2 TESALONIKA

¹ Ro Paulus, Silwanus ma Timotius, faro kawasa jemaat Tesalonika ro Allah Kma koḇedi ma Manseren Yesus Kristus. ² Saswar-fakamaman ma aski-ḇaḇenaḇye ro Allah, Kma koḇedi, ma ro Manseren Yesus Kristus ryowus mko kada. ³ Naek srar, ro ras nakam nkokofen kasumasa faro Allah snar mko. Ma nkofrur rarirya, snar kakyar mkoḇena nfamfon syadi ma saswaryae mkoḇena nsambraḇ syadi rofandu mko, ⁴ isof ro Allah jemaat ḇyena mankun nkomsik snar mko snar ḇaḇefarmku mkoḇena ma kakyar mkoḇena ro kandera ma wayam ḇeḇor mkosmana: ⁵ fasasna oso ro napnapes ro Allah ḇaḇemankara ḇyedi, ḇekofen mboi mkosyus famkosun ro Allah Ḇaḇesasoser ḇyedi, snar rofafisu ine mkoḇekandera kuker Ḇaḇesasoser ani. ⁶ Snar ḇeḇenapnapes Allah nari myunsu ḇaḇewayam mkoḇena faro ḇeḇewayam mkosya. ⁷ Ma ḇyuk ḇaḇemkei faro sewayam mkoya, ma faro nko kako, rofafisu Manseren Yesus Kristus fyasna mankundi fnoḇek malaikat ḇyesi ro boiyaswa kuker papoik ḇyedi, ⁸ rofor ḇesak-ḇesber ma myunsu faro si ḇefawi Allah ḇasya ma ḇeḇeuser Ankankinem Ḇeḇye ro Yesus, Manseren koḇedi ḇa. ⁹ Sikada nari sisma samamyai raro fyoro-fyoroya, sḇinkwanbur Manseren ḇarpon ḇyedi ma ro papoik samambraḇ ḇyedi, ¹⁰ rofyor ryama ro ras ani kawasa ḇesren ḇyesya nari sisandik baba ḇyedi ma snonkaku ḇekyarsya sikandori, snar ḇaḇesaksi nkun faro mkona mkokyarna kwar. ¹¹ Rarirya nkoḇenadiwarek mko ḇesyakwar kako, insa Allah koḇedi kyara mkosyus faro fararyor ḇyedi ma kuker samambraḇ ḇyedi ifrur mnis marisen mkoḇena famkofrur roi ḇeḇye ma ḇyeimnis fararur kakyar ḇeḇor mkoḇena kam, ¹² isof snonsnon Yesus, Manseren koḇedi, isma baba snar mko ma mkosma baba snar i, imnis Allah koḇedi saswar-fakamaman ḇyedi ma Manseren Yesus Kristus.

¹ Ro raramuma ro Manseren koḇedi Yesus Kristus ma raryur koḇedi kuker Yesus Kristus nkor faro mko naek srar, ² insa mkokmom ma mkoḇeḇirḇar fasaw awer, roi ḇekur fasasna rurya, ma kako ro ḇaḇeḇararyasya roḇa sikofen ro syap nkoḇeja, ma wos ḇeyoḇo Manseren ras ḇyedi ryama kwar. ³ Rariso wer kako, imbude snonkakusya sḇeankar mkori. Snar ras ani ryama ḇaimya roi ḇeradinena ndama ḇepon resari: Ma sfasna ḇepon snonkaku ḇeḇarḇorsya fa nari simar, ⁴ isoine mbroḇ ḇekanow mankunsi syadi ro roi ḇeḇor kam sapḇe roba sisyom imnis Allah. Ma kyain ro Allah Rum ḇyedi ma imarisen fyasna mankundiḇe Allah. ⁵ Mkoswarepen ḇake roi ḇeradinena yakofenna ḇesyakwar faro mko, rofafisu aya isya yarowus mko? ⁶ Ma baboine mkofawi rosai ḇeḇriwareki, isof nari insape fyasna mankundi rofafisu sfasna faro iya. ⁷ Snar kuker kankunes ḇarḇorya irandak ifararur kwar, ḇape baboine oso isya idwarek. Rofyor ḇedwarek ani sḇeifa ikren kwar, ⁸ rofyor ani ḇeḇarḇor ani nari fyasna mankundi, ḇape Manseren Yesus nari myuni kuker sḇayo ḇyedi faimar, rofyor Manseren Yesus kyaḇer muma werya. ⁹ Raramuma ro ḇeḇarḇor ani ikada fararur ro Ibirisya, ma nari ifrur ḇaḇekanandor nabor, aḇyair-aḇyair ma aḇyair kanandor ḇekaku ḇa. ¹⁰ Ma nari ifrur ankarsararer ḇeḇor faḇyukḇeninyan snonkaku rawo isof nari simar, ma simar snar simewer siswar ḇaḇenapnapes ḇeḇuk koreri faro siya. ¹¹ Eḇedari Allah ḇyuk papoik oso fadun siḇe nyan ḇeḇor, isof sikyar faro roi ḇeḇeankarkar. ¹² Ḇarpurya snonkaku ḇemarisen ḇaḇeḇarḇorya ma simewer sikyar faro ḇaḇenapnapesya nari sisma samamyai. ¹³ Ma nari nkokofen kasumasa ḇesyakwar faro Allah snar mko, naek srar, Manseren iswar kaku, snar ro randakya Allah kyinfir mko kwar famkosma koreri kuker Rur ḇefasren mko ma ro napnapes mkokyar ani. ¹⁴ Eḇedari dor mko kwar kuker Ankankinem Ḇeḇye nkoḇaryas ani, insa mkaksma ḇaḇebaba ro Yesus Kristus, Manseren koḇedi. ¹⁵ Inja mkores nako ma mkufepen farkarkor mkosma ro nko kwar, ma kuker wos roḇa wer kuker fas-fas. ¹⁶ Ma Allah, Kma koḇedi, kuker Manseren Yesus Kristus, saswar-fakamaman ḇyena iswar ko kwar ma ḇyuk ḇeko sneprei ḇekain fyoro ma saneraro ḇeḇye maḇeko, ¹⁷ ma nbuk sneprei ma samambraḇ faro mko ro fararur mkoḇena kada, fnoḇek awawos ḇeḇye ro kakyarya.

