roḇa wer sasoser ḇero fandu mko, ipyum syadi mkawos na ro mankun mko; yamarisen ḇa yaḇe mankara faro roi ḇeradine." ¹⁶ Raimnai iyaw si ro sim karkara ḇenapes. ¹⁷ Rarirya snonkaku ansi soper Sostenes, mananir rum ari, ma siprer i ro ḇarpon rum karkara ḇenapes ani; ḇape Galio ḇyefandun roi ḇeḇesya aniḇa. ¹⁸ Paulus kyain ras ono wer ro Korintus. Raimnai ikofen ḇayir faro naek srar ro dia, ma dayunḇe Siria, posa ro ikapnik snonburyam ḇyena ro Kenkerea, snar ḇyeamar kwar. Priskila ma Akwila suso i. ¹⁹ Ma skorande ro Efesus. Paulus ibur Priskila ma Akwila ro diya. Derer ssyun ro rum ari ma dawawos kuker kawasa Yahudi sya. ²⁰ Sor fa insa kyain fyoro knik ro dia, ḇape ḇyuk ḇa. ²¹ Ma ikofen ḇadir faro si: "Rofyor Allah imarisen nari yakaḇer faro mko." Raimnai pyaw ro Efesus. ²² Rya kwar ro Kaisarea ma fyor dek rande kwar ma ḇyuk aroo faro jemaat, posa ryaḇe Antiokhia. ²³ Kyain ras ono ro dia kwar, imbran wer, ma imbran yar sup Galatia ma Frigia ḇesiper fa isonem kawasa Kristen sisnesna kam. ²⁴ Ro fafisu ani snon Yahudi ḇenir Apolos ryama ro Efesus, mnu ḇyedi Aleksandria. I snon ḇefawi ḇewawos ma ifawinananem kaku ro Refo. ²⁵ Isma farkarkor kwar ro Nyan Manseren ḇyena. Kuker sne ḇesiper dawawos ma kuker aunos ḇyuk farkarkor ro Yesus, ḇape ifawi monda masi sren Yohanes. ²⁶ Ḇyuk farkarkor randak ro rum ari Yahudi kuker makaku. Ḇape rofyor Priskila ma Akwila sumnafi kwar, suyuni ḇe rum suḇedi ma kuker ḇaḇeaunos sukofen fasnai faroi Allah Nyan ḇyena. ²⁷ Snar Apolos imarisen kyaḇor ḇe Akhaya, inja naek srar ro Efesus sfarem syap faro kawasa Kristen ro dia insa si srowi. Ro fyor rya kwar ro Akhaya, kuker saswar ma fakamaman ro Allah, ḇyesnonkaku ḇefandun kaku faro kawasa ḇekyar sya. ²⁸ Snar kuker fawawi ḇyena fyamfaḇri kuker kawasa Yahudi ro ḇarpon snonkaku ḇeḇor ma fyasnai ḇayir ro Refo Yesus ikada Wairek.

¹ Fafisu Apolos isya kaker ro Korintus, Paulus imbranuk ro sup ya dori isof syuḇer ro Efesus. Ro dia isrow snonkaku ḇeḇe Kristen ono. ² Ikofen faro si: "Inja mkosma Rur Ḇesren ya kwar, rofyor mko kyar ya?" Ḇape skarem faroi: "Roḇayim, ma inkakmnaf ḇayim kako ro Rur Ḇesren ya isya." ³ Raimnai Paulus ikofen faro si: "Rarirya ido masasi rosai mko smaya?" Skarem: "Kuker masasi Yohanes." ⁴ Paulus ikofen: "Masasi Yohanes ikada masasi snonkaku ḇembror kwar, ma ikofen faro kawasa ḇeḇorsya mboi nari sikyar faro i ḇerama papuri, isoine Yesus." ⁵ Rofyor simnaf rarirya, sor fa sisma masi kuker snonsnon Manseren Yesus. ⁶ Ma ro fafisu Paulus ḇyeḇok si, Rur Ḇesren ya isabu faro si, ma sirandak sawawos kuker wos-wos ono ma sḇardi. ⁷ Ḇarḇor sedi indokada sesnonkaku samfur seser risuru. ⁸ Paulus rya sawawek ḇe rum ari Yahudi ro dia ma ḇyuk farkarkor kuker masasik isof paik rikior. Ro ḇaryas ḇyena ḇyesewar fa sikyar Allah Ḇaḇesasoser ḇyedi. ⁹ Ḇape ono sisya sisnesna npakrek. Simewer sikyar, imboi sonef Allah Nyan ḇyedi ro ḇarpon kawasa ḇeḇor. Inja Paulus dun kawasa Kristen ḇyesi ḇo ibur si, ma ras-ras kam ḇyuk farkarkor faro si ro Tiranus rum farkor ḇyedi. ¹⁰ Wampasi wambarek risuru ḇyuk farkarkor, isof kawasa ḇekain ro Asia kam simnaf Manseren wos ya, iḇye snon Yahudi ma Yunani kako. ¹¹ Allah ifrur fasasnai-fasasnai kanandor ḇeba kaku, kuker Paulus ḇrasi. ¹² Inja kawasa ssun marḇun ma kruḇen rosai Paulus syansun kwar fa srir na ro ḇeduf si, rarirya dafduf sena namnai ma rur ḇemaḇak sya sisasyar. ¹³ Snon Yahudi ḇena mon ono, simbran yar mnu ya, sapbir sas Manseren Yesus snori fa sḇukyaw rur ḇemaḇak ḇesower snonkaku sya ma sor, ḇo sikofen: "Yafores was mko kuker snonsnon Yesus Paulus fyarkor ani." ¹⁴ Romawa rifik ro mananir imam Yahudi oso snori Skewa siso ḇefrur rarirya. ¹⁵ Ḇape rur ḇemaḇak ani kyarem: "Yesus yamam biri, ma Paulus yafawiyi, ḇape mko, mansesiso mko?" ¹⁶ Ma snon rur ḇemaḇak ani iswoḇerya doper si ma myamunmun kuker sikam rao separpar ḇo sḇaḇer ma sifrar sibur snonkaku ani rum ḇyedi. ¹⁷ Kawasa kam ḇekain ro Efesus, iḇye Yahudi ma Yunani ḇefawi roi ḇeḇesya ine sikam simkak ma snonsnon Manseren Yesus ḇyesno syadi wer. ¹⁸ Sibor ro fandu si sikyar kwar, inja srama ma skarem ro ḇarpon, mboi si kako sakfrur frur ḇeradine. ¹⁹ Sibor kaku ro fandu si, ḇeyakfrur mon kako, siryur syap-syap rawan sena fa sikun na ro ḇarpon kawasa ḇeḇor. Maeja ro syap-syap rawan anna indokada nekumpan sarak syaran samfur ririm. ²⁰ Kuker nyan ine Manseren wos ya ryer ḇo syambraḇ syadi wer. ²¹ Ḇarpur ro roi ḇeḇesya anna kam, Paulus kyara fa iḇe ryaḇe Yerusalem dunuk Makedonia ma Akhaya. Ikofen: "Rofyor yara kaki moḇ nane kwar ma nari yakmam Roma kako." ²² Inja iwan snon risuru ḇefnoḇeki, isoine Timotius ma Erastus, supon iḇe Makedonia, ḇoi mankundi kyain ras ono kaker ro Asia. ²³ Ro fafisu ani aru biru ḇeba oso ryok fa kyur Manseren Nyan ḇyedi. ²⁴ Snar snon oso snori Demetrius, kamasan sarak, ḇefrur rum-rum kasun ḇemnis rum karwar Artemis ro sarak. Sasewar ḇyedi ḇyuk nana nabor faro kamasan-kamasan ḇyesi. ²⁵ Inja iryur sikam kuker ḇefararur ḇeso i sya ro sasewar ani ma ikofen: "Naek srar, mkofawi, nana koḇena kosma na ro sasewar ine! ²⁶ Insape mankun mkomam ma mkorower, rariso ro Efesus dererḇa ḇoi Asia ḇesiper Paulus dembuk ma ḇyeninyan kawasa ḇeḇor ma ikofen, roi snonkaku sifrur kuker ḇramin anna karwar naisya ḇa. ²⁷ Kuker nyan beradine nari sasewar koḇedi derer ryoḇa mboi nari iser koryae ro snonkaku isyadi wer rum Artemis, karwar ḇeba ani kako nari kawasa sefandun iba ma nari ryo. Ma Artemis, mankundi, Artemis, Asia ma supswan ḇesiper si syom ani baba ḇyedi nari ryo." ²⁸ Kawasa ansi simnaf rarirya simsor namsinba beri, ma sar naba soḇo: "Artemis karwar kawasa Efesus iba!" ²⁹ Mnu ani ḇesiper ḇyearu biru ma sikam semarani ḇe rum ḇeba oso ma sismer Gayus kuker Aristarkhus, snon Makedonia suirya ḇeso Paulus ro maran ḇyedi. ³⁰ Paulus imarisen rya faro kawasa ansi fama kawasa Kristen simarisen ḇa. ³¹ Ma ḇebarara ono ro Asia ḇeḇebati Paulus, sfarem swarepen faro i, insa syun awer ḇe rum ḇeba ani. ³² Ro fafisu ani kawasa ḇeryur ro rum ani si bras; ono sikofen radine ma ono wer sikofen radiyi, snar kawasa ansi searu biru ma sibor kaku sifawiḇa rosai spanjuḇer kuker ya. ³³ Ma kawasa Yahudi spampum snon oso snori Aleksander ḇe ḇarpon. Snar isma wos kwar ro kawasa ḇeḇor ansi ro rosai ḇeḇesya kwar. Dow ḇrasi fasau ma ḇyoi ḇrasi fa kawasa ansi simnai insa ḇyuk wos ḇeḇekuker si ro ḇarpon kawasa ansi. ³⁴ Ḇape rofyor sifawi i snon Yahudi mura, ssibras kam rao indokada oras risuru: "Artemis karwar kawasa Efesus iba!" ³⁵ Ḇape snon ḇefas-fas ro mnu ani ḇyuk wos faro kawasa ḇeḇor ma ikofen: "Ne, kawasa Efesus! Mansei ro sup ma swan ine ḇefawiḇa, mko kawasa Efesus, mkoi ḇefaduru iḇye rum karwar Artemis, ḇeba syadi, ma amfyanir ḇyedi ḇesabu ro nanki? ³⁶ Roi ḇeḇesya ine nari ḇyeḇesampum ḇa, inja mkoknon ma mkosau-sau awer. ³⁷ Snar mkun kwar snonkaku sine maro dine ḇoi sfasar rum karwar koḇedi ḇa ma sonef snonsnon ḇyedi ḇa. ³⁸ Inja rofyor Demetrius kuker kamasan-kamasan ḇyesi roi oso ifnai fa soḇo siksof snonkaku oso ido kankain karkara ma gubernur isya, inja ipyum syadi ḇemasasor ansi ssun safsof sena faro dia. ³⁹ Ma rofyor mkomarisen roi ono ḇeso ipyum syadi mkawos na ro kankain karkara. ⁴⁰ Snar koisya ro kandera nari sḇuksof ko, soḇo kofrur mbrus ro ras ine, snar knam oso isya ḇa fa koḇuki ḇyesano wark raryur ḇefrur aru biru ine." Rarirya kuker wos nane iwan raryur ani fa sibur ḇesisye.

