1 TESALONIKA

¹ Ro Paulus, Silwanus ma Timotius faro kawasa jemaat ro Tesalonika, kawasa ro Allah Kmaya ma ro Manseren Yesus Kristus: Saswar-fakamaman ma aski-ḇaḇye ryowus mko kada. ² Nkokofen kasumasa faro Allah ḇesyakwar snar nko kam ma nkap mko ronadi nkoḇena ḇesyakwar. ³ Snar nkoswarepen fararur kakyar mkoḇena ḇeaya kwar, fararur saswar mkoḇena ma ḇaḇesaneraro ḇedworen mkoḇena faro Manseren koḇedi Yesus Kristus ro ḇarpon Allah ma Kma koḇedi. ⁴ Ma nkofawi, ne, naek srar Allah iswar mkoya, mboi Allah kyinfir mko kwar. ⁵ Snar Ankankinem Ḇeḇye nkoḇaryas ani nkoḇuki faro mko kuker wawos monda ḇa, ḇape kuker papoik ro Rur Ḇesrenya ma kuker kakyar ḇeko. Mboi mkofawi, rariso nkofararur rofandu mko snar mko. ⁶ Mboi fyasna ḇadir mkosouser nko ma mkoso Manseren kwar; ro ḇaḇewayam ḇemarḇak mkona wos ani kuker raryaḇ ḇeḇeknam ro Rur Ḇesrenya. ⁷ Isof mko ḇefasasna kwar faro kawasa ḇekyarsya kam ro supya mnuk Makedonia ma ro Akhaya. ⁸ Snar rofandu mko, Manseren wos ḇyedi ryok ḇeruran ro Makedonia ma Akhaya monda ḇa, ḇape ro moḇna kam kakyar mkoḇedi faro Allah, ḇyesno kwar, isof nari nkokofen roi oso ḇa. ⁹ Snar mankunsi sfarfyar ro nko, rariso mkosrow nko ma rariso mkokaḇerbur karwarsya faro Allah famkuffarmyan Allah ḇekenem ma ḇenapes, ¹⁰ ma insa mkowaf raramuma ro Allah Rumkun ḇyedi ro boiyaswa, ḇyefa ḇeyiḇer kwar rofandu ḇemarsya isoine Yesus, ḇefaspar kobur masasor nari ḇeramumaya.

¹ Naek srar mankun mko kako mkofawi, raramufa nkoḇedi faro mko waworek ḇa. ² Mboi kaku ḇeri nkorafa ḇaimya, mkofawi sewayam ma sonef nko ro Filipi kwar, ḇape kuker fafnoḇek ro Allah koḇedi, nkosma makaku fankoḇaryas Ankankinem Ḇeḇye ro Allah faro mko ro fararur ḇemarḇak ine. ³ Snar ananun nkoḇena farkarkor ninyan naisya ḇa roḇaido kakara ḇekaku nairya ma sararer naisya ḇa kako. ⁴ Roḇa. Snar Allah kyara nkosyus ma ikyar Ankankinem Ḇeḇye ani faro nko, rarirya nkoḇaryas, fankofrur marisen snonkaku ḇa, mboi nkofrurfa Allah imarisen ma imnasen nkosnesna. ⁵ Snar fafisu oso ḇaim fankowos marnden -- roi ḇeradine mkofawi -- ma nkona kakara faḇrimankun ḇeyokef ḇa -- Allah ḇeḇesaksiya -- ⁶ fafisu oso ḇaim nkosewar sanandik ro snonkaku, inja ro naek srar mko ma snonkaku ḇese kako. Kaku ḇeri nkofrur rarirya imnis Kristus manwawan ḇyesi, rarirya nari nkor roi ono ro mko. ⁷ Ḇape nkoḇeaḇaḇen mko, imnis sna oso fyarus ma fyaduru romawa ḇyedi. ⁸ Rarirya kako, nkoswar naba faro mko, inja nkomarisen nkoḇerwas Allah Ankankinem Ḇeḇye ḇyedi monda faro mkoḇa, ḇape kankenem nkoḇena ḇardi kako kuker mko, snar nkoswar mko kwar. ⁹ Snar mkoswarepen kaker ḇaḇesewar ma kandera -- marmor nkoḇena kwar. Rofafisu nkofararur ro roḇ meser, insa nkofrur kandera faro oso ḇa kako rofandu mko, snar nkoḇaryas Allah Ankankinem Ḇeḇye ḇyedi faro mko. ¹⁰ Mko ḇesaksi maro nko, rarirya kako Allah, nkokenem nasren, nkofrur mnis ma nkofarorew ḇa fankokenem rofandu mko ḇekyar faro Kristus kwar. ¹¹ Mkofawi, nkomnis kma oso faro romawa ḇyesi, nkanun mko ma nkoḇuk sambraḇ faro mko oser ḇe oser kwar; ¹² ma