2 KORINTUS

2 KORINTUS

¹ Naek srar Allah kawasa ḇyesi ro Korintus ma Allah kawasa ḇyesi kam ro Akhaya ḇesiper. Ayaine, Paulus, Yesus Kristus manwawan ḇyedi, Allah mankundi isiḇeri imnis mankundi marisen ḇyedi, fnoḇek naek koḇedi Timotius, ² nukyar Allah Kma koḇedi ma Manseren Yesus Kristus ḇyeḇok ma ḇyuk aski faro mko. ³ Sanandik faḇe Allah, Kma ro Yesus Kristus Manseren koḇedi. I Kma sneḇeḇye, ma Allah ḇeḇuk samambraḇ sne faro snonkaku. ⁴ Ḇyuk samambraḇ ro kosnesna, ro fafisu ḇaḇekandera kosma na, insa samambraḇ Allah ḇyuk maḇeko ani, ko kako koḇuk samambraḇ sne faro kawasa kam ḇesma marindisya. ⁵ Kandera-kandera Kristus isma na nabor kaksma na kwar. Iso eḇedari kuker Kristus kako, kosnesna nasma samambraḇ kaku. ⁶ Rofafisu nkoisya rofyor ḇaḇekandera fafisu ani ḇyuk samambraḇ ro mkosnemna, faro aski mkoḇena. Rofyor nkosma samambraḇ ro nkosnesna, rarirya naek mko kako mkaksma samambraḇ isof naek mkomku rofafisu ḇaḇekandera imnis kandera nkaksma na kako. ⁷ Nko ḇeḇirḇarḇa ro rosai nkokyar ro mko naek srar, snar nkofawi mkakḇe kandera fnoḇek nko. Ma snar rarirya mkosma samambraḇ fnoḇek nko. ⁸ Naek mko! Nkomarisen naek mkakfawi kandera nkosma ro Asia. Kandera nkosma anna nmarḇak mankenem ma nbarekepen nko, isof nkokyar nari nkokenem werḇa; ⁹ nkokara imnis ssḇuk samamyai marmari maro nko kwar. Ḇape roi ḇerariryana ndarirya insa kokyar samambraḇ ro mankunkoḇena awer, mboi faro Allah ḇeḇuk aḇiḇer faro snonkaku ḇemarsya. ¹⁰ Allah iso ḇeḇuk koreri kwar maḇeko ro kandera raro marmar ḇeba ani. Ma ikako nari ḇeḇuk koreri maḇeko wer ro ras ḇepupesya, snar iso kokyarya. ¹¹ Nkokyar kaku mkoḇenadi warek nko, rarirya Allah nari ḇyuk aski maḇeinko wer ro kandera na. Raimnai snonkaku sibor senadi warek nko, ma nari sikofen kasumasa mufaḇe Allah; snar Allah imarisen ḇyeḇok nko imnis kankarem faro nadi ḇeḇor na. ¹² Roi nkoryaḇya mboi swaruser ro nkosnesna ro roi ḇeḇor nkofrur ro supswan ine -- isyadi ro ḇaḇeoser nkoḇedi kuker naek mko -- nkofrurna kwar kuker kakara ḇenapes ma ḇesren ro Allah. Nkofrurna kuker fawawi snonkakuḇa, ḇape kuker samambraḇ Allah ḇyuk maḇenko. ¹³ - ¹⁴ Roi nkofas mufa ḇemko ido nkofas monda roi mkowasya ma mkofawi. Fafisu ine mkofawibos nko ḇaim, ḇape yakyar naek srar nari mkofawi kaku nko. Rarirya, fafisu Manseren Yesus ifyafer wer, naek srar nari mkomsik snar nkoimnis raris nko kako nkomsik snar mko. ¹⁵ Snar kakyar ine iso randakya yaw fayarakaki mko insa naek srar mkosma ḇok ḇerarwan risuru. ¹⁶ Yakara fayaḇe yaramufa ḇemko ro marandan ayedi ḇeraḇe Makedonia ma yakaḇer nari yasnefer wer faro mko, insa naek mkofnoḇek aya fa yambran pdefḇe Yudea. ¹⁷ Ḇape yamḇrer kwar swaruser ine; inja, aw ine fyasna yafrur famfnom mondake? Rofafisu yawya, yaw imnis marisen ayedi mondake, inja yakofen, "Mboi", kniko wer, "Roḇa"? ¹⁸ Kaku ḇeri kuker Allah ḇedworen, snonsnon ḇyedi ro rosai ikofen na, asas ayedi mufa ḇemko yakofenḇa, "Mboi" ma "Roḇa". ¹⁹ Snar Yesus Kristus Allah Rumkun ḇyedi, Silas ma Timotius suḇaryas faro mko kwar ani, ma mankundaya kako yakofenḇa "Mboi" ma "Roḇa". Inja imnis kankarem "Mboi" ro Allah. ²⁰ Snar kuker Yesus Allah ikofen kwar "Mboi" ro asas-asas ḇyena. Knam ine eḇedari kokarem "Amin" ("Kaku ḇeri") mufaḇe Allah snar Yesus Kristus. Kofrur rarirya insa Allah isma sanandik. ²¹ Allah ḇefrur fa nko ma mko kodworen koḇeoser kuker Kristus; iso ḇekimfir koḇardi faro mankundi. ²² Iso eḇedari ryem kofa koḇe kawasa ḇyesi ma ḇyuk Rur ḇyedi ro kosnesna imnis fafnoḇek ro roi ḇeḇor kam fyasos maḇeko. ²³ Allah ḇyesaksi ḇeaya -- snar ifawi aya -- mboi yaraḇe Korintusḇaya, snar yamewer yafrur mkosnemna nfafardundi. ²⁴ Yaḇedafdifer mkoḇa ro rosai nari mkokyarya, snar kakyar mkoḇena nadworen kwar. Mboi yafararur fnoḇek mko monda insa mkomarisen syadi wer.

¹ Iso eḇedari yakara namuk kwar fayarakaki mufa ḇemkoḇa kuker saraurow ḇefrur fafardun mkosnem na. ² Snar rofyor yafrur fafardun mkosnemna, mansei wer nari ḇeḇuk sneprei ḇeaya, imbude snonkaku ansi onoḇa ḇoi mkoiso yafrur fasne ḇefafardunya? ³ Iso eḇedari yafas syap ine mufaḇe naek srar mko. Yamewer yarakaki mko, insa rakaki ayedi ifrur fafardun awer aya, snar mko snonkaku ḇeḇuk raryaḇ maḇe aya. Snar yakyar yasma raryaḇ, rarirya naek mkosma raryaḇ kako. ⁴ Yafas mufa ḇemko kuker sne ḇefafardun ma ḇemarḇak ma kuker mkarui ḇeḇor ḇefarsyersyer. Snar ro kakara yedi insa naek mkofafardunḇa, mboi insa naek mkofawi yaswar kaku ḇeri mko kam. ⁵ Rofyor snonkaku ono sifrur roi ḇefrur fafardun nanekam kwar, ifrurna maro ayaḇa, mboi naborke roḇa ma naborḇa -- insa yapakrek faroi awer -- ifrur rarirya faro naek srar mko kam. ⁶ Faro snonkaku ḇerariryasya, samamyai kawasa ḇeborsya ssḇuk faroi imnis kwar. ⁷ Inja naek buk payasyos faroi ma wadifi wer insa fafardun ḇyedi myarḇak mankenem awer. ⁸ Inja yor, insa mkofasna wer faroi mboi kaku ḇeri mkoswari. ⁹ Yafas syap ine mufa ḇemko fa yaḇukmnasen sas rosai mkomarisen mkoso ḇesya kwar ro fasasna ayena. ¹⁰ Rofyor mkoḇuk payasyos faro snonkaku ḇefrur sasar faro mko rarirya aya kako yakpyos sasar ro snonkaku ani. Snar rosai yapyos kwar -- rofyor roi ḇeḇefandun kaku ono naisya faneḇepyos -- inja roḇarpon Kristus yaḇuk payasyos faḇei snar naek srar mko. ¹¹ Yafrur rarirya insa Ibiris dun awer fafisu faḇyuki duf mko; snar kofawi aw ḇyenaḇa. ¹² Rofyor yarama ro Troas kuker kakara ma yaḇaryas Ankankinem Ḇeḇye ro Kristus, Manseren ḇyas kwar nyan maḇe aya insa yafararur ro moḇ ani. ¹³ Ḇape yaknonba snar yasrow Titus naek koḇani ro diaḇa. Inja yor snonkaku ḇena ro diasyaḇo yaraḇe Makedonia. ¹⁴ Ḇape kasumasa mufaḇe Allah, snar fyarkin ko ḇesya kwar fakoso yakyaker ḇaḇefainda Kristus. Allah nyako insa ḇararyas ḇekur Kristus imnis mani spum ḇediref ḇeryer ḇemoḇ nakam. ¹⁵ - ¹⁶ Snar koine komnis mani spum mamboḇo ḇediref, Kristus ikun ro Allah ḇarpon ḇyedi. Faro snonkaku ḇeraḇe raro, koine komnis dadiref raro ḇemamun; ḇape faro snonkaku nari ḇesma koreri, komnis dadiref mani spum ḇeyun ḇekankenem. Inja, manseiso nari ḇefrur mnis fararur ine? ¹⁷ Nkomnis raris snonkaku ḇese ḇefrur Allah wos ḇyediḇe roi ḇefarḇyan mondaḇa. Kakara nkoḇena nasren, snar Allah i ḇeḇuk fararur inema ḇenko. Ma Allah mankundi myam mboi nkoḇaryas wos ani imnis manfamyan Kristus.

