मत्ती

MATTHEW

मत्ती

यीशु एरू खानदान

( लूका 3:23 - 38 )

¹ अब्रहामेरी औव्लाध, दाऊदेहेरी औव्लाध, यीशु मसीहेरी वंशाबली |

² आब्रहंमेरो ईज़हाक पैइदा भोव; ते ईज़हाकेरो याकुब पैइदा भोव; ते याकुबेरे युहुदा ते तैसेरे ढ्ला पैइदा भुए | ³ ते युहुदेरो फारस, ते ज़राहा पैइदा भुए; ते तैन्केरी हैईयरू नोंव तंम्र थुं, ते तै फार्सेरो हस्रोंना पैइदा भोव, ते हस्रोंनेरो राम पैइदा भोव? ⁴ ते रामेरो आमिनादाब पैइदा भोव; ते आमिनादाबेरो न्ह्सोंना पैइदा भोव, ते न्हसोंनेरो सल्मोंना पैइदा भोव। ⁵ ते सल्मोंनेरो बौईज़ पैईदा भोव, ते बौईज़ेरी अम्मारु नोंव राहब थुं; ते बौईज़ेरो औबेद पैइदा भोव, ते ज़ैसेरी अम्मारु नोंव रुत थुं ते औबेदेरो याशी पैइदा भोव। ⁶ ते याशीएरो दावद बादशाहा पैइदा भोव,

दावदेरो सुलेमान पैइदा भोव, ते तैसेरी हैई येनी अम्मा ज़ै पेहिली उरियाऐरी कौन्श थी? ⁷ ते सुलेमानेरो रूहुबांम पैइदा भोव, ते रूहुबांमेरो आबीया पैइदा भोव, ते आबीयारो आसा पैइदा भोव। ⁸ ते आसाएरो युस्फत पैइदा भोव, ते युस्फतेरो युराम पैइदा भोव, ते युरामेरो उज़िया पैइदा भो | ⁹ ते उज़ियाएरो युतांम पैइदा भोव; ते युतांमेरो आखज़ पैइदा भोव; ते आखज़ेरो हज़किया पैइदा भोव। ¹⁰ ते हज़कियाएरो मनसी पैइदा भोव, ते मनसीएरो आमौना पैइदा भोव, ते आमौनेरो युसिया पैइदा भोव। ¹¹ ते युहुदुयेरे मुल्खे मैरां जलावतना भोइतां बाबलेरी गुलैमी मां गहंने तगर य्कुंनिया ता तैसेरे ढ्ला पैइदा भुए।

¹² बाबले मैरां जलावतना भोंनेरां पत्ती याकुंनियाएरो सियालतीएहेल पैइदा भोव, ते सियालतीएहेलेरो ज़ौरोबाबल पैइदा भोव। ¹³ ते ज़ौरोबाबलेरो आबीहुद पैइदा भोव, ते आबीहुदेरो आलियाकिंम पैइदा भोव; ते आलियाकिंमेरो आज़वर पैइदा भोव। ¹⁴ ते आज़वरेरो सादुक पैइदा भोव, ते सादुकेरो आखींम पैइदा भोव, ते आखींमेरो आलीहुद पैइदा भोव। ¹⁵ ते आलीहुदेरो आलीज़र पैइदा भोव, ते आलीज़रेरो मत्तांन पैइदा भोव; ते मत्तांनेरो याकुब पैइदा भोव | ¹⁶ ते यकुबेरो युसफ पैइदा भोव, ज़ै मरियमारो मुन्श थु, ते मरियमारो यीशु पैइदा भोव, ज़ैसजो बादे मां मसही ज़ोंने लगे।

¹⁷ ते आब्रहांमे कैरां ते दावदे तगर च़ौवधे पीड़ी भुई, ते दावदेरे युहुदी केरे जालावतन भोइतां बाबलेरी गुलैमी मां गहंने तगर च़ौवधे पीड़ी भुई, ते बाबलेरे जालावतन भोंने कैरां देइतां यीशु मस्ही तगर च़ौवधे पीड़ी भुई।

यीशु एरू ज़रम

लूका 1:26-38; 2: 1- 7

¹⁸ ते यीशु मसीहेरु ज़र्म ऐंच़रे भोंव, की ज़ैखन तैसेरी अम्मां मरियामारी कुड़माई युसफै सेहीं भेवरी थी, ते ड्लाहे कैरां पेहिले तै पाबित्र आत्माइं सेहीं दोज़िंती भुई। ¹⁹ ते तैसारो मुन्श युसफ ऐल्हेरलेइ तैनी तै च़ुप च़ारे शारनेरे लेइ सोचु, किजोकी तै तैस बदनाम केरनी ना थु चहतो। ²⁰ हेजु तै ऐन सोचने लोरो थु ता परमेशरे एकी फरिशते सुपने मां एइतां ज़ोंव, औ युसफ दोदरी औव्लाध अपनी कौन्श मरियम अपने घरे आंन्ने कैरां ना डर, किजोकी ज़ैन मठ्ठु तैसारे पेटे मांहे तैन पाक रुहारी कुद्रुती सेहीं भेवरुए। ²¹ मरियांमी मठ्ठु भोंनुए, ते तु तैसेरू नोंव यीशु रेखां, किजोकी तैहे अपने लोकन तैनकेरे पापण कैरां तैन छुटाल्हो।

²² एन सभ किछ ऐलहेरलेइ भोंव, की परमेशरेरो तै हुक्म ज़ै तैनी अपने नेबी केरे ज़िरये सेहीं दितोरो थु, पुरो भोए की। ²³ अक आड्लाही कुई पेटे भारी भोली, ते तैस अक मठ्ठु भोलु, ते तैस्जो एमांनुएइल ज़ोल्हे, ज़ैसेरो मतलबे परमेश्वर ऐसन सेहीं साथीये। ²⁴ युसफ ज़ैखन निड्लारां बींझ़ौ त तैनी परमेशरेरे फरिशतेरु ज़ोंनु मन्नु, ते मरियम अपनी कौन्श अपने घरे आंन्हीं | ²⁵ पण ज़ां तगर तैस मठ्ठु ना ज़र्मुं तां तगर तैस्कैरां दुर राहु ते ज़ैखन मठ्ठु ज़र्मुं ता युस्फै तैस मठ्ठैरु नोंव यीशु रखु।

जोषटी केरू एजनू

¹ ज़ैईस यीशु हिरोदेस बादशाहेरे ज़माने मां युहूदियेरे शहरे बैतलहंमे मां पैइदा भोव त पुर्बेरां किछ जोष्टी लोक युरोशलमे मां पुज़ै ते पुछ़ने लगे| ² युहूदी केरो बादशहा ज़ै ज़रमोरोए तै कौढ़ीये? किजोकी असैइं पुर्बे मां तैसेरो तारो लाहोरोए ते आसां तैसका मथौ टेकने एवरेम| ³ ज़ैखन हिरोदेस बादशांहें ऐह गल शुंनी त तै ते तैसेरे साथी ते युरोशलमेरे सारे लोक डेरी जे| ⁴ हिरोदेसें मन्दिरे मां सेवा केरने बाले सेवक पुरैहूत ते कौमरे सियांने लोक अकौठ्ठे केरतां पुछ़ने लगो: की मसही कौढ़ी पैइदा भोंनोएं| ⁵ तैनेइं तैस सैहीं ज़ोंव: युहूदियेरे शहरे बैतलहंमे मां पैइदा भोंनोएं किजोकी नेबेइं एंच़रे ज़ोवरुए की|

⁶ एह बैतलहंम तु ज़ै युहूदी केरे आलाके माहंस, युहूदी केरे हाकमन कैरां घट नैइं, किजोकी तीं मैरां अक एरहो हाकम निसैल्हो ज़ै मेरी कौम इस्राएलेरी हेरगैश कैरेल्हो|

⁷ तैखन हिरोदेस बादशांहें जोष्टी च़ुपच़ारे कुजेइतां तैन कैरां तारो निस्नेरो पत्तो कियो| ⁸ ते तैना ऐन ज़ोइतां बैतलहंमे मांझो भेज़े की गाथ: ते तैस मठ्ठैरो रोड़े च़ारे पत्तो केरा ते ज़ैखन तुसंन पत्तो लगे त मिम्हीं पत्तो देइयथ ताके अंम्हीं तैसका गैहीतां मथौ टेकीं|

⁹ तैना बादशाहेरी गल शुनतां च़ले जे: ते तै तारो ज़ै तैनेइं पुर्बे मां लाहोरो थु, तैन अगरी अगरी च़लो ते तैस ठैरी गैहीतां खैड़ोहु ज़ैड़ी तैन मठ्ठु थुं| ¹⁰ तै तरो लैहितां तैन बड़ी ख़ुशी भुई| ¹¹ त्ताल्ही तैना घरे अंतर जे ते तैन मठ्ठु तैसेरी अम्मा मरियमी का लाहुं, ते तैसका मथौ टेको; ते अपने डबे खौल्तां सौनु लुबांन ते मुर तैसका च़हढ़ू | ¹² ते सुप्ने मां ऐह बिसतार मैल्हो की वापस हिरोदेसे का न गैहीयथ, तैना वापस केंची होरी बत्तां अपने देशे जो च़ले जे|

मिस्र मुल्खे जो गहनू

¹³ तैनकेरे गहंनेरां पत्ती प्रभु परमेशरेरो अक सुवर्गदूत युसफै सुपने मां मैल्हो ते ज़ोंने लगो: उठ; मठ्ठै ते तैसेरी अम्मा साथी नैहीतां मिस्र देशे जो नश; ते मेरे ज़ोंने तग्र तैड़ी रैहियां किजोकी हिरोदेस बादशाह ऐस तौप्तां मारने चहते|

¹⁴ युसफ निड्लारां उठो ते मठ्ठु ते तैसेरी अम्मा साथी नैहीतां रतो रात मिस्र देशे जो च़लो जेव| ¹⁵ ते हिरोदेस बादशहेरे मरने तग्र युसफ तैड़ी राहु; ताके तै गल ज़ै नेबेइं ज़ेवरी थी पुरी भोए की मीं मिस्रे मैरां अपनु मठ्ठु कुजाऊं|

¹⁶ ज़ैखन हिरोदेसे जोष्टी केरे धौखे बैज़रो पत्तो लगो, त तैस बड़ी सर्क आई: तैनी बैतलहंम ते तैसेरे दुर दुर आलाकन मां सिपाही भेज़तां सारां मठ्ठां ज़ैना दुई सालां कैरां थियां सारां मारां: तैन दुई सालां केरे हिसाबे सैहीं इत्ल्हा मैह्लने पुड़ कियोरो थु ज़ै जोष्टन कैरां पत्तो लगोरो थु| ¹⁷ एंच़रे ज़ै गल यरमियां नेबें ज़ेवरी थी पुरी भुई की|

¹⁸ रांमा शहारे मां अक आवाज़ शुंनी: बेड़ी लेरां केरी शौर ते बड़े मातमेरी शोरे, राखल अपने मठ्ठां केरेलेइ लेरां लोरी देने, तैसारो दिल ठांडो न भोए किजोकी तैना मैरी जेवरन|

मिस्र मुल्खेराँ वापिस एजनू

¹⁹ हिरोदेसेरी मौऊतरां पत्ती प्रभु परमेशरेरो अक सुवर्गदुत मिस्रे मां युसफै सुपने मां लाहु ते तै ज़ोंने लगो| ²⁰ उठ, मठ्ठु ते तैसेरी अम्मा साथी नैहीतां इस्राएलेरे देशे जो च़लो गा; किजोकी ज़ैना लोक मठ्ठै मारने चहते थिये, तैना मैरी जेवरेन| ²¹ फिरी युसफ निड्लारां उठो, ते मठ्ठु ते तैसेरी अम्मा साथी नैहीतां इस्राएल देशे जो च़लो जेव| ²² पण ऐन शुनतां की अरख्लाउस अपने बाजेरी हिरोदेसेरी ठैरी बादशाह बनोरोए तैड़ी गहंने कैरां डेरतां ते सुपने मां पत्तो लेगतां गलिलेरे अलाके जो च़लो जेव| ²³ ते तैड़ी पुज़तां नसरत नोवेरे शाहरे मां रहंने लगो: ताके तै गल ज़ै नेबेइं ज़ेवरी थी पुरी भोए की तैसजो नासरी ज़ौल्हे|

यूहन्ना बपतिस्मो देने बालो

(मरकुस 1: 1-8; लूका 3:1-18 यूहन्ना 1:6-8, 15 -34)

¹ तैन दिहैड़न मां युहन्ना बपतिस्मो देने बालो आव ते युहूदियेरे बियाबांने मां गैहितां ऐह मनादी केरने लगो की| ² तोबा केरा किजोकी अस्मानेरी बादशाही लूशी एजने बालिए| ³ ऐह युहन्ना नबी तैहे ज़ैसेरे बारे मां इसाया नेबें ऐन ज़ोवरु थुं: की बियाबांने मां ज़ोंने बालेरी आवाज़ एजने लोरिए, की परमेशरेरे लेइ बत्त तियार केरा ते तैसेरी बत्तां सिधी केरा|

⁴ युहन्ना ऊंटेरे बालां केरो चोगो लातो थियो ते अपने लख्खे सैहीं अक चमड़ेरो पट्को बंधतो थु, ते तै बंनेरां टिटां ते गंनेरु माछ़ी खातो थु| ⁵ युरोशलम, ते युहूदिया ते यरदनेरे सारे अलाकन मैरां लोक युहन्ना नेबी का गहते थिये| ⁶ ते ज़ैखन तैना अपने पापां केरो अंगिकार केरते थिये त युहन्ना तैन दरियाए यरदने मां बप्तिसमो देतो थु|

⁷ पण ज़ैखन तैनी हेरू की बड़े फरिसी ते सदुकी बप्तिसमो नैनेरे लेइ तैसका ऐजने लोरेन त तैनी तैन जो ज़ोंव: तुस सप्पैरी औवलाधथ ते तुसंन केनी ज़ोंव की एजने बालाऊ हेरतां नश्शा| ⁸ अपने तोबा केरनेरे हिसाबे सैहीं किछ फल भी बनाथ| ⁹ ते तुस ऐस गुमाने मां न राथ की आसां अब्रहांमेरी औवलाधी मैरम: किजोकी आंव तुसंन सैहीं ज़ोतां की परमेशर इन घोड़न मैरां अब्रहांमेरे लेइ औवलाध पैइदा केरी सखते| ¹⁰ हुंनी बुट्टेरे ज़िलंन पुड़ मैक्कु रखोरोए एल्हेरेलेई ज़ैस बुट्टे रोड़ो फल न लग्गे त तै केटतां अग्गी मां फुक्नोएं|

¹¹ आंव त तुसंन मन फरांनेरे लेइ पैनी सैहीं बप्तिसमो देताइं: पण ज़ै मेरे पत्ती ऐजने बालोए तै मीं कैरां जादे निग्ग्रै: आंव त तैसेरी जुट्टरो तस्मो खोलनेरे काबले भी नैइं, पण तै तुसंन पाबित्र आतमाइं सैहीं ते अग्गी सैहीं बप्तिसमो दैल्हो| ¹² तैसेरू छज तैसेरे हथे माहैं ते तै आपनु अन्न खुब रोड़े च़ारे छ़ट्टैल्हो: तै गैहुं अपने कौठारे मां रखेल्हो: पण झ़ाझ़ तैस अग्गी मां फूकैल्हो ज़ै कधै हिशनेरी न भौल्ही|

यूहन्नरे ज़िरीये यीशु मसीहेरो बपतिस्मो

(मरकुस 1: 9-11; लूका 3:21-22 यूहन्ना 1:31-34 )

¹³ तैस मोके यीशु गलिले मैरां दरियाये यरदनेरे बन्ने पुड़ पुज़ो ताके युहन्ना कैरां बप्तिसमो नै| ¹⁴ पण युहन्ना नेबें यीशु जो न्ना ज़ोंव: किजोकी मीं तीं कैरां बप्तिसमो निहीयोरो लोड़ते ते तु मीं कैरां बप्तिसमो नैने एवरोस? ¹⁵ पण यीशुए जुवाब दितो: युहन्ना तु एंच़रे भोंने दे, किजोकी रोड़ु त ऐन थुं की आस सारी धर्मेरी सच़ाई एंच़रे सैहीं पुरी केरम, त्ताल्ही युहन्ना नबी ख़ुशी भोव| ¹⁶ यीशु ज़ैखन बप्तिसमो नैहीतां पैनी कैरां बेइर निस्सो त हेरा आंम्बर खुल्ही जेवं ते तैनी परमेशरेरी आत्मां कुबूतरेरी ज़ैरी एपु पुड़ एइंती लाही| ¹⁷ ते तैखन आंम्ब्रे मैरां एह आवाज़ आई की ऐन मेरू ट्लारु मठ्ठुऐ ऐस पुड़ आंव बड़ो खुशीं|

यीशु एरी आज़मेइश

(मरकुस 1: 12-13; लूका 4:1- 13 )

¹ तैस मोके आत्मां यीशु जंगले मां नियो ताके शैतांन तैसेरी आज़मैइश केरे। ² च़ैल्ही दिहाड़े ते च़ैल्ही रातन फाको देनेरां पत्ती यीशुए ढ्लुख लग्गी। ³ त तैखन अज़माने बाले शैताने यीशु का एइतां ज़ोंव: अगर तु परमेशरेरु मठ्ठुस त इन घोड़न जो ज़ो की ऐना रौट्टी बन्न। ⁴ यीशुए जुवाब दितो: पाबित्र शास्त्रे मां लिखेरुए की मैन्हुं सिर्फ़ रौट्टेइं सैहीं ज़िंतो न राहे बलके हर गल्ली सैहीं ज़ै परमेशरेरी ज़बांन निसचे तैस्सैहीं ज़िंतो रहते।

⁵ फिरी शैताने यीशु बुज़ूर्ग बादशहां केरे शहरे युरोशलमे मां नियो ते मन्दिरेरी ऊची छ़ंम्पी पुड़ नैहितां खड़ो कियो। ⁶ ते शैतान यीशु सैहीं ज़ोंने लगो: अगर तु परमेशरेरु मठ्ठुस त इठां छाल मार किजोकी शासत्रे मां लिखेरुए की परमेशर तेरे बारे मां अपने सुवर्गदूतन हुकम दैल्हो, ते तैना तीं अपने हथन मां छ़ुल्हे ताके तेरे पांऊन केंची घोड़न सैहीं ठौकर न लग्गे। ⁷ पण यीशुए ज़ोंव: ऐन भी शासत्रे मां लिखेरुए की तु अपने परमेशरेरी आज़मैइश न कैरां।

⁸ तैखन शैताने यीशु एक्की ऊच्चे पहाड़े पुड़ नियो ते तैड़ी दुनियारी सैरी बादशैही ते तैनकेरी शांनो शौकत हैराइ। ⁹ ते ज़ोंव: अगर तु मिंका ज़ैंधु तल्ले लेइतां मथौ टेक्स त आंव इन सभ किछ तीं दैल्हो। ¹⁰ तैखन यीशुए शैताने जो ज़ोंव: एह शैतान दुर भो किजोकी लिखेरुए की तु सिर्फ़ अपने परमेशरे का मथौ टेकां ते तैसेरी आराधना केरां।

¹¹ तैखन शैतान यीशु कैरां च़लो जेव ते सुवर्गदूते एइतां तैसेरी सेवा केरने लगे।

यीशु एरे सेवारे कम्मेरी शुरूवात

(मरकुस 1: 14-15 ; लूका 4:14- 15, 31 )

¹² ज़ैखन यीशुए ऐन शुंनु की युहन्ना नबी कैद कियोरोए त यीशु गलिले मां जेव। ¹³ ते नासरत शैरतां कफ़्रन्हुंमे मां रहंने लगो ज़ै डल्हेरे बन्ने येंनी झिलरे बन्ने ज़ैबलुंन ते नैफतैलेरे अलाके मां हैं। ¹⁴ ताके तै गग्ल ज़ै इसाया नेबें ज़ेवरी थी पुरी भोए की। ।

¹⁵ ज़ैबलुंन ते नैफतैलेरे अलाके डल्हेरे पार येंनी झिलरे ऊस पासे यरदनेरे पार ते गलिलेरो तै अलाको ज़ैसमां गैर युहूदी बसतन। ¹⁶ ते ज़ैना लोक आंधरे मां ऊम्र गुज़ारते थिये तैनेइं अक बड़ी लो लही: ते ज़ैस मुल्खे मां मौऊतरो सैयो पैउरो थु: तैठेरे रहंने बालन पुड़ बड़ी लो आई।

¹⁷ ते तैइसेरु देंतु यीशुए ऐन ज़ोंनु शुरु कियुं की तोबा केरा किजोकी अस्मानेरी बादशाही नेड़े पुज़ोरीए।

पेहिले चेलां केरू कुजानू

(मरकुस 1: 16-20 ; लूका 5:1- 11;31 ;यूहन्ना 1:35- 42)

¹⁸ एक्की दिहाड़े यीशु ज़ैखन झिलरे बन्ने च़लोरो थियो त तैनी दुइ ढ्ला, शमौन ज़ैसजो पतरस ज़ोते थिये ते तैसेरो ढ्ला आंद्रियास लाहु: तैखन तैना डल्हे मां ज़ाल लोरे थिये छ़डने, किजोकी तैना झिरां केरू येंनी मैछ़ली ट्लांनेरू कम्म केरते थिये। ¹⁹ यीशुए तैन सैहीं ज़ोंव: मीं सैहीं साथी च़ला आंव तुसंन मैन्हुं ट्लांने बाले बनैइल्हो। ²⁰ तैनेइं तैखने अपन ज़ालां तैड़ी ज़ैरे छ़ड्डां ते यीशु सैहीं साथी च़ले जे।

²¹ ज़ैखन यीशु थौड़ो ज़ैरो आग्र जेव त तैनी याकुब ते युहन्ना दुई ढ्ला लाहे ज़ैना ज़ैब्देरां मठ्ठां थियां: तैना किशती मां अपने बाजी सैहीं साथी ज़ालां बुनते थिये, यीशुए तैना कुजाए। ²² ते तैना भी तैखने किशती ते अपने बाजी तैड़ी ज़ैरे छ़ैडतां यीशु सैहीं साथी च़ले जे।

यीशु बिमारण बझ़ाते

( लूका 6: 17- 19)

²³ यीशु सारे गलिले मां हंठतो फिरतो राहू: तै तैन्केरे प्राथना भवने मां शिक्षा देंतो राहु ते बादशैहीयरी खुशखबरी शुनातो थु, ते लोकां केरी हर किस्मेरी दुख बिमैरी ते कमज़ोरी दुर केरतो थु। ²⁴ ते यीशुएरी बड़ी मूशुरी भोई जेइ, ते लोक सैभी मरीज़न ज़ैना हर किस्मेरी बिमैरी ते तकलिफन मां फसोरे थिये, ते ज़ैना मिरगरे मरीज़ थिये अधरंगी थिये, ते ज़ैन मां दुष्टात्मां थी तैना यीशु का आन्हैं ते यीशुए तैना बज़्झ़ाए| ²⁵ ते गलिल, दिक्पुलुस, युरोशलम, युहूदिया, ते दरियाए यरद्नेरे पैरीं अलाकां केरे बड़े लोक यीशु सैहीं साथी च़ले जे।

यीशु एरो पहाड़े पुड़ उपदेश

¹ यीशु तैन हछे लोकन हेरतां एकी पहाड़े पुड़ च़लो जेव: ते ज़ैखन तैड़ी बिशो त तैसेरे चेले भी तैसका आऐ। ² तैखन यीशु अपनी ज़बांन खौलतां तैन एंच़रे ज्ञान देंने लगो।

मुबारक वचन

(लूका 6:20-23 )

³ मुबारकन तैना लोक ज़ैना दिलेरे गरिबन: किजोकी आसमानेरी बादशाही तैन्केरीए।

⁴ मुबारकन तैना लोक ज़ैना मायुसंन: किजोकी तैन निस्चो भोनोएं।

⁵ मुबारकन तैना लोक ज़ैना नर्म दिलेरेन: किजोकी तैना ज़मींनरे मालक भोंनेण।

⁶ मुबारकन तैना ज़ैन परमेशरेरी ढ्लुख ट्लीश्शे: किजोकी तैना रज़नेन।

⁷ मुबारकन तैना ज़ैना रेहेंम दिलंन: किजोकी तैन पुड़ भी परमेशर रेहेंम कैरेल्हो।

⁸ मुबारकन तैना ज़ैनकेरे साफ दिलंन: किजोकी तैना परमेशरे लाहेले।

⁹ मुबारकन तैना ज़ैना सुल्हा केरतन: ते एकेकी सैहीं पियारे सैहीं मिलतन किजोकी तैन जो परमेशरेरां मठ्ठां ज़ौल्हे।

¹⁰ मुबारकन तैना ज़ैना परमेशरे नोवें पत्ती सताऐ गहतन: किजोकी असमानेरी बादशाही तैनकेरीए।

¹¹ मुबारकथ तुसां लोक ज़ैखन लोक तुसंन मेरे नोवें सैहीं लानतान केरन ते स्तान ते बुरी गल्लां तुशै बहरे मां ज़ोंते रहंन। ¹² तुसां ख़ुशी रैहियथ ते नैच़थ: किजोकी असमाने मां तुशै लेइ बड़ो फले: किजोकी लोकेइं पुराने ज़माने मां नबी भी एंच़रे स्तेऊरे थिये।

लओ ते लून

( मरकुस 9: 50 ;लूका 9:34, 35)

¹³ तुसां धेरतरु लुनथ: पण अगर लुनेरो लुनार मुकी गाहे त तैन कौस्सैहीं लुनु बनते फिरी तैन कोंची कम्मेरु न राहे: सुवाए बैरोहुं शारनेरां ते लोकेरे पांवेइं सैहीं ढ्लेंच़ोंतु राहे। ¹⁴ तुस दुनियारी लोअथ: पहाड़े पुड़ चमकतो शहार कधै छ़ैपी न सखे। ¹⁵ दियो बैलतां ओड़कतां न छ़डन: पण तैस उची ठैरी रखतन ताके तै घररे सैरी मैन्ह्न लो पुज़े। ¹⁶ ते एंच़रे तुशी लो मैन्हुं केरे सामने एरही चमके, ताके तैना तुशां रोड़ां कम्मा हेरतां तुशै असमानी बाजेरी तारिफ केरन।

व्यवस्थारी तालीम

¹⁷ ऐन न बुझ़थ की आंव तुवारित या नैबन रद्द केरने एउरोइं: आंव तैन रद्द केरने नैइं बलके ज़ैन नेबैइं ज़ौवरु थुं, तैन पुरू केरने एवरोइं। ¹⁸ किजोकी आंव तुसंन सैहीं सच़्च़ ज़ोताइं की ज़ां तग्र धरती आंम्बर खतम न भोए, तां तग्र बचनेरो लिखोरो अक लफ्ज़ भी न टलेल्हो? ज़ां तग्र सभ किछ लिखेरू पुरु न भोए। ¹⁹ ऐल्हेरेलेइ ज़ै कोई इन निकड़े ज़ैरे हुकमन मैरां केंची एकी ज़ैरे ट्लोड़ते ते होरन भी एन्ने केरनु शिखालते तै परमेशरेरी बादशैही मां सैभन कैरां निकड़ो भौल्हो,पण ज़ै तैन हुकमन पुड़ अमल केरते ते होरन भी एन हुकमन पुड़ च़लनेरु ज्ञान देते त तै असमानेरी बादशैही मां सैभन कैरां बड्डो भौल्हो| ²⁰ किजोकी आंव तुसंन ज़ोतां की ज़ां तग्र तुशी ज़िंदगी व्यवसथा मन्ने बालन ते फ्रिस्न कैरां रोड़ी न भोए: तां तग्र तुस अस्मानेरी बादशैही मां दाखल न भोई सखथ।

सरक ते मौत

²¹ तुसैहीं शुनेरू थुं की पुराने ज़मानेरे लोकन सैहीं ज़ोवरु थुं, की खुंन नैइं केरनो अगर ज़ै खुंन कैरेल्हो त तैस आदालत सज़ाह दैल्ही। ²² पण मेरु ज़ोंनु ऐने की ज़ै कोई अपने ढ्लाऐ पुड़ बिलाउजा क्रौध केरते त तैस भी आदालती मां सज़हा मैल्हेली: ते ज़ै कोई अपने ढ्लाऐ जो गैई देते त तैसभी आदालती मां जुवाब देनो पेनोएं ते ज़ै कोई अपने ढ्लाऐ जो बुरु ज़ौल्हो त तै भी नर्केरी अग्गरो हक़दार भौल्हो। ²³ अगर परमेशरे का तीं अपनी च़ड़तल च़ह्ड़ते बार याद एज्जे की मीं अपने ढ्लाऐ सैहीं किछ गिलोए। ²⁴ त तु अपनी च़ढ़तल तैड़ी ज़ैरे छ़ैडतां पैहिले अपने ढ्लाऐ सैहीं मलाप कैरां फिरी अपनी च़ढ़तल च़ैहढ़ां। ²⁵ अगर कोई मैन्हुं तीं पुड़ दाओ केरतां तीं आदालती मां नैनो चहते त तु बत्ते तैस्सैहीं सुल्हा कैरां ना त तैनी तु मुन्स्फै का खड़ो केरनोस ते तैनी तु सिपैहीएरे हवाले केरनोस ते सिपैहिए तु कैद केरतां छ़डनोस। ²⁶ आंव तुसंन सैहीं सच़्च़ ज़ोतां की ज़ां तग्र तु अपनो जुर्मानो अक अक पैइंसो न दैल्हो तां तग्र तैठां छुटी न बटेल्हो।

ज़नाह

²⁷ तुसैइं शुनेरू थुं की ज़ोउरु थुं की ज़न्हा नैइं केरनो। ²⁸ पण आंव तुसंन सैहीं ज़ोतां की ज़ै कोई केंची कौन्शी पुड़ गैन्दी नज़रां सैहीं तकते तैनी अपने दिले मां पैहिले तैस्सैहीं ज़न्हा केरी छ़ड्डो। ²⁹ एल्हेरेलेई अगर तेरी दैहिनी अछ़ तेरे लेइ पापरी ठोकर बन्चे त तैस कैढतां छ़ड, किजोकी तेरे लेइ एन्ने रोड़ुए, की तेरी जांनी मैरां अक अक पापेरी ठोकर घटती गाहे ते तेरी जान नर्के मां गहंने कैरां बंच़े। ³⁰ अगर तेरो दैहिनो हथ पाप केरते त तैस केटतां छ़ड: किजोकी तेरे लेइ एन्ने रोड़ुए की तेरी जांनी मैरां अक अक पापेरी ठोकर घटती गाहे ते तेरी जांन नर्के मां गहंने कैरां बंच़े।

फारखति

( मत्ती 19: 9; मरकुस 10: 11,12; लूका 16:18 )

³¹ ऐन भी ज़ेवरू थुं की ज़ै कोई अपनी कौन्श शारे त ऐन ज़रूरीए की फारखती लिखतां हावाले केरे। ³² पण आंव तुसंन सैहीं ज़ोतां की ज़ै कोई एपनी कौन्शी बगैर केंची गैल्तरे फारखती लिखतां देते त तै तैस सैहीं ज़न्हा केरते या ज़ै कोई शैरोरी कौन्शी सैहीं ड्लहा केरते त तै भी तैस्सैहीं ज़न्हा केरते।

कसम

³³ तुसैहीं शुनेरू थुं की पुराने ज़माने मां लोकन सैहीं ज़ोवरु थुं की झुठी कसम नैइं केरनी: अगर परमेशरेरी कसम खाथ त तैस पुरी केरथ। ³⁴ पण आंव तुसंन सैहीं ज़ोतां की कधै कसम न केरथ: न असमानेरी किजोकी तै प्रभु परमेशरेरो तखते। ³⁵ न ज़मिनरी किजोकी तै परमेशरेरी पावां केरी चौव्कीए ते न युरोशलमेरी किजोकी तै बुज़ुर्ग बादशाहां केरो ते नेबी केरो शाहरे। ³⁶ ते न अपने दौग्गैरी कसम केरथ किजोकी तुस अपनो अक बाल भी छ़ीतो या कालो न केरी सखथ। ³⁷ पण हांएरी ठैरी हां ते नाएरी ठैरी न ज़ोथ: किजोकी एस्केरां जादे ज़ोंनु शैतानी कम्मे।

बदलो

( लूका 6 : 29, 30 )

³⁸ तुस्सैहीं शुंनेरुऐ की ज़ोवरु थुं की: अछ़रे बदले अछ़ ते दंतेरे बदले दंत। ³⁹ पण आंव तुसंन सैहीं ज़ोतां की जानरो मुकाबलो न केरथ: अगर कोई तेरे दैहिनी खैखोड़ी पुड़ थपुड़ बाहेलो त तु बाऔं पासो भी तैसेरे पासे रेख्खां। ⁴⁰ ते अगर कोई दाऔ केरतां तेरी कमिच नैनी चाहे त तु कोट भी तैसेरे हवाले कैरां। ⁴¹ अगर कोई तुसंन भारो छ़ूंने अक मील नैने चाहे त तुस दुई मील गैहीयथ। ⁴² ज़ै कोई तुसंन कैरां किछ मग्गे तैस ज़रुर दैइयथ ते ज़ै कोई तुसंन कैरां पैइंसे मग्गे त तुत्र न फरेइयथ।

दुशमन सैहीं प्यार

( लूका 6 : 27, 28, 32-36 )

⁴³ तुसैइं शुंनेरु थुं की ज़ोवरु थुं: की अपने पुड़ौसी सैहीं मुहाबत केरथ ते दुशमने सैहीं बैर रेखथ। ⁴⁴ पण आंव तुसंन सैहीं ज़ोतां की अपने दुशमने सैहीं मुहाबत रेखथ ते ज़ैना तुसंन सतातन तैन केरे लेइ दुआ केरथ| ⁴⁵ ताके तुस अपने असमानी बाजी केरां मठ्ठां बेनी सखथ ज़ै अपनो दिहाड़ो अपने रोड़े लोकन पुड़ चमकाते ते बुरे लोकन पुड़ भी ते धेर्मी लोकन पुड़ झ़ड़ी देते ते बुरे लोकन पुड़ भी। ⁴⁶ अगर तुस सिर्फ तैन्ने सैहीं मुहाबत रखतथ ज़ैना तुसंन सैहीं मुहाबत रखतन त तुसंन कुन फल मैल्नोएं? कुन सुद खाने बाले भी ऐन्ने न कमान?