nkor kaku ḇeri, insa mkokenem namnis raris Allah marisen ḇyena, ḇeyor mko faro Ḇaḇesasoser ma baba ḇyedi. ¹³ Ma rarirya nkomnai ḇa ro nkokofen kasumasa faro Allah kako, snar mkona Allah wos ḇyedi nkoḇaryas kwar ani, imnis wos ro snonkaku ḇa, ḇape -- ma kaku ḇeri rarirya -- Allah wos ḇyedi, ḇefararur ro ḇekyar mkoya kako. ¹⁴ Naek srar ḇaḇewayam rosai mkosmana, jemaat-jemaat Allah ro Yudea ḇena Yesus Kristus saksma ḇaḇewayam anna kako kwar. Ḇaḇewayam mkosmana ro er mankun mkoḇansya, imnisbos kaku moḇ Allah jemaat ḇyena ro Yudea sisma ḇaḇewayam raya ro Yahudisya. ¹⁵ Mboi Yahudisya smun Manseren Yesus kwar ma nabisya ma sḇewayam nko ḇesya kwar. Allah rosai imarisenna sfandun naba mboi sḇembroḇ snonkakusya kam, ¹⁶ snar simarisen sidwarek nko insa nkobaryas awer wos ani faro er ḇese fasaksma koreri. Rarirya sifrur pdef ḇesya kwar sasar sena rawo nabor kaku inja baboine Allah masasor ḇyedi myun si kwar. ¹⁷ Ḇape naek srar rofafisu koḇesisyeya koḇinkwan ro mamamyae, ḇape kofanamyae ro kosnesna, nkoḇeḇare ḇeswar kaku ḇeri ma nkoḇesewar insa nkorakaki fankomam mko. ¹⁸ Snar nkokara kwar fankorakaki mko -- ma aya, Paulus, yafasos kwar isyadi ro rarwan oser, -- ḇape Ibirisya idwarek nko. ¹⁹ Kaku ḇeri mkoiso nkokyar ma nkoryaḇ kukerya. Snar nari rofyor Manseren Yesus ryama ma kosrow iya, nari mkoiso komsik kukerya. ²⁰ Kaku ḇeri, mkoi eḇedar nkomsik ma nkoryaḇya.

¹ Ḇarpurya nkofarmku wer ḇa, mboi nkokara iḇye syadi yerer yakain ro Atena. ² Mboi nkowan Timotius, naek ḇefararur faro Allah fnoḇek ro ḇaḇeḇaryas Kristus Ankankinem Ḇeḇye ḇyedi ryafa ḇyuk sambraḇ ḇemko ma danun mko ro kakyarya, ³ insa ono kakyar sena namarmer awer snar ḇaḇewayam anna. Mankun mkofawi, mboi sfasna ko faro ḇaḇewayam ḇera dinena kwar. ⁴ Snar, rofyor nkoisya fnoḇek mko, nkokofen faro mko kwar, nari kosma ḇaḇewayam. Ma mkofawi, ḇaḇewayam ḇeradine ndarirya kwar. ⁵ Eḇedari yafarmku wer ḇa, mboi yawan Timotius, insa yafawi rariso kakyar mkoḇena, snar yaḇeḇirḇar rofyor mkosma fafrowes ro Ibirisya kwar ma nari ḇaḇesewar nkoḇeja ḇyefromo. ⁶ Ḇape baboine, Timotius kyaḇerma kwar ma dun ḇaryas ḇefrur raryaḇ ro kakyar ma saswar mkoḇena, ma mkoḇe ḇare nko ḇesyakwar ma mkomarisen mkosrow nko, imnis nko kako nkomarisen nkosrow mko, ⁷ naek srar, nko kako, ro ḇaḇewayam ḇeḇor nkoḇena nkosma sneprei snar kakyar mkoḇena. ⁸ Baboine rofyor mkores faswef ro Manseren, imnis raris nkokenem kaḇer wer. ⁹ Snar kafkofen kasumasa rosai nari nkoḇuk faro Allah ro ḇaḇeraryaḇ ḇeḇor, nkosma ro mko, ro ḇarpon Allah koḇedi? ¹⁰ Ro roḇ meser nkonadi kaku ḇeri, insa kosrowyae ḇarpon kuker ḇarpon ma nkofamfon rosai ḇedawer kaker ro kakyar mkoḇena. ¹¹ Allah, Kma koḇedi, ma Manseren koḇedi Yesus, ḇyuk nyan maro nko fankosrow mko kada. ¹² Manseren ifrur famkoswar syadiyae mko ma mkoswar kawasa kam, imnis raris nko kako nkoswar mko. ¹³ Manseren ḇyuk sambraḇ faro mko kada, insa mkosren ma mkofarorew ḇa, ro ḇarpon Allah ma Kma koḇedi rofyor raramuma ro Manseren koḇedi, Yesus fnoḇek kawasa ḇyesya kam.