¹ Inja roi ḇeradine fyasna imnis nkosandik mankun nko werke? Roḇa nkofandun syap sanandik faro naek srar mko, roḇawer sanandik ro naek srar mko raris snonkaku ḇesesya sḇefandun raya? ² Syap sanandik nkoḇedi isoine naek srar mankundaw, ḇefas ro nkosnesna ma snonkaku oser-oser iwasya ma ifawi. ³ Mankunsi smam mboi naek srar mkomnis Kristus syap fyas, ma fyarem fankune. Syap ani ḇyeḇefas kuker fara esḇa, ḇape kuker Allah Rur ḇyedi ḇekenemya; ḇyeḇefas ro karufasḇa kako, mboi ro snonkaku sisnesna. ⁴ Nkokofen rarirya snar kakyar nkoḇena faro Allah snar Kristus. ⁵ Roi oso isya ro nko ḇaḇeri ḇefrur fa nkomsik fankofrur fararur ine, ḇape Allah i ḇeḇuk masasik ani maḇe nko. ⁶ Iso ḇefrur fankomsik ma nkoḇe manfamyan faro asas ḇebabo oso; asas ḇeḇeknam ro Allah Rur ḇyedi, mboi ro sasoser-sasoser ḇefasḇa. Snar sasoser ḇefasna nari nbuk raro, mboi Allah Rur ḇyedi kada ḇyuk kankenem. ⁷ Rofyor asas nari ḇeḇuk raroya ḇyeḇefrur ma ḇyeḇepaikir ro karui, Allah baba ḇyena nasnai kuker sanapnaper. Sananai ani isnaperbos kaku isof kawasa Israel simku fa smam Moses ḇarpon ḇyediḇa, rofyor sananai ani ipromes fawawasya. Inja rofyor asas nari ḇeḇuk raro ani ḇyeḇefrur ma ḇyeḇeseḇen kuker sanapnaper ḇeba kaku, ⁸ rarirya fararur asas Allah Rur ḇyedi ḇyukya, ḇyeḇeseḇen kuker sanapnaper ḇesyadibos kaku ḇeri wer. ⁹ Rofyor ḇakḇuk asas ḇeḇuk samamyai faro snonkaku isnaper kaku, rarirya ḇakḇuk asas ḇeḇuk faro snonkaku iḇye kaḇer kuker Allah isnaperbos kaku wer. ¹⁰ Nari kokofen mboi rosai ḇesnaper ro ḇepon iwara, isnaper werḇa kwar snar sanapnaper ḇero baboine. ¹¹ Rofyor roi ḇekain kawanba oso isnaper, rarirya roi ḇekain fyoroya nari isnaper syadi wer. ¹² Snar nkona kakyar imnis ine, eḇedari nkawos masasik rarirya. ¹³ Nkomnis raris Mosesḇa, ḇerup ḇarpon ḇyedi kuker mar ḇerup insa kawasa Israel smam awer Manseren sananai ḇyedi ḇeḇe ḇepromes fawasbur ḇarpon ḇyedi. ¹⁴ Swaruser sena neḇerup kwar. Ma isof ro ras ine kako kakara sena neḇerup kaker kuker mar ḇerup rofafisu siwasya syap-syap ro asas ḇekwar ani. Mar ḇerup ani ḇyeḇeḇas monda rofyor snonkakusya sḇeoser kuker Kristus. ¹⁵ Baboine kako, rofyor siwasya Moses syap ḇyena, mar ḇerup ani isya ryup kaker kakara sena. ¹⁶ Ḇape rofyor snonkaku oso kyaḇer wer faro Allah, mar ḇerup ani kako ḇyeḇekanow bur ḇarpon ḇyedi. ¹⁷ Inja, Manseren kokara rodine isoine Rurya. Ma romoḇsai Manseren Rur ḇyedi isya roya moḇ ani ḇaḇemkeya isya kako. ¹⁸ Ḇarpon koḇena kam neḇerupḇa kuker mar ḇerup. Komnis fanin smam faswef kuker sanapnaper ro Manseren Yesus. Rarirya koḇe ḇefadwer pdef fakomnis i; faḇaḇye muma kosnaper syadi snar sanapnaper ḇerama ro Rur, Manseren koḇedi.

