1 YOHANES

¹ Syap ine kyur Wos ḇeḇuk kankenem, isoine Wosya isya kwar roawar madero. Nkomnaf i kwar, ma nkomam i kwar, kuker nkomkasna. Nkomami kwar ma nkuf i kwar kuker nkoḇrasna. ² Rofafisu kankenem ani ḇyeḇefasnai, ma nkomami kwar. Rarirya nkoḇesaksi i ma nkoḇaryas faro mko kankenem ḇekaku ḇekain fyoro, isya fnoḇek Kmaya, ma sfasnai kwar faro nko. ³ Rosai nkomam kwar ma nkorower, ikada nkokofen ḇadir faro mko kako, insa mkoḇeoser kuker nko ma koso Kmaya ma Rumkun ḇyedi, Yesus Kristus. ⁴ Ma nkofasna kam faro mko, insa kosnesna namarisen kaku ḇeri. ⁵ Wos nkosma kwar ro Allah Rumkun ḇyedi ma nkoḇuk faro mko isoine: Allah ikada isnai, ma pampanya isya ro iḇaḇeri. ⁶ Rofyor kokofen ḇo koḇo, mboi koḇeoser kuker i, ḇape kokenem ro pampan, koḇeankar iḇye ro wos ma fararur koḇena kako. ⁷ Ḇape rofyor kokenem ro isnai imnis raris Allah isya ro isnai kako, nari kosma ḇaḇeoser kuker snonkaku ḇesesya, ma Allah Rumkun ḇyedi, Yesus rik ḇyena, nfasren sasar ḇeḇor koḇena kam. ⁸ Rofyor kokofen ḇo koḇo, kosasar ḇa, koḇeankar mankun ko ma napnapesya isya ro koḇa. ⁹ Mboi rofyor kokarem sasar koḇena faro Allah, nari ḇyuk raris asas ḇyedi ma ifrur rosai ḇenapes. Nari ipyos sasar koḇena ma fyasren ko ro ḇarḇor ḇeḇor koḇena. ¹⁰ Ḇape rofyor kokofen ḇo koḇo, kosasar ḇa, kofrur Allah imnis raris ḇeḇeankarkar; isoine kokram Allah wos ḇyena ro kosnesna ḇa.

¹ Romawayesi! Yafas roi nane faro mko insa mkofrur sasar awer. Ḇape rofyor ono sifrur sasar, ḇefnoḇek ko isoine Yesus Kristus, ḇenapes ani; nari iwos fandun koḇena ro ḇarpon Kmaya. ² Kuker fafnoḇek Yesus Kristus ani kosma ḇaḇepayasyos ro sasar koḇena. Ma kerer kosma payasyos ro sasar koḇena ḇa, mboi sasar ro kawasa kam ro supswan ine kako. ³ Rofyor koḇeuser Allah sasoser ḇyena, irya kofawi Allah. ⁴ Mansei ḇekofen ḇo ḇeyoḇo, "Yafawi Allah," ḇape ḇyeuser Allah sasoser ḇyena ḇa, snon ani dankar, ma Allah wos ḇekaku ḇyedi isya ro sne ḇyedi ḇa. ⁵ Ḇape mansei ḇeḇeuser Allah wos ḇyena ido, iswar kaku Allah. Ine fyasna koḇeoser ma kokenem kuker Allah kwar. ⁶ Mansei ḇekofen ḇo ḇeyoḇo, ḇyeoser ma ikenem kuker Allah, kankenem ḇyedi imnis raris Yesus kada. ⁷ Naek srar yaswar kaku! Roi yafas nane sasoser ḇebabo naisya ḇa. Mboi sasoser ḇekwar ro randakya sikofen faro mko isoine wos mkorower ro Allah kwar. ⁸ Ma roi yafas nane sasoser babo nairya kako; sasoser anna nfasna Yesus mankundi ma faro