प्रेरितां

ACTS

प्रेरितां केरां कम्मां

तारुफ

¹ जनाब थिफ्लुस साहब मीं एपनी किताबी मां तैना सैरी गल्लाँ लिखोरिन, ज़ैना यीशुएरे ज़िरये सैहीं अम्ले मां एवरी थी, ते ज़ैन्केरी तै तालीम भी देंतो राहु। ² तैस दिहैड़ी तगर ज़ैईस तै उबरो असमाने मैझो जेव, पण तैस कैरां पैहीले तैनी अपने चेलन पाबित्र आत्माइं सैहीं किछ हादेइत भी दितोरी थी। ³ दुःख झ़ैलनेरां बाद तैनी अपने ज़िंते भोंनेरां काही स्बुतां भी असंन तगर पूज़ां, ते च़ैल्ही दिहाड़न तग्र तैन लैहियोंतो राहु, ते परमेशरी बादशैहीयरी गल्लाँ शुंनातो राहु। ⁴ एक्की फेरे ज़ैखन तै तैन सैहीं साथी रौट्टी खाने लोरो थु, ता तैनी तैन ठाकेरू थुं, की तुस युरोशल्मे मैरां बेइर ना गैहियथ ते मेरे बाजी केरो तै वेहिदो पुरो भोंनेरो इंतज़ार केरथ, ज़ैसेरे बारे मां तुसेइं मीं कैरां शुंनेरु भी आऔ। ⁵ ते एल्हेरलेइ की तुसंन थोड़े दिहैड़ना पत्ती पाबित्र आत्मांरो बप्तीसमों मैल्हेलो, जांता युहन्ना पैनी सैहीं बप्तीसमों देतो थु।

यीशु एरू सुवर्ग ए गहनू

⁶ ज़ताल्ही तैना एक्की ठैरी अकोठे भुए, ता तैनेइं तैस पुछु, औ परमेशर कुन तु अज़ फिरी इस्राइएले तैसेरी बादशाही देंने बालोस। ⁷ तैनी तैन सैहीं ज़ोंव, ऐना मोकां केरो ता ऐना कम्मां केरो पक्को पत्तो ते अख्तीयार सिर्फ़ इशे असमानी बोवे, ते एन सिर्फ तै ज़ांनते तुशु कंम नेहीं। ⁸ पण पाबित्र आत्मां ज़ैखन तुसन पुड़ उतरेल्ही ता तुसन ज़ौर बाधेल्हो, ते युरोशल्मे ते सारे युहुदिये ते सांमरिये मां बल्के धेरतारे कुंने तगर मेरे शाहादत भोल्हे । ⁹ एना गल्लाँ ज़ोंनेरां पत्ती तै तैन केरे सामने औरते औरते उब्रो असमाने मैझो जेव ते बिदलारी मां छ़ैपी जेव। ¹⁰ ज़ैखन तैना चेले यीशु असमाने मैझो गहंतो तकने लोरे थिये, ता हेरा दुई मड़द ज़ैन छ़ीतां लिगड़ां लगोरां थियां तैन का एइतां खेड़ोहे। ¹¹ ते ज़ोंने लगे, की औ गलीली मैनाव तुस खड़खड़े आंम्ब्रेरे पासे कुंन तकने लोरेथ? एह यीशु ज़ैंच़रे तुशे सामने आंम्ब्रे मैझो च़लो जेव, तैंच़रे फिरी एज्जेल्हो ज़ैंच़रे तुससेइं लोकेइं आंम्ब्रे मैझो गहंतो लाहोरोए तैंच़रे फिरी एइंतो लाहेले।

मत्तियाहे यहूदारो रुतबो मैल्लते

¹² ज़ैखन तैना ज़ैतुंन पहाड़े पुड़ेरां युरोशल्में मां आए, ता एन पहाड़ युरोशल्में कैरां कोई आधौ मील दुर थुं। ¹³ शाहरे मां एइतां तैना तैस ठैरी जे, ज़ैड़ी पतरस युहन्ना याकुब आंद्रियास फिल्पुस तौमा ब्रत्माइ मत्ती हैल्फेरू मठ्ठु याकुब शुमौन ज़ैलोतस ते यकुबेरू मठ्ठु युहुदा रहते थिये। ¹⁴ ऐना सभ मड़द ते कौन्शां येंनी यीशुएरी आम्मां ते तैसेरे ढ्लांन सैहीं साथी अक दिल भोइतां प्राथनाइ मां मस्त रहते थिये।

¹⁵ तैन्ने दिहाड़न मां पतरस तैन ढ्लां केरी जमाती मां ज़ैनकेरी तैधात कोई अक शौव बिही थी, पतरस खड़ो भोइतां ज़ोंने लगो। ¹⁶ मेरे ढ्लाव पाक बच्नेरी तै गल ज़ै पाक रुहां दावदेरी ज़बांना पैहीले ज़ेवरी थी, पुरी भोंनी ज़रुरी थी, तै गल युहुदेरे बारे मां ज़ेवरी थी, ज़ैनी यीशुएरे ट्लुवांने बालां केरी मद्त कियोरी थी। ¹⁷ तै ईशो अक खास सैवा केरने बालो थु, तै ईशे मैन्ह्न मां तैसेरो शुमार भोतो थु। ¹⁸ तैनी एपनी हेरांमेरी कमैई सैहीं अक ऊडार घिंनेरु थुं ज़ैड़ी तै दोग्गेरे भारे खिरकोरो थु, ते तैसेरू पैट फैटतां तैसेरी एंट्लोड़ी बेइर निसोरी थी। ¹⁹ युरोशल्मेरे रहंने बालन सैरन एह पत्तो लागोरो थु, एड़ी तगर की तैनेइं एपनी ज़बांना तैस उडारेरु नोंव हेक्लदांमां रखेरू थुं, तैसेरो मत्लब भोव, खुंनेरु उडार। ²⁰ किजोकी भजना केरी कताबी मां लिखेरुए की, तैसेरू घर उज़ड़े ते तैस्मां कोई बस्ने बालो ना भोए, ते तैसेरी ठैरी कोई होरो एज्जे। ²¹ एल्हेरलेइ एन ज़रुरीए की यीशुएरु असंन सैहीं साथी एजने गहंनेरे मोके तगर। ²² येंनी युहन्नेरे बप्तीसमें कैरां लेइतां असंन कैरां उबरे गहंने तगर ज़ैना लोक बराबर असंन सैहीं साथी थिये, तैन मैरां अक मैन्हुं च़ुनों गाहे, ज़ै असंन सैहीं साथी तैसेरे ज़िंते भोंनेरो शहादत भोए। ²³ एल्हेरलेइ तैनेइं दुईये ज़ंने नामज़द किये, अक युसफ ज़ैसजो ब्रस्बा ज़ोते थिये, ज़ैसरो (खताब) युसीसे, ते दुईयवं मत्तिया थु। ²⁴ तै एन ज़ोइतां दुवा की औ परमेशर तु सैभी केरे दिले ज़ांनतां ते असंन हेरा की इन दिहाड़न मां तीं कौन ज़ैरो च़ुंनोरोए। ²⁵ की तै एस कंमेरे बारे मां बराबर ज़ांन्कहर भोए, ज़ै युहुदिये कैरां लेइतां इड़ी तगर पुज़ोरो भोए, ज़ैसेरो तै हकदार थु। ²⁶ ज़ैनेइं तैसेरे बारे मां शर्त रखेरू थुं, ज़ैन मत्तियारे नोवें पुड़ निसेरू थुं, एल्हेरलेइ तै बहरे चेलन सैहीं साथी शुमार भोतो थु।।

पवित्र आत्मरू एजनू

¹ ज़ैईस ईद पैतंकुस्तेरी दिहाड़ी अई, ता तैना सभ एक्की ठैरी अकोठे थिये। ² अचांनक अंम्ब्रेरां आवाज़ आई, ज़ेंच़रे बड़ो बात च़लने लोगोरो थु, ते तैस्सैहीं सारु घर घुंमने लगु ज़ैड़ी तैना बिशोरे थिये। ³ ते तैनेइं अगारी लप्परी ज़ैरही ज़ीभां लैही, ज़ैना तैन मैरां आलाग आलाग भोइतां तैन सैभन पुड़ एइतां टिकी। ⁴ ते तैना सभ पाबित्र आत्माइं सैहीं भरपुर भुए, ते आत्मारे ज़ोंने सैहीं तैना आलाग आलाग बोली केरने लगे। ⁵ तैईस बड़े परमेशर मन्ने बाले युहुदी ज़ैना दुनियारी हर कौमीं मैरां थिये, तैईस युरोशल्में मां थिये। ⁶ ज़ैखन तैनेइं एह आवाज़ शुंनी ता बड़े लोक जम्हां भोए, ते सभ लोक बड़े हेरान रेही जे किजोकी सारे एपनी एपनी बोली मां गल्लाँ केरते शुंने। ⁷ ते सभ हेरान परेशान भोइतां पुछ़ने लगे, की ऐना बोली बोलने बाले सारे गलीलीन? ⁸ फिरी एन कैंच़रे भोई सखते की असंन मैरां हर कोई एनकेरे ज़बांना अपने अपने मुलखेरी बोली शुंने लोरेंम। ⁹ असां ता पारथिया मादीया एलांम ते मैसुपोतामियां युहुदिया कुपदकिये पैंतुस ते आसियारे रहंने बालेम। ¹⁰ फरोगिया ते पैम्फोलियारे रहंने बालेन आस लीबियारे रहंने बालेंम, ज़ैन कुरींनेरे नेड़े, असंन मां किछ सिर्फ़ मुशाफ्रन ज़ैना रुंम शहरे मैरां एवरेंन, ते असंन मां किछ युहुदी भी आंन दे तैना गैर कौमंन बाले लोक भी आंन, ज़ैनेइं युहुदी मैहेज़्ब कुबुल कियोरोए, ते असंन मां किछ कुरीती भी आंन ते आरबेरे रहंने बाले भी आंन। ¹¹ ते तैसेरे आलावा भी आस तैन कैरां एपनी बोली मां परमेशरेरां आजीब कम्मां केरे बारे मां बीयांन शुंनी राहोरेंम। ¹² तैना बड़े हेरान भोइजे ते डेरतां एक्की होरी पुछ़ने लगे, की एन कुन भोंने लोरुए? ¹³ पण किछ तैनकेरी हासी बनेइतां ज़ोंने लगे, की एनेइं सज़री शराप हछी पियोरीए।

पतरसेरू भाशण

¹⁴ तैखन पतरस यारहे चेलन सैहीं साथी खड़ो भोव, ते बड़े ज़ोरे सैहीं ज़ोंने लगो, की औ लोकाव औ युहुदियाव औ युरोशल्मेंरे रहंने बालाव मेरी गल रोड़े च़ारे शुंना, आंव तुसन ज़ोतां की इड़ी एन कुन भोंने लोरुए। ¹⁵ ज़ैंच़रे तुस बुझ़ने लोरेथ तैन नेहीं, ऐना मैन्हुं नशे मां नेहीं, किजोकी हूंन्ना ता झ़ैझ़ारे सिर्फ़ नोव बज़ोरेन। ¹⁶ बल्के एह तै गल्ले, ज़ै युआईल नैबें ज़ेवरी थी।

¹⁷ परमेशर ज़ोते की आंव आखीररी दिहैड़न मां एरहु केरेल्हो, की अपनी रुहु सैभी लोकन पुड़ उतैरेल्हो, ते तुशां मठ्ठां कुंइयां मेरी तरफां बिस्तार देल्हां, ते तुशे नोव जुवांन ते बूढ़े सुपना लाहेलां। ¹⁸ बल्के आंव तैन दिहैड़न मां अपने सेवादार मड़दन ते कौन्शन पुड़ अपनी रुहु उतैरेल्हो, ते तैना बिस्तार देल्हे। ¹⁹ आंव बह आसमाने मां ते बून ज़मीनी पुड़ आजीब आजीब नज़ारे हैरेइल्हो, येंनी आग खुंन ते कालो तुं। ²⁰ दिहाड़ो कालो भोई गहंनोएं, ते चांदानी खुनेरी ज़ैरही लाल भोंनिएं, ते एस्कैरां पैहीले परमेशरेरी एज्नेरी अक खास दिहाड़ी भोंनिएं। ²¹ ते ज़ै कोई परमेशरेरू नोंव घिंनेल्हो तैहे पापण कैरां आज़ाद भोल्हो, ते तैस्सेरे पाप माफ़ भोल्हे। ²² औ बनी इस्राएलाव इना गल्लाँ शुंना, यीशु नासरी अक मैन्हुं थु, ज़ै परमेशरे तुशे लेइ भेज़ोरो थु, ते एस गल्लारी तस्दीक तैसेरे खास खास कंमा केरे स्बुतेइं सैहीं भोचे, ज़ैना परमेशरे तैसेरे ज़िरये सैहीं ईशे सामने हेरां, ज़ैंच़रे की तुस एपु भी ज़ांनतथ। ²³ ज़ैखन तै परमेशरेरे इन्त्ज़ामेंरे पुरे मोके पुड़ ज्ञान इल्मेरे हिसाबे सैहीं ट्लुवाव, ते तुसैहीं तै गैर युहुदी केरे हथे सलेबी पुड़ टंगेइतां माराव। ²⁴ पण परमेशरे तै मौवतरे सकेंजे मैरां छुटेइतां ज़िंतो कियो, किजोकी एन भोई ना थुं सख्तु, की तै मौवतरे कब्ज़े मां राहे। ²⁵ किजोकी दावद एस बारे मां एन ज़ोते, की आंव हर बख्त अपने सामने लहंतो रहताइं, किजोकी तै मेरे देंहींने पासे, एल्हेरलेइ मीं कोई हालहुज्त ना भोल्ही। ²⁶ तांएं मेरो दिल ख़ुशीऐ ते मेरी ज़बांन भी न्रमे, ते बल्के मेरी सारी जान एक्की उमीदी पुड़ टिकोरीए। ²⁷ किजोकी तु मीं क्ब्री मां रहंने ना देल्हो, ते ना अपने ट्लारे भगते शड़ने देल्हो। ²⁸ तीं मीं ज़िंदगारी बत्त हेरेवरिए, तु अपने दिलेरी ख़ुशी सैहीं मीं भरपुर केरेल्हो।

²⁹ ओ मेरे ढ्लाव आंव कौमारे बुज़ुर्ग दावदेरे बारे मां तुसन सैहीं साफ़ साफ़ ज़ोई सख्तां, की तै मैरी भी जेव, ते दब्बो भी ते तैसेरी कब्र आज़ भी ईशे सामने माजुदे। ³⁰ पण तै नब़ी थु; ते तै ज़ांनतो थु, की परमेशरे तैस्सैहीं कसंम कियोरिए, की तैसेरी ओवलाधि मैरां अक मैन्हुं तैसेरे तख्ते पुड़ बिशेल्हो। ³¹ तैनी पैहीले मुड़दन मैरां ज़िंते भोंनेरे बारे मां बीयांन कियेरू थुं; की ना तै क्ब्री मां रहंने दितो ते ना तैसेरी जान शड़ने दिती। ³² तैहे यीशु परमेशरे ज़िंतो कमाव ज़ैसेरे आस सभ शहातंम। ³³ तै बाजी परमेशरे देंहींने पासे बिशो ते बाजी परमेशरे कैरां पाक रुहु हासल की ज़ैसेरो वेहिदो कियोरो थु, एह तैस्से रुहुारो अक हीस्सोए, जै तुस लहतथ ते शुंनतथ। ³⁴ किजोकी दावद ता एपु आंम्बरे मां नेहीं जेवरो, पण फिरभी तै एपु ज़ोते, परमेशरे मेरे परमेशरे सैहीं ज़ोंवं, मेरे देंहींने पासे बिशोरो रह। ³⁵ ज़ां तगर आंव तेरे दुशमन तेरे पांवन हेठ ना ढ्लेंच़ी। ³⁶ एल्हेरलेइ की इस्राएलेरे सारे लोकन पत्तो लग्गे, की परमेशरे यीशु, ज़ै तुसेइं स्लेबी पुड़ च़हड़ो तै परमेशर भी मन्नो ते मसही भी मन्नो। ³⁷ ऐना गल्लाँ शुंनतां तैनकेरे दिले पुड़ ज़ख्म भुए, तैखन तैनेइं पतरसे ते होरी चेलन सैहीं ज़ोंव, ओहो ईशे ढ्लाव आस कुंन केरम? ³⁸ पतरसे तैन सैहीं ज़ोंव; तोबा केरा ते तुसन मैरां सारे अपने अपने पापां केरी मैफारेलेइ यीशु मसहीएरे नोवें सैहीं बपतीसमों घिंन्ना ते पाबित्र आत्मा तुसन इनामे मां मैल्हेली। ³⁹ एल्हेरलेइ की एह वेहिदो तुस्न ता तुशी ओवलाधी सैहींएं ते तैन सैभन सैहीं ज़ैना तैस कैरां दुरन, ते ज़ैन ईशो परमेशर एपु का कुजाल्हो। ⁴⁰ पतरसे होरी भी बेड़ी गल्लाँ केरी शहादत दिती, ते तैन समझ़ावं, की आपनो आप एस टपलांने बेली कोंमीं कैरां बच़ैइतां रेखथ। ⁴¹ ज़ैनेइं तैसेरू बचन कुबुल कींयूं, तैन बपतीसमो दितो ते तैस दिहैड़ी तकरीबन कोई ट्लाई हज़ार मैन्हुं तैन मां शांमल भुए। ⁴² ऐना लोक चेलन कैरां शिख्शा शिखते थिये ते मिलते जुलते रहते थिये, ते रौट्टी ट्लोड़ने ते दुवा केरने मां मस्त रहते थिये।

विश्वैसी केरी संगती

⁴³ चेलां केरे ज़िरये सैहीं बड़ां आजीब आजीब कंमा भोतां थियां, ते हर मैन्हुं डर ज़ैरो लगतो थु। ⁴⁴ यीशु मसही पुड़ विशवास रखने बाले सारे मड़द अकोठे रहते थिये, ते सैरी चीज़न मां एक्की होरी बराबर हिस्सेदार रखते थिये। ⁴⁵ ते तैना अपनी जैइदात ते माल सबाब बेच़तां एक्की होररी ज़ुरूरतारे मुताबक रकम बेंटतां सेभी केरी ज़ुरूरत पुरी केरते थिये। ⁴⁶ तैना रोज़ अक दिल भोइतां औक्ली मां अकोठे भोते थिये, ते घरन मां रौट्टी ट्लोड़ते थिये, ते अकोठे भोइतां ख़ुशी सैहीं खाते थिये। ⁴⁷ तैना परमेशरी तारीफ केरते थिये, तैना सेरी केरी नज़री मां रोड़े थिये ते परमेशर पापण कैरां छुटकारो मेल्हने बालां केरी तैधातक रोज़ बधातो रहतो थु ।।

टोंटो भिखारी बझ़ानों

¹ एक्की दिहाड़े पतरस ते युहन्ना दुवा केरने दिसेरे ट्लेई बज़ेइं मंद्रे मांझो च़लोरे थिये। ² ते मैन्हैंइ अक ज़रमनेरो टोंटो छ़ुइतां आंन्होरो थु, ते तैस मंद्रेरे दारे पुड़ छ़डते थिये, ज़ैसेरु नोंव बड़ु "रोड़ु थुं", ताके अंतर गहंने बालन कैरां भिछिया मग्गे। ³ ज़ैखन तैनी पतरस ते युहन्ना मंद्रे मैझो गहंते लाहे ता तैन कैरां पैइंसे मगने लगो। ⁴ पतरस ते युहन्ना तैसेरे पासे खेड़ोहीतां ज़ोंने लगे, ईशे पासे तक। ⁵ तैस उमीद भोईजेई की एन कैरां किछ पैइंसे मैल्हेले, तै तैन केरे पासे तकने लगो।

⁶ तैखन पतरसे ज़ोंव, सौनु चांदी ता असंन का आथी नेहीं, पण ज़ैन मींका आहे ता तैन आंव तीं देतांइं, तु यीशु नैसरेरे नोवें सैहीं खड़ो उठ ते च़ल फीर। ⁷ पतरसे ज़ैरो तैसेरो देहींनो हथ ट्लेईतां खड़ो कियो, ता तैसेरी ज़ांघन मां ताकत आई। ⁸ दे तै तैखने खड़ो भोव ते च़लने फिरने लगो, ते फिरी छालां मारतो ते परमेशरेरी तारीफ केरतो तैन सैहीं साथी मंद्रे मैझो च़लो जेव। ⁹ ते ज़ैना लोक तैड़ी थिये, ते ज़ैनेइं तै च़लतो फिरतो लाहु, ते परमेशरी तारीफ केरतो लाहू ता पशांनो। ¹⁰ की इही ता तैहे, ज़ै मंद्रेरे रोड़े ज़ैरहे दारे पुड़ बिशतां भिछिया मगतो थु, ते ज़ै चमतकार एन लोकां केरे सामने भोव, ता तैना लोक बड़े हेरान राहे।

मन्दरे मां पतरसेरी तालीम

¹¹ औजु तै मैन्हुं पतरस ते युहन्ना ट्लेईतां खड़खड़ो थु, ता सभ लोक ज़ैना तैड़ी खड़खड़े थिये, बड़े हेरान भोइतां सुलेमानी ब्राम्दे मां दोवड़तां तैन का आए। ¹² पतरसे एन हेरू ता तै लोकन का एंच़रे खड़ो भोव, ते ज़ोंने लगो, औ इस्राएली लोकाव तुस एस गल्ली पुड़ कीजो हेरान भेवरेथ, ते असंन एंच़रे कीजो तकने लोरेथ, असेइं ता एपनी कुदरुतारी ताकती सैहीं एह टोंटो मैन्हुं च़लने फिरनेरे काबल बनेवरोए। ¹³ अब्रहांम इज़हाक ते याकुबेरे परमेशरा ते ईशे सियांने बुज़ुरगां केरा परमेशरा अपने दासे रौशनी दे, पण तै तीं ट्लुवाव ते पिलातुसे का खड़ो केरतां मुर्ज़म बनाव हालां की पिलातुसे तै हथरां छ़डनेरो इराधो कियोरो थु। ¹⁴ तुसेइं यीशु अक एरहो धर्मी मैन्हुं रद कियो, ते पिलातुसे का दरखुवासत की की तै तुशे लेइ अक कातली हथरां छ़डे। ¹⁵ तुसेइं ता ज़िंदगारो मालके मैरतां छ़डो, पण आस शाहातम, की परमेशरे तै मुड़दन मैरां ज़िंतो कियो। ¹⁶ यीशु नोवेंरी कुदरुतां एस टोंटे, ज़ै तुशे सामने ते ज़ैस तुस ज़ांनतथ, शिफा दितोरिये ते एनी तैस्सेरे नोवें पुड़ विशवास कियोरोए, ते तुशे सामने बेझ़ोरोए।

¹⁷ मेरे ढ्लाव आंव ज़ांनताइं की ज़ैन किछ तुसेइं ते तुशे सरदारेइं यीशु सैहीं कियुं, तैन तुशी गेलती सैहीं भोवरू थुं। ¹⁸ पण परमेशरे ऐना सैरी गल्लाँ ज़ैना तैनी अपने नेबी केरी ज़बांनी ज़ोवरी थी, की मसही दुःख ऊठाल्हो ते तै तैस पुरो केरतां हेराल्हो। ¹⁹ बस्सा तोबा केरा ते परमेशरेरे पासे फिरा ते तै तुशे पाप माफ़ केरेल्हो, ते परमेशरेरी तरफां तुशे लेइ रुहेंनरे रोड़े दिहाड़े एज्जेल्हे। ²⁰ ते तै मसही येंनी यीशु ज़ै तैनी मुक्ररा कियोरोए तुशे लेइ भेज़ेल्हो। ²¹ पण ज़ां तगर तैना सैरी चीज़ां ज़ैनकेरे बारे मां परमेशरे पुराने ज़माने मां अपने पाक नेबी केरी ज़बांनी कियेरुए, बहाल ना भोल्ही, किजोकी यीशुएरू आंम्बरे मां रहंनु बड़ु ज़ुरूरीए। ²² मुसै भी एस बारे मां ज़ोवरु थुं, तुशो परमेशर तुसन का अक नब़ी भेज़ेल्हो, ज़ेंच़रे तैनी आंव तुसन का भेज़ोरोहीं ते तै नब़ी तुशे ढ्लांन मैरां भोल्हो, ते तुस तैसेरी हर गल्ली पुड़ कंन लेइयथ। ²³ ज़ै तैसेरी गल ना मन्नेल्हो तै परमेशरेरे लोकन मैरां कढो गाहेल्हो। ²⁴ सैम्युल नेबी कैरां देइतां पैहीले तमाम नेबेइं ऐना गल्लाँ केरे बारे मां खबर दितोरी थी। ²⁵ तुस नेबी केरी ओवलाधाथ ते ज़ै वेहिदो परमेशरे ईशे बुज़ुर्ग दादन सैहीं कियोरो थु, तैस्मां तुस सभ शामलथ, परमेशरे अब्रहांमे सैहीं ज़ोवरू थुं, की आंव तेरी ओवलाधारे ज़िरिये सैहीं दुनियारी तमाम कौमन ब्रकत देल्हो। ²⁶ परमेशरे अपनो सेवक च़ुंनतां पैहील्हो तुसन का भेज़ो, ताके तुसन एह ब्रकत मैल्हे, की तुसन मैरां हर कोई एपनी बुरी आदती कैरां बाज़ एज्जे ।।

पंचाइती मां यीशु

¹ हेजु पतरस ते युहन्ना लोकन सैहीं गल्लाँ केरते थिये, ता किछ कंहींन ते मंद्रेरे पुजारी ते किछ सुदुकी तैड़ी पुज़े। ² तैना बड़े परेशान थिये, की चेले लोकन तै तालीम देते थिये, की ज़ेंच़रे यीशु मुड़दन मैरां ज़िंतो भेवरोए, तैंच़रे सभ लोक मौवतरे बाद ज़िंते भोल्हे। ³ तैनेइं पतरस ते युहन्ना गरिफ्तार किये, ते तैखन ड्लोहुझ़ारो मोको थु, ते तैना होरसां तगर गरिफ्तार केरतां ढैपतां छ़डोरे थिये। ⁴ फिरभी केही लोकेइं तैन कैरां सुसमाचार शुंनतां विशवास कियो, ते तैनकेरी तैधात बधते बधते पांच़हज़ारन तगर पुज़ी जेई।

⁵ होरसां युहुदी केरे सरदार बुज़ुर्ग ते शैरितरे लोक युरोशल्में मां जम्हां भुए। ⁶ हन्ना सरदार कंहींन तैड़ी थु, ते कैफा ते युहन्ना अस्केंदर ते सरदार कंहींनेरे खानदेंनरे होरे लोक भी तैड़ी थिये। ⁷ तैनेइं पतरस ते युहन्ना अपने सामने कुजाए ते तैन पुछ़ु, तुसेइं क्सेरी कुदरती या कसेरे नोवें सैहीं एन कम कियेरुए? ⁸ तैखन पतरस पाबित्र आत्माइं सैहीं मस्त भोईतां तैन एंच़रे सैहीं ज़ोंने लगो, औ कौमरे सरदाराव ते बुज़ूर्गाव। ⁹ अगर आज़ असां एल्हेरलेइ तल्ब कियोरेंम, की असां एक्की रोड़े कंमेरे जुवाबदहम, ज़ैन असेइं एक्की टोंटे मैनेरे लेइ क्मावं ते तैस शिफ़ा दिती। ¹⁰ ते तुसन ते सारे इस्राएलीन एह पत्तो लग्गे, की एह मैन्हुं यीशु नैसरेरे नोवेंरी कुदरुति सैहीं बेझ़ोईतां तुशे सामने खड़ोए, ज़ै यीशु तुसेइं मारोरो थु, पण परमेशरे तै मुड़दन मैरां ज़िंतो कियोरोए। ¹¹ एह तैहे घोड़े, ज़ै तुसेइं मिस्त्रेंइं रद्दी कियोरो थु, पण तैहे घोड़ कुंनेरो घोड़ भोइजेव। ¹² पापां केरी माफ़ी केंचेरे होरेरे ज़ोंने सैहीं नेहीं, किजोकी अस्मानेरां ऊंढू कोई होरु दुइयावं नोवं नेहीं दितेरू, ज़ैनकेरे ज़ोंने सैहीं ईशे पाप माफ़ भोंन।

¹³ ज़ैखन तैनेइं पतरस ते युहन्नेरी करतुत हेरी, ते तैखन तैन पत्तो लग्गो, की ऐना ता आनपुड़ ते मामुली मैन्हुंण ते तैना बड़े हेरान भुए, त्ताल्ही तैनेइं बुझ़ू की ऐना लोक यीशु सैहीं साथी राहोरेंन। ¹⁴ तैनेइं पतरस ते युहन्नेरे खलाफ किछ ना ज़ोइ बटु, एल्हेरलेइ की ज़ैस मैन्हुं शिफ़ा मैल्होरी थी, तै मैन्हुं तैन सैहीं साथी खड़खड़ो थु। ¹⁵ तित्ताल्ही तैनेइं पतरस ते युहन्ना आदालती कैरां बेइर नैनेरे लेइ ज़ोंव, ते एपुम्मेहीं मुशोरो केरने लगे। ¹⁶ असां एन लोकन कुन केरम? युरोशल्मेंरे सभ लोक ज़ांनतन की एन लोकेइं अक बड़ो चमतकार हरेवरोए, ज़ैसेरो आस भी इनकार ना केरी बटम। ¹⁷ फिरि भी आस एन ना चाहंम की औ गल लोकन मां जादे मुशुर भोए, रोड़ु ता एन्ने की आस एन धम्केइतां ज़ोंम की आज़ेरे बाद यीशुएरू नोंव घिन्तां केंची सैहीं गल ना केरथ। ¹⁸ त्ताल्ही तैनेइं पतरस ते युहन्ना अंतर कुजेइतां हुकम दितो, की यीशुएरू नोंव घिन्तां केंची सैहीं गल ना केरथ ते ना तालीम देइयथ। ¹⁹ पण पतरस ते युहन्ने तैन जुवाब दितो, तुस एपु एह फैस्लो केरा, की कुंन एह गल परमेशरेरी नज़री मां ठीके, फिरी आस तुशी गल मन्म कि परमेशरेरी? ²⁰ किजोकी एन नेहीं की ज़ैन किछ आसेइं शुंनु ते लाहूं, ते तैसेरू आस ज़िक्र ना केरम। ²¹ तैखन तैनेइं पतरस ते युहन्ना डरेइतां धम्केइतां हथरां छ़डे द्रासले मां तैना फैस्लो ना केरी बटे, की एन सज़हा ता देंम पण कैंच़रे देंम, किजोकी तमाम लोक एह माजरो हेरतां परमेशरेरी तारीफ केरते थिये। ²² ते ज़ै मैन्हुं शिफ़ा मैल्हतां रोड़ो भोवरो थु, च़ैल्ही सालन कैरां जादे थु।

विशवास केरने बालां केरी प्रार्थना

²³ पतरस ते युहन्ना तैठां छुट्नेरां बाद अपने लोकन का च़ले जे ते ज़ैन किछ सरदार कंहींनेइं ते बुज़ुरगेइं तैन ज़ोवरू थुं, तैन सैहीं शुनावं। ²⁴ ज़ैखन तैनेइं ऐना गल्लाँ शुंनी ता बड़े ज़ोरे सैहीं परमेशरे का दुवा केरने लगे; इशे ज़मीन ते आस्मानेरे खाल्क ते माल्क तीं ज़मीन ते आसमान ते सुमुंद्र ते ज़ैन किछ एस्मां आहे तीं बनेवरुए। ²⁵ तीं पाबित्र आत्मांरे ज़ीरये सैहीं अपने सेवक ईशे बाजी दावदेरी ज़बांनी ज़ेवरु थुं, की कौमा तैशे मां किजोईअन ते ओवलाधां गलत खियाल दिले मां रखोरेन?

