लूका

LUKE

लूका

परिचय

¹ किजोकी बड़े लोकेइं एल्हेरेलेइ तियारी कियोरी थी की ज़ैन गल्लां ईशे सामने सच़्च़े भुई बिती तैन पत्रां देंती रोड़े च़ारे शुनम| ² खास केरतां तैन गल्लां ज़ैन बचनेरे मैन्हेंइ ज़ैन एस शुरु कैरां देंते एपु एस गल्लरे चशम दिद गुवहा थिये तैनेइं सुसमाचार असन तग्र पुझ़ाऊ| ³ एल्हेरेलेइ ऐह ट्लारे थिप्लुस मीं एपु पैहिले देंती सैरी गल्लां केरी शुरुवात रोड़े च़ारे लिखतां तीं केझो भेज़ी| ⁴ किजोकी ज़ैन गल्लां केरी पढ़हाई तीं कियोरिए तैन गल्लां केरो तीं रोड़े च़ारे पत्तो लग्गे की तैन कैत्री पैकिन|

यूहन्नरे ज़रमेरू ऐलान

⁵ युहूदियारे बादशाह हिरोदेसेरे ज़मांने मां अक पुरैहूत थु: ज़ैसेरु नोंव ज़ाक्रिया थु: तै अबिय्यारे खान्देंनी मैरां थु: तैसेरी कौन्श अलशिबा भी हारुंनेरे खानदेंनी मैरां थी| ⁶ ते तैन दुइये परमेशरेरी नज़री मां सच़्च़ै भगत ते परमेशरेरे हुकमन पुड़ रोड़े च़ारे च़लने बाले थिये| ⁷ पण तैन केरी कोई ओवलाध न थी किजोकी अलशिबा बांझ थी ते तैना दुइये बूढां थियां|

⁸ एकी फेरे ज़ैईस तै ज़ाकरियारे खानदेंनरी बैरी पुड़ परमेशरे क पुरैहूतेरू कम लोरो थु: केरने| ⁹ त एरू भोवं की पुरैहुतां केरे रुवाज़ेरे हिसाबे सैहीं तैसरु नोवं निसु की तै परमेशररे घरे मां गैहितां गूग्ल बाले| ¹⁰ ते ज़ैखन गूग्ल बालनेरो मोको आव ते अरदास केरने बाले बेइर अकौठ्ठे भोइतां दुआ लोरेथिये केरने| ¹¹ त परमेशरेरो अक सुवर्गदूत ज़ैड़ी तैनेइं गूज्ल बलोरो थु: चौकेरे दैहिंने पासे खड़ो भोव ते सैभेइं लाहू| ¹² ज़ाक्रिया तैस लैहीतां डेरी जेव ते तै बेहोश भोई जेव| ¹³ पण सुवर्गदूतें तैस जो ज़ोंव: ज़ाक्रिया डर न्ना तेरी दुआ शुनोरियेतेरी कौन्श अलशिबाई अक मठ्ठु भोंनुएं तू तैसरु नोवं युहन्ना रेखां| ¹⁴ तै तेरे लेइ बड़ी खुशरी गल्ल भोल्ही ते बड़े लोक तैसेरे ज़र्मने सैहीं ख़ुशी भोल्हे| ¹⁵ किजोकी तै परमेशरेरी नज़री मां सियंनो भोनोएं ते तै शरापेरे नशे कैरां उमरी दूर राल्हो ते तै एपनी हेइयरे पेटे मां पवित्रात्माइं सैहीं भेरतां भोल्हो| ¹⁶ तै बनी ईस्राएली लोकन मैरां परमेशरे पासे ज़ै तैनकेरो परमेशरे वापस तैसक आंन्हेल्हो| ¹⁷ ते कने तै ईलियारे आत्मारी तकती सैहीं तैस अगरी अगरी च़लेल्हो तके हाज बौवां केरो दिल ओवलाधरे पासे ते परमेशर न मन्ने बाले लोकांकेरो दिल परमेशर मन्ने बालां केरे पासे बद्लेल्हो तके परमेशरेरे लेइ अक पक्की कौंम तियार भोए|

¹⁸ ज़ाक्रियाए सुवर्गदूते सैहीं ज़ोंव:आंव कैंच़रे मैन्नी आंव त बुढौइं ते मेरी कौन्श भी बूढी भोवरिये| ¹⁹ सुवर्गदूते जुवाब दितो आंव जिब्राईल अंहीं आंव परमेशरे क खड़ो भोताइं आंव एल्हेरेलेइ भेज़ोरोइं की आंव तीं सैहीं गल्ल केरीं ते तीं ऐह खुशखबरी शुनेइं| ²⁰ ते हेर ज़ां तग्र एन्न गल्लां पूरी न भोंन तेरी ज़बांन बंद भोलल्ही ते तू गल्ल न केरी बटेल्हो किजोकी तीं मेरी गल्लां कैरू यकिंन नैइं कियेरू ज़ैन अपने मोके पुड़ पूरी भोंनी थी| ²¹ ते एस फेरे लोक ज़ाक्रियाऐ बलगने लोरेथिये तैन बड़े परेशान भोई जे की ज़ाक्रियाए हेक्ली मां एत्रु च़ीर किजो लावं| ²² ज़ैखन तै बेइर निसो त तै कुजी न बटो तैनेइं बुझ़ी छ़डु की ऐनी हेक्ली मां किछ दरशन लाहेरुए किजोकी तै इशारो केरतो थु: पण कुजी न थु: बट्तो| ²³ जैईस तैसेरी सेवारू कम पुरु भोवं त तै घरजो च़लो जेव|

²⁴ तैसरां बाद तैसेरी कौन्श अलशिबा दोज़िंती भोई ते तैसां एपू पंच़ मिहींने तग्र छ़पैइतां रखु| ²⁵ की ज़ैखन परमेशरे मेरो कुसूर लोकन मैरां दूर केरनेरेलेइ मैरां तकु ते तैनी मेरेलेइ एन कियुं ते लोकन मां आंव लांनती भोंने कैरां बच़ाइ|

यीशु एरे ज़रमेरू ऐलान

²⁶ शैईयवं मिहींने जिबरायल सुवर्गदूत परमेशरेरी तरफां गलिलेरो शाहर नस्रते मां एकी अड्लेही कुइये क भेज़ो| ²⁷ तैसारी कुड़माइ दाऊदेरे घरांने मैरां एकी मड़दे सैहीं भैऊरी थी ज़ैसेरु नोवं युसफ थु: ते कुईयरु नोवं मरियम थु| ²⁸ सुवर्गदूत तैसक एइतांनमसकार ज़ोंवं तीं पुड़ परमेशरेरी बड़ी दिया भेवरीये परमेशर तीं सैहीं साथिये| ²⁹ मरियम सुवर्गदूतेरी गल्ल शुनतां डेरी जेई ते ज़ोंने लगी एन कैरू नमसकारे | ³⁰ सुवर्गदूते तैस सैहीं ज़ोवं हे मरियम किजो कि परमेशरेरो तीं पुड़ बड़ो फज़ल भोवरोए| ³¹ तू दोज़ींती भोल्ही तीं अक मठ्ठु भोल्हु तू तैसरु नोवं यीशु रेखां| ³² तै सियांनो भोल्हो ते परमेशरेरु मठ्ठु भोल्हु ते परमेशर तैस अपने बाजी केरो दाऊदेरो तखत तैस दैल्हो| ³³ ते तै याकुबेरे घरांने पुड़ हमेशां बादशाही केरल्हो ते तैसरी बादशाही कधै खतम न भोल्ही| ³⁴ मरियमां सुवर्गदूते पुछ़ू एन कैंच़रे भोई सक्ते? आंव त अड्लाहीं| ³⁵ सुवर्गदूते जुवाब दितो पबित्र आतमा तीं पुड़ उत्रैल्ही ते परमेशरेरी कुदरुत तीं पुड़ सैयो कैरेल्ही एलहेरलेई तै पाक पबित्र ज़ै ज़र्मेल्हो तैसजो परमेशरेरु मठठु ज़ोल्हे| ³⁶ ते हेर तेरी रिशतेदार अलशिबारे क भी बूढ़े बारे मठठु भोंने बालूऐ तैसजो लोक बांझ ज़ोते थिये; शैई महिंन केरी देंती दोज़िंतीए| ³⁷ किजोकी परमेशरेरे लेइ कोई असुखतु नैइं| ³⁸ मरियमां सुवर्गदूते जुवाब दितो आंव परमेशरेरी ट्लारीं ज़ैन तीं ज़ेवरुए परमेशर केरे त तैन्ने भोए तैखन सुवर्गदूत तैसकैरां च़लो जेव|

मरियम इलीशिबा सैहीं मिलती ए

³⁹ तैनी दिहेड़न मां मरियम तियार भोइतां युहूदियारे पहाड़ी अलाकेरे एकी शहारे मां जेई| ⁴⁰ ते ज़ाक्रियारे घरेमां गैहितां अलशिबाई जो नमसकार कियुं| ⁴¹ ज़ैखन अलशिबां मरियमांरु नमसकार शुनू त बच्चो तैसारे पेटे मां छालां मारने लगो ते अलशिबा पाबित्र आत्माइं सैहीं भेरोई जेई| ⁴² ते बड़े ज़ोरे सैहीं ज़ोंने लगी तू कौन्शन मां मुबारकस ते तेरे पेटेरो फल भी मुबारके| ⁴³ ते मीं पुड़ एह दिया कैंच़रे भोई की मेरे परमेशरेरी अम्मा मी क एवरीऐ? ⁴⁴ किजोकी हेर ज़ैरही तेरे नमसकारेरी अवाज़ मेरे कंने मां अई त बच्चे ख़ुशी सैहीं मेरे पेटे मां छालां लगो मारने| ⁴⁵ मुबारके तै ज़ैसां विशवास कियो की परमेशरे तैस जो ज़ैन किछ ज़ोंव:तैन पुरु भोइतां राहेलु|

मरियमरू स्तुति - गीत

⁴⁶ ते मरियमा ज़ोंव:मेरी जान परमेशरेरी तारिफ केरचे| ⁴⁷ ते मेरी आत्मा मेरे मुखती देने बाले परमेशरे कैरां खुशी भुई| ⁴⁸ किजोकी तैनी मेरी कमज़ोरी पुड़ नज़र दिती की हेर अज़ैरां देइतां हरज़मांनेरे लोक मींजो मुबारक ज़ोल्हे| ⁴⁹ किजोकी परमेशरे मेरे लेइ बड़ां बड़ां कम्मा कियोरन ते तैसरु नोवं मुबारक भोए| ⁵⁰ तैसेरी दिया तैस कैरां डरने बालन पुड़ पिड़ी पिड़ी तग्र रहचे| ⁵¹ तैनी एपनी पैख्ड़ी सैहीं अजीब कम्मा कियोरन ज़ैन अपनो आप बडो समझ़ते थिये तैनी तैन तित्र बित्र किये| ⁵² तैनी बादशाह तैनकेरी गैद्दी पुड़ेरां उन्ढे बछ़ौड़े ते ज़ैन कमज़ोर थिये तैन खड़े किये| ⁵³ तैनी नियन्ने रोड़ी रोड़ी चिज़ैइं सैहीं रज़ांने ते धन दौवलती बाले खाली हथेइं भेज़े| ⁵⁴ तैनी अपने सेवक ईस्राएल एपु तियार कियो एपनी दियारी तैस यादगारी मां| ⁵⁵ ज़ैसेरो तैनी इशै बोव दादे ते अब्रहांमे सैहीं ते तैसेरी ओवलाधी सैहीं वैहिधौ कियोरो थु: ते तैसेरी दिया तैन पुड़ हमेशां तग्र भोंती रह्ली| ⁵⁶ ते मरियम कोई ट्लाई मिहींने तग्र अलशिबाही सैहीं साथी राही ते फिरी अपने घरजो आई|

यूहन्ना बपतिस्मो देने बालेरू ज़रम

⁵⁷ ते अल्शिबारो गलल्हे बिशनेरो मोको एजी आव ते तैस मठठु ज़र्मुं| ⁵⁸ तैसारे असेपासेरे रिशतेदारेइं एन शुनुं की परमेशरे तैस पुड़ बड़ी दिया कियोरिये तैससैहीं साथी खुशी मनई| ⁵⁹ अठ्ठावं दिहाड़े तैन मठठेरी सुंनत केरने आऐ ते तैसेरु नोवं तैसेरे बौवेरे ज़ाक्रियारे नोवें पुड़ रखनु चहते थिये| ⁶⁰ पण तैसेरी अम्मा ज़ोंने लगी नैइं एसेरू नोवं युहन्ना भोल्हु| ⁶¹ लोक तैसजो ज़ोंने लगे तुशी खानदेंनी मां कोई भी एस नोवेंरो नैइं| ⁶² तैखन तैनी लोकेइं ज़ाक्रीयाये पासे इशारे सैहीं पुछ़ू की तू मठ्ठेरू नोवं कुन रखनु चहतं? ⁶³ ज़ाक्रीयाये पटारी मगी ते तैस पुड़ लिखू की एसेरू नोवं युहन्नाएं ते सभ लोक हेरांन रेहीजे| ⁶⁴ तैखने तैसेरी ज़बांन खुली ते ज़ाक्रिया गल्लां लगो केरने ते परमेशरेरी तारिफ केरने लगो| ⁶⁵ अपने असेपासेरे लोक एस तमाशे हेरतां हेरांन रेहिजे ते युहूदीयेरे पहाड़ी अलाकंन मां एस गल्लरी चरचा भोंने लगी| ⁶⁶ ते शुन्ने बाले हेरांन रेहितां सोचते थिये की एन मठ्ठु बडु भोइतां कैरू भोनुएं किजोकी परमेशरेरी आत्मा अज़ैरी देंतीं तैस्सेहीं साथिये?

जकरयारू स्तुति गीत

⁶⁷ तैखन तैसरो बाजी ज़ाक्रिया पवित्र आत्माइं सैहीं भेरोऊ ते नबुत केरने लगो|

⁶⁸ ईस्राएलेरे परमेशरेरी तारिफ भोए किजोकी तैनी एइतांअपने लोकन नजात दितोरिये| ⁶⁹ ते अपने दास दाऊदेरे घरांने मां अक बड़ो तकतबर खास नबी भेज़ोरोए| ⁷⁰ ज़ैंच़रे तैसेरे पाक नेबी केरे ज़िरये ज़ेवरू थु: ज़ैन शुरू कैरां देंते भोंते एवरेन| ⁷¹ ताके असां अपने दुशमन कैरां ते बैर रखने बालन कैरां छुटम| ⁷² ते तै ईशे बौव दादे पुड़ दिया केरे ते अपनो पाबित्र वैहिधे याद केर| ⁷³ तै कसम ज़ै तीं ईशै बौव दादे अब्रहांमे सैहीं कियोरी थी| ⁷⁴ की तै असन हिमत दैल्हो की असां अपने दुशमन कैरां बेच़ी सखम केंची भी डरेरां बगैर| ⁷⁵ ते परमेशरेरी अराधन सैरी उमरी सच़्च़्च़े दिले सैहीं केरते रह्म| ⁷⁶ ते एह मठ्ठा तू परमेशरेरो भगत भोल्हो किजोकी तू परमेशरेरे अगरी अगरी च़ेलतां तैसेरी बत्तां तियार केरल्हो| ⁷⁷ तके तैसेरे लोकन तैस मुखतरु ज्ञान दे ज़ैन पापां केरी मैफारे लेई मैल्ह्ते| ⁷⁸ ईशै परमेशरेरी तैस बेड़ी दियाइ सैहीं अक बड़ो रोड़ो दिहड़ो निस्नोऐं| ⁷⁹ तके तैनकेरे लेई ज़ैन आंधरे ते मौऊतरी छेहोई मां बिशोरेंन तैन अक बड़ी लौ दे ते ईशे पांवन ज़िंदगरी बत्तां लाऐ|

⁸⁰ तैन मठ्ठु बेडोंतू जेवं ते आत्माइं मां बधतू जेवं ते ईस्राएले मां बांदे भोंनेरे दिहैड़ी तग्र बियाबांने मां राहू|

यीशु एरू ज़रम

( मत्ती 1 : 18 - 25 )

¹ तैन दिहैड़न मां कैसरहे गैसतुस बादशाहे एलांन कियेरु थु: की रुंमी हुकूंमती मां रहंने बाले सारे लोक अपन अपन नोवां लिखांन| ² एह पैहिली शुरुआत थी ज़ै सुरयेरे हाकम रेनुएसएरे ज़माने मां भुई| ³ ते सारे लोक अपन अपन नोवां लिखाने अपने अपने शहरे जो च़ले जे| ⁴ युसफ भी गलिलेरे शहर नसरते मैरां युहूदिये मां दाऊदेरे शेहर बैतलहंमें मां जो च़लो किजोकी तै दाऊदेरे घरांनेरी ओवलाधी मैरां थु| ⁵ तके तैड़ी एपनी कौन्श मरियमी सैहीं साथी ज़े दोज़िंती थी नोवं लिखाए| ⁶ जैईस तैन बैतलहंमे मां पूजां त मरियमी गल्लहे बिशनेरो मोको आव| ⁷ ते तैस पैहिलू मठ्ठु ज़र्मु ते तैनी तैन फैल्ह्ड़ी मां पलेटतां गाल्ही क राखु किजोकी तैस ध्रमशाली मां कोंच ठार न थी मैल्होरी|

फरिश्तां केरो पुहालण बिसतार

⁸ किछ पुहाल राती एकी ड्लबड़े मां गब्बां केरो पैरहो केरते थिये| ⁹ त परमेशरेरो सुवर्गदूत तैन क बांदो भोव ते परमेशरेरी लौ तैनकेरे च़ौवरे पासन बलने लगी त तैन डेरी जे| ¹⁰ पण सुवर्गदूते तैन जो ज़ोंव:डरा न्न किजोकी आंव तुसन अक बड़ी खुशखबरी शुंनने एवरोइं ज़ै ख़ुशी सैरी कौमरे लेइ भोल्ही| ¹¹ की अज़ दाऊदेरे घरांने मां अक मुखती देंने बालो पैइदा भेवरोए येनी यीशु मसही परमेशर| ¹² ते तैसेरो तुशे लेइ एह नशान भोल्हो की तुसन अक मठ्ठु फैल्ह्ड़ी मां पलैट्टेरू गौरु केरी गाल्ही क मैल्हेलु| ¹³ तैखने अंम्ब्रे मैरां खासे सुवर्गदूत बांदे भुए ते तैन परमेशरेरी तारिफ केरने लगे ते एन ज़ोंने लगे|

¹⁴ परमेशरेरी तारिफ भोए ते ज़मिनी पुड़ तैन मैन्हुं ज़ैन पुड़ तै खुशै सदा शांती मैल्हे|

¹⁵ ज़ैखन सुवर्गदुत पुहालां केरे सांमने वापस अंम्बरे मेंझो च़ले जे त पुहाल एपू म्मेंइ ज़ोंने लगे एजा अस बैतलहंमे मां गहंम ज़ैलहेरो बिस्तर परमेशरे असन दितोरोए तैस हेरम| ¹⁶ एलहेरलेई तैन लुशी तैठ्ठां च़ले जे ते तैड़ी पुज़े त सच़्च़्च़े तैड़ी मरियम युसफ ते निकड़ो बच्चो फैल्ह्ड़ी मां पलैट्टोरो गौरु केरी गाल्ही क मैल्हु| ¹⁷ ते पुहाल एन हेरतां ज़ैन तैनेइं एस मठ्ठैरे बारे मां ज़ोवरी थी तै गल बड़ी मुशुर भोई जेई| ¹⁸ पुहालां केरी गल्लां शुनतां सारे लोक हेरांन रेहीजे| ¹⁹ पण मरियम सैरी गल्लां अपने दिले मां रेखतां सोचने लगी| ²⁰ ते पुहालन ज़ैंच़रे तैनी सुवर्गदूते ज़ेवरु थु: तैनेइं एपनी एछैइं तैन सभ किछ लैहीतां परमेशरेरी तारिफ केरते वापस घर जो च़ले जे|

यीशु एरू नोंव रखनू

²¹ अठ्ठावं दिहाड़े ज़ैईस तैसेरो सुन्तीं बशाल्नेरो मोको आव त तैसरु नोवं यीशु रखु एन तैन नोवें ज़ैन सुवर्गदूते मरियमरे दोज़िंते भोंने कैरां पैहीले रखेरू थु|

मन्दरे मां यीशु एरू अर्पण

²² ज़ैखन मुसैरी रसमरे हिसाबे सैहीं तैसेरे शुच्चे भोंनेरे दिहाड़े पुरे भोए त युसफे त मरियमां यीशु योरोशल्में मांजो निह्यो तके तैस परमेशरे क पैश केरम| ²³ ज़ैंच़रे परमेशरेरे बचने मां लिखेरुए की सारां पैहिलां मठ्ठां परमेशरे लेइ पबित्र भोल्हां| ²⁴ ज़ैंच़रे परमेशरेरे बचने मां लिखेरुए की अक जोड़ी केंम्री केरी ते अक जोड़ी कबुतरां केरे दुई बच्चे सुखनरे लेइ आंन्ह

शमौनेरू गीत

²⁵ तैईस युरोशलमें मां अक मैन्हुं थु: तैसरु नोवं शुमौन थु: तै बड़ो रोड़ो मैन्हुं थु: कंने परमेशर मन्ने बालो थु: ते ईस्राएली लोकन रोड़ी बत्तां हेरने चहतो थियो ते तैस मां पबित्र आतमां थी| ²⁶ पबित्र आतमां तैस ज़ेवरू थु: की ज़ां तग्र तू परमेशर यीशु मस्ही न लाहेल्हो मरेल्हो न्न। ²⁷ शामुनं रुहांनी शेक्ती सैहीं हेकाली मां अव तैखन यीशु भी तैसरे हाज बोवेइं अंत्र अंन्ह्नोरो थु, की तैसेरी सुन्त कमाम | ²⁸ ता शामुने यीशु कुंमें मां ट्लातो ते परमेशरेरी तारीफ केरने लगो | ²⁹ एह परमेशर तीं ज़ै अपनो वेहीधो कियोरोए अपने दासे ख़ुशी सैहीं भेज़तस| ³⁰ किजोकी मेरी एछ़ेइं तेरी मुखती लाहोरिए| ³¹ ज़ै तीं सैरी कौमा केरे सांमने तियार कियोरोए| ³² तै गैर युहूदी केरेलेइ लौ देंने बालो दिहाड़ो ते तेरी ईस्राएली कौमरे लेइ अक बड़ी लौ बनेल्ही|

हन्नाहारी गुवाही

³³ यीशुएरे अम्मा बाजी ऐन गल्लां शुनतां ज़ैन यीशुएरे बारे मां केरते थिये जुगती सैहीं शुन्ने लोरे थिये| ³⁴ तैखन शुमौने तैस ब्रकत दिती ते तैसेरी अम्मा मरियमी ज़ोंव:हेरा इही गल पक्कीए की एन मठ्ठु ईस्राएले मां बड़े लोकांकेरे खिरकने बाले ते उठने बालां केरे लेइ एह अक एरहो नशान भोल्हो की ज़ैसेरे खलाफ लोक गल्लां केरेल्हे ³⁵ तके बड़े दिलां केरी गल्लां खुली गैनिण ते गंमेरी तलवारां तेरी जान भी ज़खमी केरनीएं| ³⁶ तैड़ी अक कौन्श थी ज़ै रूहांनी गल्लां केरती थी तैसारू नोवं हन्न थु: तै आशरेरे खानदेंनी मैरां अक मैन्हुं ज़ैसेरु नोवं फ़्नोवऐल थु: हन्न तैसेरी कुई थी तै बड़ी बुढी थी तै अपने ड्लाहेरां बाद सात साल अपने मुशै सैहीं साथी रहोरी थी| ³⁷ तै रंन्डी थी तैसारी उमर चूरासी साल थी तै मन्दिररे मैरां न थी गहती ते रात दिहेड़ी ब्रतां रखती ते दुवां प्राथन केरती रहती थी| ³⁸ तैखन तै भी तैड़ी एइतांपरमेशरेरू शुकर केरने लगी ते तैन सभ ज़ैन युरोशलमें गुलेंमी कैरां छुटनु बलगते थिये तैस मठ्ठेरे बारे मां गल्लां केरने लगी|

नासरते जो वापिस एज्नू

³⁹ ज़ैखन मरियम त युसफे रसमरे मुतबक यीशुएरी सुन्त कमाई त तैन गलिले मैरां अपने शहरे नसरते मेंझो जे| ⁴⁰ तैन मठ्ठु बडोंतू जेवं अकलमंद भोंतू जेवं किजोकी परमेशरेरो तैसपुड़ बड़ो अनुग्रे थु|

बच्चो यीशु मन्दरे मां

⁴¹ यीशुएरे अम्मा बाजी हर साल बडी दिहाड़ी बनने युरोशलमें मां गहते थिये| ⁴² ज़ैखन यीशु बहरे सालां केरो भोव त तैन बेडी दिहेड़ारे लेइ फिरी युरोशलमें मां जे| ⁴³ ज़ैखन बडी दिहाड़ी बिती जेई त यीशुएरां अम्मा बाजी वापस घरजो आं त मठ्ठु युरोशलमें मां रेही जेंवं ते तैसेरे अम्मा बाजी कोई पत्तो न थु| ⁴⁴ तैनेइं बुझ़ू की यीशु होरी मैन्ह्न सैहीं अगरों जेवरोए ते तैन अपने रिशतेदारन ते दोस्तन मां तोपने लगे| ⁴⁵ ज़ैखन तैन यीशु न मैल्लो त तैना वापस तोपते तोपते यूरोश्लामे मां पुज़े| ⁴⁶ ट्लेईयवं दिहाड़े तैनेइं यीशु हेकली मां सियांने लोकन सैहीं गलबात केरतो ते तैन सैहीं सुवाल जुवाब केरतो मैल्हो| ⁴⁷ ज़ैना लोक तैसेरी गल्लां शुन्ने लोरे थिये तैन यीशुएरी गल्लां शुनतां हेरांन रेहीजे| ⁴⁸ ज़ैखन तैसेरे हाज बौवेइं यीशु लाहू त तैना हेरांन रेहीजेयां तैनेइं ज़ोंव: मठ्ठा तीं असन सैहीं एन कुन कमावं? तेरां हाज बौव तीं तोपते तोपते परेशान भोई जेअं| ⁴⁹ यीशु तैन पुछ़ने लगो तुस मीं किजो तोपने लगोरे थिये? तुसन पत्तो नैइं की मी अपने बाजेरे घरे मां रहंनु ज़ारुरी थु| ⁵⁰ पण तैनेइं न बुझ़ू की एह असंन सैहीं कुन लोरोए ज़ोंने| ⁵¹ तैखन तै अपने अम्मा बाजी सैहीं साथी नसरते मां आव ते अपने अम्मा बाजी क राहू ते मरियमां ऐना सैरी गल्लां अपने दिले मां रेखी|

⁵² यीशु अकली मां भी ते कदे मां भी बेडोंतो जेव ते परमेशरेरी ते ईनसानेरी नज़री मां मुशुर भोंतो जेव|

यूहन्ना बपतिस्मो देने बालेरो बिसतार

( मत्ती 3 : 1 - 12 ; मरकुस 1 : 1 -8 ; यूहन्ना 1 : 19 - 28 )

¹ कैसर तिबरीसैरी हुकुमतरे परनोवं साले ज़ैखन पुन्तियुस पिलातुस युहूदियेरो गुवर्नर थु: ते गलिले मां हिरोदेसें नोवेंरो च़ैवरोवं ते तैसरो ढ्लाह फुलपुस एतुरिया ते तिरखोंनीतिसेरो ते लिसनियास अबिलनेरो हाकम च़ौवरोवं हिस्से पुड़ हुकुमत केरतो थु| ² हन्ना ते कैईफ़ा तैस साल पुरैहुत थिये तैईस परमेशरेरो बचन ज़ाक्रियएरे मठ्ठे युहन्ना पुड़ नाज़ल भेवरो थु| ³ ते युहन्ना यरदनेरे सैरी असे पासेरे अलाकन मां गैहितां पापां केरी मैफरो तोबा केरनेरे लेइ ते बपतिसमेरो प्रचार केरने लगो| ⁴ ज़ैंच़रे यशायाह नेबें बचनेरी कितबी मां लिखेरुए की बियाबांने मां फुकरने बालेरी अवाज़ एईचे की परमेशरेरी बत्त बनाथ ते तैसेरी बत्तां पैठी केरा|

⁵ डुघी ठारां सैरी भेरोइ गैनिण हर अक पहाड़ उन्ढु घिसनुएं ते ज़ैना ट्लेढी बत्तन तैना सीधी केरनीण ज़ैना उन्ढीं उबरीन तैना सीधी केरनीण|

⁶ ते हर अक मैन्हुं परमेशरेरी मुखती हेरेल्हो|

⁷ ते युहन्ना तैन लोकन ज़ैना जथन मां तैस कैरां बप्तिस्मों नैणे ऐवरे थिये त युहन्ना तैन सैहीं ज़ोतो थु: एह सप्पैरे बच्चाव तुसंन केंनी ज़ोंव:की एजने बालाव लुशी नश्शा| ⁸ बस्सा तोबा केरा ते अपने लेइ फल तियार केरा ते अपने दिले मां एन न ज़ौथ की अब्रहांम इशो बौवऐ किजोकी आंव तुसंन सैहीं ज़ोतां की परमेशर इन घोड़न मैरां अपने लेइ आव्लाध पैइदा केरी सखते| ⁹ ते हुन्ना त बुटेरे ज़ीलन पुड़ मैक्कु रखोरोए बस्सा ज़ै बूट रोड़ो फल न दे तै कटनोएं ते अगी मां छ़डनोएं| ¹⁰ लोकेइं तैस पुछ़ू फिरि असां कुन केरम? ¹¹ युहन्ने तैन सैहीं ज़ोंव:की ज़ैस क दुई कुर्तेन त अक कुरतो तैस देथ ज़ैस क अक भी नैइं ते ज़ैस क रौट्टीए आहे त तै भी रौट्टी बंटे| ¹² ते चुंगी नैणे बाले भी बप्तिस्मों नैणे ऐवरे थिये तैनेइं तैस पुछ़ू की एह गुरु जी असां कुन केरम? ¹³ तैनी तैन सैहीं ज़ोंव:ज़ैन तुशे लेइ कंनुणी हक रखेरूए तैस कैरां जादे न नैहीयथ| ¹⁴ ते तैखन होरी सिपैहीएइं भी तैस पुछ़ू की असां कुन केरम? तैनी तैन सैहीं ज़ोंव:की केंची पुड़ ज़ुल्म न केरथ ते न केंची कैरां बैहक न नैइयथ पण एपनी तनखुवाही पुड़ गुज़ारो केरथ|

¹⁵ तैखन लोक ख़ुशी थिये ते सभ लोक अपने दिले मां युहन्नेरे बारे मां सोचते थिये की ज़ै एवरोए तै मस्सहीए की नैइं| ¹⁶ त युहन्ने तैन जुवाबे मां तैन सैहीं ज़ोंव:की आंव त तुस्न पैंनी सैहीं बप्तिस्मों देताइं पण ज़ै मीं कैरां जादे ज़ोरे बालोए तै एज्ने बालोए आंव तैसेरी जुट्टरो तसमो भी खोलनेरे कबल नैइं ते तै तुस्न पवित्रात्माइं ते अगी सैहीं बप्तिस्मों दैल्हो| ¹⁷ किजोकी छज तैसेरे हथे मां हैं ते तै अपनुं अंण रोड़े च़ारे बातेईतां ते गैंहूं अपने कौठारे मां रखेल्हो पण झ़ाझ़ तैस अगी मां फुकेल्हो ज़ै हिश्नेरी न भोल्ही|

¹⁸ बसा तै बड़े रोड़े च़ारे लोकन समझ़ैइतां परमेशरेरी खुशखबरी शुनतो राहु| ¹⁹ हिरोदेस च़ौवरोवं मुल्खे पुड़ बादशाही केरतो थु: ते युहन्ने तै ठाकोरो थु: की हिरोदेसें अपने ढ्लाहेरी फिल्पुसैरी कौन्श हिरोदियास ज़ै थी तैस सैहीं ड्लाहा कियोरो थु: ते होरी भी बेड़ी गैलती कियोरी थी| ²⁰ तैनी एह सैभन कैरां जादे बुरी हरकत की की युहन्ना कैद केरतां छ़डौ|

यीशु एरो बपतिस्मो

( मत्ती 3 : 13 - 17 ; मरकुस 1 : 9 -11 )

²¹ ज़ैखन सभ लोक बप्तिस्मों नैणे लोरे थिये त यीशुए भी बप्तिस्मों नियो ते ज़ैखन तै दुआ लोरो थु: केरने त एरहू भोवं की अंम्बर खुली जेवं| ²² ते पवित्रात्मा कुबुतरेरी शकली मां यीशु पुड़ उतरी ते अंम्बरे मैरां ईही आवाज़ अई की ऐन मेरु ट्लारु मट्ठूए आंव ऐस पुड़ खुशीं|

यीशु एरी खानदानी

( मत्ती 1 : 1 -17 )