¹ Fararur nkofrur ine ḇyeḇefrur kuker Allah famfnoḇek ḇyedi. Iso ḇeḇuk fararur ine maḇenko. Rarirya nkoḇe ḇirḇarḇa. ² Nkofararur kuker nyan ḇepampan ma ḇefrur fanorḇa. Nkomewer nkofararur kuker ankarkar roḇa nkowararye Allah wos ḇyenandi. Kuker sananai nkoḇaryas Allah marisen ḇyena. Inja nkoḇuk faro snonkaku kam faskara nko ro sisnesna ro Allah ḇarpon ḇyedi. ³ Rofyor Ankankinem Ḇeḇye nkoḇaryas ani ono sifawi ḇaim ido, sikada snonkaku nari ḇeramura ḇeraroya. ⁴ Ilah (Manserensya) ḇeḇarḇor ḇeyuf supswan ine srup kakara snonkaku ḇekyarḇasya. Si ḇedwareksi insa smam awer sananai ro Ankankinem Ḇeḇyeya ḇekur Kristus baba ḇyedi, ḇemnis Allah fanir ḇyedi. ⁵ Wos nkobaryas ine wos ro mankun nkoḇa. Wos ani ikada wos ḇekur Yesus Kristus; mboi i Manseren; ma nkoine manfamyan ro naek srar mko snar Yesus Kristus. ⁶ Allah ikofen, "Iḇyekada ro pampanya dori sananaya dek," Allah ani kako ḇeḇuk sananaya fadek ro kosnesna, insa kakara koḇena nasnai insa kofawi Allah sanapnaper ḇyedi ḇesnai ro Kristus ḇarpon ḇyedi. ⁷ Ḇape nana ḇepyum ro rur ani nkuni kuker baken sifrur ro saprop ḇeḇemaejaḇa ine. Rarirya isnaibos mboi baba papoik ani isya ro Allah mboi isya ro nkoḇa. ⁸ Sawos nkora ḇandiḇar, ḇape nkodadorḇa. Nko kmom, ḇape nkoḇeḇirḇarḇa. ⁹ Sibor sembroḇ nko, ḇape nkemir nkokain ḇa. Ma fafisu ono siprer nko rao nkosapi, ḇape nkomarḇa. ¹⁰ Ro moḇ rosai wer nkoisya nkoḇaḇir ḇesya kwar marmar Yesus ḇyedi ro baken nkoḇena, insa kankenem ḇyedi isnaibos ro ḇaken nkoḇena. ¹¹ Rofyor nkokenem ine, marmarya iḇemyun nko snar Yesus, insa Yesus kankenem ḇyedi kako isnaibos wer ro baken nkoḇena nari ḇemar ine. ¹² Ine fyasna ro baken nkoḇena marmarya isya ifararur sambraḇ ro nyan ḇyena, ro naek srar baken bedi kankenemya iso ḇefararur sambraḇya. ¹³ Ro Refo kosma wos ine, "Yakyar eḇedari yawawos." Inja, kuker kakyar ḇerarirya kako, nkawawos snar nkokyar. ¹⁴ Nkokyar mboi Allah ḇeḇawes kaḇer Manseren Yesus kwar, nari ḇyawes kaḇer kokako kuker Yesus, ma dun naek srar mko ma nko ḇeḇarpon ḇyedi. ¹⁵ Roi ḇeḇor nane kam nefandun faro naek srar mko. Snar snonkaku sibor sifawi Allah saswar ḇyedi, nadi kasumasa nabor syadi wer ssḇuk mufaḇe Allah; rarirya Allah isma sanandik. ¹⁶ Iso eḇedari nkoḇeḇirḇarḇa. Nyan ro ḇar baken koḇena namkok syadi rariso wer, ḇape nyan ro ḇar rur koḇena neḇefrur babo ro ras ḇeras. ¹⁷ Ma kandera ḇemanan, nkofawi ḇekain fyoroḇa, nari ḇyuk maḇenko marisen ḇesyadadi ma ḇekain fyoro. Marasrisen ani ibasyadi wer kaku rofyor koḇuki kyara kandera ani. ¹⁸ Snar nkomam epen roi komam naneḇa, mboi roi komamba na. Roi komam na nkain fyoroḇa, ḇape roi komamba na nkain faswef isof fyoro-fyoro.

¹ Snar nkofawi rofyor aḇdares isoine baken -- moḇ kokenem ro supswan ine ḇyeḇemkok, nari Allah fyasos maḇeko rum oso ro boiyaswa, Allah mankundi ḇefruriya ma ḇekain fyoro-fyoroya. ² Ro aḇdares kokain ro ine, kofafko snar komarisen kaku ḇeri kokain ro rum koḇedi ro boiyaswaya. ³ Snar ro rum ine, koḇe ḇefadiren. ⁴ Rofyor kokain ro aḇdares ro supswan ine kofafko snar kamnam koḇena nmarḇak. Snar komarisen, kofasparbur baken koḇeja ro supswan ineḇa, mboi komarisen fa kosun baken ro boiyaswa, insa baken koḇedi nari ḇemar ine kankenemya dufepeni. ⁵ Ḇefasos ko faro moḇ ani isoine Allah mankundi, ma ḇyuk Rur ḇyedi maḇeko fa fyaduru ko. ⁶ Eḇedari kosnesna nsambraḇ ḇesyakwar. Kofawi rofyor kokain ro baken koḇena, koḇinkwan ro rum nari kokain roya fnoḇek kuker Manseren. ⁷ Snar kokenem kuker knam kakyar, mboi ḇyeknam ro roi komam naba, ⁸ eḇedari kosnesna naknon. Komarisen syadi kofasparbur baken koḇena, insa kokain fnoḇek kuker Manseren. ⁹ Eḇedari koḇesewar kaku ḇeri fakofrur sneprei Allah, iḇye rofyor koisya ro aḇdares koḇena ro dine, roḇaido ro diwa. ¹⁰ Snar nari kokam kores ro ḇarpon Kristus karapesa nasan ḇenapes ḇyedi, ma oser-oser isma munsu imnis raris fararur ḇyedi ro supswan ine -- fararur ḇeḇye roḇaido ḇeḇarḇor. ¹¹ Kofawi rosaiso komkak Manseren; eḇedari koḇesewar fa snonkaku sikyar. Allah myamḇaḇir parasres ko, ma yakyar naek mko kako mkomamḇaḇir nko ro mkosnemna. ¹² Kuker ine nkor fa naek mkosandik nkoḇa. Marisen nkoḇeja monda nkoḇuk nyan ḇeḇye oso faro naek mko insa mkosandik maro nko, insa naek mkofawi rariso nari naek mkokarem faro snonkaku ḇeḇefandun roi ḇekur baken ma roi ḇekur ruryaḇa. ¹³ Snar Allah fandun ḇyena, nkofrur imnis ḇesawo. Ma snar fandun naek mkoḇena, nkoknon. ¹⁴ Kristus saswar ḇyedi ḇedif nko; ma nkofawi snon oser imar fadwer snonkakusya kam kwar, iso eḇedari snonkakusya kam simar kwar. ¹⁵ Kristus imar fadwer snonkakusya kam, insa snonkaku ḇekenemsya, sikenem faro mankunsi ḇardi werḇa, mboi sikenem faro Kristus ḇemar kwar ma ḇyeḇeḇawes kaḇer wer snar fandun sena. ¹⁶ Iso eḇedari, nkokara snonkakusya werḇa imnis warnkyara snonkaku. Randakya nkokara Kristus kwar roḇar snonkaku, ḇape baboine roḇa kwar. ¹⁷ Snonkaku ḇeḇeoser kwar kuker Kristus, sḇesnonkaku ḇebabo kaku ḇeri. Inja roi ḇekwar ro snonkaku ani isyaḇa kwar -- snar nakam nbabo kwar. ¹⁸ Allah iso ḇefrur nakamya. Ifrur rarirya snar Kristus ma koḇye kaber wer kuker i, raimnai ḇyuk fararur maḇeko fa koḇaryas wos ḇeḇye insa snonkaku ḇesesya kako sakḇye kaḇer wer faro Allah. ¹⁹ Inja wos nkoḇena kuker manfandu Kristus, Allah ifrur isof snonkakusya siḇye kaḇer wer kuker Allah. Allah ifrurna rarirya mboi kyor sasar snonkakusya sifrur faroi naba. Ma Allah ḇyuk fararur ani maḇenko fa nkoḇaryas wos ani. ²⁰ Inja nkoine manwawan Kristus. Ma nkawawos faro naek mko imnis Allah mankundi ḇewawos faro naek mko. Snar Kristus snonsnon ḇyedi, nkor kaku ḇeri ḇemko, mkona Allah saswar ḇyedi ḇeḇuk fa mkoḇye kaḇer wer kuker i. ²¹ Kristus ifrur sasarḇa, ḇape Allah ḇyuk faḇyar sasar koḇena, insa koḇye kaḇer wer kuker Allah, snar ḇaḇeoser koḇena kuker Kristus.