²⁶ ज़मीनरे बादशाहा परमेशर ते तैसेरे मसहीएरे खलाफ खड़े भुए ते शुन्ने बालेइं तैनकेरी मुखालफत की। ²⁷ एन सच़ै की हिरोदेस पैंतुस ते पिलातुस ते गैर युहुदी सभ मिलतां तेरे बडे सेवक यीशुएरे खलाफ खड़ेभुए, ज़ै तीं मसही मुक्ररा कियोरो थु। ²⁸ तैना एल्हेरलेइ अकोठे भोवरे थिये की ज़ैन किछ तु एपनी कूदरुतारे इराधेरे मुताबक पैहीले तैनी मुक्र्रा कियेरु थुं, तैस पुड़ आम्ल केरम। ²⁹ हुन्ना औ परमेशरा तैनकेरी धेमकी तक, ते अपने बंदे हींमत दे, की तै तेरु बचन बेड़ी ख़ुशी सैहीं लोकन शुनेई सखे। ³⁰ आपनो हथ अग्रोहुं रख, ते अपने पाबित्र सेवके यीशुएरे नोवें सैहीं शिफ़ा दे, ते चमत्कार हेरा ते आजीब आजीब कंमा केर। ³¹ ते ज़ैखन तैनेइं दुवा की ता ज़ैस ठैरी तैना अकोठे जम्हां थिये, ता तै ठार हिल्हने लगी, ते तैना सभ पाबित्र आत्माइं सैहीं मस्त भोइजे, ते परमेशरेरु बचन बेड़ी ख़ुशी सैहीं शुनाने लगे।

वीशैरी केरी मेंणडली ज़िन्दगी

³² विशवास केरने बालां केरी जमात अक दिल ते अक जान थी, कोई भी एरहो ना थु ज़ै अपनो माल आपनो समझ़तो भोए, बल्के होरन भी सैरी चीज़न मां शामल रखते थिये। ³³ ते चेले बेड़ी कुदरुती सैहीं परमेशर यीशुएरे मुड़दन मैरां ज़िंते भोंनेरी शाहादत देते थिये, ते तैन पुड़ परमेशरेरो बड़ो सैयो थु। ³⁴ तैन मैरां कोई भी मौताज ना थु, किजोकी ज़मीना केरे ता घरां केरे माल्क तैन बेच़ी बेच़तां तैनकेरी कींमत आंन्हते थिये। ³⁵ ते तै रकम चेलां केरे पांवन पुड़ एंन्हतां छ़डते थिये, ते हर केंची तैसेरी ज़ुरुरतारे मुताब्क बेंटतां देते थिये। ³⁶ युस्फ़ अक लावी थु, ज़ै कुब्रूसेरो रहंने बालो थु, ते चेलेइं तैसेरू नोंव ब्रनबास रखेरू थुं, ज़ैसेरो मतलबे समझ़दारु मठ्ठु। ³⁷ तैनी अपनु उडार बेच़ु, ते किमत एंन्हतां चेलां केरे पांवन पुड़ छ़डी।

हनन्याह ते सफीरा

¹ हनांनियां नोवेंरो अक मैन्हुं थु, ते तैसेरी कौन्शारु नोवं सफीरा थुं, ते तैनेइं एपनी जेईदातरो किछ हिस्सो बैच़ी छ़डो। ² तैनी कींमती मैरां किछ पैइंसे एपु का रखे, ज़ैसेरो तैसेरी कौन्शी भी पत्तो थु, ते बाकी होरे पैइंसे एंन्हतां चेलां केरे पांवन पुड़ छ़डे। ³ पतरसे तैससैहीं ज़ोंव, हनानियाएं शैताने तेरे दिले मां एह गल कैंच़रे छ़डी की तु पाबित्र आत्माइं सैहीं झुठ ज़ोतस, ते ज़मीनारे पैइंसन मैरां किछ रेखी छ़डे? ⁴ कुन बेच़ने कैरां पैहीले ज़मींन तेरी ना थी, पण बेच़नेरां बाद तेरी ना रही? तु एन सोचनेरे बारे मां केंनी मजबुर कियो? तीं मैन्हुं सैहीं नेहीं बल्के परमेशरे सैहीं झुठ ज़ोवरुए। ⁵ हनानियां एन शुंनते ऊंढो खिरकी जेव, दे तैसेरो दम निसी जेव, ते ज़ैन लोकेइं एन शुंनु ता तैन बड़ो डर भोइजेव। ⁶ तैखन किछ नोवजुवांन आए ते तैनेइं तैसेरी लाश काफ्ने मां प्लेटतां ते बेरोहुं नैहितां देबतां छ़डी। ⁷ ट्लेई घैन्टना पत्ती तैसेरी कौन्श आई, ते तैस एस बारे मां कोई पत्तो ना थु। ⁸ पतरसे तैस पुछ़ु, मीं ज़ौ, की ज़मींनरी कींमत एत्री मैल्होरी थी? तैसां ज़ोंवं, हां कुल कींमत एत्री मैल्होरी थी। ⁹ पतरसे तैससैहीं ज़ोंव, परमेशरेरी पाबित्र आत्मां आज़मानेरे लेइ तुस कैंच़रे सैहीं राज़ी भुए, ते ज़ैन लोकेइं तेरो मुंन्श दबोरोए तैन्केरे पाव दारे तगर पुज़ी जेवरेन, ते तैना तिंमीं बेरोहूं घिंनी गएल्हे। ¹⁰ तै कौन्श तैखने पतरसेरे पांवन पुड़ पैई, ते तैसारो भी दम निसी जेव, ते ज़ैखन नोवजुवांन अंतर आए ता तै कौन्श मुओरी लैहितां तैभी छ़ुइतां तैसारे मुंन्शे ड्लाखोरां देबतां छ़डी। ¹¹ सारी कलीसिया बल्के एन गल्लाँ केरे शुंन्ने बालन बड़ो डर भोई जेव।

निशान ते बडां बडां कम्मां

¹² चेलेइं लोकन मां बड़े चमत्कार ते अजीब अजीब कम्मा कींयां, ते सारे इमानदार अक दिल भोइतां सुलेमानी आंगने मां जम्हां भोते थिये। ¹³ हालांकी लोक तैन्केरी बड़ी इज़्त केरते थिये, पण केंची हींमत ना आई की तैन मां शांमल भोंन। ¹⁴ तैन्केरे ज़ोंने सैहीं केही मड़देइं ते कौन्शेइं विशवास कियो, ते परमेशर मन्ने बालां केरी तेधात बधती च़ली। ¹⁵ ते लोक बीमारन खटन पुड़ ते पीठी पुड़ छ़ुइतां सड़की मां रखते थिये, की पतरस ज़ैखन तैस बत्तां निसैल्हो ता तैसेरी छाव ता तैन पुड़ पै। ¹⁶ युरोशल्मेंरे च़ौवरे पासना ड्लोंवां केरे बैशुमार लोक बीमारन ते ज़ैन मां दुष्टात्मां थी, एपु सैहीं साथी आंन्ह्ते थिये, ते तैना सभ रोड़े भोइतां गहते थिये।

प्रेरतां केरी गिरफतारी

¹⁷ त्ताल्ही सरदार कंहींन ते तैसेरे साथी ज़ैना सुदुकी केरे फिरके मैरां थिये, तैन बड़ी सरक आई ते तैना चेलां केरे खलाफ खड़े भुए। ¹⁸ ते तैनेइं चेले ट्लुवेइतां जैल्ही मां छ़ेडी दिते। ¹⁹ पण परमेशरेरो फरिशतो जैल्ही मां गैहीतां दार खोलतां चेलन का जेव, ते तैना बेइर कैढतां तैन सैहीं ज़ोंने लगो। ²⁰ गाथ ते मंद्रेरे अंगने मां खड़े भोइतां इस नोंवीं ज़िंदगरे बारे मां सैरी गल्लाँ लोकन शुनाथ। ²¹ तैना झ़ैझ़ां मंद्रेरे अंगने मां पुज़ै ते ज़ेंच़रे तैन फरिशते हुकम दितोरो थु, तैंच़र लोकन तालींम देंने लगे, ते ज़ैखन सरदार कंहींन ते तैसेरे साथी तैड़ी आए, ता तैनेइं आदालत आलियारो इजलास कुजाव,

ज़ैसमां युहुदी केरे सारे बुज़ुर्ग एवरे थिये, ते तैनेइं यीशुएरे चेले जैल्ही मैरां कुजाए। ²² ज़ैखन सिपाही जैल्ही मां पुज़े ता तैना चेले तैड़ी ना मैल्हे, ते वापस एइतां तैन खबर दिती। ²³ असेइं जैल्ह रोड़े च़ारे बंद कियोरी थी, ते पैरेदार भी असंन दारे मां खड़खड़े मैल्हे पण ज़ैखन असेइं जैल्ह खोल्ही ता आंतर कोई ना मैल्हो। ²⁴ एना गल्लाँ शुंनतां मंद्रेरो सरदार कंहींन ते सारे की सारे लोक हेरान रेहीजे, की हूंनी कुंन भोल्हु। ²⁵ तैखन केंचे एइतां ज़ोंव, तैना मैन्हुं ज़ैना तुसेइं जैल्ही मां छ़डोरे थिये, तैना मंद्रे मां खड़े भोइतां तालींम देंने लगोरेंन। ²⁶ तैखन मंद्रेरो सरदार अपने सिपाही साथी घिंनतां जेव, ते चेले कुजेइतां आंन्हैं पण ज़बरदस्ती नेहीं, किजोकी तैना लोकन कैरां डरते थिये, की कोस्कोई एरहू ना भोए की ऐना असंन मैरी छ़डन।

²⁷ तैनेइं चेले एंन्हतां आदालत आलया मां पैश किये, ते सरदार कंहींने तैन पुछ़ू। ²⁸ असेइं तुसन ठाकेरु थुं, की यीशुएरू नोवं घिंनतां तालींम ना देइयाथ। ²⁹ पतरस ते होरी चेलेइं जुवाब दितो, असंन मैन्हुं केरो हुकम मन्नेरे बजाहे परमेशरेरो हुकम मन्नो ज़ुरुरिए। ³⁰ ईशे बोव दादेरे परमेशरे एह यीशु मुड़दन मैरां ज़िंतो कियो, ज़ै तुसेइं स्लेबी पुड़ टेंगतां मारो। ³¹ परमेशरे अपनो हुकम मन्ने बालो मैनतां अपने देहींने हथेरे पासे बिशाल्हो, ताके तै इस्रेएलन पापां केरी माफ़ी दे। ³² असां एन गल्लाँ केरे शाहादतम ते पीबित्र आत्मांरे भी, ज़ै तैनी आपनो हुकम मन्ने बालन दितोरीए।

³³ ज़ैखन तैनेइं एन शुंनु ता फुकोई जे, ते तैनकेरी मर्ज़ी लगी ज़ोंने की एन मैरी छ़डम। ³⁴ पण अक फ्रिसी ज़ैसेरु नोवं गमलीएल थुं, ते ज़ै शैरितरो मन्ने बालो थु, ते ज़ै सैभी लोकन मां समझ़दार थु, तैनी आदालती मां खड़े भोइतां हुकम दितो की ऐना मैन्हुं थोड़े च़ीरे बेइर भेज़ा। ³⁵ तै एन ज़ोंने लगो, औ ईस्रैएलाव तुस ज़ैन किछ एन मैन्ह्न सैहीं केरनु चहतथ तैन रोड़े च़ारे सोचा। ³⁶ किजोकी थोड़े च़ीरे पैहीले थोदास उठोरो थु, ते तैनी शर्त लेवरू थुं, की आंव बड़ु किछ केरतां, ते तकरीबन च़ौवर शौव मैन्हुं तैस्सैहीं मिलोरे थिये, पण तै मारो जेव, ते तैसेरे मन्ने बाले सारे तित्र बित्र भोइजे। ³⁷ तैसेरां पत्ती युहुदा गलीली ईस्म नुवेसरे दिहाड़न मां निसोरो थु, ते तैनी काही लोक अपने पासे खींचोरे थिये; तैभी मारो जेव, ते तैसेरे ज़ैतरे साथी थिये, सभ तित्र बित्र भोइ जे। ³⁸ हुंनी आंव तुसन एन्ने ज़ोतां की एन मैन्ह्न कैरां दुर भोथ, ते एन गहंने देथ किजोकी अगर ऐना आजीब कम्मां मैन्हुं केरी तरफां भोलां ता एपु खत्म भोई गहंनण। ³⁹ ते अगर ऐना कम्मां परमेशरी तरफां भोलां, ता तुस एन मैन्हुं केरू किछ ना बिगैड़ी सख्त, ते तुस परमेशरेरां खलाफ लड़ने बाले भोले, तैनेइं तैसेरी सल्लह मन्नी।

⁴⁰ ते चेले अंतर कुजेइतां तैन डंडेइं बावैहीतां तैन ज़ोंवं, की अज़ेरे बाद यीशुएरे नोवें सैहीं कोई गल ना केरथ, ते तैना हथरां छ़डै। ⁴¹ चेले आदालत आलया मैरां च़ले जे, तैना एस गल्ली पुड़ ख़ुशी थिये, की असां यीशुएरे नोवें सैहीं बेज़त भोंनेरे काबल समझ़ै। ⁴² तैनेइं तालींम देंनी बंद ना की, बल्के रोज़ मंद्रे मां गैहीतां ते घर घर गैहीतां खुश खबरी शुंनाते राहे की यीशुए मसहीए।।

सत सेवक च़ुन्ने

¹ इही गल तैईसेरीए ज़ैईस चेलां केरी तेधात बधने लगोरी थी, युनानी युहुदी तैठेरे युहुदी केरी शकैइत केरने लगे, की पुराने ज़मानेरे मुताबक रौट्टी बंटनेरी तकसीमारे मोके ईशी रेंडी कौन्शां केरी घट परवहा केरतन। ² एन शुन्तां बहरे चेलेइं सारे चेले अकोठे किये, ते ज़ोंव, ईशे लेइ एन मुनासब नेहीं की आस परमेशरेरी बचनेरी मुनादी केरनी छ़ैडतां रौट्टी बंटनेरो इंतज़ाम केरम। ³ एल्हेरलेइ औ मेरे ढ्लाव, अपने लोकन मैरां सत रोड़े ज़ैरे नेक नितरे मैन्हुं च़ुंना, ज़ैना पाबित्र आत्माइं सैहीं भरपुर भोंन, ताके आस तैन एस कम्मेरी ज़िंम्बारी सोंफम। ⁴ पण आस्ता दुवा केरने ते बचन शुनाने मां मस्त भोंनेम। ⁵ एह गल सारे लोकन ख़ुशी आई, ते तैनेइं अक सैंत्फुस ज़ै पाबित्र आत्माइं सैहीं भरपुर थु, तै च़ुंनो ते दुईयावं होरे ज़ैना च़ुंने तैन्केरां नोवां इनण फिलपुस पुरखुरूस नेकानुर तैमोन पुर्मिनास नेक्लाव्स ज़ै इन्ताकीयारो अक खास युहुदी थु। ⁶ ते तैना चेलन का पैश किये, ते तैनकेरे लेइ तैनेइं दुवा की, ते तैन पुड़ हथ रखे। ⁷ एंच़रे सैहीं परमेशरेरु बचन फैल्तु जेवं, ते युरोशल्में मां चेलां केरी तेधात बधती जेई, ते बड़े कहींनेइं विशवास कियो ते मसही भोईजे।

स्तिफनुसेरी गरफतारी

⁸ सैंतफुलुस परमेशरेरी पाबित्र आत्माइं सैहीं भरपुर थु, तै लोकन आजीब आजीब कम्मा ते आजीब चमत्कार हेरातो थु। ⁹ आज़ाद भोवरे युहुदी केरो अक प्राथना भावन थु, ज़ैसमा गुरींनेरे ता आसकेंद्र्येरे किछ युहुदी लोक प्राथना केरते थिये, ते ऐना लोक ते क्लकियारे ता आसियारे किछ युहुदी मिलतां सैंतफुलुसे सैहीं बेंस केरने लगे। ¹⁰ पण ज़ैस हिसाबे सैहीं सैंतफुलुस तैन सैहीं गल्लाँ केरतो थु, तैसेरो केंचे जुवाब ना देई बटो। ¹¹ तैखन तैनेइं किछ लोक शिखाले, की तुस एन ज़ोइयथ, की आसेइं सैंत्फुस मुसैरे ता परमेशरेरे खिलाफ बकवास केरते शुंनोरेन। ¹² त्ताल्ही तैनेइं किछ लोक युहुदी बुज़ुर्ग ते शैरितरे किछ मन्ने बाले सैंत्फुसेरां खिलाफ ब्मकाए ते तै ट्लेइतां आदालत आलिया मां पैश कियो। ¹³ तैनेइं बड़े झुठे शाहादत पैश किये, ते तैनेइं शाहादत दिती की एह मैन्हुं पाबित्र मंद्रेरे ता शैरितरे खिलाफ गल्लाँ केरने कैरां बाज़ ना एज्जे। ¹⁴ ते आसेइं एस मैन्हुं कैरां एन भी ज़ोंतु शुंनु, की यीशु नासरी इस ठैरी बरबाद केरेल्हो, ते ईना रसमां ज़ैना मुसै नेबें दितोरी थी, तैन भी बदलेल्हो। ¹⁵ आदालत आलियारे मुलाज़्म सैंतफुलुसेरां लुखु लुखु तकने लगे, पण सैंतफुलुसेरु तुत्र फरिशतेरु ज़ैरु लैहीयोतु थुं।।

स्तिफनुसेरी भाषा

¹ तैखन सरदार कंहींने सैन्तफुनुसे पुछ़ू, कुंन ऐना गेल्त्ती सैच़ीन? ² सैन्तफुनुसे जुवाब दितो, मेरे ढ्लाव ते मेरे बुज़ुर्गाव मेरी गल शुंना, परमेशरेरी कुदरुत अब्राहांमें पुड़ तैखन बांदी भोवरी थी, ज़ैखन तै हारांने मां बस्नेकैरां पेहिलो मैसुपोतामियें मां रहतो थु। ³ परमेशरे तैस्सैहीं ज़ोंव, अपने मुल्खे ता अपने रिशतेदारन शेरतां तैस मुल्खे मां गह, ज़ै आंव तीं औरेइल्हो। ⁴ तांए तै कसिदी केरे मुल्खे शैरतां हारांने मां बसोरो थु, तैसेरे बाजी केरे मरनेरां पत्ती परमेशरे तै तैस मुल्खे मां आंन्हों ज़ैसमा आज़ तुस बसोरेथ। ⁵ परमेशरे तैस इड़ी किछ भी ज़मीन ना दिती, अक गज़ भी ज़मीन ना दिती, पण वेहिधो ज़ुरूर कियो की इही ज़मीन आंव तीं ते तेरी औवलाधी कब्ज़े मां देल्हो हालांकी तैइस अब्राहांमे कोई औवलाध ना थी। ⁶ परमेशरे इब्राहांमे सैहीं ज़ोंव, तेरी औवलाध एकी होरी मुल्खे मां परदेशी केरी ज़ैरही राहेल्ही, तैठेरे लोक तैन गुलेंमी मां रखेल्हे, ते च़ैवर शौव सालन तगर तैन पुड़ ज़ुल्म केरते राहेल्हे। ⁷ पण आंव तैस ज़ाती ज़ैना तैन गुलांम बनाल्हे ता आंव तैन सज़ह देल्हो, ते तैसेरां बाद आंव तेरी औवलाधारे लोकन आंव तैठां इड़ी एंन्हेल्हो ते तैना मेरु नोवं घिंनेल्हे। ⁸ ते परमेशरे अब्रहांमे सैहीं वेहीदो कियोरो थु, ज़ैसेरो निशान सुंनत थी, ज़ैखन इज़हाक ज़रमो ते आठ्ठे दिहैड़ी केरो भोव, ता अब्रहांमे तैसेरी सुंनत की ते, तैसेरां बाद इज़हाकेरो याकुब पैइदा भोव, ते याकुबेरां बाद ईशी कौमरे बहरे कबीलां केरे बुज़ुर्ग पैइदा भुए। ⁹ याकुबेरे मठ्ठेइं धोखो केरतां आपनो ढ्ला युसफ मीस्रन जो बेच़ौ, ते तैनेइं युसफ मिस्रे मां नैहीतां गुलांम बनाव? पण परमेशर युस्फे सैहीं साथी थु। ¹⁰ परमेशरे तै सैरी मसीबतन कैरां बच़ैइतां रखो, ते तैस बड़ी अकल दिती, ते मिस्रेरे फैरोंन बादशाहेरे सामने बड़ी क़ाबलियत दिती, ते फैरोंने युसफ मिस्रेरो मंत्री बनाव, ते अपने मैहेलेरो पुछ़नो गन्नो बनाव। ¹¹ एक्की साल सारे मिस्रे मां काल पैव ते बड़ी मसीबत आई, ते इशे बाजी दादे भी अन्नेरो घाटो भोव। ¹² ज़ैखन याकुबे शुंनु की मिस्रे मां अन्न मैल्ते ता तैनी इशे बुज़ुर्ग मिस्रे मां भेज़े, तैड़ी तैना पैहीले बार मस्सां जेवरे थिये। ¹³ ज़ैखन तैना दुईयावं फेरे मिस्रे मां जे, ता युस्फे आपनो आप तैन पशांनाव, ते फैरोंने भी युस्फेरी सुकूंनतरो पत्तो लगो। ¹⁴ तैसेरां बाद युस्फे आपनो बाजी याकुब ते तैसेरु पचहत्र मैन्हुं केरू टबर मिस्रे मैझो कुजावं। ¹⁵ त्ताल्ही याकुब मिस्रे मां च़लो जेव, ते तैसेरे बौव दादे तैड़ी मैरी जे। ¹⁶ तैनकेरी लाशां तैठ्ठां सिक्में मां एंन्हीं, ते तैना तैस ठैरी दफन की ज़ैड़ी अब्रहांमे रकम देईतां बंनी हंमुरे कैरां ठार घिंनोरी थी।

¹⁷ परमेशरे अब्रहांमे सैहीं अक वैहीदो कियोरो थु, तैस वैहीदेरो पुरो भोंनेरो मौको अव ता मिस्रे मां ईशै लोकां केरी तेधात भी बड़ी बेधी जेवरी थी। ¹⁸ तैस मौके अक होरो बादशाह मिस्रे मां हुकमरांन बनोरो थु, जै युसफेरे बारे मां किछ भी ना थु ज़ांनतो। ¹⁹ तैनी ईशी कौमी सैहीं धौखो कियो, ते ईशै बुज़ुर्गन पुड़ बड़े ज़ुलम किये, तैना एत्रे मजबुर किये की तैना अपने ज़र्मते बच्चे बेरोहुं शारन ताके तैना मैरी गहंन। ²⁰ तैन्ने दिहैड़न मां मुसौ पैदा भोव, तै हेरनो हछो रोड़ो थु, ते तै ट्लाई मिहींने तग्र अपने बाजी केरे घरे मां पलतो राहु। ²¹ ज़ैखन तै दरियाए मां शारो ता फैरोंनेरी कुईयां तै छ़ुईतां आंन्हों ते अपने मठ्ठैरो ज़ैरो पालो। ²² मुसै नेबें मिस्री केरी सैरी तालीमारो ते तैन्केरी सैरी गल्लाँ केरी वाकफित भोई जेई, ते परमेशरेरे वचने मां ते तैस पुड़ आंमल केरने मां दुईने मां ताकतबर थु।

²³ ज़ैखन मुसौ नबी च़ैल्ही सालां केरो भोव ता तैसेरे दिले मां एह गल आई, की आंव अपने ढ्लां केरो येंनी बनी ईस्रेली केरो हाल दरियाफत केरीं। ²⁴ मुसै तैन मैरां एक्की पुड़ ज़ुलम भोंतो लाहु ता मुसौ तैसेरी मदत केरने तैस का पुज़ौ, ते तै ज़ालम मिस्री कतल केरतां तैसेरे ज़ुलमैरो बदलो घिंनो। ²⁵ मुसैरो खियाल थु, की तैसेरे बदलैरी लोकन तैसेरी गल्लरो एसास भोलो, की परमेशरे तैसेरे ज़िरये सैहीं तैन मिस्री केरी गुलैंमी कैरां तैन छुटाए, पण तैनेइं मुसैरु कोई एवसान ना समझ़ु। ²⁶ मुसै हौरसां दुई ईस्राएली एपु म्मेहीं लड़ते लाहे, ते तैन समझ़ांनेरी कौशीश की, ते मुसै तैन ज़ोंवं, औ जुवांनाव तुस ता एपु म्मेहीं ढ्ला भोतथ, ते तुस किजो एक्कैकी मारने लगोरेथ? ²⁷ पण ज़ै मैन्हुं अपने पुड़ोसी मारने लोरो तु, ता तैनी मैने मुसै जो धमकी देईतां ज़ोंवं, तु कैनी असन पुड़ राज़ो या काज़ी मुकर्रा कियोरोस? ²⁸ ज़ैंच़रे तीं तै मिस्री हिज मारोरो थु, तैंच़रे तु अज़ मीं मारने चहतस? ²⁹ एह गल शुंनते मुसौ ऐठ्ठां न्शौ, ते मुलख मदियांने मां परदेशी केरो ज़ैरो रहंने लगो, ते तैड़ी तैसेरां दुई मठ्ठां पैईदा भुआं।

³⁰ च़ैल्ही सालना बाद तैस कौआ सेंनारे बियाबांने मां एक्की झ़ल्लोएंरी अगी मां परमेशरेरो फरीशतो लाहु। ³¹ मुसौ एह चमतकार हेरतां हेरांन रेही जेव, ते ज़ैखन तै रोड़े चारे हेरनेरे लेई नेड़े जेव ता तैनी परमेशरेरी आवाज़ शुंनी। ³² की आंव तेरे बौव दादेरो येंनी अब्रहांम ईज़हाक ते याकुबेरो परमेशर अंही, मुसै एन लैहीतं ब्रदाशत ना लगु भोंने, ते ऐ डेरतां कम्बने लगो। ³³ तैखन परमेशरे मुसै जो ज़ोंवं, अपनी जुट्टी खोल, किजोकी ज़ैस ठैरी तु खड़ोस तै पाबित्र ठारे। ³⁴ मीं मिस्रे मां अपने लोकां केरी मुसिबत हेरी, मीं तैन्केरी आवज़ भी शुंनोरीए, एलहेरलेई अंवं तैन छुटांनेरे लेई अंवं उंढौ एवरोइं, हुंनी ऐई" अंवं तीं फिरी वापस मिस्रे भेज़ने बालोइं।

³⁵ ऐहे तै मुसौए ज़ैसेरो तैनेइं ईनकार कियोरो थु, की तु कैनी असंन पुड़ राज़ौ बनेवरोस, ते ऐहे तै मुसौ परमेशरे अपने फरिशतेरे ज़िरये सैहीं ज़ै तैनी बलते झ़ल्लोंएं मां लाहोरो थु, राज़ौ" ते छुटाने बलो बनेईतां भेज़ो। ³⁶ ऐन्नी शखशै" मुसै लोक मिस्रे मैरां अपने लोक कढे, ते मुलख मिस्रे मां ते बैरे कुलज़में मां चैल्ही सालन तग्र बियबांने मां अजिब अजिब नज़ारे हेरांतो राहु। ³⁷ ऐनी मुसै बनी ईस्राएले सैहीं ज़ेवरु थुं, मेरो परमेशर तुशै ढ्लांन मैरां मेरे लेई अक मेरो ज़ैरो अक नबी भेज़ेल्हो, ते तुसां तैसेरी ज़ोंनु शुंनथ। ³⁸ ऐहे मुसौ" बियाबांने मां बनी ईस्राएलन सैहीं साथी थु, ऐहे तै मुसौ थु, ज़ैस सैहीं फरिशते कौआ सेंना पहाड़े पुड़ गल्लाँ कियोरी थी, ते तैस्से ज़िंतो वचन दितोरो थु, ताके तै असंन तग्र पुज़ाऐ। ³⁹ पण ईशै बौव दादेइं तैसेरो हुकम ना मन्नो, बलके रद्दी कियो, ते तैन्केरो दिल मिस्रेरे पसे बेदलोने लगो। ⁴⁰ तैनेइं हारुंने सैहीं ज़ोंवं, तु ईशै लेई अक देबतो बना, जै असंन अग्री अग्री च़ले, किजोकी अस ना ज़ांनम" की मुसै ज़ैनी असां मुलख मिस्रे मैरां कैढतां आंन्होरे थिये, तै कौरां जेवरोए। ⁴¹ तैखन तैनेइं बछ़ड़ेरी शकलारो अक बुत बनाव, ते तैसका सुखना च़ैड़ी, ते अपने हथां केरे बनेवरे बुत्ते का बड़ी खुशी मनाई। ⁴² पण परमेशरे तैन कैरां अपनु तुत्र फरांव, ते तैना अंम्ब्रेरे तारां केरी मिनत केरनेरे लेई छ़डे, ज़ैंच़रे नेबी केरी किताबी मं लिखेरुए, औ बनी ईस्राएलाव" कुन तुस च़ैल्ही सालन तग्र बियाबांने मां मींजेई सुखना देंते नेहीं राहोरे?

⁴³ बलके तुसेइं एपु सैहीं साथी मौलकेरो तैम्बु ते रफांन देबतेरे तारे छ़ुईतां च़लते थिये, ऐन्ना तैना बुत्तन ज़ैना तुसेइं एपनी पुज़ारे लेई बनेवरे थिये, ऐलहेरलेई अंवं तुसन बाबले कैरां भी दुर जलावतन केरेल्हो।

⁴⁴ बियाबांने मां ईशै बौव दादन का पाबित्र तैम्बु थु, ज़ैसेरो चमतकार मुसै लहोरो थु, ते ज़ोंने बाले तैस हादैईत कियोरी थी, कि तु अक किबीलो तैसेरे मुताबक बना, ऐलहेरलेई शहादतरो तैम्बु तैस्से हिसाबे पुड़ बनाव जेव। ⁴⁵ ज़ैखन तै तैम्बु ईशै बौव दादन मैल्हो ता तैनेइं तै साथी नैहीतां यौशुए सैहीं साथी तैस पाबित्र ज़मिनी पुड़ पुज़े, ज़ै तैनेइं तैन कौमन कैरं थुसोड़ोरी थी, ज़ैना परमेशरे तैनकेरे सामने तैठ्ठां कढोरे थिये, ते तै तैम्बु दावदेरे ज़माने तग्र तैड़ी राहू। ⁴⁶ दावद परमेशरेरो ट्लारो भोव, ते तैनी परमेशरे का मिनत मगी, की मीं याकुबेरे परमेशरेरे लेई अक घर बनानेरे लेई ईजाज़त दे। ⁴⁷ पण तै सुलैमान थु, ज़ैस परमेशरेरु घर बनानेरे लेई ईजाज़त मैलहोरी थी। ⁴⁸ पण प्रभु परमेशर" ईनसानेरे बनेवरे घरे मां ना राहे, ज़ैंच़रे नेबेइं ज़ौवरुए।

⁴⁹ किजोकी परमेशरे ज़ोवरुए की आंम्बर मेरो तख्तै ते ज़मीन मेरे पांवां केरी चोव्कीए ते तुस फिरी मेरे लेइ केरूज़ैरहु घर बनाल्हे, या मेरे आराम केरनेरी ठार कैरही ज़ैरही भोल्ही?

⁵⁰ कुंन ऐना सैरी चिज़ां मेरी बेंनोरी नेहीं?

