2 TIMOTIUS

¹ Ro Paulus, manwawan Yesus Kristus snar Allah marisen ḇyedi yaḇaryas asas ro kankenem kuker Yesus Kristus, ² faro Timotius, romawa karyer ayedi: saswar-fakamaman, ḇaḇye ma aski ro Allah Kmaya ma Yesus Kristus Manseren koḇedi, ryous aw kada. ³ Yakofen kasumasa faro Allah, yuffarmyan kuker sneuser ḇesren imnis raris up ayesi sifrur kwar. Ma yaswarepen aw ḇesyakwar ro fararyor yena, ro roḇ ma meser. ⁴ Ma rofyor yaswarepen mkaru ḇena, yamarisen fayasrow aw wer kuker marisen. ⁵ Snar yaswarepen kakyar ḇesrendam bedi, isoine kakyar ḇekenem randak ro kpumi Lois ma ro snami Eunike ma yakyar naisya ro mankundaw kako. ⁶ Eḇedari yaḇuk swarepen faro aw rofyor yasawardofen aw fabaryas fakamaman Allah ḇero awya. ⁷ Snar Allah ḇyuk rur ḇemakakak maro koḇa, mboi rur ḇeḇawes samambraḇ, saswar ma ḇaḇeawnos. ⁸ Inja wamsik ma besaksi Manseren koḇedi ma wamsik kako snar aya, snon ḇesmai ro bui snar Yesus Kristus, mboi wakḇe kandera faro Ankankinem Ḇeḇye ḇyedi kuker Allah samambraḇ ḇyedi. ⁹ Allah iso ḇeḇuk koreri ḇeko ma ḇeyor ko kuker fararyor ḇesren, ḇeḇeknam ro fararur koḇena ḇa, mboi ḇyeknam ro kakara ma saswar-fakamaman mankundi ḇyena, ḇeḇuk ḇeko kwar ro Yesus Kristus ro awarmadero ḇaimya. ¹⁰ Ma baboine ḇyeḇefasna snar rarama Yesus Kristus ro Ankankinem Ḇeḇye ḇeḇuk korerima ḇeko, ro papoik marmari kwar ma ḇeyun kankenem ḇekain fyoroya. ¹¹ Snar Ankankinem Ḇeḇye ine yaḇe ḇefasna imnis manbaryas, imnis manwawan ma imnis guru. ¹² Eḇedari yasma kandera kukerna kam, ḇape yamai ḇa; snar yafawi manseiso yakyarya ma yakyar nari ipok fyaduru rosai ikyar kwar maḇeaya isof ro Ras Ḇepupesya. ¹³ Waserepen roi ḇeḇor wamnaf kwar ro aya imnis fasasna faro farkarkor ḇeḇye ma wafrurna kuker kakyar ma saswar snar Yesus Kristus. ¹⁴ Faduru arasai ḇeḇye, sikyar kwarma ḇeko, ro Rur Ḇesren ḇekain ro kosnesna. ¹⁵ Wafawi kwar mboi sikam ro supya mnuk Asia-Kasun si susubur aya; rarirya kako Figerus ma Hermogenes. ¹⁶ Manseren ḇyuk ḇaḇye ḇyedi faro Onesiforus kina ḇyesi snar rarwan riḇeso kwar ifrur sneprei aya. Imai ḇa ryakaki aya ro bui. ¹⁷ Fafisu aya isya ro Roma, syewar aya ma isrow aya kako kwar. ¹⁸ Ma ro Efesus ifnoḇek aya nabor kwar. Roi ḇeradinena wafawi kwar. Manseren fyasna ḇaḇye ḇyedi faro i ro Ras Ḇepupesya kada.

