यूहन्ना

JOHN

यूहन्ना

वचन जिसमे मां आव

¹ सैभन कैरां पैहीलो वचना थु, ते वचन परमेशरे सैहीं साथी थु, ते वचने परमेशर थु। ² ते वचने सैभन कैरां पैहीलो परमेशरे सैहीं साथी थु। ³ सब किछ तैस्सेसैहीं पैईदा भोवं, ते ज़ैन किछ पैईदा भोवं ऐस मैरां कोई भी चीज़ तैसेरे बगैर पैईदा ना भोई। ⁴ तैस मां ज़िंदगी थी, ते तै ज़िंदगी मैन्हुं केरी लो थी। ⁵ लो आंधरे मां चमकचे, ते आंधरे तै कधै भी मन्ज़ूर ना की।

⁶ परमेशरेरे अक मैन्हुं भेज़ो जेव, ज़ैसेरु नोवं युहन्ना थुं। ⁷ ते तै एलहेरलेई एवरो थु की लोअरी शहादत दे, ताके सब लोक तैसेरे ज़िरीये सैहीं विश्वास केरन। ⁸ तै एपू लो ना थी, पर लोअरी गुवाही देंने एवरो थुI

⁹ सच़ी लो ज़ै हर एक्की मैन्हुं लो देचे, दुनियाई मां एजने बाली थी। ¹⁰ तै संसारे मां थु, ते तै संसारे ना पशांनो हालां की संसार तैस्से सैहीं पैईदा भोवं। ¹¹ तै अपने लोकन मां अव, ते तैसेरे अपनेइं तै कबूल ना कियो। ¹² पण ज़ैत्रेइं तै कबूल कियो, तैनी तैना परमेशरेरी अवलाद भोंनेरु हक दितु येंनी तैना ज़ैनां तैसेरे नोवें पुड़ विश्वास केरतन। ¹³ तै ना लैव्हे सैहीं, ना ज़िसमेरी मेर्ज़ी सैहीं, ना मैन्हुं केरे मेर्ज़ी सैहीं ब्लके परमेशरेरी मेर्ज़ी सैहीं पैईदा भोवरोए।

¹⁴ ते तै वचन जिसमे मां अव; ते इशै दरमियाने मां राहु, ते असेइं तैसेरी एरी माहिमा हेरी, ज़ैंच़रे बौवेरे अकैल्हे मठ्ठैरी माहिमा हेरी, ज़ै फज़ले ता सच़ैई सैहीं भैरतां थु | ¹⁵ यहुन्ने तैसेरे बारे मां गूवाही दिती, ते ज़ोरे ज़ोरे सैहीं जोंव, ईही तैहे, ज़ैसेरे बारे मां मीं ज़ोवरू थुं, की ज़ै मेरां पत्ती एजी राहोरोए, तै मीं कैरां बड्डोए कीजो की तै मीं कैरां पैहीलो थु। ¹⁶ तै तैमां बड़ी दियाए ते असंन तैसेरी दियाई सैहीं बड़ी ब्रकत मैल्ही, येंनी ब्रकती पुड़ ब्रकत। ¹⁷ किजोकी शेरित ता मूसैरे ज़िरये सेहिं मैल्होरी थी, पण ब्रकत ता सच़ैईयरु दान यीशुएरे ज़िरये सैहीं मैल्हु। ¹⁸ परमेशरे कधै केंचे नेहीं लाहोरो, अके मठ्ठू" ज़ैन बौवेरे कुम्मे मांहैं तैनी तै हेराव।

यूहन्ना बपतिस्मो देने बालेरी गुवाही

( मत्ती 3 : 1 - 12 ; मरकुस 1 : 1 - 8 ; लूका 3 : 1 - 8 )

¹⁹ युरोशलम शहरेरे युहुदी बुज़ुर्गेइं किछ परैहुत ते लावी युहन्ना का भेज़े, की तैस पुछ़न की तु कौवंनस। ²⁰ तैनी रोड़े च़ारे ज़ोंव, की आंव मसही नेहीं। ²¹ त्ताली तैनेइं तैस पुछ़ु, तु कौवंनस? कुन तु एलियास? युहन्ने तैन जुवाब दितो आंव नेहीं, ते फिरी पुछ़ू, कुन तु तै नबिस? तैनी जुवाब दितो नेहीं। ²² तैनेइं फिरी तैस पुछ़ू, फिरी तु कौवंनस? ताके असां अपने भेज़ने बालन जुवाब देम, तु अपने बारे मां कुन ज़ोतस? ²³ तैनी जोंव, ज़ैंच़रे यशाया नेबें जोवरूए, आंव जंगले मां हक देंने बालेरी आवाज़ाइं कि तुसां परमेशरेरी बत तयार केरा।

²⁴ तैखन तैना फ्रिसी ज़ैना युहान्ने का भेजोरे थिये। ²⁵ तैनेइं तैस सुवाल पुछ़ो, अगर तु नाू मसहीअस, ना एलीयास ते ना नबी, तै फिरी बपतिस्मो कीजो देतस? ²⁶ यूहन्ने जुवाब दितो, आंव ता पैनी सैहीं बपतीस्मो देतां, पण तुसंन मां अक एरहो मैन्हुंए ज़ैस तुस ना ज़ांनथ। ²⁷ मतलब मेरां पत्ती एजने बालोए, ज़ैसेरे आंव बूटां केरो तसमे खोलनेरे काबल नेहीं। ²⁸ ऐनां गल्लाँ यरदनेरां पार बैतनियां मां भोई, ज़ैड़ी यहुन्ना बपतिस्मो देतो थु।

परमेशरेरू गबड़ू

²⁹ दुईयवं दीहाड़े तैनी यीशु अपने पासे एंइतो लाहु तै जोंव, तक्का परमेशरेरू गबड़ू ज़ैन सैरी सन्सारेरे पाप नैते। ³⁰ ईही तैहे, ज़ैसेरे बारे मां मीं ज़ोवरू थुं, कि अक मैन्हुं मीं पत्ती एजने बालोए, तै मीं कैरां बड्डोए, किजो की तै मीं कैरां पैहीलो थु। ³¹ आंव ता तैस एपु भी पशानतो ना थु, आंव ता पैनी सैहीं बपतीसमो देंतो अव, कि तै मैन्हुं इस्राएले मां बांदो भोए। ³² ते यहुन्ने ऐह गवाही दिती, मीं आत्मा कबूतरेरे शकली मां आसमानेरां एंइती लाही, ते तै तैस पुड़ बिशी। ³³ आंव ता तैस पशानतो ना थु, पर ज़ैनी आंव पैनी सैहीं बपतीसमो देंने भेज़ो, तैनी मीं सैहीं जोंव, ज़ैस पुड़ तु आत्मा एंइती ते बिश्ती लाहेलो, तैहे पवित्र आत्माइं सैहीं बपतीसमो देने बालोए। ³⁴ तै मीं लाहु तै गुवाही दिती, कि इन परमेशरेरु मठ्ठूए।

यूशु एरे पेहिले चेले

³⁵ दुईयावं दीहाड़े फिरी युहन्ना ते तैसेरे चेलन मैरां दुय्य ज़ने खड़े भोवरे थीये, ³⁶ ते तैनी यीशु तेकतां ज़ै च़ल्लोरो थु जोंव, तक्का इन परमेश्वरेरू गबड़ूए। ³⁷ त्ताली तैना दुय्य चेले एन शुन्तां यीशुए पत्ती च़ले। ³⁸ यीशुए बेदलोइतां तैना एईते लाए ते तैना ज़ोंव, तुस कैस लगोरेथ तोपने? तैनेइं ज़ोंव, ओ रब्बी (मतलब ओ गुरू)तु कोड़ी रहतस? ³⁹ तैनी तैना ज़ोवं च़ला तुस एपू हेरेले, त्ताली तैनेइं गैहीतां तैसेरे रहंनेरी ठार हेरी, ते तैस दिहाड़े तैना तैस साथी राहे एह ड्लोवझ़रे च़ोवरे बज़ां केरो मोको थु।

⁴⁰ तैन दुई चेलन मैरां ज़ैना युहन्नेरी गल शुनतां यीशु पती च़लोरे थिये, अक अंद्रियास थु ज़ै शुमौन पतरसेरो ढ्ला थु। ⁴¹ अंद्रियासे पैहिलु एन कम कियुं की अपने ढ्लाए शमौने तोप्तां तैस सैहीं ज़ोंव की असंन मसही मैल्होरोए, ज़ैसेरो मतलब युनैनी मां खरसतुसे"। ⁴² तैखन तै तैससैहीं साथी यीशु का अव, यीशुए तैसेरे पासे तकु ते ज़ोंव, तु युहन्नेरु मठ्ठु शुमौनस अज़ैरे बाद तेरु नोंव कैइफा येंनी पतरस भोल्हु।

फिलिप्पुस ते नतनएल कुजानो

⁴³ होरसां यीशुए गलिले मं गहंनेरी तियारि की, तैनी फिलपुस लैहितां तैसजो ज़ोंव, मी सैहीं साथी च़ल। ⁴⁴ फिलपुस ते अंद्रियास ते पतरस बैतसैईदा शहरे मां रहते थिये। ⁴⁵ फिलपुस नातनऐहेले सैहीं मिलो ता ज़ोंने लगो, की ज़ैस मैनेरे बारे मां मूसै तुवारिती मां ते नेबेइं एपनी किताबी मां ज़ोवरुए की तै असंन मैल्होरोए, तैन युसफैरु मठ्ठु यीशु नासरीए | ⁴⁶ नातनएहेले यीशुए पुछ़ु, कुन नासरते मैरां भी ओई रोड़ी चिज़ निसी सखचे? फिलपुसे ज़ोंव, गैहीतां एपु हेर। ⁴⁷ ज़ैखन यीशुए नातनऐहेल अपने पासे ऐइंतो लाहु ता तैनी तैसेरे बारे मांएन ज़ोंव, ईही असली ऐस्राएली एसमां कोई शक नेहीं। ⁴⁸ नातनैहेले यीशुए पुछ़ु, तु मी केंच़रे ज़ांनतस? यीशुए तैस जुवाब दितो, फिलपुसेरे कुजांने कैरां पैहिले ज़ैखन तु अंजिरेरे येंनी फैगेरे बुटे हैठ थु मीतु तैड़ी लाहोरो थु। ⁴⁹ नातनऐहेले ज़ोंव, रबी" तु परमेशरेरु मठ्ठुस, तु ईस्राएलेरो बादशहास। ⁵⁰ यीशुए तैस जुवाब दितो, मीं तीं सैहीं ज़ोंव की मीं तु फ़ैगेरे बूटे हैठ लाहोरो थु, कुन तीं तांए विश्वास कियोरो थु? तु इठां भी बेडी बेडी गल्लाँ लाहेलो। ⁵¹ फिरी तैनी ज़ोंवं, आंव तुसन सैहीं सच़ सच़ ज़ोतांइ कि तुस सुवर्ग खुल्लू तै परमेशरेरे सुवर्गदूतन उबरे गहंते ते अबने आदमें पुड़ उत्रते लाहेलो।

गलीलेरे काना मां पेहिलो चमतकार

¹ फीरी ट्लेइंयोवं दिहाड़े कानाएं गलिले मां केंचेरो ड्लाह थु, ते यीशुएरी अम्मां भी तैड़ी थी। ² यीशु ते तैसेरे चेलन भी धाम कियोरी थी। ³ ज़्ताल्ही दाछ़ारो रस मुको त यीशुएरी अम्मां लगी ज़ोंने, एन का दाछ़ारु श्रबत मुक्कैरुए। ⁴ यीशु लगो ज़ोंने, ओ कौन्शै असंन कुने? हेजु मेरो मौको नेहीं एवरो। ⁵ तैसेरी आम्मां सेवकन सैहीं ज़ोंव, जैन किछ एह तुसन सैहीं ज़ोए तैन्ने केरथ। ⁶ तैड़ी नेड़े घौड़ां केरे शा घड़े रखोरे थिये, ज़ैना युहुदी केरी रसम पुरी केरनेरे कम्मे एंइते थिये एन घड़न मां अक सौ बी लिटरन कैरां लेइतां अक शौ पंजही लिटरन तग्र पानी लगतु थुं। ⁷ यीशुए अपने चेलन सैहीं ज़ोंवं, घड़न मां पानी भरा, तैनेइं पुरे घड़े भरे। ⁸ त्ताली यीशुए तैन ज़ोंवं, गाथ धांमारे प्रधाने हेराथ, तैनेइं तैस का श्रबत निहुं। ⁹ ज़्ताल्ही धांमारे प्रधाने तैंन पानी पियुं, ज़ैंन दाछ़ारो रस बनोरू थुं, तै ना थु ज़ांनतो कि एन कोठां एवरुए पण सेवक जांनते थिये, ज़ैनेइं तैन कैढतां आंन्हेरु थुं, एलहेरलेइ धांमारे प्रधांने लड़ो कुजाव। ¹⁰ हर कोई मैंनू पैहीलो रोड़ो दाछ़ारो रस देते, तै बुरो ज़ैरो पत्ती, जो रखते पर तीं रोड़ी हेजू पत्रोंहुं रखोरीए। ¹¹ यीशुएरो एह पैहीलो चमत्कार थु, ज़ै तैनी कानाएं गलिले मां हेरेवरो थु, ते तैसेरे चेलेइं तैस पुड़ विश्वास कियो।

¹² ऐसेरां पत्ती तै ता तैरेरी अम्मां ते तैसेरे ढ्ला ते तैसेरे चेले कुफ्रनहुंमें मां जे ते किछ दिहाड़े तैड़ी राहे।

मन्देरे मैरां बुपारी कढने

( मत्ती 21 : 12 -13 ; मरकुस 11 : 15 - 17 ; लूका 19 : 45 - 46 )

¹³ ज़ैईस युहुदी केरी बड्डी दिहाड़ी नेड़े अई ता यीशु युरोशलमें जो च़लो जेव। ¹⁴ तैनी तैड़ी प्राथना भावने मां गोरु गब्बां ते कुबुतर बेच़ने बाले लाहे, ते सुंनार भी ज़ैना तैड़ी बिशोरे थिये। ¹⁵ यीशुए तैन एरहु डांग मारु की ज़ैतरे भी हुड़ दांत समेत बेच़ने बाले बेरोहुं खदाड़े, ते सुंनारां केरे मौती छैकतां छ़ड्डे ते तैनकेरी बिशनेरी ठारां पुटी छ़ैडी। ¹⁶ ते कुबुतर बेच़ने बालन जो ज़ोंव, ईना ईठां घिंनी गाथ, मेरे बाजेरु घर तुसेइं बपारेरी मन्डी बनेवरीए। ¹⁷ तैसेरे चेलन याद आंव की पाबित्र शासत्रे मां लिखेरुए की तेरे घरेरी शौर मीं खेईगह्ली।

¹⁸ युहुदी तैसैहीं ज़ोने लगे की तु कोई चमतकार केरतां हेरेई सखतस की तीं ऐन केरनेरु हक्के? ¹⁹ यीशुए तैन जुवाब दितो, ऐस घरे डोला, ते आंव ऐस ट्लेई दिहैड़न मां खड़े केरेल्हो। ²⁰ युहुदेइं जुवाब दितो, इन भवन बन्ने मां च़ैल्ही साल लगोरेन, कुन तु ऐस ट्लेई दिहैड़न मां बनेई सखतस? ²¹ पण यीशुऐ ज़ैस भवनेरी गल कियोरी थी, तै तैसेरी अपनी जान थी | ²² एलहेरलेई ज़ैखन तै मुड़दन मैरां ज़िंतो भोव तैखन तैसेरे चेलन याद आंव की तैनी ईही गल ज़ोवरी थी ते तैन पाबित्र शासत्रे पुड़ ते यीशु मसहीएरी ज़ोवरी गल्लन पुड़ पुरु यकींन आंव।

यीशु मैंन्हू केरे मने ज़ानते

²³ ज़ैखन तै ईद फस्हीएरे मोके युरोशलमे मां थु ता बड़े लोकेइं तैसेरे चमतकार लैहितां तैस पुड़ विशवास कमाव। ²⁴ पण यीशु तैन पुड़ अतबार ना थु, एलहेरलेई तै सैभी केरो हाल ज़ांनतो थु | ²⁵ तैस ऐह ज़रुरत ना थी, की कोई मैन्हुं तैसकेंची होरी मैनेरे बारे मां ज़ोए किजोकी तै मैन्हुं केरे दिलेरो हाल ज़ांनतो थु।

यीशु ते नीकूदेमुस

¹ फ्रिसन मां अक मैन्हुं थु तैसेरु नोवं नेकोदेंमस थुं तै युहुदी केरी अदालतरो अक मुलाज़म थु। ² एकी राती तै यीशु का ऐइतां ज़ोंने लगो, रबी" अस ज़ांनतम की तु परमेशरे तु गुरु नबेइतां भेज़ोरोस किजोकी ज़ैना चमतकार तु हेरातस, होरो कोई ना हेरेई बटे, ज़ां तगर परमेशर तैस्सेहीं साथी ना भोऐ। ³ यीशुए जुवाब दितो आंव तुसंन सैहीं सच़ सच़ ज़ोतां की ज़ां तगर कोई नोवें त्रिके सैहीं पैइदा ना भोऐ तै परमेशरेरी बादशाही ना लैही बटे। ⁴ निकोदेंमसे पुछ़ू, अगर कोई मैन्हुं बुढो भोते ता तै कैंच़रे सैहीं दुबारो पैइदा भोई सखते? ऐन ता ना भोई सखे की तै फिरी एपनी अम्मरे पेटे मां गैहीतां दुबारो ज़रमे। ⁵ यीसुए जुवाब दितो, आंव तुसंन सैहीं सच़ सच़ ज़ोतां की ज़ां तगर कोई मैन्हुं पैनी ते आत्माइं सेहिं पैइदा ना भोऐ तै परमेशरेरी बादशैही मां दाखल ना भोई बटे। ⁶ मैन्हुं सैहीं ता मैन्हुं पैइदा भोते, पण ज़ै आत्माइं सैहीं पैइदा भोते तै आत्मांए। ⁷ हेरांन ना भौथ की मी तुसंन सैहीं ज़ोंव, की तुसंन सैभन नोवें त्रिके सैहीं पैइदा भोंनु ज़रुरीए। ⁸ हवा ज़ैरां च़लनु चहचे तैरां च़लचे, तु तैसारी शौर ता शुंनतस पण ऐन ना ज़ांनस की तै कौठां ऐइचे ते कौरां गहचे, आत्मांइ सैहीं पैइदा भोंने बाले हर मैनेरो हाल भी ऐरहो भोंनोएं। ⁹ निकोदेंमसे पुछ़ू, एन केंच़रे सैहीं आसांन भोई सखते? ¹⁰ यीशुए ज़ोंव, तीं ता ईस्रेएलन मां अक गुरेरो दर्जो मैल्होरोए, ते फिरी भी तु ऐह गल ना ज़ांनस? ¹¹ आंव ता तुसंन सैहीं सच़ सच़ ज़ोतां की अस ज़ैन ज़ांनत तैन्ने ज़ोतम ते ज़ैन लाहेरुए तैसेरी गुवाही देतम, फिर भी तुस लोक ईशी गुवाही ना मन्थ। ¹² मीं ता तुसंन सैहीं धेर्तरी गल्लाँ की ते तुसेइं यकींन ना कियुं ते अगर आंव अंम्ब्रेरी गल्लाँ ज़ोइं ता तुस कैंच़रे यकींन कैरल्हे? ¹³ कोई मैन्हुं अंम्ब्रे मां नेहीं जेवरो सुवाऐ तैसेरे ज़ै अंम्ब्रेरां ना भोऐ ऐवरो येंनी, अबने आदम"। ¹⁴ ज़ैंच़रे मूसै बियाबांने मां पितलरो सप बंटे पुड़ ऊचो टंगो, तैंच़रे ज़रुरीऐ की अबने आदम" भी ऊची ठैरी टंगो गाहे। ¹⁵ ताके ज़ै कोई तैस पुड़ विशवास कमाऐ, तैस हांमेशरी ज़िंदगी मैल्हे।

¹⁶ किजोकी परमेशरे दुनियाई सैहीं ऐत्रो पियार कियो की तैनी अपनु अक मठ्ठु दितु ताके ज़ै कोई तैस पुड़ विशवास केरे तै नाश ना भोऐ, ब्लके तैस हांमेशरी ज़िंदगी मैल्हे। ¹⁷ किजोकी परमेशरे मठ्ठु दुनियाई मां एलहेरलेई नेहीं भेज़ेरु की तै दुनियाई सज़हरो हुकम शुंनाऐ, ब्लके एलहेरलेई की दुनियाई तैसेरे ज़िर्ये सैहीं मुखती दे। ¹⁸ ज़ै मठ्ठै पुड़ विशवास केरते तैस जो सज़हरो हुकम ना भोऐ, पण ज़ै मठ्ठै पुड़ विशवास ना केरे तैस जो सज़हरो हुकम भोवरोए, किजोकी तैनी परमेशरेरे एकी मठ्ठै पुड़ विशवास नेहीं कमेवरो। ¹⁹ ते सज़हरे हुकमेरी वजा ऐहे की लौ" दुनियाई मां अई, पण लोकेइं तैस लौअरे बजाहे आंधरु पसंद कियुं किजोकी तैनकैरां कम्मा बुरां थियां। ²⁰ ज़ै कोई बुरु कम केरते तै लोई सैहीं नफ्रत केरते ते तैसारे नेड़े ना ऐजे, कोसकोही ऐरु ना भोऐ की तैसेरां कमा बांदां भोंन। ²¹ पण ज़ैसेरी ज़िंदगी रोड़े कम्म केरे लेई बाकमे तै लौअरे नेड़े ऐईते ताके बांदु भोऐ की तैसेरे हर कमेरो परमेशरेरी मेर्ज़रे मुताबक फल मैल्हे |

यीशु एरे लेई यूहन्नारी गुवाही

²² ऐन गल्लं केरे बाद यीशु त तैसेरे चेले युहुदियरे आलाके मां जे, ते तैड़ी रेहितां लोकन बपतिसमो देने लगे। ²³ युहन्ना भी अनुणे" मां बपतिसमो देने लगो, तै ठार शालमेरे नेड़े थी, वजा ऐह थी की तैड़ी पानी हछु थुं ते लोक बपतिसमो नैनेरे लेई ऐइंते रहते थिये। ²⁴ ऐह युहन्नेरे जैल्ही मां छ़डने कैरां पैहिली गल्ले। ²⁵ युहन्नेरे चेलां केरी ऐकी युहुदी सैहीं ऐस रसंमरे बारे मां ज़ै पैनी सैहीं बपतिसमो दितो गहतो थियो, बेंस शुरु भोई। ²⁶ एलहेरलेई तैना युहन्ना का ऐइतां ज़ोंने लगे, रबी" तै मैन्हुं ज़ै दरया यरदनेरे पार तीं सैहीं साथी थु ते तीं तैसेरे बारे मां गुवाही दितोरी थी तै भी बपतिसमो देते ते सब लोक तैस्सेका गहतन। ²⁷ युहन्ने जुवाब दितो, मैन्हुं किछ ना मैल्हे, ज़अं तगर तैस परमेशरेरी तरफां ना मैल्हे। ²⁸ तुस ऐपु शहातथ की मीं तुसंन सैहीं ज़ोवरु थुं की आंव मसही नेहीं, ब्लके आंव तैसकैरां पैहिले भेज़ोरोइं। ²⁹ महरनी ता महरावेरी भोचे, पण महरावेरो दौसत ज़ै तैसेरी आहरत बिरत केरते ते महरावेरी हर गल शुंनतो रहते ते तैसेरी गल शुंनतां खुशी रहते, बस्सा मेरी ऐह खुशी पुरी भोई जेई। ³⁰ एन ज़ुरुरीए की तै बधै ते आंव घैटीं।

³¹ ज़ै बेंधौरां ऐइते तै बड़ो ऊचो भोते, ते ज़ै मैन्हुं धेरती पिड़योंए तै धेरतरोऐ तै धेरतरी गल्लाँ केरते, पण ज़ै अंम्ब्रेरां ऐइते तै सैभना ऊचो भोते। ³² तैनी ज़ैन किछ लाहुं ते शुंनू तैसेरी गुवाही देते, पण तैसेरी गुवाही कोई ना मन्ने। ³³ पण ज़ै कुबूल केरते तै तैसेरी तसदीक देते की तै सच़ोए। ³⁴ एलहेरलेई ज़ै परमेशरे भेज़ोरोए तै परमेशरेरी गल्लाँ ज़ोते एलहेरलेई की तै पाबित्र आतमा खुले हथैइं देते। ³⁵ बाजी मठ्ठै सैहीं मुहाबत रखते ते तैनी सभ किछ तैसेरे हावाले कियेरुए। ³⁶ ज़ै मठ्ठै सैहीं विशवास केरते तैस हांमेशरी ज़िंदगी मैल्चे, पण ज़ै मठ्ठै पुड़ विशवास ना रखे तै ज़िंदगी कैरां दुर भोई गहते ते तैस पुड़ परमेशरेरो क्रौध रहते।