⁵¹ ओ गलां कटने बालाव तुशे दिल ता कन दुइये अकट्टेंन, तुस पाबित्र आत्मांरी हमेशां खालफत केरते रहतथ, ज़ैंच़रे तुशे बोव दादे केरते एवरेंन। ⁵² कुंन कोई नब़ी एरहो भी गुज़री जेवरोए, ज़ै तुशे बाजीं दादेइं नेहीं स्तेवरो? तैनेइं ता तैना नब़ी भी मारे ज़ैनेइं तैस धैर्मैरे एज्नेरे बारे मां ज़ोवरु थुं, ते आज़ तुसेइं तै ट्लुवेइतां कतल कमवाव। ⁵³ तुसन तै हुकम मैल्हो, ज़ै फरिशतन कैरां मैल्होरो थु, पण तैस पुड़ अंमल ना कियुं।

स्तिफनुसे पुड़ घोड़ेव

⁵⁴ ज़ैखन तैनेइं ऐना गल्लाँ शुंनी ता तैना फुकोई जे, ते तैसजो दंत लगे च़ापने। ⁵⁵ पण सैंतफुसे पाबित्र आत्मांइं सैहीं मस्त भोइतां आंम्ब्रेरे पासे तकु ता तैस परमेशरेरु दर्शन भोई जेंवं, ते तैनी यीशु परमेशरेरे देंहींने पासे खड़खड़ो लाहु। ⁵⁶ तैनी ज़ोंव, हेरा आंव आंम्ब्र खुलु लहतांइं, ते आबने आदम परमेशरेरे देंहींने पासे खड़खड़ो लहतांइं। ⁵⁷ एन शुंनतां तैना ज़ोरे सैहीं चिंडां मारने लगे, ते अपने कंन्न मां एंगोली छ़ैडी ते अकोठ्ठै सैभेइं तैस पुड़ हंम्लौ कियो। ⁵⁸ ते तै दिलतां शहरे कैरां बेइर नीयो ते तैस्जेई घौड़ेइं बहंने लगे, तैखन शहातेइं अपने कुरते खोलतां सावल नोवेंरे एकी मैन्हुं का रेखतां छ़डे। ⁵⁹ ते ज़ैखन तैना सैन्तफुनुसे जो घौड़ेइं बहंने लगोरे थिये, ते तै सैन्तफुनुस इन ज़ोइतां प्रार्थना केरने लगो; कि औ प्रभु यीशु, मेरी आत्मा कबूल केर | ⁶⁰ फिरी तैनी ज़ेंधु तल्ले लेइतां ज़ौरे सैहीं ज़ोंवं, औ परमेशर इही पाप एनकेरे ज़िंमे ना लेइयां, एन ज़ोंनेरां पत्ती सैंतफुसेरी मौवत भोई जेई, ते सावल सैन्तफुनुसेरे कतल केरने मां खुशी थु।।

कलीसियाई पुड़ ज़ुलम

¹ तैस्से दिहाड़े युरोशल्मेंरी क्लीस्याइ पुड़ ज़ुल्मां केरो सिलसिलो शुरू भोइ जेव, चेले ता होरे मसही लोक युहुदिया ते सांमरी आलाके मां बेंटोइ जे? ² किछ रोड़े मैन्हैंइ सैन्तफुनुसेरी लाश नैहीतां देबतां छ़डी, ते तैसेरे मरने पुड़ बड़ो मातम भोव। ³ उरहां सावले क्लीस्यां ऊज़ैड़नी शुरू की ते तै घर घर गहतो थु, ते मड़दन ते कौन्शंन बेरोहूं घसीटतो थु, ते कैद केरतां छ़डतो थु।

सामरिया मां फिलिप्पुसेरो प्रचार

⁴ क्लीस्यारे लोक तित्तर बित्तर भोंनेरे पत्ती ज़ैड़ी ज़ैड़ी जे ता परमेशरेरु बचन लोकन शुंनाते च़ले। ⁵ फिल्पुस सांमरियारे एकी शहरे मां जेव, ते तैड़ी परमेशरु बचन शुनानु शुरू कियुं। ⁶ ज़ैखन तैन लोकेंइं फिल्पुसेरी गल्लाँ शुंनी, ता तैनेइं आजीब आजीब कंमां लहं ता लोक बेड़ी ख़ुशी सैहीं तैसेरे पासे बेदलोंने लगे। ⁷ ते किछ लोक बीमार ते किछ टोंटे थिये, ते काही लोकन मां दुष्टात्मां भी थी, ते तैना दुष्टात्मां चींडां मैरती नेशी जेई ते बड़े लोक आध्रांगी ते टोंटे बेझ़ौई जे। ⁸ ते तैनकेरे वजाही सैहीं शाहरे लोकन बड़ी ख़ुशी भोईजेई।

जादूगर शमौन

⁹ बड़े च़ीर्रे देंते शुंमौन नोवेंरे एकी मैने सांमरियारे शहरे मां सारे लोक अपने जैदेइं सैहीं हेरान कियोरे थिये, ते तै ज़ोतो थु, की आंव अक बडो मैन्हुंहीं। ¹⁰ नीके बडे सभ तैसेरे पासे भोइतां ज़ोंने लगे की एह मैन्हुं मां बड़ी कुदरुते" ज़ै सच़ ज़ोते। ¹¹ किजोकी तैनी अपने जेदु सैहीं सभ हेरान कियोरे थिये, एल्हेरलेइ लोक तैस बड़े ईज़तारे काबल समझ़ने लगे। ¹² पण ज़ैखन फिल्पुसे परमेशरेरी बादशैहीयरी ते यीशु मसहीएरो परचार केरनों शुरू कियो ता सारे लोकेइं मड़देइं कौन्शेइं विशवास कियो ते बपतीसमों नैने लगे। ¹³ शुंमौने एपु भी विशवास कियो, ते बपतीसमो नैइतां फिल्पुसे सैहीं साथी च़लो ते तै बड़ां आजीब आजीब कंमा हेरतां हेरान रेही जेव।

सामरिया मां पतरस ते यूहन्ना

¹⁴ ज़ैखन युरोशल्में मां चेलेइं शुंनु की सांमरियारे लोकेइं परमेशरेरु बचन कुबुल कियेरुए ते तैनेइं पतरस ता युहन्ना तैन का भेज़े। ¹⁵ ज़ैखन तैना तैड़ी पुज़े ता तैनेइं तैन लोकां केरे लेइ दुवा की, की एन पुड़ पाक रुहु उतरे। ¹⁶ एल्हेरलेइ की तैन पुड़ पाक रुहु आज़तगर उतरोरी ना थी, तैनेइं सिर्फ परमेशर यीशु मसहीएरे नोवें सैहीं बपतीसमों निहीयोरो थु। ¹⁷ तैखन पतरसे ते युहन्ने तैन पुड़ हथ रेखतां दुवा की, ते तैन भी पाबित्र आत्मां उतरी। ¹⁸ ज़ैखन शुंमौने हेरू की चेलां केरे हथ रखने सैहीं पाबित्र आत्मां उतरचे, ता शुंमौने पैइंसे एंन्हता चेलन का पैश किये। ¹⁹ ते शुंमौन ज़ोंने लगो, की मींम्हीं आख्तीयार देथ, की आंव भी ज़ैस पुड़ हथ रेखीं ता तैस पुड़ पाबित्र आत्मां उतरे। ²⁰ तैखन पतरसे जुवाब दितो, तेरे रुपेइए तींसैहीं साथी गर्क भोंन, किजोकी तु रुपेइयेइं सैहीं परमेशरेरी इही नियांमत घिंन्नी चहतां। ²¹ एस बारे मां तेरो कोई भी हेसौ नेहीं किजोकी तेरो मन परमेशरे का साफ नेहीं। ²² तु एपनी इस ब्दनीति कैरां बाज़ एई, ते तोबा केर , ते परमेशरे का दुवा केर ताके तै शैहीद तेरी इस बुरी नीतारे लेई तीं माफ़ केरे। ²³ किजोकी आंव हेरतांइं की तु शैहीद केंची गलत आध्रमें मां फ्सोरोस।

²⁴ तैखन शुंमौने जुवाब दितो, मेरे लेइ परमेशरे का दुवा केरा, की ज़ैन किछ तुसेइं ज़ोवरुए, तैन मेरे पैश ना एज्जे। ²⁵ ज़ैखन चेले बचन शुंनेइतां ते गुवाही देइतां वापस युरोशल्में मां आए, ता बत्ते सैमरी केरे कैही ड्लोंवन म्मेहीं परमेशरो सुसमाचार शुंनाते जे।

फिलिप्पुस ते कूश मुल्के मां आधिकारी

²⁶ फिरी एरहु भोंवं की परमेशरे एकी फरिशतें फिल्पुसे सैहीं ज़ोंव, की उठ ते जुनुबेरी बत्तां गा ज़ै बियाबांने म्मेहीं उज़्ज़ा जेई गह्चे। ²⁷ फिल्पुस उठो ते च़लो जेव, ते बत्ते मां तैस अक जशी खोजो मैल्हो, ज़ै जैशी केरी मलका कंदाकेरो बज़ीर थु, ते तैसेरे सारे खज़ांना केरी हेरगेश तैसेरे ज़िंमें थी, एह मैन्हुं युरोशल्में मां प्राथना केरने एवरो थु। ²⁸ ते हुनी तैठां वापस एइतां घरजो च़लोरो थु, ते तै अपने रथे पुड़ च़ैड़तां च़लोरो थु, ते ईसाया नेबेरो सबक पड़ने लगोरो थु। ²⁹ पाबित्र आत्मां फिल्पुसे हुकम दितो, की नेड़े गैहीतां रथे सैहीं साथी च़ल। ³⁰ फिल्पुस दोवड़तां रथे का नेड़े पुज़ो, ता रथे बाले कैरां ईसाया नेबेरो किसो पड़तो शुंनो, ते फिल्पुसे तैस पुछ़ू, ज़ैन किछ तु पड़ने लगोरोस तैन समझ़तां भी? ³¹ तैनी ज़ोंव, आंव समझ़ांनेरे बगैर कैंच़रे सेंमझ़ी सख्तां, तैनी फिल्पुसे का मिनत की की एई रथे पुड़ बिश। ³² पाबित्र कताबी मैरां ज़ैन तै पुड़ने लगोरो थु, ता तैन इन थुं, तैनेइं तै भैडारो ज़ैरो मारने जो निहीयो, ज़ैंच़रे गब्बोंव एप्नी उन्ना बरधांने बालां केरे सामने च़ूप केरते, एंच़रे तै भी आपनु आशी ना खोल्हेलो।

³³ तैसेरी कमज़ोरारी वजाही सैहीं तैसेरो कोई इन्साफ ना भोव, कौन तैसेरी ओवलाधरो हाल शुंनाल्हो? किजोकी धेरती पुड़रां तैसेरू नोंव सेंवा मटेवरुए। ³⁴ खोजें फिल्पुसे सैहीं ज़ोंव, मेरभानी केरतां मींसैहीं ज़ो की एह नब़ी कसेरे बारे मा ज़ोते, अपने या होरी केंचेरे बारे मां ज़ोते? ³⁵ फिल्पुसे किताबरे तैस सफे कैरां शुरू केरतां यीशु मसहीएरे बारे मां सुसमाचार शुंनाव। ³⁶ बत्तां च़लते च़लते तैना एकी एरही ठैरी पुज़े ज़ैड़ी पानी थुं, खोजें ज़ोंव, और इड़ी पानीएं हुंनी मीं बपतीसमों नैने कैरां कौवंन रोकी सखते? ³⁷ फिल्पुसे ज़ोंव, अपने दिले जानी सैहीं विशवास केरतस ता बपतीसमों नैही सख्तां, तैनी जुवाब दितो, आंव विशवास केरताइं की यीशु मसही परमेशरेरू मठ्ठुए। ³⁸ फिरी तैनी रथ रोकनेरे लेइ हुकम दितो, ते खोजो ते फिल्पुस दुईये पैनी मां जे, ते फिल्पुसे तैस बपतीसमों दितो। ³⁹ ज़ैखन तैना पैनी मैरां बेइर निसे ता परमेशरेरी पाक रुहां फिल्पुस तैठां स्ल्ल्हो, ते खोजे तै फिरी ना लाहू किजोकी तै बेड़ी ख़ुशी सैहीं वापस च़लोरो थु । ⁴⁰ ते फिलपुस आशदुदे म्मेहीं निसतो च़लतो सारे ड्लोंवन मां सुसामाचार शुंनातो कैस्रे मां पुज़ो।

शाऊलेरो मन बेदलोनों

( प्रेरितों 22 : 6 - 16 ; 26 : 12 - 18 )

¹ एस दोवराने मां सावल परमेशरे चेलन मारनेरी धेंम्की देतो रहतो थु, ते तै सावल सरदार कंहींने का जेव। ² ते तैस कैरां दंम्शकेरे प्राथना भवनेरे लेइ चिठ्ठी मगी, की एल्हेरलेइ अगर कोई यीशुएरो चेलो या कोई होरो एन कंम केरतो लाहे, चाहे तै मड़द भोए, या कौन्श, तैस ट्लेइतां युरोशल्में मां आंन्हें। ³ ज़ैखन तै च़लतो च़लतो दंम्शकेरे नेड़े पुज़ो ता, आचानक आम्ब्रेरां लौ आई ते सावलेरे च़ौवरे पासन चमकने लगी। ⁴ सावल तल्लै मां खिरको ते तैस अक आवाज़ आई, औ सावल औ सावल तुमीं कीजो सत्तातस? ⁵ सावले पुछ़ू औ परमेशर तु कौवंनस? तैनी जुवाब दितो आंव यीशुआंहीं ज़ैस तु सतातस। ⁶ उठ ते शहरे मां गा तैड़ी आंव तींजो ज़ोहिलो की तीं कुन केरनुएं। ⁷ ज़ैना लोक सावले सैहीं साथी थिये, तैना च़ूपच़ारे खड़े रेहीजे, तैन आवाज़ ता शुंनोती थी, पण लैहियोतु किछ भी ना थुं। ⁸ तैखन सावल तल्लै मैरां खड़उठो ता तैनी एपनी एछ़ी घैड़ी ता तैस किछ भी ना लगु लैहियोंने, ते तैसेरे सैथेंइं हथेरां ट्लेइतां दंम्शके मां पूज़ाव। ⁹ तैस ट्लेइ दिहाड़न तगर किछ ना लगु लैहियोंने, ते तैनी खानु पीनु भी शैरी छ़डु।

¹⁰ दंम्शके मां यीशुएरो अक चेलो रहतो थु, ज़ैसेरु नोंव हंनानियां थुं, परमेशरे तैस आत्माइं मां ज़ोवरू थुं, औ हंनानियां तैनी ज़ोंव, हां परमेशर ज़ो। ¹¹ परमेशरे तैसजो ज़ोंव, उरहां गा ज़ैस्जो सीधी बत्त ज़ोत्न, तु युहुदेरे घरे गा तैड़ी सावल नोवेंरो अक मैन्हुंएं, ज़ै तिर्सस शाहरेरो रहंने बालोए, तु तैसेरे बारे मां पुछ़ां, किजोकी हेरां तै दुवा केरने मां मस्ते। ¹² तैनी आत्माइं मां हंनानियां नोवेंरो अक मैन्हुं एंइतो लाहोरोए, ते एपु पुड़ हथ रख्तो लाहोरोए की तै एपनी एछ़ेंइं सैहीं फिरी लाहे। ¹³ हंनानियांए ज़ोंव, औ परमेशर मीं एस मैनेरे बारे मां लोकन कैरां बेड़ी गल्लाँ केरती शुंनोरीन, ते एन भी की एनी तेरे लोकन सैहीं युरोशल्में मां कुन कुन बुरु कियेरुए। ¹⁴ एस सरदार कंहींने कैरां आख्तीयार मैल्होरोए, की इड़ी भी ज़ै तेरु नोंव घिंन्ते, तैस गिरिफ्तार केरे। ¹⁵ पण परमेशरे हंनानियांएं सैहीं ज़ोंव, गा किजोकी मीं तै मैन्हुं च़ुनोरोए, ताके तैसेरे ज़िरये सैहीं गैर ज़ातन मां ते बादशैहीन ते बनी इस्रेएलन मां मेरे नोवेंरी जेए जए कार भोए। ¹⁶ आंव तैस समझ़ैइल्हो की तैस मेरे नोवें सैहीं केत्रो दुःख झ़ैल्नो पैनोएं। ¹⁷ तैखन हंनानियां जेव, ते तैस घरे मां दाखल भोव, तैनी अपने हथ सावले पुड़ रखे ते ज़ोंव, एह मेरे ड्ला सावल, ज़ैखन तु इरहां एवरो थु ता तीं बत्ती मां परमेशर यीशु मैल्होरो थु, तैनी आंव इड़ी भेज़ोरोहीं, ताके तीं फिरी लैहियोए ते पाबित्र आत्माइं सैहीं भरपूर भोस। ¹⁸ तैखन सावलेरी एछ़न मैरां ज़ैरां शेकड़ां झ़ड़ां ते सावल लहंने लगो, तैखन सावले खड़उठतां बपतीसमों निहीयो। ¹⁹ ते किछ रौट्टी खेइतां तैस हींमत आई,

दिमश्के मां शाऊलेरे ज़िरिये प्रचार

ते किछ दिहाड़े तै चेलन सैहीं साथी दंम्शके मां राहु। ²⁰ तैसेरां बाद सावले प्राथना भवने मां प्रचार केरनो शुरू कियो, की यीशु मसही परमेशरेरू मठ्ठुए। ²¹ ज़ैत्रेइं सावलेरु नोंव शुंनु, ता तैना सभ हेरान भोइतां पुछ़ने लगे, कुन एह तैहे मैन्हुं ता नेहीं ज़ै युरोशल्में मां परमेशरेरू नोवं घिंन्ने बालन मारतो थु? ते तै इड़ी भी तैल्हेरलेइ ता नेहीं एवरो की एन लोकन ट्लेइतां सरदार कंहींना केरे हवाले केरे? ²² एसेरां बाद सावल मज़बूत भोंतो जेव, ते एह गल की यीशु ही मसहीए ते सावल दंम्शकेरे रहंने बाले युहुदीन भरोसो देंतो राहु।

²³ ज़ैखन बड़े दिहाड़े बीते ता युहुदेइं मिलतां सावल मारनेरो मुशोरो कियो। ²⁴ तैना रात दिहाड़ी तैस शाहररे च़ौवरे पासन तोपते रहते थिये, की कौड़ी हथे लग्गे, पण सावले तैनकेरो पत्तो लगोरो थु। ²⁵ तैखन सावलेरे चेलेइं राती टोकरी मां छ़ैडतां रस्से सैहीं टोकरी मां औसैलतां बुन पूज़ाव।

यरूशलेमें मां शाऊल

²⁶ ज़ैखन सावल युरोशल्में मां पुज़ो ता तैन चेलन मां शांमल भोंनेरी कौशिश की, पण सभ तैस कैरां डरते थिये, किजोकी तैन यकींन ना थुं एइतु की तै सच़्च़ै यीशुएरो चेलो बनोरोए। ²⁷ पण ब्रनबासे सावल एपु सैहीं साथी चेलन का आंन्हों ते तैन ज़ोंव की कैंच़रे सावले बत्तां च़लते च़लते परमेशर लाहोरोए, ते परमेशरे तैस्सैहीं गल्लाँ कीयोरिन, ते तैनी केतरी ख़ुशी सैहीं दंम्शके मां यीशुएरे नोवेंरो प्रचार कियोरोए । ²⁸ तैखन सावल युरोशल्में मां तैन सैहीं मील्तो जुल्तो राहु ते बेड़ी ख़ुशी सैहीं प्रचार केरतो राहु। ²⁹ ते युनानी बोली केरने बाले युहुदन सैहीं भी गलबात केरतो थु, पण तैना तैस मारनेरे लेइ टिकोरे थिये। ³⁰ ज़ैखन मसही ड्लांन पत्तो लग्गो ता तैनेइं तै कैसरे मैझो निहीयो ते तैठां तिरस्से जो भेज़ो।

³¹ ता सारे युहुदिये आलाके मां ते गलील ते सांमरियारी कलिस्याई मां चेंन भोई, ते पाबित्र आत्माइं मां ते तेधाती मां बधती ते पक्की भोंती जेई, ते परमेशरे डरे मां रेहितां ज़िंदगी गुज़ारने लगे।

लुद्दा ते याफा मां पतरस

³² ज़ैखन पतरस काही ड्लोंवन म्मेहीं च़लतो च़लतो लुद्दा मां रहंने बाले बुज़ुरग्न का पुज़ो। ³³ ता तैस तैड़ी आनियास नोवेंरो अक मैन्हुं मैल्हो, तै बीमार थु, ते आठे सालां केरो देंतो खट्टी पुड़ राहोरो थु। ³⁴ पतरसे तैसजो ज़ोंव, औ आनियास यीशु मसही तीं शिफ़ा देते, उठ आपनु बछ़ान खड़ु केर, तै तैखने तै बेझ़ोइतां खड़ो भोव। ³⁵ तैखन लुद्दा ते शारुनेरे रहंने बालेइं एन हेरतां परमेशरे पुड़ विशवास कियो।

³⁶ याफा ड्लोंवें मां अक कौन्श थी, ज़ैसारु नोंव तबिता थुं, (युनेनि मां तैसजो हिरनी ज़ोतन) ज़ै बिचारी रोड़े कंमन मां ते गरीबां केरी सेवाईमां लगोरी रहती थी। ³⁷ तैने दिहाड़न मां तै बीमार भुई, ते मैरी जेई, ते तैसारी लाश नैहीतां बह कमरे मां रखोरी थी। ³⁸ लुद्दा याफारे नेड़े थुं, ते ज़ैखन चेलेंइं शुंनु की पतरस लुद्दा माहैं, ता दुई मैन्हुं भेज़े की मेरभानी केरतां जल्दी एई। ³⁹ पतरस तैन सैहीं साथी च़लो जेव, ते ज़ैखन तैड़ी पुज़ो ता तै बह तैस कमरे मां निहीयो, सेरी रेंडी कौन्शां लेरां देती थी, ते तैस ड्लखमेइं खेड़ी थी, ते तैना लिगड़ां ज़ैना तबितां सियोरां थियां हेराने लेगी। ⁴⁰ पतरसे तैना सभ कमरे मैरां बेरोहूं कढां, ते एपु ज़ेंधु केरे भारे दुवा केरने लगो, फिरी तैनी लाशारे पासे तुत्तर फरेइतां ज़ोंव, औ तबिता उठ तबितां एपनी एछ़ी खोल्ही ते पतरसे तेकतां खड़ी भुई। ⁴¹ पतरसे हथेरां ट्लेइतां खड़ी की ते विशवासी ते रेंडी कौन्शां कुजेइतां तबिता ज़िंती तैनकेरे सुपुर्द की। ⁴² एस गल्लरी खबर सारे याफा मां फैली जेई, ते बड़े लोकेइं परमेशरे पुड़ विशवास कियो। ⁴³ पतरस किछ च़ीरे तगर याफा मां शुंमौन नोवेंरो अक मैन्हुं चमड़ौ रंगने बालेरे का राहु।।

कुरनेलियुस पतरसे कुजाते

¹ कैसरे मां अक मैन्हुं थु, तैसेरू नोंव कुर्नलियुस थुं, ते तै अक इतालूवी फौवजरो कपतान थु। ² कुर्नलियुस ता तैसेरे घर्रू सारु टबर परमेशरे कैरां डरने बाले थिये, कुर्नलियुस लोकन बड़ु दान देतो थु, ते परमेशरे का लगातार दुवा करतो रहतो थु। ³ एकी दिहाड़े कुर्नलियुसे दिसां अक परमेशरेरी रुया लाही, तैनी तैस्मां रोड़े च़ारे हेरू की अक फरिशतो तैस्का आव, ते ज़ोंने लगो, औ कुर्नलियुस। ⁴ कुर्नलियुसे डेरतां तैसेरे पासे तकु, ते पुछ़ने लगो, औ परमेशर ज़ौ, कुन गल्ले, फरिशते जुवाब दितो, तेरु दान ते तेरी दुवां परमेशरे का पुज़ोरींन। ⁵ तु हुनी किछ मैन्हुं याफा भेज़तां तैस मैन्हुं ज़ैसेरु नोवं शुंमौन पतरसे अपने का कुजा। ⁶ तै शुंमौनेरे घरे बिशोरो थु, ज़ै चमड़ो रंगनेरू कंम केरतो थु, ते सुमुंद्रेरे बन्ने रहतो थु। ⁷ ज़ैखन फरिशतो ऐना गल्लाँ केरतां च़लो जेव, ता कुर्नलियुसे अपने दुई नोकर ते अपने सिपेहींन मैरां अक भलेमांनस ज़ैरो सिपाही कुजाव। ⁸ ते तैन सारो बिस्तार शुनाव ज़ै तैनी लाहोरो थु, ते तैना याफारे पासे भेज़े।

पतरसेरू दर्शन

⁹ होरसां ज़ैखन तैना च़लते च़लते एकी शाहरे नेड़े पुज़े ता, तक्रीबन दुपाहरेइं पतरस बह छती पुड़ जेव, ताके दुआ केरीं। ¹⁰ तैस ढ्लुख ल्गोरी थी, ते किछ खानु चहतो थु, पण ज़ैखन मैन्हुं रौट्टी बनाने लगे ता तैस बैहोशी ज़ैरही भोई जेई । ¹¹ तरस तकने लगो की आंम्बर साफे ते अक च़ादर च़ौवरे कुंन्ना टेंगोरी आंम्बरेरे पासेरां ऊंढी ज़मीनरे पासे ऐवरीए। ¹² तैसमां ज़मीनरे सारे जानवर ते कीड़े मुकोड़े ते हावारां च़ुड़ौलु तैस च़ादरी मां थियां । ¹³ तैखन अक आवाज़ आई, औ पतरस औ पतरस उठ ते एन कट ते खा। ¹⁴ पण पतरसे जुवाब दितो, नेहीं परमेशर कधे नेहीं, किजोकी मीं आज़ तगर कोई भी हैराम चीज़ नेहीं खेवरी। ¹⁵ तै आवाज़ तैस्जेई फिरी आई, की तू केंची भी चीज़ी जो ज़ै परमेशरे बनेवरीए, तै पाके तु तैसजो हैराम ना ज़ौइयां। ¹⁶ ट्लेई बार एह आवाज़ आई, ते फिरी ते च़ादर आंम्बरेरे पासे च़ली जेई ।

¹⁷ पतरस दिले मां सोचने लगोरो थु, की एह केरही रुयाये, ज़ै आज़ मीं लाही, एतरे मां कुर्नालियुसेरे भेज़ोरे मैन्हुं शुंमौनेरू घर तोपते तोपते दारे मां पुज़े। ¹⁸ तैनेइं हक देइतां पुछ़ू, शुंमौन ज़ैसजो पतरस ज़ोतन इड़ी तुसांन काहे? ¹⁹ हेजु पतरस एपनी रुयारे बारे मां सोचने लगोरो थु, ता पाबित्र आत्मां तैसजो ज़ोंव, शुंमौन ट्लाई मैन्हुं तीं पुछ़ने लगोरेन। ²⁰ खड़ो उठ ते बुन गह, तैन सैहीं साथी गहंने कैरां ना डेरां, किजोकी तैना मीं भेज़ोरेन। ²¹ पतरस बुन आव, ते तैन मैन्ह्न सैहीं ज़ोंने लगो, ज़ैस मैन्हुं तुस पुछ़ने लगोरेथ तै आंवेइं, ते तुस कीजो एवरेथ? ²² तैनेइं जुवाब दितो, असां कपतान कुर्नालियुसेरे भेज़ोरे एवरेंम, तै अक धर्मी मैन्हुंएं ते परमेशर मन्ने बालोए, सारे युहुदी तैसेरी तारीफ केरतन, एकें पाक फरिशतें तैस जो ज़ोवरुए, तु शुंमौन पतरसे अपने घरे कुजेइतां तैसेरी गल्लाँ शुंना? ²³ तैखन पतरसे तैना आंतर कुजाए ते तैनकेरी खातरदारी की|

कुरनेलियुसेरे घरे मां पतरस

होरसां पतरस तैन सैहीं साथी च़लो जेव, ते याफा मैरां भी काही ढ्ला तैस्सैहीं साथी च़ले जे। ²⁴ दुईयावं दिहाड़े तैना कैसरे मां पुज़े, कुर्नालियुस तैन बल्गने लगोरो थु, ते तैनी अपने रिशतेदार ते अपने दोसत भी कुजेइतां आंन्होरे थिये। ²⁵ पतरस ज़ैखन कुर्नालियुसेरे घरे पुज़ो, ता कुर्नालियुसे तैसेरी बड़ी आदर खातरी सैहीं ईज़त की, ते करोड़ां सैहीं तैसेरे पाव बंत्ते। ²⁶ पण पतरसे तै खड़ो कियो ते ज़ोंव, खड़ो भो किजोकी आंव भी ता अक मैन्हुंइं। ²⁷ फिरी तै कुर्नालियुसे सैहीं गल्लाँ केरतो आंतर जेव, तैड़ी बड़े लोक बिशोरे थिये। ²⁸ तैनी तैन सैहीं ज़ोंव, तुसन प्त्तोए की केंची युहुदेरो गैर युहुदी सैहीं मिलनु जुल्नु ठीक नेहीं, पण परमेशरे मीं सैहीं ज़ोवरुए की आंव केंची मैन्हुं जो गंदो या नापाक ना ज़ोंइं। ²⁹ एल्हेरलेइ तुसेइं आंव कुजाव ता आंव च़ुप च़ारे च़लो आव, कुन आंव तुसन पुछ़ी सख्तां की तुसेइं आंव कीजो कुजेवरोइं?

³⁰ कुर्नालियुसे ज़ोंव, आंव च़ौवर दिहाड़े पेहीले अपने घरे मां हूंनेरे मोके कोई ट्लेई बज़ेइं दुवा लोरो थु केरने, ता आचांनक अक मैन्हुं चमकतो कुर्तो लग्गोरो मेरे तुत्तरे अगर खड़ो भोव। ³¹ ते ज़ोंने लगो, औ कुर्नालियुस परमेशरे तेरी दुवा शुंनोरीए ते तेरु दान भी कुबुल कियेरुए। ³² केंची याफा मां भेज़तां शुंमौन ज़ैसजो पतरस भी ज़ोतन, अपने का कुजा, तै शुंमौनेरे काहे ज़ै चमड़ो रंगनेरु कंम केरते, ते सुमुंद्रेरे बंन्ने रहते। ³³ एन शुंन्ते मीं तु कुजाव ते बड़ु रोड़ु भोंवं की तु एज्जी जेव, ते असां सभ परमेशरे का हाज़्रम, ते चहतंम की ज़ैन किछ परमेशरे तीं सैहीं ज़ोवरुए, तैन रोड़े च़ारे शुंनम।

पतरसेरी तालीम

³⁴ ज़ैखन पतरस ज़बान खोलतां ज़ोंने लगो, ता पतरस एपु बुझ़ी जेव, की परमेशर केंचेरो तरफदार नेहीं। ³⁵ ज़ै कोई परमेशरे कैरां डरते, तै रोड़ां कंमा केरते, भावें तै केंची भी ज़ातारो की ना भोए, तैस पुड़ ख़ुशी भोते। ³⁶ परमेशरे बनी ईस्रेएलन का आपनो बचन भेज़ो, ते यीशु मसहीएरे ज़िरये सैहीं ज़ै सैभी केरो परमेशरे सुल्हारो सुसमाचार शुंनाव। ³⁷ युहन्नेरे बपतीसमेंरी मनादी केरने कैरां देइतां ज़ैन किछ भोंवं, सारे युहुदिये मां पत्तोए, ते एनता तुस भी ज़ांनतथ। ³⁸ कैंच़रे परमेशर यीशु नासरी पाबित्र आत्मांइं सैहीं ते कुदरुति सैहीं भरपुर कियो, ते ठारी ठारी गैहीतां लोकां केरू भलु केरतो राहु, तैना सभ ज़ैना शैतानेरे जाले मां फासोरे थिये, तैन शीफा देतो थु, किजोकी परमेशर तैस्सैहीं साथी थु। ³⁹ तैनी ज़ैन किछ युहुदी केरे मुल्खे मां ते युरोशल्में मां कमावं, असां तैसेरे शाहादतम, ते तैहे तैनेइं सलेबी पुड़ टेंगतां मारो। ⁴⁰ परमेशरे तैहे यीशु ट्लेंइयावं दिहाड़े फिरी ज़िंतो केरतां हेराव।

गैर कौमन पुड़ पवित्र आत्मा उत्रनी

⁴¹ तै सैरी कौमीं पुड़ नेहीं बलके तैन गुवहांन पुड़ ज़ैहीर भोव, ज़ैना तैनी पेहीले च़ुनतां रखोरे थिये, येंनी असां ज़ैनेइं तैसेरे मुड़दन मैरां ज़िंते भोंनेरां बाद तैस्सैहीं साथी रौट्टी खेवरी थी। ⁴² ते हुकम देंन की असंन लोकन मां सुसमाचारेरी मनादी केरन ते गुवाही देंन, की सिर्फ अक यीशुए ज़ै परमेशरे ज़िंतो कियोरो, ते मुड़दां केरो जैज बनेवरोए। ⁴³ सारे नब़ी तैसेरे बारे मां गुवाही देतन, की ज़ै कोई तैस पुड़ विशवास केरते ता तैसेरे नोवें सैहीं पापां केरी माफ़ी मैल्ह्चे। ⁴⁴ पतरस हेजु एन ज़ोंतो थु, ता पबित्र आत्मां तैन पुड़ उतरी, ज़ैना बचन शुंन्ने लोरे थिये। ⁴⁵ पतरसे सैहीं साथी एजने बाले युहुदी ज़ैना मसही बनोरे थिये, तज़ब केरने लगे, की गैर युहुदन भी पाबित्र आत्मांरी नियांमत मैल्होरी। ⁴⁶ किजोकी तैनेइं गैर युहुदी केरी ज़ैरही आजीब आजीब बोली केरते, ते परमेशरेरी तारीफ करते शुंनोरी थी, तैखन पतरसे ज़ोंव। ⁴⁷ ज़ैंच़रे असंन पाबित्र आत्मां मैल्होरीए तैंच़रे तैन भी मैल्होरीए, कुन कोई एन मैन्ह्न पेंनेरो बपतीसमों नैने कैरां रोकी सखते? ⁴⁸ एल्हेरलेइ तैनी हुकम दितो, की एन यीशु मसहीएरे नोवें सैहीं बपतीसमों देथ, तैखन तैनेइं पतरसे का मिनत की की किछ दिहाड़े असंन का हेजु बिश।।

