1 KORINTUS

1 KORINTUS

¹ - ³ Naek srar Allah jemaat ḇyedi ro Korintus, Allah dor kwar fa ḇeḇe kawasa ḇyesi snar Yesus Kristus i ḇena mko, fnoḇek kawasakam ro moḇ rosairyawer ḇeḇesyowi Manseren koḇedi Yesus Kristus, isoine Manseren mkoḇedi ma Manseren koḇedi kako. Aya, Paulus, ma naek koḇedi Sostenes, nkokyar Allah Kma koḇedi, ma Manseren Yesus Kristus ḇyeḇok ma ḇyuk aski faro mko. Yafas syap ine imnis wawan ro Yesus Kristus, Allah mankundi ikanow raris marisen ḇyedi kako. ⁴ Yakofen kasumasa ḇesyakwar faro Allah snar naek srar mko, snar mkosma kwar fakamaman Allah ḇerama ro Yesus Kristus. ⁵ Snar Kristus nya naek srar mko kwar, inja naek srar kankenem mkoḇena nafo kuker roi ḇeborkam. Fawawi naek srar mkoḇena ro roiḇebor anna nakaki kaku, ma naek srar mkofawi mkoḇuk farkarkor kuker fawawi anna. ⁶ Naiso ḇefnai mboi ḇararyas ro Kristus nakom ro mkosnemna kwar, ⁷ isof naek srar mkananjar ḇok osoḇa, rofyor naek srar mkowaf Manseren koḇedi Yesus Kristus ryamuma ma nari kawasakam smami. ⁸ Kristus mankundi nari fyaduru naek srar mko isof ro ḇarpurya; insa rofyor ryama werya, isrow mko kuker fasasos ḇemnis. ⁹ Mkokyar nako faro Allah. Allah iso ḇeyor mko kwar fa mko ḇeoser kuker Rumkun ḇyedi, isoine Yesus Kristus, Manseren koḇedi. ¹⁰ Naek srar! Kuker snonsnon ro Manseren koḇedi Yesus Kristus, yor insa mkona wos oser; insa anunḇesisye isya rofandu mko awer. Iḇye wer naek srar mkoḇe oser ro kakara mkoḇena. ¹¹ Snar naek srar ono ro Kloë kina ḇyedi, sikofen ḇadir kwar maḇe aya, rakrakrok rofandu mko. ¹² Roi yakaraya isoine, rofandu mko ono sikofen ḇo soḇo, "Yaso Paulus," ono sikofen ḇo soḇo, "Yaso Apolos," ono wer sikofen ḇo soḇo, "Yaso Petrus," ono ḇese wer, sikofen ḇo soḇo, "Yaso Kristus." ¹³ Inja Kristus ḇyeḇerarwasḇa! Paulus imar ro aprop faro mkoḇa! Naek srar mkosma masi sren fa mkoso Paulusḇa, inke? ¹⁴ Kasumasa snar yaḇuk masi sren faro snonkaku oso rofandu mkoḇa, mboi Krispus ma Gayus suyerer. ¹⁵ Imbude snonkaku oso ikofen ḇo doḇo yaḇuk masi sren faroi fa insa iso aya. ( ¹⁶ Oo, kaku! Stefanus ma kina ḇyesi kada, ayai ḇeḇuk masi sren farosiya. Ḇape ḇese rosi, imnis swarepen ayedi, yaḇuk masi sren faro oso werḇa.) ¹⁷ Kristus iwan aya fa yaḇuk masi sren faro snonkakuḇa, mboi insa yaḇaryas Ankankinem Ḇeḇye ro Allah; ma ine kako nari yafruri kuker fawawi ro wos snonkakuḇa, insa papoik ro marmar Kristus ro apropya ḇyefromoḇa. ¹⁸ Ḇaryas ro Kristus marmar ḇyedi ro apropya, ḇyeḇemamkirḇa faro snonkaku nari Allah ḇyuk samamyai farosya. Ḇape, faro ko, snonkaku ḇesma koreri ro Allah, ḇararyas ani papoik ro Allah. ¹⁹ Snar ro Refo ikofen radine, "Fawawi ro snonkaku ḇemamkarkirsya nari yararḇarenna, ma ḇaḇefawawinanem ro snonkaku ḇefawisya, nari yaḇena fa napromes." ²⁰ Inja, fainda rosai ro snonkaku ḇemamkarkirsya? Fainda rosai ro ḇefawinanem ansi? Fainda rosai ro ḇefawinananem kakara ro awar ine? Allah fyasna kwar snonkaku ḇemamkarkirsya nari sifawi royoḇaḇeri! ²¹ Snar fawawi snonkaku sena rariso wer, smambir Allahḇa kuker fawawi mankunsi ḇardi. Ḇape snar Allah myamkarkir, inja imarisen ḇyuk koreri faro snonkaku ḇekyar faroisya snar ḇaryas supswan ine skara ma smamkirḇa ani. ²² Kawasa Yahudisya sor aḇyair kanandor ḇefasasnai, ma kawasa Yunanisya ssewari ro fawawi supswan ine. ²³ Ḇape koine koḇaryas monda ro Kristus ḇemar ro aprop. Ḇaryas ani ifrur masasor faro kawasa Yahudisya. Ma kawasa ḇeyakḇe Yahudiḇasya skara ma smamkirḇa ani. ²⁴ Ḇape faro snonkaku Allah dor kwarsya iḇye kawasa Yahudisya, iḇye kako kawasa ḇeyakḇe Yahudiḇasya -- ḇararyas ani irya papoik Allah ma fawawi ro Allah. ²⁵ Snar rosai ḇefasna fawawiḇa ro Allah, ikada ifawi syadi ro ḇaḇefawawi ro snonkaku; ma roi komam ḇepokḇa ro Allah, ikada syambraḇ syadi ro samambraḇ snonkaku. ²⁶ Naek srar! Indo mkoswarepen rariso rari mkoḇena, rofyor Allah dor mko. Ma ono rofandu mko si ḇefawinanem, roḇa ḇesma papoik, roḇa ḇesma nasan ḇekaki ro mamam snonkaku. ²⁷ Snar rarirya Allah kyinfir rosai supswan ine skaraḇe ḇaḇefawawiḇa, insa snonkaku ḇefawi nanemsya simai. ²⁸ Allah kyinfir rosai snonkakusya skaraḇe ḇekaryonḇa, waworek, ma isyadi wer supswan ine skaraḇe ḇeḇefandunḇa, insa Allah kyakok rosai snonkakusya sesyowina. ²⁹ Rarirya snonkaku osoḇaḇeri imarares mankundi ro ḇarpon Allah. ³⁰ Allah mankundi iso ḇefrur fa naek srar mkoḇeoser kuker Yesus Kristus. Allah ḇyuk Kristus maḇe ko, insa fawawinanem koḇena nmambir ro Kristus. Snar Kristus ḇefrur fa koḇye kaḇer wer kuker Allah, ma ifrur ko fa koḇe kawasa faro Allah. Kristus iso ḇefasparko. ³¹ Inja, rarirya, imnis sfas ro Refo radine, "Snonkaku ḇemarisen ḇemarares sya, iḇye syadi simarares si kuker rosai Allah ifrur na."

¹ Naek srar! Rofafisu yaramufa ḇe mko, ma yaḇaryas faro mko ro Allah aw ḇyena, supswan ine rosai sifawi ḇaim na, yawawos kuker fawawi snonkakuḇa. Yawawos kuker fawawi supswan ineḇa kako. ² Snar yakara namuk kwar mboi rofyor ayaisya fnoḇek mko, nari yawawos ro roi onoḇa, mboi roi ḇekur Yesus Kristus marmar ḇyedi ro apropya. ³ Rofafisu ayaisya kuker mko, yaryarḇa ma yamkakḇo yaradai. ⁴ Ḇape ḇararyas yaḇaryas faro naek srar, yaḇaryas na kuker fawawi snonkakuḇa. Mboi yaḇaryas na kuker nyan ḇeḇair papoik ro Allah Rur ḇyedi monda. Naek srar mkomam roi nane kwar. ⁵ Yafrur rarirya insa kakyar naek srar mkoḇena faro Allah nḇeknam ro fawawi snonkakuḇa, mboi nḇeknam ro Allah papoik ḇyedi. ⁶ Inja rariso wer, rofandu kankenem snonkaku rur sena nsambraḇ kwar, sikada yawawos ro ḇaḇefawawinanemya. Ḇape ḇaḇefawawinanem ine ḇaḇefawawinanem ro supswanḇa, oroḇaido ḇaḇefawawinanem bena papoik ro awar ine, nari papoik sena napromes. ⁷ Ḇape fawawi nanem yakofen inekada ḇaḇefawawinanem ro Allah. Ḇaḇefawawinanem ani supswan ine sifawi iḇa ma iyokef, ḇape Allah fyasosi kwar, faro ḇaḇeaski koḇedi, ḇepon ro supswan ine ḇyeḇefrur ḇaimya. ⁸ Snonkaku oso ḇaḇeri ro ḇeyuf papoik ro awar ine sifawi ḇaḇefawawinanem ineḇa. Snar rofyor sifawi ikada, nari spaiepen Manseren ḇeḇye syadi aniḇa. ⁹ Ḇape snar sfas ro Refo radine, "Faro snonkaku ḇeswar Allah, Allah fyasos roi ono kwar snonkakusya smam roḇa simnaf ḇaim ro snonkaku, ma nek ḇaim ro snonkaku sisnesna." ¹⁰ Ḇape Allah fyasna na kwar maḇe ko, kuker Rur ḇyedi. Allah Rur ḇyedi kyukeḇ roiḇebor kam, isof ro Allah aw ḇyena ḇeyokef kako. ¹¹ Snar ḇefawi kankenem snonkaku isoine rur snonkaku ani bardi, inke? Rarirya faro Allah kako. Ḇefawi Allah kankenem ḇyedi isoine Allah Rur ḇyedi ḇardi! ¹² Ma Allah ḇyuk ḇeko, rur ro supswan ineḇa mboi Allah Rur ḇyedi, insa kofawi roiḇebor kam Allah ḇyukma ḇeko na. ¹³ Rarirya, rofyor nkoḇaryas roi ḇekur Allah, faro snonkaku ḇena Allah Rur ḇyedi, nkoḇaryas imnis kakara snonkakuḇa, mboi nkoso Allah Rur ḇyedi moḇ fyarkor raya. ¹⁴ Snonkaku ḇena Allah Rur ḇyediḇa, nari saksma rosai Rurya fyasna naḇa. Snar faro snonkaku ani, roi sikofen anna namnis ḇaḇefawawi royoḇa monda. Snonkaku ani ifawi naḇa, snar roiḇebor anna skara na ro ḇar Rurya. ¹⁵ Snonkaku ḇena Allah Rur ḇyedi ifawi kankunes ro roiḇebor kam, ḇape iḇardi snonkaku oso myamkir iba kako. ¹⁶ Snar sfas ro Refo radine, "Mansei nari ifawi Manseren kakara ḇyena? Ma mansei nari ḇekofen farkori?" Ḇape kona Kristus kakara ḇyena!