यीशु ते सामरी कौंन्श

¹ फ्रिसी केरे कन्ने तगर ऐह गल पुज़ी की बड़े लोक यीशुएरे चेले बन्ने लगोरेन ते तैन केरी तैधात युहन्ना बपतिसमो देने बालेरे चेलन कैरां भी जादे। ² हालांकी सच़ एन थुं की यीशु एपु नेहीं ब्लके तैसेरे चेले बपतिसमो देते थिये। ³ ज़ैखन परमेशरे ऐस गल्लरो पत्तो लगो ता तै युहुदया छ़ैडतां गलिले जो वापस च़लो जेव। ⁴ किजोकी तैनी सांमरियाऐ मम्हैइं निसतां गहंनु थुं। ⁵ एलहेरलेई तै सांमरियारे सुरखार नोवेंरे शहरे मं अव तै ठार" तैस ज़मीनरे नेड़े थी ज़ै याकुबे अपने मठ्ठै युसफै दितोरी थी। ⁶ याकुबेरु खुहू भी तैड़ी थुं ते यीशु बत्ते हैन्ठतां ते थैकतां तैस खुहे पुड़ बिशौरो थु, ते तैखन दुपहरां केरो मोको थु।

⁷ अक सांमरी कौन्श तैड़ी पनी भरने आई, यीशुए तैसजो ज़ोंव, मीं पानी पिया। ⁸ किजोकी तैसेरे चेले रौट्टी आंन्हने शहरे मां जेवरे थिये। ⁹ तैस सैंमरी कौन्शां यीशु जो ज़ोंव, तु युहुदिस ते आंव अक सांमरी कौन्शांइ, तु मीं पानी पियांनेरे लेई ज़ोतस, किजोकी युहूदी सैंमरन सैहीं मिलनु जुलनु ना थिये सुखाते। ¹⁰ यीशुए तैस जुवाब दितो, तु परमेशरेरु दान बुझ़ैथी ते ऐन भी भुझ़ैथी की कौन तींकैरां पानी मगने लोरोऐ ते तु तैसकैरां मग्गैथी ते तै तीं ज़िंदगरू पानी देथौ। ¹¹ तैस कौन्शां ज़ोंव, ओ परमेशर तींका पानी भरने लेई कोई भांड नेहीं ते खुहू बड़ू डुग्घूऐ, ते तीं ज़िंदगरु पानी कौठां मैल्हु। ¹² कुन तु ईशै बाजी याकुबे कैरां भी बडोस ज़ैनी ऐन खुहू असंन दितेरुए ते तैनी एपु भी ते तैसेरी ओवलाधां ते तैसेरे गोरु गब्बेइं भी ऐस्सै मैरां पियुं। ¹³ यीशुए तैस जुवाब दितो, जै कोई ऐस खुहे मैरां पियेल्हो तैस फिरभी ट्लीश रहंनीएं। ¹⁴ पण ज़ै कोई तैन पानी पिते ज़ैन आंव देतां तैस कधै ट्लीश ना लग्गैली, सच़ ता एने की ज़ैन पानी आंव तैस देल्हो तै तैसमां अक नाग बनेलो ज़ै हांमेशां बगतो राहेलो। ¹⁵ तैस कौन्शां यीशु जो ज़ोंव, ओ परमेशर" मिम्हीं तैन पानी दे ताके मीं ट्लिश ना लग्गे ते मीं बार बार पनी भरने ईस खुहे पुड़ ना ऐजनु पै।

¹⁶ यीशुए तैसजो ज़ोंव, गह् अपनो मुन्श कुजा। ¹⁷ तैसां कौन्शां जुवाब दितो, मेरो कोई मुन्श नेहीं, यीशुए तैसजो ज़ोंव, तीं सच़ ज़ोंव की मेरो कोई मुन्श नेहीं | ¹⁸ तीं पंच़ मुन्श बनेवरेन ते ज़ैसका तु अज़ बिशोरीस तै भी तेरो मुन्श नेहीं, तीं ज़ैन किछ ज़ोंव तैन सच़े ज़ोवरुऐ। ¹⁹ तैस कोन्शां ज़ोंव, मीं बुझ़ु की तु कोई नबीस"। ²⁰ ईशै सियांने बुज़ुर्गेइं ईस पहाडे पुड़ आराधना केरते राहे, पण तुस युहुदी ज़ोतथ की युरोशलमे अक ठारे ज़ैड़ी प्राथना कियोरी लोड़चे। ²¹ यीशुए तैस कौन्शी जो ज़ोंव, मेरु यकींन केर की तै मोको भी ऐजी राहोरोए, की तुस लोक प्रभु परमेशरेरी आराधना ना ता ईस पहाड़े पुड़ केरेल्हे ते ना युरोशलमे मां केरेल्हे। ²² तुस सांमरी ज़ैसेरी आराधना केरतथ तैस ज़ांनथै नन्ना, पण अस ज़ैसेरी आराधना केरतम तैस ज़ांनतम, किजोकी मुखती युहुदन मैरांए। ²³ पण तै मोको ऐजी राहोरोऐ ब्लके ऐवरोए, ज़ैखन सच़े भगत दिले सैहीं बाजेरी आतमांरी आराधना केरेल्हे, किजोकी बाजी ऐरहे ज़ैरे सच़े भगत तोप्ते। ²⁴ प्रभु परमेशर आतमांए, ते तैसेरे भगतन एन ज़रुरीए की तैना सच़े दिले सैहीं तैसेरी आराधना केरन। ²⁵ तैस कौन्शां ज़ोंव, आंव ज़ानच्हीं की मसही, ज़ैसजो खैरतुस ज़ोतन ऐजने बालोए, ज़ैखन तै ऐजेल्हो तै सभ किछ समझ़ाल्हो। ²⁶ त्ताल्ही यीशुए ज़ोंव, आंव ज़ै तीं सैहीं गल्लाँ लगोरोइं केरने तैहे मसही आहीं।

चेलां केरी वापसी

²⁷ ऐतरे मां यीशुएरे चेले वापस आऐ ते तै तैनेइं ऐकी कौन्शी सैहीं गल्लाँ केरतो लैहितां हेरांन राहे, पण केंचे तैस एन ना पुछ़ू की तु कुन चहतस या ऐस कौन्शी सैहीं किजो गल्लाँ लगोरोस केरने। ²⁸ तै कौन्श पैनेरो घड़ौ तैड़ी छ़ैडतां वापस शहरे मं जेई ते मैन्ह्न सैहीं ज़ोंने लगी। ²⁹ ऐजा, ऐकी मैन्हुं सैहीं मिला तैनी मीं सैहीं सभ किछ ज़ोंव ज़ैन मीं अज़ तगर कियेरु थुं, कुन ऐहे तै मसही ता नेहीं? ³⁰ तैन मैन्हुं शहरे मैरां निसतां यीशुएरे पसे च़लने लगे। ³¹ ऐस फेरे यीशुएरे चेले तैस तंग लगे केरने की ओ" गुरू रौट्टी खा। ³² पण यीशुए तैन सैहीं ज़ोंव, मीं अक ऐरही रौट्टी खानीएं पण तुसंन तैसेरे बारे मां कोई पत्तो नेहीं। ³³ तैखन चेले ऐपु मम्हैइं ज़ोंने लगे, कुन केंचे पैहिले ऐसेरे लेई रौट्टी आंन्होरीए? ³⁴ यीशुए तैन सैहीं ज़ोंव, मेरी रौट्टी ईहे की ज़ैनी आंव भेज़ोरोइं तैसेरी मर्ज़ी पुरी केरीं। ³⁵ ऐन मत्ता ज़ोथ की फसल पकने हेजु च़ोवर मिहींने बाकिन? आंव तुसंन जो ज़ोतां की ऐपनी ऐछ़ी घाड़ा ते ऊडारन तक्का, तैन मां फसल पैकतां तियारे। ³⁶ हुंन्ना फसल लुन्ने बाले अपनी मुजुरी मैल्चे ते हांमेशरी ज़िंदगरी फसल कटते ताके बेंने बालो ते कटने बालो दुईये मिलतां खुशी मनाण। ³⁷ ऐलहेरलेई अक कहावते की बेंने बालो कोईए ते कटने बलो होरो कोईए, तैन सच़े"। ³⁸ मीं तुसां भेज़े की गाथ तैस फसली कट्टा ज़ै तुसेइं नेहीं बेवरी, होरेइं मैह्नती सैहीं कम कियुं ते तुसंन तैनकेरी मैह्नतरो फल मैल्हो।

सैमरी केरो विषवास केरनों

³⁹ शहरेरे बड़े लोक तैस सैंमरी कौन्शरी गुवाही शुनतां, की तैनी मीं सैहीं सभ किछ ज़ोंव, ज़ैन मीं कियेरु थुं, तैनेइं यीशु पुड़ विशवास कियो। ⁴⁰ ज़ैस शहरेरे सांमरी लोक यीशु का ऐवरे थिये, मिनत केरतां ज़ोंने लगे, आसंन का बिश फिरी तै दुई दिहाड़े तैड़ी राहु। ⁴¹ होरे भी बड़े लोक थिये ज़ैनेइं तैसेरु ज्ञान शुनतां तैस पुड़ विशवास कमाव। ⁴² तैनेइं तैस कौन्शी जो ज़ोंव, असेइं तेरी गल्लाँ शुनतां विशवास नेहीं कियोरो, ब्लके असेइं अपने कन्नेइं शुंनेरुए ते असेइं एन हुंनी बुझ़ू की ऐह मैन्हुं सच़े दुनियारो दातोऐ। ⁴³ दुई दिहैड़ना बाद यीशु फिरी गलिलेरे पासे च़लो जेव। ⁴⁴ ते यीशुए एपु ज़ोवरु थुं की कोई नबी" अपने देशे मां ईज़तदार ना भोए। ⁴⁵ ज़ैखन तै गलिले मां व ता तैठेरे खास गलिलेइं तै कुबूल कियो एलहेरलेई की तैनेइं तैन सभ किछ ज़ैन तैनी ईद फसहीएरे मोके युरोशलमे मां कियेरु थुं, तैनेइं ऐपनी ऐछ़ैइं सैहीं लाहेरु थुं तैखन तैना एपु भी तैड़ी थिये।

एकी आफरेरू मठ्ठू बझ़ानू

⁴⁶ ईही दुईयांव हैटोऐ की ज़ैखन तै कानाएं गलिले मांएवरो थु ज़ैड़ी तैनी पैनेरु बेदलतां षरबत बनेवरु थुं, ते अक बड़ो बडो आफसर थु तैसेरु मठ्ठु कुफरनहुंमे मां बिमार भोवरु थुं। ⁴⁷ ज़ैखन तैनी आफसरे शुंनु की यीशु युहुदियेरां कुफरनहुंमे मां एवरोए ता तै यीशु का पुज़ो ते मिनत केरतां ज़ोंने लगो मेरु मठ्ठु मरने बालुए तु च़ल ते तैस बज़्झ़ा। ⁴⁸ यीशुए तैस सैहीं ज़ोंव, ज़ां तगर तुस लोक निशांन ते अजिब कम्मा ना लाहेले कधै विशवास ना केरेल्हे। ⁴⁹ तैनी बडे अफसरे ज़ोंव, परमेशर" लूश केर ऐरहु ना भोए की मेरु मठ्ठु मैरी गाहे। ⁵⁰ यीशुए जुवाब दितो, च़ल तेरु मठ्ठु ज़िंतु भोंनुएं, तैनी तैसेरी गल्लरु यकींन कियुं ते तैठां च़लो जेव। ⁵¹ तै हेजु बत्ते थु ता तैसेरे नोकर तैस मैल्हे ते ज़ोंने लगे, तेरु मठ्ठु जिंतुए। ⁵² तैखन तै पुछ़ने लगो की मेरु मठ्ठु कत्ताल्ही ज़ैरे बेझ़ोंने लगेरु थुं, ते तैनेइं ज़ोंव की तैसेरो भुखार हीज सत्तोवं घैन्टे ऊतरी जेवरो थु। ⁵³ तैखन तैसेरे बोव्वे याद आंव की तैहे मोको थु, ज़ैखन यीशुए ज़ोवरु थुं की गा तेरु मठ्ठु जिंतु भोंनुएं, त्ताल्ही तैनी भी ते तैसेरे पुरे टब्रे यीशु पुड़ विशवास कमाव। ⁵⁴ ईही दुईयांव चमतकार थु ज़ै यीशुए युहुदयेरां एजनेरां बाद गलिले मां हेरेवरो थु |

अठतएली सालां केरो बीमार बझ़ानो

¹ ऐन गल्लन पत्ती यहूदी केरू अक तीहार भोंव, ते यीशु यरूशलेम ए जेव। ² यरूशलेमे माँ भीड़ दारे काँ अक हावद ए ज़ैस जो इबरैनी भाषाई माँ बैहसदा ज़ोतन, तैसेरां पंच़ अंगन्न। ³ ऐन माँ बड़े बीमार, काने,टोंटे, नीपाते [पानी हीलनेरे इंतज़ारे माँ] भोते थीये। ⁴ [कीजो कि टाइमे पुड़ परमेश्वरेरो फ्रीशतो हावदे पुड़ एईता पानी हीलातो थू। पानी हिलते ज़ै कोई पेईलो गातो तै ठीक भोतो थू, चाए तैसेरी कोई भी बीमारी कीना भोए]। ⁵ 5 तैड़ी अक मैनू थू, ज़ै अठेती सालाँ केरो बीमार थू। ⁶ यीशु ए तै तैड़ी भिशोरो लाव ते ऐन ज़ैनताँ कि एह बड़ो च़रोक्नो इस ह्लीती माँ ए, ते तैस पुछ़ू, कुन तू ठीक भोनू चातस?। ⁷ तैने बीमारे जुवाब दितो, हे प्रभू ,मीं का कोईमैनू नेंई कि ज़ताली पानी हिलाव गए ता मीं कोई तैस कुंडे माँ छ़डे पर मेरे पुज़ते पुज़ते ताँतर होरो गाते। ⁸ यीशु ए तैस सीं ज़ोंव, उठ अपनी खट सल ते च़ल फिर। ⁹ तै मैनू तैखने ठीक भोव,ते अपनी खट सलताँ च़लने फीरने लाव।

¹⁰ तै सब्तेरी दीहड़ी थी.एलहेरेलेई यहूदी तैस ज़ै ठीक भोरो थू,ज़ोने लाए, अज़ त सब्तेरी दिहाड़ी ए, तीं खट छ़ूनी जैईज नेंई। ¹¹ तैने तैन जुवाब दितो, ज़ैने अव ठीक कीव, तैने मीं सीं ज़ोंव, अपनी खट छ़ू तै च़ल फीर। ¹² तैनेंई तैस पुछ़ू, तै कौन मैनू ए ज़ैने तीं सीं ज़ोंव, खट छ़ूईताँ च़ल फीर?। ¹³ ज़ै ठीक भोरो थू तै न थू ज़ानतो कि तै कौन ए, कीजो कि तैस ठैरी भीड़ भोनेरे वजाई सीं यीशु तैस ठैराराँ होरी पासे जेवरो थू। ¹⁴ एन गल्लनाँ पत्ती यीशु तै मंदरे माँ मैलो.यीशु ए तैस सीं ज़ोंव, तक तू ठीक भोंवरोस.फिरी पाप न केराँ, एरू न भोए कि ऐस कराँ बडी आफत एजे। ¹⁵ तैने मैंने यहुदीन सीं ज़ोंव, कि ज़ैने अव ठीक केरोई तै यीशु ए। ¹⁶ ऐल हेरे लेई यहूदी यीशु सताने लाए, कीजो कि तै एराँ ज़ैराँ कम्माँ सब्तेरे दिहाड़े केरतो थू। ¹⁷ ऐस पुड़ यीशु ए तैन सीं ज़ोंव, मेरो बाजी हेजू तर कम केरतोए, तै अव भी कम केरताई। ¹⁸ ऐस वजैई सीं यहूदी मनाँ जादे मारनेरी कोशीश करने लाए, कीजो कि तै न सीरफ सब्तरे दिहड़ी हुकम न थू ट्लोतो बलकी परमेश्वर ए अपनों बाजी ज़ोतो थू ते अपनो आप परमेश्वरेरे बराबर बनातो थू।

मठ्ठेरो अधिकार

¹⁹ ऐस पुड़ यीशु ए तैन सीं ज़ोंव, अव तुसन सीं सच़ सच़ ज़ोताई, मठ्ठू एपू किछ न केरी बटटे, सिरफ तैन ज़ैन बाजी कराँ केरतू हेते, कीजो कि ज़ैना ज़ैना कमाँ बाजी कराँ केरतो लाते तैन मठ्ठू भी तैसे तरीके सीं केरते। ²⁰ कीजो की बाजी मठ्ठे सीं पयार केरते ते ज़ैना ज़ैना कम्माँ तै एपू केरते, तैनाँ सब तैस हीराते, ते तै ऐस कराँ भी बडडाँ कम्माँ हीरालो, ताकी तुस हेरान भोथ। ²¹ ज़ैंच़ाँ बाजी मुड़दन उठाते ते ज़ींताते, तैंच़ां मठ्ठू भी ज़ैस चाते ज़ींताते केरते। ²² बाजी केंचेरी आदालत न केरे,पर आदालत केरनेरू सारू कम मठ्ठे सोंफेरू ए। ²³ कि सब लोक ज़ैंच़ा बाजी केरी आदर केरतन तैंच़ां मठ्ठेरी आदर केरन, ज़ै मठ्ठेरी आदर न केरे, तै बाजी केरी ज़ैने तै भेज़ेरोए तैसेरी आदर न केरे। ²⁴ अव तुसन सीं सच़ सच़ ज़ोतंई ज़ै मेरो वचन शुन्ताँ ताँ मेरे भेज़ने बाले पुड़ विश्वास केरते, हमेशारी ज़ंदगी तैसेरी ए, ते तैस पुड़ सज़ारो हुक्म न भोए,पर तै मौतराँ पार भोईताँ ज़ंदगी माँ जेव

²⁵ अव तुसन सीं सच़ सच़ ज़ोतंई कि तै बेलो एईते, ते हूना ए ज़स म मुड़दे परमेशवरेरे मठ्ठेरे आवाज़ शुनेले, ते ज़ैन शुनेले ते तैना ज़ईले। ²⁶ किजो की ज़ैंच़ाँ परमेश्वर अपने आपे माँ ज़ंदगी रखते तैंच़े तैने मठ्ठू एह आधीकर दितोरो ए कि अपने आपे माँ ज़िंदगी रखे ऐलहेरे लेई तै मैंनेरू मठ्ठू ए। ²⁷ बल्की तैस आदालत केरनेरो भी अधिकार दितोरोए, ऐल्हेरे लेई की तैन मैंन्हेरू मठ्ठूए | ²⁸ ऐस मां हेरान न भोत, कीजो कि तै बेलो एईते कि ज़ैतरे कबरन माँन तैसेरी आवाज़ शुन्ताँ उठनेन। ²⁹ ज़ैनेंई भलाई केरीए ज़िंदगरी कयामतरे लेई ज़ींते भोनेंन. ज़ैनेंई बुराई केरी ए सज़ाएरी कयामतरे लेई ज़ींते भोंनेन।

यीशु एरे मुतालिक गुवाही

³⁰ अव्वं अपने अपे सीं किछ न केरी बटी; ज़ैन्च़ाँ शूंनताई, तैन्च़ाँ अदालत केरतंई, ते मेरी अदालत सच़्च़ी ए, किजो कि अव्वं अपनी मेरज़ी नेईं पर अपने भेज़ने बालेरी मरज़ी चहताई। ³¹ अगर अव्वं अपनी गुवाही एपू देईं, त मेरी गुवाही सच़्च़़ी नेंई। ³² अक होरो मेरी गुवाही देते, ते अव्वं ज़ानताई मेरी ज़ै मेरी गवाही देते, तै सच़्च़ो ए। ³³ तुसेईं यूहन्ना कराँ पुछ़ाव, ते तैने सच़्च़ैारी गुवाही दितोरी ए। ³⁴ पर अव्वं अपने लेई मैंनेरी गुवाही न चैई, फिरी भी अव्वं इनाँ गल्लाँ एलहेरे लेई ज़ोताई कि तुसन मुखती मैले। ³⁵ तै त बलतो ते चमकतो दीयो थू, पर तुसन थोड़े च़ीरे लेई तैस मां मगन भोनू रोड़ू न लग्गू। ³⁶ पर मीं का ज़ै गुवाही तै युहनेरे गुवाही कराँ भी बड्डी ए; किजो कि ज़ैन कम बाजेईं मीं केरनेरे लेई सोफेरू ए मतलब इने कम्माँ ज़ैना अव्वं केरताई, तैना मेरी गुकाही देतन कि बजे अव्वं भेज़ोरोईं। ³⁷ ते बाजी ज़ैने अव्वं भेज़ोरोईं, तैने मेरी गुवाही दितोरी ए; तुसेईं न कधी तैसेरी आवाज़ शुनोरी, ते न तैसेरी शक्ल लवरी ए। ³⁸ ते तैसेरो वचन मने मां नेईं रखोरो, किजो कि ज़ैने तै भेज़ेरो ए तुस तैसेरो विश्वास न केरथ। ³⁹ तुस पवत्रशास्त्रे मां तोपतथ, किजो कि समझ़तथ कि सदारी ज़िन्दगी तैस मां मैल्लते ए; ते ई तैए ज़ै मेरी गुवाही देते। ⁴⁰ फिरी भी तुस ज़िन्दगरे लेई मीं का न एजनू चाथ। ⁴¹ अव्वं मैन्न कराँ आदर न चैई। ⁴² पर अव्वं तुसन ज़ानताँ तुसन मां परमेश्वरेरो पयार नेईं। ⁴³ अव्वं अपने बाजी केरे नव्वें सीं आवरोईं ते तुस मीं कबूल न केरथ; अगर होरो कोई अपने नव्वें सीं एजे, त तैस कबूल केरेले। ⁴⁴ तुस ज़ैना एकी होरी करां आदर चातथ ते तै आदर ज़ै सिर्फ परमेश्वरेरे तरफाँ ए न चाथ, केन्च़ाँ विश्वास केरी बटतथ? ⁴⁵ इन न समझ़ा कि अव्वं बाजी केरे सामने तुसन पुड़ दोष लेईलो; तुसन पुड़ दोष लाने बालो ए ते मूसोए, ज़ैस पुड़ तुसेईं भरोसो रखोर ए। ⁴⁶ किजो अगर कि तुस मूसेरो विश्वास केरथे त मेरो भी विश्वास केरथे, ऐलहेरे लेई तैने मेरे बारे मां लिखेरू ए। ⁴⁷ पर अगर तुस तैसेरी लिखोरी गल्लन पुड़ विवास न केरथ ते मेरी गल्लन पुड़ केंच़ाँ विश्वास केरेले?