⁴⁷ अगर तुस अपने ढ्लांन जो नमसकार केरतथ त कुन तुस होरन कैरां जादे केरतथ? कुन गैर युहूदी भी ऐन न केरन? ⁴⁸ बसा तुस पबित्र साफ बना किजोकी तुशौ असमानी बाजी भी पबित्र साफे|

दान

¹ खबरदार अपनो धर्मेरो फर्ज़ सिर्फ लोकन हरांनेरे लेइ न केरा किजोकी तुशौ प्रभु परमेशर तुसंन कोई फल न दैल्हो।

² पण ज़ैखन तु बंदगी दैस त तु ढुंढूरो न देंइयां ज़ैच़ंरे होरे लोक मन्दिरन मां ते गेलन मां केरतन ताके लोक तैन्केरी तारीफ केरन, आंव तुसंन सैहीं ज़ोतां की ज़ै फल तैन मैल्ह्नो थु त तै तैन मैल्ही जेव। ³ दान देंते बार ज़ैन किछ तु अपने दैहिने हथे सैहीं दैस त बांए हथे पत्तो न लोड़े। ⁴ ताके तेरी बंदगी सुफल भोए: तैखन तेरो प्रभु परमेशर ज़ै हर बख्त तीं तक्तो, रहते तीं फल दैल्हो।

प्रार्थना

( लूका 11: 2-4 )

⁵ ज़ैखन तु दुआ केरस त होरी लोकां केरो ज़ैरो न बेना: ज़ैना मन्दिरन मां ते बज़ारां केरे मोड़न पुड़ खेड़ौहितां दुआ केरनी सुखात्न ताके लोक तैन तकन: ते आंव तुसंन सैहीं ज़ोतां की ज़ै फल तैन मैल्होरो लोड़तो थु, त तै तैन मैल्ही जेव। ⁶ पण ज़ैखन तु दुआ केरस त अपने अंत्र गैहियां ते दार बंद केरतां अपने प्रभु परमेशरे का ज़ै नज़री कैरां बेइरे तैसका दुवा केरां, तैखन तेरो परमेशर ज़ै अलैहियोंतो परमेशरे, ज़ै हर बख्त तीं तक्तो रहते तीं फल दैल्हो। ⁷ ते ज़ैखन तु दुआ केरस त गैर युहूदी केरू ज़ैरु बक बक न केरां, ते बेड़ी हेछी गल्लां बार बार न दौरेहियां, किजोकी लोक ऐन बुझ़तन की ऐनकेरे हछु ज़ोंने सैहीं परमेशर ऐनकेरी जादे शुंनते। ⁸ तैनकेरे ज़ैरे न बेनथ: किजोकी तुशौ प्रभु परमेशर तुशै मगने कैरां पैहिले तुशी ज़ुरूरतां ज़ांनते।

⁹ पण तुसां एंच़रे दुआ केरथ: एह मेरे बाजी, तु ज़ै आस्माने महांस, तेरु नोवं पबित्र मन्नु गाहे।

¹⁰ तेरी बादशाही एज्जे: तेरी मर्ज़ी ज़ैरी असमाने मां पुरी भोचे, इस ज़मिनी पुड़ भी भोए।

¹¹ इशी रोज़ैरी रौट्टी आज़ असंन दे ।

¹² ते ज़ैच़ंरे असां अपने कर्ज़दारन कर्ज़ो माफ़ केरतम, तु भी इशो कर्ज़ो माफ़ केरां।

¹³ इशी आज़मैइश न केरां, पण बुरैई कैरां बच़ेंयां, किजोकी बादशाही कुदरत ते महिमा सादा तेरी भोंती राहे आंमीन"।

¹⁴ अगर तुस लोकां केरे कुसुर माफ़ कैरेल्हे त तुशौ अस्मानी बाजी भी तुशै कुसुर माफ़ कैरेल्हो। ¹⁵ ते अगर तुस लोकां केरे कुसुर माफ़ न कैरेल्हे त तुशौ अस्मानी बाजी भी तुशै कुसुर माफ़ न कैरेल्हो।

बरत

¹⁶ ज़ैखन तुस ब्रत रखेल्हे त होरी लोकां केरू ज़ैरु आपनु तुत्र न बगैड़थ: ताके लोकन पत्तो न लग्गे की ऐनेइं अज़ ब्रत रखेरुए, आंव तुसंन सैहीं सच़्च़ ज़ोतां की ज़ै फल तैन मैल्नो थु तैन मैल्ही जेव। ¹⁷ बलके ज़ैखन तु ब्रत रखस त अपनु तुत्र धौइयां ते दौग्गे तेल मेल्लां। ¹⁸ ताके लोकन नैइं पण तेरो अस्मानी बाजी, ज़ै नज़री न एज्जे तै लाहे की ऐनी ब्रत रखेरुए तै तीं फल दैल्हो।

सुवर्गएरी दौलत

( लूका 12: 33, 34 )

¹⁹ एपु जेइ ज़मीनी पुड़ जैइदात जम्हां न केरां, ज़ैड़ी कीड़ो ते मौरच़ो लगते, ते च़ौर च़ौरी केरतां घिंनी गहते। ²⁰ बलके अपने लेइ असमाने पुड़ जैइदात जम्हां केरां ज़ैड़ी न कीड़ो लग्गे ते न मोरच़ो लग्गे ते न च़ोरे च़ोरी केरोए। ²¹ ते ज़ैड़ी तेरो माल ते जेईदात भोली, तैड़ी तेरो दिल भी लग्गेल्हो।

जिसमेरी लो

( लूका 11: 34- 36 )

²² अछ़ जांनरो अक दियोए: एल्हेरेलेई अगर तेरी अछ़ रोड़ी साफे त तेरी सारी जान ज़ैच़ंरे अक दिहाड़ोए। ²³ अगर तेरी अछ़ खराबे त सैरी जानी मां अंधरुए: बस अगर तेरे अंत्र लोऐ अंधरु बेनी गाहे त तैन कैत्रु बडु अंधरु भौल्हु।

परमेशर ते दौलत

( लूका 16: 13; 12: 22-31 )

²⁴ कोई मैन्हुं दुई मालकां केरी सेवा न केरी बटे: या त एकी सैहीं दुशमनी कैरेल्हो ते होरी सैहीं दौस्ती रखेल्हो या एकेरो बेनतां राहेलो या होरी सैयां न सुखाल्हो तुस परमेशरेरी ते दौवलतरी दुइयां केरी सेवा न केरी सखथ। ²⁵ एल्हेरे लेई की आंव तुसंन सैहीं ज़ोतांइ की न तुस एपनी जांनरी फ़िक्र केरा की तुस कुन खाल्हे या कुन पिल्हे, ते न एपनी जांनरी की कुन लांमैल्हे? कुन जान रौट्टी कैरां ते कुन जिस्म लिग्ड़े कैरां बैधतां नैइं? ²⁶ उडरने बाले च़ूड़ोलन हेरा; ज़ैना ना किछ बेंन ते ना किछ केटतां आंन्ह जांम्हां केरतां रखन, फिरी भी तुशौ परमेशर तैन कैरी हेर गैश केरते; कुन तुशी कदर तैन कैरां जादे नेहीं? ²⁷ तुसंन मां कौन एरहो ज़ैरोए ज़ै फ़िक्र केरतां अपनी ऊमर अक घड़ी भी बधैई सखते?

²⁸ लिगड़ेरे लेइ कीजो फ़िक्र केरतथ? जंगले मां सोस्नेरे फुड़ू केरां हेरा की तैना कैंच़रे बेडोतन; न तैना मैह्न्त केरन ते न तैना कत्तन। ²⁹ फिर भी आंव तुसंन सैहीं ज़ोताइं की सुलैमान भी एपनी सैरी शानो शोकतरे बावजुद भी तैन केरो ज़ैरो न थु। ³⁰ ज़ैखन परमेशर मैइदानेरो घास ज़ै अज़ै ते कालां लौउंने मां फुकनोए; एरहु लिगड़ दैल्हो; घट विश्वासे बालाव कुन तुसंन लिगड़ न दैल्हो।

³¹ किजोकी तुस फिक्र केरतां ऐन न ज़ोयथ, की कुन खांमैल्हे, या कुन पिंमैल्हे, या कुन लांमैल्हे? ³² किजोकी होरी कौमां ऐन गल्लां केरी फिकरी मां रेहिचन, ते तुशो असमानी बाजी ज़ांनते, की तुस्न इन गल्लां केरी ज़रूरते| ³³ पण पैहिले परमेशरेरी बादशैहीयरी ते रहस्त्बेज़ारी तलाश केरा त बाकी चीज़ां भी तुसंन मैल्ही गैहेली। ³⁴ ते कालेरे लेई फिक्र न केरथ, किजोकी कालेरो दिहाड़ो अपने लेई एपू फिक्र केरेलो; अज़ैरे लेई अज़ैरो दुःख बड़ोए|

होर्न पुड़ दोष नैइं लानो

(लूका 6: 37, 38 , 41, 42 )

¹ केंची दोष न लैइयथ तुसंन भी दौष न लग्गैल्हो। ² किजोकी ज़ैच़ंरे तुस होरी दौष लाएल्हे तैंच़रे तुसंन भी दौष लगनोएं ते ज़ैस हैटी सैहीं तुस नापतथ तैस्से हैटी सैहीं तुशै लेइ भी नापु गाहेलु।

³ तु अपने ढ्लाएरी ऐछ़ी मां कुड़ो कीजो तकतां ते तेरी ऐछ़ी मां त बड्डी कड़ीए तैसेरो तु खियाले न केरस? ⁴ ज़द तेरी ऐछ़ी मां कड़ीए त तु कौस ऐशी सैहीं अपने ढ्लाए जो ज़ोइ सख्तां की एई आंव तेरी ऐछ़ी मैरां कुड़ो कैढीं? ⁵ औ मैन्हां पैहिले एपनी ऐछ़ी मैरां कुड़ो कढ़ फिरी अपने ढ्लाएरी ऐछ़ी मैरां रोड़े च़ारे तेकतां कुड़ो कैढ़ी सखत्स।

⁶ पवित्र चीज़ कुतरन न देथ ते अपने मौती सुरन अगर न छ़ैडथ एरहु न भोए की तैना पांउन हैठ दलोटन ते तुसंन भी दलंन।

मग्गेले त मैल्हेलू

( लूका 11 : 9-13 )

⁷ मग्गैल्हे त तुसंन दीतु गाहेल्हु, ते तौप्पैल्हे त तुसंन मैल्हीगाहेलु, ते दार गुड़काल्हे त तुशै लेइ खोलु गाहेलु। ⁸ किजोकी ज़ै कोई मगते तैस मैल्ते, ज़ै कोई तौप्ते तैस मैल्ही गहते ते ज़ै कोई दार गुड़काते त तैसेरे लेइ खोलु गहते।

⁹ तुसन मां ऐरहो कौने; की अगर तैसेरू मठ्ठु रौट्टी मग्गे त तै तैस घोड़ दे। ¹⁰ ते या अगर मछ़ली मग्गे त सप दे? ¹¹ तुस बुरे भोंनेरे बावजुद भी अपने मठ्ठन रोड़ी चिज़ां देनी ज़ांनतथ त तुशौ परमेशर तैन ज़ैना तैस कैरां मगत्न त तुसंन रोड़ी चीज़ां की न दैल्हो ? ¹² बस्सा ज़ैरू तुस चहतथ की लोक तुसन सैहीं केरन, तुस भी तैन सैहीं तैरू केरा किजोकी शैस्त्री केरी त नेबी केरी एहे शिक्षा थी।

सुन्कड़ी बत ते खुल्ही बत

( लूका 13: 24 )

¹³ तंग दारेरां बत्तां अंतर गाथ किजोकी तैन दार खुल्हुए ते बत्त भी बड़ी हेरनी रोड़ीए, ज़ै मौउतरे पासे गहचे ते तैस बत्तां गहंने बाले बड़ेन। ¹⁴ किजोकी तैन दार सौंकड़ुए ते तै बत्त आसुख्तीए ज़ै ज़िन्दगरे पासे गहचे ते तैरां गहंने बाले भी थौड़ेन।

ज़ेरहो बुट तेरहो फल

( लूका 6:43,44 , 46; 13: 25- 27 )

¹⁵ झुठे नेबन कैरां खबरदार रेहियथ: तैना तुसन का भैढ़ां केरे रुपे मां एइतन पण असली मां मारने बाले गिद्दां भोतन। ¹⁶ तुसां तैनकेरे फले सैहीं तैन पशांनैल्हे: कुन लोक झ़लन सैहींयेरां दाछ़ कढतन ते बुटन सैहींयेरां फैगु ट्लोड़तन? ¹⁷ एल्हेरेलेइ हर एकी रोड़े बुट्टे रोड़ो फल लगते ते हर एकी बुरे बुट्टे बुरो फल लगते। ¹⁸ न रोड़े बुट्टे बुरो फल लग्गे ते न बुरे बुट्टे रोड़ो फल लग्गे। ¹⁹ ते तैस बुट्टे ज़ैस रोड़ो फल न लग्गे तै केटतां लोउंने मां फुकतां छ़डतन। ²⁰ बस्सा तुस झुठे नेबन तैनकेरे फले सैहीं पशांनैल्हे।

²¹ मींजो एह परमेशरे हे परमेशर ज़ोंने बाले सारे मैन्हुं सुर्गेरी बादशैही मां दाखल न भौल्हे; पण ज़ै, मेरे असमानी बौवेरी मेर्ज़ी पुड़ च़लने बाले ज़ुरूर दाखल भौल्हे। ²² तैस दिहेड़ी काही लोक मीं सैहीं ज़ौल्हे की एह परमेशरे हे परमेशर कुन असैइं तेरे नोवें सैहीं नुबुत नैइं कियोरी? ते तेरे नोवें सैहीं दुष्टात्मां नैइं केढौरी ते तेरे नोवें सैहीं अजीब अजीब चमत्कार नैइं हैरेवरे? ²³ तैखन आंव तैन जो साफ ज़ौल्हो आंव तुसन कधै न ज़ैनी: एह बैइमानव मेरे तुत्र अग्र दुर भौथ।

घर बनाने बाले दुइय मैंन्हू: अक्लमन्द ते बेवकूफ

( लूका 6: 47- 49 )

²⁴ पण ज़ै मेरी गल्लां शुंनते ते तैन पुड़ अमल केरते तै तैस अकलमंद मैन्हेंरो ज़ैरो भौल्हो; ज़ैनी अपनु घर पैक्की ठैरी बनेवरुए। ²⁵ झ़ड़ी लग्गी ते हड़ाई आई अंधगुबारी भुई ते हड़ाई तैस घरे पुड़ पुज़ी; पण तैन घर न डुल्लू: किजोकी तैसेरी मुनियाद पैक्की शाफड़ी पुड़ कढ्ढौरी थी। ²⁶ पण ज़ै मेरी गल्लां शुंनते ते तैन पुड़ अंमल न केरे, त तै तैस बैउकुफ मैन्हेरो ज़ैरोए भौल्हो: ज़ैनी आपनु घर रेती पुड़ बनैवरु थुं। ²⁷ झ़ड़ी लग्गी हड़ाई आइही अंधगुबारी भुई ते हड़ाई तैस घरे का पुज़ी ते तैन घर डुल्ली जेवं ते बरबाद भोवं।

²⁸ ज़ैखन यीशुए ऐना सैरी गल्लां शुंनेइतां झ़ैड़ी त सारे लोक तैसेरी शिक्षाई सैहीं हेरान रेही जे| ²⁹ किजोकी यीशु तैन तैनकेरे धर्म गुरु केरो ज़ैरो नैइं बलके बड़े आख्तीयारे सैहीं तैन शिक्षा देतो थु।

कोढ़ी बझ़ानो

( मरकुस 1: 40 - 45 लूका 5: 12-16 )

¹ ज़ैखन यीशु पहाड़े पुड़ेरां ऊन्ढौ आव त बड़े लोक तैस सैहीं साथी प्तपती च़ले। ² तैखन एक्के कौढ़ें यीशु का एइतां मथौ टेको ते ज़ोंव: एह प्रभु: अगर तु चहस त मीं साफ केरी सखतस। ³ यीशुए अपनो हथ तैस्सैहीं लाऊ ते ज़ोंव: आंव चहतां की तु साफ भोस, ते तै कौढ़ी तैखने साफ भोई जेव। ⁴ तैखन यीशुए तैसजो ज़ोंव: खबरदार केंची सैहीं न ज़ोंइयां बलके अपनो आप परमेशरेरी सेवा केरने बाले पुरैहुते हेरेयां ज़ै च़ढ़तल मुसै रखोरी थी तैस हवाले केर ताके लोकां केरेलेइ शाहादत भोए।

एकी सूबेदारेरो विशवास

( लूका 7: 1-10 )

⁵ ज़ैखन यीशु कफ्र्नुहूंम शहरे मां पुज़ो त रूंमी फौउजरो आक आफसर यीशु का एइतां मिंनत केरने लगो। ⁶ एह परमेशर मेरो नोकर फाल्जेरो मरीज़ घरे बिमार भोवरोए ते तै बेड़ी तकलिफी मां हैं। ⁷ यीशुए तैस सैहीं ज़ोंव: आंव ऐजेल्हो ते तैस बझ़ैइल्हो। ⁸ पण आफसर ज़ोंने लगो: एह परमेशर आंव एस काबले नैइं की तु मेरे अंत्र एजी सख्स, पण तु अगर सिर्फ ज़बांन सैहीं ज़ोस त मेरो नोकर बेझ़ौइ सखते। ⁹ किजोकी आंव एपु होरीकेरे आधिंने मां कम्म केरताइं ते सिपाही मेरे आधिंने माहांन: ते ज़ैखन आंव एकी जो ज़ोतां की तु गा, त तै गहते ते होरी जो ज़ोतां एई त तै ऐइते ते ज़ैखन अपने नोकरे सैहीं किछ करने जो ज़ोतां त तै केरते।

¹⁰ यीशु ऐन शुनतां बड़ो हैरान भोव ते पुतोरां एज्ने बाले मैन्ह्न सैहीं ज़ोंने लगो आंव तुसन सैहीं सच़ ज़ोतां की मीं ईस्राएले मां भी एत्रे विश्वासे बालो मैन्हुं नैइं लाहोरो। ¹¹ आंव तुसंन सैहीं सच़ ज़ोतां की बड़े लोक मशरकेरां ते मग्रबेरां एइतां आब्रहांम इज़हाक ते याकुबे सैहीं साथी असमानी बादशैहीयरी धामी मां शांमल भौल्हे। ¹² पण असमानी बादशैहीयरे बारस बैइर आंधरे मां छ़ड्डैल्हे ज़ैड़ी तैना लेरां देंते ते दंत च़ापते राहेले। ¹³ ते यीशुएं तैस आफ्सरे जो ज़ोंव: गा ज़ैरो तेरो विश्वासे तेरे लेइ तैरहु भौल्हु, ते तैखने तैसेरो नोकर बैझ़ोई जेव।

बड़े बिमैरे केरे रोगी बझ़ाने

( मरकुस 1: 29- 34 लूका 4: 38-41 )

¹⁴ ज़ैखन यीशु पतरसेरे घरे जेव त पतरसेरी शिख भुखारे सैहीं कैसरोरी खट्टी पुड़ झ़ुलोरी मैल्ही। ¹⁵ यीशुए तैसारो हथ ट्लातो ते तैखने तैसारो भुखार उत्री जेव; ते तै खड़ी उठतां यीशुएरी सेवा केरने लगी। ¹⁶ ज़ैखन ड्लौवझ़ भुई त लोकेइं काही बिमार: ज़ैन मां दुष्टात्मां थी ते तैसका आंन्हें ते यीशुए तैना सारे बिमार बज़्झ़ाए। ¹⁷ ताके इसाया नैबेरी ज़ोवरी तै गल पुरी भोए की तैनी एपु इशी कमज़ोरी हटेई ते इशी बिमैरी भी मुकैइ।

यीशु एरे चेले बननेरो मतलब

( लूका 9: 57-62 )

¹⁸ यीशुएं अपने च़ौवरे पासन हछे लोक लैहितां अपने चेलन डल्लेरे पार गहंनेरो हुक्म दितो। ¹⁹ ते अक बडो मैन्हुं धर्म शास्त्र ज़ांन्ने बालो तैसका एइतां ज़ोंने लगो: एह गुरु तु ज़ैरहां भी गाल्हो त आंव तेरी सेवा कैरेल्हो। ²⁰ यीशुए तैसजो ज़ोंव: लौई केरी कुढ्ढां ते च़ड़ौलु केरे आल्हे भोत्न, पण मैन्हेरे मठ्ठेरे लेइ कोई ठार नैइं ज़ैड़ी तै करोड़ी छ़पैइ बटे। ²¹ चेलन मैरां एक्कें यीशु सैहीं ज़ोंव: औ प्रभु मीं हुकम दे आंव गैहीतां अपने बाजी देबतां ऐजीं| ²² यीशुए तैसजो ज़ोंव: तु मीं सैहीं साथी च़ल ते मुड़दन अपने मुड़दे एपु दब्ने दे।

तूफान रोकनो

( मरकुस 4: 35 - 41; लूका 8:22-25 )

²³ ते ज़ैखन यीशु किशती पुड़ च़ढ़ौ त तैसेरे चेले भी तैस्सैहीं साथी च़ले। ²⁴ ते अचांनक झिली मां अक बड़ो तौफान औव ते किशती छ़ैल्हेंइं सैहीं छ़ैपी जेई ते यीशु तैसमा झ़ूलोरो थु। ²⁵ चेलेंइ एइतां यीशु बिंझ़ाउ ते ज़ोंव: औ प्रभु: असन बच़ा असां त डूबने लोरेंम। ²⁶ यीशुए जुवाब दितो: औ घट विश्वासे बालाउ: तुस कीजो डरतथ तैखन तैनी खड़े उठतां हवाई त तौफांनेरी छ़ैल्ह्न जो धम्कैइतां ज़ोंव: रुकी गाथ तैखने तौफांन रुकी जेव। ²⁷ लोक हैरान भोइतां ज़ोंने लगे: एह कौस किस्मेरो मैन्हुंए की हावा त पानी भी ऐसेरो हुक्म मनतन।

दुष्टात्माई बालो मैंन्हू बझ़ानों

मरकुस 5: 1 - 20; लूका 8:26-39 )

²⁸ ज़ैखन तै झिली पार गदरेंनी केरे अलाके मां पुज़ो त दुई मैन्हुं ज़ैन मां दुष्टात्मा थी, कब्रस्तांने मैरां निस्तां तैनका आए: तैना एतरे निग्र थिये की कोई तैस बत्तां निसी न थु बटतो। ²⁹ तैना ज़ोरे ज़ोरे चिंडां लगे मारने ते ज़ोंने लगे: एह परमेशरेरा मठ्ठा: तीं असन सैहीं कुन कम्मे? तु मोके कैरां पैहिले असन न्रके मां छ़डने एवरोस? ³⁰ तैन्केरां दुर अक बड़ो घांन सुरां केरो च़रने लोरो थु। ³¹ दुष्टात्माऐइं यीशु का मिनत केरतां ज़ोंव: अगर तु असन कढने चहतां त उन सुरां केरे घांने मैझो भेज़। ³² तैखन यीशुएं ज़ोंव: गाथ, ते तैना दुष्टात्मा तैठां निस्तां तैन सुरां केरे घांने मां जेइ ते सुरां केरो सारो घांन उछ़ड़तो उछ़ड़तो ड्ल्हे मां गैहीतां सारे सुर मैरी जे। ³³ तैखन सुर च़ारने बालेइं शहरे मां गैहितां लोकन सैहीं सारो बिस्तार दितो ज़ैन मां दुष्टात्मा थी तैन्केरो हाल भी शुंनाव। ³⁴ तैस शाहरेरे सारे लोक यीशु सैहीं मिल्नेरे लेइ आए ते यीशु लैहितां लोक मिनत केरतां ज़ोंने लगे ईशै अलाके मैरां च़लो गा।

अधरंगी मैंन्हू बझ़ानो

मरकुस 2: 1 - 12 ; लूका 5:17-26 )

¹ फिरी यीशु किशती मां च़ैढ़तां देरयाए पार जो जेव, ते अपने शहरे मां पुज़ो। ² किछ मैन्हेंइ अक अध्रंगी मैन्हुं खटी पुड़ छ़ुइतां आन्हों: ज़ैखन यीशुए तैनकेरो विश्वास हेरो त तैस आध्रेंगी मैन्हुं जो ज़ोंव: मठ्ठा, गा विशवास रख तेरे पाप माफ़ भुए। ³ ऐस गल्ली पुड़ धर्म गुरु अपने दिले मां ज़ोंने लगे की एह त परमेशरेरी तौहिंन केरते। ⁴ यीशुए तैनकेरी दिलेरी गल्लां बुझ़तां तैन जो ज़ोंव: तुसां अपने दिले मां बुरी गल्लां किजो सोचतथ? ⁵ ऐन ज़ोंनु कुन सुख्तुए की गा तेरे पाप माफ़ भुए: या ऐन ज़ोंनु की उठ ते च़ल? ⁶ पण तुसंन पत्तो लग्गे की मैन्हेरे मठ्ठे ज़मिनी पुड़ पाप माफ़ केरनेरो अख्तीयारे; तैखन तैनी तैस आध्रेंघी मैन्हुं जो हुक्म दितो अपनी खट सल्ह ते घर जो च़लो गा। ⁷ तै आध्रेंगी मैन्हुं अपनी खट सैल्ह्तां घरजो च़लो जेव। ⁸ ज़ैखन लोकेइं एह तमाशो हेरो त तैना डेरी जे ते परमेशरेरी तरीफ केरने लगे: की ज़ैनी मैन्हुं एत्रो अख्तीयार दितोरोए।

मत्ती कुजानो

( मरकुस 2: 13- 17 ; लूका 5:27-32 )

⁹ ज़ैखन यीशु तैठ्ठां अग्रोहूं च़लो त तैनी अक मैन्हुं मत्ती नोंवेरो धड़त घिंन्ने बालो एपनी चौव्की पुड़ बिशोरो लाहू; ते यीशुए तैसजो ज़ोंव; की तु मीं सैहीं साथी च़ल; मत्ती तैखने यीशु सैहीं साथी च़लो जेव। ¹⁰ ज़ैखन यीशु मैत्तरे घरे मां गैहितां रौट्टी खाने बीशो त काही धड़त घिंन्ने बाले ते पापी लोक भी आए ते यीशु त तैसेरे चेलन सैहीं साथी रौट्टी खाने बिश्शै। ¹¹ ज़ैखन फ्रिसैइं ऐन हेरू त यीशुएरे चेलन सैहीं ज़ोंव; की तुशो गुरु धड़त घिंन्ने बाले ते पैपी लोकन सैहीं साथी रौट्टी किजो खाते। ¹² यीशुए तैनकेरो सुवाल शुनतां ज़ोंव; सझ़र लोकन दुवैइयरी ज़ुरूरत न भोए; पण बिमारन दुवैइयरी ज़ुरूरत भोचे। ¹³ फिर भी तुस गैहितां एस गल्लरो मत्तलब कढा की; आंव सूखन नैइं बलके रेहेंम दिल पसंद केरतांइ; किजोकी आंव धैर्मन नैइं बलके पैपन कुजाने एवरोइं।

बर्तेरो सुवाल

( मरकुस 2: 18- 22 ; लूका 5:33-39 )

¹⁴ तैखन युहान्नेरे चेले यीशु का एइतां ज़ोंने लगे की कुन वजाहे की आस फ्रिसी त ब्रत रखतम, पण तेरे चेले न रखन? ¹⁵ यीशुए तैन सैहीं ज़ोंव; कुन ज़ैन लाड़ो साथी भोए त शौग बनैइ सखत्न? पण तै मोको भी ऐजैल्हो की लाड़ो तैन्कैरां अलग भौल्हो त तैखन तैना शौग बनैइ सखत्न। ¹⁶ पुराने लिगड़े पुड़ नोवें कपड़ेरी टलोई कोई न लान; किजोकी नोवों कपड़ो तैस पुराने कपड़े मैरां किछ खिंच्ते ते तै जादे छ़िंदोते। ¹⁷ एंच़रे नोवों दाखरस पुरेनी दाखरसी मां न छ़डन किजोकी मस्क फैट्टी गहचे ते दाखरस ज़ैया भोई गहते ते मस्क भी कौंची कम्मेरी न राहे; एल्हेरेलेई नोवों दाखरस नोवीं मसकी मां छ़डतन ताके दुइये सैथ्थी रहंन।

फटरी कूइय ते बीमार कौंन्श

( मरकुस 5: 21- 43; लूका 40-56 )

¹⁸ यीशु ऐन गल्लां हेजु मस्सां ज़ोंने लोरो थु, त प्राथना भवनेरो आक सेवक आव ते यीशु का मथौ टेकतां ज़ोंने लगो; मेरी कुई हुन्ना मैरी जेवरिए; पण तु अगर एइतां तैस पुड़ हथ रखस त तै हुन्ना बेझ़ौचे। ¹⁹ यीशु तैस्सैहीं साथी च़लो जेव, ते चेले भी तैस्सैहीं साथी जे। ²⁰ ते एरहु भोंव की अक कौन्श ज़ैस बहरे सालां केरो देंतो खुन च़लतो थु; तैसां यीशु पतपत्ती एइतां तैसेरे चोगे सैहीं हथ लाव। ²¹ किजोकी तै अपने दिले मां ऐन ज़ोती थी की अगर आंव यीशुएरे लिगड़े सैहीं हथ लाएल्ही त आंव ठीक भोइ गहंनी। ²² यीशुए पेरतोइतां तैस कौन्शरे पासे तक्कु ते ज़ोंव; कुईये विशवास रख; तेरे विश्वासे सैहीं तु ठीक भोउरिस; ते तै तैखने ठीक भोई जेई। ²³ ज़ैखन यीशु तैस सेवकेरे घरे पुज़े त नगारो बज़ांते ते लोक लेरां देंते लाहे। ²⁴ यीशुए ज़ोंव; दुर भौथ किजोकी कुई मुऔरी नैइं, पण झ़ूल्लोरीए; ते तैना लोक हसने लगे। ²⁵ ज़ैखन लोक तैठ्ठां दुर कढे त यीशुए अंत्र गैहितां कुईयरो हथ ट्लाव त तै खड़ी उठ्ठी। ²⁶ ते एस गल्लरी खबर सारे अलाके मां फैली जेई।

दूइय अंधे मैंन्हू बझ़ाने

²⁷ ज़ैखन यीशु तैठ्ठां आग्रोहूं च़लो त दुई कांने तैस पत्ती चिंडां मारते ज़ोंने लगे; ऐह दाउदेरा मठ्ठा असन पुड़ तरस केर। ²⁸ ज़ैखन यीशु घरे अंत्र जेव त तैना कांने तैसका आए ते तैनी तैन पुछ़ू; कुन तुसन यकींने की आंव तुसन ठीक केरी सख्ताइं? तैनेइं जुवाब दितो हां परमेशर"। ²⁹ तैखन यीशुए तैनकेरी एछ़न सैहीं हथ लाव ते ज़ोंव; तुशै विश्वास केरने सैहीं तुस ठीक भौथ। ³⁰ ते तैनकेरी ऐछ़ी खुल्ही जेई; ते यीशुए तैन रोड़े च़ारे समझ़ैइतां ज़ोंव; खबरदार एस गल्लरो पत्तो केंची न लोड़े। ³¹ पण ज़ैखन तैना बेइर निसे त तैनेइं सारे अलाके मां ऐस चमतकारेरे बारे मां ज़ोंव।