¹ Ne, naek mko, yawawos kuker mko imnis snonkaku ḇena Allah Rur ḇyediḇa. Inja yawawos faro mko monda imnis snonkaku ḇekenem kaker ro rmomen supswan ine; imnis kuker snonkaku wombrek ro kakyar sena faro Kristus. ² Randakya yaḇuk roḇean snonkuf faro mkoḇa, mboi roḇean wombrek monda; snar naek mkosambraḇ ḇaim fa mkan roḇean ḇepakrek na. Baboine kako naek mkosambraḇ ḇaim fa mkan na. ³ Snar naek mkokenem ma mkoso rari snonkaku kaker. Snar rofyor naek mkomsor ma mkomamunyae, kankenem ḇerarirya nfasna naek mkokenem ma mkoso rari snonkaku, imnis kawasa ro supswan ine? ⁴ Rofyor snon oso ikofen, "Aya ro Paulus mun ḇyedi," ma ono ḇese sikofen, "Aya yawaira Apolos," ine nfasna rari mkoḇena namnis kawasa ro supswan ine ḇembror ḇaimsya? ⁵ Inja Apolos mansei irya? Ma Paulus mansei irya? Nko Allah manfamyan ḇyesi monda, ḇekfin mko kwar fa mkokyar faro Allah. Nkokada nkofrur fararur Manseren ḇyukma ḇenko oser-oser. ⁶ Ayai ḇekerya ma Apolos i ḇeruḇya, mboi Allah mankundi ḇardi ḇeḇuk fa rokaker ḇyena nasurya. ⁷ Inja Allah iso ḇeḇefandunya, snar i ḇeḇuksurya. Ḇekerya ma ḇeruḇya suḇefandun mankunba. ⁸ Sukam sumnis ro fararur suḇena monda. Oser-oser nari isma sasuref imnis marmor ḇyedi. ⁹ Nko snonkaku ḇefararur kam faro Allah; ma naek srar mkomnis raris Allah yaf ḇyedi. Naik mkomnis raris Allah rum ḇyedi kako. ¹⁰ Kuker ḇaḇefawawi Allah ḇyukma ro aya, inja yamnis kamasan ḇaḇawes rum yarir kwar araref ro rum ani, ma snonkaku ḇese sḇawes rum ro araref ani. Snonkaku oser-oser myamepen naḇye rariso ḇyawes ro araref ani bori. ¹¹ Snar Allah ḇardi fyasna kwar Yesus Kristus ḇyeararef oser ro rum ani, oso ḇeseḇa. ¹² Ono sisya sḇawes ro ararefya bori kuker brawen, ono wer ro sarak, ono wer ro karui ḇesnai fafirek, ono wer ro ai, ono wer ro aḇris, roḇa fas baken. ¹³ Fararur snonkaku ansi oser-oser nari nfasna ro fafisu Kristus ifyafer wer mumanya. Snar for napnapesya nari ifrur fa snonkakusya fararur sena oser-oser nbayire. For napnapes nari ikun sas ma fyasna makaku ro fararur anna. ¹⁴ Rofyor rum, snonkaku sifrur ro araref ani bori inanem ro for aniḇa, snonkaku ani nari isma sasuref. ¹⁵ Ḇape rofyor snonkakusya fararur sena nananem, nari ḇyefromo; ma mankundi ḇardi nari isma koreri, ḇape imnis snonkaku ḇesasyar ro forya dori. ¹⁶ Naek srar mkofawiḇake mkoḇe Allah rum ḇyedi? Mboi Allah Rur ḇyedi kyain ro mko? ¹⁷ Rofyor snonkaku oso kyakok Allah rum ḇyedi, nari Allah kako kyakok snonkaku ani. Snar Allah rum ḇyedi isren faro mankundi ḇardi, ma naek srar mkoiso rum ani. ¹⁸ Snonkaku oso ḇyeankar mankundi ḇardi awer. Rofyor snonkaku oso rofandu mko kyara ifawi nanem imnis kakara ro supswan ine, snonkaku ani iḇyekada ifawi royoḇa, insa kaku ḇeri ifawinanem. ¹⁹ Snar supswan ine skaraḇe ḇefawinanemsya ro mamam Allah sifawi royoḇa. Snar sfas ro Refo radine, "Allah fyorepen snonkaku ḇemamkarkir kuker fawinanem sena." ²⁰ Snar sfas ro Refo radine kako, "Manseren ifawi mboi kakara snonkaku ḇemamkarkirsya kakara sena nefaindaḇa." ²¹ Eḇedari, snonkaku osoḇaḇeri imarares mankundi rofandu snonkakusya, snar roi ḇeborkam neḇeḇuk fa nwana kwar. ²² Paulus, Apolos, Petrus, supswan ine, kankenem ma marmar, awar ine roḇa awar nari ḇeramaya, roi ḇeḇor nakam naek srar mkoso ḇenananya. ²³ Ma Kristus iso ḇena naek srar mkonya, ma Allah iso ḇena Kristus iya.

¹ Mkokara inkoḇe Kristus manfamyan ḇyesi ḇekarem ma ḇeḇaryas Allah aw ḇyena faro supswan ine sifawi ḇaim na. ² Ḇepon kaku roi sor ro manfamyan ḇerariryasya isoine ḇaḇeuser faro tuan sedi. ³ Aya ḇardi yaḇe fakfukenḇa ro rosai naek srar -- roḇa manseirya wer -- skara ro aya. Rarirya rosai mankundaya yakara fa ḇekur aya kako ḇyefakfukenḇa. ⁴ Yaḇaḇir yaḇesasar ro roi osoḇaḇeri, ḇape naiso ḇefasnaḇa mboi kaku yaḇesasarḇaya. Manseren mankundi nari ḇefasna yaḇesasarke roḇa. ⁵ Inja rofyor fafisuya isya ḇaim, naek srar fasna fasaw awer snonkaku oso ḇyesasarke roḇa. Wawaf rao isof Manseren ryama resari. Iso nari ḇeḇas kankunes ḇeḇor ḇeyokef ro pampan. Iso nari ḇekakok swaruser ḇeḇor ḇekram ro snonkaku sisnesna. Rofafisu ani insape snonkaku oser-oser isma ro Allah sanandik ḇyuk ḇeina. ⁶ Naek srar! Snar ḇaḇefandun mkoḇedi, yaḇuk nakam kwar faro Apolos ma faro mankundaya ḇardi. Insa nkoḇe fasasnai faro mko, fa mkofarkor rona, "Insa Mkokara syadi awer faro snonkakusya ro rosai sfas kwar." Rarirya snonkaku osoḇa rofandu mko darer snonkaku oso, mboi kyoryae ḇeseya. ⁷ Mansei ḇefrur aw fa wasyadi ro snonkaku ḇeseya? Wafawiḇake roi ḇeḇor nakam wasmana ro Allah? Snaro wamarisen wamarares mankundaw, imnis rosai isya ro aw roi ḇeḇuk naisyaḇake? ⁸ Mboi naek srar mkofandun roi oso werḇa! Naek srar mkonana kwar! Naek srar mkoḇe wairek kwar! Mboi nkoma roḇa. Iḇye syadi kaku rofyor naek srar mkoḇe wairek kwar, insa nko ma naek srar mko koḇuk sasoser kam. ⁹ Snar ro kakara yena nkoḇe manwawan, Allah ifrur nko kwar imnis roi ḇeser mamam roḇarpon snonkaku ma malaikat. Nkomnis snonkaku ḇekaryonḇa ḇesmai samamyai marmari ro fababa ma supswan sibras nko. ¹⁰ Snar Kristus, nkoḇe snonkaku ḇefawi royoḇa, ma naek srar Kristen mkoiso ḇefawi! Nkosambraḇ ḇa, naek srar mkosambraḇ! Skoryaye nko, ma sisandik mko! ¹¹ Isof rofafisu ine nkosma basbiser ma marawrow; mar nkoḇena ḇero baken nerer monda; snonkaku sewayam nko; nkosma moḇ anenef faswef onoḇa; ¹² nkofararur fa nkosewar nanan. Rofyor nkoḇe ḇefras, nkomunsu na kuker ḇok; rofyor sḇewayam nko, nkokḇaḇ; ¹³ rofyor snonkaku sfamamai nko, nkomunsu na kuker wos ḇemyaren. Inkomnis kaku bakof supswan ine; isof rofafisu ine skara nkomnis arwarem supswan ine. ¹⁴ Yafas ine mufa ḇenaek srar fa yaḇukfrur mamyai mkoḇa, ḇape yafarkor naek srar imnis romawa ayesi. ¹⁵ Mboi imnis snonkaku Kristen, naek srar mkosma kwar guru syaran samfur, ḇape oso ḇyekma faro mkoḇa. Yerer monda yaḇekma faro mko, snar ayai ḇeyun Ankankinem Ḇeḇye ro Kristus faro mko. ¹⁶ Eḇedari kaku ḇeri yor fa mkomamepen ro aya. ¹⁷ Rarirya yawan kwar Timotius mufa ḇemko. Raris ḇeso Kristus, ikada imnis romawa karyer yaswar kaku. Ikada romawa kokyar rirya. Nari ḇyuk swarepen faro mko ro moḇ yakenem raya rofyor yakyar faro Kristus, isoine kankenem yafarkor kwar faro jemaat ro moḇ rosairya kaker. ¹⁸ Ono rofandu mko simarares si kwar, snar skara ḇo soḇo nari yaramufa faro mkoḇa. ¹⁹ Ḇape, nari yara fasaw mufa faro mko, rofyor Manseren byuk rarirya. Rofafisu ani nari yamam kako snonkaku ḇemarares ansi rosai sifrur na; mboi sawos monda awer. ²⁰ Snar rofyor Allah ḇyuk sasoser ḇyedi faro kankenem snon oso, ro roi ḇeḇesya ani ḇyeḇefasna ro samambraḇ kankenem snonkaku ani, mboi ro wos ḇyedi mondaḇa. ²¹ Inja naek srar mkokinfir monda rosai mkomarisen syadiya! Naek srar mkomarisen yaramufa insa yaḇuk farkarkor ḇepakrek roḇa yarafa yaḇuk farkarkor ḇemyaren ma saneraro?

¹ Kaku ḇeri yasma sikofen ḇadir kwar rofandu mko ono sisya sifrur sasar farbuk ḇesyadadi; rofandu mko ono sisya sifrur sasar farbuk kuker sna ḇefan sesi. Snonkaku ḇefawi Manseren ḇasya kako sakfrur roi ḇeradineḇa! ² Rariryano mkomarares mko. Iḇye syadi mkosnemna nfafardun ma mkosasyar rofandu mko snonkaku ḇefrur rariryasya. ³ - ⁴ Ro ḇar baken yaḇinkwanbur mko, ḇape ro ḇar rurya aya isya rofandu mko. Inja, yamarisen yafrur imnis aya isya rofandu mko, "Kuker snonsnon Manseren Yesus Kristus, yafasna faro snonkaku ḇefrur kwar fararur ḇeyarwarem ḇerarirya, nari sismai samamyai!" Rofafisu naek srar mkofanjur ma aya isya rofandu mko kuker rur ayedi, ma kuker papoik ro Manseren koḇedi Yesus, ⁵ naek srar koḇuk snonkaku ani faro Ibirisya insa snon ani baken ḇyedi imar ma rarirya rur ḇyedi isma koreri ro fafisu Manseren ifyaferma werya. ⁶ Rosai mkomararesya, roi ḇeḇyeḇa rirya! Naek srar mkofawi kwar wos sarḇer ine, "Mur kermkun ifrur fa terigu amek nakam napisen!" ⁷ Mkosawen ḇepon mur ḇekwar ani, isoine mur ḇesasar, insa mkomnis terigu amek ḇebabo, ḇesren ro mur sasar ḇekwar anna. Snar munara Paskah koḇedi ḇyeḇerak kwar: Kristus imnis domba Paskah koḇedi, ḇyeḇekaruk kwar. ⁸ Inja mkorama kofrur munara koḇedi kuker mamami ḇepisenḇa, isoine mamami ḇefasna saranden ma roi nakam ḇefrur marisen Allah. Mboi kofrur awer munara Paskah ani kuker mamami ḇefamnai kuker mur ḇekwar, isoine mur sasar ma ḇeḇarḇor. ⁹ Ro syap ḇepon ayedi, yafas ḇadir kwar faro mko insa mkokenem awer kuker snonkaku ḇefrur farbukya. ¹⁰ Snonkaku ḇefrur farbuk roḇa ḇenandip roḇa ḇeyankarkar roḇa ḇesyom amfyanir ḇefawi Allah ḇasya siso yakofensya! Snar rofyor naek binkwanbur si, nari wasasayarbur supswan ine. ¹¹ Moḇ yakara raya isoine, naek wakenem awer kuker snonkaku ḇekarem mankundiḇe Kristen, ḇape snonkaku ani ifrur farbuk, roḇa inandip, roḇa isyom amfyanir, roḇa imarisen donef snonkaku ḇese, roḇa ḇemasaser, roḇa wer ḇekarawraw. Mkokain mkananus awer si kako! ¹² - ¹³ Yaḇe mankara faro snonkaku ḇeḇe Kristen ḇasya, fararur ayedisyaḇa. Allah mankundi iso nari ḇeḇe mankara farosi. Ḇape faro kina jemaat, mkofawiḇake jemaatya mankundi ḇeḇemankara farosi? Snar ro Refo sfas radine, "Mkopampum snonkaku ḇeḇarḇorsya rofandu mko."

