1 PETRUS

¹ Ro Petrus, Yesus Kristus wawan ḇyedi, faro kawasa Kristen ḇefamakmok ro sup Pontus, Galatia, Kapadokia, Asia-Kasun ma Bitinia, ² isoine kawasa skinfir, imnis kuker Allah, Kma koḇedi, aw ḇyedi ma Rurya fyasren kwar, insa sisouser faro Yesus Kristus ma ḇesma fasasren kuker rik ḇyedi. Saswar-fakamaman ma aski-ḇaḇye ro Allah fyarsbawer syadi faro mko kada. ³ Sanandik faro Allah ma Kma ro Manseren koḇedi Yesus Kristus, snar ḇaḇye ḇyedi daḇen kaḇer ko kwar snar Yesus Kristus aḇiḇer ḇyedi rofandu ḇemarsya, faro kankenem oso ḇefo kuker saneraro, ⁴ insa kosma rarwas oso nari ḇero ḇa, ḇemamas ḇa ma ḇemaryoi ḇa, ḇekram ro boiyaswa faro mko. ⁵ Isoine mko, Allah fyaduru kuker samambraḇ ḇyedi snar kakyar mkoḇena rofafisu mkowaf koreri ḇefasos kwar fanari ḇyeḇefasnai ro awar ḇepupesya. ⁶ Mkoryaḇ, mboi fafisu ine mko ḇekandera snar mkosma farawrowes nabor. ⁷ Nakam ndarirya fanfasnaḇair kakyar ḇekaku bedi -- ḇeḇemaeja syadi ro brawen nari ḇero, simnasen kakaku ḇyedi kuker for -- isof mkosma sanandik kanawnow ma ḇaḇesyowi ro ras Yesus Kristus fyasnai mankundiya. ⁸ Mko mam ḇeponi ḇaim, ḇape mkoswar i. Knikine mko mam i ḇaimo ḇape mkokyar faro i. Mkoryaḇ kuker raryaḇ ḇeba syadi. ⁹ Snar mkosma bon kwar ro kakyar mkoḇena, isoine koreri faro rur mko ḇesi. ¹⁰ Koreri iso nabisya skukeḇ kuker aunos, ma sḇardi kwar ro saswar-fakamaman Allah ḇyuk faro mko. ¹¹ Ma skukeḇ rariso fafisu rosai koreri nari ryamaya, imnis kakara Kristus Rur ḇyedi ḇekenem ro si. Rofafisu ani Rur ḇyedi ḇyardi faro si ro kandera-kandera Kristus nari ismana ma ro baba ḇyedi nari ḇeyom ro ḇarpurya. ¹² Fasasnaya isya kwar faro si, mboi suffarmyan mankunsi ḇardi ḇa, ḇape suffarmyan mko kuker roi ḇeḇor kam baboine sḇaryas kwar faro mko rofandu si, kuker Rur Ḇesren, ḇewanker boiyaswa, faḇeḇaryas Ankankinem Ḇeḇye faro mko, ma malaikatsya simarisen fasifawi rosai sḇaryas ani kako. ¹³ Eḇedari wepen aw, ma waswaruser naḇye insa rwir saneraro ḇena kam faro saswar-fakamaman nari ssḇuk faro aw rofyor Yesus Kristus kyaḇerma werya. ¹⁴ Mko kenem imnis romawa ḇeḇeuser ma mkoso awer rmomen nafsu ro ḇeponiwara rofyor ḇaḇefawawi ḇa mkoḇena, ¹⁵ ḇape kankenem mkoḇena kam nasren imnis raris Yesus Kristus saranden ḇyedi, ḇeyor mko kwar ani kada, ¹⁶ snar