अक लट्टो बझ़ानो

³² ज़ैखन यीशु बेइर च़लोरो थियो त लोकेइं अक लट्टो तैसका आन्हों ज़ैसमां दुष्टात्मा थी। ³³ ते ज़ैखन दुष्टात्मा तेस्मेरां कढ़ी ता लट्टौ गल्लाँ केरने लगो, लोक बड़े हेरान भोई जे ते ज़ोंने लगे; एरहो ज़ेरहो माजरो इसराइले मां पेहिले कधे नेहीं लाहोरो। ³⁴ पण फ्रिसी ज़ोंने लगे: की एह त दुष्टात्मा केरे गुरेरी करतूती सैहीं दुष्टात्मा कढ़ते।

मज़दूर थोड़ेन

³⁵ यीशु सारे अलाके मां ते ड्लोंवन मां ते मन्दिरन मां गैहितां परमेशरेरी बादशैहीयरी खुशखबरी शुनतो थु, ते लोकन तैनकेरी बिमैरन कैरां छुटातो थु । ³⁶ ज़ैखन यीशुए बड़े एरहे ज़ैरे लोक लाहे त तैस तैन पुड़ बड़ी तरस आई; किजोकी तैना तैन भैड्डां केरे ज़ैरे थिये ज़ैनकेरो कोई पुहाल न भोए; तैनकेरो बड़ो बुरो हाल ते छ़िछ़लोरे थिये| ³⁷ तैखन यीशुए अपने चेलन सैहीं ज़ोंव; फसल त बड़ीए, पण मुजुर थौड़ेन। ³⁸ एल्हेरेलेई तुस फस्लरे मालके का मिनत केरा की तै अपनी फसल कटनेरे लेइ होरे मुजुर भेज़े।

यीशु एरे बहरे चेले

( मरकुस 3: 13-19; लूका 6: 12- 16 )

¹ फिरी यीशुएं अपने बहरे चेले एपु का कुजाए ते तैन दुष्टात्मा कढनेरो ते हर बिमैरी ते तकलिफां दुर केरनेरो आधिकार दितो।

² ते बहरे चेलां कैरां नोवां इन थियां शुमौन ज़ैसजो पतरस ज़ोते थिये, ते तैसेरो ढ्ला अन्द्रियास ज़ेबदेरु मठ्ठु याकुब तैसेरो ढ्ला युहन्ना। ³ फिलपुस तोमां मत्ती धड़त घिंन्ने बालो। ⁴ हैल्फेरू मठ्ठु याकुब ते तद्दी ते शुमौन ते कणानी ते युहूदा आस्क्र्युती ज़ैनी यीशु ट्लुवेउरो थु।

बहरे चेलां केरू सेवारू कम्म

( मरकुस 6: 7-13 ; लूका 9: 1-6; 10: 4-12 )

⁵ ऐन बहरे चेले ऐन ज़ोइतां भेज़े की गैर युहूदी कौमा केरे पासे न गैहियथ ते कने सैंमरी केरे केंची शहरे मां न गैहीयथ। ⁶ बल्के ईस्राएलेरे घरांनेरी हैरोरी भैड्डन का गैहियथ। ⁷ ते च़लते च़लते ऐन ज़ोंते गैहियथ की अस्मानेरी बादशाही नेड़े एवरीए। ⁸ बिमारन शिफा देइयथ ते मुड़दन ज़िंते केरथ ते कौढ़ी केरू कौढ़ साफ केरथ; ते दुष्टात्मा कैढथ; तुसन ऐन सभ किछ मुफ्त मैल्हेरुए ते मुफ्त देइयथ। ⁹ अपने लख्खे मां साथी सौन्नु चांदी ते पैइंसे न रेखथ। ¹⁰ ते न बत्तरे लेइ झोलो नैहियथ ते न दुई दुई लिगड़ां ते न बूट ते न सोटी; किजोकी मुजुर एपनी मुजुरारो हकदार भोते।

¹¹ ज़ैखन तुस केंची शहरे मां या ड्लोंउवें मां गाथ त तुस एरहे मैन्हेंरो पत्तो केरथ ज़ैस पुड़ तुसन अतबार भोए: तैठ्ठां ज़ां तग्र गहंनेरो मोको न एजे त तां तग्र तैड़ी तैस्से का रेहियथ। ¹² केंची घरे मां अंत्र गहंते बार तैन जो आश्रिवाद दैइयथ। ¹³ अगर तैन घर तुशै काबल भौलु त तुशु आश्रिवाद तैन पुज़ैल्हू: ते अगर तैन घर तुशै काबले न भौलु त तुशु आश्रिवाद तुसन का वापस एज्जैल्हु। ¹⁴ अगर कोई तुसंन न सुखाल्हो ते तुशी गल्ल न मन्नैल्हो त तैस घरे या शहरे मैरां बेरोहुं गहंते बार अपने पावां केरी धुड़ तैड़ी झ़ैड़थ। ¹⁵ आंव तुसंन सैहीं सच़ ज़ोतां की आदाल्तरे दिहाड़े तैस शहरेरो हाल सादुंम अंमुरा अलाकेरे हाले कैरां जादे बुरो भौल्हो।

एजने बाली मसीबत

( मरकुस 13: 9-13; लूका 21-12-17 )

¹⁶ हेरा आंव तुसंन भैडडन ड्लाघंन मां भेज़ने लोरोंइ; एल्हेरेलेई तुस सप्पां केरे ज़ैरे हुशियार ते कुबूत्रां केरे ज़ैरे सादे बेनथ। ¹⁷ मैन्ह्न कैरां हुशियार रेहियथ तैना तुसंन ट्लेइतां आदालतन मां पैश कैरेल्हे ते मन्दिरन मां तुसंन कौड़ां केरी मार दैल्हे। ¹⁸ ते तुसन मेरी वजाही सैहीं हाकमन का ते बादशहां केरे सामने हाज़र कैरल्हे; ताके तैन मां ते गैर कौमन मां मेरे गुवाह बन्थ। ¹⁹ पण ज़ैखन तैना ट्लुवेइतां हावाले कैरेल्हे त तुस फ़िक्र न केरथ; की आस कुन ज़ोंमैल्हे ते कैंच़रे ज़ोंमैल्हे किजोकी ज़ैन किछ ज़ोंनु भौलु तैखने आंव तुसन ज़ोइल्हो। ²⁰ किजोकी ज़ोंने बाले तुस नैइं, बल्की तुशो बाजीएरी आत्मा तुस्न मां ज़ौल्ही|

²¹ ढ्ला, ढ्लाए ते बाजी मठ्ठै, मारनेरे लेई सोंफेल्हे, ते मठ्ठां अपने अम्मा बाजी केरे खलाफ भोइतां तैन माराल्हे| ²² मेरे नोवेरे वजाही सैहीं सब लोक तुस्न सैहीं बैर कैरल्हे, पण ज़ै आखरी तग्र बरदाशत कैरेल्हो तैस्से मुखती मैल्हेली| ²³ ज़ैखन लोक तुसन केंची शहरे मां सताल्हे, त केंची होरि शहरे मैझो नैशी गैहियथ: आंव तुसन सैहीं सच़ ज़ोतां की ऐस कैरां पैहिले तुस इस्राएलेरे सैरी शहरन मां गैहियथ, त मैन्हेरु मठ्ठु ऐज्जी गाहेलो।

²⁴ चेलो अपने गुरू कैरां बडो नैइं; न नोकर अपने मालके कैरां| ²⁵ चेलेरे लेइ त ऐन्ने बड़ुए की तै अपने गुरेरो ज़ैरो भोए, ते नोकरेरे लेइ त ऐन्ने बड़ुए की तै अपने मालकेरे बराबर भोऐ; अगर तैनेइं मालके जो बुरु ज़ोंव; त तैसेरे घरे बालेइं त जादे बुरु ज़ोंनुएं|

कैस कैरां डर्रू लोडे ?

( लूका 12: 2-7 )

²⁶ तुस तैन कैरां न डेरथ, किजोकी कोई चिज़ ओड़कोरी नैइं, ज़ै खोल्ही न गाहेली; ते कोई चीज़ छ़प्पौरी नैइं ज़ै बांदी न भौल्ही| ²⁷ ज़ैन किछ आंव तुस्न सैहीं अंधरे मां ज़ोताइं, तुस तैन दिसां ज़ोइयथ; ते ज़ैन किछ तुशे कन्ने पत्र बल्हे सैहीं शुनावं गहते: तुस लाऐ पुड़ गैहितां तैसेरो प्रचार केरथ| ²⁸ तुस तैन कैरां न डेरथ ज़ैना जानी त मारतन, पण आत्मा न मैरी बटन, तैस कैरां डरा, ज़ै आत्माइं ते जानी दुईने नाश केरी बटते | ²⁹ कुन दुई पैइसां केरी च़ड़ोली न बिकन? फिरी भी तुशो बाजेरी मेरज़रे बगैर तैन मैरां अक भी धेरती पुड़ न झ़ेड़ी बटन | ³⁰ तुशे दौगेरे बाल भी गन्नोरेन| ³¹ एलहेरेलेई डरा न; तुशी कदर बेड़ी च़ड़ोलन कैरां भी बड़ी जादे|

यीशु कबूल केनो या न कबूल केरनो

( लूका 12: 8-9 )

³² ज़ै कोई मैन्हुं केरे सामने मेरो ईक्रार केरते, त आंव भी अपने असमानी बाजी केरे सामने तैसेरो ईक्रार कैरेल्हो| ³³ पण ज़ै कोई मैन्हुं केरे सामने मेरो इनकार केरते; त आंव भी तैसेरो अपने असमानी बाजी केरे सामने इनकार कैरेल्हो|

यीशु एरे एजनेरे निशान

( लूका 12 : 51 -53 ; 14 : 26 , 27 )

³⁴ इन न सैमझ़थ कि आंव धेरती पुड़ मेल कराने एवरोइं; मेल केरने नैइं बल्के तलवार च़लाने एवरोइं| ³⁵ किजोकी आंव एल्हेरेलेई एवरोइं की मठ्ठै बौव्वे कैरां ते कुईये अम्मा कैरां ते नूशी शिखी कैरां अलग केरीं| ³⁶ मैन्हेंरे दुश्मन त तैसेरे अपने घरेरे लोक भोनैन|

³⁷ ज़ै कोई अम्मा या बाजी मीं कैरां जादे ट्लारे समझ़ते, तै मेरे काबले नैइं ते ज़ै कोई मठ्ठै या कुईये मीं कैरां जादे समझ़ते, तै मेरे काबल नैइं| ³⁸ ते ज़ै अपनी सलिब छ़ुइतां मीं पत्ती न च़ले तै मेरे काबल नैइं| ³⁹ ज़ै अपनी जान बच़ानी चहते, तै तैस गुवांल्हो; ते ज़ै मेरे वजाही सैहीं अपनी जान गुवांते, तै तैस हासल कैरेल्हो|

फल मैल्हनो

( मरकुस 9: 41)

⁴⁰ ज़ै तुस्न कुबूल केरते, तै मीं कुबूल केरते; ते ज़ै मीं कुबूल केरते, तै मेरे भेज़ने बाले कुबूल केरते| ⁴¹ ज़ै नेबी नबी सैमझ़तां कुबूल केरेल्हो, तैस नेबेरो फल मैल्हेलो, ते ज़ै धर्मीं सैमझ़तां कुबूल केरते, तैस धैर्मेरो फल मैल्ह्ते| ⁴² ज़ै कोई इन निकड़न मैरां एकी मेरो चेलो बुझ़तां सिर्फ अक कोटोरो ठंढू पानी पियाल्हो, आंव तुस्न सैहीं सच़ ज़ोतां तै अपनो फल कधी न गुवांल्हो|

यीशु ते यूहन्ना बपतिस्मो देने बालो

( लूका 7 : 18 -35 )

¹ ज़ैखन यीशुए अपने बहरे चेलन सभ किछ समझ़ांव त तै तैठ्ठां च़लो जेव ताके तैनकेरे होरी शहरन मां भी गैहितां प्रभु परमेशरेरो वचन शुनाए।

² युहन्ना नेबें जैल्ही मां मसहीएरे कम्मा केरे बहरे मां शुंनु त तैनी अपने चेले भेज़े। ³ मसही पुछ़ने भेज़े की एजने बालो मैन्हुं तुऐ थु: की आसां केंची होरी बलगम। ⁴ यीशुए तैन जुवाब दितो; की ज़ैन किछ तुस लह्तथ तैन शुंनाथ गैहितां युहन्ने सैहीं ज़ोइ छ़डा। ⁵ की कांने लह्तन ते टोंने च़लतन ते कौढ़ी केरू कौढ़ साफ भोते ते टोंऊने शुंनतन ते मुड़दे ज़िंते भोतन ते गरीबन परमेशरेरी खुशखबरी शुंनतन। ⁶ मुबारके तै मैन्हुं ज़ैस मेरे ज़ोंने सैहीं ठोकर न लग्गे।

⁷ ज़ैखन युहन्नेरे चेले तैठ्ठां च़ले जे त यीशु लोकन सैहीं युहन्नेरे बारे मां ज़ोंने लगो; की तुस बियाबांने मां कुन हेरने जेवरे थिये? कुन हवाई सैहीं हिलते सरकण्डेरे डाल। ⁸ अगर ऐन नैइं त फिरी होरू कुन हेरने जेवरे थिये? रोड़ां लिग़ड़ां डेबतां कोई? ज़ै मह्घां लिग़ड़ां डेबतां केंची बडे मैलहे मां रहते। ⁹ अखर तुस कुन हेरने जेवरे थिये? केंची नेबी? हां पण आंव तुसन सैहीं ज़ोतां की नेबी कैरां भी बड्डे हेरने जेवरे थिये। ¹⁰ युहन्ना तै मैन्हुंए ज़ैसेरे बारे मां परमेशरेरे वचने मां लिखेरुए की हेर आंव अपनो पैगांम्बर तीं अगरी अगरी भेज़ताइं; ज़ै तीं अगरी अगरी तेरी बत्त तियार कैरेल्हो। ¹¹ आंव तुसंन सैहीं सच़ ज़ोतां की ज़ै कौन्शी कैरां ज़रमोरोए तैनमां युहन्ना बपतिसमों देंने बाले कैरां बड्डो कोई नैइं; पण ज़ै अस्मानेरी बादशैही मां सैभंन कैरां निक्ड़ोए तै युहन्ना कैरां भी बड्डोए। ¹² युहन्ना बपतिसमों देंने बालेरे दिहेड़न मां तैईस तग्र परमेशरेरी बादशैहीयरी बड़ी सखत खिलाफत भोंती राही, ते बड़े बड़े नीग्र तैस दबांते राहे। ¹³ किजोकी सारे नबी ते व्यवस्था भी युहन्ने तग्र हेराती थी। ¹⁴ अगर तुस मन्नेरे लेइ तियार भौथ त तै ऐलिय्याह ज़ै एजने बालो थु तै ऐहे थु। ¹⁵ ज़ैसका शुंनेरे लेइ कंन भोंन त तै शुंने।

¹⁶ आंव इस ज़मानेरे लोकन कैंच़रे सैहीं बियांन केरीं? तैना तैन मठ्ठां केरे ज़ैरेन ज़ैना बज़ारन मां बिशतां एपनी ज़बांन सैहीं ज़ोंते रहतन की। ¹⁷ असैइं तुशे लेइ बेंशोई बज़ाई ते तुस न नच़्च़ै; ते असैइं शौग बनव ते तुसैहीं छाती न कुट्टी। ¹⁸ किजोकी युहन्ना न खांतो आव ते न पिंतो आव ते लोक तैसजो ज़ोते थिये की तैस्मां दुष्टात्माएं। ¹⁹ ते मैन्हेरु मठ्ठु खांतो पिंतो आव ते लोक ज़ोते थिये की खांने बालो शराबी कबाबीए बल्के धड़त घिंन्ने बाले ते पैपी कैरो दौस्ते; पण अक्ल्मेंदरे कम्मेइं सैहीं धर्मी ज़ोतन।

अविश्वासे पुड़ आफसोस

( लूका : 10 -13 -15 )

²⁰ तैखन यीशु फिरी तैन शहरन मां गैहितां ज़ोंने लगो; ज़ैन मां तैनी बड़ां आजीब कम्मा कियोरां थियां पण तैनेइं तोबा न थी कियोरी। ²¹ एहे खुराज़ींन तीं पुड़ अफ्सोस, एह बैतसैदा तीं पुड़ अफ्सोस, ऐन अजीब कम्मा मीं तुसन इड़ी हेरां अगर मीं ऐन कम्मा सुर ते सैइदा मां हरेवरां भौथां; त तैना लोक कैइसेरे देंते टाट पलैटतां ते दौगेपुड़ मांज़न छ़ैडतां कैइसेरी तोबा कियोरी भौथी। ²² पण आंव तुसन सैहीं ज़ोतइं की फैसलेरे दिहाड़े सुर ते सैइदेरो हाल तुशे हाले कैरां रोड़ो भोंनोएं। ²³ ते एह कफरनहूम; कुन तु अम्ब्रे तग्र न च़ह्ढ़ौ? ते न्ना त न्रके मां गा; किजोकी ज़ैन कम्मा मीं तुसन इड़ी हेरां अगर मीं ऐन कम्मा सादुंमे मां हरेवरां भौथां त आज़ तग्र सादुंम शहेर बंच़ोरो रहंनो थु। ²⁴ पण आंव तुसन ज़ोतां की फैसलेरे दिहाड़े सादुंमेरो हाल तुशे हाले कैरां रोड़ो भोंनोएं।

बोझे मां दबोरे लोकां केरे लेई आराम

( लूका 10 : 21- 22)

²⁵ तैखन यीशुएं ज़ोंव; एह ज़मीन अस्मानेरे परमेशरा आंव तेरू शुक्र केरतां की तीं ऐन गल्लां बड़े बड़े अक्लमंदन कैरां छ़पेइतां रेखी ते निक्के मठ्ठन का बेंदी की। ²⁶ हां बाजी तेरी मर्ज़ी एहे थी।

²⁷ मेरे बाजेरां तरफां सभ किछ मेरे सुपुर्द कियेरुए; कोई होरो मैन्हुं मठ्ठै न ज़ांने सुवाए बाजेरां ते न कोई बाजी ज़ांने सुवाए मठ्ठैरां या तैस मैन्हुं ज़ैस पुड़ मठ्ठु ज़ैहीर केरने चाहे।

²⁸ एह मेहेंनत केरने बाले ते भारे सैहीं थकोरे लोकव मिंका एज्जा; आंव तुसंन आराम दैईल्हो| ²⁹ ते मेरु वचन शुंना ते मीं कैरां शिखा किजोकी आंव बड़ो न्रम आंहीं ते मेरो दिल साफे ते तुशी आत्माइं आराम मैल्ह्नोएं। ³⁰ एल्हेरेलेई की मेरु फरमान सुखतुए ते मेरो भारो पौल्लो ऐ।|

सब्तेरो प्रभु

( मरकुस 2 : 23 -28 )

¹ तैईस यीशु त तैसेरे चेले सब्त्तेरे दिहाड़े ऊडारन मम्हेंइ एक्की बत्तां च़लोरे थिये, ते तैसेरे चेले नियन्ने थिये; ते तैन ढ्लुख लग्गोरी थी; ते तैना गैहूं कैरां शिल्लां ट्लोड़तां खाने लगे। ² ज़ैखन फ्रिसैइं ऐन लाहूं: त तैना ज़ोंने लगे; तक तेरे चेले तैन कम लोरेन केरने ज़ैन सबत्तेरे दिहाड़े न भोए केरनु। ³ यीशुए जुवाब दितो; कुन तुसैइं कधै नैइं पढ़ैरु की ज़ैइस दाऊद त तैसेरे साथी ढ्लुखोरे थिये त तैनेइं कुन कियेरू थुं। ⁴ दाऊद परमेशरेरे घरे मां जेव; ते ज़ैना च़ैढ़ोरी रौट्टी थी तैठ्ठां एन्तां एपू भी खेई, ते अपने सैथन भी दिती, ते तैनेइं भी खेई हालांकी तैना रौट्टी खैनी तैनकेरे लेइ रस्मरे मुतबक ठिक न थी; किजोकी तैना रौट्टी सिरफ मन्दिरे मां सेवा केरने बाले पुरैहुत खैई सखते थिये। ⁵ या तुसैइं शासत्रे मां ऐन भी नैइं पढ़ैरू; की पुरैहूत सबत्तेरी बेज़ती केरतां भी बेकुसुर भोतन। ⁶ पण आंव तुसंन सैहीं ज़ोताइं की इड़ी तै खड़ोए, ज़ै मन्दिरे कैरां भी बडोए। ⁷ अगर तुस ऐलहेरो मतलब ज़ांनेथे की आंव रेहेंम केरनो सुखनी कैरां जादे पसंद केरतां; त तुस बेकुसुरन सलीबी पुड़ न च़हढ़ैथे। ⁸ किजोकी मैन्हेरु मठ्ठु सबत्तेरी दिहैड़ारो भी मालके।

सुकोरे हथे बालो मैंन्हू बझ़ानो

( मरकुस 3 : 1 -6 ; लूका 6 : 6 - 11 )

⁹ यीशु तैठां निस्तां तैनकेरे प्राथन भवने मां जेव। ¹⁰ तैड़ी अक मैन्हुं थु; ज़ैरो हथ शुकोरो थु, तैनेइं यीशु गलती लांनेरे बहांने सैहीं तैस पुछ़ू कुन सबत्तेरे दिहाड़े शिफा देनी जैइज़े। ¹¹ यीशुए तैनजो ज़ोंव: अगर तुसंन मैरां कैस्केरी भैड सबत्तेरे दिहाड़े गत्ते मैझो बिछ़ड़चे, त तुस कुन तैस तैठां बेइर न कढैल्हे। ¹² मैन्हेंरी कदर त भैडी कैरां बड़ी जादे; ऐलहेरे लेई सबत्तेरे दिहाड़े रोड़ु कम्म केरनु बड़ु ज़ुरूरीए। ¹³ तैखन यीशुए तैस मैन्हुं जो ज़ोंव; अपनो हथ अग्रौवं सीधो रख: तैनी हथ अग्रौवं सीधो रखो, त तैसेरो तै हथ होरी हथेरो ज़ैरहो भोई जेव। ¹⁴ पण फ्रिसी बेइर गैहितां यीशु मारनेरी साजस केरने लगे।

परमेशरेरे च़ूनोरे सेवक

¹⁵ यीशु पत्तो लग्गो, ते तै तैठां निसी जेव; ते बड़े लोक तैस पत्ती च़ले, ते तैनी तैना सब बज़झ़ाऐ। ¹⁶ ते यीशुए तैन छंदे केरतां ज़ोंव: की मेरे बारे मां केंची सैहीं न ज़ोइयथ । ¹⁷ ताके ईसाया नेबेरी ज़ोवरी तै गल पुरी भोए" की ।

¹⁸ एह मेरो चेलोए ज़ै मीं च़ुंनोरोए; ऐह मेरो ट्लारोए ज़ैस पुड़ मेरो दिल खुशे; आंव अपनी आत्मा तैस मां छ़ैडेल्हो; ते तै गैर कौमन मां गैहितां इन्साफेरू एलान कैरेल्हो। ¹⁹ ऐह न लड़ाई कैरेलो; ते न शौर: ते बत्तां च़लते भी कोई तैसेरी शोर न शुंनेल्हो।

²⁰ ते ऐह ढ्लैंच़ोरे सरकण्ढे येंनी न्राठी न ट्लोड़ैल्हो; ते न बलतो दियो हिशाह्लो ज़ां तग्र सच़्च़ैरी ज़ीत न भोए। ²¹ ते तैसेरू नोवं गैर युहूदी कौमां केरेलेइ अक बड़ी ऊमीद भौली।

यीशु ते बालज़बूल

( मरकुस 3 : 20 - 30 ; लूका 11 : 14 -23 )

²² तैखन लोकेइं अक मैन्हुं यीशु का आन्हों ज़ै लट्टो थु; ते कानो भी थु; यीशुए तै ठीक कियो; ते तै लहंने भी लगो ते गल्लां भी केरने लगो। ²³ ते लोक हेरांन भोइतां ज़ोंने लगे: की पत्तो नैइं की एन्ने दावदेरु मठ्ठु भोए? ²⁴ पण फ्रिसेइं एह गल शुंनतां ज़ोंव; एह दुष्टात्मा केरे प्रधानेरी मदती सैहीं दुष्टात्मा कढते। ²⁵ यीशु तैनकेरी दिलेरी गल ज़ांनतो थु; एल्हेरे लेइ तैनी तैन जो ज़ोंव; अगर केंची हुकुंमती मां फुट पेचे, त तै हुकूंमत बेरांन भोचे ते तै न राहे। ²⁶ अगर शैतांन शैताने कढने लगे, त तै अपनो मुखालफ एपु भुवो त फिरी तैसेरी हुकूंमत कैन्च़रे रेही सख्चे। ²⁷ अगर आंव दुष्टात्मा केरी मद्दती सैहीं दुष्टात्मा कढतां त तुशे अपने मैन्हुं किसेरी मदती सैहीं कढतन? तैन्ना तुशो फैसलो केरने बाले जैज भौल्हे। ²⁸ पण अगर आंव परमेशरेरी आत्मारे मदती सैहीं दुष्टात्मा कढतां त परमेशरेरी बादशाही तुशे नेड़े पुज़ोरीए। ²⁹ कोई केंची निग्र मैन्हेंरे घरे मां कोइ गैही सखते; ते तैसेरो माल सबाब लुट्टी सखते; पैहीले ज़ां तग्र तैस निग्र मैन्हुं बंधे न्ना? बन्धनेरे बाद तै तैस घरे लुट्टी सखते। ³⁰ ज़ै मीं सैहीं साथी नैइं तै मेरे खलाफे, ते ज़ै मीं सैहीं साथी अकोठु न केरे तै इरहां उरहां बिट्लते। ³¹ ऐलहेरेलेई आंव तुसंन सैहीं ज़ोतांइ की; मैन्हुं केरे सारे पाप ते बुरू बकेरू माफ़ भौलु पण परमेशरेरी आत्मारे खलाफ बकेरू माफ़ न भौलु। ³² अगर कोई मैन्हेंरे मठ्ठैरे खलाफ किछ ज़ोते, त तैस भी माफ़ भोल्हु, पण ज़ै परमेशरेरी आत्मारे खलाफ बकते; त तैस मैन्हुं न इस दुनियाई मां माफ़ भौलु ते न एजने बैली दुनियाई मां माफ़ भौलु।

बुट ते तैसेरो फल

( लूका 6 : 43 - 45 )

³³ या तुस बुट्टे जो रोड़ु ज़ोथ ते तैसेरे फले जो भी रोड़ु ज़ोथ; ते नता तुस तैस बुट्टे जो बुरू ज़ोथ; ते तैसेरे फले जो भी बुरू ज़ोथ किजोकी बूट अपने फले सैहीं पशैंनोते। ³⁴ औ सप्पैरे बच्चाव तुस बुरे भोइतां रोड़ी गल केंच़रे ज़ोई सखतथ? किजोकी ज़ैन दिले मां भोते तैन्ने ज़बांनी पुड़ एइते। ³⁵ रोड़ो मैन्हुं रोड़े खज़ांने मैरां रोड़ी चीज़ां कढ़ते; ते बुरो मैन्हुं बुरे खज़ांने मैरां बुरी चीज़ां बेइर कढ़ते। ³⁶ ऐलहेरे लेई आंव तुसंन सैहीं ज़ोतां: की फैस्लेरी दिहेड़ी लोकन एपनी हर एकी बुरी गल्लरो हिसाब देंनो भौल्हो । ³⁷ किजोकी तुस एपनी कमैई, ते एपनी गल्लेइं सैहीं घर्मी या पापी भोंनेथ।

आसमानी निशानेरी माँग

( मरकुस 8 : 11 -12 ; लूका 11 : 29 - 32 )

³⁸ ते तैखन किछ फ्रिसी, ते किछ तैन्केरे गुरु ज़ोंने लगे; हे गुरु असां तीं कैरां कोई निशान हेरनो चहतम। ³⁹ पण यीशुए तैन जुवाब दितो; इस ज़मानेरे बुरे, ते हेरमीं लोक निशान हेरनो चहतन; पण तैन युहन्ना नेबेरां अलावा होरो कोई निशान न हेरहव गाहेलो। ⁴⁰ किजोकी ज़ैच़ंरे युहन्ना नबी ट्लाई दिहाड़े ते ट्लाई रातन मैछ़लरे पेटे मां राहु; तैन्च़रे मैन्हेंरू मठ्ठू भी ट्लाइही दिहाड़े, ते ट्लाई रातन ज़मीनी मां रहलो। ⁴¹ नैणवाएरे लोक आदालतरे दिहाड़े इस ज़मांनेरे लोकन साथी खड़े भोइतां मुर्ज़म बनाल्हे; ऐलहेरे लेई की तैनेंइं युहन्ना नेबेरे ज़ोंने सैहीं तोबा त कियोरी थी; ते हेरा इड़ी तैहे, ज़ै युहन्ना कैरां भी बडोए। ⁴² दखनेरी रहनी मालिका आदालतरे दिहाड़े इस ज़मांनेरे लोकन सैहीं साथी खड़ी भोइतां मुर्ज़म बनाल्ही; किजो की तै बड़े दुरेरां सुलैमानेरू ज्ञान शुनेरे लेइ ऐवरी थी; पण ते हेरा इहीड़ी तैहे, ज़ै सुलेमाने कैरां भी बडोए।

आधूरे सुधारे सैहीं विपत्ति

( लूका 11 : 24 - 26 )

⁴³ ज़ैखन केन्ची मैन्हुं मैरां दुष्टात्मा निसी गहचे, त तै अपने आरामेरे लेइ बेरान ठारां हंठचे; पण ज़ैखन तैस ठार न मैल्हे। ⁴⁴ त तै ज़ोचे की आंव वापस अपने तैस्से घरे मां गहचां; ज़ैस मैरां निसोरी थी; ते ज़ैखन तै वापस एइचे, ते तैस तैन घरे खाली ते साफ सुथरु मैल्ते। ⁴⁵ फिरी तै गहचे, ते एपू सैहीं साथी होरी सत दुष्टात्मा आंह्न्चे, ते तैन सब तैस्मां रेहीचन; ते तैस मैन्हेंरो हाल पैहिले हाले कैरां भी जादे बुरो भोते; तैन्च़रे इस ज़मानेरे बुरे लोकां केरो हाल भी एरो भोंनोएं।

यीशु एरी अम्मा ते ड्लाह

( मरकुस 3 : 31 - 35 ; लूका 8: 19 - 21 )

⁴⁶ हेजु मस्सां यीशु मैन्ह्न सैहीं गल्लां केरने लोरो थु; त बेइर तैसेरी अम्मा ते ढ्ला आए; तैना तैस सैहीं गल केरनी चहते थिये। ⁴⁷ केंचे गैहीतां यीशु सैहीं ज़ोंव; बेइर तेरी अम्मा ते ढ्ला खेढ़ौरेन; तैना तीं सैहीं गल केरनी चहतन। ⁴⁸ यीशुए पत्तो देने बाले जो ज़ोंव; कौने मेरी अम्मा, ते कौने मेरे ढ्लाऐ? ⁴⁹ तैखन यीशुए अपने चेलां केरे पासे इशारो केरतां ज़ोंव; हेरा मेरी अम्मा, ते मेरे ढ्ला ईन्न। ⁵⁰ किजोकी ज़ै कोई मेरे असमानी बोव्वेरी मेर्ज़ी पुड़ च़लते तैहे मेरो ढ्ला ते मेरी बैहिंन्न, ते मेरी अम्माएं।

बीज़ बेंने बालेरू दृष्टान्त

( मरकुस 4 : 1 - 9 ; लूका 8 : 4 -8 )