¹ Ḇarpurya, naek srar, nkor ma nkanun mko ro Manseren Yesus: Mkorower ro nko kwar rariso mkokenem insa mkofrur Allah marisen ḇyedi. Roi ḇerarirya ani mkoso i kwar, ḇape kaku ḇeri mkofrur i kada. ² Snar mkofawi kako fasasnai rosai nkoḇuk kwar faro mko ro snonsnon Yesus. ³ Snar Allah marisen ḇyedi isoine ido: Insa mkokenem kuker saranden, isoine mkofrur farḇuk awer, ⁴ inja mkono oser-oser dun bin oser faḇyeswa faro mankundi ḇardi insa ikenem kuker saranden ma ḇaḇesyowi, ⁵ mboi kuker rmomen baken nafsu ḇa, imnis fararur ro snonkaku ḇefawi Allah ḇasya, ⁶ ma insa roi ḇeradine kawasa sifrur awer roi ḇeḇyeḇa faro naek sesi roḇa seankar si. Snar Manseren nari myunsu roi nanekam, imnis nkokofen fasna faro mko ro ḇeponnya. ⁷ Allah dorko insa kofrur roi ḇemamas ḇa, mboi roi ḇesren. ⁸ Inja, mansei ḇesampum roi ḇeradine, isampum snonkaku ḇa, mboi isampum Allah ḇeḇuk Rur Ḇesren ḇyedi faro mko kako. ⁹ Ro saswar manbekanaek fandun faneḇefas faro mko ḇa, snar mankun mko mkofarkor kwar saswaryae ro Allah. ¹⁰ Roi ḇeradine mkofrurna kako faro naek mkoḇesi kam ro supya mnuk Makedonia ḇesiper. Ḇape nkanun mko, naek srar, insa mkofrur syadi kakuna wer. ¹¹ Ma mkokarana imnis ḇaḇesyowi oso faro kankenem ḇeknon, famkokara roi ḇekur mankun mko ḇardi ma mkosewar nanan ro mankun mko, imnis nkanun kwar faro mko, ¹² isof mkokenem raris snonkaku ḇeḇesyowi ro mamam snonkaku ḇese ma mkokasandem awer faro si. ¹³ Naek srar nkomarisen insa mkakfawi kaku roi ḇekur snonkaku ḇemar kwar ansi; insa mkoḇarop awer imnis snonkaku ḇese ḇena kakyar ḇasya. ¹⁴ Snar rofyor kokyar, mboi Yesus imar kwar ma ḇyeḇeḇawes wer, ma kokyar kako mboi ḇemar kwar ro Yesus nari Allah fyanjur si fasiwarpui. ¹⁵ Nkokofen radine faro mko kuker Manseren wos ḇyedi: ma ḇekenem kaker koya isof Manseren raramuma ḇyedi nari kopon ḇemar ansya ḇaḇeri. ¹⁶ Snar rofafisu ssḇuk aḇyair, isoine rofafisu mananir malaikatya kyaru ma Allah kḇur ḇyedi ryok, ma nari Manseren mankundi dado ro boiyaswa ma ḇemar ro Kristus nari sḇawes si ḇepon; ¹⁷ raimnai, ḇekenem kaker koya, nari koḇe ḇekanow fnoḇek si ḇemandep ro farsyos sansoren fakosrow Manseren. Rarirya nari kowarpu Manseren isof fyoro-fyoro. ¹⁸ Inja mkoḇuk snepreiyae faro mko kuker wos nane.