mankun mko kako; snar rofyor pampanya ipromes ma isnaiya iyar kwar. ⁹ Mansei ḇekofen ḇo ḇeyoḇo, ima isya ro isnaya dori, ḇape dayin naek ḇyedi, ikada isya ro pampanya isof baboine. ¹⁰ Mansei ḇeswar naek ḇyedi, ikada ikenem ro isnaiya, snar roi oso isya ro iḇa ḇefrur fanari snonkaku ḇese sifrur sasar. ¹¹ Ḇape mansei ḇeayin naek ḇyedi, ikada isya ro pampan, imbran ro pampanya, ma ifawi moḇ iḇe ryaḇeya ḇa, snar pampanya ifrur famyam ba. ¹² Yafas faro mko kam, ne, romawa yesi, snar sasar mkoḇena Kristus ipyos na kwar. ¹³ Yafas faro mko kam, ne, kma yesi, snar mkofawi Allah, isya kwar ro awar madero. Yafas faro mko, ne, snonkbor mkoya, snar mkokafyo ḇarḇor Ibirisya kwar. ¹⁴ Yafas faro mko kam, ne, romawa yesi, snar mkofawi Kmaya kwar. Yafas faro mko kam, ne, kma yesi, snar mko kam mkofawi wos ma ro awar madero isya kwar. Yafas faro mko kam, ne, snonkbor mkoya, snar mkosambraḇ ma Allah wos ḇyedi isya ro mkosnemna, inja mkokafyo Ibirisya kwar. ¹⁵ Mkoswar awer supswan ine, roḇa rosai isya ro supswan ine. Rofyor mkoswar supswan ine, nari mkoswar Kmaya ḇa. ¹⁶ Roi ḇeḇor ro supswan ine kawasa ḇesasarsya sirmomen na -- isoine roi ḇeḇor ḇeyun sne, isof sirmomen sna na, ma roi ḇeḇor sirmomen na insa ssḇuki darer mankunsi -- nane neknam ro Kmaya ḇa, mboi ro supswan ine. ¹⁷ Supswan ine ma roi ḇeḇor kawasa sirmomen ro ina nari napromes. Ḇape snonkaku ḇefrur Allah marisen ḇyena, ikenem faswef isof fyoro-fyoro. ¹⁸ Romawa yesi mko, awar papupesya fyanam kwar! Ma imnis raris sikofen ḇadir faro mko kwar, Kristus mbroḇ ḇyesi nari srama, rarirya baboine Kristus mbroḇ ḇyesi sikḇok kwar. Ine aḇyair ḇeko rofafisu Ras Ḇepupesya fyanam kwarya. ¹⁹ Mbroḇ Kristus ḇyesi snonkaku ḇebur ko kwar, inja snonkaku koḇesisya ḇa. Snar sun ro rarwas koḇedi ido nari sisya kuker ko. Ḇape sisasyarbur ko, fyasnai oso ro si snonkaku koḇedisya ḇa. ²⁰ Ḇape Yesus Kristus ḇyuk Allah Rur ḇyedi fabyepoik mko kwar. Ma rarirya mko kam mkofawi Allah ḇenapesya. ²¹ Inja yafas ine faro mko snar mkofawi Allah kwar, ma mkofawi Allah ḇenapes dankar ḇaim. ²² Mansei ḇeḇeankarkar ani? Ḇeḇeankarkar isoine snonkaku ḇekofen ḇo ḇeyoḇo, Yesus Wairek Ḇeyun koreri raris Allah asas ḇyedi ḇa. Snonkaku ani Kristus mbroḇ ḇyedirya; ikada kyarem Kmaya ma Rumkunya ḇa. ²³ Mansei ḇekarem Rumkun ani ḇa, ikako nya Kmaya ḇa kako. Mansei ḇekarem Rumkun ani, ikada nya Kmaya kako. ²⁴ Snar