¹ तैस दिहाड़े यीशु घरेरां बेरोहुं निस्सो, ते डल्हेरे बन्ने गैहितां बीशो। ² तैसेरे च़ौवरे पासन लोकां केरी एत्री भीड़ थी, की फिरी यीशु एकी किशती मां गैहीतां बीशो, ते सारे लोक बन्ने पुड़ खड़े राहे। ³ तैखन तै तैन सैहीं कैहेंनी केरे तरीके सैहीं गल्लां केरने लगो की हेरा: की अक मैन्हुं बीज़ बेने बालो बीज़ बेने घरेरां निसो। ⁴ बीज़ बेंते बार किछ बीज़ बत्तरे बन्ने बीछ़ड़ु; ते तैन च़ुड़ौलेइं एइतां च़ुनु। ⁵ ते किछ बीज़ घोड़ांगले मां बीछ़ड़ु ते तैड़ी मित्ती न थी तां तैन लुशी लग्गु। ⁶ पण ज़ैखन धूप्प निस्सी त तैन फुकोई जेवं; ते ज़ील डुगधु न भोनेरी वजाही सैहीं शुक्की जेवं। ⁷ ते किछ बिज़ झ़ल्लन मां बीछ़ड़ु; ते तैन झ़लेइं बहंम्हैंइ फैलतां तैन दबेई छ़डु। ⁸ पण ज़ैन रोड़ी ज़मीनी मां बीछ़ड़ु, त तैस फल भी लग्गो केन्ची शौव गुन्हा केन्ची शठ गुन्हा, ते केन्ची ट्लही गुन्हा। ⁹ ज़ैसेरे कन शुन्ने बाले भोन त तै शुने।

दृष्टान्तां केरो मकसद

( मरकुस 4 : 10 - 12 ; लूका 8 : 9- 10 )

¹⁰ तैखन चेलेंइ यीशु का एइतां पुछ़ू: तु लोकन सैहीं कैहेंनी केरे तरीके सैहीं गल्लां किजो केरतां? ¹¹ यीशुए जुवाब दितो: तुसंन त अस्मानेरी बादशैहीयरो भेत समझ़नेरे लेइ अकल दितोरीए: पण तैन नैइं। ¹² किजोकी ज़ैसका आहे तैस होरु भी मैलहेलु; ते तैस का सुधी भोनूएं: ते ज़ैसका सैंइयां नैइं तैस कैरां तैन भी घिंनी गाहेले ज़ैन भौलु भी त। ¹³ आंव तैन सैहीं ऐलहेरेलेई कैहेंन्न मां गल्लां केरतां की: तैन तकने त तकत्तन पण पशैंनी न बटन; ते शुन्ने त शुनतन पण समझ़न न्ना। ¹⁴ ईसाया नेबें" भी ज़ैन ज़ोवरू थुं, एस्से बारे मां तैनी भी ज़ोवरू थुं; की तुस शुन्ते त रहले पण समझ़ैले न्ना: तकते त रहले पण पशांनैल्हे न्ना। ¹⁵ किजोकी ऐस कौमरे दिले पुड़ चरभी भेरोरीए: ते ऐना उकड़ु शुंनतन; ते ऐनेइं एपनी ऐछ़ी तुंमतां रेखोरीन: कधै एरू न भोए की तैना एछ़ेइं सैहीं लहंन ते कन्नैइं सैहीं शुंन्न ते दिले सैहीं समझ़न ते मेरे पासे फिरन ते आंव तैन शिफा देइं। ¹⁶ पण तुशी ऐछ़ी मुबारकन किजोकी तुस लह्तथ ते तुशे कन्न मुबारकन किजोकी तुस शुंनतथ। ¹⁷ किजोकी आंव तुसंन सैहीं सच़्च़ ज़ोतां की बड़े नबी, ते परमेशरेरे लोक चहते थिये: की ज़ैन तुस हेरने लोरेथ तैना ऐन हेरनू चहते थिये, पण न हेरी बटु, ते न शुनी बटु ज़ैन तुस शुन्ने लोरेथ।

बीज़ बेने बाले दृष्टान्तेरो मतलब

( मरकुस 4 : 13 - 20 ; लूका 8 : 11 - 15 )

¹⁸ हुनी तुस बीज़ बेने बालेरी कैहेंनरो मतलब शुंना। ¹⁹ ज़ैखन कोई बादशैहीयरो बिसतर शुनाते, पण समझ़े न्ना: किजोकी शैतान एइते, ते ज़ैन बीज़ तैसेरे दिले मां बेवरू थुं तैन कैढतां घिंनी गहते एह तैस बीज़ेरो ज़ैरोए ज़ैन बत्तरे बंने झ़ढ़ेरु थुं। ²⁰ ज़ैन बीज़ घोड़ांगले मां डुल्लू; तैस मैन्हेंरू ज़ैरुए, ज़ैना प्रभु परमेशरेरो बचन शुनते ख़ुशी सैहीं कुबुल केरतन। ²¹ पण सैही तरीके सैहीं पक्को न भोए: पण बचनेरे ज़ोंने सैहीं ज़ैखन सताव या दुःख मसीबत एइचे, त तै बिछ़ड़ी गहते। ²² झ़ल्लन मां बीज़ झ़ड़नेरो मतलबे की ज़ैना बचन त शुंनतन: पण दूनियारो फिक्र ते दौव्लतरो फरेब तैस दबेई छ़डते, ते तै बेफल ररेही गहते। ²³ पण रोड़ी ज़ैरी ज़मीनी मां बेवरे बीज़ेरो ज़ैरो तैहे; ज़ै वचन शुनते ते समझ़ते ते तैस फल भी लगते केन्ची शौव गुन्हा केन्ची शठ गुन्हा, ते केंची ट्लीही गुन्हा।

जंगली बीज़ेरू दृष्टात

²⁴ यीशुए तैन अक होरी कहांनी शुंनाइ, की अस्मानेरी बादशाही तैस मैन्हेंरी ज़ैरीए ज़ैनी अपने ऊडारे मां रोड़ु बीज़ बेवं। ²⁵ पण ज़ैखन तै झ़ूलोरो थु, त तैसेरे दुश्मने एइतां तैसेरे ऊडारे मां जंगली बीज़ बेवं। ²⁶ ज़ैखन पट्लां शिल्लां लगां लगने त तैन जंगली बीज़ भी साथी लग्गु। ²⁷ मालकेरे नोकरेइं एइतां तैस सैहीं ज़ोंव: कुन तीं अपने ऊडारे मां रोड़ु बीज़ न थुं बेवरु। ²⁸ तैनी जुवाब दितो: ऐन केन्ची दुश्मनेरू कम्में: नोकरेइं पुछ़ू कुन तु चहतां की असां गैहीतां तैन पुट्टी छ़डम। ²⁹ पण तैनीं ज़ोंव न्ना: एरू न भोए की तैससैहीं साथी तुस गैहूं भी पुटथ। ³⁰ फसल लून्ने तग्र दुइये साथी बेडोंने देथ ते लूनते बार आंव एपु लून्ने बालन सैहीं ज़ौइल्हो; की पैहिले जंगली बीज़ लूंन्तां अग्गी मां फुक्नेरे लेइ अकौठ्ठु केरा: ते फिरी तुस गैहूं मेरे खाते मां जम्हां केरतां रखा।

रेइयारे बीज़ेरू दृष्टान्त

( मरकुस 4 : 30 -32 ; लूका 13 : 18, 19 )

³¹ यीशुए तैन अक होरी कहांनी शुंनाइ की अस्मानेरी बादशाही रेइयारे बीज़ेरी ज़ैरीहे: ज़ैन एकें मैन्हें आन्हूं ते अपने ऊडारे मां बेवं। ³² ऐन बीज़ सैभी बीज़न कैरां निकु भोते, पण ज़ैखन बेडोते त ज़ैरो बूट बनते एड़ी तग्र की च़ूड़ोल्लु भी तैसपुड़ बिशतन।

खमीरेरू दृष्टान्त

( लूका 13 : 20 , 21 )

³³ यीशुए तैन अक होरी कहांनी शुंनाइ की अस्मानेरी बादशाही: अम्लटेरी ज़ैरीहे ज़ैन एक्की कौन्शां आन्हुं; ते हछे अट्टे मां मलावं ते सारु अट्टु अम्लट्टु बेनी जेवं।

दृष्टान्तां केरो इस्तमाल

( मरकुस 4 : 33 - 34 )

³⁴ ऐन सैरी गल्लां यीशुए कैहेंनी केरे तरीके सैहीं शुंनेइ: ते यीशु कैहेंनी केरे बगैर किछ न थु शुंनातो। ³⁵ ताके नेबी केरी ज़ोवरी तै गल्ल पुरी भोए की: आंव कैहेंनी केरे लेइ अपनी ज़बान खोल्हेलो: ते तैना गल्लां ज़ौइल्हो ज़ैना दुनिया बन्ने कैरां पैहीली छ़ैप्पोरी थी।

जंगली बीज़ेरो मतलब

³⁶ तैखन यीशु लोकन कैरां अलग भोइतां घरे अंत्र च़लो जेव; ते तैसेरे चेले तैस का एइतां ज़ोंने लगे: की तु असन जंगली बीज़ेरी कैहेंनरो मतलब समझ़ा। ³⁷ यीशुए जुवाब दितो: ज़ै रोड़ु बीज़ बेते: तैन मैन्हेरु मठ्ठुए। ³⁸ ऊडार ईही दुनियाए, ते रोड़ु बीज़ परमेशरेरी बादशाही हासल केरने बाले लोक: ते ज़ैन जंगली बीज़े तैन शैतांनेरे लोकां केरे बारे मां हैं। ³⁹ ते तै दुशमन ज़ैनी तैन बेवरू थुं तै शैतांने: ते लून्नेरो मतलब इस दुनियारो अंत भोनोएं ते लून्ने बाले परमेशरेरे सुवर्गदूतन । ⁴⁰ ज़ैच़ंरे जंगली बीज़ैरी पैदावार अग्गी मां छ़ैडतां फुकत्तन तैंच़रे इस दुनियारो अंत भोनोए। ⁴¹ मैन्हेरु मठ्ठु अपने सुवर्गदूतन भेज़ैल्हो ते तैन तैनकेरी बादशैही मां पापेरे वजाही सैहीं बन्ने बैली सैरी चीज़ां ते पापी लोक आकौठ्ठे केरेल्हे। ⁴² ते तैन अग्गरी भैठी मां छ़डैल्हे, ज़ैड़ी तैना लोक लेरां देंते ते दंत च़ापते राहेले। ⁴³ तैइस धर्मी लोक अपने बाजेरी बादशैही मां दिहाड़ेरे ज़ैरे चमकैल्हे: ज़ैस कन्न भोन त तै शुने।

छ़पोरे खज़ानेरू दृष्टान्त

⁴⁴ अस्मानेरी बादशाही तैस दौव्लतरी ज़ैरीहे: ज़ै एक्की ऊडारे मां दब्बोरी थी, ज़ै एक्की मैन्हें तौप्पी; ते तैस मैल्ली भी; ते फिरी छ़पैइतां छ़डी: ते फिरी ख़ुशी सैहीं अपने घरे जेव; ते अपनु सब किछ बेच़तां तैन ऊडार घिंनु।

अनमोल मोरेरू दृष्टान्त

⁴⁵ अस्मानेरी बादशाही तैस सोवदागरेरी ज़ैरीहे, ज़ै कीमती मोती तौप्तो थु। ⁴⁶ ज़ैखन तैस अक कीमती मोती मैल्हो, त तैनी आपनु सभ किछ बेच़तां तै मोती घिंनो।

ज़ालेरू दृष्टान्त

⁴⁷ अस्मानेरी बादशाही तैस ज़ालेरी ज़ैरीहे, ज़ैन डल्हे मां छ़डु ते तैस मां हर किस्मैरी मैछ़ली लैग्गी। ⁴⁸ ते ज़ैखन ज़ाल भेरोइ जेवं त लोकेइं खीचतां कनारे कढ़ू; ते बिशतां रोड़ी रोड़ी मैछ़ली टोकरन मां रेखी ते बुरी बुरी मैछ़ली शैरी छ़ैडी । ⁴⁹ दुनियारे अंते मां भी एरहू भोनो हैं: की सुवर्गदूते एजनेण, ते तैनेइं पापी लोक धेर्मी लोकन कैरां अलाग केरनेण। ⁵⁰ ते तैना अग्गरी भैठ्ठी मां छ़डनेण ज़ैड़ी तैन लोक लेरां देंते, ते दंत च़ापते राहेल्ले। ⁵¹

पुरानी ने नोंवे तालीमरो महत्त्व

यीशुए ज़ोंव: कुन तुसैइं ऐन सैरी गल्लां सैम्झ़ी? तैनेइं ज़ोंव हां असैइं सैम्झ़ी। ⁵² तैखन यीशुए तैन सैहीं ज़ोंव: व्य्वसथा हर गुरु ज़ैस अस्मानेरी बादशैहीयरो भेद मैल्होरोए एक्की एरे मुकान मालकेरो ज़ैरोहे, ज़ै अपने खज़ाने मैरां नोवीं ते पुरेनी दुइये किस्मां केरी चीज़ां कढते।

नसरते मां यीशु एरी निन्दा

( मरकुस 6 : 1 -6 ; लूका 4 : 16 - 30 )

⁵³ ज़ैखन यीशुए ऐना सभ कैहेंनी शुंनेई त तै तैठ्ठां आग्रोहुं च़लो जेव। ⁵⁴ ते अपने शहारे मां एइतां तैठेरे प्राथन भवने मां गैहीतां शिक्षा देने लगो: ते लोक तैसेरी शिक्षा शुन्तां हेरान भोइतां ज़ोंने लगे: ऐह अकल बुधी ते ऐना चमत्कार एस कौठ्ठां हासल भुए। ⁵⁵ कुन ऐन तैस ठठारेरू मठ्ठु नैइं? ते कुन ऐसेरी आमरू नोवं मरियम नैइं, ते कुन याकुब युसफ शुमौन ते युहूदा ऐसेरे ढ्ला नैइं। ⁵⁶ ते एसेरी सभ बैहींना इशै इड़ी न रहंन? फिरी ऐस्मां ईही करतुत कौठ्ठां आई।

⁵⁷ ते ऐनेइं सैभेइं ऐसेरी वजाही सैहीं ठोकर खई: पण यीशुए तैन सैहीं ज़ोंव: नब़ी सिर्फ अपने मुल्खे मां ते अपने रिशतेदारन मां बैज़त भोते: होरो कोंच न्ना। ⁵⁸ ऐलहेरेलेई यीशुए तैड़ी तैन केरी बेकैद्ररी वजाही सैहीं जादे चमत्कार न हेराऐ।

यूहन्ना बपतिस्मो देने बालेरो कत्ल

( मरकुस 6 : 14 - 29; लूका 9 : 7 -9 )

¹ तैईस हिरोदेस ज़ै मुलखेरे च़ोवरोवं हिस्से पुड़ हुकूंमत केरतो थु: तैनी यीशुएरी तारीफ शुनी। ² हिरोदेसे अपने नोकरन सैहीं ज़ोंव: ऐह युहन्नाएं ज़ै बपतीसमो देने बालो थु, ऐह मुड़दन मैरां ज़ींतो भोवरोए, ऐलहेरेलेइ तै चमत्कार हेराते।

³ असलिती मां हिरोदेसे युहन्ना ट्लेइतां जैल्ही मां छ़डरो थु: एसेरी वजाही सैहीं तैसेरो ढ्ला फिल्पुसेरी कौन्श हिरोदियास थी। ⁴ किजोकी युहन्ने हिरोदेसे सैहीं ज़ोवरू थुं; की फिलपुसेरी कौन्श रखनी तेरे लेइ ठीक नैइं। ⁵ ते हिरोदेस युहन्ने कतल केरनो चहतो थु; पण लोकन कैरां डरतो थु, किजोकी लोक युहन्ने नब़ी मनते थिये।

⁶ हिरोदेसेरी ज़रम दिहैड़ी मां हिरोदियासरी कुईयां मैम्हांना केरे सामने नैच़तां हिरोदेस खुश कियोरो थु। ⁷ ते हेरोदेसे तैस सैहीं वैहीदो कियोरो थु: की तु ज़ैन मग्गैल्ही आंव तैन्ने दैल्हो। ⁸ कुईयां एपनी अम्मारे ज़ोंने पुड़ ज़ोंव: की मींजेई युहन्ना पबतिस्मो देंने बालेरी करोड़ी थाले मां मग्ग। ⁹ ऐन शुन्तां हिरोदेसे बड़ो आफसोस भोव: पण अपने मैम्हांन केरे सामने कस्म खानेरी वजाही सैहीं हुक्म दितो की कुईये युहन्नेरी करोड़ी केटतां देथ। ¹⁰ त्ताली तैनी मैन्हुं भेज़तां युहन्नेरी करोड़ी कट्टाई। ¹¹ युहन्नेरी करोड़ी थाले मां रेखतां कुईये का दिती: ते तै तैसां एपनी अम्मां का घिनतां जेई। ¹² तैखन युहन्नेरे चेले आए: ते तैनेइं तैसेरी लाश छ़ुइतां निही ते देबतां छ़डी ते गैहितां यीशुए पत्तो दितो।

पंच़ हज़ार मड़दन रोटी खुवैनी

( मरकुस 6:30- 44 ; लूका 9 : 10 - 17; यूहन्ना 6 : 1 -14 )

¹³ ज़ैखन यीशुए ऐन शुंनू त तै किशतरे ज़िरये एक्की बेरांन ठैरी जो जेव: ते लोकन पत्तो लग्गो त शहरे शहरेरे लोक तैना पैदल तैस पती च़ले जे। ¹⁴ ज़ैखन यीशु किशती मैरां औस्हो त तैनी बड़े लोक पुतोरां एंइते लाहे: ते तैस तैन पुड़ बड़ी तरस आई; ते तैनी तैन्केरे बिमार लोक बज़्झ़ाए।

¹⁵ ज़ैखन ड्लोवझ़ भोई त यीशुएरे चेले एइतां ज़ोंने लगे: की इही ठार बेरांने ते ठढ भी भेवरिए: ते ऐन लोकन भेज़ी छ़ड ते कोस्कौई ड्लोंवें मां गैहीतां किछ खाने जो किछ घिन्न। ¹⁶ यीशुए ज़ोंव: ऐन भेज़ने ज़ुरुरी नैइं, तुस्सै ऐनकेरे लेइ किछ खाने जो आंन्हां। ¹⁷ चेलेंइ जुवाब दितो: इड़ी असंन का सिर्फ पांच़ रौट्टी ते दुी मैछ़लीन। ¹⁸ यीशुए ज़ोंव: तैन इरहां मिंका आंन्हां। ¹⁹ ज़ैखन तैनी लोकन घासे पुड़ उंढे बिशनेरो हुक्म दितो त पांच़ रौट्टी ते दुई मैछ़ली हथे मां रेखतां अंम्ब्रेरे पासे तेकतां बर्कत दिती? फिरी तैनी रौट्टी ट्लोड़तां अपने चेलन का दिती ते चेलेंइ तैन लोकन दिती। ²⁰ सैभेइं रेज़तां रौट्टी खैई: ते चेलेंइ ट्लुटोरे टूकां केरी बहरे टोकरी सैल्ली। ²¹ रौट्टी खाने बाले लोकां केरी तैधात कौन्शां ते मठ्ठां केरे अलावा कोई पांच़ हज़ार थी।

यीशु एरू पैनी पुड़ च़लल्नू

( मरकुस 6 : 45 - 52 ; यूहन्ना 6 : 15 - 21 )

²² तै तैसेरां बाद यीशुए अपने चेलन हुक्म दितो की: तुस किशती मां बिशतां झिली पार जो गाथ ते आंव ऐन लोकन वापस भेज़तां एइतां। ²³ ज़ैखन यीशुए तैन लोक वापस भेज़े त एपु अकैल्हो प्रार्थन केरने एक्की पहाड़े पुड़ जेव: रात भोवरी थी ते यीशु अकैल्हो थु। ²⁴ एतरे मां किशती बन्ने कैरां दुर पुज़ोरी थी ते हछी हवा च़लने सैहीं किशती झुटे खाती थी। ²⁵ रातरे च़ौवरोंवं पहरे यीशु झिली पुड़ मैइं च़लतो चेलन का नेड़े पुज़ो। ²⁶ ज़ैखन चेलेंइ यीशु झिली पुड़ मैइं च़लतो लाहु त तैना डेरी जे: तैनेइं बुझ़ू ऐह भुत एवरोए, ते डेरतां चिन्डां लगे मारने। ²⁷ पण यीशुए तैन जो लुशी ज़ोंव: डरा न्ना हिमंत रखा। ²⁸ पतरसे तैस जुवाब दितो: औ प्रभु अगर तुएस: त मिम्हीं हुक्म दे ते आंव भी पैनी पुड़ मैइं च़लतो तींका एज्जीं। ²⁹ यीशुए ज़ोंव: एई, ते पतरस किशती मैरां औसतां यीशु का गहंनेरे लेइ पैनी पुड़ मैइं च़लने लग्गो। ³⁰ पण ज़ैखन हावा ज़ोरे सैहीं च़लने लगी त पतरस डेरी जेव: ते डूबने लगो, तैखन तैनी चिन्डां मारते ज़ोंव: औ प्रभु मीं बच़ा। ³¹ यीशुए लुशी अपने हथे सैहीं झफ देइतां पतरस ट्लातो ते ज़ोंव: घट भरोसे बाला तीं शक कीजो की। ³² ज़ैखन दुईये किशती मां बीशे त हावा रुकी जेई। ³³ तैखन ज़ैना किशती मां बीशोरे थिये त तैनेइं यीशु का मथौ टेको ते ज़ोंने लग्गे: तु सच़े परमेशरेरु मठ्ठुस।

गन्नेसरते मां बीमार बझ़ाने

( मरकुस 6: 53- 56)

³⁴ ज़ैखन तैना झील लैंघतां पार गनेसरत अलाके मां उतरे। ³⁵ त तैठेरे लोकेइं यीशु पशांनो ते आस पासेरे अलाक्न मां खबर दिती: ते लोकेइं सारे बिमार यीशु का आन्हें । ³⁶ ते तैन मिनत केरने लगे की असंन सिर्फ अपने लिग्ड़े सैहीं हुरने दे ते ज़ैत्रेइं तैसेरे लिग्ड़न सैहीं हथ लाव तैत्रे ठीक भुए।।

रीती रूवाज़ मन्ने बारे मां सुवाल

( मरकुस 7 : 1 -13 )

¹ तैईस किछ फ्रिसी ते किछ धर्म गुरु युरोशलमे मैरां यीशु का आए ते ज़ोंने लगे। ² तेतेरे चेले सियांन केरी रस्मरे खलाफ किजो च़लतन तैना रौट्टी खाने कैरां पैहिले हथ न धोन? ³ यीशुए जुवाब दितो: तुस किजो एपनी रस्मीं सैहीं परमेशरेरी खलाफत केरतथ? ⁴ किजोकी परमेशरे ज़ोवरुए, की अपने हाज बोवेरी इज़त केरा: ते ज़ै कोई अपने हाज बोवे जो बुरु ज़ौल्हो तै ज़ुरुर मारो गाल्हो। ⁵ पण तुस ज़ोतथ की अगर कोई हाज बोव्वे सैहीं ज़ोए की मेरी ज़ैस चीज़ी सैहीं तुसंन फैइदो भोतो थु, तै परमेशरे जो दिती। ⁶ त एस गल्ली पुड़ अपने हाज बोव्वेरी इज़्त केरनी फ़र्ज़ नैइं, एंच़रे त तुसैइं अपने रुवाज़े सैहीं प्रभु परमेशरेरो वचन रद्दी कियुं। ⁷ ओ दुनियारे लोकाव ईसाया नेबे खुब रोड़े च़ारे नबुत कियोरी थी की।

⁸ ऐन लोक ज़बांना सैहीं त मेरी इज़्त केरतन: पण ऐन केरो दिल मीं कैरां बड़ो दुरे।

⁹ ऐना लोक बेफैइदी मेरी स्तुति केरतन: किजोकी ऐना मैन्हुं केरे हुक्मेरी शिक्षा देतन ।

नपाक केरने बैली गल्लां

( मरकुस 7 : 14 - 23 )

¹⁰ यीशुए मैन्हुं एपु का कुजेईतां ज़ोंव: शुंना ते समझ़ा । ¹¹ ज़ै चीज़ मैन्हेरे ऐशी मां गहचे तैस्सैहीं तै गन्दो न भोए: पण ज़ैन तैसेरे ऐशी मैरां बेरोहुं निस्ते: तैन्ने तैस गन्दे केरते। ¹² तैखन चेलेंइ यीशु का एइतां ज़ोंव: कुन तु ज़ांनतां की फ्रिसैइं एह गल शुनतां ठोकर खाई? ¹³ यीशुए जुवाब दितो: ज़ै बुट मेरे असमानी बोंवें नैइं लेवरो: तै ज़िलना पुटतां छ़डनोएं। ¹⁴ तैन केरी पर्वहा न केरा: तैन काने रखवालेन: अगर अक कानो होरी काने छ़ुईतां च़लाऐ त दुइये ढढै उंढे न बिछ़ड़ैल्हे।

¹⁵ पतरसे ज़ोंव: एह कहांनी असंन समझ़ा । ¹⁶ यीशुए ज़ोंव: कुन तुस हेजु भी बे समझ़ाथ। ¹⁷ कुन तुस न ज़ांनथ की ज़ैन किछ ऐशी मां गहते तैन पैटे मां गहते: ते फिरी पैटे मैरां मल्बे सैहीं बेइर निस्ते। ¹⁸ पण ज़ैना गल्लां ऐशी मैरां निसचंन: तैना दिले मैरां निसचंन ते तैना गल्लां मैन्हुं गन्दे केरचन? ¹⁹ किजोकी बुरे खियाल: कतल ज़न्हा बदचलनी झुठी शहादत, गेब्त दिले मैरां निसचे । ²⁰ ऐन एरही गल्लन ज़ैना मैन्हुं गन्दे केरचन: पण हथ धोंने बगैर रौट्टी खाने सैहीं मैन्हुं गन्दो न भोए।

कनानी कौमरे कौन्शरो विशवास

( मरकुस 7 : 24 - 30 )

²¹ यीशु तैठ्ठां च़लो जेव, ते सुर ते सैइदेरे अलाके मां च़लो जेव। ²² तैस अलाकेरी आक कनानी कौन्श यीशु का आई: ते फुकैरतां ज़ोंने लगी एह प्रभु दाऊदेरा मठ्ठा: मीं पुड़ रेहेंम केर मेरी कुइये मां दुष्टात्माएं, तै तैस बड़ी स्ताचे। ²³ पण यीशुए जुवाब न दितो: एलहेरे लेइ यीशुएरे चेले नेड़े एइतां तैसका मिनत केरने लगे: की एस भेज़ी, दे किजोकी, एह चिंडां मारचे ते ईशो पीछो न छ़डे। ²⁴ यीशुए जुवाब दितो: आंव सिर्फ ईस्राएलेरी हेरोरी भैडन का भेज़ोरोइं। ²⁵ पण तै कौन्श आई, ते यीशु का मथौ टेकतां ज़ोंने लगी: प्रभु मेरी मदत केर। ²⁶ यीशुए जुवाब दितो: बचां केरी रौट्टी नैइतां कुतरन देंनी ठीक नैइं। ²⁷ तैस कौन्शां ज़ोंव: औ पर्भु" ऐन त ठीके, पण ज़ैन टुकड़े मालकेरी मेज़ी पुड़ैरां बिछ़ड़तन तैना कुतरां भी खातन। ²⁸ कौन्शरे ऐन ज़ोंने पुड़ यीशुए जुवाब दितो: एह कौन्शे तेरो विशवास बड़ोए: तेरी मिनत कुबूल भुई ते तैसारी कुई तैखने ठीक भोई जेई।

अलग अलग किस्मेरे रोगी बझ़ाने

²⁹ यीशु तैठां निस्तां गलीलेरी झिलारे बन्ने पुज़ो: त्ताल्ही तै एक्की पहाड़े पुड़ गैहीतां बिशी जेव। ³⁰ बड़े लोकेइं कांने टोंटे लट्टे टोंवने ते होरे कही एरहे ज़ैरहे साथी एन्हतां यीशुएरे पांउन का छ़ड्डे ते यीशुए तैना सभ बज़्झ़ाए। ³¹ ज़ैखन लोकेइं हेरू की लट्टे गल्लां केरतन कमज़ोर तकड़े भोतन टोंटे च़लतन ते कांने लहतन त तैना बड़े हेरान भोई जे ते ईस्राएलेरे परमेशरेरी तरीफ़ केरने लगे।

च़ेवर हज़ार लोकन रोट्टी खुवैनी

( मरकुस 8 : 1 - 10 )

³² यीशुए अपने चेले एपु का कुजेइतां तैन सैहीं ज़ोंव: मीं ऐन लोकन पुड़ बड़ी तरस एइचे: ऐना मैन्हुं ट्लेई दिहेड़ी केरे देंते बराबर मीं सैहीं साथी च़लोरेन ऐनका खाने जो किछ भी नैइं: ते आंव ऐन नियन्ने भेज़ने न चैहीं: कोस्कौही एरहु न भोए की ऐना बत्ती मां रेहीगहंन। ³³ यीशुएरे चेलेंइ जुवाब दितो: असां इस बियाबांने मां ऐत्रे लोकां केरे लेइ रौट्टी कौठ्ठां अहंन्म: ज़ैना सैभी केरे लेइ पुरी भोन? ³⁴ यीशुए पुछ़ू: तुसंन का कैत्री रौट्टीन? तैनेइं जुवाब दितो: सत रौट्टीन ते किछ निकी निकी मैछ़ली भी आंन्ह। । ³⁵ यीशुए तैन लोकन तल्ले मां बिशनेरे लेई ज़ोंव। ³⁶ तैखन यीशुए तैना सत ऱौट्टी ते मैछ़ली ट्लेई, ते परमेशरेरु शुकर केरतां ट्लोड़ी: ते अपने चेलन का दिती ते चेलेंइ तैना मैन्ह्न दिती। ³⁷ सैभेइं रेज़तां रौट्टी खैई: ते बादे मां चेलेंइ ट्लुटोरे टूकां केरी सत टोकरी सैल्ली। ³⁸ रौट्टी खाने बालां केरी तैधात कौन्शां ते बचां केरे आलावा च़ोवर हज़ार थी। ³⁹ यीशुए सब लोक भेज़े ते एपु किशती मां च़ैढ़तां मगदंन आलाके जो च़लो जेव।

आसमानी निशानेरी माँग

( मरकुस 8 : 11 - 13 ; लूका 12 : 54 -56 )

¹ किछ फ्रिसी ते किछ सुदुकी यीशु का आए: ते तैस अज़मांनेरे लेइ तैस कैरां कोई अंम्ब्रेरो निशान हेरांनेरे लेइ ज़ोंव। ² यीशुए जुवाब दितो: ज़ैखन ड्लोवझ़ भोचे त तुस ज़ोतथ की मौसम रोड़ोए किजोकी अंम्ब्र लाले| ³ ते झैझ़ां ज़ोतथ की अज़ झ़ड़ी लगनियें ते बिदलार लगोरिए तुस अंम्ब्र ट्लड़ेरु हेरतां मौसमेरो अंदाज़ो लातथ, पण ज़मांनेरो निशान न पशैंनी सख्थ| ⁴ इस ज़मांनेरे बुरे ते ज़ालम लोक निशान मगतन: ते तैन युहन्ना नेबेरां आलावा होरो कोई निशान न दितो गाहेलो: ते युहन्ना नब़ी तैन शैरतां च़लो जेव।

फ्रिसी के सदूकी केरे तालीमरू खमीर

( मरकुस 8 : 14 - 12 )

⁵ यीशुएरे चेले झिली पार पुज़ी जे: पण रौट्टी साथी नैनी बिसरोरी थी| ⁶ यीशुए तैन सैहीं ज़ोंव: खबरदार फ्रिसी केरे त सुदुकी केरे अंम्लटे कैरां हुशार रैहियथ| ⁷ ते तैन एपु मम्हेंइ बेंस केरने लगे, की असैइं रौट्टी नैइं आंन्होरी। ⁸ यीशुए एस गल्लरो पत्तो थु, एल्हेरेलेई तैनी ज़ोंव: बै अकलाव एपुमम्हेंइ कीजो बेंस केरतथ की असंन का रौट्टी नैइं| ⁹ कुन तुसैइं हेजु नैइं बुझ़ेरू? तुसंन पांच़ हज़ार मैन्हुं केरे लेइ तैना पांच़ रौट्टी ते दुई मैछ़ली याद नैइं: ते होरी टुकां केरी कैत्री टोकरी सैल्होरी थी? ¹⁰ ते तैन च़ौवर हज़ार मैन्हुं केरे लेइ सत रौट्टी ते टुकां केरी कैत्री टोकरी सैल्होरी थी? ¹¹ तुस की न समझ़थ की मीं तुसंन फ्रिसी केरे त सुदुकी केरे अंम्लटे कैरां हुशार रहंनेरे लेइ ज़ोवरू थुं: रौट्टी केरे लेइ न थुं ज़ोवरु? ¹² तैखन तैनकेरी समझ़ी मां आंव की यीशुए फ्रिसी केरे त सुदुकी केरे रौट्टी केरे लेइ नैइं बल्के असंन ऐनकेरी शिक्षाई कैरां हुशार रहंनेरे लेइ ज़ोवरू थुं।