sfas ro Refo radine: Mkosren snar aya ine yasren. ¹⁷ Ma rofyor mkap Allah ḇe-Kma, isoine Allah ḇemamkaryer ḇa mboi ḇeḇemankara faro snonkaku kam imnis fararur ḇyena inja mkokenem kuker araryof rofyor mkoisya ro supswan ine. ¹⁸ Snar mkofawi, mko ḇeḇeḇak namuk kwar ro kankenem ḇeḇefromo kpu mkoḇesi sḇefa ḇeḇewaris faro mko. Ḇaḇyak ani roi oso nari ḇeroḇa imnis sarak roḇa brawen, ¹⁹ mboi kuker Kristus rik ḇyedi, ḇekakur kaku, ḇemnis raris rik domba mkun ḇemamas ḇa ma ḇefarorew ḇa. ²⁰ Allah kyinfir Kristus kwar rofyor supswan ine ḇyeḇefrur ḇaimya, ma rofyor awar ḇepupes ine, ryama ḇesupswan ine insa ḇyuk koreri faro mko. ²¹ Kuker i mkokyar faro Allah ḇeḇawes i kwar rofandu ḇemarsya ma ḇeḇuk baba faro i isof kakyar ma saneraro mkoḇena faro Allah. ²² Snar mkofasren mankun mko kwar kuker ḇaḇeuser faro napnapesya, isof mkoswar faro naek srar mkoḇesi kuker napnapes, inja kaku ḇeri mkoswaryae mko kuker sne ḇesiper. ²³ Snar mko ḇeḇeyaḇen kaḇer kwar famkobabo kuker Allah wos ḇekenem ma ḇekain fyoro ḇyedi mboi mko ḇeḇeyaḇen ro ḇaḇesnonkaku ḇa, mboi ro Kma ḇekain fyoroya. ²⁴ Snar ro Refo sfas radine: "Snonkakusya kam simnis aḇris, ma baba sena kam namnis aḇris pampen. Aḇrisya myaryoi, ma pampenya kako kyapaf, ²⁵ ḇape Manseren wos ḇyedi kyain faswef isof fyoro-fyoro." Ine kada Ankankinem Ḇeḇye ḇyuk faro mko.

¹ Eḇedari mkosawen ḇarḇor ḇeḇor kam, ankarkar ḇeḇor kam ma roi ḇeḇyeḇa kam, kram masasor ma anonef. ² Ma mkomnis wombrek ḇeaḇen babo, ḇemarisen ḇeyinem sus ro Rur ḇekaku, insa mkosur ma mkosma askiya. ³ Rofyor mkoḇaḇir Manseren ḇaḇye ḇyedi kaku ḇeri. ⁴ Ma mkora faro Manseren, karui ḇekenem ani, snonkakusya sisawen i, ḇape Allah kyinfir i imnis karui ḇeḇemaeja. ⁵ Ma mko kako mkomnis karui ḇekenem faro ḇaḇawes rum rur oso, imnis imam-imam ḇesren, faḇeḇuk farsarser rur, snar Yesus Kristus ḇeḇuk marisen faro Allah. ⁶ Snar sfas ro Refo radine: "Kaku ḇeri, yarir karui ḇekinfir oso ro Sion, karui dopir ḇekakur oso, ma mansei ḇekyar faroi, nari sifrur mamyai i ḇa." ⁷ Eḇedari faro ḇekyar mkoya, karui dopir ani kyakur, boi faro ḇekyar basya: "Karui kamasan ḇaḇawessya sisawen kwar, ḇyekarui dopir kwar ma ḇyekarui karkar kako kwar ma karui warki oso." ⁸ Siwarki snar sikyar Allah wos ḇyena ḇa; rarirya Allah