rarirya ḇyaryas mkomnaf kwar ro randakya mkokara naḇye i ro mkosnemna. Rofyor mkokarai naḇye ḇaryas ani, nari mko ḇeoser kuker Rumkun ani ma Kmaya. ²⁵ Ma inekada Kristus mankundi ḇyeasas maroko isoine: Kankenem ḇekaku ḇekain fyoro. ²⁶ Rosai yafas nane kam nkur snonkaku ḇeḇesasewar ḇefarkor ninyan mkosya. ²⁷ Ḇape mankun mko ḇardi, Kristus isbawer Rur ḇyedi kwar faro mko. Ma rofyor Rur ḇyedi isya ro mko, inja fandunḇa fasnonkaku sfarkor mko. Snar Rur ḇyedi fyarkor mko ro roi ḇeḇor kam; ma rosai fyarkor na nkaku, ma nasrer ḇa. Rarirya, mkomarisen ma mkoḇesyowi Rurya rosai fyarkor na, ma mkomarisen mkoḇeoser kuker Kristus. ²⁸ Inja, romawa yena mko, mko ḇeoser kuker Kristus, insa rofafisu ryama, kuker kakyar nari komku ro ḇarpon ḇyedi, ma koḇaḇir komai ḇa. ²⁹ Mkofawi kwar Kristus ikenem ma iso Allah marisen ḇyedi. Snar rarirya mkofawi kako snon oso ikenem ma iso Allah marisen ḇyedi, ikada Allah romawa ḇyedirya.

¹ Mkomame! Allah iswar ko rarirya isof sap ko ḇeromawa ḇyesi; ma rarirya -- koine Allah romawa ḇyesi. Rarirya supswan ḇeḇarḇor ine sifawi koḇa, snar supswan sifawi Allah ḇa. ² Naek srar yaswar kaku! Baboine koine Allah romawa ḇyesi ko, ḇape rariso kuker ko, ima ḇyeḇefasnai ḇaim maro ko. Mboi kofawi rofyor Kristus ryama nari komnis i, snar nari komam kaku i. ³ Snonkaku kam ḇena kakyar ine faro Kristus, iwaren mankundi insa isren kaku ḇeri ro sasar, imnis Kristus kako isren ro sasar. ⁴ Mansei ḇefrur sasar, ḇyeuk Allah sasoser ḇyena; snar sasar ikada ḇaḇeuk Allah sasoser ḇyena. ⁵ Ma mkofawi Kristus ryama faipyos snonkakusya sasar sena, ḇape ima dakḇesasar ḇa. ⁶ Snar snonkaku kam ḇekenem ma ḇeḇeoser kuker Kristus, ifrur sawawek sasar ḇa. Ḇape snonkaku ḇefrur sawawek sasar, isrow Kristus ḇaim roḇaido ifawi Kristus ḇaim. ⁷ Romawa yesi mko, mkomam monda awer ḇo manseirya kako ḇyeninyan awer mko. Mansei ḇefrur Allah marisen ḇyedi, ḇyeknam ro Allah, imnis Kristus ḇyeknam ro Allah kako. ⁸ Mansei ḇefrur sawawek sasar ikada Ibirisya romawa ḇyedirya, snar Ibiris ifrur sasar ro randakya. Allah Rumkun ḇyedi ryama ḇesupswan ine insa kyakok Ibirisya fararur ḇyena. ⁹ Snonkaku oser-oser ḇeḇeromawa faro Allah kwar, ifrur sawawek sasar ḇa, snar Allah papoik ḇyedi isya roi. Ma snar Kma ḇyedi Allah, inja ifrur sawawek sasar ḇa. ¹⁰ Inekada aḇyair rofandu Allah romawa ḇyesi kuker Ibirisya romawa ḇyesi: Mansei ḇefrur Allah