¹ Aru biru ani imnai kwar, Paulus dor kawasa Kristen ma danun si. Ma ḇyearoo si kwar, imbran ḇe Makedonia. ² Imbran yar sup ya mnuk ani ma kuker ananun nabor ḇyuk sambraḇ faro naek srar ro dia. ³ Kyain paik rikior kwar ro dia imarisen dayunḇe Siria. Ḇape ro fafisu ani kawasa Yahudi sna awi fa siḇe smuni. Rarirya kyara wer fa kyaḇer ma dunuk sup Makedonia. ⁴ Ḇesoi sya isoine Sopater Pirus mandaḇendi, ro Berea, ma Aristarkhus ma Sekondus, ro Tesalonika, ma Gayus ro Derbe, ma Timotius ma snon risuru wer ro Asia, isoine Tikhikus ma Trofimus. ⁵ Sayun ḇepon ma siwaf inko ro Troas. ⁶ Mboi rofyor munara Mamami Napisenḇa isyof kwar inkayun ro Filipi ma ras rifiak inko fyafer ro Troas ma inko srow si. Ro dia inko kain ras rifiak. ⁷ Ras ḇepon ro ari swaf ani, rofyor inko ryur fa inkan mamami, Paulus dawawos kuker naek srar ro dia, snar kyara fa meserdi iḇe pyaw. Dawawos rawo isof romfawru. ⁸ Ro sim ḇoryas moḇ inko fananjur roya, spam padamara nabor. ⁹ Snonkbor oso snori Eutikhus kyain ro koḇkir ya. Snar Paulus dawawos fyoro, isof snonkbor ani ipok anenef ya ḇa. Rarirya denef moser ma isapi ro sim ḇoryas syos ḇeḇekior ḇesop. Ro fyor sikanow i, imar kwar. ¹⁰ Inja Paulus isabu rarḇaḇ. Doḇerepen snonkbor ani, ḇo dawrepeni, ma ikofen: "Mko mbrus awer, snar isya ikenem." ¹¹ Sek wer raryas ro sim ḇoryas ani, Paulus payanasnis mamami ma sanan; sanan posa Paulus dawawos fyoro kaku wer isof dorek na nek. Posa kwar pyaw. ¹² Rofyor ani ssun snonkbor ani ḇe rum ḇyedi, ma sisnesna naprei kam. ¹³ Inkek ḇepon ḇe kapal ma inkayun ḇe Asos, kuker karkara insa inkun Paulus ro Asos imnis danun kwar faro inko, snar ikada doḇo imbran ra ḇande. ¹⁴ Fafisu isrow inko ro Asos, inko yakeri ḇe kapal, raimnai inkayun pdef ḇe Metilene. ¹⁵ Ro dia inkayun pdef ma meserdi inko mamnis kuker myos Khios. Ro meserdi wer inkayun ḇe Samos ma ras oser dawas inko sun ro Miletus. ¹⁶ Paulus kyara kwar fa ryande ro Efesus ḇa, insa fafisu ḇyena nabro awer ro Asia. I saw-saw snar, insa isya ro Yerusalem kwar, ro ras Munara ḇeba Pentakosta. ¹⁷ Snar rarirya, inja iwan snon oser ro Miletus ḇe Efesus kuker anun insa penatua-penatua jemaat srama ḇe Miletus. ¹⁸ Rofyor srama kwar, Paulus ikofen faro si: "Mkofawi, kankenem ayedi ro fandu mko, ro ras randak yafyafer ro Asia ine: ¹⁹ Kuker sne ḇekakiḇa yuffarmyan Manseren. Ro afuffarmyan ani mkaru ayena nabor namis ma nabor yasma farawrowes ro kawasa Yahudi ḇeḇe ḇemun aya. ²⁰ Rariryano yapok yamam mondaḇa ḇoi yafrur rosai ḇepyum faro mko. Nakam yaḇaryas ma yaḇuk farkor mko, iḇye ro fababa ma ro fananjur-fananjur ro rum mkoḇena; ²¹ ma yaḇe saksi ḇesyakwar faro kawasa Yahudi ma Yunani, insa simbror faro Allah ma sikyar faro Manseren koḇedi, Yesus Kristus. ²² Ḇape knikine raris women faro Rur ya yara ḇe Yerusalem ma yafawiḇa rosai nari ḇekur aya ro diwa ²³ derer rosai Rur Ḇesren ya ḇyair kwar ro mnu ḇe mnu faro aya, mboi bui ma kandera naiso ḇewaf aya. ²⁴ Ḇape yafandun nyawa yediḇa beri, mboi yasowar fa yasma knam ḇepupes fa yafrur posa afuffarmyan Manseren Yesus ḇyeasas faro aya insa yaḇe saksi Ankankinem Ḇeḇye ro saswar ma fakamaman Allah. ²⁵ Ma insape yafawi, mko kam yarama yasrow ma yaḇuk farkarkor ro Ḇaḇesasoser Allah, nari mko mam mkasi wer ḇa. ²⁶ Inja ras ine yakofen ḇayir ḇe mko aya ine yasren, yaḇe sasarḇa faro mansei ryawer nari ḇero ya. ²⁷ Snar yamyaren kaku yaḇaryas Allah marisen ḇyena kam faro mko. ²⁸ Inja mkowaren mankun mko ma mkowaren nai ḇesiper ani kam, snar mko iso Rur Ḇesren ya fyasnai kwar fa ḇemamepen ma ḇefakwak Allah jemaat ḇyedi, ismai si kwar kuker rik ro mankundi Romawa Ḇyedi. ²⁹ Yafawi, rofyor yara, nafsup ḇermomen nari ssun fandu mko ma nari siswar nai ansine ḇa. ³⁰ Mboi ro fandu mankun mko nari snonkaku ono sikḇawes, kuker farkarkor ninyan ma sesewar insa sismer kawasa Kristen bur nyan ḇenapes fa siso si. ³¹ Inja mkowaren ma mko swarepen, aya ine wampasi wambarek rikior, roḇ meser, yamnaiḇa ro yaḇuk farkarkor ḇe mko oser-oser kuker mkarui. ³² Ma knikine yarir mko faro Manseren ma ro wos saswar ma fakamaman Ḇyena, ḇepok ḇeḇawes mko ma ḇeḇuk faro mko rarwas mankundi ḇyuk kwar faro snonkaku kam fyasren kwar sya. ³³ Sarak roḇa brawen roḇa sansun yapok yarmomen na ro manseiḇa kako. ³⁴ Ma mankun mkofawi, kuker ḇramin ayesu yafararur kwar fa yasma mnis rosai yaḇe fandun ma min ḇeso aya sya fandun sena kako." ³⁵ Ro roi ḇeḇor nakam yafasnai faro mko kwar, mboi rofyor ko fararur rarirya insa ko fnoḇek snonkaku ḇepokḇa ma ko swarepen Manseren Yesus wos ḇyedi, doḇo: "Ipyum syadi ro koḇuk ya ro kosma ya." ³⁶ Rofyor ikofen wos nane kwar Paulus kyain wepur ma ḇyenadi kuker sikam. ³⁷ Sikam skanes rao sekyu-kyu ma sfor Paulus, ḇo snas ma sisyumi ḇesya kwar. ³⁸ Sikam siswar fafaya iba, isyadadi kaku snar ikofen, nari smam mkasi wer ḇa. Raimnai siyakeri ḇe kapal.

