2 PETRUS

¹ Ro Simon Petrus, manfamyan ma wawan Yesus Kristus, faro si ḇefnoḇek kuker nko ḇesma kakyar snar Allah ḇenapes ma Yesus Kristus Ḇeḇuk korerima ḇeko. ² Saswar-fakamaman ma aski nabor faro mko ḇemamḇaḇir Allah ma Yesus, Manseren koḇedi. ³ Snar Allah papoik ro ḇaḇe-Manseren ḇyena ḇyukma ḇeko kwar roi ḇeḇefandun nabor faro kankenem ḇesren snar mamamḇaḇir koḇena faro i, ḇeyor ko kwar snar papoik baba ma ḇaḇye ḇyedi. ⁴ Kuker nyan ani ḇyuk maro ko kwar ḇaḇeasas ḇeḇemaeja ḇeba kaku, insa kukerna mkun rarwas ro papoik ḇaḇe-Manseren, ma mkokfisbur rmomen-nafsu supswan ḇeḇuk raro faro mko. ⁵ Rarirya mkoḇesewar kaku ḇeri famkofamfon kakyar ḇeḇye mkoḇena, ma faro fawawi ḇeḇye, ⁶ ma faro fawawi farmkuwarek mankun, faro ḇriwarek farmku mankun, ma faro ḇaḇenamu sarandenya, ⁷ sarandenya isoine mkokenem kuker ḇeḇeuser Allah marisen ḇyedi ma mko ḇeḇefasos kuker saswar faro naek srar min Kristensya. Saswar mkoḇedi faro min Kristen fnoḇek kuker saswar faro snonkaku kam. ⁸ Snar rofyor roi ḇeḇor nane kam naisya ro mko, nari nafrur famkomyaren ma mkoḇuk bon mamamḇaḇir faro Yesus Kristus, Manseren koḇedi. ⁹ Ḇape mansei ḇeyakna roi ḇeḇor nane kam ḇasya, sipraf ma siḇor, ma sepro mboi sasar ḇepon sena neḇepyos kwar. ¹⁰ Eḇedari naek srar ayesi, mkoḇesewar kaku ḇeri, insa fararyor ma kankinfir mkoḇena nadworen syadi. Snar rofyor mkofrurna, nari mko karkar ḇa. ¹¹ Rarirya nari ssḇuk syadi faro mko nyan famkaksun ro Ḇaḇesasoser ḇekain fyoroya, isoine Manseren Ḇaḇesasoser ḇyedi ma Ḇeḇuk korerima ḇeko, isoine Yesus Kristus. ¹² Inja yakara ḇesyakwar fayaḇuk swarepen faro mko ro roi ḇeḇor anna kam, mboi mkofawina kwar ma mkodworen ro napnapes mkosma kwar. ¹³ Rofyor yakenem kaker, yakara fararur ayedi fayaḇuk swarapepen faro mko ro roi kokofen nane. ¹⁴ Snar yafawi, nari fyoro ḇa yabur supswan ine, snar Manseren koḇedi Yesus Kristus ikofen kwar maḇe aya. ¹⁵ Ḇape nari yaḇesewar, insa yabur kwar ido mkoswarepen nakam ḇesya kwar. ¹⁶ Snar nkoso farfyar kakais fararur snonkaku ḇa, rofafisu nko ḇaryas faro mko baba ma rarama Manseren koḇedi Yesus Kristus. Baba Kristus ani nkomam i kwar. ¹⁷ Nkoḇesaksi, rariso isma ḇaḇesyowi ma baba ro Allah Kmaya, rofafisu mkaren ryama faro i ro Allah mankundi, ḇekofen: "Ine kada Rumkun yedi yaswar kaku, yamarisen kuker i." ¹⁸ Mkaren nkomnaf ryamaker boiyaswa, rofyor nkowarpu i ro bon ḇesrenya bori. ¹⁹ Rarirya nkosma samambraḇ syadi wer ro Allah wos ḇyedi nabisya sḇaryas kwarna. Mkoswarepenna imnis raris mkoswarepen paramrom ḇesnai ro moḇ ḇepampan isof dorekna nakpef ma mak meser dek faisna mkosnemna kada. ²⁰ Roi mkofawi ḇepon kakuya, isoine ḇardadi ro Refo ḇyeḇeper imnis marisen snonkaku ḇa, ²¹ snar ḇardadi anna neḇeḇaryas ro marisen snonkaku ḇa, ḇape kuker dafdif ro Rur Ḇesren snonkaku sawos kuker snonsnon Allah.