¹ Inja, ne, romawa yedi, swambraḇ ro saswar-fakamaman ro Yesus Kristus. ² Rosai wamnaf ro aya kwar ro saksi ḇeḇor, farkorna kada faro snonkaku wakyarsya, ma sifawinanem kako sakfarkor snonkaku ḇese. ³ Mkoso ma mkakḇekandera imnis sordade ḇeḇye ro Yesus Kristus. ⁴ Rofyor sordade oso ḇyesewar ro fararur ma ḇyefandun ḇaḇefandun mankundi ḇyena ḇa, rarirya mananir ro sarar ḇyedi imarisen. ⁵ Snonkaku oso ḇefaḇri ro farfnak syewar monda faisma wower rofyor isomnis sasoser ḇekur farfnak ani. ⁶ Manfrudo oso ḇefararur myaren ro yaf iso nari ḇeyan ḇepon pun ro ardomes ḇyena. ⁷ Waswarepen rosai yakofen nane; Manseren nari ḇyuk fawawi faro aw ro roi ḇeḇor kam. ⁸ Waswarepen: Yesus Kristus ḇekḇok kwar rofandu ḇemarsya, ḇyeḇeyaḇen kwar imnis up ro Daud, iso yaḇaryas ro Ankankinem Ḇeḇye ayedi. ⁹ Snar ḇaḇeḇaryas Ankankinem Ḇeḇye ine eḇedari yaḇekandera, ma sewanka aya imnis snonkaku ḇeḇarḇor oso, ḇape Allah wos ḇyedi kada ḇyeḇeḇewanka ḇa. ¹⁰ Eḇedari yakbaḇ ḇo yaḇarna kam faro snonkaku Allah kyinfirsya, insa si kako saksma koreri snar Yesus Kristus kuker ḇaḇebaba ḇyedi ḇekain fyoroya. ¹¹ Kaku ḇeri ro wos ine: "Rofyor komar fnoḇek i, ko kako nari kokenem fnoḇek i; ¹² Rofyor kofarmku, ko kako nari kakḇuk sasoser fnoḇek i. Rofyor ko famyun i, i kako nari dakfamyun ko. ¹³ Rofyor komkuser ko ḇa, i kada imku faswef, snar nari fyamyunepen mankundi ḇa." ¹⁴ Buk swarepen ma wanun nakam kuker kaku ḇeri faro si ro Allah ḇarpon ḇyedi, insa spambarḇar wos awer, snar roi ḇeradine nefainda ḇaḇeri, isyadi naser famfaḇri faro ḇemnafsya. ¹⁵ Besewar insa wasyus ro Allah ḇarpon ḇyedi imnis snon oso ḇemai ḇa, mboi baryasbos wos ḇenapes ani. ¹⁶ Ḇape wamnaf awer faro wos ḇekaku ḇa ma ḇemamasna. ¹⁷ Wawos sena naduḇ imnis dafduf kanker: Rofandu si Himeneus ma Filetus su kako, ¹⁸ ḇeḇor kwar ro nyan ḇenapesya ma ḇefarkor mboi kuker ḇaḇeaḇiḇer ro bakenya isyof kwar ma rarirya skokok kakyar ro snonkaku ono. ¹⁹ Ḇape araref Allah ryirya idworen ma sfas ro araref ani radine: "Manseren ifawi snonkaku ḇyesi" ma "Snonkaku oser-oser ḇeyap Manseren snonsnon ḇyedi isusubur ḇarḇorna kada." ²⁰ Ro rum ḇebaya dori kosma dera brawen ma sarak monda ḇa, mboi ono kako ro ai ma saprop; kona ono faro roi ḇeḇye syadi ma kona ono faro roi ḇeḇye mankenem ḇa. ²¹ Rofyor snon oso fyasren mankundi ro roi ḇeḇarḇor, nari ḇyedera ro rum ani faro roi ḇeḇye syadi, ḇyeḇefasren, ma ḇyefainda faro tuan ḇyedi ma ḇyeḇefasos faro fararur rosai ḇeḇye syadiya. ²² Fanam awer marasrisen ḇeḇerarmomen baken ro snonkborsya, mboi swewar ḇaḇenapnapesya, ḇaḇefarmkuya, saswar ma aski fnoḇek snonkaku ḇefararyor faro Manseren kuker sne ḇesrensya. ²³ Fanam awer wawos ḇeḇor ro snonkaku ḇefawi royoḇasya. Snar wafawi roi ḇerarirya nbawes rakrakrok, ²⁴ snar Manseren manfamyan ḇyesi nari srakrakrok ḇa, mboi sfafir faro snonkakusya kam. Ifawi ḇyuk farkarkor, ikbaḇ ²⁵ ma kuker aḇaḇen fyarkin snonkaku ḇesampampumsya, snar kofawi ḇa imbude Manseren ḇyuk farosi fafisu ono fasimbror ma fyarkin si isof smamḇaḇir ḇaḇenapnapesya, ²⁶ ma rarirya nari sḇaḇir wer, nari sḇeḇeperbur Ibirisya denem ḇyedi ḇeyaḇek si kwar kuker marisen ḇyena.