¹ Fafisu ḇaḇesisye ḇeposer sne ani posa, nkopaw ma nkayun beri ḇe Kos. Meserdi nkayun snefer ro Rodos ma rodia nkora ḇe Patara. ² Ro Patara nkosma kapal, ḇeyayun uk ḇe Fenesia. Nkek wer ro kapal aniḇo nkopaw. ³ Fyoroḇa nkomam Siprus ro ḇar rasar, ḇape nkopdefi ma nkayun ḇe Siria. Ḇarpur ya nkofyafer ro Tirus, snar papus ḇero kapal ya siḇe siḇyawen na ro mnu ine. ⁴ Ro dia nkorakaki kawasa Kristen ma nkokain ro dia beras ri fik. Rur Ḇesren ikofen faro kawasa Kristen ansi inja ssḇuk wos faro Paulus, insa ryaḇe Yerusalem awer. ⁵ Ḇape fafisuya isyof kwar, inja nkombran pdef mararan nkoḇedi. Kawasa Kristen kuker bin romawa sesi siyaker nko isof ro mnuya ḇandiri; ma ro swan andir nkokain wepurḇo nkonadi. ⁶ Rofyor nkoḇe aroo sikwar, nkek kapal, ma sibur ḇe rum sena. ⁷ Ro Tirus nkayun ma nkofyafer ro Ptolemais ma rodia ayayun inkoḇedi isyonde. Inkokofen aroo faro naek srar ansi, ma nkokain rodia ḇe ras oser kuker si. ⁸ Ro meserdi nkombran ro dia ma nkorama ro Kaisarea. Inkosun ro Filipus, manbaryas ankankinem ḇeḇye ani rum ḇyedi, isoine oso ro fandu snon rifik skinfir kwar ro Yerusalem, ma inkokain ro rum ḇyedi. ⁹ Filipus isma inai inkbor rifiak besma fakamaman ḇaryar. ¹⁰ Inkokain ras ono kwar ro dia, nabi oso snori Agabus ryaker Yudea. ¹¹ Ryama faro inko, raimnai dun Paulus ḇeḇoḇek ḇyedi. Ma byukfes mankundi wessu ma ḇrassu, ḇo ikofen: "Rur Ḇesrenya ḇyardi kwar radine: Snonkaku ḇena ḇeḇoḇek ine nari Yahudisya sfesi radine ro Yerusalem ma sḇoḇ i faro er ḇeso." ¹² Inko mnaf rarirya, inja inkofnoḇek kawasa Kristen ḇero dia syaḇo inkor, insa Paulus ryaḇe Yerusalem awer. ¹³ Ḇape Paulus kyarem faro inko, ḇo doḇo: "Snaro mkokanes, ma kuker nyan ḇeradine mkoḇo mkofrur sneri ḇyeḇirḇar? Snar yafasos kwar fa sfes aya monda ḇa, mboi isof yamar kako ro Yerusalem kuker snonsnon Manseren Yesus." ¹⁴ Snar ḇyerer wos anun nkoḇena, inja inkomnai ḇo inkokofen: "Manseren marisen ḇyedi ndarirya monda!" ¹⁵ Inkokain ras ono nawas ro Kaisarea kwar, inko fasasos, ma inkomḇran ḇe Yerusalem. ¹⁶ Kawasa Kristen Kaisarea ono sakso inko. Naek ansi ssun nkoḇe snon oso ḇenirḇe Manason rum ḇyedi. Ikada snon Siprus ḇeḇe Kristen ḇepon kwar. Nari nkoḇeryar ro rum ḇyedi. ¹⁷ Fafisu nkora nkosuḇer ro Yerusalem naek ḇero dia sya sisrow nko kuker sne ḇemarisen. ¹⁸ Ro meserdi nko fnoḇek Paulus ḇo nkora nkosrow Yakobus; penatua-penatua sya kam siryur kwar rodia. ¹⁹ Paulus byearoo faro si, posa fyar-fyar asuser moḇsai Allah ifararur ro fandu er-er ḇeso ro afuffarmyan ḇyedi. ²⁰ Simnaf rarirya sikam sisandik Allah. Raimnai sikofen faro Paulus, ḇo soḇo: "Naek mamkada, Yahudi syaran-syaran sikyar kwar ma simyaren sisouser sasoser Refo Yahudi. ²¹ Ḇape sikam simnaf aukada, farkor kawasa Yahudi ḇekain fandu er ḇeso sya insa sisawen sasoser Moses ḇyena, snar woḇo, insa sifrur ma sikenem awer ro rari sofakfuk koḇena faro romawa sesi. ²² Inja knikine rariso? Snar nari simnaf rwama kwar ine. ²³ Iḇye, wafrur rosai inkokofen nane: Ro fandu nko naek rifiak sisya seasas. ²⁴ Wunsi fa sifnoḇek au, wafrur fasasren mankundaw fnoḇek si ma bakwarek si, isof sikapnik siḇrusna; rarirya nari snonkaku syakam sifawi, wawos simnaf ro au nkakuḇa, snar smam ausya ḇeuser sasoser Refo Yahudi. ²⁵ Mboi faro er-er ḇeso, ḇekyar kwar sya, nkofas kwar faro si mnuk nkawos namuk kwar, isoine sḇefor roḇeyan sḇukfarser faro karwar sya, ma rik, ma aiwan bemaruk sya, ma farbuk." ²⁶ Ro meserdi Paulus dun snonkaku ansi fnoḇek i, ma fyasren mankundi fnoḇek si, raimnai ssun ro Rum Allah fa sikofen ḇayir fafisu rosai nari fasasren ya nari imnai ma farsarser ssun fa sḇukfarser warek mankunsi oser-oser. ²⁷ Fafisu ras rifik anna fanam nasyonde, kawasa Yahudi ḇeraker Asia, smam smai Paulus ro Rum Allah, inja searu biru kawasa sya fa sfori, ²⁸ ma ssibras ḇo soḇo: "Ne, kawasa Israel, mkofnoḇek! Ine snonkaku ḇefarkor kawasa ro moḇ nakam insa sisampum er koḇedi ma sasoser Refo Yahudi ma moḇ ine! Ma knikine dun snon Yunani ono fa ssun ro Rum Allah fa sifrur mamas moḇ ḇesren ine!" ²⁹ Snar ro ras oso smam smai kwar Trofimus ro Efesus imbranus Paulus ro mnu ya, inja siwarki ḇo soḇo Paulus duni randum ro Rum Allah. ³⁰ Rarirya mnu ḇesiper simbrus, ma kawasa sya spanjuḇer, ma sfor Paulus ma sismer i ḇebandi bur Rum Allah ma ro fafisu ani beri kedwai ro Rum Allah nbe ḇesisen. ³¹ Rofyor saw fa siḇe smuni, ḇyesno faro mananir sarar, fa ifawi Yerusalem ḇesiper simbrus. ³² Mananir sarar ani dun fasaw sordade-sordade ma ḇukor sesi fa sra sisrow kawasa ḇeḇor ansi. Fasisu smam mananir sarar ani ma sordade-sordade ansi, inja simnai ro siprer Paulus. ³³ Mananir sarar ani fyanam Paulus fyori ma iwan fa sfesi kuker wanka, ma ifuken manseiso ine ma rosaiso ifrur ya. ³⁴ Ḇape kawasa ansi ono ssibras radine ono ssibras radia. Snar mbrus ani mananir ani ifawi mnisḇa rosai ḇeḇesya ani. Inja iwan fa ssun Paulus ḇe ayar mamun. ³⁵ Fafisu sra ro kakarya sordade ansi sforaḇen Paulus snar kawasa ḇeḇor ansi skamapepen, ³⁶ semarani ḇo sisoi, ma ssibras ḇo soḇo: "Idawer mura!" ³⁷ Ro fafisu Paulus ssuni fa syun ḇe ayar mamun, ikofen faro mananir sarar ani: "Wamarisenke yakofen roi ono faro au?" Kyarem ḇo doḇo: "Wafawi wos Yunani? ³⁸ Yakara au snon Masir ḇefrur mbrus ro ras suine, kuker snon ḇarḇor ḇeyuf romamun raimnai ḇefrar ḇebur ḇe sup ḇeḇeursḇa kuker snon ḇarḇor syaran rifiak?" ³⁹ Paulus kyarem doḇo: "Aya ine snon Yahudi, ro Tarsus, romawa ḇena mnu ḇeḇesnonsnon ro sup Kilikia; yor insa wamarisen ido, yawawos faro kawasa ḇeḇor sine." ⁴⁰ Fafisu mananir sarar ani kyarem faro Paulus kwar, rya dores ro kakar bunem ya ma pyankai epensi fa sefasis; rofyor siknon kwar, irandak dawawos faro si kuker wos Ibrani doḇo:

¹ "Ne, naek ma sinan anmkoya mkomnaf naḇye rosai yamarisen yakofen faro mko fa yaḇesano wark mankundaya." ² Ro fafisu kawasa ḇeḇor ansi simnaf dawos ro wos Ibrani, sefasis syadi wer. Ikofen ḇo doḇo: ³ "Aya ine snon Yahudi, saḇen aya ro Tarsus ro sup Kilikia, ḇape yaba ro mnu ine; befarkor aya isoine Gamaliel ḇyeaunos pyum kaku ḇe aya ro sasoser kpu koḇesi, isof aya ine yamyaren kaku yafararur faro Allah imnis raris mkokam ro fafisu ine. ⁴ Aya ine yaḇewayam naek ḇeso Manseren Nyan ḇyedi sya isof ono simar; snon ma bin yafor si ma yasun si ro bui. ⁵ Roi nane iḇye Imam Ḇeba ma Kankain Karkara Ḇebarara-Ḇebarara sya mankunsi smame. Si ḇeḇuk syap ḇeaya fa yun faro naik syaro Damsyik ma yara kwar ro diwa yafor ḇeso Manseren Nyan ḇyedi ḇero diwa sya, insa yun si ḇe Yerusalem fa sismai. ⁶ Ḇape ro maran ayedi ḇe diwara, ma fafisu yafanam Damsyik, ro arkok pandaf, kniko ḇama isnai ḇesokarares ryaker nanki iyar aya. ⁷ Ro fafisuya yasapira yaḇarek ma yamnaf mkaren oso ḇeyakawos aya: Saulus, Saulus, snaro wafrur kandera aya? ⁸ Yakarem ḇo yoḇo: Manseiso au, Manseren? Kyarem ḇo doḇo: Aya ine Yesus snon Nazaret, wafrur kandera ya. ⁹ Ma kawasa ḇeso ayasya, sakmam isnai ani, ḇape mkaren Yesus ḇekofen faro ayanya kada sakmnaf iba. ¹⁰ Yakofen wer: Manseren rosaiso nari yafrur ya? Manseren ikofen faro aya: Wakḇawes ma rwaḇe Damsyik. Rodiwa nari sikofen ḇadir faro au roi ḇeḇor kam wafrur na. ¹¹ Snar mkasi ifafar, inja min ḇeso ro mararan yedi sikfin aya ḇe Damsyik. ¹² Rodia snon oso snonsnon ḇyedi Ananias, snon ḇekyar ma ḇeso mnis sasoser Refo Yahudi ma kawasa Yahudi ḇero dia sya sifawi kami. ¹³ Ryama dores fanam aya ma ikofen: Saulus, naek ayedi, mam wer! Ma ro fafisu ani beri yamam wer ma yaknoweri. ¹⁴ Raimnai ikofen ḇo doḇo: Kpu koḇansi Allah sedi ḇyeasas au kwar fa wafawi marisen ḇyedi, insa mam napnapes ya ma wamnaf mkaren ḇesasyar ro sḇayo ḇyena. ¹⁵ Snar au nari wakofen rosai mam ro i faro kawasa sya kam rosai mam ma wamnaf na. ¹⁶ Ma knikine rosai beḇirḇar kaker? Wayor au, fa wor ro Manseren ma wasma masi sren ḇefasren au ro sasar ḇena! ¹⁷ Fafisu yakaḇerma ro Yerusalem kwar ma ro fafisu yaḇenadi ro Rum Allah, papoik Allah, nyakasiper rur ayedi. ¹⁸ Yamam Manseren, ḇekofen faro aya: Wasasyar fasaw bur Yerusalem, snar nari ḇaḇemamam ḇena ro aya sefandun naba. ¹⁹ Yakarem: Manseren, si fawi ayaiso, ḇera ḇesun ḇesaye ro rum nadi sena ma ḇefor snonkaku ḇekyar au sya ḇo ḇesun si ro bui, ma ḇeprer si. ²⁰ Ma ro fafisu Stefanus saksi ḇedi rik ḇyena nasbawer aya isya ro moḇ ani ma yamarisen kuker frur ani ma ayaiso ḇemamwarek kawasa ḇemun i sya sansun sena. ²¹ Ḇape Manseren ikofen faro aya: Rwa, snar nari Yawan au binkwan kaku rodine faro er-er ḇeso." ²² Kawasa ansi simnaf Paulus isof ro wos ine; ro fafisu ani sikam ssibras, soḇo: "Mkoyaw snonkaku ine bur supswan ine bori! Ipok fa ikenem ḇaḇeri!" ²³ Rarirya ssibras ḇesya kwar ma sso syatu ma fafen ḇebo. ²⁴ Inja mananir sarar ani ḇyuk sasoser fa ssun Paulus ḇe ayar mamun ma iwan fa skukeḇi ma sipreri, insa sifawi rosai ḇeḇeknam, isof kawasa ansi ssibras mankenem faroi rarirya. ²⁵ Fafisu Paulus siyaḇeki ma siḇe sipreri, ikofen faro mananir sordade ḇewaren i: "Mkoḇrike mkoprer snon ḇena sup Roma rofyor ḇyeḇekukeḇ ḇaim?" ²⁶ Rofyor mananir sordade ani imnaf rarirya rya ikofen ḇayir faro mananir sarar ani, ḇo doḇo: "Rosai waḇe wafrur ya? Snon ani snon ḇena sup Roma rirya." ²⁷ Inja mananir sarar rya faro Paulus ma ikofen: "Wakofen kakuke, au snon ḇena sup Roma?" Paulus kyarem ḇo doḇo: "Kaku." ²⁸ Inja mananir sarar ani ikofen: "Ḇaḇe snonsnon ḇena sup Roma ani yakoḇes i kuker maeja ḇekakur." Paulus kyarem, ḇo doḇo: "Aya kada saḇen aya ḇeromawa ro sup Roma." ²⁹ Inja siwan fa ḇeḇeḇepreri sya sisusu fasaw; ma mananir sarar ani kako imkak, rofyor ifawi kwar, mboi Paulus, doḇo iwan fa sfes ani snon Roma rirya. ³⁰ Rariryano mananir sarar ani imarisen fa ifawi kuker aunos rosai kawasa Yahudi sḇuksof Paulus. Inja meserdi iwan fa sper wanka sya buri ma ḇyuk sasoser insa mananir imam-imam ma Kankain Karkara Agama siryur kam. Raimnai dun Paulus ro ayar mamun ani ḇeḇarpon sedi.

¹ Paulus iknower ḇebarara Kankain Karkara Agama ansi, posa ikofen: "Ne, naek srar ayesi, isof ro ras ine yakenem kuker sneuser ḇesren ro ḇarpon Allah. ² Ḇape Imam Ḇeba Ananias iwan fa snonkaku ḇeyores fanam Paulus ḇyaser Paulus sḇari. ³ Paulus ikofen faro i: "Allah nari ḇyaser au, ne, arsen kamara ḇepyoper! Kwain ro dine fa kwukeḇ aya raris sasoser Refo Yahudi, ḇesyaḇo ḇeyuk sasoser Refo Yahudi kwar ḇo swoser fa sḇaser aya." ⁴ Inja snonkaku ro dia sikofen: "Kworyae Allah Imam Ḇeba ḇyedi?" ⁵ Paulus kyarem: "Ne, naek srar ayesi, yafawiḇa i kada Imam Ḇeba. Kaku fas-fas isya: Wonef awer oso ro ḇebarara manfarkin er mkoḇesi!" ⁶ Ma snar ifawi, ro fandu si ono ssun ro rarwas Saduki ma ono ssun ro rarwas Farisi, inja dor naba ro Kankain Karkara Agama ani, ḇo doḇo: Ne, naek srar ayesi, aya ine snon Farisi, ḇeḇeḇarpur ro snon Farisi; mkun aya ḇe ḇarpon Kankain Karkara ine, snar yakyar nari aḇiḇer ro snonkaku ḇemar sya." ⁷ Rofyor dawos rarirya, serwas ḇesuru ro fandu kawasa Farisi ma Saduki ma snonkaku ḇeḇor ansi sirarwas si. ⁸ Snar Saduki soḇo, aḇiḇer ḇa ma malaikat ḇa roḇaido rur ḇa, mboi Farisi sya kada skarem nakam. ⁹ Rarirya sembrus ḇeba. Snon ḇefawinananem Refo Yahudi ro rarwas Farisi ono siyor si ḇebarpon ma sfamfaḇri, soḇo: "Nkosma sasar osoḇa ro snonkaku ine! Imbude rur roḇa malaikat oso ḇeyawawos faroi kwar." ¹⁰ Isof sifrur rakrok ḇeba, inja mananir sarar imkak, imbude spawakuk Paulus. Rarirya ḇyuk sasoser faro sarar ansi insa sado fa ssun Paulus ro fandu si ḇe ayar mamun. ¹¹ Ro roḇ riwer Manseren ryama dores fanami ma ikofen faro i: "Swambraḇser snembri, snar raris waḇri kuker aya ro Yerusalem, rarirya kako nari rwa besaksi ro Roma." ¹² Ro fafisu isnai kwar, snon Yahudi ono saw ma ssowar ḇo sifras mankundi soḇo, nkomun Paulus ḇayim nkopok nkonan ba ma nkinem ba. ¹³ Kawasa ḇeaw kwar fa ḇeḇe ḇemun Paulus ansi ḇarbor sedi isyadi ro snon samfur rifiak. ¹⁴ Sra faro mananir-mananir imam-imam ma ḇebarara er Yahudi ma sikofen: "Nkosowar kwar, ma nkofras mankun nko, rofyor nkomun Paulus ḇayim, nkopok nkanan ba ma nkinem ba. ¹⁵ Inja mkofnoḇek Kankain Karkara Agama ma mkor faro mananir sarar ani, ḇyuk Paulus faro mko wer farari mkoḇe mkokukeḇi, kuker aunos, ma rofyor ani nko kada nkofasos fa nkomun Paulus ro fyor ssuni faro mko ḇaim." ¹⁶ Ḇape Paulus fnori (sradi romawa ḇyedi), imnaf smai sansin ani. Inja ryaḇe ayar mamun ma fyor simarisen kwar fa syun, ikofen ḇadir faro Paulus. ¹⁷ Rarirya Paulus dor mananir sordade oso ma ikofen faroi: "Wun romawa ine faro mananir sarar, snar ḇyefandun ikofen ḇadir roi oso faro mananir