पंच़ हज़ार मड़दन रोटी खुवैनिन

( मत्ती 14 : 13 - 21 ; मरकुस 6 : 30 - 44 ; लूका 9 : 10 - 17 )

¹ ऐना गल्लनँ पत्ती यीशु गलीलेरे डलेरे मतलब तिबिरियासेरे डलेरे पार जेव। ² ते अक बड़ी भीड़ तैस पत्ती च़ल्ली किजो कि ज़ैना चमतकार तै बीमरना पुड़ हीरतो थु ते तैना ओरते थी। ³ तैखना यीशु पहाड़े पुड़ च़ड़तां अपने चेलना साथी तैड़ी बिशो। ⁴ यहूदी कियुं फसहारू तीहार नेड़ू थऊं।

⁵ ज़ताली यीशुए अक बड़ी भीड़ अपने पासे एइती लाई, ते फिलिप्पुस ए सैहीं ज़ोंव, अस्साँ ऐना केरे लेई रोट्टई कोठँ घिनाम? ⁶ तैनी तै गल्ल तैस अज़मानेरे लेई ज़ोई किजो कि तै एपू ज़ानातो थु कि तै कुन केरेलो। ⁷ फिलिप्पुस ए तैस जुवाब दितो, दुय्य शौ दीनाराँ केरी रोट्टई भी तैना केरे लेई पूरी ना भोली कि तैना थोड़ी थोड़ी मैली गैली। ⁸ तैसेरे चेलना मैरां शमौना पतग्रसेरे ढ्लाए अिन्द्र्यास ए तैस्से सैहीं ज़ोवं। ⁹ इड़ी अक मठ्ठूए ज़ैस कां जोआं केरी पन्च़ रोट्टिना, तै दूय्य मछ़लीना; पर एतरे लोकन जो कुन तैना पूरीना? ¹⁰ यीशुए ज़ोंव, लोकन बिशाला। तैड़ी बड़ो घास थु। त्ताली लोक ज़ैना तकरीबना पन्च़ हज़ार मड़द थी, बिशे। ¹¹ त्ताली यीशुए रौट्टी ट्लोई, ते शुकर केरतां बिषने बलना दिती; ते तैन्च़ाँ मछ़लना मैरां भी ज़ैत्री तैना चहतो थी बेन्टी। ¹² ज़ताली तैना खेईता रज़े त तैनी अपने चेलना सैहीं ज़ोंव, बच़ोरे टुकड़े आकोठे केरा ताके किछ शरू ना गाहे। ¹³ ते तैनेइं आकोठे केरे, ते जोाँ केरे रौट्टी केरे टोकरना मैरां ज़ैना खाने बालना कैरां बाँच़ोरे थी बारे थी। ¹⁴ त्ताली तै चमतकार ज़ै तैनी कर्रो थु ओरतां लोक ज़ोने लाए, तै नाबी ज़ै संसारे मां एजने बालो थु सच़्च़े ई ए। ¹⁵ यीशुए ऐना ज़ैन्ताँ कि ऐना मीं राज़ो बनानेरे लेई ट्लानो चातना, फिरी आकैलो पहड़े पुड़ जेव।

यीशु एरू पैनी पुड़ च़ल्लनू

( मत्ती 14 : 22 - 23 ; मरकुस 6 : 45 - 52 )

¹⁶ ज़ताली ड्लौझ़ भोई, त तैसेरे चेले डलेरे पासे जे। ¹⁷ ते किश्ती तड़ च़ड़तां कुफ्रनहुंमें च़ले, तैस बेले अंधरू भोवरू थु; ते यीशु ओजू तग्र तैना का ना थु आवरो। ¹⁸ एँधरे वजाई सैहीं डले मां लैराँ उठने लेई। ¹⁹ ज़ताली तै तकरीबना ट्ली च़ेवर मील नेड़े आव, ते तैनेइं यीशु डले पुड़ च़लतो लाहु ते किश्तरे नेड़े एईतो लाहु ते डरे। ²⁰ पर तैनी तैना सैहीं ज़ोवं आंव एई डरा ना। ²¹ ते तै तैस किश्ती पुड़ च़ड़नेरे लेई तयार भोव ते तैखने किश्ती तैस ठैरी पुड़ पुज़ी ज़ैड़ी तैनाँ च़लोरे थी। ²² दुय्योवं दीहाड़े तैस भीड़ाँ ज़ै डलेरे पार खड़ी थी, ऐना हेरतां कि एकेराँ ईलावा होरी कोई किश्ती ना थी, यीशु अपने चेलना साथी तैस किश्ती पुड़ ना थु च़ड़रो, पर सीरफ तैसेरे चेले जेवरे थी। ²³ ताताली होरी किश्ती तिबिरियास-एरा तैस ठैरी एई, ज़ैड़ी तैनेइं प्रभू एरू शुकर केरतां रौट्टी खेवरी थी। ²⁴ एलहेरेलेई ज़ताली मैनेई ओरू कि इड़ी ना यीशु ते ना तैसेरे चेले, ते तैना भी यीशु तोपते कफरनाहूमे पुज़े। ²⁵ डलेरे पार ज़ताली तैना तैस मैल्ले त ज़ोवं ओ रब्बी, तु ईड़ी कताली आव। ²⁶ यीशुए तैना जुवाब दितो, आंव तुसन सैहीं सच़ सच़ ज़ोतांइ मीं तुस एलहेरेलेई ना तोपथ कि तुसेईं चमतकार लाहु बल्की ओलओरे लेई कि रौट्टी खेइतँ रज़े। ²⁷ नाश भोने बैली रोट्टरे केरे लेई महैन्त ना केरा, पर तैस रोट्टरे लेई महैन्त केरा ज़ै सदारे ज़िन्दगी तग्र रानीए, ज़ै मैनेरू मठ्ठू तुसन तेलो; किजो कि बाजी मतलब परमेशर ए तैस पुड़ मोहर लावरी ए। ²⁸ तैनेइं तैस्से सैहीं ज़ोंव, परमेशरेरू कम केरनेरे लेई अस कुन केरम? ²⁹ यीशुए तैना जुवाब दितो, परमेशरेरू कम इने कि तुस तैस पुड़ ज़ैनी तै भेज़ोरो ए विश्वास केरा। ³⁰ त्ताली तैनेइं तैस्से सैहीं ज़ोंव, फिरी तु कुन निशाना हीरातस कि अस तैस हेरतां तेरो विश्वास केरम? तु कोन ज़ैरू कम हीरातस? ³¹ इशे बौऊ दादेइं जंगले मां मन्नो खऔ; ज़ैन्च़े लिखोरू ए, तैनी तैना खानेरे लेई स्वर्ग एराँ रौट्टी दिती। ³² यीशुए तैना सैहीं ज़ोंव, अव तुसन सैहीं सच़ सच़ ज़ोतांइ कि मुसे तुसन तै रौट्टी स्वर्ग एराँ ना दिती, पर मेरो बाजी तुसन सच़ी रौट्टी स्वर्ग एराँ देते। ³³ किजो कि परमेशरेरी रौट्टी तैए ज़ै स्वर्ग एराँ एइतां संसारे ज़िन्दगी तेती ए। ³⁴ त्ताली तैनीहीं तैस्से सैहीं ज़ोंव, ओ प्रभु ऐह रौट्टी ऐसना सर्वग एराँ तेतो रा।

³⁵ यीशुए तैना सैहीं ज़ोंव, ज़िन्दगरी रौट्टी आंव अई, ज़ै मीं का एजते तै कधी नीयानो ना भोलो, ते ज़ै मीं पुड़ विश्वास केरेलो तै कधी ट्लीशोरो ना भोलो। ³⁶ पर मीं तुसन सैहीं ज़ोरू थुं कि तुसेईं आंव लाहु भी फिरी भी विश्वास ना केरथ। ³⁷ ज़ैना किछ बाजी मीं देते तैना सब किछ मीं का एजनू ए, ते ज़ै कोई मई के एजलो आंव तैस कधे ना केढेलो। ³⁸ किजो कि आंव अपनी मरज़ी नेहीं, बलकी अपने भेज़ने बालेरी मरज़ी पूरी केरनेरे लेई स्वर्गएराँ आवरोई। ³⁹ ते मेरे भेज़ने बालेरी मरज़ी ईए कि ज़ैना किछ तैनी मीं दितोरोए तैस मैरां आंव किछ ना हीरेईं, पर आखरी दिहैड़ी फिरी तैस ज़ींतो केरेलो। ⁴⁰ किजो कि मेरे बाजी एरी मसज़ी ईए कि ज़ै कोई मठ्ठे लाए ते तैस पुड़ विश्वास केरे, तैस सदारी ज़न्दगी मैल्ले, ते आंव तैस आखरी दीहैड़ी फिरी ज़ींतो केरेलो |

⁴¹ एलहेरेलेई यहूदी तैस पुड़ कुड़कुड़ाने लाए, किजो कि तैनी ज़ोवंरू थु , कि ज़ै रौट्टी स्वर्ग एराँ आवरी ए तै आव्वं आँई। ⁴² ते तैनेइं ज़ोंव, कुन ऐना युसफेरु मठ्ठू यीशु नेहीं, ज़ैसेरे ओई बौए अस ज़ानातम? त तै कैंच़रे जोते कि आंव स्वर्गएराँ एवरोई? ⁴³ यीशुए तैना जुवाब दितो , एपू मां मेंई ना कुड़कुड़ाथ। ⁴⁴ कोई मीं का ना एजी बट्टे ज़ां तग्र बाजी, ज़ैनी आंव भेज़ोरोई, तैस ना खिचे; ते आंव तैस आखरी दीहैड़ी फिरी ज़ींतो केरेलो | ⁴⁵ नेबी केरे लिखने मां ऐन लिखेरूए तैना सब परमेशरेरे तरफां शिखोरे भोनेना; ज़ैनी केन्चे बाजी कैरां शुन्नोरू ए त शिखोरो ए तै मीं का एई ते। ⁴⁶ एना नेहीं कि केन्चे बाजी लावरोए; पर ज़ै परमेशरेरे तरफांए तैनी बाजी लावरो ए। ⁴⁷ आंव तुसन सैहीं सच़ सच़ जोताई ज़ै कोई विश्वास केरते सदारी ज़िन्दगी तैसेरी ए। ⁴⁸ ज़िन्दगरी रौट्टी आंव अई। ⁴⁹ तुशै बौऊ दादेइं जंगले मां मन्नो खाऊ ते मरे। ⁵⁰ ई तै रौट्टी ए कि मैन्हुं खाना ते ना मरना। ⁵¹ ज़िन्दगरी रौट्टी ज़ै स्वर्ग एराँ आवरी ए, आंव अई, अगर कोई इस रौट्टी मैरां खाए, त हमेशा ज़ीतो रालो, ते ज़ै रौट्टी अव संसारेरे लेई तेईलो तैना मेरू मासे।

⁵² एस पुड़ यहूदी एपू मामेई लड़ने लाए कि ई मैन्हुं ऐसना अपनू मास केंच़रे खाने जो तेई बटते? ⁵³ यीशुए तैना सैहीं ज़ोवं आंव तुसन सैहीं सच़ सच़ ज़ोतांइ कि ज़ां तग्र तुस मैनेरे मठ्ठरू मास ना खाले, ते तैसेरो लेव ना पीथ, तुसन मां ज़िन्दगीज़ि नेहीं। ⁵⁴ ज़ै मेरू मास खाते हमेशारी ज़िन्दगी तैसेरी ए ते आखरी दीहैड़ी आंव फिरी ज़ींतो केरेलो। ⁵⁵ किजो कि हकीकीती मां मेरू मास खानेरी चीज़े ते मेरो लेव हकीकीती मां पीनेरी चीज़े। ⁵⁶ ज़ै मेरू मास खाते ते लेव पीते तै मीं मां बनोरो राते, ते आंव तैस मां। ⁵⁷ ज़ैन्च़ेरे ज़िंते बाजीं आंव भेज़ोरोइं, ते आंव बाजी केरे कारना ज़ींतोंई, तैंच़े तै भी ज़ै मीं खालो मेरे कारना ज़ींतों रालो। ⁵⁸ ज़ै रौट्टी स्वर्ग एराँ आवरीए, तैस रोट्टरी ज़ेरी नेहीं ज़ै बौऊ दादेइं‎ खाई ते मरे, ज़ै कोई ई रौट्टी खालो तै हमेशा ज़ींतो रालो. ऐना गल्लाँ तैनी कफरनाहूम एरे एकी मन्दरे मां तलीम देते ज़ोई। ⁵⁹ इना गल्लां तैनी कफरनहूमेरे एकी आब्द्तखाने मां ज़ोई |

हमेशरे ज़िन्दगरे वचन

⁶⁰ ऐल्हेरे लेई तैसेरे चेलना मैरां बड़ेई ऐना शुनतां ज़ोवं ई सखत गल्ल ए ऐह कौना शुनी बटते? ⁶¹ यीशु अपने मने मां ऐना बुझ़तां कि मेरे चेले ऐस गल्ली पुड़ एपू मामेई बेंस लावरना, तैना पुछू, कुन तुसन ऐस गल्ली पुड़ ठोकर लगोरीए? ⁶² अगर तुस मैनेरू मठ्ठू ज़ैड़ी तै पैहीलो थु तैड़ी गहंतो ते एंइते लाहेले, त कुन भोलू? ⁶³ आत्मा त ज़िंदगी देंने बाली ए जिसमे सैहीं किछ फैइदो नेहीं, ज़ैना गल्लाँ मीं तुसन सैहीं ज़ोई तैना आत्माना ते ज़िन्दगी भी आना। ⁶⁴ पर तुसन मां किछ एरना ज़ैना विश्वास ना केरन. कीजो कि यीशु पैहीलो ज़ानातो थु कि ज़ैना विश्वास ना थी केरते तैना कौना आना; ते तैस कौना ट्लवालो। ⁶⁵ ते तैनी ज़ोंव, एलहेरेलेई मईं तुसन सैहीं ज़ोरू थुं कि ज़ांतग्र बाजी केरे तरफां ऐना वरदाना ना मैले तां तग्र तै मीं का ना एजी बट्टे।

पतरसेरो विशवास

⁶⁶ ऐस पुड़ तैसेरे चेलना मैरां बड़े उलटे फीरे ते तैठाँ पत्ती तैस साथी ना च़ले। ⁶⁷ यीशुए ज़ोंव, कुन तुस भी च़ल्लू गानू चतथ? ⁶⁸ शमौना पतग्रसे तैस जुवाब दितो ओ प्रभु अस केस का गाम? हमेशाएरी ज़िन्दगरी गल्लाँ त तींए काना; ⁶⁹ ते ऐसेईं विश्वास केरो ते ज़ानू कि परमेशर एरो पवित्र मैन्हुं तु अस। ⁷⁰ यीशुए तैना जुवाब दितो, कुन मीं तुस बारे ना च़ूने?फिरभी तुसन मैरां अक मैन्हुं शौतानाए। ⁷¹ इन तैस शमौन इस्करियोतेरे बारे मां जोंव, किजोकी ई हे ज़ै तैन बारहन मैरां थू, तै ट्लावाने बालो थू |

यीशु ते तैसेरे ढ्लाह

¹ ऐना गल्लना पत्ती यीशु गलीले मां फिरतो राव; किजो कि यहूदी तैस मारनेरी कोशीश केरी रावरे थी, एलहेरेलेई तै यहूदिया मां फिरनू ना चातो थु। ² यहूदी कियुं झोंफड़ी कियुं तीहार नेड़ू थऊं। ³ एलहेरेलेई तैसेरे ढ्लेईं तैस ज़ोवं। ईठाँ यहूदिया मां ग, कि ज़ैना कम्माँ तु केरतस तैना तेरे चेले भी ओरना। ⁴ किजो कि एरो कोई ना भोलो कि ज़ै मशूर भोनो चाए, ते छ़ेपतां कम केरे। अगर तु कम केरतस, त अपनो आप हीरा। ⁵ किजो कि तैसेरे ढ्ला भी तैसेरो विश्वास ना थी केरते। ⁶ त्ताली यीशुए तैना सैहीं ज़ोंव, मेरो वखत ओजू नेहीं आवरो,पर तुशै लेई सब वखते ए। ⁷ संसार तुसन सैहीं बैर ना केरी बट्टे, पर मीं सैहीं बैर रखते किजो कि आंव तैसेरे खलाफ ई गुवाही तेताई कि तैसेरां कम्माँ बूरना। ⁸ तुस तीहारे मां गाथ,मीं हुनां ऐस तीहरे मां नेहीं एजनू किजो कि मेरो ओजू वखत पूरो नेहीं भोवरो। ⁹ ते तैना सैहीं ऐने गल्लाँ केरतां गलीले मां राव।

झोफड़ी केरे तिहारे मां यीशु

¹⁰ पर ज़ताली तैसेरे ढ्ला तीहारे मां च़ले जे त तै बाँदो ना पर छ़ेपतां ज़ेव। ¹¹ यहूदी तीहरे मां ऐना ज़ोइतां तोपने लाए कि तै कोड़ी ए? ¹² तै लोकन मां तैसेरे बारे मां बल्ले बल्ले बेड़ी गल्लाँ भोई, किछ जोते थी, तै रोड़ो मैन्हुं ए। ते किछ ज़ोते थी नेहीं तै मैन्ह्न गूमरा केरते। ¹³ फिरे भी यहूदी केरे डरे सैहीं कोई भी मैन्हुं तैसेरे बारे मां खूलतां ना थु ज़ोतो।

तीहारे मां यीशु एरी तालीम

¹⁴ ज़ताली तीहरेरे आधे दीहाड़े बीते, त यीशु मन्दरे मां गैहीतां तालीम देंने लगो। ¹⁵ त्ताली युहूदैइं ओराना भोईतां ज़ोंव, ऐस बगैर पुड़ने भीदया कैंच़रे अई? ¹⁶ यीशुए तैना जुवाब दितो, मेरी तालीइम मेरी नेहीं, बलकी मेरे भेज़ने बालेरी ए। ¹⁷ अगर कोई तैसेरी मेरज़ी पुड़ च़लनू चाए, त तै इस तालीमेरे बार मां ज़ानेलो; किजो कि ऐह परमेशरेरे तरफां ए; कि आंव अपने तरफां ज़ोतांइ। ¹⁸ ज़ै अपने तरफां किछ ज़ोते तै अपनी बडयाई चाते, पर ज़ै अपने भेज़ने बालेरी बडयाई चाते तै सच़्च़ोए, ते तैस मां पाप नेहीं। ¹⁹ कुन तुसन मूसे व्यवस्था ना थी दितोरी? फीरी भी तुसन मैरां कोई व्यवस्था पुड़ ना च़ले, कुन तुस मीं मारनो चहतथ? ²⁰ लोकेईं जुवाब दितो, तीं मां गंदी आत्मा ए! कौना तईं मारनो चाते? ²¹ यीशुए जुवाब दितो, मीं अक कम कियुं ते तुस ओराना भोए। ²² एलहेरेलेई मूसे तुसन खतनेरो हुकम दितो (ऐना नेहीं कि मूसेरे तरफां ए बलकी बाप दादां कैरां च़लतो एवरोए) ते तुस सबतेरे दीहाड़े खतनो केरतथ। ²³ ज़ां की सबतेरे दीहाड़े मैनेरो खतनो केरो गहते ताके मूसेरे व्यवस्थारो हुकम ना ट्लटे, त तुस मीं पुड़ किजो क्रोध केरतथ कि मीं सबतेरे दीहाड़े अक मैन्हुं रोड़े च़ारे ठीक केरो। ²⁴ तुतग्र ओरता आदालत ना केरा बलकी ठीक ठीक आदालत केरा।

कुन यीशु ए मसीह ए

²⁵ त्ताली किछ यरूशलेम एरे राने बाले ज़ोने लाए, कुन ऐह तैह नेहीं ज़ैस मारनेरी कोशीश च़लोरी ए? ²⁶ पर तका ऐह त खूले आम गल्लाँ केरते ते कोई ऐस किछ ना ज़ोए। कुन सरदारेईं सच़े सच़ ज़ानू कि ऐह मसही ए? ²⁷ ऐस त अस ज़ानातम कि ऐह कोठेरो ए; पर ज़ैइस मसही एजेलो त कोई ना ज़ानेलो कि तै कोठेरो। ²⁸ तैखना यीशुए मन्दर ए मां तालीम देंते हक तेइतां ज़ोंव, तुस मीं ज़ानातथ; ते इना भी कि आंव कोठेरोईं; आंव एपू नेहीं औरो, पर मेरो भेज़ने बालो सच़्च़ो ए, तैस तुस ना ज़ानाथ। ²⁹ आंव तैस ज़ानाताई किजो कि आंव तैसेरे तग्रफाई ते तैनी आंव भेज़ोरोई | ³⁰ ऐस पुड़ तैनेइं तै ट्लानो चाव, फिरी भी केन्चे तैस्से सैहीं हथ ना लव किजो कि तैसरो वखत ओजू ना थु औरो। ³¹ फिरी भी भीड़ी मैरां बड़े लोकेईं विश्वास केरो, ते ज़ोने लाए, मसही ज़ै एजेलो ते ऐठां जाते चमतकार हीरालो ज़ैना ऐने हीराहे?

यीशु ट्लानी कोशीश

³² फरीसेईं लोकन कैरां तैसेरे बारे मां बल्ले बल्ले ऐना गल्लाँ केरते शूने; ते प्रधाना याजकेईं ते फरीसेईं तैस ट्लनेरे लेई सिपाही भेज़े। ³³ ऐस पुड़ यीशुए ज़ोवं; आंव थोड़े च़ीरे तग्र ओजू तुशै साथी, फिरी आंव अपने भेज़ने बाले का गानोई। ³⁴ त्ताली तैनीहीं तैस्से सैहीं ज़ोंव, ओ प्रभु ऐह रौट्टी ऐसना सर्वग एराँ तेतो रा। ³⁵ ऐस पुड़ यहूदी एपू मामेईं ज़ोना लाए, ऐह कोरा च़लोरे ज़ैराँ अस ना गेई बटम? कुन ऐह तैना का गालो ज़ैनाँ यूनाना एरेलोकना मां तितग्र बितग्रना, ते यूनाना एरे लोकन भी तालीम तेलो? ³⁶ ऐह कुन गल्लए ज़ै ऐने ज़ोई, कि तुस मीं तोपेले पर आंव तुसन ना मेल्लेलो; ते ज़ैड़ी आंव अई तैड़ी तुस ना एजी बटतथ?

ज़िन्दरे पैनेरे दरिया

³⁷ तीहरेरे आखरी दीहाड़े, ज़ै खास दीहाड़ी ए, यीशु खड़ो भोव ते ज़ोने लव अगर कोई ट्लाइशोरो भोए त मीं का एजे ते पीये। ³⁸ ज़ै मीं पुड़ विश्वास केरे ज़न्च़े पवत्र शास्त्रे मां औरूए तैसरे दले मां ज़िन्दगरो दरया निसेले। ³⁹ तैनी ऐह वचना पवत्र आत्मारे बारे मां ज़ोव; ज़ै तैस पुड़ विश्वास केरेने बालो तैस पुड़ एजने बाली थी किजो की आत्मा ओजो तग्र ना थु उतरोरो, किजो की यीशु ओजू तग्र अपनी महिमा तग्र ना थु पुज़ोरो |

⁴⁰ त्ताली भीड़ी मैरां किछेईं ऐना गल्लाँ शुनातां ज़ोंव, सच़े ई तै नाबी ए। ⁴¹ एलहेरेलेई यहूदी तैस पुड़ कुड़कुड़ाने लाए, किजो कि तैनी ज़ोवंरू थु , कि ज़ै रौट्टी स्वर्ग एराँ आवरी ए तै आव्वं आँई। ⁴² कुन पवत्र शास्त्र मां नेहीं लिखोरू कि मसीह दाऊद एरे खानादैनी मैरां ते बैतलम एरे ढ्लवें मैरां एजेलो, ज़ैड़ी दाऊद रातो थु? ⁴³ ते तैसेरे वजैजी सैहीं लोकन मां अनाबना भोई। ⁴⁴ किछ तैना मैरां तैस ट्लने चाहते थी, पर केन्चे तैस्से सैहीं हथ ना लव।

यहूदी अगवां केरो अविश्वास

⁴⁵ तैखना सिपाई बड़े याजकना ते फरीसना का आए,तैनेइं तैना सैहीं ज़ोंव, तुसेईं तै कि ना आनो? ⁴⁶ सिपेईं जुवाब दितो, केन्चे मैने कधी एरी गल्लाँ ना की। ⁴⁷ फरीसेईं तैना जुवाब दितो, कुन तुस भी टेपलोई जे? ⁴⁸ कुन सरदारना ते फरीसना मैरां केन्चे तैस पुड़ विश्वास करो ए? ⁴⁹ पर ऐना लोक ज़ैना व्यवस्था ना ज़ान्न लानातिना। ⁵⁰ नीकुतेमुसे ज़ै पैहीलो तैस का औरो थु, ते तैना मैरां अक थु तैनी ज़ोवं। ⁵¹ कुन इशी व्यवस्था केन्ची मैन्हुं ज़ां तग्र तैसेरे शुनाम ना कि तै कुन केरते, दोषी ठहरती इ? ⁵² तैनेइं तैस ज़ोवं कुन तु भी गलीलेरोस? तोप ते ओर गलीलेरा कोई नाबी त नेहीं निसने बालो?|

⁵³ (ततैखना सब अपने अपने घरे च़ले जे) |

बदचलनी माफी

¹ पर यीशु ज़ैतुनेरे पहाड़े पुड़ जेव। ² झ़ेझ़ाँ फिरी मनादरे मां अव; सरे लोक तैस कां आए ते तै बिश्ताँ तैना तालीम देंने लव। ³ त्ताली शास्त्री ते फरीसी एकी कुवानाशी ज़ै बुरे कम्मे मां ट्लैयोरी थी, तै मझ़टे खड़ी केरी ते यीशु सैहीं ज़ोंव, ⁴ ओ गुरू ई कूवानाश बुरू कम केरते ट्लोरी ए। ⁵ व्यवस्था मां मूसे ऐसना हूकम दितोरो ए कि ऐरी ज़ेरी कूवानाशी घोड़ेईं बाथ, ते तु ऐस कूवानाशरे बारे मां कुन ज़ोतस? तैनेइं तैस प्रखनेरे लेई ऐह गल्ल ज़ोई ताके तैस पुड़ दोष लाने जो गल्ल मैल्ले। ⁶ पर यीशु उन्ढे लिकतां एंगलोई सैहीं ज़मीनी पुड़ लिखने लव। ⁷ ज़ताली तैना तैस पुछ़ते राहे ,त तैनी सीधे भोइतां तैना सैहीं ज़ोंव, तुसन मैरां ज़ैनी पाप ना भोए केर्रर, तैए पेइहलो घोड़े बाए। ⁸ ते फिरी उन्ढे लिकतां एंगलोई सैहीं ज़मीनी पुड़ लिखने लव। ⁹ पर तैना ऐना शुन्ताँ निके बडे सारे अक अक नाशे, ते यीशु अक्लो राव, ते तै कुवानाश मझ़टे खड़ी राई। ¹⁰ यीशुए सिधू भोईतां ज़ोंव, ओ कुवानाश, तैना कोरां जे? कुन केन्चे तईं पुड़ सज़ारो हुकम ना दितो?। ¹¹ तै ज़ोती ओ प्रभू केन्चे नेहीं, यीशुए ज़ोवं आंव भी तईं सज़ारो हुकना ना तेईं, ते फिरी पाप ना केराँ।