पतरसेरे ज़िरीये कम्मेरी स्पष्टी

¹ युहुदिये मां रहंने बाले चेलेइं ते मसही ढ्लांएइं एह खबर शुंनी ता गैर युहुदेइं भी परमेशरेरु बचन कुबुल कियुं। ² ते ज़ैखन पतरस वापस युरोशल्मे मां आव, ता सुंती बशाल्होरे युहुदी ज़ैना मसही बनोरे थिये, ता पतरसे सैहीं बेंस केरने लगे। ³ की तु बगैर सुंती बशाहलोरे लोकन का जेव, ते तैन सैहीं साथी बिशतां रौट्टी भी खाई। ⁴ पतरसे तैन सैहीं सारो बिस्तार पत्रां देंतो ते आखिरी तगर एंच़रे शुंनाव। ⁵ आंव याफा शाहरे मां आंव, दुवा केरने मां मघंन थु, ता मीं किछ बैहोशी ज़ैरही भोइजेइ, ते मीं अक सुपनु ज़ैरु लाहूं, ते हेरताइं की अक च़ादर ज़ैरही च़ौवरे कुंन्ना टेंगोईतां आंम्ब्रेरे पासेरां ऊंढी ओसती ओसती मीं तगर पुज़ी। ⁶ आंव तैस्मां तकने लगो ता कुन हेरतांइं की, तैस्मां ज़मींनारे सारे च़ौवरे ज़ांघेइं च़लने बाले जानबर ते कीड़े मुकोड़े ते उडरने बालां च़ुड़ौलु तैसमा थियां। ⁷ तैखन मींजेई अक आवाज़ आई, ज़ै ज़ोंने लगी, की औ पतरस खड़ो उठ ते इन कट ते खा। ⁸ मीं जुवाब दितो, औ परमेशर कधे नेहीं, किजोकी मीं आज़ तगर कोई भी गंदी या हैराम चीज़ आज़ तगर अपने ऐशी मां नेहीं छ़डौरी। ⁹ दुई बार तै आवाज़ आंम्ब्रे मैरां मींजेई आई, ते ज़ोंने लगी, की ज़ै चीज़ परमेशरे पाबित्र बनेवरीए, तू तैस्जो हैराम ना ज़ोंइयां । ¹⁰ एह आवाज़ ट्लेई बार आई, ते फिरी तै च़ादर आंम्ब्रेरे पासे खिंचोइतां च़ली जेई ? ¹¹ ठीक तैस्से मोके ट्लाई मैन्हुं ज़ैना कैसरे मैरां मींका भेज़ोरे थिये, तैस घरे का सामने खड़े भुए, ज़ैड़ी असां बिशोरे थिये। ¹² पाबित्र आत्मां मीं ज़ोंव, बैधड़क च़ारे एन सैहीं साथी गा, ऐना शा ढ्ला भीं मीं सैहीं साथी आए, ते असां तैस मैनेरे घरे जे। ¹³ तैनी असंन सैहीं ज़ोंव, की कैंच़रे सैहीं तैनी अक फरिशतो घरे लाहू ते ज़ोंने लगो, याफा मां केंची मैन्हुं भेज़तां शुंमौन ज़ैसजो पतरस ज़ोतन तैस अपने घरे कुजा। ¹⁴ तै एइतां तीं अक एरहो बिस्तार देल्हो, ज़ैसेरे ज़ोंने सैहीं तेरी खानदेंनरे सारे मैन्हुं केरे पापां केरी मुखती भोल्ही। ¹⁵ ज़ैखन मीं तैड़ी गैहीतां सुसमाचार शुंनानो शुरू कियो, ता पाबित्र आत्मां तैन पुड़ उतरी, ज़ैंच़रे पैहीले असंन पुड़ उतरोरी थी। ¹⁶ तैखन मीं तै वचन याद आव; ज़ै तैने ज़ोवरो थु; कि यहून्ना त पैनी सीं पबतीसो दितो; पर तुस्न पवित्र आत्माइं सैहीं बपतीसमो मैल्हेलो | ¹⁷ बस्सा अगर परमेशरे तैन भी तैहे नियांमत दिती, ज़ै असंन परमेशर यीशु मसही पुड़ विशवास केरने सैहीं मैल्ही, ता आंव कौन भोताइं की परमेशरे बत्ती मां ठोकर बेंनी। ¹⁸ ज़ैखन तैनेइं एन शुंनु ता चुप रेही जे, ते परमेशरेरी तारीफ केरने लगे तां ता सच़्च़े की परमेशरे गैर युहुदन भी तोबा केरतां ज़िंदगी हासल केरनेरी हिंमत दितोरीए।

अन्तिायारी कलीसिया

¹⁹ ता तैना लोक ज़ैना तैस दुखेरे मारे ज़ैसेरी शुरुवात सैंतफुसे कियोरी थी, तित्र बित्र भोईजे, ते च़लते च़लते फनीके कुब्रुसे ते इनताकिया तगर पुज़े, पण तैना परमेशरो सुसमाचार सिर्फ़ युहुदने शुंनाते थिये। ²⁰ तैन मां किछ कुब्रुसेरे ते किछ कुरेंनेरे थिये, इनताकिया मां गैहीतां यूनेणन भी परमेशर यीशु मसहीएरो सुसमाचार शुंनाने लगे। ²¹ परमेशरेरो हथ तैन पुड़ थु, ते बड़े लोकेइं विशवास कियो, ते परमेशरेरे पासे बेदलोईजे। ²² एसेरी खबर युरोशल्मेंरी क्लीसयारे लोकां केरे कंनण तगर पुज़ी, ते तैनेइं ब्रनबास इनताकिया मैझो भेज़ो। ²³ ज़ैखन तै तैड़ी पुज़ो ता परमेशरेरो चमतकार हेरतां बड़ो ख़ुशी भोव, ते तैन हिंमत दिती की अपने पुरे दिले सैहीं परमेशरेरे वफादार राथ। ²⁴ ब्रनबास अक रोड़ो मैन्हुं थु, तै पाबित्र आत्माइं सैहीं भरपुर थु, ते बड़े लोक परमेशरेरी क्लीस्याई मां शामल भोंने लगे। ²⁵ तैसेरां बाद ब्रनबास सावलेरी तलाशी मां त्रस्स जो च़लो जेव। ²⁶ तैनी सावल तोपतां इनताकिया मां आंन्हों, तैड़ी तैना एकी साले तगर दुइये ज़ांन्हें क्लीस्याई मां लोकन तालीम देंते राहे, ते मसहीएरे चेलन जो इनताकिया मां पैहीली बार मसही ज़ोंने लगे।

²⁷ एस्से दोवरांने मां इनताकिया ते युरोशल्में मैरां किछ नब़ी आए। ²⁸ ते तैन मैरां अक ज़ैसेरु नोंव आग्बुस थुं, ते खड़े भोइतां ते पाबित्र आत्मांरे ज़ोंने सैहीं एन ज़ोंव, की सैरी दुनियाई मां अक बड़ो काल पैंनोएं, एरहो ज़ैरो काल कैसर कल्लौदेसेरे ज़माने मां भी पैवरो थु। ²⁹ तैल्हेरलेइ चेलेइं फैसलो कियो की, असंन मैरां हरकोई एपनी एपनी शिर्धारे मुताबक किछ दान देथ, ताके युहुदिये मां रहंने बाले मसही ढ्लां केरी मादत भोई सखे। ³⁰ बस्सा तैनेइं किछ रकम आकोठी की ते ब्रनबास ते सावलेरे हथे युरोशल्मेंरे बुज़ुर्गन केझो भेज़ी ।।

पतरसेरी जेलरां मुक्ति

¹ तैने दिहाड़न मां हिरोदेस बादशांहैं कलिस्यारे किछ मैन्हुं पाबंद भी किये, ताके तैन सज़ाह दे। ² ते युहन्नेरो ढ्ला याकुब तलवारी सैहीं कत्ल कराव। ³ ज़ैखन तैनी हेरू की युहुदन एह गल बड़ी ख़ुशी अई, ता तैनी ईद फित्रारे दिहाड़न मां पतरस भी पाबंद कमाव। ⁴ पतरस पाबंद केरनेरां बाद हिरोदेसें तै जैल्ही मां छ़डौ, ते तैसेरी निगरेंनारे लेइ च़ैवर गुरुप बनाए, हर गुरुप च़ैवर च़ैवर सिपेही केरो थु, हिरोदेसेरो खियाल थु की ईद फासहीएरां बाद तै जैल्ही मैरां कैढतां लोकां केरे सामने पैश केरेल्हो। ⁵ पतरस ता बड़े पैरहे मां थु, पण सारी कलिस्या तैनकेरे लेइ परमेशरे का दुवा करने लगोरी थी।

⁶ हिरोदेसेरे पतरस लोकां केरे सामने आंन्हने कैरां पैहीले अक रात ज़ैखन पतरस दुई पैरहेदारां केरे मुंझ़ाटे बंधोरो झ़ूलोरो थु, ते सिपाही जैल्हरी डेवढी पुड़ पैरहो देंते थिये। ⁷ ता आचानक परमेशरेरो फरिशतो जैल्ही मां आव, ते सारी कौठी ट्लाकड़ ट्लांच़ भुई, फरिशते पतरसे खिती देइतां बिंझ़ाव ते ज़ोंव, उठ ते लुश केर, ते शंगलां पतरसेरे हथन सैहींयेरां खुलोरी थी। ⁸ फरिशते पतरसे सैहीं ज़ोंव, हिंमत केर ते जुटी ला, पतरसे तैन्ने कियुं, ते फिरी ज़ोंव आपनो चोगो ला ते मीं पतपती एई। ⁹ पतरस फरिशते पतपती जैल्ही मैरां बेइर आव, पण तैस एह पत्तो ना थु, की फरिशतो ज़ैन केरने लगोरोए एन सच़्च़ै या कोई सुपनु हेरने लगोरोइं। ¹⁰ तै पैरहेदारां केरे दुई फैटकन मैरां बेइर निस्तां अव, ते लौंहेरे फाटके का पुज़ो, ज़ै शहरेरे पासे खुलतो थु, तै फाटक तैनकेरे लेइ अपने आप खुलो, ते तैना तैठां निस्तां दुर पुज़े, फरिशतो पतरसे तैड़ी पुज़ेइतां गैईब भोइजेव। ¹¹ पतरसे ज़ैखन हौश आई, ता ज़ोंने लगो, हुनी मीं पुरु यकींन आंव, की परमेशरे आपनो फरिशतो भेज़तां आंव हिरोदेसेरे हथे मैरां छुटाव, ते युहुदेइं ज़ैन सोचेरू थुं, तैन बन्ने ना दीतु।

¹² ज़ैखन तै एस बारे मां सोचने लगोरो थु, ता मरियमरे घरे पुज़ो, ज़ै युहन्नेरी आम्मा थी, ज़ैसजो मरकुस ज़ोते थिये, तैड़ी बड़े लोक अकोठे भोइतां दुवा केरने लगोरे थिये। ¹³ पतरसे बेइरूं दार गुड़कावं ता अक कुई ज़ैसारु नोवं रुद्दा थुं, दार खोलने आई। ¹⁴ तैस कुंईयां पतरसेरी गल शुंनी ता बगैर दार खोलनेरां दोवड़ती खुशी भोइतां आई, ते ज़ोंने लगी, पतरस बेइर दारे मां एवरोए। ¹⁵ तैना मैन्हुं ज़ोंने लगे, तु कुन पागल भोवरीस, पण ज़ैखन तैसां रोड़े च़ारे ज़ोंव, की तै पतरसे, ता तैना ज़ोंने लगे पतरस ता नेहीं पण पतरसेरो फरिशतो भोल्हो। ¹⁶ ते पतरस बेइर दार गुड़कांतो राहु, ते ज़ैखन तैनेइं दार खोलु ता पतरस लैहीतां हेरान रेहीजे। ¹⁷ पतरसे तैन जो हथे सैहीं इशारो कियो, की च़ूपरहथ, ते फिरी अंत्र एइतां सारो बिस्तार शुनाव, की आंव कैंच़रे परमेशरे तैस जैल्ही मैरां बेइर कढौ, ते फिरी ज़ोंव, की याकुबे ता तैसेरे होरी मसही ढ्लांन भी पत्तो देइयथ ते एपु केंची होरी जगाई जो च़लो जेव।

¹⁸ ज़ैखन झ़े्झ़ भुई ता सिपेहीन एपु म्मेहीं खलबली मैच़ी जेई, की पतरस कौरां जेव। ¹⁹ ज़ैखन तोपनेरां पत्ती भी हिरोदेसे पतरसेरो पत्तो ना लग्गो, ता तैनी सिपेही केरू बियांन घिंन्नेरां पत्ती तैन जो कतलेरो हुकम दितो, ते पतरस युहुदिये मैरां कैसरे जो च़लो जेव, ते किछ च़ीरे तगर तैड़ी राहु।

हेरोदेसेरी मौत

²⁰ हिरोदेस सुर ते सैइदेरे लोकन पुड़ बड़ो नाराज़ थु, एल्हेरलेइ तैना लोक मिलतां तैसका आए, ते तैसेरी सुपनेरी ठैरारे एकी मैन्हुं बलतुस आपनो दोसत बनेइतां बादशाहे सैहीं सल्लारी दरखुवास की, किजोकी तैन बादशाहेरे मुल्खेरां खरच़ो मैल्ह्तो थु। ²¹ त्ताल्ही तैनी अक दिहाड़ी ठुवहालाइ ते आपना रोड़ां ज़ैरां बादशाहेरां लिगड़ां लेइतां आदालतरे तख्ते पुड़ बिशतां लोकन सैहीं ज़ोंने लगो। ²² तैनेइं ज़ैखन शुंनु ता ज़ोंने लगे, एह मैन्हुं केरी आवाज़ नेहीं बलके परमेशरी आवाज़े। ²³ किजोकी हिरोदेसें परमेशरी तारीफ ना की, तैल्हेरलेइ तैस परमेशरे फरिशतेरी एरही मार पैई की तैसेरी सैरी जानी कीड़े लग्गे, ते तै मैरी जेव।

²⁴ पण परमेशरेरु बचन आगरोवं बधतु जेवं, ते सैरी दुनियाई मां फैल्तु जेवं।

²⁵ ज़ैखन ब्रनबास ते सावल अपनी सेवा ज़ै तैनकेरे सुपुर्द कियोरी थी, तैनेइं पुरी की ता युरोशल्में जो वापस आए, ते युहन्ना ज़ैसजो मरकुस ज़ोते थिये, एपु सैहीं साथी आंन्हों।

बरनबास ते शाऊल भेझ़े

¹ इनताकियारी कलिस्याई मां काही नब़ी ते गुरु थिये, ज़ैंच़रे ब्रनबास; शुंमौन; कालिया, लोकैस कुरेंनी, ते मनाइंम, थिये, ज़ैनी च़ौवरोवं मुल्खेरे हाकम हिरोदेसे ते सावले सैहीं साथी पलोरो थु। ² ज़ैखन तैना ब्रत रेखतां परमेशरेरी आराधना केरने लगोरे थिये, ता पाबित्र आत्मां ज़ोंव, ज़ैस कंम्मेरे लेइ ब्रनबास ते सावल कुजेवरेन, तैस कंम्मेरे लेइ तैन तियार केरा। ³ तैनेइं ब्रत रेखतां दुवा की, ते तैन पुड़ हथ रेखतां ते दुवा केरतां तैना भेज़े।

पौलसेरू प्रचारेरू पेहिलू सफ़र

⁴ तैना दुइये ज़ैने पाबित्र आत्मांरी तरफां भेज़ोरे थिये, स्लोकिया पुज़े ते तैठां तैना ज़िहाज़े पुड़ कुब्रुसे जो च़लेजे। ⁵ ज़ैखन तैना सैलमीसे मां पुज़े, ता तैड़ी तैना युहुदी केरे प्राथना भवने मां परमेशरेरो सुसमाचार शुंनाने लगे, ते युहन्ना तैनकेरी मद्दत केरनेरे लेइ तैड़ी थु। ⁶ ज़ैखन तैनेइं सारे जज़ीर्ण मां हंठु फिरू, ता तैना पाफसे मां पुज़े, ता तैनकेरी मुलाकात एकी डैइंनोड़े ते झुठे नेबी सैहीं भुई, ज़ैसेरु नोंव ब्रयीशु थुं। ⁷ तै तैठेरे हाक्मेरो सीरगैसेरो मुलाज़म थु, एह हाकम अक बड़ो अकलमंद मैन्हुं थु, ते तैनी ब्रनबास ते सावल कूजेवरे थिये, किजोकी तै परमेशरेरो सुसमाचार शुन्नो चहतो थु। ⁸ पण आलीमास डैइंनोड़ो तैनकेरी मुखालफत केरने लगो, तै हाकमे विशवास केरने कैरां रोकनो चहतो थु। ⁹ तैखन सावल ज़ैसेरु नोंव पौलुस थुं, पाबित्र आत्माइं सैहीं मस्त भोइतां तैसेरे पासे तकने लगो, ते ज़ोंने लगो। ¹⁰ औ शैतांनेरे कोआ, तु हर कीसमेरी बेईमानी केरने बाला, ते नेकारो दुशमन, कुंन तु परमेशरेरी बत्त बगाड़ने कैरां बाज़ ना एजस? ¹¹ हुंनी परमेशरेरो हथ तेरे खलाफ खड़ो भेवरोए, तु कांनो भोईगहंनोस, ते किछ च़िरे तगर तु दिहाड़ो ना ल्हलो, तैखने तैस आंधारू लैहीयोने लगु, ते तै इरहां उरहां त्पोलने लगो, ताके कंखो तैस हथेरां ट्लेइतां च़लाऐ। ¹² सिरगैस हाकमे एह तमाशौ हेरतां, ते चेलन कैरां परमेशरेरो सुसमाचार शुंनतां खुशी राहु, ते मसही पुड़ विशवास कमाव।

पिसिदियारे अन्ताकिया मां

¹³ पाफसेरां पौलुस ते तैसेरे साथी ज़िहाज़े मां पम्फोलियारे आलाके मां पुज़े, ज़ैड़ी युहन्ने तैन मुबारक दिती ते वापस युरोशल्में जो च़लो जेव। ¹⁴ ते तैना प्रगीयेरां निसतां प्सदियेरे शहर इनताकिया मां आए, ते सबतेरे दिहाड़े प्राथना भावने मां गैहीतां बिशी जे। ¹⁵ नेबी केरी ता सैहेफी केरी किताब पड़नेरे बाद तैठेरे सरदारे तैन ज़ोंव, की अगर मैन्हुं केरी भालेइयारे लेइ तुस भी किछ ज़ोंनु चह्तथ ता ज़ोथ। ¹⁶ त्ताल्ही पतरस खड़ो उठो ते हथे सैहीं इशारो केरतां ज़ोंने लगो, औ बनी ईस्रैएलाव परमेशरेरे लोकाव मेरी गल शुंना। ¹⁷ ईशी ज़ात इस्रेएलेरे परमेशरे ईशे बौव दादे च़ुंनोरे थिये, ज़ैखन तैना मिस्रे मां प्रदेशी केरे ज़ैरहे रह्ते थिये, तैन परमेशरे हिंमत दिती ते अपने ज़ब्रदस्त हथे सैहीं तैठां कढै। ¹⁸ ते फिरी तै तकरीबन च़ैल्ही साल तैन्केरां टारां कंमा झ़ैलतो राहु। ¹⁹ तैनी कनाण देशे मां परमेशरे सत कौमां नाश केरतां तैनकेरी ज़मीन अपने इस्रेएली लोकन दिती। ²⁰ ऐना गल्लाँ पुरी भोंने तकरीबन च़ौवर शौव साल लगे, तैसेरां बाद परमेशरे तैनकेरे लेइ सैम्युल नेबेरे ज़माने तगर काज़ी रखतो जेव। ²¹ फिरी लोकेइं बादशाह बनानेरे लेइ दरखुवास की, ते परमेशरे बिनयांमिनेरे कबीले मैरां कैसेरु मठ्ठु सावल बादशाह बनाव ते तैनी च़ैल्ही साल युरोशल्में मां हुकुमत की। ²² फिरी तैनी सावलेरां बाद दावद तैनकेरो बादशाह बनाव ते परमेशरे दावदेरे बारे मां ज़ोंवं, की मीं इशैरू मठ्ठु दावद मैल्होरोए, तैसपुड़ आंव खुशीं ते तैहे मेरी मर्ज़ी पुरी केरेल्हो। ²³ परमेशरे अपने वेहिदेरे मुताबक दावदेरी कौम्हीं मैरां पापां केरी माफ़ी देंने बालो यीशु मसही भेज़ो। ²⁴ यीशुएरे एज्ने कैरां पैहीले युहन्ने बनीं इस्राएलेरे सैरी ज़ातां केरे सामने प्रचार कियो, की तोबा केरा ते बपतीमो नैथ। ²⁵ ज़ैखन युहन्नेरु कंम पुरू भोंने बालू थुं, ता तैनी ज़ोंव, तुस मीं कुन समझ़तथ, आंव तै नेहीं तै मैरां बाद एज्ने बालोए, किजोकी आंव ता एस काबल नेहीं की तैसेरी जुटारो तसमों भी खोली सेखीं।

²⁶ औ मेरे ढ्लाव इब्रहांमेरे औवलाधारे लोकाव, इस छुटकारेरू बचन असंन का भेज़ेरुए। ²⁷ पुराने युरोशल्मेंरे हाक्मेइं यीशु ना पशानो, पण मौवतरो फंदो ब्नेइतां तैनेइं नेबी केरी तैना गल्लाँ पुरी की, ज़ैना हर सब्तेरे दिहाड़े पेड़तां शुंनाते थिये। ²⁸ हालांकी तैन मौवतरी सज़ाहरे काबल सबुत ना मैल्हु, पण फिरी भी तैनेइं पिलातुसे का दरखुवास की, की एह कत्ल कियोरो लोड़ते। ²⁹ ते तैनेइं सभ किछ ज़ैन तैसेरे बारे मां लिखेरू थुं, पुरू कीवं, ता तै स्लेबी पुड़हेरां ओसैल्हतां एकी क्ब्री मां छ़डौ। ³⁰ पण परमेशरे तै मुड़दन मैरां भी ज़िंतो कियो। ³¹ ते ज़ैना लोक गलिले मैरां तैस्सैहीं साथी युरोशल्में मां एवरे थिये, तैन काही दिहाड़न तगर यीशु लैहीयोंतो राहु, ते हुनी तैना लोक तैसेरे शाहादतन। ³² असां तुसन सुसमाचार शुंनातम, की ज़ै वेहिदो परमेशरे ईशे बोव दादे सैहीं कियोरो थु। ³³ तैनी तैनकेरी औवलाध येंनी ईशे लेइ यीशु मसही ज़िंतो केरतां पुरू कियुं, ते होरी भजने मां लिखेरुए, की तु मेरु मठ्ठुस ते आज़ तु मीं कैरां पैइदा भोव। ³⁴ एन सच़ै, की परमेशरे तै मुड़दन मैरां भी ज़िंतो कियो, ताके तै फिरी ना मरे, परमेशरे बचने मां एंन्ने बियांन कियेरुए, की आंव तीं पाबित्र ते सैच़ी नियांमतां देल्हो, ज़ैनकेरो वेहिदो परमेशरे दावदे सैहीं कियोरो थु। ³⁵ ते होरी भजने मां दावद ज़ोते, तु अपने पाबित्र कोऐ शड़ने ना देल्हो। ³⁶ दावद ता अपने ज़माने मां परमेशरी मर्ज़ी पुरी केरनेरां पत्ती मैरी जेव, ते अपने बोव दादन सैहीं साथी दफन भोव, ते तैसेरी जान शैड़ी जेई। ³⁷ पण ज़ै परमेशरे मुड़दन मैरां ज़िंतो कियो, ता तैसेरे शड़नेरी नौबत ना आई । ³⁸ एल्हेरलेइ औ ढ्लाव, बुझ़ा की यीशुएरे ज़िरये सैहीं तुसन पापां केरी मैफारी खबर शुंनाइ गहचे। ³⁹ तुशे लेइ मुसै नेबेरी शैरीतारे मुताबक पापां केरी मुखती ना थी भोंनी, पण यीशु पुड़ विशवास केरने सैहीं हर केंची पापां केरी माफ़ी मैल्ही सख्चे। ⁴⁰ हुशार रहथ कोस्कोही एरहु ना भोए की नेबी केरी एह गल तुसन पुड़ सच़ै बीते।

⁴¹ तुस ज़ैना होरी केरी तौहींन केरतथ ता हेरा समझ़ा तै नेष्ट भोथ, किजोकी आंव तुशे ज़िंते ज़ागते एरहु कंम केरने बालोंइं, की अगर कोई तुसन सैहीं तैसेरे बारे मां बिस्तार भी दे ता तुस कधै याकींन ना केरेल्हे।

⁴² ज़ैखन पौलुस ते ब्रनबास मंद्रे मैरां च़ले ता लोक तैन का मिनत केरतां ज़ोंने लगे, की होरी सब्ते भी एन्ने गल्लाँ केरे बारे मां ज़ोंव गाहे। ⁴³ ज़ैखन लोक आराधनारे बाद बेइर निसे, ता बड़े लोक तैन पत्ती च़ले, ते तैन मां किछ युहुदी थिये, ते किछ नोवें युहुदी शामल थिये, चेलेइं तैन सैहीं गल बात की की परमेशरे विश्वासे मां बनोरे रहंनेरे लेइ समझ़ावं।

पौलसेरे ज़िरीये गैर कौमन मां प्रचारेरी शुरूवात

⁴⁴ होरी सब्तै तकरीबन सारो शाहर परमेशरो सुसमाचार शुंनेरे लेइ आकोठो भोव। ⁴⁵ ज़ैखन युहुदेइं एतरे हछे लोक लाहे ता तैनकेरो क्लैज़ो फुकोई जेव, ते पौलुसेरे खलाफ बकवास केरने लगे। ⁴⁶ पौलुस ते ब्रनबासे दल्लेर भोइतां तैन ज़ोंव, ज़ुरूरी एन थुं, की असां पैहीले तुसन परमेशरु बचन शुंनाम, पण तुसता तैस कैरां दुर भोंने लोरेथ ते अपनो आप आखिरारी ज़िंदगरे काबल ना समझ़थ, ता हेरा हुंनी असां गैर युहुदी केरे पासे गहतम। ⁴⁷ किजोकी परमेशरे आसन इही हुकम दितोरोए, मीं तु गैर कौमां केरे लेइ च़ुंनोरोस, ताके ज़मीनारे कुंने तगर पापां केरी मुखती भोए।

⁴⁸ ज़ैखन गैर युहुदेइं एन शुंनु ता बड़े खुशी भुए, ते परमेशरेरी तारीफ केरने लगे, ते ज़ैना परमेशरे हमेशारी ज़िंदगारे लेइ च़ुंनोरे थिये, तैनेइं विशवास कियो। ⁴⁹ ते परमेशरेरु बचन सैरी आलाके मां फैली जेवं। ⁵⁰ पण युहुदेइं शाहरेरे काही मड़द ते कौन्शां भड़केइ, तैना पौलुस ते ब्रनबासे सतानेरे लेइ तियार भुए, एड़ी तगर की तैना तैस आलाके मैरां भी कैढी छ़डै। ⁵¹ पौलुस ते ब्रनबासे हुकमेरे मुताबक अपने पावां केरी धुड़ भी ठुड़की ते तैठां ईकुनियंमे जो च़ले जे। ⁵² ते चेले खुशी सैहीं पाबित्र आत्माइं सैहीं भरपुर भुए।।

इकनियुस मां पौलुस ते बरनबास

¹ ईकुनियंमे मां पौलुस ते ब्रनबास दुइये ज़ांने प्राथना भावने मां जे, ते एरहु भाषण केरने लगे ते बड़े युहुदेइं ते गैर युहुदेइं विशवास कियो। ² ज़ैना युहुदी बचनेरे खलाफ थिये, तैनेइं गैर युहुदी लोक भड़काए ते तैनेइं विशवासी मैन्हुं विशवासे कैरां दुर किये। ³ फिरभी पौलुसे ते ब्रनबासे तैड़ी बड़ो वखत गुज़ारो, ते नधड़क च़ारे परमेशरे बचनेरी तालीम देंते राहे, ते परमेशरे आजीब कंम्मा केरे ज़िरये सैहीं ज़ैना तैनकेरे हथेइं सैहीं भोतां थियां, परमेशरेरु बचन सच़ साबत भोंतु राहूं | ⁴ शाहरेरे लोकन एपु म्मेहीं फुट भोई जेई, किछ लोक युहुदन सैहीं साथी थिये, ते किछ चेलन सैहीं साथी थिये। ⁵ युहुदी ते गैर युहुदी सरदारन सैहीं मिलतां चेलन सताने ते मारनेरी शुरुवात केरने बाले थिये। ⁶ की तैन एस गल्लारो पत्तो ल्ग्गो, ते तैना तैठां नेशी जे, ते उनियेरे शहर लुस्त्र ते दरबे मां ते तैसेरे आसपासेरे आलाके मां च़ले जे। ⁷ ते तैड़ी तैना परमेशरेरो सुसमाचार शुंनाने लगे।

लुस्त्रा ते दिरबे मां

⁸ लुस्त्रे मां अक मैन्हुं बिशोरो थु, ज़ै पांवां केरो कमज़ोर थु, तै ज़रम्नेरो टोन्टो थु, ते तै सैइयां ना थु च़ेली बटतो। ⁹ तै पौलुसेरी गल्लाँ रोड़े च़ारे शुंन्ने लगोरो थु, पौलुसे तैसेरे पासे रोड़े च़ारे तक्कू ता बुझ़ी जेव, की एस्मां एतरो विश्वासे की एह ठीक भोई सखते। ¹⁰ पौलुसे तैस मैन्हुं जो ज़ोंव, अपने पांवन पुड़ खड़ो भो, ते तै तैखने खड़ो भोव, ते च़लने लगो। ¹¹ ज़ैखन लोकेइं पौलुसेरु एन कंम हेरू ता लुकुनियारी बोली मां चिंडां मारने ते ज़ोंने लगे, की ईशो देबतो असंन का मैनेरी शकली मां एगोरोए। ¹² ते तैन लोकेइं ब्रनबासे ज़ियुसेरू नोवं रखु, ते पौलुसेरु हरमसेरु नोव रखु , किजोकी तै तकरीर केरने मां जादे माहिर थु। ¹³ ज़ियुस देबतेरू मंदर शहरेरे सामने थुं, तैसेरो पुजारी फुड़ुकेरे हार एंनतां शहरे फाटके पुड़ पुज़ो, किजोकी तैना लोक चहते थिये की असां चेलां केरेलेइ सुखन देंम। ¹⁴ ज़ैखन चेलेइं पौलुसे ते ब्रनबासे एन शुंनु ता तैनेइं आपना लिगड़ां छि़ंदां ते मैन्ह्न मां जे ते ज़ोरे ज़ोरे ज़ोंने लगे। ¹⁵ लोकाव तुस एन कुन केरने लगोरेथ? असां भी तुशे ज़ैरहे मैन्हुंम ते तुसन सुसमाचार शुनातम, ताके तुस ऐना फुज़ुल चीज़ां शैरतां ज़िंते परमेशरेरे पासे मुड़थ, ज़ैनी ज़मीन आसमान ते सुमुंद्र ते ज़ैन किछ भी एस्मां आहे तैनी पैइदा कियेरुए। ¹⁶ तैनी पैहीले ज़माने मां सैरी कौमन एपनी एपनी बत्तां च़लने दीतु। ¹⁷ तांभी तैनी आपनो आप बैगुनाह ना बनाव अपनी शाखती हेरानेरे लेइ आम्ब्रेरां झ़ड़ी दिति, ते फसलां केरे लेइ मौसम बनाए, ताके तुसन हछु आंन" भोए ते तुशे दिल खुशी सैहीं भरे। ¹⁸ ऐना गल्लाँ ज़ोइतां तैनेइं लोक बेड़ी मुशक्ली सैहीं रोके, की ऐना ईशें लेइ सुखन ना देंन।

¹⁹ तैखन किछ युहुदी इनताकिया मैरां ईक्नुयंमे मां आए, ते तैना लोक अपने पासे मौड़तां पौलुसे पुड़ पथराव केरने लगे, ते तै मुऔरो बुझ़तां शहरे कैरां बेरोवं घसीटतां निहीयो। ²⁰ ज़ैखन चेले तैड़ी पुज़े ता तैनेइं पौलुस घैरे मां अंन्हों ते तै खड़ो उठो ते वापस शहरे मां अव, ते होरसां ब्रनबासे सैहीं साथी दरबे जो च़लो जेव।

सीरियारे अन्तकिया जो वापिस एजनू

²¹ तैनेइं शहरे मां सुसमाचार शुंनाव ते हछे चेले बनाए, ते तैसेरां बाद तैना लुस्त्रा , ईकुनियंमे, ते इनताकिया जो च़ले जे। ²² तैना चेलां केरी मद्दत केरते थिये, ते तैन समझ़ाते थिये, की अपने विश्वासे मां पक्के मज़बूत भोइयथ, की परमेशरेरी बादंशाही मां दाखल भोंनेरे लेइ बेड़ी मसीबतां केरो सांमनो केरनो पैते। ²³ ते तैनेइं हर कलीसियाई मां सियांने लोक भी रखे, ते ब्रतां रेखतां दुवां की ते तैना परमेशरे सुपुर्द किये, ज़ैसपुड़ तैनेइं विशवास कियोरो थु।

²⁴ फिरी तैना पसदीया मैरां निसतां पम्फौलिया आलाके मां आए। ²⁵ ज़ैखन तैनेइं परगिया मां सुसमाचार शुंनाव ता आतलियारे पासे च़ले जे। ²⁶ तैठां ज़िहाज़े मां च़ैड़तां वापस इनताकिया मां जे, ते तैड़ी तैनेइं तैस सेवारे लेइ ज़ै तैनेइं पुरी कियोरी थी, परमेशरे सुपुर्द कियोरी थी। ²⁷ इनताकिया मां पुज़तां तैनेइं कलिस्यारे लोक अकोठे किये, ते ज़ैन किछ परमेशरे तैनकेरे ज़िरये कियेरू थुं, तैन लोकां केरे सामने बियांन किवं ते एन भी की परमेशरे कैंच़रे गैर युहुदी केरे लेइ विश्वासेरु दार खोलतां छ़डु। ²⁸ पौलुस ते ब्रनबास बड़े च़िरे तगर तैड़ी चेलन सैहीं साथी राहे।।