¹ Snar nkoine min ḇefararur fnoḇek Allah, inja nkor kaku ḇeri insa naek mkoḇefandunba awer Allah ḇaḇenaḇye ḇyedi. ² Allah ikofen, ro Refo radine, "Rofyor yamarisen, yarower aw kwar, ma ro ras koreriya, yafnoḇek aw kwar." Mkoswarepen kaku! Fafisu marisenya isoine. Ma rasya isoine fakosma koreri. ³ Nkofrur roi osoḇaḇeri ḇefrur fa snonkakusya sfafayaf. Inja, snonkaku osoḇaḇeri fa kyoryae afuffarmyan nkoḇena. ⁴ Inja, ro fararur ḇeḇor nkoḇena, nkofasna mboi nkoine Allah manfamyan ḇyesi. Kandera ḇeḇor nakam nkoḇar na kuker kaḇaḇaḇ: ⁵ nkosma aprer, nkosmai ro bui, ma spanjuḇerbo smun nko; nkofararur sambraḇ, nkenef mnisḇa, ma nabor kaku nkananba. ⁶ Ḇape kuker sne ḇesren, fawawi, kaḇaḇaḇ ma sne ḇeḇye, nkofasna mboi nkoine Allah manfyan ḇyesi. Ono wer nkokyar faro fanaḇnoḇek Allah Rur ḇyedi, ma kuker saswar ḇenapes, ⁷ ma nkoḇaryas Allah wos ḇyedi kuker papoik Allah, nkofasna mboi nkoine Allah manfyan ḇyesi. Nkufepen Allah marisen ḇyena imnis romamun maḇe nko fa nkoḇuki doper, roḇa nkokḇriwarek mankun nko. ⁸ Sḇesyowi nko, ḇape skoryae nko kako; sisandik ma sonef kako. Nkonapes rariso wer, ḇape soḇe nkoḇeankar. ⁹ Soḇe smamḇaḇir nkoḇa, ḇape snonkakusya kam smamḇaḇir nko. Soḇeda nkomar, ḇape nkoisya nkoḇye kaker. Smun siprer nko rariso wer ḇape nkomarḇa. ¹⁰ Rofyor sifrur fa nkosnesna nfafardun rariso wer, ḇape nkoryaḇ ḇesya kwar kako. Nkomnis snonkaku ḇesaḇarar, ḇape nkofrur fa snonkaku sibor sekayan. Nkomnis snonkaku ḇena royoḇa, ḇape nkona roi ḇeḇor nakam. ¹¹ Naek srar yaswar kaku ro Korintus! Nkawos isnai kaku faro naek srar mko kwar. Roi ḇero nkosnesna nkokofen na kwar. ¹² Nkosnesna nbasbos faro naek srar mko, mboi naek srar mkoiso ḇesisen mkosnemnabur nko. ¹³ Knikine kawawosyae, inja yor, insa mkoḇas mkosnemna kako maro nko. (Yawawos mufa ḇemko imnis romawa karyer ayesi.) ¹⁴ Mkomarisen mkoḇe oser awer kuker snonkaku ḇekyar faro Yesusḇasya; ine imnisḇa. Inja snonkaku ḇefrur Allah marisen ḇyenasya nari sḇeoser kuker snonkaku ḇesampum Allahsyake! Isnaya nari ḇyeoser kuker pampanyaḇa. ¹⁵ Kristus nari ḇyeoser kuker Ibirisyaḇa. Rosai ḇemnis kuker snonkaku ḇeḇe Kristen ma snonkaku ḇeḇe Kristenḇa? ¹⁶ Rosai ḇepam Allah rum ḇyedi kuker rum karwarya? Koine Allah rum ḇyedi, isoine Allah ḇekenem. Allah mankundi ikofen, "Nari yakain ro fadu sena, ma yakenem fnoḇeksi. Nari yaḇe Allah farosi, ma nari sḇe kawasa ayesi. ¹⁷ Eḇedari, mkosasyarbur kawasa ḇemambaḇir Allahḇasya, ma mkoḇinkwanbur si. Mkopampam awer beri kuker roi ḇeyarwarem, rarirya nari yana mko. ¹⁸ Nari yaḇe Kma faro mko, ma nari mkoḇe romawa maro aya, Manseren ḇepoik kaku ikofen rarirya."

¹ Naek srar yaswar kaku! Snar asas ḇeḇor kam neḇefrur maroko kwar. Inja, iḇye kofasren mankun ko ro roi ḇeḇor kam ḇefrur mamas baken ma rur koḇesi. Iḇye komkak faro Allah, ma kofrur sren ko insa kosma kankenem ḇardi kuker Allah. ² Naek srar mkoḇuk moḇ ro mkosnemna maḇe nko. Nkawos sasar faro snonkaku osero ḇaḇeri, ma nkofrur fromo snonkaku oseroḇa kako. ³ Yakofen rarirya fa yaḇuk sasar faro naek srarḇa. Snar, imnis yakofen ḇepon faro mko kwar, naek mkofanam kaku nkosnesna, ma kokam koḇebati ḇekenem kam ma ḇemar kam. ⁴ Yakyarbos kaku ḇeri faro mko. Ma yamsik syadi kuker mko! Mboi nkosma kandera nabor rariso wer, ḇape yasma sneprei snar naek srar mko. Rarirya yaryaḇ kaku! ⁵ Rofafisu nkofyafer ro Makedonia wer, nkokfis ro kanderayaḇa kako. Ro moḇna kam nkosma marindi; ro mun snonkaku ḇese rakrakrok, romun nkoḇeja makakak ro nkosnesna. ⁶ Ḇape kasumasa faro Allah, ḇeḇuk sneprei faro snonkaku ḇeḇeḇirḇarsya; ḇyuk sneprei maḇe nko, snar Titus rarama ḇyedi. ⁷ Nkosnesna naprei snar Titus ryamaya dererḇa, ḇape snar ikofen ḇadir naek srar mkoḇuk sneprei ḇei. Ikofen ḇadir maro nko naek srar mkomarisen fa mkosrow aya; mboi naek srar mkofafko mboi baboine kuker sneḇemarisen mkoḇesano warek aya. Wos annane nafrur fa yaryaḇ syadi wer. ⁸ Imbude syap ayedi ifrur fa mkosnemna nfafardun kwar, ḇape yafafkoḇa snar syap yafas kwar ani. Kaku rofafisu yamam syap ayedi ifrur fafardun mkosnemna -- ḇape fafardun mkoḇena nkain fyoroḇa -- rariryano yafafko kako. ⁹ Ḇape insape yamarisen -- snar mkosnemna nfafardun kwaryaḇa, mboi snar fafardun mkoḇan na nafrur fa naek srar mkosadwer rari mkoḇena. Mboi Allah imarisen fafardun ḇerarirya na. Inja, nkofrur fromo mkoḇa. ¹⁰ Snar ḇaḇefafardun Allah imarisen na nbuk bon fararwe sne ḇeḇuk koreri. Ma snonkaku nari sfafko ro roi ḇeḇesya ineḇa. Rarirya, fafardun ro supswan ine ḇyefafardun ḇeḇuk marmar. ¹¹ Naek srar indo mkokara sas bon rosai mkosma snar fafardun ḇerama ro Allah! Bon ḇyedi isoine naek srar mkosewar kaku ḇeri fa mkofasren famameya! Naek srar mkoyin sasarya, mkomkake, mkoswarkuf, mkomsik, mkomarisen mkoḇuk samamyai faro ḇesasarsya! Roi ḇeḇor nane kam mkofasna kwar mboi mkofrur sasarḇa. ¹² Inja, yafas syap ani kwar, syap ani ḇyeḇefas snar snonkaku ḇefrur sasar kwarsyaḇa. Syap ani kako faro snonkaku ḇeḇekandera kwar snar sasar aniḇa. Yafas syap ani insa ro Allah ḇarpon ḇyedi, naek srar mkofawi ro mankun mko rariso naek srar mamamepen mkoḇena naba kaku maḇe nko. ¹³ Iso ḇeḇuk sneprei nko. Ma sneprei mondaḇa, mboi isyadi wer snar nkomam Titus raryaḇ ḇyedi; naek srar mkoḇuk sneprei kwar faroi. ¹⁴ Ma yasandik mko kwar faroi. Kasumasa, snar mkofrur mamyai ayaḇa. Roi ḇeḇor nkokofen kwar faro mko roi ḇekaku nairi. Rarirya kako sanandik rosai nkokofen ro mko faro Titus nkaku kako. ¹⁵ Insape iswarsyadi naek mko, snar iswarepen naek mko kam mkomarisen farkankin ḇyena ma rariso naek mkosrowi kuker makakak ma araryof. ¹⁶ Yamarisen kaku, ma yakyar kaku mko.