fyasna kwar faro si. ⁹ Ḇape mko kada er ḇekinfir, imnis imam ḇeḇewairek, er ḇesren; Allah kawasa mankundi ḇyesi, insa mkoḇaryas Allah fararur ḇeba ḇyena, ḇeyor mko kwar famkosasyarbur pampanya faro isnai ḇyedi ḇedameserya: ¹⁰ Mko, Allah kawasa ḇyesi ro randakya ḇa, ḇape knikine, mko ḇekawasa ḇyesi kwar mko ḇeḇeswar ro randakya ḇa ḇape knikine mkosma saswar saneso kwar. ¹¹ Naek srar yaswar kaku! Yaḇuk swarepen faro mko mkomnis mandaman ḇeḇeryar ro supswan ine, mkoso awer rmomen-nafsu ro snonkaku ḇefamfaḇri ḇesampum rurya. ¹² Kankenem mkoḇena naḇye rofandu er-er ḇeḇe Yahudiḇasya, insa rofyor sonef mko imnis snonkaku ḇeḇarḇor, nari smam fararur ḇeḇye mkoḇena ma sisandik Allah ro ras raramuma ḇyedi. ¹³ Kuker snonsnon Manseren, mkokunem faro snonkaku ḇesma papoiksya; iḇye faro Kaisar ḇesma papoik ḇekakiya, ¹⁴ iḇye kako faro gubernur, Kaisar fyasna kwar faḇeḇuk samamyai faro ḇeḇarḇor ma syowi faro ḇefrur roi ḇeḇyesya. ¹⁵ Snar Allah marisen ḇyedi, mkofrur roi ḇeḇye insa mko panos sḇadon ro ḇewosḇo ḇefawi royoḇasya. ¹⁶ Mkokenem imnis snonkaku ḇemkei, ma mkomnis awer snonkaku ḇeyokef ḇarḇorsena kuker ḇaḇemkeiya mboi mkokenem imnis Allah manfamyan ḇyesi. ¹⁷ Mko ḇesyowi snonkaku kam, mkoswar naek srar mkoḇesi, mkomkak Allah, mkoḇesyowi waireksya! ¹⁸ Ne, ḇeyuffarmyan, mkokunem kuker makakak faro manseren mkoḇesi, ḇefafir ma ḇeḇenaḇyesya serer ḇa, mboi faro ḇemasasorsya kako. ¹⁹ Snar saswar-fakamaman naisya, rofyor snon oso ifawi Allah marisen ḇyedi inja ikbaḇ ḇyar kandera ḇenapes ḇana. ²⁰ Nari mkosma sanandik rariso, rofyor mkosma kandera snar sasar mko frurna? Ḇape rofyor mkofrur roi ḇeḇye raimnai mkosma kandera, nari Allah ḇyeḇok mko. ²¹ Snar faro roi ḇerarirya eḇedari mko ḇeḇeyor, snar Kristus ḇyekandera faro mko kwar ma ḇyuk fasasna faro mko kwar insa mkoso wewur ḇyena. ²² Ikada ifrur sasar ḇa, ma dankarkar ḇa. ²³ Rofyor sonef-sifyaki, ima dakonef-dakfyak ḇa; rofyor isma kandera, iḇriwarek iḇa, ḇape ḇyuk mankundi faro Allah, Mankara ḇenapesya. ²⁴ Mankundi ḇyar sasar koḇena kwar ro ai apropya, insa koine, ḇemar faro sasar kwar ko kenem faro ḇaḇenapnapesya. Snar amborew ḇyena kosma pararei kwar. ²⁵ Snar ḇeponiwara koḇor imnis domba, ḇape baboine kokaḇer kwar faro Manfarandows Ḇefaduru Rur koḇesi.