पतरस यीशु ए मसीह कबूल केरते

( मरकुस 8 : 27 - 30 ; लूका 9 : 18 -21 )

¹³ ज़ैखन यीशु कैसरेरे फ़िल्पी अलाके मां आव त तैनी अपने चेलन पुछ़ू: मैन्हेरु मठ्ठु कौने लोक एस बारे मां कुन ज़ोतन? ¹⁴ चेलेंइ ज़ोंव: किछ ज़ोतन युहन्ना बपतीसमों देंने बालोए, ते किछ ज़ोतन इलिया, ते किछ ज़ोतन यरमियां नबी ते किछ ज़ोतन नेबन मैरां कोई अक ज़ैरोऐ। ¹⁵ यीशुए तैन पुछ़ू: पण तुस मीं जो कुन ज़ोतथ? ¹⁶ शुमौन पतरसे जुवाब दितो: तु ज़िंतो प्रभु परमेशरेरु" मठ्ठु मसही" आस। ¹⁷ यीशुए जुवाब दितो: एह युहंन्नेरे मठ्ठा शुमौन तु मुबारकस किजोकी एह गल केंचे नैइं बल्के मेरे असमानी बोंवें तीं पुड़ ज़ैहीर कियोरीए। ¹⁸ ते आंव तीं सैहीं ज़ोतांइ: की तु पतरस आस ते आंव इस पक्की शफड़ी पुड़ अपनी कलीसिया बनैइल्हो ते मौऊत भी तैस पुड़ असर न कैरेल्ही। ¹⁹ आंव अपने असमानी बौवेरी चैबी तींका दैइल्हो: ते ज़ैन किछ तु ज़मीनी पुड़ बंधैल्हो तैन अंम्ब्रे मां बेंधौलु ते ज़ैन किछ तु ज़मीनी पुड़ खोल्हेलो तैन सभ किछ अंम्ब्रे मां खोल्होलु। ²⁰ तैखन यीशुए चेलन जो ज़ोंव: की एह गल केंची सैहीं न ज़ोइयथ की आंव मसही आंइ।

अपने मौतरे बारे मां यीशु भविष्य्वणी केरते

( मरकुस 8 : 31 - 33 ; लूका 9 : 22 )

²¹ एसेरे बाद यीशुए अपने चेलन पुड़ ज़ैहीर केरनु शुरू कियुं: की तैसेरू युरोशलमें मां गहंनु ज़ुरूरी थुं, ताके तै सियांने ते परमेशरेरी सेवा केरने बाले मन्दिरेरे पुरैहूत ते व्य्वसथारे गुरु केरे हथेइं बड़ो दुःख झ़ेल्ले, ते कतल कियो गाहे ते ट्लेइंयवं दिहाड़े फिरी ज़िंतो भौल्हो। ²² पतरसे तै कनारे ज़ैरहे नियो ते तैस समझ़़ांने लगो, की एह प्रभुएन कधै न भोऐ: तीं सैहीं एरहु कधै न भोल्हु। ²³ यीशुए मुड़तां पतरसे सैहीं ज़ोंव: एह शैतांन: मेरे तुत्तरे अगरां नश: तु मेरी बत्ती मां मेरे लेई रुकावट लोरोस बन्ने, तीं परमेशरेरी गल्लां केरो नैइं बल्के मैन्हुं केरी गल्लां केरो खियाल रहते।

यीशु ए पत्ती च़लनेरो मतलब

( मरकुस 8 : 34 ; 9 : 1 लूका 9 : 23 - 27 )

²⁴ तैखन यीशुए अपने चेलन सैहीं ज़ोंव: अगर कोई मेरी सेवा केरनी चहते, त तैसेरे लेइ ऐन ज़रूरीऐ की तै एपनी जांनरो इनकार केरे ते अपने लेइ फंसी साथी च़लाए ते मीं पत्ती च़ले। ²⁵ किजोकी ज़ै कोई अपनी जान हफाज़ती सैहीं रखनी चहलो: त तै तैस गुंवाल्हो: ते ज़ै अपनी जान गुंवाल्हो: त तै नोवीं ज़िंदगी हासल कैरेल्हो। ²⁶ अगर कोई सारी दुनिया हासल केरे ते एप्नी जांनरो नुकसान कमाए; त तैस कुन फ़ैइदो भौल्हो? या मैन्हुं एप्नी जांनरे बदले कुन दैल्हो? ²⁷ किजोकी ज़ैखन मैन्हेरु मठ्ठु अपने बौवेरी मैम्हाई मां अपने सुवर्गदूतन सैहीं साथी एजैल्हो: तैखन तै हर केंची अपने अपने कियोरे कम्मा केरो फल दैल्हो। ²⁸ आंव तुसंन सैहीं सच़्च़ ज़ोताइं की किछ लोक ज़ैन इड़ी खड़खड़ेन, ज़ां तग्र मैन्हेरे मठ्ठे एप्नी बादशैही मां ऐइंते न लाहेले, तां तग्र मौवतरो मज़ो न च़खैल्हे।

यीशु एरू रूप बेदलोनू

( मरकुस 9 : 2 - 13 लूका 9 : 28 -36 )

¹ शैई दिहेड़न बाद यीशुए" पतरस याकुब ते याकुबेरो ढ्ला युहन्ना एपु सैहीं साथी नैइतां एक्की उचे पहाड़े पुड़ जे। ² तैड़ी तैसेरी शकल बेदलोई जेई: तैसेरू तुत्र दिहाड़ेरु ज़ैरू चमकने लगु ते तैसेरां लिगड़ां हींवेरां ज़ैरां छ़ीतां सुफैद भुआं। ³ तैखन तैनेइं मुस्सौ ऐल्लया यीशु सैहीं गल्लां केरते लाहे।

⁴ पतरसे यीशु सैहीं ज़ोंव: इशु इड़ी रहंनु रोड़ुए, अगर तु चहतस त आंव ट्लाई डेरे बनाताइं, अक तेरे लेइ ते अक मुसैरे लेइ ते क ऐलियारे लेइ। ⁵ पतरस ऐह गल्ल मस्सां हेजु ज़ोंने लोरो थु त: आक बड़ी उज़ली चमकती बिदलार तैन पुड़ एइतां टिकी ते तैस बिदलारी मैरां ईही आवाज़ आई: ऐन मेरु ट्लारु मठ्ठुए: आंव एस पुड़ खुशीं तुस एसेरी शुंना। ⁶ ज़ैखन चेलेंइ एह आवाज़ शुंनी त तैना डेरतां तुत्रेरे भारे बिछ़ड़ी जे। ⁷ पण यीशुए एइतां तैन सैहीं हथ लाव ते ज़ोंव: उठा डरा न्ना। ⁸ ज़ैखन तैनेइं ऐछ़ी खौल्ही; त यीशुएरे अलावा होरो कोई न लाहू।

⁹ ज़ैखन तैना तैस पहाड़े पुड़रां उंढे ऐवरे थिये त यीशुए तैन ताकिद केरतां ज़ोंव: की ज़ैन किछ तुसैइं लाहेरुए मैन्हेरु मठ्ठु ज़ां तग्र मुड़दन मैरां ज़िंतो न भोए तां तग्र केन्ची सैहीं न ज़ोइयथ। ¹⁰ चेलेंइ तैस पुछ़ू की धर्म गुरु किजो ज़ोतन की ऐलिया नब़ी ज़ुरूरी पैहिलो एजनोएं। ¹¹ यीशुए जुवाब दितो: ऐलिया नबी ज़ुरुरी एजेल्हो ते सभ किछ बहाल कैरेल्हो। ¹² पण आंव तुसंन सैहीं ज़ोतां की ऐलिया त पैहिलो एवरोए ते हुनी तैना तैस पशैंनी न बटन: बल्के ज़ैन चाहूं तैससैहीं तैन्ने किंयु ऐन्च़रे मैन्हेरु मठ्ठु भी तैन साथी दुःख भोगेल्हु। ¹³ तैखन चेलेंइ बुझ़ू की यीशु तैन सैहीं युहन्ना बपतिसमो देने बालेरे बारे मां ज़ोंने लोरोए।

अक मठ्ठू बझ़ाव ज़इस मां दुष्ट आत्मा थी

( मरकुस 9 : 14 -29 लूका 9 : 37 - 43 )

¹⁴ ज़ैखन यीशु हछे लोकन मां पुज़ो त अक मैन्हुं यीशु का आव ते ज़ेंधू तल्ले लेइतां ज़ोंने लगो । ¹⁵ हे प्रभु मेरे मठ्ठै पुड़ रेहेंम केर; तैस मिरगरी वजाही सैहीं दोवरे एइतन ते तैन मठ्ठु जादे केरतां अग्गी ते पैनी मैझो खिरकते। ¹⁶ मीं तैन मठ्ठु तेरे चेलन का आंन्हेरु थुं: पण तैनेइं तैन मठ्ठु ठीक न केरी बटु। ¹⁷ यीशुए ज़ोंव: औ बैअकल लोकांव; आंव कैइस तगर तुसंन सैहीं साथी भोनोइं, आंव कैइस तग्र तुशो दुःख झ़ैलतो रेइल्हो? तैन मठ्ठु इरहां मीं का आंन्हां । ¹⁸ यीशुए दुष्टात्मा झ़ीड़काई ते तै तैस मठ्ठै मैरां निसी ते तैन मठ्ठु तैखने ठीक भोई जेवं।

¹⁹ तैखन चेलेंइ नराले ज़ैरहे यीशु का गैहितां पुछ़ू: असन कैरां तै दुष्टात्मा की न कैढोही। ²⁰ यीशुए जुवाब दितो: तुशो विश्वास घट्टे: आंव तुसंन सैहीं सच़्च़ ज़ोताइं की अगर तुसंन मां सीवलरे गलैहुवे ज़ैत्रो भी विशवास भौल्हो; त तुस उस पहाड़े जो ज़ौल्हे की इठ्ठां घिसतां ऊड़ी गा; त तैन गाहेलु: ते तुशे लेइ कोई भी कम्म असुख्तु न भौल्हु। ²¹ पण इस किसमेरी दुशटात्मा बर्ते ते उपुवासे बगैर न निसै।

अपने मौतरे बारे मां यीशु एरी दूबारा भविषवाणी

( मरकुस 9 : 30 -32 लूका 9 : 43 -45 )

²² ज़ैखन तैना गलिले मां अकौठ्ठे भुए त यीशुए तैन सैहीं ज़ोंव: मैन्हेरु मठ्ठु भी मैन्हुं केरे हवाले कियुं गाहेलु । ²³ तैना तैस मैरी छ़डैल्हे: ते तै ट्लेइयांव दिहाड़े फिरी ज़िंतो भौल्हो चेले ऐन शुंनतां बड़े परेशान भुए।

मन्दरेरी धड़त

²⁴ ज़ैखन तैना कफ्रनहुंमे मां पुज़े त हेकलरे चुंगी धड़त घिंन्ने बाले पतरसे का एइतां पुछ़ने लगे, की तुशो गुरु हेक्लरी चुंगी धड़त न दे? ²⁵ पतरसे जुवाब दितो: हां देते: ज़ैखन पतरस घरे मां पुज़ो त यीशुएं पैहिले ज़ोंव: शमौंन तेरो कुन हाले? दुनियारे बादशाह कोन लोकन कैरां धड़त घिंनतन अपने मठ्ठन कैरां या होरी लोकन कैरां? ²⁶ ज़ैखन तैनी ज़ोंव की होरन कैरां त यीशुए ज़ोंव: फिरी त मठ्ठां बरी भोई जेआं। ²⁷ पण तैन शकैइतरो मोको न मैल्हे त तू झिली पुड़ गैहितां कंटो लेइतां मैछ़ली ट्लेइयां; ते ज़ै मछ़ली पैहीली लगैल्ही, त तैसारू आशी खोलां, ते तीं च़ौवर सिक्के मैलनैण, ते तैन सिक्के नैहीतां इहीशो दुइये ज़नहां करी चुंगी (धड़त) देइयां।

स्वर्ग एरे बादशैही मां बडडो कौन ?

( मरकुस 9: 33 - 38, लूका 9: 46 - 48 )

¹ तैखन चेले यीशु का आए ते पुछ़ने लगे: की अस्मानेरी बादशैही मां सैभन कैरां बडो कौने? ² यीशुए अक निकड़ु मठ्ठु एपु का कुजावं ते तैन मुझ़ाटे खड़ु कियुं। ³ ते ज़ोंने लगो: की सच़ी गल्ल त इहे की तुस अपनो आप बेदलतां निकड़े मठ्ठैरे ज़ैरे न बनथ त तुस परमेशरेरी बादशैही मां कधी दाखल न भौल्हे। ⁴ ऐलेहेलेइ ज़ै कोई अपनो आप एक्की मठ्ठैरे बराबर बनल्हो; त तै अस्मानेरी बादशैही मां सैभन कैरां बडो भौल्हो। ⁵ ते ज़ै कोई एरे ज़ैरे निकड़े मठ्ठै मेरे नोवें सैहीं कुबूल केरते; त तै मीं कुबूल केरते।

पाप केरनेरी आज़मेइशां

( मरकुस 9 ; 42 - 48 ; लूका 17: 1, 2 )

⁶ ते ज़ै कोई ऐन निकड़न मैरां ज़ै मीं पुड़ विशवास केरते; त कैसकेरे लेइ अक बड़ी ठोकर बन्चे त तैसेरे लेइ एन्ने ठीके की ढ्लाटेरो ढ्लेइटोल तैसेरे गले ऊंढो ढंढेहीतां डुघे सुमुन्द्रे मां डोबतां छ़डोरो लोड़ते। ⁷ ठोकरां केरी वजाही सैहीं मीं अफ्सोसे, इस दुनियाइ पुड़ ठोकरां त ज़ुरूर लैग्गनिण पण तैन पुड़ अफ्सोसे ज़ैनकेरी वजाही सैहीं ठोकर लग्गे। ⁸ अगर तेरो हथ या तेरो पाव तेरे लेइ ठोकरारो ज़िरयो बनते; त तु तैस कैटतां छ़ड; किजोकी तेरु टोंटु या कांनो बेनतां ज़िंदगी मां दाखल भोनू रोड़ुए; ते तेरे दुइये हथ पाव सथे भोने सैहीं अगर तु नर्केरी अग्गी मां गास त तैल्लां केरतां तु टोंटु या कांनो बेनतां रोड़ोस। ⁹ अगर तेरी अछ़ तेरे लेइ पापेरो ज़िरयो बनते; त तु तैस कैढतां शैरी छ़ड: एक्की ऐछ़ी सैहीं ज़िंदगी मां दाखल भोनू रोड़ुए ते तेरी दुइये ऐछ़ी भोंने सैहीं तु न्रकेरी अग्गी मां गास त तैल्लां कैरतां तु कानू बेनतां रोड़ोस।

हेरोरी भैडरू दृष्टात

( लूका 15 : 3 -7 )

¹⁰ खबरदार इन मेरे नीके नीके हुक्मन मैरां तु केन्ची एरे न बुझ़ां: किजोकी आंव तीं सैहीं ज़ोतां की तैनकेरे सुवर्गदूते हर बख्त मेरे असमानी बोवेरे तुत्रेरां तकते रहतन। ¹¹ किजोकी मैन्हेंरे मठ्ठै हेरोरे लोकन तोप्ने ते मुखती देने एवरोए।

¹² तुशो खियाल कुने? की केसकौई का शैव भैढ़ां भोन, ते तैस मैरां अक हेरोए; त कुन तै पुहाल नढ़ैनुवें भैढ़ां तैड़ी ज़ैरे पहाड़े पुड़ छैडतां तैस हेरोरी भेडी तोप्ने न गाहे? ¹³ ते ज़ैखन तैस तै हेरोरी भैढ़ तोप्तां मैल्ले; त आंव तुसंन सैहीं ज़ोतां की बड़ी ख़ुशी बनाल्हो। ¹⁴ ऐलहेरे लेइ तुशो असमानी बोव ऐन न चाहे की ऐन निकन मैरां भी कोई ज़ैया न भोए।

अपरैधन सैहीं बरताव

¹⁵ अगर तेरो ढ्ला तीं सैहीं बुरयाई केरते; त तु अकैल्हे मां तैस समझ़ा: अगर तैनी तेरी गल्ल शुंनी, त तीं तै अपनो ढ्ला मन्नो। ¹⁶ अगर तै तेरी गल्ल न शुंने, त तु एपु सैहीं साथी अक या दुई मैन्हुं नैइयां: किजोकी हर गल्ली मां दुई या ट्लाई मैन्हुं शहात भोतन। ¹⁷ अगर तै तैनकेरी भी न शुंने; त तु किलिस्यारे लोकन पतो दे: अगर तै किलिस्यारे लोकां केरी भी न शुंने; त तु तैस चुंगी घिंन्ने बाले ते बुत पूज़ा करने बालेरे बराबर बुझ़ां।

रूकनू ते मौको देनो

¹⁸ आंव तुसंन सैहीं सच़्च़ ज़ोताइं की: ज़ैन किछ तुस ज़मीनी पुड़ बंधेले त समझ़ा की असमाने पुड़ बंधेरुए; ते ज़ैन किछ तुस ज़मीनी पुड़ खौल्हेले त समझ़ा की असमाने पुड़ खौल्हेरूए। ¹⁹ फिरी आंव तुस्न सैहीं सच़ ज़ोताइं , कि अगर तुस्न मैरां दुइय ज़ने धेरती पुड़ कोंची गल्ल तैना मगन तैन केरे लेई तै भोल्ही। ²⁰ किजोकी ज़ैड़ी दुई या ट्लाई मैन्हुं मेरे नोवें सैहीं अकौठे भोतन: आंव तैनकेरे मुझ़ाटे भोतांइ।

बे रहंम सेवकेरू दृष्टात

²¹ ज़ैखन पतरसे यीशु का एइतां पुछ़ू: परमेशर अगर मेरो ढ्ला मीं सैहीं बुरयाई केरतो राहे त आंव कैत्रे बार माफ़ केरीं? कुन सत बार। ²² यीशुए जुवाब दितो: आंव तीं सैहीं ज़ोतां की सत्तेरे सहत्र बार माफ़ केरतो रेहीयां।

²³ बस्सा अस्मानेरी बादशाही तैस बादशाहेरी ज़ैरीए ज़ैनी सोचु की आंव अपने नोकरन कैरां हिसाब घिंनी। ²⁴ ज़ैखन तै हिसाब घिन्ने लगो: त अक मैन्हुं तैसका हाज़र कियो: ज़ैनी लखैइं रुपैइए बादशाहे कैरां नियोरे थिये। ²⁵ किजोकी तैसका कर्ज़ो मुकाने जो किछ न थु: तैसेरे मालके हुक्म दितो की एसेरे बाल बच्चे कौन्श ते ज़ैन किछ भी आए सब बेच़तां कर्ज़ो ऊसुल केरा। ²⁶ पण तै नोकरे मालके का मिनत केरतां ज़ोंने लगो: की मीं किछ मोको दे, ते आंव तेरो सारो कर्ज़ो मुकाल्हो। ²⁷ मालके तैस नोकरे पुड़ बड़ो तरस आव: ते तैनी तै छैडी दितो ते तैस कर्ज़ो भी माफ़ कियो।

²⁸ ज़ैखन तै नोकर तैठां च़लो जेव; त तैस अक एरो नोकर मैल्हो, ज़ै तैसेरो खास दौसत थु, ते तैस तैनी शौव दीनर दितोरे थिये: तैनी तै गलेरां ट्लाव ते ज़ोंने लगो मेरो कर्ज़ो कढ। ²⁹ तैसेरो दौसत तैसेरे पांवन पैइतां ज़ोंने लगो: मीं किछ मोको; दे ते आंव तेरो सारो कर्ज़ो मुकाल्हो। ³⁰ पपण तैनी तैसेरी अक गल्ल भी न शुंनी: ते तैनी तै ढैप्तां छ़डो की ज़ां तगर कर्ज़ो न देस तां तगर ढप्पौरो राह। ³¹ ज़ैखन होरी नोकरेइं ऐन शुनू; त तैना बड़े परेशान भुए: ते मालके का गैहीतां सारो बिस्तार शुंनाव। ³² तैखन मालके तै नोकर कुजेइतां ज़ोंव: औ बेइमान नोकरा मीं तेरो सारो कर्ज़ो माफ़ कियो; किजोकी तीं मीं का मिनत मग्गोरी थी। ³³ कुन तेरे लेइ ज़ुरुरी न थुं: की ज़ैन्च़रे मीं तीं पुड़ तरस आव तैन्च़रे तु भी अपने दौस्तन पुड़ तरस खाथो? ³⁴ मालके सरक आई; ते तैनी तै नोकर जलादां केरे हवाले कियो: की ज़ां तग्र मेरो सारो कर्ज़ो न देस तां तग्र ढ़प्पौरो भोए।

³⁵ तैखन यीशुए ज़ोंव: अगर तुसंन मैरां हर अक अपने ढ्लाए दिले सैहीं माफ़ न केरे त मेरो असमानी बोव भी तुसंन सैहीं एंच़रे पैश एजैल्हो।

फैखतरे बारे मां यीशु एरी तालीम

( मरकुस 10 : 1 -12 )

¹ ज़ैखन यीशुए ऐन गल्लां ज़ोइ छ़ैडी: त तै गलिले मैरां गैहीतां दरियाए यरदनेरे पार युहूदियेरे अलाके मां च़लो जेव। ² बड़े लोक यीशु पत्ती च़ले जे; ते यीशुए तैन शिफा दिती।

³ किछ फ्रिसी लोक अज़मानेरे लेइ यीशु का आए; ते ज़ोंने लगे: कुन मैन्हुं अपनी कौन्श केन्ची भी एबेरे लेइ फारखती देनी जैइज़े। ⁴ यीशुए जुवाब दितो: कुन तुसैहीं नैइं पढ़ैरू की सैभन कैरां पैहीले परमेशरे मड़द ते कौन्श बनेवरां थियां।

⁵ ते ज़ोंव: मड़द अपने हाज बोवे कैरां कनारे बिशतां एपनी कौन्शी सैहीं साथी राहेलो; ते तैन दुइये अक जान भौल्हे। ⁶ ऐलहेरेलेई तैना दुई नैइं बल्के अक जान भौल्हे? ऐल्हेरेलेइ ज़ैस परमेशर ज़ोड़े तैस मैन्हुं अलग न केरे। ⁷ फ्रिसैइं यीशुए पुछ़ू: फिरी मुसै एह हुकम किजो दितो की तलाकनामों लिखतां छैडी देथ? ⁸ यीशुए जुवाब दितो: की मुसै तुशै कठोर दिलां केरी वजाही सैहीं एपनी कौन्शन छ़डनेरी इजाज़त दितोरी थी: पण शुरू मां ऐन न थुं। ⁹ पण आंव तुसंन सैहीं सच़्च़ ज़ोताइं की: ज़ै कोई एपनी कौन्शी बदमैशरे बगैर केन्ची होरी गल्ली पुड़ शारते; ते तै केंची होरी सैहीं ड्लाह केरते; त तै ज़न्हा केरते; ते ज़ै शैरोरी कौन्शी सैहीं ड्लाह केरते, त तै भी ज़न्हा केरते।

¹⁰ चेलेंइ यीशु सैहीं ज़ोंव: अगर मुन्शेरो ते कौन्शारे रिशतेरो ईही हाले त ड्लाह न लोड़े बनेवरो। ¹¹ यीशुए जुवाब दितो; ईही गल्ल सैभी केरे काबले कुबुल नैइं: इन तैना केरतन ज़ैन एरही ज़ैरही अक्ल मैल्होरी भोए। ¹² किछ त ज़र्मनेरे ख्स्सी भोतन ते किछ ड्लाहेरे न काबले भोतन: ते किछ एरे भी आंन्ह; कि ज़ैन अस्मानेरी बादशैयरे लेइ ड्लाहे न केरन, ते ज़ै कोई तैस कुबूल केरी सखते त केरे।

बच्चन बरकत देनी

( मरकुस 10 : 13 -16 लूका 18 : 15 - 17 )

¹³ तैल्लां पत्ती लोकेइं निकां मठ्ठां यीशु का आंन्हां: ताके यीशु तैन पुड़ हथ रेखतां दुवा केरे, पण चेलेंइ तैन लोक धमकाए। ¹⁴ यीशुए ज़ोंव: निकां मठ्ठां मीका एजने देथ, किजोकी अस्मानेरी बादशाही ऐन्ना केरीये। ¹⁵ यीशुए तैन निके मठ्ठन पुड़ हथ रेखतां तैठां अगरोहूं च़लो जेव।

दौलत मंद जवान ते हमेशरी ज़िन्दगी

( मरकुस 10 : 17 - 31 लूका 18 : 18 -30 )

¹⁶ अक मैन्हुं यीशु का आव ते पुछ़ने लगो: हे गुरु आंव कुन रोड़ु कम्म केरीं की ज़ैस्सेहीं परमेशरेरी बादशाही हासल केरीं? ¹⁷ यीशुए जुवाब दितो: तु मीं रोड़े कम्मेरे बारे मां किजो पुछ़तां: रोड़ो त सिर्फ़ अक्के; अगर तु ज़िंदगी हासल केरनी चहतां त हुकमन पुड़ अमल केर। ¹⁸ तैनी मैन्हें पुछ़ू: कौस ज़ैरे हुकमें पुड़; यीशुए जुवाब दितो: खुन नैइं केरनो, ज़न्हा नैइं केरनो, ते च़ोरी नैइं केरनी, ते झुठी शाहात नैइं देनी। ¹⁹ अपने हाज बौवां केरी सेवा केर; ते अपने पड़ौसी सैहीं अपने बराबर प्यार केर। ²⁰ तैनी नोजुवाने जुवाब दितो; ऐन सैभी हुकमन पुड़ आंव अमल केरतो एवरोहीं: हुनी मींमा कौ कमीएं? ²¹ यीशुए जुवाब दितो: अगर तु पबित्र भोनु चहतां; त गा आपनु सभ किछ बेच़तां गरीबां केरी मद्दत केर, त तीं असमाने मां खज़ानो मैल्लनोएं, ते एइतां मीं सैहीं साथी च़ल। ²² ज़ैखन तैनी नोजुवाने ऐह गल्ल शुनी; त बड़ो परेशान भोइतां च़लो जेव: किजोकी तै बड़ो अंम्बीर थु।

²³ तैखन यीशुए अपने चेलन सैहीं ज़ोंव: ऐन सच़े की अंम्बीरेरू अस्मानेरी बादशैही मां दाखल भोंनु मुशक्ले। ²⁴ फिरी आंव तुसंन ज़ोतां की ऊंटेरु सुईयरे नाके मम्हेइं निसनु सुखतुए; ते अंम्बीरेरू अस्मानेरी बादशैही मां दाखल भोनु असूखतुऐ। ²⁵ ज़ैखन चेलेंइ ऐह गल्ल शुंनी त तैना बड़े हेरान भोइजे: ते यीशुए पुछ़ने लगे की फिरी कसैरी मुखती भोई सख्चे। ²⁶ यीशुए तैनकेरे पासे तैकतां ज़ोंव: मैन्हुं केरे लेइ त ऐन मुशक्ले पण परमेशरेरे लेइ किछ मुशकल नैइं। ²⁷ पतरस खड़ो भोइतां ज़ोंने लगो: हेर असां सभ किछ शैरतां तीं पत्ती च़लोरेम: ते असन कुन मैल्नुएं? ²⁸ यीशुए तैन जुवाब दितो; की आंव तुसंन सैहीं सच़्च़ ज़ोतां: की ज़ैखन मैन्हेरु मठ्ठु अपने पबित्र तख्ते पुड़ बिशैल्हो; त तुस भी मीं पत्ती च़लने बाले; ते बहरे तखतन पुड़ बिशतां इस्राएलेरे बहरे कबीलां केरो इन्साफ कैरेल्हे। ²⁹ ते ज़ैंनी केंचे अपन घरां ते ढ्ला, बेहीन, हैई बोव, बाल बचे, मेरे लेइ तैड़ी ज़ैरे छ़डैरुए: तैस शौव गुनहा फल मैल्हेलो; ते हमेशारी ज़िन्दगरो बारस भौल्हो। ³⁰ पण बड़ेन" ज़ैना अगरी अगरी थिये तैना पत्रोवं रहंनेण; ते ज़ैन पत्रोवं थिये तैना अग्रोवं भोंनेण।।

बागरू दृष्टान्त

¹ किजोकी असमानेरी बादशाही तैस जिमदारेरी ज़ैरीए ज़ै झ़ैझ़ां उठतां बेइर निसते; ते अपने दाछ़री बागी मां मुजुरन कम्मे लाते। ² तैनी अक दीनार रोज़ मुजुरी देनेरे लेइ तैना बागी मां भेज़े। ³ कोई ट्लाई घैन्टन बाद फिरी बेइर निस्सो: ते हेरने लगो ते किछ मुजुर बज़ारे मां बेकार खेड़ौरेन। ⁴ तैनी तैन सैहीं ज़ोंव: तुस भी मेरी बागी मां एज्जा ते ज़ैन किछ जैईज़ भौलु आंव तुसंन देई दैल्हो। ⁵ बस्सा तैना च़ले जे: ते फिरी दुपहरेइं ते ड्लौवझ़रे मोके बेइर गैहीतां फिरी एन्ने कियूं। ⁶ दिहाड़ी डुबने कैरां थौड़े ज़ैरे पैहीले भी तैनी बेइर निसतां किछ होरे भी खड़खड़े लैहीतां तैनी तैन पुछ़ु: तुस झ़ैझ़ैरे देंते किजो खेढ़ोरेथ? ⁷ तैनेइं जुवाब दितो: असां केंचे कम्मे नैइं लेवरे: तैनी तैन सैहीं ज़ोंव: तुस भी मेरी बागी मां एज्जा ते कम केरा।

⁸ ज़ैखन ड्लौवझ़ भोई, त तैनी बागरे मालके अपने मुन्शी सैहीं ज़ोंव: की पैहीले लग्गोरे मुजुरन दे पत्ती कम्मे लग्गोरे मुजुरन सैभन दिहैड़ारे पैइंसे दे। ⁹ ज़ैन ड्लौवझ़रे मोके मुजुर कम्मे लग्गोरे थिये; तैन अक अक दिनर मैल्हो। ¹⁰ ज़ैन मुजुर झ़ैझ़ां कम्मे लग्गोरे थिये तैनकेरी बारी आई त तैनेइं सोचु की असंन जादे मैल्नेण: पण तैन भी अक अके दिनर मैल्लो। ¹¹ तैस मलकेरे बारे मां तैन एपु मम्हेइं बुन बह गल्लां केरने लगे। ¹² पत्ती लेवरे मुजुरेइं सिर्फ़ अक घैन्टो कम कियेरुए: ते असैइं सैरी दिहेड़ी धुपी पुड़ कम कियेरुए: पण तीं तैन भी अस्ने बराबर मुजुरी दिती। ¹³ तैनी तैन मैरां एक्की सैहीं ज़ोंव: मीयां मीं तीं सैहीं कोई बै इन्साफी नैइं कियोरी कुन तीं सैहीं अक दिनार दिहैड़री गल्ल नैइं कियोरी? ¹⁴ ऐलहेरेलेई ज़ैन तेरुए तैन ट्ला ते च़लो गा: ऐह मेरी मर्ज़ीए की पत्ती लगोरे मुजुरन भी एत्रे देइं। ¹⁵ कुन मीं ऐन हक नैइं की अपने माले मैरां ज़ैन चैहीं तैन केरीं: ते तीं मेरी गल्ल बुरी लगोरीए लगने? ¹⁶ बस्सा ज़ैना पत्ती थिये तैना पैहीले; ते ज़ैना पैहीले थिये; तैना पत्ती भोंनेण।

अपने मौतरे बारे मां यीशु एरी ट्लाइयोंव भविष्वाणी

( मरकुस 10 : 32 - 34 लूका 18 : 31 - 34 )

¹⁷ युरोशलमें जो गहंते बार यीशुए अपने बहरे चेले अलग नैइतां बत्ती मां तैन सैहीं ज़ोंव। ¹⁸ हेरह अस युरोशलमें जो च़लोरेम मैन्हेरु मठ्ठु पुरैहूतां ते ध्रम गुरु केरे हवाले केरी दैल्हे; ते तैना कतलेरो हुकम तैसेरे लेइ शुरू कैरेल्हे। ¹⁹ तैस गैर युहूदी केरे हवाले कैरेल्हे तैन मैन्हेरे मठ्ठैरी हासी बनाल्हे; ते तैस बैंतेंइ बाहेले, ते फिरी मैरी छ़डैल्हे; ते तै ट्लेइयांव दिहाड़े फिरी ज़िंतो भौल्हो।