यीशु संसारेरी लो

¹² यीशुए फिरी लोकन सैहीं ज़ोंव, संसारेरी लओ आंव आईं ,ज़ै मीं पत्ती एजेलो त तै आँधरे मां ना च़ल्लेलो, पर ज़िन्दगरी लओ हासल केरेलो। ¹³ फरीसेईं तैसैहीं ज़ोंव, तु अपनी गूवाही एपू तेतस तेरी गूवाही सच़्च़ी नेहीं, ¹⁴ यीशुए तैना जुवाब दितो, भला आंव अपनी गूवाही एपू तेताईं फिरी भी मेरी गूवाही सच़्च़ी ए, किजो कि आंव ज़ानाताई कि आंव कोठां एवरोइं ते कोराँ गाताई? पर तुस ना ज़ानाथ कि आंव कोठां एवरोइं ते कोराँ गाताई। ¹⁵ तुस शरीरेरे मुताबक आदालत केरतथ, आंव केंचेरी आदालत ना केरी। ¹⁶ ते अगर आंव आदालत केरी भी त मेरी आदालत सच़्च़ी ए, किजो कि आंव अकैल्लो नेहीं, पर आंव ते मेरो बाजीए; ज़ैनी आंव भेज़ोरोईं। ¹⁷ तुशी व्यवस्था मां भी लिखोरो ए कि दूय्य ज़नाँ केरी गूवाही मिलतां सच़्च़ी भोतीए। ¹⁸ अक त आंव अपनी गूवाही तेताईं, ते दुईयवं गूवाही ज़ैनी आंव भेज़ोरोईं। ¹⁹ तैनेइं तैस पुछ़ू तेरो बाजी कोड़ी ए? यीशुए जुवाब दितो, ना तुस मीं ज़ानातथ ना मेरे बाजी, अगर मीं ज़ानाते त मेरे बाजी भी ज़ानाते। ²⁰ ऐना गल्लाँ तैनी मन्दरे मां तालीम देते भन्डार घरे मां ज़ोई, ते केन्चे ना ट्लाव, किजो कि तैसरो मोको ओजू ना थु औरो।

अपने बारे मां यीशु एरू बीयान

²¹ तैनी फिरी तैना सैहीं ज़ोंव, आंव ज़ानाताई कि तुस मीं तोपेले ते अपने पापना मां मरेले; ज़ैड़ी आंव गाताई तैड़ी तुस ना एजी बटथ। ²² ऐस पुड़ युहूदैइं ज़ोंव, कुन ऐने अपनो आप मारनोए, ज़ैना ज़ोते कि ज़ैड़ी आंव गाताई तैड़ी तुस ना एजी बटतथ? ²³ तैनी तैना सैहीं ज़ोंव, तुस बुनायेथ, आंव बेइयोई, तुस संसारेरथ, आंव संसारेरो नेहीं। ²⁴ एलहेरेलेई मीं तुसन सैहीं ज़ोरू थु कि तुस अपने पापना मां मरेले, किजो कि अगर तुस विश्वास ना केरेले कि आंव तैएईं त अपने पापना मां मरेले। ²⁵ तैनेइं तैस ज़ोंव, तु कौनास? यीशुए तैन सैहीं ज़ोवं; ज़ैना शूरू कैरां ज़ोतो एवरोइं। ²⁶ तुशै बारे मां बड़ू किछ ज़ोनू ए ते फेसलो केरनो ए, पर मेरो भेज़ने बालो सच़्च़ो ए, ते ज़ैना मीं तैस कैरां शुनोरूए तैनी संसारे सैहीं ज़ोतांइ। ²⁷ तैनेइं ऐना ना समझ़ू कि ऐसना सैहीं बाजी केरे बारे मां कुन ज़ोने लावरोए। ²⁸ त्ताली यीशुए ज़ोवं ज़ताली तुस मैनेरे मठ्ठे उचे पुड़ च़ाड़ेले, त ज़ानेले कि आंव तैएईं, आंव अपने आपे सैहीं किछ ना केरी बेटी ज़ैंच़रे मेरो बाजी मीं शीखालते तैन्च़े ऐना गल्लाँ केरताई। ²⁹ मेरो भेज़ने बालो मीं साथी ए तैनी आंव आकैल्लो नेहीं शारो रो किजो कि आंव हमेशा तैना कम केरताई ज़ैस सैहीं तै खुश भोते। ³⁰ तै ऐना गल्लाँ ज़ोई रावरो थु किछ लोकेईं तैस पुड़ विश्वास केरो।

सच़्च़ तुस्न आज़ाद केरेलू

³¹ त्ताली यीशुए तैना यहूदन सैहीं ज़ैनीहीं तैस पुड़ विश्वास केर्रो थु, ज़ोंव, अगर तुस मेरे वचने मां बनेरे राले, त सच़्च़े मेरे चेले भोले। ³² तुस सच़्च़ ज़ानेले ते सच़्च़ तुसन आज़ाद केरेलू। ³³ तैनेइं तैस जुवाब दितो, अस त आब्रहम एरे आवलादी मरम, ते कधी केन्चेरे गुलाम नेहीं भोरे; फिरी तु कैंच़रे ज़ोतस कि तुस आज़ाद भोले? ³⁴ यीशुए तैना जुवाब दितो, आंव तुसन सैहीं सच़ सच़ ज़ोतांइ कि ज़ै कोई पाप केरते तै पापेरो गुलामे। ³⁵ गुलाम हमेशा घरे ना रेई बटे, मठ्ठू हमेशा राते। ³⁶ एलहेरेलेई अगर मठ्ठू तुसन आज़ाद केरे त सच़्च़े तुस आज़ाद भोले। ³⁷ आंव ज़ानाताई कि तुसा आब्रहमेरे आवलादी मरथ,फीरी भी मेरे वचने अपने दले मां ठार ना तेथ, एलहेरेलेई तुस मीं मारने चतथ। ³⁸ आंव तैनी ज़ोतांइ ज़ैना अपने बाजी केरे ओर्रू ए, ते तुस तैनी केरतथ ज़ैना तुसेईं अपने बाजी कैरां शुनोरूए।

³⁹ तैनेइं तैस जुवाब दितो; इषो बाजी त आब्रहमे; यीशुए तैना सैहीं जोंव, अगर तुस आब्रहमेरे आवराधी मैरां भोथे त आब्रहमेरां ज़ेराँ कम्माँ केरेथ। ⁴⁰ पर तुस मेरे ज़ेरे मैन्हुं मारने चहतथ; ज़ैनी तुसन तैना सच़्च़ो वचना ज़ोए ज़ै परमेशर ए कैरां शुनू; एरू त आब्रहामे ना थु केररू। ⁴¹ तुस अपने बाजेराँ ज़ैराँ कम्माँ केरतथ. तैनेइं तैस्से सैहीं ज़ोंव, अस ज़नाह ए सैहीं नेहीं ज़रमोरे, इशो अके बाजी ए मतलब परमेशर। ⁴² यीशुए तैना सैहीं ज़ोंव, अगर परमेशर तुशो बाजी भोथो, त तुस मीं सैहीं पयार केरेथ; किजो कि आंव पपरमेशरेरे तरफां एवरोईं; आंव अपने तरफां नेहीं एवरो, बलकी तैनी भेज़ोरोई। ⁴³ तुस मेरी गल्ल किजो ना समझ़थ? एलहेरेलेई कि तुस मेरो वचना ना शूनी बटतथ। ⁴⁴ तुस अपने बाजी शौताना एरेथ ते तैसेरी मरज़ी पूरीकेनी चहतथ।तै त शूरू कैरां खूनी ए ते सच़्च़े पुड़ ना राव, किजो कि सच़्च़ तैस मां अथी नेहीं।ज़ताली तै झूठ ज़ोते त अपनू ज़ेरू ज़ोते; किजो कि तै झूठो बलके झूठेरो बाजी ए। ⁴⁵ पर आंव सच़्च़ ज़ोतांइ तांए तुस मेरो विश्वास ना केरथ। ⁴⁶ तुसन मां मीं कौना पापी ठहरते ?अगर अव सच़्च़ ज़ोतांइ त फीरीमेरो विशवास की ना केरथ? ⁴⁷ ज़ै परमेशरेरे तरफां भोते तै परमेशर एरी गल्लाँ केरते, ते तुस एलहेरेलेई ना शुनाथ कि परमेशरेरे तरफां नेहीं।

यीशु ते अब्राहम

⁴⁸ ऐना शुनतां युहूदैइं तैस्से सैहीं ज़ोंव, कुन अस ठीक ना थी ज़ोते कि तु सामरीस, ते तीं मां गंदी आत्माए। ⁴⁹ यीशुए जुवाब दितो, मीं मां गंदी आत्मा नेहीं, पर आंव अपने बाजी एरी इज़त केरताई, ते तुस मेरी निरादर केरतथ। ⁵⁰ पर आंव अपनी बडीयाई ना चैई, हाँ अके ज़ै चाते ते आदालत केरते। ⁵¹ आंव तुसन सैहीं सच़ सच़् ज़ोतांइ कि ज़ै कोई मैन्हुं मेरे वचने पुड़ च़ले तै कधे मौती ना लालो। ⁵² यहूतेई तैस्से सैहीं ज़ोवं हुनी त ऐससेईं भुझ़ू, कि तीं मां गंदी आत्मा ए; आब्राहाम ते नाबी भी मरे, ते तु ज़ोतस,अगर कोई मेरे वचने पुड़ च़ले त तै कधी मौतरो सूवाद ना च़खेलो। ⁵³ ईशो बाजी आब्रहम मरो, कुन तु तैस कैरां भी बडडोस? ते नाबी भी मरे, तु अपने आपे कुन ठहरातस? ⁵⁴ यीशुए जुवाब दितो, अगर आंव अपनी महिमा केरी त मेरी महिमा किछ भी नेहीं; पर मेरी महिमा केरने बालो मेरो बाजी ए, ज़ैस तुस ज़ोतथ कि तै तुशो परमेशरे। ⁵⁵ तुसेईं त तै ना ज़ानो, पर आंव तैस ज़ानाताई; अगर आंव ज़ोइं कि तैस ना ज़ैनी, त तुशो ज़ैरो झूठो भोंई; पर अवतैस ज़ानाताई ते तैसेरे वचने पुड़ च़लताई। ⁵⁶ तुशो बाजी आब्राहम मेरी दीहाड़रे ऊमीदी पुड़ बड़ी खुख थु ते तैनी ओरो ते खुश भोव। ⁵⁷ युहूदैइं तैस्से सैहीं ज़ोवं, ओजू तु पज़ा साला केरो भी नेहीं भोवरो फिरी भी तीं आब्राहम लावरो ए? ⁵⁸ यीशुए तैना सैहीं ज़ोंव, आंव तुसन सैहीं सच़ सच़ ज़ोतांइ की इठां पैहीलो आब्राहम पैइदा भोव, आंव आंहीं। ⁵⁹ त्ताली तैनेइं तैस मारनेरे लेई घोड़ सल्हे, पर यीशु छ़ेपतां मन्दरे मैरां निसी जेव।

जन्मेरे अंधे लो देंनी

¹ गहंते तैनी अक मैन्हुं लाहु ज़ै ज़रमनेरो कानो थु। ² तैसेरे चेलेईं तैस पुछू, ओ रब्बी केने पाप केरो कि ऐह कानो ज़रमो, ऐने मैने की ऐसेरे अम्माँ बाजे? ³ यीशुए जुवाब दितो, ना ऐने पाप केरो ना ऐसेरे अम्माँ बाजे, पर ऐना एलहेरेलेई भोव कि परमेशर एराँ कम्माँ ऐस मां लेईहोना। ⁴ ज़ैनी आंव भेज़ोरोई,ऐसेइं कम दीहैड़ना मां केरनू ज़रूरी ए, तै रात एजने बाली ए ज़ैस मां कोई भी कम ना केरीबटे। ⁵ ज़ां तग्र आंव दुनीयाई मां अई दुनीयारी लोअई। ⁶ ऐना ज़ोईतां तैनी ज़मीनी पुड़ थुकू, ते तैस थुके सैहीं मिती सन्नी, ते तै मिती कानेरे एछ़ना पुड़ लाइतां। ⁷ तैस्से सैहीं ज़ोवं ग शीलोकेरे कुंडे मां धो, (शीलोकएरो मतलब भेज़रो) तैनी गेईतां धोई, ते तकतो वापस आव। ⁸ त्ताली पुड़ोसेईं त ज़ैनीहीं भीक मगतो लावरो थु; ज़ोने लाए कुन ई तैए मैन्हुं ज़ै पैहीलो बिश्ताँ भीख मगतो थु? ⁹ किछ मैन्हुं ज़ोने लाए; ई तैए, होरेईं ज़ोवं नेहीं तैसेरो ज़ेरो कोई होरो भोनो ए, तैनी ज़ोंव, आंव तैएंई। ¹⁰ त्ताली तैना तैस लाए पुछ़ने लाए, तेरी एछ़ी केन्चाँ खूल्ली? ¹¹ तैनी जुवाब दितो; यीशु नावेरो अके मैने मिती सान्नी; ते मेरी एछ़्छ़न पुड़ लाइतां ते मीं सैहीं ज़ोवं; ग शीलोहए मां गाएइतां धो, ते आंव ज़ेव ते धोई ते तकने लाहु। ¹² तैनेइं तैस पुछ़ू; तै कौने? तैनी ज़ोवं मीं नेहीं पतोत।

फ्रिसी च़ंगैयरी जंच पड़पाल केरतन

¹³ लोकेईं तै ज़ै पैहीलो कानो थु फरीसना का ऩेव। ¹⁴ ज़ैस दिहाड़े यीशुए मित्ती़ सेनातां तैसेरी एछ़ी खोलोरी थी, तै स्ब्तेरी दीहाड़ी थी। ¹⁵ फीसेईं भी तैस पुछ़ू; कि तैसेरी एछ़ी केनाच़ाँ खूल्ली; तैनी तैना सैहीं ज़ोंव, तैनी मेरी एछ़्छ़ना मां मित्ती लाई, फीरी मीं धोई, ते हूनी लाताई। ¹⁶ ऐस पुड़ किछ फरीसी ज़ोने लाए, ऐह मैन्हुं परमशर तरफां नेहीं; किजो कि ऐह सब्तेरी दीहाड़ी ना मन्ने; होरेईं ज़ोवं; पापी मैन्हुं एरे चमतकार कैंच़रे हीरेई बटते? ते एपू मामेईं अना बना भोई। ¹⁷ तैनेइं काने फीरी पुछ़्छ़ू; जैने तेरी एछ़ी खोलोरना; तु तैसेरे बारे मां कुन ज़ोतस? तैनी ज़ोवं तै नाबीए।

¹⁸ पर यहूदन विश्वास ना भोवं कि तै कानो थु ते हूनी लाते; ज़ां तग्र तैनेइं, तैसेरे अम्मा बाजी ना कूजे। ¹⁹ तैना पुछ़ू, कुन ऐना तुशू मठठू-ए; ज़ैस तुस ज़ोतथ कि कानू ज़रमोरू थुं? ²⁰ तैसेरे अम्मा बाजीए जुवाब दितो; असाँ त ज़ानातम कि ऐना इशू मठठू ए; ते कानू ज़रमोरू ए थु। ²¹ पर अस इना ना ज़ानाम कि आज़ कैंच़रे लाते; ते इना ज़ानाम की केने ऐहसेरी एछ़ी खोल्ली; ऐना हूनी बड़ुए ऐस पुछ़ा; ऐह अपने बारे मां एपू ज़ोलो। ²² ऐनां गल्लाँ तैसेरे अम्मा बाजी ए एलहेरेलेई ज़ोई तैना यहूदन कैरां डरते थी; किजो कि यहूदी सारे अक भोवरे थी कि अगर कोई जोए कि ऐह मसीह ए त तै मन्दरे मैरां कढो गाए। ²³ एलहेरेलेई तैसेरे अम्मा बाजे ज़ोव; ऐह बडोए, ऐसे पुछ़ा | ऐनां गल्लाँ तैसेरे अम्मा बाजी ए एलहेरेलेई ज़ोई तैना यहूदन कैरां डरते थी; किजो कि यहूदी सारे अक भोवरे थी कि अगर कोई जोए कि ऐह मसीह ए त तै मन्दरे मैरां कढो गाए।

²⁴ त्ताली तैस मैन्हुं ज़ै कानो थु; दुईयवं बार कूजेइतां ज़ोवं; परमेशर एरी स्तूती केर। अस ज़ानातम तैह मैन्हुं पापी ए। ²⁵ तैनी जुवाब दितो; आंव ना ज़ैनी कि ऐह पापी की नेहीं; आंव अक गल्ल ज़ानाताई कि आंव कानो थु हूनी लाताई। ²⁶ तैनेइं तैस पुछ़ू, देंने तीं सैहीं कुन कियुं? तैनी केंच़रे तेरी एछ़्छी खूल्ली? ²⁷ तैनी तैना सैहीं ज़ोंव, मीं त तुस्न सैहीं ज़ोवरू ए; ते तुसेईं ना शुनू; हूनी दुईयवं बार किजो शुनू चहतथ? कुन तुस भी तैसेरे चेले बन्ने चहतथ? ²⁸ त्ताली तैना तैस बुरू भलू ज़ोने लाए; तुए तैसरो चेलोस; अस त मूसेरे चेलेम। ²⁹ अस ज़ानातम परमेशर ए मूसे सैहीं गल्लाँ की; पर ऐस ना ज़ानाम कि ऐह कोठेरो ए। ³⁰ तैनी तैना जुवाब दितो; ऐह त बड़ी बडी गल्ले कि तुस ना ज़ानाथ कि ऐह कोठेरो ए; फिरी भी तैनी मेरी एछ़्छी खोल्ली। ³¹ अस ज़ानातम की परमेशर पैपी केरी ना शूने, पर कोई परमेशर एरो भगत भोए त तैसेरे मेरज़ी पुड़ च़लतो भोए; त तै तैसेरी शूनाते। ³² संसारेरे शूरू कैरां कधे शूने मां नेहीं आवरू कि केन्चे ज़रमनेरे कानेरी एछ़्छी खोल्ली; ³³ अगर ऐह मैन्हुं परमेशरेरे तरफां ना भोथो त किछ ना केरी बटेतथो। ³⁴ तैनेइं तैस ज़ोवं तु त बिलकूल पापना मां ज़रमोरोस, तु ऐसना शखालतस? ते तैनेइं तै बेइरोवं कढढो |

आत्मिक कैनार

³⁵ यीशुए शुनू कि तै बेइरोवं कढढोरो ए, ते ज़ताली तैस्से सैहीं मुलाकात भोई, त तैस्से सैहीं ज़ोवं; कुन तु परमेशरेरे मठ्ठे पुड़ विश्वास केरतस? ³⁶ तैनी तीस जुवाब दितो; ओ प्रभु तै कौने आंव तैस पुड़ विश्वास केरी? ³⁷ यीशुए तैस्से सैहीं ज़ोंव, तीं तै लवरो भी आए; ते ज़ै तीं सैहीं गल्लाँ केरी रावरोए तैए। ³⁸ तैनी ज़ोवं ओ प्रभु आंव विश्वास केरताई, ते तैस का मथो टेको। ³⁹ त्ताली यीशुए ज़ोवं आंव ईस संसारे मां आदालत केरने एवरोइं; ज़ै ना लाए तै लाए; ते ज़ैना लातना तैना काने भोना। ⁴⁰ ज़ैना फरीसी तैस साथी थी तैनेइं ज़ोवं; कुन अस भी कानेम? ⁴¹ यीशुए तैना सैहीं ज़ोंव, अगर तुस काने भोथे त पापी ना भोथे; पर हूनी ज़ोतथ कि अस लातम; एलहेरेलेई तुशो पाप बनोरो राते |

पुहाल ते भैडां केरू द्रष्टान्त

¹ आंव तुसन सैहीं सच़ सच़ ज़ोतांइ, कि ज़ै कोई दारेरे बत्ताँ बाड़े मां ना गाए; पर होरी बत्ताँ गहते; तै च़ोर ते डैकू ए। ² पर ज़ै दारेरे बत्तां गहते तै भैडां केरो पूहाले। ³ तैसेरे लेई दरबाना दार खोलते; ते भैडां तैसेरी गल्ल शुतिना; ते तै एपनी भैढना नोवें सैहीं कूजाते ते बेइर ऩेते। ⁴ ज़ताली तै एपनी सैरी भैडां बेइर कढते; त तैना केरे अगरी अगरी च़लते; ते भैडां तैस पत्ती पत्ती गैतिना; किजो कि तैना तैसेरी आवाज़ पिशैनचन। ⁵ पर तैना बखले पत्ती ना गैली; पर तैस कैरां नाशेली; किजो कि तैना बखलेरी आवाज़ ना पशांन्ण। ⁶ यीशुए तैना सैहीं कहैनी ज़ोई; पर तैनेइं ना समझ़ू कि ऐना कोना गल्लना ज़ैना तै ऐसना सैहीं ज़ोते। ⁷ तैखना यीशुए तैना सैहीं फिरी ज़ोवं; आंव तुसन सैहीं सच़ सच़ ज़ोतांइ भैडां कियुं दार आंव आंई। ⁸ ज़ैतरे मीं कैरां पेइले आए सब च़ोर ते डैकूना; पर भैतेईं तैना केरी ना शूनी। ⁹ दार अवएंई; अगर कोई मेरे ज़िरीए आन्तर गालो; त मुखती पालो, ते आन्तर बेईर एईतो गालो ते खूराक पालो। ¹⁰ च़ोर होरी कोन्ची कमेरे लेई ना एजे; बलकी च़ोरी केरने ते मारने ते खतम केरने एईते; आंव एलहेरेलेई औरोंई कि तैना ज़िन्दगी मैल्ले ते हछ्छी मैल्ले। ¹¹ रोड़ो पूहाल अवएंई; रोड़ो पूहाल भैडां केरे लेई अपनी जाना देते। ¹² मज़दूर ज़ै ना पूहाल ए ना भैडां केरो मालक ए गीदाँ एइतां लेईतां नाशते; ते गीद तैना ट्लते ते तितग्र बितग्र केरते। ¹³ तै एलहेरेलेई नाशते कि तै मज़दूरे; ते तैस भैडां केरी फीकर नेई। ¹⁴ रोड़ो पूहाल आंव आंई; आंव एपनी भैढना पिशानाताईं; ते मेरी भैडां मीं पिशैतिना। ¹⁵ ज़ैंन्च़ाँ बाजी मीं ज़ानाते, तैन्च़े आंव भी तैस ज़ानाता; ते आंव भैडां केरे लेई अपनी जाना तेताई। ¹⁶ मेरी होरी भी भैढना; ज़ैना इस बाड़े मां नेहीं; मीं तैना भी ऐन्नी ज़रूरीना; तैना मेरी आवाज़ शूनेली; फिरी आके डेरो ते आके पूहाल भोनोए। ¹⁷ बाजी एलहेरेलेई मीं सैहीं पयार केरते कि आंव अपनी जाना तेताई कि तैस फिरी नेहीं। ¹⁸ कोई तैस मीं कैरां थसोड़े ना; पर आंव ऐस एपू तेताईं; मीं तैस तेनेरू भी हके ते नेनेरू भी हके; ऐह हकम मीं मेरे बाजी कैरां मैलोरोए। ¹⁹ एना गल्लना पत्ती यहूदन मां फिरी अना बना भोई। ²⁰ तैना मैरां बड़े ज़ोने लाए; तैस मां गंदी आत्मा ए; ते तै पागल ए; तैसेरी किजो शुनातथ? ²¹ होरे लोकईं ज़ोवं; ऐना गल्लाँ एरे मैनेरी नेहीं ज़ैस मां गंदी आत्मा भोए; कुन गंदी आत्मा कांना केरी एछ़ी खोली बटतीए।