¹ Rarirya kako mko ne, bin ḇefakawin kwar mkoya, mkokunem faro swa mkoḇesi, insa ono ro mko seuser Allah wos ḇyedi ḇa, mkokofen roi oso faro si awer mboi rari mkoḇena nafrur fasikyar kako, ² rofyor smam, kankenem ḇekaku ma ḇesren ro swa sesi. ³ Karamas bena, karamas ro kankenem monda awer imnis raris famankor ofur, famankor ro brawen roḇa mkosansun sansun ḇepyum, ⁴ mboi karamas ḇena nek ro sne ḇeyokef kuker karamas nari ḇero ḇa ḇeḇeknam ro rur ḇefafir ma ḇeknon, ḇeḇemaeja kaku ro Allah mamam ḇyedi. ⁵ Snar ḇeponiwara bin ḇesrensya sfamankor si rarirya, isoine bin ḇena saneraro faro Allah; skunem faro swa sesi, ⁶ imnis raris Sara ḇyesyowi Abraham ma nyiri ḇetuan ḇyedi. Ma mko kada mko ḇeromawa faroi, rofyor mkofrur roi ḇeḇye ido mkomkak awer faro rosairyawer kako: ⁷ Rarirya kako mko, ne snon ḇefakawin kwar mkoya, mkokenem kuker fawawi faro swa mkoḇesi, imnis snonkaku ḇesambraḇ ḇa syadi! Mko ḇesyowi si snar mko kam nari mkosma saswar-fakamaman ro Allah, isoine kankenem, insa nadi mkoḇena royo idwarekna ḇa. ⁸ Ma ḇarpurya, mko kam mkona wos oser, ḇaḇaḇir oser, mkoswaryae mko imnis manḇekanaek ma ḇerun sne, ⁹ ma mkomunsu awer ḇarḇor kuker ḇarḇor, roḇa anonef-fanfadak kuker anonef-fanfadak, mboi mko kaḇer kuker mkor ḇaḇok ro Allah. Snar Allah dor mko insa mkosma ḇaḇok ro i. ¹⁰ Ro Refo sfas radine, "Mansei ḇeswar kankenem ma bemarisen bemam ras ḇeḇye, depen sḇadon ḇyedi insa dawos roi ḇeḇye ḇa awer ma ikofen awer roi ḇeḇeankarkar. ¹¹ Ḇyinkwanbur roi ḇeḇarḇor ma ifrur roi ḇeḇye, syewar ḇaḇeaski isof isma i. ¹² Snar Manseren myamepen ḇeso marisen ḇyenasya, ma Manseren imnaf nadi sena; ḇape Manseren isampum ḇefrur ḇarḇorsya." ¹³ Ma mansei nari ḇefrur ḇarḇor faro mko, rofyor mkomyaren mkofrur roi ḇeḇye? ¹⁴ Ḇape mkosma kandera rariso wer kako snar ḇaḇenapnapes, nari mkosma aski. Inja mkomkak awer faro manseiryawer kako ma mkoradai awer. ¹⁵ Ḇape mko ḇesyowi Yesus ro mkosnemna imnis Manseren! Rofafisuna kam mkofasos insa mkoḇuk kankarem faro mansei ḇefuken saneraro mkoḇena, ḇape iḇye kada kuker fawawi ma syowi, ¹⁶ ma kuker sneuser ḇesren kaku insa rofyor ḇeyonef mko smam kankenem ḇeḇye mkoḇena imnis ḇeso Kristus, nari ḇeyonef ansi simai ro mankun si. ¹⁷ Iḇye syadi koḇekandera snar kofrur roi ḇeḇye rofyor Allah imarisen roi ḇerarirya, ro kofrur ḇarḇor. ¹⁸ Snar Kristus mankundi imar ḇeoser isof fyoro-fyoro snar snonkakusya sasar sena -- snonkaku oser ḇesasar ḇa imar sadwer ḇefrur sasarsya. Kristus ifrur rarirya insa dun ko faro Allah; smuni kwar imnis ḇaḇesnonkaku, ḇape ḇyeḇeḇawes kaḇer kwar imnis ḇaḇerurya. ¹⁹ Ma Kristus Rur ḇyedi kako rya ḇyaryas Ankankinem Ḇeḇye faro rur-rur ḇero buisya, ²⁰ isoine rur snonkaku ḇeḇeuser Allah ḇa ro awar Nuh, rofafisu ani Allah ikḇaḇ ma iwaf Nuh fasasos jawara ḇyedi, faro snonkaku riwar monda ḇekenem ro faḇruḇ ani. ²¹ Baboine mko kako mkosma kankenem snar sarḇer ani, isoine masi sren -- ḇeḇuk fasasren mamas ro baken ḇa, mboi faro fararyor sneuser ḇeḇye faro Allah -- snar kaḇaḇaḇ Yesus Kristus, ²² ḇekain ro Allah ḇar raku ḇyedi, rofyor ḇyeḇekanow ḇeboiyaswa kwar ḇyuk sasoser faro malaikatsya kam, papoikna kam ma samambraḇna kam nkunem faroi.