एकी अम्मरी बिनती

( मरकुस 10 : 35 -45 )

²⁰ तैखन ज़ैबदेरे मठ्ठां केरी अम्मा अपने मठ्ठन साथी यीशु का आई; ते तैस्सका मथौ टेकतां चहती थी की किछ मिनत केरीं। ²¹ यीशुए तैस पुछ़ू: तु कुन चहचां? तैसां जुवाब दितो हुकम दे की तेरी बादशैही मां मेरे मठ्ठन मैरां अक तेरे दैहीने, ते दुइयांव बांए पासे बिशै। ²² यीशुए तैस जो ज़ोंव: तुस न ज़ांनथ की कुन लोरेथ मगने: ते कुन तुस तै कटोरो पी सख्तथ ज़ै आंव पीने बालोंइ तैनेइं जुवाब दितो: हां अस पी सख्तम। ²³ यीशुए तैन सैहीं ज़ोंव: तुस मेरे कटोरो पी सख्तथ; पण ऐन मेरु कम्म नैइं की एक्की दैहीने पासे ते होरी बांए पासे बिशैल्हीं: ऐह ठार ज़ैसेरे लेइ मेरे बोवेरी तरफां रखोरिए तै तैसेरे लेइए।

²⁴ ज़ैखन होरी दश चेलेंइं एन शुनु; त तैना बड़े नाराज़ भोईजे। ²⁵ पण यीशुए तैना नेड़े कुजाए; ते तैन सैहीं ज़ोंव: होरी कौमां केरे खढ़पैंच तैन पुड़ हुकुमत केरतन; ते तैनकेरे आफसर तैन पुड़ अखतियार रखतन। ²⁶ तुसंन मां ऐरहु न लोड़े भेवरु: बलके तुसंन मां ज़ै बडो बन्नो चहते तै सैभी केरी सेवा केरे। ²⁷ ज़ै सैभन कैरां बडो दर्जो हासल केरनो चहते; तै सैभी केरो गुलांम बने। ²⁸ किजोकी मैन्हेंरु मठ्ठू ऐलहेरे लेई नैइं एवरु की सेवा केराऐ; बल्के ऐलहेरे लेई की सेवा केरे, ते अपनी जान बड़ां केरे लेइ बलिदान केरे।

दूइय कानां केरू दृष्टान्त

( मरकुस 10 : 46 - 52 लूका 18 : 35 -43 )

²⁹ ज़ैखन यीशु त तैसेरे चेले यरीहोए मैरां च़लोरे थिये, त बड़े लोक तैस पत्पती आए। ³⁰ दुई कांने बत्ती मां बिशोरे थिये: ज़ैखन तैनेइं ऐन शुनु की यीशु इस बत्तां एवरोए; त तैना चिंडां मारने लगे: औ दऊदेरा मठ्ठा असन पुड़ रेहेंम केर। ³¹ लोक तैन कांन्न धमकाने लगे; की च़ुप रहथ, पण तैना मंना चिंडां मारने लगे: औ दऊदेरा मठ्ठा असन पुड़ रेहेंम केर। ³² यीशु खेड़ौहु ते तैन कुजेइतां पुछ़ने लगो: ज़ौथ आंव तुशे लेइ कुन केरीं? ³³ तैन कांनेइ जुवाब दितो; हे प्रभु अस चहतम की ईशी एछ़न लो एज्जे। ³⁴ यीशुए तैन पुड़ बड़ो तरस आव, ते तैनी तैनकेरे एछ़न पुड़ हथ रखो ते तैन लहंने लगे, ते दुइये कांने यीशु पत्ती च़ले जे।।

यरूशलेमे मां ज़ींत दाखल

( मरकुस 11 : 1 - 11 ; लूका 19 : 28 - 40 यूहन्ना 12 : 12 - 19 )

¹ ज़ैखन तैना युरोशलेमेरे नेड़े पुज़े; त ज़ैतून पहाड़े पुड़ बैतफिगे मैरां अपने दुइ चेले ऐन ज़ोइतां अग्रोहुं भेज़े की। ² सामने उस ड्लोंवें मां गाथ: ते तैड़ी पुज़ैल्हे, त तुसंन अक गधी बंधोरी मैल्ह्नीयें, ते तैस साथी तैसेरो अक बचो भी भोंनोए: तैस खोल्तां मीं का आंन्हां। ³ अगर कोई तुसंन किछ पुछ़े त तुस ज़ोइयथ, की प्रभु परमेशरे ऐसेरी ज़ुरुरते: ते तै लुशी तैस वापस भेज़ैल्हो। ⁴ इन सभ किछ ऐलहेरे लेई भोवं; की नेबेइं ज़ैन ज़ोवरू थुं; तैन पुरु भोवं की।

⁵ सिवंनेरी कुइये सैहीं ज़ोथ की तेरो बादशहा तीं का एवरोए, ते तै बड़ो हालिमें ते तै गैधी पुड़ च़ैढ़तां एवरोए: बल्के गैधरे बचे पुड़। ⁶ तैठ्ठां चेले च़ले जे ते ज़ैन्च़रे यीशुए हुकम दितोरो थु: तैन्च़रे कियूं। ⁷ तै गधी ते तैसारो बच्चो एन्तां पुज़े: ते तैस पुड़ लिगड़ां छ़डां: ते यीशु तैस पुड़ च़ैढ़तां च़लो। ⁸ हछै लोकन मैरां बड़े लोकेइं अपन लिगड़ां बत्ती मम्हेइं बछ़ेवरां थियां, ते किछेंइं बुट्टा केरे डाल केटतां बत्ती मम्हेइं छ़डोरे थिये। ⁹ ते तैना लोक ज़ैना यीशु सैहीं साथी अग्री अग्री पत्ती च़लोरे थिये: तैना नहरे देते थिये; की दावदेरे मठ्ठेरी रीफ भोए: मुबारके तै ज़ै परमेशरे नोवें सैहीं एइते: सैरी दुनियाई मां तैसेरी तारीफ भोए। ¹⁰ ज़ैखन यीशु युरोशलमे मां पुज़ो; त सारे शहरे मां हलचल मैच़ी जेई: ते लोक पुछ़ने लगे की ऐह कौने? ¹¹ सारे लोकेइं ज़ोंव: की ईही गलिलेरे शहर नस्र्तेरो नब़ी यीशुए।

मन्दरेरे बुपारी कढने

( मरकुस 11 : 15 - 19 लूका 19 : 45 - 48; यूहन्ना 2 : 13 -22 )

¹² यीशु प्राथना भवने मां जेव, ते ज़ैना तैड़ी बपारी बपार केरते थिये सभ तैठां कढे: तैनी सुनरां केरी दुकान ते कुबूतर बेच़ने बालां केरी ठारां ट्लोड़ी। ¹³ ते तैनी तैन जो ज़ोंव: लिखेरुए की एस जो मेरु घर दुवा केरनेरु घर ज़ौल्हे: पण तुसैहीं त एह डैकू केरो अड्डो बनेवरोए।

¹⁴ तैखन कांने टोंटे प्राथन भावने मां यीशु का आए: ते तैनी तैना सभ बज़्झ़ाए। ¹⁵ पण ज़ैखन मन्दिरेरे पुरैहूत ते व्य्वसथारे गुरुएइं ईही तमाशो हेरो ते हेकली मां मठ्ठन कैरां नहरे देंते शुने की दावदेरे मठ्ठैरी तारिफ भोए: ऐन हेरतां तैन बड़ी सर्क आई। ¹⁶ तैनेइं यीशुए पुछ़ू: की तु शुन्ने लोरोस की ऐन कुन ज़ोंने लोरेन? यीशुए तैन सैहीं ज़ोंव: हां आंव शुन्ने लोरोइं तुसैइं कधै नैइं पढ़ैरू की तीं दुध पींते बच्न कैरां भी तीं अपनी पुरी तारीफ क्मावाइ। ¹⁷ ते ज़ैखन तै शहर छ़ेडतां बैरोहुं च़लो जेव त: बैतनियां ड्लोंवें मां रात गुज़ारी।

बे फल अंजीरेरो बुट

( मरकुस 11 : 12 - 14, 20 - 24 )

¹⁸ झ़ैझ़ां ज़ैखन यीशु शहरे मैझो एवरो थु; त तैस ढ्लुख लगी। ¹⁹ तैनी बत्तरे ड्लैखी अक फैगेरो बूट लाहु: ते ज़ैखन तै नेड़े पुज़ो त पट्लां केरे आलावा तैस पुड़ किछ न लाहुं: तैलहेरे लेई तैनी बूटे जो ज़ोंव: कधै भी तीं पुड़ फल न लगेल्हो ते तैखने तै बूट शुकी जेव। ²⁰ चेलेंइ ऐन लाहुं त हेरान भोइतां पुछ़ने लगे: ऐह फैगेरो बूट अक दम कैन्च़रे शुकी जेव? ²¹ यीशुए जुवाब दितो: आंव तुसंन सैहीं सच़्च़ ज़ोताइं की अगर तुसंन विशवास पक्कोए ते तैसमां कोई शक नैइं त ज़ैन फैगेरे बूटे सैहीं भोंव तैन तुस भी केरी सखतथ: बल्के ऊस पहाड़े जो ज़ोल्हे की एठां उखड़तां सुमुंद्रे मां गा: त तैन्ने भोल्हु। ²² अगर तुसंन विशवास पक्कोए त ज़ैन किछ तुस प्राथनाइं मां मग्गैल्हे; तैन तुसंन मैल्ही गह्लु?

यीशु एरे इखतीयारे पुड़ सुवाल

( मरकुस 11 : 27 - 33 ; लूका 20 : 1- 8 )

²³ ज़ैखन यीशु प्राथन भावने मां ज्ञान शुंन्ने लोरो थु; त मन्दिरेरे पुरैहूत, ते युहूदी सियांने यीशु का एइतां पुछ़ू: तु ऐन कम्म कसेरे अखतियारे सैहीं केरतस; ते तीं ऐन कम केरनेरो अखतियार कैनी दितोरोए? ²⁴ यीशुए जुवाब दितो: आंव भी तुसंन अक गल्ल पुछ़ताइं: अगर तुस तैलहेरो जुवाब दैल्हे; त आंव भी ज़ौइल्हो की आंव ऐन कम कसेरे अखतियारे सैहीं केरताइं। ²⁵ युहुन्ना ज़ै बपतिसमों देने बालो थु; तै कौठ्ठैरो थु? अस्मानेरी तरफां थु, या की इन्सानेरी तरफां थु? तैना एपु मम्हेइं बेंस केरने लगे, की अगर अस ज़ोंतम की अस्मानेरी तरफां थु; त फिरी तैनी ज़ोनुएं की फिरी तुसैइं तैसेरू यकीन की नैइं कियेरू। ²⁶ पण अगर अस ज़ोंतम की इन्सांनेरी तरफां थु: त लोकां केरो भी डरे किजोकी लोक युहुन्ना नब़ी मनते थिये। ²⁷ ऐलहेरेलेई: तैनेइं यीशुए जुवाब दितो: अस केंची न ज़ांनम: यीशुए भी तैन सैहीं ज़ोंव: त आंव भी तुसंन सैहीं न ज़ोंइ की आंव इन कम्मा कसेरे आखतियारे सैहीं केरताइं।

दुइय मठ्ठां केरू दृष्टान्त

²⁸ हुनी तुशी राई कुने? केंची मैन्हेरां दुई मठ्ठां थियां; तैनी बडे मठ्ठै का गैहीतां ज़ोंव: अज़ दाछ़री बागी मां गा ते कम्म केर। ²⁹ तैनी जुवाब दितो: आंव न गैहीं, पण बादे मां पशतेइतां च़लो जेव। ³⁰ फिरी बोवें होरी मठ्ठै का भी गैहीतां एन्ने ज़ोंव: तैनी जुवाब दितो: हछा खरी जनाब: पण जेव न्ना। ³¹ ऐन दुइने मैरां केनी अपने बोवेरो हुकम मन्नो? तैनेइं जुवाब दितो बडे हुकम मन्नो: यीशुए तैन सैहीं ज़ोंव, की आंव तुसंन सैहीं सच़्च़ ज़ोतइं की चुंगी धड़त घिंन्ने बाले ते बदचलन कौन्शां तुसंन कैरां पैहिले परमेशरेरी बादशेही मां दाखल भौल्ही। ³² किजोकी युहन्ना तुसंन धर्मेरी ते परमेशरेरी बत्त हेराने एवरो थु: ते तुसैइं तैसेरू यकींन न कियूं; पण चुंगी घिंन्ने बाले ते बदचलन कौन्शेइं तैसेरू यकींन कियूं ते; ऐन हेरतां भी तुसैइं पसतांव न्ना की तैस पुड़ विशवास केरेथे।

दुष्ट ज़मीबदारेरू दृष्टान्त

( मरकुस 12 : 1 -12 ; लूका 20 : 9 -19 )

³³ अक होरी कहांनी शुना: एकी ज़िम्दारे अक दाछ़ारी बाग लाई ते तैसेरे च़ोवरे पासन बाड़ दितो; ते दाछ़रो रस कढनेरे लेइ अक हौवज़ बनाव; ते तैस बागरी हेर गैश केरनेरे लेइ अक उची कुड़ी बनाई ते फिरी तै काशत केरने बालन ठेके पुड़ देइतां कोंच दुर प्रदेशे जो च़लो जेव। ³⁴ ज़ैखन दाछ़ ट्लोड़नेरो मोको आव त तैनी अपनो हेसो नैनेरे लेइ अपने नोकर तैन ठैकेदारन का भेज़े। ³⁵ ते ठैकेदारेइं तैसेरे नोकर कोई झ़ूसो कुटो कोई मारो ते केंची जेई घोड़ेइं दिती। ³⁶ तैखन मालके किछ होरे नोकर भेज़े ज़ैना पैहिलन कैरां जादे थिये: पण ठैकेदारेइं तैन सैहीं भी तैरहो ज़ैरहो सुलूख कियो। ³⁷ आखर कार तैनी अपनु मठ्ठु तैन का भेज़ु: ते सोचु की मेरे मठ्ठैरो त लिहाज़ कैरल्हे। ³⁸ पण ज़ैखन ठैकेदारेइं तैसेरू मठ्ठु लाहूं: त एपु मम्हेंइं मशोरो केरने लगे: की एजा ऐस सेवां मारम ते ऐसेरी बागी पुड़ कब्ज़ो केरम। ³⁹ त्ताली तैनेइं तैन मठ्ठु बागी कैरां बेइर नैइतां मैरी छ़डु। ⁴⁰ ते ज़ैखन बागरो मालक एपु एजैल्हो, त तैन ठैकेदारन सैहीं कैरो सुलूख कैरेल्हो? ⁴¹ तैनेइं जुवाब दितो: तै तैन बदमाशन बुरे तरीके सैहीं मैरतां बागरो ठैको होरी ठैकेदारन दैल्हो: ज़ैना मोके पुड़ तैसेरो हेसो तैस देन। ⁴² यीशुए तैन सैहीं ज़ोंव: की तुसैइं पबित्र बचने मां नैइं पढ़ैरू की: ज़ै घोड़ मिस्त्रेइं रद्दी कियोरो थु, तैहे कुनेरो घोड़ भौल्हो: ऐन कम परमेशरे कियेरुए, ते ईशी नज़री मां ऐन अजीबे? ⁴³ ऐलहेरे लेइ आंव तुसंन सैहीं सच़्च़ ज़ोतइं: की परमेशरेरी बादशाही तुसंन कैरां घिंनी गाहेले: ते तैन लोकन ज़ैना फल दैल्हे तैन दिती गाहेली। ⁴⁴ ते ज़ै कोई इस घोड़े पुड़ खिरकेल्हो त तैसेरे टुकड़े टुकड़े भोई गाहेले: पण ज़ै एस उंढौ बिछ़ड़ेल्हो त तैस पिह्तां छ़डैल्हो। ⁴⁵ मन्दिरे पुरैहूत ते फ्रिसैइं यीशुएरी एह कहनी शुंनतां सैम्झ़ी जे की यीशु ऐन गल्लां इशे बारे मां ज़ोंने लोरोए| ⁴⁶ तैनेइं यीशु ट्लांनेरी कौशीश की पण लोकन कैरां डरते थिये किजोकी तैना यीशु नब़ी मनते थिये।।

ड्लाहेरे धामरू दृष्टान्त

( लूका 14 : 15 - 24 )

¹ यीशु फिरी कहेंनरे तरीके सैहीं ज़ोंने लगो। ² अस्मानेरी बादशाही एकि बादशाहेरी ज़ैरीए; ज़ैनी अपने मठ्ठैरे ड्लाहे मां। ³ अपने नोकर भेज़े की तैन लोकन ज़ैन जेई ड्लाहेरी धाम बनेवरी थी: तैन कुजान पण तैना न आए। ⁴ तैखन तैनी अपने नोकर ऐन ज़ोइतां भेज़े की ज़ैन जेई ड्लाहेरी धाम बनेवरी थी, तैन ज़ोथ की रौट्टी बनोरीए मीं बडां बडां गब्बां मारोरन: ते सभ किछ तियार भौवरुए, ते ड्लाहेरी धामी मां शामल भौथ। ⁵ पण तैनेइं कोई परवहा न की, कोई अपने उडारे मां च़लो जेव; ते कोई अपने कारोबहरे मां लग्गो ते कोई कौरां च़लो जेव। ⁶ किछ़ेइं तैसेरे नोकर ट्लाइतां तैनकेरी बेज़ती की: ते जाना भी मैरी छ़ड्डे। ⁷ बादशाहे बड़ी सर्क आई: ते तैनी अपने सिपाही भेज़तां तैना कातली भी मैरी छ़ड्डे ते तैनकेरे शहरे अग़ लेइतां छ़डी। ⁸ तैखन तैनी अपने नोकरन सैहीं ज़ोंव: ड्लाहेरी धाम तियारे पण ज़ैन कुजेवरे थिये तैन एस काबले नैइं। ⁹ ऐलहेरेलेइ तुस च़ुबत्ती मां गाथ ते ज़ैत्रे तुसंन मैल्ह्तन, तैना सभ इरहां कुजाथ। ¹⁰ त्ताली तैना नोकर च़ले जे, ते ज़ैत्रे खरे बुरे तैन मैल्हे: सब अकौठ्ठै ड्लाहे मां आंन्हें ते मेंम्हांनेइ सैहीं घर भेरतां भोवं।

¹¹ ते बादशाह मेंम्हान तकने अंत्र आव: त तैसेरी नज़र एकी मैन्हुं पुड़ पैई ज़ै ड्लाहे मां रोड़ां लिगड़ां लेइतां न थु ऐवरो। ¹² बादशाए तैस पुछ़ू मियां; तु ड्लाहेरे लिगड़न मां की नैइं एवरो: पण तैसेरी ज़बान बंद भोई जेई। ¹³ ऐस गल्ली पुड़ बादशाहें अपने नोकरन सैहीं ज़ोंव: ऐसेरे हथ पाव बैंधतां बेइर अंधरे मां छ़ड्डा ज़ैड़ी लेरां देंतो राहे, ते दंत च़ापतो राहे। । ¹⁴ किजोकी कुजेवरे त बड़ेन पण च़ुनोरे थौढ़ेन।

कैरे जो धड़त देनी

( मरकुस 12 : 13 - 17 लूका 20 : 20 - 26 )

¹⁵ तैखन फ्रिसी तैठ्‌ठां च़ले जे: ते एपु मम्हेइं मशोरो केरने लगे की एसेरी कोई गल्ल ट्लांनेरे लेइ किछ करवाई की गाहे। ¹⁶ एल्हेरेलेई तैनेइं अपने किछ चेले ते हिरोदेसेरे किछ मैन्हुं यीशु का भेज़े: ते तैनेइं ज़ोंव: की एह गुरु अस ज़ांनतम की तु सच़्च़ ज़ोतस ऐन सोचनेरे बगैर की कौन कैरोऐ सच़ैइ सैहीं परमेशरेरी बत्तां च़लनेरी शिक्षा देतस। ¹⁷ एल्हेरेलेई असंन ज़ौ की तेरी रेई मां कैसरे जो टेक्स येंनी मैलियो देनो ठीके की नैइं? ¹⁸ यीशु तैनकेरी चाल सैमझ़ी जेव: ते ज़ोंने लगो: एह लोकांव मीं कीजो अज़मातथ? ¹⁹ ज़ै सिक्को टेक्सेरे हिसाबे मां देतथ मीं हेराथ: तैनेइं अक दिनार तैसका आंन्हों। ²⁰ यीशुए तैन पुछ़ू: इस पुड़ कसेरी मौहरे, कने कसेरू नोवं लिखेरुए? ²¹ तैनेइं जुवाब दितो: कैसरेरु, तैखन यीशुए तैन सैहीं ज़ोंव ज़ैन कैसरेरुए तैन कैसरे जो देथ ते ज़ैन परमेशरेरुए तैन परमेशरे जो देथ। ²² तैना ऐन शुनतां हेरान रेही जे, ते तैस तैड़ी छ़ेडतां च़ले जे।

कयामत ते ड्ला

( मरकुस 12 : 18 - 27 लूका 20 : 27 - 40 )

²³ तैस्से दिहैड़ी किछ सुदुकी ज़ैना ज़ोते थिये की कियांमत नैइं भोंनी: यीशु का आए। ²⁴ ते तैस सैहीं ऐह सुवाल कियो की मुसै नेबें ज़ोवरुए की अगर कोई मैन्हुं बैओवलाध मैरी गाहे त तैसेरो ढ्ला तैसेरी कौन्शी सैहीं ड्लाह केरे ताके अपने ढ्लाऐरे लेइ औवलाध पैइदा केरे। ²⁵ ईशे इड़ी सत ढ्ला थिये: पैहिले ड्लाह कियो; ते तै मैरी जेव, किजो की तैस औवलाध न थी तैनी अपनी कौन्श अपने ढ्लाएरे लेइ छ़ेडी दिती, ताके तै तैसेरी कौन्श बेंनी गाहे। ²⁶ ऐहे वजा तैसेरे दुईयांव ट्लेइयांव बल्के सत्ते ढ्लांन सैहीं एन्ने भोंतु राहूं। ²⁷ आखर कार तै कौन्श भी मैरी जेई। ²⁸ हूंनी ज़ो तै कौन्श कियांमतरे दिहाड़े तैन सत्ते ढ्लांन मैरां तै कसेरी कौन्श भौल्ही? किजो की तै सैभी केरी कौन्श बनोरी थी। ²⁹ यीशुए तैन जुवाब दितो: की तुसंन मां गलतीए तुस पबित्र बचने ते न परमेशरेरी शक्ती ज़ांनथ: ते एस्से वजाही सैहीं तुस टेप्लोरेथ। ³⁰ किजो की ज़िंते भोंनेरां पत्ती तैना ड्लाह न कैरल्हे: पण तैन सुर्गे मां परमेशरेरे सुवर्गदुतां केरे ज़ैरे भोंनेण।

सेभना बड्डो हुकम

( मरकुस 12 : 28 - 34 ; लूका 10 : 25 -28 )

³¹ ते ज़ैड़ी तगर कियांमतरो येंनी मुड़दन मैरां ज़िंते भोंनेरो सुवाले: कुन तुसैइं तैन नैइं पढ़ेरु ज़ैन परमेशर ज़ोते की, ³² आंव अब्रहांमेरो परमेशर: ते इज़ाकेरो परमेशर ते याकुबेरो परमेशरांइ तै मुवोरां केरो परमेशर नैइं बल्के ज़िंतां केरो परमेशरे। ³³ लोक तैसेरी ऐह शिक्षा शुनतां हेरान रेहिजे। ³⁴ ज़ैखन फ्रिसैइं ऐन शुंनु की तैनी सुदुकी केरू आशी बंद कियेरुए: त तैना तैस्का सभ अकौठ्ठै भुए। ³⁵ तैन मैरां अक ज़ै व्य्वसथा ज़ांन्ने बालो गुरु थु, ते तै अज़मानेरे लेइ यीशुऐ पुछ़ने लगो। ³⁶ हे गुरु शासत्रे मां सैभन कैरां बडो हुकम कौन ज़ैरो हे? ³⁷ यीशुए जुवाब दितो: पर्भु अपने परमेशरे सैहीं अपने सारे दिले सैहीं ते एपनी सैरी जानी सैहीं ते एपनी सैरी आक्ल्ली कैरां जादे मुहाबत कैरां। ³⁸ सैभन कैरां बडो ते पैहिलो हुकम इहे। ³⁹ ज़ै दुईयांवे तै इहे की अपने पुड़ौसी सैहीं अपने बराबर मुहाबत रख। ⁴⁰ सैरी व्य्वसथा नब़ी ते सहाफी एन्ने दुई हुकमन पुड़ जादे ज़ोर देतन।

मसीह केसेरू मठ्ठू ?

( मरकुस 12 : 35 - 37 लूका 20 : 41 - 44 )

⁴¹ ज़ैखन होरे फ्रिसी भी तैड़ी जम्हां भोई जे, त यीशुए तैन पुछ़ू। ⁴² मसहीएरे बारे मां तुशो कुन खियाले: की तैन कैसेरू मठ्ठुए, तैनेइं जुवाब दितो: दाऊदेरू? ⁴³ यीशुए तैन सैहीं ज़ोंव: त फिरी दावद पबित्र आतमांइ सैहीं तैसजो परमेशर कीजो ज़ोते ज़ैन्च़रे। ⁴⁴ पर्भु परमेशरे मेरे पर्भु परमेशरे सैहीं ज़ोंव: मेरे देहींने पासे बिश ज़ां तगर आंव तेरे दुशमन तेरे पावंन हैठ न ढ्लेंच़ीं। ⁴⁵ बस्सा अगर दाऊद तैसजो पर्भु ज़ोते त तैन तैसेरू मठ्ठु कैन्च़रे सैहीं भोई सखते? ⁴⁶ तैन मैरां केंचे भी एक्की गल्लरो जुवाब न देइ बटो ते न केंचे तैल्लां बाद होरे सुवाल पुछ़़नेरी हिंमत की, की तैस्सैहीं सुवाल केरन।

शास्त्रन ते फरीसन कैरां खबरदार

( मरकुस 12 : 38 - 39; लूका 11 : 43 , 46 ; 20 : 45, 46 )

¹ तैखन यीशुए बड़े लोकन सैहीं, ते अपने चेलन सैहीं ऐन ज़ोंव। ² व्य्वसथारे बडे बडे गुरू ते फ्रिसी मुसैरी गेद्दी पुड़ बिशोरेन। ³ ऐलहेरेलेई ज़ैन किछ तैना तुसंन शिखालन तैस पुड़ अमल केरथ: पण तैनकेरी नकली पुड़ न च़ेलथ; किजो की तैना ज़ोंने त ज़ोतन पण केरन न्ना। ⁴ तैना एरहो गिरको भारो ज़ै केन्ची छ़ुइयोए न्ना बैंधतां होरी केरे कंधै पुड़ छ़डतन, ते एपु अंग्लोइ भी न हुरांन । ⁵ तैना ज़ैन किछ केरतन सिर्फ़ मैन्ह्न मां हेरहंनेरे लेइ केरतन: किजोकी तैन बड़े बड़े जन्त्रां ते खुल्ले कुरते लातन। ⁶ तैन मजलसी मां बिशनेजेई बड़ी रोड़ी, ते उची गैद्दी तोप्तन: प्राथन भावने मां बिशने जेई एग्रीं कुरसी तोप्तन। ⁷ ते तैना चहतन की लोक असन का झुकतां नमसकार केरन: ते असन जो रबी ज़ोंन। ⁸ पण तुस अपने आपे जो रबी न ज़ुवेइयथ, किजोकी तुशो अक्के गुरुए, ते तुस सभ ढ्लाथ। ⁹ ते ज़मीनी पुड़ केन्ची जो बाजी न ज़ोइयथ: किजोकी तुशो अक्के बाजीए ज़ै सुर्गे मां हैं। ¹⁰ ते न केन्ची जो सुवामी ज़ोइयथ किजोकी तुशो अक्के सुवामीए ज़ै मसहीए। ¹¹ पण ज़ै तुसंन मां बडो भौल्हो; त तै तुशो सेवक बने। ¹² ते ज़ै कोई अपनो आप बडो बनाल्हो; त तै निक्ड़ो बनाव गाहेलो: ते ज़ै कोई अपनो आप निक्ड़ो बनल्हो त तै बडो बनाव गाहेलो।

शास्त्री ते फरीसी के पाखण्डे पुड़ मलामत

( मरकुस 12: 40 ; लूका 11 : 39 -42 , 44 , 52 ; 20 : 27 )

¹³ ओ फरेबी व्य्वसथारे गुराऊ, ते औ फ्रिसाव; तुसंन पुड़ अफ्सोसे: किजोकी तुसैइं अस्मानेरी बादशाही लोकां केरे दाखल भोंनेरे लेइ बंद केरतां रखोरीए; किजोकी न त तुस एपु दाखल भौथ; ते न तैन दाखल भोंने देथ। ¹⁴ ओ व्य्वसथारे गुराऊ ते औ फ्रिसाव, ते औ फरेबाव मीं तुसंन पुड़ अफ्सोसे: किजोकी तुस रेंडी कौन्शां केरे घरन पुड़ कब्ज़ो केरतथ: ते लोकन हेरांनेरे लेइ लेमीं लेमीं प्राथना केरतथ: तुसंन जादे सज़ाह मैल्ह्नीयें।

¹⁵ ओ व्य्वसथारे गुराऊ; औ फ्रिसाव, ते औ फरेबाव तुसंन पुड़ अफ्सोसे: किजोकी तुस अक मैन्हुं एपनी मेर्ज़ी पुड़ च़लने बालो तोप्नेरे लेइ पैनी मां ते खुशकी मां तोपतथ: ते ज़ैखन तै मैल्ह्ते त तैस्से एपु कैरां दुगनो न्रकी बनातथ।

¹⁶ ओ कांने रखवालाव तुसंन पुड़ अफ्सोसे: की तुस ज़ोतथ की अगर कोई मन्दिरेरी कसम केरे त कोई हर्ज़ नैइं: पण अगर मन्दिरेरे सौन्नेरी कसम केरे; त तै कसमरो पाबंद भौल्हो। ¹⁷ ओ कांनाव ते औ बै अक्लाव बडु कुने सौन्नु या मन्द्र: ज़ैसेरी वजाही सैहीं सौन्नु पाबित्र समझ़ू गहते? ¹⁸ तुस ज़ोतथ की अगर कोई मण्डैईयरी कसम केरे; त कोई हर्ज़ नैइं: पण च़ैढ़ोरी चीज़री कसम केरे त तै कसमरो पाबंद भौल्हो। ¹⁹ एह कांनाव बडी चीज़ कौ ज़ैरीऐ च़ाढ़ौरी चीज़ या मण्डैई: ज़ैसेरी वजाही सैहीं च़ढ़ौरी चीज़ पबित्र समझ़ी गह्चे? ²⁰ अगर ज़ै कोई मण्डैईयरी कसम केरते; त तै सैभी च़ैढ़ौरी चीज़ां केरी कसम केरते। ²¹ ज़ै कोई मन्दिरेरी कसम केरते त तै मन्दिरे मां रहंने बालेरी कसम केरते। ²² ते ज़ै कोई सुवर्गएरी कसम केरते, तै परमेशरेरे तखतेरी ते तैस पुड़ बिशने बालेरी कसम केरते।

²³ ओ व्य्वसथारे गुराऊ: ते ओ फ्रिसाव, ते ओ फरेबाव तुसंन पुसन पुड़ अफ्सोसे: किजोकी तुस पुत्नेरो ते सोंफ़रो, ते ज़ीरेरो दाशांव हेसो त परमेशरे जो देतथ: पण व्य्वसथारी जादे गिरकी गल्लां ज़ैंच़रे इन्साफ रेहेंम दिली, ते इमान बिस्रतां छ़डेरूए: ज़ुरूरी थुं तुस ऐन भी कैरथे ते तैन भी न शारेथे। ²⁴ ओ कांने रखवालाव तुस मश्शौ त छ़ांनतथ पण सथ्थौ ऊंट निक्लतथ।

²⁵ ओ फरेबी व्य्वसथारे गुराऊ तुसंन पुड़ अफसोस तुस कुटोरो त थाली बेरमेइं खुब मांज़तथ पण अन्त्रमेइं गन्दगी भेरतांए। ²⁶ ओ कांने फ्रिसाव पैहिले कटोरो ते थाली अन्त्रमेइं मांज़ा, ते फिरी बेरमेइं भी साफ भोए।