यरूशलेमेरी सभा

¹ किछ लोक युहुदिये मैरां इनताकिया मां पुज़े, ते ढ्लांन एह तालीम देंने लगे, अगर मुसैरी रेखोरी रस्मरे मुताबक तुशी सुंनत नेहीं भोवरी ता तुशे पापां केरी मुखती ना भोईसखे। ² एस गल्ली पुड़ पौलुस ते ब्रनबासेरी तैन लोकन सैहीं बड़ी बेंस भुई, ते कलिस्यारे लोकेइं पौलुस ते ब्रनबास ते किछ होरे मैन्हुं च़ुंने की तैना युरोशल्में मां गैहितां तैड़ी एस मसले पुड़ चेलन सैहीं ते लोकन सैहीं गल बात केरन। ³ तैखन कलिस्यारे लोकेइं तैना भेज़े, ते तैना फनीके, ते सांमरियारे, आलाके म्महेइं ज़ैखन च़लोरे थिये, ता तैनेइं तैठेरे मसही ढ्लांन ज़ोंवं, की कैंच़रे गैर युहुदेइं मसही पुड़ विशवास कियो, ते कलिस्याई मां शामल भुए, एन शुंनतां सरे ढ्ला बड़े खुशी भुए। ⁴ ज़ैखन तैना युरोशल्में मां पुज़े, ता तैठेरी कलिस्यारे लोक ते चेले ते बुज़ुर्ग तैन सैहीं बेड़ी खुशी सैहीं मिले, ते तैखन तैनेइं सभ किछ बिस्तार दितो, की परमेशरे तैन्केरे ज़िरये सैहीं कैत्रां कैत्रां कंमा कीयां। ⁵ फ्रिसी फ़िर्केरे किछ लोकेइं ज़ैनेइं विशवास कियोरो थु, तैना ज़ोंने लगे, की गैर युहुदन मैरां विशवास केरने बालां केरी सुंन्त लोड़चे कियोरी, ते एन मुसै नेबेरी रस्मी पुड़ अंमल केरनेरो हुकम दितोरो लोड़ते।

⁶ एल्हेरलेइ (रसुल )चेले ते बुज़ुर्ग एह गल बात केरनेरे लेइ अकोठे भुए। ⁷ बड़ी बेंस भोंनेरे बाद पतरसे तैन खड़े भोइतां ज़ोंनु शुरू कियुं, औ मेरे ढ्लाव तुस ज़ांनतथ की बड़े च़िरे पैहीले परमेशरे आंव तुसन लोकन मैरां च़ुंनो, ताके गैर युहुदी भी मेरी ज़बांना परमेशरेरो सुसमाचार शुंनण ते विशवास केरन। ⁸ परमेशर ज़ै दिलेरो हाल ज़ांनते, तैनी ईशी ज़ैरही पाबित्र आत्मां तैन भी दिती, ते एन भी हेरावं की तैना भी परमेशरी नज़री मां बड़े रोड़ेन। ⁹ तैनी असंन मां ते तैन मां कोई फ़र्क नेहीं कियोरो, किजोकी तैनकेरे विशवास केरने सैहीं तैनकेरे दिल भी पाबित्र किये। ¹⁰ ता हुंनी तुस परमेशर आज़मानेरे लेइ मसही पुड़ विशवास केरने बालां केरे गले पुड़ एतरो बोझ कीजो रखतथ, ज़ै ना असेइं छ़ुइयोए ते ना ईशे बोव दादे छ़ुइयोए। ¹¹ किजोकी ईशो ता विशवास एहे की परमेशर यीशु मसहीऐरी बदोवलत ज़ैंच़रे तैनकेरे पापां केरी मुखती भोल्ही तैंच़रे ईशे भी पापां केरी मुखती भोल्ही।

¹² सैरी लोकन मां च़ुप च़प खामोशी ज़ैरही भोई जेई, ते लोक ब्रनबासेरु ते पौलुसेरू बियांन शुंन्ने लगे, की परमेशरे कैंच़रे गैर युहुदन मां कैरां आजीब आजीब कंमा ते निशान हेराए। ¹³ ज़ैखन तैनकेरी गल्लाँ मुकी ता याकुब ज़ोंने लगो , मेरे ढ्लाव मेरी गल शुंना। ¹⁴ शुंमौने तुसन ज़ेवरुए, की परमेशर पैहीले कैंच़रे गैर युहुदन पुड़ बांदो भोव, ताके तैन मैरां मैन्हुं च़ुंनतां अपने नोवेंरी अक कौम बनाए। ¹⁵ नेबी केरू बचन भी एसेरू ज़ैरूहे ज़ैंच़रे लिखेरुए की।

¹⁶ एसेरां बाद आंव फिरी एज्जेल्हो, ते दावदेरू डुलेरु घर फिरी बनेइल्हो, तैसेरी ट्लुटोरेरी मरांमत केरतां तैस फिरी बनेइल्हो।

¹⁷ ताके बाकी लोक येंनी सभ कौमा ज़ैना मेरे नोवें सैहीं परमेशरे तोपण, एन तैनी परमेशरे ज़ोवरुए।

¹⁸ एह तैहे परमेशरे ज़ैनी दुनियारी उबता खेब्ती कैरां देंतो समाचार देंतो राहोरोए। ¹⁹ एल्हेरलेइ मेरी ता सल्लह एहे की असां गैर युहुदन तक्लिफी मां ना छ़डम, ज़ैना परमेशरेरे पासे बेदलोरेन। ²⁰ बल्के तैन चिठी लिखतां एन ज़ोंम की बुतन का च़ैड़ौरी चीज़ां ते हैराम चीज़न कैरां दुर रहंन, ते फ्टोरे जानबरां केरु मास ना खान ते लैहु ना पींन। ²¹ एल्हेरलेइ की हर शहरे मां पुराने ज़माने कैरां लेइतां मुसैरी रस्म शुंनाते राहोरेन, कंने तै हर सब्तै दिहाड़े पेड़तां भी शुंनातन।

गैर कौमां केरे विश्वैसन चिठ्ठी

²² तैखन चेले ते बुज़ुर्ग ते सारी कलिस्या मिलतां एन रोड़ु समझ़ू, की असंन मैरां किछ मैन्हुं च़ूंनतां पौलुसे ते ब्रनबासे सैहीं साथी इनताकिया भेज़म। ²³ तैनेइं युहुदा ज़ैसजो ब्रस्ब्बा ज़ोतन ते सैलास च़ूंनों, किजोकी ऐना दुईये सैभन मां समझ़दार थिये, तैनकेरे हथे चिठी लिखतां भेज़ी, की चेलां केरी तरफां ते सियांना केरी तरफां इनताकिया, सुर्या क्लकिया, ते गैर युहुदी ढ्लांन जो जेये मसही ज़ोइयथ। ²⁴ असेइं शुंनेरुए की किछ मैन्हुं बगैर इजाज़तां तुशे इड़ी आए, ते तैनेइं एपनी गल्लेइं सैहीं तुशो दिल परेशान कियो। ²⁵ एल्हेरलेइ आसेइं एन ठीक समझ़ू, की इठां दुई मैन्हुं अपने ट्लारे पौलुस ते ब्रनबासे सैहीं साथी तुसन का भेज़म। ²⁶ ऐना एरहे मैन्हुंण की ज़ैन ईशे परमेशर यीशु मसहीएरे नोवें पत्ती एपनी जांनरी भी पर्वहा नेहीं। ²⁷ एल्हेरलेइ आसेइं युहुदा ते सैलास भेज़ोरेन, ते तैना ज़बांनी भी एना गल्लाँ शुंनाल्हे। ²⁸ पाबित्र आत्मां ते आसेइं एन ठीक समझ़ू, की इना ज़ुरूरी गल्लाँ केरे आलावा तुसन पुड़ होरो बोझ ना देंम। ²⁹ बस्सा तुस बुत्तां केरी सुखनरे मासै ते लैव्हे कैरां ते गलेरां मारोरे जानबरे कैरां ते हैराम चीज़न कैरां प्रहेज़ज़ केरथ, एन चीज़न कैरां दुर रहंनु तुशे लेइ रोड़ू भोल्हू।

³⁰ बस्सा तैना मैन्हुं च़लते च़लते इनताकिया मां पुज़े, तैड़ी तैनेइं कलिस्यारे लोक अकोठे केरतां एह चिठी तैनकेरे हवाले की | ³¹ तैना चिठी मां लिखोरी गल्लाँ पेड़तां बड़े खुशी भुए। ³² युहुदा ते सैलास एपु भी नब़ी थिये, तैनेइं तैठेरे मसही लोक रोड़े च़ारे समझ़ाए ते विश्वासे मां पक्के बनाए। ³³ किछ दिहाड़ना बाद तैठेरे ढ्लांएइं सलैमतरी दुवा केरतां वापस भेज़े, ताके अपने भेज़ने बालन का वापस गहंन। ³⁴ सैलासे तैड़ी बिशनु रोड़ लग्गु। ³⁵ पण पौलुस ते ब्रनबास इनताकिया मां रुकी जे, तैड़ी तैना काही होरी लोकन सैहीं मिलतां लोकन तालीम देंते राहे ते परमेशरेरु बचन शुंनाते राहे।

पौलसेरू दूइयों प्रचारेरू सफर

पौलस ते बरनबारे मां मतभेद

³⁶ किछ च़िरेरां बाद पौलुसे ब्रनबासे सैहीं ज़ोंवं, च़ल असां तैन सारे शहरन मां गाम, ज़ैड़ी असेइं सुसामाचार शुनेवरो थु, ते तैन ढ्लांन सैहीं मुलाकात केरम, ते हेरम कि तैन केरो कुन हाले। ³⁷ ब्रनबास युहन्ने ज़ैसजो मरकुस ज़ोते थिये, साथी नैणो चहतो थु। ³⁸ पण पौलुसे ठीक ना समझ़ू, की युहन्ना तैन सैहीं साथी गाहे, किजोकी तै पम्फोलिया मां कंम शैरतां आलग भोवरो थु। ³⁹ पौलुसे ता ब्रनबासे एपुम्मेहीं बड़ी अन बन भुई, ते तैना आलग भुए, ब्रनबास ते मरकुस ज़िहाज़े मां कुबरूसे जो च़लो जेव। ⁴⁰ ते पौलुसे सैलास साथी निहीयो, ते ढ्लांइं तैनकेरे लेइ दुवा की, ते तैना परमेशरे सुपुर्द किये ते तैना तैठां च़ले जे। ⁴¹ पौलुस सुर्या ते किलकिया म्मेहीं निस्तो च़लतो कलीसयांन मज़बूत केरतो जेव।।

पौलस तीमुथयुसे साथी नेते

¹ तैना दरबै ते फिरी लुसत्रा मां पुज़े, तैड़ी अक चेलो तैमोंथियुस नोवेंरो रहतो थु, तैसेरी आम्मां युहुदी थी, ते तै मसही पुड़ विशवास केरती थी, पण बाजी युनानी थु। ² तैमोंथियुस लुसत्रा मां ते ईकनुइयंमेरे ढ्लांन मां बड़ो रोड़ो मैन्हुं थु। ³ पौलुस तैमोंथियुसे सफरे मां एपुसैहीं साथी नैनो चहतो थु, एल्हेरलेइ पौलुसे तैमोंथियुसेरी सुंन्त कमाई, किजोकी तैस आलाकेरे सारे लोक ज़ांनते थिये, की एसेरो बाजी युनानीएं। ⁴ तैना ज़ैन ज़ैन शाहरन म्मेहीं च़लते जे, तैठेरे लोकन तैना हुकमां केरे बारे मां ज़ोंते जे, ज़ैना युरोशल्में मां चेलेइं ते सियांनेइं मिलतां शुरू कियोरो थु, ताके लोक तैन पुड़ अंमल केरन। ⁵ बस्सा कलीसियां विशवासे मां पेक्की भोंती जेई, ते तैनकेरी कलीसियां केरी तैधात बधती जेई।

त्रोआसे मां : पौलसेरू दर्शन

⁶ पौलुस ते तैसेरे साथी फरोगिया गलतियारे आलाके म्मेहीं निसतां जे, किजोकी पाबित्र आत्मां तैना आसिया मां बचन शुंनाने कैरां रोकोरे थिये। ⁷ ज़ैखन तैना मौसीयारे बन्ने पुड़ पुज़े, ता तैना बतोंनियां मां गहंनु चहते थिये, पण यीशुएरी आत्मां तैना गहंने ना दिते। ⁸ एल्हेरलेइ तैना मौसीयारे नेड़ेरां त्रावसेरे ड्लोंवें मैझो च़ले जे। ⁹ राती पौलुसे अक मैन्हुं सुपने मां लाहू, तै म्क्दुंनीयांरो थु, तै खड़ो भोइतां पौलुसे का मिनत केरने लोरो थु, की पार म्क्दुंनीयां मां एई ते ईशी मद्दत केर। ¹⁰ पौलुसेरी एह रुया (सुपनु ) हेरनेरां पत्ती लुशी तैना पार म्क्दुंनीयां मां गहंनेरे लेइ तियार भोईजे, किजोकी आसेइं बुझ़ू की परमेशरेरो असां तैड़ी सुसामाचार शुंनानेरे लेइ कुजेवरेंम।

फिलिप्पी मां : लुदियारो मन बेदलोते

¹¹ असां त्रावसेरां ज़िहाज़े मां जे, ते सुम्त्राके मां आए, ते तैठां होरसां नियापुलुसे मां पुज़े। ¹² तैठां असां फिल्पी जो च़ले जे, ज़ै रुंमी केरी बस्तीए ते म्क्दुंनीयांरे आलाकेरो ज़िलोए, तैड़ी असां बड़े दिहाड़े राहे। ¹³ स्बतैरे दिहाड़े असां शाहर्रे फाटके मैरां निसतां असां दरियाए पुड़ पुज़े, किजोकी असंन उमीद थी की तैड़ी दुवा केरने जेई ठार भोंनीएं, असां तैड़ी गैहीतां बिशीजे, तैड़ी किछ कौन्शां थी, असां तैन सुसामाचारो बचन शुंनाने लगे। ¹⁴ ईशी गल्लाँ शुंन्ने बैली कौन्शन मां अक लुद्दइया नोवेंरी थी, तै थौतिरा शाहरेरी रहंने बाली थी, ते काले कपड़ां केरो बपार केरती थी, ते परमेशर मन्ने बाली थी, ते परमेशरे तैस हिंमत दिती की तै पौलुसे कैरां सुसामाचार शुंने ते तैस कुबुल केरे। ¹⁵ ज़ैखन तैसां ते तैसारे पुरे टबरे बपतीसमों निहीयो ता तै असंन सैहीं ज़ोंने लगी, की अगर तुस लोक मीं परमेशरेरी इमानदार दासी समझ़तथ ता च़ला मेरे घरे ते बिशी राथ, ते तैसारी मिनत शुंन्तां असां खुशी भुए।

पौलस ते सीलास जेली मां

¹⁶ एकी फेरे असां दुवा केरनेरी ठारी जो च़लोरे थिये ता असंन अक कुई मैल्ही ज़ैसमा अक अजिब आतमां थी, ते तै एजने बाले ज़मनेरो बिस्तार देती थी, ते अपने मालकां केरे लेइ बड़े पैइंसे कमाती थी। ¹⁷ एह कुई पौलुसे पत्ती ते असंन पत्ती च़ली ते ज़ोंने लगी, की ऐना लोक परमेशरेरे मैन्हुंण, ते ऐना असंन पापां केरी मुखतरी बत्त हेरातन। ¹⁸ तै काही दिहाड़े एन्ने केरती रही, एग्सां पौलुसे जिच भोइतां तैस आत्माइं जो ज़ोंव; आंव तीं हुकम देताइं की यीशुएरे नोवें सैहीं निसी गा; ते तै तैखने तैस कुइए मैरां दुष्टात्मां निसी जेई।

¹⁹ ज़ैखन तैस कुईयरे माल्केइं हेरू की ईशी कमैइयरी उमीद ट्लुटी जेई, ता तैनेइं पौलुस ते सैलास ट्लेईतां सरकारे हवाले किये। ²⁰ तैनेइं पौलुस ते सैलास आदालती मां पैश किये; ते ज़ोंने लगे, की ऐना युहुदीन ते ईशे शहरे मां बड़ी खल्ब्ली मच़ांने लगोरेंन। ²¹ ते एरहे रुवाज़ेरी तालीम देतन की तैन मैन्हुं ईशे लेइ बिल्कुल ठीक नेहीं । ²² एन शुंनतां सरे लोक तैनकेरे पासे बेद्लोई जे, ते पौलुस ते सैलासेरी मुखालफत केरने लगे; ते हाक्मेइं तैन नगन्गे केरतां मार देंनेरो हुकम दितो। ²³ सिपैहीयेइं तैन खुब बेंतेइं बैही ते जैल्ही मां छ़डे, ते सिपैहींन हुकम दितो, की रोड़े च़ारे पेरहो देइयां। ²⁴ सिपैहीयेइं एह हुकम शुंनतां तैना आंधरी कोठी मां छ़डे, ते तैनकेरे पांवन बैड़ी लेइ।

पौलस ते सीलासेरी जेल्हरां मुक्ति

²⁵ कोई एधी राती पौलुस ते सैलास दुवा केरने मां मसस्त थिये, ते परमेशरी तारीफ केरते थिये; ते होरे कैदी भी शुंन्ने लोरे थिये। ²⁶ आचांनक अक भूंज़ल अव, ते जैल्हरे डंख हिल्ले ते जैल्हरां दारां खुल्ही जेआं; ते सैरी कैदी केरी बेड़ी भी खुल्ही जेई। ²⁷ सिपाही बिंझ़ो ते खड़ो उठो ते तकने लगो, ते हेरते की जैल्हरां दारां खुल्ही जेवरन; ता तैनी समझ़ू की सारे कैदी नाशोरेन; ते तैनी अपनी तलवार खिंची की आंव आपनो आप मैरी छ़ैडीं। ²⁸ पण पौलुसे ज़ोरे सैहीं ज़ोंव; आपनो आप ना मार किजोकी असां सभ इड़ीम। ²⁹ सिपाही दियो बैलतां डरतो डरतो अंत्र जेव, ते पौलुसे ते सैलासेरे पांवन पुड़ पैव। ³⁰ फिरी तैनी तैना बेइर आंन्हें ते ज़ोंने लगो, मर्ज़ आंव कुन केरीं, की मेरी मुखती भोए? ³¹ पौलुसे ते सैलासे ज़ोंव, अगर तु ता तेरु टबर यीशु मसही पुड़ विशवास केरथ ता तुशे पापां केरी मुखती भोई गहचे। ³² तैखन पौलुसे ते सैलासे तैनकेरे टबरे परमेशरो सुसमाचार शुंनाव। ³³ तैखने राती सिपैहीयेइं पौलुस ते सैलास अपने घरे निहीये ते तैनकेरे ज़खम धौए ते सैरी टबरे बपतीसमों निहीयो। ³⁴ फिरी तैनी तैना बैहींयें दोपरे निहीये ते बैशकी पुड़ बिशाल्हे; ते सारे टबरे बड़ी खुशी मनाई।

³⁵ ज़ैखन झ़ै्झ़ भुई ता रूमी हाकमे अपने सिपाही जैल्हखानेरे सिपैही का एह हुकम देइतां भेज़े की तैना मैन्हुं हथरां छ़ैडी दे। ³⁶ सिपैहीयेइं पौलुसे जो ज़ोंव; की हाकमें हुकम दितोरोए की पौलुस ते सैलास जैल्ही मैरां हथरां छ़डा। ³⁷ पण पौलुसे तैन सिपैहींन सैहीं ज़ोंव, तैनेइं असां बगैर कुसुरे मारे कुटे ते जैल्ही मां छ़डे; हालां की असां रूमी शैहरीम; हुनी कुन तै असंन च़ूप च़ारे छ़डने चहते ?पण एन ना भोइसखे , तै एपु एज्जे ते असंन बेइर कढे । ³⁸ सिपैहीयेइं गैहीतां हाकमन बिस्तार दितो, की पौलुस ते सैलास तैना रूमी शैहरीन ता तैना डेरी जे। ³⁹ तैड़ी एइतां तैन मनाने लगे, ते फिरी तैना जैल्ही मैरां बेइर आंन्हें ते मिनत की की शहरे मैरां च़ले गाथ। ⁴⁰ बस्सा पौलुस ते सैलास जैल्ही मैरां बेइर निसे ते लुदियाके जे, ते तैड़ी फिल्पेरे मसही ढ्लांन सैहीं मिले ते तैन खुश केरतां च़ले जे।।

थिस्सलुनीके शहरे मां

¹ पौलुस ते सैलास तैसेरां बाद आम्फपलुस ते आप्लोनियंरे शहरन म्मेहीं निसतां थिस्लुंनिके शहरे मां आए, तैड़ी युहुदी केरो अक प्राथना भावन थु। ² पौलुस अपने हिसाबे सैहीं प्राथना भावने मां ट्लाई हफ्ते पाबित्र शास्त्रेरी किताबी मैरां तैन सैहीं बेंस केरतो राहु। ³ पौलुस तैनकेरो मतलब समझ़ातो थु, की यीशु मसहीएरो दुःख झ़ेलनो ते मुड़दन मैरां ज़िंतु भोंनु ज़ुरूरी थुं, की ज़ैस यीशुएरो असां प्रचार केरतम; तैहे मसहीए। ⁴ किछ युहुदी एह तालीम शुंनतां खुशी भुए, ते पौलुसे ते सैलासे सैहीं मिली जे; ते एंच़रे होरे भी बड़े लोक परमेशर मन्ने बाले युनानी ते काही कौन्शां भी शामल भोई जेइ। ⁵ पण युहुदेइं ज़लगे सैहीं काही शहरेरे लोक अकोठे केरतां बकवास केरनो शुरू कियो, तैनेइं यासुंनेरे घरे पुड़ हमलो कियो ताके पौलुसे ते सैलासे तोपतां आंन्ह्म। ⁶ पण ज़ैखन तैना ना मैल्हे ता यासुंन ता काही होरे मसही ढ्ला घसीटतां शहरेरे हाक्मे का आंन्हें , ते चिंडांमारने लगे, की एन मैन्हैंइ सारी दुनीया उल्ट पुलट की, ते आज़ इड़ी भी पुज़ोरेन। ⁷ ते एना यासुंने अपने घरे मां रखोरेन, ते एना लोक कैसरेरे हुकमेंरी खलाफत केरतन, ते ज़ोतन की बादशाह ता कोई होरोए येंनी यीशु। ⁸ एह गल शुंनतां सारे लोक ते कैसरेरे हुकुम्तरे लोक डेरी जे। ⁹ ते तैनेइं यासुंन ते बाकी मसही लोक ज़मानती पुड़ हथरां छ़डे।

बिरीया शहरे मां

¹⁰ ड्लोवझ़ां मसही ढ्लांएइं पौलुस ते सैलास तैठां बैरिये जो भेज़े, ज़ैखन तैना तैड़ी पुज़े ता तैना युहुदी केरे प्राथना भावने मां जे। ¹¹ बैरियेरे लोक थिस्लुंनिकेरे लोकन कैरां जादे शरीफ़ निसे, तांए तैनेइं सुसमाचार बेड़ी खुशी सैहीं कुबुल कियो; तैना रोज़ राती एना गल्लाँ केरे बारे मां गलबात केरते थिये, की पौलुसेरी गल्लाँ सैच़ीन की नेहीं। ¹² केही युहुदेइं ते केहि होरी युनानी कौन्शेइं भी यीशु पुड़ विशवास कियो। ¹³ ज़ैखन थिस्लुंनिकियोंएरे युहुदन पत्तो लगो की पौलुस बैरींना मां परमेशरेरो सुसमाचार प्रचार केरने लगोरो थु; ता तैना तैड़ी भी पुज़े; ते लड़ाई केरनेरे लेइ लोकन भड़काने लगे। ¹⁴ त्ताल्ही ढ्लांएइं पौलुस सुमुंद्रे बन्ने भेज़ो; पण सैलास ता तिमोथियुस बैरींना मां रुकोरे राहे। ¹⁵ ज़ैना लोक पौलुसेरी हिफाज़त केरने लगोरे थिये; तैना आन्थींने मां पुज़ेइतां वापस भुए, की सैलास ता तिमोथियुस लुशी पौलुसे का पुज़्ज़ी गहंन।

एथेंस शहरे मां

¹⁶ ज़ैखन पौलुस आन्थींने मां तैन बलगने लगोरो थु; ता एन तकते की सारो शहर बुत्तैइं सैहीं भेरतांए ता तैसेरो दिल बड़ो दुखी भोव। ¹⁷ ते त्ताल्ही तै युहुदी केरे प्राथना भावने मां ते परमेशर मन्ने बाले युनेन्न सैहीं बेंस केरतो थु; ते तैन सैहीं भी ज़ैना तैस रोज़ चोवके पुड़ मैल्हते थिये। ¹⁸ किछ आपकीयुरी ते किछ स्तोएकी ते किछ फ्लस्फी तैस्सैहीं बेंस केरने लगे; ते तैन मैरां किछ ज़ोंने लगे की बकवासी कुन ज़ोंनु चहते? किजोकी पौलुस यीशुएरो सुसमाचार शुंनातो थु; ते किछ ज़ोंने लगे की एह ता आजीब देबतां केरो पत्तो देंने बालो भोई सखते। ¹⁹ त्ताल्ही तैनेइं तै एपुसैहीं साथी आरीयुपक्से मां निहीयो; तैड़ी तैस्सैहीं ज़ोंने लगे, की कुन आस ज़ैंनी सखतम की ज़ै तालीम तु देंतो च़लोरोस, तै कुंने? ²⁰ असां तेरे ऐशैरां बेड़ी आजीब गल्लाँ शुंन्ने लोरेंम; ते असां एन ज़ांन्नु चह्तम की एन सैहीं तेरो कुन मतलबे? ²¹ द्रासले मां आन्थींनेरे लोक कुन देशी कुन परदेशी एपनी फुरस्तरो सारो मोको होरी कंम्मा केरे बजाहे सिर्फ नोवीं नोवीं गल्लाँ शुंन्ने मां गुज़ारते थिये।

अरियुपगुसेरी सभा मां पौलुसेरू भाशण

²² तैखन पौलुस आरीयुपक्सेरे मुझ़ाटे खड़ो भोइतां ज़ोंने लगो; औ आन्थींने बालाव आंव हेरताइं की तुस हर गल्ली मां देबतन बड़ो उच्चो द्रजो देतथ। ²³ ज़ैखन आंव तुशे शहरे मां हंठतो फिरतो थु, ता मेरी नज़र तुशे बुत्तन पुड़ ते सुखनरी ठारन भी पैई, ते एक्की सुखनरी ठारी एन लिखेरू थुं; एक्की आनज़ांन परमेशरेरे लेइ, बस्सा तुस ज़ैस ज़ांनथे नन्ना ते तैस पुज़तथ ता आंव तैसेरो पत्तो देताइं। ²⁴ ज़ैनी परमेशरे दुनिया मां सैरी चिज़ां पैईदा कियोरीन, तै असमानेरो ते ज़िमीनरो मालके, तै हथां केरे बनेवरे मंद्रन मां ना राहे। ²⁵ तै मैनेरे हाथेइं सैहीं सेवा ना क्मवाए; किजोकी तै केंची चिज़ारो मौहोताज नेहीं, तै सैरन ज़िंदगी सांस ते सभ किछ देते। ²⁶ तैनी आदम बनाव ते तैस एक्की सैहीं हर किस्मेरे लोक पैइदा किये; ताके सर ज़मिनी पुड़ आबाद भोंन, तैनी तैनकेरी ज़िंदगारे दिहाड़े बनाए ते रहंनेरे लेइ ठार बनाई। ²⁷ ताके तैना परमेशरे तोप्न ते शैहीद तोपते तोपते तैन मैल्ही गाहे; हालांकी तै असंन केंची कैरां दुर नेहीं। ²⁸ किजोकी असां एस्सेमां च़लतम फिरतम; ज़ैंच़रे की तुशे शाइरेइं भी ज़ेवरुए, की असां ता तैसेरी ओवलाधम। ²⁹ अगर आस परमेशरी ओवलाधम ता असेइं एन ना लोड़े सोचेरू; की सैही ज़ात सोंने, चेंदरी, या घोड़ेरी मूरतरीए ते ज़ै केंची मैनेरी या मिस्त्रेरी हाथां केरी कारीगिरीए। ³⁰ पेमेशरे ऐना पुरैनी गल्लाँ खतम की, ते हुनी तै मैन्ह्न सैभी ठैरन हुकम देते की तोबा केरन। ³¹ किजोकी तैनी अक दिहाड़ी ठुवालेवरीए ज़ैखन तै सच़ै सैहीं दुनियारी आदालत एक्की एरहे मैनेरे ज़िरये सैहीं केरेल्हो; ज़ै तैनी रखोरोए, ते तै तैनी मुड़दन मैरां ज़िंतो केरतां एह गल सैरी मैन्ह्न साबत केरतां हेराइ।

³² ज़ैखन तैनेइं मुड़दां केरी आदालतारे बारे मां शुंनु ता तैन मैरां किछेइं एस गल्लरी हासी बनाई; ते किछेइं ज़ोंवं; की अस एस बारे मां फिरी कोस्कोई शुंन्मैल्हे। ³³ तैनकेरी एह हालत हेरतां पौलुस तैनकेरी मैफ्ल्ही मैरां निसतां च़लो जेव। ³⁴ पण किछ एरहे लोक पौलुसे सैहीं मिली जे, ते तैनेइं विशवास भी कमाव; तैन मैरां अक देवनुसी युस ते आरीयुपक्सेरी मजलसारो मिम्ब्र थु; ते अक कौन्श थी, तैसारु नोवं दमरस थुं; ते तैनकेरे आलावा होरे भी काही मैन्हुं थिये।।

कुरिन्थुस नगरे मां

¹ तैसेरां बाद पौलुस आन्थिंने मैरां निसतां कुरींथिसे जो च़लो जेव। ² तैड़ी तैस अक युहुदी मैल्हो; तैसेरु नोंव आकोला थुं; ते तै पैंतुसेरो रहंने बालो थु, ते तैसेरी कौन्शरु नोंव प्रसिकला थुं, ते दुईये साथी इतालियारां एवरां थियां ;किजोकी कैसर कलोदेसें हुकम दितोरो थु, की सारे युहुदी रुमे मैरां च़ले गहंन ते पौलुस तैनका जेव। ³ आकोला ते प्रसिकलारो पैशौ तैम्बु बनानेरो थियो; ते एहे पैशौ तैम्बु बनानेरो पौलुसरो भी थु ;एल्हेरलेइ पौलुस तैन सैहीं साथी रेहितां कंम केरने लगो। ⁴ पण तै हर सब्तै प्राथना भावने मां गहतो थु; ते युहुदन ते यूनैन्ण सैहीं बेंस केरतो थु, ते तैना रेही गहते थिये।

⁵ ज़ैखन सैलास ते तिमोथियुस दुइये म्क्दुंनीयेरां आए, ता पौलुस बड़े जोशे सैहीं ज़ैत्रो तैस मोको लगतो थु, ता सुसमाचार प्रचार केरने लगतो थु; पौलुस युहुदी केरे सामने गवाही देतो थु; की यीशुए मसहीए। ⁶ पण ज़ैखन युहुदी पौलुसेरे खलाफ तोहींन केरने लगे, ता पौलुसे अपना लिगड़ां ठुड़कां ते ज़ोंने लगो; तुशो लैहु तुशे गले पुड़ भोए; आंव एस गल्ली कैरां पाकआंहीं, आज़ेरे बाद आंव गैर युहुदन का गैहिलो। ⁷ तैखन पौलुस प्राथना भावने मैरां निसतां च़लो जेव; ते अक परमेशर मन्ने बालो मैन्हुं थु, तैसेरू नोंव तितुस युतस थुं, तैसेरे घरे जेव, ज़ैन प्राथना भावने सैहीं साथी थुं। ⁸ एस प्राथना भावनेरो पुजारी (सरदार) क्रीस्पुस थु, ज़ैनी सारे टबरे समेत परमेशरे पुड़ विशवास कमाव ते कुरिन्थिसएरे केही लोकेइं परमेशरे पुड़ विशवास कमाव ते तैनेइं बपतीसमों भी निहीयो । ⁹ एकी राती परमेशरे पौलुसे सैहीं सुपने मां गल की; ते परमेशर ज़ोंने लगो, की पौलुस डर नन्ना ते तू गह ते च़ूप ना रेहीयां। ¹⁰ किजोकी आंव तींसैहीं साथीं, ते कोई तीं पुड़ हमलो केरतां नुकसान ना पुज़ेइबटेल्हो; एल्हेरलेइ की इस शहरे मां मेरे केही लोक हुन्ना भी आंन्ह । ¹¹ तैल्लां बाद पौलुस तैड़ी डाढ साल राहु, ते तैन परमेशरो सुसमाचार शिखाल्तो राहु।