¹ Snaro ono sisya rofandu mko sra faro mankara ḇenapesḇa fa ssḇuk safsof naek ḇesma kakyar oser, rofyor ryakrakrok kuker naek ḇyani? Snaro dor fa Allah kawasa ḇyesi sawos namuk roi ḇeradineḇa? ² Naek wafawiḇake kawasa Kristen nari sḇemankara supswan ine? Inja rofyor naek wafawi nari bemankara faro supswan ine, snaro wapokḇa wawos namuk roi kasun ḇeradine na? ³ Naek srar mkofawiḇake nari koḇemankara faro malaikat-malaikatsya? Isyadi wer roi ḇero kankenem koḇena ro ras-ras! ⁴ Rofyor roi ḇeradine naisya, nari naek bukna faro snonkaku ḇena nasanḇaḇeri ro jemaat? ⁵ Kaku ḇeri ifrur fanor! Mboi rofandu mko ono sisya sifawi nanem fa sawos namuk rakrakrok rofandu naek srar ḇeḇe Kristen kam! ⁶ Ḇape ro ḇarya naek oso rya ḇyuk safsof naek Kristen ḇyedi faro snonkaku ḇeḇe Kristen ḇa! ⁷ Ma rakrakrok rofandu mko kako nfasna ḇadir mkokafyo kwar. Iḇye syadi sewayam mko snar napnapesya roḇa sfandun mkoḇa! ⁸ Ḇape naek srar mko ḇardi ḇefrur napnapesḇa faro snonkaku ḇesesya. Naek mankundaw kako ḇefrur fromo snonkaku ḇesesya. Ma wafrur na faro naek srar ḇesma kakyar oser! ⁹ Wafawiḇake snonkaku ḇeso Allah marisen ḇyenaḇasya, nari sakḇe kinaḇa ro Allah kawasa ḇyesi? Imbude sḇeankar naek uri. Snonkaku ḇefrur farbuk, snonkaku ḇesyom amfyanir, snon ḇefarḇuk kuker snon min sesi, ¹⁰ mankarawraw, ḇeyanfarmbram ma ḇemasaser, snonkaku ḇeyonef min sesi, ma ḇeyankarkar snonkaku ḇese -- snonkaku ḇeradinesya kam nari sakḇe kina ro Allah kawasa ḇyesiḇa. ¹¹ Naek ono rofandu mko ro randakya rari sena namnis rarirya. Ḇape ḇaḇoine mkoḇe ḇefasren kwar ro sasar na. Allah nya mko kwar. Naek mkonapes kwar kuker Allah, snar mkokyar faro Yesus Kristus kwar ma mkona Allah koḇedi Rur ḇyedi. ¹² Ono sikofen ḇo soḇo, "Ayama yamkei yafrur roi ḇeḇor kam." Ḇape faro aya nefainda kamḇa. Inja yafrur rosairya kaker, ḇape yamewer roi oso ḇyewayam aya. ¹³ Ono kako sikofen ḇo soḇo mboi roḇean faro snewarya, ma snewarya ḇyeḇefasos faro roḇean. Ḇape sukam nari Allah isawen su. Snonkakusya baken sena konana fa kobuki ifrur farbukḇa, ḇape koḇuki duffarmyan Manseren. Ma Manseren nari fyaduru baken ani. ¹⁴ Allah ḇyawes Manseren Yesus kwar ro marmarya, rarirya kako Allah nari dakḇawes ko kuker papoik ḇyedi. ¹⁵ Mkofawi ḇake baken mkoḇena irya kina ro Kristus baken ḇyedi. Inja, iḇyeke yun kina oso ro Kristus baken ḇyedi fa yaḇuki ifrur farbuk? Oroḇa beri. ¹⁶ Roḇa mkofawi ḇaimke snonkaku ḇefosen kuker farbuk, ḇyeoser kwar kuker bin ani! Snar sfas ro Refo radine, "Sukam nari suḇe baken oser." ¹⁷ Mboi mansei ḇeḇeoser kuker Manseren, Manseren Rur ḇyedi kuker snon ani rur ḇyedi suḇeoser. ¹⁸ Mkoḇinkwan bur fararur farbuk. Snar sasar ḇeḇor ḇese snonkakusya sifrurna, sifrurna ro ḇandibur baken sena. Ḇape snonkaku ḇefrur farbuk, irya ifrur sasar faro mankundi baken ḇyedi ḇardi. ¹⁹ Mkofawi baken mkoḇena irya moḇ kankain faro Allah Rur ḇyedi. Rur ani kyain ro mko. Ma Allah mankundi ḇeḇuk Rur ani faro mko. Baken mkoḇena mkoi ḇenananyaḇa. Mboi Allah i ḇenananya. ²⁰ Allah fyarwenamuk mko kwar ma ḇyak namuk mko kwar. Inja, mkofaduru baken mkoḇena naḇye kaku insa Allah isma sanandik.

¹ Insape yamarisen yawos ro rosai naek srar mkofas ro syap mkoḇedi. Rofyor snon oso fyakawinḇa, ikada iḇye kaku. ² Ḇape insa isma awer fafrowes fa ifrur roi ḇeḇyeḇa, imnis rmomen, farbuk; iḇye syadi snon ani nya swa oso ḇardi ma bin oser-oser nya swa oso ḇardi. ³ Inja, snonya ikenem imnis fararur ḇyedi faro binya raris swa ḇyedi, ma binya ikenem imnis fararur ḇyedi faro snonya raris swa ḇyedi; oser-oser ikenem imnis fararur ḇyena faro suminya. ⁴ Binya baken ḇyedi ḇinkundi ḇardi ḇenaiyaḇa; ḇena baken ḇyeja isoine swa ḇyeja. Rarirya kako snonya baken ḇyeja mankundi ḇardi ḇenaiyaḇa; ḇena baken ḇyeja isoine swa ḇyeja. ⁵ Muḇesisyeyae awer imnis imbeswa mambeswa. Fafisu ono muḇesisyeyae rofyor mumarisen kam wer. Rarirya oser-oser ḇyenadi kuker kananon. Ḇape ḇarpurya mkokaḇer ma mkofanamyae wer ḇeimbeswa mambeswa. Rofyor rariryaḇa, nari mkoso Ibiris embuk ḇyena snar mkosambraḇ ro rmomenyaḇa. ⁶ Yakofen radine imnis sasoserḇa, ḇape imnis ananun. ⁷ Kaku ḇeri yamarisen syadi insa snonkakusya kam simnis aya. Ḇape snonkaku oser-oser isma kwar fakamaman eḇesisye ro Allah. Oso isma fakamaman ine, eḇeseya isma fakamaman iwa. ⁸ Faro snonkaku ḇefakawin ḇaimsya ma bin-bin ḇeḇe ḇindansya, farkarkor ayeja isoine: Iḇye syadi mkokenem ḇesnonkbor inkbor imnis aya. ⁹ Ḇape rofyor mkosambraḇser rmomen mkoḇenaḇa, iḇye mkofakawin monda. Inja, iḇye syadi mkofakawin snar nari mkosambraḇser rmomen mkoḇenaḇa. ¹⁰ Faro ḇefakawin kwarsya, sasoser ayedi isoine: (Kaku ḇeri ayai ḇeḇuk sasoser ineḇa mboi Manseren). Bin ḇefakawin kwar oso ibur awer swari. ¹¹ Ḇape rofyor ḇyeḇefaspar kwar, ipok ḇyeswa werḇa faswef, roḇa kyaḇer faro swari. Ma snon ḇefakawin oso ipok fyaspar awer swari. ¹² Faro ḇesesya ananun ayena naiso nane: -- ananun nane ro aya ḇardi, mboi Manseren i ḇa -- rofyor snon Kristen oso fyakawin kuker bin ḇekyar faro Kristus ḇa, ma bin ani imarisen ikenem fnoḇek snon ani, inja snon ani fyaspar aweri. ¹³ Ma rofyor bin Kristen oso fyakawin kuker snon ḇekyar faro Kristus ḇa, ma snon ani imarisen ikenem fnoḇek bin ani, inja bin ani fyaspar aweri. ¹⁴ Snar snon ḇekyarḇa ani Allah fyasreni snar fakawawin ḇyedi kuker bin Allah nya kwar ani. Rarirya kako bin ḇekyarḇa ani Allah fyasreni kwar snar fakawawin ḇyedi kuker snon Allah nya kwar ani. Rofyor rariryaḇa ido, romawa suḇesi simnis romawa korwar, ḇape romawa ansi Allah romawa ḇyesirya. ¹⁵ Ḇape rofyor snonkaku ḇekyarḇa ani imarisen fyaspar swari ḇeḇe Kristen kwar, mkodwarek aweri. Rarirya ido naek roḇa srar ani imoḇes, snar Allah imarisen insa mkokenem kuker aski. ¹⁶ Snar imbesrar wamnis bin ḇekyar kwar faro Manseren --rariso imbesrar wafawi kaku mboi nari wapok buk aski faro swambri? Rarirya kako naik ḇeḇe swa Kristen rariso naek wafawi kaku mboi nari wapok buk aski faro swambri? ¹⁷ Iḇye syadi oser-oser kankenem ḇyedi iso Manseren farkankin ḇyedi imnis Allah fyasna kwar faroi rofyor Allah dori. Moḇ yaḇuk farkarkor rarirya faro jemaat oser-oser. ¹⁸ Rofyor snonkaku oso isma sofakfuk kwar, rofafisu isma fararyor ro Allah, rarirya snon ani ḇyesewar fa ipyos aḇyair sofakfuk ani awer. Rarirya kako rofyor snonkaku oso ḇyeḇesofuk ḇaim rofyor isma fararyor ro Allah, snon ani dor fa isma sofakfuk awer. ¹⁹ Snar koso sofakfukyake roḇake, sukam suḇe fainda osoḇaḇeri. Mboi ḇesyadiya isoine koso Allah sasoser ḇyena. ²⁰ Iḇye syadi snonkaku oser-oser ikenem raris fafisu isma fararyor ro Allah. ²¹ Rofyor naek srar mkosma fararyor, rofyor ani mkoḇewomen, ḇape mkokara mankenem awer nyan ani. Ḇape rofyor nari mkosma fafisu faro ḇaḇe mkeya, mkun fafisu ani beri. ²² Snar manfyan oso ḇekyar Manseren kwar, ikada snonkaku ḇemkei ro Manseren. Ma snonkaku oso ḇeḇemkei ma ḇekyar kwar faro Manseren, ikada Kristus manfamyan ḇyedirya. ²³ Allah kyoḇes ma ḇyak namuk mko kwar. Rarirya, naek srar mkopok mkoḇuk mankunmko fa mkoḇewomen faro snonkaku awer. ²⁴ Inja, naek srar, rariso wer kuker kankenem mkoḇedi rofyor mkosma fararyor, iḇye syadi mkokenem faswef rarirya kuker Allah. ²⁵ Faro inkbor ḇefakawin ḇaim. Farosi yasma sasoser osoḇa ro Manseren. Rariryano imnis snonkaku ḇesma fakamaman ro Manseren, yamarisen yaḇuk ananun ayena. ²⁶ Koswarepen kandera ḇeḇor ḇemun rofafisu ine, inja yakara iḇye syadi snonkaku sikenem faswef mura imnis moḇ sikenem rofafisu ine raya. ²⁷ Rofyor naek fakawin kwar, ḇesewar fa faspar swambri awer. Rofyor naek fakawin ḇaim ḇesewar fa fakawin awer. ²⁸ Ḇape rofyor naek fakawin, ima sasar risyaḇa. Rarirya kako rofyor inkbor oso fyakawin, ikako sasar risyaba. Derer ḇefakawin ansi nari sisrow kandera nabor. Inja yamarisen yafaspar mkobur kandera anna. ²⁹ Moḇ yakara raya isoine, naek srar: Kosma fafisu ḇeḇor werḇa. Randak ro baboine, snonkaku oso ḇefakawin kwar ikenem imnis fyakawin ḇaim; ³⁰ snonkaku ḇekanes, ikenem imnis sneḇefafardunḇa; snonkaku ḇembrif, imnis iryaḇ ḇa; snonkaku ḇekoḇes kwar, imnis isma roi onoḇa; ³¹ ma snonkaku sne ḇero roi ḇero supswan ine, iḇye ikenem raris ḇyefandun naḇa. Snar supswan ine, imnis moḇ ryaya, nari ipromes! ³² Yamarisen insa naek srar ḇemkei ro kandera. Snonkaku ḇefakawinḇa nari kyara monda roi ḇekur Manseren snar imarisen ifrur sneperi Allah. ³³ Mansei ḇefakawin kwar kyara nabor ro roi ḇero supswan ine, snar imarisen ifrur sneprei swari; ³⁴ ḇarpurya ḇyerarwas kakara ḇyena. Inkbor oso ḇefakawinḇa, oroḇa dojaru oso nari kyara ker monda roi ḇekur Manseren, snar imarisen insa kraf ma rur ḇyedi Allah nya na. Ḇape bin oso ḇefakawin kwar, kyarai ker monda roi ḇero supswan ine, snar imarisen ifrur sneprei swa ḇyedi. ³⁵ Yafas nanekam radine faro ḇaḇye naek srar mko ḇardi, mboi yakara fa yaḇuki idwarek ḇa. Roi yamarisenya insa naek srar mkofrur roi ḇenapes ma ḇeḇye, ma insa naek srar mkokara ker monda faro Manseren. ³⁶ Rofyor snon oso ḇyaḇir ifrur roi ḇemnisḇa faro inkbor ssḇuki dapsasori, rofyor fyarmku nafsu ḇyediḇa, ma kyara doḇo fyakawin kuker dojaru ḇyedi, iḇye ifrur rosai kyara ḇo ḇeḇyeya. Ḇyesasar ḇa, rofyor sufakawin. ³⁷ Ḇape rofyor snon oso kyara kwar fa fyakawin awer ma kakara ḇyedi sedusu iba, rarirya fararur ḇyedi iḇye, rofafisu fyakawin ḇa kuker dojaru ḇyedi. ³⁸ Inja snonkaku ḇeḇekawin fararur ḇyedi iḇye, ma snonkaku ḇeḇekawin ḇa fararur ḇyedi iḇye syadi wer. ³⁹ Bin oso ḇefakawin kwar ḇyeḇefesepen kuker swari kwar rofafisu swari ikenem. Rofyor swari imar kwar, bin ani imkei fa ḇyekawin kuker snon sai imarisenya; mboi fakawin ani fakawin Kristen rirya. ⁴⁰ Rariryano fainda syadi faroi rofyor fyakawin werḇa. Ine mankundaya kakara ayedirya, ma yaḇaḇir Allah Rur ḇyedi ikfin aya kako.