²³ ज़ैखन यीशुए अपनु कम शुरु कियुं त तैसेरी ऊम्र ट्लही साल थी ते ज़ैन्च़रे बुझ़ौंतू थु: की एन युस्फेरू मठ्ठुए| ²⁴ ते तै मत्तेरो ते तै लेवेरो ते तै मल्कियेरो ते तै यांनियएरो ते तैन युस्फेरु मठ्ठु थु| ²⁵ ते तै मत्तित्याहरो ते तै आमोसेरो ते तै नहुंमेरो ते तै असत्न्याहेरो ते तैन नैग्हेरु मठ्ठु थु| ²⁶ ते तै मत्तेरो ते तै मत्तित्याहरो ते तै शिंमेरो ते तै योसेखेरो ते तैन योदेरु मठ्ठु थु| ²⁷ ते तै युहन्नेरो ते तै रेसेरो ते तै ज़रुब्बाबिलेरो ते तै शालतियेलरो ते तैन नेरीरेरू मठ्ठु थु| ²⁸ ते तै मलकीयेरो ते तै अद्दीयेरो ते तै कोसामेरो ते तै इल्मोदामेरो ते तैन एइरेरु मठ्ठु थु| ²⁹ ते तै येशूएरो ते तै इलाज़ारेरो ते तै येरीमेरो ते तै मत्तेरो ते तैन लेवेरु मठ्ठु थु| ³⁰ ते तै शमौनेरो ते तै यहूदाहेरो ते तै यूसुफेरो ते तै योननेरो ते तैन इलयाकीमेरु मठ्ठु थु| ³¹ ते तै मलेआहेरो ते तै मिन्नाहेरो ते तै मत्तताएरो ते तै नातानेरो ते तैन दाऊदेरु मठ्ठु थु| ³² ते तै यिशैरो ते तै हेबेदेरो ते तै बोअज़ेरो ते तै सलमोनेरो ते तैन नहशोनेरु मठ्ठु थु| ³³ ते तै अम्मीनादाबेरो ते तै अरामेरो ते तै अर्रामेरो ते तै फारसेरो ते तैन यहुदहेरु मठ्ठु थु| ³⁴ ते तै याकूबेरो ते तै इसहाकेरो ते तै अब्र्हांमेरो ते तै तिरहेरो ते तैन नाहुरेरु मठ्ठु थु| ³⁵ ते तै सरूजेरो ते तै रुउरो ते तै इलिजेरो ते तै एबिरेरो ते तैन शिलहेरु मठ्ठु थु| ³⁶ ते तै केनानेरो ते तै अरफक्षदेरो ते तै शोंमेरो ते तै नूहेरो ते तैन लिमिकेरु मठ्ठु थु| ³⁷ ते तै मथूशिलहेरो ते तै हंनुकेरो ते तै यिरिदेरो ते तै महललेरो ते तैन कनानेरु मठ्ठु थु| ³⁸ ते तै एनोशेरो ते तै शेतकेरो ते तै आदमेरो ते तै परमेशरेरू मठ्ठु थु|

यीशु एरी आज़मैइश

( मत्ती 4 : 1 - 11 ; मरकुस 1 : 12 , 13 )

¹ फिरी यीशु पाबित्र आतमाइं सैहीं भेरतां यरदने मैरां वापस अव त च़ैलल्ही दिहाड़े आतमांरे ज़ौंने सैहीं बियाबांने मां च़लो जेव| ² ते शैतांन तैस अज़मांतो राहू तैन दिहेड़न मां तैनी किछ न खावं पींवं ते ज़ैखन तैना दिहाड़े पुरे भुए त तैस ढ्लुख लगी| ³ ते शैतांने तैस जो ज़ोंव:की अगर तू परमेशरेरु मठ्ठुस त इन घोड़न जो ज़ो की ऐना रौट्टी बन्न| ⁴ यीशु तैस जुवाब दितो की लिखेरुए की मैन्हुं सिर्फ़ रौट्टेइं सैहीं ज़िंतो न राहे| ⁵ ते शैतांन तैस एकी ऊचे पहाड़े पुड़ घींनतां जेव ते तैठ्ठां दुनियारी सैरी बाद्शैही हेरेई| ⁶ ते तैनी ज़ोंव:की एह सभ एखतियार मिएं ते एसैरी सारी शान शोकत आंव तीं दैल्हो एन मेरे स्पुर्दे आंव ज़ैस चहतां तैस देई सखतइं| ⁷ बस अगर तू मीं क माथौ टेकेल्हो त एन सभ किछ तेरु भोल्हु| ⁸ यीशुए तैस जुवाब दितो की लिखेरुए की तू सिर्फ़ अपने परमेशरे क मथो टेकं ते सिर्फ़ अपने परमेशरेरी सेवा केरां| ⁹ ते यीशु मन्दिरेरी च़ौटी पुड़ नैहीतां खड़ो कियो ते तैस सैहीं ज़ोंव:की अगर तू परमेशरेरु मठ्ठुस त अपनो आप इठां ऊंन्ढौ बछ़ौड़| ¹⁰ किजोकी लिखेरुए की आंव तेरे लेइ अपने फरिश्त्न ज़ोल्हो ते तैना तेरी हफाज़त केरेल्हे किजोकी लिखेरुए की आंव तेरे लेइ अपने सुवर्गदुतन ज़ोल्हो ते तैना तेरी हफाज़त केरेल्हे| ¹¹ ते एन भी आहे की तैन तीं अपने हथन पुड़ छ़ुल्हे किजोकी मत्ता तेरे पांउन घोड़न सैहीं ठोकर लगे| ¹² यीशु तैस जुवाब दितो की परमेशरेरु ज़ोंनुएं की तू अपने परमेशरेरी अज़मैईश न केरां| ¹³ ज़ैखन शैतांने अपनी सारी अज़मैईश परखी त किछ च़ीरे तैस कैरां दूर भोइजेव|

यीशु एरे सेवारू कम्म शुरू

( मत्ती 4 : 12 -17 ; मरकुस 1 : 14 , 15 )

¹⁴ फिरी यीशु पबित्र आतमाइं सैहीं भरपुर भोइतां गलिले जो च़लो जेव ते सारे अलाके मां तैसेरी मुशुरी भोइ जेइ| ¹⁵ ते तै तैनकेरे मन्दिरण मां तलींम देतो थु: ते सभ लोक तैसेरी तारिफ केरते थिये|

नासरते मां यीशु एरू अनदर

( मत्ती 13 : 53 - 58 ; मरकुस 6 : 1 - 8 )

¹⁶ ते फिरी तै नासरते मां आव ज़ैड़ी तै पल्लौरो थु: ते अपने मोके पुड़ सब्तेरी दिहेड़ी तै प्राथन भवने मां जेव ते वचन पड़नेरे लेइ खड़ो भोव| ¹⁷ ते यशायाह नेबेरी कितब तैस दिती ते तैनी खोलता तै वचन कढौ ज़ैड़ी लिखेरू थु: की|

¹⁸ परमेशरेरी रुहु मीं पुढ़ै एल्हेरेलेइ की तैनी आंव गरीबन परमेशरेरी खुशखबरी शुननेरेलेइ च़ुनोरोंइ की तैनी आंव भेज़ोरोंइ की कैदन हथरां छ़ैडीं ते कंना केरी एछ़न ठीक भोंनेरी खबर शुनेइं ते मसिब्तरे लोकन आज़ाद केरीं|

¹⁹ ते परमेशरेरी एज्नें बाले सालेरी खबर शुनेइं| ²⁰ फिरी तैनी तै कितब बंद केरतां अपने चेले क वापस देइतां बिशी जेव ते ज़ैतरे प्राथन भवने मां थिये सभ तैसेरां तकते थिये| ²¹ तै तैन सैहीं ज़ोंने लगो की अज़ तैन शर्त तुशै सामने पुरु भोवं| ²² ते सैभेइं तैसेरी शहादत दिती ते तैन पुड़ परमेशरेरी मेहेरभनीएं ज़ैना गल्लां तैस्केरां शुनते थिये हेरांन भोइतां ज़ोंने लगे की एन तैन युसफेरु मठ्ठु नैइं| ²³ ते यीशु तैन सैहीं ज़ोंने लगो की एह तमसिल मीं सैहीं ज़ुरुर ज़ोल्हे की एह बेईद जी अपनो आप त ठीक केर ज़ेन किछ असैइं कफरनहुमें मां केरतु शुनेरुए इड़ी अपने मुल्खे मां भी केर| ²⁴ ते तैनी ज़ोंव:आंव तुस्न सैहीं सच़्च़ ज़ोतां की कोई भी नब़ी अपने मुल्खे मां इज़्तदार न भोए| ²⁵ ते आंव तुस्न सैहीं सच़्च़ ज़ोतां की इलियएरे ज़मांने मां ज़ैखन साड़े ट्लाई साल अंम्बर बंद राहूं ते एड़ी तग्र की सैरी मुल्खे मां बड़ो अकाल पैई जेव ते बेड़ी रेंडी कौन्शां इस्राएले मां थी| ²⁶ पण इलिया तैन मैरां केंची क नैइं पण सैइदेरे मुलख सारपत शाहरे मां एकी रेंडी क भेज़ो| ²⁷ ते अलिशिया नेबेरे ज़मांने मां इस्राएले मां बड़े कौढ़ी थिये पण तैन मैरां कोई भी कौढ़े कैरां न छुटो पण सिर्फ अक नमांन कौढ़े कैरां अज़ाद भोव| ²⁸ ज़ैतरे लोक प्राथन मन्दिरे मां थिये ऐना गल्लां शुन्तां सरकी सैहीं लाल लाल भोइ जे| ²⁹ ते खड़े उठतां तैस शहरे कैरां बेइर निसे ते तै तैस पहाड़ेरी च़ौटी पुड़ घिनतां जे ज़ैस पुड़ तैनकेरो शहर अबाद थु: तके तैस तैठठां उन्ढै बछ़ौड़म| ³⁰ पण तै तैन मैरां निसतां च़लो जेव|

दुष्टातमाई बालो मैंन्हू बझ़ानों

( मरकुस 1 : 21 - 28 )

³¹ फिरी तै गलिलेरे शहर कफरनहूंमे मेंझो जेव ते सबतेरी दिहेड़ी तैन तालिम देंने लगोरो थु| ³² ते लोक तैसेरी तालिमी कैरां हेरांन रहते थिये किजोकी तैसरो वचन बड़ो भरी थु| ³³ ते प्राथन भवने मां अक मैन्हुं थु: ज़ैसमां बुरी आतमां थी तैनी बड़े ज़ोरे सैहीं चिंड मारी| ³⁴ एह यीशु नसरी तीं असन सैहीं कुन कम्मे कुन तू असंन मारने एवरोस आंव तीं ज़ानतां की तू कौन्स तू परमेशरेरु पाबित्र मठ्ठुस| ³⁵ यीशुए तैस झ़ीड़क देइतां ज़ोंव:च़ुपरह ते एस मैरां दुशट अतमां निसी गाह एत्रु ज़ोंने सैहीं दुष्ट आतमां तैसमैरां च़ुप च़ारे निसी जेई| ³⁶ ते सभ लोक हेरांन रेहितां एपु म्महेइं ज़ोंने लगे की एन कैरू वचने की तै कोस अख्तियारे सैहीं दुशटात्त्मांन हुकम देते ते तैना तैसमेरां निसी गैहीचन| ³⁷ ते सारे मुलखे मां च़ैवरे पासन तैसेरी अख़ुवा फैली जेई|

पतरसेरी शिख ते होरे लोक बझ़ाने

( मत्ती 8 : 14 - 17 ; मरकुस 1 : 29 - 34 )

³⁸ फिरी तै प्राथन भवने मैरां उठतां शुमौनेरे घरे जेव ते शुमौनेरी शिख भुखारे सैहीं बड़ी बिमार भेवरी थी ते लोकेइं तैसारे लेइ यीशु सैहीं ज़ोंवं| ³⁹ तै खड़ो भोइतां तैसारे पासे फिरो ते बिमारी झ़ीड़की त बमारी निसी जेई ते तै तैखने तैन्केरी सेवा केरने लगी| ⁴⁰ ते दिहाड़ी डूबने तग्र तैना सभ लोक ज़ैन मां रंग बरेंगी बिमेरी थी तैस क आंन्हते थिये ते यीशु तैन पुड़ हथ रेखतां तैना सभ बझ़ाए| ⁴¹ ते दुष्ट आत्मां भी चिंडां मैरती थी ते ज़ोती थी की तू परमेशरेरु मठ्ठुस ते बड़े लोकन मैरां दुष्ट आत्मा निसी जेई ते तै तैन झ़ड़कतां तैन गल न थु: देतो केरने किजोकी तैन ज़ैनती थी की एह मस्हीए|

इबादत खान्न मां प्रचार केरनो

( मरकुस 1 : 35 - 39)

⁴² ज़ैखन झ़ेझ़ भोई त तै तैठ्ठां निसतां एकी बेरांन ठैरी जेव ते पतोरां सारे लोक तैस तोपते तोपते तैस क पुज़े ते रोकने लगे की तू असन कैरां न गा| ⁴³ यीशुए तैन सैहीं ज़ोंव:मीं होरी शहरन मां भी परमेशरेरी खुशखबरी शुननिएं ज़रुरीए किजोकी आंव एल्हेरेलेइ भेज़ोरोइं| ⁴⁴ ते तै गलिलेरे मन्दिरण मा परचार केरतो राहु|

पेहिले चेले कुजाने

( मत्ती 4 : 18 - 22 ; मरकुस 1 : 16 - 20 )

¹ एकी दिहाड़े यीशु गनेसरतेरे डल्हेरे बंन्ने खेड़होरो थु: ते बड़े लोक तैसका परमेशरेरु वचन शुंन्नेरे लेइ दौवड़ते थिये| ² तैनी दुई किशती बन्ने लेगोरी लैही मैछ़ली ट्लांने बाले किशती ड्लेखी छ़ैडतां ज़ालां धौने लगोरे थिये| ³ यीशु एकी किशती मां च़ैढ़ी जेव ते किशतरे मालके शुमौने सैहीं ज़ोंने लगो तुस किशती ईठां नैइतां होरी ठैरीलाथ ते फिरी तै किशती मां बिशतां तैन लोकन तालिम देंने लगो| ⁴ ज़ैखन तैनी तालिम शुनाई त तै शुमौने सैहीं ज़ोंने लगो तुसां किशती डुघी ठैरी च़लाथ ते मैछ़ली केरेलेइ ज़ाल छ़डा| ⁵ शुमौन आगरां कुन जुवाब देते हे गुरु असैइं सैरी राती त्रले कीयोरेन ते अक मछ़ली भी नैइं ट्लेइयोरी पण असां तेरे ज़ोंने सैहीं ज़ाल छ़डतम| ⁶ आखर कर तैनेइं ज़ालां छैडी दीतां ते एत्री मैछ़ली ज़ालन मां लेग्गी की ज़ालां खीचोंने न लगां| ⁷ तैखन तैनेइं होरी किशती बालंन जो इशारो कियो की एजा इशी मद्दत केरा ते तैना भी आए ते दुइए किशती मैछ़लेइं सैहीं एत्री भेरोई जेई की किशती डूबने लेगी। ⁸ शुमौन पतरसे एन हेरतां यीशुरे पांऊन पुड़ पैइतां ज़ोंने लगे एह परमेशर आंव पापी मैन्हुंइ तुस मीं कैरां दूर भोथ| ⁹ गल्ल एह थी की ते त तैसेरे साथी एत्री मैछ़ली लैहितां हेरान भोई जेवरे थिये| ¹⁰ एहे हाल ज़ेबदेरे मठ्ठां केरो याकुबेरो त युहन्नारो भी थु: ज़ैना शुमौने सैहीं साथी थिये यीशु शुमौने सैहीं ज़ोंने लगो डरा न्ना अज़ैरे बाद तु मैन्ह्न ट्लाल्हो। ¹¹ तैनेइं किशती ड्लेखी ऐन्हतां लेइ ते अपनु सभ किछ छ़ैडतां यीशु पती च़ले जे।

कोढ़ी बझ़ानो

( मत्ती 8 : 1 - 4 ; मरकुस 1 : 40- 45 )

¹² एकी बार तै तैस अलाकेरे एकी शहारे मां थु: ते एरू भोवं की अक मैन्हुं थु: ज़ैसेरे सैरी जांनी कौढ़ थु: तैनी यीशु लाहु त पांउन पुड़ पैइतां ज़ोउले हथ केरतां ज़ोंने लगो एह परमेशर तुस चहथ त मेरु कौढ़ साफ केरी सखतथ| ¹³ ते यीशुए अपनो हथ तैस पुड़ रखो ते ज़ोंव:आवं चहतां की तेरु कौढ़ साफ भोए ते तैखने तैसरु कौढ़ साफ भोई जेंव| ¹⁴ तैखन यीशुए तैस मैन्हुं ज़ोंव:एह गल केंची सैहीं न ज़ोइयां पण तु सीधो पुरैहुत्न क गैहितां ते अपनो आप तैन हेरेइयां ते तै रसम भी साथी नैहीयां ज़ै मुसै नेबें रखोरी थी तके लोकां केरे लेइ अक शहादत भोए| ¹⁵ पण यीशु केरे बारे मां सैभन पतो लगो ते लोक दुरेरां देंते एजने लगे तके यीशुएरी गल्लां शुन्म कंने एपनी बिमैरी भी मुकांम| ¹⁶ पण यीशु जादे केरतां बेरांन ठैरी च़लो गहतो थियो ते दुआ केरतो थियो|

आधरंगी बझ़ानों

( मत्ती 9 : 1 - 8 ; मरकुस 2 : 1 -12 )

¹⁷ एकी दिहेड़ीहेड़ी एरू भोवं की यीशु ज्ञिान शुनाने लगोरो थियो ते तैखन किछ फिरसी तैड़ी आए तैन जो धर्म गुरु ज़ोते थिये तैना ते युहूदियेरे सैरी अलाकंन मैरां युरोशलमें मां एवरे थिये ते परमेशरेरी कुदरुत यीशु सैहीं थी की बिमार बेझ़ौइतां गहते थिये| ¹⁸ किछ मैन्हेंइ अक अधरांगी मैन्हुं खटी पुड़ छ़़ूइतां आंन्होरो थु: ते कोशीश लगे केरने की एस अंत्र नैहितां यीशु क पुज़ाम| ¹⁹ पण अंत्र एत्री तंगी थी की तैना अंत्र न गैही बटे फिरी तैनेइं लाए पुड़ गैहितां ला पुटू ते खटांसने तै अधरंगी मैन्हुं अंत्र यीशु केरे तुत्रे अगर हेसाल्हो| ²⁰ यीशु तैसरो विशवास हेरतां ज़ोंव: मिट्ला तेरे पाप माफ़ भुए| ²¹ धर्म गुरु ते फ्रिसी लोक सोचने लगे की एह कौन मैन्हुंए ज़ै झुठ ज़ोते परमेशरेरे बगैर कौन पाप माफ़ केरी सखते? ²² यीशुए तैनकेरी गल्लां बुझ़ी ते तैन जुवाब दितो तुस अपने दिले मां एरही गल्लां किजेई सोचतथ? ²³ एन ज़ोंनु कुन सुखतुए की तेरे पाप माफ़ भुए या एन ज़ोंनु की तु च़ल हुंनी? ²⁴ पण तुसन पत्तो ल्ग्गे की अब्ने आदमे ज़मिनी पुड़ पाप माफ़ केरनेरो अखतीयारे फिरी यीशु बिमारे जो ज़ोंव:अपनी खट सल्ह ते घर जो गा| ²⁵ तै अधरंगी बिमार मैन्हुं सैभी केरे सामने ते खड़उठो ते ज़ैस खटी पुड़ तै झ़ुलतो थु: अपने दौग्गे पुड़ छ़ुइतां परमेशरेरी तारिफ़ केरतो केरतो घर जो च़लो जेव| ²⁶ तैना सारे लोक हेरांन राहे ते परमेशरेरी तारिफ़ केरने लगे कंने ज़ोंने लगे एह त असैइं अज़ नोवीं गल्ल लाही|

लेवी कुजनो

( मत्ती 9 : 9 - 13 ; मरकुस 2 : 13 -17 )

²⁷ एन बितनेरां बाद यीशु तैठ्ठां नीस्से ते एकी धड़त घिंन्ने बाले क च़ले जे तैसेरू नोवं लावी थु: धड़त घिंन्नेरी च़ुबत्ती मां बिशोरो लाहु ते यीशुए तैस जो ज़ोंव:मी सैहीं तू साथी च़ल| ²⁸ ते तैखने यीशु सैहीं साथी च़लो जेव| ²⁹ ते फिरी लैवे यीशुरे लेइ अपने घरे अक बड़ी धाम दिती ते तैड़ी धड़त घिंन्ने बाले ते होरे भी बड़े लोक थिये| ³⁰ फ्रिसी त तैन केरे धर्म गुरु यीशु केरे चेलन सैहीं ज़ोंने लगे की तुस धड़त घिंन्ने बालन सैहीं साथी किजो खात्तथ पीतथ? ³¹ यीशुए तैन सैहीं ज़ोंव:बिमारन दुवेइयरी ज़रुरत भोचे पण सझ़़रे न भोए| ³² आंव पुंन्नी लोकांनैइं पण पैप्न पापै कैरां छुटांनेरे लेइ कुजाने एवरोइं|

बरतेरो सुवाल

( मत्ती 9 : 14 - 17 ; मरकुस 2 : 18 - 22 )

³³ तैतैन लोक यीशु सैहीं ज़ोंने लगे युहंन्नेरे चेले त ब्रत भी रखत्न ते प्राथन भी केरतन ते एन्च़रे फ्रिसी भी केरतन पण तुशे चेले त खाते पीते रहतन? ³⁴ यीशु तैन सैहीं ज़ोंव:कुन लाड़ो साथी भोंते संते जंन शोग रेखी सखत्न? कधे नैइं| ³⁵ पण तै दिहाड़ी भी एज्नीएं की लाड़ो इस दुनियाइ मैरां च़लो गहंनोएं तैईस तैना शोग बनेइ सखत्न| ³⁶ फिरी यीशु तैन अक होरी मसाल दिती की नोवुं लीग्ड़ छ़ींदतां पुरांने पुड़ टलोई न देन नता नोवीं भी छ़ींदोचे कंने पुरांने सैहीं ते मिले भी न्ना| ³⁷ नोवं श्रबत पुरेंनी मसकी मां कोई न छ़डे न्ना त नोवें श्रबते सैहीं मस्क भी फैटी गहचे ते श्रबत भी डुल्ली गहते ते तै मस्क भी बरबाद भोचे| ³⁸ किजोकी नोवं श्रबत नोवीं मसकी मां भरेरु लोड़ते| ³⁹ कोई मैंनू परानी श्रब पीयतां नोंवी न चाहे किजोकी तै ज़ोते की पुरानी रोड़ीए|

सब्तेरो प्रभु

( मत्ती 12: 1 - 8 ; मरकुस 3 : 23 - 28 )

¹ एकी फेरे यीशु सबतेरे दिहाड़े उडारन म्मेहीं च़लोरे थिये ते तैन केरे चेले गैहूं कैरां शिल्लां ह्थेइं सैहीं प्रोड़तां खाने लगोरे थिये| ² एन लैहितां फ्रिसी ज़ोंने लगे तुसां एन कुन केरतथ ज़ैन सबतेरे दिहेड़ी न भोए केरनु? ³ यीशु तैन जुवाब दितो तुसैइं कधे नैइं पढ़ैरु की जैईस दाऊदेरे साथी नियांने थिये त तैनेइं कुन क्मेवरू थु? ⁴ तैनेइं केंच़रे परमेशरेरे घरे मां गैहितां च़ैड़ोरी रौट्टी खेवरी थी ते अपने सैथन भी दितोरी थी ऐना रौट्टी खेंनी सिर्फ़ पुरैहूतां कैरू हक भोतु थु| ⁵ फिरी ते तैन सैहीं ज़ोंने लगो परमेशरेरु मठ्ठु सब्तेरी दिहेड़ारो भी मालके।

शुकोरे हथे बालो मैंन्हू बझ़ानों

( मत्ती 12 : 9 - 14 ; मरकुस 3 : 1 - 6 )

⁶ एकी बार यीशु प्राथन भवने मां गैहितां ज्ञान शुनेइ राहोरो थु: ते तैइस भी स्बतेरी दिहाड़ी थीतैड़ी अक मैन्हुं थु: ज़ैसेरो देंहीनो हथ शुकोरो थु:। ⁷ धर्म गुरु त फ्रिसी यीशुरी ताकी मां थिये की अगर यीशु स्बतेरी दिहाड़े केंची बज़्झ़ालो त असंन अल्ज़ाम लंनेरो मोको मैल्ह्नोएं। ⁸ पण यीशु तैन्केरे बारे मां सैम्झ़़ी जेव यीशुए तैस शुकोरे हथे बाले जो ज़ोंव:खड़ो उठ ते तै खड़ो भोव। ⁹ तैखन यीशु तैन सैहीं ज़ोंव:आंव तुसंन पुछ़तां की सबतेरे दिहाड़े भलाई केरनी रोड़ीए की बुराई केरनी रोड़ीए ब्च़ांनु की मारनु? ¹⁰ फिरी यीशुए सैभी कैरां तक्कु ते तैस मैन्हुं जो ज़ोंव:अपनो हथ हरा तैनी अपनो हथ अगरोवं रखो ते तैसरो हथ तैखने बेज़्झ़ौव। ¹¹ धर्म गुरन त फ्रिस्न बड़ी सरक अई तैना एपु म्मेहीं ज़ोंने लगे असां यीशु कुन केरम?

बहरे प्रेरत ठेराने

( मत्ती 10 : 1 - 4 ; मरकुस 3 : 13 - 19 )

¹² तैईस एरू भों की यीशु दुआ केरने एकी पहाड़े पुड़ च़लो जेव ते सैरी राती दुआकेरतो राहु। ¹³ ज़ैखन ट्लेकड़ोने लगु त तैनी अपने चेले एपु क कुजाए ते तैन मैरां बहरे चेले च़ुने ते तैन अक गुरु केरो दर्जो दितो। ¹⁴ अक शुमौनं ज़ैस्जो पतरस भी जोते थिये तैसरो ढ्ला इंद्रियास याकूब युहन्ना फिल्पुस ब्रत्माली। ¹⁵ मत्ती तौमा हेलफेरू मठ्ठु याकूब ते एकी मैईदांने मां खेड़ोव ते तैड़ी तैसेरे होरे भी चेले अकोठे भेवरे थिये ते सैरी युहूदियारे ते युरोशलमेंरे ते सुर ते सैइदेरे बंन्ने पुड़ेरां बड़े लोक तैड़ी एवरे थिये। ¹⁶ ते याकूबेरू मठ्ठू यहूदा ते यहूदा असकिरयुती ज़ै तैसरो ट्लुवाने बालो बनो|

तालीम देनी ते बझ़ाने

( मत्ती 4 : 23 - 25 )

¹⁷ तैखन तै तैन सैहीं साथी मैदाने मां खड़ो भोव ते तैसेरे चेले भी तैड़ी अकोठे भुए ते सारे यहूदिया ते यरूशलमेरे ते सूर ते सैइदेरे समुन्दरेरे बन्नेरे बड़े लोक ज़ैना तैड़ी थिये| ¹⁸ ऐन लोक यीशु कैरां ज्ञान शुंन्ने ते एपनी एपनी बिमैरी तैसका बझ़ांने एवरे थिये ते ज़ैन लोक परछांवीं सैहीं दुखे मां थिये तैना भी बेज़्झ़ौए। ¹⁹ सभ लोक तैस्सेहीं हथ लांनेरी कौशिश केरते थिये किजोकी तैस्मां शख्ती थी ज़ैस्सैहीं तैना बेज़्झ़ौते थिये।

बरकत ते दुखेरे वचन

( मत्ती 5 : 1 - 12 )

²⁰ यीशु अपने चेलां केरे तकने लगो ते ज़ोंने लगो मुबारकथ तूस ज़ैना गरीबथ किजोकी सुवर्गेमां बादशाही तुशिए। ²¹ मुबारकथ तुस ज़ैना नियन्ने भत्तेथ किजोकी तुस रज़नेथ ते मुबारकथ तुस ज़ैना अज़ लेरां देतथ किजोकी तुसैहीं ह्स्नुएं| ²² मुबारकथ तुस ज़ैखन परमेशरेरे नोवेंरे वजाही सैहीं लोक तुसनसैहीं बैर रखेल्हे ते तुसन भाईच़ारे कैरां कनारे छ़डेल्हे ते तुशी बैज़ती केरले ते तुशु नोवं नशान मटेइ छ़डेल्हे। ²³ तैस दिहाड़े खुशी भोइतां उछ़ड़थ किजोकी हेरा तुशे लेई सुवर्गे मां बड़ो फले तैन केरे बौव दादेइं नेबन सैहीं साथी भी एरो ज़ैरो बरतव केरते थिये|

²⁴ पण अफ्सोसे तुसां ज़ैना अंम्मीरथ किजोकी तुस्न सभ किछ मैल्हेरुए|

²⁵ अफ्सोसे तुशौ तुसां ज़ैन अज़ रज़ोरेथ किजोकी तुस नीयंन्ने रहंनेथ अफ्सोसे तुसां ज़ैना अज़ हसतथ किजोकी तुसैइं लेरां देंनिण तुसैइं शोग बनानोएं| ²⁶ पण अफ्सोसे तुसन पुड़ ज़ैखन लोक तुसन जो भलु ज़ोन किजोकी तैन लोकांकेरे बोव दादेंइं भी झुठे नेब्न सैहीं एरहो बरतव केरते थिये|

दुश्मन सैहीं प्यार

( मत्ती 5 : 38 - 48 ; 7 : 12 )

²⁷ आंव तुसन शुन्ने बालन सैहीं ज़ोताइं की अपने दुशमूने सैहीं हमदर्दी केरा ज़ैना तुसन सैहीं बैर रखत्न तैन्केरु भलु केरा| ²⁸ ज़ैन तुसन जो बुरू ज़ोतन तुस तैनकेरे लेइ ब्रकत मग्गा ज़ैन तुशी बैज़ती केरन तुस तैकेरे लेइ दुआमग्गा। ²⁹ अगर कोई तुशे तुत्रे पुड़ एकी पासे थप्पड़ बाहे त होरो पासो भी तैसेरे पासे रखा ते अगर कोई तुशु कोट नैते त कमीज़ भी तैस देथ। ³⁰ ज़े कोई तुसन कैरां किछ मग्ते त तैस देथ अगर कोई तेरो सबाब नैते त तैस कैरां वापस न मग्गा। ³¹ ते ज़ैंच़रे तुस चहतथ की लोक तुसन सैहीं रोड़ु केरन तैंच़रे तुस भी तैनसैहीं रोड़ू केरा। ³² अगर तुस तैनी सैहीं हमदरदी रखतथ ज़ैन तुसन सैहीं हमदरदी केरतन त तुशु कुन एवसांने? किजोकी बुरे पापी लोक भी अपने हमदरदी केरने बालन सैहीं हमदरदी केरतन। ³³ अगर तुस तैनकैरू भलु केरतथ ज़ैन तुशु भलु केरतन त तुशु कुन एवसांने? किजोकी बुरे पापी लोक भी अपने हमदरदी केरने बालन सैहीं हमदरदी केरतन। ³⁴ अगर तुस तैन्ने पैइंसे देतथ ज़ैन कैरां तुसन वापस भी मैलतन त तुशु कुन एवसांने? किजोकी बुरे लोक भी अपने हमदरदी केरने बालन पैइंसे देतन तके तैन कैरां वापस मैल्हन। ³⁵ पण तुस अपने दुशमून सैहीं हमदरदी रखा तैन्कैरू भलु केरा पैइंसे देइयथ पण तैन कैरां वापस मैल्हनेरी उमीद न रेखथ एलहेरो सुर्गे मां तुशे लेइ अक बड़ो फले तुस परमेशरेरां मठ्ठां भोलां किजोकी तै परमेशर न मन्ने बालन पुड़ ते ज़ालमन पुड़ भी दीया केरते। ³⁶ ज़ैरहो रहेंमदिल तुशौ परमेशरे तैरहे रहेंमदिल तुस भी भोथ।

इलज़ाम न लाथ

( मत्ती 7 : 1 -4 )

³⁷ तुस होरी केंची अल्ज़ाम न लेइयथ फिरी तुसन भी होरेइं केंचे अल्ज़ाम नैइं लांनो तुस होरी केंची माफ़ केरल्हे त तुसन भी माफ़ भोलु। ³⁸ तुस होरी किछ देल्हे त तुसन भी किछ दीतु गह्लू तुशु ब्रकतरु भांड ज़ैंच़रे आंन्नेरी हाटी हिलेइतां देतां तैन भी तैंच़रे ज़ैस हैटी सैहीं तुस होरी केरेलेइ मीनतथ तैस्से सैहीं तुशे लेइ भी मिनेल्हे।

³⁹ यीशुए तैन अक मसाल दिती की कंनो कंने बत्त हेरेई सखते? कुन तैन दुईये न बिछ़़डन? ⁴⁰ चेलो अपने गुरु कैरां बडो न भोए पण हर एकी गल्ली मां ज़ैखन सभ शीखेलो त अपने गुरेरो ज़ैरो भोल्हो। ⁴¹ तु किजो अपने ढ्लाएरी एछ़ी मां कुड़ो हेरत्स ते एपनी एछ़ी मां कंडेल न लैहीयोए? ⁴² तु अपने ढ्लाए कैंच़रे ज़ोइ सखतां की तेरी एछ़ी मैरां कंडेल कैडीं? हे लोकव पैहीले एपनी एछ़ी मैरां कंडेल कढ फिरी अपने ढ्लाएरी एछ़ी मैरां कुड़ो कैढ़ी सख्तस।

ज़ेरो बुट तेरहो फल

( मत्ती 7 : 16 - 20 ; 12 : 33 - 35 )

⁴³ किजोकी केंची भी रोड़े बूटे बुरो फल न ल्ग्गे ते न केंची बुरे बूटे रोड़ो फल लग्गे। ⁴⁴ हर बूट अपने फले सैहीं पशेंनोते किजोकी न झ़लन सैहीं फैगु लगन ते न क्रेरी सैहीं दाछ़ लगे। ⁴⁵ रोड़ो मैन्हुं अपने दिलेरे रोड़े खाते मैरां रोड़ी चीज़ां कढ़ते ते बुरो मैन्हुं अपने दिलेरे खाते मैरां बुरी चीज़ां कढ़ते किजोकी ज़ैन दिले मां भ्ररेरु भोते तैन्ने ज़बांनी पुड़ एईते।

घर बनाने बाले दूइय मैंन्हू

( मत्ती 7 : 24 - 27 )