¹² ज़ैखन गलिल्यो सुबै आख्यारो हाकम थु, ता युहुदेइं मिलतां पौलुसे पुड़ हमलो कमाव; ते पौलुस ट्लेइतां आदालती मां निहीयो। ¹³ ते ज़ोंने लगे, की एह लोकन एस त्रिकेरी परमेशरी आराधना केरनी शिखालते, ज़ै ईशे मैहेज़्बेरे बिलकुल बरखलाफे। ¹⁴ पौलुस कुंखुं ज़ोंने बालो थु; ता गलिल्युए युहुदन सैहीं ज़ोंव; औ युहुदियाव अगर केंची जुर्मेरी या कोई बड़ी शर्रारथारी गल भोथी ता आंव तुशी शुंनेथो। ¹⁵ पण तुशो आल्ज़ाम ता सिर्फ़ खाली गल्लाँ केरो ते नोंवां केरो ते तुशे मैहेज़्बेरोए, ते आंव एन गल्लाँ केरो फैस्लो देंने बालो ना बेंनी । ¹⁶ गलिल्यो सुबै आख्यारे हाक्में तैना आदालती मैरां बेरोहूं कढे। ¹⁷ तैखन तैनेइं सैभेइं सोसथिसे पुड़ पैई जे, ज़ै प्राथना भवनेरो पुजारी थु, ते तै ट्लेइतां आदल्तारे सामने मारने कुटने लगे, ते गलिल्यो सुबै आख्यारे हाकमे तैनकेरी कोई परवाह ना कमाई ।

अन्तकिया वापस एजनू

¹⁸ पौलुस काही दिहाड़े कुरींथिसे मां राहु ते फिरी तै ढ्लांन कैरां रुखसत भोइतां ज़िहाज़े मां सुरिया जो च़लो जेव, ते प्रसिकला ते आकोला भी तैस्सैहीं साथी थिये, ते कींखुर्ये मां तैनी अपनी मिनत पुरी केरनेरे लेइ तैनी अपने दोगेरी टींड बनेवरी थी। ¹⁹ ज़ैखन तैना इफ्सुसे मां पुज़े ता पौलुसे प्रसिकला ते आकोला जो तैसेरी शुकरगुज़ारी दिती, ते तै एकी प्राथना भवने मां जेव ते युहुदन सैहीं बेंस केरनेलगो। ²⁰ ज़ैखन तैने युहुदेइं पौलुसे का मिनत की, की तु हेजु किछ दिहाड़े असंन का बिश, ता पौलुसे तैन सैहीं मन्नु । ²¹ पण ज़ैखन पौलुस तैठां च़लो ता तैनी तैन सैहीं वेहिदो कियो, की अगर परमेशरेरी मर्ज़ी भुई ता आंव फिरी तुसनका एज्जेल्हो, ते फिरी पौलुस ज़िहाज़े मां च़ैड़तां इफ्सुसेरां च़लो जेव। ²² ज़ैखन तै कैसरे मां ज़िहाज़े मैरां ओस्सौ ता तैनी युरोशलमे माम गैहीतां तैनकेरी कलिसयाई जो नमसकार कियुं ते फिरी तै ईनताकियारे पासे च़लो जेव।

पौलूसेरी ट्लाइयों सफर

²³ ईनताकिया मां किछ च़िर बितनेरे बाद तै तैठां च़लो जेव, ते गलतियारे ते फरोगियारे सारे अलाकन म्महेइं निसतो च़लतो सैरी चेलन विशवासे मां मज़बुत केरतो जेव।

इफिसुस शहरे मां अपुल्लोस

²⁴ एस्से फेरे अक युहुदी थु, तैसेरू नोंव आपलुस थुं, ते तै सकेंद्रिया मां ज़रमोरो थु, ते तै ईफसुसे मां रहतो थु, ते तैसेरी बड़ी मिठी ज़बांन थी, ते तै बड़ो अकल्मंद थु, ते धर्मशास्तरेरे बारे मां बड़ो ज़ांनकहार थु। ²⁵ तैनी परमेशरेरे त्रिकेरी तालीम शिखोरी थी, ते बड़े जोशे सैहीं प्रचार केरतो थु, ते परमेशरेरे बारे मां सेही तालीम देतो थु, पण तै सिर्फ़ युहन्नेरे बपतीस्मे तगर बाकम थु। ²⁶ तै प्राथना भावने मां निधड़क च़ारे प्रचार केरने लगो, ते ज़ैखन प्रसिकला ते आकोले तैन शुंनु ता अपने घरे निहीयो, ते परमेशरेरे त्रिकेरी तालीम शिखाली । ²⁷ ज़ैखन पौलुसे सुमुंद्रे पार आखिया गहंनेरो बिस्तार कियो ता किछ ढ्लांएइं तैस हिंमत दिती ते तैठेरे चेलन जो चिठ्ठी लिखी, की एस सहीं रोड़े च़ारे मिलाथ, ते तैनी तैड़ी पुज़तां तैनकेरी बड़ी मद्दत की ज़ैनेइं परमेशरेरे फज़लै सैहीं विशवास कियोरो थु। ²⁸ किजोकी तै बड़े ज़ोरे शोरे सैहीं बेंस केरतां युहुदन खुल्ले आम झुठे साबत केरतो थु, ते पाबित्र बचने सैहीं मस्त केरतो थु, की यीशु ही मसहीए।।

इफिसुस शहरे मां पौलुस

¹ ज़ैखन आपलुस कुरींथिसे मां थु, ता पौलुस आलाकेरी एंत्रीं बत्तां निस्तां इफ्सुसे मां पुज़ो, तैस तैड़ी होरे भीकाही चेले मैल्हे। ² तैनी तैन पुछ़ु, की कुन तुसन विशवास केरते बार तुसन पुड़ पाबित्र आतमा उत्रोरी थी? तैनेइं जुवाब दितो, असेइं नेहीं शुंनेरु की पाबित्र आतमा कधै उत्रोरीए। ³ तैखन पौलुसे ज़ोंव, फिरी तुसेइं किसेरो बपतिस्मों निहीयो? तैनेइं जुवाब दितो, युहन्नेरो। ⁴ पौलुसे ज़ोंव; युहन्ने ता तोबा केरनेरो बपतिस्मों निहीयो ते ज़ोंव, की ज़ै मेरे बाद एज्जने बालोए तुस तैस पुड़ विशवास केरा येंनी यीशु मसही पुड़। ⁵ एन शुंनतां तैनेइं परमेशर यीशु मसहीएरे नोवें सैहीं बपतीसमों निहीयो । ⁶ ज़ैखन पौलुसे तैन पुड़ हथ रखे ता पाबित्र आत्मां तैन पुड़ उतरी, ता तैना आजीब आजीब बोली केरने लगे, ते एजने बाले मोकेरो हाल शुंनाने लगे । ⁷ ऐना सभ कोई बहरे मैन्हुं थिये।

⁸ फिरी पौलुसे प्राथना भावने मां गहंनु शुरू कियुं, ते कोई ट्लेई महींन्न तगर बड़े जोशे सैहीं परमेशरेरी बादशैहीयारे बारे मां लोकन पाबित्र शास्त्रे मैरां शालोख शुंनेइतां मज़बूत केरतो राहु। ⁹ पण तैन मैरां किछ कठोर दिलेरे भोइजे; ते तैनेइं विशवास केरनेरे बजाहे इनकार कमाव, ते मसहीएरे बारे मां बुरु बुरु ज़ोंने लगे, एल्हेरलेइ पौलुस तैन कैरां कनारे भोइ जेव, ते मसही चेले भी कनारे किये ते; त्रांन्सेरे सुकुले मां गहंनु शुरू किंवं, ज़ैड़ी तै रोज़ तैन सैहीं बेंस मुबासो केरतो रहतो थु। ¹⁰ एह सिल्स्लो दुई सालन तगर च़लतो राहु, एड़ी तगर की आसियारे सुबै मां रहंने बाले सारे युहुदन ते यूनेन्न परमेशरेरु बचन शुंनेरो मोको मैल्हो ।

¹¹ ते परमेशर पौलुसेरे ज़िरये सैहीं आजीब आजीब चमत्कार हेरातो थु। ¹² एड़ी तगर की पौलुस ज़ैस रूमाले सैहीं या दुब्ट्टे सैहीं हथ लातो थु, ता तैना बिमारन पुड़ छ़डते थिये, ता तैना बिमार बैझ़ोते थिये; ते अगर तैन मां दुष्टात्मां भी भोती थी, ता तैना भी निसी गैहती थी। ¹³ किछ युहुदी इरहां उरहां गैहितां यीशुएरे नोवें सैहीं फुक फक भी देंने लगे, ते तैना दुष्टात्मां कढनेरे लेइ एन ज़ोते थिये, यीशु मसहीएरो प्रचार पौलुस केरते ते तैस्सेरे नोवेंरी तीं कसम देइतां नशनेरो हुकम देताइं। ¹⁴ सरदार काहींन सिक्वएरां सत मठ्ठां भी एन्ने कम्मां केरतां थियां। ¹⁵ पण एग्सां दुष्टात्मां तैन कुन ज़ोंव; आंव यीशु मसही भी ज़ांनचाहीं ते पौलुसे भी ज़ांनचाहीं ते तुस कौवंनथ? ¹⁶ त्ताल्ही तै मैन्हुं ज़ैसमां दुष्टात्मां थी, तैन्न यीशुएरे नोवें सैहीं फुक फक देंने बालन जो पैव, ते घुली घुली तैना अपने कब्ज़ै मां केरतां एतरे कुट्टे की तैना लैव्हे लैव्हान भोइतां नगनगे तैठां नश्शै । ¹⁷ ज़ैखन इफ्सुसेरे युहुदन ते युनेंन्न एस गल्लारो पत्तो लगो, ता तैना डेरी जे, ते परमेशर यीशु मसहीएरु नोवें उच्चु भोवं। ¹⁸ केही लोकेइं ज़ैनेइं विशवास कियोरो थु, एइतां अपने बुरे कम्मां केरो दुबारो इकरार कियो। ¹⁹ केही लोकेइं ज़ैना तंत्र मंत्र शिखते ते केरते थिये, तैना किताबां सैरेइं एंनतां शरेआम फुकतां छ़ैडी, ते ज़ैखन तैन किताबां केरी किमतारो हिसाब लाव ता कोई पांज़ह हज़ारन कैरां जादे थु । ²⁰ एस्से वजाही सैहीं परमेशरेरो सुसमाचार बड़े तकड़े च़ारे ज़िलां छ़डतो जेव, ते फैल्तो जेव।

²¹ एन गल्लाँ केरे बाद पौलुसे पक्को इराधो कियो, की आंव म्क्दुंनियां ते आखियारे आलाके म्मेहीं निस्तां युरोशल्में जो च़लो गैहिलो ते फिरी रूम शहरे मां गैहितां रूम शहर भी हेरेल्हो। ²² तैनी अपने सैथन मैरां तिमोंथिस ते आरास्त्स दुई मैन्हुं म्क्दुंनियां जो भेज़े, ते एपु भी किछ च़िरे आसियारे सुबै मां रुकोरो राहु।

इफिसुस ए मां हंगामो

²³ एस फैरे मसही तरिकेरे बारे मां बड़ो हंगामो खड़ो भोव । ²⁴ अक सुंनार थु, तैसेरू नोंव देंम्त्रुस थुं, ते आर्तम्स देबारे मंद्रेरी शकली पुड़ सौंन्ने चेंदरां मंद्रां बनावातो थु, ते एन कंम ज़ांन्ने बाले कारिगिरन बड़ू कंम दुवातो थो। ²⁵ तैनी एन कंम ज़ांन्ने बाले सारे कारीगिर अकोठे कमाए ते ज़ोंने लगो, की औ मेरे ढ्लाव असां इन कंम केरतां बड़े पैइंसे कमातम। ²⁶ पण तुस हेरतथ ते शुंनतथ की ऐना दुई मैन्हुं पौलुसेरे ज़ैरहे कैंच़रे इफ्सुस ते तकरीबन सारे सुबै आसिया मां लोकन टपलाने लोरेंन ते ज़ोतन की हथेरां बनोरां मंद्रा बुत हरगज़ देबतो ना भोई सखे। ²⁷ डर एस गल्लारो नेहीं, सिर्फ की ईशै पैशैरी बदनामी भोली, बल्के पुरानी देबी आर्तमास ज़ै अहे तैसारी इज़्त भी खत्म भोंनीएं; इस सारे सुबै मां बल्के सैरी दुनियाई मां एस देबारी पूज़ा भोचे, ते हुनी तैसारी इज़्त भी खत्म भोइगंनियें।

²⁸ ज़ैखन तैनेइं शुंनु ता तैना सरकी सैहीं लाल लाल भोइ जे, ते ज़ोरे ज़ोरे नारहे देंने लगे, की इफ्सी केरी देबी आरतम्स बड़ी पुरानीएं । ²⁹ हेरते हेरते सारे शहरे मां आफरा तफरी मैच़्च़ी जेई, लोकेइं गैलुस ते आरसत्रखुसे ज़ैना पौलुसे सैहीं साथी एवरे थिये तैना ट्लेइतां घसीटते घसीटते तमाशो हेरनेरी ठैरी जो दौवड़ते जे। ³⁰ पौलुस भी मज्लासिमां गहंनु चहतो थु पण चेलेंइं तै रोको। ³¹ ते आसिया सुबैरे किछ मुलाज़मेइं ज़ैना पौलुसेरे मुलाज़म थिए, ते ज़ैना पौलुसेरे भी दोसत थिये, तैसजो बिस्तार भेज़तां मिनत केरतां ज़ोंव, की तमाशो हेरने ना गैहीयां। ³² तैड़ी पैन्चयतरी मजलिसी मां खलबली मच़ौरी थी, किजोकी किछ लोक नहरे देते थिये, ते किछ कुन ते बड़े लोकन औ भी पत्तो ना थु की तैना तैड़ी कीजो अकोठे भेवरेन । ³³ एन हेरतां युहुदेइं आसकेंदर अगर आंन्हों ते गुरुपेरे केही लोकेंइं तै घेरतां किछ किछ ज़ोंने लगे आस्केंन्द्रे लोकन च़ूप केरनेरेलेइ इशारो कियो, ताके तैना अपनी सफाई एपु ज़ोइसखन। ³⁴ ज़ैरो लोकन पत्तो लगो की एह युहुदिए, ता सभ ज़ोरे ज़ोरे नारऔ देंने लगे, की इफ्सी केरी देबी आरतमास बड़ी पुरानीएं औ एह सिलस्लो तकरीबन दुई घेंटे च़लतो राहु। ³⁵ तैखन एकी मैने शाहरेरे लोकां केरी सरक ठंढी केरतां ज़ोंव; की इफ्स्सेरे रहंने बाले कोंन कोंन ना ज़ांने की इफ्स्सेरो शहर पुरानुएं आरतीमास देबारू मंदरे ते एसेरे बुत्तां केरो बडो रखवालोए, ज़ै आंम्ब्रेरां बिछ़ड़ोरो थु। ³⁶ ज़ैखन ऐना गल्लाँ केरे खिलाफ केंचे किछ ना ज़ोंव ता ठीक थुं की तुस च़ूप रहथ ते जल्द बेज़ी मां कंम ना केरा। ³⁷ तुसेइं ज़ैना मैन्हुं इड़ी आंन्होरेंन तैनेइं ता सिर्फ़ मंद्रे लुटेरुए ना ईशी देबारे खिलाफ किछ ज़ोवरुए। ³⁸ एल्हेरलेइ अगर देंम्त्रुस ते एसेरे कारीगिरन केंची पुड़ दाओ केरनोएं ता आदालतारु दार खुलुए ते मुल्खेरे हाकम माजूदान ज़ैड़ी तुस एकी होरी पुड़ दाओ केरी सखतथ । ³⁹ अगर कोई होरो भी म्स्लोए भोए ता तैसेरो फैस्लो भी म्ज्लासी मां भोई सखते । ⁴⁰ असन ता अन्दाज़ोए की अगर कोई असंन पुड़ मुकादमों केरे ता आज़ेरे हंगांमेरे ज़िमेबार ता असांम ता असां कुन जुवाब देंमैल्हे, किजोकी एह हंगांमो बिल्कुल बिलावाजा थु। ⁴¹ एन ज़ोंनेरां बाद तैनी पैन्चैयत खत्म कमाई।।

मकिदुनिया, यूनान त्रोआसे मां पौलूस

¹ ज़ैखन बड़ी शौर मच़्च़ी ता पौलुसे अपने चेले कुजाए ते तैना समझ़ाए ते तैन बिशा ज़ोइतां म्क्दुनियां जो च़लो जेव। ² पौलुस ज़ैल्मैइं ज़ैल्मैइं निस्तो च़लो ता लोकन सुसमाचारेरे बारे मां समझ़ांतो च़लो जेव, ते आखरकार युनाने मां पुज़ो। ³ तैड़ी तै ट्लाई मिहिंने राहु, ते ज़ैखन तै ज़िहाज़े मां सूर्या जो च़लने बालो थु, ता युहुदेइं तैस मारनेरी साजश बनाई, ते एल्हेरलेइ तैनी एन रोड़ु समझ़ू की वापस म्क्दुनियां जो च़लो गहतां । ⁴ प्र्सेरु मठ्ठु सपतरुस ज़ै बिरयेरो रहंने बालो थु, ते थिस्लुनकिंयों शाहरेरे आर्स्त्रखुस ते सकेंदस ते दरबैरो गैलुस ते तिमोंथियुस ते आसियारो तैखिकुस ते तुर्फीमुस आसिया तगर तैसेरे साथी च़लते राहे। ⁵ ऐना लोक पौलुसे कैरां पैहीले निसोरे थिये, ते त्रावसे मां असंन बलगने लगोरे थिये। ⁶ पण आस बेडी दिहाड़ी ईद फितरेरे बाद ज़िहाज़े मां त्रावसे जो च़ले जे; ते पांच़ांव दिहाड़े त्रावसे मां पुज़े, ते तैन सैहीं मिले, ते सत दिहाड़े तैड़ी राहे।

त्रोआसे मां यूतुखुस ज़ींतानों

⁷ हफ्तेरे पैहीले दिहाड़े असां रौट्टी ट्लोड़नेरे लेइ अकोठे भोवरे थिये, ता पौलुस लोकन सैहीं ज़ोंने लगो, की पौलुसे होरसां तैठां आगरोहुं गहंनु थुं, ता एल्हेरलेइ तै ड्लोवझ़ां च़ीरे तगर सुसमाचार शुंनातो राहु। ⁸ बेंहीयें दोप्रे ज़ैड़ी असां सभ अकोठे बिशोरे थिये, ता तैड़ी काही दिये बलते थिये। ⁹ ता अक नोवजुवान दैरी मां बिशोरो थु, ते तैसेरू नोंव युत्खुस थुं, तै पौलुसेरो प्रचार शुंन्ते शुंन्ते झ़ूल्ही जेव, ते एछ़ी निड्ली मां ट्लेइयावं छतरां उनढो खिरको, ते हेरने लगे ता तै मैरी जेवरो थु। ¹⁰ पौलुस बुन आव ते तै नोवजुवान ट्लेइतां तैस्सैहीं लिपटो ते ज़ोंने लगो, की डरा नन्ना एह ज़िंतोए। ¹¹ फिरी तैनी बह गैहितां रौट्टी ट्लोड़ी ते सैभेइं मिलतां खाई, ते फिरी ट्लेकड़ोंने तगर बचन शुंनाने लगो, तैखन तै तैठां च़लो जेव। ¹² लोकेइं तै नोवजुवान ज़िंतो घरजो निहीयो, ते तैन बड़ु यकींन भोइ जेवं।

त्रोआसेरां मिलेतुसेरू सफर

¹³ असां आग्ग्र गैहितां ज़िहाज़े मां सुवार भोइजे ते आसुसेजो च़ले जे, ताके तैड़ी पौलुसे भी ज़िहाज़े मां च़हड़म, किजोकी पौलुसे पैहिले पैदल गहंनेरो बिस्तार कियोरो थु। ¹⁴ ज़ैखन तै असंन आसुसे मां मैल्हो ता तै असेइं ज़िहाज़े मां च़हड़ो ते असां म्त्लूंनियें मां पुज़े। ¹⁵ तैठां असां ज़िहाज़े मां सुवार भोइजे ते होरसां आस खैसरे सामने पुज़े, ते ट्लेइयांव दिहाड़े असां सामसे मां आए, ते होरसां अस मैलीतिसे मां पुज़े। ¹⁶ पौलुसे फैसलो कियोरो थु, की मीं इफ्सुसे मेइं गहंनुएं ते आसिया मां नेहीं रुकनु, ते जल्दी युरोशल्में मां पुज़नुएं ते पैंत्कुस्तेरे दिहाड़े तैड़ी गुज़ारनेन।

इफिसुसेरे बुजर्गन तालीम

¹⁷ मैलीतिसे मां पुज़तां पौलुसे इफ्सुसेरी क्लीस्यारे बुज़ुर्ग कुजाए। ¹⁸ ज़ैखन तैना आए ता तैनी तैन सैहीं ज़ोंव, तुस ज़ांनतथ की ज़ैइसोक्नो देंतो मीं आसिया मां पाव रखोरोए, ता मेरो चालचलन तुसेइं कैरो लाहू । ¹⁹ आंव बड़े सच़ै दिले सैहीं ते लेरां देइतां परमेशरी सेवा केरतो राहु, हालांकी मीं युहुदी केरी बेड़ी बेड़ी साजशां केरो सामनो केरनो पैतो थु। ²⁰ ते ज़ैना गल्लाँ तुशे लेइ फैइदेरी थी, तैना मीं तुसन सैहीं बगैर केंचेरे डरे तुसन सैहीं ज़ोइ छ़ेडी, ते बल्के ज़ैन किछ भी शिखालु दिल त्सैल्ली सैहीं ते घर घर गैहितां शिखालु। ²¹ आंव युहुदी केरे ते युनैनी केरे दुइयां केरे सामने गवाही देतांइं की तैना परमेशरे का तोबा केरन, ते ईशे यीशु मसही पुड़ विशवास केरा। ²² हेरा आंव रुहरो गुलाम बेंनतां युरोशल्में मैझो च़लरोइं, ते मीं पत्तो नेहीं की तैड़ी मींपुड़ केरी केरी गुज़रेल्ही। ²³ आंव सिर्फ़ एत्रू ज़ांनताइं की पाबित्र आत्मा मीं हर शहरे मां एन ज़ोंती राही, की कैदी दुख मसीबत मीं बलगने लोरीन। ²⁴ पण मेरी जान मेरे लेइ कोई कद्र कीमत ना रखे, ता बस्सा आंव एन चहतां की मेरो दोवरो पुरो भोए ,ते आंव परमेशरो सुसमाचार शुंनानेरू कंम ज़ैन परमेशरे मीं सौंफेरुए तैन पुरु केरीं। ²⁵ हुंनी आंव ज़ांनताइं की तुसेइं आंव ज़ैन मां परमेशरी बादशैहीयारो सुसमाचार शुंनातो राहु; ता मीं फिरी ना लाहेले। ²⁶ एल्हेरलेइ आंव तुसन साफ साफ ज़ोइ छ़डतां, की ज़ैना लोक मारे गाहेले ता आंव तैनकेरे खुने कैरां बरीं। ²⁷ किजोकी आंव बगैर केंची डरेरां तुसन शिखाल्तो राहु; की परमेशरी मर्ज़ी तुशेलेइ कुने। ²⁸ बस्सा आपनो ते सारे विशवैसी केरो खियाल रखा, ज़ैसेरे तुस पाबित्र आत्मारी तरफां च़ूंनोरेथ की परमेशरेरी क्लीस्यारी पासबानी केरा, ज़ै तैनी खास अपने खुंने सैहीं घिंनोरिए। ²⁹ आंव ज़ांनताइं की मेरे गहंनेरां बाद मारने बाले ड्लाघ तुसन मां एइतां घुसड़नेण, ते तैना भैडन ज़िंती ना छ़डेल्हे। ³⁰ बल्के तुसने मैरां एरहे लोक खड़े भोल्हे ज़ैना सच़ ट्लोड़ मरोड़ केरतां छ़डेल्हे , ताके चेलन अपने पासे केरन। ³¹ एल्हेरलेइ खबरदार रहथ ते याद रखा, की आंव ट्लाई साल लेरां देंतो रात दिहैड़ी हर एकी तैन खतरन कैरां बच़्च़ांतो राहु। ³² हुंनी आंव तुसन परमेशरे बचनेरे सुपुर्द केरताइं की ज़ै तुसन तरक्की देइसखते, ते तुसन तैस जागिरारो हक़दार ब्नेइसखते, ज़ै तुशे धेर्मी केरेलेइए। ³³ मीं केंचेरे सौन्ने चेंदारू या लिगड़ां केरू लालच़ नेहीं कियेरू। ³⁴ तुस एपु ज़ांनतथ की मीं अपने हथेइं सैहीं अपनी ते अपने सैथी केरी हर अक ज़ुरूरत पुरी कीयोरिए। ³⁵ की असां कैंच़रे सैहीं कमज़ोरन समैल्ही सख्तम? एन ता मीं तुसन केरतां भी हारेवरुए, असां परमेशर यीशु मसहीएरी गल याद रखम की देंनु, आंन्हने, कैरां जादे मुबारके।

³⁶ एन गल्लाँ केरे बाद पौलुसे ज़ेंधु तल्ले लेइतां सैभन सैहीं साथी दुवा की। ³⁷ तैना सभ गले मिलतां लेरां देंने लगे, ते एकेकी फूंमड़ी देंने लगे। ³⁸ ते पौलुसेरी ज़ैन गल्लेइं तैना गमगीन कियोरे थिये, एह गल थी, की तुस मीं फिरी ना लाहेल्हे, त्ताल्ही तैना पौलुसे ज़िहाज़े तगर पूज़ांने जे।।

पौलुसेरू यरूशलेमें गहनू

¹ ज़ैखन असां तैनकैरां खींडे ता ज़िहाज़े मां च़ले जे ता सिधे कौसे मां आए, ते होरसां अस रुदसे मां पुज़े, ते फिरी तैठां पत्रा जो च़ले जे। ² तैठां असेइं हेरू की अक ज़िहाज़ फनिके जो च़लेरुए, ता असां तैस पुड़ च़ैड़तां च़ले जे। ³ ज़ैखन ईशी नज़र कुप्रुसे पुड़ पैइ ता तै असेइं बांए हथे ओसैल्तां सुरिये जो च़ले जे, असां (सुर)सुरे मां ओसै, किजोकी ईशे ज़िहाज़े तैड़ी किछ माल ओसाल्ह्नो थु। ⁴ तैड़ी असेइं चेले तोप्तां कढे ते तैनका असां सत दिहाड़े राहे, तैनेइं पाबित्र आत्मांरे ज़ोंने सैहीं पौलुसे युरोशल्में मां गहंनेरे लेइ ठाको। ⁵ ज़ैखन असंन तैड़ी सत दिहाड़े भुए, ता असां तैठां आग्रोहुं च़ले ता सारे चेले ते कौन्शां मठ्ठां शहरे बेइर तगर साथी आए, ते सुमुंद्रेरे बंन्ने पुज़तां असेइं ज़ेंधु त्त्ल्ले लेइतां दुवा की। ⁶ फिरी असां तैन कैरां खींढे ते ज़िहाज़े मां च़ैड़तां च़ले जे, ते तैना भी अपने घरेजो च़ले जे।

⁷ असां सुरे मैरां आग्रों च़ले जे, प्तलिमीसे मां ज़िहाज़े मैरां औस्से, ते तैड़ी असेइं अपने ढ्लांन जो जए मसही कियुं ते तैन सैहीं साथी अक दिहाड़ी तैड़ी राहे। ⁸ ते होरसां असां तैठां च़ले जे, ते कैसरे मां आए ते फिल्पुस नोवेंरो अक मैन्हुं थु, तैसेरे घरे राहे, ज़ै युरोशल्में मां सत च़ूंनोरे बुज़ुरगंन मैरां अक थु। ⁹ तैसेरी च़ौवर कुंईयां थी, ते तैना आड्लेही थी, ते तैना एजने बाले ज़मानेरो बिस्तार शुंनेती थी। ¹⁰ ज़ैखन असंन तैड़ी काही दिहाड़े भुए ता तैड़ी अक नब़ी थु, जैसेरु नोंव आग्बुस थुं, तै युहुदियेरां एवरो थु। ¹¹ तैनी असंन का एइतां पौलुसेरे नाड़े सैहीं अपने हथ पाव बंधे ते ज़ोंने लगो, की पाबित्र आत्मां ज़ोवरूए की युरोशल्मेंरे युहुदी इस नाड़ेरे मालकेरे ज़ैरे बेंधतां गैर युहुदी केरे हवाले केरेल्हे। ¹² एन शुंनतां असेइं ते होरी लोकेइं पौलुसे का मिनत की, की युरोशल्में मां ना गैहींयां । ¹³ पण पौलुसे जुवाब दितो, तुस एन कुन केरने लोरेथ? तुस कीजो लेरां देई देई मेरो दिल ट्लोड़ने लोरेथ? आंव युरोशल्में मां परमेशर यीशु मसहीएरे नोवें सैहीं सिर्फ़ बेंधौनेरे लेइ नेहीं बल्के मरनेरे लेइ भी तियार आंहीं । ¹⁴ ज़ैखन पौलुसे ज़ोंनु ना मन्नु ता असां च़ूप राहे, की परमेशरी मर्ज़ी पुरी भोए।

¹⁵ एसेरां बाद असां सफरेरी तियारी केरने लगे, ते फिरी असां युरोशल्में जो च़ले जे। ¹⁶ ते कैसरेरे किछ चेले असंन सैहीं साथी च़ले, ते असां मनासुनेरे घरे निहीये ज़ैड़ी असेइं बिशनु थुं, मनासुन कुबरुसेरो रहंने बालो थु, ते कंने पुराने चेलन मैरां थु।

पौलुसेरी याकूबे सैहीं मुलाकात

¹⁷ ते ज़ैखन असां युरोशल्में मां पुज़े ता ईशे ढ्ला बड़े जोशे सैहीं असंन सैहीं मिलने आए। ¹⁸ होरसां असां पौलुसे साथी नैहीतां याकुबे सैहीं मिलने जे, तैड़ी सभ सियांने बुज़ुर्ग पैहीले अकोठे भोवरे थिये। ¹⁹ पौलुसे तैन जो जए मसही कियुं, ते सारो बिस्तार दितो की परमेशरे एनकेरी सेवारे ज़िरये सैहीं गैर युहुदन मां कुन कुन कमावं। ²⁰ ज़ैखन तैनेइं एन शुंनु ता परमेशरी तारीफ केरने लगे; ते फिरी पौलुसे सैहीं ज़ोंने लगे, मेरा ढ्ला हज़ारेइं युहुदेइं विशवास कियोरोए; ते तैना सभ हुकमन पुड़ अंमल केरने मां तकड़ेन। ²¹ एनी ता एन ज़ोवरुए की तुस सारे युहुदन ज़ैना युनेंनी केरे मुझ़ाटे रहतन एह तालीम देंतो एवरोस की मुसै नेबी शारा ते अपने मठ्ठां केरी सुंनत ना केरा, ते युहुदी केरो रुवाज़ ना मन्ना। ²² हुंन्ना ता तु इड़ी एवरोस, ते एह गल लोकां केरे कंन्ने तगर ज़ुरूर पुज़ी गाहेल्ही, ते हुंनी कुन कियुं गाहे। ²³ ईशी राई ता इहे की असंन का च़ौवर मैन्हुंन ज़ैनेइं माफ़ी मगोरीए। ²⁴ तु तैन एपुसैहीं साथी नै ते तैन सैहीं मिलतां अपनो आप साफ़ केर, ते सैरी रसमां पुरी केर ते तैनकेरो खर्च़ो भी दे, ताके तैना अपनो दौग कट्टेइ सखन, तैखन सैभंन पत्तो लगनोएं की ज़ैना गल्लाँ तेरे खलाफ फैलेवरींन, तैना गलतन ते तु एपु भी सच़ै दिले सैहीं शैरीती पुड़ अंमल केर। ²⁵ ते ज़ैड़ी तगर तैन गैर युहुदी केरो सुवाले, की ज़ैनेइं विशवास कियोरोए, तैनकेरे बारे मां असेइं पैहीले फैसलो केरतां लिखतां छ़डेरुए की तैना बुत्तांन का च़ैड़ोरी चिज़ां लैहुवे कैरां ते गल भांनोरे जनबरां केरे मासे कैरां परहेज़ केरन, ते हेराम कम्में कैरां बच़न। ²⁶ होरसां पौलुसे तैना मैन्हुं साथी निहीये, ते तैन सैहीं साथी अपनो आप साफ़ केरनेरी रस्म पुरी केरतां प्राथना भावने मां जेव, ते खबर दिती की अपनो आप साफ़ केरनेरे दिहाड़े पुरे भोने पुड़ तैना अपनी मिनत च़ह्ड़ैल्हे।