²⁷ ओ व्य्वसथारे गुराऊ; ओ फ्रिसाव, ते ओ फरेबाव तुसंन पुड़ अफ्सोस: किजोकी तुस तैन कब्रां केरे ज़ैरेथ ज़ैन सफैदी केरतां बेरमेइं बेड़ी रोड़ी लेहीयोचन, पण अंत्रमेइं मुड़दां केरी हड्डी, ते गैंदी मुशकां सैहीं भेरतां भोइचन। ²⁸ ऐन्च़रे तुस बेरमेइं, लोकन बड़े धर्मी लेहीयोतथ; पण अंत्रमेइं दुनियारी बेइमैनी सैहीं भेरतथ।

शास्त्रन ते फरीसन पुड़ सज़ाहरी भविष्दूवणी

( लूका 11 : 47 - 51 )

²⁹ ओ व्य्वसथारे गुराऊ, ओ फ्रिसाव, ते ओ फरेबाव तुसंन पुड़ अफ्सोस : किजोकी तुस नेबी केरे कब्रां आसथान सुवांरतथ ते धेर्मी केरी कब्रां बनातथ। ³⁰ ते ज़ोतथ कि अग्र अस अपने बाजी दादेरे ज़माने मां भौथे त नबी मारने मां तैनकेरु साथ न देथे। ³¹ एंच़रे तुस एपू मनतथ की तुस नेबी केरे कत्ल केरने बालां केरी ओवलाधथ। ³² हुनी तुस तैनकेरी राहोरी कसर भी पुरी केरा। ³³ ओ सप्पाव; ओ अफीकेरे बच्चाव: तुस नर्केरी अग्गी कैरां केन्च़रे बंच़ैल्हे? ³⁴ ऐलहेरेलेई आंव नेबन, ते अक्लमदां, ते व्य्वसथारे गुरु तुसंन का भेज़ने लोरोइं: तुस तैन मैरां किछन कत्ल कैरेल्हे, ते किछन सलेबी पुड़ टंगैल्हे: ते किछन अपने प्राथन भवने मां कोड़ेइं सैहीं मैरी दैल्हे: ते हर शहरे शहरे मां तैन पत्ती लग्गोरे राहेले। ³⁵ ताके सारे धैर्मी केरो खुन ज़ै धैरती पुड़ बगेवरोए, तै तुसंन पुड़ एज्जे: धर्मी हाबलेरे खुने कैरां लेइतां, ते बरकियाएरे मठ्ठै ज़करियेरे खुने तगर ज़ै तुसैइं मन्दिरे मां सुखनरी ठैरी कत्ल कियोरो थु। ³⁶ आंव तुसंन सैहीं सच़्च़ ज़ोताइं की इस ज़मानेरे लोकन ऐना सैरी गल्लां केरे ज़िमबार बनाऐ गाहेले।

यरूशलेमेरे लेई शोग

( लूका 13 : 34, 35 )

³⁷ ओ युरोशलम, ओ युरोशलम: तीं नब़ी कत्ल किये, ते ज़ैना तीं का भेज़े तैना तीं मारे कुटे, ते मीं केही फेरेइं सोचु की तेरे बच्चन जम्हां केरीं ज़ैन्च़रे कुकड़ी अपने बच्चन अपने फंघन हैठ रखचे: पण तुसैइं न सुखावं। ³⁸ हेरा तुशु घर तुशे लेइ बैरान भोई गहते। ³⁹ किजोकी आंव तुसंन सैहीं सच़्च़ ज़ोताइं: की तुस मीं हुंन्ना कैरां तैस बैले तग्र कधै न लैही बटल्हे, ज़ां तग्र न ज़ोल्हे मुबारके तै ज़ै परमेशरेरे नोवें सैहीं एइते।

मन्दरेरे बरबैदरी भविष्दूवणी

( मरकुस 13 : 1 -2 ; लूका 21 : 5- 6 )

¹ यीशु मन्दिरे मैरां निस्तां च़लोरो थु: ते तैसेरे चेले तैस का आए; ताके तैस मन्दिरेरी रंगब्रेंगी आमारतां हेरांम। ² यीशुए तैन सैहीं ज़ोंव: कुन तुस ऐन सब किछ हेरने लोरेथ? आंव तुसंन सैहीं सच़्च़ ज़ोताइं की इड़ी कोई घोड़े पुड़ घोड़ न राहेलो; बलके बछ़ौड़तां छ़ड्डैल्हे।

मसीबत ते दुःख

( मरकुस 13 : 3 - 13 ; लूका 21 : 7 -19 )

³ ज़ैखन तै ज़ैतुंन पहाड़े पुड़ बिशोरो थु; त तैसेरे चेले अलैहिदे ज़ैरे तैसका एइतां तैस सैहीं ज़ोंने लगे: की असंन ज़ो की ऐन गल्लां कतह्ली भोंनीण, ते तेरे एज्नेरो ते दुनियारो अंत भोंनेरो कुंन निशान भोंनोएं? ⁴ यीशुए तैन सैहीं ज़ोंव: खबरदार कोई तुसंन टपलाए न्ना। ⁵ किजोकी बड़े मेरे नोवें सैहीं एज्नैण ते तैनेइं ज़ोंनुए; की मसही आंवेइं; ते तैनेइं बड़े लोक टप्लांनेण। ⁶ लड़ैई भोंनीण ते लड़ैइ केरी अफुवां शुनोल्ही, खबरदार डेरथ न्ना: किजोकी ऐन गल्लां ज़ुरुरी भोंनीण पण हेजु खातमों नैइं भोंनो। ⁷ किजोकी कौंमी पुड़ कौंम, ते बादशैही पुड़ बादशाही चढ़हाई केरेल्ही, ते ठैरी ठैरी काल पैल्हो, ते भुंज़ल एज्जैल्हे। ⁸ मसिबतां केरी शुरुआत भी ऐन्ने गल्लेइं सैहीं भोंनीएं। ⁹ तैखन लोक तुसंन ट्लेइतां बड़ी सख्त सज़हा दैल्हे; ते कत्ल कैरेल्हे: ते मेरे नोंवेरे कारण सब कौमां केरे लोक तुस्न सैहीं बै रखेले| ¹⁰ तैस मोके बड़े लोक विशवासे कैरां दुर भोइतां एकी होरी ट्लुवाल्हे, ते एपु मम्हेइं भी बैर रखेल्हे। ¹¹ ते बड़े झुठे नब़ी दुनियाई मां निस्नैण ते तैनेइं बड़े लोक टप्लांनैण। ¹² बेइमानी बधने सैहीं बड़े लोकां केरो प्यार ठणढ़ौ भोई गहंनोएं। ¹³ ते ज़ै कोई अखरी दम्में तग्र सारे दुःख बरदाशत कैरेल्हो, त तैस्से मुखती मैल्ह्नीयें। ¹⁴ ते बादशैहीयरी खुशखेबरहरो सुसमाचार सैरी दुनियाई मां शुनाव गाहेलो; ताके सैरी कौंमा केरे लेइ गुवाही भोए तैखन दुनियारो खातमो भोंनोएं।

भारी मसीबतरी शुरूवात

( मरकुस 13 : 14 -23 ; लूका 21 : 20 -24 )

¹⁵ ज़ैखन तुस तैस ऊज़ड़ने बैली भिट्टी चिज़ी: ज़ैसेरे बहरे मां दांनिएल नेबें ज़ोवरू थुं: पबित्र ठैरी लाहेले; त पढ़ने बालो भी समझ़े। ¹⁶ की तैस मोके ज़ैना युहूदिये मां भौल्हे त तैना पहाड़न पुड़ जो नश्शन। ¹⁷ ते ज़ैना लाए पुड़ भौल्हे, त तैना उंढे न एजन; ते न होरी कोई चीज़ नैणे अंत्र न एजन। ¹⁸ ते ज़ै मैन्हुं उडारे मां भौल्हो, त तै लिगड़ां नैणे अंत्र न एज्जे।

¹⁹ पण अफसोसे तैन पुड़ ज़ैना तैईस गल्हे बिशने बैली भौल्ही ते ज़ैन केरे तैईस निक्के बच्चे दुध पिंते भौल्हे। ²⁰ ते प्राथन केरा की तुसंन हिंवतढ़े या सब्तेरी दिहेड़ी नशनू न पै। ²¹ किजोकी तैईस एत्री बडी मसीबत भौल्ही की: एत्री मसीबत कधी दुनियाई मां एवरी न भौल्ही; ते न कधी दुनियाई मां एज्जैल्ही। ²² अगर तैन दिहाड़ां केरी तैधात घटेवरी न भोथी: त कोई न थु बंच़नो: पण किछ खास मैन्हुं केरे लेइ तैना दिहाड़े घटेवरेन। ²³ अगर तैईस कोई तुसंन ज़ोए की मसही इड़ीए या उड़ीहे त तुस यकींन न केरथ।

²⁴ किजोकी झुठे मसही ते झुठे नब़ी दुनियाई मां निसनैण: ते तैनेइं एत्रां अजीब अजीब कम्मा केरन्न; ते अजीब नशांन हेरांनेण ते भोई सखे त च़ुनोरे लोक भी टेप्लोनेण। ²⁵ हेरा मीं तुसंन पैहिलु ज़ेवरुए। ²⁶ अगर कोई तुसंन सैहीं ज़ोए की हेरा तै बियाबाने मां हैं त तुस बेइर न गैहीयथ या कमरे मां हैं त तुस यकींन न केरथ।

²⁷ किजोकी ज़ैन्च़रे बिजली एक्की पासेरां चेमकतां होरी पासे लैहीयोचे: तैन्च़रे मैन्हेंरू मठ्ठू भी एज्जैल्हु। ²⁸ ज़ैड़ी ज़ीग भोते तैड़ी ईल्लां जम्हां भोइचन।

मैंन्हेरे मठ्ठेरू दुबारां एजनू

( मरकुस 13 : 24 - 27 ; लूका 21 : 25 - 28 )

²⁹ तैन दिहाड़न बाद दिहाड़ो कालो भोंनोएं; ते चेंदनरी लो भी खतम भोनीएं: ते अंम्ब्रेरां तारे बिछ़ड़नैण ते सारु अंम्ब्र हिलनुएं। ³⁰ तैखन मैन्हेरे मठ्ठैरो निशान अंम्ब्रे मां लैहियोंनोएं: ते दुनियारी सैरी कौंमा छाती कुटैल्ही; ते मैन्हेरु मठ्ठु अंम्ब्रे मैरां बिदलारी पुड़ बेड़ी अजीब कुदरूती सैहीं एंइते लाहेले। ³¹ ते तै अपने सुवर्गदूत ते बड़ नर्शींगेरी अवाज़ेारे ज़ोर शोरे सैहीं साथी भेज़ैल्हो: ते तैन परमेशरेरे लोकन च़ेवरे पासन येनी अंम्ब्रेरे एक्की पासैरां देइतां होरी पासे तग्र सैभंन जम्हां कैरेल्हे।

अंजीरेरे बुटेरी मिसाल

( मरकुस 13 : 28 - 31 ; लूका 21 : 29 - 33)

³² हुंनी तुस फैगेरे बुटे कैरां ईही सबक शिखा: ज़ैरहे तैसेरे डाल नर्म भोतन ते पट्लां निस्तंन त तुस बुझ़तथ की गेर्मरो मौसम एजनें बालोए। ³³ ऐन्च़रे ज़ैखन तुस ऐन गल्लां भोंती लाहेले: त तुस बुझ़ेल्हे की तै नेड़े बल्के दारे पुड़ पुज़ोरोए। ³⁴ आंव तुसंन सैहीं सच़्च़ ज़ोतां की ज़ां तग्र ऐना सभ किछ पुरु न भोए: तां तग्र एस कौंमरो खातमों न भोए । ³⁵ असमान ते ज़मीन टेली गाहेलु पण मेरी गल्लां कधै न टेलैल्ही। ³⁶ तै दिहाड़ी ते तै घड़ी कैखन एजनिएं: तैस कोई न ज़ांने ते न तैसरो पत्तो अस्मानेरे दूते ते न मठ्ठै पण सिर्फ बोवे पत्तोए। ³⁷ ज़ैंच़रे नुहेरे ज़माने मां भोवरू थुं: तैन्च़रे मैन्हेरे मठ्ठैरे एजनेरे बेले भोनुएं। ³⁸ किजोकी तौफान एजने कैरां पैहिले भी लोक खाते पिंते थिये: ते ड्लहा भी केरते रहते थिये: ते नुहेरे किशती मां गहने तग्र ऐन सभ किछ भोंतु राहूं। ³⁹ तैन पत्तो भी न थु की कुन भोंने बालुए: एड़ी तग्र की तौफान आव ते तैनी सब किछ रुढ़ैहितां नीहूं: ते मैन्हेरे मठ्ठैरु एज्नु भी एरहु भोंनुएं। ⁴⁰ तैखन उडारे मां दुई मैन्हुं कम्म केरते भौल्हे ते अक नियो गाहेलो, ते दुईयांव तैड़ी राहेलो। ⁴¹ ते दुई कौन्शां ढ्लाहटे पिह्ंती भौल्ही त अक निगाहैल्ही ते होरी तैड़ी राहेल्ही । ⁴² तुसां बिंझ़े राथ किजोकी तुस न ज़ांनथ की तुशो प्रभु कैईस एज्नोएं। ⁴³ पण याद रखा की अगर घररे मालके पत्तो भोए की च़ौर कताल्ही एज्नोएं: त तै बिंझ़ो बीशे ते अपने घरे च़ोरी न भोंने दे। ⁴⁴ एल्हेरेलेई तुस भी तियार राथ: किजोकी ज़ैखन तुसंन शक भी नैइं भोंनी त मैन्हेरु मठ्ठु एजी गहंनोएं।

वफादार दास ते दुष्ट दास

( लूका 12 : 41 - 48 )

⁴⁵ फिरी तै इमांनदार ते हुशियार सेवक कौने ज़ै तैसेरे मालके अपने नोकरन पुड़ पुछ़नो ग्न्नो रखे ताके मोके पुड़ रौट्टी दे। ⁴⁶ तै नोकर बड़ो मुबारके: अगर तैसेरो माल्क एइतां तैस्कैरां एरू ज़ैरू केरतो लाहे। ⁴⁷ त आंव तुसंन सैहीं सच़्च़ ज़ोताइं की तै मालक अपने घरेरो सारो अख्तियार तैसेरे सुपुर्द कैरेल्हो। ⁴⁸ पण अगर तै नोकर बुरो निसे त तै अपने दिले मां ऐन ज़ोए की मेरे मालकेरे एजने हेजु बड़ु च़ीरे। ⁴⁹ ते अपने सैथन मारने कुटने पै ते शरैपण सैहीं खानु पिनु शुरू केरे। ⁵⁰ ते तैसेरो मालक कौस्कोही एरही दिहेड़ी एजे ज़ैईस तैस नोकरे उमीदे न भोए: ते तैसेरो मालक एजी गाहे। ⁵¹ मालक तैस लाठैइं सैहीं मार दुवेइतां जैल्ही मां कैद केरतां छ़ड्डैल्हो ज़ैड़ी तैनी लेरां देंनी ते दंत च़ापतु रहंनुएं।

दश कुवैरी केरू दृष्टान्त

¹ तैस मोके अस्मानेरी बादशाही तैन दश ऐड्लैही कुईयां केरी ज़ैरी भौल्ही: ज़ैना अपनी लालटेन बैलतां लाड़े सैहीं मिलनेरे लेइ निसी। ² तैन मां पांच़ बेवकुफ थी, ते पांच़ बेड़ी अकलमंद थी। ³ ज़ैना बेवकुफ थी तैनेइं लालटेना त निही; पण तेल साथी न नियो। ⁴ पण ज़ैना अकलमंद थी तैनेइं लालटेना केरे अलावा कुपण मां होरो तेल साथी निहीयो। ⁵ लाड़ो एजने च़ीर लग्गु, ते तैना सभ बलगते बलगते झ़ूली जेई।

⁶ अधी रात भुई त शौर मच़ी की लाड़ो ऐवरोए: ते तैस सैहीं मिलनेरे लेइ एजा। ⁷ तैखन सैरी अड्लैही कुईयां बिंझ़ी; ते एपनी एपनी लालटेना बालने लेगी। ⁸ बेवकुफ कुईयेइं अकलमंद अड्लैही कुइंयन सैहीं ज़ोंव; अपने तेले मैरां थौड़ो ज़ैरो तेल असन भी देथ: किजोकी इशी लालटेना हिशने लोरीन। ⁹ अकलमंद अड्लैही कुईयेइं जुवाब दीतो; असन का एत्रो तेल नैइं: तुस दुकानी पुड़हेरां आंन्हां। ¹⁰ ज़ैखन तैना तेल घिंन्ने दुकानी पुड़ च़ेलोरी थी त तैत्रे मां लाड़ो पुज़ी जेव: ज़ैन अड्लैही कुईयां तियार थी तैना लाड़े सैहीं साथी अंत्र ड्लाहे मां च़ेली जेई, ते दार बंद केरतां छ़डु। ¹¹ बादे मां तैना होरी अड्लैही कुईयां भी पुज़ी ते ज़ोंने लेगी: ओ प्रभु ओ प्रभु इशे लेइ दार खोल्हा। ¹² पण तैनी जुवाब दितो: सच़्च़ त ऐने की आंव तुसंन ज़ैनी न्ना। ¹³ ऐलहेरे लेई बीझ़े राथ: किजो की तैस दिहैड़ारो न तुसंन पतोए, ते न तैस घेड़ारी कोई खबरे।

तोड़ां केरू दृष्टान्त

( लूका 19 : 11 - 27 )

¹⁴ इही तैस मैन्हेंरो ज़ैरो हाल भोनोएं: ज़ै दुर प्रदेशे गहंने बालो थु: तैनी अपने नोकर कुजाए ते सारु घर बार तैनकेरे सुपुर्द किंयु। ¹⁵ तैनी सैभन तैनकेरी क्रतुत्रे हिसाबे सैहीं रकम दिती: एक्की पांच़ तोड़े दिते होरी दुई तोड़े दिते, ते एक्की आके तोड़ो दितो, ते एपु प्रदेशे जो च़लो जेव। ¹⁶ ज़ैस नोकरे पांच़ तोड़े मैलोरे थिये: तैनी गैहीतां, ते कारोबार केरतां पांच़ तोड़े होरे कमाए। ¹⁷ ऐन्च़रे ज़ैस नोकरे दुई तोड़े मैल्होरे थिये: तैनी दुई होरे कमाए। ¹⁸ पण ज़ैस नोकरे अक तोड़ो मैल्होरो थु: त तैनी गत्त घेड़तां मालकेरी रकम छ़पैइतां छ़डी।

¹⁹ बड़े च़ीरेरां पत्ती तैसेरो मालक वापस आव: ते नोकरन सैहीं हिसाब केरने लगो। ²⁰ ज़ैस नोकरे पांच़ तोड़े मैल्होरे थिये: तैनी गैहीतां पांच़ तोड़े हाज़र कमाए ते ज़ोंने लगो: ओ मालिक तीं पांच़ तोड़े दितोरे थिये: ते हेर मीं पांच़ तोड़े होरे कमाए। ²¹ मालके तैस्सैहीं ज़ोंव: शाब्बाश इमानदार नोकरा तीं थोड़ी ज़ैरी रक्मी पुड़ इमानदेरी सैहीं कम कमावं: आंव तीं बेड़ी चीज़ां केरो मुख्तियार बनाल्हो: ते अपने मालकेरी ख़ुशी मां शांमल भो।

²² ते ज़ैस दुई तोड़े मैल्होरे थिये, तै भी आव ते ज़ोंने लगो: ओ मालिक तीं मीं दुई तोड़े दितोरे थिये: ते हेर मीं दुई तोड़े होरे कमाए। ²³ मालके तैस सैहीं ज़ोंव: शाब्बाश इमानदार नोकरा तीं थोड़ी ज़ैरी रक्मी पुड़ इमानदेरी सैहीं कम क्मावं: आंव तीं बेड़ी चीज़ां केरो मुख्तियार बनल्हो: ते अपने मालकेरी ख़ुशी मां शांमल भो।

²⁴ ते ज़ैस अक तोड़ो मैल्होरो थु, त तै भी हाज़र भोव ते ज़ोंने लगो: ओ मालिक आंव ज़ांनतो थु, की तु बड़ो बुरो मैन्हुंस ज़ैड़ी तीं फसल नैइं बेवरी तू तैठां फसल कटतां ते ज़ैड़ी तीं अक गलैव भी नैइं बछ़ौड़ोरो तू तैठां आंन जम्हां केरतां। ²⁵ ऐलहेरे लेई मीं तीं कैरां डेरतां तेरी रकम गत्ते मां देबतां छ़डी: ते हेर इहे तेरी रकम। ²⁶ तैसेरे मालके जुवाब दितो: औ बेईमान ते निकम्मां नोकरा अगर तीं पत्तो थु, की आंव ज़ैड़ी बिज़ न बेइं तैड़ी फसल कटतां ते ज़ैड़ी मीं अक गलैव भी नैइं बछ़ौडोरो त तैठ्ठां आंन जम्हां केरतां। ²⁷ त तीं ऐन लोड़तु थुं कमेवरू की मेरी रकम शौहुकारां केरे हवाले केरनी थी: ताके आंव वापस एइतां अपनी रकम सुते समेत उसुल केरेथो। ²⁸ हुनी ऐन केरा की एस कैरां तै तोड़ो नैइतां तैस देथ ज़ैसका दश तोड़ेन। ²⁹ ऐलहेरे लेई ज़ैसका आए, तैस होरु भी दितु गहलु, ते तैसका जादे भोइ गहलु: ते ज़ैसका किछ भी नैइं, तैस कैरां तैन भी घिंन्नी गाहेले ज़ैन तैसक आए भी। ³⁰ ते ऐस नक्म्मे नोकरे बेइर आंधरे मां छ़ड्डा, ज़ैड़ी ऐह लेरां देंतो ते दंत च़ापतो राहे।

इन्साफेरी दिहाड़ी

³¹ ज़ैखन मैन्हेरु मठ्ठु एपनी मेम्हाई मां अपने सुवर्गदुतन सैहीं साथी एज्जैल्हो त अपने मेम्हारे तख्ते पुड़ बिशैल्हो। ³² ते सैरी कौंमा तैसका जम्हां भौल्ही, ते लोक ऐन्च़रे एक्केकी कैरां अलग केरनेण, ज़ैन्च़रे पुहाल भैढ़न छ़ैलन मैरां खंढातन। ³³ तै भैढ़न अपने देहींने पासे, ते छ़ैलन अपने बांए पासे खेड़ी कैरेल्हो। ³⁴ तैखन बादशाह अपने देहींने पासेरे लोकन सैहीं ज़ौल्हो: एजा मेरे बाजेरे मुबारक लोकांव ईही बादशाही, ज़ै दुनियारे शुरु मां तुशे लेइ तियार कियोरिए: हीस्से मां नैथ। ³⁵ किजोकी आंव नियनो थु; ते तीं मीं रौट्टी खुवाई, आंव ट्लीशोरो थु; ते तीं मीं पानी पियावं आंव परदेशी थु, ते तीं अपने घरे मां रखो। ³⁶ आंव नग्गो थु, ते तीं मीं लिगड़ां दितां; ते आंव बिमार थु; ते तीं मेरी हैरगैश की आंव कैद थु; ते तुस मिलने आए।

³⁷ तैखन तै घर्मी मैन्हुं ज़ौल्हो की ओ प्रभु मीं कैखन तू नियनो लाहु; ते मीं तीं रौट्टी खुवाई या तु ट्लीशोरो थु, ते मीं तीं पानी पियांव। ³⁸ असैइं कैखन परदेशी सैमझतां तु अपने घरे मां रख्खो; या तु नग्गो थु, ते मीं तीं लिगड़ां दितां? ³⁹ ते अस कत्ताल्ही तीं बिमार या कैद लैहीतां तीं सैहीं मिलने आए? ⁴⁰ तैखन बादशाह जुवाब दैल्हो: की आंव तुसंन सैहीं सच़्च़ ज़ोतां की ज़ैखन तुसैइं मेरे इन निकड़े ढ्लान मैरां एक्की ज़ैरे सैहीं एरो ज़ैरो सुलुख कियो त ऐन बुझ़ा की ऐन मीएं सैहीं कियूं।

⁴¹ तैखन तै बांए पासे बालन सैहीं ज़ौल्हो: ओ लांनती लोकांव मेरे तुत्रे अग्रां दुर भौथ, ते तैस हमेशारी बैल्लती अग्गी मैझो गाथ ज़ै शैतानेरे त तैसेरे दुतां केरे लेइ तियार कियोरिए। ⁴² एल्हेरेलेई ज़ैखन आंव नियंनो थु, ते तीं मीं रौट्टी न खुवाई आंव ट्लीशोरो थु, ते तीं मीं पानी न पियांव। ⁴³ आंव परदेशी थु, ते तीं आंव अपने घरे मां न रखो: आंव नग्गो थु, ते तीं मीं लिगड़ां न दितां ते आंव बिमार थु, ते तीं मेरी हैरगैश न की ते आंव कैद थु, ते तुस मीं सैहीं मिलने न आए।

⁴⁴ त्ताल्ही तैना लोक भी ज़ौल्हे: की ओ प्रभु असैइं कत्ताल्ही तू नियंनो ट्लीशोरो परदेशी नग्गो बिमार या कैद लाहु ते असैइं तेरी मदत न की। ⁴⁵ त्ताली तै तैन जुवाब दैल्हो: आंव तुसंन सैहीं सच़्च़ ज़ोतां की ज़ैखन तुसैइं मेरे इन निकड़े ढ्लान मैरां एक्की ज़ैरे सैहीं एरो ज़ैरो सुलुख न कियो त ऐन बुझ़ा की ऐन मीएं सैहीं कियूं। ⁴⁶ ऐलहेरे लेइ ऐन लोकन हमेशारे लेइ सज़ाह भौल्ही, पण धेर्मन हमैशांरी ज़िंदगी भौल्ही।

यीशु एरे खलाफ साज़िस

( मरकुस 14 : 1 - 2 ; लूका 22 : 1 ,2 ; यूहन्ना 11 : 45 - 53 )

¹ ज़ैखन यीशुए एन गल्लां की त तैनी अपने चेलन सैहीं ज़ोंव। ² तुसंन पत्तोए की दुई दिहैड़ना बाद फसहा तिहारे: ते मैन्हेरु मठ्ठु ट्लुवांव गाहेलो ताके तै मारो गाहे।

³ तैखन मन्दिरेरे परैहुतैइं ते कौंमरे सियांनेइ कैइफेरी हावेली मां जम्हां भोइतां। ⁴ मुशोरहो कियो की यीशु धोखे सैहीं ट्लेइतां मैरी छ़डम। ⁵ पण ज़ोंने लगे की फसहा तिहारेरे मोके नैइं: एरहु न भोए की लोक हंगामो शुरु केरन।

बैतनिय्याह मां यीशु एरे दफ्नेरी तीयारी

( मरकुस 14 : 3 -9 ; यूहन्ना 12 : 1 -8 )

⁶ तैस मोके यीशु बेतनीयां मां शुमौन कौढ़ेरे घरे मां थु। ⁷ त अक कौन्श शंखमरमरी बोतली मां अत्र अक किमती तेल घिनतां यीशु का आई: तैखन तै रौट्टी खानेरे लेइ बिशोरो थु, त तैसेरे दौगेरे बालन तै तेल मल्लो। ⁸ चेले ऐन लैहीतां बड़े नाराज़ भुए ते ज़ोंने लगे: की अत्र तेल बरबाद केरनेरी कुन ज़ुरूरी थी? ⁹ अगर ऐह तेल बंच़ोरो भौथो; त बड़ी किमत मैल्ह्नी थी; ज़ै गरीबन बेन्टतां देथे। ¹⁰ यीशुए ऐन शुंनतां तैन सैहीं ज़ोंव: तुस ऐस कौन्शी कीजो तंग लोरेथ केरने? एसां त मीं सैहीं रोड़ु कियेरुए। ¹¹ गरिब गुरबे त हमेशां तुसंन सैहीं साथी भोनेण: पण आंव तुसंन सैहीं साथी हमेशां नैइं भोंनो। ¹² एसां पैहिले मेरे दबने कैरां मेरी जांनी अत्र तेले सैहीं मेलतां ते मस्हा केरतां छ़ाडोरीए। ¹³ आंव तुसंन सैहीं सच़्च़ ज़ोतां की सैरी दुनियाई मां ज़ैड़ी भी अंजिलारो सुसामाचार शुनाव गाहेल्हो: तैड़ी तैसेरी यादगैरी मां एस गल्लारो भी ज़िक्र कियो गाहेलो।

यहूदा इस्करियोतेरो विशवासघात

( मरकुस 14 : 10 , 11 ; लूका 22 : 3 -6 )

¹⁴ फिरी बहरे चेलन मैरां अक ज़ैसेरुव नोवं युहूदा आस्क्रयुती थुं: मन्दिरेरे परैहुतन का जेव। ¹⁵ ते तैन सैहीं ज़ोंने लगो: की अगर आंव यीशु तुसंन ट्लुवेइतां देइं ;त तुस मीं कुन दैल्हे? ¹⁶ ते तै तैइसेरो देंतो यीशु ट्लुवांनेरे बारे मां मोको तकने लोरो थु।

चेलन सैहीं साथी फसहरू आखरी भोझ

( मरकुस 14 : 12 -21 ; लूका 22 : 7 -13 , 21 -23 ; यहून्ना 13 : 21 - 30 )

¹⁷ फसहा तिहारे कैरां पैहिले दिहाड़े चेले यीशु का एइतां पुछ़ने लगे की: तु फस्हा तिहारे लेई रौट्टी कोड़ी खानी चहतां; ताके अस गैहीतां तियारी केरम। ¹⁸ यीशुए जुवाब दितो की: शहरे मां अक फुलानो मैन्हुंए; ते तुस तैसका गाथ ते तैस ज़ोथ की, गुरु ज़ोंने लगोरोए, मेरो मोको नेड़े पुज़ोरोए ते आंव अपने चेलन सैहीं साथी फस्हा तेरे घरे मां मनेइल्हो। ¹⁹ बसा ज़ैरो यीशुए अपने चेलन हुकम दितोरो थु: तैनेइं तैन्च़रे फस्हा तिहारेरी रौट्टी तियार की।

²⁰ ज़ैखन ड्लोवझ़ भुई त यीशु अपने चेलन सैहीं साथी रौट्टी खाने बिशो। ²¹ ते रौट्टी खांते बार यीशुए तैन सैहीं ज़ोंव: आंव तुसंन सैहीं सच़्च़ ज़ोतइं की तुसंन मैरां अक मीं ट्लुवाल्हो। ²² चेलन बड़ो दुःख भोव: तैना बैरी बैरी सैहीं तैस पुछ़ने लगे: ओ प्रभु कुन आंवे त नैइं? ²³ यीशुए जुवाब दितो: ज़ै मैन्हुं मीं सैहीं साथी थैली मैरां रौट्टी खाने लोरोए: तैहे मीं ट्लुवाल्हो। ²⁴ मैन्हेरे मठ्ठैरे त ज़ैरु तैसेरे बारे मां लिखेरुए तै ज़ांनते, की अफ्सोसे तैस मैन्हुं पुड़ ज़ैसेरी वजाही सैहीं तै ट्लुवाव जेव: तैसेरे लेइ एन्ने रोड़ु थुं की तै ज़र्मोरो न भौथो। ²⁵ तैखन युहुदो ज़ै ट्लुवाने पुड़ थु; ज़ोंने लगो :ओ रबी आंवे त नैइं? तैनी तैस सैहीं ज़ोंव, तीं एपू ज़ोंव |

प्रभु भोझ

मरकुस 14 : 22 - 26 ; लूका 22 : 14 - 20 ; 1 कुरिन्थियों 11 : 23 - 25 )

²⁶ रौट्टी खांते बार यीशुए रौट्टी ट्लाती; ते बर्कत देइतां ट्लोड़ी, ते चेलन का देइतां ज़ोंव हियांथ खाथ ईही मेरी जांने। ²⁷ फिरी यीशुए कटोरो ट्लातो, ते परमेशरेरू शुक्र केरतां चेलन का दितो ते ज़ोंव हियांथ तुस सभ इस मैरां पिया। ²⁸ किजो की ईही मेरे नोवें ऐहेदे मां मेरो तै लैहुए ज़ै बड़ां केरे पापां केरी मैफरे लेइ दितो गहते। ²⁹ आंव तुसंन सैहीं ज़ोताइं की: आंव दाछ़रो ईही रस फिरी कधै न पियेल्हो ज़ां तग्र परमेशरेरी बादशैही मां तुसंन सैहीं साथी नोवों न पीं। ³⁰ तैखन तैनेइं अक गीत ज़ोंव: ते फिरी ज़ैतुन पहाड़े पुड़ जो च़ले जे।