sarar ani." ¹⁸ Mananir sordade ani duni faro mananir sarar ani ma ikofen: "Paulus snon ḇesmai ani dor ro aya ma ikofen insa yun snonkbor ine faro au, snar ḇyefandun ikofen roi oso faro au." ¹⁹ Rarirya mananir sarar ani ikfin romawa snonkbor ani ḇeḇandi fa suyerer ma ifuken: "Rosaiso woḇo wakofen ḇadir faro aya?" ²⁰ Kyarem: "Snon Yahudi ono sna awi kwar fa sor ro au, insa meser buk Paulus wer ḇe ḇarpon Kankain Karkara Agama, Kankain Karkara ine imnis raris siḇe ssewar sananai fa sifawi kaku kuker aunos roi. ²¹ Ḇape rwower awer si, snar isyadi ro snon samfur rifiak sfasos kwar fa sisin Paulus. Sowar kwar ma sifras mankunsi soḇo, smun Paulus ḇayim sipok sanan ma sinem ba; sisya sfasos kwar ḇoi si waf monda wos ḇepupes ro au." ²² Rarirya mananir sarar ani iwan romawa snonkbor ani fa ibur ma danun faro i: "Wakofen awer faro manseirya kaker, mboi auso ḇerama kwar fa ḇekofen ḇadir faro aya." ²³ Ḇarpur ya mananir sarar ani dor mananir sordade-sordade risuru ma ikofen ḇo doḇo: "Mufasos sordade utin risuru fa sraḇe Kaisarea fnoḇek snon ḇeyek kuda samfur rifik ma snon ḇeyuf bom, utin risuru indokada ro oras siw ro roḇ ine. ²⁴ Mufasos kako keledai snonkaku sakek ro ono faro Paulus ma mkun payamyumi faro gubernur Feliks." ²⁵ Ma fyas syap oso, moḇ ryok raiso ine: ²⁶ "Aroo ro Klaudius Lisias faro gubernur Feliks ḇepyum. ²⁷ Snon ine Yahudi sya sfori ma fafisu siḇe smuni, yara kuker sarar ayesi nkodwarek ma nkofaspari, snar yamnaf snon anine ikada snon Roma rirya. ²⁸ Insa yafawi roi ḇefnai fa sḇuksofi, inja yuni ḇeḇarpon Kankain Karkara Agama sedi. ²⁹ Isnai faro aya fa yafawi roi sḇuksofi kuker ya, isoine mnuk ḇekur sasoser Refo Yahudi sedi, ḇape yasmaiḇa roi sḇuksofi fa ismai samamyai marmar roḇa samamyai bui. ³⁰ Snar sikofen ḇadir fa yafawi kwar, ono sna awi kwar fa siḇe smuni. Inja fasaw kaku yawan fa suni faro au, ma yakofen ḇadir faro ḇeḇuksof isya kwar, insa ssun wawos sena faro au." ³¹ Raimnai sordade ansi ssun Paulus imnis raris sasoser sisma ya, ma simbran ro roḇ ḇe Antipatris. ³² Ro meserdi srir snon ḇeyek kuda ansi kuker Paulus fa simbran pdef, ḇoi sikada skaḇer ḇe ayar mamun. ³³ Sra kwar ro Kaisarea ssḇuk syap ani ma Paulus kako faro gubernur. ³⁴ Ma rofyor syap ani ḇyeḇewasya kwar, gubernur ani ifuken Paulus beknam ro propinsi rosai. Ma rofyor imnaf, Paulus ryaker Kilikia, ³⁵ inja ikofen: "Nari yakara wawos ḇena rofyor ḇeḇuksof au sya srama kwar ro dine." Raimnai iwan fa siwaren Paulus ro Herodes rum ḇyedi.

¹ Ḇarpur ro ras ririm Imam Ḇeba Ananias fnoḇek ḇebarara ono ma mansḇaḇye oso snori Tertulus. Sra faro gubernur ma sfarfyar roi sḇuksof Paulus. ² Paulus ḇyeḇeyor ḇeḇarpon ma Tertulus ryak kuker ḇaḇesof ḇyena, doḇo: "Feliks ḇepyum, snar kakara ḇepyum ḇena nko kada nkosma ḇaḇeaski ḇesya kwar, snar fawawi ḇena roi ono nabor kaku neḇefadwer ma neḇefrur kwar faro er nkoḇedine. ³ Roi ḇeḇor anna naisya kwar ma ro moḇo-moḇo nkoryaḇ ma nkokofen kasumasa. ⁴ Ḇape insama kofnak awer fafisu ḇena, inja yor insa wamnaf fasau nko kuker ḇaḇenaḇye ro au. ⁵ Nkofawi au wafawi kwar, snon ine imnis kaku dafduf kapyow, snonkaku ḇefrur aru biru fandu kawasa Yahudi ro supswan ḇesiper ḇekenem, pyum ma i snonkaku ḇeḇeḇukor ro farkarkor ninyan kawasa Nasarani. ⁶ Rarirya syewar fa ḇyeuk saranden Rum Allah. Eḇedari nkofor i ma nkomarisen nko kakara kuker i farari sasoser Refo Yahudi nkoḇedi. ⁷ Ḇape mananir sarar Lisias ryama idwareki ma pyoseri kuker ḇri ro nkoḇras na, ⁸ raimnai iwan fa ḇeḇuksofi sya srama faro au. Rofyor mankundaw kwukeḇ i, nari wafawi roi ḇeḇor inkoḇuki isofi na." ⁹ Ma kawasa Yahudi ansi kako sakkofen fanuk safsof anna ḇo soḇo, wawos anna kam nkaku rarirya. ¹⁰ Raimnai gubernur ani ḇyuk faro Paulus fa dakawos. Inja Paulus dawos ḇo doḇo: "Yafawi wampasi wambarek nabor kwar bemankara faro er ine. Rarirya kuker ḇirbarḇa yawos fa yaper roi ḇekur aya ine ro ḇarpon bedi: ¹¹ Mankundaw nari wafawi, snar isyadi ḇa ro ras samfur seser risuru ḇesyof kwar yarama ro Yerusalem fa yakḇenadi. ¹² Ma ras oso ḇa fa snonkaku oso myam smai yafamfaḇri kuker snonkaku oso, roḇa yafrur mbrus, iḇye ro Rum Allah roḇa wer ro rum nadi, roḇa wer ro moḇ ḇeso ro mnu. ¹³ Ma sipok sfasnai royo fa ḇyeknam faro au ḇa, ro rosaiso sḇuksof aya. ¹⁴ Ḇape yakarem faro au, insa wafawi yaḇenadi faro kpu nkoḇesi Allah sedi, kuker yaso user Nyan Manseren, isoine Nyan sorḇe farkor ninyan. Yakyar faro roi ḇeḇor sfas ro sasoser Refo Yahudi ma syap nabi-nabi. ¹⁵ Yana kakyar faro Allah raris si kako, mboi nari aḇiḇer ya isya faro snonkaku ḇeḇor ḇemar sya, iḇye snonkaku ḇenapes sya ma ḇenapes ḇa sya. ¹⁶ Inja yasewar ḇesya kwar insa yakenem kuker sneuser ḇesren ro ḇarpon Allah ma snonkaku. ¹⁷ Ma ro ḇarpur ro wampasi wambarek ono, yakaḇer ma wer ro Yerusalem ma yun farem faro er yesi ma yaḇuk farsarser. ¹⁸ Rofyor yafrur roi anna nekam, snon Yahudi ono ḇeraker Asia sisma aya ro Rum Allah, posa ro fafisu yafrur fasasren mankundaya, ma ro fafisu ani snonkaku ḇeḇor ono ḇa ma mbrusḇa kako. ¹⁹ Siso ḇerama faro au kada ma si ḇeḇuk safsof sena rofyor sisma roino ro aya. ²⁰ Rariryano iḇye snonkaku ḇerama sine knikine sikofen ḇarḇor rosai sisma ro aya, ro fafisu ssun aya ḇeḇarpon Kankain Karkara Agama. ²¹ Roḇaido imbude wos yaḇaryas ro fandu si rofyor yores ro ḇarpon sedi, isoine: Snar aḇiḇer fandu ḇemar sya eḇedari ssun aya ḇeḇarpon bedi ro ras ine." ²² Ḇape Feliks ḇefawi mnis kaku Manseren Nyan Ḇyedi, damsu wawos sedi, ḇo doḇo: "Nari mananir sarar Lisias isya kwar ro dine insape yakaruk wawos mkoḇanine." ²³ Raimnai iwan mananir sordade ani iwaren Paulus, ma sipok sidwarek awer bati ḇyesi ḇeyuf farmyan i. ²⁴ Ma ras ono nawas Feliks ma swari Drusila, bin Yahudi; iwan fa sor Paulus, ma surower farkarkor roi ro kakyar faro Yesus Kristus. ²⁵ Ḇape rofyor Paulus dawos ro napnapes ya, apepen mankun ma ḇaḇemankara nari ḇerama, Feliks imkak ḇo doḇo: "Imnis kwar ḇo rwamura resari; fafisu ḇepyum isya nari yawan fa sor au." ²⁶ Rofyor ya Feliks ikyar, nari Paulus ḇyuk pipi ono faroi. Inja ro ras ono dori fa dawawos kukeri. ²⁷ Ḇape wampasi wambarek risuru kwar Feliks ḇyeḇesadwer kuker Perkius Festus, ma insa kawasa Yahudi simariseni, myam monda Paulus ḇo ismai ro bui.