⁴⁶ ज़ैखन तुस मेरे ज़ोंने पुड़ अमल न केरथ त मींजो परमेशर परमेशर किजो ज़ोतथ? ⁴⁷ ज़ै मींक एईते ते मेरी गल्लां शुन्तां तैनपुड़ अमल केरते त आंव तुसन ज़ोतां की तै कैसेरो ज़ैरो भोल्हो। ⁴⁸ तै तैस मैन्हेंरो ज़ैरहोए की ज़ैनी अपनु घर डूघी खाई कैढतां पैकी ठैरी घर बनवं ज़ैखन आंधी तौफंन आव त तैस घरे किछ न भोवं किजोकी तैसेरी मुनियाद पैक्की ठैरी थी। ⁴⁹ पण ज़ै मेरी गल्लां शुंनतां तैन पुड़ अमल न केरे त तै तैस मैन्हेंरो ज़ैरहोए ज़ैनी अपनु घर रेती पुड़ बनवं ते ज़ैखन हड़ाई अई त तैन घर डुली जेवं ते तब्बा भोइ जेवं।

एकी सुबेदारेरो विश्वास

( मत्ती 8 : 5 - 13 )

¹ ज़ैखन यीशु लोकन एपनी सभ गल्लां शुनेई छ़ैडी त ते कफरनहुमे मां अव। ² तैड़ी अक रुमीं आफसरेरो नोकर ज़ै तैस ट्लारो भी थु: ते बिमैरी सैहीं मरने बालो थु:। ³ तैस यीशुएरो पत्तो लगो त तैनी युहूदी केरे किछ सियांनो मैन्हुं तैस क भेज़ो ते तैन सैहीं मिनत केरतां ज़ोंव:की तै आइतां मेरो नोकर बज़्झ़ा। ⁴ तैन यीशु क आए ते तैस क मिनत केरने लगे की तैसेरी हालत एरही ज़ैरीहे ते तु तैसेरे लेइ किछ केर। ⁵ किजोकी ते ईशी ज़ाती सैहीं बड़ी मुहाबत रखते ते इशु प्राथन भवन तैन्नी बनेवरुए। ⁶ यीशु तैन सैहीं साथी च़ले जे पण ज़ैखन तैस घरे नेड़े पुज़े त सुबेदारे होरी दौस्तन सैहीं समाद भेज़ो की एह परमेशरे तकलीफ न दे आंव एस कबल नैइं की तु मेरे अंत्र एजी सखस। ⁷ ऐस्से वजाही सैहीं आंव भी अपनो आप भी तींक एजनेरे कबल न बुझ़ीं बलके एपनी ज़बांनी सैहीं ज़ोस त मेरो नोकर बेज़्झ़ौइ सखते। ⁸ तै मैन्हुं ज़ोंने लगो की आंव भी केंचेरे अदिकरे मां कम केरतां ते सिपाही मेरे आधींन्न ते ज़ैखन अक होरी जो ज़ोतां तु गा त तै गहते ते होरी जो ज़ोते एई त तै एईते ते अपने नोकरे जो ज़ोतां इन कम केर त तै केरते। ⁹ यीशु एन शुन्तां हेरांन रेही जेव ते पत्रावं लोकेरे पासे लगो तकने ज़ैना तैस पत्प्ती एवरे थिये तैन जो ज़ोंने लगो की अवं तुसन सैहीं सच़्च़ ज़ोतां की मीं एरहो जैरो विशवास इस्राएले मां नैइं लाहोरो। ¹⁰ ते ज़ैना लोक यीशु क भेज़ोरे थिये वापस ज़ैखन घरे आए त तै नोकर बेज़्झ़ौरो लाहु।

बेवारू मठ्ठू ज़ींतू केरनू

¹¹ होरसां एरू भोवं की यीशु नायन नोवेंरे शहारे मां च़लो जेव कंने तैसेरे चेले ते होरे भी बड़े लोक तैन सैहीं साथी थिये। ¹² ज़ैखन तैना शाहरेरे फाटके पुड़ नैड़े पुज़े त हेरतन की अक मुड़दो फुकने जो च़लेवरोए ते तैन एपनी हेईयरू आके मठ्ठु थु: ते शहरेरे बड़े लोक तैस रेंडी कौन्शी सैहीं साथी थिये। ¹³ यीशु एन लैहितां तैसेरी हैईये पुड़ बड़ी त्रस अई ते तैस जो ज़ोंव: लेरां न दे। ¹⁴ फिरी यीशु नैड़े एइतां मुड़देसहीं हथ लाव ते मुड़दो छ़़ुंने बाले खड़े भुए ते यीशुए ज़ोंव:एह जुवान खड़ो उठ। ¹⁵ तैन फटेरु मठ्ठु गल्लां लगु केरने ते यीशुए तैन फटेरु मठ्ठु तैसेरी हैईये सोंपतां छ़डु। ¹⁶ सभ लोक हेरांन परेशांन राहे ते परमेशरेरी तारिफ केरने लगे की अक बड़ो नब़ी असन मां एवरोए ते परमेशरे इशी मद्दत केरने एवरोए। ¹⁷ एस्से गल्लरी वजही सैहीं एह खबर युहूदियेरे च़ैवरे पासन फैली जेई।

यूहन्ना बपतिस्मो देने बालेरो सुवाल

( मत्ती 11 : 2 - 19 )

¹⁸ ते युहन्नारे चेलेइं ऐन सैरी गल्लां केरी खबर दिती त तैनी अपने चेलन मैरां दुई चेले एपु क कुजाए। ¹⁹ युहन्ना एन शुनतां दुई चेले यीशु क पुछ़ने भेज़े की एजने बालो मस्सही तुएस की असां होरी बलगम? ²⁰ तैन चेलेइं यीशु क एइतां पुछ़ू की असां युहन्ना तिंका पुछ़ने भेज़ोरेम की एजने बालो मस्सही तुएस की असां होरी बलगम? ²¹ तैखन यीशुए बड़े लोक बिमैरन कैरां ते दुष्टअत्मान कैरां छुटाए ते बड़े कंने लोकन एछ़न लौ दिती। ²² यीशु तैन चेलन जुवाब दितो की ज़ैन किछ तुसैइं लाहेरुए ते शुनेरुए गैहितां युहन्ना सैहीं बियांन केरा की कांने लहतन ते टोंटे च़लतन दे कौढ़ी केरे ज़ख्म साफ भोत्न ते टोंऊने शुंनतन ते मुड़दे ज़ींते भोतन ते गरीबन खुशखबरी शुंनाई गहचे। ²³ ते मुबारके ते ज़ै मेरे नोवें सैहीं ठोकर न खाए।

²⁴ ज़ैखन युहन्नारे भेज़ोरे चेले वापस च़ले जे त यीशु युहन्नेरे हके मां गुवहाई देंने लगो की तुस बियाबांने मां कुन हेरने जेवरे थिये? कुन हवाई सैहीं हिलते सरकण्डे? ²⁵ तुस फिरी होरू कुन हेरने जेवरे थिये? कुन रोड़ां लग्गोरां लिगड़न बालो मैन्हुं? तैन चमकते ल्ग्गोरे लीगड़न बाले मैन्हुं? ज़ैन अन्दे सैहीं बादशाही मैल्हन मां रहतन। ²⁶ त फिरी तुस होरू कुन हेरने जेवरे थिये? कुन अक नब़ी? हां आंव तुसन सैहीं ज़ोतां की नेबी कैरां बड्डे। ²⁷ एह तैहे ज़ैसेरे बारेमां लिखु जेवरुए की हेर आंव अपनो दूत तीं अगरी अगरी भेज़ताइं ज़ै तेरी बत्त अगरोवं तियार केरल्हो। ²⁸ यीशुए ज़ोंव: आंव तुसन सैहीं सच़्च़ ज़ोतां की ज़ैना कौन्शन कैरां पैइदा भेवरेन तैन मां युहन्ना बप्तिस्मों देंने बाले कैरां बडो कोई नैइं पण ज़ै परमेशरेरी बादशेही मां निकड़ोए ते तै युहान्न कैरां बड्डोए। ²⁹ ज़ैखन सैभी आम लोकेइं एन गल्लां शुनी त (चुंगी) धडत (टेक्स) नैणे बाले भी युहन्नारो बप्तिस्मों नैहितां परमेशर सच़्च़ो मन्नो। ³⁰ ते यीशुएरे बडे बडेइं तैस्केरां बप्तिस्मों न नैहितां परमेशरेरो रोड़ो ईरादो टैली दितो। ³¹ बस्सा इस ज़मांनेरे लोकन आंव किसेरू नोवं देइं की एन किसेरे ज़ैरेन? ³² तैना तैन मठ्ठां केरे ज़ैरेन ज़ैना बज़ारे मां बिशोरां एकी होरी जो हक्कां देइतां ज़ोतन असैइं तुशेलेइ बेंशोई बज़ाइ ते तुस न नच़्च़ै असैइं शौग मनाव पण तुसैइं लेरां न दिती। ³³ किजोकी युहन्ना बप्तिस्मों देंने बालो न रौट्टी खांतो आव न शराब पिंतो आव ते तुस ज़ोतथ की एस्मां दुष्टात्माएं। ³⁴ मैन्हेरू मठ्ठु खांतो पिंतो आव ते तुस ज़ोतथ ते हेरा तै शराबी मैन्हुं कंने धड़त नैणे बाले पैपी केरो दौस्ते। ³⁵ पण अक्कल अपने सैभी मठ्ठां कैरां जादे रोड़ी साबत भुई।

फ्रीसेरे घरे पैपी कौन्शी माफी

³⁶ फिरी केंचे फ्रिसे यीशु क द्र्खुवास की की मींसैहीं साथी रौट्टी खाबस्सा तै तैस्सेहीं साथी तैसेरे घरे जेव ते तैस्सेहीं साथी रौट्टी खांने लगो। ³⁷ त हेरा अक बदचलन कौन्श ज़ै तैस शहरेरी थी एन बुझ़तां की यीशु फरिसेरे घरे रौट्टी खांने बिशोरोए शंखमरमररी एकी बोतली मां अक माघो तेल अत्र आंन्हों। ³⁸ ते यीशुरे पांउन क नैड़े लेरां देंती खड़ी भुई ते तैसेरे पाव एंखेइं सैहीं सेले ते अपने दौगेरे बालेइं सैहीं पोंछ़ने लगी ते तैसेरे पावंन फुमड़ी देंने लगी कंने पावंन पुड़ अत्र तेल मलने लगी। ³⁹ ज़ैनी फ्रिसें यीशु कुजेवरो थु: तैनी ऐन लाहुं त ज़ोंने लगो अगर एह मैन्हुं नबी भोथो त बुझ़ेथो की ज़ै कौन्श तैसकाहे तै कौने ते एह केरी कौन्शे किजोकी एह ब्द्चलने। ⁴⁰ यीशु तैस सैहीं ज़ोंवं हे शुमौन मीं तींसैहीं किछ ज़ोंनुएं फ्रिसें ज़ोंव:एह गुरु ज़ो। ⁴¹ केंची शोहुकरेरो केंची दुई ज़न्न क क्रज़ो थु: एकी क पंच़ शौव दिनर ते होरी क पंज़ह दिनर थिये। ⁴² ज़ैखन तैन क देंने जो किछ न राहूं त तैनी शोहोकरे दुईने क्रज़ो माफ़ कमाव बस्सा कौन तैन मैरां जादे शोहुकारे सैहीं मुहाबत रखेल्हो? ⁴³ शुमौने जुवाब दितो की मेरे हिसाबे सैहीं त ज़ैसक पंच़ शौव दिनर थु: यीशु ज़ोंव: तीं सैही फैस्लो कियो। ⁴⁴ यीशु तैस कौन्शरे पासे तैकतां शुमौने ज़ोंव: इस कौन्शरां तक? आंव तेरे घरे आव? तीं मीं पाव धोंने जो पानी न दीतु पण ईस्सां मेरे पाव एंखेइं सैहीं धौए ते अपने दौगेरे बालेइं सैहीं पौंछ़े। ⁴⁵ तीं मीं फुमड़ी न दिती पण एसां ज़तह्लेरो आंव इड़ी एवरोइं मेरे पाव पौंछ़ने न छ़डे। ⁴⁶ तीं मेरे दौगे पुड़ तेल न छ़डो पण एसां मेरे पांवन पुड़ अत्र तेल मल्लो। ⁴⁷ एएल्हेरेलेइ आंव तीं सैहीं ज़ोतां की एसारे पाप ज़ैना जादे थिये माफ़ भुए की एसां जादे मुहाबत की पण ज़ैसेरे थोड़े पाप माफ़ भोतन त तै थोड़ी मुहाबत केरते। ⁴⁸ तैस कौन्शी जो ज़ोंव:गा तेरे पाप माफ़ भुए। ⁴⁹ एस गल्ली पुड़ ज़ैन तैस्सेहीं साथी रौट्टी खांने बिशोरे थिये अपने दिले मां ज़ोंने लगे की एह कौने ज़ै पाप भी माफ़ केरते? ⁵⁰ पण यीशुए तैस कौन्शी सैहीं ज़ोंवं तेरे विशवासे तु ठिक कियोरिस खुशी सैहीं गा।

यीशु एरी तातीम

¹ थोड़े च़ीरेरां बाद एरहू भोवं की यीशु अपने तैन बहरे चेलेन सैहीं साथी शहारे शहारे ड्लोंवें ड्लोंवें हंठने लगो ते परमेशरेरी खुशखबरी शुंनतो राहु। ² ते किछ कौन्शां भी तैन सैहीं साथी थी ज़ैन मैरां बेड़ी दुष्टआत्मा ते बिमैरी निसोरी थी तैना कौन थी मरियम त मगदलिनी थी ज़ैन मैरां सत दुष्टात्मा निसोरी थी। ³ लियोना ज़ै हिरोदेसेंरे एहेलकार खोज़ेरी कौन्श ते सोसनाह ते होरी भी कही कौन्शां थी ज़ैना अपनु सभ किछ देइतां तैन्केरी सेवा केरती थी।

बीज़ बेने बालेरू दृष्टान्त

( मत्ती 13 : 1 - 9 ; मरकुस 4 : 1 -9 )

⁴ फिरी ज़ैखन बड़े लोक तैस क अकौठ्ठे भुए ज़ैस्मां सैभी शहरां केरे लोक एवरे थिये यीशुए तैन मुसाल देइतां ज़ोंव। ⁵ अक बिज़ बेंने बालो बिज़ बेंने निसो ते बेंते बार किछ बिज़ बत्तरे आसे पासे झ़ड़ु ते किछ ढ्लेंच़ोवं ते किछ च़ुड़ोलेइं च़ुनतां खावं। ⁶ ते किछ घोड़ांगले मां झ़ड़ु ते लेगतां शुकु एल्हेरेलेइ की तैस पानी न मैल्हु। ⁷ ते किछ झ़लन मां झ़ड़ु ते झ़लेइं तैन हेदी मां दबेई छ़डु। ⁸ ते किछ बिज़ रोड़ी ज़मिंनी मां झ़ड़ु ते लगु ते शौव गुन फल लगो एन शुंनेइतां तैनी तैन सैहीं ज़ोंव: ज़ैस शुंनेरे कंन भोंन त तै शुंने।

दृष्टातां केरो मकसद

( मत्ती 13 : 10 -17 ; मरकुस 4 : 10 - 12 )

⁹ तैसेरे चेलेइं यीशु पुछ़ु की एस मुसालरो कुन मतलबे? ¹⁰ यीशुए तैन ज़ोंव:तुसन परमेशरेरी बादशैहीयरे भेतेरी समझ़ दितोरी पण होरन मसाल देइतां ज़ोतन ताके हेरतां भी न लहंन ते शुंनतां भी न शुंन्न ते न समझ़न।

बीज़ बेने बालेरे दृष्टातेरो मतलब

( मत्ती 13 : 18 - 23 ; मरकुस 4 : 13 - 20)

¹¹ एस मसालरो एह मतलबे की बिज़ परमेशरेरु वचने। ¹² बत्तरे बंनेरु बिज़ तैने ज़ैनेइं वचन शुंनु ते शैतांन एइतां दिले मैरां तै वचन घींनी गहते की एरू न भोए की विशवास केरे ते मुखती भोए। ¹³ ते घोड़ांगले मेहींयूं बिज़ तैने ज़ैनेइं वचन शुंनतां ख़ुशी सैहीं मनतन पण दिले सैहीं पक्के न भोंन ते किछ च़ीरेरां पत्ती अज़मैइशरे मोके मुड़ी गहतन। ¹⁴ ते झ़ालन मैहींयूं बिज़ तैने ज़ैनेइं वचन शुंनतां भी इस जहांनरी फिक्र ते दौवलतरो फरेब ते एशो अशरती मां फैसी गहतन ते तैन्केरो फल न पक्के। ¹⁵ पण रोड़ी ज़िमिनी मेहींयूं बिज़ तैने ज़ैना वचन शुंनतन ते अमल भी केरतन ते रोड़े च़ारे दिले मां बसातन ते सबरी सैहीं फल भी लगते।

दीयेरू दृष्टान्त

( मरकुस 4 : 21 - 25 )

¹⁶ कोई मैन्हुं दियो बैलतां केंची भांडे हैठ हेड़कतां न रखन ते न खट्टी हैठ रखन बलके उची ठैरी रखतन तके दियो अंत्र एजने बालंन लौ दे। ¹⁷ किजोकी कोई एरही चीज़ छ़प्पौरी नैइं ज़ै बंदी नैइं भेवरी ते न कोई एरू राज़े ज़ैसारो केंची पत्तो न भोए लगोरो ज़ै बांदु न कियुं गाहे। ¹⁸ बस्सा हुशार राथ की तुस कैंच़रे शुंनतथ किजोकी ज़ैसका आहे तैस होरु भी दीतु गालहु ज़ैसक नैइं तैस्केरां तैन भी नियुं गाल्हू ज़ैन तै अपनु बुझ़ते।

यीशु एरी अम्मा ते ड्लाह

( मत्ती 12 : 46 - 50 ; मरकुस 3 : 31 - 35 )

¹⁹ फिरी तैसेरी अम्मा ते तैसेरे ढ्लाह तैसका आए पण हछै मैन्हुं केरी वजाही सैहीं तैसका न पुज़ी बटे। ²⁰ ते यीशुए पत्तो दितो की तेरी अम्मा ते तैसेरे ढ्लाह बेइर खेड़ोरेन ते तीं सैहीं मिलनु चहतन। ²¹ यीशुए तैन जुवाब दितो की मेरी अम्मा ते मेरे ढ्लाह इनण ज़ैना परमेशरेरु वचन शुंनतन ते तैस पुड़ अंमल भी केरतन।

तोफान रोकनो

( मत्ती 8 : 23 - 27 ; मरकुस 4 : 35 - 41 )

²² फिरी एकी दिहाड़े एरू भोवं की यीशुए अपने चेलन सैहीं ज़ोंव:एजा डाले पार गहंम ते तैना किशती मां च़ैड़तां डले पार च़ले जे। ²³ पण ज़ैखन किशती मां च़ले त यीशुए निड्ल अई ते तै झ़ूली जेव ते डल्ले पुड़ बड़ो आंधी तौफांन आव ते किशती पैनी सैहीं भेरोई जेई ते तैन खतरो भोई जेव। ²⁴ चेलेइं एइतां यीशु बिंझ़ाव ते ज़ोंने लगे असां मैरी गहतमयीशु खड़उठो ते हवाई जो ते पैनी जो ज़ोंव:रुकीगाथ ते आंधी तौफांन रुकी जेव। ²⁵ यीशु तैन जो ज़ोंव:तुशौ विशवास कौरां जेव? तैना डेरी जे ते हेरान भोइतां एपु म्महेइं ज़ोंने लगे की एह कौने एह हवाई त पैनी हुक्म देते ते तैना एसेरो हुक्म मनतन।

दुष्टातमाई बालो मैंन्हू बझ़ानो

( मत्ती 8 : 28 - 34 ; मरकुस 5 : 1 - 20 )

²⁶ फिरी ते ग्रासेनयुंएरे अलाके मां पुज़े ज़ै गलिलेरे झिलारे सांमने पारे। ²⁷ ज़ैखन ते बन्ने पुड़ हेस्सौ त तैस शहरेरो अक मैन्हुं तैस मैल्हो ज़ैसमां दुष्टात्मां थी ते तै लिगड़ां न थु: लातो ते तै घरे न्ना ते मुशांन्न पुड़ मैहीं रहतो थियो। ²⁸ तैनी मैन्हें यीशु लाहू त चिंडां लगो मारने ते ज़ोरे सैहीं ज़ोंने लगो एह यीशुपरमेशरेरा मठ्ठा तीं मीं सैहीं कुन कम्मे? आंव तींक माफ़ी मगतां तू मीं दुखे मां न छ़ड। ²⁹ गल एह थी की यीशु तैस दुष्टात्माइं हुक्म देतोरो थु: की एस मैन्हुं मैरां निसी गा एलहेरलेइ की तै मैन्हुं दुशटातमां बड़े बुरे त्रिके सैहीं ट्लेइतां रखोरो थु: ते लोक तैस कैबु केरनेरे लेई अगरी भी रसंन ते शंगलन सैहीं बेंधतां रखते थिये ते तै तैन भी ट्लोड़तो थियो ते दुष्ट आत्मां तैस बियाबांन जंगलन मां नैती थी। ³⁰ यीशुए तैस मैन्हुं पुछ़ू तेरु कुन नोवें तैनी ज़ोंव? लशकर किजोकी तैसमां बेड़ी दुष्टात्मां थी। ³¹ ते तै दुष्टात्मान बालो मैन्हुं यीशु क ज़ोवले हथ केरतां ज़ोंने लगो की मीं नर्के मां गहंनेरो हुक्म न दे। ³² तैड़ी पहाड़े पुड़ अक सूरां केरो अक बड़ो घांन थियो ते तैन दुष्टात्माइं बालो मैन्हुं ज़ोंने लगो असन एन मां गहंने दे यीशुए गहंने दिती। ³³ ते तैना दुष्टआत्मां तैस मैन्हुं मैरां निसतां तैन सुरन मां च़ेली जेई ते सूरां केरो सारो घांन उत्रेई उन्ढे छालां मैरतां डल्हे मां डूबतां मैरी जेव।

³⁴ सुर च़ारने बाले एह तमाशो हेरतां नैशी जे ते शहरे मां ते अलाके मां एस गल्लरी खबर शुनाई। ³⁵ लोक तै तमाशो हेरने आए ते यीशु क ज़ैस मैन्हुं मैरां दुष्टात्मां निसोरी थी तैनी लिगड़ां लां ते होशी मां एइतां यीशुरे पावंन क बिशोरो लाहू ते डेरी जे। ³⁶ ते हेरने बालेइं तैन भी पत्तो दितो ज़ैन मां दुष्टात्मां थी की तै मैन्हुं कैंच़रे रोड़ो भोव। ³⁷ ते ग्रेसिनयुं आलाके मां च़ैवरे पासां केरे लोक यीशु जो ज़ोंने लगे की इठां च़लो गा किजोकी तैन पुड़ बड़ो भारी आसर भेवरो थु: ते यीशु किशती मां बिशतां वापस च़लो जेव। ³⁸ पण ज़ैस मैन्हुं मैरां दुष्टात्मां निसोरी थी तै यीशु क मिनत केरतां ज़ोंने लगो मीं एपु सैहीं साथी रख पण यीशुए तै भेज़ो ते ज़ोंव। ³⁹ अपने घरे च़लो गा ते लोकन सैहीं ज़ौ की परमेशरे मेरे लेई कुन कुन कियेरुए त्तल्ही तै च़लो जेव ते सारे शहरे मां एस मैहेरबेंनरो ज़ै यीशुए तैस पुड़ कियोरी थी सैरन शुंनाने लगो।

याईरेरी कूइय ते अक बिमार कौन्श

( मत्ती 9 : 18 - 26 ; मरकुस 5 : 21 - 43 )

⁴⁰ ज़ैखन यीशु वापस एजी राहोरो थु: त बड़े लोक यीशुए बलगते ते सुवागत केरनेरे लेई तैड़ी थिये ते बेड़ी ख़ुशी सैहीं मिलनेरे लेई तैसेरी बत्तां तकते थिये। ⁴¹ ते हेरा यायेर नोवेंरो अक मैन्हुं ज़ै प्राथना भवनेरो खास मैन्हुं थु: यीशु क आव ते तैसेरे पांवन पुड़ पैइतां ज़ोंने लगो की तू मेरे घरे च़ल। ⁴² किजोकी तैसेरी आके कुई ज़ै बहरे सालां केरी थी मरने बाली थी ते ज़ैखन यीशु च़लोरो थु: त लोक तैस उंढे बिछ़ड़ते थिये। ⁴³ ते अक होरी कौन्श ज़ैस बहरे सालां केरी देंती खुंनेरी बिमारी थी ते अपनो सारो पैइंसो बेईदन ते हकिमन क अल्लाज़ेरे लेई खरच़ कियोरो थु: ते तै केंचेरे हथे ठिक न भुई। ⁴⁴ तै कौन्श यीशु पतोरां एईतां तैसेरे चोगे सैहीं हुरी ते तैखने तैसारो खुंन बग्नो बंद भोई जेव। ⁴⁵ यीशुए ज़ोंव: ते कौने ज़ैनी मीं सैहीं हथ लेवरोए? तैखन सभ लोक ईन्कार केरने लगे त पतरसे ज़ोंवं एह गुरु लोक एक्केकी ढ्लेकेइं देइतां तीं उन्ढे बिछ़ड़ने लोरेन। ⁴⁶ पण यीशु ज़ोंव: की केंचे मीं सैहीं हथ लेवरोए किजोकी मीं पत्तो लगो की मेरी शक्ति निसोरिए। ⁴⁷ ज़ैखन तैस कौन्शां हेरू की आंव छ़ैपी न बेटीं त तै डरती डरती सामने अई ते यीशुएरे पावंन पुड़ पैइतां सैरी लोकां केरे सामने ज़ोंने लगी मीं यीशु सैहीं एलहेरलेई हथ लेवरोए ते ज़ैरहो मीं हथ लेवरोए आंव तैरही बेझ़ौरीं। ⁴⁸ यीशुए तैस कौन्शी ज़ोंव:कुईये तेरे विश्वासे तू बज़्झ़ाई ते ख़ुशी सैहीं च़ली गा। ⁴⁹ यीशु एन हेजु ज़ोंतो थु: त प्राथन भवनेरे खास मैन्हुं सैहीं केंचे ज़ोंव:की तेरी कुई मैरी जेवरिए हुनी गुरु तकलीफ न दे। ⁵⁰ पण यीशु एन शुनतां ज़ोंने लगो डरा न्ना भरोसो रखा कुई बेंच़ी गहंनियें। ⁵¹ ज़ैखन तै तैस घरे मां जेव त तैनी पतरस युहन्ना याकुब ते कुईयरे हाज बौवेरे अलावा होरो कोई अंत्र एजने न दितो। ⁵² सभ लोक तैस कुइयरे लेइ लेरां देंते थिये ते यीशुए ज़ोंव:लेरां न देथ एह कुई मुहेरी नैइं झ़ूलोरीए। ⁵³ लोक एन शुंनतां हसने लगे की तैना ज़ांनते थिये की कुई मैरी जेवरिए। ⁵⁴ पण यीशुए तैस कुइयरो हथ ट्लाव ते ज़ोंव:कुइये खड़ी उठ। ⁵⁵ तैसारी आत्मा वापस अई ते तै लुशी खड़ी भोई ते यीशुए तैस जो ज़ोंवं एस कुईये किछ खाने जो देथ। ⁵⁶ तैस कुईयरे हाज बौव हेरांन रेही जे यीशुए तैन सैहीं ताकिद केरतां ज़ोंवं ज़ैन किछ ईड़ी भोवं एन केंची सैहीं न ज़ोइयथ।

बहरे प्रेरत भेझ़ने

( मत्ती 10 : 5 - 15 ; मरकुस 6 : 7 - 13 )

¹ यीशुए अपने बहरे चेले एपु क कुजाऐ ते तैन कुदरुत ते अखतियार दितो की सैरी दुषटात्मां कढन ते बिमैरी दुर केरन। ² ते यीशुए तैना बहरे चेले परमेशरेरी बादशैहीयरी खुश खबरी शुंनाने ते बिमार ब्ज़्झ़ांनेरे लेइ भेज़ै। ³ ते तैनजो ज़ोंव:की बत्ते जो किछ न नैहियथ न सोटी न झोली न रौट्टी न पैइंसे ते न दुइयवं लिग़ड़ां। ⁴ ते ज़ैस घरे मां गाथ त तैड़ी बिशी रहंनु। ⁵ ते ज़ैस शहरेरे लोक तुसन कुबूल न केरन त तैस शहरे मैरां गहंतेबार अपने पांवां केरी धुड़ ठुड़कनी ताके तैन पुड़ गुवाही भोए। ⁶ बस्सा तैना चेले च़ले जे ते ड्लोवें ड्लोवें गैहितां परमेशरेरी खुश खबरी शुंनाते थिये ते लोकन बिमैरन कैरां ब्ज़्झ़ाते च़ले।

हेरोदेसेरी उलझ़न

( मत्ती 14 : 1 - 12 ; मरकुस 6 : 14 - 29 )

⁷ ते च़ौवरोवं मुल्खेरो बादशहा हिरोदेस एन शुंनतां डेरी जेव की किछ ज़ोते थिये युहन्ना मुड़दन मैरां ज़िंतो भोवरोए। ⁸ ते किछ इलिया ते किछ ज़ोते थिये नेबन मैरां कोई अक ज़िंतो भोवरोए। ⁹ पण हिरोदेस ज़ोंने लगो की युहन्नेरी करोड़ी त मीं कट्टाई पण एह कौने ज़ैसेरे बारे मां एरी ज़ैरी गल्लां शुंन्ने मां एजने लोरींन? ते हिरोदेस यीशु तकनेरी कौशिशि मां राहु।

पंच़ हज़ार मड़दन रोटी खुवैनी

( मत्ती 14 : 13 - 21 ; मरकुस 6 : 30 - 44 ; यूहन्ना 6 : 1 - 14 )

¹⁰ फिरि चेलेइं ज़ैन किछ कियेरू थु: यीशु सैहीं शुंनावं ते तैनी तैना अलग नैहितां बेतसैईदा नोवेंरे शहरे जो च़लो जेव। ¹¹ ते बड़े लोक तैस पती च़ले ते तै बड़ी ख़ुशी सैहीं तैन सैहीं मिलो ते तैन सैहीं परमेशरेरी बाद्शैहीयरी गल्लां केरने लगो ते ज़ैना बिमार थिये तैना ब्ज़्झ़ाए। ¹² ज़ैखन दिहाड़ी डूबने लगी त तैन बहरे चेलेइं यीशु ज़ोंव:की एन लोकन भेज़ी छ़ड एना कोस्कोई ड्लोवें मां बिशन ते रौट्टारो इंतज़ाम केरन किजोकी असां गैर आबाद ठैरींम। ¹³ यीशुए तैन ज़ोंव:की तुस्से एन किछ खाने जो देथ? चेलेइं ज़ोंव: असन क पांच़ रौट्टी ते दुई मैछ़लीन कैरां जादे किछ भी नैइं पण असां गैहितां एन जेई रौट्टी मुल्ले घिंनतां अंन्ह्तम। ¹⁴ किजोकी तैन तकरीबन पांच़ हज़ार सिरफ़ मड़दे थिये यीशुए अपने चेलन सैहीं ज़ोंव:एन लोकन पांज़ह पांज़ह मैन्हुं केरी हुंडी मां बिशाला। ¹⁵ ते चेलेइं तैन्ने कियुं ते तैन तैंच़रे बिशाल्हे। ¹⁶ यीशुए तैना पांच़ रौट्टी ते दुई मैछ़ली निही ते अंम्बरेरां तैक्तां तैन ब्रकत दिती? फिरी तैनी तैना रौट्टी ट्लोड़ी ते चेलन क दिती की तैन बिशालोरे लोकन खांने जो देंन। ¹⁷ सभ लोक रौट्टी खेईतां रज़्ज़े ते बिछ़ड़ोरे टुकां केरी बहरे टोकरी भेरतां सैल्ही।

पतरस ए यीशु मसीह कबूल केरते

( मत्ती 16 : 13 - 20 ; मरकुस 8 : 27 - 30 )

¹⁸ एकी बार यीशु अकेल्हे दुआ केरने लोरे थिये ते तैन्केरे चेले भी तैड़ी थिये? यीशुए तैन पुछ़ु की लोक मेरे बारे मां मिंजो कुन ज़ोतन आंव कौन अंहीं? ¹⁹ चेलेइं जुवाब दितो युहन्ना बप्तिस्मों देंने बालो ते किछ ज़ोत्न इलिया ते किछ ज़ोतन पूरांने नेबन मैरां कोई अक ज़िंतो भेवरोए। ²⁰ तैखन यीशुए चेलन पुछ़ू की तुस एस बारे मां मिंजो कुन ज़ोतथ? पतरसे जुवाब दीतो तु प्रभु परमेशर मस्सही आस? ²¹ एस गल्ली पुड़ यीशुए तैन ताकिद केरतां ज़ोंव:की एह गल केंची सैहीं न ज़ोइयथ।

अपने मौतरे बारे मां यीशु एरी भविश्द्वाणी

( मत्ती 16 : 21 - 23 ; मरकुस 8 : 31 - 33 )

²² ते साथी एन भी ज़ोंव:की अबने आदमे कही तकलिफां केरनी पैनिण बूढ़े सियांने ते खास मैन्हुं पुरैहुत फ्कही तैस बिलकुल घेटिया संमझ़ेल्हे तैना तैस मैरी छ़डेल्हे पण ते ट्लेंइयवं दिहाड़े फिरी ज़िंतो भोल्हो।

यीशु पत्ती च़ल्लनेरो मतलब

( मत्ती 16 : 24 -28 ; मरकुस 8 : 34 - 9 : 1 )