marisen ḇyedi ḇa, roḇaido iswar naek ḇyesi ḇa, ḇyeromawa Allah ḇaim. ¹¹ Snar ro randakya sḇair ḇaryas ine faro mko kwar: isoine mkoswaryae mko. ¹² Ma komnis awer Kain, ḇeḇeknam ro Ibiris isof myun ḇedar ḇyedi. Snaro Kain myun ḇedar ḇyedi? Snar roi ifrur na nsasar, ma roi ḇedar ḇyedi ifrur na nakada nanapes. ¹³ Rarirya, naek srar yesi, mkokandor awer rofyor snonkaku ro supswan ine siyin mko. ¹⁴ Kofawi kosasyar kwar ro marmar, ma baboine kokenem. Kofawi snar koswar naek koḇesi. Mansei ḇesaswar ḇa, ikada isya ro papoik marmarya. ¹⁵ Mansei ḇeayin naek ḇyedi, ikada snon mamun, ma mkofawi snon oso myamun ikada nya kankenem ḇekain fyoroya ḇa. ¹⁶ Rarirya kofawi Kristus saswar ḇyedi, isoine ḇyuk kankenem ḇyedi faro ko kwar; ma ko kako koḇuk kankenem koḇena faro naek srar koḇesi! ¹⁷ Rofyor snon oso nya papus ro supswan ine, ma myam naek ḇyedi isma namnis ḇa, ḇape imewer fyasna fafnoḇek faro naek ḇyedi, rariso snon ani ikofen ḇo doḇo, iswar Allah? ¹⁸ Romawa yena mko! Koswar monda awer kuker sḇadon roḇaido wawos. Ḇape koswar kuker saswar ḇekaku, kofasna ro fararur koḇena. ¹⁹ Rarirya kofawi koḇeknam ro Allah, isof koknon ro ḇarpon Allah. ²⁰ Ma rofyor kosnesna nbaḇir kosasar, kofawi Allah ibasyadi ro kosnesna ma ifawi roi ḇeḇor kam. ²¹ Inja naek srar ayesi yaswar kaku, rofyor kosnesna nbaḇir kosasar ḇa, kora faro Allah kuker kakyar. ²² Ma rosai kor roi kosmana, snar koso sasoser ḇyena kam ma kofrur rosai imarisen na. ²³ Roi syoser maroko isoine: Kokyar faro Rumkun ḇyedi Yesus Kristus; ma koswaryae ko, imnis raris sasoser Kristus faro ko. ²⁴ Mansei ḇeḇesyowi Allah sasoser ḇyena, ḇyeoser kuker Allah, ma Allah ḇyeoser kuker si. Ma kofawi Allah ḇyeoser kuker ko snar Allah Rur ḇyedi ḇyuki faro ko kwar.

¹ Naek srar yesi yaswar kaku! Mkokyar awer faro snonkaku ḇekarem ḇo ḇeyoḇo, ḇena Allah Rur ḇyedisya, ḇape mkomnasen ḇepon si famkofawi rur rosai isya ro si ḇyeknam ro Allahke roḇa. Snar nabi sararer sibor sikḇok ḇo sraḇe supswan ḇesiper. ² Rarirya kofawi Allah Rur ḇyedi: snonkaku ḇekarem Yesus Kristus ryama ḇesupswan ine imnis snonkaku, snon ani nya Rur ḇerama ro Allah. ³ Ma snonkaku ḇekarem Yesus ḇa, nya Allah Rur ḇyedi ḇa. Snon ani nya rur ḇeḇembroḇ Kristus. Rur ani sikofen ḇadir faro mko kwar nari ryama. Baboine isya ro supswan ine kwar. ⁴ Ḇape romawa ayesi, mko kada Allah romawa ḇyesi. Mko kada mkokafyo nabi-nabi sararer