¹ Naek srar, nkomarisen famkofawi kako rariso Allah saswar ḇyedi faro kawasa Kristen ro Makedonia. ² Kawasa Kristen ansi seḇemnasen kwar kuker ḇaḇewayam ḇemarbak kaku. Ḇape rofandu ḇaḇewayam ma saḇarar sena siryaḇ ma ssḇuk fafnoḇek ḇekakaku faro snonkaku ḇese. ³ Mankundaya yamam ssḇuk raris moḇ sisma raya, mboi ssḇuk syadi wer. Ma oso ḇyedifer siḇa, ⁴ sikako sor ro nko insa sakḇuk fafnoḇek faro Allah kawasa ḇyesi ro Yudea. ⁵ Nkokyar ma nkor ro siḇa mboi ssḇuk rarirya, snar randakya ssḇuk mankunsi faro Manseren kwar; ḇarpurya faro nko kako, snar Allah imarisen rarirya. ⁶ Inja, nkor kaku faro Titus -- ḇerak sasewar ine -- insa ifrur pdef sasewar ḇeḇye ine ro fandu naek srar kako. ⁷ Naek srar mkoḇye kaku ro roi ḇeḇor kam. Naek srar mkoḇye ro kakyarya, mkoḇuk kakara, ro fawawi, ma ro roi ḇeḇor ḇekur sasewar, ma ro sasewar mkoḇena maḇe nko. Inja, iḇye naek mkofawi nanem kako ro sasewar ḇeḇye ine. ⁸ Yakofen na imnis sasoser oso mufa ḇemkoḇa. Ḇape kuker fasasna ro snonkaku ono ḇese ḇefararur sambraḇ kaku ḇeḇuk fafnoḇek fa ḇefnoḇek snonkaku, ma yamarisen yamam kako isof ro moḇsaiso naek srar saswar mkoḇena. ⁹ Snar naek srar mkofawi kaku mboi Yesus Kristus Manseren koḇedi iswar ko. Ḇyekayan, ḇape ifrur mankundiḇe ḇesaḇarar faro naek srar fandun mkoḇena, insa kuker saḇarar ḇyena, naek srar mko ḇekayan. ¹⁰ Imnis kakara yedi, ro roi ḇeḇesya nane iḇye naek srar mkofrur posa rosai mkorandak kwar ro wampasi wambarek aniyafa. Snar naek srar mkoiso ḇerak sasewar ine. Rarirya kako kakara fa mkofrur sasewar ḇeradine ryama ro mko. ¹¹ Inja, iḇye naek srar mkofararur pdef imnis samambraḇ mkoḇena. Iḇye naek srar mkomsik fa mkofrur posa sasewar ani, imnis raris randakya kako mkomsik ḇo mkawraya. ¹² Rofyor mkomarisen fa mkoḇuk, nari Allah imarisen fa nyana snar neknam ro rosai mkosma na, mboi neknam ro saḇarar mkoḇenaḇa. ¹³ Yasma kakara ḇaḇeri fa yaḇuk mananan faro snonkaku ḇese ro kankarem, mboi yaḇuk marḇak faro mko. Iḇye namamnis. ¹⁴ Ḇape snar baboine naek srar mkosma namnis, inja iḇye mkofamfon ananjar sena. Nari rofyor mkakananjar ma saksma namnis, nari sakfnoḇek naek srar mko. Rarirya sukam suḇe ḇeyuf farmyan. ¹⁵ Sfas ro Refo radine, "Snonkaku ḇero andido, nya syadiḇa, ma snonkaku ḇero bakyaf, dananjarḇa." ¹⁶ Nko kofen kasumasa mufaḇe Allah snar ifrur fa Titus imyaren imnis nko fa ifnoḇek naek srar mko! ¹⁷ Snar Titus imarisen iso fararyor nkoḇedi mondaḇa, ḇape ikako imyaren kaku fa ifnoḇek mko isof mankundi imarisen ma dawos namuk fa ryamufa ḇemko. ¹⁸ Nkofarem fnoḇeki naek oso semafi rofandu kawasa Kristen snar fararur ḇyedi ro ḇararyas Ankankinem Ḇeḇye ro Allah. ¹⁹ Snar naek ani ḇyeḇekinfir kwar kako ma kawasa Kristen sikanowi fa ifnoḇek nko ro marandan nkoḇena. Snar nari ro marandan nkoḇedi fa nkoḇuk fafnoḇek anna, insa Manseren isma sanandik ma insa naek srar mkomam mboi nkomarisen nkofnoḇek. ²⁰ Nkoḇesasor kaku insa snonkaku ono skara sasar awer nko ro fafnoḇek ḇeba nkoḇuk anna. ²¹ Nkomarisen nkofrur napnapes ro Manseren ḇarpon ḇyedi mondaba, ḇape roḇarpon snonkaku kako. ²² Titus kuker naek kokofen ani, ma nkowan naek oso ḇese kako. Nkomnasen birikwar ḇerarwan ono ma nkomam imarisen ifamfnoḇek. Ma baboine, imarisen syadi ifnoḇek naek srar snar ikyar kaku nko. ²³ Titus, inido min ayedi ḇefararur fnoḇek aya fa ḇefnoḇek mko. Ma faro naek ḇese ansuine, ḇeso fnoḇek Titus, kawasa Kristen siso ḇewan sunya -- sanandik oso faro Kristus. ²⁴ Nkokyar naek srar mkofasna saswar farosi, insa kawasa Kristen kam sifawi naek srar mkoswar si ma rosai nkomsik kukerya faro naek srar mkokyar beri.