²³ फिरी यीशुए तैन सैभन ज़ोंव:की अगर कोई मेरी सेवा केरनी चहते त अपनो आप बिस्री छ़डे ते रोज़ अपनी फंसी स्ल्हे ते मीं पती च़ले। ²⁴ किजोकी ज़ै कोई अपनी जान बच़ांनी चहते तै तैस गुंवालो पण ज़ै मेरे लेइ अपनी जान गुंवाल्हो त तै तैस बच़ाल्हो। ²⁵ मैन्हुं अगर सारी दुनिया हासल केरे ते एपनी जांनरो नुक्सान केरे या अपनो आप गुंवाऐ त कुन फैईदो? ²⁶ किजोकी ज़ै कोई मीं कैरां ते मेरे वचने कैरां श्रमाल्हो त मैन्हेरु मठ्ठु भी अपने बोवे ते सुवर्गदुतन सैहीं साथी ज़ैखन एजेल्हो त तैन कैरां श्रमाल्हो। ²⁷ पण आंव तुसन सैहीं सच़्च़ ज़ोतां की किछ मैन्हुं ज़ैना इड़ी खड़ेन ज़ां तग्र तैना परमेशरेरी बादशाही एंइती न लांन्ह तां तग्र तैनका मौऊत न एजेल्ही।

यीशु एरू रूप बेदलोनू

( मत्ती 17 : 1 - 8 ; मरकुस 9 : 2 - 8 )

²⁸ एन गल्लां केरे तकरीबन अठ दिहाड़ना बाद एरू भोवं की यीशु युहन्ना याकूब पतरस साथी नैहितां एकी पहाड़े पुड़ दुआ केरने च़ले जे। ²⁹ ते ज़ैखन यीशु दुआ लोरो थु: केरने त तैसेरी शक्ल बेदलोई जेई ते तैसरो चोगो छ़ीतो सुफैद भोइतां चमकने लगो। ³⁰ ते हेरा दुई मैन्हुं यीशु सैहीं गल्लां लोरेथिये केरने ते एना मैन्हुं मुसौ त इलिया थिये। ³¹ ज़ै मेम्हाई मां बांदो भोइतां यीशुएरी मौऊतरो ज़िकर केरने लोरो थु: ज़ै सच़्च़े युरोशलमें मां बांदी भोने बाली थी। ³² पण पतरस ते तैसेरे सैथी केरी एछ़ी निड्ली सैहीं गिरकी भेवरी थी ज़ैखन तैना बिझ़े त तैनेइं यीशुरी मेंम्हा लाही ते तैन मैन्ह्न पुड़ भी नज़र पैई ज़ैन तैस्सेहीं साथी खड़खड़े थिये। ³³ ज़ैखन तैना यीशु कैरां च़ले त पतरसे यीशु सैहीं ज़ोंव:गुरु जी इशु ईड़ी रहंनु रोड़ोए की असां ट्लाई डेरे बनाम अक तेरे लेइ ते अक मुसै त इलियाएरे लेइ तैस पतो न थु: की एह कुन लोरोए ज़ोंने। ³⁴ तैखन तैन पुड़ बिदलार ज़ैरी घीरी जेई ते ज़ैखन तैना तैस घरे मां जे त तैना डेरी जे। ³⁵ तैखन तैस बिद्लारी मैरां अक आवाज़ अई की एन मेरु ट्लारु मठ्ठुए तुस एसेरू ज़ोंनु शुंना। ³⁶ ते तैस आवाज़ी सैहीं साथी तैनेइं यीशु अकैल्हो लाहु ते तैना च़ुप राहे ते ज़ैन किछ लाहेरू थु: तैन केंची सैहीं न ज़ोंव।

दुष्टातमाई बालू मठ्ठू बझ़ानू

( मत्ती 17 : 14 - 18 ; मरकुस 9 : 14 - 27 )

³⁷ होरसां एरू भोवं की ज़ैखन तैना पहाड़े पुड़ेरां उंढे एवरे थिये त बड़े लोक तैन क आए। ³⁸ एकी मैन्हें तैन लोकन मैरां बड़े ज़ोरे सैहीं हक देइतां ज़ोंव:एह गुरु आंव तींका ज़ोवले हथ केरतां की मेरु मठठु हेर तैन मेरु आक्के मठठुए। ³⁹ अक दुष्टात्मा तैस अपने कब्ज़े मां केरी गहचे ते तै अकदम चिंडां मारते ते तै कंम्ब्ने लगते ते तैसेरे एशेरां शैंफ निसचे ते दुष्टात्मा तैस बड़े बुरे तरिके सैहीं ज़ख्मी केरतां शारचे। ⁴⁰ ते मीं तेरे चेलन का बिनती कियोरी थी, कि तैस दुशटातमाइं कढन, पण तैना ना केढी बटे | ⁴¹ यीशुए जुवाब दितो हे घट विशवास केरने बालाव आंव कैईस तग्र तुसन सैहीं रेहीलो ते तुशी झ़ेल्हेलो? अपने मठ्ठे इड़ी आंन्हां| ⁴² तै मस्सां एवरो थु: त दुष्टात्मां तैन मठठु मुरोड़तां शारु? पण यीशुए दुष्टात्मां झ़ीड़केइतां कढ़ी ते तैन मठठु बज़्झ़ैइतां तैसेरे बौवेरे हवाले कीयूं।

अपने मौतरे बारे मां यीशु एरी दुइयों भविश्द्ववाणी

( मत्ती 17 : 22 , 23 मरकुस 9 : 30 - 32 )

⁴³ ते सभ लोक परमेशरेरी कुदरत हेरतां हेरांन रेहिजे ते ज़ैखन सभ लोक तैन कमां ज़ैन यीशु केरतो थु: हेरांन रहते थिये त तैनी अपने चेलन सैहीं ज़ोंव। ⁴⁴ मेरी इन गल्लां रोड़े च़ारे शुन किजोकी मैन्हेरु मठ्ठु मैन्हुं केरे हवाले भोंने बालोएय। ⁴⁵ पण तैन इस गल्ली न थिये ज़ांनते किजोकी तैन्केरां एह गल छ़पेइतां राखोरी थी की तैन न समझ़न ते चेले एस बारे मां यीशु पुछ़ने कैरां डरते भी थिये।

सैभना बडडो कौन ?

( मत्ती 18 : 1 - 5 ; मरकुस 9 : 33 - 37 )

⁴⁶ फिरी चेलन एपु मम्हेइं बड़ी बेंस भुई की असंन मां बडो कौने? ⁴⁷ यीशु तैन केरी दिलेरी गल्लां बुझ़तां अक मठठु आंन्हूं ते तैन एपु क खड़ु कियुं। ⁴⁸ ते अपने चेलन सैहीं ज़ोंव:ज़ै इस बच्चे मेरे नोवें सैहीं कुबूल केरते त तै मीं कुबूल केरते ते ज़ै मीं कुबूल केरते तै मेरे भेज़ने बाले कुबूल केरते किजोकी ज़ै तुसनमां सैभन कैरां निक्ड़ोए तै सैभन कैरां बडोए।

ज़ै खाफ नैइं तै हके मां

( मरकुस 9 : 38 - 40 )

⁴⁹ तैखन युहन्ना यीशु सैहीं ज़ोंव:एह गुरु असैइं अक मैन्हुं तेरे नोवें सैहीं दुष्टात्मां कढतो लाहू ते असैइं तैस ठाकू किजोकी तै असन सैहीं साथी न थु:। ⁵⁰ पण यीशुए तैस ज़ोंव:तुसां तैस फिरी न ठैकथ किजोकी ज़ै तुशे खलाफ नैइं तै तुशौ भोंतोए।

सामरी केरे ज़िरीये यीशु एरी खलाफत

⁵¹ ज़ैखन यीशुरे उबरे गहंनेरे दिहाड़े नेड़े आए त तै पक्के च़ारे युरोश्लमेरे पासे च़लो। ⁵² ते एपु कैरां अगरी अगरी किछ चेले भेज़े ते चेले सैंमरी केरे एकी ड्लोवें मां जे ताके यीशुएरे एजनेरी तियारी केरम। ⁵³ पण ज़ैखन ड्लोंवें बालेइं हेरू की यीशु युरोशलमें मेंझो गहंनु चहते त तै तैनेइं कुबूल न कियो। ⁵⁴ एन हेरतां तैसेरे चेले याकुब ते युहन्ना ज़ोंने लगे एह परमेशर अगर तू हुक्म दैस त असां इलिया नेबेरी ज़ैरी अंम्बरेरां आग बखेंनतां एन लोकन भस्म केरम। ⁵⁵ यीशुए तैनकेरां तक्कू ते तैना झ़ीड़कए ते ज़ोंव:तुस न ज़ांनथ की तुस कौस आत्मांरेथ। ⁵⁶ किजोकी मैन्हेरु मठ्ठु लोकन मारने नैइं बल्के बच़ांने एवरोए तैखन तैना होरी ड्लोंवेरे पासे च़ले जे।

यीशु एरो चेलो बन्नेरो मतलब

( मत्ती 8 : 19 - 22 )

⁵⁷ ज़ैखन तैना बत्तां च़लोरे थिये त केंचे यीशु सैहीं ज़ोंव:तू ज़ैड़ी भी गाल्हो आंव तेरी हिफाज़त केरल्हो। ⁵⁸ यीशुए तैस्सेहीं ज़ोंव:लोई केरी कुढ्ढां ते च़ड़ौल्ली केरे आल्हे भोत्न पण मैन्हेरे मठ्ठेरे लेइ कोई ठार न भोए ज़ैड़ी ते अपनो दौग छ़पाऐ। ⁵⁹ फिरी यीशु एकी होरी जो ज़ोंव:मीं सैहीं साथी च़ल पण तैनी मैन्हें ज़ोंव:पैहिले तु मीं भेज़ ते आंव गैहितां अपने बौवे देबीं। ⁶⁰ यीशुए तैस जो ज़ोंव:मुड़दन अपने मुड़दे दबने दे पण तु गा ते परमेशरेरी बाद्शाहीयरे बारे मां लोकन मां प्रचार कर। ⁶¹ एक्कें होरे मैन्हें यीशु जो ज़ोंव:परमेशर आंव तीं सैहीं साथी चेलीं पण पैहिले मीं भेज़ ते आंव अपने घरे बालन ज़ोइतां एज्जीं। ⁶² यीशुए तैन सैहीं ज़ोंव ज़ै हल्ली पुड़ हथ रेखतां पत्रोहुं फिरतां तकते तै परमेशरेरी बादशैहीयरे कबल न भोए।

स्तर चेले भेझ़ने

¹ ते इन गल्लां केरे पत्ती यीशुए होरे भी रोड़े ज़ैरे चेले तियार किये ते तैना दुई दुई ज़नै एपु कैरां पैहिले तैन ड्लोंवन मां ते शहरन मां भेज़ेज़ैड़ी तै एपु गहंने बालो थु:। ² ते तैनी तैन सैहीं ज़ोवं फसल त बड़ीए पण मज़दूर थौड़ेन ऐलहेरे लेई फसलरे मालके क बिनती केरा कि ते अपनी फसल कटनेरे लेई होरे मज़दूर भेज़े| ³ गाथ आंव तुस्न भैडां केरे ज़ैरहे ड्लाघन मां भेज़ने लोरोइं| ⁴ एपु सैहीं साथी न बेटवे न बूट ते न झोली नैहियथ ते न बत्तां केन्ची जो नमसकार ज़ोइयथ| ⁵ ज़ैसेरे घरे मां गाथ त पैहिले ज़ोथ कि इस घरे मां शांती भोए| ⁶ अगर तैड़ी कोई शेंतरे कबल भोल्हो त तुशी शांती तैस पुड़ रह्ली नैइं त तुशी शांती तुस्न पुड़ एजेल्ही| ⁷ तैस्से घरे मां रह्थ ते ज़ै किछ तैन कैरां मैल्हे तैन्ने खाथ किजो कि मज़दूरे एपनी मज़दूरारो हकदारे ते घरे घरे न गैहीयथ| ⁸ ते ज़ैस शहरे मां गाथ ते तैठेरे लोक तुस्न अपने घरे मां नैण त ज़ैन किछ तुशे सामने रखू गाहे तैन्ने खाथ| ⁹ तैठेरे बिमारन ठीक केरा ते तैन सैहीं ज़ोथ कि परमेशरेरू राज़ नेड़ूए| ¹⁰ पण ज़ैस शहरे मां गाथ ते तैठेरे लोक तुस्न कुबुल न केरन त तैसेरे शहरन मां गैहितां ज़ोथ| ¹¹ कि तुशे शहरेरी धूड़ भी इशे पांवन सैहीं ज़ै लगोरीए अस तुशे सामने ठुड़कतम ते फिरी भी बुझा कि परमेशरेरु राज़ तुशे नेड़े पुज़ेरूए| ¹² आंव तुस्न सैहीं सच़्च़ ज़ोताइं कि आदालतरे दिहाड़े तैस शहरेरी हालत सदौंम शहरेरी हालती कैरां जादे बुरी भोल्ही|

आविश्वसी शहरन झ़िड़क

( मत्ती 11 : 20 - 24 )

¹³ हे खुराजीन! अफसोस बैतसैईदा आफसोस किजोकी ज़ैन कम्मां मीं तुशै सामने कमां अगर एन कम्मां मीं सौर ते सैईदे मां कियोरां भोथां त तैन कैईसैरे टाट पलैटतां ते दौगे पुड़ मांज़न छैडतां ते आंगारन पुड़ बिशतां कैईसैरी तौबा कियोरी भोथी| ¹⁴ पण फिरी भी आदलतरे दिहाड़े तुशी हालत सौर ते सैईदा हाले कैरां जादे बुरो भोल्हो| ¹⁵ ते हे कफनहूंम कुन तू अम्ब्रे तग्र उचो कीव गहल्हो? न्ना बलके तु पताले तग्र उंढौ कीव गहल्हो| ¹⁶ ज़ै तुशी शुंनते तै मेरी शुंनते ज़ै तुसन घटया समझ़ते तै मीं घटया समझ़ते ते ज़ै मीं घटया समझ़ते ते मेरे भेज़ने बाले घटया समज़ते|

स्तर चेलां केरू वापिस एज्नू

¹⁷ ते तैना रोड़े चेले खुशी सैहीं वापस आए ते ज़ोंने लगे हे प्रभु तेरे नवें सैहीं दुष्ट आत्मा भी इशो हुकम मैन्चन| ¹⁸ यीशुए तैन सैहीं ज़ोवं मीं शैतन एंच़रे बिछड़तो लाहू ज़ैंच़रे च़ड़क अंम्ब्रेरां पैचे| ¹⁹ हेरा मीं तुस्न सपन ते बिच़न ड्लेंच़नेरो ते दुशमनेरी शैखती पुड़ अखतियार दितोरोए ते केंची चिज़ी सैहीं तुस्न कोई नुकसान न भोल्हो| ²⁰ फिरी भी तुस इस गल्ली सैहीं खुशी न भोईयथ की दुशटातमां तुशौ हुकम मैनचन पण इस गल्ली सैहीं खुश भोईयथ की तुशु नोवं सुवर्गए मां लिखोरूए|

यीशु एरू मघन भोंनू

( मत्ती 11 : 25 - 27; 13 : 16 , 17 )

²¹ तैखन यीशु पवित्र आत्मा सैहीं मस्त भोइतां ज़ोंने लगो एह बाजीं अम्ब्रेरे त धेरतरे परमेशरेरी तारिफ़ केरताइं की तुसैइं इन गल्लां बडे बडे लोकन ते बड़े बड़े अक्लमंद लोकन कैरां छ़पैइतां रेखी ते मठ्ठन क बेंदी कीअहं एह बाजी तेरी ख़ुशी एस्से मां थी। ²² सैरी चीज़ां मेरे बाजेरी तरफां मेरे सुपुर्द कियोरिन ते सुवाए बाजेरे होरो कोई न ज़ांने की मठठु कौने ते सुवाए मठ्ठैरे कोई न ज़ांने की बाजी कौने ज़ैस पुड़ मठठु तैस बांदु केरनेरो इराधौ रखते।

²³ तैखन ते अपने चेलां केरे पासे फिरो ते सिर्फ तैन्ने सैहीं गल्लां लगो केरने मुबारकन तैना एछ़़ी ज़ैना ऐना गल्लां हेरचन ज़ैना गल्लां तुस लातथ। ²⁴ किजोकी आंव तुसन ज़ोतां की बड़े बड़े नबी ते बादशह केरी खुवाइश थी की ऐना गल्लां हेरम ज़ैना तुस लातथ पण न लैही बट्टे ते एना गल्लां शुंनम ज़ैना तुस शुंन्तथ पण न शुंनी बैट्टी।

रहम दिल सैमरेरू दृष्टान्त

²⁵ तैखन अक कांनुनी मैन्हुं खड़ो भोव ते यीशु अज़मांनेरे लेइ ज़ोंने लगो एह गुरु मीं हंमैशरी ज़िमदगरो बारस बन्नेरे लेइ कुन लोड़ते कियेरू? ²⁶ यीशुए तैस सैहीं ज़ोंव:शैरिती मां कुन लिखेरुए? तु अंजिली कैंच़रे पढ़तस? ²⁷ तैनी मैन्हें जुवाब दितो परमेशर अपने प्रभु सैहीं अपने सारे दिले जानी सैहीं ते एपनी सैरी ताकती सैहीं ते एपनी सैरी अक्ल बुधी सैहीं मुहाबत रख ते अपने पुड़ौसी सैहीं अपने बराबर मुहाबत केर। ²⁸ यीशुए तैस जुवाब दितो तीं ठीक जुवाब दितो ऐन्ने केर फिरी तु ज़िंतो रहंनोस। ²⁹ पण तैनी अपनी रास्त्बाज़ी हेरांनेरे लेइ यीशु पुछ़ू की मेरो पुड़ौसी कौने? ³⁰ यीशुए तैस जुवाब दितो की अक मैन्हुं यरूशलमेरां यरीहोए जो च़लोरो थु: ते तै डेकू केरे हथे अव तैनेइं तैसेरां लिगड़ां खोल्लां ते मरो कुट्टो ते ज़खमी केरतां आध्मारो ब्नेइतां तैड़ी ज़ैरे छ़डतां च़ले जे। ³¹ अक पुरैहुत तैस बत्तां च़लरो थु: तैनी तै ज़खमी लाहू त ड्लखमेइं निसो। ³² एंच़रे अक लावी भी निसो ते तैस लैहीतां तै भी ड्लखमेइं निसो। ³³ फिरी अक सांमरी भी तैस बत्तां निसो ते तै ज़ख्मी लैहीतां तैस बड़ो कियास अव। ³⁴ ते तै तैसका जेव ते तैसेरे ज़ख्मन तेल मल्लो ते तैसेरे ज़ख्मन पट्टी बंधी ते अपने गधै पुड़ च़ैह्ड़तां एकी धर्मशाली मां सराइं मां तैसरो अल्लाज़ कियो। ³⁵ होरसां तैनी दुई दिनार रुपिइये कैढतां भ्ठ्यारे दिते ते ज़ोंव:एसैरी हेर गेश कैरां अगर जादे ल्गेले त आंव वैपसी पुड़ दैल्हो। ³⁶ तेरे हिसाबे मां एन ट्लेईन मैरां कौन ज़ैरहो तैसरो पड़ौसीए ज़ै डैकेइं ट्लातोरो थियो" कौन पुड़ौसी निसो? ³⁷ शैरितरे मैन्हें जुवाब दितो ज़ैनी तैस्सेहीं हमदरदी की।

मरथा ते मरियमरे घरे यीशु

³⁸ यीशुए तैस जुवाब दितो गा तु भी एन्ने केर। ³⁹ यीशु त तैसेरे चेले च़लते च़लते एकी ड्लोंवें मां पुज़े तैड़ी मरथा नोवेंरी एकी कौन्शां यीशु अपने घरे नियो तैसारी अक बेहींन भी थी तैसारु नोवं मरथा थु: तै प्रभु परमेशरेरे पांवन क बिशतां तैसेरी गल्लां शुंन्ने लोरी थी। ⁴⁰ पण मरथा हाछे कम्में कैरां घेमरोइतां यीशु क आई ते ज़ोंने लगी प्रभु तुसन ज़रां भी खियाल नैइं की मेरी बेहींन कम केरनेरे लेइ आंव अकेल्ली छ़डोरीं ते एस ज़ोथ ते मीं सैहीं साथी कम केरे। ⁴¹ प्रभु यीशुए तैस जो ज़ोंव:मरथा मरथा तु बैड़ी चीज़ां केरे बारे मां परेशान लोरिस भोने। ⁴² हालांकी अक्के चिज़े ज़ैसारी ज़ुरुरीए तै मरियमा रोड़ो हेसो रखोरोए ज़ै तैस कैरां केंचे न नैहीयोए।

चेलन प्रार्थना केरनी शिखालनी

( मत्ती 6 : 9 - 13 )

¹ एकी दिहाड़े यीशु एकी जगाई दुआ लोरे थिये केरने तैसेरे चेलन मैरां एक्कें ज़ोंव:प्रभु परमेशर ज़ैंच़रे युहन्ने अपने चेलन दुआ केरनी शिखालोरिये तैंच़रे तु भी असंन शिखाल।

² यीशु तैन ज़ोंव:की ज़ैखन तुस दुआ केर्थ त एन ज़ोइयथ एह बाजी तेरु नोवं पावित्र मन्नु गाहे ते तेरी बादशाही एजे|

³ इशी रोज़ेरी रौट्टी असन देंतो रेइयां।

⁴ इशे पाप माफ़ केरां किजोकी अस भी अपने कर्ज़दारन माफ़ केरतम ते इशी अज़मैइश न केरां|

प्रार्थनारे बारे मां यीशु एरी गुवाही

( मत्ती 7 : 7 -11 )

⁵ फिरी यीशु तैन सैहीं ज़ोंव:फर्ज़ केरा तुसन मैरां केंचेरो अक दौस्ते ऐध्धी राती अपने दौसते ज़ोते तू ट्लाई रौट्टी मीं दे। ⁶ किजोकी मेरो अक दोसत बड़े दुरेरां हंठतो मेरे क एवरोए ते मेरे क रौट्टी नैइं की आंव तैस रौट्टी देइ सेखीं। ⁷ ते तै तैसरो दौसत अंत्रां जुवाब देते मीं कैरां न उठोए दारबंदे ते मठ्ठां भी झ़ूलोरन ते आंव तीं रौट्टी न देइ सेखीं| ⁸ आंव तुसन सैहीं ज़ोतां की अगर तैसेरो दोस्त ते तैस रौट्टी न दे त तैसरो दौस्तरे बार बार मिनत केरने सैहीं ज़रुर तैस रौट्टी दैल्हो ते ज़ैत्री रौट्टी केरी तैस ज़रुरत भोल्ही देइ दैल्हो। ⁹ किजोकी ज़ै मगते तैस दितु गहते ज़ै तोप्ते तैस मैल्ह्ते ज़ै दार हिलांतो रहते त तैसेरे लीइ खोल्हु गहते। ¹⁰ किजोकी ज़ै म्गते तैस मैलते ज़ै तोप्ते तैस भी मैल्ह्ते ज़ै दार हिलाते तैसेरे लेइ दार खोल्लू गहते । ¹¹ तुसन मैरां कौन ज़ैरो बाजी एरहो भोए की तैसेरु मठ्ठु मछ़ली मगे ते तै सप्प दे? ¹² या ठुल मग्गे त तैसेरे हथे मां बिच्च़ू दे? ¹³ बस्सा की तुस बुरे भोइतां भी अपने मठ्ठन रोड़ी चीज़ देंनी ज़ांनतथ त कुन ईशो असमानी बौव परमेशर असंन पवित्र आत्मा न दैल्हो ज़ैना तैसकैरां मग्तन।

यीशु ते बालज़बूल

( मत्ती 12 : 22 -30 ; मरकुस 3 : 20 - 27 )

¹⁴ एकी बार यीशु एकी लट्टे मैरां दुष्टात्मा लोरे थिये कढने ते ज़ैखन ते दुष्टात्मा निसी त तै लट्टो गल्लां लगो केरने ते लोक हेरांन रेहीजे। ¹⁵ पण तैन मैरां किछ मैन्हुं ज़ोंने लगे कि तै दुष्टात्मारे गुरेरी हिंमती सैहीं दुष्टात्मा कढते। ¹⁶ ते किछ यीशु कैरां अज़मानेरे लेइ कोई अक असमानेरो निशान मगने लगे। ¹⁷ ते यीशुए तैन्केरी चाल बुझ़तां तैन सैहीं ज़ोंव:ज़ैस बादशैही मां फुव्ट पेचे त तै बादशाही बेरान भोचे ते ज़ैस घरे मां फुव्ट पेचे तैन उज़ड़ी गहते। ¹⁸ अगर शैतान अपनी खिलाफत एपु केरे त तैसरु राज़ कैंच़रे रेही सखते? फिरी तुस केंच़रे ज़ोतथ की बडे शैतानेरी मद्दती सैहीं दुष्टात्मा कढते। ¹⁹ अगर आंव शैतनेरी मद्द्ती सैहीं दुष्टात्मा कढतां त तुशे चेले कसेरे ज़ोंने सैहीं कढतन? तैन्ना तुशौ फैस्लो केरने बाले जैज भोल्हे। ²⁰ पण अगर आंव परमेशरेरी तकती सैहीं दुष्टात्मा कढतां त परमेशरेरी बादशाही तुशे नेड़े पुज़ोरीएए। ²¹ ज़ैखन कोई निगर मैन्हुं अपने घरेरो पैरहो केरते ता तैसरु सभ किछ बंच़ेरू रहते। ²² पण ज़ैखन तैसकैरां कोई निगर मैन्हुं तैसपुड़ हमलो केरते त तैस अपने कब्ज़े मां केरतां तैसेरे सारे हथियार घिंनी गहते ज़ैसपुड़ तैसरो भरोसो थु: ते तैसेरी सारी जेईदाद लुटी गहते। ²³ ज़ै मीं सैहीं साथी नैइं ते मेरो मुखाल्फे ते ज़ै मीं सैहीं साथी अकौठ्ठु न केरे ते तै बछ़ौड़ते।

अधूरे सुधारे सैहीं विपत्ति

( मत्ती 12 : 43 - 45 )

²⁴ ज़ैखन केंची मैन्हुं मैरां दुष्टात्मा निसचे त तै शुक्कौरी ठारन मां आराम तोप्चे ते ज़ैखन तैस तै ठार न मैल्हे त ज़ोचे की आंव वापस तैस्से घरे मं गाचां ज़ैठ्ठां आंव निसोरी थी। ²⁵ ते तैखन तै दुशटातमां वापस एइतां तैन घर साफ सुथ्रू रोड़ु लहचे। ²⁶ तैखन ते एपु सैहीं साथी सत्त होरी दुष्टात्मा साथी घिनतां तैस्मां अंत्र गैहितां बिशी गहचे ते तैस मैन्हेंरो हाल पैहिले हाले कैरां जादे बुरो भोते।

मुबारिक कौने ?

²⁷ यीशु ऐन गल्लां मस्सां ज़ोंने लगोरो थु: त हछे मैन्ह्न मैरां अक कौन्श जोरे सैहीं ज़ोंने लगी मुबारके तैन पेट ज़ैसमां तु पैइदा भोव ते मुबारकन तैना च़ुच़ू ज़ैन्केरू तीं दूध पियेरुए। ²⁸ पण यीशुए ज़ोंव:की मुबारकन तैना लोक ज़ैना परमेशरेरू वचन शुंनतन ते अमल केरतन|

आसमानी निशानेरी माँग

( मत्ती 12 : 38- 42 )

²⁹ ज़ैखन हछे लोक भोने लगे त यीशु ज़ोंव:इस ज़मानेरे लोक बुरेन ज़ैना मीं कैरां निशान मग्तन पण युहन्नेरे अलावा एन होरो कोई निशान न दितो गाल्हो। ³⁰ किजोकी ज़ैंच़रे युहन्ना नेन्वाएरे लोकन जो निशान बनो तैंच़रे मैन्हेरु मठ्ठु भी इस ज़मानेरे लोकां केरे लेइ निशान बनेल्हो| ³¹ पण दखनेरी मल्क अदालतरे दिहाड़े इस ज़मानेरे लोकन अलज़ाम लाल्ही किजोकी ते बड़े दुरेरां सुलैमानेरी अक्क्ल शुंनतां एवरी थी ते तै ईड़ी हेरा सुलैमांने कैरां भी बड्डोए। ³² नेनवाएरे लोक आदालतरे दिहाड़े इस ज़मानेरे लोकन सैहीं साथी खड़े भोइतां मुर्ज़म बनाल्हे किजोकी तैनेइं युहन्नेरे वचने सैहीं तोबा त कियोरी थी पण इड़ी हेरा कौने ज़ै युहन्ना कैरां भी बड्डोए।

जिसमेरो दियो

( मत्ती 5 : 15 ; 6 : 22 , 23 )

³³ कोई मैन्हुं दियो बैलतां भांडे हेठ या हेड़कतां न छ़डे बलके उची ठैरी रख्त्न तके अंत्र एजने बालन लौ भोए। ³⁴ तेरी जानरो दियो तेरी अछ़ै तेरी अछ़ रोड़ीए त तेरी जानी मां भी लौए ते अगर तेरी आछ़ै बुरीए त तेरी जान भी आंध्रीए। ³⁵ खबरदार कोस्कोई एरू न भोए की ज़ै लौ तुस्न मां आहे तैन आंधरु न भोए। ³⁶ बस्सा अगर तुशी जानी मां लौए त कोंची भी ठैरी आंधरु न भोए त सैरी जानी मां एरही लौ भोल्ही ज़ैंच़रे केंची दिये तीं लौ दितोरिये।

शास्त्रन ते फरीसन कैरां खबरदार

( मत्ती 23 : 1 - 36 ; मरकुस 12 : 38 - 40 )

³⁷ यीशु अपनी गल हेजु पुरी न थी ज़ेवरी त केंचे फ्रिसे यीशु क मिनत की कि मीं सैहीं साथी रौट्टी खा ते यीशु तैसेरे घरे जेव ते तैड़ी रौट्टी खाने बिशो। ³⁸ फ्रिसी एन हेरतां हेरांन भोव की यीशु बगैर हथ धोंने रौट्टी खांने बिशी जेव। ³⁹ तैखन प्रभु परमेशरे फ्रिसी सैहीं ज़ोंव:हे फ्रिसाव तुस थाली बेरमेइं त बड़ी साफ केरतथ पण तुशे अंत्र बेईमानी भेरताएं। ⁴⁰ हे बै अक्लाव ज़ैनी बेरमेइं बनेवरी तैनी आंट्लमेइं नैइं बनेवरी? ⁴¹ बस्सा एंत्री चीज़ दान केरा त सभ किछ पवित्र भोई गाल्हू| ⁴² पण एह फ्रिसाव तुसन पुड़ अफ़सोस तुस पुतनेरो त सेब्ज़ारो दशावं हिसो परमेशरे जो देतथ पण इन्साफ केरने त परमेशरेरी मुहबती कैरां दुर रहतथ लोड़तु थु: की दशावं हेसे सैहीं साथी इन भी केरथे| ⁴³ पण हे फ्रिसाव तुसन पुड़ अफ़सोस तुस लोक चहतथ की भवने मां तुसन एगरीं कुरसन पुड़ ब्शालह्न ते बज़ारन मां लोक तुसन क लिकतां नमसकार केरन। ⁴⁴ पण एह फ्रिसाव तुसन पुड़ अफ़सोस तुस तैन शैड़ोरी कब्रां केरे ज़ैरेथ ज़ैन पुड़ लोक अनज़ांन बुझ़तां पाव रखतन ते च़लतन।

⁴⁵ तैखन शैरितरे गुरन मैरां एके तैस जुवाब दितो हे गुरु ऐना गल्लां ज़ोइतां तु इशी तौहींन लोरोस केरने। ⁴⁶ यीशुए ज़ोंव: शैरितरे गुराव तुसन पुड़ अफ़सोस तुस मैन्ह्न पुड़ त एत्रो भारो ल्दतथ ज़ै छ़ुंनो असुख्तो भोते ते एपु अंग्लोई भी न हुराथ। ⁴⁷ तुसन पुड़ अफ़सोस तुस नेबी केरी कब्रां बनतथ ते तुशे बौव दादेइं तैना मारोरे थिये। ⁴⁸ बस्सा तुस शहातथ की तुस अपने बौव दादेरे कम्मां केरी पुरी तैइद केरतथ किजोकी तैनेइं त नबी कत्ल कमाये ते तुस तैन नेबी केरी कब्रां बनतथ। ⁴⁹ एलहेरलेइ प्रभु परमेशरेरी अक्लां ज़ोंव:नबी त चेले तैन क भेज़नेण तैना तैन मैरां किछ कत्ल केरले ते किछन स्ताल्हे। ⁵⁰ बस्सा इह कौंम सारे नबी केरे खुनेरे ज़ै दुनियारे शुरू कैरां देंतो बगेवरोए ज़िमबार भोल्ही। ⁵¹ हाबलेरे खुने कैरां देंतो ते ज़ाक्रियेरे खुने तग्र ज़ैना मन्दिरे मां कत्ल किये आंव ज़ोतां की एह कौंम तैनकेरे खुनेरी ज़िमबार भोल्ही| ⁵² पण एह फ्रिसाव तुसन पुड़ अफ़सोस तुसैहीं ज्ञानेरी चाबी त अपने कबज़े मां रखी तुस पण एपु भी दाखल न भोए ते ज़ैना दाखल भोंनु चहते थिये तैना भी रोके। ⁵³ ज़ैखन यीशु तैठ्ठां निसी जे त धर्म गुरेइं ते घेरो ते सर्करे मारे च़ौवरे पासना बड़े असुखते सुवाल पुछ़ने लगे। ⁵⁴ ताके यीशुएरी ज़बांना कोई एरी गल्ल निसे ज़ैस पुड़ तैस गलती लांन।

पाखणदेरे खलाफ खबरदारी

( मत्ती 10 : 26 - 27 )

¹ ऐसे फेरे हजारेइं मैन्हुं अकोठ्ठे भोइजे ते एकी होरी उंडे खिरकते थिये त यीशुए सैभन कैरां पैहिले अपने चेलन खड़े भोइतां ज़ोंव:फ्रिसी केरे खमिरे येनी तैनकेरे रिती रुवाज़े कैरां हुशार रेहियथ। ² कोई चीज़ हेड़कोरी नैइं ज़ै बांदी न भोए ते न कोई चिज़ छ़पोरीए ज़ै बांदी न भोए। ³ एल्हेरेलेइ ज़ैना गल्लां तुसैहीं आंधरे मां ज़ेवरिन तैना गल्लां लौइ मां शुंन्नीण ते ज़ैना गल्लां तुसैहीं सौड़ी मां ज़ेवरींन तैन्कैरू एलांन लाऐ पुड़ भोनुएं।