यहूदी केरो अविश्वास

²² यरूशलेम मां तीहार भोवं; ते हीवतड़ेरो मोसम थु। ²³ यीशु सूलीमानी मन्दरेरे ब्रामतेरे अंगने मां हंठने फिरने लगोरो थु। ²⁴ त्ताली युहूदैइं तै घेरो ते पु़छ़ू; तु केईस तग्र इशे दले डामाडोल केरतस? अगर तु मसीहस्स त ऐसना सैहीं साफ साफ ज़ओ। ²⁵ यीशुए तैना जुवाब दितो; मीं तुसन सैहीं ज़ोवं पर तुस विश्वास ना केरथ। ज़ैनाँ कम्माँ आंव अपने बाजी केरे नोवें सैहीं केरताईं तैना मेरे गूवाह अना। ²⁶ पर तुस एलहेरेलेई विश्वास ना केरथ कि मेरी भैढना मरा नेहीं। ²⁷ मेरी भैडां मेरी आवाज़ शुनातीना; आंव तैना ज़ानाताई,ते तैना मीं पत्ती पत्ती च़ेलतीना। ²⁸ ते आंव तैना हमेशारी ज़िन्दगी तेताई; तैना कधी खतम ना भोली; ते कोई तैना मेरे हथे मैरां थसोड़ी ना बटे। ²⁹ मेरो बाजी; ज़ैनी तैना मीं दितोतिना; सैभना कैरां बडोए; ते कोई तैना बाजी केरे हथे मैरां ना नेई बटटे। ³⁰ आंव त बाजी अकेम ए।

³¹ युहूदैइं तैस घोड़ैव देंनेरे लेई घोड़ सल्हे। ³² ऐस पुड़ यीशुए ज़ोंव,; मीं अपने बाजी केरे तरफां बड़ाँ रोड़ाँ कम्माँ हीराँ; तैना मैरां कोस कम्मेरे लेई घोड़ैव तेतथ? ³³ युहूदैइं तैस जुवाब दितो; रोड़ाँ कम्माँ केरे लेई अस तीं पुड़ घोड़ैव नेहीं केरने लावरे; पर परमेशर एरी निन्दा केरनेरे लेई; एलहेरेलेई कि मैन्हुं भोइइतां अपनो आप परमेशर बनातस। ³⁴ यीशुए तैना जुवाब दितो; कुन तुशी व्यवस्था मां ऐना नेहीं लिखोरू; मीं ज़ोवं तुस ईश्वरथ? ³⁵ अगर तैनी तैना ईश्वर ज़ोवं ज़ैना का परमेशर एरो वचना पुज़ो (ते पवित्रशास्त्र एरी कोई भी गल्ल ना टल्ले)। ³⁶ त ज़ै बाजे पवित्र ठैरेहीतां संसारे मां भेज़ो; तुस ज़ोतथ; कि, तु निन्दा केरतस, एलहेरेलेई मीं ज़ोंव, आंव परमेशरेरू मठ्ठूई। ³⁷ अगर आंव अपने बाजी कियुं कम ना केरी; त मेरो विश्वास ना केरा। ³⁸ पर आंव केरताई; त चाए मेरो विश्वास ना भी केरा; पर तैना कम्मां केरा, ताके तुस ज़ानाथ ते समझ़थ कि बाजी मीं मां ए ते आंव बाजी मां। ³⁹ तैनेइं फिरी तैस ट्लनेरी कोशीश केरी पर तै तैना मांमेईं निसी जेव।

⁴⁰ फीरी तै यरदनेरे पार तैस ठैरी जेव; ज़ैड़ी यहून्ना पेईले बपतीसमें तेतो थु; ते तैड़ी राव। ⁴¹ बड़े लोक तैस कां एइतां ज़ोते थी; यहूनाए त कोई नीशाना ना हीराव; पर ज़ैना किछ यहूनाए ऐसेरे बारे मां ज़ोवं; तैना सब सच़ थुं। ⁴² ते तैड़ी बड़ेईं यीशु पुड़ विश्वास केरो।

लाज़रेरी मौत

¹ अक मैंन्हू ज़ेसेरु नोवं लाज़र थुं ते बेतनिया मां रातो थु ज़ेह मरयम ता तेसारी बेहिना मरथारु ड्लांव थुं ² ऐह मरियम ज़ेसारो ढ्ला लाज़र थुं बीमार भेवरो थु ऐह तैहे कोंश थी ज़ेसां परमेशरे दोगे फिरी पुड़ अतग्र छ़ाडरो थु अपने दोगे सैहीं तैसेरे पाव पोंछ़़ोरे थिये | . ³ तैना दिओड़ेइं यीशु का अक बिस्तार भेज़ो ऐह परमेशर ज़ेसैहीं तु पियार केरतां बीमार भेवरोए ⁴ ज़ैखन यीशुऐ एना शुनू ता ज़ोंने लगो ऐह बमारी मरनेरे लेई नेहीं बल्के परमेशरी मेम्हा रे लेईए ताके एसेरे ज़िरयओ परमेशरे मट्ठेरी मेह्मां बंदी भोऐ

⁵ यीशु मरथा मरियम ते लाज़रे सैहीं पियार केरतो थु ⁶ फिरी भी ज़ैखन यीशुओ शुनु की लाज़र बमारे ते दुई दिहाङे फिरभी ना जेव तैड़ी बीशो ⁷ फिरी तेंनी अपने चेलन सैहीं ज़ोंव एजा अस वापस युहुदिए गह्म ⁸ तैना ज़ोंने लगे पण एह गुरु जी थोड़े च़ीर पेहिले युहुदी तुस्न झ़ुसने चाते थिये ते तु फिरी तैड़ी गंनु चातां ⁹ यीशुए जुाब दितो कुन दिहैड़ी मां बारओ घेंटे ना भोंना ज़ै मेंनु दिसां च़लते तैस ठोकर ना लगे एल्हेरलेई की तै दुनियारी लौ हेरी सकते . ¹⁰ पण अगर तै राती च़लते ता अंधरे मां तैस ठोकर लगचै ¹¹ ज़ैखन तैनी ऐना ग्ल्लां ज़ौई छ़ैडी ता ते अपने चेलेना सैहीं ज़ोंने लगो ईशो दोस्त लाज़र झ़़ुलोरोए पण आंव तैस बीझांने च़ालोंरोंइ ¹² तैसेरे चेले ज़ोंने लगे एह परमेशर अगर तैस निड्ल अई ता ते बेझ़ौई गहते ¹³ यीशुए लाज़रेरे मरनेरे बारे मां ज़ैवरू थुं पण तैसेरे चेलेइं बुझ़ु की तेलओरो मतलब आरांमेरी निड्लएह ¹⁴ एलओरेलेइ तैनी तैना रोड़ेच़ारे ज़ौवं की लाज़र मैरी जेवरोए ¹⁵ आंव तुशी वजाही सैहीं बड़ो खुशीं की आंव तैड़ी ना थुओ हुनी तुस मीं पुड़ अतबार केरले इजा हुनी असां सका गांम ते. ¹⁶ तैखन तौमां हौरी चेलना सैहीं ज़ोंने लगो एजा असां भी तेस्सेहीं साथी मरनेरे लेइ गांम

यीशु कयामत ते ज़िन्दगी

¹⁷ तैड़ी पुज़तां यीशुए पत्तो लगो की लाज़र दब्बोरे च़ैवर दिहाड़े भेवरेना ¹⁸ बेतिन्या युरोश्ल्मेरां कोई दुई मील दुर थुं ¹⁹ बड़े यहुदी मरथा ते मरयमीं का तैन्केरे ढ्ला लाज़रेरे मरनेरां पत्ती तैना भरोसो देंने एवरे थिये ²⁰ ज़ैखन मरथां शुनू की यीशुएवरोए तै तेस्सेहीं मिल्नेरे लेई बेइर निसी पण मरियम बेइर ना निसी ²¹ मरथा यीशुए सैहीं ज़ोंने लगी एह परमेशर अगर तु इड़ी भोथो ता मेरोढ्ला ना थु मरनों ²² पण आंव ज़ांनातीयहीं की ज़ैना किछ तु परमेशरे कैरां म्गेलो तै तीं तेलो . ²³ यीशुए तैस ज़ोंव तेरो ढ्ला फिरी ज़ींतो भोई गंनोए ²⁴ मरथां जुवाब दितो आंव ज़ानातीं तै अखिरी कियामतारे दिहाड़े ज़ींतो भोई गंनोंएं ²⁵ यीशुए तैस ज़ोंव कियामत ता ज़ीन्दगी आंवेंइ जै मीं पुड़ भरोसो रखते तै मरनेरां बाद भी ज़ींतो रांनोए ²⁶ ते जै कोई ज़ींतोए ते जै मीं पुड़ विश्वास केरते कधे ना मरेलो कुन तु इस पुड़ विश्वास रखतिस ²⁷ मरथां जवाब दितो हां परमेशर मेरो विश्वास तुसन पूड़े की तु परमेशरेरू मट्ठुस जै दुनियाई मां एजने बालो थुओ |

यीशु ए लेरां दिती

²⁸ ज़ैखन तेसां एह गल ज़ोइ ता तै वापस च़ली जेई ते मरयम कनारे कुजेइतां ज़ोने लगी गुरूजी एवरेना ते तीं कुजाने लगोरेना . ²⁹ जेखना मरियमां एना शुनू ता तै लुशी उठ्तां यीशु सैहीं मिलने च़ली जेई ³⁰ यीशु ओजु ड्लौंवें मां ना थु पूज़ोरो ओजु तेङी थु ज़ेङी मरथा तेस्सेहीं मिलोरी थी ³¹ तैखन तैना युहुदी ज़ैना मरियामी भरोसो देंने लोरे थिये मरियम लुशी कड़ी उठ्तां बेइर जेई ता तेनां भी तैस पाती बेइर जे की भोई स्सखते एह लेरां देंने कबरी पुड़ च़लोरिए ³² ज़ैखन मरियम तैस ठारी पुज़ी ज़ेड़ी यीशु थुओ तैस लेइतां तै तैसेरे पंवना पुड़ बिछ़ड़ी जेई ते ज़ोने लगी एह परमेशर अगर तु इड़ी भोथो ता मेरो ढ्ला ना थु मरनो | ³³ तैखन यीशुए तै ते तैससैहीं साथी एजने बाले यहूदी लेरां देंते लाओ तैस दिले मां बड़ो दुःख भोव | ³⁴ ते पुछ़ु तुसैहीं लाज़र कोड़ी रखोरोए तैना ज़ोने लगे असना सैहीं साथी एई ते एपू ओर | ³⁵ यीशुएरे एच्छ़ना मां एंखु भेरोई जेयां | ³⁶ एना ओरतां युहुदी ज़ोने लगे हेरा लाज़र एस केतरो ट्लारो थियो | ³⁷ पण तैना मेरां किछ ज़ोने लगे की ज़ैनी कंनेरी एछ़ी बझ़ेइ एतरू ना केरी बट्टू की लाज़रे मरने कैरां बच़ाथो |

लाज़र ज़ींतानों

³⁸ यीशु दुखी दिले सैहीं कबरी का आव एह अक लार ज़ेरी थी जैस पुड़ बेंधोरां अक घोड़ छ़ाडौरो थियो | ³⁹ यीशु ज़ोने लगो एह घोड़ खड़ो केरा मरथा ज़ै लाज़री बेईना थी तै ज़ोने लगी एह परमेशर एस्मेरां ता मुश्क लोरीए एजने किजोकी एस च़ेवर दिहाड़े दबोरे भेवरेना | ⁴⁰ यीशु ज़ोने लगो कुन मी तुसन ना थुं ज़ेवरू की अगर तेरो विश्वास भोलो ता तु परमेशरी महिमा ओरेली | ⁴¹ तेनेई घोड़ खड़ो कियो ते यीशुए एछ़ी उबरी केरतां ज़ोने लगो एह परमेशर आंव तिका मीनात केरतां की तीं मेरी दुवा शुनी | ⁴² आंव ज़ानातांइ की तु मेरी दुवा शुन्तास पण आंव एना लोकां केरे लेइ ज़ैना च़वरे पासना खेड़ोरेना एना ज़ेवरु थुं की ऐना भी विश्वास केरन | ⁴³ एना ज़ोनेरां पत्ती यीशुए ज़ोरे सैहीं ज़ोंव लाज़र बेइर निस | ⁴⁴ ते तै मुओरो लाज़र बेइर नीसो तैसेरे हथ पाव काफ्ने सैहीं बंधोरे थिये ते दोगे अक रुमाल बंधोरो थु यीशुए तैना ज़ोंव एस खोल्ला ते एस गंने तेथ |

यीशु एरे खलाफ साजिस

( मत्ती 26 : 6 -5 ;मरकुस 14 : 1 , 2 ; लूका 22 : 1 , 2 )

⁴⁵ बड़े युहुदी ज़ैना मर्यामी सैहीं मिलने एवरे थिये यीशुएरो एह तमाशो ओरतां तैस पुड़ विश्वास कियो | ⁴⁶ पण तैना मेरां किछेंइ फ्रिस्न का गेईतां सभ तगर शुनावं ज़ैना यीशुए कियेरू थुं | ⁴⁷ एह फीरी सरदार कहिना ते फ्रिसेंइ अदालत अलियारो अजलास कुजाव ते ज़ोने लगे अस कुन लोरेम केरने एह मेनू ता इड़ी अजीब अजीब कमां लोरोए केरने | ⁴⁸ अगर असां एस इंच़रे छ़ेडी तेमेले ता सेभी लोकेंई तैस पुड़ विश्वास केरनोंए ते फिरी रुमेंई इड़ी एइतां ईशे मांदर ता इशी कोमं दुइने पुड़ कब्ज़ो केरनोए | ⁴⁹ तैखन तैना मेरां अक ज़ैसेरु नोवं कैफा थुं ज़ै तैस साल मांदरेरो पुजारी थु ज़ोनेल्गो तुस लोक किछ़ ना ज़ांनाथ | ⁵⁰ तुसन एह पत्तो लोड़ तो थु की खरु कुने लोकां केरे लेइ अक मेंनु मरो गाओ ना की सारी क़ोम मारी गाओ | ⁵¹ एह गल तैनी अपनी भोंती ना थी ज़ेवरी पण तैस साल ज़ै कहिना थु तैसेरी तग्रफां ज़ेवरू थुं की यीशु सेरी युहुदी कोमरे लेइ अपनी जाना तेलो | ⁵² तै सिर्फ़ युहुदी कोमरे लेइ नेहीं पण एल्हेरे लेइ परमेशरे सारे लोक ज़ैना इरां उरां जेवरेना अकोठे केरतां अक बडी क़ोम बनाए | ⁵³ बसा तैनेइं तैना दिओड़ना बाद यीशुएरे कतल केरनेरी तियारी शुरू की |

⁵⁴ एसेरां बाद यीशुए युहुदीना मां च़लनु फिरनु छ़़ाडु ते बियाबानेरे अलाके अफरायम शहरे मां जेव ते अपने चेलना सैहीं साथी राने लगो |

⁵⁵ तेईस युहुदी केरी ईद फसी नेड़ै अई ता बड़े लोक आस पसेरे आलाकना मेरां युरोश्ल्मे मां जो एजने लगे ताके ईद फसी कैरां पेहिले एपनी सफेयरी सेरी रस्मा पूरी भोन | ⁵⁶ तैना यीशु तोपते थिये तेईस तैना मांदरे मां अकोठे भुए ता एकी होरी सैहीं ज़ोने लगे कोई पत्तोए कुन तै इदी मां एजेलो की नेहीं | ⁵⁷ किजोकी सरदार कहिना ता फ्रिसैहीं हुक्म दितोरो थु की अगर केंची पतो लगे की यीशु कोड़ीऐ ता ते पत्तो ते ताके आसां तैस ट्लांम |

यीशु एरे पवन पुड़ इत्र उलटानो

( मत्ती 26 : 6 - 13 ; मरकुस 14 : 3 - 9 )

¹ ईद फसी कैरां शा दिहाड़े पैहिले यीशु बेत आंईना मां जो च़लो जेव ज़ेड़ी लाज़र रातो थु ज़ै यीशुए मुड़दना मेरां ज़िन्तो कियोरो थुओ | ² एड़ी यीशुएरे लेइ अक धांमरी तियारी भोइजेइ मरथा सेवा लोरी थी केरने ते लाज़र भी तैन मां थु ज़ैना यीशु सैहीं साथी रौट्टी खाने बिशोरे थिये | ³ तैखन मरियमां अक माघो तेल अतग्र यीशुएरे पंवना मलो ते अपने दोगेरे बालना सैहीं पोंछ़ने लगी ते सारु घर मुशकां सैहीं भेरोई जेंव | ⁴ तैसेरे चेलना मेरां अक युहुदा अस्क्र्युती ज़ैनी यीशु ट्लुवेवरो थु चोग्ली लगो लाने | ⁵ अगर एह अतग्र तेल बेच़ेथे ता कोई ट्लई शाव दीनार डालर रुपेइए मेलने थिये ज़ैना गरीबना तेइसकते थिये | ⁶ तैनी एना एल्रेरलेइ ना थुं ज़ेवरू की तैस गरीबां केरो खियाल थु पण ते च़ौर थु झोली पेंसां केरी तैस का भोती थी ज़ेस मां लोक दाना छ़डते थिये ते ते अपने लेइ तैस मेरां किछ छ़पातो थु | ⁷ यीशु ज़ोने लगो तु मरियामी परेशाना ना केर ऐसांएह अतग्र तेल मेरे दब्नेरे लेइ रखोरोए | ⁸ गरीब लोक ता तुस्न सैहीं साथी पत्ती भी रंहनेना पण आंव तुस्न सैहीं साथी पत्ती नेहीं रांनो |

लाज़रेरे खलाफ साजिस

⁹ एस फेरे युहुदी लोकन पत्तो लगो की यीशु बेत अनिया मां आओ तैना भी तैड़ी जे की अक यीशु नेहीं पण लाज़र भी ओरनो चहते थिये ज़ै यीशुए मुड़दना मेरां ज़ींतो कियोरो थुओ ¹⁰ तैखन सरदार कहिनेइ लाज़र भी मारनेरी तियारी की | ¹¹ किजोकी तेईस बड़े युहुदी यीशुएरे पासे मस्त भेवरे थिये ते तैस पुड़ विश्वास केरते थिये |

यरूलेमे मां ज़ींत दाखल

( मत्ती 21 : 1 - 11 ; मरकुस 11 : 1 - 11 ; लूका19 : 28 - 40 )

¹² होरसां सरे लोक ज़ैना ईद जो तैड़ी एवरे थिये तैनेइं शुनू की यीशु भी युरोशलमें मां एजने बालोए | ¹³ त खजुरेरी डेलड़ी हाथे मां रखतां नेहरे देते मिल्नेरे लेइ निसे तारीफ मुबारके तै ज़ै परमेशरे नोवें सैहीं एइते इस्राइलेरो राज़ौ मुबारक भोए | ¹⁴ यीशुएकी निकड़े गधे पुड़ च़ैड़तां जेव ज़ेंच़रे लिखेरुए |

¹⁵ एह सियुव्नेरी कुई तु डेरां न्ना ओर तेरो बादशा एजी रहोरोए ते गधेरे बचे पुड़ च़ैड़तं एवरोए | ¹⁶ पैहिले ता यीशुएरे चेलेइं किछ ना समझ़ु की कुन लोरुए भोने ज़ताली यीशुएप्नी महिमा मां आव ता तैना याद आवं की ऐना गल्लाँ एस्सेरे बारे मां लिखुरी थी एना लोकें भी एस्सेहीं ज़ैना किउं एने गल्लाँ केरे बारे मां थुं | ¹⁷ ज़ैखन यीशुए हक तेइतां लाज़र कबरी मेरां बेइर कुजेवरो थु ता ऐना लोक भी साथी थिये तेनेई एह गल सेरिओ फेलाई | ¹⁸ ते बड़े लोकेंई एना शुनू की यीशुए अक बड़ो तमाशो ओराव तेस्सेहीं मिलने जो च़लै | ¹⁹ फ्रिसी एना ओरतां एकी होरी सैहीं ज़ोने लगे सोचा असना कुन हाथे लगु हेरा सारी दुनिया एस पत्ती च़लौरीए |

यूनानी यीशु तोपतन

²⁰ ज़ैना लोक ईद बनानेरे लेइ युरोश्ल्मे एवरे थिये तैना मां किछ यूनानी भी थिये | ²¹ तैना फ्ल्प्से का अए ज़ै गलीलएरे शहर बेतसेइदारो राने बालो थु ज़ोवले हथ केरतां ज़ोने लगे असां यीशु ओरनो चहतम | ²² फल्प्से इन्द्र्यसे ज़ोवं ते दुईएई एइतां यीशु पत्तो दितो | ²³ यीशुए तैना जवाब दितो अबना अदम बांदो भोनेरो मोको एवरोए | ²⁴ आंव तुस्नं सैहीं सच़ ज़ोतां की ज़ां तगर गेहों केरो गलेव मिती मां ना मिले आके गलेव राते पण अगर ते मिती मां मिलते ता हछे गलेव बनातना | ²⁵ ज़ै अपनी जाना ट्लारी रखते ते अपनी जाना गुवाते पण ज़ै एप्नी जानी सैहीं बेर रखते ते अक लेमी उमरारी ज़िन्दगी बच़ालौ | ²⁶ ज़ै कोई मेरी सेवा केरनी चाते तैस ज़रूरीऐ की मेरी पेरबी केरे ताके ज़ेड़ी आंवइ तैड़ी मेरो चेलो भी भोए ज़ै मेरी सेवा केरते मेरो परमेशर तैस इज़त तेलो |

क्रुसेरी मौतरो इशारो

²⁷ हुना मेरो दिल डरने लोरोए ता आंव कुन ज़ोंइ की एह परमेशर तु मीं बच़ा कधेने़हीं किजोकी एल्हेरेलेइ ता आंव एवरोइं की तैस मोके तगर पुज़इ गेहीं | ²⁸ एह बाबा अपने नॉवेंरी कुदरत हेरा तैखन अंम्बरेरां अक आवाज़ अई मी तुस्न लौ ओरेवरिए ते फिरी भी हरेइलो | ²⁹ तैखन तैड़ी मेनू केरी बड़ी भीड़ थी एह आवाज़ शुनी ता ज़ोने लगे अंबर गुड़ने लगेरुए किछ लगे ज़ोने केंचे फरिश्ते तैस सैहीं गल कियोरिए | ³⁰ यीशु ज़ोने लगो एह आवाज़ तुशैलेई एवरीऐ मेरे लेइ नेहीं | ³¹ हुना ते मोको एवरोए की दुनियारी अदालत भोनिए हुनी इस दुनियारो सरदार बेइर कढनोए | ³² पण ज़ेखं आंव सलेबे पुड़ उबरो छ़ुनौइ ता तैखन आंव सेरी लोकन एपू केजो एनेलो | ³³ यीशुएना ज़ोइतां साफ च़ारे ओरवं की ते केरी मोवतां सैहीं मरने बालोए | ³⁴ मेनू तैस पूछ़ने लगे असेंइ शुनेरुए की मसीह ज़ीन्तो रनोए फिरी तु केन्च़रे ज़ोतां की अबना अदमेरू स्लेबी पुड़ मरनु ज़रुरीऐ एह अबना अदम कोने | ³⁵ यीशुए तैना जुवाब दितो लौ तुस्न का थोड़े च़ीरे तगरे लौ ज़ां तगर तुस्न का आओ लौइ मां च़ाला एस कैरां पैहिले मत्ता अंधारु तुस्न घिनी गाओ ज़ै मेनू अंधारे मां च़लतेते ना ज़ाने ते कोरां च़लरौऐ | ³⁶ ज़ां तगर लौ तुस्न का नेड़े ता लौइ पुड़ विश्वास केरा ताके तुस लौआरी किरना बेनी सकत ज़ैखन यीशुए |

यहूदी केरू अविश्वासे मां बनेरो रहनू

ऐना गल्लाँ की ता तेटठां च़लौ जेव ता तैना केरी एच्छ़ना मां ते कांटो बेनी जेव | ³⁷ हालंकी यीशुए तैना लोकन एतरी खेडां ओरेई फिरी भी तैनेइं विश्वास ना कीयो | ³⁸ ज़ेन्च़रे इसाया नाबी ज़ोतो थु पुरु भोए की एह परमेशर इशे ज़ोने पुड़ केनी विश्वास कियो ते परमेशरेरी शक्ति केस पुड़ बांदी भुई | ³⁹ एओ गल थी की तैना विश्वास ना केरी बट्टे इसाया एकी होरी ठैरी ज़ोते |

⁴⁰ तैनी तेंकेरी एच्छ़ी केनी ते दिल भी शूरो ब्नेवरोए एरू ना भोए की तैना एच्छ़ना सैहीं लाना ते दिले सैहीं बुझ़ना ते माफ़ी मग्न ते आंव तैना बच़ैंइ | ⁴¹ इसाया नाबी तांऐ ज़ोतो थु की तैनी यीशुएरी महिमा लाहोरी थी ते तैसेरे बारे मां ग्ल भी की | ⁴² इसेरे वजही सैहीं युहुदी सरदार यीशु पुड़ विशवास ता केरने लगे पण फ्रिसी केरे वजही सैहीं विश्वासेरो इकरार ना थिये केरते तैना डरते थिये की असना मंदरे मेरां कढैले | ⁴³ खास केरतां तैना परमेशरी इज़त मेलनेरे बजाए मेनू केरी तग्रफां इज़त मेलने मां ख़ुशी थिये |