¹ Knikine kowawos ro roḇean ssḇuki fyarsarser faro karwarsya. Mboi kaku raris wos sikofen, "Koine kam kofawinanem kwar." Ḇape ḇaḇefawawinanemya ifrur fa snonkakusya simarares si, mboi saswarya kada ḇyawes snonkaku. ² Snonkaku ḇekara ḇo ḇeyoḇo ikada ifawi nabor, ḇape ifawi ḇaim rariso fawawi ḇekakuya. ³ Ḇape snonkaku ḇeswar kaku Allah sya, Allah ifawi si. ⁴ Ro yar kan roḇean ssḇuki fyarsarser kwar faro karwarsya, kofawi karwarsya sisyaḇaḇeri. Ma kofawi Allah oser ḇaken, oso ḇese isyaḇa. ⁵ Kaku ḇaḇoi mboi roi sorḇe alah ma manseren sibor kako, iḇye ḇero nanki, iḇye kako ḇero supswan ine. ⁶ Ḇape faro ko, Allah oser monda i Kma ḇefrur roi ḇeḇor kam. Kuker i kokenem. Ma Manseren oser monda kako, isoine Yesus Kristus. Kuker i roi ḇeḇor kam neḇefrur, ma snar i kokenem. ⁷ Rariryano, snonkakusya sifawi kam moḇ ineḇa. Ono sisya ro ḇepon iwara sisyom karwar. Inja, eḇedari isof baboine kako sisya skara roḇean, ssḇuki fyarsarser kwar faro karwarsya, irya roḇean faro karwar. Inja rofyor san roḇean anna skara ssasar; snar kakyar sena nsambraḇ ḇaim. ⁸ Roḇean anna ḇardi nafrur fa ḇaḇeoser koḇedi kuker Allah idworenḇa. Rofyor kan roḇean anna, kosma ḇaḇefainda osoḇa. Rarirya kako rofyor kan roḇean annaḇa, kokako kosma fromo osoḇa. ⁹ Ḇape, mkoswarepen! Imbude snonkaku ḇese sḇesasardi --snar kakyar sena nsambraḇ ḇaim -- snar naek ḇaḇemkei bedi ro roi mkofrur nakam. ¹⁰ Kakara ayedi radine: Naek srar mkoi ḇena kakyar ḇesambraḇya, rofyor mkokain mkanan ro rum karwarya. Ḇarpurya snon oso myam naek srar mkokain mkanan ro moḇ ani. Rofyor snon ani kakyar ḇyedi syambraḇ ḇa, inja nari roi mkofrur ani ifrur fa snon ani dakan roḇean ssḇuk kwar faro karwarsya? ¹¹ Rarirya, naek srar kakyar mkoḇedi ifrur fa snonkaku kakyar ḇesambraḇ ḇa ani iḇor. Mboi snon ani kako eḇedari Kristus imar. ¹² Ma rofyor naek srar mkofrur sasar ḇerarirya faro naek srar Kristensya -- isoine naek srar -- mkokakok kakyar ḇesambraḇ ḇasya sena -- rarirya naek srar mkoḇesasar faro Kristus. ¹³ Eḇedari, rofyor roḇean anna nafrur fa naek ayedi ḇyesasar, rarirya nari yakan wer ḇaḇeri roḇean anna. Imbude yafrur fa naek ayedi ḇyesasardi.

¹ Aya ine snonkaku ḇemkeiḇake? Aya ine manwawanḇake? Aya ine yakmam Yesus, Manseren koḇedi ḇaimke? Inja naek srar mkoido aḇyair ro fararur ayedi faro Manseren bake? ² Rofyor snonkaku ono ḇese simewer skarem aya ḇemanwawanri, ḇape mko kako nari ono skarem rarirya! Snar naek srar kankenem mkoḇedi imnis snonkaku Kristen irya ḇyefasasna aya ine manwawan oso. ³ Rofyor snonkaku sisampum aya, nari yakarem radine: ⁴ Inja yasma rarwas roḇean ma aninem snar fararur ayeja ḇake? ⁵ Inja yasma fa yun srar Kristen oso imnis swa fa ifnoḇek aya ro mararan ayediḇake, imnis raris Manseren Yesus ḇedar ḇyesi ma manwawan ḇesesya ma Petrus moḇ sifrur raya ḇake? ⁶ Roḇaido aya ma Barnabas nuyerer monda nuiso ssḇuk fa ḇesewar nanan ro mankun nu? ⁷ Kina ro sarar osoḇa fa syuref mankundi ro sarar embroḇya! Snon ḇefrur yaf osoḇa kyer anggur ro yaf ḇyedi raimnai dakan bon naḇa? Manfarandows osoḇa ḇefaduru dombasya raimnai dakinem domba ansi sus sesiḇa? ⁸ Roi yakofen nane neknam ro roi ras-ras komam na nererḇa, ḇape snar Refoya dakkofen rarirya kako. ⁹ Sfas ro Moses Syap ḇyedi radine, "Rofyor sapiya imas fasibusya insa krafsya siḇesebur pissya, mkosower sapi ani sḇadonya kuker pisan awer." Inja sapiya iso Allah myamepenya? ¹⁰ Roḇaido koiso Allah kyara koya? Mboi koiso fas-fas ani kyur koya. Snar snonkaku ḇefrur yafya ma ḇefrur sren fasibusya sifararur kwar kuker kakyar insa sisma rarwas bon ro fararur sena. ¹¹ Nko kekef kwar mor rurya faro kankenem naek srar. Inja rofyor nkosma ḇaḇeḇok ro naek srar ro nana mkoḇena, irya nkor nabor syadi faro naek srar mkoke? ¹² Rofyor snonkaku ono ḇese sikyar sisma roi nane ro naek srar, rosai wer kuker nko nari nkosma syadi wer ro mkoḇake? Ḇape yakfrur nyan ani ḇaim. Mboi yamarisen syadi yaḇar roi ḇeḇor nakam, ro yafrur roi ono fa nadwarek ḇaḇeḇaryas ro Ankankinem Ḇeḇyeya ro Kristus. ¹³ Naek srar mkofawi kaku snonkaku ḇefararur ro Allah Rum ḇyedi dori sisma roḇean sena ro Allah Rum ḇyedi. Ma snonkaku ḇeḇeuser rokef farsarser sisma rarwas ro farsarser sḇukfarser anna. ¹⁴ Rarirya kako Allah fyasna kwar mboi snonkaku ḇeḇaryas Ankankinem Ḇeḇye ani nari sisma roḇean ro ḇaryas ani. ¹⁵ Rariryano, yafrur oso ro nyan annane ḇaim. Ma yafas syap ine insa yakofen fa mkofrur roi annane maḇe ayaḇa. Iḇye syadi yamar ro roi ḇebor yamsik kuker anna ndoë. ¹⁶ Snar rofyor nyan ḇaḇeḇaryas Ankankinem Ḇeḇyeya ro Allah monda, rarirya ido yapok yamsik ayaḇa, snar fararur ayedirya. Aroroo faḇye maḇe aya, iḇye yaroe, rofyor yaḇaryas Ankankinem Ḇeḇyeya ḇaido! ¹⁷ Imnis raris fararur ani yafruri ro marisen ayedi, yakyar nari yasma sasuref. Ḇape yaḇaryas Ankankinem Ḇeḇyeya irya fararur sḇukma beaya. Allah ḇyuk fa yafrur fararur ani. ¹⁸ Rarirya ido, rosai yana ḇesasurefya? Sasurefya isoine: mboi yaḇaryas Ankankinem Ḇeḇye ani kuker fararyor ḇaḇyak warek maḇe aya ro osoḇa, snar yamewer yor sasuref ro sayan ayena imnis manbaryas Ankankinem Ḇeḇyeya. ¹⁹ Aya ine yaḇewomen faro osoḇa; aya ine yamkei. Rariryano yafrur mankundaya ḇemanfyan faro snonkakusya kam. Yafrur rarirya insa yasma snonkaku sibor faro Kristus. ²⁰ Faro snon Yahudisya aya ine ya frur imnis snon Yahudi insa yasma snon Yahudi ono faro Kristus. Faro snonkaku ḇeyaser Allah sasoser ḇyena Moses ḇyuk kwar, yafrur imnis yaso sasoser-sasoser anna, ḇape aya ine yamkei ro sasoser anna. Yafrur rarirya insa yasma snonkaku ansi faro Kristus. ²¹ Faro snonkaku ḇeḇe Yahudiḇasya, yafrur imnis snon oso ḇeḇe Yahudiḇa, ḇekenem roḇondibur Allah sasoser ḇyena, Moses ḇyuk na. Yafrur rarirya insa yasma snonkaku ansi faro Kristus. Ḇape roi ḇeḇesya ine nari ḇyefa yaḇeuseḇa faro Allah sasoser-sasoser ḇyena snar aya ine Kristus sasoser ḇyena naḇen aya. ²² Rofandu snonkaku kakyar ḇesambraḇ ḇasya, aya kako yafrur imnis snonkaku ḇena kakyar ḇesambraḇ ḇa insa yun snonkaku ansi faro Kristus. Kuker wos ḇeknampu, yamnis roi ḇeḇor faro snonkakusya kam insa kuker nyan rosairya kaker yun ono fasisma aski. ²³ Yafrur nakam rarirya faro Ankankinem Ḇeḇye ro Allah insa yasma ḇok kako. ²⁴ Naek srar mkofawi kaku ro fanandi farandar, ḇesosya oser monda i ḇesma sasurefya. Eḇedari naek mkofaḇri ro farandarya insa mkosma sasurefya. ²⁵ Snonkaku ḇeso fari, fyarmku ro roi ḇeḇor kam. Ifrur rarirya snar imarisen ssḇuk fa isron irai pampen ḇaḇefaindaya, isoine pampen nari ḇemaryoi fasaw. Ḇape koine kada kofarmku ro roi ḇebor kam snar komarisen ssḇuk fa kosron pampen irai nari ḇemaryoiḇa. ²⁶ Eḇedari yafrar karker ḇemoḇ sfasnaya. Imnis fanandi kaku nari yakuk famfnomba. ²⁷ Yaḇuk baken ayedi fa sfari pakreki isof yaknonser aya. Yafrur rarirya, snar imbude yor snonkaku ono ḇese kwar fa sakso fanandi ani, mboi mankundaya yaro ḇondiri.