मन्दरे मां पौलुस ट्लानों

²⁷ ज़ैखन साफ भोंनेरे सत दिहाड़े पुरे भोंने बाले थिये ता आसियाएरे युहुदेइं पौलुस मंद्रे मां लाहु ता लोकन मां हलचल मच़ाई, ते तैस ट्लेइतां चिंडां मारने लगे। ²⁸ औ ईस्रैएलाव ईशी मद्दत केरा, ईहे तै मैन्हुंएं, ज़ै हर ठैरी लोकन ईशे खलाफ ते ईशी शैरितरे खलाफ ते प्राथना भावनेरे खलाफ तालीम देंतो रहते, ते एनी एसेरां आलावा युनानी ईशे प्राथना भावने मां एन्ह्तां तै पाबित्र ठार गंदी बनेवरीए। ²⁹ तैनेइं पैहीले तुरकमस ईफसी शहरे मां पौलुसे सैहीं साथी लाहोरो थु, ते तैना सौचने लगोरे थिये की पौलुसे तै ज़रुरी मंद्रे मां नीयोरो भोंनोएं। ³⁰ सारे शहरे मां हलचल मैच़्च़ी जेई, ते मैन्हुं दौव्ड़तां जामां भोंने लगे, तैखन तैनेइं पौलुस ट्लईतां प्राथना भावने मैरां घसीटतां बेइर आंन्हों ते दारां बंद कमां। ³¹ ज़ैखन तैना तैस मारनेरी कौशिशी मां थिये, ता रुमी पलटनरे अफ्सरे खबर पुज़ी, की सारे युरोशल्में मां खल्ब्ली मच़ौरीए। ³² तै तैखने पलटनरे अफ्सर ते सिपाही साथी एन्ह्तां तैन मैन्ह्न का बुन पुज़ो, ज़ैखन तैन मैन्हैंइ पलटनरे अफ्सर ते सिपाही साथी लाहे ता तैनेइं पौलुसे मार ना दिती। ³³ पलटनरे अफ्सरे नेड़े गैहीतां पौलुस अपने कब्ज़ै मां कियो, ते तैस दुई शांगलैइं सैहीं बंधनेरो हुकंम दितो, ते फिरी तैनी पुछ़ू की एह मैन्हुं कौने ते एनी कुन कमेवरुए? ³⁴ तैस गुरुपे मां किछ लोक चिंडां मारते थिये, ते एतरी शौर मच़ौरी थी, की पलटनरे अफ्सरे असलीतरो पत्तो ना ल्ग्गो ते तैनी हुकमं दितो की पौलुसे किल्लै मां पुज़ाथ। ³⁵ ज़ैखन पौलुस सिपेहीयेइं पेवड़न उबरो च़लेवरो थु, ता लोकेइं ज़ब्रदस्ती केरतां पौलुस बंहों बांहीं उब्रो छ़ूऔ। ³⁶ सारे लोक ज़ैना पौलुसे पत्ती पैव्रे थिये, तैना चिंडां मारते थिये, की एस खत्म केरा।

³⁷ पौलुसे सिपाही किल्लै मां पुज़ाने बाले थिये, ता पौलुसे पलटनरे अफ्सरे सैहीं ज़ोंव, की आंव तींका किछ मिनत केरी सख्तां? ते तैनी पुछ़ू की तु युनानी ज़ांनतस? ³⁸ कुन तु तै मिस्री ता नेहीं, ज़ेंनी किछ च़ीरे पैहीले खलाफत कियोरी थी, ते च़ौवर हज़ार बगावत केरने बालन सैहीं साथी जंगले मां बिशोरो थु। ³⁹ पौलुसे ज़ोंवं, आंव ता युहुदीं, ते तिरस्सैरो रहंने बालोइं, ज़ै कलकियारो मशुर शहरे, मीं लोकन सैहीं तक्रीर केरनेरी ईजाज़त दे। ⁴⁰ पलटनरे अफ्सरे कैरां इज़ाज़त घिंन्तां पौलुस पोवड़न पुड़ खड़ो भोइतां लोकन जो हथे सैहीं इशारो कमाव, ते ज़ैखन तैनेइं च़ूप कमाई ता पौलुसे इब्रेंनी बोली मां ज़ोंनु शुरू कमावं।।

भीड़रे सामने पौलुसेरू भाशण

¹ मेरे ढ्लाव ते बुज़ुर्गाव मेरु बियांन शुंना ज़ैन आंव एपनी सफैई मां पैश लोरोइं केरने।

² ज़ैखन लोकेंइं तैस कैरां इब्रेंनी मां ज़ोंतु शुंनु ता तैना च़ूप रेही जे, तैखन पौलुसे ज़ोंव।

³ आंव युहुदीं ते क्लकिया शाहरेरो रहंने बालोइं, ते तिर्सुसे मां पैइदा भोवरोइं पण मेरी तालीम इस शहरे मां भोवरीए, मीं गंमली एहेलैरे कदमन मां अपने बुज़ुर्ग दादां केरी शैरीती पुड़ अंमल केरनेरी तालीम शीखोरीए, आंव भी परमेशरेरे लेइ एरहो खुश थु, ज़ैरहे आज़ तुसथ। ⁴ मीं लोक मसहीएरे तोर तरीके पुड़ च़लने बाले बड़े सताए, एड़ही तग्र की कत्ल भी किये ते, आंव मड़दन ते कौन्शन बेंधतां कैद खाने मां छ़डतो राहु। ⁵ सरदार कंहींन ते सभ बुज़ुर्ग लोक एस गल्लारे शहातन, की मीं दंमशके मां रहंने बाले युहुदी ढ्लां केरे लेइ चिठ्ठी एंन्होरी थी, ते आंव तैड़ी एस निति सैहीं जेवरो थु, की ज़ैतरे मसही लोक तैड़ीन तैन भी बेंधतां युरोशल्में मां एंन्हीं ते तैन सज़ाह दुवेंइं ।

अपनों मन बेदलोंनेरे बारे मां

⁶ आंव ज़ैखन सफ़र केरते केरते दंमशकेरे नेड़े पुज़ो, ता दुपाहरां केरे मोको थु ते आम्ब्रेरां अक बड़ी लौ भुई ते मेरे च़ौवरे पासन चमकने लगी। ⁷ आंव तल्लै बिछ़ड़ी जेव ते मीं अक आवाज़ शुंनी; ज़ै मीं जो ज़ोंने लोरी थी; औ सावल औ सावल तु मीं कीजो स्तातस? ⁸ ता मीं पुछ़ू औ परमेशर तु कौवंनस? ता मीं जो जुवाब आव की आंव यीशु नासरीं ज़ैस तु सतातस। ⁹ मेरे सैथेइं लौ ता लाही पण तैन कोई संमझ़ ना आई की तै आवाज़ मीं सैहीं कुन लोरीए ज़ोंने? ¹⁰ ता मीं पुछ़ू औ परमेशर आंव कुन कमेइं; परमेशरे ज़ोंव, उठ दंमशके मां गह तैड़ी तीं सभ तगर ज़ैन तेरे केरनेरे लेइ रखेरुए तैड़ी तीं सैहीं ज़ोंवं गाहेलु। ¹¹ मेरे सैथेइं आंव हथेरां ट्लेईतां दंमशके मां पुज़ाव, किजोकी तैस तैज़ लोंआं आंव कांनो बनेवरो थु।

¹² तैड़ी अक मैन्हुं हन्नानियां नोवेंरो मीं हेरने आव, तै बड़ो भलेमानस ते धर्मेरो पाबंद थु, ते तैठेरे युहुदन मां बड़ो इज़्तदार लैहियोतो थु। ¹³ तै मींका एइतां ज़ोंने लगो, मेरे ढ्ला, सावल, एपनी एछ़ी खोल, ता मेरी एछ़ी तैखने खुल्ली जेई, ते आंव तैस लहंने लगो। ¹⁴ तैखन तैनी ज़ोंव, तेरे बुज़ुरगां केरे परमेशरे तु च़ुंनोरोस, ताके तु तैसेरी मर्ज़ी पुरी केरस ते तैस धेर्मी लहस ते तैसेरी ज़बाना गल्लाँ शुंनस। ¹⁵ किजोकी तु सैरी लोकन मां तैसेरो गुवहा भोलो, ते तैन ज़ोल्हो की तीं कुन लाहेरूए ते कुन शुंनेरुए। ¹⁶ हुंनी च़ीर किजोवें उठ, ते बपतिस्मों नै ते अपने पाप धौइ छ़ड।

गैर कौमन मां प्रचार

¹⁷ ते ज़ैखन आंव युरोशल्में मां वापस आव, ता मीं किछ बैहोशी ज़ैरही भोइजेइ। ¹⁸ मीं परमेशर लाहू ते एन ज़ोंतु शुंनु की लुश केर, ते युरोशल्में मैरां लुशी निस, किजोकी ऐना मेरे बारे मां तेरी गुवाही कुबुल ना केरेल्हे। ¹⁹ मीं जुवाब दितो, औ परमेशर ऐना लोक ज़ांनतन की आंव हर प्राथना भावने मां गहतो थु, ते कैंच़रे आंव तेरे मन्ने बालन आंव कैद केरतो ते कुट्तो थु। ²⁰ ते ज़ैखन तेरे सेवके सैंतफुसे मारने लोरे थिये, ता आंव भी तैड़ी थु, ते तैसेरे कत्ल केरने मां खुशी थु, ते आंव कैतली केरां लिगड़ां पहरतो थु। ²¹ परमेशरे मीं सैहीं ज़ोंव, गा आंव तीं गैर युहुदी लोकन का दुर दुर भेज़ेल्हो।

²² सारे लोक पौलुसेरी गल्लाँ शुंन्ने लोरे थिये, पण ज़ैखन तै इड़ी तगर पुज़ो ता सारे लोक ज़ोरे ज़ोरे चिंडां मारने लगे, की इही ठार पाबित्र केरा किजोकी एह ज़िंतो रखनेरे काबल नेहीं। ²³ ज़ैखन लोकां केरी शौर ते चिंडां च़ैलती रेही, ता तैना लिगड़ां शैरतां धुड़ उडारने लगे। ²⁴ ता पलटनरे अफ्सरे पौलुस किल्लै मां नैहंनेरो हुकम दितो, की एस कोड़ेइं सैहीं मारा ते एसेरू बियांन घिंना ताके पत्तो लगे, की लोक कीजो चिंडां मारने लोरेन? ²⁵ ज़ैखन तैना कोड़ेइं सैहीं मारनेरे लेइ पौलुसे बंधने लगे, ता तैनी एकी अफ्सरे सैहीं ज़ै तैड़ी नेड़े थु, ता तैसजो ज़ोंव, कुन अक रुमी शहरी बगैर कुसुरे मारनो ज़ैइज़े? ²⁶ ज़ैखन तैनी अफ्सरे एन शुंनु ता तै होरी अफ्सरे का जेव, ते तैस्सैहीं ज़ोंव, की तु कुन केरतां? एह ता अक रुमीं मैन्हुंएं। ²⁷ पलटनरे अफ्सरे पौलुसे का एइतां पुछ़ू, कुन तु रुमींस ता पौलुसे जुवाब दितो, हां आंव रुमीं। ²⁸ तैनी पलटनरे अफ्सरे पौलुसे सैहीं ज़ोंव, की मीं ता बड़ो पैइंसो खैरच़तां रुमीं इज़्त हासल कीयोरिए, ते पौलुसे जुवाब दितो, पण आंव ता ज़रम्नेरो रुमीं। ²⁹ ज़ैना लोक पौलुसेरु बियांन घिंन्ने बाले थिये, ता तैना नैशी जे, ते पलटनरे अफ्सरे ज़ैखन एह पत्तो लगो, ता तै डेरी जेव, की ज़ै मैन्हुं मीं बेंधतां रखोरोए एह ता रुमेरो रहंने बालोए।

महासभारे सामने पौलुस

³⁰ होरसां पलटनरे अफ्सरे पौलुस खोल्हो ते एन दरयाफ्त केरनेरे लेइ, की युहुदी एस पुड़ कुन आल्ज़ाम लातन, तैनी युहुदीकेरी आदल्तारे किछ मुलाज़म अकोठे किये, ते सरदार कंहींन भी कुजाव, तैखन तैनी पौलुस एंन्ह्तां तैनकेरे सामने खड़ो कियो।।

¹ पौलुसे आदालतरे मुलाज़मन पुड़ बड़े रोड़े च़ारे तेकतां ज़ोंव, मेरे ढ्लाव आंव बेड़ी नेक नीति सैहीं परमेशरेरे हुकमा केरे मुताबक ज़िंदगी गुज़ारतो एवरोइं। ² सरदार कंहींन हनानियांए पौलुसे का खड़े भोइतां लोकन हुकम दितो, की एसेरे तुत्तरे मां थप्पड़ बहथ। ³ पौलुसे तैन सैहीं ज़ोंव, एन ठगैरु धर्मार्थ, तीं पुड़ परमेशरेरी आनर्थ, तु इड़ी बिशोरोस की धर्मेएरे मुताबक मेरो इन्साफ केरस, पण तु धर्मएरे खलाफ मीं मारनेरो हुकम देतस। ⁴ ज़ैना तैड़ी खड़खड़े थिये, ता तैना ज़ोंने लगे; तीं सरदार कंहींने जो बुरू ज़ोंने जो हिंमत कैंच़रे भुई? ⁵ पौलुसे तैन सैहीं ज़ोंव मेरे ढ्लाव मीं पत्तो ना थु, की एह सरदार कंहींने; शैरीती मां लिखेरुए की तु अपने सरदार कंहींने जो बुरू ना ज़ोइयां। ⁶ पौलुस ज़ांनतो थु, की तैन मां किछ सुदुकी भी आंन्ह, ते किछ फ्रिसी भी आंन्ह ते तै आदालती मां ज़ोरे सैहीं ज़ोंने लगो , की मेरे ढ्लाव आंव ता फ्रिसी केरू मठ्ठुइं; ते मीं पुड़ एंनेइं एल्हेरलेइ मुकादमों च़लैवरोए, की आंव उमीद रखताइं की मुड़दे फिरी ज़िंते भोल्हे। ⁷ पौलुसेरु एन ज़ोंते फ्रिसन ता सुदुकन एपुम्मेहीं लड़ाई शुरू भोई जेई, ते सैभन एपुम्मेहीं खल बनो। ⁸ सुदुकी ज़ोतन की कियांमत नेहीं भोंनी, ते ना फरिशतो कोई चीज़े, ते ना रुहु; पण फ्रिसी एन दुइंने मनतन। ⁹ तैखने लड़ाई शुरू भोई जेई, शैरीतरे बुज़ूरग्न मैरां ज़ैना फ्रिसी थिये, तैना खड़े भोइतां लड़ाई केरतां ज़ोंने लगे, की असां इस मैन्हुं मां कोई कुसुर ना लहंम, अगर केंची रूहां या फरिशते कोई गल कियोरीए ता फिरी कुन भोवं? ¹⁰ गल एतरी बेधी जेई, की पलटनरे आफसरे बुझ़ोंने लगु की एरहु ना भोए की पौलुसेरे टोटे टोटे ना बनान; ता तैनी सिपेहींन जो हुकम दितो की बुन गाथ ते पौलुसे ज़बरदस्ती किल्लै मैझो आंन्हां। ¹¹ तैस्से राती परमेशरे पौलुसे का एइतां ज़ोंव; हिंमत रख ज़ैंच़रे तीं युरोशल्में मां मेरी गुवाही दितोरीए, तैंच़रे तीं रुंमें मां भी गुवाही देंनी भोल्ही।

पौलुसेरे मौतरे लेई साजिस

¹² होरसां झ़ै्झ़ां युहुदेइं मिलतां फैसलो कियो, ते कसम कमाई की ज़ां तगर असां पौलुसे कत्ल ना केरम, तां तगर किछ ना खांम दे ना पींम। ¹³ एस साज्शी मां च़ैल्हींन कैरां जादे मैन्हुं थिये। ¹⁴ तैना सरदार कांहींन्न ते बुज़ूरग्न का जे, ते ज़ोंने लगे, असंन लांनत भोए, अगर असां पौलुसे मारनेरे बगैर किछ खांम या पींम ता; असेइं ता तैस खतम केरनेरी कसम कमेवरीए। ¹⁵ एल्हेरलेइ तुस सभ आदालतरे मुलाज़म मिलतां पलटनरे आफसरे का दरखुवास देथ, की तै पौलुसे लोकां केरे सामने आंन्हें, ताके एस मुकदमेरी सारी हकिकत फिरी दरयाफत भोए, एस कैरां पैहीले पौलुस ईड़ी पैश कियो गाहे, असां तियारम, की तैस ठकाने लांम।

¹⁶ पण ज़ैखन पौलुसेरे भनैज़े, एस साजशरो पत्तो ल्ग्गो, ता तैनी किल्लै मां गैहीतां पौलुसे पत्तो दितो। ¹⁷ तैखन पौलुसे अक आफसर कुजाव, ते तैस्सैहीं ज़ोंव; की इस जुवाने पलटनरे आफसरे का नैह्थ; किजोकी एह किछ ज़ोंनेरे लेइ एवरोए। ¹⁸ बस्सा तै तैस पलटनरे आफसरे का साथी निहीयो; ते ज़ोंने लगो, की आंव पौलुस कैदी, ज़ै आहे तैनी आंव कुजाव, ते तैनी मीं का दरखुवास कियोरीए, की इस जुवाने आंव तीं का एंन्हीं किजोकी एह किछ तीं सैहीं ज़ोंनु चहते। ¹⁹ पलटनरो आफसर तैस जुवांनेरो हथ ट्लेइतां तै कनारे ज़ैरे निहीयो ते पुछ़ने लगो; तु मीं सैहीं कुन ज़ोंनु चहतस? ²⁰ तैनी जुवाने ज़ोंव; की युहुदेइं अकोठे भोइतां तीं का दरखुवास देंनेरो फैस्लो कियोरोए; की तु पौलुसेरी तैकिकात दरयाफत केरनेरे बहांने पौलुसे अदालत आलिया मां आंनस। ²¹ तु तैनकेरी गल ना मेन्ना; किजोकी कोई च़ैल्हींन कैरां जादे युहुदी तैसपुड़ हमलो केरनेरी ताकी मांन; तैनेइं कसम कमेवरी की ज़ां तगर असां पौलुसे मारनेरे बगैर अगर असां किछ खांम या पींम, ता असंन लांनत भोए , हुंनी तैना तियारन; सिर्फ़ तेरे वेहिदेरो इंतज़ारे। ²² पलटनरे आफसरे तै जुवान वापस भेज़ो; ते ज़ोंव की गा, ऐना गल्लाँ ज़ैना तीं मीं सैहीं ज़ोइ; होरी केंची पत्तो ना लोड़ी ल्ग्गोरो।

पौलुस फेलिक्से कां भेझ़नों

²³ तैखन पलटनरे आफसरे होरे दुई सुबेदार कुजाए, ते तैन सैहीं ज़ोंव; की तुस दुई शौव सिपाही ते सहतर घोड़े सुवार ते दुई शौव बेड़छ़न बाले तियार रखा; तैनेइं राती नौवे बज़ेइं कैसरे मां गहंनुएं। ²⁴ ते फिरी तैनी पलटनरे आफसरे हुकम दितो की पौलुसेरे लेइ घोड़ेरो इंतज़ाम केरा, ताके तै गुवर्न्र फिल्कुसे का हफाज़ती सैहीं पूज़ाव गाहे। ²⁵ ते तैनी अक चिठ्ठी एस तरिकेरी लिखी।

²⁶ कलोदेस लोसियारी तरफां गुवर्न्र फिल्कुसे जो मेरु भोंतु जए मसही। ²⁷ एह तै मैन्हुंएं, ज़ै युहुदेइं ट्लातोरो थु; ते एस तैना मारने बाले थिये, की आंव सिपाही साथी नैहितां साथी जेव, ते तै छुटाव; किजोकी मीं पत्तो थु, की तै अक रुंमेरो रहंने बालोए। ²⁸ लिहाज़ा एन दरयाफ्त केरनेरे लेइ की तै तैना तैस पुड़ कुन आल्ज़ाम लातन; मीं तै तैनकेरी आदालत आलिया मां पैश कियो। ²⁹ ते पत्तो लग्गो, की तैनकेरो आल्ज़ाम तैनकेरी शैरितरे मसलन सैहीं तालक रखते ,पण एसेरे खलाफ कोई एरहो आल्ज़ाम नेहीं की ज़ैसेरे ज़रीये सैहीं असां तैस उमर कैद या मौव्तरी सज़ह देइ सखम। ³⁰ मीं पत्तो लग्गोरोए की एसेरे खलाफ कोई साजश भोई राहोरीए, ते मीं एह जल्दी तीं कैझो भेज़ोरोए, ते मीं तैसपुड़ दाऔ केरने बालन भी ज़ोवरुए, की तैना भी तीं का अपनो मुक़दमों पैश केरन।

³¹ बस्सा सिपाही पलटनरे आफसरेरे हुकमेरे मुताबक पौलुस एपुसैहीं साथी नैहीतां रातो रात आंतिपत्रुसे मां पुझ़ाव। ³² होरसां दिसां घोड़ सुवार तैस्सैहीं साथी अगरी अगरी गहंनेरो हुकम दितो; ते एपु किल्लै मैझो वापस च़लो जेव। ³³ ज़ैखन घोड़ सुवार कैसरे मां पुज़े ता तैनेइं गुवर्न्रे का चिठ्ठी देइतां पौलुस तैस्का पैश कियो। ³⁴ गुवर्न्रे चिठ्ठी पैड़तां पुछ़ू, एह कौस सुबैरो रहंने बालोए? ज़ैखन तैस पत्तो ल्ग्गो की एह किल्कीयारो रहंने बालोए। ³⁵ ता तैनी ज़ोंव की आंव तेरो मुक़दमों तैखन शुंनेल्हो, ज़ैखन तेरे मुदेई भी इड़ी हाज़र भोल्हे, तैखन तैनी हुकम दितो की पौलुसे हिरोदेसेरे किल्लै मां कैद केरतां रखा।।

हाकिम फेलिकुसेरे सामने पौलुस

¹ पांच़े दिहैड़ना बाद सरदार कंहींन हननियां किछ सियांने बुज़ुर्ग तीर्तुलुस बकीले सैहीं साथी कैसरे मां पुज़ो, ते गुव्रनारे का पैश भोइतां पौलुसेरां खलाफ फरियाद कमाई। ² ज़ैखन पौलुस पैश कियो ता तीर्तुलुस बकीले पौलुसे पुड़ आल्ज़ाम लांते ज़ोंव, असां तेरे ज़ोंने सैहीं बड़े आरामें सैहीं ज़िंदगी गुज़ारने लोरेंम ते तेरे खियालेइं सैहीं ईशी कौमीं बड़ो फैइदो पूज़ोरोए। ³ फैलिकस बहादुरे, असां हर जगाई ते हर बख्त तेरी मैहेर्भेंन्गी सैहीं तेरे शुक्र गुज़ारंम। ⁴ हुंनी आंव जादे च़ीर ना लेइं ते एत्रेकी मेरी दरखुवास शुंन। ⁵ असेइं लाहेरुए की इही मैन्हुं बड़ो खतरनाके, इही दुनियारे सारे युहुदन मां फित्नाबाज़े, ते नैसरी केरे बदनाम फिर्केरो मिम्ब्रे। ⁶ एनी ता मंद्र भी गंदु केर्नेरी कोशिश की, ते एल्हेरलेइ असेइं एह ट्लेइतां एस पुड़ एपनी शैरीतरे मुताबक मुक़दमों च़लानो चहते थिये। ⁷ पण पलटनरो आफसर एस असंन कैरां ज़ब्रदस्ती नैही जेव, ते तैनी हुकम दितो की एसेरे मुदेई इड़ी एइतां एसपुड़ मुक़दमों दाईर केरन। ⁸ तु एसेरू बियांन शुंनेल्हो ता तीं एसेरी सैरी गैल्ती केरो पत्तो ल्ग्नोएं, ज़ैना गैल्ती असेइं एसपुड़ लेवरींन। ⁹ युहुदी भी खुशी भोइतां ज़ोंने लगे, की ऐना गल्लाँ बिल्कुल सैहीयंन।

पौलुसेरो एगरोरां जुवाब

¹⁰ ज़ैखन गुव्रनरे पौलुसे बियांन देंनेरे लेइ इशारो कियो, ता पौलुसे जुवाब दितो की, आंव ज़ांनतांइं की तु कैही सालां केरी देंती इस कौंमरी आदालत केरने लोरोस, एल्हेरलेइ आंव अपनी सफाई तीं का पैश केरताइं। ¹¹ तु एपु पत्तो केरी सखत्स की आंव बहरे दिहाड़े पैहीले युरोशल्में मां प्राथना केरनेरे लेइ जेवरो थु। ¹² मेरे मुदेइयेइं आंव मंद्रे मां केंची सैहीं भी बेंस केरतो नेहीं लाहोरो, ते प्राथना भावने मां ते शहरे मां इरहां उरहां लड़ाई केरतो नेहीं लाहोरो। ¹³ हुंनी ऐना आल्ज़ाम ज़ैना मीं पुड़ लांने लोरेंन, ते तेरे सामने साबत ना केरी सखे। ¹⁴ हां आंव इकरार ज़ुरूर केरतांइं की ज़ैस त्रिकेरी गलती मीं करार देतन; आंव तैसेरे मुताबक अपने बुज़ुर्ग दादां केरे परमेशरेरी प्राथना केरतांइं, ते ज़ैन किछ तुवारीती ते नेबी केरी किताबी मां लिखेरुए; तैन सैभन पुड़ मेरो विश्वासे। ¹⁵ आंव भी परमेशरे पुड़ तैहे भरोसो रखताइं, ज़ै तैना रखतन की धेरमी केरी ते पैपी केरी, दुईयां, केरी कियांमत भोल्ही। ¹⁶ ते एल्हेरलेइ मेरी एहे कौशिश रह्चे, की परमेशरे का भी ते इन्सांने का भी मेरी नेकनीती राहे। ¹⁷ कैही सालां केरी गैर हैज़्रारां बाद आंव एपनी कौंमरी धर्मर्थेरी रक्मरी च़ह्ड़तल पुज़ाने आंव युरोशल्में मां एवरो थु। ¹⁸ तैखन एंनेइं आंव मंद्रे मां लाहू, ता आंव शुध भोइतां अपनी रस्म च़हड़ने लगोरो थु, ते ना कोई मीं सैहीं साथी हछे मैन्हुं थिये, ते ना कोई लड़ाई केरने लगोरो थु। ¹⁹ हां आसियारे किछ युहुदी तैड़ी थिये, अगर तैन मीं पुड़ किछ गिलो थु, ता तैनकेरू वाजब थुं, की तैना इड़ी हाज़र भोइतां मीं पुड़ दाऔ केरेथे। ²⁰ इना लोक ज़ैना इड़ी एवरेंन, ता एना ज़ोंन की ज़ैखन आंव आदालत आलिया मां पैश भोवरो थु, ता एंनेइं मींमा कुन कुसुर लाहोरो थु | ²¹ सुवाए इस गल्लारां की ज़ै मीं बड़े ज़ोरे सैहीं आवाज़ देइतां ज़ोवरी थी, की आज़ तुशे सामने मीं पुड़ मुड़दां केरी कियांम्तरे बारे मां मुक़दमों च़लांने लगोरेंन ।

²² तैखन फैलिकसे" ज़ै मसहीएरे बारे मां बड़ु किछ ज़ांनतो थु, एन ज़ोइतां मुक़दमों बंद कियो की ज़ैखन पलटनरो आफसर लोसियास इड़ी एजेल्हो ता आंव तुशे सामने इस मुक़दमेरो फैस्लो केरेल्हो। ²³ तैनी फौवजरे आफसरे जो ज़ोंव, की पौलुसे पैरहे मां आरामें सैहीं रखा, ते तैसेरे दौस्तन मैरां केंची भी तैसेरी सेवा केरनेरे लेइ ना रोकथ।

फेलिक्स ते द्रुसिल्लारे सामने पौलुस

²⁴ कैही दिहैड़ना बाद फैलिकसे अपनी कौन्श दरोसेला" ज़ै युहुदी थी, साथी आंन्हीं तैनी पौलुसे जो समाद भेज़ो ते यीशु मसही पुड़ विशवास केरनेरे बारे मां गल्लाँ शुंनी। ²⁵ ज़ैखन पौलुसे धर्मएरे बारे मां ते प्रहेज़ेरे बारे मां ते एजने बैली आदालतरे बारे मां बियांन कियुं, ता फैलिकस डेरी जेव, ते ज़ोंने लगो, हुंनी एतरू बड़ूए, अगर फुर्सत मैल्हेली ता आंव तीं फिरी कुजेइल्हो। ²⁶ फैलिकसे एह भी उमीद थी, की पौलुसेरी तरफां तैस किछ रिशपत भी मैल्हेली, एल्हेरलेइ तै पौलुसे बार बार कुजातो थु, ते तैस्सैहीं गल्लाँ केरतो थु। ²⁷ पुरे दुई सालना बाद फैलिकसेरी ठैरी पुर्केस फिस्त्स गुवर्नर बनों, ते फैलिकसे एपु युहुदी खुश केरनेरे लेइ पौलुस कैदी मां रखो।।

पौलुस शैनशाहे कां फरयाद केरते

¹ फैस्तुस सुबेदार बन्नेरे ट्लेई दिहैड़ना बाद आंव कैसरेरां युरोशल्में मां जेव। ² ज़ैड़ी सरदार कंहींन ते युहुदी बुज़ुर्ग तैस का एइतां पौलुसेरे खलाफ फ्राध लाने लगे। ³ तैना तैसका मिनत केरने लगे, की लुशी पौलुसे युरोशल्में मां हाज़र भोंनेरो हुकम दे, द्रासले मां तैनेइं तैस बत्ते मारनेरी साजश कियोरी थी। ⁴ पण फैस्तुसे जुवाब दितो, की पौलुस ता कैसरे मां कैदे, ते आंव भी तैड़ी लुशी पुज़ने बालोइं। ⁵ की ना भोए की तुसन मैरां भी किछ खास मैन्हुं मीं सैहीं साथी च़लन, की अगर सच़े तैनी कोई गलत कंम कियेरु भोए ता असां तैसपुड़ मुक़दमों दाइर केरम।

⁶ ते तै युरोशल्में मां अठ दिहाड़े राहु, ते फिरी कैसरे जो च़लो जेव; तैड़ी तै दुईयावं दिहाड़े आदालतरी कुर्सी पुड़ बिशो, ते हुकम दितो की पौलुसे हाज़ केरा। ⁷ ज़ैखन पौलुस हाज़र भोव ता युरोशल्मेंरे युहुदेइं तैस च़ुफुरतां घेरो देइतां बड़े झुठे आल्ज़ाम लांने शुरू किये; पण कोई प्क्कु सबुत ना मैल्हु। ⁸ पौलुसे अपनी सफाई देंते बार युहुदी केरे झुठे आल्ज़ामा केरे लेइ इनकार कियो, ते ज़ोंव, की मीं ता युहुदी केरी शैरीतरे खलाफ कोई कुसुर नेहीं कियोरो; ते ना मंद्रेरे खलाफ ते ना कैसरे खलाफ कोई कुसुर कियोरोए। ⁹ पण फैस्तुस एपु युहुदी खुश केरनेरे लेइ पौलुसे पुछ़ू; की तीं युरोशल्में जो गहंनु मन्ज़ुरे, ताके आंव एस मुक़दमेरो फैस्लो तैड़ी केरीं? ¹⁰ पौलुसे जुवाब दितो ;आंव इड़ी कैसरेरी आदालती मां खड़ोइं, ते मेरे मुक़दमेरो फैसलो इस्से ठैरी भोवरो लोड़ते; तु एपु भी रोड़े च़ारे ज़ांनतस की मीं युहुदी केरो कोई कुसुर नेहीं कियोरो। ¹¹ अगर आंव कुसुरवार आंहीं ता मौवतरी सज़हरे लेइकआंहीं ता मेरो मरनेरो इनकार नेहीं, पण अगर ज़ैना झुठे आल्ज़ाम युहुदी मीं पुड़ लांने लगोरेंन ते अगर तैना झुठेन ता केंची हक नेहीं की मीं तैनकेरे हवाले केरे; ते आंव इड़ी कैसरे मां अपील केरताइं । ¹² फैस्तुसे अपने सल्लाकारन कैरां मुशोरो केरतां जुवाब दितो; तीं कैसरे मां अपील कीयोरिए ता तु कैसरे का गाहेल्हो।