¹ Ro awar ma fafisu fandun faneḇefas faro mko ḇa, ² snar mankun mko ḇardi mkofawi kwar, mboi ras Manseren ryamumaya imnisbos kaku ḇekaraw ro roḇna. ³ Rofyor sikofen: Nakam neaski ma naknon -- ḇape fasaw kaku ḇaḇeraroya kyur si, imnis bin ḇemoḇesḇa oso iduf iḇedaḇen romawa ḇyedi. ⁴ Ḇape naek srar, mkokenem ro pampanya ḇa, isof ras ani ryama ifrur kanandor mko imnis ḇekaraw oso, ⁵ snar mko kam romawa ro sananai ma romawa ro meser. Koine snonkaku ro pampan roḇa snonkaku ro roḇ ḇa. ⁶ Rarirya kenef awer imnis kawasa ḇese, mboi koḇaḇir ma kowaren. ⁷ Snar ḇeyenefsya, senef ro fafisu roḇ ma ḇemsersya simser rofafisu roḇ. ⁸ Ḇape koine, kawasa ro meser, iḇyekada koḇaḇir, kona kakyar ma saswar imnis sansun mankarmomen ma kona saswoi mankarmomen kakyar faro koreri. ⁹ Snar Allah ḇyuk fakosma masasor ḇyedi ḇa, mboi kosma koreri snar Yesus Kristus, Manseren koḇedi, ¹⁰ ḇemar kwar snar ko, insa kowarenke, roḇa kenefke, kokenem fnoḇek kuker Kristus. ¹¹ Rarirya mkanunyae mko ma mkosonemyae mko, imnis moḇ mkofrur ro baboine raya. ¹² Nkor faro naek srar, insa mkoḇesyowi ḇefararur sambraḇ rofandu mko, ḇefarkin ma ḇesonek mko snar Manseren; ¹³ ma insa kaku ḇeri mkoḇeuser si kuker saswar snar fararur sena. Mkokenemyae ḇesya kwar kuker aski. ¹⁴ Nkanun mko kako, naek srar, insa mkosonek ḇekenem kuker aunos ḇasya, mkawos sneprei faro ḇefafardunsya, mko ḇesanowarek ḇeryarḇasya, mkokḇaḇ faro snonkakusya kam. ¹⁵ Mkoswarepen naḇye, insa snonkaku ono smunsu ḇarḇor kuker ḇarḇor awer, ḇape mkoḇesewar ḇesya kwar roi ḇeḇye, faro mko oser-oser ma faro snonkaku kam. ¹⁶ Mkorayaḇ ḇesya kwar. ¹⁷ Mkoḇenadi faswef. ¹⁸ Mkokofen kasumasa ro roi ḇeḇor kam, snar Allah marisen ḇyedi faro mko ro Yesus Kristus. ¹⁹ Mkofasye awer Rurya. ²⁰ Ma mkomamkyof awer ḇardadi Allah Rur ḇyedi ḇyukna. ²¹ Mkomnasen roi ḇeḇor kam ma mkona ḇeḇyena. ²² Ma mkoḇinkwanbur ḇarḇor syoso-syoso kam kada. ²³ Allah saswar-ḇaḇye ḇyedi fyasren mko kam kada mboi rur kenem fnoḇek baken mkoḇena, neḇefaduru mnis kuker farorewḇa faro raramuma ro Yesus Kristus, Manseren koḇedi. ²⁴ Allah i ḇeyor mko kwar ima ikaḇaḇaḇ, i kako nari ḇyefanamnis. ²⁵ Naek srar mkonadiwarek nko kada. ²⁶ Mkokofen aroo nkoḇenane faro naeksya kam ḇena kakyar oser. ²⁷ Kuker snonsnon ro Manseren yor kaku ḇeri insa mkowasya syap ine faro naeksya kam. ²⁸ Saswar-fakamaman ro Yesus Kristus, Manseren koḇedi, ryowus mko kam kada! Ro nko, Paulus, Silas ma Timotius