¹ Festus ryama byeras rikior ro propinsi ine kwar, raimnai imbran ro Kaisarea ḇe Yerusalem. ² Ro dia mananir-mananir imam ma ḇebarara-ḇebarara Yahudi srama faroi fa sikofen ḇadir Paulus ro roi sḇuksofi na. ³ Ssewar nyan ḇefrur fromo Paulus inja sor ro Festus isoine, iwan Paulus fa ryaḇe Yerusalem. Snar sna awi kwar insa smun Paulus ro nyan ya faduri. ⁴ Ḇape Festus kyarem faro si, Paulus kada ismai ro Kaisarea snar mankundi kyara kwar fa kyaḇer fasau ḇe Kaisarea. ⁵ Doḇo: "Inja iḇye snonkaku ḇeḇeḇukor fandu mko siso kam aya ḇediwara insa ssḇuk safsof ḇekur Paulus rofyor sasar oso kyuri." ⁶ Festus kyain syadi ro Yerusalem ḇa ḇoi ḇyeras ri war roḇa samfur. Posa kwar ibur kaḇer ḇe Kaisarea. Ro meserdi iryur kankain karkara, ma iwan fa ssun Paulus ḇeḇarpon kankain ani. ⁷ Rofyor Paulus ryama kwar ro dia, kawasa Yahudi ḇeraker Yerusalem sores yari ma ssḇuk safsof ḇemarḇak nabor kaku ḇekur i ḇoi sfasnai knam sasar oso ḇa. ⁸ Paulus ḇyesano wark mankundi, doḇo: "Aya ine yasasar ḇa beri iḇye faro sasoser Refo Yahudi iḇye faro Rum Allah roḇaido faro Kaisar." ⁹ Ḇape Festus imarisen ifrur sneprei kawasa Yahudi inja kyarem faro Paulus doḇo: "Fasoske fa rwabe Yerusalem, insa beḇekara ro diwa ro ḇarpon ayedi ro wawos ine?" ¹⁰ Ḇape Paulus ikofen: "Aya ine knikine yores ro dine ro ḇarpon mankukeḇ Kaisar ma ro dine derer yasmai kakukeḇ. Raris mankundaw wafawi kaku, yafrur sasar kermkun oso ḇa beri faro kawasa Yahudi. ¹¹ Inja, rofyor yaḇe sasar kaku ma yafrur ḇarḇor oso ḇemnis samamyai marmar, yamarisen fa yamar, ḇape, rofyor roi sḇuksof aya nkaku ḇa, snonkaku osoḇa beri ḇepok fa ḇeḇuk aya imnis samsom oso faro si. Inja yek mankara faro Kaisar!" ¹² Rarirya kina karkara, sawos yae faro si kwar, Festus kyarem faro Paulus: "Wek mankara kwar faro Kaisar, inja nari rwaḇe ḇarpon Kaisar." ¹³ Ras ri ḇeso nawas wairek Agripa kuker Bernike suraḇe Kaisarea fa sufrur farsrow ḇaḇesyowi kuker Festus. ¹⁴ Snar sukain ras ono ro dia, Festus ikofen ḇadir roi ḇekur Paulus faro wairek ani, ḇo doḇo: "Ro dine snon ḇesmai oso isya ro fafisu Feliks ibur ya. ¹⁵ Rofyor aya isya ro Yerusalem, mananir imam-imam ma ḇebarara-ḇebarara Yahudi ssḇuk safsof ḇekur snon ani ma sor insa ismai. ¹⁶ Yakarem faro si, kawasa Roma sya sipok ḇa fa ssḇuk snon siksof oso ḇesamsom ro fafisu i kuker ḇeḇuksofi sya skarkara kukeri ḇaim ro ḇarpon ḇeḇuksof i. Ma isma fafisu fa ḇyesano warek mankundi ro safsof anna. ¹⁷ Eḇedari siso aya fa nkora kam muma. Ro meserdi yaryur fasaw kankain markara ma yawan fa snon ani ryama. ¹⁸ Ḇape rofyor ḇeḇuksofi sya sores yari sipok ssḇuk fasasnai ḇaḇeri ro fararur ḇarḇor raris moḇ yaḇaḇir kwar. ¹⁹ Ḇape sikada sisma karkara ḇeso kukeri ro mnuk ḇekur agama sedi, ma kako kuker snonkaku ḇenir Yesus, ḇe mar kwar, ḇape Paulus kada ikofen kaku, mboi ikenem. ²⁰ Snar yaḇeḇirḇar nari yakara wawos ḇera dine, inja yafuken insa imarisen ido rya ḇe Yerusalem, insa roi ḇekuri ḇyeḇekara ro diwa. ²¹ Ḇape Paulus dek mankara. Dor insa iwaf ro bui, isof wawos ḇyena Kaisar mankundi ḇekara na. Rarirya yawan fa siwaren i isof yasmai fafisu fa yafarem i faro Kaisar." ²² Agripa ikofen faro Festus, ḇo doḇo: "Yamarisen yakmnaf snon ani mankundi." Festus kyarem ḇo doḇo: "Meser nari wakmnaf i." ²³ Ro meserdi Agripa ma Bernike sura kuker fasasnai nasan ma rofyor ssun kwar ro sim markara fnoḇek mananir-mananir sarar ma snonkaku ḇeḇe snonsnon ro mnu ani, Festus ḇyuk sasoser, insa ssun Paulus ḇeḇarpon. ²⁴ Festus ikofen: "O wairek Agripa ma ḇekain kam ro dine ḇefnoḇek inko. Mkomam snon ine, ḇesma safsof ro kawasa Yahudi sya kam, iḇye ro Yerusalem, iḇye kako ro dine. Srama kwar faro aya kuker bararas ma sikofen, imboi ipok ikenem kawan wer ḇa. ²⁵ Ḇape yasma sasar osoḇa roi, fa yaḇuk samamyai marmar ma snar dek mankara faro Kaisar, inja yun karkara fa yafarem i faro Kaisar. ²⁶ Ḇape yasma royo ḇa ḇeḇeknam fa yafas faro Kaisar. Knam ine iso eḇedari yuni ḇeḇarpon mkoḇena kam, isyadi ro ḇarpon bedi wairek Agripa, insa, posa kwar ro kakukeḇ ine, yafas knam oso. ²⁷ Snar raris karkara yedi imnis ḇa fa kokarem snon ḇesmai oso ḇape kofasnai knam sḇuksofi na ḇa."