कैस कैरां डरम

( मत्ती 10 : 28 - 31 )

⁴ मिट्लाव आंव तुसन सैहीं सच़्च़ ज़ोतां की तैन्केरां न डेरथ ज़ैना जानी नुकसान पुझ़ातन तैसेरे बाद तैना किछ न केरी बटन। ⁵ पण आंव तुसन सैहीं सच़्च़ ज़ोतां की कैस्कैरां डरेरु लोड़ते ज़ैस जानी मारनेरे बाद तैसेरी आत्माइं नर्के मां छ़डनेरो अख्तियारे हां आंव तुसन सैहीं सच़्च़ ज़ोतां की तैस कैरां डरा। ⁶ अगर दुई पैइंसन मां ट्लाई च़ड़ोल्ली बिक्चन पण परमेशर तैन मैरां केंची भी न बिसरे। ⁷ तुशे दौगेरे सारे बाल गंनोरेन डरा न्ना तुस त काही च़ड़ोलन कैरां भी जादे किंमतीथ।

यीशु कबूल केरनो ते न कबूल केरनो

( मत्ती 10 : 32 - 33 ; 12 : 32 ; 10 : 19 ,20 )

⁸ आंव तुसन ज़ोतां की ज़ै कोई मैन्हुं केरे सामने मेरो इकरार केरेल्हो मैन्हेरु मठ्ठुभी परमेशरेरे सुवर्गदुतां केरे सामने इकरार केरेलहो। ⁹ पण ज़ै मैन्हुं केरे सामने मेरो इनकर केरेल्हो त तैसरो इनकर परमेशरेरे सुवर्गदुतां केरे सामने कियो गाल्हो।

¹⁰ ज़ै कोई मैन्हेरे मठ्ठेरे खलाफ किछ ज़ोल्हो तै तैस माफ केरेल्हो पण ज़ै पबित्र आत्मारे खलाफ किछ ज़ोल्हो तैस माफ न केरल्हो।

¹¹ ज़ैखन तैना तुसन मन्दिरन मां ते बडे बडे हक्मन क नैल्हे त फ़िक्र न केरथ की अस कुन ज़ोंम ते कैंच़रे जुवाब देंम। ¹² किजोकी पबित्र आत्मा तुसन एस मोके पुड़ तुसन ज़ोल्ही की तुसैहीं कुन ज़ोंनुएं।

एकी दौलत मंद बेवकूफेरू दृष्टान्त

¹³ हछे मैन्ह्न मैरां केंचे एकें ज़ोंव:हे गुरु जी मेरे ढ्लाहे जो ज़ौ की मेरे हेसे मैरां मेरो हेसो मेरे हवाले केरे। ¹⁴ यीशुए तैस जुवाब दितो आंव केंनी तुशौ जैज फैस्लो केरने बालो बनेवरोइं? ¹⁵ ते यीशु तैन सैहीं ज़ोंव:हर किस्बेरे लाल्च़े कैरां दूर भोइयथ ते न केंचेरी ज़ेईदाद केंचेरी जानी कैरां जादे भोए। ¹⁶ तैखन यीशुए तैन अक बार शुंनाइ केंची अंबिरेरी ज़मिनी मां बड़ी फसल बनी। ¹⁷ तै अपने दिले मां सोचतां ज़ोंने लगो की आंव कुन केरीं? मीं क ठारे नैइं की ज़ैड़ी आंव आन रेखी सैखीं। ¹⁸ तैखन तैनी ज़ोंव:की आंव अक कम केरतां की अपने पुरांने कोठार पुटतां होरे बड्डे कोठार बनैइं ते अपनु सारु आन तैसमां रखतां। ¹⁹ ते फिरी एपनी जांनी सैहीं ज़ोंनुएं की मिका त बड़े सालन तग्र आन जम्मां भेवरुए आरामें सैहीं खातां ते एश केरतां। ²⁰ पण परमेशरे तैस मैन्हुं जो ज़ोंव:हे बै अक्ला अज़्ज़े राती तेरी जान इठां च़ली गहंनिएं ते ज़ैन किछ तीं जम्मा केरतां रखेरुए होरी केरे कम्में एजनुएं? ²¹ एलहेरलेइ ज़ै अपने लेइ दौवलत जम्मा केरते पण परमेशरेरी नज़री मां तै अंबीर न भोए एसेरो भी एहे हाल भोंनोएं।

परमेशरे पुड़ भरोसो रखनो

( मत्ती 6 : 25 - 34 )

²² तैखन यीशुए अपने चेलन सैहीं ज़ोंव:एहे गल्ले की आंव तुसन सैहीं जोतां की न त एपनी जानरी फ़िक्र केरा की तुस कुन खाले या पिल्हे ते एपनी जानी कुन डब्बैल्हे। ²³ किजोकी जान खुराकी कैरां जादे ते जिस्म लिग्ड़े कैरां बैद्धतां भोते। ²⁴ कांवां केरा तक्क तैना न बेंन ते न कटन ते न तैन क गुदाम भोए ते न खाते भोंन तां भी परमेशर तैन खाने जो देते ते तुस त च़ड़ोलंन कैरां भी जादे किमतीथ। ²⁵ तुसन मां कौन एरोहे की ज़ै फिक्र केरतां सिर्फ अक घड़ी उम्रारी बधैई सखते? ²⁶ बस्सा ज़ैखन तुस एन अक निकड़ी ज़ैरी गल्ल भी न केरी बटथ त बाकी चीज़ां केरी फिक्र किजो केरतथ। ²⁷ सोस्नेरे फुड़ु केरे तक्क की तैना कैंच़रे बेडोतन? तैन न मेहेंनत केरन ते न कत्तन तां भी आंव तुसन सैहीं ज़ोतां की सुलैमान बादशाह भी तैन फुड़ु केरो ज़ैरहो तैन कैरां घट न थु:। ²⁸ बस्सा ज़ैखन परमेशरे मैईदानेरो घास ज़ै अज़ अहे ते कलां लौवंने मां फुक्नोएं एरहू लिग़ड़ लुवाते ते एह घट विश्वासे बालाव कुन ते तुसन रोड़ु लिग़ड़ न दैल्हो? ²⁹ ते एस फिकरे मां न रेहियथ की तुस कुन खाले या पिल्हे ते न शक केरथ। ³⁰ किजोकी दुनियारी सैरी ज़ातां एस्से फिकरे मां लेगोरी रेहिचन पण तुशो बाजी ज़ांनते की तुसन कौल्हेरी कौल्हेरी ज़ुरुरते। ³¹ पैहिले परमेशरेरी बादशेहीयरी तलाश केरा फिरी तुसन ऐना सैरी चिज़ां मैल्ही गैहेली।

आसमानी दौलत

( मत्ती 6 : 19 - 21 )

³² हे कम ज़बांनव डरा न्ना किजोकी तुशे बाजेरी ख़ुशी एस्से माहें की ते तुसन बादशाही दे। ³³ अपनु घरबार बेच़तां धर्मरथ देथ ते एपु जो अक बेटुवो बनाथ ज़ै पुरांनो न भोए सुरगे मां दौवलत जम्मा केरा ज़ैन कधे न मुक्के ज़ैड़ी न च़ौर पुज़े ते न कीड़ो खाए। ³⁴ किजोकी ज़ैड़ी तेरी दौवलत भोल्ही तैड़ी तेरो दिल भी लगनोएं।

बीझ़े राथ

³⁵ सेवा केरनेरे लेइ रोड़े च़ारे आड़बंद लेइतां तियार भोथ ते दियो बैलतां रखा। ³⁶ तैन मैन्हुं केरे ज़ैरे ज़ैना अपने मालकेरे ड्लाहे मां प्चेईकी बलगने भोतन की ज़ैखन तै एजे ते दार गुड़कान त अस दार खोल्म। ³⁷ तैना नोकर मुबारकन ज़ैना अपने माल्केरे वापस एजने पुड़ बिंझ़ै मैल्ह्तन आंव तुसन सैहीं ज़ोतां की ते एपु तैन रोड़े च़ारे एपु सैहीं साथी रौट्टी खाने बशालेल्हो ते तैन क एइतां तैन केरी सेवा केरेल्हो। ³⁸ अगर मालक एधी राती एइतां अपने नोकरन बिंझ़ै लाहे त तैसेरे लेइ कैत्री रोड़ी गल्ले। ³⁹ पण याद रखा की अगर घररे मालके च़ौर एज्नेरो पत्तो भोए त तै बिंझ़ै बिशे ते अपने घरे च़ौरी न दे भोंने। ⁴⁰ बस्सा तुस भी तियार राथ ज़ैस घेड़ी तुसन खियाले नैइं भोंनो मैन्हेरु मठ्ठु एजी गहंनुएं।

वफादार या बेवफादार दास

( मत्ती 24 : 45 - 51 )

⁴¹ पतरसे पुछ़ू हे प्रभुएह मुसाल ज़ै तीं दिती सिर्फ़ इशे लेइए की सैभीकेरे लेइए? ⁴² परमेशर यीशुए ज़ोंव:कौने दियांन्त्दार अक्लमंद नोकर ज़ैसेरो माल्क तैस अपने नोकरन पुड़ पुछ़नो गंन्नो रखे तके तैन केरी खुराक ठिक मौके पुड़ रोड़े च़ारे बेंटतो राहे? ⁴³ तै नोकर मुबारके की ज़ैसेरो मालक एज्जे ते मालक तैसकैरां रोड़े च़ारे कम केरतो लाहे। ⁴⁴ आंव तुसन सैहीं सच़्च़ ज़ोतां की तै अपने सारे घरबारेरी हेरगैशरो अख्तियार तैसेरे सपुर्द केरल्हो| ⁴⁵ पण अगर ते नोकर अपने दिले मां ज़ोए की मेरे मालके एज्ने हेजु बड़ु च़ीरे ते होरी नोकरन ते नोकरेंन्न मार धाड़ केरनी शुरू केरे ते खेई पीतां नशे मां मस्त भोई गाहे| ⁴⁶ ते तैस नोकरेरो मालक केंची एरहे दिहाड़े एज्जे ज़ैइस तैस नोकरे एज्नेरो पत्तो न भोए ते तै माल्क एजी गाहे त तैस नोकरेरे टुके टुके केरतां ते तैसेरो हालत बेईमान केरी ज़ेरी भोल्ही। ⁴⁷ तै नोकर ज़ै अपने मालकेरी मरज़ी न ज़ांने ते न तैसेरे हुकमे पुड़ च़ले त अक दिहाड़ी तै पछताल्हो। ⁴⁸ पण ज़ैनि नोकरे अपने माल्केरी मरज़ी ज़ांनेरे अलावा खाने पीनेरू कम कियुं त तैस घट मार बज़ैल्ही ज़ैस जादे ज़िम्बारी मैल्हे तैस कैरां उमीद भी जादे रखैले ज़ैस क जादे जम्मा केरले तैसकैरां वापस भी जादे आंन्हेले।

यीओशु एरे एज्नेरू सबूत

( मत्ती 10 : 34 - 36 )

⁴⁹ यीशु ज़ोंव:आंव धेरती पुड़ अग्ग लांने एवरोइं ते अगर अग्ग खतोरी भोथी त रोड़ू थु| ⁵⁰ पण मीं अक बप्तिसमों घिंन्नोएं तै ज़ां तग्र न नैहीं तां तग्र आंव अफ्सोसे माहीं। ⁵¹ कुन तुस एन सोचतथ की आंव धेरती पुड़ सल्ला केरनेरे लेइ एवरोंइं? नैइं आंव त ज़ोलहो की अलग केरने एवरोइं| ⁵² किजोकी अज़ेरे देंते एकी घरेमां पंच़ मैन्ह्न एपुम्महेइं अन बन भोल्ही तैन एक्केकी सैहीं अन बने भोनियें ⁵³ बाजी मठ्ठैरे खलाफ भोल्हो ते मठ्ठु बाजेरे खलाफ भोल्हु हैई कुईयरे खलाफ ते कुई हैईयरे ख्लाफ् ते शिख नुशारे ते नुश शिखारे खलाफ भोंनियें|

वकतेरी पिशान

( मत्ती 16 : 2 , 3 )

⁵⁴ फिरी यीशुए बड़े मैन्ह्न मां ज़ोंव:की ज़ैखन तुस बिदलार डूबते पासेरां च़लती लहतथ त तुस ज़ोतथ की झ़ड़ी एजने बालीए ते तैन्ने भोते| ⁵⁵ ते जनुबेरे पासेरां हवा च़ली त तुस ज़ोतथ गर्मी भेवरिए ते तैन्ने भोते। ⁵⁶ एह दुनिया दाराव तुस ज़मीन असमांनेरी हालत हेरतां मौस्मेरो अंदाज़ो केरनो ज़ांनत्थ पण इस ज़मांने की न पशांनथ?

अपने मुद्दई सैहीं समझ़ो

( मत्ती 5 : 25 - 26 )

⁵⁷ तुस एपु फैस्लो की न केरथ की रोड़ु कुने| ⁵⁸ ज़ैखन तुस मुदैई सैहीं साथी जैजे क गाथ त बत्ते मां तैससैहीं फैस्लो की न केरथ एरू न भोए तै तीं जैजेरे हवाले केरे ते जैज सिपैहीएरे हवाले केरे ते तू कैद भोइगास। ⁵⁹ आंव तुसन सैहीं सच़्च़ ज़ोतां की ज़ां तगर तु अक अक पाई न दैल्हो तां तगर तैठ्ठां न छुटैल्हो।

मनफिराथ यानाश भोथ

¹ तैस मोके किछ लोक तैड़ी थिये ज़ैना तैस तैन गलीली केरे बारे मां ज़ोंने लगे ज़ैनकेरो लैहु पिलातुसे जानबरां केरी सुखन्रे हैहु मां मलेवरो थियो।

² यीशुए तैन जुवाब दितो कुन तुस एन समझ़तथ की तैन गलीली केरो एत्रो बुरो हाल एल्हेरेलेइ भोऊ की तैना सैरी गलिलन कैरां जादे पापी थिये। ³ आंव तुसन सैहीं ज़ोतां की नैइं बल्के अगर तुस भी तोबा न कैरल्हे त सभ एंच़रे मुकी गहंनेथ। ⁴ या कुन तैना अठारे ज़न्हैं ज़ैन ऊँढौ सेलोंमेरो बुर्ज़ बिछ़ड़ौरो थु: ते तैना सभ तैस हैठ मैरी जे ते होरे युरोशलमेंरे रहंने बाले जादे कुसूरवार थिये? ⁵ आंव तुसन सैहीं सच़्च़ ज़ोतां की नैइं बल्के अगर तुस भी तोबा न केरल्हे त तुस सभ एंच़रे बरबाद भोई गहंनेथ।

बे फल अंजीरेरू दृष्टान्त

⁶ तैसरां बाद यीशुए तैन अक मसाल शुनाइ केंचे मैन्हें एपनी बागी मां अक अंजीरेरो बुट लेवरो थु: ते तैस बुटे पुड़ फल तोप्ने आव पण तैस फल न मैल्हो। ⁷ तैखन तैनी बागबने सैहीं ज़ोंव: हेर आंव ट्लाई साल पैहिले देंतो इस बुटे पुड़ फल लोरोहीं तोप्ने पण अज़ तग्र एस पुड़ फल न मैल्हो एस केटी छ़ड एनी किजेई ठार च़िकतां रखोरिए। ⁸ पण तैनी तैस जुवाब देइतां ज़ोंवं मीं निदतां एसेरे च़ौवरे पासन खाद छडनियें। ⁹ अगर फिरभी फल न लग्गो त फिरी केटी देंनोएं।

सब्तेरे दिहैड़ी कुबड़ी कौन्श बझ़ानी

¹⁰ सब्तेरी दिहाड़ी थी ते यीशु प्राथन भवने मां शिक्षा देंने लोरो थु:। ¹¹ तैड़ी अक कौन्श थी ज़ैस अठारे सालां केरी देंती दुष्टात्मारे ज़ोंने एत्री कमज़ोर भोवरी थी की कुबड़ी भेवरी थी ते केंची त्रिके तै सीधी न थी भोती। ¹² यीशुए तै कुबड़ी कौन्श लाही त एपु क कुजाई ते ज़ोंने लगे हे बैहींने" तु एपनी तकलिफी कैरां छुटी जेइ। ¹³ ते यीशुए तैस कौन्शी पुड़ हथ रखे ते तै लुशी पठ्ठी भोई ते परमेशरेरी तारिफ केरने लगी। ¹⁴ पण प्राथन भवनेरो पुरैहू यीशु पुड़ नराज़ भोव की एनी सबतेरी दिहैड़ी एस कौन्शी शिफा किजो दिती ते ज़ोंने लगो की शा दिहाड़े क्मकाज़ केरनेरेलेइयंन ते तैन्ने मां शिफा भी दितोरी लोड़चे ते सबतेरी दिहैड़ी न्ना। ¹⁵ यीशुए तैस जुवाब दितो एह दुनिया दारव कुन तुस सबतेरी दिहाड़ी अपने दांत गधै खोलतां पानी न पियाथ? ¹⁶ त कुन एन रोड़ू न भोवं की ज़ै कौन्श बेझ़ौई तै अब्रहांमेरी कुई थी ज़ै अठारे सालां केरी देंती दुष्टात्मां बेंधतां रखोरी थी त सबतेरी दिहेड़ी एह कौन्श छुटानी थी? ¹⁷ ज़ैखन यीशुए ऐना गल्लां ज़ोइ त तैसेरे खलाफ ज़ोंने बाले सैभी केरी बेज़ती भुई ते सारे लोक यीशुए ज़ैन शानदार कम्मा अपने हथेइं कियोरां थियां ख़ुशी लगे मनाने।

राइयरे दानेरू दृष्टान्त

( मत्ती 13 : 31 , 32 ; मरकुस 4 : 30 - 32 )

¹⁸ तैखन यीशु तैन सैहीं ज़ोंने लगो परमेशरेरी बादशाही कौस चिज़ारी ज़ैरीऐ आंव कैस्सेहीं ज़ोइं? ¹⁹ तै सिव्लरे गलेवे बराबरे ज़ै एकी मैन्हें ऐन्हतां एपनी बागी मां छ़ड्डु ते लेगतां एत्रो बडो डाल भोव की च़ड़ौलु भी तैस पुड़ बिशने लगां।

खमीरेरू दृष्टान्त

( मत्ती 13 : 33 )

²⁰ यीशुए फिरी ज़ोंव:आंव परमेशरेरी बादशैहियरो बिस्तर कैस्सेहीं देइं? ²¹ तै अम्लटेरी ज़ैरीऐ ज़ैन एक्की कौन्शां ट्लाई हैटी अट्टे मां सैनतां छ़ड्डु ते सारु अट्टू अम्लटू बंनु।

सुंकड़ू दार

( मत्ती 7 : 13 , 14 , 21 - 23 )

²² यीशु युरोशलमें म्मेहीं गहंते बार शहरन मां ते ड्लोंवन मां शिक्षा देंतो च़लरो थियो। ²³ केंचे यीशु पुछ़ू हे प्रभु परमेशर कुन थौड़े ज़ैरे लोक पापे कैरां छुटेल्हे? यीशु तैन सैहीं ज़ोंव। ²⁴ सोंकड़े दारेरां बत्तां गहंनेरी कौशिश केरा किजोकी आंव तुसन सैहीं ज़ोतां की बड़े लोक अंत्र गहंनेरी कौशिश केरले पण न गैही बटेल्हे| ²⁵ ज़ैखन घररो मालक एक्की बार अपनु दार बंद केरी छ़डते त तुस बेइर खड़ खड़े दार गुड़कांते रहतथ ते ज़ोंते रहतथ की हे प्रभु परमेशर" इशे लेइ दार खोल ते तै तुसन जुवाब देते की आंव तुसन न ज़ेंनी तुस कौनथ ते कौठां एवरेथ? ²⁶ तैखन तुस ज़ोल्हे की असैइं तीं सैहीं साथी खेवरी पियोरी नैइं ते तीं इशै अंगने मां असंन शिक्षा नैइं दितोरी। ²⁷ पण परमेशर तुसन सैहीं ज़ोल्हो आंव तुसन न ज़ेंनी तुस कौनथ ते कौठां एवरेथ हे बेइमानव मीं कैरां दूर भोथ| ²⁸ ज़ैखन तुस अब्रहांम इज़हाक ते याकुब ते सभ नबी परमेशरेरी बादशैही मां सामने लाहेले ते अपनो आप बेरोहुं कढते लाहेले त लेरां देंते ते दंत च़ापते राहेले। ²⁹ लोक मशरक मगरब ज्नुब ते शुमालेरां देंते परमेशरेरी बादशैही मां ज़ैखन एइंते लाहेले। ³⁰ ते हेरा किछ एहरेंन की ज़ैना पैहिले थिये तैना पत्ती भोंनेण ते ज़ैना पत्ती थिये तैना पैहिले भोंनेण।

हेरोदेसेरी दुशमनी

³¹ तैखने किछ फ्रिसी यीशु क आए ते ज़ोंने लगे इठ्ठां निस ते कौस्कौई च़लो गा किजोकी हिरोदेस तीं मारने चहते। ³² पण यीशुए तैन ज़ोंव:उन लोइंन सैहीं गैहितां ज़ोथ की आंव अज़ ते कलां दुष्टात्मा कढने ते बिमारन बझ़ांनेरु कम केरने लोरोइं ते एन ट्लेई दिहैड़न मां पुरु केरनुएं। ³³ बस्सा मीं अज़ ते कलां ते ट्लेईदी च़लतु रहंनुएं किजोकी रोड़ु नैइं की नबी युरोशलमें कैरां बेइर मारो गाहे|

यरूशलेमेरे लेई शोग

( मत्ती 23 : 37- 39 )

³⁴ हे युरोश्लम हे युरोश्लम तीं कैत्रे नबी कत्ल किये ज़ै भी तीं क आव तै तीं माराव मीं कैही फैरेइं सोचु की तेरे मठ्ठन अकौठ्ठे केरीं ज़ैंच़रे कुकड़ी अपने बच्न अपने फांघन हैठ रख्चे पण तुस राज़ी न भुए। ³⁵ हेरा तुशु घर तुशै लेई छडु गहते ते आंव तुसन ज़ोतां की तुस मीं केंची त्रिके बी न लेही बटेल्हे ज़ां तग्र तुसन एन ज़ोंनेरो मौको न एज्जेलो मुबारके तै ज़ै परमेशरेरे नोवें सैहीं एइते।

फ्रीसेरे घरे मां यीशु

¹ एक्की बार यीशु एक्की फ्रिसीसेरे घरे रौट्टी खाने जे त कही फ्रिसी केरी नज़र तैस पुड़ थी। ² तैड़ी अक खेरड़नो बिमार ज़ैसेरी सैरी चेमड़ी रस पाक च़लती थी यीशु क सामने बिशोरो थु:। ³ यीशुए धर्म गुर्न ते फ्रिसीन पुछ़ू की सबतेरी दिहैड़ी शिफ़ा देंनी जैइज़े की नैइं? ⁴ तैना चु़प राहे तैखन यीशुए तैस बिमारे शिफ़ा दिती ते घरजो भेज़ो। ⁵ ते फ्रिस्न सैहीं ज़ोंव:कुन तुशौ दांत या गधौ ढढै ऊँढ़ौ खिरके ते सबतेरी दिहाड़ी भोए त कुन तुस तैस तैठ्ठां बेईर न कढैले? ⁶ ते तैन लोकेइं यीशुएरी गल्लां केरो जुवाब न देई बटो।

नम्रता ते रोड़े सतकार

⁷ ज़ैखन यीशुए हेरू की ज़ैना लोक धंम ब्नेइतां रौट्टी खाने कुजेवरेन कौस चिज़री तलाशी माहंन त यीशुए तैन अक बार शुंनाइ। ⁸ ज़ैखन कोई तुसन ड्लाहैरी धामी मां तुसन कुजाए ज़ै तैनेइं ट्लाहंना केरे लेइ ठार बिश्नेरे लेइ राखोरिए तैड़ी न बिशथ भोई सखते की होरो कोई तुसन कैरां जादे ट्लारो ट्लाहंनो कुजेवरो भोए। ⁹ ते तुसन दुईये ज़न कुजांने बालो तुसन क एइतां ज़ोए एह ठार होरी केरे लेइए ते तुसन शरमेइतां खड़उठनु पै ते सैभन कैरां पतर बिशनु पै। ¹⁰ ज़ैखन भी कोई तुसन धाम केरतां कुजाए त सैभन कैरां पत्तर बिशां तके ज़ैखन तेरो कुजाने बालो एज्जे ते ज़ोए मिट्ला अगर एइतंबिश त तैन लोकांकेरे सामने तेरी कैत्री इज़त भोंनीएं। ¹¹ किजोकी ज़ै कोई अपनो आप बडो बनाल्हो त तै निक्ड़ो बनाव गाल्हो ते ज़ै कोई अपनो आप निक्ड़ो बनाल्हो त तै बडो बनाव गाल्हो।

¹² फिरी यीशुए अपने कुजाने बाले सैहीं ज़ोंव:ज़ैखन तुस दिसैरी या रातरी धामी मां मैन्ह्न कुजाथ त अपने दौस्तन रिशतेदारन या अपने पुड़ौसन त अंमीरन ज़ैरे न कुजेइयथ किजोकी तैना भी तीं कुजेईतां तेरु यवसान मुकेइ छ़डैल्हे ¹³ ते बलके ज़ैखन तु धंम देस त टोंटे कंने गरीब गुरबे परदेशी कुजेंइयां| ¹⁴ ते तुसन ब्रकत मैल्हेली किजोकी तैन क किछ भी नैइं ज़ैससैहीं तैना तेरु एवसांन मुकेइ बटन ते तेरे एस एवसांनेरो फल धेर्मी लोकन सैहीं साथी फैस्लेरी दिहैड़ी मैल्हेलो।

बेडी धामरू दृष्टान्त

( मत्ती 22 : 1 - 10 )

¹⁵ ट्लाहंन्न मैरां एक्कें ऐन गल्लां शुंनतां यीशु सैहीं ज़ोंव:परमेशरेरी बादशैही मां रौट्टी खाने बालो मुबारक भोल्हो| ¹⁶ यीशुए तैस जुवाब दितो केंचे मैन्हें अक बड़ी धाम दिती ते बड़े लोक कुजाए। ¹⁷ ज़ैखन रौट्टी खांनेरो बेलो अव त तैनी अपनो नोकर भेज़ो की धांमैरन ज़ो की एज्जा रौट्टी बंनोरिए। ¹⁸ पण धांमैरेइं सैभेइं मिलतां इतराज़ कियो ते पैहिले मैन्हें ज़ोंव:की मीं उडार घिंनेरुए मीं तैस हेरने गहंनुएं ते आंव तींक मिनत केरतां की मीं रहंने दे। ¹⁹ त होरो ज़ोंने लगो मीं पंच़ हल्लां दांत घिंनोरेन ते आंव तैन लाने च़लोरोइं ते आंव तींक मिनत केरतां की मीं रहंने दे। ²⁰ अक होरो मैन्हुं लगो ज़ोंने मीं ड्लाह कियोरोए ते मेरु एज्नु ठीक नैइं| ²¹ तैखन नोकरे वापस एइतां ऐन सैरी गल्लां अपने मालके शुनेइ मालके बड़ी सरक अई तैनी अपने नोकरे जो ज़ोंव:इस शहारे मां गा ते लेंगे लुथे गरीब गुरबे न्गे नियांने भत्ते टोंटे कंने इरां कुजा। ²² नोकरे ज़ोंव:एह परमेशर ज़ैन तीं ज़ोंव:मीं तैन्ने कमावं पण फिरी भी ठार खालीए। ²³ मालके नोकरे सैहीं ज़ोंव:बत्तरे आसे पासे उडारन म्महेइं गा ते लोक मजबुर केरतां आंन्ह ताके मेरु घर भेरतां भोए। ²⁴ किजोकी आंव तीं सैहीं ज़ोतां की ज़ैन पैहिले कुजेवरे थिये तैन मैरां कोई भी मेरी धामी मां रौट्टी न खेई बटेल्हो।

चेलो बन्नेरी कीमत

( मत्ती 10 : 37- 38 )

²⁵ बड़े लोक यीशु पती च़लोरे थीये, तैनी पत्रों तक्कु ते ज़ोंव। ²⁶ बड़े लोक यीशु पती च़लोरे थिये तैनी पत्रों तक्कु ते ज़ोंव। ²⁷ अगर कोई मींक एइते पण ते पियार ज़ै ते अपने हेई बोव ड्लाह बेंहींन ते एपनी जांनी सैहीं बराबर पियार न रखे तै मेरो चेलो नैइं। ²⁸ ते ज़ै कोई अपनी फांसी छ़ूइतां मीं पती न च़ले तै मेरो चेलो न भोई सखे। ²⁹ कधे एरू न भोए की खाई कट्नेरे बाद तैस बनेइ न बटे ते तकने बाले हस्स्ते रहंन। ³⁰ ते ज़ोंन एनी मैन्हें मैह्ल त शुरू कियो पण बनेइ न बटो। ³¹ या फर्ज़ केरा की कोई बादशाह होरी बादशाहे सैहीं लड़ाई केरनेरे लेइ सोची राहोरो भोए त कुन पैहिले एन न सोचेल्हो की बिही हज़ार फौवजी सैहीं मुकबलो आंव दश हज़ार फौव्जां सैहीं तैसरो मुकबलो केरी सख्तां की नैइं? ³² अगर ते मुकबलो न केरी सखे त तैस बादशाहे सैहीं ज़ै दुरे मैन्हुं भेज़तां तैस्सेहीं सल्लारी मिनत केरे। ³³ एंच़रे अगर ज़ै कोई तुसन मैरां अपनु सभ किछ न छ़डे मेरो चेलो न भोई सखे|

बे स्वादू लूण

( मत्ती 5 : 13 ; मरकुस 9 : 50 )

³⁴ लुंन रोड़ी चिज़े पण अगर तैसरो लुंनारे मुक्को त तैन कौस्सेहीं लुंनू बनावं गहते? ³⁵ लोक तैस बैरोहुं शैरी दैल्हे ज़ैस शुंनेरे कंन भोन त तै शुंने।

हेरोरी भैडरू दृष्टान्त

( मत्ती 18 : 12 - 14 )

¹ बड़े लोक धड़त घिंन्ने बाले ते पापी लोक यीशु क एइतां तैसेरी गल्लां शुंन्ने लोरे थिये। ² फ्रिसी ते धर्म गुरु शिकयत केरतां ज़ोंने लगे की एह मैन्हुं पैप्न सैहीं ताल मेल रखते ते तैन सैहीं साथी खाते पिते।

³ यीशुए तैन अक बार शुंनई। ⁴ तुसन मां एहरो भी कोई आहे ज़ैसक शौव भैडां भोंन ते तैन मैरां अक हेरोए ते नड़ेंनुएं भैडां तैड़ी ज़ैरे जंगले मां छ़ैडतां तोप्ने न गाहे ज़ां तग्र तैस मैल्होरी नैइं? ⁵ ते ज़ैखन ते तैस मैल्हे त ख़ुशी सैहीं कंधे पुड़ छ़ुईतां आंन्हैं। ⁶ ते घरे एइतां अपने दौसतन ते भियालन कुजेइतां ज़ोए की अज़ मींसैहीं साथी ख़ुशी मनाथ की अज़ मेरी हेरोरी भैड मैल्होरीए। ⁷ आंव तुसन सैहीं ज़ोतां की एंच़रे नड़ेंनुएं परमेशरेरी तलाश केरने बाले ज़ैना तोबा केरनेरे मौताज नैइं एक्की पैपेरे तोबा केरने सैहीं सुर्गे मां बड़ी ख़ुशी बनई गचे।

हेरोरे सिकेरू दृष्टान्त

⁸ कुन एहरी भी कोई कौन्श भोल्ही ज़ैस्का चेंदरे दश सिके भोंन ते अक हेरोए ते तै दियो बैलतां घरे अंत्र धुंनी न दे ज़ां तग्र मैल्होरो नैइं तोप्ती न राहे? ⁹ ते तोप्नेरे बाद अपने पुड़ौसन ते एपनी सेहेल्न कुजेइतां एन न ज़ोए की एजा मींसैहीं साथी ख़ुशी मनाथ की अज़ मेरो हेरोरो सिक्को मैल्रोहोए। ¹⁰ बसा आंव तुसन सैहीं ज़ोतां की एक्की पैपेरे तोबा केरने सैहीं परमेशरेरे सुवर्गदूतां केरे सामने बड़ी ख़ुशी मनाई गहचे|

उड़ाव मठ्ठेरू दृष्टान्त

¹¹ फिरी यीशु ज़ोंव:केंची मैन्हेरां दुई मठ्ठां थियां| ¹² तैन मैरां निकड़े ज़ैरे अपने बौवेव़े सैहीं ज़ोंव:हे बाजी जेईदाती मां ज़ै मेरो हेसो बनते तै मीं दे तैनी हिसो बंटो ते दितो। ¹³ थोड़े दिहैड़न मां निकड़े मठ्ठै अपनु सभ किछ सामान जेईदात होरी मुल्खे जो निही ते एपनी एशो अशरती मां लुट्टाई। ¹⁴ ज़ैखन तैनी सभ किछ मुकेई छ़ड्डु त तैस मुल्खे मां बड़ो काल पैव ते तै होरी केरो गुलाम बनो। ¹⁵ तैखन ते तैस मुल्खेरे एक्की रहंने बाले क कम तोपने पुज़ो त तैनी ते अपने उडारन मां सुर च़ारनेरे कम्में लाव। ¹⁶ तैड़ी तै दानो ज़ै सुर खाते थिये तैस्सेहीं अपनु पेट भरनू चहतो थु: पण तैस तै खुराक भी खाने न थिये देते ज़ै सुर खाते थियेथु:। ¹⁷ तैखन तैस हौश आई ते ज़ोंने लगो मेरे बाजी केरे मुजुरन हदी कैरां जादे रौट्टी मैहल्चे पण आंव इड़ी फाके लोरोइं मरने। ¹⁸ मीं खड़े ऊठतां अपने बाजी क गहंनुएं ते तैस्सेहीं ज़ोंनुएं हे बाजी आंव परमेशरेरी नज़री मां ते तुशी नज़री मां पापीं। ¹⁹ हुंनी आंव एस काबल त नैइं की तुशु मठ्ठु भोइं पण मिमी अपने मुजुरंन मां रखा।