यीशु एरे वचन : इन्साफेरो आधार

⁴⁴ तैखन यीशुए ज़ोरे सैहीं ज़ोंव ज़ै कोई मी पुड़ विशवास केरते ते ना मी पुड़ पण मेरे भेज़ने बाले पुड़ विशवास केरते | ⁴⁵ ते ज़ैखन भी मेरां तकते मेरे भेज़ने बाले लाते | ⁴⁶ आंव दुनियाई मां अक लौ बेंतां एवरोंई ज़ै मी पुड़ विशवास केरलो अंधरे मां ना रालो | ⁴⁷ अगर कोई मेरी गल्लाँ शुनाते तैना पुड़ अम्ल केरते ता आंव तैस कुसूर ना लेइलो आंव दुनियाई कुसूर लाने नेहीं पण छुटाने एवरोइ | ⁴⁸ ज़ै मी किछ ना बुझ़ै ना मेरी गल शुने तसेरो हिसाब केरने बालो मेरु बच़नै ज़ै अखिरारी दिहैड़ी तैस मुर्ज़म बनेइलो | ⁴⁹ किजोकी मी एपनी तरफां किच भी नेहीं ज़ेवरू पण ज़ैनी परमेशरे आंव भेज़ोरोंइ तैनी मी ज़ोनेरो हुक्म दितोरोए | ⁵⁰ आंव ज़ांनतां की तैसेरो हुक्म मन्नो अक ह्मेशारी ज़ीन्दगीऐ एल्हेरलेइ आंव तैन्ने ज़ोतां ज़ैन ज़ोंनेरो हुक्म मेरे परमेशरे दितोरोए |

यीशु चेलां केरे पाव धोते

¹ ईद फसी एरे पेहिले दिहाड़े यीशुऐ बुझ़ु की मेरो बाजी केजो गहंनेरो मोको इस दुनियाई मेरां एवरोए ते अपने लोकन सैहीं पियार केरतो थु ज़ैना दुनियाई मां थिये ते तैसेरो पियार आखिरी मोके तगर बराबर रहू | ² तैना लोक ड्लाई लोरे थिये खाने ते शैतांने पैहिले शमुनेरे मठ्ठे यहूदा अस्क्र्युती तैसेरे दिले मां पैहिले यीशु ट्लुवांनेरो खियाल छ़डोरो थु | ³ यीशु पत्तो थु की बाजी सेरी चीज़ां तैसेरे हथे मां दितोरिना कने ते परमेशरी त्रफां एवरोए कने परमेशरे पासे वापस च़लरोए | ⁴ ते पांदी पुड़रां खड़ुठौ ते अपनू फिरना खोलु ते अक तोलियो अपने लखे सैहीं प्लेटो | ⁵ तेसेरां पत्ती तैनी अक[ पात्र ] भांड ट्लांवं तेस्मां पानी छ़ाडु ते अपने चेलां केरे पाव धोईतां लखे बन्धोरे तोलिये सैहीं पोंछ़ै | ⁶ ज़ैखन ते शुंमौन पतग्रसे का पुज़ो ता पतरस ज़ोने लगो एह परमेशर , ⁷ कुन तु मेरे पाव धोने चहतां | यीशुए जुवाब दितो ज़ैना आंव केरने लोरोइं तु हुन्ना ता नं बुझ़स पण पत्ती बुझ़नु | ⁸ पतरस लगो ज़ोने तु मेरे पाव कधे ना धोई सकस यीशुए जुवाब दितो अगर तु पाव ना धुवास ता तु मेरो चेलो नेइं | ⁹ शुंमौन पतरस यीशु सैहीं ज़ोने लगो एह प्रभु ,तुसां मेरे पाव नेइं बलकी हथ ते दोग भी धोथ | ¹⁰ यीशुए तैस्से सैहीं ज़ोंव, ज़ैनी निह्वरू ए, तैस पावां केरे इलावा होरू धोनेरू किछ ज़रूरत नेइं; ते तुस साफत; पर सारे नेइं ¹¹ यीशु पत्तो थु की कोवना तैस ट्लुवंनै बलोए एल्हेरे लेइ तैनी जोंव तुस सभ साफ नेइं |

¹² ज़ैखन तैनी सेभीकेरे पाव धोए ता अपनू फिरना लेइतां एपनी ठैरी बिशो तैखन तैनी तैना पुछ़ु ज़ैना भी मी तुस्न सैहीं कियों कुन तुस तेल्हेरो मत्लब सम्झ़तथ | ¹³ तुस मिजो गुरु ते परमेशर ज़ोतथ तुशु ज़ोनु सेही साच़ै की वाकिया आंव तुशो गुरु ते परमेशरांइ | ¹⁴ ज़ांता मी तुशै गुरे ते कने तुशै परमेशरे तुशै पाव धोए ता तुशो भी फर्ज़े की एकेकेरे पाव धोथ | ¹⁵ मी तुस्न अक इशारो दितोरोए की ज़ेन्च़रै मी पाव धोए तुस भी एकेकरे पाव धोइयाथ | ¹⁶ आंव तुस्न सैहीं सच़ ज़ोतां की कोई गुरु चेले कैरां बडो ना भोए ना कोई बिस्तार अन्ने बालो अपनो बिस्तार पुज़ाने बाले कैरां बडो भोए | ¹⁷ तुसेंइ ऐना ग्लां भुझ़ी छ़ैडी एना गलना पुड़ अम्ल भी केरले ता तुस मुबारक भोनेथ | ¹⁸ मेरो इशारो तुशै सेभी केरे पासे नेइं ज़ैना मी च़नौरथ पण पबित्र बचने ग्ल पूरी भोनी ज़ारुरी की ज़ै मेरी रौट्टी खाते तओ मिजो लतां बानेरी तियारी केरते | ¹⁹ एस कैरां पैहिले की एरु भोंव आंव तुस्न ज़ोने लोरोंइ की तेईस एरु भोलू ता तुस बुझ़ैलै तै आंवेंइ | ²⁰ आंव तुस्न साच़ज़ोतां की ज़ै मेरे भेज़ोरे पुड़ अतबार केरते तै मी पुड़ अतबार केरते ज़ै मी पुड़ अतबार केरते तै मेरे भेज़नेबाले बाले पुड़ अतबार केरते |

वीश्वासघातेरे पासे इशारो

( मत्ती 26 : 20 - 25 ; मरकुस 14 : 17 - 21 ; लूका 22 : 21 - 23 )

²¹ ऐना ग्लां केरे बाद यीशु अपने दिले मां बड़ो परेशाना भोऊ ते ज़ौ ने लगो आंव तुस्न सैहीं साच़ ज़ौतां की तुस्न मेरां एक्के आंव ट्लुवांनोंइ | ²² इसेरे चेले एकेकी पुड़ शाक केरने लगे किजोकी तैना पत्तो ना थु कि एसेरो इशारो कसेरे पासे | ²³ एना मेरां अक चेलो ज़ै यीशु सुखातो थु पांदी पुड़ नेड़े बिशोरो थु | ²⁴ शमौनं पतग्रसे एस चेले इशारे सैहीं पुछ़ु की यीशु कसेरे बारे मां ज़ोने लोरोए | ²⁵ एनी चेले यीशुएरे पासे लिकतां पुच्छ़ु एह परमेशर तै कोंवने | ²⁶ यीशुए जुवाब दितो ज़ेस आंव पेनेरी ड्लॉछ़ङौ डोब्तां तेलो तैहे भोनोए तैखन यीशुए ड्लाछ़ङौ शौमोना अस्क्र्युतेरु मटठु युहुते दितो | ²⁷ एस पिनेरे बाद शेताना तैसमां बिशी जेवएह फिरि यीशुए तैस ज़ौंवं ज़ैना किछ केरनुए लुशी केर | ²⁸ पण होरी केंची एह पत्तो ना लगो की यीशुए एना एस कीजो ज़ौवं | ²⁹ याहुते का पेंसां केरी थेलड़ी भोती थी तेनेई बुझ़़ुकी यीशु तैस ईदी जो सामाना ग्हिनेरे लेइ लोरोए ज़ोने या गरीबना किछ तेइते | ³⁰ ज़ेरो यहुते रोटटारौ ड्लाछ़ङौ खाव तेखने बेइर निसो ते रात भी भेवरी थी |

नोंवो हुकम

³¹ तैखन युहुदो तेटठॉ च़लौ जेव ता यीशु ज़ोने लगो अबना अदमें महिमा मेलोरिए उंच़रै परमेशरे तैसमां महीमा मेलोरी | ³² अगर परमेशरे तैसमा महिमा मेलोरिए ता परमेशर भी तैस अपनी महिमा तेलो तै लुशी तेलो | ³³ मेरे मटठॉव आंव किछ च़ीरैतुसन सैहीं साथीं तुस मी तोपेल्हे ज़ेन्च़रै मी युहुदना भी ज़ेवरू थुं तुस्न भी ज़ोतां ज़ेरां आंव च़लौरोइं तुस तैड़ी ना एजी सक्त | ³⁴ आंव तुस्न अक नोवों हुक्म तेतां की एकेकी सैहीं महबत रखा ज़ेन्च़रै मी तुस्न सैहीं महबत रखी तुस भी एकेकी सैहीं महबत रखा | ³⁵ अगर तुस एकेकी सैहीं महबत राखेले ता सभ लोक बुझ़ेलै की तुस मेरे चेलेथ |

पतरसेरे इन्कारेरो इशारो

( मत्ती 26 : 31 - 35 ; मरकुस 14 : 27 - 31 ; लूका 22 : 31 - 34 )

³⁶ शमौनं पतग्रसे तैस पुच्छ़ू एह परमेशर तु कोरां च़लरौस यीशुए जुवाब दितो ज़ेरां आंव च़लरौहीं तु हुन्ना मी सैहीं साथी ना एजी सकस पण बते मां एजी सकतां | ³⁷ पतरस पुच्छ़ने लगो एह परमेशर आंव तींसैहीं साथी किना एजी सेखीं आंव ता तेरे लेइ अपनी जाना भी देंनेरे लेइ तियार अंहि | ³⁸ एन शुन्तां यीशु पुच्छ़ने लगो की तु सच्च़ै मेरे लेइ अपनी जाना तेलो आंव ती सैहीं सच्च़ै ज़ोतां की कुकड़बांकी कैरां पैहिले तु मेरो ट्लैई बार इंकार केरलो |

परमेशरे तगर पुज़नेरी बत

¹ डरा न्ना परमेशरे पुड़ ता मी पुड़ विश्वास रखा | ² मेरे बाज केरे घरे मां बड़ां घरांअना अगर ना भोथां ता मी तुस्न ज़ेवरू भोनू थुं आंव तुशै लेइ ठार तियार केरने च़लरौंइ | ³ अगर आंव तुशै लेइ ठार तियार केरीं ता वापस एइतां तुस्न एपू सैहीं साथी न्हेलो ज़ेड़ी आंव भोलो तुस भी तैड़ी भोथ | ⁴ ज़ेरां आंव च़लरौंइ तुस तेठेरी बत ज़ानात्थ | ⁵ तोमें तैस सैहीं ज़ोंव एह परमेशर ईशी ब्तरो कुन पत्तो अस ता एना भी ना ज़ांन्म की तु कोरां च़लरौंस | ⁶ यीशुए जुवाब दितो बत सच़ ते ज़ीन्दगी आंवेंइ कोई मेरे सुवा बजी का ना गेही बटे | ⁷ अगर तुसैहीं सच्च़ै आंव पशानोरो भोथो ता मेरे बजी भी प्शानेथे पण हुनि तुस तैस पशेनी जे कने तोसैहीं ते लाहू भी | ⁸ फ्ल्पुस ज़ोने लगो एह परमेशर असना बाजेरी महिमा हेरा तैहे इशेलेइ बड़ीऐ ⁹ यीशुऐ जुवाब दितो फुल्पुस एतरे च़ीरैआंव तुस्न सैहीं साथी राहू कुन तु मी ना ज़ानास ज़ैनी आंव लाहू तैनी बाजी भी लाहू तु कियुं ज़ोतां असना बाजी केरी महिमा हेरा | ¹⁰ कुन तीं इकिना नेहीं की आंव बाजी मांहीं ते बाजी मीमांहें आंव ज़ैना गल्लाँ तुसन सैहीं ज़ोतां तैना गल्लाँ बाजी मीमां रेहितां केरते | ¹¹ एल्हेरलेइ आंव तुस्न ज़ोतां की आंव बाजी मांहीं ते बाजी मीमाहें तुस इकिना केरा घटे केरा घट मेरे कम कियुं ता इकिन केरा ज़ैना मेरे शाह्ताथ | ¹² आंव तुस्नसैहीं सच्च़ ज़ोतां की ज़ै मी पुड़ विशवास रखते ते भी एनाच्च़रे केरेलो ज़ैना आंव करतां पण ते मी कैरां भी बडॉं बडां कमां केरेलो किजोकी आंव बजी का च़लरौंइ | ¹³ ज़ैना किछ तुस मेरे नोंवें सैहीं म्गेल्हे आंव तुस्न तेल्हो की बाजी केरी महिमा मटठैरे वजाही सैहीं बंदी भोए | ¹⁴ अगर तुस मेरु नोवें सैहीं किछ भी केरनेरी मीनात केरले ता आंव ज़रुर एजेलो |

पवित्र आत्मारो वाइदो

¹⁵ अगर तुस मीसैहीं महबत रखताथ ता मेरो हुक्म मेनाथ | ¹⁶ आंव अपने बाजी की मीनात केरल्हो ते तुस्न अक हिमत देंने बालो मदती भेझ़ैलौ ते हमेशां तुसन सैहीं साथी रहलो | ¹⁷ इना रुहु ते सच्च़ ज़ै दुनियाई ना मेल्हे किजोकी ना ते लेहियोए ना ज़ेनोए पण तुस तैस ज़ातथ किजोकी तैसेरी रुहु तुशै अंतरे ते तुशै दिले मांराते | ¹⁸ आंव तुस्न निहाज्ड़े ना शेरेलो आंव तुस्न का एजेलो | ¹⁹ इही दुनिया किछ च़ीरां बाद मी ना लेही बटैली पण तुस मी तकते राल्हे किजोकी आंवभी ज़ींतोहीं ते तुस भी ज़ींते राल्हे | ²⁰ तैस दिहैड़ी तुसां बुझ़ैलेकी आंव अपने बाजी मांहीं ते तुस मीमांथ ते आंव तुस्न मांहीं | ²¹ ज़ेस का मेरो हुक्मे ते ते मान्ते ता तैहे मीसैहीं महबत केरते ते मेरे बाजी करो ट्लारो भोलो आम्हीं तैस ससैहीं महबत रेखेलो ते अपनो आप तैस का बंदो केरलो | ²² तैखन [युहुदा अस्क्रियुती] युहुते ज़ोंवं पण एह परमेशर कुन उजाओ की तु अपनो आप असना पुड़ बंदो केरेलो दुनियाई पुड़ न्ना | ²³ यीशुए जुवाब दितो अगर कोई मीसैहीं महबत रखते ते मेरे बचने पुड़ अम्ल केरते मेरो बाजी भी तैस सैहीं महबत रखेलो ते आस तैसका एज्मेले ते तैससैहीं साथी रामेले | ²⁴ ज़ै मीसैहीं महबत ना रखे ते मेरे बचने पुड़ अम्ल ना केरे इही बचना ज़ै तुस शुन्ने लोरेथ एह मेरु आप्नु नेहीं पण मेरे बाजी केरुए ज़ैनी आंव भेज़ोरोंई |

²⁵ ऐना सेरी ग्लां मी तुस्न साथी रेहितां ज़ोइ | ²⁶ पण ते मद्त केरने बालो पबित्र आत्मा ज़ेस बाजी मेरे नोवेसैहीं भेज़ेलो तुसन सेरी ग्लां शखालेलो हर ग्ल ज़ै मी तुसन सैहीं ज़ेवरी थी याद कमवालो | ²⁷ आंव तुसन सैहीं साथी अपनू इकिना तेइतां गातां ज़ेच़रै दुनिया तेचे तेच़रै नेहीं पण मता घमराथ मता डरथ | ²⁸ तुसैहीं मिकैरां एना ज़ोंतु शुनेरुए की आंव च़लरौंइ ते आंव तुसन का फिरी एजेलो अगर तुस मीसैहीं महबत केरथे ता ख़ुशी भोने थिये किजोकी आंव बाजी का च़लरौंइ किजोकी बाजी मीकैरां बडोए | ²⁹ मी सेरी ग्ला पेहिले तुसन ज़ेवरिना की ज़ैखन तैना पूरी भोना ता तुस मीपुड़ विश्वास केरले | ³⁰ हुनी आंव तुसन सैहीं जाते ग्लां ना केरीं किजोकी इस दुनियारो सरदार एजने बालोए तै मीपुड़ पुच्छ़़नौ नेहीं | ³¹ पण दुनियाई एह पत्तो लोड़ते की आंव बाजी सैहीं महबत केरतांइ ते तैसेरे सारे हुक्म आंव मन्तांइ एजा हुनी असां इटठां च़लम |

यीशु सच़्च़ी दाछ़

¹ आंव दाछ़ारु असल्ही बड़ह अंहि ते मेरो बाजी बाग्बाने। ² मेरी ज़ेस डेलड़ी फल ना ल्गे तेह तैस केटी छ़डतै ते ज़ेस फल लगते तैस छ़ाटतै की जाते फल लगे। ³ तु स तैस बच़नेरे ज़ोने ज़ै मी पेहिले तुसन सैहीं कियोरो थु तलोरेथ। ⁴ तुस मीमां राथ ता आंव तुसन मां रहतां केंची डेलड़ी अपने आप फल ना लगे तैस अपने ज़ीले सैहीं ज़ुड़तां रान्हू पेते तुसन भी मीमां रानेरे अलावा फल ना लेगी सखे। ⁵ आंव दाछ़ारु बड़हअंहि ते तुस मेरी डेलड़ीथ ज़ै मीमां ज़ुड़तां राते तैस खूब फल लगते मी कैरां अलाग भोइतां तुस किछ ना केरी सख्त। ⁶ ज़ै मी सैहीं ज़ुड़तां ना राहु ते तैस डेलड़ारौ ज़ेरोओ ज़ेस दूर शारतना ते शुकी गाचे एरी ज़ेरी डेलड़ी घेरतां लोंवने मां फुकी छ़डतना। ⁷ अगर तुस मीमां बनोरे रातथ ते मेरु बच़ना अपने दिले मां राखेले ता ज़ैना च्हेले मागेले तुसन मैल्हेलु। ⁸ मेरे बाजेरी महिमा एसमांहें की तुस हछो फल बनाथ ते लोकन ओराथ की तुस मेरे चेलेथ। ⁹ ज़ेन्च़रै बाजीं मीसैहीं महबत कियोरीऐ तेंच़रै सैहीं कियोरिए हुनी मेरी मुहबति मां बनोरेराथ। ¹⁰ ज़ेन्च़रै मी अपने बाजेरे हुक्में पुड़ च़ालौ ते तैसेरी मुहबति मां राहू तेंच़रै तुस भी अगर मेरे हुक्म मानेले ता मेरी म्हाबती मां बंनोरे रहले। ¹¹ मी ऐना गल्लाँ एल्हेरलेइ तुस्न ज़ेवरिना की आंव तुस्न पुड़ ख़ुशी भोंइ ते तुशी ख़ुशी पूरी भोए।

¹² मेरो हुक्म एओ की ज़ेन्च़रै मी तुस्न सैहीं पियार कियो तुस भी एकेकेकी सैहीं मुहाबत रेखाथ। ¹³ एस कैरां जाते मुहाब्त कोई नेहीं केरे ज़ेकी अपनी जाना दोस्तां केरे तेइते। ¹⁴ तुस मेरे दोसत ता अहथ पण मेरे ज़ोंने पुड़ अमल भी केराथ। ¹⁵ अज़ेरे बाद आंव तुस्न जो नोकर ना ज़ोइलो किजोकी नोकर ज़ांने की तैसेरो मालक कुन केरते पण मी तुस्न जो दोसत ज़ेवरुए किजोकी ज़ैना किछ मी बाजी कैरां स्हुनेरुए तुस्न भी शुनेवरुए। ¹⁶ तुसैहीं आंव नेहीं च़ुनौरौ पण मी तुस च़ुनौरेथ ते रखोरे भी आथ की गेहितां फल अन्थ ते फल ज़ै पक्को राहु ताके ज़ैना किछ मेरे नोवें सैहीं बाजी कैरां मग्थ ता तेह तुस्न तेइते। ¹⁷ आंव तुस्न हुक्म तेतां एपू मांम्हेंइ पियार रेखाथ।

संसारेरो बैर

¹⁸ अगर दुनिया तुस्न सैहीं दुशमनी रख्चै ता याद रखा की तैनेइं पेइल्हे मीसैहीं दुशमनी कीयोरिए। ¹⁹ अगर तुस दुनियारे भोथे ता दुनिया तुस्न अपना केरे जेरे हमदर्दी रखेथे पण हुनी तुस दुनियारे नेहीं किजोकी मी तुस दुनियाई मेरां च़ुनातां किनारे रखोरेथ तांऐं दुनिया तुस्न सैहीं दुशमनी रख्चे। ²⁰ मेरी एह गल याद रखा की कोई नोकर अपने मालके कैरां बडो ना भोए अगर दुनियां आंव स्तेवरोंइं ता तैना तुस्न भी सताले अगर तैनेइं मेरी गली पुड़ अम्ल किउं ता तुशी ग्ली पुड़ भी अम्ल केरल्हे। ²¹ तैना मेरे नॉवेरे वजही सैहीं एरहो ज़ेरहो बरताव केरल्हे किजोकी तैना मेरे भेझ़नैबाले ना ज़ांनाना। ²² अगर मी एइतां तैना सैहीं गल ना भोथी कियोरी ता तैना पापी ना थिये भोने पण हुनी तेन्केरे पापेरो तैना का कोई जुवाब नेहीं। ²³ ज़ै मीसैहीं दुशमनी रख्ते ते मेरे बाजी सैहीं भी दुशमनी रख्ते। ²⁴ अगर आंव तेन्केरे सामने तैना कम ना केरथो ज़ैना केंचे होरे नेहीं कियेरु ता तैना पापी ना थिये भोने पण हुनी तैना ओरनेरां पत्ती मीसैहीं ता मेरे बाजी दुईने सैहीं दुशमनी राख्त्न। ²⁵ पण एना एलओरलेइ भोवं की तैना केरी किताबी मां लिखोरी ग्ल पुरी भोए की तेनेइं मीसैहीं भी खामखा दुशमनी रखी। ²⁶ ज़ैखन ते मद्तगार साच़ीरुहु एजेली ज़ेस आंव अपने बाजेरी भोंती भेझ़़ेलौ ता ते मेरे बारेमां शाहात देल्हो। ²⁷ ते तुस भी गवाहथ किजोकी तुस भी शुरू कैरां मीं सैहीं साथी थी |

¹ मी तुस्न ऐना सेरी ग्लां एल्हेरलेइ ज़ोइ की तुस टेपलोथ न्ना | ² तैनेइं तुस गिल्जे मेरां काढनेथ खास केरतां एरहो ज़ेरहो मोको एजी राहोरोए अगर कोई तुस्न मैरतॉ छ़डैलौ ता तुस एना बुझ़थ की ते परमेशरी सेवा केरने लोरथु | ³ तैना एना सभ एल्हेरलेइ केरल्हे की ना तैनेइं कधी मेरो बाजी बुझ़ौ ते ना कधी आँव | ⁴ मी तुस्न ऐना सेरी ग्लां एल्हेरलेइ ज़ोइ की ज़ैखन तैना पूरी भोली ता तुस्न याद एजेलू की मी तुस्न एना पहिलु ज़ेवरु थुं |

पवित्र आत्मारां कम्मां

पैहिले एल्हेरलेइ नेहीं ज़ेवरु की आँव एपू तुस्न सैहीं साथी थु | ⁵ पण हुन्ना आँव अपने भेझ़ने बाले कह च़लरौंइ पण तुसैहीं केंचे भी ना पूछ़ू की तु कोरां च़लरौंस | ⁶ किजोकी मी तुस्न ज़ोइ छ़ाडैरुऐ एल्हेरलेइ तुस बड़े मायूस भेवरेथ | ⁷ पण आँव तुस्न सैहीं सच़ज़ोतां की मेरु इटठं गंनु तुशै लेइ बड़ु ज़रुरिए अगर आँव ना गेहिलो ता तेह मद्त्गर तुस्न का नेहीं एज्नो पण आँव च़लौ जेव ता तैस आँव तुस्न का भेझ़ी तेल्हो | ⁸ ज़ैखन ते मद्त्गर एजेलो ता ज़ेड़ी तगर पाप ता पुन्न ते इंसाफेरो अस्सरे ता ते दुनियाई पापी बनाल्हो | ⁹ पापेरे बारेमां एल्हेरलेइ की दुनियां मीपुड़ विशवास नेहीं केरन | ¹⁰ विश्वसेरे बारेमां एल्हेरलेइ की आँव वापस बाजी का च़लरौंइ ते तुसैहीं आँव फिरि नेहीं लंहनों | ¹¹ ते इन्सफेरे बारेमां एल्हेरलेइ की एस दुनियारो सरदार मुर्ज़म ब्नेइतां च़लो जेवरोए | ¹² मी होरु भी बड़ु किछ ज़ोनुए पण हुन्ना तुसैहीं तैना झ़ैलनु नेहीं | ¹³ पण ज़ैखन ते साच़ी रुहु एजेली ता ते साच़ैरे पासे तुशी मद्त केरल्हो ते अपनू भोंतु किछ ना ज़ोल्हो पण तुस्न सिर्फ तेनें ज़ोल्हो ज़ैना ते शुनेलो ते भोंने बीतने बेली ग्लां केरो पत्तो तेल्हो1 | ¹⁴ ते मेरी महिमा ओराल्हो किजोकी ते मेरी ग्लां मेरी ज़बानी शुन्तां तुस्न तगर पुझ़ालहौ | ¹⁵ सभ किछ ज़ैना भी बाजी केरुए तैना मेरुए एओ वजाओ मी ज़ोवं की पाक रुहु मेरी ज़बानी शुन्तां तुस्न तगर पुझ़ालहौ |