¹ Inja, Kristus isma kandera kwar imnis kandera ḇaḇesnonkaku, rarirya mko kako mkofasos romamun mkoḇena kuker kakara ḇeradine, -- snar mansesi ḇesma kandera ḇaḇesnonkaku, imnai kwar ro ifrur sasar, -- ² insa fafisu ḇedawerya mkoḇuki ifrur awer marisen ḇaḇesnonkakuya, mboi mkoso Allah marisen ḇyedi. ³ Snar fafisu nabor kwar mkoḇuki ifrur marisen snonkaku ḇefawi Allah ḇasya. Mkokenem kwar ro rmomen-nafsu, ḇaḇemasaser, munara ḇefnak pipi, farandinem ma syom karwar ḇeyarwarem. ⁴ Rarirya si kandor snar mkoso si famkaksun ro aner raris kankenem sena ḇa, eḇedari sonef mko. ⁵ Ḇape nari skarem faro Allah, ḇefasos kwar faḇeḇemankara faro ḇekenem ma ḇemarsya. ⁶ Eḇedari Ankankinem Ḇeḇyeya ḇyeḇeḇaryas kako faro ḇemarsya, insa sḇemankara si kwar kako ro ḇaḇesnonkaku -- imnis raris nari snonkakusya kam semankara si -- insa sikenem imnis ḇaḇerurya, siso Allah marisen ḇyedi. ⁷ Fafisu ḇepupesya ro roi ḇeḇor kam fyanam kwar. Inja mkepen mko ma mkoknon, ḇo mkoḇenadi. ⁸ Ḇape ḇepon kakuya: mkoswaryae mko kaku ḇeri, snar saswarya ikawef sasar nabor kaku. ⁹ Mkoḇuk moḇ ḇaḇeryaryae faro mko kuker sasurem ḇa. ¹⁰ Mkuffarmyanyae mko, imnis raris fakamaman snonkaku oser-oser isma kwar imnis manfarkin ḇeḇye ro Allah saswar-fakamaman ḇyena. ¹¹ Rofyor snonkaku ono sawawos ido, sawos imnis ḇeḇuk Allah wos ḇyedi; rofyor snonkaku ono suffarmyan ido, sifrurna kuker samambraḇ Allah ḇyukna, insa Allah isma baba ro roi ḇeḇor kam snar Yesus Kristus. I ḇesma papoik ma babaya isof fyoro-fyoro! Amin. ¹² Naek srar yaswar kaku, mko kandor awer for ḇesber ḇerama ḇefrur kandera mko imnis manasnasen, imnis roi ḇeba oso isya kyur mko. ¹³ Mkoryaḇ syadi, imnis kuker rarwas mkosma ro Kristus kandera ḇyedi, insa mko kako mkoryaḇ ma mkomarisen naba rofyor Kristus fyasna baba ḇyedi. ¹⁴ Fainda faro mko, rofyor mkosma anonef snar Kristus snonsnon ḇyedi, snar Rur ḇeḇye, isoine Allah Rur ḇyedi isya ro mko. ¹⁵ Snonkaku oso kako rofandu mko ḇyekandera awer snar myamun, roḇa kyaraw, roḇa ḇyarḇor, roba snar ifrur arubiru, snonkaku ḇese wos sena. ¹⁶ Ḇape, rofyor isma kandera imnis snonkaku Kristen, imai awer, mboi isandik Allah snar snonsnon Kristus ani. ¹⁷ Snar fafisuya ryama kwar fa-Allah ḇyemankara supswan ine. Ma Allah mankundi kawasa ḇyesiso nari ḇyemankara ḇepon kakusya. Ma rofyor ḇaḇemankara ani irandak maro ko, rariso kuker snonkaku ḇekyar ḇa faro Ankankinem Ḇeḇye ro Allah ani? ¹⁸ Ro Refo sfas radine: "Rofyor ḇenapessya kermkuno kada sisma koreri ḇa, nari rariso kuker ḇeḇarḇor ma ḇesasarsya?" ¹⁹ Eḇedari iḇye kako ḇesma kandera snar Allah marisen ḇyedi, ssḇuk rur sesi, ma sifrur roi ḇeḇye ḇesya kwar faro Ḇefrur siya.