¹ Agripa ikofen faro Paulus: "Wasma fafisu fa ḇesano warek mankundaw." Paulus pyankai epen si, raimnai ḇyesano warek mankundi radine: ² "O wairek Agripa, yamarisen naba kaku, snar ro ras ine yasma fafisu ro au insa yaḇuk kankarem ro ḇarpon bedi ro safsof ḇeḇor Yahudi sya ssḇuki isof aya, ³ syadi wer snar au wafawi mnis kaku rari ma kankenem kawasa Yahudi nkoḇena. Inja yor ro au, insa wakḇaḇ ḇo wamnaf aya. ⁴ Kawasa Yahudi sya kam sifawi nyan kankenem ayedi ro fafisu yaḇe snonkbor ya, snar randak ya yakenem fandu kawasa yesi ro Yerusalem. ⁵ Fyoro kwar sifawi aya ma simarisen kada, nari ssḇuk ḇaḇesaksi snar yakenem imnis snon Farisi ḇeḇeuser ḇar ḇepakrek syadi ro agama nkoḇedi. ⁶ Knikine yores ro ḇarpon mankara, snar yakyar ḇardadi, ḇemnis kwar, Allah Ḇyuk faro kpu koḇesi, ⁷ ma keret samfur seser risuru nkoḇesi, siwafya eḇedari ras roḇ sinadi kuker sne ḇesiper. Ma snar kakyar ani, iso ḇeḇedari kawasa Yahudi sya sḇuksof aya o wairek Agripa. ⁸ Snaro mkokara Allah ipok ḇa fa ḇyaws snonkaku ḇemar sya? ⁹ Yar aḇiḇer ani kyaku rariso wer ḇape aya kada yakara, fa yasampum bos beri snonsnon Yesus ro Nazaret. ¹⁰ Sasampum anine yafruri kako ro Yerusalem. Yun kawasa ḇesren ansi kwar fa sismai ro bui monda ḇa, ḇoi rofyor yasma samambraḇ ro mananir imam-imam, yamarisen kako insa sismai samamyai marmar. ¹¹ Ro rum nadi sena yaprer si ma yaḇeyaw-yaw insa sfamyun kakyar sena ma kuker masasor mankenem yayom si isof mnu-mnu ro sup amber." ¹² "Kuker roi ḇeradine, fafisu yasma papoik ḇemnis ma fararur ro mananir imam-imamsya fa yara ḇe Damsyik, ¹³ ro nyan ya faduri knikoḇama, o wairek Agripa, ro orkok pandaf yamam sasnai ḇeba oso isnai syadi sasnai ori, dado ker nanki fa iyar aya ma min ḇeso ro mararan ayedi sya. ¹⁴ Inkosapi kam ma yamnaf mkaren oso ikofen faro aya ro wos Ibrani: ’Saulus, Saulus, snaro bewayam aya? Kandera faro au fa rwos ro mankarmomen.’ ¹⁵ Ḇape yakarem: ’Manseiso au, o Manseren?’ Manseren ikofen: ’Aya ine Yesus bewayam ya. ¹⁶ Ḇape knikine, wakḇok ma wores. Yafasnai mankundaya faro au insa yaḇeasas au fa bemanfamyan ma besaksi ro roi ḇeḇor mam kwar ro aya ma roi ḇeḇor nari yafasnai wer faro au. ¹⁷ Nari yakimfir au ro fandu er ine ma er-er ḇeso si. Ma nari yawan au faro si, ¹⁸ insa simkasna nbas ma skaḇer ro panpanya ḇe isnai ya ma ro samambraḇ Ibiris faro Allah, insa kuker kakyar sena faro aya sisma ampon ro sasar ma saksma rarwas ro rosai ḇefasos faro snonkaku ḇesren kwar.’ " ¹⁹ "Inja, o wairek Agripa, ro mamam ḇeraker nanki ani eḇedari nari yamnai ḇa. ²⁰ Ro randak ya yaḇaryas faro kawasa Yahudi ro Damsyik, ro Yerusalem ma sup Yudea ḇesiper, ma kako faro er-er ḇeso insa simbror ma skaḇer faro Allah ma sifrur fararur ḇemnis kuker marandor sena. ²¹ Snar roi yakofen nane naiso ḇefnai fa kawasa Yahudi sfor aya ro rum Allah ma siḇe smun aya. ²² Ḇape snar fafnoḇek ro Allah, yakenem isof knikine ma yaḇesaksi faro snonkaku kasun ma ḇeba. Ma rosai yaḇaryas na naḇese ḇa bur rosai ḇepon iwara nabi sya ma Moses sḇaryas kwar, ²³ isoine, mboi Wairek nari isma kandera ma iso ḇeyiḇer ḇepon ro ḇemar sya, ma nari iso ḇeḇaryas isnai ya faro er ine ma faro er-er ḇeso." ²⁴ Rofyor Paulus ikofen wos anna kam fa ḇyuk karem fararur ḇyedi, Festus dawos kuker mkaren ḇeba: "Paulus, swawo! Wawasya fas-fas nabor nafrur fa swawo." ²⁵ Ḇape Paulus kyarem: "Yasawo ḇa, o Festus ḇepyum! Yawos napnapes ya kuker swaruser ḇeknon. ²⁶ Wairek ikako ifawi roi ḇeḇor nane kam, rarirya yamku ḇo yawos pdef kuker sananai faroi. Yafawi kaku roi oseroḇa fa wairek dakfawiḇa snar roi ḇeḇor nane neḇefrur ro moḇ ḇeḇeursḇa ḇa. ²⁷ Agripa wakyarke faro nabi-nabisya? Yafawi kaku wakyar faro si." ²⁸ Wairek Agripa kyarem: "Kero kada wun sneri fa yakḇe Kristen!" ²⁹ Paulus kyarem: "Yamarisen yanadi faro Allah, insa fasaw roḇa fyoro muma werer ḇa ḇoi, kawasa ḇeryur kam ro dine ḇo ḇemnaf wos yakofen nane simnis kam kuker aya ḇoi wanka sine sidawer." ³⁰ Raimnai wairek iyori ma gubernur Feliks kuker Bernike ma kawasa ḇeso kankain ansi. ³¹ Fafisu sisasyar ya sikofen yae faro si ḇo soḇo: "Snon ani ifrur sasar oso ḇa fa ifnai faro samamyai marmar roḇa samamyai bui." ³² Agripa ikofen faro Festus ḇo doḇo: "Snon ani dor mankara Kaiser ḇa kada iḇye ḇyeḇesasyar."

¹ Rofyor sawos namuk kwar, nari nkayun ḇe Italia, inja Paulus fnoḇek ḇesmai ono ḇeso sḇeḇeḇuk faro mananir sordade ḇenir Yulius ro sarar Kaisar. ² Nkek kapal oso beraker Adramitium ḇeyayun ḇesaw ḇeḇor kam ro siser Asia, ma nkosyoḇ. Aristakhus, snon oso ro Makedonia ḇeraker Tesalonika, iso nko. ³ Ro meserdi nkorande ro Sidon, Yulius ḇyeaḇaḇen faro Paulus ma ḇyuk fa Paulus isrow bati ḇyesi, insa sifnoḇek i ro fandun ḇyena. ⁴ Snar nkosor wam ya inja nkayun ro dia nkosye siser Siprus. ⁵ Ma rofyor nkunuk soren ro ḇarḇun Kilikia ma Pamfilia, nkofyafer ro Mira, ro supya fyor Likia. ⁶ Ro dia mananir sordade nkoḇedi isrow kapal oso beraker Aleksandria ḇeḇe ḇeyayun ḇe Italia. Inja nkek ro kapal ani. ⁷ Nkayun ras ono kwar, ḇape nkorurenḇa ma kuker kandera nabor nkosnefer ro Knidus. Snar nkosor wam ya ḇesya kwar, nkosye siser Kreta ma nkunuk irew Salmone. ⁸ Kuker kandera nabor nkarḇai irew ani, nkofyafer ro moḇ oso ḇenirḇe Saw Ḇeḇye, fanam mnu Lasea. ⁹ Rarirya fafisu nabor nasyof kwar. Fafisu farfor ya kako isyonde kwar ma kandera kaku rofyor kayun pdef. Rarirya Paulus ḇyuk swarepen faro si, ḇo doḇo: ¹⁰ "Naek srar, yamam, ayayun koḇedine nari dun kandera ma fromo ḇeba, faro papus ma kapal ya dererḇa ḇoi faro nyawa koḇesi kako." ¹¹ Ḇape mananir sordade ikyar syadi faro manfara ma manwadwa ro Paulus wos ḇyena. ¹² Snar saw ani ipyum ba fa nkopyar ro dia ro fafisu prim ya, inja ḇeḇor sya simarisen fa nkayun pdef ma nkoḇesewar fa nkosun ro mnu Feniks fa nkopyar ro diwa ro fafisu prim ya. Mnu Feniks irya saw oso ro myos Kreta, ḇekarḇe ḇar wambarek-wambrei. ¹³ Ro fafisu ani wam ḇeso mararai ikḇun ker ḇar wambraw. Skara ḇo soḇo, marisen sedi nari sisma. Spaw yor ya, ma nkayun fanam kaku ma nkosye siser Kreta. ¹⁴ Ḇape fyoro ḇa wam ḇeso munbun ro myos ani ḇyewam doḇer, sorḇe "Wamurem-wambrei." ¹⁵ Kapal ani wamya myuni ma syambraḇ fa syor wamya ḇa. Rarirya nkomam monda kapal ani ḇo ikren-ikḇar. ¹⁶ Ḇarpur nkoki isof ro myos mkun ḇenirḇe Kauda, ma ro dia kuker kandera nabor nkopaw wai bewaduren ro kapal ani. ¹⁷ Ma rofyor wai ḇewaduren ani ḇyeḇepaw kwar ḇe kapalya bori, raimnai sfasos dera ḇefnoḇek ma sparar kapal ani kuker kaḇrai. Ma nkomkak nkoder ro ureḇ Sirtis, inja skokyu sarwir na ma kapal iki idamdamen. ¹⁸ Snar nkokren-nkokḇar fafayaḇa ro doḇer ani, inja ro meserdi sisawen papus ḇero kapal ani ḇesoren. ¹⁹ Ma ro ras ḇeḇekior ya sisawen dera-dera kapal ya. ²⁰ Ma ro ras ri ḇeso kwar iḇye ori ma mak sya sḇayir ḇa, ma wam doḇer ḇeba ani myun nko ḇesya kwar, isof kakyar nkoḇena namuk ma nkosma nyan faspar oso ḇa kwar. ²¹ Snar sinan ḇa ro fafisu ono kwar, inja Paulus dores ro fandu si ma ikofen: "Naek srar rofyor mkoso wos ayena kada, insa kayun bur