ansi kwar, snar Rur ani isya ro mko ipok syadi ro rur ḇero snonkaku ḇeḇeknam ro supswan ine. ⁵ Nabi sararer ansya sowawos ro roiḇero supswan, ma supswan simnaf wos sena, snar si seknam ro supswan ine. ⁶ Ḇape ko kada Allah romawa ḇyesi; ma snonkaku ḇemambaḇir Allah, simnaf wawos koḇena kako. Snonkaku ḇeḇeromawa Allah ḇa, simnaf wos koḇena ḇa. Rarirya aḇyair ine kofawi rofandu Rur ḇekfin snonkaku ḇefawi Allah ma rur ḇefarkor ninyan snonkaku. ⁷ Naek srar yaswar kaku! Mkorama koswaryae ko, snar saswar ḇyeknam ro Allah. Snonkaku ḇesaswar, ikada Allah romawa ḇyedi ma ifawi Allah. ⁸ Mansei ḇesaswar ḇa, ikada myambaḇir Allah ḇa, snar Allah ikada isaswar. ⁹ Allah fyasna saswar ḇyedi ro kosnesna snar iwan Rumkun oser ḇyedi ḇesupswan ine insa kuker Rumkun ḇyedi kosma kankenem. ¹⁰ Inekada saswar: Koi ḇeswar kwar Allah i ḇa, ḇape Allah i ḇeswar ko kwar, inja iwan Rumkun ḇyedi insa kuker i kosma ḇaḇepayasyos ro sasar koḇena. ¹¹ Naek srar yaswar kaku, rofyor Allah iswar ko rarirya, ko kako koswaryae ko. ¹² Snon osoḇa kako ḇemam Allah kwar, ḇape Allah ḇyeoser kuker ko ma saswar ḇyedi imnis maro ko, rofyor koswaryae ko. ¹³ Rarirya Allah ḇyuk kwar maro ko Rur ḇyedi, inja kofawi koḇeoser kwar kuker Allah ma Allah ḇyeoser kuker ko. ¹⁴ Mankun nko nkomam kwar Allah Rumkun ḇyedi ma nkoḇaryas faro snonkaku ḇese mboi Kmaya iwan i kwar faḇye Wairek Ḇeḇuk koreri faro supswan ine. ¹⁵ Mansei ḇekarem Yesus ani Allah Rumkun ḇyedirya, Allah ḇyeoser kuker snonkaku ani, ma snonkaku ani kako ḇyeoser kuker Allah. ¹⁶ Ko ḇardi kofawi ma kokyar Allah saswar ḇyedi maḇeko. Allah ikada isaswar. Snonkaku Allah saswar ḇyedi ḇyepoiksya, snon ani ḇyeoser kuker Allah, ma Allah ḇyeoser kukeri. ¹⁷ Saswarya ḇyeḇefrur faimnis maḇe ko, insa komkak ḇa kora faro Allah ro Ras Mankaraya. Nari komkak ḇa, snar kokenem imnis raris Kristus, koisya kokenem ro supswan ine. ¹⁸ Mansei ḇesaswar, snonkaku ani imkak ḇa; snar saswar ḇemnis iyaw ḇaḇaḇir makakakya. Rarirya, saswar ani ḇyeḇefrur mnis ḇaim ro snonkaku ḇemkak ani, snar makakak dun samamyai. ¹⁹ Kosaswar snar Allah iswar syadi ko ḇepon kwar. ²⁰ Rofyor snonkaku oso ikofen ḇo doḇo, "Yaswar Allah," ḇape dayin naek ḇyedi, snonkaku ani isararer. Snar snonkaku ḇeayin naek ḇyedi myam faroya, nari rariso iswar Allah myam ḇaimya. ²¹ Ma inekada sasoser Kristus ḇyuk maḇe ko: Mansei ḇeswar Allah, dakswar naek ḇyedi kako.