¹ Yaḇuk swarepen faro penetua-penetua rofandu mko, aya imnis min penetua ma saksi ḇaḇekandera Kristus, nari ḇesma kako rarwas ro baba, rofyor Kristus baba ḇyedi ḇyeḇefasna faro snonkakusya. ² Inja mkofarandows domba nai Allah ḇyesi ḇero mkororisya, kuker dafdifer awer, ḇape kuker sneḇemarisen imnis Allah marisen ḇyedi, ma mkosewar awer ḇaḇefainda, mboi mkuffarmyan kaku ḇeri. ³ Mkofrur imnis awer raris mkomarisen mkoḇuk sasoser faro Allah domba ḇyesi ikyar faro mko kwar, ḇape mkoḇefasasna faro domba ansi. ⁴ Ma rofyor Manfarandows Ḇebasyadi ani ryama, nari mkosma wower ḇesnaper fyoroya. ⁵ Rarirya kako, ne, snonkbor mko, mkokunem faro mansarsya. Ma mkorunyae mko, snar sfas ro Refo radine: "Allah isampum ḇemararessya, ḇape iswar ḇerun snesya." ⁶ Eḇedari rwun mankundaw faro Manseren ḇramin ḇesambraḇ ḇyesuya, insa ikanow mko rofafisu ḇyedi. ⁷ Mkoḇuk makakwarek mkoḇena kam faro Allah, snar i ḇefaduru mko. ⁸ Mkoḇaḇir ma mkepen mko! Snar mbroḇ mkoḇedi, Ibiris, imbran yar mura muma imnis raris singa (aiwan ḇeyan ḇepek) ḇeaur ma ḇesewar snonkaku fadoren ḇepek. ⁹ Kosampum i kuker kakyar ḇedworen, snar mkofawi, naek srar Kristen kam ro supswan ine ḇesiper sḇar kandera ḇemnis kam. ¹⁰ Ma Allah knam ro saswar-fakamaman nakam, ḇeyor mko kwar snar Kristus baba ḇyena ḇekain fyoroya nari fyasos ma isonem, ma ḇyuk samambraḇ ma syoser mko, rofyor mkosma kandera knik monda kwar. ¹¹ I ḇena papoik isof fyoro-fyoroya! Amin. ¹² Yafas syap ḇeknampu yedine faro mko kuker fafnoḇek ro Silwanus (Silas), yakara i ḇesnon Kristen oso ḇeḇeuser. Yamarisen yadif ma yaḇuk snekin faro mko mboi ine kada fakamaman Allah ḇenapes. Inja mkufepen fakamaman ani nadworen. ¹³ Bati ḇena jemaat oser ro Babilon, Allah kyinfir si kako, sfarem aroo faro mko, rarirya kako romawa saswar ayedi Markus. ¹⁴ Mkokofen arooyae faro mko kuker saswar imnis snon Kristen. Manseren ḇyuk aski faro mko kam ḇena Kristus i kada! Amin. Ro aya, Petrus