¹ Inja, naek srar, mko ḇenadiwarek nko, insa Manseren wos ḇyedi irwuren ma imbran kuker payamyum rofandu mko. ² Ma insa nkosma faspar ro ḇefrur fafardun ma snonkaku ḇeḇarḇor, snar snonkakusya saksma kakyar kam ḇa. ³ Manseren ikada i kaḇaḇaḇ. Nari ḇyuk samambraḇ ma i ḇriwarek mko ro ḇeḇarḇorsya. ⁴ Ma nkokyar faro Manseren, mboi rosai nkanun faro mko kwar, nari mkofrur pdefna. ⁵ Ma Manseren ikfin mko faswef rarirya ḇesyakwar faro Allah saswar ḇyedi kada, isof Kristus kananon ḇyedi. ⁶ Ḇape nkanun faro mko, naek srar, kuker snonsnon Manseren Yesus Kristus, insa mkoḇinkwanbur naek ono ḇefrur fararur sena ḇa ma ḇeḇeuser farkarkor mkosma kwar ro nko anna ḇa. ⁷ Snar mankun mkofawi, rariso nari mkoso kankenem nkoḇena. Rofyor nkoisya rofandu mko nkofararur myaren kaku. ⁸ Ma nkan snonkakusya roḇeyan sena waworek ḇa, mboi nkoḇesewar rawo nkardomes ro roḇ meser, insa nkofrur kandera awer oso ro mko. ⁹ Nkosma hak fankor fafnoḇek faro naek srar kako, ḇape nkor ḇa, snar nkomarisen nkoḇe fasasna faro mko, insa mkoso fasasna ani. ¹⁰ Snar, rofyor nkoisya rofandu mko kako, nkoḇuk swarapepen ine faro mko kwar: Rofyor snonkaku oso imewer ifararur, dakanan awer. ¹¹ Nkokofen radine snar nkomnaf, mboi ono sisya sikenem kuker aunosḇa ma sifararur ḇa, mboi ssombirek kuker roi ḇeḇefandun ḇa, ¹² snonkaku ḇerariryasya nkoḇuk swarepen ma anun kuker Manseren Yesus Kristus, insa siknon ma sifrur faswef fararur sena ma rarirya nari sanan ro mankunsi. ¹³ Ma mko, naek srar, mko papum fasaw awer mkofrur fararur ḇeḇye. ¹⁴ Rofyor snonkaku ono simewer simnaf rosai nkokofen ro syap ine, mko kakop si (mko fasepen si) ma mkokenem awer kuker si, insa simai, ¹⁵ mboi mkokara si ḇembroḇ awer, ḇape mkosonek si imnis naek mkoḇesirya. ¹⁶ Manseren ḇeḇeknam aski-fakamaman, ani ḇyuk aski-fakamaman ḇyedi ro roi ḇeḇor kam, faro mko kada. Manseren ryowus mko kam kada. ¹⁷ Aroo ro aya, Paulus. Aroo ine mankundaya yafas ḇardi. Ine aḇyair ro syap ḇeḇor ayena. ¹⁸ Ma saswar fnoḇek fakamaman ro Manseren koḇedi Yesus Kristus, ryowus mko kam kada! Ro nko, Paulus, Silas ma Timotius