¹ Fandun werḇa yafas faro naek srar ro fafnoḇek sfarem faro Allah kawasa ḇyesi ro Yudea. ² Yafawi naek srar mkomarisen mkofnoḇek, ma yasandik mko kwar faro kawasa ro Makedonia. Yakofen farosi, naek srar ro Akhaya randak ro wampasi wambarek ḇesyonde kwar sfasos kwar fa ssḇuk famfnoḇek. Ma naek srar sasewar mkoḇena nadif ḇarḇebaya kwar ro sasewar sena kako. ³ Insape yawan Titus ma naek ḇese ansuine mufa ḇemko insa rosai nkomsik nko fa ḇekur mko nebeidi awer. Inja, naek srar iḇye mkofasos, snar yakofen farosi mboi mkofasos famfnoḇek anna kwar. ⁴ Yamkak warek rofyor kawasa Makedonia ono siso fnoḇek aya rofafisu yara mufaḇe mko. Ma rofyor sisrow mkofasos ḇaim, sye, nari komai kaku, snar nkokofen kwar mboi nkokyar faro mko! Ma naek srar mankun mko kako nari mkomai. ⁵ Eḇedari fandun kaku fa yawan ḇepon snonkaku sine faro mko fa mkofasos fanaḇnoḇek mkoḇe asas anna. Yafrur rarirya insa rofyor yarafa, famfnoḇek mkoḇena nfasos kwar. Rarirya, famfnoḇek ro naek srar mko, neḇeḇuk kuker marisen, mboi kuker ḇaḇedafdiferḇa. ⁶ Mkoswarepen! Snonkaku ḇeḇuḇer rokaker kermkun monda nari duf kermkun monda kako. Ḇape snonkaku ḇeḇuḇer rokaker nabor nari duf nabor kako. ⁷ Snonkaku oser-oser ḇyuk imnis marisen ḇyedi. Ḇyuk kuker fafardun awer roba snar ḇaḇedafdifer, snar Allah iswar snonkaku ḇeḇuk kuker marisensya. ⁸ Allah nari ḇyuk ḇok ḇefarsbawer faro naek srar, insa naek srar mkosma rosai mkoḇe fandun na; mboi nari naek srar mkona syadi fa mkokfrur ḇaḇye. ⁹ Sfas ro Refo ro Allah radine, "Allah ḇyerarwas, ḇyuk faro snonkaku ḇesaḇararsya; ḇaḇye ḇyedi ḇekain fyoro-fyoroya." ¹⁰ Allah i ḇefasos rokaker faro mambuḇer ma roḇeyan maḇeko, Allah ani kako nari fyasos ma ḇyuk nabor rosai naek buḇer na, insa ḇaḇenaḇye bedi nabor syadi wer. ¹¹ Rarirya naek srar nari mkosma mnis roi ḇeḇor kam isof mkomarisen mkoḇuk kuker sanemura. Ma roi ḇeḇor mkoḇuk ma nkoḇerarwas na, nbedar snonkaku sibor sikofen kasumasa faro Allah. ¹² Snar fararur ḇeḇye naek srar mkofrur ine, ḇyefa Allah kawasa ḇyesi sisma mnis monda ro ananjar senaḇa, ḇape nari sḇedar snonkaku sibor sikofen kasumasa faro Allah. ¹³ Snar ro ḇaḇenaḇye naek srar mkofasna ine, kawasa Kristen ḇeḇor ro Yudea nari sisandik Allah snar smam ḇaḇesyowi mkoḇena faro Ankankinem Ḇeḇye ro Kristus mkoso ani. Ma snar sanemura ro naek srar mkoḇerwas rosai isya ro mko farosi ma faro snonkaku ḇesesya kam. ¹⁴ Ma nari senadi warek naek srar kuker saswar ḇeba snar Allah ḇyenaḇye faro mko. ¹⁵ Iḇye kokofen kasumasa mufaḇe Allah snar roi ḇyukma naba kaku.

¹ Ro aya, Paulus, mankundaya ḇardi yamarisen yaḇuk wos ono faro mko. Snonkaku ono sikofen ro aya soḇo, rofyor yasrow naek srar mko, yamsik ayaḇa, mboi yaḇinkwan ido yamsik aya. Mboi snar fafafir ma ḇaḇenaḇye ro Kristus, ² inja yor kaku faro mko: insa mkodif awer aya fa yafasna masasik ayena rofyor yaramufa ḇemko. Snar yakara fa yaḇe yafasna masasik ayena faro kawasa ḇekofen mboi nkofararur kuker kakara ro supswan ine. ³ Mboi koisya kokenem kaker ro supswan ine, ḇape kofaḇaḇri kuker romamun supswan ine senaḇa. ⁴ Romamun koḇuki fyaḇaḇri na romamun supswan naisyaḇa, ḇape romamun Allah fyasos kuker papoik ḇyedi. Kuker romamun anna koḇuki kyakok ayar mamun snonkaku; ma koḇuki idwarek famfaḇri na ⁵ ma koḇukna nkakok ayar mamun marares sḇawes fa ssḇuki isampum napnapes ro Allah. Koḇukna nfor kakara kawasa ma kofrursi fa sesyowi mufaḇe Kristus. ⁶ Ma rofyor naek srar mkoḇeuser kaku kwar, nari mkofasos fa mkoḇuk samamyai faro snonkaku kam ḇeḇeuser ḇasya. ⁷ Naek srar mkofawi rosai ḇekakuya. Fyor snonkaku ono sikyar Kristus nyasi, iḇye kyukeḇ mankundi ma ifawi mboi Kristus nya nko kako imnis si. ⁸ Yafawi yamaiḇa rofyor yamsik nabor syadi wer ro Manseren papoik ḇyuk kwar maḇe nko, snar papoik ani ḇyeḇeḇuk fa nkokḇawes naek srar, mboi nkoḇuki kyakok ḇa. ⁹ Ro syap ayena yamewer mkokara ḇo mkoḇo yafrur makakak mko. ¹⁰ Nari snonkaku ono sikofen ḇosoḇo, "Paulus syap ḇyena nmarḇak ma npakrek, ḇape rofyor mankundi isya ro fandu ko, syambraḇ ḇa ma wos ḇyena nefaindaḇa!" ¹¹ Iḇye snonkaku ḇerarirya ansi sifawi mboi rofyor nkorafa, nari nkofrur imnis rosai nkofas ro syap anna. ¹² Kakuḇaḇoi nari yakara roḇa yaḇuk mankundaya fayamnis kuker kawasa ḇesandik mankunsisya ḇa. Snonkaku ansi sifawi royoḇaḇeri ssḇuk mankunsi skara imnis warnkyara fa skarayae mankunsi. ¹³ Nkoma rariryaḇa. Nkomsik nko, fa nkosyadi yawek yaḇa. Mboi nkoisya ro yawek supya fyor Allah ḇyuk fa nko fararur roya. Ma naek srar mkaksun ro supya fyor ani kako. ¹⁴ Inja, rofyor nkorakaki naek srar ma nkoḇaryas Ankankinem Ḇeḇye ro Kristus mufa ḇemko, kaku ḇeri nkunuk yawek ro supya fyor nkofararur royaḇa, snar naek srar mkoisya ro yawek ani dori. ¹⁵ Ine fyasna nkosandik nkoḇa ro fararur snonkaku ḇese ḇekain ro ḇondibur Allah yawek ḇyuk maḇe nko. Mboi nkokyar naek srar kakyar mkoḇena neḇefamfon wer insa nkofrur fararur ḇeba syadi wer rofandu naek srar, ḇape nkokain faswef ro Allah yawek ḇyuk maḇe nko. ¹⁶ Rarirya nkoḇaryas kako Ankankinem Ḇeḇye ani ro mnu-mnu ḇese mboi nkomarares mankun nkoḇa ro fararur nkofrur kwar ro supya mnuk snonkaku ḇesesya suffarmyan rona. ¹⁷ Sfas ro Refo radine, "Snonkaku ḇemarisen ḇemarares kuker roi oso, iḇye imarares i kuker rosai Allah ifrur kwar na." ¹⁸ Snonkaku mansei Allah isandikya, i besma sanandik ro kawasa, mboi ḇesandik mankundiḇa.