¹ Mkofawi mboi ro ras ḇepupesna nari ndama kuker kandera nabor. ² Snonkakusya nari siswar mankunsi ḇardi ma sewomen faro pipi. Nari sḇemandaw ma simarares mankunsi, sanonef, nari sisampum sinansya ma sifawi sikofen kasumasa ḇa, sfandun ḇar rurya ḇa, ³ sifawi saswar ḇa, simewer ḇaḇeaskiya, simarisen skoryae snonkaku, sfarmkuepen mankunsi ḇa, siḇarḇor, simewer roi ḇeḇyena, ⁴ simarisen sḇoḇ min sesi, skara nakwan ba ma simarares si, siso syadi rmomen-nafsu sena ro siso Allah. ⁵ Sifrur ḇaḇeari sena imnis kakara snonkaku, ḇape simewer knam ro agama ani ḇardi. Inja mkofanam awer si! ⁶ Snar rofandu si ono sisya ssun fasis ḇerum snonkaku ono bese ma sidenem bin ono ḇefo kuker sasar ma ḇefo kuker rmomen bakenya, ⁷ ma simarisen sḇeḇefarkor, ḇape smambir ḇaḇenapnapesya ḇa. ⁸ Simnisbos kaku Yanes ma Yambres ḇesampum Muses, rarirya si kako sisampum ḇaḇenapnapesya. Swaruser sena ndobur si ma kakyar sena nasusu. ⁹ Inja nari sirwuren ḇa, snar simnis raris Yanes ma Yambres, ḇaḇefawawi royoḇa sena nari nfababa faro snonkakusya kam. ¹⁰ Ḇape waser farkarkor yena kwar, rariso kankenem ayedi, marisen ayedi, kakyar ayedi, kaḇaḇaḇ ayedi, saswar ayedi, ma ḇaḇenamu ayedi. ¹¹ Waso kwar ḇaḇekandera ḇaḇewayam ma kandera imnis yaḇekandera ro Antiokia ma ro Ikonium ma ro Listera kwar. Kandera anna kam yaḇarna ma Manseren fyaspar ayaburna kam. ¹² Mboi snonkaku oser-oser ḇemarisen ḇekenem ro ḇaḇeari snar Yesus Kristus nari sisma ḇaḇewayam, ¹³ mboi ḇeḇarḇorsya ma ḇesararersya sikada nari sḇarḇor syadi, sfarkor ninyan ma sḇeḇeyakḇeninyan kako. ¹⁴ Ḇape wuf faswef ro ḇaḇenapnapes wasma kwar ma wakyar ani, ma waswarepen ḇesyakwar snonkaku ḇefarkorna kwar faro aw. ¹⁵ Waswarepen kako mboi rofyor wabaḇaya mambir kwar Refo ḇeḇuk fawawinanem faro aw ma ḇefarkin aw faro koreri snar kakyar faro Yesus Kristus. ¹⁶ Fasfas ḇeḇor ḇeramuma ro Allah nbefainda kaku fakoḇuki fyarkor, koḇuki ikofen fasna ḇaḇesasarya, koḇuki ifrur mnis rari ma koḇuki fyarkor snonkaku ro ḇaḇenapnapesya. ¹⁷ Rarirya Allah snonkaku ḇyesi oser-oser sḇeḇefasos faro fararur ḇeḇyeya.