पतरसेरे इन्कारेरी भविष्दुवाणी

( मरकुस 14 : 27 - 31 ; लूका 22 : 31 - 34 ; यूहन्ना 13 : 36 - 38 )

³¹ तैखन यीशुए तैन सैहीं ज़ोंव: तुस तैस राती मेरी वजाही सैहीं डामाडोल भौल्हे: किजोकी लिखेरुए की आंव पुहाले मारेल्हो ते धंनेरी भैढ़ां तित्र बित्र भौल्ही। ³² पण आंव ज़िंतो भोइतां तुसंन कैरां पैहिले गलीले मां पुज़्ज़ैल्हो। ³³ पतरसे जुवाब दितो: भावें तेरी वजाही सैहीं सारे डामाडोल भोंन, पण आंव डामाडोल न भौइल्हो। ³⁴ यीशुए ज़ोंव: आंव तुसंन सैहीं सच़्च़ ज़ोतइं की अज़ राती कुक्ड़ बांक देंने कैरां पैहिले तु मेरो ट्लेई फैरेइं इनकार कैरेल्हो। ³⁵ पण पतरसे ज़ोंव: अगर तीं साथी मीं मरनु भी पै त तां भी आंव तेरो इनकार न कैरेल्हो ते सैरे चेलेंइ भी ऐन्ने ज़ोंव।

गतसमनी मां प्रार्थना

मरकुस 14 : 32 -42 ; लूका 22 : 39 - 46 )

³⁶ तैखन यीशु अपने चेलन सैहीं साथी एक्की ठैरी पुज़ो: ज़ैठ्ठैरू नोवं गस्तम्नी थुं: यीशुए तैन सैहीं ज़ोंव: तुस इड़ी बिशा, ते आंव उड़ी अग्र गैहीतां प्राथना केरताइं। ³⁷ तैनी पतरस ते ज़ैबदेरां दुईये मठ्ठां साथी नियां, ते तै मायुस ते बेचेन भोंने लगो। ³⁸ फिरी यीशु तैन सैहीं ज़ोंव: इस दुखेरे वजाही सैहीं मेरे प्राण निसने लोरेन इड़ी बिन्झ़ै बिशा। ³⁹ फिरी थौड़ो ज़ैरहे अग्र गैहितां तल्ले मां मथो टेकतां खिरको ते प्राथन केरने लगो: ओ बाजी अगर भोई सखे त ईही कटोरो मीं कैरां टेली गाहे: फिरी भी आंव चहतां, बल्के ज़ैन तु चहतां त तैन्ने भोए। ⁴⁰ ज़ैखन तै चेलन का वापस आव त तैना झ़ुलोरे लाहे त पतरसे सैहीं ज़ोंव: कुन तुस एकी घेंटे भी मीं सैहीं साथी बिन्झ़ै न बीशी सखथ। ⁴¹ बिन्झ़ै बिशा ते दुवा केरते राथ किजोकी अज़्मैइशी मां न राथ: आत्मां त निग्रे पण जान कमज़ोरे। ⁴² यीशु फिरी जेव ते प्रार्थना केरने लगो: ओ मेरे बाजी ईही कटोरो मेरे पिंनेरे बगैर टेली न सखे: फीरी भी मेरी नैइं बलके तेरी मर्ज़ी पुरी भोए। ⁴³ ज़ैखन तै चेलन का वापस आव, त तैना झ़ूलोरे लाहे: किजोकी तैनकेरी ऐछ़ी ओंड्ले सैहीं ग्रिकी भोवरी थी। ⁴⁴ ऐलहेरे लेई तै तैन तैड़ी छ़ैडतां च़लो जेव: ते फिरी प्रार्थन केरने लगो ज़ै पैहिली कियोरी थी। ⁴⁵ तैसेरां बाद तै चेलन का वापस आव, ते तैन सैहीं ज़ोंने लगो: की तुस हेजु भी तैस्से आरामेरी निड्ली मां झ़ूलोरेथ? बस्सा हेरा तै मोको नेड़े पुज़ोरोए की मैन्हेरु मठ्ठु पैपी केरे हवाले कियो गाहेलो। ⁴⁶ उठा च़ला तक्का मेरो ट्लुवांने बालो नेड़े पुज़ोरोए।

यीशु एरू धोखे सैहीं ट्लाव गहनू

( मरकुस 14 : 43 - 50 ; लूका 22 : 47 - 53 ; यूहन्ना 18 : 3 - 12 )

⁴⁷ यीशु ऐना गल्लां ज़ोंने लोरो थु: त युहूदा ज़ै बहरे चेलन मैरां थु तैड़ी पुज़ो: तैस्सैहीं साथी बड़े मैन्हुं थिये ज़ैना तलवारां ते लठ्ठां घिन्तां एवरे थिये तैना मन्दिरे मां सेवा केरने बाले पुरैहुतैइं ते कौंमरे सियांने लोकेंइ भेज़ोरे थिये। ⁴⁸ तैसेरे ट्लुवांने बाले तै इही निशान दितोरो थु: की ज़ैस आंव फूंमड़ी दैइल्हो त तैहे यीशु भोंनोएं: ते तुस तैस ट्लेइयथ। ⁴⁹ युहुदे यीशु का एइतां ज़ोंव: हे गुरु तींजो नमसकारे, ते एइतां फूंमड़ी देने लगो। ⁵⁰ यीशुए तैसजो ज़ोंव: मेरे ढ्ला ज़ैस कम्मेरे लेइ तु एवरोस तैन कम केर:त्ताल्ही लोकेइं एग्रोइतां यीशु ट्लातो ते अपने कबज़े मां कियो। ⁵¹ यीशुएरे सैथन मैरां एक्कें अपनी तलवार कढी, ते मन्दिरेरे पुरैहुतैरे नोकरे पुड़ बाही ते तैसेरो कन कटो। ⁵² यीशुए तैस जो ज़ोंव: तलवारी मियांने मां रख किजोकी ज़ैना तलवार च़लातन तैना तलवारी सैहीं मारे गाहेले। ⁵³ तीं पत्तो नैइं की अगर आंव अपने बाजी कैरां मद्त मैगीं त तै हुन्ना सुवर्गदुतां केरी बहरे फौवजां बल्के तैस कैरां भी जादे भेज़ते। ⁵⁴ पण फिरी तैना पबित्र बचनेरी गल्लां केंच़रे पुरी भोंनीण ज़ैनकेरू पुरु भोंनु ज़ुरूरीए? ⁵⁵ फिरी यीशुए तैन हछै लोकन सैहीं ज़ोंव: आंव कुन कोई डैकूइं ते तुस मींजो डांग सोटे ते तलवारां ट्लेइतां मीं ट्लांने एवरेथ? आंव त रोज़ मन्दिरे मां बिशतां शिक्षा देतो थु ते तैखन तुसैइं आंव नैइं ट्लातोरो? ⁵⁶ पण ऐन सभ किछ ऐलहेरे लेइ भोवं: की पबित्र बचने मां नेबी केरी लिखोरी गल्लां पुरी भोंन: तैखन सारे चेले तैस तैड़ी छैडतां च़ले जे।

महा सभा मां यीशु

( मरकुस 14 : 53- 65 ; लूका 22 : 54, 55 , 63 - 71 ; यूहन्ना 18 : 13 -14 , 19 -24 )

⁵⁷ ज़ैन लोकेइं यीशु ट्लातोरो थु तैना तैस मन्दिरेरे पुरैहुत कैइफे का घिन्तां जे: ज़ैड़ी तैनकेरे धर्मी लोक ते बुढे अकौठ्‌ठे भेवरे थिये। ⁵⁸ ते पतरस भी यीशु दुरेरां देंतो पत्पती मन्दिरेरे एंत्रीं अंग्ने तग्र पुज़ोरो थु: ते तैड़ी पेरहेदारन सैहीं साथी बिशतां सुर लोरो थु हेरने की कुन केरतन। ⁵⁹ मन्दिरेरे पुरैहुत ते आदालत आलियारे सभ लोक एरहे झुठै शहात तोपने लगे: की ज़ैस सैहीं यीशु क़त्ल कियु गाहे। ⁶⁰ पण कोई शाहात न मैल्लो: हालांकी बड़े झुठे शाहात भी पैश भुए: अखर कार दुई शाहात पैश भुए। ⁶¹ ते जोंने लगे: एनी ज़ोवरू थुं की आंव परमेशरेरु घर डोलतां ट्लेंइयांव दिहाड़े फिरी खड़ु केरी सखताइं। ⁶² त्ताली मन्दिरेरो पुरैहुत खड़ो भोइतां यीशु पुछ़ने लगो: तीं का एस अलज़ामेरो कुन जुवाबे? ⁶³ पण यीशु च़ुप राहु: मन्दिरे पुरैहुते फिरी पुछ़ू: तीं ज़िंते परमेशरेरी कसम भोए की असंन ज़ो, की तु परमेशरेरु मठ्ठु मसही आस? ⁶⁴ यीशुए जुवाब दितो: तीं एपु ज़ोइ छ़डु ते हुनी आंव भी ज़ोतइं की अज़ैरे बाद तुस मैन्हेरे मठ्ठै परमेशरेरे देहींने पासे बिशोरे लाहेले, ते बिदलारी मां एंइते लाहेले। ⁶⁵ तैखन मन्दिरेरे पुरैहुतें अपन लिगड़ां छ़िंदा, ते ज़ोंने लगो: ऐनी त बड़ू झुठ ज़ोंव हुनी असन केंची शाहतेरी ज़ुरूरत नैइं, तुसैइं हुन्ना एसेरू झुठ शुनेरुए। ⁶⁶ तुशी कुंन राईऐ? तैनेइं जुवाब दितो एह कतलेरे काबले? ⁶⁷ त्ताल्ही तैनेइं तैसेरे तुत्रे पुड़ थुकु ते तैस घुसैइं मुकैइं देने लगे। ⁶⁸ ओ मसही अगर तु नब़ीस त ज़ो, तीं केंनी बाहोरीए?

पतसेरू इन्कार केरनू

( मरकुस 14: 66- 72; लूका 22 : 56 - 62; यूहन्ना 18: 15- 18 , 25- 27)

⁶⁹ पतरस बेइर अंगने मां बिशोरो थु: ते अक कौन्श तैसका आई ते ज़ोंने लगी की तुभी यीशु गलिली सैहीं साथी थु। ⁷⁰ पण पतरसे सैभी केरे सांमने इनकार कियो ते ज़ोंव: मीं नैइं पत्तो तु कुन लोरिस ज़ोंने? ⁷¹ तैखन पतरस बेइर फाटकेरे पासे जेव त अक होरी कौन्श पतरसे लैइतां तैन लोकन सैहीं ज़ोंने लगी: ईही मैन्हुं भी यीशु नैसरी सैहीं साथी थु। ⁷² पण पतरसे सैभी केरे सांमने कसम केरतां इनकार कियो, ते ज़ोंव: की आंव ऐस मैन्हुं सैइयां न ज़ैनी। ⁷³ थोड़े च़ीरेरां पत्ती तैना लोक ज़ैना तैड़ी खड़खड़े थिये पतरसे का आए ते ज़ोंने लगे: तुभी तैन्ने मैरंस किजोकी तेरी बोली सैहीं बुझ़ोते की तु तैसेरो साथीस। ⁷⁴ त्ताल्ही पतरस तैस्जेई गैई देइतां ज़ोंने लगो, ते कसम केरतां ज़ोंने लगो: की आंव एस मैन्हुं सैइयां न ज़ैनी त्ताल्ही कुकड़े बांक दिती। ⁷⁵ तैखन पतरसे यीशुएरी तै गल्ल याद आई: ज़ै तैनी ज़ेवरी थी की कुकड़ेरे बांक देने कैरां पैहिले तु ट्लेई बार मेरो इन्कार कैरेल्हो: ते पतरस बेईर गैहीतां हुस्बुकैइं हुस्बुकैइं लेरां देने लगो|

पिलातुसेरे सामने यीशु

( मरकुस 15 : 1 लूका 23 : 1 , 2 ; यूहन्ना 18 : 28 -32 )

¹ ते झ़ैझ़ भोंते सारे लोक ते मंद मन्दिरेरे पुरैहूत, ते कौंमरे सयांनेइं मशौरो कियो की यीशुएरे कत्ल केरनेरो फैसलो कियो। ² ते यीशु बेंधतां नियो, ते रूंमी हाकम पिलातुसेरे हवाले कियो।

यहूदा खुदकशी केरते

( प्रेरतां केरां कम्मा 1 : 18 -19 )

³ ज़ैखन युहूदे हेरू ज़ैनी यीशु ट्लुवेवरो थु, की यीशु मुर्ज़म बनेवरोए त तैनी बड़ू पशतावं: ते तैना चेंद्रे ट्ल्ही सिक्के मंद्रेरे पुरैहुतन का वापस आंन्हें। ⁴ ते ज़ोंने लगो: मीं पाप कियो की अक बेकुसुर कत्लेरे लेइ ट्लुवाव: ते तैना ज़ोंने लग्गे असन कुने? तु ज़ांन ते तेरु कम ज़ांने? ⁵ तैखन युहूदे तैना चेंद्रे ट्ल्ही सिक्के मन्दिरे मां शैरतां छ़डे, ते एपु गैहितां अपने आपे फांसी दिती।

⁶ मन्दिरेरे परैहुतैइं तैना सिक्के सल्हे: ते ज़ोंने लग्गे की इन सिक्के त खुनेरे तैप्पूण; ऐन मन्दिरेरे खज़ाने मां रखने ठीक नैइं। ⁷ ऐलहेरे लेई तैनेइं मुशौरहो केरतां तैस रकमी सैहीं कुम्हारे कैरां अक उडार घिन्नु: ताके परदेशी केरे लेइ कब्रास्तान बनावं गाहे। ⁸ तांए त अज़ तग्र भी तैस उडारे जो लैहुहेरू उडार ज़ोतन। ⁹ तैखन तै गल पुरी भोई ज़ै यरमियां नेबे ज़ोवरी थी: की तैनेइं तैसेरी पुरी किमत चेंद्रे ट्ल्ही सिक्के निये, ऐह किमत बनी इस्राएलेरे लोकेइं कियोरी थी। ¹⁰ ते तैन चेंद्रे ट्ल्ही सिक्केइं सैहीं कुम्हारेरू उडार घिन्ने जो दिते ज़ैन्च़रे परमेशरे मीं हुक्म दितोरो थु।

पिलातुसेरे सुवाल

( मरकुस 15 : 2 - 5 ; लूका 23 : 3 - 5 ; यूहन्ना 18 : 33 - 38 )

¹¹ यीशु हाकमेरे तुत्रे अगर खड़ो थु, ते हाकम तैस पुछ़ने लगो: तु युहूदी केरो बादशाहस? यीशुए जुवाब दितो तु एपु ज़ोंने लोरोस त। ¹² ते ज़ैखन मन्दिरेरे पुरैहूत ते बूढे सियांने तैस पुड़ अलज़ाम लाने लोरे थिये त यीशुए कोई जुवाब न दितो। ¹³ तैखन पिलातुसे यीशु सैहीं ज़ोंव: हेर ऐना तेरे खलाफ कुन कुन ज़ोंने लोरेन तु शुन्तां की नैइं। ¹⁴ पण यीशुए एकी गल्लारो भी जुवाब न दितो; ते पिलातुस बड़ो हेरान भोई जेव।

मौतरे सज़ारो हुक्म

( मरकुस 15 : 6 - 15 ; लूका 23 : 13 - 25 ; यूहन्ना 18 : 39 ; 19 : 16 )

¹⁵ बादशाहेरो अक कानुण थु: की फस्हा तिहारेरे मोके पुड़ अक कैदी ज़ैस लोक चहते थिये तैस हथरां छ़डतो थु। ¹⁶ तैस मोके तैनकेरो अक मैन्हुं कैद थु; ज़ै बरहबा नोवेंरो बड़ो मुशुर थु। ¹⁷ ज़ैखन तैना लोक पिलातुसे का जम्हां भुए; त पिलातुसे तैन पुछ़ू: तुस कुन चहतथ; आंव कैस हथरां छ़ैडीं; बरहबे की यीशु ज़ैसजो मसही ज़ोतन। ¹⁸ किजोकी तिलातुसे एपु पत्तो थु: की तैनेइं सिर्फ जलनी सैहीं तै ट्लातोरोए। ¹⁹ ज़ैखन तै आदालतरी कुर्सी पुड़ बिशोरो थु; त तैसेरी कौन्शां तैसजो समाद भेज़ोरो थु: की तु एस रोड़े मैन्हेंरे बारे मां किछ न कैरां, किजोकी मीं अज़ राती ऐसेरी वजाही सैहीं सुपने मां बड़ो दुःख भेवरोए।

²⁰ पण मन्दिरेरे पुरैहूतेंइ ते सियांने लोकेंइ लोक बमकाए: की तैना पिलातुसे कैरां बरहबा हथरां छ़डांन ते यीशु मारन। ²¹ ज़ैखन हाक्मे तैन लोकन पुछ़ू: की तुस ऐन दुईन मैरां कैस चहतथ; आंव तैस हथरां छ़ैडीं: तैनेइं लोकेइं ज़ोंव: बरहबे हथरां छ़ैडां। ²² पिलातुसे तैन लोकन सैहीं ज़ोंव: फिरी आंव यीशु ज़ैसजो मसही ज़ोतन तैस कुन केरीं? सब लोक ज़ोंने लगे ऐस सलीब देथ। ²³ हाक्मे ज़ोंव कीजो? ऐनी कुन बुरयाई कियोरिए? पण तैना मना ज़ोरे ज़ोरे ज़ोंने लगे की एस सलीब देथ। ²⁴ ज़ैखन पिलातुसे हेरू की किछ भी बन्ने बालु नैइं बल्के उलटो फसाद भोंने बालोए: त तैनी पानी मेगतां तैन मैन्हुं केरे सामने हथ धोए ते ज़ोंव: की आंव ऐस एक्की धेर्मी मैन्हेंरे खुने कैरां बरी भोतांइ: तुस ज़ांन; ते तुशु कम ज़ांने। ²⁵ ते सारे लोकेइं जुवाब दितो: की ऐसेरो खुन असन पुड़ ते इशी औवलाधरे गले पुड़ भोए। ²⁶ तैखन पिलातुसे बराबो हथरां छ़ड्डो ते यीशुए कोड़े बहवैहितां तैनकेरे हवाले कियु: ताके तैना तैस सलीब देंन।

सिपाहियां केरे ज़िये यीशु एरी निन्दा

( मरकुस 15 : 16 - 20 ; यूहन्ना 19 : 2, 3 )

²⁷ तै तैखन पिलातुसेरे सिपैहीयेइं यीशु शाही किले मां अन्तर नैइतां सारे फौव्जी सिपाही यीशुएरे च़ुफुरतां जम्हां भुए। ²⁸ तैनेइं तैसेरां लिगड़ां खोल्लां ते तैस अक धोती ज़ैरी प्लेटि। ²⁹ फिरी कन्टां केरू ताज तैसेरे दौगे पुड़ रखु ते तैसेरे देंहीने हथे मां अक सोटी दिती: ते तैसेरे सामने खेड़ोइतां तैसेरी हासी बनाने लगे की एह युहूदी केरे बादशाह: तींजो नमसकारे। ³⁰ तैना तैसपुड़ थुकते थिये ते डण्डैइं सैहीं तैसेरे दौगे पुड़ बहते थिये। ³¹ तैसेरी हासी बनानेरे बाद तैसेरी धोती खोल्ली: ते तैस तैसेरां लिगड़ां लुवां ते तैठ्ठां च़ल्ले, ताके तैस सलीब देंन?

यीशु एरू क्रुसे पुड़ च़ाड़ु गहनू

( मरकुस 15 : 21 - 32 ; लूका 23 : 26 - 43 ; यूहन्ना 19 : 17 - 27 )

³² ज़ैखन तैना तैठ्ठां च़लोरे थिये; त तैन कुरेनेरो अक मैन्हुं मैल्हो: जैसेरू नोवं शुमोन कुरेंनी थुं: तैन लोकेइं ट्लातो ताके यीशुएरी सलीब छ़ुइतां च़लाऐ। ³³ ते गुल्गुत्ता नोवेरी ठैरी पुज़े: ज़ैसेरो मतलबे खोपड़ारी ठार। ³⁴ तैड़ी तैनेइं यीशु अक नर्म ज़ैरी शराप पिने जेई दिती: पण तैनी एशी सैहीं हुरेइतां इनकार कियो। ³⁵ ज़ैखन तैनेइं यीशु सलिबी पुड़ च़हढ़ो त शर्त रेखतां तैसेरां लिगड़ां भी एपु मम्हेइं बंटां। ³⁶ ते तैड़ी बिशतां तैसेरो पैरो केरने लगे। ³⁷ ते तैनेइं तैसेरो जुर्म एक्की पैखड़ी पुड़ लिखतां तैसेरे दौगे कैरां बह लाई ज़ैसपुड़ ऐन लिखेरू थुं: एह युहूदी केरो बादशाहे? ³⁸ तैखन यीशु सैहीं साथी दुई डैकन भी सलिबी दिती: अक यीशुएरे देहींने पासे, ते होरो बांए पासे। ³⁹ तैठ्ठां गहंने बाले सारे लोक दोग हिलैहितां गहते थिये ते ऐन ज़ोते थिये। ⁴⁰ इस मन्दिरे डोलने बाला ते ट्लेई दिहड़न मां बनाने बाला: अपनो आप त बच़ा: अगर तू परमेशरेरु मठ्ठुस त एस सलीबी पुड़रां ऊंढो ओस। ⁴¹ ऐन्च़रे मन्दिरे पुरैहूत ते बुढे सियांने भी तैसेरी हासी बनाते थिये: ते ज़ोते थिये। ⁴² ऐनी होरे बच़ाए पण अपनो आप न बच़ेई बटो: इही त इस्राएलेरो बादशाहे: अगर हुन्ना भी तु सलिबी पुड़रां ऊंढो औसतां त अस तीं पुड़ विशवास केरतम। ⁴³ एसेरो भरोसो परमेशरे पुड़ए: अगर परमेशरे एस चहते त हेजु भी एस बच़ाए: किजो की ऐनी ज़ोवरू थुं की आंव परमेशरेरु मठ्ठुइं। ⁴⁴ ते दुई डैकू भी ज़ैन तैस्सैहीं साथी स्लेब दितोरी थी: तैना भी तैस्जो खरु बुरु ज़ोते थिये।

यीशु एरे प्राण देने

( मरकुस 15 : 33 - 41 ; लूका 23 : 44 -49 ; यूहन्ना 19 : 28 -30 )

⁴⁵ बहरे बज़न कैरां देंतु ते ट्लेई बज़न तग्र सारे मुल्खे मां अंधरु भेवरू थुं। ⁴⁶ ते ट्लेई बज़ां केरे क्रिब यीशुए बड़े ज़ोरे सैहीं ज़ोंव एली एली लमां शफकैनी: ज़ैसेरो मतलब भोते औ मेरे प्रभु औ मेरे प्रभु तीं आंव किजो शारो? ⁴⁷ ज़ैन लोक तैड़ी खड़ खड़े थिये: तैन मैरां किछ शुनतां ऐन ज़ोंने लगे, की ऐह त इलिया फुकारने लोरोए। ⁴⁸ तैखन अक मैन्हुं दौव्ड़तां जेव, ते अक गलास पैनीं मां डोबतां ते सरकण्ढ़ै पुड़ येंनी नाघालेरी सौटी पुड़ टकेइतां पीनेरे लेइ तैसेरे ऐशी सैहीं हुराव। ⁴⁹ किछ ज़ोंने लगे ठैरा बल्लगा हुनी हेरतम की एलिया एस बच़ाने एइते की नैइं। ⁵⁰ ते यीशुए फिरी ज़ोरे सैहीं चिंड मारी ते अपनी जान भी दिती। ⁵¹ तैखन हेक्लरो पड़दो बहं, ते बुन तग्र छ़ींदोइतां दुई हिस्से भुओ ते पहाड़ां ते सारी ज़मीन हीलने लगी। ⁵² कब्रां फैटी जेई ते परमेशरेरे बड़े पबित्र लोक ज़ैना मौवतरी निड्ला मां झ़ूलोरे थिये: ज़िंते भोइजे। ⁵³ ते कब्रन मैरां निस्तां ज़िंते भोंनेरां पत्ती पबीत्र शहारे मां दाखल भुए: ते तैड़ी बड़े होरी लोकेइं भी लाहे। ⁵⁴ तैखन तैनी अफ्सरे ते तैसेरे सैथेइं ज़ैन यीशुएरी निगरानी केरने लोरे थिये: भु़ंज़ल गहंतो हेरो; त तैना डेरी जे; ते ज़ोंने लगे: सच़्च़े ऐह मैन्हुं परमेशरेरु मठ्ठुए। ⁵⁵ तैड़ी बेड़ी कौन्शां ज़ैना गलिले मैरां यीशु सैहीं साथी तैसेरी सेवा केरती तैस पत्ती एवरी थी: ते दुररां तकने लोरी थी। ⁵⁶ तैन मां मरीयम मगदलिनी याकुब त युसेसएरी अम्मां मरियम ते ज़ैबदेरे मठ्ठां केरी अम्मा साथी थी।

यीशु एरू दबू गहनू

( मरकुस 15 : 42 - 47 ; लूका 23 : 50 - 56 ; यूहन्ना 19 : 38 - 42 )

⁵⁷ ज़ैखन ड्लोवझ़ भुई त आरमितरो अक अंम्बीर युसफ नोंवेरो मैन्हुं ज़ै एपु भी यीशुएरो चेलो थु। ⁵⁸ तैनी पिलातुसे का गैहितां यीशुएरी लाश मगी: ते पिलातुसे हुकम दितो की लाश एसेरे हवाले केरा। ⁵⁹ युसफे लाश नैहीतां एक्की रोड़ी ज़ैरी च़ादरी मां प्लेटी। ⁶⁰ ते तै लाश एक्की नोवीं कूढ़ी मां ज़ै शफ़ड़ी मां घड़ोरी थी तैड़ी लाश छ़ड्डी: ते तैस कूढ़ी आग्रोरां अक बड्डो घोड़ तैस ऊब्रो छ़डो। ⁶¹ ते मरियम मगदलिनी ते होरी मरीयम तैड़ी तैस कूढ़रे सामने ज़ैस्मां यीशुएरी लाश रखोरी थी बिशोरी थी।

कबरी पुड़ पेरहो

⁶² होरसां फस्हा तिहारेरे दिहाड़ेरे बाद मन्दिरेरे पुरैहुत ते फ्रिसी मिलतां पिलातुसे का पुज़े। ⁶³ ते ज़ोंने लगे प्रभु असंन यादे की तैनी धोखेबाज़े अपने ज़िंते सासैइं ज़ोवरू थुं: की मीं ट्लेईयांव दिहाड़े फिरी ज़िंतु भोई गहंनुएं। ⁶⁴ ऐलहेरेलेइ हुकम दे ताके ट्लाई दिहाड़न तग्र कब्रारी निगरानी की गाहे, कधै एरू ना भोए की तैसेरे चेले एइतां तैसेरी लाश छ़पांण, ते लोकन सैहीं ज़ोंन की तै मुड़दन मैरां ज़िंतो भोवरोए, ऐह धोखो पैहिले धोखे कैरां भी जादे बुरो भौल्हो। ⁶⁵ पिलातुसे जुवाब दितो, तुसंन का पैरहो देंने बाले आंन्ह ता तैना नैथ ते ज़ैड़ी तग्र भोई सखते ता पैरहो देथ। ⁶⁶ तैखन तैनेइं गैहीतां घोड़े पुड़ अपनी मौहोर लाई: ते कब्रारी निगरेंनरे लेइ पैरहेदार रखे।

यीशु एरू ज़ींतू भोंनू

( मरकुस 16 : 1 -10 ; लूका 24 : 1 - 12 ; यूहन्ना 20 : 1 -10 )

¹ सब्तेरां बाद हफ्तेरे पैहिले दिहाड़े ट्लेकड़ोंते ट्लेकड़ोंते मरियम मगदलिनी ते होरी मरियम ज़ैड़ी यीशुएरी लाश कुढ़ी मां रखोरी थी: हेरने ऐई। ² अचांनक अक बड़ो भूंज़ल आव: किजोकी प्रभु परमेशरेरो सुवर्गदूत अंम्ब्रे मैरां आव; ते तैस कूढ़ी ऐग्रिंयों घोड़ ऊंढो बछ़ौड़तां तैस पुड़ बिशी जेव। ³ तैसेरी शक्ल सुरत बड़ी रोड़ी दिहाड़ेरी ज़ैरी थी: ते तैसेरां लिगड़ां हींवेरां ज़ैरां छ़ीतां सुफैद थीयां। ⁴ पैरहेदार डेरतां थर थर कम्ब्ने लगे ते ज़ैरे मुड़दे भुए। ⁵ सुवर्गदूते कौन्शन सैहीं ज़ोंव: आंव ज़ांनताइं की तुस यीशुए तोप्ने लोरिथ: ज़ैस सलीब दितोरी थी। ⁶ तै इड़ी नैइं बल्के ज़ैन्च़रे तैनी ज़ोवरू थुं, तै ज़िंतो भोवरोए एजा तै ठार हेरा ज़ैड़ी तै थु। ⁷ ते तैनेइं जल्दी गैहितां तैसेरे चेलन पत्तो देथ: की तै मुड़दन मैरां ज़िंतो भोवरोए, ते तुसंन कैरां पैहिलो गलिले मां पुज़ोरोए: ते तुसैइं तै लहंनोएं हेरा मीं तुसंन ऐन ज़ोवरुए।

⁸ त्ताल्ही तैना कौन्शां डेरतां भी ते ख़ुशी सैहीं भी कूढ़ी मैरां बेइर एई: ते दौवड़ती दौवड़ती जेई ताके चेलन पत्तो देंम। ⁹ अचांनक यीशु तैन मैल्हो, ते तैनी ज़ोंव तुसंन शांती मैल्हे: ते तैनेइं तैसेरे पाव बांते, ते तैसका मथो टेको। ¹⁰ तैखन यीशुए तैन ज़ोंव: डरा न्ना ते गाथ ते मेरे ढ्लांन सैहीं ज़ोथ की गलिले मैझो गहंन: तैन मीं तैड़ी लाहेले।

पेरदारां केरी बिसतार

¹¹ हेजु तैना कौन्शां बत्ते थी, त पैरहेदारन मैरां किछ शहारे मां जे ते मन्दिरेरे पुरैहुतन सैहीं सारो बिस्तार शुनाव। ¹² त्ताल्ही मन्दिरेरे पुरैहूतेंइ ते सियांनेइ मिलतां मशौरो कियो की ते सिपैहीन खरी रकम दिती। ¹³ ते तैन ज़ोंव: की ज़ैखन अस राती झ़ूलोरे थिये त तैसेरे चेले अए ते तैनेइं तै नीयो। ¹⁴ अगर ऐह गल हाक्मेरे कन्न तग्र पुज़ी त अस तैस सम्झ़ांमैल्हे ते तुसंन खतरे कैरां बच़ांमैल्हे। ¹⁵ तैखन सिपैहियेइं रकम नि ते ज़ैन्च़रे तैनेइं ज़ोवरू थुं तैन्च़रे कमावं: ते अज़ तग्र ऐह गल युहूदन मां मुशूरे।

यीशु एरू लेइहोनू ते आखरी हुक्म

( मरकुस 16 : 14 - 18 ; लूका 24 : 36 - 49 ; यूहन्ना 20 : 19 - 23 ; प्रेरतां कम्मां 1 :6 -8 )

¹⁶ तैखन यारहे चेले गलिले मां जे ते तैस पहाड़े पुड़ अकौठ्ठे भुए ज़ैड़ी गहंनेरी यीशुए तैन हदैइयत दितोरी थी। ¹⁷ ज़ैखन तैनेइं यीशु लाहु त तैसका मथो टेको: ते किछन हेजु भी शक थी। ¹⁸ तैखन यीशु तैन का नेड़े आव ते तैन सैहीं ज़ोंने लगो: मीं ज़मीनी पुड़ ते अंम्ब्रे पुड़ पुरो अखतीयार दितोरोए। ¹⁹ ऐलहेरेलेई तुस गहथ ते सैरी कौंमां केरे चेले बनाथ: ते तैन बाजी, मठ्ठैरे, ते पाबित्र आत्मांरेनोवें सैहीं बप्तीसमो दैथ। ²⁰ ते तैन ऐह शिक्षा दैइयथ कि तैना तैन सैभी गल्लन पुड़ अंमल केरन ज़ैनकेरो मीं तैन हुकम दितोरोए,ते हेरा आंव दुनियारे आखीरी तग्र तुसन सैहीं साथीं।