¹ Mkoḇuk fa yafrurḇe ḇefawi royoḇa kerkoper. Iḇyeke? ² Yaswar mufaḇe naek srar, imnis Allah mankundi iswar mufaḇe naek srar kako. Naek srar mkomnis dojaro ḇesren kaker oso, yaḇe asas kwar fa nari ḇefakawin kuker snon oso, isoine Kristus. ³ Ḇape yamkak warek kakara naek srar mkosma fafrowes fa nari mkoḇesyowi faro Kristusḇa, imnis raris ḇepon iwara Hawa kako isma fafrowes ro ikakya. ⁴ Snar rofyor snon oso ryama faro naek srar ma ḇyuk farkarkor ro Yesus eḇeseya -- mboi Yesus nkofasna kwar aniḇa. Ma naek srar mkomarisen kako mkona rur ma ’ankankinem ḇeḇye’ eḇesebos beri kuker Allah Rur ḇyedi ma Ankankinem Ḇeḇye mkosma kwar ro nko. ⁵ Yafawi yasasar kermkuno ḇaḇeri ro ’manwawan-manwawan’ ḇebasyadi mkoḇesi! ⁶ Mboi yafawi yawawos mankunba, ḇape fawawi ḇekur Allah yafawi syadi. Eḇedari nkofas na kwar roi ḇeḇor kam mufaḇe naek srar. ⁷ Rofyor yaḇaryas Ankankinem Ḇeḇye ro Allah faro naek srar mko, yor sasuref kermkun oḇa ro naek srar kako; ma rarirya yarun mankundaya. Yafrur rarirya insa yakanow naek srar mko. Inja, yafrur sasar oso faro naek srarke? ⁸ Rofafisu yuffarmyan naek srar mko kawasa Kristen ḇese siso ḇeḇak warek aya. Rarirya ido yafrur fromo kawasa Kristen ansi insa yafnoḇek naek srar. ⁹ Rofyor yasma pipiḇa rofafisu ani, yamewer yafrur kandera snon oso ro fandu mko. Fandun ayena kam naek srar ḇeramaker Makedonia siso befasosna. Yamkuser aya naḇye insa yaḇuk kandera awer faro naek oso ro rosai ryawer, ma nari yamku pdef faswef rarirya. ¹⁰ Masasik ayedine oso nari ḇyereriḇa ro moḇ sairya wer ro supya mnuk Akhaya ḇesiper, snar Kristus farkarkor ḇenapes ḇyena naisya ro aya. ¹¹ Yakofen rarirya snaro? Yaswar naek srar mkoḇake? Allah ifawi yaswar mko! ¹² Rosai yafrur ro baboine nari yafrur pdefi insa manwawan ḇese ḇemarares ansi, sisma nyan osoḇa fa simsiksi ḇo sikofen, mboi sakfararur kako imnis ko. ¹³ Snonkaku ḇerarirya syaido manwawan ḇesararer. Sikada sifararur kuker ankarkar ma sefarari imnis Kristus manwawan ḇyesi. ¹⁴ Kokandor fararur sedi ḇerariryaḇa snar Ibiris mankundi kako ḇyefarari malaikat ḇesren. ¹⁵ Inja nari kokandorḇa rofyor manfamyan ḇyesi sifrur farari imnis manfamyan ḇefrur Allah marisen ḇyedi. Ḇape ḇarpurya nari smunsu farosi imnis fararur ḇeḇor sena. ¹⁶ Yakofen ḇeosero wer: Imbude ono skara ayaḇe ḇefawi royoḇari. Ḇape rofyor naek mkokara aya rariryano, mkomarisen ido mkoḇuk fa yafawi royoḇayo yamsik kerkoper kako. ¹⁷ Rodine nari yakofen masasik ayedi, ḇape Manseren iso ḇewan fa yakofenyaḇa. Mboi roi ḇeḇesya ine yawawos imnis snon ḇefawi royoḇa oso. ¹⁸ Kakuḇaḇoi snonkaku sibor simsiksi ro roi ḇeḇor ro supswan, inja yoḇe yamsik mankundaya kermkuno kako. ¹⁹ Naek srar kuker sneḇemarisen mkokḇaḇ faro snonkaku ḇefawi royoḇasya, snar mkokara mkofawi nanemrya! ²⁰ Rofyor snonkaku sifrur mkoḇe women, roḇa sinem rik mkoḇena, sfasyar nana mkoḇena, ma skara sikaki syadi ro mko ma sḇaser mko, mkoren monda! ²¹ Yamai yakarem mboi nkosambraḇ ḇafa nkofrur imnis si. Ḇape rosai snonkaku ḇese simsiksi kuker na, yamsik aya kako! (Yawawos imnis snon ḇefawi royoḇa.) ²² Snon Ibrani siryake? Aya kako snon Ibrani. Snon Israel siryake? Aya kako snon Israel. Abraham up ḇyesiryake? Aya kako rarirya! ²³ Kristus manfamyan ḇyesiryake? Mboi yawawos imnis snonkaku ḇena swaruserḇa, ḇape aya manfamyan ḇeḇye syadi ro sikam. Yafararur sambraḇ syadi, sḇeaya fa yasun ro bui, siprer aya syadi isof fanam yamar. ²⁴ Kawasa Yahudi siprer aya ḇerarwan ririm kwar kuker ayos samfur rikior seser risiw. ²⁵ Kawasa Roma siprer ayaḇe rarwan rikior; fafisu ono sso aya kuker karui. Kapalna nambroi kuker ayaḇe rarwan rikior ro soren, ma rarwan oser yapyar yaki yararyoi ḇeoras samfur risuru seser fiak. ²⁶ Rarwan nabor kaku yambran mararan ḇeyun raro: war ḇedaf ḇeyun raro, manfasyar ḇeyun raro ro kawasa Yahudi rarirya kako kawasa ḇeḇe Yahudiḇa, raro ro mnu ḇebana, ḇondina, raro ro soren, ma raro ro kawasa ḇeyap mankunsiḇe naek Kristen ḇape Kristen sisyaḇa. ²⁷ Yafararur sambraḇ isof yaḇe yamar kaku: rarwan ono yenefḇa, yananḇa, yinemḇa, rarwan nabor yabiser, yasyuf snar mar bemnisba ma yasma mob fa yakain roḇa. ²⁸ Robo nakam, ras ono yararyofwarek kawasa Kristen kam. ²⁹ Rofyor ono ssambraḇ ḇa aya kako yaksambraḇ ḇa. Rofyor ono sisapi ro sasar, sne ayedi fyafardun kako. ³⁰ Rofyor yamsik ro ras ono, rarirya yamsik ro roi ḇefasna samambraḇ ḇa ayena. ³¹ Yaḇe ankarḇa; Allah, Manseren Yesus Kma ḇyedi ḇyesaksi ḇeaya! Snonsnon ḇyedi isma sanandik ro fyoro-fyoro. ³² Rofafisu aya isya ro Damsyik, wairek Aretas faker ḇyedi, iwan bo sordadesya siwaren warek kedwai ro mnuya insa sfor aya. ³³ Ḇape sikyu aya kuker aram oso ro koḇkir ayar mamun karuya. Rarirya yasma faspar rodia.