¹ Naek mko! Iḇye mkoswarepen rofafisu up koḇesi siso Moses rosai ḇeḇesya kuker si. Sikam mandepya fyadiren si, ma sunuk Soren Ḇerik kuker aski. ² Faro ḇeso Moses, sikam sisma masi sren kuker mandep ma soren ani. ³ Sikam san roḇean rur ḇemamnis, ⁴ ma sinem aninem rurya ḇemnis kako. Sikam sinem ro bon karui rur ḇefnoḇek si; bon karui ani isoine Kristus derer. ⁵ Rariryano, Allah imarisenba kuker ḇar ḇebaya, eḇedari simar ro sup ḇeḇeursḇa. ⁶ Nakam nefasasna maḇeko, insa nbuk swarapepen ḇeko insa kormomen awer roi ḇeḇarḇor imnis moḇ sifrur kwar raya. ⁷ Ma insa kaksyom awer karwar imnis ḇar ḇebaya moḇ sifrur raya. Sfas ro Refo radine, "Ma er ansikam san ma sinem, ma simas ḇo sisyom karwar." ⁸ Koma kofrur awer farbuk imnis ḇar ḇebaya moḇ sifrur raya. Snar, sifrur farbuk inja ḇemar ro ras osersya sḇesyaran samfur risuru seser rikior. ⁹ Kofrowes sas awer Manseren imnis ḇar ḇebaya moḇ sifrur raya ro ḇepon iwara, isof ikak ḇeknampu sarek si fa simar. ¹⁰ Kosasurem awer; imnis ḇar ḇebaya moḇ sifrur raya ro ḇepon iwara, isof Malaikat Marmari myun si. ¹¹ Roi nanekam ndarirya farosi fa nefasasna maḇeko ma kawasa ḇese. Ma nakam neḇefasepen fa neswarapepen maḇeko. Snar baboine kokenem ro awar ḇepupesya. ¹² Snonkaku ḇekara ḇeyoḇo ḇeyores nako, iḇye ḇyesasori; insa isapi awer. ¹³ Farawrowes mkosmaya ikada farawrowes snonkakusya sisma kam rirya. Ḇape Allah inapes ro asas ḇyena. Nari myam monda mkoḇa ro fafrowes ḇesyadi ro samambraḇ mkoḇena. Rofafisu mkosma fafrowes, nari ḇyuk nyan faro mko insa mkofarmku. ¹⁴ Snar rarirya, naek srar yaswar kaku, iḇye mkayin ḇaḇesamsyom faro karwarsya. ¹⁵ Yawawos faro mko imnis faro snonkaku ḇefawinananem. Iḇye mkokara ro mankun mko ro wos yakofen nane. ¹⁶ Rofafisu kinem anggur ma kokofen kasumasa faro Allah, fyasna ḇair ḇake mboi koḇeoser kuker Kristus ro marmar ḇyedi? Ma rofafisu koḇerarwas mamami fa kankam, fyasna ḇair ḇake mboi koḇeoser kuker Kristus baken ḇyedi? ¹⁷ Snar mamami oser baken monda ma kan kam ro mamami oser baken ani kako, inja kokam kofasna koḇeoser baken. ¹⁸ Indo mkomamepen ro kawasa Yahudisya. Si ḇeyan roḇean sḇukfarser ro rokef farsarser, sikada snonkaku ḇeḇeoser kuker moḇ ani. ¹⁹ Rosai yakara kukerya? Mboi karwar roḇaido roḇean sḇukfarsarser faro karwarsya nḇuk fainda osoke? ²⁰ Roḇaḇeri! Kakara ayedi rosai sḇukfarsarser ro rokef farsarser faro karwarsya nakada farsarser faro Allah ḇa, mboi faro ibiris sya. Ma yamewer mkoḇeoser kuker ibiris. ²¹ Mkinem awer ro Manseren sek aninem ḇyedi, fnoḇek ibiris sek aninem ḇyedi kako. Mkanan awer ro Manseren meja ḇyedi, fnoḇek ibiris meja ḇyedi kako. ²² Inja komarisen kofrur fa Manseren imsorke? Inja kosambraḇ syadi Manserenke? ²³ Snonkaku sikofen, "Kofrur monda rosai komarisen." Kaku! Ḇape roi ḇeḇor komarisen anna nefainda kamḇa. "Iḇye kofrur rosai komarisen anna" -- ḇape roi ḇeḇor komarisen anna nbawes kankenem kobenaḇa. ²⁴ Snonkaku oso ifararur faro fandun mankundi ḇyena ḇardi awer. Snonkaku oser-oser ifararur faro fandun snonkaku ḇese kako. ²⁵ Iḇye mkan rosai sboḇ ro pasar. Mkokukeḇ ḇepon awer na, ma mkokamananen awer. ²⁶ Snar sfas ro Refo radine, "Supswan ine kuker roi beroi nakam Manseren i ḇenananya." ²⁷ Rofyor naek ḇeḇe Kristen ḇa oso pyos aw fa wakanan kada, ma naek wasma paspos ani, wan rosai srir ro meja ani faro aw. Kwukeḇ awer roḇean anna ndamuma kero, insa wakamananen awer. ²⁸ Ḇape rofyor ono sikofen faro aw, "Roḇean nane sḇukna nfarser kwar faro karwarsya," wan awer roḇean anna, snar waswarepen fandun ro snon ani ma swaruser ḇyena. ²⁹ Ro kakara yedi faro naek sneuser bediḇa, ḇape sneuser ro snon ani. Ono sisya nari sifuken, "Inja, snaro ḇaḇemkei ayena snonkaku ḇesesya komananen ḇyena nadwarek na? ³⁰ Rofyor nyaḇe yanan ido yakofen kasumasa faro Allah, snaro snonkaku skoryaye aya kuker roḇean anna, mboi sifawiḇa yanadi yakofen kasumasa faro Allah snar roḇean anna?" ³¹ Rosai wer mkofrurya -- mkanan roḇa mkinem -- mkofrur nakam fa mkoksandik Allah. ³² Mkokenem rarirya insa kankenem mkoḇedi ifrur fa snonkaku ḇeḇesya skarkar ma nafnai fa naek mkoḇesi sḇesasar awer; iḇye snon Yahudi roḇa snon ḇeḇe Yahudiḇa, roḇa wer Allah jemaat ḇyedi. ³³ Mkokenem imnis aya. Yaḇesewar yafrur sneprei snonkaku kam ro roi ḇeḇor kam, kuker kakara faro fandun mankundaya ḇardiḇa. Mboi kakara yedi derer insa sikam sisma aski.

¹ Mkoso nyan ayedi, imnis aya yaso nyan Kristus. ² Yasandik mko snar mkoswarepen aya ḇesya kwar ma mkoso farkarkor yaḇuk faro mko na. ³ Ḇape yamarisen insa mkofawi roi oser wer, isoine ḇeḇeḇru rofandu snonsya oser-oser isoine Kristus; mboi ḇeḇeḇru faro binsya ḇefakawin isoine snonsya, ma ḇeḇeḇru ro Kristus isoine Allah. ⁴ Rofyor snon oso fafisu ḇyenadi roḇa ḇyaryas Allah kafkofen ḇadir ḇyena ro ḇarpon snonkaku ḇeḇor, iswoi karamas, rarirya snon ani kyoryae Kristus. ⁵ Rofyor bin oso fafisu ḇyenadi roḇa ḇyaryas Allah kafkofen ḇair ḇyena ro ḇarpon snonkaku ḇeḇor, mboi iswoi karamasḇa, bin ani kyoryae swari ḇeḇeḇru faroi. Rarirya imnis raris bin ani ḇru ḇyeja ḇyebekapnik. ⁶ Snar rofyor bin oso imewer iswoi karamas, iḇye syadi snonburyam ḇyena neḇekapnik. Rofyor bin oso sikapnik snonburyam ḇyena, irya anonef oso faro ḇinkundi. Inja iḇye syadi iswoi karamas. ⁷ Snonsya kada fandunba fasiswoi karamas snar sfasna Allah sananai ma baba ḇyedi. Ḇape binsya sfasna baba ro snonsya, ⁸ snar snonsya seḇefrur ro binsya ḇa, mboi binsya seḇefrur ro snonsya. ⁹ Ma snonsya seḇefrur faro fandun binsyaḇa, mboi binsya kada seḇefrur faro fandun snonsya. ¹⁰ Eḇedari, insa malaikatsya sakḇe saksi, inja bin oso nari iswoi saswoi, imnis kakop ḇefasna binsya sfadiren ro siswas si. ¹¹ Rariryano ro kankenem ḇaḇe Kristen koḇedi, binya demir ro ḇinkundibur snonyaḇa, ma snonya kako demir ro mankundibur binyaḇa. ¹² Snar imnis bin ḇepon ani ḇyeḇefrur ro snonya, ḇape ḇarpurya binya daḇen snon ani; ma Allah i ḇeḇeknam roi nakamya. ¹³ Indo naek srar mkokara ro mankun mko roi ḇeḇesya ine: iḇyeke bin oso ḇyenadi faro Allah ro ḇarpon snonkaku ḇeḇor, imboi iswoi saswoiḇa? ¹⁴ Ro fawawi koḇena, naek mkoḇe ḇefarkor kwar mboi rofyor snonsya snonburyam sena nakwan, ine roi ḇefrur mamyai. ¹⁵ Ḇape faro binsya, sisma snonburyam ḇekwan fa nakawef siḇrusna iria marisen sedi. ¹⁶ Ne, inja ono sisya sfamfaḇri, kuker roi ḇeradine, roi oser monda yamarisen yakofen isoine, iḇye kokako wer ma Allah jemaat-jemaat ḇese ḇyena nakam nasma rari oser monda ro jemaat. ¹⁷ Ro roi yaḇeyawos nane, yasandik naek srar mkoḇa. Naek srar ro fananjur mkoḇena nbuk bon ḇeḇye onoḇa, mboi roi ḇeḇyeḇa nairi. ¹⁸ Yamnaf ḇeponya mboi ro fananjur jemaat naek srar ro rarwas ono sisya sfamfaḇriyae. Ma yakyar mboi roi yamnaf nane nkaku. ¹⁹ Kaku rofandu mko anunḇesisye isya, insa komam mansesi ḇeḇe Kristen kakusya rofandu mko. ²⁰ Ḇape naek srar mkofananjur ani mkofrur anan meja sren ḇekakuyoḇa. ²¹ Snar rofyor mkanan ido, mkun famfaḇri roḇean faro mankun mko, isof ono saksma roḇean annaḇa, isyadi wer ono simser. ²² Snaro rarirya? Mkona rumbake? Fa mkanan ma mkinem rona! Roḇaido naek srar mkomarisen mkokoryae Allah jemaat ḇyedi ma mkokoryae snonkaku ḇesaḇararsya? Inja rosai nari yakofen faro mko? Yarer mkoke? Roḇa! Nari yarer mkoḇa. ²³ Snar farkarkor yaḇuk faro mko, yasma na ro Manseren mankundi: mboi ro roḇ ani fafisu Yesus, Manseren koḇedi, ḇyeḇeḇoḇ ani, dun mamami, ²⁴ ma ikofen kasumasa faro Allah posa, pyef ma pyanasnis mamami ani, raimnai ikofen, "Inekada baken ayedirya ḇyeḇeḇoḇ faro mko. Mkofrur rarirya fa mkoswarepen aya." ²⁵ Rarirya kako rofyor sanan posa kwar, dun sek anggur kako ma ikofen, "Anggur ineido Allah asas ḇebabo ḇyedi, ḇyekakop ro rik ayena. Rofyor mkinem i, mkofrur rarirya fa mkoswarepen aya." ²⁶ Mboi rofyor mkan mamami ma mkinem anggur ine, naek srar mkoḇaryas Manseren marmar ḇyedi isof iwerma. ²⁷ Eḇedari, snonkaku ḇeyan Manseren mamami ḇyedi roḇa ḇeyinem Manseren anggur ḇyedi kuker rari ḇeḇyeḇa ido, snonkaku ani ḇyesasar faro Manseren baken ma rik ḇyena. ²⁸ Inja snonkaku oser-oser kyukeḇ mankundi resari insape dan mamami ma dinem anggur ani. ²⁹ Snar rofyor mansei ḇeyan mamami ma ḇeyinem anggur ine, ma ḇyefandun anan Meja sren ḇekur Manseren baken ḇyediḇa, snon ani dan ma dinem fa isma samamyai Allah faro mankundi. ³⁰ Eḇedari rofandu mko ono sibor siduf ma siryarḇa, ma ono simar kwar kako. ³¹ Ḇape rofyor kokukeḇ mankunko ḇepon resari, Allah nari ḇyuk samamyai faro koḇa. ³² Ḇape rofyor Allah ḇyuk samamyai maroko, nari iprerko, insa kosma samamyai fnoḇek awer samamyai supswan ine. ³³ Eḇedari naek srar, rofyor mkoryur fa mkanan ro Manseren meja ḇyedi, iḇye mkowafyae mko. ³⁴ Rofyor ono sibiser, iḇye sanan ḇepon ro rum sena resari. Imbude naek srar mkofanjur monda fa mkosma samamyai Allah faro mankun mkondi. Faro roi ḇese na, nari yakofen ḇayir na wer faro mko, rofyor yaramufa ḇemko.