बादशाह अग्रिप्पारे सामने पौलुस

¹³ किछ दिहैड़ना बाद अगीरपा बादशाह ते बिरनीके कैसरे मां आए, ताके फैस्तुसे सैहीं मुलाकात केरम। ¹⁴ एल्हेरलेइ तैना बड़े दिहाड़े तैड़ी राहे; एल्हेरलेइ फैस्तुसे पौलुसेरे मुक़दमेरो सारो हाल बियांन कीयो, की इड़ी अक नेक मैन्हुंएं; ज़ैस फैलिक्स कैदी मां छ़ैडतां च़लो जेव। ¹⁵ ज़ैखन आंव युरोशल्में मां थु, ता सरदार कंहींन ते युहुदी बुज़ुर्ग मीं का फ्राध लांनेरे लेइ एवरे थिये, की एसेरे खलाफ सज़हरो हुकम दितो गाहे। ¹⁶ मीं तैन ज़ोवरू थुं, की रुंमी दस्तुरे मुताबक कोई मैन्हुं सज़ह देंनेरेलेइ हवाले ना किव गाहे; ज़ां तगर तैस अपने मुदेइ केरे सामने तैन आल्ज़ामा केरे बारे मां अपनी सफाई पैश केरनेरो मोको ना दितो गाहे। ¹⁷ एल्हेरलेइ ज़ैखन ऐना लोक इड़ी आए ता मीं तैखने होरसां एपनी आदालती मां हाज़र भोंनेरो हुकम दितो। ¹⁸ ज़ैखन तैसेरे मुदेइ अपनो दाऔ पैश केरनेरे लेइ खड़े भुए ता, तैनेइं कोई एरहो आल्ज़ाम तैसपुड़ ना लाव; ज़ैसेरो मीं शक थु। ¹⁹ बलके तैनकेरी लड़ाई तैन केरे अपने ध्रमेरे केंची यीशु नोवेंरे मैनेरे बारे मां थु, तै मैरी जेवरोए; पण पौलुस तैसजो ज़िंतो ज़ोते। ²⁰ आंव बेड़ी उलझनी मां राहोरोइं की कैंच़रे एन गल्लाँ केरी तैकिकात केरीं; एल्हेरलेइ मीं पौलुसे पुछ़ू; की तीं युरोशल्में मां गहंनु मन्ज़ुरे; ताके एन गल्लाँ केरो फैसलो तैड़ी भोए? ²¹ पण पौलुसे आपील कमाई की इस मुक़दमेरो फैसलो कैसरेरी आदालती मां भोवरो लोड़ते; एल्हेरलेइ मीं हुकम दितो की तै कैसरे गहंने तगर इड़ी पाबंद राहे। ²² अगीरपा बादशाहे फैस्तुसे सैहीं ज़ोंव; आंव भी एस मैनेरी गल्लाँ एसेरी ज़बाना शुंन्नी चहताइं; फैस्तुसे जुवाब दितो, की तू तैसेरी गल्लाँ कालां शुंनी सखत्स।

²³ होरसां अगीरपा बादशाह ते बिरनीके बेड़ी शांनी सैहीं आए, ते पलटनरे बडे बडे आफसर ते शाहर्रे खास खास लोक कचैरी मां दाखल भुए, फैस्तुसे हुकम दितो की पौलुसे हाज़र केरा। ²⁴ फिरी फैस्तुसे ज़ोंव; अगीरपा बादशाह ते बाकी लोकाव तुस इस मैन्हुं लहतथ एसेरां खलाफ सैरी युहुदी कौमां मीं का युरोशल्में मां भी ते इड़ी कैसरे मां लेरां देइ देइ दरखुवास कियोरी थी, की एस ज़िंते ना छ़ैडथ। ²⁵ पण मीं पत्तो लग्गो की ऐनी कोई एरहु गलत कंम नेहीं कियेरू, की एह कत्ल कियु गाहे; एल्हेरलेइ एनी इड़ी कैसरे मां आपील कीयोरिए, ता आंव ठीक समझ़तां की एस तैरां भेज़ीं । ²⁶ पण कैसरे जो लिखनेरे लेइ मीं का कोई एरही खास गल नेहीं, एल्हेरलेइ मीं तुशे खास अगीरपा बादशाहेरे सामने पैश कियोरोए ताके पुछ़ गंन केरनेरे बाद अगर कोई खास गल भोए ता आंव कैसरे जो लिखतां भेज़ी सेखीं। ²⁷ किजोकी केंची कैदी भेज़ते बार तैसेरे आल्ज़ाम अगर आंव केंची ना शुंनेइं ता तै मेरी अकलमंदी नेहीं।।

अग्रिप्पारे सामने पौलुसेरू बियान

¹ त्ताल्ही अगीरपा बादशाहे पौलुसे जो ज़ोंव, तीं अपने बारे मां ज़ोंनेरी इजाज़ते, तैखन पौलुस अपनो हथ खड़ो केरतां अपनी सफाई पैश केरने लगो।

² औ अगीरपा बादशाह आंव अपनो आप खुश किस्मत समझ़ताइं की तेरे सामने खड़ो भोईतां युहुदी केरे आल्ज़ामा केरे खलाफ अपनी सफ़ाई पैश केरने लगोरोइं। ³ खास केरतां तु सारे युहुदी केरी रस्मों रुवाज़ेरे बारे मां बाक़मस, ते एल्हेरलेइ आंव तीं का मिनत केरतां की तु सबरी सैहीं मेरो बिस्तार शुंनस।

⁴ युहुदी मीं रोड़े च़ारे ज़ांनतन की पैहीले आंव अपने मुल्खे मां ते बादे मां मेरी जुवेंनरो चालचलन केरहो थु। ⁵ तैना पैहीले देंते मीं ज़ांनतन ते अगर चहंन ता मेरे हक्के मां गुवाही देइ सखत्न, की आंव अपने कठर धरमेरे फ़िर्केरे मुताबक फ्रिसी केरे तरीके सैहीं ज़िंदगी गुज़रतो एवरोइं। ⁶ परमेशरे ईशे बौव दादे सैहीं अक वैहिधो कियोरो थु, मीं उमीदे की तै पुरो भोल्हो, तैस उमिदरी वजाही सैहीं मीं पुड़ मुक़दमों च़लेवरोए। ⁷ एस वैहिदेरे पुरे भोंनेरी उमीद ईशे बहरे केरे बहरे कबिलने, एल्हेरलेइ तैना दिले सैहीं रात दिहाड़ी परमेशरेरी आराधना स्तुति केरते रहतन, औ अगीरपा बादशाह मेरी इस उमीदरे लेइ युहुदी मीं पुड़ मुक़दमों दाईर केरने लगोरेंन। ⁸ कुन तुस एस गल्ली पुड़ की परमेशर मुड़दन फिरी ज़िंते केरेल्हो, गलत समझ़तथ? ⁹ पैहीले आंमहीं समझ़तो थु, की यीशु नैसरेरे नोवेंरी हर तरीके मुखालफत केरनी मेरो फ्रज़ै। ¹⁰ एल्हेरलेइ आंव युरोशल्में मां एंन्ने केरतो राहु, मीं सरदार कांहींन्न कैरां इजाज़त एंन्ह्तां बड़े परमेशरेरे सेवक कैद केरतां छ़डै, ते ज़ैखन तैन फंसी देते थिये, ता आंव भी तैड़ी एहे राई देतो थु। ¹¹ आंव एकी एकी प्राथना भावने मां गहतो थु, ते तैन सज़ह दुवातो थु, ते लोकन यीशुएरे खलाफ गैई देंनेरे लेइ मजबुर केरतो थु, ते मसही लोकां केरी मुखालफत केरनी मीं एतरी खुशी एइती थी की आंव दुर दुर शहरन मां गैहीतां तैन स्तातो थु।

अपनों मन बेदलोंनेरे बारे मां

( प्ररितों 9 : 1 - 19 ; 22 : 6 - 16 )

¹² एकी बार सरदार कांहींन्न कैरां आखतियार एंन्ह्तां एस्से कम्मेरे लेइ दंमश्केरु सफ़र केरने लगोरो थु। ¹³ ता औ अगीरपा बादशाह आंव हेजु बत्ते थु, ता दुपहरां केरे मोके आंब्रेरां अक लौ एइंती लाही, ज़ै दिहाड़ेरी लौई कैरां भी जादे थी, ते तै इशे च़ौवरे पासंन चमकने लगी। ¹⁴ असां सभ तल्ले मां बिछ़ड़ी जे, ते मीं अक आवाज़ शुंनी, ज़ै मीं सैहीं इब्रेंनी ज़बानी मां एन ज़ोंने लगोरी थी; की औ सावल औ सावल तु मीं कीजो सतातस (आंक्से) पैने पुड़ लत मारनी तेरे लेइ बड़ी मुश्कले। ¹⁵ ता मीं जुवाब दितो; औ परमेशर तु कौवंनस; ता परमेशरे मीं जुवाब दितो आंव यीशु आंहीं ज़ैस तु सतातस? ¹⁶ पण उठ ते अपने पांवंन पुड़ खड़ो भो, किजोकी आंव तीं पुड़ एल्हेरलेइ ज़ैहीर भेवरोइं की तीं आंव अपनो सेवक बनेइं, ते ज़ैन किछ तीं लाहेरुए तु तैसेरो शाहदत बनेल्हो। ¹⁷ आंव तीं तेरे लोकन कैरां ते गैर कौमन कैरां बच़ांतो राहेल्हो आंव तीं तैन मां भेज़ने लोरोइं। ¹⁸ ताके तु तैनकेरी एछ़ी खोल्स ते तैन आंधरे मैरां लौई मां आंन्स ते कंने शैताने कैरां छुटेइतां परमेशरेरे पासे आंन्स, ताके तैना मीं पुड़ विशवास केरन ते तैनकेरे पापां केरी माफ़ी भोए ते परमेशरेरे खास लोकन मां शांमल भोइतां अपनी जैईदात हासल केरन।

अपने कम्मां केरे बारे मां

¹⁹ ते एल्हेरलेइ औ अगीरपा बादशाह मीं एस आंब्रेरी रूयारो इनकार नेहीं कमेवरो। ²⁰ ते पैहीले मीं दंमशकेरे लोकन मां ते फिरी युरोशल्मेंरे ते सारे युहुदीयेरे रहंने बालन ते गैर युहुदन मां भी मीं परमेशरेरो सुसमाचार शुंनाव की तोबा केरा, ते परमेशरेरे पासे फिरा ते एपनी नेक निति सैहीं अपने दिल साफ़ केरतां परमेशरे का पैश भोथ। ²¹ एन्ने गल्लाँ केरे लेइ युहुदेइं आंव मंद्रे मां ट्लातो ते मारनेरी कौशिश की। ²² पण आंव परमेशरेरी किर्पाई सैहीं आज़ तगर ज़िंतोंइं, ते सैभी निके बडन का आंव गुवाही देताइं, की ज़ैना गल्लाँ आंव ज़ोताइं तैना की ज़ैना नेबेंइं ज़ोवरी थी, ते मुसै नेबें भी ज़ोवरी थी। ²³ येंनी एह की मसही बड़ो दुख भोगेल्हो, ते सैभंन कैरां पैहील्हो मुड़दन मैरां ज़िंतो भोईतां युहुदी कौमीं ता गैर युहुदी लोकन (लौअरो) रौशनारो समाद देल्हो।

²⁴ ज़ैखन पौलुस एन ज़ोंने लगोरो थु, ता फैस्तुसे ज़ोरे सैहीं ज़ोंव; तू मस्तांनो भोईजेव, जादे ज्ञाने सैहीं तु पागल भोइजेवरोस। ²⁵ पौलुसे जुवाब दितो, जनाब फैस्तुस साहब आंव पागल नेहीं भोवरो; आंव ज़ैन किछ ज़ोंने लगोरोइं तैन सच़े। ²⁶ बादशाह एन गल्लाँ केरो बाकमें; ते आंव एससैहीं खुलतां गल केरी साख्ताइं, ते मीं यकींने की एन मैरां कोई भी गल तैस कैरां छ़पोरी नेहीं; किजोकी एह चमत्कार कोई एरहो नेहीं भेवरो। ²⁷ औ अगीरपा बादशाह कुन तु नेबंन मनतस; आंव ज़ांनताइं की तु मनतस? ²⁸ अगीरपा बादशाहे पौलुसे सैहीं ज़ोंव, कुन तु थोड़ी ज़ैरी गल्लेइं सैहीं मीं तु मसही बनाने चहतस? ²⁹ पौलुसे जुवाब दितो; भंवें थोड़ी ज़ैरी या जादे गल्लेइं सैहीं, पण आंव ता परमेशरे का दुवा केरताइं की; ना सिर्फ़ तु बलके ज़ैतरे भी आज़ मेरी गल्लाँ शुंनी राहोरेंन सभ मेरे ज़ैरे भोंन, पण इन शंगलां केरे बगैर।

³⁰ तैखन अगीरपा बादशाह खड़ो उठो ते तैससैहीं साथी गुवर्नर ते बिरनीके ते तैससैहीं साथी होरे भी खड़े ³¹ ते बेइर निस्तां एकेकी सैहीं ज़ोंने लगे, की एह मैन्हुं कोई एरहु कंम ता नेहीं लोरो केरने, की एस सज़ाहे मौवत दिती गाहे, या कैदी मां रखो गाहे। ³² अगीरपा बादशाहे फैस्तुसे सैहीं ज़ोंव, की अगर एनी मैने कैसरे मां आपील ना भोथी कियोरी ता एह छुटी सख्तो थु।।

पौलुसेरू रोमेरू सफर : क्रेते तगर

¹ ज़ैखन एह बिस्तार बनों की असां लोक ज़िहाज़े मां इतालिया जो गहंम ता पौलुस ता होरे कैदी शाही पलटनरे आफसरेरे सुपुरुद किये; ज़ैसेरु नोंव युलुएस थुं। ² असां अद्रामुतियमेंरां एकी ज़िहाज़े मां च़ैड़तां च़ले जे; ज़ै आसियारी सैहिली बंदरगहरां बत्तां अग्रोहूं गहंने बालू थुं; ते थिस्लूंनिकेरो इरसत्रखुस मिकदुंनी असंन सैहीं साथी थु। ³ होरसां ज़ैखन ज़िहाज़ सैइदे मां रुकु ता युलुएसें पौलुसे पुड़ मैहरभानी केरतां तैस अपने दौस्तन सैहीं मुलाकात केरनेरी इजाज़त दिती; ताके तैसेरे ज़िरये सैहीं पत्तो लग्गे। ⁴ तैठां फिरी असां ज़िहाज़े मां च़ैड़तां च़लै जे, ते कुबरुसेरी आड़ी म्मेंहीं निस्से, किजोकी हवा बड़ी ज़ब्रदस्त थी। ⁵ फिरी असां किलकिया ते पम्फोलियारे सुमुंद्रेरी बत्तां निसतां अग्रोहूं च़ले जे, ता लोकियारे शहर मौरा मां औस्से। ⁶ फौवजारे आफसरे तैठां आसकेंदरयारु अक ज़िहाज़ मैल्हु, ज़ैन इतालिया जो च़लेरु थुं, तैनी असां तैस्मां च़हड़े। ⁷ असां बड़े दिहाड़न तगर बल्लै बल्लै अग्रोहूं च़लते राहे; ते किंद्सेरे सामने पुज़े; पण तैज़ हवा च़लैने सैहीं असंन अग्रोहूं गहंनेरी मुशकल भोई जेई; ते एल्हेरलेइ असां स्लमोंनेरे सामने निसतां कुरितेरी आड़ी मां निसे। ⁸ ते बेड़ी मुश्कली सैहीं सुमुंद्रेरे बंन्ने बंन्ने अग्रोहूं च़लते हुसेंन नोवेंरी बंदरगाही मां पुज़े, ज़ैठां लुसीया शहर नेड़े थु।

⁹ तैड़ी असंन कैही दिहाड़े रुकनु पैवं, किजोकी बरतेरी दिहाड़ी बितोरी थी, ते तैस मौसमें मां सुमुंद्ररेरू सफ़र भी बड़ू मुशकल भोइगह्तु थुं, पौलुसे तैन समझ़ांते बार ज़ोंव। ¹⁰ मेरे ढ्लाव आंव ज़ोतांइं की इशु सफ़र बड़ु खतरनाक भोलु, की ना सिर्फ़ ईशो माल सबाब ते ज़िहाज़े बल्के ईशी जानी भी खतरोए। ¹¹ पण फौवजारे आफसरे ,पौलुसेरी गल शुंनेरे बजाहे ज़ैना परमेशर नेहीं ते कंने ज़िहाज़ेरे मालकेरी गल्लाँ शुंन्ने धियांन दीतु। ¹² किजोकी तै बंदरगह ठंढारो मोसम बितनेरे बाद रोड़ी ना थी, एल्हेरलेइ ईशो फैसलो एह थु, की असां केंची तरीके अग्रोहूं निस्म ते असंन उमीद थी, की फैंकिसे मां पुज़तां हिंवंतड़ेरो मौसम तैड़ी गुज़ैरी गहंमैल्हे, एह कुरितेरी अक बंदरगह थी, ज़ै शुमाल मशरक ते जनुब मशरकेरे पासे थी।

समुद्रे मां तोफान

¹³ ज़ैखन जनुबेरे पासेरां थोड़ी थोड़ी हवा च़लने लगी, ता तैनेइं समझ़ू की ईशी मुशकल खतम भुई, ते तैनेइं लैंगर तैठां खड़ू कियुं, ते कुरितेरे बंन्ने बंन्ने अग्रोहुं च़लते जे। ¹⁴ पण लुशी अक बड़ी तौफांनी हवा च़ली ज़ैसजो युर्ग्लुन ज़ोतन, शुमाल मशरकेरे पासेरां आई, ते। ¹⁵ ज़िहाज़ अपने पलैट्टे मां कियुं, ते ज़िहाज़ ढ्लैक्कां खाने लगु, ते असेइं ज़िहाज़ हावारे भरोसे पुड़ छ़डू। ¹⁶ ज़ैखन असां भी रुड़ते रुड़ते कूदा जज़ीरेरी आड़ी मां पुज़े, ता तै डुंगी ज़ै ज़िहाज़ेरे पत्तोरां बंधोरी थी; ता बेड़ी मुशक्ली सैहीं कैबु मां की। ¹⁷ ईशे मैन्हैंइ तै उब्री च़ैड़तां ज़िहाज़ ट्लुटने कैरां बच़ानेरे लेइ रेस्सैइं सैहीं बेंधतां छ़डू, किजोकी तैन डर थु, की एरहु ना भोए, की ज़िहाज़ सौरतीसेरी रेती मां डुबी गाहे, एल्हेरलेइ तैनेइं भारी सामान ओसाल्हू ते ज़िहाज़े मां रुड़ते रुड़ते च़ले जे। ¹⁸ ज़ैखन तौफानी हवाई सैहीं ज़िहाज़ जादे ढ्लैक्कां खाने लगु, ता होरसां असेइं ज़िहाज़ेरो माल सुमुंद्रे मैझो शरनो शुरू कियो। ¹⁹ ट्लेईयावं दिहाड़े तैनेइं ज़िहाज़ेरू सामान भी सुमुंद्रे मैझो शैरी छ़डु। ²⁰ ता कैही दिहाड़े ना असेइं दिहाड़ो लाहू ते ना तारे ते तौफांन भी मन्ना जादे ज़ोर केरने लगोरो थु; ते असंन बंच़नेरी हुंनी कोई उमीद ना रही।

²¹ लोकन रौट्टी खैवरे कही दिहाड़े भेवरे थिये, एल्हेरलेइ पौलुसे तैन मां खड़े भोइतां ज़ोंव; मेरे ढ्लाव अगर तुस मेरु ज़ोंनु मन्नेथे, ते कुरिते मैरां अग्रोहुं ना एवरे भोथे, ता इही नुकसान ते इही तकलीफ कीजो भोंनी थी? ²² पण आंव तुसन का मिनत केरताइं की; हिंमत ना हारा तुसन मैरां कोई भी ना मरेल्हो; चाहे ज़िहाज़ डूबी किना गाहे। ²³ किजोकी मेरे परमेशरेरो फरिशतो ज़ैसेरी आंव प्राथना केरताइं, हीज राती तै मींका एवरो थु। ²⁴ ते तै ज़ोंने लगो, औ पौलुस डर न्ना तु कैसरे मां ज़ुरूर पैश भोल्हो ते परमेशर तेरी वजाही सैहीं एन सैभी केरी जान बच़ाल्हो, ज़ैना ज़िहाज़े मां तीं सैहीं साथींन। ²⁵ एल्हेरलेइ जनाब तुसां अपनी हिंमत रखा की मेरे परमेशरे ज़ैन किछ मीं सैहीं ज़ोवरुए तैन्ने भोल्हु। ²⁶ असां ज़रूर केंची टेपू पुड़ पुज़ी गहंमैल्हे।

ज़िहाझ़ ट्लाउटनू

²⁷ च़ौवधौवं राती ज़ैखन असां सुमुंद्रे [बेर्रा आद्रिया ] मां इरहां उरहां फिरते थिये, ता म्लाहेंइं बुझ़ू की असां बंन्नेरे नेड़े पुज़ी जेवरेंम। ²⁸ तैनेइं पानी रेसी सैहीं नापु ता एशही हथ निसु ते थोड़े आग्गर गैहीतां नापु ता शठ हथ निसु। ²⁹ एस डरे सैहीं की कौस्कोही शफ़ड़ी सैहीं ना बज़्म, ते तैनेइं ज़िहाज़ेरे पैत्रीं पासे च़ौवर लैंग्रां सुमुंद्रे मां छ़डां ते झ़ै्झ़री लौअरे लेइ दुवा केरने लगे। ³⁰ म्लाहेंइं ज़िहाज़ेरे मुझ़ाटेरां बेरोंहूं निसनेरे लेइ डोंगी ऊंढी ओसाल्ही, पण तैना ज़िहाज़ेरे एग्रींएं पासेरां लैंग्र पैनी मां छ़डनू चहते थिये। ³¹ तैखन पौलुसे फौवजी आफसरे ते सिपेहीन सैहीं ज़ोंव, अगर इना लोक ज़िहाज़े मां ना भोल्हे ता तुशु लोकां केरू बंच़नु मुशक्ले। ³² एल्हेरलेइ सिपेहीयेंइं डूंगारी रेस्सी केटतां सुमुंद्रे मेंझेई शैरी दिती।

³³ झ़ैझ़ भोंने कैरां पैहीले पौलुसे सैभन का मिनत कमाई, की तुस किछ रौट्टी खाथ, तैनी ज़ोंव, की तुस च़ौवधे दिहाड़ी केरे देंते तुस लोक बंच़नेरे खियाले मां पेवरेथ, ते तुस रौट्टी सैहीं हुरोरे भी नेहीं। ³⁴ आंव तुसन का मिनत केरताइं की तुस रौट्टी खाथ, किजोकी तुशे लेइ रोड़ु एंन्ने की याकींन केरा की तुशो बाल बिंगो ना भोल्हो। ³⁵ ज़ैखन तैनी एन ज़ोंव, ता तैनी रौट्टी आंन्हीं ते सैभी केरे सामने परमेशरेरु शुक्र केरतां ट्लोड़ी ते खाने लगो। ³⁶ तैसकैरां लैहितां होरन भी हिंमत आई, ते तैना भी रौट्टी खाने लगे। ³⁷ असां सभ मिलतां कोई दुई शौव मैन्हुं थिये, ज़ैना इस ज़िहाज़े मां सुवार थिये। ³⁸ ज़ैखन तैनेइं रेज़तां रौट्टी खाई ता तैनेइं सारे गैहूं सुमुंद्रे मैझो शारने शुरू किये, ताके ज़िहाज़ पोल्लु भोए?

³⁹ ज़ैखन दिहाड़ो निसो ता तैनेइं तै ठार ना पशानी, पण अक ठार लाही ते तै पासो साफ थु, तैनेइं बिस्तार कमाव की अगर भोई सखे ता असां ज़िहाज़ एस पुड़ च़ाड़म। ⁴⁰ बस्सा लैंगर खोलतां सुमुंद्रे मां छ़ैडी दितु, ते पतवारां केरी रेसी भी खोल्ही छ़ैडी, एग्रीयों बादबांन भी बह च़ैडी छ़डो, ते एपु बन्नेरे पासे जो नशै। ⁴¹ पण ज़िहाज़ खुशकी पुड़ गैहीतां रेती पुड़ टिकी जेवं, ते ज़िहाज़ेरो एग्रीयों पासो रेती मां डुबी जेवं ते पैत्रीयों पासो छ़ैल्लैइं सैहीं बज़कने लगो। ⁴² सिपेही केरी सल्लाह थी की कैदन मारम ताके तैन मैरां कोई तारी देइतां मत्ता नेशी गहंन। ⁴³ पण फौवजी आफसरे पौलुसेरी जान बच़ांनेरे लेइ एन ना दीतु केरने, ते हुकम दितो की ज़ै तारी ज़ांनते ता तै पैहीलो छाल मारे, ते खुशकी पुड़ पुज़तां अपनी जान बच़ाए। ⁴⁴ ते बाकी होरे लेकड़ारे तखत्न पुड़ ते ज़िहाज़ेरी होरी चीज़ां केरी म्द्दती सैहीं अपनी जान बच़ाथ, ते बस्सा सभ एस तरीके सैहीं खुशकी पुड़ सलांमत पुज़ी जे।।

माल्टा द्वीपे मां पौलुस

¹ ज़ैखन असां ठीक ठाक सुमुंद्रेरे बंन्ने साहिले पुड़ पुज़े, ता असंन पत्तो ल्ग्गो, की इस ज्ज़ीरेरु नोंव मालटाए। ² तैठेरे रहंने बालेइं असंन सैहीं बड़ो रोड़ो बरताव कियो, झ़ड़ी ल्ग्गोरी थी, ते ठंढ भी बड़ी थी, तैनेइं बचारेइं अग्ग बाली ते ईशी बड़ी आदर कमाई। ³ पौलुसे शुकोरे कैड़ु केरो अक लेग्गु बनाव; ते ज़ैखन तै तैना कैड़ु अग्गी मां छ़डने लगो ता अग्गारे सैके सैहीं तैन कैड़न मैरां अक सप निसो, ते पौलुसेरे हथे सैहीं प्लेटोव। ⁴ ज़ैखन जज़ीरेरे लोकेइं सप पौलुसेरे हथे सैहीं प्लेटोरो लाहु, ता एपुम्मेहीं ज़ोंने लगे , एह मैन्हुं ज़ुरूर कोई खुंनीएं; एह सुमुंद्रे मां गर्क भोंने कैरां ता बंच़ोरोए, पण इन्साफ एस ज़िंतो ना छ़डेल्हो। ⁵ पण पौलुसे सप्पे अग्गी मैझो घिल देइतां ट्लाट्टो ते पौलुसे कोई किछ ना भोंवं। ⁶ तैना लोक बलगने लगोरे थिये, की एसेरी सारी जान एफरी गहंनीएं ते एह मैरी गहंनोएं, ते बड़े च़ीरे तगर बलगनेरे बाद पौलुसे किछ ना भोंवं, ता तैना सोचने लगे, की एह ज़ुरूर कोई देबतोए।

⁷ तै आलाको तैस ज्ज़िर्रो हाकम पुबलीयुसरी अपनी मलकीत थी; तैनी असां अपने घरे नैइतां ट्लाई दिहाड़े ईशी आदर खात्र केरतो राहु। ⁸ पुबलीयुसेरो बाजी भूखारे ते पैच्सी सैहीं बड़ो बिमार भोवरो थु; ते पौलुसे तैसका गैहीतां तैसेरे लेइ दुवा की, ते तैसपुड़ हथ रेखतां तैस शीफा दिती, ते तै ठीक भोईजेव। ⁹ फिरी तैस जज़िरेरे सारे बिमार लोक एज्जी एज्जी ठीक भोंने लगे। ¹⁰ तैन लोकेइं ईशी बड़ी इज़्त की, ते असां तैठां अग्रोहुं गहंनेरे लेइ तियार भुए, ता तैनेइं ईशी ज़ुरुरतरी सैरी चिज़ां ज़िहाज़े मां छ़ैडी दिती।

माल्टा दूीपे मैरां रोमेरे पासे

¹¹ इशु ज़िहाज़ बिगड़नेरे ट्लेई मिंहींन्ना बाद असां आसकेंदरीयाएरे एकी ज़िहाज़े मां च़ले जे, ज़ैन ठंढ मुकने तगर तैस जज़ीरे मां रुकेरु थुं, तैस्मां युनेंनी केरी दुई अकोठी देबतेरी मुरतां बनोरी थी। ¹² पैहीले असां सुरकुसे मां पुज़े, ते ट्लाई दिहाड़े तैड़ी राहे। ¹³ तैठां असां च़लते च़लते रेगीयुमें मां पुज़े, ते होरसां जनुबी हवा च़लने लगी ते असां अक दिहाड़ी पत्ती पुतियुली मां पुज़े। ¹⁴ तैड़ी असंन किछ मसही ढ्ला भी मैल्हे, तैनेइं असां कुजाए ते असां तैड़ी सत दिहाड़े तैड़ी राहे, ते तैसेरां बाद असां रुंमें मां पुज़े। ¹⁵ तैठेरे ढ्लांन पत्तो ल्ग्गो, की असां एवरेंम ता तैना असंन अग्रांने अप्पियुसेरे चौव्के ते ट्लेई सरहंन तगर आए, पौलुसे तैना लैहितां परमेशरेरु धनियाबाद कियुं ते बड़ो खुशी भोव।

¹⁶ रुंम शहरे मां पुज़नेरे बाद पौलुसे इजाज़त मैल्ही, की तै एकी पैरहेदारी निगरेंनी मां ज़ैड़ी चाहे गैहीसखते।

रोमे मां पौलुस

¹⁷ ज़ैखन ट्लाई दिहाड़े बिते त पौलुसे युहुदी केरे सरदार कुजाए; ते ज़ैखन तैना अकोठे भुए ता पौलुसे तैन सैहीं ज़ोंव; मेरे ढ्लाव मीं एपनी कौमरे ते अपने बौव दादां केरी रस्मरे खलाफ कोई कंम नेहीं कियेरू ता फिर भी आंव पाबंद केरतां युरोशल्में मां रुंमी केरे हवाले कियो। ¹⁸ तैनेइं पुछ़ गंन केरनेरे बाद आंव हथरां छ़डनो थु; किजोकी मीं कोई एरहु कंम ना थुं कियेरू की ज़ैस्सेहीं मीं सज़ाहे मौवत देथे । ¹⁹ पण ज़ैखन युहुदेइं मुखालफत की ता मीं कैसरे मां आपील की; पण एल्हेरलेइ नेहीं की आंव एपनी कौमीं पुड़ कोई अल्ज़ाम लांनो चहतो थु। ²⁰ एल्हेरलेइ मीं एन रोड़ु समझ़ू, की तुसन सैहीं मिलतां गल केरीं, आंव इस्राएलेरी एक्की उमींदी सैहीं शांग्लंन मां बेंधोरोइं। ²¹ तैनेइं जुवाब दितो, असंन युहुदियेरां तेरे बारे मां ना कोई चिठ्ठी मैल्ही ते ना तैठां एजने बाले ढ्लांएइं तेरे बारे मां कोई खबर दिती, ते ना तेरे खलाफ किछ ज़ोंव। ²² पण असां तेरे बारे मां ज़ांन्नु चह्तंम, एह ता असंन प्त्तोए, की लोक सैभी ठैरन मसही फिरकेरे खलाफ गल्लाँ करतन।

²³ तैखन तैनेइं पौलुसेरी गल्लाँ शुंन्नेरे लेइ अक दिहाड़ी ठुवहलाई; ज़ैखन तै दिहाड़ी आई, ता लोक पैहीले लोकन कैरां भी जादे अकोठे भुए; पौलुसे तैन परमेशरी बादशेहीयारे बारे मां समझ़ांवं, ते साथी युशुएरे बारे मां मुसै नेबेरी किताबन मैरां तैन रोड़े च़ारे समझ़ेइतां झ़ैझ़ेरे ड्लौवझ़ां तगर गल्लाँ केरते राहे। ²⁴ किछ पौलुसेरी गल्लाँ शुंनता मस्त भोइजे, पण किछेइं ना मन्नु। ²⁵ ज़ैखन तैना एपुम्मेहीं खुशी ना भुए, ता पौलुसे तैन गहंने कैरां पैहीले अक गल ज़ोई, पाबित्र आत्मांरे ज़िरये इसाया नेबें तुशे बुज़ुर्ग दादां केरे बारे मां ठीके ज़ेवरू थुं की।

²⁶ एस कौमीं का गा, ते एन ज़ौ; की तुस शुंन्ते ता राहेल्हे, पण समझ़ेल्हे नन्ना, ते तकते ता राहेल्हे पण पशांनेल्हे नन्ना। ²⁷ किजोकी एस कौमरे दिले पुड़ चरभी भेरोरीए, एना टोंवंने भोवरेंन, ते एनेइं एपनी एछ़ी निकोल कियोरींन, कीजोकी एरहु ना भोए की एना लहंन ते कंन्न सैहीं शुंन्न ते दिले सैहीं समझ़न; ते एना मेरे पासे फिरन ते आंव एन शीफा देइं। ²⁸ एल्हेरलेइ आंव चहतां की तुस बुझ़थ की परमेशरेरो सुसमाचार गैर युहुदन का भी भेज़ोरोए ते तैना तैस शुंनेल्हे। ²⁹ ज़ैखन पौलुसे एन ज़ोंव, ता युहुदी एपुम्मेहीं बेंस केरते तैठां च़ले जे।

³⁰ पौलुसे पुरे दुई सालंन तगर क्रैइयेरे मुकाने मा राहु, ते ज़ै भी तैस्सैहीं मिलने एइतो थु, ता पौलुस तैस्सैहीं मिलतो थु। ³¹ तै बेड़ी खुशी सैहीं परमेशरेरी बादशैहीयरी खुशखबरी शुंनातो थु, ते परमेशर यीशु मसहीएरे बारे मां तालीम देंतो राहु, ते केंचे भी तैस रोकनेरी कौशिश ना कमाई।।