²⁰ बसा तै उठ्ठो ते अपने बाजी कैझो च़लो जेव ते हेजु ते बड़े दुरे थु: ते तैसेरे बाजीं तै लाहू ते तैसेरे बाजी बड़ो कियास आव तैनी दैवड़तां तै गले लाव ते खुब खुशी भोव। ²¹ मठ्ठें अपने बाजी सैहीं ज़ोंव:एह बाजी आंव परमेशरेरी नज़री मां ते तुशी नज़री मां पापीं हुंनी आंव एस काबल त नैइं की तुशु मठ्ठु ज़ोंइं। ²² पण बौवें अपने नोकरन सैहीं ज़ोंव:लुश केरा ते सैभन कैरां पैहिले रोड़ां ज़ैरां लिगड़ां एस मठ्ठे लुवाथ ते एसेरे हथे आंवठी ते पांउन जुटी लुवाथ। ²³ ते अक बडो ज़ैरो हुड़ मारा ताके आस सभ ज़ांने खाम ते ख़ुशी मनाम। ²⁴ किजोकी मेरु मठ्ठु ज़ैन मैरी जेवरू थु: अज़ ज़ींतु भेवरुए हेरोरू थु: ते मैल्हेरुए बस्सा तैना ख़ुशी मनाने लगे।

²⁵ तैईस बडू मठ्ठु ज़ैन उडारे मां थियुं ते घरजो एवरो थियो ज़ैखन ते घरे नेड़े पुज़ो त तैनी गितां केरी त नच़नेरी शौर शुनी। ²⁶ तैनी अक नोकर कुजाव ते तैस पुछ़ू एह शौर कीजेई लोरी भोंने? ²⁷ नोकरे तैस्सेहीं ज़ोंव:तेरो निक्ड़ो ढ्लाह घरे एवरोए ते तेरे बाजीं अक बडो हुड़ मारोरोए किजोकी तै ठीक ठाक घरे पुज़ोरोए। ²⁸ पण बुढ़ेरो बडु मठ्ठु नाराज़ भोवं ते अंत्र भी न लगो एजने पण तैसेरे बाजीं तैस मिठांनेरी कौशिश की। ²⁹ बडें मठ्ठैं अपने बाजी सैहीं ज़ोंव:हेरा आंव कैत्रे सालां केरी देंती तुशी सेवा केरने लोरोइं ते कधे तुशु ज़ोंनु नैइं मोड़ेरू ते तुसैहीं कधे अक छ़ैल्लरू अक छ़ैड़ु नैइं दितेरू की आंम्हीं अपने दौस्तन सैहीं ख़ुशी मनेइं। ³⁰ पण ज़ैखन तुशु निकड़ु मठ्ठु अपनु सभ किछ लुटेइतां वापस आंव त तैसेरे लेइ अक बडो हुड़ मारो| ³¹ तैसरो बाजी ज़ोंने लगो मठ्ठा तु त मिएंकास ते ज़ैन किछ मिंकाहे तैन सभ तेरुए। ³² पण असैइं ख़ुशी मनानी ज़रुरी थी किजोकि तेरो एह निक्ड़ो ढ्लाह मैरी जेवरो थु: अज़ ज़िंतो भेवरोए हेरोरो थु: ते अज़ मैलहोरोए।

च़लाक भण्डारी

¹ फिरी यीशुए अपने चेलन सैहीं ज़ोंव:की केंची अंम्बीरेरो अक मुन्शी थियो? लोकेइं तैसेरी शकैईत तैसेरे मालके सैहीं लाई की एह तेरो माल खुर्द बुर्द केरने लोरोए। ² मालके तै कुजाव ते ज़ोंव:एन कुने ज़ैन आंव तेरे बारे मां शुंन्ने लोरोइं? सारो हिसाब किताबे मां अज़ैरां बाद तु मेरो मुन्शी नैइं राहेलो। ³ मुन्शें अपने दिले मां सोचु मेरो मालक मेरे कम्में कैरां मीं कढने लोरोए मित्ती त न घेड़ोए शर्मारेमारे भिछिया भी न मैग्गोए। ⁴ आंव ज़ांनतांइं की मीं कुन केरनुएं इठ्ठां कढनेरे बाद भी लोक मीं ख़ुशी सैहीं अपने घरे मां कुबूल केरतन। ⁵ बस्सा तैनी अपने मालकेरो अक कर्ज़दार तोपो पैहिले एक्की पुछ़ू तीं क मेरे मालकेरे कैत्रे रुपैइएन? ⁶ तैनी जुवाब दितो तेलेरे शौव पींपां केरी किंमते इना रहं तेरां काक्लां ते बिशतां शौवेरां पंज़हा बना। ⁷ फिरी तैनी होरी सैहीं ज़ोंव:तींक कैत्रे रुपैइयेन? तैनी ज़ोंव: गैहुं केरी शौव बोरी केरी किंमते इना रहं तेरां काक्लां ते बिशतां शौवेरी एशही लिखी दे। ⁸ मालके तैस बेईमान मुन्शैरी तारिफ़ की एल्हेरेलेइ की तैनी बेड़ी सुजैगी सैहीं कम कियेरू थु: किजोकी इस दुनियारे लोक सोव्दागरी केरने बाले परमेशरेरे धेर्मी लोकन कैरां बड़े हुशार भोत्न। ⁹ आंव तुसन ज़ोतां की बेईमैनरी कमैई सैहीं भी अपने लेइ दौस्त तियार केरा ज़ैखन तै जगा गाहे त तुसन अपने दौस्तन कैरां तुसन आसे पासे ठार मैल्हे। ¹⁰ ज़ै धगसेरे मां ईमानदैरी सैहीं रहते ते हछे मां भी ईमानदार रहते। ¹¹ बस्सा अगर तुस दुनियारी झुठी धन दौवलती मां ईमानदार न भुए त अपनी सच़्च़ी दौवलत कौन तुशै हवाले केरल्हो? ¹² अगर तुसैहीं होरी केरो माल खिलत बिलत कियो त ज़ै तुशौ अपनो माले कौन तुसन दैल्हो?

¹³ कोई नोकर दुई मालकां केरी सेवा न केरी बटे या त तै एक्की सैहीं नफ्रत केरेल्हो ते होरी सुखाल्हो या एक्की सैहीं इमानदारी केरेल्हो ते होरी बुन्हीं बेंहीं एछ़ैइं सैहीं तक्कैल्हो तुस परमेशरेरी ते दौवलतरी दुयां केरी सेवा न केरी सखत।

यीशु एरे किछ उपदेश

( मत्ती 11 : 12 , 13 ; 5 : 31 , 32 ; मरकुस 10 : 11 , 12 )

¹⁴ तैखन धड़ैलाशाही फ्रिसी ऐन गल्लां शुन्तां यीशुरी हासी बनाने लगे। ¹⁵ यीशु तैन जो ज़ोंव:तुस तैनाथ ज़ैना लोकन मां अपनो आप बड़ो रोड़ो साफ सुथरो हेरात्न? पण परमेशर तुशे दिलेरी हालत ज़ांनते किजोकी ज़ै चीज़ लोकां केरे लेई बड़ी रोड़ी ते परमेशरेरी नज़री मां किछ भी नैइं।

¹⁶ शासत्रेरी त नेबी केरी गल्लां युहान्ने तग्र च़ेलती रेही ते फिरी परमेशरेरी बादशैहीयरी खुशखबरी शुनाने लगे ते हर कोई तैस्मा दाखल भोंनेरी बड़ी कौशिश केरने लगोरेन। ¹⁷ पण ध्रतली अंम्बर टेली गहलु पण मेरो वचन कधे न टले्ल्हो। ¹⁸ ज़े कोई अपनी कौन्श शैरतां होरी सैहीं ड्लाह केरते ते ज़न्हा केरते ते ज़ै छ़ेडोरी कौन्शी सैहीं ड्लाह केरते ते भी ज़न्हा केरते।

दौलतमंद मैंन्हू ते गरीब लाज़र

¹⁹ अक मैन्हुं बड़ो आंम्बीर थु: ते तै बड़ां रोड़ां लिगड़ां लातो थु: ते बड़ो माघो कपड़ो लातो थु: ते रोज़ एश अशरती मां मस्त रहतो थु:। ²⁰ अक बड़ो गरीब मैन्हुं ज़ैसेरु नोवं लाज़र थु: तैसेरे दारे मां बिश्तो थु: तैसेरी सारी जान खेराड़ेइं सैहीं भेरतां थी। ²¹ तै चहतो थु: की आंम्बीर मैन्हेंरे टुकेइं सैहीं अपनु पेट भेरीं पण तैड़ी कुत्रां एइतां थियां ते तैना तैसरां खेरड़ां भी च़टतां थियां। ²² फिरी एरू भोवं की तै गरीब लाज़र मैरी जेव सुवर्गदूतेइं तै छ़ुइतां अब्रहांमेरे पौट्टे मां छ़डो ते आंम्बीर मैन्हुं भी मैरी जेव ते तै दैब्बी छ़डो। ²³ ज़ैखन तैनी न्रकेरी अगी मां एपनी एछ़ी घैड़ी? त दुरेरां तैनी अब्रहांम लाहू ते तैसेरे कुम्में मां लाज़र लाहू। ²⁴ तै चिंडां मैरतां ज़ोंने लगो एह बाजी अब्रहांम मीं पुड़ रेहेंम केर ऐस लाज़रे भेज़ ते एह अपनी आंग्लोई पैनी सैहीं सेल्तां मेरे ऐशी मां छ़डे किजोकी आंव अगी मां तड़फने लोरोइं। ²⁵ पण अब्रहांमे ज़ोंव:मठ्ठा यद केर तीं त एपनी जुवेंनी मां सभ रोड़ी चीज़ां मैल्ही ते इस लाज़रे सिर्फ़ बुरी चीज़ां मैल्ही पण एह हुन्न इड़ी आरामें मां हैं ते तु तकलिफी माहंस। ²⁶ ते एन गल्लां केरे अलावा इशे ते तुशे मुझ़ाटे अक बड़ो नालोए ताके ज़ै कोई पार गंहनु चाहे न गैही सखे ते ज़ै वार एज्नु चाहे न एजी सखे। ²⁷ तैनी मैन्हें ज़ोंव:एह बाजी अब्रहांम" आंव ज़ोवले हथ केरतां ज़ोताइं की तु लाज़रे दुनियाई मां मेरे बाजी केरे घरेभेज़। ²⁸ तैड़ी मेरे पांच़ ढ्लाह आंन्ह ते तैन इही बिस्तार दे एरू न भोए ते तैना भी इस अगी मां एजन। ²⁹ पण अब्रहांमे तैस ज़ोंव:तैन क मुसै नेबेरु शासत्रे ते नेबी केरी कितबां त आंन्ह तैना तैन केरी शुन्न। ³⁰ तैनी मैन्हें ज़ोंव:नैइं एह बाजी अब्रहांम अगर कोई मुड़दन मैरां ज़िंतो भोइतां गाहे त तैना ज़रूर तोबा केरल्हे। ³¹ पण अब्रहांमे तैस्सेहीं ज़ोंवं अगर तैना मुसैरी ते नेबी केरी न शुन्न ते अगर कोई मुड़दन मैरां ज़िंतो भोइतां गाहे त तैना तैसेरु भी यकींन न केरल्हे।

ठोकरारी वजा बन्नू

( मत्ती 18 : 6 , 7 , 21 , 22 ; मरकुस 9 : 42 )

¹ तैखन तैनी अपने चेलन सैहीं ज़ोंव:एन न भोई सखे की लोकन ठोकर न लग्गे पण अफ्सोसे तैस मैन्हुं जो ज़ै होरी केरे लेइ ठोकर बनते। ² तैसेरे लेइ त एन्ने रोड़ु थु: की ढ्लाटेरो ढ्लैइटोल तैसेरे गले उन्ढो छ़ैडतां ते स्मुंद्रे मां शैरतां छ़डनो थु: ताके तै होरी निक्न जेई ठोकर न बने। ³ बस्सा हुशियार राथ अगर तेरो ढ्लाह पाप केरते त तैस समझ़ाथ ते अगर तै तोबा केरते त तैस माफ़ केरा। ⁴ अगर तै एकि दिहेड़ी मां तेरो सत्ते बार तेरो पाप केरे त अगर तिंका तै सत्ते फेरेइं तींका एइतां तोबा केरे त तु सत्ते फेरेइं तुस तैस माफ़ केरथ|

विशवास

⁵ चेलेइं परमेशरे सैहीं ज़ोंव:की एह परमेशर ईशो विश्वास बधा। ⁶ परमेशर यीशुए ज़ोंव:अगर तुशौ विश्वास सिवलारे गलेवे बराबर भी भोल्हो त तुस इस तुत्तेरे बूटे जो ज़ोइ सख्तथ की इठ्ठां उखड़ ते सुमुंद्रे मां लग त तै तुशौ हुक्म म्नेल्हो|

एकी दासेरो फर्ज़

⁷ तुसन मां एरहो कौने ज़ैसेरो नोकर उडारां बेंतो भोए ते या गोरू च़ारतो भोए ते ज़ैखन तै उडारे मैरां घरे एज्जे त तैसरो मालक तैस ज़ोए की लुश केर ते बेशकी पुड़ बिश। ⁸ या एन न जोए की मेरी रौट्टी तियार केरथते ज़ां तग्र आंव खेइं पीं न्ना ते ज़ां तग्र आंव रेज़्ज़ीं न्ना तु मेरी सेवा केरतो रह ते तैल्लां पत्ती तु भी खा? ⁹ कुन तै एल्हेरेलेइ नोकरेरू शुकर केरेल्हो की तीं तैन कियुं ज़ैन तीं केरनेरे लेइ ज़ेवरु थु:? ¹⁰ एंच़रे ज़ैखन तुस भी एन गल्लां केरी तस्दीक केरेल्हे ज़ैन केरनेरो तुसन हुक्म दितोरो थु: ज़ोथ की अस्सां निकम्मे नोकरमम? असैइं तैन्ने कियुं ज़ैन न थु: केरनु।

कोढ़हेरे दश रोगीबझ़ाने

¹¹ एक्की फेरे यीशु यरूशलमेंरे पासे च़लोरे थिये ते तै सांमरिया ते गालिले मम्हेइं च़लोरे थिये। ¹² ज़ैखन तैना एक्की ड्लोंवें मां पुज़े त तैड़ी दश कौढ़ी मैल्हे ज़ैना दुर खेड़ोरे थिये। ¹³ तैनेइं बड़े ज़ोरे सैहीं ज़ोंव:हे यीशु हे गुरु असंन पुड़ रेहेंम केर। ¹⁴ यीशुए तैन हेरतां ज़ोंव:गाथ ते अपनो आप पुरैहूतन हेराथ ते स़च़्च़ै एरहू भोवं की गहंते बार बत्ते तैन्कैरू कौढ़ साफ भोई जेवं। ¹⁵ पण तैन मैरां सिर्फ अक कौढ़ी अपनु कौढ़ हेरतां की तैसेरू कौढ़ साफ भेवरोए ख़ुशी भोइतां बड़े ज़ोरे सैहीं परमेशरेरी तारिफ केरतो वापस अव। ¹⁶ ते यीशु केरे पांउन पुड़ दौग रेखतां शुक्र लगो केरने? ते एह मैन्हुं सांमरी थु:। ¹⁷ यीशुए तैस पुछ़ू कुन तैन दश कौढ़ी केरु कौढ़ साफ नैइं भेवरे? फिरी तैना कौरां जे? ¹⁸ कुन एस परदेशेरे अलावा तैन होरन एत्री हिमत न अई की गैहितां परमेशरेरी तारिफ केरम? ¹⁹ तैखन यीशुए तैस ज़ोंव:खड़ो उठ ते च़लो गा तेरे विश्वासे तु ठीक कियोरोस।

परमेशरेरी बादशाही एजनी

(मत्ती 24: 23- 28, 38 - 41)

²⁰ फ्रिसी यीशु पुछ़ने लगे की परमेशरेरू राज़ कैइस एजनुएं? यीशुए तैन जुवाब दितो की परमेशरेरू राज़ एरू नैइं की लोक तैस एइंते लेही बटन। ²¹ ते ज़ोंन की हेरा इड़ी या उड़ीहे एंच़रे नैइं बलके परमेशरेरू राज़ तुशे मुझ़ाटे। ²² ते यीशुए अपने चेलन सैहीं ज़ोंव:तै दिहाड़ी भी एजनिएं की जैईस तुस परमेशरेरी दिहैड़न मैरां अक दिहाड़ी हेरनेरी उमीद रखेले पण न हेरी बटेल्हे। ²³ लोक तुसन सैहीं ज़ोल्हे की हेरा तै इड़ी या उड़ीए या हेरा की तै इड़ीए पण तुस तैरां न गैहीयथ ते न तैनकेरी सेवा केराथ। ²⁴ किजोकी ज़ैंच़रे बिजली अम्ब्रे मैरां चेम्कतां एक्की पासेरां होरी पासे च़ली गहचे तैंच़रे मैन्हेरु मठ्ठु तैस दिहैड़ी बांदु भोल्हु। ²⁵ पण ज़रुरीए की तै पैहिले दुःख झ़ैल्ले ते इस ज़मांनेरे लोक तैस घेटया बुझ़न। ²⁶ ते ज़ैरु नुहेरे ज़मांने मां भेवरु थु: तैरहु मैन्हेरे मठ्ठेरे ज़मांने मां भी भोल्हु। ²⁷ तैईस भी लोक खाते पींते थिये ते ड्लाह बर भोंते रहते थिये ते ज़ां तग्र नुहु किशती मां न थु: जेवरो तां तग्र सभ किछ भोंतु राहूं? ते फिरी तौफांन आव ते सभ किछ खतम भोई जेंवं। ²⁸ ते ज़ैरु लुतेरे ज़मांने मां भोंतु थु: की लोक खाते पीते थिये बपार केरते बागां लाते ते घरां बनाने मां मस्त थिये। ²⁹ पण ज़ैस दिहैड़ी लूत्त सुदूमें मैरां बेइर निसो त पत्रोंहुं अम्ब्रेरां गंधकेरी अग्ग बैखतां सभ किछ खतम केरी छ़डु। ³⁰ ते परमेशरे अबने आद्मेरे एज्नेरे दिहाड़े भी एरहु भोंनुएं।ते परमेशरे मठ्ठेरे एज्नेरे दिहाड़े भी एरू भोंनुएं।

³¹ तैस दिहैड़ी ज़ै लाए पुड़ भोल्हो त तैसेरो माल सबाब घरे मां भोल्हो त तैस नैणे अंत्र न एज्जे ते ज़ै उडारे मां भोल्हो तैभी वापस न गाहे। ³² लुत्तेरी कौन्श याद रेखाथ। ³³ ज़ै अपनी जान बच़ांनेरी कौशिश केरेल्हो तै तैस गुंवाल्हो ते ज़ै तैस गुंवाल्हो तै तैस बच़ाल्हो। ³⁴ आंव तुसन ज़ोतां की तैस राती दुई ज़न्हें एक्की खटी पुड़ झु़ल्लोरे भोल्हे अक नैनोएं ते अक छ़डनोएं। ³⁵ दुई कौन्शां हिट्लाट पिह्ती भोल्ही त अक नैनीएं ते अक तैड़ी छ़डनींएं। ³⁶ दुई मैन्हुं उडारे मां भोल्हे त अक नैनोएं ते अक तैड़ी छ़डनोएं। ³⁷ एन शुंनतां तैनेइं यीशुए पुछ़ू असंन ज़ौ एन कौड़ी भोल्हु? यीशुए तैन ज़ोंवं ज़ैड़ी ज़िग्ग भोते तैड़ी ईल्लां भोईचन।

अधर्मी न्यायी ते बेवरू दृष्टान्त

¹ यीशु चहते थिये की चेलन पत्तो लगे की हिमत हारनेरे बगैर दुआ केरतु राहेरू लोड़ते एल्हेरेलेइ तैनी तैन अक बार शुनाई। ² एक्की शहरे मां अक काज़ी रहतो थु: ते तै न परमेशरे कैरां डरतो थु: ते न मैन्हेंरी परवा केरतो थु:। ³ तैस शहरे मां अक बैव्वा कौन्श रहती थी ज़ै तैस कैज़ी क एइंती रहती थी ते तैस क मिनत केरती रहती थी की मीं मुद्दैई कैरां छुटा। ⁴ पैहिले त तैनी एत्रो खियाल न कियो पण ज़ैखन एह हिसाब च़लतो राहु त तैनी अपने दिले मां ज़ोंव:सच़्च़ै की न आंव परमेशरे कैरां डेरीं ते न मैन्हेंरी परवाह केरीं। ⁵ पण एह बैव्वा कौन्श मीं परेशान केरती रहचे एल्हेरेलेइ आंव एसारो इन्साफ़ केरेल्हो न्ना त एसां मेरे न्के मां दम अंन्हनोएं। ⁶ परमेशरे ज़ोंव: शुंना एह बेइनसाफ काज़ी कुन लोरोए ज़ोंने। ⁷ बस कुन परमेशर अपने च़ुंनोरे लोकां केरो फैस्लो केरने मां च़िर लाल्हो ज़ैना रात दिहैड़ी फराध केरते रहतन? ⁸ आंव ज़ोतां की तै तैनकेरो फैस्लो केरेल्हो ते लुशी केरेल्हो फिरी भी ज़ैईस मैन्हेरु मठ्ठु एज्जेल्हो त कुन धेरती पुड़ विश्वास मैल्हेलो?

फ्रिसी धड़त नेने बालेरू दृष्टान्त

⁹ यीशुए किछ एरहे लोकन अक बार शुनाई की ज़ैन अपनो आप बड़ो धर्मी बुझ़ते थिये ते होरन किछ न थिये बुझ़ते। ¹⁰ दुई मैन्हुं दुआकरने प्राथन भवने मां जे अक फ्रिसी थु: ते होरो धड़त (टेक्स) घिंने बालो थु:। ¹¹ फ्रिसें खड़े भोइतां अपने दिले मां एह दुआ की की एह परमेशर आंव तेरु शुक्र केरतां की आंव होरी मैन्हुं केरो ज़ैरहो नैइं ज़ैना लुंड लफंगे बदमाशन ते इस धड़त घिंने बालेरो ज़ैरहो भी नैइं। ¹² आंव हफ्ते मां दुई बार ब्रत रखतां ते एपनी कमैईयरो दशावं हिस्सो परमेशरे जो देतां।

¹³ पण तै फ्रिसी धड़त घिंन्ने बालो ज़ै दुर खड़खड़ो थु: तैनी एत्रु भी न केरी बटु की उबरू तक्के बलके छाती कुटतां ज़ोंने लगो की हे परमेशर मीं पैपी पुड़ रहेंम केर। ¹⁴ आंव तुसन सैहीं सच़्च़ ज़ोतां की एह मैन्हुं तैस होरी कैरां रोड़ो निसतां अपने घरे जो जेव किजोकी ज़ै कोई अपनो आप बडो बनाल्हो तै निक्ड़ो बनाव गाल्हो ते ज़ै अपनो आप निक्ड़ो बनाल्हो तै बडो बनाव गाहेलो।

बच्चन बरकत देनी

( मत्ती 19 : 13 - 15 ; मरकुस 10 : 13 - 16 )

¹⁵ फिरी किछ लोक निक्के मठ्ठन यीशु क अंन्हने लगे तके यीशु तैन पुड़ दुआकेरे चेलेइं तैन लाहूं त तैन धमकए ते ठाकू। ¹⁶ पण यीशुए मठ्ठां एपु क कुजां ते चेलन सैहीं ज़ोंव:मठ्ठां मीं क एजने देथ एन न ठाका किजोकी परमेशरेरी बादशाही एरहां ज़ैरहां केरीए। ¹⁷ आंव तुसन सैहीं सच़ ज़ोतां की, ज़ै कोई परमेशरेरी बादशैही मां गहंनेरे लेइ अपनो आप निके बचन बराबर ना बनाए, तां तग्र परमेशरेरी बादशैही मां दाखल ना भोई सखे।

दौलतमन्द मैंन्हू ते सदा रहने बाली ज़िन्दगी

( मत्ती 19: 16- 30; मरकुस 10: 17- 31 )

¹⁸ केंची युहूदी यीशुए पुछ़ु एह रोड़े गुरु आंव कुन केरीं की हंमेशरी ज़िंन्दगरो बारस बेनी सैखीं? ¹⁹ यीशु जुवाब दितो तु मींजो रोड़ो किजो ज़ोतां रोड़ो त सिर्फ अक्के परमेशरे। ²⁰ तु ऐन हुक्म त ज़ांनतां की बदमाशी नैइं केरनी खुन नैइं केरनों च़ौरी नैइं केरनी झुठी शाहात नैइं देंनी ते अपने अम्मा बाजी केरी सेवा केरनी। ²¹ तैनी युयूदें ज़ोंव:आंव एन सैभी गल्लंन पुड़ निकड़ारेरो देंतु अंम्ल केरतो राहोरोइं। ²² ज़ैखन यीशुए एन शुनु त तैनी ज़ोंव:एक्की गल्ली पुड़ अंम्ल केरनु राहेरुए आपनु सभ किछ बेच़ी छ़ड ते तै पैइंसो गरीबन बेंटतां दे तीं सुर्गे मां दौवलत मैल्ह्नीएं फिरी एइतांमीं पत्ती च़ल। ²³ एह गल शुंनतां ते बड़ो उदास भोई जेव किजोकी तै बड़ो अंम्बीर थु:। ²⁴ यीशुए तैस हेरतां ज़ोंव:अंम्बीरां कैरू परमेशरेरी बादशैही मां दाखल भोंनु कैत्रु आसुख्तुए। ²⁵ ऊंटेरु सुलरे नाके म्महेइं निस्नु सुख्तुए अंम्बीरेरु परमेशरेरी बादशैही मां दाखल भोंनु असूखतुए। ²⁶ ज़ैनेइं एह गल शुंनी त तैना पुछ़ने लगे फिरी क्सेरी मुखती भोई सख्चे। ²⁷ यीशु जुवाब दितो ज़ै गल मैन्हुं केरेलेइ आसुख्तीए तै परमेशरेरे लेइ सूखतीए। ²⁸ पतरसे यीशु सैहीं ज़ोंव:हेर असां त सभ किछ छ़ैडतां तीं पत्ती च़लोरेंम। ²⁹ यीशु तैन सैहीं ज़ोंव:आंव तुसन ज़ोतां की एरहो कोई नैइं की ज़ैनी परमेशरेरी बादशैहीयरे लेइ अपनु घर बार ते कौन्श ते हाज बौव ते बाल बचे शारोरे भोंन। ³⁰ पण तैस इस दुनियाई मां किछ न मैल्हे ते एजने बैली दुनियाई मां हंमेशरी ज़िंदगीए।

अपने मौतरे बारे मां यीशु एरी ट्लाइयोंव भविश्द्वाणी

( मत्ती 20 : 17 - 19 ; मरकुस 10 : 32 - 34 )

³¹ यीशु बहारे चेले एपुसैहीं साथी निये ते तैन ज़ोंने लगो हेरा अस यरूशलमें जो च़लोरेंम ते नेबेइं ज़ैन किछ मैन्हेरे मठ्ठेरे बारे मां लिखेरुए तैन पुरु भोल्हु। ³² तै गैर युहूदी केरे हथे देंनोएं ते तैसरो मज़ाक बन्हांनोएं ते तैसेरी बेज़ती केरनीएं ते तैसेरे तुत्रे पुड़ थु:कनुएं। ³³ तैस कोड़े मारेल्हे ते तैस मैरी छ़डेल्हे पण तै ट्लेइंयावं दिहाड़े फिरी ज़िंतो भोल्हो। ³⁴ तैनेइं एह गल न सेंमझ़ी बटी ते यीशुएरी एस गल्लरो मतलब तैन कैरां छ़प्पोरो राहु।

काने भूखैरू दृष्टान्त

( मत्ती 20 : 29 - 34 ; मरकुस 10 : 46 - 52 )

³⁵ ते एरू भूं की ज़ैखन तैना यरीहोएरे नेड़े पुज़े त अक कांनो मैन्हुं बत्तरे ड्लेखी बिशोरो पैइंसे मगतो थु:। ³⁶ ज़ैखन तैनी हछे मैन्हुं केरी छ़ैड़ शुनी त तै पुछ़ने लगो की एह कौल्हेरी शौर लोरी भोंने। ³⁷ लोकेइं तैस ज़ोंव:की यीशु नासरी कोस्कोई च़लरोए। ³⁸ तै चिंडां मैरतां ज़ोंने लगो हे यीशु नासरी दाऊदेरा मठ्ठा मीं पुड़ रहेंम केर। ³⁹ यीशुए सैहीं साथी च़लने बाले लोक तैस कंने मैन्हुं धमकाने लगे, की च़ुप रह, पण तै मना जादे ज़ोरे ज़ोरे चिंडां मैरतां ज़ोंने लगो, औ यीशु नासरी अबन दावद मीं पुड़ रहेंम केर। ⁴⁰ यीशुए तैस खेड़ोइतां ज़ोंव: एस मींक अंन्हां ज़ैखन तै तैसका अव त यीशुए तैस पुछ़ू। ⁴¹ ज़ो आंव तेरेलेइ कुन केरीं? तैनी कांने मैन्हें ज़ोंव:हे परमेशर आंव चहताइं की एपनी एछ़ैइं सैहीं लैही बेटीं। ⁴² यीशुए तैस्सेहीं ज़ोंव:रोड़ो भोई गा तेरे विश्वासे तु बेझ़ैवरोस। ⁴³ तै तैखने बेझ़ौव ते लहंने लगो ते परमेशरेरी तारिफ केरतो यीशु पत्ती च़लो जेव एन हेरतां लोक परमेशरेरी तारिफ केरने लगे।

धड़त नेने बालो जक्काई

¹ यीशु यरहोए म्महेइं निसतां च़लोरे थिये। ² तैड़ी अक मैनू थु: ज़ैसरू नोवं ज़कैई थु: तै धड़त घिंन्ने बालां केरो आफसर थु: तै बड़ो अंम्बीर थु:। ³ तैस यीशु हेरनेरो चाऊ थु: पण तैसरू कद छोटू थु: तांए तै हछे मैन्ह्न मैरां लैही न थु: बटतो। ⁴ एल्हेरेलेइ तै दैव्ड़तां अग़र जेव ते गोलरेरे बूट्टे उबरो गुस्सो किजोकी ज़ैखन यीशु एजनोएं त तै तैस रोड़े च़ारे लैही बटे। ⁵ ज़ैखन यीशु तैस ठैरी पुज़े त तैनेइं उबरू तेकतां ज़ोंव:ज़कैई लुशी उन्ढो हेस किजोकी अज़ मीं तेरे घरे ट्लाहंन च़ारेई एजनुएं। ⁶ ज़कैई तैखने ऊन्ढ़ौ हेस्सौ ते यीशु बेड़ी ख़ुशी सैहीं अपने घरे नियो।

⁷ एन हेरतां सब लोक ज़ोने लाए कि यीशु त एक्की पैपी मैन्हेरो मैम्हांन बनोरोए|

⁸ ज़कैई खड़ो भोइतां प्रभु सैहीं ज़ोने लगो हे प्रभु तक्क आंव अपनी अधी जैइदात कंगालन देताइं अगर कैन्चेरू किछ खेवरु भोल्हु त तैस च़ैव्रर हिस्से वापस दैइल्हो| ⁹ तैखन यीशुए तैस सैहीं ज़ोवं अज़ इस घरे मां मुखती एवरिए ऐलहेरे लेई इन भी अब्रहांमेरू अक मठ्ठूए| ¹⁰ किजोकी मैन्हेंरू मठ्ठू हेरोरन तोपने ते मुखती देने एवरूए|

दश मोहरां केरू दृष्टान्त

( मत्ती 25 : 14 - 30 )

¹¹ ज़ैखन लोक यीशुरी गल्लां शुन्ने लगोरे थिये त तैनी तैन अक बार शुनाइ किजोकी तैन यरूशलमेंरे नेड़े पुज़ोरे थिये ते लोकां केरो खियाल थु: की परमेशरेरी बादशाही लुशी एजनीएं। ¹² तैनी तैन ज़ोंव:अक बड़ो अंम्बीर मैनू होरी मुल्खे मां गाहे ताके तैस मुल्खेरो मेंत्रेरो औहुदो घीनतां वापस एज्जे। ¹³ तैनी अपने सेवादारन मैरां दश ज़न्हैं कुजाए ते तैन दश अश्रेफी देइतां ज़ोंव: मेरे वापस एजने तग्र इस पैइंसे सैहीं करोबार केरथ। ¹⁴ पण तैस ठैरी लोक तैस सैहीं नफ्रत केरते थिये तैनेइं पतोरां तैस जो समाद भेज़ो की अस न चहंम की एह मैन्हुं असन पुड़ हुकुमत केरे।