¹ Ro ḇarpon Allah ma Yesus Kristus nari bemankara snonkaku ḇekenem ma ḇemarsya, inja yanunkaku ḇeri faro aw kuker fasasna ro Allah ma Ḇaḇesasoser ḇyedi: ² Baryas Allah wos ḇyedi, fasos rofafisu ḇeḇye roḇa fafisu ḇesamswen, fasna rosai ḇesasar, wasonek ma buk ananun kuker kaḇaḇaḇ ma farkarkor. ³ Snar rofafisuya nari ryama, snonkakusya nari sisma farkarkor ḇenapes werḇa, mboi nari siryur gurusya raris marisen sena fasḇuk farkarkor raris mankunsi marisen sena. ⁴ Sikada nari snos knaram senabur napnapesya ma sḇasna faro farfyar kakais monda. ⁵ Ḇape wepen mankundaw ro roi ḇeḇor kam, wakḇaḇ ro ḇaḇekandera, wafrur fararur ḇaḇeḇaryas Ankankinem Ḇeḇye, ma wafrur posa afuffarmyan bedi! ⁶ Faro mankundaya, fafisuya ryama kwar nari yamar imnis farsarser faro Allah ma kniko wer nari yabur supswan ine. ⁷ Fanandi ḇeḇyeya yafrur posai kwar, ma yasma mun ḇepupesya kwar ma rarirya yafaduru kakyarya kwar. ⁸ Ras suine wower napnapesya ḇyeḇefasosma ḇeaya kwar nari Manseren ḇyukima ḇeaya, Mankara ḇenapes, ro ras ḇepupes ḇyedi; ḇape faro yerer monda ḇa, mboi faro snonkaku kam ḇewaf raramuma ḇyedi. ⁹ Besewar insa rwamuma fasaw, ¹⁰ snar Demas iswar supswan ine inja ibur aya. Ryai Tesalonika kwar. Kreskes ryai Galatia kwar ma Titus ryaḇe Dalmatia. ¹¹ Mboi Lukas derer i ḇekainus aya. Wun Markusi ḇo muramuma, snar afuffarmyan ḇyedi ḇyefandun kakuma ḇeaya. ¹² Tikhikus yawan i kwar ḇe-Efesus. ¹³ Rofyor rwamuma ido wun syatu ayedi ro Troas yaburi ro Karpus rum ḇyedi ma wun kako syap ayena, isyadi kaku perkamenya (aiwan kif imnis syap ḇefasapepen). ¹⁴ Aleksander, kamasan kansai ani, ifrur ḇarḇor nabor kwar maro aya. Manseren nari myunsuna imnis fararur ḇyena. ¹⁵ Inja wepen aw, snar Aleksander isampumbosḇeri farkarkor koḇena. ¹⁶ Rofyor yaḇesano ro randakya snonkaku oso ifnoḇek aya ḇaḇeri, sikam sibur aya -- roi ḇeradine sikamar awerna, -- ¹⁷ ḇape Manseren ifnoḇek aya ma ḇyuk samambraḇma ḇeaya, insa Ankankinem Ḇeḇyeya yaḇaryasi faḇeyakḇe Yahudiḇasya sakmnaf i. Rarirya yasma faspar ro marmarya. ¹⁸ Ma Manseren nari fyaspar ayabur ḇarḇorna kam. I kada nari ḇyuk aksi ḇeaya isof yasun ro Ḇaḇesasoser ḇyedi ro boiyaswa. Sanandik faro ḇaḇebaba ḇyedi fyoro-fyoro kada! Amin. ¹⁹ Aroo faro Priskila ma Akwila ma faro Onesiforus kina ḇyesi. ²⁰ Erastus kyain ro Korintus ma Trofinus yabur i ro Miletus snar iduf. Rofafisu primya ḇaim besewar farwamuma kada. ²¹ Aroo faro aw ro Ebulus, Pudes, Linus, Klaudia ma ro naek srarsya kam. ²² Manseren ryous aw. Manseren ḇyeḇok naek srar mko kam kada! Ro aya, Paulus