¹ Kakuḇaḇoi fainda oso ro masasikyaḇa. Ḇape yamarisen yaḇaryas kako Allah rosai ḇyuk maḇe aya ro fasasna ma mamam oso. ² Ro wampasi wambarek samfur seser rifiak ḇesyonde yamam snon Kristen oso ḇyeḇekanow ḇesyos ḇeḇekior ro Firdaus (Yafawiḇa baken ḇyedi ḇyeḇekanow kaku roḇa ine mamam oso monda -- Allah i ḇefawi mondaya). ³ - ⁴ Yakofen ḇeosero wer yafawi mboi snon ine ḇyeḇekanow ḇe Firdaus (Yafawiḇa baken ḇyedi ḇyeḇekanow kaku roḇa ine mamam oso monda -- Allah i ḇefawi mondaya). Rodiwa snon ani imnaf roi ono snonkakusya sifawi skara naba ma ssḇuk fa snonkakusya sawos naba. ⁵ Snonkaku ani iso eḇedari yamarisen yamsikya, mboi mankundayaḇa. Faro mankundaya, yawos monda roi ḇeḇor ḇekur samambraḇ ḇa ayena, iso eḇedari yamarisen yamsikya. ⁶ Imnis raris yamarisen yamsik ro roi oso kako, ḇape yamewer yaḇe mandawri; mboi nari yakofen roi ḇenapes. Ḇape yafarmkuser aya, snar yamewer snonkaku ono skara ayaḇe ḇesyadi ro rosai smam yafrur kwar roḇa rosai simnaf yakofen kwar. ⁷ Ḇape insa yamarares mankenem awer snar mamam ḇefrur kanandor anna inja skuk baken ayedi kuker borek oso imnis malaikat Ibirisya ḇyaserpum aya. Dafduf ani ḇyeḇeḇuk faiprer aya insa yamararesḇa. ⁸ Yaḇenadi ḇerarwan rikior faro Manseren ro dafduf ani. Yor fa Manseren imarisen ido ikanow dafduf anibur aya. ⁹ Ḇape Manseren kyarem, "Yaswar aw inja imnis mufa ḇeaw; snar papoik ayena nsambraḇ syadi rofyor awsya rwoi samambraḇ ḇaya." Iso eḇedari yamarisen yamsik ro samambraḇ ḇayena, snar rofyor yasambraḇ ḇa, rofafisu ani yaḇaḇir Kristus samambraḇ ḇyedi fyadiren aya. ¹⁰ Inja yaryaḇ kako kuker samambraḇ ḇa ayena. Yaryaḇ rofyor sonef aya, rofyor yasma kandera, rofyor siyawyaw aya ma rofyor yasma kandera snar Kristus. Snar rofyor yasambraḇ ḇa, rofafisu ani yapok kaku. ¹¹ Kaku ḇeri yafrur imnis snonkaku ḇefawi royoḇa -- ḇape naek srar mkoiso ḇefrur fa yararirya. Inja yafawi mkoiso ḇesandik aya. Mboi yaḇe maejaḇa rariso wer, nari yakafyoḇa faro manwawan ḇebasyadi mkoḇesi! ¹² Aḇyair-aḇyair kanandor ma papoik yafasna ro fararur ḇeba kuker kabaḇaḇ mufaḇe naek srar fa nfasna aya ine manwawan oso. ¹³ Ma rosaiso nkomam mankunba ro mko, rofyor nkoḇuk kakara kuker kawasa Kristen ḇese? Mboi roi oser monda isoine: Yafrur kandera faro naek srar mkoḇa famkoḇak warek aya. Mkoḇuk maaf ro sasar aninekada. ¹⁴ Baboine yafasos ḇerarwan ḇeḇekiorya fa yara kaki mko. Ma yamewer yafrur kandera mko, snar roi yamarisenya arasa mkoḇenaḇa, mboi mankun mko. Snar romawa siso ḇesewar arasa faro sinan sesiḇa, ḇape sinan ansiso ḇesewar arasa faro romawa sesya. ¹⁵ Snar naek srar mkoi eḇedari kuker sne ḇeryaḇ yamarisen fayaḇuk roi ḇeḇor kam, mboi isof yamarisen yaḇuk mankundaya kako faro naek srar mko. Rofyor yaswar mko rarirya, rosai eḇedari naek srar mkoswar mankun ayaḇa? ¹⁶ Inja, naek srar mkokofen mankundaya yafrur kandera mkoḇa. Ḇape ono sisya sikofen aya ine yafawi yasararer; inja yasma ḇaḇefainda ro naek srar mko snar kakara sararer ayena. ¹⁷ Rariryaḇa! Inja ḇaḇefainda rosai yasma ro naek srar ro snonkaku yawan faro mkonsya? ¹⁸ Yawan Titus ma naek Kristen ḇese ansi kwar fa srakaki mko. Inja Titus dun ḇaḇefainda ono ro mkoke? Ḇape Titus ma aya nufararur kam kuker rur ḇemamnis ma nuso wewur oser! ¹⁹ Inja mkokara mkoḇo fafisu ine nuḇesewar fa nuḇesano warek nu faro mkoke? Roḇaḇeri! Naek srar nuswar kaku, Allah ifawi roi nkokofen anna kam kada namnis Kristus marisen ḇyedi. Ma roi ḇeḇor nkofrur annakada nkoḇukḇawes kankenem rur ro naek srar. ²⁰ Yamames warek imbude rofafisu yarakaki naek srar, nari yasrow naek srar mko imnis moḇ yakyar rayaḇari, ma naek srar kako nari mkosrow aya imnis moḇ mkokyar rayaḇari. Imḇude kosrow ko kuker rakrakrok, sasurem, dosam, rmomen arasa, anonefyae, sikofenyae, marares ma anunḇesisye. ²¹ Yamkak warek imbude Allah ayedi ryun aya wer ro ḇarpon naek srar rofafisu yaramufa ḇemko. Yamames warek kako roḇepon iwara naek srar ono ḇefrur sasar kwar, nari sifrur fayakanes snar simbror baim ma simnaiba ro sifrur farbuk, roi bemamas ma roi ḇemnisḇa.

¹ Ine rarwan ḇeḇekior nari yarakaki naek srar wer. Sfas ro Refo radine, "Wawos (parakara) oso kyaku rofyor kosma saksi risuru roba kior." ² Snonkaku ḇefrur sasar ro ḇepon iwara kwar ma snonkaku ḇesesya kam, yaḇuk swarepen ḇepon farosi kwar rofafisu yarakaki naek srar ro rarwan ḇeḇesuruya. Insape, rofafisu yaḇinkwan ro naek srar, yaḇuk swarepen wer insa rofyor yaramufa wer, snonkaku oso ḇaḇeri rosi nari ikfisḇa ro samamyaiya. ³ Nari naek srar mkosma fasasna kaku ḇeri Kristus dawawos kuker sḇayo ayedi. Rofyor Kristus fyasna papoik ḇyedi faro mko, papoik ḇyedi syambraḇ kaku, rarirya fyasna papoik ḇyedi rofandu naek srar. ⁴ Mboi rofafisu ḇyeḇepai ro aprop, syambraḇ ḇa, ḇape snar Allah papoik ḇyedi baboine ikenem. Nko kako nkosambraḇ ḇa, snar nko ḇeoser kuker Kristus ro kankenemya, ḇape rofyor nkoisya ro ḇarpon mkoḇedi, nko kako nkosambraḇ fnoḇek Kristus snar Allah papoik ḇyedi. ⁵ Indo naek srar mkomnasenbir mankun mko ma mkokukeḇ kaku ḇeri naek srar mkoisya mkokenem imnis kankarem kakyar mkoḇena faro Kristus! Nari naek srar mkofawi mboi Yesus Kristus isya ro fandu mko! -- mboi rofyor naek srar kakyar mkoḇena nkakuḇari. ⁶ Yakyar naek srar mkofawi nkoine nkodworen kaku ro manasnasenya. ⁷ Nkonadi mufaḇe Allah insa imarisen ifnoḇek naek srar famkofrur sasar awer. Mboi nkofasnaḇa nkoine nkofawi nkofrur posa fararur nkoḇena, ḇape insa naek srar mkofawi Allah rosai imarisen na -- imnis raris nkoḇefromo, ḇape roi osoḇa! ⁸ Snar nari nkofrur roi osoḇaḇeri ḇemnisḇa ḇesampum Allah marisen ḇyena; nkokada nkoso Allah marisen ḇyena. ⁹ Nkoryaḇ rofyor nkosambraḇ ḇa, mboi naek srar mkosambraḇ. Nkonadi warek naek srar insa mkokenem mnis. ¹⁰ Eḇedari yafas syap ine ḇepon rofyor aya isya ḇaim rofandu naek srar mko. Rarirya, rofyor yarafa kwar, nari yafasna pakakrek faro mkoḇa kuker papoik Manseren ḇyukma ḇeaya. Papoik ani ḇyeḇeḇuk fa nkoḇuki ḇyawes naek srar mko, mboi nkoḇuki kyakokḇa. ¹¹ Ḇarpurya, naek srar, iḇye mkoryaḇ, ma mkoḇesewar mkokenem mnis. Mko kram farkarkor ḇeḇor ayena. Iḇye naek srar mkoḇe sne oser ma mkokenem kuker aski. Allah ḇesaswar syadi ma ḇeḇeknam aski ani nari ryowus naek srar mko. ¹² Mkokofen arooyae ma faḇyee imnis naek srar Kristen. Allah kawasa ḇyesi kam sfarem aroo mufa ḇenaek srar. ¹³ Manseren Yesus Kristus ḇyeḇok naek srar, ma Allah iswar naek srar. Iḇye Allah Rur ḇyedi ryowus naek srar mko kam kada! Ro nu, Paulus ma Timotius