¹ Snonkaku ḇekyar Yesus ikada Wairek Ḇeḇuk koreri, Allah ḇyeasas kwar, snonkaku ani kada Allah romawa ḇyedirya. Ma snonkaku ḇeswar Kmaya, iswar Kmaya Rumkun ḇyedi kako. ² Nari kofawi koswar Allah romawa ḇyesi, rofyor koswar Allah ma koḇesyowi sasoser ḇyena. ³ Snar, koswar Allah inja koḇeuser sasoser ḇyena. Ma sasoser ḇyena nmarḇak maro ko ḇa, ⁴ snar Allah romawa ḇyesi sambraḇ sifrurkafyo supswan ḇeḇarḇor ine. Ma kofrurkafyo supswan kuker kakyar koḇena. ⁵ Mansei ḇefrurkafyo supswan kuker ḇarḇor ḇyena? Derer monda snonkaku ḇekyar Yesus ikada Allah Rumkun ḇyedi. ⁶ Yesus Kristus ryama ḇesupswan kuker masisren ḇyedi ma kuker rik marmar ḇyedi. Ryama kuker war monda ḇa, ḇape kuker war ma rik kako. Ma Allah Rur ḇyedi mankundi ḇeḇesaksi mboi inekada kyaku, snar Rur anikada inapes. ⁷ Snar saksi rikior isya [ro boiyaswa: Kmaya, Wosya ma Rur Ḇesrenya; sko kam skoḇeoser. ⁸ Ma saksi rikior skoḇuk ḇaḇesaksi ro supswan ine]: Rurya, warya ma rikya, skokam skoḇeoser. ⁹ Kokyar ḇaḇesaksi ro snonkaku, ḇape ḇaḇesaksi ro Allah syambraḇ syadi wer. Ma inekada ḇaḇesaksi Allah ḇyuk kwar ro Rumkun ḇyedi. ¹⁰ Mansei ḇekyar faro Allah Rumkun ḇyedi, isma kwar ḇaḇesaksi ani ro mankundi; ḇape mansei ḇekyar Allah ḇa, ifrur kwar Allah ḇe ḇeḇeankarkar, snar ikyar ḇa rosai Allah ḇyesaksi kwar ro Rumkun ḇyedi. ¹¹ Ḇaḇesaksi ani isoine: Allah ḇyuk kwar ḇeko kankenem ḇekain fyoroya; ma Rumkun ḇyedi ḇeḇeknam kankenem ḇekain fyoro ani. ¹² Ma mansei ḇena Rumkun ani, nari nya kankenem ḇekain fyoro ani; ma mansei ḇena Allah Rumkun ḇyedi ḇa, nari nya kankenem ani ḇa. ¹³ Faro ḇekyar Allah Rumkun ḇyedi, yafas nane kam insa mkofawi mkona kankenem ḇekain fyoroya kwar. ¹⁴ Ma komsik ḇo kora faro Allah, snar kokyar imnaf fararyor koḇena, rofyor kor rosairya wer imnis kuker marisen ḇyedi. ¹⁵ Ma rofyor kofawi imnaf fararyor koḇena ma kofawi kako nari ḇyuk rosai kor kwar faroi na. ¹⁶ Rofyor snon Kristen koḇesi oso ifrur sasar ḇeyun ḇemarmar ḇa, mkonadi warek i faro Allah; ma nari Allah ḇyuk kankenem faro snon ani. Ine kyur ḇefrur sasar ḇeyun ḇemarmar ḇa. Ḇape isya sasar ḇeyun ḇemarmar, ima yakofen ḇa insa mkonadi warek faro Allah ro sasar ani. ¹⁷ Fararur ḇeḇor ḇeḇarḇor, sasarnairya, ḇape isya sasar ḇeyun ḇemarmar ḇa. ¹⁸ Kofawi snonkaku ḇeḇeromawa Allah, sifrur sasar sawawek ḇa, snar Allah Rumkun ḇyedi fyadiren si, ma Ibirisya ifrur roi oso faro si ḇa. ¹⁹ Kofawi koine koḇeknam ro Allah, ma supswan ḇesiper ine isya ro papoik Ibirisya. ²⁰ Kofawi Allah Rumkun ḇyedi ryama kwar ma ḇyuk ḇeko fawawi kwar, insa kofawi Allah Ḇenapesya. Kankenem koḇena neoser kuker Allah Ḇenapes ani ma koḇeoser kuker Rumkun ḇyedi Yesus Kristus. Ikada Allah Ḇenapes, ma ikada kankenem ḇekaku ḇekain fyoroya. ²¹ Romawa ayesi, mkoḇinkwanbur amfyanir ḇeḇor kam!