¹ Insape yakofenḇadir rosai Allah Rur ḇyedi ḇyuk na. Ro mnuk ine yamarisen insa naek srar mkofawi kaku. ² Naek srar mkoswarepen rofyor mkofawi Manseren ḇaim, naek mkokara famkoso karwarsya ḇeḇeawer. ³ Naek srar mkofawi mboi snonkaku ḇeyawawos ro knam Rur Ḇesrenya nari ikofenḇa, "Yesus ḇyeḇefras kada!" Rarirya kako snonkaku osoḇa nari kyarem, "Yesus Manseren dirya!" Rofyor Allah Rur ḇyedi fyarkin i ḇaido. ⁴ Allah Rur ḇyedi fakamaman rosai ḇyuk na nabor fama naḇesisye, ḇape nakam Rur oser iso ḇeḇuknanya. ⁵ Fararur afuffarmyan Manseren nabor, ḇape Manseren kuffarmyan ani, Manseren oser kako! ⁶ Fararur naisya nabor ro affuffarmyan Manseren fararur ḇyena, ḇape ḇeḇuk sambraḇ faro snonkaku oser-oser ikada Allah oser kako. ⁷ Faro ḇayaye koḇena kam, Allah Rur ḇyedi ifararur ro snonkaku oser-oser mankundi. ⁸ Faro snonkaku oso, Rur ani ḇyuk fawawi ro wawos masasik. Faro oso ḇese Rur ani ḇyuk fawawi ḇeḇaryas ro Allah. ⁹ Rur oser ani kako ḇyuk faro snonkaku ḇena kakyar oser ma faro ḇesesya, Rur ani ḇyuk papoik fa ssḇuk pararei faro snonkaku. ¹⁰ Faro snonkaku oso ḇyuk papoik fa ifrur aḇyair kanandor ma faro ḇese ḇyuk ḇararyas ro Allah aw ḇyena. Faro ḇese kako Rur ani ḇyuk fawawi fa ifawi Allah Rur ḇyedi rosai ḇyuk na ma rosai ḇyukḇa na. Ḇyuk faro ono fawawi fa siwawos ro wos kofawiḇa, ma ḇese kako ḇyuk fawawi fa sḇaryas kankunes ro wos anna. ¹¹ Roi ḇeḇor anna Rur oser ani iso ḇefrur nakamya; ḇyuk fawawi ḇardi faro oser-oser raris Rur ani mankundi moḇ imarisen raya. ¹² Kristus imnis baken snonkaku; bakenya ḇyeoser, ḇape kina ḇyena nabor. Kina annakam, nabor rariso wer, nebaken oser. ¹³ Rarirya kokam kako, iḇye kawasa Yahudi, ma ḇeḇe Yahudiḇa, manfyan ma snonkaku ḇemkei; kokam kosma masasi kwar kuker Rur ani, insa koḇeoser kuker Kristus baken ḇyedi. Kokam kofawi Rur oser ani kako. ¹⁴ Snar baken ani ḇardi ḇyesya ro kina oser mondaḇa ḇoi kina nabor. ¹⁵ Rofyor weminya ikofen ḇo doḇo, "Ḇramin risayaḇa inja, yaksun ro baken anyaba," inja rarirya ido weminya dakḇe kina ro bakenya ḇake. ¹⁶ Ma rofyor knaramya ikofen ḇo doḇo, "Snar mkamor risayaḇa, inja yakḇe kina ro bakenyaḇa," inja rarirya ido knaramya dakḇe kina ro bakenya ḇake. ¹⁷ Rofyor baken ani ḇesiper ḇyemkamor monda, rariso baken ani nari ryower? Roḇaido rofyor baken ani ḇesiper ḇyeknaram monda, rariso baken ani nari nyas? ¹⁸ Komam ḇoi kina anna Allah ḇeḇuk na faro bakenya. Allah ḇyuk na oser-oser romoḇ ḇyedi iso marisen ḇyedi. ¹⁹ Rofyor nakam nekina oser monda, rosaiso sapḇe bakenya? ²⁰ Inja kaku kina nabor ḇape bakenya ḇyeoser monda. ²¹ Eḇedari mkamorya nari ikofen faro ḇraminyaḇa ḇo doḇo, "Yafandun awḇa!" roḇaido bruya ikofen faro weminyaḇa ḇo doḇo, "Yafandun awḇa!" ²² Roḇarya kina-kina ro baken kokara ḇeryarḇa na kofandun kaku na; ²³ ma kina-kina kokara ḇeḇefandunḇa na, kina-kina anna naiso koḇuk ḇaḇefandun nabor syadi faro na. Kina ḇepyumba ro bakenya naiso kokara syadi na. ²⁴ Kina ḇero baken komambo ḇepyum kwar na, koḇefandun mankun naḇa. Allah fyasos baken koḇedi rarirya kwar isof kina-kina ḇeḇefandun mankunba na naiso koḇuk ḇaḇefandun syadi na. ²⁵ Rarirya baken ani ḇyeḇerarwasḇa; kina oser-oser ḇyefandun min ḇese ḇyedi. ²⁶ Rofyor kina oso ḇyekandera, kina ḇesena kako nakḇe kandera; rofyor kina oso ḇyeḇesandik, kina ḇesenakam nakraḇ kako. ²⁷ Naek srar mko kam Kristus baken ḇyediso mko ma oser-oser ro mko ḇyekina ro baken ani kako. ²⁸ Rarirya ro jemaat kako Allah fyasna kwar moḇ faro snonkaku oser-oser: randakya manwawan; ḇeḇesuru, nabi-nabi, ḇeḇekior guru-guru, raimnai ḇefrur aḇyair kanandor, ḇarpurya faro ḇesma papoik fa ḇeḇuk pararei faro snonkaku ḇeduf, roḇaido faro ḇefnoḇek snonkaku ḇese, roḇaido faro manfarkin, roḇaido faro ḇewawos ro wos kofawiḇa. ²⁹ Sikam manwawan sisyaḇa, roḇa nabi, robaido guru. Sikam sisma papoikḇa fa sbukfrur aḇyair kanandor, ³⁰ robaido ssḇuk pararei faro snonkaku ḇeduf, roḇaido faro ḇewawos ro wos kofawiḇa, roḇaido faro snonkaku ḇepamambar wos-wos anna. ³¹ Eḇedari, naek besewar kaku ḇeri insa wasma fakamaman ḇeba syadiya. Rarirya ro mnuk ine yafasna faro mko nyan ḇeḇye syadi wer.

¹ Rofyor yawawos ro wos ḇeḇor ro snonkaku kam, ma yawos wos malaikatsya wer kako, ḇape yana saswarḇa ido yamnis raris mawon ḇeroki ḇemaum roḇaido yamnis jorojoro ḇeroki ḇeḇe brenbren. ² Rofyor yasma fakamaman faro yaḇaryas Allah wos ḇyedi, ma yafawi kankunes ro roi ḇeborkam, ma yafawi roi ḇeborkam; ma rofyor yasma kakyar ḇeba kaku isof yawan bon nafa nabur, ḇape yaswar snonkaku ḇeseḇa, rarirya yaḇefainda roi osoḇaḇeri! ³ Ma yaḇerarwas nana yena fa yaḇukfarser faro ḇesaḇararsya, ma rofyor yaḇuk baken ayedi fa ḇyeḇekun, ḇape yana saswarḇa ido, nakam nefainda ḇaḇeri. ⁴ Saswar ani kaḇaḇaḇ ma ḇaḇenaḇye. Saswar ani isasyar kuker sasuremḇa, sḇadokḇa, mararesḇa. ⁵ Saswar ani imararesḇa, darer iḇa; saswar ani ḇyedafdifer snonkaku ḇese fa siso marisen ḇyenaḇa, imasasor fasawḇa, ma ikram masasorḇa, rofyor snonkakusya sifrur sasar faroi. ⁶ Saswar ani imarisenba rofyor napnapesya isyaḇa, imarisen monda kuker napnapesya. ⁷ Napnapes ani fyarmku roḇarpon ro roi ḇeḇor nakam ma imarisen ikyar roi ḇeḇye ro snonkaku oser-oser, rofafisu ḇerariso wer kako saswar ani kakyar ḇyedi ryobur iḇa ma ikḇaḇ iwaf roi ḇeborkam. ⁸ Saswar ani nari myarmarḇa. Ḇyuk masasik faro ḇararyas Allah wos ḇyena, ma rofafisu oso ḇararyas wos ani nari imnai. Ḇyuk masasik awawos ro wos-wos ḇeḇor kofawiḇa, ma rofafisu oso masasik ani nari sḇeifa imna. Ḇyuk masasik faro fawawi ro roi ḇeborkam, ma ro fafisu oso roi ḇeḇesya ani nari ḇyeḇefandun werḇa. ⁹ Snar fawawi koḇena ma masasik ḇaḇeḇaryas Allah wos ḇyedi, imnis mankun ḇaim. ¹⁰ Nari rofyor ḇemnisna ndama kwar, nari ḇemnis mankun ḇaimna nari nadawer kam. ¹¹ Rofafisu yaḇe romawamkun, yawos imnis romawamkun yaḇaḇir imnis romawamkun ma yakara imnis romawamkun. Insape yaba kwar, rari ḇaḇeromawamkun yena yasawen na kwar. ¹² Rosai komam ro baboine namnis nin ḇefafafen ro kansinai. Ḇape nari komambos ḇekakuya. Baboine roi yafawina namnis mankun ḇaim, ḇape nari yafawi namnis imnis raris Allah moḇ ifawi namnis ayaraya. ¹³ Ma roi rikior iḇekainya isoine: kakyarya, saneraroya, ma saswarya; ma ḇeba syadi ro skonya isoine saswari.