awer Kreta, nari kosma kandera ma fromo ḇera dine ḇa! ²² Ḇape knikine, yaḇuk swarepen faro mko kako ro kandera ine, insa mkosnemna nako, snar oso ro mko nari ryoḇa derer kapal ine. ²³ Snar roḇandi Allah malaikat ḇyedi oso, isoine Allah yasyom ma ḇena aya, dores fanam aya, ²⁴ ma ikofen: Paulus, wamkak awer! Nari wores ro ḇarpon Kaisar; ma kaku ḇeri snar Allah ḇaḇenaḇye ḇyedi, inja snonkaku ḇefnoḇek au ro kapal ine sya kam nari sisma faspar. ²⁵ Inja yakyar mkosnemna naknon snar nari roi malaikat ya ikofen faro aya nari ndarirya. ²⁶ Rariryano ḇape kapal ine nari koḇei fa iryor ro myos oso." ²⁷ Ro roḇ ḇeḇesamfur seser rifiak nkoisya inkoki nkoraryoi kaker ro soren Adria. Ḇape indokada ro romfawru ḇefararur ro kapal sya sḇaḇir nkofanam ḇeḇande. ²⁸ Inja sikyu karui kara ma sisma rof samfur risuru. Siki swaf wer sikyu kara wer ma sisma rof samfur seser rim. ²⁹ Ma simkak ḇude, nkoder ro irbor oso inja sikyu yor rifiak ro kapal ya urndi, ma nkosaw kaku meser fasaw. ³⁰ Ḇape ḇefararur ro kapal sya ssewar nyan fa sibur kapal ya. Sisabu wai bewaduren sifrur farari siḇe sisawen yor ono ro kapal ya rawndi. ³¹ Inja Paulus ikofen faro mananir sordade ma sordade ḇyesi: "Rofyor skain ro kapal ineḇa nari mkosma faspar ḇa." ³² Rarirya sordade ansi siwapuk kabrai wai ḇewaduren ani fa ipyar iki. ³³ Ro fafisu isnai karkir Paulus dembuk si kam fa sanan, ḇo doḇo: "Ras samfur seser rifiak kwar mko waf-waf monda ma mko farmku basbiser ma mkonan ba. ³⁴ Inja yaḇuk swarepen faro mko, insa mkaknan resari. Nanan ani ḇyefandun kaku ro faspar mkoḇedi. Snonkaku oser ro fandu mko snonburyam ḇyena oser ipok kyapas bur ḇruriḇa." ³⁵ Dawos rarirya kwar dun mamami, ikofen kasumasa faro Allah ro ḇarpon sedi kam, pyanasnis na raimnai dan ḇepon. ³⁶ Rarirya kawasa ansi sisma sambraḇ ma sakan kako. ³⁷ Dandonek nkoḇedi kam ro kapal ya utin risuru samfur rifik seser ri wonem. ³⁸ Sanan isof sarbor kwar, sisawen roḇean gandum ḇesoren insa kapal ani myanan. ³⁹ Rofyor isnai kam kwar, smam dorei ḇepyom oso. Sifawi pyum sup aniḇa ḇape skara kwar fa siryor kapal ani ro dia. ⁴⁰ Rarirya sper kaḇrai yor anna, ma sibur na ro soren. Ro fafisu ani sper kaḇrai ro remis ya ma sbawes sarwir ḇeba ya insa wamya dun kapal ani ḇeḇande. ⁴¹ Ḇape kapal ani dunuk ro ureḇ oso, ma kapal ani ider. Rawndi ssyun ro ureḇ ani isof imarmer ḇa ḇoi urendi risen ḇeba nbaser i rao fyarmambriwer. ⁴² Rofyor ani sordade-sordade ansi skara fa soḇo smun besmai ansi, insa oso das ibur awer. ⁴³ Ḇape mananir ani imarisen fyaspar Paulus. Inja damrer swaruser sordade ansi sena, ma ḇyuk sasoser, insa ḇefawi ḇeas sya snur ḇeḇande, ⁴⁴ insa ḇeso sya snur user kuker kambafen ma kapal ya ker-ker na. Rarirya sikam srande kuker ḇayaye.

¹ Rofyor nkorande kwar kuker ḇayaye, insape nkofawi, sup ani kada myos Malta. ² Kawasa ḇekain ro myos ani senaḇye faro nko. Sikaḇen for ḇeba oso ma sembuk nko fa nkodapen for ani snar mekem ya iḇe imyun ma pnunek ya iba. ³ Fafisu Paulus iryur ai snaw-snaw ono fa ḇyuk kaḇen for ya, ikak ḇeknampu oso isasyar ro moḇ ani ma darek Paulus ḇrasi. ⁴ Rofyor snonkaku ansi smam ikak ḇekur ro Paulus ḇrasi ani, sawos yae si ḇo soḇo: "Snon ine snon mamun dirya, snar, isma faspar kwar ro soren, ḇape Karwar Napnapes ḇyuk fa ikenem ḇa." ⁵ Ḇape Paulus kyekef ikak ani ḇefor ya dori, ḇoi isyur ikak ani ḇa. ⁶ Rarirya skara ḇo soḇo, nari ḇrasi iḇyar roḇaido nari imar ḇo isapi ro fafisu ani beri. Ḇape siwaf fyoro kwar, ma smam royo ḇa ḇekuri, inja skara wer ḇo soḇo karwar oso irya. ⁷ Swafoḇa ro moḇ ani kosma gubernur ro myos ani saprop ḇyedi. Gubernur ani snori Publius. Isrow nko ma fyan nko pyum kaku ḇeras rikior. ⁸ Ro fafisu ani Publius kmari isam ma isar. Paulus syun ro sim ḇyedi; Paulus ḇyenadi ma isawar dofen i ma ḇyuk pararei faro i. ⁹ Snar roi ḇeḇesya ani ifnai fa ḇeduf ḇeso ro myos ani sra faro Paulus ma ifrur si fa siprei kako. ¹⁰ Kawasa ansi semaf nko ma rofyor nko syoḇ ro dia, sfasos roi ḇeḇaryam faro nko. ¹¹ Ḇarpur ro paik rikior nko syoḇ ro dia nkek kapal beraker Aleksandria ro fafisu primya ḇepyar ro myos ani. Kapal ani ḇyekakop Dioskuri. ¹² Nkosma rande ro Sirakusa ma nkokain ro dia beras rikior. ¹³ Ro dia nko sye siser, ma nkorande ro Regium. Ras oser posa wambraw ya iso ma ro ras ḇeḇesuru ya nko rande ro Putioli. ¹⁴ Ro dia nko srow kina-kina jemaat, ma raris fararyor sedi nkokain nus si ḇeras rifik. Posa kwar nkosyoḇ ḇe Roma. ¹⁵ Naek srar ḇekain ro diwa simnaf nko kwar ro roi ḇekur nko inja srama sisrow nko isof ro Forum Apius ma Tres Taberne. Rofyor Paulus myam si, ikofen kasumasa faro Allah ma isma samambraḇ ro sneri. ¹⁶ Nkora kwar ro Roma, ssḇuk faro Paulus fa kyain ro rum mankundi ḇyedi kuker sordade oser ḇewareni. ¹⁷ Ḇarpur ro ras rikior Paulus dor snonkaku ḇebarara er Yahudi ma rofyor siryur kwar, Paulus ikofen ḇo doḇo: "Naek srar, yafawi yafrur sasar oso faro er koḇesi ḇa roḇaido rari kpu koḇesi sena ḇa, ḇesyaḇo sfor aya ro Yerusalem ma sḇoḇ aya faro kawasa Roma. ¹⁸ Rofyor skukeḇ aya kwar, simarisen sisasyar aya, snar sisma sasar oso ḇaḇeri ro aya ḇefasnai yasmai samamyai marmar. ¹⁹ Ḇape kawasa Yahudi sisampum si inja yakarai ipyum syadi yek mankara faro Kaisar, ḇape kuker karkara ḇa fa yaḇuksof er ayedi. ²⁰ Knam ine iso yor mko muma, insa yamam mko ma yawawos kuker mko, snar kakyar kawasa Israel eḇedari sfes aya kuker wanka ine." ²¹ Ḇape sikofen faro i soḇo: "Nkosma syap ono ro Yudea ḇa ḇekofen ḇadir au ma naek oso ryama ikofen ḇadir roi ḇesasar ro au faro nko ḇa. ²² Ḇape nko marisen nkomnaf ro au, rariso swaruser ḇena, snar nko fawi ro ḇar ine, ro moḇ nakam kako ifnai famfaḇri." ²³ Raimnai sap ras oso faro Paulus. Ras sap ani srama kuker dandonek ḇeba ḇemoḇ Paulus ḇyeryar roya. Ḇyuk fasasnai ma kesaksian faro si ḇekur Ḇaḇesasoser Allah; ma knam ro Moses sasoser ḇyena ma syap ro nabi-nabi ḇyesewar fa insa sifawi ro Yesus. Wawos ani ro arwo isof mandira. ²⁴ Ono sikyar wos ḇyena ḇoi ono kada sikyar ḇa. ²⁵ Fananjur ani sibur ḇesisye kuker sna swaruser oser ḇa ro fandu si. Ḇape Paulus ikofen kako wos ine ḇo doḇo: "Kyurbos beri Rur Ḇesren ya wos ikofen faro kpu koḇesi kuker sḇayo Nabi Yesaya: ²⁶ Mkora faro er ine, ma mkokofen: ’Nari mkomnaf kuker knaram mkoḇesi, ḇesyaḇo mkokara ḇa, nari mkomam kuker mkamor mkoḇesi, ḇesyaḇo mkofawi ḇa. ²⁷ Snar er ine sisnesna nedip kwar, ma siknasna nadiw, ma simkasna nenef; insa smam awer kuker simkasna ma simnaf awer kuker siknasna ma sifawi awer kuker sisnesna, isof skaḇer ma yaḇuk pararei faro si.’ " ²⁸ "Inja insa mkofawi, korer ḇeraker Allah ani nari ḇyeḇeḇaryas faro er-er ḇeso ma nari simnaf i." [ ²⁹ Ma Paulus dawos rarirya faro si kwar, kawasa Yahudi ansi sibur ḇesisye kuker sna swaruser oser ḇa ro fandu si.] ³⁰ Ma Paulus kyain wampasi wambarek risuru ro rum mankundi ḇyakwarek ya; snonkaku ḇeḇor ḇerama faro i sya isrow si. ³¹ Kuker isnai kaku ma royo idwarek ḇa ḇyaryas Allah Ḇaḇesasoser Ḇyedi ma ḇyuk farkarkor ḇekur Manseren Yesus Kristus.