दुःख सूखे मां बेदलोलो

¹⁶ थोड़े च़ीरां पत्ती तुसैहीं आँव फिरि नेहीं लंहनों ते तैसेरे थोड़े च़ीरां पत्ती तुसैहीं आँव फिरि लंनोंही | ¹⁷ एना ज़ोंनेरां पत्ती किछ चेले ज़ोंने लगे की एना ज़ोंनेरो कुन मत्लाबे की थोड़े च़ीरां पत्ती तुसैहीं आँव फिरि नेहीं लंहनों ते तैसेरे थोड़े च़ीरां पत्ती तुसैहीं आँव फिरि लंनोंही ते होरु कुन की आँव बाजी का च़लरौंइ | ¹⁸ पण तैना एकेकी पूछ़तै राहु की थोड़े च़ीररौ कुन मत्लाबे इशी समझ़ी मां किछ ना एजे एह कुन लोरोए ज़ोंने | ¹⁹ यीशुए ओरू की तैना तैस एस बारे मां पूछ़नु चहतना तेलओरलेई तैनी तैना ज़ोंवंकी तुस एपू मांमेहीं पूछ़ने लोरेथ की मेरो मतलब कुन थु की थोड़े च़ीरां पत्ती तुसैहीं आँव फिरि नेहीं लंहनों ते तैसेरे थोड़े च़ीरां पत्ती तुसैहीं आँव फिरि लंनोंही | ²⁰ आंव तुस्न सैहीं सच़ ज़ोतां की तुस लेरांतेल्हे ते शोग बनाल्हे पण दुनियारे लोक ख़ुशी बनाल्हे तुस मायूस ता भोल्हे पण तुशो गम ख़ुशी मां बेद्लोई गांनोंऐ | ²¹ ज़ैखन केंची कोंनाशी माटठु ज़रम्नेरू पेट दुखते ता ते गमगीना भोचे ऐलओरलेई की तेसारी दुखेरी घड़ी एवरी भोचे पण ज़ेरो ब्चओ ज़रम्ते ता एस ख़ुशी मां की दुनियाई मां अक मेंनु पेइदा भेवरोए अपनी तकलीफ़ बिसरी गाचे | ²² एओ हाल तुशोए हुन्ना तुस ग्मगीनाथ पण आंव तुस्न सैहीं फिरि मिलेलो तैखन तुस ख़ुशी मनाल्हे ते तुस्नकैरां तुशी ख़ुशी कोई थसोड़ी ना बटेल्हो | ²³ तैस दिहैड़ी तुस्न मी कोई सुवाल पुछ़नेरी ज़ूरूरत नाहीं भोनी आंव तुस्न सैहीं सच़ ज़ोतां की अगर तुस मेरु नाँव घिन्तां बाजिना कैरां किछ मगेल्हे ता ते तुस्न तेइतेल्हो | ²⁴ तुसैहीं मेरु नोवं घिन्तां हुन्तागर किछ नेहीं मगेरू मगेल्हे ता मैल्हेलु ते तुशी ख़ुशी पूरी भोली |

संसारे पुड़ ज़ींत

²⁵ अगर आँव ऐना ग्लां तुस्न फेरे सैहीं ज़ोतां पण मोको एवरोए की आंव मसालां तेइतां कम ना घिनेल्हो पण आंव अपने बाजी केरे बारे मां तुस्न सैहीं साफ साफ ग्लां केरल्हो | ²⁶ तैस दीओड़ी तुस मेरु नोवं घिन्ता मगेल्हे पण आंव वेइधो ना केरीं की आंव तुशैलेइ बाजी सैहीं सुवाल केरल्हो | ²⁷ किजोकी बाजी ता तुस्न सैहीं एपू पियार केरते एलओरलेइ की तुसैहीं मीसैहीं महबत रखोरिए ते तुसैहीं विशवास कियोरोए की आंव परमेशरी तग्रफां एवरोंई | ²⁸ आंव बाजी कैरां निस्तां दुनियाई मां एवरोंई हुनी दुनियाई मेरां भोइतां वापस बाजी का च़लरौंइ |

²⁹ एसेरां बाद यीशुएरे चेलेइं ज़ोंव हुन्ना तु साफ़ साफ़ गल लोरस केरने ते मसालां तेइतां कम नेहीं लोरो घिन्ने | ³⁰ ते हुन्ना असैहीं बुझ़ू की तीं सभ किछ पत्तोए ते तु केंचेरो गुलाम नेहीं की कोई तीं पूछ़ै असां विशवास केरतम की तु परमेशरी तग्रफ़ां एवरोस | ³¹ यीशुऐ तैना जुवाब दितो हुन्ना ता तुसैहीं विशवास कियोरोए | ³² पण ते मोको एजीरहोरोए बलके पुज़ोरोए की तुस सभ नेशतांअपने अपने घरे पुज़्नेथ ते आंव इकेल्हो शारनोहीं पण फिरी भी आंव अकेल्हो नेहीं किजोकी मेरो बाजी मीसैहीं साथीऐ | ³³ मी तुस्न ऐना गल्लाँ एल्हेरलेइ ज़ोइ की तुस मी पुड़ यकीना केरा तुस दुनियाई मां मसीबत ता उठाताथ पण हिम्ती सैहीं कम केरा आंव दुनियाई मां आवतार एवरोंइ |

यीशु एरी महायजकेरी प्रार्थना अपने लेई

¹ ज़ैखन यीशुए ऐना सभ गल्लाँ ज़ोइ छ़ैडी त तैनी उबरू अंब्रेरां तेकतांबाजी हुन्ना मोको एवरोओ की तु आमने मांठेरी मेहीमां बंदी केर ताके तेरु मांठु तेरी मेंमां बंदी केरे | ² किजोकी तीं तैस सेभी मेंन्न पुड़ अखतियार इही दुवा की एह मेरे दितोरोओ की तेह तैना सेभ्नं ज़ैना तीं तैस दितोरेना हमेशारी ज़ीन्दगी ते | ³ हमेशारी ज़ीन्दगी इओ की तैना सिरफ़ तीं सच़ै परमेशरे ज़ांन्न ते यीशु मांस्सी भी ज़ांन्न ज़ेओ तीं भेज़ोरोओ | ⁴ मीं तैना कम ज़ेंना तीं मी दितेरु थुं मुकेइतां धेरतली पुड़ तेरी मेंमां बंदी की | ⁵ ते हुनी एह बाजी मी अपने सामने अपनी मेंमाही सैहीं मेंमां ते ज़ेस मां की दुनियारे पेईदा भोने कैरां पेहिलो आंव तेरो साथी थु |

अपने चेलां केरे लेई

⁶ मी तु तैना का बंदो कियो ज़ैना तीं दुनियाई मेरां च़ुनातां मी दितोरेना तैना तेरे थिये पण तीं मिजो दितोरेना ते तैनेइं तेरे बचनें पुड़ अम्ल भी कियेरुए | ⁷ हुनी तैना जांन्तंना की ज़ेंना किछ तीं मी दितेरु तैना सभ तेरी तग्रफांहें | ⁸ एल्हेरलेइ ज़ै बिस्तार तीमी दितोरो थु मी तैना तगर पुझ़ाव ते तैनेइं दिलेसैहीं मंनो ते तैस गलारे बाकम भी भोइजे की आंव तेरे पासे एवरोहीं तेतेन्केरो विश्वासे की आंव तीं भेज़ोरोंहीं | ⁹ आंव तैना केरे लेई दुवा केरतान्ही आंव दुनियारे लेइ दुवा ना केरीं पण तेंकेरेलेइ ज़ैना तीं मी दितोरेना किजोकी तैना सभ तेरेना | ¹⁰ मेरु सभ किछ तेरुओ ते तेरु सभ किछ मेरुओ मेरी मेंमां तैना केरे ज़ोंने बांदी भेवरीओ | ¹¹ मी हुनी इस दुनियाई मां नेहीं रांन्हु पण तैना ओजु इस दुनियाई मांन्ह ते आंव एह मेरे बाजी आंव तिन्केझो एवरोहीं अपने तैस नॉवेरी कुदरुती सैहीं ज़ेतीं मी दितोरी तैना स्म्हेलतां रख की तैना अक भोना ज़ेन्चरे आसां अकाम | ¹² ज़ैखन आंव तैना सैहीं साथी थु मी तैना स्मेलतां रखे ते तैना तेरे दितोरे नोंवेंरे ज़ोंने सैहीं बच़ैइतां रखे तैना मेरां कोई ना मुवो सुवाए तैसेरे ज़ै मरनेरे लेइ पेईदा भेवरो थु ताके पाक बच़़नैरु लिखेरू पुरु भोए | ¹³ हुन्ना आंव तीं केझो एवरोहीं पण ज़ां तगर आंव इस दुनियाई मांहीं ऐना गल्लाँ ज़ोंने लागोरोंहीं ताके मेरी सारी खुशी तैना मेल्हे | ¹⁴ मी तैना तेरु बच़ना पुज़ेवरुओ ते दुनियां तैना सैहीं दुशमनी रखी किजोकी ज़ेन्च़रै आंव दुनियारो नेहीं तैना भी नेहीं | ¹⁵ मेरी दुवा एह नेहीं की तेह तैना दुनियाई मेरां न्हे पण एओकी तेह तैना शैतांने कैरां बच़ैइतां रखे | ¹⁶ ज़ेन्च़रै आंव दुनियारो नेहीं तैना भी इस दुनियारे नेहीं | ¹⁷ साच़ेरे ज़ोंने सैहीं तैना पक्के केर किजोकी तेरु बाच़ना साच़ुऐ | ¹⁸ ज़ेन्च़रै तीं आंव दुनियाई मां भेज़ोरोहीं तेंन्च़रै मी भी तैना दुनियाई मां भेज़ोरेन्ह | ¹⁹ आंव अपनो आप तैना केरेलेई हवाले केरतांइ ताके तैना भी साच़ेरे ज़ोंने सैहीं तैना पक्के भोंना |

सैभी विशवैसी केरे लेई

²⁰ मेरी दुवा सिरफ़ तेंनां करेलेइ नेहीं पण तैना करेलेइओ ज़ेन्नेहीं तेन्केरो बिस्तार शुन्तां मी पुड़ विशवास केरल्हे | ²¹ कि तैना सभ अक भोना; ज़ैच़ाँ तु बाजी मीं मां आस, ते आंव तीं मां आइं तैनाच़े तैना ऐसना मां भोना, कि संसार विश्वास केरे कि तीं ए आंव भेज़ोरोइं | ²² ते तै महिमा ज़ै तीं मीं दितोरीए, कि ज़ैंच़रे अस अकम तैना भी अक भोंन | ²³ आंव तैना मां तु मीं मां कि तैना साफ भोइतां अक भोना, ते संसार ज़ांने कि तीं आंव भेज़ोरोइं, ते ज़ैन्च़े तीं मीं सैहीं पयार रखो तैन्च़े तैना सैहीं पयार रखो | ²⁴ ओ धरमी बाजी, संसार ए आंव ना ज़ांनो, पर मीं तु ज़ांनो, ते तैनेइं भी ज़ांनू कि तीं आंव भेज़ोरोइं | ²⁵ ओ धर्मी बाजी, संसारे तु ना पिशानो, पर मीं तु पिशानो, ते तैनी भी इना ज़ानू की तीं आंव भेज़ोरोईं | ²⁶ ते मीं तेरू नौं तैना शुनावं कि ज़ै प्रेम तीं मीं सैहीं थु, तै तैना मां राहेव् ते आंव तैना मां रेईं |

यीशु ट्लावानो

( मत्ती 26: 47- 56; मरकुस 14: 43 - 50 लूका 22: 47- 53 )

¹ ज़ैखन यीशुए दुवा की ता तेह अपने चेलना सैहीं साथी बेइर आव ते तैना सभ क़द्ररुनेरी आबेदी पार लेंघतां पार एकी बागीमां च़लैजे | ² तैस ट्लुवांने बालो युहुदो तैस ठारारौ बाकम थु किजोकी तेह यीशु सैहीं साथी तैड़ी केही फेरेंइ जेवरो थु | ³ ते बसा युहुदो बागीमां पुज़ो ते तैससैहीं साथी किछ रूमी फोवजी ते किछ ओक्लारे सिपाही भी थिये ज़ैना फ्रिसी सरदार काहिना केरे भोंते भेज़ोरे थिये तेंनेहीं अपने हथनामां मुसालां ते दिये ते सांद्रा साथी आनोरां थींयां | ⁴ यीशु सभ ज़ांनातो थु की तेस्सेहीं कुन कुन गल्लाँ भोनीन्ह तेल्हेरलेइ तेह बेइर आव ते पुछ़नै लगो तुस केस लोरेथ तोपने | ⁵ तैनेइं जुवाब दितो यीशु नेसरी यीशुए ज़ोंवं तेह ता आंवहीं तैस ट्लुवांने बालो युहुदो भी तेंसैहीं साथी खड़खड़ो थु | ⁶ ज़ैखन यीशुए ज़ोंवं की तेह आंवहीं ता तैना डेरतां पत्रोंवं नाशे ते ताल्लेमां खिरके | ⁷ एल्हेरलेइ तैनी फिरी पुछ़ू की तुस केस लोरेथ तोपने | तैनेइं जुवाब दितो यीशु नेसरी | ⁸ यीशुए जुवाब दितो मीता ज़ोंवं की तेह आंवेंहहीं अगर तुस मी तोपत्थ ता मेरे चेल्नता गंन्हें तेथ | ⁹ एना सैहीं एना ज़ोनेरो एह मतलब थु की ते गल पूरी भोए ज़ेतैनी ज़ेवरी थी की ज़ैना तीं मी दितोरे थिये तैना मेरां अक भी नेहीं ओरोरो | ¹⁰ शुंमौन पतग्रसे का अक तलवार थी तैनी तेह तलवार कढ़ी ते सरदार कहिनेरे नोकरे पुड़ बाही ते तैसेरो तेहिनो कना कटो | ¹¹ यीशुए पतग्रसे हुक्म दितो अपनी तलवार मियांनेमां रख कुन आंव तेह घुट ना पीं ज़ै मेरे बाजी मीजो दितोरोओ |

हन्ना कानं यीशु

¹² तैखन रूमी फोवजी ते तेन्केरे अफसर ते युहुदी सिपेहीयेहीं यीशु ट्लाव ते तैसेरे हथ बंधे | ¹³ ते पेहिलो हन्ना का न्हीयो ज़ै कैफेरो शओरो थु तैस सालेरो सरदार कहिना थु | ¹⁴ तैनी युहुद्न सल्ल्हा दितोरी थी की सेरी कोमांरेलेइ इना रोड़ु की अक मेंनु मरो गाओ |

पतरसेरू इन्कार

( मत्ती 26 : 69 - 70 मरकुस 14 : 66 - 68 ; लूका 22 : 55 - 57 )

¹⁵ शुंमौन पतरस ते अक होरो चेलो यीशु पत्पति जे ऐना चेले सरदार कहिनेरे बाकम थिये एल्हेरलेइ तेह यीशु सैहीं साथी सरदार कहिनेरी हावेली मां जेव | ¹⁶ पण पतग्रसे बेइर दारे पुड़ रुकनु पेंवं एह चेलो सरदार कहिनेरो बाकम थु वापस आव ते तैस कोंन्शी सैहीं ज़ै दारे पुड़ थी गल केरतां पतरस अंतग्र न्हीयो | ¹⁷ तैस कोंनाशां दारे पुड़ पतग्रसे पुछ़ू कुन तुभी तैसेरे चेलना मेरांस पतग्रसे ज़ोंवं नाहीं आंव नेहीं | ¹⁸ ठंडारे लेइ तैना स्पेहियेंहीं आग बालोरी थी ते च़ुफुरतां खड़सेक लोरे थिये देंने पतरस भी तेंसैहीं साथी अग लोरो थु तपने |

महायाजक यीशु पूछ ताछ केरते

( मत्ती 26 : 59 - 66 ; मरकुस 14 : 55 - 64 ; लूका 22 : 66 - 71 )

¹⁹ तैखन सरदार काहिना यिशुऐ चेलां केरे ता तलिमारे बारेमां पुछ़ने लगो | ²⁰ यीशुए जुवाब दितो मीता दुनियाई सैहीं खुल्ली गल्लाँ कियोरिना आंव ता रोज़ मंद्रनामां ते ओक्लना मां तालीम देंतो रहोरोंहीं ज़ेड़ी सारे युहुदी जामां भोतना मी छ़ैपतां कधे किछ नेहीं ज़ेवरू़ | ²¹ तु मी कीजो पुछ़तांज़ेनेहीं मेरी गल्लाँ शुनोरिना तैना पुछ़़ तैना एपू ज़ोतना की मी कुन ज़ेवरुए | ²² यीशुएरे एना ज़ोनें पुड़ स्पेहीना मेरां अक ज़ै ड्लाखोरां थु तैनी थापुड़ बाहू ते ज़ोंवं की सरदार काहिने जुवाब तेनेरो एओ तरिकोओ | ²³ यीशुए जुवाब दितो अगर मी किछ बुरू ज़ेवरुए ता हेरा ते अगर रोड़ु ज़ेवरुए ता थापुड़ कीजो बहतां | ²⁴ तेसेरां बाद हान्ने यीशुएरे हथ बन्धेइतां सरदार काहिना कैफ़े केझो भेज़ो |

पतरस दुबारां इन्कार केरते

( मत्ती 26 : 71 - 75 ; मरकुस 14 : 69 - 72; लूका 22 : 58 - 62 )

²⁵ ज़ैखन शुंमौन पतरस खड़खड़ो आग लोरो थु तपने ता केंचे तैस पुछ़ू कुन तुभी तैसेरे चेलना मेरांस पतग्रसे इनाकार केरतां ज़ोंवं नाहीं आंव नेहीं ²⁶ सरदार काहिनेरे स्पेहीना मेरां अक ज़ै तैस नोकरेरो रिशतेदार थु ज़ेसरो कना पतग्रसे तलवारी सैहीं कटोरो थु पतग्रसे पुछ़ने लगो कुन मी तु तेस्सेहीं साथी बागीमां नेहीं लाहोरो | ²⁷ पतग्रसे फिरी न्ना ज़ोंवं ते तैखन कुकड़े भी बांक दिती |

पिलातुसेरे सामने यीशु

( मत्ती 27 : 1, 2 , 11 - 14, मरकुस 15 : 1 - 5 ; लूका 23 :1-5 )

²⁸ तेनेंइं यीशु झ़ैझ़ां कैफे कैरां न्हेइतां रुमी गुव्रनार्रे मेल्हे मेझो न्हीयो युहुदी मओले मां अंतग्र ना जे किजोकी तैना डरते थिये की आसां भिटे भोइगंनेंम ते ईद फसहीएरी रौट्टी ना खेईयोए | ²⁹ तेल्हेरलेइ पितलास तैना का बेइर आव ते ज़ोनेंलगो तुस इस मेंनु पुड़ कुन अल्ज़ाम लाताथ | ³⁰ तेंनेहीं जुवाब दितो एह मुर्ज़में अगर एह मुर्ज़म ना भोथो ता आसेंइं एह तेरे हवाले ना थु केरनों | ³¹ पितलास तैना ज़ोनेंलगो तुस एस न्हेथ ते अपने धारमेरे हिसाबे सैहीं फेस्लो केरा युहुदी ज़ोनें लागे आसना ता केंची भी मारनेरी अज़ाज़त नेहीं | ³² एना एल्हेरलेइ भोंवं की ज़ैना गल्लाँ यीशुए ज़ेवरी थी की तेह केरही मोवतां मरेल्हो पुरी भोंना |

³³ तैखन पितलास मेल्हेमांझो च़लौ जेव ते तैनी यीशु कुजेईतां तैस पुछ़ू कुन तु युहुदी केरो बादशहास | ³⁴ यीशुए जुवाब दितो तु एह गा्ल अपनी भोंती ज़ोनें लोरोस की होरेंइं मेरे बारेमां तींसैहीं ज़ेवरीऐ | ³⁵ पितलासे जुवाब दितो कुन आंव कोई युहुदी आंहीं तेरी कोंमांरे ते सरदार काहिनेइं तु मेरे हवाले कीयोरोस तु ज़ो तीं कुन कियेरूओ | ³⁶ यीशुए ज़ोंवं मेरी बादशाही इस दुनियारी नेहीं अगर दुनियारी भोथी ता मेरे चेले जंग केरथे ते मी युहुदी केरे हथे ट्लेयोंने ना तेथे पण ओजु मेरी बादशाही इठेरी नेहीं | ³⁷ पितलासे ज़ोंवं ता कुन तु बाद्शास यीशुए जुवाब दितो एना ता तेरू ज़ोनुहें की आंव बादशाहीं असल्ही मां आंव एल्हेरलेइ पेईदा भेवरोहीं ते एस मत्लाबे सैहीं दुनियाई मां एवरोहीं की साच़ैरी गुवाही देंइ ज़ै साच़ौ दोस्त भोते तेह मेरी गल शुनाते | ³⁸ पिलातुसे पुछ़ू साच़ कुंने |

मौतरे सज़ाहरो हुक्म

( मत्ती 27 : 15 - 31 ; मरकुस 15 : 6 - 20 ; लूका 23 : 13 - 25 )

एना ज़ोंते ते फिरी युहुदना का जेव ते ज़ोनें लगो आंव ता एस मेंनु मुरज़म ना सेमझ़ीं | ³⁹ पण तुशै रुवाज़ेरां ओरतां आंव इदारे मोके पुड़ अककेदि हथरां छ़डतां कुन तुस चाताथ की आंव तुशैलेइ युहुदी केरे बादशाओ हथरां छ़ैडीं | ⁴⁰ तैना फिरि चींडां लागे मारने नेहीं नेहीं तेह नान्हां इशेलेइ बराबे हथरां छ़ाडा बराबा अक डेकू थु |

¹ ज़ैखन पिलातुसे यीशु नैहितां बैंतेइं बह्वैही | ² ते फोव्जारे स्पेहिंयेंइ कन्टां कियुं ताज ब्नेइतां यीशुएरे दोगे पुड़ रखु ते तैस लाल कुरतो लुवाव | ³ तैना बार बार तैसेरे सामने ग्हते थिये ते ज़ोते थिये एह युहुदी केरे बादशाह सलामे ते तसेरे तुतरे पुड़ थापुड़ बहते थिये | ⁴ पित्लास एकी फेरे फिरि आव ते युहुदना सैहीं ज़ोनेल्गो हेरा आंव तैस तुस्न कह बेइर आणतां तुस्न पत्तो लगे की आंव कोंची भी गल्ली मां एस जुरम ना लेइ सेखीं | ⁵ ज़ैखन यीशु कन्टां कियुं ताज दोगे पुड़ रेखतां ते लाल कुरतो लेइतां बेइर आव ता पिलातुसे युहुदना जो ज़ोंवं इही ओ तओ मेंनु | ⁶ सरदार कहिना ता तैसेरे सिपाही तैस लेहितां चिंडां मरने लगे एस स्लेब तेथ एस स्लेब तेथ पण पिलातुसे जुवाब दितो तुस्हे एस न्हेथ ते स्लेब तेथ ज़ेड़ी तगर आंव ज़ानातां आंव एस जुरम लंनेरो कोई बहनों ना ब्नेई सेखीं | ⁷ युहुदी सोचने लगे की असां पक्के म्हेज़बी आहम ते एना इशे म्हेज़बे कैरां बेइर बुझ़ौतै किजोकी तैनी ज़ेवरुए की आंव परमेशरेरू मांटठु अंहि | ⁸ ज़ैखन पिलातुसे एना शुनू ता ते मन्ना डरने लगो ते वापस म्हेल्हे मंजो च़ालौजेव तैड़ी तैनी यीशु पूछ़ू तु कोठरौस पण यीशुऐ कोई जुवाब ना दितो | ⁹ पिलातुसे ज़ोवं तु ज़ोस की न्ना | ¹⁰ कुन तीं पत्तो नेहीं की मी इख्तियार नाहीं की आंव तीं छ़ैडी की स्लेबी पुड़ टेंगी देंइ | ¹¹ यीशुऐ जुवाब दितो अगर एह अख्तियार तीं बंहं ना भोथो मेलोरो ता तेरो कोई अख्तियार मी पुड़ ना थु भोनों पण ज़ैनी मेंने आंव तेरे हवाले कियोरोंइ ते हछे पापेरो हक़दार भेवरोऐ |