¹ Iḇye naek srar mkoḇesewar fa mkosaswar, insa mkosma fakamaman Allah Rur ḇyedi ḇyukna, isyadi kaku faro masasik koḇuki ḇyaryas Allah aw ḇyena faro snonkakusya. ² Snonkaku ḇewawos ro wos Rurya, snon ani dawos faro snonkakuḇa; ikada dawos faro Allah. Snonkaku oso ifawiḇa rosai ikofen na, snar Allah Rur ḇyediso ḇeḇuk fadawos ro roi Allah demir ifawina. ³ Roḇarya snonkaku ḇeḇaryas Allah wos ḇyedi, ḇyaryasna faro snonkaku; fa ḇyuk sambraḇ, masasik, ma sneprei farosi. ⁴ Snonkaku ḇewos kuker wos kofawiḇa dawos fa ḇyuk sambraḇ faro mankundi monda, mboi snonkaku ḇeḇaryas Allah wos ḇyedi ifnoḇek jemaat imbror. ⁵ Iḇyekada yamarisen naek srar mko wawos kam kuker wos ḇeḇor kofawiḇa. Ḇape ḇeḇye syadiya mkoḇaryas Allah wos ḇyena kada. Snar snonkaku ḇeḇaryas Allah wos ḇyena, iso ḇeba syadi ro snonkaku ḇewawos kuker wos ḇeḇor kofawiḇa; ma snonkaku ḇewawos ro wos ḇeḇor kofawiḇa ani ikofen ḇadir rosai ikofen na, insa jemaat ḇesiper sisma fainda ro wos anna. ⁶ Rofyor yaramufa faro mko ma yawawos ro wos Rurya, irya fainda rosai faro mko? Fainda keroḇaḇeri! Mboi, rofyor yafasna fasasnai oso ro Allah, oroḇaido yakofen ḇadir roi oso ro Allah, oroḇaido yaḇaryas Allah wos ḇyedi, oroḇaido yaḇuk farkarkor. ⁷ Dera roi ḇerok ḇeḇenyawayo ḇaḇeri, imnis sonker, sireḇ, rofyor sifnak mnis raroknaḇa mboi ndok fafadi ido, rariso nari snonkaku sifawi dow rosaiso sifnakya? ⁸ Fasasnai oso ḇese isya wer: rofyor siwuf famfnom kḇurya, mansei nari ḇefasos fa ḇeḇe embroḇsya? ⁹ Rarirya kako kuker wos masasik naek srar mkawos ro wos Rurya. Rofyor masasik naek srar mkoḇedi mkawos wos ḇesnaiḇa, snonkaku oso ḇaḇeri nari ifawi rosai mkokofen na. Naek srar wos mkoḇena nari napromes ma nefromo. ¹⁰ Ro supswan ine wosna nabor kaku, ḇape wos annakam nḇadir roi ono. ¹¹ Ḇape rofyor yafawi snon oso wos dawos naḇa, snon ḇeyawos wos ani imnis snon amber maro aya; rarirya kako aya kukeri. ¹² Faro naek srar mko ḇardi yafawi mkomarisen kaku famkona fakamaman ro Allah Rur ḇyedi. Mboi yakara roi ḇeponya, nari naek srar mkoḇesewar masasik ḇefnoḇek jemaat fa imbrar. ¹³ Eḇedari snonkaku ḇewawos ro wos Rurya nari dor faro Allah insa Allah ḇyuk masasik fa ikofen fasnai rosai ikofen anna. ¹⁴ Snar rofyor yanadi kuker wos yafawiḇana, rur ayedi kada ḇyenadi, ḇape swaruser ayena nambranḇa. ¹⁵ Inja nari rosai yafrurya? Nari yafararur radine: Nari yaḇenadi kuker rur ayedi, ma nari yaḇenadi kuker kakara yena kako. Nari yadisen kuker rur ayedi, ma yamarisen yadisen kuker kakara yena kako. ¹⁶ Snar rofyor naek wakofen kasumasa faro Allah kuker rur bedi monda, ma snonkaku ḇese ḇefawi wos kofawiḇa ḇerama ro Allah Rur ḇyedi, snon ani nari ikofenḇa, "Kaku ḇeri" kuker nadi kasumasa bedi; snar ifawi rosai naek wakofenyaḇa. ¹⁷ Mboi nadi kasumasa bedi faro Manseren iḇye rariso wer, ḇape nadi ani ḇyuk fainda osoḇa faro snonkaku ḇese. ¹⁸ Yakofen kasumasa faro Allah snar mankundaya ḇardi yawawos ro wos Rurya isyadi ro naek mkokam. ¹⁹ Rariryano ro sarawrow ro jemaat koḇuk samsyom faro Manseren, yamarisen syadi yawos wos mnuk ririm snonkakusya sifawina, ro wos mnuk syaran-syaran ro wos kofawiba. Yamarisen syadi rarirya insa yaḇuk farkarkor faro snonkaku. ²⁰ Naek srar! Mkokara ḇeromawamkun awer. Ro roi ḇeḇarḇor iḇye naek srar mkomnis romawa kasun. Ḇape ro kakara, naek mkomnis snon kuf. ²¹ Ro Refo sfas radine, "Manseren ikofen, ’Rofandu snonkaku ḇewawos kuker wos Rur ḇesrenya fyarkor na, nari yawawos faro kawasa sine. Mboi rofandu snonkaku amber, nari yawawos faro kawasa ayesi; rariryano, simewer simnaf wos ayenandi.’ " ²² Inja fakamaman faro wawos kuker wos Rurya imnis aḇyair faro snonkaku ḇekyarsyaḇa, mboi faro snonkaku ḇekyarḇasya. Ma fakamaman koḇuki ḇyaryas Allah aw ḇyena faro snonkaku irya aḇyair faro snonkaku ḇekyarsya, mboi faro snonkaku ḇekyarḇa syaḇa. ²³ Eḇedari, rofyor sarawrow jemaat, jemaat ḇesiper siwawos kuker wos Rurya, raimnai snonkaku ono ḇese roḇaido snonkaku ḇeḇe Kristen ḇa ono srama, ma nari skara naek srar mkosarḇir kam! ²⁴ Mboi rofyor naek srar mkoḇaryas kam Allah wos ḇyedi, raimnai snonkaku ḇeḇe Kristen ḇa ono srama, oroḇaido snon oso ḇese, mboi roi ḇeḇor mkoḇaryas anna kam nari nfasnai snonkaku ani sasar ḇyena ma nafrur faḇyaḇir sasar ḇyena. ²⁵ Roi ḇeḇor ḇeyokef ro sneḇyedi nari neḇefasnai, isof nari ryun mankundi ma ḇyansuba faro Allah. Ikada nari kyarem ḇodoḇo: "Kaku ḇeri, Allah isya rofandu mko." ²⁶ Inja, naek srar, rosai ḇeḇesya ro roi ḇeḇor anna kam? Rofyor naek srar mkoryur famkosyom Manseren, ono sidisen, ono ssḇuk farkarkor, ono sḇaryas roi ono ro Allah, ono siwawos ro wos Rurya, ma ono wer sikofen ḇadir rosai sikofen na. Ḇape nakam iḇye neḇefrur fa ssḇuki fyarkor ma faro ḇayaye nakam. ²⁷ Rofyor ono simarisen sawos ro wos Rurya, iḇyekada snonkaku risuru roḇa kior monda siso ḇeawos asusersya. Ma snonkaku ono sikofen ḇadir rosai ḇewawos ansi sikofen na. ²⁸ Rofyor ono sisya fasikofen ḇadirḇa, snonkaku ḇewos ro wos Rurya ansi iḇye sefasis ro sarawrow ani. Iḇye sawos fasis ro sisnesna faro Allah monda. ²⁹ Snonkaku risuru roḇa kior ḇesma Allah wos ḇyedi, sḇaryas wos ani rofyor ḇesesya skarauser rosai sikofen na. ³⁰ Ḇape rofyor Allah wos ḇyedi ryama faro snonkaku ḇese ḇekain ro sarawrow ani ido, ḇewawos ani imnai. ³¹ Kuker fararur ḇeradine, naek srar mkokam, oser ḇeoser, ḇyaryas Allah wos ḇyedi; insa sikam sisma farkarkor ma sikyar syadi wer. ³² Fakamaman ro Rurya ḇyuk fa koḇaryas Allah wos ḇyedi, ḇeḇaryas ani fyara wos ani. ³³ Allah ani imarisen roi nari ḇeḇeawnos; Allah ḇemarisenḇa faro ḇaḇesapurnakḇa. Allah kawasa ḇyesi ro jemaat nakam, ³⁴ binsya sefasis rofyor sarawrow ro jemaat. Ssḇuk fasakawosḇa. Sima sakḇe ḇinfarkinḇa; ine ḇyeḇefas ro Refo kwar. ³⁵ Rofyor simarisen sifawi roi oso, nari sifuken siswassi ro rum sena, snar syowiḇa ḇin oso dawawos ro sarawrow jemaat. ³⁶ Inja Allah wos ḇyedi ryamaker mkoke? Roḇaido wos ani ḇyeḇeḇaryas monda faro mkererke? ³⁷ Rofyor snon oso ḇyaḇir isma fakamaman faḇyaryas Allah wos ḇyedi, roḇa isma fakamaman ḇese ro Allah Rur ḇyedi, snon ani ifawi roi yafas nane sasoser ḇerama ro Manseren. ³⁸ Ḇape rofyor ono sakna naḇa, mkofandun awersi. ³⁹ Inja iḇye naek srar mkoḇesewar insa mkoḇaryas Allah wos ḇyedi, ḇape mkodwarek awer snonkaku ḇemarisen ḇewos ro wos Rur ani. ⁴⁰ Ḇape nakam iḇye neḇefrur kuker syowi ma awnos.