¹ Ro ḇeponiwara nabi ḇekakuḇasya ssun rofandu Allah kawasa ḇyesi, rarirya kako rofandu mko nari guru ḇekakuḇa ono sisya. Nari ssḇuk farkarkor ninyan ḇeḇuk raro, ma nari sfamyun Ḇesma papoik ḇeḇaknamuk si kwar ma kuker nyan ḇerarirya ssun mankunsi fasaw faro raroya. ² Kawasa sibor nari siso kankenem guru-guru ḇekaku ḇa ansi ḇefo kuker rmomen-nafsu sena, ma guru ansi fararur sena nari nafrur fakawasa sibor sonef Nyan Ḇenapes Allah ḇyukna. ³ Snar sfaḇri mankun si, inja guru ḇekakuḇa ansi nari sfarfyar faro mko farfyar sun ro mankun si fasiksma ḇaḇefainda ro mko. Ḇape faro fararur sena samamyai isya fyasos fyoro kwar ma raroya isya iwaf si. ⁴ Snar rofyor Allah iswar malaikat ḇefrur sasarsya ḇa, ḇape isawen si ro for ḇembrer ḇa ma rarirya ḇyuk si faro aḇyaḇ ḇepampan faikram si isof ras mankaraya; ⁵ ma rofyor Allah iswar supswan ḇepon ani ḇa, mboi myuni kuker faḇruḇ ḇape ḇyuk aski faro Nuh munda, manḇaryas napnapes ani, kuker snonkaku ḇese rifik; ⁶ ma rofyor Allah myun mnu Sodom ma Gomora kuker for, ma rarirya myunpres si ma ifrur swarapepen oso faro ḇekenem kuker ḇarḇor ro ḇarpursya, ⁷ ḇape ḇyuk aski faro Lot, snonkaku ḇenapes, ḇekenem pdef kuker kandera snar kankenem snonkaku ḇefawi sasoser ḇa ma ḇeso monda rmomen-nafsu sena, ⁸ snar snonkaku ḇenapes sine sikenem rofandu si ma ro rasras smam ma simnaf fararur ḇarḇor sena, isof rur ḇenapes sesi sisma kandera -- ⁹ inja Manseren ifawi rariso ḇyuk aski faro snonkaku ḇesouser marisen ḇyena rofyor sisma fafrowes. Ma Manseren ifawi rariso ikram snonkaku ḇeḇarḇor faro kandera ro Ras Ḇaḇemankaraya, ¹⁰ ḇeponya snonkaku ḇeso rmomen-nafsu sena ḇemamas ma ḇeyonef Allah papoik ḇyedi. Guru ḇekakuḇa ansi sararyof ḇa mboi simarares si isof skormararu ḇa fasonef roi ḇekenem ma ḇepyum ro boiyaswa kako! ¹¹ Mboi malaikatsya ḇesambraḇ ma ḇesma papoik syadi ro guru-guru ḇekakuḇa ansi ḇesyaḇo, sakkofen wos anonef faro roi ḇekenem ma ḇepyum ro Allah ḇarpon ḇyedi ḇa. ¹² Guru ansi simnis aiwan ḇena swaruser ḇa, simnis kuker aiwan sikapar faseḇefor ma seḇemun kam monda. Sonef rosai sifawi ḇa, isof kuker fararur ḇeḇarḇor sena nari mankunsi simar kukerna imnis aiwan ḇekafdir, ¹³ ma nari sisma kankenem ḇeḇyeḇa imnis sasuref ro ḇarḇor sena. Sifrur marisen sisnesna kuker rosairya monda ro meserna, fanafrur syopen rmomen-nafsu baken sena. Rofyor skain warpu mko ro munara nanan, simnis mamas ḇefrur ayin snar simser kuker rmomen-nafsu. ¹⁴ Mamam sena nafo kuker rmomen-nafsu ḇaḇefarḇuk ma simnai ḇa ro sifrur sasar. Sidenem snonkaku kakyar ḇedworen ḇasya fasiso kakara sena. Sisnesna nebefari kwar kuker faḇri mankun. Sikada snonkaku ḇesma fafras! ¹⁵ Snar sibur nyan ḇenapesya kwar, inja siḇor, ḇo siso Bileam, Beor mandaḇendi nyan ḇyedi ḇemarisen ḇena sasuref ro fararur ḇeḇarḇor. ¹⁶ Ḇape Bileam isma swarapepen ḇepakrek snar ḇarḇor ḇyena, rofyor keledai ḇeḇeawer dawos imnis mkaren snonkaku ma idwarek nabi ḇefawiroyoḇa ani. ¹⁷ Guru ḇekakuḇa ansi simnis war sun ḇesyor, simnis mandep doḇerya isopum; sfasos kwar faro si moḇ ḇepampan ḇeyun nyawa. ¹⁸ Snar sikofen wos marares ḇeḇebei ma sifrur rmomen-nafsu farḇakḇuk fasidenem snonkaku ḇesusu babobur kankenem ḇeḇor. ¹⁹ Guru ḇekakuḇa ansi sḇeasas ḇaḇemkei faro snonkaku ansi mboi mankun sikada sḇewomen faro kankenem nari ḇero -- snar roi oso ḇefrur kafyo snonkaku, ikada ḇyewomen faro roi ḇefrur kafyo iya. ²⁰ Ma smamḇaḇir Manseren ma Yesus Kristus, Ḇeḇuk korerima ḇeko, fyaspar mankundi kwar ro arwarem supswan, ḇape kyaḇer faro nawer, isof ḇarpurya kankenem sena naḇyeḇa syadi wer ro randakya. ²¹ Eḇedari iḇye syadi smamḇaḇir awer napnapesya, snar rofyor ssmambaḇir i, ḇape ḇarpurya skaḇerbur Allah sasoser ḇyuk faro siya. ²² Wos peper ine kyaku fafyasna rosai sifrurna, "Rofanya kyaḇer fadan ḇayorem ḇyena," ma "Randip simasi kwar, nari kyaḇer fadaner i ro aner ḇyedi."