¹² तेसेरां बाद पिलातुसे यीशु हथरां छ़ाडनारी कोशिश की पण युहुदी लोक चिंडॉं मेरतां ज़ोना लगे की अगर तु एस मेंनु हथरां छ़ाडेल्हो ता तु केसरेरो हक़दार नेहीं अगर कोई अपने बादशा बन्नेरू एलाना केरते ता तेह केसरेरो खलाफ बुझ़ौते | ¹³ ज़ैखन पिलातुसे एना शुनू ता तैनी यीशु बेइर कुजेइत्ता अपने अदालतारे तख्ते पुड़ बिशो ज़ै अक उच्ची ठैरी थु ज़ेसजो आरांमी बोली महं [ गिब्ता ] ज़ोत्न | ¹⁴ ईद फसेरी तियारी ते हफ्तेरी पेहिली दिहाड़ी थी ते ड्लौवझ़ भोनें बाली थी पिलातुसे युहुद्न जो ज़ोंवं इही राहू तुशो बादशा | ¹⁵ पण तैना चींडां लगे मरने एस इठां दूर न्हेथ ते हुक्म तेथ की एस स्लेब देंम पिलातुसे ज़ोंवं कुन आंव तैस ज़ै तुशो बादशाओ तैस मेरीं सरदार कहिनेंइ ज़ोंवं केसरेरां अलावा ईशो कोई बादशहा नाहीं | ¹⁶ एसेरां बाद पिलातुसे यीशु तेंकेरे हवाले कियो ताके तैना तैस स्लेब देंना एलओरलेइ तैना तैस अपने कब्ज़े मां रेखतां तैठां च़ालै जे |

क्रुसे पुड़ गहनू

( मत्ती 27 : 32 - 44 ; मरकुस 15 : 21 - 32 ; लूका 23 : 26 - 43 )

¹⁷ यीशु अपनी स्लेब छ़़ुइतां खोपड़ी जो च़ालै ज़ेस्जो इब्रेनी मां गुल्कुता ज़ोतना | ¹⁸ तैड़ी तेनेई यीशु ते तेस्सेहीं साथी दुई डेकुन भी स्लेब दिति अक यीशुएरे तेहिने पासे होरो बांऐ पासे ते यीशु मुझ़ाटे | ¹⁹ पिलातुसे अक पखड़ी लिखतां स्लेबी पुड़ लाई तैस पुड़ लिखेरू थुं [ यीशु नासरी युहुदी केरो बादशहा ] | ²⁰ कही युहुदेंइ तैस पेख्ड़ी पुड़ पेड़तां किजोकी ज़ेस जगाई यीशु स्लेबी पुड़ टांगोरो थु ते जगा शहरेरे नेड़े थी ते पेख्ड़ी पुड़ लिखेरू इब्रानी लातिनी ते यूनानी बोली मां लिखेरू थुं | ²¹ युहुदी केरे सरदार कहिनेई पिलातुसे कह दरखुवास की की युहुदी केरो बादशहा ना लिखा किजोकी त्सेरू ज़ोनु थुं की आंव युहुदी केरो बादशहाहीं | ²² पिलातुसे जुवाब दितो मी ज़ैना लिखि छ़ाडू तैना लिखि छ़ाडू |

²³ ज़ैखन स्पेहियेई यीशु स्लेब दिति ता तेनेई यीशुएरे लीगड़ा बांटां ते तैना केरे च़ैवरओसे किये ताके सेभ्नं अक अक ओसो मेल्हे सिर्फ तैसेरो कुर्तो बाकी राहू ज़ेह बहां ते बुना तागर आके थु | ²⁴ तैना एपूमांमेंहीं ज़ोने लगे की एसेरे टोटे केरनेरे बजाओ शर्त रखम ज़ैसेरे नोंवें पुड़ परची निसेल्ही लिगड़ां तैस भोलां एना एलओरलेइ भोंवं की ज़ैना पाक बच़नै मां लिखेरू थुं तैना पुरु भोए की तेनेई मेरां लिगड़ां बांटां ते मेरे कुरतेरे लेइ लाटरी रखी ते स्पेहियेंएईं देंने कींवं |

²⁵ यीशुऐरी स्लेबी का तैसेरी अमां ता तेसारी बेहिना मरियम ज़ै क्लोपासेरी कोंन्श थी मरियम मगदिनी खाड़खड़ी थी | ²⁶ ज़ैखन यीशऐ अपनी अमां ते अक अपनो चेलो एपू क नेड़े खाड़खड़ौ लाहू ता तैनी एपनी अमां सैहीं ज़ोंवं एह अमां अज़ेरां बाद एना तेरु मटठुऐ | ²⁷ ते कने चेले जो ज़ोंवं अज़ेरां बाद इही तेरी अमांहें तैनी चेले तेखने तेह अपने घरे नेही |

यीशु एरी मौत

( मत्ती 27 : 45 - 56 ; मरकुस 15 : 33 - 41 ; लूका 23 : 44 - 49 )

²⁸ ज़ैखन यीशुऐ बुझ़ुकी हुनी सेरी गल्लाँ पूरी भोइजेइ की एल्हेरलेइ की ज़ेंच़रैपाक बच़नै मां लिखेरू थुं तैना पुरु भोंवं तैनी ज़ोंवं मी ट्लीश लगोरीऐ | ²⁹ तैड़ी अक घड़ो शरापे सैहीं भेरतां रखोरो थु लोटो तैसमां डोब्तां डांगे सैहीं लेइतां यीशुएरे ऐशही सैहीं हुराव | ³⁰ यीशुऐ तैना पिंते ज़ोंवं की पुरु भोंवं ते करोड़ी ट्लौड़तां अपने प्राण दिते |

भालो डोबनो

³¹ एह ईद फ्सेरी तियेरारी दिहाड़ी थी होरसां सब्तेरी दिहाड़ी थी युहुदी ना थिये चाते की सब्तेरी दिहैड़ी लाश सलेबे पुड़ टंगोरी राहु एल्हेरलेइ तैनेइं पिलातुसे का गेहितां ज़ोंवं की मुर्ज़मेरी ज़न्घां ट्लौड़तां तैसेरी लाश उनाढी उसालम | ³² तताल्ही सिपाही आए तैनेइं पैहिले तैना दुई मेंनाहूँ केरी ज़न्घां ट्लौड़ी ज़ैना यीशु सैहीं साथी स्लेबी पुड़ च़ाड़ौरै थिये | ³³ पण ज़ैखन यीशुऐरी बारी अई ता तैनेइं ओरू की ते पैहिले मेरी जेवरोए तेल्हेरलेइ तैनेइं तैसेरी ज़न्घां ना ट्लौड़ी | ³⁴ पण स्पेहिनामेरां एक्के अपनो मैक्कु एन्तां यीशुएरे ट्लुखी मां बाही ते तैसेरी तेलोड़ी मां बज़ी ते लेहु ता पनी बग्ने लगु | ³⁵ ज़ै मेनू एस मोके पुड़ तैड़ी थु शाहदत देते की तैसेरी गवाही सच्च़ी थी तेह ज़ांन्तो थु की ते सच्च़ लोरो ज़ोंने की तुस्भी विश्वास केर्थ | ³⁶ ऐना सेरी गल्लाँ एल्हेरलेइ भुई की पाक बच्च़नै मां लिखेरू पुरु भोंवं की तैसेरी कोई हडी ना ट्लुटैलही | ³⁷ पाक बच्च़नै मां एकी होरी ठेरी लिखेरूऐ की ते तैस ज़ैनी ते मैक्कु सैहीं काटोरोए तैस तकेल्हो |

यीशु दबो

( मत्ती 27 : 57 - 61; मरकुस 15 : 42 - 47; लूका 23 : 50 - 56 )

³⁸ एना गल्लाँ केरे पत्ती अक मेनू युसाफ नोंवेरो ज़ै अर्मितीयरो रहंने बालो थु पिलातुसे का जेव ते तैनी यीशुएरि लाश न्हेंनेरलेइ अज़ाज़त मागी एह मेनू युहुदी केरे डारे सैहीं छ़ैपुं यीशुएरो चेलो थु तेह पिलातुसे कैरां अज़ाज़त घिनातां आव ते यीशुएरि लाश नेहिजेव | ³⁹ नेकोतेम्स भी आव ज़ैनी अक थोड़े च़ीरै पेहिले एकी रती यीशु सैहीं मुलाकात कियोरी थी तैनी एपुका बड़े माघे मुसाले ते मुशकि बेली चिजां साथी एन्होरी थी ज़ैना छ़ुंनै मां कोई पंज़ह सेर येनी दाश बेटी थिये | ⁴⁰ एना दुइए ज़ांन्हेंइ यीशुएरी लाश नेहीतां तैस मुशकि मुसाले लेइतां एकी उनाली च़ादरी मां प्लेटतां ज़ेन्च़रै युहुदी दाबते थिये | ⁴¹ ज़ेड़ी यीशु मारो थु तैड़ी बागी मां अक नोविं कबर थी ज़ेस मां पेहिली कोई लाश ना थी | ⁴² किजोकी एह युहुदी केरी सब्तेरी तियेरारी दिहाड़ी थी ते कबर भी नेड़े थी तेनेहिं यीशु तैड़ी ज़ेरे रखे |

खाली कब्र

( मत्ती 28 : 1 - 8 ; मरकुस 16 : 1 - 8 ; लूका 24 :1- 12 )

¹ हफ्तेरी पेहिली दिहैड़ी झ़ैझ़ां ओजु अंधारु थुं मरियम मगदिनी कबरी पुड़ अई तेसां ओरू की कबरी पुड़रां घोड़ भी खड़ो कियोरोए | ² ते दोवड़ती शुंमौन पतग्रसे ते होरी चेलना का पुज़ी ज़ै यीशुए सुखातो थु ज़ोने लगी तेनेई यीशु कबरी मेरां केढतां न्हियोरो ते पत्तो नाहीं तेह कोड़ी रखोरोए | ³ एना शुन्तां पतरस ता आक होरो चेलो कबरारे पासे च़ालै | ⁴ दुइये तेव्ड़तां च़ालौरै थिये पण ते दुइयांव चेलो पतग्रसे कैरां आगरांवं निसि जेव ते तैस कैरां पेहिलो कबरी पुड़ पुज़ो | ⁵ तैनी लिकतां तकु ते उनालां लिगड़ां लहं ते अंतग्र ना जेव | ⁶ तेखने पतरस भी प्तप्ती तैड़ी पुज़ो ते सीधो कबरी मां जेव तैनी ओरू की तैड़ी उनालां लिगड़ां तैड़ी थियां | ⁷ ते काफ्नेरो तेह रुमाल भी ज़ै यीशुएरे दोगे सैहीं पलेटोरो थु उनाले लिगड़ना मां तह बनेवरो एकी ठेरी थु | ⁸ तैखन ते होरो चेलो भी ज़ै कबरी पुड़ पेहिलो पुज़ोरो थु अंतग्र जेव तैस भी लेहितां यकीना भोंवं | ⁹ किजोकी तैनेइं पाक बच़नैरी एह गाल ना थी समझ़ौरी ज़ैसेरे बारे मां की यीशुएरू मुड़दना मेरां ज़िन्तु भोनू ज़रुरी थुं | ¹⁰ तैखन ऐना चेले वापस घर जो च़लै जे |

मरियम मगदलीनी पुड़ बांदू भोंनू

( मत्ती 28 : 9 - 10 ; मरकुस 16 : 9 - 11 )

¹¹ पण मरियम काबरी कैरां बेइर लेरां देंती थी लेरां देंती देंती तेसां लिकतां कबरी मेझो तकु | ¹² ता तैड़ी तेसां दुई फरिश्ते लाओ ज़ैना छ़ीतां लिगड़ां थियां ज़ेड़ी यीशुएरी लाश रखोरी थी तैड़ी अक शरेंइंते ते होरो परेंइंते बिशोरे लाओ | ¹³ तेनेंहीं मरियामी पूछ़ु एह कोनाशे तु कीजो लोरिस लेरां देंने मरियमा ज़ोंवं मेरो परमेशर छ़पैवरोहै ते पत्तो नेहीं कोड़ी रखोरोए | ¹⁴ एना ज़ोंते तेह पतरोंहूँ बेदल्ही ता तैड़ी यीशु खड़खड़ो लाहू पण तैस पशाना ना अई की एह यिशुओ | ¹⁵ यीशुए ज़ोंवं एह कोनाशे तु कीजो लेरां देंने लोरिस तु केस तोपने लोरिस मरियमा समझ़़ुकी कोई बागवाने तेसां ज़ोंवं की ओ मियां अगर तीं न्हीयोरोए ता ज़ो की तीं कोड़ी रखोरोए ते आंव तैस न्हेंई | ¹⁶ यीशुए तैस ज़ोंवं मरियम तैसेरे पासे फिरि ते इब्रेनी मां ज़ोंवं [रबुनी ]ज़ेसेरो मतलब एह मेरे गुरु | ¹⁷ यीशुए जोंव मिसैहीं ना हुरां किजोकी आंव बाजी का बाह ओजु नेहीं जेवरो ते मेरे ढ्लांन गेहितां ज़ो की आंव अपने बाजी ते तुशै बाजी ते अपने परमेशर ते तुशै परमेशरे का बाह च़ालौरोंहीं | ¹⁸ मरियम मागदिनी तैठां च़ली जेई ते चेलना का गैहीतां तैन पत्तो दितो की मीं परमेशर लाहोरोए ते तैनी मी सैहीं ऐना गल्लाँ की |

चेलन पुड़ बांदू भोंनू

( मत्ती 28 : 16- 20 ; मरकुस 16 : 14 - 18 ; लूका 24 : 36 - 49 )

¹⁹ फ्तेरी पेहिली दिहैड़ी ड्लौवझ़ारै मोके सारे चेले एकी ठेहेरी थिये ते युहुदी केरे डरे सैहीं दार बन्द केरतां बिशोरे थिये यीशु आव ते तैन्केरे मुझ़ाटेखड़ो भोईतां ज़ोन्ने लगो तुसन जो मेरु सलामे | ²⁰ एना ज़ोइतां तैनी अपने हथ ते अपनी पाखड़ तैना ओराई चेलेहीं एना लेहितां बड़ी ख़ुशी बनाई | ²¹ यीशुए फिरी ज़ोंवं तुस्न जो सलामे ज़ेन्च़रै बाजीं आंव भेझ़ोरोहीं .तेंच़रे आंव भी तुस्न भी भेज़ोरेथ | ²² एना ज़ोइतां तैनी तैना जेई फुक दिति ते ज़ोंवं पाक रुहु मेल्हे | ²³ अगर तुस केस्केरे पाप माफ़ केरेल्हे ता तुशै भी माफ़ भोल्हे अगर माफ़ ना केरेल्हे ता तुशै भी माफ़ नेहीं भोंने |

थोमा पुड़ बांदू भोंनू

²⁴ ज़ैखन यीशु अपने चेलना का बांदो भोव ता तोमां ज़ेसजो तोंम ज़ोते थिये ते तेह ज़ै तैना बारहना मेरां थु तैखन तैड़ी ना थु | ²⁵ पण होरी चेलेहीं तैस ज़ेवरु थुं की आसैहीं यीशु लाहोरोए पण तोमां लगो ज़ोंने की ज़ां तागर आंव मेखां कैरां गतां तसेरे हथना ना ओरीं ते तैना गतना मां अन्गोली छ़ैाडतां ते अपने हथे सैहीं तसेरी पाखड़ ना हेरीं तां तागर यकीना ना केरीं |

²⁶ एकी हबतेरां बाद यीशुएरे चेले एकी बार फिरि तेस्से ठैरी बिशोरे थिये ते तोमां भी तेड़ही थु ते दारां भी बंद थियां ते यीशुएइतां तैना मुझ़ाटे खड़ो भोव ते तैना जो ज़ोनें लगो तुस्न जो सलामे | ²⁷ फिरि तैनी तोमां जो ज़ोंवं अपनी अंग्लोई आन्ह ते मेरो हथ ओर ते आमने हथे सैहीं मेरी दालोड़ी ओर शक ना कैरां मीपुड़ भरोसो रख | ²⁸ तोमें तेस्जो ज़ोंवं एह मेरे परमेशर एह मेरे परमेशर | ²⁹ यिशुएं तैस जो ज़ोंवं तीं आंव लेहितां तीं मीं पुड़ विश्वास कियो मुबारक तेन्हना ज़ेनेहीं आंव लाहोरो नेहीं पण फिरिभी विशवास कियो |

इस कताबरो मक़सद

³⁰ यिशुएं अपने चेलां केरे सामने बड़ां अजीब कमां कीयोरां थियां ज़ैना इस किताबी मां नेहीं लिखोरां | ³¹ पण ज़ैना लिखोराना तेनाकेरो एह मतलाबे की तुस विशवास केरा की यीशु ही मस्सही ओ येनी परमेशरेरू मांटठु ते तैस पुड़ विशवास केरतां तैसेरे नोंवें सैहीं जिंदगी हासल केरा |

तिबिरियासरे झीलरे बन्ने चेलन पुड़ बांदू भोंनू

¹ बातेमां यीशुए एपू एकी फेरे फिरि अपने चेलना का त्ब्रियास झिलारे बन्ने एन्च़रै बांदो भोव | ² की ज़ैखन शुंमौन पतरस तोमां [तोआम ]नातनएल ज़ै कांनायें गलीलेरो थु ते ज़ेब्देरू मठ्ठु ते होरे चेले भी तैड़ी थिये | ³ ता शुंमौन पतरस तैनसैहीं ज़ोंने लगो आंव मैछ़ली ट्लांनै गातां तैनेइं ज़ोंवं आस्भी तीं साथी च़लतम तैना तैठां निसे ते किश्ती मां च़ैडतां जे पण तैस राती तैना किछ ना मैल्हु |

⁴ झ़ैझ़ां यीशु बन्ने पुड़ एइतां खड़ो भोव पण चेलेइं ना पशांनों की एह यिशुओ | ⁵ यीशुए तेन्जेई हक़ तेइतां ज़ोंवं दोस्ताव कुन किछ हथे लगु तैनेइं जुवाब दितो नेहीं | ⁶ यीशुए ज़ोंवं ज़ाल किश्तारे देंहिने पासे छ़डथ ता पेक्की मैछ़ली हथे लेग्नी आन्ह कीजोकी तैनेइं ज़ाल छ़ाडु तेमेछ़ली एतरी ज़ाले मां लेगी की ज़ाल खिंचोने ना लगु | ⁷ तैखन यीशुएरे सुखाने बाले चेले पतरस सैहीं ज़ोंवं एह ता परमेशरे ज़ेरहू शुंमौन पतग्रसे एना शुन्नु की एह परमेशरे तैनी अपनो चोगो लव ज़ै तैनी खोलतां रखोरो थियो पेंनी मांजो छाल मारी | ⁸ होरे चेले ज़ैना किश्ती मां थिये ज़ाल ज़ैना मेछ़लेंइ सैहीं भेरतां थुं तैनेइं खिंच्तां अहंनाहूँ किजोकी तैना पंज़ा फुटना कैरां दूर ना थुं |

⁹ ज़ैखन तैना बन्नें पुड़ ओसे ता ओरताना की अगी पुड़ मैछ़ली रेखोरीना ते ड्लेखी रौट्टी भी आन्ह | ¹⁰ यीशुए तैनसैहीं ज़ोंवं ज़ैना मैछ़ली तुसैहीं ट्लैतौरीना तैना मेरां किछ इरहां आंन्हां | ¹¹ शुंमौन पतरस किश्ती मां च़ड़ो ते ज़ाल ड्लेखी पुड़ खिचतां आंन्हुं ज़ैसमां की अक शोव्व तरुन्जा मैछ़ली लेगोरी थी ते फिरीभी ज़ाल नेहीं छ़ींदौरु | ¹² यीशुए तैनसैहीं ज़ोंवं एजा किछ खाथ पण चेलना मेरां केंची हिमत ना अई की पूछ़मकी तु कोंव्न्स पण तैना ज़ांन्ते थिये की एह परमेशरओ | ¹³ यीशुए एइतां रौट्टी ट्लाती ते तैना भी दिती ते मैछ़ली भी दिती | ¹⁴ यीशु मुड़दना मेंरां ज़ींन्तो भोनेरां पत्ती ट्लेईयांव फेरे फिरि अपने चेलना का बांदो भोई जेव |

यीशु ते पतरस

¹⁵ ज़ैखन तैनेइं रौट्टी खाई ता यीशुए शुंमौन पतग्रसे सैहीं ज़ोंवं शुंमौन युहन्नेरा मांठा कुन तीं आंव इना सेभ्नं कैरां जाते ट्लारौंहीं तेंनी ज़ोंवं हां परमेशर तु ता मीं ज़ान्तास की मीं तु केतरो च्च़ै इना ट्लारौस यीशुए तैना सैहीं ज़ोंवं मेरे गबना भाव तेथ | ¹⁶ यीशुए फिरि तैनसैहीं ज़ोंवं शुंमौन युहन्नेरा मांठा कुन तीं आंव ससेभ्नं कैरां जाते ट्लारौंहीं तेंनी ज़ोंवं हां परमेशर तु ता मीं ज़ान्तास की मीं तु केतरो ट्लारौस यीशुए तैना सैहीं ज़ोंवं मेरे गब्बंना सम्हाला | ¹⁷ तेंनी ट्लैयांवं फेरे फिरि पूछ़ू शुंमौन युहन्नेरा मांठा कुन तीं आंव इना सेभ्नं कैरां जाते ट्लारौंहीं ता पतग्रसे दुःख भोइजेव किजोकी यीशुए तैस ट्लैई बार पूछ़ैरु थुं मांठा कुन तीं आंव ससेभ्नं कैरां जाते ट्लारौंहीं तेंनी ज़ोंवं हां परमेशर तु ता मीं ज़ान्तास की मीं तु केतरो ट्लारौस यीशुए तेसैहीं ज़ोंवं मेरी भेडां च़ारा | ¹⁸ आंव तीं सैहीं सच्च़ै ज़ोतां की ज़ैखन तु नोजुवांना थु ता ज़ेड़ी चहतो थु ता तैड़ी गहतो थु पण ज़ेईस तु बुढो भोल्हो ता अपनो हथ होरीकैरां ट्लवाल्हो ते होरो तीं लाखेरां ट्लैइतां ज़ेड़ी तु गंनाहूँ भी ना सुखालो ता तीं तैड़ी छ़ुईतां पुज़हलो | ¹⁹ यीशुए एह गल ज़ोइतां इशारो कीयो की पतरस कोसकिस्मेरी मोवतां मेरतां परमेशरी मेंमां बंदी केरल्हो तैखन यीशुए पतग्रसे सैहीं ज़ोंवं मीं पत्ती च़ल |

यीशु ते तैसेरो ट्लारो चेलो

²⁰ पतग्रसे फिरतां तकु की यीशु सुखाने बालो चेलो तैस पत्पती च़लौरौओ एह तेह चेलो थु ज़ैनी ड्लाई खांनेरे मोके यीशुएरे पासे लीकतां पुछ़ेरु थुं एह परमेशर तेह कोवंने ज़ेह तीं ट्लवालहौ | ²¹ पतग्रसे तैसेरे पासे तेकतां यीशुए पूछ़ु एह परमेशर एस चेलेरू कुन भोलू | ²² यीशुए जुवाब दितो अगर आंव चेंहीं की अगर मेरे वापस एजने तगर ज़ींन्तो राहु ता एस मां तीं कुन तु मीं पत्पती च़लेइं | ²³ एंच़रे ढ्लांन मां एह गल सेभिए फेली जेई की एह चेलो ना मरेल्हो पण यीशुए एना ना थुं ज़ेवरु की तेह ना मरेल्हो पण एना ज़ेवरु थुं अगर आंव चेंहीं की अगर मेरे वापस एजने तगर ज़ींन्तो राहु ता एस मां तीं कुन |

अखरी हिसो

²⁴ इओ तेह चेलो ओ ज़ै इना गल्लाँ केरी गुवाही देते ते ज़ैनी ऐना लिखोरी भी आंन्ह असां ज़ांन्तम की तैसेरी गुवाही साच़ीइए |

²⁵ यीशुए होरां भी बड़ां कम्मां कीयोरां थींयां अगर सेभी केरे बारेमां लिखनु भोथु ता आंव समझ़तां की तैना किताबां अज़ भोथी तैन्केरे लेइ इस दुनीयाई मां ठार ना थी भोनी |