¹⁵ ज़ैखन तै हुकुमतरो औहुदो हासल केरतां वापस अव त तैनी अपने सेवादारे जो समाद भेज़ो की ज़ैना तैनी करोबारेरे लेइ पैइंसे दितोरे थिये तके सैभी केरो पतो केरे की केनी कैत्रु क्मेवरुए। ¹⁶ पैहिले मैन्हें एइतां ज़ोंव:हे परमेशर मीं तेरी दश अश्रेफेइं सैहीं दश होरी कमैई। ¹⁷ तैनी तैस सैहीं ज़ोंव:तीं दश अश्रेफेइं सैहीं ईमेनदैरी सैहीं कम कियुं गा तीं दश शहरन पुड़ अख्तीयार दीतु गहते। ¹⁸ दुइयांव मैन्हें एइतां ज़ोंव:हे मालिक मीं तेरी पांच़ अश्रेफेइं सैहीं पांच़ होरी कमैई। ¹⁹ तैनी तैस सैहीं भी ज़ोंव:तीं भी पांच़ शहरन पुड़ अख्तीयार दीतु गहते। ²⁰ तैखन एक्की मैन्हें एइतां ज़ोंव:इना रेही तेरी अश्रेफ़ी मीं ऐन रूमाले मां बेंधतां रखोरी थी। ²¹ किजोकी तु सख्त मैन्हुंस ते आंव तीं कैरां डरतो थु: किजोकी तु तै चीज़ ज़ै तीं न भोए रखोरी तु तैस भी नैतस ते ज़ैन न भोए बेवरू तु तैन भी लुनतस। ²² तैनी तैस सैहीं ज़ोंव:हे निकम्मे मैन्हां आंव तेरी गल्लेइं सैहीं तींए मुर्ज़म बनताइं ज़द तीं पत्तो थु: की आंव बड़ो सख्त मैनूइं ते ज़ै चीज़ मीं नैइं रखोरी आंव तैस भी सल्ह्तां ते ज़ैन नैइं बेवरू आंव तैन भी लुनतं। ²³ फिरी तीं मेरे रुपैइये केन्ची क किजो नैइं रखोरे ताके आंव वापस एइतां तैस कैरां सुते समेत उसुल केरेथो? ²⁴ तैखन तैनी तैन सैहीं ज़ोंव:ज़ैन तैड़ी खड़खड़े थिये एस्कैरां एन अश्रेफी ऐनतां उस देथ ज़ैसका दश अश्रेफीन। ²⁵ तैना ज़ोंने लगे हे परमेशर एसका पैहिली दश अश्रेफीन? ²⁶ तैनी तैन जुवाब दितो आंव तुसन सैहीं ज़ोतां की ज़ैस केन्ची क किछ पल्लै भोल्हु तैस होरु भी दीतु गाल्हू ते ज़ैसक किछ भी पल्लै न भोल्हु तैस कैरां तैन भी निवं गाल्हू। ²⁷ पण मेरे इन दुश्मन ज़ैन मीं न थिये सुखाते की एह असन पुड़ हुकुमत केरे एन इरहां अंन्हां ते मेरे सामने एन मैरी छ़ड्डा।

यरूशलेमें मां ज़ींत दाखल

( मत्ती 21 : 1 - 11 ; मरकुस 11 : 1 - 11 ; यूहन्ना 12 : 12 - 19 )

²⁸ ऐना गल्लां ज़ोइतां यीशु अग्रोहुं निसे की यरूशलमें मां पुज़ी गहंम।

²⁹ ज़ैखन तैना ज़ेतुंनेरे पहाड़े बेत फिग्गे ते बैत्नियां मां पुज़े त यीशुए दुई चेले एन ज़ोइतां अग्रोहुं भेज़े। ³⁰ तुस सामने उस ड्लोवें मां गाथ ते तैड़ी तुसन अक गैधरो बचो बन्धोरो मैल्लनोए ज़ैस पुड़ अज़ तग्र कोई नैइं च़ड़ोरो तैस खोलतां इरहां आंन्हां। ³¹ ते अगर कोई तुसन पुछ़ेल्हो की तुस एस किजो लोरेथ खोलने त तुस ज़ोइयथ की प्रभु परमेशरे ऐसैरी ज़रुरते।

³² आग्रोहूं गहंने बाले चेलेइं तैन्ने किंयुं ज़ैन यीशुए तैन ज़ेवरु थु:। ³³ ज़ैखन तैना गैधरो बचो खोलने लगोरे थिये त तैसेरो मालक तैन पुछ़ने लगो तुस एस बचे किजो लोरेथ खोलने? ³⁴ तैनेइं जुवाब दितो प्रभु परमेशरे ऐसैरी ज़रुरते। ³⁵ तैनेइं तै बचो खोलतां यीशु क आंन्हों ते तैस पुड़ अपना लिगड़ां छ़ेडतां यीशु तैसपुड़ च़ैड़तां च़ले जे। ³⁶ ज़ैखन तैना च़लोरे थिये त लोकेइं बत्ती म्महेइं कमलां बछ़ेइतां छ़ाडोरां थियां।

³⁷ ज़ैखन तैना तैस ठैरी नेड़े पुज़े त ज़ैठां बत्त ज़ैतून पुड़ेरां ऊंढी गहती थी तैड़ी सारे चेलेइं एह तमाशो हेरतां ते ख़ुशी भोइतां परमेशरेरी तारिफ केरने लगे की।

³⁸ मुबारके तै बादशहा ज़ै परमेशरे नोवें सैहीं एइते सुर्गे मां मेंम्हा ते अंम्ब्रे मां शांती भोए।

³⁹ तैन मैन्ह्न मां किछ फ्रिसी भी थिये तैना यीशु सैहीं ज़ोने लगे हे गुरु अपने चेलन ज़ो की च़ूप केरन। ⁴⁰ यीशुए तैन जुवाब दितो आंव तुसन ज़ोतां की अगर ऐन च़ूप केरन त इन घौड़ चिन्डां मारेल्हे।

यरूशलेमेरे लेई शोग

⁴¹ यरूशमें मां पुज़तां यीशु यरूशलमेंरो हाल हेरतां तैस लेरां छुटी। ⁴² ते ज़ोंने लगो कुन रोड़ू भोथु: तु तैईसे तैना रोड़ी गल्लां ज़ांनेथो पण तैन हुनी तैन तेरी एछ़न कैरां छ़ेपी जेवरिन। ⁴³ तीं तैना दिहाड़े हेरने पैनेण जैईस तेरे दुशमन तेरे च़ैवरे पासन मोरच़ो बेंधतां ते तीं घेरो देइतां तीं पुड़ हमल्हो केरेल्हे। ⁴⁴ ते तीं त तेरे बचन ज़ैना तीं मां आंन्हां मिती मां मिलेल्हे ते तीं मां घोड़े पुड़ घोड़ बाकी न रहलो किजो कि तीं तै मोको ज़ैइस तीं पुड़ दिया भोवरी थी न बुझु|

मन्दरेरे बुपारी कढने

( मत्ती 21 : 12 - 17 ; मरकुस 11 : 15 - 19 ; यूहन्ना 2 : 13 - 22 )

⁴⁵ तैखन तै प्राथना भवने मां जेव ते तैड़ी तै बिपैरन ते गहक बेरोहुं कढने शुरू किये। ⁴⁶ तैनी तैन सैहीं ज़ोवं की मेरु घर प्राथनरू घर भोल्हु पण तुसैइं त डेकू केरो आड्डो बनेइतां रखोरोए।

⁴⁷ तै रोज़ भवने मां ज्ञान शुनातो थु: पण पुरैहुतेइं ते युहूदी बज़ुर्गेइं यीशु मारनेरी कौशिशि मां लागोरे थिये। ⁴⁸ पण तैन एन केरनेरो मोको न थु: मैल्तो किजोकी सारे लोक यीशुएरी गल्लां शुंन्ने च़ौवरे पासन बिशोरे रहते थिये।

यीशु एरे अधिकारे पुड़ सुवाल

( मत्ती 21 : 23 - 27 ; मरकुस 11 : 27 - 33 )

¹ एक्की दिहाड़े ज़ैखन तै प्राथन भावने मां ज्ञान लोरो थु: देंनेते तैन अंजील लोरो थु: शुनाने त पुरैहुत ते मैहेज़बी लोक ते युहूदी बुज़ुर्ग यीशु क पुज़े। ² ते तैन ज़ोंने लगेतु ऐन सैरी गल्लां कसेरे अख्तीयारे सैहीं केरतसया तीं ऐह अख्तीयार कैनी दितोरोए? ³ यीशु तैन जुवाब दितो आंव भी तुसन अक गल्ल पुछ़ताइं मीं ज़ोथ। ⁴ युहन्नेरो ब्पतिसमो सुर्गेरी तरफां थु: की मैनू केरे तरफां थु:? ⁵ तैना एपु म्मेहीं बेंस केरने लगे की अगर अस ज़ोंम की अंम्ब्रेरी तरफां थु: त तै पुछ़ेल्हो की फिरी तुसैहीं यकीन की नैइं कियेरू? ⁶ पण अगर अस ज़ोंम की मैन्हुं केरे तरफां थु: त लोकेइं अस मारनेम किजोकी तैना युहन्ने नबी मनते थिये। ⁷ तैनेइं जुवाब दितोकी अस न ज़ांनम की किसेरी तरफां थु:। ⁸ यीशु तैन सैहीं ज़ोंव:त अंम्हीं तुसन सैहीं न ज़ोइं की ऐना कम्मा कसेरे अख्तियारे सैहीं केरताइं।

दुष्ट ज़मीनदारां केरू दृष्टान्त

( मत्ती 21 : 33- 46 ; मरकुस 12 : 1- 12)

⁹ फिरी यीशुए तैन लोकन अक कहानी शुनाने लगो एक्की मैन्हें दाछ़री बाग लाई ते तै ठैकेदारन ठैके पुड़ देइतां एपु खरे च़ीरे कौस्कोई दुर प्रदेशे च़लो जेव। ¹⁰ जैईस दाछ़ पक्नेरो मोसम अव त तैनी अपनो हिस्सो नैनेरे लेइ अक नोकर भेज़ोपण तैनेइं तै खुब झ़ूसो कुटो ते खाली वापस भेज़ो। ¹¹ ते फिरी तैनी अक होरो नोकर भेज़ो पण तैनेइं तैसेरी भी बेज़ती कीते तै भी झ़ूस कुट केरतां तै भी खाली वापस भेज़ो। ¹² फिरी तैनी अक ट्लेइयंव होरो नोकर भेज़ो पण तैनेइं तैसेरी भी बेइज़ती की ते ज़ख्मी केरतां कढौ। ¹³ तैखन बागारे मालके ज़ोंव:आंव अपने मठ्ठे भेज़ताइं शैहिद तैना तैसेरो लिहाज़ केरल्हे। ¹⁴ पण ज़ैखन ठैकेदारेइं तै लाहू त एपु म्मेहीं मशोरो केरने लगे एहे मालके एजा एस्से मारम ताके जेइदात ईशी भोइगाहे। ¹⁵ तैनेइं तैन मठ्ठु बागी मैरां बेइर कैढतां मैरी छ़डु तुस सोचा की फिरी बागारे मालके तैन सैहीं कुन कियेरू भोल्हु। ¹⁶ ते मालक एइतां तैन मैरी छ़डेलोते बाग होरी केरे हवाले केरल्हो तैनेइं एन शुनतां ज़ोंव:की परमेशर न केरे। ¹⁷ तैनी तैन केरे पासे तेकतां ज़ोंव:फिरी इन कुने ज़ैन लिखेरुए की ज़ै घोड़ मिस्त्रेइं रद्दी कियो तैहे घोड़ कुंनेरो घोड़ भोल्हो? ¹⁸ ज़ै कोई इस घोड़े पुड़ बिछ़ड़ेल्हो तैसेरे टुके टुके भोल्हे ते ज़ैस ऊंढौ एह घोड़ खिरकेलो तैस ऐह पिह्तां रखेल्हो।

कैसरे धड़त देनी

( मत्ती 22 : 15 - 22 ; मरकुस 12 : 13 - 17 )

¹⁹ धर्म गुरेइं ते पुरैहूतेइं तैस ट्लांनेरी कौशिश की किजोकी तैना बुझ़ी जेवरे थिये की तैनी ऐह कहावत ऐन केरे बारे मां शुनेवरी थी पण तैन लोकन कैरां डरते थिये। ²⁰ तैन लोक यीशुएरी ताकी मां थिये तैनेइं विशवैसी केरे रुपे मां जासुस भेज़े ताके तैसेरी कोई गल्ल ट्लेई सखन ते फिरी बादशाहेरे कब्ज़े मां देई देन। ²¹ तैनेइं यीशु पुछ़ू हे गुरु अस ज़ानतम की तु सच़्च़ोस ते सच़्च़ैईयरी तालिम देतस ते केन्चेरी सहरेहींत न केरस बलके सच़्च़ै सैहीं परमेशरेरी बत्तरी तालिम देतस। ²² कुन असंन कैसरेरे राज़े जो धड़त टेक्स देंनो ठीके की गलत? ²³ यीशुए तैनकैरू मकड़ बुझ़तां तैन जो ज़ोंव। ²⁴ मीं अक रुपैइयो एंनतां हेराथ ते ऐस पुड़ किसेरी मौहोर ते किसेरू नोवें? तैनेइं ज़ोंव: कैस्रेरी| ²⁵ यीशु तैन सैहीं ज़ोंव:ज़ैन कैस्रेरुए तैन कैस्रे जो देथते ज़ैन परमेशरेरुए तैन परमेशरे जो देथ। ²⁶ ते तैना लोकां केरे सामने तैसेरी कोई गल्ल न ट्लेई सखे बलके तैसेरे जुवाबे सैहीं तैन हेरान भोइतां च़ुप रेहीजे।

कयामत ते ड्लाह

( मत्ती 22 : 23 - 33 ; मरकुस 12 : 18 - 27 )

²⁷ फिरी सुदुकी ज़ैन ज़ोते थियेकी मुवोरे ज़िंते न भोंन ते फिरी किछ यीशु क एइतांपुछ़ने लगे। ²⁸ हे गुरु असंन जो मुसैरो हुक्में की अगर कैन्चेरो ढ्लाह एपनी कौन्शारे भोंते संते हेईट्ल मैरी गाहे त तैसरो ढ्लाह तैस कौन्शी सैहीं ड्लाह केरे ताके अपने ढ्लाहएरे लेइ ओवलाध पैईदा केरे। ²⁹ सत ढ्लाह थिये पैहिले ड्लाह कियो ते हेईट्ले मैरी जेव। ³⁰ फिरी होरें तैस्सेहीं ड्लाह कियो।। ³¹ फिरी तैल्ला पत्ती ट्लेइयंव तै कौन्श रखी फिरी एंच़रे सैहीं सत्तेइं ज़ंनैहीं ड्लाह कियो पण सभ बेओवलाध मैरी जे। ³² ते आखरकार तै कौन्श भी मैरी जेई। ³³ नियायेरे येनी फैसलेरे दिहाड़े तै किसेरी कौन्श भोल्ही किजोकी तै सत्ते ज़ंन्हां केरी कौन्श बनोरी थी? ³⁴ यीशुए तैन सैहीं ज़ोंव:इस दुनियारे लोकन मां त ड्लाह बननेरो दस्तुरे। ³⁵ पण ज़ैना लोक एजने बैली दुनियारे काबल भोल्हे ते ज़ैना मुड़दन मैरां ज़िंते भोल्हे तैना ड्लाह न बनाले। ³⁶ तैना मरेल्हे भी न्नाएल्हेरेलेइ की तैना सुर्गदोतां केरे ज़ैरे भोल्हे ते तैन जो कियांमतरां मठ्ठां बेनतां परमेशरेरां भी मठ्ठां ज़ौल्हे। ³⁷ ते ज़ैड़ी तग्र मुड़दां केरो ज़िंते भोंनेरो तलके तैंच़रे मुसै नेबें ज़लते झ़ल्लोंवेरे बारे मां तैंच़रे इशारो कियो किजोकी तै परमेशर अब्रहांमेरो परमेशर ईज़हाकेरो परमेशर ते याकुबेरो परमेशर ज़ोइतां फुकरतो थु:। ³⁸ पण परमेशर मुड़दां केरो नैइं बलके ज़िंतां केरो परमेशरे किजोकी तैसेरे नेड़े सभ ज़िंतेन। ³⁹ धेर्मी लोकन मैरां किछेइं जुवाब दितोहे गुरु तीं त बड़ु रोड़ु ज़ोंव। ⁴⁰ फिरी तैन मैरां केंची हिंमत न अई की एस होरु किछ पुछ़म।

मसीह कैसेरू मठ्ठू ए

( मत्ती 22 : 41 - 46 ; मरकुस 12 : 35 - 37 )

⁴¹ फिरी यीशुए तैन सैहीं ज़ोंव:फिरी मसही जो दावदेरु मठ्ठु कैंच़रे सैहीं ज़ोतन? ⁴² किजोकी दाऊद त एपु ज़बुरे मां ज़ोते परमेशरे मेरे परमेशरे सैहीं ज़ोंव:मेरे देंहींने पासे बिश।

⁴³ की ज़ां तग्र आंव तेरे दुशमन तेरे पांउन हैठ न बिशैल्हीं। ⁴⁴ दावद ता तैस्जो प्रभु परमेशर ज़ोते,फिरी तैन तैसरु मठ्ठु कैंच़रे भोवं? दाऊद त तैस्जो प्रभु परमेशर ज़ोतेफिरी तैन तैसरु मठ्ठु कैंच़रे भोवं?

शास्त्रन कैरां सावधान

( मत्ती 23 : 1 - 36 ; मरकुस 12 : 38 - 40 )

⁴⁵ ज़ैखन सभ लोक शुनी राहोरे थियेत यीशुए अपने चेलन सैहीं ज़ोंव। ⁴⁶ ध्रम गुरन कैरां हुशियार रेहीयथ तैना लम्में लम्में कुरते लांने पसंद केरतन ते होरु एन चहतन की कोक बज़ारन मां तैन जो नमसकार केरन तैन प्राथना भावने मां उच्ची कुरसी तोपतन ते धामन मां बड़े खड़पैंन्च बन्नु चहतन। ⁴⁷ तैन बैव्वा कौन्शा केरां घरां लुटतन ते लोकन हेरांनेरे लेई बड़ी लम्मी दुआं तैन हछ्छी सज़हा मैल्नीएं।

कंगाल बेवरू दान

( मरकुस 12 : 41 - 44 )

¹ यीशु अंम्बीरां केरे पासे तकने लगोरो थु: ज़ैन भावनेरे खज़ांने मां दान लोरे थिये छ़डने। ² तैनी अक बड़ी गरीब रेंडी कौन्श लाही ज़ैसां दुई पैइंसे येनी अक धेलो च़हड़ो| ³ त्तल्ही यीशु ज़ोंवआंव तुसन सैहीं सच़्च़ ज़ोताइंकी भावनेरे खज़ांने मां दान देंने बालन मैरां सैभन कैरां जादे इस रेंन्डी कौन्शां दान दीतु। ⁴ किजोकी तैनेइं त एप्नी दौवलती मैरां सिर्फ़ धगसेरे पैइंसे परमेशरे घरे मां दितोरेनपण इस कौन्शां एपनी गरीब हालती सैहीं ज़ैन किछ ऐसारे पल्लै थियुं सभ किछ देइ छ़डु।

मन्दर नाश भोंनेरी भविष्द्वानी

( मत्ती 24 : 1- 2 ; मरकुस 13 : 1- 2 )

⁵ किछ लोक प्राथन भावनेरे येंनी हेक्लारे बारे मां ज़ोंने लोरे थियेकी बड़े माघे घोड़ेइं सैहीं ते पैइंसेइं सैहीं बनोरिए त यीशए ज़ोंव। ⁶ तैना दिहाड़े एजने बालेन की इन चीज़ां ज़ैना तुस इड़ी लहंने लोरेथ इड़ी घोड़े पुड़ घोड़ नैइं रहंनो ज़ै बछ़ोड़ेल्हे न्ना।

दुःख ते मसीबत

( मत्ती 24 : 3- 14 ; मरकुस 13 : 3- 13 )

⁷ तैनेइं यीशुए पुछ़ूहे गुरु जी ऐन गल्लां कैइस भोंनिण? ते तैन्केरो दुनियाई मां एजनेरो कुन नशान भोंनोएं। ⁸ यीशुए तैन ज़ोंवखबरदार टेपलोईयथ न्नाकिजोकी कही लोक मेरे नोवें सैहीं एजनेन ते तैनेइं ज़ोंनुएं की आंवे मसही अंहीं ते मोको भी नेड़े पुज़ोरोएतुस तैन पत्ती न गैहीयथ। ⁹ ते ज़ैखन तुस लड़ेइयरी त उल्झनरी आफुवां शुनेल्हे त डेरथ न्नाकिजो की ऐन गल्लां कैरू पैहिले भोंनु ज़रुरीए पण तैइसे खातमों नैइं भोंनो।

¹⁰ तैखन यीशुए ज़ोंव:अक कौम होरी कौमरे खिलाफ ते अक बादशहा होरी बादशाहेरे खिलाफ खड़ो भोंनोएं। ¹¹ ठारी ठारी बडे बडे भूंज़ल एजनेण ते कल पैंनोएं ते बिमारी फैलनिएं ते बुरी बुरी गल्लां भोंनिण ते अंम्बरे मां अजीब नशान लेहियोंनेण। ¹² ऐन सब गल्लां भोंने कैरां पैहिले तुशै दुशमन तुसन सिर्फ मेरे नोवेंरे वजाही सैहीं ढप्पैल्हे ते तुसन सताल्हे ते प्राथन भावनेरी अदालती मां हाज़र केरले ते जैली मां छ़डेल्हे ते बादशाहन ते गुवरनरे क पैश केरेल्हे। ¹³ तैखन तुसन मेरी गवाई देंनेरो रोड़ो मोको मैल्हेलो। ¹⁴ पण तुसन कोई ज़रूरत नैइं की पैहिले तुस फिकर केरने लगथ की अस कुन ज़ोंमेल्हे। ¹⁵ किजोकी आंव तुसन एरी ज़बांन ते अकल देइल्होकी कोई भी मुखालफ तुशै सांमने खड़ो न भोई सखेल्हो ते न कोई तुशै खलाफ किछ ज़ोइ सखेल्हो। ¹⁶ ते तुशै हाज बौव ते रिशतेदार ते दौसत तुसन सैहीं बेईमानी केरेल्हे ते तुसन मैरां किछन मारेल्हे भी। ¹⁷ ते मेरे नोवेंरे वजाई सैहीं सारे लोक तुसन सैहीं नफ्रत केरेल्हे। ¹⁸ पण तुशै दौगेरो कोई बाल बांको न भोल्हो। ¹⁹ सब किछ झ़ेलतां तुस एपनी जान बच़ैई साखेल्हे।

यरूशलेमेरे विनाशेरी भविष्द्ववाणी

( मत्ती 24 : 15 - 21 ; मरकुस 13 : 14 - 19 )

²⁰ ते ज़ैईस तुस युरोशलमेरे च़ैवरे पासन फौजेइं सैहीं घेरेरू लाल्हे त बुझ़थ की एस बेरांन भोंनेरे दिहाड़े नैड़े एवरेन। ²¹ तैस मोके ज़ैन युहूदिये मां भोल्हे तैना पहाड़े पुड़ जो नैशी गहंनते ज़ैना युरूशलेमेमां भोल्हे त तैन बेरोहुं निसन ते ज़ैना ड्लोंवंन मां भोल्हे त तैना शहारे मांझो न एजन। ²² किजोकी ऐना बदलेरे दिहाड़े भोल्हे ऐन मां तैन सभ किछ ज़ैन पैहिले लिखेरुए तैन पुरु भोंनुएं। ²³ तैन कौन्शंन पुड़ अफ्सोसे की ज़ैना तैईस बच्न दूध पियेती भोल्हीकिजो की धेरती पुड़ बड़ी मसीबत एजनिएं ते एस कौमीं पुड़ बड़ी आफत एजनीएं। ²⁴ तैना सभ तलवारी सैहीन मारे गाहेले ते गुलांम बेनतां सैभी कौमन मां पुज़ैल्हे ते गैर कौमां केरो मोको पुरोभोंने तग्र यरूशलम गैर कौमेइं सैहीं पस्त भोंतो राहेलो ।

मैंन्हेरे मठ्ठेरू ज़ींतू भोंनू

( मत्ती 24 : 29 - 31 ;मरकुस 13 : 24 - 27 )

²⁵ दिहाड़े चेंदेनी ते तारन मां निशांन बांदे भोंनेण ते धेरती पुड़ कौमन बड़ी तकलीफ़ पुज़नियें किजोकी सुमुन्द्रेरी लैहेरां केरी शौरी सैहीं तैना डेरी गहंनेण। ²⁶ डररे मारे एजने बैली मिसिबतरो इंतज़ार केरते केरते तैनकेरे होशहुवास उड़ी गहंनेण किजोकी अंम्बरेरी ताकत भी हिली गहंनियें। ²⁷ तैखन लोक मैन्हेरु मठ्ठु बेड़ी कुदरती सैहीं बिद्लारी मां एइंतु लाहेले। ²⁸ ज़ैखन ऐन गल्लां भोंनी शुरू भोल्ही त सीधे खड़े भोइतां उबरू तैकथ किजोकी तुशी मुखती भोंने बालीए।

अंजीरेरे बुटेरी मसाल

( मत्ती 24 : 32 - 35 ; मरकुस 13 : 28 - 31 )

²⁹ तैतैखन यीशुए तैन अक बार शुनइतुस फैगेरो बूट ते होरी बुटंन भी हेरतथ। ³⁰ ज़ैरी तैस गुडी लेगनी शुरू भोइचन? त तुस हेरतां बुझ़तथ की नैल्हा एवरोए। ³¹ एंच़रे तुस ज़ैखन ऐन सभ किछ सच़्च़ भोंतु लाहेले त तुस बुझ़ेल्हे की परमेशरेरी बादशाही नैड़े ऐवरीए। ³² आंव तुसन सैहीं सच़्च़ ज़ोतां की ज़ां तग्र ऐन गल्लां पुरी न भोंनऐस ओव्लाधरो खातमों न भोल्हो। ³³ धरती अंम्बर टेली गाल्हु पण मेरी गल्लां कधे न टेलेल्ही।

बीझ़े राथ

( मत्ती 24 : 36 - 44 ; मरकुस 13 : 32 - 37 )

³⁴ बस्सा खबरदार भोथ कोस्कोई एरू न भोए की तुशौ दिल नशेमां मस्त भोइतां इस ज़िंदगारे फिगरे सैहीं कमज़ोर भोएते तैस दिहाड़े तुशै लेइ अक मसिबत बने। ³⁵ किजोकी तै इस सैरी धेरती पुड़ ज़ैत्रे लोकन तैन सैभन पुड़ एंच़रे एजनीएं। ³⁶ बस्सा हर बख्त तियार रहथते प्रार्थन केरते रहथताके तुस ऐन गल्लन कैरां ज़ैना भोंने बैलीनऐन कैरां बेंच़तां परमेशरेरे मठ्ठै क खड़े भोंनेरे कबल भोथ।

³⁷ यीशु रोज़ प्राथना भावने मां तालिम देंतो थियोते राती ज़ैतून पहाड़े पुड़ रहतो थियो| ³⁸ झ़ेझ़ां सारे लोक यीशुएरी गल्लां शुनेरे लेइ प्रारथन भावने मां तैसका एंइते थिये।

यीशु एरे खलाफ साजिस

( मत्ती 26 : 1- 5 ; मरकुस 14 : 1 , 2 ; यूहन्ना 11 : 45 - 53 )

¹ बडी दिहाड़ी ज़ैस्जो फसाह ज़ोतन नेड़े एवरी थी। ² पुरैहुत ते धर्म गुरु मोको तोपने लोरे थिये की यीशु कैंच़रे सैहीं बन्ने लाम किजोकी तैना लोकन कैरां डरते थिये।

यहूदेरो विशवासघात

( मत्ती 26 : 14 - 16 ; मरकुस 14 : 10 , 11 )

³ ते शैतान युहूदे मां बेस्सी जेवतैस्जो आस्क्र्युती भी ज़ोते थिये ते तै यीशुएरे बहरे चेलन मां शुमार भोतो थु:। ⁴ दे तै पुरैहुतन ते प्राथना भावनेरे किछ खास पुछ़ने गन्ने लोकन क जेव ते तैन सैहीं मुशोरो केरने लगो की कैंच़रे सैहीं यीशु तैन केरे हवाले केरोए। ⁵ तैना बड़े ख़ुशी भुए ते तैस पैइंसे देंनेरो वाहिदो कियो। ⁶ तैनी तैन्केरी गल्ल मनी ते मोको तोप्ने लगो की यीशु कैंच़रे सैहीं तैनकेरे हावाले केरे ते केंची पतो न लग्गे।

चेलन सैहीं साथी फसहरू अखरी भोझ़

( मत्ती 26 : 17 - 25 ; मरकुस 14 : 12 - 21 ; यूहन्ना 13 : 21 - 30 )

⁷ ईद फित्रेरी दिहाड़ी नेड़े ऐवरी थीज़ैस्मां हुड़ेरी कुरबांनी देंनी ज़रुरी थी। ⁸ यीशुए पतरस ते युहन्ना ऐन ज़ोइतां भेज़े की गाथ ते इशै लेइ फ़सहरी रौट्टी तियार केरा। ⁹ चेलेइं पुछ़ूकी तु कोड़ी सुखातस की अस तींजो फ़सहरी रौट्टी तियार केरम? ¹⁰ यीशुए तैन जुवाब दितोशहारे मां गहंते तुसन अक मैन्हुं मैल्लनोएं ज़ै पैनेरो घड़ो घिंतां च़लरो भोंनोएं तैस पत्ती गैहीयथ ते ज़ैस घरे मां तै गाहेलो। ¹¹ तैसेरे मालके सैहीं ज़ोइयथकी गुरें पुछ़ेरूए की ट्लांन केरी ठार कोड़ीए ज़ैड़ी आंव अपने चेलन सैहीं साथी फसहरी रौट्टी खेई सेखीं? ¹² ते तुसन बहा नैहितां अक बडो कमरो हेराल्हो ज़ै खुब रोड़े च़ारे स्ज़ेवरो भोंनोएंतैड़ी ईशै लेइ तियारी केरथ। ¹³ तैनेइं तैड़ी गैहितां सब किछ तैरू लाहुंज़ैरु तैनी ज़ेवरू थु:ते तैड़ी फसहरी रौट्टी तियार की।

प्रभु भोज

( मत्ती 26 : 26 - 30 ; मरकुस 14 : 22 - 26 ; 1 कुरिन्थियों 11 : 23 - 25 )

¹⁴ ज़ैखन रौट्टी खांनेरो मोको आव त यीशु ते तैसेरे चेले च़ूफ़ीरतां बिशोरे थिये। ¹⁵ ते यीशुए तैन सैहीं ज़ोंवमेरी एह बड़ी खुवाश थी अपनो दुःख झ़ैलने कैरां पैहिले एक्की बार फसहरी रौट्टी तुसन सैहीं साथी खेइं। ¹⁶ किजोकी आंव तुसन सैहीं ज़ोतां की अज़ैरां पत्ती तां तग्र न किछ खेई सेखीं ज़ां तग्र परमेशरेरी बादशैहीयरु कम पुरु न भोए। ¹⁷ फिरी यीशुए कटोरो ट्लातो ते परमेशरेरू शुक्र केरतां चेलन दितो ते ज़ोवं हींयांथ ते एपुम्मेइं बंटा। ¹⁸ किजोकी आंव तुसन सैहीं ज़ोतां की अज़ैरां पत्ती दाछ़ारु ऐन पानी फिरी तां तग्र न पिएल्हो ज़ां तग्र परमेशरेरी बादशाही न एजे। ¹⁹ फिरी यीशुए रौट्टी ट्लाती ते परमेशरेरू शुक्र केरतां ट्लोड़ी ते तैसेरे टुके ब्नेइतां अपने चेलन एन ज़ोइतां दितीकी ईही मेरी जांने ज़ै तुशै लेइ आंव देताइंते तुस भी मेरी याद गैरी मां एन्ने केरते रेहीयथ। ²⁰ एंच़रे रौट्टी खानेरे बाद तैनी कटोरो ट्लातो ते चेलन क दितो ते ज़ोवं की इही कटोरो मेरो तैस खुनेरो एहेदे ज़ै तुशै लेइ दितोरोएनोवों एहेदे। ²¹ पण हेरा मीं ट्लुवांने बालेरो हथ मेरे तुत्रे अग्रे। ²² किजो कि मैन्हेरु मठ्ठु तु हुनी च़लोरोस ज़ैंच़रे की तैसेरे लेइ पैहिले ऐन पक्कु भेवरुए पण तैस मैन्हुं पुड़ अफ्सोसे ज़ैसेरे हथेइं तै ग्रिफ्तार भोए। ²³ ऐन शुंनतां तैना एपु म्मेहीं पुछ़ने लगेअसन मां एरो ज़ैरो कौने ज़ै ऐन कम केरेल्हो?