¹ Naek srar yaswar kaku, ine syap ḇeḇesuru yafas faro mko. Ro syap ansuya yaḇesewar fayaḇawes kakara ḇekaku ro mko, ² insa mkoswarepen Allah nabi ḇyesi wos sikofen ro ḇeponiwara ma mkoswarepen Manseren sasoser ḇyena, Wairek Ḇeḇuk koreri, wawan mkoḇesi sikofen ḇadir faro mko kwar. ³ Roi mkoswarepen ḇepon kakuya isoine, ro ras awar ḇepupesya nari snonkaku ḇekenem ma ḇeso rmomen-nafsu nari sikḇawes fasonef mko. ⁴ Sikofen ḇo soḇo: "Asas Manseren iḇe ryamumaya isyaro? Snar kma ma up nkoḇesi simar kwar, ḇape roi ḇeḇor kam namnis raris ro randakya rofafisu supswan ḇyeḇefrurya!" ⁵ Sikada sifrur ḇeḇefawi ḇa, mboi snar Allah ikofen nanki isya kwar ro ḇepon ma supswan kako ḇeḇeknam ro warya ma snar warya, ⁶ ma snar war ani, supswan ḇepon ani ryo kwar kuker faḇruḇya. ⁷ Ḇape kuker wos ani kako nanki ma supswan ro baboine ḇyeḇefaduru ro for ma ḇyeḇekram isof ras ḇaḇemankara ma snonkaku ḇeḇarḇorsya sro. ⁸ Ḇape naek srar yaswar kaku, roi oser ine mkofanander awer i, isoine mboi ro Manseren ḇarpon ḇyedi ras oser imnis raris wampasi wambarek syaran oser ma wampasi wambarek syaran oser imnis raris ras oser. ⁹ Manseren nari isusu asas ḇyedi ḇa, mboi snonkaku ono sisya skara rarirya, ḇape ikḇaḇ faro mko, snar imewer oso ryo, mboi insa snonkaku kam simbror ma skaḇer. ¹⁰ Ḇape Manseren Ras raramuma ḇyedi imnis ḇekaraw. Ro ras ani nari nanki ipromes kuker rakrok maum ḇeyun nyawa ma roi ḇeḇor ro supswan nari narus ro for ḇesberya, ma supswan kuker roi ḇeḇor ḇeroina nari napromes. ¹¹ Inja, roi ḇeḇor anna kam nemompraf rarirya, iḇye mkokenem nasren ¹² isoine mko ḇewaf ma ḇeswarmura ro Manseren Ras raramuma ḇyedi. Ro ras ani nari nanki inanem kuker for ma roi ḇeḇor ro supswan nari najaren snar saksak forya. ¹³ Ḇape kowaf rosai Allah ḇyeasas kwar, isoine nanki ḇebabo ma supswan ḇebabo, ro moḇ kosma ḇaḇenapnapesya. ¹⁴ Inja, naek srar yaswar kaku, rofafisu mkowafwaf roi ḇeḇor nane kam, iḇye syadi mkoḇesewar, insa sisma mkofarorewḇa ro Allah ḇarpon ḇyedi kuker ḇaḇeaski ro Allah. ¹⁵ Kwara Manseren koḇedi ḇaḇekaḇaḇaḇ ḇyedi imnis fafisu famkosma aski, imnis Paulus kako, naek koswar ani, fyas faro mko kwar iso mamkarkir Allah ḇyuk faro iya. ¹⁶ Paulus syap ḇeḇor ḇyena fyas ḇesya kwar roi ḇeḇor nane. Kaku roi ono naisya nsamswen isof sifawina ḇa ro syap anna. Ma ḇefawina ḇasya ma kakyar ḇedworen ḇasya, siwararye rosai Paulus fyasna. Mnuk ḇese ro Refo siwararyena rarirya kako. Nane nari neknam raro faro mankun si. ¹⁷ Ḇape mko naek srar yaswar kaku, mkofawi ḇepon roi ḇeḇor nane kwar. Inja mkepen mko, imbude mkosaso snonkaku ḇeḇor ḇefawi sasoser ḇa isof mkosapibur moḇ ḇeknonya. ¹⁸ Iḇye kada mkofawi kaku Manseren ḇaḇenaḇye ḇyena, Wairek Ḇeḇuk korerima ḇeko isoine Yesus Kristus, ma mko kako mkofawi kaku i. Sanandik faro i, ro baboine isof fyoro-fyoro kada! Amin. Ro aya, Petrus