¹ Inja baboine, naek srar, yamarisen insa mkoswarepen Allah Ankankinem Ḇeḇye ḇyedi wer yaḇaryas kwar faro mko. Naek wasma kwar, ma kakyar bedi ḇyeknam ro Ankankinem Ḇeḇye ani kako. ² Rofyor naek waswarepen nako faro rosai yaḇaryas ani, rarirya Ankankinem Ḇeḇye ani ḇyuk koreri faro au; demir rofyor mkona na kuker kakyarḇa. ³ Rosai yaḇuk faro naek srar roi yasma kwar nairya kako. Roi ḇeḇefandun kaku, imnis fasfas ro Refo, yaḇuk na faro naek mko mboi Kristus imar kwar snar sasar koḇena; ⁴ mboi ḇyeḇekrir kwar, ḇape ḇarpurya ḇyeḇeḇawes kaḇer wer ro ras ḇeḇekiorya. Ine kako ḇyeḇefas ro Refo kwar. ⁵ Yaḇaryas kwar faro naek srar kako mboi Kristus ḇekenem kaḇer wer ani fyasnai mankundi faro Petrus, ma ḇarpurya faro manwawan samfur seser risuru ansi. ⁶ Raimnai fyasnai mankundi wer faro manfamyan ḇyesi isyadi ro utin ririm. Snonkaku ansi sibor sikenem kaker isof baboine, mboi ḇemar kwarsya snonkaku riḇeso monda. ⁷ Raimnai Yakobus ma ḇarpurya faro manwawansya kam. ⁸ Papupes kakuya fyasnai mankundi maro aya kako -- ayai ḇemnis wombrek ḇekapaf! ⁹ Aya ine Manseren manwawan ḇyedi ḇesma anonef. Aya ine sipok sap aya ḇe manwawanḇa, snar yaḇewayam Allah jemaat ḇyena kwar. ¹⁰ Ḇape snar Allah ḇaḇenaḇye ḇyedi aya isya raris moḇ baboine yaraine. Ma Allah ḇyuk payasyos waworek mondaḇa maro aya. Snar aya iso ḇefararur syadi ro manwawan ḇesesya kam. Ḇape kaku ḇeri ḇaḇesewar ayenaisyaḇa; nane Allah ḇaḇesewar ḇyenairya ḇesewar aya ma ḇefararur fnoḇek aya. ¹¹ Inja, ro manseirya wer naek mkosma Ankankinem Ḇeḇye ani -- ro ayake roḇa ro manwawan ḇeseke -- inema ḇyekakaraḇa. Mboi ḇeḇefandunya isoine rosai nkoḇaryas anna ma naek mko kyarna isoine Allah Ankankinem Ḇeḇye ḇyenairya. ¹² Rofyor rosai nkoḇaryas anna isoine mboi Kristus diḇri kwar ro marmarya, snar rofandu naek srar mko ono sikofen mboi snonkaku ḇemarsya nari siḇer si ḇa? ¹³ Kaku ḇeri rofyor ḇemarsya nari siḇer si werḇa, ine fyasnai Kristus kako nari diḇeri wer ro marmariḇa. ¹⁴ Ma rofyor imnis raris Kristus diḇri wer ro marmaryaḇa, rarirya fainda osoḇa nkoḇaryas rosai ma fainda osoḇa kako naek wakyar, snar kakyar bedi ḇyeknamba. ¹⁵ Isyadi wer rona, nfasnai mboi nkoḇeankar faro Allah, snar nkoḇaryas mboi Allah ḇyuk fa Kristus diḇer wer ro marmarya, ḇape Allah ḇyuk aḇiḇer wer faro iḇa -- rofyor kaku rarirya ḇemarsya siḇer si werḇa! ¹⁶ Snar rofyor snonkaku ḇemarsya siḇer si werḇa, rarirya Kristus kako nari diḇeri ro marmarya werḇa. ¹⁷ Ma rofyor Kristus diḇeriḇa rarirya ido naek kakyar bena namnis mafafu monda; rarirya ido naek srar mkoisya kaker ro ḇaḇesasar nari ḇesma raroya. ¹⁸ Rarirya kako snonkaku ḇekyar faro Kristus ḇo ḇemarsya snonkaku ansi sisma raro kako. ¹⁹ Rofyor saneraro koḇena faro Kristus namuk ro kankenem koḇena ro supswan ine monda, rarirya ido kawasa kam ro supswan ḇesiper ine, koiso nari ḇeḇenyawa ḇaḇeri! ²⁰ Ḇape kokam kofawi Kristus ḇyeḇeḇawes ro marmarya. Ine fyasnai sasuref faro snonkaku ḇemar kwar ansi nari sḇeḇeḇawes wer. ²¹ Snar snonkaku oser ifnai fa marmarya syun ro supswan ine, rarirya kako snar snonkaku oser ifnai fa kaḇakḇok ro marmari ḇyeḇeḇuk faro snonkakusya kako. ²² Imnis snonkaku kam simar snar ḇaḇeoser kuker Adam, rarirya kako nari sikam sikenem wer, snar ḇaḇeoser kuker Kristus. ²³ Ḇape oser-oser nari ḇyeḇeḇawes imnis rarwas ḇyedi: ḇepon kakuya Kristus; ḇarpurya ro fafisu Kristus kyaḇerma wer, insape rarwas snonkaku ḇesun ro Kristus kawasa ḇyesi. ²⁴ Raimnai ras ḇepupesya ryama. Rofafisu ani nari Kristus ifrur kafyo ḇaḇesasoser kam, ḇaḇepapoik kam, ma ḇaḇesamambraḇ kam; raimnai ḇyuk papoik ḇyedi imnis wairek, faro Allah, Kma koḇedi. ²⁵ Kristus iso ḇeyuf ḇaḇesasoserya pdef isof Allah ifrur fa Kristus darefepen mbroḇ ḇyesi kam fa skafyo faroi. ²⁶ Mbroḇ ḇepupes nari ifrur kafyoya isoine marmari. ²⁷ Sfas ro Refo radine, "Allah ifrur roi ḇeḇor nakam fa nkafyo faroi kwar." Isnaibos ro kakara kuker "roi ḇeḇor kam" ine Allah mankundi daksunba, mboi ifrur fa roi ḇeḇor kam nkafyo faro Kristus. ²⁸ Ḇape nakam neḇekafyo kwar faro Kristus ḇaḇesasoser ḇyedi, ma mankundi, isoine Allah Rumkun ḇyedi, nari kyafyoi mankundi faro Allah ḇefrur kwar roi ḇeḇor kam fa nkafyoi faroi. Rarirya Allah mankundi kako nari ḇeḇuk sasoser faro nakamya. ²⁹ Rofyor ḇemarsya sḇeḇeḇawes kaḇer werḇa, snaro snonkaku ḇekenem ono sisma masi sren faro ḇemarsya? Rosai snonkaku ḇekenem sikyar ro ḇemar ansi? Mboi rofyor snonkaku ḇemar ansi nari sḇeḇeḇawes kaḇer werḇa, fainda rosai snonkaku sisma masi sren faro ḇemarsya? ³⁰ Ma ko kako, snaro komarisen kosun ro kandera-kandera rofafisu ḇerarirya na? ³¹ Naek srar! Rasras kam yafarmku yaḇekandera ma yamsik kuker kankenem mkoḇena snar mkokyar kwar faro Yesus Kristus, Manseren koḇedi. ³² Rofyor mnuk ine kyur ḇar snonkaku monda, fainda rosai maro aya, isof yaḇesewar fayasampum aiwan-aiwan ḇeyanḇepek ro Efesus, fainda rosai maḇe aya? Kaku ḇeri rofyor snonkaku ḇemar ansi sḇeḇeḇawes kaḇer werḇa, oh, iḇye syadi: "Mkorama kankinem ma koryaḇ, snar nari meser komar," rarirya rakrok wos peper oso. ³³ Naek beḇefrowes awer! Rofyor naek bemaniḇoḇ kuker ḇaḇeḇarḇorya, nari rari ḇeḇye bedi dakḇarḇor kako. ³⁴ Baḇir beri, ma wafrur sasar kaker awer. Kaku ḇeri roi ḇefrur mamyaya iso rofandu mko ono sisya sifawi kakubos Allah ḇaim. ³⁵ Imbude ono sifuken, "Rariso snonkaku ḇemarsya sḇeḇeḇawes kaḇer wer? Baken ḇerariso nari ssḇuk farosi, rofyor sḇeḇeḇawes kaḇer werya?" ³⁶ Mkofawi royoḇaḇeri! Rofyor naek kwer rokaker ro saprop, rokaker ani nari isur ḇeriḇa, rofyor rokaker ani ipokem ḇepon ḇaim. ³⁷ Ma rokaker naek kwer ro saprop ani -- fasibuke roḇa rokaker ḇese -- rokaker ani bakenya iso ḇesuryaḇa mboi mor ani monda. ³⁸ Allah mankundiso nari ḇeḇuk sananai ḇeḇye faro rokaker ani imnis marisen ḇyedi. Allah ḇyuk sananai faro rokaker anna oser-oser. ³⁹ Baken ro roi ḇekenem na namnis kamḇa. Snonkaku baken sena naḇese ro aiwansya baken sena; mansya baken sena naḇese, ma insya kako baken sena naḇese wer. ⁴⁰ Rarirya kako kuker roi ḇeḇor ro nanki ma roi ḇeḇor ro supswan ine. Roi ḇeḇor ro nanki oser-oser nya payamyum ḇardi, ma roi ḇeḇor ro supswan rarirya kako. ⁴¹ Payamyum ori iḇese ro payamyum paiki. Maksya kako sisnai payamyum ḇardi. Mboi payamyum mak ansi oser-oser iḇese kako. ⁴² Rarirya kako nari snonkaku ḇeḇawes kaḇer ro marmar. Baken sikrirya baken ḇekain fyoroḇa ḇape baken sḇawes kaḇerya baken ḇekain fyoro-fyoro. ⁴³ Rofyor baken ani ḇyeḇekrirya, baken ani imyaren ma iḇyeḇa; ḇape rofyor ḇyeḇeḇawes kaḇer, baken ani ipyum ma syambraḇ. ⁴⁴ Rofyor sikriri, baken ani baken ro supswan; ḇape ḇyeḇeḇawes kaḇer kwar, baken ani Allah Rur ḇyedi ḇebukiya. Baken ro supswan isya, ma baken ro Allah isya kako. ⁴⁵ Sfas ro Refo radine, "Snonkaku ḇeponya, isoine Adam, ḇyenyawa ḇekenem," ḇape Adam ḇepupes ikada Rur ḇeḇuk kankenem rirya. ⁴⁶ Ḇape ḇerama ḇepon kakuya baken saprop, mboi Ruryaḇa. Mboi Rurya iso berama papurya. ⁴⁷ Adam ḇeponya ḇyeḇefrur ro saprop, Adam ḇeḇe suruya ḇyeknam ro boiyaswa. ⁴⁸ Snonkaku ro supswan ine simnis Adam ḇeponya sḇeḇefrur ro saprop, ḇape snonkaku ro boiyaswa sikada simnis kuker i ḇeramaker boiyaswa. ⁴⁹ Ko ro baboine komnis kuker Adam sifrur ro saprop, mboi ko kako nari komnis i ḇerama ro boiyaswa ani. ⁵⁰ Naek srar, roi yakofen ine, isoine: baken sifrur ro kraf ma rik, nari dakḇekina ro Allah kawasa ḇyesiḇa; ma baken nari ḇemar nari iso baken ḇekain fyoro-fyoroya ḇa. ⁵¹ Mkokara naḇye kankunes ine: nari komar kamḇa, mboi kokam koḇe ḇesadwer. ⁵² Roi ḇeḇesya ani nari ryarirya imnis arḇeḇer, rofyor kḇurya ryok papupes. Snar rofyor komnaf rakrok kḇur ani, snonkaku ḇemar ansi sḇeḇeḇawes kaḇer kuker baken ḇekain fyoro, ma kokam nari koḇe ḇefadwer. ⁵³ Baken koḇedi ḇemar ine nari syun baken ḇemarḇa, ma baken ro supswan nari syun ḇaken ro boiyaswa. ⁵⁴ Rofyor baken ḇemar ine syun baken ḇemarḇaya, ma baken ḇero supswan ine syun kwar baken ro boiyaswa, rofyor ani imnisbos sfas ro Refo radine, "Marmarya ḇyeḇefmom kwar; ma ḇaḇefaindaya ḇyeḇesma kwar!" ⁵⁵ "Ne, marmare, fainda beja isyaro? Ne, marmare, sayaryur beja isyaro?" ⁵⁶ Sayaryur marmari iso sasari, ma sasari imbran fararur ḇyedi ḇyeuser rari agama. ⁵⁷ Ḇape kasumasa faro Allah; snar ḇyuk maḇeko ḇaḇefainda ḇeḇeuser Yesus Kristus Manseren koḇedi! ⁵⁸ Eḇedari, naek srar yaswarkuf, iḇyekada mkosambraḇ ma mkodworen. Mkofararur pdef kaku ḇeri faro Manseren, snar naek srar mkofawi mboi roi mkofrur faro Manseren nakam, nari nefromoḇa.

¹ Insape kawos ro pipi naek srar mkomarisen mko ḇukfnoḇek faro kawasa Kristen, yor insa naek srar mkofrur imnis moḇ yaḇuk kwar faro jemaat-jemaat ro Galatia. ² Ro rasras Arina, iḇye naek srar mkokam mkoḇuk ḇardi pipiker ono, oser-oser ḇyuk raris moḇ ismaraya. Mko kram pipi ansi isof yarafa, insa rofyor ani koryur ssewar awer. ³ Rofyor yarafa kwar, nari yawan snonkaku mkomarisensya. Nari yaḇuk farosi syap ḇekofen fasna, insa ssun pipi fafnoḇek ansi ḇe Yerusalem. ⁴ Ma rofyor fandun ido nari yasosi kako, ma nari yasosi ḇo nkora kam. ⁵ Nari yarakaki mko rofyor yunuk ro Makedonia kwar, snar yakara fayunuk rodia. ⁶ Rodia nari yakainus mko resari rofafisu pnunekya. Raimnai naek srar nari mkofnoḇek aya ro marandan ayedi pdef. ⁷ Yamewer yarakaki mko rarirya monda. Rofyor Manseren ḇyukido, yamarisen yakainus mko fyoro knik resari. ⁸ Rofyor ani nari yakain ro Efesus, isof ro munara Sababu Rurḇesren. ⁹ Fafisu nabor rodine faro fararur ḇeḇefainda, ḇape kawasa ḇesampum sibor sisya kako. ¹⁰ Rofyor Timotius ryafa, mkosrowi kuker ḇaḇye insa isma sambraḇ rofandu mko, snar i kako ifararur ro Manseren fararur ḇyedi imnis aya. ¹¹ Imbude ono smamkyof indi. Mkofnoḇeki ro mararan ḇyedi pdef isof kyaḇer maro aya kuker aski snar yawaf raramuma ḇyedi fnoḇek naek srar ḇesesya. ¹² Naek koḇedi Apolos, rarwan ono yor kwar faroi insa ryakaki mko fnoḇek kuker naek srar ḇesesya. Ḇape kyara namuk ḇaim fa ryamufa. Mboi rofyor isma fafisu ḇeḇye oso ido nari ryamufa. ¹³ Iḇye mkowaren ma mkores nako ro kakyar. Mkoḇri ma mkosambraḇ! ¹⁴ Roi mkofrur nakam mkofrur nakam kuker saswar. ¹⁵ Naek srar mkofawi kwar Stefanus kuker kina ḇyesya; si snonkaku randakya ḇeḇe Kristen ro Akhaya. Si ḇefararur kuker sneḇesiper faro Allah kawasa ḇyesi. ¹⁶ Yor kaku ḇeri insa naek srar mkoso farkankin snonkaku ḇerariryasya, fnoḇek snonkaku ḇese ḇefararur kayam faḇeyuf farmyan fnoḇek si. ¹⁷ Yaryaḇ kuker Stefanus, Fortunatus ma Akhaikus rarama suḇedi. Sko kada skosadwer naek srar maro aya. ¹⁸ Kaku ḇeri skofrur sneryaḇ aya; rarirya kako naek srar mkosnemna. Snonkaku ḇerariryasya mko ḇesyowi kaku si. ¹⁹ Jemaat-jemaat ro Asia sfarem aroo sena mufa ḇenaek srar mko kam. Akwila ma Priska fnoḇek jemaat ḇeryur ro rum suḇedi sfarem aroo Kristen faro mko kako. ²⁰ Naek srar kam rodine sikofen aroo mufa ḇemko. Mkokofen arooyaye oser ḇeoser kuker syowi Kristen. ²¹ Yafas ḇardi aroo yena rodine: Aroo ro aya, Paulus. ²² Snonkaku ḇeswar Manseren Yesusḇa, Allah ḇyuk samamyai faroi. Maranatha -- Manseren ryama fasaw! ²³ Aski ro Manseren Yesus kyain somko kada. ²⁴ Yafarem saswar yedi mufa ḇenaek srar mko kam ḇekyar kwar faro Yesus Kristus. Ro nu, Paulus ma Sostenes