महान मौन ? ऐस पुड़ बेंस

²⁴ तैन ऐस गल्ली पुड़ एपु म्मेइं बेंस भोई की असन मां कौन बडोए। ²⁵ यीशु तैन सैहीं ज़ोंव:होरी कौमन पुड़ तैनकेरे बादशहा हुकुमत केरतन ते तैन ज़ैन अखतियारे बाले भोतन तैन जो मैसन ज़ोतन। ²⁶ पण तुस एरे नैइं भोंनेतुसन मां ज़ै बडोए तै निकड़ेरे बराबर बने ते ज़ै हाकमें तै सेवकेरे बराबर बने। ²⁷ किजोकी बडो कौने? ज़ै तैसका साथी बिशोरोएया तै ज़ै तैसरो चेलोए? कुन तै तैसका नैइं बिशोरो? पण आंव त तुसन मां अक चेलेरे बराबर आंहीं। ²⁸ पण तुस तैनथ ज़ैना मेरी अज़मैइशरे मोके बराबर मीं सैहीं साथी रहतथ। ²⁹ ज़ैंच़रे बाजीं मीं अक बादशाही दितोरीए आंव भी तुसन अक बादशाही देताइं। ³⁰ ताके तुस मेरी हुकुमती मां मीं सैहीं साथी बिशतां खाथ पिथ बलके बड बडे शाही तखतन पुड़ बिशतां इस्राएलेरे बहरे कबीलां केरी आदालत केरल्हे।

पतरसेरे इन्कारेरी भविश्द्ववाणी

( मत्ती 26 : 11 - 35 ; मरकुस 14 : 27 - 31 ; यूहन्ना 13 : 36 - 38 )

³¹ शमौन शमौन शैताने थर थराते इजाज़त मगीनी चाही की एन गैहूं केरे ज़ैरे छ़ैटीं। ³² पण मीं तेरे लेइ प्रार्थन की कि तेरो विश्वास न बिगड़े ते ज़ैखन तु तोबा केरी गासत अपने ढ्लाहं केरो विशवास भी मज़बूत कैरां। ³³ पतरसे यीशु सैहीं ज़ोंव:हे परमेशर तीं सैहीं आंव कैद भोंने बलके मरनेरे लेइ भी तियाराइं। ³⁴ पण यीशुए ज़ोंव:हे पतरस आंव तीं सैहीं ज़ोतां की अज़ कुकड़े बांक देंने कैरां पैहिले तु मेरो ट्लाई बार इनकर केरेल्होकी आंव एस ज़ैनी न्ना।

बेतवो , झोलो, ते तलवार

³⁵ तैसरां बाद यीशुए तैस पुछ़ू की ज़ैइस मीं तुस बगैर बेटवेंते बगैर जुट्टी ते थेले बगैर भेज़ोरे थिये त तुस कैंची चिज़ारे मोतज राहोरे थिये? तैनेइं ज़ोंव: केंची चिज़रे नैइं। ³⁶ यीशु तैन सैहीं ज़ोंवपण हुनी ज़ैसक बेटवो भोएते साथी रखे ते एंच़रे झोलो भी ते ज़ैसक तलवार न भोए तै अपन लिग़ड़ां बेच़तां भी तलवार घिंन्ने। ³⁷ किजोकी आंव तुसन सैहीं ज़ोतां की इही गल्ले ज़ै लिखी जेवरिएकी तै बदकरन मां शुमार कियो जेव तैसेरू मेरे हक्के मां पुरु भोंनु ज़रुरी थु: ऐलहेरेलेइ मेरे बारे मां लिखोरी गल्लां पुरी भोंने बैलिन। ³⁸ तैनेइं ज़ोंव:हे प्रभु परमेशर हेर ईड़ी दुई तलवारन तैनी तैन सैहीं ज़ोवं बैड़ीन।

ज़ैतूनेरे पहाड़े पुड़ यीशु एरी प्रार्थना

( मत्ती 26 : 36 - 46 ; मरकुस 14 : 32 - 42 )

³⁹ फिरी तै बेइर निसो ते ज़ैंच़रे तैसेरो दस्तुर थु: तै ज़ैतुन पहाड़े पुड़ जो च़लो जेव ते तैसेरे चेले भी तैस सैहीं साथी तैरां च़ले जे। ⁴⁰ तैस ठैरी पुज़तां तैनी तैन सैहीं ज़ोवं प्रार्थन केरा ताके तुस अज़मैइशी मां न रहथ। ⁴¹ ते यीशुए तैन कैरां थोड़े ज़ैरे आग्र जेते ज़ैधंन पुड़ खेड़ोइतां प्रार्थन केरने लगे। ⁴² हे बाजी अगर तेरी मरज़ी भोएत ईही कटोरो मीं कैरां दुर केर पण फिरी भी मेरी मर्ज़ी पुरी न भोए बलके तेरी मर्ज़ी पुरी भोए। ⁴³ तैखन तैनी अंब्रेरां अक सुवर्गदूत लाहूज़ै तैस शक्ती देतो थियो| ⁴⁴ ते निरकेबली जगाई परेशान भोइतां होरी जादे दिले सैहीं प्रार्थन केरने लगोते तैसेरो (परसो) पासिंनो बुझ़ा की खुनेरे बडे बडे त्तैपु तल्ले झ़ड़ते थिये। ⁴⁵ प्रार्थन केरनेरे बाद यीशु अपने चेलन क वापस आव ते तैन गम्मेरे मारे झ़ूलोरे मैल्हे। ⁴⁶ यिशुए तैन सैहीं ज़ोवं तुस किजो झ़ूलोरेथ उठा ते प्रार्थन केरातके अज़मैइशी मां न रहथ|

यीशु धोखे सैहीं ट्लावानो

( मत्ती 26 : 47 - 56 ; मरकुस 14 : 43 - 50 ; यूहन्ना 18 : 3 - 12 )

⁴⁷ हेजु यीशु ऐह गल्ल ज़ोंने लोरो थु: त मैन्हुं केरो अक जथो तैड़ी पुज़ो ते बहरन मैरां अक ज़ैसेरू नोवं युहूदा थु: तैन सैहीं अगरी अगरी थु: ते तै यीशु फूंमड़ी देने अगर अव। ⁴⁸ पण यीशुए तैस सैहीं ज़ोंव: युहूदा कुन तु एक्की फूंमड़ी सैहीं मीं ट्लुवातस? ⁴⁹ ज़ैखन यीशुएरे सैथेइं ऐह हिसाब कितब हेरो त तैनेइं ज़ोंव:हे प्रभु कुन अस तलवार च़लांम? ⁵⁰ ते तैन मैरां एक्कें नोकरें पुरैहुतेरे नोकरे पुड़ तलवारा चलाई ते तैसरो तैनी कन उड़ाव। ⁵¹ पण यीशु जुवाब दितो बस्सा बड़ु भोई जेवं ते यीशुए तैसेरो कंने तैखने हथ लेइतां बझ़ाव| ⁵² तैखन यिशुए पुरैहुत ते मन्द्रेरे सिपाहीते बुज़ुर्ग ज़ैन तैस गरिफ्तर केरने एवरे थिये तैन जो ज़ोवं तुस कुन तलवारां ते डंडे घिन्तां मीं डैकू बुझ़तां ट्लाने एवरेथ? ⁵³ ज़ैईस आंव तुसन सैहीं साथी मन्दिरे मां भोतो थु:त तुसैहीं मीं सैहीं हथ न लाव पण इही त तुशै अंधरेरे मोकेरो अख्तियारे।

पतरसेरू इन्कार

( मत्ती 26 : 57 , 58 , 69- 75 ; मरकुस 14 : 53 , 54 ,66 - 72; यूहन्ना 18 : 12 -18 , 25 - 27 )

⁵⁴ ज़ैखन तैनेइं यीशु ट्लावते तैस तैठ्ठां नैहितां पुरैहूतेरे घरे नियो पतरस भी पत्तपति बल्ले बल्ले तैरां जेव। ⁵⁵ तैनेइं अंगने मां अग बालोरी थीते सब बिशतां अग तपने लोरे थियेते पतरस भी तैन मां थु:। ⁵⁶ ते अक कौन्श अगी क बिशोरी तकने लोरी थी ते पतरसेरां तेकतां ज़ोंने लगी की ईही मैन्हुं भी तैस सैहीं साथी थु:। ⁵⁷ पण पतरसे इनकर केरतां ज़ोवं हे कौन्शे आंव ऐस न ज़ैनी ऐह कौने। ⁵⁸ थोड़ी सैइत्रां पत्ती होरें एक्कें पतरसेरां तेकतां ज़ोवं तु भी तैन्ना केरो साथीस पण पतरसे ज़ोंव:न आंव नैइं। ⁵⁹ कोई एक्की घेन्टेरे बाद केंचे होरे बड़े यकीने सैहीं ज़ोंव:ईही मैन्हुं पक्को तैस सैहीं साथी थु:किजोकी ऐह भी ग्लीलीए। ⁶⁰ पण पतरसे इनकर केरतां ज़ोवं आंव ऐस न ज़ैनी तु कुन ज़ोतां हेजु पतरस ऐह गल्ल ज़ोंने लोरो थु: त कुक्ड़े बांक दिती। ⁶¹ ते परमेशरे फिरतां पतरसेरे पासे तक्कुते पतरसे परमेशरेरी तै गल याद आई ज़ै तैनी पतरसे सैहीं ज़ेवरी थी की अज़ कुक्ड़ बांक देंने कैरां पैहिले तु मेरो ट्लाई बार इनकार केरेल्हो। ⁶² ते पतरस बेइर गैहितां ज़ोरे ज़ोरे लेरां देंने लगो।

यीशु एरू अपमान

( मत्ती 26 : 67 - 68; मरकुस 14 : 65 )

⁶³ ज़ैने मैन्हेंइ यीशु अपने कब्ज़े मां कियोरो थु: तैना तैसेरी हासी बनाते थिये ते कने तैस बहते थिये। ⁶⁴ तैना यीशुएरी एछ़न पुड़ पट्टी बेन्धतां बहते थिये ते पुछ़ते थिये ज़ो केंनी बाहोरिए? ⁶⁵ ते तैनेइं तैसेरे खिलाफ बेड़ी बुरी बुरी गल्लां भी ज़ोई।

महासभारे सामने यीशु

( मत्ती 26 : 59 - 66 ; मरकुस 14 : 55 - 64, यूहन्ना 18 : 19 - 24 )

⁶⁶ झ़ेझ़ां शासत्री ते सियांने लोक ते पुरैहुत ते धर्म गुरेइं यीशु एपनी अदालत आलिया मां एंनतां। ⁶⁷ ज़ोंने लगे अगर तु मसहीअस त ज़ोयीशुए तैन सैहीं ज़ोंव:अगर आंव तुसन ज़ोइं भी त तुस मेरु यकींन न केरेल्हे। ⁶⁸ ते अगर आंव तुसन पुछ़ीं त तुस जुवाबे न दैल्हे। ⁶⁹ पण अज़ैरां बाद मैन्हेरु मठ्ठु परमेशरेरे देहींने पासे बिशोरो लाहेले। ⁷⁰ ऐस गल्ली पुड़ तैना सभ ज़ोंने लगे तु परमेशरेरू मठ्ठुस? यीशुए जुवाब दितोतुस एपु मींजो ज़ोतथ की तुअस? ⁷¹ तैनेइं ज़ोंवहुनी असन होरी शाहादतां केरी कुन ज़रुरीए? किजोकी असैइं एसेरी ज़बान शुंनेरुए।

पिलातुसेरे सामने यीशु

( मत्ती 27 : 1 , 2 , 11-14 ; मरकुस 15 : 1 -5 ; यूहन्ना 18 : 28 -38 )

¹ तैखन तैना सभ तैठ्ठां उठे ते यीशुए पिलातुसे क घिंनतां जे। ² ते तैसजो एन ज़ोइतां एह अलज़ांम लांने लगेकी ऐह ईशे लोकन बगाड़ते ते कैसर बादशाहे जो धड़त येंनी मैलियो देंनेरे लेइ ठाकते ते अपने आपे जो मसही ज़ोते। ³ तैखन पिलातुसे यीशुए पुछ़ूतु युहूदी केरो बादशाहास? यीशु तैस जुवाब दितो तू ऐप्पू ज़ोतसता। ⁴ पिलातुसे पुरैहुत्न ते लोकन सैहीं ज़ोवं की आंव एस मैन्हुं मां कोई कुसुर न लैहीं। ⁵ पण तैना बड़े घमन्डे सैहीं ज़ोंने लगे एह युहूदियेरे गलिले मैरां देंतो इड़ी तग्र लोकन श्खाल्तो थु: ते भड़कतो थु:। ⁶ ज़ैखन पिलातुसे ऐन शुनु त तैनी पुछ़ूकुन ऐह मैनू गलिलेरोए? ⁷ ते ज़ैरो तैस पत्तो लगो की ऐह हिरोदेसेरी रियास्त्तरो रहंने बालोएत पिलातुसे तै हिरोदेसे कैझो भेज़ोकिजोकी तैईस तैभी युरोश्लांमे मां थु:।

हेरोदेसेरे सामने यीशु

⁸ ज़ैखन हिरोदेसे यीशु लाहु त बड़ो ख़ुशी भोवकिजोकी तैस च़रौकनी देंती यीशु हेरनेरी खुवाईश थी ते तैनी तैसेरे बारे मां बेड़ी गल्लां शुनोरी थीते तैस बड़ी उमीद थी की यीशुएरू कोई खास कम हेरीं। ⁹ तैनी यीशुए बड़ु किछ पुछ़ूपण यीशुए तैस कोई जुवाब न दितो। ¹⁰ पण धर्म गुरु ते पुरैहुत ते बड़े बड़े लोक बड़े ज़ोरे शोरे सैहीं यीशु पुड़ अलज़ांम लांने लगे। ¹¹ तैखन हिरोदेसे भी अपने सैथन सैहीं मीलतां यीशुएरी बेज़ती की ते तैसेरी हासी बनईफिरी तैस अक चमकतो कुर्तो लुवेइतां पिलातुसे कैझो वापस भेज़ो। ¹² तैस दिहैड़ी पिलातुस त हिरोदेसे एक्के केरे दौसत बेनी जे हालां की पैहीले तैन एक्केकी सैहीं दुशमनी थी।

पिलातुसेरे ज़िरीये यीशु मौतरी सज़ा

( मत्ती 27 : 15 - 26 ; मरकुस 15 : 6 - 15 ; यूहन्ना 18 : 39 - 19 : 16 )

¹³ तैखन पिलातुसे पुरैहुत ते हाकम ते होरे लोक अकौठ्ठे किये। ¹⁴ ते पिलातुसे तैन सैहीं ज़ोंवतुसैइं ऐह मैनू मींक एन ज़ोंतो आंन्होरोए की ऐह लोकन शखालतेते मिंम्हीं एसैरी पुछ़ गन की पण ज़ैस जुर्मेरो अल्ज़ाम तुस एस पुड़ लातथआंव ऐल्हेरो एस मां कोई कुसुर न लैहीं। ¹⁵ ते न हिरोदेसे ज़ैनी ऐह असन क भेज़ोरोएहेरा असन क एरू कोई सुबुत ब्रामत न भोवं ज़ैस सैहीं ऐह कतल कियो गाहे। ¹⁶ तैल्हेरेलेइ आंव ऐस कुट्टैइतां छ़ैडी देतां। ¹⁷ तैईस ज़रुरी थु: की मुर्ज़मन मैरां यीशु अक हथरां छ़डेथे। ¹⁸ तैना सारे लोक चिंडां लगे मारने की एस मैन्हुं सज़हा देथ ते ब्राबे इशे लेइ हथरां छ़ड्डा। ¹⁹ बराबो शहारे मां गड़बड़ी केरनेरे ते कत्तलेरे बारे मां पाबंद भोवरो थु:। ²⁰ पिलातुसे यीशु हथरां छ़डनेरे इरादे सेंही तैस दुबारू पुछ़ू। ²¹ पण तैना लोक मना चिंडां लगे मारनेकी तु एस स्लेब दे ऐस स्लेब दे? ²² तैखन पिलातुसे तैन ट्लेईयावं फैरे फिरी ज़ोंवकिजो अखर ऐनी कुन जुर्म कियोरोए? हेरा ऐसमां एरू कोई सुबुत ब्रामत न भोवंकी एह सज़हाए मौवतरो हक़दार भोएतेलहेरे लेइ आंव ऐस कुट्टैइतां छ़ैडी देतं। ²³ पण तैन चिंडां मैरी मैरी ज़ोंने लगेकी ऐह फैंसी पुड़ च़हड़ोरो लोड़तेते तैनकेरी चिंडां मारनेरी उमीद पुरी भुई। ²⁴ बस्सा पिलातुसे तैनकेरी दरखुवासरे मुतबक मौवतरी सज़हारो हुक्म दितो। ²⁵ ते ज़ै मैन्हुं हुकुम्तरे खलाफ ते खुनेरे जुर्मे मां कैद थु: ते ज़ैस हथरां छ़डनेरे लेइ तैनेइं दरखुवास कियोरी थीतै हथरां छ़डोपण यीशु तैनकेरी मेर्ज़ी सैहीं सिपेही केरे हवाले कियो।

यीशु क्रुसे पुड़ च़ाड़ो

( मत्ती 27 : 32 - 44 ; मरकुस 15 : 21 - 32 ; यूहन्ना 19 : 17 - 27 )

²⁶ ज़ैखन तैना यीशु नैहितां च़लोरे थियेत तैनेइं शौमुंन कुरेंनी ज़ै एकी ड्लोंवेरां एवरो थु: ट्लातो ते सलीब तैसका छ़ुंने जो दिती की तु इही सलिब छ़ुइतां यीशु पत्ती च़ला।

²⁷ ते बड़े लोक तैस पत्ती च़लोरे थिये ते किछ कौन्शां भी थी ज़ैना यीशुएरे लेइ शौग बनैती थी। ²⁸ यीशुए तैनकेरे पासे मुड़तां ज़ोंव:हे यरूशलेमेरी कुईयाव मेरे लेइ लेरां न देथ बल्के अपने मठ्ठां केरेलेइ लेरां देथ। ²⁹ किजोकी तैना दिहाड़े एजने बालेंन ज़ैखन तुसां ऐन ज़ौल्हे की मुबारकन तैना कौन्शां ज़ैना बैओवलाधन ज़ैनकेरे च़ुच़ेइं दूध नैइं पियेवरू। ³⁰ तैखन तैना पहाड़न सैहीं ज़ौल्ही असंन उंढे बिछ़ड़ा ते कुढन जो ज़ौल्ही की असंन अपने आंत्र छ़पाथ। ³¹ किजोकी ज़ैखन बुटो निलोए येंनी सब्ज़ हरो भरोए ते ऐन सभ किछ ऐस्सैहीं केरने लोरेंन ते ज़ैखन शुकैल्हो त तैना कुन न केरेल्हे।

³² दुई मुर्ज़म होरे भी थियेज़ैन यीशु सैहीं साथी च़लेवरे थिये ताके तैना भी कतल भोई गहंन। ³³ ज़ैखन तैना तैस ठैरी पुज़ेज़ैड़ी जो कलवरी ज़ोतन तैड़ी यीशुए सलेबी मौत दिती ते तैना दुई मुर्ज़मन भी एक्की यीशुएरे देहींने पासे ते होरी बांए पासे सलिबी पुड़ च़हड़े। ³⁴ यीशु ज़ोवं हे बाजी ऐन माफ़ कैरांऐन न ज़ांनण की असां कुन लोरेम केरने ते तैनेइं तैसेरे लिगड़ां कैरू शर्त रेखतां एपुम्महेइं बंटा। ³⁵ लोक खड़खड़े ऐन सभ किछ हेरने लोरे थिये ते पुरैहुत ज़ोरे ज़ोरे हक्कं देते थिये ते ज़ोते थिये एनी होरे त बच़ाए ते अगर एह मसहीए ते परमेशरेरो ट्लारोए त अपने आपे की न बच़ाऐ। ³⁶ सिपाही भी तैसका एइतां तैसेरी हासी बनाने लगे ते शराब पियांनेरे लेइ तैस कैझो गिलास देने लगे। ³⁷ ते ज़ोते थिये तु अगर युहूदी केरो बादशाहस त तु अपनो आप त बच़ा। ³⁸ ते तैस सलेबी पुड़येंनी यीशुएरे दौगे कैरां बहा अक पखड़ी लिखतां लेवरी थी ते तैस पुड़ ऐन लिखेरू थु:की एह युहूदी केरो बादशाहऐ।

मन फिराने बालो कुकर्मी

³⁹ तैन दोई डेकू ज़ैना मारे जेतैन मैरां एक्कें यीशु जो ज़ोंवअगर तु मसहीअस त एपु भी बंच़ ते असंन भी बच़ा। ⁴⁰ पण होरें दुइयावं डैकें तैस जो शुरे च़ारे ज़ोंव:तीं परमेशरेरो भी डर नैइं हालांकी तैस भी तै सज़ाह मैल्लने लोरीए? ⁴¹ असन त अपने जुर्मेरी सज़ाह मैल्लोरीए ते ईशो त कतल केरनो ठीकेपण ऐनी त कोई गलत कम्म नैइं कियेरू। ⁴² तैखन तैनी ज़ोंव:हे यीशु ज़ैखन तु बादशाह बेनतां एजेल्हो त मींम्हीं याद कैरां। ⁴³ यीशुए तैस्जो ज़ोंवआंव तीं यकींने सैहीं ज़ोतां की तु अज़्ज़ै मींसैहीं साथी सुर्गे मां भोल्हो।

यीशु एरे प्राण देने

( मत्ती 27 : 45 - 56 ; मरकुस 15 : 33 -41; यूहन्ना 19 : 28 - 30 )

⁴⁴ दिसेरे दुपाहर थियेते च़ौवरे पासन आंधारू भोई जेवं ते ट्लेई बज़न तग्र आंधारू राहूं। ⁴⁵ दिहाड़ो भी कलो भोवते मन्दिरेरो पड़दो फैटतां दुई टुकड़े भुए। ⁴⁶ ते यीशुए बड़े ज़ोरे सैहीं ज़ोंव:हे बाजी आंव अपनी आत्मां तेरे हथे मां सोंफतां ते एन ज़ोइतां यीशुए प्राण दिते। ⁴⁷ ज़ैखन रूमीं कपतांने ऐह तमाशो हेरोत परमेशरेरी तारिफ केरते ज़ोंव:एह मैन्हुं सच़्च़ै धर्मी थु:। ⁴⁸ ते सारे लोक ज़ैना तैड़ी थिये ऐह अनरथ हेरतां छाती पिटते च़ले जे। ⁴⁹ पण यीशुएरे सारे ज़ेंनु पशेंनु थिये ते तैना कौन्शां ज़ैना गलिले मैरां यीशुए पत्पती ऐवरी थीदूर ज़ैरे खेड़ोहीतां एन सभ किछ हेरी रेहोरी थी।

यीशु दबनो

( मत्ती 27 : 57 - 61 ; मरकुस 15 : 42 - 47 ; यूहन्ना 19 : 38 - 42 )

⁵⁰ अक मैन्हुं थु: ज़ैसरू नोवं युस्फ़ थु: तै युहूदी केरी अदाल्तरो अक मुलाज़म भी थु: ते अक बड़ो नेक नीति ते धर्मी मैन्हुं थु:। ⁵¹ तै अदालत आलियारे आफ्सरां केरे फैस्लेरे हक्के मां न थु:? तै युहूदी केरे शहार अरमतियरो रहंने बालो थु: ते परमेशरेरी बादशैहीयरी तलाशी मां थु:। ⁵² तैनी पिलातुसे क गैहितां यीशुएरी लाश मगी। ⁵³ ते लाश सलिबी पुड़हेरां ओसैल्तां साफ कपड़े मां पलैटता ते एकी कूढी मां रखी ज़ै एकी शफ़ड़ी मां बनेवरी थीतैस कूढी मां पैहीले कोई लाश न थी। ⁵⁴ तै बेडी दिहैड़ारी तीयेरारी दिहाड़ी थी येंनी सब्तेरी दिहाड़ी शुरू भोंने बाली थी। ⁵⁵ ते तैना दुई कौन्शां ज़ैना गलिले मैरां यीशुए पत्पती ऐवरी थी? युसफे पत्पती जेई ते तैनेइं तै कूढ हेरीकी यीशुएरी लाश एस्मां केंच़रे सैहीं राखोरीए। ⁵⁶ तैखन तैना घरे जेई ते मुश्की मुसले ते अतर तेल तियार कियो ते सब्तेरी दिहेड़ी आराम कियो।।

यीशु एरू ज़ींतू भोंनू

( मत्ती 28 : 1 -10 ; मरकुस 16 : 1 -8 ; यूहन्ना 20 : 1 -10 )

¹ हफ्तेरी पेहीली दिहेड़ी झ़ेझां किछ कौन्शां मुशकि मूसाले नैहितां जेई ज़ै तैनेइं तियार कियोरो थु: ऐनतां कूढी क पुज़ी। ² पण तैनेइं तै घोड़ कूढरे गत्तै पुड़ैरां बिछ़ड़ोरो लाहु। ³ ज़ैखन तैना अंतर जेई त तैन यीशुएरी लाश न मैल्ली। ⁴ तैखन तैना एन हेरतां परेशांन भुई त दुई मैन्हुं ज़ैन छ़ीतां लिगड़ां ल्गोरां थियां तैन कौन्शन क एइतां खेड़ोए। ⁵ तैना कौन्शां डेरी जेई ते तैना तल्ले मां ठैल्लां लेगी देंने पण तैन मैन्हेंइ तैन जो ज़ोंव:तुस ज़िंते मुड़दन मां किजो लोरीथ तोपने। ⁶ तै इड़ी नैइं बल्के ज़िंतो भेवरोए तुसन याद नैइं की ज़ैइस तै गलिले मां थु: त तैनी तुसन ज़ेवरू थु:। ⁷ की मैन्हेरु मठ्ठु पैपी केरे हथे देनोएं ते स्लेबी पुड़ च़हड़नोएं ते फिरी ट्लेईयवं दिहाड़े फिरी ज़िंतो भोंनो ज़ुरूरीए। ⁸ तैखन तैन यीशुएरी गल्लां याद एई। ⁹ त्तली तैन कूढी कैरां च़ेली जेई ते यीशुएरे यारहे चेलन ते बाकी होरी चेलन भी ऐस गल्लरो पतो दितो। ¹⁰ मरियम मगदलिनी लेवांना ते याकुबेरी अम्मां मरियम ते तैस सैहीं साथी होरी भी कही कौन्शां थी ज़ैनेइं चेलन ऐन गल्लां केरो पतो दितो। ¹¹ पण तैनेइं तैनकेरू यकींन न कियुंकिजो की तैनकेरी गल्लां तैन अजीब लैगी। ¹² पण पतरस उठो ते तै कूढरे पासे दौवड़तो तैस कूढी क जेव ते तैड़ी तैनी लिक्तां अन्तर तक्कुते सिर्फ कफ़न तैड़ी लाहूं ते एस गल्ली पुड़ हेरांन भोइतां तैठ्ठां च़लो जेव।

इम्माऊसेरे बत्तां चेलन सैहीं

( मरकुस 16 : 12 , 13 )

¹³ फिरी ऐरू भोंव की तैन मैरां दुई चेले तैस दिहैड़ी एकी ड्लोंवेरे पासे च़लोरे थिये तैस ड्लोंवेरु नोवं अमावस थु: तैन यरूशलमेरां सत्त मिल दुर थु:। ¹⁴ तैन एपु म्महेइं एस्से बारे मां गल्लां केरते च़लोरे थिये ज़ै बितना बितोरी थी। ¹⁵ ज़ैखन तैना गल्लन मां मस्त थिये ते एपु म्महेइं बेंस लोरे थिये केरने त यीशु एपु तैन क नेड़े एइतां तैन सैहीं साथी साथी च़लने लगो। ¹⁶ पण तैनेइं यीशु न पशांनो किजोकी तैनकेरी एछ़न पुड़ पड़दो पेवरो थु:। ¹⁷ यीशुए तैन जो ज़ोंव:तुस लोक एपु म्महेइं कुन गल्लां केरते च़लोरेथ? तैना च़ुप राहे ते तैना बड़े मायुस ज़ैरे लैहीयोंने लोरे थिये। ¹⁸ तैखन तै ज़ैसेरु नोवं कल्पास थु: तैस सैहीं ज़ोंने लगोयरूशलमे मां सिर्फ अक तु अजीब मैन्हुंस की ज़ै तु एन भी न ज़ांनस की शाहरे मां कुन कुन भोंने लोरुए। ¹⁹ यीशुए तैन पुछ़ू कुन लोरुए भोंने? तैनेइं तैस सैहीं ज़ोंव:यीशु नासरी ते तैसेरी वारदाते तै मैन्हुं ज़ै अपने कम्मे ते बचनेरे ज़ीरये परमेशरेरी नज़री मां ते सैरी लोकां केरे लेइ अक बेड़ी कुदरुती बालो नबी थु:। ²⁰ तै इशे पुरैहुतेइं ते हाक्मेइं तै कैंच़रे सैहीं रुंमी गुवरनर्रे हवाले कियो ते तैस जो क्तलेरो हुक्म देइतां तैस सलीब दिती। ²¹ पण असन त उमीद थी की ऐहे मैन्हुंए ज़ै इस्रेएलन छुटकरो दैल्हो ते एसेरे अलावा ऐन गल्लां बितोरे अज़ ट्लेइयवं दिहाड़ीए। ²² ते साथी ईशे मैहेलेरी किछ कौन्शां झ़ैझां कूढी क जेवरी थी तैनकेरे ज़ोंने सैहीं असां हेरांन भुए। ²³ ज़ैखन तैन लाश न मैल्ली त तैना ऐन ज़ोंती एई असैइं सुवर्गदूत लाहेते तैनेइं ज़ोंव: की ते ज़िंतो भोवरोए। ²⁴ तैखन किछ ईशे साथी भी कूढी क जे ते ज़ैंच़रे कौन्शैइं ज़ेवरु थु: तैरू लाहूं पण यीशु न लाहु। ²⁵ तैनी तैन सैहीं ज़ोंव:तुस कैत्रे सादेथ ते नेबी केरी ज़ोवरी गल्लां मन्ने मां कैत्रे क्मज़ोरथ। ²⁶ कुन मसहीएरे लेइ ज़रुरी न थु: की दुःख झ़ैल्ले ते फिरी एपनी मेंमाही मां दाखल भोए? ²⁷ ते तैनी मुसे कैरां देंते ते सैरी नेबी केरी गल्लां ज़ैन तैसेरे बारे मां बचनेरी कितबी मां दरज थी तैन समझ़ैई।

²⁸ एत्रे मां तैन तैस ड्लोंवे नेड़े पुज़े ज़ैड़ी तैनेइं गहंनु थु: तैनेइं यीशुएरे च़लने सैहीं बुझ़ू की ऐनी अग्रोहुं गहंनुएं। ²⁹ पण तैनेइं ऐन ज़ोइतां मजबुर कियो की असन क बिशकिजोकी दिहाड़ी डुबोरीए आंधारू भोंने बालुए? बस्सा तै बिशनेरे लेइ तैन सैहीं साथी अंत्र च़लो जेव। ³⁰ ज़ैखन तै तैन सैहीं साथी रौट्टी खांने बिशो त तैनी रौट्टी ट्लाती ते शुक्र केरतां ट्लोड़ी ते तैन देंने लगो। ³¹ तैखन तैनकेरी एछ़ी खुल्ली ते तैनेइं तै पशांनो पण तै तैन कैरां आलोप भोई जेव। ³² तैना एपु मांमेईं ज़ोंने लगे ज़ैखन तै बत्तां असन सैहीं साथी गल्लां लोरो थु: केरने त असन पाक बचनेरी गल्लां समझ़ातो थु:ते असां कैरहे ख़ुशी सैहीं मस्त थिये। ³³ तैना तैखने तैठ्ठां उठे ते यरूशलमें मां आए ज़ैड़ी तैन याहरे चेले ते होरे तैन केरे साथी एकी ठैरी मैल्हे। ³⁴ तैना ज़ोंने लोरे थिये की परमेशर सच़्च़ै ज़िंतो भोवरोए ते शुमौने लाहोरोए। ³⁵ तैनेइं दूईयेइं बत्तरी सैरी गल्लां शुनेई ते फिरी कैंच़रे असैइं यीशु रौट्टी ट्लोड़ते बार पशांनो।

यीशु चेलन लेइहोनो

( मत्ती 28 : 16 - 20 ; मरकुस 16 : 14 - 18 ; यूहन्ना 20 : 19 - 23 ; प्रेरत 1 : 6 - 8 )

³⁶ तैना गल्लां केरने लोरे थिये त यीशु तैन मुझ़ाटे एइतां खड़ो भोव ते तैन जो ज़ोंव:तुसन शांती मैल्हे। ³⁷ पण तैना एतरे डेरी जे की तैना समझ़ने लगे की असां किसेरी आत्मां लहंने लोरेम। ³⁸ यीशुए तैन सैहीं ज़ोंव:तुस किजो डरोरेथ ते तुशे दिले मां शक किजो पैइदा भेवरोए। ³⁹ मेरे हथ पाव हेरा आंव तैहीं मीं हथ लेइतां हेरा किजोकी आत्मांइ हडी मास न भोएज़ैरू तुस मीं मां लहतथ।

⁴⁰ ऐन ज़ोंनेरे पत्ती तैनी अपने हथ पाव हेराए। ⁴¹ पण ख़ुशी सैहीं ते परेशेंनी सैहीं तैन यकींन न थु: एइतु पण यीशुए तैन सैहीं ज़ोंव:इड़ी तुसन क खाने जो किछ आहे? ⁴² तैनेइं तैस ट्लाड़ोरी ममैछ़लरी अक कतली दिती। ⁴³ तैनी ट्लाती ते तैनकेरे सामने खाई। ⁴⁴ तैनी तैन सैहीं ज़ोंवज़ैखन आंव तुसन सैहीं साथी थु:त मीं तुसन ऐन गल्लां ज़ोवरी थीकी मुसैरे शासत्रे मां ते नेबी केरी किताबन मां ते ज़बुरे मां मेरे बारे मां ज़ैन किछ लिखेरुएतैसेरू पुरु भोंनु ज़रुरीए।

⁴⁵ तैखन तैनी तैनकेरी अकल खोल्ली ताके पवित्र वचन सैमझ़ी सखन। ⁴⁶ ते तैन सैहीं ज़ोंवऐन लिखेरुए की मसही दुःख उठालो ते ट्लेइयावं दिहाड़े मुड़दन मैरां ज़िंतो भोल्हो। ⁴⁷ ते तैसेरे नोवें सैहीं यरूशलमेरां लेइतां शुरू केरतां सैरी कौमन मां तोबा ते पापां केरी मैफरी मनदी की गाहेली। ⁴⁸ किजोकी तुस ऐन गल्लां केरे शहातथ। ⁴⁹ मेरे बाजी ज़ैलहेरो वेहिदो कियोरोएआंव तै तुसन पुड़ ऊतैरेल्हो पण ज़ां तग्र अम्ब्रेरां पाबित्र आतमारु ते शैक्तरू लिगड़ न मैल्हे तैस्से शहरे मां रेहियथ।

यीशु एरू सुवर्ग ए जो गहनू

( मरकुस 16 : 19 - 20 ; प्रेरत 1: 9 - 11 )

⁵⁰ फिरी यीशुए तैन बेतनियां तग्र बेइर नियेते अपनो हथ खड़ो केरतां तैन बरकत दिती। ⁵¹ ज़ैखन तै तैन बरकत देंने लोरो थु:त तैन कैरां आलग भोई जेव ते आम्ब्रे मेंझो च़लो जेव। ⁵² चेलेइं तैस्जो मथो टेको ते फिरी ख़ुशी सैहीं यरूशलमें जो वापस च़ले जे। ⁵³ ते तैन हर बखत मन्दिरे मां एइतां परमेशरेरी तारिफ केरते थिये।।